ANNESS

“PLA I LLEVANT”

PDO-ES-A1038-AM03

Data tal-applikazzjoni: 11.2.2016

TALBA GĦAL EMENDA FL-ISPEĊIFIKAZZJONI TAL-PRODOTT

1.   Regoli applikabbli għall-emenda

L-Artikolu 105 tar-Regolament (UE) Nru 1308/2013 — Emenda mhux minuri

2.   Deskrizzjoni u raġunijiet għall-emenda

2.1.   Delegazzjoni ta’ verifika tal-ispeċifikazzjoni tal-prodott lil korp ta’ spezzjoni

L-awtorità kompetenti ddelegat il-verifika tal-konformità mal-ispeċifikazzjoni tal-prodott applikabbli ma’ dan id-DOP lill-Kunsill Governativ tal-“Pla i Llevant” DO, hekk kif ġie akkreditat mill-Awtorità tal-Akkreditazzjoni u ċ-Ċertifikazzjoni Nazzjonali Spanjola (ENAC) fi Frar 2012.

Din il-bidla hija marbuta biss mal-punt 9 tal-ispeċifikazzjoni tal-prodott, u mhux mad-dokument uniku.

2.2.   Tkabbir taż-żona demarkata

L-emenda tikkonsisti fit-tkabbir taż-żona demarkata sabiex tiġi inkluża l-muniċipalità ta’ Santanyi.

Għaldaqstant, il-punt 4 tal-ispeċifikazzjoni tal-prodott u l-punt 5 tad-dokument uniku nbidlu.

Ir-raġunijiet għall-emenda huma kif ġej.

—	Il-muniċipalità ta’ Santanyi tinsab fil-fruntiera mal-muniċipalitajiet protetti mill-“Pla i Llevant” DOP, speċifikament Campos u Felanitx.

—	It-tradizzjoni tal-produzzjoni tal-inbid fil-muniċipalità ta’ Santanyi dehret matul l-istorja tagħha.

—	Il-karatteristiċi ambjentali u tal-ħamrija tal-muniċipalità mhumiex differenti minn dawk fil-bqija taż-żona ġeografika attwali tal-“Pla i Llevant” DOP.

—	Twettqu studji sperimentali preċedenti fuq l-għeneb minn dwieli mkabbra f’Santanyi, skont ir-regoli tal-“Pla i Llevant” DOP.

—	Dawn l-istudji wrew li l-inbid magħmul mill-għeneb miksub f’Santanyi jissodisfa r-rekwiżiti ta’ kwalità (fiżiċi, kimiċi u organolettiċi) stabbiliti fid-denominazzjoni tal-oriġini “Pla i Llevant”.

L-inklużjoni tiegħu bħala muniċipalità protetta għall-produzzjoni tal-inbid tal-“Pla i Llevant” DOP hija ġustifikata bis-sħiħ.

DOKUMENT UNIKU

1.   Denominazzjoni reġistrata

Pla I Llevant

2.   Tip ta’ indikazzjoni ġeografika

DOP – Denominazzjoni ta’ oriġini protetta

3.   Kategoriji tal-prodotti tad-dwieli

1.

Inbid

3.

Inbid likur

4.

Inbid frizzanti

8.

Inbid semifrizzanti

4.   Deskrizzjoni tal-inbid/inbejjed

Inbid — Inbejjed Bojod u Rosé

L-inbdejjed bojod u rosé huma ċari, trasparenti u luminużi. B’togħmiet friski ta’ frott. Fil-palat huma friski, miftuħa u b’togħma ta’ frott. L-inbejjed bojod fil-bittija għandhom it-togħmiet karatteristiċi marbuta mal-metodu tal-bittija. Fil-palat huma mimlija, kremużi, strutturati u dewwiema.

Diossidu tal-kubrit: 240 si > 5 grs/l glukożju u fruttożju.

Il-limiti għall-parametri analitiċi li mhumiex imsemmija hawnhekk iridu jikkonformaw mar-regolamenti rilevanti tal-UE.

