KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

6.12.2016

Il-Ġurnal Uffiċjali tal-Unjoni Ewropea

C 455/2

Rata tal-kambju tal-euro (1)

Il-5 ta’ Diċembru 2016

(2016/C 455/02)

1 euro =

	Munita	Rata tal-kambju
USD	Dollaru Amerikan	1,0702
JPY	Yen Ġappuniż	122,32
DKK	Krona Daniża	7,4396
GBP	Lira Sterlina	0,84168
SEK	Krona Żvediża	9,8015
CHF	Frank Żvizzeru	1,0797
ISK	Krona Iżlandiża
NOK	Krona Norveġiża	8,9840
BGN	Lev Bulgaru	1,9558
CZK	Krona Ċeka	27,057
HUF	Forint Ungeriż	313,97
PLN	Zloty Pollakk	4,5005
RON	Leu Rumen	4,5010
TRY	Lira Turka	3,7794
AUD	Dollaru Awstraljan	1,4391
CAD	Dollaru Kanadiż	1,4240
HKD	Dollaru ta' Hong Kong	8,2997
NZD	Dollaru tan-New Zealand	1,5105
SGD	Dollaru tas-Singapor	1,5230
KRW	Won tal-Korea t'Isfel	1 254,48
ZAR	Rand ta' l-Afrika t'Isfel	14,8125
CNY	Yuan ren-min-bi Ċiniż	7,3662
HRK	Kuna Kroata	7,5356
IDR	Rupiah Indoneżjan	14 375,46
MYR	Ringgit Malażjan	4,7608
PHP	Peso Filippin	53,188
RUB	Rouble Russu	68,1175
THB	Baht Tajlandiż	38,147
BRL	Real Brażiljan	3,7044
MXN	Peso Messikan	22,0853
INR	Rupi Indjan	72,9495

(1) Sors: rata tal-kambju ta' referenza ppubblikata mill-Bank Ċentrali Ewropew.

6.12.2016

Il-Ġurnal Uffiċjali tal-Unjoni Ewropea

C 455/7

Pubblikazzjoni ta’ applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2016/C 455/07)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

DOKUMENT UNIKU

“MORCILLA DE BURGOS”

Nru tal-UE: ES-PGI-0005-01282 — 21.11.2014

DOP ( ) IĠP ( X )

1. Isem

“Morcilla de Burgos”

2. Stat Membru jew pajjiż terz

Spanja

3. Deskrizzjoni tal-prodott agrikolu jew oġġett tal-ikel

3.1. Tip ta’ prodott

Klassi 1.2. Prodotti tal-laħam (imsajra, immellħa, affumikati, eċċ.)

3.2. Deskrizzjoni tal-prodott li japplika għalih l-isem f’(1)

“Morcilla de Burgos” huwa prodott tal-laħam magħmul bil-mili ta’ zalzett li mbagħad jissajjar. Dan isir minn dawn l-ingredjenti bażiċi li ġejjin: basal tal-varjetà “Horcal”, lardu jew xaħam ta’ dam, ross, demm, ħwawar u melħ.

L-ingredjenti huma mqassmin fil-proporzjonijiet li ġejjin fil-“Morcilla de Burgos”:

—	:	basal tal-varjetà “Horcal”	:	aktar minn 35 %
—	:	ross	:	minn 15 % sa 30 %
—	:	demm	:	aktar minn 12 %
—	:	lardu jew xaħam ta’ dam	:	minn 10 % sa 22 %

Meta jkun lest, il-“Morcilla de Burgos” ikollu dawn il-karatteristiċi morfoloġiċi u organolettiċi li ġejjin:

Forma u dehra minn barra:

Meta jkun lest, il-“Morcilla de Burgos” għandu forma ċilindrika, b’dijametru ta’ bejn 30 u 100 mm, b’tul li jvarja bejn il-150 mm u t-350 mm u xi drabi għat-tond, skont il-forma tal-intestin użata. It-trufijiet jingħalqu bl-istejpils jew jintrabtu; f’dan il-każ jitħalla tul ta’ spaga biżżejjed biex iz-zalzett ikun jista’ jiddendel.

Il-forma tal-prodott tiddependi mill-forma tal-kisja. Il-lewn ta’ barra tiegħu jvarja minn kannella għal sfumatura ta’ kannella skur li hija kważi sewda. Iz-zalzett tad-demm ma jkunx imxaqqaq, mhemmx tiċrit fil-kisja, u lanqas moffa viżibbli. Iz-zalzett jinħass sod u kompatt.

Il-lewn u d-dehra meta jinqata’:

Meta jinqata’, l-aspetti predominanti tad-dehra taz-zalzett huma tikek bojod minħabba li fih ir-ross u t-tqassim bilanċjat tal-ingredjenti. Xi drabi wieħed ikun jista’ jara biċċiet ta’ lardu. Il-lewn tas-sustanza li tgħaqqad jiddependi mill-varjazzjonijiet permessi fil-kompożizzjoni tiegħu, għalkemm f’kull każ, il-lewn bażiku għandu diversi sfumaturi ta’ kannella.

c)	Konsistenza: Iz-zalzett għandu konsistenza li titfarrak fil-ħalq, bil-preżenza evidenti ta’ basal u grani sħaħ tar-ross, li ma għandux ikun iebes. Għandu ftit togħma xaħmija.

d)	Aroma u togħma: L-aromi u t-togħmiet tal-basal u tal-ħwawar varji għandhom jinħassu sewwa.

