KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

28.3.2017

Il-Ġurnal Uffiċjali tal-Unjoni Ewropea

C 96/3

Rata tal-kambju tal-euro (1)

Is-27 ta’ Marzu 2017

(2017/C 96/04)

1 euro =

	Munita	Rata tal-kambju
USD	Dollaru Amerikan	1,0889
JPY	Yen Ġappuniż	119,93
DKK	Krona Daniża	7,4404
GBP	Lira Sterlina	0,86403
SEK	Krona Żvediża	9,5503
CHF	Frank Żvizzeru	1,0713
ISK	Krona Iżlandiża
NOK	Krona Norveġiża	9,2188
BGN	Lev Bulgaru	1,9558
CZK	Krona Ċeka	27,021
HUF	Forint Ungeriż	310,21
PLN	Zloty Pollakk	4,2641
RON	Leu Rumen	4,5491
TRY	Lira Turka	3,9203
AUD	Dollaru Awstraljan	1,4261
CAD	Dollaru Kanadiż	1,4536
HKD	Dollaru ta' Hong Kong	8,4584
NZD	Dollaru tan-New Zealand	1,5416
SGD	Dollaru tas-Singapor	1,5149
KRW	Won tal-Korea t'Isfel	1 207,95
ZAR	Rand ta' l-Afrika t'Isfel	13,7610
CNY	Yuan ren-min-bi Ċiniż	7,4895
HRK	Kuna Kroata	7,4395
IDR	Rupiah Indoneżjan	14 486,06
MYR	Ringgit Malażjan	4,8055
PHP	Peso Filippin	54,516
RUB	Rouble Russu	61,8655
THB	Baht Tajlandiż	37,404
BRL	Real Brażiljan	3,3980
MXN	Peso Messikan	20,4918
INR	Rupi Indjan	70,8170

(1) Sors: rata tal-kambju ta' referenza ppubblikata mill-Bank Ċentrali Ewropew.

28.3.2017

Il-Ġurnal Uffiċjali tal-Unjoni Ewropea

C 96/7

Pubblikazzjoni ta’ applikazzjoni għal emenda skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2017/C 96/08)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni għal emenda skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

APPLIKAZZJONI GĦALL-APPROVAZZJONI TA’ EMENDA MHUX MINURI GĦALL-ISPEĊIFIKAZZJONI TAL-PRODOTT TA’ DENOMINAZZJONI TAL-ORIĠINI PROTETTA JEW TA’ INDIKAZZJONI ĠEOGRAFIKA PROTETTA

Applikazzjoni għall-approvazzjoni ta’ emenda skont l-ewwel subparagrafu tal-Artikolu 53(2) tar-Regolament (UE) Nru 1151/2012

“LIMONE INTERDONATO MESSINA”

Nru tal-UE: PGI-IT-02139 — 3.5.2016

DOP ( ) IĠP ( X )

1. Grupp applikant u interess leġittimu

Società Cooperativa Agricola Limone Interdonato di Sicilia

Via Umberto I 369

98026 Nizza di Sicilia (ME)

ITALIA

Tel. +39 0942422119

Società Cooperativa Agricola Limone Interdonato Messina Jonica

Via Sant’Antonio 15

98025 Itala (ME)

ITALIA

Tel. +39 3473632533

Il-gruppi applikanti għandhom il-jedd li jressqu applikazzjoni għal emenda skont l-Artikolu 13(1) tad-Digriet Nru 12511 tal-14 ta’ Ottubru 2013 tal-Ministeru tal-Politika tal-Agrikoltura, tal-Ikel u tal-Forestrija.

2. Stat Membru jew Pajjiż Terz

L-Italja

3. Titlu fl-ispeċifikazzjoni tal-prodott affettwat mill-emenda

—	☐	Isem il-prodott
—	☒	Deskrizzjoni tal-prodott
—	☐	Żona ġeografika
—	☐	Prova tal-oriġini
—	☐	Metodu ta’ produzzjoni
—	☒	Rabta
—	☒	Tikkettar
—	☒	Oħrajn [Referenzi legali aġġornati — struttura ta’ kontroll]

4. Tip ta’ emenda

—	☒	Emenda għall-ispeċifikazzjoni tal-prodott ta’ DOP jew IĠP rreġistrata li ma għandhiex tikkwalifika bħala minuri skont it-tielet subparagrafu tal-Artikolu 53(2) tar-Regolament (UE) Nru 1151/2012.
—	☐	Emenda għall-ispeċifikazzjoni tal-prodott ta’ DOP jew IĠP rreġistrata li minħabba fiha ma ġie rreġistrat l-ebda dokument uniku (jew dokument ekwivalenti) u li ma għandhiex tikkwalifika bħala minuri skont it-tielet subparagrafu tal-Artikolu 53(2) tar-Regolament (UE) Nru 1151/2012.