Karatteristiċi analitiċi ġenerali

Qawwa alkoħolika massima totali (f’% tal-volum)
Qawwa alkoħolika reali minima (f’% tal-volum)	10,5
Aċidità totali minima	4,5 milliekwivalenti għal kull litru
Aċidità volatili massima (f’milliekwivalenti għal kull litru)	13,3
Total ta’ diossidu tal-kubrit massimu (f’milligrammi għal kull litru)	180

Inbid — Inbejjed Ħomor

L-inbejjed ħomor huma ċari, vivaċi u luminużi, b’lewn ta’ intensità medja u għolja. L-inbejjed ġodda għandhom togħmiet friski ta’ frott, filwaqt li l-inbejjed maturi għandhom togħmiet ta’ frott misjur, imtejba permezz tal-użu tal-bittija. Fil-palat huma eleganti, pjaċevoli, qawwijin, bilanċjati u bellusin, li jintemmu b’togħma vivaċi u dewwiema.

Diossidu tal-kubrit: 180 si > 5 grs/l glukożju u fruttożju.

Il-limiti għall-parametri analitiċi li mhumiex imsemmija hawnhekk iridu jikkonformaw mar-regolamenti rilevanti tal-UE.

Karatteristiċi analitiċi ġenerali

Qawwa alkoħolika massima totali (f’% tal-volum)
Qawwa alkoħolika reali minima (f’% tal-volum)	11
Aċidità totali minima	4,5 f’milliekwivalenti għal kull litru
Aċidità volatili massima (f’milliekwivalenti għal kull litru)	13,3
Total ta’ diossidu tal-kubrit massimu (f’milligrammi għal kull litru)	140

Inbid likur

L-inbejjed likuri huma ta’ lewn it-tiben, b’menisku li jagħti fl-aħdar għal kulur id-deheb. Fl-inbejjed ħomor, il-kulur ivarja minn aħmar skur għal vjola. Huma ċari u luminużi. L-inbejjed bojod għandhom togħmiet ta’ fjuri u togħmiet li jfakkru fil-frott fil-ġulepp, bi ħjiel ta’ frott misjur. L-inbejjed ħomor għandhom togħmiet ta’ frott priservat, żbib u ġewż. Għandhom livell tajjeb ta’ aċidità, u huma bbilanċjati u eleganti.

Diossidu tal-kubrit: 175 si > 5 grs/l glukożju u fruttożju.

Il-kontenut ta’ aċidu volatili massimu huwa ta’ 25 milliekwivalenti għal kull litru, peress li dawn huma nbejjed b’qawwa alkoħolika totali b’volum ta’ 15 % vol. jew aktar. Dan huwa skont ir-deroga stabbilita fil-punt 3 tal-Anness I C tar-Regolament (KE) Nru 606/2009.

Il-limiti għall-parametri analitiċi li mhumiex imsemmija hawnhekk għandhom jikkonformaw mal-leġiżlazzjoni rilevanti tal-UE.

Karatteristiċi analitiċi ġenerali

Qawwa alkoħolika massima totali (f’% tal-volum)
Qawwa alkoħolika reali minima (f’% tal-volum)	15
Aċidità totali minima	4,5 f’milliekwivalenti għal kull litru
Aċidità volatili massima (f’milliekwivalenti għal kull litru)	25
Total ta’ diossidu tal-kubrit massimu (f’milligrammi għal kull litru)	130

Inbid frizzanti

L-inbejjed frizzanti żgħażagħ huma prattikament bla kulur. L-inbejjed frizzanti li jitqiegħdu fil-bittija għandhom kulur aktar qawwi. L-inbejjed frizzanti rosé għandhom kulur li jvarja bejn il-qoxra tal-basal u l-vjola li jagħti fir-roża.

