Artikolu Uniku

L-Ispeċifikazzjoni tal-Prodott imsemmija fl-Artikolu 50(2)(b) tar-Regolament (UE) Nru 1151/2012 għall-ismijiet “Schaf-Heumilch”/“Sheep’s Haymilk”/“Latte fieno di pecora”/“Lait de foin de brebis”/“Leche de heno de oveja” (STG) tinsab fl-Anness għal din id-Deċiżjoni.

F’konformità mal-Artikolu 51 tar-Regolament (UE) Nru 1151/2012, il-pubblikazzjoni ta’ din id-Deċiżjoni għandha tagħti d-dritt ta’ oppożizzjoni għar-reġistrazzjoni tal-isem imsemmi fl-ewwel paragrafu ta’ dan l-Artikolu fi żmien tliet xhur mid-data tal-pubblikazzjoni ta’ din id-Deċiżjoni f’Il-Ġurnal Uffiċjali tal-Unjoni Ewropea.

ANNESS

SPEĊIFIKAZZJONI TAL-PRODOTT TA’ SPEĊJALITÀ TRADIZZJONALI GARANTITA

“Schaf-Heumilch”/“Sheep’s Haymilk”/“Latte fieno di pecora”/“Lait de foin de brebis”/“Leche de heno de oveja”

Nru tal-UE: TSG-AT-02289 – 22.2.2017

“L-Awstrija”

1.   Isem/ismijiet li jrid(u) jiġi/u rreġistrat(i)

“Schaf-Heumilch” (de); “Sheep’s Haymilk” (en); “Latte fieno di pecora” (it); “Lait de foin de brebis” (fr); “Leche de heno de oveja” (es)

2.   Tip ta’ prodott

2.1.   Tip ta’ prodott

Klassi 1.4. Prodotti oħrajn li joriġinaw mill-annimali (bajd, għasel, diversi prodotti mill-ħalib għajr butir, eċċ.)

3.   Raġunijiet għar-reġistrazzjoni

3.1.   Jekk il-prodott

—	☒	jirriżultax minn metodu ta’ produzzjoni, ta’ pproċessar jew ta’ kompożizzjoni li jikkorrispondi għall-prattika tradizzjonali għal dak il-prodott jew l-oġġett tal-ikel
—	☐	huwiex magħmul minn materja prima jew ingredjenti li jintużaw tradizzjonalment

Il-produzzjoni tal-ħalib tat-tip “Heumilch” hija l-aktar forma naturali tal-produzzjoni tal-ħalib. Il-ħalib jiġi minn annimali li jitrabbew fi rziezet tradizzjonali u sostenibbli tal-produzzjoni tal-ħalib. Id-differenza ewlenija bejn il-ħalib standard u l-ħalib tat-tip “Heumilch”, kif ukoll il-karattru tradizzjonali tal-ħalib tat-tip “Heumilch”, ġejjin mill-fatt li, bħalma kien jiġri fl-eqdem forma tal-produzzjoni tal-ħalib, l-annimali ma jiġux mitmugħa foraġġ iffermentat. Mis-snin sittin (1960s) ’il quddiem, u minħabba l-mekkanizzazzjoni, l-industrijalizzazzjoni tal-agrikoltura bdiet tistrieħ dejjem aktar fuq il-produzzjoni tas-silaġġ (foraġġ iffermentat) u b’hekk naqset il-produzzjoni tal-foraġġ frisk. Barra minn hekk, ir-regolamenti jipprojbixxu l-użu ta’ annimali u għalf li jridu jiġu identifikati bħala “ġenetikament modifikati” skont il-leġiżlazzjoni prevalenti. Il-proċedura tal-għalf tiġi adattata sabiex taqbel mal-bidliet staġjonali: fil-“perjodu tal-għalf tal-ħaxix frisk”, l-annimali jiġu mitmugħa ħaxix frisk u faxxina u xi ħuxlief u forom ta’ għalf permessi skont il-punt 4.2; fil-perjodu tax-xitwa, l-annimali jiġu mitmugħa ħuxlief, jew forom oħrajn ta’ għalf permessi skont il-punt 4.2.

