28.4.2015   

MT

Il-Ġurnal Uffiċjali tal-Unjoni Ewropea

C 140/1

1.

jilqa' r-rieda tal-Kummissjoni li tilħaq liċ-ċittadini tal-UE sabiex tikseb il-fiduċja tagħhom fl-UE; jenfasizza r-rwol li l-bliet u r-reġjuni tal-UE jistgħu jaqdu għal dan il-għan;

2.

jilqa’ l-enfasi magħmula mill-programm ta’ ħidma tal-Kummissjoni fuq il-prinċipji tas-sussidjarjetà u l-proporzjonalità, u jfakkar li l-KtR jwettaq il-monitoraġġ tas-sussidjarjetà biex jiżgura li l-valur miżjud tal-azzjoni leġislattiva tal-UE jappoġġja approċċ ta’ politika iktar integrat, jiġifieri permezz ta’ ħidma fuq portafolli; jitlob valutazzjoni sistematika tal-impatt territorjali tal-inizjattivi ġodda kollha tal-UE inkluż il-programm REFIT;

3.

ifakkar fid-determinazzjoni tiegħu li jkun involut fiċ-ċiklu leġislattiv kollu fl-oqsma fejn jista' jikkontribwixxi bis-saħħa tal-kompetenzi tiegħu u jitlob lill-Kummissjoni sabiex jiġi kkonsultat dwar proposti li jiġu modifikati sostanzjalment matul il-proċess leġislattiv;

4.

jitlob li jkun hemm alleanza interistituzzjonali biex taġġorna u tlesti l-infrastrutturi fl-Unjoni Ewropea, filwaqt li jenfasizza l-importanza kbira li jiġu indirizzati n-nuqqasijiet ta’ progress, li jitnaqqsu d-distakki bejn iċ-ċentri u n-netwerks flimkien mas-sezzjonijiet transkonfinali, peress li jqis li l-konnettività u l-aċċessibbiltà tar-reġjuni kollha f’termini tat-trasport, l-enerġija, it-telekomunikazzjonijiet u l-infrastruttura diġitali u s-servizzi bħala essenzjali għall-iżvilupp territorjali u s-solidarjetà Ewropea;

5.

jistieden lill-Kummissjoni tindirizza l-lakuni li għadhom jeżistu fis-suq uniku Ewropew u biex tagħti attenzjoni partikulari lir-reġjuni tal-fruntieri; f’dan ir-rigward jitlob lill-Kummissjoni biex tiżviluppa inizjattivi komuni li għandhom jitwettqu bl-appoġġ tal-Pjattaforma tiegħu għal Raggruppamenti Ewropej għall-Kooperazzjoni Territorjali (REKT); għandha tingħata wkoll attenzjoni speċjali lir-reġjuni bi żvantaġġi demografiċi severi u permanenti, kif stipulat fit-TFUE;

6.

f’dan ir-rigward, jistieden lill-Kummissjoni Ewropea biex fl-inizjattivi tagħha tqis is-sitwazzjoni partikolari tar-reġjuni ultraperiferiċi, li l-karatteristiċi speċifiċi tagħhom u l-bżonn għal regolamenti adattati huma definiti b’mod ċar fl-Artikolu 349 tat-TFUE, bil-għan li tinkiseb il-parteċipazzjoni sħiħa tagħhom fis-suq uniku Ewropew;

7.

jilqa’ l-impenn tal-Kummissjoni li tirċievi l-fehmiet tal-koleġislaturi qabel ma tipproċedi għall-irtirar tal-proposti leġislattivi stabbiliti fl-Anness II tal-programm ta’ ħidma u jitlob li jingħata opportunità simili; jistieden lill-Kummissjoni biex ma tirtirax il-proposta tal-ekonomija ċirkolari; iqis li l-leġislazzjoni attwali dwar l-iskart teħtieġ li tiġi riveduta mill-aktar fis possibbli;

8.

jappoġġja l-isforzi tal-Kummissjoni biex tnaqqas il-piż regolatorju bil-għan li jiġu promossi l-investiment, it-tkabbir u l-impjiegi sakemm dawn ma jkunux jikkompromettu l-livelli għoljin tal-Ewropa fir-rigward tal-ħarsien soċjali, tas-saħħa u tal-ambjent u l-għażla tal-konsumatur; jitlob li jiġi mistieden jipparteċipa fil-gruppi ta' ħidma dwar is-semplifikazzjoni tal-leġislazzjoni Ewropea peress li l-awtoritajiet reġjonali u lokali huma f’ħafna każijiet l-awtorità li timplimenta l-liġi tal-UE;

9.

jiddispjaċih li l-programm ta' ħidma ma jagħmilx referenza għal inizjattivi speċifiċi fil-politika ta' koeżjoni, l-iżvilupp rurali, l-industrija tat-turiżmu u l-ambjent; jiddispjaċih b'mod partikolari dwar in-nuqqas ta' inizjattivi ġodda dwar l-aġenda urbana, l-istrateġiji makroreġjonali, il-koeżjoni territorjali u l-isfidi demograiċi; jistieden lill-Kummissjoni biex taħdem flimkien mal-KtR fl-iżvilupp ta' inizjattivi f'dawn l-oqsma.

10.

jieħu nota tal-Fond Ewropew għall-Investimenti Strateġiċi (EFSI) maħsub biex jiġu mobilizzati EUR 315 biljun f'investimenti addizzjonali f'oqsma strateġiċi fuq it-tliet snin li ġejjin;

11.

jenfasizza li l-pjan ta’ investiment għall-Ewropa u l-EFSI huma komplementari għall-politika ta’ koeżjoni u li sinerġiji b’saħħithom bejn l-EFSI l-ġdid u l-programmi operattivi tal-Fondi Strutturali u ta’ Investiment Ewropej (FSIE) ser ikunu kruċjali sabiex tiġi żgurata l-koerenza bejn il-proġetti ta’ investiment u l-istrateġiji ta’ żvilupp reġjonali u lokali; jirrakkomanda involviment adegwat tal-awtoritajiet lokali u reġjonali fil-proċess tal-għażla tal-proġetti kif ukoll fl-organizzazzjoni ta’ fora għal investiment deċentralizzati;

12.

jilqa’ l-fatt li l-Komunikazzjoni tal-Kummissjoni dwar kif għandhom jiġu applikati l-marġnijiet ta’ flessibbiltà previsti mill-Patt ta’ Tkabbir u Stabbiltà tilqa’ l-appell tal-KtR biex il-kofinanzjament nazzjonali tal-proġetti EFSI u FSIE jiġu eżentati mir-regoli tal-Patt ta’ Stabbiltà u Tkabbir. Il-KtR huwa fil-fatt konvint li applikazzjoni usa' tal-“klawżola tal-investiment” ser tgħin ħafna biex jitneħħew l-ostakli għat-tnedija mill-ġdid ta’ investimenti li jsaħħu t-tkabbir;

13.

jinsab imħasseb dwar il-kriżi kontinwa tal-pagamenti fil-baġit tal-UE u dwar il-livell dejjem jiżdied ta' kontijiet mhux imħallsa. Għalhekk jistenna li l-Kummissjoni Ewropea tippreżenta malajr il-pjan għat-tneħħija tal-akkumulazzjoni ta' kontijiet mhux imħallsa, li kienet impenjat ruħha li tippreżenta bħala parti mill-ftehim istituzzjonali dwar il-proċedura tal-baġit 2014. Ir-reviżjoni tal-qafas finanzjarju pluriennali għandha, fit-tieni stadju, tkun ta' opportunità għal soluzzjoni strutturali sabiex jiġu evitati li l-kontijiet mhux imħallsa jinbidlu f'dejn strutturali tal-UE. Ir-reviżjoni għandha tinkludi wkoll riforma tas-sistema tar-riżorsi proprji tal-UE bil-għan li titnaqqas il-vulnerabbiltà tal-finanzi tal-UE għal tilwim nazzjonali u bl-għan ta' allinjament mar-reviżjoni ta' nofs it-term tal-Istrateġija Ewropa 2020;

14.

jipproponi li, fil-qafas tar-reviżjoni ta' nofs it-term tal-Istrateġija Ewropa 2020, jiddaħħal indikatur relatat mar-rata tal-investiment fit-tabella ta' valutazzjoni makroekonomika;

15.

iħeġġeġ lill-Kummissjoni biex tevalwa wkoll l-impatt tar-regoli l-ġodda tal-ESA 2010 fuq il-kapaċità tal-awtoritajiet lokali u reġjonali li jinvestu;

16.

jilqa' l-enfasi tal-Kummissjoni fuq il-ġlieda kontra l-qgħad u jenfasizza l-ħtieġa għal miżuri b'saħħithom f'dan il-qasam, bl-involviment mill-qrib tal-awtoritajiet lokali u reġjonali u l-assoċjazzjonijiet tagħhom; jifraħ lill-Kummissjoni Ewropea għall-proporsta li ppreżentat fl-4 ta' Frar 2015 sabiex EUR 1 biljun ikunu disponibbli fl-2015 u jżidu drastikament il-prefinanzjament li l-Istati Membri jirċievu fil-qafas tal-Inizjattiva favur l-Impjieg taż-Żgħażagħ u jistieden lill-Kummissjoni Ewropea biex torganizza djalogu strutturat mal-KtR u l-assoċjazzjonijiet territorjali biex flimkien jevalwaw kif l-iskema Ewropea tal-Garanzija għaż-Żgħażagħ tista' tiġi implimentata aħjar fil-prattika;

17.

iħeġġeġ lill-Kummissjoni u lill-Istati Membri sabiex iżidu dimensjoni territorjali mal-Istrateġija Ewropa 2020 riveduta u sabiex jallinjaw is-Semestru Ewropew għall-għanijiet fit-tul tal-Ewropa 2020; jistieden lill-Kummissjoni biex tiżgura l-involviment tal-livelli sottonazzjonali tal-gvern fir-reviżjoni tal-proċessi ta’ governanza ekonomika, inkluż is-Semestru Ewropew; jikkunsidra l-effiċjenza fl-użu tar-riżorsi bħala element ewlieni tal-Istrateġija Ewropa 2020 biex jinkiseb tkabbir sostenibbli u jħeġġeġ lill-Kummissjoni u lill-Istati Membri biex jintroduċu mira ewlenija għall-produttività tar-riżorsi;

18.

jiddispjaċih li r-reviżjoni ta' nofs it-term tal-Istrateġija Ewropa 2020 tal-Kummissjoni Ewropea, li kienet mistennija tiġi ppubblikata fi Frar 2015, ġiet posposta; iħeġġeġ lill-Kummissjoni tippreżenta l-proposti tagħha dwar ir-reviżjoni tal-istrateġija mill-aktar fis possibbli;

19.

jenfasizza l-importanza li s-Suq Uniku Diġitali jitlesta sabiex tiżdied il-kompetittività tas-sistema kummerċjali reġjonali, anke permezz ta’ inċentivi għal investimenti fit-teknoloġiji ta’ informazzjoni u komunikazzjoni; jenfasizza l-ħtieġa li jingħalaq id-distakk diġitali bejn iż-żoni urbani u rurali fl-Ewropa bħala kwistjoni ta’ urġenza, li jiġu żviluppati servizzi elettroniċi pubbliċi u gvern elettroniku li huma affidabbli u aċċessibbli għal kulħadd u li jiġu implimentati l-miżuri sabiex jiżdied il-litteriżmu diġitali taċ-ċittadini, inizjattivi li jipprovdu l-mekkaniżmi meħtieġa biex jgħinu jissolvew il-problemi relatati mal-isfidi demografiċi li qed jiffaċċjaw xi partijiet tar-reġjuni tal-Ewropa; jissuġġerixxi li titjieb l-implimentazzjoni tal-Aġenda Diġitali permezz ta’ dimensjoni territorjali aktar b’saħħitha tal-Forum Diġitali annwali.

20.

jilqa' l-qafas strateġiku propost għall-Unjoni tal-Enerġija u jitlob li l-istrateġija l-ġdida tiġi bbażata fuq soluzzjonijiet lokali u reġjonali realistiċi għall-enerġija, il-mitigazzjoni tat-tibdil fil-klima, u l-adattament kif ukoll l-iżvilupp sostenibbli; jitlob lill-Kummissjoni biex tinvolvi lill-KtR aktar mill-qrib dwar l-aspetti ewlenin ta' interess lokali u reġjonali fl-oqsma tas-sigurtà tal-enerġija, l-enerġiji rinnovabbli, is-suq intern tal-enerġija u t-tnaqqis tal-emissjonijiet tal-gass b'effett ta' serra, b'mod speċjali s-swieq tal-enerġija bl-imnut u l-enerġija affordabbli, kif ukoll il-produzzjoni tal-enerġija deċentralizzata, il-governanza l-ġdida tal-enerġija u l-għoti ta' setgħa liċ-ċittadini bħala konsumaturi u produtturi tal-enerġija; jitlob ukoll lill-Kummissjoni biex tinvolvi lill-KtR fil-Forum taċ-Ċittadini dwar l-Enerġija u l-attivitajiet tal-programm Bliet Intelliġenti;

21.

jenfasizza l-kontribut importanti tal-bliet u r-reġjuni b’rabta mal-provvista tal-enerġija u kwistjonijiet ta’ sigurtà u l-futur tal-politika tal-enerġija u r-rwol tal-unjoni tal-enerġija; jissuġġerixxi sħubija strateġika bejn il-Kummissjoni, il-BEI u l-KtR sabiex jiġu żviluppati pjani ta’ azzjoni konkreti;

22.

jitlob lill-Kummissjoni biex tinvolvi lill-KtR fit-tħejjija tal-proposti leġisattivi sabiex jiġi implimentat il-pakkett tal-klima u l-enerġija għall-2030;

23.

jenfasizza l-importanza li tiġi involuta s-sistema reġjonali sabiex tiġi żgurata governanza sistematika aktar effettiva tal-politiki dwar l-enerġija u l-klima;

24.

jistieden lill-Kummissjoni biex issaħħaħ u tintegra l-Patt tas-Sindki mal-inizjattiva Mayors Adapt u biex testendi ż-żmien tagħhom lil hinn mill-2020 sabiex tikseb il-koordinazzjoni meħtieġa tal-kwistjonijiet tal-politika dwar l-enerġija u l-klima; jenfasizza r-rwol ewlieni li trid taqdi biex timmobilizza l-awtoritajiet lokali u reġjonali u jixtieq ikun involut mill-qrib fl-iżvilupp ta' dawn l-istrumenti fil-futur;

25.

ifittex li jikkontribwixxi għat-tħejjija tal-pożizzjoni tal-UE għall-UNFCCC COP21 f’Pariġi, u jistieden lill-Kummissjoni biex tinvolvi lill-KtR b’mod sħiħ fin-negozjati u l-attivitajiet relatati kollha;

26.

iqis li l-Kummissjoni għandha tippreżenta, fl-2015, Komunikazzjoni dwar l-użu tal-art bħala riżorsa, għandha twettaq reviżjoni bir-reqqa f’nofs it-term tal-Istrateġija tal-Bijodiversità tal-UE u għandha tfassal proposta ġdida għal Direttiva dwar l-aċċess għall-ġustizzja fi kwistjonijiet ambjentali, u proposta leġislattiva dwar l-ispezzjonijiet ambjentali u l-infurzar, filwaqt li huwa neċessarju li jiġi vverifikat bir-reqqa li l-proposti leġislattivi l-ġodda jew id-dispożizzjonijiet li huma inklużi fihom huma konsistenti mal-prinċipji tas-sussidjarjetà u l-proporzjonalità;

27.

jilqa' b'sodisfazzjoni l-enfasi li ssir fil-programm ta' ħidma tal-Kummissjoni Ewropea għall-2015 dwar sħubija eqreb mar-reġjuni u l-bliet għal implimentazzjoni aħjar tal-leġislazzjoni ambjentali; għalhekk jinsab ħerqan li jżid l-attivitajiet tal-Pjattaforma Teknika konġunta tal-KtR/Kummissjoni Ewropea għall-Kooperazzjoni dwar l-Ambjent kif imsemmi fis-7 Programm ta' Azzjoni Ambjentali 2014-2020 tal-Unjoni Ewropea;

28.

itenni t-talba tiegħu lill-Kummissjoni biex tipproponi miżuri li jiggarantixxu suq tal-ħalib ibbilanċjat ladarba jintemmu l-kwoti tal-ħalib fil-31 ta' Marzu 2015, sabiex jiġu evitati konsegwenzi soċjali u ekonomiċi negattivi, u riskji għall-investiment fuq terminu twil fis-settur;

29.

jirrimarka li huwa vitali li jitrawwem l-investiment fl-innovazzjoni u tissaħħaħ l-industrija Ewropea jekk l-UE trid iżżomm vantaġġ kompetittiv fl-ekonomija globali;

30.

jappella għal segwitu tal-Green Paper dwar estensjoni possibbli tal-protezzjoni tal-indikazzjoni ġeografika tal-Unjoni Ewropea għal prodotti mhux agrikoli (1);

31.

jilqa’ b’sodisfazzjon l-attenzjoni fuq l-SMEs u jenfasizza l-kontribut tagħhom għat-tkabbir u l-ħolqien tal-impjiegi fil-livell reġjonali u lokali fl-UE; jissottolinja r-rieda tiegħu li jikkoopera fil-ħolqien ta’ netwerk ta’ rappreżentanti tal-SMEs fil-livell reġjonali; jistenna l-proposti l-ġodda fir-rigward ta' Unjoni tas-Swieq Kapitali sabiex tgħin ittejjeb l-aċċess għall-finanzjament għall-SMEs;

32.

jilqa’ l-impenn tal-Kummissjoni li tippreżenta pakkett dwar il-mobbiltà tal-ħaddiema, li għandu jinkludi proposta għal reviżjoni tad-Direttiva dwar l-Istazzjonar ta' Ħaddiema; jistieden lill-Kummissjoni tkompli tiċċara l-intitolament għad-drittijiet tas-sigurtà soċjali u benefiċċji oħrajn għaċ-ċittadini li eżerċitaw id-dritt tagħhom ta’ moviment ħieles; iħeġġeġ lill-Kummissjoni biex tqis ukoll l-effetti negattivi tal-mobilità tal-ħaddiema bħall-eżodu tal-imħuħ u n-nuqqas ta’ tlaqqigħ tal-ħiliet;

33.

bil-għan li jissaħħu l-ekonomija soċjali u l-intraprenditorija soċjali fi ħdan l-UE, iħeġġeġ lill-Kummissjoni biex tressaq proposti għal statuti Ewropej għal soċjetajiet u assoċjazzjonijiet mutwi u proposta riveduta dwar l-Istatut għal Soċjetà Kooperattiva Ewropea, u li żżomm il-proposta tagħha dwar l-Istatut tal-Fondazzjonijiet Ewropej;

34.

jistieden lill-Kummissjoni tkompli l-isforzi tagħha biex tiżgura li s-settur finanzjarju jsir kemm aktar sikur u aktar kapaċi li jwettaq ir-rwol tiegħu li jiffinanzja l-ekonomija reali; jistenna, b’mod partikolari, il-proposta dwar ir-riżoluzzjoni ta’ istituzzjonijiet finanzjarji li mhumiex banek.

35.

jilqa’ b’sodisfazzjon l-intenzjoni tal-Kummissjoni li tirrevedi l-Unjoni Ekonomika u Monetarja, inkluża d-dimensjoni soċjali tagħha, u jistieden lill-Kummissjoni biex taħdem mill-qrib mal-KtR biex jitressqu proposti konkreti;

36.

jilqa’ l-objettiv tal-Kummissjoni li żżid l-isforzi għall-ġlieda kontra l-evażjoni tat-taxxa u l-frodi tat-taxxa u li timxi lejn sistema fejn il-pajjiż li fih jiġu ġġenerati l-profitti huwa wkoll il-pajjiż ta' tassazzjoni; jappoġġja l-isforzi tal-Kummissjoni li tfassal proposta dwar l-iskambju awtomatiku ta’ informazzjoni bejn l-awtoritajiet tat-taxxa fuq deċiżjonijiet tat-taxxa transkonfinali.

37.

iħeġġeġ lill-Kummissjoni tressaq dokument ta' strateġija li jiddeskrivi l-għanijiet tal-politika kummerċjali usa' tal-UE u li jkunu jistabbilixxu standards ogħla ta' trasparenza u konsultazzjoni matul in-negozjati u jiggarantixxu aċċess għas-suq sinifikanti, promozzjoni ta' standards ambjentali u soċjali għoljin u rispett sħiħ tal-awtonomija tal-awtoritajiet pubbliċi fil-livelli kolha fit-twettiq tas-servizzi pubbliċi;

38.

jappoġġja l-isforzi reċenti tal-Kummissjoni biex iżżid it-trasparenza fin-negozjati tal-ftehimiet kummerċjali u, b’mod partikolari, is-Sħubija Trans-Atlantika ta’ Kummerċ u ta’ Investiment (TTIP); jinsisti li l-ekonomiji lokali u reġjonali fuq skala żgħira m’għandhomx jintlaqtu b'mod negattiv mir-riżultat tan-negozjati, li prodotti tal-ikel ittikkettati b’mod reġjonali għandhom ikomplu jiġu protetti u li l-istandards Ewropej tas-saħħa u l-ambjent kif ukoll l-istrutturi legali u l-proċeduri tal-UE u l-Istati Membri jiġu salvagwardjati; jistenna li s-sovranità kulturali u tal-midja tal-Istati Membri tiġi garantita billi b'mod espliċitu jiġu esklużi l-kultura u l-midja mill-mandat tan-negozjar; jitlob li jinżamm infurmat b’mod regolari u trasparenti sabiex ikun jista’ jwettaq ir-rwol tiegħu bħala intermedjarju bejn l-Unjoni u l-awtoritajiet lokali u reġjonali;

39.

jistieden lill-Kummissjoni biex tassoċja lill-KtR fis-segwitu tan-negozjati dwar il-Ftehim dwar il-Kummerċ fis-Servizzi (TISA), li se jieħu post il-Ftehim Ġenerali dwar il-Kummerċ fis-Servizzi (GATS), fid-dawl tal-fatt li d-dispożizzjonijiet ewlenin tan-negozjati – bħall-kamp ta' applikazzjoni, definizzjonijiet, aċċess għas-suq, trattament nazzjonali jew eżenzjonijiet b'rabta mal-provvista ta' servizzi – jirrelataw mal-kompetenzi tal-awtoritajiet lokali u reġjonali;

40.

iħeġġeġ lill-Kummissjoni biex tiżviluppa strateġija ta' komunikazzjoni sabiex tgħarraf liċ-ċittadini dwar il-benefiċċji potenzjali ta' tali ftehimiet kummerċjali għall-ħajja ta' kuljum taċ-ċittadini Ewropej;

41.

jinnota l-impenn tal-Kummissjoni għall-opportunitajiet indaqs għall-persuni b’diżabbiltà u l-ugwaljanza bejn l-irġiel u n-nisa, iżda jiddispjaċih li m'hemmx inizjattivi ġodda speċifiċi;

42.

jappoġġja l-isforzi tal-Kummissjoni biex tistabbilixxi politika Ewropea komprensiva dwar il-migrazzjoni li tipproteġi l-fruntieri tal-UE, tiġġieled kontra t-traffikar tal-bnedmin u l-immigrazzjoni irregolari, filwaqt li jiġu rispettati d-drittijiet fundamentali tal-migranti, jinħolqu modi sikuri u legali għall-migranti biex jaslu fl-UE, titjieb il-kooperazzjoni mal-pajjiżi ta’ oriġini u ta’ tranżitu, tinbena solidarjetà ġenwina fost l-Istati Membri tal-UE u titrawwem il-kompetittività Ewropea billi jissaħħaħ il-potenzjal tal-migranti li jikkontribwixxu għall-ekonomiji tal-Istati Membri tal-UE;

43.

jitlob li jkun hemm politika tal-immigrazzjoni kkoordinata u jenfasizza li l-approċċ il-ġdid propost għall-migrazzjoni jrid jinkludi miżuri u strumenti li jirriflettu r-rwol importanti u l-kapaċità tal-awtoritajiet lokali u reġjonali fl-akkoljenza u l-integrazzjoni tal-migranti abbażi tal-prinċipji tas-solidarjetà;

44.

jistieden lill-Kummissjoni tniedi, flimkien mal-KtR, konsultazzjoni tal-awtoritajiet lokali u reġjonali sabiex jiġu evalwati aħjar l-isfidi eżistenti fil-livell lokali qabel ma jiġu mnedija inizjattivi u leġislazzjoni Ewropej ġodda.

45.

jilqa' l-intenzjoni tal-Kummissjoni li tirrevedi l-Politika Ewropea tal-Viċinat li l-KtR ser jikkontribwixxi għaliha permezz tal-ARLEM u l-CORLEAP u jitlob għal tisħiħ tal-mekkaniżmi u l-programmi għall-kooperazzjoni bejn l-UE u l-awtoritajiet lokali u reġjonali imsieħba, u jitlob għat-tisħiħ tal-inizjattivi li jappoġġjaw il-proċessi ta' deċentralizzazzjoni fil-pajjiżi msieħba; jipproponi l-espansjoni tal-kamp ta' applikazzjoni tal-programm Faċilità tal-Amministrazzjoni Lokali għall-pajjiżi msieħba kollha;

46.

jilqa' l-intenzjoni tal-Kummissjoni li tippubblika Komunikazzjoni dwar l-Għanijiet ta' Żvilupp Sostenibbli wara l-2015 u jinsab lest biex jikkontribwixxi l-esperjenza u l-inizjattivi tal-awtoritajiet lokali u reġjonali bħala msieħba ewlenin fil-kooperazzjoni deċentralizzata għall-iżvilupp; jitlob li jiġi assoċjat mill-qrib mal-iżvilupp tal-pożizzjoni tal-UE fin-negozjati globali u mal-inizjattivi fis-Sena Ewropea għall-Iżvilupp 2015.

47.

jilqa b'sodisfazzjon l-impenn tal-Kummissjoni Ewropea li tipproponi Ftehim Interistituzzjonali ġdid dwar tfassil aħjar tal-liġijiet u jitlob li jkun assoċjat miegħu;

48.

jilqa' b'sodisfazzjon kbir li jkun ta' prijorità t-tnaqqis tal-burokrazija; l-identifikazzjoni effettiva tal-burokrazija, b'mod partikulari bl-appoġġ tal-awtoritajiet lokali u reġjonali u n-negozji, ser tkun kruċjali biex jiżdied l-impatt;

49.

jikkunsidra r-restawr tal-fiduċja fl-Unjoni Ewropea bħala prijorità importanti ħafna u jistieden lill-Kummissjoni Ewropea biex tiżviluppa aktar is-sħubija interistituzzjonali dwar il-komunikazzjoni deċentralizzata; ser ikompli jippromovi ċittadinanza tal-UE attiva u jsegwi r-reviżjoni tar-Regolament dwar l-Inizjattiva taċ-Ċittadini Ewropej;

50.

jinnota l-intenzjoni tal-Kummissjoni Ewropea biex tipproponi ftehim interistituzzjonali ġdid li jinkludi lill-Kunsill dwar reġistru obbligatorju tat-trasparenza, u jitlob li l-Kummissjoni tressaq proposta leġislattiva għall-ħolqien ta’ reġistru bħal dan fuq il-bażi tal-Artikolu 352 tat-TFUE. L-istituzzjonijiet lokali u reġjonali u l-assoċjazzjonijiet rappreżentattivi tagħhom m’għandhomx ikunu obbligati li jirreġistraw f’dan, billi l-awtoritajiet lokali u reġjonali huma parti integrali tas-sistema istituzzjonali f’diversi livelli, liema rappreżentanti huma eletti demokratikament miċ-ċittadini u ma jirrappreżentawx l-interessi partiġġjani;

51.

jagħti struzzjonijiet lill-president sabiex iwassal din ir-riżoluzzjoni lill-Kummissjoni Ewropea, lill-Parlament Ewropew, lill-Kunsill u lill-President tal-Kunsill Ewropew.