Fil-każijiet kollha, l-inbid għandu dehra luminuża. Il-bżieżaq huma żgħar, u rilaxxati bil-mod għal perjodu fit-tul u jiffurmaw katini twal. It-togħmiet ifakkru fil-mod ta’ kif huma magħmula minn inbejjed preċedenti, mill-awtoliżi tan-naqal. Fil-palat l-inbid għandu aċidità bilanċjata u lixxa. Iħallu togħma nadifa u dewwiema.

Il-limiti għall-parametri analitiċi li mhumiex imsemmija hawnhekk iridu jikkonformaw mar-regolamenti rilevanti tal-UE.

Karatteristiċi analitiċi ġenerali

Qawwa alkoħolika massima totali (f’% tal-volum)
Qawwa alkoħolika reali minima (f’% tal-volum)	11
Aċidità totali minima	4,5 f’milliekwivalenti għal kull litru
Aċidità volatili massima (f’milliekwivalenti għal kull litru)	13,3
Total ta’ diossidu tal-kubrit massimu (f’milligrammi għal kull litru)	160

Inbid semifrizzanti

L-inbejjed bojod frizzanti huma ta’ lewn it-tiben, b’menisku dehbi ċar. L-inbejjed rosé huma vjola li jagħti fir-roża b’lewn ta’ intensità medja.

Huma ċari u luminużi. Il-bżieżaq u l-kolonni tal-bżieżaq huma żgħar. L-aroma hija tal-frott b’togħmiet tat-tieni fermentazzjoni. Fil-palat, l-inbid huwa frisk u togħma ta’ frott, u jħallu togħma dewwiema.

Il-limiti għall-parametri analitiċi li mhumiex imsemmija hawnhekk iridu jikkonformaw mar-regolamenti rilevanti tal-UE.

Karatteristiċi analitiċi ġenerali

Qawwa alkoħolika massima totali (f’% tal-volum)
Qawwa alkoħolika reali minima (f’% tal-volum)	10
Aċidità totali minima	4,5 f’milliekwivalenti għal kull litru
Aċidità volatili massima (f’milliekwivalenti għal kull litru)	13,3
Total ta’ diossidu tal-kubrit massimu (f’milligrammi għal kull litru)	160

5.   Prattiki tal-produzzjoni tal-inbid

a.   Prattiki enoloġiċi essenzjali

Il-prattika enoloġika speċifika

It-tekniki użati għat-trattament tal-għeneb, il-most u l-inbid, il-kontroll tal-fermentazzjoni u l-ipproċessar iridu jkunu mfassla għall-produzzjoni ta’ prodotti tal-aqwa kwalità. Jistgħu jintużaw biss sistemi mekkaniċi li ma jagħmlux ħsara jew li ma jissostitwixxux il-partijiet solidi tal-għanqud għall-estrazzjoni tal-most jew tal-inbid. Ma jistgħux jintużaw prassi li jinvolvu t-tisħin minn qabel tal-għeneb jew it-tisħin tal-most jew tal-inbejjed meta jkun hemm il-karfa, bl-għan li tiġi sfurzata l-estrazzjoni tal-materjal koloranti. Trid tiġi applikata l-pressa adattata għall-estrazzjoni tal-most jew tal-inbid u s-separazzjoni tiegħu mill-karfa, sabiex ir-rendiment ma jkunx iktar minn 70 litru tal-inbid għal kull 100 kilogramma ta’ għalla maħsuda.

b.   Rendiment massimu

11 000 ettolitru għal kull ettaru

77 ettolitru għal kull ettaru

6.   Żona demarkata

Iż-żona ta’ produzzjoni tad-denominazzjoni tal-oriġini “Pla i Llevant” hija magħmula mill-muniċipalitajiet li ġejjin, li jinsabu fil-gżira ta’ Majorka: Algaida, Ariany, Arta, Campos, Capdepera, Felanitx, Llucmajor, Manacor, Maria de la Salut, Montuíri, Muro, Petra, Porreres, Sant Joan, Sant Llorenc des Cardassar, Santa Margalida, Santanyi, Sineu u Vilafranca de Bonany, li l-Kunsill Governattiv ikklassifika bħala adattati għall-produzzjoni tal-għeneb tal-varjetajiet indikati.

