INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

26.8.2019

Il-Ġurnal Uffiċjali tal-Unjoni Ewropea

C 287/1

Rata tal-kambju tal-euro (1)

It-23 ta’ Awwissu 2019

(2019/C 287/01)

1 euro =

	Munita	Rata tal-kambju
USD	Dollaru Amerikan	1,1065
JPY	Yen Ġappuniż	117,79
DKK	Krona Daniża	7,4559
GBP	Lira Sterlina	0,90453
SEK	Krona Żvediża	10,7165
CHF	Frank Żvizzeru	1,0893
ISK	Krona Iżlandiża	138,10
NOK	Krona Norveġiża	9,9593
BGN	Lev Bulgaru	1,9558
CZK	Krona Ċeka	25,769
HUF	Forint Ungeriż	328,58
PLN	Zloty Pollakk	4,3550
RON	Leu Rumen	4,7212
TRY	Lira Turka	6,3815
AUD	Dollaru Awstraljan	1,6396
CAD	Dollaru Kanadiż	1,4741
HKD	Dollaru ta' Hong Kong	8,6776
NZD	Dollaru tan-New Zealand	1,7360
SGD	Dollaru tas-Singapor	1,5360
KRW	Won tal-Korea t'Isfel	1 341,19
ZAR	Rand ta' l-Afrika t'Isfel	16,8439
CNY	Yuan ren-min-bi Ċiniż	7,8439
HRK	Kuna Kroata	7,3940
IDR	Rupiah Indoneżjan	15 726,13
MYR	Ringgit Malażjan	4,6362
PHP	Peso Filippin	58,008
RUB	Rouble Russu	72,9469
THB	Baht Tajlandiż	33,997
BRL	Real Brażiljan	4,5224
MXN	Peso Messikan	22,0041
INR	Rupi Indjan	79,3040

(1) Sors: rata tal-kambju ta' referenza ppubblikata mill-Bank Ċentrali Ewropew.

26.8.2019

Il-Ġurnal Uffiċjali tal-Unjoni Ewropea

C 287/2

Opinjoni tal-Kumitat Konsultattiv dwar il-Fużjonijiet mogħtija fil-laqgħa tiegħu tat-28 ta’ Novembru 2018 dwar abbozz preliminarju ta’ deċiżjoni marbut mal-Każ M.8797 — Thales/Gemalto

Relatur: Il-Lussemburgu

(2019/C 287/02)

Konċentrazzjoni

Il-Kumitat Konsultattiv (10 Stati Membri) jaqbel mal-Kummissjoni li t-tranżazzjoni notifikata tikkostitwixxi konċentrazzjoni fis-sens tal-Artikolu 3(1)(b) tar-Regolament tal-Kunsill (KE) Nru 139/2004 tal-20.1.2004 dwar il-kontroll ta’ konċentrazzjonijiet bejn impriżi (1).

Il-Kumitat Konsultattiv (10 Stati Membri) jaqbel mal-Kummissjoni li t-tranżazzjoni notifikata taqa’ taħt dimensjoni tal-UE skont l-Artikolu 1(2) tar-Regolament dwar l-Għaqdiet.

Definizzjoni tas-suq

Il-Kumitat Konsultattiv (10 Stati Membri) jaqbel mad-definizzjonijiet tal-Kummissjoni għas-swieq ġeografiċi u tal-prodotti rilevanti fl-abbozz tad-Deċiżjoni.

B’mod partikolari, il-Kumitat Konsultattiv (10 Stati Membri) jaqbel li s-swieq ta’ prodotti li ġejjin jenħtieġ li jkunu distinti:

a)	Il-Moduli tas-Sigurtà tal-Hardware għal Skop Ġenerali (Hardware Security Modules, “HSMs”);

b)	HSMs għal Pagamenti;

c)	Kriptaġġ ta’ networks u l-idjaq sub-segment possibbli għad-data fil-Livell 2;

d)	Il-manifattura u l-forniment ta’ SIM cards (upstream) u l-integrazzjoni tal-GSM-R (downstream);

e)	pjattaformi ta’ ġestjoni tal-OTA SIM cards u l-integrazzjoni tal-GSM-R;

f)	Cards intelliġenti ta’ kontroll tal-aċċess għall-użu fil-ġestjoni HSM remota (upstream) u s-swieq downstream għal HSMs għal Użu Ġenerali u HSMs għal Pagamenti (downstream).

Il-Kumitat Konsultattiv (10 Stati Membri) jaqbel mad-definizzjonijiet tal-Kummissjoni tas-swieq ġeografiċi rilevanti rigward:

a.	Is-suq taż-ŻEE jew dak dinji għall-HSMs għal Użu Ġenerali;

b.	Is-suq dinji jew dinji għall-Pagament tal-HSMs;

c.	Is-suq potenzjali taż-ŻEE għall-kriptaġġ ta’ networks u l-idjaq sub-segment possibbli għad-data f’moviment fil-Livell 2;

d.	Is-suq upstream taż-ŻEE għall-manifattura u l-forniment ta’ SIM cards u s-suq downstream nazzjonali jew taż-ŻEE għal integrazzjoni tal-GSM-R;

e.	Is-suq upstream taż-ŻEE għal pjattaformi tal-ġestjoni ta’ OTA SIM cards u s-suq downstream nazzjonali taż-ŻEE għall-integrazzjoni tal-GSM-R;

f.	Is-suq upstream taż-ŻEE għall-aċċess għal cards intelliġenti għall-kontroll tal-aċċess għall-użu fil-ġestjoni remota ta’ HSM u fis-swieq downstream għal GP HSMs u HSMs għall-Pagamenti.