3.2.   Jekk l-isem

—	☐	intużax tradizzjonalment sabiex jirreferi għall-prodott speċifiku
—	☒	jidentifikax il-karattru tradizzjonali jew il-karattru speċifiku tal-prodott

In-nagħġa hija wieħed mill-eqdem annimali domestikati fid-dinja. In-nagħaġ ilhom sa mill-Era Bikrija ta’ Żmien il-Ħaġar jipprovdu lill-bnedmin b’laħam, ħalib, ġlud u suf. It-tnissil tan-nagħaġ x’aktarx beda fl-isteppi tal-lbiċ tal-Asja u nġieb fl-Ewropa mill-Persja u l-Balkani. Ir-reġjuni tal-Alpi storikament kienu addattati għat-tnissil tan-nagħaġ. Forma speċjali ta’ produzzjoni intensiva tal-bhejjem, imsejħa “Schwaigen”, intużat b’mod komuni fit-Tirol minn nofs is-seklu tnax. Il-kelma “Schwaig” ġejja mill-Ġermaniż mitkellem bejn l-1050 u l-1350 u tirreferi għal forma speċjali ta’ insedjament u, b’mod partikolari, għall-biedja fir-reġjun tal-Alpi. L-irziezet “Schwaighof” ta’ spiss kienu stabbiliti bħala insedjamenti permanenti mis-sidien tal-art għall-finijiet tat-tnissil tal-bhejjem tal-ifrat u tan-nagħaġ. L-evidenza tal-eżistenza tagħhom fit-Tirol tmur lura għas-seklu tnax. Aktar tard, it-terminu “Schwaige” xi drabi ntuża sabiex jirreferi għal mergħat tal-muntanji kkultivati biss fix-xhur tas-sajf. Il-produtturi tal-ħalib fir-reġjun tal-Alpi jissejħu wkoll “Schwaiger” jew “Schwaigerin”. Sal-aħħar tas-seklu erbatax, l-irziezet “Schwaighof” tat-Tirol kienu primarjament involuti fit-tnissil tan-nagħaġ. It-trobbija tan-nagħaġ fuq mergħat alpini wiesgħa hija għalhekk tradizzjoni fit-Tirol li tmur lura għal mijiet ta’ snin.

Madankollu, mis-seklu erbatax sas-seklu dsatax, it-tnissil tan-nagħaġ fl-Awstrija beda jonqos bil-kbir u ġie sostitwit gradwalment bit-tnissil tal-majjal. Illum il-ġurnata, in-nagħġa reġgħet bdiet tikseb l-importanza għall-produzzjoni tal-ħalib u tal-laħam tagħha.

4.   Deskrizzjoni

4.1.   Deskrizzjoni tal-prodott li għalih japplika l-isem fil-punt 1, inklużi l-karatteristiċi fiżiċi, kimiċi, mikrobijoloġiċi jew organolettiċi tiegħu, li juru l-karattru speċifiku tal-prodott (l-Artikolu 7(2) ta’ dan ir-Regolament)

Ħalib tan-nagħaġ li huwa konformi mal-leġiżlazzjoni applikabbli.

4.2.   Deskrizzjoni tal-metodu ta’ produzzjoni tal-prodott li għalih japplika l-isem imsemmi fil-punt 1 li jridu jsegwu l-produtturi, inklużi, fejn xieraq, in-natura u l-karatteristiki tal-materja prima jew tal-ingredjenti li jintużaw, kif ukoll il-metodu li permezz tiegħu jitħejja l-prodott (l-Artikolu 7(2) ta’ dan ir-Regolament)

Il-ħalib tat-tip “Schaf-Heumilch” jiġi prodott skont kundizzjonijiet ta’ produzzjoni tradizzjonali konformi mal-“Heumilchregulativ” (regolamenti dwar il-produzzjoni tal-ħalib tat-tip “Heumilch”). Id-distinzjoni ta’ dan it-tip ta’ ħalib issir minn regoli li jipprojbixxu l-użu ta’ foraġġ iffermentat, bħal silaġġ, u regoli li jipprojbixxu l-użu ta’ annimali u għalf li għandhom jiġu identifikati bħala “ġenetikament modifikati” skont il-leġiżlazzjoni prevalenti.

