ANNESS

“CÔTES DE MONTRAVEL”

AOP-FR-A0188-AM01

Data tat-tressiq tal-applikazzjoni 10-09-2014

APPLIKAZZJONI GĦAL EMENDA FL-ISPEĊIFIKAZZJONI TAL-PRODOTT

1.   Regoli applikabbli għall-emenda

L-Artikolu 105 tar-Regolament (UE) Nru 1308/2013 – Emenda mhux minuri

2.   Deskrizzjoni u spjegazzjoni tal-emenda

2.1.   Żona ġeografika ta' produzzjoni

Iż-żona ġeografika tal-produzzjoni deskritta fil-punt IV tal-Kapitolu 1 tal-Ispeċifikazzjoni tal-Prodott hija estiża għat-territorju ta' 4 muniċipalitajiet, Fougueyrolles, Nastringues, Saint-Antoine-de-Breuilh, u Vélines kif ukoll dak tal-muniċipalità antika ta' Port-Sainte-Foy, qabel l-għaqda tiegħu mal-muniċipalità ta' Ponchapt. Dawn il-muniċipalitajiet li jinsabu wkoll fiż-żona tal-produzzjoni tad-DOP “Haut-Montravel” għandhom karatteristiċi pedoklimatiċi identiċi għal dawk taż-żona tal-produzzjoni inizjalment ddefinita għad-DOP “Côtes de Montravel”, u varjetajiet tad-dwieli simili. Din l-emenda tmur id f'id ma' tibdil fil-kundizzjonijiet tal-produzzjoni sabiex turi l-karattru ħelu mezzan tal-inbejjed bojod tad-DOP “Côtes de Montravel”.

Billi l-muniċipalitajiet miżjuda maż-żona ġeografika qabel kienu fiż-żona ta' viċinanza immedjata, u għalhekk din iż-żona ġeografika hija emendata biex jitneħħew minnha.

Il-punt 6 tad-Dokument Uniku huwa emendat f'dan ir-rigward:

Id-denominazzjonijiet “Côtes de Montravel” u “Haut-Montravel” għalhekk jaqsmu bejniethom territorju komuni, b'fatturi naturali komuni.

Huma l-fatturi umani li jagħmlu d-differenza bejn dawn id-denominazzjonijiet. Fil-fatt, l-għażliet tal-produtturi tal-inbid fil-mod kif iħarrġu d-dwieli u kif jaħsduhom, l-għarfien espert fil-qasam tal-produzzjoni tal-inbid iwasslu għal prodotti differenti li għal ħafna żmien ġew identifikati b'ismijiet differenti.

L-għarfien tal-produtturi tal-inbid jirriżulta minn tradizzjoni antika ta' produzzjoni tal-inbejjed bojod miz-zokkor li jifdal, u ta' preservazzjoni ta' dawn l-inbejjed li kienu jiġu kkunsmati 'l bogħod ħafna mill-post tal-oriġini tagħhom (b'mod partikolari fl-Ewropa tat-Tramuntana).

Il-produtturi tal-inbid juru maż-żmien li jafu perfettament kif iħarrġu d-dwieli u t-tekniki tal-produzzjoni tal-inbid tagħhom sabiex jiksbu, minkejja l-perikli tal-klima, inbejjed bojod ħelwin mezzan jew ħelwin ta' kwalità għolja magħrufa bl-ismijiet “Côtes de Montravel” u “Haut-Montravel”.

Fil-punt IV(2) tal-Kapitolu 1 inżdiedet id-data tal-approvazzjoni mill-awtorità nazzjonali kompetenti tal-emenda taż-żona tar-raba' ddemarkata fiż-żona ġeografika tal-produzzjoni li ġiet iddefinita mill-ġdid.

Din l-emenda ma taffettwax id-Dokument Uniku.

2.2.   Bidla editorjali

Fil-punt VI(1)(b) tal-Kapitolu 1, il-kelma “francs” (għajnejn ġodda) hija sostitwita bil-kelma “fructifères” (għajnejn li se jagħtu l-frott): dan huwa titjib editorjali u ma jbiddilx is-sens tat-test oriġinali.

Id-Dokument Uniku huwa emendat f'dan ir-rigward fil-punt 6-a): l-espressjoni “10 yeux francs” (10 għajnejn ġodda) hija sostitwita bi “10 yeux fructifères” (10 għajnejn li se jagħtu l-frott).

2.3.   Parametri analitiċi

Fin-numru 2 tal-punt VII tal-Kapitolu 1 dwar il-maturità tal-għenba, il-qawwa alkoħolika volumetrika naturali u l-qawwa alkoħolika effettiva minima huma aġġustati mill-ġdid għal 12 % minflok 12,5 % u għal 11 % minflok 10,5 %.

