KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

2.9.2017

Il-Ġurnal Uffiċjali tal-Unjoni Ewropea

C 292/4

Ir-rata tal-interessi applikata mill-Bank Ċentrali Ewropew għall-operazzjonijiet prinċipali ta' rifinanzjament (1):

0,00 % fl-1 ta’ Settembru 2017

Rata tal-kambju tal-euro (2)

L-1 ta’ Settembru 2017

(2017/C 292/06)

1 euro =

	Munita	Rata tal-kambju
USD	Dollaru Amerikan	1,1920
JPY	Yen Ġappuniż	131,29
DKK	Krona Daniża	7,4378
GBP	Lira Sterlina	0,92075
SEK	Krona Żvediża	9,4778
CHF	Frank Żvizzeru	1,1441
ISK	Krona Iżlandiża
NOK	Krona Norveġiża	9,2555
BGN	Lev Bulgaru	1,9558
CZK	Krona Ċeka	26,077
HUF	Forint Ungeriż	305,09
PLN	Zloty Pollakk	4,2406
RON	Leu Rumen	4,5963
TRY	Lira Turka	4,0981
AUD	Dollaru Awstraljan	1,5021
CAD	Dollaru Kanadiż	1,4830
HKD	Dollaru ta' Hong Kong	9,3272
NZD	Dollaru tan-New Zealand	1,6638
SGD	Dollaru tas-Singapor	1,6146
KRW	Won tal-Korea t'Isfel	1 335,36
ZAR	Rand ta' l-Afrika t'Isfel	15,4185
CNY	Yuan ren-min-bi Ċiniż	7,8185
HRK	Kuna Kroata	7,4215
IDR	Rupiah Indoneżjan	15 875,38
MYR	Ringgit Malażjan	5,0904
PHP	Peso Filippin	60,900
RUB	Rouble Russu	68,8223
THB	Baht Tajlandiż	39,539
BRL	Real Brażiljan	3,7423
MXN	Peso Messikan	21,2608
INR	Rupi Indjan	76,3275

(1) Rata applikata għall-operazzjoni l-iktar reċenti mwettqa qabel il-jum indikat. Fil-każ ta' sejħa għall-offerti b'rata varjabbli, ir-rata tal-interessi hija r-rata marġinali.

(2) Sors: rata tal-kambju ta' referenza ppubblikata mill-Bank Ċentrali Ewropew.

2.9.2017

Il-Ġurnal Uffiċjali tal-Unjoni Ewropea

C 292/7

Pubblikazzjoni ta' applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2017/C 292/09)

Din il-pubblikazzjoni tikkonferixxi d-dritt ta' oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

DOKUMENT UNIKU

“SLAVONSKI ME”

Nru tal-UE: PDO-HR-02187 — 26.9.2016

DOP ( X ) IĠP ( )

1. Isem

“Slavonski med”

2. Stat Membru jew Pajjiż Terz

Il-Kroazja

3. Deskrizzjoni tal-prodott agrikolu jew tal-oġġett tal-ikel

3.1. Tip ta' prodott

Klassi 1.4. Prodotti oħrajn li joriġinaw mill-annimali (bajd, għasel, diversi prodotti mill-ħalib għajr butir, eċċ.)

3.2. Deskrizzjoni tal-prodott li għalih japplika l-isem f'(1)

“Slavonski med” huwa għasel magħmul min-naħal tal-għasel Karnjolan (Apis mellifera carnica, sottotip Pannonjan) min-nektar tal-pjanti li jipproduċu l-għasel jew minn tnixxijiet ta' partijiet ħajjin tal-pjanti jew eskrementi ta' insetti li jsoffu l-meraq minn parti ħajja tal-pjanti, li n-naħal imbagħad jiġbruhom u jittrasformawhom billi jgħaqqduhom ma' sustanzi speċifiċi tagħhom, jiddeitrawhom, jiddepożitawhom fix-xehda tal-għasel u jaħżnuhom hemm biex jimmaturaw, fiż-żona ġeografika msemmija fil-punt 4.

Skont il-metodu tal-produzzjoni tiegħu, “Slavonski med” huwa għasel tax-xehda, għasel tal-blokka jew għasel tax-xehda maqtugħa u għasel estratt. “Slavonski med” huwa:

1.	għasel tal-akaċja sewda;

2.	għasel tat-tilju;

3.	għasel taż-żerriegħa tal-lift;

4.	għasel tal-ġirasol:

5.	għasel tal-qastan;

6.	għasel tan-nwar;

7.	għasel mill-qtar tal-għasel tas-siġar tal-Ballut Ungeriż.

Il-karatteristiċi komuni ta' “Slavonski med” li jaffettwaw il-kwalità tal-prodott huma l-perċentwal tal-kwantità ta' ilma u l-kontenut tal-idrossimetilfurfurali (HMFs). “Slavonski med” għandu kontenut massimu ta' ilma ta' 18,3 % u l-ammont massimu ta' HMFs huwa ta' 16,5 mg/kg. Karatteristika speċifika oħra ta' “Slavonski med” hija l-preżenza fih ta' polline minn speċijiet ta' pjanti tal-familja tal-Brassicaceae, tar-Robinia spp, u tal-familja tar-Rosaceae, bħala polline sekondarju (mill-inqas 16 %) jew polline minuri (sa 15 %). L-ammont ta' sukrożju fi “Slavonski med” huwa inqas mill-valuri preskritti.

Il-karatteristiċi fiżikokimiċi, organolettiċi u tal-polline għal diversi tipi ta' għasel jidhru fit-tabelli li ġejjin:

Għasel	Ilma [%]	HMF [mg/kg]	Karatteristiċi tal-polline [%]	Konduttività elettrika [mS/cm]	Attività tad-diastażi [Skala Schade]	Kwantità ta' sukkrożju [g/100 g]
AKAĊJA SEWDA	18,3 mass	16,5 mass	20 min.	0,2 mass	8 min.	9 mass.
TILJU	18,3 mass	16,5 mass	25 min.	0,5 min	8 min.	4 mass.
ŻERRIEGĦA TAL-LIFT	18,3 mass	16,5 mass	61 min.	0,3 mass	8 min.	4 mass.
ĠIRASOL	18,3 mass	16,5 mass	45 min.	0,6 mass	8 min.	4 mass.
QASTAN	18,3 mass	16,5 mass	86 min.	0,8 mass	8 min.	4 mass.
NWAR	18,3 mass	16,5 mass	x	0,8 mass	8 min.	4 mass.
GĦASEL MILL-QTAR TAL-GĦASEL TAS-SIĠAR TAL-BALLUT UNGERIŻ	18,3 mass	16,5 mass	x	0,8 mass	8 min.	4 mass.

