19.8.2014   

MT

Il-Ġurnal Uffiċjali tal-Unjoni Ewropea

C 271/1

—

wara li kkunsidra t-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea li jagħtuh prerogattivi u responsabbiltajiet ġodda fis-sistema politika Ewropea;

—

wara li kkunsidra l-istqarrija tal-missjoni tiegħu fejn huwa definit bħala assemblea politika tar-rappreżentanti reġjonali u lokali, b’funzjoni doppja ta’ rappreżentazzjoni territorjali u demokratika fil-proċess tat-teħid ta’ deċiżjonijiet tal-Unjoni;

—

wara li kkunsidra l-Protokoll iffirmat fil-5 ta’ Frar 2014 mal-Parlament Ewropew li jifformalizza l-impenn komuni għat-tisħiħ tal-leġittimità demokratika tal-Unjoni;

—

wara li kkunsidra l-Protokoll dwar l-arranġamenti ta’ koperazzjoni bejn il-Kummissjoni Ewropea u l-Kumitat tar-Reġjuni ffirmat fis-16 ta’ Frar 2012, li jsaħħaħ l-involviment tiegħu fl-implimentazzjoni tal-programm ta’ ħidma annwali u l-ipprogrammar leġislattiv;

—

isostni r-rwol uniku li kellu għal dawn l-aħħar għoxrin sena għas-servizz tal-Unjoni Ewropea u għall-konformità mal-prinċipji tas-sussidjarjetà u l-proporzjonalità u għad-difiża tal-għanijiet tal-koeżjoni ekonomika, soċjali u territorjali.

—

jenfasizza l-impatt dejjem jikber tiegħu fuq l-iżvilupp tal-leġislazzjoni Ewropea permezz tar-rwol konsultattiv kif ukoll ir-rwol politiku li huwa jaqdi fil-proċess leġislattiv tal-UE, il-mandat ewlieni tiegħu huwa li jiżgura li l-għarfien tal-awtoritajiet lokali u reġjonali dwar l-implimentazzjoni u l-applikazzjoni tal-liġijiet tal-UE jkun inkluż fil-proċess leġislattiv;

—

iddeċieda li jgħaqqad iċ-ċelebrazzjonijiet tal-għoxrin anniversarju tiegħu ma’ ħarsa ‘l quddiem lejn ir-rwol politiku u istituzzjonali tiegħu fil-governanza tal-Unjoni Ewropea u li għaldaqstant jaqsam il-viżjoni tiegħu tal-futur tal-proċess ta’ integrazzjoni Ewropea;

—

jipproponi, għal dan il-għan, pjan direzzjonali b’għanijiet strateġiċi għat-tnedija mill-ġdid tad-dinamika tal-Unjoni Ewropea;

1.

It-tisħiħ tal-fiduċja u l-parteċipazzjoni taċ-ċittadini Ewropej fir-rigward tal-Unjoni Ewropea

1.1.

jinnota, fid-dawl tar-riżultat tal-elezzjonijiet Ewropej reċenti, il-bżonn li tissaħħaħ il-fiduċja taċ-ċittadini fl-Unjoni Ewropea sabiex l-azzjoni tal-Unjoni tkun eqreb tat-tħassib tagħhom u ġġib valur miżjud;

1.2.

jenfasizza r-rwol strateġiku tiegħu bħala rappreżentant tal-awtoritajiet lokali u reġjonali biex il-proġett Ewropew – anke bħala “Ewropa tar-reġjuni” – jirnexxi; jenfasizza li huwa mezz għat-trażmissjoni indispensabbli għall-espressjoni tal-interessi u jirrapreżenta l-livell ta’ governanza l-iktar viċin taċ-ċittadini, għaldaqstant jista’ jirrifletti l-interessi tagħhom fl-implimentazzjoni ta’ proġetti Ewropej fil-livell tal-istituzzjonijiet Ewropej;

1.3.

b’kunsiderazzjoni tas-setgħat stabbiliti legalment fil-livell Ewropew u nazzjonali, iqis li hija r-responsabilità kollettiva tal-istituzzjonijiet Ewropej, l-Istati Membri u l-awtoritajiet lokali u reġjonali li jtejbu l-idoneità regolatorja tal-Unjoni Ewropea billi jistabbilixxu proċeduri aktar trasparenti, inaqqsu l-piżijiet amminstrattivi u jistabbilixxu mekkaniżmi li permezz tagħhom ikun jista’ jiġi analizzat l-impatt tal-azzjonijiet tagħha fuq il-ħajja ta’ kuljum taċ-ċittadini;

1.4.

jenfasizza, fuq il-bażi tal-istħarriġ tal-Ewrobarometru, il-fiduċja li ċ-ċittadini Ewropej għandhom fir-rappreżentanti lokali u reġjonali tagħhom u l-aspettattivi tagħhom fir-rigward ta’ involviment akbar fil-governanza Ewropea. Huwa għalhekk essenzjali li jissaħħaħ l-istatus tiegħu bħala assemblea politika billi jivvalorizza l-eżerċizzju tal-mandati Ewropej, lokali u reġjonali tal-membri tiegħu fil-livell Ewropew, nazzjonali, reġjonali u lokali;

1.5.

ser joħroġ iktar fid-dieher il-leġittimità demokratika u l-identità politika tiegħu bħala istituzzjoni Ewropea billi huwa l-Assemblea tal-UE tar-Rappreżentanti Reġjonali u Lokali u beħsiebu jżid il-viżibbiltà u l-impatt politiku tal-opinjonijiet u l-pożizzjonijiet tiegħu; jimpenja ruħu li jżid l-attivitajiet tiegħu flimkien mal-partiti politiċi u mal-gruppi ta’ partiti politiċi fil-livelli kollha;

1.6.

se jisfrutta wkoll bis-sħiħ l-ispeċifiċità territorjali tiegħu sabiex tissaħħaħ l-influwenza tiegħu fit-teħid tad-deċiżjonijiet u jgħaqqad flimkien il-kontributi tad-delegazzjonijiet nazzjonali tiegħu u n-netwerks ta’ esperti territorjali fil-kisba tal-missjoni tiegħu;

1.7.

jappella lill-Istati Membri biex, meta jaħtru l-membri tiegħu, jiżguraw rappreżentanza politika li tirrifletti r-riżultati tal-elezzjonijiet lokali u reġjonali u li jiġu infurzati l-prinċipji tal-ugwaljanza bejn is-sessi u l-opportunitajiet indaqs u jenfasizza l-ħtieġa li jitħaffu l-proċeduri tan-nomina;

1.8.

għandu l-għan li jippromovi l-ugwaljanza bejn in-nisa u l-irġiel fl-oqsma kollha ta’ attività tiegħu biex jiżgura l-leġittimità demokratika tal-Unjoni;

1.9.

jinsisti li l-Unjoni Ewropea teħtieġ sistema ta’ governanza f’diversi livelli ġenwina li permezz tagħha tiġi garantita kooperazzjoni effettiva bejn il-bliet, ir-reġjuni u l-Istati Membri; jenfasizza li l-Unjoni Ewropea għandha tindirizza l-oqsma fejn hija meħtieġa azzjoni, waqt li tastjeni minn regoli ġodda f’oqsma fejn l-iktar livell xieraq huwa dak lokali, reġjonali jew nazzjonali;

1.10.

beħsiebu jappoġġja bis-sħiħ lill-membri tiegħu fil-qadi tagħhom tar-rwol ta’ “ambaxxaturi” tal-Ewropa fir-reġjuni, il-bliet u l-muniċipalitajiet u viċi versa u fit-tisħiħ tar-rabtiet tagħhom maċ-ċittadini tal-UE;

1.11.

iqis għalhekk essenzjali li jistabbilixxi, fi ħdan l-uffiċċji ta’ informazzjoni tal-Parlament Ewropew u l-uffiċċji tar-rappreżentanzi tal-Kummissjoni Ewropea fl-Istati Membri, mekkaniżmu ta’ appoġġ għall-attivitajiet tal-membri tal-KtR, li jinkoraġġixxi l-interazzjoni tagħhom mal-membri parlamentari fil-kostitwenzi tagħhom; huwa lest li jappoġġja kampanji ta’ komunikazzjoni deċentralizzati dwar il-prijoritajiet ta’ azzjoni tal-Unjoni u l-impatt tal-leġislazzjoni Ewropea fil-livell lokali u reġjonali filwaqt li jqis il-lingwi uffiċjali ta’ kull reġjun;

1.12.

se jappoġġja aktar il-membri tiegħu fi ħdan il-komunitajiet territorjali tagħhom, b’mod partikolari bl-organizzazzjoni ta’ dibattiti maċ-ċittadini, u fl-okkażjoni ta’ sessjonijiet speċjali mill-kunsilli lokali u reġjonali ddedikati għal temi topiċi Ewropej u, fejn xieraq, il-proposti għal Inizjattiva taċ-Ċittadini Ewropej;

1.13.

jenfasizza l-attivitajiet politiċi tiegħu li jikkostitwixxu pjattaforma għad-djalogu dwar id-dimensjoni territorjali tal-Unjoni Ewropea inklużi s-Summits tar-reġjuni u l-bliet li jipprovdu opportunità biex jiġu diskussi l-ġejjieni tal-Ewropa u l-iżvilupp tal-awtoritajiet lokali u reġjonali f’perspettiva itwal ta’ żmien;

1.14.

se jsaħħaħ l-istrateġija ta’ komunikazzjoni interistituzzjonali tiegħu u jitlob għal riformulazzjoni tal-istrateġija ta’ komunikazzjoni tal-Unjoni Ewropea, u jirrakkomanda mod ġdid ta’ komunikazzjoni mal-pubbliku permezz ta’ lingwaġġ ċar u li jinftiehem; jenfasizza r-rwol ewlieni tax-xandir lokali u reġjonali u netwerks soċjali sabiex jiffukaw mill-ġdid il-perċezzjoni tal-politiki u l-kisbiet tal-Unjoni Ewropea u l-promozzjoni tagħhom;

2.

Isegwi l-integrazzjoni Ewropea fuq il-bażi ta’ metodu komunitarju rinnovat li jikkunsidra bis-sħiħ ir-responsabbiltàjiet konġunti tal-livelli differenti ta’ governanza

2.1.

jikkunsidra l-governanza f’diversi livelli bħala prinċipju ewlieni li fuqu għandu jistrieħ metodu komunitarju rinnovat għas-segwitu tal-integrazzjoni Ewropea;

2.2.

se jieħu sjieda tal-prinċipji tal-governanza f’diversi livelli permezz tal-adeżjoni għall-Karta għall-governanza f’diversi livelli fl-Ewropa li adotta f’April 2014;

2.3.

jilqa’ b’mod partikolari l-estensjoni tal-potenzjal tal-kodiċi tal-kondotta dwar l-implimentazzjoni tal-prinċipju ta’ sħubija, diġà akkwistat għal-leġislazzjoni dwar il-politika ta’ koeżjoni, għal oqsma ta’ azzjoni oħra tal-Unjoni Ewropea.

2.4.

jikkundanna l-impatt dirett tal-kriżi fuq l-awtonomija u s-setgħa ta’ azzjoni tal-awtoritajiet lokali u reġjonali; għalhekk se juża r-rapport nazzjonali tal-Kungress tal-Awtoritajiet Lokali u Reġjonali tal-Kunsill tal-Ewropa biex isegwi l-evoluzzjoni tal-proċess ta’ deċentralizzazzjoni u reġjonalizzazzjoni;

2.5.

għandu jiżgura l-ħarsien tal-prerogattivi tal-awtoritajiet lokali u reġjonali fil-mekkaniżmi ta’ koordinazzjoni fil-livell Ewropew; iqis għalhekk essenzjali li l-awtoritajiet lokali u reġjonali jkollhom ir-riżorsi finanzjarji disponibbli li jikkorrespondu għad-deċentralizzazzjoni fiskali;

2.6.

jappoġġja l-kunsiderazzjoni aħjar tad-dimensjoni lokali u reġjonali tal-istrateġija għat-tkabbir tal-Unjoni, tal-politika tal-viċinat u tal-politika għall-iżvilupp tal-Unjoni Ewropea;

2.7.

itenni l-importanza tas-sussidjarjetà bħala prinċipju demokratiku fundamentali u mezz essenzjali għat-titjib tal-kwalità tar-regolamentazzjoni tal-UE u l-valur miżjud tal-UE kif ukoll għat-tnaqqis tal-piżijiet amministrattivi; jenfasizza l-importanza li jissaħħaħ ir-rwol mogħti lill-konformità mal-prinċipju tal-proporzjonalità; jiġbed l-attenzjoni għall-ħidma tiegħu, permezz tal-istrateġija ta’ monitoraġġ u l-mekkaniżmu ta’ konsultazzjoni tal-awtoritajiet lokali u reġjonali tiegħu, biex jiżgura li dawn il-prinċipji jiġu rispettati;

2.8.

jenfasizza r-rabta ta’ dan mal-prinċipji tas-sħubija u tal-governanza f’diversi livelli;

2.9.

se jassumi r-responsabbiltajiet tiegħu fid-dibattitu dwar ir-reviżjoni tal-kompetenzi tal-Unjoni Ewropea; dan għandu jwassal biex jiżdied il-valur miżjud tal-azzjoni tal-UE, u m’għandux ikun biss konfrontazzjoni bejn “aktar” jew “inqas” Ewropa;

2.10.

isaħħaħ l-impatt tal-opinjonijiet tiegħu permezz tal-attivazzjoni tal-mekkanimu ta’ konsultazzjoni mill-bażi territorjali tiegħu u l-koordinazzjoni, fost oħrajn, mar-reġjuni li għandhom setgħat leġislattivi u assoċjazzjonijiet li jirrappreżentaw lill-awtoritajiet lokali u reġjonali;

2.11.

se jżid l-involviment tiegħu matul iċ-ċiklu leġislattiv biex ikun jista’, jekk meħtieġ, jattiva d-dritt tiegħu ta’ rikors quddiem il-Qorti tal-Ġustizzja tal-Unjoni Ewropea;

2.12.

se jistabbilixxi għaldaqstant, kooperazzjoni iktar strutturata mal-Parlament Ewropew, il-parlamenti nazzjonali u jekk ikun adatt, it-tieni awla li tirrappreżenta d-dimensjoni territorjali fil-livell nazzjonali, iżda wkoll mal-parlamenti reġjonali u se jappoġġja l-proċedura ta’ twissija bikrija minn awtoritajiet reġjonali;

2.13.

jilqa’ l-progress li jippermetti l-involviment tiegħu mill-bidu fl-abbozzar tal-leġislazzjoni; għalhekk se jagħti attenzjoni partikolari għall-analiżi tal-impatt territorjali u l-iżvilupp ta’ indikaturi territorjali; itenni l-ħtieġa li jiġi żgurat l-involviment tal-awtoritajiet lokali u reġjonali fil-mekkaniżmi ta’ kooperazzjoni istituzzjonali għal “regolamentazzjoni aħjar”;

2.14.

se jaħdem biex iżid il-kapaċità ta’ għarfien tiegħu biex jappoġġja l-funzjoni konsultattiva tiegħu billi jinvolvi l-għarfien mill-awtoritajiet lokali u reġjonali kif ukoll mill-assoċjazzjonijiet lokali u reġjonali Ewropej fil-proċessi konsultattivi tiegħu relatati mal-opinjonijiet tiegħu, il-valutazzjonijiet tal-impatt territorjali tiegħu u r-rispett tas-sussidjarjetà u tal-proporzjonalità;

2.15.

jitlob l-involviment tal-awtoritajiet lokali u reġjonali fil-Programm dwar l-Idoneità u l-Prestazzjoni tar-Regolamentazzjoni (REFIT) sabiex titjieb il-kwalità tal-leġislazzjoni u jkun żgurat li din tiġi aċċettata aħjar miċ-ċittadini;

3.

Insaħħu r-rappreżentanza istituzzjonali tal-awtoritajiet reġjonali u lokali fil-proċess tat-teħid tad-deċiżjonijet

3.1.

jafferma l-leġittimità, il-karattru uniku u l-komplementarjetà tiegħu fl-arkitettura istituzzjonali tal-Unjoni Ewropea u għandu l-intenzjoni li jiddefendi l-indipendenza politika u l-awtonomija funzjonali tiegħu sabiex jasserixxi r-rwol tiegħu ta’ istituzzjoni politika biex jirfed il-funzjoni konsultattiva tiegħu billi jsegwi l-opinjonijiet tiegħu b’mod aktar effettiv u jsaħħaħ il-kooperazzjoni kif ukoll il-kuntatti mal-Parlament, il-Kummissjoni u l-Kunsill;

3.2.

se jikkonċentra fuq il-mandat ewlieni tiegħu; l-iffukar tal-attenzjoni u r-riżorsi tiegħu fuq il-proċess leġislattiv tal-UE se jsaħħaħ ir-rwol politiku tal-KtR bħala korp konsultattiv u jiġġustifika kwalunkwe prerogattiva addizzjonali li l-KtR jista’ jitlob fil-futur;

3.3.

jikkunsidra l-istrateġija tiegħu pass pass, fuq medda qasira ta’ żmien billi jisfrutta l-potenzjal sħiħ tat-Trattat ta’ Lisbona u fit-tul bħala parti minn tfassil mill-ġdid tat-Trattati;

3.4.

jtlob li, skont il-prinċipju ta’ kooperazzjoni sinċiera, il-konsultazzjoni tiegħu timpenja lill-istituzzjonijiet li jikkonsultawh biex jirrispettaw il-kompetenzi istituzzjonali tiegħu u ma jeżentahomx mill-obbligu tagħhom li jindikaw ir-raġunijiet għaliex ir-rakkomandazzjonijiet ewlenin tiegħu jkunu ġew jew ma ġewx segwiti;

3.5.

jilqa’ l-konsultazzjoni dejjem tikber tal-Parlament Ewropew u jistenna, mill-impatt pożittiv tal-politika ta’ kooperazzjoni stabbilita permezz tal-Ftehim ta’ Kooperazzjoni, sistema ta’ reċiproċità fil-parteċipazzjoni tar-relaturi fl-attivitajiet tal-kumitati rispettivi;

3.6.

jenfasizza fir-rigward tal-leġislatur Ewropew, il-ħtieġa ta’ tisħiħ kwalitattiv u kwantitattiv tal-kooperazzjoni tiegħu mal-Parlament Ewropew u l-Kunsill; għandu l-ħsieb li jżid l-impatt tiegħu fuq il-proposti leġislattivi billi jsaħħaħ l-involviment tar-relaturi tiegħu matul il-proċess leġislattiv kollu, sabiex jingħata appoġġ għall-monitoraġġ tal-proposti tiegħu fit-testi leġislattivi li ħareġ opinjoni dwarhom;

3.7.

jafferma status ta’ osservatur fin-negozjati fit-trijalogi fl-oqsma ta’ konsultazzjoni obbligatorja tiegħu;

3.8.

jirrakkomanda l-organizzazzjoni ta’ laqgħat interparlamentari fejn il-membri tiegħu, il-membri tal-Parlament Ewropew u tal-parlamenti reġjonali jkunu jistgħu jiddiskutu kwistjonijiet topiċi u l-impatt tal-leġislazzjoni Ewropea;

3.9.

għandu l-intenzjoni li jipparteċipa aktar mill-qrib fit-tfassil u l-implimentazzjoni tal-punti tal-programmi tal-presidenzi li huma rilevanti għall-awtoritajiet lokali u reġjonali u se jinteraġġixxi aħjar mal-Kunsill kollu kemm hu u b’mod partikolari mal-Ministri Reġjonali fil-Kunsill;

3.10.

jitlob l-involviment tar-rappreżentanti tal-awtoritajiet lokali u reġjonali, fejn xieraq dawk b’setgħa leġislattiva, fil-gruppi ta’ ħidma tal-Kunsill u tal-Kummissjoni meta l-politiki kkonċernati jkunu ta’ interess territorjali kbir;

3.11.

jilqa’ r-rapporti stabbiliti mal-Presidenza tal-Kunsill Ewropew, li għandhom ikunu strutturati sabiex jinżamm il-valur miżjud tal-konsultazzjoni territorjali, partikolarment fil-kuntest tat-tħejjija tal-Kunsill Ewropew;

3.12.

huwa sodisfatt b’mod partikulari bl-iżvilupp tal-kooperazzjoni tiegħu mal-Kummissjoni Ewropea, partikolarment fil-fażi ta’ konsultazzjoni preleġislattiva, iżda jtenni t-talba tiegħu, biex fit-tħejjija ta’ kwistjonijiet topiċi, tinbeda prattika sistematika ta’ mistoqsijiet orali u bil-miktub lill-eżekuttiv Ewropew dwar ir-rakkomandazzjonijiet politiċi tiegħu;

3.13.

jenfasizza l-ħtieġa li l-KtR ikun involut kemm jista’ jkun kmieni fl-ipprogrammar annwali u pluriennali tal-Unjoni Ewropea, sabiex huwa jkun jista’ jikkontribwixxi għad-definizzjoni tal-għażliet strateġiċi u politiċi għall-Ewropa; barra minn hekk jitlob li jiġi involut mill-bidu fil-proċess biex jinħatar Kummissarju għall-Politika Reġjonali, mill-mandat li jmiss (2014-2019);

3.14.

jappella għall-involviment tal-awtoritajiet lokali u reġjonali fil-mekkaniżmi ta’ governanza ekonomika u jaċċetta minn naħa li l-KtR jipparteċipa fid-djalogu ekonomiku bejn il-Kummissjoni Ewropea u l-Parlament Ewropew u min-naħa l-oħra li tkun żgurata l-parteċipazzjoni tal-membri tiegħu fil-ġimgħa parlamentari tal-Parlament Ewropew mal-Membri Parlamentari Ewropej u nazzjonali;

3.15.

jitlob għall-integrazzjoni tat-Trattat dwar l-Istabbiltà, il-Koordinazzjoni u l-Governanza fl-Unjoni Ekonomika u Monetarja (TSKG) fil-qafas legali tal-Unjoni Ewropea, l-introduzzjoni ta’ klawsola orizzontali li permezz tagħha jkun jista’ jiġi kkonsultat f’oqsma ta’ kompetenza kondiviża għall-miżuri ta’ koordinazzjoni tal-politiki ekonomiċi u tal-impjieg, u fl-oqsma ta’ azzjoni ta’ appoġġ, ta’ koordinazzjoni u komplementarji;

3.16.

itenni t-talbiet tiegħu fil-każ ta’ reviżjoni tat-Trattati li tindirizza l-istrutturi istituzzjonali tal-UE:

3.17.

jipproponi li tiżdied il-kelma “Ewropew” mal-isem attwali tiegħu, sabiex it-titlu komplet isir “il-Kumitat tar-Reġjuni Ewropew”;

3.18.

jinsisti li l-Konvenzjoni li se tiġi msejħa biex tirrevedi t-Trattati għandha tinkludi rappreżentanti tal-Kumitat tar-Reġjuni, sabiex jiġi żgurat l-ogħla livell possibbli ta’ leġittimità demokratika;

3.19.

jagħti struzzjonijiet lill-President tiegħu biex jgħaddi din ir-riżoluzzjoni lill-Parlament Ewropew, lill-Kunsill, lill-Kummissjoni Ewropea u lill-President tal-Kunsill Ewropew.

19.8.2014   

MT

Il-Ġurnal Uffiċjali tal-Unjoni Ewropea

C 271/6

1.

Il-bliet u r-reġjuni tal-Ewropa huma msieħba ewlenin għat-tisħiħ tal-fiduċja fl-Unjoni Ewropea

1.1.

iqis li l-għanijiet ewlenin tal-mandat leġislattiv il-ġdid tal-Unjoni Ewropea għandhom ikunu li jinħolqu iktar impjiegi u impjiegi aħjar, li jiġi ġġenerat tkabbir sostenibbli u bbilanċjat bejn it-territorji u li jiġu promossi l-valuri komuni tagħna sabiex tissaħħaħ il-fiduċja taċ-ċittadini fil-proġett Ewropew;

1.2.

jenfasizza li l-awtoritajiet lokali u reġjonali mhumiex biss sors ta’ leġittimità demokratika għall-UE iżda wkoll lieva sabiex tingħata spinta ‘l quddiem u jiġu komunikati fil-prattika l-għanijiet tal-Unjoni; ifakkar li l-governanza f’diversi livelli tiżgura li l-livelli kollha ta’ governanza jikkooperaw fl-eżerċitar tas-setgħat u li s-sussidjarjetà u l-governanza f’diversi livelli jimxu id f’id ma’ awtogovernanza lokali u reġjonali b’saħħitha;

1.3.

ifakkar li filwaqt li l-awtoritajiet lokali u reġjonali Ewropej huma responsabbli biex irendu żewġ terzi ta’ investiment dirett pubbliku fl-UE, dawn intlaqtu ħażin ħafna mill-kriżi ekonomika u finanzjarja, li wasslet għal tnaqqis sinifikanti ta’ nfiq pubbliku ta’ aktar minn 20 % f’dawn l-aħħar tliet snin kif ukoll żieda fid-diverġenza territorjali. Fl-istess ħin, l-awtoritajiet lokali u reġjonali ta’ spiss jiffaċċjaw ħtiġijiet finanzjarji dejjem ikbar biex jittrattaw il-qgħad għoli u l-esklużjoni soċjali.

2.

Investiment fil-muniċipalitajiet u r-reġjuni tal-Ewropa għal aktar impjiegi, tkabbir u sostenibbiltà

2.1.

jipproponi li tittieħed l-opportunità tal-eżami/reviżjoni ta’ nofs it-term tal-qafas finanzjarju pluriennali (QFP) 2014-2020 prevista għal tmiem l-2016 biex jiżdiedu biex tiġi eżaminata l-possibbiltà ta’ bidliet fil-limiti tal-approprjazzjonijiet ta’ pagamenti fil-baġit kumplessiv tal-QFP attwali fid-dawl tal-impenji pendenti li qed jakkumulaw (RAL) u d-diffikultajiet dejjem ikbar li qed tiffaċċja l-UE biex tissodisfa l-obbligi legali tagħha u biex ikun żgurat li l-baġit jaqbel mal-prijoritajiet strateġiċi li qed jevolvu tal-Unjoni;

2.2.

jitlob lill-Kummissjoni biex tipproponi miżuri sabiex tgħin iż-żieda tal-kapaċità ta’ assorbiment fil-livell ta’ Stat Membru u biex tikkunsidra mill-ġdid l-analiżi tagħha dwar l-esklużjoni tal-kofinanzjament nazzjonali u reġjonali tal-investimenti appoġġjati mill-UE mill-kalkoli tad-defiċit tal-baġit, u biex tikkunsidra appoġġ aktar ambizzjuż għal investiment pubbliku tal-UE fuq medda medja ta’ żmien;

2.3.

jitlob għal estensjoni ta’ żmien u ambitu tal-Inizjattiva tal-Ewropa 2020 tal-Bonds tal-Proġetti wara l-valutazzjoni indipendenti u kompleta prevista għall-2015 u fuq il-bażi tar-riżultati miksuba minnha;

2.4.

jistieden lill-Kummissjoni biex tippreżenta Komunikazzjoni dwar il-kwalità tal-infiq pubbliku li għandha fost oħrajn issarraf il-prinċipji tal-OECD dwar l-investiment pubbliku effettiv fit-tfassil futur tal-politiki tal-UE;

2.5.

jissuġġerixxi li l-Kummissjoni tippreżenta Green Paper dwar it-tisħiħ tas-sinerġiji bejn il-baġits tal-UE, dawk nazzjonali u dawk sottonazzjonali sabiex tiżgura l-aqwa użu tal-baġit tal-UE;

2.6.

jitlob lill-Kummissjoni u lill-Bank Ewropew tal-Investiment biex iżidu l-appoġġ prattiku għall-awtoritajiet lokali u reġjonali fit-tisħiħ tal-għarfien tagħhom b’rabta mal-istrumenti finanzjarji innovattivi.

3.

Insaħħu l-attenzjoni lit-territorji fil-politiki tal-UE u negħlbu l-qasma territorjali tal-UE

3.1.

iħeġġeġ lill-Kummissjoni, lill-Parlament Ewropew u lill-Istati Membri biex iżidu dimensjoni territorjali fl-istrateġija Ewropea għat-tkabbir u l-impjiegi fil-kuntest tar-reviżjoni ppjanata tagħha;

3.2.

jitlob għal azzjoni u strateġija madwar l-Unjoni Ewropea kollha għall-preservazzjoni u l-promozzjoni tad-diversità tal-kultura, tal-wirt u tal-lingwi fl-Ewropa; jemmen bis-sħiħ li għandha tingħata aktar attenzjoni fil-livell ta’ politika lill-potenzjal li għandhom il-kultura u l-wirt biex joħolqu tkabbir u impjiegi sostenibbli;

3.3.

jitlob ukoll sabiex jiġi żgurat involviment aktar mill-qrib tal-livell sottonazzjonali fil-koordinazzjoni l-ġdida tal-politika ekonomika u finanzjarja bħala parti mis-Semestru Ewropew;

3.4.

jistaqsi lill-Kummissjoni biex tevalwa r-riżultati tal-involviment tal-awtoritajiet lokali u reġjonali fl-ipprogrammar, l-implimentazzjoni u l-ipprogrammar mill-ġdid possibbli tal-ftehimiet ta’ sħubija u l-programmi operattivi, kif mitluba mir-Regolamenti tal-Fondi Ewropej Strutturali u ta’ Investiment u l-Kodiċi ta’ Kondotta Ewropea dwar is-Sħubija; kif ukoll tressaq rakkomandazzjonijiet adatti fil-każ li l-Istati Membri jonqsu milli jirrispettaw dawn id-dispożizzjonijiet;

3.5.

jitlob lill-istituzzjonijiet tal-UE sabiex iqisu aħjar id-dimensjoni territorjali fi kwalunkwe proposta oħra dwar l-approfondiment tal-Unjoni Ekonomika u Monetarja u jitlob lill-Kummissjoni Ewropea u lill-Istati Membri biex jagħtu attenzjoni speċjali lill-effetti konsegwenzjali lokali u reġjonali l-impatt possibbli tagħhom fuq is-sostenibbiltà tal-finanzi pubbliċi u fuq il-koeżjoni territorjali, b’mod partikolari minħabba l-Istrument ta’ Konverġenza u Kompetittività u riformi ekonomiċi u fiskali maġġuri oħra fl-UE;

3.6.

jitlob li l-Valutazzjoni tal-Impatt Territorjali ssir obbligatorja fit-twettiq tal-valutazzjonijiet tal-impatt tal-Kummissjoni;

3.7.

jistieden lill-Kummissjoni biex tippreżenta White Paper dwar il-Koeżjoni Territorjali sabiex issaħħaħ il-kunċett ta’ koeżjoni ekonomika, soċjali u territorjali biex b’hekk tindirizza l-inugwaljanzi territorjali li dejjem qed jiżdiedu fl-UE u tniedi mill-ġdid id-dibattitu dwar il-kejl tal-kwalità tal-ħajja “lil hinn mill-PDG”. Għad hemm differenzi ekonomiċi u soċjali kbar bejn ir-reġjuni, għaldaqstant huwa essenzjali li tiġi promossal-politika ta’ koeżjoni ekonomika, soċjali u territorjali b’attenzjoni partikolari għar-reġjuni inqas żviluppati;

3.8.

jitlob lill-Kummissjoni biex tippromovi żvilupp sostenibbli urban u dak urban/rurali permezz ta’ White Paper dwar l-iżvilupp urban integrat;

3.9.

jenfasizza l-ħtieġa għal viżjoni territorjali għall-Unjoni Ewropea u għaldaqstant jitlob sabiex tiġi aġġornata l-Iskema għall-Iżvilupp tal-Ispazju Ewropew;

3.10.

jissuġġerixxi li titqiegħed enfasi fuq l-iżvilupp ta’ soluzzjonijiet transkonfinali, netwerking interreġjonali u strateġiji makroreġjonali billi jiġi estiż ukoll l-użu tar-Raggruppamenti Ewropej ta’ Kooperazzjoni Territorjali bħala strument għal politiki oħra tal-UE;

3.11.

jitlob lill-Kummissjoni ssaħħaħ l-isforzi tagħha biex tikkompleta u testendi n-netwerk essenzjali tat-TEN-T u l-kurituri tan-netwerks essenzjali u li tinkludi lill-awtoritajiet lokali u reġjonali fit-tfassil tal-pjani ta’ ħidma tal-kurituri u ssaħħaħ l-involviment tagħhom fil-pjattaformi tal-kurituri.

4.

Nippreparaw lill-Unjoni Ewropea għal sfidi ta’ politika ġodda

4.1.

jitlob lill-Kummissjoni biex tressaq proposta dwar il-koordinazzjoni Ewropea tal-modernizzazzjoni tal-professjoni tal-għalliema;

4.2.

jistieden lill-Kummissjoni biex tipproponi qafas ta’ kwalità għall-edukazzjoni u l-kura bikrija tat-tfal u qafas tal-UE għar-rikonoxximent tal-ħiliet u l-kompetenzi, miksuba minn tagħlim mhux formali u informali;

4.3.

jitlob lill-Kummissjoni biex tagħmel proposti konkreti dwar kif għandu jiżdied il-litteriżmu diġitali miċ-ċittadini ta’ kull età;

4.4.

jistenna li l-Kummissjoni Ewropea tirrikonoxxi r-rwol tal-awtoritajiet lokali u reġjonali fl-iżvilupp tal-politiki futuri tagħha fl-oqsma tal-ġustizzja u l-affarijiet interni; jitlob partikolarment għall-inklużjoni tad-dimensjoni lokali u reġjonali fil-promozzjoni tar-rispett għad-drittijiet fundamentali, u fl-iżvilupp ta’ politika komprensiva dwar il-migrazzjoni fit-tfassil tal-attivitajiet tagħha;

4.5.

jenfasizza l-importanza tal-iskemi ta’ Garanzija għaż-Żgħażagħ bħala mekkaniżmu biex jiġu miġġielda r-rati ta’ qgħad għolja fost iż-żgħażagħ u biex jipprovdu opportunitajiet għaż-żgħażagħ Ewropej. Għaldaqstant, il-Kumitat jappella għal żieda fil-fondi ta’ dan il-programm u għal iktar appoġġ għall-awtoritajiet lokali u reġjonali fit-tħejjija, l-iżvilupp u l-implimentazzjoni ta’ dawn l-istrumenti;

4.6.

jissuġġerixxi integrazzjoni aħjar tal-kultura u l-kreattività fl-Istrateġija riveduta tal-Ewropa 2020 u l-inizjattivi ewlenin futuri tagħha;

4.7.

jistieden lill-Kummissjoni biex taħdem mill-qrib mal-bliet u l-awtoritajiet lokali u reġjonali fl-isforzi tagħhom biex jintegraw il-migranti, element importanti biex jinkisbu l-għanijiet tal-Istrateġija Ewropa 2020 u biex jiġu indirizzati l-isfidi demografiċi tal-UE;

4.8.

jitlob ir-rikonoxximent tal-bidla demografika bħala prijorità fit-tfassil ta’ leġislazzjoni relatata tal-UE u fl-implimentazzjoni tal-programmi ta’ fondi kollha tal-UE għall-perjodu 2014-2020;

4.9.

itenni t-talba tiegħu għal strateġija Ewropea għall-persuni mingħajr dar;

4.10.

jitlob lill-Kummissjoni biex iżżid l-isforzi tagħha sabiex tikkoordina u timmoniterja effettivament il-politiki ta’ integrazzjoni tar-Rom fil-livell nazzjonali, reġjonali u lokali; jissuġġerixxi kooperazzjoni msaħħa mal-“Alleanza Ewropea tal-Bliet u r-Reġjuni għall-Inklużjoni tar-Rom” tal-Kunsill tal-Ewropa;

4.11.

jitlob għall-iżvilupp ta’ inizjattiva reġjonali tal-Programm dwar l-Idoneità u l-Prestazzjoni tar-Regolamentazzjoni (REFIT) sabiex jitnaqqas b’mod speċifiku l-piż amministrattiv, partikolarment għall-Intrapriżi Żgħar u Medji; jitlob għat-tisħiħ tar-rwol tal-awtoritajiet lokali u reġjonali fl-eżami tas-Small Business Act;

4.12.

jitlob lill-Kummissjoni biex issaħħaħ ir-rwol tal-istrateġiji intelliġenti ta’ speċjalizzazzjoni fl-Ewropa biex jindirizzaw id-distakk tal-innovazzjoni bejn ir-reġjuni tal-UE; jitlob għal Pjan ta’ Azzjoni għall-“Iskala ta’ Eċċellenza” li jipprovdi passi prattiċi u monitoraġġ permanenti għall-konnessjoni tal-programmi ta’ riċerka Ewropej (Orizzont 2020) mal-Fondi Ewropej Strutturali u ta’ Investiment;

4.13.

jitlob li tittieħed azzjoni sabiex jitlesta s-suq uniku billi jitnaqqsu l-piżijiet fuq l-eżerċizzju ta’ professjonijiet liberi u regolati fl-Istati Membri, u jistenna wkoll li l-Kummissjoni Ewropea tagħti bidu għall-proposti leġislattivi mħabbra fil-Pjan ta’ Azzjoni dwar l-Intraprenditorija 2020 tul l-ewwel nofs tal-mandat leġislattiv il-ġdid sabiex titħaffef l-implimentazzjoni tal-Pjan ta’ Azzjoni u l-ħolqien tal-impjieg fil-livell lokali u reġjonali;

4.14.

jitlob għal Pjan ta’ Azzjoni Ewropew dwar l-Innovazzjoni tas-Settur Pubbliku b’fokus speċifiku fuq l-amministrazzjoni lokali u reġjonali;

4.15.

jissuġġerixxi r-reviżjoni tal-White Paper tal-2011 “Pjan direzzjonali għal Żona Unika Ewropea tat-Trasport” li għandha tinkludi dibattitu dwar il-politika tat-trasport futura tal-Unjoni lil hinn mill-2020;

4.16.

jistieden lill-Kummissjoni biex tagħti attenzjoni partikolari lir-rwol tal-gvernijiet lokali u reġjonali fl-iżvilupp ta’ politika tal-enerġija Ewropea integrata; soluzzjonijiet tal-enerġija deċentralizzati huma meħtieġa biex innaqqsu d-dipendenza tagħna fuq il-fjuwils fossili u għaldaqstant jeħtieġ li l-UE tiżgura kundizzjonijiet ugwali għal produtturi tal-enerġija iżgħar;

4.17.

jistieden lill-Kummissjoni tippreżenta Pjan ta’ Azzjoni kontra l-faqar enerġetiku li jgħaqqad miżuri fil-livell Ewropew, nazzjonali u reġjonali/lokali;

4.18.

jitlob lill-istituzzjonijiet u l-Istati Membri tal-UE biex iqisu b’mod espliċitu r-rwol tal-awtoritajiet lokali u reġjonali fl-implimentazzjoni ta’ miri vinkolanti ambizzjużi għat-tnaqqis tal-emissjonijiet tas-CO2, is-sehem tal-enerġiji rinnovabbli u l-effiċjenza fl-użi tal-enerġija u biex f’dan il-qasam jkomplu jiżviluppaw il-prinċipju tas-sħubija analogu mal-politika ta’ koeżjoni tal-UE; jappella wkoll lill-istituzzjonijiet tal-UE u lill-Istati Membri biex jestendu l-ambitu tal-Patt tas-Sindki bħala l-istrument Ewropew għall-integrazzjoni tal-awtoritajiet lokali u reġjonali fil-politika tal-UE dwar it-tibdil tal-klima u biex jipprovdulu r-riżorsi adatti lil hinn mill-2020;

4.19.

jappella lill-Kummissjoni Ewropea biex issegwi r-reviżjoni u l-iżvilupp ta’ politiki fl-oqsma tal-arja, l-ilma u l-istorbju bħala approċċ orjentat lejn is-sors, jiġifieri biex l-iżvilupp tal-problemi jiġi miġġieled fis-sors u billi jitqiesu l-esperjenzi tal-awtoritajiet lokali u reġjonali, li sikwit jiffaċċjaw il-kompitu tal-implimentazzjoni tal-politiki adatti mingħajr ma jkollhom influwenza diretta fuq is-sorsi tal-problemi;

4.20.

jistieden lill-Kummissjoni Ewropea biex tipproponi strateġija għall-iżvilupp rurali sostenibbli adegwata bbażata fuq approċċ territorjali integrat;

4.21.

jitlob biex il-miżuri ta’ salvagwardja pprovduti taħt il-Politika Agrikola Komuni (PAK) riformata jiġu supplementati minn miżuri oħra aktar immirati biex jindirizzaw il-volatilità tas-suq;

4.22.

jitlob għal valutazzjoni tal-impatt sabiex jiġu studjati l-konsegwenzi tal-ftehimiet kummerċjali li attwalment qed jiġu negozjati għas-settur agrikolu;

4.23.

jitlob lill-Kummissjoni biex tappoġja u ssaħħaħ ir-rwol tal-awtoritajiet lokali u reġjonali mill-pajjiżi ta’ tkabbir fir-riforma tal-amministrazzjoni pubblika u biex tagħti attenzjoni speċifika għall-qagħda tad-deċentralizzazzjoni fir-rapporti ta’ progress annwali;

4.24.

jenfasizza li l-UE għandha taġixxi b’mod deċiżiv fl-appoġġ tal-pajjiżi tas-Sħubija tal-Lvant billi tipprovdi appoġġ għat-tisħiħ tal-proċessi tad-demokrazija u d-deċentralizzazzjoni lokali u reġjonali u tħeġġeġ l-użu tal-programmi għall-kooperazzjoni bejn is-Sħubija tal-Lvant u l-awtoritajiet lokali u reġjonali tal-UE;

4.25.

jistieden lill-Kummissjoni biex tuża l-Istrument Ewropew ta’ Viċinat bħala għodda biex tiżdied il-koeżjoni territorjali fil-pajjiżi msieħba tal-Mediterran kif ukoll il-kooperazzjoni bejn ir-reġjuni u l-awtoritajiet lokali tagħhom;

4.26.

jitlob lill-Kummissjoni, f’dan il-kuntest, biex tespandi l-Programm tal-Faċilità tal-Amministrazzjoni Lokali għall-pajjiżi ġirien fin-Nofsinhar; jitlob għall-formulazzjoni u l-implimentazzjoni ta’ politiki ta’ migrazzjoni sostenibbli fir-reġjun tal-Mediterran bl-involviment tal-partijiet interessati kollha, b’mod speċjali l-gvernijiet nazzjonali u l-awtoritajiet lokali u reġjonali;

4.27.

jitlob li l-awtoritajiet lokali u reġjonali jkunu involuti fl-iżvilupp ta’ “Sħubijiet ta’ Integrazzjoni” ma’ pajjiżi terzi u f’inizjattivi oħra ta’ prevenzjoni relatati mal-promozzjoni tal-migrazzjoni ċirkolari;

4.28.

jistenna li l-awtoritajiet lokali u reġjonali jkunu involuti fl-implimentazzjoni ta’ approċċ territorjali għall-iżvilupp, inkluża r-rikkezza ta’ esperjenza tagħhom fil-kooperazzjoni deċentralizzata għall-iżvilupp; jitlob sabiex jiġu appoġġjati l-kontribut tal-awtoritajiet lokali u reġjonali għas-Sena Ewropea tal-Iżvilupp 2015 u l-istrateġiji ta’ żvilupp lokali/reġjonali;

4.29.

jissuġġerrixxi li jissoktaw in-negozjati dwar Sħubija Trans-Atlantika ta’ Kummerċ u ta’ Investiment (TTIP) mal-Istati Uniti bil-kundizzjoni li jiġu rispettati t-trasparenza u l-parteċipazzjoni demokratika u li jiġu salvagwardjati l-istandards soċjali u ambjentali; jitlob li l-KtR jingħata status ta’ parti interessata f’dan il-proċess;

4.30.

jitlob lill-Kummissjoni tippreżenta proposta għal emenda għall-Att dwar l-elezzjoni tal-Parlament Ewropew sabiex jissaħħaħ ir-rikonoxximent tal-funzjoni demokratika tal-Parlament Ewropew, pereżempju permezz tal-istabbiliment ta’ limitu komuni madwar l-UE kollha għar-rappreżentanza fil-Parlament Ewropew, u biex jiġi ffaċilitat l-eżerċizzju tad-dritt tal-vot billi jiġi propost reġistru Ewropew tal-votanti;

4.31.

jissuġġerixxi reviżjoni tal-istrateġija “Nikkomunikaw l-Ewropa fi Sħubija” sabiex jiġi appoġġjat ir-rwol li jaqdu l-awtoritajiet lokali u reġjonali fl-għoti ta’ informazzjoni liċ-ċittadini dwar l-Unjoni u l-politiki tagħha; jitlob lill-Kummissjoni biex tikkoopera aktar mill-qrib mal-KtR fl-implimentazzjoni ta’ politika ta’ komunikazzjoni deċentralizzata ġenwina fil-livell reġjonali u lokali, b’mod speċjali permezz tar-Rappreżentanzi tagħha fl-Istati Membri;

5.