Fin-numru 1 b) tal-punt IX dwar standards analitiċi, il-kontenut ta' zokkor fermentabbli nbidel minn 51 gramma għal kull litru għal 54 gramma għal kull litru. Din l-emenda ma taffettwax id-Dokument Uniku.

Dawn l-emendi jirrigwardaw il-karatterizzazzjoni tal-inbejjed DOP “Haut-Montravel” u l-affermazzjoni tal-karattru ħelu mezzan ta' din il-produzzjoni.

2.4.   Varjetajiet tad-dwieli u taħlita

In-numru 2 tal-punt V tal-Kapitolu 1 dwar ir-regoli ta' proporzjon fl-użu tal-varjetajiet differenti tal-għeneb huwa ċċarat: “la proportion du cépage Sémillon B doit être supérieure ou égale à 30 %” (il-proporzjon tal-varjetà Sémillon B għandu jkun daqs jew ogħla minn 30 %). Din il-varjetà, li hija predominanti fiż-żona ta' produzzjoni, għandha kapaċità kbira għall-maturazzjoni żejda f'din iż-żona ta' produzzjoni bi klima oċeanika.

Fin-numru 1 a) tat-Taqsima IX tal-Kapitolu 1 dwar it-taħlita tad-dwieli, il-proporzjon minimu tal-varjetajiet tal-għeneb prinċipali fit-taħlita żdied minn 50 għal 80 %. Huwa ppreċiżat ukoll, fil-qafas tad-dispożizzjoni dwar il-varjetajiet tad-dwieli għall-produzzjoni, li l-proporzjon tal-varjetà Semillon B għandu jkun daqs jew ogħla minn 30 % fit-taħlita.

Dawn l-emendi jirrigwardaw il-karatterizzazzjoni tal-inbejjed DOP “Haut-Montravel” u l-affermazzjoni tal-karattru ħelu mezzan ta' din il-produzzjoni.

2.5.   Rabta mal-oriġini

Il-punt X tal-Kapitolu 1 dwar ir-rabta maż-żona ġeografika ġie riprodott b'mod korrelattiv mal-estensjoni taż-żona ġeografika ta' produzzjoni.

DOKUMENT UNIKU

1.   Isem/ismijiet

Côtes de Montravel

2.   Tip ta' indikazzjoni ġeografika

DOP - Denominazzjoni ta' oriġini protetta

3.   Kategoriji tal-prodotti tad-dwieli

1.

Inbid

4.   Deskrizzjoni tal-inbid/inbejjed

L-inbid huwa nbid abjad mhux frizzanti, ħelu mezzan, eleganti u fin, suave, u z-zokkor fermentabbli li hemm fih ma jaffettwa qatt il-konsistenza sabiħa tiegħu. Il-ħsad tal-għeneb isir meta dawn ikunu kemmxejn immaturati ż-żejjed. Biex jinkiseb dan it-tip ta' nbid kemm frisk u b'togħma ta' frott, l-inbejjed li joriġinaw minn taħlita li fiha l-varjetajiet tal-għeneb prinċipali jinsabu fil-maġġoranza. Wara l-fermentazzjoni dawn ikollhom kontenut ta' zokkor ferementabbli ta' bejn 25 g/l u 54 g/l. Wara l-arrikkiment l-inbejjed ma għandhomx jaqbżu qawwa alkoħolika volumetrika totali ta' 14,5 %. L-inbejjed ikollhom qawwa alkoħolika volumetrika naturali minima ta' 12,5 %.

Karatteristiċi analitiċi ġenerali

Qawwa alkoħolika massima totali (f'% tal-volum)
Qawwa alkoħolika effettiva minima (f'% tal-volum)	11
Aċidità minima totali
Aċidità volatili massima (f'milliekwivalenti għal kull litru)
Kontenut massimu totali ta' diossidu tal-kubrit (f'milligrammi għal kull litru):

L-istandards stipulati fir-regolamentazzjoni ġenerali għandhom japplikaw fir-rigward tal-qawwa alkoħolika massima totali, tal-aċidità minima totali, tal-aċidità volatili massima, tal-kontenut massimu totali ta' diossidu tal-kubrit.

