Artikolu Uniku

L-applikazzjoni għal emenda tal-ispeċifikazzjoni għad-denominazzjoni “Dehesa del Carrizal” (DOP), skont l-Artikolu 105 tar-Regolament (UE) Nru 1308/2013, tinsab fl-Anness ta’ din id-Deċiżjoni.

B’konformità mal-Artikolu 98 tar-Regolament (UE) Nru 1308/2013, il-pubblikazzjoni ta’ din id-Deċiżjoni tagħti d-dritt ta’ oġġezzjoni għall-emenda tal-ispeċifikazzjoni msemmija fl-ewwel paragrafu ta’ dan l-Artikolu fi żmien xahrejn mid-data tal-pubblikazzjoni tagħha f’Il-Ġurnal Uffiċjali tal-Unjoni Ewropea.

ANNESS

“DEHESA DEL CARRIZAL”

PDO-ES-A0054-AM02

Data tal-applikazzjoni: 27.6.2014

TALBA GĦAL EMENDA FL-ISPEĊIFIKAZZJONI TAL-PRODOTT

1.   Regoli applikabbli għall-emenda

L-Artikolu 105 tar-Regolament (UE) Nru 1308/2013 – Emenda mhux minuri

2.   Deskrizzjoni u raġunijiet għall-emenda

2.1.   Tħassar il-massimu tal-qawwa alkoħolika attwali

Il-massimu tal-qawwa alkoħolika tal-inbejjed, jiġifieri 15 % vol., tħassar billi l-livell kurrenti jillimita l-possibbiltà għal vendemji iktar maturi u ma jiħux vantaġġ mill-potenzjal tal-varjetajiet disponibbli u tal-ħamrija.

Taħt il-punt 2.1, KARATTERISTIĊI ANALITIĊI TAL-INBEJJED tal-ispeċifikazzjoni tal-prodott, minflok il-“Qawwa alkoħolika attwali (% vol) 12 ≤ % vol ≤ 15” din jenħtieġ li taqra “≥ 12 %”. Id-Dokument Uniku ġie emendat.

2.2.   Inklużjoni ta' varjetà ġdida

Il-varjetà “Petit Verdot” ġiet introdotta minħabba l-abilità tagħha li tadatta għall-karatteristiċi taż-żona tal-produzzjoni u minħabba l-karatteristiċi tal-għenba f'termini ta' ksib tal-kwalità u l-karatteristiċi tal-inbejjed uniċi tad-Dehesa del Carrizal. Dan ifisser li jistgħu jiġu prodotti nbejjed monovarjetali ta' din il-varjetà, u li l-Petit Verdot tista' tiġi inkluża fl-inbejjed imħalltin minn varjetajiet differenti.

Taħt il-punt 2.2 tal-ispeċifikazzjoni tal-prodott, dwar il-karatteristiċi li jridu jiġu determinati permezz tal-analiżi organolettika, ġie miżjud il-punt 2.2.3, dwar it-Tinto Petit Verdo u l-karatteristiċi organolettiċi tal-inbejjed prodotti minn din il-varjetà, u taħt il-punti 2.2.4 u 2.2.5 ġiet inkluża l-varjetà Petit Verdot fit-taħlitiet ta' dawk l-inbejjed. Din ġiet inkluża wkoll taħt il-punt 3.1 dwar l-inbejjed monovarjetali.

Il-“Petit Verdot” ġiet inkluża wkoll taħt il-punt 6, “Il-varjetajiet tal-għeneb tal-inbid”.

Din ġiet inkluża bħala varjetà sekondarja. Id-Dokument Uniku għalhekk mhuwiex affettwat.

2.3.   Inklużjoni tal-varjetà Tempranillo fit-taħlitiet kollha

Il-varjetà “Tempranillo” ġiet inkluża fit-taħlitiet kollha possibbli tal-varjetajiet permessi sabiex jiżdiedu l-opzjonijiet għat-taħlit, bl-użu tal-karatteristiċi speċifiċi ta' kull varjetà, u mingħajr varjazzjoni tal-karatteristiċi analitiċi u organolettiċi definiti għal dawn l-inbejjed fl-ispeċifikazzjoni.