Sħubija msaħħa mal-istituzzjonijiet Ewropej

5.1.

jitlob li jkun involut fin-negozjati li ġejjin għal Ftehim Interistituzzjonali dwar tfassil aħjar tal-liġijiet;

5.2.

jissuġġerixxi kooperazzjoni aktar mill-qrib mal-Kummissjoni Ewropea fil-fażi preleġislattiva fuq il-bażi tal-ftehim ta’ kooperazzjoni sabiex jiġu definiti inizjattivi strateġiċi fuq medda itwal ta’ żmien u jiġu promossi soluzzjonijiet ta’ governanza f’diversi livelli fil-politiki tal-UE;

5.3.

jistieden lill-Parlament Ewropew, fuq il-bażi tal-ftehim ta’ kooperazzjoni tal-2014 mal-KtR, sabiex isaħħaħ il-kooperazzjoni tul il-proċess leġislattiv kif ukoll waqt is-Semestru Ewropew u fil-valutazzjoni tal-impatt territorjali tal-leġislazzjoni tal-UE;

5.4.

jitlob għal trattament ugwali tal-awtoritajiet lokali u reġjonali u l-assoċjazzjonijiet tagħhom fir-rigward tal-bidliet fl-obbligu li jirreġistraw fir-Reġistru tat-Trasparenza previst mill-Ftehim Interistituzzjonali l-ġdid dwar ir-Reġistru tat-Trasparenza;

5.5.

jissuġġerixxi li l-Kunsill ikompli jsaħħaħ il-kooperazzjoni mal-KtR f’dawk l-oqsma ta’ tħassib ewlieni għall-awtoritajiet lokali u reġjonali.

19.8.2014   

MT

Il-Ġurnal Uffiċjali tal-Unjoni Ewropea

C 271/11

Relatur

:

Is-Sur Verkerk (NL/ALDE), Sindku ta’ Delft

1.

Il-bliet huma muturi ekonomiċi importanti tal-Unjoni, u huma qabel kollox postijiet fejn jiżviluppaw l-individwu u l-komunità u joffru ħafna possibbiltajiet għal miżuri ambjentali effiċjenti. L-impenn tal-bliet u r-reġjuni urbani huwa sinifikanti ħafna għall-implimentazzjoni tal-Istrateġija Ewropa 2020 u għall-iżvilupp ekonomiku, soċjali u territorjali tal-UE (1).

2.

Il-pożizzjoni importanti tal-bliet fis-soċjetà Ewropea xprunat l-inizjattivi tal-Istati Membri u l-Kummissjoni Ewropea bil-għan li tiġi stabbilita aġenda urbana għall-UE. Anke n-Nazzjonijiet Uniti (NU) għarfet l-importanza tal-bliet. Bħalissa n-NU qed tħejji l-Aġenda Urbana Ġdida li għandha tiġi stabbilita fl-2016 matul il-Konferenza li jmiss dwar il-Ħabitat III. L-aġenda urbana tal-UE tista’ tagħmel kontribut hawnhekk.

3.

Fit-Trattat tal-UE hemm diversi emendi li jagħtu lill-UE bażi legali biex tiġi appoġġjata l-politika urbana li titwettaq fil-livell nazzjonali, reġjonali u lokali kif ukoll ir-responsabbiltajiet primarji tal-Istati Membri, bħar-referenza għall-koeżjoni ekonomika, soċjali u territorjali (Artikolu 3), ir-referenza għall-awtonomija lokali (Artikolu 4) u d-dimensjoni lokali tal-prinċipju tas-sussidjarjetà (Artikolu 5). Madankollu, bħalissa, fil-livell tal-UE, m’hemm l-ebda aġenda urbana komprensiva mmirata lejn il-futur minkejja l-appell li l-Parlament Ewropew għamel fl-2011 għal aġenda urbana Ewropea (2), il-proċess intergovernattiv fil-qafas tal-Karta ta’ Leipzig u d-Dikjarazzjoni ta’ Toledo. Minħabba n-nuqqas ta’ aġenda urbana ġenerali, fil-livell tal-UE hemm wisq ftit koerenza bejn id-diversi inizjattivi ta’ politika u programmi ta’ sussidji u mhux kull inizjattiva ta’ politika fil-livell tal-UE jkollha r-riżultati konkreti mixtieqa.

4.

Apparti minn hekk, il-passat jindika li m’hemm l-ebda garanzija li d-dimensjoni urbana ser tibqa’ tingħata attenzjoni fl-aġenda Ewropea (3). Fl-1997, il-Kummissjoni kienet diġà ħarġet Komunikazzjoni dwar aġenda urbana għall-UE (4). Minkejja bosta dikjarazzjonijiet u attivitajiet madankollu, żewġ decenji wara, din l-aġenda għadha ma saritx realtà. L-UE għandha tiżgura li l-bliet u ż-żoni urbani għandhom ikunu jistgħu jisfruttaw is-saħħa u l-potenzjal sħiħ tagħhom bħala muturi għat-tkabbir ekonomiku, l-impjieg u l-inklużjoni soċjali. Issa huwa ż-żmien għal aġenda urbana Ewropea ġenwina. Il-Karta ta’ Leipzig hija bażi tajba għal dan. Aġenda Ewropea urbana għandha tindirizza l-aspetti kollha – soċjali, ekonomiċi u ambjentali – tal-iżvilupp urban sostenibbli.

5.

Il-Kumitat tar-Reġjuni jappella lill-Kummissjoni biex, b’referenza għall-Komunikazzjoni prevista li ssegwi l-Forum Urban tas-17 u t-18 ta’ Frar 2014, tippreżenta White Paper għal aġenda urbana komprensiva. Din il-White Paper għandha tagħmilha possibbli li d-dimensjoni urbana tiġi ankrata b’mod strutturali fil-politika u r-regolamenti Ewropej rilevanti kollha biex jiġu evitati d-duplikazzjonijiet u l-inkonsistenzi attwali. Matul it-tħejjija tal-White Paper, il-Kumitat stess ser ikompli bid-dibattitu dwar l-aġenda urbana tal-UE biex jagħti lill-Kummissjoni kontribut konkret u biex iżomm id-dibattitu dwar l-aġenda urbana fuq l-aġenda Ewropea. Il-Kumitat jenfasizza l-importanza ta’ approċċ sostenibbli u olistiku għaż-żoni urbani, abbażi ta’ ideat u suġġerimenti li l-KtR għamel fl-opinjonijiet l-oħra komplementari tiegħu, jiġifieri l-Opinjonijiet dwar Is-Seba’ Programm ta’ Azzjoni Ambjentali u l-Bliet Sostenibbli (5) u l-Pakkett dwar il-Mobilità Urbana (6).

6.

B’aġenda urbana fil-livell tal-UE tiġi rikonoxxuta l-importanza tal-bliet biex ikunu jistgħu jwettqu l-għanijiet ta’ politika Ewropej u biex tissaħħaħ il-kompetittività internazzjonali tal-UE. Fl-istess ħin, it-tfassil tal-aġenda urbana msemmija ma jista jinjora la l-interazzjonijiet bejn il-bliet u ż-żoni ta’ kampanja, u lanqas l-influwenza kbira li jħalli fuq l-iżvilupp tat-territorju ġenerali. Għaldaqstant, huwa importanti li tiġi prevista sinerġija kbira bejn din l-aġenda urbana u l-aġenda territorjali tal-Istrateġija Ewropa 2020.

7.

Bis-saħħa tal-bidla minn ekonomija tas-servizzi għal ekonomija tal-għarfien u d-diġitizzazzjoni li qed tiżdied fis-soċjetà, il-bliet żviluppaw f’pilastri ekonomiċi u muturi tal-impjieg fl-UE. L-għeruq tal-innovazzjoni u forom ġodda ta’ attività ekonomika jinsabu ħafna drabi fil-bliet. Il-bliet huma wkoll il-postijiet fejn tinbet l-arti, il-kultura u l-kreattività li minnhom il-bliet u ċ-ċittadini jiksbu l-identità tagħhom. B’hekk il-bliet jikkostitwixxu ass importanti tal-UE fil-kompetizzjoni internazzjonali ma’ partijiet oħra tad-dinja.

8.

Bħalissa fl-UE hemm mat-68 % tal-popolazzjoni li tgħix f’żoni urbani (7). Apparti ż-żewġ metropoli kbar ta’ Pariġi u Londra, l-UE għandha struttura poliċentrika unika ta’ bliet kbar, ta’ daqs medju u żgħar. Mal-200 miljun persuna jgħixu fil-bliet li għandhom sa 1 00  000 abitant, li ħafna drabi jaqdu rwol reġjonali importanti fil-qasam tas-servizzi u l-amenitajiet u biex jittejbu l-kwalità tal-ħajja u l-bilanċ territorjali. L-aġenda urbana tal-UE għalhekk m’għandhiex tkun limita għall-ikbar bliet tal-Ewropa, imma għandha tkun adattata wkoll għall-bliet iż-żgħar u ta’ daqs medju u għaż-żoni urbani. F’dan il-kuntest hija ħaġa tajba li t-tliet Presidenzi li jmiss tal-UE (l-Italja, l-Estonja u l-Lussemburgu) ser jagħtu attenzjoni speċjali lill-bliet iż-żgħar u ta’ daqs medju fl-UE u lir-rwol tagħhom f’kuntest komuni ta’ żvilupp territorjali.

9.

Madankollu, għall-abitanti l-belt u l-viċinati rurali tagħhom illum huma iktar miż-żona amministrattiva limitata. L-abitanti tal-belt u dawk li mhumiex abitanti tal-belt jivvjaġġaw fi skala ta’ agglomerazzjonijiet akbar, u jivvjaġġaw lejn żoni tax-xogħol u żoni funzjonali (urbani jew rurali-urbani) f’sistema urbana ta’ kuljum (daily urban system). Sabiex il-ħajja tal-abitanti tagħhom tiġi ffaċilitata, l-amministrazzjonijiet urbani jingħaqdu f’netwerks mal-muniċipalitajiet ġirien biex jorganizzaw iċ-ċirkolazzjoni tat-traffiku u t-trasport, il-ġestjoni tat-territorju, l-ambjent u l-ekonomija fil-livell adatt. Il-kooperazzjoni bejn iż-żoni urbani u ż-żoni rurali madwarhom hija kruċjali hawnhekk. F’dan il-kuntest, iż-żoni periurbani u dawk rurali għandhom rwol importanti x’jaqdu, għax jipprovdu l-ikel, l-enerġija, l-ispazju, ir-rikreazzjoni u n-natura lill-bliet tal-madwar, u iktar minn hekk joffru protezzjoni kontra r-riskji bħan-nirien tal-foresti u l-għargħar. Barra minn hekk, jeħtieġ li jitqies li kultant dawn is-sistemi urbani jinkludu territorju li jappartjeni lil iktar minn Stat Membru wieħed. Jeħtieġ li tingħata attenzjoni speċjali lill-problemi speċifiċi li jinħolqu f’dawn iż-żoni urbani transkonfinali.

10.

L-agglomerazzjonijiet jew reġjuni funzjonali jeħtieġu governanza ta’ tip ieħor u viżjoni fit-tul biex jiġu żgurati koeżjoni tajba u riżultati konkreti, bħal sistema tat-trasport integrata (8). Dawn il-viżjonijiet fit-tul, li f’ċerti Stati Membri diġà bdew jiżviluppaw f’kooperazzjoni bejn l-awtoritajiet lokali u reġjonali, jifformaw il-bażi għal approċċ komprensiv iffokat fuq il-lokalità li jiggarantixxi l-koeżjoni territorjali taż-żona u jagħti lok li jinkisbu riżultati konkreti li jistgħu jitkejlu. Fis-snin 2014-2020 f’għadd ta’ Stati Membri l-investimenti integrati territorjali ser jagħmluha possibbli li jintużaw riżorsi minn oqsma ta’ prijorità jew programmi differenti u b’hekk jaqdu rwol ta’ stimolu billi tiġi promossal-koeżjoni bejn il-bliet u ż-żoni tal-madwar li għandhom rabtiet funzjonali billi joħolqu sinerġiji u jagħmlu possibbli l-finanzjament ta’ proġetti iktar ambizzjużi, u billi fl-aħħar mill-aħħar jagħmlu possibbli li jiġu solvuti l-problemi komuni li jmorru lil hinn mil-limiti amministrattivi tal-awtoritajiet deċentralizzati. Il-Kumitat jinnota li l-Kummissjoni, fl-istudju tagħha L-ibliet ta’ għada, issemmi dan l-iżvilupp u tagħraf li fil-politika tagħha għandha tqis iktar lir-reġjuni funzjonali fil-livell tal-agglomerazzjonijiet u l-metropoli u anke dak transkonfinali (9).

11.

Billi jaħdmu fil-livell ta’ agglomerazzjoni (borrowing size) il-bliet igawdu flimkien il-vantaġġi ta’ rabta ikbar bejniethom bħal kapaċità innovattiva ikbar, rabta aħjar bejn l-edukazzjoni u s-suq tax-xogħol u marka ekoloġika iżgħar, filwaqt li jillimitaw l-iżvantaġġi bħat-tniġġis ambjentali, in-nuqqas ta’ aċċessibilità, l-esklużjoni soċjali u l-kriminalità (10). Il-kobor mhux dejjem aħjar. Huwa għaldaqstant importanti li jiġi żgurat li l-komunitajiet lokali jkunu rappreżentanti b’mod attiv fid-deċiżjonijiet muniċipali, inkluż fid-diskussjoni dwar miżuri ta’ kooperazzjoni ma’ awtoritajiet fil-viċinat.

12.

Madankollu huma ż-żoni urbani li partikularment iridu jiffaċċjaw l-isfidi soċjali. Għalhekk ħafna inizjattivi ta’ politika Ewropej – intenzjonalment u mhux – għandhom konsegwenzi għall-politika urbana. F’dan il-kuntest, il-Kumitat jitlob li ssir rieżami aktar bir-reqqa tal-lista tal-inizjattivi kollha tal-Kummissjoni b’dimensjoni urbana b’segwitu għad-dokument tematiku li kien il-bażi għal forum urban “CITIES – Cities of tomorrow: Investing in Europe” (Il-bliet ta’ għada: ninvestu fl-Ewropa) ta’ Frar 2014 (11).

13.

Il-bliet jassumu r-responsabbiltà tagħhom biex jisfruttaw l-opportunitajiet u biex jindirizzaw l-ostakli. Il-bliet Ewropej jistgħu jagħtu kontribut sinifikanti fl-implimentazzjoni tal-Istrateġija Ewropa 2020. L-isfidi soċjali li tiġbor fiha din l-Istrateġija jiffurmaw ukoll parti mill-aġenda politika għall-bliet u r-reġjuni. Hawnhekk l-interess taċ-ċittadin huwa ċentrali. Il-bliet fl-UE bħalissa qed jiffaċċjaw diversi sfidi u problemi. Fejn minn naħa xi bliet raw tnaqqis fil-popolazzjoni tagħhom minħabba l-emigrazzjoni u t-tixjiħ u tfaċċaw problemi relatati mal-kobor fil-livell ta’ amenitajiet tagħhom, il-popolazzjoni fi bliet oħra kibret b’tali mod li żdiedet il-pressjoni fuq l-amenitajiet u żdiedu wkoll problemi oħra bħall-qgħad (fost iż-żgħażagħ), l-esklużjoni soċjali, il-faqar, id-djar affordabbli, il-konġestjoni tat-traffiku u t-tniġġis tal-ambjent. Problema ġenerali li ġiet aggravata mir-reċessjoni hija ż-żieda fid-distakk bejn id-domanda għas-servizzi lokali li qed tikber u r-riżorsi finanzjarji li qed jistaġnaw jew jonqsu. L-aġenda urbana għandha tagħti attenzjoni lil dawn il-problemi u sfidi kollha.

14.

L-aġenda urbana tal-UE għandha timmira li tissostitwixxi l-mudell urban attwali, ifframmentat, maqsum u esklużiv, b’mudell ieħor kumpatt, komprensiv u inklużiv. Dan l-approċċ il-ġdid ifisser li, fil-qafas ta’ approċċ olistiku, l-enfasi tkun fuq taħlita ta’ persuni u attivitajiet għall-ħolqien kemm tat-tkabbir ekonomiku kif ukoll tal-impjiegi, filwaqt li tingħata attenzjoni ukoll lil bilanċ tajjeb bejn l-aspetti ekonomiċi, soċjali u ambjentali tal-iżvilupp urban.

15.

Ir-relazzjoni bejn il-gvern u s-soċjetà qiegħda tinbidel b’mod kruċjali. Iċ-ċittadini qed isemmgħu leħinhom dejjem iktar u qegħdin isiru aktar esiġenti, filwaqt li d-diġitizzazzjoni tas-soċjetà tagħtihom iktar awtonomija (ċittadinanza ġdida). It-tieni nett dawn iċ-ċittadini qed jassumu dejjem iktar ir-responsabbiltà soċjali tagħhom. Qed jiżdied l-għadd ta’ kumpaniji li joffru prodotti minn nieqa sa nieqa, jaħdmu kontra l-ħela tal-materja prima u jagħtu lin-nies żvantaġġati opportunità fis-suq tax-xogħol. L-amministrazzjonijiet tal-bliet jixtiequ jaħdmu f’diversi livelli dejjem iktar mill-qrib mal-erba’ spirali (stabbiliti abbażi tal-mudell tat-tliet spirali u li jinvolvu r-rabta ta’ kooperazzjoni bejn il-gvernijiet, il-kumpaniji, l-istituzzjonijiet tal-għarfien u l-organizzazzjonijiet soċjali) biex jiġu indirizzati l-isfidi soċjali. Għalhekk, ħafna drabi l-gvern lokali għandu rwol mexxej, u bħala klijent ta’ tnedija (launching customer) jew mexxej, joffri pjattaforma għall-imsieħba l-oħra biex jinstabu soluzzjonijiet. Hawnhekk il-belt tiffunzjona bħala post (living lab) fejn flimkien mal-imsieħba jseħħu l-proġetti li huma l-aktar adatti għall-kundizzjonijiet lokali. Il-bliet li fihom hemm stabbiliti universitajiet u skejjel sekondarji għandhom rwol addizzjonali biex tiġi stimolata l-intraprenditorija u biex tinħoloq rabta bejn il-possibbiltajiet teknoloġiċi u l-kwistjonijiet importanti tas-soċjetà. B’hekk, iż-żoni urbani saru l-mudelli esperimentali tal-politika Ewropea.

16.

Bħala parti mis-soċjetà l-gvernijiet jassumu responsabbiltà li jpoġġu fuq l-aġenda kwistjonijiet importanti għas-soċjetà bħall-kriżi ekonomika, it-tibdil demografiku u l-problemi relatati mal-klima. Il-forom tradizzjonali ta’ amministrazzjoni, organizzazzjoni u ekonomija ma joffru l-ebda soluzzjoni għal dawn il-problemi. Minħabba d-daqs tal-isfidi, il-baġits imnaqqsa u l-kumplessità tal-kwistjonijiet, il-gvern m’għadux jista’ jieħu ħsieb kollox waħdu.

17.

Fil-kuntest ta’ soċjetà dejjem aktar parteċipattiva, fit-teħid tad-deċiżjonijiet tagħhom l-awtoritajiet lokali għandhom jinkludu inizjattivi lokali kondiviżi jew koorganizzati miċ-ċittadini, il-kumpaniji u l-istituzzjonijiet tas-soċjetà ċivili fil-livell urban jew muniċipali. B’hekk l-organizzazzjoni tal-belt qed tiġi ġestita minn diversi atturi minflok mill-muniċipalità waħedha. L-isfida hawnhekk hija li ċ-ċittadini kollha fis-soċjetà l-ġdida jkunu jistgħu jieħdu sehem, b’mod partikolari ż-żgħażagħ u l-migranti, sabiex tiġi evitata soċjetà maqsuma fi tnejn. Il-belt bħala ‘magna’ għall-integrazzjoni soċjali u anke bħala mezz ta’ emanċipazzjoni għall-abitanti tagħha jikkostitwixxu tnejn mill-iktar funzjonijiet importanti ta’ belt moderna.

18.

L-inizjattivi lokali jiżguraw li f’kull belt jew żona urbana jiġu pprovduti servizzi adatti għall-post. B’hekk, fil-livell pan-Ewropew hemm varjetà fl-approċċi. Il-politika u r-regolamenti Ewropej għandhom iqisu r-relazzjonijiet ġodda fil-livell lokali u d-diversità fl-approċċi għall-isfidi soċjali li jġibu magħhom u għandhom jippruvaw jagħmlu ġabra ta’ dawn l-aħjar prattiki li qed ifiġġu kif ukoll jiffaċilitaw l-iskambju tagħhom madwar l-UE.

19.

S’issal-UE ħadmet b’regolamenti ġenerali u skadenzi uniformi għall-implimentazzjoni tal-għanijiet ta’ politika tagħha. Fit-tfassil ta’ politika tagħha l-UE għandha tqis iktar kemm l-inizjattivi tagħha jistgħu jiġu implimentati fil-livell lokali u (sotto)reġjonali u tkun disposta għal kontribut mill-gvernijiet deċentralizzati fit-tfassil ta’ valutazzjonijiet tal-impatt u ta’ politika ġdida (approċċ minn isfel għal fuq). B’kunsiderazzjoni tal-prinċipju tas-sussidjarjetà u tal-proporzjonalità kull valutazzjoni tal-impatt għal proposta ġdida għandha tinkludi valutazzjoni kritika tal-impatt fuq il-bliet. Hekk biss jista’ jiġi evalwat u żgurat minn qabel li l-politiki u r-regolamenti Ewropej jistgħu jiġu implimentati fil-livell lokali.

20.

Sabiex id-diskussjoni dwar id-dimensjoni urbana tiġi integrata b’mod strutturali fil-livell tal-UE, il-Kumitat jipproponi li l-Forum Urban tas-17 u t-18 ta’ Frar 2014 minn issa ‘l quddiem jibda jsir kull sentejn. Il-Kumitat jappella wkoll lill-Kummissjoni biex taħtar rappreżentant għall-politika urbana fl-organizzazzjoni tagħha, li jkollu l-awtorità li jaħdem mal-grupp ta’ ħidma interservizz għall-politika urbana tal-Kummissjoni li janalizza kull proposta u inizjattiva għad-dimensjoni urbana u li jippermetti l-implimentazzjoni ta’ approċċ ta’ politika komprensiv. Dan il-grupp ta’ ħidma għandu jingħata l-kompitu wkoll li jinkorpora l-kontribut tal-bliet fit-tfassil tal-politika l-ġdida tal-UE li jkollha impatt fuq iż-żoni urbani. Il-Kumitat għandu jkun jista’ jaħtar rappreżentant tiegħu għall-politika urbana biex jivvaluta l-proposti għad-dimensjoni urbana.

21.

Il-Kumitat jappoġġja l-ħolqien ta’ grupp ta’ ħidma tal-Istati Membri biex ikun hemm viżjoni komuni għall-bliet Ewropej, fejn tingħata attenzjoni partikolari lill-pożizzjoni tal-bliet fl-Istrateġija Ewropa 2020, u li din tiġi ppreżentata fl-2016. Huwa jappella lill-Istati Membri biex jaħdmu flimkien mill-qrib mal-Kumitat u mal-għaqdiet tal-awtoritajiet lokali. Din il-viżjoni komuni tista’ sservi bħala bażi importanti għall-iżvilupp ulterjuri tal-aġenda urbana, kemm fil-livell Ewropew, kif ukoll fil-livell tal-Istati Membri individwali, ir-reġjuni u l-muniċipalitajiet.

22.

Il-Kumitat tar-Reġjuni jtenni t-talba tiegħu biex il-Kummissjoni tfassal White Paper dwar politika urbana integrata (12) qabel ma jitħabbar is-suċċessur tal-Istrateġija Ewropa. L-għan ta’ din il-White Paper hu li jiġi stabbilit approċċ iktar komprensiv fil-politika u l-leġislazzjoni tal-UE li jħallu impatt fuq il-bliet u ż-żoni urbani, u biex il-bliet u l-awtoritajiet lokali u reġjonali jiġu involuti iktar mill-qrib fit-tħejjija ta’ din il-politika, u anke biex jagħmel rakkomandazzjonijiet dwar liema elementi fil-programmi tal-fondi Ewropej jistgħu jappoġġjaw l-iżvilupp tal-bliet. Il-bażi għal dan hija governanza mġedda. Fl-aħħar mill-aħħar il-White Paper għandha twassal biex id-dimensjoni urbana tkun ġenwinament integrata b’mod orizzontali fil-proċess tat-teħid tad-deċiżjonijiet tal-UE (integrazzjoni tad-dimensjoni urbana), mhux għal strateġija jew programm speċjali tal-UE. Din il-White Paper għandha titfassal mill-Kummissjoni li jmiss f’kooperazzjoni mill-qrib mal-bliet biex b’hekk il-ħtieġa ta’ governanza ġdida fil-politika urbana tiġi enfasizzata fil-livell tal-UE.

23.

Il-White Paper għandha tinkludi l-elementi li ġejjin:

24.

Il-Kumitat tar-Reġjuni jinnota li għall-kompetittività internazzjonali tagħha l-Ewropa tiddependi fil-biċċa l-kbira minn bliet vibranti u dinamiċi. Għaldaqstant, il-politika u r-regolamenti tal-UE jistgħu jgħinu biex joħolqu l-kundizzjonijiet tajbin. L-implimentazzjoni ta’ madwar 70 % tal-politika u r-regolamenti Ewropej teħtieġ koerenza ġenerali. Madankollu, il-Kumitat jinnota li r-regoli fil-livell Ewropew kultant ikollhom l-effett oppost. Il-Kumitat jagħti eżempju tajjeb ta’ dan fl-Opinjoni tiegħu dwar “Ir-reviżjoni tal-politika tal-UE dwar il-kwalità tal-arja u l-emissjonijiet” (13), fejn isemmi li fl-approċċ lejn it-titjib tal-kwalità tal-arja, il-livelli ta’ ambizzjoni tad-diversi direttivi tal-UE dwar l-ambjent għandhom jiġu koordinati u l-iskadenzi għall-iżvilupp għandhom jimxu b’mod sinkronizzat biex jinkisbu r-riżultati mixtieqa.

25.

Il-lakuni fil-politika li tnaqqas il-problema fis-sors jistgħu jwasslu għal sitwazzjonijiet prekarji. Barra minn hekk ċerti bliet mhumiex kapaċi jiksbu l-istandards mixtieqa filwaqt li jirriskjaw li l-Istati Membri responsabbli għalihom, permezz tal-leġislazzjoni nazzjonali, jaqilgħu multi mill-UE għax ikunu qabżu l-limiti Ewropej. Il-Kumitat jappella lill-Kummissjoni biex tiżviluppa metodu għal politika iktar komprensiva biex jinkisbu politika u leġislazzjoni koerenti, l-ewwel billi ssir valutazzjoni tal-impatt territorjali aktar robusta u bil-parteċipazzjoni tal-awtoritajiet lokali u reġjonali, u li tippermetti li l-UE toffri l-kundizzjonijiet adatti lill-bliet u r-reġjuni urbani għall-implimentazzjoni tal-politika Ewropea.

26.

Sabiex ikun hemm approċċ verament komprensiv, tkun ħaġa tajba li fil-White Paper tingħata definizzjoni ċara ta’ żvilupp urban sostenibbli komprensiv u li jiġu stabbiliti għanijiet ċari li l-UE tixtieq tilħaq f’dan il-qasam. Dawn għandhom ikunu għanijiet orizzontali li għandhom jitwettqu mid-diversi oqsma ta’ politika.

27.

Approċċ komprensiv lejn il-politika urbana jinvolvi li jitqiesu l-politiki tal-ġestjoni tat-territorju, billi ż-żoni urbani jmorru lil hinn mil-livell muniċipali.

28.

F’dan il-kuntest, il-Kumitat tar-Reġjuni jfakkar dwar il-pożizzjoni tiegħu li l-istrument ta’ valutazzjoni tal-impatt territorjali għandu jintuża bħala linja gwida biex jinkiseb approċċ iktar komprensiv tal-politika sabiex tiġi promossal-koeżjoni territorjali (14). Hawnhekk, il-Kumitat jiddefinixxi l-koeżjoni territorjali bħala kunċett fi tliet dimensjonijiet: żvilupp territorjali bilanċjat, integrazzjoni territorjali u governanza territorjali. Il-Kumitat jiddispjaċih li l-Kummissjoni Ewropea tillimita l-valutazzjoni tal-impatt għall-ewwel wieħed minn dawn it-tliet oqsma, filwaqt li hija preċiżament it-tieni dimensjoni tal-approċċ komprensiv li hija l-iktar importanti għall-politika u l-leġislazzjoni. Ir-rieżami mistenni tal-linji gwida tal-Kummissjoni stess dwar il-valutazzjoni tal-impatt huwa kruċjali għax joffri opportunità unika biex l-integrazzjoni tad-dimensjoni urbana tiġi definita b’mod preċiż fil-proċessi interni tal-iżvilupp ta’ politika tal-Kummissjoni.

29.

Inqisu wkoll li l-White Paper dwar il-politika urbana komprensiva għandha tindirizza t-tema tar-riġenerazzjoni taż-żoni urbani degradati, ir-riabilitazzjoni u r-rinnovazzjoni urbani, kif ukoll l-effiċjenza fl-użu tal-enerġija u l-kostruzzjoni tal-bini.

30.

Eżempju tajjeb ta’ approċċ iktar komprensiv fil-livell tal-UE huwa s-Sħubija Ewropea għall-Innovazzjoni għal Bliet u Komunitajiet Intelliġenti. Din is-Sħubija nħolqot biex permezz ta’ inizjattivi pubbliċi/privati jiġu xprunati innovazzjonijiet għall-bliet li jinsabu fl-interfaċċja tal-mobbiltà urbana, l-effiċjenża fil-qasam tal-enerġija u teknoloġiji tal-informazzjoni u l-komunikazzjoni. Is-Sħubija toffri l-possibbiltà biex il-politika makroekonomika fil-livell tal-UE tissarraf fil-livell prattiku tal-bliet. Hawnhekk huwa tassew importanti li l-bliet jingħataw il-libertà li jistabbilixxu l-aġenda u li jkunu jistgħu jaqdu rwol mexxej, b’tali mod li jkunu jistgħu verament ikunu mexxejja.

31.

Hemm kuntrast qawwi bejn l-eżempji tajbin bħas-Sħubija Ewropea għall-Innovazzjoni għal Bliet u Komunitajiet Intelliġenti u l-involviment tal-bliet fil-programmi tal-fondi strutturali fil-perjodu 2007-2013. Għall-perjodu ta’ programmazzjoni l-ġdid 2014-2020, ġiet allokata attenzjoni speċjali għad-dimensjoni urbana fil-politika tal-koeżjoni permezz ta’ għadd ta’ inizjattivi speċifiċi (allokazzjoni obbligatorja ta’ 5 % għall-baġit tal-FEŻR għall-iżvilupp urban, twaqqif ta’ netwerks Ewropej għall-iżvilupp urban, kif ukoll miżuri innovattivi fil-qasam tal-iżvilupp urban sostenibbli). It-talba għal iktar densità tista’ madankollu twassal biex belt ma titqiesx fil-kuntest tal-iżvilupp urban sħiħ tagħha. Hemm bżonn ta’ koordinazzjoni mtejba fi ħdan il-Kummissjoni sabiex ikun fehim aħjar tal-politiki settorjali tad-dimensjoni urbana (l-ambjent, l-infrastruttura tal-enerġija, il-mobbiltà) fl-unitajiet kollha tagħha.

32.

Il-Kumitat tar-Reġjuni jtenni l-appoġġ tiegħu għall-attenzjoni li l-Kummissjoni tagħti lill-iżvilupp urban integrat fil-politika ta’ koeżjoni l-ġdida (15). F’dan il-qafas ukoll, bi pjaċir jinnota t-tisħiħ tal-prinċipju tas-sħubija fil-pakkett il-ġdid ta’ koeżjoni u l-pubblikazzjoni tal-kodiċi ta’ kondotta Ewropea għas-sħubija. Madankollu, il-Kumitat tar-Reġjuni ser jibqa’ viġilanti fir-rigward tal-implimentazzjoni prattika tal-proposti tal-Kummissjoni matul l-implimentazzjoni tal-programmi operattivi l-ġodda tal-FEŻR u l-FSE, speċjalment il-mod li bih il-bliet u l-bliet il-kbar huma involuti fil-ġestjoni u l-governanza tal-programmi.

33.

Il-Kumitat tar-Reġjuni jappella lill-Kummissjoni biex, b’mod konġunt mal-Kumitat, timmonitorja, u fejn possibbli tippromovi, l-inklużjoni attiva tal-bliet fil-programmi l-ġodda tal-fondi strutturali. It-tagħlimiet li jinsiltu minn hawn jistgħu jservu bħala rakkomandazzjoni ta’ politika importanti fl-iżvilupp tal-politika ta’ koeżjoni wara l-2020, u anke għal programmi oħra Ewropej li jistgħu jippromovu t-twettiq tal-għanijiet Ewropej fil-livell lokali.

34.

Il-bliet jieħdu sehem ukoll fi programmi oħra tal-UE għas-sussidji bħal LIFE, Orizzont 2020, Enerġija Intelliġenti-Ewropa, eċċ. għalkemm dawn il-programmi m’għandhomx punt fokali tematiku dwar il-kwistjonijiet urbani u s-sinerġiji mal-programmi tal-Fondi Ewropej Strutturali u ta’ Investiment ESI. Attenzjoni speċjali għas-sinerġiji bejn is-sussidji tal-UE jkollha effetti pożittivi fuq il-bliet.

35.

Bil-ħolqien ta’ netwerks ta’ awtoritajiet lokali fil-livell Ewropew, il-Kummissjoni qed tindirizza l-bżonn li jsir skambju ta’ prattiki tajbin bejn il-bliet f’diversi temi. Anke l-programm ta’ kooperazzjoni territorjali Urbact, il-programm tal-UE għall-promozzjoni tal-iżvilupp sostenibbli urban, jindirizza dan il-bżonn. Barra minn hekk, il-programm “L-Ewropa għaċ-ċittadini” jħeġġeġ lill-muniċipji jwaqqfu netwerks tematiċi dwar kwistjonijiet ta’ interess komuni bħala għodda importanti għall-iffaċilitar tal-iskambju tal-prattiki tajbin. Apparti l-programmi kofinanzjati mill-fondi strutturali u l-azzjonijiet ta’ kompetizzjoni organizzati mill-UE, hemm iktar programmi għall-iskambju tal-għarfien bejn il-bliet (pereżempju Civitas, il-Patt tas-Sindki, Mayors Adapt, l-Inizjattiva għal Bliet u Komunitajiet Intelliġenti, il-Qafas ta’ Referenza għall-Bliet Sostenibbli, Managenergy). Il-Kumitat jinnota li l-għadd ta’ inizjattivi għall-iskambju tal-għarfien u l-esperjenza dejjem qed jiżdied u jsir iktar divers. Sabiex ikun hemm approċċ iktar komprensiv il-Kumitat jappella lill-Kummissjoni biex tikkonsolida dawn il-programmi tas-sussidji Ewropej u n-netwerks ta’ appoġġ differenti, sabiex iż-żoni lokali jkunu jistgħu jifhmu aħjar u jipparteċipaw b’mod aktar effiċjenti minn dak preżenti.

36.

Sabiex il-bliet u ż-żoni urbani jiġu evalwati aħjar minflok biss bl-indikatur tal-PDG jeħtieġ li għall-iskambju tal-għarfien u l-valutazzjoni komparattiva tal-politika urbana jkun hemm biżżejjed data disponibbli, jekk possibbli fil-livell tar-reġjuni. Problema kruċjali hawnhekk hija li s-sottodiviżjoni tar-reġjuni NUTS tal-Eurostat ma tirriflettix sew ir-realtà fil-bliet u l-muniċipalitajiet. Għalhekk jeħtieġ li l-Eurostat jipprovdi u jiġbor data lokali aktar dettaljata u titkompla l-ħidma relatata mal-awditjar urban u sondaġġi simili jew li jiġu definiti kriterji omoġenji għad-delimitazzjoni taż-żoni metropolitani. Jeħtieġ li jiġu implimentati strumenti konkreti biex ikunu jistgħu jitkejlu l-progress u l-impatt ta’ aġenda urbana integrata fil-livell tal-UE. F’dan il-qafas il-Kumitat jappella lill-Kummissjoni biex tiżviluppa strument ta’ monitoraġġ għall-iżvilupp ta’ aġenda urbana tal-UE.

37.

Wasal iż-żmien għal governanza ġdida, fejn ser jissaħħaħ l-involviment tal-bliet fiċ-ċiklu sħiħ tal-proċess ta’ politika Ewropew (pereżempju permezz tal-KtR, netwerks tal-bliet bħall-Eurocities jew il-Patt tas-Sindki), fejn ser jibda qabel u jissaħħaħ l-involviment tal-bliet fiċ-ċiklu sħiħ tal-proċess ta’ politika Ewropew. Meta l-bliet u l-awtoritajiet lokali u reġjonali jiġu involuti aħjar fil-fażijiet kollha ta’ dan iċ-ċiklu l-UE tista’ tinfluwenza aħjar it-tibdil li l-bliet qed jgħaddu minnu bħalissa. Il-konsegwenzi tal-inizjattivi ta’ politika u r-regolamenti għall-bliet b’hekk jistgħu jiġu evalwati u indirizzati aħjar sabiex jiġi eliminat ir-riskju ta’ politika inkonsistenti tal-UE li tkun maqtugħa mir-realtà. Barra minn hekk, fid-dawl tal-Artikolu 5 tar-Regolament Ġenerali (UE) Nru 1303/2013 dwar il-Fondi Strutturali tal-UE, dan il-“metodu ta’ governanza f’diversi livelli” għandu japplika tul il-proċess kollu ta’ tħejjija u ta’ implimentazzjoni tal-programmi rilevanti tal-politika ta’ koeżjoni tal-UE.

38.

Il-prinċipju tal-governanza f’diversi livelli huwa ta’ importanza kbira, iżda dan il-prinċipju għandu jiġi adattat għar-relazzjoni l-ġdida bejn il-gvern u s-soċjetà. Dan għandu jimxi id f’id mar-rwol ikbar tal-bliet u l-awtoritajiet lokali u reġjonali fil-proċess tat-tfassil tal-politika tal-UE. Għal dan il-għan, l-iffirmar tal-Karta għall-governanza f’diversi livelli fl-Ewropa mill-muniċipji Ewropej ser tikkontribwixxi għall-parteċipazzjoni tal-livelli differenti ta’ governanza (lokali, reġjonali, nazzjonali u Ewropew) fit-tfassil ta’ politiki pubbliċi effettivi, bl-applikazzjoni ta’ għadd ta’ prinċipji bħall-parteċipazzjoni, il-kooperazzjoni, it-trasparenza, l-inklużjoni u l-koerenza politika li huma kundizzjonijiet essenzjali biex jiġi garantit li dawn il-politiki pubbliċi jirnexxu, fl-interess taċ-ċittadini.

39.

Ir-rappreżentanti tal-bliet u l-awtoritajiet lokali u reġjonali għandhom jiġu involuti b’mod strutturali fit-tfassil tal-politika mis-servizzi tal-Kummissjoni (pereżempju billi jieħdu sehem fi grupp ta’ esperti), biex abbażi ta’ esperjenzi prattiċi u informazzjoni konkreta, ikun hemm koordinazzjoni aħjar tad-dimensjoni urbana fil-politika Ewropea. Il-ftehimiet relatati jistgħu jiġu stabbiliti fil-ftehim interistituzzjonali l-ġdid bejn il-Kummissjoni l-ġdida u l-Kumitat tar-Reġjuni.

40.

Il-Kumitat innifsu jabbina importanza kbira mad-dimensjoni urbana fil-politika Ewropea u l-iżvilupp ta’ aġenda urbana tal-UE. F’dan il-kuntest, il-Kumitat, bħala kelliem tal-awtoritajiet lokali u reġjonali fl-UE, jiddikjara li ser isegwi mill-qrib l-iżvilupp tal-White Paper u jkompli jwettaq dibattitu intern u estern dwar l-aġenda urbana. Din l-Opinjoni hija l-ewwel kontribut tal-Kumitat fit-triq lejn approċċ verament komprensiv tal-bliet tal-UE.

19.8.2014   

MT

Il-Ġurnal Uffiċjali tal-Unjoni Ewropea

C 271/18

Relatur

:

Is-Sur Bore (UK/PSE), Membru tal-Kunsill tal-Belt ta’ Birmingham

Dokument ta’ referenza

:

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Lejn mobilità urbana kompetittiva u effiċjenti fl-użu tar-riżorsi – COM(2013) 913 final

A call to action on urban logistics – SWD(2013) 524 final

Targeted action on urban road user safety – SWD(2013) 525 final

A call for smarter urban vehicle access regulations – SWD(2013) 526 final

Mobilising Intelligent Transport Systems for EU cities – SWD(2013) 527 final

1.

Is-sistemi tat-trasport urban sostenibbli jwasslu għal kwalità tal-ħajja aħjar għaċ-ċittadini Ewropej u huma importanti għall-kompetittività ekonomika tal-bliet, ir-reġjuni u l-Unjoni Ewropea kollha kemm hi. Fil-bliet jgħixu 70 % taċ-ċittadini Ewropej u l-bliet huma ċentri importanti tal-attività ekonomika, fejn jiġi ġġenerat iktar minn 80 % tal-PDG tal-Unjoni.

2.

Il-mobilità urbana u t-trasport urban huma kompetenza tal-awtoritajiet lokali u reġjonali, li huma responsabbli għat-tfassil u l-implimentazzjoni tal-politiki ta’ mobilità urbana u għall-provvediment tat-trasport pubbliku fit-territorju tagħhom. Id-deċiżjonijiet li jridu jittieħdu fuq livell lokali spiss huma marbuta ma’ qafas stabbilit mill-politika nazzjonali u fi ħdan Aġenda Urbana tal-UE ġdida. Fil-fatt, bosta jikkunsidraw l-aġenda għall-Mobilità Urbana bħala komponent tal-aġenda tal-Bliet Intelliġenti.

3.

Il-Kumitat tar-Reġjuni ħareġ rakkomandazzjonijiet ta’ politika fl-Opinjonijiet preċedenti tiegħu dwar il-mobilità urbana, b’mod partikolari fl-Opinjoni tiegħu dwar il-Green Paper dwar it-Trasport Urban (1), fiż-żewġ Opinjonijiet dwar il-Pjan ta’ Azzjoni dwar il-Mobilità Urbana (2), u fl-Opinjoni dwar il-White Paper “Pjan Direzzjonali għal Żona Unika Ewropea tat-Trasport” (3). Dawn ir-rakkomandazzjonijiet ipproponew politiki ta’ mobilità urbana sostenibbli li jikkunsidraw id-dimensjonijiet ekonomiċi, ambjentali u soċjali.

4.

Fil-Pakkett dwar il-Mobilità Urbana, hemm fehim sħiħ dwar il-prinċipju tas-sussidjarjetà, b’azzjonijiet iffukati meta jkun hemm valur miżjud tal-UE, b’mod partikolari fit-trawwim ta’ kooperazzjoni, l-iskambju tal-aħjar prattika u l-gwida. Hemm ukoll rakkomandazzjonijiet lill-Istati Membri biex jintroduċu miżuri fir-rigward tal-loġistika urbana, ir-regolamenti dwar l-aċċess urban, l-użu tas-soluzzjonijiet tas-sistemi ta’ trasport intelliġenti (STI), u s-sikurezza tat-toroq urbani.