5.   Prattiki tal-produzzjoni tal-inbid

a.    Prattiki enoloġiċi speċifiċi

Prattika enoloġika speċifika

Kull trattament termiku tal-ħsad tal-għeneb li jinvolvi temperatura inqas minn -5 °C u kull użu ta' mini jew ta' kompartimenti tat-tnixxif tal-għeneb (“passerillage”) huma pprojbiti. L-użu ta' biċċiet ta' injam u ż-żieda ta' tannini huma pprojbiti. Wara l-arrikkiment l-inbejjed ma għandhomx jaqbżu qawwa alkoħolika volumetrika totali ta' 14,5 %. Minbarra d-dispożizzjonijiet ta' hawn fuq, l-inbejjed, f'dak li għandu x'qasam mal-prattiki enoloġiċi użati, għandhom jikkonformaw mar-rekwiżiti kollha stabbiliti fil-livell tal-UE kif ukoll fil-Kodiċi Rurali u tas-Sajd Marittimu.

Prattika tal-kultivazzjoni

Id-densità minima tat-tħawwil tad-dwieli hija ta' 5 000 pjanta għal kull ettaru. L-ispazju bejn ir-ringieli ma jistax jaqbeż iż-żewġ metri u l-ispazju bejn dielja u oħra fl-istess ringiela ma jistax ikun inqas minn 0,80 metru.

Id-dwieli jinżabru skont it-tekniki li ġejjin: żabra skont il-metodu Guyot, il-metodu cordon de Royat jew bl-użu ta' żabra qasira.

Kull dielja jkollha massimu ta' 10 għajnejn li jagħtu l-frott.

L-irrigazzjoni hija pprojbita.

b.    Rendimenti massimi

60 ettolitru għal kull ettaru

6.   Żona delimitata

Il-ħsad tal-għeneb u l-inbejjed isiru u jiġu pproċessati fit-territorju tal-muniċipalitajiet li ġejjin tad-Département tad-Dordogne: Bonneville-et-Saint-Avit-de-Fumadières, Fougueyrolles, Lamothe-Montravel, Montcaret, Montazeau, Montpeyroux, Nastringues, Port-Sainte-Foy-et-Ponchapt, Saint-Antoine-de-Breuilh, Saint-Méard-de-Gurçon, Saint-Michel-de-Montaigne, Saint-Vivien u Vélines.

7.   Varjetajiet prinċipali

Sauvignon B, Muscadelle B, Sauvignon G, Semillon B

8.   Deskrizzjoni tar-rabta/rabtiet

Iż-żona demarkata tar-raba' bid-dwieli tibbenefika lir-raba tal-ġir tafli skulati b'mod tajjeb li jinsabu fuq il-pjanura kif ukoll il-partijiet inklinati li jħarsu lejn in-nofs-nhar Barra minn hekk, dawn ir-raba' bid-dwieli għandhom ħamrija fqira u li tgħaddi l-ilma minnhom iżda għandhom kontenut ta' tafal biżżejjed biex ma jiġux affettwati mill-effetti tan-nixfa fis-sajf. Huma jintgħażlu wkoll bir-reqqa sabiex tinkiseb kwalità ottimali tal-għeneb għall-produzzjoni tad-denominazzjoni “Côtes de Montravel”.

Ir-regoli ta' produzzjoni tad-denominazzjoni huma kkaratterizzati minn densità minima ta' tħawwil ta' 5 000 pjanti għal kull ettaru, u piż ta' ħsad baxx għal kull pjanta. Din il-ġestjoni stretta tiżgura maturità biżżejjed u bikrija tal-għeneb sabiex dan ikollu konċentrazzjoni tajba u b'mod partikolari għall-varjetajiet lokali tar-reġjun bħal pereżempju l-Muscadelle B, is-Sauvignon B, is-Sauvignon Gris G, u anki l-Ondenc B, iżda l-aktar il-varjetà Sémillon B, li ta' spiss tinsab bil-ħafna u għandha kapaċità kbira għall-maturazzjoni żejda fil-klima oċeanika. Sabiex ikun jista' jibbenefika mid-DOP l-għeneb tal-“Côtes de Montravel”, jinħasdu meta jkunu mmaturaw sew, b'kontenut ta' zokkor ta' aktar minn 198 gramma kull litru ta' most. It-tekniki ta' konċentrazzjoni permezz tat-tkessiħ jew tal-kompartimenti tat-tnixxif huma pprojbiti. Bl-istess mod, sabiex jiġi ppreservat l-għeneb qabel jingħasar, l-użu tal-magni tal-pressa kontinwi u tal-kontenituri li jitbattlu waħedhom bil-pompa rotarja bil-qala' huma pprojbiti.

F'din iż-żona l-għarfien espert tal-produtturi tal-inbid ġej minn tradizzjoni antika tal-produzzjoni tal-inbejjed miz-zokkor li jkun jifdal u li jikkontrollaw perfettament biex jiksbu nbejjed abjad ħelwin mezzan jew ħelwin ta' kwalità għolja magħrufa bl-ismijiet “Côtes de Montravel” u “Haut-Montravel”.

