29.8.2017   

MT

Il-Ġurnal Uffiċjali tal-Unjoni Ewropea

C 285/1

29.8.2017   

MT

Il-Ġurnal Uffiċjali tal-Unjoni Ewropea

C 285/2

—

wara li kkunsidra l-Artikolu 225 tat-Trattat dwar il-Funzjonament tal-Unjoni Ewropea (TFUE),

—

wara li kkunsidra l-Artikoli 2 u 3 tat-Trattat dwar l-Unjoni Ewropea (TUE),

—

wara li kkunsidra l-Karta tad-Drittijiet Fundamentali tal-Unjoni Ewropea u b’mod partikolari l-Artikoli 23, 24 u 25 tagħha,

—

wara li kkunsidra r-riżoluzzjoni tiegħu tal-24 ta’ Marzu 2009 dwar il-ġlieda kontra l-mutilazzjoni ġenitali femminili fl-Unjoni Ewropea (1), u r-riżoluzzjoni tiegħu tal-14 ta’ Ġunju 2012 dwar it-tmiem għall-mutilazzjoni ġenitali tan-nisa (2),

—

wara li kkunsidra d-dikjarazzjoni tiegħu tat-22 ta’ April 2009 dwar il-kampanja “LE għall-Vjolenza kontra n-Nisa” (3),

—

wara li kkunsidra r-riżoluzzjoni tiegħu tas-26 ta' Novembru 2009 dwar l-eliminazzjoni tal-vjolenza kontra n-nisa (4),

—

wara li kkunsidra r-riżoluzzjoni tiegħu tal-5 ta' April 2011 dwar il-prijoritajiet u l-punti ewlenin ta' qafas politiku ġdid tal-UE għall-ġlieda kontra l-vjolenza fuq in-nisa (5),

—

wara li kkunsidra r-riżoluzzjoni tiegħu tas-6 ta’ Frar 2013 dwar is-57 sessjoni tal-Kummissjoni dwar l-Istatus tan-Nisa (CSW) tan-NU: l-eliminazzjoni u l-prevenzjoni tal-forom kollha ta' vjolenza fuq in-nisa u l-bniet (6),

—

wara li kkunsidra r-riżoluzzjoni tiegħu tal-11 ta' Ottubru 2007 dwar qtil ta' nisa (femiċidji) fil-Messiku u fl-Amerika Ċentrali, u l-irwol tal-Unjoni Ewropea fil-ġlieda kontra dan il-fenomenu (7),

—

wara li kkunsidra l-Istrateġija tal-Kummissjoni għall-ugwaljanza bejn in-nisa u l-irġiel 2010–2015 li ġiet ippreżentata fil-21 ta’ Settembru 2010,

—

wara li kkunsidra l-Pjan ta’ Azzjoni tal-Kummissjoni li Jimplimenta l-Programm ta’ Stokkolma (COM(2010)0171),

—

wara li kkunsidra l-Programm tad-Drittijiet, l-Ugwaljanza u ċ-Ċittadinanza 2014-2020,

—

wara li kkunsidra l-Konklużjonijiet tal-Kunsill EPSCO tat-8 ta’ Marzu 2010 dwar l-eradikazzjoni tal-vjolenza kontra n-nisa,

—

wara li kkunsidra d-Direttiva 2011/93/UE tal-Parlament Ewropew u tal-Kunsill tat-13 ta’ Diċembru 2011 dwar il-ġlieda kontra l-abbuż sesswali u l-isfruttament sesswali tat-tfal u l-pedopornografija, u li tissostitwixxi d-Deċiżjoni Qafas tal-Kunsill 2004/68/ĠAI (8),

—

wara li kkunsidra l-opinjoni tal-Kumitat Ekonomiku u Soċjali Ewropew tat-18 ta’ Settembru 2012 dwar l-“Eradikazzjoni tal-vjolenza domestika fuq in-nisa” (9),

—

wara li kkunsidra l-linji gwida tal-UE dwar il-vjolenza fuq in-nisa u l-bniet u l-ġlieda kontra l-forom kollha ta’ diskriminazzjoni kontrihom,

—

wara li kkunsidra l-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika (il-Konvenzjoni ta’ Istanbul),

—

wara li kkunsidra l-Artikolu 11(1)(d) tal-Konvenzjoni dwar l-Eliminazzjoni tal-Forom Kollha ta’ Diskriminazzjoni kontra n-Nisa adottata mill-Assemblea Ġenerali tan-NU bir-Riżoluzzjoni 34/180 tat-18 ta’ Diċembru 1979,

—

wara li kkunsidra d-dispożizzjonijiet tal-istrumenti legali tan-NU fl-isfera tad-drittijiet tal-bniedem, b’mod partikolari dawk li jikkonċernaw id-drittijiet tan-nisa, bħalma huma l-Karta tan-NU, id-Dikjarazzjoni Universali tad-Drittijiet tal-Bniedem, il-Patti Internazzjonali dwar id-Drittijiet Ċivili u Politiċi u dwar id-Drittijiet Ekonomiċi, Soċjali u Kulturali, il-Konvenzjoni dwar is-Soppressjoni tat-Traffikar tal-Bnedmin u l-Isfruttament tal-Prostituzzjoni ta’ Oħrajn, il-Konvenzjoni dwar l-Eliminazzjoni ta’ Kull Forma ta’ Diskriminazzjoni kontra n-Nisa (CEDAW) u l-Protokoll Fakultattiv tagħha, il-Konvenzjoni kontra t-Tortura u Trattament jew Pieni Krudili, Inumani jew Degradanti Oħra, il-Konvenzjoni tal-1951 rigward l-Istatus tar-Refuġjati, u l-prinċipju ta’ non-refoulement, il-Konvenzjoni tan-Nazzjonijiet Uniti dwar id-drittijiet tal-persuni b’diżabilità,

—

wara li kkunsidra strumenti oħra tan-NU dwar il-vjolenza kontra n-nisa, bħad-Dikjarazzjoni ta’ Vjenna u l-Programm ta’ Azzjoni tal-25 ta’ Ġunju 1993 adottata mill-Konferenza Dinjija dwar id-Drittijiet tal-Bniedem (A/CONF. 157/23) u d-Dikjarazzjoni dwar l-Eliminazzjoni tal-Vjolenza kontra n-Nisa tal-20 ta’ Diċembru 1993 (A/RES/48/104),

—

wara li kkunsidra r-riżoluzzjonijiet tal-Assemblea Ġenerali tan-NU tat-12 ta’ Diċembru 1997 bit-titolu “Crime prevention and criminal justice measures to eliminate violence against women” (A/RES/52/86), tat-18 ta’ Diċembru 2002 bit-titolu “Working towards the elimination of crimes against women committed in the name of honour”, (A/RES/57/179), u tat-22 ta’ Diċembru 2003 bit-titolu “Elimination of domestic violence against women” (A/RES/58/147) u tar-riżoluzzjoni tal-Assemblea Ġenerali tan-NU tal-5 ta’ Marzu 2013 bit-titolu “Intensifying global efforts for the elimination of female genital mutilations” (A/RES/67/146),

—

wara li kkunsidra r-rapporti mir-Rapporteurs Speċjali tal-Kummissarju Għoli tan-NU tad-Drittijiet tal-Bniedem dwar il-vjolenza kontra n-nisa u r-Rakkomandazzjoni Ġenerali Nru 19 adottata mill-Kumitat għall-Eliminazzjoni tad-Diskriminazzjoni Kontra n-Nisa (il-11-il Sessjoni, 1992),

—

wara li kkunsidra d-Dikjarazzjoni u l-Pjattaforma ta’ Azzjoni ta’ Bejġing, adottati mir-Raba’ Konferenza Dinjija dwar in-Nisa fil-15 ta’ Settembru 1995 u r-riżoluzzjonijiet tal-Parlament tat-18 ta’ Mejju 2000 dwar is-segwitu għall-Pjattaforma ta’ Azzjoni ta’ Bejġing (10), tal-10 ta’ Marzu 2005 dwar is-segwitu għar-Raba’ Konferenza Dinjija dwar in-Nisa – Pjattaforma ta’ Azzjoni (Bejġing+10) (11) u tal-25 ta’ Frar 2010 dwar Bejġing + 15 – Pjattaforma ta’ Azzjoni tan-NU għall-Ugwaljanza bejn is-Sessi (12),

—

wara li kkunsidra r-riżoluzzjoni tal-Assemblea Ġenerali tan-NU tad-19 ta’ Diċembru 2006 bit-titolu “Intensifikazzjoni tal-isforzi biex tiġi eliminata kull forma ta’ vjolenza kontra n-nisa” (A/RES/61/143), u r-Riżoluzzjonijiet 1325 u 1820 tal-Kunsill tas-Sigurtà tan-NU dwar in-nisa, il-paċi u s-sigurtà,

—

wara li kkunsidra l-Konklużjonijiet tas-57 sessjoni tal-Kummissjoni dwar l-Istatus tan-Nisa dwar l-eliminazzjoni u l-prevenzjoni ta’ kull forma ta’ vjolenza kontra n-nisa u l-bniet,

—

wara li kkunsidra r-Rapport tan-NU tar-Rapporteur Speċjali dwar il-vjolenza kontra n-nisa, il-kawżi u l-konsegwenzi tagħha, Rashida Manjoo, tas-16 ta’ Mejju 2012,

—

wara li kkunsidra l-Artikolu 5 tal-Pjan ta'Azzjoni Internazzjonali ta' Madrid dwar it-Tixjiħ,

—

wara li kkunsidra l-Valutazzjoni tal-Valur Miżjud Ewropew (13),

—

wara li kkunsidra l-Artikoli 42 u 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi u l-opinjoni tal-Kumitat għal-Libertajiet Ċivili, il-Ġustizzja u l-Intern (A7-0075/2014),

A.

billi fid-Direttiva 2012/29/EU (14) li tistabbilixxi standards minimi fir-rigward tad-drittijiet, l-appoġġ u l-protezzjoni tal-vittmi tal-kriminalità, il-vjolenza sessista hija definita bħala vjolenza li hija diretta kontra persuna minħabba s-sess ta’ dik il-persuna, l-identità tal-ġeneru jew l-espressjoni tal-ġeneru jew li taffettwa lil persuni ta’ sess partikolari b’mod sproporzjonat; billi din tista’ tirriżulta fi ħsara fiżika, sesswali, emozzjonali jew psikoloġika, jew telf ekonomiku, għall-vittma u titqies bħala forma ta' diskriminazzjoni u ksur tal-libertajiet fundamentali tal-vittma u tinkludi vjolenza f’relazzjonijiet mill-qrib, vjolenza sesswali (inklużi l-istupru, l-attakk sesswali u l-fastidju sesswali), traffikar tal-bnedmin, skjavitù, u forom differenti ta’ prattiki li jagħmlu l-ħsara, bħalma huma ż-żwiġijiet sfurzati, il-mutilazzjoni ġenitali femminili u l-hekk imsejħa “delitti tal-unur”;

B.

billi l-vjolenza sessista tinvolvi vittmi u awturi ta’ kull età, sfondi edukattivi, dħul u pożizzjonijiet soċjali u hija marbuta mad-distribuzzjoni inugwali tal-poter bejn in-nisa u l-irġiel fis-soċjetà tagħna u ma’ ideat u imġibiet ibbażati fuq l-isterjotipi fis-soċjetà tagħna li jeħtieġ li jiġu miġġielda fl-aktar stadju bikri bil-għan li jinbidlu l-attitudnijiet;

C.

billi n-nisa qed ikunu dejjem aktar suġġetti għall-vjolenza li titwettaq mill-irġiel, is-sħab, l-eksirġiel jew l-ekssħab tagħhom; billi f'xi pajjiżi n-numru ta' vittmi żdied f'daqqa u l-konsegwenzi li jsofru l-vittmi wrew it-tendenza li jsiru ferm aktar serji u li jwasslu saħansitra għall-mewt, u l-istatistika turi li n-numru ta' nisa maqtula qed jilħaq propozjon dejjem akbar tat-total ta' omiċidji;

D.

billi f'xi pajjiżi l-istħarriġ statistiku juri li, anke jekk in-numru totali ta' omiċidji ma żdiedx, żdied però n-numru ta' nisa maqtula fuq it-total ta' omiċidji, li jikkonferma li l- vjolenza kontra n-nisa żdiedet;

E.

billi l-faqar estrem iżid ir-riskju tal-vjolenza u forom oħra ta’ sfruttament li jxekklu l-parteċipazzjoni sħiħa tan-nisa fl-oqsma kollha tal-ħajja u l-kisba tal-ugwaljanza bejn is-sessi;

F.

billi aktar indipendenza u involviment soċjali u ekonomiku jagħmel lin-nisa anqas vulnerabbli u jnaqqas il-vjolenza sessista;

G.

billi l-istereotipi ġodda, u l-forom ta' diskriminazzjoni u vjolenza żdiedu riċentement minħabba l-użu akbar ta' netwerks soċjali, bħalma huma l-prattiki abbużivi ta' korruzzjoni sesswali (grooming) immirati l-aktar lejn l-adoloxxenti;

H.

billi l-attitudni sessista fost il-ġenerazzjoni żagħżugħa dwar ir-rwoli tas-sessi hija persistenti; iż-żgħażagħ nisa li huma vittmi ta’ vjolenza għadhom jingħataw it-tort u jiġu stigmatizzati mill-pari tagħhom u mill-bqija tas-soċjetà;

I.

billi l-vjolenza hija esperjenza trawmatika għal kwalunkwe raġel, mara, tifel jew tifla, imma l-vjolenza sessista hija iktar ta’ spiss imposta fuq in-nisa milli fuq l-irġiel, u kemm tirrifletti kif ukoll issaħħaħ l-inugwaljanzi bejn l-irġiel u n-nisa u tikkomprometti s-saħħa, id-dinjità, is-sigurtà u l-awtonomija tal-vittmi tagħha;

J.

billi t-tfal li kienu xhieda ta' vjolenza fuq qarib qrib tagħhom għandhom jiġu kkunsidrati u wieħed għandu jieħu ħsiebhom mill-aspett tat-trattament psikoloġiku meħtieġ u d-dispożizzjonijiet ta’ għajnuna soċjali, barra minn hekk billi t-tfal li kienu xhieda ta' vjolenza huma wkoll f'riskju akbar li jiġu affettwati minn problemi emozzjonali u ta' relazzjonijiet;

K.

billi n-nisa vittmi ta’ vjolenza sessista u t-tfal tagħhom ta’ spiss ikunu jeħtieġu appoġġ u protezzjoni speċjali minħabba r-riskju għoli ta’ vittimizzazzjoni sekondarja u ripetuta ta’ intimidazzjoni u ta’ ritaljazzjoni marbuta ma’ tali vjolenza;

L.

billi n-nisa u t-tfal li jesperjenzaw vjolenza jeħtieġu faċilitajiet ta' rifuġju speċifiċi fejn jistgħu jiġu offruti servizzi ta' kura tas-saħħa, assistenza legali u konsulenza u terapija psikoloġiċi; billi r-rifuġji tan-nisa għandhom jingħataw finanzjament xieraq mill-Istati Membri;

M.

billi l-vjolenza maskili kontra n-nisa tibdel il-post tan-nisa fis-soċjetà u l-awtodeterminazzjoni tagħhom mil-lat tas-saħħa tagħhom, l-aċċess tagħhom għall-impjiegi u l-edukazzjoni, l-integrazzjoni tagħhom fl-attivitajiet soċjali u kulturali, l-indipendenza ekonomika tagħhom, il-parteċipazzjoni tagħhom fil-ħajja pubblika u politika u fit-teħid tad-deċiżjonijiet u r-relazzjonijiet tagħhom mal-irġiel kif ukoll iż-żieda fir-rispett għalihom infushom;

N.

billi l-vjolenza kontra n-nisa tista’ tħalli feriti fiżiċi u psikoloġiċi profondi, tikkawża dannu lis-saħħa ġenerali tan-nisa u l-bniet, inkluża s-saħħa riproduttiva u sesswali tagħhom, u f’xi każijiet, tirriżulta fil-mewt, li tissejjaħ ukoll femminiċidju;

O.

billi hemm il-ħtieġa ta' edukazzjoni u taħriġ minn età żgħira ħafna biex tiġi miġġielda l-vjolenza kontra n-nisa u l-vjolenza sessista inġenerali peress li din tiżviluppa l-ħiliet taż-żgħażagħ biex jittrattaw lis-sħab tagħhom b'rispett hu x’inhu l-ġeneru tagħhom u biex ikunu konxji tal-prinċipji tal-ugwaljanza;

P.

billi l-vjolenza kontra n-nisa qed tieħu forom dejjem iżjed inaċċettabbli, inkluża s-sħubija fi gruppi li jorganizzaw it-traffikar tan-nisa għal sfruttament sesswali;

Q.

billi l-istudji fuq il-vjolenza kontra n-nisa jikkalkulaw li waħda minn kull ħamsa sa kwart tan-nisa kollha fl-Ewropa sofrew atti ta’ vjolenza fiżika għallinqas darba tul il-ħajja adulta tagħhom, u aktar minn waħda minn kull għaxra sofriet vjolenza sesswali li tinvolvi l-użu tal-forza (15);

R.

billi, skont l-Evalwazzjoni tal-Valur Miżjud Ewropew, l-ispiża annwali lill-UE tal-vjolenza sessista kontra n-nisa hija stmata għal EUR 228 biljun fl-2011 (jiġifieri 1,8 % tal-PDG tal-UE), li minnhom EUR 45 biljun fis-sena fis-servizzi pubbliċi u tal-istat u EUR 24 biljun tal-produzzjoni ekonomika mitlufa;

S.

billi f’Marzu 2013 l-Aġenzija għad-Drittijiet Fundamentali ħarġet xi riżultati preliminari tal-istħarriġ Ewropew tagħha dwar il-vjolenza fuq in-nisa, li juri, fost oħrajn, li: erba’ minn ħames nisa ma talbu għall-ebda servizz, bħal kura tas-saħħa, servizzi soċjali, jew appoġġ lill-vittmi, wara l-aktar inċidenti serji ta’ vjolenza minn persuna li ma kinitx is-sieħeb tagħhom; in-nisa li fittxew għajnuna kienu dawk li aktarx jitolbu għal servizzi mediċi, u dan jenfasizza l-ħtieġa li jiġi żgurat li l-professjonisti tal-kura tas-saħħa jkunu jistgħu jindirizzaw il-ħtiġijiet tal-vittmi ta’ vjolenza; tnejn minn kull ħames nisa ma kinux konxji tal-liġijiet jew l-inizjattivi politiċi li jipproteġuhom f’każijiet ta’ vjolenza domestika, u nofshom ma kienu konxji dwar l-ebda liġi jew inizjattiva preventiva;

T.

billi l-Kummissjoni enfasizzat fl-istrateġija tagħha għall-ugwaljanza bejn is-sessi 2010-2015 li l-vjolenza sessista hija waħda mill-problemi ewlenin li għandha tiġi indirizzata biex tinkiseb ugwaljanza ġenwina bejn is-sessi;

U.

billi l-qafas legali tat-Trattat ta’ Lisbona joffri possibbiltajiet ġodda biex tiżdied il-kooperazzjoni fil-politika tal-ġustizzja kriminali fil-livell tal-Unjoni, li tippermetti lill-istituzzjonijiet u lill-Istati Membri jaħdmu flimkien fuq bażijiet sodi, biex b’hekk joħolqu tradizzjoni legali komuni fl-Unjoni fir-rigward tal-ġlieda kontra kull tip ta' vjolenza fuq in-nisa u diskriminazzjoni kontrihom, fir-rigward ta’ sistemi u tradizzjonijiet legali nazzjonali mingħajr ma tissostitwihom;

V.

billi s-sensibilizzazzjoni u l-mobilizzazzjoni, inkluż permezz tal-midja u l-midja soċjali, jikkostitwixxu komponent importanti ta’ strateġija ta’ prevenzjoni effettiva;

W.

billi m’hemm l-ebda intervent wieħed li jelimina waħdu l-vjolenza sessista, iżda taħlita ta’ azzjonijiet infrastrutturali, legali, ġudizzjarji, ta’ infurzar, kulturali, edukattivi, soċjali, tas-saħħa u azzjonijiet oħra relatati mas-servizzi jistgħu jqajmu kuxjenza u jnaqqsu l-vjolenza u l-konsegwenzi tagħha b’mod sinifikanti;

X.

billi s-sitt għanijiet inseparabbli li huma l-bażi ta' kwalunkwe miżura li tiġġieled kontra l-vjolenza fuq in-nisa huma l-politika, il-prevenzjoni, il-protezzjoni, il-prosekuzzjoni, id-dispożizzjoni u s-sħubija;

Y.

billi huwa importanti li tiżdied l-azzjoni kontra l-industrija li għandha perċezzjoni tat-tfajliet u l-bniet bħala oġġetti sesswali;

Z.

billi n-nisa fl-Unjoni Ewropea mhumiex protetti b’mod ugwali kontra l-vjolenza mill-irġiel minħabba politiki u leġiżlazzjoni varji madwar l-Istati Membri, rigward fost l-oħrajn id-definizzjoni tar-reati u l-ambitu tal-leġiżlazzjoni, u għalhekk huma vulnerabbli għal tali vjolenza;

AA.

billi minħabba fatturi bħar-razza, l-etniċità, ir-reliġjon jew twemmin, is-saħħa, l-istat ċivili, id-djar, l-istat ta' migrazzjoni, l-età, id-diżabilità, l-orjentazzjoni sesswali u l-identità tal-ġeneru, in-nisa jista’ jkollhom ħtiġijiet speċjali u jkunu aktar vulnerabbli għal diskriminazzjonijiet multipli;

AB.

billi f’bosta każijiet in-nisa jonqsu milli jressqu lmenti kontra atti ta’ vjolenza sessista kontrihom, għal raġunijiet li huma kumplessi u diversi u li jinkludu fatturi psikoloġiċi, ekonomiċi, soċjali u kulturali, u għax jistgħu wkoll ma jkollhomx fiduċja fil-ħila tal-pulizija, fis-sistema ġuridika u fis-servizzi soċjali u tas-saħħa li jgħinuhom b’mod konkret; billi f'xi każijiet l-awtoritajiet iqisu l-vjolenza sessista bħala problema tal-familja u għalhekk waħda li tista' tiġi solvuta f'dak il-livell;

AC.

billi l-politika tas-saħħa riproduttiva għandha tkun fil-qalba ta' dan id-dibattitu;

AD.

billi l-ġabra ta' dejta diżaggregata, kwalitattiva u kwantitattiva, paragunabbli, li tkopri l-aspetti kollha tal-problema, hija indispensabbli, biex tinftiehem il-firxa reali tal-vjolenza kontra n-nisa fl-Unjoni, il-konsegwenzi tagħha u, għalhekk, għall-iżvilupp ta' politiki effettivi;

AE.

billi r-rifjut tal-proposta tal-Kummissjoni mill-Parlament Ewropew fit-12 ta’ Diċembru 2012 għal regolament tal-Parlament Ewropew u tal-Kunsill dwar l-istatistika Ewropea fuq is-sikurezza mill-kriminalità (16) itenni l-bżonn għal proposta ġdida għal leġiżlazzjoni tal-UE li tistabbilixxi sistema koerenti għall-ġbir ta’ statistika dwar il-vjolenza kontra n-nisa fl-Istati Membri, u billi l-Kunsill, fil-konklużjonijiet tiegħu ta’ Diċembru 2012, talab li jsir titjib fil-ġbir u t-tixrid ta’ dejta affidabbli, paragunabbli, u aġġornata regolarment li tirrigwarda kull forma ta’ vjolenza kontra n-nisa kemm fil-livell nazzjonali u tal-UE;

AF.

billi l-Mutilazzjoni tal-Ġenitali Femminili (FGM) hija rikonoxxuta internazzjonalment bħala ksur tad-drittijiet tal-bniedem, bħala forma ta’ tortura kontra l-bniet u n-nisa, u tirrifletti inugwaljanza profonda bejn is-sessi; billi L-FGM tikkostitwixxi forma estrema ta’ diskriminazzjoni kontra n-nisa, kważi dejjem titwettaq fuq il-minurenni u hija ksur tad-drittijiet tat-tfal;

AG.

billi l-prostituzzjoni tistta' titqies bħala tip ta’ vjolenza kontra n-nisa, minħabba l-effett li din ikollha fuq is-saħħa fiżika u mentali tagħhom, b’mod speċjali f’każijiet ta’ prostituzzjoni sfurzata u fit-traffikar tan-nisa għal finijiet ta’ prostituzzjoni;

AH.

billi t-tendenza għad-delitti mwettqa f’isem l-unur qiegħda tiżdied b’mod perikoluż fi ħdan il-fruntieri tal-Unjoni Ewropea, tendenza li taffettwa l-aktar lill-bniet;

AI.

billi l-abbuż tal-anzjani huwa rikonoxxut bħala ksur tad-drittijiet tal-bniedem tan-nisa anzjani, kif ukoll il-ħtieġa għall-prevenzjoni u l-ġlieda kontra l-abbuż tal-anzjani fil-pajjiżi kollha tal-UE;

AJ.

billi l-adozzjoni tal-linji gwida tal-UE dwar il-Vjolenza kontra n-Nisa u l-bniet u l-ġlieda kontra kull forma ta’ diskriminazzjoni kontrihom kif ukoll il-kapitolu speċifiku dwar il-protezzjoni tan-nisa kontra l-vjolenza sessista fil-Qafas Strateġiku u l-Pjan ta’ Azzjoni tal-UE dwar id-Drittijiet tal-Bniedem qed jimmarkaw id-determinazzjoni politika ċara tal-UE biex tittratta s-suġġett tad-drittijiet tan-nisa bħala prijorità u biex tieħu azzjoni għall-perjodu fit-tul f’dak il-qasam; billi l-koerenza bejn id-dimensjonijiet interni u esterni fil-politiki dwar id-drittijiet tal-bniedem xi kultant tista’ tesponi distakk bejn ir-retorika u l-imġiba;

AK.

billi, skont ir-rapporti tal-Kummissjoni u ta' Amnesty International, FGM tirrigwarda mijiet ta' eluf ta' nisa u bniet fl-Ewropa u spiss tissemma ċ-ċifra ta' 500 000 vittma; billi d-disparitajiet bejn id-dispożizzjonijiet legali fl-Istati Membri qed iwasslu għall-fenomenu tal-hekk imsejjaħ “turiżmu FGM” transkonfinali fl-UE;

AL.

billi hemm ħtieġa kontinwa għall-UE biex taħdem ma’ pajjiżi terzi biex teqred il-prattika vjolenti tal-FGM; billi dawk l-Istati Membri u l-pajjiżi terzi li għandhom leġiżlazzjoni nazzjonali li tikkriminalizza l-FGM għandhom jaġixxu fuq din il-leġiżlazzjoni;

1.

Jitlob lill-Kummissjoni biex, sa tmiem l-2014, fuq il-bażi tal-Artikolu 84 tat-TFUE, tissottometti proposta għal att li jistabbilixxi miżuri għall-promozzjoni u l-appoġġ tal-azzjoni tal-Istati Membri fil-qasam tal-prevenzjoni tal-vjolenza kontra n-nisa u l-bniet (VAWG), skont ir-rakkomandazzjonijiet dettaljati stabbiliti fl-Anness hawnhekk;

2.

Jistieden lill-Kummissjoni tressaq proposta riveduta għal Regolament dwar statistika Ewropea li tkun immirata lejn reati vjolenti u tinkludi wkoll sistema koerenti għall-ġbir tal-istatistika dwar il-vjolenza sessista fl-Istati Membri;

3.

Jitlob lill-Kunsill biex jattiva l-klawsola passerelle, billi jadotta deċiżjoni unanima li tidentifika l-vjolenza kontra n-nisa u l-bniet (u forom oħra ta’ vjolenza sessista) bħala qasam ta’ kriminalità elenkat fl-Artikolu 83(1) tat-TFUE;

4.

Jitlob lill-Kummissjoni biex tippromwovi ratifiki nazzjonali u tniedi l-proċedura għall-adeżjoni tal-UE għall-Konvenzjoni ta’ Istanbul dwar il-vjolenza kontra n-nisa, ladarba jkun evalwat l-impatt u l-valur miżjud li dan tal-aħħar ikollu;

5.

Jitlob lill-Kummissjoni biex tippreżenta Strateġija għall-UE kollha u Pjan ta’ Azzjoni għall-ġlieda kontra kull forma ta' vjolenza fuq in-nisa u l-bniet (VAWG), kif previst fl-2010 fil-pjan ta' azzjoni li jimplimenta l-programm ta' Stokkolma, bil-għan li jipproteġi l-integrità tan-nisa, l-ugwaljanza (l-Artikolu 2 tat-TUE) u l-benessri (Artikolu 3(1) TUE) b'mod tanġibbli u effettiv fil-qasam tal-libertà, is-sigurtà u l-ġustizzja, filwaqt li tiffoka partikolarment fuq li tagħmel in-nisa konxji tad-drittjiet tagħhom u l-irġiel u s-subien (minn età żgħira) tal-ħtieġa li jirrispettaw l-integrità fiżika u psikoloġika tan-nisa, sabiex jgħinu biex tiġi pprevenuta tali vjolenza, filwaqt li tenfasizza l-ħtieġa li s-servizzi tal-pulizija u ġudizzjarji jingħataw taħriġ xieraq fl-ittrattar tal-isfidi speċifiċi tal-vjolenza sessista, u tinkoraġġixxi lill-Istati Membri jagħmlu arranġamenti biex jgħinu lill-vittmi jibnu ħajjithom mill-ġdid u jirkupraw il-kunfidenza fihom infushom, sabiex jiġu mħarsa mill-vulnerabilità jew id-dipendenza futuri; iqis li tali strateġija għandha tagħti attenzjoni partikolari lill-gruppi vulnerabbli bħal persuni anzjani, persuni b’diżabilità, immigranti u persuni LGBT (leżbjani, gay, bisesswali u transġeneru) u li għandha tinkludi wkoll miżuri li jappoġġjaw lit-tfal li jkunu xhieda ta’ vjolenza u jirrikonoxxuhom bħala vittmi ta’ kriminalità;

6.

Jitlob lill-Kummissjoni tippromwovi l-kollaborazzjoni bejn l-Istati Membri u l-NGOs u l-organizzazzjonijiet tan-nisa sabiex iħejju u jimplimentaw strateġija effiċjenti biex tiġi eliminata l-vjolenza kontra n-nisa;

7.

Iħeġġeġ lill-Kummissjoni biex tadotta l-ewwel passi lejn l-istabbiliment ta’ Osservatorju Ewropew dwar il-Vjolenza Kontra n-Nisa u l-Bniet li jibni fuq strutturi istituzzjonali eżistenti (Istitut Ewropew għall-Ugwaljanza bejn is-Sessi (EIGE)) u dirett minn Koordinatur tal-UE dwar il-VAWG;

8.

Iħeġġeġ lill-Kummissjoni biex toħloq, fit-tliet snin li ġejjin, Sena Ewropea Kontra l-Vjolenza Fuq in-Nisa u l-Bniet bil-għan li tiżdied is-sensibilizzazzjoni fost iċ-ċittadini kif ukoll tal-politikanti rġiel u nisa dwar din il-problema mifruxa li taffettwa l-Istati Membri kollha, bil-għan li jiġi ppreżentat pjan ta’ azzjoni ċar li jwassal għat-tmiem tal-vjolenza kontra n-nisa;

9.

Jistieden lill-Istati Membri jiġġieldu kontra d-delitti mwettqa f’isem l-unur billi jipprovdu edukazzjoni u kenn għal dawk li jistgħu jisfaw vittmi u biex jimmobilizzaw il-kampanji ta’ sensibilizzazzjoni dwar il-forma estrema ta’ abbużi tad-drittijiet tal-bniedem u l-għadd ta’ mwiet traġiċi kkawżati mid-delitti mwettqa f’isem l-unur;

10.

Jistieden lill-Istati Membri u l-partijiet interessati, li jaħdmu mal-Kummissjoni, biex jgħinu fit-tixrid tal-informazzjoni dwar il-programmi tal-UE u l-finanzjament disponibbli għalihom biex jikkombattu l-vjolenza kontra n-nisa;

11.

Jikkonferma li r-rakkomandazzjonijiet jirrispettaw id-drittijiet fundamentali u l-prinċipji tas-sussidjarjetà u l-proporzjonalità;

12.

Iqis li l-implikazzjonijiet finanzjarji tal-proposta mitluba għandhom ikunu koperti mill-baġit tal-Unjoni, it-Taqsima III (l-iżgurar ta’ komplementarjetà sħiħa mal-linja baġitarja eżistenti relatata mas-suġġett tal-proposta);

13.

