4.11.2016   

MT

Il-Ġurnal Uffiċjali tal-Unjoni Ewropea

C 407/1

4.11.2016   

MT

Il-Ġurnal Uffiċjali tal-Unjoni Ewropea

C 407/2

—

wara li kkunsidra l-Artikolu 2 u l-Artikolu 3(3), it-tieni subparagrafu, tat-Trattat dwar l-Unjoni Ewropea (TUE) u l-Artikolu 8 tat-Trattat dwar il-Funzjonament tal-Unjoni Ewropea (TFUE),

—

wara li kkunsidra l-Artikolu 23 tal-Karta tad-Drittijiet Fundamentali tal-Unjoni Ewropea,

—

wara li kkunsidra l-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali (ECHR),

—

wara li kkunsidra d-Dikjarazzjoni Universali tad-Drittijiet tal-Bniedem tal-1948,

—

wara li kkunsidra l-Konvenzjoni tan-Nazzjonijiet Uniti tal-1979 dwar l-Eliminazzjoni ta' Kull Forma ta' Diskriminazzjoni kontra n-Nisa (CEDAW),

—

wara li kkunsidra l-Konvenzjoni tan-NU tal-1949 dwar is-Soppressjoni tat-Traffikar tal-Bnedmin u l-Isfruttament tal-Prostituzzjoni ta' Oħrajn,

—

wara li kkunsidra d-Dikjarazzjoni u l-Pjattaforma ta' Azzjoni ta' Pekin adottati mir-Raba' Konferenza Dinjija dwar in-Nisa fil-15 ta' Settembru 1995 u d-dokumenti riżultanti sussegwenti adottati fis-sessjonijiet speċjali tan-Nazzjonijiet Uniti Pekin + 5 (2000), Pekin + 10 (2005) u Pekin + 15 (2010) u dwar id-dokument riżultanti tal-konferenza ta' reviżjoni Pekin + 20,

—

wara li kkunsidra r-Regolament (UE) Nru 606/2013 tal-Parlament Ewropew u tal-Kunsill tat-12 ta' Ġunju 2013 dwar ir-rikonoxximent reċiproku ta' miżuri ta' protezzjoni f'materji ċivili (1),

—

wara li kkunsidra r-Regolament (KE) Nru 1567/2003 tal-Parlament Ewropew u tal-Kunsill tal-15 ta' Lulju 2003 dwar l-għajnuna għal strateġiji u azzjonijiet dwar ir-riproduttività u s-saħħa sesswali u d-drittijiet fil-pajjiżi li għadhom jiżviluppaw (2),

—

wara li kkunsidra d-Direttiva 2012/29/UE tal-Parlament Ewropew u tal-Kunsill tal-25 ta' Ottubru 2012 li tistabbilixxi standards minimi fir-rigward tad-drittijiet, l-appoġġ u l-protezzjoni tal-vittmi tal-kriminalità, u li tissostitwixxi d-Deċiżjoni Qafas tal-Kunsill 2001/220/ĠAI (3),

—

wara li kkunsidra d-Direttiva 2011/99/UE tal-Parlament Ewropew u tal-Kunsill tat-13 ta' Diċembru 2011 dwar l-ordni Ewropea ta' protezzjoni (4),

—

wara li kkunsidra d-Direttiva 2011/36/UE tal-Parlament Ewropew u tal-Kunsill tal-5 ta' April 2011 dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi tiegħu, u li tissostitwixxi d-Deċiżjoni Qafas tal-Kunsill 2002/629/ĠAI (5),

—

wara li kkunsidra d-Direttiva 2010/41/UE tal-Parlament Ewropew u tal-Kunsill tas-7 ta' Lulju 2010 dwar l-applikazzjoni tal-principju ta' trattament ugwali bejn l-irġiel u n-nisa li jeżerċitaw attività li fiha jaħdmu għal rashom u li tħassar id-Direttiva tal-Kunsill 86/613/KEE (6),

—

wara li kkunsidra d-Direttiva tal-Kunsill 2010/18/UE tat-8 ta' Marzu 2010, li timplimenta l-Ftehim Qafas rivedut dwar il-liv tal-ġenituri konkluż minn BusinessEurope, UEAPME, CEEP u ETUC u li tħassar id-Direttiva 96/34/KE (7),

—

wara li kkunsidra d-Direttiva 2006/54/KE tal-Parlament Ewropew u tal-Kunsill tal-5 ta' Lulju 2006 dwar l-implimentazzjoni tal-prinċipju ta' opportunitajiet indaqs u ta' trattament ugwali tal-irġiel u n-nisa fi kwistjonijiet ta' impjiegi u xogħol (tfassil mill-ġdid) (8),

—

wara li kkunsidra d-Direttiva tal-Kunsill 92/85/KEE tad-19 ta' Ottubru 1992 dwar l-introduzzjoni ta' miżuri biex jinkoraġġixxu t-titjib fis-saħħa u s-sigurtà fuq il-post tax-xogħol għall-ħaddiema nisa tqal u ħaddiema li welldu reċentement, jew li qed ireddgħu (l-għaxar Direttiva partikolari fis-sens tal-Artikolu 16(1) tad-Direttiva 89/391/KEE) (9),

—

wara li kkunsidra d-Direttiva tal-Kunsill 2004/113/KE tat-13 ta' Diċembru 2004 li timplimenta l-prinċipju ta' trattament ugwali bejn l-irġiel u n-nisa fl-aċċess għal u l-provvista ta' merkanzija u servizzi (10) u s-sentenza relatata tal-1 ta' Marzu 2011 tal-Qorti tal-Ġustizzja tal-Unjoni Ewropea fil-kawża Test-Achats (C-236/09) (11),

—

wara li kkunsidra l-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika (il-Konvenzjoni ta' Istanbul),

—

wara li kkunsidra l-Patt Ewropew għall-Ugwaljanza bejn is-Sessi (2011-2020), adottat mill-Kunsill Ewropew f'Marzu 2011 (12),

—

wara li kkunsidra l-Komunikazzjoni mill-Kummissjoni tal-5 ta' Marzu 2010 bl-isem “Impenn imsaħħaħ għall-ugwaljanza bejn in-Nisa u l-Irġiel: Karta f’Isem il-Mara” (COM(2010)0078),

—

wara li kkunsidra l-komunikazzjoni tal-Kummissjoni tal-21 ta' Settembru 2010 intitolata “Strateġija għall-ugwaljanza bejn in-nisa u l-irġiel 2010-2015” (COM(2010)0491),

—

Wara li kkunsidra l-Komunikazzjoni tal-Kummissjoni tat-3 ta' Marzu 2010 intitolata “Ewropa 2020: Strateġija għal tkabbir intelliġenti, sostenibbli u inklussiv” (COM(2010)2020),

—

wara li kkunsidra l-Komunikazzjoni tal-Kummissjoni tal-20 ta' Settembru 2011 bit-titolu “Insostnu t-tkabbir u l-impjiegi – aġenda għall-immodernizzar tas-sistemi ta' edukazzjoni għolja fl-Ewropa” (COM(2011)0567),

—

wara li kkunsidra d-Dokument ta' Ħidma tal-Persunal tal-Kummissjoni tas-16 ta' Settembru 2013 intitolat “Mid-term review of the Strategy for equality between women and men (2010-2015)” (SWD(2013)0339),

—

wara li kkunsidra d-Dokument ta' Ħidma tal-Persunal tal-Kummissjoni tat-8 ta' Marzu 2010 intitolat “EU Plan of Action on Gender Equality and Women's Empowerment in Development (2010-2015)” (SWD(2010)0265),

—

wara li kkunsidra l-konklużjonijiet tal-Kunsill Impjiegi, Politika Soċjali, Saħħa u Affarijiet tal-Konsumatur tad-19-20 ta' Ġunju 2014,

—

wara li kkunsidra l-istudju mid-Dipartiment C tal-Politika tal-Parlament Ewropew intitolat “Study on the Evaluation of the Strategy for Equality between Women and Men 2010-2015 as a contribution to achieve the goals of the Beijing Platform for Action”, ippubblikat fl-2014,

—

wara li kkunsidra r-rapport tal-Aġenzija tal-Unjoni Ewropea għad-Drittijiet Fundamentali (FRA) bl-isem “Violence against women – an EU-wide survey. Main results” ippubblikat f'Marzu 2014,

—

wara li kkunsidra r-rapport tal-Aġenzija tal-Unjoni Ewropea għad-Drittijiet Fundamentali (FRA) bl-isem “Discrimination against and living conditions of Roma women in 11 EU Member States”, li ġie ppubblikat f'Ottubru 2014,

—

wara li kkunsidra r-rapport tal-Aġenzija tal-Unjoni Ewropea għad-Drittijiet Fundamentali (FRA) bl-isem “Being Trans in the EU – Comparative analysis of the EU LGBT survey data”, li ġie ppubblikat f'Diċembru 2014,

—

wara li kkunsidra r-riżoluzzjonijiet tiegħu tal-15 ta' Ġunju 1995 dwar ir-Raba' Konferenza Dinjija dwar in-Nisa f'Pekin: “Ugwaljanza, Żvilupp u Paċi” (13), tal-10 ta' Marzu 2005 dwar is-segwitu għar-Raba' Konferenza Dinjija dwar in-Nisa – Pjattaforma ta' Azzjoni, Pekin + 10 (14), u tal-25 ta' Frar 2010 dwar Pekin + 15 – Pjattaforma ta' Azzjoni tan-NU għall-Ugwaljanza bejn is-Sessi (15),

—

wara li kkunsidra r-riżoluzzjonijiet tiegħu tal-10 ta' Frar 2010 dwar l-ugwaljanza bejn in-nisa u l-irġiel fl-Unjoni Ewropea – 2009 (16), tat-8 ta' Marzu 2011 dwar l-ugwaljanza bejn in-nisa u l-irġiel fl-Unjoni Ewropea – 2010 (17),u tat-13 ta' Marzu 2012 dwar l-ugwaljanza bejn in-nisa u l-irġiel fl-Unjoni Ewropea – 2011 (18), u tal-10 ta' Marzu 2015 dwar l-ugwaljanza bejn in-nisa u l-irġiel fl-Unjoni Ewropea – fl-2013 (19),

—

wara li kkunsidra r-riżoluzzjoni tiegħu tat-12 ta' Settembru 2013 dwar l-applikazzjoni tal-prinċipju ta' paga ugwali għall-ħaddiema rġiel u nisa għal xogħol ugwali jew għal xogħol ta' valur ugwali (20),

—

wara li kkunsidra r-riżoluzzjoni tiegħu tat-12 ta' Marzu 2013 dwar l-eliminazzjoni tal-istereotipi tas-sessi fl-UE (21),

—

wara li kkunsidra r-riżoluzzjonijiet tiegħu tas-17 ta' Ġunju 2010 dwar aspetti rigward il-ġeneru fil-kuntest tar-reċessjoni ekonomika u l-kriżi finanzjarja (22) u tat-12 ta' Marzu 2013 dwar l-impatt tal-kriżi ekonomika fuq l-ugwaljanza bejn is-sessi u d-drittijiet tan-nisa (23),

—

wara li kkunsidra r-riżoluzzjoni tiegħu tas-6 ta' Frar 2013 dwar is-57 sessjoni tal-Kummissjoni dwar l-Istatus tan-Nisa (CSW) tan-NU: l-eliminazzjoni u l-prevenzjoni tal-forom kollha ta' vjolenza fuq in-nisa u l-bniet (24),

—

wara li kkunsidra r-riżoluzzjoni tiegħu tal-24 ta' Mejju 2012 b'rakkomandazzjonijiet lill-Kummissjoni dwar l-applikazzjoni tal-prinċipju ta' paga ugwali għall-ħaddiema rġiel u nisa għal xogħol ugwali jew għal xogħol ta' valur ugwali (25),

—

wara li kkunsidra r-riżoluzzjoni tiegħu tal-20 ta' Novembru 2013, dwar il-proposta għal direttiva tal-Parlament Ewropew u tal-Kunsill dwar it-titjib tal-bilanċ bejn is-sessi fost diretturi mhux eżekuttivi ta' kumpaniji elenkati f'borża u miżuri relatati (26).

—

wara li kkunsidra r-riżoluzzjoni tal-Parlament Ewropew tal-25 ta' Frar 2014 b'rakkomandazzjonijiet lill-Kummissjoni dwar il-ġlieda kontra l-Vjolenza Fuq in-Nisa (27).

—

wara li kkunsidra r-riżoluzzjoni tiegħu tat-25 ta' Frar 2014 dwar is-Semestru Ewropew għall-koordinazzjoni tal-politika ekonomika: Stħarriġ Annwali dwar it-Tkabbir 2014 (28),

—

wara li kkunsidra l-Artikolu 52 tar-Regoli ta' Proċedura tiegħu,

—

wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi u l-opinjoni tal-Kumitat għall-Impjiegi u l-Affarijiet Soċjali (A8-0163/2015),

A.

billi d-dritt għal trattament ugwali huwa dritt fundamentali deċiżiv rikonoxxut fit-Trattati tal-Unjoni Ewropea fermament stabbilit fis-soċjetà Ewropea u huwa indispensabbli għall-iżvilupp ulterjuri ta' din is-soċjetà u għandu japplika fil-leġiżlazzjoni, fil-prattika, fil-ġurisprudenza kif ukoll fil-ħajja reali;

B.

billi l-UE storikament ħadet passi importanti biex issaħħaħ id-drittijiet tan-nisa u l-ugwaljanza bejn is-sessi, iżda kien hemm tnaqqis fl-azzjoni politika u r-riforma għall-ugwaljanza bejn is-sessi matul l-aħħar għaxar snin fil-livell tal-UE; billi l-istrateġija preċedenti tal-Kummissjoni kienet wisq dgħajfa u ma rriżultatx f'azzjoni suffiċjenti għall-ugwaljanza bejn is-sessi; billi strateġija ġdida jeħtiġilha tagħti spinta ġdida u twassal għal azzjoni konkreta biex id-drittijiet tan-nisa jissaħħu u tiġi promossa l-ugwaljanza bejn is-sessi;

C.

billi wħud mill-għanijiet stabbiliti ntlaħqu permezz tal-istrateġija preċedenti tal-Kummissjoni, iżda ma nkisbitx ugwaljanza sħiħa, filwaqt li evidenza ta' interazzjoni bejn forom differenti ta' diskriminazzjoni, miri preċiżi u miżuri ta' analiżi effettivi spiss kienu nieqsa u l-integrazzjoni taż-żewġ sessi baqgħet tiġi implimentata sa punt limitat biss;

D.

billi l-ugwaljanza bejn is-sessi hija valur bażiku tal-UE rikonoxxut fit-Trattati u fil-Karta tad-Drittijiet Fundamentali u l-UE assumiet il-kompitu speċifiku li tintegra dan fl-attivitajiet kollha tagħha; billi l-ugwaljanza bejn is-sessi hija essenzjali bħala objettiv strateġiku sabiex jintlaħqu l-objettivi ġenerali tal-UE, bħall-mira tar-rata tal-impjieg fi ħdan l-istrateġija Ewropa 2020 u assi ekonomiku essenzjali għall-promozzjoni tat-tkabbir ekonomiku ekwu u inklussiv; billi t-tnaqqis tal-inugwaljanza okkupazzjonali mhuwiex biss għan f'termini ta' trattament ugwali, iżda wkoll f'termini ta' effiċjenza u fluwidità fis-suq tax-xogħol;

E.

billi d-distakk fl-edukazzjoni, l-impjiegi, is-saħħa u d-diskriminazzjoni bejn ir-Roma u s-soċjetà ġenerali jibqa' wiesa', u s-sitwazzjoni tan-nisa Roma fl-UE hija saħansitra agħar bħala riżultat ta' diskriminazzjoni multipla bbażata kemm fuq l-etniċità kif ukoll is-sess;

F.

billi l-pożizzjoni ekonomika u politika tal-Ewropa tista' biss titjieb u l-konsegwenzi tal-bidla demografika jistgħu jiġu evitati jekk it-talenti u l-potenzjal tan-nisa u l-irġiel kollha jiġu sfruttati;

G.

billi ma nistgħux nibqgħu marbuta ma' mudelli ekonomiċi skaduti u ambjentalment mhux sostenibbli li huma bbażati fuq sistema ta' distribuzzjoni tax-xogħol ibbażata fuq is-sess li skadiet u li issa ġiet superata mill-integrazzjoni tan-nisa fis-suq tax-xogħol; billi għandna bżonn ta' mudell ġdid u soċjalment sostenibbli bbażat fuq l-għarfien u l-innovazzjoni, li jinkorpora fih il-firxa sħiħa tat-talenti tan-nisa fin-nisġa produttiva, inkluż billi jinxteħet dubju dwar xi normi industrijali u l-fatturi li jassenjaw l-irġiel u n-nisa kompiti differenti, li jirrimedja l-bilanċ tar-responsabbiltà bejn l-irġiel u n-nisa fl-isfera pubblika u privata u li jarmonizza l-ħajja personali u professjonali tal-ħaddiema taż-żewġ sessi;

H.

billi l-possibilità ta' aċċess għal servizzi ta' kura tat-tfal u ta' appoġġ għall-anzjani bi prezz raġonevoli u ta' kwalità għolja kif ukoll għal persuni oħra dipendenti huwa essenzjali biex tiġi żgurata l-parteċipazzjoni ugwali tal-irġiel u n-nisa fis-suq tax-xogħol, fl-edukazzjoni u t-taħriġ;

I.

billi l-Pjattaforma ta' Peking għall-Azzjoni din is-sena tagħlaq għoxrin sena u l-għanijiet u l-implimentazzjoni sħiħa tagħha huma aktar rilevanti minn qatt qabel;

J.

billi l-vjolenza kontra n-nisa, kemm jekk hi fiżika, sesswali jew psikoloġika, hija ostaklu ewlieni għall-ugwaljanza bejn in-nisa u l-irġiel u tibqa' l-vjolazzjoni l-aktar mifruxa tad-drittijiet tal-bniedem li taffettwa l-livelli kollha tas-soċjetà, iżda waħda mid-delitti l-anqas rappurtati; billi, minkejja l-miżuri kollha meħuda kontra l-fastidju sesswali, skont l-istħarriġ tal-FRA li sar f'Marzu 2014, 55 % tan-nisa esperjenzaw forma waħda jew aktar ta' fastidju sesswali matul ħajjithom u 33 % tan-nisa esperjenzaw vjolenza fiżika u/jew sesswali sa mill-età ta' 15-il sena; billi ħajja ħielsa mill-vjolenza hija prerekwiżit għal parteċipazzjoni sħiħa fis-soċjetà, u għandhom jiġu introdotti miżuri b'saħħithom biex tiġi miġġielda l-vjolenza kontra n-nisa;

K.

billi l-prostituzzjoni furzata hija vjolenza li taffettwa b'mod partikolari lil dawk l-aktar vulnerabbli, hija l-aktar relatata ma' netwerks tal- kriminalità organizzata u t-traffikar tal-bnedmin u hija ostaklu għall-ugwaljanza bejn in-nisa u l-irġiel;

L.

billi n-nisa, minħabba strutturi tradizzjonali u diżinċentivi fiskali, ġie impost fuqhom status ta' persuna sekondarja li taħdem bi qligħ fil-familja, fil-forma ta' segregazzjoni kemm vertikali kif ukoll orizzontali fis-suq tax-xogħol, karriera b'lakuni u inugwaljanza fil-paga rilevanti għas-sess, u billi, barra minn hekk, ix-xogħol ta' kura bla ħlas, il-kura tat-tfal, il-kura tal-anzjani u ta' dipendenti oħra u x-xogħol domestiku huma konsiderevolment imwettqa aktar spiss min-nisa, u għalhekk in-nisa jkollhom anqas ħin disponibbli biex isegwu attività bi qligħ, u, min-naħa l-oħra, dan iwassal għal pensjoni ħafna iktar baxxa, u għaldaqstant ir-rikonċiljazzjoni tax-xogħol u l-ħajja tal-familja, anki biex jintlaħqu l-objettivi tal-istrateġija Ewropa 2020, għandha tiġi promossa permezz ta' miżuri konkreti, fejn l-irġiel, b'mod partikolari, għandhom ikunu involuti aktar mill-qrib;

M.

billi r-rata ta' impjieg tan-nisa hija ta' 63 %, jew 53,5 % jekk l-impjiegi jitkejlu f'ekwivalenti ta' full-time (29); billi d-distakk fil-paga bejn is-sessi huwa ta' 16,4 % u d-distakk tal-pensjonijiet bejn is-sessi huwa f'medja ta' 39 %; billi l-parteċipazzjoni tan-nisa fis-suq tax-xogħol mhux dejjem tissarraf f'influwenza, pożizzjonijiet ta' poter u teħid ta' deċiżjonijiet li spiss huma okkupati mill-irġiel, li jillimita lin-nisa fil-kapaċità tagħhom li jkunu influwenti u jirrappreżenta defiċit demokratiku fil-proċess ta' teħid ta' deċiżjonijiet, minħabba li n-nisa jagħmlu nofs il-popolazzjoni; billi l-promozzjoni tal-ugwaljanza bejn is-sessi tmur lil hinn mill-projbizzjoni ta' diskriminazzjoni bbażata fuq is-sess, u azzjoni pożittiva b'appoġġ għan-nisa tat prova tal-fatt li hija essenzjali għall-integrazzjoni sħiħa tagħhom fis-suq tax-xogħol, fit-teħid tad-deċiżjonijiet politiċi u ekonomiċi u s-soċjetà b'mod ġenerali; billi l-esklużjoni tan-nisa minn pożizzjonijiet ta' poter u l-korpi tat-teħid tad-deċiżjonijiet għandha effett ħażin fuq il-kapaċità tagħhom li jinfluwenzaw kemm l-iżvilupp u l-emanċipazzjoni tagħhom stessu l-iżvilupp tas-soċjetà;

N.

billi l-kwoti tas-sessi u ż-zipped lists fit-teħid ta' deċiżjonijiet politiċi ddimostraw li huma għodod effettivi ħafna biex jindirizzaw id-diskriminazzjoni u żbilanċi ta' poter bejn is-sessi u biex titjieb ir-rappreżentanza demokratika f'korpi tat-teħid ta' deċiżjonijiet politiċi;

O.

billi n-nuqqas ta' promozzjoni tal-politiki ta' bilanċ bejn ix-xogħol u l-ħajja privata, il-promozzjoni insuffiċjenti ta' sigħat tax-xogħol flessibbli, speċjalment fost l-irġiel, u r-rata baxxa tal-użu ta' liv tal-ġenituri u tal-paternità jippreżentaw ostakli kbar għall-indipendenza ekonomika tan-nisa u l-kondiviżjoni ugwali tar-responsabilitajiet tal-familja u dawk domestiċi;

P.

billi l-wiċċ tal-faqar fl-Ewropa huwa sproporzjonatament wieħed femminili, u dan jinkludi b'mod partikolari l-ommijiet waħedhom, in-nisa b'diżabilità, in-nisa żgħażagħ, in-nisa anzjani, nisa migranti u nisa minn minoritajiet etniċi, li kollha huma milquta mill-faqar u mill-esklużjoni soċjali, sitwazzjoni aggravata mill-kriżi ekonomika u l-miżuri ta' awsterità speċifiċi, li ma għandux jiġġustifika li jsir inqas xogħol għall-ugwaljanza, kif ukoll in-nuqqas ta' sikurezza tal-impjieg, impjieg part-time, pagi u pensjonijiet baxxi, id-diffikultà ta' aċċess għal servizzi soċjali u tas-saħħa, u l-fatt li huma partikolarment l-impjiegi fis-settur pubbliku u s-servizzi fis-settur tal-kura li qed jiġu eliminati, li jagħmel il-perspettiva tal-ugwaljanza bejn is-sessi anki aktar importanti;

Q.

billi n-nisa li jgħixu f'żoni rurali huma aktar vittmi tad-diskriminazzjoni multipla u tal-istereotipi tas-sess min-nisa li jgħixu fiż-żoni urbani, u r-rata ta' impjieg tan-nisa li jgħixu fiż-żoni rurali hija ħafna inqas minn dik tan-nisa li jgħixu fil-bliet; billi ż-żoni rurali huma milquta min-nuqqas ta' opportunitajiet ta' impjieg ta' kwalità għolja; billi, barra minn hekk, għadd kbir ta' nisa qatt ma huma attivi fis-suq uffiċjali tax-xogħol u, għalhekk, mhumiex reġistrati bħala qiegħda jew inklużi fl-istatistiki ta' dawk qiegħda, ħaġa li tikkawża problemi finanzjarji u legali partikolari fir-rigward tad-drittijiet tal-maternità u l-liv tal-mard, l-akkwist tad-drittijiet tal-pensjoni u l-aċċess għas-sigurtà soċjali, kif ukoll problemi fil-każ ta' divorzju;

R.

billi r-rwoli tradizzjonali tas-sessi u l-istereotipi għadhom jeżerċitaw influwenza kbira ħafna fuq id-diviżjoni tax-xogħol fid-dar, fl-edukazzjoni, fil-karrieri, fuq il-post tax-xogħol u fis-soċjetà b'mod ġenerali;

S.

billi l-istereotipi tas-sessi u strutturi tradizzjonali għandhom impatt negattiv fuq is-saħħa, u billi l-aċċess universali għas-saħħa sesswali u riproduttiva u d-drittijiet assoċjati huma drittijiet fundamentali tal-bniedem u għalhekk ma għandhomx jiġu limitati; billi d-dritt li wieħed jikkontrolla ġismu stess u d-dritt tal-awtodeterminazzjoni huma prerekwiżiti fundamentali għall-ugwaljanza universali;

T.

billi wieħed minn kull sitt koppji madwar id-dinja jesperjenzaw xi forma ta' problema ta' infertilità; billi l-Kummissjoni għandha tressaq Analiżi Komparattiva ġdida ta' Riproduzzjoni Assistita Medikament fl-UE, peress li l-istudju tal-2008 (SANCO/2008/C6/051), li dak iż-żmien uriet inugwaljanza sinifikanti ta' aċċess għat-trattament tal-fertilità, huwa skadut;

U.

billi għad hemm istituzzjonijiet edukattivi li jipprattikaw is-segregazzjoni tas-sessi, u materjali edukattivi spiss ikun fihom stereotipi li jgħinu biex jipperpetwaw ir-rwoli tradizzjonali separati assenjati lill-bniet u s-subien, li għandu impatt negattiv fuq l-għażliet tagħhom; billi dawn il-patterns tar-rwoli huma msaħħa aktar speċjalment minn rappreżentazzjonijiet u immaġni tan-nisa trażmessi mill-mezzi tax-xandir, materjal disponibbli fuq l-internet u r-reklamar;

V.

billi l-persuni transsesswali frekwentement jiffaċċjaw diskriminazzjoni, fastidju u vjolenza madwar l-UE llum minħabba l-identità tal-ġeneru jew l-espressjoni tal-ġeneru tagħhom;

W.

billi l-UE għandha responsabilità u rwol bħala mudell għall-ugwaljanza bejn is-sessi u d-drittijiet tan-nisa, li għandhom isiru kwistjoni ta' tħassib ewlenija fl-azzjonijiet esterni tagħha; billi l-ugwaljanza bejn is-sessi, il-ġlieda kontra l-vjolenza abbażi tas-sess u l-għoti tas-setgħa lin-nisa huma essenzjali jekk il-miri internazzjonali tal-iżvilupp għandhom jintlaħqu u għas-suċċess tal-politiki tal-UE dwar l-affarijiet barranin, il-kooperazzjoni għall-iżvilupp u l-politiki tal-kummerċ internazzjonali; billi n-nisa mhux biss huma aktar vulnerabbli għall-effetti tal-enerġija, l-ambjent u t-tibdil fil-klima, iżda huma wkoll atturi effettivi f'dak li għandu x'jaqsam ma' strateġiji ta' mitigazzjoni u adattament, kif ukoll bħala mutur għal mudell ta' tkabbir ekwu u sostenibbli;

X.

billi l-mekkaniżmi istituzzjonali jiffurmaw bażi neċessarja għall-kisba tal-ugwaljanza bejn is-sessi; billi l-ugwaljanza bejn is-sessi jeħtiġilha tiġi trattata bħala aspett importanti u trasversali tal-oqsma kollha tal-politika fl-UE u l-Istati Membri tagħha, flimkien mal-kunċetti ta' integrazzjoni tal-ugwaljanza bejn is-sessi, l-ibbaġitjar fuq il-bażi tal-ġeneru u l-valutazzjoni tal-impatt fuq il-ġeneru;

Y.

billi l-analiżi sistematika tad-dejta skont is-sess hija għodda vitali biex jinkiseb progress ġenwin u sabiex ir-riżultati jiġu valutati b'mod effiċjenti;

Z.

billi f’dawn l-aħħar snin il-movimenti kontra l-ugwaljanza bejn is-sessi għamlu avvanz fil-qasam pubbliku f'għadd ta' Stati Membri, billi ppruvaw isaħħu r-rwoli tradizzjonali tas-sessi u sfidaw il-kisbiet eżistenti fil-qasam tal-ugwaljanza bejn is-sessi;

AA.

billi l-isfidi attwali u l-esperjenza miksuba juru li n-nuqqas ta' politika koerenti bejn l-oqsma differenti għamlitha diffiċli biex tinkiseb l-ugwaljanza bejn is-sessi fil-passat, u li proporzjon xieraq ta' fondi u koordinazzjoni aħjar, it-tixrid u l-promozzjoni tad-drittijiet tan-nisa huma meħtieġa, filwaqt li jitqiesu s-sitwazzjonijiet differenti;

1.

Jistieden lill-Kummissjoni biex tfassal u tadotta strateġija separata ġdida għad-Drittijiet tan-Nisa u l-Ugwaljanza bejn is-Sessi fl-Ewropa mmirata lejn il-ħolqien ta' opportunitajiet indaqs u bbażata fuq l-oqsma ta' prijorità tal-istrateġija preċedenti bil-ħsieb li ttemm kull forma ta' diskriminazzjoni li jħabbtu wiċċhom magħha n-nisa fis-suq tax-xogħol, fir-rigward tal-pagi, il-pensjonijiet, it-teħid ta' deċiżjonijiet, l-aċċess għall-prodotti u s-servizzi, ir-rikonċiljazzjoni bejn il-ħajja tal-familja u l-ħajja tax-xogħol u l-forom kollha ta' vjolenza kontra n-nisa u biex tneħħi l-istrutturi u l-prattiki diskriminatorji relatati mal-ġeneru; jenfasizza li l-Istrateġija l-ġdida tad-Drittijiet tan-Nisa u l-Ugwaljanza bejn is-Sessi jeħtieġ li tqis il-forom multipli u intersezzjonali ta' diskriminazzjoni kif imsemmi fl- Artikolu 21 tal-Karta tad-Drittijiet Fundamentali, li għandhom fatturi sottostanti komuni iżda li jaffettwaw lin-nisa b'mod differenti, u jeħtieġ li tiżviluppa azzjonijiet speċifiċi li jsaħħu d-drittijiet ta' gruppi differenti ta' nisa, inklużi n-nisa b'diżabilità, in-nisa migranti u ta' minoranza etnika, in-nisa Roma, in-nisa aktar anzjani, ommijiet waħedhom u l-LGBTI;

2.

Jistieden ukoll lill-Kummissjoni biex tiżviluppa miżuri maħsuba biex jeliminaw id-diskriminazzjoni kontra n-nisa kollha fid-diversità tagħhom taħt strateġija usa' ta' antidiskriminazzjoni u pjan direzzjonali LGBTI distint u separat; għal dak il-għan, iħeġġeġ lill-Kunsill biex jilħaq pożizzjoni komuni malajr kemm jista' jkun dwar il-proposta għal direttiva tal-Kunsill dwar l-implimentazzjoni tal-prinċipju ta' trattament ugwali bejn il-persuni irrispettivament mir-reliġjon jew it-twemmin, id-diżabilità, l-età, il-ġeneru jew orjentazzjoni sesswali, li ilha imblukkata minn mindu ġiet adottata mill-Parlament f'April 2009;

3.

Jiddispjaċih li l-Istrateġija għall-ugwaljanza bejn in-nisa u l-irġiel 2010-2015 ma tindirizzax b'mod speċifiku d-diżabilità, minkejja l-fatt li n-nisa b'diżabilità ta' spiss huma f’sitwazzjoni inqas favorevoli mill-irġiel b'diżabilità u huma aktar esposti għar-riskji tal-faqar u l-esklużjoni soċjali; jistieden għalhekk lill-Kummissjoni tindirizza l-bżonnijiet tan-nisa b'diżabilità sabiex tiġi żgurata parteċipazzjoni akbar tagħhom fis-suq tax-xogħol; f'dan is-sens jiddispjaċih ukoll li l-Istrateġija Ewropea tad-Diżabilità 2010-2020 ma tinkludix ukoll perspettiva integrata dwar il-ġeneru jew kapitolu separat iddedikat għall-politiki tad-diżabilità b'konċentrazzjoni speċjali fuq il-ġeneru;

4.

Jistieden lill-Kummissjoni tinvolvi lis-soċjetà ċivili u s-sħab soċjali b'mod strutturat fl-iżvilupp u l-evalwazzjoni kontinwa tal-istrateġija;

5.

Jistieden lill-Istati Membri jsaħħu u jinfurzaw l-eżerċizzju sħiħ ta' negozjar kollettiv fis-settur privat u dak pubbliku, bħala għodda indispensabbli għar-regolazzjoni tar-relazzjonijiet tax-xogħol, il-ġlieda kontra d-diskriminazzjoni fil-paga u l-promozzjoni tal-ugwaljanza;

6.

Jistieden lill-Kummissjoni, meta tkun qed tevalwa l-applikazzjoni tad- Direttiva 2004/113/KE li timplimenta l-prinċipju ta' trattament ugwali bejn l-irġiel u n-nisa fl-aċċess għal u l-provvista ta' merkanzija u servizzi, biex tikkunsidra l-każijiet ta' diskriminazzjoni

7.

Jistieden lill-Kummissjoni tiċċara r-rwol li hija tixtieq li l-UE jkollha fid-dinja u fil-ħidma tagħha mal-Istati Membri, inklużi l-awtoritajiet kompetenti tagħhom fir-rigward tal-promozzjoni tal-ugwaljanza bejn is-sessi, kemm fi ħdan kif ukoll barra l-fruntieri tal-Unjoni, u ssegwi dawn l-għanijiet kemm permezz tal-kunċett tal-integrazzjoni tal-ugwaljanza bejn is-sessi fl-oqsma kollha kif ukoll permezz ta' miżuri speċifiċi, immirati u konkreti; jenfasizza l-ħtieġa li l-perspettiva tal-ġeneru u l-ġlieda kontra l-vjolenza abbażi tal-ġeneru jiġu integrati fil-politika barranija tal-UE, il-politika ta' kooperazzjoni għall-iżvilupp u l-politika tal-kummerċ internazzjonali u li jiġu ssalvagwardjati l-istrumenti finanzjarji u r-riżorsi umani neċessarji;

8.

Jiddispjaċih għal darb'oħra dwar il-fatt li l-istrateġija Ewropa 2020 ma inkludietx b'mod sodisfaċenti l-perspettiva tal-ġeneru, u għalhekk jistieden lill-Kummissjoni u lill-Kunsill jiżguraw li l-ugwaljanza bejn is-sessi tiġi inkorporata fil-programmi, l-azzjonijiet u l-inizjattivi kollha mnedija fil-qafas ta' dik l-istrateġija u biex jintroduċu pilastru speċifiku għall-ugwaljanza bejn in-nisa u l-irġiel fi ħdan l-istrateġija, biex jikkunsidraw l-objettivi tal-istrateġija futura bħala aspett tas-Semestru Ewropew, u biex idaħħlu l-perspettiva tal-ġeneru fir-rakkomandazzjonijiet speċifiċi għall-pajjiżi u l-Istħarriġ Annwali dwar it-Tkabbir;

9.

Jistieden lill-Kummissjoni u l-Istati Membri biex jiġbru, janalizzaw u jippubblikaw dejta statistika affidabbli mqassma skont is-sess u indikaturi tal-ugwaljanza bejn is-sessi fl-oqsma kollha tal-politika u fil-livelli kollha ta' governanza, li tibni fuq il-ħidma tal-Istitut Ewropew għall-Ugwaljanza bejn is-Sessi u l-Aġenzija tal-Unjoni Ewropea għad-Drittijiet Fundamentali, sabiex jagħmluha possibbli li d-disinn u l-applikazzjoni tal-istrateġiji għall-ugwaljanza bejn is-sessi fl-UE u l-Istati Membri jkunu jistgħu jiġu analizzati, sabiex dawk l-istrateġiji jiġu aġġornati u l-applikazzjoni tal-inklużjoni ta' kwistjonijiet dwar is-sessi fl-oqsma kollha tal-politika nazzjonali u tal-Unjoni tiġi analizzata, u, fejn possibbli, tali dejta tkompli tiġi diżaggregata fuq il-bażi tar-razza jew l-oriġini etnika, ir-reliġjon jew it-twemmin u d-diżabilità, biex issir possibbli analiżi intersezzjonali għall-oqsma kollha tal-politika, u b'hekk tiġi dokumentata d-diskriminazzjoni multipla li jġarrbu ċerti gruppi ta' nisa; iħeġġeġ lill-Kummissjoni u lill-Istati Membri sabiex jagħtu bidu għal valutazzjonijiet tal-impatt fuq il-ġeneri fil-politiki tal-Istati Membri, speċjalment meta jipproponu riformi tal-pensjonijiet u tax-xogħol;

10.

Jistieden lill-Kummissjoni tfassal l-istrateġija fil-forma ta' pjan ta' azzjoni prattiku b'indikazzjoni ċara tal-partijiet responsabbli interessati, filwaqt li tiżgura li tikkunsidra b'mod partikolari s-suġġerimenti speċifiċi stipulati hawn isfel, li jkopru l-oqsma tal-vjolenza kontra n-nisa, ix-xogħol u l-ħinijiet tax-xogħol, in-nisa fil-poter u t-teħid ta' deċiżjonijiet, ir-riżorsi finanzjarji, is-saħħa, l-għarfien, l-edukazzjoni u l-midja, id-dinja minn perspettiva usa' kif ukoll il-mekkaniżmi istituzzjonali u l-integrazzjoni tal-ugwaljanza bejn is-sessi; jenfasizza l-ħtieġa li jiġu introdotti, fejn applikabbli u b'rispett sħiħ tal-kompetenzi tal-UE, inputs leġiżlattivi bil-għan li jissaħħaħ il-qafas legali għall-ugwaljanza bejn is-sessi;

11.

Itenni t-talba tiegħu lill-Kummissjoni, magħmula fir-riżoluzzjoni tiegħu tal- 25 ta' Frar 2014, li tinkludi rakkomandazzjonijiet biex tiġi miġġielda l-vjolenza kontra n-nisa, biex tippreżenta att legali li jipprovdi kemm sistema konsistenti għall-ġbir ta' dejta statistika kif ukoll approċċ imsaħħaħ mill-Istati Membri għall-prevenzjoni u t-trażżin tal-forom kollha ta' vjolenza kontra n-nisa u l-bniet u tal-vjolenza bbażata fuq is-sess u sabiex l-aċċess għall-ġustizzja jiġi ffaċilitat;

12.

Jistieden lill-Kummissjoni biex tinkludi definizzjoni ta' vjolenza bbażata fuq is-sess f'konformità mad-dispożizzjonijiet tad-Direttiva 2012/29/UE fl-istrateġija futura u biex tippreżenta strateġija komprensiva dwar il-vjolenza kontra n-nisa u l-bniet u l-vjolenza abbażi tal-ġeneru li tinkludi att leġiżlattiv vinkolanti mill-aktar fis possibbli; jistieden lill-Kunsill biex jattiva l-klawsola passerelle, billi jadotta deċiżjoni unanima sabiex mal-oqsma tal-kriminalità elenkati fl- Artikolu 83(1) tiżdied il-vjolenza bbażata fuq is-sess;

13.

Jistieden lill-Kummissjoni biex tivvaluta l-possibbiltà ta' adeżjoni tal-UE mal-Konvenzjoni ta' Istanbul u biex tibda din il-proċedura mill-aktar fis possibbli, kif ukoll biex tippromwovi r-ratifika tal-Konvenzjoni ta' Istanbul mill-Istati Membri permezz tal-istrateġija l-ġdida u biex taħdem b'mod attiv biex tiġi miġġielda l-vjolenza kontra n-nisa u l-bniet; jistieden lill-Istati Membri biex jiffirmaw u jirratifikaw il-Konvenzjoni ta' Istanbul kemm jista' jkun malajr;

14.

Itenni l-appell tiegħu lill-Kummissjoni biex is-sena 2016 tiġi ddikjarata s-Sena Ewropea għall-ġlieda kontra l-vjolenza fuq in-nisa u l-bniet, fejn matulha għandha tingħata prijorità lill-promozzjoni ta' strateġiji fuq firxa wiesgħa u effettivi sabiex titnaqqas b'mod sinifikanti l-vjolenza kontra n-nisa u l-bniet;

15.

Jitlob lill-UE tappoġġa lill-Istati Membri fl-iżvilupp ta' kampanji u strateġiji kontra l-fastidju ta' kuljum fil-konfront tan-nisa fil-pubbliku, u fil-proċess tgħaddi l-aħjar prattiki lill-Istati Membri;

16.

Iqis bħala neċessarji u urġenti l-monitoraġġ ulterjuri tat-traspożizzjoni u l-implimentazzjoni tad-direttiva li tistabilixxi standards minimi dwar id-drittijiet, l-appoġġ u l-protezzjoni tal-vittmi ta' atti kriminali, ir-regolament dwar ir-rikonoxximent reċiproku ta' miżuri ta' protezzjoni f'materji ċivili, u d-Direttiva dwar l-Ordni Ewropea ta' Protezzjoni sa u lil hinn mill-2015;

17.

Jistieden lill-Kummissjoni tistabbilixxi fermament kampanji ta' “tolleranza żero” fl-istrateġija u tappoġġja lill-Istati Membri fl-isforzi tagħhom biex jagħmlu s-soċjetà aktar konxja tal-problema tal-vjolenza kontra n-nisa u fil-promozzjoni tagħhom ta' kampanji ta' sensibilizzazzjoni annwali dwar l-oriġini tal-vjolenza u l-abbuż u fir-rigward tal-prevenzjoni, l-aċċess għall-ġustizzja, u l-appoġġ għall-vittmi; jenfasizza l-importanza tal-inklużjoni tas-soċjetà kollha kemm hi, u b'mod partikolari l-irġiel u s-subien b'mod aktar speċifiku, fil-ġlieda kontra l-vjolenza kontra n-nisa; jistieden ukoll lill-Kummissjoni tkompli taħdem fuq l-inizjattivi tagħha fil-ġlieda kontra l-mutilazzjoni ġenitali femminili;

18.