Għasel	KARATTERISTIĊI ORGANOLETTIĊI TAL-GĦASEL
Għasel	Lewn	Togħma	Riħa
AKAĊJA SEWDA	isfar għal isfar ċar	togħma pjaċevoli tal-akaċja sewda	mhux qawwija, riħa dgħajfa
TILJU	isfar ċar kemxejn ħadrani	pjaċevoli, kemxejn morra	riħa qawwija ta' żahar tat-tilju
ŻERRIEGĦA TAL-LIFT	isfar ċar li jagħti lejn lewn it-tiben	kemxejn ħelwa li tagħti għal kemxejn qarsa	riħa ta' ħaxix, qawwija
ĠIRASOL	jagħti fl-oranġjo	ħelwa li tagħti lejn togħma kemxejn astrinġenti	riħa sottili ta' ġirasol
QASTAN	kannella	morra, kemxejn qarsa	riħa qawwija ħafna u penetranti ta' tuffieħ misjur iżżejjed
NWAR	isfar bi sfumaturi li jagħtu fl-aħmar u iktar skuri	pjaċevolment ħelwa, ftit morra	riħa dgħajfa għal intensa
GĦASEL MILL-QTAR TAL-GĦASEL TAS-SIĠAR TAL-BALLUT UNGERIŻ	skur sew, kważi iswed	kemxejn ħelu	riħa ta' għasel tal-foresta

Għasel	Speċi tal-pjanta (dominanti, sekondarja, u polline minuri)
Akaċja sewda	Robinia pseudoacacia (akaċja sewda) min. 20 %, Brassicaceae, Rosaceae
Tilju	Tilia (tilju) min. 25 %, Robinia spp. (akaċja)
Żerriegħa tal-lift	Brassica napus (żerriegħa tal-lift) min. 61 %, Rosaceae, Salix spp. (żafżafa)
Ġirasol	Helianthus annuus (ġirasol) min. 45 %, Brassicaceae
Qastan	Castanea sativa (qastan ħelu) min. 86 %
Nwar	Brassicaceae, Rosaceae, Salix spp. (żafżafa)
Għasel mill-qtar tal-għasel tas-siġar tal-Ballut Ungeriż	elementi tal-għasel mill-qtar tal-għasel tas-siġar (spori u ifa), Castanea sativa (qastan ħelu)

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

In-naħal jistgħu jingħalfu b'mod artifiċjali matul il-perjodu ta' nuqqas ta' tiftix ta' ikel (fil-bidu tar-rebbiegħa u fl-aħħar tal-ħarifa, skont il-kundizzjonijiet meteoroloġiċi). Dan jista' jsir billi n-naħal jingħalfu z-zokkor, iżda dan għandu jkun ġie prodott fiż-żona ġeografika ddefinita msemmija fil-punt 4. L-għasel ma jistax jitqiegħed fis-suq bħala “Slavonski med” jekk il-kundizzjonijiet relatati mal-għalf artifiċjali ma jkunux intlaħqu, u jekk is-sors tal-ikel tan-naħal ikun l-għalf artifiċjali.

3.4. Passi speċifiċi tal-produzzjoni li jridu jsiru fiż-żona ġeografika ddefinita

Il-passi kollha tal-produzzjoni u tal-estrazzjoni ta' “Slavonski med” għandhom isiru fiż-żona ġeografika ddefinita msemmija fil-punt 4.

3.5. Regoli speċifiċi dwar it-tqattigħ, it-tħakkik, l-ippakkjar, eċċ.

L-għasel “Slavonski med” għandu jiġi ppakkjat fiż-żona ġeografika ddefinita msemmija fil-punt 4 sabiex l-awtentiċità u l-kwalità ta' “Slavonski med” tkun imħarsa aħjar u jiġu żgurati t-traċċabbiltà tal-prodott u l-kontrolli fuqu.

B'dan il-mod biss tista' tinżamm il-kwalità u jiġi evitat kull tibdil fiżikokimiku u organolettiku. It-trasport tal-merkanzija lejn post ġdid iwassal għal tibdil fit-temperatura, fl-umdità u fl-assorbiment ta' rwejjaħ estranji, u għal żieda fil-kwantità ta' HMFs u diastażi.

L-ippakkjar ta' “Slavonski med” fiż-żona definita jnaqqas ir-riskju li jitħallat ma' għasel li mhuwiex taż-żona definita fil-punt 4.

3.6. Regoli speċifiċi dwar it-tikkettar

Il-logo li jidher fil-figura għandu jidher fuq kull oġġett tal-ippakkjar imqiegħed fis-suq. L-utenti kollha tal-marka li jqiegħdu l-prodott fis-suq b'konformità mal-ispeċifikazzjoni tiegħu għandhom id-dritt li jużaw il-logo fl-istess kundizzjonijiet. Il-logo għandu lewn kannella u iswed, mirqum b'rabtiet Kroati, u għandu naħla fil-kantuniera ta' fuq tax-xellug tiegħu. Fuq ix-xellug, il-logo għandu mappa tal-Kroazja, u fuq in-naħa tal-lemin hemm is-sena “1879” u l-istemma araldika antika ta' Slavonja. F'nofs il-logo hemm doqqajs tal-qasab. Fil-Parti ta' fuq tal-logo hemm l-isem “Slavonski med”, u fin-naħa t'isfel tal-logo hemm tliet werqiet tal-ballut.