L-inbejjed bid-denominazzjoni “Côtes de Montravel” huma nbejjed bojod ġeneralment ħelwin mezzan, kultant ħelwin, eleganti u fini, suave, li fihom it-toniċità sabiħa bla ebda mod ma hi affettwata mill-preżenza taz-zokkor fermentabbli Biex jinkiseb dan it-tip ta' nbid kemm frisk u b'togħma tal-frott, l-inbejjed tad-denominazzjoni “Côtes de Montravel” iridu jkunu ġejjin minn taħlita li fiha l-maġġor parti tkun tikkonsisit mill-varjetajiet tad-dwieli prinċipali. Il-kontenut ta' zokkor fermentabbli huwa ta' bejn 25 g/l u 54 g/l li jsostni l-ħlewwa ta' dawn l-inbejjed li fl-istess ħin jippreżentaw konsistenza mmerqa u kremuża. Għalhekk dawn ivarjaw mill-inbejjed bojod tad-denominazzjoni “Haut-Montravel” riżervata għall-inbejjed li għandhom livell aktar għoli ta' zokkor fermentabbli (aktar minn 85 g/l) u li huma prodotti mill-għeneb mmaturati ż-żejjed bl-azzjoni tal-moffa nobbli (botrytis cynerea) jew mingħajrha.

Qabel ma daħal l-insett Phylloxera, l-istorja tal-inbejjed “Côtes de Montravel” mhijiex magħrufa ħafna u tagħmel biss referenza għall-inbejjed ta' “Montravel” b'mod ġenerali, mingħajr ma tispeċifika jekk dawn humiex inbejjed sekki jew inbejjed b'zokkor fermentabbli. Fl-1903, Edouard FERET ħoloq inventarju komprensiv tal-vitikultura fil-Bergeracois fil-ktieb “Bergerac et ses vins”. Jinnota li: “Fil-canton ta' Vélines, l-inbejjed bojod għandhom vitalità u aroma partikolari li minħabba fihom kienu kklassifikati bl-isem ‘Côtes de Montravel’. Dawn l-inbejjed huma ta' kulur abjad ħafna, fini ħafna u ħelwin mezzan, ħelwin u ta' spiss b'aroma pjaċevoli”. Edouard Feret jinnota wkoll li l-inbejjed bojod ta' Montcaret huma l-aqwa nbejjed bojod tal-“Côtes de Montravel” u li huma karatterizzati b'finezza kbira vitali u pjaċevoli.

9.   Kundizzjonijiet essenzjali oħra

Unità ġeografika usa'

Qafas legali:

Leġiżlazzjoni Nazzjonali

Tip ta' kundizzjoni supplementari:

Dispożizzjonijiet addizzjonali dwar it-tikkettar

Deskrizzjoni tal-kundizzjoni:

L-inbejjed bid-denominazzjoni ta' oriġini kontrollata “Côtes de Montravel” jistgħu jispeċifikaw fuq it-tikketti tagħhom l-unità ġeografika usa' ta' “Sud-Ouest”. Din l-unità ġeografika usa' tista' tidher ukoll fuq kwalunkwe fuljett jew reċipjent. Id-daqs tal-ittri għall-unità ġeografika usa' ma għandux ikun akbar, fl-għoli jew fil-wisa', mid-daqs tal-ittri li jiffurmaw l-isem tad-Denominazzjoni ta' Oriġini Protetta.

Żona fil-viċinanza immedjata

Qafas legali:

Leġiżlazzjoni Nazzjonali

Tip ta' kundizzjoni supplementari:

Deroga dwar il-produzzjoni fiż-żona ġeografika ddefinita

Deskrizzjoni tal-kundizzjoni:

Iż-żona fil-viċinanza immedjata, iddefinita bid-deroga għall-produzzjoni tal-inbid, għall-ipproċessar tal-inbid, hija rrappreżentata mit-territorju tal-muniċipalitajiet li ġejjin:

—	Id-Département tad-Dordogne: Bergerac, Le Fleix, Monfaucon, Saint-Laurent-des-Vignes.

—	Id-Département tal-Gironde: Gardegan-et-Tourtirac, Gensac, Landerrouat, Les Lèves-et-Thoumeyragues, Pineuilh, Saint-Avit-Saint-Nazaire u Saint-Emilion.

Referenza għall-pubblikazzjoni tal-ispeċifikazzjoni tal-prodott

https://info.agriculture.gouv.fr/gedei/site/bo-agri/historique/annee-2014/semaine-26