Jenfasizza li biex wieħed jiġġieled b'mod effettiv kontra l-vjolenza kontra n-nisa u l-impunità, tinħtieġ bidla fl-attitudni lejn in-nisa u l-bniet fis-soċjetà, fejn in-nisa huma ta' spiss rappreżentati fi rwoli subordinati u l-vjolenza kontrihom hi ħafna drabi ttollerata jew ma tingħatax importanza; jistieden lill-Kummissjoni tappoġġja lill-Istati Membri fl-azzjoni biex jipprevjenu u jiġġieldu kontra l-vjolenza fil-ħafna forom tagħha u l-kawżi fl-għeruq u fil-protezzjoni tan-nisa abbużati, u biex jadottaw miżuri speċifiċi għall-aspetti differenti, inkluż aktar appoġġ għall-postijiet ta' kenn għan-nisa u l-organizzazzjonijiet li jaħdmu biex jappoġġjaw lin-nisa li huma vittmi ta’ vjolenza bbażata fuq il-ġeneru u azzjonijiet preventivi bħalma huma l-ġlieda kontra l-istereotipi tas-sessi u attitudnijiet soċjokulturali diskriminatorji minn età żgħira 'l quddiem, kif ukoll li jiġu kkastigati dawk li jinsabu ħatja;

19.

Jinnota li l-femminizzazzjoni tal-faqar tista' twassal għal żieda fit-traffikar tan-nisa, l-isfruttament sesswali u l-prostituzzjoni furzata, ħaġa li tirreduċi lin-nisa għal dipendenza finanzjarja akbar; jistieden lill-Kummissjoni u lill-Istati Membri jesploraw ir-raġunijiet għalfejn in-nisa jirrikorru għall-prostituzzjoni u modi biex tiġi skoraġġita d-domanda; jissottolinja l-importanza ta' programmi għall-ħruġ mill-prostituzzjoni;

20.

Jinnota l-importanza ta' taħriġ sistematiku għal persunal kwalifikat li jieħu ħsieb lin-nisa vittmi ta' vjolenza fiżika, sesswali jew psikoloġika; iqis li dan it-taħriġ huwa essenzjali għal dawk li jipprovdu kura tal-ewwel u t-tieni linja, inklużi s-servizzi ta' emerġenza soċjali, il-protezzjoni medika u ċivili, u servizzi tal-pulizija;

21.

Jistieden lill-Istati Membri biex jimplimentaw bis-sħiħ id-Direttiva 2011/36/UE dwar il-prevenzjoni u l-ġlieda kontra t-traffikar tal-bnedmin, u jistieden lill-Kummissjoni biex tevalwa u tissorvelja l-implimentazzjoni u tidentifika l-aħjar prattiki biex jiġu kondiviżi mill-Istati Membri bil-ħsieb tal-adozzjoni ta' strateġija ġdida għall-ġlieda kontra t-traffikar tal-bnedmin wara li l-istrateġija attwali tiskadi fl-2016, li għandha tinkorpora perspettiva dwar is-sessi u tagħti prijorità lid-drittijiet tal-vittmi tat-traffikar, b'pilastru speċifiku dwar it-traffikar tal-bnedmin għal finijiet ta' sfruttament sesswali u b'enfasi partikolari fuq metodi ġodda ta' traffikar li qed jiżviluppaw filwaqt li metodi oħra aktar stabbiliti qed jieqfu, kif ukoll biex tiżgura li l-politiki tal-Istati Membri, il-baġits u l-eżiti kollha fi ħdan l-iżvilupp tal-istrateġija jkunu trasparenti u aċċessibbli;

22.

Jistieden lill-Kummissjoni tassisti lill-Istati Membri billi tiżgura li l-vittmi tal-istalking ikunu jistgħu jibbenefikaw mill-protezzjoni mogħtija minn miżuri eżistenti bħall-Ordni Ewropea ta' Protezzjoni, ir-regolament dwar ir-rikonoxximent reċiproku ta' miżuri ta' protezzjoni f'materji ċivili, u d-direttiva tal-UE dwar il-vittmi meta dawn jiċċaqalqu minn Stat Membru għal ieħor, u biex tikkunsidra aktar miżuri biex ittejjeb il-protezzjoni tal-vittmi tal-istalking, meta wieħed iqis li ċ-ċifri juru li 18 % tan-nisa fl-UE esperjenzaw l-istalking sa mill-età ta' 15-il sena, u wieħed minn kull ħames vittmi tal-istalking qalu li l-imġiba abużiva kompliet għal sentejn jew aktar (30);

23.

Jistieden lill-Kummissjoni tassisti lill-awtoritajiet kompetenti tal-Istati Membri fit-tfassil tal-programmi ta' azzjoni tagħhom għall-ugwaljanza bejn is-sessi u biex tagħti attenzjoni partikolari għall-forom ġodda ta' vjolenza kontra n-nisa u l-bniet, bħall-fastidju ċibernetiku, is-cyberstalking (31) u l-bullying ċibernetiku, u kif ukoll tagħmel evalwazzjonijiet kontinwi; jenfasizza wkoll, f'dan il-kuntest, l-importanza tal-kooperazzjoni mill-qrib mas-soċjetà ċivili sabiex jiġu identifikati problemi fi stadju aktar bikri u biex jiġu indirizzati b'mod aktar effettiv;

24.

Jistieden lill-Kummissjoni tiżgura li l-Istati Membri kollha jagħmluha possbbli li l-ġeneru ppreferit ta' persuna jiġi rikonoxxut legalment bis-sħiħ, inkluż il-bdil tal-isem, in-numru tas-sigurtà soċjali u indikaturi oħra tas-sess fuq id-dokumenti ta' identità;

25.

Jistieden lill-Kummissjoni, għal darb'oħra, tistabbilixxi mill-aktar fis possibbli Osservatorju Ewropew dwar il-Vjolenza kontra n-Nisa, fil-bini tal-Istitut Ewropew għall-Ugwaljanza bejn is-Sessi u dirett minn Koordinatur tal-UE dwar il-vjolenza kontra n-nisa u l-bniet;

26.

Jistieden lill-Kummissjoni tagħti attenzjoni speċjali fl-istrateġija l-ġdida għad-diversi modi li jirrikonċiljaw il-ħajja tal-familja u x-xogħol; jiddispjaċih, f'dan ir-rigward, dwar il-falliment tan-negozjati dwar l-adozzjoni tad-Direttiva dwar il-liv tal-maternità, u jtenni r-rieda mingħajr limitu tal-Parlament li jikkoopera; jitlob sadattant lill-Istati Membri jissalvagwardjaw id-drittijiet tal-maternità tagħhom, biex jieħdu miżuri biex jipprevjenu t-tkeċċija inġusta tal-impjegati matul it-tqala u jipproteġu n-nisa u l-irġiel b'responsabilitajiet ta' kura mit-tkeċċija inġusta;

27.

Jiġbed l-attenzjoni għall-fatt li, minkejja l-finanzjament tal-UE disponibbli, uħud mill-Istati Membri għamlu tnaqqis fil-baġits li qed jaffettwaw id-disponibilità, il-kwalità u l-ispejjeż tas-servizzi ta' kura tat-tfal, b'impatt negattiv sussegwenti fuq ir-rikonċiljazzjoni tal-familja u l-ħajja tax-xogħol, li taffettwa b'mod partikolari lin-nisa; jistieden lill-Kummissjoni tissorvelja l-ilħuq tal-objettivi ta' Barċellona u biex tkompli tappoġġja lill-Istati Membri fil-ħolqien servizzi ta' kura tat-tfal ta' kwalità għolja u bi prezz raġonevoli u b'sigħat ta' attendenza sensibbli u biex suċċessivament jiżviluppaw miri ġodda fil-qasam tal-istrutturi għall-kura tat-tfal; jenfasizza f'dan ir-rigward l-importanza ta' żieda fid-disponibilità, il-kwalità u l-aċċessibilità ta' kura tas-saħħa u servizzi ta' kura għat-tfal, l-anzjani, u persuni li jeħtieġu kura speċjali bi prezzijiet raġonevoli, inkluża l-għajnuna lil persuni dipendenti, u sadattant jiġi żgurat li d-disponibilità ta' dawn is-servizzi tkun kompatibbli mas-sigħat tax-xogħol full-time kemm għan-nisa kif ukoll għall-irġiel; jinnota żieda fl-assistenza ta' kuljum u l-faċilitajiet tan-nurseries ma tiddependix biss fuq il-politiki pubbliċi meħtieġa, iżda wkoll fuq inċentivi għal min jimpjega l-ħaddiema sabiex jipprovdi dawn is-soluzzjonijiet;

28.

Jenfasizza l-importanza ta' forom flessibbli ta' xogħol biex jippermettu lin-nisa u l-irġiel jirrikonċiljaw ix-xogħol u l-ħajja tal-familja, bil-kondizzjoni li l-ħaddiem ikun liberu li jagħmel l-għażla, u jagħti istruzzjonijiet lill-Kummissjoni biex tikkoordina u tippromwovi l-iskambji tal-aħjar prattiki; jenfasizza, f'dan ir-rigward, il-ħtieġa għal kampanji ta' sensibilizzazzjoni għal qsim indaqs tax-xogħol domestiku u l-kura kif ukoll il-kura tas-saħħa, investiment aħjar fl-infrastruttura tal-kura, u l-inkoraġġiment tal-parteċipazzjoni tal-irġiel u l-introduzzjoni ta' liv tal-paternità ta' mill-inqas 10 ijiem u l-liv tal-ġenituri disponibbli għaż-żewġ ġenituri, imma b'inċentivi qawwijin għall-missirijiet, bħal liv tal-ġenituri mhux trasferibbli; jenfasizza li liv tal-ġenituri ugwali huwa ta' benefiċċju għall-membri kollha tal-familja kollha u jista' jservi bħala inċentiv biex titnaqqas id-diskriminazzjoni assoċjata mal-liv tal-ġenituri;

29.

Jitlob li jiġu adottati l-miżuri meħtieġa biex jiġu promossi rati ogħla ta' impjieg fost in-nisa, bħall-kura u l-kura tat-tfal bi prezzijiet raġonevoli, skemi adegwati ta' maternità, paternità u liv tal-ġenituri u flessibbiltà fil-ħinijiet tax-xogħol u l-postijiet tax-xogħol; jenfasizza l-importanza ta' kundizzjonijiet tax-xogħol tajbin u sikuri li jippermettu kemm lin-nisa kif ukoll lill-irġiel jirrikonċiljaw ix-xogħol u l-ħajja privata, u jistieden lill-Kummissjoni tikkoordina u tippromwovi t-tisħiħ tad-drittijiet tax-xogħol għal iktar ugwaljanza bejn in-nisa u l-irġiel; jenfasizza li titjib fil-bilanċ bejn il-ħajja tal-familja, il-ħajja personali u l-ħajja professjonali huwa element importanti għall-irkupru ekonomiku, id-demografija sostenibbli u l-benesseri personali u soċjali u jinnota li parteċipazzjoni ugwali bejn l-irġiel u n-nisa fis-suq tax-xogħol tista' żżid b'mod sinifikanti l-potenzjal ekonomiku tal-UE, filwaqt li tikkonferma n-natura ekwa u inklużiva tagħha; jinnota li skont it-tbassir tal-OECD, konverġenza sħiħa tar-rati ta' parteċipazzjoni tirriżulta f'żieda ta' 12,4 % tal-PDG per capita sal-2030; jinnota li għalkemm ix-xogħol part-time, li jsir fil-biċċa l-kbira min-nisa, jista' jagħmilha aktar faċli sabiex wieħed jirrikonċilja l-ħajja tal-familja u l-ħajja tax-xogħol, huwa daqstant minnu wkoll li dan jinvolvi inqas opportunitajiet ta' karriera, pagi u pensjonijiet aktar baxxi, użu insuffiċjenti tal-kapital uman u, konsegwentement, inqas tkabbir ekonomiku u prosperità;

30.

Jenfasizza l-importanza li l-Istitut Ewropew għall-Ugwaljanza bejn is-Sessi jintalab jiġbor dejta b'mod komprensiv, speċifika għas-sessi fil-qasam tal-allokazzjoni tal-ħin dedikat għall-kura tal-familja, il-kura tas-saħħa u x-xogħol domestiku u l-ħin liberu, bil-għan li ssir evalwazzjoni regolari;

31.

Jirrakomanda li, peress li l-kompożizzjoni u d-definizzjoni tal-familji jinbidlu maż-żmien, il-leġiżlazzjoni dwar il-familja u x-xogħol għandha ssir aktar komprensiva fir-rigward ta' familji b'ġenitur waħdu u ġenituri LGBT;

32.

Jistieden lill-Kummissjoni u lill-Istati Membri jippromwovu l-vuċi tan-nisa fid-djalogu soċjali u r-rappreżentanza tan-nisa fit-trade unions fis-setturi kollha;

33.

Jistieden lill-Kummissjoni, bħala parti mill-istrateġija, tħeġġeġ lill-Istati Membri jirratifikaw il-Konvenzjoni 189 tal-Organizzazzjoni Internazzjonali tax-Xogħol, biex jissaħħu d-drittijiet tal-persuni inkarigati mix-xogħol domestiku u l-kura tal-familja;

34.

Jistieden lill-Kummissjoni tassisti lill-awtoritajiet kompetenti tal-Istati Membri biex jinħolqu inċentivi għall-impjegati biex jittrasformaw xogħol informali f'impjiegi uffiċjali; jenfasizza l-livell għoli ta' xogħol mhux iddikjarat li jista' jiġi osservat speċjalment f'setturi ddominati min-nisa, bħalma huwa x-xogħol fi djar privati; jistieden lill-Istati Membri jiġġieldu kontra x-xogħol prekarju u l-impjieg mhux iddikjarat tan-nisa, li jikkontribwixxu għad-deregolamentazzjoni sħiħa tal-istrutturi ta' ħlas tan-nisa u jikkawżaw aktar faqar fost in-nisa, speċjalment aktar tard fil-ħajja, u dan għandu impatt negattiv kemm fuq is-sigurtà soċjali tan-nisa kif ukoll fuq il-livelli tal-PDG tal-UE, u biex jiżguraw li l-ħaddiema jgawdu protezzjoni soċjali adegwata; jitlob li tiġi stabbilita malajr Pjattaforma Ewropea biex issir prevenzjoni aħjar tax-xogħol mhux dikjarat u anki biex dan jiġi mxekkel;

35.

Jenfasizza li l-feminizzazzjoni tal-faqar hija r-riżultat ta' bosta fatturi li jinkludu l-waqfien fil-karriera tan-nisa, id-distakk bejn il-pagi tal-irġiel u tan-nisa (16,4 %), id-distakk fil-pensjonijiet bejn is-sessi (39 %), l-inugwaljanzi bejn is-sessi fil-progress tal-karriera, il-fatt li spiss in-nisa jiġu impjegati b'kuntratti mhux standard (bħal xogħol part-time furzat, kuntratti interim jew ta' “sigħat żero”) u l-assenza ta' status ta' sigurtà soċjali għal sħab li jassistu lil persuni li jaħdmu għal rashom, u faqar fil-familji mmexxija minn ommijiet waħedhom; jissottolinja li t-tnaqqis fil-faqar b'20 miljun ruħ sal-2020 jista' jintlaħaq permezz ta' politiki kontra l-faqar u kontra d-diskriminazzjoni li huma msejsa fuq integrazzjoni tal-perspettiva tal-ġeneri, programmi ta' azzjoni li jiddedikaw attenzjoni partikolari lil nisa żvantaġġati u li huma appoġġjati minn azzjonijiet li jimmiraw lejn il-faqar fost in-nisa, u minn titjib tal-kundizzjonijiet tax-xogħol f'setturi bi dħul baxx li fihom in-nisa huma eċċessivament rappreżentati; jissottolinja li d-diskriminazzjoni multipla li jħabbtu wiċċhom magħha n-nisa abbażi ta' diżabilità, sfond razzjali u etniku, status soċjoekonomiku, l-identità tal-ġeneru u fatturi oħra, tikkontribwixxi għall-feminizzazzjoni tal-faqar; jenfasizza l-importanza tal-monitoraġġ tal-effetti tal-ġeneru fuq l-effetti tat-tassazzjoni u l-mudelli tal-ħinijiet tax-xogħol fuq in-nisa u l-familji;

36.

Jistenna li l-Kummissjoni tadotta l-miżuri kollha li għandha għad-dispożizzjoni tagħha u ssaħħaħ l-aspetti kollha tad-direttivi tal-UE dwar it-trattament ugwali għall-irġiel u n-nisa, inklużi s-sħab soċjali li jinnegozjaw ftehimiet kollettivi, u li tħeġġeġ id-djalogu mas-sħab soċjali biex jiġu eżaminati kwistjonijiet bħat-trasparenza tal-ħlas, il-kundizzjonijiet ta' kuntratt ta' xogħol part-time jew għal terminu fiss għan-nisa, filwaqt li tħeġġeġ ukoll il-parteċipazzjoni tan-nisa fis-setturi “ħodor” u innovattivi; jenfasizza li l-pensjonijiet huma fattur determinanti importanti tal-indipendenza ekonomika tal-benefiċjarji tagħhom u li d-distakki fil-pensjonijiet jirriflettu l-iżvantaġġi akkumulati ta' karriera mgħoddija f'suq tax-xogħol bi preġudizzju bbażat fuq il-ġeneru; jistieden lill-Kummissjoni u lill-Istati Membri jieħdu miżuri adegwati biex jitnaqqas id-distakk fil-pensjonijiet bejn is-sessi, li huwa konsegwenza diretta tad-distakk fil-pagi bejn is-sessi, u biex jivvalutaw l-impatt tas-sistemi tal-pensjoni fuq in-nisa, b'attenzjoni partikolari għall-kuntratti part-time u l-kuntratti atipiċi;

37.

Jenfasizza l-importanza li titqajjem kuxjenza dwar il-kunċett ta' sjieda kondiviża fil-livell tal-UE sabiex jiġi żgurat rikonoxximent sħiħ tad-drittijiet tan-nisa fis-settur agrikolu; iħeġġeġ lill-Kummissjoni u lill-Istati Membri biex jikkontribwixxu għall-promozzjoni ta' strateġija li twassal għall-ħolqien ta' impjiegi għan-nisa f'żoni rurali u, b'mod impliċitu, biex jiżguraw pensjonijiet deċenti għal nisa rtirati fl-UE li jgħixu f'kundizzjonijiet prekarji, u jitlob appoġġ għal sforzi politiċi sabiex jissaħħaħ ir-rwol tan-nisa fl-agrikoltura u għal rappreżentanza xierqa tagħhom fil-fora politiċi, ekonomiċi u soċjali kollha tas-settur agrikolu;

38.

Jistieden lill-Kummissjoni u lill-Istati Membri jieħdu kont tal-ostakli soċjoekonomiċi li jħabbtu wiċċhom magħhom in-nisa f'ċirkustanzi speċifiċi bħal f'żoni rurali, f'setturi ddominati mill-irġiel, f'età aktar avvanzata u n-nisa b'diżabilità; jenfasizza li n-nisa qed ikomplu jesperjenzaw nuqqas ta' sikurezza fl-impjieg aktar mill-irġiel u li n-nuqqas ta' sikurezza żdied bħala riżultat tal-kriżi, u jesprimi tħassib dwar in-numru u l-proporzjon ta' nisa li jbatu l-faqar fost dawk li jaħdmu; huwa tal-fehma li l-għajnuna għan-nisa biex jirritornaw lura fis-suq tax-xogħol tirrikjedi soluzzjonijiet multidimensjonali ta' politika li jinkludu t-taħriġ tul il-ħajja u azzjoni għall-ġlieda kontra x-xogħol prekarju u li jippromwovu x-xogħol bi drittijiet u prattiki differenzjati ta' organizzazzjoni tax-xogħol; jitlob lill-Kummissjoni u lill-Istati Membri jsaħħu l-perspettiva tal-ġeneru fil-programmi kollha għall-ħolqien tal-impjiegi, joħolqu impjiegi ta' kwalità għolja skont l-Aġenda tax-Xogħol Deċenti tal-ILO;

39.

Jenfasizza li t-tkabbir ekonomiku u l-kompetittività fl-UE jiddipendu fuq il-possibilità jingħalaq id-distakk bejn dak li n-nisa jiksbu fl-edukazzjoni tagħhom (60 % ta' dawk li jiggradwaw mill-università fl-Ewropa huma nisa) u s-sehem u l-pożizzjoni tagħhom fis-suq tax-xogħol; jenfasizza l-ħtieġa tal-ġlieda kontra l-aspetti kollha ta' segregazzjoni vertikali u orizzontali, peress li tali segregazzjoni tillimita l-impjieg tan-nisa għal ċerti setturi u teskludihom minn livelli ogħla fil-ġerarkija tal-kumpaniji; jenfasizza li l-leġiżlazzjoni eżistenti li fiha azzjoni pożittiva, b'mod partikolari fis-settur pubbliku ta' xi Stati Membri, tejbet l-ugwaljanza bejn is-sessi fil-livell ta' dħul, iżda li jeħtieġ li tiġi estiża għal-livelli kollha tal-karriera;

40.

Jirrimarka li l-akbar żieda minn issa fil-proporzjon ta' nisa fil-bordijiet korporattivi seħħet f'pajjiżi li diġà adottaw leġiżlazzjoni dwar kwoti obbligatorji, u li fl-Istati Membri fejn l-ebda miżuri obbligatorji ma ġew implimentati l-kumpaniji għadhom 'il bogħod milli jilħqu bilanċ aċċettabbli bejn is-sessi; jenfasizza l-ħtieġa ta' appoġġ għall-proċeduri trasparenti għall-ħatra ta' nisa bħala membri mhux eżekuttivi f'bordijiet ta' kumpaniji elenkati fil-boroż; iħeġġeġ lis-settur pubbliku u dak privat biex jipprevedu skemi volontarji li jippromwovu lin-nisa f'pożizzjonijiet maniġerjali; jistieden lill-Kummissjoni tinkludi fl-istrateġija miżuri speċifiċi sabiex tippromwovi rappreżentanza ugwali tan-nisa u l-irġiel f'pożizzjonijiet ta' tmexxija u biex tappoġġja lill-Kunsill fin-negozjati għall-adozzjoni tad-direttiva għal rappreżentanza bbilanċjata ta' rġiel u nisa f'bordijiet mhux eżekuttivi; jitlob lill-Kunsill biex jilħaq pożizzjoni komuni malajr kemm jista' jkun dwar dan l-abbozz ta' direttiva;

41.

Jistieden lill-Kummissjoni biex toħloq inċentivi għall-Istati Membri biex joħolqu rappreżentanza aktar bilanċjata tan-nisa u l-irġiel fil-kunsilli muniċipali, fil-parlamenti reġjonali u nazzjonali u l-Parlament Ewropew, u jenfasizza f'dan ir-rigward l-importanza ta' listi elettorali bbilanċjati fir-rigward tas-sess immexxija b'mod alternat minn raġel u mara; jenfasizza l-importanza ta' kwoti biex tiżdied il-preżenza tan-nisa fit-teħid ta' deċiżjonijiet politiċi; jitlob lill-istituzzjonijiet kollha tal-UE jieħdu miżuri interni biex tiżdied l-ugwaljanza fi ħdan korpi tat-teħid tad-deċiżjonijiet tagħhom stess, billi jipproponu kemm kandidat femminili u kemm maskili għal pożizzjonijiet ta' livell għoli tal-UE; jemmen li l-ugwaljanza għandha tkun rekwiżit għall-Kummissjoni u li l-ħatra ta' Kummissjoni abbażi tal-ugwaljanza hija indikatur importanti għal xogħol ta' ugwaljanza fil-futur;

42.

Jiġbed l-attenzjoni lejn l-iżbilanċ eżistenti fil-parteċipazzjoni tal-irġiel u n-nisa fit-teħid ta' deċiżjonijiet fil-politika, fil-gvern u fl-ekonomija, u lejn il-fatt li l-ostakli għall-parteċipazzjoni tan-nisa jistgħu jiġu attribwiti għal taħlita ta' diskriminazzjoni bbażata fuq is-sess, imġiba stereotipata li għandha tendenza li tippersisti fin-negozju, il-politika u s-soċjetà; jinnota li n-nisa jirrappreżentaw 60 % tal-gradwati l-ġodda, iżda mhumiex rappreżentati biżżejjed, pereżempju, fis-settur tax-xjenza u r-riċerka; jistieden lill-Kummissjoni u lill-Istati Membri iżidu s-sensibilizzazzjoni tan-nisa dwar opportunitajiet ta' taħriġ f'dan il-qasam u biex tiżgura li jkollhom l-istess possibilitajiet daqs l-irġiel biex jibdew il-professjonijiet korrispondenti u minnhom jagħmlu karriera; jinnota li n-nisa b'mod ġenerali għandhom karrieri li ma jippermettulhomx jagħmlu progress sinifikanti; jistieden lill-Istati Membri joffru l-inkoraġġiment u l-appoġġ tagħhom lin-nisa sabiex ikun jista' jkollhom karrieri ta' suċċess, inkluż permezz ta' azzjonijiet pożittivi bħal programmi ta' networking u ta' mentoring, kif ukoll billi joħolqu kundizzjonijiet adegwati u jiżguraw opportunitajiet indaqs mal-irġiel fl-etajiet kollha għat-taħriġ, l-avvanz, il-prattika ta' ħiliet mill-ġdid u t-taħriġ mill-ġdid; jenfasizza l-importanza ta' politiki mmirati lejn l-ugwaljanza bejn in-nisa u l-irġiel fl-impjiegi waqt li jiġu rikonoxxuti l-vulnerabilitajiet potenzjali tan-nisa fl-ogħla professjonijiet; jenfasizza li, b'mod partikolari, il-Kummissjoni għandha tippromwovi politiki kontra l-fastidju fuq il-post tax-xogħol (32);

43.

Jisħaq fuq il-fatt li n-nisa jikkostitwixxu 52 % tal-popolazzjoni totali Ewropea, iżda terz biss ta' dawk li jaħdmu għal rashom jew dawk li jibdew negozju fl-UE; jenfasizza l-importanza ta' programmi ta' appoġġ għal intraprendituri nisa u għal nisa fix-xjenza, u jħeġġeġ lill-UE biex tappoġġja tali programmi b'mod aktar tanġibbli. jistieden lill-Kummissjoni tanalizza u tiżviluppa proposti għal modi biex in-nisa jinteressaw ruħhom fl-istabbiliment ta' impriżi; jenfasizza li nisa imprendituri, xjenzati u akkademiċi potenzjali għandhom ikunu magħmula konxji ta' programmi ta' appoġġ u opportunitajiet ta' finanzjament; jinkoraġixxi lill-Istati Membri biex jippromwovu politiki u azzjonijiet ta' assistenza u pariri għal dawk in-nisa li jiddeċiedu li jsiru imprendituri u biex jinkoraġġixxu l-intraprenditorija tan-nisa, jiffaċilitaw u jissimplifikaw l-aċċess għall-finanzjament u appoġġ ieħor, u jnaqqsu l-burokrazija u ostakoli oħra għall-ftuħ ta' negozji min-nisa;

44.

Għal darb'oħra jiġbed l-attenzjoni għall-fatt li għad hemm distakk fil-pagi bejn is-sessi li bilkemm ġie mnaqqas f'dawn l-aħħar snin; jenfasizza li d-distakk bejn il-pagi tal-irġiel u n-nisa huwa kkawżat min-nuqqas ta' parteċipazzjoni tan-nisa fis-suq tax-xogħol, mis-segregazzjoni vertikali u orizzontali, u mill-fatt li s-setturi fejn in-nisa huma rrappreżentati żżejjed spiss huma kkaratterizzati minn salarji iktar baxxi; jistieden lill-Kummissjoni timmonitorja l-implimentazzjoni tad- Direttiva 2006/54/KE u biex tippreżenta miżuri speċifiċi li jqisu d-differenzi strutturali fil-pagi, kemm leġiżlattivi kif ukoll mhux leġiżlattivi, sabiex tiżgura trasparenza tal-pagi u tapplika sanzjonijiet, biex b'hekk jitnaqqas id-distakk fil-pagi bejn is-sessi, u biex tissottometti rapport ta' progress annwali dwar dan is-suġġett; iħeġġeġ lill-Istati Membri biex jagħrfu l-potenzjal tal-aħħar direttiva dwar l-akkwist pubbliku bħala għodda għall-promozzjoni u t-tisħiħ tal-politika tal-integrazzjoni tal-perspettiva tal-ġeneri, billi tikkonsidra l-istabbiliment ta' rekwiżiti bbażati fuq il-leġiżlazzjoni nazzjonali eżistenti dwar it-trattament ugwali u l-ugwaljanza bejn is-sessi bħala prerekwiżiti għall-kuntratti tal-akkwist pubbliku fejn ikun applikabbli; jistieden lill-Kummissjoni u lill-Istati Membri jeżaminaw jekk klawżoli soċjali fl-akkwist pubbliku jistgħux jintużaw bħala għodda potenzjali biex jissaħħu l-politiki ta' inklużjoni soċjali; jirrikonoxxi li l-leġiżlazzjoni tal-UE dwar il-kompetizzjoni għandha tiġi rrispettata fl-iżvilupp ta' din l-idea;

45.

Jistieden lill-Kummissjoni u l-Istati Membri biex iqisu l-iżviluppi demografiċi u l-bidliet fid-daqs u l-kompożizzjoni tal-unitajiet domestiċi fit-tfassil tal-politiki fiskali tagħhom, l-arranġamenti tas-sigurtà soċjali u s-servizzi pubbliċi;

46.

Jistieden lill-Kummissjoni tappoġġja lill-Istati Membri fil-ġlieda kontra l-faqar, li taffettwa b'mod partikolari l-ommijiet waħedhom u li żdiedet minħabba l-kriżi, ħaġa li wasslet għall-esklużjoni soċjali;

47.

Jistieden lill-Kummissjoni tappoġġja lill-Istati Membri fl-użu tal-Fondi Strutturali għall-investiment fis-servizz pubbliku tal-kura tat-tfal u l-kura tal-anzjani, bħala strateġija essenzjali biex tiżdied il-parteċipazzjoni tan-nisa fis-suq tax-xogħol;

48.

Itenni li d-Direttiva 2006/54/KE fil-forma attwali tagħha mhijiex effettiva biżżejjed biex jiġi indirizzat id-distakk bejn il-pagi tal-irġiel u n-nisa u jinkiseb l-objettiv tal-ugwaljanza bejn is-sessi fl-impjiegi u l-okkupazzjoni; iħeġġeġ lill-Kummissjoni tirrevedi din id-direttiva mingħajr dewmien;

49.

Iqis li l-politiki u l-istrumenti maħsuba biex jindirizzaw il-qgħad fost iż-żgħażagħ, bħall-Garanzija għaż-Żgħażagħ u l-Inizjattiva favur l-Impjieg taż-Żgħażagħ, għandhom jissodisfaw il-ħtiġijiet speċifiċi għal irġiel u nisa żgħażagħ sabiex jippermettulhom li jkollhom aċċess għas-suq tax-xogħol; jinnota li l-proporzjon ta' nisa żgħażagħ li jinsabu barra mill-impjieg, l-edukazzjoni jew taħriġ (NEET) huwa ogħla minn dak tal-irġiel żgħażagħ; jitlob ukoll il-ġbir ta' dejta diżaggregata skont is-sess fil-qasam tal-qgħad fost iż-żgħażagħ sabiex jiġu żviluppati politiki mfassla b'mod immirat u bbażati fuq l-evidenza;

50.

Jistieden lill-Kummissjoni tfassal kemm il-pakkett ta' investimenti adottat fl-2014 kif ukoll il-Garanzija għaż-Żgħażagħ b'mod aktar mill-qrib lejn is-sitwazzjoni speċifika u l-ħtiġijiet speċifiċi tal-bniet u tan-nisa;

51.

Jenfasizza l-importanza tal-iskambju tal-aħjar prattika u inizjattivi sabiex tiġi kkombattuta t-tendenza lejn id-dekwalifikazzjoni tan-nisa, sabiex jiġu żviluppati ħiliethom, jew jingħataw taħriġ li jippermettilhom jerġgħu jidħlu fis-suq tax-xogħol wara żmien iddedikat esklussivament biex jieħdu ħsieb uliedhom jew persuni dipendenti oħra; jenfasizza wkoll l-importanza li jittejjeb u jiġi ffaċilitat ir-rikonoxximent ta' diplomi u kwalifiki, sabiex jiġi evitat li l-ħiliet tan-nisa kkwalifikati tajjeb ma jintilfux, li spiss huwa l-każ fir-rigward ta' migranti nisa;

52.

Jistieden lill-Kummissjoni tgħin lill-Istati Membri biex jiżguraw servizzi ta' kwalità għolja, aċċessibbli ġeografikament u finanzjarjament fil-qasam tas-saħħa u d-drittijiet sesswali u riproduttivi, l-abort sikur u legali u mezzi ta' kontraċezzjoni kif ukoll il-kura tas-saħħa ġenerali;

53.

Iħeġġeġ lill-Kummissjoni tinkludi s-saħħa u d-drittijiet sesswali u riproduttivi (SRHRs) fl-Istrateġija tas-Saħħa tal-UE li jmiss, sabiex tiżgura ugwaljanza bejn in-nisa u l-irġiel u biex tikkomplementa l-politiki nazzjonali SRHR;

54.

Jistieden lill-Istati Membri jiffukaw fuq il-prevenzjoni ta' mard trażmess sesswalment u metodi ta' prevenzjoni, kif ukoll dwar il-prevenzjoni u r-riċerka sabiex itejjeb l-iskoperta bikrija ta' mard bħall-kanċer tan-nisa (kanċer tas-sider, tal-għonq tal-utru, u tal-ovarji) permezz ta' kontrolli u analiżijiet ġinekoloġiċi regolari;

55.

Itenni t-talba tiegħu lill-Kummissjoni u lill-Organizzazzjoni Dinjija tas-Saħħa biex ineħħu d-disturbi tal-identità tal-ġeneru mil-lista ta' disturbi mentali u tal-imġiba, u biex tiżgura riklassifikazzjoni li ma tqishomx bħala patoloġiji fin-negozjati relatati dwar il-ħdax-il verżjoni tal-Klassifikazzjoni Internazzjonali tal-Mard (ICD-11), u biex jiġi żgurat li d-diversità tal-ġeneru fit-tfulija ma titqiesx bħala patoloġija;

56.

Filwaqt li tiġi rikonoxxuta l-importanza tad-drittijiet sesswali u riproduttivi, jistieden lill-Kummissjoni toħloq mudelli tal-aħjar prattika ta' edukazzjoni dwar is-sess u r-relazzjonijiet għaż-żgħażagħ madwar l-Ewropa;

57.

Jenfasizza li l-Kummissjoni jeħtieġ li twettaq il-verifika skont is-sessi sabiex jiġi żgurat li l-politiki tas-saħħa tal-UE u r-riċerka ffinanzjata mill-UE jindirizzaw dejjem aktar l-istatus u d-dijanjożi tas-saħħa tan-nisa;

58.

Jenfasizza l-importanza ta' kampanji ta' sensibilizzazzjoni dwar sintomi ta' mard relatat mas-sess kif ukoll dwar rwoli u stereotipi speċifiċi għas-sess, li għandhom impatt fuq is-saħħa, u jistieden lill-Kummissjoni tipprovdi appoġġ finanzjarju għall-programmi ta' riċerka relatati mas-sessi;

59.

Jistieden lill-Kummissjoni tħeġġeġ lill-Istati Membri sabiex jippromwovu appoġġ (mediku) għall-fertilità u biex ittemm id-diskriminazzjoni fl-aċċess għat-trattament tal-fertilità u r-riproduzzjoni assistita; jinnota wkoll f'dan ir-rigward l-importanza ta' appoġġ għall-adozzjoni;

60.

Jistieden lill-Kummissjoni u lill-Istati Membri biex jieħdu azzjoni biex jimplimentaw programmi ta' edukazzjoni sesswali fl-iskejjel u jiżguraw pariri u aċċess għall-kontraċezzjoni għaż-żgħażagħ;

61.

Jistieden lill-Kummissjoni toħloq inċentivi fl-Istati Membri għal edukazzjoni kompetenti b'imġiba kritika lejn il-midja biex jitpoġġew fid-dubju l-istereotipi u l-istrutturi kif ukoll biex jiskambjaw eżempji tal-aħjar prattika għall-eżami tal-materjal użat fit-tagħlim fil-konfront ta' modi ta' rappreżentazzjoni ta' rwoli stereotipati; jistieden lill-Kummissjoni, f'dan ir-rigward, tappoġġja programmi biex tqajjem kuxjenza ta' stereotipi, sessiżmu u rwoli tradizzjonali tas-sessi fis-settur tal-edukazzjoni u tal-mezzi tax-xandir kif ukoll biex twettaq kampanji għal role models pożittivi femminili u maskili; jenfasizza f'dan ir-rigward il-fatt li l-ġlieda kontra l-bullying u l-preġudizzju kontra persuni LGBTI fl-iskejjel, kemm ta' studenti, ġenituri jew għalliema, għandhom ikunu parti mill-isforzi tal-UE fil-ġlieda kontra l-istereotipi tas-sessi; jenfasizza f'dan il-kuntest l-importanza ta' pedagoġija ta' ekwità bejn is-sessi għall-għalliema, sabiex ikunu jistgħu jispjegaw b'mod ċar il-benefiċċji tal-ugwaljanza bejn is-sessi kif ukoll ta' soċjetà diversa;

62.

Jistieden lill-Istati Membri, u speċjalment ir-regolaturi tal-midja, biex iqisu l-pożizzjoni mogħtija – kemm f'termini kwantitattivi kif ukoll kwalitattivi – lin-nisa u biex jippromwovu immaġini bilanċjata u mhux stereotipata tan-nisa, b'mod li jirrispetta d-dinjità tan-nisa, ir-rwoli differenti u l-identità tagħhom, u biex jiżguraw li l-midja awdjoviżiva kummerċjali ma jkun fiha ebda diskriminazzjoni fuq bażi ta' sess jew rappreżentazzjoni umiljanti tan-nisa, b'mod partikolari b'referenza għall-midja bbażata fuq l-internet li ta' spiss tkun immirata fuq in-nisa u l-bniet; jenfasizza li l-Istati Membri għandhom itejbu wkoll l-aċċess tan-nisa għal opportunitajiet ta' xogħol fil-midja u, b'mod partikolari, għal pożizzjonijiet ta' teħid ta' deċiżjonijiet; jistieden lill-Kummissjoni tissensibilizza l-Istati Membri favur il-ħtieġa li l-midja pubblika u dik legali jaġixxu bħala role model fil-preżentazzjoni tad-diversità; jistieden lill-Kummissjoni u lill-Istati Membri jimpenjaw ruħhom b'aktar konvinzjoni biex itemmu l-istereotipi tas-sessi trażmessi mill-mezzi tax-xandir u jiġbed l-attenzjoni lejn il-miżuri importanti li huma inklużi fir-rapport tal-Parlament dwar l-eliminazzjoni tal-istereotipi tas-sessi, li ġie adottat fl-2013;

63.

Jiġbed l-attenzjoni lejn ir-rwol deċiżiv li l-edukazzjoni u l-għoti tas-setgħa għandhom fil-ġlieda kontra l-istereotipi tas-sessi u biex itemmu d-diskriminazzjoni bbażata fuq is-sess, u lejn l-impatt pożittiv għan-nisa kif ukoll għas-soċjetà u l-ekonomija b'mod ġenerali; jissottolinja li huwa estremament importanti li dawn il-valuri jiġu inkulkati minn età bikrija, u biex jitwettqu kampanji ta' sensibilizzazzjoni fil-postijiet tax-xogħol u fil-mezzi tax-xandir, li jenfasizzaw ir-rwol tal-irġiel fil-promozzjoni tal-ugwaljanza, id-distribuzzjoni ugwali tar-responsabilitajiet tal-familja u l-kisba ta' bilanċ bejn ix-xogħol u l-ħajja privata;

64.

Jenfasizza li l-konformità mal-ugwaljanza bejn is-sessi għandha tiġi kkunsidrata bħala kriterju għall-programmi ta' kultura, ta' edukazzjoni u ta' riċerka ffinanzjati mill-UE, u jitlob lill-Kummissjoni tinkludi qasam speċifiku ta' riċerka dwar is-sessi fi ħdan il-programm Orizzont 2020;

65.

Jagħti istruzzjonijiet lill-Kummissjoni biex twettaq studju tal-impatt ta' kuljum ta' rappreżentazzjoni tal-ġeneru fil-ħajja pubblika, fil-mezzi tax-xandir u l-istituzzjonijiet edukattivi, li tiffoka b'mod partikolari fuq il-bullying fl-iskejjel, id-diskors ta' mibegħda u l-vjolenza bbażata fuq is-sess;

66.

Jistieden lill-Kummissjoni tappoġġja kampanji u inizjattivi għall-promozzjoni tal-parteċipazzjoni attiva taċ-ċittadini fis-soċjetà, speċjalment għan-nisa u l-irġiel migranti;

67.

Jitlob lill-Kummissjoni tiżgura li l-kooperazzjoni Ewropea għall-iżvilupp issegwi approċċ li jkun ibbażat fuq id-drittijiet tal-bniedem, u b'mod partikolari tenfasizza l-ugwaljanza bejn is-sessi, it-taħriġ għan-nisa, il-ġlieda kontra l-forom kollha ta' vjolenza kontra n-nisa, u l-qerda tat-tħaddim tat-tfal; jenfasizza li l-aċċess universali għas-saħħa, partikolarment is-saħħa sesswali u riproduttiva u d-drittijiet assoċjati, hija dritt fundamentali tal-bniedem, u jenfasizza d-dritt ta' aċċess volontarju għas-servizz tal-ippjanar tal-familja, inkluża l-kura relatata mal-abort sikur u legali, u informazzjoni u edukazzjoni biex titnaqqas il-mortalità tal-ommijiet u tat-trabi u l-eliminazzjoni ta' kull forma ta' vjolenza bbażata fuq is-sess, inkluża l-mutilazzjoni ġenitali femminili, iż-żwieġ tat-tfal, bikri u furzat, il-ġeneriċidju, l-isterilizzazzjoni furzata u l-istupru fiż-żwieġ;

68.

Jenfasizza li huwa assolutament meħtieġ li l-perspettiva tal-ġeneru tiġi integrata fl-elementi kollha tal-programmazzjoni għas-sikurezza tal-ikel, peress li n-nisa huma responsabbli għal 80 % tal-agrikoltura fl-Afrika;

69.

Jistieden lill-Kummissjoni biex, fit-tkabbir u l-Politika tal-viċinat u fl-oqsma tal-kooperazzjoni għall-iżvilupp, il-kummerċ u r-relazzjonijiet diplomatiċi, taħdem għall-introduzzjoni ta' standard li jiddefinixxi d-drittijiet tan-nisa bħala dritt tal-bniedem u li jirrendi r-rispett ta' dan id-dritt obbligatorju u parti mid-djalogi strutturati fis-sħubijiet kollha u n-negozjati bilaterali tal-UE; jenfasizza l-importanza ta' kollaborazzjoni parteċipattiva mal-partijiet interessati kollha, b'mod partikolari l-organizzazzjonijiet tad-drittijiet tan-nisa u l-organizzazzjonijiet tas-soċjetà ċivili u l-assoċjazzjonijiet tal-gvern lokali u reġjonali fil-kuntest tal-kooperazzjoni għall-iżvilupp; iħeġġeġ lill-Kummissjoni tirrikonoxxi li t-tqegħid tal-bniet fuq quddiem nett fl-iżvilupp dinji jagħti qafas biex jiġi żgurat li d-drittijiet tal-bniedem li għandhom igawdu l-bniet jiġu rispettati, promossi u mwettqa, u jitlob l-inklużjoni ta' “Dikjarazzjoni tal-Bniet” u l-għanijiet tagħha fil-qalba ta' strateġija dwar l-ugwaljanza bejn is-sessi wara l- 2015; jenfasizza l-importanza li jitmexxew kampanji ta' informazzjoni u ta' sensibilizzazzjoni fil-komunitajiet fejn huma pprattikati vjolazzjonijiet tad-drittijiet tal-bniedem abbażi tal-ġeneru;

70.

