29.7.2014   

MT

Il-Ġurnal Uffiċjali tal-Unjoni Ewropea

C 247/1

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni biex tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq il-punti ewlenin fejn hija meħtieġa azzjoni sabiex jissaħħaħ il-potenzjal tal-Ewropa għal tkabbir sostenibbli u kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew tal-Gvern tal-Istati Membri ddeċidew fuq Patt għal Tkabbir u Impjiegi, li jipprovdi qafas koerenti għal azzjoni fil-livell nazzjonali, fil-livell tal-UE u fil-livell taż-żona tal-euro bl-użu tal-pressjonijiet, strumenti u politiki kollha possibbli. Huma ddeċidew fuq azzjoni li għandha tittieħed fuq il-livell tal-Istati Membri, fejn b'mod partikolari esprimew l-impenn sħiħ tagħhom biex jiksbu l-objettivi tal-istrateġija Ewropa 2020 u biex jimplimentaw ir-rakkomandazzjonijiet speċifiċi għall-pajjiżi.

(4)

Fit-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma tal-Belġju għall-2013 u ta l-opinjoni tiegħu dwar il-Programm ta' Stabbiltà aġġornat tal-Belġju għall-perijodu 2012-2016. Fil-15 ta' Novembru 2013, b'konformità mar-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha dwar l-abbozz ta' pjan baġitarju tal-Belġju għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, abbażi tar-Regolament (UE) Nru 1176/2011, il-Kummissjoni adottat ir-Rapport dwar il-Mekkaniżmu ta' Twissija, fejn identifikat il-Belġju bħala wieħed mill-Istati Membri li fil-konfront tiegħu kien ser isir rieżami fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kondizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu trattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi modernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tar-rieżami fil-fond tagħha għall-Belġju, skont l-Artikolu 5 tar-Regolament (UE) Nru 1176/2011. Skont l-analiżi tal-Kummissjoni jiġi konkluż li l-Belġju jkompli għaddej minn żbilanċi makroekonomiċi, li jirrikjedu monitoraġġ u azzjoni ta' politika. B'mod partikolari, l-iżviluppi fir-rigward tal-kompetittività esterna tal-oġġetti jkomplu jingħataw attenzjoni minħabba li deterjorament persistenti jista' jhedded l-istabbiltà makroekonomika.

(8)

Fit-30 ta' April 2014, il-Belġju ppreżenta l-Programm Nazzjonali ta' Riforma għall-2014 tiegħu kif ukoll il-Programm ta' Stabbiltà għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(9)

L-objettiv tal-istrateġija baġitarja msemmi fil-Programm ta' Stabbiltà 2014 huwa li jintlaħaq kemm baġit bilanċjat f'termini strutturali sal-2016 kif ukoll l-objettiv tat-terminu medju fis-sena ta' wara. Il-Programm ta' Stabbiltà jikkonferma l-objettiv preċedenti tat-terminu medju ta' 0,75 % tal-PDG, li jirrifletti l-objettivi tal-Patt ta' Stabbiltà u Tkabbir, iżda t-twettiq tiegħu jiġi pospost għall-2017, sena wara s-sena tal-mira stipulata fil-Programm ta' Stabbiltà tas-sena li għaddiet. Il-progress annwali ppjanat lejn l-objettiv tat-terminu medju huwa konformi mal-aġġustament mitlub mill-Patt ta' Stabbiltà u Tkabbir. Skont il-Programm ta' Stabbiltà, il-valur referenzjarju tan-nefqa jintlaħaq matul il-perijodu tal-programm. Id-dejn ta' 101,5 % tal-PDG fl-2013 huwa aktar mill-valur referenzjajru tat-Trattat jiġifieri 60 % tal-PDG, u skont il-Programm ta' Stabbiltà huwa mistenni li fl-2017 jonqos b'mod gradwali għal 93 % tal-PDG. Inġenerali, l-objettivi tal-Programm ta' Stabbiltà huma konformi mar-rekwiżiti tal-Patt ta' Stabbiltà u Tkabbir. Ix-xenarju makroekonomiku li jappoġġa l-previżjonijiet baġitarji fil-Programm ta' Stabbiltà, li tħejjew minn istituzzjoni indipendenti (l-Uffiċċju Federali tal-Ippjanar), huwa plawsibbli. Il-previżjonijiet ta' tkabbir huma qrib il-previżjonijiet tat-tbassir tar-rebbiegħa 2014 tas-servizzi tal-Kummissjoni. Il-perkors fiskali għadu mhuwiex appoġġat minn miżuri. It-tbassir tal-Kummissjoni ma juri l-ebda titjib fl-2014 iżda deterjorament strutturali fl-2015 skont l-assunzjoni normali ta' ebda bidla fil-politika. Dan ipoġġi t-twettiq tal-miri f'riskju u jista' jwassal għal devjazzjoni sinifikanti mill-aġġustament lejn l-objettiv tat-terminu medju matul l-2014-15. Barra minn hekk, skont it-tbassir tal-Kummissjoni, il-Belġju mhux se jkun konformi mar-regola tad-dejn kemm fl-2014 kif ukoll fl-2015. Abbażi tal-valutazzjoni tiegħu tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, l-opinjoni tal-Kunsill hija li l-Belġju wassal id-defiċit tiegħu ġenerali tal-gvern b'mod sostenibbli għal anqas minn 3 % tal-PDG fl-2013, iżda mill-2014 jinsab f'riskju ta' devjazzjoni sinifikanti mir-rekwiżiti tal-parti preventiva.

(10)

Il-Belġju għamel progress sostanzjali bl-introduzzjoni tal-arranġamenti ta' koordinazzjoni strutturali. Ftehim ta' Kooperazzjoni dwar Koordinazzjoni Fiskali li ġie konkluż fit-tmiem tal-2013 jintroduċi regola ta' bilanċ baġitarju strutturali (definita skont l-objettiv tat-terminu medju) fuq livell ta' gvern ġenerali kif mitlub mill-Patt Fiskali. Barra minn hekk, dan jifformalizza l-prattika ta' koordinazzjoni stabbilita billi jagħmel (i) ir-rwol tal-“Kumitat Konsultattiv” intergovernattiv fil-proċess uffiċjali u (ii) ir-rwol tal-Kunsill Għoli tal-Finanzi aktar espliċitu. Barra dan, il-Ftehim ibassar tisħiħ tar-rwol tal-monitoraġġ tal-Kunsill Għoli permezz tal-introduzzjoni ta' mekkaniżmu ta' korrezzjoni espliċitu f'każ ta' devjazzjoni sinifikanti mill-miri stipulati. Arranġamenti ulterjuri jistgħu jkunu meħtieġa biex wara l-2014 il-miri jsiru vinkolanti.

(11)

Filwaqt li l-Belġju riċentement irnexxielu jnaqqas iż-żieda fir-rata tad-dejn pubbliku, il-piż tad-dejn pubbliku ta' 101,5 % tal-PDG huwa għoli u hemm responsabbiltajiet sostanzjali u obbligazzjonijiet futuri mill-impenji għall-pensjonijiet. Jekk dawn għandhom jiġu koperti filwaqt li jinżamm livell ta' għajxien għoli, l-iżviluppi tal-kosti baġitarji futuri jridu jinżammu taħt kontroll, ir-rati tal-attivitajiet u l-impjiegi għandhom jiżdiedu; u l-kompetittività internazzjonali trid tkun aħjar. F'kull qasam minn dawn, il-Belġju jkompli jiffaċċa sfidi importanti. Minkejja li l-Belġju ħa l-passi meħtieġa fid-direzzjoni t-tajba li se jħallu l-effetti fis-snin li ġejjin, aktar azzjoni ambizzjuża se tkun meħtieġa, aktar u aktar minħabba li r-riformi qed jinħolqu wkoll fost sħab kummerċjali.

(12)

Il-livell tat-taxxa globali fil-Belġju huwa fost l-ogħla fl-Unjoni u l-piż tat-taxxa għandu inklinazzjoni b'mod sostanzjali lejn ix-xogħol, li jirriżulta f'wieħed mill-akbar porzjon ta' taxxa fl-Unjoni. Numru ta' karatteristiċi speċifiċi tas-sistema tat-taxxa jinvolvu ħsara fl-ambjent, bħat-trattament fiskali tal-karozzi tal-kumpaniji. Ittieħdu xi miżuri mmirati sabiex jitnaqqsu l-kosti lavorattivi għal gruppi speċifiċi u titnaqqas id-differenza bejn il-pagi gross u netti li jinsabu fl-aħħar fl-iskala tal-pagi. Madankollu, ma kien hemm l-ebda bidla tal-piż tat-taxxa lejn bażijiet li huma anqas detrimentali għat-tkabbir. L-ewwel ħsibijiet dwar riforma tat-taxxa komprensiva biex tiffaċilita t-twettiq tas-sostenibbiltà tal-finanzi pubbliċi, tappoġġa l-kompetittività u t-tkabbir tal-impjiegi, u tħares l-ambjent, ġew imnedija. Riforma komprensiva tat-taxxa bħal din tkun teħtieġ li tinvolvi tbegħid tat-taxxi mix-xogħol, simplifikazzjoni tas-sistema fiskali, żieda fl-effiċjenza tal-VAT, twessiegħ tal-bażijiet tat-taxxa, tnaqqis tan-nefqiet fuq it-taxxa, tneħħija tal-lakuni leġislattivi u l-eliminazzjoni ta' sussidji li jagħmlu ħsara ambjentali.

(13)

Il-Belġju jiffaċċa impatt previst sinifikanti ħafna mit-tixjiħ tal-popolazzjoni, bl-ispejjeż tat-tixjiħ maħsuba li jiżdiedu b'aktar minn 8 % tal-PDG bejn l-2010 u l-2060, b'mod partikolari mill-pensjonijiet u l-kura fit-tul. Ir-riforma tas-sigurtà soċjali għall-anzjani li ngħatat bidu reċentement hija maħsuba li jkollha impatt pożittiv fuq l-impjieg tagħhom. Madankollu, minħabba l-kobor tal-isfida, jeħtieġ li jkun hemm aktar sforzi biex tinkiseb sostenibbiltà fiskali. Dawn iridu jikkunsidraw il-ħtieġa biex tinżamm l-adegwatezza tal-iskemi tas-sigurtà soċjali għall-anzjanità. Miżuri huma meħtieġa biex ikun hemm rabta bejn l-età tal-irtirar mal-iżviluppi tal-istennija tal-għomor, biex titnaqqas id-differenza bejn l-età tal-irtirar statutorja u effettiva, u titjieb il-kosteffettività tan-nefqa pubblika fuq il-kura fit-tul.

(14)

Il-Belġju jiffaċċja nuqqas kbir ta' utilizzazzjoni tax-xogħol. Ir-rati tal-attività u l-impjiegi huma anqas mill-medja tal-UE u staġnati, filwaqt li l-qgħad fit-tul bħala perċentwal tal-qgħad totali jibqa' għoli. Fil-maġġoranza tal-każijiet, il-porzjon il-kbir ta' taxxa fuq ix-xogħol, permezz tal-interazzjoni mas-sistema tal-benefiċċji, joħloq qgħad sinifikanti u nases ta' inattività għall-parti l-kbira tal-kategoriji tal-ħaddiema. Filwaqt li ttieħdet azzjoni sabiex jitnaqqsu n-nases tal-qgħad għall-persuni b'pagi baxxi, in-nassa kibret għall-parti l-kbira tal-kategoriji u n-nases ta' inattività jibqgħu jinxterdu. Minħabba li l-kosti lavorattivi jibqgħu għoljin, il-politiki ta' reklutaġġ għandhom tendenza li jnaqqsu r-riskji u jippenalizzaw lil min ikun barra mis-sistema bħaż-żgħażagħ, il-ħaddiema bi ftit kompetenzi professjonali u n-nies li jkunu ġejjin minn kuntest ta' migrazzjoni, li, flimkien mal-ħaddiema anzjani, juru rati ta' parteċipazzjoni fis-suq tax-xogħol ħafna anqas mill-medja tal-UE. Il-protezzjoni msaħħa għal min ikun fis-sistema fejn it-tibdil tal-impjieg jinvolvi telf tal-intitolamenti (pereż. drittijiet għal danni, irtirar bikri, benefiċċji għall-anzjanità), tiskoraġġixxi l-mobbiltà professjonali bejn l-impjiegi u s-setturi. Inerzja bħal din tagħmel il-politiki attivi tas-suq tax-xogħol fil-Belġju relattivament ineffiċjenti u twassal għal sitwazzjoni fejn ir-rata għolja ta' qgħad f'ċerti oqsma u setturi tkun teżisti flimkien ma' swieq tax-xogħol stretti u nuqqasijiet ta' ħiliet li jxekklu t-tkabbir f'oħrajn. Il-qgħad fost iż-żgħażagħ żdied b'mod sinifikanti matul is-sena li għaddiet, b'differenzi kbar bejn ir-reġjuni u l-gruppi. L-indirizzar tal-problema strutturali tad-differenzi tal-ħiliet irid jimxi flimkien mal-ġlieda kontra l-problema persistenti tat-tluq bikri mill-iskola u ż-żgħażagħ li jitilqu mill-iskola mingħajr kwalifiki. Is-sitt riforma statali toffri l-opportunità biex titjieb l-effiċjenza u jiġu indirizzati l-politiki tal-impjiegi, bil-kondizzjoni li l-kooperazzjoni bejn il-livell federali u dak reġjonali jkun l-aħjar possibbli.

(15)

Il-Belġju jkompli jgħaddi minn kompetittività li qed tmur għall-agħar, inkluż fir-rigward ta' aspetti mhux marbutin ma' kosti. B'mod partikolari, il-kapaċità tal-manifattura li tikkompeti internazzjonalment qed tiddgħajjef, li jiġi rifless fil-marġini li qed jonqsu għall-produtturi u fil-qerda tal-impjiegi. Il-Belġju tradizzjonalment iddependiet fuq l-indiċjar tal-pagi biex iżżomm il-kapaċità tal-akkwist. Madankollu, il-qabża tal-limitu fit-tkabbir tal-pagi totali ġiet ikkoreġuta tard u b'mod insuffiċjenti. Barra minn hekk, in-norma ċentrali tal-pagi mhux dejjem tippermetti għal żviluppi settorjali fil-produttività u li l-kondizzjonijiet tas-suq tax-xogħol jiġu riflessi b'mod adegwat. Għaldaqstant, il-pagi kibru aktar mill-produttività, li wassal għal telf ta' impjiegi u kompetittività. B'konsultazzjoni mas-sħab soċjali u skont il-prattika nazzjonali, il-Belġju jkun jeħtieġ jagħmel riforma tas-sistema tiegħu tal-formazzjoni tal-pagi sabiex jippermetti għal dispersjoni settorjali tal-pagi akbar u biex il-pagi jkunu allinjati aħjar mal-iżviluppi tal-produttività. Il-prezzijiet fis-settur tal-bejgħ bl-imnut jibqgħu 'l fuq mill-medja tal-pajjiżi ġirien, filwaqt li r-restrizzjonijiet fis-servizzi professjonali jimpedixxu l-iżvilupp ta' mudelli ta' negozju innovattivi u jrażżnu l-investiment. It-tariffi ta' distribuzzjoni għall-elettriku jibqgħu l-ogħla fl-Ewropa u r-reġjonalizzazzjoni ppjanata tagħhom żżid l-inċertezza fir-rigward tal-evoluzzjoni futura tal-kosti ta' distribuzzjoni għall-utenti aħħarin minħabba li t-tariffa ffriżata kurrenti ma tkoprix il-kosti ta' distribuzzjoni li qed jiżdiedu. Jekk il-Belġju se jżomm pagi għoljin u fl-istess ħin joħloq impjiegi ġodda, dan irid jipproduċi u jbigħ oġġetti aktar sofistikati u b'valur miżjud ogħla fis-swieq tad-dinja minn dawk li qed jipproduċi bħalissa. Fil-Belġju hemm nuqqas ta' kumpaniji li jikbru b'mod rapidu f'setturi innovattivi. L-appoġġ innovattiv huwa żviluppat sew u jkopri ċ-ċiklu sħiħ ta' innovazzjoni iżda sar kumpless u frammentat. It-tkabbir ta' attivitajiet b'valur miżjud għoli ta' spiss jixxekkel min-nuqqas ta' riżorsi umani bi kwalifiki suffiċjenti.

(16)

Huwa mistenni li l-Belġju jonqos milli jilħaq il-mira ta' tnaqqis tiegħu ta' 15 % għall-emissjonijiet ta' gass serra fis-setturi mhux koperti mis-sistema tal-UE għan-negozjar ta' emissjonijiet sal-2020, tal-inqas mhux mingħajr ma jiddependi fuq il-mekkaniżmi ta' flessibbiltà. Filwaqt li qed jittieħdu ċerti inizjattivi, jidher li dawn għandhom nuqqas ta' direzzjoni koerenti u l-impatt globali tal-miżuri li jnaqqsu l-emissjonijiet, b'mod partikolari mis-settur tat-trasport u l-kostruzzjoni, jibqa' mhux ċar. It-tnaqqis tal-VAT fuq l-elettriku jista' jkompli jfixkel l-isforzi f'dan ir-rigward. In-negozjati dwar ftehim ta' kooperazzjoni u kondiviżjoni tal-piżijiet bejn l-istat federali u r-reġjuni ma wasslux għal distribuzzjoni ċara tal-isforzi. Il-konġestjoni tat-toroq qed tpoġġi piż sinifikanti fuq l-ekonomija Belġjana, meta mqabbla mal-parti l-kbira tal-pajjiżi l-oħra. Is-severità tal-problema tirrikjedi rispons komprensiv ta' politika li jqis il-potenzjal tal-imposti differenzjati skont il-ħin tal-konġestjoni, jagħmel rieżami tat-trattament favorevoli tat-taxxa tal-użu privat tal-karozzi tal-kumpaniji u l-karti tal-karburant u li jżid l-effiċjenza tat-trasport pubbliku.

(17)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Belġju. Hija vvalutat il-Programm Nazzjonali ta' Riforma u l-Programm ta' Stabbiltà. Hija mhux biss qieset ir-rilevanza tagħhom għall-politika fiskali u soċjoekonomika sostenibbli fil-Belġju, iżda wkoll il-konformità tagħhom mar-regoli u l-gwida tal-UE, fid-dawl tal-ħtieġa tat-tisħiħ tal-governanza ekonomika kumplessiva tal-Unjoni billi jiġi pprovdut kontribut fil-livell tal-UE għad-deċiżjonijiet nazzjonali tal-ġejjieni. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (6) hawn taħt.

(18)

Fid-dawl ta' din il-valutazzjoni, il-Kunsill eżamina l-Programm ta' Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) ta' hawn taħt.

(19)

Fid-dawl tar-rieżami fil-fond tal-Kummissjoni u ta' din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Stabbiltà. Ir-rakkomandazzjonijiet tagħha skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (2), (4), u (5) hawn taħt.

(20)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika fiż-Żona tal-Euro kollha kemm hi. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7) Bħala pajjiż li l-munita tiegħu hija l-euro, il-Belġju għandu wkoll jiżgura l-implimentazzjoni sħiħa u f’waqtha ta' dawk ir-rakkomandazzjonijiet,

1.

Wara l-korrezzjoni tad-defiċit eċċessiv, isaħħaħ il-miżuri baġitarji għall-2014 fid-dawl tad-differenza emerġenti ta' 0,5 % tal-PDG abbażi tat-tbassir tar-rebbiegħa tas-servizzi tal-Kummissjoni għall-2014, li jindika riskju tad-devjazzjoni sinifikanti mqabbel mar-rekwiżiti parti preventiva tal-Patt ta' Stabbiltà u Tkabbir. Fl-2015, isaħħaħ b'mod sinifikanti l-istrateġija baġitarja biex jiżgura l-aġġustament mitlub ta' 0,6 % tal-PDG lejn l-objettiv tat-terminu medju, li jkun jiżgura wkoll konformità mar-regola tad-dejn. Minn hemm 'il quddiem, sakemm l-objettiv tat-terminu medju jintlaħaq, ikompli l-aġġustament strutturali annwali ppjanat lejn l-objettiv tat-terminu medju, b'konformità mar-rekwiżit ta' aġġustament strutturali annwali ta' mill-anqas 0,5 % tal-PDG, u aktar f'kondizzjonijiet ekonomiċi xierqa jew jekk meħtieġ jiżgura li r-regola tad-dejn tintlaħaq sabiex tpoġġi l-proporzjon għoli tad-dejn tal-gvern ġenerali fit-triq ta' tnaqqis sostnut. Jiżgura kontribuzzjoni bilanċjata mil-livelli kollha tal-gvern għat-twettiq tar-regoli fiskali inkluż ir-regola ta' bilanċ baġitarju strutturali, permezz ta' strument vinkolanti bi tqassim espliċitu tal-miri f'perspettiva ta' ppjanar tat-terminu medju.

2.

Jtejjeb il-bilanċ u l-korrettezza tas-sistema fiskali globali u jħejji riforma komprensiva tat-taxxa li tippermetti tbegħid tat-taxxi mix-xogħol, bażijiet aktar favur it-tkabbir, simplifikazzjoni tas-sistema fiskali, tneħħija tal-lakuni, żieda fl-effiċjenza tal-VAT, twessiegħ tal-bażijiet tat-taxxa, tnaqqis tan-nefqiet fuq it-taxxa u l-eliminazzjoni ta' sussidji li jagħmlu ħsara ambjentali.

3.

Jikkontrolla t-tkabbir fin-nefqa pubblika futura marbuta mat-tixjiħ, b'mod partikolari mill-pensjonijiet u l-kura fit-tul, billi jiżdiedu l-isforzi biex titnaqqas id-differenza bejn l-età ta' rtirar statutorja u effettiva, jitmexxa 'l quddiem it-tnaqqis tal-possibiltajiet ta' rtirar bikri, jiġi promoss it-tixjiħ attiv, tiġi allinjata l-età tal-irtirar għat-tibdil fl-istennija tal-għomor, u tittejjeb il-kosteffettività tan-nefqa pubblika fuq il-kura fit-tul.

4.

Tiżdied il-parteċipazzjoni fis-suq tax-xogħol, b'mod partikolari billi jitnaqqsu d-diżinċentivi finanzjarji għax-xogħol, jiżdied l-aċċess tas-suq tax-xogħol għal gruppi żvantaġġati bħaż-żgħażagħ u n-nies li ġejjin minn kuntest ta' migrazzjoni, titjieb il-mobbiltà professjonali u l-indirizzar tan-nuqqas u d-differenzi fil-ħiliet kif ukoll it-tluq bikri mill-iskola. Isaħħaħ is-sħubija tal-awtoritajiet pubbliċi, is-servizzi pubbliċi ta' impjiegi u l-istituzzjonijiet edukattivi biex jiġi pprovdut appoġġ bikri u personalizzat għaż-żgħażagħ, fil-pajjiż kollu.

5.

Jerġa' jikseb lura l-kompetittività billi jkompli r-riforma tas-sistema tal-iffissar tal-pagi, inkluż l-indiċjar tal-pagi, b'konsultazzjoni mas-sħab soċjali u skont il-prattika nazzjonali, biex jiżgura li l-evoluzzjonijiet tal-pagi jirriflettu l-iżviluppi tal-produttività fuq livell settorjali u/jew tal-kumpaniji, kif ukoll iċ-ċirkostanzi ekonomiċi u biex jipprovdi għal korrezzjonijiet awtomatiċi effettivi meta jkun meħtieġ; billi jsaħħaħ il-kompetizzjoni fis-settur tal-bejgħ bl-imnut, jneħħi r-restrizzjonijiet żejda fis-servizzi, inkluż is-servizzi professjonali u jindirizza r-riskju ta' aktar żidiet fil-kosti ta' distribuzzjoni tal-enerġija; billi jippromwovi innovazzjoni permezz ta' skemi ta' inċentivi simplifikati u anqas ostakoli amministrattivi; u jkompli l-edukazzjoni kkoordinata u l-politiki ta' taħriġ li jindirizzaw id-differenzi mifruxa fil-ħiliet u d-disparitajiet reġjonali fit-tluq bikri mill-iskola.

6.

Jiżgura li l-miri tal-2020 biex jitnaqqsu l-emissjonijiet ta' gass serra mill-attivitajiet li mhumiex tal-ETS jintlaħqu, b'mod partikolari fir-rigward tal-kostruzzjoni u t-trasport. Jiżgura li l-kontribuzzjoni tat-trasport tiġi allinjata mal-objettiv li titnaqqas il-konġestjoni fit-toroq. Jaqbel dwar distribuzzjoni ċara tal-isforzi u l-piżijiet bejn l-entitajiet federali u reġjonali.

29.7.2014   

MT

Il-Ġurnal Uffiċjali tal-Unjoni Ewropea

C 247/7

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni f'livell nazzjonali, tal-UE kif ukoll taż-żona tal-euro permezz tal-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma tal-Bulgarija għall-2013 u ta l-opinjoni tiegħu dwar il-Programm ta' Konverġenza aġġornat tal-Bulgarija għall-perijodu 2012-2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta’ Twissija, li fih identifikat lill-Bulgarija bħala wieħed mill-Istati Membri li għalihom se ssir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal-eżami mill-ġdid fil-fond dwar il-Bulgarija, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslet biex jiġi konkluż li l-Bulgarija kienet għad għandha żbilanċi makroekonomiċi li jeħtieġu monitoraġġ u azzjoni politika. Partikolarment, l-aġġustament li qed jieħu fit-tul tas-suq tax-xogħol jiġġustifika azzjonijiet politiċi, filwaqt li qed isir progress tajjeb fil-korrezzjoni tal-pożizzjoni esterna u d-diżingranaġġ korporattiv.

(8)

Fis-17 ta' April 2014, il-Bulgarija ppreżentat il-Programm Nazzjonali ta' Riforma 2014 u l-Programm ta' Konverġenza 2014 tagħha. Biex jiġu kkunsidrati l-konnessjonijiet ta' bejniethom, iż-żewġ Programmi ġew ivvalutati fl-istess żmien.

(9)

L-objettiv tal-istrateġija baġitarja spjegata fil-Programm ta' Konverġenza għall-2014 huwa li jintlaħaq l-objettiv fuq terminu medju ta' defiċit strutturali ta' -1 % tal-PDG sal-fl-2016. L-objettiv ta’ terminu medju huwa aktar strinġenti minn dak tal-Patt ta' Stabbiltà u Tkabbir. Il-Bulgarija bbenefikat minn possibbiltà ta' devjazzjoni temporanja mill-objettiv ta’ terminu medju b'0,6 % tal-PDG fl-2013 u b'0,1 % tal-PDG fl-2014 li ppermettew proġetti ffinanzjati b'mod konġunt. Il-Programm ta' Konverġenza jippjana deterjorazzjoni fil-bilanċ strutturali (rikalkulat) b'0,3 % tal-PDG fl-2014, li jwassal għal -1,3 % tal-PDG, u għal titjib b'0,3 % tal-PDG fl-2015, li jwassal għal -1,0 % tal-PDG, jiżguraw ir-ritorn lejn l-objettiv ta’ terminu medju. Ir-rata tat-tkabbir tan-nefqa tal-gvern ma taqbiżx il-parametru referenzjarju rilevanti tan-nefqa ta' terminu medju fl-2014-15. Għalhekk il-pjan baġitarji huma skont ir-rekwiżiti tal-Patt ta' Stabbiltà u Tkabbir. Il-proporzjon tad-dejn huwa inqas sew minn 60 % tal-PDG u, skont il-Programm tal-Gvern, huwa mistenni li jiżdied biss ftit għal 20,6 % tal-PDG sal-aħħar tal-perijodu tal-programm. Ix-xenarju makroekonomiku sottostanti l-previżjonijiet baġitarji fil-Programm ta' Konverġenza huwa ottimist għall-perijodu 2014-15, bi tkabbir annwali mistenni jilħaq 2,1 % fl-2014 u 2,6 % fl-2015 minflok 1,7 % fl-2014 u 2,0 % fl-2015 proġettati mit-tbassir tar-rebbiegħa 2014 tas-servizzi tal-Kummissjoni. Skont it-tbassir tal-Kummissjoni, id-devjazzjoni tal-Bulgarija mill-objettiv ta’ terminu medju fl-2014 huwa akbar minn dak permess abbażi tad-devjazzjoni temporanja permessa mill-proġetti finanzjati b'mod konġunt, u r-redditu meħtieġ fuq l-objettiv ta' terminu medju mhux se jintlaħaq fl-2015. Abbażi tal-valutazzjoni tagħha tal-Programm ta' Konverġenza tal-2014 u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li jeżisti riskju ta' devjazzjoni mill-objettiv ta’ terminu medju mill-2014-15.

(10)

Il-konformità tat-taxxa u l-kwalità tal-amministrazzjoni tat-taxxa għadhom ta' sfida ewlenija fil-Bulgarija. L-estimi disponibbli jindikaw li teżisti ekonomija moħbija mdaqqsa, u dan huwa kkonfermat mid-data dwar ix-xogħol mhux dikjarat fil-Bulgarija. Il-kostijiet amministrattivi tal-ġbir ta' dħul u l-kostijiet tal-konformità biex jitħallsu t-taxxi huma relattivament għoljin. Minkejja diversi miżuri meħuda b'reazzjoni għal dawn l-isfidi, il-Bulgarija xorta waħda għad ma għandhiex strateġija sħiħa għall-konformità tat-taxxa, li tkopri l-ħidma kollha tal-awtoritajiet tal-ġbir tat-taxxa u li tinkludi analiżi minn qabel tal-aktar riskji sinifikanti għall-ġbir tat-taxxa kif ukoll evalwazzjoni tal-miżuri diġà fis-seħħ, inklużi miżuri ta' simplifikazzjoni kif ukoll kontrolli aħjar.

(11)

Fl-2013, il-Bulgarija marret pass lura mill-impenji li ħadet qabel fil-qasam tar-riforma tal-pensjonijiet. L-Iskemi ta’ rtirar bikri ma tnaqqsux kif kien previst. Iż-żieda annwali ppjanata fl-età statutorja tal-irtirar ġiet posposta. Ma sar l-ebda progress fejn tidħol l-armonizzazzjoni tal-età tal-irtirar għall-irġiel u n-nisa u ma ttieħdu l-ebda passi biex jiġu ssikkati l-kriterji tal-eliġibbiltà u l-kontrolli biex jiġi limitat l-abbuż fl-allokazzjoni tal-pensjonijiet tal-invalidità. Il-Bulgarija hija wieħed mill-pajjiżi fejn il-popolazzjoni qed tixjieħ bl-aktar mod mgħaġġel fl-Unjoni, u dan għandu implikazzjonijiet negattivi fuq is-suq tax-xogħol, il-potenzjal għat-tkabbir fl-ekonomija u għall-finanzjament tas-sistema tal-pensjonijiet tagħha. Għalhekk il-Bulgarija teħtieġ tkompli r-riforma tas-sistema tal-pensjonijiet tagħha. Il-Bulgarija qiegħda wkoll taffaċċa sfidi kbar fir-razzjonalizzazzjoni u l-immaniġġar tas-settur tal-isptarijiet, inkluż nuqqas ta' trasparenza fil-finanzjament tal-isptarijiet u servizzi tal-kura tal-pazjenti ta' barra mhux żviluppati biżżejjed. Barra minn hekk, il-livell għoli ta pagamenti formali u informali mġarrba mill-pazjenti effettivament teskludi ċerti segmenti tal-popolazzjoni mill-aċċess għall-kura tas-saħħa. L-indikaturi tal-istatus tal-qasam tas-saħħa huma dgħajfa ħdejn Stati Membri oħra, ħaġa li tindika li fil-futur tista' tkun meħtieġa nefqa strutturali pubblika ogħla fis-settur tas-saħħa.

(12)

Fl-aħħar snin is-suq tax-xogħol ma kellux prestazzjoni tajba, u b'hekk kien qed jillimita l-kapaċità ta' aġġustament tal-ekonomija u jhedded il-potenzjal tat-tkabbir tagħha. Il-qgħad stabbilizza ruħu fl-2013, iżda r-rati tal-qgħad fost iż-żgħażagħ u l-qgħad fit-tul komplew jiżdiedu. Il-Bulgarija taffaċċa waħda mill-ogħla proporzjonijiet ta' żgħażagħ li mhux jaħdmu, li mhux qed jistudjaw jew mhux qed jirċievu taħriġ, ħaġa li timplika sottoutilizzazzjoni u sottożvilupp gravi tal-kapital uman. Sar biss progress limitat ħafna fit-tisħiħ tal-kapaċità tal-Aġenzija tal-Impjiegi. Hemm ukoll il-ħtieġa li l-kopertura u l-effikaċja tal-politiki attivi tas-suq tax-xogħol jiġu estiżi. Il-Bulgarija ma għandhiex miżuri effettivi biex tilħaq liż-żgħażagħ mhux reġistrati, inklużi r-Rom, f'konformità mal-objettivi ta' garanzija għaż-żgħażagħ. Proporzjonijiet sinifikanti ta' dawk qiegħda mhumiex koperti minn protezzjoni soċjali standard (benefiċċji għal min ma jaħdimx u għajnuna soċjali) iżda jiddependu minflok fuq is-solidarjetà tal-familja jew xogħol informali. Il-Bulgari jinsabu f'wieħed mill-ogħla riskji tal-faqar u l-esklużjoni soċjali fl-Unjoni. Livelli minimi għall-pagamenti tal-kontribuzzjonijiet tal-assigurazzjoni soċjali jistgħu jimpedixxu lil dawk bi ftit ħiliet milli jipparteċipaw bis-sħiħ l-ekonomija formali. Twettqu xi analiżijiet biex jiġi vvalutat l-impatt possibbli u dawn jeħtieġ li jiġu vvalutati u segwiti b'azzjoni politika xierqa. Ma hemmx linji gwida ċari għall-istipular trasparenti tal-paga minima fil-Bulgarija. Il-paga minima statutorja żdiedet sostanzjalment mill-2011 u dan seta' kellu impatt negattiv fuq l-impjiegi u għalhekk għandu jiġi mmonitorjat.

(13)

Il-Bulgarija għadha ma adottatx l-Att tal-Edukazzjoni fl-Iskejjel li jipprovdi qafas għall-implimentazzjoni tar-riformi komprensivi meħtieġa tas-sistema tal-iskola, fosthom il-modernizzazzjoni tal-kurrikula u taħriġ aħjar għall-għalliema. Hemm il-ħtieġa li titjieb il-kwalità tal-edukazzjoni u t-taħriġ vokazzjonali fil-Bulgarija u li jiġu integrati aħjar fl-istrutturi edukattivi ġenerali sabiex isiru possibbli perkorsi flessibbli, jitnaqqas it-tluq kmieni mill-iskola u jitjieb l-aċċess għat-tagħlim tul il-ħajja. Min-naħa tagħha, l-edukazzjoni għolja qed taffaċċa sfidi persistenti biex tirrispondi aħjar għall-ħtiġijiet tas-suq tax-xogħol. L-istandard baxx tal-kwalità taċ-ċertifikati jikkontribwixxi għal prestazzjoni ħażina. Qiegħda tiġi diskussa strateġija ġdida għall-edukazzjoni għolja, li titlob ristrutturar tal-maniġment tal-universitajiet permezz tal-involviment dirett tal-partijiet interessati bħan-negozji u l-istudenti, il-konsolidazzjoni tal-universitajiet, u approċċ ibbażat fuq il-prestazzjoni biex l-outputs edukattivi jkunu allinjata aħjar mad-domandi tas-suq tax-xogħol. Sfida li tkompli tikkonċerna l-aċċess għall-edukazzjoni għat-tfal żvantaġġati, partikolarment it-tfal Rom. Is-sentejn preskolastiċi obbligatorji hija miżura importanti fid-direzzjoni t-tajba u għandha tiġi implimentata b'mod strett, flimkien ma' miżuri li jipprevjenu t-tluq kmieni mill-iskola. Hemm il-ħtieġa li jiżdiedu l-inizjattivi eżistenti biex jitjieb it-taħriġ tal-għalliema u titnaqqas de facto s-segregazzjoni fl-iskejjel. Ir-regoli li jgħaqqdu l-allowance għat-tfal b’parteċipazzjoni fl-edukazzjoni huma fis-seħħ, iżda jista' jkun li l-miżuri għadhom ma tawx l-effetti mixtieqa.

(14)

Sforzi usa' biex tiġi mmodernizzata l-amministrazzjoni pubblika kellhom impatt limitat minħabba l-approċċ frammentat u l-impenn insuffiċjenti lejn riformi fil-fond. Il-Bulgarija teħtieġ strateġija kkoordinata għar-riforma fl-amministrazzjoni pubblika biex jissaħħu l-professjonaliżmu u l-indipendenza tal-amministrazzjoni pubblika u tal-aġenziji regolatorji tagħha, fosthom sistemi meritokratika għall-ħatriet u l-iżvilupp tal-karrieri tal-uffiċjali pubbliċi u strutturi effettivi biex tiġi indirizzata l-korruzzjoni. Aktar sforzi huma meħtieġa biex jitjieb l-ambjent kummerċjali ġenerali. L-isfidi jinkludu l-proċeduri biex jinkisbu l-permessi u r-reġistrazzjoni ta' negozji. Ir-riżoluzzjoni tal-insolvenzi tieħu aktar minn medja ta' tliet snin u r-rata tal-irkupru hija baxxa. Ġew adottati regoli ġodda dwar il-pagamenti tard fl-2013 u jeħtieġ li jiġu implimentati. L-iżvilupp tal-gvern-e waqaf, u l-koordinazzjoni biex tkun żgurata l-interoperabbiltà tas-sistemi u l-ħolqien ta' punt uniku ta' kuntatt mhumiex biżżejjed, u b'hekk qed jiġu limitati l-isforzi biex tiżdied it-trasparenza u jitnaqqsu l-piżijiet amministrattivi. Fil-qasam tal-akkwist pubbliku ma jeżistix qafas legali sempliċi u kodifikat, u dan iwassal għal sitwazzjoni legali u regolatorja kumplikata li toħloq ħafna inċertezzi għall-operaturi. L-indipendenza tal-ġudikatura wkoll għadha ta' tħassib ewlieni li jaffettwa l-ambjent kummerċjali fil-Bulgarija. Il-Bulgarija ħadet xi passi biex tindirizza l-korruzzjoni, iżda l-progress kumplessiv kien limitat u jibqa' fraġli u jirrikjedi kontrolli konsistenti u sanzjonijiet dissważivi għall-konflitti ta' interess. Hemm ukoll il-ħtieġa li tiġi żgurata koordinazzjoni aħjar fost l-istituzzjonijiet ta' kontra l-korruzzjoni u li jiġu protetti mill-influwenza politika.

(15)

Il-kompetizzjoni fis-setturi tal-elettriku u l-gass għadha limitata. Oqsma ta' tħassib partikolari għat-titjib tal-funzjonament tas-swieq tal-enerġija jinkludu n-nuqqas ta' skambji fl-elettriku u l-gass u n-nuqqas ta' suq tal-operaturi trasparenti. Is-suq ħieles fl-elettriku huwa ddominat minn fornitur wieħed u d-daqs limitat tiegħu jfisser li l-kompetizzjoni ma tistax taqdi l-funzjoni tagħha li tiżgura l-kosteffiċjenza. L-indipendenza u effikaċja tar-regolatur nazzjonali tibqa' limitata. Id-dipendenza fuq l-importazzjonijiet minn għadd limitat ta' fornituri u n-nuqqas ta' żvilupp infrastrutturali joħolqu riskju ta' xokkijiet fil-provvista. Pakkett komprensiv ta' miżuri biex titjieb effiċjenza enerġetika kien propost biex jiġi ffinanzjat mill-UE fil-perijodu ta' programmar il-ġdid 2014-2020.

(16)

Fil-kuntest tas-Semestru Ewropew, il-Kummissjoni għamlet analiżi komprensiva tal-politika ekonomika tal-Bulgarija. Hija vvalutat il-Programm Nazzjonali ta’ Riforma u l-Programm ta’ Konverġenza. Hija qieset mhux biss ir-rilevanza tagħhom għall-politika fiskali u soċjoekonomika sostenibbli fil-Bulgarija iżda anki l-konformità tagħhom mar-regoli u l-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (6) hawn taħt.

(17)

Fid-dawl ta' din il-valutazzjoni, il-Kunsill eżamina l-Programm ta' Konverġenza, u l-opinjoni tiegħu (5) hija riflessa b'mod partikolari fir-rakkomandazzjoni (1) ta' hawn taħt.

(18)

Il-Kunsill eżamina l-Programm Nazzjonali ta' Riforma u l-Programm ta' Konverġenza fid-dawl tar-rieżami fil-fond tal-Kummissjoni u ta' din il-valutazzjoni. Ir-rakkomandazzjonijiet tiegħu skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (3), (4) u (5) hawn taħt,

1.

Issaħħaħ il-miżuri baġitarji għall-2014 fid-dawl tad-differenza emerġenti meta mqabbel mal-parti preventiva tar-rekwiżiti tal-Patt ta' Stabbiltà u Tkabbir. Fl-2015, issaħħaħ l-istrateġija baġitarja biex tiżgura li jintlaħaq l-objettiv fuq perijodu medju u jinżamm wara. Tiżgura l-kapaċità tal-kunsill fiskali l-ġdid biex ikun jista' jissodisfa l-mandat tiegħu. Timplimenta strateġija tat-taxxa komprensiva biex issaħħaħ il-ġbir tat-taxxa, tindirizza l-ekonomija moħbija u tnaqqas il-kostijiet tal-konformità.

2.

Tadotta strateġija fuq terminu twil għas-sistema tal-pensjonijiet, tkompli biż-żieda annwali pjanata fl-età statutorja tal-irtirar u tistabbilixxi mekkaniżmu biex torbot l-età statutorja tal-irtirar mal-istennija tal-għomor fuq terminu twil, filwaqt li gradwalment tneħħi l-għażliet tal-irtirar kmieni u tekwalizza l-età statutorja tal-irtirar għall-irġiel u n-nisa. Tissikka l-kriterji tal-eliġibbiltà u l-proċeduri għall-allokazzjoni tal-pensjonijiet tal-invalidità, pereżempju billi tqis aħjar il-kapaċità li l-applikanti jkun baqagħlhom biex jaħdmu. Tassigura l-għoti ta' kura tas-saħħa kosteffettiva inkluż billi ttejjeb il-prezz tas-servizzi tal-kura tas-saħħa filwaqt li torbot il-finanzjament tal-isptarijiet mal-eżiti, taċċellera l-ottimizzazzjoni tan-netwerk tal-isptarijiet u tiżviluppa l-kura tal-pazjenti esterni.

3.

Ittejjeb l-effiċjenza tal-Aġenzija tal-Impjiegi billi tiżviluppa sistema ta' monitoraġġ tal-prestazzjoni u timmira aħjar lejn dawk l-aktar vulnerabbli, bħall-ħaddiema bi ftit ħiliet u ixjaħ, dawk qiegħda fit-tul u r-Rom. Testendi l-kopertura u l-effikaċja tal-politiki attivi tas-suq tax-xogħol biex tqabbel il-profili ta' min qiegħed ifittex xogħol u tilħaq liż-żgħażagħ mhux reġistrati li mhux jaħdmu, li mhux qed jistudjaw jew mhux qed jirċievu taħriġ, f'konformità mal-objettivi ta' garanzija għaż-żgħażagħ. Ittejjeb il-kopertura effettiva tal-benefiċċji tal-qgħad u l-għajnuna soċjali u r-rabtiet tagħhom mal-miżuri ta' attivazzjoni. Tkompli r-rieżami komprensiv tal-limiti minimi għall-kontribuzzjonijiet tas-sigurtà soċjali ħalli tiżgura li s-sistema ma tagħmilhiex aktar vantaġġuża għal dawk bi ftit ħiliet li jibqgħu barra mis-suq tax-xogħol. Tistabbilixxi, f'konsultazzjoni mas-sħab soċjali, linji gwida trasparenti għall-aġġustament tal-pagi minimi statutorji filwaqt li tqis l-impatt fuq l-impjiegi u l-kompetittività. Sabiex ittaffi l-faqar, ittejjeb aktar l-aċċessibbiltà u l-effikaċja tas-servizzi soċjali u t-trasferimenti għat-tfal u l-anzjani.

4.

Tadotta l-Att dwar l-Edukazzjoni fl-Iskejjel u twettaq riformi fl-edukazzjoni vokazzjonali u għolja sabiex iżżid il-livell u r-rilevanza tal-ħiliet miksuba fil-livelli kollha, filwaqt li trawwem sħubijiet bejn l-istituzzjonijiet edukattivi u d-dinja kummerċjali bil-għan li tallinja aħjar ir-riżultati mal-ħtiġijiet tas-suq tax-xogħol. Issaħħaħ il-kwalità tal-edukazzjoni vokazzjonali u l-istituzzjonijiet tat-taħriġ u ttejjeb l-aċċess għat-tagħlim tul il-ħajja. Tħaffef l-isforzi biex ittejjeb l-aċċess għall-edukazzjoni preskolastika u skolastika ta' kwalità u inklużiva ta' tfal żvantaġġati, partikolarment ir-Rom u timplimenta b'mod strett ir-regoli li jorbtu l-pagament tal-benefiċċji tat-tfal mal-parteċipazzjoni fl-edukazzjoni.

5.

Tkompli ttejjeb l-ambjent kummerċjali, partikolarment għall-impriżi żgħar u ta' daqs medju, billi tnaqqas il-burokrazija, tippromwovi l-gvern-e, tirrazzjonalizza l-proċeduri ta' insolvenza u timplimenta leġiżlazzjoni dwar il-pagamenti tard. Ittejjeb is-sistema tal-akkwist pubbliku billi ttejjeb il-kapaċità amministrattiva, issaħħaħ il-kontrolli ex ante mwettqa mill-Aġenzija tal-Akkwist Pubbliku u tieħu passi konkreti għall-implimentazzjoni tal-akkwist-e. Ittejjeb il-kwalità u l-indipendenza tal-ġudikatura u żżid il-ġlieda kontra l-korruzzjoni.

6.

Iżżid ir-riformi tas-settur tal-enerġija sabiex iżżid il-kompetizzjoni, l-effiċjenza u t-trasparenza tas-suq u l-effiċjenza enerġetika, partikolarment billi tneħħi l-ostakli għas-suq, tnaqqas il-piż tas-segment regolat, iżżid l-isforzi biex toħloq suq tal-operaturi trasparenti għall-elettriku u l-gass, tneħħi l-kwoti gradwalment, u ssaħħaħ l-indipendenza u l-kapaċità amministrattiva tar-regolatur tal-enerġija. Taċċelera l-proġetti ta' interkonessjoni mal-Istati Membri ġirien u mal-pajjiżi kandidati, b'mod partikolari għall-gass, u ssaħħaħ il-kapaċità li tindirizza l-qtugħ.

29.7.2014   

MT

Il-Ġurnal Uffiċjali tal-Unjoni Ewropea

C 247/12

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni biex tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq l-oqsma ewlenin fejn hija meħtieġa azzjoni sabiex jissaħħaħ il-potenzjal tal-Ewropa għal tkabbir sostenibbli u l-kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi nazzjonali tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, waqt li esprimew, b'mod partikolari, impenn sħiħ sabiex jinkisbu l-objettivi tal-Istrateġija tal-Ewropa 2020 u jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta’ Lulju 2013, il-Kunsill adotta Rakkomandazzjoni (3) dwar il-Programm Nazzjonali ta’ Riforma tar-Repubblika Ċeka għall-2013 u ta l-opinjoni tiegħu dwar il-Programm ta' Konverġenza aġġornat tar-Repubblika Ċeka għall-2012‐2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Ukoll, fit-13 ta' Novembru 2013, il-Kummissjoni, fuq il-bażi tar-Regolament (UE) Nru 1176/2011 tal-Parlament Ewropew u tal-Kunsill (4), adottat ir-Rapport ta' Mekkaniżmu ta' Twissija, li fih, ir-Repubblika Ċeka ma ġietx identifikata bħala wieħed mill-Istati Membri li għalihom se ssir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidazzjoni fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidazzjoni fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu trattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fis-16 ta' April 2014, ir-Repubblika Ċeka ppreżentat il-programm Nazzjonali ta' Riforma tagħha tal-2014 u, fit-28 ta' April 2014, il-Programm ta' Konverġenza tagħha tal-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(8)

L-objettiv tal-istrateġija baġitarja deskritta fil-Programm ta' Konverġenza tal-2014 huwa li d-defiċit tal-gvern ġenerali jinżamm taħt it-3 % tal-valur ta' referenza tat-Trattat tal-PDG matul il-perjodu tal-programm. Il-Programm ta' Konverġenza jsemmi l-objettiv ta' terminu medju ta' ‐ 1 % tal-PDG, li jirrifletti r-rekwiżiti tal-Patt ta' Stabbiltà u Tkabbir. Filwaqt li l-istrateġija baġitarja hija konformi mal-Patt ta' Stabbiltà u Tkabbir fl-2014, l-aġġustament meħtieġ f'termini strutturali mhuwiex mistenni li jintlaħaq fl-2015 peress li l-bilanċ strutturali kkalkolat mill-ġdid huwa proġettat li jiddeterjora b'0,6 pp. Barra minn hekk, l-infiq tal-gvern huwa mistenni li jikber b’pass mhux konsistenti mal-limitu referenzjarju tan-nefqa. Il-bilanċ strutturali kkalkolat mill-ġdid huwa previst li jiddevja mit-triq ta' aġġustment meħtieġ fl-2016 u fl-2017 bil-bilanċ strutturali kkalkolat mill-ġdid ipproġettat għal ‐ 1,6 % u ‐ 1,9 % tal-PDG rispettivament. Inġenerali, mill-2015 hu mistenni riskju ta' devjazzjoni mit-triq ta' aġġustament lejn l-objettiv ta' terminu medju. Skont il-Programm ta' Konverġenza, il-proporzjon tad-dejn, li huwa taħt is-60 % tal-valur referenzjali tal-PDG, hu proġettata li jaqa' temporanjament b'1,1 pp għal 45 % tal-PDG fl-2014 u li jiżdied għal 46 % tal-PDG fl-2015. Ix-xenarju makroekonomiku sottostanti għall-projezzjonijiet baġitarji fil-Programm ta' Konverġenza huwa plawsibbli. L-ekonomija Ċeka mistennija tikber b'1,7 % fl-2014 u bi 2 % fl-2015 skont il-Programm ta' Konverġenza meta mqabbel ma' 2 % u 2,4 % previsti mit-tbassir tas-servizzi tal-Kummissjoni għar-Rebbiegħa 2014. Ir-riskji ewlenin għall-prospettiva baġitarja joħorġu minn inċertezza kbira dwar l-iżvilupp futur ta' investiment pubbliku u minn infiq potenzjali ta' darba relatat mal-kuntratt ta' lokazzjoni ppjanat għal fighter jets b'impatt li jżid id-defiċit b' 0,5 % tal-PDG fl-2015.

Skont it-tbassir tal-Kummissjoni hemm riskju ta' devjazzjoni sinifikanti mill-objettiv ta' terminu medju fl-2015. Id-differenza fir-rigward tax-xenarju tal-Programm ta' Konverġenza tinsab f'assunzjonijiet differenti dwar politiki u miżuri diskrezzjonali fl-2015. Abbażi tal-valutazzjoni tiegħu tal-Programm ta' Konverġenza u t-Tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li d-defiċit tnaqqas b'mod sostenibbli għal taħt it-3 % tal-PDG fl-2013, f'konformità mar-rakkomandazzjoni tal-Kunsill, u li waqt l-objettiv ta' terminu medju huwa mistenni li jintlaħaq fl-2014, hemm riskju ta' devjazzjoni sinifikanti minnu fl-2015.

(9)

Ir-Repubblika Ċeka ħarġet minn riċessjoni ta' sentejn u bħalissa qed taffaċċja l-isfida li tikseb tkabbir kbir ‐sostnut, f'kuntest ta' popolazzjoni li qed tixjiħ b'rata mgħaġġla. L-investiment pubbliku ilu jinsab fuq triq wieqfa għan-niżla sa minn dawn l-aħħar snin u l-investiment fl-infrastruttura sofra partikolarment. Il-mudell tat-tkabbir tal-ekonomija Ċeka qabel il-kriżi kien jiddependi fuq flussi kbar deħlin ta' kapital barrani u orjentazzjoni ta' esportazzjoni qawwija. Peress li l-ispazju għall-irkupru bbażat fuq l-akkumulazzjoni ta' fatturi ta' produzzjoni (inkluż kapital barrani) jidher limitat, id-direzzjoni mill-ġdid tal-ekonomija lejn muturi domestiċi ta' tkabbir tiftaħ toroq ġodda għal kisbiet ta' produttività. Elementi essenzjali ta' dan il-proċess jinkludu l-appoġġ għall-edukazzjoni, it-taħriġ u l-innovazzjoni u t-tisħiħ tal-istituzzjonijiet.

(10)

Il-gvern riċentement approva t-Trattat dwar l-Istabbiltà, il-Koordinazzjoni u l-Governanza, għalkemm ir-ratifika tiegħu mill-Parlament għadha pendenti. Ix-xogħol fuq riforma komprensiva tal-qafas fiskali beda fl-2011 iżda l-adozzjoni u l-implimentazzjoni tiegħu għadhom mhux ċerti. L-adozzjoni tal-leġislazzjoni rilevanti li tiżgura konformità mad-Direttiva tal-Kunsill 2011/85/UE (5) ġiet posposta wkoll.

(11)

Fil-qasam tat-tassazzjoni, l-isfidi prinċipali għar-Repubblika Ċeka huma li tagħmel il-ġbir tad-dħul iktar effiċjenti u tikseb struttura tat-taxxa li tgħin iktar it-tkabbir. Ir-Repubblika Ċeka ħadet xi miżuri biex ittejjeb il-konformità mat-taxxa, b'mod partikolari fil-qasam tat-tassazzjoni indiretta, iżda n-nefqa inġenerali għal-konformità għadha għolja wisq. F'dan il-kuntest, il-bażijiet tat-taxxa (taxxi fuq l-introjtu, kontribuzzjonijiet tas-saħħa u tas-sigurtà soċjali) għadhom ma ġewx armonizzati u l-istabbiliment ta' punt uniku ta' ġbir previst fl-2015 kien ikkanċellat. Il-Gvern madankollu ħabbar l-intenzjoni tiegħu li jindirizza l-kwistjoni tal-armonizzazzjoni tal-bażijiet tat-taxxa. Ir-rakkomandazzjonijiet tal-2013 rigward l-istruttura tat-tassazzjoni għadhom ma ġewx segwiti. It-tassazzjoni fuq ix-xogħol tibqa' għolja, speċjalment għal persuni b'introjtu baxx, inklużi ħaddiema part-time, notevolment minħabba l-kontribuzzjonjiet tas-sigurta soċjali elevati. Jeżisti xi potenzjal għal kambjament ta' direzzjoni mit-tassazzjoni tax-xogħol għal oqsma oħra, bħall-ambjent u t-taxxi rikorrenti ta' abitazzjoni, li huma t-tnejn relattivament baxxi. Jibqgħu diskrepanzi sinifikanti fit-trattament tal-kontribuzzjonijiet tat-taxxa u tas-sigurtà soċjali tal-impjegati u ta' dawk li jaħdmu għal rashom, li jwasslu biex il-bażi tat-taxxa tiċkien u joħolqu inċentivi għal impjieg indipendenti fittizju b'konsegwenzi inġusti għal dawk l-impjegati skont kuntratt tal-impjieg regolari.

(12)

Ir-Repubblika Ċeka qed taffaċċja riskji ta' sostenibbiltà medji fit-terminu twil prinċipalment minħabba żidiet ippjanati fil-pensjonijiet u l-infiq tal-kura tas-saħħa. Skont il-leġislazzjoni attwali, l-età statutorja tal-irtirar hija ppjanata li tiżdied fil-perijodu twil iżda bil-mod wisq fit-terminu medju. Il-Gvern jippjana li jintroduċi mekkaniżmu ta' reviżjoni li jallinja l-età tal-irtirar mal-kambjamenti fl-istennija tal-għomor iżda din hija risposta parzjali għall-isfida tad-distakk tas-sostenibbiltà. Barra minn hekk, l-indiċjar temporanjament iktar baxx se jkun terminat fl-2015, sena qabel dik pjanata, u l-mekkaniżmu ta' indiċjar tal-pensjoni standard (prezzijiet flimkien ma' terz taż-żieda f'pagi reali) għadu ma ġiex rivedut. Sar progress limitat fil-promozzjoni tal-impjegabbiltà ta' ħaddiema ikbar fl-età. Ma sar l-ebda progress fit-titjib tal-kosteffettività tal-infiq pubbliku fuq il-kura tas-saħħa. Is-settur tal-in‐patients juri eċċess fil-kapaċità li jindika li hemm lok għal titjib possibbli fil-kosteffettività u l-governanza.

(13)

Saru ċerti passi inizjali sabiex tittejjeb l-kapaċità u l-kwalità tas-servizz pubbliku tal-impjiegi. Dawn imorru fid-direzzjoni t-tajba iżda l-impatt tagħhom irid jiġi evalwat. Politiki tas-suq tax-xogħol attivi jibqgħu b'nuqqas ta' finanzi u ma jindirizzawx b'mod effettiv in-nisa bi tfal żgħar, iż-żgħażagħ u ħaddiema ikbar fl-età. Minkejja r-rata tal-impjieg globali għolja, dawn il-gruppi għadhom mhux rappreżentati biżżejjed fis-suq tax-xogħol. Aċċess limitat għal faċilitajiet u servizzi abbordabbli għall-indukrar tat-tfal u t-tħaddin relattivament baxx ta' impjieg part-time jfixkel il-parteċipazzjoni tan-nisa fis-suq tax-xogħol. Id-distakk bejn il-pagi tal-irgiel u n-nisa fl-2012 kien għadu wieħed mill-ikbar fl-Unjoni.

(14)

Ir-rilevanza tal-kwalità u s-suq tax-xogħol tas-sistema edukattiva Ċeka huma raġuni għal tħassib. Ittieħdu xi miżuri biex jittejjeb il-qafas tal-evalwazzjoni fl-edukazzjoni obbligatorja, iżda s-segwitu fir-rigward ta' skejjel u studenti b'riżultati iktar baxxi jibqa' ta' sfida. L-attrattività tal-professjonijiet tat-tagħlim ukoll hija kwistjoni, li l-gvern jippjana li jindirizza. Il-parteċipazzjoni baxxa tat-tfal Rom fl-edukazzjoni tat-tfulija bikrija inklussiva u fl-edukazzjoni primarja tibqa' sfida għall-integrazzjoni tagħhom. Ir-riforma tal-edukazzjoni iktar għolja ġiet posposta wkoll u ma sar l-ebda progress dwar it-tkabbir tal-akkreditazzjoni u l-iffinanzjar fl-edukazzjoni għolja. Ġew introdotti kambjamenti żgħar biss fir-rigward tal-iffinanzjar tal-istituzzjonijiet tar-riċerka. Jibqa' kruċjali li jinħolqu inċentivi xierqa għal riċerkaturi pubbliċi biex ifittxu l-eċċellenza, jindirizzaw sfidi soċjetali, u jikkooperaw mas-settur tan-negozju.

(15)

Il-proċess ta' deregolamentazzjoni tan-numru għoli ta' professjonijiet regolati nbeda, iżda b'pass bil-mod li ma jipproduċix benefiċċji rapidi minn kompetizzjoni miżjuda fis-settur tas-servizzi. Ir-Repubblika Ċeka ħadet xi miżuri inizjali biex iżżid l-effiċjenza tal-enerġija, speċjalment permezz ta' inċentivi ta' fondi pubbliċi b'appoġġ għas-settur tal-kostruzzjoni. Il-potenzjal għall-iffrankar tal-enerġija jibqa' sostanzjali u iktar miżuri ambizzjużi jikkontribwixxu biex titnaqqas id-dipendenza fuq l-enerġija.

(16)

Il-kwalità u l-effikaċja tal-amministrazzjoni pubblika jkomplu jirrappreżentaw sfida b'riperkussjonijiet ekonomiċi negattivi. Il-mistenni Att dwar is-Servizz Ċivili għadu ma ġiex adottat; l-adozzjoni tiegħu hija prijorità prinċipali għall-gvern. Il-progress fil-ġlieda kontra l-korruzzjoni kien limitat; biċċiet kbar ta' leġislazzjoni mill-istrateġija kontra l-korruzzjoni 2013‐14 għadhom ma ġewx adottati. Viżjoni ċara ta' terminu itwal dwar kif għandha tiġi indirizzata b'mod durabbli din il-kwistjoni ta' importanza kbira għall-iżvilupp ekonomiku u soċjetali għadha ma gietx formulata. L-implimentazzjoni ta' tenders pubbliċi fuq livell lokali u reġjonali qed ikollha dewmien bla bżonn. Ir-regoli tal-akkwist pubbliku ġodda jikkostitwixxu pass lura billi jneħħu wħud mis-salvagwardji ta' trasparenza. Sar progress limitat fuq it-titjib tal-implimentazzjoni tal-fondi tal-UE. Hemm bżonn ta' sforzi ulterjuri kif muri mir-rati ta' żbalji għoljin irrappurtati mill-awtorità tal-awditjar għal diversi programmi fl-aħħar tal-2013.

(17)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tar-Repubblika Ċeka. Hija vvalutat il-Programm Nazzjonali ta' Riforma u l-Programm ta’ Konverġenza. Hija ma kkunsidratx biss ir-rilevanza tagħhom għall-politika fiskali u soċjoekonomika sostenibbli fir-Repubblika Ċeka iżda wkoll il-konformità tagħhom mar-regoli u l-gwida tal-UE, minħabba l-bżonn għat-tisħiħ tal-governanza ekonomika globali tal-Unjoni Ewropea billi jiġi pprovdut kontribut fil-livell tal-UE fid-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (7) hawn taħt.

(18)

Fid-dawl ta' din il-valutazzjoni, il-Kunsill eżamina l-Programm ta' Konverġenza, u l-opinjoni tiegħu (6) hija riflessa b'mod partikolari fir-rakkamondazzjoni (1) ta' hawn taħt.

1.

Wara l-korrezzjoni tad-defiċit eċċessiv, iżżomm pożizzjoni fiskali tajba fl-2014. Issaħħaħ b'mod sinifikanti l-istrateġija baġitarja fl-2015 sabiex tiżgura li l-objettiv ta' terminu medju jintlaħaq u jibqa' fl-objettiv ta' wara t-terminu medju. Tagħti prijorità lil infiq li jiffavorixxi t-tkabbir biex tappoġġa l-irkupru u ttejjeb il-prospetti għat-tkabbir. Tadotta u timplimenta miżuri biex issaħħaħ il-qafas fiskali, u b'mod partikolari tistabbilixxi istituzzjoni fiskali indipendenti biex tissorvelja politiki fiskali, tintroduċi regoli fiskali għal gvernijiet lokali u reġjonali u ttejjeb il-koordinazzjoni bejn is-saffi kollha tal-gvern.

2.

Ittejjeb il-konformità tat-taxxa billi tiffoka b'mod partikolari fuq il-VAT u tnaqqas l-ispejjeż tal-ġbir u l-ħlas tat-taxxi billi tissimplifika s-sistema tat-taxxa u tarmonizza l-bażijiet tat-taxxa fuq l-introjtu personali u l-kontribuzzjonijiet tas-sigurtà soċjali u s-saħħa. Tnaqqas il-livell għoli ta' tassazzjoni fuq ix-xogħol, partikolarment għal persuni bi dħul baxx. Iċċaqlaq it-tassazzjoni fuq oqsma ta' inqas detriment għat-tkabbir, bħat-taxxi rikorrenti fuq l-abitazzjoni u t-taxxi tal-ambjent. Tnaqqas iktar id-diskrepanzi fit-trattament tat-taxxa ta' impjegati u ta' dawk li jaħdmu għal rashom.

3.

Tiżgura sostenibbiltà dejjiema tal-iskema tal-pensjonijiet pubbliċi, b'mod partikolari billi taċċellera ż-żieda tal-età statutorja tal-irtirar u billi torbotha b'mod iktar ċar mal-kambjamenti fl-istennija tal-għomor. Tippromwovi l-impjegabbiltà ta' ħaddiema ikbar fl-età u tagħmel rieżami tal-mekkaniżmu ta' indiċjar tal-pensjonijiet. Tieħu miżuri biex ittejjeb b'mod sinifikanti l-kosteffettività u l-governanza tas-settur tal-kura tas-saħħa, b'mod partikolari għall-kura fl-isptarijiet.

4.

Issaħħaħ l-effiċjenza u l-effettività tas-servizz tal-impjieg pubbliku, b'mod partikolari billi tistabbilixxi sistema ta' kejl tal-prestazzjoni. Iżżid il-parteċipazzjoni ta' żgħażagħ qiegħda f'servizzi personalizzati. Iżżid b'mod konsiderevoli d-disponibbiltà ta' faċilitajiet u servizzi abbordabbli u ta' kwalità tal-indukrar tat-tfal, b'konċentrazzjoni fuq tfal sa tliet snin.

5.