Fil-punt 2.2 tal-ispeċifikazzjoni tal-prodott, dik dwar il-karatteristiċi li jridu jiġu determinati permezz tal-analiżi organolettika, il-punt 2.2.4 jinkludi l-varjetà Tempranillo. Id-Dokument Uniku ma ġiex emendat.

2.4.   Żmien minimu għall-maturazzjoni

Iż-żmien massimu għall-maturazzjoni tneħħa billi l-kapaċitajiet tal-btieti ġew emendati, u ż-żminijiet massimi għall-maturazzjoni jeħtieġ jiġu estiżi. Għalhekk tpoġġiet biss restrizzjoni fuq iż-żmien minimu għall-maturazzjoni, billi l-inbid jiġi kkontrollat bit-tidwiq.

Fl-ispeċifikazzjoni tal-prodott, ġew emendati l-punti li ġejjin: 2.2.4, 2.2.5, 3.1 u 3.2. Id-Dokument Uniku ma ġiex emendat.

2.5.   Żieda fit-temperatura tal-fermentazzjoni alkoħolika

Il-medda tat-temperatura għall-fermentazzjoni alkoħolika tħassret, u ġiet stabbilita temperatura massima. Dan jippermetti li l-fermentazzjoni alkoħolika tibda f'temperatura iktar baxxa, li jfisser li din tibda aktar bil-mod u hekk tipproteġi l-aromi primarji tal-inbejjed.

Fil-punt 3.1 tal-ispeċifikazzjoni tal-prodott, fejn hemm referenza għall-fermentazzjoni alkoħolika f'temperaturi “bejn 22 °C u 30 °C”, din jenħtieġ li taqra “sa 35 °C”.

Fid-Dokument Uniku, ġie emendat il-punt 2.5.1, “Prattiki enoloġiċi speċifiċi”.

2.6.   Żmien minimu għall-maċerazzjoni

Il-medda ta' ġranet għall-maċerazzjoni tħassret, u ġie stabbilit numru minimu ta' ġranet sabiex jinkisbu iktar aromi primarji f'ċerti lottijiet u sabiex il-prodott finali jingħata kumplessità organolettika.

Fil-punt 3.1 tal-ispeċifikazzjoni tal-prodott, fejn jgħid li t-tqegħid f'tankijiet għal “bejn 10 u 30”, jenħtieġ li jgħid “għal mill-inqas sebat” ijiem ta' maċerazzjoni.

Fid-Dokument Uniku, ġie emendat il-punt 2.5.1, “Prattiki enoloġiċi speċifiċi”.

2.7.   Żieda fir-rendiment mit-tagħsir

Hija mitluba żieda fir-rendiment mit-tagħsir għall-inbejjed kollha minn 60-70 litru għal kull 100 kg ta' għeneb maħsud għal 75 litru għal kull 100 kg ta' għeneb maħsud, billi qabel kien jitqies biss il-ħsad manwali, u fil-każ tal-ħsad mekkaniku, ir-rendimenti jiżdiedu biss b'bejn 4 % u 6 % billi f'dan il-każ huma biss l-għeneb u mhux iz-zkuk ukoll li jidħlu fil-fabbrika tal-inbid.

Fil-punt 3.1 tal-ispeċifikazzjoni tal-prodott, minflok “60-70 litru għal kull 100 kg ta' għeneb maħsud”, din jenħtieġ li taqra “75 litru għal kull 100 kg ta' għeneb maħsud”.

Fid-Dokument Uniku, ġie emendat il-punt 2.5.1, “Prattiki enoloġiċi speċifiċi”.

2.8.   Żieda fit-temperatura tal-fermentazzjoni malolattika

Il-medda tat-temperatura għall-fermentazzjoni malolattika tħassret, u ġiet stabbilita temperatura massima. Dan jippermetti l-fermentazzjoni malolattika tibda f'temperatura iktar baxxa, li jfisser li din tibda aktar bil-mod, li jagħti kumplessità organolettika ikbar lill-prodott finali.

Fil-punt 3.1 tal-ispeċifikazzjoni tal-prodott, fejn hemm referenza għall-fermentazzjoni malolattika f'temperaturi “bejn 20 °C u 22 °C”, din jenħtieġ li taqra “sa 25 °C”.