Jagħti istruzzjonijiet lill-President tiegħu biex jgħaddi din ir-riżoluzzjoni u r-rakkomandazzjonijiet dettaljati annessi magħha lill-Kummissjoni u lill-Kunsill kif ukoll lill-parlamenti u lill-gvernijiet tal-Istati Membri, lill-Kunsill tal-Ewropa u lill-EIGE;

29.8.2017   

MT

Il-Ġurnal Uffiċjali tal-Unjoni Ewropea

C 285/11

—

wara li kkunsidra l-Artikoli 290 u 291 tat-Trattat dwar il-Funzjonament tal-Unjoni Ewropea (TFUE),

—

wara li kkunsidra r-Regolament (UE) Nru 182/2011 tal-Parlament Ewropew u tal-Kunsill tas-16 ta' Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (1),

—

wara li kkunsidra l-Fehim Komuni dwar l-Atti Delegati, kif approvat fit-3 ta’ Marzu 2011 mill-Konferenza tal-Presidenti,

—

wara li kkunsidra l-Ftehim Qafas dwar ir-relazzjonijiet bejn il-Parlament Ewropew u l-Kummissjoni Ewropea (2), b’mod partikolari l-punt 15 tiegħu u l-Anness 1 għalih,

—

wara li kkunsidra s-sentenza tal-Qorti tal-Ġustizzja tal-5 ta' Settembru 2012 fil-Kawża C-355/10, il-Parlament v il-Kunsill (għadha mhix rappurtata), u l-Kawża C-427/12 pendenti, il-Kummissjoni v il-Parlament Ewropew u l-Kunsill tal-Unjoni Ewropea,

—

wara li kkunsidra r-riżoluzzjoni tiegħu tal-5 ta' Mejju 2010dwar is-setgħa tad-delegazzjoni leġiżlattiva (3),

—

wara li kkunsidra r-rapport ta' informazzjoni tal-Kumitat Ekonomiku u Soċjali Ewropew, adottat fid-19 ta' Settembru 2013, dwar Regolamentazzjoni aħjar: atti ta' implimentazzjoni u atti delegati,

—

wara li kkunsidra l-ittra tas-26 ta' Novembru 2012 mill-President tal-Parlament lill-President tal-Konferenza tal-Presidenti tal-Kumitati dwar il-prinċipji orizzontali fl-użu ta' atti delegati fir-rigward ta' programmi leġiżlattivi koperti mill-Qafas Finanzjarju Pluriennali (QFP), kif approvati mill-Konferenza tal-Presidenti fil-laqgħa tagħha tal-15 ta' Novembru 2012,

—

wara li kkunsidra l-ittra tat-8 ta' Frar 2013 mill-President tal-Parlament lill-Presidenti tal-Kunsill u tal-Kummissjoni dwar in-nuqqas ta' progress fil-Kunsill fir-rigward tal-proposti ta' allinjament fl-oqsma tal-agrikultura u s-sajd,

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Affarijiet Legali u l-opinjonijiet tal-Kumitat għall-Iżvilupp, il-Kumitat għall-Affarijiet Ekonomiċi u Monetarji, il-Kumitat għall-Impjiegi u l-Affarijiet Soċjali, il-Kumitat għall-Ambjent, is-Saħħa Pubblika u s-Sikurezza tal-Ikel, il-Kumitat għall-Industrija, ir-Riċerka u l-Enerġija, il-Kumitat għat-Trasport u t-Turiżmu, il-Kumitat għall-Agrikoltura u l-Iżvilupp Rurali, il-Kumitat għas-Sajd, u l-Kumitat għal-Libertajiet Ċivili, il-Ġustizzja u l-Intern (A7-0435/2013),

A.

billi t-Trattat ta’ Lisbona introduċa l-possibbiltà għall-Parlament u l-Kunsill (flimkien indikati bħala “il-leġiżlatur”) li jiddelegaw parti mis-setgħat tagħhom stess lill-Kummissjoni f’att leġiżlattiv (“l-att bażiku”); billi d-delega hija operazzjoni delikata li fiha l-Kummissjoni tkun mitluba li teżerċita s-setgħa li hija intrinsika għar-rwol proprju tal-leġiżlatur; billi għalhekk hu meħtieġ li tkun żgurata applikazzjoni korretta tat-Trattat, sabiex ikun garantit livell suffiċjenti ta' leġittimità demokratika għal atti delegati wkoll; billi l-punt ta’ tluq meta tkun eżaminata l-kwistjoni tad-delega għandu għalhekk dejjem ikun il-libertà tal-leġiżlatur; billi skont il-ġurisprudenza stabbilita, l-adozzjoni tar-regoli essenzjali għas-suġġett previst hija riżervata għal-leġiżlatur; li tfisser li l-adozzjoni ta' dispożizzjonijiet li jitolbu deċiżjonijiet politiċi li jaqgħu taħt ir-responsabbiltà tal-leġiżlatur ma jistgħux ikunu delegati; billi għalhekk dik is-setgħa delegata tista’ tikkonsisti biss fis-supplimentar jew fl-emendar ta’ partijiet mill-att leġiżlattiv li mhumiex essenzjali; billi l-atti delegati li jirriżultaw li jkunu adottati mill-Kummissjoni se jkunu atti mhux leġiżlattivi ta’ ambitu ġenerali; billi l-att bażiku għandu jiddefinixxi b’mod espliċitu l-objettiv, il-kontenut, il-kamp ta’ applikazzjoni u t-tul ta’ din id-delega, u għandu jistipula l-kundizzjonijiet li d-delega hija suġġetta għalihom;

B.

billi sabiex jiġu stabbiliti l-arranġamenti prattiċi u l-kjarifiki maqbula u l-preferenzi applikabbli għad-delega tas-setgħa leġiżlattiva skont l-Artikolu 290 TFUE, il-Parlament, il-Kunsill u l-Kummissjoni qablu dwar Fehim Komuni għall-Atti Delegati bil-ħsieb tal-eżerċizzju mingħajr problemi tas-setgħa delegata u l-kontroll effettiv ta’ dik is-setgħa mill-Parlament Ewropew u mill-Kunsill;

C.

billi t-Trattati jipprovdu li l-Istati Membri jadottaw il-miżuri kollha tad-dritt nazzjonali meħtieġa biex jiġu implimentati atti tal-Unjoni li huma legalment vinkolanti; billi, madankollu, fejn huma meħtieġa l-kundizzjonijiet uniformi għall-implimentazzjoni tal-atti tal-Unjoni li huma legalment vinkolanti, dawk l-atti għandhom jagħtu setgħat ta’ implimentazzjoni lill-Kummissjoni (u f’ċertu każijiet eċċezzjonali lill-Kunsill), kif stabbilit fl-Artikolu 291 TFUE; billi fejn l-att bażiku jeħtieġ li l-adozzjoni tal-atti ta’ implimentazzjoni mill-Kummissjoni tkun suġġetta għall-kontroll mill-Istati Membri, l-att bażiku għandu jagħti dawk is-setgħat ta’ implimentazzjoni lill-Kummissjoni skont ir-Regolament (UE) Nru 182/2011; billi impenn ewlieni li għamlet il-Kummissjoni f’dikjarazzjoni annessa ma’ dak ir-Regolament kien l-allinjament urġenti tal-acquis mas-sistema l-ġdida ta’ atti delegati u ta’ implimentazzjoni li għandu jitlesta matul it-terminu leġiżlattiv attwali, inkluż l-atti bażiċi li jirreferu għall-proċedura regolatorja bi skrutinju (RPS);

D.

billi huwa l-kompitu tal-leġiżlatur li jiddetermina, abbażi ta’ kull każ għalih, il-livell ta’ dettall ta’ kull att leġiżlattiv u għalhekk anke jiddeċiedu jekk jiddelegawx kwalunkwe setgħa lill-Kummissjoni biex tadotta l-atti delegati kif ukoll jekk hux se jkunu meħtieġa setgħat biex jiżguraw kundizzjonijiet uniformi għall-implimentazzjoni tal-att leġiżlattiv; billi l-għoti ta’ dawn is-setgħat delegati jew ta’ implimentazzjoni qatt ma huwa obbligu; billi dan l-għoti għandu madankollu jitqies fejn huma meħtieġa l-flessibbiltà u l-effiċjenza u ma jistgħux jitwasslu permezz tal-proċedura leġiżlattiva ordinarja; billi d-deċiżjoni dwar jekk jiġux mogħtija s-setgħat delegati jew ta’ implimentazzjoni għandha tkun ibbażata fuq fatturi oġġettivi li għandhom jippermettu stħarriġ ġudizzjarju tas-soluzzjoni adottata; billi n-nuqqas ta' każistika dwar l-Artikolu 290 TFUE u dwar il-kriterji mniżżla fih għamlitha aktar diffiċli għall-Parlament Ewropew u l-Kunsill li jaqblu dwar delimitazzjoni bejn atti ta' implimentazzjoni u atti delegati;

E.

billi d-delega tas-setgħa lill-Kummissjoni mhijiex biss kwistjoni teknika iżda tista’ tinvolvi kwistjonijiet ta’ importanza politika konsiderevoli għaċ-ċittadini u l-konsumaturi tal-Unjoni, l-impriżi u setturi sħaħ minħabba l-impatti possibbli soċjoekonomiċi, ambjentali u tas-saħħa tagħhom;

F.

billi n-negozjati leġiżlattivi dwar ħafna suġġetti wrew interpretazzjonijiet diverġenti fost l-istituzzjonijiet dwar ċertu kwistjonijiet; billi, skont l-Artikolu 37a tar-Regoli ta’ Proċedura tal-Parlament, il-kumitati tiegħu jistgħu jitolbu opinjoni mingħand il-Kumitat għall-Affarijiet Legali meta jiskrutinizzaw proposta li tipprevdi atti delegati; billi l-Konferenza tal-Presidenti tat-13 ta' Jannar 2012approvat linja komuni, u fid-19 ta' April 2012 approvat approċċ orizzontali li għandu jiġi segwit mill-kumitati individwali sabiex jingħelbu d-differenzi ta’ opinjoni; billi dik il-linja komuni jeħtieġ li tittieħed pass ieħor ’il quddiem mill-Parlament bit-twaqqif ta' kriterji tiegħu stess għall-applikazzjoni tal-Artikoli 290 u 291 TFUE u billi jagħmel ħiltu biex ikun hemm qbil dwar dawn il-kriterji mal-Kunsill u mal-Kummissjoni;

1.

Iqis li dawn il-kriterji mhux vinkolanti li ġejjin għandhom jiġu segwiti mill-Parlament meta japplika l-Artikoli 290 u 291 TFUE; dan is-sett ta’ kriterji ma jistax jiġi kkunsidrat bħala eżawrjenti:

2.

Iħeġġeġ lill-Kummissjoni u lill-Kunsill jibdew negozjati mal-Parlament sabiex jilħqu ftehim dwar il-kriterji msemmija hawn fuq; iqis li dan jista’ jintlaħaq fil-qafas tar-reviżjoni tal-Ftehim Interistituzzjonali dwar it-Tfassil Aħjar tal-Liġijiet li tkun tinkludi dawn il-kriterji;

3.

Itenni d-deċiżjonijiet meħuda mill-Konferenza tal-Presidenti fil-laqgħat tagħha fit-13 ta' Jannar 2011 u fid-19 ta' April 2012 dwar l-atti delegati u l-atti ta’ implimentazzjoni, u jenfasizza li l-Parlament għandu dejjem jinsisti fuq l-użu tal-atti delegati għas-setgħat kollha delegati lill-Kummissjoni li jissodisfaw il-kriterji stabbiliti fl-Artikolu 290 TFUE, u li l-fajls li fihom id-drittijiet istituzzjonali tal-Parlament dwar l-inklużjoni tal-atti delegati mhumiex salvagwardjati, ma għandhomx jitqiegħdu fl-aġenda plenarja għal vot li jwassal għal ftehim; jenfasizza li l-Parlament, diġà fil-bidu tan-negozjati, għandu jiġbed l-attenzjoni għall-kwistjoni tal-atti delegati u l-atti ta’ implimentazzjoni bħala kwistjoni istituzzjonali ewlenija għall-Parlament;

4.

Jistieden lill-Kummissjoni sabiex fil-futur tiġġustifika espressament u b’mod sostenibbli, għaliex hija tipproponi att delegat jew ta' implimentazzjoni f’abbozz legali, u għalfejn tikkunsidra l-kontenut regolatorju tiegħu mhuwiex essenzjali; ifakkar li huwa ċar mid-dispożizzjonijiet tal-Artikoli 290 u 291 tat-TFUE, li atti delegati u atti ta’ implimentazzjoni huma mfassla għal ħtiġijiet differenti u għalhekk ma jistgħux jiġu sostitwiti wieħed b’ieħor;

5.

Jemmen li, sabiex tissaħħaħ il-pożizzjoni tar-rapporteurs tiegħu fin-negozjati leġiżlattivi, għandu jsir rikors akbar għall-possibbiltà li tintalab opinjoni mingħand il-Kumitat għall-Affarijiet Legali skont l-Artikolu 37a tar-Regoli ta' Proċedura;

6.

Jesprimi tħassib serju dwar il-fatt li l-allinjament tal-acquis mat-Trattat ta’ Lisbona huwa biss parzjalment realtà erba’ snin wara d-dħul fis-seħħ tiegħu; jilqa’ l-preżentazzjoni mill-Kummissjoni tal-proposti reċenti għall-allinjament tal-atti leġiżlattivi li jifdal li jipprovdu għall-użu tal-proċedura regolatorja bi skrutinju (RPS); jenfasizza madankollu l-ħtieġa li jinbdew negozjati dwar dawk il-proposti malajr kemm jista’ jkun, sabiex jiġi ffinalizzat dan l-eżerċizzju qabel it-tmiem tal-leġiżlatura attwali; iqis li mill-inqas, il-każijiet kollha li ġew trattati qabel taħt l-RPS għandhom issa jkunu allinjati mal-Artikolu 290 TFUE, peress li l-miżuri tal-RPS huma wkoll miżuri ta’ ambitu ġenerali mfassla biex jemendaw elementi mhux essenzjali tal-att bażiku, fost l-oħrajn billi jitneħħew uħud minn dawk l-elementi jew billi jiġi ssupplimentat l-istrument biż-żieda ta’ elementi ġodda mhux essenzjali; fl-istess ħin, jistieden lill-Kunsill ikompli bit-taħditiet dwar dawk il-proposti speċifiċi ta’ allinjament li għadhom miżmuma fil-Kunsill, inkluż il-proposti fl-oqsma tal-agrikoltura u s-sajd;

7.

Jesprimi tħassib li, minkejja l-fatt li tista’ tkun soluzzjoni tajba f’ċertu każijiet, iż-żamma sistematika tal-elementi kollha ta' politika fl-att bażiku tista’, maż-żmien, iċċaħħad l-Artikolu 290 TFUE mill-użu tiegħu bħala mezz ta’ valur għar-razzjonalizzazzjoni tal-proċess leġiżlattiv, li kienet ir-raġuni bażika inizjali sabiex tiġi evitata ġestjoni mikro u proċedura ta' kodeċiżjoni mtaqqla u fit-tul; jenfasizza li dan l-approċċ jista' jkun ferm diffiċli biex jiġi applikat f'xi każijiet, bħal fis-setturi fejn it-teknoloġiji għadhom qed jiġu żviluppati;

8.

Jenfasizza li f’dawk il-każijiet fejn ikun ġie deċiż li jintużaw l-atti ta’ implimentazzjoni, it-tim ta’ negozjar tal-Parlament għandu jevalwa sew x’tip ta’ kontroll huwa meħtieġ mill-Istati Membri u jekk għandhiex tintuża l-proċedura ta’ konsultazzjoni jew ta’ eżami; jenfasizza li t-timijiet ta’ negozjar tal-Parlament, f'każijiet fejn tintuża l-proċedura ta’ eżami, għandhom jaċċettaw biss l-hekk imsejħa “klawżola ta’ ebda opinjoni” f’każijiet eċċezzjonali biss u ġġustifikati sew, peress li dan jimpedixxi lill-Kummissjoni milli tadotta l-abbozz tal-att ta’ implimentazzjoni fil-każ ta’ “ebda opinjoni” mill-kumitat magħmul mir-rappreżentanti tal-Istati Membri u ppresedut mill-Kummissjoni;

9.

Jirrakkomanda lill-Kummissjoni biex ma tabbużax minn dawn l-atti delegati biex terġa' tiftaħ id-diskussjonijiet dwar kwistjonijiet li ntlaħaq ftehim dwarhom fil-livell politiku fit-trilogi; jirrimarka li s-setgħa li tadotta atti delegati għandha preferibbilment tingħata lill-Kummissjoni biss għal perjodu limitat ta' żmien;

10.

Iħeġġeġ lill-kumitati tiegħu jimmonitorjaw mill-qrib l-użu tal-atti delegati u ta’ implimentazzjoni fl-isferi ta’ responsabbiltà rispettivi tagħhom; għal dak il-għan, jitlob lill-Kummissjoni ttejjeb l-arranġamenti amministrattivi għat-trażmissjoni u l-iffajljar ta’ dokumenti relatati mal-atti delegati, inkluż dokumenti ta' tħejjija, sabiex tiżgura mill-inqas, l-istess livell ta’ informazzjoni u trasparenza li għandu r-reġistru eżistenti għall-atti ta’ implimentazzjoni u sabiex tiggarantixxi l-fluss simultanju tal-informazzjoni lill-Parlament u lill-Kunsill bħala leġiżlatur;

11.

Iqis li sar progress sinifikanti fl-iżgurar ta' trażmissjoni veloċi tal-atti delegati lill-Kumitati responsabbli, li kellu effett pożittiv fuq l-eżerċizzju tad-dritt ta' skrutinju mill-Membri;

12.

Ifakkar għalhekk fir-responsabbiltà politika tal-leġiżlatur u l-ħtieġa li l-Parlament jiġi involut, b’mod regolari u f’waqtu, fil-fażi ta' tħejjija tal-atti delegati; jitlob lill-Kummissjoni żżomm lill-Parlament, inkluż lir-Rapporteur responsibble għal fajl inkwistjoni, kompletament infurmati dwar l-iskeda ppjanata, il-laqgħat skedati tal-gruppi ta' esperti u l-kontenut tal-atti delegati previsti, inkluż billi tipprovdi aċċess għall-bażijiet tad-data relevanti, bħal CIRCA;

13.

Iħeġġeġ lill-Kummissjoni tirrispetta bis-sħiħ il-paragrafu 15 tal-Ftehim Qafas dwar ir-relazzjonijiet bejn il-Parlament Ewropew u l-Kummissjoni Ewropea, inter alia billi tissimplifika l-proċedura biex tistieden l-esperti tal-Parlament għal laqgħat ma’ esperti nazzjonali, jekk hekk ikun mitlub mill-kumitat Parlamentari responsabbli; jirrikonoxxi li, bħala riżultat tal-attendenza għal dawk il-laqgħat tal-esperti tal-Parlament, il-Kummissjoni tista’ tiġi mistiedna għal laqgħat fil-Parlament biex ikollha skambju addizzjonali ta’ fehmiet dwar it-tħejjija tal-atti delegati; iħeġġeġ lill-Kummissjoni tapplika wkoll il-paragrafu 15 tal-Ftehim Qafas għall-partijiet ta' dawk il-laqgħat tal-Istati Membri u tal-Kummissjoni fejn huma diskussi kwistjonijiet għajr l-atti ta’ implimentazzjoni skont it-tifsira tar-Regolament (UE) Nru 182/2011;

14.

Hu tal-fehma li ż-żmien bejn it-trażmissjoni tal-abbozz finali tal-atti ta' implimentazzjoni u l-adozzjoni tagħhom mill-Kummissjoni hu qasir wisq, b'hekk ma jippermettix sorveljanza adegwata mill-Parlament; iħeġġeġ lill-Kummissjoni, għalhekk, biex tirrispetta bis-sħiħ id-dritt tal-Parlament li jiskrutinizza l-abbozz finali tal-atti ta' implimentazzjoni fi żmien perjodu ta' xahar bi qbil mal-ftehim tal-2008 bejn il-Parlament u l-Kummissjoni dwar il-proċeduri tal-komitoloġija;

15.

Jitlob għall-allokazzjoni ta’ riżorsi tekniċi u dawk tar-riżorsi umani suffiċjenti għal atti delegati u dawk ta' implimentazzjoni, sabiex jiġi żgurat, fost l-oħrajn, it-trasferiment intern u effiċjenti ta’ informazzjoni; jemmen li t-tqassim tal-atti delegati lill-Membri permezz ta' newsletter jiffaċilita l-iskrutinju ta' atti bħal dawn u jippermetti li l-Membri jqajmu oġġezzjonijiet possibbli f'waqthom;

16.

Jirrakkomanda li jkunu maħtura rapporteurs permanenti f'kull kumitat responsabbli għal atti delegati u ta' implimentazzjoni, biex jiggarantixxu koerenza fil-kumitat ikkonċernat u ma' kumitati oħra; iqis li kwistjonijiet simili għandhom ikunu ttrattati b'mod koerenti, filwaqt li tinżamm il-flessibbiltà meħtieġa;

17.

Jilqa' d-disponibilità tal-esperti tal-Kummissjoni biex jieħdu sehem fil-laqgħat ta' informazzjoni mal-Membri, peress li jidher li l-organizzazzjoni ta' laqgħat bħal dawn fi żmien adatt qabel l-adozzjoni tal-atti delegati hija utli sabiex ikunu ċċarati elementi ewlenin ta' atti bħal dawn u tkun iffaċilitata l-ħidma tal-Parlament fil-valutazzjoni tal-atti kkonċernati;

18.

Ikompli jappella b’mod partikolari lill-membri tat-tim tan-negozjar sabiex jiddedikaw attenzjoni speċjali għal atti delegati u ta' implimentazzjoni meta jagħmlu r-rapport lill-kumitat kompetenti wara kull trilogu, skont l-Artikolu 70(4) tar-Regoli ta’ Proċedura tal-Parlament;

19.

Jiddeplora l-fatt li d-dossiers tal-allinjament għal leġiżlazzjoni essenzjali dwar l-agrikoltura u s-sajd ġew blukkati mill-Kunsill wara li fallew in-negozjati fi trilogi informali u fl-ewwel qari tal-Parlament; jenfasizza li r-raġuni għal din is-sitwazzjoni ta' spiss tinsab fin-nuqqas ta' rieda min-naħa tal-Kunsill li jagħmel użu minn atti delegati; jinnota li kien biss fil-kuntest tal-proċeduri leġiżlattivi sħaħ relatati mar-riforma tal-PAK u l-PKS li setgħet tinstab soluzzjoni għall-allinjament li tkun aċċettabbli għaż-żewġ naħat, għalkemm seta' kien hemm qbil dwar xi dispożizzjonijiet dment li ma jkunux jikkostitwixxu preċedent; iħeġġeġ lill-Kunsill jagħmel progress fir-rigward tad-dossiers tal-allinjament pendenti, sabiex il-proċeduri jkunu jistgħu jiġu konklużi qabel it-tmiem tal-leġiżlatura attwali;

20.

Ifakkar li, speċjalment fil-każ tal-Istrument ta' Kooperazzjoni għall-Iżvilupp (DCI), il-Parlament sa mill-2006 ipprattika proċess ta' 'skrutinju demokratiku' fil-forma ta' djalogu politiku mal-Kummissjoni dwar abbozz ta' miżuri; jinnota madankollu li l-esperjenza tal-Parlament dwar din il-prattika kienet varjata, u li l-influwenza tiegħu fuq id-deċiżjonijiet tal-Kummissjoni kienet limitata;

21.

Jindika, li fl-isfera tal-kooperazzjoni għall-iżvilupp, l-atti ta' implimentazzjoni spiss huma bbażati fuq konsultazzjonijiet minn qabel ma' partijiet terzi, u dan il-fatt jagħmilha aktar diffiċli li jsiru tibdiliet fi stadju avvanzat tal-proċedura formali ta' komitoloġija; jenfasizza, għalhekk, li notifika bikrija kif ukoll djalogu mal-Parlament huma pass importanti biex il-Parlament jagħmel użu effettiv tas-setgħa ta' skrutinju;

22.

Jirrimarka li fil-qasam tas-servizzi finanzjarji r-regolamenti dwar l-Awtoritajiet Superviżorji Ewropej (ASE) jintroduċu standards tekniċi regolatorji (STR) u standards tekniċi ta' implimentazzjoni (STI) li permezz tagħhom l-ASE jissottomettu abbozzi ta' STR u STI lill-Kummissjoni għall-adozzjoni; hu tal-fehma li, minħabba l-għarfien tekniku u l-ħiliet speċjalisti tal-ASE, l-atti delegati għandhom jieħdu l-forma ta' STR aktar milli atti delegati ordinarji, kull fejn ikun possibbli; iqis li anki qabel ma tadotta atti delegati ordinarji l-Kummissjoni għandha tfittex il-parir tekniku tal-ASE rilevanti dwar il-kontenut ta' dawk l-atti;

23.

Jirrimarka li, skont ċerti atti leġiżlattivi, il-perjodu għal skrutinju STR jista' jkun estiż b'xahar, minħabba l-volum u l-kumplessità, u jqis li din it-tip ta' flessibbiltà għandha ssir ir-regola; jirrimarka, barra minn hekk, li l-leġiżlatur stabbilixxa perjodu ta' skrutinju ta' tliet xhur, li jista' jiġi estiż bi tliet xhur, għall-atti delegati kollha fl-oqsma tas-servizzi finanzjarji, u jqis li din il-prattika għandha tiġi estiża għal oqsma oħra ta' natura kumplessa;

24.

Jenfasizza li l-arranġamenti li permezz tagħhom l-ebda att delegat ma jista' jiġi ppreżentat matul il-perjodi ta' btala tal-Parlament għandhom japplikaw ukoll għal STR;

25.

Jemmen li s-sejħa għall-partijiet interessati biex ikunu membri fil-gruppi tal-partijiet interessati tal-ASE għandha ddum għal tul ta' żmien biżżejjed (mhux inqas minn xahrejn), tinħareġ permezz ta' diversi mezzi u ssegwi proċess ċar u ssimplifikat sabiex jiġi żgurat li applikazzjonijiet jintlaqgħu minn ħafna kandidati differenti; ifakkar fil-ħtieġa li l-gruppi ta' partijiet interessati tal-ASE jkunu bbilanċjati f'konformità mad-dispożizzjonijiet tar-regolamenti rispettivi;

26.

Ifakkar li fil-qasam tal-impjiegi u l-affarijiet soċjali, il-Parlament ikkuntesta l-validità tad-deċiżjoni tal-EURES quddiem il-Qorti tal-Ġustizzja sabiex jiddefendi l-prerogattivi tiegħu;

27.

Jistieden lill-Kummissjoni tinkludi fil-programm ta' ħidma tagħha proposti biex jiġu emendati l-atti legali kollha li qabel kienu jagħmlu parti mit-tielet pilastru, sabiex jiġu allinjati mal-ġerarkija l-ġdida ta’ normi u sabiex jiġu rispettati s-setgħat, il-kompetenzi u d-dritt għall-informazzjoni tal-Parlament Ewropew dwar id-delega ta’ setgħa lill-Kummissjoni skont it-Trattat ta’ Lisbona; jenfasizza li dan se jirrikjedi valutazzjoni individwali ta’ kull att legali biex jiġu identifikati d-deċiżjonijiet li – bħala elementi essenzjali – jeħtieġ li jittieħdu mil-leġiżlatur, b’mod partikolari fejn dawn jirrelataw mad-drittijiet fundamentali tal-persuni konċernati, u dawk li jistgħu jitqiesu li huma mhux essenzjali (ara s-sentenza tal-Qorti tal-Ġustizzja fil-Kawża C-355/10);

28.

Jiġbed l-attenzjoni dwar il-fatt li l-Kunsill qed ikompli jadotta atti legali abbażi ta' dispożizzjonijiet ta' dak li kien it-tielet pilastru, ħafna wara d-dħul fis-seħħ tat-Trattat ta' Lisbona, u għaldaqstant il-Parlament kellu jibda proċeduri legali quddiem il-Qorti tal-Ġustizzja;

29.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Parlamenti tal-Istati Membri.

29.8.2017   

MT

Il-Ġurnal Uffiċjali tal-Unjoni Ewropea

C 285/18

—

wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 136 flimkien mal-Artikolu 121(2) tiegħu,

—

wara li kkunsidra r-Regolament (UE) Nru 1175/2011 tal-Parlament Ewropew u tal-Kunsill tas-16 ta’ Novembru 2011 li jemenda r-Regolament tal-Kunsill (KE) Nru 1466/97 dwar it-tisħiħ tas-sorveljanza ta’ pożizzjonijiet ta' budget u s-sorveljanza u l-koordinazzjoni ta’ politika ekonomika (1),

—

wara li kkunsidra d-Direttiva tal-Kunsill 2011/85/UE tat-8 ta’ Novembru 2011 dwar ir-rekwiżiti għal oqfsa baġitarji tal-Istati Membri (2),

—

wara li kkunsidra r-Regolament (UE) Nru 1174/2011 tal-Parlament Ewropew u tal-Kunsill tas-16 ta’ Novembru 2011 dwar miżuri ta’ infurzar biex jikkoreġu żbilanċi makroekonomiċi eċċessivi fiż-żona tal-euro (3),

—

wara li kkunsidra r-Regolament tal-Kunsill (KE) Nru 1177/2011 tat-8 ta’ Novembru 2011 li jemenda r-Regolament (KE) Nru 1467/97 dwar li titħaffef u li tiġi ċċarata l-implimentazzjoni tal-proċedura ta’ defiċit eċċessiv (4),

—

wara li kkunsidra r-Regolament (UE) Nru 1176/2011 tal-Parlament Ewropew u tal-Kunsill tas-16 ta’ Novembru 2011 dwar il-prevenzjoni u l-korrezzjoni tal-iżbilanċi makroekonomiċi (5),

—

wara li kkunsidra r-Regolament (UE) Nru 1173/2011 tal-Parlament Ewropew u tal-Kunsill tas-16 ta’ Novembru 2011 dwar l-infurzar effettiv tas-sorveljanza tal-baġit fiż-żona tal-euro (6),

—

wara li kkunsidra r-riżoluzzjoni tiegħu tal-5 ta’ Frar 2013 dwar it-titjib tal-aċċess għall-finanzi għall-SMEs (7),

—

wara li kkunsidra l-Komunikazzjoni tal-Kummissjoni tas-6 ta’ Diċembru 2012 dwar Pjan ta’ Azzjoni għat-tisħiħ tal-ġlieda kontra l-frodi tat-taxxa u l-evażjoni tat-taxxa (COM(2012)0722),

—

wara li kkunsidra r-Regolament (UE) Nru 473/2013 tal-Parlament Ewropew u tal-Kunsill tal-21 ta’ Mejju 2013 dwar dispożizzjonijiet komuni għall-monitoraġġ u l-valutazzjoni tal-abbozzi tal-pjani baġitarji u l-iżgurar tal-korrezzjoni tad-defiċit eċċessiv tal-Istati Membri fiż-żona tal-euro (8),

—

wara li kkunsidra r-Regolament (UE) Nru 472/2013 tal-Parlament Ewropew u tal-Kunsill tal-21 ta’ Mejju 2013 dwar it-tisħiħ tas-sorveljanza ekonomika u baġitarja tal-Istati Membri fiż-żona tal-euro li jesperjenzaw jew ikunu mhedda b’diffikultajiet gravi fir-rigward tal-istabbiltà finanzjarja tagħhom (9),

—

wara li kkunsidra r-riżoluzzjoni tiegħu tat-23 ta’ Ottubru 2013 dwar is-Semestru Ewropew għall-koordinazzjoni tal-politika ekonomika: l-implimentazzjoni tal-prijoritajiet għall-2013 (10),

—

wara li kkunsidra l-Komunikazzjoni tal-Kummissjoni tat-13 ta’ Novembru 2013 dwar l-Istħarriġ Annwali dwar it-Tkabbir tal-2014 (COM(2013)0800),

—

wara li kkunsidra r-riżoluzzjoni tiegħu tal-21 ta' Mejju 2013 dwar il-ġlieda kontra l-frodi fiskali, l-evażjoni fiskali u r-rifuġji fiskali (11),

—

wara li kkunsidra r-riżoluzzjoni tiegħu tat-12 ta’ Diċembru 2013 dwar l-appell għal impenn vinkolanti u li jitkejjel kontra l-evażjoni tat-taxxa u l-evitar tat-taxxa fl-UE (12),

—

wara li kkunsidra r-riżoluzzjoni tiegħu tat-12 ta’ Diċembru 2013 dwar it-tħejjija għal-laqgħa tal-Kunsill Ewropew (19-20 ta’ Diċembru 2013) (13),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Ekonomiċi u Monetarji u l-opinjoni tal-Kumitat għall-Baġits (A7-0084/2014),

A.

billi l-previżjoni l-aktar reċenti tal-ħarifa tal-Kummissjoni turi li t-tkabbir reali tal-PDG fiż-żona tal-euro qed jirritorna bil-mod u huwa mistenni jilħaq il-1,1 % fl-2014, il-qgħad huwa mistenni jonqos u l-inflazzjoni mistennija tibqa’ sew taħt it-2 %;

B.

billi t-tkabbir fi swieq emerġenti qed jistaġna, filwaqt li qed jibqa’ b’saħħtu fl-Istati Uniti u pożittiv fil-Ġappun;

C.

billi, mill-20 sat-22 ta’ Jannar 2014, il-Parlament kellu laqgħa ta’ livell għoli mal-membri parlamentari nazzjonali (fil-kuntest tal-Ġimgħa Parlamentari Ewropea) biex jiddiskutu l-Istħarriġ Annwali dwar it-Tkabbir tal-2014, kif ukoll l-objettivi tal-politika ekonomika ġenerali għat-tkabbir u l-impjiegi, bil-ħsieb li titqies aktar l-effettività tal-politiki u tal-effetti konsegwenzjali potenzjali fl-UE;

D.

billi l-Kummissjoni tirrikonoxxi li l-maġġorparti tal-objettivi tal-istrateġija Ewropa 2020 mhumiex ser jintlaħqu anke fl-aktar xenarju ottimist;

E.

billi l-Parlament laqa' l-introduzzjoni tal-Istrument għall-Konverġenza u l-Kompetittività bħala parti mill-isforzi biex jissaħħaħ il-qafas ta’ governanza;

1.

Jinnota li fl-UE qed iseħħ irkupru ekonomiku iżda dan għadu dgħajjef; jissottolinja l-fatt li tinħtieġ konsolidazzjoni fiskali li tiffavorixxi t-tkabbir u li l-isforzi għandhom jiġu appoġġati sabiex, minn naħa waħda, tkun żgurata l-konformità mal-qafas ta' governanza ekonomika attwali, u min-naħa l-oħra, jinħolqu aktar tkabbir u impjiegi sostenibbli fuq perjodu medju u twil ta' żmien;

2.

Jilqa’ r-rikonoxximent tal-ħtieġa ta’ konsolidazzjoni fiskali li tiffavorixxi t-tkabbir; iħeġġeġ lill-Kummissjoni tittrażmetti din il-prijorità f’rakkomandazzjonijiet konkreti lill-Istati Membri u għall-UE kollha kemm hi, fosthom dawk taħt programmi ta’ aġġustament ekonomiku, sabiex ma jindirizzawx biss il-konsolidazzjoni fiskali iżda anke r-riformi strutturali li jwasslu għal tkabbir reali, sostenibbli u soċjalment bilanċjat, impjiegi, kompetittività msaħħa u żieda fil-konverġenza;

3.

Jinnota li t-twessigħ tal-ispreads tar-rati tal-imgħax sovrani naqqsu b’mod sinifikanti l-marġni ta’ manuvrar fir-rigward tal-politika fiskali f’għadd ta’ Stati Membri; jinnota, wkoll, li l-approċċ lejn il-politika monetarja li ħa l-Bank Ċentral Ewropew (BĊE) għen biex jitnaqqsu l-ispreads tar-rati tal-imgħax sovrani; jinnota li l-BĊE, permezz ta' “forward guidance”, se jżomm din il-politika fuq perjodu qasir u medju ta' żmien, u għalhekk jikkontribwixxi għal tkabbir aktar b'saħħtu;

4.

Jinnota li l-Kummissjoni timmoniterja l-objettivi tal-istrateġija Ewropa 2020 fil-livell nazzjonali u f'dak Ewropew fir-rakkomandazzjonijiet speċifiċi għall-pajjiżi u għalhekk tikkontrolla aktar mill-qrib il-miri stabbiliti għall-impjieg, ir-riċerka u l-iżvilupp, l-edukazzjoni, il-faqar, l-enerġija rinnovabbli u t-tnaqqis tal-emissjonijiet;

5.

