1.7.2016   

MT

Il-Ġurnal Uffiċjali tal-Unjoni Ewropea

C 240/1

1.

jilqa’ b’sodisfazzjon “Ir-rapport tal-ħames presidenti” fid-dawl tal-fatt li huwa pass importanti fil-ħidma sabiex l-Unjoni Ekonomika u Monetarja (UEM) tkun iżjed reżiljenti fil-konfront tal-iskossi ekonomiċi, sabiex jiġu implimentati aħjar l-prinċipji u l-għanijiet tal-Unjoni Ekonomika u Monetarja kif stabbiliti fl-Artikolu 3 tat-Trattat dwar l-Unjoni Ewropea u fl-Artikolu 120 tat-Trattat dwar il-Funzjonament tal-Unjoni Ewropea u sabiex jitwettqu riformi biex tiżdied il-leġittimità demokratika tal-governanza tal-UEM;

2.

jinnota, madankollu, li r-rapport ma jissuġġerixxix riformi tal-Mekkaniżmu Ewropew ta’ Stabbiltà u ma jindirizzax il-kwistjoni tal-inadempjenza sovrana fi ħdan l-UEM; iħoss li għandu jkun hemm enfasi akbar biex tinstab soluzzjoni għall-problemi fundamentali tal-unjoni monetarja, jiġifieri enfasi fuq l-iżbilanċi fil-kontijiet kurrenti li jirriżultaw minn differenzi fiż-żieda fil-produttività. Ir-raġuni hija li dawn iwasslu wkoll għal żbilanċi fit-trasferimenti tal-kapital fost il-pajjiżi u r-reġjuni, u għandhom jiġu implimentati mekkaniżmi li jipprovdu feedback lill-pajjiżi u r-reġjuni li l-atturi politiċi u ekonomiċi tagħhom ma jsegwux politika soda u ġestjoni soda tar-riskji;

3.

jemmen li s-sitwazzjoni ekonomika attwali, fejn it-tkabbir huwa dgħajjef u l-qgħad għoli, tiġġustifika approċċ integrat bil-għan li jiġu stabilizzati l-finanzi tal-Istati Membri, fost affarijiet oħra abbażi ta’ approċċ imsejjes fuq aktar approfondiment tas-Suq Uniku (1) u aktar sforzi sabiex tissokta l-implimentazzjoni tar-riformi strutturali u jitħeġġeġ l-investiment u b’hekk ikun hemm tkabbir sostenibbli fil-ġejjieni;

4.

jinnota li l-migrazzjoni u l-mobbiltà tal-forza tax-xogħol għandhom il-potenzjal li jsaħħu t-tkabbir fi ħdan l-UE, iżda biex dan iseħħ jeħtieġ li jiġu indirizzati kwistjonijiet speċifiċi marbutin mal-aċċess għall-abitazzjoni, għal servizzi pubbliċi u għal benefiċċji soċjali, u mal-flessibbiltà tas-suq tax-xogħol; iżda dan jitlob b’mod speċjali l-provvediment ta’ kofinanzjament permezz tal-Unjoni Ewropea, sabiex tittejjeb il-kapaċità ta’ akkoljenza;

5.

jenfasizza l-ħtieġa li jissaħħu s-sjieda u l-leġittimità demokratika fl-UE, u fl-istess ħin għandha tissaħħaħ id-dimensjoni reġjonali, bil-għan li l-qafas legali jiġi applikat b’mod ġust u konsistenti fl-UE kollha, filwaqt li jiġi rispettat il-kunċett tas-sussidjarjetà;

6.

jilqa’ b’sodisfazzjon il-proċedura f’żewġ fażijiet li għandha l-għan li l-ewwel tibni fuq strumenti u trattati eżistenti ħalli mbagħad jiġu implimentati bidliet iżjed wesgħin fit-tieni fażi bil-għan li l-proċess tal-konverġenza jsir iżjed vinkolanti għall-pajjiżi tal-euro billi jintlaħaq ftehim komuni dwar linji gwida għall-konverġenza;

7.

jenfasizza l-ħtieġa għal iżjed konverġenza kemm bejn l-Istati Membri kif ukoll fi ħdanhom, u jikkundanna d-diverġenzi li f’ċerti każi huma ikbar fi ħdan l-Istati Membri milli bejniethom;

8.

fl-istess ħin, jenfasizza li d-disparitajiet soċjali, ekonomiċi u territorjali jistgħu jitnaqqsu biss permezz ta’ kunċett ibbażat fuq l-Istrateġija 2020 li tħaddan dimensjoni reġjonali u politika ta’ koeżjoni orjentata lejn ir-riżultati, u għaldaqstant itenni l-appoġġ tiegħu għal proċess ta’ konverġenza ekonomika u soċjali. Il-KtR itenni wkoll sejħietu għal konsultazzjoni wiesgħa mal-Ewropa kollha dwar il-viżjoni territorjali futura tal-Unjoni Ewropea sal-2050. Hemm bżonn viżjoni ċara bħal din sabiex il-politiki u l-mekkaniżmi ta’ finanzjament ikunu jistgħu jiġu allinjati magħha (2). Il-KtR jilqa’ l-esplorazzjoni attwali ta’ strateġiji tal-Politika ta’ Koeżjoni wara l-2020;

9.

jenfasizza l-ħtieġa li jiġi appoġġjat aktar l-iżvilupp tar-reġjuni fil-fruntieri, tar-reġjuni periferali u l-anqas ċentrali u ta’ dawk li jiffaċċjaw sfidi demografiċi sabiex tinkiseb konverġenza b’mod konsistenti u kontinwu u skont l-istrateġiji adottati mal-UE kollha;

10.

iwissi kontra l-idea ta’ approċċ wieħed tajjeb għal kulħadd peress li s-sitwazzjoni kemm bejn l-Istati Membri kif ukoll fi ħdanhom teħtieġ il-flessibbiltà, li min-naħa tagħha titlob li l-awtoritajiet tal-kompetittività jirrispettaw il-mekkaniżmi nazzjonali għall-iffissar tal-pagi u m’għandhomx jieħdu r-rwol tal-imsieħba soċjali f’dan il-qasam;

11.

huwa tal-fehma li l-awtoritajiet tal-kompetittività għandhom jikkunsidraw l-aspetti kollha tal-ambjent tan-negozju f’sens wiesa’, jiġifieri fatturi bħall-produttività, il-ħiliet, l-innovazzjoni, l-ambjent tan-negozju u l-burokrazija eċċessiva. Għalhekk, il-Kumitat jaqbel li l-kunċett ta’ “kompetittività” ma jiġix ridott għas-sempliċi kwistjoni tal-livelli tas-salarji;

12.

jaqbel li għandha ssir aktar enfasi fuq l-impjieg u l-benesseri;

13.

jinnota li l-immappjar tal-indikaturi soċjali juri li l-qgħad, il-faqar u l-esklużjoni soċjali huma kkonċentrati f’reġjuni anqas żviluppati u għandhom rabta ċara ma’ kemm ġew implimentati sew ir-rakkomandazzjonijiet preċedenti taħt l-Istrateġija Ewropa 2020, fost l-oħrajn;

14.

jilqa’ b’sodisfazzjon il-fatt li r-Rapport tal-Ħames Presidenti fil-prinċipju jirrikonoxxi li d-dimensjoni soċjali tinħtieġ minn perspettiva ekonomika; itenni f’dan il-kuntest l-appoġġ tiegħu għall-appell mill-Parlament Ewropew lill-Istati Membri biex jikkunsidraw jiffirmaw Patt dwar l-Investiment Soċjali, li jistabbilixxi objettivi ta’ investiment soċjali fil-livell nazzjonali sabiex jintlaħqu l-għanijiet tal-Istrateġija Ewropa 2020 fil-qasam tal-impjiegi u fil-qasam soċjali u l-edukazzjoni (3);

15.

jilqa’ l-fatt li l-Kummissjoni tagħraf ir-rwol tal-imsieħba soċjali biex tiġi aċċettata t-tkomplija tal-iżvilupp tal-Unjoni Ekonomika u Monetarja. Dan jirrigwarda kemm ir-rwol fit-tfassil tal-Programmi Nazzjonali ta’ Riforma kif ukoll b’mod ġenerali enfasi akbar fuq ix-xogħol u kwistjonijiet soċjali, kif ukoll fuq il-“pilastru ta’ drittijiet soċjali” previst. Id-djalogu mal-imsieħba soċjali huwa utli u jista’ jżid l-aċċettazzjoni fl-Istati Membri. Fil-ġejjieni l-imsieħba soċjali jistgħu jagħtu kontribut importanti għal proġetti konġunti potenzjali li huma jiżviluppaw abbażi tal-pjan ta’ azzjoni konġunt tagħhom;

16.

jemmen li jeħtieġ li d-disparitajiet reġjonali jiġu indirizzati sabiex jiġu miġġielda l-inugwaljanzi soċjali, jiżdied it-tkabbir, jinħolqu l-impjiegi u jittejbu l-kompetittività u l-koeżjoni fi ħdan l-UEM u fl-UE, u jirrikonoxxi r-rwol importanti li l-awtoritajiet lokali u reġjonali jaqdu bħala impjegaturi, u sabiex joħolqu ambjent li jiffavorixxi n-negozju;

17.

juri li l-awtoritajiet lokali u reġjonali huma strumentali biex jikkontribwixxu għaż-żieda fil-kompetittività permezz ta’ inizjattivi lokali u reġjonali;

18.

jilqa’ b’sodisfazzjon il-fatt li fid-dokument “Rakkomandazzjoni dwar l-istabbiliment ta’ Bordijiet Nazzjonali tal-Kompetittività fiż-Żona tal-Euro” (COM(2015) 601 final) jingħad biċ-ċar li dawn il-Bordijiet għandhom jipprovdu appoġġ fit-teħid tad-deċiżjonijiet u mhux iressqu proposti finali;

19.

jilqa’ b’sodisfazzjon il-fatt li s-Semestru Ewropew qed jiġi ssemplifikat u msaħħaħ fi ħdan il-qafas leġislattiv attwali u li d-dokumenti jiġu kkoordinati aħjar sabiex jittejjeb il-fokus, ikun hemm aktar effiċjenza u tiġi ċċarata s-sjieda sabiex jintlaħqu l-għanijiet tal-UE ta’ governanza tajba;

20.

jirrikonoxxi l-valur tas-Semestru Ewropew bħala għodda biex twassal għal riformi fil-livell nazzjonali u tal-UE, billi jiżgura li l-UE u l-Istati Membri tagħha jikkoordinaw il-politiki ekonomiċi tagħhom;

21.

itenni l-istedina tiegħu lill-Kummissjoni u lill-Parlament biex jiġi introdott kodiċi ta’ kondotta li jiggarantixxi li l-awtoritajiet lokali u reġjonali jiġu involuti b’mod strutturat fis-Semestru Ewropew, bil-ħsieb li jressqu proposta konkreta dwar din il-kwistjoni sal-2016 u jimpenja ruħu li jkollu djalogu kontinwu mal-Kummissjoni Ewropea dwar il-kwistjoni;

22.

jinsisti li r-rapporti tal-pajjiżi u r-rakkomandazzjonijiet speċifiċi għal kull pajjiż jindirizzaw b’mod espliċitu kwistjonijiet relatati mad-differenzi reġjonali, u biex b’mod sistematiku jibnu fuq l-informazzjoni fil-livell lokali u reġjonali;

23.

jiddispjaċih li l-istruttura modifikata tas-Semestru Ewropew ma ssemmix lill-KtR fid-diskussjoni dwar il-prijoritajiet taż-żona tal-euro u jħeġġeġ lill-Kummissjoni biex tiffoka fuq il-kwistjonijiet reġjonali fid-dokumenti dwar is-Semestru Ewropew bl-appoġġ ta’ analiżi reġjonali sistematika tal-impjieg u kwistjonijiet soċjali, fost l-oħrajn;

24.

huwa tal-fehma li l-implimentazzjoni tal-unjoni bankarja hija, fuq medda qasira ta’ żmien, l-aktar strument effiċjenti fl-isforzi biex jiġu evitati kriżijiet fis-sistema finanzjarja, jinkiser iċ-ċirku vizzjuż bejn il-banek nazzjonali u l-Istati Membri u jiġu minimizzati l-effetti negattivi tal-iskossi ekonomiċi;

25.

jistieden lill-Kummissjoni u lill-Istati Membri biex inaqqsu r-riskji fis-sistema finanzjarja, itejbu l-flessibbiltà tal-prezzijiet u jimplimentaw sistemi ta’ sigurtà nazzjonali;

26.

għaldaqstant huwa tal-fehma li l-prerekwiżit għall-introduzzjoni ta’ Skema Ewropea ta’ Assigurazzjoni tad-Depożiti (EDIS) huwa li l-fondi Ewropej ta’ riżoluzzjoni u l-garanziji tad-depożiti jiġu stabbiliti u ffinanzjati u li r-rabta bejniethom tkun ġiet iċċarata sabiex jiġi minimizzat ir-riskju ta’ periklu morali;

27.

jistieden lill-Bank Ċentrali Ewropew (BĊE) u lill-Awtorità Bankarja Ewropea (ABE) biex janalizzaw il-kwalità tal-assi finanzjarji u jwettqu testijiet tal-istress tal-istituzzjonijiet finanzjarji involuti fl-EDIS sabiex jiġu żgurati kundizzjonijiet ekwivalenti ta’ kompetizzjoni għal dawn l-istituzzjonijiet;

28.

jistieden lill-Kummissjoni biex tispjega l-valur miżjud tal-Kunsill Fiskali Ewropew, li s-Segretarjat tiegħu huwa pprovdut mis-Segretarjat Ġenerali tal-Kummissjoni. Huwa partikolarment importanti li jiġi diskuss kif jista’ jiġi evitat li tali korp iwassal bla bżonn għal ambjent diġà kumpless ta’ sorveljanza makroekonomika;

29.

Jiddispjaċih li ma ngħatat ebda opportunità għat-tressiq ta’ opinjonijiet qabel il-ħolqien tal-Bord Fiskali Ewropew. Il-KtR jemmen li, fil-prinċipju, huwa importanti li tiġi ssorveljata b’mod konsistenti l-konformità mar-regoli tal-Patt ta’ Stabbiltà u Tkabbir. Fl-istess waqt, l-għamla attwali tal-korp propost tqajjem dubju dwar jekk il-vantaġġi tiegħu humiex ser ikunu proporzjonati meta mqabbla mal-burokrazija addizzjonali mistennija. Barra minn hekk, mhuwiex ċar fuq liema bażi legali huwa msejjes il-ħolqien tiegħu u x’ser tkun ir-rabta bejn il-Bord Fiskali Ewropew u l-kunsilli konsultattivi fiskali nazzjonali;

30.

jixtieq jara l-implimentazzjoni tal-Unjoni tas-Swieq Kapitali, li tippermetti l-flussi transkonfinali tal-kapital mingħajr theddid għall-istabbiltà ta’ reġjuni u pajjiżi differenti, u li tgħin lin-negozji, speċjalment lill-mikroimpriżi u lill-SMEs, jiksbu aċċess għal firxa wiesgħa ta’ sorsi ta’ finanzjament;

31.

jemmen li Unjoni tas-Swieq Kapitali koerenti u mfassla sew għandha tħaddan it-28 Stat Membru kollha tal-UE kif ukoll tippromovi kundizzjonijiet ekwi fl-Unjoni Ewropea, u jistieden lill-Istati Membri jiżguraw li l-unjoni bankarja tibqa’ miftuħa għal dawk l-Istati Membri li għadhom ma adottawx l-euro;

32.

jinsisti li l-Patt ta’ Stabbiltà u Tkabbir għandu jiġi rispettat u jenfasizza l-importanza li kull Stat Membru jkollu ekonomija soda u finanzi pubbliċi stabbli peress li hija prerekwiżit għall-investimenti meħtieġa kemm fuq perjodu qasir ta’ żmien kif ukoll fit-tul (4);

33.

jitlob li l-Istati Membri jħaddnu politika ekonomika responsabbli biex b’hekk ikollhom aċċess għall-istrumenti Ewropej maħsuba biex jistabilizzaw l-ekonomija. L-użu għandu jimxi id f’id ma’ implimentazzjoni sħiħa tar-riformi strutturali, bil-għan li jkun hemm livell ogħla ta’ konverġenza, koordinazzjoni u integrazzjoni, u jitlob li l-għajnuna, taħt l-ebda ċirkustanza, ma għandha tirriżulta fi trasferimenti f’direzzjoni waħda. Il-fond għall-istabbiltà u strumenti oħra bħall-Programm ta’ Sostenn tar-Riforma Strutturali m’għandhomx jitfasslu b’mod li jissostitwixxu l-politika attwali ta’ koeżjoni;

34.

jaqbel mal-Kummissjoni li l-evalwazzjoni futura tas-“Six Pack” u tat-“Two Pack” għandha tintuża bħala bażi biex tittejjeb it-trasparenza fi ħdan u l-leġittimità għall-UE, li hija partikolarment importanti fil-livell lokali u reġjonali. Għaldaqstant, jitlob li jinħoloq “djalogu ekonomiku” bejn il-KtR u l-Kummissjoni, abbażi tad-djalogu eżistenti bejn il-Kummissjoni u l-Parlament;

35.

itenni l-konvinzjoni tiegħu li hemm bżonn ta’ kapaċità fiskali sabiex l-UEM ikollha mekkaniżmu temporanju ta’ assorbiment tax-xokkijiet finanzjarji (5);

36.

itenni li l-kundizzjonijiet għall-finanzjament tal-investiment fl-ekonomija reali nbidlu b’mod fundamentali mill-kriżi ekonomika attwali ‘l hawn, u jenfasizza r-rwol importanti tal-awtoritajiet lokali u reġjonali sabiex jintlaħaq il-livell massimu ta’ effiċjenza u jiġu identifikati l-ostakli għall-investimenti produttivi;

37.

itenni mill-ġdid it-talba tiegħu għal regola tad-deheb bil-għan li l-investimenti fit-tul jibqgħu separati minn nefqa attwali, u jinkoraġġixxi l-introduzzjoni ta’ qafas konsistenti mal-kriterji Ewropej, li jagħmel possibbli l-identifikazzjoni tal-investiment fi kwistjonijiet soċjali u fl-infrastruttura meħtieġ li hu l-aktar importanti biex jiġi sostnut it-tkabbir potenzjali fit-tul.

38.

jenfasizza l-ħtieġa li tittejjeb il-kwalità tal-investiment pubbliku, fost l-oħrajn billi jiġu applikati l-prinċipji tal-OECD dwar l-investiment pubbliku effettiv fil-livelli kollha ta’ gvern, u jitlob biex issir diskussjoni dwar kif id-deċentralizzazzjoni fiskali f’partijiet differenti tas-settur pubbliku tista’ ttejjeb il-kwalità tal-infiq pubbliku, u b’hekk tinħoloq konsolidazzjoni fiskali li tiffavorixxi t-tkabbir, mingħajr ma jitpoġġa f’riskju l-prinċipju tas-solidarjetà bejn ir-reġjuni sottonazzjonali tal-Istati Membri individwali;

39.

itenni talbietu lill-Kummissjoni li tippubblika White Paper li tistabbilixxi tipoloġija fil-livell tal-UE għall-kwalità tal-investiment pubbliku fil-kontijiet tal-infiq pubbliku abbażi tal-effetti fit-tul u biex tinkludi kapitolu dwar il-kwalità tal-investiment pubbliku, inkluż fil-livell sottonazzjonali, f’kull rapport annwali dwar il-finanzi pubbliċi tal-Unjoni Ekonomika u Monetarja (UEM) (6);

40.

huwa tal-fehma li Unjoni Ekonomika u Monetarja iżjed profonda u reżiljenti tibbenefika minn strutturi anqas kumplessi, sjieda aktar ċara u aktar trasparenza, pjuttost milli jiżdiedu saffi ġodda ta’ regoli ma’ dawk li diġà jeżistu. Jilqa’ b’sodisfazzjon, għalhekk, l-intenzjoni tal-Kummissjoni li tissemplifika u li żżid it-trasparenza u tiċċara s-sjieda;

41.

jitlob għal aktar realiżmu fir-rigward tal-implimentazzjoni prattika ta’ penali amministrattivi għall-pajjiżi li jonqsu milli jikkonformaw ma’ regoli definiti b’mod konġunt, kif ukoll diskussjoni dwar kif il-mekkaniżmi tas-suq jistgħu jkunu alternattiva jew żieda;

42.

jenfasizza li jeħtieġ li tingħata attenzjoni partikolari biex jiġi żgurat li l-governanza ekonomika tkun ikkaratterizzata minn responsabbiltà ċara fil-livelli kollha, inkluż fil-livell lokali u reġjonali, peress li dawn tal-aħħar huma dawk li ta’ spiss jieħdu r-responsabbiltà għall-implimentazzjoni tal-politika f’diversi oqsma, bħalma huma l-impjieg, is-saħħa u l-edukazzjoni;

43.

iħeġġeġ lill-Kummissjoni tinvolvi l-Kumitat tar-Reġjuni fit-tħejjija tal-White Paper dwar it-tranżizzjoni mill-ewwel fażi għat-tieni fażi tar-riforma tal-UEM;

44.

ifakkar fl-importanza li tiġi approfondita l-unjoni monetarja filwaqt li jitqiesu wkoll l-implikazzjonijiet għar-relazzjonijiet mal-pajjiżi li mhumiex fiż-żona tal-euro u li jiġu ċċarati l-proposti li jkopru l-Istati Membri kollha u mhux biss dawk fiż-żona tal-euro;

45.

jinsisti li kwalunkwe miżura li qed taffettwa l-ikkompletar tal-UEM tiġi implimentata bl-iżjed mod trasparenti sabiex ma jitgerrxux dawk l-Istati Membri li għadhom ma adottawx l-euro u sabiex jiġi evitat li jkun hemm “Ewropa b’żewġ veloċitajiet”.

1.7.2016   

MT

Il-Ġurnal Uffiċjali tal-Unjoni Ewropea

C 240/6

1.

jilqa’ l-ħidma tal-Kummissjoni Ewropea biex tappoġġja l-banek promozzjonali u biex toħloq pjattaformi ta’ investiment bħala elementi importanti tal-Pjan ta’ Investiment għall-Ewropa. Iżda jiddispjaċih li minkejja li d-definizzjoni formali ta’ banek promozzjonali nazzjonali fil-prinċipju tħaddan fiha wkoll banek reġjonali, il-Kummissjoni, fil-prattika madankollu tikkonċentra esklużivament fuq ir-rwol tal-amministrazzjonijiet nazzjonali u tappella biss għat-twaqqif ta’ banek promozzjonali nazzjonali ġodda. Minbarra dan banek promozzjonali li joperaw fuq livell lokali u reġjonali jiksbu għarfien u rikonoxximent fil-qafas tal-Pjan ta’ Investiment għall-Ewropa;

2.

ifakkar fid-definizzjoni ta’ banek jew istituzzjonijiet ta’ żvilupp kif stabbilita fir-Regolament dwar il-Fond Ewropew għall-Investimenti Strateġiċi, jiġifieri “l-entitajiet legali impenjati f’attivitajiet finanzjarji fuq bażi professjonali, li għalihom Stat Membru, jew entità ta’ Stat Membru f’livell ċentrali, reġjonali jew lokali, jagħtu mandat biex jitwettqu attivitajiet ta’ żvilupp jew ta’ promozzjoni”;

3.

ifakkar li banek promozzjonali mfassla skont diversi mudelli jaqdu rwol importanti biex jittaffew il-konsegwenzi tal-kriżi ekonomika u finanzjarja, speċjalment fid-dawl tat-tnaqqis tal-investimenti pubbliċi fuq livell lokali u reġjonali, li ssemmiet fl-aktar rapport konġunt reċenti tal-Kumitat Ewropew tar-Reġjuni u l-OECD;

4.

b’rabta ma’ dan jiġbed l-attenzjoni għall-fatt li għall-promozzjoni ta’ investimenti, li huma meħtieġa għall-awtoritajiet reġjonali, f’xi pajjiżi hemm banek li joperaw mal-pajjiż kollu (eż. fi Franza u l-Polonja), li s-sidien konġunti tagħhom huma l-awtoritajiet reġjonali (il-pajjiżi Skandinavi u n-Netherlands), iżda li hemm ukoll, minbarra banek promozzjonali nazzjonali, banek promozzjonali reġjonali (eż. fil-mudell Ġermaniż), li huma proprjetà (sħiħa jew parzjali) tar-reġjun federali rispettiv u li jwettqu xogħol ta’ promozzjoni speċifiku ġħar-reġjun federali. L-għamla ta’ dawn il-banek promozzjonali tvarja skont l-esperjenzi storiċi u l-kundizzjonijiet ekonomiċi fl-Istat jew ir-reġjun rispettiv;

5.

ifakkar li l-istituzzjonijiet ta’ promozzjoni mhux dejjem ikunu banek – f’xi pajjiżi jkollhom l-għamla ta’ aġenziji, kumpaniji ta’ investiment jew fondi ta’ investiment, u mhuwiex rari li jingħataw kapital ta’ riskju, u anke dan it-tip ta’ istituzzjonijiet, li mhumiex banek, jista’ jkollhom funzjoni importanti fil-Pjan ta’ Investiment għall-Ewropa;

6.

jiġbed l-attenzjoni għall-fatt li fuq livell lokali u reġjonali sa issa mhux fl-Istati Membri u r-reġjuni kollha huma disponibbli strumenti finanzjarji jew l-istrumenti u l-esperjenza eżistenti ma jistgħux jintużaw bl-aħjar mod minbarra li s-sehem tas-settur privat normalment huwa limitat għat-twettiq ta’ kuntratti – dan iżid il-ħtieġa għal appoġġ għall-istituzzjonijiet finanzjarji ta’ promozzjoni lokali;

7.

jisħaq li hemm modi differenti għat-twaqqif ta’ banek promozzjonali, bl-istess mod li l-istorja ta’ kif bdew dawk li diġà jeżistu żviluppat b’modi differenti – xi wħud twaqqfu mill-ewwel bħala istituzzjonijiet indipendenti, oħrajn żviluppaw minn dipartimenti ta’ banek pubbliċi;

8.

jenfasizza li l-ħolqien ta’ banek promozzjonali u l-kapaċità operattiva tagħhom huma essenzjali bħala strumenti ekonomiċi, strutturali u soċjopolitiċi fost l-oħrajn bħala reazzjoni għal dgħufija strutturali jew falliment tas-swieq (anke dawk reġjonali), u fl-istess ħin huwa konxju mid-diffikultajiet ta’ definizzjoni kunċettwali ċara u valutazzjoni ta’ falliment tas-suq; b’rabta ma’ dan jappella għal interpretazzjoni wiesgħa b’mod permanenti tat-terminu “falliment tas-suq”;

9.

jiġbed l-attenzjoni tal-Kummissjoni Ewropea dwar il-fatt li l-awtoritajiet reġjonali għandu jkollhom aktar influwenza fuq l-għażla ta’ soluzzjonijiet finanzjarji, li jaqdu l-interessi tal-amministrazzjonijiet lokali. In-nuqqas ta’ kunsiderazzjoni tal-fehmiet tal-awtoritajiet lokali u reġjonali sikwit twassal għall-promozzjoni ta’ investimenti li ma jgħoddux għall-programmi operazzjonali reġjonali u mal-istrateġiji lokali;

10.

jindika diskrepanza sostanzjali fil-livell tal-iżvilupp tas-sistemi ta’ promozzjoni nazzjonali individwali, li b’konsegwenza tagħha pajjiżi u reġjuni b’kultura anqas żviluppata ta’ dan it-tip ta’ entità bankarja juru nuqqasijiet sistematiċi. Dan jista’ jwassal biex xi kultant ma jkunx hemm biżżejjed appoġġ għall-awtoritajiet u l-intrapriżi lokali min-naħa tal-banek promozzjonali nazzjonali, li għandhom jagħmlu deċentralizzazzjoni qawwija tas-servizzi li joffru;