Il-valutazzjoni kompetittiva

Il-Kumitat Konsultattiv (10 Stati Membri) jaqbel mal-valutazzjoni tal-Kummissjoni li t-tranżazzjoni notifikata tista’ twassal għal effetti orizzontali mhux koordinati li jimpedixxu b’mod sinifikanti l-kompetizzjoni effettiva għal HSMs għal Użu Ġenerali fis-suq taż-ŻEE jew fis-suq dinji l-aktar minħabba t-tneħħija tar-restrizzjonijiet kompetittivi importanti li Thales u Gemalto eżerċitaw fuq xulxin, flimkien man-numru limitat ħafna ta’ kompetituri alternattivi kredibbli.

Il-Kumitat Konsultattiv (10 Stati Membri) jaqbel mal-valutazzjoni tal-Kummissjoni li t-tranżazzjoni notifikata mhux se timpedixxi b’mod sinifikanti l-kompetizzjoni effettiva minħabba l-effetti tagħha fuq is-swieq affettwati li ġejjin:

a.	Is-suq taż-ŻEE jew is-suq dinji għall-HSMs għal Pagamenti;

b.	Is-suq taż-ŻEE jew is-suq dinji għall-kriptaġġ ta’ networks u s-subsegment l-aktar dejjaq possibbli ta’ data f’moviment fil-Livell 2;

c.	Is-suq upstream taż-ŻEE għall-manifattura u l-forniment ta’ SIM cards u s-suq downstream nazzjonali jew taż-ŻEE għal integrazzjoni tal-GSM-R;

d.	Is-suq upstream taż-ŻEE għal pjattaformi tal-ġestjoni ta’ OTA SIM cards u s-suq downstream nazzjonali taż-ŻEE għall-integrazzjoni tal-GSM-R;

e.	Is-suq upstream taż-ŻEE għall-aċċess għal cards intelliġenti għall-kontroll tal-aċċess għall-użu fil-ġestjoni remota ta’ HSM u fis-swieq downstream għal GP HSMs u HSMs għall-Pagamenti.

Rimedju

Il-Kumitat Konsultattiv (10 Stati Membri) jaqbel mal-Kummissjoni li l-impenji offruti mill-Partijiet Notifikanti fid-9 ta' Novembru 2018 skont l-Artikolu 8(2) tar-Regolament dwar l-Għaqdiet jindirizzaw it-tħassib dwar il-kompetizzjoni identifikat mill-Kummissjoni fir-rigward tas-suq taż-ŻEE jew tas-suq dinji għall-HSMs għal Użu Ġenerali.

Il-Kumitat Konsultattiv (10 Stati Membri) jaqbel mal-konklużjoni tal-Kummissjoni li t-tranżazzjoni notifikata, soġġetta għal konformità sħiħa mal-impenji offruti mill-Partijiet Notifikanti fid-9 ta' Novembru 2018, x'aktarx mhijiex se tfixkel b'mod sinifikanti l-kompetizzjoni effettiva fis-suq intern jew f'parti sostanzjali minnu.

10.

Il-Kumitat Konsultattiv (10 Stati Membri) jaqbel mal-Kummissjoni li t-tranżazzjoni notifikata għalhekk jenħtieġ li tiġi ddikjarata kompatibbli mas-suq intern f’konformità mal-Artikolu 2(2) u 8(2) tar-Regolament dwar l-Għaqdiet u l-Artikolu 57 tal-Ftehim ŻEE.

(1) ĠU L 24, 29.1.2004, p. 1 (ir-“Regolament dwar l-Għaqdiet”).

26.8.2019

Il-Ġurnal Uffiċjali tal-Unjoni Ewropea

C 287/5

Taqsira tad-Deċiżjoni tal-Kummissjoni

tal-11 ta’ Diċembru 2018

li tiddikjara konċentrazzjoni kompatibbli mas-suq intern u mal-funzjonament tal-Ftehim dwar iż-ŻEE

(Il-Każ M.8797 — Thales/Gemalto)

(notifikata bid-dokument C(2018) 222)

(il-verżjoni bl-Ingliż biss hija awtentika)

(Test b'rilevanza għaż-ŻEE)

(2019/C 287/04)

Fil-11 ta’ Diċembru 2018 il-Kummissjoni adottat Deċiżjoni f'każ ta' fużjoni skont ir-Regolament tal-Kunsill (KE) Nru 139/2004 tal-20 ta' Jannar 2004 dwar il-kontroll ta’ konċentrazzjonijiet bejn impriżi (1) , u partikolarment l-Artikolu 8(1) ta' dan ir-Regolament. Verżjoni mhux kunfidenzjali tad-Deċiżjoni sħiħa, billi l-każ jista' jkun fil-forma ta' verżjoni proviżorja, hija disponibbli fl-ilsien awtentiku tal-każ fuq is-sit web tad-Direttorat Ġenerali għall-Kompetizzjoni, f'dan l-indirizz: http://ec.europa.eu/comm/competition/index_en.html.