“Heumilchregulativ” (regolamenti dwar il-produzzjoni tal-ħalib tat-tip “Heumilch”)

“Schaf-Heumilch” huwa tip ta’ ħalib tan-nagħaġ li jiġi estratt minn nagħaġ li jkunu qegħdin jipproduċu l-ħalib u li jiġi prodott minn produtturi tal-ħalib li jkunu ntrabtu li jikkonformaw mal-kriterji li ġejjin. Ma jistgħux jintużaw annimali jew għalf li għandhom jiġu identifikati bħala “ġenetikament modifikati” skont il-leġiżlazzjoni prevalenti.

L-azjenda agrikola kollha tat-trobbija tal-bhejjem trid titmexxa skont dawn ir-regoli tal-produzzjoni tal-ħalib tat-tip “Heumilch”.

Tipi ta’ għalf permessi

—	L-annimali jiġu mitmugħa prinċipalment ħaxix frisk, pjanti leguminużi u faxxina matul il-“perjodu tal-għalf tal-ħaxix frisk” u ħuxlief fil-perjodu tax-xitwa.

—	Dawn li ġejjin huma inklużi u permessi bħala għalf oħxon addizzjonali: żerriegħa tal-kolza ħadra, qamħirrum aħdar, segala ħadra u pitravi għall-għalf, kif ukoll ħuxlief, nifel u gerbub tal-qamħirrum.

—	Mill-inqas 75 % tal-għalf niexef kollu li jingħata lill-annimali kull sena jrid ikun għalf oħxon.

—	L-għelejjel taċ-ċereali, bħall-qamħ, ix-xgħir, il-ħafur, it-tritikal, is-segala u l-qamħirrum huma wkoll permessi, fil-forma kummerċjali konvenzjonali tagħhom u f’komposti bil-minerali (eż. nuħħala, gerbub).

—	Dawn li ġejjin jistgħu jintużaw ukoll bħala għalf: fażola, piżelli tal-għelieqi, frott żejtni u frakass jew pasta estratti.

Tipi ta’ għalf ipprojbiti

—	It-tipi ta’ għalf li ġejjin huma pprojbiti: silaġġ (foraġġ iffermentat), ħuxlief umduż u ħuxlief iffermentat.

—

L-annimali ma jistgħux jiġu mitmugħa prodotti sekondarji mill-birreriji, mid-distilleriji jew mill-għasir tal-frott, jew prodotti sekondarji oħrajn mill-industrija tal-ikel, bħal żrieragħ imxarrbin tal-birreriji jew biċċiet ta’ pjanti mxarrbin. Xi eċċezzjonijiet huma biċċiet ta’ pjanti nixfin u melassa bħala prodott sekondarju tal-manifattura taz-zokkor u għalf tal-proteina niexef li jiġi prodott matul l-ipproċessar taż-żrieragħ.

—	L-annimali li jipproduċu l-ħalib ma għandhom jiġu mitmugħa ebda forma ta’ foraġġ imxarrab.

—	L-annimali ma jistgħux jiġu mitmugħa prodotti li ġejjin mill-annimali, ħlief għall-annimali żgħar fl-età, li jistgħu jingħataw ħalib u xorrox.

—	L-annimali ma jistgħux jiġu mitmugħa skart tal-ġonna u tal-frott jew urea.

Il-kundizzjonijiet tal-fertilizzazzjoni

—

L-użu ta’ ħama tad-dranaġġ, prodotti ta’ ħama tad-dranaġġ jew kompost li jkun ġej minn impjanti muniċipali tat-trattament tal-iskart, bl-eċċezzjoni ta’ kompost ekoloġiku (taħlita komposta ta’ materja veġetali) huwa pprojbit fiż-żoni kollha sfruttati fuq livell agrikolu mill-azjenda tat-trobbija tal-bhejjem.

—	L-azjendi tat-trobbija tal-bhejjem iridu jistennew mill-inqas tliet ġimgħat wara t-tixrid tad-demel qabel ma jużaw l-art sabiex jirgħu l-bhejjem fuqha.

L-użu ta’ sustanzi awżiljarji kimiċi

—	Huwa permess biss l-użu selettiv ta’ pestiċidi kimiċi sintetiċi taħt is-superviżjoni esperta ta’ speċjalisti agronomiċi u l-immirar ta’ siti speċifiċi fi kwalunkwe waħda miż-żoni tal-għalf aħdar tal-azjenda tat-trobbija tal-bhejjem.