28.4.2015   

MT

Il-Ġurnal Uffiċjali tal-Unjoni Ewropea

C 140/7

1.

ifakkar li l-Unjoni Ewropea (UE) hija aktar minn sempliċi komunità ekonomika, u teqreb iżjed lejn komunità ta' valuri – kif stabbilit fil-Preambolu tal-Karta tad-Drittijiet Fundamentali tal-Unjoni Ewropea – li tqiegħed lill-individwi fil-qalba tal-attivitajiet tagħha; ifakkar ukoll li l-UE tikkontribwixxi għall-iżvilupp tal-valuri komuni filwaqt li tirrispetta d-diversità tal-kulturi u t-tradizzjonijiet tal-popli tal-Ewropa kif ukoll l-identitajiet nazzjonali tal-Istati Membri u l-organizzazzjoni tal-awtoritajiet pubbliċi tagħhom fil-livell nazzjonali, reġjonali u lokali;

2.

jenfasizza li qbil dwar it-TTIP jista’ jagħti stimolu tassew meħtieġ lill-ekonomija Ewropea, iwassal għal tkabbir sinifikanti tal-prodott gross domestiku Ewropew u l-ħolqien ta’ impjiegi ġodda ta’ kwalità għolja;

3.

ifakkar li r-riżultat tal-ftehim tat-TTIP ser joħloq regoli vinkolanti fuq iż-żewġ naħat tal-Atlantiku għal-livelli kollha ta' governanza, minn fuq nett sal-awtoritajiet lokali, u għaldaqstant japplika għal madwar 820 miljun individwu u ser iwitti t-triq għall-ftehimiet bilaterali u multilaterali ta' kummerċ u ta' investiment kollha futuri, inkluż il-Ftehim dwar il-Kummerċ fis-Servizzi (TiSA); għalhekk dawn in-negozjati huma tal-ikbar importanza għall-ħajja taċ-ċittadini kollha tal-UE u tal-Istati Uniti u għandhom isiru b'mod ġust u trasparenti b'konsiderazzjoni tal-aħjar interess taċ-ċittadini;

4.

jilqa' b'sodisfazzjon li d-direttivi ta' negozjati jirrikonoxxu d-dritt tal-partijiet li qed jinnegozjaw li “jadottaw, iżommu u jinforzaw miżuri neċessarji sabiex jiġu segwiti objettivi ta' politika leġittimi bħall-protezzjoni tas-soċjetà, l-ambjent u s-saħħa pubblika, jiġu żgurati l-integrità u l-istabbilità tas-sistema finanzjarja, jiġu promossi s-sigurtà u s-sikurezza pubblika, u tiġi promossa u protetta d-diversità kulturali”;

5.

jinnota li n-negozjati dwar il-ftehimiet trans-Atlantiċi ta' kummerċ ħieles jinkludu oqsma li jaqgħu fi ħdan il-kompetenza legali tal-livelli governattivi u amministrattivi kollha, inklużi l-awtoritajiet lokali u reġjonali u fid-dawl ta' din id-dimensjoni lokali u reġjonali konsiderevoli tal-ftehim, jitlob lill-Kummissjoni Ewropea tinkludih fil-Grupp Konsultattiv dwar it-TTIP tal-Kummissjoni Ewropea bħala assemblea tar-rappreżentanti lokali u reġjonali tal-UE sabiex jiġi żgurat l-involviment u l-parteċipazzjoni minn stadju bikri tal-livell reġjonali, muniċipali u lokali fin-negozjati;

6.

madankollu, jiddispjaċih li s'issa l-Kummissjoni Ewropea ma inkludietx il-Kumitat Ewropew tar-Reġjuni bħala r-rappreżentant tas-soċjetà ċivili fil-grupp konsultattiv tagħha;

7.

jenfasizza l-bżonn li tinżamm il-flessibbiltà regolatorja li teżisti bħalissa fl-Istati Membri kif ukoll dik tal-ġejjieni, speċjalment fil-qasam tal-istabbiliment ta' standards ta' protezzjoni u tas-servizzi ta' interess ġenerali. Il-garanzija tal-flessibbiltà hija indispensabbli l-iktar għall-intrapriżi tas-servizzi pubbliċi, peress li jipprovdu servizzi ta' interess ekonomiku ġenerali; jenfasizza wkoll il-prinċipju fundamentali stabbilit fit-Trattati tar-rispett tal-awtoregolamentazzjoni lokali u reġjonali;

8.

ma jaqbilx mal-proposta għal iktar kooperazzjoni regolatorja, li tagħti vuċi privileġġjata lill-imsieħba kummerċjali u tal-investiment fil-fażi preleġislattiva jew leġislattiva tal-proċessi leġislattivi tal-UE, l-Istati Membri u l-awtoritajiet lokali u reġjonali, jew li tippermetti li jiġu posposti l-proċeduri leġislattivi permezz tat-talba ta' studji tal-impatt tal-leġislazzjoni dwar il-kummerċ ħieles;

9.

jenfasizza li dan il-ftehim ser ikun ta’ benefiċċju għal kumpaniji ta’ kull daqs, b’mod partikolari l-SMEs, li m'għandhomx ir-riżorsi finanzjarji, legali jew oħrajn sabiex jiffaċċjaw regoli differenti u ostakoli oħrajn għall-kummerċ;

10.

jassumi li t-TTIP jista' jkun opportunità biex tingħata spinta lit-tkabbir u l-impjieg fl-UE, peress li jista' jipprovdi aċċess reċiproku għas-suq għall-kummerċ ta' prodotti, servizzi, u investimenti, kif ukoll l-akkwist pubbliku u dispożizzjonijiet regolatorji miftuħa u jnaqqas l-ostakli kummerċjali nontariffarji (ONT);

11.

jinnota li, fid-dawl ta' dazju doganali medju ta' 2 %, l-ispinta għat-tkabbir partikolarment mistennija mill-Kummissjoni Ewropea għandha tinsab prinċipalment fil-konverġenza tad-dispożizzjonijiet regolatorji u t-tnaqqis tal-ONT;

12.

madankollu, jinnota li ftehim b'kamp ta' applikazzjoni daqshekk globali jipprovdi oppportunitajiet iżda jinvolvi wkoll riskji u, f'dan il-kuntest, jenfasizza b'mod espliċitu li l-parteċipazzjoni demokratika u l-kompetenzi tal-awtoritajiet lokali, muniċipali u reġjonali għandhom ikunu ssalvagwardjati;

13.

jilqa' b'mod favorevoli d-deċiżjoni tal-Kunsill tal-UE li jippubblika l-mandat ta' negozjar tat-TTIP. Il-KtR jiddispjaċih li dan seħħ diversi xhur wara li kien diġà ġie żvelat fuq l-internet, kif ukoll il-fatt li r-restrizzjonijiet fuq il-mandat ta' negozjar għadhom pjuttost kbar. Għalhekk dawn iridu jitnaqqsu sabiex jiġi garantit aċċess aħjar għall-pubbliku fir-rigward tal-qagħda tan-negozjati;

14.

jinnota wkoll li, fid-dawl tal-kamp ta' applikazzjoni tal-ftehim bejn l-UE u l-Istati Uniti, għandu jiġi garantit f'kull ħin il-kontroll demokratiku tan-negozjati u għaldaqstant jitlob lill-Kummissjoni Ewropea u lill-Istati Membri biex jiżguraw negozjati kemm jista' jkun trasparenti. F'termini konkreti dan ifisser li għandhom jiġu ppubblikati d-dokumenti essenzjali kollha u, fejn possibli, jiġu preżentati fil-ħin u b'mod komprensiv id-direttivi ta' negozjati lill-awtoritajiet lokali u reġjonali, lill-gruppi soċjali rilevanti kollha kif ukoll liċ-ċittadini kollha tal-Unjoni Ewropea; b'rabta ma' dan jilqa' l-fatt li l-Istati Membri, li jżommu ma' deċiżjoni unanima fir-rigward tal-pubblikazzjoni ta' dokumenti dwar in-negozjati għall-ftehmiet kummerċjali, fil-bidu ta' Jannar 2015 talbu lill-Kummissjoni Ewropea tippubblika t-test tal-proposti inizjali tal-UE f'diversi oqsma tan-negozjati;

15.

jenfasizza li t-TTIP huwa ftehim imħallat, li huwa soġġett għall-approvazzjoni tal-Parlament Ewropew u għandu jiġi ratifikat ukoll minn kull wieħed mit-28 Stat Membru tal-Unjoni Ewropea, li skont il-liġi tal-Istat Membru kkonċernat jista' jirrikjedi mhux biss l-approvazzjoni tal-parlament nazzjonali iżda wkoll l-approvazzjoni tal-gvern, il-parlament jew il-kmamar li jirrappreżentaw il-livell reġjonali;

16.

jitlob li tiġi eżaminata l-possibbiltà li tiġi introdotta klawżola ta’ reviżjoni fil-ftehim bejn l-UE u l-Istati Uniti sabiex, fejn adegwat, ikun possibbli li jiġu riveduti u emendati l-ftehimiet li jintlaħqu, skont l-impatt tagħhom;

17.

jistieden lill-Kummissjoni taħdem sabiex il-ftehim dwar it-TTIP jiġbor fih approċċ ta' elenkar pożittiv u biex tirrifjuta approċċ ta' elenkar negattiv u l-hekk imsejħa klawżoli “krikk” (ratchet clauses);

18.

iqis li l-livell għoli tal-istandards ta' protezzjoni Ewropej li jeżistu għaċ-ċittadini fl-Unjoni Ewropea huwa kisba ewlenija li għandha tiġi protetta kemm jista' jkun u jħeġġeġ li l-istandards legali eżistenti fl-Istati Membri tal-UE, pereżempju dwar il-ħarsien tal-ħajja, is-sigurtà tal-prodotti, il-protezzjoni tas-saħħa, soċjali, ambjentali, tal-klima, alimentari u tal-annimali kif ukoll id-drittijiet tal-konsumatur u l-protezzjoni tad-data, il-proprjetà intellettwali kif ukoll id-drittijiet tal-ħaddiema, u dwar il-kundizzjonijiet siguri għas-servizzi pubbliċi fl-ebda każ m'għandhom jonqsu iżda pjuttost għandhom jittejbu; jappoġġja l-fehma li d-dritt li jiġu regolati dawn l-oqsma prinċipali għandu jibqa' tal-istituzzjonijiet Ewropej u nazzjonali rilevanti biss;

19.

jitlob li l-imsieħba fin-negozjati jaħdmu favur it-titjib ta' dawn l-istandards u, jekk ikun hemm bżonn, għall-adozzjoni jew ir-rikonoxximent tal-ogħla livell ta' standards ta' protezzjoni tal-pajjiżi msieħba u jitlob ukoll biex dawn l-istandards ta' protezzjoni jiġu ottimizzati fil-futur; għandu jitwaqqaf mekkaniżmu biex jiġu aġġustati skont l-aħħar għarfien xjentifiku;

20.

jenfasizza li l-prinċipju ta’ prekawzjoni huwa wieħed mill-prinċipji fundamentali tal-politika Ewropea għall-protezzjoni ambjentali, tas-saħħa u tal-konsumatur, u b'konformità miegħu l-miżuri jittieħdu minn qabel u b'mod proattiv għall-prevenzjoni ta' riskji għas-saħħa tal-bniedem, l-annimali u l-pjanti u ħsara lill-ambjent. F'dan il-kuntest għalhekk jinnota li ftehim trans-Atlantiku ta' kummerċ ħieles m'għandux iwassal biex jiddgħajjef il-prinċipju ta' prekawzjoni applikabbli fl-UE partikolarment fl-oqsma tal-protezzjoni ambjentali, tas-saħħa, tal-ikel u tal-konsumatur;

21.

jafferma wkoll li d-dettalji importanti kollha tal-ftehim għandhom jiġu negozjati u li ma għandu jkun hemm l-ebda trasferiment addizzjonali ta' kwistjonijiet regolatorji – li jevitaw il-proċess leġislattiv demokratiku – lejn korpi ta' esperti speċjalizzati stabbiliti apposta;

22.

jiddispjaċih li l-monitoraġġ, id-dekodifika u l-analiżi fil-livell globali tal-komunikazzjoni elettronika mis-servizzi tal-intelliġenza, fost oħrajn mill-Aġenzija tas-Sigurtà Nazzjonali Amerikana (National Security Agency – NSA) kif ukoll minn aġenziji tal-intelliġenza ta' pajjiżi ħbieb tal-UE, kellhom impatt negattiv dejjiemi fuq il-fiduċja taċ-ċittadini Ewropej fir-rigward tal-istandards ta' protezzjoni tad-data internazzjonali u f'dan il-kuntest jitlob lill-partijiet tan-negozjati jiggarantixxu d-dritt għall-privatezza u jissalvagwardjaw il-libertà u d-drittijiet taċ-ċittadini anke fl-internet;

23.

jinsisti li n-negozjati dwar it-TTIP għandhom ikunu marbuta mal-konklużjoni ta’ ftehim komprensiv dwar il-protezzjoni tad-data bejn l-UE u l-Istati Uniti;

24.

jinnota li l-acquis tal-UE (l-“acquis communautaire”) jistipula b'mod vinkolanti dispożizzjonijiet fil-qasam tal-istandards tal-Organizzazzjoni Internazzjonali tax-Xogħol (ILO) kif ukoll dwar is-sikurezza okkupazzjonali u s-sigurtà tal-prodotti u, f'dan il-kuntest, jenfasizza li l-intrapriżi multinazzjonali għandhom jikkonformaw b'mod espliċitu mal-istandards ewlenin tal-ILO fil-qasam tax-xogħol u l-linji gwida tal-OECD anke fil-qafas ta' negozjati ulterjuri tat-TTIP;

25.

huwa kontra li d-drittijiet ta' protezzjoni eżistenti u futuri tal-ħaddiema, bħad-dritt għall-parteċipazzjoni fl-organizzazzjoni tax-xogħol u drittijiet oħra tal-protezzjoni tal-ħaddiema, jiġu definiti bħala ostakoli kummerċjali nontariffarji fit-TTIP; barra minn hekk, ir-regolamentazzjoni tas-suq tax-xogħol, is-sistemi tas-sigurtà soċjali, l-awtonomija fin-negozjar kollettiv, il-libertà ta' assoċjazzjoni, id-dritt tal-istrajkar, il-paga minima u l-ftehimiet kollettivi ta' Stat Membru tal-UE għandhom ukoll jibqgħu r-responsabbiltà tal-Istati Membri individwali;

26.

jilqa' l-fatt li skont il-mandat ta' negozjar tal-UE “il-kwalità għolja tal-utilitajiet pubbliċi tal-UE għandha tiġi preservata skont it-TFUE u b'mod partikolari l-Protokoll Nru 26 dwar is-Servizzi ta' Interess Ġenerali, u fid-dawl tal-impenn tal-UE f'dan il-qasam, inkluż il-Ftehim Ġenerali dwar il-Kummerċ fis-Servizzi (GATS)”; madankollu f'dan il-kuntest jirreferi għad-dispożizzjonijiet komuni tat-Trattat dwar l-Unjoni Ewropea (TUE), li skonthom l-Unjoni għandha tirrispetta l-ugwaljanza tal-Istati Membri quddiem it-Trattati kif ukoll l-identità nazzjonali tagħhom, inerenti fl-istrutturi politiċi u kostituzzjonali fundamentali tagħhom, inkluża l-awtonomija lokali u reġjonali (Artikolu 4(2) tat-TUE);

27.

jenfasizza l-prinċipju li l-organizzazzjoni tal-awtoritajiet lokali u reġjonali għandha tiġi żgurata bħala waħda mill-oqsma ewlenin tad-dritt għall-awtonomija muniċipali u li r-remuniċipalizzazzjoni tas-servizzi pubbliċi, jiġifieri l-provvista ta' servizzi pubbliċi mill-korpi pubbliċi tagħhom fi kwalunke żmien, anki wara l-privatizzazzjoni ta' dawn is-servizzi, għandha tibqa' għalkollox possibbli skont is-sitwazzjoni lokali u abbażi tar-rieda tal-votanti lokali;

28.

ifakkar b'insistenza li l-mandat ta' negozjar tal-Kummissjoni ma jmurx lil hinn mill-qafas kostituzzjonali – li jfisser li għandha tiġi rispettata l-protezzjoni tal-Istati Membri f'dak li jirrigwarda kwistjonijiet ta' interess ġenerali;

29.

jinnota li, skont il-paragrafu 20 tal-mandat ta' negozjar tal-UE, is-servizzi li jitwettqu fi ħdan l-eżerċizzju tal-awtorità governattiva huma esklużi mill-mandat ta' negozjar u jitlob li jiġi ċċarat li għalhekk dan jeskludi min-negozjati s-servizzi li huma kkunsidrati mill-ġurisprudenza tal-partijiet kontraenti jew tal-membri tagħhom bħala servizzi li jitwettqu fl-eżerċizzju tal-awtorità governattiva;

30.

jitlob kjarifika dwar jekk is-servizzi pubbliċi msemmija fil-paragrafu 19 tal-mandat ta' negozjar tal-UE jirreferux għas-servizzi li huma soġġetti għal sistemi regolatorji speċifiċi jew ikkaratterizzati minn impenji speċifiċi imposti fuq il-provvedituri tas-servizzi fil-livell nazzjonali, reġjonali jew lokali fl-interess ġenerali, skont il-ġurisprudenza ta' kull parti kontraenti jew ta' kull membru; dawn jinkludu pereżempju l-provvista tal-ilma u tal-enerġija, ir-rimi tal-iskart u tad-drenaġġ, is-servizzi tal-emerġenza, is-saħħa pubblika u s-servizzi soċjali, it-trasport pubbliku u l-abitazzjoni, miżuri ta' pjanar urban u ta' żvilupp urban;

31.

jitlob lill-Kummissjoni biex, għas-servizzi pubbliċi taħt il-paragrafu 19 tal-mandat ta' negozjar tal-UE, tipprovdi eċċezzjoni orizzontali mill-obbligi kollha tal-prinċipju tal-aċċess għas-suq u tat-trattament nazzjonali u, fir-rigward tas-servizzi pubbliċi, jitlob li tiġi infurzata eċċezzjoni għas-setturi kollha u għall-miżuri eżistenti u dawk futuri sabiex il-partijiet kontraenti jillimitaw in-numru tas-servizzi u tal-provvedituri tas-servizzi, sabiex il-provvedituri tas-servizzi jimponu obbligi speċifiċi u jirregolaw id-dispożizzjonijiet ta' dawn is-servizzi fil-qafas tal-interess ġenerali;

32.

jinnota li ma jqisx bħala neċessarju l-ftuħ ulterjuri, speċjalment għas-servizzi edukattivi ffinanzjati minn sorsi differenti, inkluż fil-qasam tal-edukazzjoni preskolari, l-iskejjel, l-universitajiet u l-edukazzjoni tal-adulti u t-tagħlim tul il-ħajja, peress li l-ftehim multilaterali tal-GATS diġà jinkludi diversi obbligi dwar il-liberalizzazzjoni fil-qasam tas-servizzi;

33.

jilqa' r-rapport dwar il-mekkaniżmu għar-riżoluzzjoni ta' tilwim bejn l-investitur u l-istat (ISDS) maħruġ mill-Kummissjoni Ewropea wara l-konsultazzjoni pubblika tagħha; iqisu bħala kontribut ulterjuri importanti għall-isforzi kemm tal-Istati Uniti kif ukoll tal-Kummissjoni biex jiżguraw aktar trasparenza fin-negozjati dwar it-TTIP u biex jippermettu li jinstemgħu l-fehmiet ta' firxa wiesgħa ta' partijiet interessati; jirrakkomanda bis-sħiħ li, fid-dawl tal-1 50  000 risposta li juru, inter alia, oppożizzjoni kbira lejn il-mekkaniżmu tal-ISDS, il-Kummissjoni tikkunsidra b'mod assolut ir-riżultati tal-proċess ta' konsultazzjoni fil-valutazzjoni finali tagħha tad-dispożizzjonijiet tal-ftehim. Barra minn hekk, jilqa' wkoll li l-Kummissjoni l-ġdida mhux ser taċċetta li l-ġurisprudenza tal-qrati tal-Istati Membri tal-UE tkun limitata minħabba regoli speċjali għall-ilmenti tal-investituri u li l-istat tad-dritt u l-ugwaljanza quddiem il-liġi għandhom japplikaw ukoll f'dan il-kuntest;

34.

jappoġġja lill-Kummissjoni bil-qawwa biex tressaq proposti ulterjuri biex ittejjeb it-trasparenza u l-ġustizzja fl-ISDS;

35.

javża li jeżistu riskji kbar assoċjati mad-dispożizzjonijiet dwar il-protezzjoni tal-investiment u mal-mekkaniżmu għar-riżoluzzjoni ta' tilwim bejn l-investitur u l-istat applikabbli għar-relazzjoni bejn l-UE u l-Istati Uniti (ISDS), li jmorru kontra l-ġurisdizzjonijiet ordinarji, u għaldaqshekk mhumiex ikkunsidrati bħala neċessarji. Il-liġijiet tal-Istati Membri m'għandhomx jiġu affettwati mill-ftehim trans-Atlantiku ta' kummerċ ħieles. Huwa jistenna li jinżamm il-marġni ta' flessibbiltà tal-Unjoni Ewropea u tal-parlamenti u l-gvernijiet tal-Istati Membri biex b'hekk jitħarsu l-possibbiltajiet ta' influwenza demokratika taċ-ċittadini u sabiex it-tilwim dwar l-investiment jitressaq quddiem il-qrati nazzjonali;

36.

jenfasizza li l-miżuri politiċi u amministrattivi li jgawdu minn leġittimità demokratika u l-istat tad-dritt m'għandhomx jiġu dubitati mit-tribunali tal-arbitraġġ b'mod speċjali fir-rigward ta' talbiet għal kumpens għad-danni b'mod retorattiv u li l-klawżoli dwar il-protezzjoni tal-investiment fit-TTIP bl-ebda mod m'għandhom iwasslu biex il-liġi regolatorja statali tiġi affettwata b'mod dirett jew indirett;

37.

jinnota li l-leġislazzjoni dwar is-sjieda pubblika tal-istituzzjonijiet tat-tfaddil u l-banek tal-Länder tal-Ġermanja (Landesbank), m'għandhiex tithedded mit-TTIP jew kwalunkwe ftehimiet kummerċjali oħra tal-UE. Leġislazzjoni bħal din la hija ostaklu għall-aċċess għas-suq u lanqas m'hi kwalunkwe forma oħra ta' diskriminazzjoni;

38.

jinnota li attwalment 85 % tas-sejħiet għall-offerti pubbliċi fl-Unjoni Ewropea diġà huma aċċessibbli għal offerenti Amerikani għall-kontra tat-32 % tas-sejħiet għall-offerti Amerikani biss li huma aċċessibbli għal offerenti mill-UE, u dan l-iżbilanċ jiġi aggravat minħabba s-sistema ta' “opt-in” tal-pajjiżi tal-Istati Uniti. Għaldaqstant, dan il-ftehim għandu jippromovi l-ugwaljanza tal-opportunitajiet bejn iż-żewġ partijiet, li għandu jkun ta’ benefiċċju b'mod partikolari għall-SMEs Ewropej sabiex ikollhom aċċess għal swieq Amerikani tal-akkwist pubbliku;

39.

jenfasizza li m'għandux jinxteħet dubju fuq l-aspetti tal-istabbiliment ta' standards tal-liġi Ewropea dwar l-akkwist, speċjalment jekk nikkunsidraw l-implikazzjonijiet tal-implimentazzjoni tagħhom fi-livell reġjonali u lokali, pereżempju fir-rigward tar-rispett ta' standards dwar il-liġi tax-xogħol, soċjali u n-negozjar kollettiv, l-akkwist pubbliku ekoloġiku jew il-kunsiderazzjoni tal-intrapriżi żgħar u ta' daqs medju (SMEs), li jiżguraw li jiġu kkunsidrati kriterji oħra fis-sejħiet għall-offerti, apparti l-prezz, bħal aspetti soċjali u sostenibbli, għall-offerent bl-aħjar offerta;

40.

ifakkar lill-KE biex tagħti ħarsa mill-qrib lejn l-istandards tas-saħħa u s-sikurezza okkupazzjonali fis-Sħubija Trans-Atlantika ta' Kummerċ u ta' Investiment (TTIP);

41.

jiġbed l-attenzjoni għall-ħtieġa li jiġu garantiti eżenzjonijiet mil-leġislazzjoni tal-UE dwar l-akkwist pubbliku u l-konċessjonijiet, kif inhu previst attwalment għad-diversi direttivi dwar l-akkwist pubbliku (livelli limitu, “in-house”, kooperazzjoni intermuniċipali, eżenzjonijiet settorjali bħal perżempju s-settur tal-ilma jew għas-servizzi tas-salvataġġ);

42.

jilqa' l-fatt li l-Ftehim ta' kummerċ ħieles tal-UE jinkludi għall-ewwel darba kapitolu dedikat għall-SMEs, u jilqa' b'sodisfazzjon ukoll il-fatt li t-TTIP għandha l-għan li tiffaċilita, b'mod partikolari għall-SMEs, l-aċċess għas-suq rispettiv kif ukoll għall-kummerċ u l-investiment fuq iż-żewġ naħat tal-Atlantiku b'mod speċjali billi jitnaqqsu l-ostakli kummerċjali nontariffarji, li huma ta' piż kbir l-iżjed għall-SMEs; Dan permezz ta’ ċertezza legali akbar, speċjalment għall-SMEs fis-settur tas-servizzi, u permezz tat-tisħiħ u l-protezzjoni tad-drittijiet tal-proprjetà intellettwali u industrijali, li l-benefiċċji tagħhom huma siewja wkoll għal dawn l-intrapriżi;

43.

jibża' li d-diversità tal-istandards fil-qasam tal-protezzjoni ambjentali, il-protezzjoni soċjali tal-ħaddiema, l-għajnuna pubblika, il-proċeduri għall-privattivi, l-enerġija, eċċ., tirriżulta f’telf ta’ attivitajiet, produzzjoni u tipi oħra ta' telf, tal-intrapriżi differenti li jinsabu fir-reġjuni tal-UE lejn l-Istati Uniti minħabba inqas spejjeż pereżempju b'rabta mal-enerġija, il-finanzjament tar-riżorsi rinnovabbli, l-emissjonijiet ta’ CO2, l-istandards soċjali għall-ħaddiema, iżda wkoll b'rabta mar-riċerka u l-iżvilupp, b'mod partikolari permezz ta’ ħeffa ikbar fil-proċeduri għall-privattivi, eċċ.