Figura: Il-logo ta' “Slavonski med”

4. Definizzjoni fil-qosor taż-żona ġeografika

“Slavonski med” jiġi prodott fi Slavonja, fil-konfini amministrattivi tal-bliet u tal-muniċipalitajiet fil-kontej li ġejjin: il-Kontea kollha ta' Vukovar-Srijem, il-Kontea ta' Osijek-Baranja, il-Kontea ta' Brod-Posavina, il-Kontea ta' Požega-Slavonia, il-Kontea ta' Bjelovar-Bilogora u l-Kontea ta' Virovitica-Podravina u l-bliet u l-villaġġi ta' Novska, Lipovljani u Jasenovac fil-kontea ta' Sisak-Moslavina.

5. Rabta maż-żona ġeografika

5.1. Speċifiċità taż-żona ġeografika

Fatturi naturali

Ir-reġjun ta' Slavonja huwa mdawwar bi tliet xmajjar kbar tal-pjanura: id-Drava fit-Tramuntana, id-Danubju fil-Lvant, u s-Sava fin-Nofsinhar. Element ambjentali importanti u determinanti f'dan ir-reġjun, f'dak li jirrigwarda r-riżalti u l-karatteristiċi ġeomorfoloġiċi, huwa d-differenza bejn il-Punent muntanjuż u l-Lvant li fil-biċċa l-kbira tiegħu huwa ċatt. L-aktar punt baxx (78 metru 'l fuq mil-livell tal-baħar) jinsab fir-rokna Xlukkajra ta' Spačva.

Mill-art kollha ta' Slavonja li tkopri erja tas-superfiċje ta' 1 248 600 ettaru, l-art li tinħarat tammonta għal 52 % (655 468 ettaru), il-foresti huma mifruxin fuq 29 % (359 605 ettaru), il-mergħat jagħmlu 4,2 % u hemm 1,2 % magħmulin minn għelieqi.

Minħabba dan l-arranġament tal-użu tal-art u d-differenzi sinifikanti fil-kundizzjonijiet klimatiċi, l-għamla tal-art u l-karatteristiċi tal-veġetazzjoni fi Slavonja, il-kundizzjonijiet huma ideali għall-produzzjoni ta' “Slavonski med”, li jista' jiġi prodott mill-għasel tal-akaċja sewda, mill-għasel tal-lift, mill-għasel tat-tilju, mill-għasel tal-ġirasol, mill-għasel tal-qastan, mill-għasel tan-nwar u mill-għasel mill-qtar tal-għasel tas-siġar tal-Ballut Ungeriż.

Filwaqt li għarfet in-natura unika tal-klima speċifika ta' Slavonja, tal-ħamrija u l-karatteristiċi tal-ilma u r-rikkezza tal-flora u l-fawna tagħha, ir-Repubblika tal-Kroazja poġġiet tliet żoni fil-konfini tagħha taħt protezzjoni, jiġifieri ħolqot tliet Parks Nazzjonali. Dawn huma Kopački Rit, Papuk u Lonjsko Polje.

Il-klima u l-kundizzjonijiet meteoroloġiċi fi Slavonja huma determinati primarjament min-nuqqas ta' altitudni ta' Slavonja, mill-pożizzjoni tagħha fil-Pjanura Pannonjana u mill-espożizzjoni għan-naħa interna tal-kontinent Ewropew. Għall-biċċa l-kbira tax-xitwa, iż-żona taqa' taħt massa ta' arja kiesħa, iżda tisħon b'mod konsiderevoli fis-sajf. Fis-sajf, iktar ma wieħed jersaq lejn il-Lvant, iktar it-temperatura tiżdied, bi tnaqqis konkomitanti fl-ammont ta' xita.

Matul l-istaġuni kollha jibqgħu jippersistu temperaturi li jwasslu għat-tkabbir u l-iżvilupp ta' pjanti li jipproduċu l-għasel. Fir-rebbiegħa, it-temperatura medja hija ta' 11,8 °C, it-temperatura medja tas-sajf hija ta' 21,1 °C, it-temperatura medja fil-ħarifa hija ta' 11,3 °C, u t-temperatura medja fix-xitwa hija ta' 1,0 °C. It-temperatura medja waqt l-istaġun tat-tkabbir (minn April sa Settembru) hija ta' 18,3 °C.

It-tendenza u t-tqassim annwali tax-xita jiffavorixxu l-produzzjoni tal-pjanti u t-trobbija tan-naħal. L-għadd ta' jiem ta' xita jvarja bejn 104 u 160 jum fis-sena.

Il-medja tal-veloċità tar-riħ fix-xahar hija l-ogħla fix-xhur tar-rebbiegħa (Marzu u April) u l-inqas fl-aħħar tas-sajf u fil-bidu tal-ħarifa (Awwissu u Settembru). Ħafna drabi r-riħ jonfoħ mill-Majjistral u mix-Xlokk, u jsegqu l-irjieħ mil-Lbiċ u mill-Grigal.

Il-pjanti li jipproduċu l-għasel li jikbru fiż-żona definita ta' Slavonja jwarrdu fi żminijiet differenti (bejn Marzu u Novembru), u b'hekk in-naħal ikollu għażla wiesgħa ta' sorsi ta' nektar u polline.

Fatturi umani

Dawk li jrabbu n-naħal fis-Slavonja ilhom iżommu t-tradizzjoni tal-produzzjoni tal-għasel għal 130 sena. B'mod ġenerali, hija produzzjoni fuq skala żgħira ta' għasel li jissupplimenta d-dħul tal-familji mill-azjendi agrikoli tal-familja fiż-żoni rurali. Matul il-ħafna snin ta' trobbija tan-naħal fi Slavonja, il-kompetenza f'dan is-settur ġiet żviluppata u trażmessa bil-prattika, bil-ħiliet u bl-għarfien tal-popolazzjoni.