I. IL-PROĊEDURA

(1)

Fit-18 ta’ Ġunju 2018, il-Kummissjoni Ewropea (“il-Kummissjoni”) irċeviet avviż ta’ konċentrazzjoni skont l-Artikolu 4 tar-Regolament dwar l-Għaqdiet (2) li permezz tagħha Thales S.A. (“Thales” jew “il-Parti Notifikanti”, Franza) takkwista, fis-sens tal-Artikolu 3(1)(b) tar-Regolament dwar l-Għaqdiet, il-kontroll waħdieni ta’ Gemalto N.V. (“Gemalto”, in-Netherlands) (it-“Tranżazzjoni”) (3). Minn hawn ’il quddiem Thales u Gemalto huma msejħa kollettivament il-“Partijiet”.

(2)

Wara eżami preliminari tal-avviż u fuq il-bażi tal-investigazzjoni tas-suq tal-ewwel fażi, il-Kummissjoni kkonkludiet li t-Tranżazzjoni qanqlet dubji serji dwar il-kompatibbiltà tagħha mas-suq intern fir-rigward tas-suq għal Moduli tas-Sigurtà tal-Hardware (Hardware Security Modules, “HSM”) u adottat deċiżjoni biex tibda proċedimenti skont l-Artikolu 6(1)(c) tar-Regolament dwar l-Għaqdiet fit-23 ta’ Lulju 2018 (id-“Deċiżjoni skont l-Artikolu 6(1)(c)”).

(3)

Fis-26 ta’ Lulju 2018, it-tieni fażi tal-perjodu ta’ investigazzjoni ġiet estiża b’20 jum tax-xogħol wara talba tal-Parti Notifikanti skont l-ewwel sentenza tat-tieni subparagrafu tal-Artikolu 10(3) tar-Regolament dwar l-Għaqdiet.

(4)

Fil-21 ta’ Awwissu 2018, il-Parti Notifikanti ppreżentat il-kummenti bil-miktub tagħha għad-Deċiżjoni skont l-Artikolu 6(1)(c) (it-“Tweġiba skont l-Artikolu 6(1)(c)”).

(5)

Fl-10 ta’ Ottubru 2018, il-Parti Notifikanti ppreżentat impenji skont l-Artikolu 8(2) tar-Regolament dwar l-Għaqdiet sabiex tindirizza t-tħassib dwar il-kompetizzjoni identifikat mill-Kummissjoni.

(6)

Fis-7 ta’ Novembru 2018, il-Parti Notifikanti ppreżentat impenji riveduti skont l-Artikolu 8(2) tar-Regolament dwar l-Għaqdiet sabiex tindirizza t-tħassib dwar il-kompetizzjoni identifikat mill-Kummissjoni.

II. IL-PARTIJIET U T-TRANŻAZZJONI

(7)

Thales hija grupp internazzjonali rreġistrat fi Franza u kkwotat fil-Borża Euronext ta’ Pariġi. Thales hija attiva mad-dinja kollha f’ħames oqsma ewlenin: (i) l-aeronawtika; (ii) l-ispazju; (iii) it-trasport fuq l-art; (iv) id-difiża; u (v) is-sigurtà. Fl-2017, hija kellha dħul globali ta’ EUR 15,8 biljun, operazzjonijiet f’56 pajjiż u 64 100 impjegat.

(8)

Gemalto hija kumpanija internazzjonali tas-sigurtà diġitali rreġistrata fin-Netherlands u kkwotata fil-Borża Euronext ta’ Pariġi u ta’ Amsterdam. Gemalto hija attiva mad-dinja kollha f’sitt oqsma ewlenin: (i) pjattaformi u servizzi mobbli; (ii) software u prodotti inkorporati f’apparati mobbli; (iii) sistemi ta’ pagament; (iv) programmi tal-gvern; (v) it-trażmizzjoni ta’ data minn magna għall-magna (Internet tal-Oġġetti (jew Internet of Things, “IoT”); u (vi) is-sigurtà tal-intrapriża. Gemalto ġiet stabbilita fl-2006 bħala riżultat tal-kombinazzjoni ta’ Axalto Holding N.V. u Gemplus International S.A. Fl-2017, Gemalto kellha dħul globali ta’ madwar EUR 3 biljun, operazzjonijiet f’47 pajjiż u 15 000 impjegat.

(9)

Skont ftehim dwar l-għaqdiet (il-“Ftehim dwar l-Għaqdiet”) li daħal fis-seħħ fis-17 ta’ Diċembru 2017, Thales takkwista l-ishma ordinarji kollha maħruġa u pendenti u l-ishma tad-depożitorju Amerikan f’Gemalto permezz ta’ offerta pubblika sħiħa rrakkomandata rregolata mil-liġi Netherlandiża, li se tiġi estiża b’mod partikolari għal Franza u għall-Istati Uniti. L-offerta hija soġġetta għas-sodisfazzjon jew l-eżenzjoni minn kundizzjonijiet normali, inklużi iżda mhux limitati għal: (i) approvazzjonijiet regolatorji; (ii) livell minimu ta’ aċċettazzjoni ta’ mill-inqas 67 % tal-ishma ta’ Gemalto; (iii) l-assenza ta’ effett negattiv materjali; (iv) l-assenza ta’ ksur materjali tal-Ftehim dwar l-Għaqdiet; u (v) il-fatt li ebda offerta superjuri ma tkun saret jew ġiet aċċettata.

(10)

Għaldaqstant, it-Tranżazzjoni tirriżulta f’konċentrazzjoni fis-sens tal-Artikolu 3(1)(b) tar-Regolament dwar l-Għaqdiet.

III. ID-DIMENSJONI TAL-UE

(11)

It-tranżazzjoni għandha dimensjoni tal-UE fis-sens tal-Artikolu 1(2) tar-Regolament dwar l-Għaqdiet.