44.

jenfasizza li b'mod partikolari għall-SMEs, id-dazji doganali, ir-rekwiżiti amministrattivi eċċessivi u l-proċeduri onerużi ta' kontroll u ta' konformità jimponu piżijiet u spejjeż sproporzjonati, li sikwit iwasslu biex jiġi evitat il-kummerċ ma' msieħba mill-Istati Uniti. Fl-Unjoni Ewropea jeżistu aktar minn 20 miljun SMEs li jimpjegaw żewġ terzi tal-ħaddiema fis-settur privat. It-tneħħija prevista tal-ostakoli tariffarji u nontariffarji li jfixklu l-aċċess għas-suq u l-kummerċ tista' toffri possibbiltajiet aħjar ta' esportazzjoni għall-SMEs u b'hekk tiftaħ il-bieb għal aktar opportunitajiet ta' impjieg;

45.

jafferma li l-biċċa l-kbira tal-Istati Membri tal-Ewropa huma kontra l-kultivazzjoni, l-importazzjoni u l-ipproċessar tal-organiżmi ġenetikament modifikati (OĠM);

46.

jitlob li jiġu previsti regoli speċjali għas-settur agrikolu sabiex tiġi projbita l-importazzjoni ta' ċerti prodotti fl-UE. Dan jikkonċerna l-aktar il-prodotti li ma jikkonformawx mad-Direttiva dwar it-Tikkettar, il-prodotti li fihom jew huma magħmula minn OĠM, l-annimali injettati b'ormoni tat-tkabbir u t-tqegħid fis-suq ta' ikel li ġej minn annimali klonati. L-istess jgħodd ukoll għall-ikel trattat b'sustanzi projbiti fl-UE u prodotti tal-ikel fejn l-ingredjenti mhumiex indikati tajjeb fuq it-tabella;

47.

jenfasizza li l-bijodiversità agrikola hija l-bażi tal-produzzjoni tal-ikel u jiġbed l-attenzjoni għall-fatt li l-ftehim ippjanat tat-TTIP m'għandux jillimita d-disponibbiltà tal-varjetajiet antiki ta' żrieragħ, ifaqqar l-għelejjel tar-raba' tradizzjonali tagħna u lanqas m'għandu jxekkel l-agrikoltura ta' kwalità u ekoloġika;

48.

jappella biex jiddaħħal kapitolu speċifiku dwar Indikazzjonijiet Ġeografiċi (GIs) bil-għan li jistabbilixxi leġislazzjoni għall-ħarsien tal-GIs fiż-żewġ ġurisdizzjonijiet u sistema ta' għarfien reċiproku tad-deżinjazzjonijiet tal-UE u tal-Istati Uniti, fost l-oħrajn permezz ta' indikazzjoni speċifika tal-użu ġeneriku tal-isem ta' prodott u/jew il-post ta' produzzjoni u billi jinżammu l-istandards Ewropej;

49.

jenfasizza b'mod espliċitu li l-Istati Membri, ir-reġjuni u l-muniċipji għandhom iżommu l-possibbiltà li jadottaw kwalunkwe miżura regolatorja jew finanzjarja biex jipproteġu jew jippromovu d-diversità kulturali, il-libertà, u l-pluraliżmu tal-midja kif ukoll biex jippreservaw jew jiżviluppaw servizzi awdjoviżivi jew servizzi relatati oħra sabiex jindirizzaw il-bżonnijiet demokratiċi, soċjali u kulturali ta' kull soċjetà, indipendentement mit-teknoloġija użata jew mill-pjattaforma ta' distribuzzjoni. Is-sovranità tal-Istati Membri fil-qasam tal-kultura u tal-midja għandha titħares permezz ta' eżenzjoni ċara tal-kultura u l-midja mill-mandat tan-negozjati;

50.

jesprimi t-tama li, fid-dawl tal-impatt globali tal-ftehim ta' kummerċ ħieles, il-partijiet fin-negozjati jesprimu ruħhom favur regoli kummerċjali ġusti u sostenibbli, li ma jmorrux kontra l-isforzi mnedija rispettivament mill-UE u l-Istati Uniti fil-qafas tal-politiki tagħhom ta' żvilupp biex itejbu s-sitwazzjoni tal-pajjiżi li qed jiżviluppaw, iżda li jiġu implimentati f'perspettiva ta' responsabbiltà u ta' solidarjetà internazzjonali fir-rigward ta' dawn il-pajjiżi;

51.

jenfasizza l-ħtieġa li tinġabar, tiġi analizzata, evalwata u ġestita data komprensiva u komparabbli li tippermetti li jiġi previst u joħroġ fid-dieher l-impatt tat-TTIP fuq il-livell reġjonali, muniċipali u lokali, b'attenzjoni speċjali għar-reġjoni ultraperiferiċi, sabiex fil-futur jiġu ffaċilitati l-previżjonijiet ekonomiċi u l-istimi statistiċi, u f'dan ir-rigward jiġi ppubblikat studju ibbażat fuq ix-xjenza.

28.4.2015   

MT

Il-Ġurnal Uffiċjali tal-Unjoni Ewropea

C 140/13

1.

jilqa' l-konsultazzjoni mnedija permezz tal-Green Paper tal-Kummissjoni Ewropea Nagħmlu l-aħjar mill-kompetenzi tradizzjonali tal-Ewropa: il-possibilità li tiġi estiża l-protezzjoni tal-indikazzjoni ġeografika tal-Unjoni Ewropea għal prodotti mhux agrikoli, filwaqt li jfakkar li l-Artikolu 3 tat-TUE jirrikonoxxi s-salvagwardja u l-iżvilupp tal-wirt kulturali Ewropew fost l-objettivi li għandhom jitqiesu fl-iżvilupp tas-suq intern, li l-Artikolu 118 tat-TFUE għandu l-għan li jiżgura protezzjoni uniformi tad-drittijiet tal-proprjetà intellettwali fl-Unjoni fi ħdan is-suq intern u li l-Artikolu 169 tat-TFUE jiżgura l-ħarsien tad-drittijiet tal-konsumaturi (inkluża l-promozzjoni ta' drittijiethom għall-informazzjoni);

2.

jagħraf li l-wirt soċjali u kulturali Ewropew jiġi mħares anke billi jiġi promoss in-know-how artiġjanali u industrijali li tradizzjonalment jinsabu fid-diversi reġjuni tal-UE u li informazzjoni korretta dwar il-prodotti artiġjanali u industrijali tista' tikkontribwixxi biex tiġi żgurata l-protezzjoni tad-drittijiet tal-konsumaturi;

3.

iqis li r-reġjuni Ewropej huma estramament sinjuri fi prodotti mhux agrikoli relatati mal-għarfien tradizzjonali (li ħafna drabi jinżamm ħaj permezz tal-mikrointrapriżi u l-intrapriżi ż-żgħar) u li promozzjoni u protezzjoni adegwati ta' dan it-tip ta' prodotti jistgħu jikkontribwixxu għall-iżvilupp tal-UE lokali u reġjonali, l-iktar mil-lat ekonomiku u soċjali, filwaqt li jxekklu wkoll il-fenomeni ta' stmerrija tal-falsifikazzjoni u l-imitazzjoni;

4.

jaqbel li huwa essenzjali li jiġi żgurat li jiġu rispettati l-istandards dwar il-protezzjoni tal-Indikazzjonijiet Ġeografiċi (IĠ) fil-qafas tal-ftehim dwar id-drittijiet tal-proprjetà intellettwali relatati mal-kummerċ (TRIP), li japplika għall-membri kollha tal-Organizzazzjoni Dinjija tal-Kummerċ (WTO);

5.

jitlob lill-Kummissjoni Ewropea biex jiġi involut u konsultat b'mod attiv fil-proċess wara l-analiżi tat-tweġibiet riċevuti mill-konsultazzjoni, fid-dawl tar-rwol ċentrali tal-Kumitat bħala rappreżentant istituzzjonali tal-awtoritajiet lokali u reġjonali u peress li l-Indikazzjonijiet Ġeografiċi intrinsikament għandhom karattru reġjonali u lokali.

6.

jenfasizza li l-Qorti tal-Ġustizzja Ewropea kkonfermat li l-Indikazzjonijiet Ġeografiċi jikkostitwixxu dritt tal-proprjetà intellettwali (1) u li s-sistema ta' protezzjoni tal-Indikazzjoni Ġeografika hija kompetenza esklużiva tal-UE. Għaldaqstant, iqis li jeħtieġ li jsir intervent biex l-iskemi kollha li jeżistu llum b'mod mhux uniformi f'ċerti Stati Membri jiġu armonizzati fi skema unika Ewropea (2);

7.

ifakkar li l-esperjenza bl-Indikazzjoni Ġeografika eżistenti għall-prodotti agrikoli assolutament għandha titqies b'mod adegwat fid-diskussjoni dwar l-estensjoni potenzjali ta' dawn l-indikazzjonijiet għall-prodotti mhux agrikoli;

8.

iqis li protezzjoni msaħħa u armonizzata tal-Indikazzjoni Ġeografika għal prodotti mhux agrikoli tikkontribwixxi għat-tisħiħ tas-suq intern, bis-saħħa ta' diversi effetti pożittivi diretti (tiżdied il-possibilità tal-aċċess għal fondi ta' promozzjoni u jiġi preservat l-impjieg fl-oqsma ekonomikament fraġli) u indiretti (bħar-riperkussjonijiet potenzjali fit-turiżmu) diġà identifikati fil-Green Paper tal-Kummissjoni Ewropea;

9.

iqis li l-estensjoni tal-protezzjoni tal-Indikazzjoni Ġeografika għall-prodotti mhux agrikoli tinkludi benefiċċji potenzjali għall-konsumaturi, li permezz tagħha jkollhom strument ieħor biex jagħmlu għażliet konxji tal-konsum (irrispettivament mill-offerta vasta ta' prodotti fis-suq), u b'hekk ikunu jistgħu jidentifikaw aħjar l-awtentiċità, l-oriġinalità u l-kwalità tal-prodotti;

10.

jenfasizza kif sistema armonizzata ta' protezzjoni tal-Identifikazzjoni Ġeografika għall-prodotti mhux agrikoli tista' ġġib magħha vantaġġi anke għar-relazzjonijiet bejn l-Unjoni u pajjiżi terzi. Fil-fatt jekk ikollha pożizzjoni unanima l-UE ssaħħaħ il-pożizzjoni tagħha fin-negozjati tal-ftehimiet kummerċjali jew f'azzjonijiet ta' protezzjoni tal-prodotti proprji fis-swieq barranin;

11.

jaqbel mal-idea li l-protezzjoni tal-Indikazzjonijiet Ġeografiċi għall-prodotti mhux agrikoli tista' tikkontribwixxi biex jiġi preservat il-wirt kulturali u artistiku tat-tradizzjonijiet lokali u reġjonali Ewropew u jissuġġerixxi l-possibilità li jiddaħħlu elementi ta' responsabbiltà soċjali korporattiva fl-oqsma potenzjali ta' produzzjoni, b'tali mod li tissaħħaħ il-kapaċità ta' dawn il-prodotti li joħolqu kapital soċjali fl-oqsma ta' produzzjoni;

12.

jittama li tista' tinkiseb skema ta' protezzjoni tal-Indikazzjoni Ġeografika tal-prodotti mhux agrikoli li tkun iktar sempliċi meta mqabbla ma' dik eżistenti għall-prodotti agrikoli, li minħabba ż-żidiet suċċessivi fil-protezzjonijiet illum hemm għadd kbir ta' tipoloġiji ta' Indikazzjoni Ġeografika, ħaġa li toħloq ir-riskju li tfixkel lill-konsumatur;

13.

jispera li t-tikketti tal-Indikazzjonijiet Ġeografiċi mhux agrikoli jistgħu jkunu sempliċi u faċli li jintgħarfu u li jistgħu jitqiegħdu fuq il-prodotti bil-lingwa oriġinali tal-prodotti stess u/jew bl-Ingliż;

14.

iqis li, kif diġà ġara fil-każ tal-Indikazzjoni Ġeografika, sistema ġdida ta' protezzjoni għall-Indikazzjoni Ġeografika mhux agrikola għandha tippermetti l-protezzjoni tad-denominazzjonijiet mhux ġeografiċi assoċjati b'mod ċar ma' lokalità partikolari, fir-rigward tad-derogi għall-protezzjoni diġà prevista fil-Ftehim TRIPS;

15.

jisħaq li approċċ trasversali għall-protezzjoni tal-Indikazzjonijiet Ġeografiċi mhux agrikoli jkun bil-wisq aħjar minn approċċ settorjali, fejn sett ta' regoli komuni għat-tipoloġiji kollha ta' prodotti żgur ikun iktar sempliċi biex jiġi amministrat mill-intrapriżi u mill-awtoritajiet nazzjonali, reġjonali u lokali;

16.

jenfasizza li għall-Indikazzjonijiet Ġeografiċi tal-prodotti mhux agrikoli tkun ħaġa tajba li jiġu previsti (mhux iktar minn) żewġ livelli distinti ta' rabta mat-territorju, li jikkorrispondu mad-distinzjoni attwali bejn il-prodotti DPO (rabta iktar qawwija) u IĠP (rabta inqas qawwija) fir-rigward tal-Indikazzjoni Ġeografika għall-prodotti agrikoli;

17.

jittama li l-oqsma potenzjali ta' produzzjoni (determinanti biex tinkiseb reġistrazzjoni ta' Indikazzjoni Ġeografika) ikunu jinkludu informazzjoni relatata mal-materja prima użata, deskrizzjoni tal-proċess tal-produzzjoni, turija tar-rabta tal-prodott mat-territorju u possibbilment elementi ta' responsabbiltà soċjali korporattiva (b'garanzija ta' impenn fit-territorju stess);

18.

jinnota li l-kriterji li l-produtturi jkollhom jissodisfaw biex jiksbu l-istatus ta' Identifikazzjoni Ġeografika m'għandhomx jostakolaw l-innovazzjoni potenzjali tal-prodott jew li tittejjeb l-effiċjenza tal-proċess ta' manifattura;

19.

ifakkar li fost l-għanijiet tal-Indikazzjonijiet Ġeografiċi nsibu garanzija ta' kwalità għall-konsumaturi, u b'hekk, filwaqt li ma naħsbux li jista' jiġi definit parametru kwalitattiv omoġenju, tkun ħaġa tajba li jiġu previsti miżuri ta' verifika fir-rigward tal-oqsma ta' produzzjoni għall-perjodu sħiħ tal-protezzjoni. Dawn il-miżuri ta' verifika jistgħu jsiru minn entitajiet pubbliċi reġjonali (jew sħubijiet pubbliċi-privati, bħal, pereżempju, uħud mill-Kmamar tal-Kummerċ).

20.

iqis li l-ħolqien ta' sistema unika fil-livell tal-UE għall-protezzjoni tal-Indikazzjonijiet Ġeografiċi mhux agrikoli jkun aħjar mit-triq li twassal għall-armonizzazzjoni tal-istandards nazzjonali uniċi, għax ikun iktar ekwu u jiżgura skedi komuni fl-UE kollha;

21.

jipproponi li, għall-Istati Membri fejn diġà hemm sistema ta' protezzjoni prevista tal-Indikazzjonijiet Ġeografiċi mhux agrikoli, jiġi previst perjodu qasir b'dispożizzjonijiet transitorji bbażati fuq il-koeżistenza taż-żewġ sistemi (pereżempju sal-2020), biex imbagħad issir bidla definittiva għal mekkaniżmu uniku tal-UE;

22.

iqis li proċedura ta' reġistrazzjoni tal-Indikazzjonijiet Ġeografiċi mhux agrikoli għandha tkun obbligatorja u li t-tali proċedura għandha tkun ibbażata fuq sistema b'żewġ fażijiet (kif hemm illum għall-Indikazzjonijiet Ġeografiċi agrikoli) li tinvolvi l-livell reġjonali fir-rigward tal-verifika tal-ispeċifiċitajiet lokali u l-livell Ewropew fir-rigward tal-verifika tal-kriterji komuni għall-UE kollha;

23.

jisħaq li l-proċess ta' reġistrazzjoni tal-Indikazzjonijiet Ġeografiċi għandu jkollu skadenzi ċerti u żgurati mil-liġi, b'tali mod li jiġi evitat li l-amministrazzjonijiet pubbliċi bi skopijiet ħżiena jfixklu l-proċess u joħolqu danni għall-produtturi;

24.

iqis li l-produtturi, l-assoċjazzjonijiet tagħhom u l-Kmamar tal-Kummerċ għandhom ikunu l-awtoritajiet prinċipali li jistgħu jitolbu r-reġistrazzjoni ta' Indikazzjoni Ġeografika għall-prodotti mhux agrikoli; ikun raġonevoli li jiġi previst li f'każijiet speċifiċi u raġunati jista' jkun ukoll produttur waħdu, entità lokali jew reġjonali jew assoċjazzjoni tal-konsumaturi li jagħmlu t-talba għar-reġistrazzjoni. L-istess kategoriji intitolati li jagħmlu talba għar-reġistrazzjoni għandu jkollhom id-dritt li jitolbu proċedura ta' oġġezzjoni jekk ikun hemm bżonn;

25.

jenfasizza li minħabba l-attenzjoni attwali li qed tingħata lill-baġits pubbliċi, tista' ssir talba għal kontribut mill-produtturi biex jinkiseb l-istatus ta' Indikazzjoni Ġeografika, sakemm ikun kontribut f'daqqa (tantum), ikun uniformi fir-rigward tal-ispejjeż imġarrba u jkun applikat bl-istess mod fl-UE kollha;

26.

jispera li l-livell ta' protezzjoni li jingħata lill-Indikazzjonijiet Ġeografiċi tal-prodotti mhux agrikoli jkun jista' jkun l-istess bħal dak previst fl-Artikolu 23 tal-Ftehim TRIPS għall-inbejjed u x-xorb alkoħoliku, fis-sens li d-drittijiet tal-produtturi jiġu protetti bis-saħħa ġusta;

27.

jipproponi li s-sistema ta' monitoraġġ biex jiġu rispettati d-drittijiet relatati mal-Indikazzjonijiet Ġeografiċi tal-prodotti mhux agrikoli tista' tkun pubblika jew pubblika-privata, iżda li fiż-żewġ każijiet tiġi preferuta l-kompetenza tal-awtoritajiet lokali u reġjonali minħabba l-kuntatt dirett li għandhom mat-territorju;

28.

jifhem li s-suċċess li jista' jkollha sistema ta' Indikazzjoni Ġeografika għall-prodotti mhux agrikoli sa ċertu punt tista' żżid ir-riskju ta' falsifikazzjoni jew imitazzjoni mill-produtturi kompetituri. Għal din ir-raġuni għandhom jiġu previsti proċeduri rapidi ta' salvagwardja li malajr jistgħu jidentifikaw u jeliminaw il-prodotti falsifikati jew imitati;

29.

iqis li l-protezzjoni tal-Indikazzjonijiet Ġeografiċi m'għandux ikollha perjodu ta' żmien limitat, iżda xorta għandha tkun tista' tiġi prevista l-possibilità li l-protezzjoni tiġi rtirata bl-istess kundizzjonijiet previsti għall-Indikazzjonijiet Ġeografiċi tal-prodotti agrikoli;

30.

iqis li l-kunflitti potenzjali bejn l-Identifikazzjonijiet Ġeografiċi mhux agrikoli u d-ditti għandhom ikunu regolati l-istess kif jiġu regolati dawn il-kunflitti fl-Indikazzjonijiet Ġeografiċi agrikoli;

31.

fl-aħħar nett, jenfasizza li minħabba l-esperjenza vasta tiegħu fl-indirizzar ta' suġġetti ta' politika reġjonali u lokali, il-fehma tiegħu għandha tkompli ssaħħaħ u tiżviluppa r-rakkomandazzjonijiet għall-ħolqien ta' sistema ta' protezzjoni tal-Indikazzjonijiet Ġeografiċi mhux agrikoli fl-UE, u għalhekk jitlob li l-Kummissjoni Ewropea tipproċedi bit-tressiq ta' proposta leġislattiva f'dan is-sens.

28.4.2015   

MT

Il-Ġurnal Uffiċjali tal-Unjoni Ewropea

C 140/16

1.

jilqa' b'mod favorevoli l-intenzjoni tal-Komunikazzjoni tal-KE dwar il-qafas strateġiku l-ġdid tal-UE 2014-2020 dwar is-saħħa u s-sikurezza okkupazzjonali (Occupational Health and Safety – OHS) li tkun konformi mal-objettivi tal-Ewropa 2020 fir-rigward tal-impjieg, permezz tal-promozzjoni ta' standards għoljin għall-kundizzjonijiet tax-xogħol, kemm fl-UE kif ukoll fil-livell internazzjonali, iżda jistaqsi għalfejn il-Kummissjoni ma tipprevedi l-ebda azzjoni leġislattiva speċifika fi ħdan dan il-qafas strateġiku, b'mod partikolari fil-qasam tal-mard muskolo-skeletali (MSD) u l-karċinoġeni;

2.

f’dan il-kuntest jappoġġja t-talba tal-Parlament Ewropew lill-Kummissjoni Ewropea:

3.

jiġbed l-attenzjoni għall-kontradizzjoni mill-Kummissjoni Ewropea li ssegwi l-istabbiliment ta’ Qafas Strateġiku tal-UE dwar is-Saħħa u s-Sigurtà fuq il-Post tax-Xogħol 2014-2020 filwaqt li fl-istess ħin tħabbar fil-Programm ta’ Ħidma tagħha għall-2015 l-irtirar possibbli tal-proposta għal Direttiva li temenda d-Direttiva tal-Kunsill 92/85/KEE dwar miżuri li jinkoraġġixxu titjib fis-saħħa u s-sigurtà fuq il-post tax-xogħol għall-ħaddiema nisa tqal u ħaddiema li welldu reċentement, jew li qed ireddgħu;

4.

jagħraf l-importanza tal-koordinazzjoni tal-miżuri, fil-livell tal-UE, sabiex jiġu indirizzati r-riskji marbuta mas-saħħa u sikurezza okkupazzjonali u biex jinkisbu t-titjib kontinwu u l-progress fil-kundizzjonijiet tax-xogħol;

5.

huwa konxju tal-fatt li twettqu ħafna mill-inizjattivi previsti fl-istrateġija tal-UE għall-perjodu 2007-2012, meta ma kien hemm l-ebda miri vinkolanti u li jistgħu jitkejlu stabbiliti skont skeda ta' żmien;

6.

jenfasizza r-rwol importanti u essenzjali li min iħaddem u r-rappreżentanti tal-ħaddiema għandu jkollhom fl-iżvilupp ta’ politiki dwar is-saħħa u s-sikurezza fil-livell Ewropew, nazzjonali, reġjonali u lokali u jistieden lill-Kummissjoni biex issaħħaħ id-djalogu soċjali fil-proċessi tat-teħid ta’ deċiżjonijiet tagħha;

7.

jaqbel mal-għażla tal-KE li tindividwa tliet sfidi prinċipali fil-qafas strateġiku ġdid li huma: i) il-konformità mal-leġislazzjoni fis-seħħ; ii) it-titjib tal-prevenzjoni ta' mard relatat max-xogħol inkluża l-prevenzjoni ta' riskji ġodda u dawk emerġenti; iii) ir-rispons għall-bidla demografika;

8.

jaqbel mal-Parlament Ewropew (PE) li l-kriżi ekonomika mhijiex skuża biex jitwarrbu l-politiki ta' prevenzjoni u jenfasizza l-importanza tas-saħħa u s-sikurezza okkupazzjonali bħala dritt fundamentali tal-ħaddiema (1);

9.

jilmenta li l-awtoritajiet lokali u reġjonali ftit li xejn ġew involuti fl-istrateġija tal-Kummissjoni Ewropea u jappella lill-Kummissjoni biex tiggarantixxi l-parteċipazzjoni formali tagħhom biex jassumu impenji fil-qasam, u b'hekk jiġu rikonoxxuti, anke fil-kwalità ta' impjegaturi importanti, bħala suġġetti istituzzjonali fundamentali;

10.

jenfasizza li, permezz tas-sħubijiet u r-rabtiet tagħhom man-negozji lokali, l-awtoritajiet lokali u reġjonali jistgħu jaqdu rwol regolatorju importanti fl-adozzjoni tar-regoli, fil-promozzjoni tal-kultura ta' prevenzjoni, u fl-applikazzjoni korretta tal-istandards preventivi, fl-appoġġ ta' attivitajiet ta' rappreżentanza u l-ħarsien kollettiv tas-sikurezza.

11.

jipproponi li jiġi identifikat kumitat ta' tmexxija ċentrali Ewropew bil-ħila jidentifika, jikkoordina, jiżviluppa, u jivverifika fil-qasam tas-saħħa u s-sikurezza okkupazzjonali (preferibilment ikkoordinat mill-EU-OSHA), anke sabiex jaqdi rwol proattiv ta' referenza, gwida u monitoraġġ iktar effiċjenti fl-applikazzjoni min-naħa talIstati Membri tal-leġislazzjoni Ewropea. Dan il- kumitat ta' tmexxija għandu:

12.

jemmen li hemm bżonn li tiġi indirizzata malajr il-problema tat-tnaqqis tad-drittijiet tal-ħaddiema u li jsiru interventi effettivi sabiex jitnaqqsu d-differenzi fir-regoli u l-mudelli u fl-applikazzjoni tagħhom fil-qasam tas-saħħa u s-sikurezza okkupazzjonali, wieħed mill-fatturi li jista' jagħti lok għal żieda fil-prattiki ta' dumping soċjali u kompetizzjoni mhux ġusta fit-territorji fi ħdan is-suq tal-UE;

13.

jaqbel mal-azzjoni prevista mill-KE biex jiġu riveduti l-istrateġiji nazzjonali fid-dawl tal-qafas ġdid, billi jitwaqqaf bażi ta' data tal-oqfsa strateġiji nazzjonali kollha fil-qasam tas-saħħa u s-sikurezza okkuppazzjonali, f'kollaborazzjoni mal-aġenzija Ewropea EU-OSHA. Din il-ħidma għandha ssir abbażi ta' djalogu mill-qrib mal-imsieħba soċjali Ewropej;

14.

huwa konvint li hemm bżonn jiġu promossi l-iżvilupp ta' kultura ta' prevenzjoni (b'inizjattivi fil-qasam tat-taħriġ fl-iskejjel, l-apprendistat, it-taħriġ professjonali u kontinwu) u kultura intraprenditorjali serja u moderna msejsa fuq il-konvinzjoni li l-kwalità fil-persuni tiddetermina l-kwalità tal-proċessi u tal-prodotti industrijali;

15.

iqis essenzjali t-taħriġ dwar il-prevenzjoni tar-riskji fuq ix-xogħol, li jirriżulta f'benefiċċji kemm għall-ħaddiema kif ukoll għall-kumpanija nnifisha;

16.

jaqbel mal-KE li s-sensibilizzazzjoni dwar is-saħħa u s-sikurezza okkupazzjonali tibda fl-iskejjel u jappoġġja r-rakkomandazzjoni biex jingħataw iżjed importanza fil-programmi skolastiċi;

17.

jaqbel mal-attenzjoni li l-KE qed tagħti lis-sensibilizzazzjoni tal-opinjoni pubbliku, b'enfasi fuq ir-rwol li l-awtoritajiet lokali u reġjonali għandu jkollhom f'dan il-qasam;

18.

jappoġġja b'konvinzjoni partikolari l-iffinanzjar ta' azzjonijiet mill-2014 'il quddiem u jitlob biex jiġu previsti tipi ta' appoġġ ad hoc għal proġetti mressqa mill-awtoritajiet lokali u reġjonali, b'mod partikolari f'dak li jirrigwarda dawk li jirrappreżentaw ir-reġjuni li fihom il-kopertura tas-sistema tas-saħħa pubblika m'hijiex effikaċi jew li qed jiffaċċjaw sfidi demografiċi;

19.

jappoġġja, f'koerenza mal-prinċipju tas-sussidjarjetà orizzontali, anke l-azzjonijiet previsti għall-appoġġ tal-impriżi għal soluzzjonijiet tekniċi u organizzattivi ta' ħarsien tas-saħħa u s-sikurezza okkupazzjonali;

20.

jaqbel mal-KE dwar il-bżonn li jingħata appoġġ tekniku-finanzjarju lill-istrument ta' valutazzjoni interattiv tar-riskji onlajn OiRA (2) u lill-istrumenti l-oħra tekniċi-xjentifiċi u tal-informattika fl-Istati Membri, b'mod partikolari fis-setturi prijoritarji u tal-mikrointrapriżi u l-intrapriżi żgħar;

21.

jappoġġja l-azzjoni tal-KE biex tippromovi l-iskambju tal-aħjar prattiki mal-SMEs li jirċievu l-għajnuna mill-kumpaniji kbar fl-ambitu tal-katina żviluppatur-fornitur-xerrej sabiex jiġu mtejba s-saħħa u s-sikurezza okkupazzjonali;

22.

jitlob aktar politiki integrati għall-SMEs (inċentivi finanzjarji, aċċess aħjar għall-fondi tal-FSE u tal-FEŻR, strumenti prattiċi, fuq kollox rigorużi mil-lat tekniku-xjentifiku, għall-valutazzjoni tar-riskji, sħubija);

23.

jittama li jiġu promossi politiki għall-eżenzjonijiet fiskali tal-investimenti kapitali u l-ispejjeż ta' manutenzjoni annwali għall-impriżi li jintroduċu sistemi u strumenti ta' ġestjoni tas-saħħa u s-sikurezza okkupazzjonali skont il-linji gwida u l-mudelli maħruġa mill-entitajiet kompetenti pubbliċi regolatorji;

24.

fl-istess waqt, jittama li jiġi żviluppat pjan Ewropew ta' inċentivi għall-impriżi għal proġetti għall-introduzzjoni u l-manutenzjoni ta' sistemi ta' ġestjoni tas-saħħa u tas-sikurezza okkupazzjonali, bl-użu ta' fondi ta' garanzija sabiex l-aċċess għal kreditu bankarju jsir aktar faċli u biex jissaħħu l-attivitajiet ta' għajnuna teknika lill-impriżi, b'mod partikolari l-SMEs, anke permezz tal-Aġenzija UE-OSHA.