—	L-isprej permess għall-qtil tad-dubbien jista’ jintuża fl-imqawel għall-produzzjoni tal-ħalib biss meta ma jkunx hemm in-nagħaġ li jkunu qegħdin jipproduċu l-ħalib.

Projbizzjonijiet fuq il-konsenja

—	Il-ħalib ma jistax jiġi kkonsenjat bħala ħalib tat-tip “Schaf-Heumilch” fi żmien 10 ijiem wara li twelled in-nagħġa.

—	Meta jintużaw nagħaġ li jkunu ġew mitmugħa silaġġ (foraġġ iffermentat), irid ikun hemm perjodu ta’ stennija ta’ mill-inqas 14-il jum.

—

Fir-rigward tal-annimali alpini li jkunu ġew mitmugħa silaġġ (foraġġ iffermentat) fl-irziezet tagħhom, dawn għandhom jiġu mitmugħa għalf li ma jkunx fih silaġġ għal 14-il jum qabel ma jittellgħu jirgħu fil-mergħat alpini, jew inkella l-ħalib tagħhom jista’ jiġi kklassifikat bħala ħalib tat-tip “Schaf-Heumilch” biss wara li jkunu qattgħu 14-il jum jirgħu fil-mergħat alpini (li jkunu proprjetà tal-fornitur tal-ħalib tat-tip “Schaf Heumilch”). Fil-mergħat alpini ma jista’ jiġi prodott jew użat ebda silaġġ bħala għalf.

Projbizzjoni ta’ ikel u għalf ġenetikament modifikati

—	Sabiex tiġi ppreservata l-produzzjoni tradizzjonali tal-ħalib tat-tip “Schaf-Heumilch”, ma jistgħux jintużaw annimali jew għalf li għandhom jiġu identifikati bħala “ġenetikament modifikati” skont il-leġiżlazzjoni prevalenti.

Regolamenti oħrajn

—	Ma jista’ jiġi prodott jew maħżun ebda silaġġ (foraġġ iffermentat) fl-azjenda tat-trobbija tal-bhejjem.

—	Ma jistgħux jiġu prodotti jew maħżuna balal tondi mgeżwra f’rita ta’ kwalunkwe tip fl-azjenda tat-trobbija tal-bhejjem.

—	Ma jista’ jiġi prodott ebda ħuxlief umduż jew ħuxlief iffermentat fl-azjenda tat-trobbija tal-bhejjem.

4.3.   Deskrizzjoni tal-elementi ewlenin li jistabbilixxu l-karattru tradizzjonali tal-prodott (l-Artikolu 7(2) ta’ dan ir-Regolament)

Il-karattru tradizzjonali tal-ħalib tat-tip “Heumilch” ġej mill-fatt li, bħalma kien jiġri fl-eqdem forma tal-produzzjoni tal-ħalib, l-annimali ma jiġux mitmugħa foraġġ iffermentat. Mis-snin sittin (1960s) ’il quddiem, u minħabba l-mekkanizzazzjoni, l-industrijalizzazzjoni tal-agrikoltura bdiet tistrieħ dejjem aktar fuq il-produzzjoni tas-silaġġ (foraġġ iffermentat) u b’hekk naqset il-produzzjoni tal-foraġġ frisk.

It-trobbija tal-bhejjem kienet ibbażata, minn naħa waħda, fuq ir-ragħa fil-mergħat u, min-naħa l-oħra, fuq il-produzzjoni tal-ħaxix u l-ħuxlief fil-mergħat. Skont ir-rekords bil-miktub, il-ħsad tal-ħuxlief — jew ħuxlief u “grummet” [foraġġ aħdar] — mill-inqas darbtejn fis-sena (fenum primum et secundum) kien prattika komuni fit-Tirol mis-seklu 13 ’il quddiem. (Stolz, O., Rechtsgeschichte des Bauernstandes und der Landwirtschaft in Tirol und Vorarlberg [L-istorja legali tal-bdiewa u tal-agrikoltura fit-Tirol u f’Vorarlberg], 1949.)