Jistieden lill-Kummissjoni tippromwovi l-istabbiliment ta' pjan ta' azzjoni bbażat fuq ir-riżoluzzjonijiet tal-Kunsill tas-Sigurtà tan-NU 1325 u 1820 dwar in-nisa, il-paċi u s-sigurtà, mill-Istati Membri; ifakkar lill-komunità internazzjonali dwar is-salvagwardji meħtieġa għan-nisa u l-bniet, b'mod partikolari l-protezzjoni kontra l-istupru bħala arma ta' gwerra u prostituzzjoni furzata; jikkundanna bil-qawwa l-użu kontinwu tal-vjolenza sesswali kontra n-nisa bħala arma ta' gwerra; jenfasizza li jrid isir aktar biex ikun żgurat ir-rispett għal-liġi internazzjonali, il-protezzjoni tal-vittmi, u l-aċċess għas-servizzi mediċi u l-appoġġ psikoloġiku għan-nisa u l-bniet abbużati fil-kunflitti;

71.

Jisħaq fuq il-fatt li l-provvista tal-għajnuna umanitarja min-naħa tal-UE u l-Istati Membri m'għandhiex tkun soġġetta għal restrizzjonijiet imposti minn donaturi sħab oħra fir-rigward ta' kura medika neċessarja, inkluż l-aċċess għal abort sikur għal nisa u bniet vittmi ta' stupru f'kunflitti armati.

72.

Jenfasizza l-importanza ta' politika tal-asil u tal-migrazzjoni sensittiva għall-ugwaljanza bejn is-sessi, ir-rikonoxximent tat-theddida għall-mutilazzjoni ġenitali bħala raġuni għall-asil, u l-iżvilupp ta' linji gwida xierqa u koordinazzjoni ta' eżempji tal-aħjar prattika; jenfasizza f'dan ir-rigward l-indispensabilità ta' dritt individwali ta' permanenza, għax inkella jkun hemm żbilanċ ta' poter, b'referenza partikolari għan-nisa migranti f'każijiet ta' vjolenza domestika; jistieden lill-Kummissjoni tivvaluta u tidentifika azzjonijiet speċifiċi li jistgħu jiżguraw li d-drittijiet tan-nisa li jfittxu asil jissaħħu u jkunu rispettati bis-sħiħ matul il-proċedura tal-asil;

73.

Jistieden lill-Kummissjoni tiġbor data speċifika għas-sessi bil-ħsieb li twettaq valutazzjoni tal-impatt għan-nisa fl-oqsma tal-politika dwar il-klima, l-ambjent u l-enerġija;

74.

Jirrimarka li għalkemm hemm konsulenti dwar is-sess kemm fil-missjoni ta' ġestjoni ta' kriżi ċivili kif ukoll militari li l-UE tieħu sehem fihom, in-numru ta' nisa involuti f'operazzjonijiet u missjonijiet fil-livelli kollha tat-teħid ta' deċiżjonijiet u fin-negozjati għall-paċi u l-proċessi ta' rikostruzzjoni għad irid jiżdied; jinsisti li għandu jkun hemm strateġija ddedikata rigward id-drittijiet tan-nisa u l-bniet u l-ugwaljanza bejn is-sessi għal kull missjoni; iqis ukoll li kapitolu speċifiku dwar l-ugwaljanza bejn is-sessi jeħtieġ li jiġi integrat fil-Pjan ta' Azzjoni li jmiss tad-drittijiet tal-bniedem tas-SEAE; jenfasizza f'dan ir-rigward l-importanza ta' kooperazzjoni kontinwa u intensiva bejn il-Kumitat għad-Drittijiet tan-Nisa u l-Ugwaljanza bejn is-Sessi u s-SEAE;

75.

Jistieden lill-Kummissjoni tippromwovi l-użu tal-integrazzjoni tal-ugwaljanza bejn is-sessi, l-ibbaġittjar skont is-sessi u l-valutazzjoni tal-impatt fuq il-sessi fl-oqsma kollha u għal kull proposta leġiżlattiva fil-livell kollha ta' governanza, u b'hekk tiżgura objettivi speċifiċi fil-qasam tal-ugwaljanza bejn is-sessi; jitlob lill-Qorti tal-Awdituri wkoll biex tinkorpora l-perspettiva tal-ġeneru meta tkun qed tivvaluta l-eżekuzzjoni tal-baġit tal-Unjoni; jitlob lill-Istati Membri biex bl-istess mod jintroduċu d-dimensjoni tal-ġeneru fil-baġits tagħhom sabiex janalizzaw il-programmi u l-politiki tal-gvern, l-impatt tagħhom fuq l-allokazzjoni tar-riżorsi u l-kontribut tagħhom għall-ugwaljanza bejn l-irġiel u n-nisa;

76.

Jistieden lill-Kummissjoni, barra minn hekk, tinkoraġġixxi l-kooperazzjoni bejn l-Istati Membri, l-organizzazzjonijiet tad-drittijiet tan-nisa u s-sħab soċjali;

77.

Jenfasizza l-importanza ta' finanzjament adegwat ta' korpi nazzjonali tal-ugwaljanza bejn is-sessi u korpi kontra d-diskriminazzjoni; jistieden lill-Kummissjoni tissorvelja mill-qrib l-effettività ta' korpi nazzjonali ta' lment u proċeduri fl-implimentazzjoni ta' direttivi għall-ugwaljanza bejn is-sessi; jistieden f'dan ir-rigward lill-Kummissjoni wkoll biex tappoġġja l-implimentazzjoni tal-Karta Ewropea għall-ugwaljanza bejn in-nisa u l-irġiel fil-ħajja lokali u l-kontinwità ta' NGOs, b'mod partikolari l-organizzazzjonijiet tad-drittijiet tan-nisa u organizzazzjonijiet oħra li jaħdmu fuq kwistjonijiet ta' ugwaljanza bejn is-sessi, permezz ta' assistenza finanzjarja adegwata u prevedibbli; isejjaħ f'dan il-kuntest ukoll għal appoġġ finanzjarju kontinwu għall-programm Daphne, u sabiex il-profil tiegħu jinżamm sabiex b'mod partikolari ikompli jagħti l-possibilità lill-organizzazzjonijiet tad-drittijiet tan-nisa lokalment fl-Istati Membri li jaħdmu kontra l-vjolenza kontra n-nisa;

78.

Jenfasizza l-importanza tal-kooperazzjoni f'forma ta' sħubija bejn il-Kummissjoni u l-Parlament, u għalhekk jipproponi li l-Kummissarju għall-Ġustizzja, il-Konsumaturi u l-Ugwaljanza bejn is-Sessi tippreżenta rapport ta' progress annwali f'forma orali u bil-miktub lill-Kumitat għad-Drittijiet tan-Nisa u l-Ugwaljanza bejn is-Sessi, kemm mill-perspettiva tal-Kummissjoni kif ukoll tal-Istati Membri u tadotta approċċ speċifiku għall-pajjiż fir-rappurtar b'informazzjoni speċifika dwar kull Stat Membru, dwar l-objettivi stabbiliti fl-istrateġija;

79.

Jistieden lill-Kummissjoni tikkollabora mal-Parlament u mal-Kunsill u biex issejjaħ summit annwali tal-UE għall-ugwaljanza bejn is-sessi u d-drittijiet tan-nisa, sabiex tidentifika l-progress li sar, u biex tagħmel impenji mġedda;

80.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet tal-Istati Membri.

4.11.2016   

MT

Il-Ġurnal Uffiċjali tal-Unjoni Ewropea

C 407/18

—

wara li kkunsidra l-komunikazzjoni tal-Kummissjoni lill-Parlament Ewropew, lill-Kunsill u lill-Kumitat Ekonomiku u Soċjali Ewropew tal-1 ta' Lulju 2014 bit-titolu “Kummerċ, tkabbir u proprjetà intellettwali – Strateġija għall-ħarsien u l-infurzar tad-drittijiet tal-proprjetà intellettwali fil-pajjiżi terzi” (COM(2014)0389),

—

wara li kkunsidra l-Istrateġija tal-Kummissjoni għall-infurzar tad-drittijiet tal-proprjetà intellettwali f’pajjiżi terzi (1) u l-evalwazzjoni indipendenti tagħha ta’ Novembru 2010,

—

wara li kkunsidra l-Karta tad-Drittijiet Fundamentali tal-Unjoni Ewropea, u b'mod partikolari l-Artikoli 11(1) u 17(2) tagħha,

—

wara li kkunsidra l-istrateġija Ewropa 2020 (COM(2010)2020),

—

wara li kkunsidra l-konklużjonijiet tal-Kunsill Ewropew tal-21 ta' Marzu 2014,

—

wara li kkunsidra r-rapport tal-2008 mill-Organizzazzjoni għall-Koperazzjoni u l-Iżvilupp Ekonomiċi (OECD) dwar l-impatt ekonomiku tal-iffalsifikar u l-piraterija, kif aġġornat fl-2009,

—

wara li kkunsidra r-rapport tal-2009 tal-OECD dwar il-piraterija tal-kontenut diġitali,

—

wara li kkunsidra l-istudju konġunt tal-2013 mill-Uffiċċju Ewropew tal-Privattivi u l-Uffiċċju għall-Armonizzazzjoni fis-Suq Intern (UEP/UASI) dwar l-industriji intensivi fid-drittijiet tal-proprjetà intellettwali: kontribut għall-prestazzjoni ekonomika u għall-impjiegi fl-Unjoni Ewropea,

—

wara li kkunsidra Dokument ta’ Ħidma tal-Politika għall-Kummerċ tal-2010 mill-OECD dwar “Kontributi Politiċi għat-Tisħiħ tad-Drittijiet tal-Proprjetà Intellettwali f’Pajjiżi li qed Jiżviluppaw”,

—

wara li kkunsidra l-istudju tal-2013 mill-Organizzazzjoni Dinjija tal-Kummerċ, l-Organizzazzjoni Dinjija tal-Proprjetà Intellettwali u l-Organizzazzjoni Dinjija tas-Saħħa dwar il-promozzjoni tal-aċċess għal teknoloġiji mediċi u l-innovazzjoni,

—

wara li kkunsidra r-Regolament tal-Kunsill (KE) Nru 3286/94 tat-22 ta' Diċembru 1994 li jistabbilixxi l-proċeduri tal-Komunità fil-qasam ta' politika kummerċjali komuni sabiex jiżgura l-eżerċizzju tad-drittijiet tal-Komunità skont ir-regoli internazzjonali tal-kummerċ, b'mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (2) (Regolament dwar l-ostakoli għall-kummerċ),

—

wara li kkunsidra d-Direttiva 2004/48/KE tal-Parlament Ewropew u tal-Kunsill tad-29 ta' April 2004 fuq l-infurzar tad-drittijiet tal-proprjetà intellettwali (3),

—

wara li kkunsidra r-Regolament (KE) Nru 816/2006 tal-Parlament Ewropew u tal-Kunsill tas-17 ta' Mejju 2006 dwar il-liċenzjar obbligatorju ta' privattivi relatati mal-manifattura ta' prodotti farmaċewtiċi għall-esportazzjoni lejn pajjiżi li għandhom problemi ta' saħħa pubblika (4),

—

wara li kkunsidra r-Regolament tal-Kunsill (KE) Nru 953/2003 tas-26 ta’ Mejju 2003 biex jevita diversifikazzjoni fil-kummerċ fl-Unjoni Ewropea ta’ ċerti mediċini prinċipali (5),

—

wara li kkunsidra r-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (6),

—

wara li kkunsidra r-Regolament (UE) Nru 608/2013 tal-Parlament Ewropew u tal-Kunsill tat-12 ta’ Ġunju 2013 dwar l-infurzar doganali tad-drittijiet ta’ proprjetà intellettwali u li jħassar ir-Regolament tal-Kunsill (KE) Nru 1383/2003 (7),

—

wara li kkunsidra l-Ftehim dwar l-aspetti tad-drittijiet tal-proprjetà intellettwali relatati mal-kummerċ (TRIPS) u d-Dikjarazzjoni ta’ Doha dwar il-Ftehim TRIPS u s-saħħa pubblika adottata mill-Konferenza Ministerjali tal-Organizzazzjoni Dinjija tal-Kummerċ fl-14 ta’ Novembru 2001,

—

wara li kkunsidra r-riżoluzzjoni tiegħu tat-12 ta' Lulju 2007 dwar il-Ftehim TRIPS u l-aċċess għall-mediċini (8),

—

wara li kkunsidra r-riżoluzzjoni tiegħu tat-18 ta' Diċembru 2008 dwar l-impatt tal-iffalsifikar fuq il-kummerċ internazzjonali (9),

—

wara li kkunsidra r-riżoluzzjoni tiegħu tat-22 ta' Settembru 2010 dwar l-infurzar tad-drittijiet tal-proprjetà intellettwali fis-suq intern (10),

—

wara li kkunsidra r-rapport tal-Kummissjoni tal-31 ta’ Lulju 2014 dwar l-infurzar doganali tal-UE tad-drittijiet tal-proprjetà intellettwali — Riżultati fil-fruntiera tal-UE 2013 (11),

—

wara li kkunsidra r-riżoluzzjoni tal-Kunsill dwar il-Pjan ta' Azzjoni Doganali tal-UE għall-ġlieda kontra l-ksur tad-drittijiet ta' proprjetà intellettwali (IPR) għas-snin 2013 sal-2017 (12),

—

wara li kkunsidra l-opinjoni tal-Kumitat Ekonomiku u Soċjali Ewropew tal-10 ta’ Diċembru 2014,

—

wara li kkunsidra l-Artikolu 52 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Kummerċ Internazzjonali (A8-0161/2015),

A.

billi l-kompetittività tal-UE saret u se tkun ibbażata dejjem aktar fuq il-kreattività u l-innovazzjoni, u billi t-''tkabbir intelliġenti'', jiġifieri l-iżvilupp ta’ ekonomija msejsa fuq l-għarfien u l-innovazzjoni, huwa wieħed mit-tliet prijoritajiet tal-istrateġija Ewropa 2020;

B.

billi d-drittijiet tal-proprjetà intellettwali (IPR) jikkontribwixxu għall-iżvilupp tal-innovazzjoni u l-kreattività; billi l-protezzjoni tagħhom hija kwistjoni ewlenija għall-kompetittività tal-Ewropa u billi, għalhekk, l-UE teħtieġ strateġija aktar ambizzjuża dwar il-ħarsien tad-drittijiet tal-proprjetà intellettwali fir-rigward tas-sħab kummerċjali tagħha;

C.

billi huwa essenzjali li jiġi promoss it-tisħiħ tar-rabtiet bejn l-edukazzjoni, in-negozju, ir-riċerka u l-innovazzjoni, u l-proprjetà intellettwali; billi l-proċeduri għall-ġlieda kontra l-ksur tal-IPR jiswew il-flus u jieħdu l-ħin, b’mod partikolari għall-SMEs, inklużi detenturi tad-drittijiet individwali;

D.

billi l-UE u l-Istati Membri tagħha, bħala membri tal-Organizzazzjoni Dinjija tal-Kummerċ, huma marbuta bil-Ftehim dwar id-Drittijiet tal-Proprjetà Intellettwali Relatati mal-Kummerċ (TRIPS), u għalhekk huma impenjati li jadottaw u jimplimentaw standards minimi ta' miżuri effikaċi kontra kwalunkwe ksur tal-IPR;

E.

billi d-dibattitu dwar l-IPR għandu jkun ibbażat fuq riflessjoni kwalifikata ta’ esperjenzi tal-passat kif ukoll fuq xejriet teknoloġiċi tal-ġejjieni, filwaqt li jżomm il-konsistenza bejn l-aspetti interni u esterni u jiddistingwi bejn l-ambjenti fiżiċi u diġitali, fejn xieraq, filwaqt li jqis it-tħassib tal-partijiet interessati kollha, inklużi l-SMEs u l-organizzazzjonijiet tal-konsumatur, u jimmira li jiżgura trasparenza sħiħa ta’ interessi u leġittimità adegwata biex jintlaħaq bilanċ ġust bejn l-interessi kollha involuti;

F.

billi l-iffalsifikar m'għadux aktar ristrett għal prodotti ta’ lussu, iżda jinkludi wkoll oġġetti użati b’mod komuni, bħal ġugarelli, mediċini, kosmetiċi u ikel li, jekk jiġu ffalsifikati, jistgħu jikkaġunaw korrimenti jew joħolqu riskji serji għas-saħħa tal-konsumaturi;

G.

billi fl-2013 l-awtoritajiet doganali tal-UE żammew kważi 36 miljun oġġett suspettati li huma fi ksur tad-drittijiet tal-proprjetà intellettwali, bil-valur tal-merkanzija interċettata jisboq EUR 760 miljun;

H.

billi 72 % tal-qbid kollu fl-2013 kien relatat ma' kunsinni żgħar; billi għar-raba’ sena konsekuttiva, il-mediċini kienu fl-ogħla kategorija, u jikkostitwixxu 19 % ta’ dan il-qbid u 10 % tal-qbid kollu;

I.

billi huwa neċessarju li jiġi miġġieled il-ksur tal-IPR sabiex: jitnaqqsu r-riskji li jistgħu jippreżentaw għas-saħħa u s-sigurtà tal-konsumatur u għall-ambjent; jitħares il-ħolqien tal-valur fl-UE u f’pajjiżi terzi; jiġu evitati konsegwenzi ekonomiċi u soċjali għan-negozji tal-UE u l-ħallieqa; u jiġu evitati r-riskji għad-diversità kulturali fl-Ewropa u f’pajjiżi terzi; billi jeħtieġ li tingħata attenzjoni lill-ġlieda kontra l-kriminalità organizzata li tibbenefika mill-kummerċ f’oġġetti ffalsifikati jew mill-piraterija;

J.

billi qafas ġuridiku komprensiv tal-IPR għandu jkun ikkombinat ma’ infurzar effettiv, b’referenza, fejn xieraq, għal miżuri ta’ infurzar u penali, filwaqt li jiġi żgurat li l-miżuri ta’ infurzar tal-IPR ma jtaqqlux bla bżonn il-kummerċ leġittimu;

K.

billi karatteristika importanti tal-ħarsien tal-proprjetà intellettwali tikkonsisti fl-infurzar korrett tal-liġijiet u tal-impenji internazzjonali eżistenti, fosthom l-istatuti tal-penali;

1.

Japprezza l-approċċ segwit mill-Kummissjoni, b’mod partikolari għal dak li għandu x’jaqsam mas-sejħa għal bilanċ bejn l-interessi diverġenti;

2.

Iqis li d-dibattitu dwar bilanċ ġust bejn l-interessi tad-detenturi tad-drittijiet u l-interessi tal-utenti aħħarin huwa multidimensjonali u kumplessa ħafna, b’interessi ekonomiċi fuq in-naħat kollha; iqis li l-Kummissjoni għandha tesplora kif jista' jsir dibattitu pubbliku infurmat u trasparenti dwar il-protezzjoni u l-infurzar tal-proprjetà intelletwali u xi jfisser għall-konsumaturi; iqis li l-appell għal involviment imtejjeb mill-partijiet interessati fid-dibattitu dwar l-IPR jeħtieġ li jkun akkumpanjat minn passi li jiżguraw it-trasparenza u l-leġittimità għall-parteċipanti kollha; iqis li m’hemm l-ebda evalwazzjoni fil-komunikazzjoni li tqis l-Istrateġija tal-2004 għall-infurzar tad-drittijiet tal-proprjetà intellettwali f’pajjiżi terzi kif ukoll it-twarrib tal-Ftehim Kummerċjali dwar il-Ġlieda kontra l-Falsifikazzjoni (ACTA);

3.

Jenfasizza li mhuwiex ċar biżżejjed b’liema mod u b’liema metodu jistgħu jinkisbu r-riżultati inklużi fil-komunikazzjoni, b’mod partikolari rigward liema riżorsi se jintużaw u minn fejn se jittieħdu, anke meta wieħed iqis ir-riżorsi limitati disponibbli biex jappoġġjaw lid-detenturi tad-drittijiet tal-UE li jesportaw jew li jistabbilixxu lilhom infushom fi swieq terzi;

4.

Iqis li m’hemm l-ebda indikazzjoni ċara ta’ koordinazzjoni bejn il-politiki interni u l-politiki esterni dwar il-protezzjoni tal-IPR, u jenfasizza l-importanza li jsir titjib intern dwar din il-kwistjoni; jirrikonoxxi li l-koerenza bejn il-politiki interni u esterni ma jiċħadx il-ħtieġa ta' approċċ imfassal apposta, li jirrikonoxxi l-fatti speċifiċi u ċ-ċirkostanzi li jkunu jeżistu f’suq ta’ pajjiż terz inkwistjoni;

5.

Jenfasizza li l-ħarsien tal-IPR għandu jitqies bħala l-ewwel pass – meħtieġ iżda mhux biżżejjed – lejn il-ħolqien ta’ aċċess għal suq ta’ pajjiż terz, u li l-abbiltà li wieħed jeżerċita b’mod effettiv id-drittijiet rikonoxxuti tal-proprjetà intelletwali tiddependi minn ħarsien sostantiv, inkluż l-infurzar effettiv u r-rimedji, fil-pajjiż ikkonċernat;

6.

Jenfasizza li n-natura kummerċjali ta’ bosta każijiet ta’ ksur tal-IPR, u l-involviment dejjem jikber tal-kriminalità organizzata fihom, saret kwistjoni ewlenija; jiddispjaċih li l-Konvenzjoni tan-Nazzjonijiet Uniti kontra l-Kriminalità Organizzata Transnazzjonali (il-Konvenzjoni ta’ Palermo) għad m'għandhiex protokoll dwar il-ġlieda kontra l-falsifikazzjoni, u jistieden lill-Kummissjoni u lill-Istati Membri jżidu l-isforzi tagħhom b’mod konsiderevoli sabiex dan iseħħ;

7.

Japprezza u jappoġġja l-għan ta’ koerenza aħjar bejn il-protezzjoni u l-infurzar tal-IPR u politiki oħra, u bejn il-Kummissjoni u l-Istati Membri biex tintlaħaq din il-mira; iqis li l-ħarsien tad-drittijiet tal-proprjetà intellettwali, u miżuri adegwati biex jiġġieldu kontra l-ksur tal-IPR, jistgħu jikkontribwixxu fil-ġlieda kontra l-kriminalità organizzata, il-ħasil tal-flus u l-evażjoni tat-taxxa u għall-iżvilupp ta’ suq diġitali ġust, sostenibbli, b’garanzija għall-futur u favur l-innovazzjoni;

8.

Jappoġġja lill-Kummissjoni fil-ħidma tagħha sabiex tidentifika prijoritajiet ġeografiċi, billi tuża bħala punt ta’ tluq ir-rapporti biennali tagħha dwar il-protezzjoni u l-infurzar tal-IPR f’pajjiżi terzi;

9.

Iqis li l-istrateġija ma tirrikonoxxix biżżejjed id-distinzjoni bejn il-falsifikazzjoni fiżika tal-marki kummerċjali u l-privattivi minn naħa, u l-ksur tad-drittijiet tal-awtur, b’mod speċjali fl-ambjent diġitali, min-naħa l-oħra; jinnota li billi l-pass lejn id-diġitizzazzjoni qed ikun dejjem aktar mgħaġġel, il-kwistjoni ta’ protezzjoni u infurzar tal-IPR fid-dinja diġitali ser issir iktar importanti madwar id-dinja;

10.

Iqis li l-istrateġija għandha tkun adattata aħjar għall-ambjent diġitali u tinkludi kollaborazzjoni qawwija mal-awtoritajiet doganali u l-awtoritajiet ta’ sorveljanza tas-suq biex tkun żgurata l-koerenza orizzontali;

11.

Jenfasizza li l-indikazzjonijiet ġeografiċi u l-protezzjoni tagħhom huma importanti daqs tipi oħra ta’ proprjetà intellettwali hekk kif dawn jiżguraw li l-prodotti jkunu traċċabbli sal-ħin tal-konsum u jissalvagwardjaw l-għarfien tal-produtturi;

12.

Huwa tal-fehma li l-Kummissjoni għandha tiżgura li l-indikazzjonijiet ġeografiċi jkunu rikonoxxuti u protetti b’mod ġenwin meta tkun qed tinnegozja ftehimiet ta’ kummerċ ħieles ma’ pajjiżi terzi, b’mod partikolari fir-rigward tas-Sħubija Trans-Atlantika ta’ Kummerċ u ta’ Investiment (TTIP);

13.

Huwa tal-fehma li l-ftehim TRIPS għandu jiġi implimentat b’mod effettiv u bilanċjat fejn xieraq u li kwalunkwe flessibbiltà fil-formulazzjoni tiegħu għandha tirrispetta bis-sħiħ il-prinċipju fundamentali ta’ trattament mhux diskriminatorju għal kull qasam tat-teknoloġija, kif stabbilit fl-Artikolu 27(1) tiegħu; jemmen li d-Dikjarazzjoni ta’ Doha għandha tiġi kkunsidrata wkoll, filwaqt li jenfasizza li ħarsien u infurzar imsaħħa tal-proprjetà intellettwali mhux biss jibbenefikaw lill-pajjiżi tal-UE iżda jgħinu wkoll lill-pajjiżi li qed jiżviluppaw jibnu u jiżviluppaw l-oqfsa domestiċi meħtieġa li jinkoraġġixxu u jipproteġu l-innovazzjoni u r-riċerka, kwistjoni ta’ rilevanza dejjem akbar hekk kif dawn jimxu 'l quddiem fi ħdan ktajjen ta’ valur kummerċjali internazzjonali;

14.

Jenfasizza l-ħtieġa ta’ dibattitu pubbliku infurmat, bilanċjat u aktar trasparenti dwar l-infurzar, bl-involviment tal-partijiet interessati kollha u li jibbilanċja l-interessi privati u pubbliċi kollha;

15.

Jirrikonoxxi l-ħtieġa li jiżdied l-għarfien fost il-konsumaturi dwar it-telf finanzjarju, il-ħsara għall-innovazzjoni u l-kreattività u, f'xi każijiet, il-periklu għas-saħħa u s-sigurtà kkawżat mix-xiri jew l-aċċess għal oġġetti li jiksru l-IPR; jiġbed l-attenzjoni għall-fatt li infurzar aktar b’saħħtu waħdu mhux se jsolvi t-tħassib eżistenti u futur dwar il-protezzjoni tal-proprjetà intelletwali u l-infurzar, u għandu jkun kumplimentari għal żieda fl-għarfien fost il-konsumaturi; jenfasizza r-rwol tas-settur tan-negozju f’dan ir-rigward;

16.

Iqis li huwa ċar li għandu jinkiseb l-appoġġ tal-pubbliku favur l-IPR; jinnota f’dan il-kuntest il-ħidma tal-Uffiċċju għall-Armonizzazzjoni fis-Suq Intern (UASI), li tinkludi kampanji ta’ sensibilizzazzjoni fost iċ-ċittadini dwar l-impatti tal-ksur tal-proprjetà intelletwali fuq skala kummerċjali;

17.

Jilqa’ b’sodisfazzjon il-memorandum ta’ ftehim, iffirmat fl-4 ta’ Mejju 2011, bejn id-detenturi tad-drittijiet u l-pjattaformi tal-internet fi sforz konġunt biex jitnaqqas il-bejgħ ta’ oġġetti ffalsifikati permezz ta’ pjattaformi tal-kummerċ elettroniku; jistieden lill-Kummissjoni u lill-Istati Membri jidħlu fi djalogu strutturat ma’ pjattaformi onlajn dwar kif l-aħjar li jiġi identifikat u ttrattat il-bejgħ ta’ oġġetti ffalsifikati;

18.

Jinnota li l-problema tal-ksur tal-IPR żdiedet f’dawn l-aħħar snin b'konsegwenza tad-diġitalizzazzjoni u l-għadd dejjem jikber ta’ pjattaformi ta’ bejgħ diġitali, fejn jinbiegħu u jitqassmu prodotti ffalsifikati mad-dinja kollha mingħajr mezzi effettivi ta’ kontroll; jitlob f’dan ir-rigward li ssir riflessjoni aktar fil-fond immirata lejn l-adozzjoni ta’ għodod aktar effiċjenti biex jikkontrollaw il-bejgħ onlajn ta’ prodotti fiżiċi;

19.

Iqis li l-formulazzjoni tal-istrateġija dwar il-promozzjoni ta’ protezzjoni b'saħħitha tal-indikazzjonijiet ġeografiċi fuq l-internet se jeħtiġilha tkun aktar speċifika sabiex jiġu ppreżentati objettivi konkreti;

20.

Jistieden lill-Kummissjoni taħdem mal-Korporazzjoni tal-Internet dwar l-Ismijiet u n-Numri Assenjati (ICANN) u l-Organizzazzjoni Dinjija tal-Proprjetà Intellettwali (WIPO), sabiex tistabbilixxi mekkaniżmu ta’ protezzjoni għal indikazzjonijiet ġeografiċi fuq l-internet;

21.

Iqis li r-responsabbiltajiet ta’ intermedjarji jeħtieġ li jiġu evalwati bir-reqqa; kien jilqa' f’dan ir-rigward strateġija aktar sofistikata, filwaqt li jirrikonoxxi li din il-kwistjoni hija suġġett ta’ dibattitu separat;

22.

Jistieden lill-Kummissjoni tikkontribwixxi lejn il-ħolqien ta’ ambjent li fih l-interessi tal-Istati Membri u ta’ pajjiżi terzi huma konverġenti, u jkun hemm interess reċiproku fil-ħolqien ta’ oqfsa ta’ protezzjoni ta’ standard għoli flimkien ma’ rimedji effettivi biex jitneħħew il-lakuni fil-protezzjoni tal-IPR; jinnota l-ħtieġa li ssir distinzjoni bir-reqqa bejn iċ-ċirkostanzi differenti ta’ “pajjiżi li qed jiżviluppaw”, u bejn il-kwistjonijiet kummerċjali involuti, filwaqt li jittieħed kont taċ-ċirkostanzi speċifiċi ta’ pajjiżi individwali li qegħdin jiżviluppaw;

23.

Jilqa’ il-ħidma li saret mill-Kummissjoni fl-appoġġ, fuq bażi ta’ każ b’każ, ta’ pajjiżi li qed jiżviluppaw li jixtiequ jtejbu s-sistemi tal-IPR tagħhom, u jistieden lill-Kummissjoni tkompli u tintensifika dawn l-isforzi billi tibqa' tipprovdi assistenza teknika adegwata fil-forma ta’ programmi ta’ sensibilizzazzjoni, assistenza leġiżlattiva u taħriġ ta’ uffiċjali, filwaqt li jitqies il-livell ta’ żvilupp f’kull pajjiż;

24.

Jaqbel mas-sejħa għal rispons wiesa' għal din il-problema kumplessa u multidimensjonali tar-relazzjoni bejn l-IPR u l-aċċess universali għal mediċini li jkunu għall-but ta’ kulħadd, filwaqt li jiġbed l-attenzjoni f’dan il-kuntest lejn l-importanza li fis-settur farmaċewtiku jkun hemm approċċ għall-IPR li jiffoka fuq il-pazjent;

25.

Jistieden lill-Kummissjoni u lill-Istati Membri jkomplu jiżguraw appoġġ għal djalogu kostruttiv dwar l-aċċess għal mediċini li jinvolvi l-partijiet interessati rilevanti kollha, u biex isibu modi biex jiġi ffaċilitat l-aċċess għall-mediċini għall-popolazzjonijiet tal-ifqar pajjiżi, li ma jistgħux jiksbu l-aħjar trattamenti disponibbli bħalissa;

26.

Huwa tal-fehma li, filwaqt li l-interessi u l-kompetittività ta’ kumpaniji farmaċewtiċi tal-UE għandhom jiġu protetti billi tiġi ppreżervata l-kapaċità tagħhom għall-innovazzjoni, filwaqt li jittieħed kont tal-fatt li xi intrapriżi tal-UE jipprovdu aċċess għall-mediċini permezz ta’ programmi ta’ assistenza u bi prezzijiet imraħħsa skont il-kwantità, jeħtieġ li l-prezzijiet tal-mediċini jkunu jintlaħqu min-nies tal-pajjiż fejn ikunu qed jinbiegħu, l-appoġġ għall-użu tal-flessibbiltajiet previsti fil-Ftehim TRIPS u rikonoxxuti fid-Dikjarazzjoni ta’ Doha jsir fattur essenzjali, filwaqt li jitqies ukoll it-tfixkil tas-suq ikkawżat mill-bejgħ mill-ġdid ta’ mediċini f’pajjiżi terzi; jistieden lill-Kummissjoni u lill-Istati Membri jkomplu jagħmlu sforzi ħalli jiġi żgurat li l-miżuri konfinali intiżi sabiex jostakolaw l-importazzjoni ta’ mediċini ffalsifikati ma jaffettwawx b’mod negattiv it-tranżitu ta’ mediċini ġeneriċi;

27.

Jenfasizza li l-kumpaniji għandhom jitħeġġew jikkollaboraw aħjar fl-ambjent kompetittiv tagħhom u jaħdmu flimkien mal-awtoritajiet pubbliċi bil-għan li jiġi garantit aċċess akbar u mtejjeb għall-mediċini fl-Istati Membri u f’pajjiżi terzi; Jitlob lill-Kummissjoni tikkunsidra mekkaniżmi innovattivi ta’ sostenn bħal ġabriet ta’ privattivi li jistimolaw ir-riċerka filwaqt li tiġi żgurata l-produzzjoni ġenerika;

28.

Iqis li l-Unjoni jeħtiġilha tidħol f’dibattitu usa’ b'rabta mal-promozzjoni tal-kura tas-saħħa madwar id-dinja, inklużi strateġiji biex jissaħħu s-sistemi tas-saħħa;

29.

Jistieden lill-Kummissjoni tistimola l-esportazzjonijiet bikrija ta’ mediċini ġeneriċi u bijosimili manifatturati fl-UE hekk kif dawn ma jibqgħux protetti bi privattiva f’pajjiżi terzi;

30.

Iqis li xi data statistika kkwotata fil-komunikazzjoni tnisslet bl-użu ta’ metodoloġija kontroversjali u diġà kkritikata, u li d-data statistika għandha tittejjeb sabiex tirrifletti aħjar is-sitwazzjoni attwali rigward ċ-ċentralità tal-IPR u l-protezzjoni u l-infurzar tagħhom għall-ekonomija tal-UE, u dan mhux biss biex tinforma u ttejjeb il-politika eżistenti iżda biex tkompli tappoġġja l-prinċipju ta’ tfassil ta’ politika bbażat fuq l-evidenza;

31.

Jaqbel mar-raġunament tal-Kummissjoni għall-istabbiliment ta’ Osservatorju tal-UE dwar il-Ksur tad-Drittijiet tal-Proprjetà Intellettwali, u jitlob li jiġu allokati riżorsi ddedikati;

32.

Jirrimarka li l-Osservatorju għandu jkun kompost b'mod komprensiv u m’għandux jirreplika korpi diġà eżistenti;

33.

Jistieden lill-Kummissjoni taħdem lejn Osservatorju li jżomm l-indipendenza tiegħu, biex tiżgura li ħidmietu ma tkunx imminata minn preġudizzji reali jew perċepiti;

34.

Jirrikonoxxi li politiki adegwatament armonizzati, interni u mtejba b'rabta mal-IPR jistgħu jkunu utli fl-isforz biex jitjieb l-istandard tal-protezzjoni u l-infurzar tal-IPR fil-livell globali;

35.

Jistieden lill-Kummissjoni taħdem mal-Istati Membri lejn ir-ratifika tat-Trattat tad-WIPO dwar il-Liġi tal-Marki Kummerċjali, l-Att ta’ Ġinevra tal-Ftehim tal-Aja u l-Ftehim ta’ Lisbona dwar il-Protezzjoni ta’ Denominazzjonijiet ta’ Oriġini u r-Reġistrazzjoni Internazzjonali tagħhom, u ftehimiet internazzjonali oħrajn relatati mal-IPR;

36.

Jistieden lill-Kummissjoni tieħu passi ulterjuri f’konformità mal-eżitu tal-konsultazzjoni pubblika tal-Green Paper tagħha “Nagħmlu l-aħjar mill-kompetenzi tradizzjonali tal-Ewropa” (COM(2014)0469) fir-rigward tal-estensjoni possibbli tal-Unjoni għall-protezzjoni ta’ indikazzjonijiet ġeografiċi għal prodotti mhux agrikoli;

37.

Jappoġġja l-wegħda tal-Kummissjoni li bħala prijorità tippromwovi l-infurzar u l-ħarsien aħjar tal-IPR fid-WTO u fi kwalunkwe areni internazzjonali oħrajn, u b’hekk jinfetħu swieq ġodda għall-esportaturi Ewropej u jitjieb l-aċċess għas-suq eżistenti;

38.

Jinnota li l-għoti ta’ status ta’ ekonomija tas-suq f’termini ta’ strumenti ta’ difiża tal-kummerċ jiddependi, fost kriterji oħra, fuq il-protezzjoni tal-proprjetà intelletwali fil-pajjiż ikkonċernat;

39.

Jistieden lill-Kummissjoni u lill-Istati Membri jaffermaw l-IPRs b'mod iktar effettiv fl-organizzazzjonijiet multilaterali relevanti kollha (id-WTO, l-Organizzazzjoni Dinjija tas-Saħħa u l-Organizzazzjoni Dinjija tal-Proprjetà Intellettwali), u biex jaħdmu lejn l-inklużjoni fis-sistema tad-WTO ta’ dawk il-ftehimiet internazzjonali relatati mal-IPR li għadhom ma jagħmlux parti minnha, bħat-Trattat tad-WIPO dwar il-Liġi tal-Marki Kummerċjali, it-Trattat tad-WIPO dwar il-Fonogrammi u l-Prestazzjoni, it-Trattat tad-WIPO dwar id-drittijiet tal-awtur, l-Att ta’ Ġinevra tal-Ftehim tal-Aja u l-Ftehim ta’ Lisbona dwar il-Protezzjoni ta’ Denominazzjonijiet ta’ Oriġini u r-Reġistrazzjoni Internazzjonali tagħhom;

40.

Iqis li fin-negozjati għal ftehimiet bilaterali ta’ kummerċ ħieles għandha tingħata attenzjoni adegwata lill-kapitoli dwar il-proprjetà intellettwali, u li l-partijiet li qed jinnegozjaw għandhom jirrikonoxxu li d-dritt li wieħed imexxi negozju għandu jqis ir-rispett tal-IPR u l-konformità mal-oqfsa ġuridiċi eżistenti; jilqa’ l-ħidma tal-Kummissjoni li saret sa issa fl-integrazzjoni b’suċċess tal-kapitoli dwar il-protezzjoni tal-proprjetà intelletwali u l-infurzar fi ftehimiet ta’ kummerċ ħieles bilaterali;

41.

Iqis li r-ratifika tat-trattati tad-WIPO elenkati hawn fuq għall-inklużjoni fis-sistema tad-WTO għandha tiġi inkluża fil-ftehimiet ta’ kummerċ ħieles bilaterali konklużi mill-Unjoni;

42.

Jappoġġja l-approċċ tal-Kummissjoni li tistabbilixxi djalogi dwar il-proprjetà intellettwali u gruppi ta’ ħidma ma' pajjiżi prijoritarji li magħhom m'hemmx negozjati komprensivi għaddejjin, u dan bil-għan li jinkisbu u jissaħħu impenji speċifiċi dwar il-ħarsien u l-infurzar tal-proprjetà intellettwali; jenfasizza l-ħtieġa li jiddaħħlu l-IPR fuq l-aġenda ta’ laqgħat politiċi ta’ livell għoli meta ma jkunx qed isir progress fil-livell ta’ djalogi dwar il-proprjetà intelletwali kif ukoll fil-livell ta’ laqgħat bejn l-aġenziji;

43.

Jenfasizza li l-kooperazzjoni fil-qasam tal-IPR bejn l-Unjoni u blokok reġjonali oħra għandha tissaħħaħ kull meta jkun possibbli;

44.

Jistieden lill-Kummissjoni tagħmel rikors aktar regolari għall-mekkaniżmi għar-riżoluzzjoni tat-tilwim, inkluż il-Korp għar-Riżoluzzjoni tat-Tilwim tad-WTO, meta jinkisru d-drittijiet ta’ operaturi ekonomiċi tal-Unjoni, inklużi d-detenturi kollha tal-IPR;

45.

Jistieden lill-Kummissjoni tinkoraġġixxi lill-pajjiżi terzi jagħtu rikonoxximent reċiproku lid-dritt tal-esperti ġuridiċi tal-proprjetà intellettwali li jipprattikaw;

46.

Jistieden lill-Kummissjoni u lill-Istati Membri jintensifikaw il-kooperazzjoni doganali fl-Unjoni u mal-pajjiżi terzi għall-qbid ta' prodotti ffalsifikati, u jissemplifikaw il-proċeduri doganali;

47.

Jistieden lill-Kummissjoni u lill-Istati Membri jikkooperaw aktar mill-qrib ma’ pajjiżi terzi dwar kwistjonijiet ta’ drittijiet tal-awtur u l-liċenzjar;

48.

Jinsab konvint li t-titjib fil-ħarsien tad-drittijiet tal-proprjetà intellettwali u fl-implimentazzjoni effikaċi tar-regoli rilevanti f'pajjiżi terzi jissarraf f'inċentiv qawwi għall-investituri mill-Unjoni Ewropea u lil hinn minnha biex jinvestu, jaqsmu ħiliet teknoloġiċi ġodda u jaġġornaw it-teknoloġiji eżistenti;

49.

Jinnota li xi Stati Membri għandhom attachés tal-proprjetà intelletwali fi ħdan id-delegazzjonijiet tagħhom f’ċerti pajjiżi ewlenin; jemmen li koordinazzjoni aħjar u qsim ta’ informazzjoni fost l-Istati Membri jistgħu jipprovdu opportunitajiet ġodda sabiex jintlaħqu għanijiet komuni f’termini ta’ protezzjoni tal-proprjetà intelletwali f’pajjiżi terzi;

50.

Iqis li l-operaturi ekonomiċi tal-UE u l-konsumaturi f’pajjiżi terzi fejn il-ksur tal-IPR huwa aktar komuni għandhom jiġu partikolarment protetti permezz ta’ estensjoni tal-Helpdesk tal-IPR;

51.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.