7.   L-għeneb tal-inbid ewlieni

PENSAL BLANCA, sinonimu ta’: MOLL

CALLET

GORGOLLASSA

GIRO ROS

FOGONEU

MANTO NEGRO

8.   Deskrizzjoni tar-rabta/rabtiet

Inbid

Id-dwieli huma kkaratterizzati min-natura tal-gżira tar-reġjun u l-lokalità tagħhom, li tinsab kważi fil-livell tal-baħar. Ir-riħ “Embat” tar-reġjun jipprovdi l-frisk, l-umdità u s-salinità. Jolqot lit-tip ta’ tkabbir tad-dwieli peress li l-frott jiġi espost għall-arja permezz taż-żabra ekoloġika u billi jiġu pprovdut livell għoli ta’ melħ. Il-livelli għoljin tar-raġġi tax-xemx jippromwovu s-sinteżi tal-komposti fenoliċi, jipprovdu konċentrazzjoni għolja tat-togħmiet u kontenut għoli ta’ alkoħol, inbejjed ħomor b’lewn ta’ intensità medja u għolja, u nbejjed bojod b’dehra ċara. Il-ħamrija ġibsija trawwem il-preżenza tal-aromatiċi. B’din it-taħlita ta’ fatturi, l-inbejjed tal-“Pla i Llevant” għandhom karattru uniku li fihom aċidità integrata tajjeb li tagħti l-istruttura tipika u l-qawwa tal-inbejjed.

Inbid frizzanti, semifrizzanti u likur

Il-karatteristiċi differenti tal-inbejjed frizzanti, semifrizzanti u likuri tal-“Pla i Llevant” DOP ġejjin mill-kwalità differenti tal-inbid ta’ bażi li jintuża biex minnu jsiru l-inbejjed.

9.   Kundizzjonijiet essenzjali oħra

Qafas legali:

Fil-leġiżlazzjoni nazzjonali

Tip ta’ kundizzjoni ulterjuri: Dispożizzjonijiet ulterjuri dwar it-tikkettar

Deskrizzjoni tal-kundizzjoni:

It-tikketta jrid ikollha l-isem u l-logo tal-“Pla i Llevant” DOP.

Qafas legali:

Fil-leġiżlazzjoni nazzjonali

Tip ta’ kundizzjoni ulterjuri: L-imballaġġ fiż-żona demarkata

Deskrizzjoni tal-kundizzjoni:

L-ibbottiljar irid isir fiż-żona tal-produzzjoni minħabba l-importanza tiegħu għall-kwalità tal-prodott finali. L-aqwa kundizzjonijiet huma iktar assigurati jekk l-ibbottiljar isir minn impriżi stabbiliti fl-istess reġjun tal-fabbriki tal-inbid koperti mid-denominazzjoni u li joperaw taħt il-kontroll dirett tagħhom, peress li għandhom esperjenza speċjalizzata u b’mod speċjali, għandhom għarfien profond tal-karatteristiċi speċifiċi tal-inbid inkwistjoni. Il-fliexken li jinbiegħ fihom l-inbid għall-konsum irid ikollhom siġilli, tikketta jew tikketta sekondarja numerata ta’ garanzija maħruġa mill-korp ta’ spezzjoni, li jitwaħħlu mill-fabbrika tal-inbid innifisha. Il-korp ta’ spezzjoni jrid jibgħat notifika bil-miktub minn qabel jekk irid jiġi maħżun inbid minn reġjuni ġeografiċi oħra. Il-ħżin ikun awtorizzat skont il-kundizzjonijiet li ġejjin: Inbid fi fliexken b’kapaċità ta’ < 15 L. Fliexken tikkettati fil-post tal-oriġini.

Link għall-ispeċifikazzjoni tal-prodott

http://www.caib.es/sites/qualitatagroalimentaria/es/pla_i_llevant-46239/