Ir-reġistru tal-artijiet tal-arċiveskovat ta’ Salzburg fih informazzjoni dettaljata ħafna dwar in-numru ta’ bhejjem fuq l-insedjamenti ta’ “Schwaig” u l-proprjetajiet l-oħrajn kollha li kienu jappartjenu lill-arċiveskovat fil-wied ta’ Ziller fl-1607. Speċifikament fi tmiem kull deskrizzjoni dettaljata tal-irqajja’ ta’ proprjetà individwali hemm dikjarazzjoni li tgħid: “matul ix-xitwa, joqogħdu tant żwiemel, bhejjem tal-ifrat, nagħaġ jew mogħoż”. Il-bdiewa alpini kellhom inqas bhejjem fix-xitwa milli fis-sajf, meta l-mergħat kienu disponibbli. Ma hemmx dubju li r-ragħa fuq mergħat tal-villaġġi kien ipprattikat b’mod intensiv fl-insedjamenti ta’ “Schwaig” u serva bħala sors primarju ta’ għalf għall-bhejjem. Hemm evidenza dokumentarja minn perjodu aktar kmieni, speċifikament is-sekli 13 u 14, li l-irziezet ta’ “Schwaighof” kienu jinkludu mergħat u għelieqi, kif ukoll mergħat u bwar alpini. Dan ifisser li l-produzzjoni tal-ħaxix u tal-ħuxlief twettqet fuq l-irziezet ta’ “Schwaighof” mill-aktar perjodi bikrin. F’ċerta distanza mill-irziezet hemm meded ta’ muntanji li wkoll jappartjenu għall-insedjamenti ta’ “Schwaig”. Dawn il-meded tradizzjonalment kienu jikkonsistu f’mergħat fejn jintbagħtu l-bhejjem sabiex jirgħu għal ftit ġimgħat fir-rebbiegħa u l-ħarifa, u li jintużaw sabiex isir il-ħuxlief matul il-bqija tas-sena. Fost id-diversi tipi ta’ mergħat, dawn il-mergħat muntanjużi jew f’altitudni għolja huma partikolarment karatteristiċi tal-Alpi. Dawn il-mergħat jiġu maħsuda mhux aktar minn darba fis-sena u, f’xi postijiet, darba kull sentejn sa erba’ snin. Il-kwantità ta’ ħuxlief li jipproduċu hija żgħira, iżda dan il-ħuxlief huwa fragranti u nutrittiv ħafna. (Stolz, O., Die Schwaighöfe in Tirol [L-irziezet ta’ Schwaighof fit-Tirol], 1930.)

Irid ikun hemm matmura disponibbli għall-ħuxlief. Il-provvista tal-ħuxlief trid tinħażen sar-rebbiegħa ta’ wara, minħabba li spiss ikun il-każ li l-borra tinżel ftit wara li l-bhejjem jinġiebu fil-mergħat alpini. (Trientl, A., Die Landwirtschaft in den Gebirgsländern [L-agrikoltura fil-pajjiżi muntanjużi], 1892.)

Artikolu Uniku

L-Ispeċifikazzjoni tal-Prodott imsemmija fl-Artikolu 50(2)(b) tar-Regolament (UE) Nru 1151/2012 għall-ismijiet “Ziegen-Heumilch”/“Goat’s Haymilk”/“Latte fieno di capra”/“Lait de foin de chèvre”/“Leche de heno de cabra” (STG) tinsab fl-Anness għal din id-Deċiżjoni.

F’konformità mal-Artikolu 51 tar-Regolament (UE) Nru 1151/2012, il-pubblikazzjoni ta’ din id-Deċiżjoni għandha tagħti d-dritt ta’ oppożizzjoni għar-reġistrazzjoni tal-isem imsemmi fl-ewwel paragrafu ta’ dan l-Artikolu fi żmien tliet xhur mid-data tal-pubblikazzjoni ta’ din id-deċiżjoni f’Il-Ġurnal Uffiċjali tal-Unjoni Ewropea.

ANNESS

SPEĊIFIKAZZJONI TAL-PRODOTT TA' SPEĊJALITÀ TRADIZZJONALI GARANTITA

“Ziegen-Heumilch”/“Goat's Haymilk”/“Latte fieno di capra”/“Lait de foin de chèvre”/“Leche de heno de cabra”

Nru tal-UE: TSG-AT-02290-22.2.2017

L-Awstrija

1.   Isem/ismijiet li jrid(u) jiġi/u rreġistrat(i)

“Ziegen-Heumilch” (de); “Goat's Haymilk” (en); “Latte fieno di capra” (it); “Lait de foin de chèvre” (fr); “Leche de heno de cabra” (es)

2.   Tip ta' prodott

Klassi 1.4. Prodotti oħrajn li joriġinaw mill-annimali (bajd, għasel, diversi prodotti mill-ħalib għajr butir, eċċ.)

