28.9.2016   

MT

Il-Ġurnal Uffiċjali tal-Unjoni Ewropea

C 356/1

(1)

B'konsegwenza tad-dħul fis-seħħ tat-Trattat dwar il-Funzjonament tal-Unjoni Ewropea ("it-Trattat"), jeħtieġ li s-setgħat ikkonferiti lill-Kummissjoni jiġu allinjati mal-Artikoli 290 u 291 tat-Trattat.

(2)

B’rabta mal-adozzjoni tar-Regolament (UE) Nru 182/2011 tal-Parlament Ewropew u tal-Kunsill (2), il-Kummissjoni impenjat ruħha (3), permezz ta' dikjarazzjoni, li tanalizza, fid-dawl tal-kriterji stabbiliti fit-Trattat, l-atti leġislattivi li ma kinux ġew adattati għall-proċedura regolatorja bi skrutinju qabel id-dħul fis-seħħ tat-Trattat ta’ Lisbona.

(3)

Ir-Regolament (KE) Nru 1365/2006 tal-Parlament Ewropew u tal-Kunsill (4) jikkonferixxi setgħat lill-Kummissjoni sabiex timplimenta xi wħud mid-dispożizzjonijiet tiegħu.

(4)

Sabiex ir-Regolament (KE) Nru 1365/2006 jiġi allinjat mal-Artikoli 290 u 291 tat-Trattat, is-setgħat ta’ implimentazzjoni kkonferiti lill-Kummissjoni b'dak ir-Regolament għandhom jiġu sostitwiti b’setgħat li tadotta atti ddelegati u ta’ implimentazzjoni.

(5)

Fir-rigward tar-Regolament (KE) Nru 1365/2006, sabiex jitqiesu t-tendenzi ekonomiċi u tekniċi u l-bidliet fid-definizzjonijiet adottati f'livell internazzjonali, is-setgħa li jiġu adottati atti skont l-Artikolu 290 tat-Trattat għandha tkun iddelegata lill-Kummissjoni fir-rigward tal-emedar ta' dak ir-Regolament sabiex il-livell limitu jogħla għal aktar minn 1 000 000 tunnellata għal kopertura statistika tat-trasport fil-passaġġi fuq l-ilma interni, biex jiġu adattati d-definizzjonijiet jew jiġu previsti definizzjonijiet ġodda, kif ukoll jiġu adatti l-Annessi għar-Regolament (KE) 1365/2006 biex jiġu riflessi bidliet fil-kodiċi u n-nomenklatura f'livell internazzjonali jew fl-atti leġislattivi rilevanti tal-Unjoni. Huwa partikolarment importanti li l-Kummissjoni twettaq konsultazzjonijiet xierqa matul il-ħidma ta’ tħejjija tagħha, anke fil-livell ta’ esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (5). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat ta' gruppi tal-esperti tal-Kummissjoni li jittrattaw it-tħejjija ta' atti delegati.

(6)

Il-Kummissjoni għandha tiżgura li dawk l-atti delegati ma jimponux piż amministrattiv addizzjonali sinifikanti fuq l-Istati Membri jew fuq ir-rispondenti.

(7)

Sabiex jiġu żgurati kondizzjonijiet uniformi għall-implimentazzjoni tar-Regolament (KE) Nru 1365/2006, is-setgħat ta’ implimentazzjoni għandhom jiġu konferiti lill-Kummissjoni b'mod li tkun tista' tadotta arranġamenti għat-trasmissjoni tad-data, inkluż standards għall-iskambjar tad-data, għad-disseminazzjoni tar-riżultati mill-Kummissjoni (Eurostat) u wkoll biex tiżviluppa u tippubblika rekwiżiti u kriterji metodoloġiċi mfassla biex tiġi żgurata l-kwalità tad-data prodotta. Dawk is-setgħat għandhom jiġu eżerċitati f'konformità mar-Regolament (UE) Nru 182/2011.