5. Emenda (emendi)

Deskrizzjoni tal-prodott

L-indikazzjoni li ġejja dwar l-aċidità tal-meraq, li tinsab fl-Artikolu 2 tal-ispeċifikazzjoni tal-prodott u fil-punt 3.2 tad-Dokument Uniku:

“L-aċidità totali hija inqas minn 50 g/l”

hija emendata kif ġej:

“L-aċidità totali hija inqas minn 82 g/l”.

Il-valur speċifikat fiż-żmien tal-applikazzjoni għar-reġistrazzjoni tad-denominazzjoni tkejjel mar-referenza tal-valuri tal-meraq minn frott maħsud meta jkun immatura għal kollox.

Abbażi ta’ studju reċenti mwettaq bis-saħħa tal-finanzjament mill-Programm għall-Iżvilupp Rurali — ir-Reġjun ta’ Sqallija 2007-2013, Miżura 124 “Kooperazzjoni għall-iżvilupp ta’ prodotti, proċessi u teknoloġiji ġodda fis-settur agrikolu u dak tal-ikel u fis-settur tal-foresterija” CI.B.I. (CITRUS BUSINESS INTELLIGENCE), imwettaq fl-aħħar sentejn agrikoli (2013/2014 u 2014/2015) fuq kampjun rappreżentattiv ta’ prodotti soġġetti għas-sistema ta’ kontroll tal-IĠP, kien possibbli li jiġi stabbilit li l-valuri tal-aċidità tal-meraq tal-“Limone Interdonato Messina” jonqos b’mod naturali hekk kif il-frotta timmatura, u l-valur iddikjarat fl-ispeċifikazzjoni (inqas minn 50 g/l) jintlaħaq biss meta timmatura għal kollox, jiġifieri minn Marzu ‘l quddiem, jiġifieri lejn tmiem l-istaġun tal-ħsad li jdum mill-1 ta’ Settembru sal-15 ta’ April.

Fil-fatt mill-monitoraġġ imwettaq matul il-proġett instab li l-valuri ta’ aċidità, espressi bħala aċidu ċitriku, irrappurtati waqt l-istaġun tal-ħsad minn Settembru sal-aħħar ta’ Frar, kienu ta’ madwar 80 g/l, u għalhekk mhux kummerċjabbli kif stipulat fil-pjan ta’ kontroll tal-“Limone Interdonato Messina” IĠP. Għaldaqstant, nitolbu li jiżdied il-valur marbut mal-aċidità massima indikat fl-ispeċifikazzjoni tal-“Limone Interdonato Messina” IĠP billi dan il-parametru ma jqisx il-varjazzjonijiet tal-valur tal-aċidità li jsiru waqt li l-frotta tkun qed timmatura.

Rabta

Hemm il-ħtieġa ta’ rettifika fil-punt 5 tad-Dokument Uniku ppubblikat f’ Il-Ġurnal Uffiċjali tal-Unjoni Ewropea C 74 tat-28 ta’ Marzu 2009, p. 70, li jgħid li l-“ħlewwa” tal-polpa tal-“Limone Interdonato Messina” hija marbuta mal-kontenut baxx tal-aċidu ċitriku. B’mod partikolari, nixtiequ nippreċiżaw li l-karatteristika ta’ “ħlewwa” tal-“Limone Interdonato Messina” ma tinbidilx bħala karatteristika tal-prodott minħabba li l-“ħlewwa” imsemmija għandha x’taqsam mal-grad Brix % (glukożju u fruttożju bħala zokkor maħlul f’likwidu) tal-meraq u li l-“Limone Interdonato Messina” juri medja ogħla minn dawk ta’ lumi Sqalli ieħor imnissel bil-kultivazzjoni (6,2 %) kif imfisser diġà fl-ispeċifikazzjoni attwali. It-test tal-ispeċifikazzjoni tal-prodott jibqa’ l-istess.

