Rata tal-kambju tal-euro (1)

Is-6 ta’ Settembru 2017

(2017/C 296/01)

1 euro =

(1)  Sors: rata tal-kambju ta' referenza ppubblikata mill-Bank Ċentrali Ewropew.

DEĊIŻJONI TA’ IMPLIMENTAZZJONI TAL-KUMMISSJONI

tat-28 ta’ Awwissu 2017

dwar il-pubblikazzjoni f’Il-Ġurnal Uffiċjali tal-Unjoni Ewropea tad-dokument uniku li hemm referenza għalih fl-Artikolu 94(1)(d) tar-Regolament (UE) Nru 1308/2013 tal-Parlament Ewropew u tal-Kunsill u tar-referenza għall-pubblikazzjoni tal-ispeċifikazzjoni tal-prodott għal isem fis-settur tal-inbid

[Mergelland (DOP)]

(2017/C 296/02)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1), u b’mod partikolari l-Artikolu 97(3) tiegħu,

Billi:

IDDEĊIDIET KIF ĠEJ:

Artikolu Uniku

Id-dokument uniku stabbilit skont l-Artikolu 94(1)(d) tar-Regolament (UE) Nru 1308/2013 u r-referenza għall-pubblikazzjoni tal-ispeċifikazzjoni tal-prodott għall-isem “Mergelland” (DOP) jinsabu fl-Anness ta’ din id-Deċiżjoni.

B’konformità mal-Artikolu 98 tar-Regolament (UE) Nru 1308/2013, il-pubblikazzjoni ta’ din id-Deċiżjoni għandha tagħti d-dritt ta’ oġġezzjoni għall-protezzjoni tal-isem speċifikat fl-ewwel paragrafu ta’ dan l-Artikolu fi żmien xahrejn mid-data tal-pubblikazzjoni tagħha f’Il-Ġurnal Uffiċjali tal-Unjoni Ewropea.

(1)  ĠU L 347, 20.12.2013, p. 671.

Sommarju ta’ Deċiżjonijiet tal-Kummissjoni Ewropea dwar l-awtorizzazzjonijiet għat-tqegħid fis-suq għall-użu u/jew dwar l-awtorizzazzjonijiet għall-użu ta’ sustanzi elenkati fl-Anness XIV tar-Regolament (KE) Nru 1907/2006 tal-Parlament Ewropew u tal-Kunsill dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH)

(Ippubblikat skont l-Artikolu 64(9) tar-Regolament (KE) Nru 1907/2006  (1) )

(Test b'rilevanza għaż-ŻEE)

(2017/C 296/03)

Id-deċiżjonijiet tal-għoti ta’ awtorizzazzjoni

(1)  ĠU L 396, 30.12.2006, p. 1.

(2)  Id-Deċiżjoni tinsab fis-sit web tal-Kummissjoni Ewropea fl-indirizz li ġej: http://ec.europa.eu/growth/sectors/chemicals/reach/about_mt

Avviż dwar is-sentenza tal-1 ta’ Ġunju 2017 fil-Kawża T-442/12 fir-rigward tar-Regolament ta’ Implimentazzjoni tal-Kunsill (UE) Nru 626/2012 li jemenda r-Regolament ta’ Implimentazzjoni (UE) Nru 349/2012 li jimponi dazju anti-dumping definittiv fuq l-importazzjonijiet tal-aċidu tartariku li joriġinaw mir-Repubblika Popolari taċ-Ċina

(2017/C 296/04)

Sentenza

Fis-sentenza tagħha tal-1 ta’ Ġunju 2017 fil-Kawża T-442/12 Changmao Biochemical Engineering Co. Ltd v Council  (1) (“is-sentenza”), il-Qorti Ġenerali tal-Unjoni Ewropea (“il-Qorti Ġenerali”) annulat ir-Regolament ta’ Implimentazzjoni tal-Kunsill (UE) Nru 626/2012 tas-26 ta’ Ġunju 2012 li jemenda r-Regolament ta’ Implimentazzjoni (UE) Nru 349/2012 li jimponi dazju anti-dumping definittiv fuq l-importazzjonijiet tal-aċidu tartariku li joriġinaw mir-Repubblika tal-Poplu taċ-Ċina (2) (“ir-Regolament ta’ Implimentazzjoni”), sal-punt li japplika għall-produttur esportatur Ċiniż Changmao Biochemical Engineering Co. Ltd (“il-produttur esportatur ikkonċernat”).

Il-Qorti Ġenerali ddeċidiet li d-drittijiet tad-difiża tal-produttur esportatur ikkonċernat inkisru billi ġiet miċħuda t-talba tiegħu għal divulgazzjoni tal-informazzjoni relatata mad-differenza fil-prezzijiet bejn l-aċidu tartariku DL u l-aċidu tartariku L+ fil-kuntest tal-kalkoli tal-valur normali mingħajr ebda ġustifikazzjoni valida pprovduta fi żmien debitu. Il-Qorti Ġenerali ddeċidiet li ma jistax jiġi eskluż li kieku ġiet aċċettata t-talba, l-eżitu tal-investigazzjoni seta’ kien differenti.

Konsegwenzi

Skont l-Artikolu 266 tat-Trattat dwar il-Funzjonament tal-Unjoni Ewropea, l-istituzzjonijiet tal-Unjoni jridu jieħdu l-passi meħtieġa sabiex jikkonformaw mas-sentenza.

Meta jittieħdu dawn il-passi meħtieġa biex ikun hemm konformità ma’ sentenza li tannulla miżura u biex tiġi implimentata bis-sħiħ, il-proċedura li fuqha tkun ibbażata din il-miżura tista’ titkompla sal-punt fejn tkun seħħet l-illegalità (3).

Għaldaqstant, b’konformità mas-sentenza tal-Qorti Ġenerali tal-1 ta’ Ġunju 2017, il-Kummissjoni għandha l-possibbiltà li tirrimedja l-aspetti tal-proċediment li wasslu għall-annullament parzjali tiegħu, mingħajr ma tbiddel dawk il-partijiet li ma jintlaqtux mis-sentenza (4).