(8)

F'konformità mal-prinċipju tal-proporzjonalità, huwa neċessarju u xieraq biex jinkiseb l-objettiv bażiku tal-allinjament tas-setgħat konferiti lill-Kummissjoni mal-Artikoli 290 u 291 tat-Trattat li jiġu stabbiliti regoli dwar dan l-allinjament fil-qasam tal-istatistika tat-trasport. Dan ir-Regolament ma jmurx lil hinn minn dak li hu neċessarju biex jinkiseb dak l-objettiv, f'konformità mal-Artikolu 5(4) tat-Trattat dwar l-Unjoni Ewropea.

(9)

Huwa neċessarju li l-Kummissjoni tagħmel arranġamenti għal studji pilota li għandhom jitwettqu dwar id-disponibbiltà ta' data statistika li tirrigwarda t-trasport ta’ passiġġieri. minn passaġġi fuq l-ilma interni, inklużi bis-servizzi tat-trasport transkonfinali.

L-Unjoni għandha tikkontribwixxi għall-ispejjeż biex isiru dawn l-istudji pilota. Tali kontribuzzjonijiet għandhom jieħdu l-forma ta' għotjiet lill-istituti nazzjonali tal-istatistika u awtoritajiet nazzjonali oħra msemmija fl-Artikolu 5 tar-Regolament (KE) Nru 223/2009 tal-Parlament Ewropew u tal-Kunsill (6), f'konformità mar-Regolament (KE, Euratom) Nru 966/2012 tal-Parlament Ewropew u tal-Kunsill (7).

(10)

Biex tiġi żgurata ċ-ċertezza legali, l-proċeduri biex jiġu adottati miżuri li nbdew iżda ma tlestewx qabel id-dħul fis-seħħ ta' dan ir-Regolament mhumiex affettwati minn dan ir-Regolament.

(11)

Għaldaqstant, ir-Regolament (KE) Nru 1365/2006 għandu jiġi emendat skont dan,

(1)

Fl-Artikolu 2, jiżdied il-paragrafu li ġej:

"5.   Il-Kummissjoni hija mogħtija s-setgħa li tadotta atti delegati, f’konformità mal-Artikolu 9, dwar l-emendar tal-paragrafu 2 ta’ dan l-Artikolu biex jiżdied il-livell limitu għall-kopertura statistika tat-trasport fil-passaġġi fuq l-ilma interni msemmi hemm sabiex jittieħed kont tat-tendenzi ekonomiċi u tekniċi. Meta teżerċita dik is-setgħa, il-Kummissjoni għandha tiżgura li l-atti delegati ma jimponux piż addizzjonali sinifikanti fuq l-Istati Membri jew fuq ir-rispondenti. Barra minn hekk, il-Kummissjoni għandha tiġġustifika debitament l-azzjonijiet statistiċi previsti f'dawk l-atti delegati, bl-użu, fejn adatt, ta' analiżi tal-kosteffettività, inkluża valutazzjoni tal-piż fuq ir-rispondenti u tal-ispejjeż tal-produzzjoni, kif imsemmi fil-punt (c) tal-Artikolu 14(3) tar-Regolament (KE) Nru 223/2009 tal-Parlament Ewropew u tal-Kunsill (*).

(*)  Ir-Regolament (KE) Nru 223/2009 tal-Parlament Ewropew u tal-Kunsill tal-11 ta' Marzu 2009 dwar l-Istatistika Ewropea u li jħassar ir-Regolament (Euratom, KE) Nru 1101/2008 tal-Parlament Ewropew u tal-Kunsill dwar it-trażmissjoni ta' data suġġetta għall-kunfidenzjalità statistika lill-Uffiċċju tal-Istatistika tal-Komunitajiet Ewropej, ir-Regolament tal-Kunsill (KE) Nru 322/97 u d-Deċiżjoni tal-Kunsill 89/382/KEE, Euratom li tistabbilixxi Kumitat dwar il-Programmi tal-Istatistika tal-Komunitajiet Ewropej (ĠU L 87, 31.3.2009, p. 164)."."