Tiżgura li l-akkreditazzjoni, il-governanza u l-iffinanzjar tal-edukazzjoni għolja jikkontribwixxu biex ittejjeb il-kwalità tagħha u r-rilevanza tas-suq tax-xogħol. Taċċellera l-iżvilupp u l-introduzzjoni ta' metodoloġija ġdida għall-evalwar tar-riċerka u l-allokazzjoni ta' fondi biex iżżid is-sehem ta' fondi bbażati fuq il-prestazzjoni ta' istituzzjonijiet tar-riċerka. Fl-edukazzjoni obbligatorja, tagħmel il-professjoni tat-tagħlim iktar attraenti, timplimenta qafas ta' evalwazzjoni komprensiv u tappoġġa l-iskejjel u l-istudenti b'riżultati baxxi. Iżżid l-inklussività tal-edukazzjoni, b'mod notevoli billi tippromwovi l-parteċipazzjoni ta' tfal żvantaġġati soċjalment u ta' tfal Roma b'mod partikolari fl-edukazzjoni miċ-ċokon.

6.

Taċċelera r-riforma ta' professjonijiet regolati, billi tiffoka fuq it-tneħħija ta' ħtiġijiet mhux ġustifikati u sproporzjonati. Iżżid l-isforzi biex ittejjeb l-effiċjenza tal-enerġija fl-ekonomija.

7.

Fl-2014 tadotta u timplimenta Att dwar is-Servizz Ċivili li jiżgura servizz tal-amministrazzjoni tal-istat stabbli, effiċjenti u professjonali. Tħaffef u ssaħħaħ sostanzjalment il-ġlieda kontra l-korruzzjoni billi timplimenta l-miżuri leġislattivi li jkun fadal, stipulati fl-istrateġija tal-antikorruzzjoni 2013‐2014 u billi tiżviluppa pjanijiet għall-perjodu li jmiss. Ittejjeb iktar il-ġestjoni ta' fondi tal-UE billi tissimplifika l-istrutturi ta' implimentazzjoni, ittejjeb il-kapaċità u tindirizza kunflitti ta' interess. Iżżid it-trasparenza tal-akkwist pubbliku u ttejjeb l-implimentazzjoni ta' tenders pubbliċi billi tipprovdi gwida u superviżjoni xierqa.

29.7.2014   

MT

Il-Ġurnal Uffiċjali tal-Unjoni Ewropea

C 247/17

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u tal-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jifformaw il-“linji gwida integrati”. L-Istati Membri kienu mistiedna sabiex jikkonsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew tal-Gvern tal-Istati Membri ddeċidew dwar Patt għal Tkabbir u Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma 2013 tad-Danimarka u ta l-opinjoni tiegħu dwar il-Programm ta' Konverġenza aġġornat tad-Danimarka għall-perijodu 2013-2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lid-Danimarka bħala wieħed mill-Istati Membri li għalihom ser issir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kondizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal-eżami mill-ġdid fil-fond tagħha dwar id-Danimarka, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni twassalha biex tikkonkludi li l-isfidi makroekonomiċi tad-Danimarka relatati ma' dejn privat u kompetittività esterna ma kienux għadhom identifikati bħala żbilanċi fis-sens tal-Proċedura ta' Żbilanċ Makroekonomiku. B'mod partikolari, l-aġġustament tas-suq tad-djar u l-implikazzjonijiet ta' dejn għoli tas-settur privat għall-ekonomija reali u l-istabbiltà tas-settur finanzjarju jidhru kkontrollati. Madankollu, dawn l-iżviluppi, kif ukoll il-muturi tal-kompetittività esterna, jistħoqqilhom monitoraġġ kontinwu.

(8)

Fil-15 ta' April 2014, id-Danimarka ppreżentat il-Programm Nazzjonali ta' Riforma 2014 tagħha u l-Programm ta' Konverġenza 2014 tagħha. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(9)

L-objettiv tal-istrateġija baġitarja msemmi fil-Programm ta' Konverġenza 2014 huwa li tiġi żgurata s-sostenibbiltà tal-korrezzjoni tal-iżbilanċ eċċessiv u li jinżamm il-bilanċ tal-baġit strutturali fuq il-livell tal-objettiv ta' terminu medju jew 'il fuq minnu. L-objettiv tat-terminu medju, ta' -0,5 % tal-PDG, jirrifletti l-ħtiġijiet tal-Patt ta' Stabbiltà u Tkabbir. Id-defiċit tal-gvern ġenerali tad-Danimarka kien inġieb b'mod sostenibbli taħt it-3 % tal-PDG fl-2013. Il-Programm ta' Konverġenza jimmira defiċit primarju tal-gvern ġenerali ta' 1,3 % tal-PDG fl-2014 u 2,9 % fl-2015, li huwa konsistenti ma' bilanċ strutturali (kalkolat mill-ġdid) fil-livell tal-objettiv tat-terminu medju jew 'il fuq minnu. B'ħarsa ġenerali, l-istrateġija baġitarja deskritta fil-Programm ta' Konverġenza hija konformi mal-ħtiġijiet tal-Patt ta' Stabbiltà u Tkabbir. Il-livell tad-dejn, ta' 44,5 % tal-PDG fl-2013, huwa ppjanat li jiżdied temporanjament fl-2015 u li jonqos wara. Ix-xenarju makroekonomiku sottostanti tal-projezzjonijiet baġitarji fil-Programm ta' Konverġenza huwa plawsibbli. Ix-xenarju jipproġetta tkabbir tal-PDG ta' 1,6 % fl-2014 u 1,9 % fl-2015 u b'mod ġenerali huwa f'konformità mat-tbassir tar-Rebbiegħa 2014 tas-servizzi tal-Kummissjoni ta' 1,5 % u 1,9 %. Abbażi tal-valutazzjoni tiegħu tal-Programm ta' Konverġenza 2014 u t-tbassir tal-Kummissjoni, skont ir-Regolament (KE) Nru 1466/97, l-opinjoni tal-Kunsill hija li l-finanzi pubbliċi tad-Danimarka huma tajbin u l-objettiv tal-Programm ta' Konverġenza jista' jkun mistenni li jintlaħaq.

(10)

Id-Danimarka għamlet xi progress fl-indirizzar tas-sitwazzjoni tal-gruppi fil-marġini tas-suq tax-xogħol kif ukoll dwar l-avvanz tal-effettività tal-prezz tas-sistema edukattiva. Ir-riforma tal-pensjonijiet tad-diżabilità u tal-flessimpjieg bdiet turi riżultati, ir-riforma tal-benefiċċju fi flus daħlet fis-seħħ, intlaħaq qbil fuq riforma tal-benefiċċju tal-mard u f'April il-Gvern nieda proposta għal riforma għal politiki tas-suq tax-xogħol attivi. Jibqgħu l-isfidi biex jiġi żgurat numru suffiċjenti ta' apprendistati u jitkabbru l-kwalità u l-immaġni ta' dan it-tip ta' tagħlim, tiġi mtejba l-edukazzjoni vokazzjonali u s-sistemi tat-taħriġ u jiġu indirizzati r-rati għoljin tal-tluq bikri mill-iskola. Minħabba l-istadju bikri tal-implimentazzjoni tar-riformi, l-effett sħiħ għad irid jidher. Rigward l-edukazzjoni u t-taħriġ vokazzjonali, intlaħaq ftehim għal riforma fi Frar 2014 u hija mistennija tidħol fis-seħħ f'nofs l-2015, bil-ħsieb li tittejjeb il-kwalità tal-edukazzjoni u t-taħriġ vokazzjonali permezz ta' varjetà wiesgħa ta' inizjattivi.

(11)

Li tingħata l-ħajja mill-ġdid lill-produttività tibqa' sfida għall-ekonomija Daniża. Il-valutazzjoni tal-Kummissjoni b'mod ġenerali hija konformi mas-sejbiet tal-Kummissjoni dwar il-Produttività. F'April 2014, il-Kummissjoni dwar il-Produttività ppubblikat 25 rakkomandazzjoni prinċipali u iktar minn 100 proposta konkreta f'oqsma bħall-kompetizzjoni, l-akkwist pubbliku, l-edukazzjoni, l-internalizzazzjoni, l-innovazzjoni, it-tassazzjoni u l-infrastuttura. Passi lejn l-indirizzar tal-isfida tat-tkabbir tal-produttività baxx għandhom jittieħdu permezz tal-implimentazzjoni tar-rakkomandazzjonijiet tal-Kummissjoni dwar il-Produttività.

(12)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tad-Danimarka. Hija vvalutat il-Programm Nazzjonali ta’ Riforma u l-Programm ta’ Konverġenza. Hija ma kkunsidratx biss ir-rilevanza tagħhom għall-politika fiskali u soċjoekonomika sostenibbli fid-Danimarka iżda wkoll il-konformità tagħhom mar-regoli u l-gwida tal-UE, minħabba l-bżonn għat-tisħiħ tal-governanza ekonomika globali tal-Unjoni billi jiġi pprovdut kontribut fil-livell tal-UE fid-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (3) hawn taħt.

(13)

Fid-dawl ta' din l-evalwazzjoni, il-Kunsill eżamina l-Programm ta' Konverġenza, u l-opinjoni tiegħu (5) hija riflessa b'mod partikolari fir-rakkomandazzjoni (1) ta' hawn taħt,

(1)

Wara l-korrezzjoni tal-iżbilanċ eċċessiv, tkompli tfittex politika fiskali li tiffavorixxi t-tkabbir u żżomm pożizzjoni fiskali tajba, billi tiżgura li l-objettiv baġitarju tat-terminu medju jkompli jkun osservat matul il-perijodu kopert mill-Programm ta' Konverġenza.

(2)

Tieħu miżuri ulterjuri biex ittejjeb l-impjegabbiltà tan-nies fil-marġini tas-suq tax-xogħol. Ittejjeb ir-riżultati edukattivi, b'mod partikolari għal żgħażagħ b'passat ta' migrazzjoni, u l-effettività tat-taħriġ vokazzjonali. Tiffaċilita t-transizzjoni għas-suq tax-xogħol, inkluż permezz ta' użu iktar wiesa' ta' taħriġ u apprendistat ibbażat fuq ix-xogħol.

(3)

Iżżid l-isforzi biex tneħħi ostakoli għad-dħul u tnaqqas il-piż regolatorju bil-ħsieb li żżid il-kompetizzjoni fis-settur tas-servizzi domestiċi, b'mod partikolari fil-bejgħ bl-imnut u fil-kostruzzjoni, kif rakkomandat mill-Kummissjoni dwar il-Produttività.

29.7.2014   

MT

Il-Ġurnal Uffiċjali tal-Unjoni Ewropea

C 247/20

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għat-tkabbir u l-impjiegi, bl-isem ta' Ewropa 2020, imsejsa fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni li tagħti spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, u b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r‐rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma tal-Ġermanja għall-2013 u ta l-opinjoni tiegħu dwar il-Programm ta' Stabbiltà aġġornat tal-Ġermanja għall-perijodu 2012‐2017. Fil-15 ta' Novembru 2013, f'konformità mar-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha dwar l-abbozz tal-pjan baġitarju tal-Ġermanja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lill-Ġermanja bħala wieħed mill-Istati Membri li għalihom se ssir analiżi fil‐fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l‐ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal‐eżami mill-ġdid fil-fond dwar il-Ġermanja, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslet biex jiġi konkluż li l-Ġermanja għaddejja minn żbilanċi makroekonomiċi, li jirrikjedu monitoraġġ u azzjoni politika. B'mod partikolari, il-kont kurrenti, persistentement, irreġistra surplus għoli ħafna, li jirrifletti l-effetti pożittivi tal-kompetittività qawwija, b'numru kbir ta' tfaddil li jiġi investit barra l-pajjiż. Huwa wkoll sinjal li t-tkabbir domestiku baqa' bati u li r-riżorsi ekonomiċi setgħu ma kinux allokati b'mod effiċjenti. Minkejja li s-surpluses tal-kont kurrenti ma jgħollux ir-riskji li huma simili għal defiċits kbar, id-daqs u l-persistenza tas-surplus tal-kont kurrenti tal-Ġermanja jeħtieġu attenzjoni mill-qrib. Il-bżonn ta' azzjoni biex jitnaqqas ir-riskju ta' effetti negattivi fuq il-funzjonament tal-ekonomija domestika u ż-żona tal-euro huwa partikolarment importanti minħabba d-daqs tal-ekonomija tal-Ġermanja.

(8)

Fl-14 ta' April 2014, il-Ġermanja ppreżentat il-Programm Nazzjonali ta' Riforma tagħha 2014 u, fit-8 ta' April 2014, il-Programm ta' Stabbiltà 2014 tagħha. Biex jiġu kkunsidrati l-konnessjonijiet bejniethom, iż-żewġ programmi ġew ivvalutati fl-istess żmien.

(9)

L-objettiv tal-istrateġija baġitarja msemmi fil-Programm ta' Stabbiltà 2014 huwa li jiġi żgurat li jkompli jintlaħaq l-objettiv tat‐terminu medju. Il-Programm ta' Stabbiltà jikkonferma l-objettiv tat‐terminu medju ta' ‐0,5 % tal-PDG, li jirrifletti r-rekwiżiti tal-Patt ta' Stabbiltà u Tkabbir. Skont il-Programm ta' Stabbiltà, il-bilanċ strutturali (ikkalkulat mill-ġdid) se jibqa' pożittiv fl-2014 u minn hemm 'il quddiem u d-dejn gross hu ppjanat li jinżel għal 76 % tal-PDG fl-2014 u jibqa' fit-triq tan-niżla b'mod suffiċjenti minn hemm 'il quddiem. Għalhekk, l-istrateġija baġitarja msemmija fil-Programm ta' Stabbiltà hija skont ir-rekwiżiti tal-Patt ta' Stabbiltà u Tkabbir. Ix-xenarju makroekonomiku sottostanti tal-projezzjonijiet baġitarji fil-Programm ta' Stabbiltà, li ma kienx formalment approvat minn korp indipendenti, huwa plawsibbli, peress li hu ġeneralment konformi mat-tbassir tar-Rebbiegħa 2014 tas-servizzi tal-Kummissjoni. Abbażi tal-valutazzjoni tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, l-opinjoni tal-Kunsill hija li l-finanzi pubbliċi fil-Ġermanja jibqgħu ġeneralment sodi hekk kif l-objettiv tat‐terminu medju hu mbassar li jibqa' kif inhu u r-regola tad-dejn tibqa' tiġi rrispettata.

(10)

Sar biss progress limitat mill-Ġermanja fit-tisħiħ tal‐kosteffettività tan-nefqa pubblika fil-kura tas-saħħa u l-kura fit‐tul, għalkemm ġew imħabbra inizjattivi ġodda. Filwaqt li l-għan tagħhom hu li jtejbu l-kosteffettività tal‐kura tas-saħħa, dawn il-pjani jistgħu ma jkunux biżżejjed biex ikun fihom żidiet mistennija tal-kost fil-futur. Ir-riforma tal-pensjonijiet li ġiet adottata reċentement għandha l-għan i ttejjeb il-kundizzjonijiet tal-irtirar kmieni (“Rente mit 63”) u l-livelli tal-pensjonijiet għal ċerti gruppi, tal-aħħar jinkludu wkoll suppliment tal-pensjoni għal dawk li rabbew it-tfal li twieldu qabel l-1992 (“Mütterrente”). Ir-riforma tpoġġi piż addizzjonali fuq is-sostenibbiltà tas-sistema pubblika tal-pensjonijet u hi ppjanata li tkun iffinanzjata minn rata ogħla ta’ kontribuzzjoni tal-pensjonijiet, b'implikazzjonijet negattivi għad-dħul disponibbli. Ir-riforma jista’ wkoll ikollha effett negattiv fuq kemm jaqbdu l‐art il-pensjonijiet kumplimentari tat-tieni u t-tielet pilastru. Il-Ġermanja għamlet progress limitat biex iżżid l-infiq fuq l-edukazzjoni u għanlet ftit progress rigward iż-żieda fl-infiq fuq ir-riċerka. Jidher li hemm bżonn sforzi ulterjuri fil-livelli kollha tal-gvern biex tintlaħaq il-mira tan-nefqa totali pubblika u privata fuq l-edukazzjoni u r-riċerka ta' 10 % tal‐PDG sal-2015, u hemm bżonn li timmira lejn miri ta' segwitu saħansitra aktar ambizzjużi biex tlaħħaq mal-ekonomiji l-aktar innovattivi. L-investiment fl-infrastruttura żdied fil-Ġermanja fis-snin reċenti u jeżistu pjani biex ikomplu jsaħħuh, imma jidher li hemm bżonn sforzi addizzjonali.

(11)

Il-Ġermanja għamlet progress ġeneralment limitat biex ittejjeb l-effiċjenza u x‐xejra favorevoli għat-tkabbir tas-sistema tat-taxxa u biex jitnaqqas il-piż tat-taxxa fuq ix-xogħol. Mhuma previsti l‐ebda miżuri kbar biex ikun hemm xaqliba lejn sorsi ta' dħul li jiffavorixxu aktar it-tkabbir. L-applikazzjoni tar‐rata mnaqqsa tat-taxxa fuq il-valur miżjud (VAT) (bħalissa ta' 7 %) tista' tidjieq filwaqt li titwessa' l-bażi ġenerali tal-VAT. Dħul pjuttost baxx minn taxxi rikorrenti tal-proprjetà jissuġġerixxi li hemm spazju għal żidiet u d-distribuzzjoni tal-piż tat-taxxi tista' tkun aktar ġusta jekk tiġi rivalutata l-bażi tat-taxxa fuq il-proprjetà muniċipali (Grundsteuer). Il-kundizzjonijiet għall-investiment fil-Ġermanja jistgħu jitjiebu aktar billi tiġi rriformata t-taxxa tal-kummerċ lokali (Gewerbesteuer), u jintqata' l-piż amministrattiv marbut mal-ġbir tat-taxxa, u t-tnaqqis tal-iżbilanċ tat-taxxa korporattiva eżistenti favur l‐iffinanzjar tad-dejn.

(12)

Il-qafas fiskali ġie kkomplementat mir-regola tal-baġit nazzjonali bbilanċjat u l‐istabbiliment ta' bord konsultattiv indipendenti. Jidher li għad hemm bżonn regoli speċifiċi, għall‐implimentazzjoni tar-regola kostituzzjonali tal-baġit nazzjonali bilanċjat (“trażżin tad-dejn”) f'ħafna Länder sabiex tiġi żgurata l-applikazzjoni effettiva tat-trażżin tad-dejn fiċ-ċiklu baġitarju annwali. Ir-rieżami ppjanat ta' relazzjonijiet fiskali bejn il-federazzjoni, il-Länder u l-muniċipalitajiet għandu jintuża biex isaħħaħ ir-responsabbiltà u l-akkontabilità fiskali.

(13)

Fis-snin li għaddew żdiedu l-pagi wara perijodu mtawwal ta' moderazzjoni fil-pagi, imma fl-2013 it-tkabbir reali tal-pagi kien aktar moderat milli fl-2012. Il-Ġermanja qed tippjana li tintroduċi paga minima ġenerali ta' EUR 8,50/siegħa fl-2015, li se tidħol fis-seħħ b'mod sħiħ mill-2017. L-introduzzjoni tal-paga minima ġenerali ppjanata, li hija mmirata biex tiżgura dħul minimu adegwat għall-ħaddiema, tirrikjedi monitoraġġ mill-qrib tal-impatt tagħha partikolarment fuq l-impjiegi. Sar sforz limitat biex jitnaqqas il‐porzjon għoli ta' taxxa, partikolarment għal dawk b'paga baxxa. Ir-riforma tal-pensjonijiet adottata u l-pjani kurrenti tar-riforma fil-qasam tal‐kura fit-tul, li jinvolvu żieda fir-rati ta' kontribuzzjoni tal-assigurazzjoni soċjali, jistgħu jerġgħu jżidu l-porzjon tat-taxxa. Il-Ġermanja għamlet xi progress biex ittella' l-kisbiet edukattivi tal-persuni żvantaġġati, imma r-rabta bejn il-kisba edukattiva u l‐isfond soċjoekonomiku tibqa' f'saħħitha u persistenti fuq il-ħajja lavorattiva tan-nies. Minkejja xi progress lejn miżuri ta' attivazzjoni xierqa u ta' integrazzjoni, il-qgħad fit‐tul għadu problema, li jagħti s-sinjal ta' bżonn ta' miżuri addizzjonali. Sar biss progress limitat biex jittieħdu miżuri li jiffaċilitaw it‐tranżizzjoni minn impjiegi żgħar għal forom ta' impjiegi soġġetti għal kontribuzzjonijiet sħaħ mandatorji tas-sigurtà soċjali. Ma sar l-ebda progress biex jitnaqqsu d-diżinċentivi fiskali għax-xogħol għal min għandu t-tieni sors ta' dħul. Il-Ġermanja għamlet xi progress biex iżżid id-disponibbiltà tal-postijiet għall-edukazzjoni u l-kura tat-tfal f'età bikrija u full‐time kif ukoll fl-estensjoni tal-iskejjel għall‐ġurnata sħiħa. Fl-istess waqt, il‐faċilitajiet tal-kura tat-tfal u l-iskejjel għall-ġurnata sħiħa għadhom soġġetti għal problemi ta' kwalità u differenzi reġjonali.

(14)

Il-proposta tal-gvern għal reviżjoni tal-Att dwar l-Enerġija Rinnovabbli timmira biex tbatti ż-żidiet ġenerali tal-kost tal-enerġija, tiddistribwixxi l-kostijiet b'mod aktar ugwali fost il-konsumaturi, tikkontrolla l-espansjoni tas-sorsi ta' enerġija rinnovabbli u tippromwovi l-integrazzjoni tas-suq. L-implimentazzjoni tar-riforma hemm bżonn li tiġi mmonitorjata bir-reqqa fir-rigward tal-impatt tagħha fuq il‐kosteffettività tas-sistema ta' appoġġ. Hemm bżonn ta' aktar sforzi fir-rigward tal-espansjoni tan-netwerks u l-koordinazzjoni mal-pajjiżi ġirien.

(15)

Azzjoni ta' politika biex il-kompetizzjoni tiġi stimulata ulterjorment fis-setturi tas-servizzi kienet limitata, anke jekk daħlu fis-seħħ riformi iżolati fi professjonijiet u reġjuni speċifiċi, pereżempju fir-rigward tal-awtorizzazzjonijiet u l-komunikazzjoni kummerċjali fis-settur tal-kostruzzjoni. Filwaqt li t-tkabbir tal-produttività jista' jkun li hu strutturalment aktar baxx fis-settur tas-servizzi milli fl-industrija, hu partikolarment baxx f'xi setturi tas-servizzi, partikolarment is-servizzi professjonali. Għad hemm ostakli biex wieħed jidħol fis-suq u jeżerċita servizzi professjonali. Dawn jinkludu restrizzjonjijiet dwar il-formalegali u l-parteċipazzjoni azzjonarja, u r-rekwiżiti tal-kwalifiki professjonali. Id-diversità tal-arranġamenti regolatorji għas-servizzi professjonali madwar il-Länder tissuġġerixxi li hemm ambitu biex jiġu identifikati l-approċċi regolatorji l-anqas goffi biex jiġu estiżi madwar il-pajjiż. Il-valur tal-kuntratti ppubblikati mill-awtoritajiet Ġermaniżi skont il-leġiżlazzjoni tal-UE tal-akkwisti jibqa' wieħed mill-aktar baxxi fl-Unjoni. It-transizzjoni komprensiva għal suq trasparenti tal-akkwisti elettroniċi jista' jżid il‐kompetizzjoni. Fis-settur tal-bejgħ bl-imnut, ir-regolamenti tal-ippjanar f'ċerti Länder ikomplu jirrestrinġu d-dħul ġdid fis-suq. Il-progress biex titjieb il-kompetizzjoni fis-swieq tal-ferroviji kien limitat.

(16)

Il-Ġermanja għamlet progress limitat fuq miżuri li ttieħdu biex jiġi kkonsolidat is-settur bankarju, b'mod partikolari billi jitjieb il-qafas ta' governanza. Id-deċiżjonijiet tal-Kummissjoni dwar l-għajnuna mill-Istat ġeneralment saqu r-ristrutturar tal-Landesbanken fis-snin li għaddew u s-settur għadu mfarrak. Jidher li hemm bżonn sforzi ulterjuri biex jiġu indirizzati l-ostakli strutturali u ta' governanza li jfixklu l-konsolidazzjoni misjuqa mis‐suq, li żżid ukoll l-effiċjenza globali tas-settur finanzjarju. Ir-rieżami tal-qafas legali tat-tieni pilastru tal-banek jista' jappoġġja ulterjorment il-konsolidazzjoni tas-settur tal-banek pubbliċi.

(17)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Ġermanja. Hija vvalutat il-Programm Nazzjonali ta’ Riforma u l-Programm ta’ Stabbiltà. Hija mhux biss qieset ir‐rilevanza tagħhom għall-politika fiskali u soċjoekonomika sostenibbli fil-Ġermanja imma qieset ukoll il-konformità tagħhom mar-regoli u mal-gwida tal-UE, fid‐dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha fil-qafas tas-Semestru Ewropew huma riflessi fir-rakkomandazzjonijiet (1) sa (4) hawn taħt.

(18)

Fid-dawl ta’ din l-evalwazzjoni, il-Kunsill eżamina l-Programm ta' Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) hawn taħt.

(19)

Fid-dawl tar-rieżami fil‐fond tal-Kummissjoni u din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Stabbiltà. Ir-rakkomandazzjonijiet skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (1) sa (4) hawn taħt.

(20)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-żona tal-euro inġenerali. Abbażi ta' dan, il-Kunsill ħareġ rakkomandazzjonijiet speċifiċi indirizzati lill-Istati Membri li għandhom il-munita tal-euro (7). Bħala pajjiż li l-munita tiegħu hija l-euro, il-Ġermanja għandha tiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Issegwi politika fiskali favorevoli għat‐tkabbir u tippreserva pożizzjoni fiskali soda, tiżgura li l-objettiv baġitarju fit‐terminu medju jibqa' jiġi rispettat matul il-perijodu kopert mill-Programm ta' Stabbiltà u li l-proporzjon tad-dejn gross tal-gvern jibqa' nieżel b'mod sostnut. B'mod partikolari, tuża l-ambitu disponibbli għal iżjed investiment pubbliku u aktar effiċjenti fl-infrastruttura, l-edukazzjoni u r-riċerka. Ittejjeb l-effiċjenza tas-sistema tat-taxxa, b'mod partikolari billi twessa' l-bażi tat-taxxa, partikolarment fuq il-konsum, billi tivvaluta mill-ġdid il-bażi tat-taxxa tal-proprjetà muniċipali, billi ttejjeb l-amministrazzjoni tat-taxxa, bil-ħsieb ukoll biex jiġi ndukrat l-investiment privat. Tagħmel sforzi addizzjonali biex iżżid il-kosteffettività tal-infiq pubbliku fuq il‐kura tas-saħħa u l-kura fit‐tul. Tiżgura s-sostenibbiltà tas-sistema tal-pensjonijiet billi (i) tibdel il-finanzjament tal-benefiċċji ġodda li mhumiex tal‐assigurazzjoni/estranei (“Mütterrente”) għal finanzjament minn dħul fiskali, ukoll sabiex tiġi evitata żieda ulterjuri ta' kontribuzzjonijiet tas-sigurtà soċjali, (ii) iż-żieda ta' inċentivi għal irtirar aktar tard, u (iii) iż-żieda tal-kopertura tal-iskemi tat-tieni u t-tielet pilastru. Tlesti l-implimentazzjoni tat-trażżin tad-dejn b'mod konsistenti madwar il-Länder, kollha waqt li tiżgura li l-proċeduri ta' monitoraġġ u l-mekkaniżmi ta' korrezzjoni joperaw mingħajr dewmien u jkunu relevanti. Ittejjeb it-tfassil tar-relazzjonijiet fiskali bejn il-federazzjoni, il-Länder u l-muniċipalitajiet anke bil-ħsieb li jiġi żgurat investiment pubbliku adegwat fil-livelli kollha tal-gvern.

2.

Ittejjeb il-kundizzjonijiet li jappoġġjaw ulterjorment id-domanda domestika, fost l-oħrajn billi jitnaqqsu t-taxxa u l‐kontribuzzjonijiet għoljin tas-sigurtà soċjali, speċjalment għal min jaqla' paga baxxa. Meta timplimenta l-paga minima ġenerali, timmonitorja l-impatt tagħha fuq l-impjiegi. Iżżid l-impjegabbiltà tal-ħaddiema billi tgħolli aktar il-kisba fl-edukazzjoni tal-persuni fi żvantaġġ u billi jiġu implimentati miżuri aktar ambizzjużi ta' attivazzjoni u integrazzjoni fis-suq tax‐xogħol, speċjalment għal dawk li ilhom qiegħda. Tieħu miżuri biex tnaqqas id-diżinċentivi fiskali għax-xogħol, b'mod ġenerali għal min għandu t-tieni sors ta' dħul, u tiffaċilita t‐tranżizzjoni minn impjiegi żgħar għal forom ta' impjiegi soġġetti għal kontribuzzjonijiet sħaħ mandatorji tas-sigurtà soċjali. Tindirizza n-nuqqasijiet reġjonali fid-disponibbiltà ta' faċilitajiet full‐time għall-kura tat-tfal u skejjel għall-ġurnata sħiħa filwaqt li ttejjeb il-kwalità ġenerali edukattiva tagħhom.

3.

Iżżomm il-kost ġenerali biex tittrasforma s-sistema tal-enerġija fl-aktar livell baxx possibbli. B'mod partikolari, timmonitorja l-impatt tar-riforma tal-Att dwar l‐Enerġija Rinnovabbli dwar il-kosteffettività tas-sistema ta' appoġġ għall-enerġiji rinnovabbli. Issaħħaħ l-isforzi biex tħaffef l-espansjoni tan-netwerks nazzjonali tal‐elettriku u l-gass u dawk transfruntiera. Iżżid koordinazzjoni mill-qrib dwar il-politika tal-enerġija mal-pajjiżi ġirien.

4.

Tieħu miżuri iktar ambizzjużi biex tistimula ulterjorment il-kompetizzjoni fis-settur tas-servizzi, inklużi ċerti servizzi professjonali, ukoll bir-rieżami tal-approċċi regolatorji eżistenti u tikkonverġi lejn l-aħjar prassi skont il-Länder. Tidentifika r-raġunijiet wara l-valur tal-kuntratti pubbliċi miftuħa għall-akkwisti skont il-leġiżlazzjoni tal-UE. Iżżid l-isforzi biex tneħħi r-regolamenti tal-ippjanar mhux ġustifikati li jirrestrinġu lil min jidħol ġdid fis-settur tal-livell tal-konsumatur. Tieħu azzjoni sabiex telimina l-ostakoli li baqa' għall-kompetizzjoni fis-swieq tal-ferroviji. Tkompli bl-isforzi ta' konsolidazzjoni tas-settur tal- Landesbanken, inkluż billi ttejjeb il-qafas tal-governanza.

29.7.2014   

MT

Il-Ġurnal Uffiċjali tal-Unjoni Ewropea

C 247/25

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni biex tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq il-punti ewlenin fejn hija meħtieġa azzjoni sabiex jissaħħaħ il-potenzjal tal-Ewropa għal tkabbir sostenibbli u kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fl-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, b'mod partikolari li tesprimi impenn b'mod sħiħ sabiex jinkisbu l-objettivi tal-istrateġija Ewropa 2020 u jiġu implimentati r-rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (3) dwar il-Programm Nazzjonali ta' Riforma tal-Estonja għall-2013 u ta l-opinjoni tiegħu dwar il-Programm ta' Stabbiltà tal-Estonja aġġornat għall-2012‐2017. Fil-15 ta' Novembru 2013, b'konformità mar-Regolament (UE) Nru 473/2013 tal-Parlament Ewropew u tal-Kunsill (4), il-Kummissjoni ppreżentat l-opinjoni tagħha dwar l-abbozz ta' pjan baġitarju tal-Estonja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (5), adottat ir-Rapport dwar il-Mekkaniżmu ta’ Twissija, li fih l-Estonja ma kinitx identifikata bħala wieħed mill-Istati Membri li kellha ssirlu analiżi fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Huwa enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu trattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fit-8 ta' Mejju 2014, l-Estonja ppreżentat il-Programm Nazzjonali ta' Riforma għall-2014 u fid-29 ta' April 2014 il-Programm tagħha ta' Stabbiltà għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(8)

L-objettiv tal-istrateġija baġitarja msemmi fil-Programm ta' Stabbiltà 2014 għandu jkun objettiv tat-terminu medju miżmum tul il-programm kollu biex jibni bafers fiskali għal żminijiet diffiċli fl-ekonomija. Il-Programm ta' Stabbiltà jikkonferma l-objettiv preċedenti tat-terminu medju tal-eċċess strutturali, li huwa aktar strinġenti minn dak li jitlob il-Patt ta' Stabbiltà u Tkabbir. Il-bilanċ strutturali kkalkulat mill-ġdid tal-Estonja huwa mistenni li jiddeterjora b'0,1 punti perċentwali tal-PDG fl-2014, għaldaqstant jiddevja mill-pjan ta' aġġustament mitlub, qabel ma l-PDG jittejjeb b'0,4 punti perċentwali fl-2015, u fl-2016‐2017 jibqa' qrib il-bilanċ. Barra minn hekk, il-Programm ta' Stabbiltà jindika riskju ta' devjazzjoni mill-valur referenzjarju tan-nefqa fl-2014 u riskju ta' devjazzjoni sinifikanti fl-2015. Inġenerali, il-pjan ta' aġġustament ippjanat lejn l-objettiv tat-terminu medju joħloq riskji fir-rigward tal-konformità mar-rekwiżiti tal-Patt ta' Stabbiltà u Tkabbir.

(9)

Ix-xenarju makroekonomiku sottostanti tal-previżjonijiet fiskali fil-Programm ta' Stabbiltà, li għadu ma ġiex approvat minn entità indipendenti, huwa plawsibbli u b'mod ġenerali f'konformità mat-Tbassir tar-Rebbiegħa 2014 tas-servizzi tal-Kummissjoni. Skont dak it-tbassir, id-defiċit strutturali huwa mistenni li jiddeterjora b'0,1 % tal-PDG fl-2014 li jwassal għal 0,3 % tal-PDG mqabbel mal-aġġustament meħtieġ u devjazzjoni sinifikanti meta vvalutat fuq sentejn. Fl-2015, il-Kummissjoni tbassar deterjorament ta' 0,2 % oħra fil-bilanċ strutturali li jindika devjazzjoni sinifikanti mill-aġġustament mitlub qrib l-objettiv tat-terminu medju. Hija mistennija devjazzjoni sinifikanti wkoll fir-rigward tal-valur referenzjarju tan-nefqa matul l-2014‐2015. Abbażi tal-valutazzjoni tal-Programm ta' Stabbiltà 2014 u t-tbassir tal-Kummissjoni, skont ir-Regolament Nru 1466/97, l-opinjoni tal-Kunsill hija li hemm riskju ta' devjazzjoni sinifikanti mill-objettiv tat-terminu medju fl-2014 u l-2015. Ir-regola tal-bilanċ strutturali dwar il-konformità mat-Trattat dwar l-Istabbiltà, il-Koordinazzjoni u l-Governanza daħlet fis-seħħ permezz tal-Att dwar il-Baġit tal-Istat fit-23 ta' Marzu 2014, iżda r-regola għad trid tiġi kkumplementata bit-tisħiħ tan-natura vinkolanti tal-miri tan-nefqa multiannwali.

(10)

Fir-rigward tas-suq tax-xogħol, sar progress sostanzjali biex jitnaqqas il-qgħad fost iż-żgħażagħ u dak fit-tul. Għandha tingħata attenzjoni partikolari għal miżuri li jipprovdu inċentiv biex jaħdmu lill-persuni b'livell baxx ta' qligħ. Huwa meħtieġ li jsiru aktar sforzi sabiex jiġi indirizzat it-tnaqqis kontinwu tal-forza tax-xogħol, inkluż dak dovut għal ħruġ mis-suq tax-xogħol li jirriżulta mill-età u raġunijiet ta' saħħa u diżabilità. Għaldaqstant, l-adozzjoni f'waqtha u l-implimentazzjoni tar-Riforma tal-Kapaċità għax-Xogħol, filwaqt li tiġi żgurata disponibbiltà ta' servizzi ta' sostenn, huma rilevanti ħafna. Il-kosteffettività tan-nefqa għall-politika tal-familja tista' tittejjeb aktar, inkluż billi jitrawwem l-aċċess għall-indukrar tat-tfal. Huwa mistenni li dan iwassal biex in-nisa jirritornaw qabel għas-suq tax-xogħol u jnaqqas id-differenza kbira u persistenti bejn il-pagi tal-irġiel u n-nisa. Jeħtieġ li l-isforzi biex jiġu promossi l-intraprenditorija u l-ħolqien tax-xogħol fir-reġjuni barra t-Tallinn u t-Tartu jiżdiedu sabiex jiġi evitat li d-differenzi ta' żvilupp ekonomiku jikbru u jitnaqqas il-qgħad, speċjalment fost il-ħaddiema b'kompetenzi professjonali limitati.

(11)

Fil-qasam tal-edukazzjoni u t-taħriġ, reċentement ġew adottati riformi biex l-edukazzjoni tkun konformi mar-rekwiżiti tas-suq tax-xogħol. Aktar sforzi huma meħtieġa biex tiġi ffaċilitata t-transizzjoni mill-edukazzjoni għall-impjieg. Sforzi sistematiċi huma meħtieġa, b'mod partikolari li jinvolvu sħab soċjali, biex tiżdied il-parteċipazzjoni fl-edukazzjoni u t-taħriġ vokazzjonali u t-tagħlim ibbażat fuq xogħol, speċjalment apprendistat. L-implimentazzjoni tal-Istrateġija ta' Tagħlim tul il-Ħajja tirrikjedi sforzi serji biex jiġi pprovdut titjib tal-ħiliet, taħriġ mill-ġdid, u livelli ta' kwalifiki, li huma meħtieġa ferm, speċjalment għal persuni f'pożizzjonijiet dgħajfa rigward is-suq tax-xogħol. Hemm qafas ta' speċjalizzazzjoni intelliġenti li jinkludi l-Istrateġija dwar l-Intraprenditorija u t-Tkabbir u l-Istrateġija dwar ir-Riċerka, l-Iżvilupp u l-Innovazzjoni b'enfasi fuq il-prijoritajiet kondiviżi filwaqt li l-oqsma tematiċi jkomplu jiġu speċjalizzati. L-isforzi għandhom jissoktaw lejn l-internazzjonalizzazzjoni u l-prijoritizzazzjoni tas-sistema tar-riċerka u l-iżvilupp u l-innovazzjoni, minħabba d-daqs żgħir tal-ekonomija.

(12)

L-intensità tar-riżorsi tal-Estonja tkompli tkun għolja ħafna. Sar progress biex tiġi indirizzata l-effiċjenza tal-enerġija tal-binjiet pubbliċi, iżda l-isforzi jeħtieġ li jiżdiedu u jiġu sostnuti, b'mod partikolari fis-setturi residenzjali u industrijali. Sar progress sostanzjali rigward l-immaniġġar tal-iskart u r-rimi f'miżbla, filwaqt li jeħtieġ li tiġi żgurata l-vijabbiltà ekonomika tar-riċiklaġġ. Jeħtieġ, b'mod partikolari, li jiġu implimentati miżuri fil-Pjan ta' Żvilupp tat-Trasport sabiex l-Estonja tkun tista' tikkontrolla l-emissjonijiet tas-CO2 fis-settur li mhux tal-ETS. L-effiċjenza tal-enerġija tat-trasport tal-merkanzija tista' tittejjeb bl-użu ta' mezzi ta' trasport aktar sostenibbli. L-użu tat-trasport pubbliku jista' jkompli jiżdied permezz ta' tisħiħ tal-komplementarjetà tan-netwerks reġjonali u l-interkonnessjonijiet bejn it-trasport bil-kowċ u dak ferrovjarju tal-passiġġieri. L-użu tal-karozzi privati qed jiżdied, filwaqt li l-età medja tal-flotta tal-karozzi tal-passiġġieri huwa kważi d-doppju tal-medja tal-UE u l-karozzi tal-passiġġieri ġodda huma fost l-aktar li jniġġsu l-arja fl-Unjoni. Tisħiħ sostanzjali tal-inċentivi ambjentali, inkluż it-tassazzjoni, huwa meħtieġ. Filwaqt li ttieħdu passi sinifikanti fil-konnessjonijiet tal-enerġija transkonfinali, il-konnessjoni b'mod sħiħ tas-suq tal-enerġija tal-Estonja mal-Unjoni tkun teħtieġ żmien u investiment.

(13)

It-twessigħ tad-differenzi reġjonali flimkien mat-tendenzi demografiċi negattivi, in-nuqqas ta' effiċjenza kif ukoll kooperazzjoni fost il-gvernijiet lokali jxekkel il-potenzjal ta' żvilupp tal-Estonja. Dan jirrifletti parzjalment l-ispariġġ persistenti bejn il-kapaċità fiskali u responsabbiltajiet devoluti f'muniċipalitajiet żgħar kif ukoll f'ekonomiji ta' skala limitata. L-għoti ta' servizzi aktar effiċjenti u aċċessibbli f'livell lokali, ibbażat fuq oqsma ta' servizzi u standards minimi ta' servizzi, speċjalment fit-trasport, kura fit-tul, edukazzjoni bikrija tat-tfal u servizzi soċjali, huwa prerekwiżit biex l-attivazzjoni u l-miżuri tas-suq tax-xogħol ikunu effettivi.

(14)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Estonja. Hija vvalutat il-Programm Nazzjonali ta' Riforma u l-Programm ta' Stabbiltà. Hija ma kkunsidratx biss ir-rilevanza tagħhom għall-politika fiskali u soċjoekonomika sostenibbli fl-Estonja iżda wkoll il-konformità tagħhom mar-regoli u l-gwida tal-UE, minħabba l-ħtieġa għat-tisħiħ tal-governanza ekonomika globali tal-Unjoni billi jiġi pprovdut kontribut fil-livell tal-UE fid-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (5) hawn taħt.

(15)

Fid-dawl ta’ din l-evalwazzjoni, il-Kunsill eżamina l-Programm ta' Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) hawn taħt.

(16)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-żona tal-euro inġenerali. Abbażi ta' din, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7). Bħala pajjiż li l-munita tiegħu hija l-euro, l-Estonja għandha tiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet

1.

Issaħħaħ il-miżuri baġitarji għall-2014 sabiex tiġi evitata devjazzjoni sinifikanti fid-dawl tad-distakk emerġenti ta' 0,3 % tal-PDG abbażi tat-tbassir tar-rebbiegħa tas-servizzi tal-Kummissjoni għall-2014, li jindika riskju ta' devjazzjoni sinifikanti mqabbel mar-rekwiżiti tal-fergħa preventiva tal-Patt ta' Stabbiltà u Tkabbir. Fl-2015, issaħħaħ b'mod sinifikanti l-istrateġija baġitarja biex tiżgura li l-objettiv tat-terminu medju jintlaħaq u, minn hemm 'il quddiem, jinżamm. Tikkumplementa r-regola baġitarja b'aktar regoli ta' nefqa multiannwali vinkolanti fil-qafas baġitarju tat-terminu medju u tkompli ssaħħaħ l-effiċjenza tan-nefqa pubblika.

2.

Ittejjeb l-inċentivi għax-xogħol permezz ta' miżuri mmirati għal ħaddiema b'paga baxxa. Timmira l-isforzi tal-attivazzjoni billi tiżgura l-adozzjoni u l-implimentazzjoni fil-waqt tar-riforma tal-kapaċità tax-xogħol. Iżżid l-effiċjenza u l-kosteffettività tal-politika tal-familja filwaqt li ttejjeb id-disponibbiltà u l-aċċessibbiltà tal-indukrar tat-tfal. Tuża miżuri kkoordinati biex toħloq żvilupp ekonomiku u intraprenditorija fir-reġjuni li jiffaċċjaw livell għoli ta' qgħad.

3.

Tiżgura r-rilevanza tas-suq tax-xogħol tas-sistemi ta' edukazzjoni u taħriġ, ittejjeb il-livelli ta' ħiliet u l-kwalifiki billi żżid il-miżuri ta' tagħlim tul il-ħajja u żżid b'mod sistematiku l-parteċipazzjoni fl-edukazzjoni u t-taħriġ vokazzjonali, inkluż fl-apprendistati. Tkompli tintensifika l-prijoritizzazzjoni u l-ispeċjalizzazzjoni fis-sistemi ta' riċerka u innovazzjoni u ssaħħaħ il-kooperazzjoni bejn in-negozji, l-istituzzjonijiet ogħla ta' edukazzjoni u riċerka biex tikkontribwixxi għall-kompetittività internazzjonali.

4.

Iżżid l-isforzi biex ittejjeb l-effiċjenza tal-enerġija, b'mod partikolari fil-binjiet residenzjali u industrijali. Issaħħaħ sostanzjalment l-inċentivi ambjentali għas-settur tat-trasport biex tikkontribwixxi għal mobbiltà anqas intensiva fir-riżorsi. Tkompli l-iżvilupp tal-konnessjonijiet transkonfinali ma' Stati Membri ġirien biex tiddiversifika s-sorsi tal-enerġija u tkompli tippromwovi l-kompetizzjoni permezz ta' integrazzjoni msaħħa tas-swieq tal-enerġija Baltiċi.

5.

Tibbilanċja aħjar id-dħul tal-gvern lokali mqabbel mar-responsabbiltajiet devoluti. Ittejjeb l-effiċjenza tal-gvernijiet lokali u tiżgura l-provvediment ta' servizzi pubbliċi ta' kwalità f'livell lokali, speċjalment servizzi soċjali li jikkumplimentaw il-miżuri ta' attivazzjoni.

29.7.2014   

MT

Il-Ġurnal Uffiċjali tal-Unjoni Ewropea

C 247/29

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politika tal-Istati Membri dwar l-impjiegi (3), li flimkien jiffurmaw il-“linji gwida integrati”. L-Istati Membri ġew mistiedna jqisu l-linji gwida integrati fil-politiki nazzjonali tagħhom fir-rigward tal-ekonomija u tal-impjiegi.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livell nazzjonali, fil-livell tal-UE u fil-livell taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fuq il-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-istrateġija Ewropa 2020 u biex jimplimentaw ir-rakkomandazzjonijiet speċifiċi għall-pajjiżi.

(4)

L-Irlanda kienet soġġetta għal programm ta' aġġustament makroekonomiku sa Diċembru 2013. Skont l-Artikolu 12 tar-Regolament (UE) Nru 472/2013 tal-Parlament Ewropew u tal-Kunsill (4), hija kienet għalhekk eżenti mill-monitoraġġ u l-valutazzjoni tas-Semestru Ewropew għall-koordinazzjoni tal-politika ekonomika għad-durata ta' dan il-programm. Fid-dawl tat-tlestija b'suċċess tal-programm ta' aġġustament makroekonomiku, l-Irlanda għandha issa tkun integrata b'mod sħiħ fil-qafas tas-Semestru Ewropew.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta’ Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta’ Twissija.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppublikat ir-riżultati tal-eżami mill-ġdid fil-fond tagħha għall-Irlanda, skont l-Artikolu 5 tar-Regolament (UE) Nru 1176/2011 u li jqis it-tlestija b'suċċess tal-programm Irlandiż ta' aġġustament ekonomiku u għaldaqstant il-fatt li l-Irlanda għandha issa tkun kompletament integrata fil-qafas tas-Semestru Ewropew. L-analiżi tal-Kummissjoni wasslet biex jiġi konkluż li l-programm Irlandiż ta' aġġustament makroekonomiku li tlesta reċentament kien strumentali għall-ġestjoni tar-riskji ekonomiċi u għat-tnaqqis tal-iżbilanċi. Madankollu, l-iżbilanċi makroekomiċi li jifdal jeħtieġu monitoraġġ speċifiku u azzjoni politika deċiżiva. B'mod partikolari, l-iżviluppi fis-settur finanzjarju, id-dejn tas-settur privat u dak pubbliku, u marbut ma' dan, l-obbligi esterni netti u s-sitwazzjoni tas-suq tax-xogħol ifissru li għad hemm riskji preżenti.

(8)

Fis-17 ta' April 2014, l-Irlanda ppreżentat il-Programm Nazzjonali ta' Riforma tagħha tal-2014 u, fid-29 ta' April 2014, il-Programm ta' Stabbiltà tagħha tal-2014. Sabiex jitqiesu l-konnessjonijiet ta' bejniethom, iż-żewġ programmi kienu vvalutati fl-istess waqt.

(9)

L-objettivi prinċipali tal-istrateġija baġitarja spjegati fil-Programm ta' Stabbiltà tal-2014 huma li d-defiċit eċċessiv ikun korrett sal-2015, u li l-objettiv tat-terminu medju jintlaħaq sal-2018. Il-Programm ta' Stabbiltà jimmira għal defiċit taħt it-3 % tal-PDG sal-2015, f'konformità mar-rakkomandazzjoni tal-Proċedura ta' Defiċit Eċċessiv. Il-Programm ta' Stabbiltà jikkonferma l-objettiv fuq terminu medju ta' pożizzjoni baġitarja bbilanċjata f'termini strutturali, li huwa konsistenti mad-dispożizzjonijiet tal-Patt ta' Stabbiltà u Tkabbir. Wara l-2015, il-Programm ta' Stabbiltà jistabbilixxi tnaqqis fid-defiċit nominali fiskali ta' madwar punt perċentwal tal-PDG fis-sena fl-2016–2018. Huwa għandu l-għan li jnaqqas id-dejn minn kważi 124 % tal-PDG fl-2013 għal 107 % tal-PDG fl-2018. Ix-xenarju makroekonomiku sottostanti tal-projezzjonijiet baġitarji fil-Programm ta’ Stabbiltà ġie approvat bħala “fil-firxa tal-projezzjonijiet xierqa” minn korp indipendenti (il-Kunsill Fiskali Konsultattiv Irlandiż). B’mod ġenerali huwa konformi mal-previżjoni tal-Kummissjoni għall-2014 u l-2015, b’ċerti differenzi fil-kontribuzzjonijiet tal-komponenti tad-domanda. Madankollu, il-previżjoni tal-awtoritajiet għall-aħħar snin tal-Programm ta’ Stabbiltà hija ottimista. Barra minn hekk, il-kisba tal-miri baġitarji mhix appoġġata minn miżuri suffiċjentement dettaljati fl-2015. B'riżultat ta' dan, il-previżjoni tad-defiċit tal-Kummissjoni għall-2015 hija li ser ikun ogħla mill-mira rrakkomandata mill-Kunsill. Abbażi tal-valutazzjoni tal-Programm ta’ Stabbiltà u l-previżjoni tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li l-miri tal-Programm ta’ Stabbiltà huma konsistenti mar-rekwiżiti tal-Patt ta' Stabbiltà u Tkabbir, iżda jeħtieġ li jkunu appoġġati minn miżuri speċifiċi mill-2015 'il quddiem. Saru passi sinifikanti 'l quddiem biex jittejbu aspetti importanti tal-qafas fiskali Irlandiż u l-kwalità d-dispożizzjoni f'waqtha tad-data. Regoli attwali għal-limiti tan-nefqa għall-perijodu medju jippermettu bidliet diskrezzjonali mill-gvern li mhumiex limitati għal kontinġenzi predefiniti.

(10)

Riformi tat-taxxa kkontribwixxew għall-aġġustament fiskali, iżda għad hemm lok fejn isir titjib fl-effiċjenza tas-sistema tat-taxxa u biex din tiffavorixxi aktar it-tkabbir. It-tassazzjoni fuq il-proprjetà kienet mibdula minn taxxa ta' transazzjoni għal waħda rikorrenti bbażata fuq il-valuri tal-proprjetà residenzjali, iżda l-bażi tat-taxxa għadu relattivament limitat hekk kif ċerti proprjetajiet jibqgħu barra mix-xibka tat-taxxa. It-tassazzjoni fuq ix-xogħol hija frammentata u kumplessa; u l-bażijiet tat-taxxa fuq il-konsum u t-taxxi ambjentali huma limitati minħabba rati mnaqqsa u eżenzjonijiet, waqt li tali taxxi huma aktar favorevoli għat-tkabbir. Rati tal-VAT ta' żero jew imnaqqsa jirriżultaw f'effiċjenza tal-VAT taħt il-medja tal-UE. Rati mnaqqsa tal-VAT huwa użati ħafna biex jinkisbu objettivi ta' ridistribuzzjoni minkejja li mhumiex għodda ta' politika effiċjenti u mmirata kif xieraq biex ikunu protetti gruppi vulnerabbli. Hemm skop li tittejjeb l-effikaċja tal-istrumenti tat-taxxa ambjentali u jitneħħew sussidji danneġġużi għal-ambjent.

(11)

Minkejja li l-Irlanda għandha popolazzjoni relattivament żagħżugħa, in-nefqa pubblika fuq is-saħħa kienet fost l-ogħla fl-Unjoni fl-2012 bi 8,7 % tal-ING, ogħla b'mod sinifikanti mill-medja ta' 7,3 % tal-UE. Fid-dawl tad-diffikultajiet kurrenti fil-ġestjoni tal-baġit għas-saħħa, il-pressjonijiet demografiċi mistennija minħabba fit-tixjiħ tal-popolazzjoni fissru li l-livelli tas-servizzi kurrenti jistgħu jinżammu biss jekk jinkisbu gwadanni fil-valur għall-flus matul it-terminu medju u twil. Iż-żieda fin-nefqa relatata mas-saħħa sal-2060 minħabba fi pressjonijiet demografiċi hija proġettata għal 1,2 punti perċentwali tal-PDG. L-isfidi għas-settur tas-saħħa għadhom bosta aspetti. Is-sistemi u l-proċessi tal-ġestjoni finanzjarja u dawk kontabilistiċi huma frammentati mal-fornituri tal-kura tas-saħħa. Dan jikkawża dewmien u ostakoli fil-ġbir u l-ipproċessar tal-informazzjoni. Dan ifixkel ukoll il-monitoraġġ tan-nefqa fuq is-saħħa u l-isforzi biex jinkiseb il-valur għall-flus u allokazzjoni xierqa tar-riżorsi. Il-livell għoli ta' nefqa farmaċewtika huwa sfida oħra, bin-nefqa fuq il-mediċina għall-pazjenti esterni li hi komparattivament ogħla.

(12)

L-Irlanda tiffaċċa sfidi relatati mal-qgħad, partikolarment qgħad fit-tul u fost iż-żgħażagħ, u għad hemm popolazzjoni kbira fl-età tax-xogħol b'ħiliet baxxi, li tirriżulta f'inugwaljanza u nuqqas ta' tlaqqigħ tal-ħiliet. Il-qgħad fit-tul waqa' gradwalment bit-tisħiħ reċenti tas-suq tax-xogħol, iżda għadu għoli bħala proporzjon tal-qgħad inġenerali, li jirrappreżenta iktar minn 61 % tat-total fi tmiem l-2013. Ir-rata ta' qgħad fost iż-żgħażagħ laħqet il-quċċata fuq it-30 % f'nofs l-2012. Barra minn hekk, il-proporzjon ta' żgħażagħ barra mill-impjieg, l-edukazzjoni jew it-taħriġ żdied bi 8 punti perċentwali bejn l-2007 u l-2012 għal 18,7 % qabel ma beda jbatti għal 16,1 % iżda għadu fost l-ogħla fl-Unjoni. Hemm il-ħtieġa li ż-żgħażagħ kollha jkunu koperti f'perijodu ta' erba' xhur, f'konformità mal-objettivi tal-garanzija għaż-żgħażagħ. Nuqqas ta' tlaqqigħ tal-ħiliet ħarġu bl-ibbilanċjar mill-ġdid tal-ekonomija, biex b'hekk il-bidla fil-ħiliet u t-titjib tal-ħiliet saru sfida għas-sistema tal-edukazzjoni u t-taħriġ. Barra minn hekk, il-parteċipazzjoni fit-tagħlim tul il-ħajja hija inqas mill-medja tal-UE (7,3 % meta mqabbla mal-10,7 % fl-2013).

(13)

L-Irlanda għandha waħda mill-ogħla proporzjonijiet ta' nies li jgħixu f'unitajiet domestiċi b'intensità baxxa ta' xogħol fl-Unjoni, li toħloq sfidi soċjali serji. Il-proporzjon kien ogħla mill-medja tal-UE qabel il-kriżi u tela' minn 14,3 % fl-2007 għal 24,2 % fl-2011. Intensità tax-xogħol baxxa hija partikolarment gravi fost unitajiet domestiċi b'ġenitur wieħed bit-tfal. Dan ikkontribwixxa għal riskju dejjem jikber ta' faqar jew esklużjoni soċjali tat-tfal fl-Irlanda u jiggrava l-kwistjoni tal-parteċipazzjoni inugwali tan-nisa fis-suq tax-xogħol li kienet ta' 67,2 % fl-2013, meta mqabbla ma' 83,4 % għall-irġiel. B'riżultat ta' dan, l-attenzjoni daret fuq l-aċċess għall-indukrar tat-tfal u l-affordabbiltà tiegħu, ostakolu sinifikanti għall-ġenituri li jsibu impjieg u jevitaw ir-riskju tal-faqar. Is-suq tax-xogħol huwa effettwat ukoll minn lakuni ta' nasses tal-qgħad. L-istruttura fissa tal-benefiċċji tal-qgħad fis-sistema tal-Benefiċċju għal min ifittex impjieg u dik ta' Allokazzjoni għal min ifittex impjiegi, id-durata bla limitu tal-allokazzjoni għal min ifittex impjieg u t-telf ta' ħlasijiet supplementari (partikolarment, is-suppliment tal-kera u l-karti mediċi) mar-ritorn għall-impjieg jissarrfu f'rati ta' sostituzzjoni relattivament għoljin għal dawk qiegħed fit-tul b'potenzjal ta' dħul baxx u kategoriji oħra ta' ħaddiema skont iċ-ċirkostanzi familjari.

(14)

Is-self lil SMEs għadu dgħajjef, u jirrifletti taħlita ta' talba għall-kreditu mnaqqsa u limiti fuq il-forniment, minħabba li l-SMEs ikomplu jkunu affettwati minn ingranaġġ eċċessiv u domanda domestika dgħajfa filwaqt li l-banek jeħtieġ li jagħmlu progress ulterjuri fil-kisba ta' riżoluzzjonijiet sostenibbli fil-kotba tagħhom ta' self improduttiv lil SMEs. L-aħħar stħarriġ RED C jindika li, mit-35 % tal-SMEs li talbu kreditu mill-bank bejn Ottubru 2013 u Marzu 2014, 19 % kienu rrifjutati self. L-Uffiċju tal-Analiżi tal-Kreditu kien stabbilit fi tmiem l-2009 biex jaġixxi ta' medjatur bejn il-mutwanti u l-SMEs mutwatarji prospettivi li kienu rrifjutati l-kreditu. Minkejja li pożittiv, l-impatt tal-Uffiċċju tal-Analiżi tal-Kreditu jidher li, sal-lum, kien pjuttost limitat, parzjalment minħabba li l-għadd ta' appelli kien pjuttost żgħir. L-SMEs jiddependu ħafna mill-finanzjament bankarju għall-investiment, u sorsi mhux bankarji ta' finanzi huwa relattivament sottożviluppati, minkejja li xi alternattivi, inklużi fondi ta' self, qegħdin fil-preżent ikunu eżaminati. Madankollu, hekk kif l-irkupru qed jaqbad ritmu mgħaġġel u hekk kif id-domanda domestika tirkupra, limitazzjonijiet fil-forniment x'aktarx jiżdiedu sakemm il-kanali tal-kreditu ma jissewwewx b'mod adegwat, li huwa kruċjali għall-perspettiva ta' tkabbir. Skemi u fondi ddedikati ddaħħlu fis-seħħ biex itejbu l-aċċess għal finanzjament għall-SMEs, bħall-Iskema ta' Garanzija għall-Kreditu, l-Iskema ta' Fond għas-Self, l-Iskema ta' Fond għas-Self lil Mikrointrapriżi u tliet fondi għall-SMEs li twaqqfu, iżda sa issa l-użu tagħhom kien baxx.

(15)

Minkejja r-riformi fis-settur bankarju li saru fil-programm ta' assistenza finanzjarja li tlesta reċentement, għad baqa' sfidi sinifikanti. Dawn l-isfidi kienu analizzati fid-dettall fir-rieżami profond tal-Kummissjoni dwar l-Irlanda għall-2014. Is-self improduttiv kien jirrappreżenta kważi 27 % tat-total sa minn Ġunju 2013 għat-tliet banek domestiċi prinċipali. Id-dejn fis-settur privat għadu fost l-ogħla fl-Unjoni minkejja t-tnaqqis fl-ingranaġġ reċenti u dan għadu ta' riskju għall-istabbiltà finanzjarja u ta' piż fuq l-ekonomija. It-tnaqqis fl-ingranaġġ tal-unitajiet domestiċi u l-SMEs mhux lest, u t-tiswija tal-karta bilanċjali tal-banek u l-SMEs hija kritika għar-restawr tal-kanali tal-kreditu. Is-self bankarju kompla nieżel u s-settur bankarju qed ikollu diffikultà bil-profittabbiltà, parzjalment minħabba l-għadd għoli ta' self ipotekarju indiċizzat (assi legati b'rendiment baxx) fuq il-karta bilanċjali bankarji.

(16)

Il-kost biex ikunu eżegwiti l-kuntratti huwa għoli. It-tariffi tal-avukati jirrappreżentaw il-biċċa l-kbira ta' dawn il-kostijiet, bi 18,8 punti perċentwali u kostijiet għolja għas-servizzi legali jaffettwaw l-istruttura tal-kost tan-negozji kollha, inklużi l-SMEs. Addizzjonalment, għall-kuntrarju ta' servizzi professjonali oħra, il-kostijiet tas-servizzi legali naqsu milli jaġġustaw “l isfel minn meta bdiet il-kriżi, parzjalment minħabba kompetizzjoni insuffiċjenti. L-awtoritajiet impenjaw ruħhom li jintroduċu riformi fis-settur tas-sevizzi legali bħala parti mill-programm ta' aġġustament makroekonomiku. Huma ppubblikaw Abbozz ta' Liġi dwar Regolament għas-Servizzi Legali fl-2011, li għad irid jidħol fis-seħħ. Ir-riżorsi ġudizzjarji u dawk tal-amministrazzjoni tal-qorti biex tkun implimentata l-ġestjoni attiva tal-kawża qabel il-proċess huma limitati ħafna, li jista” jkun li qed tikkontribwixxi għal dewmien fit-twettiq tal-ġustizzja u żżid il-kostijiet. Barra minn hekk, hemm lakuni sinifikanti fl-abbiltà tal-Irlanda li tiġbor data dwar l-effiċjenza tas-sistema ġudizzjarja.

(17)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Irlanda. Hija vvalutat il-Programm Nazzjonali ta' Riforma u l-Programm ta' Stabbiltà. Mhux biss qieset ir-rilevanza tagħhom għall-politika fiskali u soċjoekonomika sostenibbli fl-Irlanda imma qieset ukoll il-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (7) hawn taħt.

(18)

Fid-dawl ta’ din il-valutazzjoni, il-Kunsill eżamina l-Programm ta’ Stabbiltà tal-Irlanda u l-opinjoni tiegħu (5) hija riflessa b’mod partikolari fir-rakkomandazzjonijiet (1) u (2) ta' hawn taħt.

(19)

Fid-dawl tar-reviżjoni bir-reqqa tal-Kummissjoni u din il-valutazzjoni, il-Kunsill eżamina l-Programm Nazzjonali ta’ Riforma u l-Programm ta’ Stabbiltà. Ir-rakkomandazzjonijiet tiegħu, skont l-Artikolu 6 tar-Regolament (UE) Nru 1176/2011, huma riflessi fir-rakkomandazzjonijiet (1), (3), (5) u (6) ta' hawn taħt.

(20)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika fiż-Żona tal-Euro bħala entità sħiħa. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (6) Bħala pajjiż li l-munita tiegħu hija l-euro, l-Irlanda għandha wkoll tiżgura l-implimentazzjoni sħiħa u f’waqtha ta’ dawk ir-rakkomandazzjonijiet,

1.

Timplimenta b'mod sħiħ il-baġit tal-2014 u tiżgura l-korrezzjoni tad-defiċit eċċessiv b'mod sostenibbli sal-2015 billi tirfed l-istrateġija baġitarja b'miżuri strutturali addizzjonali waqt li tikseb l-isforz tal-aġġustament strutturali speċifikat fir-rakkomandazzjoni tal-Kunsill fil-Proċedura ta' Defiċit Eċċessiv. Wara l-korrezzjoni tad-defiċit eċċessiv, tfittex li tikseb aġġustament strutturali lejn l-objettiv fuq żmien medju ta' mill-inqas 0,5 % tal-PDG kull sena, u iktar f'kundizzjonijiet ekonomiċi tajba jew jekk meħtieġ li tiżgura li r-regola tad-dejn tkun sodisfatta sabiex id-dejn tal-amministrazzjoni pubblika jitqiegħed fit-triq tan-niżla. Ittejjeb il-kredibbiltà tal-istrateġija tal-aġġustament fiskali, timplimenta b'mod effettiv l-ippjanar baġitarji pluriennali u tiddefinixxi miżuri baġitarji wisgħin li huma sottostanti għall-miri fiskali fuq żmien medju. Tiżgura n-natura vinkolanti tal-limitu massimu tan-nefqa tal-gvern inkluż billi tillimita l-ambitu statutorju għal bidliet diskrezzjonali. Tappoġġa l-konsolidazzjoni fiskali filwaqt li tikkunsidra li żżid id-dħul permezz tat-twessigħ tal-bażi tat-taxxa. Ittejjeb it-tkabbir tas-sistema fiskali filwaqt li tara li din tiffavorixxi iktar l-ambjent.