L-annullament tar-Regolament ta’ Implimentazzjoni kien dovut għan-nuqqas ta’ konformita mad-drittijiet tad-difiża waqt pass mill-proċediment amministrattiv li fuqu huwa bbażat ir-Regolament ta’ Implimentazzjoni; jiġifieri, id-divulgazzjoni ta’ ċerta informazzjoni lil dak il-produttur esportatur fil-kuntest tal-kalkolu tal-valur normali.

It-talba tal-produttur esportatur ikkonċernat għal divulgazzjoni ta’ informazzjoni relatata mad-differenza fil-prezzijiet bejn l-aċidu tartariku DL u l-aċidu tartariku L+ fil-kuntest tal-kalkoli tal-valur normali għandha tiġi eżaminata mill-ġdid fid-dawl taċ-ċirkustanzi speċifiċi tal-Kawża.

Il-konstatazzjonijiet magħmula fir-Regolament ta’ Implimentazzjoni li ma kinux ikkontestati, jew li ġew ikkontestati iżda miċħuda mis-sentenza tal-Qorti Ġenerali jew ma ġewx eżaminati mill-Qorti Ġenerali, u għalhekk ma wasslux għall-annullament tar-Regolament ta’ Implimentazzjoni, jibqgħu validi.

Proċedura ta’ ftuħ mill-ġdid

Fid-dawl ta’ dan ta’ hawn fuq, il-Kummissjoni ddeċidiet li tiftaħ mill-ġdid l-investigazzjoni antidumping li tikkonċerna l-importazzjonijiet ta’ aċidu tartariku li joriġina mir-Repubblika tal-Poplu taċ-Ċina li wasslet għall-adozzjoni tar-Regolament (UE) Nru 626/2012 sa fejn jikkonċerna l-produttur esportatur ikkonċernat, u jkompli fil-punt fejn seħħet l-irregolarità.

Dan il-ftuħ mill-ġdid hu limitat fil-kamp ta’ applikazzjoni għall-implimentazzjoni tas-sentenza tal-Qorti Ġenerali fir-rigward ta’ Changmao Biochemical Engineering Co. Ltd. Il-ftuħ mill-ġdid ma jaffettwax investigazzjonijiet oħrajn. Għaldaqstant, ir-Regolament ta’ Implimentazzjoni tal-Kunsill (UE) Nru 349/2012 tas-16 ta’ April 2012 li jimponi dazju anti-dumping definittiv fuq importazzjonijiet tal-aċidu tartariku li joriġinaw mir-Repubblika tal-Poplu taċ-Ċina wara reviżjoni tal-iskadenza skont l-Artikolu 11(2) tar-Regolament (KE) Nru 1225/2009 (5) għadu applikabbli fir-rigward tal-produttur esportatur ikkonċernat.

Il-partijiet interessati huma infurmati b’dan ir-rieżami permezz tal-pubblikazzjoni ta’ dan l-avviż f’Il-Ġurnal Uffiċjali tal-Unjoni Ewropea.

Sottomissjonijiet bil-miktub

Il-partijiet interessati kollha, u b’mod partikulari il-produttur esportatur ikkonċernat u l-industrija tal-Unjoni, huma mistiedna jippreżentaw il-fehmiet tagħhom, jissottomettu informazzjoni u jipprovdu provi ta’ sostenn dwar kwistjonijiet li jikkonċernaw il-ftuħ mill-ġdid tal-investigazzjoni. Sakemm ma jkunx speċifikat mod ieħor, din l-informazzjoni u l-provi ta’ sostenn iridu jaslu għand il-Kummissjoni fi żmien 20 jum mid-data tal-pubblikazzjoni ta’ dan l-Avviż f’Il-Ġurnal Uffiċjali tal-Unjoni Ewropea.

Possibbiltà ta’ smigħ mis-servizzi ta’ investigazzjoni tal-Kummissjoni

Il-produttur esportatur ikkonċernat u l-industrija tal-Unjoni jistgħu jagħmlu talba biex jinstemgħu mis-servizzi ta’ investigazzjoni tal-Kummissjoni. Kull talba għal smigħ għandha ssir bil-miktub u għandha tispeċifika r-raġunijiet għat-talba.. Għal seduti ta’ smigħ dwar kwistjonijiet li jkollhom x’jaqsmu mal-ftuħ mill-ġdid tal-investigazzjoni, it-talba trid tiġi ppreżentata fi żmien 15-il jum mill-pubblikazzjoni ta’ dan l-Avviż f’Il-Ġurnal Uffiċjali tal-Unjoni Ewropea. Wara dan, it-talba għal smigħ trid tiġi ppreżentata fil-limiti tal-iskadenzi speċifiċi stabbiliti mill-Kummissjoni fil-komunikazzjoni tagħha mal-partijiet.

Struzzjonijiet għas-sottomissjonijiet bil-miktub u biex tintbagħat il-korrispondenza

L-informazzjoni ppreżentata lill-Kummissjoni għall-fini tal-investigazzjonijiet tad-difiża tal-kummerċ għandha tkun ħielsa mid-drittijiet tal-awtur. Il-partijiet interessati, qabel ma jippreżentaw lill-Kummissjoni informazzjoni u/jew dejta soġġetta għad-drittijiet tal-awtur ta’ partijiet terzi, iridu jitolbu permess speċifiku lid-detentur tad-drittijiet li jippermetti b’mod espliċitu (a) lill-Kummissjoni tuża l-informazzjoni u d-dejta għall-iskop ta’ dan il-proċediment tad-difiża tal-kummerċ u (b) tipprovdi l-informazzjoni u/jew id-dejta lill-partijiet interessati għal din l-investigazzjoni f’għamla li tippermettilhom jeżerċitaw id-drittijiet tad-difiża tagħhom.

Is-sottomissjonijiet bil-miktub u l-korrispondenza kollha pprovduti mill-partijiet interessati li jintalab trattament kunfidenzjali għalihom għandhom ikunu mmarkati “Limited” (6).

Partijiet interessati li jipprovdu informazzjoni “Limited” huma mitluba jipprovdu sommarji mhux kunfidenzjali tagħhom skont l-Artikolu 19(2) tar-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (7) (“ir-Regolament bażiku”), li jkunu mmarkati “For inspection by interested parties”. Dawn is-sommarji għandhom ikunu dettaljati biżżejjed biex jippermettu fehim raġonevoli tas-sustanza tal-informazzjoni mressqa b’mod kunfidenzjali.