11.

huwa mħasseb li mudelli ċentralizzati ta’ promozzjoni tal-iżvilupp li jiddependu minn bank nazzjonali u l-fergħat lokali u mhux awtonomi tiegħu mhux dejjem jissodisfaw b’mod sħiħ il-ħtiġijiet tal-komunitajiet lokali, speċjalment f’reġjuni mhux daqstant żviluppati, fejn l-awtoritajiet ikollhom biss influwenza ferm limitata fuq il-bank promozzjonali nazzjonali;

12.

jesprimi l-konvinzjoni li l-mudell għall-iżvilupp ta’ sistema ta’ banek promozzjonali mill-awtoritajiet lokali u reġjonali għandu jintgħażel fuq kull livell bl-għanijiet ewlenin imniżżlin hawn taħt u skont il-kriterji ewlenin imniżżlin hawn taħt għall-valutazzjoni tal-effettività: it-tneħħija tan-nuqqasijiet tas-swieq, żieda dejjiema fin-numru ta’ impjiegi, il-kunsiderazzjoni tal-interessi ta’ komunitajiet lokali, kif ukoll is-segwitu tal-għanijiet pubbliċi ta’ żvilupp ekonomiku;

13.

huwa mħasseb li r-rekwiżit propost mill-Kummissjoni Ewropea ta’ valutazzjoni ex ante ta’ banek promozzjonali li jkunu għadhom kif twaqqfu u ta’ prodotti finanzjarji ġodda offruti minnhom tnaqqas b’mod sostanzjali l-kapaċità operazzjonali tagħhom u xxekkel it-twaqqif stess ta’ banek bħal dawn, kemm fuq livell nazzjonali kif ukoll reġjonali. Barra minn hekk, b’rabta ma’ dan għandu jiġi enfasizzat li f’reġjuni anqas żviluppati sikwit ikun diffiċli li tingħata evidenza ta’ falliment tas-suq, minħabba li s-sitwazzjoni soċjoekonomika tar-reġjun kollu tista’ tkun riflessjoni tal-inadegwatezza tas-suq meta mqabbel ma’ żoni aktar żviluppati;

14.

jesprimi t-tama li tikber il-kooperazzjoni bejn il-Kumitat tar-Reġjuni u l-Bank Ewropew tal-Investiment; jappella għall-ħolqien ta’ netwerk komplementari ta’ banek promozzjonali pubbliċi li jħares il-prinċipju ta’ sussidjarjetà, sabiex jingħata kontribut għall-kisba ta’ sinerġiji ta’ natura ekonomika u soċjali; ikun sodisfatt jekk din is-sistema ssir mezz ta’ skambju interreġjonali u internazzjonali ta’ esperjenza u għarfien, u fl-istess waqt tgħin biex jiġi evitat il-periklu ta’ ċentralizzazzjoni qawwija żżejjed;

15.

jappella, għal dawk ir-reġjuni li għad ma għandhomx sett ta’ strumenti ta’ promozzjoni tagħhom, għal tisħiħ sinifikanti tal-involviment tal-awtoritajiet lokali fit-twaqqif u l-operat ta’ banek promozzjonali kif ukoll fl-evalwazzjoni tal-impatt tagħhom. Dan jista’ jsir billi l-awtoritajiet lokali u reġjonali jkollhom influwenza akbar fuq l-orjentazzjoni strateġika u l-ġestjoni ta’ banek promozzjonali nazzjonali, jew inkella billi l-banek promozzjonali nazzjonali jiġu kkomplementati permezz tat-twaqqif ta’ banek promozzjonali reġjonali (lokali). Dawn tal-aħħar kieku jikkooperaw mill-qrib mal-bank nazzjonali;

16.

huwa tal-fehma li l-għażla ta’ triq konkreta għall-iżvilupp ta’ entità ta’ bank promozzjonali f’reġjun – allura l-mistoqsija dwar jekk mudell b’bank promozzjonali nazzjonali predominanti huwiex biżżejjed jew jekk mudell deċentralizzat bi rwol akbar għal istituzzjonijiet finanzjarji jew banek promozzjonali lokali jew reġjonali huwiex aħjar – trid tibqa’ f’idejn l-awtoritajiet reġjonali jew lokali bi ftehim mal-awtoritajiet nazzjonali jew - skont is-sistema legali tal-Istat Membru rispettiv - f’idejn l-awtoritajiet nazzjonali nnifishom;

17.

huwa tal-fehma li deċiżjonijiet dwar it-twaqqif ta’ istituzzjoni ġdida jitolbu analiżi bir-reqqa tal-utilità ta’ strutturi istituzzjonali ġodda, sabiex jiġu evitati żieda bla bżonn fil-burokrazija u ħela ta’ riżorsi;

18.

jirrimarka li fil-każ tal-intenzjoni tal-Kummissjoni Ewropea u tal-BEI li jistabbilixxu qafas sistematiku għall-appoġġ tat-twaqqif ta’ banek promozzjonali reġjonali ġodda bħal dawn, hemm bżonn jitqiesu l-partikolaritajiet ta’ pajjiżi u reġjuni individwali, jitqiesu prattiki u strutturi ta’ promozzjoni tajbin f’dan il-qasam, u wkoll jiġu inklużi l-esperjenzi ta’ banek li ġew stabbiliti reċentement. Barra minn hekk jagħmel sens li l-aħjar soluzzjonijiet istituzzjonali jiġu applikati b’kunsiderazzjoni tal-partikolaritajiet lokali f’reġjuni anqas żviluppati;

19.

ifakkar li valutazzjoni ex post tal-funzjonament effiċjenti ta’ banek promozzjonali reġjonali li diġà jeżistu u li għadhom kif twaqqfu, minħabba li l-iskeda ta’ żmien tal-pjani ffinanzjati ta’ investiment normalment tkun fuq għadd ta’ snin, trid issir fuq perjodu twil, fuq perjodu bejn 10 snin u 15-il sena;

20.

iqis li l-ħolqien ta’ qafas għall-kooperazzjoni bejn fondi Ewropej tal-investiment fuq terminu twil (European Long-Term Investment Funds, ELTIF) li għadhom kif twaqqfu u banek promozzjonali reġjonali u istituzzjonijiet lokali oħrajn huwa essenzjali – għandhom jikkomplementaw lil xulxin fil-finanzjament ta’ investimenti fit-tul fil-livell lokali u dak reġjonali u mhux jikkompetu kontra xulxin;

21.

huwa favur l-idea li jinħolqu pjattaformi ta’ investiment bħala mezz għat-twettiq tal-Pjan ta’ Investiment għall-Ewropa; madankollu b’rabta ma’ dan iqis li huwa essenzjali li l-kontribut għall-pjattaformi ta’ investiment li jkun ġej minn riżorsi pubbliċi, nazzjonali, lokali jew reġjonali ma jingħaddx fil-qafas tal-Patt ta’ Stabbiltà u Tkabbir;

22.

jisħaq li l-Kummissjoni Ewropea u l-Bank Ewropew tal-Investiment għandhom ifissru b’mod ċar liema rwol ser jingħata lill-banek promozzjonali reġjonali u istituzzjonijiet finanzjarji oħrajn fis-sistema ta’ pjattaformi ta’ investiment, li għandha tinbena bħala mezz għat-twettiq tal-Pjan ta’ Investiment għall-Ewropa. Il-banek promozzjonali reġjonali għandhom jikkooperaw mal-Fond Ewropew għall-Investimenti Strateġiċi (FEIS) fuq il-bażi ta’ pjattaformi ta’ investiment marbutin ma’ setturi differenti, iżda fuq kollox stabbiliti fuq bażi ġeografika;

23.

iqis li għandhom jingħataw kjarifika u spjegazzjoni aktar fil-fond tas-sisien tal-kooperazzjoni tal-banek promozzjonali reġjonali jew lokali jew istituzzjonijiet oħrajn maċ-Ċentru Ewropew ta’ Konsulenza għall-Investimenti (European Investment Advisory Hub, EIAH). Iċ-Ċentru Ewropew ta’ Konsulenza għall-Investimenti għandu jappoġġja b’mod speċjali lill-awtoritajiet lokali u lill-banek promozzjonali lokali fit-tħejjija ta’ proġetti u jieħu f’idejh il-konsulenza fi kwistjonijiet tekniċi finanzjarji u jgħin ukoll fit-tixrid ta’ għarfien. Barra minn hekk għandu jkun hemm il-possibbiltà, li ċ-Ċentru Ewropew ta’ Konsulenza għall-Investimenti jibni rabtiet ta’ sħubija mhux biss ma’ banek nazzjonali, iżda wkoll ma’ banek reġjonali.

1.7.2016   

MT

Il-Ġurnal Uffiċjali tal-Unjoni Ewropea

C 240/9

1.

L-aġenda urbana hija proġett Ewropew ta’ importanza ewlenija: ser jiġi żviluppat metodu ta’ ħidma ġdid, li bis-saħħa ta’ qafas operazzjonali u strumenti effettivi għandu jistabbilixxi l-koerenza tal-politiki kollha, li jaffettwaw il-bliet, u jolqtu l-ispazji funzjonali ta’ madwarhom. B’madwar żewġ terzi tal-politiki settorjali kollha tal-UE li għandhom impatt fuq iż-żoni urbani tal-Ewropa, il-bliet għandhom ikunu involuti aktar mill-qrib fit-tfassil u l-implimentazzjoni tagħhom. L-għan huwa li jsir titjib fil-kwalità tal-ħajja fil-bliet u l-iżvilupp ta’ governanza “urbana” ġdida, permezz ta’ approċċ prattiku u konkret, li jikkoordina fuq livelli differenti, u jifformola u jimplimenta l-għanijiet f’konformità mal-prinċipji tas-sussidjarjetà u tal- proporzjonalità. Din il-paradigma urbana ġdida tiftaħ opportunitajiet kbar: tista’ tagħmel lin-nies lokali konxji tal-valur Ewropew biex jintlaħqu l-isfidi soċjali u demografiċi, tista’ – meta relatata mill-qrib mal-Aġenda għal Regolamentazzjoni Aħjar tal-Kummissjoni tal-UE – ittejjeb il-kwalità tal-politiki Ewropej permezz ta’ rabta b’mod reċiproku ma’ strateġiji nazzjonali, reġjonali u lokali u għalhekk tmur lil hinn sew mill-kooperazzjoni preċendenti. Il-KtR jenfasizza li l-aġenda urbana għandha tkun parti minn viżjoni territorjali aktar olistika li tikkunsidra iż-żoni urbani kif ukoll dawk rurali (1).

Tista’ tagħti wkoll kontribut rilevanti sabiex jintlaħqu l-għanijiet stipulati fl-Artikolu 3 tat-Trattat tal-UE, inkluż b’mod partikolari dawk tal-koeżjoni ekonomika, soċjali u territorjali u sabiex jintlaħqu l-għanijiet tal-Istrateġija Ewropa 2020 (2).

B’approċċ “minn isfel għal fuq” u governanza f’diversi livelli, hemm tliet kriterji ewlenin sabiex dan il-proċess jirnexxi:

2.

Il-KtR ifakkar fl-isforzi li saru sa mill-1989 u fil-Proġetti Pilota Urbani sabiex il-bliet jitqiesu iktar u jiġu inkludi b’mod aktar prominenti fil-proċess tat-tfassil tal-politika fuq livell Ewropew u għalhekk taw il-kontribut tagħhom għat-tfassil ta’ aġenda urbana fuq livell Ewropew:

3.

L-importanza tal-bliet: it-tendenza osservata b’mod globali dwar il-konċentrazzjoni tal-popolazzjoni fil-bliet, li dejjem qiegħda tikber, għandha tiġi osservata fl-Ewropa wkoll: l-Ewropa hija kontinent, fejn madwar 70 % tal-popolazzjoni llum tgħix fil-bliet jew fl-agglomerazzjonijiet urbani. Dawn huma l-mutur tal-iżvilupp ekonomiku (waħdehom jipproduċu iktar minn 75 % tal-PDG), tal-inklużjoni soċjali u tal-iżvilupp sostenibbli. Madankollu, il-bliet huma wkoll karatterizzati minn interazzjoni diretta ta’ kuntrarji soċjali, faqar u ġid, potenzjal tax-xogħol u qgħad fit-tul, domanda u nuqqas ta’ ħaddiema, differenzi kbar fis-settur tal-edukazzjoni u sfidi ambjentali speċifiċi, biex insemmu biss ftit affarijiet. Bħala “katalisti tal-integrazzjoni”, ser jaqdu wkoll parti prinċipali biex jindirizzaw il-flussi attwali ta’ refuġjati kif ukoll il-migrazzjoni fi ħdan l-UE. L-ebda waħda mill-politiki tal-Unjoni Ewropea mhi ser tkun vijabbli mingħajr ma tqis id-dimensjoni urbana.

4.

Approċċi integrati u multidixxiplinarji: il-Karta ta’ Leipzig tal-2007 diġà kienet enfasizzat li l-approċċi integrati fil-bliet biss jistgħu jkunu ta’ suċċess u li l-governanza f’diversi livelli hija l-qofol għas-soluzzjoni ta’ problemi kumplessi fil-bliet. Fost l-approċċi ta’ suċċess hemm dak li jingħeleb il-“ħsieb tal-amministrazzjoni pubblika f’Silos”, jiġifieri approċċ interdixxiplinari sabiex jiġu solvuti l-problemi, l-interazzjoni ta’ ġerarkiji klassiċi, il-governanza f’diversi livelli u l-inklużjoni ta’ partijiet interessati differenti, b’kunsiderazzjoni tad-differenzi fost l-awtroritajiet lokali u reġjonali. Għalhekk, hawnhekk qegħdin jiġu deskritti partijiet li jikkorrispondu mill-qrib mal-ideat tal-Kummissjoni Ewropea tar-“Regolamentazzjoni aħjar”, tal-“Finanzjament aħjar” u tal-“Koordinazzjoni aħjar”. Madankollu, l-approċċi integrati jeħtieġu livell għoli ta’ koordinazzjoni u kooperazzjoni u fuq il-livelli kollha, kemm dak lokali, reġjonali u nazzjonali kif ukoll dak Ewropew.

5.

Il-belt u l-pajjiż bħala żoni li jiffunzjonaw b’mod kumplementari: Fid-diskussjoni dwar l-aġenda urbana kemm-il darba ssemma l-biża’ li jkun hemm enfasi ikbar fuq il-kwistjonijiet urbani għad-detriment tal-appoġġ taż-żoni rurali. Madankollu, il-KtR jenfasizza l-importanza tar-rabtiet bejn iż-żoni urbani u rurali u r-rwol li jaqdu ż-żoni rurali, li jikkontribwixxu wkoll għat-tkabbir u l-ħolqien ta’ impjiegi. Il-politiki tal-UE m’għandhomx iħeġġu relazzjoni ta’ kompetizzjoni bejn dawn iż-żewġ dimensjonijiet sal-punt li dawn jiġu integrati ġeografikament, amministrattivament u f’termini ta’ politiki funzjonali u tematiċi. Għalhekk l-objettiv huwa li tiġi promossal-kumplementarjetà taż-żewġ dimensjonijiet u li jsir possibbli l-ittestjar ta’ forom ġodda ta’ governanza bejniethom u b’mod partikolari permezz ta’ aċċess usa’ għas-servizzi u l-iżvilupp ta’ teknoloġiji diġitali. Huwa biss meta t-tnejn li huma jkunu b’saħħithom li jista’ jinkiseb l-għan ġenerali: Ewropa ekoloġikament, ekonomikament u soċjalment b’saħħitha u koeżjoni territorjali akbar. Fil-qalba tal-politika urbana Ewropea nsibu l-bliet u l-ispazji funzjonali ta’ madwarhom kollha: mhux biss l-bliet ewlenin u kbar, iżda wkoll l-bliet medji u żgħar, li huma ta’ importanza kbira għar-reġjoni ta’ madwarhom.

6.

L-aġenda urbana tal-UE għandha tipprovdi wkoll gwida għal pożizzjonijiet ta’ negozjar tal-UE bi tħejjija għall-konferenza Habitat III li għandha ssir f’Quito mis-17 sal-20 ta’ Ottubru 2016. Barra minn hekk u b’konformità mal-objettiv tal-UE li tkun attur globali aktar b’saħħtu kif ukoll il-ħtieġa li tiżdied il-konsistenza bejn il-politiki esterni u interni tal-UE, l-UE għandha ssaħħaħ u tħeġġeġ il-kooperazzjoni internazzjonali u l-iskambju bejn l-awtoritajiet urbani.

7.

L-aġenda urbana għandha tiddependi wkoll fuq approċċ integrat bejn il-governanza urbana u reġjonali li tinkludi l-kuntesti istituzzjonali u amministrattivi sabiex tiġi implimentata b’suċċess.

8.

Għalhekk, għal aġenda urbana Ewropea li tirrispetta l-prinċipju tas-sussidjarjetà u l-parteċipazzoni tal-awtoritajiet lokali u reġjonali b’approċċ minn isfel għal fuq, huma imperattivi fatturi bħall-parteċipazzjoni tal-awtoritajiet lokali u reġjonali u l-organizzazzjonijiet rappreżentattivi nazzjonali u Ewropej tagħhom fil-proċess tat-teħid tad-deċiżjonijiet, il-parteċipazzjoni u r-responsabbiltà tagħhom fit-tfassil ta’ programmi operattivi u fl-implimentazzjoni u fil-valutazzjoni tal-politika ta’ koeżjoni, filwaqt li jiġu rispettati r-rwoli istituzzjonali tagħhom.

9.

Il-Kummissjoni Ewropea bdiet tħejji l-Patt ta’ Amsterdam flimkien mal-Presidenza Netherlandiża u bl-involviment ta’ diversi partijiet interessati. L-għan tal-Patt huwa, fil-qasam tat-tnax-il sħubija tematika, li jiżviluppa u jimplimenta pjani ta’ azzjoni matul il-perjodu ta’ tliet snin, għall-politiki integrati għall-problemi urbani ċentrali.

Dawn huma maħsuba bħala strument ewlieni ta’ twettiq fi ħdan l-Aġenda Urbana. Dawn ser jiġbru flimkien għadd dejjem jiżdied ta’ politiki settorjali li għandhom impatt fuq iż-żoni urbani tal-UE. Huwa wkoll kruċjali għas-suċċess tas-sħubijiet u tal-Bord tal-Aġenda Urbana tal-UE, li se jissorveljaw il-proċess, li jimxu ‘l quddiem f’kooperazzjoni mill-qrib mal-awtoritajiet urbani, lokali u reġjonali, l-Istati Membri, l-istituzzjonijiet Ewropej (inkluż il-KtR), u l-partijiet interessati lokali rilevanti.

Il-KtR huwa favur li jkun hemm konċentrazzjoni fuq numru limitat ta’ oqsma ta’ politika importanti li jagħmluha possibbli li jinkisbu riżultati viżibbli u juru l-valur miżjud tal-Aġenda Urbana tal-UE. It-tnax-il tema prinċipali definita ma tibni ebda lista finali. Xorta waħda għandhom jiġu ffurmati sħubiji għal suġġetti oħrajn, li jeħtieġu approċċi integrati għall-politiki, bħal pereżempju li titqies id-dimensjoni kulturali u turistika fl-iżvilupp urban, forom inklużivi ġodda ta’ parteċipazzjoni, innovazzjoni u “Bliet Intelliġenti”. Valutazzjoni komprensiva tal-prijoritajiet tematiċi ser tkun possibbli għall-ewwel darba, meta jitfasslu s-sħubijiet, peress li din tindika jekk u kif l-Unjoni Ewropea tħaddanx temi ċentrali, bħall-qgħad fost iż-żgħażagħ. Il-KtR jilqa’ bi pjaċir il-fatt li erba’ Sħubijiet Pilota (“il-kwalità tal-arja”, “il-bini tad-djar”, “il-faqar fil-bliet” u “il-migrazzjoni u l-integrazzjoni tar-refuġjati”) diġà bdew iwettqu xogħolhom. Għall-bqija tal-proċess tas-sħubijiet huwa ta’ importanza kbira li sa mill-bidu nett jintlaħaq qbil fuq livell għoli ta’ responsabbiltà, pereżempju fil-forma ta’ rappurtar kull sitt xhur lill-Kummissjoni, lill-Parlament u lill-KtR. Il-KtR jiġbed l-attenzjoni wkoll għall-possibbiltà li s-sħubijiet tematiċi jikkontribwixxu għat-tfassil tal-leġislazzjoni futura tal-UE u għar-rieżami ta’ dik attwali. Fir-rigward tal-finanzjament tal-parteċipazzjoni f’dawn l-isħubijiet tematiċi li ser tinkludi madwar 15-il sieħeb u meta jitqies il-fatt li n-Netherlands diġà pprovdew EUR 50 000 bħala appoġġ għal kull sħubija, il-KtR jitlob lill-Kummissjoni Ewropea teżamina l-possibbiltà ta’ assistenza teknika finanzjarja sabiex tappoġġja dawk l-awtoritajiet lokali li jixtiequ jsiru sħab.

10.

L-iżvilupp u l-finanzjament tal-pjanijiet ta’ azzjoni urbana, skont il-qafas tal-Patt ta’ Amsterdam jew programmi Ewropej oħrajn (eż. URBACT), jistgħu jkunu s-suġġetti ta’ programmi operazzjonali fil-perjodu ta’ programmazzjoni ġejjieni.

11.

Barra minhekk, huwa importanti li l-Kummissjoni Ewropea tieħu rwol b’saħħtu u awtorevoli fil-koordinazzjoni. Dan jinkludi l-ħatra tal-ewwel Viċi President bħala koordinatur tal-Aġenda urbana tal-UE, li permezz tal-funzjoni tiegħu tiġi ggarantita rabta mill-qrib mal-aġenda għal Regolamentazzjoni aħjar. Barra minhekk din il-koordinazzjoni tneħħi l-osservazzjoni frammentata tal-bliet, li tirriżulta mill-perspettivi tekniċi rispettivi tad-Direttorati Ġenerali individwali. “Bliet intelliġenti” u, fil-każ taż-żoni rurali, “reġjuni intelliġenti” ma jkunux biss “bliet intelliġenti teknoloġikament”, iżda wkoll soċjalment intelliġenti, Hemm ukoll il-ħtieġa għal politika integrata fi ħdan l-Aġenda Urbana tal-UE, is-semplifikazzjoni tal-Bliet Intelliġenti u tal-Istrateġiji ta’ Speċjalizzazzjoni Intelliġenti (RIS3). Huwa essenzjali approċċ olistiku, b’mod partikolari fid-dawl tal-isfidi, bħall-mewġa ta’ refuġjati u l-ħtiġiet korrispondenti ta’ integrazzjoni. Barra minhekk, l-inklużjoni tal-aġenda urbana fil-programm ta’ ħidma annwali tal-Kummissjoni Ewropea tirrappreżenta element importanti ieħor. Dan l-element iservi wkoll għat-trasparenza u għall-impenn fil-proċess.

12.

Il-KtR jinsisti li aktar progress għadu jrid isir sabiex jiġu involuti aħjar l-awtoritajiet lokali u reġjonali inklużi netwerks urbani u reġjonali u partijiet interessati oħrajn, fit-tħejjija kif ukoll l-evalwazzjoni tal-politika tal-UE b’impatt u/jew enfasi fuq l-awtoritajiet responsabbli għal żoni urbani.

13.

Estensjoni tal-valutazzjoni tal-impatt għad-dimensjoni urbana: fuq inizjattiva tal-KtR u tal-Proġett Pilota mibdi mill-Kummissjoni Ewropea għall-evalwazzjoni tal-impatt territorjali bl-eżempju tal-effiċjenza enerġetika fil-bini, intwera li hemm strumenti adatti fis-seħħ sabiex itejbu l-valutazzjoni tal-impatt tal-eżaminazzjoni tad-dimensjoni territorjali. L-aħħar u mhux lanqas, il-proġett pilota wera l-interess kbir, ir-rieda u l-kapaċità tal-bliet u tar-reġjuni, sabiex jipparteċipaw b’mod attiv f’miżuri xierqa u li dawn il-miżuri xierqa jipprovduhom bil-kontribut meħtieġ.

14.

Huwa neċessarju li tiġi implimentata l-kondiviżjoni tal-għarfien u l-kooperazzjoni bejn il-bliet sabiex jiġi promoss l-iskambju tal-għarfien espert u tal-aħjar prattika bejn il-bliet u l-awtoritajiet lokali billi jiġu minimizzati l-piżijiet amministrattivi kemm jista’ jkun. Il-ġbir ta’ data dwar kwistjonijiet ta’ żvilupp urban għandu jiġi kkunsidrat biss f’każijiet ta’ eċċezzjoni u limitat għal meta jkun assolutament essenzjali.

15.

Il-KtR ikompli jappella għal reviżjoni sistematika tal-opportunitajiet, sabiex jitjieb l-eliġibbiltà għall-ibliet u l-ispazji funzjonali tagħhom. Jistgħu jitqiesu:

16.

Minħabba l-importanza li qiegħda dejjem tikber tas-Semestru Ewropew bħala strument tal-koordinazzjoni tal-politika, il-KtR jitlob li fil-kuntest tas-Semestru Ewropew jiġu kkunsidrati wkoll b’mod xieraq aspetti urbani u rurali. Dan jista’ jinkiseb permezz ta’ involviment f’waqtu tal-awtoritajiet lokali u reġjonali fit-tħejjija annwali tal-Programmi Nazzjonali ta’ Riforma tal-Istati Membri. B’hekk, ir-rappreżentant maħtur tal-Kummissjoni Ewropea fl-Istat Membru rispettiv ikun jista’ jaqdi rwol importanti għas-Semestru Ewropew.

17.

Il-KtR jenfasizza wkoll id-dinamika u l-kapaċitajiet ta’ netwerks urbani li jagħtu kontribut biex jintlaħqu l-objettivi tal-politika tal-Unjoni Ewropea. Fir-rigward tal-Patt tas-Sindki, li jgħaqqad 6 000 awtorità lokali u reġjonali li impenjaw ruħhom biex inaqqsu l-emissjonijiet tad-diossidu tal-karbonju iktar mill-miri tal-klima tal-UE għall-2020, il-KtR jistieden lill-Kummissjoni Ewropea biex tiżviluppa r-rwol tal-Patt tas-Sindki bil-għan li l-attivitajiet tiegħu jiġu estiżi wara l-2020 u jsir mezz għall-kontributi konkreti li l-bliet jistgħu jagħmlu sabiex jiġġieldu kontra t-tibdil fil-klima fi ħdan qafas usa’ tal-UE (4).

18.

Il-Patt ta’ Amsterdam għandu jwassal għal qbil li jorbot legalment dwar il-proċess tal-implimentazzjoni tal-aġenda urbana. It-tmien sħubijiet li għadhom ma nbdewx għandhom jiġu mnedija immedjatament. Wara dan għandha tiġi pprovduta reviżjoni tal-lista tematika, sabiex jiġi ddeterminat jekk ir-realtà urbana hijiex l-element essenzjali fl-isħubiji. Il-KtR jilqa’ l-proposta fl-abbozz tal-Patt ta’ Amsterdam mill-Presidenza Netherlandiża, li suġġetti trasversali, fosthom governanza urbana, governanza lil hinn mill-fruntieri amministrattivi, inkluż belt-pajjiż- kif ukoll kooperazzjoni transfruntiera, u l-għoti ta’ servizzi pubbliċi ta’ interess ġenerali, għandhom jiġu indirizzati fl-isħubiji kollha. L-aħħar aspett huwa li jiġi żgurat li l-Aġenda Urabana tal-UE skont l-Artikolu 14 TFUE u l-Protokoll 26 tirrispetta l-awtonomija lokali u reġjonali u d-diskrezzjonijiet relatati magħha fi ħdan il-liġi primarja tal-UE u b’mod partikolari tintegra s-servizzi ta’ interess ġenerali muniċipali tematikament.

