ANNESS

1.   DAĦLA

1.1.   Għan tal-Linji gwida

Ir-Rakkomandazzjoni tal-Kummissjoni “Linji gwida dwar il-kriterji ta’ trattament indaqs u ta’ trasparenza li għandhom jiġu applikati mill-ENTSO-E u l-ENTSOG meta jiżviluppaw it-TYNDPs tagħhom” (“il-Linji gwida”) tqiegħed fil-prattika d-dispożizzjonijiet tar-Regolament (UE) Nru 347/2013 tal-Parlament Ewropew u tal-Kunsill tas-17 ta’ April 2013 dwar linji gwida għall-infrastruttura tal-enerġija trans-Ewropea u li jħassar id-Deċiżjoni Nru 1364/2006/KE u li jemenda r-Regolamenti (KE) Nru 713/2009, (KE) Nru 714/2009 u (KE) Nru 715/2009 (1) (“ir-Regolament tat-TEN-E”).

It-TYNDPs għall-elettriku u għall-gass huma dokumenti ta’ referenza Ewropej komprensivi u aġġornati għan-netwerks ta’ trażmissjoni tal-elettriku u tal-gass. It-TYNDPs huma dokumenti li joħorġu kull sentejn, u li jagħtu ħarsa wiesgħa lejn il-pjanijiet ta’ espansjoni tat-trażmissjoni identifikati bħala meħtieġa biex jiżguraw li l-grilja ta’ trażmissjoni tiffaċilita l-għanijiet tal-politika tal-enerġija tal-UE. It-TYNDPs iservu ta’ bażi li minnha tinsilet il-lista ta’ Proġetti ta’ interess komuni (PCIs) fis-setturi tal-elettriku u tal-gass. Il-proġetti tal-gass u tal-elettriku li huma inklużi fit-TYNDPs biss jistgħu applikaw biex isiru PCIs, u l-valutazzjoni tagħhom tibbaża b’mod sinifikanti fuq l-analiżijiet tal-kostijiet u l-benefiċċji speċifiċi għall-proġetti, ipprovduti mit-TYNDPs.

Il-Linji gwida jfissru l-qafas legali li japplika għall-proċess ta’ tfassil u ta’ adozzjoni tat-TYNDPs. Jimmiraw li jiżguraw proċess ġust, ugwali u trasparenti għall-inklużjoni ta’ proġetti fit-TYNDP billi jistabbilixxu struttura, kontenut u prinċipji li għandhom jiżguraw il-konsistenza bejn iż-żewġ proċessi tat-TYNDP kif ukoll interpretazzjoni uniformi tal-prinċipji u r-regoli applikabbli miż-żewġ ENTSOs. Jipprovdu qafas ġenerali għall-adozzjoni, għar-reviżjoni u għall-applikazzjoni tad-dokumenti ta’ implimentazzjoni prattika li għandhom jiġu adottati u użati mill-ENTSO-E u mill-ENTSOG, rispettivament, biex jiżguraw trattament ugwali u trasparenza tul dawn l-eżerċizzji.

It-tfassil ta’ dawn il-linji gwida huwa rikjest mill-Anness III 2(5) tar-Regolament tat-TEN-E dwar il-proċess għall-istabbiliment ta’ listi reġjonali fi ħdan il-proċess ta’ identifikazzjoni ta’ Proġetti ta’ Interess Komuni (“PCIs”): “… il-Kummissjoni għandha toħroġ Linji Gwida dwar il-kriterji li għandhom jiġu applikati mill-ENTSO tal-Elettriku u l-ENTSO tal-Gass meta jkunu qed jiżviluppaw il-pjanijiet deċennali għall-iżvilupp tan-netwerk rispettivi tagħhom imsemmijin fil-punti (3) u (4) ta’ hawn fuq, sabiex tiżgura t-trattament ugwali u t-trasparenza tal-proċess.” Id-dispożizzjonijiet dwar il-proċessi tat-TYNDP stabbiliti skont il-Linji gwida se jkunu applikabbli għal kull proġett ikkunsidrat għall-inklużjoni fit-TYNDP rispettiv, irrispettivament mill-pjanijiet tal-promotur biex dan jitressaq, jew le, bħala kandidat fi ħdan il-proċess ta’ selezzjoni li jmiss tal-PCIs.

