30.12.2015   

MT

Il-Ġurnal Uffiċjali tal-Unjoni Ewropea

C 440/1

30.12.2015   

MT

Il-Ġurnal Uffiċjali tal-Unjoni Ewropea

C 440/2

—

wara li kkunsidra l-Artikoli 174 u 176 tat-Trattat dwar il-Funzjonament tal-Unjoni Ewropea, li jistabbilixxu l-objettiv tal-koeżjoni ekonomika, soċjali u territorjali u jiddefinixxu l-istrumenti finanzjarji strutturali biex dan l-objettiv jintlaħaq, u jipprovdu li l-Fond Ewropew għall-Iżvilupp Reġjonali jkun maħsub biex jikkontribwixxi għall-korrezzjoni tal-iskwilibriji reġjonali prinċipali li jeżisti fl-Unjoni,

—

wara li kkunsidra l-Komunikazzjoni tal-Kummissjoni tat-3 ta’ Marzu 2010 bl-isem “Ewropa 2020 Strateġija għal tkabbir intelliġenti, sostenibbli u inklużiv” (COM(2010)2020),

—

wara li kkunsidra r-Riżoluzzjoni tiegħu tal-20 ta’ Mejju 2010 dwar il-kontribut tal-Politika ta’ Koeżjoni għall-kisba tal-objettivi ta’ Lisbona u tal-UE 2020 (1),

—

wara li kkunsidra r-riżoluzzjoni tiegħu tal-14 ta’ Diċembru 2010 dwar il-ksib ta' koeżjoni territorjali, soċjali u ekonomika vera fi ħdan l-UE – kundizzjoni sine qua non għall-kompetittività dinjija? (2),

—

wara li kkunsidra l-Komunikazzjoni tal-Kummissjoni tad-9 ta’ Novembru 2010 intitolata “Konklużjonijiet tal-ħames rapport dwar il-koeżjoni ekonomika, soċjali u territorjali: il-futur tal-politika ta’ koeżjoni” (COM(2010)0642),

—

wara li kkunsidra l-Komunikazzjoni tal-Kummissjoni tat-23 ta’ Novembru 2010 bit-titolu “Aġenda għall-ħiliet ġodda u l-impjiegi: Kontribut Ewropew lejn livell massimu ta' impjiegi” (COM(2010)0682),

—

wara li kkunsidra l-Komunikazzjoni tal-Kummissjoni tas-16 ta’ Diċembru 2010 bit-titolu “Il-Pjattaforma Ewropea kontra l-Faqar u l-Esklużjoni Soċjali: Qafas Ewropew għall-koeżjoni soċjali u territorjali” (COM(2010)0758),

—

wara li kkunsidra l-Komunikazzjoni tal-Kummissjoni tas-26 ta' Jannar 2011 bl-isem “Ewropa li tuża r-riżorsi b'effiċjenza – Inizjattiva ewlenija taħt l-Istrateġija Ewropa 2020” (COM(2011)0021),

—

wara li kkunsidra r-riżoluzzjoni tiegħu tat-23 ta’ Ġunju 2011 dwar is-sitwazzjoni attwali u sinerġiji futuri għal effikaċja akbar bejn il-FEŻR u Fondi Strutturali oħra (3),

—

wara li kkunsidra r-riżoluzzjoni tiegħu tat-8 ta' Ġunju 2011 bit-titolu “Il-PDG u lil hinn minnu – inkejlu l-progress f’dinja li dejjem tinbidel” (4),

—

wara li kkunsidra r-riżoluzzjoni tiegħu tat-8 ta' Ġunju 2011 dwar “Ninvestu fil-ġejjieni: Qafas Finanzjarju Multiannwali (MFF) ġdid għal Ewropa kompetittiva, sostenibbli u inklużiva” (5),

—

wara li kkunsidra r-riżoluzzjoni tiegħu tal-5 ta’ Lulju 2011 dwar il-Ħames Rapport ta’ Koeżjoni tal-Kummissjoni u l-istrateġija għall-politika ta’ koeżjoni ta’ wara l-2013 (6),

—

wara li kkunsidra r-riżoluzzjoni tiegħu tas-27 ta’ Settembru 2011 dwar l-assorbiment tal-Fondi Strutturali u l-Fondi ta’ Koeżjoni: tagħlimiet meħuda għall-politika ta’ koeżjoni futura tal-UE (7),

—

wara li kkunsidra l-proposta għal regolament tal-Parlament Ewropew u tal-Kunsill, tas-6 ta’ Ottubru 2011, li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew koperti mill-Qafas Strateġiku Komuni u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta’ Koeżjoni u li jħassar ir-Regolament (KE) Nru 1083/2006 (COM(2011)0615),

—

wara li kkunsidra l-Proposta għal regolament tal-Parlament Ewropew u tal-Kunsill, tas-6 ta’ Ottubru 2011, dwar dispożizzjonijiet speċifiċi li jikkonċernaw il-Fond Ewropew għall-Iżvilupp Reġjonali, u l-Investiment li għandu fil-mira t-tkabbir ekonomiku u l-impjiegi, u jirrevoka r-Regolament (EC) No 1080/2006 (COM(2011)0614),

—

wara li kkunsidra l-proposta għal regolament tal-Parlament Ewropew u tal-Kunsill, tas-6 ta’ Ottubru 2011, dwar il-Fond Soċjali Ewropew u li jħassar ir-Regolament tal-Kunsill (KE) Nru 1081/2006 (COM(2011)0607),

—

wara li kkunsidra l-proposta għal regolament tal-Parlament Ewropew u tal-Kunsill, tas-6 ta’ Ottubru 2011, dwar Programm tal-Unjoni Ewropea għall-Bidla Soċjali u l-Innovazzjoni (COM(2011)0609),

—

wara li kkunsidra r-riżoluzzjoni tiegħu tal-15 ta' Novembru 2011 dwar il-Pjattaforma Ewropea kontra l-Faqar u l-Esklużjoni Soċjali (8),

—

wara li kkunsidra r-riżoluzzjoni tiegħu tad-9 ta' Lulju 2008 fuq it-tema “Lejn kultura ġdida għall-mobiltà urbana” (9),

—

wara li kkunsidra r-riżoluzzjoni tiegħu tal-24 ta’ Marzu 2009 dwar id-dimensjoni urbana tal-politika ta’ koeżjoni fil-perjodu ġdid ta’ programmar (10),

—

wara li kkunsidra r-riżoluzzjoni tiegħu tat-23 ta’ April 2009 dwar pjan ta' azzjoni għall-mobilità fl-ibliet (11),

—

wara li kkunsidra r-riżoluzzjoni tiegħu tat-23 ta’ Ġunju 2011 dwar l-Aġenda Urbana Ewropea u l-Futur tagħha fil-Politika ta’ Koeżjoni (12),

—

wara li kkunsidra r-riżoluzzjoni tiegħu tat-13 ta' Ottubru 2005 dwar id-dimensjoni urbana fil-kuntest tat-tkabbir (13),

—

wara li kkunsidra r-riżoluzzjoni tiegħu tas-26 ta’ Settembru 2006 dwar l-Istrateġija Tematika dwar l-Ambjent Urban (14),

—

wara li kkunsidra l-Karta ta’ Leipzig dwar il-Bliet Ewropej Sostenibbli, approvata fl-okkażjoni tal-Laqgħa Ministerjali Informali dwar l-Iżvilupp Urban u l-Koeżjoni Territorjali li saret fl-24 u l-25 ta' Mejju 2007 f'Leipzig,

—

wara li kkunsidra d-Dikjarazzjoni ta’ Toledo għall-Iżvilupp Urban, approvata waqt il-Laqgħa Ministerjali Informali li saret f’Toledo fit-22 ta’ Ġunju 2010,

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali (A7-0406/2012),

A.

billi 80 % taċ-ċittadini Ewropej jgħixu f’kuntesti urbani (din il-figura għadha qed tkompli tikber minħabba l-aċċelerazzjoni tal-flussi migratorji minn żoni rurali lejn dawk urbani), u huwa hemmhekk li huma kkonċentrati fil-biċċa l-kbira l-effetti tal-kriżi ekonomika u fejn jinsabu l-isfidi tal-ġlieda kontra t-tibdil tal-klima, tal-ħolqien ta’ postijiet tax-xogħol, tal-benesseri u tal-kwalità tal-ħajja;

B.

billi ż-żoni urbani għandhom ifasslu pjanijiet ta’ azzjoni għall-futur fuq żmien medju u għal żmien fit-tul fl-oqsma tal-koeżjoni ekonomika, soċjali u territorjali sostenibbli;

C.

billi l-ibliet jirrappreżentaw il-mutur tal-ekonomija, tal-produzzjoni u tal-impjiegi, madankollu fl-istess waqt jikkostitwixxu l-kuntest li fih wieħed jiltaqa’ mal-problemi tas-suburbanizzazzjoni, tal-qgħad u, b’mod aktar ġenerali, tal-esklużjoni soċjali u tas-segregazzjoni, u tat-tniġġis ambjentali;

D.

billi ż-żoni urbani b’saħħithom għandhom ukoll influenza pożittiva fuq il-kampanja tal-madwar, u dan jista’ jkollu effetti li jkomplu jinfirxu;

E.

billi jeħtieġ li l-kunċett ta’ periferija urbana jiġi kkunsidrat mill-ġdid biex titbiddel it-tendenza attwali li hemm lejn segregazzjoni spazjali, li twassal għal polarizzazzjoni soċjali;

F.

billi l-proċessi ta’ trasformazzjoni li qed iseħħu bħalissa fit-tessut urban jipproduċu aspettattivi u problemi dejjem akbar li għalihom l-istat tradizzjonalment jipprova jirriżolvi u, għalhekk, jeħtieġu mekkaniżmi għal koeżjoni ekonomika, soċjali u territorjali innovattivi u integrati;

G.

billi f’bosta bliet it-tibdil soċjodemografiku wassal għal ċaqliq tal-popolazzjoni mid-djar tagħhom fiż-żoni urbani aktar antiki lejn oqsma residenzjali ġodda u aktar periferiċi, żoni urbani fit-truf tal-bliet jew sempliċement bliet żgħar ġodda qrib agglomerazzjonijiet kbar;

H.

billi l-inugwaljanza soċjali hija sfida f’ħafna żoni urbani, u billi l-inugwaljanzi bejn il-qwartieri residenzjali spiss huma dovuti għal politiki dwar l-akkomodazzjoni li ma jkunux xierqa u għall-fatt li l-provvedimenti tas-servizzi spiss huma ristretti għaż-żoni li jkunu aktar għanja;

I.

billi konsiderazzjoni mill-ġdid tal-approċċi tradizzjonali tista’ ssir l-okkażjoni biex jiġi varat proċess ta’ sperimentazzjoni urbanistika u ta’ itinerarji proġettwali, imsejsa fuq interpretazzjoni mill-ġdid tal-azzjonijiet ta’ ppjanar tal-ispazji, il-ħtiġijiet komunitarji u l-involviment taċ-ċittadini;

1.

Jenfasizza li l-mudell ta’ żvilupp lokali jirrappreżenta punt ta’ saħħa ewlenija tal-politika ta’ koeżjoni peress li fatturi ta’ mobilità deċiżivi jinkoraġġixxi s-selezzjoni tal-aħjar għażliet li huma l-eqreb għaċ-ċittadini, l-azzjonijiet konġunti u l-miżuri l-aktar koerenti, effikaċi u effiċjenti, filwaqt li jagħti, barra minn hekk, viżibilità akbar lill-interventi komunitarji f’dawk iż-żoni tal-UE li jinsabu quddiem sfidi aktar diffiċli;

2.

Jitlob li jkun hemm fażi regolatorja ġdida tal-UE konnessa ma’ pjan għas-salvagwardja u r-riġenerazzjoni taż-żoni urbani, li – filwaqt li tirrispetta l-prinċipju tas-sussidjarjetà – tkun tista’ tipprovdi l-bażi ġuridika meħtieġa, tiddefinixxi l-għanijiet komuni u kondiviżi fuq perjodu medju u fit-tul, u tagħmel l-aħjar użu possibbli mill-fondi tal-politika ta’ koeżjoni;

3.

Jittama li jittieħdu azzjonijiet immirati biex jitlestew għalkollox u jiġu restawrati l-partijiet li diġà jeżistu fl-ibliet, inklużi l-kwartieri residenzjali emarġinati, biex issir il-konverżjoni funzjonali ta' spazji li m'għadhomx jintużaw u żoni ta’ żvilupp mill-ġdid, it-tisħiħ, permezz ta’ proċess ta’ żvilupp dinamiku, tal-attrattiva tal-postijiet fejn jgħixu n-nies, u biex il-komunità tingħata lura spazji ta' simboliżmu qawwi u li jkunu storikament għanja li jkunu tilfu l-funzjoni oriġinali tagħhom u li ftit ftit ġew ittraskurati, filwaqt l jipprwovu l-wirt kulturali;

4.

Jitlob li jiġu mmobilizzati riżorsi kulturali u ekonomiċi, filwaqt li bħala prijorità wieħed jassumi s-sostenibilità soċjali tat-trasformazzjoni urbana, u b’hekk jingħata kontribut lis-solidarjetà urbana, lill-inklużjoni soċjlai u lill-integrazzjoni tal-gruppi vulnerabbli u emarġinati fiż-żoni urbani, bil-għan li jiġi sfruttat għalkollox il-potenzjal tal-iżvilupp fil-għarfien li l-proċessi ta’ riġenerazzjoni urbana għandhom ir-riskju li jobżqu ’l barra t-taqsimiet aktar dgħajfa tal-popolazzjoni; jenfasizza, għalhekk, il-ħtieġa li l-abitanti jiġu involuti mill-qrib mill-aktar stadju bikri possibbli;

5.

Jenfasizza r-rwol ewlieni li ż-żoni urbani għandhom iwettqu biex jintlaħqu l-objettivi ekonomiċi, soċjali u ambjentali tal-istrateġija Ewropa 2020, u jenfasizza l-fatt li l-Unjoni tista’ tkun kompetittiva globalment jekk il-politika ta’ koeżjoni tisfrutta għalkollox il-potenzjal ta’ żvilupp tar-reġjuni u ż-żoni urbani kollha tagħha;

6.

Jitlob li jkun hemm approċċ integrat li jipprevedi l-interkonnessjoni tas-sistema naturali u ambjentali ma’ dik storika-kulturali u ma' dik soċjo-produttiva, filwaqt li jiġi ggarantit l-iżvilupp tan-netwerk infrastrutturali, it-titjib tal-ispazji urbani u t-tkabbir tat-tessut ekonomiku u filwaqt li jiġi promoss użu mħallat tat-territorju, permezz tal-integrazzjoni tal-opri residenzjali u mhux residenzjali, infrastrutturi tanġibbli u sistemi ta' konnettività mhux tanġibbli;

7.

Jenfasizza li jinħtieġu forom ġodda ta’ riġenerazzjoni urbana, li jiffukaw fuq il-ħtieġa li l-komunitajiet ikollhom għad-dispożizzjoni tagħhom spazji pubbliċi, parkijiet, rikreazzjoni, kultura u sport;

8.

Jitlob li jkun hemm dinamika ta' proġettazzjoni fejn ikun hemm parteċipazzjoni u sħubijiet ma' assoċjazzjonijiet u ċittadini biex jiġi ggarantit il-kollegament meħtieġ bejn il-politiki ġenerali u l-ispazji territorjali speċifiċi, filwaqt li jiġi apprezzat il-valur tal-partikolaritajiet, l-identitajiet, il-memorja u l-istorja tagħhom u jiġi msaħħaħ is-sens ta’ appartenenza għall-komunità u l-fiduċja fl-istituzzjonijiet;

9.

Jenfasizza li r-riġenerazzjoni urbana u r-rivitalizzazzjoni ekonomika huma marbuta mill-qrib ħafna bejniethom u li l-kostruzzjoni ta’ lokal attraenti tista’ ssir fattur fil-proċess tal-irkupru ekonomiku; jirrimarka li bil-għan li dan jirnexxi li jsir, ir-riġenerazzjoni urbana għandha ssir flimkien ma' approċċ ġdid li jikkombina flimkien l-isforzi biex tiġi pprevenuta d-deġenerazzjoni urbana, jiġi promoss l-iżvilupp taż-żoni li jinsabu fil-bżonn u ta’ dawk emarġinati u jiġu appoġġjati t-tkabbir ekonomiku lokali u l-ħolqien tal-impjiegi, ikkumplementati minn miżuri soċjali;

10.

Jitlob li jittieħdu azzjonijiet deċiżivi għall-ġlieda kontra l-ineffiċjenza enerġetika, permezz tar-riassenjament funzjonali ta' binjiet u l-kostruzzjoni ta' djar li jkunu effiċjenti fl-użu tal-enerġija, inkluż għall-akkomodazzjoni soċjali; it-tnaqqis tal-konġestjonijiet, il-kontaminazzjoni u l-istorbju b’tali mod li l-belt issir aktar kompetittiva f’dak li jirrigwarda l-problemi ambjentali;

11.

Jisħaq fuq il-ħtieġa li jkun hemm strateġija għall-preservazzjoni u s-salvagwardja tal-wirt urban u tad-djar f’żoni klassifikati bħala li jinsabu f'riskju kbir ta' terremoti u għargħar;

12.

Itenni li hu meħtieġ li jiġi kkoordinat l-użu tal-fondi biex jiġi ggarantit approċċ integrat għall-funzjonament ħażin tal-iżvilupp demografiku, tat-tixjiħ progressiv u tal-konċentrazzjoni urbana; jiġbed l-attenzjoni għall-fatt li l-proġetti tal-fondi strutturali jistgħu jgħinu biex jiġu pprovduti soluzzjonijiet għal problemi serji u għandhom jiffukaw fuq in-nies u jagħtu attenzjoni partikolari lil dawk li huma żvantaġġati f’din is-soċjetà, pereżempju t-tfal, iż-żgħażagħ, in-nisa u x-xjuħ;

13.

Jilqa’ l-passi meħuda biex jiġu promossi n-netwerks bejn l-ibliet u l-iskambju ta’ esperjenzi u ta’ prattiki tajba; jirrimarka li dawn il-passi għandhom ikomplu jiġu msaħħa u estiżi aktar biex jinkludu ż-żoni urbani funzjonali; jitlob l-espansjoni tal-istrumenti eżistenti għal dan il-għan filwaqt li jenfasizza li l-programmi u l-korpi eżistenti għandhom jintużaw qabel ma jinħolqu strutturi ġodda;

14.

Jilqa’ d-dispożizzjoni li mill-anqas 5 % tar-riżorsi tal-Fond Ewropew għall-Iżvilupp Reġjonali (FEŻR) jsiru disponibbli għall-azzjonijiet integrati għal żvilupp urban sostenibbli, li għandu jiġi ddelegat lill-bliet biex jiġu ġestiti minnhom; jenfasizza li din iċ-ċifra hija mira minima u għandha tintuża biex tappoġġja l-iżvilupp fiż-żoni urbani funzjonali; jistieden lil-livelli differenti ta' awtorità jagħmlu użu mill-istrumenti l-ġodda bħalma huma l-iżvilupp lokali mmexxi mill-komunità;

15.

Jopponi r-riġidità fl-użu tar-riżorsi msemmija hawn fuq fl-implimentazzjoni tal-investimenti territorjali integrati (ITI); hu tal-fehma li l-Istati Membri għandhom jingħataw il-possibilità li jimplimentaw l-azzjonijiet integrati għal żvilupp urban sostenibbli anke permezz ta’ programm operazzjonali speċifiku jew assi ta’ prijorità speċifika;

16.

Jenfasizza li, filwaqt li ż-żoni urbani jistgħu jagħtu kontribut vitali bħala ċentri ta' tkabbir u muturi tat-tkabbir, jeħtieġ li jiġu integrati l-ħtiġijiet ta' żvilupp lokali meta jkunu qed jiġu indirizzati l-problemi taż-żoni suburbani, ġirien u rurali, bil-għan li tiġi promossa relazzjoni li ma tkunx f'konflitt imma li tkun kumplementari u sinerġetika, u bil-għan li jiġi ttrattat b'mod deċiżiv u organizzat it-telf gradwali tal-periferiji rurali-urbani, minħabba t-tendenza tat-tifrix urban, u l-konverżjoni ta’żoni rurali f’art għall-bini, filwaqt li jiġu żviluppati l-aċċessibilità tas-servizzi pubbliċi;

17.

Jitlob li jsir titjib tal-kapaċità amministrattiva – pereżempju permezz ta’ użu akbar tal-għajnuna teknika – tal-awtoritajiet lokali u reġjonali, u tal-atturi ekonomiċi u soċjali, fl-immaniġġjar tal-fondi strutturali, għall-fini li jkun hemm governanza fuq diversi livelli reali, bil-għan li jiġi żgurat li l-objettivi jintlaħqu; iqis li huwa kruċjali li netwerks multifunzjonali sostenibbli, ibbażati fuq prattiki tajba, jiġu żviluppati u promossi b’tali mod li jistimula l-formazzjoni ta’ sħubijiet urbani-rurali li jkunu mimlija ħajja u integrati bbażati fuq il-ħtiġijiet tar-reġjuni individwali;

18.

Jenfasizza l-opportunità li jinħoloq netwerking bejn il-proġetti pilota dwar l-iżvilupp urban sostenibbli ffinanzjati mill-FEŻR u l-programm pluriennali l-ġdid Orizzont 2020, biex jiġu ggarantiti soluzzjonijiet innovattivi u strateġiji li jistgħu jiġu replikati fil-qasam tar-riġenerazzjoni urbana;

19.

Jinsab konvint li l-esperjenza tal-“Patt tas-Sindki” tista’ tirrappreżenta punt ta' tluq tajba għal żviluppi ulterjuri fis-segwitu tal-objettivi tal-Istrateġija UE 2020;

20.

Jitlob li jkun hemm mudell tal-mmaniġġjar tal-mobilità sostenibbli, integrat mal-ippjanar urban, li jkun jikkonsisti f’aktar faċilitajiet pubbliċi u netwerks loġistiċi sistemiċi li jkunu jixirqu lill-ħtiġijiet tad-distribuzzjoni urbana tal-beni u s-servizzi, filwaqt li tingħata attenzjoni xierqa lill-ħtiġijiet ta’ trasport ekoloġiku;

21.

Jinsab konvint li problemi ambjentali bħalma hu l-immaniġġjar tal-iskart jirrappreżentaw problema maġġuri li tmur lil hinn minn sempliċi aspetti tekniċi u għandhom impass fuq kwestjonijiet soċjali; iħeġġeġ, barra minn hekk, li jkomplu jittieħdu l-miżuri li jiżguraw servizzi ta’ kwalità ta’ provvista u purifikazzjoni tal-ilma fl-ibliet, minħabba li dawn huma ta' benefiċċju għall-pubbliku u għall-ambjent fl-istess ħin;

22.

Jenfasizza li ż-żieda fl-ispazji ħodor u fil-parkijiet urbani tikkostitwixxi element ta’ valur estremament għoli f’dak li hu patrimonju naturali, storiku u kulturali, tikkontribwixxi biex jiġu regolati l-effetti negattivi tal-mikroklima, għal baġit enerġetiku aqwa u tfaddil finanzjarju, tiżdied is-sostenibilità u l-kwalità tal-ambjent urban, u tippermetti li jiġu ssodisfati l-ħtiġijiet rikreattivi u soċjali;

23.

Jitlob li, fid-definizzjoni tal-proċessi ta’ żvilupp urban, tingħata prijorità lill-materjali u soluzzjonijiet tekniċi li jippermettu standards ta’ ffrankar enerġetiku f’konformità mal-objettivi tal-politiki Ewropej;

24.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kummissjoni u lill-Kunsill.

30.12.2015   

MT

Il-Ġurnal Uffiċjali tal-Unjoni Ewropea

C 440/6

—

wara li kkunsidra t-Trattat dwar il-Funzjonament tal-Unjoni Ewropea, u b’mod partikolari t-titolu XVIII tiegħu,

—

wara li kkunsidra r-Regolament tal-Kunsill (KE) Nru 1083/2006 tal-11 ta' Lulju 2006 li jistabbilixxi regoli ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta' Koeżjoni u jirrevoka r-Regolament (KE) Nru 1260/1999 (1),

—

wara li kkunsidra d-Deċiżjoni tal-Kunsill 2006/702/KE tas-6 ta' Ottubru 2006 dwar il-linji ta' gwida strateġiċi dwar il-koeżjoni (2),

—

wara li kkunsidra r-riżoluzzjoni tiegħu tal-5 ta’ Lulju 2011 dwar il-Ħames Rapport ta’ Koeżjoni tal-Kummissjoni u l-istrateġija għall-politika ta’ koeżjoni ta’ wara l-2013 (3),

—

wara li kkunsidra r-riżoluzzjoni tiegħu tat-23 ta’ Ġunju 2011 dwar is-sitwazzjoni attwali u sinerġiji futuri għal effikaċja akbar bejn il-FEŻR u Fondi Strutturali oħra (4),

—

wara li kkunsidra r-riżoluzzjoni tiegħu tat-8 ta' Ġunju 2011 dwar “Ninvestu fil-ġejjieni: Qafas Finanzjarju Multiannwali (MFF) ġdid għal Ewropa kompetittiva, sostenibbli u inklużiva” (5),

—

wara li kkunsidra r-riżoluzzjoni tiegħu tat-23 ta’ Ġunju 2011 dwar l-Aġenda Urbana Ewropea u l-futur tagħha fil-politika ta’ koeżjoni (6),

—

wara li kkunsidra r-riżoluzzjoni tiegħu tat-23 ta' Ġunju 2011 dwar l-għan 3: sfida għall-kooperazzjoni territorjali – l-aġenda futura tal-kooperazzjoni transkonfinali, transnazzjonali u interreġjonali (7),

—

wara li kkunsidra r-riżoluzzjoni tiegħu tas-7 ta’ Ottubru 2010 dwar il-politika ta’ koeżjoni u dik reġjonali tal-UE wara l-2013 (8),

—

wara li kkunsidra r-riżoluzzjoni tiegħu tal-20 ta’ Mejju 2010 dwar il-kontribut tal-Politika ta' Koeżjoni għall-kisba tal-objettivi ta' Lisbona u tal-istrateġija UE2020 (9),

—

wara li kkunsidra r-riżoluzzjoni tiegħu tal-20 ta’ Mejju 2010 dwar l-implimentazzjoni tas-sinerġiji tal-fondi assenjati għar-riċerka u l-innovazzjoni fir-Regolament (KE) Nru 1080/2006 dwar il-Fond Ewropew għall-Iżvilupp Reġjonali u s-Seba' Programm Qafas għar-Riċerka u l-Iżvilupp fil-bliet u r-reġjuni kif ukoll fl-Istati Membri u fl-Unjoni (10),

—

wara li kkunsidra l-istudju ppubblikat mill-Parlament Ewropew bl-isem “Il-politika ta’ koeżjoni wara l-2013: valutazzjoni kritika tal-proposti leġiżlattivi”,

—

wara li kkunsidra l-Konklużjonijiet tal-Presidenza Pollakka tal-24-25 ta’ Novembru 2011 dwar id-dimensjoni territorjali tal-politiki tal-UE u l-Politika ta’ Koeżjoni futura (11),

—

wara li kkunsidra l-proposta tas-6 ta’ Ottubru 2011 għal regolament tal-Parlament Ewropew u tal-Kunsill li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew koperti mill-Qafas Strateġiku Komuni u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta’ Koeżjoni u li jħassar ir-Regolament (KE) Nru 1083/2006 (COM(2011)0615),

—

wara li kkunsidra l-proposta tas-6 ta' Ottubru, 2011 għal regolament tal-Parlament Ewropew u tal-Kunsill dwar dispożizzjonijiet speċifiċi li jikkonċernaw il-Fond Ewropew għall-Iżvilupp Reġjonali, u l-Investiment li għandu fil-mira t-tkabbir ekonomiku u l-impjiegi’, u jirrevoka r-Regolament (KE) Nru 1080/2006 (COM(2011)0614),

—

wara li kkunsidra l-ħames rapport tal-Kummissjoni tad-9 ta’ Novembru 2010 bit-titolu “Il-koeżjoni ekonomika, soċjali u territorjali: il-futur tal-politika tal-koeżjoni” (COM(2010)0642),

—

wara li kkunsidra l-komunikazzjoni tal-Kummissjoni tad-19 ta’ Ottubru 2010 bit-titolu “Ir-Reviżjoni tal-Baġit tal-UE” (COM(2010)0700) u l-annessi tekniċi tiegħu (SEC(2010)7000),

—

wara li kkunsidra l-komunikazzjoni tal-Kummissjoni tas-6 ta' Ottubru 2010 bit-titolu “Politika Reġjonali li tikkontribwixxi għal tkabbir intelliġenti fl-Ewropa 2020” (COM(2010)0553),

—

wara li kkunsidra l-komunikazzjoni tal-Kummissjoni tal-31 ta’ Marzu 2010 bl-isem “Il-politika ta’ koeżjoni: Rapport Strateġiku 2010 dwar l-implementazzjoni tal-programmi 2007-2013” (COM(2010)0110),

—

wara li kkunsidra l-komunikazzjoni tal-Kummissjoni tat-3 ta’ Marzu 2010 bl-isem “Ewropa 2020: strateġija għal tkabbir intelliġenti, sostenibbli u inklussiv” (COM(2010)2020),

—

wara li kkunsidra r-rapport 'An agenda for a reformed cohesion policy – A place-based approach to meeting European Union challenges and expectations', rapport indipendenti mħejji fuq talba ta' Danuta Hübner, Kummissarju għall-Politika Reġjonali, minn Fabrizio Barca, April 2009,

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali u l-opinjoni tal-Kumitat għall-Impjiegi u l-Affarijiet Soċjali (A7-0421/2012),

A.

billi l-politika ta’ koeżjoni għandha l-miri li tnaqqas id-differenzi bejn ir-reġjuni tal-UE billi ssaħħaħ il-koeżjoni ekonomika, soċjali u territorjali, u billi kienet effikaċi fil-promozzjoni tal-integrazzjoni Ewropea permezz tal-iżvilupp soċjali u ekonomiku;

B.

billi r-Regolament dwar id-Dispożizzjonijiet Komuni (CPR) jippreskrivi r-regoli komuni applikabbli għall-ħames programmi Ewropej ta’ finanzjament (il-Fond Ewropew għall-Iżvilupp Reġjonali (FEŻR), il-Fond Soċjali Ewropew (FSE), il-Fond ta' Koeżjoni, il-Fond Agrikolu Ewropew għall-Iżvilupp Rurali (FAEŻR) u l-Fond Ewropew Marittimu u tas-Sajd (FEMS) li huma maħsuba għall-implimentazzjoni tal-politiki ta’ koeżjoni, rurali u tas-sajd;

C.

billi l-Qafas Strateġiku Komuni jħares lejn il-mekkaniżmi għall-ħolqien ta’ aktar koordinament bejn il-fondi koperti mis-CPR (il-FEŻR, il-FSE, il-Fond ta' Koeżjoni, il-FAEŻR u l-FEMS) u lejn l-integrazzjoni aħjar tal-fondi koperti mis-CPR ma’ oqsma oħrajn ta’ politika tal-UE;

D.

billi d-dimensjoni territorjali hija aspett li tolqot lil kulħadd tal-politika ta’ koeżjoni u li tagħti lir-reġjuni Eworpej l-opportunità li jagħmlu użu mill-potenzjal territorjali individwali ħalli jaħdmu lejn il-kisba tal-objettivi tal-politika ta’ koeżjoni;

E.

billi l-koeżjoni territorjali issa hija rikonoxxuta mit-Trattat ta’ Lisbona bħala objettiv fundamentali tal-UE;

1.