19.

Minbarra l-korpi u l-obbligi ta’ rappurtar previsti fil-Patt tas-Sindki, għandu jkun hemm rappurtar regolari lill-Kummissjoni Ewropea, lill-Parlament Ewropew, lill-Kunsill u lill-KtR, sabiex tiġi żgurata proċedura trasparenti u aċċessibbli b’mod wiesa’, li tkun tista’ tiġi segwita mhux biss minn dawk li huma involuti direttament, iżda wkoll mill-pubbliku interessat (5).

20.

Sabiex jiġi żgurat livell għoli ta’ responsabilità għall-Presidenzi futuri, il-Patt ta’ Amsterdam għandu jiġi inkorporat fil-konklużjonijiet tal-Kunsill Ġenerali f’Ġunju 2016, wara l-adozzjoni tiegħu fit-30 ta’ Mejju 2016 fil-Kunsill Informali tal-Ministri għall-Iżvilupp Urban. Dan għandu jsir flimkien ma’ talba lill-Presidenzi tal-Kunsill futuri, sabiex jinkorporaw l-aġenda urbana fil-programmi ta’ ħidma rispettivi.

Il-Presidenza tal-Kunsill Slovakka għandha tfassal l-ewwel rapport sal-aħħar tal-2016 dwar l-istat tal-implimentazzjoni tas-sħubijiet.

21.

Sabiex jiġi stabbilit l-obbligu għal aktar żvilupp tal-politika u sostenibbiltà fi ħdan l-aġenda urbana, għandha tiġi ppreżentata White Paper, li tevalwa u tissistematizza r-riżultati tas-sħubijiet u li tiddeskrivi u li tagħmel trasferibbli l-elementi ta’ governanza aħjar: B’hekk, minn naħa waħda, ser jinkiseb l-obbligu u min-naħa l-oħra ser tinkiseb ukoll żieda fit-trasparenza. Madanakollu, il-White Paper ma għandhiex titħejja wara t-tmiem tal-perjodu tat-tliet snin tas-sħubijiet: minflok, fl-2017 wara evalwazzjoni ta’ nofs it-terminu, għandha tiġbor fil-qosor u tissistematizza l-esperjenzi akkumulati, li għandhom jikkontribwixxu għat-tħejjija tal-perjodu futur ta’ programmar tal-Fondi Strutturali u ta’ Investiment Ewropej mill-2021 u għall-perjodu ta’ wara l-Istrateġija Ewropa 2020.

1.7.2016   

MT

Il-Ġurnal Uffiċjali tal-Unjoni Ewropea

C 240/15

1.

jilqa’ t-talba tal-Kummissjoni Ewropea għal opinjoni ta’ prospettiva dwar il-kwistjonijiet marbuta mat-titjib tar-rappurtar ambjentali u l-assigurazzjoni tal-konformità tal-liġi tal-UE dwar l-ambjent. Iż-żewġ kwistjonijiet ġew enfasizzati fl-Aġenda tal-Kummissjoni Ewropea dwar regolamentazzjoni aħjar (1);

2.

ifittex li, bl-opinjoni ta’ prospettiva, jikkontribwixxi għall-Inizjattiva REFIT tal-Kummissjoni Ewropea “Kontroll tal-idoneità tar-razzjonalizzazzjoni tal-obbligi ta’ monitoraġġ u rappurtar fil-politika dwar l-ambjent”, u għas-segwitu ta’ rakkomandazzjonijiet preċedenti tal-KtR dwar it-titjib tal-implimentazzjoni aħjar tal-liġi tal-UE dwar l-ambjent; (2);

3.

jenfasizza li r-responsabbiltà ewlenija biex jiġu żgurati l-implimentazzjoni u l-infurzar effettivi tal-leġislazzjoni tal-UE taqa’ taħt l-awtoritajiet nazzjonali, ħafna drabi fil-livelli reġjonali u lokali, kif ġie rikonoxxut mill-Parlament Ewropew (3);

4.

jenfasizza li livell għoli ta’ protezzjoni ambjentali huwa wieħed mill-għanijiet fundamentali tal-Unjoni Ewropea, u jtenni t-tħassib tiegħu dwar il-livell tal-implimentazzjoni tal-liġi ambjentali;

5.

jenfasizza l-vantaġġi numerużi li jirriżultaw mill-implimentazzjoni bir-reqqa tal-leġislazzjoni ambjentali tal-UE — mhux biss għall-ambjent u għall-ekonomija billi jinħolqu kundizzjonijiet indaqs u ċertezza legali għall-kumpaniji u tiġi promossal-innovazzjoni — iżda wkoll b’mod partikolari billi jitjiebu l-kundizzjonijiet tal-ħajja tan-nies u s-saħħa tagħhom; jenfasizza f’dan il-kuntest, li l-ispiża tat-traspożizzjoni mhux kompluta jew inkorretta tal-leġislazzjoni ambjentali tal-UE hija stmata għal madwar EUR 50 biljun fis-sena;

6.

jieħu nota tat-tħassib imqajjem mill-Parlament Ewropew li ħafna mill-ispejjeż amministrattivi mhux meħtieġa marbuta mal-implimentazzjoni tal-leġislazzjoni ambjentali tal-UE huma minħabba prattiki amministrattivi pubbliċi u privati mhux adegwati u ineffiċjenti f’diversi Stati Membri u fl-awtoritajiet reġjonali jew lokali tagħhom (4); hawnhekk huwa importanti li l-awtoritajiet lokali u reġjonali jingħataw setgħat ċari fil-leġislazzjonijiet nazzjonali biex iwettqu dmirijiethom;

7.

iħeġġeġ, f’konformità mal-Aġenda ġdida tal-Kummissjoni dwar Regolamentazzjoni Aħjar, biex tittejjeb din is-sitwazzjoni u jħeġġeġ lill-Istati Membri u lill-awtoritajiet lokali u reġjonali biex jimplimentaw leġislazzjoni ambjentali tal-UE bl-iktar mod ċar, sempliċi u li faċli biex jintuża waqt li jiżguraw l-effiċjenza tagħha;

8.

jinnota madankollu li hemm raġuni fundamentali għall-ineffiċjenza minħabba li l-leġislazzjoni tal-UE xi kultant tiġi abbozzata mingħajr valutazzjoni minn qabel b’saħħitha u ffukata tajjeb tal-poteri, l-implikazzjonijiet ta’ spejjeż ta’ konformità u kwistjonijiet ta’ kapaċità tal-awtoritajiet lokali u reġjonali u l-kundizzjonijiet ambjentali differenti fl-Istati Membri;

9.

jenfasizza li l-ġbir tal-informazzjoni (monitoraġġ), it-trasferiment ta’ informazzjoni (rappurtar) u l-pubblikazzjoni u t-tixrid ta’ data għaċ-ċittadini huma essenzjali għal ċiklu sħiħ ta’ politika tal-iżvilupp, l-implimentazzjoni u l-valutazzjoni tal-leġislazzjoni ambjentali;

10.

itenni t-tħassib tiegħu dwar l-isforzi inugwali ta’ M&R madwar l-Ewropa, fejn l-informazzjoni li qed tiġi ġenerata spiss tkun mhux kompluta, inkompatibbli jew mhux aġġornata; jirrikonoxxi li informazzjoni aħjar u iżjed aċċessibbli fil-livell nazzjonali, reġjonali u lokali tista’ tippermetti li problemi ambjentali ewlenin jiġu identifikati iktar kmieni waqt li tiġi ffaċilitata l-implimentazzjoni effiċjenti ta-sistemi tat-twissija bikrija stipulati fid-direttivi differenti, u b’hekk jiġu ffrankati l-ispejjeż fuq medda twila ta’ żmien;

11.

jenfasizza r-rwol prinċipali li jaqdu l-awtoritajiet lokali u reġjonali fil-ġbir tal-għarfien u fl-użu tal-M&R għall-provvista tal-informazzjoni għall-pubbliku, u aktar sensibilizzazzjoni fost iċ-ċittadini f’kooperazzjoni ma’ aġenziji għall-protezzjoni tal-ambjent;

12.

jenfasizza li huma meħtieġa l-allokazzjoni xierqa tar-responsabbiltajiet u r-riżorsi, u flussi ta’ informazzjoni ċara fir-rekwiżiti ambjentali ta’ M&R tal-Istati Membri bejn il-muniċipalitajiet, ir-reġjuni u l-livell nazzjonali, sabiex ikun żgurat li r-rapporti u l-indikaturi relatati mal-qagħda tal-ambjent huma konsistenti, effettivi u affidabbli;

13.

iħeġġeġ lill-awtoritajiet lokali u reġjonali biex jiżviluppaw obbligi għall-iżviluppaturi ta’ pjani/proġetti biex jissottomettu d-data ambjentali tagħhom, miġbura għal valutazzjonijiet tal-impatt ambjentali u għall-kisba tal-permessi/liċenzji meħtieġa taħt il-liġi ambjentali tal-UE, lill-awtoritajiet lokali u reġjonali;

14.

jenfasizza li huwa importanti li l-awtoritajiet lokali u reġjonali jaħdmu flimkien mill-qrib u jinvolvu u jappoġġjaw voluntiera, NGOs u ċittadini interessati fir-riċerka xjentifika (ix-xjenza taċ-ċittadini) fil-ġbir tad-data dwar l-ambjent, b’mod partikolari fuq il-bijodiversità;

15.

jilqa’ l-fatt li l-Kummissjoni Ewropea qed twettaq kontroll tal-idoneità dwar is-simplifikazzjoni tar-rekwiżiti ta’ M&R fil-liġi ambjentali tal-UE. Il-KtR jitlob lill-Kummissjoni Ewropea biex tikkoordina l-kontroll tal-idoneità permezz ta’ reviżjonijiet tar-rekwiżiti ta’ M&R f’oqsma oħra ta’ politika tal-UE, pereżempju, l-agrikoltura, l-enerġija u s-servizzi finanzjarji;

16.

jappoġġja lill-Kummissjoni Ewropea fl-intenzjoni tagħha li tiżviluppa M&R ambjentali aktar moderni, effiċjenti u effettivi fil-leġislazzjoni tal-UE. Il-KtR iqis l-objettivi li ġejjin bħala kruċjali (5):

17.

jaqbel ma’ dawn il-prinċipji li ġejjin, li għandhom jiggwidaw ir-rekwiżiti ta’ M&R fil-livell tal-UE: komprensività u suffiċjenza, koerenza u konsistenza, komparabilità bbilanċjata ma’ sussidjarjetà, proporzjonalità, aċċessibilità, puntwalità u kontinwità (6);

18.

jinsisti li l-Kummissjoni Ewropea, l-Istati Membri u l-awtoritajiet lokali u reġjonali fl-isforzi tagħhom biex jissimplifikaw il-M&R u jnaqqsu l-piż amministrattiv:

19.

jenfasizza l-ħtieġa ta’ inventarju komprensiv tal-obbligi ta’ rappurtar fl-acquis ambjentali tal-UE, verifika tal-ħtieġa għalihom, u valutazzjoni tal-ispejjeż amministrattivi ta’ M&R għall-awtoritajiet lokali u reġjonali;

20.

jitlob li l-kontroll tal-idoneità tal-Kummissjoni Ewropea tar-rekwiżi ta’ M&R iqisu b’mod adegwat l-aspetti differenti taċ-ċiklu DPSIR (il-fatturi mexxejja, il-pressjonijiet, l-istat, l-impatti, ir-rispons);

21.

iħeġġeġ lill-Kummissjoni Ewropea biex tesplora l-kisbiet fl-effiċjenza u tindirizza l-piż amministrattiv żejjed fil-M&R b’mod partikolari permezz tal-awtomatizzazzjoni ta’ għodod ta’ rappurtar, u billi tħares lejn sinerġiji fost l-obbligi ta’ rappurtar taħt direttivi differenti;

22.

jirrikonoxxi l-prattika tajba eżistenti fir-rekwiżiti ta’ M&R ambjentali. Eżempji jinkludu WISE u l-integrazzjoni ta’ rappurtar dwar l-emissjonijiet fl-arja minn impjanti ta’ kombustjoni kbar fir-Reġistru Ewropew dwar ir-Rilaxx u t-Trasferimenti ta’ Inkwinanti (E-PRTR);

23.

jemmen li għat-titjib tal-M&R ambjentali u biex ikollha stampa tal-iskop tagħha, il-Kummissjoni Ewropea għandha tistabbilixxi “tabelli ta’ valutazzjoni tal-implimentazzjoni” għal direttivi addizzjonali, kif diġà jeżistu għal xi direttivi iktar riċenti (7);

24.

jinsisti li l-Kummissjoni Ewropea, hi u tikkunsidra revoka tad-Direttiva ta’ Rappurtar Standardizzat, għandha terġa’ tiżviluppa approċċ orizzontali għal M&R fil-futur fil-livell tal-UE;

25.

jirrikonoxxi r-rwol importanti tal-Aġenzija Ewropea għall-Ambjent (EEA) biex tipprovdi bażi solida ta’ għarfien li ssostni l-politika ambjentali u l-implimentazzjoni tagħha, kif ukoll il-valur tal-ħidma tagħha fil-M&R;

26.

itenni l-appoġġ tiegħu għall-iżvilupp ta’ Oqfsa Strutturati ta’ Implimentazzjoni u Informazzjoni (SIIFs) kif propost mill-Kummissjoni Ewropea għal-liġijiet kollha ewlenin tal-UE dwar l-ambjent (8);

27.

itenni t-talba tiegħu lill-Kummissjoni Ewropea biex tiżgura li l-Istati Membri u l-awtoritajiet lokali u reġjonali tagħhom jimplimentaw sew ir-rekwiżiti minimi eżistenti tad-Direttiva dwar l-aċċess għall-informazzjoni fi kwistjonijiet ambjentali f’konformità mal-Konvenzjoni ta’ Aarhus (9);

28.

jara potenzjal sostanzjali fis-soluzzjonijiet elettroniċi u l-gvern elettroniku fl-assistenza lill-awtoritajiet lokali u reġjonali għas-simplifikazzjoni tal-M&R ambjentali tagħhom, b’mod partikolari fid-dawl tat-tnaqqis ta’ piżijiet amministrattivi fuq l-awtoritajiet lokali u reġjonali u n-negozji; ir-reġistrar ta’ data strutturata u r-riżultati sistemizzati tal-M&R; l-iffaċilitar tal-analiżi tar-riskju; it-titjib tal-kwalità tal-M&R: pereżempju gwida dwar l-M&R u formoli fuq il-web; kif ukoll parteċipazzjoni tal-pubbliku u informazzjoni għall-pubbliku mtejba;

29.

jitlob lill-Kummissjoni Ewropea u lill-Aġenzija Ewropea għall-Ambjent janalizzaw, permezz ta’ proġetti piloti, kif ir-rekwiżiti ta’ M&R fuq l-awtoritajiet lokali u reġjonali jistgħu jitnaqqsu bis-saħħa tal-ICT u l-gvern elettroniku mingħajr ma jintlaqat l-impatt tal-leġislazzjoni;

30.

jistieden lill-Kummissjoni Ewropea biex tevalwa l-approċċi tagħha għall-kontroll tal-idoneità fejn l-operaturi u l-awtoritajiet lokali u reġjonali jistgħu jużaw l-istess għodda ta’ rappurtar elettroniku għal diversi biċċiet ta’ leġislazzjoni ambjentali tal-UE;

31.

itenni t-talba tiegħu lill-Kummissjoni Ewropea, l-Aġenzija Ewropea għall-Ambjent u l-Istati Membri biex ikomplu jisfruttaw l-opportunitajiet ta’ tekniki għall-osservazzjoni tad-dinja, bħall-Monitoraġġ Globali tal-Ambjent u s-Sigurtà (GMES), biex tittejjeb l-effikaċja tal-monitoraġġ (10);

32.

jenfasizza l-ħtieġa li jiġu promossi l-investimenti fis-sistemi u l-għodod ta’ informazzjoni onlajn, inklużi portali fuq l-Internet li huma faċli li jintużaw u paġni tal-Internet, u jħeġġeġ li l-utenti tas-sistema, bħalma huma l-awtoritajiet lokali u reġjonali u l-operaturi, ikunu involuti fl-iżvilupp ta’ sistemi;

33.

jappella biex isiru sforzi biex tiġi żgurata l-interoperabbiltà transsettorjali u transkonfinali komprensiva tas-servizzi elettroniċi tal-UE u tal-Istati Membri fil-qasam tal-ambjent fil-livell nazzjonali, reġjonali u lokali (11);

34.

jenfasizza r-rwol importanti li l-informazzjoni pubblika ambjentali (spazjali) taqdi għal negozji msejsa fuq id-diġitali, inklużi l-SMEs u l-istartups; iħeġġeġ lill-awtoritajiet lokali u reġjonali biex jisfruttaw il-potenzjal sħiħ tal-użu mill-ġdid tal-informazzjoni tas-settur pubbliku, u l-appoġġ ta’ ħiliet intraprenditorjali diġitali fl-użu ta’ din id-data, sabiex jiġu appoġġati ċ-ċittadini, in-negozji u s-soċjetà ċivili fl-iżvilupp ta’ servizzi ġodda, żieda fil-kompetittività u l-ħolqien ta’ impjiegi ġodda;

35.

jistieden lill-Kummissjoni Ewropea biex tinkoraġġixxi aktar l-iskambju tal-aħjar prattiki u teknoloġiji bejn l-Istati Membri, l-awtoritajiet reġjonali u lokali u biex tippromovi M&R ambjentali diġitali u l-forniment ta’ informazzjoni dwar l-ambjent, u r-riċerka u l-innovazzjoni dwaru, fil-Pjan ta’ Azzjoni tagħha dwar il-gvern elettroniku 2016-2020 li ġej u fis-sejħiet tagħha fil-ġejjieni għal proposti taħt il-programm LIFE, il-Faċilità Nikkollegaw l-Ewropa (CEF), u l-programm Orizzont 2020;

36.

jinkoraġġixxi lill-awtoritajiet lokali u reġjonali biex jippromovu l-iżvilupp ta’ M&R u Oqfsa Strutturati ta’ Implimentazzjoni u ta’ Informazzjoni ambjentali diġitali, u żieda fil-kapaċità amministrattiva, billi jagħmlu użu mill-assistenza teknika taħt il-Fondi Strutturali u ta’ Investiment Ewropej;

37.

huwa tal-fehma, li fuq il-bażi tal-esperjenzi li nkisbu bl-implimentazzjoni tad-Direttiva 2007/2/KE li tistabbilixxi Infrastruttura għall-Informazzjoni Ġeografika fl-Ewropa (INSPIRE) jeħtieġ li wieħed jiżen liema dispożizzjonijiet funzjonali u tekniċi tad-Direttiva jistgħu jiġu implimentati, sabiex jintlaħqu l-miri tagħha u meta wieħed iqis l-ispejjeż u l-benefiċċji. F’dan il-kuntest qed tiġi mistennija b’antiċipazzjoni l-evalwazzjoni REFIT tad-Direttiva dwar INSPIRE, li tippermetti l-qsim ta’ informazzjoni dwar l-ispazju ambjentali fost l-organizzazzjonijiet tas-settur pubbliku u li tiffaċilita l-aċċess pubbliku għall-informazzjoni dwar l-ispazju fl-Ewropa kollha;

38.

jappoġġja aktar żvilupp ta’ INSPIRE bħala għodda tal-Gvern elettroniku biex tipprovdi l-format u l-proċess komuni għall-ġbir ta’ data dwar informazzjoni spazjali ambjentali għas-simplifikazzjoni tal-M&R ambjentali, u biex l-assigurazzjoni tal-konformità u l-infurzar tal-leġislazzjoni tal-UE jkunu effiċjenti, filwaqt li jiġu implimentati l-prinċipji tal-Open Government Data u soluzzjonijiet diġitali fil-qafas ta’ Smart City għall-pubblikazzjoni u t-tixrid ta’ data għaċ-ċittadini;

39.

jistieden lill-Kummissjoni Ewropea biex teżamina l-konsegwenzi possibbli jekk ir-rekwiżiti ta’ INSPIRE dwar il-formati jsiru obbligatorji f’oqsma oħrajn;

40.

jemmen li INSPIRE tista’ twassal għal benefiċċji sostanzjali għall-awtoritajiet lokali u reġjonali u jħeġġeġ lill-Istati Membri, bl-appoġġ tal-Kummissjoni Ewropea, biex isaħħu l-involviment tal-awtoritajiet lokali u reġjonali tagħhom fil-proċess ta’ INSPIRE u biex jibnu l-kapaċità biex INSPIRE tiġi implimentata fost l-amministrazzjonijiet lokali u reġjonali (12);

41.

jappella għal rwol akbar ta’ koordinazzjoni tal-EEA u tal-JRC tal-Kummissjoni Ewropea fl-iżgurar tal-konsistenza u l-kompatibbiltà fil-ġbir u t-tqabbil tad-data differenti fil-livell tal-UE, kif isir permezz ta’ diversi għodod, pereżempju INSPIRE, GMES, GEOSS u EyeonEarth;

42.

jinnota l-enfasi li l-Aġenda tal-Kummissjoni Ewropea dwar Regolamentazzjoni Aħjar tagħmel fuq l-inizjattiva “Make it Work” ta’ xi Stati Membri (13) li qed tagħti pariri dwar dispożizzjonijiet ta’ assigurazzjoni tal-konformità fil-liġi ambjentali tal-UE;

43.

jikkundanna n-nuqqas ta’ koerenza u konsistenza fir-rekwiżiti tal-assigurazzjoni tal-konformità f’biċċiet differenti tal-liġi tal-UE dwar l-ambjent, b’livelli differenti ta’ dettall fid-dispożizzjonijiet u definizzjonijiet differenti li maż-żmien evolvew b’mod separat. Dan jista’ jirriżulta f’sitwazzjoni fejn l-awtoritajiet lokali u reġjonali jiffaċċjaw problemi fl-interpretazzjoni u l-integrazzjoni ta’ dawn id-dispożizzjonijiet meta jwettqu attivitajiet ta’ assigurazzjoni ta’ konformità;

44.

jappoġġja dawn il-prinċipji li ġejjin għall-assigurazzjoni tal-konformità taħt il-liġi ambjentali tal-UE: id-deżinjazzjoni/il-ħatra, is-setgħat u l-professjonaliżmu tal-awtoritajiet kompetenti; assigurazzjoni tal-konformità msejsa fuq l-informazzjoni; taħlita adatta ta’ attivitajiet ta’ assigurazzjoni tal-konformità; it-twettiq tal-ippjanar, l-evalwazzjoni u r-reviżjoni ta’ attivitajiet ta’ assigurazzjoni tal-konformità, komunikazzjoni mal-pubbliku u l-iżgurar ta’ segwitu; l-iżgurar ta’ koordinazzjoni effettiva bejn l-awtoritajiet differenti;

45.

jistieden lill-awtoritajiet nazzjonali, reġjonali u lokali sabiex, barra mill-prinċipji msemmija hawn fuq, japplikaw approċċ tal-assigurazzjoni tal-konformità msejjes fuq ir-riskju, filwaqt li l-UE tagħmel rakkomandazzjonijiet għall-implimentazzjoni li jikkorrispondu għall-partikolaritajiet u l-interessi fuq il-livell lokali u dak reġjonali;

46.

iqis il-valutazzjoni tar-riskju bħala opportunità importanti sabiex l-awtoritajiet lokali u reġjonali kompetenti jnaqqsu il-piż amministrattiv mhux meħtieġ, filwaqt li jżommu standard għoli ta’ protezzjoni ambjentali, billi jipprijoritizzaw aħjar l-użu tar-riżorsi ta’ spezzjoni limitati tagħhom;

47.

jemmen li l-liġi ambjentali tal-UE, prinċipalment ir-riskji ta’ nuqqas ta’ konformità u l-impatt potenzjali ta’ dan fuq l-ambjent u s-saħħa, għandha tkun rispettata;

48.

jistieden lill-Kummissjoni Ewropea biex fil-futur qrib tressaq inizjattiva dwar l-assigurazzjoni tal-konformità li tkopri l-promozzjoni, il-monitoraġġ u l-infurzar tal-konformità, li tagħmel enfasi fuq approċċ ibbażat fuq ir-riskju, u li twettaq l-għanijiet tas-7 Programm ta’ Azzjoni Ambjentali;

49.

jappoġġja l-alternattiva ta’ direttiva orizzontali tal-UE, li għandha tistabbilixxi dispożizzjonijiet dwar l-assigurazzjoni tal-konformità fir-rigward tal-prinċipji msemmija hawn fuq għall-acquis ambjentali tal-UE; u li għandha twieġeb ukoll is-sejħa tal-KtR biex il-Kummissjoni Ewropea tressaq qafas ġenerali u vinkolanti tal-UE dwar spezzjonijiet u sorveljanza ambjentali (14);

50.

iqis l-awtoritajiet lokali u reġjonali kompetenti bħala f’pożizzjoni kruċjali b’mod partikolari għal attivitajiet ta’ promozzjoni tal-konformità li jinvolvu kooperazzjoni mal-komunità regolata u l-għoti ta’ informazzjoni liċ-ċittadini dwar in-nuqqas ta’ konformità u r-riżultati ta’ spezzjonijiet ewlenin imwettqa;

51.

iħeġġeġ lill-Istati Membri, lill-awtoritajiet reġjonali u lokali, biex konsegwentement japplikaw infurzar u jadottaw sanzjonijiet proporzjonati u disważivi għal ksur tal-liġi tal-UE dwar l-ambjent, u li konsegwentement japplikaw id-Direttiva 2008/99/KE dwar ir-reat ambjentali;

52.

iħeġġeġ, bħala azzjoni komplementari, li l-Kummissjoni Ewropea u l-Istati Membri jkomplu jsaħħu r-rwol tan-Netwerk tal-UE għall-Implimentazzjoni u l-Infurzar tal-Liġi Ambjentali (IMPEL), inkluż b’mod partikolari l-iżgurar ta’ appoġġ finanzjarju adegwat fit-tul għall-IMPEL, li jiżdied l-użu sistematiku tal-IMPEL ta’ spezzjonijiet għal evalwazzjoni bejn il-pari u spezzjonijiet konġunti (15); fl-oqsma kollha ewlenin tal-leġislazzjoni ambjentali; iżżid il-kooperazzjoni tagħha ma’ netwerks Ewropej oħra li jaħdmu fuq l-assigurazzjoni ta’ konformità; u żvilupp ulterjuri tan-netwerks IMPEL nazzjonali li jimpjegaw esperti mill-awtoritajiet reġjonali u lokali għall-qsim tal-aħjar prattiki;

53.

jappoġġja s-sejħa tal-Parlament Ewropew (16) lill-Kummissjoni Ewropea biex tippromovi l-bini tal-kapaċità ta’ netwerks ta’ mħallfin u prosekuturi speċjalizzati wkoll fil-kriminalità ambjentali;

54.

jitlob lill-Kummissjoni Ewropea biex tikkunsidra fl-inizjattiva possibbli ġdida tagħha dwar l-assigurazzjoni tal-konformità, is-sejħiet preċedenti tal-KtR dwar il-ħtieġa biex terġa’ tingħata l-ħajja d-direttiva staġnata dwar l-aċċess għall-ġustizzja fi kwistjonijiet ambjentali, kif appoġġjat ukoll mill-Parlament Ewropew, u għal kriterji ġenerali għall-ġestjoni nazzjonali tal-ilmenti (17);

55.

ifakkar li l-fondi strutturali tal-UE għandhom Objettiv Tematiku speċifiku maħsub għat-titjib tal-kapaċità tal-awtoritajiet lokali u reġjonali u għaldaqstant għandhom jiġu allokati għal dak il-għn fondi suffiċjenti mill-UE.