Dawn il-linji gwida mhumiex legalment vinkolanti. Il-metodi, l-għodod u l-iskedi ta’ żmien futuri li jkunu se jintużaw mill-ENTSO-E u mill-ENTSOG fil-proċessi ta’ tfassil tat-TYNDPs tagħhom għandhom jikkonformaw bis-sħiħ mar-rekwiżiti tar-Regolament (KE) Nru 714/2009 (2) u (KE) Nru 715/2009 (3) tal-Parlament Ewropew u tal-Kunsill, ir-Regolament tat-TEN-E u l-Linji gwida.

1.2.   Destinatarji

Il-Linji gwida huma indirizzati lill-ENTSO għall-elettriku u għall-ENTSO għall-gass. Il-kriterji applikati mill-ENTSOs skont dan id-dokument se jolqtu lil dawn li ġejjin:

—

il-promoturi ta’ proġetti kollha li qegħdin jippjanaw li jiżviluppaw proġett ta’ infrastruttura tat-trażmissjoni tal-elettriku li jinsab għalkollox jew parzjalment f’tal-anqas pajjiż wieħed irrappreżentat fi ħdan l-ENTSO-E u li jitqies ta’ rilevanza Ewropea (4), kif ukoll il-promoturi tal-ħżin li qegħdin jippjanaw li jiżviluppaw proġetti ta’ ħżin tal-elettriku fi ħdan l-Unjoni Ewropea u li jirrispettaw il-limitazzjonijiet tekniċi stipulati fl-Anness II tar-Regolament tat-TEN-E, jew kwalunkwe apparat jew istallazzjoni essenzjali biex is-sistema taħdem b’mod sikur, sigur u effiċjenti.

—

il-promoturi ta’ proġetti kollha li qegħdin jippjanaw li jiżviluppaw proġett ta’ infrastruttura tat-trażmissjoni tal-gass ta’ rilevanza Ewropea: pipeline tat-trażmissjoni tal-gass, faċilitajiet ta’ ħżin taħt l-art, faċilitajiet ta’ riċeviment u ħżin u ta’ rigassifikazzjoni jew dekompressjoni għall-gass naturali likwifikat (LNG) jew għall-gass naturali kkompressat (CNG), jew kwalunkwe apparat jew istallazzjoni essenzjali biex is-sistema taħdem b’sikurezza, sigurtà u effiċjenza, jew biex tippermetti kapaċità bidirezzjonali.

2.   IL-PJANIJIET TA’ GĦAXAR SNIN GĦALL-IŻVILUPP TAN-NETWERK (TYNDPS)

2.1.   Rekwiżiti legali

It-TYNDP għall-elettriku u t-TYNDP għall-gass jitħejjew, rispettivament, mill-ENTSO-E u mill-ENTSOG, skont l-Artikoli 8 rispettivi tar-Regolamenti (KE) Nru 714/2009 u (KE) Nru 715/2009. It-TYNDPs mhux vinkolanti li jkopru l-Unjoni kollha jiġu adottati u pubblikati kull sentejn, u jinkludu l-immudellar tan-netwerk integrat, l-iżvilupp tax-xenarji, prospettiva tal-adegwatezza tal-ġenerazzjoni Ewropea jew prospettiva tal-adegwatezza tal-provvista Ewropea, skont il-każ, kif ukoll valutazzjoni tar-reżiljenza tas-sistema.

It-TYNDPs jibnu fuq pjanijiet nazzjonali ta’ investiment, filwaqt li jqisu pjanijiet reġjonali ta’ investiment kif ukoll, jekk xieraq, aspetti tal-ippjanar tan-netwerks li jolqtu lill-Unjoni, u huma soġġetti għal analiżi tal-kostijiet u l-benefiċċji, bl-użu tal-metodoloġija stabbilita, skont ir-Regolament tat-TEN-E. Rigward l-interkonnessjonijiet transfruntiera, it-TYNDPs jibnu wkoll fuq il-ħtiġijiet raġonevoli ta’ utenti differenti tas-sistema, u jintegraw impenji fit-tul mill-investituri filwaqt li jidentifikaw lakuni fl-investiment, speċifikament b’rabta mal-kapaċitajiet transfruntiera.