25.

jappoġġja l-miżuri u r-rakkomandazzjonijiet ta' politika tar-riżoluzzjoni tal-PE tal-14 ta' Jannar 2014 dwar l-ispezzjonijiet fuq il-post tax-xogħol effikaċi bħala strateġija għat-titjib tal-kundizzjonijiet tax-xogħol fl-UE;

26.

jilqa' bi pjaċir il-gwida u l-koordinazzjoni tal-ispetturi tax-xogħol u tal-funzjonarji tal-korpi kompetenti fil-qasam tas-saħħa u s-sigurtà tal-Istati individwali, min-naħa tas-SLIC (Senior Labour Inspectors Committee) li jkun mgħammar bi strumenti u riżorsi adatti;

27.

jappoġġja l-importanza li l-aġenti tal-amministrazzjoni li jiżguraw is-sigurtà u s-saħħa fuq il-post tax-xogħol jiffaċilitaw ukoll ir-rispett tar-regoli, u jisħaq ir-rwol tal-awtoritajiet lokali u reġjonali fit-tħarriġ tagħhom, filwaqt li jittama li jiġu identifikati mudelli speċifiċi ta' spezzjoni għall-impriżi mikro u żgħar, sakemm dawn ma jkunux wisq burokratiċi u jġibu ħafna spejjeż mhux sostenibbli;

28.

l-azzjonijiet li għandhom l-għan li jsaħħu r-rispett tar-regoli għandhom ikunu bbażati fuq l-evidenza tal-effikaċja, u għandhom jiffukaw b'mod partikolari fuq dawk is-setturi produttivi fejn hemm tassew riskji reali ta' ksur tar-regolamenti tas-saħħa u s-sikurezza, u b'hekk jiġi żgurat li jikkonċentraw fuq l-infurzar tar-regolamenti eżistenti dwar l-espożizzjoni għal karċinoġeni bħall-asbestos, u dak il-mard l-aktar prevalenti fuq il-post tax-xogħol bħall-Mard Muskolo-Skeletali (MSD), mard relatat mal-istress u mard respiratorju ieħor bħall-Mard Pulmonari Ostruttiv Kroniku (COPD);

29.

jittama li l-awtoritajiet lokali u reġjonali jaqdu rwol iktar b'saħħtu ta' kontroll tat-territorju, partikolarment permezz tat-tisħiħ progressiv tas-setgħat tagħhom, speċjalment fir-rigward tas-sistema tal-akkwist pubbliku u s-subkuntrattar, li tirrappreżenta wieħed mill-oqsma ewlenin li għandhom jiġu salvagwardati aħjar;

30.

jipproponi li jiġi mħeġġeġ l-iskambju tal-prattiki tajbin fost l-awtoritajiet reġjonali u lokali attivi fil-qasam;

31.

jaqbel dwar il-ħtieġa li f'kollaborazzjoni mal-Istati Membri, mal-Kumitat Għoli tal-Ispettorat tax-Xogħol (Senior Labour Inspectors Committee – SLIC) u mal-Kumitat Konsultattiv dwar is-Saħħa u s-Sigurtà (Advisory Committee on Safety and Health – ACSH), jiġu evalwati l-effikaċja tas-sanzjonijiet u l-multi amministrattivi imposti u l-modalitajiet mhux tradizzjonali ta' kontroll, bil-kundizzjoni li s-settur pubbliku jingħata l-opportunità li jaqdi rwol f'dawn il-korpi;

32.

jaħseb li hija għażla tajba u strateġika li titwaqqaf pjattaforma Ewropea għall-ħarsien tas-saħħa tal-ħaddiema migranti, minħabba l-kapaċità dejjem iktar dgħajfa tal-Istati biex jintervjenu kontra l-effetti tal-globalizzazzjoni u l-bidliet soċjodemografiċi maħluqa, fuq kollox, minn fenomeni ta' migrazzjoni.

33.

jilqa' l-inklużjoni tad-Direttiva qafas 89/391/KEE (3), fil-programm REFIT, billi fl-istħarriġ li sar mill-Kummissjoni Ewropea fl-2011 instab li d-Direttiva kienet fost l-għaxar atti leġislattivi bl-akbar piż għall-SMEs (4);

34.

jemmen li flimkien mad-dispożizzjonijiet dwar sanzjonijiet, għandu jkun hemm standardizzazzjoni tal-għanijiet, b'regoli ċari u proċeduri effikaċi u ħfief, biex tingħata aktar importanza lir-rwol tal-korpi konġunti rappreżentattivi tal-partijiet soċjali li, jekk ikunu involuti b’mod adatt, u fil-limiti tar-rwoli assenjati lilhom, jistgħu jappoġġjaw lil dawk li skont il-liġi nazzjonali huma responsabbli għall-implimentazzjoni tal-azzjonijiet preventivi;

35.

huwa favur li l-azzjonijiet eventwali ta' semplifikazzjoni tal-valutazzjoni tar-riskji u/jew it-tnaqqis tal-piż amministrattiv jiġu inklużi bħala parti integrali mill-analiżi tal-leġislazzjoni dwar is-saħħa u s-sikurezza okkupazzjonali, iżda fl-istess ħin għandu jiġi żgurat li l-livell ta' protezzjoni tal-ħaddiema ma jonqosx;

36.

jaħseb li, għal xi setturi, speċjalment il-mikrointrapriżi, jistgħu jiġu identifikati u promossi strumenti bħal pereżempju OiRA, li jiffaċilitaw l-analiżi tar-riskju. Il-kriterji u l-parametri oġġettivi għandhom ikunu bbażati fuq valutazzjoni preċiża u proċess ta' ġestjoni tar-riskju, kemm jista' jkun semplifikati u definiti b'mod konġunt ma' entitajiet istituzzjonali fil-qasam, sabiex jiġu żviluppati strumenti ta' valutazzjoni u ġestjoni tar-riskju semplifikati, anke permezz ta' tipi ta' ċertifikazzjoni fuq bażi volontarja;

37.

jaħseb li l-piż tal-applikazzjoni tas-sistemi ta' ġestjoni tas-saħħa u s-sikurezza okkupazzjonali huwa wkoll ikkaġunat minn ammont eċċessiv ta' burokrazija mhux dejjem marbuta mal-istandardizzazzjoni pubblika iżda mal-konformità ma' standards internazzjonali. Filwaqt li jirrikonoxxi l-professjonalità ta' dawk li joperaw fil-qasam tas-sikurezza, jaħseb li dan m'għandux jirrappreżenta t-tieni “front” ta' kumplessità fil-kumpanija, speċjalment għall-kumpaniji ż-żgħar. Għaldaqstant, jappella għal djalogu Ewropew li jindirizza l-kwistjoni ta' ċertifikazzjoni ta' kwalità tas-saħħa u s-sikurezza okkupazzjonali, bil-għan li jiġi definit standard tal-UE volontarju li jistabbilixxi r-rekwiżiti minimi sostenibbli.

38.

huwa konvint li l-azzjonijiet maħsuba għall-ħarsien tas-saħħa u s-sikurezza okkupazzjonali jridu jiġu indirizzati b'mod prekawzjonarju u olistiku, filwaqt li jitqiesu r-rabtiet qawwija bejn il-produzzjoni, ix-xogħol u l-ambjent, u abbażi tal-aqwa evidenza medika u xjentifika li teżisti;

39.

jinnota li għandha tingħata attenzjoni lill-mard mill-asbestos, mard tal-pulmuni u tal-ġilda, il-kanċer, l-ażma, il-mard ostruttiv, MSD, mard relatat mal-istress u mard ieħor kroniku, u jenfasizza l-ħtieġa għal analiżijiet bir-reqqa dwar ir-riskji li jeżistu u riskji ġodda li ġejjin mir-ristrutturar, mit-teknoloġiji l-ġodda u mill-materjali u l-prodotti;

40.

jaħseb li, b'referenza għall-applikazzjoni industrijali ta' teknoloġiji, materjali u prodotti ġodda, u fid-dawl tal-inċertezza xjentifika, huwa neċessarju li jiġi applikat approċċ ta' prekawzjoni fil-ġestjoni tar-riskji tas-saħħa;

41.

iqis li:

42.

jirrimarka dwar l-ammont qed jikber ta' ħaddiema nisa u d-differenzi bejn il-ħajja tax-xogħol tan-nisa u dik tal-irġiel (tip ta' xogħol, kundizzjonijiet differenti ta' esponiment għal riskji) li jħallu impatt fuq is-saħħa u s-sikurezza rispettivi tagħhom;

43.

jirrakkomanda d-diversifikazzjoni tal-miżuri protettivi fl-ambjenti tax-xogħol, sabiex tiġi assigurata l-effiċjenza, kemm għan-nisa kif ukoll għall-irġiel, filwaqt li jitqiesu t-tip effettiv ta' xogħol li jitwettaq u d-differenzi soġġettivi u oġġettivi tal-kundizzjonijiet rispettivi ta' esponiment għal riskji;

44.

jaqbel li l-politika tas-saħħa u s-sikurezza okkupazzjonali tista' tikkontribwixxi għall-ġlieda kontra d-diskriminazzjoni u l-promozzjoni ta' opportunitajiet indaqs fil-politiki tal-UE, billi tippromwovi l-implimentazzjoni preċiża tad-Direttiva 2000/78/KE relatata mal-ħarsien tas-saħħa u s-sikurezza okkupazzjonali ta' persuni b'diżabilità u d-Direttiva 2006/54/KE, li tipprojbixxi trattament inqas favorevoli ta' nisa fuq il-post tax-xogħol minħabba tqala jew maternità (5)  (6);

45.

ifakkar li t-tagħlim tul il-ħajja u l-volontarjat huma żewġ elementi essenzjali li minnhom jiddependi t-tixjiħ attiv u f'saħħtu. L-edukazzjoni tal-adulti u l-volontarjat minn persuni ta' età kbira għandhom jiġu appoġġjati fil-livell tal-UE, u dak nazzjonali u lokali sabiex tkompli tiġi estiża l-ħajja tax-xogħol, jiġi promoss l-irtirar attiv u jiġi appoġġjat l-għajxien indipendenti (7); għaldaqstant l-UE għandha tippromovi t-tfassil ta' manwal ta' prattiki tajbin Ewropej fil-qasam tat-tixjih attiv;

46.

għalhekk huwa tal-fehma li sabiex tissolva l-problema tat-tixjiħ tal-impjegati għandu jiġi żgurat l-iskambju tal-informazzjoni u l-aħjar prattiki bejn l-Istati Membri u l-intrapriżi kif ukoll miżuri ta' inklużjoni adatti;

47.

il-Kumitat “huwa fiduċjuż li l-azzjoni tal-UE li tappoġġja tixjiħ attiv u b'saħħtu u solidarjetà bejn il-ġenerazzjonijiet ser tagħti spinta lill-innnovazzjoni u lill-potenzjal tat-tkabbir fl-UE u ser ikollha benefiċċji ekonomiċi għall-atturi pubbliċi u privati fil-livell lokali, nazzjonali u tal-UE” (8).

48.

jinnota li t-titjib tal-ġbir tad-data huwa fundamentali sabiex jiġi garantit it-tqabbil tal-prestazzjonijiet u r-riżultati fil-qasam tas-saħħa u s-sikurezza okkupazzjonali fl-UE, u jirrimarka dwar il-ħtieġa li l-analiżijiet komparattivi tad-data jitqiesu fid-dawl ta' titjib kontinwu permezz tal-individwar tal-aħjar prattiki fir-rigward ta' proċessi minflok f'termini ta' prestazzjoni. Dan bil-għan li jiffavorixxi l-kondiviżijoni tad-data dwar riskji effettivi mill-Istati Membri;

49.

jappoġġja l-istedina tal-KE biex tinġabar u tiġi prodotta data statistika, anke fil-livell lokali u reġjonali, iktar dettaljata dwar inċidenti u mard okkupazzjonali, dwar l-esponiment professjonali u dwar mard marbut max-xogħol;

50.

jirrimarka li fl-ambitu tal-ġestjoni ta' sistema ta' informatika tas-saħħa u s-sikurezza okkupazzjonali, jidher wisq limitat ir-rwol tal-partijiet soċjali li, għall-kuntrarju, għandhom ikunu msieħba effikaċi fil-ħolqien tal-arkitettura tas-sistema, fiż-żieda tad-data tas-settur, fil-ġestjoni tal-flussi ta' informazzjoni kif ukoll fl-użu tagħhom;

51.

jenfasizza li data statistika iżjed affidabbli tista' toffri inventarju tar-riskji għas-saħħa tal-ħaddiema, sabiex nifhmu aħjar il-kawżi u b'hekk jiġu misluta konklużjonijiet operattivi;

52.

jappella għall-ħolqien ta' sistema informattiva Ewropea għall-prevenzjoni fil-postijiet tax-xogħol (għarfien għal prevenzjoni), bħala strument operattiv dinamiku li permezz tiegħu tiġi integrata l-informazzjoni kollha disponibbli fis-sistemi nazzjonali attwali u jinħoloq mudell ta' qari ma' bażi tad-data unifikata.

53.

jaqbel mal-fehma tal-KE li standards tal-UE ċari fil-leġislazzjoni fil-qasam tas-saħħa u s-sikurezza okkupazzjonali jistgħu jwasslu għal standards dwar ix-xogħol ekwivalenti fil-livell dinji, permezz ta' ftehimiet bilaterali u multilaterali ma' pajjiżi terzi;

54.

jaħseb li fil-kuntest internazzjonali globalizzat ġdid, huwa neċessarju li jiġi garantit li konvenzjonijiet u ftehimiet internazzjonali dwar standards fil-qasam tas-saħħa u s-sikurezza okkupazzjonali jiġu adottati u applikati b'mod konkret mill-partijiet kollha kkonċernati, sabiex tinżamm il-kompetittività tal-UE u tiġi evitata d-delokalizzazzjoni ta' impriżi f'pajjiżi terzi huma u jfittxu kuntesti leġislattivi iżjed permissivi;

55.

ifakkar lill-KE biex tħeġġeġ lill-Istati Membri biex jirratifikaw l-ILO kollha kif ukoll konvenzjonijiet u ftehimiet internazzjonali oħra dwar is-saħħa u s-sigurtà, u li tagħti ħarsa mill-qrib lejn l-istandards tas-saħħa u s-sikurezza okkupazzjonali u kwistjonijiet oħra fin-negozjati tas-sħubijet kollha li jiġu stabbiliti fid-dinja kollha u b'mod partikolari fin-negozjati attwali dwar is-Sħubija Trans-Atlantika ta' Kummerċ u ta' Investiment (TTIP) mal-Istati Uniti.

28.4.2015   

MT

Il-Ġurnal Uffiċjali tal-Unjoni Ewropea

C 140/22

1.

F'dawn l-aħħar snin, it-terminu “ekoloġiku” sar ħafna iżjed prominenti fit-tfassil tal-politika, peress li l-preokkupazzjonijiet ambjentali saru trasversali u globali. L-Istrateġija Ewropa 2020 għal tkabbir intelliġenti, sostenibbli u inklużiv identifikat li t-tranżizzjoni lejn mudell ekonomiku ekoloġiku, b'emissjonijiet baxxi tal-karbonju u effiċjenti fl-użu tar-riżorsi hija essenzjali;

2.

Waħda mit-temi ċentrali ta' dawn iż-żewġ Komunikazzjonijiet hija l-kunċett tal-“ekonomija ekoloġika”, li hija definita bħala mudell li [j]iżgura t-tkabbir u l-iżvilupp, [i]ħares is-saħħa u l-benesseri tal-bniedem, [j]ipprovdi impjiegi diċenti, [i]naqqas l-inugwaljanzi u [j]investi fil-bijodiversità, kif ukoll [j]ippreservaha, anke fis-servizzi relatati mal-ekosistema li hija tipprovdi (kapital naturali), għall-valur intrinsiku tagħha u għall-kontribut essenzjali tagħha għall-benesseri tal-bniedem u għall-prosperità ekonomika" (1);

3.

It-tranżizzjoni lejn ekonomija ekoloġika ser ikollha impatt dirett fuq il-kompetittività, kemm tan-negozji individwali kif ukoll tal-ekonomija Ewropea inġenerali. Ir-riżorsi qed isiru skarsi. Il-konsum qed jiżdied f'għadd dejjem ikbar ta' oqsma, u qed noqorbu lejn il-limiti ambjentali tagħna. Tranżizzjoni f'waqtha lejn ekonomija ekoloġika fl-UE mhux biss hija mixtieqa iżda essenzjali għall-preservazzjoni u t-tisħiħ tal-kompetittività u l-prosperità fl-iqsar tul ta' żmien possibbli;

4.

jappoġġja l-Komunikazzjoni tal-Kummissjoni dwar Pjan ta' Azzjoni Ekoloġiku għall-SMEs u l-Inizjattiva għal Impjiegi Ekoloġiċi;

5.

jaqbel mal-fehma tal-Kummissjoni, li esprimiet fiż-żewġ Komunikazzjonijiet, li tranżizzjoni li tirnexxi lejn ekonomija ekoloġika hija fattur kruċjali fil-kompetittività preżenti u futura tal-Unjoni Ewropea;

6.

jenfasizza r-rwol pivotali li jaqdu s-settur pubbliku u l-awtoritajiet lokali u reġjonali fl-iffaċilitar tat-tranżizzjoni lejn ekonomija ekoloġika; minbarra l-promozzjoni tat-tranżizzjoni lejn ekonomija ekoloġika, l-awtoritajiet pubbliċi għandhom ikunu mudell u punt ta' referenza fl-implimentazzjoni tal-proġetti, il-programmi, il-leġislazzjoni, l-għoti ta' kuntratti u l-ħolqien tal-impjieg fil-kuntest ta' paradigma ġdida tal-ekonomija ekoloġika;

7.

huwa tal-fehma li huwa fundamentalment importanti li jitkomplew l-isforzi għall-promozzjoni tal-kompetittività ekoloġika tal-SMEs permezz tat-titjib tal-aċċess għall-finanzjament, l-għoti ta' iżjed informazzjoni, is-semplifikazzjoni tal-leġislazzjoni, it-tnaqqis tal-burokrazija u t-tisħiħ ta' kultura li tiffavorixxi kultura ta' negozji ekoloġiċi;

8.

japprova l-għan tal-Inizjattiva għal Impjiegi Ekoloġiċi li l-politiki tal-impjieg u l-ambjent jaħdmu id f'id biex flimkien jappoġġjaw it-tranżizzjoni lejn ekonomija kompetittiva, ekoloġika u effiċjenti fl-użu tar-riżorsi.

9.

jisħaq li l-kwistjoni tal-ħiliet hija partikolarment rilevanti għaż-żgħażagħ, li għadhom qed jiffaċċjaw rata għolja ħafna ta' qgħad ta' iżjed minn 22 %, u għandhom jitħejjew aħjar għall-impjiegi tal-ġejjieni b'mod ġenerali, u għal impjiegi ekoloġiki b'mod partikolari;

10.

jaqbel mal-Kummissjoni dwar il-bżonn li jiġu kkunsidrati mill-ġdid u aġġornati l-kurrikuli tat-taħriġ u l-edukazzjoni, kif ukoll is-sistemi tal-kwalifiki sabiex tiġi ffaċilitata t-tranżizzjoni lejn ekonomija ekoloġika;

11.

josserva li n-negozji jvarjaw ħafna bejniethom: xi wħud diġà jipprovdu prodotti u servizzi ekoloġiċi, filwaqt li dawk li joffru servizzi u prodotti iżjed tradizzjonali jistgħu wkoll jibbenefikaw, pereżempju, billi jużaw sorsi ta' enerġija u materja prima li jagħmlu inqas ħsara lill-ambjent;

12.

huwa tal-fehma li l-isfidi ambjentali għandhom jitqiesu kemm bħala opportunità kif ukoll theddida għan-negozji individwali, l-impjegati tagħhom, is-swieq tax-xogħol u l-UE;

13.

huwa tal-fehma li t-termini u ċ-ċifri bażiċi u l-punt tat-tluq għall-ekonomija ekoloġika għandhom jiġu ċċarati u definiti b'tali mod li jkun hemm ftehim reċiproku dwar it-termini u ċ-ċifri u jkunu wkoll konsistenti u mhux ambigwi;

14.

huwa tal-fehma li tranżizzjoni li tirnexxi lejn ekonomija ekoloġika hija kruċjali għall-kompetittività attwali u futura tal-UE, u għal din ir-raġuni huwa fundamentali li jiġi żgurat li t-termini jintużaw b'mod konsistenti;

15.

jenfasizza d-dimensjoni reġjonali tat-tranżizzjoni lejn ekonomija ekoloġika, u r-rwol ewlieni li jaqdu l-awtoritajiet lokali u reġjonali fl-edukazzjoni, l-infrastruttura, l-appoġġ għan-negozji lokali u l-ħolqien ta' servizzi tal-impjieg; jiġbed l-attenzjoni wkoll għall-inizjattivi ekoloġiċi eżistenti fil-livell lokali li jistgħu jservu ta' eżempju għal reġjuni oħra tal-UE;

16.

jenfasizza d-diversità taċ-ċirkustanzi u l-isfidi li jiffaċċja l-livell lokali, u jitlob li jiġu kkunsidrati ċ-ċirkustanzi eċċezzjonali tar-reġjuni f'dak li jirrigwarda l-ekoloġizzazzjoni tal-ekonomija;

17.

jenfasizza li ekonomija ekoloġika li tirnexxi ser ikollha ħames elementi prinċipali: 1) tnaqqis, li jfisser li l-konsum tal-materja prima u l-użu tal-enerġija jridu jitnaqqsu f'kull aspett; 2) l-użu ta' enerġiji nodfa, u b'hekk tiġi evitata d-dipendenza esterna, jitnaqqsu l-emissjonijiet u jinħoloq l-impjieg; 3) effiċjenza, li jfisser li l-materja prima u l-enerġija jridu jintużaw b'mod iżjed effiċjenti fil-katina tal-valur kollha ta' prodott jew servizz partikolari; 4) netwerking u l-iskambju tal-aqwa prattika; l-iskambju ta' informazzjoni bejn l-Istati Membri u s-setturi jipprovdi opportunità biex tingħata spinta lill-provvista tal-prodotti u s-servizzi ekoloġiċi, anke lis-swieq lil hinn mill-UE; u 5) aċċess għall-finanzjament, li jfisser li huwa kruċjali li jiġi żgurat li l-finanzjament ikun disponibbli u li titnaqqas il-burokrazija; l-applikazzjonijiet għall-finanzjament għandhom ikun sempliċi, faċli jinftiehmu u anke utli f'oqsma oħra tan-negozju;

18.

jenfasizza li, fil-mument tal-valutazzjoni, hemm differenzi sostanzjali fi ħdan is-suq intern tal-UE bejn is-setturi u l-Istati Membri meta niġu għall-effiċjenza fl-użu tar-riżorsi, u jitlob li jittieħdu passi biex titħeġġeġ l-effiċjenza fl-użu tar-riżorsi permezz tal-iskambju ta' eżempji tal-aqwa prattika u tal-fallimenti;

19.

jenfasizza l-importanza tal-awtoritajiet lokali u reġjonali, b'mod partikolari tal-muniċipalitajiet, fl-implimentazzjoni tal-miżuri indikati fil-punt preċedenti, filwaqt li jiġi analizzat jekk dawn il-miżuri għandhomx jiġu ffinanzjati fil-qafas Komunitarju attwali;

20.

huwa tal-fehma li għandhom jiġu kkunsidrati f'kull stadju tal-katina tal-valur l-isforzi li jsiru għat-titjib tal-effiċjenza fl-użu tar-riżorsi, u li bis-saħħa ta' dan jitnaqqas b'mod sostanzjali l-bżonn għall-materja prima, u li approċċ imsejjes fuq il-katina tal-valur għandu jiġi integrat fl-attivitajiet tas-settur pubbliku u dak privat;

21.

huwa tal-fehma li l-Pjan ta' Azzjoni Ekoloġiku għandu jiffoka fuq miżuri fil-livell tal-UE bil-għan li jallinjaw u jsaħħu l-inizjattivi ekoloġiċi attwali li jintużaw biex jappoġġjaw l-SMEs fil-livell nazzjonali u reġjonali;

22.

jieħu nota tal-enfasi fuq l-enerġija rinnovabbli u l-bijokarburanti, f'liema qasam l-UE għandha biżżejjed informazzjoni, għarfien u teknoloġija, jitlob għat-tneħħija tal-ostakli għall-iżvilupp sabiex jiġu ġġenerati bosta impjiegi ekoloġiċi kkwalifikati u ta' kwalità għolja u jappoġġja r-RŻI f'dan is-settur;

23.

jenfasizza l-importanza tal-mentalità ekoloġika u ż-żieda fil-prevalenza tat-tikkettar b'oriġini fl-UE fl-Istati Membri;

24.

japprova l-għan tal-Kummissjoni Ewropea li fl-2015 twaqqaf Ċentru Ewropew tal-Eċċellenza fl-Effiċjenza fir-Riżorsi u li tikkollegah ma' netwerk ta' sħubijiet fir-reġjuni Ewropej kollha, iżda jitlob lill-Kummissjoni biex, fir-rigward ta' dan iċ-ċentru, tiċċara min se jkunu dawn l-imsieħba u kif ser jintgħażlu;

25.

jenfasizza wkoll il-bżonn li l-awtoritajiet lokali u reġjonali jiġu involuti f'dan il-proċess, għaliex huma l-entitajiet ideali biex jifhmu ċ-ċirkustanzi u l-isfidi speċifiċi fil-livell lokali u reġjonali, u biex jivvalutaw liema huma l-iżjed partijiet interessati lokali rilevanti. F’dan ir-rigward, jeħtieġ li jiġi promoss it-tfassil ta' kartografija li tiddetermina l-potenzjal partikolari ta' kull reġjun bil-għan li l-atturi lokali jiġu megħjuna jidentifikaw il-clusters ta' investiment, il-miżuri biex jappoġġjaw l-impjieg indipendenti u l-ħolqien ta' korsijiet ta' taħriġ u l-ispeċjalizzazzjoni tagħhom b'rabta mal-aspetti differenti tal-ekonomija ekoloġika;

26.

iqis li hemm bżonn li jiġu stabbiliti miri favur id-disinn ambjentalment responsabbli tal-prodotti u jappella għal responsabbiltà ambjentali akbar min-negozji;

27.

jenfasizza li l-għarfien u l-ħiliet meħtieġa għall-ekoloġizzazzjoni tal-ekonomija għandhom ikunu disponibbli għal kulħadd fl-Istati Membri differenti rigward il-kwistjonijiet ewlenin, u li għandhom jittieħdu passi biex jiġi żgurat livell adegwat ta' għarfien fil-livell lokali;

28.

jitlob li jsiru sforzi biex jixtered iżjed il-prinċipju tat-tagħlim tul il-ħajja; fattur ewlieni huwa l-ħakma ta' informazzjoni ġdida, peress li l-ekonomija ekoloġika titlob tibdil u azzjoni trasparenti rigward it-taqsimiet differenti tal-proċess tal-katina tal-valur;

29.

jenfasizza li, attwalment, ma hemmx bilanċ adegwat bejn ix-xogħol u l-ħiliet disponibbli u t-tibdil sistemiku miexi bil-mod; il-proġett ESCO tal-Kummissjoni huwa eżempju tajjeb ta' tentattiv biex l-impjegaturi jitqabblu mal-impjegati li huma kkwalifikati għar-rwol; għal aktar proposti dwar tlaqqigħ tax-xogħol mal-ħiliet, il-KtR jirreferi għall-Opinjoni tiegħu dwar “Qafas ta' kwalità tal-UE għall-antiċipazzjoni tat-tibdil u r-ristrutturar” (2);

30.

jisħaq li l-ekonomija ekoloġika ser tinvolvi t-tranżizzjoni lejn ekonomija ċirkolari u b'emissjonijiet baxxi ta' karbonju, li ser toħloq impjiegi ġodda u innovattivi. Dan ifisser li l-postijiet antiki tax-xogħol ser jiġu sostitwiti minn postijiet ġodda u l-profili okkupazzjonali tal-impjiegi jkollhom jiġu definiti mill-ġdid;

31.