56.

Sabiex ikompli jiġi implimentat is-7 Programm ta’ Azzjoni Ambjentali tal-UE u l-objettiv prijoritarju 4 tiegħu dwar it-titjib tal-implimentazzjoni, u bħala segwitu tar-rakkomandazzjonijiet f’opinjonijiet preċedenti tal-KtR dwar it-titjib tal-implimentazzjoni tal-liġi ambjentali tal-UE, il-KtR iħeġġeġ lill-Kummissjoni Ewropea u l-UE biex (18):

57.

jitlob lill-Kummissjoni Ewropea biex twaqqaf grupp ta’ esperti tal-Kummissjoni Ewropea magħmul minn rappreżentanti minn Stat Membru, l-awtoritajiet lokali u reġjonali u l-partijiet interessati, biex jipprovdi pariri dwar it-titjib tal-kwalità u l-koerenza tal-acquis ambjentali tal-UE u l-implimentazzjoni tagħha, jew li tintegra dan il-kompitu fil-mandat ta’ gruppi ta’ esperti eżistenti tal-Kummissjoni Ewropea ta’ kompożizzjoni simili; il-KtR joffri li jikkontribwixxi għal dan il-grupp;

58.

Il-KtR iħeġġeġ lil:

59.

jilqa’ favorevolment l-enfasi l-ġdida li l-koleġislaturi qed jixħtu fuq it-titjib tal-implimentazzjoni tal-liġi ambjentali tal-UE u l-iskrutinju tagħha (19);

60.

jitlob lill-Parlament Ewropew u lill-Kunsill biex jesploraw b’mod konġunt mal-KtR kif il-funzjoni konsultattiva tal-KtR tista’ tinkludi l-esperjenzi tal-awtoritajiet lokali u reġjonali fl-eżerċizzji ta’ skrutinju individwali tagħhom;

61.

jenfasizza l-esperjenza li kiseb permezz tal-Pjattaforma Teknika Konġunta għall-Kooperazzjoni dwar l-Ambjent tal-KtR/Kummissjoni Ewropea, li tipprovdi forum biex jitrawwem djalogu dwar il-problemi u s-soluzzjonijiet lokali u reġjonali fl-implimentazzjoni tal-liġi ambjentali tal-UE;

62.

jenfasizza li l-Pjattaforma ġiet rikonoxxuta u tqiegħdet fuq bażi soda u fit-tul mill-Kunsill u l-Parlament Ewropew fis-7 Programm ta’ Azzjoni Ambjentali; li jikkonferma li l-Pjattaforma se “tiffaċilita d-djalogu u l-iskambju tal-informazzjoni sabiex titjieb l-implimentazzjoni tal-leġiżlazzjoni fuq il-post”;

63.

jixtieq għalhekk jikkontribwixxi għal aktar żvilupp tal-Pjattaforma Teknika, u jissuġġerixxi li l-Kummissjoni Ewropea tesplora mal-Parlament Ewropew u mal-Kunsill, safejn il-laqgħat tal-Pjattaforma Teknika jistgħu jiġi assoċjati mad-dibattiti mal-Parlament Ewropew u mal-Kunsill dwar implimentazzjoni aħjar tal-ambjent u skrutinju;

64.

japprezza l-fatt li l-Kummissjoni Ewropea fil-qasam tal-politika ambjentali tal-UE f’dawn l-aħħar snin ħadet approċċ proattiv billi tirrikjedi kontribut bikri mill-KtR għat-tfassil ta’ politika, u billi titlob għal opinjonijiet ta’ prospettiva kif stipulat fil-ftehim ta’ kooperazzjoni ffirmat miż-żewġ istituzzjonijiet (20). Il-KtR jissuġġerixxi li jiġi studjat b’mod konġunt jekk fuq bażi aktar regolari, tistax tiġi koorganizzata laqgħa waħda tal-Pjattaforma Teknika fil-qafas ta’ kull opinjoni ta’ prospettiva.

65.

jitlob lill-Kummissjoni Ewropea biex tassoċja mill-qrib lill-Kumitat tar-Reġjuni ma’ kwalunkwe inizjattiva futura li jkollha l-għan li ttejjeb l-implimentazzjoni u l-governanza ambjentali, bħall-inizjattiva EIR (21);

1.7.2016   

MT

Il-Ġurnal Uffiċjali tal-Unjoni Ewropea

C 240/24

1.

iqis li huwa meħtieġ li t-tranżizzjoni enerġetika tkun kompletament ta’ benefiċċju għall-konsumaturi finali: id-djar, in-negozji u l-industrija. F’dan il-kuntest, il-linji ta’ politika dwar il-ġestjoni tal-enerġija għandhom jimmiraw lejn il-kontroll tal-konsum mill-konsumaturi stess, sabiex ikunu jistgħu jieħdu vantaġġ minn teknoloġiji ġodda biex inaqqsu l-kontijiet tagħhomu u jikkontribwixxu għall-isforzi tal-UE biex tilħaq il-miri tal-klima ambizzjużi kif miftiehma f’Pariġi waqt il-COP21. Dawn il-politiki għandhom jgħinuhom biex mhux biss jipparteċipaw attivament fis-suq iżda wkoll jibbenefikaw minn mekkaniżmi ta’ protezzjoni tal-konsumaturi effettivi u adegwati, li jistgħu jkunu neċessarji biex jiġi miġġieled il-faqar enerġetiku;

2.

jinnota l-progress li diġà sar fir-rigward tal-użu razzjonali tal-enerġija, tat-tnaqqis tal-konsum, kif ukoll tal-iżvilupp u l-użu ta’ teknoloġiji u servizzi għal ġestjoni mtejba tal-enerġija fil-livell lokali u tal-konsumaturi finali permezz ta’, fost l-oħrajn, qafas regolatorju Ewropew volontarju u dinamiku. Il-leġislazzjoni tal-futur għandha tinkoraġġixxi lill-Istati Membri u l-awtoritajiet lokali u reġjonali biex ikomplu bl-isforzi tagħhom sabiex itejbu l-livelli tagħhom ta’ prestazzjoni dwar l-effiċjenza tal-enerġija, it-tnaqqis tal-emissjonijiet tal-gassijiet b’effett ta’ serra u l-iżvilupp tal-kapaċitajiet ta’ produzzjoni ta’ enerġija rinnovabbli, inklużi l-kapaċitajiet ta’ ġenerazzjoni deċentralizzati;

3.

jinnota l-għadd kbir ħafna u l-varjetà wiesgħa ħafna ta’ servizzi u soluzzjonijiet tekniċi u teknoloġiċi, eżistenti jew li attwalment qed jiġu żviluppati, fil-qasam tal-ġestjoni tad-domanda, kif ukoll fil-ġestjoni tal-ġenerazzjoni deċentralizzata. L-Unjoni Ewropea għandha tagħti prijorità li tħeġġeġ u tappoġġja l-iżvilupp ta’ dawn l-għodod, li tivvaluta r-rilevanza u l-impatt tagħhom, kemm f’termini ta’ enerġija, kif ukoll ekonomiċi, soċjali u ambjentali u li tirregolahom sabiex jiġi żgurat l-użu sikur, faċli u affordabbli;

4.

jixtieq, permezz ta’ din l-Opinjoni, jikkontribwixxi għad-diskussjoni usa’ dwar il-qafas strateġiku għal Unjoni tal-Enerġija u jilqa’ b’sodisfazzjon ħafna mill-messaġġi ewlenin tal-Komunikazzjoni dwar Patt Ġdid għall-Konsumaturi tal-Enerġija (COM(2015) 339 final), li twitti t-triq għal Unjoni tal-Enerġija li tqiegħed iċ-ċittadin fiċ-ċentru u li tista’ tipproteġi l-konsumaturi l-iżjed vulnerabbli; jappella lill-Kummissjoni Ewropea biex issegwi din il-Komunikazzjoni, fi żmien definit, billi tadotta u timplimenta inizjattivi speċifiċi u konkreti fl-oqsma msemmija fil-Komunikazzjoni u b’attenzjoni xierqa għat-tħassib u l-esperjenzi tal-awtoritajiet lokali u reġjonali;

5.

itenni, f’dan il-kuntest, it-talba tiegħu biex il-miżuri tat-tielet pakkett dwar l-enerġija, tad-Direttiva dwar l-effiċjenza fl-enerġija u tad-Direttiva dwar is-soluzzjoni alternattiva għat-tilwim jkunu implimentati bis-sħiħ;

6.

jirrakkomanda li l-Kummissjoni Ewropea twettaq analiżi dettaljata tal-isfidi, l-ostakoli u l-opportunitajiet marbuta mal-parteċipazzjoni konkreta tal-konsumaturi tal-enerġija fis-swieq tal-enerġija, sabiex tikseb fehim fil-fond tas-sitwazzjoni tagħhom u ta’ kwalunkwe diffikultajiet li jħabbtu wiċċhom magħhom, u li jkunu jeħtieġu aktar miżuri ta’ appoġġ mill-UE, l-Istati Membri, l-awtoritajiet lokali jew reġjonali jew l-organizzazzjonijiet tas-soċjetà ċivili;

7.

jenfasizza r-rwol ewlieni li jaqdu l-awtoritajiet lokali u reġjonali fl-implimentazzjoni tal-leġislazzjoni Ewropea f’dan il-qasam, fil-ħolqien u l-iffinanzjar tal-infrastruttura għad-distribuzzjoni, il-kejl u l-ġestjoni tad-domanda għall-enerġija, fil-ġestjoni tal-ġenerazzjoni deċentralizzata u t-tixrid tal-aħjar prattiki żviluppati fil-livell reġjonali u lokali, kif ukoll li jinformaw u jagħtu pariri lill-konsumaturi tal-enerġija. Għaldaqstant, il-Kumitat Ewropew tar-Reġjuni qed jitlob li jkun involut fl-istadji kollha tal-iżvilupp tal-politiki futuri li għandhom jiġu adottati f’dan il-qasam mill-Unjoni Ewropea;

8.

itenni, f’dan il-kuntest, il-ħtieġa li kwalunkwe leġislazzjoni futura dwar il-ġestjoni tad-domanda għall-enerġija u tal-ġenerazzjoni deċentralizzata tal-enerġija rinnovabbli, kif ukoll il-protezzjoni tal-konsumaturi u tad-drittijiet tagħhom, ikunu ibbażati fuq il-prinċipju tas-sussidjarjetà. Il-Kumitat Ewropew tar-Reġjuni jistieden lill-Unjoni Ewropea biex tikkunsidra sew il-kompetenzi tal-awtoritajiet lokali u reġjonali, sabiex ikun żgurat livell ta’ intervent li jirrispetta bis-sħiħ il-prinċipju tas-sussidjarjetà;

9.

itenni r-rieda tiegħu biex ikompli jikkontribwixxi għat-tħejjija u l-proċess tal-Forum taċ-Ċittadini dwar l-Enerġija u biex jipparteċipa b’mod attiv fl-iżvilupp tal-politiki tal-UE, billi jagħmel rakkomandazzjonijiet dwar l-inizjattivi reċenti u futuri u dwar l-impatt soċjali u ekonomiku fil-livell lokali u reġjonali;

10.

jilqa’ l-fatt li l-Kummissjoni Ewropea tagħmel referenza għall-Patt tas-Sindki (1); ifakkar li l-firmatarji tiegħu, jiġifieri l-awtoritajiet lokali u reġjonali madwar l-UE, huma mudelli vera tal-konsum tal-enerġija sostenibbli u li jippromovu b’mod volontarju l-prattika t-tajba f’termini ta’ awtoġenerazzjoni mill-konsumatur; jenfasizza li aktar minn 180 membru tal-KtR diġà jirrappreżentaw firmatarji tal-Patt tas-Sindki u li l-KtR huwa impenjat li jippromovi l-Patt tas-Sindki kemm fost il-membri tiegħu kif ukoll fil-kuntatti tiegħu mal-awtoritajiet lokali u reġjonali fl-UE u lil hinn minnha; Inizjattivi oħrajn li jippermettu lill-bliet jersqu lejn miri ambizzjużi lanqas m’għandhom jiġu ddiskriminati (2);

11.

jenfasizza li hu meħtieġ li l-Kummissjoni Ewropea tagħmel referenza wkoll għall-Patt tal-Gżejjer, inizjattiva simili u parallela mal-Patt tas-Sindki li tgħaqqad aktar minn mitt firmatarju, li fil-kuntest tiegħu, l-awtoritajiet tal-gżejjer iwettqu ħidma importanti għall-kisba tal-għanijiet ta’ żvilupp sostenibbli tal-UE sal-2020;

12.

itenni t-talba tiegħu li jiġi rappreżentat f’awtoritajiet regolatorji tal-enerġija ewlenin fil-livell tal-UE (ACER) kif ukoll fil-livell nazzjonali (ARN) (3);

13.

jindika li l-adozzjoni ta’ għanijiet ġodda fil-qasam tal-ġestjoni tad-domanda tal-enerġija u l-ġenerazzjoni tal-enerġija rinnovabbli, kif ukoll ta’ strumenti ekonomiċi possibbli marbuta magħhom, għandha titwettaq f’konformità mal-prinċipju tal-proporzjonalità. Il-Kumitat Ewropew tar-Reġjuni jistieden lill-Kummissjoni Ewropea biex tqis l-impatt li dawn il-miżuri l-ġodda jistgħu jħallu fuq l-awtoritajiet lokali u reġjonali kollha, il-baġits tagħhom u l-kapaċitajiet amministrattivi u operattivi tagħhom, b’kunsiderazzjoni tal-ispeċifiċitajiet u d-diffikultajiet partikolari li tista’ tiltaqa’ magħhom kull tip ta’ entità; jenfasizza li l-prinċipju ta’ prekawzjoni bħala element fundamentali tal-liġi ambjentali tal-UE għandu jiġi applikat ukoll għall-politika tal-enerġija tal-UE;

14.

isostni, fir-rigward tal-infrastruttura għall-enerġija, li għall-awtonomizzazzjoni u r-responsabbilizzazzjoni tal-konsumaturi jidher li huwa meħtieġ l-iżvilupp ta’ netwerks u miters intelliġenti (bil-kundizzjoni li jkun sodisfatt l-interess ekonomiku tal-konsumatur finali), effiċjenti u bi prezzijiet raġonevoli, produttivi, tajbin biex insaqqsu l-frodi, faċli għall-utent, sikuri u mfassla skont il-ħtiġijiet u l-istennijiet tal-konsumaturi fir-rigward tal-informazzjoni, tal-kontroll tal-konsum u t-tnaqqis fil-kontijiet tagħhom;

15.

jenfasizza l-importanza tar-rwol li għandhom l-operaturi tan-netwerk, u b’mod partikolari l-operaturi tan-netwerk ta’ distribuzzjoni, fl-iżvilupp ta’ netwerks intelliġenti fil-livell lokali, fl-installazzjoni u l-ġestjoni ta’ miters intelliġenti kif ukoll fl-implimentazzjoni ta’ soluzzjonijiet għall-ħtiġijiet ġodda ta’ flessibbiltà (fil-ġbir u d-distribuzzjoni), soluzzjonijiet essenzjali għall-funzjonament tajjeb tas-suq fil-futur; jieħu nota tal-intenzjoni tal-Kummissjoni li ssegwi mill-qrib l-implimentazzjoni ta’ standards eżistenti tal-UE għal metraġġ intelliġenti, netwerks intelliġenti u ġestjoni tal-informazzjoni, u jaqbel li l-aċċess għad-data għall-konsumaturi għandu jkun “effettiv” u “mhux diskriminatorju” għall-klijenti jew partijiet terzi magħżula minnhom; jistenna bil-ħerqa t-tfassil tal-qafas legali neċessarju fil-kuntest tal-Istrateġija għal Suq Uniku Diġitali u tar-reviżjoni tar-Regolament Ġenerali dwar il-Protezzjoni tad-Data tal-UE;

16.

jenfasizza li f’ħafna reġjuni, l-introduzzjoni ta’ teknoloġiji ġodda timponi spejjeż sinifikanti minħabba li l-infrastrutturi tal-enerġija hija jew antika jew ma teżistix; għaldaqstant jemmen li huwa indispensabbli li jinstab mod kif il-livell lokali jew reġjonali jiddetermina kif għandhom jinqasmu l-ispejjeż bejn il-fornitur tas-servizzi, il-konsumatur u l-awtoritajiet reġjonali, kif ukoll l-ammont ta’ sussidji disponibbli biex jiġi ffinanzjat l-investiment. It-tranżizzjoni għandha ssir b’mod li fl-aħħar mill-aħħar twassal għal tnaqqis fil-kontijiet tal-konsumaturi. Fl-istess ħin, il-Kumitat iqis li huwa essenzjali li l-konsumaturi jkunu informati kif suppost dwar it-tħassib li jista’ jkollhom u l-benefiċċji tat-teknoloġiji u kemm jistgħu jagħtu kontribut, sabiex titnaqqas l-oppożizzjoni għan-novità;

17.

jilqa’ b’sodisfazzjon l-attenzjoni li qed titfa’ l-Kummissjoni fuq il-kwistjoni speċifika tal-faqar enerġetiku, li jirrappreżenta sfida partikolari għal ħafna awtoritajiet lokali u reġjonali għaliex tabilħaqq jeħtieġ li jiġi indirizzat kemm fil-kuntest tal-politika soċjali, kif ukoll tal-politika tal-enerġija; jappella lill-Kummissjoni Ewropea biex timxi lil hinn minn sempliċiment “titjib tal-ġbir tad-data” u taħdem lejn definizzjoni komuni wiesgħa tal-faqar enerġetiku u pjan ta’ azzjoni adatt, imsejjes fuq l-idea tal-aċċess għall-enerġija bħala dritt soċjali bażiku;

18.

jenfasizza l-importanza tal-finanzjament tal-Fond Ewropew għall-Investimenti Strateġiċi (FEIS) fl-implimentazzjoni tal-Pjan Ewropew ta’ Rilanċ Ekonomiku, u għal miżuri biex tiżdied l-effiċjenza enerġetika;

19.

jistieden lill-UE u lill-Istati Membri jistabbilixxu qafas regolatorju li huwa ta’ benefiċċju kemm għall-konsumaturi tal-enerġija kif ukoll għall-“prosumaturi” u fornituri oħra tal-enerġija li huma involuti b’mod attiv fis-swieq tal-bejgħ bl-imnut tal-enerġija. Huwa wkoll meħtieġ li jiġi żgurat finanzjament suffiċjenti u faċilment aċċessibbli għal dawk l-awtoritajiet lokali u reġjonali li jikkontribwixxu għat-tranżizzjoni tal-enerġija lejn swieq tal-bejgħ bl-imnut tal-enerġija sostenibbli u inklużiva;

20.

jenfasizza li għall-awtonomija ġenwina tal-konsumaturi hija meħtieġa s-sensibilizzazzjoni tal-konsumaturi, permezz ta’ miżuri xierqa, bħal pereżempju l-installazzjoni ta’ miter intelliġenti u l-aċċess tal-konsumaturi għall-informazzjoni dwar dan, l-użu razzjonali tal-enerġija, il-protezzjoni tal-ambjent – b’mod partikolari l-kwalità tal-arja – kif ukoll il-ġlieda kontra t-tibdil fil-klima. Din is-sensibilizzazzjoni għandha tinkludi informazzjoni ċara u sħiħa dwar l-għażliet disponibbli u għandha tippermetti lill-konsumaturi jagħżlu provvista u ġestjoni ta’ enerġija sostenibbli u bi prezzijiet raġonevoli;

21.

jenfasizza l-ħtieġa li jiġi żgurat l-aċċess tal-konsumaturi għal informazzjoni li hija sempliċi, ċara, kompluta u adegwata, sikura, affidabbli, b’xejn u indipendenti fir-rigward tal-provvista tal-enerġija, kemm fir-rigward tal-offerti tal-provvista, il-kuntratti, id-drittijiet u l-obbligi tagħhom kif ukoll fir-rigward tal-prodotti u s-servizzi, inklużi s-sussidji Ewropej u nazzjonali, li tgħinhom inaqqsu l-konsum u l-kontijiet tagħhom, jiksbu u jħaddmu l-mezzi tagħhom għall-produzzjoni tal-enerġija; dan jinkludi l-ħtieġa għal informazzjoni mmirata għall-konsumaturi l-iżjed vulnerabbli, fil-formats adatti (inkluża għal dawk li mhumiex wisq familjari mal-komunikazzjoni elettronika jew għandhom aċċess limitat għaliha);

22.

jenfasizza li l-awtoritajiet reġjonali u lokali, billi huma l-entitajiet li huma l-eqreb taċ-ċittadini, jistgħu jipprovdu għajnuna u pariri essenzjali lill-konsumaturi u jibnu kultura li twassal għal inizjattivi fil-livell lokali, madankollu, jenfasizza li hemm bżonn ta’ riżorsi addizzjonali biex l-awtoritajiet lokali u reġjonali jkunu jistgħu jisfruttaw bis-sħiħ il-potenzjal tagħhom f’dan ir-rigward u jiżviluppaw soluzzjonijiet innovattivi;

23.

jipproponi l-adozzjoni ta’ rekwiżiti u inċentivi ġodda għall-operaturi tat-trażmissjoni u d-distribuzzjoni biex tiżdied il-flessibbiltà tan-netwerks tal-enerġija permezz tas-sistemi intelliġenti, il-ħżin tal-enerġija u l-konverżjoni bejn portaturi tal-enerġija;

24.

jinnota li għandu jkun hemm kundizzjonijiet ekwivalenti ta’ kompetizzjoni għal dawk kollha interessati li fil-futur jiġġeneraw u jiddistribwixxu l-enerġija u/jew jipprovdu servizzi ġodda, sabiex jagħmlu possibbli, pereżempju, il-flessibbiltà tas-sistema u l-integrazzjoni tal-enerġija prodotta mill-“prosumaturi” (inklużi l-aggregaturi);

25.

jiġbed l-attenzjoni tal-Kummissjoni Ewropea għall-fatt li l-politika dwar l-enerġija għandha tikkontribwixxi għat-tnaqqis fil-piż tal-enerġija fil-baġit tad-djar u l-intrapriżi u, għaldaqstant, tal-kont finali tagħhom. F’dan il-kuntest, il-Kumitat Ewropew tar-Reġjuni huwa mħasseb li, f’xi każijiet, il-ġestjoni tad-domanda tista’ tesponi lill-konsumaturi għall-bidliet fis-swieq tal-bejgħ bl-ingrossa u tal-bejgħ bl-imnut, li jistgħu jwasslu għal tariffi ogħla li l-konsumaturi ma jkunux jifilħu jħallsu. Huwa għalhekk meħtieġ li jiġu offruti pjani tat-tariffi b’rati garantiti u fit-tul sabiex jipproteġu l-konsumaturi kontra kwalunkwe tibdil qawwi. Il-konsumaturi għandhom jiġu infurmati wkoll dwar kif għandhom jużaw u jibbenefikaw minn prezzijiet varjabbli bbażati fuq tariffi tal-enerġija kkwotati;

26.

jaqbel li dawn il-problemi jammontaw f’xi każijiet għal falliment tas-suq fis-settur tal-enerġija u li nuqqas ta’ kompetizzjoni jista’ jkun ostaklu serju għal suq iżjed favorevoli għall-konsumatur; huwa tal-fehma, madankollu, li l-iżvilupp fir-regolamentazzjoni għandu jsir b’attenzjoni xierqa għall-ħtiġijiet speċifiċi ta’ partijiet interessati differenti, inklużi l-awtoritajiet lokali u reġjonali u l-konsumaturi vulnerabbli;

27.

jiddispjaċih bil-kumplessità, it-tul ta’ ħin u l-proċeduri burokratiċi wisq li baqgħu persistenti fil-proċedura ta’ bdil tal-fornitur, u jitlob biex id-diversi entitajiet regolatorji jiżguraw l-infurzar tal-leġislazzjoni fis-seħħ dwar il-kundizzjonijiet ta’ bdil tal-fornitur;

28.

jappoġġja l-impenn tal-Kummissjoni Ewropea biex tiżgura li kull konsumatur ikollu aċċess għal mill-inqas għodda għat-tqabbil li hija indipendenti u verifikata. Tqabbil bħal dan għandu jkun ċar, komplut, affidabbli u indipendenti, faċli u bla ħlas. Dan għandu jippermetti t-tqabbil tal-kuntratti attwali mal-offerti tas-suq. Peress li l-fornituri għandhom it-tendenza li jiddiversifikaw l-offerti tagħhom billi jinkludu servizzi fil-kuntratti ta’ provvista tal-enerġija, it-tqabbil għandu jqabbel id-diversi “pakketti” proposti, filwaqt li jippermetti t-tqabbil tal-“provvista” biss;

29.

jipproponi li jitniedu kampanji ta’ informazzjoni relatati mal-bidla minn fornitur għal ieħor fuq inizjattiva tal-awtoritajiet regolatorji tal-enerġija, l-awtoritajiet lokali u reġjonali territorjali u l-organizzazzjonijiet tal-konsumatur. Dawn il-kampanji jistgħu jagħmlu referenza għall-għodod ta’ tqabbil eżistenti;

30.

isostni li l-Kummissjoni Ewropea u l-entitajiet regolatorji nazzjonali u reġjonali għandhom jiżguraw il-funzjonament mingħajr xkiel tal-proċeduri ta’ bdil ta’ fornitur, u li l-konsumaturi – partikolarment dawk l-iktar vulnerabbli – għandu jkollhom aċċess għal parir xieraq dwar l-għażla ta’ kuntratt ta’ provvista kif ukoll għajnuna biex jibdlu l-fornitur u/jew il-kuntratt;

31.

jitlob li l-Unjoni Ewropea tadotta regolamentazzjoni ambizzjuża dwar it-tnaqqis tal-ħin meħtieġ għall-konsmatur biex jibdel minn fornitur għal ieħor u dwar l-awtomazzjoni tal-proċess tal-bidla;

32.

jixtieq li l-kwistjonijiet marbuta mal-prattiċi kummerċjali u l-promozzjoni dwar il-provvista tal-enerġija jkunu regolati aktar strettament, fil-livell Ewropew, sabiex jittaffew il-varjazzjonijiet fil-prezzijiet u ma jiġux inkoraġġuti prattiki abbużivi f’dan il-qasam. F’dan il-kuntest, il-Kumitat Ewropew tar-Reġjuni jitlob l-implimentazzjoni sħiħa tad-Direttiva dwar il-prattiċi kummerċjali żleali u d-Direttiva dwar id-drittijiet tal-konsumatur;

33.

jitlob li jkun regolat u promoss ix-xiri kollettiv tal-enerġija maħsub għall-istituzzjonijiet pubbliċi, l-unitajiet domestiċi u n-negozji. Dan għandu jtejjeb il-funzjonament tas-suq, jiżgura aċċess għall-enerġija għal kulħadd, u jiffaċilita dan l-aċċess, bi tnaqqis b’mod effettiv u sostenibbli tal-impatt tal-ispejjeż tal-kontijiet tal-enerġija fuq il-baġit tal-konsumatur;

34.