Jekk parti interessata li tippreżenta informazzjoni kunfidenzjali ma tipprovdix sommarju mhux kunfidenzjali tagħha fil-format u l-kwalità mitlubin, din l-informazzjoni tista’ tiġi injorata.

Il-partijiet interessati huma mistiedna jagħmlu s-sottomissjonijiet u t-talbiet kollha tagħhom bil-posta elettronika inkluż dokumenti ta’ prokuri u ċertifikazzjoni. Meta jużaw il-posta elettronika, il-partijiet interessati jesprimu l-qbil tagħhom mar-regoli applikabbli għas-sottomissjonijiet elettroniċi li jinsabu fid-dokument “KORRISPONDENZA MAL-KUMMISSJONI EWROPEA F’KAŻIJIET TA’ DIFIŻA TAL-KUMMERĊ” ippubblikat fuq is-sit web tad-Direttorat Ġenerali għall-Kummerċ: http://trade.ec.europa.eu/doclib/docs/2014/june/tradoc_152577.pdf

Il-partijiet interessati jridu jindikaw isimhom, l-indirizz, in-numru tat-telefown u indirizz tal-posta elettronika validu u għandhom jiżguraw li l-indirizz elettroniku pprovdut ikun indirizz elettroniku tax-xogħol uffiċjali operattiv u ċċekkjat kuljum.

Ladarba jingħataw id-dettalji ta’ kuntatt, il-Kummissjoni se tikkomunika mal-partijiet interessati permezz tal-posta elettronika biss, dment li ma jitolbux li jirċievu d-dokumenti kollha mingħand il-Kummissjoni permezz ta’ mezz ieħor ta’ komunikazzjoni jew sakemm in-natura tad-dokument li għandu jintbagħat ma tkunx teħtieġ l-użu tal-posta reġistrata.

Għal aktar regoli u informazzjoni dwar il-korrispondenza mal-Kummissjoni inklużi l-prinċipji li japplikaw għas-sottomissjonijiet bil-posta elettronika, jenħtieġ li l-partijiet interessati jikkonsultaw l-istruzzjonijiet ta’ komunikazzjoni mal-partijiet interessati msemmija hawn fuq.

L-indirizz tal-Kummissjoni għall-korrispondenza:

Nuqqas ta’ kooperazzjoni

F’każijiet fejn xi parti interessata tirrifjuta l-aċċess għall-informazzjoni meħtieġa jew ma tipprovdihiex fit-termini preskritti stipulati, jew tfixkel b’mod sinifikanti l-investigazzjoni, jistgħu jiġu stabbiliti konklużjonijiet, sew jekk pożittivi kif ukoll jekk negattivi, abbażi tal-fatti disponibbli, konformi mal-Artikolu 18 tar-Regolament bażiku.

Meta jinstab li xi parti interessata tkun tat informazzjoni falza jew qarrieqa, l-informazzjoni tista’ tiġi injorata u jistgħu jintużaw il-fatti disponibbli.

Jekk parti interessata ma tikkooperax jew tikkoopera parzjalment biss u s-sejbiet għalhekk ikunu bbażati fuq fatti disponibbli skont l-Artikolu 18 tar-Regolament bażiku, ir-riżultat jista’ jkun anqas favorevoli għal dik il-parti milli kieku tkun ikkooperat.

In-nuqqas li tingħata tweġiba kompjuterizzata ma jiġix ikkunsidrat bħala nuqqas ta’ kooperazzjoni, dment li l-parti interessata turi li biex tippreżenta t-tweġiba kif mitlub ikun iwassal għal piż żejjed mhux raġonevoli jew kost addizzjonali mhux raġonevoli. Jenħtieġ li l-parti interessata tikkuntattja lill-Kummissjoni immedjatament.

Uffiċjal tas-Seduta

Il-produttur esportatur ikkonċernat u l-industrija tal-Unjoni jistgħu jagħmlu talba għal intervent tal-Uffiċjal tas-Seduta fi proċedimenti kummerċjali. L-Uffiċjal tas-Seduta jagħmilha ta’ punt ta’ kuntatt bejn il-partijiet interessati u s-servizzi ta’ investigazzjoni tal-Kummissjoni. L-Uffiċjal tas-Seduta jeżamina t-talbiet għal aċċess għall-fajl, it-tilwim dwar il-kunfidenzjalità tad-dokumenti, it-talbiet għal estensjoni tat-termini preskrittivi u t-talbiet għal smigħ minn partijiet terzi. L-Uffiċjal tas-Seduta jista’ jorganizza seduta ta’ smigħ ma’ parti interessata individwali u jagħmilha ta’ medjatur biex jiżgura li d-drittijiet tad-difiża tal-partijiet interessati jkunu qed jitħaddmu b’mod sħiħ.

Talba għal seduta ta’ smigħ mal-Uffiċjal tas-Seduta jenħtieġ li ssir bil-miktub u jenħtieġ li tispeċifika r-raġunijiet għat-talba. Għal seduti ta’ smigħ dwar kwistjonijiet li jirrigwardaw l-istadju inizjali tal-investigazzjoni, it-talba trid tiġi ppreżentata fi żmien 15-il jum mid-data tal-pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea. Wara dan, talba għal seduta ta’ smigħ trid tkun ippreżentata fl-iskadenzi speċifiċi stipulati mill-Kummissjoni fil-komunikazzjoni tagħha mal-partijiet.

L-Uffiċjal tas-Seduta jipprovdi wkoll opportunitajiet biex issir seduta li tinvolvi lill-partijiet u li tippermetti li jiġu ppreżentati fehmiet differenti u li jitressqu argumenti kuntrarji dwar kwistjonijiet li jirrigwardaw, fost affarijiet oħra, l-implimentazzjoni tas-sentenza.