5.

jenfasizza l-importanza ta’ politika tal-Unjoni Ewropea komprensiva dwar iż-żoni urbani fuq il-bażi tal-ideat u s-suġġerimenti espressi fl-Opinjonijiet paralleli u komplementari tal-Kumitat dwar aġenda urbana integrata, dwar l-enfasi tas-Seba’ Programm ta’ Azzjoni Ambjentali fuq il-bliet sostenibbli u dwar il-mobbiltà urbana;

6.

Jenfasizza li għall-iżvilupp urban irid jiġi segwit approċċ sostenibbli u olistiku. Il-problemi ta’ mobilità urbana ma jistgħux jiġu solvuti permezz ta’ approċċ settorjali biss. Għandha tiġi kkunsidrata b’mod partikolari r-rabta bejn id-dimensjoni urbana tal-politika tat-trasport u l-kunċett usa’ tal-ġestjoni tat-territorju, mhux biss biex jitjiebut-trasport u l-infrastruttura urbani iżda wkoll biex tiġi miġġielda l-espansjoni urbana u tiġi kkunsidrata mill-ġdid ir-relazzjoni bejn il-bliet u l-ambjent (urban/rurali) tal-madwar. Għal aktar proposti dwar is-sostenibbiltà, il-KtR jirreferi għall-Opinjoni dwar is-Seba’ Programm ta’ Azzjoni Ambjentali u l-Bliet Sostenibbli (4);

7.

jikkunsidra neċessarju li jkun hemm miżuri (kampanji ta’ sensibilizzazzjoni, inċentivi, eċċ) fil-livell tal-Istati Membri li jistgħu jibdlu l-imġiba tan-nies fil-konfront tal-użu ta’ mezzi ta’ trasport li jużaw inqas enerġija;

8.

jemmen li l-PMUS għandhom ikunu integrati sew mal-politiki tal-użu tal-art. L-iżvilupp ippjanat ħażin li ma jkunx effettivament integrat man-netwerk tat-trasport jirriżulta f’iktar domanda għat-trasport u jwassal għal dipendenza eċċessiva mill-karozza privata għal ħafna vjaġġi;

9.

jaċċetta li l-pjani ta’ mobilità urbana sostenibbli huma strument strateġiku xieraq għall-iżvilupp ta’ dan l-approċċ integrat għall-mobilità urbana li huwa mmirat lejn il-modi u l-forom kollha ta’ trasport fiż-żona funzjonali kollha ta’ belt jew ta’ agglomerazzjoni urbana: dak pubbliku u privat; it-taksis; it-trasport tal-passiġġieri u tal-merkanzija; motorizzat jew le; mobbli jew ipparkjat – li lkoll għandhom jikkunsidraw l-aspetti ta’ mobilità u tal-ġeneru tal-popolazzjoni. It-tfassil ta’ pjani ta’ mobilità urbana sostenibbli għall-bliet kollha tibqa’ talba ewlenija tal-KtR, billi t-tfassil u l-implimentazzjoni tal-pjani ta’ mobilità urbana huma r-responsabbiltà tal-bliet stess;

10.

jiddispjaċih li għalkemm diġà ġew żviluppati pjani ta’ mobilità sostenibbli f’ħafna bliet u wrew li huma bażi eċċellenti għal diskussjoni u għall-implimentazzjoni ta’ miżuri għat-titjib tal-mobilità fiż-żoni urbani, għad m’hemmx definizzjoni komuni fil-livell Ewropew tal-kunċett ta’ pjani ta’ mobilità urbana sostenibbli;

11.

jilqa’ l-fatt li l-Kummissjoni Ewropea involviet b’mod attiv lill-Kumitat tar-Reġjuni fil-proċess tal-valutazzjoni tal-impatt għall-pakkett dwar il-Mobilità Urbana u b’mod partikolari il-fatt li d-DĠ MOVE ikkunsidra t-tħassib ewlieni tal-Kumitat tar-Reġjuni fir-rigward tal-elaborazzjoni ta’ proposta mhux vinkolanti;

12.

Għandu dubji dwar il-proċess li bih il-Kummissjoni għandha l-intenzjoni tiżgura li l-miri u l-miżuri msemmija fil-pakkett dwar il-mobilità urbana jinkisbu sew, meta hija konxja mill-fatt li fit-territorju Ewropew hemm bliet u reġjuni fejn id-definizzjoni u l-implimentazzjoni tal-pjani taż-żoni urbani qegħdin fi stadji differenti ta’ maturità. Dan jista’ jirrigwarda l-mobilità tal-persuni jew miżuri għall-loġistika urbana, ir-regolamentazzjoni u l-monitoraġġ iktar intelliġenti għall-aċċess għaż-żoni urbani, it-twaqqif ta’ sistemi intelliġenti tat-trasport urban u s-sikurezza fuq it-toroq urbani;

13.

jikkunsidra l-kunċett bħala gwida mhux vinkolanti, kif ukoll jiċċara li dan jista’ u għandu jiġu adattat għaċ-ċirkostanzi partikolari tal-Istati Membri u taż-żoni urbani;

14.

jilqa’ l-impenn tal-Kummissjoni li tappoġġja l-iżvilupp u l-promozzjoni ta’ dan il-kunċett, b’mod partikolari l-proposta biex titwaqqaf Pjattaforma Ewropea dwar il-PMUS u l-impenn li jingħata appoġġ lill-awtoritajiet nazzjonali, reġjonali u lokali fl-iżvilupp u l-implimenzzjoni tal-PMUS, inkluż permezz ta’ strumenti ta’ finanzjament. Għandu jkun hemm impenn assolut mill-Kummissjoni Ewropea biex ir-rappreżentanti tal-awtoritajiet lokali u reġjonali jiġu involuti fil-Pjattaforma Ewropea;

15.

iħeġġeġ li l-proposta tal-Kummissjoni għat-twaqqif ta’ Grupp ta’ Esperti tal-Istati Membri dwar il-Mobilità u t-Trasport Urbani tinvolvi wkoll lir-rappreżentanti tal-awtoritajiet lokali jew tal-bliet, biex b’hekk jikkontribwixxu għall-pjattaforma Ewropa proposta;

16.

jitlob li l-PMUS jiġu promossi fil-livell nazzjonali u jħeġġeġ lill-Istati Membri biex iħejju l-bidliet leġislattivi meħtieġa sabiex jiżguraw li jkun hemm il-kundizzjonijiet qafas neċessarji sabiex jippermettu lill-awtoritajiet lokali u reġjonali joħolqu u jimplimentaw b’suċċess strateġiji lokali għall-mobilità urbana;

17.

jindika li l-bliet huma fulkru fejn mezzi differenti jiltaqgħu u fejn normalment il-vjaġġi jibdew u jintemmu. Għaldaqstant għandhom jiġu kkunsidrati bħala parti importanti ħafna u inseparabbli tan-netwerks tat-trasport kollha, u b’konsegwenza, għandha tingħata biżżejjed attenzjoni għall-mobilità urbana;

18.

jemmen li r-regolamenti dwar l-aċċess urban u t-tariffi għall-utenti tat-toroq jistgħu jkunu strumenti effettivi għall-ġestjoni tal-kompetizzjoni fid-domanda għall-ispazju fit-toroq fil-livell urban u għall-indirizzar ta’ problemi kruċjali bħall-konġestjoni, it-tniġġis u l-espansjoni urbana. Dan huwa konformi mal-prinċipju ta’ min iniġġes iħallas u jikkontribwixxi għal bidla lejn l-użu ta’ modi ta’ trasport aktar sostenibbli;

19.

jinnota li l-prinċipju tas-sussidjarjetà jeħtieġ deċiżjoni tal-awtoritajiet lokali biex jiġu implimentati regolamenti dwar l-aċċess urban u skemi ta’ tariffazzjoni tal-utenti tat-toroq. Jeħtieġ li dawn l-iskemi ikunu adattati għas-sitwazzjonijiet u l-bżonnijiet speċifiċi tal-livell lokali u għalhekk m’hemmx soluzzjoni waħda għal kulħadd. Dan jista’ jsir biss fil-livell lokali mill-awtoritajiet lokali u reġjonali;

20.

jinnota li f’dawn l-aħħar snin ġiet implimentati firxa kbira ta’ skemi madwar l-UE iżda jissuġġerixxi li din l-eteroġeneità kultant tista’ tagħmel l-ivvjaġġar madwar l-Ewropa aktar diffiċli, b’mod partikolari minħabba n-nuqqas ta’ informazzjoni li jeżisti b’mod mifrux dwar kif dak li jkun jikkonforma mad-diversi skemi lokali;

21.

jirrimarka li r-regolament dwar l-aċċess għaż-żoni urbani għandu jkun ibbażat fuq regoli ċari li huma kemm jista’ jkun universali f’termini ta’ għanijiet bħat-tnaqqis tat-traffiku, inqas emissjonijiet ta’ tniġġis u inċentivi li jinkoraġixxu l-użu ta’ mezzi ta’ trasport oħra, iktar sostenibbli;

22.

jaqbel għalhekk, f’dan ir-rigward u skont l-Opinjoni tal-Kumitat tar-Reġjuni tal-2009 dwar il-Pjan ta’ Azzjoni għall-Mobilità Urbana (5), li jkun hemm livell minimu ta’ armonizzazzjoni u koerenza fil-livell tal-UE, b’mod partikolari fir-rigward tal-kategorizzazzjoni tal-vetturi, il-klassi ta’ emissjoni u s-sinjali tat-toroq; u dan għandu jsir fi sħubija bejn l-awtoritajiet lokali, nazzjonali u tal-UE;

23.

jilqa’ l-proposta tal-Kummissjoni biex trawwem skambju mal-Istati Membri u l-esperti dwar ir-regolamenti dwar l-aċċess urban u biex tipprepara gwida mhux vinkolanti biex tgħin lill-bliet jimplimentaw skemi relatati mar-regolamenti dwar l-aċċess urban b’mod effettiv;

24.

jissuġġerixxi li bis-sistemi ta’ trasport intelliġenti (STI), hemm il-ħtieġa għal standards tekniċi komuni li jiżguraw interoperabbiltà sabiex jiġu evitati ostakli tekniċi ġodda għall-moviment liberu fi ħdan l-UE;

25.

jiddispjaċih li l-għadd ta’ mwiet fit-toroq fl-UE, bi 26  000 każ ta’ mewt fl-2013, jibqa’ inaċċettabilment għoli. Partikolarment inkwetanti huwa l-fatt li l-utenti vulnerabbli tat-toroq, bħall-persuni bil-mixi, iċ-ċiklisti, u b’mod partikolari l-persuni mdaħħlin fl-età, huma l-aktar affettwati. Jinsab partikolarment inkwetat dwar il-fatt li l-għadd ta’ ċiklisti li mietu kompla jiżdied meta mqabbel mal-2010;

26.

jenfasizza l-importanza tas-sikurezza fit-toroq biex tiżgura modi sostenibbli ta’ trasport, bħar-roti u l-mixi u l-impatt pożittiv għall-aġenda tas-saħħa billi aktar nies ikollhom appoġġ biex jagħmlu vjaġġi attivi. Dawn il-kwistjonijiet għandhom ikunu parti integrali mill-PMUS u gwida addizzjonali biex dan iseħħ din tkun ta’ benefiċċju;

27.

iħeġġeġ biex tkun promossa wkoll l-edukazzjoni dwar is-sikurezza fit-toroq għall-individwi, billi hemm relazzjoni diretta bejn l-edukazzjoni dwar is-skurezza fit-toroq u l-aċċidenti tat-traffiku fit-toroq;

28.

ifakkar li l-KtR diġà approva l-għanijiet dwar is-sikurezza fit-toroq stabbiliti fil-White Paper tal-2011 dwar it-Trasport biex, sal-2050, inqarrbu lejn trasport stradali fejn ma jkunx hemm każijiet ta’ mewt, u biex nimmiraw li nnaqqsu bin-nofs l-imwiet fit-toroq sal-2020 meta mqabbel mal-għadd fl-2010;

29.

jirrikonoxxi li l-isforzi biex titjieb is-sikurezza permezz tad-disinn tal-vetturi u l-użu tas-STI, bħas-sistemi ta’ assistenza għas-sewwieq (b’mod speċjali s-soluzzjonijiet V2I u V2 V), se jnaqqsu l-livell ta’ inċidenti iżda jissuġġerixxi li jeħtieġ li jsir aktar mill-awtoritajiet lokali u reġjonali biex jinkoraġġixxu l-użu ta’ vetturi b’disinn aktar sikur, eż. permezz ta’ proċessi ta’ akkwist;

30.

jirrakkomanda li s-soluzzjonijiet ibbażati fuq is-STI għandhom jesploraw ukoll kif il-promozzjoni ta’ bidla reali fl-imġiba tas-sewqan ser tipprovdi gwadann fl-ambjent, is-sikurezza fit-toroq u l-effiċjenza enerġetika;

31.

jilqa’ l-proposta tal-Kummissjoni Ewropea li tindirizza s-sikurezza tat-toroq urbani fil-qafas tal-pakkett dwar il-mobilità urbana u jinnota li hemm l-impenn tal-Kummissjoni Ewropea li tiġbor u xxerred eżempji ta’ prattika tajba dwar l-ippjanar tas-sikurezza tat-toroq, u biex tanalizza l-miżuri bil-għan li jonqos l-għadd ta’ korrimenti serji tat-traffiku fit-toroq fiż-żoni urbani. Dan m’għandux ikun limitat għas-sentejn li ġejjin, kif ġie suġġerit, iżda għandu jibqa’ għaddej jekk ikun hemm bżonn;

32.

jilqa’ b’sodisfazzjon ir-rakkomandazzjoni tal-Kummissjoni Ewropea li l-Istati Membri jiżguraw il-ġbir adatt ta’ indikaturi dwar is-sikurezza fit-toroq fl-aktar livell dettaljat possibbli, u jinkoraġġixxi lill-awtoritajiet lokali biex jużaw din id-data biex janalizzaw is-sitwazzjoni fil-livell lokali u għall-ippjanar tas-sikurezza fit-toroq. Huwa rikonoxxut li interventi tal-inġinerija fl-aħħar mill-aħħar għandhom impatt limitat u li, bl-użu ta’ data dwar is-sikurezza fit-toroq, huwa possibbli li jiġu identifikati ċerti komunitajiet li jkunu l-aktar involuti f’ħabtiet tat-traffiku fit-toroq. Dan jippermetti kampanji u programmi ta’ mġiba dwar is-sikurezza fit-toroq aktar iffukati u mmirati;

33.

jenfasizza li, f’konformità mal-prinċipji tas-sussidjarjetà u tal-governanza f’diversi livelli, l-awtoritajiet lokali u reġjonali għandhom ir-responsabbiltà li jfasslu l-politiki dwar is-sikurezza fit-toroq fi ħdan mandat li jiffoka fuq is-soluzzjoni ta’ problemi lokali, adattati għall-kuntest lokali. Il-PMUS jistgħu jkunu strument effettiv biex jiġi promoss approċċ integrat għas-sikurezza fit-toroq fil-livell lokali;

34.

jenfasizza li r-rwol tal-merkanzija u l-loġistika ma jistax jiġi sottovalutat. Għalkemm il-loġistika urbana tirrappreżenta sehem relattivament żgħir tat-traffiku urban, tieħu ammont konsiderevoli ta’ spazju tat-toroq urbani, eż. għat-tagħbija u l-ħatt, u b’hekk tikkontribwixxi għall-konġestjoni u problemi oħra. Il-vetturi tal-merkanzija urbana jikkontribwixxu wkoll b’mod sproporzjonat għat-tniġġis tal-arja u dak akustiku, u huma ta’ spiss involuti f’inċidenti gravi li jinvolvu utenti vulnerabbli tat-toroq bħall-persuni bil-mixi u ċ-ċiklisti. F’dan ir-rigward, it-titjib tal-loġistika urbana jkollu impatt pożittiv fuq is-sistema tat-trasport urban kollha kemm hi;

35.

jenfasizza li hemm potenzjal sinifikanti fir-rigward tal-introduzzjoni ta’ teknoloġiji ġodda, eż. soluzzjonijiet bi fjuwils alternattivi. Huwa rikonoxxut li l-iżvilupp u l-użu bikri ta’ vetturi b’enerġija nadifa jista’ jkollhom benefiċċji immedjati fil-bliet f’termini tat-tnaqqis tad-dipendenza miż-żejt, kif ukoll benefiċċji għas-saħħa minħabba kwalità tal-arja mtejba u t-tnaqqis tal-istorbju. L-għan tal-White Paper tal-2011 dwar it-Trasport biex niksbu loġistika tal-bliet kważi ħielsa mis-CO2 fiċ-ċentri urbani ewlenin sal-2030 huwa għal darba oħra appoġġjat mill-KtR;

36.

jinnota li, b’mod speċjali għal operaturi ta’ skala iżgħar, is-sostenibbiltà ekonomika tal-introduzzjoni ta’ vetturi iktar nodfa fil-flotta tal-loġistika urbana tista’ tirrikjedi mekkaniżmu ta’ inċentivi bbażati fuq gwadann assoċjat mal-esternalitajiet. F’dan ir-rigward, għandhom jiġu stabbiliti għanijiet kwantitattivi f’dak li għandu x’jaqsam mal-flotot ta’ vetturi pubbliċi u privati;

37.

jilqa’ l-inklużjoni tal-kwistjoni tal-loġistika urbana fil-pakkett dwar il-mobilità urbana, partikolarment billi l-loġistika urbana hija traskurata ħafna fl-ppjanar tat-trasport tal-bliet;

38.

jilqa’ l-impenn tal-Kummissjoni Ewropea li tieħu azzjoni fir-rigward tat-tixrid u l-adozzjoni tal-aħjar prattika tal-loġistika urbana, b’mod partikolari li tipprovdi dokumenti ta’ gwida dwar kif tista’ titjieb il-prestazzjoni loġistika urbana u li tiffaċilita l-akkwist ta’ vetturi iżjed nodfa u sikuri billi tikkunsidra mill-ġdid l-ambitu tal-Portal tal-Vetturi Nodfa (www.cleanvehicle.eu);

39.

jirrikonoxxi li għad hemm nuqqas ta’ data u informazzjoni dwar il-flussi tal-merkanzija biex iż-żoni urbani jiġu megħjuna jippjanaw b’mod iktar effettiv għall-movimenti tal-merkanzija fiż-żona tagħhom. Jekk din id-data u din l-informazzjoni jintrabtu mal-applikazzjonijiet tas-STI, l-awtoritajiet urbani jkunu jistgħu jifhmu aħjar il-bżonnijiet loġistiċi urbani, tittejjeb l-effiċjenza tal-movimenti, u jiġu identifikati rotot aktar adattati għall-vetturi bil-għan li jkun hemm inqas emissjonijiet;

40.

jaċċetta l-pożizzjoni tal-Kummissjoni Ewropea li għandha tingħata kunsiderazzjoni xierqa lil-loġistika urbana fl-approċċi nazzjonali għall-mobilità urbana fi ħdan l-Istati Membri, u b’mod partikolari lill-PMUS;

41.

jirrikonoxxi mill-ġdid il-potenzjal li joffru s-STI fir-rigward tal-ottimizzazzjoni tal-mobilità urbana u fit-tilħiq tal-għanijiet tal-politika, bħal aktar sikurezza u inqas konġestjoni. It-teknoloġiji tal-informazzjoni jaqdu rwol ewlieni billi jappoġġjaw xejriet ġodda ta’ mobilità bbażati fuq l-użu konġunt tal-modi kollha ta’ trasport (eż. informazzjoni dwar l-ivvjaġġar u t-traffiku multimodali fil-ħin reali, sistemi elettroniċi multimodali integrati għall-ħruġ tal-biljetti, u skemi ta’ car sharing u bike sharing);

42.

jiddispjaċih li l-użu tal-applikazzjonijiet tas-STI għadu frammentat ħafna, ikkawżat min-nuqqas kemm tal-interoperabilità kif ukoll ta’ koperazzjoni effettiva. Jaqbel mal-fehma tal-Kummissjoni Ewropea li s-STI jistgħu jirrealizzaw il-potenzjal sħiħ tagħhom biss bl-użu fuq skala wiesgħa madwar l-Ewropa kollha. L-importanza ta’ din il-koerenza u l-interoperabilità tappoġġja l-ivvjaġġar transkonfinali u l-moviment liberu fi ħdan l-UE. Dan japplika wkoll għaż-żoni urbani, li huma ta’spiss nodi importanti fin-netwerk trans-Ewropew tat-trasport;

43.

jitlob sabiex jingħata appoġġ lill-inizjattivi tal-awtorità lokali biex jiġu implimentati s-STI. Jeħtieġ li titħaffef l-introduzzjoni tal-innovazzjonijiet tekniċi u teknoloġiċi li jtejbu l-mobilità, l-effiċjenza, is-sigurtà u l-kwalità tat-trasport f’żoni urbani;

44.

ifakkar li l-Kummissjoni Ewropea diġà bdiet il-ħidma fir-rigward ta’ STI interoperabbli u koerenti, b’mod partikolari l-provvista ta’ qafas legali bid-Direttiva 2010/40/UE (id-Direttiva dwar is-STI) u t-twaqqif ta’ grupp ta’ esperti dwar is-STI urbani, li diġà żviluppa linji gwida għall-użu ta’ applikazzjonijiet ewlenin tas-STI fiż-żoni urbani;

45.

f’dan il-kuntest, jilqa’ l-impenn tal-Kummissjoni Ewropea li tkompli bil-ħidma tagħha f’dan il-qasam u l-intenzjoni tagħha li tissupplimenta l-leġislazzjoni eżistenti dwar l-aċċess għad-data dwar it-traffiku u l-ivvjaġġar, biex tħejji l-ispeċifikazzjonijiet dwar informazzjoni tat-traffiku f’ħin reali u servizzi ta’ informazzjoni multimodali taħt il-qafas tad-Direttiva 2010/40/UEdwar is-STI, u biex tiffaċilita l-varar ta’ sistemi ta’ komunikazzjoni bejn vettura u oħra u bejn il-vetturi u l-infrastruttura fiż-żoni urbani. Madankollu, b’dawn il-kwistjonijiet kollha, il-protezzjoni tad-data u l-kwistjonijiet ta’ privatezza huma prerekwiżiti importanti għall-aċċettazzjoni ta’ dawn is-sistemi u għandhom ikunu rispettati bis-sħiħ;

46.

jiddispjaċih li l-kwistjonijiet tal-kwalità tal-arja u l-klima mhumiex indirizzati b’mod adegwat fil-Komunikazzjoni. Hekk kif it-tibdil fil-klima jkollu impatt, se jiżdied l-għadd ta’ ġranet li fihom is-sistemi tat-trasport jiffaċċjaw sitwazzjonijiet ta’ temp estrem. Jekk ma tittieħed l-ebda miżura biex is-sistemi tat-trasport tagħna jiġu adattati għal dawn l-avvenimenti, huma mistennija aktar tfixkil u spejjeż soċjali u ekonomiċi ogħla;

47.

jenfasizza li, għal ħafna raġunijiet oħra, il-kwalità tal-arja hija kwistjoni ta’ tħassib kbir f’ħafna bliet tal-Ewropa, u, fid-dawl tal-fatt li l-ispiża umana tal-kwalità fqira tal-arja hija agħar minn dik tal-inċidenti tat-traffiku, hija l-ewwel kawża ambjentali ta’ mwiet prematuri fl-UE. Għandha impatt ukoll fuq il-kwalità tal-ħajja minħabba problemi li jirriżultaw mill-ażżma jew problemi respiratorji oħra. It-tniġġis tal-arja jikkawża telf ta’ ġranet ta’ xogħol u spejjeż kbar fil-qasam tal-kura tas-saħħa, u l-aktar milquta huma gruppi vulnerabbli bħat-tfal, l-ażżmatiċi u l-persuni mdaħħlin fl-età. Huwa ta’ ħsara għall-ekosistemi minħabba t-tniġġis tan-nitroġenu żejjed (l-ewtrofikazzjoni) u x-xita aċiduża. L-ispejjeż diretti tat-tniġġis tal-arja għas-soċjetà, inkluża l-ħsara fl-uċuħ tar-raba’ u l-bini, jammontaw għal madwar EUR 23 biljun fis-sena, u l-ispejjeż esterni minħabba l-impatt fuq is-saħħa biss huma stmati għal EUR 330-940 biljun (bejn 3-9 % tal-PDG tal-UE);

48.

jinnota li, minħabba ksur tal-limiti tas-saħħa għall-NO2 stabbiliti mill-UE, ħafna gvernijiet tal-Istati Membri potenzjalment qed jiffaċċjaw proċedimenti legali ta’ ksur mill-Kummissjoni Ewropea, bil-possibbiltà ta’ multi sostanzjali li jistgħu jiġu mgħoddija lill-awtoritajiet lokali u l-entitajiet pubbliċi li fihom ma tteħditx azzjoni xierqa skont is-setgħat tagħhom. Dan madankollu jeħtieġ illi jiġi amministrat b’attenzjoni. Fl-istess ħin deher ċar li l-ksur fil-livell lokali huwa spiss minħabba, fost affarijiet oħra, politika nazzjonali u Ewropea mhux adatta għall-indirizzar tal-problemi mill-bidu nett. Hemm bżonn ta’ approċċ f’diversi livelli, fejn kull livell ta’ governanza (Ewropew, nazzjonali, reġjonali u lokali) jassumi r-responsabbiltà tiegħu u jadotta l-miżuri li jistgħu u għandhom jiġu adottati fil-livell tiegħu;

49.

jissuġġerixxi li d-diversi elementi tal-PMUS ilkoll jistgħu jikkontribwixxu biex jindirizzaw il-kwalità tal-arja. Is-STI jwasslu għal movimenti iktar effiċjenti tat-trasport. Il-ġestjoni aħjar tal-loġistika urbana tnaqqas l-istorbju u l-konġestjoni u ttejjeb l-effiċjenza tal-vjaġġi; ir-regolamenti dwar l-aċċess urban tal-vetturi jistgħu jintużaw biex jipprojbixxu vetturi li jniġġsu żżejjed u jħeġġu l-użu ta’ vetturi iżjed silenzjużi b’emissjonijiet baxxi ħafna; u, permezz ta’ miżuri tas-sikurezza fit-toroq, tista’ tiġi mħeġġa mġiba aħjar fis-sewqan li għandha tgħin sabiex jonqsu l-emissjonijiet globali filwaqt li jonqsu l-għadd ta’ inċidenti fin-netwerk tat-trasport u l-konġestjoni li ta’ spiss iġibu magħhom. Programmi bħaċ-Civitas jew l-Ecostars huma eżempji tajbin ta’ dan;

50.

jemmen li l-miżuri inklużi fil-PMUS għandhom iżidu l-għadd ta’ nies bil-mixi, u li jsuqu r-roti u jużaw it-trasport pubbliku, u b’hekk jitnaqqsu mhux biss l-emissjonijiet u l-istorbju mit-traffiku tal-vetturi iżda jkun hemm ukoll aċċessibilità aħjar għal kulħadd, titjib fl-ugwaljanza fis-sistema tat-trasport, kif ukoll żieda fl-attività fiżika u t-titjib tas-saħħa pubblika;

51.

ifakkar li l-leġislazzjoni eżistenti tal-UE dwar il-kwalità tal-arja, l-istorbju u t-tassazzjoni tal-vetturi qed tiġi riveduta bħalissa u jħeġġeġ li dawn isiru konsistenti mal-ispirtu ta’ din il-Komunikazzjoni;

52.

jemmen li huwa importanti li l-bliet esposti għar-riskju ta’ tniġġis akustiku jkollhom pjan ta’ tqassim f’żoni tal-istorbju, li bih jiġi kklassifikat it-territorju skont il-livell massimu ta’ tniġġis akustiku permess u li fih ikunu stabbiliti żoni urbani u suburbani b’impatt ta’ storbju minimu speċjalment ħdejn parks, skejjel, sptarijiet u residenzi protetti għall-persuni mdaħħlin fl-età;

53.

għaldaqstant, jitlob li t-tħassib dwar it-tniġġis tal-arja u dak akustiku jissarraf f’azzjonijiet permezz tal-PMUS, kemm mill-UE kif ukoll mill-Istati Membri;

54.

jilqa’ l-impenn tal-Kummissjoni Ewropea biex issaħħaħ l-appoġġ tal-UE għall-mobilità urbana sostenibbli fl-oqsma tal-kooperazzjoni, l-esperjenza u l-iskambju tal-aħjar prattiki, ir-riċerka u l-innovazzjoni, l-appoġġ finanzjarju u l-kooperazzjoni internazzjonali;

55.

B’mod partikolari, jilqa’ l-intenzjoni li jittejjeb l-Osservatorju eżistenti tal-Mobilità Urbana ELTIS billi jiġi integrat il-portal attwali tal-Pjani dwar il-Mobilità u billi dan jiġi żviluppat f’ċentru tal-għarfien komprensiv. Dan ser jikkonsolida l-informazzjoni dwar l-ippjanar tat-trasport urban minn madwar l-UE u jżid mal-Pjattaforma Ewropea ppjanata dwar il-PMUS, u b’hekk jipprovdi lill-awtoritajiet lokali u reġjonali bl-għodod neċessarji sabiex japplikaw il-PMUS b’suċċess;

56.

japprova l-proposta biex tiġi żviluppata Tabella ta’ Valutazzjoni dwar il-Mobilità Urbana, proposta għall-ewwel darba fil-White Paper tal-2011 dwar it-Trasport, bil-għan li tipprovdi indikaturi armonizzati bħala riferiment u biex jitqabbel il-progress taż-żoni urbani madwar l-UE;

57.

jissuġġerixxi, madankollu, li kwalunkwe tabella ta’ valutazzjoni teħtieġ li tkun żviluppata b’attenzjoni sabiex jiġi żgurat li ma ssirx sempliċi sistema ta’ klassifikazzjoni. It-Tabelli ta’ Valutazzjoni tal-Mobilità Urbana għandhom bżonn ikunu “speċifiċi għall-belt” biex jistabbilixxu bażi marbuta maż-żmien, biex b’hekk jinkludu għadd ta’ indikaturi ewlenin (pereżempju l-qasma modali (modal split), l-aċċessibbiltà, il-vetturi effiċjenti fl-użu tal-karburanti, il-kwalità tal-arja u s-saħħa). Applikazzjonijiet sussegwenti tal-finanzjament tal-UE jeħtieġ li jkunu marbuta b’mod speċifiku ma’ kif il-proġett jew l-iżvilupp se jtejjeb/ikollu impatt fuq il-bażi ta’ punteġġ u t-tabelli ta’ valutazzjoni għandhom jiġu riveduti annwalment;

58.

jirreferi għall-piż qawwi fuq il-bliet minħabba ż-żieda fl-għadd ta’ vetturi. Is-servizzi ta’ car sharing żviluppati f’xi bliet fl-Ewropa jistgħu jtaffu s-sitwazzjoni b’mod konsiderevoli. Madanakollu, s’issa dan mhux qed jiżviluppa b’mod uniformi fil-pajjiżi Ewropej għalkemm il-proġett Ewropew MOMO wera potenzjal kbir. Il-Kummissjoni għandha ddaħħal il-mudell ta’ qsim (bħall-bike sharing, car sharing, car pooling) b’mod ċar fl-istrateġiji tagħha;

59.

iħeġġeġ li l-appoġġ finanzjarju għall-mobilità urbana sostenibbli permezz tal-Fondi Strutturali u ta’ Investiment Ewropej ikun imsejjes fuq il-gwida li l-Kummissjoni Ewropea tipprovdi lill-awtoritajiet lokali u reġjonali dwar kif il-Fondi Strutturali u ta’ Investiment Ewropej jistgħu jintużaw b’mod aktar sistematiku għall-finanzjament ta’ pakketti integrati ta’ miżuri fil-qasam tal-mobilità urbana, inkluż permezz ta’ strumenti ġodda bħall-Investimenti Territorjali Integrati. Barra min dan, hemm bżonn ta’ gwida dwar kif għandhom jiġu żviluppati l-Pjani dwar il-Mobilità biex juru li dawn joffru valur għall-flus għall-investimenti u jisfruttaw is-sinerġiji ma’ possibbiltajiet oħra ta’ finanzjament tal-UE bħall-Orizzont 2020;

60.

jilqa’ b’sodisfazzjon l-intenzjoni tal-Kummissjoni li tagħti aktar attenzjoni lill-bliet iż-żgħar u medji li jaqdu rwol fundamentali fis-sistema urbana Ewropea kollha kemm hi. Barra minn hekk, dawn il-bliet għandhom potenzjal kbir minħabba l-vantaġġi soċjali, ambjentali u istituzzjonali li jgawdu b’rabta mad-daqs iżgħar tagħhom. Il-problemi marbutin mal-mobilità urbana mhumiex fenomenu li jolqot esklużivament lill-bliet metropolitani l-kbar, u l-bliet iż-żgħar u medji jridu saħansitra jiffaċċjaw diffikultajiet akbar biex jiffinanzjaw proġetti għat-titjib tal-mobilità urbana, minħabba l-ispejjeż għoljin u inqas ekonomiji ta’ skala;

61.

jissuġġerixxi li hemm argumenti sodi biex il-PMUS jintrabtu mal-azzjonijiet tal-bliet tal-UE fi ħdan il-Patt tas-Sindki. L-impenn volontarju tal-bliet għall-Patt tas-Sindki jista’ jkun mudell validu għall-promozzjoni tal-użu tal-PMUS;

62.

jirrimarka li f’ħafna bliet, speċjalment fl-Istati Membri l-ġodda, il-bidliet ekonomiċi u soċjali wasslu għal bidla radikali fil-funzjoni ta’ żoni urbani partikolari u għalhekk bidliet fundamentali fil-fluss ta’ trasport. Dawn il-bidliet jeħtieġu rikostruzzjoni komprensiva u bi spiża għolja ta’ kull tip ta’ infrastruttura tat-trasport. Huwa għalhekk li għal dawn il-bliet huwa essenzjali li l-ewwel tiġi indirizzata – u appoġġjata mill-Fondi Ewropej Strutturali u ta’ Investiment – ir-rikostruzzjoni ta’ din l-infrastruttura essenzjali biex issir operattiva u adegwata. L-appoġġ tal-Fondi Ewropej Strutturali u ta’ Investiment għaldaqstant m’għandux ikun limitat għall-konnessjoni għan-netwerks TEN-T, iżda għandu jkun jista’ jiffinanzja l-komunikazzjonijiet u l-infrastruttura lokali għall-pubbliku u mezzi ta’ trasport alternattiv li jikkontribwixxi sew għall-mobilità urbana;

63.

jemmen li, jekk il-PMUS jitfasslu skont linji gwida tal-UE, allura wieħed jista’ jassumi li huma msawra fuq il-ħtiġijiet tal-mobilità taċ-ċittadini lokali, bl-appoġġ tal-partijiet interessati lokali u x-xiri sfurzat mill-politiċi lokali. Il-Pjani ta’ Mobilità Urbana Sostenibbli jistgħu jiżguraw li l-flus jiġu integrati fi kwistjonijiiet ta’ pprogrammar u ppjanar usa’ li jibbenefikaw minn impenn politiku fil-livell lokali;

64.

jappoġġja l-idea li l-allokazzjoni tal-fondi ta’ koeżjoni u dawk għall-iżvilupp rurali jkunu kkoordinati billi l-bliet u r-reġjuni joħorġu ċertifikat tal-Awditjar tal-Prestazzjoni u s-Sostenibbiltà tal-Mobilità Urbana li jkun koerenti u vvalidat indipendentement.

19.8.2014   

MT

Il-Ġurnal Uffiċjali tal-Unjoni Ewropea

C 271/25

Relatur

Is-Sinjura Matonienė (LT/KRE), Membru tal-Kunsill tal-Belt ta’ Šiauliai

Dokument ta’ referenza

Ittra ta’ konsultazzjoni tal-Kummissjoni Ewropea tas-27 ta’ Novembru 2013

1.

Sabiex ikun hemm użu effiċjenti tar-riżorsi u ekonomija b’emissjonijiet baxxi tal-karbonju, li jħarsu u jsaħħu l-kapital naturali u jipproteġu s-saħħa u l-benesseri taċ-ċittadini, l-għan tas-7 Programm ta’ Azzjoni Ambjentali (EAP) hu li jintlaħqu l-miri ambjentali u tat-tibdil fil-klima fejn l-Unjoni diġà waslet għal ftehim dwarhom, sabiex jiġi pprovdut qafas legali għall-politika ambjentali sal-2020 u biex tiġi stabbilita viżjoni fit-tul sal-2050 għall-UE u l-Istati Membri tagħha.

2.

Il-Kummissjoni Ewropea talbet lill-Kumitat tar-Reġjuni joħroġ Opinjoni dwar il-miżuri proposti għall-implimentazzjoni tat-tmien għan tas-Seba’ Programm ta’ Azzjoni Ambjentali u ressqet erba’ mistoqsijiet speċifiċi:

3.

Fl-UE hemm 350 miljun persuna (70 %) li jgħixu fi bliet b’iktar minn 5  000 abitant. Sal-2020 probabbilment 80 % tal-Ewropej ser ikunu qed jgħixu fil-bliet jew fis-subborgi. Il-kwalità tal-ħajja u l-kundizzjonijiet ambjentali globali jiddependu direttament mill-istat tal-ambjent urban. Il-biċċa l-kbira ta’ sustanzi niġġiesa li jidħlu fl-ambjent joriġinaw fil-bliet.

4.

Ħafna bliet jiffaċċjaw prinċipalment sfidi simili fil-qasam tal-ambjent: it-titjib tal-kwalità tal-arja, it-tnaqqis tat-tniġġis akustiku, tal-konġestjoni tat-traffiku u tal-emissjonijiet ta’ gassijiet b’effett ta’ serra, it-telfien tal-bijodiversità, l-iskarsezza tal-ilma, l-għargħar u l-ħsara mill-maltempati, il-preservazzjoni ta’ superfiċji ekoloġiċi, ir-riabilitazzjoni tal-art ikkontaminata u t-titjib tal-ġestjoni tal-iskart u l-provvista tal-enerġija.

5.

Il-KtR jenfasizza l-benefiċċji tanġibbli tal-implimentazzjoni ta’ politiki u miżuri sostenibbli inkluż ambjent imtejjeb, saħħa pubblika aħjar, kwalità tal-ħajja mtejba, iktar ċertezza regolatorja għall-industrija, u inqas distorsjonijiet fis-suq. Jenfasizza wkoll li huwa stmat li l-ispejjeż tan-nonimplimentazzjoni tal-leġislazzjoni tal-UE dwar l-ambjent bejn wieħed u ieħor jammontaw għal madwar EUR 50 biljun fis-sena u jinkludu spejjeż marbuta mas-saħħa u spejjeż diretti għall-ambjent (1).

6.

Jenfasizza li l-bliet sostenibbli ser jiġu definiti mill-kapaċità tagħhom li jiksbu l-miri tal-mitigazzjoni tat-tibdil fil-klima. Minħabba l-konċentrazzjoni tal-popolazzjoni fiż-żoni urbani, jinnota li l-bliet ser ikollhom jaqdu rwol mexxej fit-tnaqqis tal-gassijiet b’effett ta’ serra biex iż-żieda fit-temperatura globali ma taqbiżx iż-żewġ gradi Celsius; u l-bliet huma fl-aħjar pożizzjoni li jħeġġu l-bidla fl-imġiba meħtieġa għat-trasformazzjoni radikali fl-infrastruttura tal-enerġija u t-trasport. Jagħraf ukoll li l-kapaċità tal-bliet li jadattaw għat-tibdil fil-klima inevitabbli u li t-temp estrem ser tiddetermina wkoll is-sostenibbiltà ekonomika u soċjali tagħhom u b’hekk il-kompetittività tal-Unjoni Ewropea.

7.

Fil-valutazzjoni u l-ippjanar tal-miżuri tal-UE, b’rabta mal-iżvilupp sostenibbli tal-bliet, għandu jitqies ukoll il-kuntest globali. Fit-22 ta’ Ġunju 2012, fil-Konferenza tan-Nazzjonijiet Uniti dwar l-iżvilupp sostenibbli ġiet adottata d-Dikjarazzjoni Rio+20, li tisħaq fuq ekonomija inklużiva u li tirrispetta l-ambjent u tistabbilixxi l-għanijiet tal-iżvilupp sostenibbli għal wara l-2015.

8.

B’konformità mad-Dikjarazzjoni ta’ Rio+20, il-KtR iqis li belt sostenibbli hija waħda li tippromovi soċjetà li hija ekonomikament, ambjentalment u soċjaliment sostenibbli, li għandha biss impatt minimu fuq l-ambjent, li tippromovi teknoloġiji ġodda, toħloq l-impjiegi, tħares il-ġid kulturali u naturali u toffri s-sigurtà soċjali. Hija wkoll belt li tagħti s-setgħa lill-komunità lokali tagħha biex tieħu sehem fil-proċess tat-teħid tad-deċiżjonijiet fil-livell lokali.

9.

Il-promozzjoni ta’ bliet sostenibbli tirrikjedi approċċ olistiku li permezz tiegħu jistgħu jiġu solvuti kemm il-kwistjonijiet tal-ħarsien tal-ambjent u l-problemi soċjali u ekonomiċi tal-bliet kif ukoll jindirizza kif il-bliet jistgħu jibnu reżiljenza għad-diżastri. Għalhekk il-kunċett ta’ belt sostenibbli ma jistax jiġi limitat għall-ħarsien tal-ambjent. L-isfida hi li jiġi żgurat li l-kriterji huma bbażati fuq il-livelli adegwati ta’ informazzjoni mill-oqsma ta’ suġġett differenti u li huma rilevanti għat-tipi differenti ta’ bliet madwar l-UE. Dan huwa essenzjali biex jiġi żgurat li l-kriterji jkunu faċli biex jintużaw għal kwalunkwe belt li trid taħdem biex issir sostenibbli, u li tinħoloq responsabbilizzazzjoni pubblika ta’ dan il-proċess. Approċċ olistiku u sostenibbli ser ikun prerekwiżit għall-iżvilupp urban futur. Għal aktar proposti dwar il-politiki urbani u l-politiki ta’ reżiljenza, il-KtR jirreferi għall-Opinjoni dwar l-Aġenda Urbana tal-UE u l-Opinjoni dwar il-ġestjoni tar-riskji sabiex tinkiseb ir-reżiljenza (2).

10.

Il-ħolqien ta’ bliet sostenibbli jeħtieġ miżuri sodi għall-ħarsien tal-ambjent li jridu jiġu inkorporati f’kull qasam ta’ politika rilevanti u li jridu jiġu integrati fi strateġiji u attivitajiet settorjali oħra inklużi dawk immirati li joħolqu l-impjiegi u t-tkabbir.

11.

Skont il-prinċipju tas-sussidjarjetà l-ippjanar tal-bliet sostenibbli u l-ġestjoni tat-territorju huma kompitu tal-Istati Membri u għalhekk dan il-prinċipju għandu jiġi rispettat b’mod assolut. Huwa importanti wkoll li l-awtoritajiet lokali u reġjonali jiġu involuti fl-iktar stadji bikrija tat-tfassil ta’ dawn il-politiki, kif ukoll fl-implimentazzjoni u l-infurzaar tagħhom fil-prattika. L-Unjoni Ewropea tista’ tieħu azzjoni ta’ appoġġ u tħeġġeġ lill-bliet, lir-reġjuni u lill-Istati Membri jiskambjaw l-informazzjoni, jaqsmu l-aħjar prattiki u jitgħallmu minn xulxin.

12.

Filwaqt li l-miżuri, l-arranġamenti u l-prijoritajiet finanzjarji tal-UE huma wkoll immirati l-aktar lejn bliet kbar ta’ iktar minn 1 00  000 abitant, jinnota li madwar 56 % tal-bliet tal-UE għandhom bejn 5  000 u 1 00  000 abitant. Jenfasizza l-importanza tal-impatt akkumulattiv tas-sostenibbiltà ta’ bliet żgħar u ta’ daqs medju u jenfasizza li hemm ambitu konsiderevoli fi bliet iżgħar biex jitfasslu u jiġu implimentati l-prinċipji tal-iżvilupp urban sostenibbli.

13.

Jenfasizza l-bżonn għal diskussjoni ġenerali dwar id-direzzjoni tal-bliet sostenibbli bil-għan li jiġu stabbiliti għanijiet komuni sal-2050.

14.