(2)

Fl-Artikolu 3, jiżdiedu l-paragrafi li ġejjin:

"Il-Kummissjoni hija mogħtija s-setgħa li tadotta atti delegati f'konformità mal-Artikolu 9, rigward l-emenda ta' dan l-Artikolu biex jiġu adattati d-definizzjonijiet li jinsabu hemm jew jiġu previsti definizzjonijiet ġodda sabiex jittieħed kont tad-definizzjonijiet rilevanti emendati jew adottati fil-livell internazzjonali.

Meta teżerċita dik is-setgħa, il-Kummissjoni għandha tiżgura li l-atti delegati ma jimponux piż addizzjonali sinifikanti fuq l-Istati Membri jew fuq ir-rispondenti. Barra minn hekk, il-Kummissjoni għandha tiġġustifika debitament l-azzjonijiet statistiċi previsti f'dawk l-atti delegati, bl-użu, fejn adatt, ta' analiżi tal-kosteffettività, inkluża valutazzjoni tal-piż fuq ir-rispondenti u tal-ispejjeż tal-produzzjoni, kif imsemmi fil-punt (c) tal-Artikolu 14(3) tar-Regolament (KE) Nru 223/2009.".

(3)

Fl-Artikolu 4, jiżdied il-paragrafu li ġej:

"4.   Il-Kummissjoni hija mogħtija s-setgħa li tadotta atti delegati f'konformità mal-Artikolu 9, rigward l-emenda tal-Annessi biex jiġu riflessi bidliet fil-kodiċi u n-nomenklatura fil-livell internazzjonali jew fl-atti leġislattivi rilevanti tal-Unjoni.Meta teżerċita dik is-setgħa, il-Kummissjoni għandha tiżgura li l-atti delegati ma jimponux piż addizzjonali sinifikanti fuq l-Istati Membri jew fuq ir-rispondenti. Barra minn hekk, il-Kummissjoni għandha tiġġustifika debitament l-azzjonijiet statistiċi previsti f'dawk l-atti delegati, bl-użu, fejn adatt, ta' analiżi tal-kosteffettività, inkluża valutazzjoni tal-piż fuq ir-rispondenti u tal-ispejjeż tal-produzzjoni, kif imsemmi fil-punt (c) tal-Artikolu 14(3) tar-Regolament (KE) Nru 223/2009.".

(4)

Jiddaħħal l-Artikolu li ġej:

"Artikolu 4a

Studji pilota

1.   Sa … [24 xahar wara d-dħul fis-seħħ ta’ dan ir-Regolament], il-Kummissjoni, b’kooperazzjoni mal-Istati Membri, għandha tiżviluppa il-metodoloġija xierqa għall-ġbir tal-istatistika dwar it-trasport tal-passiġġieri fil-passaġġi fuq l-ilma interni, inklużi bis-servizzi tat-trasport transkonfinali.

2.   Sa … [36 xahar wara d-dħul fis-seħħ ta’ dan ir-Regolament], il-Kummissjoni għandha tniedi studji pilota volontarji li għandhom jitwettqu mill-Istati Membri li jipprovdu data fl-ambitu ta’ dan ir-Regolament dwar id-disponibbiltà ta’ data statistika li tirrigwarda t-trasport tal-passiġġieri fil-passaġġi fuq l-ilma interni, inklużi bis-servizzi tat-trasport transkonfinali. Dawk l-istudji pilota għandu jkollhom l-għan li jivvalutaw il-fattibbiltà ta’ dak il-ġbir ta' data ġdida, l-ispejjeż tal-ġbir tad-data relatati u l-kwalità statistika implikata.

3.   Sa … [48 xahar wara d-dħul fis-seħħ ta’ dan ir-Regolament], il-Kummissjoni għandha tippreżenta rapport lill-Parlament Ewropew u lill-Kunsill dwar ir-riżultati ta’ tali studji pilota. Skont ir-riżultati ta’ dak ir-rapport, u f'perijodu raġonevoli, il-Kummissjoni għandha tippreżenta, jekk ikun xieraq, proposta leġislattiva lill-Parlament Ewropew u lill-Kunsill biex jiġi emendat dan ir-Regolament fir-rigward tal-istatistika dwar it-trasport tal-passiġġieri fil-passaġġi fuq l-ilma interni, inklużi bis-servizzi tat-trasport transkonfinali.