Il-parametri fiżikokimiki tal-prodott finali:

—	pH: bejn 6 u 7;

—	kontenut ta’ umdità: bejn 54 % u 67 %;

—	xaħam: bejn 15 % u 25 % f’materja niexfa;

—	total ta’ zokkor: ≥ 3,5 % f’ materja niexfa;

—	fibra: ≥ 2,7 % f’ materja niexfa;

—	kontenut ta’ melħ: 0,5 % sa 2 %.

Il-“Morcilla de Burgos” jista’ jinbiegħ sħiħ, bil-kisja jew mingħajrha, f’porzjonijiet jew flieli, diment li jkun ippakkjat u diment li l-oriġini tiegħu tista’ tkun identifikata.

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Il-varjetà “Horcal” tal-basal (Allium cepa L). Din hija varjetà indiġena ta’ basal bil-karatteristiċi li ġejjin: għamla tonda ċatta, dijametru ta’ mill-inqas 80 mm, piż ta’ aktar minn 100 g, qoxra kannella u b’laħam ta’ lewn li jvarja minn abjad għal ħadrani fl-isfar.

Ir-ross huwa niexef, intier, mill-varjetajiet ta’ granelli qosra Ġappuniżi bħal “Bahía” jew “Bomba”, u jappartjeni għall-klassi “Extra” u jinħażen f’kundizzjonijiet iġjeniċi. Jista’ jkun imsajjar minn qabel.

Fih lardu jew xaħam tad-dam. Jinħażen fil-friża jew fil-friġġ f’temperatura taħt l-4 °C.

Demm tan-nagħaġ, tal-baqar jew tal-ħnieżer.

Melħ (melħ tal-ikel).

Ħwawar. L-aktar ħwar essenzjali huwa l-bżar iswed. Jistgħu jintużaw ukoll il-paprika, ir-riegnu, il-kemmun, l-imsiemer tal-qronfol, it-tewm, il-kannella, il-karwija, it-tursin u l-ħlewwa. Dawn jinżammu, maħżuna kif xieraq, f’ambjent xott sakemm jintużaw.

Kisja: nadifa, miżmuma sew u f’kundizzjoni tajba.

3.4. Passi speċifiċi fil-produzzjoni li jridu jsiru fiż-żona ġeografika ddefinita

L-istadji kollha fit-tħejjija u l-produzzjoni tal-“Morcilla de Burgos” iridu jseħħu fiż-żona, inklużi dawn li ġejjin:

—	it-tħejjija tal-lardu jew tax-xaħam tad-dam u tal-basal;

—	it-taħlit tal-ingredjenti;

—	il-mili tal-kisja;

—	is-sajran u l-ventilazzjoni taz-zalzett tad-demm.

3.5. Regoli speċifiċi dwar it-tqattigħ, it-taħkik, l-ippakkjar, eċċ.

—

3.6. Regoli speċifiċi dwar it-tikkettar

It-tikketti kummerċjali ta’ kull kumpanija rreġistrata għandu jkollhom il-kliem: Indikazzjoni Ġeografika Protetta “Morcilla de Burgos”.

Il-prodott protett jintbagħat b’tikketta b’numru li tinkludi mill-inqas l-isem “Morcilla de Burgos” u l-logo tal-Indikazzjoni Ġeografika Protetta.

Il-logo tal-Indikazzjoni Ġeografika Protetta huwa:

4. Definizzjoni fil-qosor taż-żona ġeografika

Iż-żona ġeografika ddefinita tkopri l-provinċja kollha ta’ Burgos.

5. Rabta maż-żona ġeografika

Ir-reputazzjoni ta’ “Morcilla de Burgos” hija waħda mill-evidenzi tar-rabta bejn iż-żona ġeografika u l-prodott.

Ftit hemm informazzjoni bil-miktub dwar il-“Morcilla de Burgos”, peress li għal sekli sħaħ, il-qtil tal-ħnieżer fl-irziezet u l-produzzjoni tal-“Morcilla de Burgos” kien isir fil-familja, u diversi riċetti dwar kif għandu jsir għaddew minn ġenerazzjoni għal oħra bil-fomm. Mit-tieni nofs tas-seklu 20 ‘il quddiem, it-tisjir reġjonali reġa’ qabad, u ġew ippubblikati għadd sostanzjali ta’ kotba dwar il-gastronomija li jsemmu dan il-fatt u li għandhom l-għan li jqajmu mill-ġdid u jiġbdu l-attenzjoni lejn dawn it-teżori gastronomiċi.

Għal sekli sħaħ, il-ħnieżer kienu jinqatlu f’Burgos fix-xitwa. Din kienet tradizzjoni b’għeruq soda fost il-familji, ipprattikata fuq skala żgħira. Il-prodotti mill-qtil tal-ħnieżer kienu jinkludu laħam frisk u zalzett bnin, li kienu jitimgħu lill-familja kollha għall-bqija tas-sena. Il-“Morcilla de Burgos” kien partikolari peress li kien jinkludi d-demm, ix-xaħam u l-intestini tal-ħnieżer.