Għal aktar informazzjoni u għad-dettalji ta’ kuntatt, il-partijiet interessati jistgħu jikkonsultaw il-paġni web tal-Uffiċjal tas-Seduta fuq is-sit web tad-DĠ Kummerċ: http://ec.europa.eu/trade/trade-policy-and-you/contacts/hearing-officer/

Proċessar ta’ dejta personali

Id-data personali kollha miġbura f’din l-investigazzjoni tiġi ttrattata skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni tal-individwi fir-rigward tal-ipproċessar ta’ data personali mill-istituzzjonijiet u l-korpi tal-Komunità u dwar il-moviment liberu ta’ dik id-data (8).

Informazzjoni lill-awtoritajiet doganali

Id-dazji antidumping definittivi mħallsa skont ir-Regolament ta’ Implimentazzjoni (UE) Nru 626/2012 fuq l-importazzjonijiet tal-aċidu tartariku li attwalment jaqgħu fi ħdan il-Kodiċi NM ex 2918 12 00 (kodiċi TARIC 2918120090) u li joriġinaw fir-Repubblika tal-Poplu taċ-Ċina, prodott minn Changmao Biochemical Engineering Co. Ltd (kodiċi TARIC addizzjonali A688), li jaqbżu d-dazji antidumping imposti mir-Regolament ta’ Implimentazzjoni (UE) Nru 349/2012 dwar l-istess importazzjonijiet, jenħtieġ li jitħallsu lura jew jintbagħtu lura. Il-ħlas mill-ġdid jew ir-remissjoni jridu jintalbu mingħand l-awtoritajiet doganali nazzjonali skont il-leġiżlazzjoni doganali applikabbli.

Divulgazzjoni

Il-produttur esportatur ikkonċernat u l-Industrija tal-Unjoni jkunusussegwentement informati bil-fatti u l-konsiderazzjonijiet essenzjali li fuq il-bażi tagħhom hemm l-intenzjoni li tiġi implimentata s-sentenza u se jingħataw l-opportunità li jikkummentaw.

(1)  Is-Sentenza tal-Qorti Ġenerali tal-1 ta’ Ġunju 2017, Changmao Biochemical Engineering v Council, T-442/12, ECLI:EU:T:2017:372.

(2)  ĠU L 182, 13.7.2012, p. 1.

(3)  Is-Sentenzi tal-Qorti tal-Ġustizzja tat-3 ta’ Ottubru 2000, Industrie des poudres sphériques v Council, C-458/98 P, EU:C:2000:531, il-paragrafi 80 sa 85, kif ukoll tat-28 ta’ Jannar 2016, CM Eurologistik, C-283/14 u C-284/14, EU:C:2016:57, il-paragrafi 48 sa 55.

(4)  Is-Sentenza tal-Qorti tal-Ġustizzja tal-14 ta’ Ġunju 2016, il-Kummissjoni v McBride, il-Kawża C-361/14 P, EU:C:2016:434, il-paragrafu 56. ara wkoll, fil-qasam tad-dumping, is-sentenza tal-Qorti tal-Ġustizzja tat-3 ta’ Ottubru 2000, Industrie des poudres sphériques v Council, il-Kawża C-458/98 P EU:C:2000:531, il-paragrafu 84.

(5)  ĠU L 110, 24.4.2012, p. 3.

(6)  Dokument “Limited” huwa dokument li jiġi kkunsidrat kunfidenzjali skont ir-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (ĠU L 176, 30.6.2016, p. 21) u l-Artikolu 6 tal-Ftehim tad-WTO dwar l-Implimentazzjoni tal-Artikolu VI tal-GATT 1994 (il-Ftehim dwar l-Antidumping). Dan huwa wkoll dokument protett skont l-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (ĠU L 145, 31.5.2001, p. 43).

(7)  ĠU L 176, 30.6.2016, p. 21.

(8)  ĠU L 8, 12.1.2001, p. 1.

Pubblikazzjoni ta’ applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2017/C 296/05)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

DOKUMENT UNIKU

“JAJCA IZPOD KAMNIŠKIH PLANIN”

Nru tal-UE: PGI-SI-02112 — 4.11.2015

DOP ( ) IĠP ( X )

1.   Isem

“Jajca izpod Kamniških planin”

2.   Stat Membru jew pajjiż terz

Is-Slovenja

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.4. Prodotti oħrajn li joriġinaw mill-annimali (bajd, għasel, diversi prodotti mill-ħalib għajr butir, eċċ.)

3.2.   Deskrizzjoni tal-prodott li għalih japplika l-isem f’(1)

Il-bajd imsejjaħ “Jajca izpod Kamniških planin” għandu qoxra lixxa ta’ ħxuna uniformi u luminożità matta li jagħtik l-impressjoni li l-bajd idum frisk għal żmien twil. Dan il-bajd għandu qoxra iebsa. Hija meħtieġa forza medja ta’ mill-inqas 32 N biex tagħmel ħsara lill-qoxra ta’ dan it-tip ta’ bajd. L-isfar tal-bajd huwa partikulari u uniformi, b’valur tal-pigmentazzjoni ta’ mill-inqas 11 fuq l-iskala DSM La Roche. F’dak li għandu x’jaqsam mal-piż, il-bajd jista’ jiġi kkummerċjalizzat bħala bajd ta’ daqs differenti skont il-piż minimu nett tal-kaxxa, jew inkella jiġi kklassifikat skont il-kategoriji tal-piż li ġejjin: bajd żgħir, medju, kbir u kbir ħafna. Il-bajd tat-tip “Jajca izpod Kamniških planin” għandu kontenut għoli ta’ aċidi xaħmin poliinsaturati, b’mod partikulari ta’ aċidu alfalinoleniku. Dan il-bajd fih tal-inqas 2,5 % bil-piż ta’ aċidi xaħmin omega-3 u l-ogħla proporzjon tal-aċidi xaħmin omega-6 meta mqabblin mal-aċidi xaħmin omega-3 huwa ta’ 8:1. Dan il-proporzjon, li jikkonforma mar-rakkomandazzjonijiet tal-Organizzazzjoni Dinjija tas-Saħħa, huwa tajjeb ferm mil-lat nutrittiv u mil-lat tas-saħħa.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Fl-għalf tat-tiġieġ tal-bajd jintuża l-karbonat tal-kalċju li ġej mill-barrieri ta’ Stahovica, li jinsabu fejn il-belt ta’ Kamnik, bħala suppliment minerali. It-tiġieġ tal-bajd jingħataw jixorbu biss ilma li ġej minn żewġ akwiferi tal-livelli ta’ fuq tax-xmajjar Kamniška Bistrica u Savinja. L-aċidi xaħmin omega-3 ġejjin miż-żerriegħa tal-kittien wara li din tiġi pproċessata kif xieraq.