Skont l-Artikolu 9(2) tar-Regolamenti (KE) Nru 714/2009 u (KE) Nru 715/2009 u l-Artikolu 6(3)(b) tar-Regolament (KE) Nru 713/2009 tal-Parlament Ewropew u tal-Kunsill (5), l-Aġenzija għall-Kooperazzjoni tar-Regolaturi tal-Enerġija (“l-Aġenzija”) tipprovdi opinjonijiet motivati kif xieraq fuq l-abbozzi tat-TYNDPs, kif ukoll rakkomandazzjonijiet lill-ENTSOs, fejn tqis li l-abbozz ta’ TYNDP rispettiv ma jikkontribwix lejn in-nondiskriminazzjoni, il-kompetizzjoni effettiva, il-funzjonament effiċjenti u sigur tas-swieq interni, jew livell suffiċjenti ta’ interkonnessjoni transfruntiera miftuħa għall-aċċess minn parti terza.

L-ENTSOs huma legalment marbutin (6) li jwettqu proċessi ta’ konsultazzjoni wiesgħa matul it-tħejjija tat-TYNDPs. Dawn il-proċessi għandhom jitwettqu fi stadju bikri, b’mod miftuħ u trasparenti, bl-involviment tal-parteċipanti fis-suq kollha rilevanti, awtoritajiet regolatorji nazzjonali u awtoritajiet nazzjonali oħra, u intrapriżi tal-provvista, tal-ġenerazzjoni jew tal-produzzjoni. Għandhom jidentifikaw il-fehmiet u l-proposti tal-partijiet kollha rilevanti fil-proċess tat-teħid tad-deċiżjonijiet. Id-dokumenti u l-minuti kollha tal-laqgħat marbutin mal-konsultazzjonijiet għandhom isiru pubblikament aċċessibbli.

Ir-Regolament tat-TEN-E, li skontu huwa stabbilit il-proċess ta’ identifikazzjoni tal-PCIs, jirrikjedi l-inklużjoni ta’ proġetti kandidati tal-elettriku u tal-gass fit-TYNDP bħala prekundizzjoni, bil-għan li jiġu inklużi fil-listi tal-PCIs tal-Unjoni kollha (7).

Fl-aħħar nett, l-ENTSOG huwa legalment marbut li jiżgura li jkun hemm konsistenza u allinjament bejn il-prospettivi fit-tul tal-monitoraġġ tal-kwalità tal-gass ippubblikati kull sentejn u t-TYNDP għall-gass li jitħejja fl-istess ħin. Il-proċess ta’ konsultazzjoni mal-partijiet ikkonċernati użat għat-TYNDP jeħtieġ li jitwessa’ biex jinkludi bħala element il-kwalità tal-gass.

2.2.   Prinċipji li għandhom jirrispettaw l-ENTSOs fil-proċess tat-TYNDP

Sabiex jiżguraw it-trattament indaqs u t-trasparenza tal-proċessi tat-TYNDPs, u bil-monitoraġġ tal-Aġenzija kif stipulat fl-Artikolu 9 tar-Regolamenti (KE) Nru 714/2009 u (KE) Nru 715/2009, jenħtieġ li l-ENTSO-E u l-ENTSOG:

—

jorganizzaw, għat-TYNDPs tagħhom tal-elettriku u tal-gass, proċessi mhux diskriminatorji biex jidentifikaw u jinkludu l-proġetti Ewropej kollha rilevanti ta’ infrastruttura tal-elettriku u dawk ta’ infrastruttura tal-gass, rispettivament, irrispettivament mill-istatus tal-promoturi tagħhom (membri tal-ENTSO jew mhux).

—

jirreklamaw il-proċessi tat-TYNDP, jikkonsultaw il-partijiet ikkonċernati fi stadji kritiċi ta’ teħid tad-deċiżjonijiet kif ukoll dwar l-abbozzi tat-TYNDPs, u jagħmlu possibbli l-impenn tagħhom fil-proċess. Jekk jinqala’ l-bżonn u fuq talba mill-ENTSOs, l-assoċjazzjonijiet ta’ partijiet ikkonċernati rilevanti jistgħu jiġu involuti fuq bażi ad hoc, bi rwol ta’ konsulenza fil-proċessi. L-assoċjazzjonijiet ta’ partijiet ikkonċernati rilevanti jistgħu jiġu informati wkoll b’mod regolari dwar il-proċessi ta’ TYNDP li jkunu għaddejjin;

—	jiżguraw it-trasparenza fid-data li tidħol u toħroġ mill-proċessi tat-TYNDP, skont il-metodoloġija tal-analiżi tal-kostijiet u l-benefiċċji, sabiex kwalunkwe parti kkonċernata, pereżempju, tkun tista’ tifhem il-valutazzjoni mwettqa mill-ENTSOs.