L-ewwel referenza bil-miktub għall-“Morcilla de Burgos” tmur lura għall-1928, meta l-kirurgu veterinarju Spanjol magħruf fil-bidu tas-seklu 20, Cesáreo Sanz Egaña, jirreferi għal “zalzett tad-demm mitħun magħmul fl-irħula ta’ [il-provinċja ta’] Burgos, u li l-karatteristika tiegħu hija proporzjon kbir ta’ basal, kif ukoll ross, demm, xaħam u ħwawar bħal bżar, paprika u ħlewwa”. Il-fatt li Sanz Egaña jsemmi dan il-prodott f’manwal tekniku juri li sa dak iż-żmien, il-prodott kien diġà kiseb il-fama li kien jistħoqqlu u prestiġju. Il-“Morcilla de Burgos” beda xi ftit żmien wara li r-ross tfaċċa fir-reġjun ta’ Burgos. Fis-seklu 15, minħabba l-pożizzjoni strateġika tiegħu fi Spanja, Burgos sar wieħed mill-aktar ċentri attivi tal-kummerċ, li ffaċilita l-wasla tar-ross minn Valencia. Jingħad li r-ross kien inkorporat fil-“Morcilla de Burgos” b’reazzjoni għall-ħtieġa li tiżdied il-produzzjoni, jittawwal iż-żmien sakemm idum tajjeb, u jsir aktar sod u fin għall-palat.

L-Arkivju Muniċipali ta’ Burgos jinkludi l-ewwel applikazzjoni għal awtorizzazzjoni għall-bejgħ tal-“Morcilla de Burgos”, li tmur lura għall-1908. In-numru ta’ dawn l-applikazzjonijiet żdied mis-snin ħamsin u mis-sittinijiet ‘il quddiem.

Kien fit-tieni nofs tas-seklu għoxrin, minħabba titjib fit-trasport tal-oġġetti u migrazzjoni kbira tal-popolazzjoni rurali lejn iż-żoni industrijali, li l-“Morcilla de Burgos” qasam il-fruntieri tal-provinċja u l-fama tiegħu nxterdet madwar Spanja. Il-“Morcilla de Burgos” beda jissemma aktar, l-aktar fil-gwidi tat-turisti u fil-kotba tat-tisjir, u b’hekk ġie kkonfermat bħala waħda mill-ispeċjalitajiet tipiċi tal-provinċja. Dawn il-pubblikazzjonijiet kienu jinkludu:

—	Enciclopedia de la carne: producción, comercio, industria, higiene. [Enċiklopedija tal-laħam: produzzjoni, kummerċ, industrija, iġjene] Ed. Espasa-Calpe, Madrid. Sanz Egaña, C., 1948.

—

El trasfondo antropológico de la cocina castellano-leonesa [Sfond antropoloġiku tal-kċina ta’ Castile-Leon], Libro de la gastronomía de Castilla y León [Ktieb tal-gastronomija ta’ Castile-Leon]. Il-Ministeru tal-Edukazzjoni u l-Kultura, Gvern tal-Komunità Awtonoma ta’ Castile-Leon, Valladolid. Jiménez Lozano, 1986.

—	Embutidos (Alimentos de España) [Zalzett ippreservat (Ikel ta’ Spanja)]. El País Aguilar, Madrid. Arrate, B., 1992.

—	Cocina y gastronomía de Castilla y León [Ikel u gastronomija ta’ Castile-Leon]. Ediciones Pirámide, Madrid. Fernández de Alperi, S., 1995.

—	Libro práctico de la chacinería en casa [Manwal prattiku biex tagħmel iz-zalzett id-dar]. Ediciones Altosa, Madrid. Díaz, R., 1999.

—	Cocina Burgalesa Actual. Cocineros, Restaurantes y Artistas de Burgos 2011-2012 [Tisjir kontemporanju ta’Burgos - koki, ristoranti u artiġjani ta’ Burgos, 2011-2012.]. Javier Cano Hernán. Revista Siburita, 2011.

Ta’ min jenfasizza dak li jgħid Díaz Yubero (1998) dwar dan il-prodott fix-xogħol tiegħu Sabores de España [Togħmiet ta’ Spanja]: “…iz-zalzett tad-demm huwa zalzett umli iżda b’togħma inkredibbli. L-aqwa zalzett tad-demm fi Spanja jsir f’Burgos, mid-demm tal-ħnieżer”.

Il-manifattura tal-“Morcilla de Burgos” hija storikament assoċjata mal-qtil tal-ħnieżer fl-irziezet. Fis-seklu għoxrin, il-“Morcilla de Burgos” beda jsir fi kċejjen industrijali u f’fabbriki permezz ta’ metodi tradzzjonali skont ir-riċetti mgħoddija minn ġenerazzjoni għal oħra. Dan ma wassalx għal tnaqqis fil-kwalità; fil-fatt, ġara l-oppost, peress li l-prodott beda jiġi kkontrollat għall-indafa u l-iġjene, biex b’hekk ġew assigurati l-aqwa kundizzjonijiet għall-konsum tiegħu. Bis-saħħa tal-użu tal-magni fil-proċess tal-manifattura taz-zalzett, id-demm jiġi fornut minn biċċeriji awtorizzati. Il-parti l-kbira tal-biċċeriji fil-provinċja ta’ Burgos jimmaniġġaw diversi tipi ta’ annimali għall-qatla u d-demm tal-annimali differenti ma jinżammx separat, u għalhekk il-“Morcilla de Burgos” jista’ jsir permezz tad-demm tal-ħnieżer, tan-nagħaġ jew tal-baqar waqt li f’kull ħin tiġi assigurata l-kwalità finali tal-prodott.