4.11.2016   

MT

Il-Ġurnal Uffiċjali tal-Unjoni Ewropea

C 407/25

—

wara li kkunsidra d-Direttiva 2004/48/KE tal-Parlament Ewropew u tal-Kunsill tad-29 ta' April 2004 dwar l-infurzar tad-drittijiet tal-proprjetà intellettwali (1) (“id-Direttiva tal-Infurzar tad-DPI”),

—

wara li kkunsidra l-Artikolu 17 tal-Karta tad-Drittijiet Fundamentali tal-Unjoni Ewropea,

—

wara li kkunsidra r-Regolament (UE) Nru.386/2012 tal-Parlament Ewropew u tal-Kunsill tad-19 ta' April 2012 li permezz tiegħu l-Uffiċċju għall-Armonizzazzjoni fis-Suq Intern (Trademarks u Disinji) jiġi fdat b’ċerti kompiti relatati mal-infurzar tad-drittijiet tal-proprjetà intellettwali, inkluż it-tlaqqigħ ta’ rappreżentanti mis-settur pubbliku u privat bħala Osservatorju Ewropew tal-Ksur tad-Drittijiet tal-Proprjetà Intellettwali (2),

—

wara li kkunsidra r-Regolament (UE) Nru 608/2013 tal-Parlament Ewropew u tal-Kunsill tat-12 ta’ Ġunju 2013 dwar l-infurzar doganali tad-drittijiet tal- proprjetà intellettwali u li jħassar ir-Regolament tal-Kunsill (KE) Nru 1383/2003,

—

wara li kkunsidra r-rapport tal-UASI u tal-Uffiċċju Ewropew tal-Privattivi (UEP) ippreżentat f’Settembru 2013 u intitolat “Intellectual property rights intensive industries: contribution to economic performance and employment in the European Union”,

—

wara li kkunsidra l-komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni tal-25 ta' Ġunju 2008 bit-titolu '“Aħseb l-Ewwel fiż-Żgħir” – “Att dwar in-Negozji ż-Żgħar” għall-Ewropa' (COM(2008)0394),

—

wara li kkunsidra l-komunikazzjoni mill-Kummissjoni lill-Kunsill, lill-Parlament Ewropew u l-Kumitat Ekonomiku u Soċjali Ewropew tal-11 ta' Settembru 2009 dwar “Li ssaħħaħ l-infurzar tad-drittijiet tal-proprjetà intellettwali fis-suq intern” (COM(2009)0467),

—

wara li kkunsidra r-rapport mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni tat-22 ta' Diċembru 2010 intitolat “Applikazzjoni tad-Direttiva 2004/48/KE tal-Parlament Ewropew u tal-Kunsill, tad-29 ta' April 2004, dwar l-infurzar tad-drittijiet tal-proprjetà intellettwali” (COM(2010)0779) u d-dokument ta’ ħidma tal-persunal li jakkumpanjaha (3),

—

wara li kkunsidra s-sommarju li sar mill-Kummissjoni tar-risposti għall-konsultazzjoni pubblika “Infurzar Ċivili tad-drittijiet tal-proprjetà intellettwali: konsultazzjoni pubblika dwar l-effiċjenza tal-proċedimenti u l-aċċessibbiltà ta' miżuri” ta' Lulju 2013 (4),

—

wara li kkunsidra l-komunikazzjoni mill-Kummissjoni lill-Parlament Ewropew, il-Kunsill u l-Kumitat Ekonomiku u Soċjali Ewropew tal-1 ta' Lulju 2014 bit-titolu “Lejn kunsens imġedded dwar l-infurzar tad-Drittijiet tal-Proprjetà Intellettwali: Pjan ta' Azzjoni tal-UE” (COM(2014)0392),

—

wara li kkunsidra l-komunikazzjoni tal-Kummissjoni lill-Parlament Ewropew, lill-Kunsill u lill-Kumitat Ekonomiku u Soċjali Ewropew tal-1 ta' Lulju 2014 bit-titolu “Kummerċ, tkabbir u proprjetà intellettwali – Strateġija għall-ħarsien u l-infurzar tad-drittijiet tal-proprjetà intellettwali fil-pajjiżi terzi” (COM(2014)0389),

—

wara li kkunsidra l-pjan tal-Kummissjoni li toħloq suq diġitali uniku tal-UE u r-riżoluzzjoni tal-Parlament tal-20 ta’ April 2012 dwar suq uniku diġitali kompetittiv (5),

—

wara li kkunsidra l-Konklużjonijiet tal-Kunsill tal-4-5 ta' Diċembru 2014 dwar l-infurzar tad-DPI (6),

—

wara li kkunsidra r-riżoluzzjoni tal-Kunsill dwar il-Pjan ta' Azzjoni Doganali tal-UE għall-ġlieda kontra l-ksur tad-DPI għas-snin 2013 sal-2017 (7),

—

wara li kkunsidra r-riżoluzzjoni tiegħu tat-22 ta' Settembru 2010 dwar l-infurzar tad-drittijiet tal-proprjetà intellettwali fis-suq intern (8),

—

wara li kkunsidra l-ittra tal-Kumitat għall-Affarijiet Legali tal-24 ta' Marzu 2011 dwar ir-Rapport dwar l-applikazzjoni tad-Direttiva 2004/48/KE,

—

wara li kkunsidra l-Artikolu 27 tad-Dikjarazzjoni Universali tad-Drittijiet tal-Bniedem, li tistipula li kulħadd għandu d-dritt għall-protezzjoni tal-interessi morali u materjali li jirriżultaw minn kwalunkwe produzzjoni xjentifika, letterarja jew artistika li huma jkunu l-awtur tagħha,

—

wara li kkunsidra l-Artikolu 52 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Affarijiet Legali u l-opinjonijiet tal-Kumitat għas-Suq Intern u l-Ħarsien tal-Konsumatur u tal-Kumitat għall-Kultura u l-Edukazzjoni (A8-0169/2015),

A.

billi t-Trattat dwar il-Funzjonament tal-Unjoni Ewropea u l-Karta tad-Drittijiet Fundamentali tal-Unjoni Ewropea jagħmlu enfasi partikolari fuq il-proprjetà intellettwali, fl-Artikoli 118 u 17 rispettivament;

B.

billi d-drittijiet tal-proprjetà intellettwali huma wieħed mill-istimoli tal-innovazzjoni u l-kreattività u kontributur ewlieni għall-kompetittività, l-impjieg u d-diversità kulturali; billi l-awtentiċità tal-prodott m’għandhiex dejjem tingħaqad mas-sigurtà tal-prodott u l-kwistjonijiet tal-kwalità tal-prodott, u l-infurzar tad-drittijiet tal-proprjetà intellettwali jkollu rwol biex jiżgura s-saħħa u s-sikurezza tal-konsumaturi; billi d-dħul li jinkiseb mill-falsifikazzjoni ġeneralment jikkontribwixxi biex tissaħħaħ l-ekonomija klandestina u l-kriminalità organizzata;

C.

billi l-UE qed taffaċċja għadd kbir ta’ ksur tad-drittijiet tal-proprjetà intellettwali, u billi l-volum u l-valur finanzjarju ta’ dan il-ksur huwa allarmanti, kif ġie rrappurtat mill-Kummissjoni fir-rapport tagħha dwar l-applikazzjoni tad-Direttiva dwar l-infurzar tad-drittijiet tal-proprjetà intellettwali (COM(2010)0779); billi dawn iċ-ċifri juru wkoll il-valur li jirrappreżentaw id-DPI għall-ekonomija Ewropea fil-kompetizzjoni dinjija;

D.

billi l-ksur tad-DPI, inkluż il-falsifikazzjoni, jiskoraġġixxi t-tkabbir, il-ħolqien tal-impjiegi, l-innovazzjoni u l-kreattività;

E.

billi l-ksur tad-dritt tal-proprjetà intellettwali jikkawża dannu mhux materjali u ekonomiku għall-intrapriżi Ewropej, u jwassal għal telf ekonomiku u fiskali kbir għall-istati;

F.

billi protezzjoni adegwata tad-drittijiet tal-proprjetà intellettwali tikkostitwixxi rekwiżit għall-iżvilupp tal-ekonomija diġitali u tas-suq uniku diġitali;

G.

billi l-iżvilupp, li dejjem qed jikber b'mod aktar rapidu, tal-kummerċ elettroniku u tal-attivitajiet fuq l-internet biddel il-mod kif għandu jitqies l-infurzar tad-DPI fl-ambjent diġitali, b’mod partikolari għaliex dan joffri possibbiltajiet ġodda għal ksur anki permezz ta’ imgiba soċjali ġdida tal-utenti;

H.

billi l-Parlament innota bi tħassib dak li r-rapport tal-UASI juri rigward l-eżistenza, fost minoranza sinifikanti ta' Ewropej, ta' ċertu livell ta' tolleranza għall-idea li l-ksur tad-DPI jista' jitqies bħala aċċettabbli (9); billi hemm nuqqas ta' għarfien adegwat tal-importanza soċjali u kulturali tad-DPI u tal-azzjonijiet meqjusa bħala ksur tagħhom, u nuqqas ta' kuxjenza, speċjalment fost Ewropej żgħażagħ, tal-konsegwenzi potenzjali tal-ksur tad-DPI fuq l-ekonomija u s-soċjetà tal-UE, u fuq is-sikurezza ġenerali taċ-ċittadini; billi huwa neċessarju u possibbli li jsiru kampanji xierqa ta' kuxjenza u informazzjoni għall-utenti;

I.

billi hemm bżonn li jiġu rduppjati l-isforzi għall-ġlieda kontra l-kummerċ illegali fl-oġġetti ffalsifikati u li ħadd ma għandu jagħmel profitt minn ksur tad-DPI;

J.

billi l-infurzar tal-liġi huwa essenzjali rigward il-prevedibbiltà tal-liġi, u billi huwa tal-akbar importanza li jinstabu mezzi effikaċi, proporzjonati u dissważivi biex jiġu infurzati d-DPI bejn il-fruntieri;

K.

billi l-ksur tad-DPI għandu impatt partikolari fuq l-SMEs, inkluż f'servizzi bejn in-negozji, u jista' jwassal għat-telf ta' swieq u falliment;

L.

billi l-fatt li jitqiesu l-aspetti internazzjonali huwa fundamentali għall-infurzar tad-DPI peress li l-ksur tad-DPI huwa fenomenu globali;

M.

billi għandu jitqies il-ksur, kemm onlajn kif ukoll offlajn, fl-azzjonijiet politiċi kontra l-ksur tad-DPI;

1.

Jilqa’ b’sodisfazzjon il-komunikazzjoni tal-Kummissjoni tal-1 ta’ Lulju 2014 li tippreżenta Pjan ta’ Azzjoni tal-UE għal kunsens ġdid dwar l-infurzar tad-drittijiet tal-proprjetà intellettwali; jappoġġja l-approċċ tagħha lejn l-infurzar tad-DPI, ibbażat fuq azzjonijiet preventivi u fuq għodod ta' politika li għandhom il-ħsieb li jċaħħdu lil dawk li jiksru l-liġi fuq skala kummerċjali mid-dħul tagħhom u jagħmluha aktar diffiċli għall-prodotti mhux konformi milli jitqiegħdu fis-suq;

2.

Jenfasizza li r-responsabilità primarja għall-infurzar tad-DPI tibqa' tal-awtoritajiet pubbliċi tal-Istati Membri;

3.

Jenfasizza li l-objettiv ewlieni tal-Pjan ta' Azzjoni għandu jkun li jiżgura l-infurzar effettiv u bbażat fuq l-evidenza tad-DPI, u li għandu rwol ewlieni fl-istimular tal-innovazzjoni, il-kreattività, il-kompetittività, it-tkabbir u d-diversità kulturali; jinnota li l-miżuri meħuda għall-infurzar tal-IPR għandhom ikunu bbażati fuq dejta preċiża u affidabbli;

4.

Jenfasizza li fi żminijiet tal-kriżi finanzjarja, li fiha l-assistenza finanzjarja tal-qasam kulturali titnaqqas drastikament, id-drittijiet tal-proprjetà intellettwali ħafna drabi huma s-sors tad-dħul prinċipali għall-artisti kreattivi, għalhekk jenfasizza li l-iżgurar ta’ remunerazzjoni ġusta għall-artisti kreattivi għandu jkun aspett ewlieni tal-Pjan ta’ Azzjoni tal-UE;

5.

Huwa tal-fehma li l-miżuri għall-protezzjoni tal-proprjetà intellettwali għandhom ikunu żgurati b’mod trasparenti u li l-pubbliku u l-partijiet ikkonċernati l-oħra kollha jkunu informati b’mod komprensiv, fl-interess li l-innovazzjoni, il-kreattività u l-kompetittività ma jkunux affettwati;

6.

Jirrikonoxxi li l-infurzar tad-DPI mhuwiex biss mutur għall-impjiegi u t-tkabbir madwar l-Unjoni, iżda huwa essenzjali għall-funzjonament tajjeb tas-suq uniku – speċjalment fid-dawl ta’ fatturi bħas-sehem tal-PDG tal-UE u l-impjiegi, u l-firxa tal-industriji li jibbenefikaw mid-DPI u li jisfruttaw minnhom – u jiżvolġi rwol ewlieni fl-istimular tal-innovazzjoni, il-kreattività, il-kompetittività u d-diversità kulturali;

7.

Jenfasizza li d-drittijiet tal-proprjetà intellettwali jkunu garanti b’mod partikolari tal-kreattività, l-innovazzjoni u l-kompetittività tal-industriji kulturali u kreattivi, iżda wkoll ta' setturi industrijali oħrajn, kif enfasizzat il-Kummissjoni fil-komunikazzjoni tagħha “Għal Rinaxximent Industrijali Ewropew”; jistieden lill-Kummissjoni biex tkompli l-ħidma sabiex id-DPI jitqiesu bħala fattur ta’ kompetittività tal-ekonomija Ewropea;

8.

Jissottolinja l-fatt li d-DPI mhumiex biss drittijiet tal-awtur iżda wkoll marki kummerċjali u privattivi, fost oħrajn, u li kull wieħed minn dawn huwa vitali għall-valur tal-prodotti u s-servizzi tal-Ewropa;

9.

Jinnota li skont il-Kummissjoni, is-setturi kulturali u kreattivi, li ta’ spiss jinvolvu d-DPI, diġà jirrappreżentaw sa 4,5 % tal-PDG u sa 8,5 miljun impjieg fl-UE u mhux biss huma essenzjali għad-diversità kulturali iżda wkoll jikkontribwixxu b’mod sinifikanti għall-iżvilupp soċjali u ekonomiku;

10.

Jemmen li l-atturi kollha fil-katina tal-provvista għandhom rwol x’jaqdu fil-ġlieda kontra l-ksur tad-DPI u għandhom ikunu involuti f’dan il-proċess; jenfasizza li approċċ li jinvolvi l-atturi kollha għandhom jiġu żviluppati kemm f’kuntest onlajn kif ukoll offlajn; jemmen li d-drittijiet fundamentali jeħtieġ li jkunu bbilanċjati sabiex dan ikun ta’ suċċess, peress li l-miżuri li jolqtu d-drittijiet fundamentali ma jistgħux jitwettqu b’mod volontarju mill-operaturi kummerċjali, iżda jeħtieġu bażi legali u sorveljanza ġudizzjarja;

11.

ifakkar li l-inkorporazzjoni tal-atturi onlajn fil-ġlieda kontra l-ksur tad-dritt tal-proprjetà intellettwali għandha tkun f’konformità mal-prinċipji tad-Direttiva 2000/31/KE (Direttiva dwar il-kummerċ elettroniku) u l-Karta tad-Drittijiet Fundamentali tal-Unjoni Ewropea.

12.

Jinnota li l-prodotti fiżiċi falsifikati u li jiksru d-DPI qed jiġu dejjem aktar innegozjati u mibjugħa minn swieq onlajn, fejn l-awtoritajiet tal-Istati Membri għandhom kapaċitajiet limitati biex jikkontrollaw il-bejgħ; jenfasizza l-ħtieġa li s-sidien tal-pjattaformi tas-swieq jiġu involuti fl-isforzi kollha biex jiġu infurzati l-IPRs, inklużi l-isforzi biex jitneħħew il-prodotti falsifikati u biex il-bejjiegħa ta' prodotti falsifikati jiġu pprojbiti mis-siti tagħhom;

13.

Jenfasizza l-importanza li tiġi żgurata l-applikazzjoni ta’ diliġenza dovuta fil-katina tal-provvista kollha, inkluża l-katina tal-provvista diġitali u l-atturi u l-operaturi ewlenin kollha fiha, bħalma huma l-ħallieqa, l-artisti u d-detenturi tad-drittijiet, il-produtturi, l-intermedjarji, il-fornituri tas-servizzi tal-internet, il-pjattaformi tal-bejgħ online, l-utenti aħħarin u l-awtoritajiet pubbliċi;

14.

Jemmen li l-applikazzjoni tad-diliġenza dovuta fil-katina tal-provvista u sorveljanza tas-suq imtejba u l-kondiviżjoni tal-informazzjoni bejn l-awtoritajiet doganali jtejbu l-ambjent tan-negozju u jikkontribwixxu biex jevitaw prodotti u servizzi li jikkostitwixxu vjolazzjoni milli jidħlu fis-suq; jenfasizza li l-proporzjon bejn l-ispejjeż u l-benefiċċji u l-effettività ta’ kwalunkwe skemi ta’ awditjar kwalitattivi għandhom ikunu vvalutati sew u li l-għoti ta’ appoġġ lill-SMEs għandu jkun kunsiderazzjoni b’saħħitha f’dak ir-rigward;

15.

Jinnota wkoll il-proposti dwar il-konsultazzjoni inklużiva tal-partijiet interessati dwar l-applikazzjoni tad-diliġenza dovuta tal-UE fil-katina tal-provvista kollha, inklużi l-fornituri ta' servizzi ta' pagament, għall-prevenzjoni tal-ksur tad-DPI, u jitlob li l-eżitu tal-konsultazzjonijiet u l-iskema volontarja ta’ diliġenza dovuta tal-UE jiġu ppreżentati lill-Parlament fuq bażi annwali aktar milli kull sentejn;

16.

Jistieden lill-Kummissjoni tagħmel trasparenti u f'waqthom il-konsultazzjonijiet kollha mal-partijiet interessati u biex tiżgura li l-eżitu tal-konsultazzjonijiet jiġi analizzat kemm kwalitattivament kif ukoll kwantitattivament u jiġi kondiviż mal-partijiet interessati, inkluż il-Parlament u istituzzjonijiet oħra tal-UE;

17.

Jenfasizza l-importanza ta’ ftehimiet skont is-settur u gwidi ta’ prattika tajba għall-ġlieda kontra l-ksur tal-IPR; jistieden lill-operaturi tal-industrija biex jaqsmu informazzjoni dwar pjattaformi li jagħtu aċċess għal kontenut li jikser l-IPR, u biex jieħdu miżuri koordinati u proporzjonati, bħal notifika u tneħħija (notice and takedown), sabiex jitnaqqas l-introjtu ġġenerat minn dan it-tip ta' kontenut jew pjattaformi; jinnota li tali miżuri ma għandhomx jinkludu mblukkar mhux ġudizzjarju ta' websajts;

18.

Jirrimarka li pjattaformi “cyberlocker” huma wieħed miċ-ċentri ewlenin għall-ksur tal-IPR, li minnu huma indirettament jidderivaw dħul permezz ta’ reklamar u/jew abbonamenti;

19.

Jilqa’ l-approċċ li jċaħħad lill-persuni li jiksru d-DPI mid-dħul tagħhom permezz ta’ ftehim bejn id-detenturi tad-drittijiet u s-sħab tagħhom; jappoġġja l-elaborazzjoni ta’ memoranda ta’ fehim bħala miżuri legali flessibbli li jiġġieldu kontra l-falsifikazzjoni u l-piraterija, u jappoġġja l-idea li jiġu żviluppati aktar miżuri bħal dawn fost il-partijiet interessati; f’dan ir-rigward, jirrakkomanda lill-Kummissjoni biex twettaq studju dwar kif dawn l-operazzjonijiet ta’ falsifikazzjoni qed jiffinanzjaw bejniethom l-attivitajiet tagħhom (ibiegħu prodotti foloz u jipprovdu kontenut illegali);

20.

Ifakkar li minn Mejju tal-2011, jeżisti Memorandum ta’ Qbil dwar il-Bejgħ ta’ Oġġetti Ffalsifikati fuq l-Internet u jistieden lill-Kummissjoni biex tevalwa r-riżultati tal-implimentazzjoni ta' dan il-Memorandum ta' Qbil u tagħti rendikont lill-Parlament;

21.

Jemmen li l-Kummissjoni għandha tqis ukoll l-effettività ta' inizjattivi eżistenti u attivitajiet futuri possibbli fir-rigward tar-rwol ta' intermedjarji fl-indirizzar tal-ksur tad-DPI;

22.

Jirrimarka li fis-settur kulturali u kreattiv b’mod partikolari, għandha titħeġġeġ il-kooperazzjoni – inkluż abbażi ta’ awtoregolamentazzjoni – bejn id-detenturi tad-drittijiet, l-awturi, l-operaturi tal-pjattaforma, l-intermedjarji u l-konsumaturi finali, bil-għan li ksur tad-DPI jinqabad fi stadju bikri; jenfasizza li l-effikaċja ta’ din l-awtoregolamentazzjoni jeħtieġ tiġi vvalutata mill-Kummissjoni fil-futur qarib u li miżuri leġiżlattivi ulterjuri jistgħu jkunu meħtieġa;

23.

Jenfasizza li fis-settur kulturali u kreattiv, il-fornituri ta’ servizzi ta’ ħlas għandhom ikunu involuti fid-djalogu bil-għan li jitnaqqas il-profitt iġġenerat mill-ksur tad-DPI fil-kuntest onlajn;

24.

Ifakkar fl-involviment tal-kriminalità organizzata f’attivitajiet internazzjonali ta’ ksur tad-DPI u l-importanza kbira li tiġi ppreżentata soluzzjoni Ewropea koordinata, li ssaħħaħ il-miżuri ta’ awditjar fis-seħħ filwaqt li jiġi implimentat il-prinċipju “segwi l-flus”, għas-salvagwardja tal-interessi tal-konsumaturi u l-integrità tal-katina tal-provvista;

25.

Jilqa’ l-approċċ li ttieħed mill-Kummissjoni biex tiżviluppa kampanji ta’ sensibilizzazzjoni fil-mira; jemmen li huwa essenzjali li kulħadd għandu jifhem il-konsegwenzi konkreti tal-ksur tad-DPI għas-soċjetà kollha kemm hi, u għall-konsumaturi u ċ-ċittadini b’mod individwali; jemmen li l-konsumaturi għandhom ikunu infurmati aħjar dwar minn xiex jikkonsistu d-DPI, u x’jista’ jsir jew ma jistax isir bil-prodotti u l-kontenut protetti; jistieden lill-Kummissjoni u l-Istati Membri biex ikomplu jiżviluppaw azzjonijiet ta’ sensibilizzazzjoni mmirati lejn udjenzi speċifiċi u swieq rilevanti;

26.

Jirrakkomanda kampanja ta’ informazzjoni usa’ rigward il-Pjattaforma tal-Awtoritajiet tal-Infurzar u d-Detenturi tad-Drittijiet tal-Proprjetà Intellettwali sabiex id-detenturi tad-drittijiet ikollhom rwol aktar attiv fid-difiża tad-drittijiet tagħhom madwar l-Unjoni Ewropea permezz tal-integrazzjoni tad-Database tal-Infurzar man-netwerk sikur tad-Direttorat Ġenerali għat-Tassazzjoni u l-Unjoni Doganali; jitlob għal aktar integrazzjoni, u li tkun aktar rapida, mal-awtoritajiet tal-pulizija u awtoritajiet tad-dwana oħrajn mad-dinja kollha biex jiżguraw infurzar aħjar tad-DPI;

27.

Jenfasizza fuq il-ħtieġa li tiġi indirizzata b’mod aktar speċifiku l-ġenerazzjoni żagħżugħa permezz ta’ kampanji xierqa li jżidu s-sensibilizzazzjoni minħabba li huwa magħruf li, kif jirriżulta minn servej reċenti dwar il-perċezzjoni tal-proprjetà intellettwali, hija dik il-ġenerazzjoni partikolari li tirrispetta l-inqas id-DPI;

28.

Jinsisti fuq l-importanza ta’ inizjattivi li għandhom l-għan li jivvalutaw u jimmonitorjaw l-iżvilupp tal-għarfien dwar il-fehim taż-żgħażagħ u l-perċezzjoni tal-proprjetà intellettwali sabiex inkunu nistgħu nifhmu aħjar il-bżonnijiet tagħhom u jiġu definiti l-aktar azzjonijiet xierqa li għandhom jittieħdu;

29.

Jilqa’, b’mod partikolari, l-isforzi tal-Osservatorju Ewropew dwar il-Ksur tad-Drittijiet tal-Proprjetà Intellettwali, li jinsab fi ħdan l-Uffiċċju għall-Armonizzazzjoni fis-Suq Intern (UASI), li għandhom l-għan li jqajmu kuxjenza fost il-konsumaturi dwar il-benefiċċji li jagħżlu prodotti li jirrispettaw id-DPI u l-iffaċilitar tal-aċċess għal dawn il-prodotti;

30.

Jemmen li fl-istess ħin il-konsumaturi għandu jkollhom kapaċità aħjar biex jidentifikaw offerti li jiksru d-drittijiet sabiex ikunu jistgħu jiddeċiedu li ma jipproċedux b'xiri partikolari; jiddeplora l-fatt li l-pjan ta' azzjoni tal-Kummissjoni ma tinkludi l-ebda azzjoni mfassla biex ittejjeb il-kapaċità tal-konsumaturi li jidentifikaw prodotti u kontenuti illegali; jistieden lill-Kummissjoni u lill-Istati Membri biex jirriflettu aktar dwar l-iżvilupp ta’ għodod u linji gwida speċifiċi, u li jkun hemm analiżi bbażata fuq l-evidenza u l-iżvilupp possibbli ta’ sistema armonizzata ta’ proċeduri ta’ notifika/irtirar ta’ prodotti u kontenut illegali, b’tali mod li l-konsumaturi u l-impriżi jkunu jistgħu jieħdu azzjoni meta dawn jiġu mqarrqa, bl-istess mod kif huma jistgħu jaħdmu biex tinġibed l-attenzjoni għal kontenut mhux mixtieq, abbażi tal-esperjenzi miġbura mill-Kummissjoni u l-Osservatorju Ewropew dwar il-Ksur tad-Drittijiet tal-Proprjetà Intellettwali, speċjalment fir-rigward tal-qsim tal-aħjar prattiki;

31.

Jinnota li s-sistema tan-notifika u t-tneħħija, ta' URL wieħed wieħed, ta’ kontenut li jikser l-IPR, għandha limitazzjonijiet prattiċi minħabba l-ħeffa li biha l-kontenut inkwistjoni jista’ jerġa jkun magħmul disponibbli; jistieden, għaldaqstant, lill-operaturi f’dan is-settur biex jibdew jaħsbu dwar kif is-sistema tan-notifika u t-tneħħija tista’ssir aktar effettiva fuq tul ta’ żmien;

32.

Jirrimarka li l-atturi kollha involuti fil-katina ta’ distribuzzjoni għandhom jikkooperaw fl-iżvilupp ta’ kampanji tal-informazzjoni li jagħtu lill-konsumaturi informazzjoni dwar id-drittijiet u l-obbligi tagħhom filwaqt li jaċċedu u jużaw il-kontenut kreattiv faċilment;

33.

Iqis li trasparenza akbar u informazzjoni aqwa jistgħu jiġu implimentati b'mod effettiv biss bil-kooperazzjoni tal-atturi interessati ewlenin tal-internet li jiċċirkolaw kontenut protett mid-DPI, u li għalhekk jaqbel li dawn jiġu involuti f’tali sforzi biex jintlaħqu t-trasparenza u ċ-ċirkolazzjoni ta’ informazzjoni;

34.

Jinsisti fuq il-bżonn li jiġu kkoordinati inizjattivi u kampanji fl-Istati Membri kollha sabiex tiġi evitata d-dupplikazzjoni tax-xogħol u żgurati l-koerenza u l-effiċjenza;

35.

Jitlob lill-awtoritajiet tal-Istati Membri jiżguraw li prodotti li jiksru l-IPRs, li jkunu riskju għas-sikurezza, jiġu inklużi fin-notifiki ta' RAPEX, irrispettivament minn jekk dawn il-prodotti jinbigħux legalment jew illegalment fl-Istat Membru inkwistjoni;

36.

Jemmen li, f’ċerti setturi, in-nuqqas ta’ għarfien tal-konsumatur dwar offerti legali, u l-provvista ta’ prodotti u kontenut li ma jiksrux id-drittijiet, li xi kultant tkun diffiċli biex taċċessja jew tkun għalja, jistgħu jagħmluha diffiċli biex il-konsumaturi jiġu evitati milli jixtru prodotti illegali jew jużaw kontenut illegali; huwa tal-fehma li jeħtieġ isir iktar progress f’dan il-qasam, u jtenni t-talba tiegħu li l-Kummissjoni u l-Istati Membri għandhom ipoġġu aktar pressjoni fuq l-industrija biex jiġu żviluppati, fl-Istati Membri kollha, offerti leċiti li jkunu kemm diversifikati kif ukoll attraenti sabiex il-konsumaturi ġenwinament ikollhom opportunità biex jixtru prodotti leċiti jew jużaw kontenut leċitu;

37.

Jenfasizza l-bżonn ta' approċċ aktar olistiku b’enfasi fuq kif tintlaħaq id-domanda tal-konsumatur billi jiżdiedu d-disponibilità u l-konsum ta’ offerti legali, innovattivi u bi prezz raġonevoli, ibbażati fuq mudelli tan-negozju adattati għall-internet li jippermettu li jitneħħew l-ostakli, u b'hekk jinħoloq suq li hu tassew suq uniku diġitali Ewropew, filwaqt li jżommu bilanċ bejn id-drittijiet tal-konsumaturi u l-protezzjoni tal-innovaturi u l-ħallieqa;

38.

Huwa tal-fehma wkoll li waħda mill-possibbiltajiet għat-tisħiħ tad-DPI tista’ tkun l-iżvilupp ta’ mudelli ta’ negozju innovattivi; jenfasizza wkoll li f’dan ir-rigward għandu jiġi meqjus mill-ġdid it-titjib u l-adattament kostanti għat-teknoloġija li kontinwament qiegħda tiżviluppa għal oqsma partikolari tal-industrija;

39.

Jenfasizza l-importanza li jitjiebu l-proċeduri ċivili ta’ infurzar tal-IP għall-SMEs u l-ħallieqa individwali, billi dawn għandhom rwol importanti fis-setturi kulturali u kreattivi u ta’ spiss ma jkollhomx il-kapaċità jinfurzaw id-drittijiet tagħhom minħabba l-kumplessità, l-ispejjeż u t-tul ta’ dawn il-proċeduri;

40.

Jilqa’ l-intenzjoni ddikjarata mill-Kummissjoni li tappoġġja l-SMEs fl-infurzar tad-DPI tagħhom, permezz tat-titjib ta’ modi aċċessibbli ta’ rimedju ċivili, sabiex jiġġieldu aħjar l-abbuż tas-suq minn kompetituri akbar u, b’mod partikolari, li tivvaluta aktar il-ħtiġijiet tal-SMEs għal azzjoni futura tal-UE;

41.

Jilqa’ d-deċiżjoni meħuda fil-Komunikazzjoni tal-Kummissjoni tal-1 ta’ Lulju 2014 dwar Pjan ta' Azzjoni tal-UE, u b’mod aktar speċifiku l-Azzjoni 4 tagħha, li kienet immirata lejn it-titjib tal-proċeduri ta’ infurzar ċivili tad-DPI għall-SMEs, b’mod partikolari fir-rigward tat-talbiet ta’ valur baxx u l-azzjoni possibbli f’dak il-qasam;

42.

jenfasizza li, għall-SMEs, huwa kruċjali li jkun hemm strutturi ċari u ġestibbli għall-infurzar tal-IPRs tagħhom;

43.

Jistieden lill-Kummissjoni biex tiżgura li kwalunkwe miżura meħuda jkollha impatt limitat f’termini ta’ piż u spejjeż imposti fuq l-SMEs; b'mod partikolari, jistieden lill-Kummissjoni biex tivvaluta ulterjorment kif l-SMEs jistgħu jieħdu sehem fi skemi ta' awditjar kwalitattivi u jidentifikaw liema miżuri speċifiċi jistgħu jittieħdu favur l-SMEs għal dan l-għan;

44.

Jinsisti fuq il-ħtieġa li jitqiesu l-SMEs fl-abbozzar tal-leġiżlazzjoni, u jtenni li l-prinċipju “aħseb l-ewwel fiż-żgħir” għandu dejjem jiġi applikat;

45.

Jenfasizza l-importanza tal-aċċess għall-ġustizzja u tal-kosteffettività ta' proċedimenti ġudizzjarji, speċjalment għall-SMEs, u jitlob għall-iżvilupp ta' servizzi ta' medjazzjoni u ta' skemi alternattivi oħra għas-soluzzjoni ta' tilwim bejn in-negozji fil-qasam tad-DPI;

46.

Jinsisti fuq l-importanza li jittieħed impenn sabiex jiġu analizzati regolarment fatturi determinati mill-SMEs sabiex jużaw jew ma jużawx id-DPI tagħhom, b’tali mod li jiġi identifikat fejn jista’ jsir titjib kemm fir-rigward ta’ SMEs innovattivi jew dawk li jkunu qed jaffaċċjaw problemi, partikolarment f’termini ta’ implimentazzjoni tad-DPI tagħhom;

47.

Jistenna b'ħerqa li jirċievi informazzjoni dwar l-inizjattivi nazzjonali eżistenti li jindirizzaw l-infurzar ċivili tad-DPI għall-SMEs sal-aħħar tal-2015; jilqa’ b’sodisfazzjon il-Green Paper li ġejja dwar il-ħtieġa għal azzjoni tal-Unjoni fil-ġejjieni bbażata fuq l-aħjar prattiki li jinsabu fl-iskemi finanzjati nazzjonalment li jgħinu lill-SMEs jinfurzaw id-DPI tagħhom;

48.

Jesprimi s-sodisfazzjon tiegħu dwar l-iżvilupp tal-attivitajiet tal-Osservatorju Ewropew tal-ksur tad-drittijiet tal- proprjetà intellettwali bħala appoġġ utli għar-riflessjoni għal dawk li jfasslu l-politika u għodda għall-ġbir u l-iskambju ta’ data u informazzjoni dwar il-forom kollha ta’ ksur tad-DPI;

49.

Jenfasizza li d-dmir tal-Uffiċċju għall-Armonizzazzjoni fis-Suq Intern (UASI) – li jikseb data li tiddokumenta ksur tad-DPI mill-industrija u li jiġġenera data u analiżi affidabbli tal-impatt reali tal-ksur fuq l-atturi ekonomiċi – għandu jkun parti mill-Pjan ta' Azzjoni ta' għaxar punti u tal-bażi għal azzjonijiet ulterjuri fis-setturi differenti l-aktar affettwati; f'dan ir-rigward, jistieden lill-Kummissjoni ttejjeb id-database tal-Għodda ta' Appoġġ għall-Intelligence fil-Ġlieda kontra l-Falsifikazzjoni (ACIST) żviluppata mill-UASI sabiex ikollha aċċess għal informazzjoni dwar dawk li jiffalsifikaw il-prodotti u u tiżgura li l-prodotti ffalsifikati ma jinxtrawx mill-awtoritajiet kontraenti;

50.

Jenfasizza li sabiex jinkiseb infurzar sinifikanti tad-DPI, l-informazzjoni sħiħa għandha tkun disponibbli u aċċessibbli rigward it-tip ta' DPI (pereżempju, il-privattiva, il-marka kummerċjali u d-dritt tal-awtur) li huma ta' relevanza f'kull sitwazzjoni, l-istatus tal-validità ta' dawn id-drittijiet u l-identità tas-sidien, inkluż f'forma ta' metadata fil-każ ta' fajls diġitali;

51.

Jistieden lill-Kummissjoni biex tagħmel użu sħiħ ta’ dejta miġbura mill-Osservatorju u dwar ir-riżultati tal-attivitajiet tal-Osservatorju, biex tislet konklużjonijiet u tipproponi soluzzjonijiet għat-titjib tal-infurzar tad-DPI li għandhom jintużaw minn dawk li jfasslu l-politika; jistieden lill-Kummissjoni biex tirrapporta lura lill-Parlament dwar dan fuq bażi regolari;

52.

Jinnota li t-taħriġ għall-iżvilupp tal-infurzar tad-DPI settorjali fuq livell nazzjonali huwa essenzjali, bħalma huwa r-rwol li l-Osservatorju se jkollu biex jgħin fit-taħriġ tal-awtoritajiet tal-Istati Membri u fl-iskambju tal-aħjar prattika, b’mod partikolari billi jippromwovi kampanji aċċessibbli b’mod diġitali li jagħtu valur għall-flus u jikkoordinawhom mal-aġenziji u l-korpi rilevanti;

53.

Jilqa’ t-twaqqif mill-Kummissjoni ta’ grupp ta’ esperti tal-infurzar tad-DPI, u jistieden lill-Kummissjoni sabiex tiżgura li l-Parlament, u fejn ikun meħtieġ, l-Osservatorju Ewropew dwar il-Ksur tad-Drittijiet tal-Propjetà Intellettwali, ikun involut aktar mill-qrib fil-ħidma tal-grupp u li jissejjaħ b’mod partikolari biex jibgħat esperti biex jattendu l-laqgħat tiegħu;

54.

Jilqa' l-pubblikazzjoni tar-rapport tal-Kummissjoni dwar l-applikazzjoni tad-Direttiva tal-Infurzar tad-DPI (10), filwaqt li jinnota li, f'ċerti każijiet, jistgħu jsiru biss konklużjonijiet limitati minħabba li, f’xi Stati Membri, it-traspożizzjoni tad-direttiva saret tard; jistieden lill-Kummissjoni biex tipprovdi analiżi ulterjuri tal-impatt tad-direttiva, b’mod partikolari fuq l-innovazzjoni u fuq l-iżvilupp tas-soċjetà tal-informazzjoni, kif jeżiġi l-Artikolu 18(1) tagħha u kif mitlub mill-Parlament Ewropew fir-riżoluzzjoni tiegħu msemmi hawn fuq tal-22 ta’ Settembru 2010; ifakkar, madankollu, li l-Kummissjoni identifikat numru ta’ aspetti oħra rigward l-infurzar tad-DPI, bħar-rwol tal-intermedjarji fil-ġlieda kontra l-infrazzjonijiet, li jista’ jkun utli wkoll fil-ġlieda kontra l-abbużi;

55.

Jieħu nota tar-rapport tal-Kummissjoni li jindika li d-Direttiva dwar l-Infurzar tad-DPI hija, f’xi każijiet, inadegwata għall-era diġitali u insuffiċjenti għall-ġlieda kontra l-ksur onlajn; Jistieden lill-Kummissjoni biex tħejji valutazzjoni dettaljata tal-limitazzjonijiet tal-qafas legali attwali fir-rigward tal-attivitajiet onlajn u, jekk ikun xieraq, bi proposti għall-adattament tal-qafas leġiżlattiv tal-UE għall-ambjent tal-internet; jinsisti li dawn il-proposti eventwali jkunu s-suġġett ta’ studju dettaljat dwar l-impatti tagħhom;

56.

Jieħu nota tas-sejba li interpretazzjonijiet diverġenti ta' ċerti dispożizzjonijiet tad-direttiva jirriżultaw f'differenzi fl-applikazzjoni tagħha fl-Istati Membri, u jistieden lill-Kummissjoni tieħu azzjoni biex issolvi l-problemi identifikati fir-rapport, inkluż permezz ta' kjarifika ulterjuri tad-direttiva;

57.

Itenni t-talba tiegħu għal strateġija komprensiva tad-DPI, inkluż qafas legali komprensiv fil-ġlieda kontra l-ksur tad-DPI adatti għall-ambjent onlajn, b’rispett sħiħ tad-drittijiet u l-libertajiet fundamentali, il-proċessi ġusti, il-proporzjonalità u l-protezzjoni tad-data; iqis li l-protezzjoni legali hija meħtieġa b’mod urġenti għall-kreazzjonijiet ġodda peress li dan se jinkoraġġixxi l-investiment u jwassal għal aktar innovazzjonijiet;

58.

Jenfasizza li kwalunkwe leġiżlazzjoni relatata mad-DPI trid tirrifletti l-iżvilupp tal-era diġitali filwaqt li jitqiesu l-ambjent onlajn u diversi mezzi ta' distribuzzjoni li jiggarantixxu approċċ bilanċjat li jirrappreżenta l-interessi tal-partijiet ikkonċernati kollha involuti u b'mod partikolari tal-konsumaturi u d-dritt tagħhom ta' aċċess għall-kontenut, waqt li fl-istess ħin jiġu promossi l-artisti, il-kreaturi u l-innovazzjoni fl-Ewropa;

59.

Itenni li jinħtieġ qafas modern tad-drittijiet tal-awtur favur il-kompetizzjoni u favur il-konsumatur, u jinħtieġ ukoll li dan il-qafas jappoġġja l-kreattività u l-innovazzjoni billi jiżgura ambjent protett, adegwat u sigur għall-inventuri u l-ħallieqa;

60.

Jenfasizza li l-industriji kulturali u kreattivi tal-Unjoni Ewropea li huma mutur għall-iżvilupp soċjali u ekonomiku kif ukoll għall-ħolqien ta’ impjiegi fl-Ewropa, filwaqt li jfakkar li l-kontribut notevoli tat-tkabbir ekonomiku, l-innovazzjoni u l-ħolqien tal-impjiegi fl-Unjoni jinħoloq ukoll mill-kreaturi, id-disinjaturi u l-istituzzjonijiet li jiddependu fuq l-eċċezzjonijiet u l-limitazzjonijiet għad-drittijiet tal-awtur; jenfasizza li kwalunkwe inizjattiva leġiżlattiva biex jiġi mmodernizzat id-dritt tal-awtur għandha tkun ibbażata fuq evidenza indipendenti rigward l-impatt fuq it-tkabbir u l-impjiegi (partikularment fir-rigward tal-SMEs fis-setturi kulturali u kreattivi), l-aċċess għall-għarfien u l-kultura, kif ukoll l-ispejjeż u l-benefiċċji potenzjali;

61.

Jinsisti dwar ir-rwol importanti tal-awtoritajiet tad-dwana, u l-kooperazzjoni internazzjonali fil-ġlieda kontra l-ksur tad-DPI f’kummerċ transkonfinali, u jenfasizza l-ħtieġa li tiġi appoġġjata u ffaċilitata l-ħidma tas-servizzi doganali f'kooperazzjoni reċiproka, billi jiġu ċċarati r-regoli operattivi, b’mod partikolari sabiex din il-ħidma tippermetti l-prestazzjoni effettiva tal-ispezzjonijiet tal-prodotti li jkunu fi tranżitu fit-territorju tal-UE;

62.

Jistieden lill-Kummissjoni biex, meta tkun qed timplimenta l-Pjan ta' Azzjoni dwar l-Infurzar tad-DPI, tqis l-inizjattivi relatati, speċjalment il-Pjan ta' Azzjoni Doganali tal-UE sabiex tiġġieled kontra l-ksur tad-DPI u l-istrateġija għall-ħarsien u l-infurzar tad-DPI f'pajjiżi terzi;

63.

Jistieden sorveljanza tas-suq imtejba, ġestjoni tar-riskju u l-iskambju tal-informazzjoni fost l-awtoritajiet doganali dwar il-kwistjonijiet li tqajmu fil-kuntest tal-infurzar tad-DPI mid-dwana, pereżempju fir-rigward tal-ħażna u tal-qerda ta’ prodotti illegali;

64.