—	jiżguraw, mill-applikazzjoni tal-proġett sal-finalizzazzjoni tat-TYNDP, aċċess ġust u mhux diskriminatorju tal-promoturi tal-proġetti għal informazzjoni dwar il-valutazzjoni tal-proġetti tagħhom, imwettqa skont il-metodoloġija tal-analiżi tal-kostijiet u l-benefiċċji.

Sabiex jiżguraw il-konsistenza bejn it-TYNDPs u l-proċess ta’ selezzjoni tal-PCIs, l-ENTSOs għandhom jikkonsultaw u jinfurmaw regolarment lill-Kummissjoni u lill-Aġenzija dwar il-proċessi tat-TYNDPs, speċjalment dwar l-inklużjoni u l-valutazzjoni tal-proġett. Dan għandu jippermetti lill-ENTSOs jilqgħu r-rakkomandazzjonijiet tal-Kummissjoni u tal-Aġenzija bi żmien biżżejjed għat-TYNDPs aħħarija rispettiva.

3.   TRESSIQ TA’ PROĠETTI GĦALL-INKLUŻJONI FIT-TYNDP

It-TYNDPs għall-elettriku u għall-gass għandhom jinkorporaw il-proġetti kollha rilevanti tal-infrastruttura tal-elettriku u tal-gass Ewropej kif stipulat fir-Regolament (UE) Nru 347/2013.

Sabiex jiġu żgurati (1) proċess ġust u mhux diskriminatorju għall-inklużjoni tal-proġetti fit-TYNDPs, (2) it-trasparenza tal-proċess, u (3) il-konsistenza ġenerali tal-approċċi, jenħtieġ li l-ENTSO-E u l-ENTSOG jiġbru u jivvalidaw l-applikazzjonijiet ta’ proġetti kollha f’waqthom, inkluż:

—

perjodu għat-tressiq tal-applikazzjonijiet ta’ tul ta’ żmien xieraq biex jippermetti lill-promoturi tal-proġetti jressqu l-proġetti u l-informazzjoni meħtieġa li tkopri wkoll id-dettalji prattiċi kollha rilevanti għall-inklużjoni fit-TYNDP; id-dati tal-bidu u tat-tmiem tal-perjodu għat-tressiq tal-applikazzjonijiet għandhom ikunu rriklamati fuq is-siti web tal-ENTSOs; l-istess skadenzi għandhom japplikaw għall-promoturi tal-proġetti kollha matul il-proċess. Il-promoturi tal-proġetti kollha jenħtieġ li jkollhom aċċess għall-istess informazzjoni matul il-proċess, u jekk ċertu promotur jitlob kjarifiki jew informazzjoni addizzjonali marbuta mal-proċess ġenerali, jenħtieġ li l-ENTSOs jikkomunikaw lill-promoturi tal-proġetti kollha l-oħra l-kjarifiki jew informazzjoni addizzjonali li jistgħu jkunu rilevanti għalihom.

—

perjodu ta’ verifika li għandu jagħti żmien biżżejjed biex jiġi żgurat li l-applikazzjonijiet kollha fihom data affidabbli li tqis proġetti ta’ infrastruttura paragunabbli (eż. l-istadju tal-iżvilupp u d-data tal-ikkummissjonar), u biex jiġi żgurat li jkun hemm fehim reċiproku dwar id-data tal-proġett bejn l-ENTSO-E jew l-ENTSOG u kull promotur ta’ proġett;

—	il-pubblikazzjoni fuq is-sit web tal-ENTSO rispettiv tal-lista tal-proġetti meqjusa għall-inklużjoni fit-TYNDP jenħtieġ li ssir fi żmien raġonevoli sabiex jiġu żgurati t-trasparenza u d-disponibbiltà minn kmieni tal-informazzjoni bażika li tidentifika l-proġetti;

—	konsultazzjoni pubblika ta’ tul ta’ żmien xieraq biex jippermetti lil kull min jista’ jkollu interess jibgħat kummenti fuq kull abbozz ta’ TYNDP.

4.   DOKUMENTI TA’ IMPLIMENTAZZJONI PRATTIKA TAL-ENTSOS

Sabiex tiġi żgurata l-implimentazzjoni tal-Linji gwida u jkun hemm konformità mal-prinċipji elenkati hawn fuq, l-ENTSO-E u l-ENTSOG għandhom ifasslu dokumenti speċifiċi ta’ implimentazzjoni prattika, bil-għan li jipprovdu lill-promoturi tal-proġetti b’linji gwida dwar il-passi proċedurali u l-informazzjoni meħtieġa li għandha titressaq għall-inklużjoni tal-proġett tagħhom fit-TYNDP rispettiv.