Fid-Dokument Uniku, ġie emendat il-punt 2.5.1, “Prattiki enoloġiċi speċifiċi”.

2.9.   Perjodu minimu tal-fermentazzjoni malolattika

Il-medda ta' ġranet għall-fermentazzjoni malolattika ġiet imħassra, u ġie stabbilit numru minimu ta' ġranet, billi xi lottijiet għandhom livelli iktar baxxi ta' aċidu maliku fil-bidu tal-fermentazzjoni malolattika, u għalhekk jistgħu jlestu l-proċess kmieni.

Fil-punt 3.1 tal-ispeċifikazzjoni tal-prodott, fejn jgħid it-tqegħid f'tankijiet “li jdum minn 10 sa 30 ġurnata”, jenħtieġ li jgħid “li jdum għal mill-inqas sebat ijiem”.

Fid-Dokument Uniku, ġie emendat il-punt 2.5.1, “Prattiki enoloġiċi speċifiċi”.

2.10.   Kapaċità tal-btieti u t-tankijiet

Il-kapaċità f'litri tal-btieti tal-ballut u t-tankijiet tal-injam tħassret, billi l-użu tal-btieti u t-tankijiet ta' volumi differenti jippermettilna nadattaw iż-żminijiet tal-maturazzjoni tal-varjetajiet ta' għeneb differenti skont il-karatteristiċi tagħhom.

Fil-punt 3.1 tal-ispeċifikazzjoni tal-prodott, minflok “Maturazzjoni fi btieti tal-ballut ta' 225-330 litru li m'għandhomx iktar minn ħames snin, għal 12-24 xahar, u tankijiet tal-injam ta' 4 000 litru, biż-żmien tal-maturazzjoni kontrollat bit-tidwiq” din jenħtieġ li taqra “Maturazzjoni għal mill-inqas 12-il xahar fi btieti tal-ballut Franċiż u/jew Amerikan u/jew Ewropew u/jew tankijiet tal-injam, biż-żmien tal-maturazzjoni kontrollat bit-tidwiq.”

Fil-punt 3.2 tal-ispeċifikazzjoni tal-prodott, minflok “Il-maturazzjoni ddum għal għadd totali ta' 12-24 xahar, u sseħħ fi btieti tal-ballut Franċiż ta' 225-300 litru u tankijiet tal-injam ta' 4 000 litru. Il-btieti użati ma jistax ikollhom iktar minn 2-3 snin fl-ewwel ftit xhur, segwiti minn btieti li huma ġodda jew għandhom sena. Iż-żmien tal-maturazzjoni huwa kontrollat bit-tidwiq.”, din jenħtieġ li taqra “Jiġu prodotti żewġ tipi ta' nbejjed, skont iż-żmien totali tal-maturazzjoni, li jista' jvarja minn mill-inqas 3 xhur għall-inbid deskritt fil-punt 2.2.4 ta' din l-ispeċifikazzjoni, u mill-inqas 12-il xahar għall-inbid deskritt fil-punt 2.2.5 ta' din l-ispeċifikazzjoni. Il-maturazzjoni ssir fil-btieti tal-ballut Franċiż u/jew Amerikan u/jew Ewropew u/jew tankijiet tal-injam, biż-żmien tal-maturazzjoni kontrollat bit-tidwiq.”

Fid-Dokument Uniku, ġie emendat il-punt 2.5.1, “Prattiki enoloġiċi speċifiċi”.

2.11.   Emendi għall-produzzjoni tal-inbid abjad Chardonnay

It-temperatura massima għall-maċerazzjoni kiesħa ġiet limitata bil-għan li tinkiseb kumplessità ikbar tal-aromi sabiex l-aromi primarji jiġu espressi aħjar. Il-perċentwal massimu tal-most fermentat fuq ir-residwu tiegħu u t-tul ta' żmien meħtieġ fil-btieti ġew imħassra, bil-għan li tiġi fermentata kwantità ikbar ta' most għal tul ta' żmien itwal fil-btieti tal-ballut sabiex jinkisbu iktar aromi terzi. It-tul tal-proċess tal-fermentazzjoni ġie estiż ukoll sabiex jinkisbu iktar aromi sekondarji. Dan jipproduċi nbid iktar kumpless li jeħtieġ ftit li xejn jew l-ebda filtrazzjoni.