jistieden lill-Unjoni Ewropea teżamina d-diversi komponenti tal-kontijiet tal-enerġija sabiex tħejji kont “tipiku” b’sett ta’ komponenti standard, li faċli jinqara, ċar u komparabbli fuq livell Ewropew u li jippermetti li l-konsumaturi jottimizzaw l-użu tal-enerġija tagħhom. F’dan ir-rigward il-Kumitat Ewropew tar-Reġjuni jappoġġja l-inizjattiva tal-Kunsill tar-Regolaturi Ewropej tal-Enerġija biex tipproponi definizzjonijiet armonizzati tad-diversi elementi li għandhom jiġu inklużi fil-kontijiet tal-enerġija;

35.

jitlob li din l-istandardizzazzjoni tinvolvi l-obbligu tal-inklużjoni ta’ informazzjoni dwar għodod u servizzi b’xejn disponibbli, marbuta mat-tqabbil ta’ offerti ta’ provvista u informazzjoni u appoġġ għall-familji u n-negozji dwar il-protezzjoni tad-drittijiet tal-konsumatur, fil-kont finali;

36.

jistieden lill-Istati Membri joħolqu għodod u servizzi biex jgħinu lill-familji u n-negozji jifhmu l-kontijiet, biex ikunu jistgħu janalizzawhom u, fejn meħtieġ, jagħtu pariri u jgħinu lill-konsumaturi finali fil-passi meqjusa meħtieġa biex jikkoreġu l-irregolaritajiet jew jirreferuhom għal kuntratti ta’ provvista aktar adattati għall-ħtiġijiet tagħhom;

37.

jirrakkomanda li l-kontijiet u l-informazzjoni kollha maħruġa mill-fornituri lill-konsumaturi finali tagħhom jkunu jistgħu jintbagħtu fil-forma mitluba mill-konsumatur, jiġifieri permezz ta’ ittra jew b’mezz elettroniku, mingħajr ebda diskriminazzjoni;

38.

jenfasizza l-fatt li l-konsumaturi vulnerabbli huma partikolarment suxxettibbli li jkollhom diffikultajiet biex jifhmu liema huma l-irħas rati fost għażla estensiva ħafna, u ħafna drabi jitolbu l-għajnuna lill-eqreb livell ta’ governanza. Għaldaqstant, il-Kumitat Ewropew tar-Reġjuni jistieden lill-Unjoni Ewropea tappoġġa lill-awtoritajiet lokali u reġjonali fl-iżvilupp ta’ sistemi ta’ appoġġ fil-qasam tal-enerġija, jekk dan mhux qed isir mill-Istati Membri;

39.

jenfasizza li l-konsumaturi għandu jkollhom aċċess faċli għal qari tal-miter tagħhom, f’forom differenti (permezz ta’ miter intelliġenti, onlajn, permezz ta’ dikjarazzjoni dettaljata dwar il-kont tal-enerġija tagħhom kull xahar, permezz ta’ konsulenza individwali, eċċ.);

40.

jenfasizza l-ħtieġa li l-konsumaturi jkunu infurmati b’mod intelliġibbli dwar il-ġestjoni tal-qari tal-miters u l-użu tad-data dwar il-konsum tagħhom, bi speċifika ta’ liema informazzjoni se tinġabar u tinħażen, kull meta, u għal kemm żmien;

41.

jenfasizza l-ħtieġa li jiġi adottat, fq il-livell Ewropew, qafas strett fir-rigward tas-sigurtà u l-protezzjoni tal-ħajja privata, fir-rigward tad-data tal-miters;

42.

isejjaħ għal darb’oħra biex jiġi aċċellerat l-iżvilupp ta’ sistemi intelliġenti, kemm fil-livell tan-netwerks kif ukoll fil-livell tal-produttur/konsumatur, tiġi ottimizzata s-sistema kumplessiva u jiġu implimentati miters intelliġenti, bħala element ewlieni ta’ ġestjoni effiċjenti tad-domanda li tinvolvi l-parteċipazzjoni attiva tal-konsumatur;

43.

jappella għall-adozzjoni ta’ qafas strett, fil-livell Ewropew, dwar l-użu ta’ miters intelliġenti u l-għażla tal-użi u l-funzjonalitajiet tagħhom, filwaqt li jfakkar li l-għan tal-użu tagħhom huwa r-razzjonalizzazzjoni u t-tnaqqis fil-konsum. F’dan il-kuntest, il-Kumitat jappella biex kwalunkwe għażla ġdida ta’ teknoloġija tkun soġġetta, qabel l-adozzjoni, għal valutazzjoni komprensiva tal-impatt fuq l-enerġija, ekonomiku, soċjali u ambjentali possibbli tagħha, jekk tkun ser tiġi introdotta bħala standard;

44.

jistieden lill-UE u lill-Istati Membri jagħtu prijorità lir-riċerka applikata għall-ġestjoni u t-tnaqqis tal-konsum, l-ispjazzament u t-tnaqqis tad-domanda għall-enerġija, l-introduzzjoni ta’ sistemi ta’ miters, ta’ distribuzzjoni u ta’ trasmissjoni intelliġenti, sikuri, affidabbli u affordabbli, kif ukoll sistemi ta’ ħżin industrijali u domestiku;

45.

jenfasizza li l-iżvilupp u l-funzjonament tal-bliet għandhom impatt kbir fuq id-domanda għall-enerġija, billi jirrappreżentaw bejn 60 % u 80 % tal-konsum dinji tal-enerġija u madwar l-istess perċentwal ta’ emissjonijiet ta’ CO2. Għaldaqstant, jenfasizza r-rwol importanti li jistgħu jaqdu Sħubija Ewropea għall-Innovazzjoni dwar Bliet u Komunitajiet Intelliġenti u mudelli ta’ finanzjament u kummerċjali oħra biex jippromovu l-iskjerament ta’ teknoloġiji tal-enerġija intelliġenti;

46.

jiddispjaċih li l-Komunikazzjoni tirrikonoxxi r-rwol tal-awtoritajiet lokali u reġjonali biss fil-kuntesti dojoq ta’ “Żieda fil-parteċipazzjoni tal-konsumaturi” u speċifikament fil-Patt tas-Sindki, iżda ma tinkludix l-awtoritajiet lokali u reġjonali bħala atturi pereżermpju fil-konklużjonijiet ġenerali fejn azzjoni ulterjuri hija meqjusa neċessarja “fil-livell tal-Istati Membri, u [permezz ta’] inizjattivi ta’ kollaborazzjoni tal-industrija, l-organizzazzjonijiet tal-konsumaturi u regolaturi nazzjonali”; għaldaqstant jappella lill-Kummissjoni Ewropea biex tinkludi l-perspettiva lokali u reġjonali b’mod aktar ġenerali fl-azzjonijiet futuri tagħha f’dan il-qasam, mhux l-inqas bħala produtturi u fornituri tal-enerġija;

47.

huwa tal-fehma li l-miters intelliġenti jistgħu jkunu wkoll għodda importanti sabiex tiġi indirizzata l-kwistjoni tal-faqar enerġetiku, iżda jfakkar li huwa meħtieġ li jiġi żgurat li t-teknoloġiji tal-kejl intelliġenti ma twassalx għal spejjeż eċċessivi għall-konsumaturi u/jew limitazzjoni eċċessiva tal-użu tagħhom tal-enerġija;

48.

jistieden lill-UE u lill-Istati Membri tagħha jiżguraw li l-awtoritajiet lokali u reġjonali, kif ukoll il-kumpaniji lokali tal-enerġija, jibbenefikaw minn finanzjament adegwat u faċilment aċċessibbli biex jorganizzaw politiki u proġetti fil-qasam tal-effiċjenza enerġetika u tal-produzzjoni u l-użu tal-enerġija rinnovabbli, pereżempju sabiex jiġu pprovduti parir dwar l-enerġija. Il-Kumitat Ewropew tar-Reġjuni jitlob lill-Unjoni Ewropea biex tintegra dan l-aspett fil-programmi ta’ finanzjament futuri kollha f’dan il-qasam;

49.

jipproponi li jiġi stabbilit qafas ċar, li jipprovdi aċċess faċli għan-netwerks intelliġenti għall-enerġija prodotta mill-konsumatur, biex b’hekk jiġi faċilitat u jitnaqqas id-dewmien tal-proċeduri għal-liċenzjar/l-awtorizzazzjoni u jitneħħew l-ostakli amministrattivi u regolatorji li fadal li jfixklu kompetizzjoni effettiva;

50.

jistieden lill-Kummissjoni Ewropea u lill-Istati Membri joħolqu qafas regolatorju xieraq sabiex jiġu żgurati kundizzjonijiet ekwivalenti ta’ kompetizzjoni għall-parteċipanti ġodda fis-suq li huma l-prosumaturi, u jintroduċu l-miżuri u l-inċentivi suffiċjenti u l-garanziji neċessarji biex jistimulaw l-awtokonsum deċentralizzat tal-enerġija rinnovabbli u rimunerazzjoni ġusta tal-produzzjoni tal-enerġija;

51.

jinnota li hemm għadd ta’ eżempji ta’ prattika tajba dwar il-parteċipazzjoni tal-konsumaturi fil-ġestjoni tajba tal-konsum u l-ġenerazzjoni deċentralizzata tal-enerġija rinnovabbli u jenfasizza r-rwol importanti li jaqdi l-Kumitat Ewropew tar-Reġjuni fl-iskambju tal-aħjar prattiki;

52.

jenfasizza, b’mod partikolari, il-potenzjal enormi tal-awtoġenerazzjoni individwali u kollettiva tal-enerġiji rinnovabbli disponibbli lokalment, u jitlob lill-Unjoni Ewropea tinvestiga l-ostakoli finanzjarji u regolatorji, marbuta wkoll mal-ħtieġa tal-addattament tan-netwerks elettriċi eżistenti għall-mekkaniżmi ta’ awtokonsum, li jillimitaw l-iżvilupp ta’ dawn l-inizjattivi u tadotta miżuri biex dawn jingħelbu. F’dan il-kuntest, il-Kumitat Ewropew tar-Reġjuni jenfasizza li l-kunċett ta’ sjieda huwa importanti għall-involviment taċ-ċittadini fit-tranżizzjoni tal-enerġija b’mod effettiv, u jitlob li tingħata attenzjoni speċjali lill-konsumaturi li m’għandhomx il-mezzi finanzjarji jew prattiki biex jinvestu fit-teknoloġiji ta’ awtoġenerazzjoni; barra minn hekk, jenfasizza r-rwol importanti li jistgħu jaqdu l-awtoritajiet lokali u reġjonali fl-organizzazzjoni jew l-appoġġ ta’ inizjattivi lokali għal skemi kollettivi, kooperattivi jew ta’ awtoġenerazzjoni għall-produzzjoni, id-distribuzzjoni u l-konsum tal-enerġija;

53.

jilqa’ l-inizjattiva tal-Forum taċ-Ċittadini dwar l-Enerġija, filwaqt li jenfasizza li huwa mixtieq li jiġu stabbiliti strutturi u mekkaniżmi regolari oħra li jippermettu lill-konsumaturi tal-enerġija jesprimu l-opinjoni tagħhom fi żmien xieraq u b’hekk jinfluwenzaw l-għażliet magħmula dwar is-swieq tal-enerġija.

1.7.2016   

MT

Il-Ġurnal Uffiċjali tal-Unjoni Ewropea

C 240/31

1.

jinnota li l-kriżi attwali tar-refuġjati b’riżultat tal-gwerra ċivili fis-Sirja u l-instabbiltà politika f’għadd ta’ pajjiżi tal-Afrika ta’ Fuq, u ta’ kunflitti u nuqqas ta’ liġijiet f’ċerti nħawi fid-dinja, hija ta’ skala li qatt ma rajna bħalha u li din il-kriżi għadha ‘l bogħod milli tiġi solvuta;

2.

iqis li l-iskop u l-kobor tal-problema jeħtieġu approċċ olistiku, li jikkonsisti f’diversi elementi: l-akkoljenza sostenibbli ta’ refuġjati li ġejjin fl-Ewropa, b’rispett tad-drittijiet tagħhom; il-prevenzjoni tal-migrazzjoni irregolari, fost affarijiet oħra billi jissaħħaħ il-kontroll tal-fruntieri esterni; l-introduzzjoni ta’ sanzjonijiet kriminali kontra t-traffikanti tal-bnedmin u t-twaqqif ta’ sistema effettiva u sigura biex l-individwi li ma jissodisfawx il-kriterji għal persuni li jfittxu asil jintbagħtu lura; it-titjib tal-akkoljenza fir-reġjuni ta’ oriġini, jiġifieri kemm il-pajjiżi ta’ oriġini kif ukoll ir-reġjuni ġirien; u l-indirizzar tal-kawżi primarji tal-migrazzjoni minħabba l-vjolenza u n-nuqqas ta’ liġijiet. L-UE ilha impenjata tindirizza dawn il-kwistjonijiet differenti għal żmien twil. Il-Kumitat jilqa’ dan l-approċċ (1) u jenfasizza l-importanza li fil-fatt jiġu implimentati l-ftehimiet u jiġu rispettati l-obbligi assunti;

3.

jiddispjaċih li, fil-prattika, l-akbar attenzjoni tingħata biex jitnaqqas l-għadd tar-refuġjati li jaslu fl-Ewropa u biex dawn jitqassmu bejn l-Istati Membri, minflok li jiġu mħarsa d-drittijiet ta’ dawn il-persuni f’kull livell. L-awtoritajiet lokali u reġjonali għandhom jieħdu r-responsabilità mingħajr preċedent għall-akkoljenza u l-integrazzjoni tar-refuġjati fl-Ewropa; barra minn hekk, il-KESE jqis importanti li l-Kummissjoni Ewropea tagħti attenzjoni kostanti u viġilanti għal dawn l-isfidi dejjem jikbru u tħejji proposti sabiex jiġu appoġġjati l-attivitajiet imwettqa għal dan l-għan mill-awtoritajiet lokali u reġjonali rilevanti;

4.

jinnota li s’issa ngħatat inqas attenzjoni lill-akkoljenza tar-refuġjati fir-reġjuni ta’ pajjiżhom, u f’dawn ir-reġjuni għad hemm kwantitajiet ogħla b’mod sinifikanti minn dawk li hemm fl-Ewropa: il-UNHCR irreġistrat 2,1 miljun refuġjat Sirjan reġistrati fl-Eġittu, fl-Iraq, fil-Ġordan u fil-Libanu; il-Gvern Tork irreġistra 1,9 miljun Sirjan, filwaqt li aktar minn 26 700 refuġjat Sirjan ġew irreġistrat fl-Afrika ta’ Fuq, jiġifieri total ta’ 4 390 439 (2);

5.

jilqa’ l-isforzi tal-Kunsill Ewropew biex jilħaq ftehim mat-Turkija; madanakollu huwa mħasseb dwar jekk il-ftehim konkluż mat-Turkija hux se jnaqqas l-għadd ta’ persuni li jaqsmu l-fruntieri tal-UE b’mod irregolari. jitlob li r-refuġjati jirċievu għajnuna finanzjarja diretta u jkollhom il-possibbiltà li japplikaw għal viża umanitarja fil-kampijiet tar-refuġjati f’pajjiżi terzi. Parti mill-għajnuna għandu wkoll tmur għall-UNHCR biex itejbu l-kondizzjonijiet ta’ għajxien fil-kampijiet tar-refuġjati;

6.

huwa konvint li bosta persuni li jitilqu minn pajjiżhom jintbagħtu fil-kampijiet tar-refuġjati, ta’ spiss f’pajjiż viċin. Mhux kulħadd għandu r-riżorsi meħtieġa għal vjaġġi iżjed ’il bogħod, pereżempju lejn l-Ewropa, indipendentement mill-kwalità tal-kundizzjonijiet tal-akkoljenza tagħhom fil-lokazzjoni attwali tagħhom. Ħafna jittamaw li jkunu jistgħu jirritornaw lura lejn il-pajjiż ta’ oriġini tagħhom jew ikollhom tama li jkunu jistgħu jibnu ħajja dinjituża f’kamp tar-refuġjati. Din tal-aħħar timplika prestazzjoni ta’ servizzi bażiċi xierqa (akkomodazzjoni, ikel, saħħa, eċċ.), edukazzjoni għat-tfal, impjieg, dħul finanzjarju, u koeżistenza paċifika fl-ambjent il-ġdid;

7.

fassal din l-Opinjoni fuq inizjattiva proprja bil-għan li jagħti direzzjoni lill-miżuri tal-UE mmirati lejn it-titjib tal-protezzjoni tar-refuġjati fir-reġjuni ta’ oriġini, jiġifieri l-pajjiżi tal-ewwel akkoljenza, li ta’ spiss ikunu l-pajjiżi ġirien tal-pajjiż li minnu jkunu qegħdin jaħarbu. L-opinjoni turi li l-awtoritajiet lokali u reġjonali jistgħu jagħtu kontribut sinifikanti sabiex jintlaħqu l-għanijiet tal-UE f’dan il-kuntest u liema strumenti huma meħtieġa. Jenfasizza kif l-istrateġiji u l-possibbiltajiet tad-diversi livelli ta’ gvern jistgħu jikkomplementaw lil xulxin sabiex jinkisbu koordinazzjoni aħjar u riżultati aħjar, waqt li jħarsu d-drittijiet u l-valuri fundamentali li l-UE tpoġġi fil-qalba tal-politiki tagħha. F’dan ir-rigward, għandu jiġi mfakkar, għal finijiet ta’ kompletezza, li t-titjib tal-kundizzjonijiet tal-akkomodazzjoni fir-reġjun ta’ oriġini ma jaffettwax ir-rikonoxximent tad-dritt għall-protezzjoni internazzjonali fi ħdan l-UE (3);

8.

jinnota li l-akkomodazzjoni fir-reġjun ta’ oriġini f’każ ta’ kriżi tkun sottomessa għal xi realtajiet “fissi”:

9.

jinnota li, irrispettivament jekk l-akkomodazzjoni ssirx fil-kampjiet jew barra, fil-każijiet kollha, il-persuni spostati għandhom impatt konsiderevoli fuq il-komunitajiet ospitanti: żieda fil-pressjoni fuq is-servizzi bażiċi, fir-rigward tal-provvista tal-ilma tax-xorb, l-edukazzjoni u s-saħħa, il-ħarsien tal-ambjent (skart u ilma mormi), integrazzjoni fis-suq tax-xogħol, eċċ.;

10.

huwa konxju li għall-komunitajiet ospitanti ħafna drabi dan il-fenomenu jsarraf f’żieda fil-prezzijiet tal-ikel, tal-akkomodazzjoni, tas-servizzi, eċċ. filwaqt li fl-istess ħin ikun hemm iktar kompetizzjoni għall-impjiegi, u għalhekk pagi aktar baxxi;

11.

huwa konxju li għall-komunitajiet ospitanti, dawn il-pressjonijiet differenti jiżdiedu man-numru ta’ problemi u sfidi li diġà jeżistu. Dawn l-elementi kollha flimkien ta’ spiss joħolqu tensjonijiet soċjali bejn ir-refuġjati u l-komunitajiet ospitanti, fost (il-gruppi ta’) ir-refuġjati nfushom, bejn (gruppi), jew jintwerew bħala tensjonijiet soċjali inattivi fi ħdan il-komunitajiet ospitanti;

12.

jirrikonoxxi wkoll li dan jista’ jwassal għall-biża’ mill-effett valanga: hekk kif dawn il-pressjonijiet ma jibqgħux kontrollati, il-komunitajiet ospitanti jistgħu jaraw ukoll fi ħdanhom il-vjolenza u l-flussi tar-refuġjati;

13.

jidentifika, fl-aħħar nett, in-natura ad hoc ta’ bosta dispożizzjonijiet ta’ kontinġenza implimentati. Il-lok tal-kampjiet ta’ refuġjati mhux dejjem ikun maħsub tajjeb; din l-għażla ta’ spiss isseħħ f’perspettiva limitata ta’ ppjanar, mingħajr ma tkun integrata f’viżjoni usa’ tal-iżvilupp territorjali u bosta drabi mingħajr ma jingħata widen lill-awtoritajiet lokali u reġjonali, li b’mod definittiv huma milquta l-aktar mill-konsegwenzi, kif ġie deskritt hawn fuq;

14.

huwa tal-fehma li, fid-dawl tas-sitwazzjoni kif deskritta hawn fuq, jeħtieġ li tintgħażel taħlita ta’ ġestjoni ta’ kriżi u ta’ approċċ fit-tul, bil-għan li jiġu pprovduti l-ħtiġijiet bażiċi, tinħoloq koeżjoni soċjali, u jiġi garantit żvilupp fiżiku, soċjali u ekonomiku b’mod ikkontrollat u li jirrispetta d-drittijiet umani, inkluża l-ugwaljanza bejn is-sessi, u l-ambjent;

15.

jirrakkomanda li, fejn possibbli, id-dipendenza tar-refuġjati fuq l-għajnuna, pereżempju minħabba li ma jkunux jistgħu jagħmlu xogħol bi ħlas, titneħħa kemm jista’ jkun malajr. Għandhom isiru sforzi sabiex jiġi żgurat li r-refuġjati jsiru awtonomi u, kemm jista’ jkun, ikunu jistgħu jiġġestixxu ħajjithom billi, pereżempju, jiġu promossi għażliet sabiex ikunu jistgħu jagħmlu xogħol bi ħlas. F’dan il-kuntest, huwa żvilupp pożittiv li r-refuġjati Sirjani fit-Turkija issa jistgħu jiksbu permess tax-xogħol. Għandhom jiġu adottati approċċi ġodda, pereżempju li jinvolvu lill-komunità kummerċjali. Skont l-esperti, l-għajnuna fi ftit flus kontanti lir-refuġjati għandha impatt ħafna iktar pożittiv fuq l-ekonomija lokali mill-għajnuna mhux finanzjarja; għalhekk, il-KESE jappella li tiġi studjata din il-possibilità u fejn possibbli jiġu applikati r-riżultati;

16.

jirrakkomanda li minn issa ’il quddiem għandu jiġi żgurat it-twaqqif, l-iżvilupp u l-ġestjoni tal-kampijiet ta’ akkoljenza jkunu mill-bidu bbażati fuq l-approċċ ta’ “żvilupp urban u territorjali” minflok fuq il-prinċipju ta’ “emerġenza”, u jitqiesu mill-bidu l-impatti pożittivi kif ukoll negattivi fuq il-komunitajiet ospitanti; dan l-approċċ ifisser li jkollhom isiru għażliet aktar infurmati fir-rigward tal-post u l-possibbiltà li jiġi estiż fil-futur, tad-disponibbiltà tal-faċilitajiet, eżistenti jew li ser jiġu żviluppati, tal-impatti ekonomiċi, tat-traffiku, eċċ, waqt li tingħata attenzjoni speċjali lill-gruppi vulnerabbli bħan-nisa u t-tfal;

17.

jinnota, barra minn hekk, li l-aċċess għall-edukazzjoni u x-xogħol imħallas, flimkien ma’ miżuri oħra li huma jew mhumiex immirati għal gruppi speċifiċi, bħan-nisa, it-tfal u ż-żgħażagħ, hija importanti għal żewġ raġunijiet. L-ewwel nett jitnaqqas ir-riskju ta’ radikalizzazzjoni, l-iżolazzjoni, is-segregrazzjoni u l-vulnerabbiltà għal attivitajiet kriminali (it-traffikar tal-bnedmin, il-prostituzzjoni, it-traffikar tal-organi) u r-reklutaġġ minn netwerks terroristiċi; it-tieni nett jiffaċilita l-integrazzjoni soċjali, ekonomika u kulturali fin-nisġa soċjali tal-pajjiż ospitanti;

18.

iħeġġeġ lill-UE biex tgħin bl-għoti tal-kura tas-saħħa mentali lir-refuġjati Sirjani, b’mod speċjali t-tfal, li jsofru minn disturbi ta’ stress postrawmatiku li jirrappreżenta theddida għas-saħħa u għall-integrazzjoni tagħhom;

19.

huwa tal-fehma li l-approċċ għandu wkoll jibda mill-preżenża permanenti jew għall-inqas fit-tul ħafna tar-refuġjati, inkluża barra l-kampijiet, u għalhekk mill-inklużjoni tagħhom fil-komunitajiet ospitanti. Pereżempju, parti mir-riżorsi jistgħu jiġu allokati biex jiġi offrutappoġġ għal xogħol soċjalment utli u għall-parteċipazzjoni fl-akkoljenza ta’ dawk li għadhom kemm waslu. Dan jeħtieġ djalogu politiku wiesa’, filwaqt li għandha titqies is-sitwazzjoni speċifika tar-reġjuni li jirċievu u tal-gruppi ta’ refuġjati affettwati;

20.

jinnota li tali approċċ ma jistax jiffoka biss fuq ir-refuġjati, iżda għandu neċessarjament jiffoka wkoll fuq il-prevenzjoni u s-soluzzjoni tal-problemi li jiffaċċjaw il-komunitajiet ospitanti nfushom. Il-komunità internazzjonali għandha, aktar minn qatt qabel, tkun lesta li tassisti lill-gvernijiet nazzjonali u lill-awtoritajiet lokali u reġjonali fil-missjoni tagħhom sabiex tgħinhom fir-responsabbiltà tagħhom lejn l-ambjent fejn għandha tiġi żviluppata “l-integrazzjoni fir-reġjun”. Din l-għajnuna għandha wkoll tiġi tradotta f’termini finanzjarji, pereżempju biex tgħin jinżammu s-servizzi bażiċi u l-iżvilupp ekonomiku lokali u reġjonali;

21.

jinnota li l-problemi tar-refuġjati u tal-komunitajiet fil-pajjiżi ta’ oriġini u r-reġjun tal-madwar jimmanifestaw ruħhom fl-irħula, il-bliet u r-reġjuni fejn jgħixu, imorru l-iskola, jieħdu l-kura, jaħdmu jew ifittxu impjieg, jgħixu mal-ġirien, eċċ. Wara l-għajnuna diretta ta’ emerġenza, huwa speċjalment fil-livell tal-awtoritajiet lokali u reġjonali li jridu jiġu żviluppati l-azzjonijiet u s-soluzzjonijiet (7);

22.

jinnota li l-awtoritajiet lokali u reġjonali fil-pajjiż ta’ oriġini u r-reġjun tal-madwar isibuha verament diffiċli biex jilħqu dawn l-aspettattivi. F’ħafna każijiet, fil-fatt, anke qabel il-wasla tar-refuġjati, huma kellhom jiffaċċjaw nuqqas ta’ kompetenzi, riżorsi finanzjarji insuffiċjenti u nuqqas ta’ persunal kwalifikat. F’sistema politika ċentralizzata, barra minn hekk ma jistgħux jaġixxu malajr minħabba li ħafna deċiżjonijiet u ħafna spejjeż l-ewwel iridu jiġu approvati f’livell amministrattiv ogħla;

23.

huwa neċessarju li tissaħħaħ il-kollaborazzjoni bejn l-awtoritajiet lokali u reġjonali minn naħa waħda, u l-UNHCR u l-NGOs umanitarji min-naħa l-oħra, sabiex jaħdmu b’mod koordinat; fid-dawl tas-sussidjarjetà, ir-rikonoxximent u l-appoġġ għal dawk l-entitajiet pubbliċi, privati u mingħajr skop ta’ qligħ tat-tielet settur u tas-soċjetà ċivili li jieħdu ħsieb b’mod speċjali l-akkoljenza u l-bżonnijiet tar-refuġjati fir-reġjuni, billi jiggarantixxu perkors kostruttiv ta’ integrazzjoni li huwa aktar konxju tas-sitwazzjonijiet u l-kwistjonijiet reġjonali;

24.