3.   Raġunijiet għar-reġistrazzjoni

3.1.   Huwa prodott

—	☒	li jirriżulta minn metodu ta' produzzjoni, ta' pproċessar jew ta' kompożizzjoni li jikkorrispondi għal prattika tradizzjonali għal dak il-prodott jew l-oġġett tal-ikel;
—	☐	li huwa magħmul minn materja prima jew ingredjenti li jintużaw tradizzjonalment.

Il-produzzjoni tal-ħalib tat-tip “Heumilch” hija l-iktar forma naturali ta' produzzjoni tal-ħalib li teżisti. Il-ħalib jiġi minn annimali li jitrabbew fi rziezet tradizzjonali u sostenibbli tal-produzzjoni tal-ħalib. Id-differenza ewlenija bejn il-ħalib standard u l-ħalib tat-tip “Heumilch” u l-karattru tradizzjonali ta' dan tal-aħħar huma li, bħalma kien jiġri dari fil-produzzjoni tal-ħalib, l-annimali ma jingħataw l-ebda għalf iffermentat. Mis-snin sittin 'il quddiem, u minħabba l-mekkanizzazzjoni, l-industrijalizzazzjoni tal-agrikoltura bdiet tistrieħ dejjem iktar fuq il-produzzjoni tal-foraġġ insilat (għalf iffermentat) u b'hekk naqset ferm il-produzzjoni tal-foraġġ niexef. Barra minn hekk, il-linji gwida jipprojbixxu l-użu ta' annimali u ta' għalf li jridu jiġu identifikati bħala annimali u għalf ġenetikament modifikati skont il-leġiżlazzjoni fis-seħħ. L-alimentazzjoni tal-annimali tinbidel skont l-istaġuni: fil-perjodu tal-foraġġ aħdar, l-annimali jiġu mitmugħa ħaxix frisk, ħuxlief iżda wkoll l-għalf awtorizzat skont il-punt 4.2; il-foraġġ tax-xitwa jkun magħmul minn ħuxlief u l-għalf awtorizzat skont il-punt 4.2.

3.2.   Huwa isem

—	☐	li jintuża tradizzjonalment biex jirreferi għall-prodott speċifiku;
—	☒	li jindika l-karattru tradizzjonali tal-prodott jew l-ispeċifitajiet tiegħu.

Il-produzzjoni tal-ħalib tal-mogħoż tat-tip “Heumilch” u l-ipproċessar tiegħu ilhom jeżistu minn kemm ilhom jitrabbew il-mogħoż fl-agrikoltura (minn madwar il-ħdax-il seklu qabel Kristu). It-trobbija tal-mogħoż kienet komuni ħafna fil-Medju Evu fix-“Schwaighöfen” (irziezet tradizzjonali) tal-Prealpi u tal-muntanji tat-Tirol fejn ta' spiss il-bdiewa kienu jieħdu l-mogħoż magħhom fil-mergħat imħarbta ħafna tal-Alpi li kienu jinsabu 'l bogħod mill-bwar, sabiex ikollhom provvista ta' ħalib. Il-kelma “Schwaig” ġejja mill-Ġermaniż mitkellem bejn l-1050 u l-1350, u tirreferi għal forma speċifika ta' insedjament tal-bniedem u, b'mod partikolari, għall-biedja fir-reġjun tal-Alpi. Bosta “Schwaighöfe” kienu jinbdew bħala insedjamenti permanenti mis-sidien tal-art stess u l-bhejjem tagħhom kienu jintużaw l-iktar għall-produzzjoni tal-ħalib (u b'mod partikolari għall-produzzjoni tal-ġobon). Dawn l-insedjamenti ilhom jeżistu fit-Tirol sa mis-seklu 12. F'ċerti reġjuni tal-Alpi fejn kienet tiġi pprattikata l-kondiviżjoni ugwali tal-irziezet bejn il-benefiċjarji, il-bdiewa ż-żgħar kienu jrabbu l-mogħoż sabiex ikollhom il-ħalib meħtieġ fl-irziezet li kienu jinsabu fil-wied.