Il-“Morcilla de Burgos” għandu kwalitajiet speċifiċi li jiddistingwuh minn zalzett tad-demm ieħor prodott fi bnadi oħrajn ta’ Spanja. Dawn il-kwalitajiet ġejjin mill-użu tal-varjetà ta’ basal “Horcal”. Skont ma jingħad tradizzjonalment rigward il-qatla tal-annimal, li tingħadda mill-missier għall-iben u ssir f’bosta rħula anki sal-ġurnata tal-lum, l-aqwa basal li jista’ jintuża fiz-zalzett tad-demm huwa tal-varjetà reġjonali magħrufa bħala “Horcal”, li tissejjaħ ukoll matancera (“biċċier”) jew de matanza (“tal-qatla”) minħabba l-assoċjazzjoni mill-qrib tiegħu ma’ din l-attività, speċjalment peress li jinqata’ fil-ħarifa u fil-bidu tax-xitwa, li jaħbat maż-żmien tal-qatla. Din il-basla ilha titkabbar tradizzjonalment fil-widien tax-xmajjar ewlenin li jaqsmu l-provinċja ta’ Burgos: il-Pisuerga, l-Arlanzón, l-Arlanza u d-Duero, u f’żoni aktar iżolati fil-baċin ta’ Ebro.

Din it-tip ta’ basla ġie deskritt minn José López y Camuñas (1854) u Sanz Egaña (1948, 1949) b’konnessjoni mal-produzzjoni taz-zalzett tad-demm. Skont José López y Camuñas, l-awtur ta’ diversi kotba tar-riċetti ta’ dak iż-żmien, biex isir zalzett tad-demm bil-basal, “trid tqatta’ ftit basal ħelu tat-tip Horcal, tqiegħdu fuq biċċa għażel ċara u tħallih joqgħod matul il-lejl; ftit qabel ma tagħmel iz-zalzett tad-demm, ħu l-basal minn fuq il-biċċa mingħajr ma tmissu u itfgħu fl-ilma biex jagħli ma’ ftit melħ, u wara li toħorġu, ħallih iqattar ftit”.

Dan it-tip ta’ basal jintuża f’“Morcilla de Burgos” peress li huwa basal ħelu faċli biex jitqatta’ u minħabba l-kontenut għoli ta’ fibra u ta’ ilma li fih (kważi 92 %) u l-kapaċità tiegħu li jżomm ħafna ilma. Barra minn hekk, peress li huwa abjad dan il-basal jidher inqas fil-prodott lest minn tipi oħrajn ta’ basal.

Is-sehem tal-“Morcilla de Burgos” irrappreżentat mill-basla “Horcal” għandu influwenza diretta fuq tliet aspetti fiżikokimiċi tal-prodott — il-pH, it-total taz-zokkor u l-fibra djetetika totali (TDF) — u barra minn hekk jinfluwenza n-numru u l-intensità tal-komposti volatili, b’mod partikolari l-komposti tal-kubrit li fih, li jagħtuh aroma partikolari u togħma pikkanti, li jiddistingwuh minn zalzett ieħor tad-demm magħmul fi Spanja bir-ross.

Referenza għall-pubblikazzjoni tal-ispeċifikazzjonijiet

(it-tieni subparagrafu tal-Artikolu 6(1) ta’ dan ir-Regolament)

http://www.itacyl.es/opencms_wf/opencms/informacion_al_ciudadano/calidad_alimentaria/4_condiciones_DOP/index.html

(1) ĠU L 343, 14.12.2012, p.1.

6.12.2016

Il-Ġurnal Uffiċjali tal-Unjoni Ewropea

C 455/11

Pubblikazzjoni ta’ applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2016/C 455/08)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 tal-Parlament Ewropew u tal-Kunsill (1).

DOKUMENT UNIKU

Ir-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel (2)

“WEST WALES CORACLE CAUGHT SEWIN”

Nru tal-KE: UK-PGI-0005-01180 — 12.11.2013

IĠP ( X ) DOP ( )

1. Isem

“West Wales Coracle Caught Sewin”

2. Stat Membru jew Pajjiż Terz

Ir-Renju Unit

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott

Klassi 1.7: Ħut, molluski u krustaċi friski, u prodotti magħmulin minnhom

3.2. Deskrizzjoni tal-prodott li għalih japplika l-isem f’(1)

“West Wales Coracle Caught Sewin” huwa l-isem mogħti lill-ħut tal-ispeċi Salmo trutta, li jkun maqbud bl-użu tal-metodu tradizzjonali ta’ Wales tal-qedem imsejjaħ sajd mill-coracle.

Il-“West Wales Coracle Caught Sewin” huwa ħut frisk ileqq fiddien, b’għadd ta’ tikek suwed li jinsabu kemm fuq u taħt il-linja laterali. Il-laħma ta’ sewin hija soda b’saħħa tal-muskoli tajba u għandha riħa ta’ ħut frisk. Il-kulur tal-laħma huwa roża ċar ħafif distintiv, għalkemm dan jista’ jvarja xi ftit billi s-sewin jiekol biss meta jkun fil-baħar u l-kulur tal-laħma tiegħu jiġi affettwat mid-dieta tiegħu fil-baħar.

Il-ħut “West Wales Coracle Caught Sewin” huma uniċi billi huma maqbuda malli jidħlu fis-sistema tax-xmara mill-baħar fl-ilmijiet baxxi u tal-marea tax-xmara. Indikazzjoni ta’ din il-“freskezza” hija li meta jidnaddaf il-kontenut tagħhom ħafna drabi jkun għad fih komponenti tad-dieta tal-baħar tagħhom bħal sallur tar-ramel. Il-ħut huwa frisk, b’laħma soda u muskoli żviluppati ta’ kwalità superjuri, li jirriżultaw f’konsistenza aktar densa. Għandu għamla atletika viżibilment tawwalija mingħajr depożiti xaħmija żejda, dan jirriżulta minn għawma migratorja twila fil-baħar u l-kwalità taż-żoni fejn isib jiekol waqt li jkun fil-baħar. L-għamla u d-daqs ġenerali tal-“West Wales Coracle Caught Sewin” ivarjaw minħabba n-natura selvaġġa tagħhom. Il-“Wales Coracle Caught Sewin” ma fih l-ebda addittivi artifiċjali u/jew koloranti.