jirrakkomanda li l-awtoritajiet lokali u reġjonali fil-pajjiż ta’ oriġini u r-reġjun tal-madwar jistgħu ġenwinament jieħdu r-responsabbiltà li jżommu jew jagħtu s-servizzi bażiċi kif ukoll, fir-rigward tal-aspetti tal-iżvilupp ekonomiku u soċjali sostenibbli fuq perjodu fit-tul, fir-reġjuni u l-muniċipalitajiet tagħhom, li jiksbu titjib f’diversi livelli:

25.

jinnota li biex l-akkoljenza fir-reġjun issir element serju tal-politika kollha tar-refuġjati, hemm bżonn b’mod permanenti ta’ ammont sostanzjali ta’ riżorsi ekonomiċi, materjali, umani u tekniċi. Il-Kunsill Ewropew dwar il-Ġustizzja u l-Intern tal-14 ta’ Settembru 2015 għalhekk iddeċieda li jżid il-kontribuzzjoni tal-UE u tal-Istati Membri għall-UNHCR, sabiex din tkun tista’ tilqa’ numru kbir ta’ refuġjati Sirjani f’kampijiet fil-pajjiżi ġirien, kif ukoll li jżid b’mod sinifikanti l-Fond Fiduċjarju Reġjonali tal-Unjoni Ewropea b’reazzjoni għall-kriżi Sirjana, imsejjaħ ukoll il-Fond Madad (8). Din iż-żieda allegatament ser tkun meħtieġa għal bosta snin;

26.

jitlob li strumenti simili għall-Fond Madad jkunu disponibbli biex jiġu indirizzati l-krizijiet li jiffaċċjaw diversi pajjiżi tal-Afrika ta’ Fuq, minn fejn (potenzjalment) jiġu flussi kbar ta’ refuġjati;

27.

għalhekk iħeġġeġ lill-Istati Membri tal-UE biex jassumu r-responsabbiltà tagħhom biex jipprovdu appoġġ finanzjarju u jagħmlu disponibbli riżorsi li diġà ġew imwegħda mingħajr dewmien, u sabiex jagħmlu aktar sforzi biex jitneħħa fil-prattika d-distakk sinifikanti fil-fondi fiduċjarji bejn ir-riżorsi minn finanzjament tal-UE u l-kontribuzzjonijiet tal-Istati Membri;

28.

jirrakkomanda li, waqt li jiġu definiti l-prijoritajiet tiegħu, il-Fond Madad jagħti biżżejjed attenzjoni lill-kwistjonijiet ta’ “governanza” u t-traduzzjoni tagħhom f’azzjonijiet ma’ u għall-awtoritajiet lokali u reġjonali, kif ukoll azzjoni rapida b’mod suffiċjenti, filwaqt li jibqgħu preċiżi, ippjanati, effettivi u effiċjenti;

29.

iħeġġeġ lill-Istati Membri biex jipprovdu l-mezzi ekonomiċi u l-proċeduri amministrattivi meħtieġa, inkluża l-parteċipazzjoni tal-awtoritajiet lokali u reġjonali, b’mod speċjali dawk b’kompetenzi fl-oqsma tas-saħħa, tal-edukazzjoni u tas-servizzi soċjali, u fit-tqassim ta’ dawn ir-riżorsi għall-għajnuna ta’ dawn il-persuni, sabiex jassumu b’mod konġunt l-applikazzjoni tal-mezzi xierqa li bihom għandha tiġi indirizzata din is-sitwazzjoni b’mod sħiħ;

30.

jirrakkomanda, fil-kuntest tal-politiki Ewropej għall-għajnuna għall-iżvilupp, li l-azzjonijiet għandhom jiġu mmirati b’mod ċar fuq l-indirizzar u l-eliminazzjoni tal- kawżi primarji tal-kunflitti li jwasslu biex in-nies jaħarbu minn pajjiżhom, inklużi n-nuqqas ta’ strutturi demokratiċi li jiffunzjonaw, ir-rispett għad-drittijiet tal-bniedem, il-persekuzzjoni minħabba r-reliġjon u n-nuqqas ta’ governanza tajba fid-diversi livelli ta’ gvern f’pajjiżi fraġli. L-UE tista’ għalhekk tikkontribwixxi biex tnaqqas il-kawża li twassal biex gruppi kbar ta’ nies jaħarbu, minħabba li ħajjithom tkun fil-periklu u ma jarawx tama ta’ paċi;

31.

jirrikonoxxi, għal dan il-għan, l-importanza li jiġu stabbiliti mezzi ta’ komunikazzjoni formali, istituzzjonalizzati u effettivi mal-awtoritajiet reġjonali u lokali tar-reġjuni ta’ oriġini tar-refuġjati, sabiex jiġu identifikati l-inħawi prinċipali li jeħtieġu l-akbar attenzjoni u l-azzjonijiet l-aktar xierqa, li huma l-appoġġ finanzjarju u teknoloġiku, it-taħriġ tal-uffiċjali għolja, l-iskambju tal-għarfien u l-aħjar prattiki;

32.

iqis li l-prinċipji li jinsabu fid-dokument “Sustainable urban agenda for the Mediterranean region” (Aġenda urbana sostenibbli għar-reġjun tal-Mediterran) u l-azzjonijiet ta’ gwida mfissrin fis-sejħa għal sħubija mad-delegazzjoni tas-Sindki Libjani, li huma inizjattivi żviluppati mill-ARLEM, jirrappreżentaw it-triq ’il quddiem biex tiġi implimentata protezzjoni effettiva tar-refuġjati fir-reġjun ta’ oriġini;

33.

jirrakkomanda, fil-kuntest tad-djalogu politiku mal-gvernijiet tal-pajjiżi tal-ewwel akkoljenza, li jimbotta r-rwol tal-awtoritajiet lokali u reġjonali u b’dan il-mod jiġbed l-attenzjoni għall-kundizzjonijiet ġenerali meħtieġa sabiex l-awtoritajiet lokali u reġjonali jkunu jistgħu jaqdu r-rwol tagħhom u jassumu r-responsabbiltajiet tagħhom. Huwa meħtieġ li jinħolqu sinerġiji bejn l-atturi lokali u reġjonali tal-kooperazzjoni deċentralizzata, bil-għan li jiġu ffaċilitati proġetti u programmi komuni ta’ appoġġ internazzjonali. Dan jikkonċerna, fost l-oħrajn, li jintlaħqu ftehimiet mal-Gvern Tork u l-implikazzjonijiet għall-awtoritajiet lokali u reġjonali fiż-żoni tal-fruntiera mas-Sirja u għall-bliet fit-Turkija fejn jgħixu gruppi kbar ta’ refuġjati. L-Assoċjazzjoni ta’ Muniċipalitajiet Torok ħejjiet proposti inizjali f’dan il-kuntest;

34.

jitlob li titħeġġeġ il-parteċipazzjoni tal-awtoritajiet lokali u reġjonali minn stadju bikri fil-valutazzjonijiet tal-ħtiġijiet, kif ġew identifikati fil-Pjan Reġjonali għar-Refuġjati u r-Reżiljenza 2015-2016 b’reazzjoni għall-kriżi Sirjana (3RP). Approċċ koordinat tal-għajnuna huwa wkoll meħtieġ fil-livell lokali, u l-parteċipazzjoni attiva tal-awtoritajiet lokali hija neċessarja għal dan il-għan, fl-istadji kollha tal-iżvilupp tal-programm ta’ għajnuna;

35.

l-awtoritajiet lokali u reġjonali Ewropej żviluppaw xi prattiki tajbin u kompetenzi rigward l-integrazzjoni tar-refuġjati. Għalhekk, jistieden lill-Kunsill, lill-Kummissjoni u lis-SEAE biex jagħmlu użu mill-esperjenza, ir-rieda u n-netwerks tal-awtoritajiet lokali u reġjonali Ewropej: il-Kumitat, kif ukoll l-ARLEM u l-CORLEAP stabbiliti fi ħdanu, il-pjattaformi kif ukoll l-assoċjazzjonijiet nazzjonali tal-muniċipalitajiet, bħal pereżempju l-VNG (Vereniging van de Nederlandse Gemeenten – l-Assoċjazzjoni tal-Muniċipji Netherlandiżi) (9). Dawn ipprovdew ammont kbir ta’ għarfien u esperjenzi fir-rigward tas-servizzi bażiċi, l-integrazzjoni u l-iżvilupp ekonomiku lokali u reġjonali, mhux biss fl-Ewropa iżda wkoll fil-pajjiżi tal-ewwel akkoljenza. L-approċċ konkret ta’ kondiviżjoni tal-aħjar prattiki, ippjanar globali u mmirat tal-faċilitajiet fl-ambjent tagħhom, ibbażat fost affarijiet oħra fuq l-ippjanar tax-xenarju u jqis l-impatt fuq il-potenzjal tal-iżvilupp tal-komunitajiet ta’ akkoljenza jidher li huwa komplementari ħafna għall-ħidma tal-UNHCR fil-Ġordan u l-Libanu;

36.

jitlob li, fi djalogu ma’ atturi ewlenin oħra f’dan il-qasam, inkluż matul is-Summit Umanitarju Dinji li ser isir f’Istanbul f’Mejju 2016, ikomplu jiġu żviluppati l-kunċetti ta’ din l-Opinjoni u jiġu tradotti f’politiki u programmi. Il-Kumitat huwa lest li jipprovdi aktar kontribut.

1.7.2016   

MT

Il-Ġurnal Uffiċjali tal-Unjoni Ewropea

C 240/37

1.

Jilqa’ bis-sħiħ il-komunikazzjoni tal-Kummissjoni tal-14 ta’ Ottubru 2015 intitolata “Kummerċ għal kulħadd: Lejn politika aktar responsabbli għall-kummerċ u l-investiment” u jirrikonoxxi l-potenzjal importanti li l-kummerċ jista’ jippreżenta f’termini ta’ tkabbir, ħolqien ta’ impjiegi u xogħol, u l-investiment fl-UE;

2.

Jappoġġja l-ambizzjoni tal-Kummissjoni biex tiżgura li l-benefiċċji tal-globalizzazzjoni jitqassmu b’mod ġust u li l-impatti negattivi jiġu mitigati u jenfasizza li, sabiex jitqarrbu l-kundizzjonijiet, jeħtieġ li l-ftehmiet kummerċjali moderni jmorru lil hinn minn sempliċi tariffi u jpoġġu l-enfasi fuq l-SMEs; madankollu jaqbel mal-Kummissjoni li l-politika tal-kummerċ tista’ taħdem biss jekk l-Ewropa tkompli tiffoka fuq it-tneħħija tal-ostakli għat-tlestija tas-suq uniku;

3.

Jilqa’ l-impenn tal-Kummissjoni li fuqu kull inizjattiva sinifikanti fil-qasam tal-politika tal-kummerċ se tkun soġġetta għal valutazzjoni tal-impatt fuq is-sostenibbiltà; ifakkar dwar l-importanza li jitwettqu evalwazzjonijiet ex-post u jenfasizza li l-valutazzjonijiet u l-evalwazzjonijiet tal-impatt inkluż konsultazzjoni xierqa tal-partijiet interessati huma kruċjali fit-tfassil ta’ politiki tal-kummerċ tajba, trasparenti u bbażati fuq l-evidenza;

4.

Jitlob lill-Kummissjoni biex tipprovdi valutazzjoni f’waqtha tal-impatt fuq il-baġit tal-UE u l-politiki strutturali ffinanzjati mill-UE (Fondi Strutturali u ta’ Investiment Ewropej, Fond Ewropew ta’ Aġġustament għall-Globalizzazzjoni, eċċ.) tal-miżuri għal-liberalizzazzjoni tal-kummerċ previsti fil-ftehimiet ta’ kummerċ ħieles jew li jidderivaw minn arranġamenti multilaterali bħall-kwistjoni li jingħata Status ta’ Ekonomija tas-Suq liċ-Ċina;

5.

Jenfasizza li l-miżuri ffinanzjati taħt il-Fond Ewropew għall-Globalizzazzjoni (FEG) huma ta’ spiss orjentati lejn perjodu qasir u jitlob għal iktar koordinazzjoni ma’ politiki oħra tal-UE, b’mod speċifiku l-politika tal-koeżjoni, sabiex jiġi żgurat li d-disparitajiet reġjonali attwali fi ħdan l-UE mhux biss ma jiżdidux aktar iżda jonqsu;

6.

Jirrikonoxxi l-importanza ekonomika tal-armonizzazzjoni regolatorja hekk kif din tnaqqas in-numru ta’ regoli legali li jridu jkunu konformi magħhom sħab tan-negozju fi ftehim. Jirrimarka madankollu l-bżonn li jiġi żgurat li tali armonizzazzjoni fil-ftehmiet kummerċjali tal-UE żżomm jew ittejjeb l-istandards fir-rigward tal-protezzjoni tal-konsumatur, l-ambjent u d-drittijiet tal-ħaddiema;

7.

Jistenna mill-Kummissjoni Ewropea li tagħti prova ta’ trasparenza fir-rigward tal-pjani ambizzjużi tagħha għal ftehmiet kummerċjali internazzjonali futuri. F’dan il-kuntest jiġbed l-attenzjoni għall-ambizzjoni tiegħu biex jiddefinixxi mill-ġdid ir-relazzjonijiet tal-UE mal-imsieħba Afrikani, tal-Amerika Latina u tal-Karibew kif ukoll biex jintensifika aktar il-kooperazzjoni fil-kummerċ fil-qafas tal-politika tal-viċinat tal-UE;

8.

Jenfasizza r-rwol ċentrali tal-SMEs bħala s-sinsla tal-iżvilupp reġjonali u lokali u għalhekk għall-koeżjoni tal-UE kollha kemm hi u jfakkar li l-ispejjeż tal-kundizzjonalità għall-istandards internazzjonali huma normalment ogħla għall-SMEs milli għall-korporazzjonijiet multinazzjonali. Jilqa’, f’dan ir-rigward, il-fatt li l-Kummissjoni tagħti post importanti lill-SMEs fl-Istrateġija tagħha billi tenfasizza d-diffikultajiet li jistgħu jiltaqgħu magħhom fir-rigward tal-liberalizzazzjoni tal-kummerċ u jitlob li l-awtoritajiet lokali u reġjonali jiġu kontinwament involuti fid-djalogu previst li jseħħ bejn il-Kummissjoni u l-Istati Membri dwar il-ħtiġijiet speċjali tal-SMEs;

9.

Jenfasizza li t-tliet prinċipji ewlenin tal-effettività, trasparenza u valuri jistgħu f’xi ħinijiet ikunu f’kunflitt u jirrikonoxxi l-argument tal-Komunikazzjoni li l-politika tal-kummerċ għandha tikkunsidra u possibbilment ukoll tippromovi ħafna oqsma ta’ politika oħrajn iżda jfittex aktar ċarezza dwar kif dan jista’ jidħol fis-seħħ b’mod prattiku; barra minn hekk jinnota li l-interessi ekonomiċi m’għandhom qatt jieħdu s-sopravent fuq il-garanzija ta’ aċċess ugwali għas-servizzi pubbliċi;

10.

Jenfasizza li fit-twaqqif ta’ Qorti ta’ investiment internazzjonali għandu jiġi assigurat li matul il-perjodu tranżitorju sakemm il-Qorti tal-Investiment Internazzjonali tkun issostitwixxiet kompletament il-mekkaniżmi kollha tar-riżoluzzjoni tat-tilwim tal-investiment ipprovduti fil-ftehmiet kummerċjali tal-UE, l-interessi ekonomiċi ma jipprevalux fuq id-dritt li l-awtoritajiet pubbliċi kompetenti jipprovdu servizzi pubbliċi skont it-taħlita xierqa li jqisu neċessarja;

11.

Jilqa’ d-dikjarazzjoni mill-Kummissjoni Ewropa fid-29 ta’ Frar 2016 li l-kapitolu dwar il-protezzjoni tal-investiment tal-ftehim ta’ kummerċ ħieles bejn l-UE u l-Kanada (CETA) jindirizza l-elementi tal-approċċ riformat propost mill-UE għal sistema għas-soluzzjoni tat-tilwim bejn l-investitur u l-istat aktar trasparenti u jipprovdi għal:

12.

Jilqa’ l-pożizzjoni adottata mill-Kummissjoni dwar is-servizzi pubbliċi li l-ftehimiet kummerċjali futuri tal-UE m’għandhomx jipprevjenu lill-gvern fil-livelli kollha li jipprovdi, jappoġġja jew jirregola s-servizzi pubbliċi u ma għandhom jimponu l-ebda obbligu fuq l-Istati Membri biex jipprivatizzaw kwalunkwe servizz, kif ukoll ma għandhomx jipprevenuhom milli jespandu l-firxa tas-servizzi li joffru lill-pubbliku;

13.

Jenfasizza li l-awtoritajiet lokali u reġjonali dejjem għandu jkollhom il-possibbiltà li jipprovdu servizzi ta’ interess ġenerali, irrispettivament minn kif is-servizzi jiġu pprovduti u jiġu ffinanzjati.

14.

Jilqa’ l-Konklużjonijiet tal-Kunsill mitftiehma fil-Kunsill tal-Kummerċ fis-27 ta’ Novembru 2015, minħabba li jirrappreżentaw approċċ bilanċjat ħafna li jbiddel l-enfasi iżda mhux is-sustanza tal-politika tal-kummerċ skont il-politika barranija tal-UE;

15.

Iqis li d-dimensjoni territorjali tal-istrateġija għandha tiżgura li l-awtoritajiet lokali u reġjonali madwar l-UE jibbenefikaw b’mod ġust mill-opportunitajiet tat-tkabbir u tal-investiment mistennija li jiġu ġġenerati mill-Ftehmiet ta’ Kummerċ Ħieles u mill-ftehmiet tal-kummerċ b’mod ġenerali, minħabba li dawn il-ftehmiet huma deskritti fil-Komunikazzjoni; Barra min hekk irid jiġi ċċarat, x’jistgħu jfissru l-ftehimiet ta’ kummerċ ħieles, fir-rigward ta’ attivitajiet iffinanzjati pubblikament fil-livell lokali, għall-ħarsien tal-libertà ta’ organizzazzjoni u l-awtogovernanza lokali;

16.

jitlob, f’konformità mal-Artikoli 14 u 106 tat-Trattat dwar il-Funzjonament tal-Unjoni Ewropea (TFUE) u l-Protokoll Nru 26 dwar is-servizzi ta’ interess ġenerali, biex is-servizzi ta’ interess ġenerali kif ukoll is-servizzi ta’ interess ekonomiku ġenerali, attwali u futuri, (inklużi l-provvista tal-ilma, il-kura tas-saħħa, is-servizzi soċjali, is-sistemi tas-sigurtà soċjali u l-edukazzjoni, il-ġestjoni tal-iskart u t-trasport pubbliku) ikunu esklużi mill-kamp ta’ applikazzjoni ta’ ftehimiet kummerċjali li jkunu qed jiġu nnegozjati;

17.

Jemmen li hemm ħtieġa identifikata għall-elaborazzjoni reġjonali u lokali u t-twassil tal-programmi tal-internazzjonalizzazzjoni tal-SMEs li jinvolvu partijiet interessati lokali u reġjonali. Dan ikun jinkludi wkoll l-identifikazzjoni ta’ nuqqasijiet bl-appoġġ għat-tnaqqis tal-inugwaljanzi u l-impatti negattivi li kummerċ aktar miftuħ jista’ jġib f’ċerti reġjuni;

18.

Jargumenta li huwa importanti li wieħed ifakkar li l-kummerċ u l-investiment mhuwiex biss dwar il-ftuħ tas-swieq, li sussegwentement jistimula l-kompetizzjoni u l-innovazzjoni għall-iżvilupp tal-kompetittività tal-Ewropa, li finalment jista’ joħloq impjiegi u tkabbir iżda wkoll dwar żvilupp neċessarju tar-reġjuni kollha sabiex tissaħħaħ il-koeżjoni ekonomika, soċjali u territorjali u l-prosperità taċ-ċittadini kollha;

19.

Jilqa’ l-enfasi fuq il-valuri tal-UE fi ħdan l-istrateġija ġdida u l-promozzjoni tal-valuri ewlenin Ewropej bħall-iżvilupp sostenibbli u d-drittijiet tal-bniedem fi ħdan il-ftehmiet tal-kummerċ iżda jemmen li għandhom jiġu stipulati b’mod konkret;

20.

Jirrikonoxxi li l-konverġenza regolatorja fil-Ftehmiet ta’ Kummerċ Ħieles fil-livelli settorjali tista’ tnaqqas duplikazzjoni bla bżonn tal-proċeduri u r-rekwiżiti tal-liċenzjar li jwasslu għal riżultati ekwivalenti. Madankollu, biex jiġi evitat tilwim sussegwenti, huwa importanti li t-test tal-ftehim jitfassal bi preċiżjoni u li tinħoloq lista “pożittiva” eżawrjenti tas-servizzi li huma s-suġġett tal-ftehimiet dwar il-kummerċ fis-servizzi;

21.

Jilqa’ l-fokus tal-komunikazzjonijiet fuq il-potenzjal mhux sfruttat tal-SMEs u l-ħtieġa li jiġu pprovduti b’appoġġ immirat sew, li jibda b’politika tal-kummerċ ġusta;

22.

Jidentifika li l-Konverġenza regolatorja hija partikolarment rilevanti għall-ħolqien tal-opportunitajiet ta’ internazzjonalizzazzjoni u l-integrazzjoni fi ktajjen tal-valur globali għall-SMEs;

23.

Jemmen li riżultat bilanċjat fis-setturi tradizzjonali sensittivi bħall-agrikoltura għandu jkun l-objettiv fil-Ftehmiet ta’ Kummerċ Ħieles tal-UE kollha u jkun soġġett għal rikonoxximent ta’ prodotti ta’ kwalità u l-protezzjoni tagħhom f’livell internazzjonali minħabba l-fenomenu tal-iffalsifikar;

24.

Jaqbel li l-intensifikazzjoni tad-dibattitu relatat mal-politika tal-kummerċ tal-UE tipprovdi opportunità biex jiġu involuti aħjar il-partijiet interessati kollha fil-preparazzjoni, in-negozjati u l-implimentazzjoni tal-inizjattivi differenti tagħna fil-qasam; Għal dan l-għan, madankollu, huwa meħtieġ li tkun żgurata t-trasparenza b’mod aktar wiesa’ milli hu l-każ illum;

25.

Jitlob li jittieħdu miżuri msaħħa biex jappoġġjaw l-iżvilupp sostenibbli u l-governanza tajba permezz ta’ ftehmiet ta’ kummerċ, inizjattivi li jinvolvu diversi partijiet interessati u lil hinn, b’enfasi fuq kummerċ ħieles, ġust u etiku, il-protezzjoni ambjentali, id-drittijiet tal-ħaddiema, kundizzjonijiet tax-xogħol deċenti, kif ukoll id-drittijiet tal-bniedem, il-protezzjoni tas-saħħa u tal-konsumatur, il-benessri tal-annimali, l-iżgurar tal-protezzjoni tad-diversità kulturali u l-promozzjoni tal-iżvilupp permezz tal-kummerċ, inkluż l-Għajnuna għall-Kummerċ u l-Aġenda tal-2030;

26.

Isostni li l-ftehmiet kummerċjali għandhom jipprovdu opportunitajiet ugwali madwar l-Istati Membri, ir-reġjuni, inklużi r-reġjuni l-aktar imbiegħda u t-territorji barranin tal-UE, u s-setturi rilevanti kollha, inklużi l-industrija, l-agrikoltura u s-servizzi. Jilqa’, f’dan il-kuntest, li l-Kunsill enfasizza l-ħtieġa li tiġi ffaċilitata u mtejba l-integrazzjoni tal-kumpaniji Ewropej fil-ktajjen tal-valur globali, b’mod partikolari l-intrapriżi żgħar u medji;

27.

Jilqa’ l-impenn tal-Kummissjoni tal-UE għall-miżuri tat-trasparenza u jittama li jkun segwit minn miżuri konkreti oħra favur viżibilità akbar, jiġifieri obbligu ta’ trasparenza fir-rigward tal-poiżizzjonijiet meħuda fin-negozjati, anke min-naħa tal-partijiet l-oħra. Madankollu, huwa jikkritika l-Komunikazzjoni talli naqset milli tindirizza l-problemi l-aktar fundamentali mat-trasparenza dwar li ssir politika tal-kummerċ fil-livell tal-Istati Membri tal-UE, pereżempju kif l-għanijiet tal-politika tal-kummerċ huma fformulati qabel ma jibdew in-negozjati, jiġifieri fl-istadju meta t-28 Stat Membru jistabbilixxu mandat;

28.

Jisħaq li d-drittijiet tal-konsumatur tal-UE għandhom ikunu bbilanċjati aħjar fid-dibattitu tal-kummerċ lil hinn mill-kwistjonijiet ta’ privatezza, is-sigurtà tal-konsumaturi u d-dritt tagħhom li jkunu jafu dwar il-prodotti. Il-komponenti ewlenin tal-protezzjoni tal-konsumatur - l-informazzjoni, it-trasparenza u l-għażla - għandhom jiġu ssalvagwardjati u jitħarsu;

29.

Għandu jkun hemm fokus ugwali għall-SMEs li jesportaw u għall-SMEs li ma jesportawx, sabiex jiġi żgurat li l-benefiċċji tal-kummerċ miftuħ u l-politika kummerċjali tal-UE, ma jkunux esklużivament limitati għal dawk l-SMEs li jikkontribwixxu għall-ekonomija tal-esportazzjoni ta’ Stat Membru;

30.

Jinkoraġġixxi lin-negozjaturi tal-UE biex jagħmlu pressjoni għall-inklużjoni ta’ kapitolu dwar in-Negozji ż-Żgħar fil-ftehmiet tal-kummerċ tal-UE futuri kollha;

31.

Jemmen li t-tnaqqis fl-ispiża tar-regolamentazzjoni jwassal b’mod pożittiv għal imbuttatura ikbar biex tgħin lin-negozji żgħar u medji jidħlu fi swieq ġodda fejn is-sistemi duplikattivi bejn l-imsieħba kummerċjali barra mill-Ftehmiet ta’ Kummerċ Ħieles jaġixxu bħala ostakolu għad-dħul u lill-kumpaniji ikbar u iktar stabbiliti biex jimmonopolizzaw is-swieq;

32.

Jappoġġja l-kummerċ aktar miftuħ bħala l-antidotu għal-livelli baxxi ta’ investiment billi jaġixxi bħala stimulant għall-ekonomija globali fi żmien meta l-livelli tad-dejn jibqgħu għoljin;

33.

Jinnota l-fokus qawwi tal-Komunikazzjoni dwar Ftehmiet ta’ Kummerċ Ħieles bilaterali (FTAs), jirrakkomanda madankollu li l-UE għandha terġa’ tibda tqis il-politika kummerċjali tagħha b’mod aktar qawwi fil-qafas tal-aġenda multilaterali tad-WTO;

34.

Huwa mħasseb li l-fokus akbar fuq l-aġenda tal-kummerċ bilaterali qed jippromovi l-formazzjoni ta’ blokkijiet ekonomiċi u kompetizzjoni diskriminatorja u deregolatorja għad-detriment ta’ pajjiżi ekonomikament aktar dgħajfa li għandhom anqas setgħat ta’ negozjar;

35.

Jirrimarka li nisġa dejjem iżjed kumplessa ta’ standards u regoli kummerċjali hija ta’ żvantaġġ għal kulħadd, u jappella lill-Kummissjoni tiggarantixxi sinerġiji kif ukoll uniformità bejn il-ftehimiet bilaterali, plurilaterali u multilaterali li qegħdin jiġu negozjati bħalissa; anke l-ftehimiet ġodda jridu jkunu mnebbħa mill-prinċipj taċ-ċarezza, it-trasparenza u s-semplifikazzjoni;

36.