Għadaqstant, il-paragrafi tal-punt 5 li ġejjin huma emendati kif ġej:

“Il-karatteristiċi fondamentali tal-‘Limone Interdonato Messina’ huma l-prekoċità tal-maturazzjoni u l-pożizzjoni konsegwenti fis-suq waqt perjodu li fih fiż-żoni l-oħra taċ-ċitru fil-Meditteran ma jkunx għadu ġie prodott il-lumi isfar, fil-ħlewwa tal-polpa minħabba l-kontenut baxx ta’ aċidu ċitriku (inqas minn 50 g/l), fir-reżistenza eċċezzjonali għall-marda tan-nixfa taċ-ċitri (Phoma tracheiphila), fl-epikarpju fin, karatteristika li ġejja mill-epikarpju lixx, bi glandoli żejtnija mifruxin.”

Huwa emendat kif ġej:

“Il-karatteristiċi bażiċi tal-‘Limone Interdonato Messina’ huma l-maturazzjoni bikrija tiegħu, li jfisser li jista’ jitqiegħed fis-suq f’perjodu qabel ma jiġi prodott kwalunkwe lumi isfar ieħor fiż-żoni fil-Mediterran fejn jikber iċ-ċitru, il-ħlewwa tal-polpa tiegħu, ir-reżistenza eċċezzjonali għall-marda tan-nixfa taċ-ċitri (Phoma tracheiphila), u l-epikarpju fin, lixx u bi glandoli żejtija mifruxin.”.

“Il-karatteristiċi fundamentali tiegħu identifikati fuq kollox fil-prekoċità tal-maturazzjoni, fil-ħlewwa tal-polpa, minħabba l-kontenut baxx tal-aċidu ċitriku, u l-epikarpju fin huma rriżultat ta’ sistema ta’ relazzjoni bejn il-karattri pedoklimatiċi, ix-xitla u l-metodi ta’ kultivazzjoni tipiċi taż-żona IĠP.”

Huwa emendat kif ġej:

“Il-karatteristiċi bażiċi tiegħu, b’mod partikolari l-maturazzjoni bikrija tiegħu, il-ħlewwa tal-polpa, u l-epikarpju fin, huma r-riżultat ta’ għadd ta’ fatturi: il-ħamrija, il-klima, ix-xitla u l-metodi ta’ kultivazzjoni tipiċi fiż-żoni ta’ produzzjoni tal-IĠP.”

Tikkettar

Il-logo tal-“Limone Interdonato Messina”, ġie ikkoreġut billi tneħħa s-simbolu tal-Unjoni Ewropea minn fuqu. Is-simbolu tal-Unjoni Ewropea huwa proprjetà tal-Kummissjoni Ewropea u ma jistax jifforma parti mil-logo tal-prodott.

Oħrajn

Jenħtieġ li jiġu aġġornati r-referenzi legali għar-Regolament (UE) Nru 1151/2012 tal-Parlament Ewropew u tal-Kunsill.

Jenħtieġ li r-referenzi għall-korp tal-ispezzjoni responsabbli għall-kontroll tal-ispeċifikazzjoni tal-prodott jiġu inklużi fl-ispeċifikazzjoni tal-prodott.

DOKUMENT UNIKU

“LIMONE INTERDONATO MESSINA”

Nru tal-UE: PGI-IT-02139 — 3.5.2016

DOP ( ) IĠP ( X )

1. Isem

“Limone Interdonato Messina”

2. Stat Membru jew Pajjiż Terz

L-Italja

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott

Klassi 1.6. Frott, ħaxix u ċereali, friski jew ipproċessati

3.2. Deskrizzjoni tal-prodott li għalih japplika l-isem fil-punt 1

L-Indikazzjoni Ġeografika Protetta “Limone Interdonato Messina” hija riservata għall-varjetà mnissla bil-kultivazzjoni, “Interdonato”, ibridu naturali bejn klonu tat-tronġ u klonu tal-lumi. Meta jitqiegħed fis-suq irid ikollu l-karatteristiċi li ġejjin:

— frotta: ta’ użin bejn medju u tqil, bejn it-80 u t-350 g,

— forma: ovali bi protuberanza evidenti u daħla ftit baxxa minn fejn taqbad maz-zokk tas-siġra,