4.   Deskrizzjoni

4.1.   Deskrizzjoni tal-prodott li għalih japplika l-isem imsemmi fil-punt 1, b'indikazzjoni tal-karatteristiki fiżiċi, kimiċi, mikrobijoloġiċi jew organolettiċi ewlenin tiegħu li juru l-karattru speċifiku tal-prodott (l-Artikolu 7(2) ta' dan ir-Regolament)

Ħalib tal-mogħoż li huwa konformi mal-leġiżlazzjoni fis-seħħ.

4.2.   Deskrizzjoni tal-metodu ta' produzzjoni tal-prodott li għalih japplika l-isem fil-punt 1 li l-produtturi jridu jsegwu inkluż, fejn xieraq, in-natura u l-karatteristiki tal-materja prima jew l-ingredjenti użati, u l-metodu li permezz tiegħu jiġi ppreparat il-prodott (l-Artikolu 7(2) ta' dan ir-Regolament)

Il-ħalib tal-mogħoż tat-tip “Heumilch” huwa prodott b'mod tradizzjonali b'konformità mal-“Heumilchregulativ” (regoli dwar il-produzzjoni tal-ħalib tat-tip “Heumilch”). Dan it-tip ta' ħalib huwa kkaratterizzat mill-projbizzjoni tal-foraġġ iffermentat, bħall-foraġġ insilat, u mill-projbizzjoni tal-użu ta' annimali u ta' għalf li jridu jiġu identifikati bħala annimali u għalf ġenetikament modifikati skont il-leġiżlazzjoni fis-seħħ.

“Heumilchregulativ”

Il-ħalib tal-mogħoż tat-tip “Heumilch” huwa ħalib tal-mogħoż prodott minn azjendi agrikoli li jkunu ntrabtu li jħarsu l-kriterji li ġejjin: l-użu ta' annimali u ta' għalf li jridu jiġu identifikati bħala annimali u għalf ġenetikament modifikati skont il-leġiżlazzjoni fis-seħħ huwa pprojbit.

L-azjenda agrikola kollha trid titmexxa skont ir-regoli tal-produzzjoni tal-ħalib tat-tip “Heumilch”.

Għalf awtorizzat

—	L-alimentazzjoni tal-annimali hija magħmula essenzjalment minn ħaxix frisk u minn pjanti leguminużi fil-perjodu tal-foraġġ aħdar u minn ħuxlief fil-perjodu tal-foraġġ tax-xitwa.

—	It-tipi ta' għalf oħxon li jistgħu jintużaw bħala suppliment huma l-kolza, il-qamħirrum u s-segala għall-għalf, il-pitravi għall-għalf, kif ukoll il-gerbub tal-ħuxlief, tan-nefel u tal-qamħirrum u tipi simili ta' għalf.

—	Tal-inqas 75 % mill-għalf niexef kollu li l-annimali jingħataw kull sena jrid ikun għalf oħxon.

—	Bħala ċereali jistgħu jintużaw il-qamħ, ix-xgħir, il-ħafur, it-tritikal, is-segala u l-qamħirrum jew fil-forma kummerċjali konvenzjonali tagħhom, jew inkella mħallta ma' minerali (granza, gerbub, eċċ.).

—	Il-ful, il-piżelli għall-għalf, il-frott żejtni u d-dqiq oħxon u/jew il-pasta tal-estrazzjoni huma awtorizzati wkoll.

Għalf ipprojbit

—	L-użu tal-foraġġ insilat (għalf iffermentat) u tal-ħuxlief umduż jew iffermentat bħala għalf huwa pprojbit.

—

L-annimali ma għandhomx jingħalfu bil-prodotti sekondarji tal-birreriji, tad-distilleriji u tal-fabbriki tas-sidru, jew bi prodotti sekondarji oħrajn tal-industrija alimentari, bħall-fond u l-iskart tal-birreriji jew il-polpa umduża. Eċċezzjoni: il-polpa diżidratata u l-melassa li huma prodotti sekondarji tal-produzzjoni taz-zokkor u l-għalf tal-proteini li joħroġ mill-ipproċessar taċ-ċereali, fil-forma niexfa tiegħu.

—	L-annimali tas-sess femminili ma għandhom jingħataw l-ebda għalf umduż.