Il-prattiki tat-trobbija tan-naħal li dawk li jrabbu n-naħal wirtu minn missirijiethom fir-rigward tal-produzzjoni ta' “Slavonski med” huma kif ġej:

—	il-biċċa l-kbira tad-doqqajs huma tal-injam;

—	dawk li jrabbu n-naħal joqogħdu attenti ħafna biex jużaw affumikaturi li bħala fjuwil jużaw residwu niexef tal-pjanti, li jiġġenera forma ħafifa ta' duħħan;

—	in-naħal ma għandhom qatt jingħalfu b'mod artifiċjali waqt il-perjodu tal-għalf fil-beraħ;

—	ix-xehda titbattal bil-mod tradizzjonali, jiġifieri bl-użu ta' pettne, sikkina jew xkupilja;

—	l-għasel jitneħħa mill-qafas mingħajr tisħin permezz taċ-ċentrifugazzjoni;

—	l-għasel ma jkunx ġie ppasturizzat;

—	It-temperatura massima li fiha l-għasel jista' jiġi dekristallizzat hija ta' 43 °C.

5.2. Speċifiċità tal-prodott

“Slavonski med” huwa kkaratterizzat minn valur massimu ta' HMF ta' 16,5 mg/kg u minn kontenut massimu ta' ilma ta' 18,3 % meta jkun għadu frisk. “Slavonski med” għandu spettru tal-polline; fi kliem ieħor, ikun fih polline minn speċijiet ta' pjanti tal-familji tal-Brassicaceae u Rosaceae, u mir-Robinia spp., fil-biċċa l-kbira tal-għasel monoflorali u poliflorali. Dan jiddistingwih mill-għasel prodott f'żoni oħra. L-ammont ta' sukrożju fi “Slavonski med” huwa inqas mill-valuri preskritti.

Il-karatteristiċi ta' “Slavonski med” huma riflessi fil-karatteristiċi tal-polline, dawk fiżiċi, kimiċi u dawk organolettiċi. Il-prodott jista' jiġi dekristallizzat f'temperatura massima ta' 43 °C, li tiżgura li l-kwalitajiet tiegħu, derivati mill-flora speċifika fiż-żona definita u n-naħal, jibqgħu l-istess.

L-isem “Slavonski med” jintuża kemm fis-suq u kemm fil-lingwaġġ ta' kuljum (irċevuta (2014); nota ta' ringrazzjament għal donazzjoni (2015); ittra ta' ringrazzjament (2015); timbru fuq l-ippakkjar).

5.3. Rabta kawżali bejn iż-żona ġeografika u l-karatteristiċi tal-prodott

Minħabba l-kundizzjonijiet klimatiċi u dawk tal-ħamrija li huma favorevoli, kif ukoll minħabba l-abbundanza ta' speċijiet tal-pjanti li jipproduċu l-għasel fil-mergħat, fl-għelieqi u fil-foresti estensivi, fiż-żoni li jmissu ma' wċuħ tal-ilma u li huma suxxettibbli għall-għargħar u bwar alluvjali tul ix-xmajjar Sava, id-Drava u d-Danubju, in-naħal tal-għasel Karnjolan (Apis mellifera carnica, sottotip Pannonjan) irnexxielhom isibu ħafna mergħat b'abbundanza ta' nektar u polline għal eluf ta' snin. Inħolqot żona agroekoloġika unika li biha “Slavonski med” jispikka bħala għasel varjetali pur. Hekk huwa magħruf u rrispettat fis-suq.

Il-ħidma u l-kundizzjonijiet fil-miġbħa jiddeterminaw ir-rendiment tal-għasel u huma direttament marbuta mal-kundizzjonijiet klimatiċi, li fi Slavonja jiffavorixxu l-produzzjoni ta' “Slavonski med”.

Fir-rebbiegħa t-temperaturi jippermettu t-tkabbir bikri u abbundanti ta' pjanti li jwarrdu fir-rebbiegħa, ta' siġar tal-frott u mergħat, filwaqt li fis-sajf it-temperaturi huma favorevoli għall-maturazzjoni tal-għelejjel agrikoli, li wħud minnhom jipproduċu l-għasel u huma essenzjali għall-produzzjoni ta' “Slavonski med”.

Il-kundizzjonijiet klimatiċi fil-ħarifa huma xierqa għan-naħal hekk kif huma jħejju għall-ibernazzjoni, filwaqt li l-kundizzjonijiet klimatiċi fix-xitwa huma tajbin għall-ibernazzjoni u lin-naħal jagħtuhom bidu tajjeb għall-istaġun il-ġdid.

It-temperaturi ottimali tar-rebbiegħa u tas-sajf iwasslu għat-tnixxija ta' nektar derivat mill-biċċa l-kbira tal-pjanti. Il-pjanti li jwarrdu fir-rebbiegħa jnixxu nektar f'temperaturi iktar baxxi, filwaqt li l-pjanti li jwarrdu fis-sajf jeħtieġu temperatura notturna ogħla sabiex it-tnixxija ma tonqosx jew tieqaf.

L-għadd ta' jiem li fihom tagħmel ix-xita huwa inqas minn terz fis-sena (iżda tal-anqas 104 ijiem), li jfisser li hemm għadd suffiċjenti ta' jiem fis-sena mingħajr xita li matulhom in-naħal jista' jiġbor in-nektar.

Fir-rebbiegħa n-naħal ikollhom ammont akbar ta' nektar disponibbli għalihom. Minnu jġibu l-enerġija u jkunu jistgħu jirreżistu l-kurrenti tal-arja aktar faċilment. Fi tmiem is-sajf tonqos il-qawwa tar-riħ u jonqos l-ammont ta' nektar, in-naħal jaħlu inqas enerġija biex jirreżistu r-riħ u jżommuha aktar faċilment biex iħejju għall-ibernazzjoni.