Jirrikonoxxi sistema ta’ governanza multi-livell simplifikata bħala integrali għall-proċess ta’ teħid ta’ deċiżjonijiet skont il-politika ta’ koeżjoni, bil-ħtieġa ta' kollaborazzjoni f’kull stadju ta’ livell Ewropew, nazzjonali, reġjonali u lokali fl-ippjanar, l-iżvilupp u l-eżekuzzjoni tal-programmi Ewropej ta’ finanzjament; jistieden lill-Kummissjoni tiżgura li dan ikun rifless fl-iżvilupp ta’ kuntratti ċari u definiti tajjeb ta’ sħubija;

2.

Jenfasizza l-importanza tal-kodiċi ta’ kondotta Ewropew għall-Istati Membri, ir-reġjuni u l-awtoritajiet lokali waqt it-tħejjija, l-implimentazzjoni u l-monitoraġġ tal-programmi ta' finanzjament; jirrikonoxxi li, sabiex tinkiseb din il-kollaborazzjoni, huwa importanti li jiġi żgurat li d-deċiżjonijiet jitwettqu fl-aktar livell qrib taċ-ċittadini possibbli;

3.

Jenfasizza li, minkejja li sar progress sinifikanti lejn il-konverġenza fl-Unjoni Ewropea, id-differenzi bejn ir-reġjuni tal-UE (pereżempju f'termini ta' aċċessibilità) għadhom jeżistu u qed ikomplu jikbru; jenfasizza l-fatt li l-baġit għall-politika ta’ koeżjoni wara l-2013 irid tal-anqas jinżamm fil-livell attwali tiegħu ħalli jiġi żgurat li s-sostenn jibqa’ jasal f’dawk l-inħawi li jeħtieġu reġenerazzjoni ekonomika u soċjali fir-reġjuni kollha tal-UE;

4.

Jilqa’ l-proposti tal-Kummissjoni li tiffoka fuq riżultati li jistgħu jitkejlu miksuba mill-politika ta’ koeżjoni ħalli tiżdied is-sostenabilità tal-investimenti u tiġi ggarantita l-effettività tal-programmi ta’ finanzjament; jenfasizza l-ħtieġa li l-fokus fuq sistema mmexxija mir-riżultati jinkludi l-flessibbiltà fil-livell nazzjonali, reġjonali u lokali, filwaqt li jitqiesu s-simplifikazzjoni, il-prijoritajiet tal-ipprogrammar u s-sħubija, sabiex is-sistemi mmexxija mir-riżultati jkunu speċifiċi għar-reġjuni;

5.

Jaqbel mal-proposti ġenerali tal-Kummissjoni għas-CPR kollu ħalli jitnaqqas il-piż amministrattiv; jenfasizza l-fatt, għalhekk, li r-regoli, il-verifiki u l-eliġibilità jeħtieġ li jkunu ċċarati sa mill-bidu nett u li s-simplifikazzjoni b’suċċess tal-proċeduri amministrattivi tista' tinkiseb permezz ta’ approċċ integrat għall-għoti tal-fondi;

6.

Jenfasizza l-importanza, waqt li tkun qiegħda tissawwar u tiġi implimentata l-politika ta’ koeżjoni, li jiġi żgurat bilanċ ġust bejn il-kontrolli meħtieġa għall-użu tal-fondi, u l-effettività tagħhom;

7.

Jisħaq dwar il-ħtieġa li jkun żgurat approċċ flessibbli għall-istabbiliment ta’ objettivi lokali u reġjonali, bil-partijiet interessati f’livell reġjonali involuti fl-istadji kollha ħalli jkun żgurat li l-programmi Ewropej ta’ finanzjament jissodisfaw il-ħtiġijiet sabiex jiġu indirizzati d-differenzi soċjali u ekonomiċi;

8.

Jisħaq li l-flessibilità għandha tinkludi wkoll possibilità akbar li l-proġetti joperaw fil-fondi differenti koperti mill-CPR u li din il-flessibilità akbar tgħin fis-simplifikazzjoni tat-twettiq tal-proġetti u żżid il-komplementarjetà u l-aspetti trasversali tal-finanzjament Ewropew;

9.

Jenfasizza li l-objettivi tal-koeżjoni territorjali huma marbuta inseparabbli mal-isfidi ekonomiċi u soċjali u jagħraf li l-politika ta' koeżjoni tista' tagħti kontribut siewi għall-kisba tal-objettivi tal-istrateġija Ewropa 2020, b’mod speċjali fl-oqsma tal-impjiegi, tal-edukazzjoni u tat-tnaqqis tal-faqar, billi tiġi introdotta dimensjoni territorjali għall-istrateġija tat-tkabbir tal-Ewropa;

10.

Jenfasizza l-fatt li l-użu ta’ programmi oħrajn ta’ finanzjament (eż. Orizzont 2020), possibilment f’allinjament mal-finanzjament tal-politika ta' koeżjoni, għandu jitqies ukoll meta ssir il-ħidma lejn l-ilħuq tal-objettivi tal-istrateġija Ewropa 2020;

11.

Jirrikonoxxi l-enfasi miżjuda fuq bliet u żoni urbani bħala xprun għal tkabbir ekonomiku;

12.

Jenfasizza l-importanza tat-tisħiħ tar-rabtiet urbani-rurali eżistenzi u tal-promozzjoni ta’ oħrajn ġodda; jenfasizza li dan jeħtieġ fokus u kollaborazzjoni b'saħħithom u fuq bosta livelli bejn il-partijiet interessati rurali u dawk urbani, u li għandhom jinħolqu l-kundizzjonijiet ideali permezz tat-trawwim ta' sħubiji u netwerks, sabiex titħeġġeġ il-parteċipazzjoni rurali fl-attivitajiet integrati ta’ entità ġeografika funzjonali partikolari;

13.

Jenfasizza l-bżonn li jinħolqu konnessjonijiet bejn il-programmi ta’ kooperazzjoni territorjali u strateġiji territorjali b’mod aktar effiċjenti u jenfasizza r-rwol potenzjali tar-Raggruppament Ewropew ta’ Kooperazzjoni Territorjali (REKT) biex dan jinkiseb;

14.

Jenfasizza li, minħabba d-daqs, riżorsi u aspetti soċjali u ekonomiċi differenti tal-bliet u taż-żoni urbani tal-UE, id-definizzjoni ta' dawn l-inħawi hija deċiża fil-livell tal-Istati Membri;

15.

Jenfasizza li l-koeżjoni territorjali tapplika wkoll għall-koeżjoni fit-territorji, jiġifieri l-garanzija li ż-żona kollha tagħti kontribut ekonomiku u mhux biss il-bliet il-kbar, u jenfasizza li l-potenzjal tal-irħula ż-żgħar u ta’ daqs medju f’żoni rurali li jagħtu kontribut sinifikanti lir-reġjun m’għandux ikun injorat;

16.

Jenfasizza li sabiex jiġu indirizzati l-aspetti trasversali tal-koeżjoni territorjali bil-għan li jinkisbu riżultati tanġibbli f’livell reġjonali u li jiġi sfruttat bis-sħiħ il-potenzjal individwali tar-reġjuni, jeħtieġ li jkun hemm Kuntratti ta' Sħubija ddefiniti sewwa; jenfasizza li dan jista' biss jinkiseb bl-involviment tal-atturi fil-livell lokali u reġjonali, sabiex il-partijiet kollha jkunu jistgħu jikkontribwixxu għat-tħejjija u t-twettiq tal-programmi; jenfasizza li dan huwa partikolarment importanti meta jkun hemm il-ħsieb li jiġu megħjuna territorji li jħabbtu wiċċhom ma' sfidi speċifiċi, bħar-reġjuni trasnkonfinali, muntanjużi, reġjuni gżejjer u dawk l-aktar periferali;

17.

Jilqa’ l-proposti tas-CPR li jinkoraġixxu koordinament u integrazzjoni aħjar tal-programmi ta' finanzjament ħalli jkun żgurat impatt akbar tal-fondi, u l-preżenza akbar tad-dimensjoni territorjali tal-politika ta' koeżjoni fil-qafas għall-2014-2020;

18.

Jenfasizza li approċċ territorjali aktar b’saħħtu u aktar integrat għall-finanzjament Ewropew, b'bini tal-kapaċità adegwat u l-involviment tas-sħab soċjali u tas-soċjetà ċivili fil-livelli lokali u reġjonali, kemm f'ambjenti urbani kif ukoll rurali, huwa mod pożittiv biex jiġi żgurat li l-flus jiġu diretti sabiex jiġu indirizzati l-isfidi soċjali u ekonomiċi fit-tul tal-Ewropa;

19.

Jisħaq li l-armonizzazzjoni mtejba bejn il-politika ta’ koeżjoni u l-oqsma l-oħrajn tal-politika identifikati mis-CPR se tippermetti lir-reġjuni Ewropej jissoktaw jiżviluppaw ekonomikament billi jinqdew bil-punti f’saħħithom individwali tagħhom;

20.

Isemmi bħala eżempju l-Wales European Funding Office (WEFO) u l-intenzjoni tiegħu li jintegra l-fondi Ewropej f’Wales bil-ħolqien ta’ “portal” waħdieni li jkun jippermetti l-aċċess għall-informazzjoni dwar il-fondi kollha koperti mis-CPR; jissottolinja l-potenzjal għal-“portal” tal-WEFO li jinkludi pjattaforma komuni bi proċess wieħed ta’ applikazzjoni, ħlas, monitoraġġ u valutazzjoni għall-fondi kollha koperti mis-CPR; jenfasizza li dan l-approċċ jippermetti identifikazzjoni eħfef tas-sinerġiji potenzjali u l-integrazzjoni bejn il-flussi ta’ finanzjament, biex b’hekk ikun armonizzat u ssimplifikat il-proċess tal-applikazzjoni għall-fondi Ewropej;

21.

Jenfasizza li, minħabba l-karatteristiċi kondiviżi mill-fondi koperti mis-CPR u minn programmi oħrajn ta’ finanzjament (eż. Orizzont 2020, LIFE+), l-effikaċja tal-finanzjament Ewropew jista’ jittejjeb billi jkun esplorat l-allinjament potenzjali bejn dawn il-fondi;

22.

Jilqa’ l-proposti għal qafas regolatorju b’fokus fuq l-iżvilupp lokali u integrat permezz ta’ “żvilupp lokali mmexxi mill-komunita”, “pjani konġunti ta’ azzjoni”, u “investiment territorjali integrat”;

23.

Jisħaq li, wara l-proposti tal-Kummissjoni, l-investiment kollu jrid jikkumplimenta l-ħtiġijiet lokali u ma jiddupplikax fuq proġetti oħrajn;

24.

Jitlob li jkun hemm approċċ integrat għall-istrumenti ta’ twettiq relatati (iżvilupp lokali mmexxi mill-komunità (CLLD), investimenti territorjali integrati (ITIs), pjanijiet konġunti ta' azzjoni (JAPs)), li jippermettu lis-sħubijiet lokali jagħżlu, skont il-ħtiġiet individwali tagħhom, kombinazzjonijiet differenti ta’ dawn l-istrumenti kif ikun xieraq, u sabiex tiġi kkunsidrata l-possibbilià li jiġu applikati aktar arranġamenti flessibbli biex jiġu kkonċentrati r-riżorsi, filwaqt li jiġu kkunsidrati l-bżonnijiet speċifiċi tal-Istati Membri u tar-reġjuni;

25.

Jenfasizza l-ħtieġa li l-applikazzjoni tal-istrument propost tinżamm sempliċi kemm jista’ jkun sabiex tiġi evitata ż-żieda fil-piż amministrattiv fuq l-awtoritajiet lokali u biex tinżamm konformità mal-għanijiet tas-simplifikazzjoni;

26.

Iqis li l-kapaċità istituzzjonali f’livelli differenti ta’ intervent hija element sinifikanti li jiżgura l-applikazzjoni b'suċċess tal-approċċ territorjali;

27.

Jaċċentwa l-eżempju tas-sottodelegazzjoni għall-kunsilli fil-Pajjiżi l-Baxxi, li tinkludi li partijiet mill-programmi ta’ finanzjament (eż. il-FERD) jiġu ddelegati mill-awtorità reġjonali lill-awtoritajiet lokali, bl-azzjonijiet implementati f’livell lokali ħalli jkunu indirizzati l-ħtiġijiet lokali; jisħaq li l-allokazzjoni tar-responsabbiltà ġestjonarja lill-awtoritajiet lokali tagħti potenzjal akbar għall-integrazzjoni tal-aqwa kombinazzjoni ta’ fondi maħsubin għall-ħtiġijiet lokali; jisħaq li, bl-istrutturi ta’ ġestjoni li diġà jeżistu fil-livell lokali, dan l-approċċ ikun jista’ jibbenefika t-twassil tal-ITIs, fil-livell lokali jew sublokali;

28.

Jagħti s-sostenn tiegħu lill-proposti tal-Kummissjoni dwar is-CLLD bħala għoti importanti tas-CPR li se jiffoka fuq l-iżvilupp tas-sinerġiji bejn il-fondi kollha koperti mis-CPR;

29.

Iqis li dan l-istrument huwa mezz eċċellenti ta’ kif tkun inkoraġġuta l-parteċipazzjoni minn isfel għal fuq minn sezzjoni trasversali tal-atturi tal-komunità lokali li jaħdmu għall-objettivi territorjali sostenibbli; jilqa', f'dan ir-rigward, it-tisħiħ ulterjuri tal-kapaċità amministrattiva fil-livell reġjonali u lokali għal azzjonijiet ta' bini ta' kapaċità maħsuba biex itejbu l-parteċipazzjoni kemm tal-awtoritajiet reġjonali kif ukoll tas-sħab soċjali lokali;

30.

Jirrikonoxxi s-suċċess tal-passat tal-programm Leader bħala għodda importanti għat-twettiq tal-politika għall-iżvilupp rurali u jemmen li permezz tas-CLLD dan il-mekkaniżmu ta’ twettiq jista’ jkun strumentali biex jirrispondi għall-isfidi lokali u reġjonali; jappoġġja wkoll l-użu tas-CLLD fl-iżvilupp urban;

31.

Jistieden lill-Kummissjoni tiċċara l-proposta tagħha dwar is-CLLD fil-fażi ta’ implimentazzjoni sabiex il-parteċipanti potenzjali jkunu jistgħu jiddeterminaw bis-sħiħ l-iskop, il-kamp ta’ applikazzjoni u l-effett probabbli tas-CLLD; jistenna bil-ħerqa l-pubblikazzjoni ta’ gwida dwar is-CLLD għall-Awtoritajiet ta’ Ġestjoni;

32.

Jirrikonoxxi l-progress magħmul mill-2007 bil-Gruppi ta’ Azzjoni Lokali tas-Settur tas-Sajd mal-Gruppi ta’ azzjoni lokali tal-Leader (LAGs) bħala eżempju ta’ kif il-CLLD futur jista’ jikkombina l-fondi f’livell lokali f'dak li għandu x'jaqsam mal-fondi kollha koperti mis-CPR; jenfasizza l-eżempju ta’ 11-il sħubija lokali fid-Danimarka li jużaw kemm il-Fond FAEŻR (Leader) kif ukoll il-Fond Ewropew għas-Sajd (Assi 4) biex jiffinanzjaw il-proġetti li juża l-istess sistema ta’ twettiq u l-istess amministrazzjoni;

33.

Jenfasizza l-ħtieġa li wieħed iħares lejn eżempji bħalma hu l-użu integrat tal-fondi FAEŻR u FEMS permezz tas-CLLD fil-perjodu futur ta' programmar bħala mezz tal-iżvilupp tas-sinerġiji bejn il-fondi kollha koperti mis-CPR;

34.

Jappoġġja proposti tas-CPR li jkunu introdotti pjani konġunti ta’ azzjoni li jippermettu lill-gruppi ta' proġett ikunu ffinanzjati minn aktar minn programm operattiv wieħed;

35.

Jirrikonoxxi l-pjani konġunti ta’ azzjoni bħala pass pożittiv lejn il-ġestjoni msejsa fuq ir-riżultati, b'konformità ma’ waħda mill-objettivi globali tal-politika ta' koeżjoni post-2013;

36.

Jenfasizza l-importanza li jiġi żgurat li dawn l-istrumenti jkunu żviluppati flimkien mas-CLLD ħalli jkun żgurat li s-CLLD jsir aktar minn sempliċiment għodda strateġika għall-iżvilupp tal-kapaċità lokali, minflok objettiv ta' investiment fih innifsu, filwaqt li jiġi promoss, fost l-oħrajn, l-inklużjoni soċjali u l-ġlieda kontra l-faqar;

37.

Jitlob kjarifika dwar il-kamp ta' applikazzjoni u l-integrazzjoni tal-pjanijiet konġunti ta' azzjoni, u dwar jekk hux se jintużaw għat-twettiq tal-programmi sħaħ, jew ta' partijiet minnhom;

38.

Jirrikonoxxi li pjanijiet ta’ azzjoni konġunti jistgħu joffru assistenza effettiva sabiex tinkiseb l-integrazzjoni bbilanċjata taż-żgħażagħ fis-suq tax-xogħol; jindika, madankollu, li għandom jiġu evitati l-proċessi ta’ teħid ta’ deċiżjonijiet l-proċeduri amministrattivi eċċessivament twal;

39.

Jilqa’ l-proposti għall-ITIs, li lill-bliet jistgħu jagħtuhom l-opportunità li jissodisfaw il-ħtiġijiet speċifiċi tagħhom billi jibbenefikaw minn fondi minn aktar minn assi wieħed ta' prijorità għall-implementazzjoni tal-programmi operattivi b'mod integrat;

40.

Jilqa’ aktar kjarifika dwar il-kamp tal-applikazzjoni tal-ITIs u li l-potenzjal għall-istrument, jekk ikun jixraq għall-ħtiġijiet lokali, jintuża wkoll fiż-żoni mhux urbani u fiż-żoni periurbani, bl-użu tal-fondi kollha koperti mis-CPR; jenfasizza li għandha tiġi żgurata l-koerenza tal-ITIs mal-istrateġiji reġjonali tal-iżvilupp sostenibbli sabiex tittejjeb il-koeżjoni ekonomika u soċjali, mhux biss fost ir-reġjuni, iżda wkoll fost iż-żoni urbani u mhux urbani fir-reġjuni;

41.

Jaċċentwa l-eżempju ta’ mudell propost għall-ITIs minn Greater Manchester, li jintegra l-finanzjament minn kemm jista’ jkun għejun relevanti possibbli għall-kisba ta’ valur aħjar mill-investiment; jenfasizza l-fatt li l-iżvilupp ta’ dan il-mudell għadu għaddej u jista’ potenzjalment jintuża biex tkun sostnuta strateġija li ġġib bosta benefiċċji ekonomiċi u soċjali għar-reġjun tal-belt; jisħaq li l-ITI propost jintegra l-prijoritajiet tal-FEŻR mal-miżuri tal-FSE u li, fid-dawl tal-fokus miżjud tal-FEŻR fuq l-SMEs u l-innovazzjoni, hemm il-potenzjal li l-ITI joħloq rabtiet mal-proġetti tal-Orizzont 2020 fil-futur;

42.

Jilqa’ l-proposti tal-Kummissjoni għal użu akbar, u t-twessigħ tal-kamp ta’ applikazzjoni, tal-istrumenti finanzjarji permezz tal-ħolqien ta' regoli aktar sempliċi u aktar ċari li jiżguraw effikaċja akbar fost il-ħames fondi koperti mis-CPR;

43.

Jenfasizza l-potenzjal tal-istrumenti finanzjarji, inkluż il-mikrokrediti, li jiftħu għejun alternattivi ta’ finanzjament għal medda wiesgħa ta’ atturi li jikkomplimentaw il-metodi tradizzjonali ta’ finanzjament; jenfasizza li fil-qafas ta’ finanzjament tal-futur, l-istrumenti finanzjarji għandu jkollhom l-abbiltà li jservu ta' lieva għall-finanzjament privat u joffru l-flessibbiltà lill-Istati Membri u lir-reġjuni sabiex is-setturi fil-mira u l-metodi ta’ implimentazzjoni jitfasslu apposta għall-bżonnijiet speċifiċi tagħhom;

44.

Jisħaq li l-istrumenti finanzjarji, bħala mekkaniżmi li jippermettu l-kooperazzjoni bejn l-impriżi, l-organizzazzjonijiet tas-settur pubbliku u l-istituzzjonijiet edukattivi, għandhom jitħeġġu wkoll bħala mezz għall-iżvilupp ta’ approċċ integrat għall-finanzjament;

45.

Jilqa’ l-proposti fil-Qafas Strateġiku Komuni għall-Kuntratti ta’ Sħubija biex jiddeskrivu l-allinjament potenzjali bejn il-fondi koperti mis-CPR u programmi oħra ta’ finanzjament, bħall-Programm Qafas tal-UE għar-Riċerka u l-Innovazzjoni (dak li qabel kien l-FP7, u li issa sar l-Orizzont 2020), il-LIFE + jew il-Faċilità Nikkollegaw l-Ewropa;

46.

Jirrikonoxxi li, filwaqt li l-programmi ta’ finanzjament bħalma hu l-Orizzont 2020 huma primarjament iffokati fuq l-eċċellenza, il-Fondi Strutturali preċedentement kellhom suċċess fi rwol ta’ “bini ta’ kapaċità” bl-għoti ta' finanzjament għall-iżvilupp tan-negozji u l-organizzazzjonijiet li mbagħad issieħbu fl-FP7 jew fil-progetti tal-Programm Kwadru għall-Kompetittività u l-Innovazzjoni (CIP);

47.

Jenfasizza li s-sinerġiji eżistenti bejn il-fondi koperti mis-CPR u l-Orizzont 2020 ifissru li ż-żewġ sorsi ta' finanzjament jistgħu potenzjalment jintużaw waqt li ssir ħidma lejn objettivi tematiċi komplimentari;

48.

Jenfasizza li l-impjiegi u l-politiki soċjali għandhom irwol importanti għal żvilupp territorjali sostenibbli u soċjalment ibbilanċjat u għandhom ħafna x'jikkontribwixxu biex inaqqsu d-differenzi reġjonali, u biex itejbu l-benessri taċ-ċittadini u jipprovdu opportunitajiet indaqs għal kulħadd;

49.

Jenfasizza li l-ġlieda kontra l-faqar tinkludi l-ġlieda kontra l-esklużjoni, u li r-reġjuni rurali b'densità tal-popolazzjoni baxxa jew b'popolazzjonijiet li qed jixjieħu jridu jħabbtu wiċċhom ma' għoti insuffiċjenti ta' servizzi tas-saħħa, li jistgħu jiġu kkumpensati sa ċertu punt mill-aċċess imtejjeb għal teknoloġiji broadband u l-promozzjoni tat-telemediċina;

50.

Iqis li l-approċċ territorjali għandu jkun mekkaniżmu effettiv għall-appoġġ ta’ SMEs biex joħolqu impjiegi ġodda u sostenibbli u biex jinbdew jew jiġu żviluppati programmi għal taħriġ professjonali; iqis li l-attività intraprenditorjali mmirata lejn it-tkabbir u l-impjieg u l-isfruttar tal-potenzjal tista' taħdem bejn konfini amministrattiva reġjonali u oħra, u jitlob lill-Istati Membri jtejbu l-kundizzjonijiet eżistenti għall-intraprendituri ġodda sabiex ikunu jistgħu jisfruttaw aħjar il-potenzjal għoli tagħhom biex joħolqu impjiegi ġodda u sostenibbli;

51.

Jenfasizza l-importanza li jinħolqu sinerġiji b’saħħithom bejn il-politika ta’ koeżjoni u politiki oħra tal-UE, sabiex tiġi ssalvagwardjata l-effettività tal-politika ta' koeżjoni fl-indirizzar ta’ sfidi attwali soċjali u tal-impjieg;

52.

Jirrimarka li l-kooperazzjoni territorjali u l-istrateġiji makroreġjonali jistgħu jkunu strumenti utli għall-identifikazzjoni u l-ġlieda kontra d-disparitajiet reġjonali, bħall-aċċess għall-edukazzjoni u l-impjiegi, u għall-promozzjoni tal-konverġenza bejn ir-reġjuni Ewropej;

53.

Jemmen li l-mobilità volontarja tal-ħaddiema u l-gradwati żgħażagħ fl-UE tista’ tkun soluzzjoni għan-nuqqasijiet tas-suq tax-xogħol reġjonali u lokali u jħeġġeġ lill-Istati Membri u lir-reġjuni biex jużaw din il-mobilità b’mod aktar effettiv sabiex iħeġġu l-iżvilupp u l-koeżjoni territorjali;

54.

Iqis li huwa essenzjali li jiġu kkoordinati l-azzjonijiet appoġġjati mill-FSE f’livelli tal-politika differenti sabiex ikun possibbli approċċ territorjali effiċjenti; iqis li huwa neċessarju, b'mod partikolari, li ssir konnessjoni bejn is-servizzi ta' edukazzjoni u l-faċilitajiet għall-bżonnijiet tas-suq tax-xogħol lokali;

55.