Ġew emendati l-punt 3.3 tal-Ispeċifikazzjoni tal-Prodott u l-punt 2.5.1 tad-Dokument Uniku.

2.12.   Tkabbir taż-żona ġeografika

Qed nitolbu żieda ta' 5,03 ettari maż-żona, billi din iż-żona addizzjonali hija maġenb ir-roqgħat tal-art diġà inklużi fl-ispeċifikazzjoni tal-prodott. Billi dawn ir-roqgħat tal-art kollha jmissu ma' dawk l-irqajja' tal-art inklużi attwalment fiż-żona ġeografika tad-DOP, u huma separati biss minn triq, dawn jissodisfaw l-istess kundizzjonijiet klimatiċi, tal-elevazzjoni u tal-ħamrija. Dawn ma kinux inklużi oriġinarjament billi ma kinux imħawlin bid-dwieli.

Fil-punt 4 tal-ispeċifikazzjoni tal-prodott, “Demarkazzjoni taż-żona ġeografika”, tal-ispeċifikazzjoni tal-prodott, ġew miżjuda l-kliem “u l-irqajja' tal-art 860a, 860b u 860c tal-poligonu 23”, u ż-żona ġiet miżjuda għal “26,2764 ettari”.

Fid-Dokument Uniku, ġie emendat il-punt 2.6, “Iż-żona ġeografika definita”.

2.13.   Inklużjoni ta' rendiment massimu ġdid

Ġie inkluż rendiment massimu għall-varjetà ġdida Petit Verdo, minħabba li, meta tiġi miżjuda varjetà ġdida, irid jiġi inkluż ir-rendiment massimu stabbilit għal dik il-varjetà ġdida.

Fl-ispeċifikazzjoni tal-prodott, taħt il-punt 5 “Ir-rendiment massimu”, ġie miżjud dan li ġej: “- Petit Verdot: 84 hl/ha u 12 000 kg/ha.”

Fid-Dokument Uniku, ġie emendat il-punt 2.5.2, “Ir-rendiment massimu”.

2.14.   Aġġornament tal-lista ta' korpi taċ-ċertifikazzjoni awtorizzati għall-ispeċifikazzjoni tal-prodott “Dehesa del Carrizal”.

L-isem u l-indirizz tal-korp taċ-ċertifikazzjoni awtorizzat kurrenti huma mogħtija.

Fl-ispeċifikazzjoni tal-prodott, taħt il-punt 9.1 “Il-korp tal-kontroll”, ġie miżjud il-korp ta' ċertifikazzjoni li ġej:

LIEC AGROALIMENTARIA, S.L.

Pol. Industrial Calle XV, Parcela R-113

13200 Manzanares (Ciudad Real)

ESPAÑA

Ġiet inkluża wkoll ħolqa ġdida, li telenka l-korpi taċ-ċertifikazzjoni delegati biex jivverifikaw l-ispeċifikazzjoni tal-prodott għal din id-DOP.

Id-Dokument Uniku ma ġiex emendat.

DOKUMENT UNIKU

1.   Isem li se jiġi reġistrat

Dehesa del Carrizal

2.   Tip ta' indikazzjoni ġeografika

DOP — Denominazzjoni ta' Oriġini Protetta

3.   Kategoriji tal-prodotti tad-dwieli

1.

Inbid

4.   Deskrizzjoni tal-inbid/inbejjed

INBID

Inbid Aħmar u Abjad

Ħomor monovarjetali u mħalltin b'kulur tal-morello, ċirasa jew ċirasa qarsa skont l-inbid, b'intensità tal-kulur medja għal medja/għolja. Aromi tal-frott b'noti tal-muntanji. Togħma ta' zalza tal-frott li tħalli togħma fil-ħalq rikka u fit-tul.

Il-kulur abjad għandu sfumaturi ta' isfar lewn il-ħuxlief fl-aħdar, b'intensità ftit qawwija. Aroma ta' frott eżotiku u l-polpa tal-frott bl-għadma. Butir, krema, ħmira. Xott, kważi żejtni. Tannini mill-injam ġdid. Frott tropikali, naqal u inkaljat. Iħalli togħma fil-ħalq qawwija u rinfreskanti.