Il-bliet huma responsabbli għall-implimentazzjoni tal-miżuri fil-qasam tal-ippjanar urban, il-politika tal-iżvilupp, il-ħarsien tal-ambjent u l-politika tal-enerġija. Għalhekk il-bliet jinsabu fl-aħjar livell amministrattiv biex jimplimentaw il-miżuri għall-iżvilupp sostenibbli tal-bliet bl-iktar mod kosteffiċjenti.

15.

Il-prinċipju tal-governanza f’diversi livelli għandu jissaħħaħ, għax is-suċċess fil-livell nazzjonali u lokali jiddependi mill-ħidma konġunta fil-qasam tal-iżvilupp sostenibbli tal-bliet u approċċ komuni bejn il-bliet li għandhom ir-responsabbiltà għall-iżvilupp urban u l-livelli l-oħra (reġjonali, nazzjonali u Ewropew) li jikkontribwixxu għall-qafas globali tas-sostenibbiltà.

16.

Il-KtR, bħala l-istituzzjoni tal-UE li tirrappreżenta leħen ir-reġjuni u l-bliet tal-UE u bħala l-punt ta’ kuntatt għal ħafna netwerks lokali, għandu jkun element ċentrali fi ħdan din is-sistema ta’ governanza. Dan ser jiżgura li l-leġislazzjoni tal-UE tkun adattata aħjar għas-sitwazzjoni u l-bżonnijiet tal-bliet. Dan jippermettilhom li joħolqu sens ta’ responsabbiltà għall-miżuri tas-sostenibbiltà urbana.

17.

Sabiex jinkisbu bliet sostenibbli għandha tintuża taħlita tal-approċċ minn isfel għal fuq u approċċ minn fuq għal isfel (Bottom-up/Top down). Mhuwiex biżżejjed li l-bliet jieħdu inizjattiva. Huwa rakkomandat li fil-livell tal-UE jkun hemm qafas komuni bi gradi adatti ta’ flessibbiltà li permezz tiegħu l-bliet ikunu jistgħu janalizzaw lilhom innifishom skont kriterji komuni għall-bliet sostenibbli u jwettqu l-għanijiet tas-sostenibbiltà għall-bliet skont miżuri tagħhom stess. Jeħtieġ ukoll li jkun possibbli aċċess aħjar għall-mekkaniżmi ta’ finanzjament tal-UE. Skont il-kriterji rrakkomandati tal-UE, li għandhom jibnu fuq il-Qafas ta’ Referenza għal Żvilupp Sostenibbli tal-Bliet, għandha ssir analiżi tas-sostenibbiltà tal-bliet u jiġu evalwati l-punti b’saħħithom u dawk dgħajfa tal-belt. Abbażi tar-riżultat il-belt tista’ tagħti direzzjoni lill-iżvilupp u tiddeċiedi liema huma l-miżuri adatti biex ittejjeb is-sitwazzjoni tagħha. Dawn il-kriterji jistgħu jiġu peżati b’mod varjat biex jiġu kalibrati l-prijoritajiet u l-iskop tagħhom.

18.

Il-livelli ta’ governanza lokali, reġjonali u nazzjonali għandhom jieħdu ħsieb koordinazzjoni orizzontali u vertikali, inkluża l-kooperazzjoni intermuniċipali u transkonfinali, li tiżgura approċċ estensiv għall-iżvilupp urban, biex tiġi evitata d-duplikazzjoni u li l-investiment jiġi iżolat u jsir mingħajr koordinazzjoni.

19.

Il-KtR jilqa’ l-istrument il-ġdid ta’ “Ftehimiet ta’ Implimentazzjoni tas-Sħubija” u jitlob lill-Kummissjoni għal iktar ċarezza u gwida fir-rigward tal-involviment tal-awtoritajiet lokali u reġjonali f’dan l-istrument.

20.

Il-Kumitat tar-Reġjuni għalhekk jappella biex sal-2050, fil-livell tal-UE, jitfasslu għanijiet komuni għall-bliet sostenibbli, li għandhom jintlaħqu sal-2050, fuq il-bażi ta’ katalogu ta’ kriterji rrakkomandati. Il-miżuri meħtieġa sabiex jinkisbu l-għanijiet diġà għandhom ikunu inklużi fir-rakkomandazzjonijiet speċifiċi għall-pajjiżi mħejjija mill-Kummissjoni Ewropea, u jipprovdu gwida dwar l-implimentazzjoni tal-għanijiet tal-Istrateġija Ewropa 2020. L-iżvilupp tal-għanijiet fuq terminu twil ta’ żmien u l-kriterji meħtieġa għandhom ikunu bbażati fuq l-inizjattivi li diġà jeżistu f’dan il-qasam, inkluża l-Karta ta’ Leipzig dwar il-bliet Ewropej sostenibbli.

21.

Il-KtR iħeġġeġ lill-awtoritajiet lokali u reġjonali biex jiddiskutu l-kunċetti rispettivi tagħhom għall-iżvilupp sostenibbli urban mal-partijiet kollha rilevanti fid-diversi livelli ta’ governanza. F’dan ir-rigward, il-konsultazzjonijiet pubbliċi miftuħin għaċ-ċittadini huma mezz eċċellenti biex dawn jiġu involuti fl-istrateġiji li jridu jiġu definiti. Ladarba l-kriterji jkunu ġew żviluppati, id-dibattitu pubbliku dwar il-prestazzjoni mkejla skont dawn il-kriterji jista’ jħeġġeġ lil iktar bliet biex jaqbdu t-triq lejn is-sostenibbiltà.

22.

Jistieden lill-Kummissjoni Ewropea biex taħdem mal-Istati Membri fuq approċċ komuni lejn il-miżuri għall-promozzjoni tal-iżvilupp ta’ bliet sostenibbli u biex tiġbor informazzjoni dwar liema mekkaniżmi ta’ suċċess diġà jeżistu għal dan l-appoġġ. Approċċ komuni u proċeduri flessibbli jagħmluha possibbli biex il-bliet jagħżlu l-aħjar miżuri għall-iżvilupp sostenibbli tal-bliet fit-tul.

23.

Il-bliet għandhom jippromovu sħubija innovattiva u effettiva bejn is-settur pubbliku u dak privat, biex il-proġetti mmexxija skont il-kunċett tas-sostenibbiltà tal-bliet jitwettqu bl-aħjar mod possibbli.

24.

Għandhom jintużaw l-għażliet u l-istrutturi eżistenti ta’ finanzjament, inklużi dawk disponibbli taħt il-programm LIFE plus għall-appoġġ tal-proġetti pilota. Il-programm tal-BEI għall-finanzjament tal-miżuri għall-effiċjenza fl-użu tal-enerġija diġà qed jiġi applikat b’suċċess u l-possibbiltà li jiġu żviluppati programmi simili f’oqsma oħra rilevanti għas-sostenibbiltà għandhom jiġu esplorati.

25.

Għandu jiġi promoss ir-raggruppament tal-proġetti, mekkaniżmu li kultant jintuża fil-prattika, li jiġbor flimkien bosta muniċipalitajiet li għandhom l-istess għan. Dan jiffaċilita l-finanzjament ta’ proġetti żgħar li huma ta’ importanza għar-reġjun.

26.

Is-sensibilizzazzjoni tal-pubbliku u l-għoti ta’ inċentivi huma wieħed mill-fatturi ewlenin biex il-bliet sostenibbli jsiru realtà. Il-miżuri intiżi għall-konservazzjoni tal-ilma, l-estensjoni tal-impjanti tar-riċiklaġġ u ta l-ikkompostar, l-użu iktar mifrux tat-trasport pubbliku u l-iffrankar tal-enerġija, eċċ., waħidhom mhumiex biżżejjed għal parteċipazzjoni attiva u estensiva tas-soċjetà fil-ħolqien tal-bliet sostenibbli. Il-KtR jistieden lill-Kummissjoni Ewropea sabiex tagħti parir lill-bliet dwar il-possibbiltajiet li jintużaw miżuri ta’ informazzjoni viżwali, biex iċ-ċittadin f’kull ħin ikun jista’ jkun infurmat aħjar dwar is-sitwazzjoni tal-ambjent urban (fost oħrajn informazzjoni dwar it-tniġġis tal-arja, it-traffiku).

27.

Il-Kumitat tar-Reġjuni jilqa’ b’sodisfazzjon il-ħidma tal-Kummissjoni Ewropea fejn tipprovdi portal ibbażat fuq l-Internet bħala punt ta’ kuntatt uniku u jħeġġeġ lill-membri tiegħu biex jipprovdu informazzjoni rilevanti jekk u meta meħtieġ. Jistieden lill-Istati Membri biex jiżguraw li l-informazzjoni komuni dwar il-kriterji, l-istrumenti ta’ finanzjament u l-inizjattivi jilħqu lill-bliet. Għandhom jitħejjew pjani ta’ komunikazzjoni rilevanti bl-involviment tal-istituzzjonijiet tal-UE, ir-rappreżentanzi tagħhom fl-Istati Membri, l-assoċjazzjonijiet tal-awtoritajiet lokali u reġjonali u kwalunkwe parti interessata oħra rilevanti.

28.

Kemm il-pjattaformi u l-istrumenti eżistenti kif ukoll il-bażijiet tad-data u l-inizjattivi tagħhom għandhom ikunu involuti fl-isforzi tal-livell tal-UE għall-appoġġ tal-bliet sostenibbli u għandhom jintużaw sabiex titħeġġeġ il-kooperazzjoni bejniethom, u bejn il-bliet u r-reġjuni li diġà huma involuti f’netwerks bħalma huma l-Patt tas-Sindki, il-Qafas ta’ Referenza għal Żvilupp Sostenibbli tal-Bliet, EnergyCities, Eurocities, ICLEI, l-Alleanza Globali Kontra t-Tibdil fil-klima.

29.

Il-Kummissjoni Ewropea għandha tevalwa u ssaħħaħ l-istrateġija ta’ komunikazzjoni tagħha fil-kuntest tal-perjodu l-ġdid ta’ finanzjament u tħeġġeġ kemm lill-Istati Membri kif ukoll lill-bliet biex japprofittaw bis-sħiħ mill-5 % tal-fondi previsti fil-FEŻR għall-iżvilupp urban sostenibbli.

30.

Il-Kumitat tar-Reġjuni, li qed jipprovdi l-esperjenza tal-awtoritajiet lokali u reġjonali u jaħdem flimkien mal-Kummissjoni Ewropea u l-partijiet interessati, ser ikompli jxerred l-informazzjoni u jippromovi prattiki tajba dwar il-bliet sostenibbli kif ukoll dwar opportunitajiet ta’ fondi disponibbli.

31.

Il-KtR itenni l-appoġġ tiegħu għall-iżvilupp ta’ Oqfsa ta’ Implimentazzjoni u Informazzjoni Strutturati (Structured Implementation and Information Frameworks – SIIF) għal-liġijiet ambjentali kollha ewlenin tal-UE u jappella lill-KE biex tinvolvi lill-awtoritajiet lokali u reġjonali biex jieħdu sehem fis-SIIF.

32.

Jenfasizza li l-mobbiltà urbana sostenibbli u li tirrispetta l-ambjent taqdi rwol importanti ħafna fis-sostenibbiltà tal-bliet tagħna. Għal aktar proposti dwar is-sostenibbiltà u t-trasport sostenibbli fil-bliet, il-KtR jirreferi għall-opinjonijiet dwar il-Pakkett tal-Mobbiltà Urbana (3).

33.

L-UE għandha tappoġġja iktar l-inizjattivi eżistenti li jippromovu l-innovazzjoni u l-aħjar prattiki fil-bliet kif ukoll in-netwerking u l-iskambju, u jekk hemm bżonn testendihom, u l-bliet għandhom jiġu involuti f’dan u anke jaqdu rwol mexxej fil-qasam tal-iżvilupp tal-bliet sostenibbli. F’dan il-kuntest il-KtR jirreferi għall-miżuri innovattivi fil-qasam tal-iżvilupp sostenibbli tal-bliet li għall-perjodu 2014-2020 ser jiġu finanzjati mill-FEŻR. Dawn il-miżuri jinkludu l-proġetti pilota li għandhom jittestjaw soluzzjonijiet ġodda għal problemi li huma relatati mal-iżvilupp sostenibbli tal-bliet fil-livell tal-UE.

34.

Il-KtR jissuġġerixxi wkoll lill-KE li tappoġġja u tespandi l-proġetti mressqa min-netwerks lokali u li jkunu kisbu suċċess bħar-reviżjoni bejn il-pari u l-attivitajiet ta’ tagħlim reċiproku, inkluż iż-żjarat lis-siti, il-ġemellaġġ ekoloġiku, il-mentoring u t-taħriġ bejn l-imsieħba, il-monitoraġġ tal-impjiegi, l-eżamijiet u l-valutazzjonijiet u l-iskemi ta’ mobbiltà għall-esperti tal-bliet.

35.

Fil-livell nazzjonali, reġjonali u lokali jistgħu jinħatru punti ta’ kuntatt (focal points) għall-iżvilupp sostenibbli tal-bliet. Bl-għajnuna tagħhom il-miżuri individwali, fosthom il-programm ta’ skambju għall-esperti, jistgħu jiġu koordinati b’mod iktar faċli. L-aġenziji tal-enerġija u l-amministrazzjonijiet tar-reġjuni tal-iżvilupp tal-livell NUTS II jistgħu jieħdu r-rwol ta’ koordinazzjoni. Huma diġà għandhom kuntatti stabbiliti sew mal-bliet li jaqgħu taħt l-awtorità tagħhom flimkien ma’ esperjenza fil-koordinazzjoni ta’ programmi Ewropej.

36.

Il-kompetizzjoni għall-premju ta’ Belt Kapitali Ekoloġika tal-Ewropa kisbet suċċess mhux ħażin u għandha tkompli tiġi żviluppata. L-eżempju tal-Kapitali Ewropea tal-Kultura juri li premju b’bażi legali u finanzjarja soda għandu potenzjal saħansitra ikbar biex iħeġġeġ lill-bliet jieħdu sehem u jiġġeneraw riżultati fit-tul Il-KtR huwa favur li l-“Belt Kapitali Ekoloġika tal-Ewropa” tiġi żviluppata fl-istess direzzjoni.

37.

Aspett wieħed tal-Premju għall-Belt Kapitali Ekoloġika tal-Ewropa li għandu jitqies mill-ġdid huwa l-fatt li skont il-limitu attwali għall-eliġibbiltà huma biss il-bliet b’iktar minn 1 00  000 abitant li jistgħu jikkompetu. Għaldaqstant, il-KtR jissuġġerixxi li jista’ jiġi kkunsidrat it-tieni premju għall-bliet Ewropej b’tal-anqas 50  000 abitant. B’hekk il-bliet Ewropej iżgħar jiġu offruti opportunità wkoll. Imbagħad tkun ħaġa adatta li l-kriterji għal din il-kategorija jiġu adattati għar-riżorsi u l-ħtiġiet tal-bliet iżgħar, sabiex ikunu jistgħu jieħdu sehem fil-kompetizzjoni l-ikbar numru possibbli ta’ kandidati.

38.

Il-KtR jappella biex in-Netwerk tal-Bliet Kapitali Ekoloġiċi Ewropej jissaħħaħ iktar biex ir-rebbieħa u l-bliet nominati għall-premju ta’ “Belt Kapitali Ekoloġika tal-Ewropa” jkunu jistgħu jirreklamaw il-bliet tagħhom mal-pubbliku inġenerali, jagħmlu skambju tar-riżultati miksuba u l-ideat tekniċi u għal dan il-għan jistgħu jużaw pjattaforma proprja jew anke strutturi eżistenti.

39.

Il-KtR jippromovi l-premju tal-“Belt Kapitali Ekoloġika tal-Ewropa” b’mod attiv u jissuġġerixxi li l-Kummissarju Ewropew għall-ambjent jikteb ittra mhux biss lill-Istati Membri kollha fejn jitlobhom iqajmu kuxjenza fost il-bliet u r-reġjuni tagħhom dwar il-premju imma li jista’ jindirizzaha anke lill-organizzazzjonijiet ambjentali li jikkooperaw mill-qrib mal-bliet.

40.

Tista’ tiġi studjata l-possibilità li l-Kummissjoni tagħti premju għall-aħjar “ekodistrett Ewropew”, sabiex tippromovi r-restawr ta’ distretti identifikati bħala fqar u vulnerabbli u tħeġġeġ lill-komunitajiet lokali jinvolvuhom fil-ġestjoni tad-distretti tagħhom.

41.

Barra mill-inizjattivi tal-KE, għandhom jitqiesu premji oħra bħal pereżempju l-premju tal-Bandiera l-Ħadra (Green Flag Award), dak għall-konservazzjoni tal-Bijodiversità, dak għall-promozzjoni tat-trasport ekoloġiku, eċċ.) fil-livell lokali, reġjonali u nazzjonali.

19.8.2014   

MT

Il-Ġurnal Uffiċjali tal-Unjoni Ewropea

C 271/30

Relatur

is-Sinjura Håkansson Harju (SV/PSE), Membru tal-Kunsill Muniċipali ta’ Järfälla

Dokumenti ta’ referenza

Ewropa miftuħa u sikura: kif nagħmluha realtà

COM(2014) 154 final

L-Aġenda tal-Ġustizzja tal-UE għall-2020 – It-Tisħiħ tal-Fiduċja, tal-Mobbiltà u tat-Tkabbir fl-Unjoni

COM(2014) 144 final

1.

jilqa’ b’sodisfazzjon l-għan tal-Kummissjoni li tikkonsolida l-progress li sar fil-qasam tal-ġustizzja u l-affarijiet interni permezz ta’ implimentazzjoni adatta u monitoraġġ effettiv. Fl-istess ħin, jenfasizza li r-riżultat ta’ konsolidazzjoni bħal din jista’ jfisser miżuri leġislattivi addizzjonali li jirrispettaw il-prinċipji tas-sussidjarjetà u l-proporzjonalità biex jimtlew il-lakuni eżistenti u jippermettu li l-UE tindirizza l-isfidi globali ġodda b’mod iżjed flessibbli;

2.

huwa tal-fehma li enfasi iżjed b’saħħitha fuq l-impenji tal-UE fir-rigward tad-drittijiet fundamentali għandha tħalli impatt ġenwin fil-livelli kollha. B’konformità mal-Karta tad-Drittijiet Fundamentali tagħha, l-UE trid tkompli tiżviluppa aktar il-ħidma tagħha f’dan il-qasam sabiex tibqa’ żona miftuħa u sigura msejsa fuq ir-rispett komuni tad-drittijiet fundamentali;

3.

f’dan ir-rigward, jilqa’ b’sodisfazzjon li l-Kummissjoni Ewropea żviluppat qafas biex tindirizza t-theddid sistemiku kontra l-istat tad-dritt fl-Istati Membri, peress li l-istat tad-dritt u l-prinċipju tal-ugwaljanza quddiem il-liġi huma prerekwiżit għall-implimentazzjoni u r-rispett tad-drittijiet fundamentali fl-Unjoni (1);

4.

huwa tal-fehma li l-Karta tad-Drittijiet Fundamentali tal-UE tirrikonoxxi kemm drittijiet fundamentali li jappartjenu għal kulħadd kif ukoll drittijiet speċifiċi għaċ-ċittadini tal-UE. Sabiex dawn id-drittijiet kollha jsiru realtà għall-individwi, tinħtieġ ħidma sostanzjali f’diversi livelli fejn l-awtoritajiet lokali u reġjonali jaqdu rwol fundamentali, attiv u li jħares lejn il-ġejjieni;

5.

jenfasizza li huma l-komunitajiet lokali li jibnu s-sisien ta’ soċjetà inklużiva b’rispett ġenwin għad-drittijiet fundamentali u, għalhekk, anke soċjetà kkaratterizzata mill-opportunitajiet indaqs, id-diversità u l-ħarsien tal-iżjed persuni vulnerabbli. Fl-istess ħin, huwa wkoll fil-livell lokali u reġjonali li l-isfidi fl-oqsma tal-ġustizzja u l-affarijiet interni joħorġu l-iżjed fid-dieher u l-effetti tagħhom fuq l-individwi huma l-iżjed ċari;

6.

jappoġġja l-proposta tal-Kummissjoni li jiġu adottati strumenti legali komplementari li jiffaċilitaw il-ħajja taċ-ċittadini u jikkontribwixxu għat-tkabbir, bil-kundizzjoni li ma jkunux superfluwi, ikunu effettivi u jiffavorixxu kemm jista’ jkun possibbli l-armonizzazzjoni u s-semplifikazzjoni tal-qafas leġislattiv attwali. Tfassil aħjar tal-liġijiet jikkontribwixxi għat-tkabbir ekonomiku, fid-dawl tal-fatt li jiffaċilita r-relazzjonijiet korporattivi u l-ħajja ta’ kuljum taċ-ċittadini;

7.

jirrakkomanda li l-Kummissjoni Ewropea tiffoka fuq proposti speċifiċi u prattiċi għal leġislazzjoni li jkollha benefiċċji diretti għaċ-ċittadini – speċjalment f’perjodu li fih il-problemi ekonomiċi u soċjali qed jiżdiedu – u li jgħinuhom b’mod konkret ħafna biex isolvu d-diffikultajiet li jiffaċċjaw ta’ spiss minħabba l-kriżi ekonomika. Dawn id-diffikultajiet jinqalgħu l-iżjed fir-reġjuni transkonfinali inqas żviluppati fejn huwa iżjed diffiċli li ċ-ċittadini jwettqu l-attivitajiet ekonomiċi u soċjali tagħhom;

8.

iqis li sabiex id-drittijiet fundamentali taċ-ċittadini kollha jkunu rispettati bis-sħiħ jinħtieġu ħidma kollettiva u ċara u responsabbiltà komuni fil-livelli kollha. Il-ħidma fil-qasam tad-drittijiet fundamentali għandha tinvolvi proċess fit-tul u kontinwu. Approċċ komuni sabiex dan jintlaħaq irid jissejjes kemm fil-livell lokali, reġjonali u nazzjonali kif ukoll f’dak tal-UE. Jekk il-livelli differenti ma jaħdmux id f’id, hemm il-periklu li jkunu esposti għall-estremiżmu, ir-razziżmu u l-ksenofobija u ssir ħsara għall-iżvilupp pożittiv tal-UE kollha;

9.

jenfasizza r-rwol ewlieni li jaqdu l-awtoritajiet lokali u reġjonali fl-oqsma ta’ politika tal-ġustizzja u l-affarijiet interni. Huma għandhom responsabbiltà kruċjali għall-implimentazzjoni ta’ bosta elementi tal-leġislazzjoni eżistenti fil-livell nazzjonali u dak tal-UE; huma jiżviluppaw u jittestjaw soluzzjonijiet ġodda ta’ politika; jappoġġjaw ir-residenti fl-eżerċitar tad-drittijiet fundamentali tagħhom u jiġbru informazzjoni u esperjenza meħtieġa għall-iżvilupp addizzjonali tal-oqsma ta’ politika. Għalhekk, l-awtoritajiet lokali u reġjonali għandhom kapaċità kbira biex jikkontribwixxu fil-fażijiet kollha ta’ żvilupp tal-oqsma ta’ politika, mill-ippjanar u l-implimentazzjoni sal-monitoraġġ u l-valutazzjoni;

10.

jemmen li l-awtoritajiet lokali u reġjonali għalhekk huma msieħba li huma meħtiġin bis-sħiħ fit-tfassil u l-implimentazzjoni tal-miżuri fil-qasam tal-ġustizzja u l-affarijiet interni. Għalhekk, iħeġġeġ lill-Kummissjoni, il-Parlament u l-Kunsill biex jirrikonoxxu b’mod espliċitu l-awtoritajiet lokali u r-reġjuni bħala msieħba sħaħ f’dawn l-oqsma ta’ politika u jagħtuhom l-opportunità biex jerfgħu s-sehem tagħhom tar-responsabilità;

11.

jemmen li l-politiki fil-qasam tal-ġustizzja u l-affarijiet interni għandhom jiġu kkoordinati u integrati mal-politiki l-oħra tal-UE. Jiġbed l-attenzjoni għall-ħtieġa ta’ koordinazzjoni aħjar bejn il-kwistjonijiet relatati mal-ġustizzja u l-affarijiet interni minn naħa u l-politika ekonomika tal-UE, il-politika soċjali u l-politika esterna min-naħa l-oħra, sabiex jissaħħaħ ir-rispett tad-drittijiet fl-oqsma kollha u tiżdied il-konsistenza bejniethom. Il-politiki tal-ġustizza u l-affarijiet interni għandhom jiġu kkoordinati mal-politika ekonomika u soċjali żviluppata mill-Fondi Strutturali u ta’ Investiment Ewropej fir-reġjuni inqas żviluppati, partikolarment fil-qasam tat-taħriġ u l-impjieg. Barra minn hekk, jaqbel mal-Kummissjoni li l-politiki tal-ġustizzja u l-affarijiet interni għandhom jiġu integrati fil-politika esterna globali tal-UE b’mod li jissaħħu d-djalogu u l-kooperazzjoni ma’ pajjiżi terzi u s-sinerġiji ma’ oqsma oħra ta’ politika tal-UE (2);

12.

huwa tal-fehma li l-awtoritajiet fil-livelli kollha għandhom ikunu involuti b’mod attiv fil-ħarsien u l-promozzjoni tad-drittijiet fundamentali u l-libertajiet tal-persuni kollha. L-awtoritajiet lokali u reġjonali għandhom responsabbiltà akbar biex joħolqu sensibilizzazzjoni mtejba dwar id-drittijiet fundamentali, minħabba li huma qrib taċ-ċittadini;

13.

jixtieq jenfasizza li l-bnedmin kollha għandhom drittijiet u libertajiet fundamentali irrispettivament mis-sess, razza, kulur, oriġini etnika jew soċjali, karatteristiċi ġenetiċi, lingwa, reliġjon jew twemmin, opinjoni politika jew xi opinjoni oħra, appartenenza għal minoranza nazzjonali, proprjetà, twelid, diżabbiltà, età jew orjentazzjoni sesswali, u li l-hekk imsejħa gruppi vulnerabbli bħat-tfal, il-migranti mingħajr dokumenti u dawk li jfittxu asil u oħrajn dejjem jeħtieġu attenzjoni speċjali fl-ippjanar, l-implimentazzjoni, il-monitoraġġ u l-valutazzjoni;

14.

jemmen li, sabiex niġġieldu kontra ż-żieda fl-estremiżmu, ir-razziżmu u l-ksenofobija f’bosta Stati Membri tal-UE, tinħtieġ komunikazzjoni strateġika dwar ir-responsabbiltà konġunta fil-livelli differenti għar-rispett, il-ħarsien, it-twettiq u l-promozzjoni tad-drittijiet fundamentali, il-konformità mal-obbligi internazzjonali komuni, kif ukoll il-benefiċċji fit-tul tal-akkoljenza ta’ dawk li qed ifittxu l-asil u tar-refuġjati;

15.

huwa tal-fehma li l-għarfien dwar kif id-drittijiet fundamentali jitwettqu f’azzjoni prattika huwa fattur ċentrali għall-ħolqien ta’ żona ġudizzjarja Ewropea li tirrispetta u tippromovi d-drittijiet fundamentali, id-diversità u l-kooperazzjoni. Għalhekk, jilqa’ b’sodisfazzjon il-gwida fuq l-Internet żviluppata mill-Aġenzija tal-UE għad-Drittijiet Fundamentali bil-għan li jiġu megħjuna l-uffiċjali pubbliċi tal-awtoritajiet lokali, reġjonali u nazzjonali biex b’mod prattiku jtejbu l-ħidma biex jipproteġu u jippromovu d-drittijiet fundamentali permezz ta’ ħidma f’diversi livelli (3). Iħeġġeġ lill-Kummissjoni tinvesti riżorsi addizzjonali fl-iżvilupp, l-aġġornament u t-tixrid ta’ għodod prattiċi ta’ din in-natura bħala appoġġ għall-uffiċjali u rappreżentanti eletti fil-livelli differenti;

16.

jenfasizza, fid-dawl tar-rwol ċentrali, il-kapaċità kbira u l-esperjenza tal-awtoritajiet lokali u reġjonali, il-bżonn ta’ forum għall-iskambju ta’ informazzjoni u tal-aħjar prattiki bejn l-awtoritajiet lokali u reġjonali, l-atturi tas-soċjetà ċivili u livelli amministrattivi oħra (nazzjonali, Ewropej u internazzjonali). Iħeġġeġ lill-UE tiffaċilita dan iżjed permezz ta’ inizjattivi jew programmi mmirati;

17.

jissuġġerixxi li r-rapport annwali tal-Aġenzija dwar il-Karta tad-Drittijiet Fundamentali tal-UE għandu jinkludi informazzjoni dwar kif l-awtoritajiet lokali u reġjonali qed jimplimentawh. Dan jgħin biex jixħet dawl fuq l-oqsma fejn l-awtoritajiet lokali u reġjonali jista’ jkollhom bżonn iżidu l-isforzi tagħhom u jsaħħu l-komunikazzjoni bejn il-livelli;

18.

josserva li d-drittijiet fundamentali mhumiex biss kwistjoni għall-qasam tal-ġustizzja u l-affarijiet interni iżda prattikament id-direttorati ġenerali kollha. Sabiex isaħħaħ ir-rwol u n-natura orizzontali tagħhom, jeħtieġ li l-Kummissarji responsabbli għall-Ġustizzja u l-Affarijiet Interni jikkoordinaw id-drittijiet fundamentali mad-direttorati ġenerali kollha tal-Kummissjoni Ewropea;

19.

huwa tal-fehma li l-iskop ta’ din il-funzjoni ta’ koordinatur għandu jkun li tirrikonċilja l-kompetenzi tad-direttorati ġenerali sabiex jiġu evitati għanijiet kunfliġġenti, tiġi ssorveljata l-implimentazzjoni tad-drittijiet fundamentali, isiru analiżijiet dwar id-drittijiet u l-ġeneru, tiġi kompilata d-data, l-Istati Membri jitħeġġu jirratifikaw u jimplimentaw strumenti ewlenin tad-drittijiet fil-livell internazzjonali u reġjonali, jiġu kkonsultati diversi partijiet interessati u jiġi żgurat li jintużaw it-terminoloġija u l-komunikazzjoni t-tajba. Il-koordinazzjoni għandha tiġi żviluppata bil-kooperazzjoni mill-qrib mal-Aġenzija tal-UE għad-Drittijiet Fundamentali;

20.

josserva li l-kooperazzjoni fil-qasam tad-drittijiet fundamentali tista’ tiġi ffaċilitata jekk id-drittijiet garantiti fil-Karta jkunu direttament applikabbli wkoll fl-Istati Membri;

21.

jemmen li jeħtieġ li jissaħħaħ l-għarfien dwar id-drittijiet speċifiċi taċ-ċittadini tal-UE f’pajjiżi oħra tal-UE. L-applikazzjoni tad-Direttiva dwar il-moviment ħieles tal-persuni hija ċentrali biex iċ-ċittadini tal-UE u l-familji tagħhom jiġu garantiti d-dritt li jiċċaqilqu bejn l-Istati Membri u jgħixu fihom liberament;

22.

josserva li d-dritt għall-moviment ħieles jista’ jiġi ċċarat aktar. Kif tosserva l-Kummissjoni, iċ-ċittadini tal-UE ta’ spiss jiffaċċjaw diversi problemi prattiċi u ġuridiċi meta jippruvaw jeżerċitaw id-drittijiet li huma għandhom fil-pajjiż li jgħixu fih f’pajjiż ieħor tal-UE (4). Fl-istess ħin, għandhom jinstabu soluzzjonijiet aħjar għall-isfidi li l-moviment ħieles joħloq għall-muniċipalitajiet u/jew ir-reġjuni individwali. Anke f’dan ir-rigward, għandhom jintużaw miżuri u programmi mmirati;

23.

jenfasizza li l-UE għandha ssaħħaħ l-implimentazzjoni tal-politiki Ewropej tal-asil u l-migrazzjoni li huma bbażati fuq id-drittijiet fundamentali, is-solidarjetà, il-fiduċja reċiproka u r-responsabbiltà kondiviża bejn l-Istati Membri u l-awtoritajiet lokali u reġjonali;

24.

jitlob li l-Ewropa tibqa’ kenn għal dawk li jaħarbu persekuzzjoni jew huma fil-bżonn ta’ protezzjoni. Il-ħtieġa li tinħoloq akkoljenza kkontrollata tal-migranti u li tiġi protetta l-integrità tal-fruntieri ma għandha qatt titħalla tieħu preċedenza fuq id-dritt li tinkiseb protezzjoni internazzjonali. Għalhekk, ifakkar li l-kontroll u l-monitoraġġ tal-fruntieri tal-art u tal-ilmijiet m’għandux ifisser li jintesew l-obbligi fundamentali li jiġu salvati l-ħajjiet u rispettati d-drittijiet tal-bniedem;

25.

huwa tal-fehma li kooperazzjoni li taħdem tajjeb u fiduċja fost il-livell lokali, reġjonali, nazzjonali u tal-UE f’dak li jirrigwarda l-kondiviżjoni tar-riżorsi u tal-kompetenzi huma indispensabbli għal sistema sostenibbli u adegwata għall-akkoljenza ta’ dawk li qed ifittxu l-asil u tar-refuġjati. Attwalment, hemm xi nuqqasijiet fir-rigward ta’ ċerti aspetti essenzjali f’din il-kooperazzjoni u dan huwa ta’ xkiel serju għas-sistemazzjoni tal-persuni li jkunu għadhom kif waslu, kif ukoll twassal għall-periklu li tħeġġeġ it-tendenzi ksenofobiċi; Essenzjalment, hemm l-istess ħtieġa għal kooperazzjoni effettiva fil-każ tal-akkoljenza ta’ tipi oħra ta’ migranti;

26.

iħeġġeġ lil-livelli kollha tal-gvern fl-UE jaqsmu r-responsabbiltà li jilqgħu u jintegraw ir-refuġjati, u jitlob għal kooperazzjoni, koordinazzjoni u solidarjetà interreġjonali ikbar permezz tal-iżvilupp ta’ mekkaniżmu ta’ ridistribuzzjoni fost l-Istati Membri, ir-reġjuni u l-awtoritajiet lokali, filwaqt li jitqiesu l-limiti strutturali, ir-riżorsi u fatturi rilevanti oħra; Ir-responsabbiltà għall-politika tal-asil u tar-refuġjati hija tal-Istati individwali, li jerfgħu wkoll ir-responsabbiltà ekonomika tal-akkoljenza. Il-kondiviżjoni tal-akkoljenza hija żbilanċjata wkoll fi ħdan l-Istati Membri u min Stat Membru għal ieħor u b’hekk xi awtoritajiet lokali u reġjonali jerfgħu responsabbiltà ikbar minn livelli oħra peress li jilqgħu parti kbira mill-persuni li jkunu għadhom kif waslu; Il-Kumitat ifakkar li l-Unjoni Ewropea trid tqis id-diffikultajiet partikolari li jiffaċċjaw ir-reġjuni tal-Ewropa, li fi kwalunkwe ħin jistgħu jirrappreżentaw il-punt tad-dħul għal dawn il-migranti, li jeħtieġu tipi ta’ għajnuna u servizzi li f’ħafna każijiet jeċċedu l-kapaċitajiet ta’ reġjuni individwali. Għalhekk, għandu jiġi introdott strument finanzjarju speċifiku li huwa intiż primarjament għar-reġjuni li jilqgħu l-migranti u għaż-żoni ta’ tranżitu;

27.

jinsab imħasseb dwar il-fatt li xi kultant l-Istati Membri tal-UE ma jirrispettawx il-Konvenzjoni tan-NU dwar id-Drittijiet tat-Tfal u l-Pjan ta’ Azzjoni dwar Minorenni mhux Akkumpanjati (2010-2014) f’każijiet ta’ akkoljenza ta’ tfal minorenni migranti, refuġjati u li jkunu qed ifittxu l-asil, kif ukoll minorenni li ma jkunux akkumpanjati; jenfasizza l-importanza ta’ appoġġ reċiproku mill-awtoritajiet lokali u reġjonali sabiex ikunu jistgħu jerfgħu sehem mir-responsabbiltà biex jiżguraw li dawn id-dispożizzjonijiet jiġu rispettati kemm għas-subien kif ukoll għall-bniet. Ifakkar lill-Kummissjoni li l-Pjan ta’ Azzjoni msemmi hawn fuq jintemm fl-2014, u għaldaqstant jitlob li jinbeda l-proċess għat-tiġdid tiegħu;

28.

josserva li, sa issa, l-Artikolu 80 tat-TFUE ma ntużax biex jittieħdu miżuri li jimplimentaw is-solidarjetà u l-kondiviżjoni ġusta tar-responsabbiltà fir-rigward tal-mobilità; L-impenji fir-rigward tar-rilokazzjoni u r-risistemazzjoni huma kompletament volontarji u, f’xi każijiet, ċerti bliet ħadu l-inizjattiva biex japplikaw dawn l-impenji fil-prattika;

29.

huwa tal-fehma li d-diviżjoni żbilanċjata tal-persuni li qed ifittxu l-asil u tar-refuġjati bejn il-bliet u r-reġjuni u fi ħdan ir-reġjuni, u n-nuqqas ta’ xogħol u ta’ akkomodazzjoni huma sfidi kbar għall-awtoritajiet lokali u reġjonali. Huma wkoll sfidi kbar in-nuqqas ta’ ppjanar bil-quddiem u l-possibbiltà li jsir ippjanar għall-akkoljenza fi żmien propizju. Is-soluzzjonijiet ad hoc sikwit ikollhom konsegwenzi soċjali negattivi, u dan jaffettwa l-possibbiltajiet li għandhom l-individwi li jagħmlu użu mill-għodod meħtieġa biex jibdew il-proċess tal-integrazzjoni;

30.

għalhekk jemmen li wasal iż-żmien biex b’mod iżjed ċar jiġi investigat x’jimplikaw responsabbiltà kondiviża u solidarjetà fil-qasam tal-asil. Huwa ċar li Stati, reġjuni u awtoritajiet lokali differenti jipprovdu argumenti differenti għal dak li huma jqisu bħala kondiviżjoni ġusta tar-responsabbiltajiet u s-solidarjetà abbażi taċ-ċirkustanzi u x-xewqat speċifiċi tagħhom. Dan jinvolvi kollox min-numru ta’ dawk li qed ifittxu l-asil li jaslu direttament, in-numru ta’ applikazzjonijiet għall-asil li jiġu pproċessati, is-sitwazzjoni finanzjarja, in-nuqqas tad-djar, akkoljenza iżjed bikrija, id-densità tal-popolazzjoni, eċċ. Jinvolvi wkoll jekk il-perspettiva hix fuq perjodu qasir jew twil ta’ żmien;

31.

jenfasizza l-bżonn li jkun hemm skambju tal-aħjar prattiki fost l-awtoritajiet lokali u reġjonali u l-Istati Membri fir-rigward tal-proċess tat-trattament ta’ dawk li qed ifittxu l-asil u r-refuġjati, il-politiki tal-integrazzjoni u l-ġlieda kontra l-migrazzjoni irregolari. Josserva li dan jista’ jiżgura li jiġu indirizzati minn isfel għal fuq kemm id-disparità fl-Istati Membri u r-reġjuni f’dak li jirrigwarda l-kundizzjonijiet li fihom dawk li qed ifittxu l-asil, ir-refuġjati jew il-migranti irregolari jiġu ospitati mal-wasla tagħhom, kif ukoll id-disparità fl-effiċjenza u l-ħeffa li bihom l-applikazzjonijiet u l-fajls jiġu pproċessati. Jiġbed ukoll l-attenzjoni għall-fatt li l-muniċipalitajiet iż-żgħar ma għandhomx ir-riżorsi meħtieġa biex jittrattaw flussi kbar ta’ migranti u, f’dan ir-rigward, jenfasizza l-importanza tas-solidarjetà fost il-muniċipalitajiet u jitlob għat-tisħiħ tal-Frontex għal kooperazzjoni ssemplifikata iżjed effettiva u msaħħa b’mod effiċjenti bejn l-awtoritajiet nazzjonali tal-fruntieri u biex il-migranti jiġu protetti kif ukoll il-fruntieri esterni tal-UE;

32.

għaldaqstant, sabiex isir progress fid-diskussjonijiet dwar il-kondiviżjoni tar-responsabbiltajiet, jipproponi li jsir studju ta’ riċerka biex jiġi ċċarat il-mod kif l-Istati Membri, ir-reġjuni u l-awtoritajiet lokali differenti jiddefinixxu r-responsabbiltà kondiviża u s-solidarjetà, kif ukoll x’impatti jkollhom definizzjonijiet differenti li jintużaw f’xenarji differenti. L-istudju għandu janalizza wkoll kif distribuzzjoni aktar ġusta tal-asil u l-akkoljenza tar-refuġjati fost l-awtoritajiet lokali u reġjonali u l-Istati tista’ ssir realtà fl-UE;

33.

jemmen li huwa importanti wkoll li l-UE tibbenefika mir-riżorsi kbar li l-individwi li jkunu għadhom kif waslu jiġġeneraw. Ħidma ta’ suċċess fil-qasam tal-integrazzjoni, bil-ġestjoni tad-diversità fil-livell lokali u reġjonali hija xprun għat-tkabbir, toħloq opportunitajiet ġodda tat-tagħlim u l-intraprenditorija u twitti t-triq għar-rekwiżiti futuri tax-xogħol, kif ukoll tiffinanzja s-sistema tas-sigurtà soċjali għas-snin li ġejjin. Biex din il-politika twassal għall-benefiċċji, huwa kruċjali li jsir investiment fl-edukazzjoni u l-impjiegi għall-migranti sabiex ikunu jistgħu jidħlu fis-suq tax-xogħol tal-UE, kif ukoll fit-taħriġ dwar id-diversità kulturali u l-ġestjoni tagħha biex jinkiseb tibdil fl-attitudnijiet tal-popolazzjoni inġenerali u jittejbu r-relazzjonijiet soċjali;

34.

jenfasizza l-bżonn li l-frodi u l-abbuż jiġu indirizzati fil-livell tal-UE;

35.

jemmen li r-rati baxxi tat-twelid f’bosta Stati Membri u l-bidla ġenerazzjonali futura ser iwasslu għal żieda fil-bżonn ta’ ċittadini li għandhom l-età tax-xogħol. L-akkoljenza tal-persuni li qed ifittxu l-asil u r-refuġjati tinvolvi mhux biss sfida iżda wkoll opportunitajiet kbar għall-Istati Membri tal-UE. L-UE għandha sempliċement issib tweġibiet kredibbli għall-isfidi demografiċi li qed tiffaċċja l-Unjoni;

36.

josserva li kien hemm progress limitat fl-adozzjoni ta’ leġislazzjoni dwar il-migrazzjoni legali. Ir-riżultat huwa li s-sistema tal-migrazzjoni tal-UE hija inkompleta ħafna. Għalhekk jilqa’ b’sodisfazzjon il-prijorità ta’ approċċ komprensiv rigward kwistjonijiet ta’ migrazzjoni, u li tingħata importanza kbira lill-promozzjoni ta’ sħubija bbilanċjata u ġenwina mal-pajjiżi ta’ oriġini u ta’ tranżitu fir-rigward tal-akkoljenza tal-migranti b’mod organizzat u li jirrispetta d-drittijiet tagħhom;

37.

huwa tal-opinjoni li l-kriminalità organizzata trid tiġi miġġielda wkoll fil-livell lokali permezz ta’ inizjattivi soċjali u edukattivi: billi jintwera, speċjalment lill-abitanti ta’ żoni ddominati mill-kriminalità organizzata, li huwa possibbli mudell ta’ żvilupp differenti msejjes fuq it-trasparenza, il-parteċipazzjoni u d-demokrazija, u billi jiġi pprovdut appoġġ edukattiv b’mod partikolari liż-żgħażagħ li huma fil-periklu li jsiru parti minn strutturi illegali; u billi jiġi konfiskat id-dħul mill-kriminalità organizzata u jintuża minflok għal proġetti soċjali, entitajiet lokali u s-soċjetà ċivili. L-awtoritajiet Ewropej, nazzjonali, reġjonali u pubbliċi għandhom responsabbiltà kruċjali biex jikkooperaw f’dawn it-tipi ta’ inizjattivi;

38.

jaqbel mal-Kummissjoni li politika tal-migrazzjoni ġestita tajjeb tinkludi miżuri biex jitnaqqsu l-migrazzjonijiet irregolari (5). Fl-istess ħin, huwa meħtieġ li l-migrazzjoni irregolari u l-assistenza lill-migranti irregolari ma jiġux kriminalizzati u li tingħata attenzjoni speċjali għal vittmi possibbli tat-traffikar tal-bnedmin. L-awtoritajiet lokali u reġjonali għandhom jindirizzaw iċ-ċirkustanzi li jiffaċċjaw, fir-rigward tar-rispett tad-drittijiet fundamentali, li fost affarijiet oħra għandu jfisser li jipprovdu servizzi lill-migranti irregolari;

39.

jeħtieġ li r-rappreżentanti tal-awtoritajiet lokali u reġjonali jingħataw il-possibbiltà li jiżviluppaw strutturi għall-iskambju tal-għarfien u l-kondiviżjoni tal-esperjenza u tal-prattiki tajbin rigward l-impjieg, l-edukazzjoni u l-inklużjoni soċjali bil-għan li tingħata viżibbiltà ikbar lid-dimensjoni lokali fil-politika tal-integrazzjoni. Forum għall-iskambju tal-għarfien huwa prerekwiżit għall-ħolqien ta’ politika dinamika tal-integrazzjoni fi ħdan l-Unjoni li tiżgura d-drittijiet tal-migranti. Maż-żmien, forum ta’ dan it-tip għandu jwassal wassal għal tnaqqis fid-differenzi bejn l-Istati Membri anke fil-qasam tal-integrazzjoni;

40.

jemmen li, sabiex ikunu jistgħu jiġu indirizzati l-problemi li jaffettwaw is-sigurtà tan-nies u jiksru d-drittijiet fundamentali, bħall-kriminalità organizzata, b’mod partikolari t-traffikar tal-bnedmin, it-traffikar tad-droga u l-isfruttament sesswali tal-minorenni, il-prevenzjoni hija importanti daqs il-prosekuzzjoni. Ifakkar lill-Kummissjoni dwar ir-rwol kruċjali li jaqdu l-atturi lokali u reġjonali fl-iżvilupp ta’ strateġiji biex jimpedixxu l-kriminalità u biex jieħdu responsabbiltà għall-benesseri kontinwu tal-vittmi;

41.

huwa tal-fehma li l-awtoritajiet lokali u reġjonali għandhom jaqdu rwol aktar importanti fil-ġlieda kontra l-kriminalità organizzata transkonfinali. Dan huwa dovut għall-fatt li, kulma jmur, ir-reati kriminali fl-ambjent lokali qed ikunu aktar marbutin mal-kriminalità organizzata internazzjonali u l-komunitajiet lokali huma l-ewwel vittmi tal-organizzazzjonijiet kriminali li jiddestabilizzaw l-istrutturi soċjali tagħhom. Jaqbel mal-Kummissjoni dwar il-ħtieġa li jinbnew sistemi siguri u affidabbli biex in-nies u n-negozji jkunu jistgħu jużaw b’mod sħiħ il-potenzjal tal-Internet. Għaldaqstant, il-kooperazzjoni tal-Istati Membri maċ-Ċentru Ewropew taċ-Ċiberkriminalità (EC3) tal-Europol, għandha titwessa’ għal-livell reġjonali u lokali, biex b’hekk tissaħħaħ il-ġlieda kontra l-kriminalità tal-informatika sa mil-livell ta’ gvern li jinsab l-eqreb taċ-ċittadini;

42.

jiġbed l-attenzjoni għall-fatt li l-korruzzjoni hija ta’ interess speċjali għall-awtoritajiet lokali u reġjonali u ċ-ċittadini tagħhom. Għandu l-ħsieb li jkompli jiġġieled il-korruzzjoni fil-livelli kollha bil-kooperazzjoni ta’ istituzzjonijiet oħra tal-UE, il-Kunsill tal-Ewropa u organizzazzjonijiet oħra billi jipproteġi l-interessi finanzjarji tal-UE, pereżempju permezz tat-twaqqif ta’ Uffiċċju tal-Prosekutur Ewropew;

43.

jappoġġja l-istrateġija tal-UE għall-qerda tat-traffikar tal-bnedmin. L-awtoritajiet lokali u reġjonali jistgħu jikkontribwixxu bil-bosta għall-implimentazzjoni effettiva tal-istrateġija u minħabba r-rabtiet lokali tagħhom jistgħu jagħrfu s-sinjali li xi ħadd ikun vittma tat-traffikar tal-bnedmin. Għalhekk, huwa favur li l-awtoritajiet lokali u reġjonali jikkontribwixxu biex jiġu żviluppati linji gwida għall-identifikazzjoni tal-vittmi, il-protezzjoni tagħhom u l-garanzija tal-benesseri kontinwu tagħhom, partikolarment fil-każ tal-minorenni;

44.

huwa tal-fehma li l-gvernijiet lokali huma msieħba importanti għall-bini tal-kapaċità fil-pajjiżi li minnhom jaslu l-migranti. Il-kooperazzjoni internazzjonali transkonfinali bejn l-awtoritajiet lokali li jilqgħu lill-migranti jew l-applikanti għal asil u l-kontropartijiet tagħhom fil-pajjiżi ta’ oriġini għandha tittejjeb u tiġi żviluppata b’mod konsiderevoli. Il-livell lokali jaqdi rwol importanti fit-tfassil u l-implimentazzjoni ta’ programmi ta’ akkoljenza u ta’ ripatrijazzjoni.