jitlob li tiġi promossa kooperazzjoni iżjed mifruxa bejn l-awtoritajiet, l-SMEs, l-assoċjazzjonijiet u l-istabbilimenti edukattivi, peress li l-ħakma ta' tipi ġodda ta' informazzjoni titlob li l-miżuri u l-istrumenti għall-finanzjament ikunu mmirati u kkoordinati aħjar;

32.

jenfasizza l-importanza tar-riċerka u l-iżvilupp teknoloġiku bħala mezz li jistimula l-implimentazzjoni tal-ekonomija ekoloġika, billi jintuża l-pakkett Ewropew attwali billi, bl-użu ta’ fondi Ewropej eżistenti, tiġi promossa l-kooperazzjoni bejn l-universitajiet, l-SMEs u korpi lokali u reġjonali oħra, ikkoordinati bħala elementi ewlenin ta’ għarfien (edukazzjoni, riċerka u innovazzjoni) f’forom sinergiċi bħalma huma r-raggruppramenti jew il-pjattaformi ta’ innovazzjoni miftuħa għall-iskambju tal-għarfien u l-influwenza reċiproka tal-għarfien;

33.

jitlob li, fid-dawl tal-għarfien importanti u s-setgħat li għandhom f'dan il-qasam, l-awtoritajiet lokali u reġjonali jiġu involuti bis-sħiħ fil-miżuri ta' koordinazzjoni. Diġà jeżistu eżempji tajbin ta' sħubijiet li jintużaw mill-awtoritajiet lokali biex jipprovdu n-negozji u l-assoċjazzjonijiet b'pariri dwar kwistjonijiet marbutin mal-enerġija, fost l-oħrajn dwar kif jiġu identifikati s-sussidji u l-possibbiltajiet ta' finanzjament, rakkomandazzjonijiet dwar miżuri individwali, l-iżvilupp ta' inventarju li jiġbor fih il-provvedituri tat-tagħmir u tas-servizzi, u għajnuna għat-tħejjija tas-sejħiet għall-offerti;

34.

jaqbel mal-Kummissjoni dwar il-bżonn li jiġu kkunsidrati mill-ġdid u aġġornati l-kurrikuli tat-taħriġ u l-edukazzjoni, kif ukoll is-sistemi tal-kwalifiki b'kooperazzjoni mill-qrib mal-Istati Membri u l-awtoritajiet lokali u reġjonali sabiex tiġi kkunsidrata u ffaċilitata t-tranżizzjoni lejn ekonomija ekoloġika u jipproponi li l-proċessi tal-edukazzjoni u t-taħriġ jinkludu mill-inqas modulu wieħed dedikat għal dan is-suġġett. Għandhom ukoll jittieħdu passi biex jiġi eżaminat kif jiġi ssorveljat l-impatt tat-taħriġ, peress li hemm bżonn monitoraġġ fit-tul kemm f'livell ogħla kif ukoll f'wieħed iżjed baxx;

35.

huwa mħasseb dwar l-adegwatezza, il-prevedibbiltà u l-livell ta' taħriġ marbutin mal-ekonomija ekoloġika u l-ħiliet ekoloġiċi fl-Istati Membri differenti. Huwa kruċjali li jiġi żgurat li jinħolqu korsijiet ta' taħriġ fl-Istati Membri li jkopru għarfien ambjentali, legali u dak marbut man-negozju, li għandu jiżgura wkoll li l-uffiċjali jkollhom id-data u l-ħiliet meħtieġa;

36.

jisħaq li l-kwistjoni tal-ħiliet ġodda hija partikolarment rilevanti għaż-żgħażagħ, li għandhom jitħejjew aħjar għall-impjiegi tal-ġejjieni b'mod ġenerali, u l-impjiegi ekoloġiċi b'mod partikolari;

37.

jenfasizza l-bżonn għal perspettiva usa' u li jiġi kkunsidrat l-impatt fit-tul sabiex il-ħiliet ambjentali jkunu jistgħu jiġu kkombinati ma' kompetenzi sodi marbutin man-negozju. Mentalità miftuħa għall-ħtiġijiet tal-ambjent u tan-negozji għandha tibda titrawwem fost it-tfal tal-iskola, peress li l-professjonijiet il-ġodda ser jitolbu kemm ħiliet fix-xjenzi naturali, kif ukoll dawk tekniċi u matematiċi. Din is-sensibilizzazzjoni għandha wkoll tingħata prominenza speċjali fi programmi ta’ edukazzjoni għall-adulti;

38.

jinsab imħasseb dwar il-fatt li ftit hemm SMEs fl-Ewropa li huma konxji tal-possibbiltà li jużaw ir-riżorsi b'mod iżjed effiċjenti, jew tal-benefiċċji ekonomiċi li jistgħu jiksbu meta jisfruttaw dan l-għarfien fil-prattika;

39.

jissuġġerixxi li l-awtoritajiet lokali, reġjonali u nazzjonali li għandhom setgħat fiskali jimplimentaw, anke permezz ta' taxxi u imposti iżjed baxxi, l-akkwist pubbliku u t-tnaqqis tat-taxxi, mekkaniżmi ta' diskriminazzjoni pożittiva favur l-intrapriżi li japplikaw il-prinċipji u l-kunċetti tal-ekonomija ekoloġika, fil-kuntest tar-responsabbiltà soċjali korporattiva;

40.

jitlob li l-informazzjoni dwar l-opportunitajiet ta' taħriġ u finanzjament tkun adattata għall-SMEs fis-setturi differenti, peress li mhux bilfors japprezzaw il-bżonn għal taħriġ assoċjat mal-ekonomija ekoloġika;

41.

jitlob li jiġu stabbiliti inċentivi għall-ikkompletar tal-ħiliet, għaliex huwa essenzjali li jinkisbu informazzjoni u għarfien ġodda. Għandu jiġi mifhum kif il-materjali kollha li jistgħu jiġu riċiklati jistgħu jintużaw għal skopijiet oħra u jinbidlu f'materjali ġodda u innovattivi, u x'inhuma r-regoli u r-rekwiżiti;

42.

josserva li l-ispejjeż tal-materja prima żdiedu f'75 % tal-SMEs fl-UE matul perjodu ta' ħames snin, u li l-miżuri għall-ittestjar ta' metodi ġodda u t-tixrid sistematiku tagħhom huma meħtieġa mill-iżjed fis sabiex tiġi protetta l-kompetittività tan-negozji;

43.

jirrakkomanda li s-setturi differenti jeżaminaw f'iżjed dettall l-opportunitajiet għal kooperazzjoni msaħħa, kif ukoll opportunitajiet biex jisfruttaw l-għarfien fis-servizzi rispettivi tagħhom, il-prodotti jew il-komponenti tagħhom. Dan ser jipprovdi opportunitajiet intraprenditorjali lin-negozji ż-żgħar b'mod partikolari, li jistgħu jiffurmaw entitajiet akbar permezz tan-netwerking. Għandhom jinġabru eżempji, u l-aqwa prattika għandha tixtered fl-Istati Membri;

44.

jirrakkomanda li tiġi eżaminata kull opportunità biex l-SMEs jiġu megħjuna jintroduċu mill-ġdid materja prima użata u żejda fil-katini tal-produzzjoni u l-valur tagħhom, jew anke bħala parti mill-produzzjoni ta' negozju ieħor. Eżempju ta' dan huwa l-kunċett ta' sistema tal-enerġija f'ċiklu magħluq adattat għaċ-ċirkustanzi lokali, fejn l-iskart, l-enerġija mitlufa, in-nutrijenti u s-CO2 jintużaw u jiġu riċiklati lura fil-produzzjoni tal-enerġija u l-ikel;

45.

josserva l-bżonn li titħeġġeġ il-kooperazzjoni intraprenditorjali bejn is-settur tal-ikel organiku u setturi oħra potenzjalment marbutin miegħu: ir-restoranti u s-servizzi għall-forniment tal-ikel u x-xorb, it-turiżmu rurali, l-agrituriżmu, it-turiżmu marbut man-natura, il-produzzjoni ta' imballaġġ sostenibbli u/jew artiġjanali, il-kostruzzjoni sostenibbli, il-produzzjoni ta' ikel tradizzjonali, eċċ.;

46.

jirrakkomanda li ssir kampanja ta' sensibilizzazzjoni dwar l-iżvilupp sostenibbli orjentata lejn iċ-ċittadini tal-UE, li tenfasizza l-opportunitajiet li għandu kull wieħed u waħda minnha biex individwalment ninfluwenzaw l-ammont u l-ipproċessar tal-iskart;

47.

josserva li l-awtoritajiet lokali għandhom rwol kruċjali x'jaqdu fil-ksib tal-miri tal-UE marbutin mal-emissjonijiet. Eżempju tajjeb huwa l-proġett Finlandiż “Kohti hiilineutraalia kuntaa” (“Lejn belt newtrali fl-użu tal-karbonju”), li l-għan tiegħu huwa li l-atturi lokali – il-kunsill lokali, ir-residenti u n-negozji – jimpenjaw ruħhom li jnaqqsu l-emissjonijiet tal-gassijiet b'effett ta' serra. Il-proġett għandu l-għan li jidentifika approċċi ġodda u innovattivi li joħolqu impjiegi lokali, u li huma bbażati fuq l-użu sostenibbli ta' riżorsi naturali lokali u effiċjenza akbar fl-użu tal-enerġija;

48.

jirrakkomanda li jiġu żviluppati l-kunċetti tal-iskambju tal-ekonomija u tal-ekonomija tas-servizzi li permezz tagħhom, minflok l-idea ta' sjieda tradizzjonali, il-konsumaturi jistgħu jixtru l-prodotti bħala servizz u mbagħad jeħduhom lura fi tmiem iċ-ċiklu ta' ħajjithom għand il-produttur bil-għan li jerġgħu jintużaw;

49.

jirrakkomanda li jiġu żviluppati metodi aħjar ta' kalkolu li jipprovdu kejl iżjed affidabbli tal-konsum tal-enerġija;

50.

jifhem li l-ħolqien ta' prodotti li jirrispettaw l-ambjent iżda fl-istess ħin jirnexxu mil-lat kummerċjali ser jitlob investiment finanzjarju sostanzjali kemm fl-iżvilupp u t-tnedija tal-prodotti kif ukoll fir-reġistrazzjoni tal-prodotti u s-servizzi ġġenerati mill-iżvilupp tal-prodotti inkwistjoni. Fil-ġejjieni, il-leġislazzjoni ser ikollha tkun kapaċi tipprovdi opportunità għall-iżvilupp rapidu ta' innovazzjonijiet ġodda, pjuttost milli tirrestrinġih jew tillimitah;

51.

jissuġġerixxi li jiġi promoss l-użu ta’ sistemi ta’ ġestjoni ambjentali, b’mod partikolari s-sistema Ewropea tal-EMAS, bil-għan li tiġi inkorporata l-kultura ekoloġika fit-teħid tad-deċiżjonijiet mill-kumpaniji, u b’hekk isiru iżjed effettivi kemm il-funzjonament tagħhom kif ukoll l-informazzjoni pprovduta lill-pubblika dwar il-prestazzjoni ambjentali tagħhom;

52.

jaqbel mal-Kummissjoni li l-Istati Membri jistgħu wkoll inaqqsu l-kost lavorattiv billi jużaw id-dħul mill-irkantar fil-qafas tal-iskema tal-UE għan-negozjar tal-emissjonijiet (ETS), iżda jenfasizza li l-ETS fil-forma attwali tagħha mhijiex kompletament effettiva;

53.

jilqa' b'sodisfazzjon l-enfasi tal-inizjattiva fuq il-promozzjoni tal-intraprenditorija, u jtenni l-fehma tiegħu li l-Ewropa għandha tippreżenta l-intraprenditorija liż-żgħażagħ bħala għażla ta' karriera possibbli u promettenti;

54.

huwa tal-fehma li, flimkien mal-ekonomija ekoloġika, l-intraprenditorija soċjali tista' tiġi kkunsidrata bħala alternattiva siewja għall-modi tradizzjonali ta' kif isir in-negozju kemm għal skop ta' qligħ kif ukoll mhux; f'dan ir-rigward, jilqa' b'sodisfazzjon ir-rieda tal-Kummissjoni li tiffaċilita l-aċċess tan-negozji soċjali għall-finanzjament;

55.

huwa tal-fehma li permezz tal-innovazzjoni u d-disinn mill-ġdid tal-prodotti u l-mudelli tal-produzzjoni u n-negozju, l-intrapriżi jistgħu jnaqqsu l-użu ta' materja prima għalja u jnaqqsu l-iskart;

56.

jemmen li l-introduzzjoni ta' sistema Ewropea uniformi għaċ-ċertifikazzjoni tal-ekonomija ekoloġija tkun ta' benefiċċju għan-negozju b'mod partikolari, u fuq perjodu twil ta' żmien tipprovdi l-prevedibbiltà, peress li jkunu magħrufin minn qabel l-interpretazzjonijiet legali ta' firxa ta' oqsma differenti ta' kunflitt legali;

57.

josserva li l-materja prima, l-ilma u l-enerġija jirrappreżentaw 50 % tal-ispejjez totali kollha tal-manifattura tan-negozji (3). It-tnaqqis ta' din iż-żieda eċċessiva fl-ispejjeż tal-intrapriżi permezz ta' reviżjoni tas-sistema tal-produzzjoni, tat-trasport u d-distribuzzjoni tal-enerġija, u żieda fl-effiċjenza fl-użu tar-riżorsi u l-enerġija jistgħu jiġġeneraw iffrankar sostanzjali ħafna. Din is-sitwazzjoni tidher ferm iżjed rilevanti meta wieħed iqis iż-żieda fl-ispejjez tal-enerġija u bosta materja prima f'dawn l-aħħar snin;

58.

jirrakkomanda li l-operaturi fil-livell lokali u reġjonali jkunu infurmati b'mod immirat dwar il-potenzjal tas-sorsi ta' finanzjament tal-perjodu ta' programmazzjoni 2014-2020 u li dan il-finanzjament jintuża biex jgħin lill-SMEs “ekoloġiċi”: bħala eżempji nsibu l-FEŻR, l-FSE, il-FAEŻR, il-programm LIFE, il-Faċilità ta' Finanzjament Kapitali Naturali (Natural Capital Financing Facility), l-Istrument ta' Finanzjament Privat għall-Effiċjenza fl-Użu tal-Enerġija (Private Financing for Energy Efficiency Instrument), il-COSME u l-Orizzont 2020;

59.

iqajjem il-kwistjoni tat-tranżizzjoni lejn taxxi u imposti ambjentali bħala strumenti biex jixprunaw il-kondiviżjoni tar-responsabbiltà ambjentali li, skont il-Kummissjoni, huma inqas ta' ħsara għat-tkabbir u jwasslu kemm għal prestazzjoni ambjentali aħjar kif ukoll għal livell ogħla ta' impjieg. L-Istati Membri li ppruvaw it-taxxi ambjentali jistgħu jaqsmu l-esperjenzi tagħhom b'mod iżjed mifrux, u Stati Membri oħra jistgħu jsegwu din il-prattika;

60.

josserva li l-Kummissjoni u l-Istati Membri żviluppaw indikaturi u għodod applikabbli li jiżguraw li s-swieq fil-livell tal-UE u fil-livell nazzjonali u reġjonali jinftiehmu aħjar. Bil-għan li jagħmlu impatt, l-Istati Membri għandhom jużaw moduli armonizzati tal-UE fl-implimentazzjoni u meta jittrasferixxu d-data;

61.

itenni l-osservazzjoni tiegħu li sabiex jinħoloq ambjent favorevoli għan-negozji, l-awtoritajiet pubbliċi jridu jinvestu f'infrastruttura ta' kwalità għolja fl-oqsma tat-trasport u tat-teknoloġija diġitali, fost l-oħrajn, u sabiex jiksbu dan għandhom bżonn l-appoġġ tal-Unjoni Ewropea;

62.

jifhem li l-SMEs għandhom nuqqas ta' għarfien, netwerks u ħiliet tal-IT, u għalhekk isibuha diffiċli jaħtfu l-opportunitajiet ipprovduti mill-prevenzjoni tal-iskart u l-użu mill-ġdid tal-prodotti, il-materja prima u l-iskart bħala parti minn katini differenti tal-valur;

63.

jenfasizza li l-ispejjeż għaljin marbutin mal-investiment inizjali jistgħu jkomplu jnaqqsu l-interess fl-implimentazzjoni ta' attivitajiet tan-negozju relatati mal-użu mill-ġdid u r-riċiklaġġ tar-riżorsi, peress li l-SMEs iridu jiġġudikaw jekk l-attivitajiet humiex vijabbli mil-lat kummerċjali. Għaldaqstant, għandhom jittieħdu miżuri leġislattivi u dawk marbutin mat-tassazzjoni, kif ukoll tipi oħra ta' għajnuna, biex inaqqsu l-impatt tagħhom;

64.

huwa tal-fehma li jeħtieġ li jiġu adottati b'mod usa' u jixterdu fl-Istati Membri kollha standards ekoloġiċi li jirrispettaw il-bijodiversità u jippromovu politiki għall-mitigazzjoni u l-adattament għat-tibdil fil-klima, u li għal dan il-għan hemm bżonn komunikazzjoni regolari mal-konsumaturi;

65.

jirrikonoxxi li l-prinċipji miġbura fl-istandards tal-ekonomija ekoloġika fil-livell tal-UE għandhom jiġu ankrati fl-attivitajiet kollha tal-SMEs, iżda huwa wkoll kruċjali li l-utenti finali tal-prodotti, jiġifieri l-konsumaturi, jixtru prodotti ċċertifikati bħala responsabbli mil-lat ambjentali;

66.

josserva li katina tal-valur li tkun iżjed ekoloġika, u li tinvolvi l-manifatturar mill-ġdid, it-tiswijiet, il-manutenzjoni, ir-riċiklaġġ u d-disinn ekoloġiku, tista' tipprovdi opportunitajiet kummerċjali konsiderevoli għal bosta SMEs, iżda l-ostakli leġislattivi, istituzzjonali, tekniċi u kulturali jimpedixxu lill-SMEs milli jibbenefikaw minn dan u għalhekk dawn l-ostakli għandhom jitneħħew jew, jekk mhuwiex possibbli li jitneħħew, għandhom jinstabu modi biex jingħelbu.

28.4.2015   

MT

Il-Ġurnal Uffiċjali tal-Unjoni Ewropea

C 140/28

1.

ifakkar li l-politika ta' koeżjoni tal-Unjoni Ewropea għandha tkompli taqdi rwol primordjali fir-rilanċ tal-ekonomija tar-reġjuni Ewropej;

2.

itenni, wara l-opinjoni tal-Kumitat dwar il-proposta ta' regolament ġenerali dwar il-fondi tal-qafas strateġiku komuni (1), l-oppożizzjoni tiegħu fil-prinċipju għal kull kundizzjoni makroekonomika imposta fuq l-implimentazzjoni tal-politika ta' koeżjoni u b'mod aktar preċiż għar-rabta bejn l-effikaċja tal-Fondi Ewropej strutturali u tal-Investiment u governanza ekonomika tajba. Fil-fatt, din ir-rabta sserraħ fuq ipoteżi falza li skontha l-awtoritajiet lokali u reġjonali huma responsabbli għar-riżultati baġitarji daqs l-awtoritajiet nazzjonali;

3.

barra minn hekk, ifakkar fit-talba tal-Kumitat Ewropew tar-Reġjuni li titfassal white paper dwar il-politika ta' koeżjoni territorjali bil-għan speċifiku li tniedi mill-ġdid id-dibattitu dwar il-kejl tal-kwalità tal-ħajja u l-kwalità tat-tkabbir ekonomiku lil hinn mis-sempliċi PDG; jirrakkomanda li jitħejjew indikaturi ġodda iżjed affidabbli li jirriflettu aħjar l-aspettattivi tas-soċjetà;

4.

barra mill-oppożizzjoni tiegħu għall-prinċipju tal-kundizzjonalità makroekonomika, għandu d-dubji dwar il-valur miżjud ta' dawn il-linji gwida, li mhumiex għajr parafrażi tal-Artikolu 23 tar-Regolament 1303/2013;

5.

iqis li l-awtoritajiet lokali u reġjonali jispiċċaw penalizzati intortament bi programmazzjoni mill-ġdid peress li m'humiex responsabbli għad-defiċit pubbliku nazzjonali eċċessiv, peress li spiss huma għandhom obbligu kostituzzjonali li jżommu l-baġits tagħhom f'bilanċ. Għaldaqstant, id-defiċit globali tal-finanzi pubbliċi sottonazzjonali tal-UE-27, li jikkorrispondu għal 0,1 % tal-PDG fl-2007, kien ta' madwar 0,8 % tal-PDG fl-2009 u l-2010. Anke jekk id-deterjorazzjoni tal-finanzi pubbliċi sottonazzjonali kienet aktar ċara f'xi pajjiżi li fihom id-defiċit żdied b'aktar minn 0,5 punti perċentwali bejn l-2007 u l-2013, hija tibqa' bla kejl komuni ma' dik tal-baġits nazzjonali (2);

6.

jenfasizza li sitwazzjoni kumparabbli ħafna tapplika għad-dejn tal-awtoritajiet lokali u reġjonali peress li (kif tirrikonoxxi l-Kummissjoni fis-6 rapport dwar il-koeżjoni), it-tkabbir tad-dejn pubbliku jiġi prinċipalment mill-attivitajiet tal-amministrazzjoni ċentrali. Id-dejn globali tal-awtoritajiet lokali u tar-reġjuni mingħajr saħħa leġislattiva importanti għadu inqas minn 10 % tal-PDG fl-Istati Membri kollha. Madankollu id-dejn jibqa' preokkupanti f'għadd ta' pajjiżi;

7.

Iqis li, skont għadd ta' studji, l-effikaċja tan-nefqa pubblika hija aktar marbuta mill-viċin mal-effikaċja u l-governanza tajba (3) milli ma' fatturi makroekonomiċi u barra minn hekk, li l-kwalità tal-azzjoni pubblika għandha rwol determinanti fuq il-kapaċità tal-politika tal-koeżjoni li jkollha impatt fuq it-tkabbir. Jinnota wkoll li r-regolamenti tas-“Six-Pack” diġà jipprevedu sanzjonijiet ibsin fil-każ ta' nuqqas ta' konformità tar-regoli ta' stabbiltà makroekonomika. Għaldaqstant jiddubita kemm is-sanzjonijiet permezz tat-twaqqif tal-Fondi Strutturali jkunu effikaċi peress li jikkastigaw, fost affarijiet oħra, l-istess nuqqas darbtejn;

8.

jaħseb ukoll li fil-kuntest tas-“Six-Pack” għandu jiġi rivedut il-metodu ta' kalkolu tad-“defiċit strutturali”, sabiex jitqiesu l-karatteristiċi proprji tal-ekonomiji nazzjonali u tad-differenzi strutturali tan-nefqa pubblika;

9.

huwa serjament imħasseb dwar ir-riskju li l-miżuri previsti għall-perjodu 2014-2020 jistgħu jkunu ta' piż fuq it-tkabbir Ewropew u l-proġetti ta' żvilupp ekonomiku u soċjali billi joħolqu insigurtà dwar il-programmazzjoni tal-FEŻR u l-FSE mill-2015; l-ippjanar ta' dawn il-programmi diġà huwa mhedded biżżejjed mid-dewmien fl-ipprogrammar li rriżulta mill-ikkompletar tard tan-negozjati dwar il-qafas finanzjarju pluriennali u d-diffikultà li qed jiffaċċjaw l-Istati Membri u l-awtoritajiet lokali u reġjonali biex jilħqu r-rekwiżit ta' kundizzjonalità ex-ante;

10.

f'dan ir-rigward jenfasizza r-rwol li qed jikber u jsir aktar importanti tal-awtoritajiet lokali u reġjonali, li jwettqu madwar 33 % tal-infiq pubbliku, ftit aktar minn 2 punti fuq l-aħħar żewġ deċenji (1995-2013), jiġifieri 16 % tal-PDG. Jekk il-piż tagħhom ivarja skont il-pajjiż, skont l-organizzazzjoni istituzzjonali tagħhom, huma għandhom rwol ħafna aktar importanti mill-amministrazzjonijiet ċentrali fl-offerta ta' servizzi pubbliċi u fuq kollox għan-nefqiet meħtieġa għat-tkabbir kif ġew definiti mill-istess Kummissjoni (ara s-6 rapport ta' koeżjoni), fl-oqsma tal-edukazzjoni, il-kura tas-saħħa, il-ħarsien tal-ambjent, it-trasport, ir-riċerka u l-iżvilupp, kif ukoll l-enerġija;

11.

f'dan ir-rigward jitlob ir-reviżjoni tal-klawsola tal-investiment biex tkun tista' sseħħ is-separazzjoni tar-rendikonti tal-investimenti reġjonali u nazzjonali li jsiru taħt il-kofinanzjament tal-fondi Ewropej (Fondi Ewropej Strutturali u ta' Investiment jew Faċilità Nikkollegaw l-Ewropa) mill-kalkoli tad-defiċits pubbliċi nazzjonali fil-qafas tas-Semestru Ewropew;

12.

jiġbed l-attenzjoni għall-kontradizzjoni intrinsika bejn, minn naħa, id-dispożizzjonijiet dwar il-kundizjonalità makroekonomika u, min-naħa l-oħra, id-dispożizzjonijiet tal-Patt ta' Stabbiltà u Tkabbir, li jawtorizzaw ċerta flessibilità fl-applikazzjonijiet tagħhom fil-każ ta' ċirkostanzi eċċezzjonali u temporanji, definiti mir-Regolament Nru 1177/2011, kif ukoll il-konsiderazzjonijiet tal-Kummissjoni li skonthom “il-qafas fiskali tal-UE joffri biżżejjed lok għall-bilanċ tar-rikonoxximent tal-ħtiġijiet ta' investiment pubbliku produttiv mal-għanijiet tad-dixxiplina fiskali” (4);

13.

f'dan il-kuntest ifakkar fit-tħassib tiegħu dwar il-qafas ġdid tal-kontabilità SEC 2010 tal-Eurostat, li daħal fis-seħħ f'Settembru 2014, u li ma jiddistingwix bejn l-infiq u l-investiment u li joħloq għall-awtoritajiet lokali u reġjonali obbligu li japplikaw limiti massimi ta' investiment fis-sena u għal kull persuna. Fil-fatt hemm il-periklu li dawn il-limiti jwaqqfu lill-awtoritajiet lokali u reġjoanli ta' ċerti Stati Membri milli jakkwistaw il-kofinanzjament neċessarju għall-proġetti rilevanti tal-Fondi Strutturali u tal-Investiment Ewropej. Għaldaqstant jistieden lill-Kummissjoni Ewropea biex tippreżenta rapport dwar id-dħul fis-seħħ tas-SEC 2010;

14.

ifakkar li l-awtoritajiet lokali u reġjonali ġew milqutin tliet darbiet mill-miżuri ta' konsolidazzjoni baġitarja adottati fil-livell nazzjonali b'risposta għall-kriżi ekonomika u finanzjarja. L-ewwel, dawn il-miżuri xekklu b'mod qawwi l-kapaċità tal-awtoritajiet sottonazzjonali milli jikkontribwixxu fl-investimenti pubbliċi, li kienu medja ta' 2,3 % tal-PDG bejn l-2002 u l-2007 fl-UE-27 u li naqsu għal 1,8 % tal-PDG, iżda fuq kollox naqsu f'termini reali b'7,2 % fl-2010, 5,9 % fl-2011, 3,3 % fl-2012 u bi 8,6 % fl-2013;

15.

it-tieni, peress li t-trasferimenti kurrenti u t-trasferimenti f'kapital mill-amministrazzjonijiet ċentrali jiffurmaw is-sorsi ewlenin tal-awtoritajiet lokali u reġjonali fi kważi l-pajjiżi kollha tal-UE, id-dħul tagħhom kellu tnaqqis importanti b'effett immedjat fuq id-defiċits fil-baġits tagħhom. Fil-każ tar-reġjuni Spanjoli, dan kien aktar serju peress li huma kellhom tnaqqis ta' 62 % f'termini reali tad-dħul tagħhom wara tnaqqis qawwi tat-trasferimenti mill-amministrazzjoni ċentrali (45 %), minn naħa u ż-żieda sostanzjali ta' trasferimenti mir-reġjuni lejn l-amministrazzjoni ċentrali (minn bilkemm EUR 1,4 biljun għal EUR 10,1 biljun bil-prezzijiet tal-2005);