2.

Tavvanza r-riforma tas-settur tal-kura tas-saħħa li bdiet fil-qafas strateġiku tas-Saħħa Futura biex iżżid il-kosteffettività. Tfittex li ssegwi miżuri addizzjonali biex tnaqqas l-infiq farmaċewtiku, anki permezz ta' eżerċizzju aktar frekwenti ta' riallinjament tal-prezzijiet għall-mediċini brevettati, penetrazzjoni ikbar tal-mediċina ġenerika u prassi mtejba tal-preskrizzjonijiet. Tirriforma s-sistemi tal-ġestjoni finanzjarja tal-awtorità nazzjonali tas-saħħa biex tissimplifika s-sistemi mal-fornituri kollha u tappoġġa ġestjoni aħjar tal-pretensjonijiet. Tintroduċi identifikaturi individwali tas-saħħa li jibdew minn mhux aktar tard minn tmiem l-ewwel kwart tal-2015.

3.

Tfittex li tikseb titjib ulterjuri fil-politiki attivi fis-suq tax-xogħol, b'iffukar partikolari fuq il-qgħad fit-tul, dawk b'ħiliet baxxi u, skont l-objettivi tal-garanzija għaż-żgħażagħ, iż-żgħażagħ. Tavvanza r-riforma li tinsab għaddejja tas-sistema tal-edukazzjoni u t-taħriġ avvanzata (FET - Further Education and Training), l-iskemi ta' appoġġ għall-impjiegi u l-programmi ta' apprendistat. Toffri aktar taħriġ fuq il-post tax-xogħol; ittejjeb u tiżgura r-rilevanza tal-korsijiet FET u tal-apprendistati fir-rigward tal-ħtiġijiet tas-suq tax-xogħol. Iżżid il-livell u l-kwalità tas-servizzi ta' appoġġ ipprovduti mill-uffiċċji tax-xogħol ta' Intreo. Iddaħħal fis-seħħ sistema ta' referenza għall-FET bejn l-uffiċċji Intreo u l-Bordijiet tal-Edukazzjoni u t-Taħriġ.

4.

Tittratta l-intensità tax-xogħol baxxa tal-unitajiet domestiċi u tindirizza r-riskju tal-faqar tat-tfal permezz ta' rtirar gradwali tal-benefiċċji u tal-pagamenti supplimentari mar-ritorn għall-impjieg. Tiffaċilita l-parteċipazzjoni fis-suq tax-xogħol għan-nisa billi ttejjeb l-aċċess għall-indukrar tat-tfal affordabbli u full-time, partikolarment għall-familji bi dħul baxx.

5.

Tavvanza l-politiki għas-settur tal-SMEs inklużi inizjattivi li jindirizzaw id-disponibbiltà tal-finanzjament bankarju u mhux bankarju u l-kwistjonijiet ta’ ristrutturar tad-dejn, filwaqt li tevita r-riskji fuq il-finanzi pubbliċi u l-istabbiltà finanzjarja. Tavvanza inizjattivi biex ittejjeb l-aċċess tal-SMEs għall-kreditu bankarju u għall-finanzjament mhux bankarju. Tintroduċi sistema ta' monitoraġġ għall-SMEs li jissellfu fis-settur bankarju. B'mod parallel, taħdem biex tiżgura li faċilitajiet mhux bankarji ta' kreditu, inkluż it-tliet fondi tal-SMEs kofinanzjati mill-Fond ta' Riżerva Nazzjonali tal-Pensjonijiet, Microfinance Ireland u l-iskema temporanja ta' garanzija tas-self, ikunu utilizzati aħjar. Tippromwovi l-użu ta' dawn l-iskemi u ta' skemi mhux bankarji oħra mill-SMEs. Ittejjeb il-viżibbiltà tal-Uffiċċju għall-Analiżi tal-Kreditu u l-kapaċitajiet fil-medjazzjoni ta' tilwimiet bejn il-banek u l-SMEs mutwatarji potenzjali li kienu miċħuda l-kreditu.

6.

Timmonitorja l-prestazzjoni tal-banek kontra l-miri ta' ristrutturar tal-arretrati fuq self ipotekarju. Tħabbar miri ambizzjużi għat-tielet u r-raba' kwarti tal-2014, għall-banek prinċipali ta' self ipotekarju biex jipproponu u jikkonkludu soluzzjonijiet ta' ristrutturar għal self ipotekarju f'arretrati b'aktar minn 90 jum, bil-għan li jsolvu sostanzjalment l-arretrati fuq self ipotekarju sa tmiem l-2014. Tkompli tivvaluta s-sostenibbiltà tal-arranġamenti ta' ristrutturar konklużi permezz ta' awditi u analiżi fuq il-post immirata. Tiżviluppa linji gwida għad-durabbiltà tas-soluzzjonijiet. Tippubblika data regolari dwar il-portafolli ta' self bankarju lill-SMEs li turi l-arretrati tal-pagamenti biex ittejjeb it-trasparenza. Tiżviluppa strateġija biex tindirizza skoperturi morużi fuq proprjetà immobbli kummerċjali. Tistabbilixxi reġistru ċentrali tal-kreditu.

7.

Tnaqqas il-kost tal-proċedimenti u s-servizzi legali u trawwem il-kompetizzjoni, inkluż billi tadotta l-Liġi dwar ir-Regolament dwar is-Servizz Legali sa tmiem l-2014, inkluż id-dispożizzjoni tiegħu li tippermetti l-istabbiliment ta' prattiki multidixxiplinari, u billi tfittex li tneħħi r-rahan tal-konsulent legali (solicitor). Timmonitorja l-impatt tiegħu, inkluż il-kost tas-servizzi legali. Tieħu passi eżekuttivi biex tiżgura li l-Awtorità Regolatorja tas-Servizz Legali topera mingħajr dewmien u li tissodisfa l-obbligi tagħha skont il-leġislazzjoni, inklużi t-termini għall-pubblikazzjoni tar-regolamenti jew il-linji gwida għall-prattiki multidixxiplilnari u s-soluzzjoni tal-ilmenti. Ittejjeb is-sistemi tal-ġbir tad-data biex ittejjeb il-monitoraġġ u l-evalwazzjoni tal-effiċjenza tal-proċedimenti ġudizzjarji biex tidentifika kwistjonijiet li jeħtieġu riforma.

29.7.2014   

MT

Il-Ġurnal Uffiċjali tal-Unjoni Ewropea

C 247/35

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tniedi strateġija ġdida għat-tkabbir u l-impjiegi, l-Ewropa 2020, li tkun imsejsa fuq koordinazzjoni msaħħa tal-politiki ekonomiċi, u li tiffoka fuq l-oqsma ewlenin fejn tinħtieġ azzjoni li tagħti spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta’ Lulju 2010, il-Kunsill, fuq il-bażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u fil-21 ta’ Ottubru 2010, huwa adotta deċiżjoni dwar il-linji gwida għall-politiki tal-Istati Membri dwar l-impjiegi (3), li flimkien jagħmlu l-“linji gwida integrati”. L-Istati Membri ġew mistiedna jqisu l-linji gwida integrati fil-politiki fil-politiki nazzjonali tagħhom dwar l-ekonomija u tal-impjiegi .

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fl-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew fuq azzjoni li għandha tittieħed fuq il-livell tal-Istati Membri, fejn b'mod partikolari esprimew l-impenn sħiħ tagħhom biex jiksbu l-objettivi tal-Istrateġija Ewropa 2020 u biex jimplimentaw ir-rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma ta' Spanja għall-2013 u ta l-opinjoni tiegħu dwar il-Programm ta' Stabbiltà aġġornat ta' Spanja għall-perijodu 2012‐2016. Fil-15 ta' Novembru 2013, skont ir-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha fuq l-abbozz ta' pjan baġitarju ta' Spanja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lil Spanja bħala wieħed mill-Istati Membri li għalihom ser issir rieżami fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet biex jiġu ggarantiti l-istabbiltà finanzjarja, il-konsolidazzjoni fiskali u l-azzjoni biex jittrawwem it-tkabbir. Huwa enfasizza l-ħtieġa li jissokta l-konsolidazzjoni fiskali differenzjata u favur it-tkabbir, biex l-ekonomija jerġa’ jkollha kundizzjonijiet normali għas-self, biex jiġu promossi t-tkabbir u l-kompetittività, biex jiġu indirizzati l-qgħad u l-konsegwenzi soċjali tal-kriżi, u biex tiġi mmodernizzata l-amministrazzjoni pubblika.

(7)

Fil-5 ta' Marzu 2014, il-Kummissjoni ppubblikat ir-riżultati tar-rieżami fil-fond tagħha għal Spanja, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni twassalha biex tikkonkludi li Spanja tinsab għaddejja minn żbilanċi makroekonomiċi, li jeħtieġu monitoraġġ speċifiku u azzjoni politika deċiżiva. B'mod partikolari, f'bosta oqsma, l-aġġustament tal-iżbilanċi identifikati s-sena li għaddiet bħala eċċessivi avvanza b'mod ċar u r-ritorn għal tkabbir pożittiv naqqas ir-riskji. Madankollu, il-firxa u n-natura interrelatata tal-iżbilanċi, b'mod partikolari livelli għoljin ta' dejn domestiku u estern u qgħad għoli, ifissru li vulnerabbiltajiet għadhom preżenti.

(8)

Fit-30 ta' April 2014, Spanja ppreżentat il-Programm Nazzjonali ta' Riforma għall-2014 tagħha u l-Programm ta' Stabbiltà tal-2014 tagħha. Sabiex jitqiesu l-konnessjonijiet bejniethom, iż-żewġ programmi ġew ivvalutati fl-istess waqt.

(9)

L-għan tal-istrateġija baġitarja ppreżentata fil-Programm ta' Stabbiltà tal-2014 huwa li jikkorreġi d-defiċit eċċessiv sal-2016 u jintlaħaq l-objettiv fuq żmien medju fl-2017. Il-Programm ta' Stabbiltà jikkonferma l-objettiv fuq żmien medju ta' pożizzjoni baġitarja bbilanċjata f'termini strutturali, li hija iktar stretta minn dak meħtieġ fil-Patt ta' Stabbiltà u Tkabbir. Il-Programm ta' Stabbiltà jippjana li jnaqqas id-defiċit taħt it-3 % tal-PDG fl-2016, skont il-mira stabbilita fir-Rakkomandazzjoni tal-Kunsill tal-21 ta' Ġunju 2013 (6), u jimmira defiċit għall-2014 taħt dak rakkomandat (5,5 % tal-PDG kontra 5,8 % tal-PDG). Madankollu, it-titjib annwali tal-bilanċ strutturali (ikkalkulat mill-ġdid) ippjanat fil-Programm ta' Stabbiltà jaqa' taħt l-isforz rakkomandat mill-2014. Għall-2017, il-pjan jipprevedi progress suffiċjenti lejn l-objettiv fuq żmien medju, għalkemm dan jista' ma jkunx suffiċjenti biex jintlaħaq fl-istess sena kif iddikjarat fil-Programm ta' Stabbiltà. Il-Programm ta' Stabbiltà jipprojetta li l-proporzjon tad-dejn tal-gvern jilħaq l-ogħla punt fl-2015 b'101,7 % tal-PDG u li jibda jonqos minn dak il-punt 'il quddiem. B'mod ġenerali, l-istrateġija baġitarja mniżżla fil-Programm ta' Stabbiltà hija biss parzjalment skont ir-rekwiżiti tal-Patt ta' Stabbiltà u Tkabbir. Ix-xenarju makroekonomiku li jirfed il-projezzjonijiet baġitarji fil-Programm ta' Stabbiltà, li ma kienx prodott jew approvat minn korp indipendenti, hu plawżibbli b'mod wiesa' għall-2014 u soġġett għal riskji ta' telf ta' valur fl-2015 meta mqabbel mat-tbassir tar-Rebbiegħa tas-servizzi tal-Kummissjoni għall-2014. Għall-2016‐2017, ir-rati ta' tkabbir tal-PDG fil-Programm ta' Stabbiltà kienu kemxejn ottimisti meta mqabbla mal-estimi attwali tar-rata ta' tkabbir potenzjali tal-ekonomija u l-ħtiġijiet ta' aġġustament ekonomiku ta' wara l-kriżi li għad baqa'.

Għalhekk, il-modi ta' aġġustament tad-defiċit u tad-dejn huma soġġetti wkoll għal riskji ta' telf ta' valur. Barra minn hekk, miżuri konkreti biex jappoġġaw il-miri ta' defiċit nominali mill-2015 'il quddiem għadhom mhumiex speċifikati b'mod suffiċjenti, speċjalment fir-rigward tal-bidliet għal-leġislazzjoni tat-taxxa fil-qafas tar-riforma tat-taxxa ppjanata. Riskji oħrajn huma relatati ma' obbligazzjonijiet kontinġenti u renditi minn iffrankar ippjanat fil-livelli lokali u reġjonali. Ibbażat fuq it-tbassir tal-Kummissjoni, l-isforz fiskali fil-perijodu 2013‐2014 ma jintlaħaqx b'1,1 punti perċentwali f'termini ta' bidla (ikkoreġuta) fil-bilanċ strutturali (għalkemm din iċ-ċifra hi minfuħa minn bidliet reċenti fil-metodoloġija għall-istima tal-output potenzjali) u b'0,4 punti perċentwali meta mqabbel mal-ammont ta' miżuri stmati bħala meħtieġa meta saret ir-rakkomandazzjoni skont il-Proċedura ta' Defiċit Eċċessiv. Ibbażat fuq il-valutazzjoni tiegħu tal-Programm ta' Stabbiltà u t-tbassir tal-Kummissjoni, skont ir-Regolament tal-Kunsill (KE) Nru 1466/97, il-Kunsill hu tal-opinjoni li l-miżuri li jirfdu l-istrateġija baġitarja jeħtieġ li jiġu speċifikati ulterjorment u li sforzi addizzjonali huma meħtieġa biex ikunu konformi b'mod sħiħ mar-Rakkomandazzjoni tal-Kunsill skont il-Proċedura ta' Defiċit Eċċessiv.

(10)

Kien hemm progress fin-naħa tal-istruttura fiskali, fir-rappurtar tat-twettiq baġitarju u fl-applikazzjoni tal-miżuri korrettivi għall-korpi amministrattivi mhux konformi. Madankollu, għad hemm skop għall-implimentazzjoni tal-mekkaniżmi ta' infurzar addizzjonali, imwaqqfa fil-Liġi Organika dwar l-Istabbiltà Baġitarja ta' Spanja, għal reġjuni mhux konformi. Ittieħdu miżuri ġodda biex jinfurzaw il-perijodu medju ta' 30 ġurnata għal pagamenti lil fornituri kummerċjali fil-livelli kollha tal-gvern. Twaqqfet istituzzjoni fiskali indipendenti bil-liġi f'Novembru 2013 u l-president tagħha ġie maħtur fi Frar 2014. Madankollu, l-istituzzjoni ma kinitx operazzjonali fil-waqt biex tivvaluta l-Programm ta' Stabbiltà tal-2014. Il-Programm Nazzjonali ta' Riforma tal-2014 jagħraf ukoll il-ħtieġa li tinżamm il-kosteffettività fin-nefqa tal-kura tas-saħħa u farmaċewtika, eż. biċ-ċentralizzazzjoni tax-xiri ta' prodotti farmaċewtiki, ir-reviżjoni tal-basket ta' servizzi, l-iżvilupp ta' rekords kliniċi diġitali, jew it-tisħiħ tal-ġestjoni ta' stabbilimenti tas-saħħa. Bil-biċċa l-kbira tal-konsolidazzjoni fiskali ppjanata li tiġi minn iffrankar fin-nefqa, rieżami sistematiku tan-nefqa fil-livelli kollha tal-gvern għandu jgħin jidentifika oqsma fejn jista' jiġi ġġenerat iffrankar favorevoli għat-tkabbir waqt li jakkomoda għall-ħtiġijiet ta' dawk l-aktar vulnerabbli.

(11)

Fl-2013, Spanja adottat miżuri ġodda biex tindirizza l-preġudizzju ta' dejn fit-tassazzjoni korporattiva. Matul l-2013, Spanja għamlet xi progress ukoll fit-titjib tal-konformità mat-taxxa b'intensifikazzjoni tal-ġlieda kontra l-frodi tat-taxxa u x-xogħol mhux iddikjarat, iżda għad baqa' sfidi importanti. Fl-2013 u fl-2014, Spanja introduċiet tnaqqis fil-kontribuzzjonijiet tas-sigurtà soċjali għall-ingaġġ ta' impjegati ġodda u żgħażagħ. Wara l-kunsinna ta' rapport komprensiv fuq ir-riforma tat-taxxa minn Kumitat Espert ikkummissjonat mill-Gvern, l-awtoritajiet jippjanaw li jippreżentaw proposti leġislattivi konkreti fit-tieni kwart tal-2014. Skont il-Programm Nazzjonali ta' Riforma tal-2014, il-proposti ser jimmiraw li jimmodernizzaw is-sistema tat-taxxa, inaqqsu l-preġudizzju kontra l-impjiegi, irawmu l-ġbir ta' dħul, jiffavorixxu l-iżvilupp ekonomiku, jiżguraw l-unità tas-suq u n-newtralità fiskali u jtejbu l-kompetittività tal-ekonomija Spanjola filwaqt li jikkontribwixxu għall-konsolidazzjoni fiskali. It-tfassil u l-implimentazzjoni ta' din ir-riforma ser ikunu importanti għal prospetti ekonomiċi u finanzi pubbliċi fil-futur.

(12)

L-istabbiltà finanzjarja ġiet imsaħħa mir-rikapitalizzazzjoni u r-ristrutturar tas-settur bankarju u l-implimentazzjoni bir-reqqa tal-programm Mekkaniżmu Ewropew ta' Stabbiltà (MES) ta' Lulju 2012 għar-rikapitalizzazzjoni ta' istituzzjonijiet finanzjarji, kompluta fit-22 ta' Jannar 2014. Madankollu, is-settur finanzjarju fi Spanja għadu jiffaċċja sfidi sinifikanti li għad iridu jiġu monitorjati u mmaniġġjati bir-reqqa. Barra minn hekk, titjib fil-kundizzjonijiet ta' ffinanzjar ta' banek qed jingħata biss b'mod gradwali għall-finanzjament ta' SMEs. Waqt li timxi 'l quddiem, huwa importanti li tiżgura li l-kreditu jkompli jmur f'setturi vijabbli tal-ekonomija hekk kif ikompli t-tnaqqis fl-ingranaġġ tas-settur privat. L-awtoritajiet ħadu bosta miżuri biex itejbu l-aċċess tal-kumpanniji għal finanzjament bankarju u dak mhux bankarju u biex jiffaċilitaw ir-ristrutturar tad-dejn korporattiv iżda huma meħtieġa aktar azzjonijiet ta' politika.

(13)

Is-suq tax-xogħol qed juri sinjali ta' stabilizzazzjoni u hu mistenni li fl-2014 ikun hemm irkupru ħafif b'livelli li qed jiżdiedu ta' impjiegi u tnaqqis fil-qgħad. Madankollu, b'medja annwali ta' 26,1 % fl-2013, ir-rata tal-qgħad tibqa' għolja ħafna. Ta' tħassib partikolari hi r-rata għolja ta' qgħad fost iż-żgħażagħ ta' 54,3 %, u l-ogħla punt sinifikanti ta' qgħad fit-tul ta' 49,7 % tal-qgħad totali fl-2013, b'dan tal-aħħar b'rati partikolarment għoljin fost ħaddiema iktar anzjani u b'ħila baxxa. Evalwazzjonijiet disponibbli tar-riforma tas-suq tax-xogħol tal-2012 jikkonkludu li r-riforma, flimkien mal-impenn tal-imsieħba soċjali għal moderazzjoni tal-pagi fl-2012‐2014, għenu biex jipprovdu lil kumpanniji b'aktar flessibbiltà interna u biex jitnaqqas it-telf ta' xogħol, tingħata prijorità għal ftehimiet ta' negozjar kollettiv fuq livell ta' kumpannija u titjib fil-possibbiltajiet għal kumpanniji biex joħorġu mill-ftehim kollettiv. Ir-riforma naqqset ukoll il-kostijiet ta' kumpens għal tkeċċija mhux ġusta u kkontribwixxiet għal tnaqqis fin-numru ta' tkeċċijiet ikkontestati fil-qorti, u introduċiet kuntratt ġdid biex tippromwovi r-reklutaġġ stabbli f'SMEs. Miżuri ulterjuri ddaħħlu fl-2013 u kmieni fl-2014 biex jiffaċilitaw impjiegi part-time stabbli, u jnaqqsu b'mod temporanju l-kontribuzzjonijiet tas-sigurtà soċjali fuq kuntratti indefiniti ġodda. Madankollu, is-segmentazzjoni tibqa' sfida importanti għas-suq tax-xogħol Spanjol, in-numru ta' tipi ta' kuntratt jibqa' għoli u d-differenza bejn il-kostijeit ta' tmiem tal-impjieg għal kuntratti ta' terminu fiss u dawk indefiniti jibqa' fost l-ogħla fl-Unjoni anke wara r-riforma.

(14)

Sar progress fir-riforma tal-politiki tas-suq tax-xogħol, inkluża l-approvazzjoni tal-Pjan ta' Impjiegi annwali (PAPE). Madankollu, l-azzjoni biex jiġi modernizzat u rinforzat is-servizz tal-impjiegi pubbliċi li tidher li miexja bil-mod, thedded li tista' tfixkel l-implimentazzjoni b'suċċess tal-qafas il-ġdid. Kien hemm dewmien fl-operazzjonalizzazzjoni sħiħa tal-portal tax-xogħol uniku. Sar progress fit-trawwim ta' kooperazzjoni ma' aġenziji privati ta' kollokament, iżda huma meħtieġa sforzi ulterjuri.

(15)

Ir-rilevanza inadegwata tal-edukazzjoni u t-taħriġ għas-suq tax-xogħol u l-proporzjon għoli ta' persuni qiegħda mingħajr kwalifiki formali (35,2 %) jikkontribwixxu għar-rata għolja ta' żgħażagħ qiegħda, kif ukoll għall-qgħad. Ir-rata ta' żgħażagħ barra mill-edukazzjoni, impjieg jew taħriġ tibqa' ogħla mill-medja tal-UE. Il-proporzjon ta' studenti li jitilqu qabel iż-żmien mill-edukazzjoni u t-taħriġ, għalkemm qed jonqos, xorta waħda jibqa' għoli ħafna (23,5 %). Ir-rati ta’ kisba terzjarja huma sostnuti, iżda l-edukazzjoni u t-taħriġ vokazzjonali u skemi ta' taħriġ u apprentistat għadhom mhux utilizzati fil-kapaċità massima tagħhom u l-profiċjenza ta' gradwati ta' edukazzjoni u' taħriġ vokazzjonali ta' sekondarja għolja għadha inqas mill-medja tal-UE. Spanja qed taħdem ukoll fuq miżuri li jinkoraġġixxu l-impjiegi taż-żgħażagħ. L-Istrateġija nazzjonali 2013‐2016 tal-Impjiegi u l-Intraprenditorija taż-Żgħażagħ, ippreżentata f'Marzu 2013 issa qed tiġi implimentata, għalkemm għad hemm xi miżuri li jridu jidħlu fis-seħħ. Billi tkompli tibni fuq dik l-Istrateġija, Spanja ħadet passi biex tiġġieled kontra l-qgħad taż-żgħażagħ, skont l-objettivi ta' garanzija taż-żgħażagħ. Gie rreġistrat xi progress f'miżuri fil-ġlieda kontra t-tluq bikri mill-iskola u għall-promozzjoni ta' edukazzjoni u taħriġ vokazzjonali doppja, iżda l-implimentazzjoni sħiħa u l-użu effiċjenti ta' fondi jibqgħu kruċjali. Dwar taħriġ vokazzjonali doppju, koordinazzjoni kontinwa fost il-persuni interessati kollha, inklużi dawk li jieħdu deċiżjonijiet u dawk li jagħtu t-taħriġ fil-livelli kollha tal-gvern u dawk li jimpjegaw, hi meħtieġa biex is-sistema tiġi ssimplifikata, tiffavorixxi tqabbil aħjar tad-domandi tax-xogħol u tiggarantixxi l-kompatibbiltà ta' mudelli ta' edukazzjoni u taħriġ vokazzjonali doppja madwar ir-reġjuni.

(16)

L-aktar bħala riżultat tas-sitwazzjoni tas-suq tax-xogħol, iżda wkoll minħabba effikaċja limitata tal-protezzjoni soċjali fit-tnaqqis tal-faqar, Spanja tinsab taħt il-medja tal-UE fir-rigward tal-indikaturi ewlenin li jkejlu l-faqar u l-esklużjoni soċjali, bit-tfal u ż-żgħażagħ li huma partikolarment esposti. Bħala riżultat tal-kriżi, Spanja rat ukoll wieħed mill-akbar tnaqqis fl-introjtu disponibbli gross tal-unitajiet domestiċi u wieħed mill-ogħla livelli ta' inugwaljanza introjtu fl-Unjoni. L-isfidi ewlenin huma li jiġu ssimplifikati proċeduri għal dawk li jagħmlu talba għal assistenza soċjali u titjib fil-governanza u fil-koordinazzjoni interistituzzjonali fil-livelli nazzjonali, reġjonali u lokali. Il-Pjan ta' Azzjoni Nazzjonali għall-perijodu 2013‐2016 għal Inklużjoni Soċjali jipprovdi qafas ta' politika xieraq għal adattament ta' politiki tas-suq tax-xogħol attivi għal dawk l-iktar il-bogħod mis-suq tax-xogħol, bl-indirizzar tal-faqar u t-titjib fl-effiċjenza ta' servizzi ta' appoġġ għall-familji. Madankollu, assistenza soċjali u benefiċċji għandhom effetti ta' distribuzzjoni mill-ġdid limitati fost gruppi differenti f'riskju, li jissuġġerixxi mmirar dgħajjef. Barra minn hekk, koordinazzjoni limitata bejn is-servizzi ta' impjiegi u dawk soċjali (inklużi dawk fuq livelli reġjonali u lokali) u l-piż amministrattiv involut fl-aċċess għal skemi ta' introjtu minimu jfixklu t-tranżizzjoni mingħajr problemi bejn l-assistenza soċjali u l-integrazzjoni mill-ġdid fis-suq tax-xogħol.

(17)

Spanja għamlet progress fir-riformi strutturali bil-promozzjoni tat-tkabbir u l-kompetittività fil-biċċa l-kbira skont il-pjanijiet fil-Programm Nazzjonali ta' Riforma 2013. Il-liġi fuq il-garanzija tal-unità tas-suq kienet adottata f'Diċembru 2013 u l-implimentazzjoni kumplessa tagħha għadha għaddejja. Il-liġi fuq l-intraprenditorija adottata fil-ħarifa tal-2013 ġabet ukoll titjib fil-qafas għall-insolvenza korporattiva u iktar forom flessibbli tal-kumpanniji, u fir-rigward tar-razzjonalizzazzjoni ta' skemi ta' appoġġ għall-internazzjonalizzazzjoni ta' kumpanniji. L-użu tal-għoti ta' liċenzji espress ġie estiż biex b'hekk ġie simplifikat il-ftuħ ta' ħwienet, u miżuri oħrajn meħudin biex jiffaċilitaw l-għoti ta' liċenzji lil negozji. Madankollu, leġislazzjoni sekondarja li tippermetti lil kumpanniji b'responsabbiltà limitata biex jinħolqu permezz ta' punti uniċi ta' servizz fl-iskadenzi iqsar stabbiliti fil-liġi tal-intraprenditorija ta' Settembru 2013 għadha pendenti. Barra minn hekk, hemm każ għar-rieżami kontinwu ta' ostakoli regolatorji għat-tkabbir ta' kumpanniji, inkluża t-tassazzjoni, minħabba id-diskrepanza ta' Spanja vis‐à‐vis Stati Membri oħrajn tal-żona tal-euro fir-rigward tad-daqs ta' kumpannija. Ir-riforma tant mistennija ta' servizzi professjonali ilha tesperjenza dewmien u teħtieġ titħaffef. Ma ttieħdet l-ebda miżura biex jitneħħew restrizzjonijiet dwar l-istabbiliment ta' bini għal ħwienet li jbigħu bl-imnut fuq skala kbira.

(18)

Is-sistema ta' R&I Spanjola teħtieġ li żżid il-kwalità tar-riżultati xjentifiċi tagħha, trawwem kooperazzjoni pubblika-privata u tiffaċilita l-konverżjoni tar-riċerka u l-innovazzjoni fi prodotti kummerċjali. Fl-2013, il-Gvern adotta strateġija nazzjonali għax-xjenza, it-teknoloġija u l-innovazzjoni, li għad teħtieġ li tkun appoġġjata minn finanzjament pubbliku. Barra minn hekk, il-ħolqien ta' Aġenzija ta' Riċerka tal-Istat ġdida, li hi mogħtija l-kompitu ta' mmaniġġjar effiċjenti tal-investiment pubbliku fir-R&D, huwa pendenti.

(19)

Ittieħdu passi sinifikanti biex jiġi indirizzat id-defiċit tat-tariffi tal-elettriku, speċjalment bit-tnaqqis tal-kostijiet tas-sistema, għalkemm l-impatt eżatt tar-riforma, b'mod partikolari fuq sorsi ta' enerġija rinnovabbli, għadu mhux kompletament ċar. Il-Gvern qed jesplora modi kif jimminimizza effetti mifruxa negattivi fuq il-finanzi pubbliċi minn awtostradi bil-pedaġġ insolventi. L-awtoritajiet stabbilixxew bażi tad-data li għandha indikaturi ekonomiċi, ambjentali, dawk relatati mat-traffiku u oħrajn li jappoġġaw l-analiżi qabel l-investiment fl-infrastruttura, iżda għadhom ma stabbilixxewx korp indipendenti biex jgħin jivvaluta proġetti ta' infrastruttura ewlenin fil-futur. Kompetizzjoni effettiva f'servizzi tal-passiġġieri u tal-merkanzija bil-ferrovija għadha mhux possibbli minħabba ostakli tekniċi u legali, li jfixklu l-użu effiċjenti ta' stokk ta' infrastruttura estensiv.

(20)

Ir-riforma tal-amministrazzjoni pubblika qed timxi “l quddiem. Għaddiet riforma ta' amministrazzjoni pubblika lokali f'Diċembru 2013 u l-implimentazzjoni tal-kumitat tal-esperti fuq ir-riforma tal-amministrazzjoni pubblika għadha għaddejja u ser tkompli matul l-2014‐2015. Ir-riforma ġudizzjarja hija f'varji stadji ta' tlestija u/jew implimentazzjoni u teħtieġ li titlesta. Sforzi reċenti fil-qasam tal-indirizzar tal-korruzzjoni jinkludu l-liġi fuq it-trasparenza, l-aċċess pubbliku għall-informazzjoni u l-governanza tajba, adottata f'Diċembru 2013, kif ukoll żewġ abbozzi ta' liġi fuq is-superviżjoni ta' finanzjament ta' partiti u r-responsabbiltà ta' uffiċjali ta' grad għoli. Qed jiġi implimentat il-Pjan Nazzjonali tal-2012‐2014 kontra x-Xogħol Irregolari u l-Frodi tas-Sigurtà Soċjali (Plan Nacional de Lucha contra el Empleo Irregular y el Fraude a la Seguridad Social). Spanja estendiet ukoll in-netwerk tagħha ta' ftehimiet internazzjonali għall-iskambju ta' informazzjoni rilevanti għal valutazzjonijiet tat-taxxa u nediet proġett ma” kumpanniji privati biex jistudjaw titjib potenzjali fl-immaniġġjar tas-sistema ta' benefiċċji.

(21)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika ta' Spanja. Hija vvalutat il-Programm Nazzjonali ta’ Riforma u l-Programm ta’ Stabbiltà. Hija qieset mhux biss ir-rilevanza tagħhom għal politika fiskali u soċjoekonomika sostenibbli fi Spanja imma wkoll il-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata input fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha fil-qafas tas-Semestru Ewropew huma riflessi fir-rakkomandazzjonijiet (1) sa (8) hawn taħt.

(22)

Fid-dawl ta’ din l-evalwazzjoni, il-Kunsill eżamina l-Programm ta' Stabbiltà, u l-opinjoni (7) tiegħu hija riflessa b’mod partikolari fir-rakkomandazzjoni (1) hawn taħt.

(23)

Fid-dawl tar-rieżami fil-fond tal-Kummissjoni u ta' din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Stabbiltà. Ir-rakkomandazzjonijiet tiegħu, skont l-Artikolu 6 tar-Regolament (UE) Nru 1176/2011, huma riflessi fir-rakkomandazzjonijiet (1) (2), (3), (4), (6) (7) u (8) hawn taħt.

(24)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-żona tal-euro bħala ħaġa waħda. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (8). Bħala pajjiż li l-munita tagħha hija l-euro, Spanja għandha tiżgura wkoll l-implimentazzjoni sħiħa u f’waqtha ta’ dawk ir-rakkomandazzjonijiet,

1.

Tirrinforza l-istrateġija baġitarja mill-2014, b'mod partikolari billi tispeċifika b'mod sħiħ il-miżuri sottostanti għas-sena 2015 u lil hinn, biex tiżgura l-korrezzjoni tad-defiċit eċċessiv b'mod sostenibbli sal-2016 bil-kisba tal-isforz ta' aġġustament strutturali speċifikat fir-Rakkomandazzjoni tal-Kunsill fil-Proċedura ta' Defiċit Eċċessiv. Korrezzjoni li tħalli effett fit-tul tal-iżbilanċi fiskali titlob implimentazzjoni kredibbli ta' riformi strutturali ambizzjużi li jżidu l-kapaċità tal-aġġustament u jagħtu spinta lit-tkabbir u l-impjiegi. Wara l-kisba tal-korrezzjoni tad-defiċit eċċessiv, tfittex li tikseb aġġustament strutturali lejn l-objettiv fuq żmien medju ta' mill-inqas 0,5 % kull sena, u iktar f'kundizzjonijiet ekonomiċi tajbin jew jekk meħtieġ tiżgura li r-regola tad-dejn tintlaħaq sabiex il-proporzjon għoli tad-dejn tal-amministrazzjoni pubblika jitqiegħed fit-triq ta' tnaqqis sostnut. Tiżgura li l-awtorità fiskali indipendenti ġdida tkun operazzjonali b'mod sħiħ mill-aktar fis possibbli u tiġi żgurata implimentazzjoni sħiħa tal-miżuri preventivi, korrettivi u ta' infurzar fil-Liġi Organika dwar l-Istabbiltà Baġitarja fil-livelli kollha tal-gvern, inkluż l-eliminazzjoni ta' arretrati kummerċjali fis-settur pubbliku. Twettaq sa Frar 2015 rieżami sistematiku tan-nefqa tal-livelli kollha tal-gvern biex tirfed l-effiċjenza u l-kwalità tal-infiq pubbliku hi u sejra 'l quddiem. Tkompli fiż-żieda tal-kosteffettività tas-settur tal-kura tas-saħħa, b'mod partikolari b'aktar razzjonalizzazzjoni tal-infiq farmaċewtiku, inkluż fi sptarijiet u t-tisħiħ tal-koordinazzjoni bejn it-tipi ta' kura, filwaqt li tinżamm l-aċċessibbiltà għal gruppi vulnerabbli. Tadotta sa tmiem l-2014 riforma tat-taxxa komprensiva biex is-sistema tat-taxxa tkun aktar sempliċi u aktar immirata lejn il-ħolqien ta' tkabbir u ta' impjiegi, il-preservazzjoni tal-ambjent u l-istabbiltà tal-miżuri.

Għal dak il-għan, iċċaqlaq id-dħul lejn taxxi inqas distorsivi, bħal taxxi fuq il-konsum, ambjentali (eż. fuq karburanti tal-magni) u proprjetà rikorrenti; jitneħħew nefqiet tat-taxxa ineffiċjenti fuq dħul personali u ta' dħul korporattiv; jiġi kkunsidrat tnaqqis fil-kontribuzzjonijiet tas-sigurtà soċjali ta' dawk li jimpjegaw, b'mod partikolari għal impjiegi b'pagi baxxi; jittieħdu miżuri biex tiġi evitata tassazzjoni li xxekkel l-funzjonament mingħajr xkiel tas-suq intern ta' Spanja. Iżżid l-isforz fil-ġlieda kontra l-evażjoni tat-taxxa.

2.

Tlesti r-riforma biex jiġu salvati l-banek, fir-rigward tal-adozzjoni ta' leġislazzjoni sekondarja u tlesti r-ristrutturar ta' banek ta' tfaddil tal-istat sabiex jitħaffef l-irkupru sħiħ tagħhom u jiġi ffaċilitat ir-ritorn għal sjieda privata. Tippromwovi l-isforzi tal-banek biex jiġu sostnuti proporzjonijiet ta' kapital b'saħħithom, timmonitorja l-attività tal-kumpannija ta' ġestjoni tal-assi Sareb biex tiżgura ċ-ċessjoni f'waqtha ta' assi filwaqt li timminimizza l-kost għal dawk li jħallsu t-taxxa. Tlesti l-miżuri li għaddejjin biex ikun hemm iktar aċċess għal finanzi minn SMEs, b'mod partikolari bl-iffinalizzar ta' miżuri li għaddejjin bħalissa għat-titjib ta' intermedjazzjoni finanzjarja mhux bankarja. Tneħħi l-konġestjonijiet li għad baqa' bil-qafas tal-insolvenza korporattiva, b'mod partikolari bit-titjib tal-għarfien ta' amministratturi ta' insolvenza u l-kapaċità tas-sistema ġudizzjarja li timmaniġġja każijiet ta' insolvenza u tiżviluppa qafas permanenti għall-insolvenza personali, filwaqt li tingħata l-attenzjoni dovuta lid-drittijiet tal-kredituri/min jissellef bilanċjati u konsiderazzjonijiet ta' stabbiltà finanzjarja.

3.

Issegwi l-miżuri ġodda għat-tnaqqis tas-segmentazzjoni tas-suq tax-xogħol favur xogħlijiet sostenibbli u ta' kwalità, pereżempju permezz tat-tnaqqis ta' għadd ta' tipi ta' kuntratti u tiżgura aċċess ibbilanċjat għad-drittijiet ta' tmiem l-impjieg. Timmonitorja b'mod regolari u kontinwu r-riformi tas-suq tax-xogħol. Tippromwovi żviluppi ta' paga reali konsistenti mal-objettiv tal-ħolqien ta' impjiegi. Issaħħaħ ir-rekwiżit ta' tfittix ta' impjieg fil-benefiċċji tal-qgħad. Ittejjeb l-effikaċja u l-immirar ta' politiki tas-suq tax-xogħol attivi, inklużi sussidji ta' kiri, partikolarment għal dawk li jiffaċċaw aktar diffikultajiet fl-aċċess għal impjiegi. Tirrinforza l-koordinazzjoni bejn is-suq tax-xogħol u l-edukazzjoni u politiki ta' taħriġ. Tħaffef il-modernizzazzjoni ta' servizzi ta' impjieg pubbliku biex tiġi żgurata konsulenza effettiva u personalizzata, taħriġ adegwat u tqabbil ta' xogħlijiet, b'iffukar speċjali fuq dawk li ilhom qiegħda għal żmien twil. Tiżgura l-applikazzjoni effettiva ta' kooperazzjoni pubblika‐privata f'servizzi ta' kollokament qabel tmiem l-2014, u l-monitoraġġ tal-kwalità tas-servizzi pprovduti. Tiżgura l-funzjonament effettiv tal-Portal ta' Xogħol Uniku u tikkumbinah ma' miżuri oħrajn bħala appoġġ għall-mobbiltà tax-xogħol.

4.

Timplimenta l-Istrateġija tal-Intraprenditorjat u tal-Impjiegi għaż-Żgħażagħ 2013‐2016 u l-valutazzjoni tal-effikaċja tagħha. Tipprovdi offerti ta' kwalità tajba ta' impjieg, apprendistati u traineeships għal żgħażagħ biex jitjib l-ilħuq tagħhom għal żgħażagħ mhux reġistrati u qiegħda, skont l-objettivi ta' garanzija taż-żgħażagħ. Timplimenta b'mod effettiv l-iskemi edukattivi l-ġodda biex tiżdied il-kwalità tal-edukazzjoni primarja u sekondarja. Ittejjeb il-gwida u l-appoġġ għal gruppi f'riskju li jitilqu qabel iż-żmien mill-iskola. Iżżid ir-rilevanza tal-edukazzjoni u t-taħriġ vokazzjonali għas-suq tax-xogħol, b'mod partikolari bit-titjib tal-kooperazzjoni ma' dawk li jimpjegaw u bl-għoti ta' appoġġ għat-taħriġ ta' ħarrieġa u tuturi.

5.

Timplimenta l-Pjan Nazzjonali ta' Azzjoni fuq l-Inklużjoni Soċjali 2013‐2016 u l-valutazzjoni tal-effikaċja li tkopri l-firxa wiesa' tal-objettivi tiegħu. Issaħħaħ il-kapaċità amministrattiva u l-koordinazzjoni bejn is-servizzi ta' impjieg u dawk soċjali sabiex jiġu pprovduti modi integrati bħala appoġġ għal dawk li qegħdin f'riskju, u tingħata spinta, fost l-Amministrazzjonijiet Pubbliċi responsabbli għall-iskemi ta' introjtu minimu, jiġu simplifikati proċeduri bħala appoġġ għal tranżizzjonijiet bejn skemi ta' introjtu minimu u s-suq tax-xogħol. Ittejjeb l-immirar ta' skemi ta' appoġġ għal familji u servizzi ta' kwalità li jiffavorixxu unitajiet domestiċi b'introjtu baxx bit-tfal, biex tiġi żgurata l-progressività u l-effikaċja ta' trasferimenti soċjali.

6.

Tiżgura implimentazzjoni ambizzjuża u ta' malajr tal-Liġi Nru 20/2013 dwar l-Unità tas-Suq fil-livelli kollha tal-amministrazzjoni. Tadotta riforma ambizzjuża ta' servizzi professjonali u ta' assoċjazzjonijiet professjonali sa tmiem l-2014, li tiddefinixxi l-professjonijiet li jeħtieġu reġistrazzjoni f'organizzazzjoni professjonali, u t-trasparenza u r-responsabbiltà ta' korpi professjonali, il-ftuħ ta' attivitajiet riżervati mingħajr ġustifikazzjoni u s-salvagwardja tal-unità tas-suq fl-aċċess għal servizzi professjonali fi Spanja u fl-eżerċitar tagħhom. Tnaqqas aktar il-ħin, il-kost u n-numru ta' proċeduri meħtieġa għat-twaqqif ta' negozju li jopera. Tindirizza restrizzjonijiet mhux ġustifikati għat-twaqqif ta' bini ta' bejgħ bl-imnut fuq skala kbira, partikolarment permezz ta' rieżami tar-regolamenti tal-ippjanar reġjonali eżistenti. Tidentifika sorsi ta' finanzjament għall-istrateġija nazzjonali ġdida għax-xjenza, it-teknoloġija u l-innovazzjoni u tara li l-Aġenzija tar-Riċerka tal-Istat ġdida ssir operazzjonali.

7.

Wara r-riforma tal-2013, tiżgura l-eliminazzjoni effettiva tad-defiċit fis-sistema tal-elettriku mill-2014, anki bit-teħid ta' miżuri strutturali ulterjuri jekk meħtieġ. Tindirizza l-problema ta' ta' awtostradi bil-pedaġġ insolventi sabiex tnaqqas il-kostijiet għall-Istat. Twaqqaf korp indipendenti biex jikkontribwixxi għall-valutazzjoni ta' proġetti ta' infrastruttura ewlenin fil-futur sa tmiem l-2014. Tieħu miżuri biex tiżgura kompetizzjoni effettiva fis-servizzi tal-ferroviji tal-merkanzija u l-passiġġieri.

8.

Timplimenta fil-livelli kollha tal-gvern ir-rakkomandazzjonijiet tal-kumitat għar-riforma tal-amministrazzjoni pubblika. Issaħħaħ il-mekkaniżmi ta' kontroll u żżid it-trasparenza ta' deċiżjonijiet amministrattivi, b'mod partikolari fil-livelli reġjonali u lokali. Tlesti u timmonitorja mill-viċin il-miżuri li għaddejjin fil-ġlieda kontra l-ekonomija moħbija u xogħol mhux iddikjarat. Tadotta riformi pendenti fuq l-istruttura tal-ġudikatura u fuq il-mappa tal-ġudikatura u tiżgura l-implimentazzjoni ta' riformi adottati.

29.7.2014   

MT

Il-Ġurnal Uffiċjali tal-Unjoni Ewropea

C 247/42

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għal Tkabbir u Impjiegi, li jipprovdi qafas koerenti għal azzjoni f'livell nazzjonali, dak tal-UE kif ukoll taż-Żona tal-Euro permezz tal-użu tal-għodod, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma ta' Franza għall-2013 u ta l-opinjoni tiegħu dwar il-Programm ta' Stabbiltà aġġornat ta' Franza għall-perijodu 2012-2017. Fil-15 ta' Novembru 2013, b'konformità mar-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha dwar l-abbozz ta' pjan baġitarju ta' Franza għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, fuq il-bażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lil Franza bħala wieħed mill-Istati Membri li għalihom ser issir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal-eżami mill-ġdid fil-fond dwar Franza, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslet biex jiġi konkluż li Franza tkompli tesperjenza żbilanċi makroekonomiċi, li jeħtieġu monitoraġġ speċifiku u azzjoni politika deċiżiva. Partikolarment, id-deterjorazzjoni fil-bilanċ tal-kummerċ u fil-kompetittività u l-implikazzjonijiet tad-dejn kbir tas-settur pubbliku jistħoqqilhom attenzjoni politika kontinwa.

(8)

Fil-5 ta' Marzu 2014, il-Kummissjoni rrakkomandat li Franza għandha tagħmel aktar sforzi biex tiżgura konformità sħiħa mar-rakkomandazzjoni tal-Kunsill skont il-Proċedura ta' Defiċit Eċċessiv.

(9)

Fis-7 ta' Mejju 2014, Franza ppreżentat il-Programm Nazzjonali ta' Riforma tagħha għall-2014 kif ukoll il-Programm ta' Stabbiltà għall-2014. Biex jiġu kkunsidrati l-konnessjonijiet ta' bejniethom, iż-żewġ Programmi ġew ivvalutati fl-istess żmien.

(10)

L-objettiv tal-istrateġija baġitarja msemmi fil-Programm ta' Stabbiltà tal-2014 huwa li jikkoreġi d-defiċit eċċessiv sal-2015 u li jilħaq l-objettiv ta’ terminu medju fl-2017. Il-Programm ta' Stabbiltà jikkonferma l-objettiv ta’ terminu medju preċedenti ta' baġit ibbilanċjat f'termini strutturali, li huwa aktar strett mir-rekwiżiti mitluba mill-Patt ta' Stabbiltà u Tkabbir. Il-Programm ta' Stabbiltà jippjana li d-defiċit jinġieb għal 3 % tal-PDG fl-2015, 'l fuq mill-mira stipulata fir-rakkomandazzjoni tal-Kunsill tal-21 ta' Ġunju 2013. Minn hemm 'il hemm, il-progress annwali ppjanat (rikalkulat) lejn l-objettiv fuq terminu medju huwa fil-biċċa l-kbira skont ir-rekwiżit ta' mill-inqas 0,5 % tal-PDG. B'mod ġenerali, l-istrateġija tal-baġit spjegata fil-Programm ta' Stabbiltà hija biss parzjalment skont ir-rekwiżiti tal-Patt ta' Stabbiltà u Tkabbir. Il-Programm ta' Stabbiltà jipproġetta li d-dejn tal-gvern se jilħaq il-95,6 % tal-PDG fl-2014 u l-2015 u mbagħad jinżel għal 91,9 % fl-2017. Ix-xenarju makroekonomiku li jsostni l-previżjonijiet baġitarji fil-Programm ta' Stabbiltà huwa plawsibbli għall-2014 u kemm xejn ottimist għall-2015, bil-PDG projettat li jikber b'1,0 % u 1,7 % din is-sena u ta' wara rispettivament, minflok 1,0 % u 1,5 % skont it-tbassir tar-rebbiegħa 2014 tas-servizzi tal-Kummissjoni. F'April 2014, il-Kunsill Għoli għall-Finanzi Pubbliċi (“Haut Conseil des finances publiques”) li huwa indipendenti ħareġ opinjoni dwar ix-xenarju makroekonomiku tal-Programm ta' Stabbiltà. Il-Programm ta' Stabbiltà jiddeskrivi għadd ta' miżuri addizzjonali għall-2014, fosthom il-kanċellazzjoni ta' approprjazzjonijiet ministerjali li ser jiġu adottati bħala parti minn baġit supplimentari u l-ewwel effetti tal-pjan ta' ffrankar ta' EUR 50 biljun mħabbar mill-Gvern.

Abbażi ta' dan, u wkoll meta jitqies li l-isforz fiskali milħuq fl-2013 kien ogħla minn dak mistenni meta saret ir-rakkomandazzjoni tal-Kummissjoni, il-Programm ta' Stabbiltà jista' jitqies li ftit jew wisq jirreaġixxi għar-rakkomandazzjoni tal-Kummissjoni. Il-livell tad-dettall tal-miżuri ta' konsolidament fiskali mhuwiex biżżejjed biex jiżgura l-korrezzjoni tas-sitwazzjoni ta' defiċit eċċessiv sal-2015, kif sostnut mit-tbassir tal-Kummissjoni ta' defiċit ta' 3,4 % tal-PDG is-sena d-dieħla u aġġustament strutturali sottostanti li ma jilħaqx b'ħafna l-livell rakkomandat mill-Kunsill. Madankollu, ir-riskji għall-miri baġitarji jxeqilbu lejn in-naħa t'isfel. Partikolarment, parti mill-miżuri addizzjonali għall-2014 imħabbra fil-Programm ta' Stabbiltà għadhom iridu jiġu adottati u l-ammont ippjanat ta' ffrankar għall-2015 huwa ambizzjuż wisq. Abbażi tat-tbassir tal-Kummissjoni, l-isforz fiskali matul l-2013-2014 mhux biżżejjed b'0,2 punti perċentwali tal-PDG f'termini ta' bidla (ikkoreġuta) fil-bilanċ strutturali u b'mill-inqas 0,1 punti perċentwali tal-PDG f'termini tal-ammont ta' miżuri stmati bħala meħtieġa fi żmien ir-rakkomandazzjoni tal-Kunsill. Abbażi tal-valutazzjoni tiegħu tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li l-miżuri li jsostnu l-istrateġija baġitarja jeħtiġilhom jiġu speċifikati aktar u li huma meħtieġa aktar sforzi biex din tikkonforma mar-rakkomandazzjoni tal-Kunsill u biex tiżgura perkors xieraq lejn l-objettiv ta’ terminu medju minn hemm 'il quddiem. Partikolarment, l-isforzi għandhom ikunu elenkati fil-dettall fil-liġi li ġejja li temenda l-baġit għall-2014.

(11)

Minħabba d-dejn tal-gvern għoli u li għadu qed jiżdied u li l-iskadenza biex jiġi kkoreġut id-defiċit eċċessiv kienet estiża għall-2015, huwa wisq aktar importanti li l-baġit tal-2014 jiġi implimentat b'mod strett u li jsiru sforzi sostanzjali ta' konsolidament bis-serjetà fl-2015. Partikolarment, in-nefqa pubblika għandha tikber b'pass wisq iżgħar mis-snin ta' qabel, kif ippjanat mill-Gvern. Għalhekk, hemm il-ħtieġa li l-istrateġija biex titnaqqas in-nefqa tiġi speċifikata aktar billi tiġi intensifikata l-analiżi kontinwa tal-infiq u billi jiġi ridifenit fejn rilevanti, l-ambitu tal-azzjoni tal-gvern. Iffrankar imdaqqas fuq terminu qasir ma jistax jintlaħaq mingħajr ma titnaqqas b'mod sinifikanti ż-żieda fin-nefqa tas-sigurtà soċjali, li tammonta għal kważi nofs in-nefqa tas-settur pubbliku.

Dan jimplika tnaqqis fil-kostijiet tal-kura tas-saħħa u l-pensjonijiet, pereżempju billi jiġu stabbiliti miri għan-nefqa annwali fil-kura tas-saħħa aktar ambizzjużi u ffriżar temporanju tal-pensjonijiet, kif ukoll ta' benefiċċji soċjali oħra, attwalment previsti mill-Gvern. Barra minn dan, il-liġi l-ġdida pjanata tad-deċentralizzazzjoni għandha tirrazzjonalizza d-diversi s-saffi amministrattivi fi Franza biex telimina d-dupplikazzjoni amministrattiva u jinħolqu aktar sinerġiji, żieda fl-effiċjenza u ffrankar permezz tal-fużjoni jew it-tneħħija ta' saffi amministrattivi . F'dan ir-rigward, mhux biss ir-riformi strutturali elenkati fil-Programm ta' Stabbiltà ser iseħħu biss fuq terminu medju, minkejja l-iskeda pjanata li kienet ġiet ippreżentata mill-Programm ta' Stabbiltà, iżda ser ikunu wkoll soġġetti għal riskji ta' implimentazzjoni sinifikanti. Il-kontroll tan-nefqa tal-gvern lokali għandha tissaħħaħ ukoll, fosthom billi tinkludi limitu massimu fuq iż-żieda annwali fid-dħul mit-taxxi tal-gvern lokali, b'kont meħud tal-limiti eżistenti għal għadd ta' taxxi lokali, filwaqt li jiġi implimentat b'mod rigoruż it-tnaqqis ippjanat fl-għotjiet mill-gvern ċentrali. Lil hinn mill-ħtieġa għall-iffrankar fuq terminu qasir, is-sostenibbiltà fuq terminu twil tal-finanzi pubbliċi hija kwistjoni ta' tħassib ukoll.

Filwaqt li n-nefqa pubblika fuq is-saħħa nżammet taħt kontroll f'dan l-aħħar snin, huma meħtieġa aktar sforżi biex titjieb il-kosteffikaċja tas-sistema tas-saħħa. Partikolarment, hemm il-ħtieġa li jiġu implimentati aktar politiki ta' konteniment tal-kostijiet peress li s-sistema tas-saħħa hija proġettata li tiffaċċa żieda sinifikanti fin-nefqa fuq perjodu medju u twil. Oqsma fejn għandha tiżdied l-effiċjenza jinkludu l-farmaċewtiċi u l-infiq amministrattiv kif ukoll il-kura fl-isptarijiet. Fl-aħħar, riforma tal-pensjonijiet ġiet adottata f'Diċembru 2013 bil-għan li tiżgura s-sostenibbiltà fit-tul tas-sistema. Madankollu, ir-riforma tal-pensjonijiet mhux ser tkun biżżejjed biex telimina d-defiċit tas-sistema, b’mod partikolari d-defiċit li jirriżulta minn skemi għall-uffiċjali u l-impjegati tal-gvern statali li jaħdmu f’għadd ta’ kumpanniji kkontrollati mill-Istat u fl-aħħar mill-aħħar, skont il-projezzjonijiet mill-awtoritajiet Franċiżi, il-miżuri l-ġodda tal-pensjoni ser inaqqsu d-defiċit totali tas-sistema biss bin-nofs għal madwar 0,5 % tal-PDG sal-2020. Barra minn hekk, id-daqs tal-aġġustament huwa soġġett għal riskji sinifikanti għax ix-xenarju makroekonomiku li jsostni dawn il-projezzjonijiet jista' jkun ottimist iżżejjed. Il-kumitat li għadu kif twaqqaf biex jimmonitorja l-pensjonijiet (“Comité de suivi des retraites”) għandu jiżgura li d-defiċit tas-sistema jiġi eliminat gradwalment.

(12)

Franza hija fost l-Istati Membri fejn il-kost tax-xogħol huwa l-ogħla. Partikolarment, il-piż għoli tat-taxxa fuq ix-xogħol inaqqas il-profittabbiltà tad-ditti u jdgħajjef l-impjiegi. Sabiex jgħin lill-kompetittività tal-kost, il-Gvern ħa għadd ta' inizjattivi biex inaqqas il-piż tat-taxxa fuq ix-xogħol. Ribass tat-taxxa għall-kompetittività u l-impjiegi (CICE), ekwivalenti għal tnaqqis fil-kost tax-xogħol għall-pagi inqas minn darbtejn u nofs il-paga minima kien adottat f'Diċembru 2012. Tnaqqis ieħor ta' EUR 10 biljun fil-kost tax-xogħol tħabbar bħala parti mill-“patt ta' responsabbiltà u solidarjetà” f'Jannar 2014. Iż-żewġ miżuri ser jammontaw għal EUR 30 biljun jew 1,5 % tal-PDG, li huma proporzjonati maż-żieda kumplessiva fit-tassazzjoni tal-kumpanniji rreġistrati fl-2010-2013 u li tnaqqas biss bin-nofs id-differenza bejn Franza u ż-Żona tal-Euro f'termini ta' kontribuzzjonijiet tas-sigurtà soċjali mill-impjegatur. Madankollu, id-ditti li jesportaw, li x'aktarx iħallsu pagi għoljin, se jibbenefikaw inqas mis-CICE mid-ditti li ma jesportawx, u b'hekk jitnaqqas l-impatt tal-miżura fuq il-kompetittività. Il-patt ta' responsabbiltà u solidarjetà jinkludi tnaqqis fil-kost tax-xogħol għall-pagi baxxi u tnaqqis li jimmira lejn pagi bejn 1,6 u 3,5 darbiet il-paga minima. Il-miżura tal-aħħar, li mistennija tidħol fis-seħħ mill-2016, ikollha impatt aktar dirett fuq id-ditti li jesportaw. L-iffissar tal-pagi fi Franza għandu x-xejra li jwassal għal distrosjonijiet tal-istruttura tal-pagi u jillimita l-abbiltà tad-ditti li jaġġustaw il-pagi meta jonqos ir-ritmu ekonomiku. Il-Kunsill Għoli għall-Finanzjament tal-Protezzjoni Soċjali (“Haut Conseil du financement de la protection sociale”) ivvaluta l-impatt tax-xenarji differenti tal-eżenzjonijiet mis-sigurtà soċjali fuq ix-xogħol, iżda ma tantx enfasizza l-impatt fuq l-iżvilupp tal-pagi u l-kompetittività.

Madankollu, għalkemm ingħataw eżenzjonijiet estenżivi, għall-ħaddiema li jitħallsu paga minima, il-kost tax-xogħol bil-paga minima għadu għoli. Dawn l-eżenzjonijiet ikkontribwixxew għall-inklużjoni tal-kostijiet tax-xogħol fl-2013, li huwa żvilupp pożittiv, iżda l-livell tal-paga minima fi Franza jibqa' għoli meta mqabbel ma' dak ta' Stati Membri oħra. Il-paga minima għalhekk għandha tibqa' tevolvi b'mod li jkun ta' sostenn għall-kompetittività u l-ħolqien tax-xogħol. Fi Franza jeżistu biss ftit eżenzjonijiet mill-paga minima statutorja u jistgħu jsiru sforzi addizzjonali biex jitnaqqas il-kost tax-xogħol għall-gruppi vulnerabbli.

(13)

Il-klassifikazzjoni globali ta' Franza f'għadd ta' stħarriġiet dwar l-ambjent kummerċjali ħżienet. Waqt li saru sforzi bħala parti minn “xokk ta' simplifikazzjoni” mniedi f'Lulju 2013 biex tiġi ffaċilitata r-relazzjoni bejn id-ditti u l-amministrazzjoni, hemm bżonn li l-ambjent kummerċjali jitjieb aktar. Flimkien ma' dan, għadd ta' miżuri meqjusa fil-pjan ta' simplifikazzjoni għadhom iridu jiġu definiti u implimentati. Partikolarment, għandha tingħata attenzjoni speċifika lir-regolamenti tal-kodiċi tax-xogħol jew ir-regoli tal-kontabilità marbuta ma' limiti ta' daqs speċifiċi li jtellfu t-tkabbir tad-ditti Franċiżi. Dawn jistgħu jkollhom rwol fid-diffikultajiet tal-SMEs biex jikbru sa daqs li jippermettilhom jesportaw u jinnovaw. Inizjattivi politiċi biex jissaħħaħ l-infiq fir-R&Ż u l-innovazzjoni minn kumpanniji privati, partikolarment il-kreditu tat-taxxa fil-pilastri tar-riċerka u l-innovazzjoni, sa issa taw riżultati mħallta. Il-piż dejjem jonqos tas-settur industrijali fis-settur privat ta' Franza jfisser li l-infiq fir-R&Ż mill-kumpanniji privati qed jistaġna minkejja sforżi sinifikanti fil-livell tad-ditti. Bħala konsegwenza, proporzjon kbir tal-infiq fir-R&Ż għadu ffinanzjat bi flus pubbliċi direttament permezz ta' riċerka pubblika jew indirettament permezz ta' sussidji. L-effikaċja tal-għodod eżistenti għandha titjieb aktar sabiex twassal għal infiq ogħla fir-R&Ż minn ditti privati u innovazzjoni fis-settur privat. Partikolarment, ir-riżorsi allokati għall-pilastri tal-kompetittività jistgħu jrawmu effetti ta' skala aħjar u jtejbu d-diffużjoni tal-innovazzjoni. Barra minn hekk, l-effikaċja tal-politika tista' tissaħħaħ billi dawn il-pilastri jitħallew isiru netwerks reali ta' ditti b'effetti sekondarji pożittivi. Fl-aħħar, il-kost tal-kreditu tat-taxxa fuq ir-riċerka huwa mistenni li jilħaq EUR 5,8 biljun fl-2014 (qrib iż-0,3 % tal-PDG). Minkejja l-kost ta' din il-miżura, mhi disponibbli l-ebda valutazzjoni ex post tal-effikaċja tagħha fuq ir-R&Ż b'kont meħud tal-aħħar riformi.

(14)

Minkejja li tneħħew ostakli fuq il-forma ġuridiċi, ir-rekwiżiti jew it-tariffi tal-parteċipazzjoni għal ċerti professjonijiet (pereż. il-veterinarji, il-kontabilisti), u ġew adottati miżuri ġodda biex titjieb il-kompetizzjoni permezz tal-Liġi dwar il-Konsum reċenti, xi professjonisti għadhom jiffaċċjaw ostakli sinifikanti biex jidħlu jew iwettqu negozju llum (pereż. tat-taxis, is-settur tas-saħħa, in-nutara u l-professjonisti legali b'mod aktar ġenerali). Il-prinċipju tan-numerus clausus għall-aċċes għal ħafna professjonijiet (tobba, spiżjara, eċċ,) għadu qed itellef l-aċċess għas-servizzi, u jista' jiġi rieżaminat mingħajr ma' jitpoġġew f'riskju l-kwalità u s-sikurezza. Sal-lum ma saret l-ebda valutazzjoni bir-reqqa tal-ħtieġa għar-restrizzjonijiet li affettwaw il-professjonijiet regolati u l-proporzjonalità tagħhom. Fis-settur tal-imnut, ir-rekwiżiti tqal tal-awtorizzazzjonijiet biex jinfetħu ħwienet kummerċjali, b'mod partikolari li jirriżulataw mir-regoli tal-ippjanar urban u l-projbizzjoni ta' bejgħ b'telf għadhom hemm u għandhom impatt ħażin fuq il-kompetittività u l-konsumaturi. Sal-lum, ma ġiet adottata l-ebda miżura konkretta fi Franza biex jitneħħew l-ostakli għad-dħul fis-settur tal-imnut. Fir-rigward tad-distribuzzjoni tal-elettriku u l-gass, qed jitneħħew gradwalment il-prezzijiet regolati għall-konsumaturi li mhumiex unitijiet domestiċi. Madankollu, il-prezzijiet għadhom regolati għall-unitajiet domestiċi u għall-elettriku dawn huma stipulati taħt il-livelli tal-kost u l-aċċess għal fornituri oħrajn huwa limitat. Fir-rigward tal-interkonnessjonijiet tal-enerġija, il-proġetti fis-seħħ, partikolarment ma' Spanja, għandhom jitlestew biex jissaħħu l-interkonnessjonijiet tal-elettriku u l-gass mal-pajjiżi ġirien. Fis-settur tal-ferroviji, l-ostakli għad-dħul fis-suq għadhom jimpedixxu l-funzjonament effiċjenti tas-suq. Franza ma fetħitx is-suq domestiku tagħha tal-passiġġieri bil-ferrovija għall-kompetizzjoni, ħlief is-servizzi internazzjonali, fejn hemm biss ftit parteċipanti ġodda. Hija nediet riforma tas-sistema ferrovjarja tagħha bil-ħsieb li tagħmilha aktar finanzjarjament sostenibbli. Abbozz ta' liġi kien ppreżentat f'Ottubru 2013 u bħalissa qiegħed jiġi diskuss mill-Parlament. Il-miżuri ppreżentati jinkludu l-istabbiliment ta' maniġer tal-infrastruttura bil-poteri kollha fi ħdan struttura integrata vertikalment inkluż l-operatur stabbilit. Din l-istruttura ġdid tista' xxekkel l-aċċess għan-netwerk minn operaturi alternattivi.