Jemmen li huwa ta’ importanza ewlenija li jiġu promossi skambji tal-aħjar prattiki bejn l-Istati Membri, fil-kuntest ta’ ppjanar fit-tul għall-iżvilupp territorjali, sinifikanti u effettiv, u permezz tal-promozzjoni ta’ impjiegi deċenti u sostenibbli bl-għan tal-prevenzjoni u l-ġlieda kontra l-faqar u l-qgħad;

56.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

30.12.2015   

MT

Il-Ġurnal Uffiċjali tal-Unjoni Ewropea

C 440/13

—

wara li kkunsidra l-Artikoli 175, 212 u 222 tat-TFUE,

—

wara li kkunsidra r-Regolament tal-Kunsill (KE) Nru 2012/2002 tal-11 ta' Novembru 2002 li jistabbilixxi l-Fond ta’ Solidarjetà tal-Unjoni Ewropea (1),

—

wara li kkunsidra l-Ftehim Interistituzzjonali tas-7 ta’ Novembru 2002 bejn il-Parlament Ewropew, il-Kunsill u l-Kummissjoni dwar il-finanzjament tal-Fond ta' Solidarjetà tal-Unjoni Ewropea li jissupplimenta l-Ftehim Interistituzzjonali tas-6 ta’ Mejju 1999 dwar id-dixxiplina baġitarja u t-titjib fil-proċedura baġitarja (2),

—

wara li kkunsidra l-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar il-Futur tal-Fond ta’ Solidarjetà tal-Unjoni Ewropea (COM(2011)0613),

—

wara li kkunsidra r-rapport mill-Kummissjoni dwar il-Fond ta’ Solidarjetà tal-Unjoni Ewropea 2010 (COM(2011)0694),

—

wara li kkunsidra r-rapport mill-Kummissjoni dwar il-Fond ta’ Solidarjetà tal-Unjoni Ewropea – Rapport Annwali 2008 kif ukoll ir-Rapport dwar l-esperjenza li nkisbet wara sitt snin ta’ applikazzjoni tal-istrument il-ġdid (COM(2009)0193),

—

wara li kkunsidra l-pożizzjoni tat-18 ta’ Mejju 2006 tiegħu dwar il-proposta għal regolament tal-Parlament Ewropew u tal-Kunsill li jistabbilixxi l-Fond ta’ Solidarjetà tal-Unjoni Ewropea (3),

—

wara li kkunsidra l-opinjoni tal-Kumitat Ekonomiku u Soċjali Ewropew dwar il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar il-futur tal-Fond ta’ Solidarjetà tal-Unjoni Ewropea (4),

—

wara li kkunsidra r-Rapport Speċjali Nru 3/2008 tal-Qorti tal-Awdituri – Il-Fond ta’ Solidarjetà tal-Unjoni Ewropea: huwa rapidu, effiċjenti u flessibbli biżżejjed? (5),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali (A7-0398/2012),

A.

billi l-Artikolu 222 tat-TFUE jistipula li l-Unjoni u l-Istati Membri tagħha għandhom jaġixxu flimkien fi spirtu ta’ solidarjetà jekk xi Stat Membru jkun suġġett għal attakk terroristiku jew ikun vittma ta’ diżastru naturali jew ikkaġunat mill-bniedem;

B.

billi l-Fond ta’ Solidarjetà tal-Unjoni Ewropea (FSUE) huwa l-istrument ewlieni biex tintwera s-solidarjetà tal-Unjoni billi jipprovdi appoġġ finanzjarju sinifikanti lill-Istati Membri jew reġjuni milquta minn diżastri serji;

C.

billi l-FSUE, meta tkun meħtieġa l-mobilizzazzjoni tiegħu, huwa ġeneralment meqjus bħala wieħed mill-aktar strumenti sodisfaċenti li għandha l-Unjoni Ewropea peress li jikkostitwixxi l-aktar espressjoni ċara, deċiżiva u importanti tas-solidarjetà Ewropea maċ-ċittadini tagħha f'sitwazzjoni diffiċli;

D.

billi l-proposta leġiżlattiva tal-2005 għal regolament ġdid dwar il-FSUE sabet appoġġ kbir fil-Parlament Ewropew, iżda rriżulta li ma kinitx aċċettabbli għall-maġġoranza tal-Istati Membri u finalment ġiet irtirata mill-Kummissjoni;

E.

billi l-kriżi attwali tobbliga lill-Istati Membri u lill-UE biex ma jonfqux iżżejjed;

F.

billi serje ta’ rapporti (6) kkonkludew li r-Regolament attwali dwar il-FSUE jeħtieġ li jiġi emendat bl-għan ewlieni li jsir aktar flessibbli u titjieb l-operabbiltà tiegħu, filwaqt li jiġi rrispettat dejjem il-prinċipju tas-sussidjarjetà;

1.

Jenfasizza l-importanza tal-FSUE bħala l-istrument ewlieni li jippermetti lill-Unjoni Ewropea tirrispondi għal diżastru serju li jseħħ fit-territorju tal-Unjoni jew f’pajjiżi li qegħdin jinnegozjaw l-adeżjoni tagħhom fl-UE;

2.

Jenfasizza li, minkejja l-perċezzjoni tajba taċ-ċittadini, għandu jitjieb il-mod kif jopera, billi jiġi jsir aktar flessibbli u jingħata viżibbiltà akbar sabiex tittejjeb il-kredibbiltà tal-Unjoni Ewropea maċ-ċittadini tagħha;

3.

Jenfasizza l-importanza tal-għajnuna mogħtija lill-Istati Membri mill-FSUE biex ittaffi l-piż fuq il-finanzi pubbliċi meta jiffaċċjaw emerġenzi kkawżati minn diżastru serju, li f'ħafna każijiet ma jkunux jistgħu jlaħħqu miegħu;

4.

Jikkunsidra li ż-żmien attwalment meħud biex jiġi mmobilizzat il-fond huwa twil iżżejjed u għaldaqstant jindika l-ħtieġa li tittejjeb l-effikaċja u l-ħeffa tal-proċeduri amministrattivi meħtieġa għall-mobilizzazzjoni tiegħu, li teħtieġ l-intervent ta’ tliet istituzzjonijiet Ewropej qabel ma ktun tista' tingħata l-approvazzjoni, bil-konsegwenza li dawn il-proċeduri jdewmu u jtawlu b’mod eċċessiv iż-żmien meħud biex tingħata għajnuna lill-Istati Membri affettwati minn diżastru, u b’hekk ma jintlaħqux ir-riżultati mixtieqa;

5.

Jirrimarka li l-maġġoranza tal-applikazzjonijiet (63 %) saru fil-kategorija eċċezzjonali ta' “diżastru reġjonali” u li, minn dawn, 66 % ġew miċħuda wara evalwazzjoni mill-Kummissjoni;

6.

Huwa tal-fehma li, fil-każ ta' dawk li huma meqjusa diżastri “li qed jiżviluppaw bil-mod”, id-dispożizzjonijiet attwali tar-regolament jippreżentaw diffikultajiet legali u prattiċi għall-mobilizzazzjoni, u għalhekk jitlob li l-Kummissjoni tikkunsidra li turi iktar flessibbiltà fir-rigward tal-iskadenza stabbilita għat-tressiq tal-applikazzjonijiet, biex tkun tista' tingħata attenzjoni partikolari biex jiġi żgurat li ħsara bħal din tkun tista' wkoll tiġi koperta mill-FSUE;

7.

Jilqa' d-deċiżjoni tal-Kummissjoni dwar il-ħtieġa li ssir reviżjoni tar-Regolament attwali dwar il-FSUE, bil-għan li jitjiebu l-funzjonament u t-tħaddim tiegħu; jaqbel mal-opinjoni tal-Kummissjoni li, minħabba l-kriżi ekonomika attwali, il-proposta għal emenda tar-regoli ma għandha toħloq ebda piż finanzjarju addizzjonali, la għall-baġit tal-Unjoni u lanqas għal dak tal-Istati Membri;

8.

Jirrimarka li għandu jkompli japplika l-prinċipju li min huwa responsabli għad-danni jħallas, sabiex l-użu tal-FSUE ma jkunx jista' jeżenta lil dawk responsabbli għal diżastru mir-responsabbiltà tagħhom;

9.

Jikkunsidra li l-oppożizzjoni ta’ ċertu għadd ta’ Stati Membri, beżgħana li xi bidliet sinifikanti fil-bażi ġuridika ta’ dan l-istrument jinvolvu nfiq ekonomiku akbar, mhix iġġustifikata u llimita l-aġġustament tar-Regolament tal-2002 għal ċerti kjarifiki u tentattiv biex jittejjeb it-tħaddim tiegħu; jirrimarka li sfortunatament, mill-ħolqien tal-Fond, id-diżastri fir-reġjuni tal-Unjoni Ewropea żdiedu b’mod sinifikanti fin-numru, fin-natura, fis-severità u fl-intensità;

10.

Jilqa’ madankollu l-fatt li s-sempliċi introduzzjoni ta’ ċerti aġġustamenti fir-regoli fis-seħħ tikseb titjib sinifikanti fil-funzjonament tiegħu, filwaqt li jinżamm l-iskop u n-natura tiegħu, li jikkonsisti prinċipalment fil-fatt li jkun strument flessibbli u effettiv li jista’ jipprovdi għajnuna fil-pront liċ-ċittadini affettwati minn fenomenu li jkollu riperkussjonijiet erji fuq il-kundizzjonijiet tal-għajxien u l-benessri tagħhom;

11.

Jistaqsi jekk definizzjoni iktar ċara u preċiża tal-kunċett ta’ diżastru tistax tgħin biex jitnaqqas ix-xettiċiżmu ta’ ħafna mill-Istati Membri li jopponu riforma profonda ta’ dan l-istrument tal-UE;

12.

Jenfasizza l-ħtieġa urġenti li jiġu ssimplifikati l-proċeduri burokratiċi meħtieġa għall-mobilizzazzjoni dan l-istrument tal-UE, bil-ħsieb li jiġi mnaqqas il-ħin bejn il-mument meta jseħħ id-diżastru u dak li fih l-Istat Membru jew reġjun ikkonċernat jirċievi l-għajnuna, li xi kultant idum aktar minn sena; jirrimarka, madankollu, li dan l-istrument ma ġiex maħluq biex jagħti rispons rapidu iżda biex jiffinanzja mill-ġdid operazzjonijiet ta’ emerġenza ffinanzjati inizjalment mill-awtoritajiet pubbliċi tal-pajjiż ikkonċernat;

13.

Jilqa’ l-proposta tal-Kummissjoni li tikkontribwixxi għas-simplifikazzjoni tal-proċeduri fil-livell Ewropew sabiex jitnaqqas id-dewmien; jenfasizza li l-Istati Membri għandhom janalizzaw ukoll il-proċeduri amministrattivi tagħhom u jidentifikaw u jneħħu xkiel possibbli li jista’ jkun ta’ ostaklu għall-mobilizzazzjoni aktar mgħaġġla ta’ għajnuna lir-reġjuni affettwati;

14.

Jistieden lill-Istati Membri jikkooperaw mill-qrib mal-awtoritajiet lokali u reġjonali fl-istadji kollha tal-implimentazzjoni, sabiex jiżguraw li l-għajnuna tal-Unjoni tkun viżibbli u effettiva fil-post, u biex jippromwovu soluzzjonijiet sostenibbli;

15.

Iqis li l-proposta tal-Kummissjoni marbuta mal-amalgamazzjoni tad-deċiżjonijiet ta’ għoti u l-ftehimiet ta’ implimentazzjoni bejn il-Kummissjoni u l-Istati Membri hija interessanti u xierqa ladarba l-Parlament u l-Kunsill ikunu għamlu disponibbli r-riżorsi finanzjarji, peress li twassal biex jiġi ffrankat il-ħin u, konsegwentement, twassal għal rispons aktar rapidu;

16.

Iqis li minħabba l-inċertezza u l-imprevedibbiltà tan-numru u s-severità tad-diżastri li jistgħu jseħħu, il-FSUE għandu jibqa’, bħal ma hu fil-preżent, barra mill-baġit tal-Unjoni u jiġi mobilizzat biss meta jseħħu diżastri;

17.

Jaqbel mal-idea li l-introduzzjoni tal-possibbiltà li jitħallsu ħlasijiet bil-quddiem malli l-Istat affettwat ikun applika għall-għajnuna hija wkoll mod vijabbli biex jitħaffef il-proċess tal-għoti tal-għajnuna lill-pajjiżi milquta minn diżastru kbir, u li tgħin sabiex titjieb l-effettività tal-FSUE; iqis li, jekk jiġi deċiż hekk, il-ħlasijiet bil-quddiem għandhom jikkostitwixxu persentaġġ fiss tal-għajnuna totali li tkun mistennija li se tingħata u li, f’każ li l-applikazzjoni ma tiġix aċċettata, għandhom jingħataw lura lill-baġit tal-Unjoni;

18.

Jistieden lill-Kummissjoni tiddefinixxi b’mod ċar il-kamp ta’ applikazzjoni u l-kopertura tal-Fond, filwaqt li tiġi eliminata kwalunkwe inċertezza legali possibbli dwar il-kamp ta' applikazzjoni tiegħu u tiġi evitata sitwazzjoni fejn l-Istati Membri jippreżentaw applikazzjonijiet pressjoni miċ-ċittadini tagħhom għalkemm ikunu jafu li l-applikazzjonijiet tagħhom se jkollhom jiġu rrifjutati;

19.

Huwa tal-fehma li jekk diżastru jikkawża “effett ta’ kaskata” , id-danni “kollaterali” għandhom jiġu koperti taħt il-Fond meta jaffettwaw sinifikament l-istruttura soċjoekonomika ta’ reġjun;

20.

Jenfasizza l-ħtieġa li jiġi ddefinit b’mod ċar u sempliċi x’inhu diżastru fil-livell reġjonali u li tiġi ċċarata l-eliġibbiltà tad-diżastri li jseħħu fil-livell reġjonali, permezz tal-introduzzjoni ta’ kriterju sempliċi u oġġettiv li jippermetti li jiġu assmilati mad-diżastri l-oħra, filwaqt li tiġi eliminata kull possibbiltà ta’ interpretazzjoni spekulattiva u kull dubju rigward l-eliġibbiltà tagħhom fost l-applikanti;

21.

Iqis li l-kriterju bbażat fuq il-limitu minimu tad-dħul jista’ jiġi adottat bħala kriterju bażiku ġenerali għal kull tip ta’ diżastru; jenfasizza li, f’każ li dan jiġi stabbilit bħala indikatur li jiddetermina l-eliġibbiltà ta’ diżastri reġjonali, għandu jiġi aġġustat biex ikun allinjat fil-livelli tal-PDG reġjonali tal-aħħar sena li jkollha figuri uffiċjali disponibbli, filwaqt li jiġi applikat fattur korrettiv definit minn qabel, li jiġbor it-telf li ma jistax jiġi kkwantifikat f’termini ta’ dħul kif ukoll l-effetti diretti u indiretti li normalment jakkumpanjaw diżastru reġjonali, li ta’ spiss ikunu ħafna akbar minn dawk li jiġu kkalkulati f’termini ta’ dħul;

22.

Huwa tal-fehma li l-limitu minimu ta’ danni ta' 1,5 % tal-PDG reġjonali fil-livell NUTS 2 (7) propost għad-definizzjoni tal-eliġibbiltà ta’ diżastru reġjonali jiċċara l-aspettattivi dwar l-eliġibbiltà jew le ta’ applikazzjoni potenzjali għal mobilizzazzjoni tal-Fond, iżda jissottolinja li peress li ntlaħaq kważi l-istess riżultat bħal bil-kriterji attwali għad-diżastri reġjonali, kważi dawk kollha li jseħħu fil-livell reġjonali ser ikomplu jkunu inammissibbli; jirrimarka, għalhekk, li limitu minimu tant għoli mhuwiex se jagħti r-rispons li jistennew iċ-ċittadini u, għalhekk, mhux se tiġi evitata l-frustrazzjoni fost il-vittmi ta’ diżastru li, għall-kuntrarju ta’ dan, se jkomplu jikkundannaw l-azzjonijiet tal-Unjoni u jakkużawha b'nuqqas ta’ sensittività lejn iċ-ċittadini tagħha;

23.

Ifakkar li l-prevenzjoni tad-diżastri għandha rwol vitali fil-politiki tal-Unjoni u tirrappreżenta l-irħas mod kif titnaqqas il-vulnerabbiltà għad-diżastri; jenfasizza li r-reġjuni tal-UE għandhom jagħmlu użu koerenti tal-opportunitajiet kollha ta’ finanzjament differenti għall-prevenzjoni sostenibbli tad-diżastri;

24.

Jissottolinja li għandu jkun ċar li n-nixfa se tkompli titqies bħala tip ta' diżastru eliġibbli għall-FSUE, b'iffukar fuq il-mitigazzjoni tal-effetti soċjoekonomiċi u ambjentali tal-każijiet ta' nixfa fil-kuntest tad-Direttiva Qafas dwar l-Ilma, u filwaqt li jitqies il-fatt li din hija problema strutturali dejjiema li diffiċli tiġi rrikonċiljata mal-iskadenzi għall-applikazzjonijiet stabbiliti u li għandha riperkussjonijiet serji fuq l-iżvilupp soċjali u ekonomiku tar-reġjuni affettwati; jinsisti, għaldaqstant, li f’każ ta’ nixfa serja jew diżastri oħra li jiżviluppaw bil-mod, għandhom jiddaħħlu dispożizzjonijiet speċifiċi li jistabbilixxu d-data tal-ewwel intervent tal-awtoritajiet pubbliċi kontra l-fenomenu, biex b’hekk ikun possibbli rispons rapidu u legalment ċar;

25.

Iħeġġeġ lill-Kummissjoni teżamina u tadatta l-kriterji sabiex il-FSUE jkun jista’ jagħti rispons għad-diżastri naturali fil-Mediterran, li huma dawk li, parzjalment minħabba t-tibdil fil-klima, huma l-aktar diżastri naturali serji li qed iseħħu fl-Unjoni f'dawn l-aħħar snin;

26.

Jirrimarka li l-FSUE ma jkoprix id-danni kollha li jirriżultaw minn diżastru naturali, u d-danni li jaqgħu taħt dan l-istrument għandhom għalhekk jiġu definiti kif suppost fi proposta għal regolament fil-futur;

27.

Jirrimarka li permezz tal-istrumenti eżistenti huwa diffiċli ħafna biex jingħata rispons adegwat, fil-livell tal-UE, għall-kriżijiet serji li mhumiex ta’ oriġini naturali, bħalma ġie muri fil-każijiet ta’ inċidenti industrijali jew il-kriżijiet serji għas-saħħa pubblika, u huwa meħtieġ li, jekk dan iseħħ, l-Unjoni għandu jkollha l-istrumenti xierqa biex toffri rispons xieraq;

28.

Jenfasizza l-ħtieġa li l-FSUE jikkomplementa strumenti ta' finanzjament oħra, bħall-fondi strutturali, meta jagħti rispons għad-diżastri naturali, filwaqt li jieħu vantaġġ mill-ħolqien ta’ sinerġiji ma’ dawn il-mekkaniżmi u programmi assoċjati;

29.

Jenfasizza li fil-Qafas Finanzjarju 2014-2020 li jmiss, ir-reġjuni għandu jkollhom flessibbiltà suffiċjenti u għandhom ikunu jistgħu jirridistribwixxu r-riżorsi assenjati lilhom sabiex ikunu jistgħu jżidu, jekk ikun meqjus meħtieġ u xieraq, ir-riżorsi disponibbli f’każ ta’ diżastru, u jitlob lill-Kummissjoni biex tirrevedi r-regolament fis-seħħ fi żmien opportun għall-perjodu finanzjarju l-ġdid;

30.

Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill u lill-Kummissjoni, kif ukoll lill-parlamenti nazzjonali.

30.12.2015   

MT

Il-Ġurnal Uffiċjali tal-Unjoni Ewropea

C 440/17

—

wara li kkunsidra l-Artikolu 225 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 298 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 41 tal-Karta tad-Drittijiet Fundamentali tal-Unjoni Ewropea, li jipprovdi li d-dritt għal amministrazzjoni tajba huwa dritt fundamentali,

—

wara li kkunsidra r-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwu fir-rigward tal-ipproċessar ta’ data personali mill-istituzzjonijiet u korpi Komunitarji u dwar il-moviment liberu ta’ dik id-data (1),

—

wara li kkunsidra r-Regolament (KE) Nru 1049/2001 tal-Parlament Ewropew u tal-Kunsill tat-30 ta’ Mejju 2001 dwar l-aċċess pubbliku għad-dokumenti tal-Parlament Ewropew, tal-Kunsill u tal-Kummissjoni (2),

—

wara li kkunsidra l-ġurisprudenza estensiva tal-Qorti tal-Ġustizzja tal-Unjoni Ewropea, li rrikonoxxiet ġabra ta’ prinċipji ġenerali tal-liġi amministrattiva bbażati fuq it-tradizzjonijiet kostituzzjonali tal-Istati Membri,

—

wara li kkunsidra r-riżoluzzjoni tiegħu tas-6 ta’ Settembru 2001 dwar ir-Rapport Speċjali tal-Ombudsman Ewropew lill-Parlament Ewropew wara inkjesta fuq inizjattiva proprja dwar l-eżistenza u l-aċċessibilità pubblika ta’ Kodiċi ta’ Mġiba Amministrattiva Tajba (3), fl-istituzzjonijiet u l-korpi differenti tal-Komunità,

—

wara li kkunsidra d-Deċiżjoni tal-Kummissjoni 2000/633/KE, KEFA, Euratom tas-17 ta’ Ottubru 2000 li temenda r-Regoli ta’ Proċedura tagħha biż-żieda ta’ anness dwar Kodiċi ta’ Mġiba Amministrattiva Tajba għal membri tal-persunal tal-Kummissjoni Ewropea fir-relazzjonijiet tagħhom mal-Pubbliku (4) ,

—

wara li kkunsidra d-Deċiżjoni tas-Segretarju Ġenerali tal-Kunsill/Rappreżentant Għoli għall-Politika Esterna u ta’ Sigurtà Komuni tal-25 ta’ Ġunju 2001 dwar kodiċi ta’ mġiba amministrattiva tajba għas-Segretarjat Ġenerali tal-Kunsill tal-Unjoni Ewropea u tal-persunal tiegħu fir-relazzjonijiet professjonali tagħhom mal-pubbliku (5),

—

wara li kkunsidra r-Rakkomandazzjoni tal-Kunsill tal-Ewropa CM/Rec(2007)7 tal-Kumitat tal-Ministri lill-Istati Membri dwar amministrazzjoni tajba, tal-20 ta’ Ġunju 2007,

—

wara li kkunsidra il-“Prinċipji ta’ servizz pubbliku għas-servizz pubbliku tal-UE” ppubblikat mill-Ombudsman Ewropew fid-19 ta’ Ġunju 2012;

—

wara li kkunsidra l-istħarriġ ikkummissjonat mill-Gvern Svediż mill-Aġenzija Svediża għall-Amministrazzjoni Pubblika dwar il-prinċipji ta’ amministrazzjoni tajba fl-Istati Membri tal-Unjoni Ewropea (6),

—

wara li kkunsidra n-noti ta’ informazzjoni ppreżentati fil-Konferenza dwar il-liġi amministrattiva tal-UE organizzata mid-Dipartiment tal-Politika tal-Kumitat għall-Affarijiet Legali tal-Parlament u l-Università ta’ León (León, is-27 u t-28 ta’ April 2011),

—

wara li kkunsidra r-rakkomandazzjonijiet inklużi fid-dokument ta’ ħidma dwar is-sitwazzjoni u l-prospetti futuri għal-liġi amministrattiva tal-UE ppreżentati mill-Grupp ta’ Ħidma dwar il-Liġi Amministrattiva tal-UE lill-Kumitat għall-Affarijiet Legali fit-22 ta’ Novembru 2011,

—

wara li kkunsidra l-Valutazzjoni tal-Valur Miżjud Ewropew ta’ Liġi ta’ Proċedura Amministrattiva tal-Unjoni Ewropea, ippreżentata mill-Unità għall-Valur Miżjud Ewropew lill-Kumitat għall-Affarijiet Legali fis-6 ta’ Novembru 2012,

—

wara li kkunsidra l-Artikoli 42 u 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Legali u l-opinjonijiet tal-Kumitat għall-Affarijiet Kostituzzjonali u l-Kumitat għall-Petizzjonijiet (A7-0369/2012),

A.

billi, bl-iżvilupp tal-kompetenzi tal-Unjoni Ewropea, iċ-ċittadini qegħdin dejjem iżjed ikunu kkonfrontati direttament bl-amministrazzjoni tal-Unjoni, mingħajr ma dejjem ikollhom id-drittijiet proċedurali korrispondenti li jistgħu jinfurzaw kontriha f’każijiet fejn azzjonijiet bħal dawn jistgħu jkunu meħtieġa;

B.

billi ċ-ċittadini għandhom kull dritt jistennew mill-amministrazzjoni tal-Unjoni livell għoli ta' trasparenza, effiċjenza, eżekuzzjoni rapida tal-ħidmiet u kapaċità ta’ rispons, irrispettivament minn jekk ikunux qed jirreġistraw ilment formali jew inkella jkunux qed jeżerċitaw id-dritt li jressqu petizzjoni skont it-Trattat, flimkien ma’ informazzjoni rigward il-possibbiltà li jieħdu passi ulterjuri fil-kwestjoni li tkun;

C.

billi r-regoli u l-prinċipji eżistenti tal-Unjoni dwar l-amministrazzjoni tajba jinsabu mferrxin f’varjetà wiesgħa ta’ sorsi: il-liġi primarja, il-ġurisprudenza tal-Qorti tal-Ġustizzja tal-Unjoni Ewropea, il-leġiżlazzjoni sekondarja, strumenti legali nonvinkolanti u l-impenji unilaterali mill-istituzzjonijiet tal-Unjoni;

D.

billi l-fatt li l-Unjoni nieqsa minn ġabra koerenti u komprensiva ta’ regoli kodifikati tal-liġi amministrattiva jagħmilha diffiċli għaċ-ċittadini biex jifhmu d-drittijiet amministrattivi tagħhom skont il-leġiżlazzjoni tal-Unjoni;

E.

billi l-kodiċijiet ta’ mġiba interni eżistenti tal-istituzzjonijiet differenti għandhom effett limitat, ivarjaw minn xulxin u mhumiex vinkolanti;

F.

billi fir-riżoluzzjoni msemmija hawn fuq tas-6 ta’ Settembru 2001, fil-fehma li l-istess kodiċi ta’ mġiba amministrattiva tajba għandha tapplika għall-istituzzjonijiet, il-korpi u l-aġenziji kollha tal-Unjoni, il-Parlament approva b’emendi l-Kodiċi Ewropea ta’ Mġiba Amministrattiva Tajba abbozzat mill-Ombudsman;

G.

billi fl-istess riżoluzzjoni l-Parlament stieden lill-Kummissjoni biex tissottometti proposta għal regolament li jkun fih kodiċi ta’ Mġiba Amministrattiva Tajba bbażata fuq l-Artikolu 308 tat-Trattat li jistabbilixxi l-Komunità Ewropea;

H.

billi, kif enfasizzat mill-Ombudsman, dan jgħin biex tiġi eliminata l-konfużjoni li attwalment qed tirriżulta mill-eżistenza parallela ta’ kodiċijiet differenti għal ħafna istituzzjonijiet u korpi tal-Unjoni, jiżgura li l-istituzzjonijiet u l-korpi japplikaw l-istess prinċipji bażiċi fir-relazzjonijiet tagħhom maċ-ċittadini u jenfasizza, kemm għaċ-ċittadini kif ukoll għall-uffiċjali, l-importanza ta’ prinċipji bħal dawn;

I.

billi l-azzjonijiet kollha tal-Unjoni jeħtieġ li jkunu konformi mal-istat tad-dritt b’separazzjoni stretta tal-poteri;

J.

billi d-dritt fundamentali għal amministrazzjoni tajba minqux fl-Artikolu 41 tal-Karta tad-Drittijiet Fundamentali tal-Unjoni Ewropea sar vinkolanti bħala liġi primarja;

K.

billi r-regoli dwar l-amministrazzjoni tajba jippromwovu t-trasparenza u r-responsabbiltà;

L.

billi problema urġenti li l-Unjoni Ewropea qed tħabat wiċċha magħha llum hija dik tan-nuqqas ta’ fiduċja min-naħa taċ-ċittadini, nuqqas li jista’ jaffettwa l-leġittimità tagħha; billi l-Unjoni Ewropea jeħtiġilha tindirizza bil-ħeffa tweġibiet ċari u viżibbli liċ-ċittadini ħalli tirrispondi għall-preokkupazzjonijiet tagħhom;

M.

billi l-kodifikazzjoni tal-prinċipju ta’ servizz – jiġifieri l-prinċiju li l-amministrazzjoni għandha taħdem biex tiggwida, tgħin, taqdi u tappoġġja liċ-ċittadini, taġixxi bil-kortesija adatta u għaldaqstant tevita proċeduri ta’ piż u tul bla bżonn, biex b’hekk tiffranka ħin u sforzi sew liċ-ċittadini if ukoll lill-uffiċjali – ikun ta’ siwi biex jissodisfa l-aspettativi leġittimi taċ-ċittadini u jibbenefika sew liċ-ċittadini kif ukoll lill-amministrazzjoni f’dak li jirrigwarda servizz imtejjeb u aktar effiċjenza; billi l-għarfien tad-dritt taċ-ċittadini tal-Unjoni għal amministrazzjoni tajba għandu jitkattar, inkluż permezz tas-servizzi ta’ informazzjoni u n-netwerks relevanti tal-Kummissjoni;

N.

billi, fid-dawl ta r-rakkomandazzjonijiet tal-Grupp ta' Stati kontra l-Korruzzjoni (GRECO) tal-Kunsill tal-Ewropa, ġabra ċara u vinkolanti ta’ regoli għall-amministrazzjoni tal-Unjoni tkun sinjal pożittiv fit-taqbida kontra l-korruzzjoni fl-amministrazzjonijiet pubbliċi;

O.

billi ġabra ċentrali ta’ prinċipji ta’ amministrazzjoni tajba attwalment tgawdi aċċettazzjoni wiesgħa fost l-Istati Membri;

P.

billi l-ġurisprudenza tal-Qorti tal-Ġustizzja żviluppat prinċipji proċedurali stabbiliti sewwa li japplikaw għall-proċeduri tal-Istati Membri fi kwistjonijiet komunitarji u li għandhom japplikaw a fortiori biex jiggwidaw l-amministrazzjoni tal-Unjoni;

Q.

billi Liġi Ewropea ta’ Proċedura Amministrattiva tkun ta’ siwi għall-amministrazzjoni tal-Unjoni hija u tuża l-qawwa tal-organizzazzjoni interna tagħha biex tiffaċilita u tippromwovi l-ogħla standards ta’ amministrazzjoni;

R.

billi Liġi Ewropea ta’ Proċedura Amministrattiva ssaħħaħ il-leġittimità tal-Unjoni u tqawwi l-fiduċja taċ-ċittadini fl-amministrazzjoni tal-Unjoni;

S.

billi Liġi Ewropea ta’ Proċedura Amministrattiva tista’ ssaħħaħ konverġenza spontanja tal-liġi amministrattiva nazzjonali, fir-rigward tal-prinċipji ġenerali ta’ proċedura u d-drittijiet fundamentali ta’ ċittadini fil-konfront tal-amministrazzjoni, u għalhekk issaħħaħ il-proċess ta’ integrazzjoni;

T.

billi Liġi Ewropea ta’ Proċedura Amministrattiva tista’ trawwem il-kooperazzjoni u l-iskambju tal-aqwa prattiki bejn l-amministrazzjonijiet nazzjonali u l-amministrazzjoni tal-Unjoni, biex tilħaq l-objettivi stabbiliti bl-Artikolu 298 tat-Trattat dwar il-Funzjonament tal-Unjoni Ewropea;

U.

billi d-dħul fis-seħħ tat-Trattat ta’ Lisbona ta lill-Unjoni bażi ġuridika adegwata għall-adozzjoni ta’ Liġi Ewropea ta’ Proċedura Amministrattiva;

V.

billi l-azzjoni leġiżlattiva mitluba f’din ir-riżoluzzjoni għandha tkun ibbażata fuq valutazzjonijiet tal-impatt dettaljati, li inter alia jikkwantifikaw il-kostijiet tal-proċeduri amministrattivi;

W.

billi l-Kummissjoni għandha tidħol f’konsultazzjoni adegwata mal-atturi relevanti kollha, u għandha b’mod partikolari tutilizza l-għarfien speċjali u espert tal-Ombudsman Ewropew, ladarba lilu jsiru l-ilmenti tal-pubbliku rigward abbużi fil-korpi u fl-istituzzjonijiet tal-Unjoni;

1.