16.

it-tielet, skont l-OECD, il-miżuri ta' konsolidazzjoni baġitarja naqqsu aktar il-kapaċità tagħhom ta' investiment u l-awtoritajiet lokali u reġjonali kellhom ukoll jiffaċċjaw id-deterjorazzjoni tal-kundizzjonijiet tas-self;

17.

jiġbed l-attenzjoni għall-importanza tal-kontribut tal-FESI għall-investiment pubbliku fi żminijiet ta' kriżi peress li dan għadda minn 11,5 % tal-investiment pubbliku tal-UE (FGKF) fl-2007, għal 18,1 % fl-2013. Il-kontribut tiegħu jirrappreżenta aktar minn 75 % tal-investiment pubbliku f'xi pajjiżi. Bejn il-perjodu 2007-2013, l-allokazzjonijiet taħt il-Fondi Strutturali u l-Fondi ta' Koeżjoni u l-kofinanzjament nazzjonali assoċjati, irrappreżentaw annwalment u b'medja madwar 0,55 % tal-PDG tal-UE 27;

18.

iqis kuntradittorja l-introduzzjoni ta' theddida fuq il-krediti tal-FEŻR u tal-FSE meta l-Istati Membri jinsabu f'diffikultà ekonomika. It tnaqqis fl-infiq pubbliku ma jwassalx għal tnaqqis awtomatiku fid-defiċits pubbliċi u jista' jkollu effetti negattivi fil-qasam soċjali;

19.

huwa jitħasseb dwar id-deterjorazzjoni potenzjali fis-sitwazzjoni tal-finanzi pubbliċi nazzjonali u sottonazzjonali fil-każ li jitwaqqfu l-ħlasijiet u mhux biss l-impenji. Barra minn hekk, ifakkar li r-rabta bejn il-Fondi Strutturali u l-governanza ekonomika tajba tad-defiċits pubbliċi diġà wriet il-limiti tagħha fl-applikazzjoni oriġinali tal-fondi ta' koeżjoni, peress li s-sanzjonijiet marbutin mad-defiċits pjuttost għandhom it-tendenza li jiggravaw is-sitwazzjoni ekonomika tal-Istati kkonċernati;

20.

itenni l-istedina tiegħu lill-Kummissjoni Ewropea biex tippreżenta white paper li tistabbilixxi tipoloġija fil-livell tal-UE għall-kwalità tal-investiment pubbliku fil-kontijiet tal-infiq pubbliku skont l-effetti fit-tul tiegħu. Tipoloġija ta' dan it-tip tista' twassal għal evalwazzjoni ddettaljata tal-kwalità tal-investimenti pubbliċi fil-kalkolu tad-defiċit baġitarju jew ukoll li jitqiesu aħjar iċ-ċiklu jew il-kuntest makroekonomiku reali;

21.

jiddubita kemm il-kontenut u l-modalitajiet tal-programmazzjoni mill-ġdid huma pożittivi b'mod sistematiku u jikkontribwixxu biex tissaħħaħ il-kompetittività fit-tul tal-pajjiżi u jorjentaw l-iżvilupp ekonomiku mill-ġdid lejn is-setturi tal-futur. L-analiżi ta' dak li sar mill-2009 turi li l-urġenza tas-sitwazzjoni wasslet lill-Kummissjoni u lill-Istati Membri biex jippromovu l-proġetti li kienu diġà għaddejjin, ħalli jħaffu l-konsum tal-krediti u jwasslu għal-likwidità. Dawn l-għażliet b'mod globali għamluha possibbli li l-parti dedikata lir-riċerka, l-iżvilupp u l-innovazzjoni tikber, b'appoġġ ġeneriku lill-intrapriżi, l-enerġiji rinnovabbli, lir-rotot u lis-suq tax-xogħol b'miżuri li kienu ffokati b'mod aktar speċifiku fuq l-impjieg taż-żgħażagħ. Iżda setgħu wkoll wasslu biex jiġu traskurati ċerti setturi b'potenzjal għat-tkabbir bħas-servizzi tal-ICT, l-investiment fl-ambjent, il-ferroviji, l-edukazzjoni, it-taħriġ u t-tisħiħ tal-kapaċitajiet;

22.

huwa mħasseb għan-nuqqas ta' operabbiltà tal-limiti ġuridiċi tal-programmazzjoni mill-ġdid bħal dawk li jirriżultaw mill-obbligu tar-rispett tad-direzzjonijiet tematiċi, tal-bilanċ FSE-FEŻR, eċċ.;

23.

ma jqisx realistika wisq l-implimentazzjoni ta' dispożittiv li ma jkunx applikabbli ħlief bejn l-2015 u l-2019;

24.

iqis li l-programmazzjoni mill-ġdid m'hijiex affattu eżerċizzju faċli u ħafif biex issir, anzi, fuq il-bażi tal-esperjenza tal-aħħar ħames snin marbutin mas-6 rapport dwar il-koeżjoni li wassal għall-mobilizzazzjoni ta' riżorsi umani kbar fit-8 Stati Membri konċernati, inklużi dawk tal-Kummissjoni Ewropea, nipprevedu li ser tkun tiswa ħafna flus u tkun iebsa biex titmexxa mill-amministrazzjonijiet nazzjonali u l-awtoritajiet lokali u reġjonali;

25.

jibża' minn żieda fil-burokrazija fl-eżerċizzju tal-programmazzjoni mill-ġdid, peress li jrid jiġi akkumpanjat mill-istess obbligi bħat-tfassil tal-ftehim ta' sħubija (indikaturi tal-prestazzjoni, kundizzjonijiet, eċċ...) li jwassal għall-obbligu tal-impjieg ta' esperti ġodda u l-ħolqien ta' spejjeż ġodda. Żieda sproporzjonata fix-xogħol imposta fuq l-impjegati tista' twassal biex tonqos l-effiċjenza fuq ix-xogħol jew għal sitwazzjoni li tkun l-oppost ta' dik mistennija;

26.

jiddeplora l-piż żejjed amministrattiv marbut mal-eżerċizzju tal-programmazzjoni mill-ġdid li jagħfas mhux biss fuq l-amministrazzjonijiet Ewropej u nazzjonali iżda wkoll, u fuq kollox, fuq dawk tar-reġjuni peress li huma huma l-awtoritajiet li jiġġestixxu. Dan jista' joħloq spejjeż addizzjonali kbar minħabba fl-urġenza tar-risposta li tkun trid tingħata lit-talbiet tal-Kummissjoni u l-ħtieġa li jinstabu impjegati supplimentari;

27.

jiddeplora ċ-ċentralizzazzjoni kemm nazzjonali kif ukoll Ewropea, li hemm wara l-provvediment kollu kemm hu bil-preżenza qawwija tal-Kummissjoni. Bla dubju ta' xejn, iż-żmien qasir tal-iskadenzi tal-programmazzjoni mill-ġdid ser iwassal biex jiġu mhedda l-prinċipji tas-sħubija u ta' governanza f'diversi livelli li huma parti integrali mill-politika ta' koeżjoni;

28.

jenfasizza l-impatt negattiv fuq l-opinjoni pubblika ta' sanzjoni bħal din li bla dubju twassal biex tiżdied l-ostilità fir-rigward tal-UE;

29.

fl-aħħar jesprimi s-sorpriża tiegħu għall-fatt li l-kontroll demokratiku tal-Parlament Ewropew fuq din is-sistema l-ġdida ta' kundizzjonalità makroekonomika ma jistax isir b'mod aktar komplet minħabba f'fatturi li jidhru dejjem aktar teknokratiċi partikolarment fir-rigward tal-programmazzjoni mill-ġdid tal-fondi. Għaldaqstant jappella b'fermezza lill-Kummissjoni Ewropea biex terġa' tpoġġi lill-Parlament Ewropew fiċ-ċentru tat-teħid tad-deċiżjonijiet f'dak kollu li jirrigwarda l-implimentazzjoni tal-prinċipju tal-kondizzjonalità makroekonomika, b'rabta mal-Kumitat Ewropew tar-Reġjuni.

28.4.2015   

MT

Il-Ġurnal Uffiċjali tal-Unjoni Ewropea

C 140/32

1.

huwa tal-fehma li d-demokrazija, id-drittijiet tal-bniedem u l-istat tad-dritt huma t-tliet pilastri fundamentali li fuqhom għandu jistrieħ kull ordni ġuridiku ta' kwalunkwe tip u forma. Id-demokrazija hija “dritt kollettiv”, id-drittijiet tal-bniedem huma drittijiet individwali inaljenabbli li għandhom ikunu garantiti taħt kull ċirkostanza, anke meta d-demokrazija fis-seħħ ma tkunx sħiħa jew perfetta. Il-prinċipji tal-istat tad-dritt u l-prattiki li jirriżultaw huma essenzjali għad-demokrazija u l-garanzija tad-drittijiet tal-bniedem. Għalhekk jilqa' b'sodisfazzjon kbir il-proposta tal-Kummissjoni li jitwaqqaf qafas li jħares l-istat tad-dritt fl-UE. Dan huwa essenzjali bħala bażi tal-fiduċja reċiproka bejn l-Istati Membri kif ukoll bejniethom u ċ-ċittadini tal-UE għall-integrazzjoni Ewropea. Qafas komuni ta' dan it-tip huwa ta' ġid mhux biss għall-Istati Membri iżda wkoll għall-awtoritajiet lokali u reġjonali, peress li fil-prattika dawn tal-aħħar iġorru l-piż tal-implimentazzjoni tad-drittijiet u l-libertajiet fundamentali;

2.

jirrimarka li d-drittijiet tal-bniedem, bħala drittijiet fundamentali marbuta mar-rispett għad-dinjità tal-persuna, jiġu qabel kull entità istituzzjonali u, essenzjalment, jieħdu prijorità fuqhom;

3.

jinnota li għad li m'hemm l-ebda definizzjoni unika tal-istat tad-dritt, hemm tradizzjoni legali Ewropea dwar dan il-kunċett ċentrali li jistrieħ fuq tliet prinċipji bażiċi: (1) l-obbligi legali ta' kull ċittadin u l-applikazzjoni tagħhom għandhom jiġu appoġġjati mil-liġi u ma jistgħux jiddependu minn deċiżjoni arbitrarja jew unilaterali tal-awtorità eżekuttiva jew kwalunkwe setgħa diskrezzjonali oħra – (2) it-tilwim bejn iċ-ċittadini u s-setgħa eżekuttiva għandhom jiġu riżolti mil-liġi ordinarja permezz ta' setgħa ġudizzjarja newtrali u indipendenti – (3) id-drittijiet fundamentali taċ-ċittadini (il-libertà personali, ta' opinjoni, ta' assoċjazzjoni...) għandhom jiġu rispettati u definiti b'mod ċar filwaqt li jissejsu fuq bażi leġislattiva ċara u ma jkunux dipendenti minn kunċett, dikjarazzjoni jew garanzija kostituzzjonali mċajpra jew interpretazzjonijiet arbitrarji. Dawn il-prinċipji għandhom żewġ kampi ta' applikazzjoni: minn naħa l-gvernijiet iridu jaqdu l-kompetenzi tagħhom b'konformità ma' liġijiet u regoli pubblikati u miktubin b'lingwaġġ ċar, abbażi ta' prinċipji legali b'bażi soda li jiġu eżekwiti b'mod ġust u miftuħ, u min-naħa l-oħra l-gvernijiet iridu jikkonformaw mal-Kostituzzjoni tagħhom u l-istess liġi li tirregolahom;

4.

jemmen li l-prinċipju importanti tas-sussidjarjetà (Artikolu 5(3) tat-TUE) għandu jservi wkoll bħala bażi u linja gwida fit-tfassil tal-approċċ tal-governanza f'diversi livelli għall-protezzjoni tad-drittijiet fundamentali;

5.

jirrimarka li l-Konvenzjoni Ewropea għad-Drittijiet tal-Bniedem u l-Karta tad-Drittijiet Fundamentali tal-Unjoni Ewropea, li huma l-iktar qafas avvanzat f'dan il-qasam, minn meta ġew adottati ilhom iservu bħala l-bażi vinkolanti għall-Unjoni stess, l-Istati Membri kollha u kull livell ta' gvern ibbażat fuq il-prinċipji tal-istat tad-dritt u l-infurzar tiegħu;

6.

jinnota li l-kunċett tal-governanza f'diversi livelli kif ġie żviluppat mill-UE iżda anke b'mod usa' mill-Kunsill tal-Ewropa, huwa ispirat mill-fatt li saret evoluzzjoni neċessarja u li għadha għaddejja f'termini ta' “governanza” fl-UE, minn mudell “minn fuq għal isfel” lejn mudell iktar inklużiv, fejn iridu jitlaqqgħu ż-żewġ dimensjonijiet tas-sussidjarjetà: dik “vertikali” fejn il-parteċipazzjoni, ir-responsabbiltà konġunta u s-sħubija tar-rappreżentanti eletti fil-livell reġjonali u lokali huma msaħħa, u d-dimensjoni “orizzontali” fejn ir-responsabbiltà konġunta tingħata u tittieħed mill-atturi l-oħra (soċjoekonomiċi, edukattivi, tas-saħħa u kulturali) fis-soċjetà u dan fl-oqsma kollha ta' politika. Il-governanza f'diversi livelli tirreferi kemm għal diversi atturi kif ukoll għal diversi livelli. Il-politika ta' kuljum tar-reġjuni u l-awtoritajiet lokali hija influwenzata minn avvenimenti, azzjonijiet u influwenzi fil-livell nazzjonali u Ewropew li f'ħafna oqsma jiddeċiedu l-ambitu tal-azzjoni minn dak li jiġri fil-kontinent kollu kemm hu u, fl-aħħar mill-aħħar, mid-dinja globali. L-istat tad-dritt jopera wkoll f'livelli differenti fl-Unjoni Ewropea u għaldaqstant irid jiġi mħares fl-interazzjoni bejn il-livelli differenti. Politika ta' opportunitajiet indaqs u fl-aħħar mill-aħħar ta' integrazzjoni soċjali tqis ir-realtà konkreta tal-globalizzazzjoni u dan jinkludi l-isfidi tal-opportunitajiet għall-impjieg u aċċess għall-benefiċċji tas-sigurtà soċjali. Kull sistema nazzjonali għandha l-istorja tagħha u l-mudell tagħha, iżda mixjin lejn it-twaqqif ta' normi transnazzjonali u fl-aħħar mill-aħħar ser jirriżulta spazju Ewropew għad-drittijiet fundamentali, bl-inklużjoni tad-drittijiet soċjali, appoġġjat fuq diversi livelli u interkonnessjonijiet orizzontali;

7.

jidhirlu li l-governanza f'diversi livelli tagħmilha possibbli li tiġi indirizzata theddida possibbli għall-istat tad-dritt f'sitwazzjoni konkreta u tikkompensa għal għadd ta' nuqqasijiet: nuqqas ta' informazzjoni, kapaċità, fondi, possibbiltajiet amministrattivi u impatt politiku billi jiġu involuti l-awtoritajiet lokali u reġjonali fis-sorveljanza u l-implimentazzjoni tal-prinċipji tal-istat tad-dritt fl-UE. Dan bl-istess mod iwassal għal demokrazija iktar parteċipattiva, iktar trasparenza u responsabbiltà u barra minn hekk iċ-ċittadini jingħataw pożizzjoni iktar ċentrali. Il-ħarsien tal-istat tad-dritt għalhekk huwa mezz biex l-Ewropa toqrob lejhom u viċiversa bil-għan, imfisser fil-White Paper dwar il-Governanza f'Diversi Livelli, li jkun hemm “azzjoni kkoordinata tal-Unjoni, l-Istati Membri u l-awtoritajiet lokali u reġjonali, ibbażata fuq is-sħubija u li għandha l-għan li tħejji u timplimenta l-politiki tal-Unjoni Ewropea”;

8.

jinnota li abbażi tal-White Paper dwar il-Governanza f'Diversi Livelli, il-kunċett kompla jiżviluppa gradwalment, kif jidher mill-Opinjoni ta' segwitu li adotta l-Kumitat Ewropew tar-Reġjuni fl-2012, kif ukoll mill-workshops li twaqqfu, it-tabella li ġiet emendata u ftit ilu l-pubblikazzjoni tal-Karta dwar il-Governanza f'Diversi Livelli. Apparti l-fatt li l-kunċett qed jidher dejjem iktar f'diversi oqsma ta' politika u qed jiġi applikat minn diversi msieħba, insibu riżultat preliminari fir-Regoli Ġenerali u l-Kodiċi ta' Kondotta sussegwenti dwar il-Fondi Ewropej Strutturali u ta' Investiment;

9.

jinnota li l-Komunikazzjoni tal-Kummissjoni tenfasizza b'mod ċar li l-istat tad-dritt huwa s-sinsla ta' kull demokrazija moderna u wieħed mill-prinċipji fundamentali li jinbtu mit-tradizzjonijiet kostituzzjonali komuni tal-Istati Membri kollha tal-UE u b'hekk huwa wieħed mill-iktar valuri importanti li fuqhom hija bbażata l-Unjoni bħala żona ta' libertà, sigurtà u ġustizzja (Artikolu 2 tat-TUE u l-Preambolu tat-Trattat u l-Karta tad-Drittijiet Fundamentali tal-Unjoni Ewropa). Il-qafas ġdid propost huwa intiż biex ineħħi t-theddid futur għall-istat tad-dritt qabel ma jidħlu fis-seħħ u jintlaħqu l-kundizzjonijiet għall-attivazzjoni tal-mekkaniżmi msemmija fl-Artikolu 7 tat-TUE, iżda bl-ebda mod ma jaffettwa l-proċeduri ta' ksur eżistenti b'konsegwenza tal-Artikolu 258 tat-TFUE;

10.

jinnota li l-qafas leġislattiv il-ġdid jintroduċi approċċ orizzontali transkonfinali li jista' jaffettwa l-qafas ta' valuri komuni tal-UE bl-azzjonijiet tal-atturi tal-Istat u fejn il-proċeduri ta' ksur attwali mhux dejjem joffru soluzzjoni. It-tisħiħ tal-istat tad-dritt bħala valur komuni essenzjali tal-UE għalhekk huwa neċessarju biex jinkisbu l-għanijiet tal-protezzjoni tal-valuri fundamentali fejn il-protezzjoni tad-drittijiet fundamentali hija element kruċjali;

11.

jidhirlu li l-qafas il-ġdid, li jħaddan proċedura fi tliet fażijiet, għandu jindirizza lakuna u joħloq il-possibbiltajiet għall-istituzzjonijiet tal-UE sabiex jivvalutaw l-istat tad-dritt, u eventwalment jirreaġixxu meta Stat Membru jkun f'riskju li joħloq theddida sistematika għall-istat tad-dritt minħabba l-azzjoni tiegħu. Għal din ir-raġuni, il-mekkaniżmu l-ġdid jipprevedi tliet stadji: (1) il-valutazzjoni objettiva u bir-reqqa tas-sitwazzjoni fl-Istat Membru konċernat – (2) rakkomandazzjonijiet għal azzjonijiet immedjati u konkreti sabiex jiġi evitat it-theddid għall-istat tad-dritt – (3) monitoraġġ tal-miżuri li jkun ħa l-Istat Membru kkonċernat b'reazzjoni għar-rakkomandazzjoni li tkun saritlu. F'din il-proċedura li hija bbażata fuq id-djalogu mal-Istat Membru kkonċernat, huwa importanti ħafna li l-livelli differenti ta' governanza jiġu involuti kemm jista' jkun kmieni, inklużi l-livelli lokali u reġjonali, kif ukoll is-soċjetà ċivili;

12.

jirrimarka li l-awtoritajiet lokali u reġjonali huma l-ewwel li jiġu konfrontati direttament mill-isfidi u l-problemi li jista' jkollhom effett fuq il-proċeduri tal-istat tad-dritt u b'hekk kemm ċerti drittijiet fundamentali jistgħu jiġu infurzati minħabba sitwazzjonijiet li jinqalgħu ta' kuljum f'diversi oqsma fosthom problemi ekonomiċi, il-qgħad, l-ambjent, it-tibdil fil-klima. Ir-rwol speċjali li jaqdu l-awtoritajiet lokali u reġjonali jinsab fil-kompetenzi li għandhom, li jippermettulhom jidentifikaw theddid sistemiku potenzjali għall-istat tad-dritt minn stadju bikri u anke l-isforz li jagħmlu biex jiksbu r-riżultati, ħaġa li l-politika Ewropea dejjem trid tissalvagwardja. Dan jgħodd aktar f'dinja globali fejn il-migrazzjoni u l-mobbiltà rriżultaw f'relazzjonijiet interkulturali u soċjetà pluralistika b'diversi valuri u twemmin li jinħassu l-iktar fil-komunitajiet lokali. Ir-riżultati dwar il-ħarsien tal-istat tad-dritt u d-drittijiet fundamentali jistgħu jinkisbu biss meta l-livelli kollha ta' politika jaħdmu flimkien, ikunu kollegati b'mod adegwat u jagħtu sehemhom, abbażi tal-kompetenzi u r-responsabbiltajiet ta' kull wieħed minnhom u jekk jikkoordinaw id-diversi kontributi tagħhom.. F'ħafna oqsma qed jiġi rikonoxxut dejjem iktar li l-politika bbażata fuq l-evidenza (evidence based) u l-politika skont il-post (place based) huma meħtieġa biex jinkisbu riżultati aħjar. Dan jgħodd mingħajr ebda dubju għall-ħarsien tad-drittijiet fundamentali. It-tisħiħ ta' dawn id-drittijiet għandu impatt pożittiv fuq l-iżvilupp soċjali u ekonomiku. Id-deċiżjonijiet li jittieħdu fl-eqreb livell taċ-ċittadini jsaħħu l-fiduċja fosthom u fis-soċjetà fejn jgħixu;

13.

jirrimarka li fi ftit snin id-diskors fl-UE dwar id-drittijiet fundamentali u t-tisħiħ tal-istat tad-dritt qed jiġi rifless fil-mudell tal-governanza f'diversi livelli. Barra minn dan, il-prinċipji operattivi kif imsemmija fl-Opinjoni ta' segwitu tagħna tal-2012, it-tabella dettaljata u ċertament il-Karta dwar il-Governanza f'Diversi Livelli, huma strumenti kruċjali biex din il-viżjoni tissarraf f'termini prattiċi;

14.

jinnota li l-valuri fundamentali li tirrappreżenta l-“Ewropa” (li ma tfissirx biss l-UE u l-Kunsill tal-Ewropa iżda anke t-tradizzjonijiet nazzjonali prinċipali), mhumiex relatati biss mal-ordni ġuridiku demokratiku iżda anke mal-politika li tiġi implimentata biex il-valuri jingħataw opportunitajiet ġenwini biex jitwettqu. Meta dan l-aspett jitqies kompletament, il-pożizzjoni tal-awtoritajiet lokali u reġjonali tintwera f'dawl totalment differenti. Minflok li jkunu biss entitajiet li jimplimentaw il-leġislazzjoni u l-miżuri ta' politika nazzjonali (u Ewropej) (l-approċċ minn fuq għal isfel),huma jkunu atturi sħaħ bir-responsabbiltà politika biex, fi ħdan oqfsa stabbiliti u skont is-sitwazzjoni lokali, ifasslu politika integrata. Dan ma jikkonċernax biss id-drittijiet taċ-ċittadini u dawk politiċi iżda anki d-drittijiet ekonomiċi u soċjali (l-edukazzjoni, ix-xogħol, is-saħħa, il-benesseri, l-abitazzjoni);

15.

jirrimarka li l-awtoritajiet lokali u reġjonali huma l-ewwel awtoritajiet li jiffaċċjaw l-ostakli relatati mad-drittijiet fundamentali tal-politika nazzjonali. Huma jkollhom jiffaċċjaw il-persuni individwali, il-gruppi jew 'kategoriji' li jintlaqtu l-ewwel mill-ksur tal-istat tad-dritt jew mir-restrizzjonijiet tad-drittijiet fundamentali. Punt ta' interess partikolari hawnhekk hu l-garanzija tad-drittijiet fundamentali universali għall-abitanti kollha, irrispettivament mid-drittijiet u d-dispożizzjonijiet li jgħoddu speċifikament għaċ-ċittadini tal-UE;

16.

jemmen li d-drittijiet fundamentali, bħall-opportunitajiet indaqs għall-impjieg u l-emanċipazzjoni soċjali, għandhom jiġu promossi b'mod sistematiku permezz ta' miżuri ta' appoġġ adegwati. F'dan id-dawl l-awtoritajiet lokali u reġjonali, flimkien mal-livelli ta' gvern nazzjonali u Ewropej u s-soċjetà, huma msieħba sħaħ f'approċċ strateġiku għat-twettiq ta' stat tad-dritt soċjali;

17.

jikkunsidra li l-preokkupazzjoni dwar il-ksur potenzjali tad-drittijiet fundamentali għandha tiġi estiża biex tinkludi rieda politika sistematika biex l-istat tad-dritt fl-Unjoni Ewropea u fl-Istati Membri tagħha jiżviluppa f'termini pożittivi wkoll. Dan jispjega l-bidla minn kunċett tal-istat tad-dritt li joffri biss ħarsien legali tad-drittijiet għal kunċett dinamiku fejn id-drittijiet fundamentali jiksbu wkoll aspett soċjali permezz ta' miżuri ta' politika. Dan l-aspett ma joħroġx biżżejjed fid-dieher mill-KE, li żżomm (eċċessivament) lura fir-rigward ta' 'affarijiet interni' tal-Istati Membri u li fil-qafas ta' politika ġdida tagħha prinċipalment tixtieq tiżviluppa alternattiva aktar flessibbli fir-rigward ta' proċeduri ġenwini sabiex tkun tista' ssir attiva aktar kmieni. B'hekk il-governanza f'diversi livelli, li bil-mod il-mod qed tiġi aċċettata iktar, tista' tkun approċċ utli. Il-Komunikazzjoni tal-KE tiftaħ il-perspettiva għal approċċ proattiv permezz ta' referenza għall-Kummissjoni ta' Venezja, iżda biex dan l-approċċ ikun jista' jħalli effett għandhom jiġu involuti l-livelli differenti ta' gvern u s-soċjetà ċivili tal-pajjiż ikkonċernat;

18.

jinnota li l-awtoritajiet lokali u reġjonali huma l-imsieħba kruċjali tal-gvernijiet nazzjonali u Ewropej biex flimkien mas-soċjetà mhux biss jipproteġu l-istat tad-dritt modern iżda anke biex jiffurmawh b'mod attiv u strateġiku permezz ta' inizjattivi ta' politika. Dan huwa l-kompitu ewlieni ta' kull livell ta' governanza. L-atturi li jonqsu milli jagħmlu dan b'mod sistematiku qed imorru kontra l-Karta tad-Drittijiet Fundamentali u jqiegħdu lilhom innifishom barra mill-evoluzzjoni Ewropea;

19.

għandu jiġi rispettat ir-rwol kruċjali tal-awtoritajiet lokali u reġjonali fil-garanzija tad-drittijiet fundamentali biex dawn jiġu żviluppati b'mod iktar effiċjenti, iżda, dejjem fir-rispett tad-drawwiet u l-Kostituzzjoni ta' referenza;

20.

jidhirlu li l-awtoritajiet lokali u reġjonali għandu jkollhom il-possibbiltà li jirrikorru direttament għand il-Kummissjoni Ewropea meta josservaw li l-istat tad-dritt ikun qed jiġi mhedded b'xi mod. Il-Kummissjoni Ewropea għandha toħloq strutturi adatti għal dan il-għan;

21.

Il-protezzjoni tad-drittijiet fundamentali mhijiex biss kwistjoni tal-Kummissjoni Ewropea; il-Parlament Ewropew għandu jikkontribwixxi b'mod attiv ukoll. F'każjiet ta' theddid imminenti għall-istat tad-dritt għandha tiġi provduta t-trasparenza parlamentari meħtieġa fil-livell tal-UE bl-involviment tal-awtoritajiet lokali u reġjonali sabiex is-sitwazzjoni tkun tista' tiġi analizzata;

22.

jinnota, madankollu, li fil-livell reġjonali u lokali tista' ssir distinzjoni bejn id-dimensjoni vertikali u dik orizzontali. Dan jirreferi għall-interazzjoni bejn l-inizjattivi tas-settur pubbliku u dak privat, pereżempju fl-iżvilupp soċjoekonomiku u fid-dispożizzjonijiet dwar l-edukazzjoni, is-saħħa u l-kura;

23.