Rapport tas-sussidjarja ta' Đakovo ppubblikat fl-1845 List mesečni horvatsko-slavonskog Gospodarskoga družtva [Ġurnal ta' Kull Xahar tal-Intrapriżi Kummerċjali Kroati u Slavonjani] jiddikjara li “m'hemm l-ebda belt jew muniċipalità fi Slavonja li ma tipproduċix għasel ta' kwalità tajba”. L-Assoċjazzjoni Slavona tal-Apikultura ġiet stabbilita f'Osijek fl-1879, l-ewwel u l-eqdem assoċjazzjoni tat-tip tiegħu fix-Xlokk tal-Ewropa, u l-ġurnal Slavonska Pčela [In-Naħla Slavonjana] twaqqaf bħala l-bulettin Slavonjan tal-Assoċjazzoni tal-Apikoltura sa minn Marzu 1881. Wara li twaqqaf il-ġurnal bdew jiġu stabbiliti malajr fergħat tal-Assoċjazzjoni. L-Assoċjazzjoni Slavona tal-Apikultura kienet involuta b'mod attiv fil-promozzjoni tat-trobbija tan-naħal fi Slavonja u fit-titjib tal-kwalità ta' “Slavonski med”, u hekk ħeġġet l-involviment tal-għalliema tal-iskejjel primarji fl-iżvilupp tat-trobbija tan-naħal, is-sensibilizzazzjoni tal-avvanzi fit-trobbija tan-naħal, it-tixrid tal-aħbarijiet reċenti dwar it-trobbija tan-naħal u l-kalendarji għall-għalf tan-naħal, eċċ. L-importanza tal-kontribuzzjoni tagħha għall-iżvilupp tat-trobbija tan-naħal fi Slavonja, u b'mod aktar ġenerali fil-Kroazja, hija kkonfermata mill-fatt li Bogdan Penjić (1852–1918), il-fundatur u s-segretarju fit-tul ta' din l-eqdem assoċjazzjoni u, fl-istess ħin, editur ta' Slavonska pčela, jissemma bħala l-missier tal-apikultura moderna fil-Kroazja. Huwa kien responsabbli għall-introduzzjoni tal-ewwel doqqajs mgħammra b'pettnijiet aġġustabbli (fl-1871), l-ewwel estratturi tal-għasel u l-adozzjoni tal-fondazzjoni tax-xama' artifiċjali (fl-1879). L-ewwel wirja tal-apikultura ġiet organizzata f'Osijek fl-1889, u fl-1903 l-Assoċjazzjoni tal-Apikoltura ta' Vukovar ippubblikat inizjattiva fil-gazzetta Gospodarski list biex jiġi organizzat suq tal-għasel.

It-twaħħid reċiproku tal-kundizzjonijiet klimatiċi u tal-ħamrija speċifiċi, l-esperjenza ta' sekli sħaħ tal-popolazzjoni lokali fit-trobbija tan-naħal, u l-interazzjoni reċiproka bejniethom jinfluwenza is-“Slavonski med” b'tali mod li għandu kompożizzjoni fiżikokimika speċifika u propjetajiet organolettiċi speċifiċi li għalihom il-konsumaturi jiddistingwuh u japprezzawh.

Referenza għall-pubblikazzjoni tal-ispeċifikazzjoni

(it-tieni subparagrafu tal-Artikolu 6(1) ta' dan ir-Regolament)

http://www.mps.hr/UserDocsImages/HRANA/SLAVONSKI%20MED/Izmijenjena%20Specifikacija%20proizvoda-Slavonski%20med%20.pdf

(1) ĠU L 343, 14.12.2012, p. 1.

2.9.2017

Il-Ġurnal Uffiċjali tal-Unjoni Ewropea

C 292/12

Pubblikazzjoni ta' talba għal emenda skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2017/C 292/10)

Din il-pubblikazzjoni tikkonferixxi d-dritt ta' oppożizzjoni għall-applikazzjoni għal emenda skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

TALBA GĦALL-APPROVAZZJONI TA' EMENDA MHUX MINURI FL-ISPEĊIFIKAZZJONI TA' DENOMINAZZJONI TAL-ORIĠINI PROTETTA JEW TA' INDIKAZZJONI ĠEGORAFIKA PROTETTA

Applikazzjoni għall-approvazzjoni ta' emenda skont l-ewwel subparagrafu tal-Artikolu 53(2) tar-Regolament (UE) Nru 1151/2012

“NÜRNBERGER BRATWÜRSTE”/“NÜRNBERGER ROSTBRATWÜRSTE”

Nru tal-UE: PGI-DE-02191 — 28.9.2016

DOP ( ) IĠP ( X )

1. Grupp applikant u interess leġittimu

Grupp applikant/Applikant:

Schutzverband Nürnberger Bratwürste e.V.

Am Trödelmarkt 58

90403 Nürnberg

DEUTSCHLAND

Tel. +49 9119373877

Email: info@nuernberger-bratwuerste.de

Schutzverband Nürnberger Bratwürste e.V. huwa grupp ta' produtturi tan-“Nürnberger Bratwürsten”.

2. Stat Membru jew Pajjiż Terz

Il-Ġermanja

3. Intestatura tal-ispeċifikazzjoni tal-prodott affettwata mill-emenda

—	☐	Isem il-prodott
—	☐	Deskrizzjoni tal-prodott
—	☐	Żona ġeografika
—	☐	Prova tal-oriġini
—	☐	Metodu tal-produzzjoni
—	☐	Rabta maż-żona ġeografika
—	☐	Tikkettar
—	☒	Oħrajn (ippakkjar, entitajiet ta' kontroll)

4. Tip ta' emenda/i

—	☒	Emenda fl-ispeċifikazzjoni tal-prodott ta' DOP jew IĠP irreġistrata li ma tistax titqies bħala emenda minuri skont it-tielet subparagrafu tal-Artikolu 53(2) tar-Regolament (UE) Nru 1151/2012.
—	☐	Emenda fl-ispeċifikazzjoni tal-prodott ta' DOP jew IĠP irreġistrata li għaliha ma jkun ġie ppubblikat l-ebda Dokument Uniku (jew ekwivalenti) u li ma tistax titqies bħala emenda minuri skont it-tielet subparagrafu tal-Artikolu 53(2) tar-Regolament (UE) Nru 1151/2012.

5. Emenda/i

(e) Metodu ta' produzzjoni:

Wara l-aħħar paragrafu li ġej

L-istadji kollha fil-produzzjoni ta' “Nürnberger Bratwürste”/“Nürnberger Rostbratwürste” iseħħu fiż-żona ġeografika identifikata. Dawn huma kif ġej:

—	it-tqattiegħ f'biċċiet żgħar tal-laħam permezz tal-ixxreddjar u l-ikkapuljar,

—	it-taħlit tal-laħam imqatta' żgħir u t-taħlit ma' ħwawar biex jinħoloq il-mili taz-zalzett,

—	il-mili tal-imsaren tan-nagħaġ

jiżdied:

kif ukoll

—	l-ippakkjar taz-zalzet.