Jenfasizza l-importanza ta’ kooperazzjoni mill-qrib u skambju ta’ informazzjoni u taħriġ xieraq tal-awtoritajiet doganali, l-awtoritajiet tas-sorveljanza tas-suq u l-awtoritajiet ġudizzjarji;

65.

Jenfasizza r-rwol kruċjali li jaqdu l-awtoritajiet pubbliċi fil-livelli kollha, fosthom dawk lokali, reġjonali u nazzjonali, permezz tal-akkwist pubbliku u ta’ xiri, u jfaħħar ir-rieda tal-Kummissjoni li tiżviluppa, tippromwovi u tippubblika gwida dwar l-aħjar prattiki biex l-awtoritajiet pubbliċi f'kull livell jevitaw li jixtru prodotti ffalsifikati;

66.

Jilqa’ l-Green Paper proposta tal-Kummissjoni dwar konsultazzjoni mal-partijiet interessati dwar l-impatt tal-fatturazzjoni b’lura u ta' skemi relatati biex jiġi indirizzat il-ksur tad-DPI fuq skala kummerċjali u sabiex tiġi vvalutata l-ħtieġa li jittieħdu azzjonijiet aktar konkreti f’dan il-qasam, kemm fil-kuntest onlajn kif ukoll f'dak offlajn; jemmen li l-introduzzjoni ta' dritt fl-UE kollha ta' 'fatturazzjoni b'lura' fuq l-oġġetti falsifikati mixtrija bla intenzjoni tista' tkun benefiċċju pożittiv għall-konsumaturi u tinkoraġġixxi lin-negozjanti jivverifikaw l-oġġetti qabel ma jbigħuhom;

67.

Jappoġġja l-enfasi fuq il-Pjan ta’ Azzjoni dwar l-importanza tal-ħidma mal-Istati Membri, l-iskambju tal-informazzjoni u tal-aħjar prattika, u l-koordinazzjoni tal-attivitajiet ta’ infurzar transkonfinali;

68.

Jenfasizza li sabiex tiġi stimulata l-innovazzjoni u l-kompetittività f’setturi bbażati fuq l-għarfien fl-Unjoni, b’mod kompatibbli mad-DPI, jeħtieġ li tiġi stimulata riċerka miftuħa u l-qsim tal-għarfien, li huma wkoll identifikati bħala elementi ewlenin fl-istrateġiji “Ewropa Globali” u “Ewropa 2020”;

69.

Jenfasizza l-ħtieġa ta' sistemi ta’ detezzjoni preċiżi li jwasslu għal interruzzjoni rapida ta’ attivitajiet li jiksru d-DPI fuq skala kummerċjali;

70.

Jirrimarka li l-introjtu ġġenerat permezz tal-użu tal-IPR jirrappreżenta sors importanti ta’ finanzjament estern għal proġetti ta’ riċerka, u għaldaqstant joffri forza mexxejja għall-innovazzjoni u l-iżvilupp u l-kooperazzjoni bejn l-universitajiet u l-intrapriżi;

71.

Jitlob li l-pjan ta’ azzjoni jiġi implimentat malajr, sabiex, jekk ikun meħtieġ, il-miżuri meħtieġa biex jiġu nfurzati l-IPR, b’mod partikolari fis-settur kulturali u kreattiv, ikunu jistgħu jiġu riveduti fil-futur qrib biex jitqiesu l-ħtiġijiet reali;

72.

Jistieden lill-Kummissjoni tevalwa l-implimentazzjoni ta’ kull waħda mill-azzjonijiet ippreżentati fil-Pjan ta' Azzjoni u biex tirrapporta lura dwarhom lill-Parlament sa mhux aktar tard minn Lulju 2016;

73.

Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill u lill-Kummissjoni, u lill-parlamenti u l-gvernijiet tal-Istati Membri.

4.11.2016   

MT

Il-Ġurnal Uffiċjali tal-Unjoni Ewropea

C 407/35

—

wara li kkunsidra r-riżoluzzjonijiet tiegħu tat-13 ta' Diċembru 2012 dwar ir-rakkomandazzjonijiet tal-Parlament Ewropew lill-Kunsill, lill-Kummissjoni u lis-Servizz Ewropew għall-Azzjoni Esterna dwar il-Ftehim ġdid UE-Russja (1), tat-12 ta' Settembru 2013 dwar il-pressjoni mir-Russja fuq il-pajjiżi tas-Sħubija tal-Lvant (fil-kuntest tas-Summit tas-Sħubija tal-Lvant li jmiss f'Vilnjus) (2), tas-6 ta' Frar 2014 dwar is-Summit UE-Russja (3) u tat-18 ta' Settembru 2014 dwar is-sitwazzjoni fl-Ukraina u s-sitwazzjoni attwali tar-relazzjonijiet UE-Russja (4) u tat-12 ta' Marzu 2015 dwar l-omiċidju tal-kap tal-oppożizzjoni Russu Boris Nemtsov u l-istat tad-demokrazija fir-Russja (5),

—

wara li kkunsidra l-konklużjonijiet u d-dikjarazzjonijiet tal-Kunsill Ewropew, tal-Kunsill Affarijiet Barranin u tal-mexxejja tal-G7 matul dawn l-aħħar 18-il xahar dwar is-sitwazzjoni fl-Ukraina u dwar ir-relazzjonijiet mar-Russja,

—

wara li kkunsidra l-ftehimiet milħuqa f'Minsk fil-5 u fid-19 ta' Settembru 2014 u fit-12 ta' Frar 2015 (6),

—

wara li kkunsidra d-Dikjarazzjoni tal-5 ta' Settembru 2014 tas-Summit tan-NATO f'Wales,

—

wara li kkunsidra r-riżoluzzjonijiet adottati mill-Assemblea Ġenerali tan-Nazzjonijiet Uniti fis-27 ta' Marzu 2014 (7) u mill-Kunsill tas-Sigurtà tan-Nazzjonijiet Uniti fis-17 ta' Frar 2015 (8),

—

wara li kkunsidra l-Artikolu 52 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Affarijiet Barranin (A8-0162/2015),

A.

billi l-UE ilha għal għexieren ta' snin tistinka biex tibni sħubija strateġika ta' benefiċċju reċiproku mar-Russja bbażata fuq valuri u prinċipji kondiviżi, bħad-demokrazija u l-istat tad-dritt, u fuq interessi komuni; billi l-UE tibqa' miftuħa għal tali relazzjoni u għal djalogu li jwassal għaliha, u tixtieq tirritorna għal relazzjoni kooperattiva mar-Russja, kemm-il darba l-awtoritajiet Russi jissodisfaw l-obbligi ġuridiċi u internazzjonali tagħhom;

B.

billi, b'reazzjoni għal u minkejja l-vjolazzjoni min-naħa tar-Russja tal-integrità territorjali Ġeorġjana fl-2008, l-okkupazzjoni kontinwa tar-reġjuni Ġeorġjani tal-Abkażja u r-reġjun ta' Tskhinvali/Ossezja tan-Nofsinhar, kif wkoll in-nuqqas ta' osservanza min-naħa tar-Russja tal-obbligi kollha tagħha skont il-ftehim dwar il-waqfien mill-ġlied tal-2008, l-UE għażlet mudell ta' kooperazzjoni akbar bħala mod kif jitkompla l-involviment mar-Russja, għall-benefiċċju reċiproku tagħhom; billi, minflok ma ttieħdu miżuri restrittivi, tnedew jew issaħħew sensiela ta' inizjattivi għal kooperazzjoni aktar b'saħħitha – bħalma huma l-ispazji komuni, is-Sħubija għall-Modernizzazzjoni, in-negozjati dwar Ftehim Ġdid UE-Russja u d-djalogu dwar id-Drittijiet tal-Bniedem;

C.

billi r-Russja – minħabba l-annessjoni illegali tal-Krimea, azzjoni li ġiet ikkundannata bil-qawwa mill-UE u li mhux ser tkun rikonoxxuta, u minħabba l-kunflitt armat kontra l-Ukraina, bil-parteċipazzjoni diretta u indiretta tas-servizzi militari u tas-sigurtà, u billi qiegħda deliberatament tiddestabbilizza dan il-pajjiż ġar sovran u indipendenti – qiegħda tagħmel ħsara kbira lir-relazzjoni tagħha mal-UE, inkwantu qiegħda tipperikola l-prinċipji bażiċi tas-sigurtà tal-Ewropa, ma tirrispettax il-fruntieri u tikser l-impenji internazzjonali tagħha, b'mod partikolari l-Karta tan-Nazzjonijiet Uniti, l-Att Finali ta' Ħelsinki, il-Memorandum ta' Budapest, il-Karta ta' Pariġi għal Ewropa Ġdida tal-1990, u t-Trattat bilaterali ta' Ħbiberija, Kooperazzjoni u Sħubija; billi s-sitwazzjoni umanitarja fil-Krimea u fl-Ukraina tal-Lvant marret għall-agħar b'mod konsiderevoli, b'diversi eluf ta' mwiet;

D.

billi r-Russja hija direttament jew indirettament, involuta f'għadd ta' “kunflitti ffriżati” fil-viċinat tagħha – fit-Transnistrija, fl-Ossezja tan-Nofsinhar, fl-Abkażja u f'Nagorno-Karabakh – li jikkostitwixxu impediment gravi għall-iżvilupp u għall-istabbiltà tal-pajjiżi ġirien kkonċernati u għall-avviċinament tagħhom mal-Unjoni Ewropea;

E.

billi l-Federazzjoni Russa għadha kemm niżżlet fuq lista sewda 89 politiku tal-UE – fosthom ex Membri jew Membri attwali tal-Parlament Ewropew – u uffiċjali, u ċaħditilhom id-dħul għar-Russja;

F.

billi r-Russja – kontra l-ispirtu ta' relazzjonijiet ta' bon viċinat, u bi ksur tad-dritt, tar-regoli u tal-istandards internazzjonali – abbażi ta' duttrina li skontha tikkunsidra ruħha li għandha d-dritt li tipproteġi l-kompatrijotti Russi barra l-pajjiż, ħadet deliberatament azzjonijiet immirati lejn id-destabbilizzazzjoni tal-ġirien tagħha permezz ta' embargi kummerċjali illegali jew konklużjoni ta' trattati ta' integrazzjoni ma' separatisti u reġjuni seċessjonisti;

G.

billi, b'reazzjoni għall-annessjoni illegali tal-Krimea u għall-gwerra ibrida mnedija mir-Russja kontra l-Ukraina, l-UE adottat serje gradwali ta' miżuri restrittivi; billi għadd ta' pajjiżi oħra adottaw sanzjonijiet simili b'reazzjoni għall-aggressjoni tar-Russja;

H.

billi relazzjoni kostruttiva bejn l-UE u r-Russja għandha tinstab fuq medda twila ta' żmien, fl-interess taż-żewġ partijiet u bil-għan li jiġu ffaċċjati sfidi globali komuni, bħat-tibdil fil-klima, żviluppi teknoloġiċi ġodda u l-ġlieda kontra t-terroriżmu, l-estremiżmu u l-kriminalità organizzata; billi l-kooperazzjoni bejn l-UE u r-Russja għandha riżultati pożittivi f'ċerti oqsma bħal pereżempju d-dimensjoni tat-Tramuntana u l-kooperazzjoni transkonfinali; billi r-Russja adottat atteġġjament kostruttiv fin-negozjati reċenti mal-Iran;

I.

billi dawn il-miżuri restrittivi u speċifiċi mhumiex diretti kontra l-poplu Russu iżda kontra ċerti individwi u impriżi konnessi mat-tmexxija Russa, li qegħdin jieħdu vantaġġ dirett mill-kriżi attwali mal-Ukraina, fis-settur ekonomiku u dak tad-difiża, u l-għan tagħhom huwa li jistimulaw bidla fil-politiki tal-gvern Russu lejn il-viċinat komuni, u azzjonijiet fih; billi s-sanzjonijiet relatati mad-destabbilizzazzjoni fl-Ukraina tal-Lvant għandhom jitneħħew malli r-Russja timplimenta bis-sħiħ id-dispożizzjonijiet tal-Ftehimiet ta' Minsk; billi dawn is-sanzjonijiet għandhom jiġu msaħħa kemm-il darba li r-Russja tagħżel li tkompli tiddestabbilizza, direttament jew indirettament, lill-Ukraina u li tippreġudika l-integrità territorjali tagħha; billi s-sanzjonijiet relatati mal-annessjoni illegali tal-Krimea se jibqgħu fis-seħħ sakemm il-peniżola tkun irritornata lill-Ukraina;

J.

billi l-Federazzjoni Russa, bħala membru sħiħ tal-Kunsill tal-Ewropa u tal-Organizzazzjoni għas-Sigurtà u l-Kooperazzjoni fl-Ewropa, u firmatarja tad-Dikjarazzjoni Universali tad-Drittijiet tal-Bniedem, impenjat ruħha li tħares il-prinċipji universali tad-demokrazija, l-istat tad-dritt u r-rispett għad-drittijiet tal-bniedem; billi l-UE tappoġġa bis-sħiħ l-adeżjoni u l-parteċipazzjoni tar-Russja f'diversi organizzazzjonijiet u fora internazzjonali, bħall-G8, il-G20 u d-WTO; billi l-inklużjoni tar-Russja f'dawn l-organi ħolqot tensjonijiet minħabba vjolazzjonijiet ripetuti ta' regoli min-naħa tar-Russja, pereżempju n-nuqqas ta' konformità mal-istandards u l-obbligi tad-WTO (bl-introduzzjoni ta' għadd ta' miżuri diskriminatorji kontra Stati Membri individwali tal-UE u pajjiżi oħra fil-viċinat tagħha), u n-nuqqas tagħha li timplimenta aktar minn elf sentenza tal-Qorti Ewropea tad-Drittijiet tal-Bniedem u li tiggarantixxi drittijiet bażiċi tal-bniedem; billi l-konsultazzjonijiet UE-Russja dwar id-drittijiet tal-bniedem mhumiex konklużivi jew ma wasslux għal riżultati konkreti;

K.

billi l-istat tad-dritt, bħala wieħed mill-prinċipji fundamentali tal-UE, jimplika mhux biss rispett għad-demokrazija u d-drittijiet tal-bniedem, iżda wkoll konformità mad-dritt internazzjonali, garanzija li l-liġi tiġi applikata u eżegwita b'mod ġust, kif ukoll l-indipendenza u l-imparzjalità tal-ġudikatura; billi dawn il-kundizzjonijiet mhumiex sodisfatti fir-Russja, fejn l-awtoritajiet jonqsu milli jiddefendu l-istat tad-dritt u jirrispettaw id-drittijiet fundamentali, u fejn id-drittijiet politiċi, il-libertajiet ċivili u l-libertà tal-midja ddeterjoraw f'dawn l-aħħar snin; billi reċentement ġiet adottata leġiżlazzjoni b'dispożizzjonijiet ambigwi li qegħdin jintużaw sabiex jiżdiedu aktar restrizzjonijiet fuq l-atturi tal-oppożizzjoni u tas-soċjetà ċivili; billi l-adozzjoni reċenti tal-liġi li tikkriminalizza l-hekk imsejħa “propaganda omosesswali” wasslet għal żieda fi vjolenza u diskors ta' inċitament għall-mibegħda omofobika u kontra persuni LGBTI, li l-awtoritajiet naqsu milli jindirizzaw; billi, wara l-annessjoni illegali tal-Krimea, ir-rispett għad-drittijiet tal-bniedem, inkluż il-libertà ta' espressjoni, ta' għaqda u ta' assoċjazzjoni, iddeterjora b'mod serju fil-peniżola tal-Krimea, bil-komunità tat-Tatari partikolarment affettwata;

L.

billi Alexei Navalny, mexxej prominenti tal-oppożizzjoni, ġie akkużat u kkundannat abbażi ta' provi ffalsifikati, u huwa sottopost għal intimidazzjoni u fastidju fuq bażi kontinwa, inkluż bil-priġunerija ta' ħuh; billi l-Partit tal-Progress li huwa jippresjedi qiegħed jinżamm milli jipparteċipa fl-elezzjonijiet parlamentari li jmiss; billi Nadiya Savchenko, Membru tar-Rada tal-Ukraina, tinsab detenuta illegalment fir-Russja, bi ksur tad-dritt internazzjonali;

M.

billi l-Indiċi dwar il-Perċezzjoni tal-Korruzzjoni tikklassifika lill-Federazzjoni Russa fil-136 post fost 175 li jfisser li r-Russja tqajjem tħassib serju rigward il-korruzzjoni u l-ħasil tal-flus internazzjonali, li hija theddida għall-ekonomiji Ewropej u għall-integrità tagħhom;

N.

billi r-Russja tuża b'mod attiv armi ibridi, iċċajpar deliberatament il-linji ta' bejn attività militari/paramilitari u l-attiviżmu politiku;

O.

billi l-Indiċi Dinji tal-Libertà tal-Midja tal-2014 tikklassifika lill-Federazzjoni Russa fil-148 post fost 180; billi twessa' u żdied b'mod sinifikanti l-finanzjament tal-mezzi tal-midja kkontrollati mill-Istat; billi l-inizjattivi u l-attivitajiet tad-difensuri tad-drittijiet tal-bniedem, l-organizzazzjonijiet indipendenti tas-soċjetà ċivili, l-avversarji politiċi, il-midja indipendenti u ċ-ċittadini ordinarji ta' spiss jiġu ristretti jew imxekkla; billi l-ispazju għal espressjoni ta' opinjonijiet indipendenti u pluralistiċi naqas u huwa kontinwament mhedded; billi l-Fond Ewropew għad-Demokrazija qiegħed jikkonċentra fuq il-kwistjoni tal-pluralità tal-midja Russa, u billi, flimkien mas-sħab tiegħu, huwa mistieden jiżviluppa inizjattivi ġodda tal-midja;

P.

billi azzjonijiet irresponsabbli ta' ġettijiet tal-gwerra Russi qrib l-ispazju tal-ajru tal-UE u l-Istati Membri tan-NATO jikkompromettu s-sikurezza ta' titjiriet ċivili u jistgħu jkunu ta' theddida għas-sigurtà tal-ispazju tal-ajru Ewropew; billi manuvri provokattivi militari fuq skala kbira twettqu mir-Russja fil-viċinanza immedjata tal-UE, filwaqt li theddid ta' attakki militari u saħansitra nukleari mir-Russja saru pubbliċi; billi r-Russja ssospendiet il-parteċipazzjoni tagħha fin-negozjati dwar it-Trattat dwar il-Forzi Armati Konvenzjonali fl-Ewropa, u tinsab fi ksur tat-Trattat għall-Eliminazzjoni tal-Missili b'Medda Medja (Trattat INF);

Q.

billi l-enerġija, li għandha rwol ċentrali u strateġiku fir-relazzjonijiet bejn l-UE u r-Russja, hija strument fundamentali tal-politika barranija Russa; billi r-reżiljenza tal-UE għal pressjonijiet esterni tista' tinkiseb permezz ta' diversifikazzjoni tal-provvista tal-enerġija u tnaqqis fid-dipendenza mir-Russja; billi l-UE għandha titkellem b'vuċi waħda u turi solidarjetà interna b'saħħitha fir-rigward tas-sigurtà tal-enerġija tagħha;

R.

billi l-Federazzjoni Russa ppromoviet b'mod attiv l-Unjoni Ekonomika Ewro-Asjatika; billi dan il-proġett ta' integrazzjoni ekonomika ma għandhiex titqies bħala kompetizzjoni għall-Unjoni Ewropea;

1.

Itenni li l-involviment dirett u indirett tar-Russja fil-kunflitt armat fl-Ukraina u l-annessjoni illegali tal-Krimea, kif ukoll il-vjolazzjoni min-naħa tar-Russja tal-integrità territorjali tal-Ġeorġja, u l-koerċizzjoni ekonomika u d-destabbilizzazzjoni politika tal-ġirien Ewropej tagħha, jikkostitwixxu vjolazzjoni deliberata tal-prinċipji demokratiċi u l-valuri fundamentali u tad-dritt internazzjonali; f'dan il-kuntest, l-UE ma tistax tipprevedi li tirritorna għaż-“żamma tal-istatus quo” u ma għandha l-ebda għażla ħlief li tipproċedi għal rivalutazzjoni kritika tar-relazzjonijiet tagħha mar-Russja, li tinkludi l-abbozzar, kemm jista' jkun malajr, ta' pjan ta' kontinġenza bis-setgħa tal-persważjoni u sabiex jikkumbatti l-politiki aggressivi u diviżivi tar-Russja, u ta' pjan komprensiv dwar ir-relazzjonijiet futuri tagħha ma' dak il-pajjiż u s-sħab Ewropej tal-Lvant tagħha; jissottolinja li r-riżoluzzjoni tal-kunflitt fil-Lvant tal-Ukraina tista' tkun biss ta' natura politika;

2.

Jisħaq fuq il-fatt li f'dan il-punt, ir-Russja, minħabba azzjonijietha fil-Krimea u fl-Ukraina tal-Lvant, ma tistax tibqa' tiġi ttrattata, jew ikkunsidrata, bħala “sieħba strateġika”; jirrimarka li sħubijiet strateġiċi għandhom ikunu msejsa fuq il-fiduċja reċiproka u r-rispett tad-dritt internazzjonali, li huwa bbażat fuq id-demokrazija, is-sovranità statali u l-libertà tal-għażla tal-ordinament kostituzzjonali intern u l-orjentamenti ta' politika barranija, l-integrità territorjali tal-Istat, u r-rispett għall-istat tad-dritt, id-drittijiet tal-bniedem, u l-prinċipji tad-diplomazija u l-kummerċ internazzjonali;

3.

Jinsab serjament imħasseb dwar il-fatt li r-Russja issa apertament ħadet pożizzjoni u taġixxi bħala rivali tal-komunità demokratika internazzjonali u l-ordinament ġuridiku tagħha, b'mod partikolari billi tfittex li tirridefinixxi bil-forza l-fruntieri fi ħdan l-Ewropa; jinsab allarmat biż-żieda ta' atmosfera ta' mibegħda diretta kontra l-attivisti tal-oppożizzjoni, id-difensuri tad-drittijiet tal-bniedem, il-minoranzi u l-pajjiżi tal-viċinat, u d-deterjorament fis-sitwazzjoni tad-drittijiet tal-bniedem u l-istat tad-dritt fir-Russja; jikkundanna l-intimidazzjoni fuq vuċijiet kritiċi permezz ta' vjolenza, proċessi, priġuneriji u miżuri oħra użati mill-Istat;

4.

Jikkundanna l-miżura arbitrarja li politiċi u uffiċjali tal-UE huma pprojbiti milli jidħlu fit-territorju Russu u jenfasizza li t-tmexxija Russa qiegħda tikser ripetutament id-dritt internazzjonali u qiegħda tikser l-istandards universali u timpedixxi t-trasparenza; iqis dan l-att bħala kontroproduċenti u ta' ħsara għall-kanali ta' komunikazzjoni bejn l-Unjoni Ewropea u r-Russja li diġà huma dgħajfa; jenfasizza li l-politiċi u l-uffiċjali tal-UE milquta mill-miżura għandhom jiġu infurmati bir-raġunijiet għala huma mċaħħda milli jidħlu fit-territorju Russu u għandu jkollhom id-dritt li jirrikorru f'appell ta' din id-deċiżjoni quddiem qorti indipendenti;

5.

Huwa tal-opinjoni li, fuq terminu twil, relazzjoni kostruttiva u prevedibbli bejn l-UE u r-Russja hija possibbli u mixtieqa għall-benefiċċju reċiproku tagħhom, speċjalment fid-dawl tar-relazzjonijiet eżistenti politiċi, kummerċjali, fit-trasport u fl-enerġija, kuntatti interpersonali inkluż permezz tal-Erasmus+ u l-Passi Komuni (9), kooperazzjoni transkonfinali, it-tibdil fil-klima, l-ambjent, u kooperazzjoni settorjali, meta jitqies li sanzjonijiet reċiproċi huma ta' ħsara għaż-żewġ ekonomiji, li sfidi u interessi komuni fix-xena dinjija għandhom jiġu indirizzati, u li n-natura diviżiva tal-perċezzjoni tas-sigurtà fl-Ewropa tista' tingħeleb permezz ta' aktar djalogu; jilqa', f'dan ir-rigward, l-eżitu pożittiv tal-kooperazzjoni UE-Russja f'diversi oqsma, bħalma huma l-ġlieda kontra t-terroriżmu, l-estremiżmu u l-kriminalità organizzata, is-sħubija tad-dimensjoni tat-Tramuntana, it-taħdidiet nukleari mal-Iran, u l-Proċess ta' Paċi fil-Lvant Nofsani; jistieden lir-Russja tipparteċipa b'mod kostruttiv sabiex tinstab soluzzjoni għall-kunflitt fis-Sirja;

6.

Jissottolinja li r-relazzjonijiet UE-Russja għandhom minn issa 'l quddiem ikunu bbażati fuq ir-rispett tad-dritt internazzjonali u djalogu, li permezz tiegħu l-UE tkun lesta li timpenja ruħha u tniedi mill-ġdid kooperazzjoni mal-awtoritajiet f'Moska f'għadd ta' oqsma speċifiċi ta' interess komuni; jissottolinja li l-issoktar ta' kooperazzjoni għandha tiġi prevista bil-kundizzjoni li r-Russja tirrispetta l-integrità territorjali u s-sovranità tal-Ukraina, inkluża l-Krimea, timplimenta bis-sħiħ il-Ftehimiet ta' Minsk (li jinkludu kontroll sħiħ tal-fruntieri mill-awtoritajiet Ukraini, irtirar mingħajr kundizzjonijiet ta' truppi u armi Russi, u waqfien immedjat tal-għoti ta' għajnuna lill-gruppi ribelli, u tieqaf milli tiddestabbilizza attivitajiet militari u ta' sigurtà fuq il-fruntieri tal-Istati Membri tal-UE; jenfasizza li l-OSKE wriet li hija struttura kapaċi tagħti kontribut lir-riżoluzzjoni tal-kriżijiet; jenfasizza li tali kooperazzjoni potenzjalment imġedda ma għandhiex issir għad-detriment ta' prinċipji internazzjonali, valuri Ewropej, standards u impenji internazzjonali; jenfasizza li l-UE għandha tiddefinixxi b'mod ċar kemm x'tistenna mir-Russja, speċjalment fir-rigward tar-rispett tad-dritt internazzjonali u tal-impenji kuntrattwali kif ukoll li taġixxi bħala sieħba prevedibbli, u dwar il-miżuri li se jittieħdu wara l-31 ta' Diċembru 2015, jekk ir-Russja tonqos milli tonora l-impenji tagħha (jew qabel dik id-data f'każ ta' żviluppi serji fuq il-post), u l-issoktar tal-kooperazzjoni li hija tkun lesta li toffri f'każ ta' konformità; jenfasizza li kooperazzjoni bħal din għandha taderixxi għalkollox mal-istandards internazzjonali tad-drittijiet tal-bniedem;

7.

Ifaħħar is-solidarjetà u l-għaqda murija mill-Istati Membri fil-kuntest tal-annessjoni illegali Russa tal-Krimea u l-involviment dirett fil-gwerra fl-Ukraina, li tippermetti l-adozzjoni u estensjoni ulterjuri ta' miżuri ta' risposta, u l-konnessjoni tagħhom mal-implimentazzjoni sħiħa tal-Ftehimiet ta' Minsk; jistieden lill-Istati Membri jqisu il-preservazzjoni ta' din l-għaqda bħala prijorità assoluta u sabiex jastjenu minn relazzjonijiet u ftehimiet bilaterali li jistgħu jkunu ta' dannu għal din l-għaqda jew jiġu interpretati b'dan il-mod; itenni li l-għaqda fl-azzjoni u s-solidarjetà fost l-Istati Membri u mal-pajjiżi kandidati hija essenzjali biex tkun żgurata l-kredibilità, il-leġittimità u l-effikaċja tal-politiki tal-UE u l-kapaċità tagħha li tirreżisti l-isfidi u l-pressjonijiet esterni, filwaqt li fl-istess ħin trawwem relazzjoni aktar profonda u kooperattivi mal-pajjiżi tas-Sħubija tal-Lvant;

8.

Jissottolinja, f'dan ir-rigward, li l-approfondiment tal-integrazzjoni tal-UE u l-koerenza bejn il-politiki interni u esterni tagħha hija essenzjali għal politika esterna u ta' sigurtà tal-UE aktar koerenti, effikaċi u ta' suċċess, inkluż fil-konfront tar-Russja; jistieden, għalhekk, lill-Istati Membri jkomplu u jintensifikaw l-isforzi tagħhom, għall-eliminazzjoni effikaċi tan-nuqqas ta' qbil fit-teħid ta' deċiżjonijiet u, kif ukoll flimkien ma' pajjiżi kandidati, għall-konsolidament ta' politiki komuni, b'mod partikolari fl-oqsma tal-kummerċ, tas-servizzi u tranżazzjonijiet finanzjarji, tal-migrazzjoni, tal-enerġija, tal-ġestjoni tal-fruntieri esterni, tal-informazzjoni u taċ-ċibersigurtà;

9.

Itenni l-appell tiegħu lill-UE u lill-Istati Membri sabiex jagħmlu użu sħiħ mid-dispożizzjonijiet u mill-istrumenti tat-Trattat ta' Lisbona, bil-ħsieb li tiġi msaħħa n-natura strateġika li tħares 'il quddiem tal-politika estera u ta' sigurtà komuni Ewropea; jinsab konvint bil-qawwa, barra minn hekk, li r-rwol ċentrali tad-drittijiet tal-bniedem f'kull aspett tal-azzjoni esterna tal-UE huwa prerekwiżit għall-garanzija tar-rwol rispettat u kredibbli tagħha bħala attur globali;

10.

Itenni l-konvinzjoni tiegħu li l-politika dwar l-enerġija hija element sinifikanti tal-politika esterna tal-UE; jappoġġa bis-sħiħ, għalhekk, il-ħolqien malajr ta' Unjoni tal-Enerġija Ewropea b'saħħitha, b'mod speċifiku l-interkonnessjoni ta' netwerks nazzjonali tal-enerġija sabiex titnaqqas b'mod konsiderevoli d-dipendenza ta' Stati Membri individwali mill-fornituri ta' enerġija esterni, b'mod partikolari r-Russja; jinsab konvint bil-qawwa li l-isfidi għas-solidarjetà Ewropea, u l-vulnerabbiltà tagħha, u l-esponiment tal-Istati Membri individwali u l-pajjiżi kandidati, għall-użu tal-enerġija bħala pedina fin-negozjati politiċi u diplomatiċi jista' jiġi miġġieled biss b'mod effikaċi permezz tal-applikazzjoni sħiħa ta' leġiżlazzjoni tal-UE dwar l-enerġija, u b'mod partikolari l-implimentazzjoni tat-tielet pakkett dwar l-enerġija u t-tlestija ta' suq intern tal-enerġija liberu, trasparenti, integrat u sinkronizzat, effiċjenti fl-użu tal-enerġija – bi proporzjon adegwat ta' sorsi ta' enerġija rinnovabbli — u reżiljenti, bi provvista diversifikata, f'liema każ il-leġiżlazzjoni dwar il-kompetizzjoni għandha tapplikaw mingħajr ebda ekwivoku; jistieden lill-UE tipprovdi appoġġ adegwat lill-Partijiet Kontraenti tal-Komunità tal-Enerġija li impenjaw ruħhom biex jimplimentaw l-acquis tal-UE dwar l-enerġija, bil-ħsieb li jsaħħu l-pożizzjoni ta' negozjati tagħhom fil-konfront tal-fornituri esterni tal-enerġija;

11.

Jisħaq fuq il-ħtieġa u r-rilevanza tas-sospensjoni tal-kooperazzjoni mar-Russja fis-settur tad-difiża fid-dawl tal-attitudni aggressiva tagħha, u jistieden lill-Istati Membri u lill-pajjiżi kandidati jastjenu milli jieħdu kwalunkwe deċiżjoni li tista' tikkomprometti din il-pożizzjoni unanima; huwa għalhekk tal-fehma li, minkejja n-natura bilaterali tagħhom, il-ftehimiet fil-qasam tal-kooperazzjoni tad-difiża mar-Russja għandhom ikunu vvalutati bir-reqqa fil-livell tal-UE, bil-għan li jiġi definit approċċ konsistenti u xieraq; jikkonstata l-importanza tal-kooperazzjoni bejn l-UE u n-NATO f'dan ir-rigward;

12.

Jinsab mħasseb ħafna bir-restrizzjonijiet li qegħdin jiżdiedu fuq il-libertà tal-midja u tal-internet, iż-żieda fil-kontroll tal-midja online, l-użu tal-koerċizzjoni biex jitrażżan ir-rappurtar imparzjali u t-tgħawwir tal-istandards ġurnalistiċi fir-Russja, kif ukoll iż-żieda tal-monopolju fl-informazzjoni disponibbli għall-pubbliku Russofonu barra mill-pajjiż mill-midja statali; jikkundanna l-projbizzjoni fuq ix-xandir ta' stazzjonijiet televiżivi Ukraini u tat-Tatari fil-Krimea;

13.

Iġedded l-appell tiegħu għal żvilupp ta' kapaċitajiet analitiċi u ta' monitoraġġ imsaħħa tal-propoganda Russa, speċjalment bil-lingwa Russa, sabiex ikunu jistgħu jidentifikaw u jirreaġixxu malajr u b'mod xieraq, kontra informazzjoni deliberatament partiġjana mifruxa f'diversi lingwi tal-UE; jistieden lill-Kummissjoni talloka mingħajr dewmien finanzjament adegwat għal proġetti konkreti li għandhom l-għan li jiġġieldu l-propoganda Russa u d-diżinformazzjoni fi ħdan l-UE u barra minnha, u li jipprovdu informazzjoni oġġettiva għall-pubbliku ġenerali fil-pajjiżi tas-Sħubija tal-Lvant, u biex tiżviluppa strumenti xierqa għal komunikazzjoni strateġika; jilqa', f'dan ir-rigward, il-konklużjonijiet tal-Kunsill Ewropew tal-20 ta' Marzu 2015 dwar pjan ta' azzjoni kontra kampanji ta' diżinformazzjoni; jistieden lill-Kummissjoni u lill-Istati Membri jfasslu wkoll mekkaniżmu koordinat għat-trasparenza u għall-ġbir, monitoraġġ u rappurtar tal-għajnuna finanzjarja, politika jew teknika pprovduta mir-Russja lill-partiti politiċi u lill-organizzazzjonijiet oħra fi ħdan l-UE, bil-ħsieb li jivvaluta l-involviment u l-influwenza tagħha fuq il-ħajja politika u l-opinjoni pubblika fl-UE u fil-pajjiżi ġirien fil-Lvant, u sabiex tieħu miżuri xierqa;

14.

Huwa mħasseb ħafna dwar it-tendenza reċenti tal-midja Russa, ikkontrollata mill-Istat, li terġa' tikteb u tinterpreta avvenimenti storiċi tas-seklu XX, bħalma huma l-iffirmar tal-Patt Molotov-Ribbentrop u l-protokolli sigrieti tiegħu, kif ukoll r-rikors għal narrativa storika selettiva għal finijiet ta' propaganda politika attwali;

15.

Jinsab imħasseb ħafna bil-kuntatti intensivi u bil-kooperazzjoni, ittollerati mit-tmexxija Russa, bejn partiti populisti, faxxisti u tal-lemin estrem Ewropej minn naħa, u gruppi nazzjonalistiċi fir-Russja min-naħa l-oħra; jirrikonoxxi li din tirrappreżenta periklu għall-valuri demokratiċi u l-istat tad-dritt fl-UE; jistieden, f'dan ir-rigward, lill-istituzzjonijiet tal-UE u lill-Istati Membri jieħdu azzjoni kontra din it-theddida emerġenti ta' “Internazzjonali Nazzjonalista”;

16.

Jinsab mħasseb ħafna bl-appoġġ tar-Russja u bil-finanzjament ta' partiti estremisti u radikali fl-Istati Membri tal-UE; iqis il-laqgħa reċenti f'San Pietruburgu tal-partiti tal-lemin estrem bħala insult għall-memorja ta' miljuni ta' Russi li ssagrifikaw ħajjithom sabiex isalvaw id-dinja min-Nażiżmu;

17.

Jistieden lill-UE tagħti appoġġ lill-proġetti mmirati biex jippromwovu u jiżviluppaw standards ġurnalistiċi għoljin, libertà tal-midja u informazzjoni imparzjali u affidabbli fir-Russja, u li jikkumbattu l-propaganda fi ħdan l-UE u l-pajjiżi tas-Sħubija tal-Lvant; jistieden lill-Kummissjoni tagħmel disponibbli finanzjament adegwat għall-inizjattivi li qegħdin jiżviluppaw midja Russofona alternattiva għall-midja Russa kkontrollata mill-Istat, sabiex jipprovdu lill-pubbliku Russofonu b'sorsi ta' informazzjoni kredibbli u indipendenti;

18.

Itenni li rispett bla kompromessi għall-istat tad-dritt huwa prinċipju ewlieni u fundamentali tal-UE, u jappella għall-applikazzjoni stretta, rapida u mingħajr kundizzjonijiet tiegħu f'każ ta' kwalunkwe ksur tar-regoli; jistieden lill-Kummissjoni tapplika bl-istess determinazzjoni l-prinċipju ta' kompetizzjoni ħielsa u ġusta fis-suq uniku, inkluż fil-proċedimenti kontra Gazprom; huwa tal-fehma li l-UE u l-Istati Membri jridu jagħmlu aktar enfasi fuq il-ħtieġa li r-Russja tindirizza is-sħubija tagħha fid-WTO b'mod kostruttiv u sabiex tikkonforma bis-sħiħ mal-impenji sussegwenti, inkluż billi ttemm restrizzjonijiet inġustifikati għall-kummerċ u tipprovdi aċċess mhux diskriminatorju għas-swieq tagħha;

19.

Jistieden lir-Russja tikkoopera bis-sħiħ mal-komunità internazzjonali dwar l-investigazzjoni dwar it-twaqqigħ tat-titjira MH17, u jikkundanna kwalunkwe tentattiv jew deċiżjoni sabiex tingħata amnestija jew iddewwem il-prosekuzzjoni ta' dawk identifikati bħala responsabbli; itenni l-istedina tiegħu lir-Russja tagħti lura minnufih il-fdalijiet u l-kaxxi s-suwed kollha tal-ajruplan tal-Gvern Pollakk li kkraxxja fi Smolensk; jistieden lill-istituzzjonijiet kollha tal-UE jqajmu dawn it-talbiet f'kull kuntatt bilaterali mal-awtoritajiet Russi;

20.

Jistieden lill-Gvern tal-Federazzjoni Russa jirrikonoxxi l-portata u l-gravità tal-problema ta' vjolenza u fastidju kontra persuni LGBTI fir-Russja, u li jimpenja ruħu li jieħdu passi biex jintemmu dawn l-abbużi u li jħassar id-dispożizzjonijiet tal-Liġi Nru 135-FŻ tad-29 ta' Ġunju 2013 (il-liġi dwar il-“propaganda omosesswali”) li jipprojbixxu d-distribuzzjoni ta' informazzjoni dwar relazzjonijiet LGBTI; jistieden lis-SEAE, lill-Kummissjoni u lill-Istati Membri tal-UE jqajmu l-kwistjoni tal-omofobija u l-vjolenza kontra persuni u attivisti LGBTI f'laqgħat ma' uffiċjali Russi rilevanti, inkluż fl-ogħla livell; jistieden lis-SEAE, lill-Kummissjoni u lill-Istati Membri tal-UE – f'konformità mal-linji gwida tal-UE ta' Ġunju 2013 – jippromwovu u jipproteġu t-tgawdija tad-drittijiet tal-bniedem kollha minn persuni LGBTI, jikkontribwixxu għall-ġlieda kontra kwalunkwe forma ta' vjolenza kontra persuni LGBTI billi jfittxu għajnuna u rimedju għal vittmi ta' tali vjolenza, u billi jappoġġaw inizjattivi tas-soċjetà ċivili u governattivi għall-monitoraġġ ta' każijiet ta' vjolenza, u billi jedukaw il-persunal inkarigat mill-eżekuzzjoni tal-liġi;

21.

Filwaqt li jqis l-arrikkiment ta' soċjetà permezz tal-iżvilupp ta' soċjetà ċivili ġenwina u indipendenti, jesprimi tħassib serju dwar l-istat tad-drittijiet tal-bniedem li dejjem qed immur għall-agħar, inklużi d-drittijiet tal-libertà ta' espressjoni, ta' assoċjazzjoni u ta' għaqda u d-drittijiet ta' persuni LGBTI, u l-istat tad-dritt fir-Russja u fil-Krimea wara l-annessjoni illegali tagħha; jikkundanna bil-qawwa t-trażżin kontinwu tal-gvern ta' fehmiet dissidenti billi jimmira lejn l-organizzazzjonijiet mhux governattivi indipendenti permezz tal-hekk imsejħa “liġi tal-aġenti barranin” u t-trażżin persistenti u multiformi ta' attivisti, avversarji politiċi u ta' dawk li jikkritikaw ir-reġim; jiġbed l-attenzjoni b'mod partikolari għall-qtil ta' Anna Politkovskaya, Natalya Estemirova, Boris Nemtsov u Sergey Magnitsky, Alexander Litvinenko u oħrajn; jitlob li kull qtil ta' attivisti politiċi, ġurnalisti u infurmaturi jiġi investigat kif suppost u indipendentement, li dawk responsabbli jitressqu quddiem il-ġustizzja bħala sinjal tal-ġlieda kontra l-impunità mingħajr kompromessi, u li jitqiesu miżuri restrittivi mmirati jekk l-investigazzjonijiet imwettqa mhumiex konformi mal-istandards internazzjonali; itenni t-talba tiegħu lill-Kunsill biex jonora l-impenn tiegħu li jiddefendi dawn il-prinċipji, u li jadotta, fuq proposta li għandha tiġi ppreżentata mingħajr dewmien mill-VP/RGħ, miżuri restrittivi għall-uffiċjali involuti fil-każ dokumentat sew ta' Magnitsky; jissottolinja li l-obbligu tar-Russja li tikkonforma mad-drittijiet tal-bniedem u mal-istandards tal-istat tad-dritt joħroġ direttament mis-sħubija tagħha man-NU, mal-Kunsill tal-Ewropa u mal-OSKE;

22.

jenfasizza l-importanza ta' appoġġ kontinwu politiku u finanzjarju għall-attivisti tas-soċjetà ċivili indipendenti, id-difensuri tad-drittijiet tal-bniedem, il-bloggers, il-midja indipendenti, akkademiċi li jikkritikaw u personaġġi pubbliċi u NGOs, bil-għan li jiġu promossi l-valuri demokratiċi, il-libertajiet fundamentali u d-drittijiet tal-bniedem fir-Russja u fil-Krimea okkupata; jistieden lill-Kummissjoni tipprogramma għajnuna finanzjarja lis-soċjetà ċivili Russa aktar ambizzjuża mill-istrumenti finanzjarji esterni eżistenti; iħeġġeġ lill-UE tiddjaloga mal-uffiċjali u mal-organizzazzjonijiet tas-soċjetà ċivili Russi li huma lesti jiżviluppaw viżjoni tar-relazzjonijiet politiċi u diplomatiċi mal-UE bbażati fuq sħubija u kooperazzjoni; jissottolinja l-ħtieġa li jkunu promossi, kemm jista' jkun, kuntatti interpersonali u sabiex jinżammu, minkejja l-istat attwali tar-relazzjonijiet, djalogu u kooperazzjoni b'saħħithom bejn l-UE u l-istudenti u r-riċerkaturi Russi, bejn is-soċjetajiet ċivili u bejn l-awtoritajiet lokali, bil-ħsieb li tittaffa t-tensjoni u ttejjeb il-fehim reċiproku;

23.