Il-“West Wales Coracle Caught Sewin” huwa ta’ daqs minimu ta’ 1 kg u daqs massimu ta’ 10 kg. Il-“West Wales Coracle Caught Sewin” għandu jkollu marki perfetti u mingħajr tebgħa fuq denbu, max-xewk jew ma’ rasu, il-ħut huwa pjuttost tond u mbaċċaċ. Il-pala ta’ denbu hija normalment kwadra jew konvessa. Għonq denbu huwa wiesa’ u x-xedaq ta’ fuq jestendi ‘il barra mit-tarf ta’ wara tal-għajn. Peress li s-sajd mill-coracle jaqbad is-sewin ħuta ħuta u mhux ħut f’daqqa il-“West Wales Coracle Caught Sewin” mhuwiex suxxettibbli għall-ħsara u distorsjonijiet fil-laħma li spiss iseħħu bit-troti tal-baħar oħrajn imrobbija jew maqbuda bix-xbiek. Dan jikkontribwixxi għall-kwalità tal-ikel tal-“West Wales Coracle Caught Sewin” bil-konsistenza ta’ laħma pristina, soda u densa tiegħu.

Meta jissajjar, il-“West Wales Coracle Caught Sewin” għandu togħma distintiva sottili tagħti fil-“butir” b’sottonoti li jfakkruk fil-“ġewż” u għandu palat uniku (artab u nadif) frisk.

Il-“West Wales Coracle Caught Sewin” jinbiegħ primarjament għall-konsum sħiħ u fil-biċċa l-kbira frisk, għalkemm is-Sewin jista’ jinbiegħ iffriżat.

3.3. Materja prima (għall-prodotti pproċessati biss)

—

3.4. Għalf (għall-prodotti li joriġinaw mill-annimali biss)

—

3.5. Passi speċifiċi tal-produzzjoni li jridu jsiru fiż-żona ġeografika ddefinita

Il-“West Wales Coracle Caught Sewin” irid jinqabad bl-użu tal-metodu tradizzjonali antik magħruf bħala sajd mill-coracle waqt l-istaġun tas-sewin li jvarja skont f’liema mit-tliet (3) xmajjar f’West Wales ikun qed isir is-sajd.

—	Tywi: mill-1 ta’ Marzu sal-31 ta’ Lulju

—	Teifi: mill-1 ta’ April sal-31 ta’ Awwissu

—	Taf: mill-1 ta’ Marzu sal-31 ta’ Lulju.

3.6. Regoli speċifiċi dwar it-tqattigħ, il-ħakk, l-ippakkjar, eċċ:

—

3.7. Regoli speċifiċi dwar it-tikkettar

—

4. Deskrizzjoni fil-qosor taż-żona ġeografika

Iż-żoni fix-xmajjar Tywi, Taf u Teifi f’West Wales kif ġej:

Ix-Xmara Tywi

Fil-parti tax-xmara li tinsab bejn linja immaġinarja dritta li taqsam ix-Xmara Tywi mill-istazzjon tal-ippumpjar ferrovjarju ħdejn il-fabbriki l-antiki tal-landa fin-National Grid Reference (NGR) SN 420205 u linja immaġinarja dritta li taqsam it-Tywi fin-NGR SN 394137

Ix-Xmara Teifi

Fil-parti tax-xmara li tinsab bejn il-Pont Cardigan u l-Pont Llechryd.

Ix-xmara Taf

Fil-parti tax-xmara li tinsab bejn il-pont tat-triq prinċipali fuq l-A477 bejn Carmarthen-Pembroke u madwar 1,6 km mal-fluss ’l isfel tax-xmara sa linja immaġinarja dritta li taqsam ix-Xmara Taf mill-Punt Wharley sal-Punt Ginst.

5. Rabta maż-żona ġeografika

5.1. Speċifiċità taż-żona ġeografika

It-trota tal-baħar ta’ Wales (Sewin) tirrappreżenta razza ġenetika ta’ ħut adattat lokalment li jikber aktar malajr u jgħix ħajja itwal minn trot tal-baħar minn reġjuni oħra. Dawn huma ta’ piż ikbar mill-medja tat-troti, u għandhom kapaċità akbar li jipproduċu fi snin konsekuttivi. F’Wales hemm uħud mill-aktar xmajjar produttivi fil-Gżejjer Britaniċi għat-trota tal-baħar. Paragun tul l-aħħar ħames (5) snin tal-aqwa 30 xmara f”Wales għat-trota tal-baħar, ikklassifika t-Tywi u t-Teifi fl-ewwel (1) u fit-tieni (2) post. L-ilma tat-Taf, tat-Tywi u tat-Teifi huwa ta’ kwalità għolja ħafna u jiġi mmonitorjat regolarment u rreġistrat minn Natural Resources Wales. L-għejun ta’ kull waħda minn dawn it-tliet (3) xmajjar jinsabu fil-fond tal-Muntanji Cambrian jew Preseli f’żoni ferm rurali ddominati minn mergħa b’nuqqas distint ta’ industrija. Kemm ix-Xmara Tywi kif ukoll ix-Xmara Teifi ġew klassifikati bħala Żoni Speċjali ta’ Konservazzjoni skont id-Direttiva Ewropea dwar il-Ħabitats. Il-livelli tat-tniġġiż fit-tliet xmajjar huma baxxi ħafna, u ngħataw status ta’ Grad “A”, li juri li dawn ix-xmajjar huma “ekosistemi naturali u jagħtu lok għal sajd tas-salmonidi u tal-kiprinidi tajjeb ħafna”. Il-kwalità għolja tal-ilma tax-xmajjar tikkontribwixxi għad-daqs, għall-kundizzjoni verġni u għall-marki perfetti tal-coracle caught sewin.