Jemmen li l-ekonomija inġenerali tal-UE trid tagħti spinta akbar lill-kompetittività tagħha kemm fir-rigward tal-prezzijiet kif ukoll ta' aspetti oħra għajr il-prezz fl-ekonomija globali, b’mod partikolari biż-żieda fil-kompetittività fis-swieq tal-prodotti u s-servizzi biex tissaħħaħ il-produttività, l-effiċjenza fl-użu tar-riżorsi u biex jitbaxxew il-prezzijiet, u billi żżomm l-ispejjeż tax-xogħol konformi mal-produttività u tiżgura li jitnaqqsu l-iżbilanċi makroekonomiċi interni;

6.

Jirrikonoxxi r-riformi strutturali ambizzjużi implimentati minn dawk l-Istati Membri li esperjenzaw diffikultajiet serji; jinkoraġġixxi lil dawk l-Istati Membri jkomplu bl-isforzi tagħhom; jirrimarka li jeħtieġ li l-isforzi għar-riformi strutturali jitkomplew b’determinazzjoni u li jiġu monitorjati sabiex tiġi żgurata l-effettività tar-riforma u biex jinbena fuq il-progress li diġà sar; jinkoraġġixxi l-adozzjoni u l-implimentazzjoni ta' programmi ta’ riforma strutturali li jippromwovu l-konverġenza u l-kompetittività fil-livell nazzjonali u f'dak Ewropew, u jżidu t-tkabbir sostenibbli u jippromwovu l-impjieg; jissottolinja l-importanza tal-implimentazzjoni rapida u effettiva ta’ programmi u skemi għall-ġlieda kontra l-qgħad, b’mod speċjali fost iż-żgħażagħ;

7.

Jissottolinja l-importanza tat-tnedija jew it-tkomplija tal-proċess ta’ riformi strutturali koerenti u sostenibbli għall-istabbiltà fuq perjodu medju u twil ta' żmien; jenfasizza li l-UE ma tistax tikkompeti abbażi tal-kostijiet ġenerali jew tax-xogħol biss, iżda jeħtieġ li tinvesti aktar fir-riċerka, l-innovazzjoni u l-iżvilupp, l-edukazzjoni u l-ħiliet, u l-effiċjenza fl-użu tar-riżorsi, kemm fil-livell nazzjonali kif ukoll f'dak Ewropew;

8.

Itenni t-talba tiegħu li jiġi adottat att legali dwar 'linji gwida ta' konverġenza' skont il-proċedura leġiżlattiva ordinarja, li jistabbilixxu, għal perjodu stabbilit, numru limitat ħafna ta' miri għall-miżuri ta' riforma l-aktar urġenti u jtenni wkoll it-talba tiegħu biex l-Istati Membri jiżguraw li l-programmi nazzjonali ta' riforma għandhom jiġu stabbiliti abbażi tal-linji gwida ta' konverġenza msemmija hawn fuq u għandhom jiġu vverifikati mill-Kummissjoni; jistieden lill-Istati Membri jikkommettu ruħhom biex jimplimentaw bis-sħiħ il-programmi nazzjonali ta' riforma tagħhom; jissuġġerixxi li, fuq din il-bażi, l-Istati Membri jistgħu jidħlu fi 'sħubija ta' konverġenza' mal-istituzzjonijiet tal-UE, bil-possibilità ta' finanzjament kundizzjonali għall-attivitajiet ta' riforma; itenni li kooperazzjoni ekonomika aktar b’saħħitha bħal din għandha timxi id f’id mal-mekkaniżmu finanzjarju bbażat fuq l-inċentivi; iqis li kull finanzjament jew strument addizzjonali, bħall-mekkaniżmu ta’ solidarjetà, għandu jkun parti integrali mill-baġit tal-UE, iżda barra mill-pakkett miftiehem tal-qafas finanzjarju pluriennali (QFP);

9.

Jesprimi preokkupazzjoni dwar id-dejn pubbliku u privat ġenerali tal-Istati Membri fiż-żona tal-euro; jirrimarka li jeħtieġ li l-UE tmur lil hinn minn mudell ta’ tkabbir ibbażat fuq akkumulazzjoni tad-dejn u konsum tar-riżorsi eċċessivi;

10.

Jistieden lill-Istati Membri, għalhekk, jagħtu attenzjoni partikolari, fit-tfassil ta' politiki u riformi ekonomiċi, lill-impatt fuq il-ġenerazzjoni żagħżugħa ta' Ewropej kif ukoll fuq il-ġenerazzjonijiet futuri, sabiex iż-żgħażagħ ma jiċċaħdux minn opportunitajiet mill-bidu nett; jissottolinja l-fatt li jeħtieġ li jsiru aktar sforzi biex jiġu miġġielda l-effetti fit-tul tal-qgħad u b’mod partikolar tal-qgħad fost iż-żgħażagħ;

11.

Jirrikonoxxi lil dawk l-awtoritajiet tal-Istati Membri li implimentaw b’suċċess programmi ta’ aġġustament makroekonomiku jew programmi tas-settur finanzjarju;

12.

Jirrimarka li kundizzjoni neċessarja għas-suċċess ta' programmi ta' assistenza finanzjarja hija kombinazzjoni ta' solidarjetà u kundizzjonalità, sjieda b'saħħitha u impenn favur ir-riforma; iħeġġeġ lill-Kummissjoni u lill-Istati Membri, madankollu, jinkorporaw l-assistenza finanzjarja u s-sistema ad hoc tat-Trojka fi struttura legali mtejba li tkun konformi mal-qafas ta' governanza ekonomika tal-UE u mal-liġi Komunitarja, biex b'hekk jiggarantixxu r-responsabbiltà demokratika;

13.

Jissottolinja l-fatt li l-Unjoni Ekonomika u Monetarja (UEM) tinsab ’il bogħod milli tkun kompleta, u jfakkar lill-Kummissjoni fl-obbligi u l-impenji tagħha li ttejjeb it-tkabbir u l-konverġenza ekonomika, u li ssaħħaħ l-kompetittività fl-UE; jemmen li l-aħjar mod biex dan jinkiseb ikun jekk finalment il-Kummissjoni kellha tressaq aktar proposti għall-ikkompletar tal-UEM b'konformità mal-linji gwida kollha fil-pjan ta’ azzjoni tagħha għal UEM profonda u ġenwina; jinnota li l-ikkompletar tal-UEM għandu jkun ibbażat fuq il-metodu Komunitarju;

14.

Jirrikonoxxi l-kisbiet tar-regolamenti finanzjarji ġodda u riveduti tal-UE sabiex tingħeleb il-kriżi finanzjarja; jinnota li l-ikkompletar tat-tliet pilastri tal-Unjoni Bankarja u l-implimentazzjoni tar-regoli l-ġodda dwar ir-rekwiżiti kapitali għall-banek jikkontribwixxu għall-istabbiliment mill-ġdid tal-fiduċja fir-reżiljenza tas-settur bankarju Ewropew;

15.

Jilqa’ l-istqarrija tal-Kummissjoni li tgħid li l-ogħla prijorità tal-Istħarriġ Annwali dwar it-Tkabbir (SAT) tal-2014 hija li jinbnew tkabbir u kompetittività sostenibbli, intelliġenti u inklużivi li jwasslu għal aktar ħolqien ta' impjiegi;

16.

Jaqbel mal-Kummissjoni li l-Istati Membri jeħtieġ li jkomplu jippruvaw jiksbu konsolidazzjoni fiskali li tiffavorixxi t-tkabbir; jistieden lill-Istati Membri jissimplifikaw is-sistemi tat-taxxa, inaqqsu t-taxxi u l-kontribuzzjonijiet tas-sigurtà soċjali, speċjalment għal dawk bi dħul baxx u medju, u li jintaxxaw aktar il-konsum u l-attivitajiet li jagħmlu ħsara lill-ambjent pjuttost milli x-xogħol sabiex jistimolaw it-tkabbir, l-investiment privat u l-ħolqien tal-impjiegi, biex l-isforzi ta' konsolidazzjoni jsiru aktar effiċjenti, u biex jiżdiedu l-investimenti fl-edukazzjoni, ir-riċerka u l-iżvilupp, u l-politiki attivi fis-suq tax-xogħol;

17.

Iħeġġeġ lill-Istati Membri fi programm ta' aġġustament ikomplu jimplimentaw jew jibdew jimplimentaw riformi strutturali sostenibbli u li jiffavorixxu t-tkabbir filwaqt li jsaħħu l-isforzi biex jintlaħqu l-objettivi tal-istrateġija Ewropa 2020; jesprimi preokkupazzjoni dwar in-nuqqas ta’ sjieda ta’ riformi speċifiċi f’dawk l-Istati Membri li qed jesperjenzaw defiċits eċċessivi fil-baġit jew fil-kont kurrenti; iqis li l-prinċipju ta' “frontloading” kif ukoll id-distribuzzjoni immedjata għandhom jiġu applikati għall-fondi kollha għall-perjodu 2014-2020 imfassla biex jagħtu spinta lit-tkabbir ekonomiku, l-impjieg u l-investiment strateġiku, b’mod partikolari fir-rigward tal-Inizjattiva favur l-Impjieg taż-Żgħażagħ;

18.

Jenfasizza l-importanza tal-monitoraġġ u l-implimentazzjoni tar-rakkomandazzjonijiet speċifiċi għall-pajjiżi, is-sorveljanza multilaterali, l-iskambju ta’ esperjenzi u l-aħjar prattiki u l-evalwazzjonijiet bejn il-pari bħala mezzi li jistimolaw dibattitu u pressjoni fuq il-pari, biex b’hekk tiġi pprovduta direzzjoni li tgħin fil-ħolqien tal-momentum u l-aċċettazzjoni meħtieġa għar-riformi;

19.

Jirrimarka għal darb’oħra li nuqqas ta’ riformi ambizzjużi biex tissaħħaħ il-kompetittività tal-ekonomiji Ewropej, kif ukoll biex tiġi ssalvagwardjata s-sostenibbiltà tas-sistemi tas-sigurtà soċjali u tal-kura tas-saħħa se jpoġġi piż eċċessiv fuq il-ġenerazzjonijiet futuri; jirrimarka wkoll dwar l-importanza tar-rettifikazzjoni ta' sitwazzjonijiet ta' defiċit eċċessiv u ta' żbilanċi fil-kont kurrenti;

20.

Jirrimarka għal darb'oħra li l-istituzzjonijiet sovrani u finanzjarji juru vulnerabbiltajiet kostanti f’ambjent ta’ tkabbir baxx;

21.

Jenfasizza li jeħtieġ li r-riformi strutturali jiġu kkomplementati b'investiment aktar fit-tul fl-edukazzjoni, ir-riċerka, l-innovazzjoni u l-enerġija sostenibbli; jemmen li s-sħubijiet pubbliċi-privati jistgħu jitqiesu wkoll bħala għodda biex jitħeġġeġ l-investiment u biex jinkiseb tkabbir intelliġenti u sostenibbli li jikkomplementaw il-programmi ta' investiment pubbliku;

22.

Jitlob li tittieħed azzjoni aktar b’saħħitha u aktar konsistenti fuq il-bażi tal-Pjan ta’ Azzjoni komprensiv tal-Kummissjoni biex tissaħħaħ il-ġlieda kontra l-evażjoni tat-taxxa; iħeġġeġ lill-Kummissjoni tinkorpora miri tanġibbli u li jistgħu jitkejlu fl-Istrateġija Ewropa 2020;

23.

Jenfasizza li l-aċċess għall-fondi, partikolarment għall-SMEs, huwa wieħed mill-akbar ostakli għat-tkabbir fl-UE; jemmen li jinħtieġu aktar alternattivi għall-finanzjament bankarju billi tittejjeb l-allokazzjoni effiċjenti ta' kapital permezz tas-swieq tal-kapital, jiġi stimolat l-investiment fit-tul u jsir użu sħiħ mill-istrumenti finanzjarji innovattivi ġodda tal-UE mfassla biex jappoġġaw l-aċċess għas-swieq tal-kapital għall-SMEs; jemmen li l-ikkompletar tal-Unjoni Bankarja għandu jsaħħaħ l-aċċess għall-finanzi u joħloq kundizzjonijiet ekwi biex l-SMEs jiksbu aċċess għall-fondi; jissottolinja l-ħtieġa li jiġi limitat aktar il-piż amministrattiv għall-SMEs u li jitqies kontinwament il-prinċipju tal-proporzjonalità fl-iżvilupp tar-reġimi regolatorji; jemmen li l-Bank Ewropew tal-Investiment (BEI) jista' jiżvolġi rwol aktar attiv fl-għoti ta' aċċess għall-fondi għall-ekonomija reali; iqis li l-proposti dwar il-finanzjament tal-BEI li saru fil-Kunsilli l-aktar reċenti, b'mod partikolari dawk marbuta mal-finanzjament għall-SMEs, jistgħu u għandom ikunu aktar ambizzjużi;

24.

Itenni l-importanza tal-ikkompletar tas-Suq Uniku għat-tkabbir fl-UE; jemmen li l-Istati Membri u l-Kummissjoni mhux qed iwettqu l-impenji tagħhom biex is-Suq Uniku jiġi kkompletat;

25.

Jissottolinja l-fatt li n-nuqqas ta’ suq tax-xogħol intern li jiffunzjona sew u approċċ sostenibbli għall-immigrazzjoni qed ixekkel it-tkabbir fl-UE; jenfasizza l-vantaġġi makroekonomiċi għall-Istati Membri li jimmodernizzaw is-swieq tax-xogħol tagħhom u jħeġġeġ lill-Kummissjoni u lill-Istati Membri jikkunsidraw miżuri speċifiċi għat-tisħiħ ta' suq tax-xogħol komuni li jirnexxi bbażat fuq il-moviment liberu tal-ħaddiema, kundizzjonijiet ekwi effettivi u l-prinċipju tal-konverġenza soċjali 'l fuq, kif ukoll politika tal-immigrazzjoni adegwata u inklużiva kemm fil-livell nazzjonali kif ukoll f'dak Ewropew;

26.

Jistieden lill-Kummissjoni tispjega lill-Parlament il-miżuri speċifiċi li biħsiebha tieħu sabiex tiffaċilita u tilħaq l-għanijiet tagħha ta’ aktar tkabbir sostenibbli u ta' kompetittività msaħħa;

27.

Jemmen li b’mod ġenerali l-SAT mhuwiex dettaljat biżżejjed u ma jipprovdix il-mezzi sabiex jintlaħqu l-objettivi tiegħu;

28.

Jieħu nota tar-Rapport dwar il-Mekkaniżmu ta’ Twissija; jinnota t-tnaqqis gradwali fl-iżbilanċi interni fl-ekonomija tal-UE; jiġbed l-attenzjoni wkoll lejn l-iżbilanċi esterni, inklużi s-surpluses esterni eċċessivi u t-tnaqqis tal-ishma tas-suq tal-esportazzjoni fil-biċċa l-kbira tal-Istati Membri;

29.

Jirrimarka li l-objettiv tal-proċedura ta’ żbilanċ makroekonomiku huwa li jiġu evitati l-effetti konsegwenzjali negattivi tal-politiki nazzjonali li jkunu mfassla ħażin għal Stati Membri oħra taż-żona tal-euro; huwa preokkupat li l-Kummissjoni, fil-qari tagħha tat-tabella ta’ valutazzjoni, ma tqisx biżżejjed il-fatt li ż-żona tal-euro u l-Istati Membri inklużi fiha huma ekonomiji interdipendenti u miftuħa;

30.

Jieħu nota tal-valutazzjoni tal-Kummissjoni li numru ta’ żbilanċi makroekonomiċi kbar qed jiġu kkoreġuti; jirrimarka li, sabiex tissaħħaħ aktar il-kompetittività ġenerali tal-UE, il-Kummissjoni trid tqis is-surplus tal-kont kurrenti ta' Stat Membru meta mqabbel mal-bqija taż-żona tal-euro;

31.

Huwa preokkupat li l-biċċa l-kbira tal-Istati Membri għadhom qed jitilfu l-ishma tas-suq fuq livell globali u għandhom pożizzjoni ta’ investiment internazzjonali netta negattiva ħafna; jiddispjaċih li karatteristiċi importanti oħra li għandhom influwenza qawwija fuq il-kompetittività, bħall-ispejjeż kapitali għal kull unità, għadhom ma ġewx integrati fit-tabella ta’ valutazzjoni għall-iżbilanċi makroekonomiċi minkejja talbiet ripetuti mill-Parlament;

32.

Għadu preokkupat dwar in-nuqqas ta’ progress fit-tnaqqis tal-livelli tad-dejn eċċessiv privat; jirrimarka li dan mhuwiex biss ta’ tħassib għall-istabbiltà finanzjarja, iżda jillimita wkoll il-potenzjal tat-tkabbir tal-UE;

33.

Jirrimarka li s-sitwazzjoni attwali ta' rati tal-imgħax straordinarjament baxxi fil-kurva tar-rendita hija fatt ta' tħassib rigward it-tfaddil privat u d-dispożizzjonijiet ta' rtirar għaċ-ċittadini Ewropej;

34.

Jinnota l-ewwel valutazzjoni tal-Kummissjoni tal-abbozz ta' pjanijiet baġitarji tal-Istati Membri; jissottolinja li l-eżami tal-abbozz ta' pjanijiet baġitarji jtejjeb is-sorveljanza u l-monitoraġġ multilaterali tas-sitwazzjoni baġitarja tal-Istati Membri;

35.

Huwa preokkupat li żewġ Stati Membri biss laħqu l-objettiv tagħhom għal perjodu medju ta' żmien; jistieden lill-Istati Membri ikomplu bl-isforzi tagħhom u, jekk meħtieġ, isaħħuhom, peress li l-konsolidazzjoni li tiffavorixxi t-tkabbir fl-Istati Membri li mhumiex konformi hija neċessarja;

36.

Jenfasizza li s-Semestru Ewropew m’għandu bl-ebda mod jipperikola l-prerogattivi tal-Parlament Ewropew u dawk tal-parlamenti nazzjonali; jissottolinja l-fatt li għandu jkun hemm qasma ċara bejn il-kompetenzi nazzjonali u dawk tal-UE u li l-Parlament huwa s-sede tar-responsabbiltà fil-livell tal-Unjoni; iħeġġeġ lill-Kummissjoni tiżgura l-involviment formali u xieraq tal-Parlament Ewropew fil-passi kollha tal-proċess tas-Semestru Ewropew sabiex tiżdied il-leġittimità demokratika tad-deċiżjonijiet meħuda;

37.

Jenfasizza l-ħtieġa li tissaħħaħ ir-responsabbiltà demokratika għall-Parlament Ewropew u dik tal-parlamenti nazzjonali fir-rigward ta’ elementi essenzjali tal-operat taż-żona tal-euro, bħall-Mekkaniżmu Ewropew ta' Stabbiltà, id-deċiżjonijiet tal-Grupp tal-euro u l-monitoraġġ u l-evalwazzjoni tal-programmi ta’ assistenza finanzjarja; jitlob lill-Kummissjoni twettaq u tippubblika evalwazzjonijiet interni ex post tar-rakkomandazzjonijiet u l-parteċipazzjoni tagħha fit-Trojka;

38.

Jirrimarka li l-problema ewlenija f’bosta Stati Membri hija li l-frammentazzjoni tas-swieq finanzjarji tirriżulta f’nuqqas ta’ finanzjament u f'aktar spejjeż ta’ finanzjament, speċjalment għall-SMEs; iqis li l-BĊE għandu jżomm ir-rwol proattiv tiegħu favur id-deframmentazzjoni u jqis li l-BEI jista' jippromwovi aktar il-finanzjament għall-SMEs, l-intraprenditorija, l-esportazzjonijiet u l-innovazzjoni, li lkoll huma vitali għall-irkupru ekonomiku;

39.

Jinnota li ftit li xejn hemm differenzi bejn l-SAT tal-2014 u dak tal-2013; jiddispjaċih, għalhekk, għal darb'oħra, rigward l-assenza ta' proposti ġodda mill-Kummissjoni dwar ir-rwol li jista' jiżvolġi l-baġit tal-UE biex jistimola t-tkabbir u l-ħolqien tax-xogħol sabiex jintlaħqu l-miri tal-istrateġija Ewropa 2020;

40.

Jiddispjaċih li l-Kummissjoni naqset milli tagħti lill-Parlament rapport eżawrjenti dwar l-implimentazzjoni tal-patt dwar it-tkabbir u l-impjiegi miftiehem f'Ġunju 2012;

41.

Jistieden lill-Kummissjoni tipprovdi tabella ta' valutazzjoni aġġornata regolarment dwar l-implimentazzjoni tal-programmi l-ġodda, li permezz tagħha jkunu jistgħu jsiru paraguni bejn l-Istati Membri, li jippermettu li jittieħdu deċiżjonijiet aktar infurmati fir-rigward tal-prijoritajiet tal-infiq, fid-dawl tax-xejriet osservabbli mill-awtorità baġitarja;

42.

Jissottolinja l-fatt li l-livell baxx ta' approprjazzjonijiet ta' pagament u l-limitu massimu strett fuq il-pagamenti jibqgħu problema kruċjali għall-baġit tal-UE, li għandhom effett partikolarment negattiv fuq l-irkupru ekonomiku, billi pagamenti tardivi huma ta' ħsara primarjament għall-benefiċjarji diretti; jissottolinja, barra minn hekk, li dan il-livell baxx ta' pagament fil-baġit tal-UE tal-2014 huwa b'kontradizzjoni totali tal-miżuri miftiehma mill-koleġiżlaturi biex iżidu temporanjament ir-rati ta' kofinanzjament tal-UE għall-programmi tal-UE li huma taħt ġestjoni kondiviża fl-Istati Membri li għaddejjin jew jinsabu mhedda minn diffikultajiet serji fir-rigward tal-istabilità finanzjarja tagħhom; ifakkar fil-ħtieġa li tiġi żgurata, fid-dawl tal-implimentazzjoni, il-progressjoni ordinata tal-pagamenti sabiex tevita kwalunkwe trasferiment anomalu ta' impenji pendenti (“RAL”) għall-baġit tal-2015 u, f'dan ir-rigward, sabiex jintużaw, fejn xieraq, il-mekkaniżmi ta' flessibbiltà differenti inklużi fir-Regolament dwar il-QFP; biħsiebu jkompli l-monitoraġġ bir-reqqa tiegħu tas-sitwazzjoni ġenerali dwar il-pagamenti, b'mod speċjali fir-rigward tal-livell għoli ħafna ta' pagamenti li għadhom iridu jsiru għall-ikkompletar tal-programmi tal-QFP preċedenti;

43.

Jiddispjaċih għal darb'oħra li l-Istati Membri qed jibqgħu jqisu l-kontribuzzjoni tagħhom għall-baġit tal-UE bħala parametru varjabbli ta' aġġustament għall-isforzi tagħhom ta' konsolidazzjoni li, minnu nnifsu, iwassal għal tnaqqis artifiċjali fil-volum ta' pagamenti disponibbli fil-baġit tal-UE; jistieden lill-Kummissjoni tqis bis-sħiħ din ix-xejra rikorrenti u perikoluża meta tivvaluta l-pjanijiet baġitarji tal-Istati Membri u tipproponi azzjonijiet konkreti biex treġġagħha lura;

44.

Ifakkar fil-fehma tiegħu li s-sitwazzjoni fiskali tal-Istati Membri tista' tittejjeb permezz ta' sistema ġdida ta' riżorsi proprji għall-finanzjament tal-baġit tal-Unjoni li tnaqqas il-kontribuzzjonijiet tal-introjtu nazzjonali gross, u b'hekk l-Istati Membri jkunu jistgħu jwettqu l-isforzi tagħhom ta' konsolidazzjoni mingħajr ma jipperikolaw il-finanzjament tal-UE li jappoġġa investiment f'miżuri ta' rkupru ekonomiku u ta' riforma; jissottolinja, għalhekk, l-importanza li jagħti lill-grupp ta' livell għoli l-ġdid dwar ir-riżorsi proprji, li għandu jwassal għal riforma vera tal-finanzjament tal-UE;

45.

Itenni li kooperazzjoni ekonomika aktar b'saħħitha għandha timxi id f'id ma' mekkaniżmu bbażat fuq l-inċentivi; iqis li kull finanzjament jew strument addizzjonali, bħall-mekkaniżmu ta’ solidarjetà, għandu jkun parti integrali mill-baġit tal-UE, iżda barra mill-pakkett miftiehem tal-QFP;

46.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill Ewropew, lill-Kunsill, lill-Kummissjoni, lill-Gvernijiet u lill-Parlamenti tal-Istati Membri u lill-Bank Ċentrali Ewropew.

29.8.2017   

MT

Il-Ġurnal Uffiċjali tal-Unjoni Ewropea

C 285/24

—

wara li kkunsidra l-Artikolu 9 tat-Trattat dwar il-Funzjonament tal-Unjoni Ewropea (TFUE),

—

wara li kkunsidra l-Artikoli 145, 148, 152 u 153(5) tat-TFUE,

—

wara li kkunsidra l-Artikolu 28 tal-Karta tad-Drittijiet Fundamentali tal-Unjoni Ewropea,

—

wara li kkunsidra l-komunikazzjoni mill-Kummissjoni tat-13 ta' Novembru 2013 bl-isem “Stħarriġ Annwali dwar it-Tkabbir tal-2014 (COM(2013)0800), u l-abbozz tar-Rapport Konġunt dwar l-Impjiegi anness magħha;

—

wara li kkunsidra r-riżoluzzjoni tiegħu tat-23 ta' Ottubru 2013 dwar ‘is-Semestru Ewropew għall-koordinazzjoni tal-politika ekonomika: l-implimentazzjoni tal-prijoritajiet għall-2013’ (1),

—

wara li kkunsidra l-komunikazzjoni tal-Kummissjoni tat-2 ta' Ottubru 2013 bit-titolu ‘It-tisħiħ tad-dimensjoni soċjali tal-Unjoni Ekonomika u Monetarja’ (COM(2013)0690),

—

wara li kkunsidra l-Mistoqsija Orali O-000122/2013 – B7-0524/2013 lill-Kummissjoni, u lir-riżoluzzjoni relatata tal-Parlament tal-21 ta' Novembru 2013 dwar il-komunikazzjoni tal-Kummissjoni bit-titolu ‘It-tisħiħ tad-dimensjoni soċjali tal-Unjoni Ekonomika u Monetarja’ (2) ,

—

wara li kkunsidra l-komunikazzjoni tal-Kummissjoni tat-3 ta' Marzu 2010 bl-isem ‘Ewropa 2020: Strateġija għal tkabbir intelliġenti, sostenibbli u inklussiv’ (COM(2010)2020),

—

wara li kkunsidra r-riżoluzzjoni tiegħu tat-8 ta' Settembru 2010 dwar 'il-proposta għal deċiżjoni tal-Kunsill dwar linji gwida għall-politika tal-impjiegi tal-Istati Membri: It-Tieni Parti tal-Linji Gwida Integrati tal-Istrateġija Ewropa 2020' (3),

—

wara li kkunsidra l-Komunikazzjoni mill-Kummissjoni tat-18 ta’ April 2012 bit-titolu 'Lejn irkupru li jwassal għall-ħolqien abbundanti ta’ impjiegi' (COM(2012)0173),

—

wara li kkunsidra l-Mistoqsija Orali O-000120/2012 lill-Kummissjoni u r-riżoluzzjoni relatata tal-Parlament tal-14 ta’ Ġunju 2012 dwar ‘Lejn irkupru li jwassal għall-ħolqien abbundanti ta’ impjiegi’ (4),

—

wara li kkunsidra l-komunikazzjoni tal-Kummissjoni tat-23 ta' Novembru 2010 bl-isem ‘Aġenda għall-ħiliet ġodda u l-impjiegi: Kontribut Ewropew lejn livell massimu ta' impjiegi’ (COM(2010)0682, u r-riżoluzzjoni tal-Parlament tas-26 ta' Ottubru 2011 dwarha (5),

—

wara li kkunsidra l-komunikazzjoni tal-Kummissjoni tas-16 ta' Diċembru 2010 bl-isem ‘Il-Pjattaforma Ewropea kontra l-Faqar u l-Esklużjoni Soċjali: Qafas Ewropew għall-koeżjoni soċjali u territorjali’ (COM(2010)0758), u r-riżoluzzjoni tal-Parlament tal-15 ta' Novembru 2011 dwarha (6),

—

wara li kkunsidra l-Komunikazzjoni mill-Kummissjoni bl-isem ‘Inizjattiva għall-Opportunitajiet taż-Żgħażagħ’ (COM(2011)0933),

—

wara li kkunsidra r-riżoluzzjoni tiegħu tal-20 ta’ Novembru 2012 dwar ‘il-Patt dwar l-Investiment Soċjali’ – bħala reazzjoni għall-kriżi” (7),

—

wara li kkunsidra l-Komunikazzjoni mill-Kummissjoni tal-20 ta' Frar 2013 bit-titolu “Lejn Investiment Soċjali għat-Tkabbir u l-Koeżjoni – inkluża l-implimentazzjoni tal-Fond Soċjali Ewropew 2014-2020” (COM(2013)0083);

—

wara li kkunsidra l-Mistoqsija Orali O-000057/2013 – B7-0207/2013lill-Kummissjoni, u lir-riżoluzzjoni relatata tal-Parlament tat-12 ta' Ġunju 2013 dwar il-komunikazzjoni tal-Kummissjoni “Lejn Investiment Soċjali għat-Tkabbir u l-Koeżjoni – inkluża l-implimentazzjoni tal-Fond Soċjali Ewropew 2014-2020” (8) ,

—

wara li kkunsidra r-Riżoluzzjoni tal-Parlament Ewropew tal-5 ta’ Frar 2013 dwar it-titjib tal-aċċess għall-finanzi għall-SMEs (9)

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Impjiegi u l-Affarijiet Soċjali (A7-0091/2014),

A.

billi r-reċessjoni fiż-żona tal-euro waslet fi tmiemha fit-tieni kwart tal-2013, meta wieħed jara ċ-ċifri, iżda billi t-tkabbir annwali fiż-żona tal-euro se jibqa’ fraġli din is-sena u l-qgħad għadu fuq livell għoli ħafna; billi jeħtieġ li t-tkabbir sostenibbli jitjieb b’mod sinifikanti sabiex dan ikun jista’ jitqies irkupru fit-tul u sabiex ikun iġġenerat il-momentum meħtieġ biex itaffi l-isfidi soċjoekonomiċi tal-UE;

B.

billi l-qgħad fl-UE laħaq il-figura allarmanti ta’ 26,6 miljun, u l-qgħad fit-tul żdied fil-maġġoranza tal-Istati Membri u laħaq ammont rekord fl-UE inġenerali; billi t-tnaqqis fl-impjiegi kien aktar qawwi f’dawk il-pajjiżi li kellhom iwettqu riforma fiskali sostanzjali;

C.

billi r-rati ta' qgħad taż-żgħażagħ laħqu livelli mingħajr preċedenti, b'medja ta' 23 % għall-UE kollha, u billi f'xi Stati Membri r-rata ta' qgħad fost iż-żgħażagħ fl-età ta' bejn 16 u 25 sena hija ogħla minn 50 %; billi s-sitwazzjoni tas-suq tax-xogħol hija partikolarment kritika għaż-żgħażagħ, indipendentement mil-livell ta' edukazzjoni tagħhom, li spiss jispiċċaw qegħda jew b'kuntratti ta' impjieg prekarji, skemi ta' taħriġ bla ħlas jew jemigraw; billi fl-2011 it-telf ekonomiku minħabba n-nuqqas ta’ impenn taż-żgħażagħ fis-suq tax-xogħol kien stmat għal EUR 153 biljun fl-Istati Membri, li jikkorrispondi għal 1,2 % tal-PDG tal-UE; billi r-riġidità eċċessiva tar-regolament dwar is-suq tax-xogħol f'diversi Stati Membri jwassal għal nuqqas ta' flessibilità għall-assorbiment effettiv tax-xokkijiet; billi l-leġiżlazzjoni attwali fil-qasam tas-suq tax-xogħol f'xi każijiet tista' tipproteġi b’mod sproporzjonat persuni b’informazzjoni privileġġjata u tolqot negattivament l-inklużjoni taż-żgħażagħ fil-forza tax-xogħol;

D.

billi din kienet ir-riċessjoni l-aktar profonda u li damet l-aktar fl-istorja ekonomika tal-aħħar 100 sena, iżda ġie evitat diżastru, filwaqt li l-effetti tal-kriżi ġew distribwiti fuq diversi snin, anki deċennji; billi dawn l-effetti jinkludu l-fatt li l-qgħad fit-tul għadu qed jiżdied, li possibilment jirriżulta f'qgħad strutturali; billi s-segmentazzjoni tas-suq tax-xogħol kompliet tiżdied, u f’diversi Stati Membri d-dħul medju tal-familji qed jonqos u l-indikaturi juru tendenza għal livelli daqsxejn ogħla u forom aktar profondi ta’ faqar u esklużjoni soċjali, inkluż il-faqar fost dawk li jaħdmu għal numru ta' snin li ġejjin;

E.

billi riċentement il-Fond Monetarju Internazzjonali (FMI) innota li hemm skop biex jiġi intaxxat aħjar u b'mod aktar progressiv, li jista' jgħin biex inaqqas l-inugwaljanzi fl-UE; billi hemm il-ħtieġa li l-piż tat-taxxa jitneħħa minn fuq il-ħaddiema u jitqiegħed fuq forom oħra ta' taxxa sostenibbli sabiex jiġu promossi t-tkabbir u l-ħolqien tal-impjiegi u jkun hemm dħul addizzjonali fil-proċess u titjieb il-leġittimità tal-isforz ta' konsolidazzjoni;

F.

billi l-effetti tal-kriżi rriżultaw f’diverġenza mingħajr preċedenti u li qed tikber fl-output u l-impjieg bejn il-pajjiżi ċentrali u dawk periferiċi; billi d-distakk bejn il-pajjiżi ċentrali u periferiċi f'rati ta' qgħad laħaq 10 punti perċentwali fl-2012, meta mqabbel mas-sena 2000 fejn kien hemm 3,5 punti perċentwali biss. billi din id-diverġenza hija prevista li tilħaq valur massimu din is-sena;

G.

billi huwa meħtieġ li tkompli tiġi segwita konsolidazzjoni fiskali favur it-tkabbir u differenzjata sabiex tiggarantixxi s-sostenibbiltà tal-istat soċjali u tal-finanzi pubbliċi fit-tul;

H.

billi t-titjib ekonomiku għandu għalhekk jittieħed bħala inkoraġġiment biex jiġu segwiti sforzi b’determinazzjoni iżda, sabiex tingħata attenzjoni lit-tkabbir u l-impjiegi, sabiex jinżammu l-programmi ta’ riforma bil-għan li titjieb il-kompetittività u biex jiġi żgurat l-irkupru b’mod dejjiemi;