Karatteristiċi analitiċi ġenerali

Qawwa alkoħolika totali massima (f'% tal-volum)
Qawwa alkoħolika reali minima (f'% tal-volum)	12
Aċidità totali minima	4 grammi għal kull litru espressa bħala aċidu tartariku
Aċidità volatili massima (f'milliekwivalenti għal kull litru)	16,7
Total massimu ta' diossidu tal-kubrit (f'milligrammi għal kull litru)	120

Għal-limiti li ma ġewx speċifikati, għandha tiġi mħarsa l-leġiżlazzjoni ġenerali fis-seħħ.

5.   Prattiki enoloġiċi

a.   Prattiki enoloġiċi essenzjali

Tagħsir mingħajr ma jinqabżu l-1,5 kg/cm2 li ma jippermettix li jinkisbu iktar minn 75 litru kull 100 kg ta' għeneb maħsud. Ħomor: fermentazzjoni alkoħolika f'temperatura li qatt ma taqbeż il-35 °C. Fermentazzjoni malolattika f'temperatura massima ta' 25 °C għal mhux inqas minn sebat ijiem. Maturazzjoni fi btieti tal-ballut Franċiż u/jew Amerikan u/jew Ewropew u tankijiet tal-injam. Bojod: maċerazzjoni kiesħa għal 6-12-il siegħa f'temperatura massima ta' 16 °C. Mill-inqas 25 % tal-most miksub jenħtieġ li jiffermenta fuq ir-residwi tiegħu fil-btieti.

b.   Rendimenti massimi

Cabernet Sauvignon u Tempranillo

10 000 kg ta' għeneb għal kull ettaru

Cabernet Sauvignon u Tempranillo

70 ettolitru għal kull ettaru

Syrah u Petit Verdot

12 000 kg ta' għeneb għal kull ettaru

Syrah u Petit Verdot

84 ettolitru għal kull ettaru

Merlot

8 500 kg ta' għeneb għal kull ettaru

Merlot

59,5 ettolitru għal kull ettaru

Chardonnay

9 000 kg ta' għeneb għal kull ettaru

Chardonnay

63 ettolitru għal kull ettaru

6.   Żona ġeografika demarkata

Iż-żona tinkludi l-irqajja' tal-art li ġejjin fil-muniċipalità ta' Retuerta del Bullaque (Ciudad Real), l-irqajja' tal-art 449a, 449ec, 449ea, 449eb, 449ada, 449adb, 449adc u 449eca tal-poligonu 9, u l-irqajja' tal-art 860a, 860b u 860c tal-poligonu 23

L-erja tal-wiċċ tal-vinja hija ta' 26,2764 ettari.

7.   Il-varjetà(jiet) tal-għeneb tal-inbid ewlenija/ewlenin

CHARDONNAY

SYRAH

CABERNET SAUVIGNON

8.   Deskrizzjoni tar-rabta/rabtiet

1.

Informazzjoni dettaljata dwar iż-żona ġeografika (fatturi naturali u umani): Iż-żona ġeografika hija kkaratterizzata mill-eżistenza ta' żoni ta' art bil-ġebel u kanali dojoq tal-ilma. Din tinsab f'depressjoni, fuq ġenb ta' għolja li jħares lejn it-Tramuntana, protetta minn għolja li titfa' d-dell fuq il-vinja fis-sigħat bikrin ta' filgħaxija, u li minnha jgħaddi l-Carrizal. Din ix-xmajra tipprovdi l-umdità, bi ċpar ħafif anke matul is-sajf, li jirriżulta fi nbejjed li huma kważi Atlantiċi fin-natura tagħhom b'kuntrast mal-inbejjed tal-Mediterran miż-żoni tal-madwar. L-altitudni, kważi 800 metru “l fuq mil-livell tal-baħar, tikkawża differenzi kbar fit-temperatura bejn binhar u billejl u maturazzjoni bil-mod, u fi snin eċċezzjonali l-perjodu ta' maturazzjoni jista” jdum għal sa kważi 60 ġurnata mit-tisjir sal-ħsad. Il-varjazzjoni fit-temperatura matul il-perjodu ta' maturazzjoni hija anke ikbar milli fiż-żona tal-madwar. Il-ħamrija hija karatterizzata minn tiswira ħarxa, b'żoni fejn sa 80 % tal-frazzjoni hija ikbar minn 2 mm. Matul il-formazzjoni tal-ħamrija, ix-xmajra ttrasportat il-kwarzit, li kien ta' importanza primarja billi dan ifforma saff b'tiswira ħarxa u ta' ħxuna konsiderevoli 'l fuq mill-istrata iktar baxxi tat-trab ġulġlieni. Il-ħamrija hija ħamrija tal-kwarzit u hija aċida, b'pH ta' bejn 4,7 u 6, li huwa ferm iktar baxx mill-pH taż-żona tal-madwar. Iż-żona ġeografika hija protetta minn terren Mediterranju muntanjuż, li jilqa' kontra l-irjieħ tan-Nofsinhar sħan, li jipprevjeni temperaturi iktar għoljin. Hija kkaratterizzata minn speċijiet bħal-liċi, l-arżnu, il-ħaxixet il-mikinsa, ir-rockrose, il-klin u s-sagħtar.