Jistieden lill-Kummissjoni tipproponi leġiżlazzjoni li tiżgura t-trasparenza sħiħa tal-finanzjament politiku u l-finanzjament tal-partiti politiċi fl-UE skont ir-rakkomandazzjoni tal-Kunsill Ewropew fir-rigward b'mod partikolari ta' partijiet interessati politiċi jew ekonomiċi esterni għall-UE;

24.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lis-Servizz Ewropew għall-Azzjoni Esterna, lill-Gvern u lill-Parlament tal-Federazzjoni Russa u lill-gvernijiet u lill-parlamenti tal-pajjiżi tas-Sħubija tal-Lvant.

4.11.2016   

MT

Il-Ġurnal Uffiċjali tal-Unjoni Ewropea

C 407/42

—

wara li kkunsidra r-Regolament (UE, Euratom) Nru 883/2013 tal-Parlament Ewropew u tal-Kunsill tal-11 ta’ Settembru 2013 dwar investigazzjonijiet immexxija mill-Uffiċċju Ewropew Kontra l-Frodi (OLAF) u li jħassar ir-Regolament tal-Parlament Ewropew u tal-Kunsill (KE) Nru 1073/1999 u r-Regolament tal-Kunsill (Euratom) Nru 1074/1999 (1),

—

wara li kkunsidra d-deċiżjoni tiegħu tad-29 ta' April 2015 dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2013, Taqsima III – Il-Kummissjoni u l-aġenziji eżekuttivi (2),

—

wara li kkunsidra d-deċiżjoni tiegħu tat-3 ta' April 2014 dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2012, Taqsima III – Il-Kummissjoni u l-aġenziji eżekuttivi (3),

—

wara li kkunsidra r-riżoluzzjoni tiegħu tat-3 ta’ Lulju 2013 dwar ir-Rapport Annwali 2011 dwar Il-protezzjoni tal-interessi finanzjarji tal-UE – Il-ġlieda kontra l-frodi (4),

—

wara li kkunsidra r-riżoluzzjoni tiegħu tal-11 ta’ Marzu 2015 dwar ir-Rapport Annwali 2013 dwar Il-protezzjoni tal-interessi finanzjarji tal-UE – Il-ġlieda kontra l-frodi (5),

—

wara li kkunsidra r-Rapport Annwali tal-Attività 2014 tal-Kumitat ta' Sorveljanza tal-OLAF (minn issa 'l quddiem “il-KS”),

—

wara li kkunsidra l-Opinjoni Nru 4/2014 tal-KS, bl-isem “Kontroll tad-dewmien tal-investigazzjonijiet immexxija mill-Uffiċċju Ewropew ta’ Kontra l-Frodi”,

—

wara li kkunsidra r-reazzjoni tal-OLAF għall-Opinjoni Nru 4/2014 tal-KS,

—

wara li kkunsidra l-Opinjoni Nru 5/2014 tal-KS, bl-isem “Ir-rappurtar estern tal-OLAF dwar id-dewmien tal-investigazzjonijiet”,

—

wara li kkunsidra r-reazzjoni tal-OLAF għall-Opinjoni Nru 5/2014 tal-KS,

—

wara li kkunsidra r-Rapport Nru 1/2014 tal-KS, bl-isem “Is-salvagwardja tal-indipendenza investigattiva tal-OLAF”,

—

wara li kkunsidra l-Opinjoni Nru 2/2014 tal-KS, bl-isem “L-implimentazzjoni mill-OLAF tar-rakkomandazzjonijiet tal-Kumitat ta' Sorveljanza”,

—

wara li kkunsidra r-Rapport Nru 3/2014 tal-KS, bl-isem “Ftuħ ta’ każijiet fl-OLAF fl-2012”,

—

wara li kkunsidra r-reazzjoni tal-OLAF għar-Rapport Nru 3/2014 tal-KS,

—

wara li kkunsidra n-Nota tal-KS dwar l-Analiżi tal-Abbozz tal-Prijoritajiet tal-Politika ta’ Investigazzjoni tal-OLAF għall-2015 tal-Kumitat ta' Sorveljanza,

—

wara li kkunsidra r-Rapport Annwali tal-Attività 2013 tal-KS,

—

wara li kkunsidra l-Opinjoni Nru 2/2013 tal-KS, bl-isem “It-twaqqif ta’ proċedura interna tal-OLAF għall-ilmenti”,

—

wara li kkunsidra l-Opinjoni Nru 1/2014 tal-KS, bl-isem “Il-Prijoritajiet tal-Politika ta’ Investigazzjoni tal-OLAF”,

—

wara li kkunsidra l-Opinjoni Nru 2/2014 tal-KS, bl-isem “L-għażla tal-każijiet fl-OLAF”,

—

wara li kkunsidra l-osservazzjonijiet tal-KS dwar il-proċeduri ta’ investigazzjoni fl-OLAF,

—

wara li kkunsidra r-Rakkomandazzjonijiet tal-2012 tal-KS,

—

wara li kkunsidra d-dokument tal-KS bl-isem “Missjoni, kompetenzi u objettivi tal-Kumitat ta' Sorveljanza tal-Uffiċċju Ewropew ta’ Kontra l-Frodi – Reviżjoni ta' nofs il-perjodu (2014-2015)”,

—

wara li kkunsidra l-Arranġamenti ta' Ħidma tal-KS mal-OLAF,

—

wara li kkunsidra l-mistoqsijiet lill-Kummissjoni u lill-Kunsill dwar ir-rapport annwali 2014 tal-Kumitat ta' Sorveljanza tal-OLAF (O-000060/2015 – B8-0553/2015, O-000061/2015 – B8-0554/2015 u O-000066/2015 – B8-0555/2015),

—

wara li kkunsidra l-Artikolu 128(5) u l-Artikolu 123(4) tar-Regoli ta' Proċedura tiegħu,

A.

billi fir-Rapport Annwali tal-Attività 2014 tiegħu l-Kumitat ta’ Sorveljanza (KS) tal-OLAF innota li waqt ir-riorganizzazzjoni tal-OLAF (fl-1 ta’ Frar 2012), infetħu 423 każ fl-istess jum permezz ta’ deċiżjoni unika tad-Direttur Ġenerali tal-OLAF (DĠ tal-OLAF); billi, abbażi tal-analiżi tiegħu, il-KS ikkonkluda li (i) l-OLAF ma mexxa l-ebda valutazzjoni xierqa tal-informazzjoni li daħlet għall-ebda wieħed mill-każijiet analizzati mill-KS, (ii) fil-maġġoranza l-kbira tal-każijiet ma kien hemm l-anqas ħjiel ta’ xi attività ta' valutazzjoni, u (iii) id-DĠ tal-OLAF fetaħ il-każijiet kollha inkwistjoni mingħajr ma stabbilixxa minn qabel li kien hemm suspett serju biżżejjed li kienu twettqu frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni – u dan imur kontra r-rekwiżit ġuridiku għall-ftuħ ta' investigazzjoni tal-OLAF li kien fis-seħħ f’dak iż-żmien;

B.

billi l-KS, fil-komunikazzjonijiet tiegħu lill-istituzzjonijiet tal-UE, irrimarka li minkejja l-obbligu ċar stabbilit fl-Artikolu 17(5) tar-Regolament (UE, Euratom) Nru 883/2013, id-DĠ tal-OLAF ma rrappurtax lill-KS fl-2014 dwar dawk ir-rakkomandazzjonijiet għall-OLAF li ma ġewx implimentati;

C.

billi fl-ewwel nofs tal-mandat tiegħu l-KS ħareġ 50 rakkomandazzjoni lill-OLAF, li minnhom tmienja biss ġew implimentati għalkollox, sitta ġew implimentati parzjalment, waħda hija pendenti, 20 ma ġewx implimentati, u billi fi 15-il każ il-KS ma kienx f’pożizzjoni li jivverifika l-implimentazzjoni minħabba li ma kienx hemm biżżejjed informazzjoni sostantiva;

D.

billi l-KS – fin-nota tiegħu dwar l-abbozz tal-Prijoritajiet tal-Politika ta’ Investigazzjoni tal-OLAF għall-2015 – osserva li l-OLAF ma kienx qies it-tliet rakkomandazzjonijiet li saru fl-Opinjoni tal-KS Nru 1/2014: (i) id-DĠ tal-OLAF ma kienx ippubblika linji gwida dwar l-applikazzjoni tal-prinċipji tal-għażla li jirriżultaw mir-Regolament (UE, Euratom) Nru 883/2013 (użu effiċjenti tar-riżorsi, proporzjonalitá, sussidjarjetà/valur miżjud) u, minflok ma eżamina mill-ġdid l-indikaturi finanzjarji biex jadattahom għar-realtà tal-programmi ta’ nfiq, kien abolixxihom kompletament; (ii) l-Abbozz tal-Prijoritajiet tal-Politika ta’ Investigazzjoni għall-2015 deher li kien qed jieħu inkunsiderazzjoni għadd ta' dokumenti minn partijiet ikkonċernati, iżda ma jidher li sar l-ebda djalogu mal-partijiet ikkonċernati fir-rigward tal-indikaturi finanzjarji u rigward is-segwitu possibbli tal-każijiet li juru suspett suffiċjenti ta' frodi, iżda li kienu ġew imwarrba abbażi tal-Prijoritajiet tal-Politika ta’ Investigazzjoni jew il-prinċipji tal-għażla; (iii) id-DĠ tal-OLAF ma għaddiex lill-KS valutazzjoni tal-applikazzjoni tal-Prijoritajiet tal-Politika ta’ Investigazzjoni preċedenti jew sommarju tal-feedback mogħti mill-partijiet ikkonċernati, minkejja impenn preċedenti li jagħmel dan;

E.

billi l-KS kien irrimarka b'mod kostanti l-inabilità tiegħu li jissorvelja l-independenza tal-OLAF, il-funzjoni investigattiva tiegħu, l-applikazzjoni tal-garanziji proċedurali u d-dewmien tal-investigazzjonijiet, minħabba n-nuqqas ta' aċċess għall-informazzjoni neċessarja;

F.

billi l-KS iddikjara li l-qalba tal-problema fir-rigward tal-effettività tar-rwol ta’ sorveljanza tiegħu mhix l-implimentazzjoni fqira tal-Arranġamenti ta’ Ħidma, iżda differenza fundamentali ta’ fehmiet bejn il-KS u d-DĠ tal-OLAF fil-perċezzjonijiet tagħhom tar-rwol tal-KS;

G.

billi l-Parlament, fir-riżoluzzjonijiet imsemmija qabel dwar ir-Rapporti Annwali 2011 u 2013 dwar il-protezzjoni tal-interessi finanzjarji tal-UE – il-ġlieda kontra l-frodi, talab titjib fl-abilità tal-KS biex iwettaq ir-rwol tiegħu;

H.

billi l-KS f'għadd ta' okkażjonijiet stieden lill-istituzzjonijiet tal-UE biex jew isaħħu l-kompetenzi tiegħu, b'mod partikolari permezz ta' aċċess sħiħ għall-fajls tal-każijiet tal-OLAF, jew biex jieħdu miżuri oħra biex jiżguraw l-obbligu ta' rendikont tal-OLAF;

I.

billi f'Marzu 2014 id-DĠ tal-OLAF impenja ruħu li jagħmel rapport lill-KS darba fis-sena dwar il-għadd ta' lmenti li jkunu ntlaqgħu, l-ipproċessar tagħhom kemm sar fil-ħin u l-klassifikazzjoni tagħhom bħala jew ġustifikati jew mhumiex; billi, madankollu, il-KS jirrapporta li huwa ma kien irċieva l-ebda informazzjoni bħal din;

J.

billi r-Regolament (UE, Euratom) Nru 883/2013 saħħaħ ir-rwol tal-KS fis-sorveljanza tad-dewmien tal-investigazzjonijiet tal-OLAF; billi, minkejja r-rispett formali tal-OLAF għall-obbligu li jirrapporta regolarment għand il-KS dwar l-investigazzjonijiet li jieħdu aktar minn 12-il xahar, il-KS ikkonkluda, fl-Opinjoni Nru 4/2014 tiegħu bl-isem “Kontroll tad-dewmien tal-investigazzjonijiet immexxija mill-OLAF”, li l-informazzjoni mogħtija lilu ma kenitx biżżejjed biex ikun jista' jissorvelja kif xieraq u b'mod effettiv id-dewmien tal-investigazzjonijiet tal-OLAF;

K.

billi, fl-Opinjoni Nru 5/2014 tiegħu bl-isem “Ir-rappurtar estern tal-OLAF dwar id-dewmien tal-investigazzjonijiet”, il-KS ikkonkluda li r-rappurtar dwar id-dewmien tal-investigazzjonijiet min-naħa tal-OLAF ma kienx ta ħarsa komprensiva tal-prestazzjoni investigattiva tiegħu; billi, filwaqt li l-OLAF iddikjara fir-rapport annwali tiegħu li “l-investigazzjonijiet qed jitlestew f'inqas żmien”, il-KS ikkonkluda li t-titjib fir-riżultati tal-investigazzjonijiet tal-OLAF kien dovut għall-introduzzjoni ta' metodi ġodda ta' kalkolu;

L.

billi, fir-Rapport Nru 1/2014 tiegħu bl-isem “Is-salvagwardja tal-indipendenza tal-OLAF”, il-KS talab għal kjarifika tar-rwol tal-OLAF fl-implimentazzjoni tal-politika ta' kontra l-frodi tal-Kummissjoni fis-settur tas-sigaretti;

M.

billi għal sentejn wara xulxin il-KS esprima, fir-Rapport Annwali tal-Attività tiegħu, it-tħassib tiegħu dwar in-nuqqas ta' trasparenza rigward il-parteċipazzjoni tal-OLAF fil-laqgħat tal-“Kamra tal-Ikklirjar” tal-Kummissjoni u r-riskji inerenti fir-rigward tal-indipendenza investigattiva tal-OLAF;

N.

billi l-KS ġibed l-attenzjoni tal-istituzzjonijiet tal-UE lejn il-ħtieġa li jiġu implimentati r-rekwiżiti tar-Regolament (UE, Euratom) Nru 883/2013 rigward il-funzjonament indipendenti tas-Segretarjat tal-KS;

O.

billi l-KS identifika erba’ kundizzjonijiet bażiċi li jiżguraw il-funzjonament indipendenti tas-Segretarjat: (i) reklutaġġ, valutazzjoni u promozzjoni tal-Kap tas-Segretarjat abbażi tad-deċiżjonijiet tal-KS; (ii) klassifikazzjoni mill-ġdid tal-Kap tas-Segretarjat bħala maniger anzjan; (iii) reklutaġġ, evalwazzjoni u promozzjoni tal-persunal tas-Segretarjat mill-Kap tiegħu; (iv) sottodelegazzjoni tal-implimentazzjoni tal-baġit tas-Segretarjat lill-Kap tiegħu;

P.

billi l-Parlament ikkunsidra r-reazzjonijiet tal-OLAF għar-rapporti u l-opinjonijiet tal-KS li ntbagħtu lill-Parlament;

1.

Jenfasizza bil-qawwa r-responsabilità li għandu l-OLAF li jirrispetta r-rekwiżiti ġuridiċi għall-ftuħ ta' investigazzjoni; ifakkar li, fir-rigward tal-423 każ li nfetħu fl-istess jum, 8,4 % biss ta' dawk li ngħalqu rriżultaw f'rakkomandazzjonijiet; jistieden lill-KS jagħti segwitu għar-rispett tar-rekwiżiti ġuridiċi fuq bażi regolari;

2.

Jirreferi għar-riżoluzzjoni tiegħu imsemmija qabel tad-29 ta' April 2015 dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2013, u jħeġġeġ lill-OLAF, mingħajr dewmien, jagħti ġustifikazzjoni għall-każijiet li fihom ma implimentax ir-rakkomandazzjonijiet tal-KS;

3.

Iqis li huwa ta' dispjaċir li l-KS sabha impossibbli li jikkonkludi jekk il-Prijoritajiet tal-Politika ta' Investigazzjoni kinux identifikati korrettament u jekk l-applikazzjoni tagħhom kellhomx konsegwenzi pożittivi jew negattivi għall-ġlieda kontra l-frodi u l-korruzzjoni;

4.

Jiddeplora l-fatt li l-KS mhuwiex kapaċi jimplimenta l-mandat tiegħu għalkollox; jirreferi għar-riżoluzzjonijiet tiegħu imsemmija qabel dwar ir-Rapporti Annwali tal-2011 u l-2013 dwar Il-protezzjoni tal-interessi finanzjarji tal-UE – Il-ġlieda kontra l-frodi, u jistieden lill-Kummissjoni tieħu miżuri biex ittejjeb l-abilità tal-KS li jissorvelja l-indipendenza tal-OLAF, il-funzjoni investigattiva tiegħu, l-applikazzjoni tal-garanziji proċedurali u d-dewmien tal-investigazzjonijiet, mingħajr, madankollu, ma jqiegħed l-indipendenza tal-OLAF f'riskju;

5.

Iħeġġeġ lill-Kummissjoni tiffaċilita n-negozjati bejn l-OLAF u l-KS billi tfassal pjan ta' azzjoni sal-31 ta' Diċembru 2015 bil-ħsieb li temenda l-Arranġamenti ta' Ħidma biex jinħoloq ambjent ta' ħidma li fih il-KS jkun jista' jwettaq il-mandat tiegħu; hu tal-fehma li l-Arranġamenti ta' Ħidma emendati għandhom jiċċaraw ir-rwol tal-KS lill-partijiet ikkonċernati kollha; jinnota li s-segretarjat tal-korp superviżorju jaqa' taħt il-kontroll (amministrattiv) tal-korp issorveljat;

6.

Jitlob li jitwettaq l-impenn li ta d-DĠ tal-OLAF li jagħti lill-KS il-għadd ta' lmenti li jkunu ntlaqgħu, l-ipproċessar tagħhom kemm sar fil-ħin u l-klassifikazzjoni tagħhom bħala jew ġustifikati jew mhumiex;

7.

Iħeġġeġ lill-OLAF jirrispetta r-rekwiżiti ġuridiċi ħalli l-KS jkun jista' jaqdi waħda mill-funzjonijiet ewlenin tiegħu fir-rigward tas-superviżjoni tad-dewmien tal-investigazzjonijiet tal-OLAF;

8.

Jilqa', madankollu, il-fatt li l-OLAF u l-KS bdew jaħdmu flimkien biex itejbu l-informazzjoni li l-OLAF jagħti lill-KS u biex jarrikkixxu l-kontenut tar-rapporti dwar l-investigazzjonijiet li jdumu aktar minn 12-il xahar;

9.

Jinnota li minn 134 investigatur fi tmiem l-2014, 13 (10 %) minnhom ġew assenjati lill-unità tat-tabakk u l-kontrafatti, u 44 (33 %) lill-unitajiet tal-agrikoltura u l-fondi strutturali, li kienu jikkostitwixxu 86 % tal-interessi finanzjarji involuti (EUR 1,9 biljun); jirrakkomanda, għalhekk, li l-OLAF jikkunsidra mill-ġdid l-allokazzjoni tar-riżorsi tiegħu;

10.

Jesprimi tħassib dwar it-trasparenza tal-parteċipazzjoni tal-OLAF fil-laqgħat tal-“Kamra tal-Ikklirjar” tal-Kummissjoni;

11.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-parlamenti nazzjonali u lill-Kumitat ta’ Sorveljanza tal-OLAF.

4.11.2016   

MT

Il-Ġurnal Uffiċjali tal-Unjoni Ewropea

C 407/46

—

wara li kkunsidra l-preambolu tat-Trattat dwar l-Unjoni Ewropea (TUE), b'mod partikolari t-tieni premess u mir-raba' sas-seba' premessi tiegħu,

—

wara li kkunsidra b'mod partikolari l-Artikoli 2, 3(3), it-tieni subparagrafu, l-Artikoli 6 u 7 tat-TUE, kif ukoll l-artikoli tat-TUE u t-Trattat dwar il-Funzjonament tal-Unjoni Ewropea (TFUE) relatati mar-rispett, il-promozzjoni u l-protezzjoni tad-drittijiet fundamentali fl-UE,

—

wara li kkunsidra l-Karta tad-Drittijiet Fundamentali tal-Unjoni Ewropea tas-7 ta' Diċembru 2000, ipproklamata fit-12 ta' Diċembru 2007 fi Strasburgu u li daħlet fis-seħħ mat-Trattat ta' Lisbona f'Diċembru 2009,

—

wara li kkunsidra l-Artikoli 1, 2 u 19 tal-Karta tad-Drittijiet Fundamentali tal-Unjoni Ewropea,

—

wara li kkunsidra l-Protokoll Nru 13 tal-Konvenzjoni tal-Kunsill tal-Ewropa għall-Protezzjoni tad-Drittijiet tal-Bniedem u tal-Libertajiet Fundamentali, b'rabta mat-tneħħija tal-piena tal-mewt fiċ-ċirkostanzi kollha,

—

wara li kkunsidra l-Konvenzjoni għall-Protezzjoni tad-Drittijiet tal-Bniedem u tal-Libertajiet Fundamentali (KEDB), il-ġurisprudenza tal-Qorti Ewropea tad-Drittijiet tal-Bniedem, u l-konvenzjonijiet, ir-rakkomandazzjonijiet, ir-riżoluzzjonijiet u r-rapporti tal-Assemblea Parlamentari, il-Kumitat tal-Ministri, il-Kummissarju Għoli għad-Drittijiet tal-Bniedem u tal-Kummissjoni ta' Venezja tal-Kunsill tal-Ewropa,

—

wara li kkunsidra r-riżoluzzjoni tiegħu tat-3 ta' Lulju 2013 dwar is-sitwazzjoni tad-drittijiet fundamentali: standards u prattiki fl-Ungerija (skont ir-riżoluzzjoni tal-Parlament Ewropew tas-16 ta' Frar 2012) (1),

—

wara li kkunsidra r-riżoluzzjoni tiegħu tas-27 ta' Frar 2014 dwar is-sitwazzjoni tad-drittijiet fundamentali fl-Unjoni Ewropea (2012) (2),

—

wara li kkunsidra l-komunikazzjoni tal-Kummissjoni tal-11 ta' Marzu 2014 bit-titolu “Qafas ġdid tal-UE biex jissaħħaħ l-Istat tad-Dritt” (COM(2014)0158),

—

wara li kkunsidra r-rapport tas-16 ta' Diċembru 2014 mill-Kummissarju għad-Drittijiet tal-Bniedem tal-Kunsill tal-Ewropa wara ż-żjara tiegħu fl-Ungerija bejn l-1 u l-4 ta' Lulju 2014,

—

wara li kkunsidra l-konklużjonijiet tal-Kunsill tal-Unjoni Ewropea u tal-Istati Membri mlaqqgħin fi ħdan il-Kunsill tas-16 ta' Diċembru 2014 dwar l-iżgurar tar-rispett għall-istat tad-dritt,

—

wara li kkunsidra s-sessjoni ta' smigħ dwar is-sitwazzjoni tad-drittijiet tal-bniedem fl-Ungerija, li saret fit-22 ta' Jannar 2015 mill-Kumitat għal-Libertajiet Ċivili, il-Ġustizzja u l-Intern,

—

wara li kkunsidra d-dikjarazzjonijiet tal-Kunsill u tal-Kummissjoni mressqa waqt id-dibattitu plenarju li sar fil-Parlament Ewropew fil-11 ta' Frar 2015 dwar qafas tal-UE għad-demokrazija, l-istat tad-dritt u d-drittijiet fundamentali,

—

wara li kkunsidra l-iskambju ta' fehmiet li sar fis-7 ta' Mejju 2015 mill-Kumitat għal-Libertajiet Ċivili, il-Ġustizzja u l-Intern wara d-deċiżjoni tal-Konferenza tal-Presidenti tat-30 ta' April 2015, dwar l-effetti possibbli, inkluż fuq id-drittijiet u l-istatus ta' pajjiż bħala membru tal-Unjoni Ewropea, f'każ li Stat Membru jiddeċiedi li jintroduċi mill-ġdid il-piena tal-mewt,

—

wara li kkunsidra d-dikjarazzjonijiet tal-Kunsill u tal-Kummissjoni mressqa fid-dibattitu plenarju li sar fil-Parlament Ewropew fid-19 ta' Mejju 2015 dwar is-sitwazzjoni fl-Ungerija,

—

wara li kkunsidra l-Artikolu 123(2) u (4) tar-Regoli ta' Proċedura tiegħu,

A.

billi l-Unjoni Ewropea hija msejsa fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inklużi d-drittijiet ta' persuni li jagħmlu parti minn minoranzi, u billi dawn il-valuri huma komuni għall-Istati Membri f'soċjetà fejn il-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel huma prevalenti (Artikolu 2 tat-TUE);

B.

billi l-Karta tad-Drittijiet Fundamentali tal-Unjoni Ewropea tipprojbixxi kull diskriminazzjoni bbażata fuq is-sess, ir-razza, il-kulur, l-oriġini etnika jew soċjali, il-karatteristiċi ġenetiċi, il-lingwa, ir-reliġjon jew it-twemmin, l-opinjoni politika jew xi opinjoni oħra, l-appartenenza għal minoranza nazzjonali, il-proprjetà, it-twelid, id-diżabilità, l-età, jew l-orjentazzjoni sesswali;

C.

billi t-tneħħija tal-piena tal-mewt hija prekundizzjoni għal sħubija mal-UE, bl-UE ssostni pożizzjoni b'saħħitha u bbażata fuq prinċipji kontra l-piena tal-mewt, li t-tneħħija tagħha hija objettiv ewlieni tal-politika tagħha dwar id-drittijiet tal-bniedem;

D.

billi d-dritt għall-asil huwa garantit, b'rispett dovut għar-regoli tal-Konvenzjoni ta' Ġinevra tat-28 ta' Lulju 1951 u l-Protokoll tagħha tal-31 ta' Jannar 1967 dwar l-istatus tar-refuġjati u b'konformità mat-TUE u t-TFUE;

E.

billi l-Karta tad-Drittijiet Fundamentali tal-Unjoni Ewropea u l-Konvenzjoni Ewropea dwar id-Drittijiet tal-Bniedem ġew inkorporati kompletament fil-kostituzzjoni tal-Ungerija; billi l-iżviluppi reċenti fl-Ungerija wasslu madankollu għal tħassib fuq is-sitwazzjoni tal-pajjiż;

F.

billi wara l-avvenimenti reċenti fl-Ungerija, il-Prim Ministru tal-Ungerija Viktor Orbán għamel dikjarazzjoni fit-28 ta' April 2015 dwar il-ħtieġa li jkun hemm dibattitu pubbliku dwar il-piena tal-mewt; billi fit-30 ta' April 2015 il-President tal-Parlament Ewropew, Martin Schulz, ħareġ stqarrija għall-istampa li fiha ddikjara li Viktor Orbán kien żgurah li l-Gvern Ungeriż ma kellu l-ebda pjan jieħu passi biex jerġa' jdaħħal il-piena tal-mewt, u li kien se jħares u jirrispetta t-trattati Ewropej u l-leġiżlazzjoni Ewropea kollha; billi Viktor Orbán tenna dikjarazzjonijiet simili fl-1 ta' Mejju 2015, iżda matul intervista fuq ir-radju nazzjonali żied li d-deċiżjoni għall-introduzzjoni mill-ġdid tal-piena tal-mewt għandha tkun unikament kompetenza tal-Istati Membri, u b'hekk tbiegħed mid-dispożizzjonijiet tat-Trattati tal-UE;

G.

billi f'Mejju 2015 il-Gvern Ungeriż nieda konsultazzjoni pubblika dwar il-migrazzjoni, wara li fl-imgħoddi kien wettaq għadd ta' konsultazzjonijiet simili fuq kwistjonijiet oħra; billi l-konsultazzjoni pubblika tista' sservi ta' strument importanti u ta' valur biex il-gvernijiet jiżviluppaw politiki li jgawdu bażi soda ta' appoġġ fost il-pubbliku; billi l-kwistjonijiet ġew ikkritikati għan-natura suġġestiva u retorika tagħhom, billi jistabbilixxu rabta diretta bejn il-fenomeni migratorji u t-theddid għas-sigurtà;

H.

billi matul l-iskambju ta' fehmiet fil-Kumitat għal-Libertajiet Ċivili, il-Ġustizzja u l-Intern, il-maġġoranza tal-gruppi politiċi kienu tal-fehma li l-introduzzjoni mill-ġdid tal-piena tal-mewt u l-mistoqsijiet li saru fil-konsultazzjoni pubblika kienu inaċċettabbli;

I.

billi, fl-istqarrija tiegħu mressqa fid-dibattitu plenarju li sar fil-Parlament Ewropew fid-19 ta' Mejju 2015 dwar is-sitwazzjoni fl-Ungerija, il-Presidenza tal-Kunsill tal-Unjoni Ewropea ddikjarat li l-Kunsill ma kienx ddiskuta s-sitwazzjoni fl-Ungerija u għalhekk ma adotta l-ebda pożizzjoni formali dwar din il-kwistjoni;

J.

billi l-isforzi biex tiġi indirizzata s-sitwazzjoni attwali fl-Ungerija ma għandhomx l-għan li jiġi individwat Stat Membru jew gvern partikolari iżda li jissodisfaw obbligu kollettiv fuq l-istituzzjonijiet kollha tal-UE, u b'mod partikolari l-Kummissjoni bħala l-gwardjan tat-Trattati, li jiżguraw l-applikazzjoni u l-konformità mat-Trattati u l-Karta fl-Unjoni kollha u f'kull Stat Membru;

1.

Jinsisti li l-piena tal-mewt hija inkompatibbli mal-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem li fuqhom hija msejsa l-Unjoni, u li għalhekk kwalunkwe Stat Membru li jintroduċi mill-ġdid il-piena tal-mewt ikun qed jikser it-Trattati u l-Karta tad-Drittijiet Fundamentali tal-UE; jafferma mill-ġdid bl-aktar mod riżolut, li t-tneħħija tal-piena tal-mewt hija punt importanti fl-iżvilupp tad-drittijiet fundamentali fl-Ewropa;

2.

Ifakkar li ksur serju minn Stat Membru tal-valuri msemmija fl-Artikolu 2 tat-TUE jiskatta l-proċedura tal-“Artikolu 7”;

3.

Jikkundanna bil-qawwa d-dikjarazzjonijiet ripetuti magħmula mill-Prim Ministru Ungeriż Viktor Orbán li jagħtu lok għal dibattitu dwar l-introduzzjoni mill-ġdid potenzjali tal-piena tal-mewt fl-Ungerija, biex b'hekk jiġi istituzzjonalizzat u alimentat kunċett li jikser il-valuri li fuqhom hija msejsa l-Unjoni; jinnota għalhekk id-dikjarazzjoni li saret minn Viktor Orbán li ma jerġax idaħħal il-piena tal-mewt fl-Ungerija, u jissottolinja r-responsabbiltà ta' prim ministru, bħala kap ta' gvern, li jippromwovi l-valuri tal-UE u jagħti eżempju;

4.

Jinnota li l-Istati Membri għandhom id-dritt sovran li jniedu konsultazzjonijiet nazzjonali; ifakkar madankollu li l-konsultazzjonijiet għandhom jirriflettu r-rieda tal-gvernijiet li jeżerċitaw governanza responsabbli intiża biex tiżgura soluzzjonijiet politiċi demokratiċi u r-rispett għall-valuri fundamentali Ewropej;

5.

Jikkundanna l-konsultazzjoni pubblika dwar il-migrazzjoni u l-kampanja relatata fuq billboards madwar il-pajjiż kollu mnedija mill-Gvern Ungeriż, u jenfasizza li l-kontenut tal-konsultazzjoni partikolari mnedija fl-Ungerija, kif ukoll il-lingwaġġ li ntuża dwar l-immigrazzjoni u t-terroriżmu huma ferm qarrieqa, żbilanċjati u mimlija preġudizzji, hekk kif jistabbilixxu rabta diretta u preġudikata bejn il-fenomeni migratorji u t-theddid għas-sigurtà; jindika li t-tweġibiet għall-kwestjonarju onlajn għandhom jiġu kkomplementati minn data personali, li b'hekk tiżvela l-opinjonijiet politiċi ta' dak li jkun bi ksur tar-regoli dwar il-protezzjoni tad-data; jappella għalhekk sabiex din il-konsultazzjoni tiġi rtirata;

6.

Jiddispjaċih li l-konsultazzjoni pubblika titfa' l-ħtija fuq l-istituzzjonijiet tal-UE u l-politiki tagħhom mingħajr ma tirrikonoxxi r-responsabbiltà tal-Istati Membri għal dawn l-oqsma; ifakkar li l-Istati Membri huma involuti kompletament fil-proċess leġiżlattiv tal-UE;

7.

Jistieden lill-Istati Membri kollha jipparteċipaw b'mod kostruttiv fid-diskussjoni li għaddejja dwar l-Aġenda Ewropea dwar il-Migrazzjoni, li taffettwa ugwalment il-politiki interni, esterni u tal-iżvilupp li jridu jiġu implimentati fl-UE;

8.

Jemmen li l-Istati Membri kollha jeħtiġilhom jottemperaw ruħhom bis-sħiħ mad-dritt tal-UE fil-prattika leġiżlattiva u amministrattiva tagħhom, u li kwalunkwe leġiżlazzjoni, inkluża l-liġi primarja ta' kwalunkwe Stat Membru jew pajjiż kandidat, trid tirrifletti u tkun konformi mal-valuri bażiċi Ewropej, jiġifieri l-prinċipji demokratiċi, l-istat tad-dritt u d-drittijiet fundamentali;

9.

Jiddeplora n-nuqqas ta' reazzjoni min-naħa tal-Kunsill għall-iżviluppi l-aktar reċenti fl-Ungerija, u jikkundanna n-nuqqas ta' impenn mill-Istati Membri biex jiżguraw ir-rispett għall-istat tad-dritt kif speċifikat fil-konklużjonijiet tal-Kunsill tal-Unjoni Ewropea tas-16 ta' Diċembru 2014; iħeġġeġ lill-Kunsill tal-Unjoni Ewropea u lill-Kunsill Ewropew jorganizzaw diskussjoni u jadottaw konklużjonijiet dwar is-sitwazzjoni fl-Ungerija;

10.

Jinnota li dawn l-iżviluppi reċenti wasslu għal tħassib dwar il-prinċipji tal-istat tad-dritt, id-demokrazija u d-drittijiet fundamentali fl-Ungerija matul is-sena li għaddiet, li, ikkunsidrati flimkien, jistgħu jirrappreżentaw theddida sistemika emerġenti għall-istat tad-dritt f'dan l-Istat Membru;

11.

Iħeġġeġ lill-Kummissjoni tħaddem l-ewwel stadju tal-qafas tal-UE biex jissaħħaħ l-istat tad-dritt, u għalhekk biex tagħti bidu minnufih għal proċess fil-fond ta' monitoraġġ dwar is-sitwazzjoni tad-demokrazija, l-istat tad-dritt u d-drittijiet fundamentali fl-Ungerija, billi tevalwa ksur potenzjali sistemiku serju tal-valuri li fuqhom hija bbażata l-Unjoni skont l-Artikolu 2 tat-TUE, inkluż l-impatt kombinat ta' għadd ta' miżuri li jaggravaw is-sitwazzjoni tad-demokrazija, l-istat tad-dritt u d-drittijiet fundamentali, u billi tevalwa l-ħolqien ta' theddida sistemika għall-istat tad-dritt f'dak l-Istat Membru li tista' tiżviluppa f'riskju ċar ta' ksur serju skont it-tifsira tal-Artikolu 7 tat-TUE; jistieden lill-Kummissjoni tippreżenta rapport dwar din il-kwistjoni lill-Parlament u lill-Kunsill qabel Settembru 2015;

12.

Jistieden lill-Kummissjoni tippreżenta proposta għall-istabbiliment ta' mekkaniżmu tal-UE dwar id-demokrazija, l-istat tad-dritt u d-drittijiet fundamentali, bħala għodda għall-konformità mal-Karta u t-Trattati u l-infurzar tagħhom kif iffirmata mill-Istati Membri kollha, li tibbaża fuq indikaturi komuni u oġġettivi, u biex twettaq valutazzjoni annwali imparzjali dwar is-sitwazzjoni tad-drittijiet fundamentali, id-demokrazija u l-istat tad-dritt fl-Istati Membri kollha, mingħajr diskriminazzjoni u fuq bażi ugwali, bl-involviment ta' evalwazzjoni mill-Aġenzija tal-UE għad-Drittijiet Fundamentali, flimkien ma' mekkaniżmi xierqa vinkolanti u korrettivi sabiex jimtlew il-lakuni eżistenti u jkun hemm rispons awtomatiku u gradwali għall-ksur tal-istat tad-dritt u d-drittijiet fundamentali fil-livell tal-Istati Membri; jagħti istruzzjonijiet lill-Kumitat tiegħu għal-Libertajiet Ċivili, il-Ġustizzja u l-Intern biex jikkontribwixxi għall-iżvilupp u l-elaborazzjoni ta' din il-proposta fil-forma ta' rapport leġiżlattiv fuq inizjattiva proprja li għandu jiġi adottat sa tmiem is-sena;

13.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni, lill-Kunsill, lill-President, lill-Gvern u lill-Parlament tal-Ungerija, lill-gvernijiet u lill-parlamenti tal-Istati Membri u tal-pajjiżi kandidati, lill-Aġenzija tal-UE għad-Drittijiet Fundamentali, lill-Kunsill tal-Ewropa u lill-Organizzazzjoni għas-Sigurtà u l-Kooperazzjoni fl-Ewropa.

4.11.2016   

MT

Il-Ġurnal Uffiċjali tal-Unjoni Ewropea

C 407/50

—

wara li kkunsidra r-Rapport ta' Progress 2014 tal-Kummissjoni dwar it-Turkija (SWD(2014)0307),

—

wara li kkunsidra l-komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni tat-8 ta' Ottubru 2014 bit-titlu “L-Istrateġija tat-Tkabbir u l-Isfidi Ewlenin 2014-15” (COM(2014)0700),

—

wara li kkunsidra r-riżoluzzjonijiet preċedenti tiegħu, b'mod partikolari dawk tal-10 ta' Frar 2010 dwar ir-rapport dwar il-progress tat-Turkija 2009 (1), tad-9 ta' Marzu 2011 dwar ir-rapport ta' progress tat-Turkija għall-2010 (2), tad-29 ta' Marzu 2012 dwar ir-rapport ta' progress 2011 dwar it-Turkija (3), tat-18 ta' April 2013 dwar ir-Rapport ta' Progress 2012 dwar it-Turkija (4), tat-13 ta' Ġunju 2013 dwar is-sitwazzjoni fit-Turkija (5), tat-12 ta' Marzu 2014 dwar ir-Rapport ta' Progress 2013 dwar it-Turkija (6), tat-13 ta' Novembru 2014 dwar azzjonijiet Tork li joħolqu tensjonijiet fiż-żona ekonomika esklussiva ta' Ċipru (7), u tal-15 ta' Jannar 2015 dwar il-libertà tal-espressjoni fit-Turkija (8),

—

wara li kkunsidra r-riżoluzzjoni tiegħu tal-15 ta' April 2015 dwar għeluq il-mitt sena mill-Ġenoċidju Armen (9),

—

wara li kkunsidra l-Qafas ta' Negozjar għat-Turkija tat-3 ta' Ottubru 2005,

—

wara li kkunsidra d-Deċiżjoni tal-Kunsill 2008/157/KE tat-18 ta' Frar 2008 dwar il-prinċipji, il-prijoritajiet u l-kundizzjonijiet li jinsabu fis-Sħubija għall-Adeżjoni mar-Repubblika tat-Turkija (10) (“is-Sħubija għall-Adeżjoni”), kif ukoll id-deċiżjonijiet preċedenti tal-Kunsill tal-2001, l-2003 u l-2006 dwar is-Sħubija għall-Adeżjoni,

—

wara li kkunsidra l-konklużjonijiet tal-Kunsill tal-14 ta' Diċembru 2010, tal-5 ta' Diċembru 2011, tal-11 ta' Diċembru 2012, tal-25 ta' Ġunju 2013, tal-24 ta' Ottubru 2014 u tas-16 ta' Diċembru 2014,

—

wara li kkunsidra l-Artikolu 46 tal-Konvenzjoni Ewropea dwar id-Drittijiet tal-Bniedem (KEDB) li jistabbilixxi li l-partijiet kontraenti jimpenjaw ruħhom li jirrispettaw is-sentenzi finali tal-Qorti Ewropea tad-Drittijiet tal-Bniedem (QEDB) fi kwalunkwe każ li jkunu parti fih,

—

wara li kkunsidra l-Karta tad-Drittijiet Fundamentali tal-Unjoni Ewropea,

—

wara li kkunsidra r-rapport tal-Bank Dinji tat-28 ta' Marzu 2014 bit-titlu 'Evaluation of the EU-Turkey Customs Union' (Evalwazzjoni tal-Unjoni Doganali UE-Turkija),

—

wara li kkunsidra r-rapport tal-Kummissjoni dwar il-progress tat-Turkija fl-issodisfar tar-rekwiżiti tal-pjan direzzjonali tagħha tal-liberalizzazzjoni tal-viża (COM(2014)0646),

—

wara li kkunsidra x-xogħol ta' Kati Piri bħala r-rapporteur permanenti tal-Kumitat għall-Affarijiet Barranin għat-Turkija,

—

wara li kkunsidra l-Artikolu 123(2) tar-Regoli ta' Proċedura tiegħu,

A.

billi n-negozjati għall-adeżjoni mat-Turkija nfetħu fit-3 ta' Ottubru 2005 u billi l-ftuħ ta' tali negozjati huwa l-punt tat-tluq ta' proċess li jieħu ħafna żmien u li għandu eżitu miftuħ, ibbażat fuq kundizzjonalità ġusta u rigoruża u impenn favur ir-riformi;

B.

billi l-UE għadha impenjata favur tkabbir ulterjuri bħala politika fundamentali għall-promozzjoni tal-paċi, tad-demokrazija, tas-sigurtà u tal-prosperità fl-Ewropa; billi kull pajjiż kandidat se jiġi ġġudikat fuq il-merti proprji tiegħuu, abbażi ta' dan, il-Kummissjoni ma tipprevedix xi adeżjoni ġdida fl-UEf'din il-leġislatura;

C.

billi t-Turkija impenjat ruħha li tissodisfa l-kriterji ta' Kopenħagen, twettaq riformi adegwati u effikaċi, iżżomm relazzjonijiet ta' bon viċinat u twettaq allinjament progressiv mal-UE; billi dawn l-isforzi għandhom jitqiesu bħala opportunità għat-Turkija biex issaħħaħ l-istituzzjonijiet tagħha u tissokta l-proċess tagħha ta' demokratizzazzjoni u modernizzazzjoni;

D.

billi, skont il-klassifikazzjoni magħmula minn Freedom House għal-libertà tal-istampa u tal-midja, it-Turkija issa qed tiġi kklassifikata bħala pajjiżi li m'għandux libertà tal-istampa u li fih il-libertà tal-internet hija biss parzjali;

E.

billi Reporters without Borders (Ġurnalisti Mingħajr Fruntieri) fl-2014 ikklassifikat it-Turkija bħala pajjiż fost dawk li fihom il-ġurnalisti l-aktar li sofrew theddidiet u attakki fiżiċi;

F.

billi l-UE għandha tibqa’ l-punt ta’ riferiment għar-riformi fit-Turkija;

G.

billi l-bażi għall-adeżjoni mal-UE għadha l-konformità sħiħa mal-kriterji ta' Kopenħagen u l-kapaċità ta' integrazzjoni tal-UE, bi qbil mal-konklużjonijiet tal-Kunsill Ewropew ta' Diċembru 2006;

H.

billi, fil-proċess tal-adeżjoni, l-istat tad-dritt – li jinkludi, partikolarment, is-separazzjoni tal-poteri, il-ġlieda kontra l-korruzzjoni u l-kriminalità organizzata, il-libertà tal-għaqda u tal-protesta paċifika, il-libertà tal-espressjoni u tal-mezzi ta' komunikazzjoni, id-drittijiet tan-nisa, id-drittijiet tar-reliġjon, id-drittijiet ta' persuni li jappartjenu għal minoranzi (nazzjonali), u l-indirizzar tad-diskriminazzjoni fil-konfront ta' gruppi vulnerabbli bħar-Rom u l-persuni leżbjani, gay, bisesswali, transġeneru u intersesswali (LGBTI) – huwa ta' importanza ċentrali;

I.

billi fil-komunikazzjoni tagħha bit-titlu “L-Istrateġija tat-Tkabbir u l-Isfidi Ewlenin 2014-15” il-Kummissjoni kkonkludiet li t-Turkija hija sieħba strateġika għall-Unjoni Ewropea, f'termini ekonomiċi u ta' sigurtà enerġetika, u li l-kooperazzjoni mat-Turkija fi kwistjonijiet ta' politika barranija hija kruċjali, billi, fl-istess komunikazzjoni, il-Kummissjoni esprimiet it-tħassib tagħha rigward il-protezzjoni tad-drittijiet fundamentali, l-indipendenza tal-ġudikatura, l-istat tad-dritt, id-dritt ta' għaqda u l-libertà ta' espressjoni;

J.

billi t-Turkija, għad-disa' sena konsekuttiva, għadha ma implimentatx id-dispożizzjonijiet li joħorġu mill-Ftehim ta' Assoċjazzjoni KE-Turkija u l-Protokoll Addizzjonali tiegħu; billi dan ir-rifjut għadu jħalli effett negattiv profond fuq il-proċess tan-negozjati;

K.

billi, bil-ħsieb li ttejjeb l-istabbiltà u tippromwovi r-relazzjonijiet ta' bon viċinat, it-Turkija jeħtiġilha tintensifika l-isforzi tagħha sabiex issolvi kwistjonijiet bilaterali pendenti, inklużi obbligi ġuridiċi pendenti u tilwimiet li għadhom mhux solvuti dwar il-fruntieri tal-art, tal-baħar u tal-ispazju tal-ajru mal-ġirien diretti tagħha, bi qbil mad-dispożizzjonijiet tal-Karta tan-NU u mad-dritt internazzjonali;

L.

billi l-awtoritajiet Torok ma qablux li jerġgħu jiftħu s-seminarju Ortodoss fuq il-gżira ta' Heybeliada;

1.