(15)

Franza għandha taxxi kumplessivi għoljin u li qed jiżdiedu. Fl-2013, il-proporzjon tat-taxxa mal-PDG kien ta' 45,9 %, wieħed mill-ogħla fl-Unjoni u li kien għola bi 3,3 punti perċentwali minn meta beda l-konsolidament fiskali fl-2010. F'dan l-isfond, kumitat speċjali (“Assises de la fiscalité”) ipprovda input għal riforma tas-sistema tat-taxxa. Sa issa ftit sar progress biex jitbaxxaw ir-rati statutorji tat-taxxa fuq l-introjtu personali u tal-kumpanniji u biex tiżdied effiċjenza tal-VAT. Minflok, kontribuzzjoni żejda temporanja fuq il-kumpanniji kbar ġiet estiża sal-2015 u dan ser jirriżulta biex ir-rata kumplessiva tat-taxxa fuq l-introjtu tal-kumpanniji ser tilħaq 38,1 % (ir-rata statutorja ta' 33,3 % diġà hija waħda mill-ogħla fl-Unjoni). Il-Gvern ħabbar s-soppressjoni progressiva tal-kontribuzzjoni ta’ solidarjetà soċjali korporattiva (“C3S”) u t-tnaqqis gradwali fir-rata statutorja għal 28 % sal-2020. Dwar dan tal-aħħar, m’hemm l-ebda informazzjoni dettaljata dwar iż-żmien preċiż tal-miżura. Sar ukoll xi progress limitat matul l-aħħar sena fit-tnaqqis u r-razzjonalizzazzjoni tal-infiq tat-taxxa fuq l-introjtu. Minkejja xi ftit progress fil-qasam tat-tassazzjoni ambjentali (pereż. bl-introduzzjoni gradwali tat-taxxa fuq il-karbonju jew “contribution climat énergie”), is-sehem tat-taxxa ambjentali fil-PDG għadu baxx. Partikolarment, id-dazji tas-sisa fi Franza mhumiex indiċizzati mal-inflazzjoni u xi sussidji ta' ħsara għall-ambjent importanti, bħar-rata preferenzjali tad-dazju tas-sisa fuq id-diżil għadhom hemm. Fl-aħħar ma ttieħdet l-ebda miżura addizzjonali fl-2013 biex tindirizza x-xejra lejn id-dejn fit-tassazzjoni tal-kumpanniji bil-għan li tiġi pprevenuta żieda oħra fid-dejn privat.

(16)

Għalkemm għadd ta' miżuri politiċi ttieħdu fi Franza, is-sitwazzjoni fis-suq tax-xogħol baqgħet tiħżin fl-2013 u għad hemm sfidi sinifikanti. Il-qgħad kompla jikber għal 10,3 % fl-2013 (minflok 7,5 % fl-2008). Is-suq tax-xogħol ta' Franza għadu segmentat b'livelli baxxi ħafna ta' transizzjonijiet minn kuntratti temporanji għal kuntratti permanenti (il-probabbiltà li wieħed jiċċaqlaq minn kuntratt temporanju għal xogħol permanenti kienet biss ta' 10,6 % fl-2010, meta mqabbla ma' 25,9 % tal-medja fl-Unjoni). Il-ftehim interprofessjonali dwar l-iżgurar tax-xogħol sar liġi li ġiet adottata f'Lulju 2013. Minkejja li din ir-riforma hija pass pożittiv, l-impatt f'dan l-istadju għadu ma nħassx kullimkien. Partikolarment, wisq ftit kumpanniji użaw l-arranġamenti għall-arranġamenti fil-livell ta' kumpanija maħluqa mil-liġi biex tiżdied il-flessibbiltà tal-kundizzjonijiet tax-xogħol fil-każ ta' diffikultajiet ekonomiċi temporanji. Madankollu, ir-rata tat-tkeċċijiet effettivi li nġibu quddiem il-qrati naqqset sew. Filwaqt li fl-2014 saru negozjati bejn is-sħab soċjali biex jirriformaw is-sistema tal-benefiċċji tal-qgħad, l-arranġament il-ġdid mhuwiex mistenni jnaqqas sostanzjalment id-defiċit tas-sistema. Id-defiċit kumulat tas-sistema tal-benefiċċji tal-qgħad, li kien qrib il-1 % tal-PDG fl-2013, jitlob miżuri strutturali addizzjonali biex jiżguraw is-sostenibbiltà tagħha. Partikolarment, xi elementi, bħall-kundizzjonijiet tal-eleġibbiltà, il-benefiċċji digressivi tul iż-żmien jew ir-rati ta' sostituzzjoni għall-ħaddiema bl-ogħla pagi ġew immodifikati biss ftit wara l-aħħar ftehim bejn is-sħab soċjali f'Marzu 2014, u dawn għandhom jiġu adattati aktar biex jiżguraw li l-inċentivi biex dak li jkun jaħdem ikunu adegwati. Grazzi għar-riformi suċċessivi fil-pensjonijiet, ir-rata tal-impjieg tal-ħaddiema bejn il-55 u l-64 sena żdiedet b'mod kostanti matul dawn l-aħħar tliet snin.

Madankollu, ir-rata tal-impjieg fost il-ħaddiema ixjaħ fi Franza (45,6 % fl-2013) għadha inqas sew mill-medja fl-Unjoni ( - 4,5 puntos porcentuales punti perċentwali inqas) u 55 % biss tal-ħaddiema ixjaħ fi Franza jirtiraw mill-ewwel wara l-impjieg (2008-2011). B'riżultat, ir-rata tal-qgħad f'dan il-grupp żdiedet sew matul l-aħħar snin. Għalhekk, hemm il-ħtieġa li jissaħħu l-miżuri biex titjieb l-impjegabbiltà tagħhom filwaqt li jiġu rieżaminati l-inċentivi tagħhom biex jibqgħu jaħdmu jew jerġgħu jibdew jaħdmu.

(17)

L-istħarriġ tal-Programm tal-2013 għall-Valutazzjoni Internazzjonali tal-Istudenti juri li l-inugwalità edukattiva fi Franza hija fost l-għola fil-pajjiż tal-OECD. Wieħed minn kull sitt żgħażugħ fi Franza jitlaq l-edukazzjoni u t-taħriġ mingħajr kwalifiki. Dan huwa ta’ tħassib partikolari minħabba li r-rata tal-qgħad fost iż-żgħażagħ kienet ta’ 25,5 % fi tmiem l-2013 u minħabba li r-riskju li jkunu qiegħda kien kważi darbtejn ogħla għaż-żgħażagħ l-inqas kwalifikati. L-iskemi li jippromwovu l-apprendistati għandhom jilħqu b’mod partikolari ż-żgħażagħ l-inqas kwalifikati. Skemi li jippromwovu l-apprendistat għandhom jilħqu partikolarment liż-żgħażagħ bl-inqas kwalifiki Sar xi progress fl-indirizzar ta' din il-kwistjoni permezz tat-tnedija tar-riforma tal-edukazzjoni obbligatorja f'Lulju 2013 u l-adozzjoni ta' liġi dwar l-edukazzjoni vokazzjonali u t-tagħlim tul il-ħajja f'Marzu 2014. Madankollu, għadu kmieni wisq biex wieħed jivvaluta jekk dawn il-miżuri hux ser inaqqsu effettivament l-inugwaljanzi fis-sistema edukattiva u l-pjan ġdid li jimmira lejn l-iskejjel tal-edukazzjoni sekondarja baxxa f'żoni żvantaġġati li tħabbar f'Jannar 2014 għad irid jiġi implimentat. Fl-aħħar, it-transizzjoni mill-iskola għax-xogħol ġiet iffaċilitata iżda l-għadd ta' apprendisti naqas fl-2012 u l-iskemi bbenefikaw dejjem aktar minn studenti fl-edukazzjoni għolja.

(18)

Fil-kuntest tas-Semestru Ewropew, il-Kummissjoni għamlet analiżi komprensiva tal-politika ekonomika ta' Franza. Hija vvalutat il-Programm Nazzjonali ta' Riforma u l-Programm ta' Stabbiltà. Hija qieset mhux biss ir-rilevanza tagħhom għall-politika fiskali u soċjoekonomika sostenibbli fi Franza iżda anki l-konformità tagħhom mar-regoli u l-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (7) hawn taħt.

(19)

Abbażi ta’ din il-valutazzjoni, il-Kunsill eżamina l-Programm ta’ Stabbiltà, u l-opinjoni tiegħu (6) tidher b’mod partikolari fir-rakkomandazzjoni (1) ta' hawn taħt.

(20)

Fid-dawl tar-rieżami approfondit tal-Kummissjoni u din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Stabbiltà. Ir-rakkomandazzjonijiet tiegħu skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (1) sa (6) hawn taħt.

(21)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-Żona tal-Euro inġenerali. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7) Bħala pajjiż li l-munita tiegħu hija l-euro, Franza għandha wkoll tiżgura l-implimentazzjoni sħiħa u fil-ħin ta' dawk ir-rakkomandazzjonijiet,

1.

Issaħħaħ l-istrateġija baġitarja, fosthom billi tispeċifika aktar il-miżuri sottostanti għas-sena 2014 u lil hinn biex tiżgura l-korrezzjoni tad-defiċit eċċessiv b'mod sostenibbli sal-2015 billi tilħaq l-isforz tal-aġġustament strutturali speċifikat mir-rakkomandazzjoni tal-Kunsill skont il-Proċedura ta’ Defiċit Eċċessiv. Korrezzjoni durabbli tal-iżbilanċi fiskali teħtieġ implimentazzjoni kredibbli tar-riformi strutturali ambizjużi biex tiżdied il-kapaċità tal-aġġustament u tingħata spinta lit-tkabbir u l-impjiegi. Wara l-korrezzjoni tad-defiċit eċċessiv, twettaq aġġustament strutturali lejn l-objettiv ta’ terminu medju ta' mill-inqas 0,5 % tal-PDG kull sena, u aktar f'kundizzjonijiet ekonomiċi tajbin jew jekk meħtieġ li tiżgura li r-regola tad-dejn tintlaħaq sabiex il-proporzjon tad-dejn għoli tal-amministrazzjoni pubblika jinġieb b'mod sostenibbli fid-direzzjoni 'l isfel. Iżżid l-isforzi biex tikseb żidiet fl-effiċjenza fis-sottosetturi kollha tal-amministrazzjoni pubblika, fosthom billi tirridifenixxi l-ambitu tal-azzjoni tal-gvern. Partikolarment, tieħu passi biex tnaqqas b'mod sinifikanti ż-żieda fl-infiq tas-sigurtà soċjali mill-2015 kif ippjanat, billi tistipula miri tal-infiq annwali fil-kura tas-saħħa aktar ambizzjużi, tinkludi l-kostijiet tal-pensjonijiet, u tissimplifika l-benefiċċji familjari u l-benefiċċji tad-djar. Tistabbilixxi skeda ċara għall-proċess ta’ deċentralizzazzjoni li għaddej u tieħu l-ewwel passi minn Diċembru 2014, bil-għan li tiġi eliminata d-duplikazzjoni amministrattiva, jiġu ffaċilitati fużjonijiet bejn il-gvernijiet lokali u jiġu ċċarati r-responsabbiltajiet ta’ kull saff ta’ gvern lokali. Issaħħaħ l-inċentivi biex tiġi ssimplifikata n-nefqa tal-gvern lokali, billi tiġi limitata ż-żieda annwali fuq id-dħul mit-taxxa tal-gvern lokali waqt li jitnaqqsu għotjiet mill-gvern ċentrali kif ippjanat. Apparti l-ħtieġa ta' ffrankar fuq terminu qasir, tieħu passi biex tindirizza ż-żieda projettata fin-nefqa pubblika fuq is-saħħa fuq terminu medju u twil, fosthom fil-qasam tan-nefqa farmaċewtika, u tieħu miżuri addizzjonali meta u fejn meħtieġ biex iġġib is-sistema tal-pensjonijiet f'bilanċ sal-2020 b'mod sostenibbli waqt li tkopri l-iskemi kollha, b'fowkus speċjali fuq l-iskemi speċjali u dawk kumplimentarji eżistenti.

2.

Tiżgura li t-tnaqqis fil-kost tax-xogħol li jirriżulta mill-“crédit d'impôt compétitivité emploi” ikun sostenibbli. Tieħu azzjoni biex tnaqqas aktar il-kontribuzzjoni tas-sigurtà soċjali mill-impjegaturi f'konformità mal-impenji skont il-patt ta' responsabbiltà u solidarjetà, u tiżgura li l-ebda miżura oħra ma tpaċi dan l-effett u li l-miri previsti attwalment jinżammu. Tevalwa aktar l-impatt ekonomiku tal-eżenzjonijiet mill-kontribuzzjoni tas-sigurtà soċjali, tpoġġi l-enfasi fuq l-impjiegi, l-iżviluppi tal-pagi u l-kompetittività u tieħu miżuri xierqa kif meħtieġ. Tnaqqas aktar il-kost tax-xogħol b'mod li ma jaffettwax il-baġit jiġifieri fin-naħa t'isfel tal-iskala tal-pagi b'mod partikolari permezz ta' tnaqqis immirat fil-kontribuzzjoni tas-sigurtà soċjali tal-impjegaturi filwaqt li tqis l-iskemi diversi ta' għajnuna għall-paga.

3.

Tissimplifika r-regoli amministrattivi, fiskali u tal-kontabilità tal-kumpanniji u tieħu miżuri konkreti biex timplimenta l-“pjan ta' simplifikazzjoni” fis-seħħ tal-Gvern sa Diċembru 2014. Telimina l-impedimenti regolatorji fuq it-tkabbir tal-kumpanniji, partikolarment billi tirrieżamina l-kriterji marbuta‐mad-daqs fir-regolamenti biex tevita l-effetti ta' limiti massimi. Tieħu passi biex tissimplifika u ttejjeb l-effiċjenza tal-politika tal-innovazzjoni, b'mod partikolari permezz ta' evalwazzjonijiet b'kont meħud tal-aħħar riformi u jekk meħtieġ adattament tal-“crédit d'impôt recherche”. Tiżgura li r-riżorsi jkunu ffukati fuq il-pilastri tal-kompetittività l-aktar effettivi u tippromwovi aktar l-impatt ekonomiku tal-innovazzjoni żviluppata fil-pilastri.

4.

Tneħħi r-restrizzjonijiet mhux ġustifikati fuq l-aċċess għal u l-eżerċizzju tal-professjonijiet regolati u tnaqqas il-kostijiet tad-dħul u timpromwovi l-kompetizzjoni fis-servizzi. Tieħu aktar azzjoni biex tnaqqas il-piż regolatorju li jaffettwa l-funzjonament tas-settur bl-imnut, partikolarment billi tissimplifika l-awtorizzazzjonijiet għall-ftuħ ta' ħwienet kummerċjali u tneħħi l-projbizzjoni fuq il-bejgħ b'telf. Filwaqt li żżomm kundizzjonijiet affordabbli għall-gruppi vulnerabbli, tiżgura li t-tariffi regolati tal-gass u l-elettriku għall-konsumaturi tal-unitajiet domestiċi jkunu stipulati f'livell xieraq li ma jirrappreżentax ostaklu għall-kompetizzjoni. Issaħħaħ il-kapaċità tal-interkonnessjonijiet tal-elettriku u tal-gass ma' Spanja; b'mod partikolari, iżżid il-kapaċità tal-interkonnessjonijiet tal-gass biex tintegra bis-sħiħ is-suq tal-gass Iberiku mas-suq Ewropew. Fis-settur ferrovjarju, tiżgura l-indipendenza ta’ amministratur tal-infrastruttura unifikat ġdid mingħand l-operatur stabbli u tieħu passi biex tiftaħ trasport domestiku tal-passiġġieri għall-kompetizzjoni b’mod konformi mad-dispożizzjonijiet tad-direttivi li jmiss u ż-żmien li ser jiġi deċiż permezz tagħhom.

5.

Tnaqqas il-piż tat-taxxa fuq ix-xogħol u żżid l-isforzi biex tissimplifika u żżid l-effiċjenza tas-sistema tat-taxxa. Għal dan il-għan, fil-baġit tal-2015, tibda tieħu miżuri biex: tneħħi l-infiq ineffiċjenti tat-taxxa fuq l-introjtu personali u tal-kumpanniji abbażi tal-valutazzjonijiet reċenti u l-inizjattiva “Assises de la fiscalité” filwaqt li tnaqqas ir-rati statutorji; tieħu miżuri addizzjonali biex tneħħi il-preġudizzju dwar id-dejn fit-taxxa tal-kumpanniji; twessa' l-bażi tat-taxxa, b'mod partikolari dwar il-konsum; tneħħi gradwalment sussidji li jagħmlu ħsara lill-ambjent.

6.

Tieħu aktar azzjoni biex tiġġieled ir-riġidità tas-suq tax-xogħol, partikolarment billi tieħu miżuri biex tirriforma l-kundizzjonijiet tal-“accords de maintien de l'emploi” biex iżżid l-użu tagħhom minn kumpanniji li jkunu għaddejjin minn diffikultajiet. Tieħu miżuri addizzjonali biex tirriforma s-sistema tal-benefiċċju tal-qgħad flimkien mas-sħab soċjali, sabiex tiggarantixxi s-sostenibbiltà tagħha filwaqt li tiżgura li tipprovdi inċentivi adegwati biex dak li jkun jirritorna jaħdem. Tiżgura li ħaddiema anzjani jibbenefikaw minn pariri u taħriġ adegwat u tevalwa mill-ġdid l-arranġamenti speċifiċi rilevanti fir-rigward tal-benefiċċju tal-qgħad fir-rigward tas-sitwazzjoni tagħhom fis-suq tax-xogħol.

7.

Twettaq modernizzazzjoni tal-edukazzjoni u t-taħriġ vokazzjonali, timplimenta r-riforma tal-edukazzjoni obbligatorja, u tieħu aktar passi biex tnaqqas l-inugwaljanzi edukattivi partikolarment billi ssaħħaħ il-miżuri tat-tluq kmieni mill-iskola. Tiżgura li l-politiki attivi tas-suq tax-xogħol jgħinu lill-gruppi l-aktar vulnerabbli. Ittejjeb it-transizzjoni mill-iskola għax-xogħol, b'mod partikolari billi żżid il-miżuri biex tiżviluppa aktar l-apprendistat b'enfasi speċifika fuq dawk bl-inqas ħiliet.

29.7.2014   

MT

Il-Ġurnal Uffiċjali tal-Unjoni Ewropea

C 247/50

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni biex tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq il-punti ewlenin fejn hija meħtieġa azzjoni sabiex jissaħħaħ il-potenzjal tal-Ewropa għal tkabbir sostenibbli u kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi nazzjonali tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri iddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-għodod, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Il-Kroazja pparteċipat fis-Semestru Ewropew 2013 fuq bażi volontarja u informali billi ppreżentat programm ekonomiku; ma kien hemm l-ebda rakkomandazzjoni speċifika għall-pajjiż. Fil-21 ta' Ġunju 2013, il-Kunsill adotta konklużjonijiet li jilqgħu l-programm ekonomiku tal-Kroazja, li jenfasizzaw li l-Kroazja hija mistennija tagħmel progress lejn l-ilħuq tal-ħtiġijiet tal-Patt ta' Stabbiltà u Tkabbir u li għandha bżonn timbarka fuq triq ta' konsolidazzjoni kredibbli, filwaqt li tissalvagwardja l-infiq li jiffavorixxi t-tkabbir u tiżgura lok għal kofinanzjament tal-influss ta' fondi tal-UE.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lill-Kroazja bħala wieħed mill-Istati Membri li għalihom se ssir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal-eżami mill-ġdid fil-fond tagħha għall-Kroazja, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslet biex jiġi konkluż li l-Kroazja qed tesperjenza żbilanċi makroekonomiċi eċċessivi, li jeħtieġu monitoraġġ speċifiku u azzjoni tal-politika qawwija. B'mod partikolari, hija meħtieġa azzjoni fuq il-politika dwar il-vulnerabbiltajiet li ġejjin minn obbligazzjonijiet esterni mdaqqsa, prestazzjoni ta' esportazzjoni li qed tonqos, ditti b'ingranaġġ għoli u dejn tal-gvern ġenerali li qed jiżdied malajr, kollu f'kuntest ta' tkabbir baxx u kapaċità ta' aġġustament fqira.

(8)

Fl-24 ta' April 2014, il-Kroazja ppreżentat il-Programm Nazzjonali ta' Riforma tagħha tal-2014 u l-Programm ta' Konverġenza tagħha tal-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(9)

L-għan tal-istrateġija baġitarja li huwa deskritt fil-Programm ta' Konverġenza tal-2014 huwa li jikkoreġi d-defiċit eċċessiv sal-2016, filwaqt li fl-istess ħin jidderieġi lura għal triq ta' tkabbir ekonomiku sostenibbli. Dan huwa mistenni li jintlaħaq bi tnaqqis kontinwu tad-defiċit minn 4,9 % tal-PDG fl-2013 għal inqas minn 3 % tal-PDG sal-2016, l-iskadenza għall-korrezzjoni tad-defiċit eċċessiv. Il-Programm ta' Konverġenza jipprojetta li d-dejn tal-gvern se jilħaq quċċata ta' madwar 72 % tal-PDG fl-2014, jinżel ftit fis-sena ta' wara u jistabbilizza minn hemm 'il quddiem. Ix-xenarju makroekonomiku sottostanti l-projezzjonijiet baġitarji fil-Programm ta' Konverġenza huwa ottimistiku fuq il-perijodu ta' programm sħiħ. Skont ix-xenarju tal-Programm ta' Konverġenza, il-PDG għandu jistaġna fl-2014, filwaqt li huwa projettat tkabbir moderat ta' 1,2 % fl-2015; kontra tnaqqis ta' 0,6 % u tkabbir ta' 0,7 % rispettivament, fit-Tbassir tar-Rebbiegħa tal-2014 tal-Kummissjoni. Il-figuri tat-tbassir baġitarju tal-Programm ta' Konverġenza jitbiegħdu mill-istandards tas-Sistema Ewropea tal-Kontijiet Nazzjonali u Reġjonali (SEK), li jżidu mal-inkonsistenzi ta' data tal-passat u x-xenarju makroekonomiku u filwaqt li jfixklu paragun xieraq mat-tbassir tar-Rebbiegħa tal-2014 tas-servizzi tal-Kummissjoni. Barra minn hekk, il-Programm ta' Konverġenza ma jipprovdix livell suffiċjenti ta' dettall dwar il-miżuri ta' konsolidazzjoni għall-2015 u l-2016, b'mod partikolari dwar il-lat ta' nfiq. Skont it-tbassir tar-Rebbiegħa tal-2014 tas-servizzi tal-Kummissjoni, il-bilanċ nominali huwa mistenni li jilħaq it-3,8 % u t-3,1 % tal-PDG fl-2014 u l-2015 rispettivament. Wara l-aġġustament neċessarju biex dawn il-projezzjonijiet isiru paragunabbli mal-miri stipulati fil-kuntest tal-Proċedura tad-Defiċit Eċċessiv (jiġifieri billi jiġi eskluż l-impatt tat-trasferiment ta' assi tal-pensjonijiet tat-tieni pilastru) il-Kummissjoni tipprojetta li d-defiċit fl-2014 ikun ta' 4,6 % tal-PDG u ta' 3,8 % fl-2015.

Peress li l-Programm ta' Konverġenza jikkostitwixxi l-ewwel rapport dwar l-azzjoni meħuda mill-awtoritajiet wara l-ftuħ tal-Proċedura tad-Defiċit Eċċessiv fit-28 ta' Jannar 2014, il-Kummissjoni vvalutat l-azzjoni li ttieħdet mill-Kroazja f'Komunikazzjoni ppubblikata fit-2 ta' Ġunju 2014. B'mod partikolari, il-mira nominali hija mistennija li tintlaħaq fl-2014, filwaqt li d-defiċit huwa mistenni li jkun pjuttost 'il fuq mill-mira fl-2015. It-titjib fil-bilanċ strutturali tal-gvern jaqa' marġinalment inqas minn dak li huwa mitlub kemm fl-2014 u kemm fl-2015. Fl-aħħar nett, filwaqt li l-kambjament fil-bilanċ strutturali aġġustat jinsab taħt l-isforz rakkomandat, l-isforz imkejjel mill-ammont sottostanti tal-miżuri diskrezzjonali huwa stmat li jiġi mwassal kemm fl-2014 u kemm fl-2015. Sabiex jitnaqqas l-impatt negattiv fuq it-tkabbir u tittejjeb is-sostenibbiltà fuq il-konsolidazzjoni, attenzjoni ikbar lill-kwalità tal-miżuri u transizzjoni għal miżuri bbażati fuq l-infiq huma garantiti. Abbażi tal-valutazzjoni tal-Programm ta' Konverġenza u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li, filwaqt li l-Kroazja ħadet azzjoni effettiva sat-30 ta' April 2014 sabiex tikkoreġi d-defiċit eċċessiv kif rakkomandat, huma meħtieġa sforzi addizzjonali sabiex tkun konformi mar-rakkomandazzjoni skont il-Proċedura ta' Defiċit Eċċessiv biex tikkoreġi d-defiċit eċċessiv sal-2016 u tiġi żgurata l-kredibbiltà tal-korrezzjoni.

(10)

Miżuri ta' konsolidazzjoni baġitarji għandhom ikunu mmirati lejn tkabbir tal-kwalità ta' finanzi pubbliċi, bil-ħsieb li jinkisbu effiċjenzi, b'mod partikolari fil-pagi, fis-sigurtà soċjali u fl-infiq f'sussidji u biex jipprovdu spazju fiskali suffiċjenti biex tingħata prijorità lill-infiq u l-investimenti li jiffavorixxu t-tkabbir, inkluż fi proġetti finanzjati mill-Unjoni. Il-Kroazja implimentat riformi sinifikanti fil-qafas fiskali tagħha fi snin riċenti. Madankollu, għad hemm nuqqasijiet fir-rigward tal-ippjanar baġitarju, il-kontroll effettiv fuq l-infiq u l-applikazzjoni konsistenti tar-restrizzjonijiet baġitarji, li għandhom impatt negattiv fuq it-tfassil tal-politika fiskali. Għalkemm inbidlu riċentement it-tfassil tar-regoli fiskali għandu jittejjeb iktar. B'mod partikolari, l-effettività tal-qafas fiskali hija mxekkla min-nuqqas ta' mekkaniżmi preventivi u konformità dgħajfa mar-regola tad-dejn, u formulazzjoni ambigwa tar-regola ta' bilanċ baġitarju strutturali. Filwaqt li l-istabbiliment tal-Kummissjoni għall-Politika Fiskali huwa milqugħ sew, miżuri addizzjonali huma meqjusa neċessarji sabiex tissaħħaħ il-pożizzjoni tagħha fl-ippjanar u l-monitoraġġ tal-baġit, l-iktar notevolment l-indipendenza mill-awtoritajiet baġitarji kollha.

(11)

Il-Kroazja taffaċċa l-isfida li tfittex konsolidazzjoni fiskali mingħajr ma tagħmel dannu lill-kompetittività u l-prospetti ta' rkupru ekonomiku. Kontra sfond bħal dan, il-lat tad-dħul tal-finanzi pubbliċi huwa ristrett minn definizzjoni dejqa tal-bażijiet għat-taxxi li joffru rendiment ta' taxxa stabbli u għandhom ftit impatt distortiv fuq it-tkabbir. F'dan il-kuntest, il-Programm Nazzjonali ta' Riforma jħabbar pjan biex tiġi introdotta taxxa fuq il-proprjetà rikorrenti fl-2016 iżda t-tfassil operattiv tagħha, inkluż dak tal-bażi tat-taxxa, għad irid jiġi speċifikat. Il-Kroazja hija determinata wkoll biex tieħu miżuri biex ittejjeb il-konformità mat-taxxa billi tnaqqas l-ekonomija griża. Ittieħdu passi f'dan il-qasam. L-introduzzjoni gradwali tar-reġistri tal-flus fiskali żdiedet ir-riċevuti tat-taxxa billi kabbret is-sorveljanza tat-tranżazzjonijiet. L-organizzazzjoni mill-ġdid tal-amministrazzjoni tat-taxxa hija mistennija ttejjeb l-effiċjenza u l-effettività tal-kollezzjoni tat-taxxa filwaqt li tnaqqas il-piżijiet tal-konformità għall-kontribwenti. Madankollu, fid-dawl tal-bżonnijiet tal-konsolidazzjoni fiskali, kif ukoll billi titqies data li timmira lejn ammonti sinifikanti ta' taxxi mhux miġbura, jidher li hemm lok biex tiżdied iktar l-effiċjenza tal-kollezzjoni tat-taxxa u hemm bżonn ta' sforzi kontinwi biex tittejjeb il-konformità mat-taxxa billi jiġu pprovduti servizzi elettroniċi lill-kontribwenti.

(12)

Il-Kroazja ħadet miżuri bil-ħsieb li ttejjeb is-sostenibbiltà u l-adegwatezza tal-pensjonijiet; minn Novembru 2010, l-età statutorja tal-irtirar, l-età tal-irtirar kmieni u l-perijodu kwalifikanti għan-nisa ġew miżjuda gradwalment u huma mistennija li jiġu armonizzati b'mod sħiħ sal-2030. L-emendi għall-Att dwar l-Assigurazzjoni għall-Pensjonijiet adottat f'Diċembru 2013 itellgħu l-età statutorja tal-irtirar minn 65 għal 67 u l-età tal-irtirar kmieni minn 60 għal 62. Madankollu, din iż-żieda se ssir effettiva mill-2031, li mhuwiex ambizzjuż biżżejjed jekk jitqiesu xejriet demografiċi. Minkejja riformi implimentati matul snin riċenti, għadhom jeżistu varji possibiltajiet għall-irtirar kmieni. Meta jiġi kkunsidrat il-limitu tal-eżenzjonijiet, il-penali għall-bonus tal-irtirar kmieni u l-irtirar tard joħolqu ftit inċentiva biex in-nies jaħdmu sal-età statutorja tal-irtirar, li jħalli impatt negattiv fuq il-provvista ta' ħaddiema u s-sostenibbiltà tas-sistema tal-pensjonijiet. L-Att dwar il-Korp tal-Ispeċjalizzazzjoni Forensika Singola ġie adottat fl-2013 biex jgħin jillimita ż-żieda ta' pensjonanti b'diżabbiltà u jnaqqas il-frodi billi jgħaqqad il-valutazzjonijiet tad-diżabbiltà. Flimkien mal-ispezzjonijiet miżjuda, dan jindirizza bżonn definit iżda l-effett fuq l-infiq jiddependi fuq kif il-miżuri huma implimentati u l-punt sa liem id-deċiżjonijiet huma infurzati. Pensjonijiet bi skemi speċjali li kienu “l fuq minn ċertu livell limitu tnaqqsu b'10 %, għalkemm fuq bażi temporanja, filwaqt li l-indiċjar tagħhom intrabat ma” skattatur tal-PDG. Minkejja tentattivi riċenti biex jitnaqqas l-infiq u tiżdied it-trasparenza, il-pass u l-punt ta' konverġenza tal-pensjonijiet bi skemi speċjali lejn regoli ġenerali huma kajmana u l-progress globali għadu limitat.

(13)

Is-settur tas-saħħa jikseb riżultati tas-saħħa raġonevolment tajbin u, b'xi varjazzjoni reġjonali, is-servizzi huma aċċessibbli, iżda s-sistema tikkontribwixxi b'mod sinifikanti biex tkompli tagħmel pressjoni fuq il-finanzi pubbliċi. L-awtoritajiet identifikaw ineffiċjenzi rimedjabbli fin-netwerk tal-isptarijiet. Il-pjan regolatorju ppreżentat f'Marzu 2014 għall-organizzazzjoni mill-ġdid tal-kura tal-isptarijiet jipprovdi għal miżuri li jtejbu l-kosteffettività, bħar-razzjonalizzazzjoni tan-netwerk tal-isptarijiet, it-tul ta' żmien medju mnaqqas ta' perjodi fl-isptar, allokazzjoni ta' sodod aħjar fl-isptarijiet, inkluż għall-kura ta' terminu twil, u kambjamenti ulterjuri fl-iffinanzjar tal-isptarijiet. Kapaċitajiet ta' monitoraġġ u implimentazzjoni qawwija kemm fl-isptarijiet u kemm fil-gvern ċentrali għandhom jiġu żgurati sabiex il-pjan jitpoġġa fil-prattika. Il-kura fit-tul hija kkaratterizzata minn servizzi mxerrda bejn is-sistemi tas-saħħa u s-servizzi soċjali, rati ta' kopertura baxxa u kura formali, infiq għoli tal-proviżjoni u listi twal ta' stennija.

(14)

Ir-rati tal-impjieg u l-attività huma fost l-iktar baxxi fl-Unjoni, u huma partikolarment baxxi għaż-żgħażagħ u l-pensjonanti. Lil hinn minn żviluppi ċikliċi, dawn ir-riżultati tas-suq tax-xogħol huma parzjalment relatati ma' ambiti istituzzjonali u tal-politika. Il-Kroazja daħlet għal riformi tas-suq tax-xogħol sabiex tiżdied il-flessibbiltà fuq is-suq tax-xogħol. Fażi tal-bidu tar-riforma, li ġiet kompluta fl-2013, iffokat fuq ir-regolamentazzjoni ta' kuntratti tal-impjieg ta' terminu definit. Il-Gvern adotta tieni proposta leġislattiva f'Jannar 2014 li tipprovdi għat-tnaqqis ta' nfiq tas-sensji billi jiġu mnaqqsa u simplifikati l-proċeduri u tiżdied l-flessibbiltà tal-ħin tax-xogħol. Barra minn hekk, iktar forom ta' xogħol flessibbli bħal kuntratti part‐time għandhom jiġu introdotti. Dawn il-kambjamenti jpoġġu lill-Kroazja b'mod wiesa' fuq l-istess livell mal-pari tagħha, sa fejn għandu x'jaqsam l-indiċi tal-protezzjoni tal-impjieg. Għalkemm dawn il-forom huma mistennija li jkollhom effett pożittiv fuq l-impjieg globali, huma jimplikaw ukoll riskju miżjud tas-segmentazzjoni tas-suq tax-xogħol, inkluż l-iżvilupp tal-kuntratti ta' terminu definit. Sadattant, l-ebda kambjament mhu previst għall-istituzzjonijiet li jistabbilixxu l-pagi minkejja l-kombinazzjoni partikolari tal-Kroazja ta' pagi medji relattivament għoljin u impjieg baxx ħafna. Minkejja qgħad li dejjem qed jiżdied, l-infiq u l-kopertura ta' miżuri tal-politiki tas-suq tax-xogħol attivi biex jippermettu aċċess imtejjeb għal, u żmien itwal fis-suq tax-xogħol għadhom taħt il-medja, speċjalment fir-rigward ta' żgħażagħ, in-nies qiegħda għal żmien twil u ħaddiema ikbar fl-età. Il-kapaċità amministrattiva tas-servizz tal-impjieg pubbliku Kroat huwa taħt pressjoni qawwija, inkluż fuq livell reġjonali. Sistema globali biex jiġu sorveljati u evalwati żviluppi fuq is-suq tax-xogħol u bżonnijiet tas-suq tax-xogħol inkluż it-tbassir tal-ħiliet ma teżistix u lanqas ma hemm evalwazzjoni regolari ta' miżuri ta' politika tas-suq tax-xogħol attivi. Hemm proporzjon għoli ta' attività mħallsa mhux dikjarata.

(15)

Is-sitwazzjoni fuq is-suq tax-xogħol hija ta' tħassib partikolari għaż-żgħażagħ peress li l-qgħad fost iż-żgħażagħ żdied drastikament u laħaq kważi 50 % fl-2013 filwaqt li l-proporzjon taż-żgħażagħ li mhumiex fl-edukazzjoni, l-impjieg jew it-taħriġ ikompli jiżdied. Sfidi importanti jinkludu ħidma ta' outreach għal żgħażagħ mhux irreġistrati u mobilizzazzjoni tas-settur privat biex joffri iktar apprendistati, f'konformità mal-objettivi ta' garanzija taż-żgħażagħ. Il-Kroazja taffaċċa wkoll sfidi serji fl-edukazzjoni fir-rigward ta' rilevanza tas-suq tax-xogħol u l-kwalità tal-proviżjoni fis-setturi edukattivi kollha. Hemm nuqqas fit-tagħlim ibbażat fuq ix-xogħol u l-gwida tal-karriera madwar l-edukazzjoni sekondarja u terzjarja filwaqt li l-ingaġġ tal-impjegati mal-edukazzjoni u t-taħriġ vokazzjonali, u l-edukazzjoni sekondarja u terzjarja huwa baxx. Ir-rati tal-impjieg fost gradwati riċenti huma b'mod sinifikanti iktar baxxi mill-bqija tal-Unjoni. Is-sistema ta' edukazzjoni u ta' taħriġ vokazzjonali antikwata għaddejja minn riforma fil-forma ta' pilotaġġ ta' kurrikula ġodda tal-iskola. L-implimentazzjoni ta' Qafas tal-Kwalifikazzjonijiet Kroati u l-Istrateġija dwar l-Edukazzjoni, ix-Xjenza u t-Teknoloġija tinsab pendenti iżda għandha ttejjeb ir-riżultati edukattivi u tallinjahom mal-bżonnijiet tas-suq tax-xogħol.

(16)

Qgħad għoli u parteċipazzjoni tas-suq baxxa wasslu għal deterjorament tas-sitwazzjoni soċjali fil-Kroazja. Il-proporzjon ta' persuni f'riskju tal-faqar u l-esklużjoni soċjali żdiedet fi snin riċenti u hija b'mod sinifikanti 'l fuq mill-medja tal-UE. It-tfassil tas-sistema tal-benefiċċju soċjali tagħmel possibbli għal reċipjenti biex jakkumulaw trasferimenti ta' flus li jikkoinċidu. Meta r-reċipjenti jidħlu fix-xogħol, jitilfu l-benefiċċju ta' uħud minn dawn it-trasferimenti soċjali, biex b'hekk jinħolqulhom diżinċentivi biex jidħlu fis-suq tax-xogħol. Hemm lok biex is-sistema ta' protezzjoni soċjali ssir aktar effiċjenti u trasparenti: bħalissa, l-allokazzjoni ta' skemi u benefiċċji ta' appoġġ tad-dħul hija mxerrda madwar ħafna istituzzjonijiet u livelli tal-gvern, b'applikazzjoni inkonsistenti tal-kriterji u trikkib. L-Att dwar l-Għajnuna Soċjali tal-2013 daħħal kriterji tad-dħul (means testing) aktar stretti u għaqqad erbgħa minn iktar minn 70 benefiċċju fuq livell nazzjonali, inklużi uħud li jimmiraw gruppi speċifiċi, fid-Dħul Minimu Ġenerali. “One‐stop shop” nazzjonali, li permezz tiegħu l-benefiċċji fi flus fuq livell nazzjonali jkunu amministrati, qed ikun implimentat gradwalment sal-2016. Madankollu, monitoraġġ u evalwazzjoni sistemiċi se jkunu diffiċli peress li l-iskemi u l-programmi ta' appoġġ tad-dħul fuq livelli lokali u reġjonali u l-varji benefiċċji fi flus mingħajr kriterji tad-dħul li jolqtu kategoriji speċifiċi tal-popolazzjoni, ma ġewx integrati. Minkejja numru ta' riformi leġislattivi mill-2011, it-tfassil tas-sistemi tal-benefiċċji soċjali naqas milli jolqot in-nies l-iktar fil-bżonn.

(17)

Il-qafas regolatorju attwali biex isir in-negozju fil-Kroazja jimponi piż għoli fuq in-negozji, inklużi nuqqas ta' ċertezza legali, teħid tad-deċiżjonijiet mhux trasparenti b'mod partikolari fuq livell lokali, u miżati parafiskali numerużi. Barra minn hekk, frammentazzjoni għolja tar-responsabbiltajiet amministrattivi pubbliċi fil-livelli reġjonali u lokali u qasma kumplessa ta' kompetenzi bejn il-ministeri u l-aġenziji fuq livell ċentrali jikkumplikaw deċiżjonijiet tan-negozju u jtawlu l-proċeduri amministrattivi. Iddaħħal fis-seħħ approċċ strutturat fuq livell governmentali ċentrali biex jiġu identifikati l-ostakoli għan-negozju; madankollu, metodoloġija konsistenti biex jitkejjel il-piż amministrattiv mhijiex applikata, li jnaqqas l-effettività tal-miżuri diġà meħuda. Il-one‐stop shop eżistenti għan-negozji jkopri funzjonalitajiet eżistenti biss. Hemm bżonn li jiġi razzjonalizzat u jittejjeb il-kontroll fuq sussidji u garanziji pubbliċi; reġistru ċentrali ta' kumpaniji u individwi appoġġati jirrappreżenta l-ewwel pass f'dan il-qasam. Il-Kroazja bdiet riformi tal-amministrazzjoni pubblika biex issaħħaħ il-kapaċitajiet amministrattivi tagħha u biex ittejjeb l-orjentazzjoni lejn il-klijent tagħha ta' servizzi pubbliċi għaċ-ċittadini u n-negozji. Madankollu, il-kwalità tal-governanza pubblika tibqa' baxxa, b'koordinazzjoni dgħajfa madwar livelli differenti tal-gvern u ftit jew użu formalistiku ż-żejjed ta' tfassil tal-politika u valutazzjoni bbażati fuq l-evidenza. L-adozzjoni tal-istrateġija tar-riforma tal-amministrazzjoni pubblika hija pass fid-direzzjoni t-tajba; l-istrateġija għandha tkun implimentata bir-reqqa fuq il-livelli kollha tal-gvern. L-esperjenza tal-implimentazzjoni tal-fondi ta' qabel l-adeżjoni timmira lejn nuqqasijiet f'termini ta' ppjanar strateġiku u kapaċità istituzzjonali u dgħufijiet fl-elaborazzjoni tal-proġetti u s-segwitu.

(18)

Kumpaniji proprjetà tal-Istat jew ikkontrollati mill-Istat huma affettwati b'mod negattiv filwaqt li l-implimentazzjoni tal-istrateġija għall-ġestjoni ta' assi pubbliċi u intrapriżi ltaqgħet ma' dewmien. Attwalment, ma hemm l-ebda proċedura ta' għażla kompetittiva għall-membri u l-maniġment tal-bordijiet superviżorji, u l-ħatriet mhumiex ippubblikati. Filwaqt li ttieħdu miżuri biex jittejjeb il-qafas ta' kontra l-korruzzjoni, huma meħtieġa iktar sforzi fil-prevenzjoni tal-korruzzjoni, fuq is-saffi kollha tal-gvern. L-elementi prinċipali li bħalissa huma neqsin mill-qafas ta' kontra l-korruzzjoni jinkludu mekkaniżmi ta' verifika effettivi għal kunflitti ta' interess u żvelar tal-assi lil uffiċjali pubbliċi, kif ukoll salvagwardji speċifiċi għal intrapriżi proprjetà tal-Istat u kkontrollati mill-Istat. Is-setgħat ta' verifika tal-Kummissjoni għar-Riżoluzzjoni ta' Kunflitti ta' Interess huma bbażati fuq il-kompetenzi u l-proattività ta' awtoritajiet oħrajn. Minkejja l-progress li sar biex tiżdied it-trasparenza tal-proċeduri ta' akkwist pubbliku, l-għodod tal-valutazzjoni tar-riskju mhumiex qed jintużaw sistematikament u setturi vulnerabbli jidhru li mhumiex biżżejjed prijoritizzati. Is-sorveljanza fuq l-implimentazzjoni effettiva ta' regoli ta' akkwist pubbliku għandha bżonn tiġi infurzata, kif ukoll bl-għan tal-allokazzjoni ta' fondi tal-UE fis-snin li ġejjin.

(19)

L-applikazzjoni mifruxa tal-proċedura ta' prefalliment fl-2013 sabet ċertu suċċess fl-indirizzar ta' problemi tas-servizz tad-dejn iffaċċjati minn kumpaniji fil-kuntest ta' proċeduri ta' falliment kumplessi, għaljin u twal. Madankollu, hemm ambitu biex jissaħħaħ b'mod konsiderevoli l-istrument billi jiġu indirizzati varji nuqqasijiet, bħall-kjarifika insuffiċjenti tar-rwol tal-Istat fil-proċess, it-tisħiħ tar-rwol tal-qrati kummerċjali fil-validazzjoni ta' talbiet u pjanijiet ta' ristrutturar tajbin, billi jiġi estiż l-ambitu tal-proċedura biex jippermetti ristrutturar effettiv qabel ma d-debitur isir insolventi, u l-indirizzar ta' nuqqasijiet fl-implimentazzjoni tal-liġi. Minkejja numru ta' riformi biex tittejjeb l-effettività tas-sistema ġudizzjarja, proċedimenti ġudizzjarji f'kawżi ċivili, kummerċjali u amministrattivi kontenzjużi huma twal għalxejn, partikolarment fil-prim'istanza. In-numru ta' kawżi pendenti żdied fl-2013 u huwa għoli ħafna, partikolarment fir-rigward ta' proċedimenti ċivili u kummerċjali. Sforz kontinwu sabiex jinħolqu u jiġu infurzati l-inċentivi t-tajba biex jiġu solvuti proċedimenti fil-ħin u biex jiġu promossi riżoluzzjonijiet ekstraġudizzjarji, speċjalment fil-każ ta' talbiet żgħar, huwa meħtieġ biex jiġu indirizzati dawn il-kwistjonijiet, peress li jtellfu l-attività tan-negozju u jnaqqsu l-attrattività tal-Kroazja għall-investiment dirett barrani.

(20)

L-approċċ konservattiv adottat mill-Bank Nazzjonali Kroat għal regolamentazzjoni prudenti, b'mod partikolari fir-rigward ta' livelli kapitali, fisser li l-banek bnew grad ta' reżiljenza li wera li huwa bżonnjuż minħabba l-isfidi li issa qed jaffaċċaw mill-ekonomija dgħajfa. Madankollu, bl-ekonomija li dieħla fis-sitt sena ta' reċessjoni u self improduttiv li qed jiżdied, hemm riskji għall-kwalità tal-assi tal-banek. Huwa milqugħ sew li ċerti portafolli tal-ikbar erba' banek Kroati, li huma ta' sjieda barranija, se jkunu koperti mit-test ta' rieżami/stress ta' kwalità tal-assi taż-Żona tal-Euro tal-Mekkaniżmu Superviżorju Uniku l-ġdid. Madankollu, l-eżerċizzju jeskludi ċerti portafolli importanti materjalment minn perspettiva Kroata, peress li l-portafolli huma magħżula abbażi tar-rilevanza tagħhom fuq livell ta' grupp bankarju. Barra minn hekk, l-eżerċizzju ma jkoprix banek ta' daqs medju u żgħar, li jistgħu jkollhom livelli iżgħar ta' kapital u kwalità tal-assi inqas robusta, u huma potenzjalment importanti għall-istabbiltà finanzjarja. Il-komplementar tal-Mekkaniżmu Superviżorju Uniku b'eżerċizzju dijanjostiku superviżorju ddiżinjat speċifikament għas-sistema finanzjarja Kroata (u li jkopri portafolli sinifikanti ta' sussidjarji Kroati li mhumiex parti mill-eżerċizzju tal-Mekkaniżmu Superviżorju Uniku, kif ukoll il-banek ta' daqs medju u żgħir) ittejjeb il-fehim globali tal-klassifikazzjoni tas-self tal-banek u l-adegwatezza tal-provvedimenti tat-telf mis-self tagħhom.

(21)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Kroazja. Hija vvalutat il-Programm Nazzjonali ta’ Riforma u l-Programm ta’ Konverġenza. Hija kkunsidrat mhux biss ir-rilevanza tagħhom għall-politika fiskali u soċjoekonomika sostenibbli fil-Kroazja iżda wkoll il-konformità tagħhom mar-regoli u l-gwida tal-UE, minħabba l-bżonn li tiġi infurzata l-governanza ekonomika globali tal-Unjoni billi jiġi pprovdut input fuq livell tal-UE f'deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (8) hawn taħt.

(22)

Fid-dawl ta' din il-valutazzjoni, il-Kunsill eżamina l-Programm ta' Konverġenza, u l-opinjoni tiegħu (4) hija riflessa b'mod partikolari fir-rakkamondazzjoni (1) ta' hawn taħt.

(23)

Fid-dawl tar-rieżami fil-fond tal-Kummissjoni u din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Konverġenza. Ir-rakkomandazzjonijiet tiegħu skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet minn (1) sa (8) hawn taħt.

1.

Timplimenta b'mod sħiħ il-miżuri baġitarji adottati għall-2014. Issaħħaħ l-istrateġija baġitarja, billi tispeċifika iktar miżuri mħabbra għall-2015 u l-2016, u tikkonsidra miżuri li jiffavorixxu t-tkabbir, permanenti addizzjonali sabiex tiżgura korrezzjoni sostenibbli għad-defiċit eċċessiv sal-2016. Fl-istess ħin, tiżgura li l-isforz ta' aġġustament strutturali kif speċifikat fir-rakkomandazzjoni tal-Kunsill skont il-Proċedura tad-Defiċit Eċċessiv jiġi mwassal. Tallinja projezzjonijiet tal-programm ma' standards tas-SEK u l-ħtiġijiet tal-Patt ta' Stabbiltà u Tkabbir. Tieħu miżuri biex issaħħaħ il-kontroll fuq l-infiq. Sa Marzu 2015, twettaq rieżami ta' nfiq bir-reqqa. Issaħħaħ il-proċess ta' ppjanar baġitarju, b'mod partikolari billi ssaħħaħ l-eżattezza ta' tbassir makroekonomiku u baġitarju u ssaħħaħ in-natura li torbot ta' limiti ta' nfiq annwali u ta' terminu medju u ttejjeb it-tfassil ta' regoli fiskali. Sa Ottubru 2014, abbażi tal-liġi tal-Kummissjoni għall-Politika Fiskali stabbilita riċentement, issaħħaħ l-indipendenza tagħha mill-awtoritajiet baġitarji kollha, twessa' l-mandat tagħha, b'mod partikolari fir-rigward tal-monitoraġġ tar-regoli fiskali kollha u l-valutazzjoni ex ante u ex post tat-tbassir, u tiżgura riżorsi adegwati. Billi tibni fuq pjanijiet imsemmija fil-Programm Nazzjonali ta' Riforma, tippreżenta strateġija konkreta biex tirriforma t-tassazzjoni tal-proprjetà rikorrenti. Tibda proċess ta' rappurtar u rieżami tal-infiq tat-taxxa. Ittejjeb il-konformità mat-taxxa, b'mod partikolari billi tkabbar iktar l-effiċjenza tal-amministrazzjoni tat-taxxa; tippreżenta pjan ta' azzjoni għal dan l-għan sal-aħħar tal-2014.

2.

Tnaqqas l-aċċess għal irtirar kmieni. Tadotta leġislazzjoni sa Marzu 2015 biex tgħaġġel l-armonizzazzjoni ppjanata tal-etajiet statutorji tal-irtirar tan-nisa u l-irġiel u biex tavvanza ż-żieda ppjanata tal-età statutorja tal-irtirar għal 67 sena. Tiżgura l-infurzar ta' valutazzjonijiet u kontrolli tal-pensjonijiet tad-diżabbiltà iktar stretti u tgħaġġel l-integrazzjoni tal-pensjonijiet skont skemi speċjali fis-sistema tal-pensjoni ġenerali. Issaħħaħ il-kosteffettività tas-settur tal-kura tas-saħħa, inklużi sptarijiet.

3.

Timplimenta t-tieni fażi tar-riforma tal-liġi tax-xogħol, wara konsultazzjoni mal-imsieħba soċjali, b'mod partikolari fir-rigward ta' kundizzjonijiet għal sensji u ħinijiet tax-xogħol, u bil-ħsieb li żżomm segmentazzjoni ulterjuri tas-suq tax-xogħol inkluż għaż-żgħażagħ, sa Marzu 2015. Tagħmel eżami mill-ġdid tas-sistema tal-istabbiliment tal-pagi bil-ħsieb li ttejjeb l-allinjament ta' żviluppi tal-produttività u kondizzjonijiet tal-pagi. Tippreżenta l-konklużjonijiet ta' dan ir-rieżami sal-aħħar tal-2014. Issaħħaħ l-effettività u l-kamp ta' effett ta' politiki tas-suq tax-xogħol attivi billi ssaħħaħ il-kapaċitajiet amministrattivi tas-servizzi tal-impjieg pubbliku, inkluż fuq livell reġjonali, u billi żżid il-kopertura tal-ħaddiema żgħażagħ, nies qiegħda għal żmien twil u ħaddiema ikbar fl-età. Tagħti prijorità biex tilħaq żgħażagħ mhux reġistrati u timmobilizza s-settur privat biex toffri iktar apprendistati f'konformità mal-objettivi ta' garanzija taż-żgħażagħ. Tiddeskrivi pjanijiet, sal-aħħar tal-2014, biex tindirizza xogħol mhux iddikkjarat. Timplimenta miżuri biex ittejjeb ir-rilevanza tas-suq tax-xogħol u l-kwalità tar-riżultati tal-edukazzjoni billi timmodernizza s-sistemi ta' kwalifikazzjoni, billi tpoġġi fis-seħħ mekkaniżmi ta' assigurazzjoni ta' kwalità u billi ttejjeb transizzjonijiet skola-xogħol, b'mod partikolari billi ssaħħaħ l-edukazzjoni vokazzjonali u t-tagħlim ibbażat fuq ix-xogħol.

4.

Tagħmel rieżami ta' sistemi tat-taxxa u l-benefiċċji sal-aħħar tal-2014, u tippreżenta pjan ta' azzjoni biex ittejjeb ir-reattivazzjoni ta' persuni inattivi u qiegħda. Issaħħaħ l-effettività u t-trasparenza tas-sistema ta' protezzjoni soċjali billi tikkonsolida iktar il-benefiċċji, billi tgħaqqad il-kriterji tal-eliġibbiltà u tgħaqqad id-data mil-livelli u l-entitajiet tal-gvern rilevanti kollha fil-“one‐stop shop”. Ittejjeb l-effettività u l-adegwatezza tal-benefiċċji tal-assistenza soċjali permezz ta' mira aħjar tagħhom.

5.

Tieħu miżuri ulterjuri biex ittejjeb l-ambjent tan-negozju. B'mod partikolari, f'Marzu 2015 tistabbilixxi mira biex il-ħtiġijiet amministrattivi jitbaxxew konsiderevolment, inklużi l-miżati parafiskali. Tindirizza l-livell għoli ta' frammentazzjoni u responsabbiltajiet li jikkoinċidu billi tissimplifika l-proċessi amministrattivi u billi tiċċara l-qafas tat-teħid tad-deċiżjonijiet u l-kontabilità madwar varji livelli ta' gvern u f'livell ta' gvern ċentrali bejn il-ministeri u l-aġenziji. Ittejjeb il-kapaċità amministrattiva u l-ippjanar strateġiku tal-unitajiet bil-ġestjoni ta' Fondi Ewropej Strutturali u ta' Investiment u tipprovdihom b'livelli ta' persunal adegwati u stabbli.

6.

Tippreżenta, sa Ottubru 2014, pjan dettaljat għall-ġestjoni tal-proprjetà pubblika għall-2015. Tiżgura li kumpaniji fil-kontroll tal-Istat huma regolati b'mod trasparenti u responsabbli, b'mod partikolari, issaħħaħ il-ħtiġijiet ta' kompetenza għal membri ta' bordijiet ta' ġestjoni u superviżjoni nominati mill-istat u tintroduċi reġistru pubbliku għall-ħatriet. Issaħħaħ il-prevenzjoni tal-korruzzjoni fl-amministrazzjoni pubblika u f'intrapriżi proprjetà tal-Istat u kkontrollati mill-Istat, inkluż billi żżid is-setgħat ta' verifika tal-Kummissjoni dwar il-Konflitt ta' Interess. Issaħħaħ it-trasparenza u l-effiċjenza tal-akkwist pubbliku kemm fuq livell ċentrali u kemm fuq livell lokali, u l-kapaċità li tissorvelja l-implimentazzjoni u taqbad l-irregolaritajiet.

7.

Sal-aħħar tal-2014 issaħħaħ ir-rwol tal-qrati kummerċjali billi tagħmel monitoraġġ tat-trasparenza u l-legalità fl-applikazzjoni tal-proċedura ta' prefalliment korporattiva. Tagħmel eżami mill-ġdid tat-test obbligatorju ta' insolvenza/illikwidità biex taċċessa l-proċedimenti għal soluzzjoni ta' prefalliment u tissimplifika l-proċess ta' insolvenza/likwidazzjoni biex tnaqqas it-tul tiegħu. Ittejjeb il-kwalità u l-effiċjenza tas-sistema ġudizzjarja, b'mod partikolari billi tipprovdi inċentivi biex issolvi proċedimenti f'kawżi ċivili u kummerċjali kontenzjużi u f'kawżi amministrattivi fil-ħin u biex tagħżel soluzzjoni barra mill-qorti speċjalment għal talbiet żgħar.

8.

Tikkomplementa r-rieżami ta' kwalità tal-assi u l-eżerċizzi tat-test tal-istress tal-Bank Ċentrali Ewropew tal-2014, twettaq eżerċizzju ta' analiżi ta' portafoll komprensiv imfassal speċifikament għas-settur finanzjarju Kroat, b'fokus fuq portafolli importanti li mhumiex koperti mill-eżerċizzju tal-Bank Ċentrali Ewropew u li jinkludu banek ta' daqs medju u żgħar prinċipali.

29.7.2014   

MT

Il-Ġurnal Uffiċjali tal-Unjoni Ewropea

C 247/57

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tvara strateġija ġdida għall-impjiegi u t-tkabbir, Ewropa 2020, imsejsa fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn jeħtieġ azzjoni biex tingħata spinta lill-potenzjal tal-Ewropa għat-tkabbir sostenibbli u l-kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew tal-Gvern tal-Istati Membri ddeċidew fuq Patt għal Tkabbir u Impjiegi, li jipprovdi qafas koerenti għal azzjoni fil-livell nazzjonali, fil-livell tal-UE u fil-livell taż-żona tal-euro bl-użu tal-pressjonijiet, strumenti u politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-istrateġija Ewropa 2020 u biex jiġu implimentati r-rakkomandazzjonijiet‐speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma tal-Italja 2013 u ta l-opinjoni tiegħu dwar il-Programm ta' Stabbiltà għall-2012‐2017. Fil-15 ta' Novembru 2013, f'konformità mar-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha dwar l-abbozz ta' pjan baġitarju tal-Italja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir (6), li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta’ Novembru 2013, il-Kummissjoni, abbażi tar-Regolament (UE) Nru 1176/2011 adottat ir-Rapport dwar il-Mekkaniżmu ta’ Twissija, li fih identifikat lill-Italja bħala wieħed mill-Istati Membri li għalihom kellha titwettaq analiżi fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex tiġi mmodernizzata l-amministrazzjoni pubblika.

(7)

Fil-5 ta' Marzu 2014, il-Kummissjoni ppubblikat ir-riżultati tar-rieżami fil-fond dwar l-Italja, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslitha biex tikkonkludi li l-Italja għaddejja minn żbilanċi makroekonomiċi eċċessivi li jeħtieġu monitoraġġ u azzjoni politika. B’mod partikolari, il-livell persistentement għoli tad-dejn pubbliku flimkien ma’ kompetittività esterna dgħajfa minħabba t-tkabbir kważi staġnat fil-produttività, u aggravat aktar bit-tkabbir imkaxkar u dgħajjef, jistħoqqilhom attenzjoni u azzjoni politika deċiżivi.

(8)

Fit-22 ta’ April 2014, l-Italja ressqet il-Programm Nazzjonali ta’ Riforma 2014 tagħha u l-Programm ta’ Stabbiltà tagħha għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(9)

L-objettiv tal-istrateġija baġitarja spjegata fil-Programm ta’ Stabbiltà huwa l-kisba l-objettiv ta’ terminu medju ta’ pożizzjoni baġitarja bilanċjata f’termini strutturali sal-2016, filwaqt li jikkonforma mar-regola tad-dejn fil-perijodu ta’ transizzjoni 2013-2015. Il-Programm ta’ Stabbiltà jikkonferma l-objettiv ta’ terminu medju ta’ pożizzjoni baġitarja bilanċjata f’termini strutturali, li tirrifletti r-rekwiżiti tal-Patt ta’ Stabbiltà u Tkabbir. L-aġġustament strutturali (rikalkulat) ippjanat fil-Programm ta’ Stabbiltà huwa ta’ 0,2 punti perċentwali tal-PDG fl-2014 u ta’ 0,4 punti perċentwali fl-2015. Skont il-Programm ta’ Stabbiltà, dan l-aġġustament limitat lejn l-objettiv ta’ terminu medju huwa ġustifikat minn kundizzjonijiet ekonomiċi severi u l-isforz meħtieġ biex jiġi implimentat programm ambizzjuż ta’ riformi strutturali. B’mod partikolari, huma ppjanati bosta riformi strutturali li jkollhom impatt pożittiv fuq it-tkabbir ekonomiku potenzjali u li eventwalment inaqqsu l-proporzjon tad‐dejn tal-gvern mal‐PDG fis-snin li ġejjin. L-aġġustament strutturali ppjanat fil-Programm ta’ Stabbiltà jippermetti lill-Italja tikkonforma mal-parametru referenzjarju għat-tnaqqis tad-dejn matul il-perijodu ta’ transizzjoni 2013-2015, parzjalment bis-saħħa ta’ pjan ambizzjuż għall-privatizzazzjoni li ser jiġi implimentat matul 2014-2017 (li jammonta għal 0,7 punti perċentwali tal-PDG kull sena). Ix-xenarju makroekonomiku sottostanti tal-proġettazzjonijiet baġitarji fil-Programm ta’ Stabbiltà, li ma ġiex approvat minn korp indipendenti, huwa kemxejn ottimist, b’mod partikolari għall-aħħar snin tal-Programm ta’ Stabbiltà.

Hija ppjanata devjazzjoni mill-perkors ta’ aġġustament lejn l-objettiv ta’ terminu medju fl-2014; jekk tirrepeti ruħha s-sena ta’ wara, tkun tista’ tiġi vvalutata bħala sinifikanti, inkluż fuq il-bażi tal-parametru referenzjarju tan-nefqa. Barra minn hekk, il-kisba tal-miri baġitarji mhijiex sostnuta għal kollox b’miżuri dettaljati biżżejjed, b’mod partikolari mill-2015. It-tbassir tar-rebbiegħa 2014 tas-servizzi tal-Kummissjoni jindika nuqqas ta’ konformità mal-parametru referenzjarju għat-tnaqqis tad-dejn fl-2014 peress li l-aġġustament strutturali proġettat (0,1 punti perċentwali biss tal-PDG) ma jilħaqx l-aġġustament strutturali meħtieġ ta’ 0,7 punti perċentwali tal-PDG. Fuq il-bażi tal-valutazzjoni tal-Programm ta' Stabbiltà u t-tbassir tal-Kummissjoni skont ir-Regolament (KE) Nru 1466/97, il-Kunsill huwa tal-opinjoni li sforzi addizzjonali, inkluż fl-2014, huma meħtieġa biex tintlaħaq il-konformità mar-rekwiżiti tal-Patt ta’ Stabbiltà u Tkabbir.

(10)

L-azzjoni reċenti biex tittaffa t-tassazzjoni fuq il-fatturi tal-produzzjoni kienet kemxejn limitata. Għalhekk hemm ambitu biex il-piż tat-taxxa jitressaq aktar fuq il-konsum, il-proprjetà u l-ambjent, f’konformità stretta mal-miri baġitarji. Rigward il-konsum, it-titjib tal-istruttura tas-sistema tat-taxxa jeħtieġ ukoll b'mod kruċjali reviżjoni tar-rati mnaqqsa tal-VAT u tan-nefqiet tat-taxxa diretta, b’attenzjoni xierqa għall-ħtieġa li jitnaqqas l-impatt distribuzzjonali possibbli. Fir-rigward tal-proprjetà, reviżjoni tal-valuri katastali skont il-valuri attwali tas-suq, tippermetti tassazzjoni rikorrenti aktar ġusta fuq il-proprjetà immobbli. Liġi abilitanti adottata reċentament għar-riforma tat-taxxa tirrappreżenta opportunità biex jitwettqu dawn ir-riformi meħtieġa. Minħabba d-daqs tal-isfida, azzjoni fuq il-kompożizzjoni tal-istruttura tat-taxxa teħtieġ li tiġi kkomplementata b’miżuri addizzjonali biex tittejjeb l-amministrazzjoni tat-taxxa u l-konformità tat-taxxa u b'miżuri deċiżivi biex tkun miġġielda l-evażjoni tat-taxxa, l-ekonomija moħbija u x-xogħol mhux dikjarat, li għandhom ikunu ta’ piż kemm fuq il-finanzi pubbliċi kif ukoll fuq il-piż tat-taxxa għall-kontribwenti konformi. F’dan ir-rigward, il-liġi abilitanti għar-riforma tat-taxxa tipprevedi diversi miżuri biex tissaħħaħ l-amministrazzjoni tat-taxxa: sistema ta' stima komprensiva tad-diskrepanza tat-taxxa u sistema għall-monitoraġġ tagħha, miżuri ta’ simplifikazzjoni, azzjonijiet biex titjieb ir-relazzjoni mal-kontribwenti, miżuri li jtejbu l-irkupru tad-dejn tat-taxxa lokali u t-tisħiħ tal-kontrolli tat-taxxa. Id-deċiżjoni li jiġu introdotti prospetti tat-taxxa mimlija minn qabel mill-2015 huwa pass pożittiv addizzjonali biex titjieb il-konformità mat-taxxa.