— epikarpju: Fin u lixx bi glandoli żejtnija mifruxin,

— kulur: għall-bidu tal-maturazzjoni kummerċjali jkun aħdar matt għal isfar u mal-maturazzjoni fiżjoloġika jkun isfar minbarra t-truf li jkunu aħdar matt,

— polpa: ta’ kulur isfar, b’sawra medja u delikwixxenti bi ftit jew xejn żerriegħa,

— meraq: ta’ kulur isfar lewn iċ-ċitru, b’rendiment ta’ mhux inqas minn 25 %. L-aċidità totali hija inqas minn 82 g/l Il-grad Brix mhuwiex inqas minn 6,2,

— kategorija kummerċjali: “Extra” u “I”.

Il-ħsad tal-“Limone Interdonato Messina” IĠP isir mill-1 ta’ Settembru sal-15 ta’ April.

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

—

3.4. Passi speċifiċi tal-produzzjoni li jridu jsiru fiż-żona ġeografika ddefinita

Il-proċessi tal-produzzjoni għandhom isiru biss fiż-żona tal-produzzjoni msemmija fil-punt 4. Il-ħsad isir matul il-perjodu indikat fil-punt 3.2, bl-idejn u bl-użu ta’ mqass biex ma titneħħiex il-parti minn fejn tkun imqabbda mas-siġra.

3.5. Regoli speċifiċi dwar it-tqattigħ, it-tħakkik, l-ippakkjar, eċċ. tal-prodott li għalih qed tirreferi d-denominazzjoni reġistrata

Il-frott tal- “Limone Interdonato Messina” IĠP, mhux kummerċjalizzat hekk kif jinqata’, jista’ jiġi ppreservat f’temperaturi baxxi. Huma maħżuna fi mħażen kesħin li jżommu livell ta’ umdità relattiva għolja (79-95 %) biex tinżamm is-sodezza tal-frotta, filwaqt li l-arja tinbidel (ħames darbiet il-volum tal-maħżen kull 24 siegħa) biex jitneħħew id-diossidu tal-karbonju u l-etilen li jiżviluppaw hekk kif il-frotta tkun qed tieħu n-nifs. Il-lumi huwa maħżun f’temperaturi bejn 6 u 11 °C. Il-frott irid jiġi ppakkjat mhux iktar minn 30 ġurnata wara l-ħsad.

Il-“Limone Interdonato Messina” IĠP jitqiegħed fis-suq f’kontenituri u/jew f’tilari tal-injam, tal-plastik u/jew tal-kartun, fi xkejjer tax-xibka li ma jiżnux iktar minn 5 kg u f’kontenituri tal-kartun immewġin. Il-pakketti, il-basktijiet u l-kontenituri għandhom ikunu ssiġillati b’tali mod li jżommu milli l-kontenut jinħareġ mingħajr ma jinkiser is-siġill. Il-“Limone Interdonato Messina” jista’ jitqiegħed fis-suq anke bl-ingrossa sakemm kull frotta jkollha stiker fuqha.

3.6. Regoli speċifiċi dwar it-tikkettar tal-prodott li għalih jirreferi l-isem reġistrat

Fuq it-tikketta tal-imballaġġ għandu jkun hemm: l-isem “Limone Interdonato Messina” IĠP u l-logo, b’karattri ikbar minn dawk tal-informazzjoni l-oħra fuq it-tikketta; l-isem, l-isem tan-negozju u l-indirizz tal-produttur u/jew tal-imballatur u l-kategorija kummerċjali “Extra” jew “I”.

Il-logo huwa magħmul minn żewġ ċrieki konċentriċi: Fl-ewwel ċirku, fl-isfond aħdar bħall-kulur tal-lumi Interdonato fil-bidu tal-maturazzjoni, hemm il-kliem: “LIMONE INTERDONATO” u żewġ ritratti tal-lumi. Fit-tieni ċirku, fl-isfond ta’ kulur blu bħall-baħar hemm l-istampa tal-Kurunell Interdonato, li beda l-varjetà mnissla bil-kultivazzjoni, li ġġib l-istess isem, ir-rappreżentazzjoni ta’ Sqallija u l-kitba “MESSINA” li tikkompleta l-isem tal-IĠP.