I.

billi l-iżbalji fil-previżjonijiet ekonomiċi tal-Kummissjoni għat-tkabbir u l-qgħad fi snin riċenti juru l-ħtieġa ta' titjib fil-mudell ta' previżjoni u ta' strateġija bil-għan li tintemm il-kriżi; billi l-pass tal-konsolidazzjoni fiskali naqas; billi l-ħolqien tal-impjiegi fiż-żona tal-euro għadu dgħajjef ħafna; billi skont il-Eurostat, l-inflazzjoni fiż-żona tal-euro tinsab taħt il-miri tal-BĊE;

J.

billi l-iżviluppi demografiċi qed jagħmlu pressjoni fuq il-baġits nazzjonali u s-sistemi tal-pensjonijiet; billi l-istennija tal-għomor qed tkompli tiżdied;

K.

billi jeħtieġ li jitqies il-koeffiċjent tal-istennija tal-għomor bil-għan li tiġi żgurata s-sostenibbiltà tas-sistemi tal-pensjonijiet;

L.

billi l-fokus fuq il-veloċità u l-intensità fl-insegwiment tar-riformi strutturali kien asimetriku fost l-Istati Membri waqt il-kriżi, filwaqt li kien ferm aktar eżiġenti għal pajjiżi periferiċi milli għal pajjiżi ewlenin; billi l-Istati Membri kollha għandhom jikkondividu l-istess spinta u jwettqu r-riformi strutturali meħtieġa sabiex jippromwovu tkabbir sostenibbli u bilanċjat u ħolqien ta' impjiegi fil-qasam;

M.

billi l-Istati Membri kollha għandhom bżonn itejbu l-prestazzjoni u l-kompetittività tagħhom u sfida vera li qed taffaċċja ż-żona tal-euro attwalment hija d-diverġenzi soċjoekonomiċi li dejjem qed jikbru bejn l-Istati Membri; billi huwa fl-interess tal-Istati Membri kollha li jiżguraw li l-isfidi tal-impjieg u dawk soċjali jiġu indirizzati f’waqthom u b’mod effettiv biex jiġi evitat id-deterjorament ekonomiku;

N.

billi l-investiment fl-edukazzjoni u t-taħriġ, ir-riċerka u l-innovazzjoni – l-oqsma ewlenin għat-tkabbir ekonomiku u l-ħolqien tal-impjiegi – fl-UE għadu aktar baxx milli fost is-sħab ekonomiċi ewlenin u l-kompetituri f'partijiet oħra tad-dinja; billi l-investiment produttiv f'dawn l-oqsma huwa essenzjali għal ħruġ sostenibbli mill-kriżi;

O.

billi l-appoġġ għall-imprendituri għandu jkun prijorità għall-Istati Membri;

P.

billi taħlita ta’ politika koerenti li tikkombina politiki makroekonomiċi, politiki strutturali, istituzzjonijiet tas-suq tax-xogħol sodi, swieq tax-xogħol mhux segmentati, negozjar kollettiv u sistemi ta’ protezzjoni soċjali b’riżorsi tajbin huma essenzjali biex itaffu x-xokkijiet ċikliċi; billi sistema bbażata fuq ir-riintegrazzjoni rapida fis-suq tax-xogħol b'miżuri ta' sostenn ibbażati fuq il-flessigurtà hija importanti wkoll biex ittaffi x-xokkijiet ċikliċi;

Q.

billi l-livelli ta’ faqar kienu qed jiżdiedu mill-2007, b’mod li 24,2 % tal-popolazzjoni tal-UE jinsabu attwalment f’riskju ta’ faqar jew ta’ esklużjoni soċjali; billi l-infiq għall-protezzjoni soċjali naqas kważi fl-Istati Membri kollha u billi l-Kumitat tal-Protezzjoni Soċjali (SPC) qed javża li dejjem aktar persuni huma f’riskju ta’ faqar ta’ introjtu, faqar fost it-tfal, ħtiġijiet mediċi mhux sodisfati, tiċħid materjali serju u esklużjoni soċjali;

R.

billi l-UE qed tonqos milli tikseb il-miri kważi kollha tal-Ewropa 2020, u billi l-progress fl-Istati Membri biex jissodisfaw l-objettivi ta’ Ewropa 2020 kien diżappuntanti; billi l-impenji li saru fil-programmi nazzjonali ta’ riforma ta’ 2013 ma kinux biżżejjed biex jissodisfaw il-maġġoranza tal-miri fil-livell tal-UE;

S.

billi jeħtieġ li jkunu promossi r-responsabbiltà demokratika, is-sjieda u l-leġittimità fir-rigward tal-atturi kollha involuti fis-Semestru Ewropew; billi l-involviment adegwat tal-Parlament huwa parti kruċjali minn dan il-proċess; billi l-parlamenti nazzjonali huma r-rappreżentanti u l-garanti tad-drittijiet miksuba u ddelegati miċ-ċittadini; billi l-introduzzjoni tas-Semestru Ewropew għandha tirrispetta bis-sħiħ il-prerogattivi tal-parlamenti nazzjonali;

T.

billi hemm nuqqas ta’ arranġamenti li jiżguraw li l-Kunsill Ewropew jirrispetta l-pożizzjoni tal-Parlament qabel ma jadotta kull sena l-prijoritajiet proposti mill-Kummissjoni fl-Istħarriġ Annwali dwar it-Tkabbir;

U.

billi, mill-20 sat-22 ta' Jannar 2014, kellu laqgħat ta' livell għoli ma' membri parlamentari nazzjonali, fl-ambitu tal-Ġimgħa Parlamentari Ewropea biex jiddiskuti l-Istħarriġ Annwali dwar it-Tkabbir 2014, inkluż l-aspetti ta' impjieg u soċjali tiegħu;

1.

Jilqa' l-fatt li din is-sena, għall-ewwel darba, l-abbozz ta' Rapport ta' Impjieg Konġunt anness mal-Istħarriġ Annwali dwar it-Tkabbir (SAT) jinkludi tabella ta' valutazzjoni għal politiki ta' impjiegi u soċjali, li se jgħinu biex isaħħu l-monitoraġġ tal-iżviluppi tal-impjieg u soċjali bħala parti mill-monitoraġġ makroekonomiku fi ħdan is-Semestru Ewropew; iqis li dan għandu jħalli impatt fuq il-gwida politika fis-Semestru Ewropew bħala infurzar tad-dimensjoni soċjali tal-Unjoni Ekonomika u Monetarja, peress li dan mhuwiex biss mixtieq, iżda wkoll meħtieġ sabiex jindirizza l-kriżi u jipprevjeni diverġenzi soċjoekonomiċi serji fiż-żona tal-euro, filwaqt li b’hekk itejjeb is-sostenibbiltà tagħha; jesprimi t-tħassib profond tiegħu dwar in-natura limitata tar-rwol tal-Parlament fis-Semestru Ewropew; jiddeplora l-fatt li ftit li xejn sar progress mill-Kummissjoni u l-Kunsill biex isaħħu l-iskrutinju demokratiku tal-gwida politika ekonomika; huwa tal-fehma li, skont it-Trattati eżistenti, l-Artikolu 136 TFUE jippermetti lill-Kunsill, fuq rakkomandazzjoni mill-Kummissjoni u permezz tal-votazzjoni tal-Istati Membri biss li l-valuta tagħhom hija l-euro, li jadotta linji gwida vinkolanti dwar il-politika ekonomika għall-pajjiżi taż-żona tal-euro fil-qafas tas-Semestru Ewropew; jenfasizza li mekkaniżmu ta' inċentiv isaħħaħ in-natura vinkolanti tal-koordinazzjoni tal-politika ekonomika; jistieden li jkun hemm Ftehim Interistituzzjonali sabiex jinvolvi lill-Parlament fl-abbozzar u l-approvazzjoni tal-Istħarriġ dwar is-SAT u l-Linji Gwida dwar il-Politika Ekonomika u l-Impjiegi;

2.

Jenfasizza li l-prijoritajiet soċjali u ekonomiċi kif miftiehem fil-qafas tal-istrateġija UE2020 huma profondament interkonnessi; jemmen li s-sostenibbiltà ekonomika u l-bilanċ makroekonomiku ma jistgħux jintlaħqu, kemm fi żmien medju u wkoll fit-tul, mingħajr it-tisħiħ u s-salvagwardja tad-dimensjoni soċjali tal-UEM. jikkunsidra li l-aspetti soċjali u ekonomiċi tal-Unjoni huma żewġ naħat tal-istess munita u li t-tnejn għandhom rwol ewlieni fl-iżvilupp tal-UE;

3.

Jinnota, madankollu, li dawn l-indikaturi ma ġewx magħmula vinkolanti, bħat-tabella ta' valutazzjoni tal-Proċedura dwar l-Iżbilanċ Makroekonomiku; jitlob lill-Kummissjoni u lill-Istati Membri jivvalutaw din is-sitwazzjoni fid-dawl tal-iżbilanċi soċjali u tal-impjieg li qed jikbru fl-UE;

4.

Jiddispjaċih li l-indikaturi tal-impjieg u soċjali proposti mill-Kummissjoni huma insuffiċjenti biex ikopru b'mod komprensiv is-sitwazzjonijiet ta' impjieg u soċjali tal-Istati Membri; jitlob li t-tabella ta’ valutazzjoni tinkludi indikaturi supplementari, b’mod partikolari livelli ta’ faqar fost it-tfal, aċċess għall-kura tas-saħħa, kundizzjoni ta' persuni mingħajr dar, u indiċi ta’ xogħol deċenti, sabiex tkun tista’ ssir valutazzjoni xierqa tas-sitwazzjoni soċjali fl-Istati Membri; jemmen li l-indikaturi għandhom, wara konsultazzjoni mal-Parlament, jiġu rieżaminati fuq bażi regolari; jinnota li hemm nuqqas ta’ arranġamenti li jiżguraw li l-Kunsill Ewropew jirrispetta l-pożizzjoni tal-Parlament qabel ma jadotta kull sena l-prijoritajiet proposti mill-Kummissjoni fl-SAT;

5.

Jenfasizza l-importanza ta' impriża, kull meta tkun meħtieġa, il-Ministri għax-xogħol u l-affarijiet soċjali tal-Grupp tal-euro qabel is-summits tal-euro: jemmen li laqgħat konġunti biex jiksbu pożizzjoni koerenti bejn il-Kunsilli tal-EPSCO u l-ECOFIN huma daqstant kruċjali, sabiex jiżguraw li l-kwistjonijiet soċjali u tal-impjieg jiġu indirizzati b’mod aktar sħiħ fid-diskussjonijiet u d-deċiżjonijiet tal-awtoritajiet taż-żona tal-euro u bil-għan li jikkontribwixxu għal-laqgħat tal-kapijiet tal-istat u tal-gvern taż-żona tal-euro;

6.

Jinnota li filwaqt li riformi strutturali jistgħu jagħtu l-frott fi żmien medju jew fit-tul, il-ħtieġa li tkun stimolata d-domanda interna tal-UE tirrikjedi li l-Kummissjoni u l-Kunsill itejbu l-investiment sabiex isostni t-tkabbir u impjiegi ta’ kwalità fi żmien qasir u jtejjeb il-potenzjal fi żmien medju; jinnota li l-objettivi ewlenin diġà ġew definiti fl-istrateġija Ewropa 2020 u fil-Patt għal Tkabbir u Impjiegi miftiehem f’Ġunju 2012, iżda li l-finanzjament irid jiżdied; għaldaqstant, iħeġġeġ lill-Istati Membri biex jistabbilixxu pakkett ta’ investiment li jammonta għal 2 % tal-PDG tal-UE sabiex ikun hemm titjib sinifikanti fis-sitwazzjoni ekonomika fuq perjodu qasir ta’ żmien u fl-istat attwali tas-swieq tax-xogħol tal-Istati Membri kif kien imħeġġeġ fir-riżoluzzjoni tal-Parlament tal-11 ta’ Settembru 2013 dwar “L-indirizzar tal-qgħad fost iż-żgħażagħ: soluzzjonijiet possibbli” (10);

7.

Jenfasizza li l-kompetittività tal-UE għandha tiġi promossa primarjament permezz ta’ investimenti li jżidu l-produttività fl-edukazzjoni, ir-R&D, l-innovazzjoni kontinwa, aktar diġitalizzazzjoni u s-servizzi cloud; jikkunsidra li dawn jagħtu spinta u jistgħu jagħmlu l-UE destinazzjoni preferuta għall-impriżi globali, esportatur ta’ prodotti u servizzi b’valur miżjud kbir u fornitur ta’ impjiegi ta’ kwalità għolja;

8.

Jinsab imħasseb li aktar minn 20 Stat Membru naqqsu l-infiq fl-edukazzjoni f’termini relattivi (bħala persentaġġ tal-PDG), filwaqt li b’hekk qegħdin idgħajfu t-tkabbir u l-kompetittività tagħhom, li jsofru wkoll min-nuqqas ta’ bilanċ bejn il-ħtiġijiet tax-xogħol u l-kwalifiki attwali tal-forza tax-xogħol; jinnota li t-tnaqqis ta’ tali investiment se jżid id-dgħufija strutturali tal-UE, minħabba l-ħtieġa dejjem tikber għal ħaddiema kwalifikati ħafna u l-fatt li f’bosta Stati Membri proporzjon kbir tal-forza tax-xogħol attwalment huma ħaddiema bi ftit kwalifiki; iwissi li skont il-Eurostat, kważi nofs it-tfal kollha li l-ġenituri tagħhom kellhom livell baxx ta’ edukazzjoni kienu f’riskju ta’ faqar fl-UE27 fl-2011, meta mqabbla ma’ 22 % tat-tfal ta' dawk il-ġenituri b’livell ta’ edukazzjoni medju u 7 % ta’ dawk b'ġenituri li għandhom livell ta’ edukazzjoni għolja, bl-akbar differenzi li nstabu mill-Eurostat fir-Rumanija (78 % tat-tfal ġejjin minn familji fejn hemm livell baxx ta’ edukazzjoni meta mqabbla ma’ 2 % li ġejjin minn familji fejn hemm livell ta’ edukazzjoni għolja), ir-Repubblika Ċeka (76 % u 5 %), is-Slovakkja (77 % u 7 %), il-Bulgarija (71 % u 2 %) u l-Ungerija (68 % u 3 %);

9.

Jilqa' l-fatt li fis-SAT 2014, il-Kummissjoni tistieden lill-Istati Membri biex jipproteġu jew jippromwovu l-investiment fit-tul fl-edukazzjoni, ir-riċerka u l-innovazzjoni, l-azzjoni dwar l-enerġija u l-klima; iqis dan bħala insuffiċjenti, madankollu, biex jippermetti lill-Istati Membri b’baġits diġà limitati biex jilħqu dan il-għan; jistieden lill-Kummissjoni tistabbilixxi pjan li jgħin lil dawk l-Istati Membri jagħmlu l-investimenti produttivi meħtieġa, pereżempju fl-edukazzjoni u r-R&Ż minħabba l-potenzjal ta' dawk is-setturi li jiġġeneraw it-tkabbir u l-impjiegi;

10.

Jindika li, fi żmien ta’ restrizzjonijiet fiskali severi u ta’ tnaqqis fil-kapaċità tas-self fis-settur privat, il-fondi Ewropej, jirrappreżentaw ingranaġġ essenzjali, għad-dispożizzjoni tal-Istati Membri, biex tiġi stimulata l-ekonomija u biex jgħinu sabiex jinkisbu l-objettivi tat-tkabbir u tal-impjiegi tal-Istrateġija Ewropa 2020;

11.

Iqis li l-politika ta' koeżjoni hija essenzjali biex tgħin tnaqqas id-disparitajiet kompetittivi interni u l-iżbilanċi strutturali; jistieden lill-Kummissjoni, bħala kwistjoni ta’ urġenza, tipprogramma mill-ġdid fondi strutturali mhux minfuqa favur il-progammi għall-impjieg taż-żgħażagħ u l-SMEs; jistieden lill-Kummissjoni ssib soluzzjonijiet speċjali għal dawk l-Istati Membri b’rati ta’ qgħad għoljin ħafna li se jiġu sfurzati jirritornaw fondi tal-UE minħabba problemi ta’ kofinanzjament;

12.

Jistieden lill-Kummissjoni tapplika l-prinċipju tal-frontloading (forniment minn qabel) għal dawk il-fondi essenzjali għall-irkupru tal-kriżijiet, bħall-Fond Soċjali Ewropew, għall-perjodu 2014-2020 filwaqt li jkun hemm monitoraġġ b’attenzjoni għal effetti mhux mixtieqa ta’ frontloading bħal ma huwa r-riskju ta’ diżimpenn awtomatiku u l-impatt fuq il-profili tal-pagamenti għal dawk l-Istati Membri li għandhom l-ogħla livelli ta’ qgħad u li huma għaddejjin minn proċessi ta’ konsolidazzjoni fiskali profondi, speċjalment rigward il-programmi li jkabbru t-tkabbir ekonomiku, l-impjieg u l-investiment strateġiku;

13.

Iqis li tal-anqas 25 % tal-fondi ta' koeżjoni nazzjonali għandhom jintużaw għal programmi speċifiċi taħt il-Fond Soċjali Ewropew f'dawk l-Istati Membri bl-ogħla livelli ta' qgħad u ta' faqar;

14.

Jitlob għal swieq tax-xogħol li jistgħu jadattaw ruħhom aktar u li huma aktar dinamiċi, li kapaċi jaġġustaw ruħhom għal tfixkil fil-qagħda ekonomika mingħajr ma jikkawżaw sensji u aġġustamenti eċċessivi fil-pagi; ifakkar li l-kapaċità tal-akkwist ta' diversi ħaddiema tal-UE naqset bil-kbir, id-dħul tal-familji naqas u d-domanda interna naqset, filwaqt li b’hekk ingħatat spinta lill-qgħad u l-esklużjoni soċjali, partikolarment f’dawk il-pajjiżi li ntlaqtu l-agħar mill-kriżi; jinnota li t-tnaqqis tal-ispejjeż tax-xogħol li jissarrfu f'pagi/salarji ma tistax tkun l-unika strateġija għall-akkwist mill-ġdid tal-kompetittività; jinnota li l-komunikazzjoni dwar is-SAT 2014 tenfasizza li l-pajjiżi ewlenin bl-ispazju meħtieħ għal manuvra jista' iżidu l-pagi bħala mod kif iżidu l-infiq; jitlob li r-rakkomandazzjonijiet juru ambizzjoni sabiex jippromwovu tkabbir aktar bilanċjat u ħolqien ta' impjiegi fiż-żona tal-euro;

15.

Jinnota li l-Kummissjoni, fir-Rapport Konġunt dwar l-Impjiegi 2014, tinnota li t-tnaqqis fil-kost ta’ unità lavorattiva u l-moderazzjoni tal-pagi daħlu fl-iżviluppi tal-prezzijiet, parzjalment minħabba ż-żidiet simultanji fit-taxxi indiretti u prezzijiet amministrati;

16.

Jinnota li l-impjiegi u l-pagi diċenti huma importanti, mhux biss għall-koeżjoni soċjali u l-ġustizzja fis-soċjetà iżda wkoll għaż-żamma ta' ekonomija b'saħħitha; jistieden lill-Kummissjoni u lill-Istati Membri, skont il-kompetenzi rispettivi tagħhom, jipproponu miżuri li jindirizzaw l-inugwaljanza u jiggarantixxu paga diċenti; jitlob lill-Istati Membri jiġġieldu kontra l-faqar fost dawk li jaħdmu billi jsegwu politiki tas-suq tax-xogħol bil-għan li jiżguraw pagi għall-għajxien għal dawk li jaħdmu;

17.

Jinnota li n-nisa qed jagħtu spinta lit-tkabbir tax-xogħol fl-Ewropa u li għaldaqstant jeħtieġ sforz akbar sabiex isir użu sħiħ mill-potenzjal produttiv tal-ħaddiema nisa permezz ta’ implimentazzjoni aħjar tal-politiki dwar l-ugwaljanza bejn is-sessi u użu aktar effettiv tal-finanzjament tal-UE għal dan il-għan;

18.

Jenfasizza l-importanza li tiġi esplorata l-possibilità ta' tnaqqis tal-pressjoni fuq il-pagi permezz ta' skemi ta' paga minima skont il-prattiki nazzjonali;

19.

Jenfasizza li l-kwalità tal-impjieg hija essenzjali f'ekonomija b'għarfien intensiv sabiex tippromwovi produttività għolja tax-xogħol u innovazzjoni rapida abbażi ta' forza tax-xogħol kompetenti, li tadatta ruħha u li hija impenjata bi standards diċenti tas-saħħa u s-sikurezza, sens ta' sigurtà u ħinijiet tax-xogħol raġonevoli;

20.

Jistieden lill-Istati Membri jippreżentaw il-pjanijiet nazzjonali tal-impjieg ġenerali u taż-żgħażagħ fil-Programmi Nazzjonali ta’ Riforma 2014 tagħhom; jiddispjaċih li, minkejja talbiet ripetuti tal-Parlament, numru sinifikanti ta’ Stati Membri ma ppreżentawx tali pjanijiet sal-2013;

21.

Jiddispjaċih li l-Kunsill naqas milli jieħu kont tal-appell tal-Parlament biex fil-gwida tiegħu għall-2013 jiffoka l-attenzjoni tiegħu fuq il-kwalità tal-impjiegi; jistieden lill-Kummissjoni biex tinkludi fl-Istħarriġ Annwali dwar it-Tkabbir 2014 it-temi tal-kwalità tal-impjiegi, tat-taħriġ, skemi ta’ tagħlim doppju u l-aċċess għal taħriġ tul il-ħajja, tad-drittijiet ċentrali tal-ħaddiema, tas-sostenn għall-mobilità tal-forza tax-xogħol, tal-impjieg indipendenti permezz tat-tqawwija tas-sigurtà għall-ħaddiema fis-CSRs fuq il-bażi tas-SAT 2014;

22.

Jenfasizza li r-riformi fis-suq tax-xogħol għandhom jiffokaw biex iżidu l-produttività u l-effiċjenza tax-xogħol sabiex tiġi promossa l-kompetittività tal-ekonomija tal-UE u jiġu permessi t-tkabbir u l-ħolqien tal-impjiegi sostenibbli, filwaqt li jiġu rispettati kemm il-kelma u l-ispirtu tal-acquis soċjali Ewropew u l-prinċipji tiegħu; jemmen li r-riformi fis-suq tax-xogħol għandhom jiġu implimentati b’tali mod li jippromwovu l-flessibbiltà interna u l-kwalità tal-impjiegi;

23.

Jemmen li r-riformi strutturali fis-suq tax-xogħol għandhom jintroduċu flessibilità interna sabiex iżommu l-impjieg fi żminijiet ta' disturb ekonomiku, u għandhom jiżguraw il-kwalità tal-impjieg, is-sikurezza fi tranżizzjonijiet ta' impjieg, il-provvista ta' skemi ta' benefiċċju għall-qgħad li huma bbażati fuq rekwiżiti ta' attivazzjoni u konnessi ma' politiki ta' riintegrazzjoni li jmantnu l-inċentivi tax-xogħol, filwaqt li jiżguraw introjtu diċenti u t-twaqqif ta' arranġamenti kuntrattwali li jiġġieldu s-segmentazzjoni tas-suq tax-xogħol, jantiċipaw ir-ristrutturar ekonomiku u jiżguraw aċċess għal tagħlim tul il-ħajja; jemmen li huwa biss bilanċ ibbażat fuq il-flessigurtà li jista’ jassigura suq tax-xogħol kompetittiv;

24.

Jenfasizza l-importanza ta’ politiki tax-xogħol attivi, komprensivi u inklużivi fil-kuntest attwali; huwa mħasseb ħafna li diversi Stati Membri, minkejja r-rati ta' qgħad li qegħdin jiżdiedu, għandhom allokazzjonijiet baġitarji biex jiffinanzjaw tali politiki tax-xogħol; jistieden lill-Istati Membri jżidu l-kopertura u l-effikaċja tal-politiki attivi tas-suq tax-xogħol, f’kooperazzjoni mill-qrib mas-sħab soċjali;

25.

Jistieden lill-Istati Membri ifasslu – f'kollaborazzjoni mas-settur privat u s-sħab soċjali skont prattiki nazzjonali – u jippreżentaw pjanijiet li jinkludu miżuri speċifiċi għall-ħolqien tal-impjiegi, inkluż b’mod partikolari għas-setturi identifikati mill-Kummissjoni li għandhom potenzjal għoli bħas-setturi tas-saħħa u tal-kura soċjali, fl-ekonomija b’livell baxx ta’ karbonju u effiċjenti fl-użu tar-riżorsi u fis-settur tal-ICT; jistieden lill-Istati Membri jappoġġaw, permezz ta' dawk il-pjanijiet ta' impjiegi, il-ħolqien ta' opportunitajiet ta' impjieg, partikolarment għal dawk qiegħda fit-tul, iċ-ċittadini anzjani qiegħda, in-nisa, u gruppi prijoritarji oħrajn li ntlaqtu l-aktar mill-kriżi, bħall-immigranti u persuni b'diżabbiltajiet;

26.

Jenfasizza l-importanza tal-Erasmus+ kif ukoll il-kontribut sinifikanti li l-Programm Ewropew għall-Edukazzjoni, Taħriġ, Żgħażagħ, Sport u Lingwi jista’ jagħmel biex itejjeb is-sitwazzjoni tas-suq tax-xogħol, b’mod speċjali dik taż-żgħażagħ;

27.

Jenfasizza l-importanza tal-kooperazzjoni msaħħa bejn is-Servizzi tal-Impjieg Pubbliku (PES) sabiex jiżviluppaw u jimplimentaw sistemi ta’ tagħlim ibbażat fuq statistika u evidenza fl-Ewropa kollha u jimplimentaw inizjattivi għas-suq tax-xogħol Ewropew;

28.

Huwa mħasseb ħafna li, għal darb’oħra, ir-rati ta’ qgħad fost iż-żgħażagħ għadhom għoljin ħafna; jinnota li s-sitwazzjoni taż-żgħażagħ qiegħda hija partikolarment inkwetanti; jitlob, għalhekk, lill-Kummissjoni u l-Istati Membri jieħdu azzjoni urġenti biex idaħħlu liż-żgħażagħ fis-suq tax-xogħol; jistieden lill-Istati Membri jimplementaw il-miżuri li ilu li kien hemm ftehim dwarhom jew li huma ġodda bil-għan li jindirizzaw il-qgħad fost iż-żgħażagħ u jnaqqsu l-għadd ta’ żgħażagħ barra mill-edukazzjoni, impjieg jew taħriġ (NEETs), filwaqt li jikkunsidraw l-aspett kwalitattiv ta’ xogħol diċenti li jirrispetta bis-sħiħ l-istandards ewlenin tax-xogħol;

29.

Jilqa' l-adozzjoni mill-Kunsill ta' Garanzija għaż-Żgħażagħ, kif ukoll is-EUR 6 biljun iddedikati għall-Inizjattiva għall-Impjieg taż-Żgħażagħ taħt il-QFP li jmiss; jistieden lill-Istati Membri jimplimentaw skemi ta’ garanzija taż-żgħażagħ bħala kwistjoni ta’ urġenza, u jużaw ir-riżorsi disponibbli b’mod effiċjenti, filwaqt li jikkonċentraw fuq dawk li jinsabu fl-aktar sitwazzjonijiet diffiċli; jinsab imħasseb, madankollu, li xi wħud mill-gvernijiet ma għamlux disponibbli l-finanzjament meħtieġ biex dan iseħħ; jistieden lill-Istati Membri jintroduċu sistema adegwata ta’ monitoraġġ tal-effiċjenza tal-miżuri implimentati u tar-riżorsi finanzjarji impenjati;

30.

Jilqa’ b'sodisfazzjon li l-fondi msemmija hawn fuq jistgħu jintużaw fl-ewwel sentejn tal-qafas finanzjarju li ġej; ifakkar, madankollu, li dan l-ammont bla ebda dubju mhuwiex biżżejjed biex jiġġieled il-qgħad fost iż-żgħażagħ b’mod dejjiemi u li għandu jikkostitwixxi pagament inizjali li bih tiġi indirizzata l-problema; jenfasizza li l-ILO ikkalkulat li jinħtieġ total ta' EUR 21 biljun biex jitwettaq programm effettiv kontra l-qgħad fost iż-żgħażagħ fiż-żona tal-euro biss meta mqabbel mat-telf għall-ekonomija minħabba n-nuqqas ta’ impenn taż-żgħażagħ fis-suq tax-xogħol li huwa stmat għal madwar EUR 153 biljun fl-Istati Membri fl-2011 jew 1,2 % tal-PDG tal-UE; jistieden lill-Kummissjoni tagħmel il-Garanzija għaż-Żgħażagħ prijorità biex iżżid il-baġit disponibbli fir-rieżami ta' nofs it-terminu tal-QFP;

31.

Jistieden lill-Kummissjoni u l-Kunsill sabiex jiżguraw li anki l-Istati Membri suġġetti għall-proċedura ta’ defiċit eċċessiv ikollhom l-ispazju fiskali sabiex jimplimentaw l-Iskemi ta' Garanzija għaż-Żgħażagħ;

32.

Jilqa' l-proposta tal-Kummissjoni għal qafas ta' kwalità għall-iskemi ta' taħriġ, sabiex tippromwovi l-impjegabbiltà u ttejjeb il-kundizzjonijiet tax-xogħol għaż-żgħażagħ; jinnota, madankollu, in-nuqqas li titlob livelli ta' paga adegwati; jistieden lill-Kummissjoni, l-Istati Membri u s-sħab soċjali Ewropej jimplimentaw b’mod ambizzjuż l-Alleanza għall-Apprendistati;

33.

Jemmen li minħabba n-numru ta’ ħaddiema, partikolarment żgħażagħ, li issa qed jitilqu l-pajjiżi ta’ oriġini tagħhom għal Stati Membri oħra bi tfittxija ta’ opportunitajiet ta’ impjieg, hemm ħtieġa urġenti li jiġu żviluppati miżuri adegwati. jinnota li sabiex tiġi garantita l-portabbiltà tad-drittijiet tal-pensjoni u l-kontinwazzjoni tal-benefiċċji tal-impjieg għal tal-anqas tliet xhur waqt li r-reċipjent ikun qed ifittex xogħol fi Stat Membru ieħor, fil-preżent il-leġiżlazzjoni tal-UE qed tiġi emendata; jinnota li ntlaħaq ftehim bejn il-Kunsill u l-Parlament dwar il-portabilità transkonfinali ta' drittijiet tal-pensjonijiet supplimentari;

34.

Jenfasizza l-importanza ta’ sistema ta’ edukazzjoni doppja kif prattikata f’xi Stati Membri; jemmen li l-edukazzjoni doppja tista’ tiġi implimentata f’ħafna aktar Stati Membri, filwaqt li jitqiesu l-karatteristiċi nazzjonali;

35.

Jilqa’ l-intenzjoni tal-Kummissjoni li tkompli tibni fuq il-Portal Ewropew dwar il-Mobilità fix-Xogħol (EURES) billi tintensifika u twessa’ l-attivitajiet tagħha u, b’mod partikulari, billi tippromwovi l-mobilità taż-żgħażagħ; jitlob biex tkun abbozzata strateġija speċifika għal dan il-għan, flimkien mal-Istati Membri; josserva wkoll, madankollu, li l-mobilità għandha tibqa’ volontarja u m’għandhiex tillimita l-isforzi biex jinħolqu l-impjiegi u l-postijiet ta’ taħriġ fuq il-post sabiex ma tkomplix tiżdied il-problema tal-“eżodu ta’ mħuħ”, li diġà seħħet fl-Istati Membri l-aktar milquta mill-kriżi;

36.

Jinnota li l-inugwaljanza fl-introjtu qed tiżdied bejn l-Istati Membri u fi ħdanhom, partikolarment fin-nofsinhar tal-UE u fil-periferija tagħha; jinnota wkoll li f’diversi pajjiżi l-kriżi intensifikat it-tendenzi fit-tul ta’ polarizzazzjoni tal-pagi u segmentazzjoni tas-suq tax-xogħol;

37.

Jinnota li reċentement il-FMI innota li hemm skop biex jiġi intaxxat aħjar u b'mod aktar progressiv, li jista' jgħin biex inaqqas l-inugwaljanzi fl-UE; jenfasizza li billi hemm il-ħtieġa li l-piż tat-taxxa jitneħħa minn fuq il-ħaddiema u jmur lejn forom oħra ta' taxxa sostenibbli sabiex jiġu promossi t-tkabbir u l-ħolqien tal-impjiegi u jkun hemm dħul addizzjonali fil-proċess, sabiex titjieb il-leġittimità tal-isforz ta' konsolidazzjoni;

38.

Jistieden lill-Istati Membri jadottaw miżuri favorevoli għall-ħolqien tal-impjiegi, bħal riformi tat-taxxa tax-xogħol li jipprovdu inċentivi ta' impjieg, jappoġġaw l-impjieg indipendenti volontarju u jippromowvu n-negozju f'setturi strateġiċi;

39.

Jinnota l-importanza tat-tnaqqis tat-tassazzjoni fuq ix-xogħol, speċjalment permezz ta’ tnaqqis temporanju mmirat sew f’kontribuzzjonijiet ta’ sigurtà soċjali jew skemi ta’ sussidji ta’ impjiegi għal persuni li ġew reklutati ġodda, speċjalment żgħażagħ, ħaddiema b’pagi baxxi jew bi ftit kwalifiki, il-persuni li ilhom qiegħda u gruppi vulnerabbli oħrajn, filwaqt li tiġi żgurata s-sostenibbiltà fit-tul tas-sistemi tal-pensjoni pubbliċi;

40.

Jenfasizza l-importanza li jittieħdu passi effettivi biex ikun miġġieled xogħol mhux iddikjarat, impjieg indipendenti falz, frodi tat-taxxa u evażjoni tat-taxxa, partikolarment fil-kuntest tal-konsolidazzjoni fiskali, sabiex jipproteġi lill-ħaddiema u r-rendimenti fiskali u jżomm il-kunfidenza pubblika fil-ġustizzja u l-effikaċja tas-sistemi fiskali;

41.