Is-sajd bil-coracle ta’ Wales huwa mod ta’ sajd antik ta’ ħut migratorju u legalment huwa l-uniku metodu ta’ sajd awtorizzat f’dawn ix-xmajjar fejn jista’ jinqabad u jinbigħ is-sewin. Din hija sengħa artiġjanali rreġistrata fis-Seklu 11 (u qabel), li għadha tradizzjoni ħajja fis-seklu 21. Għalkemm dari l-coracles ta’ Wales kienu jintużaw b’mod estensiv madwar Wales, illum il-ġurnata jintużaw esklużivament fit-Taf, fit-Tywi u fit-Teifi. Dawn it-tliet xmajjar huma l-uniċi postijiet fl-Ewropa fejn is-sajd bil-coracle (bl-użu ta’ dan it-tip partikolari ta’ coracle) għadu pprattikat. Hem sajjied bil-coracle li jistad fit-Tywi, li ġej minn familja li ilha tistad bil-coracle f’din ix-xmara tas-sajd għal aktar minn 300 sena. Il-coracles ta’ Wales huma dgħajes ovali żgħar b’tavla min-naħa għall-oħra fin-nofs li tifforma siġġu. Dawn huma magħmulin bl-idejn mill-injam tal-fraxxnu u taż-żafżafa u jinħadmu qishom basket. Kull coracle iġorr sajjied wieħed u jinsaq b’moqdief b’id waħda. Is-sajd bil-coracle ta’ Wales jinvolvi par coracles li jaħdmu flimkien, b’xibka mdendla bejniethom. Is-sajd iseħħ prinċipalment billejl biex is-sewin ma jarax dell il-coracle jew ix-xibka riesqa lejh.. Is-sajd bil-coracle ta’ Wales huwa ferm regolat, u s-sajd huwa permess li jsir biss fil-limiti tal-marea baxxa u fiż-żoni tal-marea ta’ dawn ix-xmajjar. Il-linji ta’ demarkazzjoni huma ddikjarati bil-liġijiet supplimentari tas-sajd. Is-sajjieda kollha tal-coracle ta’ Wales irid ikollhom il-liċenzja, u x-xbieki tal-coracle huma koperti bil-leġiżlazzjoni.

Is-sewin jivvjaġġaw lejn il-postijiet fejn ibidu tul qiegħ ix-xmara u jsegwu l-kontorni tax-xmara. Dan l-għarfien ġie akkumulat mis-sajjieda tal-coracle tul sekli ta’ sajd. Ix-xbiek jitkarkar ma’ qiegħ ix-xmara bl-użu taċ-ċombini. Ix-xbiek jaqbad il-ħut fl-ewwel 18-il pulzier minn qiegħ ix-xmara u l-ħut kollu li jkun qed jgħum aktar ‘il fuq minn hekk ma jinqabadx. Ħila essenzjali assoċjata mas-sajd bil-coracle u l-manifattura tax-xbiek, hija s-sistema unika tal-piżijiet li tikkonsisti mill-għadd u t-toqol ta’ piżijiet taċ-ċomb imwaħħla max-xbieki tal-coracle. Is-sistema ewlenija hija kumplessa u fin-natura tagħha msejsa fuq is-serje ta’ numri Fibonacci. Hija mgħallma permezz tal-prattika u hija ħila u kapaċità li ntirtet minn ġenerazzjoni għall-oħra.

Huwa illegali li jinqabad u jinbiegħ is-sewin bi kwalunkwe metodu ieħor għajr is-sajd bil-coracle. Dan jgħin biex tiġi ppreservata, issorveljata u żgurata t-traċċabilità ta’ kull “West Wales Coracle Caught Sewin”.

L-istaġun tas-sajd bil-qasab u x-xlief (għal skopijiet ta’ sport biss) jibda u jintemm aktar tard mill-istaġun tal-coracle.

Is-sewin maqbud bil-qasba u x-xlief huwa espost għat-tajn u l-ħama tax-xmara għal perjodi itwal, b’hekk il-ħut jieħu togħma aktar “artija” u laħmu spiss jitlef lewnu minħabba l-weraq li jaqgħu waqt li jintasab bla ma jkun attiv fl-għadajjar kif ġeneralment jiġri. In-nuqqas ta’ attività tiegħu tikkontribwixxi biex ir-riżervi tiegħu jiġu eżawriti.