L-awtoritajiet lokali u reġjonali – speċjalment dawk b'kompetenzi leġislattivi – huma responsabbli direttament biex jappoġġjaw għadd ta' drittijiet fundamentali u għalhekk stabbilixxew linji ta' politika ġenerali. Dan jikkonċerna wkoll drittijiet ċivili speċifiċi konkreti għall-garanzija tal-libertà tal-espressjoni u l-libertà tal-għaqdiet u l-azzjoni, il-parteċipazzjoni f'elezzjonijiet ħielsa u ġusti u b'mod iktar ġenerali l-ġlieda kontra kull forma ta' diskriminazzjoni fil-komunità lokali jew reġjonali tagħhom. L-awtoritajiet lokali u reġjonali mhumiex biss interfaċċja f'każ ta' ksur ċar tad-drittijiet fundamentali iżda għandhom ifasslu huma stess linji gwida ċari u jikkontribwixxu għat-twettiq ta' dawn id-drittijiet;

24.

L-approċċ tradizzjonali tal-UE jqis li r-reġjuni, il-bliet u l-lokalitajiet tagħna huma magħmulin minn ċittadini tal-UE u l-politika tan-nondiskriminazzjoni tiffoka fuq id-drittijiet taċ-ċittadini minn Stati Membri oħra. Iżda naturalment ir-realtà soċjoloġika, b'mod partikolari fil-bliet il-kbar, hija ħafna iktar kumplessa. L-integrazzjoni soċjali tista' tinkiseb biss permezz ta' diversi forom ta' demokrazija rappreżentattiva u parteċipattiva bħala pjattaforma għal koeżistenza kondiviża, li tħares ukoll il-wirt storiku u kulturali lokali. Għalhekk jekk irridu ninvolvu lill-abitanti kollha u rridu nwessgħu d-definizzjoni ta' 'ċittadinanza' (ara l-White Paper tal-Kunsill tal-Ewropa dwar id-Djalogu Interkulturali (2008): “Iċ-ċittadinanza fl-usa' sens hija dritt u tabilħaqq responsabbiltà li wieħed jieħu sehem fil-ħajja kulturali, soċjali u ekonomika u fl-affarijiet pubbliċi tal-komunità flimkien ma' oħrajn”. Il-Professur A. Papisca tkellem fuq l-istess linji dwar in-'nova civitas';

25.

Il-Qafas Strateġiku tal-UE għad-Drittijiet Fundamentali propost mill-Aġenzija tal-UE għad-Drittijiet Fundamentali (FRA) joffri qafas għall-appoġġ tar-rabta msemmija hawn fuq bejn id-dimensjoni orizzontali u dik vertikali biex tinkiseb parteċipazzjoni, kooperazzjoni u koordinazzjoni deċiżiva. F'dan ir-rigward, l-Aġenzija għad-Drittijiet Fundamentali għandha tkun f'pożizzjoni li teżamina r-rispett tal-istat tad-dritt u tad-drittijiet fundamentali fl-Istati Membri tal-UE u, jekk ikun hemm bżonn, toħroġ twissija;

26.

jemmen li kemm il-FRA kif ukoll il-Kunsill tal-Ewropa għandhom jagħtu prova ta' applikazzjoni tal-għarfien, b'mod partikolari lill-awtoritajiet lokali u reġjonali;

27.

jaħseb li l-kunċett tal-governanza f'diversi livelli għandu jservi b'mod ċar bħala l-prinċipju għall-protezzjoni tad-drittijiet fundamentali;

28.

jidhirlu li l-awtoritajiet reġjonali u/jew lokali għandhom jitħeġġu:

29.

jista' jeżamina jekk il-proposti li ġejjin jikkontribwixxux għall-ħarsien tal-istat tad-dritt fl-Unjoni Ewropea:

28.4.2015   

MT

Il-Ġurnal Uffiċjali tal-Unjoni Ewropea

C 140/37

1.

huwa sodisfatt li l-Kummissjoni nediet il-pakkett ta' miżuri dwar l-ekonomija ċirkolari (1), li jistabbilixxi qafas komuni u koerenti fl-Unjoni Ewropea għall-użu effikaċi tar-riżorsi. Il-Kumitat tar-Reġjuni jenfasizza li dan il-proċess jeħtieġ ir-rieda politika għall-bidla, politika ta' investiment fit-tul u l-ippjanar ta' dan l-investiment, kif ukoll bidla fis-sensibilizzazzjoni b'impenn ikbar miċ-ċittadini u bidla fl-imġiba tagħhom lejn ir-riżorsi. Barra minn hekk, huwa jinsisti fuq ir-rwol ewlieni tal-awtoritajiet lokali u reġjonali fl-applikazzjoni ta' dawn il-politiki kif ukoll l-implimentazzjoni u l-valutazzjoni tagħhom (2);

2.

jappoġġja bis-sħiħ il-bżonn u l-benefiċċji tat-tranżizzjoni għal ekonomija ċirkolari, kif intwera b'mod ċar mill-Pjattaforma Ewropea għall-Użu Effiċjenti tar-Riżorsi (EREP) (3). Il-Kumitat tar-Reġjuni jfakkar li din hija sekwenza loġika ta' impenji fil-Pjan Direzzjonali għal Ewropa b'Użu Effiċjenti tar-Riżorsi, li ġew żviluppati fis-7 Programm ta' Azzjoni Ambjentali tal-UE (s-7 EAP). Huwa jenfasizza l-iżvilupp ta' ekonomija ċirkolari bħala l-fattur ewlieni sabiex jintlaħqu l-objettivi kollha tal-effiċjenza fl-użu tar-riżorsi, u jiġi żgurat li l-ekonomija tkun tista' tikber kif ukoll issir inqas dipendenti mir-riżorsi primarji, u b'hekk jittejjeb il-ħarsien tal-ambjent;

3.

għaldaqstant huwa mħasseb serjament għall-fatt li f'Diċembru l-Kumissjoni ħabbret l-intenzjoni tagħha li tirtira l-proposta leġislattiva li temenda diversi Direttivi dwar l-iskart għall-promozzjoni ta' ekonomija ċirkolari; iqis li l-proposta li dwarha diġà sar ammont konsiderevoli ta' xogħol mid-diversi istituzzjonijiet tal-UE u mill-partijiet interessati tirrappreżenta ġeneralment sett ibbalanċjat ta' kompromessi; f'dan il-kuntest ifakkar fil-messaġġi diretti ta' appoġġ għat-tkomplija tal-proċess leġislattiv kemm mill-Parlament Ewropew kif ukoll mill-Kunsill tal-Ministri, u anke minn diversi partijiet interessati;

4.

jistieden lill-Kummissjoni Ewropea biex tadotta metodu olistiku u aktar integrat għall-ekonomija ċirkolari. It-tranżizzjoni lejn ekonomija ċirkolari teħtieġ mhux biss li tingħata attenzjoni lill-għan li jiġi pprevenut l-iskart u jkun hemm l-użu mill-ġdid tiegħu, iżda wkoll li jkun hemm approċċ fuq katina sħiħa u koerenza aħjar bejn il-politiki u l-inizjattivi differenti bħall-Pjan Direzzjonali għal Ewropa Effiċjenti fir-Riżorsi, is-Seba' Programm ta' Azzjoni Ambjentali, il-Pakkett dwar il-Klima u l-Enerġija l-Impronta Ambjentali (LCA u l-marka tal-karbonju), u l-Istrateġija Ewropea bbażata fuq is-settur bijoloġiku “Ninnovaw għal Tkabbir Sostenibbli: Bijoekonomija għall-Ewropa”;

5.

jieħu nota, f'dan il-kuntest, tal-intenzjoni tal-Kummissjoni Ewropea li, sa tmiem l-2015, tippreżenta sett ta' proposti 'mtejba' u 'aktar ambizzjużi'; madankollu, għandu dubji serji kemm jistgħu jinstabu kompromessi mtejba sostanzjalment dwar għadd kbir ta' kwistjonijiet kumplessi fi skeda ta' ħin relattivament qasira; f'dan il-kuntest ifakkar fil-bżonn urġenti ta' linji gwida legali ċari u affidabbli għall-awtoritajiet lokali u reġjonali u fil-potenzjal kbir tal-ekonomija ċirkolari biex tikkontribwixxi għat-tkabbir ekonomiku; għaldaqstant jirrakkomanda li ma jintilifx żmien iżda jitkomplew l-isforzi għat-titjib tal-proposti tal-Kummissjoni fi ħdan il-proċedura leġislattiva diġà mibdija u, għalhekk, jitlob lill-Kummissjoni u lill-koleġislaturi sabiex jieħdu kunsiderazzjoni ta' dawn l-osservazzjonijiet u s-suġġerimenti fil-ħidma futura tagħhom, inkluż fit-tisħiħ ta' ekonomija ċirkolari fl-istadji bikrin tad-disinn u l-manifattura tal-prodotti;

6.

jenfasizza l-ħtieġa li l-approċċ Ewropew għall-ekonomija ċirkolari jqis il-bijoekonomija b'mod sħiħ. Il-bijoekonomija tipprovdi fatturat annwali ta' EUR 22 biljun, tagħti kontribut ewlieni lit-tkabbir ekoloġiku u sostenibbli u toffri opportunitajiet ġodda ta' impjieg u negozju. Il-maġġoranza tal-investiment ibbażati fuq is-settur bijoloġiku jsir fil-livell reġjonali/lokali fejn l-inizjattivi minn isfel għal fuq joħolqu ktajjen ta' valur ġodda u impjiegi ġodda;

7.

ifakkar, f'dan il-kuntest, b'mod partikolari l-potenzjal importanti tal-ekonomija ċirkolari biex tiġġeneraiffrankar għan-negozji tal-UE, l-awtoritajiet pubbliċi u l-konsumaturi. Jenfasizza li dan it-tfaddil għandu jissarraf f'investimenti fuq skala kbira u fit-tul għall-ekonomija tal-UE u konsegwentement iwassal għall-ħolqien ta' impjiegi sostenibbli fl-UE;

8.

jenfasizza l-ħtieġa li jiġi żviluppat aktar qafas politiku għall-ekonomija ċirkolari fil-livelli kollha – UE, nazzjonali u reġjonali – permezz ta' miżuri li jikkombinaw ir-regolamentazzjoni intelliġenti, strumenti bbażati fuq is-suq, speċjalment dawk li jiffukaw fuq il-promozzjoni tal-użu tal-materjali riċiklati, ir-riċerka u l-innovazzjoni, inċentivi, l-iskambju ta' informazzjoni u l-appoġġ għal approċċi volontarji. Il-KtR iqis li d-disinn u l-innovazzjoni huma kruċjali biex titħaffef it-transizzjoni lejn ekonomija ċirkolari, u jistieden lill-Kummissjoni biex tippromovi l-innovazzjoni, inkluża taħt il-programm tal-UE għar-Riċerka u l-Innovazzjoni (Orizzont 2020), tiffaċilita l-iżvilupp ta’ aktar mudelli ċirkolari għal prodotti u servizzi, inkluż permezz ta’ politika aktar koerenti tal-prodott, tiżviluppa aktar ir-reviżjoni u l-applikazzjoni tad-Direttiva tal-Ekodisinn permezz tal-inklużjoni ta’ kriterji tal-effiċjenza fl-użu tar-riżorsi, u tistabbilixxi kif se tapplika l-użu tal-kejl tal-impatt ambjentali tad-disinn tal-prodott u l-proċess;

9.

jappoġġja l-applikazzjoni tad-Direttiva dwar l-Ekodisinn skont kriterji tal-effiċjenza fir-riżorsi relatati mad-durabilità, il-modularità, il-kapaċità ta' użu mill-ġdid u r-riċiklaġġ, flimkien mal-ogħti ta' pariri dwarhom lill-konsumatur, inkluż għal gruppi ta' prodotti prijoritarji futuri fil-Pjan ta' Ħidma 2015-2017. Il-Kumitat talab għal reviżjoni radikali ta' din id-Direttiva u tal-miżuri ta' implimentazzjoni tagħha sabiex jiġi promoss l-użu effiċjenti tar-riżorsi, permezz tal-estensjoni tal-kamp ta' applikazzjoni tagħha biex jinkludi prodotti li mhumiex relatati mal-enerġija li jħallu impatt sinifikanti fuq l-ambjent (4);

10.

jenfasizza l-importanza li fil-bidu tal-proċessi tal-produzzjoni tingħata attenzjoni partikolari lill-imballaġġ magħmul minn materjali komposti, sabiex jitnaqqas l-iskart minn materjal bħal dan li mhuwiex riċiklabbli jew riċiklabbi biss permezz ta’ teknoloġiji kumplessi u li jiswew ħafna flus; jissuġġerixxi li r-Regolament Ecolabel jiġi estiż għal għadd dejjem jikber ta' servizzi u prodotti, kemm biex tiġi żgurata implimentazzjoni aħjar tal-miżuri previsti għat-tnaqqis tal-iskart kif ukoll biex tiġi pprovduta gwida aktar utli u ċara għall-konsumaturi biex jitnaqqas l-impatt ambjentali tal-prodotti u s-servizzi;

11.

jilqa' b'sodisfazzjon l-inizjattivi mħabbra mill-Kummissjoni Ewropea għall-promozzjoni tal-akkwist pubbliku ekoloġiku (APE), speċifikament il-gwida dwar il-possibbiltajiet offruti mid-direttivi l-ġodda dwar l-akkwist pubbliku fil-qasam tal-APE, rakkomandazzjoni dwar il-monitoraġġ tal-prestazzjoni tal-Istati Membri biex jilħqu l-mira indikattiva ta' 50 % tal-APE, u appoġġ għall-ħolqien ta' netwerks tal-APE fost l-awtoritajiet pubbliċi. Il-KtR, madankollu, itenni t-talba tiegħu favur miri tal-APE obbligatorji għall-gvernijiet nazzjonali u l-istituzzjonijiet Ewropej (5);

12.

itenni li hu essenzjali li jsir monitoraġġ tal-progress tal-inizjattiva ewlenija “Ewropa effiċjenti fir-riżorsi” fil-qafas tal-istrateġija Ewropa 2020 u l-eżerċizzji tas-Semestru Ewropew u tal-Istħarriġ Annwali dwar it-Tkabbir marbutin magħha. L-effiċjenza fl-użu tar-riżorsi jeħtieġ li ssir parti integrali mis-sistema ta' rapportar nazzjonali għall-Ewropa 2020, il-Programmi Nazzjonali ta' Riforma u r-rakkomandazzjonijiet speċifiċi għall-pajjiż; f'dan il-kuntest, jitlob lill-Kunsill Ewropew biex, fir-reviżjoni ta' nofs it-term tal-istrateġija Ewropa 2020, jinkludi mira ewlenija ġdida rigward il-produttività tar-riżorsi għal żieda ta' mill-anqas 30 % fil-produttività tar-riżorsi sal-2030, imkejla skont il-PDG diviż bil-konsum ta' materja prima, filwaqt li jitqiesu l-miri li diġà jeżistu fil-livell nazzjonali (6);

13.

jinnota l-progress li sar fil-ġestjoni tal-iskart bis-saħħa tal-qafas leġislattiv Ewropew ibbażat fuq il-politika ta' previżjoni. Il-Kumitat tar-Reġjuni jfakkar li ċerti Stati Membri u awtoritajiet lokali u reġjonali jilħqu u jaqbżu l-miri tal-UE f'dan il-qasam u jqis li l-liġijiet futuri għandhom iqisu l-pożizzjonijiet differenti ta' tluq u b'mod partikolari jappoġġjaw lil dawk bl-aħjar prestazzjoni ħalli jkomplu u jżidu l-isforzi tagħhom f'dan ir-rigward;

14.

jaħseb li politika responsabbli u sostenibbli dwar il-ġerarkija tal-iskart għandu jkollha bħala l-għan it-tnaqqis massimu tal-produzzjoni tal-iskart u t-tnaqqis tal-impatt negattiv tal-iskart u l-ġestjoni tiegħu fuq is-saħħa tal-bniedem u l-ambjent, u kif ukoll it-tnaqqis tal-konsum tal-materji u jiġu integrati mill-ġdid fiċ-ċiklu ekonomiku dawk il-materji kontenuti fl-iskart. Il-KtR huwa tal-fehma li l-konformità mal-ġerarkija tal-iskart hija l-metodu l-iżjed effiċjenti biex jiġu limitati l-ispejjeż ambjentali u finanzjarji tal-ġestjoni tal-iskart; għalhekk huwa dispjaċut li l-komunikazzjoni tal-Kummissjoni ma teżaminax l-idea li tiġi inkluża mira vinkolanti għat-tnaqqis globali tal-iskart fid-Direttiva Qafas dwar l-Iskart;

15.

iqis li, bħala wieħed mill-aktar passi diretti sabiex tiġi ffaċilitata l-introduzzjoni mill-ġdid tal-materjali fiċ-ċiklu tal-produzzjoni u għalhekk ikun hemm progress lejn ekonomija ċirkolari, għandhom ikunu aktar faċli biex jiġu applikati l-mekkaniżmi għad-dikjarazzjoni jekk il-prodotti għandhomx status ta' prodotti sekondarji jew ta' tmiem tal-istadju tal-iskart;

16.

jenfasizza li minħabba fid-differenzi li hemm bejn ir-reġjuni u l-Istati Membri tal-UE f'dak li jirrigwarda r-rispett tal-miri ffissati mil-liġijiet Ewropej attwali dwar il-ġestjoni tal-iskart (7), huwa importanti ħafna li titħeġġeġ il-kooperazzjoni u d-diffużjoni tal-eżempji ta' prattiki tajbin fil-qasam, b'mod li dawk li għandhom prestazzjoni inqas tajba jiġu megħjuna biex jilħqu l-għanijiet finali; madankollu, għandu jiġi kkunsidrat il-fatt li f'dawk ir-reġjuni u t-territorji fejn il-popolazzjoni hija mxerrda ħafna b'densità ta' popolazzjoni baxxa u b'distanzi kbar għaċ-ċentri tat-trattament, jiżdiedu l-ispejjeż tal-ġestjoni tal-iskart u huwa diffiċli ħafna li jintlaħaq l-għan tal-iskart żero;

17.

jixtieq josserva li huwa importanti li jinħolqu swieq għall-materjali sekondarji li jiġu rkuprati mill-iskart u għall-prodotti li jsiru mill-iskart, billi jinħoloq qafas ġuridiku u omoġenju u billi fost affarijiet oħra, tingħata garanzija wkoll għall-ugwaljanza tal-opportunitajiet lill-atturi kollha li jużaw dawn il-materjali u jintroduċuhom fiċ-ċiklu ekonomiku;

18.

jenfasizza r-rwol ewlieni li jaqdu l-awtoritajiet lokali u reġjonali fl-implimentazzjoni tal-leġislazzjoni f'dan il-qasam, fil-ħolqien u l-iffinanzjar tal-infrastruttura għall-ipproċessar u l-ħażna tal-iskart u fil-ġestjoni operazzjonali tal-flussi tal-iskart, din tal-aħħar fost l-ikbar sfidi li qed jiffaċċjaw l-awtoritajiet. Kif stqarr f'opinjoni preċedenti (8), il-KtR jappella biex l-awtoritajiet lokali u reġjonali jingħataw leħen ikbar fir-reviżjoni tal-miri li se jkunu meħtieġa jilħqu. F’dan il-kuntest, il-KtR jitlob li l-UE tassigura li l-awtoritajiet lokali u reġjonali jgawdu livell ta' intervent u ta' kooperazzjoni li jkun konformi bis-sħiħ mal-prinċipju tas-sussidjarjetà;

19.

jiddispjaċih li l-proposta għal Direttiva ma tagħtix biżżejjed attenzjoni lill-irkupru tal-enerġija mill-iskart fil-każ tal-iskart mhux riċiklabbli, bħala l-aħħar stadju fi proċess ta' valorizzazzjoni tal-iskart, minkejja li jkun iktar faċli li jinkisbu l-għanijiet ambizzjużi stabbiliti għall-Istati Membri kollha u fl-istess ħin tittejjeb l-indipendenza tal-enerġija tal-UE;

20.

iqis li r-riżultati tal-valutazzjoni tal-impatt (9) li jakkumpanjaw it-test tal-proposta tad-Direttiva tal-Parlament Ewropew u tal-Kunsill huma mill-aktar ottimisti u jirrakkomanda lill-Kummissjoni tiċċara ċerti aspetti dwar id-data li fuqha twettqet din il-valutazzjoni, b'mod partikolari l-argumenti xjentifiċi li wassluha biex tagħżel approċċ speċifiku, l-ispejjeż ta' dan il-proċess u, mhux anqas importanti, kemm hu għaqli li bħala kriterju tintgħażel is-sitwazzjoni tal-Istati Membri bl-aħjar prestazzjoni;

21.

b'segwitu għar-rakkomandazzjonijiet preċedenti (10), jappoġġa introduzzjoni sistematika u aċċellerata ta' strumenti ekonomiċi fl-immaniġġjar tal-iskart mill-Istati Membri u l-awtoritajiet lokali u reġjonali, pereżempju billi jiġu promossi strumenti bħal dawn fil-pjani tal-immaniġġjar tal-iskart u l-konformità (bħala parti mis-sistema ta' twissija bikrija) u billi tiġi promossa r-responsabbiltà estiża tal-produttur; il-Kumitat jenfasizza l-potenzjal ta' dawn l-istrumenti biex jiġġeneraw dħul għall-awtoritajiet lokali u reġjonali, li jista' jintuża biex jikkumpensa (parti mill-) spejjeż amministrattivi marbutin mal-implimentazzjoni u l-infurzar tal-miri tal-iskart, u li jista' jintuża wkoll bħala fondi għal attivitajiet ta' tindif tal-iskart, ta' riċiklaġġ jew proġetti ambjentali oħra;

22.

jitlob lill-Kunsill u lill-Parlament Ewropew li jżommu, fl-anness VI tal-proposta ta' Direttiva, definizzjoni ta' skart muniċipali unika u bla ambigwità. Din id-definizzjoni għandha tiġi ċċarata billi l-attenzjoni tiċċaqlaq minn fuq min jiġbor l-iskart għal fuq x'tip ta' skart qiegħed jinġabar. Hemm bżonn ta' definizzjoni unika ċċarata sabiex tiġi żgurata l-implimentazzjoni koerenti u tajba tal-politika u biex jitqabblu l-kisbiet tal-awtoritajiet lokali u reġjonali u ta' Stati Membri differenti;

23.

jesprimi s-sodisfazzjon tiegħu dwar il-proposta li timmodifika d-definizzjoni ta' skart li tajjeb jiġi kkunsidrat bħala proċessat bil-għan li jintuża mill-ġdid jew jiġi riċiklati. Minkejja li għadha mhux ibbażata għal kollox fuq ir-riżultati, hija tirrispondi għat-talbiet li l-Kumitat tar-Reġjuni kien ifformula minn qabel favur l-istabbiliment ta' metodu uniku għall-kalkolu tal-prestazzjonijiet tar-riċiklaġġ u tal-volumi effettivament reċiklati (11);

24.

jirrakkomanda lill-Kummissjoni li tirrevedi d-definizzjonijiet dwar il-ġbir u l-ġbir selettiv, peress li huma jiġu interpretati b'mod differenti minn Stat Membru għall-ieħor. Bl-istess mod, il-Kumitat tar-Reġjuni jirrakkomanda li l-kunċett ta' differenzjazzjoni għandu jiġi definit ukoll, għal raġunijiet kemm statistiċi u ta' komunikazzjoni kif ukoll tal-kwalità tal-materjali, peress li għadd sew ta' Stati Membri jirreġistraw u jgħoddu l-kwantitajiet ta' skart li jaslu fl-impjanti ta' differenzjazzjoni, li jista' jkollhom sa' 30 % ta' impuritajiet;

25.

jenfasizza u jappoġġja l-idea li huwa importanti li jiġi stabbilit metodu uniku ta' kalkolu tal-miri ta' riċiklaġġ u jilqa' b'sodisfazzjon il-proposta tal-Kummissjoni. Din is-simplifikazzjoni u din l-għażla tal-“metodu bbażat fuq ir-riżultati” ser jagħmluha possibbli li l-prestazzjonijiet differenti fl-UE jitqabblu aħjar u jikkontribwixxu biex l-iskart jiġi trasformat f'riżorsi utli; jenfasizza, madankollu, li għad fadal ħafna mistoqsijiet dwar il-metodu ta' kalkolu propost. Għal xi flussi ta' skart, jista' jkun diffiċli ħafna biex jintlaħqu l-għanijiet stipulati permezz tat-tekniki attwali. Il-Kumitat jitlob lill-Kummissjoni Ewropea biex tipprovdi dettalji dwar il-metodoloġija u d-definizzjonijiet użati u, fejn xieraq, tipproponi adattamenti;

26.

jinnota li biex jiġu rispettati l-prinċipji tal-ġerarkija tal-iskart, li l-ewwel nett ifittex li jevita l-produzzjoni tal-iskart, peress li dan huwa fost affarijiet oħra element essenzjali tal-ekonomija ċirkolari, dan il-prinċipju għandu jitqies qabel l-oħrajn kollha. F'din il-perspettiva, il-Kummissjoni għandha tipproponi l-ewwel nett miri vinkolanti għall-prevenzjoni tal-produzzjoni tal-iskart, appoġġjati minn inċentivi finanzjarji kif ukoll l-applikazzjoni sħiħa tal-prinċipju ta' min iniġġes iħallas;

27.

itenni t-talba biex tiġi introdotta mira vinkolanti għall-prevenzjoni/it-tnaqqis tal-iskart muniċipali fl-UE, sabiex sal-2020 l-ammont ta' skart muniċipali ġenerat għal kull ras jitnaqqas b'10 % meta mqabbel mal-livell fl-2010 (12);

28.

jirrakkomanda miżuri addizzjonali għat-tijib tal-ġbir separat u r-riċiklaġġ tal-iskart, pereżempju: il-promozzjoni tat-trasport pnewmatiku ta' skart domestiku lejn faċilitajiet ta' ġbir separat; l-iżvilupp ta' reċepjenti b'diversi kompartamenti fil-faċilitajiet għas-separazzjoni u l-ġestjoni tal-iskart mill-kostruzzjoni u d-demolizzjoni; l-iżvilupp ta' mudelli ta' ġestjoni u installazzjonijiet għar-riċiklaġġ ta' skart mill-pannelli solari fotovoltajċi, fid-dawl taż-żieda prevista fil-ġejjieni ta' dat-tip ta' skart; l-implimentazzjoni ta' netwerk ta' infrastrutturi għad-dekontaminazzjoni u l-irkupru ta' mezzi tat-trasport fl-aħħar taċ-ċiklu ta' ħajja tiegħu;

29.

jenfasizza li fit-transizzjoni lejn ekonomija ċirkolari m'għandhiex titqies biss il-ġestjoni tal-iskart iżda anke setturi oħra li huma relatati mal-iżvilupp u l-manifattura ta' prodotti. Biex il-prodotti jiġu riċiklati u jsiru disponibbli faċilment għandu jiġi promoss l-iżvilupp tal-prodotti b'mod ekoloġiku u jitħeġġeġ it-tixrid tat-teknoloġiji li ma jipproduċu l-ebda jew ftit skart;

30.

fir-rigward tat-tisħiħ tar-responsabbiltà estiża tal-produttur, jappella lill-Kunsill u lill-Parlament Ewropew biex iżommu l-bidla proposta fl-Artikolu 8 tad-Direttiva Qafas dwar l-Iskart, li issa tobbliga u mhux biss tistieden lill-Istati Membri biex iħeġġu l-ekoeffiċjenza u l-ekodisinn tal-prodotti, inklużi d-durabilità teknika u r-riċiklabbiltà, u jqisu l-impatt tal-prodotti tul iċ-ċiklu sħiħ tal-ħajja;

31.