(11)

Implimentazzjoni bir-reqqa u rapida tal-miżuri adottati tibqa’ sfida ewlenija għall-Italja, kemm f’termini li jiġu indirizzati l-lakuni eżistenti fl-implimentazzjoni u l-prevenzjoni li jiġi akkumulat aktar dewmien. Waħda mill-għodod ewlenin biex titjieb l-implimentazzjoni tal-prestazzjoni tal-Italja, u aktar ġeneralment tiġi żgurata azzjoni politika b'inqas intoppi, hija l-koordinazzjoni msaħħa u allokazzjoni aktar effiċjenti tal-kompetenzi bejn il-livelli differenti ta’ gvern. Dan imbagħad jista’ jkun ta’ benefiċċju għall-immaniġġar tal-fondi tal-UE, fejn sa issa seħħet biss azzjoni parzjali u mhux sħiħa, speċjalment fir-reġjuni tan-nofsinhar. L-immaniġġar tal-fondi tal-UE għadu jbati minn kapaċità amministrattiva dgħajfa u n-nuqqas ta’ trasparenza, evalwazzjoni u kontroll tal-kwalità. Il-kwalità tas-servizz pubbliku tiggwadanja wkoll minn żieda l-effikaċja u l-orjentazzjoni lejn is-servizz, u bidliet korrispondenti fl-immaniġġar tar-riżorsi umani. Il-korruzzjoni għadha piż sinifikanti fuq is-sistema produttiva tal-Italja u fuq il-fiduċja fix-xena politika u istituzzjonali. Hemm bżonn ta' rieżami tal-istatut tal-limitazzjonijiet. Ġlieda effettiva kontra l-korruzzjoni teħtieġ ukoll li l-Awtorità Nazzjonali Kontra l-Korruzzjoni għall-Evalwazzjoni u t-Trasparenza tal-Amministrazzjonijiet Pubbliċi, tingħata setgħa adegwata. Għadhom jippersistu ineffiċjenzi fil-ġustizzja ċivili u l-impatt tal-miżuri adottati jeħtieġ jiġi mmonitorjat bir-reqqa.

(12)

Fuq il-bażi tar-rieżami mmirat tal-kwalità tal-assi li sar is-sena l-oħra taħt il-patroċinju tal-Bank tal-Italja, għadu importanti li jitjieb l-immaniġġar tal-assi indeboliti u jitħeġġeġ it-twarrib tagħhom sabiex terġa' tingħata l-ħajja lill-kapaċità tal-banek li jespandu l-provvista tal-kreditu lill-ekonomija reali. Fir-rigward tal-aċċess għall-finanzi, l-azzjonijiet prinċipali li ttieħdu sa issa ffukaw fuq li jitħaffef l-aċċess tal-kumpaniji għall-kreditu, iżda l-iżvilupp ta’ strumenti ta’ finanzjament oħra apparti s-self bankarju għadu limitat, speċjalment għall-intrapriżi żgħar u medji. L-inizjattivi meħuda fil-qasam tal-governanza korporattiva tal-banek — b’mod partikolari l-prinċipji l-ġodda ħarġu reċentement mill-Bank tal-Italja — huma pass tajjeb. Fl-istess ħin, l-impatt tagħhom ser jiddependi fuq l-implimentazzjoni xierqa tagħhom mill-banek u l-infurzar. B’mod partikolari, għadu meħtieġ monitoraġġ mill-qrib ta’ uħud mill-akbar banek kooperattivi (“banche popolari”).

(13)

Is-sitwazzjoni tas-suq tax-xogħol kompliet tiddeterjora fl-2013, bil-qgħad jiżdied għal 12,2 % u l-qgħad fost iż-żgħażagħ laħaq 40 % fl-Italja. L-iżgurar ta’ implimentazzjoni xierqa u monitoraġġ bir-reqqa tal-effett tar-riformi adottati fis-suq tax-xogħol u l-istipular tal-pagi huwa essenzjali biex ikun iggarantit li l-benefiċċji mistennija f’termini ta’ aktar flessibbiltà ta’ ħruġ, flessibbiltà ta' dħul regolata aħjar, sistema aktar komprensiva ta’ benefiċċji tal-qgħad u allinjament aħjar tal-pagi mal-produttività materjalizzata. Il-pjanijiet għat-titjib tal-effikaċja tas-servizzi tal-istazzjonar permezz tat-tisħiħ tas-servizzi pubbliċi tal-impjieg kienu soġġetti għal dewmien u jeħtieġ li jiġu aċċelerati. Miżuri mmirati lejn it-trawwim tal-ħolqien tal-impjiegi fuq terminu qasir jeħtieġ li jiġu kkomplementati b’miżuri li jindirizzaw is-segmentazzjoni. Globalment, is-suq tax-xogħol Taljan għadu kkaratterizzat mis-segmentazzjoni u parteċipazzjoni baxxa, li jaffettwaw lin-nisa u liż-żgħażagħ b’mod partikolari. Għalhekk, il-passi limitat li ttieħdu sa issa għandhom bżonn jiġu estiżi, inkluż f’konformità mal-objettivi ta’ garanzija għaż-żgħażagħ. L-Italja qed tesperjenza tnaqqis fid-dħul disponibbli għall-unitajiet domestiċi flimkien ma’ żieda fil-faqar u l-esklużjoni soċjali, li qed jaffettwaw lill-familji bit-tfal b’mod partikolari. In-nefqa soċjali fl-Italja tibqa’ orjentata prinċipalment lejn l-anzjani u b’konċentrazzjoni minima fuq l-attivazzjoni, li tillimita l-ambitu biex jiġi indirizzat ir-riskju tal-esklużjoni soċjali u l-faqar. L-iskema pilota tal-għajnuna soċjali introdotta reċentement għandha l-għan li tipprovdi xibka ta’ sigurtà soċjali. L-estensjoni prevista tagħha għall-pajjiż kollu ser teħtieġ titjib fl-effikaċja tal-infiq u s-servizzi soċjali fit-territorju kollu.

(14)

Jeħtieġ li jsiru sforzi biex titjieb il-prestazzjoni edukattiva u l-allokazzjoni tal-kapital uman fil-livelli edukattivi kollha, jiġifieri dak primarju, sekondarju u terzjarju. Il-professjoni tal-għalliema hija kkaratterizzata minn perkors tal-karriera wieħed u bħalissa toffri prospetti limitati f’termini ta’ żvilupp professjonali. Id-diversifikazzjoni tal-karrieri tal-għalliema u rabta aħjar tal-iżvilupp tagħhom mal-mertu u l-prestazzjoni flimkien mal-ġeneralizzazzjoni tal-evalwazzjoni tal-iskejjel, tista’ jsarraf f’riżultati skolastiċi aħjar. Jidher li huma ta' importanza kruċjali li fil-livelli ta' sekondarja għolja u terzjarju tiġi żgurata transizzjoni bla intoppi bejn l-edukazzjoni u s-suq tax-xogħol, u t-tisħiħ u t-twessigħ tat-taħriġ prattiku, permezz ta’ tagħlim u edukazzjoni u taħriġ vokazzjonali bbażati aktar fuq ix-xogħol. Is-segwitu tad-digriet leġislattiv tal-2013 dwar din il-kwistjoni, li stabbilixxa reġistru nazzjonali tal-kwalifiki huwa essenzjali sabiex ikun żgurat ir‐rikonoxximent nazzjonali tal-ħiliet. Filwaqt li tibni fuq l-azzjoni inizjali f’din id-direzzjoni, jekk l-allokazzjoni tal-finanzjament pubbliku lill-universitajiet u l-istituti ta' riċerka tibda ssir fuq il-bażi tal-prestazzjoni tar-riċerka u t-tagħlim, dan ikun ta' kontribut kemm biex titjieb il-kwalità tal-universitajiet u potenzjalment tiżdied il-kapaċità tar-riċerka u l-innovazzjoni, fejn din għadha lura.

(15)

Ittieħdu xi passi biex jinkiseb ambjent aktar faċli għan-negozji u ċ-ċittadini, iżda l-impatt tagħhom huwa mxekkel minn dewmien fl-approvazzjoni finali tagħhom u nuqqasijiet fl-implimentazzjoni. Għad hemm għadd ta’ ostakli għall-kompetizzjoni (oqsma ta’ attività riżervati, skemi ta' konċessjonijiet/awtorizzazzjoni, eċċ.) fis-servizzi professjonali, l-assigurazzjoni, id-distribuzzjoni tal-fjuwil, il-bejgħ bl-imnut u s-servizzi postali. Sensiela ta’ nuqqasijiet li jaffettwaw is-sistema tal-akkwist pubbliku wkoll jeħtieġ li jiġu indirizzati. It-tisħiħ tal-kompetizzjoni fil-qasam tas-servizzi pubbliċi lokali hija prijorità oħra. B’mod partikolari, jeħtieġ li tiġi implimentata l-leġislazzjoni attwali li tistipula li l-kuntratti eżistenti li mhumiex konformi mal-liġi tal-UE dwar kriterji interni jridu jiġu rratifikati sal-31 ta’ Diċembru 2014.

(16)

Ostakli fl-infrastruttura jxekklu l-funzjonament tajjeb tas-suq tal-enerġija. Fit-trasport, in-nuqqas ta’ infrastruttura intermodali u n-nuqqas ta’ sinerġiji u kollegamenti ta' postijiet 'il ġewwa fil-pajjiż ma' portijiet Taljani jistħoqqilhom attenzjoni u azzjoni partikolari. F'termini ta' kopertura tal-broadband, l-Italja għandha żoni mhux urbani li mhumiex milħuqa sew.

(17)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Italja. Hija vvalutat il-Programm Nazzjonali ta’ Riforma u l-Programm ta’ Stabbiltà. Hija mhux biss qieset ir-rilevanza tagħhom għall-politika tas-sostenibbiltà fiskali u soċjoekonomika fl-Italja, imma wkoll il-konformità tagħhom mar-regoli u l-gwida tal-UE, fid-dawl tal-ħtieġa ta' tisħiħ fil-governanza ekonomika kumplessiva tal-Unjoni billi jiġi pprovdut kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet (1) sa (8) hawn taħt.

(18)

Fid-dawl ta’ din l-valutazzjoni, il-Kunsill eżamina l-Programm ta' Stabbiltà, u l-opinjoni tiegħu (7) hija riflessa b’mod partikolari fir-rakkomandazzjoni (1) hawn taħt.

(19)

Fid-dawl tar-rieżami fil-fond tal-Kummissjoni u ta' din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Stabbiltà. Ir-rakkomandazzjonijiet tiegħu skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (1) sa (8) hawn taħt.

(20)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-Żona tal-Euro inġenerali. Fuq din il-bażi l-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (8). Bħala pajjiż li l-munita tiegħu hija l-euro, l-Italja għandha wkoll tiżgura l-implimentazzjoni sħiħa u f’waqtha ta’ dawn ir-rakkomandazzjonijiet,

1.

Issaħħaħ il-miżuri baġitarji għall-2014 fid-dawl tad-differenza emerġenti relattiva mar-rekwiżiti tal-Patt ta’ Stabbiltà u Tkabbir, jiġifieri r-regola tat-tnaqqis tad-dejn, abbażi tat-tbassir tar-rebbiegħa 2014 tas-servizzi tal-Kummissjoni u tiżgura progress lejn l-OTM. Fl-2015, issaħħaħ b’mod sinifikanti l-istrateġija baġitarja biex tiżgura l-konformità mar-rekwiżit għat-tnaqqis tad-dejn, u b'hekk tilħaq l-OTM. Minn hemm 'l hemm, tiżgura li d-dejn tal-amministrazzjoni pubblika jkun fuq perkors biżżejjed “l isfel; timplimenta aġġustament fiskali li jiffavorixxi t-tkabbir abbażi tal-iffrankar sinifikanti mħabbar li jirriżulta minn titjib durabbli tal-effiċjenza u l-kwalità tan-nefqa pubblika fil-livelli kollha tal-gvern, filwaqt li jiġi ppreservat l-infiq li jsaħħaħ it-tkabbir bħall-innovazzjoni tar-R&Ż, l-edukazzjoni u proġetti ta' infrastruttura essenzjali. Tiggarantixxi l-indipendenza u t-tħaddim sħiħ tal-kunsill fiskali malajr kemm jista” jkun u mhux aktar tard minn Settembru 2014, fiż-żmien għall-valutazzjoni tal-Abbozz tal-Pjan Baġitarju tal-2015.

2.

Tkompli ċċaqlaq il-piż tat-taxxa minn fuq il-fatturi produttivi għal fuq il-konsum, il-proprjetà u l-ambjent, f’konformità mal-miri baġitarji. Għal dan l-għan, tevalwa l-effikaċja tat-tnaqqis reċenti tal-porzjon tat-taxxa fuq ix-xogħol u tiżgura l-finanzjament tiegħu għall-2015, tirrevedi l-ambitu tan-nefqiet diretti tat-taxxa u twessa' l-bażi tat-taxxa, b’mod partikolari fuq il-konsum. Tiżgura tassazzjoni ambjentali aktar effettiva, inkluż fil-qasam tad-dazji tas-sisa, u tneħħi sussidji li huma ta’ ħsara għall-ambjent. Timplimenta l-liġi abilitanti għar-riforma tat-taxxa sa Marzu 2015, anke billi tadotta d-digrieti li jwasslu għar-riforma tas-sistema katastali biex tkun żgurata l-effettività tar-riforma tat-tassazzjoni tal-proprjetà immobbli. Tkompli ttejjeb il-konformità mat-taxxa billi ttejjeb il-prevedibbiltà tas-sistema tat-taxxa, tissimplifika l-proċeduri, ittejjeb l-irkupru tad-dejn tat-taxxa, u timmodernizza tal-amministrazzjoni tat-taxxa. Tkompli l-ġlieda kontra l-evażjoni tat-taxxa u tieħu passi addizzjonali kontra l-ekonomija moħbija u x-xogħol mhux dikjarat.

3.

Bħala parti minn sforz usa' biex ittejjeb l-effiċjenza tal-amministrazzjoni pubblika, tikkjarifika l-kompetenzi fil-livelli kollha tal-Gvern. Tiżgura mmaniġġar aħjar tal-fondi tal-UE billi tieħu azzjoni deċiżiva biex tittejjeb il-kapaċità amministrattiva, it-trasparenza, l-evalwazzjoni u l-kontroll tal-kwalità kemm fil-livell nazzjonali kif ukoll f'dak reġjonali, speċjalment fir-reġjuni tan-nofsinhar. Ittejjeb aktar l-effikaċja tal-miżuri kontra l-korruzzjoni, inkluż billi tirrevedi l-istatut tal-limitazzjonijiet sal-aħħar tal-2014, u ssaħħaħ il-poteri tal-awtorità nazzjonali ta' kontra l-korruzzjoni. Timmonitorja fil-ħin l-impatt tar-riformi adottati biex tiżdied l-effiċjenza tal-ġustizzja ċivili bil-għan li tiġi żgurata l-effikaċja tagħhom u jiġu adottati miżuri addizzjonali jekk ikun meħtieġ.

4.

Issaħħaħ ir-reżiljenza tas-settur bankarju u tiżgura l-kapaċità tiegħu li jimmaniġġa u jiddisponi minn assi indeboliti biex jerġa’ tingħata l-ħajja lis-self fl-ekonomija reali. Trawwem aċċess għall-finanzi mhux bankarju għall-kumpaniji, speċjalment l-intrapriżi żgħar u medji. Tkompli tippromwovi u timmonitorja l-prassi ta’ governanza korporattiva effiċjenti fis-settur bankarju kollu, b’attenzjoni partikolari għall-banek kooperattivi kbar (“banche popolari”) u r-rwol tal-fondazzjonijiet, bil-għan li titjieb l-effikaċja tal-intermedjazzjoni finanzjarja.

5.

Tevalwa, sa tmiem l-2014, l-impatt tar-riformi tas-suq tax-xogħol u l-istipular tal-pagi fuq il-ħolqien tax-xogħol, il-proċeduri ta' tkeċċija, id-duwaliżmu fis-suq tax-xogħol u l-kost tal-kompetittività, u tevalwa l-bżonn ta’ azzjoni addizzjonali. Taħdem lejn protezzjoni soċjali aktar komprensiva għall-persuni qiegħda, filwaqt li tillimita l-użu tal-iskemi ta' supplimentazzjoni tal-pagi biex tiffaċilita r-riallokazzjoni tax-xogħol. Issaħħaħ ir-rabta bejn politiki attivi u passivi tas-suq tax-xogħol, u tibda bi pjan direzzjonali dettaljat għal azzjoni sa Diċembru 2014, u ssaħħaħ il-koordinazzjoni u l-effiċjenza tas-servizzi pubbliċi tal-impjieg madwar il-pajjiż. Tadotta azzjoni effettiva biex tippromwovi l-impjieg tan-nisa, billi jiġu adottati miżuri biex jitnaqqsu d-diżinċentivi fiskali għal dawk li huma tieni sors tad-dħul minn Marzu 2015 u tipprovdi servizzi ta’ ndukrar adegwati. Tipprovdi servizzi adegwati madwar il-pajjiż liż-żgħażagħ mhux reġistrati u tiżgura impenn aktar b’saħħtu tas-settur privat biex joffri apprendistati u skemi ta’ taħriġ ta’ kwalità sal-aħħar tal-2014, f’konformità mal-objettivi ta’ garanzija għaż-żgħażagħ. Tindirizza l-iskopertura għall-faqar u l-esklużjoni soċjali, tkabbar l-iskema pilota ġdida ta’ għajnuna soċjali, f'konformità mal-miri baġitarji, li tiggarantixxi li tkun immirata kif xieraq, kundizzjonalità stretta u uniformità territorjali u ssaħħaħ ir-rabta mal-miżuri ta’ attivazzjoni. Ittejjeb l-effikaċja tal-iskemi ta’ għajnuna u servizzi ta’ kwalità għall-familji bi dħul baxx li jiffavorixxu l-unitajiet domestiċi bit-tfal.

6.

Timplimenta s-Sistema Nazzjonali għall-Evalwazzjoni tal-Iskejjel biex ittejjeb l-eżiti tal-iskola u tnaqqas r-rati ta’ tluq bikri mill-iskola. Iżżid l-użu tat-tagħlim ibbażat fuq ix-xogħol fl-edukazzjoni u t-taħriġ vokazzjonali fis-sekondarji għolja u ssaħħaħ l-edukazzjoni terzjarja b'orjentazzjoni vokazzjonali. Toħloq reġistru nazzjonali tal-kwalifiki biex tiżgura rikonoxximent wiesgħa tal-ħiliet. Tiżgura li l-finanzjament pubbliku jippremja aħjar lill-kwalità tal-edukazzjoni għolja u r-riċerka.

7.

Tapprova l-leġislazzjoni pendenti jew miżuri oħrajn ekwivalenti mmirati lejn is-simplifikazzjoni tal-ambjent regolatorju għan-negozji u ċ-ċittadini u tindirizza d-diskrepanzi fl-implimentazzjoni fil-leġislazzjoni eżistenti. Trawwem il-ftuħ tas-suq u tneħħi l-ostakli li fadal, u r-restrizzjonijiet, għall-kompetizzjoni fis-servizzi professjonali u s-servizzi pubbliċi lokali, l-assigurazzjoni, id-distribuzzjoni tal-fjuwil, il-bejgħ bl-imnut u s-setturi tas-servizzi postali. Ittejjeb l-effiċjenza tal-akkwist pubbliku, speċjalment billi tissimplifika l-proċeduri inkluż permezz tal-użu aħjar tal-akkwist elettroniku, tirrazzjonalizza l-korpi ċentrali tal-akkwist u tiżgura applikazzjoni xierqa tar-regoli ta’ qabel u ta’ wara l-għoti. Fis-servizzi pubbliċi lokali, timplimenta b’mod rigoruż il-leġislazzjoni li tipprovdi għar-ratifika tal-kuntratti li ma jikkonformawx mar-rekwiżiti dwar l-għoti intern sal-31 ta’ Diċembru 2014.

8.

Tiżgura t-tħaddim bla telf ta' żmien u sħiħ tal-Awtorità tat-Trasport sa Settembru 2014. Tapprova l-lista tal-infrastruttura strateġika fis-settur tal-enerġija u ttejjeb l-immaniġġar tal-portijiet u l-kollegamenti ma’ postijiet fin-naħa ta' ġewwa tal-pajjiż.

29.7.2014   

MT

Il-Ġurnal Uffiċjali tal-Unjoni Ewropea

C 247/63

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politika tal-Istati Membri dwar l-impjiegi (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livell nazzjonali, fil-livell tal-UE u fil-livell taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-objettivi tal-istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta' Lulju 2013, il-Kunsill adotta Rakkomandazzjoni (3) dwar il-Programm Nazzjonali ta' Riforma tal-Latvja għall-2013 u ta l-opinjoni tiegħu dwar il-Programm ta' Konverġenza aġġornat tal-Latvja aġġornat għall-2012-2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (4), adottat ir-Rapport dwar il-Mekkaniżmu ta’ Twissija, li fih il-Latvja ma ġietx identifikata bħala wieħed mill-Istati Membri li għalihom ser issir analiżi fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidazzjoni fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidazzjoni fiskali differenzjat u favur it-tkabbir, sabiex il-kondizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu trattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fid-29 ta' April 2014, il-Latvja ppreżentat il-Programm Nazzjonali ta' Riforma 2014 u fit-30 ta' April 2014 ippreżentat il-Programm ta' Stabbiltà tagħha 2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(8)

L-objettiv tal-istrateġija baġitarja deskritta fil-Programm ta' Stabbiltà 2014 huwa li gradwalment jitnaqqas id-defiċit nominali u li jinżamm bilanċ strutturali li jkun konsistenti mal-objettiv ta' terminu medju meta titqies id-devjazzjoni temporanja permessa mill-objettiv ta' terminu medju minħabba l-impatt tar-riforma sistemika tal-pensjonijiet. Il-Programm ta' Stabbiltà biddel l-objettiv ta' terminu medju minn ‐ 0,5 % għal - 1,0 %; l-objettiv ta' terminu medju l-ġdid jirrifletti l-objettivi tal-Patt ta' Stabbiltà u Tkabbir. It-triq 'il quddiem ippjanata tal-bilanċ nominali fil-Programm ta' Stabbiltà tal-Latvja timplika deterjorament gradwali tal-bilanċ strutturali (ikkalkulat mill-ġdid), għalkemm xorta fil-marġini permess mill-implimentazzjoni tar-riforma tal-pensjonijiet. Meta wieħed iqis id-devjazzjoni permessa mill-objettiv ta' terminu medju, id-defiċit strutturali ppjanat huwa konformi mar-rekwiżit tal-Patt ta' Stabbiltà u Tkabbir sal-2016. Madankollu, iż-żieda ppjanata fid-defiċit strutturali ikkalkulat mill-ġdid fl-2017 twassal għal devjazzjoni mit-triq ta' aġġustament meħtieġ lejn l-objettiv ta' terminu medju. B'mod ġenerali, l-istrateġija baġitarja deskritta fil-Programm ta' Stabbiltà hija ġeneralment konformi mar-rekwiżiti tal-Patt ta' Stabbiltà u Tkabbir. Id-dejn pubbliku huwa stabbilit biex jibqa' ferm taħt is-60 % tal-PDG matul il-perjodu kollu tal-programm, u jinżel għal 31 % tal-PDG sal-2017. Ix-xenarju makroekonomiku li jirfed il-projezzjonijiet baġitarji fil-Programm ta' Stabbiltà, li ma ġiex approvat formalment minn istituzzjoni indipendenti, huwa plawżibbli. It-tkabbir ekonomiku huwa mistenni li jibqa' madwar 4 % fis-sena matul il-perjodu tal-programm, u ż-żidiet proġettati fil-prezzijiet huma moderati.

(9)

Ix-xenarju baġitarju tal-Programm ta' Stabbiltà jipprevedi tnaqqis qawwi fis-sehem tad-dħul u l-infiq tal-gvern fil-PDG, u dan jirrifletti diversi miżuri li jnaqqsu d-dħul kontra t-trażżin immirat fl-infiq. Iż-żieda fid-domandi tal-infiq f'diversi oqsma ta' politika tirrappreżenta riskju għat-tnaqqis proġettat fl-infiq fil-Programm ta' Stabbiltà. It-tbassir tar-rebbiegħa tal-2014 tas-servizzi tal-Kummissjoni juri li, filwaqt li l-politika fiskali fl-2014 hija konformi mar-rekwiżit tal-Patt ta' Stabbiltà u Tkabbir, hemm riskju ta' devjazzjoni fl-2015. Abbażi tal-valutazzjoni tiegħu tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li fl-2014 id-devjazzjoni tad-defiċit strutturali mill-objettiv ta' terminu medju tirrifletti l-impatt tar-riforma sistemika tal-pensjonijiet, filwaqt li mill-2015 hemm riskju ta' devjazzjoni mit-triq ta' aġġustament meħtieġa.

(10)

Il-Latvja ħadet passi biex tnaqqas il-piż tat-taxxa għall-ħaddiema bi dħul baxx u l-familji b'persuni dipendenti u biex issaħħaħ it-tassazzjoni tal-proprjetà u dik ambjentali, iżda l-livell u t-tfassil ta' dawn it-taxxi ma jaffettwawx biżżejjed l-imġiba tal-operaturi ekonomiċi, u xi sussidji li jagħmlu ħsara ambjentali għadhom fis-seħħ. Filwaqt li l-awtoritajiet għamlu xi progress biex itejbu l-konformità tat-taxxa u jnaqqsu l-proporzjon ta' attivitajiet ekonomiċi mhux iddikjarati, speċjalment billi tejbu l-valutazzjoni tar-riskju u ħarrxu s-sanzjonijiet kontra l-imġiba frodulenti, għad baqa' sfidi għall-ġlieda kontra l-frodi u l-evażjoni tat-taxxa. B'mod partikolari, minkejja li jirrappreżenta proporzjon sinifikanti tat-tassazzjoni totali, id-dħul mit-taxxi fuq il-konsum għandu potenzjal kbir għal aktar żieda jekk tittejjeb il-konformità tat-taxxa.

(11)

Minkejja pjan oriġinarjament ambizzjuż biex issir riforma fl-edukazzjoni għolja, il-Latvja ma għamlet l-ebda progress fl-istabbiliment ta' sistema ta' akkreditazzjoni approvata internazzjonalment, il-pjanijiet biex jiġi introdott mudell ta' finanzjament ġdid huma previsti indikattivament fl-2016, il-konsolidazzjoni tal-istituzzjonijiet ta’ edukazzjoni għolja ddgħajfet u r-restrizzjonijiet fuq l-użu tal-lingwi barranin baqgħu ma nbidlux. Dan minkejja l-fatt li hemm biżżejjed lok għar-riforma tas-sistema tal-edukazzjoni għolja, li hija kbira wisq fid-dawl tal-popolazzjoni li qed tonqos, toffri wisq programmi ta' studju distinti u għandha attrazzjoni limitata għall-istudenti barranin u l-persunal tat-tagħlim. Ir-riżultati tal-ewwel valutazzjoni indipendenti tal-istituzzjonijiet ta' riċerka juru li 21 % ta' xjentisti ekwivalenti għal persuni full-time jaħdmu għal dawk l-10 % li ġew valutati u li jistgħu jitqiesu bħala ċentri ta' riċerka internazzjonali ta' livell għoli. Barra minn hekk, il-Latvja kellha intensità fir-R&Ż ta' 0,66 % biss tal-PDG fl-2012 u mhijiex miexja fid-direzzjoni t-tajba biex tikseb l-objettiv tal-Ewropa 2020 tagħha li tiddedika 1,5 % tal-PDG għar-R&Ż.

(12)

Il-Latvja għamlet progress biex tindirizza l-qgħad, li naqas b'mod konsiderevoli. Madankollu, il-qgħad fost iż-żgħażagħ għadu relattivament għoli u hemm bżonn ta' miżuri biex jintlaħqu ż-żgħażagħ inattivi li ma jirreġistrawx. Għalkemm il-Latvja ħadet miżuri sabiex tindirizza nuqqas ta' tlaqqigħ tal-ħiliet u l-kwalità tal-edukazzjoni vokazzjonali, dawn xorta jeħtieġu attenzjoni, speċjalment fit-titjib tal-kwalità tal-apprendistati u fl-iżvilupp ta' gwida komprensiva għall-karrieri. Il-politiki attivi fis-suq tax-xogħol għadhom limitati fil-kamp ta' applikazzjoni tagħhom u jiddependu wisq fuq il-ħidmiet pubbliċi.

(13)

Il-faqar fost dawk li għandhom l-età tax-xogħol għadu għoli ħafna fil-Latvja. Il-Latvja ħadet xi passi biex tirriforma l-assistenza soċjali u lestiet valutazzjoni fuq skala kbira tas-sistema tas-sigurtà soċjali li tipprovdi bażi solida għal riforma bbażata fuq l-evidenza. Hija żiedet b'mod sinifikanti diversi benefiċċji relatati mat-tfal, u żiedet il-limiti mhux taxxabbli stabbiliti fit-taxxa fuq l-introjtu personali għal persuni li huma dipendenti. Madankollu, l-effettività tal-protezzjoni soċjali f'termini ta' tnaqqis tal-faqar għadha batuta u t-tfassil ta' sistema effettiva ta' protezzjoni soċjali għadha problematika. B'mod ġenerali, proporzjon għoli tal-popolazzjoni jinsab f'riskju ta' faqar jew esklużjoni soċjali, speċjalment it-tfal. Il-familji bit-tfal, il-persuni qiegħda, il-persuni b'diżabbiltà u l-persuni li jgħixu f'żoni rurali jinsabu f'riskju partikolarment għoli ta' faqar u esklużjoni soċjali. L-infiq tal-Latvja fuq il-protezzjoni soċjali bħala perċentwal tal-PDG huwa l-aktar baxx fl-Unjoni. L-aċċess għall-kura tas-saħħa huwa mxekkel mill-ispiża, inklużi ħlasijiet għolja mħallsa miċ-ċittadin innifsu u ħlasijiet informali prevalenti, li jħallu proporzjon għoli tal-popolazzjoni bi ħtiġijiet għall-kura tas-saħħa li ma jiġux sodisfati. Hemm biżżejjed lok biex tissaħħaħ l-effiċjenza tas-sistema, jiġi żgurat finanzjament kosteffettiv u jiġu promossi attivitajiet ta' prevenzjoni tal-mard.

(14)

Il-Latvja għamlet xi progress bil-ftuħ tas-suq tal-elettriku tagħha għall-kompetizzjoni u dan ser jiġi estiż għas-settur tal-unitajiet domestiċi fil-bidu tal-2015. F'Ġunju 2013, il-Latvja ngħaqdet mas-suq tal-elettriku “Nord Pool Spot” tal-pajjiżi Skandinavi u Baltiċi. Jeħtieġ aktar tisħiħ tal-interkonnessjonijiet mas-suq tal-enerġija tal-UE, peress li attwalment il-Latvja hija dipendenti fuq l-importazzjoni u l-konnessjoni transkonfinali tal-elettriku mal-Estonja ħafna drabi tkun konġestjonata. Għaldaqstant, l-iżvilupp tal-infrastruttura huwa essenzjali u l-Latvja qed tħabbat wiċċha ma' sfidi konsiderevoli biex tagħmel tajjeb għan-nuqqasijiet infrastrutturali. Sar ukoll xi progress fis-settur tal-gass naturali billi l-Parlament approva l-emendi għal-liġi dwar l-Enerġija, li tistabbilixxi l-ftuħ gradwali tas-suq tal-gass minn April 2014; madankollu l-ftuħ komplet tas-suq ġie pospost sal-2017. Il-Latvja ressqet taħlita bbilanċjata ta' miżuri ta' politika li jindirizzaw l-ekonomija fl-użu tal-enerġija għas-setturi prinċipali tal-ekonomija u fis-snin li ġejjin aktar minn 70 % tal-ekonomija fl-użu tal-enerġija ser tkun iġġenerata fis-settur tal-bini. Madankollu, l-effiċjenza fit-trasport, fil-bini u fis-sistemi ta' tisħin għadha teħtieġ li titjieb.

(15)

Il-Latvja ħadet azzjoni sinifikanti biex ittejjeb il-kapaċitajiet fil-ġudikatura sabiex tnaqqas il-proċedimenti pendenti u t-tul tagħhom. Madankollu, l-ammont kbir ta' xogħol pendenti fil-ġudikatura għadu ta' theddida għan-negozji u jeħtieġ li jitlestew ir-riformi sabiex tittejjeb l-effiċjenza u l-kwalità tal-ġudikatura, fosthom fir-rigward tal-insolvenza, il-medjazzjoni u l-arbitraġġ. Il-Latvja pproponiet riformi ambizzjużi tal-amministrazzjoni pubblika; madankollu l-implimentazzjoni tagħhom hija bil-mod u ma tapplikax għall-gvernijiet lokali u r-riforma tal-impriżi tal-Istat għandha dewmien b'mod sinifikanti. Hemm bżonn ta' emendi għad-Dritt tal-Kompetizzjoni sabiex il-Kunsill tal-Kompetizzjoni jingħata aktar indipendenza istituzzjonali u finanzjarja sabiex jintervjeni b'mod effettiv kontra l-azzjonijiet tal-korpi pubbliċi u privati li jillimitaw il-kompetizzjoni.

(16)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Latvja. Hija vvalutat il-Programm Nazzjonali ta’ Riforma u l-Programm ta’ Stabbiltà. Hija ma qisitx biss ir-rilevanza tagħhom għal politika fiskali u soċjoekonomika sostenibbli fil-Latvja, iżda wkoll il-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (5) hawn taħt.

(17)

Fid-dawl ta’ din l-evalwazzjoni, il-Kunsill eżamina l-Programm ta' Stabbiltà, u l-opinjoni tiegħu (5) hija riflessa b’mod partikolari fir-rakkomandazzjoni (1) hawn taħt.

(18)

Fil-kuntest tas-Semestru Ewropew, il-Kummissjoni għamlet ukoll analiżi tal-politika ekonomika taż-żona tal-euro kollha kemm hi. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (6). Bħala pajjiż li l-munita tiegħu hija l-euro, il-Latvja għandha tiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Tippreżerva pożizzjoni fiskali soda fl-2014 u ssaħħaħ l-istrateġija baġitarja mill-2015, u tiżgura li d-devjazzjoni mill-objettiv ta' terminu medju tibqa' limitata għall-impatt tar-riforma sistemika tal-pensjonijiet. Issegwi l-isforzi biex tkompli tnaqqas il-piż tat-taxxa fuq il-ħaddiema bi dħul baxx fil-kuntest ta' bidla lejn taxxi ambjentali u fuq il-proprjetà li jkunu aktar favur it-tkabbir u billi ttejjeb il-konformità u l-ġbir tat-taxxa.

2.

Timxi 'l quddiem fl-implimentazzjoni tar-riforma tal-edukazzjoni superjuri, b'mod partikulari permezz tat-twaqqif ta' aġenzija tal-akkreditazzjoni indipendenti u mudell ta' finanzjament li jiffavorixxi l-kwalità. Tipprovdi gwida għall-karrieri fil-livelli edukattivi kollha, ittejjeb il-kwalità tal-edukazzjoni u t-taħriġ vokazzjonali, fosthom billi ssaħħaħ l-apprendistat, u tagħmel progress fir-rigward tal-impjegabbiltà taż-żgħażagħ, fosthom billi tpoġġi fis-seħħ miżuri sabiex jintlaħqu żgħażagħ li mhux f'impjieg u ma jsegwux xi kors ta' edukazzjoni jew ta' taħriġ u li mhumiex uffiċjalment reġistrati. Tieħu passi għal sistema ta' riċerka aktar integrata u komprensiva anki billi tikkonċentra l-finanzjament fuq istituzzjonijiet ta' riċerka internazzjonalment kompetittivi.

3.

Twettaq riforma tal-assistenza soċjali u l-finanzjament ulterjuri tagħha sabiex tiżgura kopertura aħjar, adegwatezza tal-benefiċċji, attivazzjoni msaħħa u servizzi soċjali mmirati. Iżżid il-kopertura tal-politiki attivi fis-suq tax-xogħol. Ittejjeb il-kosteffettività, il-kwalità u l-aċċessibbiltà tas-sistema tal-kura tas-saħħa.

4.

Tħaffef l-iżvilupp tal-interkonnessjonijiet tal-gass u l-elettriku għall-Istati Membri ġirien sabiex tiddiversifika s-sorsi ta' enerġija u tippromwovi l-kompetizzjoni permezz ta' integrazzjoni mtejba tas-swieq tal-enerġija Baltiċi. Tkompli bl-isforzi sabiex tkompli żżid l-effiċjenza enerġetika fit-trasport, il-bini u s-sistemi ta' tisħin.

5.

Tlesti r-riformi ġudizzjarji, fosthom ir-riformi pendenti tal-oqfsa ta' insolvenza, arbitraġġ u medjazzjoni sabiex tiżgura ambjent ġuridiku li jiffavorixxi n-negozju u l-konsumaturi. Timxi 'l quddiem fir-riformi tal-amministrazzjoni pubblika, fosthom billi timplimenta r-riforma tal-amministrazzjoni ta' impriżi tal-Istat u żżid l-indipendenza istituzzjonali u finanzjarja tal-Kunsill tal-Kompetizzjoni.

29.7.2014   

MT

Il-Ġurnal Uffiċjali tal-Unjoni Ewropea

C 247/67

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni biex tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq il-punti ewlenin fejn hija meħtieġa azzjoni biex jissaħħaħ il-potenzjal tal-Ewropa għal tkabbir sostenibbli u kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta' Lulju 2013, il-Kunsill adotta Rakkomandazzjoni (3) dwar il-Programm Nazzjonali ta' Riforma tal-Litwanja għall-2013 u ta l-opinjoni tiegħu dwar il-Programm ta' Konverġenza tal-Litwanja għall-perijodu 2012‐2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (4), adottat ir-Rapport dwar il-Mekkaniżmu ta’ Twissija, li fih il-Litwanja ma ġietx identifikata bħala wieħed mill-Istati Membri li kellha ssirlu analiżi fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Huwa enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fl-1 ta' April 2014, il-Litwanja ppreżentat il-Programm Nazzjonali ta' Riforma tagħha għall-2014 u fit-22 ta' April 2014 ippreżentat il-Programm ta' Konverġenza tagħha għall-2014. Biex jiġu kkunsidrati l-konnessjonijiet ta' bejniethom, iż-żewġ Programmi ġew ivvalutati fl-istess żmien.

(8)

L-objettiv tal-istrateġija baġitarja spjegata fil-Programm ta' Konverġenza għall-2014 huwa li jintlaħaq l-objettiv fuq terminu medju sal-2015 u li jintlaħaq bilanċ pożittiv strutturali ta' 0,9 % tal-PDG fit-tmiem tal-Programm ta' Konverġenza fl-2017. Il-Programm ta' Konverġenza jikkonferma l-objettiv fuq terminu medju preċedenti ta' 1 % tal-PDG, li jirrifletti r-rekwiżiti tal-Patt ta' Stabbiltà u Tkabbir. Abbażi tal-bilanċ strutturali tal-baġit (rikalkulat), il-progress annwali lejn l-objettiv ta’ terminu medju huwa ta' mill-inqas 0,5 % tal-PDG fl-2014 u fl-2015. Fl-istess ħin, hemm riskju ta' devjazzjoni mill-parametru referenzjali għan-nefqa fl-2015. Kumplessivament, il-perkors tal-aġġustament lejn l-objettiv ta’ terminu medju huwa ġeneralment konformi mar-rekwiżiti tal-Patt ta' Stabbiltà u Tkabbir. Il-Programm ta' Konverġenza juri li d-dejn jonqos sostanzjalment matul il-perjodu tal-programm għal madwar 35 % sal-2017. Ix-xenarju makroekonomiku sottostanti għall-proġettazzjonijiet baġitarji fil-Programm ta' Konverġenza huwa ġeneralment plawsibbli. Fl-istess ħin, għas-snin 2015‐2017, għad iridu jiġu speċifikati miżuri ta' konsolidazzjoni. Skont it-tbassir tar-rebbiegħa 2014 tas-servizzi tal-Kummissjoni, l-aġġustament strutturali fl-2014 u l-2015 huwa mistenni jkun ta' 0,2 % u 0,6 % tal-PDG rispettivament, u għalhekk għall-2014 0,3 % tal-PDG inqas mill-issikkar meħtieġ ta' 0,5 % tal-PDG. Barra minn hekk, il-parametru referenzjali tan-nefqa jinsab f'riskju ta' devjazzjoni sinifikanti fl-2014, b'devjazzjoni oħra, għalkemm inqas, fl-2015. Abbażi tal-valutazzjoni tiegħu tal-Programm ta' Konverġenza u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li hemm riskju ta' devjazzjoni sinifikanti mill-perkors ta' aġġustament lejn l-objettiv ta’ terminu medju mill-2014.

(9)

L-importanza relattiva tat-taxxi meqjusa inqas ta' detriment għat-tkabbir, bħat-taxxi fuq il-proprjetà u ambjentali, għadha baxxa. Id-dħul mit-taxxa jiddependi ħafna fuq it-tassazzjoni indiretta u fuq ix-xogħol filwaqt li l-proporzjon li tgħodd għalih it-tassazzjoni ambjentali għadu baxx. Dħul akbar minn taxxi orjentati aħjar lejn it-tkabbir jista' jintuża biex inaqqas il-piż tat-taxxa fuq dawk bi dħul baxx, partikolarment dawk b'ħiliet limitati. Fil-bidu tal-2013 sar rieżami parzjali tas-sistema tat-taxxa u l-Gvern iddeċieda li jaġġusta t-tassazzjoni kapitali, iżid il-livell limitu tad-dħul taxxabbli li jimplika żieda fil-progressività tat-taxxa fuq id-dħul personali għall-benefiċċju ta' dawk bi dħul baxx u jżid id-dazju tas-sisa fuq it-tabakk u l-alkoħol. Kumplessivament, madankollu, x'aktarx li dawn il-miżuri se jkollhom effett negattiv fuq id-dħul. Għalhekk għadu kruċjali li jittieħdu passi ulterjuri biex titjieb is-sostenibbiltà tal-finanzi pubbliċi u tissaħħaħ in-naħa tad-dħul. Ma ttieħdet l-ebda miżura kbira wara r-rakkomandazzjonijiet speċifiċi għall-pajjiż tal-2013 dwar it-tassazzjoni ambjentali. Kien kemm progress limitat fit-tisħiħ tal-qafas fiskali, billi l-limiti massimi fuq in-nefqa għadhom vinkolanti b'mod li mhux biżżejjed u l-bildiet leġiżlattivi għadhom mhumiex approvati. Il-Litwanja għadha tiffaċċa sfidi f'termini ta' konformità tat-taxxa, partikolarment biex tindirizza l-frodi fil-VAT, fost l-oħrajn billi ssaħħaħ il-miżuri tal-immaniġġar tar-riskji. Il-pjan ta' azzjoni għall-konformità tat-taxxa tal-2013‐2014 qiegħed jiġi implimentat u l-ewwel stimi jissuġġerixxu xi effetti pożittivi. Fl-2013, ittieħed sett ta' miżuri biex tissaħħaħ il-konformità tat-taxxa fil-qasam tal-VAT u d-dazju tas-sisa. Għall-2014‐2015 ġiet imnedija strateġija mmirata ġdida.

(10)

Żviluppi demografiċi sfavorevoli jitfgħu dubji fuq is-sostenibbiltà fiskali fuq terminu twil tal-Litwanja. L-infiq fuq il-pensjonijiet huwa pproġettat li se jiżdied sostanzjalment u huwa stmat li, fuq 50 sena, ser jilħaq kważi d-doppju tal-medja tal-UE. In-nefqa gradwali tal-età statutorja tal-irtirar li bdiet fl-2012 mhijiex biżżejjed biex tlaħħaq mal-forza tax-xogħol li qed tonqos u l-istennija tal-għomor li qed tiżdied. Barra minn hekk, żieda drastika tal-faqar u nuqqas materjali sever fost l-anzjani jindika problemi marbuta mal-adegwatezza tal-pensjonijiet. Il-Litwanja ħadet passi importanti iżda iżolati fid-direzzjoni t-tajba u huma meħtieġa aktar bidliet sinifikanti biex timplimenta riforma komprensiva. Lestiet ir-riforma tal-pilastru tat-tieni pensjoni, iżda la l-iskemi okkupazzjonali u lanqas l-akkumulazzjoni għall-pensjoni volontarja mhuma jintużaw wisq. Flimkien maż-żieda fl-età statutorja tal-irtirar, huma meħtieġa wkoll miżuri li jiżguraw l-impjegabbiltà ta' ħaddiema ixjaħ u ambjenti tax-xogħol favur l-età.

(11)

Il-qgħad kumplessiv naqas iżda l-qgħad strutturali għadu għoli, ħaġa li tindika spariġġ fil-ħiliet, partikolarment għal dawk b'ħiliet limitati. Il-qgħad fost iż-żgħażagħ u r-rati ta' żgħażagħ li mhumiex jistudjaw, f'impjieg jew taħriġ qed jonqsu, iżda għadhom għoljin. Il-koperta limitata tal-politiki attivi fis-suq tax-xogħol għadha ta' sfida, u effikaċja u l-iskedar tagħha jeħtieġu jitjiebu. Huwa mbassar li fil-futur se jiżdied in-nuqqas ta' ħaddiema b'ħiliet. Biex titjieb impjegabbiltà taż-żgħażagħ, huwa importanti li titjieb ir-rilevanza għas-suq tax-xogħol tal-edukazzjoni għolja u vokazzjonali, titjieb il-kwalità tal-iskemi ta' apprendistat u t-tagħlim ibbażat fuq ix-xogħol, bi sħubija mas-settur privat inklużi l-SMEs. Il-parteċipazzjoni fit-tagħlim tul il-ħajja għadha mhijiex biżżejjed. Rieżami komprenżiv tal-liġi tax-xogħol, bl-involviment tas-sħab soċjali, huwa meħtieġ biex jinstabu mezzi biex jitnaqqas il-piż amministrattiv fuq min iħaddem. Primarjament se jkun essenzjali li jiġu identifikati u mneħħija r-restrizzjonijiet bla bżonn li jaffettwaw il-ftehimiet kuntrattwali flessibbli, id-dispożizzjonijiet tat-tkeċċija u l-arranġamenti tal-ħinijiet tax-xogħol.

(12)

Minkejja titjib reċenti, il-faqar fost in-nies tal-età tax-xogħol għadu ogħla mill-medja tal-UE. Żidiet fil-paga minima mensili u fil-livell limitu mhux taxxabbli għenu biex jiġi indirizzat il-faqar. Madankollu, il-faqar fost l-anzjani u n-nuqqas materjali sever żdiedu sew fl-aħħar snin. Fl-2012‐2013, ir-riforma bi prova fl-għajnuna soċjali fi flus wasslet għal għadd iżgħar ta' benefiċjarji soċjali u nefqa f'benefiċċji soċjali fi flus. Fl-2014, din il-prova ġiet estiża għall-muniċipalitajiet kollha. Hemm ħtieġa li jiġi żgurat monitoraġġ u evalwazzjoni tal-effetti tar-riforma fuq dawk l-aktar fil-bżonn. Il-kopertura tal-miżuri ta' attivazzjoni għall-benefiċjarji tal-għajnuna soċjali għal dawk qegħda fit-tul mhijiex biżżejjed. Barra minn dan, il-miżuri għadhom iffukati fuq skemi ta' xogħol pubbliku, u għalhekk jipprovdu sostenn ta' dħul, iżda ma jgħinux biex titjieb l-impjegabbiltà tal-benefiċjarji. Jeħtieġ li jiġi vvalutat l-impatt tar-riforma fuq dawk bi dħul baxx. Il-Litwanja adottat il-Pjan ta' Azzjoni 2014‐2020 biex Titjieb l-Inklużjoni Soċjali. Madankollu, tibqa' l-ħtieġa li jiġu stabbiliti l-gruppi ewlenin fil-mira, il-baġit u l-miżuri konkreti, li jispeċifikaw kif ser jintlaħqu l-miri u kif se jikkooperaw id-diversi ministeri, gvernijiet lokali u atturi mis-soċjetà ċivili li jimplimentaw il-Pjan ta' Azzjoni.

(13)

Il-Gvern beda riforma ambizzjuża tal-intrapriżi tal-istat mill-2010. F'Diċembru 2013 ġew approvati atti legali finali li jemendaw il-linji gwida dwar it-trasparenza li jirrikjedu li l-intrapriżi kollha tal-istat, mill-2014, jipprovdu data separata għall-funzjonijiet kummerċjali u mhux kummerċjali fir-rapporti annwali tagħhom. L-ewwel rapport li jipprovdi din l-analiżi dettaljata huwa mistenni f'Awwissu 2014. Dan għandu jippermetti valutazzjoni aktar dettaljata tas-suċċess ta' din il-bidla. Madankollu, għadd ta' membri indipendenti tal-bordijiet fl-intrapriżi tal-istat għadu żgħir, parzjalment minħabba r-restrizzjonijiet legali li japplikaw għall-intrapriżi tal-istat u muniċipali. Qed jiġu proposti bidliet legali li jippermettu li jinħatru membri indipendenti fil-bordijiet tal-intrapriżi kollha tal-istat. L-effikaċja tas-separazzjoni tal-funzjonijiet kummerċjali u mhux kummerċjali u l-professjonalizzazzjoni tal-bordijiet iridu jiġu vvalutati la darba jkunu implimentati bis-sħiħ.

(14)

Il-konnessjonijiet tal-elettriku u l-gass mal-Istati Membri ġirien għadhom mhux żviluppati biżżejjed, bir-riżultat ta' kompetizzjoni limitata u prezzijiet għoljin. Il-kompetizzjoni fis-swieq domestiċi ssaħħet permezz tal-liberalizzazzjoni tas-swieq tal-gass u l-elettriku, iżda l-konsumaturi għadhom ma eżerċitawx id-drittijiet tagħhom li jibdlu l-fornituri. Filwaqt li l-Gvern għamel l-interkonnessjonijiet tal-enerġija prijorità, dawn għadhom iridu jitlestew. Ġie kkummissjonat pajplajn tal-gass importanti u t-terminal tal-LNG fi Klaipeda huwa mistenni li jibda jaħdem sa Diċembru 2014. Sar xi progress fir-rigward tal-interkonnessjonijiet tan-netwerk tal-enerġija tal-Litwanja mas-suq tal-enerġija tal-UE. Aktar minn hekk, l-effiċjenza enerġetika għandha bżonn titjieb. Il-Litwanja għamlet xi progress fl-effiċjenza enerġetika tal-bini, fosthom fir-rigward tal-investimenti taħt il-fond holding JESSICA. Fl-2013 ittieħdu miżuri leġiżlattivi biex jitħaffef assorbiment tal-fond holding. Fil-bidu tal-2014 lestew proġetti u l-applikazzjonijiet inizjali żdiedu b'mod konsiderevoli. Il-bidliet legali jinvolvu li jitnaqqsu s-sussidji għat-tisħin jekk ir-residenti jirrifjutaw ir-rennovazzjoni, u b'hekk tneħħew id-disinċentivi għar-rennovazzjoni.

(15)

Fil-kuntest tas-Semestru Ewropew, il-Kummissjoni għamlet analiżi komprensiva tal-politika ekonomika tal-Litwanja. Hija vvalutat il-Programm Nazzjonali ta’ Riforma u l-Programm ta’ Konverġenza. Hija qieset mhux biss ir-rilevanza tagħhom għall-politika fiskali u soċjoekonomika sostenibbli fil-Litwanja iżda anki l-konformità tagħhom mar-regoli u l-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (6) hawn taħt.

(16)

Fid-dawl ta' din il-valutazzjoni, il-Kunsill eżamina l-Programm ta' Konverġenza, u l-opinjoni tiegħu (5) hija riflessa b'mod partikolari fir-rakkomandazzjoni (1) ta' hawn taħt,

1.

Issaħħaħ il-miżuri baġitarji għall-2014 fid-dawl ta' tkabbir fin-nefqa li jaqbeż il-parametru referenzjali u tad-differenza emerġenti ta' 0,3 % tal-PDG f'termini ta' sforz strutturali abbażi tat-tbassir tar-rebbiegħa 2014 tas-servizzi tal-Kummissjoni, li jindikaw riskju ta' devjazzjoni sinifikanti relatata mal-parti preventiva tar-rekwiżiti tal-Patt ta' Stabbiltà u Tkabbir. Fl-2015, issaħħaħ l-istrateġija baġitarja biex tiżgura l-aġġustament meħtieġ ta' 0,5 % tal-PDG lejn l-għan fuq terminu medju. Minn hemm “l hemm tiżgura li l-objettiv ta’ terminu medju jibqa” jiġi rispettat. Tikkumplimenta l-istrateġija baġitarja b'qafas fiskali msaħħaħ aktar, partikolarment biex tiżgura limitu massimu vinkolanti fuq in-nefqa meta tistabbilixxi l-qafas baġitarju ta' terminu medju. Tanalizza aktar is-sistema tat-taxxa u tikkonsidra li żżid dawk it-taxxi li huma lanqas ta' ħsara għat-tkabbir, bħat-tassazzjoni rikorrenti fuq il-proprjetà u l-ambjent, filwaqt li tkompli ttejjeb il-konformità tat-taxxa.

2.

Tadotta u timplimenta leġislazzjoni fuq riforma komprensiva tas-sistema tal-pensjonijiet. Partikolarment, tallinja l-età statutorja tal-irtirar mal-istennija tal-għomor, tirestrinġi l-aċċess għall-irtirar kmieni, tistabbilixxi regoli għall-indiċazzjoni tal-pensjonijiet u tippromwovi l-użu ta' skemi ta' tfaddil kumplimentari. Tissostanzja r-riforma tal-pensjonijiet b'miżuri li jippromwovu l-impjegabbiltà ta' ħaddiema ixjaħ.

3.

Timmira aħjar il-miżuri tal-politika attiva fis-suq tax-xogħol lejn dawk qiegħda fit-tul u b'ħiliet limitati. Ittejjeb il-kopertura u l-adegwatezza tal-benefiċċji tal-qgħad u torbothom mal-attivazzjoni. Tindirizza l-ispareġġi persistenti fil-ħiliet billi ttejjeb ir-rilevanza tal-edukazzjoni għas-suq tax-xogħol fost l-oħrajn abbażi ta' sistemi li jipprevedu l-ħiliet u tippromwovi t-tagħlim tul il-ħajja. Sabiex iżżid l-impjegabbiltà taż-żgħażagħ, tagħti prijorità biex toffri apprendistati ta' kwalità, u forom oħra ta' tagħlim ibbażat fuq ix-xogħol, u ssaħħaħ is-sħubija mas-settur privat. Tirrieżamina l-adegwatezza tal-leġislazzjoni tax-xogħol, partikolarment fir-rigward tal-qafas tal-kuntratti tax-xogħol u għall-arranġamenti fil-ħinijiet tax-xogħol, b'konsultazzjoni mas-sħab soċjali.

4.

Tiżgura kopertura adegwata ta' dawk l-aktar fil-bżonn u tkompli ssaħħaħ ir-rabtiet bejn l-għajnuna soċjali fi flus u l-miżuri ta' attivazzjoni.

5.

Tlesti l-implimentazzjoni tar-riformi tal-intrapriżi tal-istat kif ippjanat; partikolarment billi tlesti s-separazzjoni tal-attivitajiet kummerċjali minn dawk mhux kummerċjali, iżżid il-professjonalizzazzjoni tal-bordijiet eżekuttivi u timmonitorja mill-qrib il-konformità mar-rekwiżiti tar-riforma.

6.

Tħaffef il-miżuri biex ittejjeb l-effiċjenza enerġetika tal-bini, permezz ta' implimentazzjoni rapida tal-fond holding. Tkompli tiżviluppa konnessjonijiet transkonfinali mal-Istat Membri ġirien kemm għall-elettriku kif ukoll għall-gass biex tiddiversifika s-sorsi u tippromwovi l-kompetizzjoni permezz ta' integrazzjoni aħjar tas-swieq tal-enerġija tal-Baltiku.

29.7.2014   

MT

Il-Ġurnal Uffiċjali tal-Unjoni Ewropea

C 247/72

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għat-tkabbir u l-impjiegi, l-Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għal tkabbir sostenibbli u kompetittività.

(2)

Fit-13 ta’ Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u, fil-21 ta’ Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw l-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta’ Lulju 2013, il-Kunsill adotta Rakkomandazzjoni (3) dwar il-Programm Nazzjonali ta’ Riforma tal-Lussemburgu għall-2013 u ta l-opinjoni tiegħu dwar il-Programm ta’ Stabbiltà tal-Lussemburgu aġġornat għall-perijodu 2012‐2016. Fil-15 ta' Novembru 2013, f'konformità mar-Regolament (UE) Nru 473/2013 tal-Parlament Ewropew u tal-Kunsill (4), il-Kummissjoni ppreżentat l-opinjoni tagħha dwar l-abbozz ta' pjan baġitarju tal-Lussemburgu għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jagħti bidu għas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lil-Lussemburgu bħala wieħed mill-Istati Membri li għalihom ser issir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu trattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal-eżami mill-ġdid fil-fond dwar il-Lussemburgu, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni twassalha biex tikkonkludi li l-Lussemburgu ma għandhiex żbilanċi makroekonomiċi fis-sens tal-Proċedura ta' Żbilanċ Makroekonomiku. B'mod partikolari, l-analiżi tal-bilanċ favorevoli fil-kont kurrenti turi li dan mhuwiex ġej minn domanda domestika fjakka, iżda huwa riżultat tal-mudell ta' tkabbir partikolari tal-pajjiżi li huwa bbażat ħafna fuq is-servizzi finanzjarji. Ir-riskji għall-istabbiltà finanzjarja domestika li ġejjin mill-preżenza ta' settur finanzjarju kbir jeżistu iżda huma relattivament miżmuma hekk kif is-settur jiddiversifika u jispeċjalizza fl-istess ħin. Il-livell għoli ta' dejn fis-settur privat, b'mod partikolari fost il-korporazzjonijiet mhux finanzjarji jirrifletti b'mod prinċipali l-preżenza ta' għadd kbir ta' impriżi multinazzjonali li jużaw il-fergħat jew is-sussidjarji tagħhom fil-Lussemburgu għal operazzjonijiet ta' finanzjament intragrupp. Fl-aħħar nett, il-pożizzjoni favorevoli attwali tal-finanzi pubbliċi tiddependi ħafna fuq is-sostenibbiltà ta' mudell ta' tkabbir ibbażat fuq settur finanzjarju ta' suċċess u tippreżenta riskju għas-sostenibbiltà għolja fit-tul.

(8)

Fit-28 ta' April 2014, il-Lussemburgu ppreżenta l-Programm Nazzjonali ta' Riforma għall-2014 u, fil-25 ta' April 2014, il-Programm ta' Stabbiltà tiegħu għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(9)

L-objettiv tal-istrateġija baġitarja tat-terminu medju msemmi fil-Programm ta' Stabbiltà tal-2014 huwa li jirritorna għall-objettiv ta' terminu medju fl-2016, wara li ddevja minnu b'mod sinifikanti fl-2015. Il-Programm ta' Stabbiltà jikkonferma l-objettiv ta' terminu medju preċedenti ta' bilanċ favorevoli ta' 0,5 % tal-PDG, li jirrifletti r-rekwiżiti tal-Patt ta' Stabbiltà u Tkabbir. Il-bilanċ favorevoli strutturali (ikkalkulat mill-ġdid) tal-amministrazzjoni pubblika huwa mbassar jonqos minn 1,4 % tal-PDG fl-2013 għal 1,1 % fl-2014, qabel jinbidel f'defiċit ta' 0,1 % tal-PDG fl-2015. Minn hemm 'il quddiem, huwa ppjanat li jinkisbu bilanċi favorevoli strutturali li jikbru gradwalment. Għaldaqstant, il-Lussemburgu huwa mistenni li jibqa' fl-objettiv ta' terminu medju tiegħu fl-2014, iżda li jiddevja b'mod sinifikanti minnu fl-2015. Skont il-Programm ta' Stabbiltà, ir-rata ta' tkabbir tal-infiq pubbliku, mingħajr il-miżuri diskrezzjonali tal-introjtu, tkun ogħla mir-rata ta' terminu medju ta' referenza tat-tkabbir potenzjali tal-PDG fl-2015. B'mod ġenerali, l-objettivi tal-programm huma parzjalment konformi mar-rekwiżiti tal-parti preventiva tal-Patt ta’ Stabbiltà u Tkabbir, b'devjazzjoni b'mod partikolari fl-2015. Il-proporzjon tad-dejn, li kien ta' 23,1 % tal-PDG fl-2013, li huwa ħafna taħt is-60 % tal-valur referenzjarju tal-PDG, huwa mbassar li jkompli jonqos matul il-perijodu tal-programm. Ix-xenarju makroekonomiku li jirfed it-tbassir baġitarju fil-Programm ta' Stabbiltà, li ġie ppreparat minn korp indipendenti (STATEC), huwa kemxejn ottimist għall-2014 u l-2015. Il-Gvern ibassar rata ta' tkabbir tal-PDG ta' 3,2 % kemm fl-2014 kif ukoll fl-2015, filwaqt li t-tbassir tas-servizzi tal-Kummissjoni għar-rebbiegħa tal-2014 jipprevedi 2,6 % u 2,7 % rispettivament. Barra minn hekk, il-miżuri li jirfdu l-perkors fiskali għall-perijodu 2015‐18 għadhom ma ġewx kompletament speċifikati mill-awtoritajiet. Skont it-tbassir tal-Kummissjoni, li ma jiħux inkonsiderazzjoni l-aktar miżuri mħabbra riċentement, il-bilanċ favorevoli strutturali huwa stmat li jonqos għal 0,6 % tal-PDG fl-2014 u jinbidel f'defiċit ta' 1,3 % tal-PDG fl-2015. Ir-rata ta' tkabbir tal-infiq pubbliku, mingħajr il-miżuri diskrezzjonali tal-introjtu, hija stmata li tkun ogħla mir-rata ta' terminu medju ta' referenza tal-PDG potenzjali fl-2015, meta tkun mistennija devjazzjoni sinifikanti. Abbażi tal-valutazzjoni tagħha tal-Programm ta' Stabbiltà u t-tbassir tal-Kummissjoni, skont ir-Regolament tal-Kunsill (KE) Nru 1466/97, il-Kunsill huwa tal-opinjoni li hemm riskji għall-ksib tal-miri tal-Programm ta' Stabbiltà, li huma biss parzjalment konformi mar-rekwiżiti tal-parti preventiva tal-Patt ta’ Stabbiltà u Tkabbir, b'mod partikolari mill-2015.

(10)

F'Lulju 2013 il-Gvern ippreżenta abbozz ta' liġi lill-Parlament dwar it-traspożizzjoni tad-dispożizzjonijiet tad-Direttiva tal-Kunsill 2011/85/UE (5) u t-Trattat dwar l-Istabbiltà, il-Koordinazzjoni u l-Governanza. Filwaqt li l-abbozz ta' liġi huwa mistenni li jidħol fis-seħħ fl-1 ta' Jannar 2014, l-adozzjoni tiegħu ġiet posposta minħabba r-riżenja tal-Gvern f'Lulju. Skont l-abbozz ta' liġi, ġiet introdotta Liġi ta' Programm Finanzjarju Pluriennali ġdida li tkopri l-istess perijodu ta' żmien bħall-aġġornament li ġej tal-Programm ta' Stabbiltà. Il-Liġi ta' Programm Finanzjarju Pluriennali tiġi aġġornata annwalment kontinwament, flimkien mal-baġit annwali. Hija tagħti dettalji dwar pjanijiet biex jinkiseb l-objettiv baġitarju ta' terminu medju fil-livell tal-amministrazzjoni pubblika. L-abbozz ta' liġi jintroduċi livelli massimi pluriennali fil-Liġi ta' Programm Finanzjarju Pluriennali li jkopri s-settur tal-gvern ċentrali biss, iżda ma hemm l-ebda speċifikazzjoni dwar il-konsegwenzi f'każ li jinqabżu l-livelli massimi. L-abbozz ta' liġi ma jbassarx regola nazzjonali tal-infiq li tiggwida t-twaqqif ta' miri pluriennali tal-infiq. Madankollu, huwa għandu dispożizzjonijiet għall-pjan ta' aġġustament biex jiġi rispettat l-objettiv ta' terminu medju. F'Marzu 2014 ġie ppreżentat abbozz rivedut tal-liġi lill-Parlament, u fost affarijiet oħrajn jipprevedi l-allokazzjoni tal-kompitu għall-monitoraġġ indipendenti ta' regoli fiskali għal istituzzjoni ġdida, il-“Conseil National des Finances Publiques”.

(11)

Barra minn hekk, id-dħul mit-taxxa mill-VAT ser jintlaqat mir-regoli l-ġodda dwar id-dħul mill-VAT iġġenerat minn attivitajiet tal-kummerċ elettroniku. Mill-2015, tali dħul ser jiġi trasferit mill-pajjiż fejn jinsab il-fornitur lejn dak tar-residenza tal-klijent. Il-Gvern ħabbar li r-rati tal-VAT ser jiżdiedu b'2 punti perċentwali, u dan għandu parzjalment jikkompensa għat-telf mid-dħul. Madankollu, minħabba l-użu mifrux ta' rati mnaqqsa u mnaqqsa ħafna, jista' jsir dħul addizzjonali billi tiġi estiża l-applikazzjoni tar-rata standard u b'hekk tikkumpensa aktar għat-telf imsemmi hawn fuq.