3.4.   Passi speċifiċi tal-produzzjoni li jridu jsiru fiż-żona ġeografika ddefinita

It-tiġieġ iridu jitnisslu, jitkabbru u jbidu l-bajd fiż-żona ġeografika.

3.5.   Regoli speċifiċi dwar it-tqattigħ, it-tħakkik, l-ippakkjar, eċċ.

—

3.6.   Regoli speċifiċi dwar it-tikkettar

—

4.   Definizzjoni konċiża taż-żona ġeografika

Iż-żona ġeografika tinsab madwar l-Alpi ta’ Kamnik-Savinja u hija ddelimitata minn linja li tgħaddi mal-fruntiera tas-Slovenja mal-Awstrija u mit-toroq tat-trasport li ġejjin:

Il-bliet u l-irħula kollha kkollegati permezz ta’ dawn it-toroq jinsabu fiż-żona ġeografika.

5.   Rabta maż-żona ġeografika

Il-bajd imsejjaħ “Jajca izpod Kamniških planin” ħa l-fama tajba tiegħu lejn tmiem is-seklu 19, meta ħafna nisa tal-bdiewa mir-reġjun ta’ Kamnik bdew ifornu lill-kċejjen ta’ Ljubljana u lis-suq ta’ din il-belt b’dan il-prodott prezzjuż. Dak iż-żmien, iż-żona ġeografika tal-muntanji ta’ Kamnik [Kamniške planine] diġà kienet tipprovdi kundizzjonijiet eċċellenti għall-produzzjoni tal-bajd għall-konsum mill-bniedem, permezz ta’ ilma ta’ kwalità tajba ħafna, minħabba li dan ir-reġjun li fih ma tantx jgħixu nies u li mill-bqija għadu pjuttost mhux mittiefes jipprovdi ilma tax-xorb ta’ kwalità eċċellenti. Barra minn hekk, il-barriera tal-ġebel tal-franka li hemm fi Stahovica nad Kamnikom minn dejjem kellha effett tajjeb fuq il-produzzjoni tal-bajd (il-ġebel tal-karbonat li wieħed isib f’din il-barriera ġej min-naqal u jmur lura għal iktar minn 200 miljun sena u minħabba l-metamorfiżmu termiku huwa eċċezzjonalment pur mil-lat kimiku). Il-mikroklima karatteristika subalpina u t-temperaturi moderati ta’ dan ir-reġjun ukoll għinu b’mod sinifikanti biex żviluppat il-produzzjoni tal-bajd fiż-żona ġeografika fl-imgħoddi.

Dawn il-kundizzjonijiet naturali kienu eċċellenti biex il-produzzjoni tal-bajd tal-mejda setgħet tiżviluppa f’diversi rziezet. Fiż-żona ġeografika kien ġie żviluppat it-tkabbir tal-kittien minħabba li kien hemm bżonnu biex mill-fibra tiegħu jiġi prodott il-kanvas, u b’hekk f’Mengeš żviluppat l-industrija tal-għażil. Għalkemm il-kittien kien jitkabbar għall-fibra tiegħu, iż-żerriegħa tiegħu, li kienet prodott sekondarju tiegħu, kienet tintuża biex biha jingħalfu l-annimali, l-aktar il-pollam. Fiż-żona minn fejn ġej il-bajd tat-tip “Jajca izpod Kamniških planin”, insibu kotba sħaħ li jittrattaw it-tkabbir tal-kittien. L-ewwel referenza għal dan insibuha f’entrata tal-1493 fir-reġistru tal-artijiet tal-ħakkiem fewdali ta’ Jablje li fiha l-kittien jissemma bħala wieħed mid-dieċmi li dawk ta’ taħtu riedu jħallsuh, u l-aħħar waħda nsibuha f’rakkont tal-1953 li jispjega l-iżvilupp tal-fabbrika ta’ Induplati Jarše.

Minħabba li 40 % miż-żerriegħa tal-kittien hija xaħam, u nofs dan l-ammont huwa aċidu xaħmi omega-3 (aċidu alfalinoleniku), il-bajd kien ta’ kwalità tajba ħafna u tajjeb għas-saħħa. Għalhekk, fil-każ tal-bajd tat-tip “Jajca izpod Kamniških planin”, inżammet it-tradizzjoni li t-tiġieġ tal-bajd jingħalef ukoll biż-żerriegħa tal-kittien. Minħabba f’hekk, il-bajd imsejjaħ “Jajca izpod Kamniških planin” ivarja mill-bajd ta’ ħafna produtturi oħrajn li jużaw materja prima mhux daqshekk tradizzjonali, bħaż-żejt tal-ħuta denaturat u l-algi, biex il-bajd tagħhom ikun fih l-aċidi xaħmin omega-3.

Il-bajd imsejjaħ “Jajca izpod Kamniških planin” fih tal-inqas darbtejn l-ammont ta’ aċidi xaħmin omega-3 li jkun fih bajd ieħor arrikkit bl-omega-3 u jingħaraf minn dan it-tip ta’ bajd mill-kontenut għoli tiegħu ta’ aċidu alfalinoleniku.