5.2. Speċifiċità tal-prodott

“Il-West Wales Coracle Caught Sewin” hija ħuta tal-passa li għandha l-kapaċità li tgħix fl-ilma ħelu tax-xmajjar u fl-ilma baħar. Is-sewin jibda ħajtu fix-xmajjar Teifi, Taf u Tywi, jemigra lejn il-baħar biex jiekol u jikber u mbagħad jerġa’ lura fl-istess xmara fejn twieled biex jitgħammar. Il-muskolarità tkun iktar żviluppata fis-sewin selvaġġ meta mqabbel mat-trota tal-baħar imrobbija, minħabba d-distanza li jgħum tul il-migrazzjoni tiegħu u l-kwalità tajba taż-żoni fejn isib l-ikel fil-baħar. Il-ħut jiekol biss waqt li jkun fil-baħar u waqt li jiekol fil-baħar jakkumula r-riżervi tal-enerġija tiegħu..

It-tonalità muskolari li tiżviluppa matul l-għuma migratorja tagħhom tirriżulta f’konsistenza densa u laħma soda mingħajr depożiti xaħmija żejda. Dawn il-karatteristiċi huma ppreservati permezz ta’ metodu ta’ sajd li jiżgura li l-ħut jinqabad fl-aqwa tiegħu hekk kif jidħol fis-sistema tax-xmara fl-ilmijiet baxxi u tal-marea tax-xmara u qabel ma jsir karatteristikament inattiv u r-riżervi tiegħu jiġu eżawriti fl-ambjent tax-xmara. Dan jikkontribwixxi biex il-“West Wales Coracle Caught Sewin” ikollu togħma distintiva sottili li tagħti fil-“butir” b’sottonoti li jfakkruk fil-“ġewż” u b’palat uniku (artab u nadif) frisk bil-laħma soda u t-tessut sfiq tiegħu.

Ix-xbieki tal-coracle għandhom koppijiet b’malji restrittivi ta’ mhux anqas minn 10 ċentimetri, li jfisser li l-iżgħar sewin jiżgiċċa x-xibka u b’hekk tiġi żgurata s-sostenibilità tas-sajd bil-coracle. Is-sajd tas-sewin bil-qasba u x-xlief jaf jaqbad ħut iżgħar.

5.3. Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO) jew il-kwalità speċifika, ir-reputazzjoni jew karatteristiċi oħrajn tal-prodott (għall-IĠP)

Il-bażi tal-applikazzjoni għal IĠP hija msejsa fuq il-karatteristiċi ta’ prodott uniku ta’ kwalità li l-karatteristiċi speċifiċi tiegħu huma marbuta ma’:

—	Il-kwalità tal-ilma ħelu fejn il-ħut ifaqqas u mbagħad jerġa’ lura biex jgħammar

—	Id-distanza migratorja li l-ħut “selvaġġ” jgħum meta jkun fil-baħar

—	Il-kwalità għolja taż-żoni fejn jiekol fil-baħar. Il-ħut jiekol biss waqt li jkun fil-baħar u huwa hemmhekk li r-riżervi tal-enerġija jakkumulaw fil-forma ta’ proteina muskolari.

—

Il-fatt li s-sajd bil-Coracle huwa metodu ta’ sajd tradizzjonali uniku maħsub biex jaqbad il-ħut waħda waħda f’kundizzjoni pristina hekk kif jidħlu fis-sistema tax-xmara mill-baħar u qabel ma jonqsu r-riżervi tal-enerġija tagħhom. Indikazzjoni ta’ din il-“freskezza” hija li meta jidnaddaf il-“West Wales Coracle Caught Sewin”, il-ġewwieni tiegħu spiss ikun għad fih komponenti tad-dieta tal-baħar tiegħu, bħal sallur tar-ramel.

Il-fatturi msemmija hawn fuq jikkontribwixxu għall-karatteristiċi bla difetti tal-ħut li huma prodott frisk b’laħam sod u muskoli żviluppati ta’ kwalità superjuri b’kontenut għoli ta’ proteina muskolari u ta’ żejt mingħajr depożiti xaħmija żejda. Dawn il-karatteristiċi huma riflessi fil-kwalità tal-ħut meta jittiekel, b’konsistenza ta’ laħma soda u tessut dens u li meta jissajjar għandu togħma distintiva sottili li tagħti fil- “butir” b’sottonoti li jfakkruk fil-“ġewż” u b’palat uniku frisk, ħafif u nadif

Il-coracles ta’ Wales kienu jintużaw b’mod estensiv madwar Wales, imma llum il-ġurnata jintużaw esklużivament fix-Xmajjar Taf, Tywi u Teifi, li lkoll jinsabu fil-Punent ta’ Wales. Is-sajd bil-Coracle ilu jeżisti għal aktar minn 300 sena f’familja waħda li għadha tistad fix-Xmara Tywi.

Is-sajd bil-coracles ta’ Wales huwa tradizzjoni li tmur lura għall-1800jiet. Jinkludi bosta ħiliet li ilhom jintirtu minn ġenerazzjoni għall-oħra bħall-manifattura tal-coracles, il-manifattura tax-xbiek, l-għarfien ta’ f’liema żoni tal-marea jsir is-sajd, u l-kapaċità li wieħed jifhem ix-xmara u jikkunsidra fatturi bħalma huma l-fond tax-xmara (jiddependi mill-ilma tal-għargħar), il-marea u l-kundizzjonijiet tar-riħ. Is-sajd bil-coracle jinvolvi ħiliet kbar u sewqan u navigar bi preċiżjoni filwaqt li jkollok kontroll tal-pożizzjoni tax-xibka u tibqa’ f’wiċċ l-ilma. Il-ħila tas-sajjied hija enfasizzata mill-fatt li s-sajd bil-coracles iseħħ prinċipalment billejl. Il-coracles ta’ Wales jinħadmu bl-idejn mill-injam tal-fraxxnu u taż-żafżafa u jinbnew qishom basket. Għalkemm id-disinn u l-metodu tal-manifattura tagħhom baqgħet ma nbidlitx għal sekli sħaħ, l-iżviluppi ta’ materjali moderni jinkludu l-użu tal-calico, il-kanvas u l-fibra tal-ħġieġ fil-produzzjoni tagħhom.