IV. IS-SWIEQ RILEVANTI

(12)

Id-Deċiżjoni tidentifika s-swieq rilevanti li ġejjin: HSMs għal Użu Ġenerali (General Purpose (GP) HSMs), HSMs għal Pagamenti (Payment HSMs), software ta’ tagħmir kriptografiku, kriptaġġ ta’ networks għal data f’moviment, manifattura u provvista ta’ SIM cards, u pjattaforma ta’ amministrazzjoni ta’ OTA SIM cards.

a. HSMs għal Użu Ġenerali u HSMs għal Pagamenti

(13)

Wara r-riżultati tal-investigazzjoni tas-suq fil-Fażi I u II, il-Kummissjoni tqis li hemm suq separat għall-HSMs għal Użu Ġenerali u l-HSMs għal Pagamenti.

(14)

Fir-rigward tas-sostitwibbiltà min-naħa tad-domanda, ma hemm l-ebda sostitwibbiltà min-naħa tad-domanda billi (i) l-HSMs għal Użu Ġenerali u l-HSMs għal Pagamenti huma mfassla u ċċertifikati għal każijiet ta’ użu differenti, (ii) l-HSMs għal Użu Ġenerali u l-HSMs għal Pagamenti huma teknikament differenti ħafna, (iii) l-HSMs għal Użu Ġenerali u l-HSMs għal Pagamenti għandhom propożizzjonijiet kummerċjali differenti, (iv) l-ipprezzar differenzjat bejn l-HSMs għal Użu Ġenerali u l-HSMs għal Pagamenti jirrifletti l-funzjonalitajiet differenti / propożizzjonijiet differenti tagħhom, (v) il-klijenti tal-HSMs għal Użu Ġenerali u tal-HSMs għal Pagamenti għandhom xejriet ta’ xiri differenti.

(15)

Fir-rigward tas-sostitwibbiltà min-naħa tal-provvista, ma hemm l-ebda sostitwibbiltà min-naħa tal-provvista billi (i) d-disinji tal-HSMs għal Użu Ġenerali u l-HSMs għal Pagamenti jinvolvu teknoloġiji differenti, (ii) il-fornituri tal-HSMs għal Użu Ġenerali u l-HSMs għal Pagamenti jgħaddu minn proċess ta’ ċertifikazzjoni differenti, (iii) il-kompetituri tal-HSMs għal Użu Ġenerali u l-HSMs għal Pagamenti huma differenti, (iv) il-kompetituri attivi f’HSMs għall-Użu Ġenerali u HSMs għal Pagamenti ma setgħux faċilment jew malajr jaqilbu għall-provvista tat-tip HSM l-ieħor bi tweġiba għal żieda fil-prezz.

(16)

L-investigazzjoni tal-Kummissjoni pprovdiet aktar konferma li l-HSMs għal Użu Ġenerali u l-HSMs għal Pagamenti jitfasslu b’mod differenti, kemm f’dak li jirrigwarda l-hardware kif ukoll f’dak li jirrigwarda s-software. Filwaqt li d-differenzi fil-hardware jistgħu ma jkunux daqshekk ċari (Securosys issostni li din tista’ tibda tibni HSM għal Pagamenti fuq il-bażi tal-pjattaforma tal-HSM għal Użu Ġenerali tagħha; b’mod simili Futurex tqis li d-differenzi jikkonċernaw aktar il-firmware milli l-hardware), huwa s-software li jikkostitwixxi l-parti ferm ikbar tal-isforz ta’ investiment u li jidher ċar li huwa differenti b’mod li jservi każijiet distinti ta’ użu. Sabiex tinkiseb ċertifikazzjoni tal-PCI, l-HSMs għall-Pagamenti jridu jissodisfaw, fost l-oħrajn, rekwiżiti stretti ta’ sigurtà fiżika u loġika. Il-fatt li l-biċċa l-kbira tal-każijiet ta’ espansjoni minn suq HSM għal ieħor f’dawn l-aħħar snin saret permezz ta’ akkwisti, jappoġġa l-argument li l-iżvilupp tat-tip l-ieħor ta’ HSMs meta diġà qed jiġi mmanifatturat wieħed minnhom mhuwiex faċli.

(17)

Fir-rigward tad-definizzjoni tas-suq ġeografiku, il-Kummissjoni tqis li għal kull HSM għal Użu Ġenerali u HSM għal Pagamenti s-suq huwa mifrux mill-inqas maż-żona kollha taż-ŻEE jew madwar id-dinja iżda d-definizzjoni tista’ titħalla miftuħa għall-finijiet ta’ dan il-każ billi l-valutazzjoni kompetittiva ma tinbidilx għal-livelli ġeografiċi differenti.

b. Swieq oħra tal-prodott rilevanti

(18)

Il-Kummissjoni vvalutat ukoll swieq possibbli għas-software ta’ kriptaġġ (ES), għas-servizzi ta’ evalwazzjoni ta’ Sigurtà, għas-SIM Cards u għall-Ġestjoni tal-OTA SIM, u għall-cards intelliġenti għall-kontroll tal-Aċċess.