4. Deskrizzjoni fil-qosor taż-żona ġeografika

Iż-żona ta’ produzzjoni tal-“Limone Interdonato Messina” IĠP tinkludi t-territorju kollu tal-muniċipalitajiet fil-provinċja ta’ Messina li ġejjin: Messina, Scaletta Zanclea, Itala, Alì, Alì’ Terme, Nizza di Sicilia, Roccalumera, Fiumedinisi, Pagliara, Mandanici, Furci Siculo, S. Teresa di Riva, Letojanni, S. Alessio Siculo, Forza D’Agrò, Taormina, Casalvecchio Siculo, Giardini Naxos u Savoca.

5. Rabta maż-żona ġeografika

Iż-żona ġeografika li fiha titkabbar l- “Limone Interdonato Messina” IĠP hija medda vasta tal-kosta tal-baħar Joniku f’Messina, li hija esposta għall-Baħar Joniku b’mod uniformi, u twassal saż-żoni muniċipali bejn Messina u Taormina.

Il-medda tal-varjetà mnissla bil-kultivazzjoni tista tinsab minn mal-livell tal-baħar sa madwar 400 metru ’l fuq mil-livell tal-baħar, iżda tinsab ukoll iktar ‘il fuq fix-xtut fertili ta’ għadd ta’ nixxigħat u l-baċiri tal-iskular.

L-orografika hija ffurmata mill-katina tal-muntanji Peloritani li titla’ wieqfa mill-Baħar Joniku, u li l-qċaċet tagħha huma qrib il-kosta, u b’hekk joħolqu art muntanjuża u xaqlib wieqaf, anke f’altitudnijiet kemxejn baxxi. Fil-fatt, ħafna mill-art għandha gradjent ta’ iktar minn 40 % u l-unika art ċatta tinsab qrib ix-xtut tan-nixxigħat u l-kosta.

Fir-rigward tal-ġeoloġija taż-żona, il-Grigal ta’ Sqallija hu marbut stratigrafikament mal-Kalabrija, b’bażi ta’ blat tal-granitiku, skistuż u filladiku li hu kopert minn ħamrija aktar reċenti. Probabbilment, din il-bażi hija tal-Kambrijani u hija magħmula minn qasmiet tal-granit porfirojde u minn skisti.

Is-sedimentazzjoni post-Kambrijani hija magħmula minn strati alternati ta’ ġebla tal-franka, dolomiti, skisti u tafal, filwaqt li s-sedimenti suċċessivi Plijoċeni għandhom konglomerati basali, ħamrija, tafal u fl-aħħar nett ġebel ramli u ramel.

Fir-rigward tal-profil tettoniku, il-konsegwenzi ewlenin ta’ din l-istruttura ġeoloġika huma l-frammentazzjoni tal-blat li jwasslu għall-ħolqien ta’ fwawar u l-istabbilità tal-ħamrija b’depożiti alluvjali ħoxnin, li jsostnu l-akkumulazzjoni tal-infiltrazzjoni tal-ilma fil-wiċċ tal-ilma ta’ taħt l-art.

Dawn iż-żewġ fatturi jiżguraw id-disponibilità tal-ilma ta’ taħt l-art għall-irrigazzjoni.

Iż-żona għandha tipi differenti ta’ ħamrija, bil-predominanza ta’ litosoli alluvjali u ħamrija kannella fertili ħafna.

Fir-rigward tal-idroloġija taż-żona, għandha titqies il-preżenza mifruxa ta’ kanali tal-ilma li eċċezzjonalment isiru xmajjar wara xita qawwija; aspett sinifikanti huwa l-presenza fis-sottoswol ta’ ilmijiet rikki fil-kubrit, fil-melħ, fil-bromu u fil-jodju, li jiġu sfruttati wkoll għal skopijiet termali. Għaldaqstant, ir-riżorsi tal-ilma jikkonsistu prinċipalment f’idrometeori, fwawar u ilma ta’ taħt l-art li jinġabar minn għadd kbir ta’ bjar. Il-klima taż-żona hija tipikament Mediterranja bi xtiewi li mhumiex ħorox u sjuf b’perjodi twal ta’ nixfa u temperaturi għoljin. Ir-irjieħ prevalenti huma mill-Punent u mill-Grigal. Fix-xitwa, l-irjieħ mill-Majjistral u mill-Lbiċ huma frekwenti u jistgħu jkunu pjuttost qawwija. Jinħass ħafna wkoll ix-Xlokk, riħ sħun u umdu li jonfoħ min-Nofsinhar għax-Xlokk għal perjodi twal.