Jitlob li l-politika kummerċjali tal-UE għandha tikkunsidra speċifikament il-promozzjoni tal-kummerċ f’setturi fejn l-UE hija mexxejja dinjija, pereżempju t-teknoloġija ekoloġika;

37.

Jitlob li r-Reġjuni u l-Kmamar tal-Kummerċ Lokali u Reġjonali jew organizzazzjoni rappreżentattiva/multiplikatriċi ekwivalenti jiġu infurmati b’mod xieraq dwar l-isfidi u l-opportunitajiet maħluqa biż-żieda tal-kummerċ internazzjonali. Dan huwa importanti b’mod speċjali għall-SMEs minħabba li huma aktar probabbli li ma jkollhomx ir-riżorsi biex jissorveljaw l-iżviluppi fil-kummerċ dinji huma stess;

38.

Jemmen li għandu jkun hemm koerenza akbar bejn il-Politika tal-Kummerċ u l-politiki li għandhom l-għan li jgħinu lill-pajjiżi li qed jiżviluppaw, fl-istess waqt mingħajr ma tintilef il-mira ta’ żvilupp strateġiku u tkabbir kontinwu fl-UE;

39.

Jenfasizza li l-istandards tax-xogħol, inkluż it-tmien konvenzjonijiet fundamentali tal-Organizzazzjoni Internazzjonali tax-Xogħol, għandhom jiġu implimentanti bl-istess mod fil-kapitoli kollha tal-ftehimiet ta’ kummerċ, u li dawn il-ftehimiet għandhom jinkludu reviżjoni tal-klawsola li tippermetti lil parti toħroġ mill-ftehim jew tissospendi l-impenji fl-każ ta’ ksur tal-istandards tax-xogħolu dawk soċjali;

40.

Jenfasizza li fir-rigward tal-ftehmiet tal-investiment, l-impenji tad-delimitazzjoni tal-miżuri tal-politika pubblika leġittima kontra sfida ppreżentata mill-Ftehmiet ta’ Kummerċ Ħieles huma importanti ħafna minħabba li m’għandu jkun hemm l-ebda impediment biex l-Istati Membri jsegwu miżuri leġittimi ta’ politika pubblika bħal kontra l-konsum tat-tabakk;

41.

Jindika li d-diskussjoni ISDS u ICS hija kkumplikata, u jitlob biex it-tilwimiet legali li jaffettwaw il-konformità mal-ftehimiet tal-kummerċ jitressqu quddiem il-qrati pubbliċi fil-post fejn huwa rreġistrat l-uffiċċju tal-konvenut, u biex il-proċedimenti jsiru bil-lingwa tal-konvenut u jkunu regolati mil-liġijiet fis-seħħ fil-pajjiż tal-konvenut; għandu jkun possibbli d-dritt għall-appell; il-mekkaniżmi għar-riżoluzzjoni tat-tilwimiet bejn l-istati għandhom ikunu bbażati fuq il-proċeduri attwali fil-livell tad-WTO;

42.

Jappella lill-Kummissjoni, barra minn hekk, biex tiżgura li sa ma tiġi stabbilita l-ICS, ma jintużawx mingħajr limitu l-mekkaniżmi ta’ riżoluzzjoni tat-tilwim bejn l-istat u l-investitur ibbażati fuq fuq klawżoli tal-aktar nazzjon favorit, barra mill-kamp ta’ applikazzjoni tal-ftehim kummerċjali rilevanti;

43.

Isostni li huwa neċessarju li ftehmiet tal-kummerċ, anki wara li jkunu ġew miftiehma u rratifikati, ikollhom mekkaniżmu (xi tip ta’ korp regolatorju sorveljanti) li jippermetti aġġustamenti tekniċi, kif ukoll klawsola ta’ reviżjoni li tippermetti reviżjoni possibbli mill-ġdid tal-ftehim inkwistjoni, u klawsola li permezz tagħha d-deċiżjonijiet dwar miżuri ta’ liberalizzazzjoni jistgħu jiġu rtirati fi kwalunkwe ħin – anke fil-każ ta’ deċiżjonijiet meħuda minn entitajiet lokali u reġjonali fil-qasam ta’ kompetenza tagħhom stess;

44.

Huwa wkoll importanti li dawk li jirrappreżentaw l-UE u l-imsieħba tal-kummerċ f’dan il-korp ikunu infurmati tajjeb u tiġi żgurata rappreżentazzjoni bbilanċjata tal-interessi;

45.

Jenfasizza li huwa importanti li wieħed jipprova jissemplifika l-kummerċ mal-pajjiżi l-oħra kollha li l-UE m’għandhiex Ftehim ta’ Kummerċ Ħieles magħhom;

46.

Jaqbel li l-ibbilanċjar mill-ġdid tal-kontribuzzjoni relattiva tal-ekonomiji żviluppati u emerġenti għas-sistema huwa rekwiżit ewlieni biex jimxu ‘l quddiem fil-futur;

47.

Jisħaq li l-ebda ftehim ta’ kummerċ tal-UE ma għandu jwassal għal livelli aktar baxxi tal-protezzjoni tal-konsumatur, ambjentali, jew soċjali u tax-xogħol minn dawk li hemm illum fl-Unjoni Ewropea u fl-Istati Membri individwali. Għandu jibqa’ wkoll possibblili dawn il-livelli jiġu żviluppati aktar. Huwa jirrakkomanda li dawn il-prinċipji jissaħħu u barra minn hekk jiġi ċċarat li dan japplika wkoll għal kwistjonijiet ta’ sikurezza tal-prodotti u ta’ ħarsien tas-saħħa, tal-annimali, u tad-data; wieħed jistenna li l-marġni ta’ manuvra tal-Unjoni Ewropea kif ukoll tal-parlamenti u tal-gvernijiet tal-Istati Membri jiġi żgurat u b’hekk jitħarsu wkoll il-possibbiltajiet demokratiċi taċ-ċittadini tagħhom li jeżerċitaw influwenza;

48.

jitlob li jiddaħħlu miżuri biex jiġu appoġġjati l-konsumaturi fil-kuntest tal-kummerċ transkonfinali f’oġġetti u servizzi ma’ pajjiżi terzi, pereżempju fil-forma ta’ help desks online li jipprovdu informazzjoni jew pariri b’rabta mat-tilwim;

49.

Japprova l-inklużjoni ta’ dispożizzjonijiet kontra l-korruzzjoni fil-ftehmiet ta’ kummerċ bħala miżura oħra li tiżgura li n-negozji u l-konsumaturi kollha jistgħu jfittxu l-benefiċċji ta’ ftehim u b’hekk inaqqsu l-qasma serja reġjonali;

50.

Jemmen li l-Kumitat għar-Reġjuni għandu rwol integrali fl-iżgurar li l-benefiċċji tal-ftehmiet ta’ kummerċ jinħassu fuq livell lokali u reġjonali u li jiskrutinizzaw dawk il-ftehmiet li l-benefiċċji tagħhom ma kinux jinħassu fuq livell aktar lokali;

51.

Jenfasizza l-ħtieġa li l-UE tinkludi l-akkwist pubbliku fil-ftehimiet ta’ kummerċ internazzjonali, filwaqt li fl-istess ħin tipprovdi ingranaġġ fin-negozjati, sabiex tirrispondi għan-nuqqas ta’ qbil bejn il-ftuħ tas-swieq tal-akkwist pubbliku tal-UE u l-prattiki restrittivi mill-imsieħba kummerċjali ewlenin;

52.

Jilqa’ l-proposta riveduta tal-Kummissjoni Ewropea dwar l-Istrument tal-Akkwist Pubbliku (1) u jenfasizza li din l-għodda tista’ tikkontribwixxi fil-ġlieda kontra l-korruzzjoni f’pajjiżi terzi. Barra minn hekk, jitlob li jkun hemm użu bbilanċjat tal-istrument sabiex jiġi evitat li jintuża biex iħares jew jagħlaq is-swieq tal-akkwist pubbliku tal-UE.

53.

Jenfasizza l-ħtiġijiet speċifiċi tal-SMEs tal-UE u d-diffikultajiet li jistgħu jaffaċċjaw meta jipparteċipaw fi swieq tal-akkwist pubbliku ta’ pajjiżi terzi. Jilqa’ f’dan ir-rigward l-fatt li l-istrument mhux se japplika għall-offerti sottomessi mill-SMEs tal-UE u l-fatt li l-applikazzjoni tiegħu se tkun limitata għal kuntratti li jaqbżu ċertu livell limitu.

1.7.2016   

MT

Il-Ġurnal Uffiċjali tal-Unjoni Ewropea

C 240/43

1.

jenfasizza li s-Suq Uniku, bħala l-bażi fundamentali tal-moviment liberu tal-merkanzija, tas-servizzi, tal-persuni u tal-kapital fl-Unjoni Ewropea (UE), huwa s-suċċess ekonomiku ewlieni tal-UE u għen sabiex jiżdiedu l-prosperità u l-impjiegi. Sabiex jaħdem aħjar minn hekk huma meħtieġa aktar riformi strutturali u ekonomiċi sabiex jintlaħqu l-miri stabbiliti għat-tkabbir u l-impjiegi fl-Istrateġija Ewropa 2020, kif ukoll l-għanijiet stabbiliti fl-Artikolu 3 tat-Trattat dwar l-UE fir-rigward tal-iżvilupp sostenibbli, ekonomija soċjali tas-suq kompetittiva ħafna u l-koeżjoni ekonomika, soċjali u territorjali; jinsisti wkoll li s-Suq Uniku, l-Ftehim ta’ Schengen dwar il-Moviment Liberu tal-Persuni u t-tlestija tal-Unjoni Ekonomika u Monetarja tal-Ewropa (1) huma marbutin b’mod inseparabbli; iqis, għalhekk, li t-tlestija u l-implimentazzjoni tas-Suq Uniku huma ta’ importanza kbira għall-isfruttament tal-potenzjal sħiħ tas-Suq Uniku;

2.

jaqbel li, sabiex tkun aktar effettiva, l-Istrateġija tas-Suq Uniku aġġornata għandha tkun fuq tliet binarji sabiex: (1) toħloq opportunitajiet għall-konsumaturi, għall-professjonisti u għan-negozji; (2) tħeġġeġ u tippermetti l-modernizzazzjoni u l-innovazzjoni li teħtieġ l-Ewropa; (3) tiżgura li titwettaq b’mod konkret għall-ġid tal-konsumaturi u tan-negozji fil-ħajja ta’ kuljum. Tali strateġija fuq tliet binarji u integrata għandha timmira li tindirizza l-isfidi mqajma mill-effetti kkombinati tal-bidla teknoloġika u l-globalizzazzjoni mgħaġġla u l-uniku adattament gradwali tas-sistemi skolastiċi u tat-taħriġ;

3.

jappoġġja s-sejħa tal-Parlament Ewropew għall-inklużjoni tal-pilastru tas-Suq Uniku fis-Semestru Ewropew (2), b’sistema ta’ monitoraġġ u evalwazzjoni regolari tal-integrazzjoni tas-Suq Uniku, li tkun komposta minn sett ta’ indikaturi kwantitattivi u kwalitattivi, valutazzjoni komparattiva, reviżjonijiet bejn il-pari u skambju tal-aqwa prattiki;

4.

iqis li l-Istrateġija tas-Suq Uniku hija maħsuba biex tikkumplementa u tiġi kkumplementata mill-inizjattivi tal-UE dwar l-investiment, il-kompetittività u l-aċċess għall-finanzi, is-suq intern għall-enerġija, is-Suq Uniku Diġitali u l-mobbiltà tal-ħaddiema, filwaqt li għaldaqstant jiddispjaċih li l-komunikazzjoni tal-Kummissjoni ma kinitx akkumpanjata mill-proposta għal reviżjoni tad-direttiva dwar l-istazzjonar tal-ħaddiema, li kien maħsub biex ikun waħda mill-inizjattivi ewlenin ta’ din il-Kummissjoni għall-indirizzar tad-dumping soċjali u t-tisħiħ tad-drittijiet tal-ħaddiema u l-garanzija tan-negozjar kollettiv bħala qafas għar-relazzjonijiet industrijali. Din is-sitwazzjoni m’għandhiex twassal għal nuqqas ta’ kontinwità bejn il-pjan direzzjonali għall-approfondiment tas-suq uniku u l-inizjattivi meħtieġa għat-titjib tal-kundizzjonijiet għall-mobilità tas-suq tax-xogħol u għandha tiġi indirizzata fil-proċedura leġislattiva dwar il-proposta tal-Kummissjoni Ewropea li temenda d-Direttiva dwar l-istazzjonar tal-ħaddiema (Direttiva 96/71) imressqa fit-8 ta’ Marzu;

5.

jenfasizza li s-Suq Uniku huwa politika trażversali li tinteraġixxi ma’ ħafna politiki settorjali tal-UE. Il-KtR għalhekk kien qed jistenna li l-Komunikazzjoni dwar l-Istrateġija tas-Suq Uniku tal-Kummissjoni tiddeskrivi b’mod aktar ċar l-interazzjonijiet b’mod partikolari mal-politika kummerċjali u tal-kompetizzjoni. Fir-rigward tal-politika kummerċjali, kien ikun leġittimu li wieħed jistenna li qabel ma jingħata Status ta’ Ekonomija tas-Suq (MES) liċ-Ċina sal-aħħar tal-2016, il-Komunikazzjoni tħabbar li għandha ssir analiżi tal-impatt ekonomiku, soċjali u territorjali u l-impatt fuq is-Suq Uniku ta’ deċiżjoni bħal din;

6.

jitlob li jitlesta s-Suq Uniku Digitali li għandu l-potenzjal li jnaqqas id-distakk diġitali bejn ir-reġjuni, u biex ikompli jtejjeb l-aċċess għall-informazzjoni, iġib titjib fl-effiċjenza, u jintroduċi mudelli ta’ negozju u amministrattivi mtejba; jenfasizza li l-kummerċ elettroniku u l-akkwist elettroniku jiġġeneraw benefiċċji tanġibbli għall-kosumaturi, il-gvern elettroniku jiffaċilita l-konformità online u l-aċċess għal opportunitajiet ta’ xogħol u negozju kemm għaċ-ċittadini kif ukoll għan-negozji, u b’hekk jikkontribwixxi għat-tkabbir ekonomiku;

7.

jiġbed l-attenzjoni għar-rwol speċifiku tar-Raggruppamenti Ewropej ta’ Kooperazzjoni Territorjali (REKT) bħala parteċipanti transkonfinali fis-Suq Uniku, kif ukoll ta’ strutturi transkonfinali oħrajn bħar-Raggruppamenti Ewropej ta’ Interess Ekonomiku jew is-Soċjetà Kooperattiva Ewropea. Dawn huma laboratorji għas-Suq Uniku u jistgħu jgħinu fl-identifikazzjoni tal-ostakoli tas-Suq Uniku, minħabba li jistgħu jidentifikaw u jindirizzaw lokalment kwistjonijiet bħall-akkwist pubbliku, il-kuntratti transkonfinali, it-tassazzjoni doppja tal-persunal, il-liġi applikabbli, il-protezzjoni tal-konsumaturi u s-servizzi transkonfinali;

8.

jiddeplora n-nuqqas ta’ azzjonijiet speċifiċi favur is-settur tal-artiġjanat u n-nuqqas ta’ referenza diretta għalih, minkejja li hemm aktar minn sittax-il miljun intrapriża tal-artiġjanat li jaqdu rwol importanti fil-ħolqien tal-impjiegi u l-iżvilupp ekonomiku;

9.

itenni li sabiex jiġu ddeterminati l-effetti tal-politiki tal-UE, l-Istati Membri u l-Unjoni Ewropea jeħtieġu jimplimentaw Valutazzjonijiet tal-Impatt Territorjali bħala prattika standard fil-proċess tat-tfassil ta’ politika kif ukoll fil-programmazzjoni u l-implimentazzjoni tal-politiki settorjali (3);

10.

jilqa’ l-inizjattiva mħabbra mill-Kummissjoni dwar l-aġenda Ewropea għall-ekonomija kollaborattiva, inkluż il-gwida dwar kif id-dritt tal-Unjoni japplika għal dan is-settur ġdid, l-ambizzjoni tiegħu li jappoġġja l-potenzjal tiegħu f’termini ta’ tkabbir sostenibbli u l-ħolqien tal-impjiegi u kif ukoll l-intenzjoni tiegħu li jeżamina sa liema punt id-dispożizzjonijiet tad-Direttiva dwar is-Servizzi, id-Direttiva dwar il-Kummerċ elettroniku u l-acquis dwar il-protezzjoni tal-konsumatur tal-UE huma applikabbli għal ekonomija kollaborattiva u jekk hemmx bżonn għal aktar regolamentazzjoni b’mod partikolari fir-rigward tad-drittijiet tas-sigurtà soċjali u tal-impjieg tal-ħaddiema, in-normi tas-saħħa u s-sigurtà, it-tassazzjoni u l-liċenzjar; itenni l-konvinzjoni tal-KtR li kwalunkwe inizjattiva regolatorja iebsa għandu jkollha approċċ settorjali u tqis l-iskala tal-inizjattiva ta’ ekonomija kollaborattiva bħala kriterju għat-tfassil ta’ linji regolatorji;

11.

jirrimarka li l-valutazzjonijiet ex-ante tal-impatt territorjali u urban jistgħu jitmexxew u jiġu żviluppati bi sħubija mill-qrib mal-livelli kollha tal-gvern bil-għan li jiġu identifikati l-protokolli metodoloġiċi. Jinnota li l-valutazzjonijiet għandhom jiġu ddisinjati b’tali mod li ma jkunux ta’ piż bla bżonn għall-promozzjoni u l-iżvilupp ta’ attivitajiet ġodda, kif ukoll ma joħolqux piżijiet addizzjonali fuq l-attivitajiet ta’ xogħol ta’ kuljum tal-impriżi eżistenti, irrispettivament mid-daqs tagħhom;

12.

jappoġġja l-intenzjoni tal-Kummissjoni li tippreżenta inizjattivi mmirati biex inaqqsu l-piż kbir li jpoġġu l-obbligi tar-rappurtar u r-reġistrazzjoni tal-VAT fuq l-SMEs u l-istart-ups, b’mod partikolari meta joperaw bejn il-fruntieri; jirrimarka li s-semplifikazzjoni tar-rekwiżiti tar-rappurtar tal-VAT għall-SMEs u għall-mikro-intrapriżi kienet identifikata wkoll bħala opportunità għal aktar azzjoni fil-konsultazzjoni tar-Reġjuni Intraprenditorjali Ewropej (EER) li saret mill-KtR f’April 2014. Dan huwa partikolarment rilevanti għall-kummerċ bl-imnut, il-lukandi u r-ristoranti, fejn l-interess ta’ operaturi ta’ daqs żgħir li joperaw bejn il-fruntieri jista’ jiġi ostakolat minn burokrazija goffa wisq, bi ħsara għal diversi kategoriji ta’ konsumaturi;

13.

jirrikonoxxi li l-fattur ta’ sostenn għall-SMEs kellu rwol tal-akbar importanza biex jippermetti lill-SMEs ikollhom aċċess għall-finanzjamenti u jittama li dan l-istabbiliment jiġi estiż għas-snin li ġejjin;

14.

jilqa’ l-intenzjoni tal-Kummissjoni li tressaq proposta leġislattiva dwar falliment kummerċjali sabiex ikun żgurat li l-imprendituri jingħataw it-tieni ċans. Dan l-approċċ x’aktarx li jrawwem l-intraprenditorija u l-innovazzjoni fl-Ewropa, hekk kif imprendituri li joperaw f’ambjent li ma jistigmatizzax il-falliment ikunu aktar inklinati li jidħlu għal proġetti aktar innovattivi; jinnota li l-qafas legali għal falliment għandu, madankollu, jiżgura li jiġi inkoraġġit biss it-teħid ta’ riskju responsabbli u li tiġi pprovduta ċertezza u ġustizzja lill-kredituri;

15.

jitlob lill-Kummissjoni sabiex timmonitorja bir-reqqa l-applikazzjoni effettiva mill-Istati Membri u mill-awtoritajiet sottonazzjonali rilevanti tal-miżuri ta’ traspożizzjoni tad-Direttiva 2011/7/UE dwar il-ġlieda kontra l-ħlas tard fi tranżazzjonijiet kummerċjali u biex tibda proċeduri ta’ ksur rapidi fil-każ li d-direttiva ma tiġix applikata kif suppost minħabba li l-SMEs ħafna drabi ma jkunux f’pożizzjoni li jinfurzaw id-drittijiet tagħhom taħt din id-direttiva kontra kumpanija dominanti jew awtorità pubblika;

16.

iħeġġeġ lill-Kummissjoni biex tapplika l-prinċipju “Aħseb l-ewwel fiż-Żgħir”, jiġifieri li titfassal leġislazzjoni biss meta jkun neċessarju u b’kunsiderazzjoni tal-iżgħar intrapriżi. Jistieden lill-Kummissjoni tissorvelja l-applikazzjoni u l-introduzzjoni effettiva tal-prinċipju “darba biss” mill-Istati Membri sabiex jitnaqqsu l-piżijiet amministrattivi żejda għall-SMEs u ċ-ċittadini;

17.

jistieden lill-Kummissjoni biex tiffaċilità l-parteċipazzjoni diretta fir-riskju ta’ self u l-aċċess għal għodod innovattivi għall-ġbir tal-kapital ta’ riskju bħall-finanzjament kollettiv;

18.

jistieden lill-Kummissjoni biex tagħti informazzjoni aħjar għall-SMEs b’mod aktar aċċessibbli permezz tal-organizzazzjonijiet rappreżentattivi tal-SMEs;

19.

jenfasizza l-importanza tal-ftuħ ulterjuri tas-swieq tas-servizzi fl-Ewropa minħabba l-livell relattivament baxx ta’ kummerċ transkonfinali fis-servizzi, l-importanza dejjem tikber tas-servizzi bħala sehem tal-PDG u x-xogħol fir-reġjuni u l-bliet tal-Ewropa u x-xejra lejn aktar integrazzjoni tas-servizzi fl-offerta ta’ valur tal-industrija; jirrikonoxxi l-isforzi tal-Kummissjoni sabiex tiftaħ is-swieq tas-servizzi fil-parametri tad-Direttiva dwar is-Servizzi u jenfasizza li l-ftuħ ulterjuri tas-swieq tas-servizzi għandu jsir fi ħdan l-istandards leġislattivi u ta’ kwalità diġà milħuqa;

20.

jaqbel mal-ħtieġa li jiġu vvalutati u indirizzati minn naħa l-lakuni regolatorji, u min-naħa l-oħra l-problema ta’ duplikazzjoni ta’ regolamenti jew regoli konfliġġenti f’ċerti oqsma tas-Suq Uniku u li jitneħħew l-ostakoli persistenti għall-moviment liberu, li jipprevjenu lin-negozji u lill-konsumaturi Ewropej milli jisfruttaw il-potenzjal sħiħ tas-Suq Uniku;

21.

jirrakkomanda li l-“qafas analitiku li jrid jintuża mill-Istati Membri meta jirrevedu r-regolamenti eżistenti jew jipproponu regolamenti addizzjonali” jinkludi kriterji għall-klassifikazzjoni ta’ settur bħala “settur ta’ prijorità”. Tabilħaqq, fil-Komunikazzjoni ma tingħata ebda spjegazzjoni għala ċerti servizzi għandhom jingħataw prijorità (4);

22.

Kif indikat minn studju riċenti tal-Parlament Ewropew ippreżentat quddiem il-Kumitat għas-Suq Intern u l-Ħarsien tal-Konsumatur, jirrikonoxxi li sospensjoni fit-tul tal-ftehim ta’ Schengen twassal għal konsegwenzi negattivi konsiderevoli għal sa seba’ oqsma ekonomiċi: il-PDG, il-kummerċ, l-investimenti diretti barranin, l-impjiegi, il-mobilità, il-konsum u l-SMEs.Għalhekk, bil-għan li jitħares is-suq uniku u l-kisbiet importanti miksuba tul is-snin, huwa tal-akbar importanza li jinżammu dawn l-istandards (5);

23.

jappoġġja l-impenn tal-Kummissjoni li timmodernizza s-sistema tal-istandards b’kollaborazzjoni mal-komunità tal-istandardizzazzjoni, minħabba li l-istandards urew li kienu effettivi ħafna sabiex jappoġġjaw l-integrazzjoni tas-suq, permezz tal-impatt tagħhom fuq l-ispejjeż tal-industrija, l-interoperabbiltà, l-aċċess għas-swieq u l-esportazzjoni; kwalunkwe riforma tal-istandards trid tqis il-ħtiġijiet tal-produtturi żgħar u ta’ daqs medju;

24.

jilqa’ l-fatt li fis-16 ta’ Marzu 2016 il-Kummissjoni ppreżentat “Komunikazzjoni dwar l-isfidi li taffaċċja l-industrija tal-azzar” anke jekk il-KtR kien qed jistenna li l-komunikazzjoni dwar is-Suq Uniku tal-Kummissjoni tkun tindirizza diġà s-segwitu għall-“Pjan ta’ Azzjoni għal industrija tal-azzar kompetittiva u sostenibbli fl-Ewropa” ta’ Ġunju 2013 peress li l-isfidi li taffaċċja l-industrija tal-azzar għandhom x’jaqsmu ma’ ħafna aspetti tal-Istrateġija għas-Suq Uniku; jiġbed l-attenzjoni għall-fatt li l-KtR se jiddedika opinjoni speċifika għall-isfidi li taffaċċja l-industrija tal-azzar li b’mod partikolari se tibni fuq ir-riżoluzzjoni tal-Parlament Ewropew tas-16 ta’ Diċembru 2015 dwar l-iżvilupp ta’ Industrija Ewropea sostenibbli tal-metalli komuni (6);

25.

kif diġà indika f’opinjoni reċenti (1), itenni l-appell tiegħu lill-Kummissjoni sabiex tippreżenta proposta leġislattiva għall-protezzjoni tal-indikazzjonijiet ġeografiċi għal prodotti mhux agrikoli fl-UE; dan jgħin biex iżid ir-rikonoxximent u l-kwalità tal-prodotti;

26.

jirrikonoxxi li l-prinċipju ta’ rikonoxximent reċiproku huwa kruċjali għall-prodotti li mhumiex koperti mill-istandards tal-UE, iżda li l-applikazzjoni tiegħu hija irregolari u jeħtieġ li tittejjeb sabiex jiġi pprovdut qafas regolatorju aktar prevedibbli għall-moviment liberu tal-prodotti. Huwa mixtieq ukoll li fl-istess ħin għal tali prodotti tiġi assigurata informazzjoni korretta lill-konsumaturi, li jingħata r-rikonoxximent xieraq lill-prodotti ta’ kwalità u li tiġi indikata l-oriġini tal-prodotti;

27.

jenfasizza l-appoġġ tiegħu għall-miżuri maħsuba biex iżommu l-prodotti illegali u mhux konformi barra mis-suq tal-UE fid-dawl tal-inċidenza dejjem tikber ta’ dan il-kummerċ, li jxekkel il-kompetizzjoni u jpoġġi lill-konsumaturi f’riskju. Sorveljanza aktar stretta ta’ attivitajiet ta’ falsifikazzjoni għandha tagħti kontenut prattiku lill-għan ta’ “Noħolqu l-opportunitajiet għall-konsumaturi, il-professjonisti u n-negozji”, b’mod partikolari għall-SMEs;

28.

jilqa’ l-approċċ ġenerali stabbilit fil-Komunikazzjoni b’rabta mal-akkwist pubbliku; jappoġġja b’mod aktar speċifiku n-netwerking bejn il-korpi ta’ analiżi tal-prim’istanza, l-assistenza teknika għall-Istati Membri u għodod ta’ monitoraġġ imtejba, li għandhom jgħinu wkoll lill-awtoritajiet lokali u reġjonali fl-implimentazzjoni ta’ regoli dwar l-akkwist pubbliku; f’dan ir-rigward jiġbed l-attenzjoni għar-rwol possibbli taċ-ċentri tal-għarfien fil-qasam tal-akkwist pubbliku bħala sorsi ta’ għajnuna, konsulenza u informazzjoni;

29.

jaqbel ukoll mal-prinċipju tat-tnedija ta’ mekkaniżmu volontarju ta’ akkwist pubbliku ex-ante għal proġetti infrastrutturali fuq skala kbira, iżda jistaqsi għaliex il-Kummissjoni ffissat limitu massimu daqstant għoli ta’ EUR 700 miljun. Għalhekk, jissuġġerixxi li l-limitu massimu jitbaxxa b’mod sinifikanti, b’mod partikolari fl-isfond tar-rapport speċjali 10/2015 tal-Qorti Ewropea tal-Awdituri dwar “L-isforzi sabiex jiġu indirizzati l-problemi bl-akkwist pubbliku fin-nefqa ta’ Koeżjoni tal-UE għandhom jiġu intensifikati”;

30.

madankollu jitlob li r-reġistru tal-kuntratti u l-istrumenti ta’ analiżi tad-data, previsti mill-Kummissjoni għal raġunijiet ta’ trasparenza, jitfasslu b’tali mod li ma jwasslux għal spejjeż żejda għall-awtoritajiet kontraenti pubbliċi. Il-Kummissjoni Ewropea diġà għandha għad-dispożizzjoni tagħha, minħabba l-obbligu li l-kuntratti li jaqbżu ċertu limitu jingħataw wara sejħa għall-offerti mal-UE kollha, kwantità konsiderevoli ta’ data, tant li mhuwiex meħtieġ li jiġu introdotti obbligi oħrajn ta’ informazzjoni u statistika mal-UE kollha;

31.

jilqa’ l-isforzi tal-Kummissjoni li tivvaluta kontinwament l-implimentazzjoni mill-pajjiżi tal-UE tad-Direttiva dwar is-Servizzi u li twettaq għadd ta’ eżerċizzji ta’ evalwazzjoni (“reviżjonijiet bejn il-pari”) sabiex tneħħi l-bqija tal-ostakoli għall-kummerċ transkonfinali tas-servizzi fl-UE, u tiġi kkunsidrata b’mod partikolari anki l-kwistjoni tal-hekk imsejjaħ “imblukkar ġeografiku tas-servizzi diġitali”; madankollu, huwa tal-fehma li l-eżitu ta’ dawn l-eżerċizzji ma għandux jiġi prekluż mill-Kummissjoni, billi tgħid li ma hemm ebda pjan li tiġi riveduta jew emendata d-Direttiva dwar is-Servizzi.