(19)

Software ta’ Kriptaġġ: il-Kummissjoni kkunsidrat jekk (i) software ta’ kriptaġġ jistax ikompli jinqasam f’segmenti għad-data li qed tintuża, għad-data wieqfa, u għad-data f’moviment, kif ukoll jekk aktar sottosegmentazzjonijiet humiex possibbli bbażati fuq il-livell u s-saffi ta’ kriptaġġ, u (ii) jekk il-kriptaġġ ta’ networks għad-data f’moviment tistax tifforma suq separat. Għall-finijiet ta’ din id-Deċiżjoni, id-definizzjoni eżatta tas-suq tal-prodott tista’ titħalla miftuħa billi t-Tranżazzjoni ma tfixkilx b’mod sinifikanti l-kompetizzjoni effettiva skont xi definizzjoni plawżibbli tas-suq, inklużi l-aktar swieq stretti possibbli għal (i) software ta’ kriptaġġ għal data wieqfa / li qed tintuża u subsegmenti oħra possibbli skont il-livell ta’ kriptaġġ (f’ħażna / diski, fajl/folder, bażi tad-data jew livell tal-applikazzjoni, tokenizzazzjoni u data mistura eċċ.) u (ii) kriptaġġ tan-networks għal data f’moviment u subsegmenti possibbli fuq il-bażi tas-saff li fuqu jsir il-kriptaġġ tan-network. Fir-rigward tas-suq ġeografiku rilevanti għas-software ta’ kriptaġġ u għall-kriptaġġ tan-networks, il-Kummissjoni qieset li s-suq huwa dinji jew tal-inqas mifrux maż-ŻEE.

(20)

Servizzi ta’ evalwazzjoni tas-sigurtà: il-Kummissjoni qieset il-kwistjoni dwar jekk is-suq tal-prodotti jikkonsistix mis-servizzi ta’ evalwazzjoni tas-sigurtà (ċibernetiċi) kollha jew jekk jeżistux swieq separati għal kwalunkwe segmentazzjoni ta’ dawn is-servizzi abbażi taċ-ċertifikazzjoni li għaliha ġie akkreditat il-laboratorju, u kkonkludiet li s-suq jista’ jitħalla miftuħ billi t-Tranżazzjoni ma tfixkilx b’mod sinifikanti l-kompetizzjoni effettiva skont kwalunkwe definizzjoni tas-suq plawżibbli, inkluż l-aktar suq dejjaq possibbli għas-servizzi ta’ evalwazzjoni tas-sigurtà tas-CSPN. Il-kwistjoni dwar jekk is-suq ġeografiku għas-servizzi ta’ evalwazzjoni tas-sigurtà (ċibernetiċi) huwiex dinji jew mifrux madwar iż-ŻEE tista’ titħalla miftuħa.

(21)

Is-SIM Cards u l-Ġestjoni tal-OTA SIM: il-Kummissjoni, f’konformità mal-prattika deċiżjonali tagħha, tikkonferma li s-suq tal-prodott rilevanti huwa s-suq għall-provvista tal-ġestjoni tal-OTA SIM cards u ta’ pjattaformi ta’ servizzi. Il-Kummissjoni tħalli miftuħa l-kwistjoni dwar jekk is-suq għall-manifattura u l-provvista ta’ SIM cards ikunx jikkostitwixxi suq separat u jekk l-integrazzjoni tal-GSM-R tikkostitwixxix suq separat billi t-Tranżazzjoni ma tfixkilx b’mod sinifikanti l-kompetizzjoni effettiva skont kwalunkwe definizzjoni plawżibbli tas-suq, inkluż l-aktar suq dejjaq possibbli għall-manifattura u l-provvista ta’ SIM cards u l-integrazzjoni tal-GSM-R. Is-suq ġeografiku rilevanti għal (i) manifattura u l-forniment ta’ SIM cards, (ii) il-ġestjoni tal-OTA SIM cards u tal-pjattaformi ta’ servizzi huwa mill-inqas mifrux maż-ŻEE, jekk mhux dinji. Rigward l-integrazzjoni tal-GSM-R, il-Kummissjoni tqis li s-suq huwa jew mifrux maż-ŻEE jew dinji fl-ambitu tiegħu.

(22)

Cards intelliġenti għall-kontroll tal-aċċess: id-definizzjoni eżatta tas-suq tal-prodott tista’ titħalla miftuħa billi t-Tranżazzjoni ma tfixkilx b’mod sinifikanti l-kompetizzjoni effettiva skont xi definizzjoni plawżibbli tas-suq, inkluż l-inqas suq possibbli inkluż għal (i) fiżiċi u (ii) cards biċ-ċippa mikroproċessuri għall-kontroll tal-aċċess loġiku. Id-definizzjoni eżatta tas-suq ġeografiku tista’ titħalla miftuħa.

V. VALUTAZZJONI KOMPETITTIVA

(23)

Il-valutazzjoni kompetittiva tal-Kummissjoni hija bbażata fuq l-evidenza kwalitattiva u kwantitattiva kollha fuq il-fajl tal-każ, b’mod partikolari fuq ir-riżultati tal-investigazzjoni tas-suq, fuq id-dokumenti interni tal-Partijiet stess, fuq ir-rikostruzzjoni tas-suq, kif ukoll fuq intervisti mmirati ma’ parteċipanti fis-suq.

(24)

It-Tranżazzjoni tagħti lok għas-swieq li ġejjin affettwati orizzontalment:

(1)	Is-suq għal HSMs għal Użu Ġenerali

(2)	Is-suq għall-HSMs għal Pagamenti

(3)	Is-suq potenzjali għal kriptaġġ ta’ networks u l-idjaq sub-segment possibbli għad-data f’moviment fis-Saff 2 fis-suq taż-ŻEE

(25)

It-Tranżazzjoni tagħti lok għal swieq affettwati vertikalment fir-rigward tar-rabtiet bejn is-swieq li ġejjin:

(1)	Is-suq upstream taż-ŻEE għall-manifattura u l-forniment ta’ SIM cards (li fih is-sehem tas-suq ta’ Gemalto huwa ta’ [30–40] %) u s-suq downstream nazzjonali jew taż-ŻEE għall-integrazzjoni tal-GSM-R.