Jenħtieġ li dawn id-dokumenti jiġu żviluppati u adottat mill-ENTSO rispettiv wara li dan jikkonsulta mal-partijiet ikkonċernati rilevanti u jqis kif xieraq ir-rakkomandazzjonijiet tal-Kummissjoni u tal-Aġenzija.

Fil-proċessi tat-TYNDP sussegwenti, ir-reviżjoni u l-aġġornamenti tad-dokumenti ta’ implimentazzjoni prattika jista’ jibdihom l-ENTSO rispettiv wara li dan jikkonsulta mal-Kummissjoni u mal-Aġenzija, jew fuq talba tal-Kummissjoni.

Billi l-inklużjoni ta’ applikazzjonijiet ta’ proġetti inadegwati kieku tolqot l-immudellar tan-netwerks tal-elettriku u tal-gass, b’mod li potenzjalment tipperikola l-adozzjoni f’waqtha tat-TYNDPs u l-għan ta’ trasparenza rigward l-iżvilupp tan-netwerks tal-elettriku u tal-gass fl-Unjoni, kif previst mill-premessa 9 tar-Regolament (KE) Nru 714/2009 u mill-premessa 18 tar-Regolament (KE) Nru 715/2009, jenħtieġ li l-ENTSO-E u l-ENTSOG jiddefinixxu, fid-dokumenti ta’ implimentazzjoni prattika tagħhom, kriterji għall-inklużjoni jew għal-esklużjoni ta’ proġetti mressqa. Il-proġetti kollha li jkunu se jiġu aċċettati għall-inklużjoni fit-TYNDP jenħtieġ li jissodisfaw dawn ir-rekwiżiti amministrattivi u tekniċi kif deskritti fid-dokumenti ta’ implimentazzjoni prattika tal-ENTSO rispettiv.

Jenħtieġ li d-dokumenti ta’ implimentazzjoni prattika jispjegaw fil-qasir il-proċessi tat-TYNDP, inkluż l-iskadenzi applikabbli għal kull pass tat-TYNDP u r-rabta tagħhom mal-proċess ta’ selezzjoni tal-PCIs, u jenħtieġ li jelenkaw il-kriterji amministrattivi u tekniċi li għandhom jiġu ssodisfati sabiex jippermettu li proġett isir parti mit-TYNDP rispettiv. Dawn il-kriterji jistgħu jinġabru f’kategoriji differenti, u jiġu applikati kif xieraq, skont it-tip ta’ promotur ta’ proġetti, it-tip ta’ infrastruttura li l-proġett rispettiv ikun se jimplimenta, kif ukoll l-istatus ta’ progress tal-proġett, filwaqt li jiġu żgurati t-trasparenza tal-proċess u t-trattament ugwali għall-promoturi tal-proġetti kollha kkonċernati. Il-promoturi tal-proġetti diġà inklużi fit-TYNDPs ta’ qabel għandhom jerġgħu jressqu applikazjoni uffiċjali għall-inklużjoni fit-TYNDP li jkun qiegħed jitħejja. Madankollu, l-inklużjoni ta’ proġett partikulari fit-TYNDPs ta’ qabel tista’ tippermetti proċess simplifikat ta’ applikazzjoni għat-TYNDPs attwali, u dan il-proċess għandu jiġi deskritt fid-dokumenti ta’ implimentazzjoni prattika tal-ENTSOs.

Id-deċiżjoni aħħarija dwar l-inklużjoni ta’ proġett fil-Lista ta’ Proġetti tat-TYNDP hija f’idejn l-ENTSO kompetenti, u kull deċiżjoni marbuta maċ-ċaħda tal-inklużjoni ta’ proġett fit-TYNDP għandha tkun spjegata kif xieraq.