Jitlob lill-Kummissjoni biex tissottometti, fuq il-bażi tal-Artikolu 298 tat-Trattat dwar il-Funzjonament tal-Unjoni Ewropea, proposta għal regolament dwar Liġi Ewropea ta’ Proċedura Amministrattiva, skont ir-rakkomandazzjonijiet dettaljati mniżżla fl-Anness;

2.

Jikkonferma li r-rakkomandazzjonijiet jirrispettaw id-drittijiet fundamentali u l-prinċipju ta’ sussisdjarjetà;

3.

Iqis li l-proposta mitluba m’għandha l-ebda implikazzjoni finanzjarja.

4.

Jagħti struzzjonijiet lill-President tiegħu biex jgħaddi din ir-riżoluzzjoni u r-rakkomandazzjonijiet dettaljati annessi magħha lill-Kummissjoni u lill-Kunsill, lill-Ombudsman Ewropew u lill-parlamenti u lill-gvernijiet tal-Istati Membri.

30.12.2015   

MT

Il-Ġurnal Uffiċjali tal-Unjoni Ewropea

C 440/23

—

wara li kkunsidra l-Artikolu 225 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikoli 9 u 151 u l-Artikolu 153(1)(e) tat-Trattat dwar il-Funzjonament tal-Unjoni Ewropea,

—

wara li kkunsidra l-Artikoli 14, 27 u 30 tal-Karta dwar id-Drittijiet Fundamentali tal-Unjoni Ewropea,

—

wara li kkunsidra l-valutazzjoni tal-valur miżjud Ewropew ta' miżura tal-Unjoni dwar informazzjoni lill-ħaddiema u konsultazzjoni tal-ħaddiema, antiċipazzjoni u ġestjoni tar-ristrutturazzjoni, li saret mill-Unità Ewropea għall-Valur Miżjud tal-Parlament Ewropew u li ġiet trażmessa lill-Kumitat għall-Impjiegi u l-Affarijiet Soċjali fid-19 ta' Novembru 2012 (1),

—

wara li kkunsidra 'Managing change – Final report of the High Level Group on economic and social implications of industrial change, set up by the Luxembourg Employment Summit of November 1997' (Niġġestixxu l-bidla – Rapport finali tal-grupp ta' Livell Għoli dwar l-implikazzjonijiet ekonomiċi u soċjali tal-bidla industrijali, imwaqqaf mis-Samit tal-Impjieg fil-Lussemburgu ta' Novembru 1997) (2),

—

wara li kkunsidra r-Rakkomandazzjoni tal-Kunsill 92/443/KEE tas-27 ta' Lulju 1992 dwar il-promozzjoni tal-parteċipazzjoni mill-persuni impjegati fil-qligħ u fir-riżultati tal-intrapriżi (inkluża l-parteċipazzjoni ta' ekwità) (3),

—

wara li kkunsidra r-Regolament (KE) Nru 2157/2001 tal-Kunsill tat-8 ta’ Ottubru 2001 dwar l-Istatut ta’ Kumpannija Ewropea (SE) (4),

—

wara li kkunsidra d-Direttiva 98/59/KE tal-Kunsill tal-20 ta’ Lulju 1998 dwar l-approssimazzjoni tal-liġijiet tal-Istati Membri dwar redundancies kollettivi (5),

—

wara li kkunsidra d-Direttiva tal-Kunsill 2000/78/KE tas-27 ta’ Novembru 2000 li tistabbilixxi qafas ġenerali għall-ugwaljanza fit-trattament fl-impjieg u fix-xogħol (6),

—

wara li kkunsidra d-Direttiva tal-Kunsill 2001/23/KE tat-12 ta' Marzu 2001 dwar l-approssimazzjoni tal-liġijiet tal-Istati Membri relatati mas-salvagwardja tad-drittijiet tal-impjegati fil-każ ta' trasferiment ta' impriżi, negozji jew partijiet ta' impriżi jew negozji (7),

—

wara li kkunsidra d-Direttiva Nru 2001/86/KE tal-Kunsill tat-8 ta’ Ottubru 2001 li tissupplimenta l-istatut għal kumpanija Ewropea rigward l-involviment tal-ħaddiema (8),

—

wara li kkunsidra d-Direttiva 2002/14/KE tal-Parlament Ewropew u tal-Kunsill tal-11 ta' Marzu 2002 li tistabbilixxi qafas ġenerali dwar l-informazzjoni u l-konsultazzjoni ta’ l-impjegati fil-Komunità Ewropea (9),

—

wara li kkunsidra d-Direttiva 2003/72/KE tal-Kunsill tat-22 ta’ Lulju 2003 li tissupplimenta l-Istatut ta’ Soċjetà Kooperattiva Ewropea fir-rigward tal-involviment tal-impjegati (10),

—

wara li kkunsidra d-Direttiva 2004/25/KE tal-Parlament Ewropew u tal-Kunsill tal-21 ta' April 2004 fuq offerti ta' xiri (11),

—

wara li kkunsidra d-Direttiva Nru 2005/56/KE tal-Parlament Ewropew u tal-Kunsill tas-26 ta' Ottubru 2005 dwar mergers transkonfinali ta’ kumpaniji ta' responsabilità limitata (12),

—

wara li kkunsidra d-Direttiva 2009/38/KE tal-Parlament Ewropew u tal-Kunsill tas-6 ta' Mejju 2009 dwar l-istabbiliment ta' Kunsill tax-Xogħlijiet Ewropew jew proċedura fl-impriżi fuq skala Komunitarja u fil-gruppi tal-impriżi fuq skala Komunitarja għall-għanijiet ta' informazzjoni u ta' konsultazzjoni tal-impjegati (13),

—

wara li kkunsidra l-Komunikazzjoni tal-Kummisjoni tal-31 ta' Marzu 2005 dwar "Strutturar mill-ġdid u impjiegi: li tantiċipa u takkumpanja l-istrutturar mill-ġdid biex jiżviluppa l-impjieg: ir-rwol tal-Unjoni Ewropea' (COM(2005)0120) u l-opinjoni tal-Kumitat Ekonomiku u Soċjali Ewropew tal-14 ta' Diċembru 2005 (14),

—

wara li kkunsidra l-Komunikazzjoni mill-Kummissjoni dwar l-Aġenda Soċjali (COM(2005)0033),

—

wara li kkunsidra d-Deċiżjoni tal-Kunsill 2010/707/UE tal-21 ta' Ottubru 2010 dwar il-linji gwida għall-politika tal-Istati Membri dwar l-impjiegi (15),

—

wara li kkunsidra l-Kommunikazzjoni tal-Kummissjoni bit-titolu “Politika Industrijali Integrata għall-Era tal-Globalizzazzjoni – Il-Kompetittività u s-Sostenibilità fix-Xena Prinċipali” (COM(2010)0614),

—

wara li kkunsidra l-Komunikazzjoni mill-Kummissjoni bit-titolu “Lejn Att dwar is-Suq Uniku” (COM(2010)0608 finali/2),

—

wara li kkunsidra l-Komunikazzjoni tal-Kummissjoni bl-isem “Aġenda għall-ħiliet ġodda u l-impjiegi” (COM(2010)0682),

—

wara li kkunsidra l-Green Paper tal-Kummissjoni dwar “Ristrutturazzjoni u antiċipazzjoni tal-bidla: X'tgħallimna mill-esperjenza reċenti?” (COM(2012) 0007),

—

wara li kkunsidra r-riżoluzzjoni tiegħu tal-15 ta' Diċembru 2011 dwar ir-rieżami ta' nofs il-perjodu tal-Istrateġija Ewropea 2007-2012 dwar is-saħħa u s-sigurtà fuq il-post tax-xogħol (16),

—

wara li kkunsidra l-komunikazzjoni mill-Kummissjoni bit-titolu “Lejn irkupru li jwassal għall-ħolqien abbundanti ta' impjiegi” (COM(2012)0173),

—

wara li kkunsidra r-riżoluzzjoni tiegħu tas-26 ta’ Mejju 2005 dwar Aġenda Soċjali għall-perjodu 2006-2010 (17),

—

wara li kkunsidra l-Opinjoni ta' inizjattiva proprja tal-Kumitat Ekonomiku u Soċjali Ewropew tal-25 ta' April 2012 dwar il-“Il-kooperattivi u r-ristrutturar” (18),

—

wara li kkunsidra r-riżoluzzjoni tiegħu tal-10 ta’ Mejju 2007 dwar it-tisħiħ tal-leġiżlazzjoni Ewropea fil-qasam tal-informazzjoni u l-konsultazzjoni tal-ħaddiema (19),

—

wara li kkunsidra r-riżoluzzjoni tiegħu tad-9 ta’ Marzu 2011 dwar Politika Industrijali għall-Era Globalizzata (20),

—

wara li kkunsidra l-Komunikazzjoni tal-Kummissjoni tal-20 ta' Settembru 2011 dwar “Pjan Direzzjonali għal Ewropa b’użu effiċjenti tar-riżorsi” (COM(2011)0571),

—

wara li kkunsidra l-komunikazzjoni tal-Kummissjoni tat-8 ta’ Marzu 2011 intitolata “Pjan direzzjonali għal ekonomija kompetittiva b’livell baxx ta’ emissjonijiet tal-karbonju fl-2050” (COM(2011)0112),

—

wara li kkunsidra r-riżultati tar-riċerki u tal-istħarriġ mwettqa mill-Fondazzjoni Ewropea għat-Titjib tal-Kondizzjonijiet tal-Ħajja u tax-Xogħol ,

—

wara li kkunsidra l-Artikoli 42 u 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Impjiegi u l-Affarijiet Soċjali (A7-0390/2012),

A.

billi r-ristrutturazzjoni mhijiex fenomenu ġdid iżda prattika li sseħħ iktar frekwentement minħabba sfidi ekonomiċi, u billi f’dawn l-aħħar snin saret iktar prevalenti, kif ukoll ħadet ħafna forom differenti, u kibret f’ċerti setturi u ġiet introdotta f’oħrajn ġodda b’konsegwenzi imprevedibbli fl-istruttura ekonomika u soċjali tal-Istati Membri;

B.

billi l-kriżi ekonomika globali li bdiet fl-2008 tirrikjedi li l-kumpaniji u l-impjegati tagħhom jagħmlu bidliet neċessarji biex jissalvagwardjaw il-kompetittività u l-impjiegi, u billi dik il-kriżi kibret b'mod sinifikanti minħabba l-ispekulazzjoni finanzjarja fis-settur finanzjarju, u ħaffet ir-rata tal-bidla b’mod qawwi, biex b'hekk żiedet b'mod allarmanti l-pressjoni fuq il-ħaddiema, it-territorji u l-livelli kollha tal-gvern għall-adattament strutturali;

C.

billi b'riżultat tat-tibdil radikali fl-istrateġiji ekonomiċi, fl-aħħar 30 sena kien hemm qalba enormi fil-ġid mill-ekonomija reali għall-ekonomija finanzjarja; u billi għandha tittejjeb is-sitwazzjoni ta' dawk li ħolqu l-prodotti kollha u jipprovdu s-servizzi kollha, iżda li jbatu l-effetti kollha tal-kriżi ekonomika;

D.

billi r-ristrutturazzjoni ssir kwistjoni għall-partijiet interessati fi stadju avvanzat biss, u ħafna drabi meta jkunu qed jiġu kkunsidrati s-sensji;

E.

billi, waqt ir-ristrutturazzjoni, huwa l-impatt immedjat u faċilment perċettibbli fuq l-impjiegi li jattira l-aktar attenzjoni, waqt li l-effett negattiv fuq il-kundizzjonijiet tax-xogħol u s-saħħa tal-ħaddiem mhuwiex rikonoxxut u indirizzat b’mod adegwat;

F.

billi l-partijiet interessati multipli u differenti involuti fir-ristrutturazzjoni huma iżolati u rarament jikkooperaw fit-tul;

G.

billi, hekk kif ġie enfasizzat b'mod konsistenti fil-karti politiċi reċenti mill-Kummissjoni, b'mod partikolari fl-Istrateġija Ewropa 2020 u fil-Komunikazzjoni dwar il-Politika Industrijali tat-28 ta' Ottubru 2010, “Antiċipazzjoni u ġestjoni aħjar tar-ristrutturar għandhom jgħinu lill-impjegati u lill-kumpaniji biex jadattaw għat-tranżizzjonijiet imposti minn kapaċitajiet eċċessivi kif ukoll mill-modernizzazzjoni u minn aġġustament strutturali”. […] “[il-]maniġment u [il-]ħaddiema huma l-atturi ewlenin li jridu jaqblu fuq l-istrateġiji ta’ ristrutturazzjoni fil-livell tal-kumpanija. L-interventi ta' politika għandhom jakkumpanjaw ristrutturazzjoni bħal din biex jevitaw diffikulatjiet soċjali u jippromwovu ħiliet u impjiegi ġodda, hekk li jnaqqsu sensji tal-massa u d-deklin ta’ reġjuni sħaħ jew ir-rilokazzjoni ta’ industriji sħaħ, kif ukoll jiffaċilitaw ir-rikonverżjoni ekonomika u t-tranżizzjoni professjonali”;

H.

billi l-kriżi wasslet għal governanza ekonomika ġdida fil-livell tal-Unjoni, permezz tal-istħarriġ annwali dwar it-tkabbir u s-semestru, u billi l-governanza ekonomika ġdida tista’ hija nnifisha twassal għal ristrutturazzjoni u għalhekk teħtieġ l-involviment tas-sħab soċjali;

I.

billi hemm il-ħtieġa li l-ħaddiema jkunu ppreparati fil-mument opportun għall-bidla lejn ekonomija favur il-klima b’użu effiċjenti tar-riżorsi, u billi l-iżvilupp għandu potenzjal enormi ta’ impjieg, iżda li se jagħti lok għar-ristrutturazzjoni ta’ setturi u kumpaniji mhux sostenibbli;

J.

billi t-telf fl-impjiegi kien jammonta għal kważi d-doppju tan-numru ta' impjiegi maħluqa fit-tielet kwart tal-2011, u hemm il-possibilità li din it-tendenza tikber minħabba t-tħabbir ta' ristrutturazzjonijiet kbar f'oqsma strateġiċi;

K.

billi ntilfu 'l fuq minn 6,4 miljun impjieg fis-setturi tal-kostruzzjoni u tal-manifattura bejn l-2008 u 2011;

L.

billi l-Istati Membri kollha li fihom kien hemm relattivament ftit tkeċċijiet matul il-kriżi, għandhom sistemi ta' relazzjonijiet industrijali ferm żviluppati, li jagħtu lill-impjegati u r-rappreżentanti tagħhom għadd relattivament għoli ta' drittijiet fil-qasam tal-konsultazzjoni, l-informazzjoni u l-ġestjoni konġunta, sistemi li wasslu għall-ilħuq ta' ftehimiet konġunti fil-livell tal-kumpanija, abbażi ta' liġijiet u ftehimiet kollettivi;

M.

billi, hekk kif ġie ddikjarat fl-Istħarriġ Annwali dwar it-Tkabbir: it-titjib tar-reazzjoni tal-Unjoni għall-kriżi, “il-prestazzjoni pożittiva fl-esportazzjonijiet ta' ċerti Stati Membri turi li s-suċċess fis-swieq dinjija jistrieħ fuq fatturi usa' bħall-ispeċjalizzazzjoni fis-settur, l-innovazzjoni u l-livelli tal-kapaċitajiet li jżidu l-kompetittività reali”; anke fil-kriżi, il-kumpaniji f'xi Stati Membri ħadu approċċ fuq medda twila ta' żmien u użaw il-kapaċitajiet kollha biex jiżguraw li impjegati mħarrġa tajjeb u b’għarfien prattiku kbir ma jitkeċċewx;

N.

billi l-impriżi tal-Unjoni jafu jsibuha diffiċli li jiksbu suċċess fis-swieq dinjija jekk sempliċement iraħħsu fuq il-prezzijiet tal-kompetituri tagħhom, minflok jiżviluppaw prodotti, proċessi u servizzi tajbin;

O.

billi l-impjegati f'setturi mhux sostenibbli għandhom jingħataw assistenza u taħriġ biex jagħmlu tranżizzjoni lejn impjiegi favur l-ambjent;

P.

billi jeżisti l-periklu li l-prattiki tajbin li rriżultaw mill-kriżi u li setgħu ġew identifikati, b'mod partikolari mill-ILO, ma jiġux ikkunsidrati biżżejjed u ma jintużawx għal kriżijiet fil-ġejjieni; billi għalhekk, l-istituzzjonijiet tal-Unjoni Ewropea għandhom jinvestigaw u jiddokumentaw tali prattiki tajbin, sabiex ikunu jistgħu jintużaw ukoll għas-sitwazzjonijiet ta’ ristrutturazzjoni;

Q.

billi fil-Komunikazzjoni tagħha dwar Aġenda għal ħiliet ġodda u impjiegi tat-23 ta' Novembru 2010, il-Kummissjoni tirrikonoxxi wkoll li l-adattabilità u l-proattività meta wieħed ikun qed ibiddel l-impjieg jew l-okkupazzjoni madankollu jistgħu jiġu ostakolati min-nuqqas ta' sikurezza minħabba li t-tranżizzjonijiet għandhom il-potenzjal li jġibu magħhom riskju ta' qgħad, salarji iktar baxxi u insikurezza soċjali; billi tranżizzjonijiet pożittivi tul il-karrieri tal-persuni huma għalhekk essenzjali sabiex ikun hemm adattament kostanti, tinżamm u tiżdied l-impjegabilità filwaqt li tiġi provduta sikurezza lill-individwi u fluwidità fis-swieq tax-xogħol;

R.

billi, f’każijiet ta’ ristrutturazzjoni fejn it-tkeċċijiet huma inevitabbli, il-kategoriji ta' ħaddiema vulnerabbli, inklużi ħaddiema żgħażagħ u ħaddiema akbar fl-età, huma spiss fil-mira għal sensja meta mqabbla ma’ gruppi ta’ etajiet oħra, anke meta din tikkostitwixxi diskriminazzjoni ta’ età skont il-leġiżlazzjoni rilevanti tal-Unjoni;

S.

billi, kif iddikjarat fil-Komunikazzjoni tal-Kummissjoni dwar “Lejn Att dwar is-Suq Uniku," is-sens ta’ diżillużjoni li wħud iħossu fir-rigward tas-suq intern jista’ jkun spjegat minħabba li teżisti l-perċezzjoni li l-liberalizzazzjonijiet suċċessivi seħħew b'detriment għad-drittijiet soċjali akkwistati minn atturi ekonomiċi differenti.”; “It-Trattat ta' Lisbona u l-kunċett ta' ‘ekonomija soċjali tas-suq kompetittiva ħafna’ bħala wieħed mill-għanijiet prinċipali jitlobna nadottaw viżjoni aktar sħiħa tas-suq uniku . Il-libertajiet ekonomiċi u l-libertajiet tal-azzjonijiet kollettivi għandhom jiġu armonizzati. Huwa essenzjali li d-djalogu bejn is-sħab soċjali jieħu l-ħajja u b'hekk ikun jista' jwassal aħjar għal leġiżlazzjonijiet ‘minn u għal’ sħab soċjali hekk kif previst mit-Trattat ta’ Lisbona.”; “Lil hinn mir-reazzjonijiet għall-kriżi ekonomika u finanzjarja, l-istrateġiji ta' antiċipazzjoni ppermettew li l-impriżi jipprevjenu l-kunflitti soċjali permezz ta' ġestjoni proattiva u negozjata tar-ristrutturazzjonijiet. Dik hija kundizzjoni tas-suċċess ekonomiku u rekwiżit soċjali, hekk kif tippermetti tqassim ġdid tar-riżorsi lis-setturi li qed jemerġu, u li tagħti lill-ħaddiema opportunitajiet ġodda meta l-impjieg tagħhom ikun f'periklu”; billi att tal-Unjoni għar-ristrutturazzjonijiet jippermetti li jinbena ambjent ibbażat fuq il-fiduċja reċiproka;

T.

billi l-approfondiment tas-suq uniku jwassal għal kompetizzjoni addizzjonali li twassal għal ristrutturazzjoni; billi l-Unjoni għandha terfa’ r-responsabbiltà għal dan il-proċess billi tistabbilixxi l-qafas biex ittaffi l-konsegwenzi soċjali;

U.

billi l-Linji Gwida ta’ referenza għall-ġestjoni tal-bidla u tal-konsegwenzi soċjali tagħha, imfassla mis-sħab soċjali f’Ottubru 2003, ma ġew madankollu segwiti minn l-ebda miżura leġiżlattiva għalkemm ġew segwiti minn żewġ ċikli ta’ seminars nazzjonali organizzati mis-sħab soċjali fil-qafas tal-programmi ta’ ħidma pluriennali tagħhom; billi dawn għadhom fil-biċċa l-kbira mhux magħrufa mhux biss mill-organizzazzjonijiet nazzjonali u settorjali tas-sħab soċjali, iżda wkoll, u aktar importanti, minn kumpaniji u r-rappreżentanti tal-ħaddiema tagħhom; billi, madankollu, tkun ta’ importanza kbira l-osservanza f’waqtha u effettiva tal-prinċipji inklużi f’dawk il-Linji Gwida u li jirriżultaw ukoll minn studji u rapporti oħra; billi, peress li l-prattiki tal-kumpaniji f’dan il-qasam spiss huma reattivi minflok proattivi, jintervjenu wisq ’l isfel fil-proċess tat-teħid tad-deċiżjonijiet u ma jinvolvux entitajiet esterni li jista’ jkollhom rwol suffiċjenti, jew fil-ħin suffiċjenti, fit-taffija tal-impatt soċjali tiegħu;

V.

billi l-Kummissjoni fittxet kontribuzzjonijiet konkreti dwar kif tiżviluppa ulterjorment il-politika f'dan il-qasam permezz tal-“Green Paper: Ristrutturazzjoni u antiċipazzjoni tal-bidla: X'tgħallimna mill-esperjenza reċenti?”, li tirrikonoxxi li “huwa ċert li t-tibdil teknoloġiku u l-innovazzjoni jistgħu jwasslu għal strateġiji ta’ aġġustament għall-impriżi u għall-impjiegi, iżda hemm indikazzjonijiet ukoll li l-innovazzjoni, flimkien mar-riċerka u l-edukazzjoni, jistgħu jwasslu għal mod effettiv sabiex l-Ewropa toħroġ mill-kriżi”;

W.

billi l-kooperattivi li jimmaniġġjaw ir-ristrutturazzjoni b’mod responsabbli mil-lat soċjali u billi “l-mudell speċifiku ta’ governanza kooperattiva, li huwa msejjes fuq is-sjieda konġunta, il-parteċipazzjoni demokratika u l-kontroll tal-membri, kif ukoll il-kapaċità tal-kooperattivi li jiddependu minn riżorsi finanzjarji proprji u minn netwerks ta’ appoġġ, jispjegaw għalfejn il-kooperattivi huma aktar flessibbli u innovattivi fil-ġestjoni tar-ristrutturazzjoni matul iż-żmien, kif ukoll fil-ħolqien ta’ negozju ġdid”;

X.

billi, minkejja d-dikjarazzjonijiet qawwija msemmija hawn fuq, il-Kummissjoni pprovdiet reazzjonijiet deludenti għar-riżoluzzjonijiet parlamentari dwar l-informazzjoni, il-konsultazzjoni u r-ristrutturazzjoni, u dan enfasizza l-bżonn ta' miżuri urġenti u konkreti f'dan il-qasam, kif ukoll fir-rigward ta' talbiet minn protagonisti ekonomiċi u soċjali rilevanti oħra;

Y.

billi din ir-riżoluzzjoni hija mingħajr preġudizzju għall-obbligi ta’ informazzjoni li jirriżultaw mid-dritt tal-Unjoni u nazzjonali; billi, sakemm id-dritt tal-Unjoni u dak nazzjonali jipprovdu hekk, il-proċeduri ta’ informazzjoni għandhom jintużaw bis-sħiħ biex jiġu implimentati r-rakkomandazzjonijiet stabbiliti f’din ir-riżoluzzjoni;

Z.

billi din ir-riżoluzzjoni hija mingħajr preġudizzju għall-obbligi tal-protezzjoni tal-impjieg u l-obbligi relatati mat-tmiem tal-impjieg li jirriżultaw mil-liġi nazzjonali;

AA.

billi attwalment hemm differenzi kbar fil-liġijiet nazzjonali dwar ir-responsabbiltajiet ta’ min iħaddem, lejn l-impjegati tiegħu fil-proċess ta’ ristrutturazzjoni; billi s-sħab soċjali Ewropej ġew ikkonsultati darbtejn tul id-deċennju tas-snin 2000, u l-Kummissjoni ma ħaditx azzjoni;

AB.

billi informazzjoni u konsultazzjoni tajbin u effettivi b'rabta mal-mezzi ta' ristrutturazzjoni jfissru li dawn jitwettqu diversi xhur qabel id-deċiżjoni tar-ristrutturazzjoni prevista, li jirrigwardaw ukoll lill-kumpaniji dipendenti u li jwettqu malajr taħriġ vokazzjonali mill-ġdid bil-għan li jikkontribwixxu biex l-impriżi u l-Unjoni jsiru iktar kompetittivi, biex b'hekk jibagħtu l-messaġġ ta' ċertezza u trasparenza liċ-ċittadini tal-Unjoni u lill-investituri fi żmien ta' kriżi;

AC.

billi dawk l-impriżi li ma jirnexxilhomx jadattaw għall-kundizzjonijiet li dejjem qed jinbidlu, ma jkunux jistgħu jlaħħqu mal-kompetituri għal żmien twil; billi l-impriżi, il-ħaddiema u s-setturi nnifishom normalment ikunu dawk li jafu l-aktar dwar il-bżonnijiet tagħhom ta’ ristrutturazzjoni; billi kull Stat Membru jgħaddi minn tipi differenti ta’ ristrutturazzjoni u l-impatti tagħha huma differenti f’kull wieħed minnhom;

AD.

billi l-Kummissjoni, biex tgħin lill-ħaddiema u l-kumpaniji jantiċipaw il-bidliet b’mod aktar effettiv, nediet riċerki profondi u analiżi, kemm fuq il-fenomenu tar-ristrutturazzjoni nnifsu kif wkoll fuq il-monitoraġġ tas-setturi ta’ attività, inkluża serje ta’ studji dwar il-bidliet fl-impjieg bejn il-preżent u l-2020 (21); billi din l-analiżi prospettiva twettqet b’kollaborazzjoni ma’ riċerkaturi indipendenti, is-sħab soċjali u istituzzjonijiet oħra tal-Unjoni, bħall-Parlament Ewropew u l-aġenziji u l-korpi tal-Unjoni, bħaċ-Ċentru Ewropew għall-Monitoraġġ dwar il-Bidla (22) tal-Fondazzjoni Ewropea għat-Titjib tal-Kondizzjonijiet tal-Ħajja u tax-Xogħol u ċ-Ċentru Ewropew għall-Iżvilupp ta’ Taħriġ Vokazzjonali;

AE.

billi bħalissa qed issir reviżjoni tar-Regolament (KE) Nru 1927/2006 tal-Parlament Ewropew u l-Kunsill tal-20 ta’ Diċembru 2006 li jistabbilixxi Fond Ewropew ta’ Aġġustament għall-Globalizzazzjoni (23);

1.