4.   Il-baġit ġenerali tal-Unjoni għandu, fejn xieraq u b'kont meħud tal-valur miżjud tal-Unjoni, jikkontribwixxi għall-finanzjament ta’ dawk l-istudji pilota.".

(5)

Fl-Artikolu 5, il-paragrafu 2 huwa sostitwit b’dan li ġej:

"2.   Il-Kummissjoni għandha tadotta atti ta' implimentazzjoni li jistipulaw l-arranġamenti għat-trasmissjoni tad-data lill-Kummissjoni (Eurostat), inklużi standards għall-iskambjar tad-data. Dawk l-atti ta' implimentazzjoni għandhom jiġu adottati f'konformità mal-proċedura ta’ eżami msemmija fl-Artikolu 10(2).".

(6)

Fl-Artikolu 6, jiżdied is-subparagrafu li ġej:

"Il-Kummissjoni għandha tadotta atti ta' implimentazzjoni li jistipulaw l-arranġamenti għat-tixrid tar-riżultati. Dawk l-atti ta' implimentazzjoni għandhom jiġu adottati f'konformità mal-proċedura ta’ eżami msemmija fl-Artikolu 10(2).".

(7)

Fl-Artikolu 7, il-paragrafu 1 huwa sostitwit b’dan li ġej:

"1.   Il-Kummissjoni għandha tadotta atti ta' implimentazzjoni li jistipulaw ir-rekwiżiti u l-kriterji metodoloġiċi mfassla sabiex tiġi żgurata l-kwalità tad-data prodotta. Dawk l-atti ta' implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 10(2).".

(8)

Fl-Artikolu 7, jiżdiedu l-paragrafi li ġejjin:

"4.   Għall-finijiet ta’ dan ir-Regolament, il-kriterji tal-kwalità li għandhom jiġu applikati għad-data li għandha tiġi trasmessa huma dawk imsemmija fl-Artikolu 12(1).

5.   Il-Kummissjoni għandha tadotta atti ta’ implimentazzjoni li jistipulaw l-arranġamenti, l-istruttura, il-perjodiċità u l-elementi ta’ komparabbiltà għar-rapporti tal-kwalità. Dawk l-atti ta' implimentazzjoni għandhom jiġu adottati skont il-proċedura ta' eżami msemmija fl-Artikolu 10(2).".

(9)

L-Artikolu 8 huwa sostitwit b'dan li ġej:

"Artikolu 8

Rapporti dwar l-implementazzjoni

Sal-31 ta' Diċembru 2020 u kull ħames snin wara dan, il-Kummissjoni, wara li tikkonsulta mal-Kumitat tas-Sistema Ewropea tal-Istatistika, għandha tippreżenta rapport lill-Parlament Ewropew u lill-Kunsill dwar l-implimentazzjoni ta' dan ir-Regolament u dwar żviluppi futuri:

F'dak ir-rapport, il-Kummissjoni għandha tieħu kont tal-informazzjoni rilevanti pprovduta mill-Istati Membri dwar titjib potenzjali u dwar il-ħtiġijiet tal-utenti. B'mod partikolari, dak ir-rapport għandu:

(10)

L-Artikolu 9 huwa sostitwit b'dan li ġej:

"Artikolu 9

Eżerċizzju tad-delega

1.   Is-setgħa tal-adozzjoni ta’ atti delegati hija kkonferita lill-Kummissjoni soġġetta għall-kondizzjonijiet stipulati f’dan l-Artikolu.