4.1.   Kriterji amministrattivi u tekniċi dwar il-promoturi tal-proġetti u l-proġetti meqjusa għall-inklużjoni fit-TYNDP

Jenħtieġ li l-kriterji amministrattivi u tekniċi jiġu żviluppati filwaqt li jitqiesu l-aspetti li ġejjin:

—

Il-promoturi tal-proġetti li qegħdin jippjanaw li jiżviluppaw proġett ta’ infrastruttura u li dan jiġi inkluż fit-TYNDP rispettiv jenħtieġ li jagħtu evidenza tal-kredibbiltà tagħhom f’termini ta’ kapaċità finanzjarja u għarfien espert tekniku biex jimplimentaw il-proġett rispettiv huma stess jew permezz ta’ sottokuntratturi. Irrispettivament mill-kategoriji differenti li taħthom jaqgħu l-proġetti ta’ infrastruttura tal-enerġija, il-proċessi ta’ inklużjoni fit-TYNDP jenħtieġ li jibnu fuq kriterji amministrattivi li jiżguraw trattament ġust u mhux diskriminatorju ta’ kwalunkwe promotur tal-proġetti, filwaqt li jiżguraw ukoll l-evidenza tas-solidità tal-proġetti meqjusa.

—

Skont l-istatus ta’ progress tal-proġett, il-promoturi tal-proġetti jenħtieġ li jagħtu evidenza tas-solidità tal-proġett meqjus għall-inklużjoni fit-TYNDP rispettiv, u jenħtieġ li jagħtu evidenza li tippermetti l-valutazzjoni tar-rilevanza Ewropea tal-proġett mill-ENTSOs. Irrispettivament mill-kategoriji differenti li taħthom jaqgħu l-proġetti ta’ infrastruttura tal-enerġija, il-proġetti meqjusa għall-inklużjoni fit-TYNDPs jenħtieġ li jissodisfaw ċerti kriterji tekniċi minimi, li għandhom jiġu ddettaljati fid-dokument ta’ implimentazzjoni prattika tal-ENTSO rispettiv. Dawn ir-rekwiżiti tekniċi u l-limiti minimi korrispondenti – jekk applikabbli – jenħtieġ li jkunu maħsubin biex jiżguraw li l-proġetti jkollhom rilevanza Ewropea mil-lat kummerċjali jew ta’ sigurtà tal-provvista.

—

F’termini tal-għoti ta’ evidenza tas-solidità tal-proġetti meqjusa għall-inklużjoni fit-TYNDP, il-promoturi tal-proġetti jenħtieġ li jkunu marbutin li jagħtu evidenza rigward l-azzjonijiet li diġà jkunu ħadu biex jibdew l-implimentazzjoni tal-proġett rispettiv (eż. l-istatus ta’ PCI jew l-inklużjoni fl-aħħar Pjan Nazzjonali ta’ Żvilupp disponibbli, jew ftehimiet iffirmati bejn il-ministeri jew ir-regolaturi tal-pajjiżi milquta, jew ir-riżultati ta’ studji ta’ vijabbiltà jew previjabbiltà, eċċ.). Meta l-ENTSOs jitolbu lill-promoturi tal-proġetti jagħtu evidenza tal-kapaċità finanzjarja tagħhom u tal-għarfien espert tekniku tagħhom biex jimplimentaw proġett, jew evidenza tas-solidità tal-proġett rispettiv, jenħtieġ li l-ENTSOs jiżguraw li r-rekwiżiti ma jkunux sproporzjonati għall-kategoriji differenti tal-promoturi tal-proġetti. Jekk l-applikazzjoni ta’ rekwiżiti differenti tkun iġġustifikata, jenħtieġ li l-ENTSOs jiżguraw li jintalab livell simili jew korrispondenti ta’ dettall u ta’ evidenza mingħand il-promoturi tal-proġetti.

4.2.   It-trattament tad-data

4.2.1.   L-użu tad-data u l-aċċess pubbliku għad-data

Id-dokumenti amministrattivi pprovduti mill-promoturi tal-proġetti matul il-fażi ta’ tressiq tal-applikazzjonijiet, u r-riferimenti għall-istatus legali, il-kapaċità finanzjarja u l-għarfien espert tekniku tagħhom (kif imsemmija fit-taqsima 4.1) jenħtieġ li jintużaw mill-ENTSOs biss sabiex jiżguraw il-konformità mal-kriterji amministrattivi ddefiniti fid-dokumenti ta’ implimentazzjoni prattika tagħhom, u jenħtieġ li jiġu ttrattati b’mod kunfidenzjali mill-ENTSOs, bi qbil mar-regoli interni tagħhom, sakemm ma jkunux diġà pubbliċi.

L-input tekniku pprovdut mill-promoturi tal-proġetti u l-benefiċċji vvalutati tal-proġetti evalwati skont il-metodoloġija tal-analiżi tal-kostijiet u l-benefiċċji jenħtieġ li jiġi ppubblikat mill-ENTSOs bħala parti mill-proċessi tat-TYNDP.