(2)	Is-suq upstream taż-ŻEE għall-OTA SIM cards u l-pjattaformi ta’ amministrazzjoni (li fih is-sehem tas-suq ta’ Gemalto huwa ta’ madwar [40–50] %) u s-suq downstream nazzjonali jew taż-ŻEE għal integrazzjoni tal-GSM-R.

a. HSMs għal Użu Ġenerali

(26)

Skont ir-rikostruzzjoni tas-suq tal-Kummissjoni, Thales u Gemalto għandhom sehem tas-suq kombinat għall-2017 ta’ [70–80] % għall-HSMs għal Użu Ġenerali (Thales: [30–40] %; Gemalto: [30–40] %). Din iċ-ċifra ta’ 70-80 % hija kkonfermata minn parteċipanti oħra fis-suq.

(27)

L-investigazzjoni tas-suq ikkonfermat li Thales u Gemalto huma l-eqreb kompetitur ta’ xulxin. Iż-żewġ Partijiet jidher li għandhom rwol bħala forza kompetittiva importanti fis-suq. Kemm Thales kif ukoll Gemalto joffru prodott b’karatteristiċi simili ħafna, l-aktar importanti hu li kemm l-HSMs għal Użu Ġenerali ta’ Thales kif ukoll dawk ta’ Gemalto huma programmabbli. Iż-żewġ Partijiet jinvestu b’mod sinifikanti fir-Riċerka u l-Iżvilupp. Hemm biss għadd limitat ta’ fornituri alternattivi ta’ HSMs għal Użu Ġenerali li r-rwol u s-sehem tas-suq tagħhom huma aktar baxxi b’mod sinifikanti minn dawk tal-Partijiet. Barra minn Gemalto, parteċipant ieħor wieħed biss jitqies bħala kompetitur leġittimu għal Thales.

(28)

Rigward ir-restrizzjoni eżerċitata mill-Cloud Service Providers (CSPs), il-Kummissjoni tqis li d-domanda għall-HSMs fiżiċi se tibqa’. L-investigazzjoni tas-suq fil-Fażi I u l-Fażi II uriet li, minkejja t-tkabbir mistenni tal-cloud, is-soluzzjonijiet ibbażati fuq il-cloud għadhom fil-bidu tagħhom u jaffettwaw biss applikazzjonijiet ġodda billi l-applikazzjonijiet storiċi jibqgħu marbuta mal-infrastruttura attwali bbażata fuq l-HSMs fiżiċi. Id-domanda għall-HMSs fiżiċi se tibqa’ kemm minħabba kwistjonijiet ta’ legat kif ukoll minħabba raġunijiet ta’ fiduċja u l-ħtieġa li tiġi żgurata sigurtà massima għaċ-ċwievet u d-data kriptata.

(29)

Il-manifatturi tradizzjonali tal-HSM bħal Thales, Gemalto u Utimaco jidhru li huma l-mexxejja fl-iżvilupp ta’ soluzzjonijiet ta’ punt uniku ta’ servizz adattati għal klijenti li jixtiequ jaqsmu d-data (u għalhekk l-aċċess għaċ-ċwievet ta’ kriptaġġ) f’ambjenti fiżiċi u cloud. Skont il-Partijiet, Thales u Gemalto segwew mogħdijiet komplimentari, li permezz tagħhom Gemalto introduċiet l-offerta proprja tagħha għall-Protezzjoni tad-Data wara Talba (Data Protection on Demand, DPOD) iffukata fuq HSM/KSM aaS (as a service) filwaqt li Thales iffukat fuq il-portabbiltà ewlenija permezz ta’ Bring Your Own Key (BYOK). Iż-żewġ soluzzjonijiet huma maħsuba biex jiffaċilitaw l-operazzjonijiet tal-klijenti f’diversi clouds.

(30)

Il-Kummissjoni tqis li t-Tranżazzjoni twassal għal impediment sinifikanti ta’ kompetizzjoni effettiva fir-rigward, tal-anqas, tas-suq taż-ŻEE għal HSMs għal Użu Ġenerali.

b. HSMs għal Pagamenti

(31)

Is-sehem tas-suq ta’ Gemalto fis-suq taż-ŻEE għal HSMs għal Pagamenti huwa ta’ [5–10] % għall-2017. Thales hija l-attur ewlieni f’dan is-suq filwaqt li Gemalto għandha sehem tas-suq ferm aktar baxx u ġġenerat dħul baxx ħafna fiż-ŻEE li kien stabbli f’dawn l-aħħar tliet snin.

(32)

Il-Kummissjoni tqis li Thales u Gemalto mhumiex kompetituri mill-qrib f’dan is-suq.

(33)

Il-Kummissjoni tqis li wara t-Tranżazzjoni l-entità fuża tkompli taffaċċja kompetizzjoni qawwija mill-bqija tal-manifatturi tal-HSMs għal Pagamenti bħal Atos, DocuSign, Futurex, MicroFocus, Prism, Realsec, Ultra Electronics, u Utimaco.