Raġuni għall-emenda:

L-ippakkar tan-“Nürnberger (Rost-)Bratwürste” isir b'mod tradizzjonali fl-istabbiliment tal-produttur u għaldaqstant isir fiż-żona ġeografika identifikata. B'mod partikolari l-kwalità taz-zalzett teħtieġ ippakkjar malajr sabiex jibqa' frisk u ma jintilfux il-karatteristiċi tat-togħma. In-“Nürnberger (Rost-)Bratwürste” huwa prodott tal-ikkapuljat sensittiv ħafna b'taħwir partikolarment fin li għandu skadenza relattivament qasira u li jrid jinżamm dejjem imkessaħ. Jekk l-ippakkjar ma jsirx direttament wara l-produzzjoni, il-kwalità tista' tintilef għal kollox. Anki b'trasport konformi mar-rekwiżiti normali ta' iġjene, tista' tintilef il-kwalità taz-zalzett għal dik li hija freskezza, togħma u karatteristiċi esterni, bħal pereżempju jinxef u jsir kannella. It-trasport lejn post ieħor wkoll fih ir-riskju kbir li jidħlu l-impuritajiet jew li jkun hemm kontaminazzjoni minn aġenti patoġeniċi, speċjalment meta z-zalzett ikun nej. Ir-riżultati ta' żewġ studji minn istituzzjonijiet indipendenti li joperaw fil-qasam tal-ittestjar tal-oġġetti tal-ikel jikkonfermaw li anki ftit sigħat wara li jintbagħtu n-“Nürnberger (Rost-)Bratwürsten” bl-ingrossa, jitfaċċaw l-anormalitajiet fil-karatteristiċi tal-kwalitajiet sensorji u mikrobijoloġiċi. Għaldaqstant hemm ir-riskju li dawn il-konsegwenzi negattivi jippersistu jekk l-ippakkjar idum biex isir. Fl-aħħar nett, it-trasport tal-prodott f'post ieħor jista' jkun ta' ħsara għar-reputazzjoni tal-indikazzjoni ġeografika.

Il-proċess tal-ippakkjar isir fi stadji ta' produzzjoni importanti li huma inklużi fl-ispeċifikazzjoni u z-zlazet li jkunu twal jew qosra żżejjed jitwarrbu. Barra minn hekk isir ukoll kontroll tal-kwalità u kull varjazzjoni fil-kwalità tiġi identifikata minnufih minn persuni kompetenti.

Minħabba t-tip ta' prodott, jekk l-ippakkjar ma jsirx direttament wara l-produzzjoni mill-istabbiliment IĠP innifsu, it-traċċabbiltà u ċ-ċertezza tal-oriġini tan-“Nürnberger (Rost-)Bratwürsten” ma jkunux jistgħu jiġu aċċertati. Jekk in-“Nürnberger (Rost-)Bratwürste” jinbiegħ sfuż jew bl-ingrossa mbagħad jiġi ppakkjat, ikun hemm riskju li jitħallat ma' zlazet oħrajn simili. Bilkemm wieħed ikun jista' jibqa' jagħraf jekk wara kollox għadux l-oriġinal.

(g) Organu/organi ta' spezzjoni:

L-isem u l-indirizz tal-awtoritajiet kompetenti għandhom jiġu aġġornati kif ġej:

Għall-ispezzjonijiet tal-produtturi:

Isem:

Bayerische Landesanstalt für Landwirtschaft

Institut für Ernährungswirtschaft und Märkte

Indirizz:

Menzinger Str. 54

80638 München

DEUTSCHLAND

Tel.

+49 89178000

Faks

+49 8917800313

Għall-verifiki ta' prattiki abbużivi:

Isem:

Bayerisches Staatsministerium für Umwelt und Gesundheit

Indirizz:

Rosenkavalierplatz 2

81925 München

DEUTSCHLAND

Tel.

+49 8912610

Faks

+49 8912611122

Raġuni għall-emenda:

L-isem u l-indirizz tal-awtoritajiet kompetenti responsabbli għall-ispezzjonijiet tal-produtturi u għall-verifiki ta' prattiki abbużivi ma kienux aġġornati. Ir-referenza għall-kumpanija “Lacon GmbH” għandha titħassar. Bħalissa fil-Bavarja hemm diversi entitajiet tal-kontroll li huma awtorizzati u li għandhom l-istess setgħat, u l-produtturi jistgħu jagħżlu liema jridu minnhom.

DOKUMENT UNIKU

“NÜRNBERGER BRATWÜRSTE”/“NÜRNBERGER ROSTBRATWÜRSTE”

Nru tal-UE: PGI-DE-02191 — 28.9.2016

DOP ( ) IĠP ( X )

1. Isem

“Nürnberger Bratwürste”/“Nürnberger Rostbratwürste”

2. Stat Membru jew Pajjiż Terz

Il-Ġermanja

3. Deskrizzjoni tal-prodott agrikolu jew tal-oġġett tal-ikel

3.1. Tip ta' prodott

Klassi 1.2. Prodotti tal-laħam (imsajra, immellħa, affumikati, eċċ.)

3.2. Deskrizzjoni tal-prodott li għalih japplika l-isem f'(1)

Zalzett għax-xiwi twil 7-9 cm f'musrana tan-nagħaġ issikkata, imqatta' medju; piż unitarju nej ta' madwar 20-25 g;

Kompożizzjoni:

Laħam tal-majjal b'xi xaħam imneħħi, laħam xaħmi, partikolarment majjal taż-żaqq, xaħam taż-żaqq, xedaq, xaħam tax-xedaq, dahar u xaħam tad-dahar, mhux mili, mhux imnixxef (bl-eċċezzjoni ta' Bratwürste ffumikati); it-taħlita ta' ħwawar tvarja skont ir-riċetta tradizzjonali, il-merdqux speċjalment huwa tipiku; għandu jkun hemm mhux anqas minn 12 % ta' proteina ta' laħam ħieles mill-proteina ta' tessut konnettiv, u kontenut ta' xaħam assolut ta' mhux aktar minn 35 %; il-perċentwali ta' proteina ta' laħam ħieles mill-proteina ta' tessut konnettiv fil-proteina tal-laħam ma tkunx anqas minn 75 % fil-volum (istometrikalment) u mhux anqas minn 80 % (kimikament).