Jitlob lill-Kummissjoni tressaq mill-iktar fis, abbażi tal-Artikolu 225 tat-Trattat dwar il-Funzjonament tal-Unjoni Ewropea u wara li tikkonsulta lis-sħab soċjali, proposta għal att legali dwar Informazzjoni lill-ħaddiema u konsultazzjoni tal-ħaddiema, antiċipazzjoni u ġestjoni tar-ristrutturazzjoni, skont ir-rakkomandazzjonijiet dettaljati stabbiliti fl-Anness hawn taħt;

2.

Jikkonferma li r-rakkomandazzjonijiet jirrispettaw id-drittijiet fundamentali u l-prinċipju ta’ sussisdjarjetà; jikkonferma wkoll li r-rakkomandazzjonijiet huma fir-rispett tal-prinċipju tal-proporzjonalità, il-libertà intraprenditorjali u d-dritt għall-proprjetà;

3.

Jikkonferma l-importanza ta’ djalogu soċjali sod, ibbażat fuq fiduċja reċiproka u responsabbiltà konġunta, bħala strument aħjar sabiex jinstabu soluzzjonijiet ta’ qbil u metodi komuni sabiex jantiċipaw, jipprevjenu u jimmaniġġjaw il-proċessi tar-ristrutturazzjoni;

4.

Jistieden lill-Kummissjoni tanalizza jekk hux meħtieġ li jittieħdu miżuri fuq livell tal-Unjoni sabiex tissorvelja l-attivitajiet tal-impriżi bl-iskop li jkun evitat kwalunkwe tip ta’ abbuż li jkun ta’ detriment, b’mod speċjali għall-ħaddiema;

5.

Jistieden lill-Kummissjoni tiżgura li t-tkeċċijiet jitqiesu bħala l-aħħar għażla u wara li jiġu kkunsidrati l-alternattivi kollha possibli, mingħajr ma jfixklu l-kompetittività tal-impriżi;

6.

Iqis li l-proposta mitluba m'għandha l-ebda konsegwenza finanzjarja;

7.

Jagħti istruzzjonijiet lill-President tiegħu biex jgħaddi din il-proposta u r-rakkomandazzjonijiet dettaljati li jakkumpanjawha lill-Kummissjoni u lill-Kunsill.

30.12.2015   

MT

Il-Ġurnal Uffiċjali tal-Unjoni Ewropea

C 440/38

—

wara li kkunsidra r-riżoluzzjoni tiegħu tal-10 ta’ Mejju 2012 dwar il-piraterija marittima (1),

—

wara li kkunsidra r-riżoluzzjoni tiegħu tal-15 ta' Jannar 2009 dwar is-sitwazzjoni fil-Qarn tal-Afrika (2),

—

wara li kkunsidra r-riżoluzzjoni tiegħu tal-10 ta’ Marzu 2010 dwar ir-Rapport tal-2008 dwar il-Politika Barranija u ta’ Sigurtà Komuni (3),

—

wara li kkunsidra r-riżoluzzjoni tiegħu tal-11 ta’ Mejju 2011 dwar ir-Rapport tal-2009 dwar il-Politika Barranija u ta’ Sigurtà Komuni (4),

—

wara li kkunsidra r-riżoluzzjoni tiegħu tat-12 ta’ Settembru 2012 dwar ir-Rapport Annwali mill-Kunsill lill-Parlament Ewropew dwar il-Politika Estera u ta’ Sigurtà (5),

—

wara li kkunsidra l-Konklużjonijiet tal-Kunsill dwar il-Qarn tal-Afrika tal-14 ta' Novembru 2011, u, b’mod partikolari, il-Qafas Strateġiku fl-Anness tagħhom,

—

wara li kkunsidra l-Istrateġija Ewropea ta’ Sigurtà u d-dokument tal-14 ta’ Marzu 2008 mir-Rappreżentant Għoli u l-Kummissjoni għall-Kunsill Ewropew bl-isem 'It-tibdil fil-klima u s-sigurtà internazzjonali',

—

wara li kkunsidra r-rapport finali tal-Missjoni ta’ Osservazzjoni Elettorali tal-UE dwar l-elezzjonijiet li saru fl-Etjopja fit-23 ta’ Mejju 2010,

—

wara li kkunsidra l-adozzjoni ta’ kostituzzjoni għas-Somalja minn 825 membri tal-Assemblea Kostitwenti Nazzjonali fl-1 t’ Awwissu 2012, wara li kkunsidra l-elezzjoni demokratika ta’ president ġdid tas-Somalja fil-11 ta’ Settembru 2012 bħala parti mill-proċess ta’ tranżizzjoni,

—

wara li kkunsidra l-konklużjonijiet tal-Kunsill dwar il-Politika ta’ Sigurtà u Difiża Komuni tal-1 ta’ Diċembru 2011 u tat-23 ta’ Lulju 2012,

—

wara li kkunsidra r-riżoluzzjonijiet tal-Kunsill tas-Sigurtà tan-NU dwar is-sitwazzjoni fis-Somalja, b’mod partikolari r-Riżoluzzjoni 2067(2012),

—

wara li kkunsidra l-Missjoni tal-Unjoni Afrikana fis-Somalja (AMISOM), il-kunċett strateġiku tagħha tal-5 ta’ Jannar 2012 dwar l-istabbiliment ta’ preżenza fl-erba' setturi u r-Riżoluzzjoni 2036(2012) tal-Kunsill tas-Sigurtà tan-NU li titlob lill-Unjoni Afrikana biex iżżid in-numri tal-forza tal-AMISOM minn 12 000 għal massimu ta’ 17 731 membru tal-persunal bl-uniformi, li jinkludu truppi u persunal minn unitajiet tal-pulizija mħarrġa,

—

wara li kkunsidra r-Riżoluzzjoni Nru 1820(2008) tal-Kunsill għas-Sigurtà tan-NU dwar in-nisa, il-paċi u s-sigurtà,

—

wara li kkunsidra r-rapport tan-NU tal-25 ta’ Jannar 2011 u l-25 proposta li fih magħmula minn Jack Lang, il-Konsulent Speċjali tas-Segretarju Ġenerali tan-NU dwar kwisjonijiet legali relatati mal-piraterija lil hinn mill-kosta tas-Somalja, wara li kkunsidra r-rapporti ta’ segwitu minn Jack Lang, inkluż ir-rapport dwar il-modalitajiet għall-istabbiliment ta’ qrati Somali speċjalizzati kontra l-piraterija tal-15 ta’ Ġunju 2011, u r-rapport tas-Segretarju Ġenerali dwar qrati speċjalizzati kontra l-piraterija fis-Somalja u fi Stati oħra fir-reġjun tal-20 ta’ Jannar 2012,

—

wara li kkunsidra l-Istrateġija Konġunta UE-Afrika,

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Barranin u l-opinjoni tal-Kumitat għall-Iżvilupp (A7-0408/2012),

A.

billi l-Qarn tal-Afrika huwa wieħed mir-reġjuni l-inqas siguri fid-dinja f’dak li jirrigwarda l-ikel u miljuni ta’ persuni li jgħixu f’dik iż-żona jsofru l-ġuħ u jinsabu f’riskju ta’ karestija; billi dan ir-reġjun ġeografiku fih pajjiżi li huma fost dawk bl-istandards tas-saħħa l-aktar baxxi fid-dinja; billi dan hu wkoll wieħed mill-ifqar reġjuni tad-dinja u wieħed minn dawk li għandhom l-ikbar nuqqas ta’ governanza; billi n-nuqqas ta' sigurtà tal-bnedmin u n-nuqqas ta' sigurtà ta' ikel b'mod partikolari jaggravaw il-kriżijiet umanitarji fir-reġjun; billi l-komunità internazzjonali naqset milli tieħu passi preventivi biex tindirizza l-kwistjonijiet tas-sigurtà tal-bnedmin, in-nixfa u l-karestiji f'dak ir-reġjun;

B.

billi r-reġjun għandu storja twila ta’ kun0flitti u billi teżisti relazzjoni bejn il-kunflitti, il-faqar u n-nuqqas ta’ żvilupp; billi ma jistax jinkiseb żvilupp sostenibbli f’ambjent karatterizzat minn tensjonijiet, kunflitti armati u istituzzjonijiet governattivi li mhumiex stabbli, waqt li fl-istess ħin il-faqar u n-nuqqas ta’ żvilupp joperaw bħala fatturi li joħolqu kunflitt; billi t-tibdil fil-klima x'aktarx li jkompli jiggrava s-sitwazzjoni f'dan ir-reġjun, fejn l-okkorrenzi ta’ nixfa diġà saru iżjed frekwenti;

C.

billi l-instabbiltà fit-tul fil-Qarn tal-Afrika tirriżulta f’konsegwenzi għas-sigurtà tal-pajjiżi tal-viċinat u l-kontinent kollu u, minħabba l-eżistenza ta' netwerks tat-terroriżmu fir-reġjun, tista' taffettwa s-sigurtà ta' reġjuni oħra, bħall-Ewropa, il-Peniżola Għarbija u l-Ażja t'Isfel;

D.

billi ċ-ċirklu vizzjuż ta’ nuqqas ta’ sigurtà, instabbiltà, faqar u governanza ħażina jista’ jiġi indirizzat b’suċċess u b’mod effettiv biss permezz ta’ approċċ komprensiv u ħolistiku impenjat li jikseb l-iżvilupp fil-pajjiżi tar-reġjun b’mod sostenibbli; billi l-Qarn tal-Afrika huwa eżempju tal-konnessjoni bejn l-iżvilupp u s-sigurtà, billi huwa reġjun fejn l-attivitajiet kriminali, speċjalment it-terroriżmu u l-piraterija, jikbru bħala konsegwenza ta' faqar estrem u governanza ħażina, jew nuqqas ta' governanza tal-istat;

E.

billi jeżisti interess Ewropew fi tliet livelli differenti u interess internazzjonali usa’ fis-sitwazzjoni ta’ sigurtà fil-Qarn tal-Afrika li jirrelata ma': l-ewwel nett, it-theddida maħluqa mit-terroriżmu internazzjonali u l-fondi mill-piraterija u l-ħtif ta’ persuni mgħoddija lil organizzazzjonijiet terroristiċi; it-tieni nett, it-theddida ekonomika lill-kummerċ internazzjonali u l-ħtieġa li jiġi faċilitat il-passaġġ b’mod sigur tat-trasport bil-baħar; u t-tielet nett, il-ħtieġa li n-NU jiġu assistiti fl-għanijiet tagħhom, pereżempju fil-protezzjoni tal-bastimenti tal-Programm Dinji tal-Ikel fir-reġjun;

F.

billi l-impenn tal-UE għar-reġjun huwa infurmat kemm bl-importanza ġeostrateġika tiegħu kif ukoll bix-xewqa li n-nies li jgħixu fil-Qarn jingħataw appoġġ u jinħelsu mill-faqar; billi sabiex isir dan u tintlaħaq paċi dejjiema l-UE impenjat ruħha li tappoġġja l-isforzi kemm fil-livell reġjonali, eżempju permezz tal-IGAD (l-Awtorità Intergovernattiva għall-Iżvilupp) u l-Unjoni Afrikana, kif ukoll fil-livell nazzjonali għall-konsolidazzjoni tal-paċi u l-ġustizzja fuq il-bażi tal-prinċipji tal-inklużjoni, l-istat tad-dritt u tar-rispett għad-drittijiet tal-bniedem;

G.

billi l-IGAD tibqa' strument li mhux żviluppat biżżejjed għat-titjib tal-kooperazzjoni, l-integrazzjoni u s-sigurtà fil-livell reġjonali; billi hemm il-ħtieġa li l-IGAD ikollha rwol ċentrali fl-arkitettura politika u tas-sigurtà tal-Qarn tal-Afrika, kif ukoll fil-prevenzjoni tal-kunflitti u fl-integrazzjoni politika u ekonomika fir-reġjun, bil-għan li l-pajjiżi tar-reġjun ikunu impenjati u ankrati ma' aġenda politika u ekonomika komuni;

H.

billi linja kontinwa ta’ nuqqas ta’ sigurtà u instabbiltà li tmur mill-Oċean Atlantiku sal-Oċean Indjan tista’ ssaħħaħ l-attivitajiet tat-traffikar tad-droga fl-Atlantiku tat-Tramuntana kollu u fl-Amerika Latina u l-Karibew, kif ukoll tħeġġeġ it-traffikar fl-armi u l-persuni filwaqt li tiftaħ rotot ġodda ta’ traffikar u l-possibbiltà tal-kuntrabandu ta’ drogi kemm lejn l-Ewropa kif ukoll lejn il-peniżola Għarbija;

I.

billi l-kompetizzjoni fost l-istati għar-riżorsi naturali fir-reġjun, b’mod partikolari l-karburanti fossili u l-ilma, u l-kompetizzjoni sabiex jiġi pprovdut aċċess infrastrutturali għall-portijiet għall-istati li jipproduċu ż-żejt u l-gass kif ukoll aċċess għall-baħar min-naħa tal-istati mdawra bl-art jistgħu joħolqu iżjed tensjoni fir-reġjun u jwasslu għal instabbiltà kronika;

J.

billi l-istabbiltà vijabbli fit-tul fil-Qarn tal-Afrika tista’ tinbena biss fuq istituzzjonijiet demokratiċi qawwija u responsabbli, fuq l-istat tad-dritt u fuq ir-rispett għad-drittijiet tal-bniedem, b’mod partikolari, il-libertà tal-espressjoni, u fuq prospetti ekonomiċi aħjar għas-soċjetà b’mod ġenerali;

K.

billi huwa essenzjali li jitrawmu b’mod attiv żoni żgħar ta’ stabbiltà fir-reġjun, li jiġi indirizzat il-faqar u li jiġi promoss l-irkupru ekonomiku bħala mezz biex jiġu rrestawrati l-istati falluti; billi ma jista’ jkun hemm l-ebda sigurtà mingħajr żvilupp u l-ebda żvilupp mingħajr sigurtà;

L.

billi l-insorġenza vjolenti ta’ Al-Shabaab, in-nuqqas governanza statali fis-Somalja, it-theddid minħabba attivitajiet kontinwi ta' piraterija fil-kosta tas-Somalja, it-tensjonijiet u l-kunflitti potenzjali bejn is-Sudan u s-Sudan t'Isfel, ir-reġjuni suxxettibbli għall-kunflitti ta' Abiyei u d-Darfur, it-tranżizzjoni politika fl-Etjopja wara l-mewt tal-Prim Ministru Meles Zenawi, it-tensjonijiet bejn l-Etjopja u l-Eritrea u s-Somalja, it-tensjoni bejn l-Eritrea u Ġibuti, u l-attivitajiet terroristiċi tal-Lord’s Resistance Army (LRA) kollha jikkontribwixxi biex il-Qarn tal-Afrika jkun wieħed mir-reġjuni l-aktar suxxettibbli għall-kunflitti fid-dinja, u b’hekk joħolqu tbatija enormi lill-persuni, l-ispustament intern tal-persuni, id-deterjorament tas-sitwazzjonijiet ta’ kriżijiet umanitarji, u l-ostakolar tal-iżvilupp soċjali u ekonomiku sostenibbli kif ukoll tad-demokrazija u tal-istat tad-dritt;

M.

billi, hekk kif il-ġlieda kontra Al-Shabaab fis-Somalja qiegħda tagħmel progress li dejjem qed jiżdied, jeżisti riskju dejjem ikbar li l-attivitajiet terroristiċi u d-destabilizzazzjoni jinfirxu lejn partijiet oħra tas-Somalja jew iżjed ’il ġewwa f’partijiet tal-Afrika li qabel ma kinux affettwati;

N.

billi l-instabilità politika u l-kunflitt dejjem preżenti fis-Somalja virtwalment qerdu kwalunkwe prospett ta' żvilupp ekonomiku sostenibbli fir-reġjun; billi n-nuqqas ta' prospetti stabbli demokratiċi u ekonomiċi għall-popolazzjoni, partikolarment iż-żgħażagħ, flimkien man-nuqqas tad-demokrazija, tal-istat tad-dritt, tal-governanza u tas-sigurtà tal-bnedmin jipprovdi art fertili għall-inkoraġġiment tal-attività kriminali, inklużi l-piraterija u l-kuntrabandu tad-droga, filwaqt li jsostni gruppi terroristiċi bħal Al-Shabaab; billi hu essenzjali li tali kwistjonijiet jiġu indirizzati b'mod kompensiv filwaqt li wieħed jibni fuq l-istrumenti kollha tal-UE ta' azzjoni esterna, u li tali azzjoni tiġi kkumplimentata mill-istabbiliment ta' qrati Somali speċjalizzati kontra l-piraterija malli jkunu stabbiliti strutturi statali vijabbli fis-Somalja;

O.

billi l-Gvern Federali Tranżitorju tas-Somalja (TFG) ma rnexxilux joħloq amministrazzjoni stabbli u inklużiv li tkun kapaċi tippromwovi l-kunsens fost id-diversi komponenti etniċi u politiċi tagħha; billi l-gvern il-ġdid tas-Somalja jrid jirċievi appoġġ sħiħ mill-komunità internazzjonali sabiex b’hekk ikun jista’ jiffaċċja l-isfidi li għandha s-Somalja u jistabbilixxi mill-ġdid stabbiltà politika, demokratika, etnika u soċjali sostenibbli;

P.

billi l-bastimenti tas-sajd minn ħafna pajjiżi ħadu vantaġġ mill-kaos fis-Somalja biex jistadu fiż-żona ta’ 200 mil nawtiku tas-Somalja mill-1990, u b’hekk imminaw l-għajxien tas-sajjieda Somali;

Q.

billi skont l-UNHCR, hemm iżjed minn miljun refuġjat Somalu mxerrda mal-Qarn tal-Afrika, u prinċipalment fil-Kenja u l-Etjopja, u 1,3 miljun persuna spustata internament (IDPs) fis-Somalja; billi l-kunflitt intern, it-terroriżmu ta’ Al-Shaabab u l-kriżijiet konsekuttivi ta’ nixfa huma l-kawża ewlenija tal-fenomenu tal-eżodu minn u l-ispustament tal-persuni fis-Somalja, li jaffettwaw ir-reġjun kollu b’mod tanġibbli;

R.

billi fl-20 ta’ Awwissu 2012 li għadda kien hemm żewġ avvenimenti fil-Qarn tal-Afrika ta’ importanza kbira għar-reġjun: l-ewwel, il-mewt tal-Prim Ministru tal-Etjopja, Meles Zenawi, u t-tieni, l-istabbiliment tal-ewwel parlament formali tas-Somalja f’iktar minn għoxrin sena; billi l-ħatra ta’ Parlament ġdid u l-elezzjoni tal-President ġdid tas-Somalja Hassan Sheikh Mohamud, fl-10 ta’ Settembru 2012, irrappreżentaw mument storiku, u pass importanti lejn it-titjib tal-paċi u s-sigurtà u wrew li s-sitwazzjoni fis-Somalja mhijiex irriversibbli;

S.

billi l-Etjopja, Ġibuti, il-Kenja u l-Uganda taw appoġġ militari u politiku għall-isforzi biex tinkiseb stabbiltà fir-reġjun, speċjalment permezz tal-Missjoni tal-Unjoni Afrikana fis-Somalja (AMISOM), u b'hekk ħadmu għal soluzzjoni vijabbli għas-sigurtà u l-istabbiltà fir-reġjun li tkun tappartjeni lil u mmexxija mill-Afrikani, bl-appoġġ attiv tal-komunità internazzjonali; billi l-Unjoni Afrikana hija sieħba prezzjuża għall-paċi u l-istabbiltà fir-reġjun;

T.

billi s-sitwazzjoni ta’ sigurta u dik militari fis-Somalja għadha perikoluża u mhux prevedibbli; billi l-AMISOM kienet kapaċi titfa’ lura l-milizja Iżlamika Al Shabaab u skjerat 100 suldat f’Baidoa; billi dan l-aħħar il-Kenja interveniet b’mod militari fis-Somalja Ċentrali tan-Nofsinhar, iżda ma kinitx kapaċi tegħleb lill-Al Shabaab b’mod deċiżiv; billi l-Forzi tad-Difiża Nazzjonali tal-Etjopja intervenew fir-reġjun ta' Hiraan u fir-reġjun ta' Bay fi Frar 2012; billi l-aabużi tad-drittijiet tal-bniedem, it-tortura, id-detenzjonijiet arbitrarji u l-eżekuzzjonijiet sommarji, kif ukoll attakki illegali ta’ ritaljazzjoni kontra persuni ċivili mwettqa minn forzi Etjopjani leali għat-TFG ġew rrapurtati mill-Human Rights Watch; billi l-Eritrea, ġara tagħha, kienet akkużata mill-Grupp ta' Monitoraġġ u Sanzjonijiet tan-NU li qed tipprovdi armi, taħriġ u appoġġ finanzjarju lil Al Shabaab, b'hekk qed tikser l-embargo tal-armi tan-NU;

U.

billi tmiem għall-kriżi fis-Somalja, waqt li tiddependi fuq l-istabbiltà miksuba permezz tal-operazzjonijiet tal-Unjoni Afrikana fil-pajjiż, tista’ tinkiseb biss bil-preservazzjoni u l-appoġġ tal-istabbiltà soċjali u politika, li jfisser li l-partijiet involuti fl-operazzjonijiet militari se jkollhom ukoll responsabbiltà kbira fl-appoġġ tal-awtoritajiet lokali, bil-mezzi kollha meħtieġa, għall-perjodu ta’ wara l-waqfien tal-operazzjonijiet militari;

V.

billi l-azzjonijiet militari internazzjonali waħedhom ma jistgħu qatt jistabbilixxu s-sigurtà, l-istabbiltà u l-paċi fit-tul, sakemm dawn ma jkunux akkumpanjati minn programmi ta’ żvilupp demokratiku;

W.

billi l-mewt tal-Prim Ministru Meles Zenawi x'aktarx li jkollha konsegwenzi nazzjonali u reġjonali profondi, li joħolqu opportunità għat-tmexxija l-ġdida biex din tiftaħ l-ispazju politiku, tirrevoka l-liġijiet repressivi u tinvolvi ruħha fi djalogu politiku li jinkludi lil kulħadd lejn tranżizzjoni demokratika; billi l-ħolqien ta' gvern inklużiv elett b’mod demokratiku fl-Etjopja huwa l-uniku mod sabiex tiġi evitata l-firxa tal-instabbiltà, tar-radikaliżmu u tal-inkwiet fil-pajjiż, li qed jheddu r-rwol tal-Etjopja fil-ġlieda kontra t-terroriżmu;

X.

billi fl-elezzjonijiet parlamentari ta’ Mejju tal-2010, il-FDRPE kiseb 545 mill-547 siġġu kkontestat, ħaġa li ħeġġet lill-Missjoni ta’ Osservazzjoni Elettorali tal-UE sabiex tiddikjara li l-elezzjonijiet ma laħqux l-istandards internazzjonali;

Y.

billi l-Etjopja tirċievi iktar għajnuna esterna minn pajjiżi oħra Afrikani, mill-Istati Uniti u l-UE;

Z.

billi, wara 20 sena ta’ indipendenza taħt il-gvern tal-president Isaias Afewerki, l-Eritrea huwa wieħed mill-pajjiżi l-iżjed repressivi u magħluqa fid-dinja b’rekord tad-drittijiet tal-bniedem tremendament fqir li jinkludi t-tqegħid fil-ħabs, it-tortura u l-qtil taċ-ċittadini tiegħu; billi fil-5 ta’ Lulju 2012 il-Kunsill tad-Drittijiet tal-Bniedem tan-NU adotta riżoluzzjoni li tikkundanna bil-qawwi l-ksur kontinwu, mifrux u sistematiku tad-drittijiet tal-bniedem imwettaq mill-awtoritajiet tal-Eritrea, ir-restrizzjonijiet kbar fuq il-libertà tal-opinjoni u l-espressjoni, u l-lieva furzata taċ-ċittadini għal perjodi indefiniti, bil-ħatra wkoll ta’ Rapporteur Speċjali dwar is-sitwazzjoni tad-drittijiet tal-bniedem fl-Eritrea, sabiex jinkiser l-iżolament tal-pajjiż, u jiġu investigati u rrapurtati l-abbużi; billi ċ-ċittadin Svediż-Eritrean Dawit Isaak għadu miżmum incommunicado fil-ħabs mingħajr ġuri fl-Eritrea wara 11-il sena;

Aa.

billi, fis-26 ta’ Settembru 2012, il-Presidenti tas-Sudan u tas-Sudan t’Isfel iffirmaw ftehim ta’ kooperazzjoni li kien ilu mistenni, li jipprevedi l-fluss mill-ġdid taż-żejt min-Nofsinhar għat-Tramuntana, id-demilitirizzazzjoni taż-żona ta’ protezzjoni ma’ tul il-fruntiera, il-ftuħ mill-ġdid tal-kummerċ transkonfinali u l-libertà ta’ moviment taċ-ċittadini miż-żewġ pajjiżi; billi ż-żewġ pajjiżi għad iridu jaqblu dwar l-istat ta’ Abyei u dwar żoni oħra li huma s-suġġett ta’ tilwim;

Ab.

billi s-Sudan t’Isfel qed jiffaċċja sfidi politiċi, ekonomiċi u ta’ sigurtà serji, speċjalment dwar il-vjolenza interkomunali u n-nuqqas ta’ strutturi solidi ta’ governanza; billi d-diżarm li għaddej tal-persuni ċivili, magħruf bħala 'Operazzjoni Restawr tal-Paċi', li beda f’Marzu 2012 bħala reazzjoni għall-vjolenza interkomunali fl-Istat ta’ Jonglei, wassal għal abbużi rrapurtati mwettqa mill-forzi tal-armata kontra persuni ċivili;

Ac.

billi għadu diffiċli li tintlaħaq il-paċi fir-reġjun tal-Punent tad-Darfur u fl-Istati tan-Nofsinhar ta’ Kordofan t’Isfel u l-Blue Nile; billi l-organizzazzjonijiet tad-drittijiet tal-bniedem għadhom qed jirrappurtaw dwar bumbardamenti indiskriminati f’żoni ċivili min-naħa tal-forzi tal-gvern, qtil ekstraġudizzjarju, arresti arbitrarji, sakkeġġ fuq skala kbira u l-qerda tal-proprjetà; billi l-vjolenza li għadha għaddejja kkawżat kriżi umanitarja dejjiema u li tqajjem tħassib;

Ad.

billi l-aċċess għall-popolazzjonijiet jibqa’ wieħed mill-akbar problemi fil-pajjiżi tal-Qarn tal-Afrika sabiex jiġu indirizzati l-emerġenzi umanitarji;

Ae.

billi l-Kummissjoni Ewropea qed tipprepara ruħha biex iżżid għal EUR 158 miljun l-għajnuna umanitarja totali mogħtija lill-popolazzjonijiet vittmi tan-nixfa li tolqot lill-pajjiżi tal-Qarn tal-Afrika;

Af.

billi l-pajjiżi prinċipali membri prinċipali tal-Unjoni Afrikana impenjaw ruħhom, waqt il-konferenza internazzjonali tad-donaturi li saret f’Addis Abeba, biex jagħmlu disponibbli kważi USD 350 miljun għall-pajjiżi li ntlaqtu min-nixfa;

Ag.

billi l-Qarn tal-Afrika u b’mod speċjali s-Somalja ġew milquta minn kriżi kbira ta’ karestija minħabba nixfa li rriżultat fi kriżi umanitarja serja li affettwat aktar minn 12-il miljun persuna fir-reġjun, inklużi aktar minn 7,5 miljun persuna fis-Somalja; billi l-kriżi ta’ karestija mhux biss ikkawżat l-imwiet ta’ ħafna persuni, b’mod speċjali tfal, iżda wasslet ukoll għal fluss fuq skala kbira ta’ refuġjati lejn il-pajjiżi ġirien tal-Kenja u l-Etjopja; billi l-Kummissjoni Ewropea żiedet l-għajnuna umanitarja tagħha minn EUR 9 miljun fl-2008 għal EUR 46 miljun fl-2009, iżda mbagħad naqqset l-ammont għal EUR 35 fl-2010 u għal EUR 30 miljun fl-2011; billi sussegwentement irrevediet l-allokazzjoni u żidietha għal EUR 77 miljun, imma mhux qabel l-okkorrenza ta' nixfa kbira fis-sajf tal-2011;

Ah.

billi t-titjib sinifikanti fis-sitwazzjoni umanitarja fil-Qarn tal-Afrika se jkun interrelatat mal-għanijiet l-oħra kollha li l-Unjoni qiegħda tipprova tilħaq fir-reġjun, u kwalunkwe riżoluzzjoni sostenibbli tal-kunflitti differenti li jaffettwaw ir-reġjun, għalhekk, għandha tqis il-ħtiġijiet tal-persuni spustati internament u l-kriżi li għaddejja tar-refuġjati u l-kawżi tagħha, inklużi nuqqas ta’ sigurtà strutturali tal-ikel, il-kunflitti u l-effetti tat-tibdil fil-klima, ukoll b’attenzjoni speċjali għall-gruppi ta’ popolazzjonijiet l-iżjed vulnerabbli bħan-nisa u t-tfal;

Ai.

billi d-donaturi u l-atturi politiċi sinifikanti fir-reġjun jinkludu mhux biss atturi politiċi u ta’ żvilupp tradizzjonali bħall-UE, l-Istati Uniti u organizzazzjonijiet internazzjonali bħan-NU u l-Bank Dinji, iżda wkoll it-Turkija, l-Eġittu, l-Istati tal-Kunsill ta' Kooperazzjoni tal-Golf, b’mod partikolari l-Qatar, u l-Organizzazzjoni tal-Kooperazzjoni Iżlamika; billi ċ-Ċina kellha u għad għandha rwol importanti fil-promozzjoni tal-iżvilupp infrastrutturali u l-kapaċitajiet ekonomiċi fil-Qarn tal-Afrika billi tipprovdi self ad hoc b’rati baxxi ta’ interessi li mhumiex kundizzjonali fuq pajjiżi li jkunu qegħdin iwettqu riformi effettivi u li ħafna drabi jaġixxu bħala tħeġġiġ għal aċċess privileġjat għal riżorsi naturali u għall-aċċess għas-suq għall-pajjiż;

Aj.

billi l-UE hija l-fornitur prinċipali tal-għajnuna internazzjonali u ta’ għajnuna umanitarja fil-Qarn tal-Afrika u billi tikkontribwixxi għall-iżvilupp u s-sigurtà ta’ dan ir-reġjun fuq l-art u fil-baħar;

Ak.