Minn dak li ssemma hawn fuq, wieħed jista’ jikkonkludi li l-aspetti pedoloġiċi, orografiċi, klimatiċi u ambjentali taż-żona fejn jitkabbar il-“Limone Interdonato Messina”, hija sistema ambjentali unika li ma tinstabx fi bnadi oħra. Il-prova hija li x-xtieli tal-lumi Interdonato li jikbru f’inħawi oħra ta’ Sqallija u tal-Kalabrija, qatt ma pproduċew frott bl-istess karatteristiċi speċifiċi u tipiċi ta’ preġju daqs il-varjetà mnissla bil-kultivazzjoni li tinsab fiż-żona msemmija. Il-karatteristiċi bażiċi tal-“Limone Interdonato Messina” huma l-maturazzjoni bikrija tiegħu, li jfisser li jista’ jitqiegħed fis-suq f’perjodu qabel ma jiġi prodott kwalunkwe lumi isfar ieħor fiż-żoni fil-Mediterran fejn jikber iċ-ċitru, il-ħlewwa tal-polpa tiegħu, ir-reżistenza eċċezzjonali għall-marda tan-nixfa taċ-ċitri, u l-epikarpju fin, lixx u bi glandoli żejtnija mifruxin.

L-applikazzjoni għar-reġistrazzjoni tal-“Limone Interdonato Messina” bħala IĠP hija marbuta mar-reputazzjoni li ilu jgawdi minn dejjem dan il-prodott fiż-żona li fih jiġi kkultivat. Lura fl-1875, il-kurunell Interdonato, eroj ta’ żmien Garibaldi, għażel din il-varjetà partikolari mnissla bil-kultivazzjoni, li l-frott tagħha jiddistingwi ruħu permezz tal-perjodu ta’ maturazzjoni bikrija, id-daqs kbir, il-forma tawwalija u ċilindrika, il-kontenut tal-meraq u l-qoxra lixxa tiegħu. Minn dak iż-żmien ‘l hawn ġie apprezzat u rikonoxxut mir-residenti taż-żona li tawh ukoll ismijiet oħra bħal: “limone speciale” jew “fino”, li għadhom jintużaw sal-lum flimkien mal-isem “Limone Interdonato”.

Il-karatteristiċi bażiċi tiegħu, b’mod partikolari l-maturazzjoni bikrija tiegħu, il-ħlewwa tal-polpa, u l-epikarpju fin, huma r-riżultat tas-sistema ta’ relazzjoni bejn il-karattri pedoklimatiċi, ix-xitla u l-metodi ta’ kultivazzjoni tipiċi taż-żona IĠP. Fost il-prassi agronomiċi li huma importanti għall-iżvilupp tal-karatteristiċi speċifiċi tal-varjetà Iterdonato mnissla mill-kultivazzjoni fiż-żona tal-produzzjoni IĠP, ta’ min isemmi l-fertilizazzjoni bbażata fuq iż-żieda ta’ livelli għoljin ta’ sustanzi organiċi u fuq il-fertilizzanti li jirrilaxxaw bil-mod in-nitroġenu. Peress li hu xjentifikament ippruvat li s-supplimenti tan-nitrat għandhom effett kbir fuq il-ħruxija tal-epikarpju, l-użu ta’ fertilizzanti organiċi b’rilaxx bil-mod jgħin l-assorbiment gradwali tan-nitrat mix-xitla u l-firxa tal-glandoli żejtnija tal-frotta. Teknika speċjali oħra li tintuża hija dik tal-irrigazzjoni kostanti u adegwata matul il-perjodu ta’ tkabbir u ta’ maturazzjoni tal-frotta, li fil-maġġoranza jsir fis-sajf. Għalhekk, il-preżenza tal-“Limone Interdonato Messina” fil-kosta tal-Baħar Joniku fil-Provinċja ta’ Messina, hija żvilupp naturali li jsir permezz ta’ taħlita ta’ fatturi naturali u umani partikolari fiż-żona tal-produzzjoni u li ma jistgħux jiġu replikati band’oħra. Dan hu konfermat mir-riżultati negattivi tat-tentattivi kollha biex tiġi estiża l-kultivazzjoni fiż-żoni ġirien ta’ Katanja, u fuq in-naħa tal-Punent ta’ Messina mal-kosta tal-Baħar Tirren, filwaqt li l-kultivazzjoni baqgħet stabbli u produttiva fiż-żona ta’ oriġini. Barra minn hekk, ma hemmx dubju li l-maturazzjoni bikrija tal-frotta hija dovuta wkoll għall-klonu tat-tronġ li minnu toriġina l-varjetà mnissla bil-kultivazzjoni, “Interdonato”. Fil-qosor, sa mis-seklu XIX, il-“Limone Interdonato” ta xejra oħra lill-pajsaġġ tal-kosta kollha tal-Baħar Joniku fil-Provinċja ta’ Messina, li kisbet ir-reputazzjoni ta’ “art bil-ġonna li dejjem iħaddru”, li ħallew effett fuq l-ekonomija, id-drawwiet, l-għamla soċjali, l-avvenimenti, il-kultura, ir-riti u t-tradizzjonijiet.