Bħala produtturi tal-bajd, in-nisa tal-bdiewa minn Kamnik u mir-reġjun ta’ warajh baqgħu jfornu l-bajd għall-konsum lin-nies ta’ Ljubljana sat-Tieni Gwerra Dinjija, meta l-ħakkiema tal-belt dawru lil din il-belt kapitali bi fruntiera u b’ħajt doppju magħmul mill-fildiferru mxewwek li fixkel dan il-kummerċ li qabel kien jiffjorixxi. L-għanja tradizzjonali msejħa “Katarina Barbara”, li Karel Štrekelj, li kien espert fil-kultura Slava u li kien jiġbor l-għanjiet tradizzjonali, kiteb fl-1895, hija dwar tiġieġa misruqa li kienet maħsuba biex titma lin-nies ta’ Ljubljana. Wara l-gwerra għadda ftit taż-żmien qabel ma reġgħet bdiet dieħla t-tradizzjoni tat-tnissil tat-tiġieġ fl-għoljiet ta’ madwar il-muntanji ta’ Kamnik. Madankollu, minn dak iż-żmien ’l hawn din kompliet tissaħħaħ u tiżviluppa. Għal snin sħaħ, il-fama tal-bajd prodotti fl-għoljiet ta’ madwar il-muntanji ta’ Kamnik tqieset bħala ħaġa ovvja. Kien biss lejn tmiem id-disgħinijiet li l-produtturi bdew jirreklamaw b’mod attiv il-bajd tagħhom. Diversi artikli li dehru fil-gazzetti, f’rivisti tal-ikel u fuq is-siti tal-Internet, kif ukoll diversi emissjonijiet tat-televiżjoni, dokumenti kummerċjali u fuljetti juru l-fama attwali li jgawdi minnha l-bajd imsejjaħ “Jajca izpod Kamniških planin”. Pereżempju, fil-ktieb tiegħu tal-2005 intitolat “Nazaj v planinski raj: kultura slovenstva in mitologija Triglava”, Boštjan Šaver isemmi l-bajd tat-tip “Jajca izpod Kamniških planin” bħala eżempju ta’ prodott li ismu jindika r-rabta bejn dawk li joqogħdu fis-Slovenja u l-Alpi u l-muntanji li nsibu f’dan il-pajjiż. Il-bajd imsejjaħ “Jajca izpod Kamniških planin” jissemma fil-fuljett ippubblikat mill-Bord tat-Turiżmu tas-Slovenja intitolat “Okusiti Slovenijo”, li għandu l-għan li juri l-wirt għani Sloven marbut mal-ikel. Dan il-bajd jissemma f’diversi pubblikazzjonijiet oħrajn (kemm f’rivisti u kemm f’pubblikazzjonijiet li joħorġu darba f’sena), bħal fil-pubblikazzjoni tal-2011 bl-isem ta’ “Gorenjska hrana” u f’dik intitolata “Slovenska kulinarika”, kif ukoll f’artikli, pereżempju, tal-Assoċjazzjoni tal-Konsumaturi tas-Slovenja, li, fost l-oħrajn issemmi ’l dan it-tip ta’ bajd fil-fuljett tagħha intitolat “Slovenska tradicionalna živila” u f’artiklu intitolat “To so dobra jajca”.

Referenza għall-pubblikazzjoni tal-Ispeċifikazzjoni tal-prodott

(it-tieni subparagrafu tal-Artikolu 6(1) ta’ dan ir-Regolament)

http://www.mkgp.gov.si/fileadmin/mkgp.gov.si/pageuploads/podrocja/Varna_in_kakovostna_hrana_in_krma/zasciteni_kmetijski_pridelki/Specifikacije/JAJCA_IZPOD_KAMNISKIH_PLANIN-splet.pdf

(1)  ĠU L 343, 14.12.2012, p. 1.

Pubblikazzjoni ta’ applikazzjoni skont l-Artikolu 17(6) tar-Regolament (KE) Nru 110/2008 tal-Parlament Ewropew u tal-Kunsill dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi ta’ xorb spirituż u li jħassar ir-Regolament tal-Kunsill (KEE) Nru 1576/89

(2017/C 296/06)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 17(7) tar-Regolament (KE) Nru 110/2008 tal-Parlament Ewropew u tal-Kunsill (1).

L-ISPEĊIFIKAZZJONIJIET PRINĊIPALI TAL-FAJL TEKNIKU

Spiritu tal-inbid bl-indikazzjoni ġeografika

Il-“КАРНОБАТСКА ГРОЗДОВА РАКИЯ”/“ГРОЗДОВА РАКИЯ ОТ КАРНОБАТ”/“KARNOBATSKA GROZDOVA RAKYA”/“GROZDOVA RAKYA OT KARNOBAT”

Nru tal-UE PGI-BG-01865 — 7.1.2014

1.   L-indikazzjoni ġeografika li għandha tiġi rreġistrata

Il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat”

2.   Kategorija tax-xorb spirituż

Винена дестилатна спиртна напитка/Spiritu tal-inbid

3.   Deskrizzjoni tax-xorb spirituż

Il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” huwa spirtu tal-inbid b’qawwa alkoħolika minima ta’ 40 % vol., li:

3.1.   Karatteristiċi fiżiċi

Likwidu ċar ftit ileqq, mingħajr sediment u partikoli jifflowtjaw. Għandu kulur safrani ċar, riżultat tal-maturazzjoni fi btieti tal-ballut jew taż-żieda tal-karamel, u aroma karatteristika tal-materja prima użata u żviluppata permezz tal-maturazzjoni.

3.2.   Karatteristiċi kimiċi

L-ispirtu tal-inbid għandu qawwa alkoħolika minima ta’ 40 % vol. u huwa prodott soġġett għal konfomità stretta mar-rekwiżit li ma jistgħux jiġu prodotti aktar minn 75 litru ta’ inbid minn kull 100 kg ta’ għeneb, bl-inbid sussegwentament jiġi ddistillat għal anqas minn 65 % vol. alkoħol.

Qawwa alkoħolika — 40 % vol.; kontenut ta’ metanol — 11 g/hl ta’ 100 % vol. alkoħol; sustanzi volatili — 140–200 g/hl ta’ 100 % vol. alkoħol.

Is-sustanzi volatili huma fattur prinċipali ieħor li jinfluwenza l-kwalitajiet organolettiċi tax-xarba. Huma taħlita ta’ alkoħol superjuri, aċidi totali, esteri u aldeidi. L-aroma tax-xarba hija determinata mill-kwantità ta’ esteri (14–30 g/hl ta’ 100 % vol. alkoħol) u aldeidi (7–9 g/hl ta’ 100 % vol. alkoħol), u t-togħma tiegħu mill-kwantità ta’ alkoħol superjuri li jkun fih (120–150 g/hl ta’ 100 % vol. alkoħol).