32.

ifakkar li l-Punti ta’ Kuntatt Waħdieni (PKW) huma element essenzjali tad-Direttiva dwar is-Servizzi. Madankollu, diversi aspetti li huma relatati mill-qrib mal-provvista tas-servizzi mhumiex koperti mid-direttiva (eż. l-istazzjonar tal-ħaddiema, kwistjonijiet fiskali, dispożizzjonijiet tas-sigurtà soċjali, kwalifiki professjonali). Dawn l-aspetti għandhom madankollu jiġu inklużi fis-servizz tal-informazzjoni tal-PKW sabiex jipprovdu punti uniċi ta’ servizz b’valur miżjud reali. Barra minn hekk, ikun importanti li tiġu pprovduta l-informazzjoni mill-inqas bl-Ingliż flimkien mal-lingwa nazzjonali;

33.

iqis li l-inizjattiva tal-passaport tas-servizzi għandha tkun limitata għal servizzi rregolati mid-Direttiva 2006/123/KE dwar is-servizzi fis-suq intern, jiġifieri, mhux applikabbli għall-operaturi tas-servizzi pubbliċi, sakemm ma jwettqux attivitajiet kummerċjali jew għal servizzi li ma għandhomx impatt transkonfinali u huma soġġetti għar-regolazzjoni fil-livell nazzjonali, reġjonali jew lokali;

34.

jilqa’ l-inizjattiva tal-Kummissjoni għall-prevenzjoni ta’ diskriminazzjoni kontra l-utenti u l-kumpaniji fil-kummerċ transkonfinali, partikolarment il-kummerċ fuq l-Internet; jinsisti madankollu li ċerti vantaġġi, jiġifieri prezzijiet aktar baxxi, li mhumiex rilevanti għas-suq uniku, jistgħu jiġu riżervati għal ċerti benefiċjarji ta’ servizzi, jekk dan ikun imsejjes fuq kriterji oġġettivi leġittimi;

35.

jiddispjaċih li l-Komunikazzjoni tal-Kummissjoni ma tħabbar ebda proposta fir-rigward tal-ekonomija soċjali, għalkemm din għandha rwol ewlieni fl-iżvilupp ekonomiku u soċjali tal-UE, fejn hija responsabbli għal żewġ miljun intrapriża, inklużi assoċjazzjonijiet, kooperattivi u assoċjazzjonijiet mutwi u tipprovdi 11-il mijun impjieg, jiġifieri 10 % tan-negozji kollha fl-Ewropa u 6 % tal-popolazzjoni li taħdem; f’dan l-isfond, ifakkar li l-KtR “(ħeġġeġ) lill-Kummissjoni Ewropea biex tippreżenta qafas legali li jkun ikopri sensiela ta’ definizzjonijiet komuni applikabbli għall-forom Ewropej differenti tal-ekonomija soċjali, jiġifieri, għas-soċjetajiet kooperattivi, il-fondazzjonijiet, l-assoċjazzjonijiet mutwi u l-assoċjazzjonijiet biex jippermetti lill-intrapriżi tal-ekonomija soċjali joperaw fuq bażi legali sikura u b’hekk japprofittaw mill-benefiċċji tas-suq intern u l-libertà tal-moviment (…)” (2);

36.

jafferma li l-ekonomija soċjali għandha tiġi appoġġata mhux biss permezz tal-istabbiliment ta’ qafas legali globali f’livell Ewropew, iżda anke permezz tal-iżvilupp ta’ programmi speċifiċi ta’ finanzjament;

37.

jiddispjaċih li l-Komunikazzjoni tal-Kummissjoni ma tressaq ebda proposta b’rabta ma’ SGEI, eż. b’rabta mar-rekwiżiti ta’ kwalità, b’mod partikolari fir-rigward tal-koeżjoni soċjali u territorjali, għalkemm l-Artikolu 14 tat-Trattat dwar il-Funzjonament tal-UE jipprovdi l-bażi legali għaliha; jesprimi tħassib li, fir-rigward ta’ SGEI, l-enfasi tal-Kummissjoni hija ristretta biss għall-kwistjonijiet ta’ għajnuna mill-Istat, għalkemm dawn is-servizzi għandhom rwol ewlieni fis-suq intern. Jinsisti li fl-għoti ta’ SGEI, huwa ta’ importanza kbira li l-obbligi ta’ servizz pubbliku jkunu bbażati fuq linji gwida trasparenti u kontrolli effettivi u li jkollhom l-għan li jipprovdu servizzi ta’ kwalità għolja u kosteffettivi; jitlob għalhekk li skont it-tqassim tal-kompetenzi rispettivi bejn l-UE, l-Istati Membri, ir-Reġjuni u l-awtoritajiet lokali, il-Kummissjoni Ewropea żżid l-isforzi tagħha biex tippromovi s-Servizzi ta’ Interess Ekonomiku Ġenerali fil-qafas tal-UE, sabiex titjieb il-kwalità tal-ħajja taċ-ċittadini Ewropej f’kull livell;

38.

jinnota li l-implimentazzjoni minn April 2016 tal-qafas komuni għall-għoti ta’ konċessjonijiet hija b’mod partikolari sensittiva fil-qasam ta’ servizzi infrastrutturali (portijiet, ferroviji u awtostradi) u ewlenija għall-ikkompletar tas-Suq Uniku minħabba li l-kompetizzjoni ġusta hija prekwiżit sabiex jiġu żgurati aħjar id-drittijiet tal-konsumatur u jiġu massimizzati l-benefiċċji, għall-konsumaturi, għall-impriżi li għandhom mandat u għall-awtorità konċedenti;

39.

jappella biex titqies il-kwistjoni insulari jew remota fir-rigward tal-iżvantaġġi kummerċjali, speċjalment fl-ispejjeż addizzjonali tat-trasport.

1.7.2016   

MT

Il-Ġurnal Uffiċjali tal-Unjoni Ewropea

C 240/49

1.

jaqbel mal-prinċipju ta’ dan il-programm ta’ appoġġ li għandu l-għan li jipprovdi, fuq bażi volontarja u wara li ssir talba, assistenza teknika għal riformi strutturali fl-Istati Membri, f’oqsma ta’ attività li jikkonċernaw kompetenzi kondiviżi bejn l-Unjoni Ewropea u l-Istati Membri; iqis li fattur għas-suċċess ta’ dan il-programm huma l-koordinazzjoni effikaċi mal-programmi ta’ assistenza teknika eżistenti fil-livell tal-UE u tal-Istati Membri benefiċjarji, u l-parteċipazzjoni attiva tal-awtoritajiet lokali u reġjonali f’din il-koordinazzjoni bl-għan li tingħata viżjoni iktar territorjali tal-programm;

2.

iqis li t-titjib tal-kapaċità amministrattiva fil-livelli nazzjonali, reġjonali u lokali tal-gvern tal-Istati Membri li jressqu t-talba għandu jkun l-għan ewlieni ta’ dan il-programm ta’ appoġġ u li għandu jsir wkoll parametru għar-reviżjoni attwali tal-Istrateġija Ewropa 2020;

3.

jitlob li l-programm ikun ibbażat fuq dokument strateġiku uniku tal-Unjoni għat-titjib tal-kapaċità istituzzjonali u amministrattiva tal-awtoritajiet pubbliċi fil-livelli kollha ta’ gvern; jistieden lill-Kummissjoni tipproponi dan id-dokument uniku li, fost oħrajn, għandu jistabbilixxi b’mod trasparenti u ekwu l-kriterji li se jiġu adottati għall-prijoritizzazzjoni tal-interventi tal-programm u l-allokazzjoni tar-riżorsi disponibbli, kif ukoll il-kriterji u l-mekkaniżmi ta’ koordinazzjoni tal-interventi eżistenti, kemm fil-livell tal-Unjoni, inkluż dak tal-programm, kif ukoll fil-livelli nazzjonali, reġjonali u lokali, fir-rispett sħiħ tal-prinċipji tas-sussidjarjetà u l-proporzjonalità b’garanzija tal-awtonomija u l-ispeċifiċità tal-livelli territorjali differenti. Fuq din il-bażi, għandhom jitfasslu dokumenti uniċi tal-istess tip għall-Istati Membri benefiċjarji, f’kooperazzjoni mal-Istat Membru u b’konformità mal-prinċipju tas-sħubija;

4.

jenfasizza li, abbażi tad-diviżjoni tas-setgħat u tal-kompetenzi fis-seħħ f’kull Stat Membru, kif ukoll ir-rakkomandazzjonijiet speċifiċi għall-pajjiżi li ta’ spiss huma indirizzati lill-awtoritajiet lokali jew reġjonali, il-programm għandu jkun aċċessibbli għall-awtoritajiet lokali u reġjonali; jistieden lill-Kummissjoni tiżgura li dan huwa minnu, pereżempju billi tivverifika jekk, filwaqt li t-talbiet ta’ assistenza teknika mressqa mill-awtoritajiet nazzjonali jkunu jkopru oqsma ta’ kompetenza tal-awtoritajiet reġjonali u lokali, dawn tal-aħħar ikunux ġew involuti fit-tfassil tal-proġett ta’ riforma strutturali inkwistjoni, f’konformità mal-kuntest istituzzjonali ta’ kull pajjiż;

5.

iqis li l-proposta għal Regolament tkun konformi mal-prinċipju tas-sussidjarjetà jekk l-assistenza teknika ssir disponibbli f’oqsma li jaqgħu taħt il-kompetenza kondiviża bejn l-Unjoni u l-Istati Membri (ara l-emendi għall-Premessa 6, l-Artikolu 3(1) u l-Artikolu 4. Peress li l-proposta hija bbażata fuq mekkaniżmu volontarju, din ma tqajjem l-ebda kwistjoni dwar il-proporzjonalità;

6.

iqis li huwa essenzjali li l-programm jiġi kkoordinat b’mod effettiv ma’ programmi u strumenti tal-UE li jikkofinanzjaw l-assistenza teknika fil-qafas tal-Fondi Strutturali (Artikolu 59 tar-Regolament Nru 1303/2013 u l-Objettiv Tematiku Nru 11), il-Fond għal Għajnuna Ewropea għall-Persuni l-Aktar fil-Bżonn (FEAD), il-Fond għall-Ażil, il-Migrazzjoni u l-Integrazzjoni (AMIF), il-Fond għas-Sigurtà Interna (ISF) kif ukoll il-programmi settorjali tal-UE (Faċilità Nikkollegaw l-Ewropa, Orizzont 2020, “L-Ewropa għaċ-ċittadini”, “Ġustizzja” u “Drittijiet, Ugwaljanza u Ċittadinanza”);

7.

jinsisti li l-finanzjament tal-programm permezz tat-trasferiment ta’ mezzi bbaġitjati għall-għajnuna teknika taħt il-Fondi Strutturali u ta’ Investiment Ewropej, jista’ jkun biss soluzzjoni tranżitorja. Jopponi wkoll li dawn l-arranġamenti ta’ finanzjament iwittu t-triq biex il-politika ta’ koeżjoni tkun soġġetta għall-eżerċizzju tas-“Semestru Ewropew” billi l-politika ta’ koeżjoni għandha l-leġittimità proprja tagħha imnaqqxa fit-trattati Ewropej.

8.

jenfasizza li ma hemmx soluzzjoni waħda għar-riformi strutturali u li l-prattiki tajba jistgħu biss iservu ta’ ispirazzjoni biex jinstabu soluzzjonijiet adatti għall-kuntesti differenti u l-ispeċifitajiet lokali u reġjonali tal-Istati Membri li jressqu t-talba;

9.

jinkoraġġixxi l-iskambju tal-aħjar prattiki bejn l-Istati Membri fil-qafas tal-implimentazzjoni ta’ riformi strutturali, u jirrakkomanda li s-sħubijiet bejn l-Istati Membri, fl-ambitu tal-programm, jiġu msaħħa permezz tal-involviment ta’ awtoritajiet lokali u reġjonali li jkollhom similaritajiet soċjoekonomiċi jew ġeografiċi, jew soġġetti għal riformi strutturali b’aspetti transkonfinali;

10.

ifakkar li livell għoli ta’ sjieda tar-riformi strutturali fil-livell lokali min-naħa tal-awtoritajiet lokali u reġjonali, l-imsieħba soċjali u l-atturi tas-soċjetà ċivili kkonċernati hija kundizzjoni essenzjali għas-suċċess tal-programm u sabiex dan jikkontribwixxi biex tissaħħaħ il-fiduċja u tiġi promossal-kooperazzjoni bejn l-Istat Membru li jressaq it-talba, il-Kummissjoni u l-Istati Membri l-oħrajn;

11.

jitlob li l-appoġġ għar-riformi strutturali, tingħata attenzjoni sistematika għall-għanijiet ta’ żvilupp sostenibbli, ta’ inklużjoni soċjali, ta’ aċċessibilità għall-kura tas-saħħa, ta’ impjiegi u taħriġ, b’konformità mal-għanijiet tal-Istrateġija Ewropa 2020. Il-KtR jitlob għalhekk li l-evalwazzjonijiet tal-programm ta’ appoġġ imwettqa mill-Kummissjoni jieħdu kunsiderazzjoni ta’ indikaturi oħrajn apparti l-PDG (6);

12.

iqis li l-kofinanzjamenti tal-Istati Membri rigward il-programm ta’ appoġġ jaqgħu taħt il-klawżola ta’ riforma strutturali tal-Patt ta’ Stabbiltà u Tkabbir (7);

13.

jenfasizza li l-programm għandu jitqies bħala programm pilota; jirrakkomanda li titwettaq valutazzjoni tal-mezzi tiegħu fi żmien debitu qabel jibda l-perjodu li jmiss ta’ programmazzjoni finanzjarja fl-2021, sabiex jiġi stabbilit jekk huwiex opportun li l-programm isir permanenti jew le, u, jekk iva, jekk ikunx meħtieġ, fattibbli u ta’ ġid il-ħolqien ta’ fond għal riżorsi proprji allokati għall-appoġġ għal riformi strutturali.

1.7.2016   

MT

Il-Ġurnal Uffiċjali tal-Unjoni Ewropea

C 240/62

1.

ifakkar fl-importanza li jiġu involuti l-awtoritajiet lokali u reġjonali dwar din il-kwistjoni peress li huma l-aktar sensittivi għaliha minħabba r-rwol li għandhom fil-ġlieda kontra t-tibdil fil-klima, u minħabba li min-natura inerenti tagħhom huma l-eqreb istituzzjonijiet għaċ-ċittadini u fuq quddiem biex jimmaniġġjaw emerġenzi ambjentali;

2.

jitlob li l-atturi globali ewlenin kollha (kumpaniji, is-settur finanzjarju, il-gvernijiet, in-Nazzjonijiet Uniti, l-NGOs u s-soċjetà ċivili) jikkollaboraw mal-livelli kollha tal-gvern sabiex ir-reazzjoni għall-emerġenzi ambjentali u klimatiċi tkun koordinata u effettiva, skont ma ħareġ mis-COP21 ta’ Pariġi; jieħu nota f’dan il-kuntest tal-Komunikazzjoni COM(2016) 110 final “The Road from Paris” (Id-Direzzjoni wara Pariġi) li se tiġi analizzata aktar fil-fond minn opinjoni tal-KtR futura; jiddispjaċih, madankollu, għad-dgħjufija relattiva tar-referenza għar-rwol tal-ETS riformata fl-implimentazzjoni tal-ftehim ta’ Pariġi u n-nuqqas ta’ rikonoxximent tad-dimensjoni reġjonali f’dan il-proċess;

3.

iqis pożittiv l-eżitu tas-COP21 f’dak li jirrigwarda r-rieda komuni ta’ kollaborazzjoni biex jintlaħaq tragward ambizzjuż u jaqbel mad-deċiżjoni li kull ħames snin issir reviżjoni tal-miri, b’mod li dawn ikunu dejjem adatti; madankollu jenfasizza li kienet okkażjoni mitlufa sabiex seta’ jiġi indirizzat fil-livell globali r-riskju ta’ rilokazzjoni tal-emissjonijiet u jiġu previsti xi azzjonijiet;

4.

jenfasizza l-importanza ta’ integrazzjoni dejjem iktar b’saħħitha bejn is-sistema tal-ETS u l-politiki ta’ inċentivazzjoni tas-sorsi rinnovabbli u tal-effiċjenza fl-użu tal-enerġija; f’dan ir-rigward jagħraf il-bżonn li tiġi semplifikata u armonizzata l-leġislazzjoni

5.

Id-Direttiva tal-EU ETS hija strument ta’ politika tal-UE taħt il-liġi ambjentali tal-UE. Il-proposta ta’ emenda tad-Direttiva ma tqajjem l-ebda kwistjoni rigward il-konformità tagħha mal-prinċipju ta’ sussidjarjetà, peress li t-trattament tat-tibdil fil-klima u l-effetti tiegħu huma b’mod ċar kwistjoni transkonfinali u għalhekk l-għanijiet ta’ din id-Direttiva ma jistgħux jinkisbu b’mod suffiċjenti mill-Istati Membri, imma aħjar f’livell tal-UE. Il-proposta ta’ emenda tad-Direttiva ma tmurx ukoll lil hinn minn dak li hu neċessarju fil-forma jew kontenut sabiex jintlaħaq l-għan tal-implimentazzjoni tal-mira għat-tnaqqis tal-emissjoni tal-gass serra tal-UE għall-2030 b’mod kost effettiv u b’hekk konformi mal-prinċipju tal-proporzjonalità;

6.

jirrikonoxxi li l-għanijiet stabbiliti fl-Istrateġija Ewropa 2020 huma ta’ prijorità, u jisħaq li dawn ċertament huma kompatibbli mal-għan li tinżamm industrija Ewropea b’saħħitha, kompetittiva u moderna, li għaliha r-regoli mhumiex meqjusa bħala mekkaniżmu ta’ ħsara, iżda bħala inċentiv għal effiċjenza akbar u għall-immodernizzar. Għalhekk jistieden lill-Kummissjoni Ewropea sabiex tirrifletti wkoll fuq il-kunċett ta’ “marka tal-karbonju” tal-prodotti u tivvaluta kif ser tippromovi konsum aktar sostenibbli;

7.

jenfasizza l-importanza li jiġi indirizzat in-nuqqas ta’ ekwilibriku bejn il-kwoti u d-domanda fis-suq tal-kwoti, li jikkontribwixxi biex jiġi garantit prezz tal-karbonju xprunat aktar mit-tnaqqis tal-emissjonijiet għal żmien medju u fit-tul, u b’hekk jitħeġġeġ l-investiment fit-teknoloġiji b’emissjonijiet baxxi tal-karbonju. Jirrimarka wkoll li, ladarba r-riżerva tal-istabbiltà tas-suq għandha l-għan li żżid il-flessibilità tal-provvista tal-kwoti għall-irkant matul il-perjodu ta’ tranżizzjoni bejn fażijiet ta’ negozjar, il-bidliet previsti mill-proposta għal Direttiva għandhom jikkontribwixxu biex jiġu evitati bidliet kbar fin-numru ta’ kwoti għall-irkant u jiżgura distribuzzjoni ġusta tal-għadd ta’ dawn il-kwoti kull sena.

8.

jilqa’ l-proposta tal-Kummissjoni Ewropea li taġġorna r-regolamenti dwar is-sistema ta’ skambju ta’ kwoti ta’ emissjonijiet tal-Unjoni (EU ETS) u l-alternattiva li tuża direttiva bħala strument leġislattiv;

9.

jiġbed l-attenzjoni dwar l-osservazzjonijiet tal-Qorti Ewropea tal-Awdituri, jiġifieri li hemm nuqqasijiet sinifikanti fl-implimentazzjoni tal-ETS UE u jagħmel rakkomandazzjonijiet biex jittejbu l-integrità u l-implimentazzjoni ta’ din is-sistema, inkluż il-kunċett ta’ effiċjenza industrijali li jiżgura l-kompetittività sħiħa tal-ekonomija tal-UE;

10.

ifakkar, kif diġà enfasizzat f’xi opinjonijiet preċedenti (1), li fost il-problemi li kien hemm s’issa fl-implimentazzjoni tal-EU ETS hemm dik tal-livell tal-prezzijiet tal-karbonju li spiss jitqies ineffiċjenti. F’dan ir-rigward isostni li l-għan tal-UE għandu jkun li tippromovi prezzar ġust fuq livell internazzjonali u tipprevjeni l-varjazzjonijiet għal skopijiet ta’ spekulazzjoni;

11.

ifakkar li d-Direttiva li tistabbilixxi s-sistema tal-EU ETS hija parti minn sistema aktar kumplessiva ta’ miżuri u ma għandhiex teskludi l-possibbiltà li l-Istati individwali jistabbilixxu wkoll taxxa fuq il-karbonju, bil-għan li jippromovu l-innovazzjoni u joħolqu vantaġġi kompetittivi, kif diġà qed isir fin-Norveġja u l-Isvezja, pereżempju;

12.

jaqbel mal-prinċipju li s-setturi kollha tal-ekonomija, inklużi dawk mhux koperti mis-sistema tal-EU ETS, għandhom jikkontribwixxubiex jitnaqqsu l-emissjonijiet, billi jtejbu s-sostenibbiltà ambjentali u fl-istess waqt jiggarantixxu s-sostenibbiltà soċjali. Għaldaqstant, iħeġġeġ lill-Istati Membri jżidu l-isforzi tagħhom diretti lejn is-setturi li mhumiex koperti mill-EU ETS, peress li dawn jikkontribwixxu għal aktar minn 50 % tal-emissjonijiet. F’dan ir-rigward huwa ssuġġerit li tiġi vvalutata reviżjoni tas-sussidji ppjanati fid-diversi setturi, sabiex jixprunaw lis-suq lejn soluzzjonijiet innovattivi u effiċjenti, jew li jiġi estiż in-numru ta’ setturi koperti mill-ETS, pereżempju billi jiġu inklużi l-emissjonijiet ikkawżati mis-settur tat-trasport (bil-baħar u fuq l-art) u mis-settur tal-kostruzzjoni;

13.

jirrakkomanda bil-qawwi li r-riforma tħeġġeġ biex il-mekkaniżmi ta’ kumpens tal-ispejjeż indiretti tal-industrija jkunu armonizzati fl-UE kollha (biex jiġu evitati d-distorsjonijiet tas-suq intern ikkawżati mill-kompetizzjoni reġjonali) u li s-sistema tippremja lildawk bl-aqwa prestazzjoni;

14.

jittama li l-adozzjoni ta’ sistema ETS għaċ-Ċina ppjanata mill-2017 (2) tħeġġeġ anke lil atturi oħrajn fix-xena globali, u b’hekk tħaffef il-konverġenza lejn ekonomija b’żero emissjonijiet ta’ gassijiet serra u twassal għat-tneħħija gradwali tas-sistema ta’ allokazzjoni bla ħlas tal-kwoti. Madankollu, l-ewwel għandhom jiġu kkunsidrati diversi forom ta’ appoġġ u inċentivi biex issir bidla mill-produzzjoni tal-enerġija mill-karburanti fossili għal forom ta’ enerġija rinnovabbli bħala alternattivi għal allokazzjoni mingħajr ħlas.

15.

jinnota bi pjaċir ir-rieda biex jittejbu r-regoli eżistenti biex tissaħħaħ it-trasparenza, permezz ta’ data aġġornata aktar frekwenti, affidabbli u verifikata. Għalhekk jitlob li l-punti ta’ riferiment teknikament u ekonomikament realistiċi jiġu aġġornati qabel il-perjodu ta’ skambju u jiġu stabbiliti fuq data industrijali robusta;

16.

iqis li huwa essenzjali li l-allokazzjoni tal-finanzjament pubbliku b’rabta mal-klima tissokta anke wara l-2020, u jittama li ssir dejjem aktar element ċentrali fil-qafas finanzjarju tal-UE, anke fl-istadju tar-reviżjoni ta’ nofs it-term previst għall-programmi Ewropej ewlenin ta’ finanzjament u, b’mod partikolari, għall-programm Orizzont 2020;

17.

jissuġġerixxi li jintuża l-effett ta’ lieva tal-istrumenti tal-politika esterna Ewropea u tal-politika kummerċjali (b’referenza partikolari għall-ftehimiet ta’ kummerċ ħieles) sabiex jitħaffef il-pass tal-konverġenza tal-Istati terzi lejn is-sistema tal-EU ETS, u b’hekk jippromovu qafas internazzjonali li jgħin biex jintlaħqu miri aktar wesgħin;

18.

jittama li l-estensjoni tal-EU ETS anke għall-emissjonijiet mill-avjazzjoni tkun tista’ tiġi indirizzata malajr kemm jista’ jkun, sabiex tiffavorixxi tnaqqis kontinwu tal-emissjonijiet anke minħabba l-avvanzi teknoloġiċi li jwasslu biex it-trasportaturi Ewropej isiru aktar kompetittivi fuq livell globali u mexxejja tas-sostenibbiltà.

1.7.2016   

MT

Il-Ġurnal Uffiċjali tal-Unjoni Ewropea

C 240/72