19.8.2014   

MT

Il-Ġurnal Uffiċjali tal-Unjoni Ewropea

C 271/36

Relatur

Is-Sur Gábor Bihary (HU/PSE), Membru tal-Kunsill Ġenerali ta’ Budapest

Dokument ta’ referenza

1.

iħoss li huwa kompletament inaċċettabbli li, fil-komunitajiet territorjali tagħna, fl-2014 għad hemm minn jgħix fit-triq, b’riskju għal saħħtu u għal ħajtu. Huwa tal-mistħija li fl-Unjoni Ewropea hemm madwar 3 miljun persuna mingħajr dar, appoġġjati mis-sistemi tas-sigurtà soċjali, iżda li f’ħafna każi ma jafux li dawn is-sistemi jeżistu, jew li dawn is-sistemi ma jiħdux ħsiebhom b’mod adatt;

2.

jinnota li l-problema tal-persuni mingħajr dar hija l-aktar forma estrema ta’ faqar u esklużjoni soċjali (1), li tmur kontra d-dinjità u d-drittijiet tal-bniedem, peress li post fejn wieħed jgħix hija ħtieġa fundamentali tal-bniedem;

3.

itenni (2), f’dan il-kuntest, it-talba tiegħu għal qafas ta’ azzjoni Ewropew għall-akkomodazzjoni soċjali sabiex:

4.

jirrikonoxxi li għalkemm l-Istati Membri tal-UE għandhom sistemi ta’ protezzjoni soċjali mill-iktar avvanzati fid-dinja, l-għadd ta’ persuni mingħajr dar żdied fi kważi l-Istati Membri kollha minħabba fatturi diversi bħalma huma l-impatt tal-kriżi ekonomika, tibdil fis-soċjetà, diskriminazzjoni kontra l-minoranzi jew kwistjonijiet ta’ migrazzjoni regolati ħażin. Barra minn hekk, ċerti Stati Membri għandhom nuqqas ta’ akkomodazzjoni soċjali u akkomodazzjoni affordabbli;

5.

jenfasizza li hemm ritorn għoli fuq l-investimenti fil-ġlieda għat-tnaqqis tal-problema ta’ persuni mingħajr dar. Fil-fatt dawn l-investimenti jikkontribwixxu biex inaqqsu l-infiq soċjali f’dan il-qasam fit-tul u b’mod permanenti;

6.

jenfasizza li jeħtieġ li jittieħdu miżuri fil-livell tal-UE biex tiġi indirizzata l-isfida ta’ ċittadini foqra u vulnerabbli tal-UE li jiċċaqalqu fi ħdan l-Unjoni, lil hinn mill-fruntieri nazzjonali. Il-mobilità soċjali wasslet għal problema transkonfinali ta’ persuni mingħajr dar li ma tistax tiġi solvuta fil-livell nazzjonali, reġjonali u lokali jew billi titnaqqas il-mobilità taċ-ċittadini tal-UE;

7.

jirrimarka li għalkemm l-Istati Membri u b’mod partikolari l-awtoritajiet lokali u reġjonali huma direttament responsabbli għall-persuni mingħajr dar, ir-rwol tal-Kummissjoni Ewropea fit-tfassil tal-politiki, it-twaqqif ta’ kooperazzjoni fil-livell Ewropew, u t-tixrid tal-aħjar prattiki għandu jissaħħaħ waqt li jibqa’ rispettat il-prinċipju tas-sussidjarjetà. L-UE għandha bżonn iżżid l-isforzi tagħha biex tikkumplimenta u tappoġġja l-isforzi tal-Istati Membri u l-awtoritajiet lokali u reġjonali, fl-ispirtu tal-Pjattaforma Ewropea kontra l-faqar u l-esklużjoni soċjali (3);

8.

jirrimarka li kull Stat Membru għandu jkollu strateġija nazzjonali għall-persuni mingħajr dar, li tista’ tikkompleta l-istrateġiji reġjonali, li tidentifika b’mod ċar ir-responsabbiltajiet għall-ġbir tad-dejta u l-monitoraġġ u l-implimentazzjoni tal-istrateġija; għalhekk jistieden lill-Istati Membri jfasslu strateġiji globali għall-persuni mingħajr dar, li jinkludu definizzjoni tas-servizzi nazzjonali li jittrattaw din il-problema, iżda li jiddefinixxu wkoll għanijiet ċari u trasparenti u li jieħdu l-impenn fir-rigward tal-UE u fir-rigward tal-preżentazzjoni ta’ mudelli ta’ valutazzjoni li jippermettu li r-riżultati tal-istrateġija ta’ kull Stat Membru tal-UE jkunu vvalutati b’mod trasparenti;

9.

jenfasizza li dawn l-istrateġiji komprensivi għall-persuni mingħajr dar għandhom jirreferu għar-rwol tal-awtoritajiet lokali u reġjonali u tas-soċjetà ċivili; fl-istess ħin, fl-interess ta’ governanza tajba għandhom jiċċaraw it-tqassim tal-ħidmiet u l-allokazzjoni tar-riżorsi bejn livelli differenti ta’ governanza;

10.

iwissi dwar il-fatt li xi Stati Membri tal-UE sabu diffikultà fl-implimentazzjoni tal-istrateġiji tagħhom għall-persuni mingħajr dar, minħabba n-nuqqas ta’ governanza f’diversi livelli fil-prattika;

11.

jilqa’ l-pożizzjonijiet adottati preċedentament mill-Parlament Ewropew dwar l-istrateġija tal-UE għall-persuni mingħajr dar (4), li jitolbu lill-Istati Membri jagħmlu progress fl-implimentazzjoni tal-għan li jegħlbu l-problema tal-persuni mingħajr dar sal-2015;

12.

jiġbed l-attenzjoni li r-raġunijiet għall-problema ta’ persuni mingħajr dar u l-kwantità tagħhom ivarjaw bejn l-Istati Membri, u anke fir-reġjuni individwali. Din is-sitwazzjoni teħtieġ il-parteċipazzjoni tal-awtoritajiet lokali u reġjonali fit-tħejjija ta’ strateġija biex tiġi indirizzata l-problema tal-persuni mingħajr dar. Il-kawżi u d-daqs tal-fenomenu għandhom jiddeterminaw l-għażla ta’ strumenti adatti. L-awtoritajiet lokali jinsabu fl-aħjar pożizzjoni biex jiksbu għarfien dwar dan peress li huma f’kuntatt dirett mal-problema;

13.

jilqa’ f’dan il-kuntest il-ħidma mwettqa min-netwerk dwar persuni mingħajr dar HABITACT, www.habitact.eu, li huwa netwerk ta’ awtoritajiet lokali/reġjonali li qed jixprunaw l-innovazzjoni soċjali fil-qasam tal-persuni mingħajr dar, permezz ta’ strateġiji integrati għal persuni mingħajr dar;

14.

jaqbel mat-talba tal-Parlament Ewropew lill-Kummissjoni biex din tistabbilixxi grupp ta’ esperti ta’ livell għoli biex jappoġġjaha fit-tħejjija u l-iżvilupp ta’ strateġija tal-UE għall-persuni mingħajr dar; jenfasizza l-importanza tal-parteċipazzjoni mir-rappreżentanti tal-awtoritajiet lokali u reġjonali f’dan il-grupp ta’ esperti;

15.

jinnota li l-Kummissjoni diġà ppubblikat dokument ta’ ħidma tal-persunal tal-Kummissjoni (5) li jipprovdi gwida dwar l-indirizzar tal-problema tal-persuni mingħajr dar, iżda jinnota b’dispjaċir il-livell baxx ta’ ambizzjoni Ewropea f’dan it-test. Tinħtieġ strateġija Ewropea, li tipprovdi sett ta’ għodod lill-awtoritajiet lokali u reġjonali, li l-NGOs u l-voluntiera tagħhom jistgħu jużaw b’mod effettiv fil-prattika, kif ukoll li jippermettu l-iskambju u t-tixrid ta’ prattiki tajba, u ta’ azzjoni legali biex jevitaw il-kriminalizzazzjoni tal-kundizzjoni tal-persuni mingħajr dar, u l-kundanna ta’ dawk l-atti ta’ mibegħda, vjolenza u persekuzzjoni indirizzati lejhom;

16.

jinsisti dwar il-fatt li l-faqar u l-persuni mingħajr dar mhux reati. Fid-dawl ta’ dan, il-kriminalizzazzjoni tal-persuni mingħajr dar, f’xi Stati Membri flimkien mal-introduzzjoni u l-applikazzjoni ta’ regoli lokali soċjalment mhux sensittivi bi ksur tad-drittijiet tal-bniedem huwa affront għall-prinċipju tat-trattament ugwali u għad-dinjità tal-bniedem;

17.

jitlob għal rikonoxximent u appoġġ ikbar fuq livell nazzjonali, lokali, reġjonali u tal-UE tal-ħidma tal-organizzazzjonijiet tas-soċjetà ċivili li jiddefendu d-drittijiet u l-interessi ta’ persuni mingħajr dar, li huma vulnerabbli u foqra u mhux f’pożizzjoni li jiddefendu d-drittijiet tagħhom;

18.

jittama li fl-ebda Stat Membru ma jkun hemm persuni esposti għal theddid mill-pulizija sempliċiment għax jinstabu mingħajr dar – bi ksur tal-liġi, jew permezz ta’ tibdil fil-liġi f’dan is-sens;

19.

jappoġġja attivitajiet mill-organizzazzjonijiet tas-soċjetà ċivili, l-assoċjazzjonijiet Ewropej u l-organizzazzjonijiet ċentrali tagħhom fil-livell Ewropew, li joperaw fl-Istati Membri biex jgħinu persuni mingħajr dar jagħmluhom konxji tad-drittijiet tagħhom, u jinkoraġġixxu l-iżvilupp ta’ ambjent soċjali inklużiv u kuxjenza soċjali li tippermetti l-maġġoranza tan-nies jempatizzaw mas-sitwazzjoni tal-persuni mingħajr dar u li jwasslu għal miżuri, inkluż f’termini ta’ finanzjament tal-UE, biex tingħeleb il-problema;

20.

jistieden lill-Istati Membri u lill-Presidenza tal-Kunsill biex jiżguraw li l-problema tal-persuni mingħajr dar titpoġġa regolarment fuq l-aġenda tad-diskussjonijiet ministerjali. Il-Kumitat tar-Reġjuni jixtieq jenfasizza wkoll l-importanza li jiġu inklużi rappreżentanti tal-awtoritajiet lokali u reġjonali f’dawn il-laqgħat, u jistieden ukoll lill-Kummissjoni Ewropea biex tipprovdi appoġġ loġistiku u finanzjarju għal dawn it-tip ta’ laqgħat;

21.

jenfasizza l-importanza li, fl-istrateġija tal-UE għall-persuni mingħajr dar, tingħata prijorità għall-approċċ li jiffoka fuq l-akkomodazzjoni (“Housing-led”) jew li jpoġġi l-akkomodazzjoni qabel kollox (“Housing-first”), u li tingħata attenzjoni speċjali lil dawk mingħajr dar li jaqsmu minn pajjiż għal ieħor u lin-nisa u lil minorenni;

22.

jenfasizza r-rabta bejn il-ġestjoni tal-persuni mingħajr dar u l-iżvilupp reġjonali, l-istrumenti ta’ finanzjament tal-UE (eż. FSE, FEŻR) (6), kif ukoll il-kwistjonijiet ta’ inklużjoni soċjali u d-drittijiet tal-bniedem; dan huwa wkoll marbut mill-qrib mal-għan tal-Istrateġija Ewropa 2020 li toħroġ 20 miljun persuna mill-faqar (7);

23.

ifakkar lir-reġjuni fl-Istati Membri li ntlaqtu b’mod partikolari mill-problema tal-persuni mingħajr dar biex, fil-qafas tat-tfassil tal-programmi operattivi tagħhom, jagħmlu użu mill-fondi Ewropej għall-persuni fil-bżonn, bħall-Fond Soċjali Ewropew (FSE). Dawn jistgħu itejbu s-sitwazzjoni tal-persuni mingħajr dar u jwasslu għall-integrazzjoni tagħhom fis-soċjetà u s-swieq tax-xogħol;

24.

jenfasizza l-importanza ta’ azzjoni preventiva bikrija fil-livell lokali u reġjonali, permezz tal-identifikazzjoni ta’ persuni fir-riskju li jispiċċaw mingħajr dar u miżuri ta’ appoġġ personalizzat li jipproteġuhom mit-tkeċċija minn darhom, flimkien ma’ assistenza immedjata għal dawk li diġà tilfu darhom. Għalhekk ser ikun hemm bżonn jitwaqqfu miżuri strutturali li jiffurmaw parti mill-benesseri, bħad-djar, l-impjieg, l-edukazzjoni, il-familja u l-politiki relatati;

25.

jirrimarka li hemm bżonn ta’ approċċ integrat, b’kooperazzjoni iktar mill-qrib bejn is-sistemi tas-sigurtà soċjali u tal-kura tas-saħħa sabiex jevitaw li l-kwalità ta’ ħajja u b’hekk, l-istat tas-saħħa tal-persuni li jkunu għadhom kif sfaw mingħajr dar tmur għall-agħar ħafna, b’mod partikolari fil-każ ta’ persuni li fil-passat diġà bbenefikaw minn dawn is-servizzi;

26.

jiġbed l-attenzjoni għall-fatt li l-attenzjoni għall-persuni mingħajr dar trid tibda fit-triq, għax l-identifikazzjoni u t-trattament tal-mard mentali jew l-abbuż mid-drogi li jistgħu jbatu minnhom ma jistgħux jistennew li tiġi solvuta l-problema tagħhom ta’ nuqqas ta’ dar;

27.

jenfasizza l-importanza li tingħata biżżejjed għajnuna, pereżempju f’forma ta’ faċilitajiet ta’ akkomodazzjoni, li tista’ tgħin biex ikun evitat li persuni jispiċċaw mingħajr dar;

28.

jenfasizza li biex ikunu jistgħu jwettqu l-azzjonijiet tagħhom b’mod aktar effikaċi, il-partijiet interessati li jitrattaw il-problema tan-nies mingħajr dar jeħtieġu fondi u appoġġ adegwati kemm mill-Istati Membri kif ukoll mill-Unjoni Ewropea biex ikunu jistgħu jieħdu passi effettivi biex jipprovdu servizzi ta’ impjiegi u ta’ taħriġ għal persuni mingħajr dar, waqt li jħeġġuhom ifittxu xogħol jew jibqgħu jaħdmu jekk diġà għandhom impjieg;

29.

jemmen li t-taħriġ vokazzjonali, it-taħriġ mill-ġdid, l-edukazzjoni għall-adulti u t-tagħlim tul il-ħajja huma mod effikaċi, anki jekk indirett, ta’ kif in-nies jistgħu jinħarġu mill-problema tan-nuqqas ta’ dar. Taħriġ strutturat sew li jwassal għal impjieg reali huwa investiment tajjeb mil-lat ta’ kemm l-individwi kif ukoll is-soċjetà, u jista’ jagħti riżultati dejjiema li jgħinu lill-persuni mingħajr dar joħorġu minn sitwazzjonijiet diffiċli. L-edukazzjoni hija ta’ sikwit rekwiżit bażiku, iżda huwa kruċjali li n-nies għandhom ikunu mmotivati biex jieħdu miżuri fit-tul u proattivi biex jgħollu lilhom infushom f’pożizzjoni li jkunu atturi attivi fis-soċjetà. Il-kooperazzjoni mal-persuni kkonċernati u l-involviment attiv tagħhom huma essenzjali biex titjieb ħajjithom;

30.

jenfasizza l-importanza li jiġi żgurat li l-akkomodazzjoni provviżorja jew ta’ emerġenza ġestiti mill-awtoritajiet lokali, l-entitajiet tal-karità, il-knejjes u l-organizzazzjonijiet tas-soċjetà ċivili tkun ta’ kwalità tajba, aċċessibbli mill-inqas lokalment jew reġjonalment, u taqbel mal-ħtiġijiet tal-utenti. Madankollu, l-iżjed ħaġa mixtieqa hija li jintużaw approċċi msejsa fuq il-provvediment ta’ akkomodazzjoni, pereżempju l-approċċ “housing first”;

31.

jindika li għall-persuni mingħajr dar u dawk ta’ dħul baxx, l-aċċess għal akkomodazzjoni permanenti, disponibbli fil-qrib u affordabbli huwa ta’ importanza kruċjali. Huwa ċertament minnu li dan jista’ jinkiseb biss bi sħubija adegwata bejn il-partijiet interessati kollha abbażi taċ-ċirkustanzi lokali;

32.

jiffavorixxi sforzi mmirati oħra fir-rigward tal-persuni mingħajr dar fil-livell tal-UE permezz tal-politiki settorjali rilevanti tal-UE, b’mod partikolari fl-oqsma tal-ekonomija, il-finanzi, is-sigurtà soċjali, l-iżvilupp reġjonali, is-saħħa, id-drittijiet tal-bniedem, iż-żgħażagħ, l-ugwaljanza bejn is-sessi, il-migrazzjoni u l-integrazzjoni;

33.

jappoġġja l-integrazzjoni tal-kwistjoni tal-persuni mingħajr dar fil-proċess ta’ implimentazzjoni tal-istrateġija Ewropa 2020 li tista’ tieħu l-forma ta’ rakkomandazzjonijiet speċifiċi għall-pajjiż għal azzjoni nazzjonali, b’mod partikolari fl-Istati Membri fejn hemm bżonn progress urġenti dwar il-kundizzjoni tal-persuni mingħajr dar;

34.

jixtieq li l-Kummissjoni tħares lil hinn mir-rakkomandazzjonijiet speċifiċi għall-pajjiż, u tinkoraġġixxi lill-Istati Membri jkomplu jsegwu l-isforzi tagħhom u jinkludu l-problema tal-persuni mingħajr dar fil-Programmi Nazzjonali ta’ Riforma;

35.

jenfasizza li għandha tiġi miġbura dejta komprensiva u komparabbli dwar il-persuni mingħajr dar, mingħajr stigmatizzazzjoni tal-persuni kkonċernati. Dawn id-dejta għandhom jiġu diffrenzjati skont ir-raġunijiet għal kundizzjoni ta’ persuni mingħajr dar u l-intensità tal-fenomenu u għandu jkollhom diżaggregazzjoni skont it-reġjuni mill-inqas fil-livell ta’ NUTS 2. Din il-bażi Din il-bażi ta’ dejta hija prerekwiżit biex jiġi żgurat li l-politiki ta’ żvilupp ikollhom impatt, u fl-aħħar tingħeleb kompletament il-problema tal-persuni mingħajr dar;

36.

jargumenta li, peress li l-azzjoni fil-livell lokali u reġjonali għandha taqdi rwol deċiżiv fil-mitigazzjoni tal-problema tal-persuni mingħajr dar, l-UE għandha tħares lejn l-effettività globali, u tikkunsidra f’liema każijiet ikun tajjeb li jintużaw strumenti oħra ta’ finanzjament (bħal PROGRESS, il-Programm Ewropew għall-Impjiegi u l-Innovazzjoni Soċjali, JESSICA, il-Fond Agrikolu Ewropew għall-Iżvilupp Reġjonali, LEADER, u l-programm ta’ Għajnuna għall-Persuni l-Aktar fil-Bżonn) lil hinn mill-FSE u l-FEŻR biex tiġi indirizzata l-problema;

37.

iħeġġeġ lill-Istati Membri biex jużaw il-fondi Ewropej rilevanti u jiżguraw tranżizzjoni bejn l-inklużjoni soċjali u l-integrazzjoni fis-swieq tax-xogħol, sabiex tittejjeb is-sitwazzjoni tal-persuni mingħajr dar;

38.

huwa importanti li jitħeġġeġ il-volontarjat għall-għoti ta’ servizzi lill-persuni mingħajr dar, biex jiġu involuti fir-riżoluzzjoni tal-problemi soċjali u jiżdied l-għarfien ġenerali tal-problemi ta’ din il-komunità – fi kliem ieħor, li jiġu inkorporati fil-proċessi ta’ inklużjoni soċjali;

39.

jaqbel li jissaħħu l-mekkaniżmi ta’ parteċipazzjoni adattati għall-karatteristiċi tal-persuni mingħajr dar, li jippermettu l-involviment tagħhom b’mod effettiv, li jiffavorixxu t-teħid ta’ deċiżjonijiet konġunti bejn l-atturi involuti kollha, u fl-aħħar mill-aħħar li jtejbu l-kwalità tal-attenzjoni li jingħataw billi jsiru protagonisti fil-proċess ta’ inklużjoni soċjali tagħhom.

19.8.2014   

MT

Il-Ġurnal Uffiċjali tal-Unjoni Ewropea

C 271/40

Relatur

Gian Mario Spacca (IT/ALDE), President tar-Reġjun tal-Marche

Dokument ta’ referenza

COM(2014) 357 final

SWD(2014) 190 final

SWD(2014) 191 final

1.

jilqa’ b’sodisfazzjon il-konklużjonijiet tal-Kunsill ta’ Diċembru 2012, li jappellaw lill-Kummissjoni ħalli tippreżenta Strateġija tal-UE għar-Reġjun Adrijatiku u Joniku (EUSAIR) sal-aħħar tal-2014. Din id-deċiżjoni kienet ġiet rakkomandata fl-Opinjoni fuq inizjattiva propja tal-KtR dwar il-kooperazzjoni territorjali fil-baċir tal-Mediterran permezz tal-makroreġjun Adrijatiku-Joniku, adottata fil-11 ta’ Ottubru 2011 (1);

2.

jaqbel mad-definizjoni ta’ strateġiji makroreġjonali bħala oqfsa integrati appruvati mill-Kunsill Ewropew li jirrelataw mal-Istati Membri u pajjiżi terzi fl-istess żona ġeografika li jindirizzaw sfidi komuni u jipprovdu soluzzjonijiet permezz ta’ kooperazzjoni msaħħa għall-koeżjoni ekonomika, soċjali u territorjali (2);

3.

jilqa’ b’sodisfazzjon il-proposta tal-EUSAIR li ser tħaddan erba’ pajjiżi tal-UE (il-Kroazja, il-Greċja, l-Italja u s-Slovenja) u erba’ pajjiżi barra mill-UE (l-Albanija, il-Bosnja-Ħerzegovina, il-Montenegro u s-Serbja) u ser tikkontribwixxi b’mod sostanzjali għall-integrazzjoni Ewropea tal-pajjiżi kandidati jew kandidati potenzjali fir-reġjun. Il-komponent tal-integrazzjoni mal-UE joffri valur miżjud rilevanti f’din l-istrateġija makroreġjonali (3);

4.

jisħaq fuq l-aspetti ta’ rikonċiljazzjoni, sigurtà u stabbiltà fir-Reġjun Adrijatiku u Joniku permezz tal-kooperazzjoni mal-pajjiżi l-oħra li m’humiex fl-UE, li jistgħu jingħaqdu f’dan il-makroreġjun fil-ġejjieni; f’dan ir-rigward, jenfasizza r-rwol tal-awtoritajiet reġjonali u lokali bħala protagonisti li jippromovu d-demokrazija, id-deċentralizzazzjoni, aktar governanza awtonoma fil-livell lokali u reġjonali u l-bini tal-kapaċità;

5.

jinnota li l-istrateġija Adrijatika-Jonika tista’ tkun il-bidu ta’ approċċ u strateġija aktar integrati li jirrigwardaw il-baċir kollu tal-Mediterran, kif ġie indikat fir-riżoluzzjoni tal-PE (4);

6.

jinnota li l-ARLEM (L-Assemblea Lokali u Reġjonali Ewromediterranja) ukoll tappella għal approċċ makroreġjonali għall-baċir kollu tal-Mediterran mill-iżvilupp ta’ tliet makroreġjuni integrati, il-Punent tal-Mediterran, l-Adrijatiku-Joniku, il-Lvant tal-Mediterran (5);

7.

jaqbel mal-konklużjonijiet tal-Kunsill Affarijiet Ġenerali ta’ Ottubru 2013 dwar il-ħtieġa li jiġu riveduti s-sistemi ta’ governanza tal-makroreġjuni, u jilqa’ b’sodisfazzjon ir-rapport ippubblikat mill-Kummissjoni Ewropea fl-20 ta’ Mejju 2014 kif ukoll il-Komunikazzjoni tal-Kummissjoni Ewropea dwar l-Istrateġija tal-Unjoni Ewropea għar-Reġjun Adrijatiku Joniku tas-17 ta’ Ġunju 2014. barra min hekk jaqbel mal-fehma tal-Kunsill dwar l-importanza tar-responsabbiltà u s-sens ta’ sjieda tal-pajjiżi kkonċernati, li tirrikjedi t-tisħiħ tal-atturi reġjonali u lokali rilevanti kif ukoll impenn ċar u fit-tul mill-partijiet interessati (6), barra minn hekk jitlob parteċipazzjoni akbar tar-reġjuni u tal-Kumitat tar-Reġjuni fil-fażi tal-koordinament, b’appoġġ għall-Kummissjoni Ewropea, dan għandu jseħħ ukoll fil-fażi tal-implimentazzjoni. F’dan ir-rigward jaqbel li l-pjan ta’ azzjoni jipprevedi struttura ta’ Governanza ibbażata fuq koordinaturi għal kull pilastru li ġej mill-Ministri kompetenti u jenfasizza li dawn jistgħu jiġu wkoll minn gvernijiet reġjonali.

8.

jenfasizza l-ħtieġa ta’ governanza intelliġenti u koordinata b’livelli ta’ governanza li jkunu kollegati bejniethom: tmexxija politika b’saħħitha li twassal għal teħid ta’ deċiżjonijiet ċari mill-pajjiżi li jipparteċipaw, koordinazzjoni b’saħħitha, ftehim dwar l-implimentazzjoni territorjali u sjieda kondiviża b’mod mifrux bl-għajnuna tal-Kummissjoni Ewropea, bl-appoġġ tal-Kumitat tar-Reġjuni;

9.

jisħaq li l-EUSAIR teħtieġ tmexxija politika b’saħħitha u li l-Inizjattiva Adrijatika Jonika li ġġib flimkien tmien Ministri tal-Affarijiet Barranin tal-pajjiżi interessati, jista’ jkollha rwol importanti ta’ koordinazzjoni f’dan ir-rigward; mill-banda l-oħra, l-EUSAIR għandha bżonn pjattaforma ta’ governanza f’diversi livelli, u r-reġjuni u l-awtoritajiet lokali jistgħu jipprovdu ħiliet ta’ livell għoli għall-implimentazzjoni effikaċi tal-proġetti f’approċċ makroreġjonali integrat;

10.

jappella biex l-awtoritajiet lokali u reġjonali jkollhom rwol aktar b’saħħtu fil-governanza u l-implimentazzjoni tal-istrateġija.

11.

għaldaqstant jinnota li l-Grupp Interreġjonali Adrijatiku-Joniku tal-Kumitat tar-Reġjuni twaqqaf fit-30 ta’ Jannar 2013 bil-għan li jappoġġja l-Kummissjoni Ewropea fit-tħejjija ta’ Strateġija Adrijatika u Jonika sal-aħħar tal-2014, u jippromovi identità komuni għar-reġjun Adrijatiku-Joniku sabiex jiġbed l-attenzjoni għall-potenzjal sħiħ tar-reġjun;

12.

jinnota li “l-mandat” tal-Kunsill Ewropew lill-Kummissjoni huwa l-frott ta’ sforzi konġunti mill-pajjiżi fir-reġjun. Huwa jibni fuq diversi inizjattivi, bħall-Inizjattiva Adrijatika-Jonika (AII) mnedija mid-Dikjarazzjoni ta’ Ancona tal-2000, u fuq fora u netwerks oħra tal-Adrijatiku-Joniku bħall-Forum ta’ Assoċjazzjoni tal-Bliet tal-Adrijatiku u l-Joniku, il-Forum tal-Kmamar tal-Kummerċ tal-Adrijatiku u l-Joniku, in-netwerk tal-universitajiet UniAdrion, u l-Ewroreġjun Adrijatiku u Joniku;

13.

jenfasizza li l-ħtiġijiet territorjali jistgħu jiġu indirizzati b’governanza f’diversi livelli li tibda mil-livell lokali u titla’ ‘l fuq, bil-għan li jiġu trattati problemi u sfidi komuni tar-Reġjun Adrijatiku u Joniku permezz ta’ soluzzjonijiet li jkun hemm qbil wiesa’ dwarhom; dan huwa s-sigriet tas-suċċess ta’ din l-istrateġija tal-UE;

14.

jaqbel li l-għan ewlieni tal-Istrateġija proposta hija l-promozzjoni ta’ żvilupp ekonomiku sostenibbli u l-prosperità soċjali, it-tkabbir u l-ħolqien tal-impjiegi fir-Reġjun b’konformità mal-għanijiet tal-istrateġija Ewropa 2020, billi ttejjeb l-attrazzjoni, il-kompetittività u l-konnessjoni filwaqt li jiġu preżervati l-ambjent u l-ekosistemi marini u kostali;

15.

jesprimi s-sodisfazzjon għall-adozzjoni mill-Kummissjoni tas-“Strateġija marittima għall-Baħar Adrijatiku u l-Baħar Joniku” (7), li ġiet inkluża fl-EUSAIR;

16.

huwa sodisfatt bl-ambitu u l-kontenut tal-erba pilastri tal-EUSAIR li jirriżultaw minn konsultazzjoni estensiva ta’ partijiet interessati fir-Reġjun, jiġifieri “tkabbir Blu”, “nikkollegaw ir-reġjun”, kwalità ambjentali”, u “turiżmu sostenibbli”; huwa sodisfatt li l-inklużjoni tal-komunikazzjoni fil-kwistjonijiet trasversali tal-“bini tal-kapaċità fosthom tal-komunikazzjoni” u “r-riċerka, l-iżvilupp, l-innovazzjoni u l-SMEs”;

17.

jappella lill-Kummissjoni Ewropea li tiżviluppa valutazzjoni ta’ referenza tal-impatt u tas-sitwazzjoni makroekonomika tal-EUSAIR bħala l-ewwel pass lejn il-bini tal-kapaċità, u l-implimentazzoni tal-erba’ pilastri/prijoritajiet ta’ azzjoni biex timmira aħjar l-għanijiet u tkejjel il-progress lejhom;

18.

jitlob li jkun hemm attenzjoni akbar fuq il-koeżjoni territorjali u soċjali dwar it-tħassib ewlieni li ma jistax jiġi trattat b’mod effiċjenti mill-pajjiżi individwali, bħas-saħħa, it-tixjiħ attiv, id-differenzi fil-kundizzjonijiet demografiċi u ekonomiċi bejn u fi ħdan il-pajjiżi fir-Reġjun, kif ukoll problemi marbutin mas-sigurtà, il-kriminalità organizzata, il-migrazzjoni illegali, ir-rilokazzjoni tan-negozji u l-qgħad fost iż-żgħażagħ. Dawn il-kwistjonijiet għandhom jiġu trattati f’kull wieħed mill-erba’ pilastri bil-għan li jinkiseb tkabbir intelliġenti, sostenibbli u inklużiv b’koerenza mal-politiki u l-għanijiet tal-Ewropa 2020, u biex tiżdied il-kompetittività u l-attrazzjoni tar-reġjuni tal-EUSAIR;

19.

jissuġġerixxi li jitqiesu l-esperjenzi tal-Istrateġiji tal-Baltiku u tad-Danubju u li jiġi organizzat forum anwali tal-EUSAIR biex jiffaċilita d-djalogu ekonomiku u soċjali u s-sjieda mifruxa tal-Istrateġija Adrijatika-Jonika permezz tal-parteċipazzjoni effikaċi tal-partijiet interessati soċjali u ekonomiċi, NGOs, organizzazzjonijiet taż-żgħażagħ, assoċjazzjonijiet tas-soċjetà ċivili, eċċ.);

20.

jilqa’ b’sodisfazzjoni l-opportunità tal-mument li tippermetti lill-EUSAIR li tiġi inkluża fil-ġenerazzjoni ġdida ta’ dokumenti ta’ ppjanar u programmar 2014-2020 tal-fondi strutturali u ta’ investiment tal-UE u l-fondi tal-IPA – il-Ftehim ta’ Sħubija, id-Dokumenti ta’ Strateġija tal-IPA, il-Programmi Operattivi – kif ukoll fil-politiki u programmi kollha rilevanti tal-UE bħall-Orizzont 2020, COSME, eċċ.;

21.

jinnota li r-Regolament dwar id-Dispożizzjonijiet Komuni, ir-regolament tal-kooperazzjoni territorjali Ewropea u r-regolament tal-IPA huma opportunitajiet reali għall-EUSAIR peress li jeħtieġu l-fondi kollha strutturali, tal-investiment u tal-IPA biex jadottaw il-prijoritajiet makroreġjonali;

22.

jenfasizza l-ħtieġa ta’ parteċipazzjoni akbar mill-awtoritajiet reġjonali u lokali fl-identifikazzjoni tal-proġetti prijoritarji għar-Reġjun Adrijatiku u Joniku; jilqa’ b’sodisfazzjon l-inklużjoni tal-ġestjoni tar-riskju mid-diżastri naturali fil-prinċipji orizzontali għall-erba’ pilastri tal-komunikazzjoni EUSAIR tal-Kummissjoni u jerġa’ jitlob li tingħata attenzjoni akbar fil-livell tal-azzjoni progressiva lil temi orizzontali bħalma huma l-migrazzjoni, id-dritt għas-saħħa u t-taħriġ għall-amministraturi fi skola għolja ta’ taħriġ għall-Adrijatiku u l-Joniku;

23.

jappella għall-appoġġ attiv mill-istituzzjonijiet finanzjarji Ewropej u internazzjonali bħall-BEI, il-BERŻ, il-Bank Dinji u oħrajn, bħal fil-każ tal-Qafas ta’ Investiment tal-Balkani tal-Punent;

24.

jissuġġerixxi l-ħolqien ta’ Faċilità ta’ Implimentazzjoni bil-kollaborazzjoni tal-BEI u l-korpi finanzjarji internazzjonali li tippermetti s-sottomissjoni ta’ “proġetti bankabbli” (8);

25.

jappella biex il-kofinanzjament privat jiġi integrat mal-fondi disponibbli;

26.

jirrikonoxxi “r-regola tat-tliet le”: l-ebda regolament ġdid, l-ebda istituzzjoni ġdida, l-ebda fondi addizzjonali, u jenfasizza r-regola tat-“tliet iva” li ssir referenza għaliha f’diversi fora: aktar fondi kumplimentari, aktar koordinazzjoni istituzzjonali u aktar proġetti ġodda;

27.

jenfasiza li l-appoġġ finanzjarju fil-livell tal-UE għall-assistenza teknika marbuta mal-istrateġiji makroreġjonali diġà wera li huwa assi importanti fl-Istrateġija tal-Baltiku u għandu jiġi estiż għal dik Adrijatika-Jonika; jappella għal intestatura speċifika baġitarja li għandha tinħoloq għall-assistenza teknika għall-makroreġjun Adrijatiku u Joniku, bħall-intestatura baġitarja li nħolqot għall-makroreġjuni tal-Baltiku u d-Danubju, li pprovdiet 2,5 miljun ewro f’impenn u approprijazzjonijiet ta’ pagamenti għal kull makroreġjun sal-2014;

28.

jappella għal attenzjoni aktar qawwija dwar il-komunikazzjoni bħala kwistjoni trasversali biex tissaħħaħ is-sjieda pubblika tal-istrateġija makroreġjonali u governanza aktar b’saħħitha, kif ġie enfasizzat ukoll fil-“Contribution of the Adriatic-Ionian Interregional Group of the CoR to the stakeholders consultation” ta’ Diċembru 2013 indirizzata lill-Kummissjoni Ewropea;

29.

jenfasizza l-komunikazzjoni bħala għodda biex tissaħħaħ is-sensibilizzazzjoni tas-soċjetà ċivili ta’ dak li din l-Istrateġija tirrappreżenta għaċ-ċittadini, u tal-valur miżjud tagħha fit-tisħiħ tal-identità tar-Reġjun Adrijatiku u Joniku;

30.

jaqbel li l-bini tal-kapaċità hija kwistjoni trasversali rilevanti biex tiżgura s-suċċess tal-EUSAIR, peress li r-Reġjun Adrijatiku Joniku huwa żona kbira li fiha pajjiżi tal-UE, pajjiżi kandidati u kandidati potenzjali, bi strutturi amministrattivi differenti;

31.

jaqbel li l-pajjiżi tal-UE kif ukoll pajjiżi mhux tal-UE għandhom bżonn isaħħu l-ħiliet u l-kapaċitajiet biex jaslu għal soluzzjonijiet intelliġenti u sostenibbli għall-problemi komuni fl-oqsma tal-ġestjoni tar-riżorsi umani, ir-relazzjonijiet internazzjonali, eċċ. Miżura waħda possibbli tkun li titwaqqaf Skola Għolja tal-Amministrazzjoni Adrijatika Jonika bħall-ENA Franċiża (Ecole Nationale d’Administration), li fiha uffiċjali taċ-ċivil tar-Reġjun Adrijatiku Joniku jistgħu jiżviluppaw il-ħiliet u l-kapaċitajiet meħtieġa għall-governanza f’diversi livelli, biex b’hekk ikunu jistgħu jimplimentaw proċessi innovattivi tal-amministrazzjoni pubblika;

32.

jikkunsidra li l-bini ta’ żona Adrijatika Jonika għat-tul għal djalogu paċifiku u għal kooperazzjoni effettiva, ma jistax isir mingħajr ma jkunu involuti, b’mod konsistenti, iż-żgħażagħ tar-reġjuni kkonċernati. Għalhekk, jistieden lill-Istati membri u lill-Kummissjoni Ewropea biex jippromovu, jiffaċilitaw u jtejbu l-implimentazzjoni tal-programmi għall-mobbiltà taż-żgħażagħ eżistenti fil-qafas taż-żona EUSAIR;

33.

jenfasizza li kwistjonijiet politiċi urġenti li huma rilevanti għar-reġjun bħall-migrazzjoni għandhom jidhru bħala fatturi ta’ integrazzjoni u sors ta’ impjieg li jikkontribwixxu biex ir-Reġjun Adrijatiku Joniku u ż-żona kollha tal-Mediterran jitrattataw sfidi ewlenin;

34.

jisħaq li s-sigurtà hija kwistjoni oħra ewlenija ta’ tħassib li ma tistax tiġi trattata minn pajjiżi individwali u jappella lill-Kummissjoni Ewropea li ddaħħal azzjonijiet speċifiċi biex tindirizza din il-kwistjoni fl-erba’ pilasti tal-Istrateġija;

35.

japprezza l-Komunikazzjoni konġunta tal-Kummissjoni Ewropea u r-Rappreżentant Għoli tal-Unjoni Ewropea għall-Affarijiet Barranin u l-Pjan ta’ Sigurtà “Għal qasam marittimu mondjali miftuħ u sigur: l-elementi għal Strateġija ta’ Sigurtà Marittima tal-Unjoni Ewropea” (9), filwaqt li jisħaq li l-interessi marittimi tal-Ewropa huma marbutin b’mod fundamentali mal-benesseri, il-prosperità u s-sigurtà taċ-ċittadini u l-komunitajiet tagħha;