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Laħam tal-majjal mingħajr wisq xaħam; Laħam xaħmi, partikolarment majjal taż-żaqq; xaħam taż-żaqq, xedaq, xaħam tax-xedaq, dahar u xaħam tad-dahar tal-majjal; il-kontenut ta' xaħam tal-prodott aħħari huwa limitat għal 35 %; ma għandux ikun hemm anqas minn 12 % ta' proteina ta' laħam ħieles minn proteina ta' tessut konnettiv (MPFCP); taħlita ta' ħwawar, l-aktar merdqux; imsaren tan-nagħaġ.

3.4. Passi speċifiċi tal-produzzjoni li jridu jsiru fiż-żona ġeografika ddefinita

L-istadji kollha fil-produzzjoni ta' “Nürnberger Bratwürste”/“Nürnberger Rostbratwürste” iseħħu fiż-żona ġeografika identifikata. Dawn huma kif ġej:

—	it-tqattiegħ f'biċċiet żgħar tal-laħam permezz tal-ixxreddjar u l-ikkapuljar,

—	it-taħlit tal-laħam imqatta' żgħir u t-taħlit mal- ħwawar biex jinħoloq il-mili taz-zalzett,

—	il-mili tal-imsaren tan-nagħaġ.

3.5. Regoli speċifiċi dwar it-tqattigħ, it-tħakkik, l-ippakkjar, eċċ.

Anki l-ippakkjar taz-zalzett irid isir fiż-żona ġeografika ddefinita. L-ippakkjar irid isir direttament wara l-produzzjoni fl-istabbiliment tal-produttur. Dan iservi biex tiġi aċċertata l-kwalità b'mod partikolari f'dak li għandu x'jaqsam mal-karatteristiċi tat-togħma u tal-freskezza tal-prodott, u jnaqqas ir-riskju tal-impuritaijet u l-kontaminazzjoni marbuta mat-trasport lejn post ieħor. In-“Nürnberger (Rost-)Bratwürsten” huma prodotti tal-ikkapuljat sensittivi ħafna. Anki b'mezz tat-trasport li jikkonforma mar-rekwiżiti normali tal-iġjene, fi żmien ftit sigħat tista' tintilef għal dejjem il-kwalità tan-“Nürnberger (Rost-)Bratwürsten” mhux ippakkjati.

L-ippakkjar direttament fl-istabbiliment tal-produttur jiżgura wkoll aktar traċċabilità u ċertezza tal-oriġini. Jekk in-“Nürnberger (Rost-)Bratwürste” jinbiegħ sfuż jew bl-ingrossa mbagħad jiġi ppakkjat wara, wieħed bilkemm ikun jista' jibqa' jagħraf jekk wara kollox għadux l-oriġinal.

3.6. Regoli speċifiċi dwar it-tikkettar

—

4. Deskrizzjoni fil-qosor taż-żona ġeografika

Iż-żona tal-belt ta' Nuremberg.

5. Rabta maż-żona ġeografika

Speċifiċità taż-żona ġeografika

Il-produzzjoni tal-Bratwürste f'Nuremberg hija tradizzjoni ta' mijiet ta' snin li hemm provi x'juru li tmur lura għall-1313. It-tqaddid tipiku fit-tul u fil-piż tan-“Nürnberger Bratwürste”/“Nürnberger Rostbratwürste” imur lura mill-anqas għas-sena 1573. Il-pożizzjoni ta' Nuremberg fl-intersezzjoni ta' żewġ rotot importanti tal-kummerċ wasslet biex f'Nuremberg minn żmien bikri kien hemm disponibbiltà ta' ħwawar mil-Lvant għall-produzzjoni taz-zalzett.

It-tradizzjoni tal-produzzjoni tal-Bratwurst fiż-żona tal-belt ta' Nuremberg għadha ħajja ħafna s'issa. In-“Nürnberger Bratwürste”/“Nürnberger Rostbratwürste” kienu apprezzati ħafna minn Goethe u Jean Paul, pereżempju. Il-“Bratwurst-Glöcklein” fiż-żona ta' St. Sebald kienet waħda mid-djar pubbliċi l-aktar famużi fil-Ġermanja tas-seklu 19; ma kinitx miftuħa biss għall-aristokratiċi u l-plutokrati, iżda kienet ukoll waqfa essenzjali għal kull min kien iżur il-belt.

Speċifiċità tal-prodott

In-“Nürnberger Bratwürste”/“Nürnberger Rostbratwürste” huma kkaratterizzati mill-għamla żgħira tagħhom mhux tas-soltu u mill-ħjiel tal-merdqux. Huma konformi ma' standard ta' kwalità għolja li ilu kkontrollat għal ħafna żmien, huma magħrufin lil hinn sewwa mir-reġjun ta' Nuremberg u għandhom fama tajba ħafna mal-konsumaturi.

Dan huwa rifless fil-fatt li programm standard ta' żjara lill-belt illum jinkludi l-konsum tan-“Nürnberger Bratwürste”/“Nürnberger Rostbratwürste” f'wieħed mill-ħafna “Bratwurstküchen” jew “Wurstbratereien” fiċ-ċentru tal-belt ta' Nuremberg.

Rabta kawżali bejn iż-żona ġeografika u l-kwalità speċifika, ir-reputazzjoni jew karatteristiċi oħra tal-prodott

It-tradizzjoni ta' mijiet ta' snin tal- produzzjoni tal-Bratwurst f'Nuremberg, l-istandard ta' kwalità għolja li ilu jiġi kkontrollat għal ħafna żmien, u l-għamla żgħira mhux tas-soltu għamlu lill-“Nürnberger Bratwürste”/“Nürnberger Rostbratwürste” magħrufa u apprezzati ħafna mal-Ġermanja kollha u mad-dinja.