Jilqa' favorevolment ir-rapport ta' progress 2014 tal-Kummissjoni dwar it-Turkija u jikkondividi l-konklużjoni tiegħu li t-Turkija hija sieħba strateġika għall-Unjoni Ewropea u li negozjati ta' adeżjoni attivi u kredibbli jipprovdu qafas adatt biex il-potenzjal tar-relazzjonijiet UE-Turkija jiġi sfruttat bis-sħiħ; jenfasizza li l-proċess ta' riforma fil-kuntest ta' negozjati mal-UE jista' jippreżenta opportunità sinifikanti għat-Turkija biex din tiżviluppa sistema demokratika pluralista qawwija, b'istituzzjonijiet sodi, għall-benefiċċju taċ-ċittadini kollha tat-Turkija, kif ukoll għal relazzjonijiet eqreb mal-UE; jitlob li l-Kummissjoni terġa' tivvaluta l-mod li bih in-negozjati tmexxew s'issa u kif ir-relazzjonijiet u l-kooperazzjoni bejn l-UE u t-Turkija jistgħu jittejbu u jiġu intensifikati;

2.

Jissottolinja li relazzjoni effikaċi u li tiffunzjona sewwa, ibbażata fuq id-djalogu, kooperazzjoni aktar stretta, impenn reċiproku u negozjati bejn l-UE u t-Turkija – fid-dawl tal-qrubija ġeografika tagħhom, ir-rabtiet storiċi bejniethom, il-komunità Torka kotrana li tgħix fl-UE, ir-rabtiet ekonomiċi stretti u l-interessi strateġiċi komuni tagħhom – tkun ta' benefiċċju għaż-żewġ partijiet; jistieden lit-Turkija tqiegħed il-proċess ta' riforma fil-qalba tal-għażliet ta' politika nazzjonali tagħha; huwa tal-fehma li l-UE għandha taħtaf din l-opportunità li ssir l-ankra prinċipali tal-proċess tad-demokratizzazzjoni ulterjuri fit-Turkija billi tippromwovi valuri universali u l-istandards regolatorji Ewropej bħala punti ta' riferiment għall-proċess ta' riforma, u billi tappoġġa lit-Turkija fl-iżvilupp ta' istituzzjonijiet demokratiċi sodi u ta' leġiżlazzjoni effikaċi bbażati fuq ir-rispett tal-libertajiet fundamentali, id-drittijiet tal-bniedem u l-istat tad-dritt u li jirrappreżentaw u jiddefendu l-interessi tas-sezzjonijiet kollha tas-soċjetà Torka;

3.

Iħeġġeġ lill-Gvern Tork iħaffef il-pass tan-negozjati u jħeġġu jimpenja ruħu bla ekwivoċi li jirrispetta l-valuri u l-prinċipji demokratiċi, li huma fil-qalba tal-Unjoni Ewropea; jappoġġa l-isforzi tal-Kummissjoni Ewropea l-ġdida biex tintensifika l-ħidma mat-Turkija abbażi ta' interessi kondiviżi u sfidi komuni; jieħu nota tal-ftuħ tan-negozjati dwar il-Kapitolu 22 (Politika reġjonali) f'Novembru 2013;

4.

Jilqa' b'sodisfazzjon l-elezzjoni tal-aktar parlament inklużiv u rappreżentattiv fl-istorja moderna Torka, li jirrifletti d-diversità tal-pajjiż; ifaħħar ir-reżiljenza tad-demokrazija Torka u l-ispirtu demokratiku taċ-ċittadini tagħha, kif tixhed ir-rata għolja ħafna ta' votanti li ħarġu jivvutaw u l-parteċipazzjoni impressjonanti tal-volontiera tas-soċjetà ċivili f'jum l-elezzjoni; jistieden lill-partiti politiċi kollha biex jaħdmu għat-twaqqif ta' gvern stabbli u inklużiv bil-għan li jissaħħaħ il-proċess ta' demokratizzazzjoni tat-Turkija u d-djalogu ta' riforma tagħha mal-UE;

5.

Jissottolinja l-importanza li ninvestu aktar sforzi f'kuntatti interpersonali biex jinħoloq ambjent favorevoli ta' kooperazzjoni bejn it-Turkija u l-UE; jenfasizza, għalhekk, li fl-interess ta' rabtiet aktar stretti bejn l-UE u t-Turkija, għandu jsir progress konkret fil-qasam tal-liberalizzazzjoni tal-viżi abbażi tat-twettiq tar-rekwiżiti stabbiliti fil-pjan direzzjonali lejn reġim ta' eżenzjoni ta' viża mat-Turkija; jenfasizza li fil-perjodu intermedju, l-UE għandha tagħmilha aktar faċli li persuni tan-negozju jiksbu viża, u li programmi ta' skambju ta' studenti u akkademiċi u l-opportunitajiet ta' aċċess għas-soċjetà ċivili għandhom jiġu promossi b'mod attiv; jemmen li l-opportunitajiet ta' aċċess imtejjeb għall-UE jafu jipprovdu aktar appoġġ għall-proċess ta' riforma fit-Turkija;

6.

Josserva li t-Turkija kompliet timplimenta r-riformi mis-snin preċedenti; jilqa' pożittivament, f'dan ir-rigward, il-bidliet fil-qafas ġuridiku fil-qasam tal-partiti politiċi u tal-kampanji elettorali, li issa jippermetti li l-kampanji politiċi jsiru b'lingwi oħra u mhux biss bit-Tork, jagħti lok għall-kopresidenza tal-partiti u jiffaċilita r-regoli tal-organizzazzjoni lokali tal-partiti politiċi; itenni l-importanza li l-limitu elettorali minimu ta' 10 % jitbaxxa, b'mod li jkun jippermetti parteċipazzjoni politika tal-komponenti kollha tas-soċjetà fit-Turkija;

7.

Jenfasizza li kostituzzjoni ġdida bbażata fuq dispożizzjonijiet li jippromwovu soċjetà pluralistika, inklużiva u tolleranti tista’ ssaħħaħ il-proċess ta’ riforma u tipprovdi bażi soda għal-libertajiet fundamentali u l-istat tad-dritt; ifaħħar ix-xogħol li għamel il-kumitat ta' konċiljazzjoni kostituzzjonali, li, qabel ma ġie xolt, laħaq kunsens fuq 60 emenda kostituzzjonali; itenni t-talba tiegħu biex jitkompla l-proċess ta' riforma kostituzzjonali u jenfasizza l-ħtieġa li kostituzzjoni ġdida tissejjes fuq kunsens wiesa' mill-ispektrum politiku kollu u mis-soċjetà kollha kemm hi; iħeġġeġ lit-Turkija tikkonsulta mal-Kummissjoni ta’ Venezja fil-qafas tal-proċess ta’ Riforma Kostituzzjonali;

8.

Jilqa’ l-istrateġija l-ġdida mfassla mill-Gvern tat-Turkija biex il-leġiżlazzjoni l-ġdida kollha tiġi mgħoddija permezz tal-Ministeru tal-Affarijiet tal-UE, bil-għan li jiżdied ir-rwol tiegħu fir-rigward tal-koordinazzjoni u li titjieb il-konformità tal-abbozzi ta’ leġiżlazzjoni mal-istandards Ewropej; jirrakkomanda, f'dan ir-rigward, li kull meta jkun possibbli, issir konsultazzjoni mill-qrib mal-Kummissjoni ta' Venezja kif ukoll djalogu aktar intensiv mal-Kummissjoni Ewropea dwar il-leġiżlazzjoni l-ġdida li tkun qed titħejja u dwar l-implimentazzjoni tal-liġijiet eżistenti, bil-għan li tkun żgurata l-kompatibilità mal-acquis tal-UE;

9.

Jenfasizza l-importanza ta’ konsultazzjoni adegwata tas-soċjetà ċivili fil-proċess leġiżlattiv; jirrakkomanda, għalhekk, li għandhom jiġu żviluppati mekkaniżmi ta’ konsultazzjoni strutturati tas-soċjetà ċivili bħala parti mill-proċess leġiżlattiv u tat-tfassil tal-politika u fil-proċess tal-implimentazzjoni ta’ leġiżlazzjoni ġdida; ifaħħar il-vitalità tas-soċjetà ċivili fit-Turkija; jenfasizza li huma meħtieġa riformi konsistenti biex jiggarantixxu l-libertà ta' assoċjazzjoni u ta' espressjoni, biex l-organizzazzjonijiet tas-soċjetà ċivili jingħataw lok joperaw liberament mingħajr restrizzjonijiet u li jtejbu l-aċċess tagħhom għall-finanzjament;

10.

Jappoġġja u jinkoraġġixxi bis-sħiħ l-isforzi min-naħa tal-Gvern tat-Turkija u l-partijiet interessati l-oħrajn kollha biex tintlaħaq konklużjoni komprensiva u sostenibbli tal-proċess ta’ paċi mal-komunità Kurda abbażi ta’ negozjati mal-PKK), li jinsab fil-lista ta’ organizzazzjonijiet terroristiċi tal-Unjoni Ewropea, u proċess ta' integrazzjoni soċjoekonomika u politika tal-komunità Kurda; jappoġġja bil-qawwa t-tħabbira min-naħa tal-HDP ta' kungress straordinarju tal-PKK biex iċedu l-arma u li jippromwovi l-politika demokratika bħala metodu; jinkoraġġixxi b'qawwa lill-Gvern biex ikompli jagħti prijorità, u jtejjeb, id-drittijiet soċjali, kulturali u politiċi kif ukoll it-trattament indaqs, taċ-ċittidini ta' oriġini Kurda; jilqa' favorevolment il-liġi intiża li “toħloq bażi ġuridika aktar soda għall-proċess ta' riżoluzzjoni”, adottata mit-TGNA fil-11 ta' Ġunj u 2014, li tipprevedi miżuri li jeqirdu t-terroriżmu, isaħħu l-inklużjoni soċjali, jintegraw mill-ġdid lill-persuni li jħallu l-PKK u jċedu l-armi u jippreparaw l-opinjoni pubblika għar-ritorn tal-ex-ġellieda; huwa tal-fehma li riżoluzzjoni b'suċċess tal-kwistjoni Kurda hi importanti ħafna u tagħti kontribut pożittiv sostanzjali lid-demokrazija, il-paċi, l-istabilità u l-ħarsien tad-drittijiet tal-bniedem fit-Turkija; iħeġġeġ għaldaqstant, lill-partiti politiċi kollha biex isostnu dan il-proċess; jistieden lill-Kummissjoni tipprovdi assistenza teknika u tiddedika riżorsi disponibbli taħt l-Istrument għall-Assistenza ta' Qabel l-Adeżjoni (IPA),inter alia, għal programmi ta' integazzjoni soċjoekonomika u edukazzjoni fix-Xlokk bħala mezz għat-tisħiħ tal-proċess ta' riżoluzzjoni Kurd; josserva li n-negozjati dwar il-Kapitolu 22 (Politika Reġjonali) jistgħu jgħinu lit-Turkija fid-definizzjoni ta' programm ta' koeżjoni effikaċi għax-Xlokk tat-Turkija;

11.

Jiddispjaċih dwar id-deċiżjoni min-naħa tal-Impriża Idrawlika Statali tat-Turkija li tkompli bix-xogħlijiet fuq id-diga ta’ Ilisu, li se jkollha effetti soċjali, ambjentali u politiċi devastanti; ifakkar li l-parti l-kbira tal-popolazzjoni ta' dan ir-reġjun huma Kurdi, u li l-kostruzzjoni se tolqot ħażin ħafna lill-popolazzjoni u l-kultura Kurda;

12.

Jesprimi tħassib dwar il-fatt li l-Indiċi tal-Perċezzjoni tal-Korruzzjoni 2014, maħruġ mill-organizzazzjoni Transparency International fit-3 ta' Diċembru 2014, jindika żieda qawwija fil-perċezzjoni tal-korruzzjoni fit-Turkija matul is-sena li għaddiet, u li issa l-pajjiż jinsab fl-64 post fl-indiċi; jiddispjaċih ħafna dwar il-mod ta' kif il-Gvern u l-Parlament tat-Turkija rreaġixxew fir-rigward tal-allegazzjonijiet ta’ korruzzjoni magħmula f'Diċembru 2013, inklużi dawk kontra persuna li qabel kienu Membri tal-Gvern, u dwar il-fatt li ma kien hemm l-ebda segwitu tal-investigazzjonijiet tal-korruzzjoni serji ħafna; jesprimi tħassib dwar il-prosekuzzjoni kriminali ta’ ġurnalisti investigattivi li segwew il-każijiet ta’ korruzzjoni; jappella għal investigazzjoni trasparenti u indipendenti tal-akkużi li saru f’Diċembru 2013; jisħaq fuq il-ħtieġa ta' aktar rieda politika għall-iżvilupp ta' qafas ġuridiku adegwat għall-ġlieda kontra l-korruzzjoni, li mhux biss iddgħajjef il-funzjonament tal-istituzzjonijiet u l-fiduċja taċ-ċittadini fid-demokrazija, iżda tista' wkoll tagħmel ħsara lill-iżvilupp ekonomiku u lil klima favorevoli għall-investimenti;

13.

Jesprimi tħassib dwar l-emendi reċenti għal-Liġi dwar il-Kunsill Għoli tal-Imħallfin u l-Prosekuturi u r-riassenjazzjonijiet u t-tkeċċijiet sussegwenti numerużi ta’ imħallfin u prosekuturi u l-arresti, riassenjazzjonijiet u tkeċċijiet ta’ uffiċjali tal-pulizija, li qajmu tħassib serju u iġġustifikat dwar l-indipendenza, l-imparzjalità u l-effiċjenza tal-ġudikatura u tas-separazzjoni tas-setgħat u r-rispett tal-prinċipju tal-istat tad-dritt, li għadhom il-qalba tal-kriterji politiċi ta’ Kopenħagen; jinsab imħasseb dwar il-fatt li sikwit isiru tibdiliet f'leġiżlazzjoni ewlenija mingħajr konsultazzjoni xierqa mal-partijiet interessati rilevanti; jilqa' pożittivament l-abolizzjoni tal-Artikolu 10 tal-liġi kontra t-terroriżmu; jinsab imħasseb, madankollu, dwar il-fatt li d-definizzjonijiet wiesgħa ħafna jagħmlu l-kamp ta’ applikazzjoni tal-liġi kontra t-terroriżmu eċċessiv u jippermettu interpretazzjonijiet verament wiesgħa; ifakkar il-bżonn li ssir riforma tal-Artikolu 314 tal-kodiċi kriminali, sabiex dawk biss li huma membri ta' organizzazzjoni terroristika jew armata, jew jikkontribwixxu għall-attivatajiet ta' tali organizzazzjoni, ikun jistgħu jittellgħu quddiem il-qorti; jitlob li tiġi adottata strateġija għal riforma ġudizzjarja allinjata ma' standards Ewropej, b'kooperazzjoni mal-partijiet konċernati kollha; japprezza l-ewwel pass meħud favur it-tnaqqis tat-tul massimu ta' arrest preventiv qabel is-smigħ tal-kawża minn 10 għal 5 snin, iżda jisħaq li jeħtieġ ikun hemm aktar tnaqqis biex ikun evitat li l-arrest preventiv qabel is-smigħ tal-kawża jsir kastig de facto; jenfasizza l-importanza li jinħolqu qrati reġjonali tal-appell u li jiġu adottati l-miżuri relevanti kollha biex jiġi żgurat proċess xieraq; iħeġġeġ lit-Turkija tkompli r-riforma tas-sistema ġudizzjarja u biex tiżgura aċċess ġust u effettiv għall-ġustizzja għat-tfal kollha;

14.

Jesprimi tħassib serju dwar il-Liġi 6532 li daħlet fis-seħħ fis-26 ta’ April 2014 u li żiedet b’mod drammatiku s-setgħat tal-Aġenzija Nazzjonali tal-Intelligence, dgħajfet il-libertà tal-midja, il-libertà ta’ espressjoni u d-dritt ta' aċċess għall-informazzjoni ta’ interess pubbliku, biex b’hekk il-persunal tal-Aġenzija saru prattikament immuni minn proċedimenti legali u l-ksur tar-regoli tal-privatezza billi tagħmilha possibbli għall-Aġenzija li takkwista data personali mingħajr ordni tal-qorti; iqis li dawk id-dispożizzjonijiet jiksru l-obbligi tat-Turkija fir-rigward tad-dritt umanitarju internazzjonali u l-liġijiet nazzjonali tiegħu stess;

15.

Jilqa' pożittivament għadd ta' deċiżjonijiet importanti li ħadet il-Qorti Kostituzzjonali tat-Turkija biex tħares l-istat tad-dritt u d-drittijiet fundamentali, bħal-libertà ta' espressjoni, fatt li wera r-reżiljenza tas-sistema kostituzzjonali; josserva, barra minn hekk, li s-sentenzi tal-Qorti Kostituzzjonali enfasizzaw l-irregolaritajiet fit-twettiq tal-investigazzjonijiet u fil-proċessi sussegwenti fil-kawżi Energekon u Sledgehammer; japprezza l-fatt li l-Qorti Kostituzzjonali għadha tirċievi rikorsi individwali; jesprimi tħassib dwar emendi għall-Kodiċi Kriminali, u b’mod partikolari l-użu tat-terminu “suspett raġonevoli”, li jagħti lok għal attakki arbitrarji fuq l-oppożizzjoni; jirrimarka li dawn l-emendi ġew adottati mingħajr konsultazzjoni mal-Kummissjoni, għall-kuntrarju ta’ dak li ġie miftiehem matul in-negozjati;

16.

Jesprimi tħassib serji dwar il-livell għoli ta' polarizzazzjoni politika fit-Turkija; ifakkar li l-pluraliżmu għandu jkun fil-qalba ta’ kwalunkwe sistema demokratika; iħeġġeġ, għalhekk, il-promozzjoni tad-djalogu fl-ispektrum politiku kollu tat-Turkija; jenfasizza li fir rigward ta' proċessi ta’ riforma ewlenin u fit-tul, kostituzzjoni ġdida u t-taħditiet dwar ftehim għall-Kurdi, djalogu ta' dan it-tip huwa indispensabbli; jistieden lill-partit fil-gvern u lill-oppożizzjoni biex jagħmlu kull sforz possibbli biex jikkooperaw u jilħqu kunsens, u biex jinkludu lis-soċjetà ċivili attivament fil-proċessi ta’ teħid ta’ deċiżjonijiet;

17.

Jilqa' l-adozzjoni, f'Marzu 2014, tal-Pjan ta' Azzjoni għall-Prevenzjoni ta' Vjolazzjonijiet tal-Konvenzjoni Ewropea dwar id-Drittijiet tal-Bniedem (KEDB) bħala pass sinifikanti lejn l-allinjament tal-qafas ġuridiku tat-Turkija mal-ġurisprudenza tal-QEDB u jistenna li l-Gvern jadotta aktar provvedimenti biex jimplimenta r-rakkomandazzjonijiet tiegħu; jenfasizza li s-sħubija tat-Turkija fil-Kunsill tal-Ewropa timpenja lit-Turkija ssegwi standards politiċi u legali għoljin u jitlob lit-Turkija timpenja ruħha b'mod sħiħ mal-Kunsill tal-Ewropa u l-Kummissjoni ta' Venezja dwar il-proċess ta' riforma tagħha; ifakkar li l-progress fin-negozjati jiddependi mir-rispett tal-istat tad-dritt u tad-drittijiet fundamentali;

18.

Jinnota bi tħassib li l-maġġor parti tal-investigazzjonijiet dwar il-ġrajjiet tal-park ta' Gezi f'Mejju/Ġunju 2013 u l-allegazzjonijiet dwar ir-rikors sproporzjonat għall-forza u l-abbuż min-naħa tal-pulizija għadhom pendenti u ftit sar progress fl-identifikazzjoni tal-allegati awturi ta' dawn ir-reati; jenfasizza li wara numru ta' lmenti li waslu dwar ir-rikors għall-forza mill-uffiċjali tal-pulizija waqt il-protesti f'Gezi, l-Ombudsman ħarġet rapport fejn sabet rikors sproporzjonat għall-forza; jistieden lill-awtoritajiet Torok jagħmlu tajjeb għal dawk il-vittmi kollha, li kienu dimostranti mhux vjolenti jew li ma kinux fost id-dimostranti, iżda kienu biss fuq is-sit ta' dawn l-avvenimenti b'mod aċċidentali; jitlob itt-tlestija ta' investigazzjonijiet effikaċi u imparzjali dwar il-każijiet kollha tal-allegati maltrattatamenti min-naħa tal-uffiċjali statali u jappella sabiex dawk responsabbli jinġiebu quddiem il-ġustizzja; jissottolinja l-bżonn ta' adozzjoni sussegwenti ta' regoli ċari dwar ir-rikors għall-forza u r-rwol tal-pulizija f'konformità mal-istandards internazzjonali; iħeġġeġ bil-qawwa r-revoka tar-restrizzjonijiet għall-għaqda paċifika u jenfasizza li ma għandhomx jiġu invokati liġijiet oħrajn, bħal-leġiżlazzjoni kontra t-terroriżmu, biex in-nies ma jitħallewx jeżerċitaw id-dritt tagħhom ta' protesta paċifika u li d-dimostrazzjonijiet paċifiċi ma jkunux raġuni għal arrest; jistieden lill-Gvern Tork biex jipprovdi kontrokontrolli adegwati, oġġettivi u trasparenti fuq is-setgħa tal-aġenziji tal-infurzar tal-liġi; jirrakkomanda li l-awtoritajiet Torok iwaqqfu mekkaniżmu indipendenti u effikaċi għall-ilmenti li jikkonċernaw lill-pulizija; jesprimi tħassib serju dwar il-pakkett tas-sigurtà domestika li jmur kontra l-prinċipju ta' sorveljanza ġudizzjarja tal-attivitajiet tal-pulizija u li huwa eċċessiv fil-kamp ta' applikazzjoni tiegħu;

19.

Jissottolinja l-ħtieġa ta' reviżjoni tal-liġi dwar l-Istituzzjoni Nazzjonali għad-Drittijiet tal-Bniedem (NHRI) tat-Turkija bil-għan li jsir korp indipendenti, mgħammar b'riżorsi adegwati, responsabbli fil-konfront tal-pubbliku u bil-parteċipazzjoni ta' gruppi tas-soċjetà ċivili; jieħu nota tar-rakkomandazzjonijiet fir-rapport maħruġ mill-Ombudsman, inkluża t-talba għar-rikors gradwali u proporzjonat għall-forza mill-pulizija, u biss bħala l-aħħar riżorsa u taħt supeviżjoni; jenfasizza l-importanza li jissaħħaħ id-dritt ta' inizjattiva tal-Ombudsman, il-kapaċità tiegħu li jwettaq kontrolli u garanziji fuq il-post biex jagħti segwitu adegwat għad-deċiżjonijiet tal-Ombudsman;

20.

Ifaħħar lit-Turkija dwar soċejtà ċivili tar-Rom dejjem tikber; jittama li l-organizzazzjonijiet il-ġodda tar-Rom jingħataw l-appoġġ u l-ħin li jippermettulhom jieħdu sehem sinifikanti f'inizjattivi ta' kooperazzjoni biex ifasslu u jimplimentaw miżuri kemm fil-livell lokali kif ukoll dak nazzjonali; jirrakkomanda li l-Gvern jikkombina proġetti ta' akkomodazzjoni eżistenti ma' aspetti soċjali u fit-tul bħall-kura tas-saħħa u l-edukazzjoni; jilqa' l-pjanijiet ta' azzjoni ġenerali biex tiġi miġġielda d-diskriminazzjoni li jistgħu jagħtu lir-Rom aċċess akbar għas-suq tax-xogħol;

21.

Iħeġġeġ lill-Gvern tat-Turkija jiggarantixxi l-libertà tal-midja bħala kwistjoni ta' prijorità u jipprovdi qafas ġuridiku adegwat li jiggarantixxi l-pluraliżmu f'konformità mal-istandards internazzjonali; jikkundanna l-isforzi tal-Gvern Tork biex jipprojbixxi l-aċċess għall-midja soċjali u s-siti web jew jagħlaq dawn tal-aħħar mingħajr ordni tal-qorti, l-approċċ restrittiv tiegħu għal-libertà ta' espressjoni u l-pressjoni fuq il-midja u l-ġurnalisti, li ħafna drabi jirriżultaw fl-intimidazzjoni, it-tkeċċija jew l-arrest ta' ġurnalisti u awtoċensura mifruxa; jirrimarka li l-vjolazzjonijiet tal-libertà ta' espressjoni żdiedu wara l-iskandlu tal-korruzzjoni ta' Diċembru 2013; iqis li huwa meħtieġ li jiġi stabbilit qafas ġuridiku li jippermetti li jkun hemm trasparenza sħiħa dwar is-sjieda tal-grupp tal-midja; itenni l-impenn tal-UE favur il-libertà ta' espressjoni f'kull forma tagħha u jistieden lid-Delegazzjoni tal-UE għat-Turkija biex tkompli tissorvelja proċessi ta' ġurnalisti u difensuri tad-drittijiet tal-bniedem;

22.

Jikkundanna r-raids reċenti tal-pulizija u d-detenzjoni ta' għadd ta' ġurnalisti u rappreżentanti tal-midja fl-14 ta' Diċembru 2014; ifakkar li stampa libera u pluralista hija komponent essenzjali ta' kwalunkwe demokrazija, bħalma huma proċess ġust u l-indipendenza tal-ġudikatura; jenfasizza, għalhekk, il-ħtieġa li fil-każijiet kollha (i) tingħata informazzjoni biżżejjed u trasparenti dwar l-allegazzjonijiet kontra l-akkużati, (ii) l-akkużati jingħataw aċċess sħiħ għall-evidenza inkriminatorja u drittijiet sħaħ ta' difiża, u (iii) jiġi żgurat li l-każijiet jitmexxew sewwa b'tali mod li jistabbilixxu l-veraċità tal-akkużi bla dewmien u lil hinn minn kull dubju raġonevoli; jistieden lill-awtoritajiet tat-Turkija jeżaminaw u jindirizzaw dawn il-każijiet malajr kemm jista' jkun u jaderixxu mal-istandards internazzjonali ta' proċess ġust, f'każ li jinsistu dwar it-tkomplija tal-proċedimenti;

23.

Isostni li l-azzjoni reċenti tal-Gvern Tork kontra l-libertà tal-istampa u l-pluralità tal-opinjonijiet hija inkompatibbli mad-drittijiet fundamentali tal-Unjoni Ewropea u b'hekk hi f'konflitt mal-ispirtu tal-proċess tan-negozjati;

24.

Huwa tal-fehma li, f'konformità mal-impenn tal-UE favur l-istat tad-dritt u l-valuri fundamentali, b'mod urġenti jinħtieġu riformi fit-Turkija fl-oqsma tal-ġudikatura u d-drittijiet fundamentali u l-ġusitzzja, il-libertà u s-sigurtà rispettivament; jemmen ukoll li l-komunikazzjoni tal-parametri tal-ftuħ uffiċjali għall-Kapitoli 23 (ġudikatura u drittijiet fundamentali) u 24 (ġustizzja, libertà u sigurtà) hija pass importanti biex jiġu promossi riformi tassew effikaċi u kif jiġi żgurat li l-proċess ta' riforma fit-Turkija jkun imsawwar abbażi ta' valuri u standards Ewropej; itenni l-appell tiegħu lill-Kunsill biex, ladarba jkunu sodisfatti l-kriterji stabbiliti, jibda negozjati dwar il-ġudikatura u d-drittijiet fundamentali u dwar il-ġustizzja, il-libertà u s-sigurtà; jistieden lit-Turkija tikkoopera kemm jista' jkun għal dan il-għan; jistieden lill-Kummissjoni tippromwovi mingħajr dewmien aktar djalogu u kooperazzjoni mat-Turkija fl-oqsma koperti mill-Kapitoli 23 u 24 biex tippromwovi fehim komuni dwar ir-riformi meħtieġa;

25.

Jilqa' d-deċiżjoni li r-riformi relatati mal-istat tad-dritt u mad-drittijiet fundamentali, mal-affarijiet interni u mas-soċjetà ċivili għandhom jirċievu aktar finanzjamenti fl-ambitu tal-Istrument għall-Assistenza ta' Qabel l-Adeżjoni (IPA) II għall-perjodu 2014-2020; jirrimarka li l-promozzjoni tal-istat tad-dritt, id-demokrazija u l-libertajiet fundamentali huma prinċipji ewlenin li jirregolaw l-appoġġ ta' qabel l-adeżjoni; itenni l-konklużjoni tal-Kunsill ta' Diċembru 2014 li ser tiġi introdotta koerenza msaħħa bejn l-assistenza finanzjarja u l-progress ġenerali li jkun sar fl-implimentazzjoni tal-istrateġija ta' qabel l-adeżjoni, inkluż ir-rispett sħiħ għall-istat tad-dritt u l-libertajiet fundamentali; jistieden, barra minn hekk, lill-Kummissjoni Ewropea biex timmonitorja mill-qrib l-implimentazzjoni tal-IPA II fil-pajjiżi kandidati kollha u biex tiddedika riżorsi disponibbli taħt l-Istrument Ewropew għad-Demokrazija u għad-Drittijiet tal-Bniedem (EIDHR) biex tiġi appoġġjata l-libertà ta' espressjoni, inklużi l-libertà u l-pluraliżmu tal-mezzi ta' komunikazzjoni, il-libertà ta' assoċjazzjoni u ta' assemblea, id-drittijiet relatati mat-trade unions, u l-libertà tal-ħsieb;

26.

Jieħu nota tal-fatt li t-Turkija kkontribwiet għad-dħul fis-seħħ, fl-1 ta' Awwissu 2014, tal-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika (il-Konvenzjoni ta' Istanbul); jesprimi, madankollu, tħassib dwar il-livelli għolja u persistenti ta' vjolenza fuq in-nisa u n-nuqqas ta' implimentazzjoni ta' protezzjonijiet tal-liġi domestika għall-prevenzjoni tal-vjolenza fuq in-nisa; jistieden lill-awtoritajiet Torok jipprovdu biżżejjed faċilitajiet ta' akkoljenza għall-protezzjoni tan-nisa u l-minuri li huma vittmi ta' vjolenza; jirrakkomanda li l-Gvern jippromwovi l-ugwaljanza bejn is-sessi fl-oqsma politiċi, ekonomiċi, soċjali, kulturali u ċivili jew fi kwalunkwe qasam ieħor; jistieden lill-Gvern tat-Turkija biex, b'kooperazzjoni mas-soċjetà ċivili u l-assoċjazzjonijiet tal-impriżi rilevanti, jiffaċilita l-intraprenditorija tan-nisa u jnaqqas l-ostakli għall-aċċess tan-nisa għal attivitajiet ekonomiċi u jħeġġeġ lill-Gvern tat-Turkija, f'dan ir-rigward, biex jistabbilixxi mira ambizzjuża fejn jidħol l-aċċess tan-nisa għall-impjiegi; jirrimarka li t-Turkija qiegħda fil-125 post minn 142 pajjiż fir-rapport tal-Forum Ekonomiku Dinji dwar id-Disparità Globali bejn is-Sessi tal-2014; jiddispjaċih bil-qawwi għar-rimarki li saru minn xi uffiċjali u rappreżentanti tal-Gvern dwar ir-rwol tan-nisa fis-soċjetà Torka u jenfasizza l-importanza tal-ġlieda kontra l-isterjotipi u l-preġudizzji fis-soċjetà kontra n-nisa;

27.

Jenfasizza l-importanza li jitkompla l-proċess ta' riforma fil-qasam tal-libertà tal-ħsieb, il-kuxjenza u r-reliġjon billi jingħata lok sabiex il-komunitajiet reliġjużi jiksbu personalità ġuridika, billi jiġu eliminati r-restrizzjonijiet kollha fuq it-taħriġ, il-ħatra, ir-residenza legali u s-suċċessjoni tal-kleru, u billi tiġi żgurata implimentazzjoni adegwata tad-deċiżjonijiet kollha rilevanti tal-QEDB u tar-rakkomandazzjonijiet tal-Kummissjoni ta' Venezja; jenfasizza, f'dan ir-rigward, il-ħtieġa li jiġi promoss djalogu mal-komunità Alevi u li jingħata rikonoxximent xieraq lid-djar Cem bħala postijiet ta' qima, li jiġi permess il-ftuħ mill-ġdid tas-seminarju Grieg Ortodoss ta' Halki u jitneħħew l-ostakli kollha għall-funzjonament tajjeb tiegħu, kif ukoll li jiġi permess l-użu uffiċjali tat-titolu ekkleżjastiku tal-Patrijarka Ekumeniku; jitlob lill-awtoritajiet rilevanti Torok jindirizzaw il-kwistjonijiet kollha pendenti relatati mar-radd lura tal-art li kienet tappartjeni lill-monasteru ta' Mor Gabriel u r-rivendikazzjonijiet territorjali kollha l-oħra tal-Knisja Sirijaka; ifakkar fl-importanza li ssir implimentazzjoni adegwata tar-rakkomandazzjonijiet tal-Kummissjoni ta' Venezja dwar Imvros u Tenedos fir-rigward tal-protezzjoni ta' proprjetà u drittijiet relatati mal-edukazzjoni; jissottolinja l-ħtieġa li jiġi rispettat bis-sħiħ, f'konformità mal-valuri Ewropej, id-dritt għal stili ta' ħajja differenti, kemm sekulari kif ukoll ibbażati fuq il-fidi, u li tinżamm is-separazzjoni tal-istat mir-reliġjon; jenfasizza l-importanza li jiġu protetti d-drittijiet tal-minoranzi; jesprimi dispjaċir dwar il-fatt li, wara t-tneħħija tal-liġi preċedenti sentejn ilu u minħabba lakuna ġuridika eżistenti, mhuwiex possibbli li l-fondazzjonijiet tal-karità li mhumiex Musulmani jagħżlu l-korpi ta' tmexxija tagħhom;

28.

Jenfasizza l-bżonn li jiġi rikonoxxut id-dritt għall-oġġezzjoni ta' kuxjenza għas-servizz militari obbligatorju;

29.

Jistieden lit-Turkija tagħmel sforzi serji biex tipproteġi d-drittijiet tal-komunità LGBTI u huwa tal-fehma li l-ħolqien ta' korp speċifiku għall-ġlieda kontra d-diskriminazzjoni, id-diskors ta' mibegħda, ir-razziżmu, il-ksenofobija, l-antisemitiżmu u l-intolleranza jsaħħaħ id-drittijiet individwali fit-Turkija; jistieden lit-Turkija biex tiddigrieta leġiżlazzjoni komprensiva kontra d-diskriminazzjoni, li tinkludi l-projbizzjoni ta' diskriminazzjoni u diskors ta' mibegħda abbażi ta' etniċità, reliġjon, orjentazzjoni sesswali, ġeneru jew identità tal-ġeneru, u biex tinkludi l-projbizzjoni ta' tali diskriminazzjoni f'kostituzzjoni ġdida; jesprimi tħassib dwar l-attakki frekwenti fuq persuni transġeneru u n-nuqqas ta' protezzjoni pprovduta lill-persuni LGBTI kontra atti ta' vjolenza; jiddispjaċih ħafna li r-reati ta' mibegħda kontra persuni LGBTI spiss jibqgħu mhux ikkastigati jew li s-sentenzi tat-trasgressuri jkunu mnaqqsa minħabba “provokazzjoni inġusta” min-naħa tal-vittma; itenni l-appell tiegħu lill-Gvern tat-Turkija biex jordna lill-Forzi Armati Torok jieqfu jikklassifikaw l-omosesswalità u t-transesswalità bħala “marda psikosesswali”;

30.

Jesprimi dispjaċir għat-telf ta' bosta ħajjiet wara d-diżastri fil-minjieri ta' Soma u Ermenek; jilqa' r-ratifika min-naħa tat-Turkija tal-Konvenzjoni tal-Organizzazzjoni Internazzjonali tax-Xogħol (ILO) dwar is-sikurezza u s-saħħa fil-minjieri u jitlob l-implimentazzjoni tagħha bla dewmien; jenfasizza l-importanza li jissolvew il-kwistjonijiet relatati mas-saħħa u s-sikurezza okkupazzjonali fis-setturi kollha u jħeġġeġ biex il-monitoraġġ tal-inċidenti fatali fuq ix-xogħol ikun aktar trasparenti; huwa tal-fehma li l-libertà tat-trade unions, id-djalogu soċjali u l-involviment tas-sħab soċjali huma fundamentali għall-iżvilupp ta' soċjetà prospera u pluralista, u jissottolinja l-importanza ta' aktar progress fl-oqsma tal-politika soċjali u l-impjiegi, abbażi ta' implimentazzjoni adegwata u f'waqtha tal-konvenzjonijiet tal-ILO; jieħu nota tan-nuqqasijiet leġiżlattivi fil-qasam tad-drittijiet tax-xogħol u tat-trade unions; jenfasizza li d-dritt għall-organizzazzjoni, għan-negozjar kollettiv u d-dritt ta' strajk għall-impjegati tas-settur privat u għall-impjegati taċ-ċivil għandhom ikunu allinjati mal-acquis tal-UE u mal-istandards internazzjonali; iħeġġeġ lill-Gvern Tork iħejji pjan direzzjonali biex itejjeb il-leġiżlazzjoni u jallinjaha mal-istandards tal-ILO; jenfasizza l-importanza li t-Turkija tissodisfa l-parametri tal-ftuħ dwar il-politika soċjali u l-impjiegi; jistieden lill-Kummissjoni tipprovdi assistenza teknika adegwata lit-Turkija fil-qasam tar-riforma tax-xogħol u kif jiġu promossi l-istandards tal-UE;

31.

Jistieden lit-Turkija tilleġiżla dwar il-kundizzjonijiet tax-xogħol ta' ħaddiema part-time, pereżempju, li bħalissa huma soġġetti għal kundizzjonijiet ħżiena, nuqqas ta' sigurtà tax-xogħol u problemi biex jissieħbu fit-trade unions; jinnota li s-setturi tal-minjieri u tal-kostruzzjoni huma l-aktar industriji perikolużi fit-Turkija u jitlob investigazzjonijiet trasparenti f'inċidenti fatali fuq il-post tax-xogħol;

32.

Jistieden lill-Gvern Tork iwaqqaf il-pjanijiet tiegħu għall-kostruzzjoni tal-impjant tal-enerġija nukleari Akkuyuy; jirrimarka li s-sit previst jinsab f'reġjun suxxettibbli għal terremoti severi, u għalhekk jippreżenta theddida serja mhux biss għat-Turkija iżda għar-reġjun tal-Mediterran; għaldaqstant, jitlob lill-Gvern Tork jingħaqad mal-Konvenzjoni Espoo, li qed timpenja l-partijiet jinnotifikaw u jikkonsultaw lil xulxin dwar proġetti ewlenin taħt kunsiderazzjoni li x'aktarx ikollhom impatt ambjentali negattiv sinifikanti bejn il-fruntieri; għal dan il-għan, jitlob lill-Gvern Tork jinvolvi lill-gvernijiet tal-pajjiżi ġirien tiegħu, bħall-Greċja u Ċipru, li jkunu involuti jew għall-inqas ikkonsultati matul kwalunkwe żvilupp ulterjuri fl-inizjattiva ta' Akkuyu;

33.