36.

jinnota li l-benessri taċ-ċittadini huwa fundamentali għall-iżvilupp armonjuż tar-reġjun; jenfasizza li s-servizzi tal-kura tas-saħħa u r-riċerka għandhom jiġu koordinati biex jiżguraw l-effiċjenza fl-operat tas-settur tas-saħħa;

37.

jisħaq fuq ir-rilevanza tat-temi tas-“sajd u l-akkwakultura”, “it-teknoloġija blu” u “is-servizzi tal-baħar u marittimi”;

38.

jilqa’ b’sodisfazzjon id-Direttiva tal-PE u tal-Kunsill li tistabbilixxi qafas għall-ippjanar spazjali marittimu u għall-ġestjoni integrata tal-kosta (10) u jħeġġeġ lill-KE tqis din id-Direttiva fl-ippjanar ta’ azzjonijiet speċifiċi fir-Reġjun Adrijatiku Joniku;

39.

jenfasizza li l-governanza f’diversi livelli mill-partijiet interessati li jipparteċipaw fit-tkabbir tal-baħar u marittimu hija fattur essenzjali fil-ġestjoni effiċjenti taż-żona Adrijatika Jonika permezz ta’ regoli komuni u protokolli dwar is-sajd u l-preżervazzjoni tal-istokkijiet tal-ħut, kif ukoll sistemi u proċeduri ta’ ġestjoni standardizzati;

40.

jenfasizza li l-ekoinnovazzjoni flimkien mal-modernizzazzjoni tas-sajd u l-akkwakultura kif ukoll (b’rabta mill-qrib mat-tieni pilastru) tat-trasport marittimu u l-portijiet bl-infrastrutturi tagħhom fuq l-art u l-clusters marittimi huma essenzjali biex jassiguraw l-esplojtazzjoni razzjonali tar-riżorsi tal-baħar u tas-sistemi marittimi. Tikketta komuni ta’ prodotti tal-ħut ta’ kwalità għolja b’oriġini traċċabbli tista’ tkun għodda importanti biex iż-żona tiġi promossa;

41.

jenfasizza r-rilevanza tat-temi “transport marittimu”, “konnessjonijiet intermodali fuq l-art” u “netwerks tal-enerġija” u jiġbed l-attenzjoni għall-importanza li jissaħħu l-infrastrutturi immaterjali tal-ICT. Il-Cloud Adrijatika-Jonika tirrappreżenta mezz li jgħaqqad il-pjattaformi attwali sabiex il-proċessi u l-protokolli kondiviżi jiġu standardizzati, ikun hemm trasport tal-merkanzija u tal-passiġġieri intermodali effiċjenti, jiġu faċilitati s-servizzi, l-ħarsien ambjentali u s-sigurtà marittima;

42.

jenfasizza li r-Reġjun Adrijatiku Joniku għandu bżonn itejjeb l-aċċess tax-Xlokk tal-Ewropa għall-kumplament tad-dinja, inkluża ż-żona tal-Mediterran, bl-estensjoni tal-Kuritur Baltiku Adrijatiku tul ix-xifer Adrijatiku. Is-sistemi tat-trasport intermodali f’din iż-żona għandhom bżonn jissaħħu biex titjieb il-pożizzjoni tar-reġjun bħala ċentru tat-trasport f’qafas internazzjonali;

43.

jisħaq fuq ir-rilevanza tat-temi “bijodiversità tal-baħar”, “tniġġis tal-ibħra” u “ħabitats terrestri transnazzjonali u l-bijodiversità”;

44.

jenfasizza li r-Reġjun Adrijatiku Joniku għandu bżonn jippreżerva l-ħabitats u l-ekosistemi quddiem l-isfidi tat-tibdil fil-klima permezz ta’ governanza integrata f’diversi livelli bil-parteċipazzjoni tal-partijiet interessati kollha fi proċess kondiviż u integrat;

45.

jiġbed l-attenzjoni li l-Mediterran huwa baħar kważi magħluq bl-aktar rata baxxa ta’ riġenerazzjoni tal-ilma fid-dinja, u b’hekk jeħtieġ li din l-ekosistema delikata jkollha livell għoli ta’ ħarsien u proġetti ta’ esperimentazzjoni avvanzati;

46.

jilqa’ b’sodisfazzjon l-Istrateġija tal-UE dwar l-adattament għat-tibdil fil-klima ta’ April 2013 (11) li tinkoraġġixxi l-iskambju tal-aħjar prattiki u l-iżvilupp ta’ pjani ta’ azzjoni makroreġjonali, bħala eżempji ta’ approċċi globali u valutazzjoni aħjar tar-riskji u d-dgħufijiet;

47.

jissottolinja r-rilevanza tal-“prodotti u s-servizzi diversifikati tat-turiżmu”, u tat-temi ta’ “ġestjoni sostenibbli tat-turiżmu”, li jirriżultaw mill-konsultazzjoni tal-partijiet interessati fil-Konferenza ta’ Ateni;

48.

jisħaq li l-attrazzjoni tar-Reġjun hija rappreżentata prinċipalment mit-turżimu bħala wieħed mis-setturi tat-tkabbir ewlenin u skattatur notevoli għall-iżvilupp tal-ekonomija marittima u fuq l-art tiegħu. L-iżvilupp tas-settur jirrikjedi governanza f’diversi livelli bil-parteċipazzjoni tal-awtoritajiet nazzjonali, reġjonali u lokali kif ukoll il-partijiet interessati territorjali, mill-kmamar tal-kummerċ sal-universitajiet;

49.

jiġbed l-attenzjoni li fuq il-bażi ta’ teżori naturali, kulturali u storiċi kondiviżi, il-kwalità għolja ta’ prodotti agroalimentari, it-tradizzjonijiet ta’ ospitalità professjonali, u l-pajsaġġi attraenti li għandhom jiġu komunikati permezz tal-marka Adrijatika Jonika, it-turiżmu jista’ jkun lieva importanti għat-tkabbir sosotenibbli, l-opportunitajiet tal-impjieg għaż-żgħażagħ u l-inklużjoni soċjali peress li llum “nofs l-impjiegi tat-turiżmu kostali Ewropew u l-valur miżjud jinsabu fil-Mediterran” (12);

50.

jenfasizza l-importanza ta’ din it-tielet strateġija makroreġjonali tal-UE li tibni fuq l-esperjenza ta’ strateġiji makroreġjonali li diġà jeżistu biex tiżviluppa kooperazzjoni ġdida innovattiva u intelliġenti kif ukoll metodu ta’ governanza f’diversi livelli esperimentali u innovattiv li fih “nitgħallmu billi naġixxu”, filwaqt li wieħed ifittex is-sinerġiji u l-iskambju tal-prattiki ma’ strateġiji oħra tal-UE;

51.

jindika r-rilevanza tal-EUSAIR biex jingħata impetu ġdid lill-indirizzar ta’ kwistjonijiet komuni fir-Reġjun u l-promozzjoni tal-prosperità ekonomika u soċjali sostenibbli b’attenzjoni partikolari fuq it-tkabbir u l-impjiegi b’konformità mal-għanijiet tal-Ewropa 2020, billi titjieb l-attrazzjoni, il-kompetittività u l-konnessjoni sabiex ir-Reġjun Adrijatiku Joniku jsir ċentru ewlieni;

52.

iħeġġeġ lill-Kummissjoni Ewropea biex ikollha rwol ewlieni fi pjattaforma ta’ koordinazzjoni u implimentazzjoni ta’ governanza f’diversi livelli innovattiva li fiha d-deċiżjonijiet jiġu maqsuma biex jassiguraw l-impenn politiku u s-sjieda tal-partijiet interessati fil-livell Ewropew, nazzjonali, reġjonali u lokali, b’koerenza mal-prinċipju tas-sussidjarjetà; is-settur privat u s-soċjetà ċivili għandhom jipparteċipaw billi jiżguraw sens qawwi u mifrux ta’ appartenenza għall-Istrateġija permezz tal-komunikazzjoni, l-għoti tar-rendikonti u riżultati trasparenti minn fuq għal isfel u minn isfel ‘il fuq, pereżempju portal tad-data miftuħ, forum annwali ta’ djalogu ekonomiku u soċjali dwar l-EUSAIR, eċċ.;

53.

jenfasizza li l-integrazzjoni tal-UE hija element fundamentali tal-EUSAIR, li fih erba’ pajjiżi mill-UE u erba’ li m’humiex, u jiġbed l-attenzjoni għall-elementi ta’ rikonċiljazzjoni, sigurtà, stabbiltà u prosperità permezz ta’ kooperazzjoni aktar mill-viċin u r-rwol tar-reġjuni bħala atturi ewlenin fil-promozzjoni tal-awtogovernanza tar-reġjuni, il-bini tal-kapaċità, id-deċentralizzazzjoni u d-demokrazija.

19.8.2014   

MT

Il-Ġurnal Uffiċjali tal-Unjoni Ewropea

C 271/45

Relatur

Kadri Tillemann (EE/PPE)

President tal-Kunsill tal-Muniċipalità Rurali ta’ Keila

Dokument ta’ referenza

Ittra mill-Viċi President tal-Kummissjoni Ewropea tat-13 ta’ Diċembru 2013

1.

jirrikonoxxi li f’Marzu 2011, il-mexxejja tal-UE impenjaw ruħhom li jwettqu l-mira primarja tal-UE 2020 li, sal-2020, jitwaqqaf it-telf tal-bijodiversità u d-degradazzjoni tas-servizzi tal-ekosistemi fl-UE, u li dawn jerġgħu jiġu kif kienu safejn hu fattibbli, filwaqt li jiġi intensifikat il-kontribut tal-UE biex ikun evitat it-telf tal-bijodiversità globali. L-Istrateġija tal-UE dwar il-Bijodiversità sal-2020, kif adottata mill-Kummissjoni Ewropea f’Mejju 2011 (1), u appoġġata mill-Kunsill (2), tinkludi 6 miri ewlenin u 20 azzjoni sabiex jgħinu lill-UE biex tilħaq l-objettiv tal-bijodiversità tal-2020;

2.

jirrikonoxxi li l-istrateġija tal-UE għandha mandat globali. Hija tittraduċi l-miri u l-impenji globali li l-UE ħadet fl-10 Konferenza tal-Partijiet Interessati (COP 10) tal-Konvenzjoni tan-Nazzjonijiet Uniti dwar id-Diversità Bijoloġika (CBD) fl-2010, jiġifieri l-Pjan Strateġiku għall-Bijodiversità 2011-2020 (Deċiżjoni X/2), inkluż l-20 Objettiv tal-Bijodiversità għall-2020 ta’ Aichi (3);

3.

ifakkar li t-telf tal-bijodiversità huwa problema globali, li għandha konsegwenzi ambjentali, soċjoekonomiċi u fuq is-saħħa serji li jaffetwaw il-kwalità tal-ħajja tal-persuni. Dan huwa fenomenu li nibet minn diversi fatturi, mhux l-anqas l-azzjoni tal-bniedem;

4.

jiġbed l-attenzjoni għall-fatt li l-awtoritajiet lokali u reġjonali (4) jaqdu rwol kritiku fl-implimentazzjoni fil-prattika tal-objettivi tal-UE u dawk internazzjonali tal-bijodiversità, u għalhekk li jgħinu lill-gvernijiet nazzjonali biex jevitaw iżjed telf tal-bijodiversità. Bħala riżultat tad-deċentralizzazzjoni kontinwa li qiegħda sseħħ f’ħafna Stati Membri, l-awtoritajiet lokali u reġjonali żiedu r-responsabbiltà għall-implimentazzjoni ta’ politiki relatati mal-bijodiversità;

5.

jenfasizza l-importanza li jiġu applikati l-prinċipji tal-White Paper tal-KtR dwar il-governanza f’diversi livelli u l-Karta għall-Governanza f’Diversi Livelli fl-Ewropa adottata mill-KtR f’April 2014 (5) fl-implimentazzjoni tal-Istrateġija għall-Bijodiversità u l-objettivi ta’ Aichi. Il-KtR jikkunsidra li l-governanza f’diversi livelli hija azzjoni kkoordinata mill-UE, l-Istati Membri u l-awtoritajiet lokali u reġjonali, abbażi ta’ sħubija fil-fażijiet kollha taċ-ċiklu tal-politiki tal-UE mit-tfassil sal-implimentazzjoni. Il-governanza ta’ servizzi tal-bijodiversità u tal-ekosistemi timplika għodod ta’ politika koerenti u mandati fil-livelli kollha ta’ gvern;

6.

jappella lill-Kummissjoni Ewropea biex tħejji valutazzjoni tal-Istati Membri dwar il-governanza f’diversi livelli tal-bijodiversità u tidentifika r-rwol attiv tal-gvernijiet reġjonali u lokali fit-tali governanza. L-istess dokument għandu jidentifika ż-żoni li l-bijodiversità tagħhom tkun mhedda min-nuqqas ta’ mudell ta’ governanza li joħloq rabta bejn l-Istati Membri, il-gvernijiet reġjonali u lokali u l-partijiet interessati ekonomiċi u soċjali rilevanti u jipprovdi suġġerimenti dwar kif dan it-theddid jista’ jiġi indirizzat;

7.

jilqa’ b’sodisfazzjon f’dan ir-rigward il-fatt li l-Istrateġija tal-Bijodiversità sal-2020 tiddikjara li “jinħtieġ li l-miri kondiviżi bejn l-UE u s-CBD ikunu segwiti permezz ta’ taħlita ta’ azzjonijiet fuq livelli subnazzjonali, nazzjonali u dak tal-UE” u li l-Kummissjoni Ewropea tipprova tibni “sħubijiet effettivi fit-tul” mal-“partijiet interessati oħrajn li huma involuti fl-ippjanar tal-ispazju u l-ġestjoni tal-użu tal-art fl-implimentazzjoni tal-istrateġiji tal-bijodiversità fil-livelli kollha”;

8.

jenfasizza l-importanza tad-Deċiżjoni X/22 tas-CBD (6), li tinkludi l-“Pjan ta’ azzjoni dwar il-gvernijiet sottonazzjonali, il-bliet u awtoritajiet lokali oħrajn għall-bijodiversità (2011-2020)” u tad-Deċiżjoni XI/8(A) tas-CBD (7). Il-KtR jaħseb li d-Deċiżjoni X/22 tas-CBD hija unika fis-sens li tippreżenta d-deċiżjoni l-iżjed avvanzata ta’ “governanza f’diversi livelli” fi Ftehim Multilaterali dwar l-Ambjent (MEA);

9.

ifakkar li l-Opinjoni tal-KtR li tħejji għall-COP 10 tas-CBD (8) u d-delegazzjoni tal-KtR dwar il-COP 10 appoġġjaw bis-saħħa l-adozzjoni tad-Deċiżjoni X/22 tas-CBD; barra minn hekk, il-KtR, fil-Memorandum ta’ Ftehim iffirmat mal-UNEP fl-2012, qabel li jippromovi l-implimentazzjoni ta’ din id-Deċiżjoni tas-CBD;

10.

jappella lill-Istati Membri biex jimplimentaw l-impenji li għamlu fid-Deċiżjoni X/22 tas-CBD biex itejbu l-mekkaniżmi ta’ governanza u l-istrumenti legali u volontarji tagħhom sabiex jikkollaboraw u jappoġġaw l-awtoritajiet lokali u reġjonali f’azzjonijiet lokali u reġjonali tal-bijodiversità, filwaqt li jitqiesu l-missjoni, l-objettivi u l-lista ta’ azzjonijiet indikattiva taħt id-Deċiżjoni X/22 tas-CBD u l-miri u l-azzjonijiet tal-Istrateġija tal-UE dwar il-Bijodiversità sal-2020;

11.

jilqa’ b’sodisfazzjon ir-referenza li għamel il-Kunsill fil-konklużjonijiet tiegħu tat-12 ta’ Ġunju 2014 dwar il-COP 12 tas-CBD f’Ottubru 2014 (9) għar-rwol li jaqdu l-awtoritajiet lokali u reġjonali biex imexxu ‘l quddiem l-implimentazzjoni tal-Pjan Strateġiku tas-CBD għall-2020 u biex jintlaħqu l-Miri tal-Bijodiversità ta’ Aichi; jappella lill-Kunsill biex, fil-konklużjonijiet futuri tiegħu dwar il-COPs tas-CBD, jirrifletti l-approċċ imsejjes fuq il-governanza f’diversi livelli billi jsaħħaħ ir-rikonoxximent tiegħu fil-konfront tal-awtoritajiet lokali u reġjonali bħala partijiet interessati governattivi b’mod distint minn partijiet interessati oħra mhux governattivi fi ħdan il-proċess tas-CBD;

12.

jixtieq jaqsam l-esperjenzi tiegħu ta’ governanza fuq ħafna livelli fil-qasam tal-bijodiversità u l-implimentazzjoni tad-Deċiżjoni X/22 tas-CBD mal-awtoritajiet lokali u reġjonali minn reġjuni oħra tad-dinja billi jakkumpanja d-delegazzjoni tal-UE għall-COP12 tas-CBD bħala osservatur f’Ottubru 2014, biex b’hekk jibni fuq il-parteċipazzjoni tal-KtR fil-COP 10 u l-Memorandum ta’ Fehim tiegħu mal-UNEP, sabiex jiġi żgurat li l-leħen tal-awtoritajiet lokali u reġjonali tal-UE jkun rappreżentat b’mod adatt;

13.

jiġbed l-attenzjoni għall-fatt li kkummissjona studju dwar “Governanza f’diversi livelli tal-kapital naturali tagħna” (10) biex jappoġġa din l-Opinjoni u janalizza l-kooperazzjoni bejn l-Istati Membri u l-awtoritajiet lokali u reġjonali tagħhom, l-azzjoni innovattiva tal-awtoritajiet lokali u reġjonali, u l-aħjar prattiki attwali, kif ukoll jipprovdi suġġerimenti iżjed dettaljati għat-titjib tal-governanza f’diversi livelli;

14.

iħeġġeġ lill-awtoritajiet lokali u reġjonali biex jagħtu eżempju bit-tmexxija tagħhom u jilqa’ bis-sħiħ l-istrateġiji, l-azzjonijiet u l-approċċi innovattivi li bosta awtoritajiet lokali u reġjonali ħadu biex jipproteġu u jiġġestixxu l-bijodiversità u l-ekosistemi tagħhom b’mod sostenibbli; jilqa’ wkoll l-inizjattivi tajbin li diġà qed jieħdu xi Stati Membri biex jappoġġjaw lill-awtoritajiet lokali u reġjonali tagħhom. Dawn l-azzjonijiet kollha jispiraw ir-rakkomandazzjonijiet ta’ politika li ġejjin;

15.

jappella lill-Istati Membri biex jiżguraw jew itejbu l-parteċipazzjoni tal-awtoritajiet lokali u reġjonali fit-twaqqif, ir-reviżjoni u l-implimentazzjoni ta’ Strateġiji u Pjani ta’ Azzjoni Nazzjonali għall-Bijodiversità (NBSAP), billi jinkludu, pereżempju, assoċjazzjonijiet nazzjonali ta’ awtoritajiet lokali u reġjonali f’kummissjonijiet/kumitati ta’ tmexxija nazzjonali għall-bijodiversità;

16.

iħeġġeġ lill-Istati Membri biex jiżviluppaw aktar, f’kooperazzjoni mal-assoċjazzjonijiet nazzjonali tal-awtoritajiet lokali u reġjonali tagħhom, dokumenti ta’ gwida, inizjattivi ta’ bini tal-kapaċità u servizzi ta’ konsulenza prattika għal strateġiji lokali u reġjonali tal-bijodiversità, pjani ta’ azzjoni u miżuri;

17.

iħeġġeġ bil-qawwa lill-awtoritajiet reġjonali biex jiżviluppaw Strateġiji u Pjani ta’ Azzjoni Reġjonali għall-Bijodiversità (RBSAP), u biex il-bliet u l-muniċipalitajiet ifasslu Strateġiji u Pjani ta’ Azzjoni Lokali għall-Bijodiversità (LBSAP) u jirrikkonoxxi inizjattivi li diġà ttieħdu f’dan il-qasam. Dawn jistgħu jipprovdu kemm viżjoni komprensiva kif ukoll qafas prattiku għall-ġestjoni sostenibbli tal-bijodiversità fil-livelli sottonazzjonali, billi jiġu meqjusal-miri tal-bijodiversità definiti fil-livell nazzjonali, Ewropew u tas-CBD;

18.

iħeġġeġ lill-Istati Membri biex jappoġġjaw, pereżempju f’kooperazzjoni mal-assoċjazzjonijiet nazzjonali tal-awtoritajiet lokali u reġjonali, l-istabbiliment ta’ rabtiet bejn l-awtoritajiet lokali u reġjonali tagħhom biex isaħħu l-ġestjoni tal-bijodiversità u biex jistabbilixxu jew jappoġġjaw finanzjarjament skemi nazzjonali ta’ premji/rikonoxximent li jippromovu azzjonijiet favur il-bijodiversità li jittieħdu mill-awtoritajiet lokali u reġjonali;

19.

iħeġġeġ lill-awtoritajiet lokali u reġjonali jadottaw approċċ komprensiv lejn il-bijodiversità fid-dipartimenti amministrattivi tagħhom u jibnu l-kapaċità fi ħdan l-amministrazzjonijiet tagħhom, filwaqt li jagħmlu l-aħjar użu mill-proġetti ta’ bini ta’ kapaċità amministrattiva, il-pakketti ta’ taħriġ jew ta’ konsulenza provduti għall-awtoritajiet lokali u reġjonali fil-livell nazzjonali, Ewropew jew internazzjonali; iħeġġeġ ukoll lill-awtoritajiet lokali u reġjonali jsaħħu l-kollaborazzjoni tagħhom fir-rigward tal-bijodiversità fl-assoċjazzjonijiet, in-netwerks jew il-pjattaformi tal-awtoritajiet lokali u reġjonali fil-livell nazzjonali, tal-UE u internazzjonali bħala mezz importanti biex jiġu indirizzati l-isfidi komuni u jiġu provduti pariri ta’ politika konġunta lill-Istati Membri, l-UE u lis-CBD;

20.

jappella lill-Istati Membri biex itejbu l-koordinazzjoni mal-awtoritajiet lokali u reġjonali tagħhom meta jħejju pożizzjonijiet nazzjonali u segwiti fir-rigward tal-Qafas Komuni ta’ Implimentazzjoni tal-Istrateġija għall-Bijodiversità tal-UE jew fil-kuntest tal-attivitajiet nazzjonali relatati mas-CBD (rappurtar);

21.

jitlob lill-Istati Membri biex, fi qbil mal-awtoritajiet lokali u reġjonali, jistabbilixxu indikaturi kompatibbli biex il-kundizzjonijiet u l-iżviluppi fl-oqsma ta’ azzjoni tal-istrateġiji tal-bijodiversità jkunu komparabbli f’livelli differenti;

22.

jisħaq fuq il-ħtieġa li l-Istati Membri u l-awtoritajiet reġjonali u lokali jikkooperaw b’mod effikaċi u malajr biex jiffinalizzaw l-istabbiliment tal-pjani ta’ ġestjoni ta’ Natura 2000 jew strumenti ekwivalenti li jistabbilixxu l-miżuri ta’ konservazzjoni u ta’ restorazzjoni meħtieġa biex tintlaħaq il-mira 1 tal-Istrateġija tal-Bijodiversità tal-UE;

23.

jistenna li tittieħed azzjoni kollettiva mill-Istati Membri u l-awtoritajiet lokali u reġjonali biex tintlaħaq it-tieni mira tal-Istrateġija tal-Bijodiversità tal-UE għall-2020, li għandha l-għan li tirrestawra tal-anqas 15 % tal-ekosistemi degradati sal-2020; kif ukoll li ttemm it-telf tal-bijodiversità u d-degradazzjoni tal-ekosistemi u tirrestawrahom fit-territorju Ewropew kollu, u mhux biss fis-siti tan-Natura 2000;

24.

itenni l-appell tiegħu (11) biex l-awtoritajiet lokali u reġjonali japplikaw il-prinċipju ta’ “l-ebda telf nett tal-bijodiversità u s-servizzi tal-ekosistemi” għall-ippjanar urban u reġjonali, l-awtorizzazzjoni tal-infrastruttura tad-djar, l-industrija, l-agrikoltura, is-sajd, il-forestrija, ir-rikreazzjoni, it-turiżmu, l-enerġija jew it-trasport u l-għajnuna finanzjarja, billi jiżguraw miżuri ta’ kumpens/ibbilanċjar għal kwalunkwe impatt negattiv li fadal fuq is-servizzi ta’ bijodiversità u tal-ekosistemi;

25.

ifakkar li l-prevenzjoni tad-degradazzjoni tal-ekosistemi u l-irkupru tal-funzjonalitajiet tal-ekosistemi degradati għandhom jingħataw preferenza assoluta, għaliex il-miżuri għall-ġestjoni tal-konsegwenzi tal-iżbilanċi ekoloġiċi li jirriżultaw mill-attività tal-bniedem huma dejjem aktar għaljin, twal u fuq kollox mingħajr ċertezza rigward ir-riżultati tagħhom;

26.

jenfasizza l-importanza ta’ studji TEEB (L-Ekonomija tal-Ekosistemi u l-Bijodiversità) nazzjonali, reġjonali u lokali dwar il-valur ta’ servizzi tal-ekosistemi u l-ħtieġa biex dan l-approċċ jiġi applikat għal proġetti lokali sabiex jintwerew il-benefiċċji soċjoekonomiċi, pereżempju ta’ żoni protetti fil-livell nazzjonali, reġjonali u lokali; jenfasizza wkoll il-ħtieġa li jiġi inkorporat il-valur tal-kapital naturali fil-prattiki ta’ pjanar, kontabbiltà/rappurtar u baġitjar nazzjonali, reġjonali u lokali b’appoġġ għall-Azzjoni 5 tal-Istrateġija tal-UE dwar il-Bijodiversità;

27.

iqis li għalkemm l-evalwazzjoni ekonomika tas-servizzi tal-ekosistemi tista’ tgħin sabiex tittieħed deċiżjoni bejn għanijiet konfliġġenti fil-kuntest ta’ ċerti studji tal-ispejjeż-benefiċċji, din l-evalwazzjoni tinvolvi diffikultajiet metodoloġiċi u etiċi. Għaldaqstant, il-KtR jappoġġja modi alternattivi u flessibbli biex jiġu evalwati l-ispejjeż tat-telf tal-bijodiversità, inklużi dawk imsemmija fl-Opinjoni tiegħu, CDR4577-2013_00_00_TRA_AC;

28.

jara li hemm ħtieġa biex jingħata appoġġ għall-isforzi tal-awtoritajiet lokali u reġjonali biex itejbu l-qagħda tal-għarfien dwar il-bijodiversità, l-ekosistemi u s-servizzi tagħhom u l-immappjar tal-GIS, bl-użu ta’ skali li huma adatti għall-ippjanar lokali/reġjonali u l-monitoraġġ tal-istatus ta’ ekosistema, filwaqt li jitqiesu dawn il-ħtiġijiet fil-MAES (Mappjar u Evalwazzjoni tal-Ekosistemi u s-Servizzi tagħhom fl-Ewropa); iqis ukoll li hemm bżonn li l-awtoritajiet lokali u reġjonali jiġu appoġġjati fil-ġestjoni tad-data dwar l-ispazju ambjentali b’mod li jikkonforma mal-INSPIRE sabiex jiġi ffaċilitat l-iskambju tad-data kif ukoll sabiex l-infrastrutturi ekoloġiċi jiġu konnessi b’mod transkonfinali;

29.

jindika l-ħtieġa li jitniedu portali għal informazzjoni onlajn u aġġornata dwar il-bijodiversità biex iservu bħala punt ta’ riferiment ewlieni għall-awtoritajiet lokali u reġjonali u l-pubbliku interessat, b’reviżjoni u manutenzjoni regolari u jilqa’ b’sodisfazzjon it-twaqqif tal-Atlas Diġitali MAES madwar l-UE kollha.

30.

jirrimarka li l-urbanizzazzjoni hija sfida kif ukoll opportunità biex jinżammu u jiġu ġestiti s-servizzi tal-ekosistemi. Huwa ċar li jinħtieġ jiġu kkunsidrati r-relazzjonijiet interkonnessi tal-forzi u l-impatti kif ukoll il-flussi li jidħlu u li joħorġu li jorbtu lill-bliet mal-ekosistemi ġewwa u barra mit-territorju tagħhom. Ir-reġjuni urbani għandhom jiġu mħeġġa u appoġġjati biex jieħdu iktar responsabbiltà ħalli jippromovu u jiżviluppaw metodi sabiex jiġu integrati l-ambjent naturali u l-ħtiġijiet umani kif ukoll il-benesseri tal-bniedem. Għandha tiġi enfasizzata wkoll l-importanza tal-pajsaġġ bħala espressjoni tar-relazzjoni tal-bniedem mal-ambjent u r-responsabbiltà tiegħu li jieħu ħsieb il-pajsaġġ, liema aġir ikollu impatt importanti fuq il-bijodiversità. Huwa importanti wkoll li tissemma l-Konvenzjoni Ewropea tal-2000 dwar il-Pajsaġġ u tiġi enfasizzata l-opportunità li jsir tiftix ta’ sinerġiji mal-Istrateġija għall-Bijodiversità;

31.

jiġbed l-attenzjoni għall-perspettiva ekonomika tal-iżvilupp ta’ servizzi tal-ekosistema – l-għajxien fil-limiti ta’ ekosistemi f’saħħithom u l-infurzar tal-valur tagħhom naturalment se jappoġġa l-aspetti l-iżjed importanti ta’ ekonomija ekoloġika: progress ekonomiku sostenibbli; tnaqqis tat-tniġġis u effiċjenza fl-użu tar-riżorsi. Sabiex wieħed jisfrutta l-benefiċċji tal-ġestjoni ta’ ekosistema ta’/minn ekonomija ekoloġika, il-proċessi tagħha jridu jagħmlu parti integrali mill-proċessi tat-teħid tad-deċiżjonijiet fil-livelli kollha ta’ governanza (i.e. lokali, reġjonali, nazzjonali u globali) biex tiġi appoġġata r-razzjonalizzazzjoni tal-użu ta’ riżorsi;

32.

jenfasizza l-potenzjal tal-infrastruttura ekoloġika bħala għodda territorjali integrata u multifunzjonali għat-twettiq tal-prinċipji tal-governanza f’diversi livelli fil-ġestjoni u l-protezzjoni tal-bijodiversità, u għat-titjib tas-servizzi tal-ekosistema fir-reġjuni, b’kontribut għall-Aġenda territorjali tal-istrateġija Ewropa 2020 għar-raffurzar tal-koeżjoni u tal-identità territorjali;

33.

itenni l-appell tiegħu (12) biex l-awtoritajiet lokali u reġjonali jimplimentaw, iżommu u jimmonitorjaw infrastruttura ekoloġika rurali u urbana, b’mod partikolari permezz tar-responsabbiltajiet tagħhom territorjali u ta’ ppjanar urban u ta’ ppjanar spazjali, ir-regolamenti dwar l-użu tal-art, il-proċeduri tal-awtorizzazzjoni tal-ippjanar, l-istandards, ir-regolamenti u l-kodiċi tal-bini;

34.

jappella lill-Istati Membri biex jappoġġaw inizjattivi lokali u reġjonali ta’ ġestjoni u ppjanar tal-infrastruttura ekoloġika billi jipprovdulhom ir-riżorsi, il-pariri u d-direzzjoni neċessarji, inkluża d-desinjazzjoni ta’ netwerks nazzjonali ta’ infrastruttura ekoloġika, u dispożizzjonijiet fil-liġijiet/politika nazzjonali ta’ ppjanar spazjali għall-awtoritajiet lokali u reġjonali biex jiġi kkunsidrat il-forniment ta’ infrastruttura ekoloġika fis-sistema ta’ ppjanar spazjali, urban u territorjali tagħhom;

35.

jisħaq li għal implimentazzjoni effikaċi tal-GI hemm bżonn li l-Istati Membri u l-awtoritajiet lokali u reġjonali jżommu u jiżviluppaw l-iskemi ta’ kooperazzjoni għall-awtoritajiet lokali u reġjonali attwali u jistabbilixxu oħrajn ġodda għall-kooperazzjoni transkonfinali fil-livell makroreġjonali u dak pan Ewropew, u għall-kooperazzjoni għall-iżvilupp deċentralizzata biex jissaħħu u jiġu sfruttati l-isforzi konġunti ta’ ħarsien integrat tal-bijodiversità u ta’ ġestjoni;

36.

jiġbed l-attenzjoni għall-fatt li komunitajiet lokali ta’ sikwit għandhom għarfien imsejjes fuq esperjenza tradizzjonali jew personali fir-rigward tal-kapaċità tar-riżorsi naturali biex jipprovdu għall-komunitajiet u l-mezz ta’ għajxien tagħhom. Din il-kapaċità tista’ tiffaċilita ż-żamma u r-restawr ta’ servizzi tal-ekosistemi jekk jiġu appoġġjati b’mod adegwat u integrati b’mod effettiv fit-tfassil u l-ippjanar ta’ politika tal-bijodiversità; iħeġġeġ lill-Istati Membri jiżviluppaw inizjattivi nazzjonali bil-għan li jappoġġjaw is-sħubijiet awtonomi tal-komunità lokali li jikkontribwixxu għall-ksib tal-objettivi nazzjonali dwar il-bijodiversità;

37.

jenfasizza r-rwol sinifikanti tal-awtoritajiet lokali u reġjonali fil-komunikazzjoni, l-edukazzjoni u s-sensibilizzazzjoni tal-pubbliku (attivitajiet CEPA (communicating, educating and raising public awarness)). Il-pubbliku inġenerali huwa relattivament mhux familjari mal-objettivi tal-politika tal-bijodiversità. Madankollu, huwa essenzjali għaċ-ċittadini u l-gruppi usa’ tal-partijiet interessati biex ikunu konxji ta’ dak kollu li jista’ jiġi ggwadanjat jew mitluf f’dan ir-rigward. Il-KtR iqis il-promozzjoni tax-xjenza taċ-ċittadini bħala metodu importanti għall-involviment u l-edukazzjoni tan-nies u l-użu tal-għarfien lokali b’mod effettiv; iħeġġeġ ukoll lill-Istati Membri jgħinu lill-awtoritajiet lokali u reġjonali fl-attivitajiet CEPA tagħhom pereżempju permezz ta’ mekkaniżmu ta’ koordinament nazzjonali adatt;

38.

jiġbed l-attenzjoni għall-ħtieġa li l-awtoritajiet lokali u reġjonali jkomplu jżidu l-isforzi tagħhom biex ikabbru s-sensibbiltà tal-partijiet interessati u tal-pubbliku dwar l-għanijiet tal-bijodiversità u, biex jagħmlu dan, jimplimentaw jew jippromovu programmi ta’ sensibilizzazzjoni mmirati;

39.

iħeġġeġ lill-awtoritajiet lokali u reġjonali biex jappoġġaw u jifformalizzaw sħubijiet ġodda bejn diversi partijiet interessati u kumpaniji privati, is-soċjetà ċivili, inklużi l-NGOs ambjentali, u l-komunità tar-riċerka; u biex joħolqu kooperazzjoni lokali/reġjonali ma’ dawn l-imsieħba bil-għan li jsir użu effiċjenti mill-fondi nazzjonali jew Ewropej (pereżempju Orizzont 2020); iħeġġiġhom ukoll jippromovu l-impenji volontarji tas-setturi ewlenin bħall-assoċjazzjonijiet jew il-kumpaniji fil-qasam tal-agrikoltura, it-turiżmu u l-isports fuq barra;

40.

jenfasizza l-ħtieġa biex il-livelli kollha ta’ gvern ikkonċernati jiżguraw parteċipazzjoni ta’ suċċess u komprensiva tal-partijiet interessati fil-proċessi ta’ ppjanar u ta’ implimentazzjoni tal-politika tal-bijodiversità peress li aktarx dan se jwassal għal riżultati soċjali tajbin, bħal fehim komuni aħjar tal-valuri tal-partijiet interessati, iktar fiduċja u tagħlim; dan jinkludi wkoll proċeduri parteċipattivi effettivi, pereżempju fl-identifikazzjoni ta’ żoni ta’ konservazzjoni tan-natura;

41.

qed jistenna Regolament futur tal-Parlament Ewropew u tal-Kunsill dwar il-prevenzjoni u l-ġestjoni tal-introduzzjoni u t-tixrid ta’ speċijiet eżotiċi invażivi (13) biex l-awtoritajiet lokali u reġjonali jingħataw l-għajnuna biex jindirizzaw dan il-periklu serju għall-bijodiversità lokali, is-servizzi tal-ekosistemi kif ukoll is-saħħa tal-bniedem u l-ekonomiji. Fil-kuntest ta’ qafas legali tal-UE dwar speċijiet eżotiċi invażivi, u b’konformità mal-leġislazzjoni u l-programmi nazzjonali u l-inizjattivi transkonfinali, l-awtoritajiet lokali u reġjonali huma fil-qagħda adatta biex jieħdu azzjoni effettiva biex jimmonitorjaw, jevitaw, jeradikaw, jillimitaw u jikkontrollaw dawn l-ispeċijiet u biex jipprovdu appoġġ u għarfien lokali biex jinstab il-bilanċ neċessarju bejn l-interessi soċjoekonomiċi u ambjentali kkonċernati u biex jitjieb il-fehim pubbliku tal-problema;

42.

jinnota li l-bijodiversità hija kwistjoni intersettorjali. Għall-implimentazzjoni effettiva tal-politika, il-ħarsien tal-bijodiversità għandu jiġi integrat fl-aġenda ta’ diversi setturi ta’ governanza nazzjonali, reġjonali u lokali (ippjanar spazjali u ppjanar urban, pajsaġġ, agrikoltura, forestrija, sajd, enerġija, tibdil fil-klima, saħħa, trasportazzjoni, djar, użu tal-art, eċċ.) b’konformità mas-suġġerimenti tal-Istrateġija tal-Bijodiversità tal-UE sal-2020 u l-objettivi tas-CBD ta’ Aichi;

43.

jiġbed l-attenzjoni għall-ħtieġa speċjali biex l-awtoritajiet fil-livelli kollha ta’ governanza jirrikonoxxu u jindirizzaw il-kwistjoni tal-bijodiversità agrikola minħabba l-potenzjal ta’ bijodiversità sinifikanti tal-ispeċijiet, ir-razez/varjetajiet u r-riżorsi ġenetiċi ta’ interess agrikolu u l-agroekosistema inġenerali;

44.

jappella lill-awtoritajiet lokali u reġjonali u lill-Istati Membri, kif inhu mitlub mill-Istrateġija tal-Bijodiversità tal-UE, biex jimmiraw aħjar il-finanzjament mill-FAEŻR għall-ħarsien tal-bijodiversità, inkluż l-integrazzjoni ta’ objettivi kwantifikati tal-bijodiversità fil-programmi reġjonali tal-iżvilupp rurali u l-lokalizzazzjoni koerenti u l-allokazzjoni baġitarji ta’ miżuri agroambjentali. Għal dan il-għan ikun partikolarment utli li jiġu promossi Inizjattivi ta’ Żvilupp Lokali Mmexxija mill-Komunità relatati mal-bijodiversità (pereżempju bdiewa u forestiera sabiex jirnexxielhom joħolqu kontinwità fl-elementi tal-pajsaġġ, il-ħarsien ta’ riżorsi ġenetiċi);

45.

iħeġġeġ lill-Istati Membri u lill-awtoritajiet lokali u reġjonali jiżguraw li jsir użu ottimu mill-opportunitajiet finanzjarji offruti mill-FEŻR, peress li għall-ewwel darba l-bijodiversità u l-ekosistemi ġew inklużi fl-objettivi u b’hekk jipprovdu sorsi addizzjonali ta’ finanzjament għat-tnedija ta’ infrastruttura ekoloġika;

46.

jenfasizza l-importanza tal-Programm LIFE għall-proġetti ta’ infrastruttura ekoloġika u tal-bijodiversità tal-awtoritajiet lokali u reġjonali u jħeġġeġ lill-punti ta’ kuntatt nazzjonali tal-LIFE jikkooperaw mill-qrib mal-awtoritajiet lokali u reġjonali u mal-punti ta’ kuntatt reġjonali tal-LIFE fit-tħejjija tal-applikazzjonijiet tal-LIFE; jixtieq ukoll li jara kategorija ġdida ta’ finanzjament tal-proġetti integrati tal-LIFE sabiex jissaħħaħ l-appoġġ għall-proġetti fuq skala reġjonali u jiġi mobilizzat l-appoġġ minn fondi oħra tal-UE, nazzjonali u privati; (14)

47.

iħeġġeġ lill-awtoritajiet lokali u reġjonali, bl-appoġġ mill-Istati Membri tagħhom, biex jesploraw modi innovattivi ta’ finanzjament, inkluż, pereżempju, fondazzjonijiet privati/kummerċjali jew fondazzjonijiet taħt il-liġi pubblika, il-lotteriji reġjonali/nazzjonali, is-sħubijiet pubbliċi/privati, proġetti ta’ restawr tal-foresti/torbieri u bjar tal-karbonju, inċentivi tat-taxxa, pagamenti għal servizzi tal-ekosistema (PES), tikkettar/ċertifikazzjoni volontarji; jew sħubijiet intraprenditorjali lokali; id-dħul mill-ħruġ ta’ permessi marbutin mal-ġestjoni tat-territorju u l-kostruzzjoni għandu jiġi allokat b’mod dirett għal inizjattivi fil-livell lokali u reġjonali relatati mal-bijodiversità;

48.

jinkoraġixxi l-awtoritajiet lokali biex jaħdmu b’mod effikaċi f’kull livell ta’ finanzjament bil-għan li jwaqqfu s-sussidji u l-mekkaniżmi fiskali li jagħmlu ħsara lill-bijodiversità;

49.

jenfasizza l-importanza ta’ proġetti tal-UE nazzjonali kofinanzjati li jgħinu lill-awtoritajiet lokali u reġjonali japplikaw għal proġetti tal-UE relatati mal-bijodiversità kofinanzjati sabiex itejbu l-kapaċità tagħhom biex jisfruttaw l-opportunitajiet biex jiffinanzjaw soluzzjonijiet għall-bijodiversità u l-infrastruttura ekoloġika adattati għall-post taħt il-programmi operattivi tal-fondi tal-UE, u li jinvestu fil-bini tal-kapaċità transsettorjali meħtieġa, il-kofinanzjament u n-netwerking; jirrikonoxxi wkoll l-importanza tal-programmi nazzjonali ta’ finanzjament li jiffinanzjaw l-azzjonijiet (pilota) tal-awtoritajiet lokali u reġjonali li jikkonktribwixxu għall-objettivi nazzjonali dwar il-bijodiversità;

C.