Id-data dwar il-kostijiet imressqa mill-promoturi tal-proġetti biex dawn jiġu inklużi fit-TYNDPs għandha tiġi ppubblikata mill-ENTSOs. Jistgħu japplikaw derogi jekk id-data tiġi ddikjarata kunfidenzjali mill-promoturi tal-proġetti rispettivi. Fejn applikabbli, dawk għandhom ikunu ddettaljati fid-dokumenti ta’ implimentazzjoni prattika tal-ENTSOs.

Madankollu, fil-kuntest tal-eżerċizzju ta’ selezzjoni tal-PCIs, il-Gruppi Reġjonali stabbiliti skont ir-Regolament tat-TEN-E jenħtieġ li jkollhom aċċess għad-data kollha dwar il-kostijiet imressqa mill-promoturi tal-proġetti fi ħdan il-proċessi tat-TYNDP.

Riżultati aggregati jew ġenerali tal-valutazzjoni jistgħu jiġu ppubblikati mill-ENTSO-E u mill-ENTSOG, jew jistgħu jintużaw f’avvenimenti pubbliċi, skont id-dokumenti ta’ implimentazzjoni prattika u r-regoli interni tagħhom.

4.2.2.   Korrezzjonijiet tad-data mdaħħla

F’każ li l-informazzjoni u d-data teknika mressqin għal proġett ikunu skorretti skont il-Linji gwida u d-dokumenti ta’ implimentazzjoni prattika tal-ENTSOs, il-promotur tal-proġetti jenħtieġ li jingħata l-opportunità li jirrapporta l-informazzjoni kkoreġuta lill-ENTSO rispettiv fil-perjodu ta’ verifika tal-konsistenza, sal-iskadenza stipulata fid-dokumenti ta’ implimentazzjoni prattika tal-ENTSOs, u sa mhux aktar tard minn tmiem il-konsultazzjoni pubblika tat-TYNDP.

Dan il-perjodu jenħtieġ li jipprevedi skeda ta’ żmien stabbilit biċ-ċar minn qabel, li għandha tiżgura żmien biżżejjed għat-tressiq xieraq tal-informazzjoni kkoreġuta, kif ukoll għal kwalunkwe skambju ta’ informazzjoni jew kjarifiki meħtieġa bejn l-ENTSO kompetenti u l-promotur tal-proġetti rispettiv.

Jekk ikun hemm xi inkonsistenzi fil-korrezzjonijiet tal-informazzjoni, l-ENTSO-E u l-ENTSOG, rispettivament, jenħtieġ li jiddiskutu u jikkonkludu mal-promoturi tal-proġetti, skont il-każ, dwar l-inklużjoni tal-proġett rispettiv fil-Lista ta’ Proġetti tat-TYNDP. Id-deċiżjonijiet kollha tal-ENTSO-E u tal-ENTSOG dwar korrezzjonijiet fl-informazzjoni ta’ proġett jenħtieġ li jkunu motivati, tal-anqas bir-raġuni għall-aċċettazzjoni jew ċaħda tal-bidliet mitluba, u jenħtieġ li jinqasmu mal-promoturi tal-proġetti kkonċernati, mal-Kummissjoni u mal-Aġenzija. Jekk l-inkonsistenzi kapaċi jolqtu l-inklużjoni possibbli ta’ proġett fit-TYNDP, l-ENTSOs jistgħu jikkonsultaw mal-Kummissjoni u mal-Aġenzija dwar il-każ qabel ma jieħdu d-deċiżjoni tagħhom.

Peress li l-proġetti jevolvu l-ħin kollu bejn it-tressiq għall-inklużjoni fit-TYNDP u l-pubblikazzjoni tat-TYNDP, għall-finijiet ta’ ċarezza, jenħtieġ li t-TYNDPs jiddefinixxu d-data tal-validità tad-data tal-proġett tat-TYNDP.

L-iskadenzi raġonevoli stabbiliti fir-rigward tal-fażi ta’ korrezzjoni tad-data mdaħħla ma għandhomx ifixklu l-iskeda ta’ żmien tal-proċess ġenerali tat-TYNDP, u jenħtieġ li jkunu stabbiliti b’ċarezza fid-dokumenti ta’ implimentazzjoni prattika tal-ENTSOs.