2.   Is-setgħa li tadotta atti delegati msemmija fl-Artikolu2(5), fl-Artikolu 3 u fl-Artikolu 4(4) għandha tiġi konferita lill-Kummissjoni għal perijodu ta' ħames snin minn … [id-data tad-dħul fis-seħħ ta' dan ir-Regolament emendatorju]. Il-Kummissjoni għandha tfassal rapport dwar id-delega tas-setgħat mhux iktar tard minn disa’ xhur qabel tmiem il-perijodu ta’ ħames snin. Id-delega tas-setgħa għandha tiġi estiża b'mod taċitu għal perijodi ta' żmien bl-istess durata, sakemm il-Parlament Ewropew jew il-Kunsill ma joġġezzjonax għal tali estensjoni mhux aktar tard minn tliet xhur qabel it-tmiem ta' kull perijodu.

3.   Id-delega tas-setgħa msemmija fl-Artikolu 2(5), l-Artikolu 3 u l-Artikolu 4(4) tista' tiġi revokata fi kwalunkwe ħin mill-Parlament Ewropew jew mill-Kunsill. Id-deċiżjoni ta’ revoka għandha twassal għat-tmiem tad-delega tas-setgħa speċifikata f’dik id-deċiżjoni. Din għandha tidħol ssir effettiva fil-jum wara dak tal-pubblikazzjoni tad-deċiżjoni f'Il-Ġurnal Uffiċjali tal-Unjoni Ewropea jew f'data aktar tard speċifikata fiha. Ma għandhiex taffettwa l-validità ta’ kwalunkwe att delegat li jkun diġà fis-seħħ.

4.   Qabel ma’ tadotta att delegat, il-Kummissjoni għandha tikkonsulta esperti nnominati minn kull Stat Membru f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (**)

5.   Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.

6.   Att delegat adottat bis-saħħa tal-Artikolu 2(5), l-Artikolu 3 u l-Artikolu 4(4) għandu jidħol fis-seħħ biss jekk ma tiġix espressa oġġezzjoni la mill-Parlament Ewropew u lanqas mill-Kunsill fi żmien xahrejn min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perijodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex sejrin joġġezzjonaw. Dak il-perijodu għandu jiġi estiż b'xahrejn fuq inizjattiva tal-Parlament Ewropew jew tal-Kunsill.

(**)  ĠU L 123, 12.5.2016, p. 1."."

(11)

L-Artikolu 10 huwa sostitwit b'dan li ġej:

"Artikolu 10

Proċedura ta' kumitat

1.   Il-Kummissjoni għandha tiġi assistita mill-Kumitat tas-Sistema Statistika Ewropea stabbilit bir-Regolament (KE) Nru 223/2009. Dak il-kumitat għandu jkun kumitat fis-sens tar-Regolament (UE) Nru 182/2011 tal-Parlament Ewropew u tal-Kunsill (***)

2.   Fejn issir referenza għal dan il-paragrafu, għandu japplika l-Artikolu 5 tar-Regolament (UE) Nru 182/2011.

(***)  Ir-Regolament (UE) Nru 182/2011 tal-Parlament Ewropew u tal-Kunsill tas-16 ta’ Frar 2011 li jistabbilixxi r-regoli u l-prinċipji ġenerali dwar il-modalitajiet ta’ kontroll mill-Istati Membri tal-eżerċizzju mill-Kummissjoni tas-setgħat ta’ implimentazzjoni (ĠU L 55, 28.2.2011, p. 13)."."

(12)

L-Anness G huwa mħassar.

28.9.2016   

MT

Il-Ġurnal Uffiċjali tal-Unjoni Ewropea

C 356/6

1.

Fit-28 ta’ Ġunju 2013, il-Kummissjoni ressqet quddiem il-Kunsill u l-Parlament Ewropew proposta għal Regolament tal-Parlament Ewropew u tal-Kunsill li jemenda r-Regolament (KE) Nru 1365/2006 dwar statistika ta’ trasport ta’ merkanzija minn passaġġi fuq l-ilma interni fir-rigward l-għoti ta’ setgħat delegati u ta' implimentazzjoni lill-Kummissjoni għall-adozzjoni ta’ ċerti miżuri.

2.

Il-pożizzjoni fl-ewwel qari tal-Parlament Ewropew ġiet adottata fil-Plenarja fil-11 ta’ Marzu 2014.