50.

jemmen li r-reviżjoni ta’ nofs it-term tal-Kummissjoni Ewropea għandha tqis kull bidla li saret bejn it-tnedija tal-istrateġija fl-2011 u r-reviżjoni ta’ nofs it-term fl-2015, b’mod partikolari l-qafas finanzjarju l-ġdid u l-fondi tal-UE bejn l-2014-2020 u ħafna mill-azzjonijiet tal-istrateġija, li għandhom jiġu implimentati qabel ir-reviżjoni ta’ nofs it-term. F’dan ir-rigward, il-KtR jappoġġa bil-qawwa l-fehma tal-Kunsill li l-Kummissjoni Ewropea għandha tirrakkomanda azzjonijiet ulterjuri (15), u b’hekk jikkontribwixxi għat-tisħiħ tal-effettività tat-tieni stadju tal-implimentazzjoni tal-istrateġija, sabiex jiġi żgurat li l-mira ewlenija tal-istrateġija tintlaħaq sal-2020;

51.

jaqbel mal-Parlament Ewropew li eżami kruċjali tal-impenn tal-UE għat-tilħiq tal-miri tal-bijodiversità se tkun l-implimentazzjoni finali tal-fondi tal-UE ġodda għall-perjodu 2014-2020 f’dan il-qasam. Il-livell inadegwat ta’ integrazzjoni tal-protezzjoni tal-bijodiversità f’politiki oħra tal-UE wassal biex l-ewwel strateġija tal-UE falliet fl-2010 (16). Hija meħtieġa metodoloġija għat-traċċar tal-infiq relatat mal-bijodiversità madwar il-baġit tal-UE, simili għal dik li qed tiġi żviluppata għall-infiq relatat mal-klima;

52.

jenfasizza l-importanza tal-ekoloġizzazzjoni bħala pilastru ċentrali tal-Politika Agrikola Komuni (PAK) sabiex jinkisbu l-miri tal-bijodiversità. Huwa essenzjali li r-reviżjoni ta’ nofs it-term tal-PAK tieħu passi iżjed ċari f’din id-direzzjoni sabiex tiżgura li l-ekoloġizzazzjoni twassal għal titjib ambjentali ġenwin, inkluża l-bijodiversità fiż-żoni rurali madwar l-Ewropa kollha;

53.

jemmen fil-potenzjal kbir tal-infrastruttura ekoloġika bħala għodda biex jitwaqqaf it-telf tal-bijodiversità u tiġi evitata l-frammentazzjoni tal-ħabitat, u għaldaqstant jistenna li r-reviżjoni tal-istrateġija tindika elementi ewlenin għal konsiderazzjoni fir-rapport ta’ progress tal-Kummissjoni Ewropea dwar l-infrastruttura ekoloġika, li huwa mistenni lejn l-aħħar tal-2017, u b’mod partikolari li jipprevedi fl-2018 proposta għal leġislazzjoni tal-UE dwar it-TEN-G, Infrastruttura Ekoloġika Trans-Ewropea (bħala parti mill-baġit tal-UE wara l-2020), u jtenni r-rakkomandazzjonijiet preċedenti tiegħu f’dan ir-rigward;

54.

jirreferi għat-talba tiegħu (17) lill-Kummissjoni biex l-għan li jkun evitat kwalunkwe telf tal-bijodiversità u tas-servizzi tal-ekosistemi jiddaħħal fil-leġislazzjoni Ewropea, b’kunsiderazzjoni tal-ħidma tal-Kummissjoni Ewropea marbuta mal-azzjoni 7b tal-istrateġija tal-UE favur il-bijodiversità fil-programm Orrizont 2020;

55.

jistieden lill-Kummissjoni Ewropea biex twaqqaf skema ta’ impenn/premju tal-UE għal kisbiet tal-bliet u reġjuni fil-qasam tal-bijodiversità u pjattaforma għal skambju, sabiex l-awtoritajiet lokali u reġjonali Ewropej jiġu rikonoxxuti għall-kontribut ta’ suċċess u importanti tagħhom biex l-Istrateġija għall-Bijodiversità tal-UE tilħaq l-għanijiet tagħha; F’dan ir-rigward, il-KtR jirrikonoxxi l-Premju Natura 2000 ġdid, iżda dan huwa immirat lejn firxa wiesgħa ta’ partijiet interessati;

56.

jitlob li fil-BISE (Sistema ta’ Informazzjoni dwar il-Bijodiversità) tiżdied id-disponibbiltà ta’ data aktar lokalizzata u ta’ riżoluzzjoni għolja tas-servizzi tal-ekosistemi u ta’ data oħra ta’ monitoraġġ billi tiġi inkluża wkoll data miġbura mill-osservatorji reġjonali tal-bijodiversità u d-data aggregata bbażata fil-bliet (bħall-valutazzjonijiet tal-bliet tal-UE ibbażati fuq pereżempju l-Indiċi tal-Bijodiversità fil-Bliet/l-Indiċi ta’ Singapore) sabiex jiġu promossi l-iskambju tad-data u l-informazzjoni bejn il-bliet u r-reġjuni u konsulenza aktar divrenzjata mil-lat reġjonali fil-politika tal-UE u sabiex jiġi ffaċilitat ir-rappurtar dwar titjib fil-livell reġjonali/lokali madwar l-Ewropa;

57.

jirrimarka dwar il-ħtieġa li jikomplew b’mod effettiv id-djalogu u l-kooperazzjoni tal-UE ma’ msieħba ewlenin fil-pajjiżi kandidati u dawk li potenzjalment huma kandidati sabiex jingħataw l-għajnuna biex jiżviluppaw u jaġġustaw il-politiki tagħhom biex jilħqu l-miri tal-bijodiversità tal-2020. L-awtoritajiet lokali u reġjonali tal-UE jistgħu jagħtu l-appoġġ li l-awtoritajiet lokali u reġjonali mhux fl-UE jeħtieġu sabiex ikunu jistgħu jikkontribwixxu ħalli jintlaħqu l-miri tal-bijodiversità Ewropej u globali, billi jaqsmu l-għarfien u l-aħjar prattiki tagħhom kif ukoll permezz tal-Kumitati Konsultattivi Konġunti, il-Gruppi ta’ Ħidma rilevanti tal-KtR, l-ARLEM u l-CORLEAP; f’dan ir-rigward; il-KtR jappella lill-Kummissjoni Ewropea biex tippromovi kooperazzjoni tal-iżvilupp deċentralizzata bejn l-awtoritajiet lokali u reġjonali tal-UE u l-awtoritajiet lokali u reġjonali fil-pajjiżi li qed jiżviluppaw fi ħdan il-faċilità li għadha kemm inħolqot EU Biodiversity for Life (B4Life);

58.

jitlob li l-Istrateġija tal-UE tirrikonoxxi u tiżgura aktar appoġġ għall-impenn tal-awtoritajiet lokali bħala msieħba ewlenin fl-inizjattiva BEST, li tippromovi l-konservazzjoni u l-użu sostenibbli tal-bijodiversità unika fir-Reġuni Ultraperiferiċi tal-UE u l-Pajjiżi u t-Territorji extra-Ewropej;

D.

59.

jappella lill-Kummissjoni Ewropea biex tenfasizza l-fatt li tagħti importanza kbira lid-Deċiżjoni X/22 tas-CBD u l-implimentazzjoni tagħha fl-Ewropa;

60.

jappella lill-Kummissjoni Ewropea biex tirrimarka li ntlaħaq kunsens fl-UE li hemm bżonn kbir biex l-istituzzjonijiet tal-UE, l-Istati Membri u l-awtoritajiet lokali u reġjonali jimplimentaw approċċ f’diversi livelli, kooperattiv u integrat lejn it-tilħiq tal-Objettivi tal-Bijodiversità ta’ Aichi u l-miri relatati tal-Istrateġija għall-Bijodiversità tal-UE. Għalkemm diġà sar progress sostanzjali biex dan jintlaħaq, u jeżistu diversi prattiki tajba f’diversi Stati Membri, jinħass li dan il-proċess ta’ kooperazzjoni u governanza f’diversi livelli għadu ma ġiex stabbilit b’mod adegwat madwar l-UE u għalhekk irid jitjieb iżjed;

61.

jistieden lill-Kummissjoni Ewropea biex tirrikonoxxi fir-rappurtar tagħha l-involviment attiv ta’ diversi awtoritajiet lokali u reġjonali tal-UE f’attivitajiet u netwerks tal-bijodiversità globali, inklużi l-kumitati konsultattivi stabbiliti taħt id-Deċiżjoni X/22 tas-CBD; bħall-Kumitat Konsultattiv dwar il-Gvernijiet Sottonazzjonali u l-Kumitat Konsultattiv dwar il-Bliet fis-Sħubija Dinjija favur l-azzjoni lokali u sottonazzjonali għall-bijodiversità;

62.

jirrikonoxxi l-kontribut tal-Kummissjoni Ewropea għad-Deċiżjoni X/22 tas-CBD, permezz ta’ din l-Opinjoni ta’ prospettiva u kooperazzjoni fuq l-istudju relatat tal-KtR, u l-parteċipazzjoni tal-KtR fil-Qafas Komuni ta’ Implimentazzjoni tal-istrateġija tal-UE, barra mill-appoġġ permezz tal-programmi LIFE u INTERREG, għall-bini tal-kapaċità u l-qsim tal-aħjar prattika, u opportunitajiet ġodda fil-Proċess Bijoġeografiku ġdid u l-Pjattaforma ta’ Natura 2000;

63.

iħeġġeġ lill-Kummissjoni Ewropea biex tinkludi r-rwol speċifiku tal-awtoritajiet lokali u reġjonali fl-azzjoni esterna tal-UE fir-rappurtar tagħha lis-CBD dwar id-Deċiżjoni X/22 bħala waħda mill-azzjonijiet ewlenin li l-KE/UE beħsiebha tenfasizza aktar fil-ġejjieni, bil-għan li tesplora – b’kooperazzjoni mal-KtR – mezzi addizzjonali kif tappoġġa kooperazzjoni deċentralizzata bejn l-awtoritajiet lokali u reġjonali Ewropej u dawk fil-pajjiżi li qed jiżviluppaw jew fil-pajjiżi tal-viċinat tal-UE fir-rigward tal-ġestjoni sostenibbli tal-bijodiversità u l-ekosistema, b’rabta mal-azzjoni (g) tad-Deċiżjoni X/22 tas-CBD.

19.8.2014   

MT

Il-Ġurnal Uffiċjali tal-Unjoni Ewropea

C 271/53

Relatur

Adam Struzik (PL/PPE), Marixxall tar-reġjun ta’ Mazovia

1.

jiġbed l-attenzjoni li għall-ewwel darba qed iħejji Opinjoni dwar l-eżekuzzjoni tal-baġit tal-UE, biex jippreżenta l-fehmiet tal-awtoritajiet lokali u reġjonali, kemm fir-rigward tal-perspettiva finanzjarja attwali kif ukoll għas-snin 2014-2020;

2.

jinforma li biex tittejjeb il-kwalità tal-opinjonijiet dwar l-eżekuzzjoni tal-UE din l-Opinjoni tħejjiet abbażi ta’ stħarriġ (1) fost l-awtoritajiet lokali u reġjonali, li kellu rispons sinifikanti, ħaġa li tirrifletti l-interess f’din il-kwistjoni u li tindika r-rieda għall-kooperazzjoni biex jinstabu soluzzjonijiet għall-problemi u l-potenzjal tal-approċċ territorjali;

3.

jenfasizza li l-baġit tal-UE huwa strument ferm importanti biex jinkisbu l-għanijiet tal-Unjoni Ewropea. Ir-rwol tiegħu għandu jiġi enfasizzat issa b’mod partikolari – fil-kuntest tal-kriżi finanzjarja li għadha għaddejja f’ħafna pajjiżi u l-bżonn li tiġi appoġġjata l-kompettività tal-ekonomija Ewropea, il-ħolqien tal-impjiegi u l-promozzjoni tal-valuri komuni Ewropej;

4.

jinnota li l-baġit tal-UE jipprovdi riżorsi biex jinkisbu l-għanijiet tal-Unjoni Ewropea kif stabbiliti fit-Trattati u miftiehma fl-ogħla livelli politiċi (bejn il-Kunsill, il-Parlament Ewropew u l-Kummissjoni Ewropea), iżda fl-istess ħin huwa strument kruċjali biex jintlaħqu l-għanijiet tal-politika pubblika mwettqa fil-livell tal-Istati Membri u l-miżuri li jittieħdu mill-awtoritajiet lokali u reġjonali. F’dan il-kuntest iqis li enfasi ikbar fuq ir-riżultati twassal għal għażla aħjar ta’ għanijiet u strumenti li jirriflettu s-sitwazzjonijiet differenti fid-diversi territorji tal-UE u b’hekk issaħħaħ l-effettività u l-effikaċja tal-baġit tal-UE;

5.

jinnota li l-awtoritajiet lokali u reġjonali qed jiġu involuti fl-implimentazzjoni tal-baġit tal-UE bħala benefiċjarji diretti u bħala maniġers tal-fondi Ewropej, iżda li huma responsabbli għall-eżekuzzjoni tal-baġit fil-livell lokali u reġjonali b’mod kondiviż mal-Istati Membri, il-Kummissjoni Ewropea u istituzzjonijiet oħra Ewropej;

6.

bi pjaċir jinnota li b’konformità mad-dispożizzjonijiet legali relatati mal-perjodu ta’ programmar 2014-2020, ir-rwol tad-dimensjoni territorjali fit-twettiq tal-politika Ewropea ssaħħaħ. Għalhekk ir-rwol tal-awtoritajiet lokali u reġjonali fit-twettiq tal-baġit tal-UE ser jiżdied iktar;

7.

f’din l-Opinjoni jiffoka fuq il-fondi li huma iktar importanti għall-awtoritajiet lokali u reġjonali, inkluż, qabel kollox, il-Fondi Ewropej Strutturali u ta’ Investiment (ESIF): il-Fond Ewropew għall-Iżvilupp Reġjonali (FEŻR), il-Fondi ta’ Koeżjoni, il-Fond Soċjali Ewropew (FSE), il-Fond Agrikolu Ewropew għall-Iżvilupp Reġjonali (FAEŻR) u l-Fond Ewropew Marittimu u tas-Sajd (FEMS), filwaqt li jindika l-importanza ta’ fondi oħra bħal dawk tal-programm Orizzont 2020 biex jintlaħqu l-għanijiet immirati fil-livell Ewropew, nazzjonali, reġjonali u lokali;

8.

jinnota li, fid-dawl tas-sitwazzjoni soċjoekonomika attwali, il-fatt li l-adozzjoni tal-qafas legali tal-fondi tal-UE għas-snin 2007-2013 saret iktar tard milli mistenni, u li ħafna politiki Ewropej tfasslu sabiex jinkisbu għanijiet strutturali fit-tul minflok ma jippromovu l-effetti tal-provvista fil-perjodu l-qasir, ir-rata ta’ eżekuzzjoni tal-baġit tal-UE għandha titqies bħala waħda sodisfaċenti;

9.

jinsab imħasseb li minkejja s-sodisfazzjon ġenerali bl-implimentazzjoni tal-baġit tal-UE, hemm differenzi konsiderevoli fir-rata ta’ implimentazzjoni tal-baġit bejn l-Istati Membri u d-diversi fondi;

10.

jinnota li d-differenzi fl-implimentazzjoni tal-Baġit tal-UE bejn il-pajjiżi huma r-riżultat ta’ ħafna fatturi – u ftit minnhom biss huma relatati direttament mal-eżekuzzjoni tal-infiq fil-livell tal-awtoritajiet lokali u reġjonali. Fost il-fatturi li għandhom impatt fuq ir-rata tal-eżekuzzjoni tal-Baġit tal-UE nsibu:

11.

jinnota li fil-fehma tal-awtoritajiet lokali u reġjonali l-Istati Membri għandhom l-ikbar impatt fuq it-twettiq tal-baġit tal-UE fil-livell Ewropew, filwaqt li fil-każ tal-proġetti kofinanzjati mill-baġit tal-UE hija l-kapaċità amministrattiva li għandha l-ikbar influwenza fuq ir-rata ta’ implimentazzjoni, segwita mid-disponibbiltà tal-fondi (pubbliċi u nazzjonali) għall-kofinanzjament u l-kumplessità tad-dispożizzjonijiet tal-fondi individwali;

12.

f’dan il-kuntest jinnota li l-ilment dwar ir-rata bil-mod tal-implimentazzjoni tal-proġetti kofinanzjati mill-baġit tal-UE minħabba l-kapaċità amministrattiva limitata tal-awtoritajiet lokali u reġjonali huwa biss parzjalment ġustifikat. L-awtoritajiet lokali u reġjonali huma konxji tal-kapaċità amministrattiva ħafna drabi inadegwata iżda r-rata ta’ implimentazzjoni fil-livell lokali u reġjonali tal-fondi tal-UE hija influwenzata anke minn kwistjonijiet li jaqgħu taħt il-kompetenzi tal-Istati Membri u l-Kummissjoni Ewropea;

13.

għalhekk jappella lill-Istati Membri biex isaħħu l-kooperazzjoni u jikkoordinaw l-attivitajiet tagħhom mal-awtoritajiet lokali u reġjonali fit-tħejjija tal-programmi operattivi u s-soluzzjonijiet speċifiċi ta’ implimentazzjoni, biex tiġi żgurata l-ogħla rata u kwalità possibbli fl-implimentazzjoni tal-fondi tal-UE u jitnaqqas kemm jista’ jkun il-piż fuq il-benefiċjarji;

14.

jappella lill-Kummissjoni Ewropea u lill-Istati Membri biex ikunu iktar proattivi fil-perspettiva finanzjarja l-ġdida, b’mod partikolari biex tintroduċi programmi ta’ informazzjoni u taħriġ għall-awtoritajiet lokali u reġjonali, bil-għan li tiżdied ir-rata u l-kwalità tal-implimentazzjoni tal-baġit tal-UE;

15.

jinnota li l-identifikazzjoni mill-Kummissjoni Ewropea tal-aħjar prattiki jista’ jkollha impatt fuq ir-rata ta’ implimentazzjoni tal-baġit, b’mod partikolari f’dawk l-oqsma li jinkorporaw ħafna fondi, programmi u msieħba, inklużi dawk implimentati taħt strumenti ġodda bħall-Investimenti Territorjali Integrati u l-Iżvilupp Lokali Mmexxi mill-Komunità (CLLD);

16.

barra minn hekk, jinnota possibbiltajiet oħra biex tiżdied ir-rata ta’ implimentazzjoni tal-proġetti kofinanzjati mill-UE fil-livell lokali u reġjonali:

17.

għandu fiduċja li r-regoli l-ġodda tal-ESIF se jkollhom impatt pożittiv fuq ir-rata ta’ implimentazzjoni tal-proġetti kofinanzjati mill-baġit tal-UE fil-livell tal-awtoritajiet lokali u reġjonali. Madankollu f’dan l-istadju ta’ tħejjija għall-perspettiva tal-perjodu 2014-2020 ma nistgħux nivvalutaw kif u f’liema oqsma ser issir din l-aċċellerazzjoni;

18.

jilqa’ b’sodisfazzjon il-pubblikazzjoni mill-Kummissjoni Ewropea tat-Tabella ta’ Valutazzjoni Finali tas-Semplifikazzjoni għall-QFP 2014-2020 (2);

19.

jappella biex fil-perjodu ta’ programmazzjoni li jmiss (wara l-2020), tittejjeb il-kwalità u l-effikaċja tad-djalogu bejn l-istituzzjonijiet Ewropej u l-Istati Membri; sabiex jitressqu abbozzi ta’ regolamenti, jitwettqu n-negozjati u jiġu konklużi d-diskussjonijiet kollha dwar il-proposti leġislattivi fi żmien tajjeb biex tkun tista’ tinbeda l-eżekuzzjoni tal-baġit tal-UE fil-bidu tal-2021;

20.

jinnota li m’hemmx informazzjoni statistika suffiċjenti dwar il-parteċipazzjoni tal-awtoritajiet lokali u reġjonali fl-implimentazzjoni tal-baġit tal-UE. Għalhekk jappella lill-Kummissjoni Ewropea u lill-Istati Membri biex b’mod regolari jippubblikaw l-informazzjoni dwar din il-kwistjoni (anke dwar ir-rapporti annwali ta’ implimentazzjoni u r-rapporti perjodiċi tal-koeżjoni) u biex jwettqu valutazzjonijiet regolari ta’ din il-kwistjoni li għandha tiġi diskussa bil-parteċipazzjoni tal-Kumitat tar-Reġjuni;

21.

jindika li skont l-informazzjoni tal-Kummissjoni Ewropea u l-Qorti Ewropea tal-Awdituri l-oqsma tal-iżbalji ewlenin huma:

22.

jinnota li l-ispiża tal-kontroll tan-nefqa tal-awditjar tal-koeżjoni tista’ tiġi stmata għal madwar EUR 860 miljun jew 0,2 % tal-baġit tal-FEŻR/FK u tal-FSE (3);

23.

huwa sodisfatt li mill-2009, il-Qorti tal-Awdituri sabet li l-livell ta’ irregolaritajiet fin-nefqa marbuta mal-koeżjoni li kien hemm għall-perjodu ta’ programmazzjoni 2007-2013 hija b’mod ċar inqas mil-livell osservat għall-perjodu 2000-2006 (4);

24.

iqis li l-livell tal-iżbalji f’dawn l-oqsma ma jirriflettix l-abbużi fl-użu ta’ riżorsi tal-UE (frodi) imma kemm il-gruppi ta’ benefiċjarji bħall-awtoritajiet lokali u reġjonali jikkonformaw mar-regoli miftiehma u l-kwalità tal-kontrolli u s-sistemi ta’ ġestjoni, kemm nazzjonali kif ukoll Ewropej;

25.

f’dan il-kuntest jinnota li t-tnaqqis fil-kwantità ta’ żbalji f’dawn iż-żewġ oqsma jeħtieġ il-koordinazzjoni bejn l-awtoritajiet lokali u reġjonali, l-Istati Membri, il-Kummissjoni Ewropea u istituzzjonijiet oħra Ewropej. Għalhekk iħeġġeġ kooperazzjoni iktar mill-qrib mhux biss fl-istadju tal-implimentazzjoni tal-programmi u l-proġetti kofinanzjati mil-UE iżda anke fit-tfassil tad-dispożizzjonijiet legali u l-linji gwida. Jirreferi għall-bżonn li s-servizzi tal-Kummissjoni jivverifikaw il-konformità tas-sistemi nazzjonali tal-eliġibbiltà u l-akkwist pubbliku mal-liġi Ewropea qabel ma jiġu implimentati l-programmi u l-proġetti mhux biss meta jitwettqu;

26.

ifakkar li l-korrezzjonijiet finanzjarji jiddaħħlu meta jiġu żvelati l-irregolaritajiet, ħaġa li mhux biss taffettwa r-rata ta’ implimentazzjoni tal-fondi tal-UE imma anke tinfluwenza l-probabbiltà li jinkisbu r-riżultati mistennija;

27.

bi pjaċir jinnota li r-regoli dwar l-eliġibbiltà tan-nefqa ser jiġu applikati b’mod iktar flessibbli matul il-perjodu ta’ programmazzjoni l-ġdid. F’dan il-kuntest, il-proposti fil-qafas tal-FSE, li jippermettu użu iktar estensiv ta’ pagamenti globali u rati fissi minflok ir-rimborż ta’ spejjeż reali, għandhom jitqiesu b’mod pożittiv. Dan għandu jkollu impatt pożittiv fuq it-tnaqqis tal-piż amministrattiv għall-benefiċjarji, bil-kundizzjoni li l-Kummissjoni Ewropea timmonitorja s-sitwazzjoni bir-reqqa sabiex tħeġġeġ lill-Istati Membri li jkunu qed jeżitaw li japplikaw il-mekkaniżmi semplifikati proposti;

28.

jappella biex, b’attenzjoni għall-fatt li l-ispejjeż semplifikati ma jintużawx għall-proġetti tal-akkwist pubbliku, il-Kummissjoni għandha teżamina l-possibbiltà li jiddaħħlu semplifikazzjonijiet simili għall-proġetti li jkunu finanzjati minn fondi apparti mill-FSE;

29.

bi pjaċir jinnota l-passi li ttieħdu diġà fil-livell tad-dispożizzjonijiet għar-regoli u l-proċeduri għall-ESIF kollu, iżda jqis li hemm inċertezza konsiderevoli fost l-awtoritajiet lokali u reġjonali dwar l-impatt tar-regolamenti l-ġodda biex jiffaċilitaw l-implimentazzjoni jew biex iżidu l-opportunitajiet għall-koordinazzjoni bejn l-ESIF u fondi esterni oħra bħall-programm Orizzont 2020. Dan jindika li hemm bżonn li l-Kummissjoni Ewropea, il-Qorti Ewropea tal-Awdituri u l-Istati Membri jorganizzaw programm ta’ informazzjoni u taħriġ inkluż taħriġ li jippromovi l-mudelli ta’ spiża semplifikata (5);

30.

iqis li għandu jkun possibbli li jitnaqqas l-ammont ta’ irregolaritajiet billi jinħoloq sett komuni ta’ regoli bażiċi għall-ESIF u billi l-Istati Membri jitħallew iħejju r-regoli tagħhom stess għall-eliġibbiltà tan-nefqa abbażi ta’ ħtiġiet lokali speċifiċi;

31.

jipproponi li fir-rigward tas-sistemi ta’ kontroll għandha tingħata ħafna iktar attenzjoni lill-koordinazzjoni bejn il-kontrolli mwettqa mid-diversi istituzzjonijiet ta’ ġestjoni u awditjar: l-awtoritajiet nazzjonali u reġjonali, il-Kummissjoni u l-Qorti tal-Awdituri. Ifakkar li l-kontrolli għandhom jaqdu l-kompitu tagħhom: li jtejbu l-kwalità tal-implimentazzjoni tal-proġetti. F’dan il-kuntest ifakkar li ħafna drabi l-korrezzjonijiet finanzjarji li jsiru mill-awtoritajiet lokali u reġjonali ma jkunux proporzjonali għall-iskala ta’ irregolaritajiet;

32.

jesprimi tħassib dwar il-fatt li minħabba nuqqas ta’ kapaċità amministrattiva u nuqqas ta’ riżorsi, l-awtoritajiet tal-awditjar dejjem aktar spiss qed iqabbdu kumpaniji tal-awditjar mis-settur privat għax-xogħol tagħhom ta’ awditjar (48 %) u b’hekk jgħollu n-nefqa pubblika globali tal-awditjar u jitilfu l-kontroll fuq il-programmar tal-proġetti;

33.

jinnota li kull sena l-baġit tal-UE qed ikollu dejjem iktar problemi biex jiżgura sors ta’ dħul stabbli mill-Istati Membri. Dan huwa dovut għall-ammont dejjem ikbar ta’ dejn mhux imħallas fl-aħħar ta’ kull sena baġitarja;

34.

iqis li din il-problema jista’ jkollha impatt fuq l-awtoritajiet lokali u reġjonali billi ttawwal il-perjodu ta’ stennija għar-rimborż tal-ispejjeż, ħaġa ta’ tħassib partikolari f’dawk il-pajjiżi l-iktar milquta mill-kriżi;

35.

iqis li l-akkumulazzjoni ta’ dejn mhux imħallas fil-baġit tal-UE hija dovuta:

36.

jinsab imħasseb li dan jista’ jwassal għal sitwazzjoni fejn tiżdied is-somma tar-RAL (6). Din il-problema tgħodd l-iktar għall-politika ta’ koeżjoni u l-politika għall-iżvilupp rurali. Jekk nassumu li m’hemmx telf materjali fl-allokazzjonijiet baġitarji tal-Istati Membri b’riżultat tal-applikazzjoni tar-regola ta’ diżimpenn awtomatiku, il-baġit għall-2014 u l-2015 jista’ jkollu jiżdied sew;

37.

iqis li l-prolongazzjoni tar-regola tad-diżimpenn awtomatiku għal N+3 snin matul il-perjodu ta’ programmazzjoni l-ġdid potenzjalment tista’ tiġġenera għadd ikbar ta’ RAL – iżda dan m’għandux jiġi interpretat bħala stedina biex jiżdiedu l-ammonti ammortizzati mill-Kummissjoni – iktar hemm bżonn li tittejjeb il-kwalità ta’ ppjanar finanzjarju f’kull livell – lokali, nazzjonali u Ewropew;

38.

jinnota li mod pożittiv biex tittejjeb il-kwalità tal-ippjanar finanzjarju fil-livell tal-awtoritajiet lokali u reġjonali jkun li jingħataw linji gwida iktar ċari (mill-Kummissjoni lill-Istati Membri) dwar l-użu ta’ ħlasijiet minn qabel mill-benefiċjarji u l-introduzzjoni ta’ regoli ġodda dwar il-politika ta’ koeżjoni flimkien ma’ skadenza ta’ 90 jum għall-allokazzjoni ta’ ħlasijiet lill-benefiċjarji;

39.

iqis li r-riżultati tal-infiq tal-fondi huwa dejjem iktar viżibbli fil-kuntest lokali u reġjonali milli fil-livell makroekonomiku. Madankollu ħafna drabi l-impatt tal-baġit tal-UE fuq l-iżvilupp tal-Ewropa, il-pajjiżi u r-reġjuni individwali, ma jistax jintwera sew minħabba l-kwalità xejn sodisfaċenti tal-analiżi u l-konċentrazzjoni tal-attenzjoni fuq ir-rata ta’ implimentazzjoni minflok il-ksib tar-riżultati ppjanati;

40.

f’dan il-kuntest bi pjaċir jinnota li fil-qafas tal-perspettiva finanzjarja 2014-2020 l-fondi kollha tal-UE, b’mod partikolari l-ESIF, ser ikunu ħafna iktar orjentati lejn ir-riżultati. Skont ir-riżultati tal-istħarriġ għandha tiżdied l-effikaċja tal-implimentazzjoni tal-fondi tal-UE u jiżdiedu l-possibbiltajiet li l-għanijiet tal-UE jinkisbu mill-interventi ffokati fuq it-temi u r-reġjuni;

41.

jinnota li orjentazzjoni ikbar lejn ir-riżultati għandha tinkiseb permezz ta’ rabta loġika bejn l-għanijiet stabbiliti, il-valuri tal-indikaturi, l-oqfsa ta’ prestazzjoni u s-sistemi ta’ monitoraġġ u ta’ valutazzjoni;

42.

madankollu, jiġbed l-attenzjoni li l-kunċett ta’ orjentazzjoni ikbar lejn ir-riżultati jkun jista’ jintuża sew biss jekk il-proċess tat-twaqqif ta’ miri u stadji (milestones) għall-interventi u l-valuri tagħhom fil-livell tal-programmi operattivi jkun ta’ kwalità għolja u jirrifletti mhux biss il-miri Ewropej iżda anke l-miri speċifiċi b’varjazzjonijiet reġjonali;

43.

peress li dan il-fokus iktar qawwi fuq ir-riżultati tal-baġit tal-UE huwa kemm importanti kif ukoll ġdid, jitlob lill-Kummissjoni Ewropea tniedi sensiela ta’ programmi ta’ informazzjoni u taħriġ dwar it-twaqqif tal-għanijiet, l-identifikazzjoni tal-fatturi u l-valuri tagħhom u l-ħolqien ta’ oqfsa ta’ prestazzjoni. Jindika li jeħtieġ li jsir iktar titjib fis-sistemi ta’ monitoraġġ u valutazzjoni fl-Istati Membri b’kunsiderazzjoni tar-rwoli u l-ħtiġiet tal-awtoritajiet lokali u reġjonali;

44.

iqis li fattur importanti ħafna għas-suċċess tal-kunċett ta’ orjentazzjoni ikbar lejn ir-riżultati huwa l-kwalità tan-negozjati għall-programmi operattivi, li għandhom jiġu ttrattati mill-Kummissjoni u mill-Istati Membri bħala proċess ta’ tagħlim reċiproki;

45.

itenni t-tħassib tiegħu dwar ir-Riżerva tal-Prestazzjoni li tammonta għal 6 % tal-baġit tal-koeżjoni taħt il-mira tal-Investiment għat-Tkabbir u l-Impjiegi u l-istess għall-iżvilupp rurali m’hijiex l-għodda adatta għal dawn ir-rekwiżiti;

46.

jinnota li żieda fl-effiċjenza u l-effikaċja tista’ tinkiseb biss bil-parteċipazzjoni attiva ta’ kull parti interessata – b’mod partikolari dawk responsabbli għall-biċċa l-kbira tal-ispejjeż u li għalhekk jagħmlu kontribut ikbar biex jinkisbu l-għanijiet tal-politiki Ewropej, b’mod partikolari l-awtoritajiet lokali u reġjonali;

47.

b’konformità mar-riżultati tal-istħarriġ, jiddikjara li lest ikun parteċipant attiv fl-iktar dibattiti importanti fil-livell Ewropew u msieħeb affidabbli tal-Istati Membri u l-istituzzjonijiet Ewropej fit-tħejjija u l-implimentazzjoni tal-baġit tal-UE. B’mod partikolari, dan ser jirrikjedi li jkun iktar involut fil-ħidma tal-istituzzjonijiet Ewropej l-oħra, anke fit-tħejjija tal-opinjonijiet proprji (bħal din l-Opinjoni), l-analiżijiet u r-rapporti dwar l-iktar kwistjonijiet importanti għar-residenti tal-UE.

19.8.2014   

MT

Il-Ġurnal Uffiċjali tal-Unjoni Ewropea

C 271/58

Relatur

Is-Sinjura Durdu (LU/ALDE), Membru tal-Kunsill Komunali tal-Komun ta’ Wincrange

1.

jenfasizza li din l-opinjoni tirrigwarda t-taqsima III tal-baġit tal-UE u ma tkoprix l-infiq amministrattiv taħt l-Intestatura V;

2.

ifakkar li qed jipprepara għat-tieni darba opinjoni fuq inizjattiva proprja dwar il-proċedura baġitarja annwali tal-UE;

3.

jinsisti li t-tfassil tal-baġit annwali tal-UE għandu impatt dirett fuq l-awtoritajiet lokali u reġjonali u l-finanzi pubbliċi tagħhom, u li dan huwa ta’ natura politika u strateġika;

4.

jiddispjaċih li l-Qafas Finanzjarju Pluriennali (QFP) 2014-2020 ġie adottat sitt xhur tard meta mqabbel mal-perjodu preċedenti 2007-2013 u jinnota li dan se jaffettwa l-assorbiment tal-approprjazzjonijiet ta’ impenn u l-profil tal-pagament fuq perjodu medju;

5.

jiddispjaċih li l-Kummissjoni Ewropea adottat il-proposta tal-baġit annwali tagħha għall-2015 fil-11 ta’ Ġunju u mhux qabel, jiġifieri kważi xahrejn iktar tard fis-sena milli kien il-każ qabel l-2013. Fil-fatt dan id-dewmien ifixkel il-possibbiltà li l-partijiet interessati differenti, inkluż il-Kumitat tar-Reġjuni, jipprovdu r-reazzjonijiet tagħhom fil-ħin qabel ma l-Kunsill jieħu l-pożizzjoni tiegħu;

6.

jinnota b’dispjaċir li hemm nuqqas ta’ statistika meħtieġa li tippermetti lill-Kumitat tar-Reġjuni jaqdi r-rwol konsultattiv tiegħu u jwettaq analiżi komparattiva bejn l-Istati Membri. Bit-tali informazzjoni, il-KtR jista’ jidentifika fejn jinsabu s-saħħiet u d-dgħufijiet tal-governanza f’diversi livelli u jagħmel proposti sabiex jiġi ottimizzat l-użu tal-baġit tal-UE;

7.

jixtieq li f’dan il-kuntest jirċievi mill-Kummissjoni aġġornamenti regolari dwar il-qagħda tal-implimentazzjoni tal-baġit tal-UE;

8.

itenni wkoll it-talba tiegħu lill-Kummissjoni Ewropea sabiex tipprovdi mill-aktar fis possibbli:

9.

jenfasizza n-numru importanti ta’ baġits ta’ emenda fl-aħħar snin u jemmen li dawn idgħajfu l-ġestjoni tajba u t-trasparenza tal-baġits annwali;

10.

jitlob lill-Kummissjoni Ewropea, il-Parlament Ewropew u l-Kunsill biex jarmonizzaw il-mod kif ikun ippreżentat it-tibdil fl-abbozzi ta’ baġit sabiex jiġu ffaċilitati l-possibbiltà li tinftiehem tal-proċedura, it-trasparenza tagħha u għaldaqstant il-proċess ta’ skrutinju demokratiku;

11.

ifakkar fil-kuntest tal-kriżi li qed tippersisti fil-maġġoranza tal-Istati Membri tal-UE, minkejja xi sinjali ta’ rkupru ekonomiku, u fir-restrizzjonijiet baġitarji li qed jiffaċċjaw l-awtoritajiet nazzjonali u sottonazzjonali; jinsisti li l-baġit għall-2015 jista’ jkollu rwol importanti fil-konsolidazzjoni tat-tendenza ta’ rkupru ekonomiku, fit-twettiq tal-investimenti meħtieġa għall-futur tal-Ewropa, u biex jittaffa l-impatt tal-kriżi fuq iċ-ċittadini Ewropej;

12.

ifakkar fir-rwol importanti tal-awtoritajiet lokali u reġjonali fl-irkupru ekonomiku u l-koeżjoni ekonomika, soċjali u territorjali fl-Unjoni peress li terz tal-infiq pubbliku u żewġ terzi tal-investimenti pubbliċi twettqu minnhom u dawn huma għaldaqstant assoċjati ma’ parti kbira tal-ġestjoni u/jew l-użu tal-baġit tal-UE. Dan jenfasizza l-impatt dirett tal-baġit Ewropew fuq il-baġit tal-awtoritajiet lokali u reġjonali Ewropej u juri l-effetti ħżiena li jista’ jkollu trasferiment tal-approprjazzjonijiet ta’ impenn fuq l-ekonomija reali;

13.

jinnota li l-progress li sar sabiex jintlaħqu l-għanijiet tal-Istrateġija Ewropa 2020 huma diżappuntanti u li l-baġit tal-2015 għandu rwol ewlieni fil-kisba ta’ dawn l-għanijiet;

14.

jenfasizza li l-impenji ġodda magħmula fl-2014 bħala l-ewwel sena tal-QFP ser ikunu dgħajfa, u li l-2015, bħala t-tieni sena tal-QFP, ser ikollha rwol ewlieni fis-suċċess tal-programmi ġodda pluriennali tal-2014-2020; ifakkar madankollu li jeħtieġ li jkun previst assorbiment baxx tal-impenji għas-sena finanzjarja l-ġdida 2015, aggravat b’mod speċjali bir-regola n+3, u għalhekk jistieden lill-Kummissjoni Ewropea u lill-Istati Membri, u bis-sehem tar-reġjuni, biex japprovaw malajr kemm jista’ jkun il-ftehimiet ta’ sħubija u l-programmi operazzjonali kollha sabiex tkun possibbli l-implimentazzjoni rapida tagħhom;

15.

jenfasizza l-importanza li jiġu antiċipati sew l-investimenti biex jittaffew l-effetti negattivi eventwali ta’ konċentrazzjoni fit-tmiem tal-perjodu u jiddispjaċih li l-Kummissjoni ma tipprevedix l-antiċipazzjoni ta’ approprjazzjonijiet oħra għajr dawk diġà previsti mill-Kummissjoni Ewropea, bħall-inizjattiva għall-impjieg taż-żgħażagħ, l-Orizzont 2020, Erasmus + u COSME. L-antiċipazzjoni tista’ tikkonċerna programmi oħra fejn il-ġestjoni hija waħda ċentrali, bħal pereżempju l-Faċilità Nikkollegaw l-Ewropa (u b’mod partikolari n-netwerks ta’ enerġija). Il-programmi ta’ ġestjoni deċentralizzata jeħtieġu ż-żmien biex jiġu implimentati u għalhekk ma jistgħux jiġu antiċipati għall-2014-2015;

16.

ikejjel il-kobor tal-problema tal-qgħad fost iż-żgħażagħ u jitlob lill-Kummissjoni Ewropea biex tiċċara l-proċeduri għall-implimentazzjoni tas-EUR 6 biljun ippjanati għall-inizjattiva għall-impjieg taż-żgħażagħ li għandhom ikunu kkonċentrati bejn l-2014 u l-2015 kif ukoll l-interazzjoni bejn il-ftehimiet ta’ sħubija u l-pjani nazzjonali għall-implimentazzjoni tal-Garanzija għaż-Żgħażagħ; jesprimi d-dubji tiegħu dwar il-kapaċità ta’ assorbiment ta’ EUR 6 biljun fl-2014-2015 minħabba d-dewmien fl-adozzjoni tal-programmi operazzjonali u l-għadd żgħir ta’ Stati Membri li għażlu l-antiċipazzjoni tal-infiq fl-1 ta’ Settembru 2013; jinsisti f’dan il-kuntest fuq il-ħtieġa li l-eżekuzzjoni ta’ din l-inizjattiva titressaq ‘il quddiem għall-bidu tal-2015; jistieden lill-Kummissjoni biex tiċċara liema ser ikunu l-ammonti allokati għal din l-isfida fit-tul mill-2016; jaqbel mal-fehma tal-Parlament Ewropew li l-opportunitajiet kollha ta’ finanzjament, inkluż il-marġni ġenerali ta’ impenji tal-QFP, għandhom ikunu riveduti sabiex tkun żgurata l-kontinwità ta’ din il-linja baġitarja wara l-2015;

17.

jitlob biex tinħoloq linja baġitarja speċifika għall-assistenza teknika lill-makroreġjun Adrijatiku-Joniku, wara l-eżempju tal-linja baġitarja maħluqa għall-makroreġjun Baltiku u dak tad-Danubju fil-livell ta’ EUR 2,5 miljun f’approprijazzjonijiet ta’ impenn u ta’ pagament fl-2014.

18.

jiddeplora l-akkumulazzjoni ta’ kontijiet mhux imħallsa (EUR 23,4 biljun għall-uniċi tliet fondi strutturali u ta’ koeżjoni fl-aħħar tal-2013); jiddispjaċih li dan il-fenomenu kompla jikber dawn l-aħħar snin, jinnota li huwa inaċċettabbli li l-Kummissjoni Ewropa ma tonorax l-obbligi tagħha u li l-benefiċjarji ma jistgħux jitħallsu lura minħabba nuqqas ta’ approprjazzjonijiet ta’ pagament suffiċjenti; jinsab kuntent li l-Kummissjoni Ewropea pproponiet li tuża l-approprjazzjonijiet ta’ pagament kollha għall-2015 mill-QFP; madankollu huwa inkwetat ħafna għall-ammont insuffiċjenti ta’ approprjazzjonijiet ta’ pagament u tal-kostrizzjonijiet fil-fluss tal-flus li filfatt ma jippermettux lill-Kummissjoni li tillikwida malajr it-talbiet kollha għal pagament, u dan jista’ joħloq problemi konsiderevoli fir-reġjuni;

19.

jiddispjaċih li l-limiti massimi għall-approprjazzjonijiet ta’ pagament jipprevjenu lill-UE milli tlaħħaq ma’ sitwazzjonijiet ta’ emerġenza, kif muri fil-qasam tal-politika umanitarja fejn ix-xogħol tal-organizzazzjonijiet umanitarji huwa affettwat minn pagamenti tard. Il-kontijiet mhux imħallsa minn dawn l-organizzazzjonijiet ammonta għal EUR 160 miljun fl-aħħar tal-2013;

20.

jesprimi tħassib dwar id-differenza bejn l-ammont ta’ approprjazzjonijiet ta’ impenn u ta’ pagament fil-kuntest ta’ żieda b’rata mgħaġġla ta’ impenji pendenti, jikkundanna d-defiċit baġitarju strutturali tal-UE u jistieden lill-Kummissjoni biex tfassal pjan ta’ azzjoni ċar li jibbilanċja l-baġit għall-bqija tas-sena baġitarja għall-2014-2020 u jirreferi f’dan ir-rigward għall-opinjoni tal-KtR dwar l-implimentazzjoni tal-baġit tal-UE (relatur is-Sur Struzik);

21.

jinsab kuntent li l-abbozz tal-baġit 2015 jagħti importanza kbira, bħal fl-2014, lill-pagamenti ta’ impenji li twettqu tul il-perjodu 2007-2013 sabiex tiġi evitata akkumulazzjoni ta’ pagamenti tard u li jiġi onorat il-massimu tal-pagamenti għall-perjodu 2014-2020 mill-2016;

22.

jissuġġerixxi li tingħata prijorità lir-rimbors tal-Istati Membri li jkunu sofrew l-aktar mill-kriżi ekonomika u li l-UE talbithom jagħmlu sforzi konsiderevoli biex jitnaqqas id-dejn pubbliku u l-iżbilanċi baġitarji, u li għandhom bżonn l-akbar appoġġ tal-UE sabiex jappoġġjaw it-tkabbir u jgħinu liċ-ċittadini l-aktar vulnerabbli tagħhom;

23.

jiddeplora l-fatt li l-abbozz ta’ baġit tal-Unjoni Ewropea għall-2015 ma jipprevedix l-użu tal-riżerva ta’ kontinġenza, li jista’ jikkontribwixxi biex iħaffef il-problemi tal-fluss tal-flus u jiffaċilita rimborż mgħaġġel tat-talbiet għal pagament;

24.

jitlob li l-marġni ġenerali għat-tkabbir u l-impjiegi fl-2014 u l-2015 jintużaw mill-2016 għat-taqsima dwar il-politika ta’ koeżjoni;

25.

huwa kuntent li jara grupp ta’ ħidma ta’ livell għoli dwar ir-riżorsi proprji tal-UE, b’mandat mill-Presidenti tal-Kummissjoni Ewropea, tal-Parlament Ewropew u tal-Kunsill tal-Unjoni Ewropea, li ġie stabbilit biex itejjeb is-sistema attwali ta’ dħul tal-baġit tal-UE li wriet il-limiti tagħha. Fil-fatt, huwa essenzjali li ssir riforma tas-sistema sabiex il-baġit tal-UE jiddependi inqas fuq il-kontribuzzjonijiet diretti mill-Istati Membri billi jiżdiedu r-riżorsi proprji tal-UE, u b’hekk jiġu ffaċilitati n-negozjati dwar l-approprjazzjonijiet ta’ pagament;

26.

itenni t-talba tiegħu sabiex tiġi organizzata konsultazzjoni tal-KtR dwar il-baġits għas-snin li jmiss;

27.

jixtieq l-involviment tal-KtR fil-laqgħat interistituzzjonali dwar il-qagħda tas-sitwazzjoni u l-prospetti ta’ eżekuzzjoni tal-baġit tul is-sena finanzjarja attwali u tul is-snin finanzjarji futuri kif stabbilit fil-punt 36 tal-anness tal-Ftehim Interistituzzjonali tal-QFP;

28.

jitlob biex jiġi rivedut il-qafas legali li jirregola l-perjodu ta’ pagament ta’ 60 jum sabiex dan isir vinkolanti għall-programmi ta’ ġestjoni kondiviża u biex tiġi applikata piena finanzjarja għall-awtoritajiet nazzjonali f’każ li ma jirrispettawx dan il-perjodu.