4.2.3.   Aċċess tal-promoturi għar-riżultati tal-valutazzjoni u għad-data tat-TYNDP

Fejn rilevanti, u skont il-metodoloġija tal-analiżi tal-kostijiet u l-benefiċċji, jenħtieġ li l-ENTSOs jibagħtu lill-promoturi tal-proġetti, qabel il-konsultazzjonijiet dwar l-abbozzi tat-TYNDPs, ir-riżultati tal-valutazzjoni tal-proġett tagħhom. Jekk mitlub, jenħtieġ li l-promoturi tal-proġetti jingħataw l-opportunità li jipparteċipaw f’laqgħa bilaterali ma’ rappreżentanti tal-ENTSO rispettiv, sabiex il-promotur ikun jista’ jifhem aħjar ir-riżultati tal-valutazzjoni tal-proġett tagħhom.

Lil hinn mir-riżultati ppubblikati fir-rapport tat-TYNDP, kull promotur tal-proġetti għandu dritt għall-aċċess għal informazzjoni aktar iddettaljata dwar il-proġett tiegħu, sa fejn din tkun disponibbli għall-ENTSO-E u għall-ENTSOG fil-qafas tal-proċess ta’ valutazzjoni.

Barra minn hekk, għal raġunijiet ta’ trattament indaqs, jekk mitlub, jenħtieġ li l-ENTSO kompetenti jagħmel disponibbli, mill-iktar teknikament fis possibbli u qabel l-adozzjoni tat-TYNDP, id-data mdaħħla u maħruġa, jekk din tkun mitluba mill-promotur tal-proġetti, sabiex jispjega l-valutazzjoni fid-dettall (inkluż il-preżunzjonijiet dwar is-suq u l-immudellar tan-netwerk).

4.2.4.   Id-dritt tal-promoturi li jitolbu reviżjoni tal-valutazzjoni tal-proġett

F’każ ta’ nuqqas ta’ qbil bejn l-ENTSO kompetenti dwar il-valutazzjoni mwettqa bi qbil mal-metodoloġija tal-analiżi tal-kostijiet u l-benefiċċji, jenħtieġ li l-promotur tal-proġetti jkollu d-dritt li jitlob reviżjoni tal-valutazzjoni tal-proġett tagħhom. Jenħtieġ li tali talba tkun irraġunata u sostanzjata kif xieraq mill-promotur.

F’din il-fażi ta’ reviżjoni, jenħtieġ li l-ENTSOs jikkonsultaw mal-Kummissjoni u mal-Aġenzija, u jekk jitqies meħtieġ, jistgħu jikkonsultaw ukoll, b’mod ad hoc, lill-partijiet ikkonċernati rilevanti meta jiġu biex iqisu l-ġustifikazzjonijiet tal-promoturi tal-proġett. Meta jieħu d-deċiżjoni aħħarija tiegħu, jenħtieġ li l-ENTSO kompetenti jqis kif xieraq il-fehmiet espressi.

Ma għandhomx ikunu soġġetti għal diskussjoni f’din il-fażi ta’ reviżjoni l-elementi li ġejjin (u jitqies li tkun diġà saret konsultazzjoni dwarhom mal-partijiet ikkonċernati aktar kmieni fil-proċess, u li jkunu ġew maqbula u ffinalizzati): preżunzjonijiet ta’ xenarji, data, metodoloġiji ta’ analiżi tal-kostijiet u l-benefiċċji, u data tal-proġett imressqa bħala parti mill-proċess.

---

(1)  ĠU L 115, 25.4.2013, p. 39.

(2)  ĠU L 211, 14.8.2009, p. 15.

(3)  ĠU L 211, 14.8.2009, p. 36.

(4)  Kif stipulat skont ir-Regolamenti (KE) Nru 714/2009 u (KE) Nru 715/2009: “Netwerks vijabbli ta’ trażmissjoni tal-elettriku u tal-gass u interkonnessjonijiet reġjonali meħtieġa, li jkunu relevanti mil-lat kummerċjali u ta’ sigurtà, għandhom ikunu inklużi fil-pjanijiet għall-iżvilupp tan-netwerks.”

(5)  ĠU L 211, 14.8.2009, p. 1.

(6)  L-Artikolu 10 tar-Regolamenti (KE) Nru 714/2009 u (KE) Nru 715/2009.

(7)  Il-premessa 21 u l-Anness III 2(3) u 2(4) tar-Regolament tat-TEN-E.