3.

Fil-25 ta’ Novembru 2014 saret laqgħa ta’ trilogu informali mar-rappreżentanti tat-tliet istituzzjonijiet. Matul din il-laqgħa, intlaħaq qbil dwar test ta’ kompromess finali.

4.

Fid-19 ta’ Diċembru 2014, il-COREPER ħa nota tal-kompromess milħuq matul it-Trilogu iżda ma approvahx, bil-kwistjoni prinċipali tkun l-istudji pilota obbligatorji dwar id-data dwar il-passiġġieri li għandhom isiru mill-Istati Membri.

5.

Wara saru negozjati informali intensi bejn il-presidenzi suċċessivi: LV, LU u NL mal-Parlament Ewropew u l-Kummissjoni.

6.

Fis-27 ta’ April 2016, il-COREPER ta mandat ġdid lill-Presidenza biex issib kompromess li jissodisfa lill-koleġislaturi.

7.

Il-Kumitat għat-Trasport u t-Turiżmu (TRAN) laħaq qbil dwar it-test tal-mandat u fl-24 ta’ Mejju 2016, il-President tal-Kumitat indirizza ittra lill-President tal-Kumitat tar-Rappreżentanti Permanenti, fejn iddikjara li, jekk il-Kunsill jadotta l-pożizzjoni tiegħu fl-ewwel qari skont it-test tal-mandat adottat fis-27 ta’ April 2016, huwa jirrakkomanda lill-Plenarja biex il-pożizzjoni tal-Kunsill tiġi aċċettata mingħajr emendi, soġġett għall-verifika mill-ġuristi lingwisti, fit-tieni qari tal-Parlament.

8.

Fis-6 ta' Ġunju 2016, il-Kunsill ikkonferma l-qbil politiku tiegħu dwar it-test ta' kompromess tar-Regolament.

9.

L-iskop tal-abbozz ta’ regolament huwa li jallinja r-Regolament (KE) Nru 1365/2006 dwar statistika ta’ trasport ta’ merkanzija minn passaġġi fuq l-ilma interni mat-TFUE fir-rigward l-għoti ta’ setgħat delegati u ta' implimentazzjoni lill-Kummissjoni għall-adozzjoni ta' ċerti miżuri.

10.

Wara l-votazzjoni fil-Plenarja, il-Parlament Ewropew u l-Kunsill wettqu negozjati bil-għan li jikkonkludu qbil bikri fit-tieni qari abbażi ta' pożizzjoni tal-Kunsill fl-ewwel qari li l-Parlament seta' japprovaha kif kienet. It-test tal-pożizzjoni tal-Kunsill fl-ewwel qari jirrifletti b'mod sħiħ il-kompromess milħuq bejn il-koleġislaturi.

11.

Il-kwistjoni prinċipali ewlenija bejn iż-żewġ istituzzjonijiet kienet it-talba tal-Parlament Ewropew għal data addizzjonali dwar it-trasport tal-passiġġieri fil-passaġġi fuq l-ilma interni. Il-kompromess li eventwalment ġie maqbul bejn il-Kunsill u l-Parlament huwa rifless f’artikolu ġdid “Studji pilota” li jitlob lill-Kummissjoni, f’kooperazzjoni mal-Istati Membri, biex tniedi studji pilota volontarji dwar it-trasport tal-passiġġieri fil-passaġġi fuq l-ilma interni.

12.

Il-pożizzjoni tal-Kunsill tirrifletti b’mod sħiħ il-kompromess milħuq fin-negozjati bejn il-Parlament Ewropew u l-Kunsill, bil-qbil tal-Kummissjoni u hija konformi b’mod sħiħ mal-Ftehim Interistituzzjonali dwar ir-regolamentazzjoni aħjar. Il-kompromess huwa kkonfermat mill-ittra li l-President tal-Kumitat TRAN indirizza lill-President tal-Kumitat tar-Rappreżentanti Permanenti fl-24 ta' Mejju 2016.