19.8.2014   

MT

Il-Ġurnal Uffiċjali tal-Unjoni Ewropea

C 271/61

Relatur

Is-Sur Siggs, Kunsillier, Kunsill tal-Kontea ta’ Somerset (UK/KRE)

Dokument ta’ referenza

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Il-Qafas ta’ Hyogo għal Azzjoni wara l-2015: l-Immaniġġar ta’ riskji biex tinkiseb reżiljenza – COM/2014/0216 final

1.

jilqa’ b’sodisfazzjon il-Komunikazzjoni mill-Kummissjoni, peress li d-diżastri għandhom impatti maġġuri fuq l-ekonomija, is-soċjetà, l-ekoloġija u s-sigurtà u joħolqu sfidi enormi għall-awtoritajiet lokali u reġjonali;

2.

jirrikonoxxi li politiki ta’ prevenzjoni u mmaniġġjar tar-riskji huma essenzjali biex jiżguraw tkabbir ekonomiku u żvilupp sostenibbli filwaqt li jipproteġu n-nies u li qafas internazzjonali mġedded għat-tnaqqis ta’ riskji tad-diżastri se jgħin b’mod sinifikanti biex jiġu indirizzati l-isfidi tal-ġejjieni, inklużi dawk li jirriżultaw mit-tibdil fil-klima, u jirrikonoxxi r-rwol tal-Unjoni Ewropea, u tal-awtoritajiet lokali u reġjonali tagħha, fl-isforzi ta’ mitigazzjoni u adattament għat-tibdil fil-klima u ta’ bini ta’ infrastrutturi reżiljenti;

3.

jinnota bi tħassib li fis-snin reċenti, id-diżastri żdiedu b’mod sinifikanti kemm fil-frekwenza kif ukoll fl-intensità. Bejn l-2002 u l-2012, id-diżastri naturali kkawżaw medja ta’ aktar minn 1 00  000 mewt fis-sena u hemm xejra li qed tikber f’telf ekonomiku globali dirett mad-dinja kollha, b’ammont medju ta’ telf ekonomiku ta’ iktar minn EUR 100 biljun fis-sena. Filwaqt li l-pajjiżi kollha huma vulnerabbli, pajjiżi li qed jiżviluppaw isofru telf akbar tal-ħajja u nazzjonijiet żviluppati jkollhom aktar spejjeż ekonomiċi. Fl-UE d-diżastri naturali kkawżaw 80  000 mewt u EUR 95 biljun f’telf ekonomiku matul l-aħħar deċennju;

4.

josserva li għalkemm l-UE llum taqdi rwol aktar attiv fil-qasam tal-protezzjoni ċivili wara d-dħul fis-seħħ tal-Mekkaniżmu tal-Unjoni għall-Protezzjoni Ċivili, l-esperjenza tal-UE qed issir aktar kumplessa minħabba l-firxa ta’ sistemi amministrattivi u legali varjati għall-immaniġġjar tal-mekkaniżmi nazzjonali ta’ protezzjoni ċivili differenti madwar l-UE;

5.

jirrikonoxxi li l-impatti tat-tipi kollha ta’ diżastri jistgħu jitnaqqsu permezz tal-ġestjoni tar-riskji tad-diżastri u l-bini ta’ reżiljenza f’infrastrutturi eżistenti u futuri, madankollu dawk li jfasslu l-politika qed jiffaċċjaw għażliet fiskali, ambjentali, soċjali u kulturali diffiċli dwar kif jiżguraw sikurezza bażika u kwalità tal-ħajja minħabba t-theddida ta’ diżastri minn perikli naturali kif ukoll minn attakki intenzjonali. Fl-istess waqt, hemm bżonn li tingħata attenzjoni speċjali lil sfidi ġodda;

6.

iqis li żoni kostali u marittimi jiffaċċjaw sfidi addizzjonali fit-tnaqqis tar-riskji tad-diżastri. Minħabba li huma esposti għal livelli tal-baħar li qed jogħlew, tisħin tal-oċeani, mewġ għoli, xita fit-tul u nirien fl-ambjent naturali, dawn il-postijiet huma ta’ spiss inqas aċċessibbli u l-operazzjonijiet ta’ salvataġġ jistgħu jkunu iktar ikkomplikati minn bnadi oħra. Jistieden lill-UE biex tirrifletti dwar din il-vulnerabbiltà fil-kuntest tal-istrateġija tal-UE għat-turiżmu marittimu u tal-kosta. Bl-istess mod, iż-żoni bi żvantaġġi ġeografiċi u demografiċi jiffaċċjaw sfidi addizzjonali, l-istess bħaż-żoni muntanjużi u ż-żoni ta’ valur ambjentali speċjali; dawn iż-żoni jistgħu jiffaċċjaw riskji akbar ta’ diżastri naturali, bħal uqugħ tal-art (landslides), nirien fil-foresti, kif ukoll nixfiet, li jwasslu għal miżuri ta’ prevenzjoni, stat ta’ tħejjija u intervenzjoni kumplessi;

7.

josserva li l-konsegwenzi traġiċi u fatali ta’ katastrofi fl-Ewropa ta’ spiss jiggravaw minħabba żewġ fatturi ewlenin: il-fraġilità intrinsika tat-territorju u l-iżvilupp mhux adatt fil-passat;

8.

jitlob impenn imġedded biex fil-pjanijiet ta’ żvilupp settorjali jiġu integrati politiki għat-tnaqqis tar-riskji ta’ diżastri sabiex jiġi żgurat approċċ komprensiv għall-bini tar-reżiljenza;

9.

jirrikonoxxi li l-aċċess għal informazzjoni sħiħa, affidabbli u preċiża huwa essenzjali biex wieħed jifhem id-diżastri u jitgħallem minnhom u b’hekk jitwettqu pjani għall-bini ta’ reżiljenza, il-mitigazzjoni tal-impatt ta’ avvenimenti futuri u l-iżvilupp ta’ każijiet għal investiment finanzjarju. Għalkemm jinġabru rapporti dwar riskji u perikli, l-integrazzjoni tagħhom kemm fi ħdan u bejn il-pajjiżi teħtieġ li tittejjeb;

10.

jistieden lill-awtoritajiet lokali u reġjonali biex japplikaw bis-sħiħ politika dwar aċċess miftuħ għad-data u jippermettu ż-żamma tal-informazzjoni fuq raġunijiet ta’ difiża, sigurtà jew kummerċjali biss meta dan ikun leġittimu u strettament meħtieġ. L-interessi kummerċjali m’għandhomx jieħdu preċedenza fuq is-sikurezza u l-benessri pubbliċi;

11.

jirrakkomanda aktar kollaborazzjoni u investiment f’sistemi ta’ informazzjoni, kif ukoll fil-konnessjoni transkonfinali tagħhom, u ħidma mas-settur privat (li għandu informazzjoni sinifikanti relatata mad-diżastri) sabiex id-data dwar id-diżastri u l-ġestjoni tagħhom tkun tista’ tiġi reġistrata, meħuda, analizzata u użata għall-pjani u l-mitigazzjoni tal-effetti ta’ diżastri oħra fil-ġejjieni;

12.

jirrikonoxxi li l-awtoritajiet lokali u reġjonali għandhom responsabbiltà politika u istituzzjonali għall-protezzjoni taċ-ċittadini tagħhom u ħafna drabi huma l-ewwel livell ta’ governanza li jirrispondi f’każ ta’ emerġenza għax jipprovdu servizzi bażiċi u sorveljanza u ġestjoni tad-diżastri hekk kif iseħħu. L-awtoritajiet lokali u reġjonali huma fuq quddiem fil-ġestjoni ta’ diżastri, u huma responsabbli għall-prevenzjoni u għal rispons u operazzjonijiet ta’ salvataġġ immedjati u għandhom għarfien iddettaljat tal-lokalità u l-komunitajiet tagħhom. Huma jeħtieġu l-għarfien, għodod, kapaċitajiet u riżorsi biex iwettqu r-responsabbiltajiet tagħhom biex jipproteġu l-ħajja, il-proprjetà, l-ekonomija u l-ambjent;

13.

josserva li r-responsabilità għall-protezzjoni ċivili ħafna drabi hija devoluta fil-livell lokali u reġjonali mingħajr biżżejjed fondi biex jissodisfaw il-ħtiġijiet, u jitlob lill-gvernijiet nazzjonali sabiex jipprovdu biżżejjed fondi skont l-obbligi;

14.

jitlob li jsir studju wiesa’ dwar kif l-aħjar li tissaħħaħ il-kapaċità tal-awtoritajiet lokali u tingħata spinta lill-parteċipazzjoni tagħhom fit-teħid ta’ deċiżjonijiet dwar ir-reżiljenza u t-tnaqqis tar-riskju ta’ diżastri;

15.

jirrikonoxxi li d-diżastri jistgħu jkunu lokali, reġjonali, nazzjonali jew internazzjonali fl-iskala u l-impatt, u għalhekk jirrakkomanda li jiġu stabbiliti protokolli li jiżguraw koordinazzjoni aħjar bejn il-politiki u l-pjanijiet reġjonali u nazzjonali għar-riskji ta’ diżastri, li jkun hemm integrazzjoni aħjar ta’ dawk li jfasslu l-politika u dawk li jippjanaw għal-lokal, u li jiġu miftiehma proċeduri ta’ eskalazzjoni għal diżastri li jħallu impatt fuq aktar minn żona reġjonali waħda; jinnota li jistgħu jiġu kwantifikati l-fatturi ta’ riskju u jenfasizza li d-densità tal-popolazzjoni tinfluwenza r-riskji;

16.

jiġbed l-attenzjoni għat-theddid u d-diżastri transkonfinali li jolqtu reġjuni f’żewġ Stati Membri jew aktar tal-UE, u jitlob kooperazzjoni mtejba bejn reġjuni ġirien biex jiżguraw li l-isforzi tal-prevenzjoni jkunu komuni u li l-attivitajiet ta’ rispons jiġu kkoordinati. Fil-livell lokali u reġjonali, hemm bżonn jinħolqu sistemi ta’ informazzjoni effettivi fiż-żoni konfinali biex jibagħtu l-informazzjoni bejn fruntiera u oħra f’ħin reali u biex jikkollegaw flimkien lill-korpi responsabbli għall-ġestjoni tal-kriżijiet;

17.

josserva li l-awtoritajiet lokali u reġjonali għandhom tliet rwoli distinti fir-rigward tal-ġestjoni tad-diżastri:

18.

jirrakkomanda li l-investiment għat-titjib fl-istat tat-tħejjija u r-reżiljenza – li jikkunsidra l-probabbiltà li jseħħ diżastru – huwa l-aktar mod effettiv u kosteffikaċi biex jitnaqqsu l-impatt u l-ispiża tar-rispons u l-irkupru mid-diżastri. Dan jinkludi investiment f’infrastruttura reżiljenti li tkun tiflaħ għal diżastri inklużi binjiet, trasport (toroq, ferroviji, ajruporti), servizzi (komunikazzjonijiet, provvisti tal-enerġija, provvisti tal-ilma, drenaġġ) u infrastruttura soċjali;

19.

jinnota li l-UE għandha Fond ta’ Solidarjetà biex jipprovdi l-assistenza u jinsab sodisfatt li l-bidliet għar-regolament proposti mill-Kumitat tar-Reġjuni ġew inkorporati fil-verżjoni finali. Issa huwa possibbli li taħt il-fond, pereżempju, infrastruttura li tkun saritilha l-ħsara tintradd lura lil stat li fih tkun tista’ tirreżisti diżastri futuri jew, saħansitra, li din l-infrastruttura tittieħed post ieħor. Madanakollu l-Kumitat tar-Reġjuni jappella biex il-Fond ta’ Solidarjetà jiġi allokat riżorsi finanzjarji adegwati fil-baġit tal-UE. Il-Kumitat tar-Reġjuni jistieden ukoll lill-Istati Membri biex jagħmlu l-aħjar użu possibbli mill-opportunitajiet għal finanzjament ta’ proġetti ta’ prevenzjoni ta’ riskji ta’ diżastri u ta’ ġestjoni tar-riskji mħejjija fi ħdan il-qafas 2014-2020;

20.

jifhem li bidla fl-approċċ lil hinn minn enfasi fuq ir-rispons u l-irkupru għall-prevenzjoni, l-istat ta’ tħejjija u r-reżiljenza jitlob mentalità u approċċ ġodda fl-allokazzjoni ta’ riżorsi finanzjarji. Dan jirrikjedi investiment ippjanat bil-quddiem pjuttost milli nefqa reattiva. Dan l-approċċ, li jikkunsidra l-probabbiltà li jseħħ diżastru, se jkun aktar kosteffikaċi u ta’ benefiċċju fuq perjodu ta’ żmien itwal;

21.

jirrikonoxxi d-diffikultajiet ta’ kwantifikazzjoni, kejl u stima tal-valur tar-reżiljenza tal-komunitajiet (ħlief wara li jseħħ diżastru) u biex jiġi preżentat każ kummerċjali għall-investiment fir-reżiljenza;

22.

jemmen bis-sħiħ li l-applikazzjoni ta’ kodiċijiet tal-kostruzzjoni, ippjanar bil-galbu u monitoraġġ tal-użu tal-art jistgħu jnaqqsu l-vulnerabilità b’mod sinifikanti;

23.

jistieden lill-Kummissjoni twettaq riċerka u tipprovdi gwida dwar kif l-awtoritajiet lokali u reġjonali jistgħu bl-aħjar mod jiżguraw li l-iżviluppi kollha (inkluż binjiet, trasport u servizzi) ikunu ppjanati abbażi tar-reżiljenza; filwaqt li jirrikonoxxi li l-awtoritajiet lokali u reġjonali huma responsabbli għall-monitoraġġ tal-applikazzjoni u l-konformità ma’ standards ta’ disinn reżiljenti;

24.

jirrikonoxxi li minkejja li r-reżiljenza, filwaqt li ssir valutazzjoni raġonevoli tal-probabbiltà li jseħħ diżastru, tkun kosteffikaċi fuq perjodu ta’ żmien twil, l-iżvilupp ta’ reżiljenza għal diżastri jista’ jeħtieġ fondi ta’ kapital sostanzjali. Strutturi aktar sikuri jeħtieġu bidliet fid-disinn li tipikament jiswew minn 10 sa 50 % aktar biex jinbnew (u aktar jekk ikun meħtieġ jiġu rilokati l-grilja tal-enerġija, jew in-netwerks tat-trasport jew l-ilma); jenfasizza li azzjoni issa hija ħafna aktar kosteffikaċi mit-tagħmir modifikat f’binjiet perikolużi. L-UNISDR (Uffiċċju tan-Nazzjonijiet Uniti għat-Tnaqqis tar-Riskju tad-Diżastri) jistma li l-proporzjon l-ispiża/il-benefiċċju huwa ta’ 1:4. Barra minn hekk, sistemi reżiljenti ġodda jeħtieġu teknoloġija ġdida u t-taħriġ, li ta’ spiss mhumiex faċilment disponibbli f’reġjuni inqas żviluppati;

25.

jitlob lill-awtoritajiet lokali u reġjonali biex jivvalutaw ir-reżiljenza ta’ strutturi eżistenti, partikolarment dawk li fihom servizzi essenzjali bħal sptarijiet u impjanti tat-trattament tal-ilma;

26.

jitlob lill-Kummissjoni sabiex twettaq studju dwar kif l-aħjar jiġu żviluppati komunitajiet reżiljenti li huma lesti, mgħammra u kapaċi jsostnu lilhom innifishom meta jinqalgħu d-diżastri;

27.

jilqa’ b’sodisfazzjon l-enfasi tal-Kummissjoni fuq ir-reżiljenza u jaqbel li din tippermetti lill-awtoritajiet lokali, reġjonali u nazzjonali biex jippreparaw aħjar għal diżastri permezz tal-ippjanar ta’ kontinġenza u evalwazzjonijiet tar-riskju (mill-awtoritajiet lokali u reġjonali, in-negozji u gruppi oħra) biex inaqqsu t-telf mid-diżastri, minflok jistennew li jseħħ avveniment u jħallsu għalih wara;

28.

iwiegħed l-appoġġ għall-“Kampanja għal Bliet Reżiljenti” tan-NU u l-għodda ta’ valutazzjoni proprja tagħha, li tippermetti lill-gvern lokali li janalizza r-reżiljenza tiegħu kontra sett ta’ 10 fatturi essenzjali;

29.

Jieħu nota tad-Dikjarazzjoni ta’ Venezja dwar il-bini tar-reżiljenza fil-livell lokali għal protezzjoni tal-wirt kulturali u għal strateġiji ta’ adattament għat-tibdil fil-klima tal-UNISDR 2012, u tal-ħtieġa li nirriflettu dwar kif nipproteġu aħjar il-patrimonju kontra d-diżastri;

30.

jirrikonoxxi li d-diżastri se jkomplu jseħħu u jistgħu jiżdiedu fil-futur. Ir-rapporti ta’ kunsens dwar it-tibdil fil-klima maħruġa mill-Grupp Intergovernattiv ta’ Esperti dwar it-Tibdil fil-Klima jindikaw li ftit hemm dubju dwar il-ħtieġa li wieħed jippjana u jibni infrastruttura li tista’ twieġeb għar-realtà tat-tibdil fil-klima;

31.

josserva li ħafna diżastri huma kkaratterizzati minn nuqqas ta’ komunikazzjoni u ġestjoni. Il-ġestjoni ta’ diżastru hija kompitu interdixxiplinari li jinvolvi firxa ta’ organizzazzjonijiet. Jilqa’ bil-qawwa, għalhekk, l-inklużjoni fit-test tal-Mekkaniżmu tal-Unjoni għall-Protezzjoni Ċivili ta’ dispożizzjonijiet li jistabbilixxu programm ta’ taħriġ għall-membri ta’ timijiet tal-intervent u workshops, seminars u proġetti pilota għall-formazzjoni ta’ mexxejja tal-protezzjoni ċivili;

32.

iħeġġeġ lill-awtoritajiet lokali u reġjonali sabiex jirrikonoxxu r-rwol, ta’ spiss sottovalutat, li s-settur volontarju u komunitarju jista’ jkollu biex jipprovdi reżiljenza wara diżastru, u biex joħolqu pjani biex din ir-riżorsa tiġi żviluppata u tintuża. Ċittadini infurmati u sensibilizzati huma komponent ewlieni fil-bini tar-reżiljenza; jirrikonoxxi li hija sinifikanti d-dimensjoni tal-ġeneru fil-bini ta’ komunitajiet reżiljenti;

33.

jirrikonoxxi li l-awtorità lokali u reġjonali għandha d-dmir li żżomm lill-komunità tagħha infurmata dwar riskji potenzjali jew li qed jiżviluppaw u li tippjana minn qabel mal-partijiet interessati rilevanti dwar kif tikkomunika dawn it-theddidiet mingħajr ma tqajjem biża’ jew tgerrex negozji prospettivi;

34.

jirrikonoxxi r-rwol dejjem akbar tat-teknoloġija tal-mowbajl, tal-Internet u tal-midja soċjali fil-komunikazzjoni ta’ informazzjoni dwar diżastri u jitlob li jsiru studji ulterjuri dwar l-aħjar prattiki fl-użu tal-komunikazzjoni diġitali f’każ ta’ diżastri. Il-komunikazzjoni diġitali qed issir dejjem aktar il-mezz li bih l-individwi u l-komunitajiet jaċċessaw l-aħbarijiet u l-informazzjoni u ta’ sikwit se tkun l-ewwel sors ta’ informazzjoni. Dawn il-mezzi ta’ komunikazzjoni jistgħu jkunu wkoll rotot importanti għal kisba ta’ informazzjoni mingħand il-vittmi u għal koordinazzjoni tal-attivitajiet ta’ rispons;

35.

jaqbel li l-attivitajiet ta’ sensibilizzazzjoni huma essenzjali biex jinxtered il-messaġġ fost in-nies lokali. Huwa importanti li jiġu involuti l-partijiet kollha tal-komunità, li tibda l-ħidma mill-aktar fis possibbli u li l-komunitajiet jitħeġġu jippjanaw għall-awtoassistenza peress li ħafna drabi l-għajnuna esterna tieħu perjodu sinifikanti biex tasal. Għalhekk, huwa fundamentali wkoll li jiġu stabbiliti programmi u pjani speċifiċi ta’ tħejjija għal emerġenzi fl-iskejjel, sabiex ikun hemm sensibilizzazzjoni u komprensjoni sa minn età żgħira sabiex ikun hemm żieda fil-livell ta’ reżiljenza tal-popolazzjoni;

36.

jitlob lill-awtoritajiet lokali u reġjonali biex ifasslu kanali ta’ komunikazzjoni effettivi biex jintlaħqu fil-ħin dawk l-iktar vulnerabbli u biex jistabbilixxu mekkaniżmi sabiex jinġiebu f’post sikur il-persuni matul u wara avvenimenti estremi tat-temp u katastrofi oħra. Is-soċjetajiet Ewropej qed jixjieħu u l-proporzjon tal-popolazzjoni b’mobilità mnaqqsa jew diżabilitajiet qed jiżdied. F’każ ta’ diżastru, dawn huma bosta drabi l-aktar vulnerabbli u l-ewwel vittmi;

37.

jitlob li jsiru investiment u taħriġ (prattika) għad-diżastri għax dawn l-attivitajiet isalvaw il-ħajjiet u jnaqqsu l-interruzzjoni. It-taħriġ immirat u l-edukazzjoni għall-ħaddiema tal-protezzjoni ċivili, bħal dawk immirati għall-mexxejja tal-komunità, u għal prattikanti tal-kura soċjali jew medika, kif ukoll għas-servizzi tas-salvataġġ u tat-tifi tan-nar, jistgħu jnaqqsu l-imwiet matul u wara l-kriżi;

38.

jirrikonoxxi li l-irkupru wara diżastru jista’ jieħu bosta snin u li l-assigurazzjoni taqdi rwol importanti fl-iżgurar ta’ rkupru f’waqtu u effettiv. Jenfasizza r-rwol pożittiv li s-sħubijiet pubbliċi privati jistgħu jaqdu u jappella għall-promozzjoni tagħhom. Assigurazzjoni privata tista’ tikkontribwixxi għal finanzi pubbliċi sostenibbli u tista’ taqdi rwol pożittiv fil-ġestjoni tar-riskju ta’ diżastri. Din tgħin biex jitnaqqas l-impatt ekonomiku u tiffaċilita l-irkupru. Poloz tal-assigurazzjoni mfasslin tajjeb jistgħu wkoll jiskoraġġixxu mġiba riskjuża u jippromovu s-sensibilizzazzjoni dwar ir-riskji. Is-sħubijiet pubbliċi privati għandu jkollhom oqsma definiti tajjeb u objettivi miftiehma minn qabel;

39.

jesprimi tħassib li minħabba li r-riskji qed jiżdiedu, l-assigurazzjoni tista’ ma tibqax disponibbli jew affordabbli f’ċerti żoni. Dan imbagħad jista’ jkompli jikkontribwixxi għal vulnerabbiltà u jiggrava s-suxxettibilità tas-soċjetà, u b’hekk l-awtoritajiet pubbliċi jitħallew b’espożizzjoni finanzjarja potenzjalment kbira;

40.

Jissuġġerixxi li l-irkupru huwa opportunità biex tiġi inkluża r-reżiljenza futura fil-bini mill-ġdid tad-djar u l-infrastruttura; speċjalment fiż-żoni li huma soġġetti perjodikament għad-diżastri naturali (pereżempju bliet u villaġġi maġenb ix-xmajjar). Hemm bżonn ta’ azzjoni fil-livell tal-Istati Membri biex tiġi garantita d-disponibbiltà tal-fondi, forsi permezz ta’ sħubijiet, mhux biss għax-xogħol tal-irkupru iżda wkoll għal miżuri li jipprovdu l-ħarsien minn diżastri futuri;

41.

Josserva li l-awtoritajiet lokali u reġjonali għandhom rwol matul l-irkupru biex jimmaniġġjaw l-aspettattivi, id-diżappunti u l-kwistjonijiet tas-saħħa ta’ dawk milquta jew spostati minn diżastri u dan għandu bżonn ta’ riżorsi kontinwi;

42.

iħeġġeġ lill-Kummissjoni biex tinkorpora bis-sħiħ il-bini ta’ reżiljenza fl-għajnuna umanitarja u l-politiki tal-iżvilupp tagħha;

43.

iħeġġeġ biex il-qafas Hyogo għal azzjoni wara l-2015 iqis ir-rabta bejn ir-riskji u r-reżiljenza u l-mobilità tal-bniedem. Jinnota li d-diżastri ta’ sikwit iwasslu għal flussi tal-popolazzjoni u li dan jista’ jkollu konsegwenzi negattivi sistematiċi għall-komunitajiet ta’ oriġini u ta’ destinazzjoni;

44.

jirrikonoxxi li fil-pajjiżi li qed jiżviluppaw, l-oqfsa għall-ippjanar huma inqas żviluppati u l-muturi ekonomiċi joħolqu pressjonijiet ta’ żvilupp kbar. Awtoritajiet governattivi fil-livelli kollha jridu jirrealizzaw li l-iżvilupp jista’ jżid ir-riskji ta’ diżastri, u fejn huma jippermettu l-iżvilupp għandhom jaċċettaw żieda konkomitanti ta’ dawn ir-riskji;

45.

jilqa’ b’sodisfazzjon li l-prinċipji tas-sussidjarjetà u l-proporzjonalità huma rispettati. Il-protezzjoni ċivili hija qasam fejn l-Unjoni taġixxi biex tappoġġja, tikkoordina jew tissupplimenta l-azzjoni tal-Istati Membri tagħha. Barra minn hekk, in-natura mhux vinkolanti tal-Komunikazzjoni u l-prinċipji mħabbra fiha mill-Kummissjoni jikkonfermaw il-proporzjonalità;

19.8.2014   

MT

Il-Ġurnal Uffiċjali tal-Unjoni Ewropea

C 271/66

Relatur

is-Sur Varacalli, Sindku ta’ Gerace (IT/PSE)

Dokument ta’ referenza

Rapport tal-Kummissjoni lill-Parlament Ewropew, lill-Kunsill u lill-Kumitat Ekonomiku u Soċjali Ewropew dwar ir-Riżorsi Ġenetiċi Agrikoli – mill-konservazzjoni sal-użu sostenibbli – COM(2013) 838 final

1.

jinnota li l-istrateġija Ewropea dwar il-konservazzjoni u l-użu sostenibbli tar-riżorsi ġenetiċi fl-agrikultura fir-rapport tal-Kummissjoni Ewropea, mibgħut lill-Parlament Ewropew, lill-Kunsill u lill-Kumitat Ekonomiku u Soċjali Ewropew, tiġi mill-impenji li ħadet l-Unjoni Ewropea biex twaqqaf it-telf progressiv tal-bijodiversità fit-territorju Ewropew sal-2020.

2.

jinnota li l-istess strateġija toriġina b’mod partikolari minn kif kienet definita qabel mill-Konvenzjoni dwar id-Diversità Bijoloġika adottata f’Rio de Janeiro fl-1992, li minnha rriżultaw, tul iż-żmien, ftehimiet internazzjonali ta’ implimentazzjoni sinifikanti, speċjalment il-Protokoll ta’ Cartagena (2000), it-Trattat Internazzjonali tal-FAO dwar ir-Riżorsi Ġenetiċi tal-Pjanti għall-Ikel u l-Agrikoltura (2004) u, aktar riċenti, il-Protokoll ta’ Nagoya dwar l-aċċess għall-benefiċċji li jirriżultaw mill-użu tal-bijodiversità u t-tqassim tagħhom (2010);

3.

jikkunsidra li l-intervent Ewropew jikkonċentra fuq żewġ linji operattivi: minn naħa waħda l-politika tal-iżvilupp rurali, b’firxa wiesgħa ta’ miżuri agroambjentali u attività sfiqa tas-sħubija Ewropea; min-naħa l-oħra l-politika tar-riċerka u l-innovazzjoni, issa permezz tal-programm qafas Orizzont 2020, li għandu l-għan li jtejjeb l-ispeċifikazzjoni u l-irfinar tal-għarfien dwar id-diversità ġenetika fl-agrikoltura, u li dan l-intervent għandu wkoll jistrieħ fuq ir-regolamentazzjoni tal-prodotti veġetali u li ġejjin mill-annimali kif ukoll fuq il-politika agrikola nnifisha biex tiġi żgurata d-diversità tal-wirt ġenetiku użat mill-bdiewa;

4.

jikkunsidra li t-telf progressiv tal-bijodiversità, għal diversi raġunijiet konverġenti, jolqot b’mod partikolari l-komunitajiet lokali u l-istituzzjonijiet li jirrappreżentawhom, minħabba l-effett li t-telf tal-bijodiversità għandu fuq it-territorji;

5.

ifakkar, f’dan ir-rigward, li l-awtoritajiet reġjonali u lokali għandhom għarfien espert sinifikanti dwar il-ġestjoni tal-bijodiversità fit-territorju tagħhom, bħal, pereżempju, fis-settur kumplessiv li joħroġ l-awtorizzazzjonijiet għall-użu tar-riżorsi naturali, kif ukoll il-prerogattivi istituzzjonali tal-istess awtorità għall-ġestjoni tas-siti Natura 2000, li huma wieħed mis-sisien ewlenin ta’ azzjoni tal-UE dwar il-bijodiversità. Eżempju ieħor huwa l-kompetenza fir-rigward tal-kofinanzjament ta’ programmi ta’ żvilupp rurali kif ukoll il-kooperazzjoni transkonfinali sabiex jitjiebu l-ġestjoni u l-iskambju ta’ informazzjoni, peress li ħafna riżorsi ġenetiċi jistgħu jiġu kondiviżi fiż-żoni transkonfinali;

6.

iqis għalhekk li għandu dejjem, u b’mod aktar konkret jiġi segwit l-involviment istituzzjonali tal-awtoritajiet lokali u reġjonali fil-programmi mmirati lejn il-konservazzjoni u l-użu sostenibbli ta’ riżorsi ġenetiċi fl-agrikultura, flimkien mad-disponibbiltà ta’ strumenti legali ta’ intervent effiċjenti u biżżejjed riżorsi finanzjarji għal intervent effettiv;

7.

jirrimarka, fir-rigward tal-kwistjoni speċifika marbuta mar-riżorsi finanzjarji, li l-Kummissjoni tenfasizza fil-konklużjonijiet tar-Rapport tagħha (p. 9), li “Hekk kif nersqu lejn l-2020, ir-riżorsi ġenetiċi jafu jserrħu fuq riżorsi finanzjarji akbar u firxa usa’ ta’ opportunitajiet ta’ finanzjament kif previst mill-Iżvilupp Rurali u l-Orizzont 2020, kif ukoll minn politiki oħrajn tal-Unjoni”; madanakollu, jeħtieġ li din l-informazzjoni tkun oġġettivament verifikabbli f’termini tal-effettivà u d-disponibbiltà konkreta ta’ aktar riżorsi u li dawn ir-riżorsi jkunu disponibbli mill-aktar fis possibbli, b’kunsiderazzjoni wkoll li l-maġġoranza tal-fondi tal-Unjoni mmirati għall-konservazzjoni tad-diversità ġenetika fl-agrikoltura huma fis-settur tar-riċerka;

8.

jenfasizza fir-rigward tal-prospetti tal-attivitajiet li jinsabu fir-Rapport, l-importanza tal-qafas legali u istituzzjonali li fih jiġi ttrattat is-suġġett tar-riżorsi ġenetiċi, u li fil-kuntest Ewropew issir enfasi dwaru essenzjalment fl-oqsma msemmija, dak tal-politiki tal-iżvilupp rurali u dak marbut mal-qafas tal-UE għar-riċerka u l-innovazzjoni, kif ukoll ir-regolamentazzjoni dwar il-prodotti veġetali u li ġejjin mill-annimali, u l-politika agrikola nnifisha;

9.

jenfasizza, fir-rigward tal-politiki ta’ żvilupp rurali, l-argumenti tiegħu f’Opinjoni reċenti dwar Is-sostenibbilta taż-żoni rurali tad-9 ta’ Ottubru 2013, b’mod partikolari f’dak li għandu x’jaqsam mal-potenzjal ta’ żoni rurali wkoll f’termini ta’ bijodiversità;

10.

jafferma mill-ġdid li l-inizjattivi dwar dan is-suġġett jitpoġġew f’kuntest globali speċifiku, kif diġà ssemma’, li element ewlieni tiegħu huwa msemmi fit-Trattat Internazzjonali dwar ir-Riżorsi Ġenetiċi tal-Pjanti għall-Ikel u l-Agrikoltura tal-FAO, li l-Unjoni Ewropea ffirmat; dan iservi ta’ qafas ta’ koordinazzjoni u promozzjoni tal-inizjattivi dwar il-ġestjoni tar-riżorsi ġenetiċi tal-pjanti, u jwassal għal obbligu ġuridiku tal-konservazzjoni tad-diversità ġenetika lill-Istati li jissiebħu;

11.

jinnota li tul iż-żmien, l-Ewropa tat importanza konsiderevoli lill-problema tal-konservazzjoni tad-diversità ġenetika fl-agrikoltura, riċentament bid-deċiżjoni tal-2010 tal-Kapijiet tal-Istat tal-Unjoni li jwaqqfu t-telf tal-bijodiversità fl-UE fil-qafas tal-programm Orizzont 2020, bit-teħid ta’ impenji relatati, obbligi li issa jinsabu fl-Istrateġija Ewropea dwar il-Bijodiversità adottata fl-2011, iżda li dan għadu mhux qed jagħti l-frott;

12.

jinsab imħasseb minħabba li l-programmi komunitarji li ġew żviluppati tul is-snin, madanakollu, kif indikat b’mod ċar fir-rapport, ma waqqfux, “…it-telf tal-bijodiversità agrikola…”, u għaldaqstant jista’ jaqbel mar-rapport tal-Kummissjoni li jidentifika l-approċċ tal-konservazzjoni bħala elementi essenzjali tal-miżuri fir-rigward tal-konservazzjoni u l-użu sostenibbli tar-riżorsi ġenetiċi;

13.

madanakollu jemmen li din il-metodoloġija, li għandha tiġi żviluppata u diversifikata aktar, ma ħallietx effetti adatti mil-lat tal-użu tar-riżorsi stess, u minflok irreġistrat involviment limitat tal-utenti aħħarin, u għalhekk għandu jiġi segwit l-għan li jitnaqqas id-distakk wiesa’ li għad hemm bejn ir-riżultati tar-riċerka u l-użu sostenibbli effettiv tar-riżorsi ġenetiċi;

14.

jilqa’ b’sodisfazzjon il-fatt li r-rapport, li jiffoka speċifikament fuq dan is-suġġett, jiffoka l-attenzjoni fuq il-ħtieġa li nibdlu r-rotta fir-relazzjoni bejn ir-riċerka u l-użu, fis-sens li l-attivitajiet xjentifiċi għandhom jiddependu mill-bżonnijiet konkreti tal-bdiewa, destinatarji meħtieġa u indispensabbli għas-soluzzjonijiet offruti mir-riċerka, kif ukoll biex tiġi garantita s-sigurtà tal-ikel taċ-ċittadini u l-produzzjoni ta’ ingredjenti attivi interessanti għall-industrija farmaċewtika u dik kimika;

15.

jinnota li fl-aħħar tal-2013 inħoloq grupp fokus dwar ir-riżorsi ġenetiċi. Sfortunatament, l-informazzjoni dwar dan il-grupp fokus hija disponibbli biss bl-Ingliż, u dan ser jillimita t-tixrid tal-informazzjoni lill-utenti aħħarin. Għaldaqstant ikun partikolarment importanti li l-Kummissjoni timmobilizza r-riżorsi biex l-informazzjoni operattiva tixxerred fuq skala akbar.

16.

Barra minn hekk japprova l-enfasi tal-Kummissjoni fuq approċċ ta’ governanza f’diversi livelli meħtieġ għal strateġija globali u olistika li tkun kapaċi ssib il-bilanċ neċessarju bejn id-dimensjoni tal-politika tar-riċerka u l-innovazzjoni u dik tal-politika tal-iżvilupp rurali;

17.

iqis li huwa wkoll meħtieġ, kif indikat fir-rapport, li d-disponibbiltà tal-bażijiet ta’ data u l-kollezzjonijiet rilevanti eżistenti jsiru aktar aċċessibbli, biex jiżdied l-użu effettiv, billi f’ ħafna każijiet, in-nuqqas ta’ għarfien huwa ta’ detriment għall-użu potenzjali;

18.

iqis il-ħtieġa, barra minn hekk, li l-effett konservattiv jimxi pass pass ma’ approċċ integrat sistematiku, sabiex jippermetti r-relazzjonijiet ta’ ħidma stabbli bejn il-parteċipanti f’diversi livelli tal-proċess, li jibda mil-livell ta’ azjenda agrikola, u jiffoka fuq razez u uċuħ tradizzjonali u lokali, u billi jsir sforz favur l-użu ta’ razez u uċuħ tradizzjonali u lokali mill-bdiewa permezz ta’ sett ta’ miżuri konverġenti maħsubin biex ireġġgħu lura u jżidu l-bijodiversità fi ħdan l-ażjendi agrikoli;

19.

f’dan is-sens jilqa’ b’sodisfazzjon it-tbassir fir-rapport, tat-twaqqif ta’ “netwerks madwar l-Unjoni li jivvalorizzaw dan il-materjal…”, mekkaniżmu ta’ integrazzjoni, li għandu jipprovdi parteċipazzjoni effettiva minn isfel għal fuq, inkluż fil-livell istituzzjonali reġjonali u lokali;

20.

jilqa’ b’sodisfazzjon u japprova l-ħtieġa għal impenn qawwi mill-awtoritajiet reġjonali u lokali, filwaqt li jitqies il-fatt li r-rapport speċifikament jenfasizza, fost l-oħrajn, li l-politiċi u l-amministrazzjonijiet “jinvolvu ruħhom fl-iżvilupp tal-qafas istituzzjonali u legali b’mod li huwa konsistenti...” biex jintlaħaq ir-riżultat mistenni;

21.

jikkunsidra li kjarifika ulterjuri tal-Kummissjoni tkun utli għal “... reviżjoni ewlenija tal-leġislazzjoni…”, sabiex jiġu raffurzati b’mod konkret il-mekkaniżmi għall-konservazzjoni tar-riżorsi, speċjalment bil-kooperazzjoni tas-setturi interessati differenti, u bit-titjib relatat ta’ aċċess għas-suq tal-varjetajiet konvenzjonali u l-użu ġenwin mill-bdiewa ta’ materjal ġenetiku li b’mod naturali jkun aktar diversifikat minn dak ta’ bħalissa. L-abbozz ta’ regolament Ewropew għandu jieħu dan aktar inkunsiderazzjoni;

22.

jappoġġja l-prinċipju ta’ proċess tat-teħid ta’ deċiżjoni integrat, bit-tama li l-awtoritajiet lokali u reġjonali jkunu jistgħu jkunu protagonisti, biex iħarsu l-bosta speċijiet u l-ispeċifiċitajiet ġenetiċi tal-pjanti u tal-animali relatati li ħaqqhom protezzjoni fit-territorji tagħhom u joffru l-kontribut tagħhom għall-integrazzjoni tal-attivitajiet ta’ dawk li huma l-aktar involuti direttament (xjenzjati, bdiewa, raħħala, konsumaturi), li r-rwoli speċifiċi tagħhom huma spjegati b’mod adegwat fir-rapport;

23.

hemm bżonn li s-soċjetà ssir konxja tal-valur tar-riżorsi ġenetiċi u tal-importanza li dawn jiġu konservati, studjati u użati b’mod sostenibbli, filwaqt li fl-istess ħin tingħata spinta lill-programmi ta’ taħriġ għat-tekniċi u l-bdiewa, flimkien mal-mekkaniżmi ta’ koordinazzjoni, monitoraġġ u evalwazzjoni għall-protezzjoni tal-bijodiversità fis-settur agrikolu;

24.

jilqa b’sodisfazzjoni għalhekk b’mod partikolari, l-enfasi qawwija fuq il-mekkaniżmi ta’ Sħubija Ewropea għall-Innovazzjoni “Produttività u sostenibbiltà Agrikola” (flimkien mal-involviment parallel tal-Kumitat dwar ir-riżorsi ġenetiċi, imwaqqaf mir-Regolament tal-Kunsill Nru 870/2004), bħala mezz ta’ tisħiħ konkret tar-rabtiet bejn ir-riċerka u forom ta’ użu tar-riżorsi, anke bl-għan iddikjarat tal-adattament għall-kuntest u għall-ħtiġijiet lokali;

25.

barra minn hekk, jissuġġerixxi, fl-istess sens, li jiġi żgurat skambju effettiv ta’ għarfien bejn il-partijiet interessati, li tiġi inċentivata “l hekk imsejħa ħidma konġunta (co-working), fi ħdan il-komunitajiet lokali individwali u fost il-komunitajiet lokali differenti, bħala sistema eżemplari tal-esperjenzi differenti li jistgħu jitqabblu u jinfluwenżaw lil xulxin b” mod naturali;

26.

jissuġġerixxi t-twaqqif ta’ logo żviluppat u ffinanzjat mill-Kummissjoni għall-prodotti li ġejjin minn riżorsi ġenetiċi li jinsabu fil-periklu u/jew li jiġu kkonservati u żviluppati. Il-kundizzjonijiet għal dan il-logo għandhom jiġu stabbiliti b’mod li jħeġġeġ u jappoġġja lill-produtturi u lil atturi lokali/reġjonali oħrajn;

27.

juri tħassib, li jintwera biċ-ċar fir-rapport ukoll, li l-attivitajiet xjentifiċi ftit li xejn kienu effettivi tul iż-żmien għall-bdiewa u l-utenti; għandu jkun innutat ukoll li r-rapport tal-grupp ta’ esperti indipendenti dwar il-programm Komunitarju ta’ azzjoni dwar il-konservazzjoni, il-karatterizzazzjoni, il-ġbir u l-użu ta’ riżorsi genetiċi fl-agrikoltura, regolat mir-Regolament tal-Kunsill Nru 870/2004 imsemmi, juri li l-benefiċjarji kienu sostanzjalment istituti ta’ riċerka; għalhekk jafferma mill-ġdid il-ħtieġa li fil-programm il-ġdid, jitħeġġeġ aktar l-involviment tal-utenti aħħarin speċjalment biex jintlaħqu l-għanijiet tal-programm, u partikolarment biex ir-riżultati tal-proġetti jintużaw fuq il-post b’mod konkret u effettiv, fost l-oħrajn billi jġu xprunati b’mod xieraq li jwieġbu għas-sejħiet għall-offerti;

28.

jinnota li l-Proposta għal Regolament tal-Parlament Ewropew u tal-Kunsill dwar il-produzzjoni u d-disponibbiltà fis-suq ta’ materjal riproduttiv tal-pjanti (COM(2013) 262 final), marbuta bis-sħiħ mal-kwistjonijiet eżaminati f’din l-Opinjoni inċaħdet mill-Parlament Ewropew fil-11 ta’ Marzu 2014;