(12)

In-nefqa pubblika tal-pensjonijiet bħala proporzjon tal-PDG fil-Lussemburgu għandha tiżdied, skont iċ-ċifri tar-Rapport tal-2012 tal-Kummissjoni dwar it-Tixjiħ, minn 9,2 % tal-PDG għal 18,6 % fl-2060. Dan huwa l-aktar minħabba l-infiq relatat mat-tixjiħ u b'mod partikolari l-pensjonijiet. Ir-riforma tal-pensjonijiet tal-2012 kienet limitata fil-kamp ta' applikazzjoni tagħha u ma indirizzatx b'mod sostanzjali t-theddida tas-sostenibbiltà fit-tul tal-finanzi pubbliċi. Il-finanzjament ta' terminu qasir tas-sistema tal-pensjonijiet bħalissa huwa garantit minn proporzjon baxx ta' dipendenza tal-età avvanzata u jserraħ fuq il-kontribuzzjonijiet imħallsa mill-popolazzjoni relattivament żagħżugħa tal-ħaddiema transkonfinali. Fil-futur, din it-tendenza hija mistennija li tinbidel u l-kostijiet tal-pensjonijiet, kif ukoll il-kostijiet tal-kura fit-tul, probabbilment ser jiżdiedu b'mod sostanzjali. Sabiex tiġi garantita l-vijabbiltà tas-sistema tal-pensjonijiet, teħtieġ żieda sostanzjali fir-rata tal-kontribuzzjonijiet wara l-2020, barra mill-moderazzjoni integrata tal-adattament tal-pensjonijiet għal-livell ta' għajxien. Dan ifisser żieda sinifikanti fil-piż fuq ix-xogħol appoġġat mill-popolazzjoni attiva futura u, konsegwentement, tnaqqis fil-kompetittività tal-kostijiet. Minħabba l-livell attwalment għoli tar-rata ta' sostituzzjoni, setgħu ttieħdu xi miżuri differenti sabiex tiġi żgurata distribuzzjoni aktar ġusta tal-piż fost il-ġenerazzjonijiet. L-introduzzjoni ta' limitu massimu fuq l-aġġustamenti tal-pensjonijiet abbażi ta' żidiet reali fil-pagi jżid ir-riżervi tal-pensjonijiet. Barra minn hekk, iż-żieda fl-età ta' rtirar effettiv, li bħalissa hija l-età ta' 59 sena, billi tiġi allinjata mal-bidla fl-istennija tal-għomor, tgħin sabiex tiżgura s-sostenibbiltà fit-tul tas-sistema tal-pensjonijiet. Barra minn hekk, il-possibilitajiet għal irtirar bikri għandhom jitnaqqsu. L-inċentivi finanzjarji sabiex jittawlu l-karrieri tax-xogħol, kif previst fir-riforma tal-pensjonijiet, jistgħu jikkontribwixxu għas-sostenibbiltà tas-sistema tal-pensjonijiet, iżda l-impjegabbiltà tal-ħaddiema akbar fl-età għandha tkompli tittejjeb billi tissaħħaħ l-edukazzjoni vokazzjonali u t-tagħlim tul il-ħajja. Jeħtieġ li l-Lussemburgu jrażżan il-ħtieġa futura għal kura fit-tul, u l-kostijiet relatati magħha, sabiex jiżgura s-sostenibbiltà tagħha. Is-servizzi tal-kura fit-tul jistgħu wkoll isiru aktar kosteffiċjenti billi tissaħħaħ il-koordinazzjoni bejn il-kura tas-saħħa u l-kura soċjali, titjieb il-konsenja tas-servizzi u jiġu appoġġati aħjar dawk li jieħdu ħsieb il-familji.

(13)

Il-bilanċ favorevoli tal-kont kurrenti tal-Lussemburgu huwa mmexxi mis-servizzi finanzjarji u jaħbi defiċit persistenti u li gradwalment jiżdied fil-bilanċ kummerċjali għall-oġġetti, li ġej minn tkabbir bil-mod fl-esportazzjoni. Filwaqt li din it-tendenza tirrifletti l-importanza li dejjem tiżdied tas-settur tas-servizzi fl-ekonomija, hija wkoll minħabba telf aktar strutturali tal-kompetittività fil-kostijiet. Iż-żieda stabbli riċenti fil-kost ta' unità lavorattiva dgħajfet il-kompetittività tan-nisġa industrijali tal-Lussemburgu. Il-modulazzjoni tal-mekkaniżmu ta' indiċjar tal-pagi adottata mill-Gvern fl-2012 ser tintemm sa tmiem l-2014. Filwaqt li jistgħu jiġu esplorati diversi mogħdijiet, huwa importanti li l-pagi jintrabtu aktar mill-qrib mal-produttività permezz ta' riforma tas-sistema tal-indiċjar tal-pagi, li tippermetti differenzazzjoni settorjali. Id-dipendenza kbira fuq is-settur finanzjarju tirrappreżenta riskju strutturali għall-ekonomija. Għaldaqstant, jeħtieġ li l-Lussemburgu jiffoka fuq l-iżvilupp ta' impriżi speċjalizzati ħafna bħala xprun għat-tkabbir immexxi mill-innovazzjoni. Filwaqt li t-tkabbir tal-intensità tar-R&Ż fis-settur pubbliku b'erba' darbiet mill-2000 jirrifletti r-riżoluzzjoni li jinbnew il-kapaċitajiet tar-riċerka pubblika, il-Lussemburgu ma jinsabx fit-triq it-tajba biex jintlaħaq l-objettiv tal-intensità tar-R&Ż għall-2020 tiegħu ta' 2,3‐2,6 % tal-PDG, minħabba t-tnaqqis f'salt fl-intensità tan-negozju tar-R&Ż (minn 1,53 % tal-PDG fl-2000 għal 1 % fl-2012). Il-prestazzjoni tiegħu fuq l-indikaturi dwar il-kooperazzjoni bejn l-istituzzjonijiet ta' riċerka pubblika u l-impriżi għandha tittejjeb aktar. Għandha tiġi segwita r-riforma mnedija fl-2013 dwar ir-rinfurzar tar-raggruppament tal-innovazzjoni.

(14)

Għalkemm ġew adottati diversi miżuri, il-qgħad fost iż-żgħażagħ huwa għoli b'mod persistenti, u huwa 17,4 % tal-popolazzjoni attiva fl-2013, għalkemm niżel minn 18 % fl-2012. Huwa jiddependi ħafna fuq il-livell edukattiv u huwa aktar baxx fost dawk li laħqu livell edukattiv ogħla. Is-sistema edukattiva tal-Lussemburgu tħabbat wiċċha ma' għadd ta' sfidi speċifiċi, bħall-multilingwiżmu u l-ħiliet speċifiċi meħtieġa minn suq tax-xogħol speċjalizzat ħafna b'settur finanzjarju kbir. Ir-riżultati tal-istħarriġ dwar il-ħiliet tal-istudenti tal-OECD fl-2012 ikkonfermaw li jeħtieġu aktar miżuri biex jikkontrobattu l-prestazzjoni relattivament dgħajfa taż-żgħażagħ fil-ħiliet bażiċi, kif ġie osservat mill-2006. F'dan ir-rigward, għandhom jiġu segwiti r-riformi fl-iskejjel primarji u sekondarji. Barra minn hekk, il-kwalità u l-attrattività tat-taħriġ vokazzjonali u edukattiv għandhom jittejbu aktar sabiex jipprovdu s-suq tax-xogħol b'forza tax-xogħol ikkwalifikata, inkluż b'mod partikolari nies bi sfond ta' migrazzjoni. It-tfassil tas-sistema tat-taxxa u tal-benefiċċji jinsab fil-bidu ta' diffikultajiet kbar ħafna fis-suq tax-xogħol, fost l-ogħla fl-Unjoni, għal-livelli kollha tal-pagi u l-kompożizzjonijiet tal-familji. Barra minn hekk, minkejja sforzi reċenti għar-riforma, il-politiki ta' attivazzjoni għadhom dgħajfa u l-parteċipazzjoni fil-politiki attivi fis-suq tax-xogħol qatt ma kienet obbligatorja matul il-perijodu tal-qgħad.

(15)

Il-Lussemburgu huwa impenjat li jnaqqas l-emissjonijiet ta’ gassijiet b'effett ta' serra fis-setturi mhux tal-ETS b'20 % fl-2020, iżda huwa mistenni li ma jilħaqx din il-mira bi 23 punt perċentwali. Barra minn hekk, l-emissjonijiet tal-2013 huma mistennija li jkunu 1 % ogħla mill-mira stabbilita għall-2013 fid-Deċiżjoni dwar il-Kondiviżjoni tal-Isforzi. Madwar 70 % tal-emissjonijiet relatati mat-trasport huma relatati mal-esportazzjonijiet tal-fjuwil, fost l-oħrajn ta' dazji tas-sisa baxxi ħafna fuq il-fjuwils. Ir-rikonoxximent tal-esportazzjoni tal-fjuwil bħala sfida ewlenija fit-tieni Pjan ta' Azzjoni Nazzjonali dwar il-Klima adottat f'Mejju 2013 huwa pass 'il quddiem. Madankollu, jeħtieġu miżuri aktar speċifiċi u fit-tul biex tiġi indirizzata din il-kwistjoni. It-tassazzjoni ambjentali kienet responsabbli għal 2,4 % tal-PDG fl-2012, filwaqt li fl-2004 kienet responsabbli għal 3,1 %. Dan it-tnaqqis huwa riżultat b'mod partikolari għad-dħul fiskali tal-enerġija influwenzat min-nuqqas tal-indiċjar fuq it-taxxi tal-enerġija. It-taxxi tat-trasport, eskluż il-fjuwils, jirrappreżentaw 0,2 % tal-PDG fl-2012. It-taxxi tal-fjuwil użat għat-trasport huma għoljin bi 2,2 % tal-PDG, minkejja t-trattament preferenzjali tat-taxxa tad-diżil, l-aktar minħabba x-xirja transkonfinali tal-fjuwil. Bit-tassazzjoni ambjentali li hija responsabbli għal-proporzjon anqas mill-medja tad-dħul totali mit-taxxa, it-tfassil tat-taxxi ambjentali tiegħu jistgħu jittejbu, b'mod partikolari billi tiżdied it-tassazzjoni fuq il-prodotti tal-enerġija għat-trasport.

(16)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Lussemburgu. Hija vvalutat il-Programm Nazzjonali ta' Riforma u l-Programm ta' Stabbiltà. Hija ma qisitx biss ir-rilevanza tagħhom għal politika fiskali u soċjoekonomika sostenibbli fil-Lussemburgu, iżda anki l-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (5) hawn taħt.

(17)

Abbażi ta’ din il-valutazzjoni, il-Kunsill eżamina l-Programm ta’ Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) ta' hawn taħt.

(18)

Fil-kuntest tas-Semestru Ewropew, il-Kummissjoni għamlet ukoll analiżi tal-politika ekonomika taż-żona tal-euro inġenerali. Abbażi ta' din, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7). Bħala pajjiż li l-munita tiegħu hija l-euro, il-Lussemburgu għandu jiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Jippreserva pożizzjoni fiskali b'saħħitha fl-2014; isaħħaħ b'mod sinifikanti l-istrateġija baġitarja fl-2015 biex jiżgura li l-objettiv ta' terminu medju jintlaħaq u jibqa' fl-objettiv ta' terminu medju minn hemm 'il quddiem, sabiex jipproteġi s-sostenibbiltà tal-finanzi pubbliċi, b'mod partikulari billi jqis l-obbligazzjonijiet impliċiti relatati mat-tixjiħ. Isaħħaħ il-governanza fiskali billi jħaffef l-adozzjoni ta' qafas baġitarju fuq perijodu medju li jkopri l-amministrazzjoni pubblika u jinkludi limiti massimi pluriennali ta' nfiq, u billi jistabbilixxi l-monitoraġġ indipendenti tar-regoli fiskali. Ikompli jwessa' l-bażi tat-taxxa, b'mod partikolari fuq il-konsum.

2.

Fid-dawl tal-iżgurar tas-sostenibbiltà fiskali, irażżan in-nefqa relatata mal-età billi jagħmel il-kura fit-tul aktar kosteffettiva, isegwi r-riforma tal-pensjonijiet sabiex tiżdied l-età effettiva ta' rtirar, inkluż billi jillimita l-irtirar kmieni, bl-allinjament tal-età tal-irtirar jew tal-benefiċċji tal-pensjoni ma' bidliet fl-istennija tal-għomor. Isaħħaħ l-isforzi sabiex iżid ir-rata tal-parteċipazzjoni tal-ħaddiema li huma akbar fl-età inkluż billi jtejjeb l-impjegabbiltà tagħhom permezz tat-tagħlim tul il-ħajja.

3.

Iħaffef l-adozzjoni tal-miżuri strutturali, f'konsultazzjoni mal-imsieħba soċjali u skont il-prattiki nazzjonali, sabiex jirriforma s-sistema għall-iffissar tal-pagi inkluż l-indiċjar tal-pagi bil-ħsieb li jittejjeb ir-rispons tal-pagi għall-iżviluppi tal-produttività, b'mod partikolari fil-livell settorjali. Isegwi d-diversifikazzjoni tal-istruttura tal-ekonomija, fosthom billi jinkoraġġixxi l-investiment privat fir-riċerka u jkompli jiżviluppa l-kooperazzjoni bejn ir-riċerka pubblika u l-impriżi.

4.

Isegwi l-isforzi biex jitnaqqas il-qgħad fost iż-żgħażagħ għal persuni li jfittxu impjieg b'ħiliet baxxi, inklużi dawk bi sfond ta' migrazzjoni, permezz ta' strateġija koerenti, fosthom billi jkompli jittejjeb it-tfassil u l-monitoraġġ ta' politiki attivi fis-suq tax-xogħol, li jindirizzaw in-nuqqas ta' tlaqqigħ tal-ħiliet, u jnaqqsu d-diżinċentivi finanzjarji għax-xogħol. Għal dan il-għan, iħaffef l-implimentazzjoni tar-riforma tal-edukazzjoni u t-taħriġ ġenerali u vokazzjonali sabiex il-ħiliet taż-żgħażagħ jitqabblu aħjar mad-domanda għall-ħaddiema.

5.

Jiżviluppa l-qafas komprensiv u jieħu miżuri konkreti sabiex jilħaq l-għan tal-2020 għat-tnaqqis tal-emissjonijiet ta' gassijiet b'effett ta' serra minn attivitajiet mhux tal-ETS, speċjalment permezz tat-tassazzjoni tal-prodotti tal-enerġija għat-trasport.

29.7.2014   

MT

Il-Ġurnal Uffiċjali tal-Unjoni Ewropea

C 247/77

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tniedi strateġija ġdida għat-tkabbir u l-impjiegi, l-Ewropa 2020, li tkun imsejsa fuq koordinazzjoni msaħħa tal-politiki ekonomiċi, u li tiffoka fuq l-oqsma ewlenin fejn tinħtieġ azzjoni li tagħti spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta’ Lulju 2010, il-Kunsill, fuq il-bażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u fil-21 ta’ Ottubru 2010, huwa adotta deċiżjoni dwar il-linji gwida għall-politiki tal-Istati Membri dwar l-impjiegi (3), li flimkien jagħmlu l-“linji gwida integrati”. L-Istati Membri ġew mistiedna jqisu l-linji gwida integrati fil-politiki nazzjonali tagħhom dwar l-ekonomija u l-impjiegi.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar l-azzjoni li għandha tittieħed fil-livell tal-Istati Membri, b'mod partikolari esprimew l-impenn sħiħ tagħhom biex jintlaħqu l-objettivi tal-istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma għall-2013 tal-Ungerija u ta l-opinjoni tiegħu dwar il-Programm ta' Konverġenza aġġornat tal-Ungerija għall-perijodu 2013‐2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lill-Ungerija bħala wieħed mill-Istati Membri li għalihom ser issir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet sabiex ikunu garantiti l-istabbiltà finanzjarja, il-konsolidazzjoni fiskali u l-azzjoni li tħeġġeġ it-tkabbir. Huwa enfasizza l-ħtieġa li ssir konsolidazzjoni fiskali differenzjata u li tkun favorevoli għat-tkabbir, biex jiġu rkuprati l-kondizzjonijiet normali ta’ self lill-ekonomija, għall-promozzjoni tat-tkabbir u l-kompetittività, għall-indirizzar tal-qgħad u l-konsegwenzi soċjali tal-kriżi, u għall-immodernizzar tal-amministrazzjoni pubblika.

(7)

Fil-5 ta’ Marzu 2014, il-Kummissjoni ppubblikat ir-riżultati tal-eżami mill-ġdid fil-fond għall-Ungerija, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni twassalha biex tikkonkludi li l-Ungerija qiegħda tesperjenza żbilanċi makroekonomiċi li jistħoqqilhom monitoraġġ u azzjoni politika deċiżiva. B'mod partikolari, l-aġġustament kontinwu tal-pożizzjoni internazzjonali nett negattiva ferm, il-livell għoli ta' dejn pubbliku u privat fil-kuntest ta' settur finanzjarju dgħajjef u prestazzjoni ta' esportazzjoni li qed tiddeterjora jibqgħu jistħoqqilhom attenzjoni mill-qrib ħafna bil-għan li jitnaqqsu r-riskji importanti ta' effetti negattivi ferm fuq il-funzjonament tal-ekonomija.

(8)

Fit-30 ta’ April 2014, l-Ungerija ressqet il-Programm Nazzjonali ta’ Riforma tagħha tal-2014 u l-Programm ta' Konverġenza tagħha tal-2014. Sabiex jitqiesu l-konnessjonijiet bejniethom, iż-żewġ programmi ġew ivvalutati fl-istess waqt.

(9)

L-objettiv tal-istrateġija baġitarja deskritta fil-Programm ta' Konverġenza tal-2014 huwa li jitnaqqas id-defiċit nominali minn 2,9 % tal-PDG fl-2014 għal 1,9 % sal-aħħar tal-perijodu tal-programm. Dan għandu jinkiseb bi proċess ta' konsolidazzjoni kkonċentrat bis-sħiħ fl-aħħar tal-perijodu, filwaqt li l-miri tad-defiċit ġew riveduti “l fuq meta mqabbla mal-Programm ta' Konverġenza ta' qabel. Il-Programm ta' Konverġenza jikkonferma l-objettiv ta' terminu medju ta' 1,7 % tal-PDG, li jirrifletti l-objettivi tal-Patt ta' Stabbiltà u Tkabbir. Madankollu, fuq il-bażi tal-bilanċ strutturali kkalkulat mill-ġdid, l-objettiv ta' terminu medju mhux mistenni li jinkiseb sal-aħħar tal-perijodu tal-programm. Il-bilanċ strutturali (ikkalkulat mill-ġdid) huwa mistenni li jiddeterjora b'1,5 punti perċentwali fl-2014, u b'hekk jitbiegħed sew mill-objettiv ta' terminu medju, u ser jistabbilizza fl-2015, li jimplika nuqqas ta' 0,5 % tal-PDG mit-titjib meħtieġ lejn l-objettiv ta' terminu medju. Il-valur referenzjarju tan-nefqa juri devjazzjoni sinifikanti kemm fl-2014 kif ukoll fl-2015. Il-bilanċ strutturali (ikkalkulat mill-ġdid) huwa mistenni li jiddeterjora aktar kemm fl-2016 kif ukoll fl-2017. B'mod ġenerali, mill-2014 hija mistennija devjazzjoni sinifikanti mill-proċess ta' aġġustament lejn l-objettiv ta' terminu medju. Il-Programm ta' Konverġenza jistenna tnaqqis gradwali iżda kontinwu fid-dejn tal-gvern minn 79 % tal-PDG fl-2013 għal madwar 75 % tal-PDG fl-2017. Ix-xenarju makroekonomiku li jirfed il-projezzjonijiet baġitarji fil-Programm ta' Konverġenza huwa ġeneralment plawsibbli għall-2014‐2016, bil-PDG mistenni jikber bi 2,3 % u 2,5 % fl-2014 u l-2015 rispettivament, meta mqabbel ma”2,3 % u 2,1 % skont it-tbassir tar-Rebbiegħa 2014 tas-servizzi tal-Kummissjoni. Madankollu, il-Programm ta' Konverġenza huwa ottimist wisq għall-2017.

Ir-riskji għall-miri baġitarji huma bbilanċjati b'mod ġenerali fl-2014, iżda hemm riskji li qed jiżdiedu li d-defiċit jista' jirriżulta ogħla milli previst mill-2015. Hemm riskji partikolari ġejjin mill-fatt li t-tnaqqis ippjanat mill-proporzjon tan-nefqa huwa mistenni li jintlaħaq bit-twaqqif ta' ffriżar nominali kullimkien jew ir-restrizzjoni ta' żidiet taħt ir-rata tal-inflazzjoni għal ħafna mill-oġġetti tal-infiq diskrezzjonali. It-tbassir tar-Rebbiegħa 2014 tas-servizzi tal-Kummissjoni jistenna defiċit nominali għall-2014 u l-2015 identiku għall-miri tal-Programm ta' Konverġenza. B'defiċit strutturali mistenni ta' 2,2 % tal-PDG fl-2014 u 2,3 % fl-2015, it-tbassir tal-Kummissjoni jikkonferma r-riskju ta' devjazzjoni sinifikanti mill-objettiv fuq terminu medju mill-2014. Aktar minn hekk, it-tbassir tal-Kummissjoni jimmira wkoll għan-nonkonformità mal-punt ta' riferiment għat-tnaqqis tad-dejn fl-2014 u l-2015. Fl-2014, id-deterjorament projettat tal-bilanċ strutturali (‐ 1,4 % tal-PDG) huwa akbar minn dak li huwa permess għall-konformità mar-regola dwar id-dejn (‐ 0,5 % tal-PDG). Abbażi tal-valutazzjoni tiegħu tal-Programm ta' Konverġenza u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li hemm bżonn ta' aktar sforzi ta' konsolidazzjoni strutturali fid-dawl tar-riskji ta' devjazzjoni sinifikanti mill-objettivi fuq terminu medju kif ukoll tan-nonkonformità mar-regola dwar id-dejn mill-2014.

(10)

Il-qafas baġitarju fuq terminu medju ġie msaħħaħ bl-estensjoni tal-orizzont ta' ppjanar lil hinn mis-sena baġitarja attwali. L-effettività u n-natura vinkolanti tiegħu madankollu għadhom mhumiex żgurati. Ġew introdotti regoli fiskali numeriċi ġodda, iżda d-dgħufijiet fit-tfassil għadhom ma tranġawx, l-aktar minħabba n-nuqqas ta' monitoraġġ ex post sistematiku, n-nuqqas ta' livelli ta' devjazzjoni massimi permissibbli u mekkaniżmi ta' korrezzjoni tajbin. Il-lista limitata tal-kompiti mandatorji tal-Kunsill Fiskali u l-kapaċità analitika tiegħu għadhom mhumiex proporzjonati mad-dritt tal-veto baġitarju tiegħu. It-tisħiħ ulterjuri tal-qafas baġitarju fuq terminu medju u t-twessigħ tal-mandat obbligatorju tal-Kunsill Fiskali, jgħinu fit-titjib tal-kredibbiltà, t-trasparenza u l-effettività tal-qafas fiskali globali.

(11)

Minkejja l-iskema “Fondi għat-Tkabbir” issussidjata tal-Bank Ċentrali, għal intrapriżi żgħar u medji, ir-ritorn għas-self normali lill-ekonomija ma qabadx ritmu b'mod sostenibbli. Il-piż regolatorju fuq is-settur finanzjarju kompla żdied, u l-kapaċità ta' akkumulazzjoni kapitali ġiet limitata. Miżuri bħaż-żieda tat-taxxa fuq it-transazzjonijiet finanzjarji, għenu fiż-żieda fl-użu ta' kontanti tal-ekonomija. Il-portafoll domestiku kompla jmur għall-agħar u l-proporzjon għoli ta' self li ma jrendix attwalment jirrappreżenta waħda mill-akbar sfidi għas-settur finanzjarju. It-tindif tal-portafoll huwa mxekkel mill-effiċjenza dgħajfa tal-proċeduri ta' riżoluzzjoni. L-ebda miżura ġdida sostanzjali ma ttieħdet biex jitneħħew l-assi ħżiena mill-karta tal-bilanċ tal-bank. L-għaqda ta' piż regolatorju kbir u proporzjon għoli ta' self li ma jrendix wasslet għal pressjoni fuq il-krediti disponibbli. Il-gvern ħabbar kemm-il darba l-intenzjoni tiegħu li jintroduċi skema ġdida ta' ħelsien biex tassisti lill-mutwatarji tal-muniti barranin; f'ħafna każijiet, dawn ma jolqtux lill-mutwatarji f'diffikultà u jkollhom impatt negattiv fuq il-kultura tal-pagament tal-unitajiet domestiċi, minħabba l-aspettattiva ta' aktar għajnuna mill-gvern. Ir-regolazzjoni u s-superviżjoni finanzjarja ssaħħu bl-integrazzjoni tal-Awtorità tas-Sorveljanza Finanzjarja fl-istruttura ċentrali tal-bank u bl-għoti tar-responsabbiltà tas-sorveljanza makroprudenzjali lill-bank ċentrali. Beda x-xogħol preparatorju fl-istabbiliment ta' reġim ta' riżoluzzjoni bankarja.

(12)

Minkejja li l-frekwenza tal-bidliet ta' taxxi naqset meta mqabbla mas-sena ta' qabel, ma sar ebda progress sostanzjali biex is-sistema fiskali korporattiva ssir aktar ibbilanċjata. Uħud mit-taxxi speċifiċi għas-setturi attwali ġew saħansitra miżjuda. L-applikazzjoni tar-rati tat-taxxa differenti tul is-setturi hija ostakolu għall-allokazzjoni effettiva tar-riżorsi u għalhekk teffettwa t-tkabbir b'mod negattiv. Biex it-tassazzjoni tiffavorixxi aktar l-impjiegi, l-Ungerija wessgħet l-eliġibbiltà għall-kreditu tat-taxxa tal-familja fuq it-taxxa tad-dħul personali, li tista' tgħin lil ħaddiema bil-paga. Il-proporzjon ta' taxxa fuq persuni weħedhom bi dħul baxx huwa wieħed mill-ogħla fl-Unjoni. Minkejja t-twessiegħ parzjali tal-kamp ta' applikazzjoni għal ommijiet bi tliet itfal jew iktar, il-kriterji ta' eliġibbiltà għall-Att tal-Protezzjoni tal-Impjiegi baqgħu essenzjalment l-istess, anke jekk proporzjon sinifikanti ta' ħaddiema b'pagi baxxi jibqgħu barra l-kamp ta' applikazzjoni tal-miżura. Ser ikun importanti li wieħed jevalwa l-impatt u l-kosteffettività tal-iskema u li tiġi adattata bħala neċessarja biex tkabbar il-kapaċità tagħha li ddaħħal in-nies fl-impjieg. Sar xi progress fit-trasferiment tat-tassazzjoni 'l bogħod mix-xogħol lejn it-taxxi ambjentali, iżda huma meħtieġa miżuri addizzjonali. Ir-rabta online tal-cash registers mal-awtorità tat-taxxa qiegħda tiġi implimentata gradwalment, wara dewmien ripetut fil-passat. Madankollu, l-Ungerija għadha tbati minn livell għoli ta' nonkonformità mat-taxxa, b'livell miżmum ta' xogħol mhux iddikjarat u d-distakk tal-konformità mal-VAT. Il-miżuri ta' kontroll għandhom jissaħħu b'mod partikolari b'ħarsa lejn it-titjib tal-effiċjenza tal-ġlieda kontra l-frodi tal-VAT.

(13)

Ir-rata tal-qgħad fost iż-żgħażagħ, naqset fl-2013, filwaqt li żdiedet ir-rata ta' żgħażagħ li jinsabu barra mill-impjieg, l-edukazzjoni jew it-taħriġ. Il-koordinazzjoni effiċjenti mill-fergħat tas-Servizz Pubbliku tal-Impjiegi ma' istituzzjonijiet edukattivi u partijiet interessati lokali tista' żżid il-komunikazzjoni. It-tisħiħ tal-kapaċitajiet fis-servizz pubbliku tal-impjieg, inkluż it-tħejjija ta' sistema tal-profili tal-klijenti, beda, filwaqt li l-politiki attivi tas-suq tax-xogħol għas-suq tax-xogħol miftuħ għandhom jiġu evalwati biex jiġu vvalutati l-effiċjenza u l-effettività tagħhom u jekk meħtieġ jiġu adattati biex itejbu l-aċċess għas-suq tax-xogħol għal xi gruppi żvantaġġati. Jeħtieġ li jiġi msaħħaħ l-element ta' attivazzjoni fi swieq tax-xogħol u miżuri soċjali differenti (Skema tax-Xogħlijiet Pubbliċi, benefiċċju tal-qgħad, assistenza soċjali). L-Iskema tax-Xogħlijiet Pubbliċi tiġbed il-maġġoranza tar-riżorsi baġitarji disponibbli għal miżuri għall-impjieġ, iżda fl-2013, 11,54 % tal-parteċipanti tagħha kienu kapaċi jerġgħu lura fis-suq tax-xogħol miftuħ wara li ħarġu mill-iskema. Dan qajjem it-tħassib dwar jekk l-iskema għandhiex tkun adattata, per eżempju bil-bini ta' konnessjonijiet aktar b'saħħithom għall-attivazzjoni, taħriġ u appoġġ għat-tfittix tax-xogħol, biex jiġi żgurat impatt tal-impjiegi aktar dejjiemi. Il-parteċipazzjoni tan-nisa fis-suq tax-xogħol, ġiet imħeġġa minn flessibbiltà akbar fis-sistema tal-liv tal-ġenituri mħallas u l-forniment ta' kapaċitajiet tal-indukrar tat-tfal, iżda huma meħtieġa aktar sforzi minħabba li l-livelli ta' impjieg fost in-nisa jibqgħu taħt is-60 %. Il-perijodu ta' eliġibbiltà għall-benefiċċji tal-qgħad huwa iqsar miż-żmien medju meħtieġ minn dawk li jfittxu x-xogħol biex isibu xogħol. In-numru ta' nies f'riskju ta' faqar jew esklużjoni soċjali fl-Ungerija qed jikber b'mod stabbli u bħalissa jirrappreżenta kważi terz tal-popolazzjoni kollha. Il-faqar ikompli jaffettwa gruppi żvantaġġati b'mod sproporzjonat, b'mod partikolari t-tfal u r-Rom. Filwaqt li hemm fis-seħħ Strateġija Nazzjonali tal-Inklużjoni Soċjali, il-miżuri politiċi f'ħafna oqsma ma jippromwovux sistematikament l-għanijiet iddefiniti minn dik l-istrateġija. Huma meħtieġa miżuri politiċi integrati u simplifikati biex inaqqsu l-faqar b'mod effettiv.

(14)

L-ambjent kummerċjali fl-Ungerija huwa kkaratterizzat minn tibdil frekwenti fil-qafas regolatorju u l-kompetizzjoni limitata f'numru dejjem akbar ta' setturi. Ġew introdotti ostakoli ġodda fis-settur tas-servizzi u dawk eżistenti ma tneħħewx (pereżempju l-ispiżeriji, l-immaniġġjar tal-iskart, il-pagament bil-mowbajl, il-bejgħ bl-imnut tat-tabakk u l-kotba tal-iskola). L-investiment naqas b'mod partikolarment qawwi f'dawk is-setturi li fihom ġew imposti soprataxxi speċifiċi għas-setturi imposti fis-snin reċenti. Bejn l-2010 u l-2013, l-investiment nominali naqas b'44 % fl-enerġija, 28 % fil-finanzi u 18 % fis-setturi tal-komunikazzjoni, filwaqt li żdied bi 3,4 % b'mod ġenerali. Sar xi progress fit-titjib tal-kompetizzjoni fl-akkwist pubbliku, iżda huma meħtieġa sforzi ulterjuri. Per eżempju, aktar dipendenza fuq l-akkwist elettroniku tista' tiġġenera ffrankar ta' flus sinifikanti, ittejjeb it-trasparenza tal-akkwist pubbliku u żżid il-kompetizzjoni. Ittieħdu passi biex jiġu implimentati strateġiji ta' integrità u biex jiġu promossi standards ta' trasparenza aħjar fl-amministrazzjoni pubblika, iżda huma meħtieġa sforzi ulterjuri biex il-korruzzjoni tiġi indirizzata b'mod effettiv.

(15)

Il-proporzjon ta' dawk li jieqfu mill-iskola qabel iż-żmien qed jikber u kien hemm dewmien ripetut fl-adozzjoni ta' strateġija ta' prevenzjoni ta' tluq bikri mill-iskola. Huma meħtieġa aktar sforzi biex l-istudenti jingħataw ħiliet, kompetenzi u kwalifiki bażiċi li huma rilevanti għas-suq tax-xogħol. L-aċċess ugwali għal edukazzjoni integrata ta' kwalità jibqa' problema ewlenija għat-tfal żvantaġġati, b'mod partikolari r-Rom. Ġiet ippromulgata liġi ġdida dwar it-taħriġ vokazzjonali, li fost l-oħrajn tintroduċi “mudell doppju” ġdid, biex tnaqqas it-transizzjoni li għadha diffiċli mill-edukazzjoni għas-suq tax-xogħol, li l-effetti tagħha għandhom jiġu segwiti mill-qrib.

(16)

L-Ungerija kompliet timplimenta tnaqqis fil-prezzijiet tal-elettriku u tal-gass għall-utent aħħari fl-2013 u l-2014. Dan it-tnaqqis fil-prezzijiet, flimkien mal-piż żejjed tat-taxxa fuq il-kumpanniji tal-enerġija, affettwaw b'mod negattiv il-kapaċità tal-fornituri li jirkupraw l-investimenti tal-ispejjeż u l-enerġija u l-manutenzjoni tan-netwerk. Bħalissa, l-intensità enerġetika domestika hija fost l-ogħla fl-Unjoni u l-effiċjenza enerġetika tista' titjieb b'mod partikolari fis-settur residenzjali. In-nuqqas ta' indipendenza tar-regolatur tal-enerġija fl-iffissar ta' kundizzjonijiet u tariffi għall-aċċess għan-netwerk jibqgħu ta' tħassib. Ittieħdu xi passi biex l-organizzazzjoni tal-kumpanniji tat-trasport pubbliku tiġi ssimplifikata, iżda s-sostenibbiltà tista' titjieb aktar billi jiġu indirizzati l-ispejjeż operattivi u tinbidel is-sistema tariffarja.

(17)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Ungerija. Hija vvalutat il-Programm Nazzjonali ta’ Riforma u l-Programm ta’ Konverġenza. Hija kkunsidrat mhux biss ir-rilevanza tagħhom għal politika fiskali u soċjoekonomika sostenibbli fl-Ungerija, iżda wkoll il-konformità tagħhom mar-regoli u l-linji gwida tal-UE, minħabba l-bżonn li tissaħħaħ il-governanza ekonomika kumplessiva tal-Unjoni permezz ta' kontribut fil-livell tal-UE f'deċiżjonijiet nazzjonali tal-futur. Ir-rakkomandazzjonijiet tagħha taħt is-Semestru Ewropew huma riflessi fir-rakkomandazzjonijiet (1) sa (7) hawn taħt.

(18)

Fid-dawl ta' din il-valutazzjoni, il-Kunsill eżamina l-Programm ta' Konverġenza, u l-opinjoni (5) tiegħu hija riflessa b'mod partikolari fir-rakkomandazzjoni (1) ta' hawn taħt.

(19)

Fid-dawl tar-rieżami fil-fond u din il-valutazzjoni tal-Kummissjoni, il-Kunsill eżamina l-Programm Nazzjonali ta' Riforma u l-Programm ta' Konverġenza. Ir-rakkomandazzjonijiet tiegħu skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (1), (2), (3) u (5) hawn taħt,

1.

Issaħħaħ il-miżuri baġitarji għall-2014 fid-dawl tad-distakk emerġenti relattiv għar-rekwiżiti tal-Patt ta' Stabbiltà u Tkabbir ibbażat fuq it-tbassir tar-Rebbiegħa 2014 tal-Kummissjoni. Fl-2015, u wara, issaħħaħ b'mod sinifikanti l-istrateġija baġitarja biex tiżgura li jintlaħaq l-objettiv fuq terminu medju u l-konformità mar-rekwiżiti ta' tnaqqis tad-dejn biex il-proporzjon tad-dejn tal-amministrazzjoni pubblika jinżamm fit-triq ta' tnaqqis sostnut. Tiżgura n-natura vinkolanti tal-qafas baġitarju fuq terminu medju permezz ta' monitoraġġ sistematiku ex post tal-konformità mar-regoli fiskali numeriċi u l-użu ta' mekkaniżmi korrettivi. Ittejjeb it-trasparenza tal-finanzi pubbliċi, inkluż permezz tat-twessigħ tal-mandat obbligatorju tal-Kunsill Fiskali, billi teħtieġ il-preparazzjoni ta' tbassir makrofiskali regolari u l-valutazzjonijiet tal-impatt ta' proposti importanti ta' politika.

2.

Tgħin biex jerġa' jkun hemm flussi ta' self normali fl-ekonomija, fost l-oħrajn billi ttejjeb id-disinn ta' u tnaqqas il-piż tat-taxxi imposti fuq l-istituzzjonijiet finanzjarji. Taġġusta t-taxxa fuq it-transazzjonijiet finanzjarji sabiex tevita d-devjazzjoni tat-tfaddil mis-settur bankarju u ssaħħaħ l-inċentivi għall-użu ta' pagamenti elettroniċi. Tinvestiga u tneħħi ostakoli għat-tindif tal-portafoll, fost l-oħrajn tissikka r-regoli tal-proviżjonament għal self ristrutturat, tneħħi l-ostakoli għall-esklużjoni kollaterali kif ukoll iżżid il-veloċità u l-effiċjenza tal-proċedimenti ta' insolvenza. F'dan ir-rigward, tikkonsulta mill-qrib il-partijiet interessati dwar inizjattivi ġodda ta' politika u tiżgura li dawn ikunu mmirati sew u ma jżidux il-periklu morali għall-mutwatarji. Tkompli ttejjeb ir-regolamentazzjoni u s-superviżjoni finanzjarja.

3.

Tiżgura sistema fiskali stabbli, aktar ibbilanċjata u ssimplifikata għall-kumpanniji bit-tneħħija gradwali ta' taxxi speċifiċi għas-setturi distorsivi. Tnaqqas il-proporzjon tat-taxxa għal dawk bi dħul baxx, fost l-oħrajn billi ttejjeb l-effiċjenza tat-taxxi ambjentali. Iżżid il-miżuri biex titjieb il-konformità mat-taxxa - b'mod partikolari biex tnaqqas il-frodi tal-VAT - u tnaqqas l-ispiża ġenerali tagħha.

4.

Issaħħaħ il-politiki attivi fis-suq tax-xogħol, fost l-oħrajn billi tgħaġġel l-introduzzjoni tas-sistema tal-profili tal-klijenti tas-Servizz Pubbliku tal-Impjiegi. Timplimenta n-netwerk ippjanat ta' mentoring taż-żgħażagħ u tikkoordinah ma' istituzzjonijiet edukattivi u partijiet interessati lokali biex iżżid il-komunikazzjoni. Twettaq rieżami tal-iskema pubblika tax-xogħol biex tevalwa l-effettività tagħha fl-għajnuna li tagħti lin-nies biex isibu tibdil sussegwenti u ssaħħaħ aktar l-elementi ta' attivazzjoni tagħha. Tikkunsidra li żżid il-perijodu ta' eliġibbiltà għall-benefiċċji tal-qgħad, filwaqt li tqis il-ħin medju meħtieġ biex jinstab xogħol ġdid u r-rabta mal-miżuri ta' attivazzjoni. Ittejjeb l-adegwatezza u l-kamp ta' applikazzjoni tal-assistenza soċjali filwaqt li ssaħħaħ ir-rabta mal-attivazzjoni. Sabiex jittaffa l-faqar, timplimenta miżuri politiċi ssimplifikati u integrati biex jonqos il-faqar b'mod sinifikanti, l-aktar fost it-tfal u r-Rom.

5.

Tistabbilizza l-qafas regolatorju u trawwem kompetizzjoni tas-suq, fost l-oħrajn billi tneħħi l-ostakoli fis-settur tas-servizzi. Tieħu passi aktar ambizzjużi biex iżżid il-kompetizzjoni u t-trasparenza fl-akkwist pubbliku, inkluż l-użu aħjar tal-akkwist elettroniku, kif ukoll tnaqqas il-korruzzjoni u l-piż amministrattiv ġenerali.

6.

Timplimenta strateġija nazzjonali dwar il-prevenzjoni tat-tluq bikri mill-iskola u tiffoka fuq it-tfal li jieqfu mill-edukazzjoni u t-taħriġ vokazzjonali. Tistabbilixxi approċċ sistematiku biex tippromwovi l-edukazzjoni tradizzjonali inklużiva għal gruppi żvantaġġati, b'mod partikolari għar-Rom. Tappoġġa t-transizzjoni bejn l-istadji differenti tal-edukazzjoni u lejn is-suq tax-xogħol u tissorvelja mill-qrib l-implimentazzjoni tar-riforma tat-taħriġ vokazzjonali. Timplimenta riforma fl-edukazzjoni għolja li tippermetti kisba terzjarja akbar, b'mod partikolari għal studenti żvantaġġati.

7.

Twettaq rieżami tal-impatt tar-regolazzjoni tal-prezzijiet tal-enerġija fuq l-inċentivi għall-investiment u dwar il-kompetizzjoni fis-swieq tal-elettriku u tal-gass. Tieħu aktar passi biex tiżgura l-awtonomija tar-regolatur nazzjonali fit-twaqqif tat-tariffi u l-kundizzjonijiet tan-netwerk. Tieħu miżuri biex iżżid l-effiċjenza enerġetika, l-aktar fis-settur residenzjali. Iżżid aktar is-sostenibbiltà tas-sistema tat-trasport, fost l-oħrajn billi tnaqqas l-ispejjeż operattivi u tirrevedi s-sistema tariffarja ta' intrapriżi li huma proprjetà tal-Istat fis-settur tat-trasport.

29.7.2014   

MT

Il-Ġurnal Uffiċjali tal-Unjoni Ewropea

C 247/83

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma ta' Malta għall-2013 u ta l-opinjoni tiegħu dwar il-Programm ta' Stabbiltà aġġornat ta' Malta għall-perijodu 2012-2016. Fil-15 ta' Novembru 2013, f'konformità mar-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha dwar l-abbozz ta' pjan baġitarju ta' Malta għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lil Malta bħala wieħed mill-Istati Membri li għalihom se ssir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tal-eżami mill-ġdid fil-fond dwar Malta, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslet biex jiġi konkluż li Malta ma kienx għad għandha żbilanċi makroekonomiċi fis-sens tal-Proċedura tal-Iżbilanċ Makroekonomiku. Għalkemm id-dejn jibqa’ għoli, ir-riskji għas-sostenibbiltà tad-dejn tas-settur privat u pubbliku u l-istabbiltà tas-settur finanzjarju jidhru stabbli, anki jekk dawn jistħoqqilhom monitoraġġ kontinwu. B'mod partikolari, l-indikaturi tal-istabbiltà finanzjarja għadhom sodi. Madankollu, fid-dawl tan-natura strutturali tar-riskji fis-settur, kontinwazzjoni tal-prattiċi prudenti attwali ta' superviżjoni u teħid ta' riskji hija fundamentali. Is-suq tad-djar sar stabbli u għalhekk ir-riskji minn skopertura eċċessiva għall-proprjetà huma limitati. Id-dejn privat qed jonqos; id-disingranaġġ korporattiv qed iseħħ b'mod kontrollat u l-pressjonijiet fuq is-suq tal-krediti huma limitati.

(8)

Fis-16 ta' April 2014, Malta ppreżentat il-Programm Nazzjonali ta' Riforma 2014 li kien aġġornat fit-8 ta' Mejju 2014 u, fit-30 ta' April 2014, ippreżentat il-programm ta' stabbiltà tagħha 2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(9)

L-objettiv tal-istrateġija baġitarja msemmi fil-Programm ta' Stabbiltà 2014 huwa li jikkoreġi d-defiċit eċċessiv b'mod sostenibbli sal-2014 u biex gradwalment jintlaħaq l-objettiv fuq terminu medju ta' pożizzjoni baġitarja bilanċjata f'termini strutturali, li huwa aktar strinġenti minn dak li jeħtieġ il-Patt ta' Stabbiltà u Tkabbir. Madankollu, mhux ippjanat li jintlaħaq l-objettiv ta’ terminu medju matul il-perjodu tal-programm. Fl-2014, l-aġġustament strutturali (rikalkulat) ippjanat mhux ser jilħaq l-isforz rakkomandat bi ftit. Wara l-korrezzjoni ppjanata tad-defiċit eċċessiv, hija ppjanata devjazzjoni żgħira mill-perkors tal-aġġustament lejn l-objettiv fuq terminu medju fl-2015. Minn hemm 'il hemm, il-progress annwali ppjanat lejn l-objettiv fuq terminu medju huwa fil-biċċa l-kbira skont ir-rekwiżit ta' mill-inqas 0,5 % tal-PDG. Il-Programm ta' Stabbiltà jipprojjetta li d-dejn tal-gvern, li kien ta' 73 % tal-PDG fl-2013, ser jitpoġġa fid-direzzjoni 'l isfel, f'konformità mal-parametru referenzjarju tat-tnaqqis tad-dejn, sa mill-2014. Kumplessivament, l-objettivi tal-programm huma fil-biċċa l-kbira skont ir-rekwiżiti tal-Patt ta' Stabbiltà u Tkabbir. Ix-xenarju makroekonomiku sottostanti l-previżjonijiet fiskali fil-Programm ta' Stabbiltà, li kien ġie approvat minn korp indipendenti (l-Uffiċċju Nazzjonali tal-Awditjar), huwa plawsibbli għall-2014 u l-2015 minħabba li l-previżjonijiet tat-tkabbir ekonomiku huma marġinalment inqas minn dawk fis-servizzi tal-Kummissjoni fit-tbassir tar-Rebbiegħa 2014 għal dawn is-snin.

Madankollu, ir-riskji għall-miri baġitarji jxeqilbu lejn in-naħa t'isfel, peress li ż-żieda fid-dħul strutturali pjanata matul il-perjodu tal-programm mhijiex sottostanzjata bis-sħiħ minn miżuri u infiq akbar milli ppjanat jista' jkun jeħtieġ żborżi baġitarji ogħla. Skont it-tbassir tal-Kummissjoni, fl-2014 Malta hija mistennija tikkoreġi sostanzjalment id-defiċit eċċessiv tagħha. Fl-istess waqt, abbażi tat-tbassir tal-Kummissjoni, l-isforz fiskali fuq il-perjodu 2013-2014 ma jilħaqx b'1,6 % tal-PDG f'termini ta' bidla (ikkoreġuta) fil-bilanċ strutturali u b'1,25 % tal-PDG f'termini ta' ammont ta' miżuri meħtieġa stimati bħala meħtieġa fi żmien ir-rakkomandazzjoni tal-Proċedura ta’ Defiċit Eċċessiv. Filwaqt li ma hemm l-ebda marġini fir-rigward tal-konformità mal-parametru referenzjarju tat-tnaqqis tad-dejn fl-2014, ir-riskji għax-xenarju tad-dejn ixaqilbu lejn in-naħa pożittiva.

(10)

Fl-2015, hemm riskju ta’ devjazzjoni sinifikanti mill-progress meħtieġ lejn l-objettiv fuq terminu medju. Abbażi tal-valutazzjoni tagħha tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, l-opinjoni tal-Kunsill hija li, filwaqt li d-defiċit nominali pjanat u d-dejn tal-amministrazzjoni pubblika ta' Malta huma konformi mar-rakkomandazzjoni tal-Proċedura ta’ Defiċit Eċċessiv, huma meħtieġa sforzi addizzjonali biex l-aġġustament strutturali jinġieb f'konformità ma' dak rakkomandat fl-2014 u biex ikun żgurat perkors xieraq lejn l-objettiv fuq terminu medju mill-2015.

(11)

In-natura mhux vinkolanti tal-qafas fiskali ta' Malta u l-orizzont qasir tal-ippjannar fiskali mhumiex ta' sostenn għal pożizzjoni fiskali soda. L-adozzjoni tal-leġislazzjoni li kellha tidħol fis-seħħ sal-aħħar tal-2013 u mmirata lejn li jintlaħqu r-rekwiżiti tad-Direttiva tal-Kunsill 2011/85/UE (6) u l-Patt Fiskali ġiet ittardjata. Madankollu, skont il-Programm ta' Stabbiltà l-Gvern reċentement approva l-Att dwar ir-Responsabbiltà Fiskali, li ser jiġi sottomess għall-approvazzjoni tal-Parlament. L-abbozz tal-att jipprevedi l-introduzzjoni ta' regola ta' baġit bilanċjat f'termini strutturali, regola dwar id-dejn, qafas baġitarju rolling fuq tliet snin u l-istabbiliment gradwali ta' Kunsill Fiskali li jkun inkarigat bl-approvazzjoni tat-tbassir makroekonomiku u fiskali uffiċjali tal-gvern kif ukoll bil-monitoraġġ ex ante u ex post tar-rispett tar-regoli fiskali.

(12)

Id-dipartimenti tad-dħul ta' Malta se jiġu integrati f'awtorità unika, li se tirrazzjonalizza l-proċessi tal-ġbir tat-taxxa u tiġġieled l-evażjoni. Sabiex titjieb il-konformità tat-taxxa u jitħeġġeġ l-irkupru tal-ammonti dovuti, ġew riveduti l-penali fil-leġiżlazzjoni tal-VAT u l-imgħaxx fuq it-taxxi dovuti. Ġew introdotti diversi miżuri oħra li wkoll huma mistennija jikkonsolidaw is-sistema tat-taxxa ta' Malta. Dawn il-miżuri huma fid-direzzjoni t-tajba, iżda l-impatt tagħhom għadu jrid jibda jinħass.

(13)

Minkejja li għadhom jeżistu sfidi fir-rigward tas-sostenibbiltà fit-tul tal-finanzi pubbliċi ta' Malta, sa issa ftit sar progress fir-riformi tas-sistema tal-pensjonijiet tagħha u s-sostenibbiltà tas-servizzi tas-saħħa tagħha. Filwaqt li twaqqaf Grupp għall-Istrateġija tal-Pensjonijiet biex jivvaluta l-alternattivi kollha biex tiġi riformata s-sistema tal-pensjoni, l-awtoritajiet Maltin ikkommettew ruħhom li ma jgħollux l-età statutorja tal-irtirar aktar miż-żidiet li ddaħħlu fir-riforma tal-pensjoni tal-2006. Filwaqt li Malta beħsiebha tindirizza dawn in-nuqqasijiet b'miżuri fis-suq tax-xogħol u b'mod partikolari bl-istrateġija tat-tixjiħ attiv li adottat reċentement, x'aktarx li dan mhux ser isolvi l-problema. Is-sostenibbiltà tas-sistema tal-kura tas-saħħa żżid l-isfida fid-dawl ta' żieda pproġettata fl-infiq relatat mal-età. Għadu kif tnieda abbozz ta' strateġija tas-sistemi tas-saħħa nazzjonali, iżda mhuwiex ċar kif dan se jiġi implimentat u x'vantaġġi se jġib f'termini ta' kosteffettività u sostenibbiltà. Hemm bżonn li l-kura primarja pubblika tissaħħaħ.

(14)

It-tluq mill-iskola kmieni f'Malta għadu għoli, iżda qed jittieħdu miżuri biex dan jitnaqqas u qed titwaqqaf sistema komprensiva ta' monitoraġġ. Il-livell tal-ħiliet bażiċi għadu baxx madankollu u jikkontribwixxi għal litteraliżmu baxx u tluq mill-iskola kmieni. Implimentazzjoni tajba tal-Istrateġija Nazzjonali għal-Litteraliżmu li ġiet adottata dan l-aħħar hija mistennija ssostni l-isforzi li jindirizzaw dan in-nuqqas. Dan se jiġi kkumplimentat b'aktar miżuri, li huma mistennija jżidu r-rilevanza tat-taħriġ u l-edukazzjoni għas-suq tax-xogħol. Dawn jinkludu r-riforma fil-qafas tal-apprendistat, l-istabbiliment ta' strateġija għat-tagħlim tul il-ħajja kollha, l-introduzzjoni ta' tagħlim ibbażat fuq ix-xogħol fl-edukazzjoni u t-taħriġ vokazzjonali, u programm speċifiku finanzjat mill-Fond Soċjali Ewropew.

(15)

Malta bħalissa qed timplimenta għadd ta' miżuri sinifikanti li għandhom l-għan li jżidu l-parteċipazzjoni tan-nisa fis-suq tax-xogħol, b'mod partikolari permezz tal-għoti ta' servizzi ta' indukrar tat-tfal bla ħlas lil unitajiet domestiċi fejn il-ġenituri jaħdmu jew qed ikomplu jistudjaw. L-implimentazzjoni effettiva se tkun ta' importanza kruċjali. L-awtoritajiet qed jgħinu wkoll biex it-tfal jiġu indukrati wara l-ħin tal-iskola u joffru opportunitajiet biex it-tfal jintbagħtu l-iskola qabel il-ħinijiet tal-ftuħ stipulati, ħalli r-responsabbiltajiet ġeniturjali jkun jistgħu jiġu rikonċiljati aħjar mal-ħajja tax-xogħol. Huma wkoll previsti inċentivi tat-taxxa biex il-ġenituri jitħeġġu jibagħtu lit-tfal f'faċilitajiet għall-indukrar tat-tfal li diġà qed ħadmu skont skemi preċedenti. Madankollu ftit qed isir biex jingħataw u jiġi promoss l-użu ta' arranġamenti flessibbli ta' xogħol, bħal telexogħol u ħin flessibbli, li jistgħu jgħinu bir-reintegrazzjoni tan-nisa fis-suq tax-xogħol.

(16)

Sabiex titjieb aktar il-kompetittività internazzjonali tagħha, flimkien ma' li tevita l-impatt negattiv potenzjali ta' misallinjament bejn l-iżviluppi fil-pagi u l-produttività, Malta għad jeħtiġilha tindirizza n-nuqqasijiet infrastrutturali fis-setturi tal-enerġija u t-trasport li jdgħajfu l-potenzjal tagħha, b'mod partikolari fid-dawl tal-kosti elevati tal-enerġija. L-interkonnettur tal-elettriku mal-Italja għandu jkun lest din is-sena, u se jsaħħaħ is-sigurtà tal-provvista u jista' jikkontribwixxi għad-diversifikazzjoni tal-provvista u l-użu ta' enerġija rinnovabbli ġenerata esternament. It-terminal LNG ta' Delimara u l-konnessjoni pjanata man-netwerk Ewropew tal-gass ukoll se żżid it-taħlita tal-enerġija ta' Malta u trendiha inqas dipendenti fuq sors prinċipali wieħed ta' enerġija u b'hekk iżżid l-attrattività tagħha bħala post tan-negozju. Is-sorsi ta' enerġija rinnovabbli domestiċi, bl-eċċezzjoni ta' xi suċċess fejn tidħol l-enerġija fotovultajka, huma sors li għad irid jiġi sfruttat.

(17)

Ċerti ineffiċjenzi fl-amministrazzjoni pubblika qed ikomplu jillimitaw il-klima kummerċjali f'Malta. Filwaqt li t-titjib fl-akkwist pubbliku sejjer fid-direzzjoni t-tajba, il-proċeduri tal-akkwist għadhom twal iżżejjed u jwasslu għal infiq pubbliku ineffiċjenti. Dawn il-miżuri mhumiex akkumpanjati minn miri u għalhekk il-valutazzjoni tal-effikaċja tagħhom hija diffiċli. In-nuqqas ta' alternattivi għall-finanzjament tad-dejn iwassal għal kosti għoljin għall-finanzjament tal-kumpaniji, ħaġa li tpoġġi pressjoni fuq l-attività ekonomika tagħhom. Din it-tendenza tad-dejn korporattiv tista' twassal għal ingranaġġ korporattiv għoli u allokazzjoni mhux biżżejjed tal-kapital. Għalhekk jeħtieġ li jinstabu aktar opportunitajiet ta' finanzjament mhux bid-dejn. L-ineffiċjenzi fis-sistema ġuridika enfasizzati fir-rakkomandazzjonijiet speċifiċi għall-pajjiż tal-2013 għal Malta għadhom hemm. Filwaqt li huwa mistenni li għadd mill-ħafna proposti ta' riforma li għamlet il-Kummissjoni għar-Riforma tal-Ġustizzja f'Novembru 2013 se jiġu implimentati sal-aħħar tal-2014, għad iridu jitħabbru skeda u prijoritazzjoni tal-miżuri ċari. Wieħed għadu wkoll irid jara kif dawn se jindirizzaw ix-xogħol b'lura, partikolarment fir-rigward tan-nuqqasijiet identifikati hawn fuq.

(18)

Malta saħħet is-sorveljanza regolatorja tagħha biex tiżgura l-istabbiltà tas-settur finanzjarju. Is-superviżjoni makroprudenzjali żdiedet mal-funzjonijiet tal-Bank Ċentrali ta' Malta, u qed issir enfasi speċjali fuq il-kwistjonijiet ta' stabbiltà finanzjarja, filwaqt li l-Bord Konġunt għall-Istabilità Finanzjarja issa huwa mdaħħal fil-leġiżlazzjoni. Ittieħdu miżuri sodisfaċenti biex jitjieb il-provvediment għat-telf mis-self, l-aktar permezz tal-introduzzjoni ta' reviżjoni tar-Regola Bankarja nru 9.

(19)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika ta' Malta. Hija vvalutat il-Programm Nazzjonali ta’ Riforma u l-Programm ta’ Stabbiltà. Hija mhux biss ħadet kont tar-rilevanza tagħhom għall-politika fiskali u soċjoekonomika sostenibbli f'Malta iżda wkoll tal-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet minn (1) sa (5) hawn taħt.

(20)

Fid-dawl ta’ din l-evalwazzjoni, il-Kunsill eżamina l-Programm ta' Stabbiltà, u l-opinjoni tiegħu (7) hija riflessa b’mod partikolari fir-rakkomandazzjoni (1) hawn taħt.

(21)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-Żona tal-Euro inġenerali. Abbażi ta' dan, il-Kunsill ħareġ rakkomandazzjonijiet speċifiċi indirizzati lill-Istati Membri li għandhom il-munita tal-euro (8). Bħala pajjiż li l-munita tiegħu hija l-euro, Malta għandha tiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Tikkoreġi d-defiċit eċċessiv b'mod sostenibbli sal-2014. Fl-2015, issaħħaħ b'mod sinifikanti l-istrateġija baġitarja biex tiżgura l-aġġustament strutturali meħtieġ ta' 0,6 % tal-PDG lejn l-objettiv ta’ terminu medju. Għalhekk, twettaq aġġustament strutturali ta' mill-inqas 0,5 % tal-PDG kull sena, u aktar f'kundizzjonijiet ekonomiċi tajbin jew jekk meħtieġ li tiżgura li r-regola tad-dejn tintlaħaq sabiex il-proporzjon tad-dejn tal-amministrazzjoni pubblika jinżamm b'mod sostenibbli fid-direzzjoni 'l isfel. Tlesti l-adozzjoni tal-Att dwar ir-Responsabbiltà Fiskali bil-ħsieb li ddaħħal fis-seħħ qafas fiskali multiannwali abbażi ta' regoli u vinkolanti u tistabbilixxi istituzzjoni indipendenti inkarigata bil-monitoraġġ tar-regoli fiskali u li tapprova t-tbassir makroekonomiku li jissottostanzja l-ippjanar fiskali. Tkompli ssaħħaħ il-konformità mat-taxxa u tiġġieled l-evażjoni tat-taxxa billi tiżgura t-twettiq u l-evalwazzjoni tal-miżuri li ttieħdu s'issa, filwaqt li tieħu azzjoni addizzjonali, b'mod partikolari billi tippromwovi l-użu ta' mezzi elettroniċi tal-pagament.

2.

Sabiex ikun żgurat li s-sostenibbiltà fit-tul tal-finanzi pubbliċi tkompli r-riforma li għaddejja fil-pensjonijiet, bħal permezz tal-aċċellerazzjoni taż-żieda diġà adottata fl-età statutorja tal-irtirar u billi konsekuttivament jorbtuha mal-bidliet fl-istennija tal-għomor. Tiżgura li riforma komprensiva fis-sistema tas-saħħa pubblika twassal għal użu kosteffettiv u sostenibbli tar-riżorsi disponibbli, bħat-tisħiħ tal-kura primarja.

3.

Tkompli l-isforzi tal-politika biex tindirizza r-rilevanza tal-edukazzjoni u t-taħriġ għas-suq tax-xogħol u billi ttejjeb l-isforzi fuq ir-riforma tas-sistema tal-apprendistat. Ittejjeb aktar il-kisba ta’ ħiliet bażiċi u tnaqqas it-tluq bikri mill-iskola, b’mod partikolari bil-finalizzazzjoni u l-implimentazzjoni tal-istrateġija nazzjonali tal-litteriżmu mħabbra. Ittejjeb aktar il-parteċipazzjoni tan-nisa fis-suq tax-xogħol, b'mod partikolari ta' dawk li jixtiequ jerġgħu jidħlu fis-suq tax-xogħol billi tippromwovi arranġamenti ta' xogħol flessibbli.

4.

Tiddiversifika t-taħlita tal-enerġija fl-ekonomija, inkluż billi żżid il-porzjon ta' enerġija prodotta minn sorsi rinnovabbli.

5.

Tkompli l-isforzi biex tiżdied l-effiċjenza u tnaqqas it-tul ta' proċeduri ta' akkwist pubbliku; tinkoraġġixxi alternattivi għall-finanzjament ta' dejn tal-kumpanniji billi tiffaċilita l-aċċess għas-swieq kapitali u l-iżvilupp ta' fondi ta' kapital ta' riskju; u żżid l-effiċjenza tas-sistema ġudizzjarja billi tiżgura implimentazzjoni f'waqtha u effiċjenti tar-riforma ġudizzjarja ippjanata.

29.7.2014   

MT

Il-Ġurnal Uffiċjali tal-Unjoni Ewropea

C 247/88

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tniedi strateġija ġdida għat-tkabbir u l-impjiegi, l-Ewropa 2020, li tkun imsejsa fuq koordinazzjoni msaħħa tal-politiki ekonomiċi, u li tiffoka fuq l-oqsma ewlenin fejn tinħtieġ azzjoni li tagħti spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta’ Lulju 2010, il-Kunsill, fuq il-bażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (2010 sa 2014) u fil-21 ta’ Ottubru 2010, huwa adotta deċiżjoni dwar il-linji gwida għall-politiki tal-Istati Membri dwar l-impjiegi (3), li flimkien jagħmlu l-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż.

(4)

Fid-9 ta' Lulju 2013, il-Kunsill adotta Rakkomandazzjoni (4) dwar il-Programm Nazzjonali ta' Riforma 2013 tal-Pajjiżi l-Baxxi u wassal l-opinjoni tiegħu dwar il-Programm ta' Stabbiltà tal-Pajjiżi l-Baxxi aġġornat għall-2012‐2017. Fil-15 ta' Novembru 2013, skont ir-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha fuq l-abbozz ta' pjan baġitarju tal-Pajjiżi l-Baxxi għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lill-Pajjiżi l-Baxxi bħala wieħed mill-Istati Membri li għalihom ser issir reviżjoni approfondita.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Hu enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kondizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fil-5 ta' Marzu 2014, il-Kummissjoni ppubblikat ir-riżultati tar-reviżjoni approfondita dwar il-Pajjiżi l-Baxxi, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni wasslitha biex tikkonkludi li l-Pajjiżi l-Baxxi għadhom għaddejjin minn żbilanċi makroekonomiċi li jeħtieġu monitoraġġ u azzjoni politika. Partikolarment, l-iżviluppi makroekonomiċi fir-rigward tas-settur tad-dejn u d-diżingranaġġ fis-seħħ, flimkien mal-ineffiċjenzi li baqa' fis-suq tad-djar, jistħoqilhom attenzjoni. Għalkemm is-surplus kbir fil-kont kurrenti ma jimponix riskji bħal defiċits kbar, u huwa parzjalment marbut mal-ħtieġa għal diżingranaġġ, il-Kummissjoni se ssegwi l-iżviluppi fil-kont kurrenti tal-Pajjiżi l-Baxxi fil-kuntest tas-Semestru Ewropew.

(8)

Fid-29 ta' April 2014, il-Pajjiżi l-Baxxi ppreżentaw il-Programm Nazzjonali ta' Riforma tagħhom għall-2014, u fit-30 ta' April 2014 ippreżentaw il-Programm ta' Stabbiltà għall-2014. Biex jiġu kkunsidrati l-konnessjonijiet ta' bejniethom, iż-żewġ Programmi ġew ivvalutati fl-istess żmien.