—	L-annimali ma għandhom jingħataw l-ebda għalf li jkun ġej mill-annimali (bħall-ħalib, ix-xorrox, id-dqiq mill-karkassi, eċċ.), ħlief għall-annimali ż-żgħar li jistgħu jingħataw il-ħalib u x-xorrox.

—	L-annimali ma għandhom jingħataw l-ebda skart tal-ġonna u tal-frott, bħall-patata u l-urea.

Regoli dwar il-fertilizzazzjoni

—	Fir-raba' kollu tagħhom, il-fornituri tal-ħalib ma għandhom jużaw l-ebda ħama tad-drenaġġ, prodott tal-ħama tad-drenaġġ jew kompost li jkun ġej minn impjanti muniċipali tat-trattament tal-ilma mormi, minbarra l-kompost ekoloġiku.

—	Il-fornituri tal-ħalib iridu jistennew tal-inqas tliet ġimgħat minn meta jinxtered id-demel tal-bhejjem biex jużaw il-foraġġ miksub mir-raba' tal-foraġġ kollu tagħhom.

L-użu ta' awżiljajri kimiċi

—	Fir-raba' tal-foraġġ kollu tal-fornituri tal-ħalib, il-prodotti kimiċi fitosanitarji sintetiċi jistgħu jintużaw biss b'mod selettiv u mmirat, taħt is-superviżjoni ta' konsulenti agrikoli esperti.

—	L-użu ta' sustanzi bil-bexx awtorizzati kontra d-dubbien fil-bini fejn jinżammu l-bhejjem tal-ħalib huwa possibbli biss meta fih ma jkunx hemm il-bhejjem tas-sess femminili.

Skadenzi li jridu jiġu rispettati għall-kunsinna tal-ħalib

—	Il-ħalib jista' jibda jitqassam bħala ħalib tal-mogħoż tat-tip “Heumilch” minn għaxart ijiem wara t-twelid.

—	Fil-każ tal-mogħoż li jkunu ngħalfu bil-foraġġ insilat (foraġġ iffermentat), irid jgħaddi perjodu ta' stennija ta' mill-inqas 14-il jum.

—

Fil-każ ta' annimali tal-Alpi li jkunu ngħalfu bil-foraġġ insilat (foraġġ iffermentat) fir-razzett fejn ikunu qed jitrabbew, dawn iridu jingħalfu b'għalf li ma jkunx jinkludi l-foraġġ insilat għal 14-il jum qabel ma jittellgħu jirgħu fil-mergħat tal-Alpi, jew inkella l-ħalib tagħhom jista' jibda jintuża bħala ħalib tal-mogħoż tat-tip “Heumilch” biss wara li jkunu qattgħu 14-il jum fir-reġjun tal-Alpi (fl-unità ta' produzzjoni tal-ħalib tal-mogħoż tat-tip “Heumilch” li tappartjeni lill-istess razzett). Fil-mergħat fir-reġjun tal-Alpi, la jista' jiġi prodott il-foraġġ insilat u l-annimali lanqas ma jistgħu jingħalfu bih.

Projbizzjoni tal-ikel u l-għalf ġenetikament modifikati

—	Sabiex jinżamm il-karattru tradizzjonali tal-ħalib tal-mogħoż tat-tip “Heumilch”, ma jistgħux jintużaw annimali u għalf li jridu jiġu identifikati bħala annimali u għalf ġenetikament modifikati skont il-leġiżlazzjoni fis-seħħ.

Dispożizzjonijiet oħra

—	La jista' jiġi prodott u lanqas maħżun il-foraġġ insilat (foraġġ iffermentat).

—	La jistgħu jiġu prodotti u lanqas maħżuna l-balal tondi ta' kull tip imkebbin fil-plastik irqiq.

—	Ma jista' jiġi prodott l-ebda ħuxlief umduż jew ħuxlief iffermentat.

4.3.   Deskrizzjoni tal-elementi essenzjali li jistabbilixxu l-karattru tradizzjonali tal-prodott (l-Artikolu 7(2) ta' dan ir-Regolament)

Il-ħalib tal-mogħoż tat-tip “Heumilch” ivarja mill-ħalib tal-mogħoż standard minħabba l-kundizzjonijiet tal-produzzjoni tiegħu rregolati mill-“Heumilchregulativ” (regoli dwar il-produzzjoni tal-ħalib tat-tip “Heumilch”), spjegati fil-punt 4.2.