Referenza għall-pubblikazzjoni tal-ispeċifikazzjoni

(it-tieni subparagrafu tal-Artikolu 6(1) ta’ dan ir-Regolament)

Il-Ministeru preżenti nieda l-proċedura nazzjonali ta’ oġġezzjoni bil-pubblikazzjoni tal-proposta għar-rikonoxximent tal-IĠP “Limone Interdonato Messina” fil-Gazzetta Uffiċjali tar-Repubblika Taljana Nru. 63 tas-16 ta’ Marzu 2016. It-test sħiħ tal-ispeċifikazzjoni tal-prodott jinsab fuq is-sit web li ġej:

http://www.politicheagricole.it/flex/cm/pages/ServeBLOB.php/L/IT/IDPagina/3335

billi żżur il-paġna uffiċjali tal-Ministeru tal-Politika Agrikola, Alimentari u l-Forestrija (www.politicheagricole.it) u tagħfas fuq “Prodotti DOP e IGP” (fuq in-naħa ta’ fuq fil-lemin tal-iskrin), u wara fuq “Prodotti DOP, IGP e STG” (fil-ġenb, fuq in-naħa tax-xellug tal-iskrin) u billi fl-aħħar tagħfas fuq “Disciplinari di produzione all’esame dell’UE”.

(1) ĠU L 343, 14.12.2012, p. 1.

		ISSN 1977-0987
Il-Ġurnal Uffiċjali tal-Unjoni Ewropea		C 96

Edizzjoni bil-Malti	Informazzjoni u Avviżi	Volum 60 28 ta' Marzu 2017

Avviż Nru	Werrej	Paġna
	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2017/C 96/01	Ebda oppożizzjoni għal konċentrazzjoni notifikata (Il-Każ M.8395 — Bridgepoint/Zenith) ( 1 )	1
2017/C 96/02	Ebda oppożizzjoni għal konċentrazzjoni notifikata (Il-Każ M.8377 — SPIE/SAG) ( 1 )	1
2017/C 96/03	Ebda oppożizzjoni għal konċentrazzjoni notifikata (Il-Każ M.8087 — Smiths Group/Morpho Detection) ( 1 )	2

	V Avviżi
	PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI
	Il-Kummissjoni Ewropea
2017/C 96/05	Notifika minn qabel ta’ konċentrazzjoni (Il-Każ M.8059 — Investindustrial/Black Diamond/Polynt/Reichhold) ( 1 )	4
2017/C 96/06	Notifika minn qabel ta’ konċentrazzjoni (Il-Każ M.8430 — AÜW/Siemens/egrid) — Każ li jista’ jiġi kkunsidrat għal proċedura ssimplifikata ( 1 )	5
2017/C 96/07	Notifika minn qabel ta’ konċentrazzjoni (Il-Każ M.8362 — Lonza Group/Capsugel) ( 1 )	6
	ATTI OĦRAJN
	Il-Kummissjoni Ewropea
2017/C 96/08	Pubblikazzjoni ta’ applikazzjoni għal emenda skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel	7

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2017/C 96/04	Rata tal-kambju tal-euro	3


	(1) Test b'rilevanza għaż-ŻEE.