Billi t-twaqqif ta’ ambjent sigur għall-kummerċ u t-trasport huwa t-triq ewlenija lejn l-istabilizzazzjoni u l-iżvilupp fir-reġjun, kemm fuq l-art kif ukoll fuq il-baħar;

Al.

billi l-bejgħ tal-ivorju illegali sar wieħed mis-sorsi ta’ dħul l-iżjed importanti għall-milizji bħal Al Shabaab, kif ukoll għall-forzi militari uffiċjali, wara żieda enormi tad-domanda mill-pajjiżi Asjatiċi; billi skont is-CITES, il-livell ta’ qbid mingħajr permess tal-iljunfanti huwa l-agħar f’dan id-deċennju u l-ħtif irreġistrat tal-ivorju laħaq l-ogħla livell sa mill-1989;

Am.

billi, skond rapport mill-Programm Ambjentali tan-Nazzjonijiet Uniti (UNEP), għadd kbir ta' vjaġġi illegali bi skart tossiku, li l-kontenut tagħhom qed inixxi, intrema matul il-kosta tas-Somalja, fejn is-saħħa tal-popolazzjoni lokali u l-konservazzjoni tal-ambjent ġew totalment injorati; billi, skont l-istess rapport, l-iskart mormi fil-baħar joriġina parzjalment mill-UE u huwa ta' dannu irriversibbli għas-saħħa tal-bniedem u l-ambjent fir-reġjun, bi ksur flagranti tad-drittijiet tal-bniedem;

An.

billi t-tmien Għanijiet tal-Millennju kollha bħalissa mhumiex mexjin fid-direzzjoni t-tajba fir-reġjun, u wirja determinata ta’ rieda politika biss se tagħmilha possibbli li jsir xi progress fit-tliet snin li fadal qabel l-iskadenza tal-2015;

Ao.

billi l-irrazzjonalità u l-estremiżmi politiċi huma milqugħa f’sitwazzjonijiet ta’ miżerja jew ta’ karestija; billi erbatax-il xahar wara li n-NU ħabbret uffiċjalment l-eżistenza tal-ewwel karestija tas-seklu XXI fil-Qarn tal-Afrika, is-sitwazzjoni umanitarja wriet titjieb relattiv imma għadha kritika;

Ap.

billi l-progress fit-tnaqqis tal-faqar sofra kontrattempi fil-Qarn tal-Afrika minħabba l-kriżi tal-ikel u l-karburanti, kif ukoll il-kriżi ekonomika u finanzjarja u l-impatt tat-tibdil fil-klima,

Aq.

billi, f’Marzu tal-2012 l-FAO stmat li iktar minn tmien miljun persuna teħtieġ għajnuna fil-Qarn tal-Afrika (inklużi 3,2 miljuni fl-Etjopja, 2,5 miljuni fis-Somalja, 2,2 miljuni fil-Kenja u 180 000 f’Ġibuti); billi fl-2011, ir-reġjun għadda minn l-ikbar nixfa fl-aħħar 60 sena, li affettwat iktar minn 13-il miljun persuna, tant li mijiet ta’ eluf kellhom jitilqu minn djarhom u għexieren ta’ eluf tilfu ħajjithom;

Ar.

billi x-xogħol tal-Qorti Kriminali Internazzjonali fil-Qarn tal-Afrika li jressaq lill-awturi tar-reati quddiem il-ġustizzja u jiġġieled kontra l-impunità qed jiġi mfixkel minn ċerti pajjiżi individwali fir-reġjun;

As.

billi sabiex ikompli x-xogħol ta’ għajnuna umanitarja tiegħu u jinvesti fi skorzi ta' rkupru fis-Somalja, il-Kenja u l-Etjopja, il-UNICEF jeħtieġ USD 273 miljun għall-2012, li minnhom, sal-aħħar ta’ Lulju 2012 li għadda rċieva biss 33 % tal-kwantità msemmija;

1.

Jilqa' l-istrateġija tal-UE għall-Qarn tal-Afrika, u b'mod partikolari l-approċċ komprensiv tagħha bbażat fuq l-indirizzar tat-tħassib rigward is-sigurtà u l-istabbiltà, l-infurzar tal-istat tad-dritt u l-iżgurar ta’ proċess xieraq li għandu jinkludi l-funzjonament tal-mekkaniżmi u l-proċeduri tal-infurzar tal-liġi, kif ukoll sistema ġuridika indipendenti, filwaqt li jiġu indirizzati l-kawżi sottostanti tiegħu, b'mod partikolari permezz tal-istrateġiji ta' żvilupp u umanitarji bbażati fuq objettivi ċari; iħeġġeġ l-implimentazzjoni sħiħa tal-Qafas Strateġiku tal-UE għall-Qarn tal-Afrika u jappoġġja l-ħames elementi tiegħu bbażati fuq:

jenfasizza l-importanza tal-promozzjoni ta’ tkabbir ekonomiku sostenibbli fir-reġjun u t-tnaqqis tal-faqar billi tingħata tweġiba għall-ħtiġijiet bażiċi tal-persuni;

2.

Jenfasizza li kwalunkwe soluzzjoni sostenibbli għan-numru kbir ta’ kunflitti fir-reġjun tista’ tirnexxi biss jekk tistabbilixxi l-prinċipji tal-viċinanza tajba bis-superament tar-rivalità u t-tilwim fil-konfini, in-nuqqas ta’ interferenza u l-kooperazzjoni bejn l-Istati, l-iżvilupp sostenibbli ma’ u l-kondiviżjoni ekwa u ġustu tal-aċċess għar-riżorsi, b’opportunità ekonomika għal kulħadd mingħajr diskriminazzjoni; jinnota li dan jeħtieġ sforzi ta’ trasformazzjoni f'termini ta' bini tal-paċi, il-medjazzjoni u r-rikonċiljazzjoni kif ukoll it-tmiem tal-impunità fil-kooperazzjoni mal-Qorti Kriminali Internazzjonali, u rispett sħiħ għal-liġi umanitarja internazzjonali inkluż l-aċċess mingħajr xkiel għall-għajnuna umanitarja lill-popolazzjoni, kif ukoll għad-drittijiet tal-bniedem; jinnota li l-Unjoni, b’koordinazzjoni mill-qrib mal-korpi reġjonali, għandha rwol fl-assistenza ta’ dawn il-proċessi, fil-ġlieda kontra l-proliferazzjoni tal-armi żgħar u l-armi ħfief u fil-faċilitazzjoni tad-demobilizzazzjoni, id-diżarm u r-reintegrazzjoni ta’ dawk li kienu kumbattenti, iżda jenfasizza li fl-aħħar nett huma l-popli tal-Qarn tal-Afrika nfushom l-uniċi atturi li jistgħu jippermettu lir-reġjun li jikseb il-paċi, l-istabbiltà u l-prosperità, flimkiken ma' gvern responsabbli u l-istat tad-dritt;

3.

Jilqa' l-ħatra tar-Rappreżentant Speċjali tal-Unjoni Ewropea (RSUE) għall-Qarn tal-Afrika, kif mitlub mill-Parlament fir-riżoluzzjoni tiegħu, imsemmija hawn fuq, tal-10 ta' Mejju 2007 dwar il-Qarn tal-Afrika; iħeġġeġ lir-Rappreżentant Għoli/lill-Viċi President u lill-Kummissjoni Ewropea sabiex jappoġġjaw b’mod attiv ix-xogħol tar-RSUE billi jiżguraw riżorsi finanzjarji u umani adegwati u aċċess dirett għall-istrutturi u l-missjonijiet tas-PSDK kif ukoll għall-iżvilupp tal-Kummissjoni Ewropea u l-istrutturi u l-programmi umanitarji u ta’ politika; ifakkar li fir-riżoluzzjoni tiegħu l-Parlament Ewropew talab lir-RSUE għall-Qarn tal-Afrika biex jissottometti rapporti regolari lill-Parlament; jilqa', f'dan ir-rigward, ir-rapporti regolari tar-RSUE lill-Parlament, u jistiednu jkompli d-djalogu u l-iskambji ta' fehmiet mal-Membri tiegħu fuq bażi regolari; jilqa' wkoll il-ħatra ta' RSUE għas-Sudan u għas-Sudan t'Isfel; jemmen li bil-ħsieb li tkun żgurata konsultazzjoni sħiħa u koordinazzjoni tal-azzjoni, iż-żewġ Rappreżentanti Speċjali għandhom jiġi kkonsultati fuq bażi regolari mis-servizzi kompetenti tal-programmazzjoni tal-istrumenti finanzjarji għall-azzjoni esterna tal-UE, u għandhom ikunu pprovduti b'pariri politiċi u strateġiċi regolari; jinnota l-valur tad-djalogu u l-koordinazzjoni regolari bejn iż-żewġ RSUEs u l-kapijiet tad-Delegazzjonijiet tal-UE fir-reġjun;

4.

Huwa tal-fehma li jistgħu jiġu investiti aktar riżorsi fl-IGAD sabiex tkun promossa sistema ta' governanza tajba, kif ukoll djalogu politiku effettiv u mekkaniżmi għall-bini ta' kunsens ġewwa u fost l-istati membri kollha tagħha; jistieden lill-UE sabiex tiffaċilita dan ir-rwol billi tinvolvi ruħha iżjed fil-proċess tagħhom tal-bini tal-kapaċità interna tagħhom; ifakkar li se tkun ta' importanza kbira l-promozzjoni ta' qafas istituzzjonali reġjonali għad-djalogu u l-koordinazzjoni fost il-pajjiżi tar-reġjun, b'referenza partikolari għall-Etjopja, il-Kenja u l-Uganda bħala atturi ewlenin fir-reġjun, li se jeħtiġilhom ikomplu jikkoordinaw l-isforzi u jsegwu objettivi kondiviżi; ifakkar ukoll li l-IGAD tista' tipprovdi qafas adegwat għad-djalogu u l-koordinazzjoni dwar l-isfruttar ta' riżorsi naturali vitali bħall-ilma;

5.

Jistieden lill-Kummissjoni Ewropea biex tipprevedi għajnuna u appoġġ għall-pajjiżi Afrikani kollha li huma impenjati b’mod militari għaż-żamma tal-paċi fil-pajjiżi tal-Qarn tal-Afrika u b’mod partikolari fis-Somalja;

6.

Jilqa’ d-deċiżjoni tal-UE li tipprovdi appoġġ addizzjonali lill-AMISOM, sabiex tippermettilha tosserva bis-sħiħ il-mandat tagħha u tilħaq qawwa totali ta’ 17 731 suldat, kif awtorizzat min-NU;

7.

Jemmen li r-riżultati tal-AMISOM fil-ġlieda kontra Al Shabaab, bħall-ksib mill-ġdid tal-kontroll ta’ Kismayo, jikkonfermaw l-importanza strateġika tal-appoġġ tal-Unjoni Afrikana; jenfasizza, għalhekk, l-importanza li jiġi promoss il-proċess tal-UA tal-bini tal-istituzzjonijiet, il-bini tal-kapaċitajiet u l-governanza tajba, kif ukoll il-kapaċitajiet ta’ reazzjoni tagħha, inkluż fil-livell ta’ ġestjoni ta’ kriżijiet u fil-livell militari; jilqa’ l-istabbiliment ta’ Delegazzjoni tal-UE għall-Unjoni Afrikana f’Addis Ababa;

8.

Jitlob, b'urġenza, li tingħata assistenza għas-sistemi ġuridiċi u penitenzjarji ta' dawk il-pajjiżi li kkooperaw mal-UE fit-trasferiment ta' dawk sospettati b'piraterija (il-Kenja, is-Seychelles u l-Mawrizju), kif ukoll appoġġ għall-awtoritajiet tas-Somalja sabiex ikun żgurat li dawn ikollhom il-kapaċità ġudizzjarja u l-proċessi legali dovuti, skont id-dritt internazzjonali, prinċipalment il-liġi internazzjonali tad-drittijiet tal-bniedem, biex dawn ikunu jistgħu jittrattaw il-pirati maqbudin u militanti ta' Al-Shabaab; jenfasizza l-importanza, fl-istess ħin, li l-pirati maqbudin jiġu offruti proċess ta' riabilitazzjoni u riintegrazzjoni soċjali;

9.

Jiddispjaċih mill-fatt li, minkejja l-għajnuna tal-UE għat-tisħiħ tal-Istat tad-dritt fir-reġjun, l-eżistenza ta' l-ftehimiet ta' trasferiment konklużi bejn l-Unjoni u pajjiżi terzi (il-Kenja, is-Seychelles, il-Mawrizju), u l-ftehimiet bilaterali ta’ ripatrijazzjoni tal-pirati kkundannati bejn is-Seychelles, il-Puntland u s-Somaliland, kif ukoll d-diversi oqfsa legali internazzjonali rilevanti, bosta pirati u kriminali oħra għadhom ma ġewx arrestati jew ġew arrestati imma mbagħad ġew liberati minħabba nuqqas ta’ provi konkreti jew ta' rieda politika li dawn jiġu prosekutati;

10.

Jilqa’ bil-qawwi r-rapport tan-NU tal-25 ta' Jannar 2011 li jenfasizza 25 proposta magħmula minn Jack Lang, il-Konsulent Speċjali tas-Segretarju Ġenerali tan-NU dwar kwistjonijiet legali relatati mal-piraterija lil hinn mill-kosta tas-Somalja; jilqa’ wkoll ir-rapporti rilevanti ta’ segwitu minn Jack Lang bħar-rapport dwar il-modalitajiet għat-twaqqif ta’ qrati speċjalizzat Somali ta’ kontra l-piraterija tal-15 ta’ Ġunju 2011 u r-rapport tas-Segretarju Ġenerali dwar qrati speċjalizzati kontra l-piraterija fis-Somalja u Stati oħra fir-reġjun tal-20 ta’ Jannar 2012; iħeġġeġ lir-Rappreżentant Għoli/lill-Viċi President, lir-RSUE, lit-tliet Kapjiet tal-Missjonijiet u l-Kapijiet tad-Delegazzjonijiet sabiex jittrattaw il-proposti magħmula minn Jack Lang bħala kwistjoni prijoritarja u sabiex jiżviluppaw strateġija dwar il-kontribut tal-UE lill-approċċ internazzjonali għall-ġustizzja kriminali fit-territorju tas-Somalja;

11.

Itenni s-sejħa tiegħu lill-Istati Membri, b’kooperazzjoni mal-Europol u l-INTERPOL, sabiex jinvestigaw u jirrintraċċaw il-flussi tal-flus u jikkonfiskaw is-somom imħallsa bħala flus ta’ estorsjoni lill-pirati, billi hemm indikazzjonijiet li dan il-flus jista’ jiġi trasferit f’kontijiet bankarji mad-dinja kollha, inklużi banek fl-Ewropa, kif ukoll li jiġu identifikati u jiġu żmantellati n-netwerks kriminali organizzati li jiksbu profitt minn atti bħal dawn; jistieden lill-Kunsill sabiex jiffaċilita iżjed min-naħa waħda l-kooperazzjoni bejn EU NAVFOR u min-naħa l-oħra dik bejn l-Europol u l-Interpol;

12.

Iħeġġeġ lill-pajjiżi kollha tar-reġjun sabiex jikkollaboraw mal-ICC, u jfakkar l-obbligu vinkolanti ta’ dawk li huma firmatarji u li rratifikaw l-Istatut ta’ Ruma; jilqa’ wkoll l-iżviluppi reċenti fl-ICC, li jippermettu li r-riċerka u l-investigazzjonijiet jitwettqu f'pajjiżi li mhumiex firmatarji jew li ma rratifikawx l-Istatut ta’ Ruma;

13.

Jitlob lill-istituzzjonijiet tal-Unjoni Ewropea sabiex jibqgħu għassa u attivi qabel it-tranżizzjoni politika li se tibda fl-Etjopja u qabel l-iżviluppi demokratiċi li jibdew iseħħu fis-Somalja;

14.

Iqis li jkun xieraq li tittieħed l-opportunità ppreżentata mill-ftuħ għas-suċċessjoni tal-Prim Ministru tal-Etjopja Meles Zenawi, li miet fl-20 ta’ Awwissu 2012, bl-elezzjoni tal-President ġdid Somalu u l-elezzjonijiet leġiżlattivi Kenjani li resqin fl-2013, sabiex:

15.

Jilqa’ b’sodisfazzjon il-fatt li sad-data ta’ skadenza stabbilita mill-pjan direzzjonali tal-KPS, hekk kif approvat mir-Riżoluzzjoni 2046(2012) tal-Kunsill tas-Sigurtà tan-Nazzjonijiet Uniti, isir ftehim bejn is-Sudan u s-Sudan t'Isfel dwar ir-riżorsi taż-żejt; jittama li dan il-ftehim jirregola wkoll b’mod definittiv malajr kemm jista’ jkun il-problema tat-trasportazzjoni taż-żejt tas-Sudan t’Isfel;

16.

Jilqa' l-kontribut tal-Operazzjoni EUNAVFOR, ATALANTA fl-isforz sabiex tiġi miġġielda l-piraterija u tittejjeb is-sigurtà marittima 'l barra mill-kosta tas-Somalja; jenfasizza r-rwol tagħha sabiex tipproteġi l-bastimenti mikrija lill-Programm Dinji tal-Ikel li jwasslu għajnuna lis-Somalja, u bastimenti vulnerabbli oħra, kif ukoll provvisti lill-AMISOM; jilqa' d-deċiżjoni tal-Kunsill tat-23 ta' Marzu, 2012 li ttawwal l-EUNAVFOR ATALANTA sa Diċembru 2014 u testendi l-mandat tagħha biex tindirizza l-bażijiet operazzjonali tal-pirati fuq l-art; iħeġġeġ lill-Istati Membri biex jiżguraw li l-ATALANTA EUNAVFOR tkun appoġġjata sew b'sorveljanza adegwata u bastimenti tal-għassa, peress li l-vantaġġi kurrenti fil-ġlieda kontra l-piraterija huma riversibbli, kif ukoll bil-mezzi biex il-komunità internazzjonali tkun tfittex il-pirati u min jiffinanzjahom u n-netwerks tagħhom, filwaqt li jirrikonoxxi li, fil-fatt, il-miżuri l-iżjed effettivi kontra l-piraterija kienu l-miżuri ta’ protezzjoni abbord il-bastimenti introdotti mill-kumpaniji tat-trasport marittimu; jilqa’ f’dan il-kuntest it-talbiet reċenti mill-industrija marittima għal regolazzjoni tal-kumpaniji privati tas-sigurtà marittima, u jistieden lill-Organizzazzjoni Marittima Internazzjonali, il-gvernijiet tal-Istati tal-bandiera u l-industrija marittima sabiex jaħdmu flimkien biex jiżviluppaw iktar u jimplimentaw b'mod ċar, konsistenti u infurzabbli l-istandards internazzjonali maqbula dwar l-użu ta' persunal armat ta' sigurtà kkuntrattat privatament abbord il-bastimenti, u sabiex il-kumpaniji privati tas-sigurtà marittima jaġixxu b'aderenza stretta ma' dawk l-istandards;

17.

Jinnota l-importanza tal-kooperazzjoni bejn l-EU NAVFOR u l-missjoniiet l-oħra internazzjonali li joperaw fiż-żona, prinċipalment l-operazzjoni bbażata fuq l-art tal-AMISOM u jqis li r-relazzjonijiet tajba u kooperazzjoni mill-qrib, inkluża l-kondiviżjoni tal-informazzjoni, huma l-fattur ewlieni sabiex tiġi żgurata Somalja stabbli; ifakkar li l-EUNAVFOR ATALANTA u l-Operazzjoni Tarka tal-Atlantiku tan-NATO jistgħu biss ikollhom suċċess biex iwaqqfu u jrażżnu l-piraterija jekk tiġi implimentata strateġija komprensiva fil-Qarn tal-Afrika, u b’mod partikolari fis-Somalja, sabiex jiġu indirizzati r-raġunijiet li jħeġġu lis-Somali biex jinvolvu ruħhom fil-piraterija u fl-attivitajiet kriminali għal skopijiet ta’ dħul; jinnota li l-missjoni attwali tan-NATO kontra l-piraterija, l-Operazzjoni Tarka tal-Atlantiku, kellha suċċess b'żewġ operazzjonijiet iqsar kontra l-piraterija datati minn Ottubru 2008 għall-protezzjoni tat-trasport marittimu WFP;

18.

Jilqa' d-deċiżjoni tal-Kunsill tal-Affarijiet Barranin tat-12 ta' Diċembru 2011 li tistabbilixxi inizjattiva ta' bini ta' kapaċitajiet reġjonali marittimi, magħrufa bħala EUCAP Nestor, sabiex issaħħaħ il-kapaċitajiet marittimi u ġudizzjarji u t-taħriġ tal-forza kostali tal-pulizija u tal-imħallfin b’konsultazzjoni ma’, u bil-kunsens ta’, il-komunitajiet lokali f'ħames pajjiżi fil-Qarn tal-Afrika u fil-Punent tal-Oċean Indjan; jistieden lill-Istati Membri kollha biex jaħtru persunal ċivili u militari kompetenti għall-missjoni l-ġdida mingħajr dewmien; jistieden koordinazzjoni mill-qrib ma' inizjattivi oħra, inklużi il-proġett MARSIC tal-UE, fil-qafas tal-Programm Rotot Marittimi Kritiċi sponsorjat mill-Istrument għall-Istabbiltà u l-Programm tas-Sigurtà Marittima (MASE) reġjonali, li nbeda mill-pajjiżi tar-reġjuni tal-Afrika tal-Lvant u ta’ Isfel u tal-Oċean Indjan u huwa appoġġjat mill-UE u li l-għan tiegħu huwa s-soluzzjoni tal-problema tal-piraterija fuq l-art u t-titjib tal-kapaċitajiet ġudizzjarji għall-arrest, it-trasferiment, id-detenzjoni u l-prosekuzzjoni ta’ persuni ssuspettati li wettqu azzjonijiet ta’ piraterija; jemmen li hu biss bit-tisħiħ tal-kapaċitajiet ta' sigurtà tal-kosta tal-pajjiżi max-xatt, l-indirizzar tal-kawżi oriġinali tal-piraterija fuq l-art u billi tiġi mħeġġa l-osservanza tal-Aħjar Prattiki tal-Ġestjoni BMP4 għat-trasport bil-baħar u standards imtejba għall-industrija tas-sigurtà marittima, li l-komunità internazzjonali se tkun tista’ tilħaq il-mira usa' ta' stabilità u sigurtà għar-reġjun u, għalhekk, tnaqqas il-bżonn tar-rondi navali fiż-żona;

19.

Jilqa' d-deċiżjoni ta' Lulju 2011 li testendi u tagħti punt fokali ġdid lill-mandat tal-Missjoni ta' Taħriġ tal-UE (EUTM) ibbażata fl-Uganda; madankollu jitlob li jsiru skrining u monitoraġġ aħjar tal-kondotta u r-responsabilizzazzjoni tar-rekluti kollha mħarrġa mill-EUTM sabiex jiġi żgurat li persuni minuri jew individwi affiljati ma’ gruppi militanti ma jiġux aċċettati fil-programm, li dawn jiġu integrati fil-forzi armati tas-Somalja, u li kwalunkwe diżerzjoni tkun innotifikata u investigata immedjatament; jitlob ukoll lill-UE sabiex tadotta rwol fil-monitoraġġ mill-qrib tal-katina ta' pagament għal forzi ta' taħriġ, sabiex ikun żgurat li dawn jaslu għand il-benefiċjarji intenzjonati tagħhom u jiġġeneraw motivazzjoni, lealtà u impenn, u b'hekk ikun żgurat li l-kapaċità li jieħdu s-sjieda f'idejhom tibqa' tal-forzi tas-sigurtà futuri tas-Somalja;

20.

Jenfasizza l-ħtieġa għal koordinazzjoni strateġika mill-qrib fost l-atturi kollha relatati mas-sigurtà, b'mod partikolari EUNAVFOR ATALANTA, EUTM Somalja u EUCAP Nestor, kif ukoll in-NATO (Operazzjoni Tarka tal-Oċeanu), it-taskforce immexxija mill-Istati Uniti CTF-151, in-NU u l-AMISOM; jinnota l-eżistenza ta' mekkaniżmi ta’ koordinazzjoni internazzjonali, bħall-Grupp Ċentrali dwar il-Piraterija lil hinn mill-Kosta tas-Somalja (CGPCS) fi New York u l-mekkaniżmu Shared Awareness and Deconfliction (SHADE) fil-Bahrain; jilqa’, għalhekk, id-deċiżjoni tal-Kunsill tat-23 ta' Marzu 2012 biex jattiva, għal perjodu inizzjali ta’ sentejn, iċ-Ċentru ta' Operazzjonijiet tal-UE sabiex jikkoordina u jżid is-sinerġiji bejn tliet missjonijiet tal-PSDK fil-Qarn tal-Afrika, kif ukoll l-istrutturi bbażati fi Brussell, fil-kuntest tal-Istrateġija għall-Qarn tal-Afrika u flimkien mar-Rappreżentant Speċjali tal-UE għall-Qarn tal-Afrika;

21.

Jnnota li jeżistu sinjali li l-LRA tista’ tkun qiegħda tespandi l-firxa tagħha, billi tinvolvi aktar pajjiżi fil-ġlieda u tqiegħed aktar tfal f’riskju; ifakkar li l-ġlieda kontra l-LRA u t-tfittxija għall-mexxej tal-LRA, Joseph Kony, tiddependi ħafna fuq il-finanzjament, it-tagħmir u l-appoġġ loġistiku mill-Istati Uniti; jistieden lill-UE sabiex tikkoordina mal-Istati Uniti għal kwalunkwe assistenza addizzjonali meħtieġa fil-ġlieda kontral-LRA, taħt is-sorveljanza tal-UA;

22.