(9)

L-objettiv tal-istrateġija tal-baġit spjegata fil-Programm ta' Stabbiltà tal-2014 huwa li jiġi żgurat li l-korrezzjoni tad-defiċit eċċessiv fl-2013 tkun sostenibbli, u li tintlaħaq pożizzjoni baġitarja qrib l-objettiv ta’ terminu medju sal-2015. L-objettiv ta’ terminu medju huwa defiċit strutturali ta' mhux aktar minn 0,5 % tal-PDG, li jirrifletti r-rekwiżiti tal-Patt ta' Stabbiltà u Tkabbir. Miżuri fiskali mdaqqsa addizzjonali kienu implementati, iżda l-iżbilanċ strutturali (rikalkulat) fl-2014 huwa ppjanat li jibqa' kostanti meta mqabbel mal-2013, li jindika devjazzjoni sinifikanti mill-aġġustament minimu meħtieġ ta' 0,5 % tal-PDG. Fl-2015, l-iżbilanċ strutturali (rikalkulat) huwa ppjanat li jitjieb b'0,3 punti perċentwali tal-PDG. In-nefqa tikber b'pass konsistenti mal-parametru referenzjarju tan-nefqa kemm fl-2014 kif ukoll fl-2015. Wara l-valutazzjoni kumplessiva tal-istrateġija baġitarja tal-Pajjiżi l-Baxxi, il-perkors tal-aġġustament lejn l-objettiv ta’ terminu medju huwa parzjalment konformi mar-rekwiżiti tal-Patt ta' Stabbiltà u Tkabbir. Skont il-Programm ta' Stabbiltà, id-dejn gross tal-gvern se jistabbilizza ruħu fl-2015 u minn hemm il-quddiem jonqos. Ix-xenarju makroekonomiku li jirfed il-proġettazzjonijiet baġitarji fil-Programm ta' Stabbiltà huwa plawsibbli u tħejja minn korp indipendenti, l-Uffiċċju ta' Analiżi ta' Politika Ekonomika tal-Pajjiżi l-Baxxi. Ir-riskji għall-miri baġitarji jidhru li huma mdaqqsa iżda ġeneralment ibbilanċjati. It-tbassir tar-rebbiegħa 2014 tas-servizzi tal-Kummissjoni jipprevedi stabbilizzazzjoni tal-bilanċ strutturali fl-2014 u titjib ta' 0,5 % tal-PDG fl-2015. Skont it-tbassir tal-Kummissjoni, il-Pajjiżi l-Baxxi se jaderixxu mal-parametru referenzjarju tan-nefqa fl-2014, iżda mhux fl-2015. Sabiex jitjieb il-potenzjal tat-tkabbir tal-Pajjiżi l-Baxxi, huwa ta' importanza massima li l-konsolidazzjoni meħtieġa tissalvagwardja n-nefqa li ttejjeb it-tkabbir, bħall-innovazzjoni u r-riċerka, fosthom ir-riċerka fundamentali, l-edukazzjoni u t-taħriġ. Abbażi tal-valutazzjoni tiegħu tal-Programm ta' Stabbiltà u t-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li l-Pajjiżi l-Baxxi ġabu d-defiċit tal-amministrazzjoni pubblika tagħhom b'mod sostenibbli taħt it-3 % tal-PDG fl-2013, iżda mill-2014 jinsabu f'riskju ta' devjazzjoni sinifikanti mir-rekwiżiti tal-fergħa preventiva.

(10)

Sfida ewlenija tinsab fis-suq tad-djar, fejn riġiditajiet u inċentivi distortivi ilhom jinġemgħu tul id-diċennji biex jiffurmaw il-finanzjament tad-djar u x-xejriet fis-settur tat-tfaddil. It-tendenza tal-unitajiet domestiċi li jingranaw id-dejn ipotekarju gross ma' patrimonju immobbiljari tirrifletti bil-kbir l-inċentivi fiskali li ilhom jeżistu, b'mod partikolari d-deduċibbiltà sħiħa mit-taxxa tal-interessi ipotekarji. Minn April 2012, ġew implimentati serje ta' miżuri biex parzjalment jindirizzaw dawn l-inċentivi. Xi wħud minn dawn jinvolvu aġġustamenti fit-trattament fiskali tal-finanzjament tad-djar. Il-mossa gradwali biex tiġi limitata d-deduċibbiltà mit-taxxa tal-interessi ipoketarji u jiżdied l-inċentiv għall-ammortizzazzjoni hija ġustifikata, iżda t-tnedija gradwali ta' din il-miżura hija bil-mod wisq biex tinfluwenza l-imġiba tal-ammortizzazzjoni. Il-proporzjon tas-self mal-valur ta' 100 %, li għandu jintlaħaq fl-2018, għadu għoli. Is-suq tal-kiri huwa ristrett bir-regolamentazzjoni u l-preżenza qawwija ta' settur tal-akkomodazzjoni soċjali kbir ħafna li xorta waħda jkollu jaffaċċa listi ta' stennija twal. L-introduzzjoni reċenti ta' differenzjar tal-kera abbażi tal-introjtu fis-settur tal-akkomodazzjoni soċjali hija pass fid-direzzjoni t-tajba, iżda l-impatt tiegħu huwa limitat. Il-korporazzjonijiet tal-akkomodazzjoni soċjali xorta waħda jistgħu jibnu postijiet b'rata mensili ogħla mil-limitu tal-kiri soċjali. Minkejja li r-rakkomandazzjonijiet tal-2013 talbu għal attenzjoni partikolari fuq l-unitajiet domestiċi l-aktar fil-bżonn, għadha għaddejja l-ħidma fuq din ir-ridirezzjoni. Għalhekk, filwaqt li l-miżuri proposti huma passi fid-direzzjoni t-tajba, il-pass inġenerali tar-riformi huwa bil-mod fl-indirizzar tal-problemi sottostanti u għalhekk jeħtieġ jitħaffef meta l-ekonomija tkun tippermetti, filwaqt li jibqa' jiġi żgurat li jkun hemm akkomodazzjoni soċjali disponibbli għaċ-ċittadini żvantaġġati li ma jistgħux jiksbu residenza bil-kondizzjonijiet tas-suq, fosthom f'lokalitajiet b'domanda għolja.

(11)

Is-sostenibbiltà fit-tul tas-sistema tal-pensjonijiet tjiebet permezz ta' żieda gradwali fl-età statutorja tal-irtirar minn 65 sena fl-2012 għal 67 sena fl-2023. Il-Pajjiżi l-Baxxi bdew riformi komprensivi fil-pilastri finanzjati pubblikament u privatament tas-sistema tal-pensjonijiet u fis-sistema ta' kura fit-tul. Dan huwa kkumplimentat b'riformi li jħeġġu lill-ħaddiema akbar fl-età biex jaħdmu għal aktar żmien u biex tiżdied il-mobilità fis-suq tax-xogħol. Ir-riformi fil-kura fit-tul tefgħu r-responsabbiltajiet fuq il-muniċipalitajiet, bi tnaqqis tan-nefqa inġenerali u attenzjoni partikolari fuq ameljorament fl-effiċjenza. Partijiet minn dawn ir-riformi sostanzjali għadhom iridu jiġu adottati. L-isfidi li fadal jinkludu distribuzzjoni xieraq bejn il-ġenerazzjonijiet u fi ħdanhom tal-kostijiet u r-riskji, u l-monitoraġġ tal-kwalità u l-aċċessibbiltà tal-ħtiġijiet ta' kura fit-tul. L-implimentazzjoni tal-pjanijiet għar-riforma tal-kura fit-tul tgħin biex jitrażżnu l-kostijiet tat-tixjiħ li qed jogħlew b'mod rapidu u għalhekk tappoġġa s-sostenibbiltà tal-finanzi pubbliċi. F'dan ir-rigward, il-kwalità u l-aċċessibbiltà għall-kura fit-tul għandhom jinżammu f'livell adegwat.

(12)

Ir-riformi proposti mill-Gvern fis-suq tax-xogħol jimmiraw li jżidu l-parteċipazzjoni u l-mobbiltà fis-suq tax-xogħol. L-Att tal-Parteċipazzjoni għandu l-għan li jsaħħaħ il-parteċipazzjoni fis-suq tax-xogħol. Mandankollu, ir-riformi għadhom mhumiex miktuba f'liġi. Barra minn hekk, huma meħtieġa aktar miżuri biex jitnaqqsu d-diżinċentivi fiskali għax-xogħol u titjieb l-impjegabbiltà tal-persuni fil-marġini tas-suq tax-xogħol, fosthom in-nisa, nies bi sfond migratorju, nies b'diżabbiltà u l-anzjani. Il-Pajjiżi l-Baxxi ħabbru riformi fl-iskema tal-benefiċċji tal-qgħad u fil-leġiżlazzjoni relattivament stretta tal-protezzjoni tax-xogħol, inkluż inċentiv tat-taxxa biex tiżdied il-parteċipazzjoni. Madankollu, filwaqt li dawn il-miżuri jmorru fid-direzzjoni t-tajba, huma ma jistgħux jiġu vvalutati bis-sħiħ qabel jiġu implimentati fir-realtà. It-tħaffif tat-tneħħija tad-diżinċentivi li baqa' għal dawk l-unitajiet domestiċi b'tieni sors ta' introjtu biex iżidu s-siegħat li jaħdmu għandu l-potenzjali li jtaffi aktar in-nuqqas ta' forniment ta' ħaddiema fil-futur. Fl-aħħar mill-aħħar, l-użu aħjar tal-flessibbiltà eżistenti fil-qafas istituzzjonali għal żidiet aktar differenzjati fis-salarji jista' jsostni l-introjtu inġenerali tal-unitajiet domestiċi u għalhekk tad-domanda domestika mingħajr ma jkun ta' ħsara għall-kompetittività.

(13)

Fil-kuntest tas-Semestru Ewropew, il-Kummissjoni għamlet analiżi komprensiva tal-politika ekonomika tal-Pajjiżi l-Baxxi. Hija vvalutat il-Programm Nazzjonali ta' Riforma u l-Programm ta' Stabbiltà. Hija qieset mhux biss ir-rilevanza tagħhom għall-politika fiskali u soċjoekonomika sostenibbli fil-Pajjiżi l-Baxxi iżda anki l-konformità tagħhom mar-regoli u l-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew jidhru fir-rakkomandazzjonijiet (1) sa (4) hawn taħt.

(14)

Fid-dawl ta’ din il-valutazzjoni, il-Kunsill eżamina l-Programm ta’ Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) ta' hawn taħt.

(15)

Fid-dawl tar-reviżjoni approfondita tal-Kummissjoni u din il-valutazzjoni, il-Kunsill eżamina l-Programm Nazzjonali ta' Riforma u l-Programm ta' Stabbiltà. Ir-rakkomandazzjonijiet tiegħu skont l-Artikolu 6 tar-Regolament (UE) Nru 1176/2011 huma riflessi fir-rakkomandazzjonijiet (2) u (4) hawn taħt.

(16)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-żona tal-euro b'mod sħiħ. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7). Bħala pajjiż li l-valuta tiegħu hija l-euro, il-Pajjiżi l-Baxxi għandu jiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Wara l-korrezzjoni tad-defiċit eċċessiv, isaħħaħ il-miżuri baġitarji għall-2014 fid-dawl tad-differenza emerġenti ta' 0,5 % tal-PDG abbażi tat-tbassir tar-rebbiegħa tas-servizzi tal-Kummissjoni għall-2014, li jindika riskju ta' devjazzjoni sinifikanti mqabbel mar-rekwiżiti tal-parti preventiva tal-Patt ta' Stabbiltà u Tkabbir. Fl-2015, isaħħaħ b'mod sinifikanti l-istrateġija baġitarja biex jiżgura li jintlaħaq l-objettiv ta’ terminu medju u wara dan jibqgħu jżommuh, u jiżguraw li r-regola tad-dejn tintlaħaq sabiex iżommu l-proporzjon tad-dejn ġenerali tal-gvern f'perkors sostenibbli 'l isfel. Jipproteġi n-nefqa f'oqsma li huma direttament rilevanti għat-tkabbir bħall-edukazzjoni, l-innovazzjoni u r-riċerka.

2.

Fejn l-ambjent ekonomiku jippermetti dan, iżid l-isforzi biex jirriforma s-suq tad-djar billi jżid ir-ritmu tat-tnaqqis tad-deduċibbiltà tal-interessi ipoketarji mit-taxxa, billi jipprovdi għal mekkaniżmu tal-ipprezzar orjentat aktar lejn is-suq tal-kiri, u billi jorbot aktar il-kirjiet mal-introjtu tal-unitajiet domestiċi fis-settur tal-akkomodazzjoni soċjali. Jimmonitorja l-effetti tar-riformi fil-qasam tal-akkomodazzjoni soċjali f'termini ta' aċċessibbiltà u affordabbiltà għall-unitajiet domestiċi bi dħul baxx. Ikompli l-isforzi biex jirridirezzjona l-politiki tal-akkomodazzjoni soċjali biex jgħin lill-unitajiet domestiċi l-aktar fil-bżonn.

3.

Jimplimenta riformi fit-tieni pilastru tas-sistema tal-pensjonijiet, jiżgura distribuzzjoni xierqa bejn il-ġenerazzjonijiet u fi ħdanhom tal-kostijiet u r-riskji. Jissottostanzjaw iż-żieda gradwali tal-età statutorja tal-irtirar b'miżuri biex itejjeb l-impjegabbiltà tal-ħaddiema ixjaħ. Jimplimenta r-riforma prevista fil-qasam tal-kura fit-tul bil-għan li jiżgura s-sostenibbiltà, filwaqt li jiżgura aċċess ġust u l-kwalità tas-servizzi u jimmonitorja l-effetti tagħha.

4.

Jieħdu aktar miżuri biex itejbu l-parteċipazzjoni fis-suq tax-xogħol partikolarment fost persuni fil-marġini tas-suq tax-xogħol u jnaqqsu d-diżinċentivi tat-taxxa fuq ix-xogħol. Jimplimentaw riformi fil-leġiżlazzjoni tal-protezzjoni tax-xogħol u s-sistema tal-benefiċċji tal-qgħad, u jindirizzaw aktar ir-riġiditajiet tas-suq tax-xogħol. F'konsultazzjoni mas-sħab soċjali u skont il-prassi nazzjonali, jippermettu żidiet aktar differenzjati fis-salarji billi jużaw bis-sħiħ il-qafas istituzzjonali eżistenti.

29.7.2014   

MT

Il-Ġurnal Uffiċjali tal-Unjoni Ewropea

C 247/92

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tvara strateġija ġdida għall-impjiegi u t-tkabbir, Ewropa 2020, imsejsa fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn jeħtieġ azzjoni biex tingħata spinta lill-potenzjal tal-Ewropa għat-tkabbir sostenibbli u l-kompetittività.

(2)

Fit-13 ta’ Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u, fil-21 ta’ Ottubru 2010, dan adotta deċiżjoni dwar il-linji gwida għall-politika tal-Istati Membri dwar l-impjiegi (2), li flimkien jagħmlu l-“linji gwida integrati”. L-Istati Membri ġew mistiedna jqisu l-linji gwida integrati fil-politiki nazzjonali tagħhom fir-rigward tal-ekonomija u tal-impjiegi.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għall-azzjoni fuq il-livelli nazzjonali, tal-UE u taż-Żona tal-Euro bl-użu tal-għodod, strumenti u politiki kollha. Huma ddeċidew fuq azzjoni li għandha tittieħed fuq il-livell tal-Istati Membri, fejn b'mod partikolari esprimew l-impenn sħiħ tagħhom biex jiksbu l-objettivi tal-Istrateġija Ewropa 2020 u biex jimplimentaw ir-rakkomandazzjonijiet speċifiċi għall-pajjiżi.

(4)

Fid-9 ta’ Lulju 2013, il-Kunsill adotta Rakkomandazzjoni (3) dwar il-Programm Nazzjonali ta’ Riforma tal-Awstrija għall-2013 u ta l-opinjoni tiegħu dwar il-Programm ta’ Stabbiltà aġġornat tal-Awstrija għall-perjodu 2012-2017. Fil-15 ta' Novembru 2013, f'konformità mar-Regolament (UE) Nru 473/2013 tal-Parlament Ewropew u tal-Kunsill (4), il-Kummissjoni ppreżentat l-opinjoni tagħha dwar l-abbozz ta' pjan baġitarju tal-Awstrija għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li kien jirrappreżenta l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (5), adottat ir-Rapport dwar il-Mekkaniżmu ta’ Twissija, li fih l-Awstrija ma kinitx identifikata bħala wieħed mill-Istati Membri li kellha ssirlu reviżjoni fil-fond.

(6)

Fl-20 ta' Diċembru 2013, il-Kunsill Ewropew endorsja l-prijoritajiet biex jiġu żgurati l-istabbiltà finanzjarja, il-konsolidazzjoni fiskali u l-azzjoni biex jitrawwem it-tkabbir. Huwa enfasizza l-ħtieġa li tkun segwita konsolidazzjoni fiskali differenzjata li tiffavorixxi t-tkabbir, li jerġgħu jinġiebu l-kundizzjonijiet normali għas-self fl-ekonomija, li jiġu promossi t-tkabbir u l-kompetittività, li jiġu indirizzati l-qgħad u l-konsegwenzi soċjali tal-kriżi, u li tiġi mmodernizzata l-amministrazzjoni pubblika.

(7)

Fit-8 ta' April 2014, l-Awstrija ppreżentat il-Programm Nazzjonali ta' Riforma tagħha tal-2014 u, fid-29 ta' April 2014, il-Programm ta' Stabbiltà tal-2014 tagħha. Sabiex jitqiesu l-konnessjonijiet ta' bejniethom, iż-żewġ programmi kienu vvalutati fl-istess waqt.

(8)

L-objettiv tal-istrateġija baġitarja spjegata fil-Programm ta' Stabbilità tal-2014 huwa li jkun sodisfatt l-objettiv fuq terminu medju tad-defiċit strutturali ta' mhux aktar minn 0,45 % tal-PDG sal-2016, li jirifletti r-rekwiżiti tal-Patt ta' Stabbiltà u Tkabbir. Id-defiċit tal-amministrazzjoni pubblika tnaqqas b'mod sostenibbli għal anqas minn 3 % tal-PDG fl-2013. Il-bilanċ strutturali (rikalkulat) kien ippjanat li jibqa' kostanti fl-2014 u li jtejjeb il-PDG b'0,3 punti perċentwali fl-2015, u jonqos milli jissodisfa l-aġġustament meħtieġ matul is-sentejn b'mod sinifikanti. Tkabbir fuq in-nefqa se jiddevja wkoll b'mod sinifikanti mill-valur referenzjarju fl-2014 u fl-2015. Fit-12 ta' Mejju 2014, l-Awstrija ħabbret sett ta' miżuri addizzjonali tad-dħul u n-nefqa. Sakemm dawn il-miżuri jkunu implimentati b'mod strett u f'waqthom, l-istrateġija baġitarja tal-Awstrija ma għadhiex timplika devjazzjoni ppjanata sinifikanti mit-triq ta' aġġustament lejn l-objettiv fuq żmien qasir fl-2014. Fl-istess waqt, l-aġġustament ippjanat lejn l-objettiv fuq żmien medju għadu qed jippreżenta riskji fir-rigward tal-konformità mar-rekwiżiti tal-Patt ta' Stabbiltà u Tkabbir. Skont il-Programm ta' Stabbiltà, id-dejn gross tal-amministrazzjoni pubblika se jiżdied b'mod sinifikanti minn qrib is-74,5 % tal-PDG fl-2013 għal 79 % tal-PDG fl-2014, minħabba l-impatt tal-istabbiliment ta' Entità għal-Likwidazzjoni għall-assi ta' Hypo Alpe Adria, waqt li d-dejn se jibda jonqos mill-2015 'il quddiem.

Ix-xenarju makroekonomiku li jirfed il-proġettazzjonijiet baġitarji fil-Programm ta' Stabbiltà huwa plawsibbli u tħejja minn korp indipendenti, l-Istitut Awstrijak għar-Riċerka Ekonomika (WIFO). Il-Previżjoni tar-Rebbiegħa tas-servizzi tal-Kummissjoni għall-2014 tistenna li d-defiċit jibqa' taħt it-3 % fl-2014 u l-2015. Madankollu hija tipproġetta deterjorament tal-bilanċ strutturali fl-2014 u titjib tal-PDG ta' 0,1 % biss fl-2015. Abbażi tal-valutazzjoni tal-Programm ta' Stabbiltà u tal-previżjoni tal-Kummissjoni kif ukoll tal-valutazzjoni tagħha tal-miżuri addizzjonali mħabbra fit-12 ta' Mejju, skont ir-Regolament (KE) Nru 1466/97, il-Kunsill huwa tal-opinjoni li l-Awstrija kkoreġiet b'mod sostenibbli d-defiċit eċċessiv tagħha, iżda għad hemm riskju ta' devjazzjoni sinifikanti mit-triq għall-aġġustament lejn l-objettiv fuq żmien medju fl-2014 u l-2015.

(9)

F'konformità mat-Trattat dwar l-Istabbiltà, il-Koordinazzjoni u l-Governanza, l-Awstrija saħħet il-qafas fiskali tagħha fl-2012 permezz ta' riforma tal-Patt ta' Stabbiltà Intern Awstrijak. Il-mandat tal-Kunsill Fiskali Awstrijak kien estiż minn Novembru 2013 b'risposta għar-rekwiżiti tal-Patt Fiskali. Il-ħtieġa għal riforma bir-reqqa tar-relazzjonijiet tal-livelli differenti tal-gvern biex ikunu simplifikati aħjar ir-responsabbiltajiet rispettivi tagħhom, tibqa' madankollu, kif rikonoxxuta fil-ftehim ta' koalizzjoni.

(10)

Nefqiet fuq iż-żmien medju u dak twil tal-pensjonijiet u tal-kura tas-saħħa u sa ċertu punt inqas dawk għall-kura fit-tul joħolqu riskju għas-sostenibbiltà tal-finanzi pubbliċi. Fl-2014, daħlu fis-seħħ xi miżuri biex ikun limitat l-aċċess għall-iskemi ta' rtirar bikri u biex iżidu l-inċentivi biex wieħed jibqa' fl-impjieg għal aktar żmien. Madankollu, ir-rata effettiva tal-irtirar ta' 58,4 snin fl-2012 hija sew inqas mill-medja tal-UE. Hija tibqa' sew inqas mill-età statutorja tal-irtirar (b'5,6 snin għall-irġiel u b'2,6 snin għan-nisa fl-2012). Il-Programm Nazzjonali ta' Riforma fih miri fuq żmien qasir relattivament ambizzjużi biex l-età ta' rtirar effettiv tiżdied b'1,6 snin bejn l-2012 u l-2018 u l-implimentazzjoni tagħhom trid tkun immonitorjata mill-qrib. Ir-riformi reċenti fis-sistema tal-pensjonijiet probabbilment inaqqsu r-riskji għas-sostenibbiltà, sa ċertu punt, jekk ikunu akkumpanjati ma' titjib fil-kundizzjonijiet tas-suq tax-xogħol li jħallu ħaddiema kbar fl-età jdumu aktar fl-impjieg tagħhom. Madankollu ma hemm l-ebda pjan biex ikunu introdotti miżuri aktar strutturali u b'effett fit-tul, bħall-aċċellerazzjoni tal-armonizzazzjoni tal-età statutorja tal-irtirar għall-irġiel u n-nisa u l-allinjament tal-età tal-irtirar mal-bidliet fl-istennija tal-għomor, li addizzjonalment tikkontribwixxi għall-ħajjiet itwal ta' xogħol u għas-sostenibbiltà' finanzjarja tas-sistema tal-pensjonijiet.

(11)

Allokazzjoni effiċjenti tar-riżorsi fis-sistema tas-saħħa Awstrijaka hija mfixkla minn struttura ta' governanza kumplessa u ffukar relattivament qawwi fuq is-settur kbir u ogħli tal-isptarijiet. Ittieħdu xi miżuri biex tkun implimentata r-riforma tal-kura tas-saħħa u biex tiżdied il-kosteffettività tan-nefqa pubblika. Madankollu, jistgħu ma jkunux suffiċjenti biex jindirizzaw id-dgħufijiet strutturali fis-settur u għad baqa' l-ħtieġa li jkunu stabbiliti miri aktar serji biex issir il-bidla minn kura fl-isptar għal kura barra mill-isptar u biex tissaħħaħ il-kura tas-saħħa preventiva, li għaliha n-nefqa pubblika qiegħda taħt il-medja tal-UE. Il-miżuri mħabbra biex issaħħaħ il-forniment tal-kura primarja u biex tiżviluppa programmi ta' kura integrata għall-mard kroniku kienu milqugħa tajjeb. Il-fond għall-kura fit-tul, li kien estiż għall-2016 b'EUR 650 miljun addizzjonali u li huwa ppjanat li se jkun estiż ulterjorment għall-2018 b'EUR 700 miljun oħra, jipprovdi soluzzjoni interim għall-finanzjament tas-servizzi tal-kura. Is-sostenibbiltà' finanzjarja tal-kura fit-tul se teħtieġ attenzjoni anki lil hinn minn din l-iskeda taż-żmien.

(12)

Is-sistema tat-taxxa Awstrijaka tkompli tkun karatterizzata minn taxxa ogħla u piż tas-sigurtà soċjali fuq ix-xogħol, partikolarment b'introjtu baxx. Taxxi fuq ix-xogħol jiffurmaw 24,7 % tal-PDG fl-2012, wieħed mill-ogħla fl-Unjoni. Il-porzjon ta' taxxa jammonta għal kważi 50 % tal-ispejjeż tax-xogħol. Kontribuzzjonijiet soċjali għoljin u taxxi fuq l-introjtu tad-dħul x'aktarx li jnaqqsu l-inċentivi għax-xogħol ta' dawk l-individwi b'potenzjal ta' dħul baxx u għat-tieni sors ta' dħul.

Il-pakkett tat-taxxa adottat reċentement jinkludi miżuri limitati biex jitnaqqas il-piż tat-taxxa fuq il-manodopera iżda ma jisfruttax il-potenzjal ta' bidla fit-taxxi lekn taxxi li huma inqas detrimentali għat-tkabbir, bħat-taxxi rikorrenti fuq il-proprjetà immobbli, fejn l-estimi tal-valuri taxxabbli huma skaduti.

(13)

Is-suq tax-xogħol Awstrijak għadu qed jiffunzjona bl-inqas rata ta' qgħad fl-Unjoni (2013: 4,9 %). Madankollu, l-isfidi futuri li jirriżultaw mit-tixjiħ demografiku u forza lavorattiva li qed tonqos jesiġu użu aħjar tal-potenzjal tas-suq tax-xogħol sottoutilizzat tal-ħaddiema aktar maturi, tan-nisa u tal-migranti. Ir-rata ta' impjieg tal-ħaddiema aktar maturi tibqa' taħt il-medja tal-UE (44,9 % meta mqabbla ma' 50,3 %), minkejja li din ir-rata żdiedet sostanzjalment mis-sena 2000 bi kważi 15-il punti perċentwali għal 44,9 % fl-2013. Miżuri biex jikkontrollaw l-irtirar kmieni qed isiru effettivi fl-2014 u qed jitħejjew miżuri ulterjuri biex isaħħu l-inċentivi għal-ħruġ aktar tard mis-suq tax-xogħol. Madankollu, għad hemm diffikultajiet biex ħaddiema aktar maturi jibqgħu fis-suq tax-xogħol jew jerġgħu jidħlu fih. Il-migranti jkomplu jiffaċċaw ostakoli għall-integrazzjoni sħiħa fis-suq tax-xogħol u rati ta' qgħad ogħla b'mod sinifikanti, parzjalment minħabba l-ostakoli li fadal għar-rikonoxximent tal-kwalifiki tagħhom, waqt li jikkostitwixxu parti dejjem tikber tal-forza tax-xogħol. Waqt li r-rata ta' impjieg tan-nisa ta' 70,8 % fl-2013 hija relattivament għolja, hija ferm inqas favorevoli f'ekwivalenti għall-full time (55,6 % fl-2012). L-Awstrija għandha waħda mill-ogħla perċentwali ta' nisa f'impjieg part-time u konċentrazzjoni għolja ta' nisa f'impjiegi b'pagi baxxi. B'konsegwenza ta' dan, id-differenza bejn il-pagi u l-pensjonijiet tal-irġiel u n-nisa hija waħda mill-ogħla fl-Unjoni. Għalkemm ittieħdu xi miżuri biex itejbu l-indukrar tat-tfal u s-servizzi għall-kura fit-tul, id-disponibbiltà għadha limitata.

(14)

L-Awstrija tejbet l-eżiti edukattivi fil-kategoriji kollha kif imkejla mill-istħarriġ tal-OECD tal-2012 dwar il-ħiliet tal-istudenti, iżda l-kisbiet fil-qari għadhom taħt il-medja tal-UE u l-isfond soċjoekonomiku għad għandu influwenza sinifikanti fuq il-kisbiet edukattivi. Waqt li kumplessivament il-mira għat-tluq bikri mill-iskola ntlaħqet, ir-rata ta' studenti li twieldu barra mill-pajjiż, li jikkostitwixxu għadd dejjem jikber ta' studenti, kienet aktar minn tliet darbiet ogħla minn dik ta' dawk li twieldu fl-Awstrija (18,5 % meta mqabbla ma' 5,7 % fl-2012). Enfasi insuffiċjenti titqiegħed fuq il-prevenzjoni mit-tluq bikri mill-iskola u għad irid ikun żviluppat approċċ strateġiku nazzjonali għall-edukazzjoni bikrija tat-tfal ta' livell għoli. Xi riformi għal aspetti varji tas-sistema skolastika, partikolarment il-varar tal-programm tal-Iskola Medja Ġdida, għadhom għaddejjin jew għadhom kif ġew adottati. Il-potenzjal li Skola Medja Ġdida ttaffi l-effetti negattivi tat-tqassim tal-istudenti f'tipi differenti ta' skejjel wara erba' snin ta' skola elementari (“intraċċar bikri”) għal dawk soċjalment żvantaġġati u ttejjeb l-eżiti tat-tagħlim għandu jkun monitorjat mill-qrib. Fl-edukazzjoni għolja, iż-żieda fl-għadd ta' studenti miktuba titfa' pressjoni fuq il-finanzi u l-organizzazzjoni, waqt li l-perċentwali ta' studenti li jlestu l-programmi jibqa' taħt il-medja tal-UE. It-titjib tal-eżiti edukattivi jibqa' importanti ħafna sabiex tkun faċilitata t-triq mill-edukazzjoni għall-impjiegi.

(15)

Għad hemm ostakoli regolatorji sinifikanti li jfixklu lill-kumpaniji u l-professjonisti individwali milli joffru s-servizzi tagħhom fl-Awstrija. Leġiżlazzjoni li tirregola professjonijiet speċifiċi tillimita l-forom tal-kumpaniji u timponi rekwiżiti azzjonarji, waqt li fl-istess waqt tagħti aċċess għal professjonijiet individwali hija soġġetta għal kwalifiki professjonali speċifiċi u l-istabbiliment ta' kumpaniji interdixxiplinarji tas-servizzi tibqa' diffiċli. Il-kombinament ta' dawn ir-rekwiżiti toħloq ostakoli għad-dħul fis-suq u għall-eżerċitar tas-servizzi professjonali li tillimita l-kompetizzjoni. Fir-rigward tar-rekwiżiti tal-kwalifika professjonali, l-Awstrija qed tipparteċipa fl-eżerċizzju ta' evalwazzjoni reċiproka madwar l-UE u aġġornat il-bażi tad-dejta tagħha ta' professjonijiet irregolati bħala l-ewwel pass għall-valutazzjoni tal-ġustifikazzjoni u l-proporzjonalità tar-rekwiżiti ta' kwalifika professjonali.

(16)

Ir-rekwiżiti ta' pubblikazzjoni fil-leġiżlazzjoni ta' akkwist tal-UE għandhom l-għan li jiżguraw il-kompetizzjoni u t-trattament ugwali permezz ta' informazzjoni aħjar dwar l-opportunità ta' kuntratt, li hija kundizzjoni ewlenija għall-aċċess għas-suq. Grad ogħla ta' kompetizzjoni fost l-offerenti ġeneralment tirriżulta f'offerti aktar favorevoli għall-entitajiet tal-akkwist inkluż tnaqqis sostanzjali tal-prezzijiet. Madankollu, il-valur tas-sejħiet għall-offerti ppubblikati mill-awtoritajiet Awstrijaki u entitajiet fil-leġiżlazzjoni ta' akkwist tal-UE kien ta' 1,5 % tal-PDG u 6,6 % tan-nefqa pubblika totali fuq ix-xogħlijiet, beni u servizzi fl-2012, inqas sew mill-medji tal-UE ta' 3,4 % u 17,7 % rispettivament. Din is-sitwazzjoni toħloq spejjeż konsiderevoli għall-kontribwent Awstrijak u għan-negozji f'termini ta' opportunitajiet ta' negozju mitlufa.

(17)

Minkejja żidiet fil-baġit tal-Awtorità Federali Awstrijaka tal-Kompetizzjoni, hija għad għandha nuqqas sinifikanti tal-persunal meta mqabbla mal-awtoritajiet ta' Stati Membri oħra ta' daqs simili u dawk iżgħar. Is-swieq tal-ferrovija Awstrijaki tal-merkanzija u l-passiġġieri jibbenefikaw minn sforzi ulterjuri biex titrawwem il-kompetizzjoni, kif irrakkomandat mill-Kunsill fl-2013.

(18)

Waqt li l-kapitalizzazzjoni kumplessiva tas-settur bankarju kompliet titjib fl-2013, sforzi ulterjuri biex jissaħħu l-bafers kapitali jidhru li huma meħtieġa meta wieħed jikkunsidra l-profil tar-riskju tal-banek. Fl-2013 il-Kunsill irrakkomanda li l-Awstrija tħaffef ir-ristrutturar tal-banek nazzjonalizzati u dawk parzjalment nazzjonalizzati. Fil-preżent, il-qafas ġuridiku għall-istralċ ta' Hypo Alpe Adria għandu jkun ippreżentat għall-adozzjoni mill-Parlament sas-sajf. It-tħejjija organizzattiva għat-twaqqif tal-kumpanija maniġerjali tal-assi (KMA) rispettiva tinsab għaddejja. Il-KMA hija mistennija ssir operattiva fil-ħarifa. Österreichische Volksbanken AG u l-bank tal-assi ħżiena ta' Kommunalkredit, KA Finanz, ikompli bir-ristrutturar jew l-istralċ tagħhom, rispettivament, f'konformità mad-deċiżjonijiet mal-għajnuna mill-Istat tal-UE. Passi trasparenti u deċiżivi biex ilestu r-ristrutturar tal-banek nazzjonalizzati tkun essenzjali għas-salvagwardja tal-istabbiltà finanzjarja u biex ikunu mminimizzati l-effetti negattivi fuq il-finanzi pubbliċi.

(19)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Awstrija. Hija vvalutat il-Programm Nazzjonali ta' Riforma u l-Programm ta' Stabbiltà. Mhux biss qieset ir-rilevanza tagħhom għall-politika fiskali u soċjoekonomika sostenibbli fl-Awstrija imma qieset ukoll il-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet (1) sa (5) hawn taħt.

(20)

Fid-dawl ta’ din il-valutazzjoni, il-Kunsill eżamina l-Programm ta’ Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) ta' hawn taħt.

(21)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika fiż-Żona tal-Euro bħala entità sħiħa. Fuq din il-bażi, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7). Bħala pajjiż li l-munita tiegħu hija l-euro, l-Awstrija għandha tiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Wara l-korrezzjoni tad-defiċit eċċessiv, issaħħaħ il-miżuri baġitarji għall-2014 fid-dawl tad-distakk emerġenti ta' madwar 0,5 % tal-PDG abbażi tal-Previżjoni tar-Rebbiegħa tas-servizzi tal-Kummissjoni għall-2014 u wara li jitqiesu miżuri oħrajn ta' konsolidazzjoni mħabbra mill-Awstrija, li jindikaw riskju ta' devjazzjoni sinifikanti fir-rigward tar-rekwiżiti tal-parti preventiva tal-Patt ta' Stabbiltà u Tkabbir. Fl-2015, issaħħaħ b'mod sinifikanti l-istrateġija baġitarji biex tiżgura li l-objettiv fuq żmien medju jintlaħaq, u li jinżamm wara dan, u tiżgura li r-regola tad-dejn tkun sodisfatta sabiex il-proporzjon tad-dejn tal-amministrazzjoni pubblika jkompli fit-triq tan-niżla. Tissimplifika ulterjorment ir-relazzjonijiet fiskali bejn is-saffi tal-Gvern pereżempju billi tissimplifika l-qafas organizzattiv u billi tallinja r-responsabbiltajiet ta' nfiq u ta' ffinanzjar.

2.

Ittejjeb is-sostenibbiltà fuq żmien twil tas-sistema tal-pensjonijiet, partikolarment billi tmexxi 'l quddiem l-armonizzazzjoni tal-età statutorja tal-irtirar għall-irġiel u għan-nisa, billi żżid l-età effettiva ta' rtirar u billi tallinja l-età tal-irtirar mal-bidliet fl-istennija tal-għomor. Timmonitorja l-implimentazzjoni tar-riforma riċenti li tirrestrinġi l-aċċess għall-irtirar bikri. Ittejjeb ulterjorment tal-kosteffikaċja u s-sostenibbiltà tal-kura tas-saħħa u s-servizzi tal-kura fit-tul.

3.

Tnaqqas il-porzjon ta' taxxa għoli fuq ix-xogħol għal dawk bi dħul baxx billi ċċaqlaq it-tassazzjoni għal sorsi oħra li huma inqas detrimentali għat-tkabbir, bħat-taxxi rikorrenti fuq il-proprjetà immobbli, inkluż l-aġġornament tal-bażi tat-taxxa. Issaħħaħ miżuri biex ittejjeb il-prospetti għas-suq tax-xogħol ta' nies bi sfond ta' migrant, nisa u ħaddiema aktar maturi. Dan jinkludi titjib ulterjuri tas-servizzi tal-indukrar tat-tfal u tal-kura fit-tul u r-rikonoxximent tal-kwalifiki tal-migranti. Ittejjeb l-eżiti tal-edukazzjoni, b'mod partikolari għal żgħażagħ żvantaġġati inklużi dawk bi sfond ta' migranti billi ttejjeb l-edukazzjoni bikrija tat-tfal u billi tnaqqas l-effetti negattivi tat-tqassim bikri tat-tfal fi klassijiet skont il-ħila. Tkompli ttejjeb l-ippjanar strateġiku fl-edukazzjoni għolja u ttejjeb il-miżuri biex tnaqqas dawk li jabbandunaw minn kmieni l-iskola.

4.

Tneħħi ostakoli eċċessivi għall-fornituri ta' servizz, inkluż fir-rigward ta' forom legali u rekwiżiti azzjonarji u fir-rigward tat-twaqqif ta' kumpaniji interdixxiplinarji tas-servizzi. Tirrieżamina jekk ir-restrizzjonijiet fuq id-dħul fil-professjonijiet irregolati u t-twettiq tagħhom huwiex proporzjonat u ġġustifikat mill-interess ġenerali. Tidentifika r-raġunijiet wara l-valur baxx tal-kuntratti pubbliċi miftuħa għall-akkwist skont il-leġiżlazzjoni tal-UE. Issaħħaħ b'mod sostanzjali r-riżorsi tal-Awtorità Federali għall-Kompetizzjoni.

5.

Tkompli tissorvelja mill-qrib ir-ristrutturar ordnat tal-banek nazzjonalizzati jew parzjalment nazzjonalizzati u tavvanzah b'mod effettiv.

29.7.2014   

MT

Il-Ġurnal Uffiċjali tal-Unjoni Ewropea

C 247/97

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni biex tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq il-punti ewlenin fejn hija meħtieġa azzjoni sabiex jissaħħaħ il-potenzjal tal-Ewropa għal tkabbir sostenibbli u kompetittività.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew il-Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni f'livell nazzjonali, dak tal-UE kif ukoll taż-Żona tal-Euro permezz tal-użu tal-għodod, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, b'mod partikolari li tesprimi impenn b'mod sħiħ sabiex jinkisbu l-objettivi tal-Ewropa 2020 u jiġu implimentati r-rakkomandazzjonijiet speċifiċi għall-pajjiż.

(4)

Fit-9 ta' Lulju 2013, il-Kunsill adotta Rakkomandazzjoni (3) dwar il-Programm Nazzjonali ta' Riforma għall-2013 tal-Polonja u ta l-opinjoni tiegħu dwar il-Programm ta' Konverġenza aġġornat tal-Polonja għall-perijodu 2012‐2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Ukoll, fit-13 ta' Novembru 2013, il-Kummissjoni, fuq il-bażi tar-Regolament (UE) Nru 1176/2011 tal-Parlament Ewropew u tal-Kunsill (4), il-Kummissjoni adottat ir-Rapport ta' Mekkaniżmu ta' Twissija, li fih il-Polonja ma ġietx identifikata bħala wieħed mill-Istati Membri li għalihom se ssir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu trattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fl-24 ta' April 2014, il-Polonja ppreżentat il-Programm Nazzjonali ta' Riforma tagħha għall-2014 u l-Programm ta' Konverġenza tagħha għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(8)

L-objettiv tal-istrateġija baġitarja msemmi fil-Programm ta' Konverġenza tal-2014 għandu jkun li d-defiċit jinżel għal anqas minn 3 % tal-valur referenzjarju tal-PDG fit-Trattat sal-2015 u jintlaħaq l-objettiv tat-terminu medju sal-2018. L-objettiv tat-terminu medju (‐1 % tal-PDG f'termini strutturali) huwa aktar strinġenti minn dak li jitlob il-Patt ta' Stabbiltà u Tkabbir. Il-miri tad-defiċiit nominali ppreżentati fil-Programm ta' Konverġenza tal-2014 huma konsistenti ma' korrezzjoni f'waqtha td-defiċit eċċessiv. Barra minn hekk, filwaqt li l-aġġustament strutturali (ikkalkulat mill-ġdid) fl-2014 huwa konformi mar-rakkomandazzjoni tal-Kunsill skont il-Proċedura ta' Defiċit Eċċessiv, huwa anqas mit-titjib mitlub fl-2015. Fis-snin wara l-korrezzjoni ppjanata tad-defiċit eċċessiv, il-progress annwali ppjanat (ikkalkulat mill-ġdid) lejn l-objettiv tat-terminu medju huwa anqas mir-rekwiżit tal-Patt ta' Stabbiltà u Tkabbir. Għaldaqstant, l-objettivi tal-programm huma parzjalment konformi mar-rekwiżiti tal-Patt ta' Stabbiltà u Tkabbir. Huwa previst li d-dejn gross tal-gvern jibqa’ taħt is-60 % tal-PDG matul il-perijodu kopert mill-programm. L-awtoritajiet Pollakki pprevedew li dan se jonqos f'daqqa minn 57,1 % tal-PDG fl-2013 għal 49,5 % fl-2014, l-aktar minħabba t-trasferiment kbir u ta' darba tal-assi tal-fond tal-pensjoni, u se jibqa' f'dan il-livell fl-2015. Ix-xenarju makroekonomiku li jirfed il-projezzjonijiet baġitarji fil-Programm ta' Konverġenza huwa plawżibbli għall-2014 u ottimist għall-2015 b'rata ogħla ta' tkabbir reali tal-PDG ta' 3,8 % meta mqabbel mat-3,4 % fit-tbassir tas-servizzi tal-Kummissjoni għar-Rebbiegħa tal-2014. Abbażi tal-valutazzjoni tiegħu tal-Programm ta' Konverġenza u tat-tbassir tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li filwaqt li l-Polonja hija mistennija li tibqa' taħt il-livell massimu tad-defiċit nominali rrakkomandat mill-Kunsill għall-2014, jeżistu riskji għal korrezzjoni sostenibbli tad-defiċit eċċessiv fl-2015, u, minn hemm, għall-mixja ta' aġġustament xierqa lejn l-objettiv tat-terminu medju.

(9)

Sabiex jiġi żgurat is-suċċess tal-istrateġija ta’ konsolidazzjoni fiskali, huwa importanti li l-konsolidazzjoni fiskali tkun appoġġata b'riformi strutturali komprensivi. Sehem baxx ta’ nfiq li jsaħħaħ it-tkabbir (l-edukazzjoni, ir-riċerka u l-innovazzjoni) ixekkel il-prospetti ta’ tkabbir fit-tul. L-infiq fil-qasam tal-kura tas-saħħa huwa mistenni li jikber b'mod konsiderevoli fit-terminu medju għal dak twil minħabba soċjetà li qed tixjieħ. Il-piż fuq il-finanzi pubbliċi jista' jitnaqqas u l-aċċess għall-kura tas-saħħa jittejjeb bit-tisħiħ tal-kura primarja u s-sistemi ta' riferiment u bl-isfruttament tal-potenzjal għal qligħ tal-kosteffiċjenza fil-kura fl-isptar. Il-konformità baxxa tat-taxxi tibqa' problema, b'mod partikulari f'termini ta' effiċjenza tal-amministrazzjoni tat-taxxa u fil-livell tal-piż amministrattiv fuq il kontribwenti. Fl-istess waqt il-Polonja reċentament ippubblikat Pjan ta' Azzjoni għat-titjib fl-effiċjenza tal-konformità tat-taxxi u l-amministrazzjoni tat-taxxa fis-snin 2014‐2017. Il-Polonja għandha sistema ta' rati mnaqqsa ta' VAT li tikkontribwixxi għall-ogħla nuqqas fil-politika tal-VAT fl-Unjoni. Dan iwassal għal telf fid-dħul u kostijiet miżjuda ta' konformita tat-taxxa. Il-livell ta' tassazzjoni fuq l-enerġija huwa relattivament baxx. Fil-passat riċenti ttieħdu passi biex jitjieb il-qafas fiskali Pollakk. Madankollu, il-qafas jibbenefika mill-introduzzjoni ta' kunsill fiskali indipendenti sħiħ, li jkun responsabbli għal verifiki ex ante ta' konformità mar-regoli fiskali, valutazzjoni ta' previżjonijiet makroekonomiċi u baġitarji u analiżi tas-sostenibbiltà fit-tul tal-finanzi pubbliċi kif ukoll valutazzjoni ex post ta' konformità mar-regoli fiskali.

(10)

Il-qgħad fost iż-żgħażagħ żdied b'mod gradwali matul l-aħħar sena, u dan parzjalment jirriżulta mill-ispariġġ kontinwu bejn l-eżiti tal-edukazzjoni u l-ħtiġijiet tas-suq tax-xogħol kif ukoll il-proporzjon li qed tikber ta' żgħażagħ barra mill-edukazzjoni, impjieg jew taħriġ. Minkejja l-isforzi kontinwi biex tiġi riformata s-sistema ta' edukazzjoni u taħriġ vokazzjonali, jeħtieġ li l-aċċess għal apprentistati ta' kwalità tajba u tagħlim imsejjes fuq ix-xogħol ikompli jiġi ffaċilitat, sabiex tissaħħaħ il-kooperazzjoni bejn l-iskejjel u l-impjegaturi u sabiex jintlaħqu ż-żgħażagħ li mhumiex irreġistrati, f'konformità mal-objettivi ta' garanzija għaż-żgħażagħ. L-aġġustament tal-ħiliet għar-rekwiżiti tas-suq tax-xogħol huwa wkoll importanti b'mod partikulari fil-kuntest tat-tagħlim tul il-ħajja, fejn il-parteċipazzjoni għadha baxxa ħafna, speċjalment fir-rigward tal-ħaddiema kbar fl-età, li l-kompetenzi tagħhom ta' spiss ma jkunux għadhom validi. Is-segmentazzjoni tas-suq tax-xogħol tippersisti bl-użu estensiv ta' kuntratti ta' impjieg b'terminu fiss kif ukoll kuntratti tal-liġi ċivili. L-inċidenza tal-impjiegi b'terminu fiss hija partikolarment għolja fost iż-żgħażagħ. Filwaqt li l-kuntratti b'terminu fiss ta' spiss ikunu meqjusa bħala strument għan-nies qiegħda biex jidħlu fis-suq tax-xogħol bil-ħsieb li aktar tard jimxu lejn kuntratt permanenti, dan ma jidhirx li huwa l-każ għall-maġġoranza tal-ħaddiema fil-Polonja, billi r-rata tat-tranżizzjoni minn impjieg b'terminu fiss għal impjieg permanenti hija baxxa, u dan għandu t-tendenza li jinfluwenza ħażin il-produttività u l-kwalità tal-kapital uman.

(11)

Il-parteċipazzjoni tan-nisa fis-suq tax-xogħol għadha baxxa. Il-Polonja ħadet diversi miżuri biex issaħħaħ l-impjiegi tan-nisa, fosthom żieda fid-disponibbiltà ta' servizzi tal-kura tat-trabi (skejjel tat-trabi), u żieda fil-finanzjament pubbliku għall-edukazzjoni preprimarja sabiex il-ġenituri jitħeġġu jiktbu lil uliedhom għall-edukazzjoni preprimarja. Madankollu, id-disponibbiltà tas-servizzi tal-kura tat-trabi għadha baxxa, speċjalment fiż-żoni rurali, u għadhom jeżistu inugwaljanzi fl-aċċess għall-edukazzjoni preprimarja. Il-parteċipazzjoni tal-ħaddiema kbar fl-età fis-suq tax-xogħol fil-Polonja għadha baxxa. Il-possibbiltajiet għal irtirar bikri tnaqqsu b'mod sinifikanti iżda jeħtieġ li jsiru aktar sforzi sabiex tiżdied l-impjegabbiltà tal-ħaddiema kbar fl-età u t-tul effettiv tal-ħajja tax-xogħol. Ir-riforma tal-iskemi tal-pensjoni speċjali għall-minaturi u l-bdiewa għadha problematika. L-iskema għall-bdiewa (KRUS) toħloq inċentivi biex il-bdiewa fuq skala żgħira jibqgħu fis-settur agrikolu, u dan jirriżulta f'qgħad moħbi fiż-żoni rurali u jistimula l-ekonomija informali. Il-minaturi jkompli jgawdu minn privileġġi f'termini ta' drittijiet għall-pensjoni ħtieġa minima għal rekord tax-xogħol. Iż-żewġ skemi tal-pensjoni jimpedixxu l-mobilità settorjali u territorjali tas-suq tax-xogħol.

(12)

Il-Polonja hija fost l-Istati Membri bl-iktar livell baxx ta’ nefqa fir-R&Ż u hija waħda mill-agħar fl-indikaturi usa’ tal-innovazzjoni. In-nefqa fir-R&Ż privati hija baxxa b'mod speċjali. L-infiq baxx fir-R&Ż huwa abbinat mal-attività dgħajfa fir-riċerka u l-innovazzjoni minn kumpanniji u ambjent tan-negozju li ma jħeġġiġx biżżejjed l-innovazzjoni. Is-sistema ta' appoġġ għall-innovazzjoni fil-Polonja kienet avversa għar-riskji, ibbażata l-aktar fuq għotjiet, tappoġġa l-assorbiment u t-trasferiment tat-teknoloġija mingħajr impatt kbir fuq l-innovazzjoni ġenwinament ġdida. L-inċentivi eżistenti tat-taxxa għar-R&Ż mhumiex effettivi għall-promozzjoni tar-R&Ż interni mis-settur privat u jintużaw biss mill-kumpaniji l-kbar. L-intrapriżi Pollakki ddependew l-aktar fuq l-assorbiment tat-teknoloġija. Filwaqt li dan kellu suċċess f’li jiżgura l-kisbiet fil-produttività u t-tkabbir ekonomiku, il-Polonja issa teħtieġ tranżizzjoni lejn mudell indiġenu bbażat fuq l-innovazzjoni. Iż-żieda fil-kapaċità fl-innovazzjoni tal-kumpaniji Pollakki, it-titjib tar-rabtiet bejn ix-xjenza u l-industrija u l-iżvilupp tal-istrumenti mmirati għaċ-ċiklu sħiħ tal-innovazzjoni għadhom problematiċi.

(13)

Għad hemm qligħ potenzjali għoli ħafna minn titjib fl-effiċjenza enerġetika fis-setturi kollha tal-ekonomija tal-Polonja u dan il-qligħ jista' jappoġġa t-tkabbir, itejjeb il-kompetittività u jinkkontribwixxi għat-tnaqqis tad-dipendenza enerġetika tal-Polonja. Il-kapaċità fil-ġenerazzjoni tal-enerġija domestika qed teqdiem u l-grilja elettrika għadha konġestjonata izda proġetti biex tinħoloq aktar kapaċità ta' interkonnessjoni bejn Stati Membri ġirien qed javvanzaw. Il-problema ewlenija fis-suq tal-gass naturali għadha n-nuqqas ta' diversifikazzjoni u kompetizzjoni.

(14)

L-infrastruttura sottożviluppata tat-trasport u tal-broadband fiss tal-Polonja għadha waħda mill-akbar ostakoli għat-tkabbir. B'mod partikulari, jeħtieġu investimenti sinifikanti fin-netwerk degradat tal-ferrovija biex tiżdied il-kompetittività tas-settur ferrovjarju u jinkiseb bilanċ aħjar bejn it-trasport fuq l-art u bil-ferrovija. Madwar terz biss tat-total ta' madwar 20 000 km tal-linji ferrovjarji operatorji jinsabu f'kundizzjoni teknika tajba. Għad hemm problemi bl-implimentazzjoni f'waqtha ta' proġetti ferrovjarji. L-effiċjenza fir-riżorsi tista' tiżdied billi jittejjeb l-immaniġġar tal-iskart.

(15)

L-infurzar tal-kuntratti fil-Polonja jieħu fit-tul u l-proċedura biex jinkisbu l-permessi għall-kostruzzjoni hija twila u ta' piż. Il-kostijiet għall-konformità tat-taxxa huma għoljin, u din hija problema ewlenija fl-ambjent tan-negozju. Il-Polonja għamlet progress sostanzjali fl-implimentazzjoni ta' riforma ambizzjuża li tiffaċilita l-aċċess għall-professjonijiet irregolati.

(16)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tal-Polonja. Hija vvalutat il-Programm Nazzjonali ta' Riforma u l-Programm ta’ Konverġenza. Hija ma qisitx biss ir-rilevanza tagħhom għal politika fiskali u soċjoekonomika sostenibbli fil-Polonja, iżda anke l-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika ġenerali tal-Unjoni billi jingħata kontribut fil-livell tal-UE għal deċiżjonijiet nazzjonali futuri. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (6) hawn taħt.

(17)

Abbażi ta' din il-valutazzjoni, il-Kunsill eżamina l-Programm ta’ Konverġenza, u l-opinjoni tiegħu (5) tidher b’mod partikolari fir-rakkomandazzjoni (1) ta' hawn taħt,

1.

Issaħħaħ l-istrateġija baġitarja sabiex tiżgura l-korrezzjoni tad-defiċit eċċessiv b'mod sostenibbli sal-2015 billi tikseb l-isforz ta' aġġustament strutturali speċifikat fir-rakkomandazzjoni tal-Kunsill skont il-Proċedura ta' Defiċit Eċċessiv. Wara l-korrezzjoni tad-defiċit eċċessiv u sakemm jintlaħaq l-objettiv fuw it-terminu medju, twettaq aġġustament strutturali annwali ta' 0,5 % tal-PDG bħala valur referenzjarju. Korrezzjoni dewwiema tal-iżbilanċi fiskali teħtieġ implimentazzjoni kredibbli ta' riformi strutturali ambizzjużi biex tiżdied il-kapaċità tal-aġġustament u tippermetti żieda fit-tkabbir u l-impjiegi. F'dak ir-rigward, timminimizza t-tnaqqis fl-investiment li jtejjeb it-tkabbir, ittejjeb l-immirar tal-politiki soċjali u l-kosteffettività tal-infiq u l-effiċjenza ġenerali tas-settur tal-kura tas-saħħa, twessa' l-bażi tat-taxxa, pereżempju billi tindirizza l-kwistjoni ta' sistema estensiva ta' rati mnaqqsa tal-VAT, u ttejjeb il-konformità tat-taxxa, b'mod partikulari billi żżid l-effiċjenza tal-amministrazzjoni tat-taxxa. Twaqqaf kunsill fiskali indipendenti.

2.

Issaħħa l-isforzi biex tnaqqas il-qgħad fost iż-żgħażagħ, b'mod partikolari billi tkompli ttejjeb ir-rilevanza tal-edukazzjoni u tal-ħtiġijiet tas-suq tax-xogħol, iżżid id-disponibbiltà tal-apprentistati u l-postijiet tat-tagħlim imsejjes fuq ix-xogħol u billi ssaħħaħ l-ilħiq taż-żgħażagħ mhux irreġistrati u l-kooperazzjoni bejn l-iskejjel u l-impjegaturi, f'konformità mal-objettivi ta' garanzija għaż-żgħażagħ. Iżżid il-parteċipazzjoni tal-adulti fit-tagħlim tul il-ħajja sabiex jaġġustaw il-forniment tal-ħiliet għad-domanda tal-ħiliet. Tiġġieled is-segmentazzjoni tas-suq tax-xogħol billi żżid l-isforzi tagħha biex tiżgura tranżizzjoni aħjar minn impjieg b'terminu fiss għal impjieg permanenti u billi jitnaqqas l-użu eċċessiv ta’ kuntratti tal-liġi ċivili.

3.

Tkompli bl-isforzi tagħha biex iżżid il-parteċipazzjoni tan-nisa fis-suq tax-xogħol, b'mod partikulari billi tieħu aktar passi biex iżżid id-disponibbiltà ta' kura tat-tfal u edukazzjoni preprimarja affordabbli u ta' kwalità u tiżgura l-finanzjament stabbli. Tinkludi lill-bdiewa fis-sistema tal-pensjonijiet ġenerali, u tibda billi tgħaġġel il-ħolqien tas-sistema għall-valutazzjoni u r-reġistrazzjoni tal-introjtu tal-bdiewa. Ittemm gradwalment l-iskema speċjali tal-pensjonijiet għall-minaturi bil-għan li dawn jintegraw ruħhom fl-iskema ġenerali. Tirfed ir-riforma tal-pensjonijiet ġenerali billi żżid l-isforzi tagħha biex tippromwovi l-impjegabbiltà tal-ħaddiema akbar fl-età biex jgħollu l-etajiet ta’ ħruġ mis-suq tax-xogħol.

4.

Ittejjeb l-effettività tal-inċentivi tat-taxxa billi tippromwovi r-R&Ż fis-settur privat bħala parti mill-isforzi biex issaħħaħ ir-rabtiet bejn ir-riċerka, l-innovazzjoni u l-politika industrijali, u timmira aħjar l-istrumenti eżistenti fl-istadji differenti taċ-ċiklu tal-innovazzjoni.

5.

Iġġedded u testendi l-kapaċità tal-ġenerazzjoni tal-enerġija u ttejjeb l-effiċjenza fil-katina kollha tal-enerġija. Tħaffef u testendi l-iżvilupp tal-grilja elettrika, fosthom l-interkonnessjonijiet transfruntiera mal-Istati Membri ġirien, u tiżviluppa l-interkonnettur tal-gass mal-Litwanja. Tiżgura l-implimentazzjoni effettiva tal-proġetti tal-investiment ferrovjarji bla ebda dewmien u ttejjeb il-kapaċità amministrattiva f'dan is-settur. Tħaffef l-isforzi biex tiżdied il-kopertura tal-broadband fiss. Ittejjeb l-immaniġġar tal-iskart.

6.

Tieħu passi ulterjuri biex ittejjeb l-ambjent tan-negozju billi tissimplifika l-infurzar tal-kuntratti u r-rekwiżiti għall-permessi tal-kostruzzjoni. Iżżid l-isforzi tagħha biex tnaqqas il-kostijiet u l-ħin li jittieħed fuq il-konformità tat-taxxa min-negozji. Tlesti r-riforma kontinwa mmirata lejn l-iffaċilitar tal-aċċess għall-professjonijiet irregolati.

29.7.2014   

MT

Il-Ġurnal Uffiċjali tal-Unjoni Ewropea

C 247/102

(1)

Fis-26 ta' Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiż‐.

(4)

Il-Portugall kien issoġġettat għal programm ta' aġġustament makroekonomiku sas-17 ta' Mejju 2014 f'konformità mal-Artikolu 1(2) ta' Deċiżjoni ta' Implimentazzjoni tal-Kunsill 2011/344/UE (3), li jipprovdi li ssir assistenza finanzjarja disponibbli għal tliet snin. Fit-23 ta' April 2014, il-Kunsill iddeċieda (4) li jestendi d-disponibbiltà tal-assistenza finanzjarja b'sitt ġimgħat, biex jippermetti valutazzjoni komprensiva u eżawrjenti tal-konformità mal-kundizzjonalità tal-programmi u l-iżbursament ordnat tal-aħħar porzjon tas-self. Skont l-Artikolu 12 tar-Regolament (UE) Nru 472/2013 tal-Parlament Ewropew u tal-Kunsill (5) il-Portugall għalhekk kien eżenti mill-monitoraġġ tal-valutazzjoni tas-Semestru Ewropew għall-koordinazzjoni tal-politika ekonomika għad-durata tal-programm. Ladarba ħareġ mill-programm, il-Portugall issa għandu jiġi integrat b'mod sħiħ fil-qafas tas-Semestru Ewropew.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (6)adottat ir-Rapport dwar il-Mekkaniżmu ta' Twissija.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidament fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidament fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Skont ir-Regolament (UE) Nru 472/2013, il-Portugall kien eżenti mill-obbligu li jippreżenta il-Programm Nazzjonali ta' Riforma u l-Programm ta' Stabbiltà tiegħu għad-durata tal-programm ta' aġġustament makroekonomiku. Madankollu, hu ppreżenta Dokument ta' Strateġija Fiskali aġġornat fit-30 ta' April 2014 (Documento de Estratégia Orçamental), u ittra mill-Gvern li tipprovdi aġġornament dwar l-iżviluppi tal-miri tal-Ewropa 2020. Fis-17 ta' Mejju 2014, il-Gvern ippreżenta l-programm ta' riforma kontinwa tiegħu u l-inizjattivi ġodda lejn tkabbir sostenibbli fid-dokument intitolat “It-Triq lejn it-Tkabbir, strateġija ta' riforma fit-terminu medju għall-Portugall”.

(8)

L-objettiv tal-istrateġija baġitarja mfassla fid-Dokument ta' Strateġija Fiskali tal-2014 hu li jikkoreġi d-defiċit eċċessiv sal-2015 b'mod sostenibbli u jilħaq l-objettiv tat-terminu medju sal-2017. L-istrateġija tippjana li d-defiċit tal-gvern iġġibu sa 4,0 % tal-PDG fl-2014 u li tbaxxih iktar sa 2,5 % tal-PDG fl-2015, f'konformità mal-miri stabbiliti fir-Rakkomandazzjoni tal-Proċedura tad-Defiċit Eċċessiv tal-21 ta' Ġunju 2013 u kkonfermata mill-ġdid mit-12-il rieżami tal-programm ta' aġġustament makroekonomiku. Madankollu, fit-30 ta' Mejju 2014, il-Qorti Kostituzzjonali annullat miżuri ta' konsolidazzjoni stmati li kien ser ikollhom impatt fuq ir-riżultati baġitarji fl-2014 b'madwar 0,4 % tal-PDG b'effetti possibbli ta' segwitu fl-2015. Sabiex wieħed jikseb il-miri miftiehma, il-Gvern ser ikollu jintroduċi miżuri ta' sostituzzjoni ta' daqs ekwivalenti. Madankollu, hemm żewġ sentenzi tal-Qorti Kostituzzjonali li għadhom pendenti li jipprevjenu kwantifikazzjoni kompleta tal-miżuri li għandhom jittieħdu. Fid-dawl tal-ħin disponibbli limitat, il-Gvern jista' jirrikorri għal miżuri ta' natura anqas favorevoli għat-tkabbir, partikolarment fuq in-naħa tad-dħul. Lil hinn mill-2015, l-istrateġija tikkonferma l-għan li jintlaħaq l-objettiv tat-terminu medju sal-2017 permezz tat-twettiq ta' sforz strutturali ta' 0,5 % tal-PDG fl-2016 u li jintlaħaq defiċit strutturali ta' 0,5 % fl-2017. Skont l-istrateġija, id-dejn gross tal-gvern ġenerali ser jilħaq il-quċċata ta' madwar 130,2 % tal-PDG fl-2014 u ser jibda jinżel gradwalment mill-2015. Ix-xenarju makroekonomiku sottostanti tal-proġettazzjonijiet baġitarji tal-istrateġija huwa konformi mat-tbassir tar-Rebbiegħa tal-Kummissjoni u kien analizzat mill-Kunsill tal-Finanzi Pubbliċi. Wara s-sentenza tal-Qorti Kostituzzjonali l-istrateġija fiskali fl-2014 ser ikollha tiġi riveduta sabiex tintlaħaq il-mira tad-defiċit ta’ 4 % tal-PDG. Madankollu, jibqa' riskji negattivi għall-mira, b'mod partikolari minħabba inċertezzi legali u l-impatt tal-istatistika ta’ operazzjonijiet immirati lejn ġestjoni aktar effiċjenti tad-dejn imdendel fuq xi impriżi tal-istat.

L-aġġustament baġitarju tal-2015 huwa mirfud minn miżuri ta’ konsolidazzjoni fiskali li jammontaw għal 0,8 % tal-PDG li huwa meqjus li jkun biżżejjed sabiex tintlaħaq il-mira ta’ 2,5 % tal-PDG. Abbażi tal-valutazzjoni tal-istrateġija fiskali tal-Gvern u t-tbassir tal-Kummissjoni, skont ir-Regolament (KE) Nru 1466/97, l-opinjoni tal-Kunsill hija li l-objettivi tal-Istrateġija huma konsistenti mar-rekwiżiti tal-Patt ta’ Stabbiltà u Tkabbir.