Il-“West Wales Coracle Caught Sewin” huwa prodott ta’ kwalità sinonimu mal-wirt u l-kultura alimentari ta’ Wales u jintuża minn bosta koki primi u esperti tal-gastronomija. Fl-istaġun tas-sajd bil-coracle, il-ħuta regolarment tfeġġ bħala prodott staġjonali fuq il-menu fi stabbilimenti lokali magħrufa u hija mfittxija ħafna kemm min-nies tal-post kif ukoll mit-turisti. Il-“West Wales Coracle Caught Sewin” ta’ spiss jinbiegħ affumikat, u jinbiegħ lil ħwienet tal-ikel prestiġjużi f’Londra u madwar ir-Renju Unit. Il-“West Wales Coracle Caught Sewin” attwalment jinbiegħ fis-swali tal-ikel ta’ Harrods u Fortnum & Mason f’Londra.

Andrew Luck — kok lokali tax-Xmara Tywi:

“Bħala kok, huwa ta’ inkoraġġiment għalija li nara l-ewwel West Wales Coracle Caught Sewin tal-istaġun jidħol frisk mill-coracles ta’ West Wales. Il-West Wales Coracle Caught Sewin huwa ħuta mill-aqwa għall-kokijiet li jużawha, mhux biss minħabba l-konsistenza densa u t-togħma friska unika — iżda wkoll għax tirrakkonta storja u ġġorr magħha wirt storiku tradizzjonali.

Huwa pjaċir li wieħed isibha fuq il-menu u li jkun taf eżattament minn fejn ġej dan il-prodott ta’ kwalità. Il-West Wales Coracle Caught Sewin hija ħuta superjuri u meta tiġi affumikata jew imsajra turi d-diversità vera tagħha.”

Referenza għall-pubblikazzjoni tal-ispeċifikazzjoni

(l-Artikolu 5(7), tar-Regolament (KE) Nru 510/2006 (3))

https://www.gov.uk/government/publications/protected-food-name-west-wales-coracle-caught-sewin-pgi

(1) ĠU L 343, 14.12.2012, p.1.

(2) Sostitwit bir-Regolament (UE) Nru 1151/2012 (ĠU L 93, 31.3.2006, p. 1).

(3) Ara n-nota ta’ qiegħ il-paġna 2.

		ISSN 1977-0987
Il-Ġurnal Uffiċjali tal-Unjoni Ewropea		C 455

Edizzjoni bil-Malti	Informazzjoni u Avviżi	Volum 59 6 ta' Diċembru 2016

Avviż Nru	Werrej	Paġna
	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2016/C 455/01	Ebda oppożizzjoni għal konċentrazzjoni notifikata (Il-Każ M.8226 — TowerBrook Capital Partners/Van Dijk Educatie Beheer) ( 1 )	1

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2016/C 455/02	Rata tal-kambju tal-euro	2
2016/C 455/03	Sommarju ta’ Deċiżjonijiet tal-Kummissjoni Ewropea dwar l-awtorizzazzjonijiet għat-tqegħid fis-suq għall-użu u/jew għall-użu ta’ sustanzi elenkati fl-Anness XIV tar-Regolament (KE) Nru 1907/2006 tal-Parlament Ewropew u tal-Kunsill dwar ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta’ Sustanzi Kimiċi (REACH) (ippubblikat skont l-Artikolu 64(9) tar-Regolament (KE) Nru 1907/2006) ( 1 )	3
2016/C 455/04	Sommarju ta’ Deċiżjonijiet tal-Kummissjoni Ewropea dwar l-awtorizzazzjonijiet għat-tqegħid fis-suq għall-użu u/jew għall-użu ta’ sustanzi elenkati fl-Anness XIV tar-Regolament (KE) Nru 1907/2006 tal-Parlament Ewropew u tal-Kunsill dwar ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta’ Sustanzi Kimiċi (REACH) (ippubblikat skont l-Artikolu 64(9) tar-Regolament (KE) Nru 1907/2006) ( 1 )	4
2016/C 455/05	Sommarju ta’ Deċiżjonijiet tal-Kummissjoni Ewropea dwar l-awtorizzazzjonijiet għat-tqegħid fis-suq għall-użu u/jew għall-użu ta’ sustanzi elenkati fl-Anness XIV tar-Regolament (KE) Nru 1907/2006 tal-Parlament Ewropew u tal-Kunsill dwar ir-Reġistrazzjoni, il-Valutazzjoni, l-Awtorizzazzjoni u r-Restrizzjoni ta’ Sustanzi Kimiċi (REACH) (ippubblikat skont l-Artikolu 64(9) tar-Regolament (KE) Nru 1907/2006) ( 1 )	5

	V Avviżi
	PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI
	Il-Kummissjoni Ewropea
2016/C 455/06	Notifika minn qabel ta’ konċentrazzjoni (Il-Każ M.7982 — Abbott Laboratories/Alere) ( 1 )	6
	ATTI OĦRAJN
	Il-Kummissjoni Ewropea
2016/C 455/07	Pubblikazzjoni ta’ applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel	7
2016/C 455/08	Pubblikazzjoni ta’ applikazzjoni skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel	11


	(1) Test b'rilevanza għaż-ŻEE