Jissottolinja l-benefiċċji importanti tal-Unjoni Doganali (UD) bejn l-UE u t-Turkija; ifakkar li, mill-bidu tal-UD fl-1996, il-valur tal-kummerċ bilaterali bejn it-Turkija u l-UE kiber aktar minn erba' darbiet, b'żieda sinifikanti parallela tal-investiment dirett barrani mill-UE lejn it-Turkija u integrazzjoni aktar profonda bejn l-impriżi Torok u Ewropej għall-ġid tat-tnejn li huma; jenfasizza f'dan ir-rigward, madankollu, li kwalunkwe żieda fl-impatt pożittiv tal-UD hija marbuta mill-qrib ma' konformità mar-regoli u r-rekwiżiti tagħha, u għaldaqstant huwa mħasseb ħafna dwar il-problemi dejjem jikbru għall-kumpaniji Ewropej li qegħdin jagħmlu kummerċ mat-Turkija; jirrimarka l-valutazzjoni reċenti tal-UD min-naħa tal-Bank Dinji, li jisħaq fuq il-bżonn li jiddaħħlu għadd ta' riformi biex jinżamm ambjent favorevoli għal kooperazzjoni ekonomika stretta anki fil-futur; jiġbed partikolarment l-attenzjoni fuq il-bżonn: (i) li titwessa' l-UD biex tkopri wkoll il-prodotti agrikoli, is-servizzi u l-akkwist pubbliku, (ii) li jinħolqu kundizzjonijiet favorevoli għat-tkabbir kontinwu tal-kummerċ, inkluża l-faċilitazzjoni tal-viżi għal min isiefer fuq xogħol, u (iii) biex konsultazzjonijiet bejn l-UE u t-Turkija fir-rigward tal-impatt fuq it-Turkija tal-Ftehimiet ta' Kummerċ Ħieles iffirmati mill-UE mal-pajjiżi terzi, ikunu segwiti b'aktar intensità;

34.

Huwa tal-fehma li d-djalogu politiku bejn it-Turkija u l-UE għandu jkun integrat bi djalogu ekonomiku regolari strutturat, f'livell għoli, dwar kwistjonijiet ta' interess komuni, fosthom ir-relazzjonijiet kummerċjali mal-pajjiżi terzi; jissottolinja, f'dan ir-rigward, l-interazzjoni bejn il-funzjonament korrett tal-istat tad-dritt u l-iżvilupp ekonomiku; jemmen fl-importanza f'li jiġi żviluppat u msaħħaħ il-qafas ekonomiku, istituzzjonali u ġuridiku tat-Turkija fil-qasam tal-politika ekonomika u monetarja, partikolarment għal dik li hija l-indipendenza tal-Bank Ċentrali, u jemmen li dan jista' jikkontribwixxi għall-allinjament tat-Turkija mal-acquis; jinnota li l-kooperazzjoni ekonomika tkun imsaħħa sewwa bit-Turkija tikkonforma b'mod suffiċjenti mal-istandards tal-UE dwar l-akkwist pubbliku, il-kompetizzjoni u l-impjieg u l-politika soċjali;

35.

Jerġa' jafferma l-appoġġ tiegħu għad-dħul fis-seħħ, fl-1 ta' Ottubru 2014, tal-ftehim ta' riammissjoni mal-UE; jinkoraġġixxi lill-Kummissjoni tkompli l-monitoraġġ tal-progress mit-Turkija fl-issodisfar tar-rekwiżiti tal-pjan direzzjonali għal-liberalizzazzjoni tal-viżi; jilqa' l-isforzi effikaċi magħmula biex jiġu sodisfatti l-kriterji identifikati fil-pjan direzzjonali għal-liberalizzazzjoni tal-viżi; ifakkar li d-djalogu għal-liberalizzazzjoni tal-viża huwa proċess ibbażat fuq mertu u li t-Turkija għandha tissodisfa r-rekwiżiti kollha stabbiliti fil-pjan direzzjonali tal-viża, inkluża, b'mod partikolari, l-implimentazzjoni sħiħa u effikaċi tad-dispożizzjonijiet kollha tal-ftehim ta' riammissjoni; itenni l-obbligu tat-Turkija biex timplimenta, bis-sħiħ u b'mod effikaċi, il-ftehim ta' riammissjoni u l-liberalizzazzjoni tal-viżi fil-konfront tal-Istati Membri kollha inkluż aċċess mingħajr viża u nondiskriminatorju għat-territorju Tork għaċ-ċittadini tal-Istati Membri kollha tal-UE; jistieden lit-Turkija timplimenta bis-sħiħ u b'mod effikaċi l-ftehimiet bilaterali ta' riammissjoni eżistenti; ifakkar li t-Turkija hija waħda mill-pajjiżi ta' tranżitu ewlenin għall-migrazzjoni irregolari lejn l-UE u jappella għat-titjib tal-kooperazzjoni transkonfinali tat-Turkija mal-Istati Membri ġirien tal-UE f'dan ir-rigward; jilqa' b'sodisfazzjon id-dħul fis-seħħ tal-Liġi dwar il-Barranin u l-Protezzjoni Internazzjonali u l-istabbiliment tad-Direttorat Ġenerali għall-Ġestjoni tal-Migrazzjoni (GDMM) f'April 2014 bħala passi sostanzjali lejn allinjament mal-istandards tal-UE fil-qasam tal-protezzjoni internazzjonali għall-migranti regolari u irregolari; jinnota li jeħtieġ li tiżdied il-kooperazzjoni bejn it-Turkija u l-Istati Membri kollha tal-UE, bil-għan partikolari li tissaħħaħ il-ġestjoni tal-fruntieri komuni mal-Istati Membri kollha tal-UE; jenfasizza l-ħtieġa li t-Turkija tkompli ssaħħaħ is-sigurtà tal-fruntieri sabiex tiġi miġġielda l-migrazzjoni irregolari lejn il-pajjiżi tal-UE;

36.

Ifakkar fl-importanza strateġika tat-Turkija għas-sigurtà tal-enerġija tal-UE u jqis lit-Turkija bħala sieħeb importanti fis-settur tal-enerġija; jindika t-tliet proġetti ta' Kurituri tal-Gass tan-Nofsinhar, approvati fi tmiem l-2013, li se jtejbu s-sigurtà tal-provvista tal-gass għat-Turkija u l-aċċess għall-UE bħala s-suq enerġetiku ewlieni; huwa tal-fehma li, f'kuntest ta' swieq tal-enerġija dejjem aktar kompetittivi u fid-dawl tal-bżonn ta' sorsi enerġetiċi u rotot tal-provvista diversifikati, it-Turkija, bil-potenzjal notevoli tagħha ta' enerġiji rinnovabbli, tista' tagħti kontribut sinifikanti lis-sigurtà enerġetika tal-UE u lill-ambizzjonijiet tagħha rigward id-diversifikazzjoni tal-enerġija f'konformità mad-dritt internazzjonali; jinsab imħasseb dwar kooperazzjoni aktar mill-qrib fil-qasam tal-enerġija bejn it-Turkija u r-Russja u għalhekk jemmen li l-UE għandha tħaffef in-negozjati dwar l-enerġija;

37.

Ifakkar fil-pożizzjoni strateġika tat-Turkija bħala sieħba tal-UE u Membru tan-NATO u għalhekk fl-importanza ġeopolitika kruċjali u r-rilevanza tagħha għal strateġija komprensiva li tfittex li tindirizza s-sigurtà u l-istabbiltà fil-Viċinati tal-Lvant u tan-Nofsinhar, b'referenza partikolari għas-Sirja u l-Iraq; jiġbed l-attenzjoni għall-fatt li l-iżviluppi serji ħafna fir-reġjun u l-attakki mwettqa fuq art Ewropea jagħmluha kruċjali li jiżdiedu d-djalogu u l-kooperazzjoni mal-UE dwar kwistjonijiet ta' politika barranija fil-qafas ta' djalogu politiku bejn l-UE u t-Turkija; jistieden lit-Turkija jkollha rwol attiv fil-koalizzjoni internazzjonali kontra gruppi terroristiċi bħall-ISIL u jistieden lit-Turkija tuża r-riżorsi kollha għad-dispożizzjoni tagħha; jistieden lit-Turkija żżid miżuri biex tevita li l-hekk imsejħa ġellieda barranin, flus jew tagħmir jilħqu l-ISIL u gruppi estremisti oħrajn permezz tat-territorju tagħha; jisħaq fuq il-bżonn li d-djalogu regolari bejn l-UE u t-Turkija kontra t-terroriżmu jitkompla u jissaħħaħ u li jittieħdu miżuri konkreti u azzjoni bħala parti mill-isforzi komuni tagħna fil-ġlieda kontra kull forma ta' terroriżmu; jistieden lit-Turkija tiżgura kontroll effikaċi tal-fruntieri filwaqt li tkompli tipprovdi l-assistenza meħtieġa bis-saħħa ta' mezzi ta' għajnuna umanitarja lir-rifuġjati li jidħlu mis-Sirja u tiżgura s-sigurtà tal-vittmi tal-gwerra ċivili Sirjana; jissottolinja l-importanza ta' djalogu u konsultazzjoni f'livell għoli aktar frekwenti bejn l-UE u t-Turkija dwar kwistjonijiet marbuta mal-politika barranija u s-sigurtà sabiex jiġi żgurat li l-politiki tagħna jikkomplementaw lil xulxin u li t-Turkija tallinja b'mod progressiv il-politika barranija tagħha ma' dik tal-UE;

38.

Huwa tal-opinjoni li l-Ministru Tork għall-Affarijiet Barranin għandu jkun mistieden jattendi laqgħat tal-Kunsill Affarijiet Barranin kull meta jkun rilevanti; huwa tal-opinjoni li jeħtieġ qafas ta' djalogu strutturat, kooperazzjoni u koordinament fir-rigward tal-kwistjonijiet tal-politika barranija ta' sigurtà u difiża;

39.

Jiddispjaċih li t-theddida ta' casus belli ddikjarata mill-Gran Assemblea Nazzjonali Torka kontra l-Greċja għadha ma ġietx irtirata minkejja rekord tajjeb ta' djalogu u kooperazzjoni bejn il-Greċja u t-Turkija;

40.

Ifaħħar lit-Turkija għall-assistenza kontinwa tagħha lir-rifuġjati, stmati għal 1,6 miljun, mill-Iraq u mis-Sirja u għaż-żamma ta' politika ta' fruntieri miftuħa għal skopijiet umanitarji; jilqa' b'sodisfazzjon id-Direttiva dwar il-Protezzjoni Temporanja adottata f'Ottubru 2014, li tagħti status ġuridiku sikur lir-rifuġjati u tippermettilhom jirċievu karti tal-identità u aċċess għas-suq tax-xogħol; jistieden lill-UE tkompli l-appoġġ finanzjarju tagħha għall-għajnuna umanitarja lir-rifuġjati tas-Sirja u tal-Iraq fit-Turkija; jiġbed l-attenzjoni għall-fatt li l-kampijiet tar-rifuġjati ma jesgħux aktar nies kif ukoll għall-piż tat-tfittxija ta' alloġġ fuq il-ħajja u r-riżorsi tar-rifuġjati; huwa tal-fehma li l-UE għandha tagħti appoġġ attiv lill-Gvern Tork fid-definizzjoni ta' programmi ta' assistenza fit-tul għar-rifuġjati u fil-promozzjoni tal-aċċess għall-edukazzjoni, għall-kura tas-saħħa u għall-impjieg (legali); jistieden lill-Kummissjoni żżid ir-riżorsi disponibbli fl-ambitu tal-IPA-2 u tal-Istrument li jikkontribwixxi għall-Istabbiltà u l-Paċi bil-għan li tingħata assistenza adegwata lill-komunitajiet lokali milquta minn flussi kbar ta' rifuġjati; jistieden ukoll lill-Istati Membri tal-UE jfornu (temporanjament) postijiet ta' risistemazzjoni għar-rifuġjati l-aktar vulnerabbli, fi spirtu ta' kondiviżjoni awtentika tar-responsabilitajiet;

41.

Jistieden lit-Turkija, bl-appoġġ tekniku u finanzjarju ta' sħabha, biex tipprovdi aċċess għall-edukazzjoni għall-għadd dejjem jikber ta' tfal Sirjani li jgħixu ġewwa t-Turkija;

42.

Iħeġġeġ lill-Gvern Tork itemm il-ksur kontinwu tal-ispazju tal-ajru u l-ilmijiet territorjali Griegi kif ukoll it-titjiriet tal-inġenji tal-ajru militari Torok fuq il-gżejjer Griegi;

43.

Jistieden lill-Gvern Tork jiffirma u jirratifika mingħajr dewmien il-Konvenzjoni tan-Nazzjonijiet Uniti dwar id-Dritt tal-Baħar (UNCLOS), li ġiet iffirmata u rratifikata mill-UE u t-28 Stati Membri tagħha, u jissottolinja d-dritt leġittimu tar-Repubblika ta' Ċipru li tkun involuta fi ftehimiet bilaterali li jikkonċernaw iż-żona ekonomika esklużiva tagħha; itenni t-talbiet tiegħu lit-Turkija biex tirrispetta d-drittijiet sovrani tal-Istati Membri kollha, inklużi dawk relatati mal-esplorazzjoni u mal-isfruttament tar-riżorsi naturali meta jikkonformaw mal-acquis tal-Unjoni u mad-dritt internazzjonali; jistieden lit-Turkija toqgħod lura minn kwalunkwe azzjoni li tagħmel il-ħsara lir-relazzjonijiet tajbin bejn il-ġirien u klima li twassal għal soluzzjoni paċifika ta' tilwim bilaterali;

44.

Jiddeplora r-rifjut tat-Turkija li tissodisfa l-obbligu tagħha li timplimenta bis-sħiħ u b'mod nondiskriminatorju l-Protokoll Addizzjonali għall-Ftehim ta' Assoċjazzjoni KE-Turkija fir-rigward tal-Istati Membri kollha; ifakkar li dan ir-rifjut għadu qed ikollu effett qawwi fuq il-proċess tan-negozjati;

45.

Itenni l-appoġġ qawwi tiegħu għar-riunifikazzjoni ta' Ċipru, abbażi ta' soluzzjoni ġusta, komprensiva u vijabbli għaż-żewġ komunitajiet, taħt l-awspiċji tas-Segretarju Ġenerali tan-NU u skont ir-riżoluzzjonijiet rilevanti tal-Kunsill tas-Sigurtà tan-NU u l-valuri u l-prinċipji li fuqhom hija mibnija l-UE għal federazzjoni bikomunali u biżonali b'sovranità unika, personalità ġuridika internazzjonali unika u ċittadinanza unika b'ugwaljanza politika bejn iż-żewġ komunitajiet u opportunitajiet indaqs għaċ-ċittadini kollha tagħha; jilqa' l-aħbar mill-Mibgħut Speċjali tan-NU Espen Barth Eide li l-kapijiet taż-żewġ komunitajiet għandhom jissuktaw mill-aktar fis in-negozjati taħt l-awspiċji tas-Segretarju Ġenerali tan-NU u jesprimi s-sostenn qawwi tiegħu għall-isforzi li għamel il-Konsulent Speċjali tan-NU għal Ċipru biex joħloq il-kundizzjonijiet għall-issoktar tat-taħditiet; jesprimi t-tama li l-messaġġ ta' riunifikazzjoni u ta' rikonċiljazzjoni mill-mexxej Ċiprijott Tork li ġie elett dan l-aħħar se jiftaħ tieqa ġdida ta' opportunità fil-proċess tan-negozjati; jitlob lit-Turkija u lill-partijiet ikkonċernati kollha biex jappoġġaw b'mod attiv in-negozjati dwar ir-riunifikazzjoni u biex jieħdu l-passi meħtieġa lejn in-normalizzazzjoni tar-relazzjonijiet ma' Ċipru; jistieden lit-Turkija tibda tirtira l-forzi tagħha minn Ċipru u tittrasferixxi ż-żona magħluqa ta' Famagusta lin-NU skont ir-Riżoluzzjoni 550 (1984) tal-Kunsill tas-Sigurtà tan-NU; jistieden b'mod parallel lir-Repubblika ta' Ċipru tiftaħ il-port ta' Famagusta, taħt is-superviżjoni doganali tal-UE, sabiex tippromwovi klima pożittiva għal soluzzjoni b'suċċess tan-negozjati għar-riunifikazzjoni li għaddejjin, u tippermetti liċ-Ċiprijotti Torok jinnegozjaw mal-UE b'mod leġittimu li jkun aċċettabbli għal kulħadd;

46.

Itenni d-deċiżjonijiet rilevanti tal-QEDB u jistieden lill-Gvern Tork biex b'mod immedjat iwaqqaf il-ksur tad-drittijiet tal-bniedem taċ-ċittadini Ċiprijotti u jieqaf iċaħħadhom mit-tgawdija u l-eżerċizzju tal-proprjetà u r-reliġjon tagħhom u drittijiet tal-bniedem oħrajn li joħorġu mill-ordni kostituzzjonali tar-Repubblika ta' Ċipru u l-acquis communautaire, kif ukoll il-prinċipji fundamentali u l-valuri tal-UE;

47.

Jiddeplora l-politika ta' insedjament tat-Turkija u jistieden lit-Turkija żżomm lura minn aktar insedjamenti taċ-ċittadini tat-Turkija fiż-żoni okkupati ta' Ċipru, li tmur kontra l-Konvenzjoni ta' Ġinevra u l-prinċipji tad-dritt internazzjonali; iħeġġeġ lit-Turkija ttemm l-azzjonijiet kollha li jbiddlu l-bilanċ demografiku fuq il-gżira u b'hekk jimpedixxu soluzzjoni futura;

48.

Jistieden lit-Turkija tippermetti lill-Kumitat għall-Persuni Neqsin aċċess sħiħ għall-arkivji rilevanti u ż-żoni militari fil-parti tat-Tramuntana ta' Ċipru għall-eżumazzjoni u tagħti l-informazzjoni rilevanti kollha li twassal għas-sejba ta' fdalijiet rilokati; jappella għal kunsiderazzjoni speċjali fil-konfront tax-xogħol li wettaq il-Kumitat dwar il-Persuni Nieqsa;

49.

Iħeġġeġ lit-Turkija u lill-Armenja jipproċedu għal normalizzazzjoni tar-relazzjonijiet tagħhom billi jirratifikaw, mingħajr kundizzjonijiet preliminari, il-protokolli dwar l-istabbiliment tar-relazzjonijiet diplomatiċi, jiftħu l-fruntiera u jtejbu b'mod attiv ir-relazzjonijiet tagħhom, b'referenza partikolari għall-kooperazzjoni transkonfinali u għall-integrazzjoni ekonomika; jilqa' b'sodisfazzjon id-djalogu li għaddej bħalissa bejn it-Turkija u l-Armenja;

50.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lir-RGħ/VP, lis-Segretarju Ġenerali tal-Kunsill tal-Ewropa, lill-President tal-Qorti Ewropea tad-Drittijiet tal-Bniedem, lill-gvernijiet u lill-parlamenti tal-Istati Membri u lill-Gvern u lill-Parlament tar-Repubblika tat-Turkija.

4.11.2016   

MT

Il-Ġurnal Uffiċjali tal-Unjoni Ewropea

C 407/61

—

wara li kkunsidra r-riżoluzzjonijiet preċedenti tiegħu dwar is-Sirja, inkluża dik tat-30 ta' April 2015 (1),

—

wara li kkunsidra l-komunikazzjoni tal-Kummissjoni tas-6 ta' Frar 2015 bit-titolu “Elementi għal strateġija reġjonali tal-UE għas-Sirja u l-Iraq kif ukoll it-theddida tad-Da'esh”,

—

wara li kkunsidra d-dikjarazzjonijiet u r-rapporti mis-Segretarju Ġenerali tan-NU u mill-Kummissarju Għoli tan-NU għad-Drittijiet tal-Bniedem dwar il-kunflitt fis-Sirja,

—

wara li kkunsidra r-rapporti tal-Kummissjoni Internazzjonali Indipendenti ta' Inkjesta dwar is-Sirja, stabbilita mill-Kunsill tan-Nazzjonijiet Uniti tad-Drittijiet tal-Bniedem,

—

wara li kkunsidra l-Istatut ta' Ruma tal-Qorti Kriminali Internazzjonali adottat fis-17 ta' Lulju 1998, b'mod partikolari l-Artikolu 8(2)(b)(ix) tiegħu, li jiddikjara li l-attakki diretti b'mod intenzjonali kontra monumenti storiċi jikkostitwixxu delitt tal-gwerra,

—

wara li kkunsidra r-riżoluzzjoni tiegħu tat-30 ta' April 2015 dwar il-qerda ta' siti kulturali mwettqa mill-ISIS/Da'esh (2),

—

wara li kkunsidra l-Artikolu 167 tat-Trattat dwar il-Funzjonament tal-Unjoni Ewropea (TFUE), li jiddikjara li “l-Unjoni u l-Istati Membri għandhom jikkultivaw il-koperazzjoni ma' pajjiżi terzi u mal-organizzazzjonijiet internazzjonali kompetenti fil-qasam tal-kultura”,

—

wara li kkunsidra r-Regolament tal-Kunsill (KE) Nru 116/2009 tat-18 ta' Diċembru 2008 dwar l-esportazzjoni tal-oġġetti kulturali,

—

wara li kkunsidra r-riżoluzzjoni dwar il-ħolqien ta' netwerk informali ta' awtoritajiet tal-infurzar tal-liġi u l-kompetenza esperta fil-qasam ta' oġġetti kulturali (EU CULTNET) adottata mill-Kunsill fil-laqgħa tiegħu tal-25 u tas-26 ta' Ottubru 2012,

—

wara li kkunsidra t-Tieni Protokoll (1999) tal-Konvenzjoni tal-Aja tal-1954 għall-Protezzjoni tal-Proprjetà Kulturali fil-Każ ta' Kunflitt Armat,

—

wara li kkunsidra d-dikjarazzjoni tal-Viċi President tal-Kummissjoni/ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, Federica Mogherini, tal-21 ta' Mejju 2015 dwar is-sitwazzjoni fil-Palmira; u wara li kkunsidra d-dikjarazzjoni mill-Kelliem tar-Rappreżentant Għoli, Catherine Ashton tas-17 ta' Frar 2012 li tikkundanna l-arrest ta' Mazen Darwish, u tal-Istqarrija Lokali tal-UE tat-3 ta' April 2012 dwar id-detenzjoni kontinwa mingħajr kapi ta' akkuża tas-Sur Mazen Darwish u ta' seba' difensuri tad-drittijiet tal-bniedem oħrajn,

—

wara li kkunsidra l-Linji Gwida tal-UE dwar id-Difensuri tad-Drittijiet tal-Bniedem adottati f'Ġunju 2004 u aġġornati fl-2008,

—

wara li kkunsidra r-Riżoluzzjoni Nru 2222 tal-Kunsill tas-Sigurtà tan-NU (2015),

—

wara li kkunsidra d-Dikjarazzjoni Universali tad-Drittijiet tal-Bniedem,

—

wara li kkunsidra l-Artikoli 135(5) u 123(4) tar-Regoli ta' Proċedura tiegħu,

A.

billi aktar minn 220 000 persuna, fil-parti l-kbira tagħhom nies ċivili, tilfu ħajjithom sa mill-bidu tal-kunflitt fis-Sirja fl-2011; billi r-reġim ta' Assad, l-IS/Da’esh, al-Nusra u l-partijiet l-oħra involuti fil-kunflitt wettqu ksur massiv u rikorrenti tad-drittijiet tal-bniedem u tad-dritt umanitarju internazzjonali; billi l-parti l-kbira ta' dawn ir-reati s'issa għadhom ma ġewx ikkastigati;

B.

billi r-rikors għat-tortura, l-arresti tal-massa u l-qerda mifruxa ta' żoni popolati eskalaw drammatikament fix-xhur li għaddew; u billi numru kbir ta' Sirjani ġew spustati, fejn uħud minnhom ġew mġiegħla jitbiegħdu aktar mill-assistenza umanitarja li jenħtieġu;

C.

billi l-IS/Da'esh qatlu minn tal-inqas 400 persuna, inkluż nisa u tfal, f'Palmira, sa mill-qbid ta' din il-belt Sirjana antika u, skont l-Osservatorju Sirjan għad-Drittijiet tal-Bniedem, iġġustizzjaw mill-anqas 217-il persuna u żammew taħt arrest 600 persuna oħra, inkluż nisa u tfal fuq akkuża li kellhom kuntatt mal-forzi tar-reġim u li kienu qegħdin jaħbu membri tar-reġim fi djarhom;

D.

billi l-qbid tal-belt ta' Palmira kien segwit b'attakki mill-arju feroċi mill-forzi favur Assad li qatlu għexieren ta' ċittadini u wassal lil ħafna mill-abitanti tal-belt li kien għad fadal biex jaħarbu;

E.

billi wara offensiva ġdida f'April-Mejju 2015 l-IS/Da'esh ħatfu Ramadi fis-17 ta' Mejju 2015 u Palmira fil-21 ta' Mejju 2015, li wasslet biex 50 % tat-territorju Sirjan spiċċa taħt il-kontroll tagħhom; billi l-karattru transnazzjonali tal-hekk imsejjaħ Stat Iżlamiku, li għandu riżorsi finanzjarji sinifikanti u madwar 200 000 ġellied skont uħud mis-sorsi, joħloq theddida għar-reġjun usa'; billi eluf ta' persuni barranin, inklużi ċittadini tal-UE, huma stmati li qed jiġġieldu fi ħdan dawn il-gruppi armati; billi l-qawmien tal-IS/Da'esh aggrava l-kriżi umanitarja, partikolarment permezz ta' spostament massivta' nies ċivili;

F.

billi fil-5 ta' Ġunju 2015 il-membri tal-Kunsill tas-Sigurtà tan-NU esprimew indinjazzjoni għal-livell għoli ta' vjolenza u għall-attakki kollha kontra n-nies ċivili fis-Sirja u kkundannaw l-attakki terroristiċi mwettqa mill-IS/Da'esh, al-Nusra u minn gruppi terroristiċi oħrajn li joperaw fil-pajjiż,

G.

billi Palmira tinsab bejn Damasku u l-belt tal-Lvant ta' Deir al-Zour u għandha bjar tal-gass u minjieri tal-fosfat importanti fil-viċinanza tagħha; billi l-qbid ta' Palmira kkoinċida mal-ħtif ta' Ramadi, fil-provinċja ta' Anbar tal-Iraq, mill-IS/Da’esh, iżda wkoll, ftit wara t-telfiet territorjali mill-Is/Da'esh madwar Tikrit;

H.

billi Palmira, li hi eqdem minn 2 000 sena, hi sit kulturali importanti u hi nkluża fil-Lista ta' Patrimonju Dinji tal-UNESCO; billi fil-21 ta' Mejju 2015, id-Direttur Ġenerali tal-UNESCO appella għat-tmiem immedjat tal-ostilitajiet fil-belt;

I.

billi Palmira hi simbolu tal-patrimonju kulturali għani tas-Sirja, u għandha fdalijiet monumentali ta' belt kbira, li kienet waħda miċ-ċentri kulturali fost l-iktar importanti tad-dinja antika; billi l-qtil tal-massa mill-IS/Da'esh u l-atti ta' qerda ta' patrimonju arkeoloġiku u kulturali, taħt ċerti ċirkostanzi huma meqjusa bħala reati kontra l-umanità u bħala forma ta' “tindif kulturali”, u jikkostitwixxu għal delitt tal-gwerra skont l-Istatut ta' Ruma tal-Qorti Kriminali Internazzjonali; billi dawn l-attakki sistematiċi fuq il-patrimonju kulturali ġew deskritti bħala “tindif kulturali” mid-Direttur Ġenerali tal-UNESCO, Irina Bokova;

J.

billi l-IS/Da'esh qiegħed jattakka u jeqred il-patrimonju kulturali kemm tal-Iraq u kemm tas-Sirja bħala tattika tal-gwerra għall-firxa tat-terrur u tal-mibegħda; billi, kaġun tal-qbid ta' Palmira mill-IS/Da'esh, il-patrimonju storiku ta' din il-belt jinsab taħt theddida ta' qerda;

K.

billi fl-istrateġija reġjonali tal-UE għas-Sirja u l-Iraq u t-theddida tal-IS/Da'esh, li ġiet adottata mill-Kunsill Affarijiet Barranin fis-16 ta' Marzu 2015, l-UE tikkundanna bil-qawwa kontra l-qerda intenzjonata tal-patrimonju arkeoloġiku u kulturali, u jinnota li tali azzjonijiet jistgħu jikkostitwixxu delitt tal-gwerra skont it-tifsira tal-Istatut ta' Ruma tal-Qorti Kriminali Internazzjonali (QKI);

L.

billi l-UNESCO u s-sħab l-oħrajn nedew il-Proġett għall-Protezzjoni b'Urġenza tal-Patrimonju Sirjan għal perjodu ta' tliet snin, bil-għan li jiżguraw il-ħarsien b'urġenza tal-patrimonju kulturali;

M.

billi l-kummerċ illeċitu ta' oġġetti kulturali issa huwa t-tielet l-aktar kummerċ illegali sinifikanti, wara d-drogi u l-armi, billi dan il-kummerċ illeċitu huwa ddominat minn netwerks kriminali organizzati, u billi l-mekkaniżmi nazzjonali u internazzjonali attwali la huma mgħammra u lanqas mhuma sostnuti b'mod adegwat biex jittrattaw din il-kwistjoni; billi l-UE ħadet il-passi kollha xierqa skont ir-Riżoluzzjoni Nru 2199 tal-Kunsill tas-Sigurtà tan-NU (2015) biex tipprevjeni l-kummerċ illegali tal-proprjetà kulturali;

N.

billi mill-bidu tal-kunflitt Sirjan f'Marzu 2011, kien hemm ksur mifrux u serju tad-drittijiet tal-bniedem, b'mod partikolari l-attakki mmirati intenzjonati, id-detenzjoni arbitrarja u l-għajbien ta' ġurnalisti indipendenti, difensuri tad-drittijiet tal-bniedem, ħaddiema umanitarji u persunal mediku, soġġetti għal theddid, vjolenza, arrest arbitrarju u għajbien fis-Sirja;

O.

billi Mazen Darwish, ġurnalist u attivist Sirjan u President taċ-Ċentru Sirjan għall-Midja u l-Libertà ta' Espressjoni spiċċa miżmum f'ħabs mill-2012, bħal kif ġralhom Hani Al-Zaitani u Hussain Ghrer, għall-ħidma tagħhom fil-ħarsien tal-libertà ta' espressjoni; billi ġie rrapportat li Mazen Darwish kien soġġett għal tortura ħarxa u trattament ħażin u li fis-6 ta' Mejju 2015 ittieħed f'post mhux magħruf; billi Mazen Darwish ingħata l-Premju UNESCO għal-Libertà tal-Istampa 2015, kif ukoll għotja oħra internazzjonali importanti, bħall-Preis der Lutherstädte – “Das unerschrockene Wort” 2015, il-Bruno-Kreisky-Preis für Verdienste um die Menschenrechte 2013, u l-Premju PEN-Pinter 2014; billi l-priġunerija kontinwa ta' Mazen Darwish, Hani Al-Zaitani u Hussain Ghrer hija evidenza ulterjuri tan-natura repressiva tar-reġim ta' Bashar al-Assad fis-Sirja;

P.

billi r-Riżoluzzjoni Nru 67/262 tal-15 ta' Mejju 2013 tal-Assemblea Ġeneral tan-NU talbet li l-awtoritajiet Sirjani jeħilsu b'mod immedjat il-persuni kollha miżmuma arbitrarjament, inklużi l-membri taċ-Ċentru Sirjan għall-Midja u l-Libertà ta' Espressjoni;

Q.

billi fid-19 ta' Frar 2015, il-Kummissarju Għoli tan-NU għad-Drittijiet tal-Bniedem, Zeid Ra'ad Al Hussein, ħeġġeġ lill-awtoritajiet Sirjani jeħilsu lil dawk kollha miżmuma l-ħabs talli esprimew b'mod paċifiku l-fehmiet tagħhom, inkluż Mazen Darwish;

R.

billi mijiet ta' difensuri tad-drittijiet tal-bniedem ġew soġġetti għal theddid, vjolenza, arrest arbitrarju u għajbien fis-Sirja; billi dan jinkludi l-avukata tad-drittijiet tal-bniedem u rebbieħa tal-Premju Sakharov tal-2011 Razan Zeitouneh, li nħatfet f'Duma fid-9 ta' Diċembru 2013;

1.

Jikkundanna bil-qawwa l-abbużi sistematiċi u mifruxa orribbli tad-drittijiet tal-bniedem, il-ksur tad-dritt umanitarju internazzjonali mwettaq mir-reġim ta' al-Assad, minn terroristi li jappartjenu għall-IS/Da'esh u gruppi ġiħadisti oħra fis-Sirja, u s-sentenzi u l-akkużi kontra l-attivisti, il-bloggers u l-ġurnalisti politiċi, ċivili u tad-drittijiet tal-bniedem; itenni mill-ġdid il-kundanna assoluta tiegħu tat-tortura, il-bumbardamenti intensifikati u l-użu ta' bumbardamenti mill-ajru, inklużi l-bombi f'forma ta' bittija (barrel bombs), mill-Gvern Sirjan; jesprimi s-solidarjetà qawwija tiegħu mal-vittmi; jibqa' iddispjaċut profondament għal-livell ta' tbatija umana u t-telf ta' ħajja fil-kunflitt tas-Sirja, u huwa mħasseb ħafna dwar id-deterjorazzjoni tas-sitwazzjoni umanitarja u tas-sigurtà fis-Sirja;

2.

Jikkundanna l-qbid ta' Palmira mill-IS/Da'esh fil-21 ta' Mejju 2015 wara attakk li dam għaddej disat ijiem li sewa ħafna ħajjiet u l-fatt li sa issa qatel mill-inqas 217-il persuna fi u madwar il-belt u kompla jwettaq abbużi u atroċitajiet mifruxa fil-“kalifat” li pproklama fiż-żoni li jikkontrolla fis-Sirja u l-Iraq;

3.

Jesprimi t-tħassib tiegħu dwar is-sitwazzjoni fis-sit ta' Palmira u l-eluf ta' residenti minn Palmira ġewwa l-belt, kif ukoll dwar dawk spostati minħabba l-avvanz tal-IS/Da'esh u għan-nisa u t-tfal f'Palmira, fejn innota t-tendenza tal-IS/Da'esh li jaħtfu, jisfruttaw u jabbużaw in-nisa u t-tfal band'oħra, inkluż bl-istupru, l-abbuż sesswali, iż-żwieġ sfurzat u r-reklutaġġ sfurzat tat-tfal;

4.

Iħeġġeġ lill-Kunsill, lill-Kummissjoni u lir-Rappreżentant Għoli jagħmlu disponibbli r-riżorsi finanzjarji u umani kollha meħtieġa sabiex jgħinu lir-rifuġjati;

5.

Jilqa' l-impenn li jiġu rduppjati l-isforzi kollettivi biex jingħeleb l-IS/Da'esh meħuda fil-laqgħa ministerjali tal-koalizzjoni internazzjonali kontra l-IS/Da'esh f'Pariġi fit-2 ta' Ġunju 2015; jistieden lill-koalizzjoni żżid l-isforzi biex timplimenta strateġija komuni, multidimensjonali u fit-tul biex iddgħajjef u eventwalment teqred l-IS/Da'esh; jisħaq il-ħtieġa li din l-istrateġija tkun akkumpanjata b'kooperazzjoni msaħħa mal-istati reġjonali kollha u l-atturi mhux statali kommessi għall-ġlieda kontra l-IS/Da'esh;

6.

Jibqa' konvint li la jista' jkun hemm riżoluzzjoni tal-kunflitti effikaċi u lanqas paċi sostenibbli fis-Sirja mingħajr ma tittieħed responsabilità għar-reati mwettqa min-naħat kollha waqt il-kunflitt;

7.

Jirrimarka li soluzzjoni sostenibbli għall-kriżi tas-Sirja tista' tinkiseb biss permezz ta' riżoluzzjoni politika inklużiva bbażata fuq il-Komunikat ta' Ġinevra tat-30 ta' Ġunju 2012 u appoġġjata mill-komunità internazzjonali; jistieden lill-Mibgħut Speċjali tan-NU Staffan de Mistura jaħdem mal-partijiet kollha lejn tranżizzjoni politika ġenwina li tissodisfa l-aspirazzjonijiet leġittimi tal-poplu Sirjan u b'mod indipendenti u demokratiku tippermettilhom jiddeterminaw il-futur tagħhom stess;

8.

Jesprimi tħassib serju għan-nuqqas serju ta' finanzjament għall-appelli tan-NU fl-2014, li wassal għas-sospensjoni temporanja tal-assistenza mill-Programm Dinji tal-Ikel lir-refuġjati Sirjani; iħeġġeġ, għaldaqstant, lill-komunità internazzjonali, biex iżżid il-finanzjament u l-assistenza tagħha b'rispons għall-appelli futuri;

9.

Jistieden lill-komunità internazzjonali żżid l-isforzi biex issib soluzzjoni ħalli ttaffi l-kriżi u ttemm il-gwerra fis-Sirja u tleħħen l-appoġġ tagħha għal dawk impenjati jiġġieldu lill-IS/Da'esh fis-Sirja u l-Iraq; jistieden lill-gvernijiet tar-reġjun jaħdmu flimkien, peress li kooperazzjoni mill-qrib dwar kwistjonijiet ta' sigurtà hija l-uniku mezz biex ikun hemm paċi u sigurtà fir-reġjun;

10.

Jistieden lill-komunità internazzjonali tagħmel dak kollu li huwa fis-setgħa tagħha biex tipproteġi l-popolazzjoni ċivili u tħares il-patrimonju kulturali uniku ta' Palmira, u jistieden lill-partijiet kollha għal twaqqif immedjat tal-ostilitajiet f'Palmira u biex jingħata passaġġ sikur liċ-ċivili kollha li qegħdin jaħarbu l-vjolenza;

11.

Jeżiġi l-waqfien immedjat tal-qerda tal-patrimonju kulturali tas-Sirja u l-Iraq, inklużi s-siti u l-oġġetti reliġjużi; jenfasizza li ma jistgħux jiġu tollerati tali atti mwettqa mill-IS/Da'esh jew individwi, gruppi, impriżi u entitajiet oħrajn, u jistieden ukoll għall-preservazzjoni tal-patrimonju kulturali tal-Iraq billi jiġu protetti l-proprjetà u s-siti kulturali u reliġjużi skont id-dritt umanitarju internazzjonali;

12.

Iħeġġeġ lill-UE u lill-Istati Membri jagħtu bidu għall-kampanji ta' sensibilizzazzjoni sabiex jiskoraġġixxu x-xiri u l-bejgħ illeċitu ta' oġġetti kulturali miż-żoni ta' kunflitt;

13.

Itenni mill-ġdid il-valur għoli tal-patrimonju kulturali għall-umanità kollha u għaldaqstant jikkunsidra li l-qerda tiegħu ma għandhiex tiġi meqjusa bħala delitt tal-gwerra li ma tistax tiddefendih;

14.

Jissottolinja l-ħtieġa għal sforzi konġunti mill-komunità internazzjonali biex tipprevjeni l-kummerċ illegali fil-proprjetà kulturali u t-traffikar illeċitu tal-artifatti kulturali, li jikkontribwixxu għall-iffinanzjar tal-IS/Da'esh;

15.

Japprova d-dikjarazzjonijiet magħmula mid-Direttur Ġenerali tal-UNESCO u l-miżuri speċjali kollha meħuda min-NU u l-UNESCO bil-ħsieb li tiġi mħarsa Palmira u kwalunkwe sit kulturali u storiku ieħor li jispiċċaw taħt theddida;

16.

Jistieden lis-Segretarju Ġenerali tan-NU jirreferi l-kwistjoni tal-ħarsien tas-siti kulturali kollha taħt theddida minn gruppi terroristiċi, inkluż l-IS/Da'esh, lill-Kunsill tas-Sigurtà, bil-ħsieb tal-adozzjoni ta' riżoluzzjoni dwar is-suġġett;

17.

Jistieden lill-Istati Membri u lill-istituzzjonijiet tal-UE jieħdu passi prattiċi, f'kooperazzjoni man-Nazzjonijiet Uniti, biex iħarsu s-siti kulturali, storiċi, reliġjużi u arkeoloġiċi li huma taħt theddida f'Palmira u l-Lvant Nofsani kollu kemm hu;

18.

Jilqa' u jissottolinja l-importanza kritika tax-xogħol tal-organizzazzjonijiet tas-soċjetà ċivili lokali u internazzjonali fid-dokumentazzjoni tal-ksur tad-drittijiet tal-bniedem, tal-evidenza ta' delitti tal-gwerra, tad-delitti kontra l-umanità u vjolazzjonijiet oħra; jesprimi l-ammirazzjoni u s-solidarjetà profonda tiegħu għall-attivisti kollha Sirjani li, mingħajr waqfien, ikomplu jimmonitorjaw, jiddokumentaw u jirrapportaw dwar is-sitwazzjoni tad-drittijiet tal-bniedem fil-pajjiż tagħhom mifni bil-gwerra, b'riskju għall-ħajjithom stess;

19.

Huwa mħasseb serjament dwar id-degradazzjoni dejjem sejra għall-agħar tas-sitwazzjoni umanitarja u tad-drittijiet tal-bniedem fis-Sirja u jenfasizza l-ħtieġa li tiġi rispettata l-libertà ta' espresssjoni u l-libertà tad-difensuri tad-drittijiet tal-bniedem biex iwettqu xogħolhom, f'konformità mal-obbligi internazzjonali tas-Sirja; jirrimarka li kull individwu għandu dritt għal-libertà ta' opinjoni u ta' espressjoni, u li dan huwa dritt tal-bniedem fundamentali; jikkundanna l-vjolazzjonijiet kollha tal-libertajiet tal-istampa u l-atti kollha ta' vjolenza kontra ġurnalisti fis-Sirja;

20.

Jistieden lill-awtoritajiet Sirjani biex b'mod immedjat u inkondizzjonalment jeħilsu u jwaqqgħu l-akkużi kollha kontra Marzan Darwish u dawk kollha arrestati, ikkundannati u/jew li ngħataw sentenza biex b'mod paċifiku jeżerċitaw id-dritt tagħhom tal-liberta ta' espressjoni u ta' assoċjazzjoni, kif ukoll id-difensuri tad-drittijiet tal-bniedem u l-attivisti tad-drittijiet politiċi kollha arbitrarjament imċaħħda mil-libertà tagħhom abbażi tal-attivitajiet tagħhom relatati mad-drittijiet tal-bniedem;

21.

Iħeġġeġ lill-awtoritajiet Sirjani jiddivulgaw/jiżvelaw b'mod immedjat x'sar minnhom u fejn qegħdin it-tliet irġiel u jiżguraw li huma mħarsa minn tortura u trattament ħażin, jiġi permess lilhom kuntatt immedjat mal-familji u l-avukati tagħhom, u provduti b'kull attenzjoni medika li jeħtieġu;

22.

Iħeġġeġ lill-Istati Membri jirratifikaw il-Konvenzjoni Internazzjonali għall-Ħarsien tal-Persuni Kollha mill-Għajbien Sfurzat bħala kwistjoni ta' prijorità; jistieden lis-Servizz Ewropew għall-Azzjoni Esterna (SEAE) u l-Istati Membri jippromwovu ratifikazzjoni universali u l-implimentazzjoni ta' dan l-istrument ewlieni tad-drittijiet tal-bniedem u biex jappoġġjaw il-ħidma tal-Kumitat tan-NU dwar l-Għajbien Sfurzat, stabbilit taħt din il-Konvenzjoni;