Jiddispjaċih min-nuqqas ta’ implimentazzjoni tar-regolamenti tas-CITES; jistieden lill-Kummissjoni u lill-Kunsill sabiex jippromwovu l-ħolqien ta' sistema ta' ċertifikazzjoni u kontroll tal-importazzjonijiet tal-ivorju fl-UE, b'mod simili għall-proċess Kimberly li kien ta' suċċess;

23.

Jilqa’ l-istrateġija tal-UE għall-Qarn tal-Afrika, li tinkludi mhux biss is-sigurtà u politika umanitarja, iżda wkoll politika ta’ żvilupp għat-terminu itwal ta' żmien u l-objettivi tal-Għanijiet ta' Żvilupp tal-Millennju; jenfasizza l-importanza ta’ din il-viżjoni fuq perjodu itwal ta’ politika ta’ żvilupp u jistieden lill-Kummissjoni u lill-Istati Membri sabiex jikkoordinaw il-politiki tagħhom f'dan ir-rigward u jimplimentaw programmazzjoni konġunta għad-diversi pajjiżi u għar-reġjun mill-iktar fis possibbli;

24.

Jemmen li Qarn tal-Afrika stabbli u sigur għandu jkollu impatti politiċi u ta’ sigurtà pożittivi lil hinn mir-reġjun, kif ukoll f’termini ta’ investimenti u rotot siguri ta’ tbaħħir fl-Oċean Indjan; huwa tal-opinjoni, għalhekk, li fil-livell tal-G-20 għandha tinbeda riflessjoni dwar l-istrateġiji għall-promozzjoni tas-sigurtà u l-istabbiltà fir-reġjun u dwar il-koordinazzjoni sabiex jiġu pprovduti r-riżorsi finanzjarji meħtieġa għall-implimentazzjoni ta’ approċċ komprensiv; jinnota f’dan ir-rigward l-esperjenza pożittiva tal-konferenza tas-Somalja miżmuma f’Londra fi Frar 2012 u jħeġġeġ lir-Rappreżentant Għoli/lill-Viċi President sabiex jesplora l-possibbiltà ta’ konferenza simili fl-2013;

25.

Huwa tal-fehma li l-Qarn tal-Afrika għandu jiġi kkunsidrat ukoll bħala li għandu potenzjal ekonomiku b'saħħtu, b'mod partikolari potenzjal ta’ riżorsi minerali u agrikoli; jistieden, għalhekk, lill-Kunsill, lill-Kummissjoni, lis-SEAE u lill-BEI, b’koordinazzjoni ma’ donaturi multilaterali u istituzzjonijiet finanzjarji oħra sabiex jidentifikaw proġetti ta’ interess komuni għall-pajjiżi tar-reġjun, li jistgħu jippromwovu l-kooperazzjoni u l-interdipendenza pożittiva, pereżempju fl-oqsma tal-provvista tal-enerġija, inklużi l-enerġija rinnovabbli, u r-riżorsi naturali, inkluż l-ilma; jenfasizza l-importanza tal-kummerċ transkonfinali, l-aċċess għas-swieq internazzjonjali, l-infrastrutura portwali u l-provvista ta’ kurituri adegwati għall-aċċess għal portijiet tal-pajjiżi mdawra bl-art, bħala elementi vitali għall-iżvilupp ekonomiku fit-tul tal-Qarn tal-Afrika; jitlob lill-Kummissjoni sabiex twettaq analiżi bir-reqqa tad-dimensjoni u l-impatt f’termini ekonomiċi, ambjentali u soċjali, tal-prattiki tal-kiri tal-art lil pajjiżi terzi fil-Qarn tal-Afrika u sabiex tipproponi strateġiji u mekkaniżmi possibbli ta’ salvagwardja;

26.

Huwa tal-fehma li t-tisħiħ tas-sigurtà reġjonali u l-ġlieda kontra t-terroriżmu u l-piraterija, huma kemm huma indispensabbli, ma jridux inessu l-ħtieġa assoluta li l-ewwel nett tiġi appoġġjata l-qerda tal-faqar fir-reġjun, speċjalment li l-UE, skont l-istess Trattat fundatur tagħha, għandha l-obbligu li tikkunsidra l-objettivi ta' kooperazzjoni għall-iżvilupp – it-tnaqqis u l-qerda tal-faqar jinsabu fl-ewwel post ta' dawn l-objettivi – fl-implimentazzjoni tal-politiki li x'aktarx jolqtu lill-pajjiżi li qed jiżviluppaw (Artikolu 208(1) tat-TFUE); josserva li l-pajjiżi kollha tal-Qarn tal-Afrika huma pajjiżi li qed jiżviluppaw u li, bis-saħħa ta' dan, bl-eċċezzjoni tas-Sudan u s-Sudan t'Isfel li ma ffirmawx il-Ftehim ta' Cotonou, irċevew EUR 2 biljun f'għajnuna għall-iżvilupp (fosthom EUR 644 miljun marru għall-Etjopja waħidha) għall-programmi indikattivi nazzjonali u reġjonali fil-qafas tal-għaxar Fond Ewropew għall-Iżvilupp (FEŻ) (2008-2013); jindika li, matul l-istess perjodu, dejjem fil-qafas tal-għaxar FEŻ, ir-reġjun tal-Afrika tal-Lvant, l-Afrika tan-Nofsinhar u l-Oċean Indjan jibbenefika minn EUR 619 miljun (parzjalment għall-Awtorità Intergovernattiva għall-Iżvilupp (IGAD – Intergovernmental Authority on Development)), bil-għan li jinqered il-faqar fil-pajjiżi tar-reġjun u li dawn jingħataw l-għajnuna biex jiksbu l-Għanijiet ta' Żvilupp tal-Millennju; ifakkar, fl-aħħar nett, li l-Fond għall-Paċi fl-Afrika, sottostrument tal-FEŻ, jappoġġja finanzjarjament lill-AMISOM;

27.

Huwa tal-fehma li, fil-livell dinji, id-distributur ewlieni ta' għajnuna għall-iżvilupp u ta' għajnuna umanitarja fir-reġjun, parzjalment bis-saħħa taċ-ċentralizzazzjoni tal-attività diplomatika tagħha fil-kuntest tas-SEAE u r-RSUE, is-suċċess tal-Operazzjoni Atalanta u l-preżenza diplomatika u militari fir-reġjun ta' ċerti Stati Membri, l-UE (l-Istati Membri u l-Kummissjoni) tista' tagħmel aktar biex teqred il-faqar endemiku fir-reġjun u ż-żoni anarkiċi u b'assenza tad-dritt li jinsabu fih;

28.

Iqis opportun li tittieħed l-opportunità li tippreżenta l-elezzjoni, fl-10 ta' Settembru 2012, tal-president il-ġdid tas-Somalja Hassan Sheikh Mohamud, biex, bl-għajnuna tal-Qafas Strateġiku għall-Qarn tal-Afrika u bl-appoġġ tar-RSUE fir-reġjun, kif ukoll dak tas-SEAE u l-korpi diplomatiċi nazzjonali u dak tal-Unjoni Afrikana, issir ħidma favur l-istabbiliment ta' relazzjonijiet diplomatiċi u ekonomiċi normali bejn l-Etjopja u l-Eritrea u favur is-soluzzjoni tal-kriżi tas-Somalja, peress li dan ikun ta' benefiċċju għall-iżvilupp tar-reġjun kollu kemm hu; josserva li r-Reġjun tal-Lagi l-Kbar, li jinsab fil-fruntiera taż-żoni periferiċi tal-Punent tal-Qarn tal-Afrika, huwa wkoll reġjun mill-aktar instabbli fid-dinja, li jinkludi pajjiżi fi stat gravi ħafna ta' sottożvilupp li huma milqutin mill-vjolenza armata, pereżempju r-Repubblika Demokratika tal-Kongo (RDK), jew saħansitra minn gwerer ma' wieħed jew aktar mill-pajjiżi ġirien tagħhom, pereżempju t-tensjonijiet bejn l-RDK u r-Rwanda, li f'sens wiesa' tagħmel parti mill-Qarn tal-Afrika; jenfasizza li aħna u nimplimentaw l-istrateġija Ewropea għall-Qarn tal-Afrika ma nistgħux ma nagħtux kas ir-riperkussjonijiet possibbli tagħha fuq l-iżvilupp tant meħtieġ tar-reġjuni ġirien (l-aktar, ir-reġjun tal-Lagi l-Kbar, l-Afrika Ċentrali u l-Afrika tan-Nofsinhar).

29.

Jilqa', fl-interessi kemm tal-għajnuna għall-iżvilupp reġjonali u wkoll tal-għajnuna umanitarja, il-pjan il-ġdid għall-Qarn tal-Afrika propost mill-Kummissjoni fl-2012, magħruf bl-isem SHARE (Supporting Horn of Africa Resilience – Appoġġ għar-Reżistenza tal-Qarn tal-Afrika), li jimmira li jkun strument li jgħaqqad l-għajnuna umanitarja fuq perjodu qasir mal-iżvilupp fuq perjodu twil, sabiex jikser iċ-ċirku vizzjuż tal-kriżijiet li jolqtu lir-reġjun; jappoġġja bis-sħiħ lill-Kummissjoni f'dan il-proġett ta' tisħiħ tal-Kollegament tal-Għajnuna ta' Emerġenza, ir-Riabilitazzjoni u l-Iżvilupp (LRRD: Link between Relief, Rehabilitation and Development); jitlob lill-UE biex, permezz ta' dan il-programm, taħdem lejn il-provvista ta' opportunitajiet diversi ta' għajxien u ta' aċċess aħjar għas-swieq u għall-informazzjoni, biex tagħti spinta lill-introjtu tal-unitajiet domestiċi għall-popolazzjonijiet pastoralisti, agropastoralisti, taż-żoni tax-xmajjar, kostali, urbani u periurbani, biex ittejjeb l-aċċess għas-servizzi soċjali bażiċi u biex ikollha l-għan li toffri livelli affidabbli u prevedibbli ta' appoġġ għall-popolazzjonijiet kronikament u staġjonalment fi stat ta' riskju;

30.

Jilqa' l-programm il-ġdid SHARE tal-UE, li għandu l-għan li jżid ir-reżiljenza tal-pajjiżi tal-Qarn tal-Afrika fir-rigward tad-diversi theddid li jiffaċċjaw; jenfasizza, madankollu, li dan il-programm ikun ikkoordinat mal-istrateġija tal-Unjoni Ewropea għas-Sahel, li wkoll qed jikkonfronta l-istess theddid (it-terroriżmu, it-traffikar tad-droga, it-tibdil fil-klima, l-influss tar-refuġjati u persuni spustati, eċċ.);

31.

Jemmen li fil-pajjiżi tal-Qarn tal-Afrika huwa importanti li jiġu appoġġjati l-agrikoltura, ix-xogħol tar-raħħala u t-trobbija tal-bhejjem u jilqa’ l-ħidma kbira li twettqet f’dawn l-oqsma mill-NGOs;

32.

Jistieden lill-Kummissjoni Ewropea biex tappoġġja kull programm ta’ aċċess għall-ilma, bħala dritt fundamentali u assi komuni tal-umanità, u biex tappoġġja s-sħubijiet pubbliċi u privati għall-aċċess għall-ilma għax-xorb;

33.

Jinsisti li, kulmeta jkun possibbli, l-għajnuna tal-UE fil-Qarn tal-Afrika m’għandhiex tieħu l-forma ta’ appoġġ baġitarju dirett, iżda għandha tingħata sabiex jintlaħqu miri speċifiċi fuq il-bażi ta’ indikaturi ċari ta’ prestazzjoni; iqis li, meta l-għajnuna jkollha tieħu l-forma ta’ appoġġ baġitarju, dan għandu jsir bil-kundizzjoni tal-ksib ta’ għanijiet speċifiċi; jemmen li l-programmi indirizzati lejn l-appoġġ tal-Istrateġija tal-UE għall-Qarn tal-Afrika għandhom ikunu kapaċi li jibbenefikaw mit-taħlita tar-riżorsi, jiġifieri, li l-finanzjament għal programmi bħal dawn għandu jkun miftuħ għal donaturi internazzjonali oħra abbażi ta’ standards komuni ċari sabiex jiġi ffaċilitat approċċ ikkoordinat u uniformi min-naħa tad-donaturi kollha u jkun hemm riskju minimu ta’ approċċi konflittwali jew duplikazzjoni; iqis li, b’mod simili, l-UE għandha tkun kapaċi tipparteċipa fil-finanzjament tal-programmi tal-partijiet terzi fir-reġjun, bil-kundizzjoni li tkun tista’ tiġi żgurata l-osservanza sħiħa tar-regoli dwar l-għajnuna finanzjarja tal-UE lil pajjiżi terzi;

34.

Jistieden lill-UE u lill-Istati Membri tagħha sabiex ikomplu jipprovdu għajnuna umanitarja newtrali, imparzjali u indipendenti lill-popolazzjonijiet vulnerabbli u sabiex jappoġġjaw lill-pajjiżi tar-reġjun fit-tisħiħ tal-kapaċitajiet nazzjonali tagħhom permezz ta’ strateġiji għat-tnaqqis tar-riskji minn diżastri u programmi ta’ kooperazzjoni għal żvilupp fit-tul fl-oqsma tal-preparatezza kontra n-nixfa, tal-agrikoltura, tal-iżvilupp rurali u tas-sigurtà tal-ikel;

35.

Jenfasizza li, għalkemm huwa minnu li l-kawża tat-traġedja tal-ikel fil-Qarn tal-Afrika (kif ukoll fis-Saħel) bdiet kawża tan-nixfa rikorrenti, tal-ħsad ħażin u taż-żieda fil-prezzijiet, għandu jiġi kkunsidrat li, barra minn dawn ir-raġunijiet temporanji (filwaqt li n-nixfa llum tista’ titqies diġà strutturali), jeżistu oħrajn ta’ importanza kbira, bħal destrutturazzjoni tal-komunitajiet u l-promozzjoni kbira għall-esportazzjoni ta' prodotti agrikoli għad-detriment tas-sovranità tal-ikel u tal-produzzjoni agrikola għall-konsum u l-bejgħ domestiku;

36.

Jisħaq li r-rispett għad-drittijiet tal-bniedem u l-libertajiet fundamentali jikkostitwixxi element invarjabbli tal-pedamenti tal-impenn tal-Unjoni mal-pajjiżi terzi sieħba; huwa, għalhekk, profondament imħasseb dwar rapporti ta’ arresti arbitrarji, maltrattament tal-priġunieri u vjolenza kontra dimostraturi kif ukoll miżuri repressivi kontra l-oppożizzjoni politika inkluża ċ-ċensura u d-detenzjoni arbitrarja ta’ ġurnalisti u attivisti li seħħew fir-reġjun; jistieden lill-awtoritajiet kollha fil-Qarn sabiex jirrispettaw dawn il-prinċipji fundamentali u jeħilsu lill-priġunieri politiċi kollha b’mod mhux kondizzjonali;

37.

Jesprimi t-tħassib serju tiegħu dwar il-ħtif tal-art fl-Afrika, li qed jirriskja li jqiegħed is-sigurtà lokali tal-ikel f’periklu u li jżid il-karestiji; jistieden lill-gvernijiet tal-Qarn tal-Afrika u lill-UE sabiex jivvalutaw l-impatt kurrenti tal-akkwiżizzjoni tal-art tal-biedja fuq il-faqar rurali u l-kriżi kurrenti ta’ karestija; iħeġġeġ lill-Kummissjoni tintegra l-kwistjoni tal-ħtif tal-art fid-djalogu ta’ politika tagħha mal-pajjiżi li qed jiżviluppaw, bil-għan li timplimenta koerenza bejn il-politiki;

38.

Jinsab imħasseb dwar l-allegazzjonijeit tar-rimi illegali tal-iskart minn kumpaniji u netwerks kriminali tal-UE; ifakkar li r-rimi illegali tal-iskart huwa ta’ tħassib serju għas-Somali li jgħix mal-kosta; jistieden lir-Rappreżentant Għoli/lill-Viċi President u lill-Kummissjoni sabiex, bħala kwistjoni ta' urġenza, iwettqu investigazzjoni sħiħa minn korp indipendenti, li tinkludi l-ġbir ta’ evidenza u kampjuni u, skont ir-riżultati tar-riċerka, jikkunsidraw il-possibilità ta' azzjoni legali, inkluż klejms ta' kumpens mill-kumpaniji Ewropej, mill-Istati Membri tal-UE u mill-UE;

39.

Jirrikonoxxi li huwa ta’ importanza vitali li tinżamm assistenza umanitarja indipendenti u imparzjali għall-popolazzjonijiet kollha affettwati minn kunflitti fil-Qarn tal-Afrika u li jitkompla l-finanzjament adegwat, b’mod partikolari għas-Somalja; jenfasizza li kwalunkwe tnaqqis fl-assistenza jista’ jirriżulta fil-fatt li l-poplu tas-Somalja jerġa’ jsofri kriżi umanitarja; jenfasizza l-bżonn, barra mill-assistenza umanitarja, li wieħedf jibni fuq l-isforzi bħall-inizjattiva Supporting the Horn of Africa’s Resilience (SHARE) tal-Unjoni Ewropea, sabiex tiġi żgurata r-reżistenza u jitjieb l-għajxien tal-popli lokali;

40.

Jenfasizza li d-drittijiet tal-bniedem, b’mod speċjali d-drittijiet tan-nisa, tat-tfal, tal-leżbjani, gay, bisesswali u transġeneru u tal-minoritajiet reliġjużi, ilhom jiġu traskurati fir-reġjun u jinnota li l-Iżlamiżmu tas-settet infirex f’partijiet tal-Qarn tal-Afrika u qed jhedded il-libertajiet tal-minoritajiet;

41.

Jenfasizza l-importanza tal-appoġġ Ewropew lis-soċjetà ċivili; jistieden lill-Kummissjoni u lill-Istati Membri jiżguraw appoġġ koordinat għas-soċjetà ċivili kemm f'pajjiżi individwali kif ukoll fil-livell transkonfinali u dak reġjonali;

42.

Jenfasizza l-importanza ku tiġi provduta assistenza kontinwa lis-Sudan t’Isfel bl-għan li tinħoloq u tiġi sostnuta soċjetà ċivili effettiva; jemmen bis-sħiħ li l-istrument ġdid għall-promozzjoni tad-demokrazija u d-drittijiet tal-bniedem għandu jinkludi linji ta' finanzjament ad hoc għall-Qarn tal-Afrika; jemmen li għandha tiġi kkunsidrata l-estensjoni tad-Dotazzjoni għad-Demokrazija lill-pajjiżi fil-Qarn tal-Afrika;

43.

Jilqa’ l-ftehimiet milħuqa bejn is-Sudan u s-Sudan t’Isfel dwar il-bidu mill-ġdid tal-esportazzjonijiet taż-żejt u d-demilitirizzazzjoni u jistieden liż-żewġ pajjiżi sabiex jirrispettawhom; jistieden lil kull wieħed miż-żewġ Stati biex jieqfu milli jagħtu kenn jew jappoġġjaw lil gruppi ribelli mill-Istat l-ieħor; iħeġġeġ li jitkomplew in-negozjati dwar id-delimitazzjoni tal-konfini bejn iż-żewġ pajjiżi sabiex jiġi evitat li jerġa’ jibda l-kunflitt li jista’ jikkomprometti l-ftehim reċenti, u jirrakkomanda li ż-żewġ mexxejja jkomplu t-taħdidiet sabiex jilħqu ftehim dwar l-istat ta’ Abyei u jordnaw iż-żoni ta’ tilwim skont il-Pjan Direzzjonali tal-UA u r-Riżoluzzjoni tal-Kunsill tas-Sigurtà tan-Nazzjonijiet Uniti 2046 mill-iktar fis possibbli; Jifraħ lill-bord ta’ livell għoli tal-President Mbeki, iffinanzjat parzjalment mill-Unjoni Ewropea, għas-suċċessi li kiseb, bl-appoġġ tal-UA, fin-negozjati u tal-medjazzjoni bejn is-Sudan u s-Sudan t’Isfel; jistieden lir-RSUE għas-Sudan u s-Sudan t'Isfel biex jikkoordinaw mal-kapijiet tad-delegazzjonijiet fis-Sudan u s-Sudan t'Isfel biex ikun żgurat li l-impenn, l-isforzi politiċi u l-għajnuna tal-UE jibqgħu f'livell għoli ħafna ta' viżibilità;

44.

Jilqa’ b’sodisfazzjon il-memoranda ta’ qbil konklużi b’mod separat bejn il-gvern tas-Sudan u l-Moviment ta' Liberazzjoni tal-Poplu tas-Sudan tat-Tramuntana (SPLM-N), flimkien man-NU, l-Unjoni Afrikana u l-Lega tal-Istati Għarab sabiex ikun permess it-twassil tal-għajnuna umanitarja lill-popolazzjonijiet ċivili tal-Istati tan-Nil blu u tal-Kordofan t’Isfel.

45.

Hu mħasseb dwar it-tqajjim mill-ġdid tal-vjolenza fl-Istat ta' Jonglei fis-Sudan t'Isfel, li qed tipperikola l-prograess li sar fl-istabbiliment mill-ġdid tal-paċi u s-sigurta fir-reġjun; jappoġġja l-investigazzjoni mitluba mill-UNMISS u jitlob għal sanzjonijiet kontra dawk ħatja; jistieden lill-Gvern tas-Sudan t'Isfel biex:

jenfasizza l-importanza tal-għajnuna kontinwa min-naħa tal-UE lis-Sudan t’Isfel bl-għan li tipprovdi l-bini ta’ kapaċitajiet għall-amministrazzjoni pubblika u l-awtoritajiet tal-infurzar tal-liġi tal-pajjiż, il-ħolqien u ż-żamma ta’ soċjetà ċivili effettiva u l-promozzjoni tal-governanza tajba; iħeġġeġ lill-UE sabiex tinsisti għar-ratifika ta’ trattati internazzjonali ewlenin dwar id-drittijiet tal-bniedem u tassisti lill-awtoritajiet tal-pajjiż fl-implimentazzjoni tagħhom; jikkundanna l-abbużi rrapurtati kontra persuni ċivili min-naħa tal-forzi militari fil-proċess ta’ demilitirizzazzjoni u jistieden lill-Gvern tas-Sudan t’Isfel sabiex iwettaq investigazzjoni indipendenti dwar l-avvenimenti sabiex jirresponsabilizza lis-suldati involuti u jiżgura l-kumpens għall-vittmi;

46.

Jikkundanna bil-qawwi l-atti kollha ta’ vjolenza mwettqa kontra l-persuni ċivili bi ksur tal-liġi umanitarja internazzjonali u l-liġi dwar id-drittijiet tal-bniedem fis-Sudan; iħeġġeġ lill-UE u lill-komunità internazzjonali sabiex jaqblu dwar approċċ unifikat biex jindirizzaw il-protezzjoni tal-persuni ċivili u jtemmu l-ksur tad-drittijiet tal-bniedem, b’mod partikolari f’Darfur, fil-Kordofan t’Isfel u fil-Blue Nile; jistieden lill-Gvern tas-Sudan u lill-SPLM/Tramuntana biex jibdew minnufih taħdidiet diretti bil-għan li jaqblu dwar twaqqif totali tal-ostilitajiet u jilħqu ftehim politiku abbażi tal-Ftehim Qafas tat-28 ta’ Ġunju 2011 kif stipulat fir-Riżoluzzjoni tal-Kunsill tas-Sigurtà tan-NU 2046; jenfasizza l-importanza tal-fatt li l-atturi internazzjonali jinżammu fiż-żoni tal-kunflitt u jħeġġeġ lill-awtoritajiet Sudaniżi sabiex jiżguraw is-sigurtà tagħhom, flimkien ma’ dik tal-persuni ċivili; Ifakkar fir-responsabbiltajiet tal-UE u tal-Istati Membri fir-rigward ta' appoġġ imtejjeb u kooperazzjoni mal-Qorti Kriminali Internazzjonali fl-implimentazzjoni tal-mandati ta’ arrest ta’ Ahmad Muhammad Harun, Ali Muhammad Ali Abd-Al-Rahman, Abdel Rahim Mohammed Hussein u tal-President Omar Hassan Ahmad Al Bashir;

47.

Jinsab imħasseb dwar id-deterjorazzjoni tal-kundizzjonijiet tas-saħħa tar-refuġjati tas-Sudan stmati għal 170 000 elf, li nofshom huma tfal, fl-erba’ kampijiet tan-Nil ta’ Fuq u f’dak tal-Istat tal-Unità fejn ir-riskji ta’ infezzjoni, ta’ dijarea u tal-malarja żdiedu sew u jaggravaw bin-nuqqas ta’ nutrizzjoni,

48.

Jikkundanna kull appoġġ li se jsir kemm mis-Sudan kif ukoll mis-Sudan t’Isfel għal kull grupp armat li mhuwiex parti mill-armata regolari tagħhom;

49.

Jinnota r-riżultat tal-elezzjonijiet presidenzjali tal-20 ta’ Awwissu 2012 fis-Somalja; iħeġġeġ lill-atturi politiċi kollha fis-Somalja sabiex jimpenjaw ruħhom għad-demokrazija, l-istat tad-dritt u d-drittijiet tal-bniedem, bħala l-mezzi uniċi ta' ħelsien miċ-ċirkolu vizzjuż tal-faqar, tan-nuqqas ta’ żvilupp u tan-nuqqas ta' sigurtà; jenfasizza li t-tmiem tal-mandat tal-Gvern Federali ta’ Tranżizzjoni huwa test ewlieni tal-potenzjal tas-Somalja li tipproċedi lejn stat li jiffunzjona u l-kapaċità tagħha li terġa' tibni istituzzjonijiet b'saħħithom, demokratiċi u verament rappreżentattivi; jemmen li se jkun kruċjali li jiġi ffaċilitat djalogu politiku inklużiv fis-Somalja u li jkunu promossi proċessi ta' bini ta' kunsens b'appoġġ għall-gvern il-ġdid; jistieden lill-Gvern Federali l-ġdid u lill-President il-ġdid Hassan Sheikh Mohamud, sabiex jaħdmu biex jilħqu rikonċiljazzjoni fost il-poplu Somalu billi jkomplu jaħdmu fuq il-Ftehim Garowe, sabiex jistabbilixxu l-Istat federali l-ġdid u jibdew il-proċess twil iżda importanti għall-ksib tal-paċi, is-sigurtà u d-demokrazija għall-popolu kollu tas-Somalja;

50.

Jilqa' t-teħid ta’ ġurament reċenti tal-ewwel parlament formali tas-Somalja f’iżjed minn 20 sena u jittama li dan jimmarka l-ewwel pass fi tranżizzjoni lejn demokrazija parlamentari rappreżentattiva; jinnota l-fatt li 30 % tal-kwota ta' membri nisa fil-parlament diġà ntlaħaq, filwaqt li jfakkar li l-parteċipazzjoni sinifikanti tan-nisa fis-setturi kollha tal-ħajja pubblika hija importanti sabiex l-isforzi ta’ soluzzjoni ta’ konflitt u bini ta’ paċi jirnexxu;

51.

Jilqa’ t-tmiem tat-tranżizzjoni fis-Somalja bħala opportunità għal tiġdid; jilqa' l-ħidma tal-firmatarji tal-pjan direzzjonali, tal-anzjani tradizzjonali, tal-Assemblea Kostitwenti Nazzjonali, tal-Parlament Federali l-ġdid u tal-Kumitat tal-Għażla Teknika għar-rwoli tagħhom sabiex iġibu l-perjodu ta’ tranżizzjoni fis-Somalja fi tmiemu; jilqa’ l-impenn tal-President uxxenti Hassan Sheikh Mohamud; iħeġġeġ lill-atturi politiċi kollha fis-Somalja sabiex jikkooperaw mal-awtoritajiet il-ġodda; jilqa’ l-viżjoni tal-President Hassa Sheikh għas-Somalja u l-intenzjoni tiegħu li jiżgura t-twaqqif ta’ istituzzjonijiet governattivi inklużivi u b-bażi wiesgħa, l-istabilizzazzjoni, l-istat tad-dritt u l-governanza tajba, l-irkupru ekonomiku, il-bini tal-paċi u r-rikonċiljazzjoni, il-provvista tas-servizz pubbliku u t-titjib fir-relazzjonijiet bejn is-Somalja u l-bqija tad-dinja; iħeġġu sabiex jirrispetta l-impenn tiegħu għal governanza trasparenti u responsabbli, li jiġġieled kontra l-korruzzjoni fil-livelli kollha, u li jiżgura djalogu inklużiv u t-twaqqif ta’ istituzzjonijiet rappreżentattivi u responsabbli fil-livelli nazzjonali, reġjonali, distrettwali u lokali, skont il-Kostituzzjoni provviżorja tas-Somalja;

52.