3.3.   Karatteristiċi organolettiċi

Il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” għandu palat qawwi, togħma qawwija u intensa ta’ għeneb misjur, b’nota ta’ tuffieħ aħdar u tin, iħalli togħma bbilanċjata ta’ vanilla fil-ħalq u aroma diskreta ta’ injam.

3.4.   Karatteristiċi speċifiċi (imqabbla ma’ xorb spirituż ieħor tal-istess kategorija)

Il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” isir billi jiġi ddistillat inbid magħmul mill-varjetà tal-għeneb Cherven Misket (20 %) u inbejjed magħmula minn kwalunkwe kombinament ta’ dawn il-varjetajiet bojod u ħomor (80 %):

—   bojod: Chardonnay, Muscat Ottonel, Muscat à Petit Grains, Viognier, Ugni Blanc, Traminer, Rkatsiteli, Cherven Misket, Riesling, Sauvignon Blanc, Victoria, Chasselas;

—   ħomor: Cabernet Sauvignon, Syrah, Merlot, Mavrud, Primitivo, Pamid, Alicante Bouschet, Gamay de Bouze, Pinot Noir, Cabernet Franc, Muscat ta’ Hamburg, Rubin.

Ix-Cherven Misket hija varjetà aromatika u tipproduċi n-nota bnina ta’ tuffieħ aħdar u tin fit-togħma tal-ispirtu tal-inbid.

Il-fermentazzjoni kiesħa tal-għeneb, li ssir f’temperaturi kkontrollati ta’ mhux aktar minn 22 °C, tiżgura l-preservazzjoni massima tal-aroma tiegħu. Il-potenzjal tal-aroma u tat-togħma tal-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” huwa arrikit u kkonċentrat permezz tal-użu ta’ metodu tal-produzzjoni bbażat fuq distillazzjoni kontinwa f’inqas minn 65 % vol. ta’ inbid miksub mill-għeneb.

Id-distillati jitħallew jimmaturaw fi btieti tal-ballut biex jiksbu l-bilanċ u l-armonija, fejn ikomplu jiżviluppaw il-potenzjal tagħhom. B’dan il-mod jinkisbu l-kulur dehbi karatteristiku u l-palat qawwi, it-togħma qawwija u intensa ta’ għeneb misjur u l-aroma diskreta ta’ injam.

Ix-xarba titħallat billi jiġu kkombinati d-distillati ta’ età u karatteristiċi organolettiċi differenti, u mbagħad tiżdied il-kwantità meħtieġa ta’ ilma ħelu biex il-qawwa alkoħolika tax-xarba tinġieb għal 40 % vol. Wara, x-xarba tiġi ttrattata biex ma tiddardarx u tiġi stabilizzata, skont il-prattiki enoloġiċi permessi. Meta jkun meħtieġ, jintuża l-karamel biex jaġġusta l-kulur.

4.   Iż-żona ġeografika kkonċernata

Iż-żona tinkludi dawn il-lokalitajiet: (zemlishta):

Ix-xarba tista’ tiġi bbottiljata barra miż-żona ġeografika ddefinita.

5.   Metodu biex tinkiseb ix-xarba spirituża

Il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” jiġi prodott permezz ta’ teknika klassika Bulgara. Meta l-għeneb ikun sar teknikament, kull varjetà ta’ għeneb tinġabar separatament; jinqalgħu z-zkuk tal-għeneb u, jekk ikun meħtieġ, il-polpa tal-għeneb titħalla tiksaħ. Il-kundizzjonijiet tal-fermentazzjoni u l-ħmira li tintuża huma fost is-sorsi prinċipali tal-komposti aromatiċi.

Il-fermentazzjoni kiesħa tal-għeneb tiżgura l-preservazzjoni massima tal-aroma tiegħu. Meta titlesta l-fermentazzjoni, l-inbid jiġi kkjarifikat, jekk meħtieġ, u ttrasferit għad-distillazzjoni. Id-distillazzjoni kkontrollata strettament, f’inqas minn 65 % vol., ta’ inbid miksub mill-għeneb, fejn minn 100 kg ta’ għeneb jista’ jinkiseb massimu ta’ 75 litru ta’ inbid; tiżgura l-kwalità għolja konsistenti tal-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” u għandha effett sinifikattiv fuq il-kontenut aromatiku tad-distillat li jirriżulta. B’riżultat tal-ipproċessar termali matul id-distillazzjoni, jiġu ffurmati komponenti ġodda bħall-esteri, l-aldeidi, l-aċetali, eċċ, Biex tkun żgurata l-aħjar preċiżjoni hu u jinkiseb il-profil aromatiku, jintuża metodu differenti biex jiġu prodotti d-distillati biex issir ix-xarba: jintużaw il-proprjetajiet ta’ metall prezzjuż, fil-forma ta’ filtri tal-fidda speċjali li jitwaħħlu mal-kontenituri li jintużaw għad-distillazzjoni tax-xarba.

Id-distillati li jirriżultaw jitpoġġew f’lottijiet skont il-valutazzjoni fiżikokimika u organolettika tagħhom u jitħallew jimmaturaw għal tal-inqas sitt xhur fi btieti tal-ballut b’kapaċità massima ta’ 500 litru.

Ix-xarba titħallat billi jiġu kkombinati d-distillati ta’ età u karatteristiċi organolettiċi differenti, u mbagħad tiżded il-kwantità meħtieġa ta’ ilma ħelu biex il-qawwa alkoħolika tax-xarba tinġieb għal 40 % vol. Wara, x-xarba tiġi ttrattata biex ma tiddardarx u tiġi stabilizzata, skont il-prattiki enoloġiċi permessi. Għandha kulur safrani ċar, riżultat tal-maturazzjoni fi btieti tal-ballut jew taż-żieda tal-karamel biex jinkiseb il-kulur meħtieġ.