(34)

Fid-dawl ta’ dak li ntqal hawn fuq, il-Kummissjoni tqis li t-Tranżazzjoni ma twassalx għal effetti orizzontali mhux koordinati fis-suq tal-HSMs għal Pagamenti, għall-inqas fis-suq taż-ŻEE.

c. Kriptaġġ ta’ networks

(35)

Is-sehem tas-suq ikkombinat tal-Partijiet huwa ta’ [20-30] % (Thales [0-5] %) fiż-ŻEE u [30-40] % madwar id-dinja (Thales [0-5] %). L-attivitajiet attwali ta’ Thales u ta’ Gemalto fis-suq għall-kriptaġġ ta’ networks u l-idjaq suq ipotetiku għall-kriptaġġ ta’ networks tal-Livell 2 huma limitati ħafna. L-ispazju tal-kriptaġġ ta’ networks tal-Livell 2 jirrappreżenta porzjon żgħir ħafna tas-suq tal-kriptaġġ ta’ networks li huwa kompetittiv ħafna, inklużi bosta atturi li joffru prodotti kriptati awtonomi tan-network. L-investigazzjoni tas-suq indikat b’mod qawwi li r-rispondenti huma newtrali fir-rigward tal-impatt fuq is-suq għas-software ta’ kriptaġġ, irrispettivament mid-definizzjoni eżatta tal-prodott u tas-suq ġeografiku. Fid-dawl ta’ dan ta’ hawn fuq, il-Kummissjoni hija tal-fehma li t-Tranżazzjoni ma tfixkilx b’mod sinifikanti l-kompetizzjoni effettiva fir-rigward ta’ dan is-suq.

d. Trikkib mhux orizzontali

(36)

Fir-rigward ta’ (i) l-attivitajiet ta’ Gemalto fis-suq upstream għall-manifattura u l-forniment ta’ SIM cards u l-attivitajiet ta’ Thales fis-suq downstream għall-integrazzjoni tal-GSM-R u (ii) l-attivitajiet ta’ Gemalto fis-suq upstream għall-forniment ta’ pjattaformi ta’ ġestjoni tal-OTA SIM cards u l-attivitajiet ta’ Thales fis-suq downstream għall-integrazzjoni tal-GSM-R, il-Kummissjoni tqis li t-Tranżazzjoni ma tfixkilx b’mod sinifikanti l-kompetizzjoni effettiva.

e. Konklużjoni

(37)

Id-Deċiżjoni, għalhekk, tikkonkludi li t-Tranżazzjoni twassal għal impediment sinifikanti ta’ kompetizzjoni effettiva fir-rigward tal-HSMs għal Użu Ġenerali għall-inqas fis-suq taż-ŻEE.

VI. IMPENJI PPREŻENTATI MILL-PARTIJIET

(38)

Biex jindirizzaw it-tħassib dwar il-kompetizzjoni msemmi aktar ’il fuq fis-suq tal-HSMs għal Użu Ġenerali, il-Partijiet ippreżentaw l-impenji deskritti hawn taħt.

(39)

L-impenji jikkonsistu fiċ-ċessjoni tan-negozju globali tal-HSMs għal Użu Ġenerali ta’ Thales, ikkummerċjalizzat taħt il-marka nShield (in-“Negozju f’Ċessjoni”). In-Negozju f’Ċessjoni huwa attwalment integrat f’Thales eSecurity, unità ta’ negozju li topera attivitajiet ta’ protezzjoni tad-data, li tinkludi HSMs għal Użu Ġenerali, HSMs għal Pagamenti, Ġestjoni Ewlenija u Software ta’ Kriptaġġ.

(40)

L-assi tanġibbli prinċipali li jiffurmaw parti mit-trasferiment huma: siti (fil-forma ta’ ftehimiet ta’ kiri), kif ukoll inventarju ta’ oġġetti lesti, għodod ta’ provvista, tagħmir ta’ ttestjar, materjal promozzjonali u ta’ bejgħ, dokumentazzjoni ta’ prodotti, u manwali tal-utenti relatati man-Negozju f’Ċessjoni.

(41)

Fir-rigward ta’ assi intanġibbli, in-Negozju f’Ċessjoni se jinkludi trasferiment, jew liċenzja (kif xieraq), tal-assi intanġibbli ewlenin li ġejjin: (i) il-marki kummerċjali u l-privattivi rreġistrati kollha ta’ nShield; (ii) il-proprjetà intellettwali addizzjonali mhux irreġistrata kollha inkluż l-għarfien espert, il-proċeduri tal-ittestjar, il-proċeduri ta’ manifattura, id-disinn tal-prodott, is-sigrieti kummerċjali, il-kodiċi tas-sors, u l-utilitajiet u l-libreriji assoċjati (inklużi l-ispeċifikazzjonijiet tal-prodott u l-istandards tal-kontroll tal-kwalità); (iii) l-unitajiet kollha ta’ ġestjoni tal-istokks tal-prodotti nShield elenkati fil-lista tal-prezzijiet; (iv) iċ-ċessjoni min-naħa ta’ kull liċenzja, u tal-liċenzji deħlin kollha li huma meħtieġa għall-operazzjoni (jew li b’xi mod ieħor li jintużaw min-)Negozju f’Ċessjoni; (V) id-dokumentazzjoni kollha assoċjata mar-Riċerka u l-Iżvilupp għal prodotti li bħalissa qed jiġu kummerċjalizzati (jew li huma maħsuba biex jiġu kkummerċjalizzati) taħt il-marka nShield.