Huwa mħasseb dwar iż-żieda fil-faqar fost il-gruppi ta’ età kollha; jinnota li l-faqar u l-esklużjoni soċjali fost il-persuni bejn it-18 u l-64 sena żdiedu b’mod sinifikanti f’żewġ terzi mill-Istati Membri fis-snin riċenti, l-aktar minħabba livelli dejjem jikbru ta’ djar b’nies qiegħda jew b’intensità baxxa ta’ xogħol u faqar fost dawk li jaħdmu; jinnota li r-riskju tal-faqar u l-esklużjoni soċjali fl-2012 kien ferm akbar (48,8 %) għal ċittadini ta’ pajjiżi terzi (b’età bejn it-18 u l-64) milli għal ċittadini tal-UE; jistieden lill-Kummissjoni u lill-Istati Membri jieħdu azzjoni urġenti biex jintlaħaq l-għan tal-UE-2020 dwar il-faqar u l-esklużjoni soċjali; iħeġġeġ lill-Kummissjoni u lill-Istati Membri jieħdu azzjoni immedjata fil-ġlieda kontra l-faqar fost it-tfal peress li fl-2011, 27 % tat-tfal fl-età ta’ taħt it-18-il sena kienu f’riskju ta’ faqar jew esklużjoni soċjali; jistieden lill-Kummissjoni toħroġ rakkomandazzjonijiet, speċjalment lill-Istati Membri bl-ogħla proporzjonijiet ta' persuni taħt it-18-il sena f'riskju ta' faqar jew esklużjoni soċjali;

42.

Jilqa' r-rikonoxximent tas-SAT 2014 dwar il-ħtieġa li jkunu indirizzati l-konsegwenzi soċjali tal-kriżi u tiġi żgurata s-sostenibbiltà finanzjarja tal-ħarsien soċjali; jistieden lill-Istati Membri jinfurzaw networks ta' sikurezza, jiżguraw l-effikaċja ta' sistemi tal-benessri u jinvestu f'miżuri ta' prevenzjoni;

43.

Jilqa’ l-Fond għal Għajnuna Ewropea għall-Persuni l-Aktar fil-Bżonn li se jgħin lil dawk l-aktar milquta mill-faqar jissodisfaw il-ħtiġijiet bażiċi tagħhom; jistieden lill-Istati Membri jużaw il-fondi kkonċernati b'mod xieraq u jimmirawhom lejn dawk l-aktar fil-bżonn;

44.

Jieħu nota tal-proposta tas-CSR li tirrigwarda diversi Stati Membri fir-rigward tar-riformi tal-pensjonijiet; jiddeplora l-fatt li r-rakkomandazzjonijiet tal-Kummissjoni saru mingħajr referenza għar-rakkomandazzjonijiet tal-Parlament fil-Green u l-White Papers dwar il-pensjonijiet; jenfasizza li r-riformi fil-pensjonijiet jirrikjedu koeżjoni politika u soċjali nazzjonali u jridu jiġu nnegozjati mas-sħab soċjali biex ikollhom suċċess;

45.

Jenfasizza li r-riformi mill-qiegħ meħtieġa fis-sistemi tal-pensjonijiet fl-Istati Membri għandhom ikunu mfassla, maħsuba u adottati bil-għan li tiġi żgurata s-sostenibbiltà tagħhom filwaqt li fl-istess ħin ma jiġux ipperikolati l-livelli adegwati tal-pensjonijiet, b’konformità sħiħa mal-prijoritajiet ekonomiċi u soċjali tal-istrateġija Ewropea 2020;

46.

Jenfasizza l-ħtieġa li jitwettqu r-riformi meħtieġa sabiex tiġi garantita s-sostenibbiltà tas-sistemi tal-pensjonijiet; jemmen li sabiex l-etajiet effettivi tal-irtirar jiżdiedu b’suċċess, jeħtieġ li r-riformi fis-sistemi tal-pensjonijiet jiġu akkumpanjati minn politiki li jillimitaw l-aċċess għall-iskemi tal-irtirar bikri u toroq oħra ta’ ħruġ bikri, li jiżviluppaw opportunitajiet ta’ impjiegi għall-ħaddiema aktar kbar fl-età, jiggarantixxu aċċess għat-tagħlim tul il-ħajja, jintroduċu politiki tat-taxxa favorevoli li joffru inċentivi biex dak li jkun jibqa’ jaħdem għal aktar żmien, u jappoġġjaw it-tixjiħ b’saħħtu attiv; jenfasizza l-aċċelerazzjoni tal-pressjoni maħluqa mill-iżviluppi demografiċi fuq il-baġits nazzjonali u s-sistemi tal-pensjonijiet issa li l-ewwel koortijiet tal-“ġenerazzjoni baby boom” qegħdin jirtiraw; jinnota l-progress inekwu u l-livelli irregolari ta' ambizzjoni madwar l-Istati Membri fil-formulazzjoni u l-implimentazzjoni ta' riformi strutturali mmirati biex iżidu l-impjieg, ineħħu gradwalment l-skemi ta' rtirar bikri u jevalwaw, fil-livell tal-Istati Membri u flimkien mas-sħab soċjali, il-ħtieġa li l-etajiet tal-irtirar kemm statutorju kif ukoll effettiv jitqiegħdu fuq livell sostenibbli konformi ma' żidiet fl-istennija tal-għomor; jenfasizza li l-Istati Membri li jonqsu milli jimplimentaw riformi gradwali issa jistgħu fi stadju aktar tard isibu ruħhom f'xenarju fejn ikollhom jimplimentaw riformi mqanqla minn xokk u b'konsegwenzi soċjali sinifikanti;

47.

Huwa mħasseb dwar ir-riskju tal-pensjonijiet inadegwati għall-ġenerazzjoni ta' Ewropej żgħażagħ li attwalment jinsabu qiegħda jew f'impjiegi prekarji u li se jaffaċċjaw età ta' rtirar aktar għolja u perjodi ta' kalkolu tal-pensjoni itwal;

48.

Jinnota li l-politika tal-ħarsien soċjali, partikolarment il-benefiċċji għall-qgħad, appoġġ minimu tal-introjtu u tassazzjoni progressiva, inizjalment għenu biex inaqqsu l-profondità tar-riċessjoni u stabbilizzaw is-swieq tax-xogħol u l-konsum; jenfasizza, madankollu, li l-kapaċità ta’ dawn l-istabbilizzaturi ekonomiċi u soċjali ġiet imnaqqsa b'mod inkwetanti f’dawk l-Istati Membri fejn tali stabbilizzaturi huma l-aktar meħtieġa; jinnota li konsegwentement, l-introjti tal-familji u d-domanda domestika ġew imħarsa anqas;

49.

Jemmen, li l-introduzzjoni ta’ sistemi ta’ Bonus-Malus toħloq sitwazzjoni ta' rebħa għall-partijiet kollha involuti;

50.

Jenfasizza li f'xi każijiet, il-politiki soċjali u l-istandards soċjali ntużaw bħala fatturi ta' aġġustament minħabba r-rekwiżiti ta' konsolidazzjoni fiskali; jistieden lill-Kummissjoni tivvaluta l-konsegwenzi li dawn il-proċessi għandhom għall-istati tal-benessri nazzjonali u għaċ-ċittadini; jistieden lill-Istati Membri jtejbu l-adegwatezza u l-effikaċja tas-sistemi ta’ ħarsien soċjali, u jiżguraw li dawn ikomplu jipproteġu lill-persuni kontra l-faqar u l-esklużjoni soċjali;

51.

Jenfasizza l-ħtieġa li l-Kummissjoni tirrikonoxxi l-importanza tal-persuni li jindukraw, kemm f'termini tal-provvista tal-kura u l-ekonomija u s-soċjetà inġenerali, filwaqt li tfakkar li l-interessi tal-persuni li jindukraw rari jiġu kkunsidrati fil-politiki li xorta jkollhom impatt fuqhom b'mod konsistenti u ġenerali;

52.

Jemmen, li l-finanzjament mill-UE jista’ jikkontribwixxi għall-bini tal-kapaċità tal-persuni li jindukraw fir-rigward tal-provvista tal-appoġġ (eż. appoġġ emozzjonali, skambji, u informazzjoni) u tal-affermazzjoni, u li jkun jista' wkoll jappoġġa skambju ta' informazzjoni, riċerka u networking. jemmen ukoll li jistgħu jiġu esplorati miżuri leġiżlattivi, abbażi tar-rispett lejn il-kompetenza nazzjonali u l-prinċipju tas-solidarjetà u li dan jista' jieħu l-forma ta', pereżempju, direttiva dwar il-liv għall-persuni li jindukraw;

53.

Jenfasizza l-ħtieġa li ġejja għal persuni kwalifikati li jindukraw minħabba bidliet demografiċi u l-importanza li jiġu żgurati kemm it-taħriġ kif ukoll l-edukazzjoni għal persuni li jindukraw futuri sabiex jiġi evitat il-kollass tas-sistema kollha tal-kura u tas-sigurtà soċjali; jikkunsidra wkoll l-importanza li jiġi pprovdut l-appoġġ massimu għal persuni li jindukraw (b’mod speċjali persuni li jindukraw b’mod informali) li l-kontribut tagħhom jeħtieġ li jiġi rikonoxxut;

54.

Jenfasizza l-importanza tas-servizzi tal-ospizju u dawk palljativi bħala parti mill-kura fit-tul; jinnota, li minħabba l-kompożizzjoni multiprofessjonali, il-flessibbiltà, u l-kooperazzjoni ma’ setturi oħrajn professjonali, il-persuni li jindukraw u l-utenti tat-timijiet palljativi mobbli għandhom il-potenzjal li jnaqqsu d-differenzi kruċjali fis-sistemi ta’ kura fit-tul;

55.

Jenfasizza li r-riformi kollha tas-suq tax-xogħol għandhom ikunu bbażati fuq koordinazzjoni rinforzata tad-djalogu soċjali;

56.

Jenfasizza li t-Trojka kkonfermat li parteċipazzjoni ta' kwalità għolja mis-sħab soċjali u djalogu soċjali b'saħħtu, inkluż fil-livell nazzjonali, huma essenzjali għas-suċċess ta' kwalunkwe riforma, u li partikolarment fir-riformi tal-UEM, ir-rwol tas-sħab soċjali fil-proċess ġdid ta' governanza ekonomika, speċjalment fis-Semestru Ewropew, għandu jiġi infurzat; jilqa’ l-proposta tal-Kummissjoni biex tinvolvi s-sħab soċjali b’mod aktar sħiħ fil-proċess tas-Semestru Ewropew, fost l-oħrajn fil-qafas tal-Kumitat għad-Djalogu Soċjali qabel l-adozzjoni annwali tas-SAT;

57.

Jistieden lill-Kunsill Ewropew u lill-Istati Membri jiżguraw li parlamenti nazzjonali u reġjonali, is-sħab soċjali, l-awtoritajiet pubbliċi u s-soċjetà ċivili jkunu involuti mill-qrib fl-implimentazzjoni u l-monitoraġġ tal-gwida politika taħt l-istrateġija Ewropa 2020 u l-proċess ta’ governanza ekonomika, sabiex jiżguraw is-sjieda; jistieden lill-Kunsill Ewropew u lill-Kummissjoni jinkorporaw il-monitoraġġ u l-valutazzjoni tal-għanijiet tal-impjiegi, dawk soċjali u dawk edukattivi ta' Ewropa 2020 b’mod aktar effikaċi fis-Semestru Ewropew 2014;

58.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

29.8.2017   

MT

Il-Ġurnal Uffiċjali tal-Unjoni Ewropea

C 285/40

—

wara li kkunsidra l-Komunikazzjoni mill-Kummissjoni tat-13 ta' Novembru 2013 bl-isem 'Stħarriġ Annwali dwar it-Tkabbir tal-2014' (COM(2013)0800) u r-Rapport tal-Kummissjoni bl-isem 'Suq Uniku għat-Tkabbir u l-Impjiegi: Analiżi tal-Progress li sar u tal-Ostakli li għad fadal fl-Istati Membri – Kontribut għall-Istħarriġ Annwali dwar it-Tkabbir tal-2014' (COM(2013)0785) u l-analiżi tal-kuntest għal dak ir-rapport, bl-isem 'Katini tal-valur fl-UE u barra minnha',

—

wara li kkunsidra l-ewwel Rapport tal-Kummissjoni tat-28 ta' Novembru 2012 dwar 'L-Istat ta' Integrazzjoni tas-Suq Uniku 2013 – Kontribuzzjoni għall-Istħarriġ Annwali dwar it-Tkabbir 2013' (COM(2012)0752),

—

wara li kkunsidra l-Komunikazzjoni mill-Kummissjoni tat-3 ta’ Ottubru 2012 bit-titolu “Att dwar is-Suq Uniku II – Flimkien għal tkabbir ġdid” (COM(2012)0573),

—

wara li kkunsidra l-Komunikazzjoni mill-Kummissjoni tat-8 ta’ Gunju 2012 bit-titolu “Governanza Aqwa tas-Suq Uniku” (COM(2012)0259),

—

wara li kkunsidra d-dokument ta’ ħidma tal-Persunal tal-Kummissjoni tal-24 ta’ Frar 2012 bit-titolu “Nagħmlu Suċċess mis-Suq Uniku – Kontroll annwali fuq il-governanza 2011” (SWD(2012)0025),

—

wara li kkunsidra l-Komunikazzjoni mill-Kummissjoni tat-13 ta' April 2011 bl-isem “L-Att dwar is-Suq Uniku – Tnax-il xprun sabiex jiġi stimulat it-tkabbir u r-rinfurzar tal-fiduċja – ‘Flimkien għal tkabbir ġdid’” (COM(2011)0206),

—

wara li kkunsidra l-Komunikazzjoni mill-Kummissjoni tat-3 ta’ Marzu 2010 bit-titolu “Ewropa 2020 – Strateġija għal tkabbir intelliġenti, sostenibbli u inklussiv” (COM(2010)2020),

—

wara li kkunsidra t-Tabella ta' Valutazzjoni tas-Suq Uniku Online li saret pubblika fl-4 ta' Lulju 2013,

—

wara li kkunsidra t-Tabella ta’ Valutazzjoni tas-Suq Intern Nru 26 (Frar 2013),

—

wara li kkunsidra l-Konkluzjonijiet tal-Kunsill Ewropew tas-27 u t-28 ta’ Ġunju 2013,

—

wara li kkunsidra l-konklużjonijiet tal-Kunsill tal-Kompetittività tad-29 u t-30 ta’ Mejju 2013, dwar ir-Regolamentazzjoni Intelliġenti,

—

wara li kkunsidra l-Konkluzjonijiet tal-Kunsill Ewropew tal-14 u l-15 ta’ Marzu 2013,

—

wara li kkunsidra d-deliberazzjonijiet tal-Kunsill tal-Kompetittività tat-18 u d-19 ta' Frar 2013 dwar l-Istħarriġ dwar it-Tkabbir Annwali 2013 u l-Att dwar is-Suq Uniku,

—

wara li kkunsidra r-riżoluzzjoni tiegħu tas-7 ta' Frar 2013 b'rakkomandazzjonijiet lill-Kummissjoni dwar il-governanza tas-Suq Uniku (1), u s-segwitu tal-Kummissjoni adottat fit-8 ta' Mejju 2013,

—

wara li kkunsidra l-Konkluzjonijiet tal-Kunsill Ewropew tal-24 u l-25 ta’ Ottubru 2013,

—

wara li kkunsidra r-riżoluzzjoni tiegħu tal-14 ta' Ġunju 2012 bit-titolu 'L-Att dwar is-Suq Uniku – Il-Passi li jmiss għat-Tkabbir' (2), u s-segwitu tal-Kummissjoni adottat fis-26 ta' Settembru 2012,

—

wara li kkunsidra r-riżoluzzjoni tiegħu tas-6 ta’ April 2011 dwar il-governanza u s-sħubija fis-suq uniku (3),

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għas-Suq Intern u l-Ħarsien tal-Konsumatur (A7-0066/2014),

A.

billi l-Istħarriġ Annwali dwar it-Tkabbir 2013 nieda t-tielet ċiklu tas-Semestru Ewropew u issa jinkludi – għall-ewwel darba – rapport annwali dwar l-istat ta' integrazzjoni tas-Suq Uniku;

B.

billi Suq Uniku li jiffunzjona sew u b'mod effettiv ibbażat fuq ekonomija tas-suq soċjali ferm kompetittiva hu essenzjali għal tkabbir sostenibbli u inklużiv;

C.

billi l-Parlament talab l-inklużjoni sħiħa ta' pilastru dwar is-Suq Uniku fiċ-ċiklu tas-Semestru Ewropew;

D.

billi governanza aħjar tas-Suq Uniku għandu jkollha l-għan li tiżgura traspożizzjoni kif ukoll implimentazzjoni aħjar u aktar malajr tad-direttivi u r-regolamenti relatati miegħu u speċjalment jekk konnessi mas-setturi ewlenin identifikati;

E.

billi l-kwalità tal-programmi ta' riforma nazzjonali skont is-Semestru Ewropew ivarjaw sew f'termini ta' sustanza, trasparenza u fattibbiltà;

F.

billi s-Suq Uniku għandu jidher li hu strettament konness ma' oqsma ta' politiki orizzontali oħra, bħall-protezzjoni tal-konsumaturi u tal-ħaddiema, id-drittijiet soċjali, l-ambjent u l-iżvilupp sostenibbli;

G.

billi l-Atti dwar is-Suq Uniku I u II jirrapreżentaw strateġija orizzontali mibnija sew li wasslet għal miżuri leġiżlattivi u mhux leġiżlattivi konkreti li kapaċi jilliberaw il-potenzjal ta' tkabbir mhux sfruttat tas-Suq Uniku, kif ukoll ineħħu l-ostakli għalih;

H.

billi l-Kummissjoni identifikat is-servizzi, is-servizzi finanzjarji, it-trasport, l-enerġija u s-suq diġitali bħala oqsma ewlenin biex ikun hemm funzjonament aħjar u tisħiħ tas-Suq Uniku; billi l-metodoloġija li tiddefinixxi dawn l-oqsma għandha tkun valutata u riveduta fuq bażi regolari, filwaqt li jitqiesu l-miri ta' tkabbir u l-perspettiva kif ukoll il-kriterji li jipprovdu l-protezzjoni meħtieġa għaċ-ċittadini, b'mod partikolari l-konsumaturi, il-professjonisti u l-ħaddiema;

I.

billi għadna ma ksibniex suq uniku diġitali li jiffunzjona kompletament għas-servizzi online u l-komunikazzjonijiet fl-Ewropa; billi l-moviment ħieles ta’ servizzi diġitali u l-kummerċ elettroniku transkonfinali llum il-ġurnata hu mxekkel minn regoli frammentati fil-livell nazzjonali, billi l-kumpaniji Ewropej u s-servizzi pubbliċi se jiksbu benefiċċji ekonomiċi u soċjali mill-użu ta’ servizzi u applikazzjonijiet avanzati tal-ICT;

J.

billi infrastruttura aċċessibbli u effiċjenti tat-trasport Ewropew, politika industrijali Ewropea ambizzjuża u l-ħolqien ta' suq uniku tal-enerġija – bl-għan li jappoġġaw il-kompetittività tan-negozji tal-UE u jiżguraw aċċess universali u bi prezz raġonevoli għall-enerġija lill-unitajiet familjari u lill-konsumaturi – huma vitali għas-Suq Uniku tal-UE; billi hu għalhekk meħtieġ li jkunu definiti l-azzjonijiet ta' prijorità f'dawn l-oqsma;

1.

Itenni s-sejħa tiegħu lill-Kummissjoni biex issaħħaħ il-governanza tas-Suq Uniku billi tistabbilixxi ċiklu annwali ta’ governanza tas-Suq Uniku, bħala pilastru speċifiku tas-Semestru Ewropew, li jinkludi Tabella ta’ Valutazzjoni tas-Suq Intern, rapport annwali dwar l-integrazzjoni tas-Suq Uniku bħala parti mill-Istħarriġ Annwali tat-Tkabbir, gwida tal-Kunsill Ewropew għall-Istati Membri, pjanijiet ta’ azzjoni nazzjonali bl-għan li jiġu implimentati l-linji gwida tas-Suq Uniku u rakkomandazzjonijiet dedikati speċifiċi għall-pajjiż; jistieden lill-Kummissjoni, barra minn hekk, tikkunsidra sew l-oqsma ewlenin ta' tkabbir – identifikati bħala s-settur tas-servizzi, is-settur tal-enerġija, is-settur tat-trasport u s-suq uniku diġitali – u l-miżuri inklużi fl-Atti dwar is-Suq Uniku I u II;

2.

Jenfasizza l-ħtieġa li jkun definit is-Suq Uniku bħala t-tielet pilastru tas-Semestru Ewropew sabiex ikopri għadd ta' prijoritajiet ċari relatati mal-ekonomija reali; jemmen li d-definizzjoni u l-ilħuq ta' dawn il-prijoritajiet huma essenzjali biex ikun stimulat it-tkabbir, jitnaqqas id-distakk preżenti fl-ilħuq tal-objettivi tal-istrateġija Ewropa 2020, filwaqt li tiġi żgurata konverġenza ekonomika bejn l-Istati Membri ġewwa u barra ż-żona tal-ewro u fiż-żoni fil-qalba u dawk periferali tal-UE;

3.

Ifakkar fl-opinjoni tiegħu li l-ewwel rapport dwar l-istat ta' integrazzjoni tas-Suq Uniku kien insuffiċjenti u inkomplet; jemmen, għalhekk, li r-rapporti futuri għandhom ikunu aktar ċari fir-rigward tad-defiċjenzi attwali fi Stati Membri speċifiċi, jipprovdu gwida aktar konkreta dwar rimedji possibbli u benefiċċji mistennija, u jindikaw mezzi ta' lieva effiċjenti li jsaħħu t-tkabbir u l-kompetittività u, b'hekk, joħolqu l-impjiegi li flimkien jistgħu jipprovdu rispons konkret għall-kriżi soċjali u ekonomika attwali;

4.

Jilqa' r-rapport tal-Kummissjoni għall-2014 dwar l-integrazzjoni tas-Suq Uniku (COM(2013)0785) u jappoġġja bis-sħiħ l-isforzi tal-Kummissjoni biex tintegra aktar is-Suq Uniku fil-kunsiderazzjonijiet tas-Semestru Ewropew; japprezza l-fatt li r-rapport dwar l-istat tas-Suq Uniku fl-2014 fih numru ta' elementi speċifikament relatati ma' azzjonijiet meħuda minn Stati Membri individwali; iqis madankollu li r-rapport għadu nieqes minn xi tip ta' valutazzjoni kwalitattiva tal-effikaċja tal-miżuri meħuda, tal-progress li sar u tar-riżultati ta' politika li ntlaħqu verament; jitlob li tkun żviluppata għodda analitika li tkejjel l-integrazzjoni tas-suq Uniku fil-qafas tal-pilastru tas-Suq Uniku tas-Semestru Ewropew fir-rigward tar-rakkomandazzjonijiet speċfiċi għall-pajjiż; jemmen li din l-għodda analitika tista' tkompli tikkumplimenta t-Tabella ta' Valutazzjoni tas-Suq Uniku;

5.

Jemmen li hemm ħtieġa ta' aktar koordinazzjoni u koerenza orizzontali fit-tħejjija ta' proposti leġiżlattivi b'relevanza għas-Suq Uniku; jemmen li l-governanza tas-Suq Uniku għandha tikkunsidra sew il-ħtiġijiet tal-partijiet interessati kollha u li jeħtieġ involviment aktar b'saħħtu u aktar kmieni tas-sħab soċjali, tas-soċjetà ċivili u ta' partijiet interessati oħra biex jitfasslu, jiġu adottati, implimentati u sorveljati l-miżuri meħtieġa sabiex jitħeġġeġ it-tkabbir u jissaħħu d-drittijiet taċ-ċittadini fis-Suq Uniku;

6.

Jenfasizza l-ħtieġa ta' konsultazzjonijiet komprensivi u ta' valutazzjonijiet tal-impatt dettaljati qabel ma l-Kummissjoni tadotta proposta; jenfasizza li l-proposti tal-Kummissjoni għandhom ikunu konformi mal-prinċipji tar-Regolamentazzjoni Intelliġenti, tal-Adegwatezza Regolatorja u jinkudu valutazzjoni tal-impatt fuq l-SMEs, u għandu jkollhom l-approvazzjoni tal-Bord ta' Valutazzjoni tal-Impatt tal-Kummissjoni; jenfasizza, barra minn hekk, li l-valutazzjonijiet tal-impatt iridu jevalwaw l-effetti ta' leġiżlazzjoni ġdida relatata ma' prospetti għal tkabbir u mal-kompetittività tal-Ewropa;

7.

Iqis li l-eżerċizzju tas-Semestru Ewropew għandu jkun marbut ma' proċess demokratiku aktar profond b'involviment akbar tal-parlamenti nazzjonali filwaqt li jissaħħu l-prerogattivi tal-Parlament Ewropew;

8.

Jemmen li rakkomandazzjonijiet speċifiċi għall-pajjiż maħruġa f'dan il-proċess għandhom iqisu l-progress magħmul minn kull Stat Membru u li l-arranġamenti nazzjonali biex tkun implimentata l-leġiżlazzjoni tas-Suq Uniku ma jkunux obbligati jsegwu approċċ wieħed li jkun tajjeb għal kulħadd, imma minflok għandhom ifittxu li jsaħħu l-effikaċja ta' miżuri meħuda u ta' riżultati ta' politika attwalment miksuba;

9.

Jitlob li r-rakkomandazzjonijiet speċifiċi għall-pajjiż mistennija fiċ-ċiklu tas-Semestru Ewropew 2014 jirriflettu r-riżultati tar-rapport dwar l-integrazzjoni tas-Suq Uniku b'mod aktar b'saħħtu u rigoruż mir-rakkomandazzjonijiet speċifiċi għall-pajjiż għall-2013;

10.

Hu tal-fehma li t-tielet pilastru tas-Semestru Ewropew, iddedikat lill-integrazzjoni tas-Suq Uniku, għandu jkun immirat biex jidentifika politiki u miżuri ta' prijorità li jistimulaw u li jerġgħu jagħtu spinta lill-ekonomija reali; iqis li dan il-għan jintlaħaq b'mod effettiv biss jekk l-istituzzjonijiet kollha tal-UE jikkondividuh u jappoġġawh b'mod konsistenti; jinkoraġġixxi, għal din ir-raġuni, organizzazzjoni ffukata tal-ħidma tal-Kunsill tal-Kompetittività sabiex din tkun espliċitament iddedikata biex twassal dawk il-prijoritajiet ta' relevanza lill-ekonomija reali fis-Semestru Ewropew;

11.

Iqis li s-setturi ewlenin identifikati mill-Kummissjoni – is-servizzi, is-servizzi finanzjarji, it-trasport, l-enerġija u s-suq diġitali – jibqgħu deċisivi biex ikun hemm integrazzjoni sħiħa tas-Suq Uniku; iqis, barra minn hekk, li sabiex jintlaħaq tkabbir imġedded, it-tnedija mill-ġdid ta' politika industrijali konsistenti u integrata li tiffoka fuq dawn is-setturi għandha tinkludi wkoll sforzi li jsaħħu l-protezzjoni tad-drittijiet taċ-ċittadini – inklużi dawk tal-konsumaturi u tal-ħaddiema – u mudell ta' kompetittività bbażat fuq it-tagħrif u l-innovazzjoni permezz ta' inċentivi tal-UE li jagħtu spinta lill-investiment u l-aċċess għall-finanzi, ir-R&Ż, u l-appoġġ għal edukazzjoni ogħla;

12.

Iħeġġeġ lill-Kummissjoni tiżviluppa politika industrijali Ewropea ġenwina; jemmen li l-industrijalizzazzjoni mill-ġdid għandha tkun prijorità trassettorjali għall-Unjoni; iqis li din il-politika industrijali ġdida għandha tinkludi t-tisħiħ tar-regoli tas-Suq Uniku, strateġija olistika għad-dimensjoni esterna tas-Suq Uniku b'enfasi partikolari fuq politiki koerenti tal-protezzjoni tal-konsumaturi u aċċess imtejjeb għal kapital u infrastrutturi sabiex tiżdied il-kompetittività tal-kumpaniji u jiġi ffaċilitat l-aċċess tagħhom għal swieq dinjin;

13.

Jenfasizza li, bit-tneħħija tal-ostakli għall-moviment liberu tal-persuni, tal-prodotti, tas-servizzi u tal-kapital, is-Suq Uniku jagħmilha possibbli li n-negozji joperaw fuq skala akbar, biex b'hekk isaħħaħ l-abbiltà tagħhom ta' innovazzjoni, ta' investiment, ta' żieda fil-produttività u ta' ħolqien ta' impjiegi;

14.

Jistieden lill-Kummissjoni tippreżenta pjan ta' azzjoni dettaljat ta' miżuri mfassla biex jinkiseb Suq Uniku tal-enerġija li jkun integrat u interkonness b'mod sħiħ; jenfasizza l-ħtieġa li l-konsumaturi jiġu pprovduti bi prezzijiet trasparenti u komparabbli tal-enerġija filwaqt li fl-istess ħin jiġi żgurat li l-konsumaturi, inklużi l-konsumaturi vulnerabbli, ikunu protetti; jenfasizza l-ħtieġa ta' investiment konsiderevoli fl-infrastruttura tal-enerġija u hu tal-fehma li s-setturi kollha tal-utilitajiet għandhom iżommu l-pass mal-progress fis-settur tal-enerġija;

15.

Jenfasizza li hu essenzjali li titjieb l-infrastruttura – b'mod partikolari l-konnessjonijiet transkonfinali u l-interoperabbiltà – li tiżgura li s-Suq Uniku jista' jiffunzjona b'mod effettiv; jemmen li sistema ta' trasport Ewropea, unika, interkonnessa u effiċjenti hi kruċjali għall-moviment ħieles ta' prodotti, persuni u servizzi fi ħdan is-Suq Uniku; jemmen li aktar investiment hu essenzjali biex jintlaħqu dawn l-objettivi u jtenni li għandhom jitwaqqfu firxa wiesgħa ta' strumenti finanzjarji għal dawn il-proġetti;

16.

Jenfasizza li l-implimentazzjoni konsistenti tal-leġiżlazzjoni attwali u ta' proposti ulterjuri tal-Kummissjoni dwar is-servizzi diġitali tista' tgħin biex l-Ewropa tagħmel użu sħiħ tas-suq intern; jitlob li jkun hemm politika għal suq uniku diġitali li tagħmel is-servizzi online fl-Ewropa aktar kompetittivi, aktar effettivi lil hinn mill-fruntieri u aktar trasparenti filwaqt li tipprovdi livell għoli ta' aċċessibbiltà u protezzjoni tal-konsumatur; jenfasizza l-importanza ta' investimenti mmirati u jinnota li l-ħidma dwar il-proposta għal Kontinent Konness se tgħin biex tnaqqas id-differenza fil-prezzijiet bejn l-Istati Membri billi tinkoraġġixxi l-kompetizzjoni fis-settur tat-telekomunikazzjonijiet;

17.

Jitlob implimentazzjoni ambizzjuża tal-Aġenda tal-Konsumatur, inklużi miżuri leġiżlattivi u ta' programmar, bl-għan li tissaħħaħ il-protezzjoni tal-konsumatur u l-fiduċja fis-Suq Uniku, tingħata s-setgħa lill-konsumaturi, titħeġġeġ imġiba responsabbli mill-konsumatur medju u tiżdied il-protezzjoni tal-konsumaturi vulnerabbli;

18.

Hu tal-fehma li b'aċċess aktar faċli għal fondi mill-SMEs jistgħu jittaffew ir-restrizzjonijiet ta' likwidità u jiżdied il-kapital operatorju tal-SMEs; jilqa' l-fatt li, fost il-prijoritajiet stipulati mill-Kummissjoni fl-Istħarriġ Annwali dwar it-Tkabbir 2014 u fir-rapport dwar l-integrazzjoni tas-Suq Uniku, l-iżvilupp ta' forom ta' finanzjament alternattiv għall-SMEs għandu prijorità għolja; jappoġġja b'saħħa l-objettiv ta' żvilupp ta' bonds speċifiċi u ta' suq tal-borża dedikat għall-SMEs, u jistieden lill-Kummissjoni u lill-Istati Membri jieħdu azzjoni prattika sabiex jintlaħaq dan l-objettiv; barra minn hekk, jappoġġa inizjattivi meħuda fil-livell tal-UE li jikkumplimentaw l-isforzi nazzjonali fiż-żieda ta' mikro-krediti u t-tisħiħ tal-intraprenditorija soċjali, inkluż l-appoġġ tal-banek għall-iżvilupp li jagħtu self b'rati tal-imgħax aktar baxxi mill-banek kummerċjali; jinnota l-importanza partikolari li l-SMEs jingħataw appoġġ permezz tal-programmi COSME u Orizzont 2020;

19.

Jenfasizza r-rilevanza tal-ostakoli għall-funzjonament tas-Suq Uniku kkawżati mill-framentazzjoni tas-servizzi tas-suq finanzjarju għall-konsumatur, kif enfasizzat mill-Kummissjoni fir-rapport dwar l-integrazzjoni tas-Suq Uniku, b'mod partikolari fir-rigward ta' rati tal-imgħax ferm differenti għas-self mill-banek li jħallu impatt qawwi fuq il-konsumaturi, il-familji u l-SMEs; jinsab konvint li dawn id-differenzi jfixklu l-aċċess effettiv għall-finanzjament u jħallu impatt negattiv fuq l-ekonomija reali; jinsab imħasseb dwar l-impressjoni negattiva li għandhom il-konsumaturi dwar il-frammentazzjoni u l-prestazzjoni insuffiċjenti tas-servizzi finanzjarji għall-konsumatur, l-aktar fir-rigward tal-kontijiet tal-bank, is-self ipotekarju, il-pensjonijiet privati u t-titoli;

20.

Jemmen li r-regolamentazzjoni tas-servizzi finanzjarji għandha tipprevedi informazzjoni aħjar, protezzjoni mtejba u rimedju effettiv għall-konsumaturi; jenfasizza l-ħtieġa ta' konklużjoni rapida u pożittiva tal-ħidma fir-rigward tal-proposti leġiżlattivi dwar il-konsumatur u s-suq tas-servizzi finanzjarji għall-konsumatur, b'mod partikolari l-komparabbiltà tat-tariffi relatati mal-kontijiet ta' pagamenti, il-bdil tal-kontijiet ta' pagamenti u l-aċċess għall-kontijiet ta' pagamenti b'karatteristiċi bażiċi; hu tal-fehma li għandhom jitressqu aktar proposti, bħar-reġim speċifiku ta' insolvenza tal-konsumatur biex itejjeb l-arranġamenti frammentati u inadegwati attwali, sabiex jiġi nkoraġġit l-investiment sikur ta' tfaddil privat fl-ekonomija reali;

21.