6.   Rabta mal-ambjent ġeografiku jew mal-oriġini

6.1.   Dettalji taż-żona ġeografika jew tal-oriġini rilevanti għar-rabta

Il-klima fil-muniċipalità ta’ Karnobat hija kontinentali tranżizzjonali, b’influwenza marittima qawwija fiż-żona kostali li testendi għal 20–30 km mill-kosta. L-istaġun tat-tkabbir tad-dwieli f’din iż-żona huwa 205 ijiem. L-ammont medju ta’ temperaturi bijoloġikament attivi huwa 3 911 °С, b’intervall ta’ kunfidenza ta’ 3 713 ° sa 4 109 °C. Dawn l-ammonti jikkorrispondu mal-kundizzjonijiet meħtieġa għall-varjetajiet bikrin, medju-bikrin u tardivi, rispettivament.

Iż-żona miżrugħa bi dwieli tal-frott fiha 2 766,56 ha. Il-vinji li minnhom tinġieb il-materja prima li tintuża għall-produzzjoni tal-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” jinsabu fir-reġjun tal-inbid Sub-Balkan (Rose Valley/Rozova dolina) (il-miniċipalitajiet Karnobat u Sungurlare) il-parti tal-Punent tar-reġjun tal-inbid tal-Lvant (il-Baħar l-Iswed/Chernomorski) (il-muniċipalitajiet Aytos u Tsarevo) u r-reġjun tal-inbid tan-Nofsinhar (Thracian Lowlands/Trakiyska nizina) (il-muniċipalità ta’ Straldzha). Iż-żona ġeografika tinkludi s-sub-reġjun Tundzha–Straldzha u tkopri l-għoljiet tan-naħa t’isfel tal-Lvant tal-medda ta’ muntanji Balkani madwar Karnobat u Aytos, u parti miż-żona baxxa ta’ Burgas.

Il-qċaċet għoljin u l-baċiri fil-baxx b’qigħan ċatti li wkoll huma karatteristika tipika tat-terren fil-muniċipalità ta’ Karnobat jiffavorixxu l-kultivazzjoni tal-għeneb tal-inbid, inkluż ix-Cherven Misket. Din hija varjetà ta’ għenba tal-inbid indiġena Bulgara b’rata ta’ tkabbir medja, fertilità tajba u rendiment medju. Rigward ir-reżistenza għall-ġlata, din hija l-aħjar waħda mill-varjetajiet lokali u tisboq ħafna varjetajiet ta’ għeneb tal-inbid mhux Bulgari. Il-Misket hija varjetà aromatika u tħalli nota bnina ta’ tuffieħ aħdar u tin biex ittejjeb il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat”.

6.2.   Karatteristiċi speċifiċi tax-xarba spirituża attribwibbli għaż-żona ġeografika

Il-kundizzjonijiet naturali u klimatiċi, li huma prerekwiżit għall-għeneb ta’ kwalità tajba u misjur kif suppost, ikkombinati mal-ġbir tal-għeneb bil-lejl biex tiġi ppriservata l-aroma tiegħu, u l-fermentazzjoni f’temperatura baxxa u t-tekniki ta’ distillazzjoni kontinwa, jgħinu biex jikkonċentraw l-aroma delikata tal-għenba, u l-maturazzjoni tad-distillat fi btieti tal-ballut tgħin biex il-potenzjali tal-palat u tat-togħma tax-xarba jkomplu jiżviluppaw. B’dan il-mod jinkisbu l-kulur dehbi karatteristiku u l-palat qawwi, it-togħma qawwija u intensa ta’ għeneb misjur u l-aroma diskreta ta’ injam.

Il-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” għandu palat qawwi, togħma qawwija u intensa ta’ għeneb misjur, b’nota ta’ tuffieħ aħdar u tin, iħalli togħma bbilanċjata ta’ vanilla fil-ħalq u aroma diskreta ta’ injam. Dawn huma kwalitajiet li bis-saħħa tagħhom il-konsumaturi jagħrfuh, ifittxuh u tant jogħġobhom. Ix-xarba għandha pożizzjoni stabbli fis-suq u tikkombina t-tradizzjoni mal-innovazzjoni.

Id-dokumenti li jiffurmaw il-fajl ta’ din ix-xarba jinżammu fid-Direttorat tar-Reġistrazzjoni, il-Liċenzji u l-Kontroll tal-Ministeru tal-Ekonomija Bulgaru.

7.   Dispożizzjonijiet tal-Unjoni Ewropea jew nazzjonali/reġjonali

Il-proċedura nazzjonali għall-approvazzjoni ta’ xarba spirituża b’indikazzjoni ġeografika hija stabbilita fit-Taqsima VII, “Produzzjoni ta’ xorb spirituż b’indikazzjoni ġeografika” tal-Kapitolu Disgħa, “Xorb Spirituż” tal-Att dwar ix-Xorb Spirituż (ZVSN), (SG Nru 45 tal-15 ta’ Ġunju 2012, fis-seħħ mis-16 ta’ Settembru 2012).

L-indikazzjoni ġeografika “Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat” ġiet approvata skont l-Ordni Nru T-RD-27-21 tal-Ministeru tal-Ekonomija u l-Enerġija tas-27 ta’ Novembru 2013. Din l-Ordni ġiet ippubblikata fuq is-sit web tal-Ministeru tal-Ekonomija: http://www.mi.government.bg/bg/library/zapoved-za-utvarjdavane-na-vinena-destilatna-spirtna-napitka-grozdova-rakiya-i-vinena-rakiya-s-geograf-73-c28-m361-2.html

8.   Applikant

—   Stat Membru

Il-Bulgarija

—   Indirizz sħiħ (it-triq u n-numru, il-belt/ir-raħal u l-kodiċi postali, il-pajjiż)

ul. Slavyanska 8, 1052 Sofia, Bulgaria

—   Isem il-persuna ġuridika jew fiżika

Министерство на икономиката/Il-Ministeru tal-Ekonomija

9.   Suppliment mal-indikazzjoni ġeografika

Xejn

10.   Regoli speċifiċi dwar it-tikkettar

M’hemmx regoli speċifiċi obbligatorji dwar it-tikkettar (ħlief dawk orizzontali) li japplikaw għall-“Карнобатска гроздова ракия”/“Гроздова ракия от Карнобат”/“Karnobatska grozdova rakya”/“Grozdova rakya ot Karnobat”.

(1)  ĠU L 39, 13.2.2008, p. 16.