(42)

Fir-rigward tal-kriterji tal-akkwirent, it-test tal-kriterji tax-xerrej standard huwa ssupplimentat minn kriterju addizzjonali li “L-Akkwirent għandu jkun parteċipant b’esperjenza sinifikanti fl-HSM, jew f’qasam relatat mill-qrib, bħas-sigurtà tad-data, li jgawdi livell għoli ta’ fiduċja u reputazzjoni tajba f’dawn l-oqsma fost il-klijenti bbażati fiż-ŻEE. L-Akkwirent għandu juri permezz ta’ pjan tan-negozju, fl-istadju ta’ approvazzjoni tal-Akkwirent, li jkollu l-kapaċità u l-għarfien espert, fl-użu tal-assi tiegħu u tan-negozju f’Ċessjoni, li jipprovdi l-prodotti u s-servizzi rilevanti lill-klijenti taż-ŻEE b’mod affidabbli, anki għal applikazzjonijiet fil-qasam tas-sigurtà tal-intrapriżi u li għandu pjanijiet konkreti biżżejjed biex iwettaq (i) il-passi kollha meħtieġa biex jikseb u jkompli jikseb kull ċertifikazzjoni, u l-aġġornamenti tagħhom, meħtieġa biex jipprovdi HSMs għal Użu Ġenerali fiż-ŻEE; u (ii) ir-Riċerka u l-Iżvilupp meħtieġa għall-iżvilupp ulterjuri tan-Negozju f’Ċessjoni.”

(43)

Il-Kummissjoni tqis li l-kamp ta’ applikazzjoni tan-Negozju f’Ċessjoni huwa komprensiv biżżejjed billi l-Impenji għandhom ineħħu t-trikkib kollu bejn il-Partijiet b’rabta mas-suq dinji għall-HSMs għal Użu Ġenerali. Fil-prinċipju, huma għalhekk adattati biex ineħħu t-tħassib identifikat dwar il-kompetizzjoni. In-Negozju f’Ċessjoni jinkludi l-assi kollha u l-biċċa l-kbira tal-persunal li llum qed jikkontribwixxi għall-operazzjonijiet tan-negozju tal-HSMs għall-Użu Ġenerali u għalhekk huwa komprensiv biżżejjed billi jinkludi l-assi kollha meħtieġa għall-vijabbiltà u l-kompetittività tiegħu.

(44)

Fid-Deċiżjoni, il-Kummissjoni tqis li l-Impenji jistgħu jneħħu dubji serji dwar il-kompatibbiltà tat-Tranżazzjoni mas-suq intern b’mod ċar.

VII. KONKLUŻJONI U PROPOSTA

(45)

Id-Deċiżjoni tikkonkludi li, soġġetta għall-konformità sħiħa mal-impenji mogħtija mill-Partijiet, it-Tranżazzjoni mhijiex se xxekkel b’mod sinifikanti l-kompetizzjoni effettiva fis-suq intern jew f’xi parti sostanzjali minnu.

(46)

Konsegwentement, id-Deċiżjoni tiddikjara t-Tranżazzjoni kompatibbli mas-suq intern, skont l-Artikolu 2(2) u l-Artikolu 8(2) tar-Regolament dwar l-Għaqdiet.

(1) ĠU L 24, 29.1.2004, p. 1.

(2) ĠU L 24, 29.1.2004, p. 1. B’effett mill-1 ta’ Diċembru 2009, it-Trattat dwar il-Funzjonament tal-Unjoni Ewropea (“TFUE”) introduċa ċerti bidliet, bħas-sostituzzjoni tat-terminu “Komunità” bit-terminu “Unjoni” u t-terminu “suq komuni” bit-terminu “suq intern”. Tul dan is-sommarju kollu se tintuża t-terminoloġija tat-TFUE.

(3) ĠU C 222, 26.6.2018, p. 19.

		ISSN 1977-0987
Il-Ġurnal Uffiċjali tal-Unjoni Ewropea		C 287

Edizzjoni bil-Malti	Informazzjoni u Avviżi	Volum 62 26 ta' Awwissu 2019

Werrej		Paġna
	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2019/C 287/01	Rata tal-kambju tal-euro	1
2019/C 287/02	Opinjoni tal-Kumitat Konsultattiv dwar il-Fużjonijiet mogħtija fil-laqgħa tiegħu tat-28 ta’ Novembru 2018 dwar abbozz preliminarju ta’ deċiżjoni marbut mal-Każ M.8797 — Thales/Gemalto — Relatur: Il-Lussemburgu	2
2019/C 287/03	Rapport Finali tal-Uffiċjal tas-Seduta — Thales/Gemalto (M.8797)	4
2019/C 287/04	Taqsira Tad-Deċiżjoni Tal-Kummissjoni tal-11 ta’ Diċembru 2018 li tiddikjara konċentrazzjoni kompatibbli mas-suq intern u mal-funzjonament tal-Ftehim dwar iż-ŻEE (Il-Każ M.8797 — Thales/Gemalto) (notifikata bid-dokument C(2018) 222) ( 1 )	5

	V Avviżi
	PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI
	Il-Kummissjoni Ewropea
2019/C 287/05	Notifika minn qabel ta' konċentrazzjoni (Il-Każ M.9471 — Clearlake/TA/DigiCert) — Każ li jista' jiġi kkunsidrat għal proċedura ssimplifikata ( 1 )	10
2019/C 287/06	Notifika minn qabel ta’ konċentrazzjoni (Il-Każ M.9518 — CPPIB/EQT/BNVC Group Holdings) — Każ li jista’ jiġi kkunsidrat għal proċedura ssimplifikata ( 1 )	12


	(1) Test b'rilevanza għaż-ŻEE.