2.

Informazzjoni dwar il-kwalità jew il-karatteristiċi tal-inbid dovuti fundamentalment jew esklussivament għall-ambjent ġeografiku: L-inbejjed prodotti huma Atlantiċi fin-natura tagħhom, b'kuntrast għall-inbejjed Mediterranji miż-żona tal-madwar. Dawn huma karatterizzati min-nuqqas ta' noti sħan, l-aromi reminixxenti tax-xagħri (sagħtar, klin u ħaxixet il-mikinsa) u noti reżinużi u mhux aċidużi (arżnu u ewkaliptu), jew frott eżotiku u polpa tal-frott bl-għadma fl-inbejjed bojod. L-inbejjed huma rinfreskanti u bilanċjati, b'aċidità tajba. L-inbejjed ħomor, b'tannini maturi, huma inqas aċidużi u eleganti, filwaqt li l-inbejjed bojod huma rinfreskanti, b'aċidità ogħla minn dik tipika tal-inbejjed taż-żona tal-madwar. Kemm l-inbejjed ħomor kif ukoll dawk bojod jippermettu perjodi twal ta' maturazzjoni fil-flixkun.

3.

Ir-rabta bejn il-karatteristiċi taż-żona ġeografika u l-kwalità tal-inbid: L-altitudni u l-orjentazzjoni taż-żona ġeografika, li jipproteġuha minn irjieħ sħan u nexfin, il-fatt li l-vinja tkun fid-dell filgħaxija u l-umdità pprovduta mix-xmajra jirriżultaw f'medda ta' temperaturi li tippermetti t-tannin isir b'mod suffiċjenti. Dan joħloq inbejjed b'nuqqas ta' noti sħan u natura Atlantika notevoli. L-inbejjed ħomor huma karatterizzati minn togħma mhux aċiduża, b'tannini maturi u li jħallu togħma fil-ħalq rikka u fit-tul, filwaqt li l-inbejjed bojod iħallu togħma fil-ħalq qawwija u rinfreskanti. In-nisġa ħoxna tal-ħamrija u t-trasport tal-kwarzit mix-xmajra iżidu l-aċidità tal-ħamrija, li jirriżulta fi nbejjed rifnreskanti u bilanċjati b'aċidità ogħla minn dik tipika tal-inbejjed taż-żona tal-madwar. Dan jippermetti għal perjodi itwal ta' maturazzjoni fil-flixkun. Il-preżenza tax-xagħri, bi speċijiet ta' pjanti tipiċi (rockrose, ħaxixet il-mikinsa, sagħtar, lavanda, klin, eċċ.) madwar il-vinja, li jagħti lill-inbid in-noti karatteristiċi tal-aroma tax-xagħri u noti mhux aċidużi, jew noti ta' frott eżotiku u polpa tal-frott bl-għadma fl-inbejjed bojod.

9.   Kundizzjonijiet oħra essenzjali

—

Ħolqa għall-ispeċifikazzjoni tal-prodott

http://pagina.jccm.es/agricul/paginas/comercial-industrial/consejos_new/pliegos/3_PLIEGO_DEHESA_CARRIZAL_20180628.pdf