L-ispeċjalità ħarġet fil-Belt Imperjali ta' Nuremberg bħala riżultat tal-pożizzjoni ġeografika tagħha fl-intersezzjoni ewlenija tar-rotot tal-kummerċ u l-ħwawar mill-Asja tal-Lvant. Minn hawn oriġinaw ħwawar bħall-merdqux, in-noċemuskata u l-bżar. Kienet id-disponibbiltà ta' dawn il-ħwawar mill-Asja li ppermettiet li tinbeda l-produzzjoni ta' dawn iz-zlazet. Minħabba li Nuremberg kienet belt b'ħafna kummerċ fuq distanzi twal u b'għadd ta' tradizzjonijiet moderni raffinati, kien isir zalzett dejjem iżgħar, aktar raffinat u mħawwar aħjar, li maż-żmien sar il-famuż “Nürnberger Bratwürste”. Bil-kontra taż-żoni fil-kampanja, sa mill-bidu l-belt saħqet aktar fuq il-kwalità. Filwaqt li l-kwantità kienet minn ta' quddiem band'oħra, il-prinċipju li fuqu ssawret il-produzzjoni f'Nuremberg kien dak tal-kwalità qabel il-kwantità, u kien dan li ġab miegħu d-daqs żgħir taz-zlazet.

L-osservanza tar-riċetta u tal-kwalità jmorru lura għar-regoli ta' superviżjoni tal-kunsill tal-belt ta' Nuremberg. Nuremberg tista' bir-raġun tgħid li għandha l-iktar skema antika ta' kontroll tal-oġġetti tal-ikel, li tissemma fil-kodiċi penali sa mill-1300. Bil-pubblikazzjoni tar-riċetta, b'eżerċizzju strett ta' superviżjoni u bir-restrizzjoni tal-produzzjoni għaż-żona tal-belt, il-belt ta' Nuremberg għenet biex ikun żgurat li l-karattru taz-zalzett ikun indikazzjoni tal-oriġini tiegħu. Huwa għalhekk li r-rabta maż-żona ġeografika fil-bidu kienet ibbażata fuq il-pożizzjoni ġeografika tagħha bħala intersezzjoni ewlenija tar-rotot tal-ħwawar u tal-kummerċ, u fuq l-introduzzjoni bikrija tas-superviżjoni tal-oġġetti tal-ikel. B'hekk il-pożizzjoni ġeografika u l-kontroll tal-oġġetti tal-ikel, u għaldaqstant tar-riċetta, irriżultaw fil-kwalità partikolari taz-zalzett. Il-belt imperjali bin-netwerk estensiv tagħha ta' kummerċ mad-dinja kollha ġabet speċjalità li kienet magħrufa ħafna mill-Medju Evu 'l quddiem. Illum ir-rabta hija bbażata fuq il-fama li tgawdi din l-ispeċjalità li tradizzjonalment hija apprezzata mad-dinja kollha.

Referenza għall-pubblikazzjoni tal-Ispeċifikazzjoni

(It-tieni subparagrafu tal-Artikolu 6(1) ta' dan ir-Regolament)

https://register.dpma.de/DPMAregister/geo/detail.pdfdownload/41217

(1) ĠU L 343, 14.12.2012, p. 1.

		ISSN 1977-0987
Il-Ġurnal Uffiċjali tal-Unjoni Ewropea		C 292

Edizzjoni bil-Malti	Informazzjoni u Avviżi	Volum 60 2 ta' Settembru 2017

Avviż Nru	Werrej	Paġna
	I Riżoluzzjonijiet, rakkomandazzjonijiet u opinjonijiet
	RAKKOMANDAZZJONIJIET
	Il-Bank Ċentrali Ewropew
2017/C 292/01 BĊE/2017/24	Rakkomandazzjoni tal-Bank Ċentrali Ewropew tal-24 ta’ Awwissu 2017 lill-Kunsill tal-Unjoni Ewropea dwar l-awdituri esterni tal-Banco de Portugal (BĊE/2017/24)	1

	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2017/C 292/02	Ebda oppożizzjoni għal konċentrazzjoni notifikata (Il-Każ M.8546 — Intermediate Capital Group/Domusvi Group) ( 1 )	2
2017/C 292/03	Ebda oppożizzjoni għal konċentrazzjoni notifikata (Il-Każ M.8573 — CVC Group/Arzignanese/Pasubio) ( 1 )	2
2017/C 292/04	Ebda oppożizzjoni għal konċentrazzjoni notifikata (Il-Każ M.8577 — Norsk Hydro/Sapa) ( 1 )	3
2017/C 292/05	Ebda oppożizzjoni għal konċentrazzjoni notifikata (Il-Każ M.8587 — Bridgepoint/Groupe Primonial) ( 1 )	3

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2017/C 292/06	Ir-rata tal-interessi applikata mill-Bank Ċentrali Ewropew għall-operazzjonijiet prinċipali ta' rifinanzjament: 0,00 % fl-1 ta’ Settembru 2017 — Rata tal-kambju tal-euro	4
	Il-Qorti tal-Awdituri
2017/C 292/07	Rapport Speċjali Nru 11/2017 — Il-Fond fiduċjarju Bêkou tal-UE għar-Repubblika Ċentru-Afrikana: bidu promettenti minkejja xi nuqqasijiet	5

	V Avviżi
	PROĊEDURI DWAR L-IMPLIMENTAZZJONI TAL-POLITIKA KUMMERĊJALI KOMUNI
	Il-Kummissjoni Ewropea
2017/C 292/08	Notifika tal-iskadenza imminenti ta’ ċerti miżuri antidumping	6
	ATTI OĦRAJN
	Il-Kummissjoni Ewropea
2017/C 292/09	Pubblikazzjoni ta' applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel	7
2017/C 292/10	Pubblikazzjoni ta' talba għal emenda skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel	12

	Rettifika
2017/C 292/11	Rettifika tat-tnedija ta’ proċediment antidumping li jikkonċerna l-importazzjonijiet ta’ tajers ġodda kif ukoll dawk b’wiċċ ġdid għal karozzi tal-linja jew trakkijiet, li joriġinaw fir-Repubblika tal-Poplu taċ-Ċina ( ĠU C 264, 11.8.2017 )	16


	(1) Test b'rilevanza għaż-ŻEE.