Jiddispjaċih li, minkejja l-evidenza qawwija dwar l-importanza tas-Suq Uniku biex tingħeleb il-kriżi, il-moviment liberu taċ-ċittadini, b'mod partikolari ta' ħaddiema u professjonisti fl-Ewropa għadu mhux ikkompletat u li għalhekk jinħtieġu miżuri aktar b'saħħithom sabiex jitneħħew l-ostakli li baqa' u jiġi stimulat it-tkabbir filwaqt li jiġu garantiti d-drittijiet taċ-ċittadini u tal-ħaddiema; jenfasizza l-ħtieġa ta' żvilupp bilanċjat tas-suq intern, abbażi ta' implimentazzjoni sħiħa tal-libertajiet ekonomiċi bi qbil mal-ekonomija tas-suq soċjali;

22.

Ifakkar li l-metodu ċikliku ta' tressiq ta' Atti tas-Suq Uniku ta opportunitajiet biex jiġu identifikati u diskussi fuq bażi regolari l-prijoritajiet dwar l-iżvilupp tas-Suq Uniku; iqis li dan il-metodu għandu jissaħħaħ u jiġi żviluppat aktar;

23.

Jilqa' l-pakkett ta' proposti leġiżlattivi għal regolamentazzjoni dwar is-sikurezza tal-prodott tal-konsumatur u r-regolamentazzjoni dwar is-sorveljanza tas-suq u dwar divulgazzjoni ta' informazzjoni mhux finanzjarja u dwar id-diversità minn ċerti kumpaniji u gruppi kbar; jemmen li dawn l-inizjattivi jistgħu jtejbu d-drittijiet tal-konsumaturi, jiggarantixxu aktar is-saħħa u s-sikurezza tal-konsumatur, jiffaċilitaw il-kummerċ fil-prodotti u s-servizzi, u jinkoraġġixxu mudell ġdid ta' kompetittività; jitlob, għalhekk, lill-Kummissjoni taħdem mill-qrib mal-Parlament u mal-Kunsill biex jilħqu konklużjoni f'kalendarju raġonevoli;

24.

Jenfasizza l-importanza tal-ftehimiet politiċi milħuqa fir-rigward tar-riformi tad-Direttiva dwar ir-Rikonoxximent Reċiproku tal-Kwalifiki Professjonali, il-pakkett tal-Akkwist Pubbliku u tal-Konċessjonijiet u d-Direttiva dwar is-Soluzzjoni Alternattiva tat-Tilwim u r-Regolament dwar is-Soluzzjoni Online għat-Tilwim; iħeġġeġ, għalhekk, lill-Kummissjoni u lill-Istati Membri jibdew implimentazzjoni veloċi u komprensiva tad-dispożizzjonijiet il-ġodda kollha;

25.

Jenfasizza l-ħtieġa ta' approvazzjoni u ta' traspożizzjoni xierqa tal-leġiżlazzjoni dwar l-akkwist pubbliku u l-konċessjonijiet; jenfasizza l-importanza tal-akkwist pubbliku bħala mutur ewlieni tat-tkabbir, partikolarment għall-SMEs; hu tal-fehma li l-implimentazzjoni ta' din ir-riforma tipprovdi opportunità ewlenija għall-modernizzazzjoni tal-amministrazzjoni pubblika billi tagħmel użu strateġiku tal-akkwist pubbliku f'termini ta' innovazzjoni u sostenibbiltà u ssaħħaħ il-kwalità u l-effiċjenza tal-infiq pubbliku b'risposta għar-rekwiżiti speċifiċi tal-gvern lokali u nazzjonali; iqis dawn bħala fatturi ewlenin f'implimentazzjoni b'suċċess tar-regoli li jikkonċernaw l-akkwist pubbliku u l-konċessjonijiet;

26.

Jemmen li, speċjalment sabiex jiġi miġġieled il-qgħad taż-żgħażagħ, ir-regoli l-ġodda dwar il-kwalifiki professjonali (adottati f'Novembru 2013 u li jemendaw id-Direttiva 2005/36/KE u r-Regolament IMI) huma pass importanti biex jissaħħaħ il-moviment liberu tal-ħaddiema u tal-professjonisti, filwaqt li jkun previst standard komuni għat-taħriġ u jitħeġġeġ l-użu tal-kard professjonali Ewropea; jenfasizza li l-implimentazzjoni sħiħa u korretta tad-Direttiva dwar ir-Rikonoxximent tal-Kwalifiki Professjonali (u tad-Direttiva dwar is-Servizzi) hi mutur ewlieni tat-tkabbir ekonomiku tal-UE; jemmen fl-istess ħin li hi meħtieġa riforma tal-professjonijiet regolati biex iż-żgħażagħ ikollhom aċċess aħjar għal dawk il-professjonijiet u jinħoloq suq aktar dinamiku li jagħti garanziji adegwati lill-konsumaturi;

27.

Jieħu nota tar-rispons tal-Kummissjoni għar-riżoluzzjoni tal-Parlament tas-7 ta' Frar 2013 fir-rigward tal-bażi legali għal proposta leġiżlattiva mitluba li jkun fiha l-elementi elenkati f'dik ir-riżoluzzjoni; jemmen li l-kontenut tar-rakkomandazzjonijiet speċifiċi magħmula fiha għad fihom ideat ta' valur għal governanza mtejba tas-Suq Uniku;

28.

Jieħu nota tal-istruttura aġġustata tat-tieni edizzjoni tar-rapport dwar l-integrazzjoni tas-Suq Uniku (COM(2013)0785); jilqa' l-fatt li l-Kummissjoni wieġbet ukoll għat-talbiet li l-Parlament għamel fir-riżoluzzjoni tiegħu tas-7 ta' Frar 2013; jinnota li diġà ntwera li għadd ta' miżuri msemmija f'din ir-riżoluzzjoni diġà wasslu għal implimentazzjoni u infurzar imtejba tal-liġi tal-UE, inkluż l-użu aktar strett tal-EU Pilot;

29.

Jilqa' t-Tabella ta' Valutazzjoni Online tas-Suq Uniku, u speċjalment il-mod viżwali u informattiv li bih ippreżentat il-prestazzjoni tal-Istati Membri fir-rigward tal-leġiżlazzjoni relevanti tal-UE dwar il-funzjonament tajjeb tas-suq intern; jemmen li t-Tabella ta' Valutazzjoni online għandha tkun disponibbli fil-lingwi kollha tal-Unjoni biex tkun tista' tagħmilha faċli li ċ-ċittadini Ewropej kollha jifhmu ċ-ċiklu tas-Suq Uniku u r-rwol potenzjalment attiv tagħhom fih;

30.

Jemmen li għandhom isiru sforzi biex l-implimentazzjoni u l-applikazzjoni uniformi tad-dritt tal-Unjoni fl-Istati Membri jkunu aktar trasparenti; jinnota li l-iskadenzi ta' traspożizzjoni jinqabżu b'medja ta' disa' xhur, u li hemm għadd dejjem jikber ta' direttivi li t-traspożizzjoni tagħhom ilha li suppost saret sentejn jew aktar; iqis li kull direttiva għandha tkun trasposta b'mod konsistenti u li kull miżura ta' traspożizzjoni għandha tkun adottata sabiex tirrifletti l-kompromessi milħuqa fil-livell tal-Unjoni;

31.

Jemmen, madankollu, li statistika purament kwantitattiva dwar l-implimentazzjoni tal-leġiżlazzjoni tas-Suq Uniku mhijiex biżżejjed u li jeħtieġ li tingħata attenzjoni għall-kwalità li biha l-leġiżlazzjoni tkun implimentata fl-Istati Membri abbażi ta' indikaturi speċifiċi ewlenin għas-setturi tas-Suq Uniku żviluppati fil-livell Ewropew;

32.

Jilqa' r-rapport bl-isem “il-Katini Internazzjonali tal-valur fl-UE u barra minnha” bħala eżempju pożittiv tal-użu ta' indikaturi speċifiċi sabiex tiġi vvalutata l-integrazzjoni tas-Suq Uniku, b'attenzjoni speċifika mogħtija lill-firxa tas-sistemi ta' produzzjoni fl-UE; iqis li l-għoti ta' appoġġ ulterjuri għal inizjattivi biex jinħolqu katini ta' forniment transkonfinali se jgħin fit-tneħħija ta' ostakli li ilhom jeżistu biex jitkompla s-Suq Uniku u jista' jgħin biex titjieb il-produttività u l-kompetittività tad-ditti Ewropej fl-ekonomija dinjija;

33.

Jinsab kuntent li l-livell ta' defiċit medju ta' traspożizzjoni tjieb, u attwalment niżel għal 0,6 %; jenfasizza li anke defiċit verament żgħir f'qasam ta' politika importanti jista' jħalli effetti negattivi serji fuq l-opportunitajiet tal-konsumaturi u tan-negozji, u b'hekk fuq l-ekonomija Ewropea b'mod ġenerali;

34.

Jiddeplora l-medja ta' żmien tal-proċedimenti ta' ksur, b'mod partikolari l-fatt li każijiet li jitrattaw ma' servizzi jieħdu l-aktar żmien (49,8 xhur bħala medja); iqis li proċedimenti ta' ksur urew għadd ta' limitazzjonijiet f'termini tal-indirizzar u l-korrezzjoni tal-implimentazzjoni u tad-defiċjenzi fl-applikazzjoni tad-dispożizzjonijiet tas-Suq Uniku b'mod rapidu; jistieden lill-Istati Membri jaħdmu b'mod aktar effettiv mal-Kummissjoni biex isibu soluzzjonijiet għal każijiet aktar malajr u jistieden lill-Kummissjoni tkompli taħdem biex telimina miżuri nazzjonali li huma ta' ħsara għas-Suq Uniku;

35.

Hu tal-fehma li l-proċedimenti ta' ksur għandhom ikunu meqjusa bħala l-aħħar rimedju, li għandu jittieħed biss wara li jsiru tentattivi biex tkun koordinata u korretta s-sitwazzjoni, u li l-Kummissjoni għandha, għalhekk, tippromovi l-użu tal-EU Pilot u ta' proċedimenti oħra qabel ma tressaq lil Stat Membru quddiem il-Qorti tal-Ġustizzja; jinsisti, barra minn hekk, li għandu jsir kull sforz biex ikun hemm użu aktar strett ta' proċedimenti ta' ksur għal ksur tad-dispożizzjonijiet tad-dritt tal-Unjoni fil-qasam tas-Suq Uniku, u li l-Istati Membri u l-Kunsill Ewropew għandhom ikomplu jiżviluppaw aktar il-proċedimenti ta' ksur fil-qafas tar-reviżjonijiet futuri tat-Trattat dwar il-Funzjonament tal-Unjoni Ewropea;

36.

Jappoġġa l-azzjonijiet tal-Kummissjoni biex ittejjeb il-kooperazzjoni tal-awtoritajiet nazzjonali fir-rigward tal-funzjonament tas-Suq Uniku; jaqbel li mekkaniżmu permanenti tal-IT li jiffaċilita l-iskambju ta' informazzjoni relevanti jista' jtejjeb b'mod sinifikanti s-sitwazzjoni, għaliex grupp ta' esperti nazzjonali li jiltaqa' ftit drabi fis-sena diffiċilment ikun l-iktar mod xieraq biex jitratta kwistjoni ta' prijorità bħal din;

37.

Itenni l-importanza tal-funzjonament xieraq tas-sistema ta' Informazzjoni tas-Suq Intern (IMI), li reċentement ingħatat bażi regolatorja xierqa u attwalment qed tiġi mwessa' biex tiġbor fiha oqsma u setturi ġodda ta' politika; jistieden lill-Kummissjoni tinforma lill-Parlament dwar l-operazzjoni tal-għodda tat-traduzzjoni awtomatizzata introdotta biex tiffaċilita l-komunikazzjoni bejn l-awtoritajiet nazzjonali, reġjonali u lokali;

38.

Jistieden lill-Istati Membri jimplimentaw b'mod sħiħ il-miżuri previsti fl-aġenda diġitali u jżidu l-isforzi biex jimmodernizzaw l-amministrazzjoni pubblika – mhux l-inqas permezz tal-implimentazzjoni rapida ta' miżuri relatati mal-gvern elettroniku, mas-saħħa elettronika, mal-fatturar elettroniku u mal-akkwist elettroniku – bl-għan li jipprovdu aktar servizzi diġitali li jkunu aħjar għaċ-ċittadini u l-kummerċ fl-Ewropa kollha u li jnaqqsu l-ispejjeż u jsaħħu l-effiċjenza tas-settur pubbliku;

39.

Jinnota li n-netwerk għas-soluzzjoni ta' problemi SOLVIT għadu mhux użat biżżejjed; jistieden lill-Istati Membri jiżguraw li jkunu provduti risorsi adegwati għan-netwerk SOLVIT u l-Punti ta' Kuntatt Uniku, kif mitlub mid-Direttiva dwar is-Servizzi; jistieden lill-Kummissjoni u lill-Istati Membri biex flimkien jieħdu passi li jwasslu l-informazzjoni dwar id-disponibbiltà ta' dawn l-istrumenti fost in-negozji u l-imprendituri; iqis, barra minn hekk, li l-Istati Membri għandhom iniedu skambju iżjed intensiv u wiesa’ tal-aħjar prattika;

40.

Jieħu nota taż-żieda kontinwa fl-użu tal-portals L-Ewropa Tiegħek u Pariri tal-Ewropa Tiegħek, li għandhom ikunu kapaċi jipprovdu l-informazzjoni meħtieġa lil kull min jivjaġġa minn post għall-ieħor fl-Ewropa;

41.

Jilqa' x-Xahar tas-Suq Uniku li, bejn it-23 ta' Settembru u t-23 ta' Ottubru 2013, ġab flimkien liċ-ċittadini mill-Ewropa kollha – dawk li jfasslu l-politiki, l-esperti u mexxejja tal-UE _ f'dibattitu online kif ukoll l-avvenimenti nazzjonali relatati biex jiġi diskuss il-progress li sar s'issa, l-isfidi li fadal u ideat għall-futur tas-Suq Uniku, u jistieden lill-Kummissjoni tevalwa sew it-tħassib u s-suġġerimenti li jitressqu mill-parteċipanti; jistieden lill-Kummissjoni tevalwa l-format u l-effettività tal-eżerċizzju tal-2013, inkluż il-kapaċità li tikkomunika maċ-ċittadini, in-negozji u l-konsumaturi, u tipprovdihom b'opportunità reali biex jikkontribwixxu għat-twettiq tas-Suq Uniku;

42.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni, lill-Kunsill, lill-Kunsill Ewropew, u lill-parlamenti u lill-gvernijiet tal-Istati Membri.

29.8.2017   

MT

Il-Ġurnal Uffiċjali tal-Unjoni Ewropea

C 285/47

—

wara li kkunsidra r-rapport tal-2009 tal-Organizzazzjoni tal-Ikel u l-Agrikoltura tan-Nazzjonijiet Uniti (FAO) bit-titolu “Kif nitimgħu d-dinja fl-2050”,

—

wara li kkunsidra l-Konvenzjoni Internazzjonali għall-Protezzjoni ta’ Varjetajiet Ġodda ta’ Pjanti (il-Konvenzjoni tal-UPOV),

—

wara li kkunsidra t-Trattat Internazzjonali tal-FAO dwar ir-Riżorsi Ġenetiċi tal-Pjanti għall-Ikel u l-Agrikoltura,

—

wara li kkunsidra r-rapport ta’ April 2013 bit-titolu “Headed for 9 billion – Can Europe afford to miss the potential of GM crops” (“Dalwaqt nilħqu d-Disa’ Biljuni – Jaqblilha l-Ewropa li ma tgawdix mill-potenzjal tal-għelejjel ĠM?”) ta’ Ivar Virgin/Stockholm Environment Institute, Timbro,

—

wara li kkunsidra r-rapport tal-FAO tal-1993 bit-titolu “Harvesting nature’s diversity” (“Naħsdu d-diversità tan-natura”),

—

wara li kkunsidra l-websajt dwar is-Svalbard Global Seed Vault (1),

—

wara li kkunsidra l-Komunikazzjoni tal-Kummissjoni tas-27 ta’ Marzu 2001 bit-titolu “Pjan ta’ azzjoni favur il-biodiversità fil-qasam tal-protezzjoni ta’ riżorsi naturali” (COM(2001)0162),

—

wara li kkunsidra r-Regolament (KE) Nru 1829/2003 tal-Parlament Ewropew u tal-Kunsill tat-22 ta' Settembru 2003 dwar ikel u għalf modifikat ġenetikament (2),

—

wara li kkunsidra d-Direttivi tal-Kunsill 2002/53/KE tat-13 ta' Ġunju 2002 dwar il-katalgu komuni tal-varjetajiet tal-ispeċijiet tal-pjanti agrikoli (3) u 2002/55/KE tat-13 ta' Ġunju 2002 dwar il-kummerċjalizzazzjoni taż-żerriegħa tal-ħxejjex (4),

—

wara li kkunsidra r-Regolament (KE) Nru 1830/2003 tal-Parlament Ewropew u tal-Kunsill tat-22 ta’ Settembru 2003 dwar it-traċċjabilità u l-ittikkettjar ta’ organiżmi modifikati ġenetikament u t-traċċjabilità ta’ prodotti ta’ l-ikel u għalf manifatturati minn organiżmi modifikati ġenetikament u li jemenda d-Direttiva 2001/18/KE (5),

—

wara li kkunsidra r-Regolament tal-Kunsill (KE) Nru 2100/94 tas-27 ta' Lulju 1994 rigward id-drittijiet Komunitarji dwar il-varjetà tal-pjanti (6),

—

wara li kkunsidra n-nota tas-Segretarju Ġenerali tan-NU bit-titolu “The right to food – Seed policies u and the right to food: enhancing agrobiodiversity and encouraging innovation” (A/64/170, 2009, l-Assemblea Ġenerali tan-NU),

—

wara li kkunsidra l-konklużjonijiet tal-Valutazzjoni Internazzjonali tal-Għarfien, Xjenzi u Teknoloġiji Agrikoli għall-Iżvilupp (IAASTD), proċess intergovernattiv appoġġat mill-FAO, il-Fond għall-Ambjent Dinji (GEF), il-Programm ta' Żvilupp tan-Nazzjonijiet Uniti (UNDP), il-Programm tan-Nazzjonijiet Uniti għall-Ambjent (UNEP), il-UNESCO, il-Bank Dinji u d-WHO,

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Agrikoltura u l-Iżvilupp Rurali (A7-0044/2014),

A.

billi l-Kumitat għall-Agrikoltura u l-Iżvilupp Rurali tiegħu għandu l-għan, permezz ta’ dan ir-rapport, li jniedi dibattitu komprensiv u inkjesta dwar is-sitwazzjoni kollha fir-rigward tat-tnissil ta’ pjanti fl-agrikoltura Ewropea u dik globali;

B.

billi l-industrija tat-tnissil ta’ pjanti hija ta’ importanza fundamentali fir-rigward tal-produttività, id-diversità, is-saħħa u l-kwalità tal-agrikoltura, l-ortikoltura, il-produzzjoni tal-ikel u l-għalf, u l-ambjent;

C.

billi, skont rapporti primarjament mill-entitajiet tan-NU, il-FAO u d-WHO, kif ukoll Panel Intergovernattiv tan-NU dwar it-Tibdil fil-Klima, il-popolazzjoni dinjija hija mistennija li tiżdied miċ-ċifra attwali ta' seba’ biljuni għal madwar disa’ biljuni bejn l-2040 u l-2050, u barra minn hekk, din iċ-ċifra tista’ tilħaq ukoll l-10 jew il-11-il biljun;

D.

billi din il-popolazzjoni se titfa’ domandi estremi fuq l-agrikoltura, b’mod partikolari l-produttività akbar li se tkun meħtieġa biex tiġi ssodisfata ż-żieda sostanzjali fit-talba għall-ikel, u billi l-FAO tistma li l-provvista tal-ikel se jkollha bżonn tiżdied b’70 % fuq it-30 sa 40 sena li ġejjin;

E.

billi minħabba li bejn 30 % u 50 % tal-ikel prodott jinħela fl-UE, b’medja globali ta’ madwar 30 %, parti sostanzjali mill-provvista miżjuda tal-ikel akbar meħtieġ tista’ tkun sodisfatta permezz ta’ prattiki tal-produzzjoni tal-ikel li jkunu aktar effiċjenti u sostenibbli fin-nazzjonijiet li qed jiżviluppaw, flimkien ma’ sistemi mkabbra ta’ ħżin u ta’ distribuzzjoni fil-pajjiżi li qed jiżviluppaw;

F.

billi l-problema ewlenija tibqa’ ta' kif il-popolazzjonijiet f’partijiet differenti tad-dinja se jkunu jistgħu jitimgħu lilhom infushom, peress li l-meded ta' art li jistgħu jiġu kkultivati qed jonqsu minħabba użu mhux xieraq tal-art inkluż prattiki agrikoli fqar, problema li ġiet aggravata bit-tibdil fil-klima, u filwaqt li opportunitajiet għat-tkabbir tal-meded ta’ art li hija kkultivata huma estremament limitati, peress li f’bosta partijiet tad-dinja huwa maħsub li mhu realistiku xejn li tiddaħħal fl-użu art agrikola ġdida;

G.

billi l-FAO tqis li ser ikun possibbli li jintlaħaq xi 10 % ta' żieda fil-produzzjoni agrikola mill-kultivazzjoni ta’ art agrikola ġdida, li jfisser li madwar 90 % jkollu jintlaħaq permezz ta' żieda fir-rendimenti minn art agrikola eżistenti, filwaqt li l-prodotti jridu jibqgħu jkunu ta’ kwalità tajba;

H.

billi l-esplojtazzjoni żejda ta’ art agrikola tista’ tfaqqar il-ħamrija, u fl-agħar każ, twassal għall-erożjoni u d-deżertifikazzjoni; billi l-istess ħaġa tapplika għall-meded ta' art bl-imsaġar, għax il-konverżjoni ta' meded ta' art bl-imsaġar għal art agrikola jkollha impatt hekk serju fuq il-klima, l-immaniġġjar tal-ilma u fuq il-bijodiversità li hija għażla inkonċepibbli biex tiżdied il-produzzjoni tal-ikel;

I.

billi, barra mit-tnaqqis fil-medda tal-art agrikola, il-produttività agrikola ma baqgħetx tiżdied, u xejriet inkwetanti, inkluż tnaqqis fil-produttività, ġew innutati, u se jkollhom impatt serjament avvers fuq l-agrikoltura fil-ġejjieni u fuq il-ħtiġijiet tal-ikel tal-bnedmin;

J.

billi l-produzzjoni tal-ikel ma tiddependix biss mid-disponibilità ta’ massa suffiċjenti ta’ art iżda wkoll minn fatturi bħall-klima, l-ilma, l-enerġija, u l-aċċess għan-nutrijenti; billi fil-ġejjieni dawn ir-riżorsi bażiċi se jkunu aktar limitati, u dan in-nuqqas ta’ riżorsi x’aktarx li jkollu effett avvers fuq iż-żieda fid-domanda għall-użu ta’ art agrikola, il-produzzjoni u l-vijabilità;

K.

billi x’aktarx li jseħħu tibdiliet maġġuri fil-klima fil-ġejjieni; billi għall-Ewropa dan ifisser klima sinifikament aktar xotta fir-reġjuni tan-Nofsinhar, li huma żoni ta’ importanza kbira għall-produzzjoni tal-frott u l-ħxejjex; billi fil-latitudnijiet ċentrali u tat-Tramuntana fl-Ewropa, sadattant, ix-xtiewi huma mistennija li jsiru aktar moderati u s-sjuf mistennija jkollhom konsiderevolment aktar xita milli fil-preżent; billi l-konsegwenzi probabbilment li jinkludu żieda fil-mard tal-annimali u tal-pjanti, u l-ħtieġa ta' tekniki ġodda tal-biedja;

L.

billi huwa bla dubju l-każ li l-agrikoltura Ewropea qed tiffaċċja sfidi enormi, u b'kundizzjonijiet tat-temp aktar estremi, bħalma huma nixfiet, għargħar u diżastri naturali oħra, il-biedja se jkollha bżonn tadatta bil-għan li tiġi salvagwardjata l-produzzjoni; billi l-għelejjel li wieħed jara fl-għelieqi fir-raba' llum ma jistgħux jibqgħu l-istess fil-ġejjieni jekk għandna niffaċċjaw il-ħtieġa akbar għall-ikel;

M.

billi t-tul tal-protezzjoni tad-drittijiet fuq il-varjetà fir-rigward ta’ dawk il-pjanti li jeħtieġu perjodu estiż ta' żvilupp qabel l-istadju tal-kummerċjalizzazzjoni mhuwiex biżżejjed biex ikun inkoraġġit l-investiment kummerċjali fir-riċerka u l-iżvilupp tagħhom;

1.

Jenfasizza li, sabiex issir reazzjoni għall-isfidi li ġejjin fuqna, bħalma huma l-ħtiġijiet ta' provvista futuri tal-ikel u t-tibdil fil-klima, huwa eċċezzjonalment importanti li jkollna settur effettiv u kompetittiv ta’ tnissil tal-pjanti;

2.

Minkejja l-importanza primarja ta’ ħamrija b’saħħitha u diversità fir-rigward tar-reżiljenza lill-agroekosistema, jenfasizza kemm hu importanti li jiġu żviluppati varjetajiet li jistgħu jiffaċċjaw il-kundizzjonijiet li qed nistennew li nsibu ma' wiċċna fil-futur, bħal pereżempju aktar xita u żieda fl-okkorrenza stmata ta’ mard tal-pjanti; jinnota li huwa importanti wkoll li nippreservaw u niżviluppaw id-diversità eżistenti fl-Ewropa, kemm fl-agroekosistema bħala xi ħaġa sħiħa kif ukoll fir-rigward tad-diversità ġenetika fi ħdan ir-razez u n-numru assolut ta’ tnissil differenti u razez lokali, minħabba li dawn kollha huma meħtieġa biex jiġi żgurat li aħna nkunu nistgħu nadattaw għall-isfidi tat-tibdil fil-klima;

3.

Jinnota l-ħtieġa ta' għelejjel li, pereżempju, jassorbu n-nitroġenu u l-fosfru b’mod effettiv, li huma aktar tolleranti għal nuqqas ta’ xita u għal xita aktar qawwija, li huma reżistenti għal insetti qerrieda u li jistgħu jifilħu għal tibdil fit-temperatura; jenfasizza l-fatt li huwa neċessarju wkoll li jiġu żviluppati għelejjel perenni, jiġifieri għelejjel pluriennali; jinnota li, fil-każ ta' għelejjel pluriennali, l-art ma għandhiex għalfejn tinħarat kull sena, u b’hekk il-biedja tkun ambjentalment aktar soda;

4.

Jenfasizza li, minħabba li huma meħtieġa madwar 10 snin biex tkun żviluppata varjetà ġdida, mill-istadju tar-riċerka għaż-żerriegħa finali u ħin addizzjonali biex dik il-varjetà tiġi pruvata u propagata b’mod kummerċjali, anke issa hemm bżonn ta’ inkoraġġament sostanzjali fl-investiment għal aktar riċerka sabiex jiġu ssodisfati l-bżonnijiet futuri tal-ikel u jiġi ffaċċjat it-tibdil fil-klima;

5.

Jenfasizza li, minħabba li l-opportunitajiet biex tinġieb fl-użu art agrikola ġdida huma limitati ħafna, huwa essenzjali li jiġi faċilitat il-proċess ta' żvilupp ta' għelejjel ġodda li huma karatterizzati mill-adattabilità tagħhom għall-kundizzjonijiet ambjentali, kemm huma adattati fir-rigward tal-ħtieġa tagħhom li jkampaw b'riżorsi skarsi, l-appoġġ għal għanijiet sostenibbli, produttività suffiċjenti u kwalità għolja, u jenfasizza l-fatt li huwa importanti wkoll li jiġu żviluppati għelejjel li diġà huma użati ħafna, bil-għan li tiġi injettata l-flessibilitá fl-iżviluppi tekniċi u xjentifiċi futuri fis-settur tal-għelejjel;

6.

Jinnota li t-telf kontinwu ta’ prodotti speċifiċi għall-protezzjoni tal-pjanti għal użu minuri qed ikollu impatt sinifikanti ħafna fuq il-kwalità u r-rendiment tal-frott u l-ħxejjex u qed ipoġġi f’periklu l-produzzjoni ta’ xi għelejjel ta’ speċjalità; jenfasizza l-bżonn li jinstabu kemm soluzzjonijiet għall-futur qrib u kemm għall-futur 'il bogħod fir-rigward tal-kultivazzjoni ta’ dawn l-għelejjel;

7.

Jinnota li jista' jieħu medja ta' 10 snin biex tiġi żviluppata varjetá ġdida ta' qamħ, kolza jew kwalunkwe wiċċ ieħor, u li huwa għalhekk importanti li jiġu żviluppati u użati tekniki ġodda tat-tnissil tal-pjanti li jwieġbu għad-domandi tas-soċjetà u dawk agrikoli u li nkunu miftuħa għat-teknoloġiji disponibbli bil-għan li nissodisfaw dawk il-ħtiġijiet u nsaħħu l-kompetittività tas-settur agrikolu u dak tal-ortikoltura; jesprimi tħassib minħabba d-dewmien tal-Kummissjoni biex tivvaluta tekniki ġodda tat-tnissil, u jistieden lill-Kummissjoni, biex b'urġenza, tiċċara l-istatus regolatorju tagħhom;

8.

Jistieden lill-Kummissjoni tuża l-Programm Qafas għar-Riċerka u l-Innovazzjoni ta' Orizzont 2020 tiffinanzja riċerka applikati li tappoġġa l-iżvilupp ta’ tekniki ġodda ta’ tnissil ta’ pjanti innovattivi ġodda bħalma hu t-tnissil aċċellerat;

9.

Jinnota li l-istimi mressqa mill-FAO li d-diversità tal-għelejjel ikkultivati naqset b'75 % matul is-seklu 20 u li terz tad-diversità tal-lum jista' jisparixxi sal-2050; jenfasizza li, bil-għan li tiġi żgurata s-sigurtà tal-ikel fit-tul għal popolazzjoni dinjija li qiegħda tikber u reżiljenza fis-sistemi ta' produzzjoni tal-ikel, huwa ta' importanza kruċjali li nipproteġu u nippreservaw id-diversità bijoloġika u ġenetika Ewropea; jemmen li huwa vitali, għalhekk, li nippreservaw il-maġġoranza l-kbira tal-varjetajiet lokali u reġjonali in situ u fl-azjendi tal-biedja, bil-għan li tibqa' tinżamm u tiżdied id-diversità ġenetika u kulturali kemm fi ħdan ir-razez u n-nisliet u kemm f'dak li hu n-numru assolut tagħhom;

10.

Jisħaq li, biex l-iżvilupp ta’ varjetajiet ġodda jkun possibbli, huwa essenzjali li jkollna ħafna varjazzjonijiet ġenetiċi disponibbli; jemmen, għalhekk, li t-tnaqqis rapidu huwa kawża ta’ tħassib serju;

11.

Jilqa' kemm l-iżvilupp ta' sħubijiet bejn il-gvern, l-industrija u l-organizzazzjonijiet tar-riċerka, eż. fil-qasam tat-tnissil parteċipattiv, immirat biex jistimola r-riċerka dwar qabel it-tnissil u t-tnissil, u l-karatterizzazzjoni u ż-żamma tar-riżorsi ġenetiċi; jiġbed l-attenzjoni lejn il-benefiċċji tat-tisħiħ u t-twessigħ ta' tali sħubijiet kif ukoll inizjattivi transnazzjonali f'dan il-qasam, u jisħaq fuq il-ħtieġa li jiġi żgurat li l-iskemi ta' appoġġ ikunu strutturati b’mod li jimmassimizzaw l-impatt u l-koerenza tal-investimenti b’mod globali;

12.

Jemmen li huwa vitali, meta wieħed iqis il-ġejjieni tal-Ewropa, li naħdmu serjament biex nippriservaw il-wirt ġenetiku tagħna, u li huwa partikolarment importanti li nikkultivaw u nippreservaw il-varjetajiet lokali u reġjonali sabiex nikkonservaw kemm id-diversità ġenetika u kemm dik kulturali;

13.

Jinnota li, f'tentattiv biex tiġi preservata u miżmuma l-varjetà ġenetika fl-agrikoltura u t-tnissil tal-pjanti, kollezzjonijiet ta’ żrieragħ u materjal tal-pjanti qed jinġabru f’diversi banek tal-ġeni madwar id-dinja; jinnota b’mod partikolari li hemm bank tal-ġeni f’Svalbard li fih materjal ġenetiku minn madwar id-dinja kollha, u jenfasizza l-fatt li dan huwa proġett importanti ħafna u ambizzjuż li għandu l-għan li tiġi salvagwardjata d-diversità ġenetika għall-ġejjieni;

14.

Jemmen li huwa importanti li tiġi ppreservata l-maġġoranza vasta tal-varjetajiet u tar-riżorsi ġenetiċi tal-pjanti in-situ jew fl-azjendi agrikoli; jiġbed l-attenzjoni għall-fatt li l-istituzzjonijiet pubbliċi attwalment mhumiex qed jagħmlu sforz biżżejjed jew jagħtu appoġġ biżżejjed biex jiffaċilitaw dan il-għan;

15.

Jisħaq li dan u proġetti oħra simili huma vitali għall-futur tat-tnissil tal-pjanti, il-produzzjoni agrikola u l-provvista tal-ikel;

16.

Jenfasizza l-fatt li r-riċerka u l-prattika tat-tnissil tal-pjanti huma deċiżivi għall-ġejjieni tal-produzzjoni agrikola, b’mod partikolari l-ħidma fuq l-iżvilupp ta’ varjetajiet eżistenti u dawk ġodda, bil-ħsieb li tiġi salvagwardjata l-provvista tal-ikel tal-ġejjieni;

17.

Jirrikonoxxi l-importanza li tingħata garanzija ta' aċċess għal riżorsi ġenetiċi bħala l-bażi għat-tnissil ta’ pjanti; jiddefendi b’mod partikolari l-prinċipju fundamentali tas-sistema internazzjonali tad-drittijiet ta’ min inissel il-pjanti mnaqqax fil-Konvenzjoni Internazzjonali għall-Protezzjoni ta’ Varjetajiet Ġodda ta’ Pjanti (Konvenzjoni tal-UPOV), u jenfasizza li l-użu ta’ varjetà protetta għal aktar tnissil u l-isfruttament tal-varjetà li tkun għada kemm ġiet imnissla ma jistgħux jiġu pprevenuti mid-detenturi ta' tali drittijiet; jinnota li dan il-prinċipju fundamentali huwa rikonoxxut ukoll fl-Artikolu 13.2(d)(ii) tat-Trattat Internazzjonali tal-FAO dwar ir-Riżorsi Ġenetiċi tal-Pjanti għall-Ikel u l-Agrikoltura;

18.