Jistieden lir-RGħ/VP u lill-EUSR għall-Qarn tal-Afrika biex jirrevedu b'mod kritiku l-Proċess ta' Paċi ta' Ġibuti u biex jikkunsidraw li jibagħtu tim ta' medjaturi li jkollhom il-fiduċja ta' għadd wiesa' ta' atturi Somali, inklużi assoċjazzjonijiet tan-nisa, u li jkunu kapaċi jressqu sensiela wiesgħa ta' atturi Somali madwar il-mejda tan-negozjati; jistieden lir-RGħ/VP tibda proċess għall-atturi tas-soċjetà ċivili Somala ġewwa u barra mill-pajjiż li jkun jista’ jippermetti diskussjoni regolari u kontinwa dwar soluzzjonijiet possibbli għall-problemi politiċi fil-pajjiż; jistieden lir-RGħ/VP iġġib dawn iż-żewġ proċessi flimkien filwaqt li tieħu bħala eżempju l-proċess ta’ paċi li kien suċċess bejn is-sena 2000 u s-sena 2005 fis-Sudan;

53.

Jilqa’ l-inizjattiva reċenti dwar il-paċi takl-gvern Somalu, li toffri impjiegi ċivili u taħriġ għar-ribelli diżerturi ta’ Al Shabaab; jilqa’ l-iżvilupp istituzzjonali reċenti bħall-approvazzjoni ta’ kostituzzjoni ambizzjuża li twiegħed drittijiet indaqs għaċ-ċittadini kollha, irrispettivament mill-ġeneru, reliġjon, stat soċjali jew ekonomiku, opinjoni politika, klann, diżabbiltà, okkupazzjoni, twelid jew djalett, tagħmel illegali il-mutilazzjoni ġenitali femminili u tistabbilixxi Kummissjoni dwar il-Verità u r-Rikonċiljazzjoni; jinsab imħasseb, madankollu, dwar il-fatt li f’pajjiż li ilu mxekkel minn għexieren ta’ snin ta’ ġlied intern, il-kostituzzjoni l-ġdida ma tindirizzax il-kwistjoni tad-diviżjoni tas-setgħa u r-riżorsi bejn iċ-ċentru u r-reġjuni, u jitlob li jkun hemm iżjed kooperazzjoni mal-awtoritajiet il-ġodda sabiex dawn il-kwistjonijiet jiġu indirizzati;

54.

Jistieden lill-awtoritajiet Somali sabiex jipprijoritizzaw il-bini tal-istituzzjonijiet u, bħala kwistjoni urġenti, l-istabbiliment ta’ forza tal-pulizija li tista' tiġi responsabilizzata, u li tkun trasparenti u integrativa, peress li dan jikkonsolida l-fiduċja tal-popolazzjoni fil-gvern il-ġdid; ifaħħar, f’dan ir-rigward, il-kontribut prezzjuż li EUTM Somalja qiegħda tagħti lill-forzi tas-sigurtà tal-pajjiż; juri l-fiduċja tiegħu fl-appoġġ kontinwu tal-Istati Membri fil-ħidma tal-missjoni tal-PSDK, li qed tipprova trawwem ir-rispett tad-drittijiet tal-bniedem, id-dinamiki ttal-ġeneri u l-istat tad-dritt fil-forzi militari Somali; jinnota li l-iżvilupp ta’ istituzzjonijiet Somali stabbli, responsabbli u inklużivi għandu jmur lil hinn mill-forzi tas-sigurtà u għandu jitmexxa minn u jkun il-proprjetà tal-poplu tas-Somalja jekk is-Somalja għandha ssir Stat vijabbli;

55.

Jenfasizza li strutturi vijabbli u inklużivi ekonomiċi u sistema ta' qsim tad-dħul mill-isfruttament taż-żejt u l-gass fil-ġejjieni bejn ir-reġjuni u l-livell federali, għall-benefiċċju tal-popolazzjoni kollha, se jkunu essenzjali għas-sostenibbiltà fit-tul tas-Somalja bħala stat li jiffunzjona tajjeb; iħeġġeġ lill-komunità internazzjonali sabiex ma tirripetix l-iżbalji li saru fl-imgħoddi billi tikkonċentra l-għajnuna fl-istituzzjonijiet federali f’Mogadishu b’detriment għar-reġjuni tas-Somalja, peress li din tal-aħħar jista’ jkollha rwol kruċjali fil-provvista deċentralizzata tas-servizzi bażiċi u l-istabbiltà għall-popolazzjoni; jistieden lill-UE biex timmobilizza r-riżorsi kollha waqt il-perjodu preżenti ta’ opportunità sabiex tgħin lill-entitatjiet reġjonali fis-Somalja f’dan il-proċess vitali ta' tranżizzjoni demokratika; fid-dawl tal-iżviluppi politiċi u ta’ sigurtà reċenti fis-Somalja, iħeġġeġ lill-Istati Membri u lir-RGħ/VP, b’kooperazzjoni mill-qrib mal-awtoritajiet leġittimi Somali, l-Unjoni Afrikana u l-IGAD, kif ukoll il-gvern tal-Istati Uniti, sabiex jikkunsidraw missjoni dwar ir-Riforma tas-Settur tas-Sigurtà (SSR);

56.

Jirrikonxxi li l-paċi fis-Somalja għandha tkun proċess minn isfel għal fuq; ifakkar li l-UE trid tiżgura li l-istrateġija tagħha tippermetti li l-isforzi lokali għall-bini tal-paċi u s-soluzzjoni tat-tilwim ikunu appoġġjati biżżejjed u jsiru prijorità nazzjonali u reġjonali; ifakkar ukoll li l-leġittimità lokali se tgħin fil-ħolqien ta’ istituzzjonijiet tal-gvern fis-Somalja li joffru prospettivi fit-tul għall-istabbiltà;

57.

Ifakkar li l-Unjoni Afrikana skjerat l-AMISOM, missjoni militari fis-Somalja, bil-mandat tal-Kunsill tas-Sigurtà tan-NU u li għandha bżonn kbir ta' pajjiżi li lesti jikkontribwixxu aktar suldati;

58.

Jenfasizza l-ħtieġa li l-UE, f’kooperazzjoni mill-qrib mal-Istati Uniti u l-Unjoni Afrikana, ikollha rwol rilevanti għall-futur tas-Somalja;

59.

Jinkoraġġixxi lill-komunità internazzjonali, b’kollaborazzjoni mal-KISA u n-Nofs Qamar l-Aħmar, biex tistabbilixxi ruħha malajr kemm jista’ jkun fis-Somalja u biex tiżviluppa hemmhekk faċilitajiet tas-saħħa u ċentri għal trattament li jitwettaq f’ġurnata għall-kura u n-nutrizzjoni terapewtika;

60.

Jilqa’ b’sodisfazzjon il-ħolqien tal-Faċilità ta’ Stabbiltà lokali li għandha bħala għan partikolarment li tikkoordina l-għajnuna internazzjonali fiż-żoni li għadhom kif ġew illiberati u huma aċċessibbli fis-Somalja t’Isfel;

61.

Jiddispjaċih ħafna li, sa minn Diċembru 2013 biss, 13-il ġurnalist u ħaddiem tal-midja nqatlu f’żoni kkontrollati mill-gvern tas-Somalja u li ma sar ebda progress fil-prosekuzzjoni rigward dawn il-każijiet; jenfasizza l-importanza li tiġi żgurata l-libertà tal-espressjoni u jħeġġeġ lill-Gvern il-ġdid u lill-President il-ġdid sabiex jadottaw miżuri biex jipprovdu protezzjoni aħjar lill-ġurnalisti u sabiex iwettqu investigazzjonijiet kredibbli dwar dawn il-każijiet ta’ qtil;

62.

Iħeġġeġ lill-UE u lill-imsieħba reġjonali u internazzjonali kollha sabiex jisfruttaw bis-sħiħ l-opportunità maħluqa mill-itfaċċar ta' gvern ġdid fis-Somalja li, flimkien mal-waqgħa apparenti tal-forza ta’ Al Shabaab fil-pajjiż, tipprovdi potenzjal biex tinfetaħ era politika ġdida fis-Somalja; jenfasizza, għalhekk, il-ħtieġa li l-komunità internazzjonali, speċjalment l-UE, tlesti ruħha sabiex tipprovdi appoġġ lill-awtoritajiet leġittimi u demokratiċi fil-qasam tal-bini tal-kapaċitajiet istituzzjonali, l-SSR, id-DDR, u li tappoġġja s-soċjetà ċivili; iħeġġeġ lir-RGħ/VP sabiex tiżgura li l-azzjoni tal-UE fis-Somalja tħeġġeġ soċjetà ħielsa u miftuħa li tirrispetta u tippromwovi d-drittijiet tal-bniedem, speċjalment id-drittijiet tan-nisa u d-drittijiet tal-minoritajiet, tippermetti l-għoti tas-setgħa lin-nisa u tiżgura l-bilanċ bejn is-sessi fis-setturi kollha tas-soċjeta;

63.

Jenfasizza l-eżempju pożittiv ħafna ta' Somaliland, li wriet il-kapaċità li tiżviluppa u tikkonsolida l-istrutturi demokratiċi, ekonomiċi u amministrattivi tagħha fuq perjodu ta' aktar minn għoxrin sena u li toħloq proċess demokratiku sostenibbli; jinnota li Somaliland s'issa kellha suċċess kbir fil-konsolidazzjoni tas-sigurtà u l-istabbiltà fit-territorju tiegħu u fil-kooperazzjoni fil-ġlieda kontra l-piraterija u t-terroriżmu; jesprimi tħassib, madankollu, li jekk il-grupp Al-Shabaab jinġabar mill-ġdid fir-reġjuni muntanjużi tal-fruntiera tagħha, Somaliland tista' ssir vulnerabbli; jenfasizza, għalhekk, li huwa essenzjali li Somaliland tingħata appoġġ fil-ġlieda kontra t-terroriżmu, inkluż tali miżuri bħall-promozzjoni tad-diversifikazzjoni ekonomika u l-bini tal-kapaċità għall-impjieg taż-żgħażagħ sabiex jitnaqqas ir-reklutaġġ fost iż-żgħażagħ; jinnota l-importanza li Somaliland tippromwovi l-iżvilupp ekonomiku u soċjali tar-reġjun bħala mod biex tegħleb ir-radikaliżmu taż-żoni ta’ instabbiltà fit-territorju tagħha; jistieden lill-Kummissjoni u lis-SEAE sabiex jappoġġjaw lil Somaliland fit-titjib tal-prospetti tagħha ta’ żvilupp u fil-promozzjoni tal-istabbiltà ekonomika u soċjali tagħha; jenfasizza li fit-tfittxija għal soluzzjoni għall-istabbiltà u s-sigurtà fit-tul tas-Somalja huwa importanti li jiġi evalwat l-eżempju pożittiv tal-istabilità ta' Somaliland;

64.

Jilqa’ d-dikjarazzjonhji qawwija ta’ appoġġ għall-istituzzjonijiet Federali ġodda tas-Somalja min-naħa tar-RGħ/VP waqt il-Mini Summit tal-Assemblea Ġenerali tan-NU dwar is-Somalja li sar New York u, b’mod partikolari, l-impenn tagħha għal proċess ta’ erba’ snin ta’ konsolidament tal-istituzzjonijiet federali ġodda u l-amministrazzjoni reġjonali, kif ukoll konferenza internazzjonali dwar is-Somalja fl-2013; jistieden lis-Somaliland u lill-entitajiet federali l-oħra sabiex jadottaw rwol sħiħ u ta’ appoġġ fin-negozjar tar-relazzjoni legali u politika tagħhom mal-istituzzjonijiet federali l-ġodda fis-Somalja bl-għan li jintlaħaq stat federali tas-Somalja sostenibbli, stabbli u għani;

65.

Jinnota r-rwol ewlieni tal-Etjopja għall-istabbiltà politika u ekonomika tar-reġjun kollu; jinnota li fid-diskors inawgurali tiegħu, Hailemariam Desalegn, il-Prim Ministru l-ġdid tal-Etjopja, saħaq dwar l-importanza tat-tisħiħ tad-drittijiet tal-bniedem u tal-istituzzjonijiet demokratiċi fil-pajjiż, sabiex jgħin fl-iżvilupp ta’ kultura demokratika u ta’ rispett sħiħ għad-drittijiet tal-bniedem fil-pajjiż; jemmen li l-ħolqien ta' Gvern Etjopjan ġdid jipprovdi l-opportunità li l-Etjopja tiġi involuta fl-kwistjonijiet kollha ta’ interess jew tħassib komuni, inkluż dawk fejn seta' kien hemm diverġenza ta' opinjonijiet fl-imgħoddi, u jenfasizza l-importanza li l-Etjopja tiġi appoġġjata fi triqitha lejn sistema demokratika ġdida permezz ta’ djalogu pożittiv u sħubija; jappoġġja lill-Etjopja fil-ġlieda tagħha kontra t-terroriżmu, iżda jenfasizza li din il-ġlieda għandha titwettaq fil-kuntest tar-rispett sħiħ għad-drittijiet fundamentali;

66.

Jittama li taħt it-tmexxija tal-Prim Ministru Hoilemariam Desalegn, li nħatar fil-21 ta’ Settembru 2012, l-Etjopja se tinvolvi ruħha fi proċess ta’ tranżizzjoni demokratika ġenwina sabiex twettaq il-potenzjal qawwi demokratiku tagħha, filwaqt li ttemm l-interferenza mal-libertà reliġjuża u l-libertajiet tas-soċjetà ċivili; jistieden lis-Servizz Ewropew għall-Azzjoni Esterna, lir-RSUE għall-Qarn tal-Afrika u lir-RSUE għad-Drittijiet tal-Bniedem biex jimpenjaw ruħhom mal-Etjopja dwar id-drittijiet tal-bniedem bħala kwistjoni ta' prijorità sabiex tkun tista' taħtaf l-opportunità tat-tranżizzjoni politika li qed isseħħ bħalissa biex tistituzzjonalizza tranżizzjoni verament demokratika, mibnija fuq iċ-ċentralità tad-drittijiet tal-bniedem u l-libertajiet fundamentali, il-libertà tal-midja u r-rikonoxximent sħiħ tal-libertà tal-espressjoni; Iħeġġeġ lill-UE u lill-komunità internazzjonali sabiex jibqgħu attenti u attivi fir-reazzjoni għat-tranżizzjoni politika li qed issir fl-Etjopja, sabiex jippromwovu t-tisħiħ ta' istituzzjonijiet demokratiċi u jorbtu l-assistenza politika, militari u ta’ żvilupp ma’ riformi demokratiċi konkreti, li għandhom jinkludu r-rilaxx tal-priġunieri kollha tal-kuxjenza, bħal Eskinder Nega u ġurnalisti, attivisti tad-drittijiet tal-bniedem u tal-iżvilupp u membri tal-oppożizzjoni oħra, l-ammissjoni tar-rapporteurs speċjali tan-NU dwar id-drittijiet tal-bniedem fuq il-bażi ta' aċċess mingħajr xkiel għar-reġjuni u l-faċilitajiet ta’ detenzjoni kollha, ir-revoka jew l-emendar tal-Proklamazzjoni dwar il-Karitajiet u s-Soċjetajiet u l-Proklamazzjoni Kontra t-Terroriżmu, u r-ritorn tal-politikanti tal-oppożizzjoni li qegħdin fl-eżilju; jistieden lill-UE sabiex issib modi innovattivi u siguri biex tassisti, finanzjarjament u politikament, lis-soċjetà ċivili li qiegħda tiġġieled fl-Etjopja u sabiex tinvolvi ruħha fi djalogu mill-qrib mal-oppożizzjoni, kemm dik li tinsab fl-Etjopja kif ukoll dik li tinsab eżiljata;

67.

Jinnota li attwalment fl-Etjopja m’hemm la ġudikatura u lanqas midja indipendenti, bħala riżultat ta' kampanja intenzjonata mfassla sabiex tillimita u tibblokka l-ġudikatura, tikkontrolla l-midja, tintimida l-oppożizzjoni u żżomm siekta lill-organizzazzjonijiet għad-drittijiet tal-bniedem;

68.

Jinnota li numru kbir ta' ġurnalisti ġew ipproċessati skont il-liġi kontra t-terroriżmu tal-2009; jikkundanna l-kampanja ta’ litigazzjoni reċenti li wasslet għall-kundanna in absentia mill-Qorti Federali tal-Finanzi tal-blogger Elias Kifle ta' ħabs għal għomru, u għall-kundanna ta' Wubishet Taye, deputat editur ta’ gazzetta lokali, u ta' Reeyot Alemn, kittieb ta' gazzetta, ta' 12-il sena ħabs; jilqa’, madankollu, il-maħfra reċenti li ngħatat lill-ġurnalisti Svediżi, Martin Schibbye u Johan Persson, wara l-mewt tal-Prim Ministru, Meles Zenawi; jinkoraġġixxi lill-gvern il-ġdid sabiex jestendi l-istess klemenza għall-vittmi kollha ta' ġustizzja arbitrarja;

69.

Jenfasizza l-potenzjal kbir tal-proġett Grand Renaissance Blue Nile Dam fir-reġjun ta’ Benishangul-Gumuz fl-Etjopja għall-produzzjoni ta’ enerġija nadifa u l-iżvilupp ekonomiku tar-reġjun kollu; jappoġġja l-bord internazzjonali ta’ esperti stabbilit bejn l-Etjopja, is-Sudan u l-Eġittu għal dan il-proġett, u jitlob għal ftehim aħjar dwar il-kondiviżjoni tar-riżorsi tal-ilma min-Nil u tal-enerġija prodotta mill-impjant tal-enerġija idroelettrika konness mad-diga;

70.

Jistieden lill-Gvern tal-Etjopja biex japprova formalment id-deċiżjonijiet dwar id-delimitazzjoni tal-Kummissjoni tal-Fruntiera bejn l-Eritrea u l-Etjopja bħala finali u vinkolanti, bi qbil mar-Riżoluzzjonijiet tal-UNSC 1907(2009) u 2023(2011) kif ukoll ir-riżoluzzjonijiet rilevanti tal-UA u l-IGAD; jistieden, għalhekk, lill-Gvern Eritrean biex jaqbel li jimpenja ruħu fi djalogu mal-Etjopja sabiex ikun indirizzat il-proċess tal-irtirar tat-truppi mill-fruntiera u għad-demarkazzjoni fiżika b'konformità mad-deċiżjonijiet tal-Kummissjoni tad-Demarkazzjoni, waqt li jikkunsidra l-importanza tal-fatt li l-komunitajiet jinżammu flimkien, kif ukoll in-normalizzazzjoni tar-relazzjonijiet mal-Etjopja, inkluż il-ftuħ mill-ġdid tal-fruntiera; jistieden lill-komunità internazzjonali tinvolvi ruħha mal-Eritrea u tiddefendi l-interessi u l-ħtiġijiet tal-poplu tal-Eritrea, filwaqt li tagħmel pressjoni fuq ir-reġim u l-forzi militari sabiex jippermettu l-aċċess għall-organizzazzjonijiet internazzjonali, iħejju l-elezzjonijiet li ilhom imwiegħda u jiftħu spazju politiku fil-pajjiż; jenfasizza li l-għajnuna kollha tal-UE li mhix marbuta ma' għanijiet umanitarji għandha tingħata fuq kundizzjoni stretta ta' impenn mill-awtoritajiet tal-Eritrea li jiffaċilitataw it-tranżizzjoni demokratika u t-titjib tas-sitwazzjoni tad-drittijiet tal-bniedem fil-pajjiż, b'punti ta' referenza trasparenti u tanġibbli, kif ukoll tal-bżonnijiet bażiċi tal-poplu Eritrean; jistieden lill-Eritrea sabiex ma tipprovdi l-ebda appoġġ lil gruppi armati li jqiegħdu l-paċi u r-rikonċiljazzjoni fis-Somalja u, b’mod iżjed ġenerali, l-istabbiltà reġjonali, f’periklu; jitlob għal-libertà tal-espressjoni, tal-istampa u tar-reliġjon, kif ukoll l-introduzzjoni ta’ elezzjonijiet ħielsa u ġusti u tad-demokrazija fil-pajjiż; jitlob il-ħelsien immedjat tal-priġunieri politiċi, inkluż il-ħelsien tal-ġurnalista Dawit Isaac li netfa’ l-ħabs mingħajr proċess għal aktar minn 4 000 jum.

71.

Jagħti istruzzjonijiet lill-lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, lis-SEAE u lill-Istati Membri, lir-Rappreżentant Speċjali tal-UE għas-Sudan, ir-Rappreżentant Speċjali tal-UE għall-Qarn tal-Afrika, l-Istati Membri tal-UE, il-Gvern tat-Turkija, il-Kungress tal-Istati Uniti, id-Dipartiment tal-Istat tal-Istati Uniti, il-Kummissjoni tal-Unjoni Afrikana, il-Parlament Pan-Afrikan, il-Gvernijiet u l-Parlamenti tal-Awtorità Intergovernattiva għall-Iżvilupp (IGAD), kif ukoll lill-awtoritajiet ta' Somaliland.

30.12.2015   

MT

Il-Ġurnal Uffiċjali tal-Unjoni Ewropea

C 440/55

—

wara li kkunsidra l-Konvenzjoni tal-1992 dwar id-Diversità Bijoloġika (CBD),

—

wara li kkunsidra l-Protokoll ta' Nagoya tal-2010 tas-CBD dwar Aċċess għar-Riżorsi Ġenetiċi u l-Qsim Ġust u Ekwu tal-Benefiċċji li jirriżultaw mill-Użu tagħhom,

—

wara li kkunsidra t-Trattat Internazzjonali tal-2011 dwar ir-Riżorsi Ġenetiċi tal-Pjanti għall-Ikel u Agrikoltura,

—

wara li kkunsidra t-Trattat ta' Kooperazzjoni dwar il-Privattivi tal-2002,

—

wara li kkunsidra d-Dikjarazzjoni tan-Nazzjonijiet Uniti dwar id-Drittijiet tal-Popli Indiġeni adottata mill-Assemblea Ġenerali fit-13 ta' Settembru 2007,

—

wara li kkunsidra l-Konvenzjoni tal-ILO tal-1989 dwar il-Popli Indiġeni u Tribali (Nru 169),

—

wara li kkunsidra l-Konvenzjoni Internazzjonali għall-Protezzjoni ta' Varjetajiet Ġodda ta' Pjanti, kif riveduta f'Ġinevra fid-19 ta' Marzu 1991,

—

wara li kkunsidra l-Ftehim tad-WTO tal-1995 dwar l-aspetti tad-drittijiet tal-proprjetà intellettwali relatati mal-kummerċ,

—

wara li kkunsidra t-Trattat Internazzjonali tal-2002 dwar Riżorsi Ġenetiċi tal-Pjanti għall-Ikel u Agrikoltura (ITPGR) u l-qafas tad-WHO tal-2011 rigward il-vajrus tal-influwenza,

—

wara li kkunsidra d-Direttiva 98/44/KE tal-Parlament Ewropew u tal-Kunsill tas-6 ta' Lulju 1998 dwar il-protezzjoni legali tal-invenzjonijiet bijoteknoloġiċi (1),

—

wara li kkunsidra r-riżoluzzjoni tiegħu tas-7 ta' Ottubru 2010 dwar l-objettivi strateġiċi tal-UE għall-għaxar Laqgħa tal-Konferenza tal-Partijiet għall-Konvenzjoni dwar id-Diversità Bijoloġika (CBD), li se ssir f'Nagoya (il-Ġappun) mit-18 sad-29 ta' Ottubru 2010 (2),

—

wara li kkunsidra l-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali u lill-Kumitat tar-Reġjuni bit-titolu 'L-assigurazzjoni ta' ħajjitna, il-kapital naturali tagħna: strateġija tal-UE għall-bijodiversità sal-2020' (COM(2011)0244),

—

wara li kkunsidra l-attivitajiet u r-rapporti tal-Kumitat Intergovernattiv WIPO dwar il-Proprjetà Intellettwali u r-Riżorsi Ġenetiċi, l-Għarfien Tradizzjonali u l-Folklor,

—

wara li kkunsidra r-Rapport tal-Laqgħa tal-Grupp ta' Esperti Tekniċi u Legali dwar Għarfien Tradizzjonali Marbut ma' Riżorsi Ġenetiċi fil-Kuntest tas-Sistema Internazzjonali dwar l-Aċċess u l-Qsim tal-Benefiċċji (UNEP/CBD/WG-ABS/8/2, 2009),

—

wara li kkunsidra l-istudju mitlub mill-Kumitat għall-Iżvilupp tal-Parlament intitolat 'Drittijiet tal-Proprjetà Intellettwali fuq riżorsi ġenetiċi u l-ġlieda kontra l-faqar', (2011),

—

wara li kkunsidra l-Konvenzjoni Ramsar tal-1971 dwar l-Artijiet Mistagħdra,

—

wara li kkunsidra l-Konvenzjoni dwar il-Kummerċ Internazzjonali fl-Ispeċijiet ta' Fawna u Flora Selvaġġi fil-Periklu (CITES),

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Iżvilupp u l-opinjonijiet tal-Kumitat għall-Kummerċ Internazzjonali u tal-Kumitat għall-Affarijiet Legali (A7-0423/2012),

A.

billi 70 % tal-foqra tad-dinja jgħixu f'żoni rurali u urbani u jiddependu direttament fuq il-bijodiversità għall-għajxien u l-benessri tagħhom;

B.

billi l-għanijiet ewlenin tal-Konvenzjoni dwar id-Diversità Bijoloġika (CBD) huma li jrawmu l-konservazzjoni u l-użu sostenibbli tal-bijodiversità u li jiġu indirizzati l-ostakoli li jimpedixxu l-użu tagħha;

C.

billi fornituri tar-riżorsi ġenetiċi u l-persuni li jkollhom għarfien tradizzjonali relatat ta' spiss jappartjenu lil pajjiżi li qed jiżviluppaw li għandhom bijodiversità kbira;

D.

billi l-leġiżlazzjoni dwar l-aċċess nazzjonali u l-qsim tal-benefiċċji (ABS), adottata bħala parti mill-proċess tas-CBD, ħarġet bħala tweġiba għall-prattiki tal-bijoprospettar u l-bijopiraterija;

E.

billi definizzjoni komuni tal-bijopiraterija hija l-prattika industrijali tal-privatizzazzjoni u tal-privattivi fuq il-bażi tal-għarfien tradizzjonali jew ir-riżorsi ġenetiċi ta' popli indiġeni, mingħajr awtorizzazzjoni jew l-għoti ta' kumpens lill-pajjiżi minn fejn ikunu ġejjin;

F.

billi s-CBD u l-Protokoll ta' Nagoya tagħha jeħtieġu li l-bijoprospetturi jiksbu “kunsens infurmat minn qabel” (PIC) minn u jilħqu “pattijiet li fuqhom ikun hemm qbil reċiproku” (MAT) ma' pajjiżi tal-oriġini jew komunitajiet lokali u indiġeni b'rabta mal-għarfien tradizzjonali assoċjat mal-riżorsi ġenetiċi, u li jaqsmu l-benefiċċji mill-bijoprospettar ma' pajjiżi u komunitajiet tal-oriġini;

G.

billi l-iskema ABS li qed tevolvi fl-ambitu tas-CDB topera b'mod kumplimentari mal-WTO u mal-Aspetti Kummerċjali tad-Drittijiet tal-Proprjetà Intellettwali (WTO-TRIPS),l-Organizzazzjoni Dinjija tal-Proprjetà Intellettwali (WIPO), l-Organizzazzjoni tal-Ikel u l-Agrikoltura (FAO), l-Unjoni Internazzjonali għall-Protezzjoni ta' Varjetajiet Ġodda ta' Pjanti (UPOV), u l-Organizzazzjoni Dinjija tas-Saħħa (WHO);

H.

billi l-governanza tal-ABS hija riflessa wkoll f'għadd ta' strumenti tad-drittijiet tal-bniedem, inklużi d-Dikjarazzjoni Universali tad-Drittijiet tal-Bniedem tal-1948, il-Patt Internazzjonali dwar id-Drittijiet Ċivili u Politiċi tal-1966, u l-Patt Internazzjonali dwar id-Drittijiet Ekonomiċi, Soċjali u Kulturali tal-1966;

I.

billi l-Artikolu 27(3)(b) tal-ftehim TRIPS tad-WTO jagħti d-dritt lill-gvernijiet sabiex jeskludu mill-privattivabbiltà l-pjanti, l-annimali u l-proċessi 'essenzjalment' bijoloġiċi, filwaqt li l-mikrorganiżmi u l-proċessi mhux bijoloġiċi u mikrobijoloġiċi huma eliġibbli għall-privattivi;

J.

billi l-bijodiversità tipprovdi firxa kbira ta' servizzi tal-ekosistema, bħall-ilma lokali, il-provvista tal-ikel, il-materjali li jsostnu l-għajxien u r-regolamentazzjoni tal-ilma; u billi d-degrad ambjentali joħloq sfidi ġodda għall-konservazzjoni u l-użu sostenibbli ta' firxa wiesgħa ta' speċijiet u riżorsi ġenetiċi bħala bażi għas-sigurtà tal-ikel u l-iżvilupp agrikolu sostenibbli;