jinnota li l-proposta għal Direttiva ma ssemmix għan kwantifikat għad-disinn ta' prodotti ambjentalment responsabbli u għalhekk jappella biex in-negozji jiġu mħeġġa jżidu l-proporzjon tal-materjal riċiklat użat fil-prodotti li jitpoġġew fis-suq; jitlob lill-Kummissjoni tanalizza l-possibbiltà li jiġu stabbiliti rekwiżiti għall-proporzjon ta' materjal riċiklat fil-prodotti ġodda;

32.

josserva li l-prinċipju tar-responsabbiltà estiża tal-produtturi, inklużi l-manifatturi u l-importaturi, juri li huwa kontroll effettiv tal-politika dwar il-miżuri ta' prevenzjoni tal-produzzjoni tal-iskart. Madankollu, il-Kumitat tar-Reġjuni jappella sabiex jittieħdu miżuri ta' appoġġ biex jiġi żgurat li l-ispejjeż li jinħolqu ma jmorrux għand il-konsumatur finali, u li l-profitt li jinkiseb jiġi investit mill-ġdid fil-proċess ta' ġestjoni tal-iskart;

33.

ikompli jappoġġja t-tisħiħ tal-prinċipju tar-responsabbiltà estiża tal-produtturi fil-liġijiet tal-UE (13), permezz tal-proposta li tistabbilixxi standards minimi (kopertura tal-ispejjeż għall-ġbir, il-ġestjoni u l-ipproċessar tal-fluss tal-iskart, spejjeż biex il-popolazzjoni tiġi informata u l-adattar tad-disinn tal-prodotti fid-direzzjoni tal-ekodisinn);

34.

jitlob lill-Parlament Ewropew u lill-Kunsill li jibqgħu ambizzjużi f'dak li jirrigwarda l-għan propost mill-Kummissjoni għall-użu mill-ġdid u r-riċiklaġġ tal-iskart muniċipali. Fl-istess waqt, il-Kumitat tar-reġjuni jilqa' b'sodisfazzjoni ukoll id-dispożizzjoni l-ġdida li permezz tagħha l-Istati Membri jridu jniżżlu fil-pjan ta' ġestjoni tal-iskart tagħhom miżuri għar-riċiklaġġ tal-iskart li fih kwantità sinifikanti ta' materja prima sensittiva;

35.

jagħti parir li l-liġijiet tal-UE jiġu karatterizzati kemm mill-ambizzjoni kif ukoll mir-realiżmu. Il-Kumitat tar-Reġjuni jinnota li flimkien ma' metodu uniku ta' kalkolu, il-proposti ta' modifika tal-għanijiet jistgħu jirrappreżentaw sfida iebsa għal għadd kbir ta' Stati Membri u awtoritajiet lokali u reġjonali, b'mod partikolari fil-każ ta' dawk li sabu diffikultajiet biex jimplimentaw il-liġijiet attwali. Ikun tajjeb li l-miri l-ġodda jiġu stabbiliti wara analiżi dettaljata tar-raġunijiet li għalihom dawk fis-seħħ ma ġewx rispettati u r-riperkussjonijiet tagħhom, anke fil-livell reġjonali, peress li ċerti żoni b'densità estremament baxxa ta' popolazzjoni għandhom karatteristiċi demografiċi sostanzjalment distinti; jissuġġerixxi li jiġu definiti miri għar-riċiklaġġ, ambizzjużi kif ukoll realistiċi, fuq il-bażi ta' diskussjoni fil-fond mal-Istati Membri u l-awtoritajiet lokali u reġjonali tagħhom dwar il-miżuri meħtieġa biex jiżguraw segwitu effikaċi u implimentazzjoni b'suċċess;

36.

jenfasizza li l-implimentazzjoni tal-miri attwali tvarja b'mod konsiderevoli minn Stat Membru għall-ieħor jew minn reġjun għall-ieħor; madankollu, jiġbed l-attenzjoni għall-fatt li r-riżultati pożittivi miksuba f'xi Stati Membri juru wkoll li huwa possibbli li jintlaħqu miri ambizzjużi, jew għall-inqas nersqu viċin tagħhom, sakemm il-kondizzjonijiet ikunu favorevoli u tiġi żviluppata l-kapaċità amministrattiva meħtieġa fejn din għadha ma teżistix (14);

37.

jappella bil-qawwa biex il-miri ffissati mid-direttiva l-ġdida jkunu marbutin mal-kwalità tal-materjali riċiklati jew irkuprati, b'mod li jassigura li l-materjali riċiklati ma jagħmlux ħsara lill-ambjent u lis-saħħa tal-bniedem u jkunu jistgħu jikkompetu b'mod ugwali fis-suq mar-riżorsi primarji. Barra minn hekk, għandhom jiġu stabbiliti prinċipji bażiċi konsistenti u ċari għall-kalkolu tal-kwoti tar-riċiklaġġ effettiv;

38.

jirrakkomanda li jinżamm il-livell ta' ambizzjoni fir-rigward tal-objettivi għar-riċiklaġġ tal-iskart mill-imballaġġ għall-2020, l-2025 u l-2030, u jappoġġja l-proposta li jintuża metodu uniku sabiex tiġi kkalkolata l-prestazzjoni tar-riċiklaġġ, u dan jiġi limitat għal attivitajiet ta' riċiklaġġ, għall-kuntrarju tal-attivitajiet attwali ta' rkupru u riċiklaġġ. Għandhom jiġu stabbiliti miri ta’ riċiklaġġ kwantitattivi wara li jiġi evalwat l-impatt tat-tibdil tal-metodu ta’ kalkolu. Fil-kalkolu tal-metodu u l-miri għandu jitqies ukoll l-użu mill-ġdid dirett tal-imballaġġ. Il-KtR kien talab qabel biex jiġu studjati l-possibilitajiet li r-riċiklaġġ tal-imballaġġ tal-plastik jiżdied għal 70 %, u dak għall-ħġieġ, il-metall, il-karta, il-kartun u l-injam għal 80 % sal-2020;

39.

itenni l-appell li kien għamel biex fid-Direttiva riveduta tal-UE dwar l-iskart tiddaħħal mira għar-riċiklaġġ tal-iskart bijoloġiku ġdida, bil-għan li dan is-settur jiżviluppa u biex jiġu stabbiliti miri kwantitattivi (15). Barra minn hekk, il-Kummissjoni tista' tiffissa wkoll kriterji vinkolanti dwar il-kwalità tal-kompost, sabiex tippromovi s-suq tar-riċiklaġġ ta' dan l-iskart bijoloġiku u l-ħarsien tal-ambjent (16). Għal dan l-għan, jaf ikun utli li jiġu stabbiliti linji gwida li għandhom jitwasslu liċ-ċittadini biex itejbu l-kwalità tal-bijoskart miġbur u mibgħut għall-kompost;

40.

jiġbed l-attenzjoni għal darb'oħra għall-ħtieġa li jiġu stabbiliti miri addizzjonali rigward it-tħejjija għall-użu mill-ġdid. Dawn il-miri għandhom ikunu vinkolanti, distinti u speċifiċi għal kull fluss ta' skart, b'mod partikolari għall-għamara, it-tessuti u l-skart ta’ tagħmir elettriku u elettroniku, b'mod speċjali meta wieħed iqis li miri simili diġà jeżistu f'xi pajjiżi fil-livell nazzjonali jew reġjonali (17);

41.

B'segwitu tat-talba tal-Parlament Ewropew li tiġi introdotta projbizzjoni fuq il-miżbliet (18), il-KtR sejjaħ biex ir-rimi tal-iskart riċiklabbli jew bijodegradabbli jiġi projbit sal-2020 (19). Bl-istess mod, il-Kumitat tar-Reġjuni jġedded it-talba li kien għamel lill-Parlament Ewropew u lill-Kunsill biex tal-anqas tinżamm il-mira proposta, jiġifieri d-data tal-1 ta' Jannar 2025 tinżamm bħala minn meta l-iskart li mhuwiex bijodegradabbli għandu jintrema f'miżbla u l-iskart riċiklabbli jinġabar separatament u jiġi fil-fatt riċiklat meta jkun teknikament u ekonomikament vijabbli;

42.

jitlob li jiġi rivedut il-kliem li jintuża għall-miri ta' tnaqqis, peress li l-kunċetti ta' skart muniċipali u f'miżbliet li mhux perikolużi huma kkombinati fil-kalkoli u l-proporzjonijiet ippreżentati, anke jekk l-iskart muniċipali mhuwiex l-uniku tip ta' skart li jista' jintrema f'miżbliet mhux perikolużi. Il-KtR jissuġġerixxi wkoll li l-mira fakultattiva proposta biex l-iskart residwali li jintrema fil-miżbliet jiġi limitat għal massimu ta' 5 % sal-2030 tkun tista' ssir referenza għaliha b'termini aktar flessibbli, iżda jenfasizza li għandha tinbidel f'mira vinkolanti għat-tnaqqis tar-rimi fil-miżbliet ta' dan it-tip ta' skart, li għandha tirrifletti aħjar il-mandat mogħti mis-7 Programm ta' Azzjoni Ambjentali tal-UE u r-rakkomandazzjonijiet preċedenti tal-KtR (20);

43.

jitlob lill-Kummissjoni biex taħdem aktar fuq il-potenzjal tar-riċiklaġġ tal-iskart mill-kostruzzjoni u mit-twaqqigħ tal-bini (construction and demolition waste – CDW) u, b'mod partikulari, biex tevalwa jekk mira unika għall-iskart CDW tkunx biżżejjed biex tinċentiva l-ġbir, l-għażla u r-riċiklaġġ ta' materjali differenti tal-kostruzzjoni jew jekk ikunux meħtieġa miri speċifiċi għal dawk il-materjali tal-kostruzzjoni b'sehem iżgħar fl-iskart CDW;

44.

huwa sodisfatt għat-twaqqif ta' sistema ta' twissija prekoċi, bil-għan li tivverifika r-rispett tal-miri tar-riċiklaġġ proposti mid-Direttiva l-ġdida. Il-pjani ta' konformità huma koerenti mal-loġika tar-rakkomandazzjonijiet tal-Kumitat tar-Reġjuni, hekk kif kien qed ifittex li jistabbilixxi pjani direzzjonali speċifiċi għal kull Stat Membru; madankollu, jappella lill-Kummissjoni biex toffri appoġġ metodoloġiku lill-Istati Membri li jkunu qed jiżviluppaw dawn il-pjani;

45.

bl-istess mod, japprova wkoll l-introduzzjoni tal-obbligu li jitfasslu rapporti annwali, li jiġu kkumplimentati b'rapport ta' kontroll tal-kwalità u vvalidati minn terzi indipendenti. Din id-dispożizzjoni tista' toħloq il-kundizzjonijiet meħtieġa biex tiġi vvalutata aħjar is-sitwazzjoni ta' kull Stat Membru mill-perspettiva tat-twettiq tal-miri u tingħata l-possibbiltà li jittieħdu miżuri biex titjieb il-prestazzjoni fil-qasam;

46.

jirrakkomanda li t-tressiq tar-rapporti annwali li jiġu valutati minn parti terza indipendenti jkun obbligatorju biss meta jkun hemm dubju dwar l-affidabbiltà tad-data elenkata, u jagħti parir lill-Kummissjoni biex tistabbilixxi kriterji oġġettivi u tipprovdi appoġġ metodoloġiku għat-twettiq ta' valutazzjonijiet bħal dawn;

47.

iqis li la l-miri l-ġodda fil-qasam tar-riċiklaġġ tal-iskart muniċipali, l-iskart mill-imballaġġ u l-iskart tat-tagħmir elettriku u elettroniku, la l-eliminazzjoni l-ewwel sal-2025 u wara l-2030 tar-rimi tal-iskart riċiklabbli u lanqas is-sistema tat-twissija prekoċi jew il-modifika tal-obbligi fil-qasam tar-rapporti ma jqajmu tħassib dwar is-sussidjarjetà. Madankollu jeżistu ċerti problemi, fir-rigward tal-proporzjonalità, minħabba d-differenzi fil-livell ta' implimentazzjoni tal-miri attwali u l-iskeda taż-żmien għall-miri l-ġodda previsti mill-Kummissjoni (21);

48.

jinsab imħasseb dwar l-għadd ta' dispożizzjonijiet fid-Direttiva l-ġdida li jagħtu lill-Kummissjoni l-awtorità li tadotta atti ddelegati fil-futur.

28.4.2015   

MT

Il-Ġurnal Uffiċjali tal-Unjoni Ewropea

C 140/47

1.

jenfasizza l-benefiċċji u l-opportunitajiet provduti mill-użu komprensiv tat-Teknoloġiji tal-Informazzjoni u tal-Komunikazzjoni (ICT) biex is-settur pubbliku jsir aktar effiċjenti u trasparenti;

2.

jinnota l-importanza tal-aċċessibbiltà tal-istituzzjonijiet pubbliċi għall-individwi privati u l-intrapriżi permezz ta' mezzi elettroniċi, irrispettivament mill-post fiżiku fejn tinsab il-persuna li qed tiġi indirizzata u għalhekk jenfasizza l-appoġġ tiegħu għall-iżvilupp tas-servizzi pubbliċi transkonfinali, speċjalment dawk li jkopru l-aspetti tal-interoperabbiltà u l-identifikazzjoni elettronika, il-firem elettroniċi, is-servizz elettroniku tad-dokumenti u komponenti fundamentali oħra tal-gvern elettroniku (1);

3.

jenfasizza l-importanza tal-interoperabbiltà bejn l-amministrazzjonijiet pubbliċi tal-Istati Membri differenti u ta' dawk tal-Unjoni Ewropea bħala parti mill-modernizzazzjoni ġenerali tal-amministrazzjonijiet pubbliċi madwar l-UE, kif ukoll tal-korpi tal-Komunità, bil-għan li jinkisbu l-għanijiet tal-Istrateġija Ewropa 2020 u l-programm ewlieni tagħha: Aġenda Diġitali għall-Ewropa (2);

4.

jinnota li, minn mindu ġew introdotti fl-1995, l-UE tat attenzjoni partikolari lill-programmi tal-interoperabbiltà (3), u li diversi korpi tal-UE taw valutazzjoni pożittiva ta' dawn l-attivitajiet (4) u jitlob li dan l-impenn jinżamm u li jitkompla l-proċess ta' modernizzazzjoni tas-servizzi pubbliċi, filwaqt li tiġi promossa l-governanza tajba u tiġi ffaċilitata l-interazzjoni transkonfinali u transsettorjali;

5.

jilqa' l-konklużjonijiet tal-Kunsill Ewropew ta' Ottubru 24-25 2013, li ssuġġerixxa li l-modernizzazzjoni tal-amministrazzjonijiet pubbliċi għandha titkompla, b'enfasi partikolari fuq is-servizzi elettroniċi bħall-gvern elettroniku, is-saħħa elettronika, il-fatturazzjoni elettronika u l-akkwist elettroniku, u enfasizza l-ħtieġa li tiġi żgurata l-interoperabbiltà bejn dawn is-servizzi, biex b'hekk ikun hemm aktar servizzi diġitali aħjar għaċ-ċittadini u l-intrapriżi madwar l-Ewropa, ffrankar ta' spejjeż u titjib fl-effiċjenza, it-trasparenza u l-kwalità tas-servizzi fis-settur pubbliku;

6.

jixtieq jenfasizza r-riżultati tal-Istħarriġ Annwali dwar it-Tkabbir ippubblikat mill-Kummissjoni fl-2011, l-2012 u l-2013 li juru li l-kwalità tal-amministrazzjonijiet pubbliċi Ewropej għandha impatt dirett fuq l-ambjent ekonomiku u għalhekk hija kruċjali għall-istimulazzjoni tal-produttività, il-kompetittività u t-tkabbir; konsegwentement jenfasizza l-importanza tal-modernizzazzjoni f'waqtha u komprensiva tal-amministrazzjonijiet pubbliċi;

7.

jenfasizza li aktar minn 1 00  000 awtorità lokali u reġjonali minn kull wieħed mit-28 Stat Membru tal-UE, kif ukoll pajjiżi oħra milquta direttament mil-leġislazzjoni tal-UE, huma provvedituri ewlenin ta' servizzi għall-pubbliku ġenerali u għall-intrapriżi, li leħinhom għandu jinstema' u jiġi kkunsidrat meta jiġu abbozzati inizjattivi li jikkonċernaw il-provvista ta' servizz pubbliku;

8.

jilqa' l-proposta għal programm dwar soluzzjonijiet ta' interoperabbiltà għall-amministrazzjonijiet pubbliċi, in-negozji u ċ-ċittadini Ewropej (ISA2) u jarah ukoll bħala pass lejn it-tkomplija tas-suq diġitali Ewropew (5). Madankollu, il-Kumitat jenfasizza l-importanza li jiġi żgurat li dan il-programm huwa konformi ma' oqsma ta' politika rilevanti oħra bħas-Semestru Ewropew, il-Programm Orizzont 2020, il-Faċilità Nikkollegaw l-Ewropa, il-pilastru II dwar l-interoperabbiltà u l-istandards tal-Aġenda Diġitali għall-Ewropa, l-Istrateġija Ewropea għall-Interoperabbiltà, il-Qafas Ewropew tal-Interoperabbiltà u l-aġġornamaneti futuri tagħhom bil-għan li jiġu massimizzati l-koerenza u s-sinerġiji;

9.

jinnota r-riżultati tal-istudji li jindikaw li l-gvernijiet tal-Istati Membri għadhom 'il bogħod biex ikunu jistgħu jiggarantixxu aċċess ħieles għas-servizzi pubbliċi onlajn lill-intrapriżi u lill-individwi privati, anke fi ħdan l-Istat Membru tagħhom stess (l-indikatur bħalissa jammonta għal 72 % tas-servizzi kollha), filwaqt li d-disponibbiltà tas-servizzi pubbliċi transkonfinali għaċ-ċittadini ta' pajjiżi differenti tal-UE hija ta' anqas minn nofs is-servizzi (42 %) (6);

10.

jenfasizza l-importanza tal-livell Ewropew fil-koordinazzjoni u l-provvista ta' linji gwida dwar prattika tajba f'oqsma ġodda bħas-servizzi pubbliċi elettroniċi u l-interoperabbiltà transkonfinali tagħhom;

11.

jenfasizza l-benefiċċji f'termini ta' anqas spejjeż, l-użu mill-ġdid u l-flessibbiltà tal-prodott finali provduti mill-użu ta' standards miftuħa;

12.

għaldaqstant, jappella biex isiru sforzi biex tiġi żgurata l-interoperabbiltà transsettorjali u transkonfinali komprensiva tas-servizzi elettroniċi tal-UE u tal-Istati Membri fil-livell nazzjonali, reġjonali u lokali filwaqt li l-pajjiżi interessati jkunu jistgħu jingħaqdu fis-sistema, fejn ikun adatt;

13.

jilqa' l-fatt li l-Proposta għal Deċiżjoni tibni fuq l-inizjattiva tal-koeżjoni elettronika, li timmira li tissemplifika u tistandardizza l-implimentazzjoni tal-politika ta' koeżjoni għall-perjodu 2014-2020 permezz tal-iskambju elettroniku tal-informazzjoni bejn il-benefiċjarji u l-entitajiet rilevanti;

14.

jaqbel mal-kawtela espressa fl-abbozz ta' deċiżjoni dwar il-fatt li approċċ ta' interoperabbiltà speċifika għas-settur jinkludi r-riskju li l-adozzjoni ta' soluzzjonijiet differenti jew inkompatibbli fil-livell nazzjonali jew settorjali ser toħloq ostakli ġodda li jfixklu l-funzjonament tajjeb tas-suq intern, il-libertajiet assoċjati tal-moviment u l-kompetittività tas-suq;

15.

jilqa' l-impenn tal-Programm ISA2 biex jippromovi u, fejn xieraq, jappoġġja l-istandardizzazzjoni, parzjali jew sħiħa, tas-soluzzjonijiet eżistenti tal-interoperabbiltà u li dan isir f'kooperazzjoni ma' attivitajiet oħra ta' standardizzazzjoni fil-livell tal-UE u f'organizzazzjonijiet ta' standardizzazzjoni oħra fil-livell Ewropew u internazzjonali;

16.

jinnota li l-leġislazzjoni dwar l-interoperabbiltà għandha tkun estiża għall-individwi privati u l-intrapriżi (7), u għaldaqstant jitlob li l-Programm ISA2 jkun aktar miftuħ għas-setturi nongovernattivi;

17.

jiġbed l-attenzjoni għal-livell għoli ta' fiduċja li tqiegħed fis-servizzi tal-cloud computing (8), iżda jinnota li minħabba n-natura fiżika ta' dan is-servizz għandha tingħata l-ogħla prijorità lill-kwistjonijiet tal-operazzjoni sigura u integrali tas-sistemi interoperabbli;

18.

jenfasizza li l-interoperabbiltà tal-gvern elettroniku tirrikjedi mhux biss il-kompatibbiltà tas-sistema (soluzzjonijiet M2M, jiġifieri bejn magna u oħra), iżda wkoll il-kapaċità tas-servizzi ċivili biex jaħdmu f'kooperazzjoni mill-qrib mas-sistemi tal-informazzjoni, kif ukoll is-sensibilizzazzjoni tal-pubbliku dwar il-possibbiltajiet li joffru sistemi bħal dawn; għalhekk il-Kumitat jissuġġerixxi li jiżdiedu l-komponenti dwar il-bini tal-kapaċità umana, kemm f'termini ta' ħiliet diġitali kif ukoll lingwistiċi, u dwar is-sensibilizzazzjoni fil-Programm ISA2, kif ġie suġġerit f'leġislazzjonijiet oħra (9);

19.

jilqa' l-kamp ta' applikazzjoni tal-proposta għal Programm ISA2, li ser ikopri l-livelli kollha ta' amministrazzjoni: Ewropew, lokali, reġjonali u nazzjonali u li ser jikkunsidra l-ħtiġijiet rispettivi tagħhom, kif ukoll dawk taċ-ċittadini u l-intrapriżi fejn ikun rilevanti (10);

20.

jinnota li f'għadd ta' dikjarazzjonijiet ministerjali (11), xi ministri talbu lill-Kummissjoni tiffaċilita l-kooperazzjoni bejn l-Istati Membri billi timplimenta soluzzjonijiet ta' interoperabbiltà transsettorjali u transkonfinali li jippermettu l-ksib ta' servizzi pubbliċi aktar effiċjenti u siguri;

21.

għaldaqstant, jilqa' li jiġu pprovduti soluzzjonijiet ta' interoperabbiltà żviluppati għal użu illimitat mill-istituzzjonijiet u korpi oħrajn tal-Unjoni, u l-amministrazzjonijiet pubbliċi nazzjonali, reġjonali u lokali, u b'hekk tiġi ffaċilitata l-interazzjoni transkonfinali jew transsettorjali bejniethom (12);

22.

jilqa' l-ftuħ tal-ISA2 għaż-Żona Ekonomika Ewropea u għal-pajjiżi kandidati, bħala għodda għall-promozzjoni tal-integrazzjoni tagħhom mal-UE; madankollu jissuġġerixxi li, filwaqt li jiġi kkunsidrat l-interess possibbli minn pajjiżi msieħba oħra u l-potenzjali li jinfirxu inċentivi ta' governanza tajba, il-finanzjament tal-ISA2 jinfetaħ għall-pajjiżi msieħba oħra, primarjament dawk involuti fis-Sħubija tal-Lvant jew dik Ewro-Mediterranja;

23.

madankollu, iqis kemxejn limitata u mhux definita d-dispożizzjoni li l-amministrazzjonijiet nazzjonali jistgħu jiġu appoġġjati fix-xogħol tagħhom permezz ta' strumenti speċifiċi taħt il-Fondi Ewropej Strutturali u ta' Investiment (ESIF) u jappella għal elaborazzjoni aktar iddettaljata dwar din il-proposta;

24.

jirrikonoxxi l-progress fit-tfitxija tal-interoperabbiltà għas-servizzi pubbliċi Ewropej li sar permezz tal-introduzzjoni tal-Istrateġija Ewropea għall-Interoperabbiltà u l-Qafas Ewropew tal-Interoperabbiltà u jissuġġerixxi li l-Kummissjoni tirrapporta b'mod regolari dwar il-livell ta' interoperabbiltà tas-servizzi pubbliċi fi ħdan id-diversi Stati Membri, il-pajjiżi taż-ŻEE u l-pajjiżi kandidati, b'hekk jiġu enfasizzati l-prattiki tajba u jiġi implimentat il-metodu miftuħ ta' koordinazzjoni f'dan il-qasam;

25.

jitlob biex il-bidliet attwali fl-interoperabbiltà transsettorjali u transkonfinali tas-servizzi elettroniċi tal-amministrazzjonijiet pubbliċi madwar l-UE jiġu inklużi, anke fil-livell lokali u reġjonali, bħala wieħed mill-indikaturi li għandhom jiġu żviluppati fil-programm ta' ħidma kontinwa bil-għan li jitkejjel l-impatt tal-programm;

26.

fid-dawl tar-rata baxxa ta' parteċipazzjoni mill-Istati Membri matul il-konsultazzjonijiet dwar il-Programm ISA2 (13), jissuġġerixxi li l-Kummissjoni tipprova tinvolvi aktar mill-qrib lill-Istati Membri kif ukoll lill-awtoritajiet sottonazzjonali fir-reviżjoni tal-Programm ISA2;

27.

jilqa' r-referenza għall-multilingwiżmu bħala wieħed mill-prinċipji ewlenin tal-Programm ISA2 (14) u jitlob lill-Kummissjoni tagħti attenzjoni adegwata lill-iżvilupp ta' soluzzjonijiet multilingwi, li jipprovdu lill-utenti aħħarin b'opportunitajiet tajbin biex jużaw soluzzjonijiet fil-lingwa nattiva tagħhom;

28.

fid-dawl tal-possibbiltajiet ta' użu ħażin tad-data maħżuna u proċessata, kif ukoll l-implikazzjonijiet soċjali u politiċi, jissuġġerixxi li tissemma' b'mod espliċitu l-kwistjoni tas-sigurtà tal-użu bħala waħda mill-prinċipji ġenerali li japplikaw għall-azzjonijiet kollha ffinanzjati fil-qafas tal-Programm ISA2;

29.

peress li l-implimentazzjoni tal-azzjonijiet fil-programmi li ppreċedew il-Programm ISA2 sikwit kienu ostakolati minn proċeduri ta' akkwist pubbliku onerużi, jappella lill-Kummissjoni biex tfittex titjib possibbli f'dan il-qasam, li jagħmilha possibbli wkoll li jiġu rispettati l-prinċipji tal-ġestjoni finanzjarja soda u tal-valur tal-flus;

30.

jirreferi għall-appoġġ li sikwit jenfasizza għall-iżvilupp ta' oqfsa komuni ġodda fi ħdan l-abbozz ta' deċiżjoni dwar l-ISA2 u jitlob għal approċċ li jagħmel użu aktar effiċjenti tar-riżorsi, li primarjament jiffoka fuq l-aġġornament u l-espansjoni tal-infrastruttura attwali pjuttost mill-ħolqien ta' infrastrutturi ġodda;

31.

Jiddikjara li l-proposta tikkonforma mal-prinċipji tas-sussidjarjetà u tal-proporzjonalità iżda jirrimarka li l-involviment effettiv tal-Istati Membri u l-awtoritajiet lokali u reġjonali tagħhom fil-programm ISA2 ser ikun essenzjali biex jinkisbu bis-sħiħ l-għanijiet tiegħu u jiggarantixxi r-rispett kontinwu tal-prinċipji tas-sussidjarjetà waqt l-implimentazzjoni tal-programm;

32.

għaldaqstant, jinnota l-ħtieġa għal interazzjoni mill-qrib mal-livelli kollha tal-amministrazzjoni pubblika, speċjalment fil-livell tal-gvern l-eqreb taċ-ċittadini u li jipprovdi l-ikbar firxa ta' servizzi – l-awtoritajiet lokali u reġjonali;

33.

jilqa' l-ambizzjoni li l-ISA2 jiġi limitat għal każijiet ta' valur miżjud Ewropew ċar u li jagħtu kontribut tanġibbli għat-tisħiħ u l-implimentazzjoni tal-politiki u l-leġislazzjoni tal-UE, biex b'hekk jinkisbu sinerġiji konsiderevoli permezz tal-koordinazzjoni bejn il-fruntieri jew is-setturi;