Jifhem li l-iżvilupp ta’ varjetajiet ġodda mtejba huwa kemm għoli kif ukoll jieħu ż-żmien, madankollu jenfasizza li dan huwa meħtieġ bil-għan li tinżamm il-kompetittività tal-Ewropa f’dan il-qasam; jissuġġerixxi li tali spejjeż jistgħu jiġu kumpensati billi tiġi estiża d-durata tad-drittijijiet tal-protezzjoni tal-varjetajiet tal-pjanti wara li tkun saret valutazzjoni xierqa tal-impatt;

19.

Jesprimi t-tħassib tiegħu għall-fatt li s-suq dinji tat-tnissil tal-pjanti huwa ddominat minn għadd tassew żgħir ta' impriżi multinazzjonali kbar li jinvestu biss f'għadd limitat ta' varjetajiet, filwaqt li fl-Ewropa s-suq tat-tnissil tal-pjanti għadu aktar diversifikat meta mqabbel mas-sitwazzjoni globalment, fejn l-intrapriżi żgħar u ta' daqs medju jiffurmaw parti sostanzali mis-settur; jenfasizza li s-suq Ewropew tat-tnissil tal-pjanti għandu jiġi mtejjeb aktar fl-interess tal-kompetizzjoni sana;

20.

Jemmen li l-impriżi dinjija kbar tat-tnissil tal-pjanti kisbu livell inkwetanti ta' influwenza fuq l-agrikoltura globali u l-politika agrikola; jenfasizza r-rwol tar-riċerka xjentifika indipendenti finanzjata pubblikament li ssir fl-interess pubbliku fit-tul fir-rigward tas-sigurtà tal-ikel fuq żmien twil;

21.

Jemmen, barra minn hekk, li l-impriżi li huma akbar għandhom jisfruttaw aħjar u jaqsmu ma' xulxin it-tekniki tagħhom tat-tnissil tal-pjanti, li, jekk jintużaw b’mod korrett, jistgħu jgħinu fis-soluzzjoni ta’ problemi relatati mal-ambjent, mal-klima u mal-provvista tal-ikel;

22.

Jinnota l-fatt li l-SMEs għandhom rwol importanti x'jaqdu fis-suq taż-żrieragħ u fis-settur tat-tnissil tal-pjanti fl-UE, meta wieħed iqis il-kontribuzzjoni sinifikanti tagħhom għat-tnissil tal-pjanti kummerċjali, u jiġbed l-attenzjoni lejn l-abilità tagħhom li jaqilbu r-riċerka u l-għarfien fi prodotti kummerċjali ġodda; madankollu, waqt li t-tnissil tal-pjanti qed isir settur kulma jmur iktar intensiv fir-riċerka u b’teknoloġija avvanzata, jiġbed l-attenzjoni għall-fatt li l-ispejjeż u l-għodod meħtieġa biex varjetà ġdida tiġi żviluppata u mbagħad ikkummerċjalizzata, jistgħu jkunu ta' ostakolu għall-kumpaniji li huma ta' daqs iżgħar; jemmen li durata adegwata ta' protezzjoni tad-drittijiet tagħhom fuq il-varjetà tal-pjanti u aċċess sħiħ għar-riżultati tar-riċerka jistgħu jikkontribwixxu b'mod sinifikanti biex il-kundizzjonijiet isiru ekwi għal dawk involuti, u jenfasizza li huwa ta' importanza vitali li l-investiment f'dawn il-kumpaniji fl-UE jinżamm miexi 'l quddiem;

23.

Jisħaq li huwa importanti li l-Ewropa tirbaħ lura u tkompli tiżviluppa aktar ir-riċerka u l-prattika Ewropej tat-tnissil tal-pjanti;

24.

Jenfasizza l-importanza tad-diversità tal-ispeċijiet fl-Ewropa, u tar-riċerka Ewropea dwar it- tnissil tal-pjanti li tiffoka fuq il-bżonnijiet Ewropej, inklużi pjanti, ċereali u frott li huma adattati għall-kundizzjonijiet lokali u reġjonali; jinnota li kwalunkwe żvilupp li jsir f’dan il-qasam se jgħin sabiex il-bdiewa Ewropej itejbu l-kwantità u l-kwalità tal-produzzjoni tal-ikel u l-għalf tagħhom;

25.

Jenfasizza li l-Ewropa teħtieġ firxa ta’ atturi differenti fis-settur tat-tnissil tal-pjanti u li għandu jsir possibbli li aktar impriżi u ċentri tar-riċerka jwettqu proġetti ta’ riċerka u joperaw fis-settur tat-tnissil tal-pjanti;

26.

Iqis li r-riċerka tat-tnissil tal-pjanti, jekk għandha tkompli, teħtieġ appoġġ finanzjarju fit-tul, u li mhuwiex sostenibbli li jingħata appoġġ finanzjarju għal proġett ta’ riċerka tat-tnissil tal-pjanti biss għal perjodu relattivament qasir, peress li huma meħtieġa medja ta’ 10 snin biex tiġi żviluppata varjetà ġdida;

27.

Jisħaq li l-UE, skont il-Politika Agrikola Komunit, għandha d-dmir li tassumi r-responsabilità tagħha biex tissodisfa l-isfidi futuri fil-qasam tal-agrikoltura u t-tnissil tal-pjanti fl-Ewropa; iqis li l-UE għandha taqdi rwol ewlieni fl-iżvilupp ta’ tekniki sostenibbli ta’ tnissil tal-pjanti u fil-promozzjoni tar-riċerka u l-prattika agrikoli u tat-tnissil tal-pjanti;

28.

Jenfasizza li riċerka fundamentali tat-tnissil tal-pjanti fl-UE għandha tkun finanzjata mill-UE u mill-Istati Membri tagħha; ma jemminx li huwa possibbli għall-impriżi żgħar u ta’ daqs medju tat-tnissil tal-pjanti fl-UE li jiffinanzjaw il-parti l-kbira tar-riċerka huma stess u fl-istess waqt ikunu kompetittivi;

29.

Jistieden lill-Kummissjoni talloka riżorsi finanzjarji u toħloq struttura koerenti għar-riċerka u l-prattika tat-tnissil tal-pjanti fi ħdan il-programmi ta’ riċerka u strumenti ta’ politika adegwati oħra, sabiex id-diversità Ewropea tkun tista’ tiġi preservata u żviluppata; jemmen li huwa importanti, b’mod partikolari, li l-proġetti ta’ riċerka jingħataw biżżejjed żmien u fondi biex jiksbu r-riżultati; jenfasizza li huwa wkoll ta’ importanza kbira li l-impriżi tat-tnissil ta’ pjanti jkollhom aċċess bla restrizzjonijiet għar-riżultati tar-riċerka, u li għandu jkun hemm firxa ta’ proġetti ta’ riċerka differenti, sabiex il-falliment ikollu impatt iżgħar;

30.

Jenfasizza l-fatt li se jkun hemm ħtieġa kontinwa ta’ nies tas-sengħa ta' ħila kbira biex jiġu ssodisfati d-domandi tal-futur fir-riċerka tat-tnissil tal-pjanti, u li x-xjenza tal-pjanti u t-tnissil tal-pjanti għandhom jiġu promossi aktar fl-iskejjel, l-universitajiet u fost il-pubbliku ġenerali; jirrimarka b’mod partikolari dwar is-suċċess “Jum il-Faxxinu tal-Pjanti” fit-18 ta’ Mejju 2013;

31.

Jenfasizza li l-għan aħħari tal-leġiżlazzjoni dwar it-tnissil tal-pjanti għandu jkun li jiġu ffaċilitati kemm l-applikazzjoni tat-tekniki tat-tnissil tal-pjanti u kemm ir-riċerka dwar l-agrikoltura u t-tnissil tal-pjanti; jemmen li dan għandu jirriżulta fi prodotti adattati aħjar għall-klima lokali u l-kundizzjonijiet ġeografiċi lokali, li finalment se jwasslu għal rendimenti kbar li jkunu sikuri għas-saħħa tan-nies u għall-ambjent;

32.

Jinnota li, bil-leġiżlazzjoni tal-lum dwar it-tnissil tal-pjanti bbażata fuq it-tekniki, irriżulta li huwa diffiċli, wara l-avveniment, li jiġi definit liema teknika tkun intużat fil-waqt tat-tnissil tal-pjanti, li jservi ta' konferma tad-diffikultajiet ippreżentati minn liġijiet ibbażati fuq it-teknika;

33.

Jistieden lill-Kummissjoni, b’kunsiderazzjoni tal-isfidi u s-sitwazzjoni attwali tas-settur Ewropew u globali tat-tnissil tal-pjanti, kif deskritta hawn fuq, teżamina u tanalizza b’attenzjoni s-sitwazzjoni u tipproponi miżuri effettivi u prattiċi biex jiġu indirizzati l-isfidi enormi li jiffaċċjaw in-nissiela u l-bdiewa Ewropej;

34.

Jinkoraġġixxi lill-Kummissjoni tiżviluppa strateġija ġenerali dwar l-inputs tal-agrikoltura, speċjalment fir-rigward ta’ tnissil ta’ pjanti; iħeġġeġ lill-Kummissjoni tipprovdi qafas ta’ politika li jappoġġja l-input tas-settur tal-agrikoltura bħala wieħed mill-oqsma ewlenin għall-iżvilupp ta’ produttività u sostenibbiltà agrikola;

35.

Jagħti struzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

29.8.2017   

MT

Il-Ġurnal Uffiċjali tal-Unjoni Ewropea

C 285/52

—

wara li kkunsidra 'Is-seba' rapport ta' progress dwar il-koeżjoni ekonomika, soċjali u territorjali', tal-Kummissjoni tal-24 ta' Novembru 2011 (COM(2011)0776), u d-dokument ta' ħidma tal-persunal li jakkumpanjah (SEC(2011)1372),

—

wara li kkunsidra 'It-tmien rapport ta' progress dwar il-koeżjoni ekonomika, soċjali u territorjali – L-aspetti reġjonali u urbani tal-kriżi', tal-Kummissjoni tas-26 ta' Ġunju 2013 (COM(2013)0463), u d-dokument ta' ħidma tal-persunal li jakkumpanjah (SWD(2013)0232),

—

wara li kkunsidra 'Il-politika ta’ koeżjoni: Rapport strateġiku tal-2013 dwar l-implimentazzjoni tal-programm għal bejn l-2007 u l-2013', tal-Kummissjoni tat-18 ta' April 2013 (COM(2013)0210), u d-dokument ta' ħidma tal-persunal li jakkumpanjah (SWD(2013)0129),

—

wara li kkunsidra l-proposta tal-Kummissjoni tas-6 ta’ Ottubru 2011 għal regolament tal-Parlament Ewropew u tal-Kunsill li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew koperti mill-Qafas Strateġiku Komuni u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta’ Koeżjoni u li jħassar ir-Regolament (KE) Nru 1083/2006 (COM(2011)0615),

—

wara li kkunsidra r-riżoluzzjoni tiegħu tal-11 ta' Marzu 2009 dwar il-Politika ta' Koeżjoni: investiment fl-ekonomija reali (1),

—

wara li kkunsidra r-riżoluzzjoni tiegħu tas-7 ta' Ottubru 2010 dwar il-politika ta’ koeżjoni u l-politika reġjonali tal-UE wara l-2013 (2),

—

wara li kkunsidra r-riżoluzzjoni tiegħu tal-20 ta’ Mejju 2010 dwar il-kontribut tal-politika ta’ koeżjoni għall-ksib tal-objettivi ta’ Lisbona u tal-UE2020 (3),

—

wara li kkunsidra l-proposta tal-Kummissjoni tas-6 ta’ Ottubru 2011 għal regolament tal-Parlament Ewropew u tal-Kunsill dwar dispożizzjonijiet speċifiċi li jikkonċernaw il-Fond Ewropew għall-Iżvilupp Reġjonali, u l-Investiment li għandu fil-mira t-tkabbir ekonomiku u l-impjiegi, u jirrevoka r-Regolament (KE) Nru 1080/2006 (COM(2011)0614),

—

wara li kkunsidra r-raba' Rapport ta' Monitoraġġ KtR dwar l-istrateġija Ewropa 2020, il-Kumitat tar-Reġjuni, ta' Ottubru 2013,

—

wara li kkunsidra d-dokument konġunt mid-Direttorat Ġenerali għall-Politika Reġjonali u Urbana u d-Direttorat Ġenerali għax-Xogħol, l-Affarijiet Soċjali u l-Inklużjoni, bl-isem 'Politika ta' Koeżjoni tal-UE li tikkontribwixxi għall-impjiegi u t-tkabbir fl-Ewropa', ta' Lulju 2013,

—

wara li kkunsidra l-istudju ppubblikat mill-Parlament bl-isem “Politika ta' koeżjoni wara l-2013: valutazzjoni kritika tal-proposti leġiżlattivi”, ta' Ġunju 2012,

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali u l-opinjonijiet tal-Kumitat għall-Impjiegi u l-Affarijiet Soċjali kif ukoll tal-Kumitat għad-Drittijiet tan-Nisa u l-Ugwaljanza bejn is-Sessi (A7-0081/2014),

A.

billi l-evidenza empirika turi li l-kriżi ekonomika, finanzjarja u soċjali waqqfet il-proċess ta’ konverġenza jew saħansitra qalbitu, u b’hekk aggravat id-dispartià bejn ir-reġjuni u wasslet fi tmiemu perjodu twil ta’ żmien li fih id-disparità reġjonali fil-PDG per capita u l-qgħad fi ħdan l-UE, kienu qegħdin jonqsu b’mod kostanti, waqt li fl-istess ħin affettwat b’mod aktar aħrax lir-reġjuni l-aktar dgħajfa fl-Unjoni;

B.

billi r-riżorsi pubbliċi kemm fuq livell tal-Istati Membri u kemm fuq livell tal-UE saru aktar skarsi u soġġetti għal pressjoni dejjem tiżdied, filwaqt li l-kriżi u r-reċessjoni li segwiet, kif ukoll il-kriżi tad-dejn sovran f’diversi Stati Membri, ġiegħlu lill-Istati Membri finalment jimplimentaw ir-riformi strutturali importanti meħtieġa biex jikkontribwixxu għar-restawrazzjoni ta’ tkabbir ekonomiku u l-ħolqien tal-impjiegi, u li xi drabi wasslu għal tnaqqis fil-kofinanzjament tal-Fondi Strutturali u l-Fond ta’ Koeżjoni;

C.

billi l-politiki ta' konsolidazzjoni fiskali żiedu r-rwol u l-importanza tal-politika ta' koeżjoni bħala sors ta' investiment pubbliku, partikolarment fuq livell subnazzjonali, peress li din il-politika ta' finanzjament tirrappreżenta aktar minn nofs l-investiment pubbliku kollu f'għadd sinifikanti ta' Stati Membri u reġjuni;

D.

billi l-kriżi taffettwa b’mod negattiv ir-reġjuni u l-bliet Ewropej kollha, u b’hekk iżżid l-importanza tal-finanzjament tal-politika ta’ koeżjoni anke f’reġjuni li għaddejjin minn tranżizzjoni u dawk aktar żviluppati;

E.

billi l-kontribuzzjoni għall-għanijiet tal-Istrateġija Ewropa 2020 għandha dimensjoni reġjonali b'saħħitha li għandha titqies fil-preparazzjoni u l-implimentazzjoni tal-programmi fl-ambitu ta' politiki tal-UE dwar il-koeżjoni u investiment ieħor tal-ġenerazzjoni li jmiss;

F.

billi l-enfasi tal-politika ta’ koeżjoni s’issa kienet aktar dwar l-assorbiment milli dwar id-definizzjoni u l-monitoraġġ – u l-evalwazzjoni tal-ksib – tal-objettivi, filwaqt li l-monitoraġġ u s-sistemi ta’ evalwazzjoni jonqsu milli jiksbu l-għan tagħhom b’mod sħiħ li jtejbu d-definizzjoni tal-miri differenzjati skont il-karatteristiċi, l-ispeċifiċitajiet u l-ħtiġijiet lokali, reġjonali u interreġjonali;

G.

billi l-politika ta’ koeżjoni tibqa’ tkun is-sors ewlieni tal-finanzjament pubbliku tal-UE fil-kuntest tal-qafas finanzjarju pluriennali 2014–2020, u billi fil-qafas il-ġdid tal-politika ta’ koeżjoni l-enfasi kollha qed titqiegħed fuq il-ħtieġa li l-investiment ikun iffukat fuq il-livell reġjonali u lokali f’oqsma importanti bħall-ħolqien tal-impjiegi, l-SMEs, l-impjiegi (partikolarment l-impjiegi taż-żgħażagħ), il-mobilità tax-xogħol, it-taħriġ u l-edukazzjoni, ir-riċerka u l-innovazzjoni, l-ICT, it-trasport sostenibbli u t-tneħħija tal-konġestjonijiet, l-enerġija sostenibbli, l-ambjent, il-promozzjoni tal-kapaċità istituzzjonali tal-awtoritajiet pubbliċi u l-amministrazzjoni pubblika effiċjenti, l-iżvilupp urban u l-ibliet;

H.

billi l-ħtieġa li jinkisbu aktar riżultati b’anqas riżorsi wasslet għall-inklużjoni ta’ speċjalizzazzjoni intelliġenti fil-qafas tal-politika ta’ koeżjoni (ir-Regolament dwar Dispożizzjonijiet Komuni (4)) il-ġdid, sabiex ir-reġjuni jassumu approċċ strateġiku u anqas frammentat lejn l-iżvilupp ekonomiku permezz ta’ appoġġ immirat għar-riċerka u l-innovazzjoni;

I.

billi s-sħubija u l-governanza fuq diversi livelli jikkostitwixxu prinċipji ġenerali orizzontali bil-għan li jwasslu l-istrateġija tal-Unjoni għal tkabbir intelliġenti, sostenibbli u inklużiv, fil-kuntest ta' qafas leġiżlattiv ta' politika ta' koeżjoni ġdid;

J.

billi l-evalwazzjonijiet imwettqa matul il-programm tal-2007-2013 ma ħarsux lejn iċ-ċiklu sħiħ tal-evalwazzjoni inkluż l-effiċjenza, l-effikaċja u l-impatt;

K.

billi r-rata tal-assorbiment tal-fondi hija ta’ madwar 50 % fl-Istati Membri u ta’ madwar 30 % fl-aħħar sena tal-perjodu;

L.

billi l-SMEs qed iħabbtu wiċċhom ma' diffikultajiet biex jiksbu aċċess għall-finanzjament mis-settur bankarju;

1.

Jilqa' s-seba' u t-tmien rapporti ta' progress, kif ukoll ir-rapport strateġiku tal-2013, u jistieden lill-Kummissjoni, li issa qiegħda tniedi l-evalwazzjoni ex-post tal-2007-2013, u lill-Istati Membri kollha jiżguraw li l-monitoraġġ u l-evalwazzjoni jkunu ibbażati fuq data affidabbli, iħarsu lejn l-effiċjenza, l-effikaċja u l-impatt tal-operazzjonijiet, u jiżguraw li l-evalwazzjoni ex-post titlesta sa tmiem l-2015 kif stipulat f'dak li kien ir-Regolament Ġenerali, sabiex jittieħdu tagħlimiet ċari għall-implimentazzjoni tal-evalwazzjoni ta’ nofs it-terminu għall-perjodu ta’ programmazzjoni l-ġdid;

2.

Jikkunsidra li l-politiki dwar sforz ta’ konsolidazzjoni fiskali fihom infushom mhumiex biżżejjed biex jistimulaw it-tkabbir u jippromwovu l-investiment li jiġġenera impjiegi ta’ kwalità tajba u sostenibbli, li jirrikjedu wkoll miżuri li jappoġġjaw l-ekonomija u li jħeġġu li jsir progress – li għadu fraġli u timidu – lejn l-irkupru;

3.

Jistieden lill-Kummissjoni u l-Istati Membri jżidu l-investiment fl-oqsma tal-intraprenditorija, tan-negozji li jkunu għadhom kemm fetħu u tal-impjiegi indipendenti bħala mezz kif jinħolqu aktar impjiegi, b’mod partikolari minħabba li l-SMEs u l-mikroimpriżi jipprovdu aktar minn żewġ terzi tal-impjiegi fis-settur privat tal-UE; huwa tal-fehma li għandu jkun hemm enfasi speċjali fuq il-livelli reġjonali u lokali; barra minn hekk, iqis li l-investiment fin-negozji soċjali u fl-intraprenditorija soċjali joffri għażla addizzjonali tajba bil-għan li jintlaħqu l-bżonnijiet soċjali li ma jiġux milqugħa minn beni u servizzi pubbliċi;

4.

Jesprimi t-tħassib tiegħu dwar in-nuqqas ta' riżorsi finanzjarji pubbliċi suffiċjenti, partikolarment fuq livell subnazzjonali, biex tiġi implimentata b'mod adegwat l-Istrateġija Ewropa 2020, minħabba l-impatt tal-kriżi ekonomika, u l-fatt li għadd sinifikanti ta' Stati Membri u reġjuni anqas żviluppati fil-parti l-kbira jiddependu mill-finanzjament tal-politika ta' koeżjoni; jikkunsidra li qabel ma tittieħed kwalunkwe deċiżjoni marbuta ma' sanzjonijiet makroekonomiċi potenzjali, għandha titqies sew id-dipendenza kbira ta' xi Stati Membri mill-fondi ta' koeżjoni;

5.

Jemmen li, minkejja li r-riżorsi allokati għall-politika ta' koeżjoni fil-qafas finanzjarju pluriennali attwali huma relattivament żgħar meta mqabbla mal-ħtiġijiet fuq il-post, jiżguraw effiċjenza kif ukoll sinerġiji akbar bejn il-baġit tal-UE u l-baġits nazzjonali u madankollu jistgħu jkunu mezzi importanti għall-politiki li jistimulaw it-tkabbir;

6.

Hu tal-fehma li sabiex issir kontribuzzjoni lejn il-kisba tal-Istrateġija 2020 tal-UE għal tkabbir intelliġenti, sostenibbli u inklużiv bi qbil mal-objettivi tal-koeżjoni ekonomika, soċjali u territorjali, minkejja l-ħtieġa għal enfasi fuq is-setturi b'potenzjal fuq terminu twil għall-ħolqien tal-impjiegi u l-innovazzjoni, hu importanti li jitqiesu l-ħtiġijiet sinifikanti ta' bosta mir-reġjonu inqas żviluppati rigward l-investiment fi proġetti tal-infrastruttura f'setturi bażiċi bħat-trasport, it-telekomunikazzjoni u l-enerġija sostenibbli;

7.

Jemmen li – minkejja l-evidenza li l-awtoritajiet lokali u reġjonali huma involuti fil-preparazzjonijiet tal-Ftehimiet ta’ Sħubija – hemm bżonn li tittieħed aktar azzjoni biex jissaħħu d-dimensjoni territorjali tas-sistema ta’ governanza tal-politika ta’ koeżjoni, l-istrateġija Ewropa 2020 u s-Semestru Ewropew, billi jkunu żgurati d-djalogu u l-komplementarjetà reali fost il-livelli differenti ta’ governanza, minn naħa waħda, u l-konsistenza tal-prijoritajiet stabbiliti f’dawk il-livelli mal-ħtiġijiet u l-ispeċifiċitajiet identifikati fuq livelli nazzjonali, reġjonali u lokali, fuq in-naħa l-oħra; jenfasizza f'dan ir-rigward l-importanza tal-iżgurar li l-muniċipalitajiet u r-reġjuni jkun involuti kif suppost fl-istabbiliment ta' strateġiji nazzjonali u li l-problemi u l-isfidi speċifiċi tagħhom jiġu definiti, filwaqt li tiġi evitata kwalunkwe żieda fil-piż amministrattiv;

8.

Jikkunsidra li l-politika ta’ koeżjoni tinsab fl-aħjar pożizzjoni biex tagħti lill-Istrateġija Ewropa 2020 id-dimensjoni territorjali neċessarja li hi meħtieġa biex tindirizza kemm id-differenzi rilevanti ħafna tat-tkabbir fi ħdan l-Unjoni, u fi ħdan l-Istati Membri, kif ukoll biex tiżgura li l-potenzjal ta’ tkabbir jintuża wkoll fiż-żoni l-aktar imbiegħda u l-anqas popolati, u tindirizza l-fatt li d-differenzi fil-kapaċità istituzzjonali jfissru li r-reġjuni differenti ma jistgħux jużaw il-miri mogħtija bħala referenza bl-istess mod;

9.

Jinsab partikolarment imħasseb dwar il-fatt li, minħabba l-kriżi, il-perċentwal tal-popolazzjoni li jinsab f'riskju ta' faqar jew esklużjoni soċjali, li jbatu minn nuqqasijiet materjali serji, degradazzjoni ambjentali jew kundizzjonijiet ħżiena tad-djar, jew li jkollhom intensità ta’ xogħol baxxa ħafna u li jinsabu f’riskju tal-esklużjoni u l-faqar tal-enerġija żdied b'mod konsiderevoli, bi prevalenza akbar fil-konverġenza tar-reġjuni u tal-ibliet, u b'mod partikolari fir-reġjuni madwar l-ibliet kapitali li, skont l-indikaturi, jiġu kklassifikati bħala żviluppati, b'effett partikolari wkoll fuq in-nisa, familji b'ġenitur wieħed, familji kbar b'erbat itfal jew aktar, persuni li jindukraw (speċjalment dawk li jieħdu ħsieb membri tal-familja b'diżabbiltà), membri ta' komunitajiet emarġinati jew persuni akbar fl-età li qed joqorbu lejn il-pensjoni li għalihom l-aċċess għal opportunitajiet indaqs huwa diffiċli;

10.

Jikkunsidra li dawn il-kwistjonijiet – li jdgħajfu serjament il-koeżjoni bejn ir-reġjuni u jistgħu jpoġġu f’riskju l-kompetittività tal-Unjoni fuq perjodu twil u medju – iridu jiġu indirizzati b’mod urġenti permezz ta’ ffukar fuq politiki li jiżguraw l-aċċess għal impjiegi sostenibbli u ta’ kwalità tajba u l-inklużjoni soċjali, u b'mod partikolari permezz taż-żgħażagħ, bil-promozzjoni tar-rwol kruċjali li għandhom l-SMEs f'dan ir-rigward, it-tnaqqis tal-frammentazzjoni u l-faċilitazzjoni ta' tranżizzjoni bejn impjieg u ieħor, b'enfasi fuq programmi ta' taħriġ mill-ġdid professjonali għall-persuni qiegħda fuq terminu twil, billi tittieħed tagħlima mill-esperjenza miksuba mill-persuni li jinsabu fi tmiem il-karrieri tagħhom u tiġi promossa l-indipendenza ekonomika ugwali għan-nisa u l-irġiel; iqis essenzjali l-promozzjoni tal-aċċessibbiltà fiżika u l-aċċess għall-informazzjoni u l-midja ta' komunikazzjoni, li l-kisba tagħhom għandha tiġi vvalutata bl-użu ta' indikaturi oġġettivi u kumparabbli, u billi jitqiesu l-isfidi demografiċi;

11.

Jinsisti fuq ir-rwol tal-Fond Soċjali Ewropew (FSE) fit-tnaqqis tad-disparitajiet fil-kapital uman fost ir-reġjuni u fl-għajnuna biex jiżdiedu r-rati ta' impjiegi b'mod parallel u flimkien mal-Fond Ewropew għall-Iżvilupp Reġjonali (FEŻR), fil-kontribuzzjoni għas-sodisfazzjon ta’ xi prijoritajiet ewlenin attwali tal-Unjoni, partikolarment billi jagħti spinta lill-impjiegi taż-żgħażagħ u lis-suq tax-xogħol, jippromwovi ekonomija sostenibbli u t-tkabbir, inaqqas l-għadd ta’ persuni li jieqfu mill-iskola qabel iż-żmien, u jiġġieled il-faqar, id-diskriminazzjoni u l-esklużjoni soċjali; għaldaqstant jinsisti fuq il-ħtieġa li jissaħħaħ il-prinċipju ta’ ġestjoni finanzjarja soda, b’mod partikolari l-effiċjenza u l-effikaċja tal-operazzjonijiet tal-FSE, u jistieden lill-Kummissjoni tanalizza b'mod sħiħ l-effett globali u l-impatt reali tal-FSE fuq il-qgħad u l-ħolqien ta’ impjiegi;

12.

Jirrikonoxxi li proporzjon kbir min-nefqa tal-FSE tiġi allokata bil-għan tal-promozzjoni ta' aktar impjiegi u impjiegi aħjar, tal-appoġġ tal-integrazzjoni u l-parteċipazzjoni ta’ gruppi żvantaġġati, inklużi persuni b'diżabilità, u tal-iżvilupp ta’ soċjetà inklużiva li tkun aċċessibbli għal kulħadd; jenfasizza, madankollu, li fi żminijiet ta' kriżi, għandu jitqiegħed aktar enfasi fuq il-fatt li l-FSE jkun mmirat b'mod effiċjenti biex jiġġieled l-inugwaljanzi lokali u reġjonali u l-esklużjoni soċjali, jipprovdi aċċess għall-impjiegi għall-gruppi l-aktar vulnerabbli u ż-żgħażagħ b'mod partikolari, u biex jgħin ir-riintegrazzjoni tan-nisa fis-suq tax-xogħol billi jnaqqas is-segregazzjoni abbażi tas-sessi;

13.

Jindika li l-proporzjon kbir ta’ persuni li jieqfu mill-iskola qabel iż-żmien f’xi reġjuni jaqbeż b’mod sinifikanti l-10 % u li jeħtieġ li persuni li jieqfu mill-iskola qabel iż-żmien jirċievu offerta ta' edukazzjoni, taħriġ jew xogħol li tissodisfa l-ħtiġijiet tagħhom; jirreferi, f’dan il-kuntest. għall-importanza tal-iskema Garanzija għaż-Żgħażagħ għal dawk il-persuni li jieqfu mill-iskola qabel iż-żmien; jenfasizza li sabiex jitnaqqas l-għadd ta’ persuni li jieqfu mill-iskola qabel iż-żmien, huwa importanti li s-sistema edukattiva tkun inklużiva u li toffri opportunitajiet ugwali għaż-żgħażagħ kollha; jenfasizza li għandha tinstab soluzzjoni għall-problema tal-integrazzjoni ta’ dawn iż-żgħażagħ bi ftit kwalifiki fis-suq tax-xogħol, billi jiġi pprovdut taħriġ vokazzjonali u taħriġ fuq il-post tax-xogħol li jkun mingħajr ostakli, aċċessibbli u ta’ kwalità u li jgħinhom jiksbu ħiliet, filwaqt li jitqies il-fatt li n-nuqqas ta’ kwalifiki jista' jżid ir-riskju tal-qgħad, li min-naħa tiegħu jżid ir-riskju tal-faqar u jinvolvi għadd kbir ta’ sfidi soċjali marbuta mal-esklużjoni, l-aljenazzjoni u l-isforzi falluti fil-bini ta’ ħajja indipendenti; jinnota li, għal dan il-għan, il-kontribuzzjoni tal-FSE hija kruċjali biex tgħin aktar żgħażagħ jibqgħu l-iskola u jiksbu l-kwalifiki xierqa meħtieġa biex isibu xogħol u għall-karriera tagħhom, u biex jiġi żgurat aċċess usa’ għall-edukazzjoni ta’ kwalità għolja bi proġetti speċjali għat-tfal minn gruppi żvantaġġati u minoranzi, inklużi persuni b'diżabilità; jistieden lill-Istati Membri jinkoraġġixxu taħriġ vokazzjonali u taħriġ fuq il-post tax-xogħol xieraq għal dawk li se jibbenefikaw minnu;

14.

Jenfasizza li l-qagħda tal-impjiegi taż-żgħażagħ hija dipendenti ħafna fuq is-sitwazzjoni ekonomika ġenerali u li għalhekk huwa importanti ħafna li ż-żgħażagħ ikunu appoġġati, iggwidati u ssorveljati fil-mixja tagħhom mill-edukazzjoni għall-ħajja professjonali; huwa tal-fehma li l-Kummissjoni, għalhekk, tista’ tallinja kwalunkwe proposti leġiżlattivi futuri f’dan il-qasam mal-inizjattivi “Żgħażagħ Attivi” u “Opportunitajiet għaż-Żgħażagħ”;

15.

Jenfasizza li l-okkupazzjoni f’xi reġjuni għadha anqas minn 60 % u li xi reġjuni lanqas biss jilħqu l-miri nazzjonali ta’ madwar 20–25 %, li għandu effett żvantaġġjuż ħafna fuq iż-żgħażagħ, in-nisa, persuni akbar fl-età, persuni li jindukraw (carers) u persuni b'diżabilitajiet; jenfasizza li ċerti miżuri għall-kriżi kellhom effett ħażin fuq il-koeżjoni u fundamentalment żiedu l-inugwaljanzi fl-UE; jenfasizza li sabiex il-gruppi b'riskju għoli jinżammu f'impjieg jew jinħolqu alternattivi ta’ impjieg għalihom, jeħtieġ li jkun hemm miżuri mmirati li jindirizzaw il-ħolqien tax-xogħol, l-opportunitajiet ta’ taħriġ u ż-żamma tal-impjiegi; jenfasizza li l-qgħad kien jikkaratterizza ċerti komunitajiet iżolati matul ġenerazzjonijiet sħaħ u dan jippreżenta riskju partikolari għall-gruppi ta’ popolazzjoni emarġinati;

16.

Jinnota li r-rati ta’ impjieg għadhom lura ħafna mill-mira tal-Ewropa 2020, li jkun hemm tal-anqas 75 % tal-popolazzjoni ta’ bejn l-20 u l-64 sena li jkollhom impjieg sal-2020; jinnota li filwaqt li m’hemm l-ebda mira speċifika fir rigward tar-rata ta' impjieg fil-livell reġjonali, l-Istati Membri tal-UE stabbilixxew miri nazzjonali b'mod individwali li fil-biċċa l-kbira tal-każijiet ma nkisbux, minħabba l-impatt ewlieni asimetriku li kellha l-kriżi finanzjarja u ekonomika fuq is-swieq tax-xogħol reġjonali, b’mod predominanti fin-Nofsinhar tal-Ewropa fejn kien hemm żieda eċċezzjonali fil-qgħad fost iż-żgħażagħ;

17.

Jemmen li r-reġjuni kollha jħabbtu wiċċhom mal-isfida tal-ħolqien ta' tkabbir sostenibbli u t-titjib tal-effiċjenza fl-użu tar-riżorsi; jenfasizza, f'dan ir-rigward, il-ħtieġa għal politiki, li jinkludu l-prijoritizzazzjoni tal-infiq fl-oqsma tal-edukazzjoni, it-tagħlim tul il-ħajja, ir-riċerka, l-innovazzjoni u l-iżvilupp, l-effiċjenza enerġetika u l-intraprenditorija lokali, kif ukoll il-ħolqien ta' strumenti finanzjarji ġodda għal kull tip ta' negozju, u speċjalment għall-SMEs;

18.

Ifakkar fil-potenzjal li għandhom l-SMEs fil-ħolqien tal-impjiegi u jħeġġeġ lill-Istati Membri jiżviluppaw politiki li jtejbu l-aċċess għall-finanzjament u l-kundizzjonijiet ta' finanzjament għall-SMEs; iħeġġeġ lill-Kummissjoni biex taħdem flimkien mal-Istati Membri għaż-żieda tat-trasparenza tas-sistema tas-sejħiet għal offerti u l-prevedibbiltà tagħha kif ukoll għat-tnaqqis taż-żmien bejn is-sejħiet għal offerti u l-għoti ta’ kuntratti, b’mod partikolari għall-SMEs, li jikkompetu f’ambjent li qed jinbidel b’rata mgħaġġla;

19.

Iħeġġeġ li tingħata attenzjoni partikolari għas-settur tal-industriji kulturali u kreattivi, li jikkontribwixxu għall-ilħiq tal-objettivi tal-Istrateġija Ewropa 2020, u partikolarment għall-ħolqien tal-impjiegi; jenfasizza l-kontribuzzjoni vitali ta’ dawn l-industriji għall-iżvilupp tar-reġjuni u tal-bliet; jitlob li jittieħdu miżuri fuq żmien twil li jippromwovu t-taħriġ kontinwu tan-nisa speċifikament marbut ma' dawn is-setturi, bil-għan li jiżguraw li l-kwalifiki tan-nisa jkunu jistgħu jiġu utlizzati b'mod effikaċi u jinħolqu prospettivi ġodda ta’ impjieg;

20.

Ifakkar li filwaqt li hemm evidenza qawwija li l-implimentazzjoni tal-politika ta’ koeżjoni aċċellerat, u li l-programmi li rriżultaw taw kontribut importanti f’ħafna oqsma fejn l-investiment huwa neċessarju għall-modernizzazzjoni u l-kompetittività ekonomika (bħar-riċerka u l-iżvilupp, l-appoġġ lill-SMEs, l-industrijalizzazzjoni mill-ġdid, l-inklużjoni soċjali u l-edukazzjoni u t-taħriġ), għadd ta’ Stati Membri qegħdin fir-riskju li ma jimplimentawx il-programmi tagħhom qabel it-tmiem tal-perjodu ta’ programmazzjoni attwali; iħeġġeġ lill-Kummissjoni, f'dan ir-rigward, tanalizza fil-fond il-kawżi tar-rata baxxa ta' assorbiment, u jħeġġeġ lill-Istati Membri jagħtu kofinanzjament sabiex tiġi aċċellerata l-implimentazzjoni tal-fondi;

21.

Iħeġġeġ lill-Istati Membri biex jesploraw sinerġiji bejn finanzjament tal-politika ta' koeżjoni u sorsi oħra ta' finanzjament mill-UE (bħat-TENT-T, it-TEN-E, is-CEF, Orizzont 2020, COSME u programmi oħra) kif ukoll mal-forniment ta' finanzjament mill-Bank Ewropew tal-Investiment u l-Bank Ewropew għar-Rikostruzzjoni u l-Iżvilupp; iħeġġeġ lill-Istati Membri jaċċelleraw l-implimentazzjoni u jissimplifikaw u jtejbu l-aċċess għall-fondi disponibbli sabiex jistimulaw lill-SMEs, lill-organizzazzjonijiet tas-soċjetà ċivili, lill-muniċipalitajiet lokali u lill-benefiċarji interessati oħra sabiex jużawhom;

22.

Jikkunsidra li l-evalwazzjoni għandha rwol importanti fid-dibattitu u t-tagħlim tal-politika, iżda jinsab imħasseb li, minkejja li l-provvista ta’ data ta’ monitoraġġ u ta’ informazzjoni dwar l-implimentazzjoni qed ittejjeb il-kwalità tal-miri stabbiliti, il-kwalità mhux uniformi, f’ħafna każijiet ta’ rappurtar ta’ progress tagħmilha diffiċli li tiġi żviluppata stampa sħiħa tal-progress lejn il-miri fil-livell reġjonali u f’dak lokali; jenfasizza li l-evalwazzjoni għandha wkoll tivvaluta u tipproponi miżuri biex jittaffew il-piżijiet żejda fuq il-benefiċjarji, inklużi l-SMEs, l-awtoritajiet lokali u reġjonali u l-NĠOs; jikkunsidra li kwlaunkwe piż addizzjonali marbut mal-monitoraġġ m'għandux jiġi impost;

23.

Jemmen li r-rapporti ta' progress ma jipprovdux b'mod sħiħ stampa ċara tal-progress li jsir fl-implimentazzjoni tal-politika ta' koeżjoni u lejn il-miri stabbiliti, jew għar-raġuni ta' nuqqas ta' disponibbiltà tad-data fil-livell rilevanti jew għar-raġuni ta' nuqqas ta' rabta ċara biżżejjed bejn id-data statistika provduta u safejn il-miri tal-politika ta' koeżjoni li jeħtieġu monitoraġġ jintlaħqu;

24.

Jitlob lill-Kummissjoni u lill-Istati Membri, sabiex tissaħħaħ it-trasparenza tar-rappurtar u l-kwalità tal-programmazzjoni u l-implimentazzjoni tagħha, jagħmlu użu sħiħ tal-għodda ta’ monitoraġġ u evalwazzjoni disponibbli fil-kuntest tal-qafas leġiżlattiv attwali (orjentazzjoni tar-riżultati aktar b’saħħitha, użu ta’ indikaturi komuni tar-riżultati, għażla ta’ indikaturi tar-riżultati speċifiċi għall-programm u qafas tal-prestazzjoni ċar);

25.

Jikunsidra li, filwaqt li evalwazzjonijiet tal-programmi tal-politika ta’ koeżjoni għall-perjodu 2007-2013 kofinanzjati mill-FEŻR u mill-Fond ta’ Koeżjoni juru għarfien tajjeb fl-Istati Membri rigward ir-rekwiżit ta’ ugwaljanza bejn is-sessi fit-twaqqif ta' tali programmi (70 % (5)), ir-rapporti jindikaw ukoll li l-ugwaljanza bejn is-sessi bl-ebda mod mhija integrata effettivament f’dawn il-programmi permezz ta’ identifikazzjoni ċara tal-problemi jew miri kwantifikati (anqas minn 8 %); jitlob li l-Kummissjoni tkompli ttejjeb is-sistemi ta’ rappurtar tal-Istati Membri billi tintroduċi u tuża indikaturi ħalli tagħmilha possibbli li ssir valutazzjoni tas-sostenn mogħti taħt il-politika ta’ koeżjoni għal progress ġenwin rigward tal-ugwaljanza bejn is-sessi, u sa liema grad dan il-progress qed isir;

26.

Iħeġġeġ lill-Kummissjoni tagħmel verifika tal-Awtoritajiet Maniġerjali jekk japplikaw id-Direttiva dwar il-Ħlasijiet Tard fir-rigward tal-benefiċjarji ta' proġetti u jekk jieħdu l-miżuri adegwati biex inaqqsu d-dewmien fil-ħlas;

27.

Jistieden lis-Servizz tal-Awditjar Intern tal-Kummissjoni u l-Qorti Ewropea tal-Awdituri jżidu l-verifiki tal-prestazzjoni tagħhom dwar il-Fondi ta’ Koeżjoni u l-Fondi Strutturali u b’mod partikolari dwar il-FSE;

28.

Jagħti istruzzjonijiet lill-President tiegħu biex jgħaddi din ir-Riżoluzzjoni lill-Kunsill, lill-Kummissjoni u lill-Istati Membri.

29.8.2017   

MT

Il-Ġurnal Uffiċjali tal-Unjoni Ewropea

C 285/58

—

wara li kkunsidra l-Artikoli 349 u 355, l-ewwel paragrafu, tat-Trattat dwar il-Funzjonament tal-Unjoni Ewropea (TFUE), li jirrikonoxxi status partikolari għar-reġjuni ultraperiferiċi u li jipprevedi l-adozzjoni ta’ “miżuri speċifiċi” li jippermettu l-implimentazzjoni sħiħa tat-trattati u tal-politiki komuni,

—

wara li kkunsidra l-Artikolu 107(3)(a) tat-TFUE dwar l-iskema ta' għajnuniet tal-Istat għal dawk ir-reġjuni,

—

wara li kkunsidra l-Artikolu 174 u dawk segwenti tat-TFUE li jassenjaw objettiv ta’ koeżjoni ekonomika, soċjali u territorjali u li jiddefinixxu l-istrumenti finanzjarji strutturali sabiex dan jintlaħaq,

—

wara li kkunsidra t-totalità ta' komunikazzjonijiet mill-Kummissjoni Ewropea dwar ir-reġjuni ultraperiferiċi, u b'mod partikolari l-komunikazzjoni tas-17 ta' Ottubru 2008 bl-isem “Ir-reġjuni l-aktar imbiegħda: vantaġġ għall-Ewropa” (COM(2008)0642),

—

wara li kkunsidra t-totalità tar-riżoluzzjonijiet tiegħu dwar ir-reġjuni ultraperiferiċi, u b'mod partikolari r-Riżoluzzjoni tiegħu tal-20 ta' Mejju 2008 dwar strateġija għar-reġjuni ultraperiferiċi: Kisbiet u Prospettivi fil-Ġejjieni (1),

—

wara li kkunsidra d-Dokument ta' Ħidma tal-Persunal tal-Kummissjoni “Reġjuni 2020 – evalwazzjoni tal-isfidi futuri għar-reġjuni tal-Unjoni” (SEC(2008)2868),

—

wara li kkunsidra l-messaġġ tal-gżira ta' La Réunion tas-7 ta' Lulju 2008 fil-kuntest tal-konferenza “L-Unjoni Ewropea u r-reġjuni extra-Ewropej: Strateġiji b'rabta mat-tibdil fil-klima u t-telf tal-bijodiversità”, u wara li kkunsidra l-konklużjonijiet tal-Kunsill tal-Unjoni Ewropea tal-25 ta' Ġunju 2009 dwar “Valutazzjoni ta' nofs it-terminu dwar l-implimentazzjoni tal-Pjan ta' Azzjoni tal-KE għall-Bijodiversità u Lejn Strateġija tal-Unjoni dwar Speċijiet Eżotiċi Invażivi”,

—

wara li kkunsidra l-Memorandum Konġunt tar-reġjuni ultraperiferiċi tal-14 ta’ Ottubru 2009 dwar “Ir-reġjuni ultraperiferiċi: minn issa sal-2020”,

—

wara li kkunsidra l-pjattaforma komuni tas-6 ta' Lulju 2010 indirizzata lill-President tal-Kummissjoni Ewropea, José Manuel Durão Barroso, mill-Konferenza tal-Membri Ewropej tar-reġjuni ultraperiferiċi tal-Parlament Ewropew,

—

wara li kkunsidra l-Memorandum Konġunt ta’ Spanja, Franza, il-Portugall u tar-reġjuni ultraperiferiċi, tas-7 ta’ Mejju 2010, dwar “Viżjoni mġedda tal-istrateġija Ewropea għar-reġjuni ultraperiferiċi”,

—

wara li kkunsidra l-kontribuzzjoni konġunta tar-reġjuni ultraperiferiċi tat-28 ta' Jannar 2011 fir-rigward tal-ħames rapport dwar il-koeżjoni ekonomika, soċjali u territorjali,

—

wara li kkunsidra r-rapport tat-12 ta' Ottubru 2011 bit-titolu “Europe's Outermost Regions and the Single Market: The EU's influence in the world” ippreżentat lill-Kummissarju Michel Barnier mis-Sur Pedro Solbes Mira,

—

wara li kkunsidra r-Riżoluzzjoni tiegħu tat-18 ta' April 2012 dwar ir-rwol tal-politika ta’ koeżjoni fir-reġjuni ultraperiferiċi tal-Unjoni Ewropea fil-kuntest tal-Istrateġija “Ewropa 2020” (2),

—

wara li kkunsidra l-Komunikazzjoni mill-Kummissjoni tal-20 ta’ Ġunju 2012 bl-isem: “Ir-reġjuni ultraperiferiċi tal-Unjoni Ewropea: Lejn sħubija għal tkabbir intelliġenti, sostenibbli u inklużiv” (COM(2012)0287),

—

wara li kkunsidra r-rapport tal-Membru Serge Letchimy għall-Prim Ministru tar-Repubblika Franċiża, intitol"L-Artikolu 349 tat-Trattat dwar il-Funzjonament tal-Unjoni Ewropea: Kontribuzzjoni għall-applikazzjoni tal-qafas derogatorju favur proġett globali ta' żvilupp tar-reġjuni ultraperiferiċi,

—

wara li kkunsidra l-kontributi konġunti u d-dokumenti tekniċi u politiċi tal-Konferenza tal-Presidenti tar-reġjuni ultraperiferiċi tal-Unjoni Ewropea, b’mod partikolari d-dikjarazzjoni finali tad-XIX-il Konferenza tal-Presidenti tar-reġjuni ultraperiferiċi tal-Unjoni Ewropea tas-17 u t-18 ta’ Ottubru 2013,

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali (A7-0121/2014),

A.

billi l-vantaġġi, ir-riżorsi u l-potenzjal tar-reġjuni ultraperiferiċi, rikonoxxuti mill-Kummissjoni Ewropea fl-istrateġija tagħha tal-2008 u l-komunikazzjoni tagħha tal-2012, ikopru oqsma kruċjali għall-Unjoni Ewropea f’termini ta’ riċerka, innovazzjoni u tkabbir, u billi dawn mhumiex sostnuti u ffinanzjati biżżejjed mill-fondi u l-programmi Ewropej;

B.

billi r-reġjuni ultraperiferiċi jinkludu arċipelagi, gżejjer u reġjun maqtugħ fil-foresta tal-Amazon li huma kkaratterizzati minn restrizzjonijiet speċifiċi komuni li jagħmluhom differenti minn sitwazzjonijiet ġeografiċi partikolari oħrajn tal-Unjoni (gżejjer, reġjuni muntanjużi u dawk b’popolazzjoni baxxa);

C.

billi, fir-rigward tal-objettivi li l-Unjon ffissat għaliha nnifisha għat-twettiq tal-istrateġija Ewropa 2020 għat-tkabbir, l-istrateġija Orizzont 2020, l-istrateġija Enerġija 2020, il-programmi LIFE+ u Natura 2000, in-netwerks trans-Ewropej ta' telekomunikazzjoni, tat-trasport u tal-enerġija, ir-reġjuni ultraperiferiċi jikkostitwixxu reġjuni ta' eċċellenza li jistgħu jikkontribwixxu b'mod sinifikattiv għat-twettiq ta' dawn l-isfidi,

D.

billi huwa għalhekk importanti li jitħeġġeġ l-investiment fuq żmien twil u tiġi promossa l-forza tal-innovazzjoni tar-reġjuni ultraperiferiċi għat-tisħiħ sostenibbli tat-tkabbir ekonomiku u soċjali tagħhom, u li jiżdiedu l-probabilitajiet ta' suċċess tad-diversi strateġiji tal-Unjoni;

E.

billi, biex jitwettqu dawn l-istrateġiji, il-Fondi Strutturali u l-Fond Ewropew tal-Investiment għar-reġjuni ultraperiferiċi għandhom jiġu aġġustati u ssupplimentati biex ir-reġjuni ultraperiferiċi jipparteċipaw, b’konformità mal-potenzjal u intenzjonijiet tagħhom, fl-isfidi l-kbar tal-Unjoni Ewropea;

F.

billi s-sitwazzjoni attwali tal-kriżi ekonomika u soċjali qed tħalli effetti partikolarment serji fir-reġjuni ultraperiferiċi tal-Unjoni Ewropea, b’mod partikolari f’termini ta’ kompetittività u ta’ impjiegi, u billi, biex jiġu indirizzati l-bżonn ta’ tkabbir ekonomiku u l-problema tal-qgħad, għandu jkun hemm reazzjonijiet urġenti u xierqa matul il-perjodu ta' finanzjament u ta’ programmazzjoni li jmiss;

G.

billi l-Artikolu 349 għandu jintuża wkoll bħala bażi legali li tippermetti lir-reġjuni ultraperiferiċi, permezz ta' miżuri speċifiċi, isibu posthom fil-programmi tal-Unjoni li jistgħu jiżviluppaw b’mod konkret il-potenzjal ta’ dawn ir-reġjuni;

H.

billi r-reġjuni ultraperiferiċi jistgħu jsiru territorji pilota u territorji ta' eċċellenza għall-benefiċċju tal-Unjoni kollha f’oqsma bħalma huma: il-bijodiversità, l-ambjent, l-adattament għat-tibdil fil-klima u l-attenwazzjoni tiegħu, il-ġestjoni u l-osservazzjoni ta’ fenomeni klimatiċi estremi, ir-riċerka, l-innovazzjoni, l-ispazju, il-qasam ajruspazjali, l-oċeani, it-tkabbir “blu”, il-ġestjoni spazjali marittima u l-governanza marittima, is-sismoloġija, il-vulkanoloġija, il-mard emerġenti, l-enerġiji rinnovabbli, it-trasport, it-telekomunikazzjoni, il-kapaċità ta’ intervent umanitarju urġenti f’pajjiżi terzi u l-kultura;

I.

billi r-reġjuni ultraperiferiċi jinsabu fil-baċiri marittimi tal-Karajbi, tal-Oċean Indjan u tal-Oċean Atlantiku li jikkonferixxu lill-Unjoni Ewropea status ta’ setgħa marittima mondjali, billi l-pożizzjoni ġeostrateġika tagħhom tikkontribwixxi għad-dimensjoni dinjija tal-Unjoni, u billi huma karatterizzati minn riżorsi naturali, tal-baħar u tas-sajd eċċezzjonali, li jirrappreżentaw aktar minn 50 % tal-bijodiversità dinjija;

J.

billi r-reġjuni ultraperiferiċi jikkostitwixxu realtà unika u jiffurmaw għaqda komuni kemm fi ħdan l-Unjoni Ewropea kif ukoll lil hinn minnha li għandha tiġi promossa u appoġġjata mill-Kummissjoni Ewropea, partikolarment bl-implimentazzjoni ta’ politiki komuni;

K.

billi l-ottimizzazzjoni tal-potenzjal tar-reġjuni ultraperiferiċi tirrikjedi l-ħolqien ta’ sinerġiji massimi bejn l-istrumenti, il-fondi u l-programmi kollha tal-Unjoni,

1.

Jinsab konvint li l-potenzjal, il-vantaġġi, ir-riżorsi u l-esperjenza tar-reġjuni ultraperiferiċi jikkostitwixxu opportunità oħra biex l-Unjoni u l-Istati Membri jegħlbu l-isfidi li qed jiffaċċjaw f’termini ta’ globalizzazzjoni, kapaċità ta’ innovazzjoni, tkabbir, koeżjoni soċjali, pressjonijiet demografiċi, tibdil fil-klima, prevenzjoni tar-riskji maġġuri ta' katastrofi naturali, enerġija, ġestjoni sostenibbli tar-riżorsi naturali u l-preservazzjoni tal-bijodiversità;

2.

Jinsab konvint li t-titjib tal-aċċess tar-reġjuni ultraperiferiċi għad-diversi programmi u fondi tal-Unjoni jsir kemm f'termini ta' żmien qasir kif ukoll żmien twil għall-benefiċċju tal-Unjoni kollha kemm hi; jiddispjaċih dwar l-approċċ imħeġġeġ fil-livell Ewropew li jintużaw biss politiki ta’ koeżjoni biex tiġi ffinanzjata l-biċċa l-kbira tal-proġetti ta' żvilupp tar-reġjuni ultraperiferiċi;

3.

Jappoġġa lill-Kummissjoni Ewropea fix-xewqa tagħha li timplimenta politiki li jsaħħu l-awtonomija, il-konsolidazzjoni ekonomika u l-ħolqien ta’ impjiegi sostenibbli fir-reġjuni ultraperiferiċi billi jittieħed benefiċċju mill-vantaġġi tagħhom, u miżuri prattiċi u innovattivi abbażi tal-Artikolu 349 TFUE u l-istrumenti ad hoc, b’mod partikolari fl-oqsma tal-enerġija, it-trasport u t-teknoloġija tal-informatika u l-komunikazzjoni, għal kull wieħed mill-fondi u l-programmi b’objettivi li jkunu jistgħu jżidu l-valur tal-vantaġġi tar-reġjuni ultraperiferiċi għal żvilupp sostenibbli;

4.

Jenfasizza wkoll il-ħtieġa u l-importanza li l-politiki Ewropej jikkontribwixxu, inter alia permezz ta' strumenti fiskali u doganali speċifiċi, għall-promozzjoni u d-diversifikazzjoni tal-bażi ekonomika tal-ekonomiji tar-reġjuni ultraperiferiċi u għall-ħolqien tal-impjiegi;

5.

Iqis li l-Artikolu 349 tat-TFUE jikkostitwixxi bażi legali adegwata għall-adozzjoni ta’ miżuri speċifiċi għar-reġjuni ultraperiferiċi, iżda jiddispjaċih dwar ir-rikors limitat u mnaqqas għal din id-dispożizzjoni tat-Trattat li tipprovdi l-possibbiltà li jkun hemm reġim partikolari għal status ultraperiferiku;

6.

Jistieden lill-Kummissjoni tistabbilixxi grupp ta’ kuntatt bejn il-Kummissarji Ewropej ikkonċernati, il-grupp ta’ ħidma interservizzi li jikkoordina l-politiki dwar ir-reġjuni ultraperiferiċi u membri eletti tar-reġjuni ultraperiferiċi fil-Parlament Ewropew sabiex jaraw is-sitwazzjoni attwali li jkunu qegħdin fiha l-programmi previsti u/jew mibdija għar-reġjuni ultraperiferiċi;

7.

Jenfasizza li r-reġjuni ultraperiferiċi, għaliex jinsabu ’l bogħod mill-kontinent Ewropew, huma vetturi tal-influwenza ta’ Unjoni Ewropea li qed issir konxja mid-dimensjoni dinjija tagħha u r-rwol tagħha f’dinja li għaddejja minn bidla profonda;

8.

Jinsisti li għandha tingħata attenzjoni speċjali lir-reġjuni ultraperiferiċi f’każ ta’ diżastru naturali, fid-dawl tal-karatteristiċi partikolari tagħhom f’konformità mal-Artikolu 349, li jipprovdi l-possibbiltà li jiġu adottati miżuri speċifiċi, filwaqt li jfakkar fl-importanza tal-koordinament tal-Fondi Strutturali mal-Fond ta’ Solidarjetà tal-Unjoni Ewropea;

9.

Jitlob biex l-investimenti magħmula permezz tas-servizzi ta’ interess ekonomiku ġenerali fit-teknoloġija tal-informatika u l-komunikazzjoni, it-trasport, l-ilma u l-enerġija jsiru prijorità f’dawn ir-reġjuni u jiddefendi aktar koerenza tal-qafas tal-għajnuna mill-Istat fir-reġjuni ultraperiferiċi, biex jintlaħqu l-objettivi tal-Istrateġija “Ewropa 2020”;

10.

Jinsab konvint li hemm rabta mill-qrib bejn is-sensibilizzazzjoni dwar id-dimensjoni dinjija li jista’ jkollha l-Unjoni u l-attenzjoni mogħtija lir-reġjuni ultraperiferiċi; huwa konvint li l-kunsiderazzjoni tal-Unjoni u l-Istati Membri fir-rigward tal-piż u l-importanza fil-ġejjieni li jirrappreżentaw l-għażliet strateġiċi ta’ investiment tagħhom fir-reġjuni ultraperiferiċi mhijiex suffuċjenti u hija indikatur tal-investiment baxx li l-Unjoni tagħmel fid-dimensjoni dinjija u internazzjonali tagħha stess; iqis essenzjali għar-reġjuni ultraperiferiċi t-titjib tas-sinerġiji f’dak li għandu x’jaqsam mal-istrumenti u l-programmi sabiex tiġi promossa l-kooperazzjoni internazzjonali ta’ dawn ir-reġjuni fid-dinja;

11.

Ifakkar li huwa essenzjali, għall-promozzjoni tal-ħolqien ta’ sinerġiji bejn il-Fondi Strutturali u l-programmi l-oħra tal-Unjoni, li tiġi adottata perspettiva makroreġjonali u li jiġu żviluppati strateġiji għall-makroreġjuni li jinkludu r-reġjuni ultraperiferiċi, billi jittieħed vantaġġ mill-karatteristiċi u r-riżorsi ta’ dawn ir-reġjuni;

12.

Jistieden lill-awtoritajiet nazzjonali u reġjonali jieħdu vantaġġ minn approċċ ibbażat fuq diversi fondi u jimplimentaw, safejn possibbli u bl-aktar mod effikaċi possibbli, punti ta’ kollegament bejn il-Fondi Strutturali u l-istrumenti finanzjarji ta’ programmi oħra tal-Unjoni Ewropea;

13.

Jistieden lill-Kummissjoni tapprofondixxi l-istrateġija Ewropea fir-rigward tar-reġjuni ultraperiferiċi b’mod li tippermetti li l-vantaġġi ta’ dawn ir-reġjuni jiġu żviluppati, kif ukoll tqis ir-restrizzjonijiet strutturali u permanenti tagħhom; jistieden, f’dan il-qafas, lill-Kummissjoni tindirizza l-proposti tar-reġjuni ultraperiferiċi li jinsabu partikolarment fil-pjanijiet ta’ azzjoni tagħhom;

14.

Iqis li r-reġjuni ultraperiferiċi għandhom il-potenzjal li jkunu fuq quddiem nett fir-riċerka u t-teknoloġija fl-oqsma kkonċernati mill-objettivi tal-Programm Orizzont 2020, bħall-ispazju, il-qasam ajruspazjali, il-bijoteknoloġiji, l-osservazzjoni tar-riskji naturali, ir-riċerka marittima, il-bijodiversità, l-enerġiji rinnovabbli, is-saħħa, l-adattament għat-tibdil fil-klima u t-trasport intelliġenti;

15.

Ifakkar li l-objettiv tal-politika ta’ koeżjoni 2014-2020 huwa, fost l-oħrajn, it-tisħiħ tar-riċerka, tal-iżvilupp teknoloġiku u tal-innovazzjoni;

16.

Jiddispjaċih li l-proġetti tar-reġjuni ultraperiferiċi, minħabba l-fatt li l-proġetti tagħhom ftit li xejn jissodisfaw ir-rekwiżiti li jippermettu l-kisba ta’ finanzjament Komunitarju minħabba l-karatteristiċi partikolari tagħhom, ma bbenefikawx biżżejjed mill-programm qafas għar-riċerka u l-iżvilupp għall-perjodu 2007-2013, u dan wassal għal parteċipazzjoni u rata ta’ suċċess baxxi ħafna, kif ukoll inqas preżenza fin-netwerks Ewropej ta’ riċerka; jistieden lill-Kummissjoni, f'dan ir-rigward, taġixxi sabiex tappoġġja r-riċerka fir-reġjuni ultraperiferiċi u tiffavorixxi l-kisba ta' massa kritika;

17.

Iqis li l-FEŻR waħdu ma jkunx jista' jippermetti lir-reġjuni ultraperiferiċi jissodisfaw l-objettivi tal-politika ta' koeżjoni u l-istrateġiji tal-UE 2020 u ta' Orizzont 2020; iqis, f'dan ir-rigward, li l-Kummissjoni għandha tadatta u tiggarantixxi l-aċċess tar-reġjuni ultraperiferiċi għall-programm Orizzont 2020 bil-ħolqien ta' programmi dedikati li jiffavorixxu l-integrazzjoni tar-reġjuni ultraperiferiċi fin-netwerks Ewropew u internazzjonli ta' riċerka u innovazzjoni; ifakkar f’dan ir-rigward li l-istrateġija Orizzont 2020, fil-parti li tikkonċerna l-programm “It-tixrid tal-eċċellenza u t-twessigħ tal-parteċipazzjoni”, tirrikonoxxi l-eżistenza ta’ differenzi sinifikanti fejn għandha x’taqsam il-prestazzjoni fir-riċerka u l-innovazzjoni identifikati mit-Tabella tal-Innovazzjoni tal-Unjoni, filwaqt li tippromwovi miżuri speċifiċi maħsuba biex ixerrdu l-eċċellenza u jżidu l-parteċipazzjoni tal-Istati Membri u r-reġjuni li jinabu lura fil-qasam tar-riċerka u l-innovazzjoni;

18.

Jitlob li jiġu valorizzati u żviluppati strutturalment l-universitajiet tar-reġjuni ultraperiferiċi, sabiex b’sinerġija ma’ Orizzont 2020, jikkontribwixxu għall-valorizzazzjoni kemm Ewropea kif ukoll internazzjonali tal-universitajiet tar-reġjuni ultraperiferiċi, taċ-ċentri ta’ riċerka, tar-riċerkaturi u tal-istudenti tagħhom; ifakkar li l-programmi li jippromwovu l-mobilità bejn l-universitajiet tal-istudenti, tal-professuri u l-uffiċjali qed jiġu mxekkla serjament fir-reġjuni ultraperiferiċi minħabba l-ispejjeż addizzjonali li jirriżultaw mill-pożizzjoni iżolata u d-distanza;

19.

Ifakkar li l-programmi ta’ riċerka u innovazzjoni għandhom ikunu flessibbli biżżejjed biex jadattaw għal fruntieri ġodda u sfidi ġodda tal-għarfien, bħall-baħar fond, li jirrappreżentaw potenzjal għoli;

20.

Jiġbed l-attenzjoni lejn l-interess ekonomiku li dejjem jikber, imqanqal mir-rikkezza immensa ta’ qiegħ il-baħar u l-potenzjal bijoġenetiku, minerali u bijoteknoloġiku enormi tar-reġjuni ultraperiferiċi f’dawn l-oqsma kif ukoll l-importanza li dan jiġi kkunsidrat fil-qafas tal-“Istrateġija Ewropea Ġdida għar-reġjuni ultraperiferiċi”, sabiex jiġi żgurat l-iżvilupp ta’ ekonomija tal-għarfien ibbażata fuq il-baħar u l-ħolqien ta’ attivitajiet ekonomiċi b’valur miżjud għoli f’oqsma bħall-mediċina, il-farmakoloġija u l-enerġija fost oħrajn;

21.

Jistieden lill-Kummissjoni tieħu ispirazzjoni mid-diversi konklużjonijiet tar-rapport Solbes biex tintensifika l-integrazzjoni u l-iżvilupp tar-reġjuni ultraperiferiċi fis-suq intern;

22.

Jissottolinja li l-kompetizzjoni fir-reġjuni ultraperiferiċi ma tikkonkretizzax ruħha bl-istess mod bħal fil-kumplament tat-territorju Ewropew, meta l-funzjonament ħieles tas-suq f'dawn ir-reġjuni ma jkunx possibbli fil-parti l-kbira tas-setturi tas-servizzi ta’ interess ekonomiku ġenerali, li l-attività tagħhom mhix attraenti għall-investiment privat; jissottolinja li l-offerta ta’ prodotti ta’ kwalità bi prezzijiet kompetittivi fir-reġjuni ultraperiferiċi hija possibbli biss b’kumpens adegwat mill-Istat u l-forniment ta’ dawn is-servizzi fir-reġjuni ultraperiferiċi jeħtieġ evalwazzjoni urġenti mill-Kummissjoni b’mod li tipprevedi flessibilità u adattament ikbar tal-qafas leġiżlattiv attwali tal-Unjoni għal din ir-realtà;

23.

Jistieden lill-Kummissjoni tinforza aħjar id-dispożizzjonijiet fil-qasam tal-kompetizzjoni biex jiġu evitati sitwazzjonijiet ta’ monopolju u ta’ kartelli illeċiti fir-reġjuni ultraperiferiċi;

24.

Jistieden lill-Kummissjoni tippubblika gwida għall-intrapriżi żgħar u medji fir-reġjuni ultraperiferiċi u l-kontribut tagħhom għas-suq intern, filwaqt li tqis il-programmi u l-fondi Ewropej differenti fis-seħħ fir-reġjuni ultraperiferiċi;

25.

Jistieden lill-Kummissjoni tagħti attenzjoni lill-ispejjeż addizzjonali u lill-problema tal-għoli tal-ħajja fir-reġjuni ultraperiferiċi u biex tikkunsidrahom fl-iżvilupp tal-politiki Ewropej;

26.

Iqis li l-potenzjal tar-reġjuni ultraperiferiċi fil-kwistjoni tal-ġestjoni, il-preservazzjoni u r-rijabilitazzjoni tal-bijodiversità, l-adattament għat-tibdil fil-klima u l-iżvilupp tal-enerġiji rinnovabbli jista’ jkun ottimizzat billi l-Unjoni tkun kapaċi tilħaq l-objettivi tagħha permezz tal-ħolqien ta’ sinerġiji u ta’ finanzjament komplementari bejn il-politika ta’ koeżjoni, il-programm LIFE+ u l-istrateġija Enerġija 2020;

27.

Jinnota li l-programm LIFE+ għall-perjodu 2014-2020 għandu l-għan li jikkofinanzja proġetti innovattivi favur il-preservazzjoni tal-ambjent u l-ġlieda kontra t-tibdil fil-klima; jissottolinja l-fatt li huwa essenzjali li jiġu ġġenerati sinerġiji bl-objettivi 5 u 6 tal-politika ta' koeżjoni 2014-2020, meta jitqies li huwa indispensabbli, f'dan ir-rigward, li l-parteċipazzjoni tar-reġjuni ultraperiferiċi f'LIFE+ tissaħħaħ;

28.

Jiddeplora l-fatt li l-azzjoni preparatorja BEST ma ġietx ittrasformata fi programm reali ddedikat għar-reġjuni ultraperiferiċi u l-pajjiżi u territorji extra-Ewropej, kontra l-opinjoni tal-Parlament Ewropew u l-konklużjonijiet tal-Kunsill tal-25 ta’ Ġunju 2009;

29.

Jiddeplora l-fatt li l-ħabitats u l-ispeċijiet annimali u veġetali li għandhom jiġu protetti fit-reġjuni ultraperiferiċi Franċiżi ma ġewx imniżżla fl-Anness I tad-Direttiva 92/43/KEE dwar il-ħabitats/flora/fawna, li jagħmel impossibbli l-implimentazzjoni tad-direttiva fir-reġjuni ultraperiferiċi Franċiżi u jeskludi l-parteċipazzjoni tar-reġjuni ultraperiferiċi Franċiżi fin-netwerks u programmi NATURA 2000;

30.