(9)

Jeħtieġ li l-konsolidament fiskali jkun sostnut minn riformi ulterjuri tas-sistema tal-ġestjoni tal-finanzi pubbliċi. B’mod partikolari, minkejja l-progress li sar taħt il-programm ta’ aġġustament makroekonomiku, jeħtieġ li titlesta riforma komprensiva l-Liġi ta’ Qafas tal-Baġit u hemm bżonn ta’ aktar sforzi biex jiġi żgurat strettament il-kontroll tan-nefqa bl-infurzar tal-liġi tal-kontroll tal-impenji u sabiex tkun evitata aktar akkumulazzjoni ta’ arretrati tas-settur pubbliku. It-tkomplija tar-ristrutturar ta’ impriżi pubbliċi, li tiġi żgurata l-istabbiltà finanzjarja tagħhom, u l-kontroll strett tan-nefqa fil-pensjonijiet u l-kura tas-saħħa u ser ikunu kruċjali. Fuq in-naħa tad-dħul, hemm spazju biex is-sistema tat-taxxa ssir aktar favur it-tkabbir u li tkompli titrawwem il-konformità mat-taxxa.

(10)

Il-Portugall qed jiffaċċja sfidi li huma relatati mal-qgħad li, minkejja t-tnaqqis reċenti, għadu għoli ħafna, b’mod partikolari fost iż-żgħażagħ. Ir-rata tal-qgħad kienet ta’ 16,4 % fl-2013 u l-qgħad fost iż-żgħażagħ ta’ 38,1 %, li huwa sostanzjalment ogħla mill-medja tal-UE, bħalma kien il-perċentwali ta’ żgħażagħ barra mill-edukazzjoni, impjieg jew taħriġ. Ir-rata tradizzjonalment għolja tal-Portugall ta' impjiegi fost il-persuni li għandhom bejn l-20 u l-64 sena naqset b’mod sinifikanti sa mill-bidu tal-kriżi ekonomika, minn 73,1 % fl-2008 għal 65,6 % fl-2013. Fir-rigward tal-qgħad fost iż-żgħażagħ, f’konformità mal-objettivi tal-garanzija għaż-żgħażagħ, l-isfidi ewlenin jinkludu involviment dgħajjef taż-żgħażagħ li mhumiex reġistrati, u l-bżonn biex wieħed jallinja aħjar l-edukazzjoni u t-taħriġ għall-ħtiġijiet tas-suq tax-xogħol. Taħt il-programm ta’ aġġustament makroekonomiku, il-Portugall implimenta firxa wiesgħa ta’ riformi fis-suq tax-xogħol li l-għan tagħhom hu li jtaffu l-leġislazzjoni restrittiva żżejjed għall-ħarsien tal-impjiegi, biex il-mekkaniżmi tal-iffissar tal-pagi jsiru aktar flessibbli u jitjieb il-funzjonament tas-servizzi pubbliċi tal-impjiegi u l-politiki ta’ attivazzjoni. Madankollu, għad baqa’ sfidi, b’mod partikolari l-ħtieġa li tiġi indirizzata s-segmentazzjoni tas-suq tax-xogħol u jitjieb ir-rispons tal-pagi għall-kundizzjonijiet ekonomiċi. Evalwazzjoni indipendenti tal-effetti ta’ riformi reċenti tas-sistema ta’ protezzjoni tal-impjiegi tgħin sabiex tivvaluta, b’mod partikolari, l-impatt tagħhom fuq il-ħolqien tal-impjiegi, il-prekarjetà, il-kost ġenerali tax-xogħol u dwar l-għadd ta’ appelli fil-Qorti kontra s-sensji u l-eżitu tagħhom. Minkejja l-isforzi biex jittaffa l-impatt soċjali negattiv, il-proċess ta’ konsolidament fiskali u ż-żieda fil-qgħad kellhom riperkussjonijiet negattivi f’termini ta’ faqar.

(11)

Il-Portugall għamel progress sinifikanti biex jirriforma s-sistema edukattiva tiegħu permezz ta’ diversi miżuri fil-ġlieda kontra t-tluq bikri mill-iskola, u biex titjieb ir-rata tal-kisbiet terzjarji u l-addatament għas-suq tax-xogħol. Madankollu, l-implimentazzjoni sħiħa u l-użu effiċjenti tal-fondi jibqgħu kruċjali. B’mod partikolari, aktar xogħol hu meħtieġ sabiex jitnaqqas in-nuqqas ta’ tlaqqigħ bejn il-ħiliet u l-impjiegi, inkluż billi tiżdied il-kwalità u l-attrazzjoni tal-edukazzjoni vokazzjonali u t-taħriġ, inklużi l-edukazzjoni u t-taħriġ vokazzjonali f’żewġ livelli, li jrawmu l-involviment ta’ min iħaddem biex ifasslu programmi ta’ impjiegi u jkun ipprovdut biżżejjed taħriġ u apprendistati. Hemm ukoll il-ħtieġa li jiġu implimentati b’mod effettiv servizzi ta’ konsulenza u gwida għall-karriera għal studenti tal-edukazzjoni sekondarja u terzjarja f’konformità mal-ħtiġijiet tas-suq tax-xogħol u l-antiċipazzjoni tal-ħiliet, u jsaħħu r-rabtiet mas-settur tan-negozju.

(12)

Il-Portugall ħa passi sinifikanti taħt il-programm ta’ aġġustament makroekonomiku biex itejjeb il-bażi kapitali tas-settur bankarju u jsaħħaħ il-qafas tiegħu ta' superviżjoni u riżoluzzjoni. Madankollu, għad fadal sfidi importanti u jeħtieġ li jiġu mmonitorjati u mmaniġġjati bir-reqqa; dawn jinkludu l-profittabilità tal-banek Portugiżi. Id-data għall-ewwel kwart tal-2014 turi li xi banek megħjuna irreġistraw riżultati pożittivi. Il-kwalità tal-assi għadha problema serja, b’livelli ta’ indeboliment baqgħu għoljin f’madwar 6 % tat-total gross ta’ self u self improduttiv f’livelli elevati (10,6 %), b’mod partikolari fis-segment tal-kumpaniji (aktar minn 16 %) skont id-data disponibbli fl-aħħar tal-2013. Il-Portugall adotta numru ta’ miżuri sabiex jiffaċilita s-self lil kumpaniji vijabbli, iżda l-kundizzjonijiet ta’ finanzjament jibqgħu diffiċli, b’mod partikolari għall-SMEs, u l-firxa ta’ alternattivi ta’ finanzjament għas-settur korporattiv, minbarra dawk ibbażati fuq fianzjament tal-banek, għadu limitat. Self li ngħata reċentement lil SMEs naqas b’4,8 % fl-2013 meta mqabbel mal-2012. Il-medja tar-rati ta’ interess fuq self ġdid lil kumpaniji Portugiżi naqset kemxejn mill-bidu tal-2013, iżda jibqgħu b’mod sinifikanti 'l fuq mill-medja taż-żona tal-euro. Minħabba l-livell għoli ta’ dejn korporattiv u l-ħtieġa għal aktar diżingranaġġ tas-settur bankarju, il-kapaċità tal-banek li jestendu l-kreditu lil ditti vijabbli bi spiża raġonevoli jibqa’ limitat.

(13)

Bil-għan li jiżguraw l-effiċjenza u s-sostenibbiltà tas-settur tal-enerġija u li jnaqqsu l-ispiża tal-enerġija għall-ekonomija, ġew implimentati żewġ pakketti ta’ miżuri taħt il-programm ta’ aġġustament makroekonomiku. Madankollu, il-kirjiet fis-settur tal-enerġija għandhom ikunu aktar imnaqqsa, u jiġi ttrattat id-dejn tariffarju għoli li dejjem tiela'. Għal dan l-għan, il-Portugall reċentement ħabbar it-tielet pakkett ta’ miżuri, inkluża l-estensjoni għall-2015 mill-2014 ta' imposta speċjali fuq l-operaturi tal-enerġija. Barra minn hekk, it-titjib tal-integrazzjoni tan-netwerks tal-enerġija transkonfinali u li titħaffef l-implimentazzjoni ta’ proġetti ta’ interkonnessjoni tal-elettriku u tal-gass jibqgħu kwistjonijiet pendenti u jeħtieġu segwitu b’saħħtu sabiex jintemm l-iżolament tal-peniżola Iberika mis-suq tal-enerġija tal-UE. Fis-settur tat-trasport, sar progress taħt il-programm, b’mod partikolari fit-tisħiħ tal-pożizzjoni kompetittiva tal-portijiet Portugiżi, it-tfassil ta’ pjan tat-trasport komprensiv fit-tul, wara li ġew indirizzati n-nuqqasijiet u l-lakuni li kienu indirizzati u t-titjib tal-qafas regolatorju. Madankollu, għadhom meħtieġa aktar miżuri sabiex jiġu implimentati b’mod effettiv pjan komprensiv tat-trasport fit-tul u pjan ta’ azzjoni dwar ir-riforma tal-portijiet. Hemm bżonn ukoll li jittieħdu passi biex jiżguraw l-indipendenza u l-kapaċità tar-regolatur tat-trasport u s-sostenibbiltà finanzjarja tal-impriżi tal-Istat fis-settur u li titjieb l-effiċjenza u l-kompetizzjoni fit-trasport ferrovjarju.

(14)

Riforma importanti ġiet implimentata fis-suq tal-kera urban bil-għan li s-suq tad-djar isir aktar dinamiku inkluż billi jinstab bilanċ aħjar bejn id-drittijiet u l-obbligi ta’ bejn is-sidien u l-inkwilini, l-introduzzjoni ta’ aktar flessibbiltà fl-għażla tal-perijodu tal-kuntratt u l-inċentivar xogħlijiet ta’ restawr. Għad hemm bżonn aktar xogħol biex jiġi evalwat b’mod komprensiv l-impatt ta’ din ir-riforma fuq il-bażi ta’ data dwar l-ixpruni ewlenin tas-suq u fuq l-ekonomija klandestina tas-suq tal-kiri Portugiż. Il-Portugall għamel progress sostanzjali fit-titjib tal-ambjent tan-negozju tiegħu, b’mod partikolari billi ħoloq kundizzjonijiet qafas aħjar, il-promozzjoni ta’ kultura intraprenditorjali u t-titjib tal-proċedimenti ta’ insolvenza għal ditti f’diffikultà. L-attenzjoni issa għandha tgħaddi fuq l-implimentazzjoni. Is-simplifikazzjoni ta’ proċeduri amministrattivi u tal-liċenzji għamlet progress iżda għadd ta’ miżuri għadhom mhumiex lesti. Huma meħtieġa aktar sforzi biex jitneħħew l-ostakli għall-kompetizzjoni fis-settur tas-servizzi, b’mod partikolari billi jiġu adottati emendi settorjali, u fis-servizzi professjonali, billi tiġi adottata leġislazzjoni fuq il-bqija korpi professjonali. F’dak li għandu x’jaqsam mar-Regolament u l-kompetizzjoni, miżuri ta’ segwitu huma meħtieġa biex jiġu żgurati l-indipendenza u l-awtonomija ta’ regolaturi settorjali nazzjonali u l-awtorità tal-kompetizzjoni. Dewmien sinifikanti għadu jaffettwa l-pagamenti mill-awtoritajiet pubbliċi.

(15)

Sar progress ġmielu taħt il-programm ta’ aġġustament makroekonomiku fir-razzjonalizzazzjoni u l-immodernizzar tal-amministrazzjoni pubblika f’termini ta’ impjiegi, il-politika ta’ rimunerazzjoni, il-kundizzjonijiet tax-xogħol, l-effiċjenza organizzattiva u l-kwalità tas-servizzi. Madankollu, xi miżuri ta’ riforma previsti għad iridu jiġu ffinalizzati u t-trasparenza għad trid tittejjeb. Minkejja l-progress sinifikanti li sar biex titjieb l-effiċjenza tas-sistema ġudizzjarja, hemm bżonn ta’ aktar titjib b’mod partikolari f’termini ta’ tul tal-proċedimenti, ir-rata tal-ikklirjar, l-għadd ta’ kawżi pendenti, u fil-monitoraġġ u l-proċess ta’ evalwazzjoni.

(16)

L-analiżi tal-Kummissjoni twassalha biex tikkonkludi li l-implimentazzjoni b’suċċess tal-programm ta' aġġustament makroekonomiku kienet strumentali fl-immaniġġar ta' riskji ekonomiċi u finanzjarji u t-tnaqqis tal-iżbilanċi. Il-Portugall adotta firxa wiesgħa ta’ riformi strutturali iebsin taħt il-programm, li qed jibdew jagħtu l-frott f’termini ta’ kompetittività msaħħa u jerġa’ jibda t-tkabbir ekonomiku, iżda hemm bżonn ta’ aktar ħidma biex jiġu evalwati l-impatt tar-riformi fuq il-funzjonament tal-ekonomija. Huwa għalhekk essenzjali, l-monitoraġġ kontinwu tar-riformi kollha implimentati li jiġi evalwat jekk dawn jikkontribwixxux biex tingħata spinta lill-kompetittività, il-produzzjoni u t-tkabbir fl-impjiegi.

(17)

Billi wara t-tmiem tal-programm ta’ aġġustament makroekonomiku li ser ikun legalment konklu fit-28 ta’ Ġunju 2014, il-Portugall ser ikun integrat kompletament fl-eżerċizzju tas-Semestru Ewropew, il-Kummissjoni, abbażi ta’ dan evalwat id-dokumenti mressqa mill-Portugall. Mhux biss qieset ir-rilevanza tagħhom għall-politika sostenibbli fiskali u soċjoekonomika fil-Portugall imma wkoll il-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet lill-Portugall skont is-Semestru Ewropew huma riflessi fir-rakkomandazzjonijiet (1) sa (8) hawn taħt.

(18)

Fid-dawl ta’ din l-evalwazzjoni, il-Kunsill eżamina l-istrateġija fiskali tal-Gvern, u l-opinjoni tiegħu (7) hija riflessa b’mod partikolari fir-rakkomandazzjoni (1) hawn taħt. Dawn ir-rakkomandazzjonijiet kienu ppreparati wara l-konklużjoni tal-programm ta’ aġġustament makroekonomiku u għalhekk jibnu fuq il-kisbiet ta' dak il-programm biex jiġi żgurat l-implimentazzjoni tiegħu fit-tul.

(19)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika taż-żona tal-euro inġenerali. Abbażi ta' dan, il-Kunsill ħareġ rakkomandazzjonijiet speċifiċi indirizzati lill-Istati Membri li għandhom il-munita tal-euro (8) * . Bħala pajjiż li l-munita tiegħu hija l-euro, il-Portugall għandu jiżgura wkoll l-implimentazzjoni sħiħa u f'waqtha ta' dawk ir-rakkomandazzjonijiet,

1.

Jimplimenta l-miżuri meħtieġa għall-konsolidament fiskali għall-2014 sabiex jintlaħqu l-miri fiskali u tiġi evitata l-akkumulazzjoni ta’ arretrati ġodda. Għas-sena 2015, jimplimenta strateġija baġitarja riveduta biex id-defiċit jitniżżel għal 2,5 % tal-PDG, f’konformità mal-mira stabbilita fir-Rakkomandazzjoni tal-Proċedura dwar id-Defiċit Eċċessiv, filwaqt li jinkiseb l-aġġustament strutturali meħtieġ. Jissostitwixxi miżuri ta' konsolidazzjoni li l-Qorti Kostituzzjonali tikkunsidra inkostituzzjonali permezz ta' miżuri ta' daqs u kwalità simili malajr kemm jista' jkun. Il-korrezzjoni tal-iżbilanċ eċċessiv għandha ssir b’mod u manjiera li tiffavorixxi t-tkabbir sostenibbli, tillimita l-ħtieġa li wieħed jirrikorri għal miżuri ta’ darba u għal miżuri temporanji. Wara l-korrezzjoni ppjanata tad-defiċit eċċessiv, għandu jsegwi aġġustament strutturali annwali lejn l-objettiv fuq perijodu medju ta’ żmien, f’konformità mar-rekwiżit ta’ aġġustament strutturali annwali ta’ mill-inqas 0,5 % tal-PDG, aktar fi żminijiet tajbin, u jiżguraw li r-regola tad-dejn tkun issodisfata biex il-proporzjon tad-dejn ġenerali għoli jaqbad triq sostenibbli. Jipprijoritizza l-konsolidazzjoni fiskali bbażata fuq l-infiq u tiżdied aktar l-effiċjenza u l-kwalità tan-nefqa pubblika. Iżomm kontroll strett tan-nefqa għall-amministrazzjoni ċentrali, reġjonali u lokali. Jissokta l-proċess tar-ristrutturar ta’ impriżi statali. Sal-aħħar tal-2014, jiżviluppa miżuri komprensivi ġodda bħala parti mir-riforma attwali tal-pensjonijiet, bil-għan li jtejjeb is-sostenibbiltà fuq perijodu medju tas-sistema tal-pensjonijiet. Jikkontrolla t-tkabbir tan-nefqa għall-kura tas-saħħa u jkompli r-riforma tal-isptar. Jeżamina mill‐ġdid is-sistema tat-taxxa u jagħmilha aktar favorevoli għat-tkabbir. Ikompli jtejjeb il-konformità fiskali u jiġġieled l-evażjoni tat-taxxa billi tiżdied l-effiċjenza tal-amministrazzjoni tat-taxxa. Issaħħaħ is-sistema tal-ġestjoni tal-finanzi pubbliċi billi jiffinalizza u jimplimenta malajr riforma komprensiva tal-Qafas tal-Liġi Baġitarja sa tmiem l-2014. Jiżgura konformità stretta tal-Liġi ta’ Kontroll tal-Impenji. Jimplimenta b’mod effettiv il-paga unika u l-iskali tas-supplimenti fis-settur pubbliku mill-2015 'il quddiem.

2.

Iżomm żviluppi fil-paga minima li jkunu konsistenti mal-għanijiet tal-promozzjoni tal-impjiegi u l-kompetittività. Jiżgura sistema tal-iffissar tal-pagi li tippromwovi l-allinjament tal-pagi u l-produttività fuq livell settorjali u/jew ta' ditta. Jesplora, f’konsultazzjoni mas-sħab soċjali u f’konformità mal-prattika nazzjonali, il-possibbiltà ta' sospensjoni temporanja, maqbula b'mod reċiproku fil-livell ta' ditti, ta' ftehimiet kollettivi. Sa Settembru tal-2014, jippreżenta proposti dwar sospensjoni temporanja, maqbula b'mod reċiproku fil-livell ta' ditti, ta' ftehimiet kollettivi u dwar reviżjoni tas-sopravvivenza ta’ ftehimiet kollettivi.

3.

Jippreżenta, sa Marzu 2015, evalwazzjoni indipendenti tar-riformi reċenti tas-sistema ta’ protezzjoni tal-impjiegi, flimkien ma’ pjan ta’ azzjoni possibbli għal iktar riformi li jindirizzaw is-segmentazzjoni tas-suq tax-xogħol. Ikompli r-riforma ta’ politiki attivi tas-suq tax-xogħol u s-Servizzi tal-Impjiegi Pubbliċi, li għandhom l-għan li jżidu l-impjiegi u r-rati ta’ parteċipazzjoni tax-xogħol, speċifikament permezz ta’ titjib ta’ pariri dwar l-impjiegi/għajnuna u attivazzjoni għat-tiftix ta’ impjieg/is-sistemi ta’ sanzjonijiet bil-għan li jitnaqqas il-qgħad fit-tul u jiġu integrati dawk l-iktar imbegħdin mis-suq tax-xogħol. Jindirizza l-livell għoli ta’ qgħad fost iż-żgħażagħ, b'mod partikolari permezz ta’ antiċipazzjoni u komunikazzjoni effettiva tal-ħiliet taż-żgħażagħ mhux reġistrati, f’konformità mal-objettivi tal-garanzija għaż-żgħażagħ. Jiżgura kopertura xierqa ta’ assistenza soċjali, inkluża l-iskema ta' dħul minimu, filwaqt li jiżgura l-attivazzjoni effettiva ta’ dawk li jirċievu l-benefiċċji.

4.

Itejjeb il-kwalità u r-rilevanza tas-sistema edukattiva sabiex jitnaqqas it-tluq bikri mill-iskola u jiġu indirizzati r-rati għal prestazzjonijiet edukattivi baxxi. Jiżgura nefqa pubblika effiċjenti fl-edukazzjoni u fit-tnaqqis tad-differenzi fil-ħiliet, inkluż billi jżid il-kwalità u l-attrazzjoni tal-edukazzjoni u t-taħriġ vokazzjonali u jrawwem kooperazzjoni mas-settur tan-negozju. Isaħħaħ il-kooperazzjoni bejn ir-riċerka pubblika u n-negozju u jindokra t-trasferiment tal-informazzjoni.

5.

Jissorvelja l-pożizzjoni ta’ likwidità tal-banek u n-nuqqas potenzjali fil-kapital, inkluż permezz ta’ spezzjonijiet tematiċi fuq il-post u l-ittestjar tal-istress. Jevalwa l-pjani ta’ rkupru tal-banek u jintroduċi titjib fil-proċess ta’ evalwazzjoni fejn meħtieġ. Jimplimenta strateġija komprensiva biex jitnaqqas dejn korporattiv u jsaħħaħ l-isforzi biex titwessa’ l-firxa ta’ finanzjament alternattiv, inkluż għall-istadji bikrija ta’ żviluppi tan-negozju, billi jtejjeb l-effiċjenza ta’ għodod ta’ ristrutturar tad-dejn (partikolarment il-PER u SIREVE) għal kumpaniji vijabbli, l-introduzzjoni ta’ inċentivi għall-banek u d-debituri li jinvolvu ruħhom fi proċessi ta’ ristrutturar fi stadju bikri u t-titjib tad-disponibbiltà ta’ ffinanzjar permezz tas-suq kapitali. Jiżgura li l-miżuri identifikati jappoġġaw ir-riallokazzjoni ta’ finanzjament lejn setturi produttivi tal-ekonomija, inkluż lil SMEs vijabbli, filwaqt li jevita riskji għall-finanzi pubbliċi u l-istabbiltà finanzjarja. Jimplimenta, sal-aħħar ta’ Settembru 2014, sistema ta’ twissija bikrija prinċipalment għal għanijiet ta' superviżjoni, biex tidentifika ditti, inklużi SMEs, bi probabbiltà għolja ta' inadempjenza minħabba insolvenza, u li indirettament tista' tippromwovi r-ristrutturar bikri tad-dejn korporattiv.

6.

Jimplimenta t-tieni u t-tielet pakkett ta’ miżuri fis-settur tal-enerġija bl-għan li jnaqqas l-ispejjeż tal-enerġija għall-ekonomija, filwaqt li jiġu eliminati djun tariffarji tal-elettriku sal-2020, u jissorvelja mill-qrib l-implimentazzjoni. Itejjeb l-integrazzjoni transkonfinali tan-netwerks tal-enerġija u jħaffef l-implimentazzjoni ta’ proġetti ta’ interkonnessjoni tal-elettriku u tal-gass. Jimplimenta pjan tat-trasport komprensiv fit-tul u “kronogramma” li tistabbilixxi r-riformi settorjali tal-portijiet. Ilesti konċessjonijiet tat-trasport għal żoni metropolitani ta’ Lisbona u Oporto. Jiżgura li n-negozjati ġodda tal-konċessjonijiet eżistenti tal-portijiet u l-iskemi ġodda ta’ awtorizzazzjoni huma orjentati lejn u f’konformità mal-prinċipji tas-suq intern, b’mod partikolari r-regoli tal-akkwisti. Jiżgura li l-awtorità regolatorja nazzjonali għat-trasport (AMT) tkun kompletament indipendenti u operattiva sal-aħħar ta’ Settembru 2014. Jiżgura s-sostenibbiltà finanzjarja tal-impriżi tal-Istat fis-settur tat-trasport. Isaħħaħ l-effiċjenza u l-kompetizzjoni fis-settur tal-ferrovija, billi jimplimenta l-pjan għall-kompetittività ta’ CP Carga, wara t-trasferiment ta’ terminals tal-merkanzija, filwaqt li jiżgura l-indipendenza maniġerjali tal-maniġer tal-infrastruttura u l-impriżi ferrovjarji proprjetà tal-Istat.

7.

Ikompli jtejjeb l-evalwazzjoni tas-suq tad-djar, inkluż billi jistabbilixxi, sal-aħħar tal-2014, qafas ta’ monitoraġġ u rappurtar aktar sistematiku u joħroġ rapport komprensiv dwar l-ekonomija moħbija f’dak is-suq. Ikompli bl-isforzi biex jitwettqu aktar inventarji ta’ piżijiet regolatorji bil-ħsieb li jinkludu, sa Marzu 2015, setturi li għadhom mhumiex koperti. Jadotta u jimplimenta, sal-aħħar ta’ Settembru 2014, id-digrieti pendenti ta’ liċenzjar u l-emendi settorjali. Ineħħi, sal-aħħar ta’ Settembru 2014, ir-restrizzjonijiet li għad fadal fis-settur tas-servizzi professjonali u jdaħħal fis-seħħ il-korpi professjonali emendati bil-liġijiet li għadhom ma ġewx adottati taħt il-programm ta’ aġġustament makroekonomiku. Jelimina d-dewmien fil-pagamenti mis-settur pubbliku. Jiżgura riżorsi adegwati tar-regolaturi nazzjonali u l-awtorità tal-kompetizzjoni.

8.

Ikompli jirrazzjonalizza u jimmodernizza l-amministrazzjoni pubblika ċentrali, reġjonali u lokali. Jimplimenta r-riformi biex titjieb l-effiċjenza tas-sistema ġudizzjarja u tiżdied it-trasparenza. Iżid l-isforzi biex jevalwa l-implimentazzjoni tar-riformi li saru taħt il-programm ta’ aġġustament makroekonomiku kif ukoll riformi futuri u ppjanati. B’mod partikolari, jdaħħal valutazzjonijiet sistematiċi u mandatorja ex ante u ex post fil-proċess leġislattiv. Iwaqqaf unità ta’ evalwazzjoni funzjonalment indipendenti fil-livell tal-gvern ċentrali, li tivvaluta u tirraporta kull sitt xhur dwar l-implimentazzjoni ta’ dawn ir-riformi, inkluż konsistenza ma’ valutazzjoni tal-impatt ex ante, b’passi korrettivi jekk ikun hemm bżonn.

29.7.2014   

MT

Il-Ġurnal Uffiċjali tal-Unjoni Ewropea

C 247/109

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li titnieda strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn jeħtieġ azzjoni biex tingħata spinta lill-potenzjal tal-Ewropa għat-tkabbir sostenibbli u l-kompetittività.

(2)

Fit-13 ta’ Lulju 2010, il-Kunsill adotta, abbażi tal-proposti tal-Kummissjoni, rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u fil-21 ta’ Ottubru 2010, adotta deċiżjoni dwar il-linji gwida għall-politiki dwar l-impjiegi tal-Istati Membri (2), li flimkien jagħmlu l-“linji gwida integrati”. L-Istati Membri ġew mistiedna jieħdu kont tal-linji gwida integrati fil-politiki nazzjonali tagħhom dwar l-ekonomija u l-impjiegi.

(3)

Fid- 29 ta' Ġunju 2012, il-Kapijiet tal-Istat jew il-Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni fl-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar l-azzjoni li għandha tittieħed fil-livell tal-Istati Membri, b'mod partikolari filwaqt li esprimew impenn sħiħ għall-kisba tal-objettivi tal-Istrateġija Ewropa 2020 u għall-implimentazzjoni tar-rakkomandazzjonijiet speċifiċi għal kull pajjiż‐.

(4)

Fid-9 ta’ Lulju 2013, il-Kunsill adotta Rakkomandazzjoni (3) dwar il-Programm ta’ Riforma Nazzjonali 2013 tar-Rumanija u ta l-opinjoni tiegħu dwar il-Programm ta’ Konverġenza tar-Rumanija għall-perijodu 2012‐2016.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta’ Novembru 2013, il-Kummissjoni, abbażi tar- Regolament (UE) Nru 1176/2011, adottat ir-Rapport dwar il-Mekkaniżmu ta’ Allarm.

(6)

Fl-20 ta' Diċembru 2013, il-Kunsill Ewropew approva l-prijoritajiet biex jiġu żgurati l-istabbiltà finanzjarja, il-konsolidament fiskali u azzjoni biex jitrawwem it-tkabbir. Huwa enfasizza l-ħtieġa li tkun segwita konsolidazzjoni fiskali differenzjata li tiffavorixxi t-tkabbir‐, li jerġgħu jinġiebu l-kondizzjonijiet normali għas-self fl-ekonomija, li jiġu promossi t-tkabbir u l-kompetittività, li jiġu indirizzati l-qgħad u l-konsegwenzi soċjali tal-kriżi, u li tiġi mmodernizzata l-amministrazzjoni pubblika.

(7)

Fis-6 ta’ Mejju 2014, ir-Rumanija ressqet il-Programm Nazzjonali ta’ Riforma 2014 tagħha u fil-5 ta’ Mejju 2014, il-Programm ta’ Konverġenza 2014 tagħha. Sabiex jittieħed kont tal-konnessjonijiet bejniethom, iż-żewġ Programmi ġew ivvalutati fl-istess waqt.

(8)

Fit-22 ta' Ottubru 2013 , il-Kunsill adotta d-Deċiżjoni 2013/531/UE (4) li tipprovdi għajnuna finanzjarja għal terminu‐medju lir-Rumanija sa EUR 2 biljun sa Settembru 2015. Għajnuna finanzjarja għal terminu prekawzjonarja għar-Rumanija skont il-faċilità ta' bilanċ ta' pagamenti għall-Istati Membri li mhumiex fiż-żona tal-euro kienet ikkunsidrata adatta minħabba l-flussi ta' kapital instabbli li jolqtu b'mod partikolari lis-sieq emerġenti, lir-riskji għax-xenarju makroekonomiku, u lill-vulnerabbilitajiet li baqa' fis-settur bankarju. Filwaqt li, taħt il-kondizzjonijiet tas-suq preżenti, ir-Rumanija mhix biħsiebha titlob il-ħlas ta' ebda pagament parzjali, l-għajnuna prekawzjonarja hi mistennija li tgħin tikkonsolida l-istabbiltà makroekonomika, baġitarja u finanzjarja u, permezz tas-segwitu ta' riformi strutturali, iżżid ir-reżiljenza u l-potenzjal għat-tkabbir tal-ekonomija Rumena. Il-Memorandum ta’ Ftehim tas-6 ta’ Novembru 2013 u s-supplimenti sussegwenti tiegħu li jistabbilixxu l-kondizzjonijiet li għandhom jintlaħqu skont għajnuna prekawzjonarja tal-UE jikkomplementa u jappoġġja r-rakkomandazzjonijiet‐ speċifiċi għall-pajjiż tas-Semestru Ewropew. L-għajnuna finanzjarja prekawzjonarja tal-UE ser tkun kondizzjonali hekk kif jiġi implimentat programm ta' politika ekonomika komprensiva, b'fokus partikolari fuq il-miżuri ta' riforma strutturali inkluż dawk ir-rakkomandazzjonijiet speċifiċi ‐għall-pajjiż relatati mal-kapaċità amministrattiva, ir-riformi tas-suq tal-prodotti, l-ambjent tan-negozju, is-swieq tax-xogħol, il-pensjonijiet l-intrapriżi ‐tal-istat, u l-kura tas-saħħa. Din l-aġenda ma teżentax lill-Gvern milli jimplimenta bis-sħiħ ir-rakkomandazzjonijiet kollha speċifiċi ‐għall-pajjiż. Il-prijoritizzazzjoni, l-implimentazzjoni u l-koordinazzjoni tal-politika meħtieġa għall-implimentazzjoni tal-Memorandum ta’ Fehim u rakkomandazzjonijiet speċifiċi‐ għall-pajjiż, għandhom jiġu ttrattati fejn jittieħdu Deċiżjonijiet ta’ prijorità, b’mod koerenti.

(9)

L-objettiv tal-istrateġija baġitarja deskritta fil-programm ta’ konverġenza tal-2014 huwa li jinkiseb l-objettiv ta’ terminu ‐medju ta’ defiċit strutturali ta’ 1 % tal-PDG fl-2015, li jirrifletti r-rekwiżit tal-Patt ta’ Stabbiltà u Tkabbir, u li jibqa' fih minn hawn 'il quddiem. Fl-2014, ir-Rumanija qed tibbenifika mill-possibbiltà ta' devjazzjoni temporanja mit-triq ta' aġġustament lejn objettiv għal terminu‐ medju permess għal proġetti ffinanzjati b'mod konġunt. Id-devjazzjoni temporanja għandha tiġi kumpensata fis-sena ta’ wara. Il-Programm ta’ Konverġenza jippjana stabbilizzazzjoni ta’ bilanċ strutturali (rikalkulat) fl-2014 u titjib ta’ 0,8 % tal-PGD fl-2015. In-nefqa hija prevista li tikber b’ritmu konsistenti mal-valur referenzjaru tan-nefqa fl-2014 u fl-2015. Il-proporzjon tad-dejn mal-PDG huwa previst li jilħaq 40 % fl-2015, u li jonqos fl- 2016‐2017. Inġenerali, l-istrateġija baġitarja deskritta fil-Programm ta’ Konverġenza hi konformi mar-rekwiżiti tal-Patt ta’ Stabbiltà u Tkabbir. Ix-xenarju makroekonomiku li jsostni l-projezzjonijiet baġitarji fil-programm huwa plawżibbli. Huwa konformi b'mod wiesa' mal-previżjoni tar-rebbiegħa 2014 tas-servizzi tal-Kummissjoni. Madankollu l-istima tal-PDG potenzjali li ssostni l-Programm ta’ Konverġenza hija kemxejn ogħla, prinċipalment minħabba perspettiva aktar ottimista tas-suq tax-xogħol. Hemm riskji ta' telf ta' valur għall-pjani baġitarji tal-2014 relatati mal-kontroll tan-nefqa u ġbir tat-taxxi aktar baxx ‐milli‐ kien previst.. Barra minn hekk, għall-2015 u lil hinn, il-miżuri li jsostnu t-triq fiskali proposta għadhom ma ġewx speċifikati.

Skont il-previżjoni tal-Kummissjoni, minkejja deterjorament żgħir fil-bilanċ strutturali fl-2014, ir-Rumanija hija konformi mar-rekwiżiti tal-Patt ta’ Stabbiltà u Tkabbir fl-2014, b’kont meħud tad-devjazzjoni temporanja permessa għal proġetti ffinanzjati b’mod konġunt. Għall-2015, hemm riskju ta’ devjazzjoni sinifikanti mill-aġġustament strutturali meħtieġ, b’kont meħud tal-kumpens meħtieġ għad-devjazzjoni temporanja permessa għal proġetti ffinanzjati b’mod konġunt). Barra minn hekk, ir-Rumanija hija prevista li tiddevja mill-valur referenzjarju tan-nefqa fl-2015. Abbażi tal-valutazzjoni tal-Programm ta’ Konverġenza u l-previżjoni tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li l-Programm ta’ Konverġenza jippreżenta riskji ta’ devjazzjoni sinifikanti mir-rekwiżiti tal-parti preventiva fl-2015.

(10)

Il-frodi tat-taxxa u l-evażjoni tat-taxxa fl-oqsma tal-VAT, inklużi l-iskema trans‐konfinali, id-dazji, il-kontribuzzjonijiet tas-sigurtà soċjali u t-tassazzjoni fuq id-dħul jibqgħu sfida maġġuri. Il-progress tanġibbli fil-ġlieda kontra x-xogħol mhux iddikjarat huwa limitat, filwaqt li l-effettività tal-istrateġija għall-konformità mat-taxxa hija mxekkla min-nuqqas ta’ miżuri ta’ implimentazzjoni u realistiċi u vinkolanti fokus suffiċjenti fuq il-prevenzjoni. Riforma tal-amministrazzjoni tat-taxxa biex tiżdied l-effiċjenza tagħha hija kurrenti; il-kooperazzjoni amministrattiva trans‐konfinali, b'mod partikolari fil-qasam tal-VAT, tibqa' dgħajfa. Il-porzjon tat-taxxa fuq dawk bi dħul baxx jew medju‐ jibqa' għoli u jinkoraġġixxi x-xogħol mhux iddikjarat u ‐d-dħul mhux iddikjarat. Sar xi progress fil-qasam tat-tassazzjoni ambjentali, billi s-sistema tat-tassazzjoni tal-vetturi tjiebet u dazji tas-sisa fuq il-fjuwil żdiedu u issa huma awtomatikament indiċizzati. Ir-Rumanija tiffaċċa riskji ta' sostenibbiltà għal terminu‐ twil, prinċipalment minħabba n-nefqa relatata ‐mal-età. Hemm tħassib dwar is-sostenibbilità u l-adegwatezza tas-sistema tal-pensjoni minħabba l-proporzjon baxx ta' kontributuri impjegati għall-persuni li qed jieħdu l-pensjoni. Ir-Rumanija ħadet passi biex, mill-2035, l-età tal-pensjoni għan-nisa u l-irġiel tkun l-istess.

(11)

L-użu ineffiċjenti tar-riżorsi u ġestjoni inadegwata jżidu r-riskju ta’ sostenibbiltà fiskali fis-settur tas-saħħa. Pagamenti informali mifruxa fil-kura tas-saħħa pubbliċi jkomplu jfixklu l-aċċessibilità, l-effiċjenza u l-kwalità tas-sistema. Inbdew riformi biex tittejjeb l-effiċjenza tas-settur tal-kura tas-saħħa u s-sostenibbiltà tiegħu iżda jinħtieġu sforzi kontinwi. Uħud minn dawn il-miżuri qed iġarrbu dewmien u jsofru minn finanzjament insuffiċjenti u kapaċità baxxa tas-servizzi. It-tnaqqis tal-użu eċċessiv tal-isptar ‐fil-kura tal-pazjent u t-tisħiħ tas-sistemi ta' kura primarja u ta' konsultazzjoni ser iżidu l-koste‐ffettività. Tnedew riformi ulterjuri tas-sistema tal-kura tas-saħħa mmirati biex itejbu s-saħħa tal-popolazzjoni permezz tal-promozzjoni, fost affarijiet oħra, l-aċċess ekwu għal servizzi tas-saħħa ta’ kwalità.

(12)

L-inattività għolja, in-nuqqas ta’ utilizzazzjoni tal-potenzjal tax-xogħol u l-ħtieġa li tiżdied il-kwalità u l-produttività tal-forza tax-xogħol jibqgħu sfidi ewlenin tas-suq tax-xogħol Rumen. Il-kwalità tat-tiftix ta' mpjieg pubbliku u s-servizzi ta' taħriġ mill-ġdid għadha pjuttost baxxa, minkejja xi miżuri ‐fuq skala żgħira. Riżorsi limitati fi ħdan is-servizz pubbliku tal-impjiegi u nuqqas ta’ kejl ta’ prestazzjoni jillimitaw it-twassil effiċjenti ta’ servizzi personalizzati lil dawk li qed ifittxu xogħol, lis-servizzi ta' min iħaddem u l-integrazzjoni ta’ politiki tas-suq tax-xogħol attivi u passivi. Ir-Rumanija għandha persentaġġ għoli u li qed dejjem jiżdied ta' żgħażagħ li la qed jaħdmu u lanqas mhuma qed jistudjaw jew isegwu xi taħriġ (17,3 % fl-2013). Strateġija Nazzjonali ta' Tixjiħ Attiv biex tiġi appoġġata żieda fir-rata tal-impjiegi ta’ ħaddiema aktar avvanzati fl-età ġiet posposta u issa hija mistennija fi tmiem l-2014.

(13)

M’hemm l-ebda linja gwida trasparenti għall-istabbiliment ta' paga minima li tinvolvi s-sħab soċjali li għandhom l-għan għan li jappoġġaw l-impjiegi u l-kompetittività u s-salvagwardja ta’ dħul tax-xogħol b’mod sostenibbli.

(14)

Ir-Riforma tal-Edukazzjoni tal-2011, li stabbilit aġenda għal terminu‐ fit-tul għat-titjib tal-kwalità tal-edukazzjoni fil-livelli kollha, mhix kompletament operazzjonali, minħabba riżorsi finanzjarji u umani ineffiċjenti. Wara tnaqqis f’daqqa fl-edukazzjoni u t-taħriġ vokazzjonali fl-aħħar 20 snin, diversi riformi u proġetti pilota nbdew fi snin reċenti iżda d-disponibbiltà tal-edukazzjoni u t-taħriġ vokazzjonali, ir-rilevanza tagħha għas-suq tax-xogħol u l-involviment tan-negozji fit-tagħlim abbażi tax-xogħol‐ u-apprendista għadhom baxx. Diskrepanzi fil-ħiliet importanti jippersistu għall-gradwati tal-edukazzjoni terzjarja u r-rabta bejn in-negozju u l-akkademja għadha dgħajfa, kif jidher minn rata għolja ta’ qgħad u l-ħafna gradwati universitarji li jiġu impjegati fi professjonijiet li ma jikkorrispondux għat-taħriġ tagħhom jew f’impjiegi li jirrikjedu livelli aktar baxxi ta’ kwalifiki. Il-parteċipazzjoni f’attivitajiet ta’ tagħlim tul il-ħajja għadu fost l-aktar baxxi fl-Unjoni. Ir-rata tat-tluq bikri mill-iskola jibqa’ wieħed mill-ogħla fl-Unjoni u issa huwa ogħla minn qabel l-2010, u jaffettwa b’mod partikolari r-Roma. L-impjieg tan-nisa huwa mfixkel minn provvista baxxa ta’, u aċċess limitat għal faċilitajiet ta’ kwalità abbordabbli għall-kura tat-tfal, b’mod partikolari għall-dawk bejn 0 sa 3 ‐snin.

(15)

It-tnaqqis tal-faqar jibqa' sfida maġġuri. Minkejja sitwazzjoni tal-impjiegi relattivament stabbli, id-dħul gross tal-familji naqas u l-inugwaljanzi fid-dħul qegħdin jiżdiedu. Il-familji bit-tfal huma partikolarment esposti. Kien hemm progress limitat fl-aċċellerazzjoni tat-transizzjoni mill-kura istituzzjonali għal dik alternattivi għat-tfal m'għandhomx kura mill-ġenituri. Għad hemm għadd kbir ta’ persuni b’diżabilità f’istituzzjonijiet residenzjali kbar, filwaqt li s-servizzi komunitarji għall-persuni b’diżabilità mhumiex żviluppati biżżejjed. L-adozzjoni, il-kopertura u l-adegwatezza baxxi‐ tal-benefiċċji soċjali jibqgħu ta' sfida għall-effiċjenza tal-benefiċċji soċjali biex jitnaqqas il-faqar. L-introduzzjoni tad-Dħul Minimu ta' Inserzjoni li jikkombina tliet benefiċċji soċjali (id-Dħul Minimu Garantit, l-allowance tal-familja u benefiċċji għat-tisħin) ippjanata għall-2015 ġie posposta. L-implimentazzjoni tal-Istrateġija Nazzjonali għall-Integrazzjoni tar-Rom bdiet fl-2012, iżda l-allokazzjoni finanzjarja għall-implimentazzjoni ta’ pjani ta’ azzjoni ewlenin kien insuffiċjenti u r-riżultat huma modesti. Hemm dewmien fir-reviżjoni tal-Istrateġija u l-implimentazzjoni ta’ pjani ta’ azzjoni riveduti.

(16)

Il-kapaċità dgħajfa tal-amministrazzjoni pubblika biex jiġu żviluppati u implimentati il-politiki tibqa’ sfida ewlenija għar-Rumanija, waqt li xxekkel l-iżvilupp globali tal-pajjiż, l-ambjent tan-negozju u l-kapaċità ta’ investiment pubbliku, filwaqt li mhix permessa l-provvista ta' servizzi pubbliċi ta’ kwalità suffiċjenti. Il-kawżi strutturali li wasslu għal livell baxx ta’ kapaċità amministrattiva ġew analizzati fl-2013. Abbażi ta' dan, strateġija 2014‐2020 dwar it-tisħiħ tal-amministrazzjoni pubblika qed titħejja attwalment u hu mistenni li tkun finalizzata sa nofs‐ l-2014.

(17)

Minkejja progress importanti, ir-rata ta’ assorbiment għall-fondi tal-UE tibqa’ waħda mill-aktar baxxi fl-Unjoni. Sistemi kontinwament dgħajfa ta’ ġestjoni u kontroll u prattiki tal-akkwist pubbliku jista’ jkollhom impatt negattiv fuq it-tħejjijiet għal u l-implimentazzjoni tal-ġenerazzjoni li jmiss ta’ programmi. L-ippjanar strateġiku u prijoritizzazzjoni tal-politika tal-gvern ċentrali kif ukoll prijoritizzazzjoni tal-politika u l-ippjanar baġitarju multi‐annwali fil-livell tal-Ministeri kkonċernati b’portafolli ta’ investiment importanti jibqgħu sfida. Il-leġislazzjoni dwar l-akkwist pubbliku tbati minn instabbiltà u nuqqas ta’ koerenza. L-organizzazzjoni istituzzjonali, b'atturi multipli u ta' spiss responsabbiltajiet sovraposti mhix mgħammra biex tindirizza n-nuqqasijiet u tipprovdi gwida adatta għall-awtoritajiet kontraenti. Il-korruzzjoni u l-kunflitti ta’ interessi jibqgħu ta’ tħassib għall-awtoritajiet kontraenti. Sistema ta’ kontrolli ex ante għal kunflitti ta’ interess fil-proċess tal-aġġudikazzjoni ta’ kuntratti ta’ akkwist pubbliku hi mistennija li ssir operazzjonali sa tmiem l-2014.

(18)

Il-kwalità inadegwata ta’ regolamenti u n-nuqqas ta’ trasparenza u prevedibbiltà tal-qafas regolatorju jxekklu lin-negozji u liċ-ċittadini. Proċeduri għall-akkwist tal-elettriku, li jittrattaw ma' permessi ta’ kostruzzjoni u l-ħlas ta' taxxi għadhom kumplessi. Id-drittijiet ta' proprjetà mhux ċari jirrappreżentaw sfida oħra għall-ambjent ta' negozju tar-Rumanija; anqas minn 50 % tal-proprjetà immobbli huma reġistrati fis-sistema ta' entrati tal-art u madwar 15 % biss tal-proprjetà immobbli huma verifikati u reġistrati diġitalment. Ir-Rumanija għamlet xi progress fit-titjib tal-kwalità, l-indipendenza u l-effiċjenza tas-sistema ġudizzjarja u fil-ġlieda kontra l-korruzzjoni, iżda dawn il-kwistjonijiet jibqgħu ta’ tħassib għan-negozji li jfittxu rimedju effettiv. Ir-resistenza għall-integrità u l-miżuri kontra‐ l-korruzzjoni fil-livell politiku u amministrattiv għadha qawwija.

(19)

Ir-regolamentazzjoni tal-prezzijiet fis-suq tal-elettriku għall-konsumaturi industrijali spiċċat fl-2013 u l-eliminazzjoni gradwali‐ tar-regolamentazzjoni tal-prezzijiet tal-gass u l-elettriku għadha kurrenti. L-effiċjenza u t-trasparenza tal-governanza tal-intrapriżi ‐tal-istat f'dawn is-setturi tirrappreżenta sfida maġġuri. Id-deregolamentazzjoni tal-prezzijiet tal-enerġija hija mistennija li ġġib inċentivi biex itejbu l-effiċjenza tal-enerġija, għalkemm miżuri konkreti u impenji ta’ riżorsi huma meħtieġa biex ikomplu jtejbu l-effiċjenza tal-enerġija fil-bini, it-tisħin distrettwali, l-industrija u s-setturi tat-trasport urban. L-integrazzjoni tas-swieq tal-elettriku u l-gass tar-Rumanija fis-swieq tal-UE tibqa’ inkompluta u għad hemm ostakli sostanzjali għall-implimentazzjoni ta’ konnessjonijiet trans‐konfinali għall-gass, li jikkontribwixxi biex titjib id-diversifikazzjoni tal-provvista.

(20)

L-infrastruttura sottożviluppati bażika tat-trasport tkompli tkun ta’ ostaklu għat-tkabbir fir-Rumanija. It-tkabbir għoli tal-flotta tal-vetturi u l-kwalità baxxa tal-infrastruttura tat-toroq ifixklu lin-negozji u lill-ekonomija. Il-manutenzjoni inadegwata tan-netwerk ferrovjarju affettwat is-sikurezza u l-affidabbiltà. It-trasport ta’ merkanzija fuq passaġġi fuq l-ilma interni jibqa’ ferm anqas baxx mill-potenzjal tiegħu, b'mod partikolari fuq id-Danubju. L-ineffiċjenza u l-governanza mhux‐ trasparenti tal-intrapriżi‐ tal-istat fis-settur tat-trasport ifixklu l-iżvilupp tal-infrastrutturi tan-netwerk.

(21)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tar-Rumanija. Hija vvalutat il-Programm Nazzjonali ta’ Riforma u l-Programm ta’ Konverġenza. Hija ma ħaditx kont biss tar-rilevanza tagħhom għal politika soċjo‐ekonomika u fiskali sostenibbli fir-Rumanija iżda wkoll tal-konformità tagħhom mar-regoli u l-gwida tal-UE, minħabba l-ħtieġa tat-tisħiħ tal-governanza ekonomika ġenerali tal-Unjoni billi tipprovdi kontribut fil-livell tal-UE‐ f'deċiżjonijiet nazzjonali fil-futur. Ir-rakkomandazzjonijiet tagħha skont is-Semestru Ewropew huma riflessi fir-rakkomandazzjonijiet minn (1) sa (8) ta' hawn taħt.

(22)

Fid-dawl ta' din il-valutazzjoni, il-Kunsill eżamina l-Programm ta' Konverġenza, u l-opinjoni tiegħu (5) hija riflessa b'mod partikolari fir-rakkomandazzjoni (2) ta' hawn taħt,

1.

Timplimenta l-programm ta' għajnuna finanzjarja UE/FMI billi tindirizza kompletament il-kondizzjonalità ‐ politika inkluża fil-Memorandum ta' fehim tas-6 ta' Novembru 2013 u s-supplimenti sussegwenti tiegħu ‐ li jikkumplimentaw u jappoġġaw l-implimentazzjoni ta' dawn ir-rakkomandazzjonijiet speċifiċi‐ għall-pajjiż.

2.

Timplimenta strateġija baġitarja għall-2014, li ssaħħaħ b'mod sinifikanti l-isforz baġitarju li jintlaħaq l-objettiv għal terminu ‐medju fl-2015 f'konformità mal-impenji skont il-programm ta' Bilanċ ta' Pagamenti u kif rifless fil-Programm ta' Konverġenza tal-2014, b'mod partikolari billi jiġu speċifikati l-miżuri sottostanti, u tibqa' fl-objettiv għal terminu‐ medju minn hawn 'il quddiem. Ittejjeb il-ġbir tat-taxxa billi tkompli timplimenta strateġija komprensiva ta’ konformità mat-taxxa, li tintensifika l-isforzi sabiex tnaqqas il-frodi tal-VAT. Tiġġieled kontra x-xogħol mhux dikjarat. Tnaqqas il-piż tat-taxxi għal dawk bi dħul baxx‐ jew medju‐ b'mod li ma jaffettwax‐ il-baġit. Tiffinalizza r-riforma tal-pensjonijiet li nbdiet fl-2010 billi tagħmel ugwali l-età tal-pensjoni tal-irġiel u n-nisa.

3.

Tintensifika r-riformi fis-settur tas-saħħa biex jiżdiedu l-effiċjenza, il-kwalità u l-aċċessibilità, inkluż għall-persuni żvantaġġati u l-komunitajiet remoti u iżolati. Iżżid l-isforzi biex jitrażżnu ħlasijiet informali, inkluż permezz ta’ sistemi ta’ ġestjoni u kontroll korretti.

4.

Issaħħaħ il-miżuri ta' suq tax-xogħol ‐attiv u l-kapaċità tal-Aġenzija Nazzjonali għall-Impjieg. Tagħti attenzjoni partikolari lill-attivazzjoni ta’ żgħażagħ mhux irreġistrat. Issaħħaħ il-miżuri li jippromwovu l-impjegabbiltà tal-ħaddiema akbar fl-età. Tistabbilixxi, f’konsultazzjoni mal-imsieħba soċjali, linji gwida ċari dwar l-iffissar tal-pagi minimi trasparenti, b'kont meħud tal-kondizzjonijiet ekonomiċi u tas-suq tax-xogħol.

5.

Iżid il-kwalità u l-aċċess għall-edukazzjoni u t-taħriġ vokazzjonali, l-apprendistati, l-edukazzjoni terzjarja u tat-tagħlim tul il-ħajja u tadattahom għal-ħtiġijiet tas-suq tax-xogħol. Tiżgura aċċess aħjar għall-edukazzjoni u l-kura minn kmieni fit-tfulija.

6.

Sabiex jittaffa l-faqar, iżżid l-effiċjenza u l-effikaċja tat-trasferimenti soċjali, b’mod partikolari għat-tfal, u tkompli r-riforma tal-assistenza soċjali, billi ssaħħaħ r-rabtiet tagħha mal-miżuri ta’ attivazzjoni. Tintensifika l-isforzi biex jiġu implimentati l-miżuri previsti li jiffavorixxu l-integrazzjoni tar-Roma fis-suq tax-xogħol, iżidu l-attendenza fl-iskola u jitnaqqas it-tluq bikri mill-iskola, permezz ta’ approċċ ta’ sħubija u mekkaniżmu ta’ monitoraġġ robust.

7.

Tintensifika l-isforzi biex tissaħħaħ il-kapaċità tal-amministrazzjoni pubblika, b'mod partikolari billi ttejjeb l-effiċjenza, il-ġestjoni tar-riżorsi umani, l-għodod għat-teħid‐ tad-deċiżjonijiet u l-koordinazzjoni fi ħdan u bejn il-livelli differenti tal-gvern; u billi ttejjeb t-trasparenza, l-integrità u l-affidabbiltà. Taċċellera l-assorbiment tal-fondi tal-UE, issaħħaħ is-sistemi ta’ ġestjoni u kontroll, u ttejjeb il-kapaċità tal-ippjanar strateġiku, inklużi l-element baġitarju multiannwali. Tindirizza n-nuqqasijiet persistenti fl-akkwist pubbliku. Tkompli ttejjeb il-kwalità u l-effiċjenza tas-sistema ġudizzjarja, tiġġieled kontra l-korruzzjoni fil-livelli kollha, u tiżgura l-implimentazzjoni effettiva tad-deċiżjonijiet tal-qorti.

8.

Tippromwovi l-kompetizzjoni u l-effiċjenza fl-industriji tat-trasport u l-enerġija. Taċċellera ir-riforma ta' governanza korporattiva tal-intrapriżi‐ tal-istat fis-setturi tal-enerġija u t-trasport u żżid l-effiċjenza tagħhom. Itejjeb u tissimplifika l-politiki dwar l-effiċjenza enerġetika. Ittejjeb l-integrazzjoni trans‐konfinali tan-netwerks tal-enerġija u tippermetti flussi fiżiċi fid-direzzjoni opposta fl-interkonnessjonijiet tal-gass bħala kwistjoni ta' prijorità.

29.7.2014   

MT

Il-Ġurnal Uffiċjali tal-Unjoni Ewropea

C 247/115

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għall-impjiegi u t-tkabbir, Ewropa 2020, ibbażata fuq koordinazzjoni msaħħa tal-politiki ekonomiċi, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għat-tkabbir u l-kompetittività sostenibbli.

(2)

Fit-13 ta’ Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi tal-Istati Membri u l-Unjoni (mill-2010 sal-2014) u, fil-21 ta’ Ottubru 2010, adotta deċiżjoni dwar il-linji gwida għall-politiki tal-impjiegi tal-Istati Membri (3), li flimkien jiffurmaw il-“linji gwida integrati”. L-Istati Membri ġew mistiedna sabiex jikkunsidraw il-linji gwida integrati fil-politiki nazzjonali ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għall-azzjoni fil-livelli nazzjonali, tal-UE u taż-żona tal-euro bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiżi.

(4)

Fid-9 ta’ Lulju 2013, il-Kunsill adotta Rakkomandazzjoni (4) dwar il-Programm Nazzjonali ta’ Riforma tas-Slovenja għall-2013 u ta l-opinjoni tiegħu dwar il-Programm ta’ Stabbiltà tas-Slovenja għall-perijodu 2012-2016. Fil-15 ta' Novembru 2013, f'konformità mar-Regolament (UE) Nru 473/2013 tal-Parlament Ewropew u tal-Kunsill (5), il-Kummissjoni ppreżentat l-opinjoni tagħha dwar l-abbozz ta' pjan baġitarju tas-Slovenja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011, adottat ir-Rapport dwar il-Mekkaniżmu ta' Twissija, li fih identifikat lis-Slovenja bħala wieħed mill-Istati Membri li għalihom ser issir rieżami fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet biex jiġu żgurati l-istabbiltà finanzjarja, il-konsolidazzjoni fiskali u l-azzjoni biex jitrawwem it-tkabbir. Huwa enfasizza l-ħtieġa li tkun segwita konsolidazzjoni fiskali differenzjata li tiffavorixxi t-tkabbir, li l-kondizzjonijiet ta' self għall-ekonomija jerġgħu lura għan-normal, li jiġu promossi t-tkabbir u l-kompetittività, li jiġu indirizzati l-qgħad u l-konsegwenzi soċjali tal-kriżi, u li tiġi mmodernizzata l-amministrazzjoni pubblika.

(7)

Fil-5 ta' Marzu 2014, il-Kummissjoni ppubblikat ir-riżultati tar-rieżami fil-fond tagħha dwar is-Slovenja, skont l-Artikolu 5 tar-Regolament (UE) Nru 1176/2011. L-analiżi tal-Kummissjoni twassalha biex tikkonkludi li s-Slovenja għadha qed tesperjenza żbilanċi makroekonomiċi eċċessivi, li jeħtieġu monitoraġġ u azzjoni politika b'saħħitha u kontinwa. Waqt li l-iżbilanċi kienu qed jevolvu matul l-2013 minħabba aġġustament makroekonomiku u xi azzjoni politika mis-Slovenja, id-daqs tal-korrezzjoni meħtieġa jfisser li riskji sostanzjali għadhom preżenti. B'mod iktar speċifiku, ir-riskji li joħorġu minn struttura ekonomika karatterizzata minn governanza korporattiva dgħajfa, livell għoli ta' involviment mill-Istat fl-ekonomija, telf fil-kompetittività tal-kost, piz żejjed tad-dejn tal-kumpanniji u żieda konsiderevoli fid-dejn tal-gvern jeżiġu attenzjoni mill-qrib ħafna. Waqt li sar progress konsiderevoli fit-tiswija tal-karti bilanċjali tal-banek, azzjoni determinata fir-rigward tal-implimentazzjoni sħiħa ta' strateġija komprensiva għas-settur bankarju, inkluż ristrutturar, privatizzazzjoni u superviżjoni mtejba, għadha meħtieġa.

(8)

Fil-5 ta’ Marzu 2014, il-Kummissjoni indirizzat Rakkomandazzjoni Awtonoma lis-Slovenja fejn talbet lill-awtoritajiet biex jagħmlu aktar sforzi biex jiżguraw konformità sħiħa mar-rakkomandazzjoni tal-Kunsill skont il-Proċedura ta' Defiċit Eċċessiv (PDE) u biex jirrappurtaw dwar miżuri addizzjonali f’sezzjoni dedikata tal-Programm ta’ Stabbiltà 2014.

(9)

Fil-15 ta' April 2014, is-Slovenja ppreżentat il-Programm Nazzjonali ta' Riforma 2014 tagħha u fl-24 ta' April 2014 il-Programm ta' Stabbiltà 2014 tagħha. Sabiex jittieħed kont tal-konnessjonijiet ta' bejniethom, iż-żewġ programmi ġew vvalutati fl-istess waqt.

(10)

L-objettiv tal-istrateġija baġitarja deskritta fil-Programm ta' Stabbiltà tal-2014 huwa li d-defiċit eċċessiv jiġi kkoreġut sal-2015, u li l-objettiv tat-terminu medju jintlaħaq sal-2017. Il-Programm ta' Stabbiltà jikkonferma l-objettiv preċedenti fuq terminu medju ta' baġit ibbilanċjat, li huwa konformi mar-rekwiżiti tal-Patt ta' Stabbiltà u Tkabbir. Madankollu, il-bilanċ strutturali (rikalkulat) mhux mistenni jilħaq l-objettiv fuq terminu medju sal-2017. Il-Programm ta' Stabbiltà jippjana li jnaqqas id-defiċit għal taħt it-3 % tal-PDG fl-2015, f'konformità mal-mira stabbilita fir-rakkomandazzjoni tal-Proċedura ta' Defiċit Eċċessiv. Lil hinn mill-2015, il-Programm ta' Stabbiltà jipprevedi tnaqqis kontinwu fid-defiċit qabel ma jaqleb għal surplus ta' 0,3 % tal-PDG fl-2018. Il-Programm ta' Stabbiltà jipproġetta li d-dejn tal-gvern jilħaq l-ogħla punt tiegħu meta jilħaq il-81,1 % tal-PDG fl-2015 qabel ma jaqa' għal 76 % fl-2016. Kumplessivament, l-istrateġija baġitarja deskritta fil-Programm ta' Stabbiltà hija konformi mar-rekwiżiti tal-Patt ta' Stabbiltà u Tkabbir. Ix-xenarju makroekonomiku li jirfed il-proġettazzjonijiet baġitarji fil-Programm ta' Stabbiltà, li ġie prodott minn korp indipendenti (l-Istitut għall-Analiżi Makroekonomika u l-Iżvilupp), huwa wieħed kawt. Il-Programm ta' Stabbiltà jidentifika xi miżuri addizzjonali li jassistu biex inaqqsu d-distakk bl-isforz fiskali meħtieġ. Abbażi ta' dan, huwa kkunsidrat li l-Programm ta' Stabbiltà rrisponda parzjalment għar-Rakkomandazzjoni Awtonoma tal-Kummissjoni. Madankollu, għad hemm riskji negattivi minħabba li l-miżuri li jirfdu l-Programm ta' Stabbiltà mhumiex iddettaljati biżżejjed, u ħafna minnhom għad iridu jiġu adottati.

Kull ħtieġa ta' rikapitalizzazzjoni addizzjonali tal-bank li tirriżulta mill-eżami tal-kwalità tal-assi u t-test tal-istress tal-2013 fis-Slovenja, iżżid il-proporzjonijiet tad-defiċit u tad-dejn waqt li kwalunkwe dħul mill-privatizzazzjoni b'suċċess tal-entitajiet jew banek proprjetà tal-istat li ma kienx inkorporat fil-proġettazzjonijiet tal-programm inaqqas il-piż tad-dejn. Abbażi tal-previżjoni tal-Kummissjoni, l-isforz fiskali matul il-perijodu 2013-2014 huwa 1,4 % inqas mill-PDG f'termini tal-bidla (ikkoreġuta) fil-bilanċ strutturali u 0,5 % inqas mill-PDG f'termini tal-ammont tal-miżuri meħtieġa stmati neċessarji meta saret ir-rakkomandazzjoni tal-Proċedura ta' Defiċit Eċċessiv. Għall-2015, filwaqt li l-Programm ta' Stabbiltà jipproġetta defiċit skont ir-rakkomandazzjoni tal-Proċedura ta' Defiċit Eċċessiv, il-previżjoni tar-Rebbiegħa tas-servizzi tal-Kummissjoni għall-2014 tistima defiċit ta' 3,1 % tal-PDG.

(11)

Barra minn hekk, abbażi tal-previżjoni tal-Kummissjoni, l-isforz fiskali mkejjel kemm mill-bidla (ikkoreġuta) fil-bilanċ strutturali kif ukoll mill-ammont sottostanti tal-miżuri diskrezzjonali li għandhom ikunu implimentati huwa mistenni li jkun inqas mill-livell rakkomandat mill-Kunsill għall-2015. Abbażi tal-valutazzjoni tiegħu tal-Programm ta' Stabbiltà u l-previżjoni tal-Kummissjoni, skont ir-Regolament (KE) Nru 1466/97, il-Kunsill huwa tal-opinjoni li sforzi addizzjonali, fl-2014 u wara, huma meħtieġa sabiex tkun żgurata konformità sħiħa mar-rakkomandazzjoni tal-Proċedura ta' Defiċit Eċċessiv, inkluż l-isforz strutturali meħtieġ.

(12)

Fir-rigward tar-regoli fiskali, fl-2013 il-Parlament approva bażi kostituzzjonali għall-istabbiliment ta' regola ta' bilanċ baġitarju/surplus tal-amministrazzjoni pubblika f'termini strutturali. Madankollu, il-leġislazzjoni ta' implimentazzjoni meħtieġa, jiġifieri l-Att tar-Regoli Fiskali, li kellu jidħol fis-seħħ sa Novembru 2013, għad irid jiġi adottat. B'mod partikolari, il-bażi ġuridika neċessarja jeħtieġ li tkun stabbilita sabiex ikunu definiti r-rwol, il-mandat u l-indipendenza ta' Kunsill Fiskali li jiffunzjona. It-tlestija f'waqtha ta' eżami komprensiv tan-nefqa tal-utenti baġitarji kollha fil-qasam ewlieni tas-saħħa jistgħu jidentifikaw miżuri li jirfdu l-konsolidazzjoni fiskali u jidentifikaw opzjonijiet għat-titjib tal-effiċjenza u l-kosteffikaċja.

(13)

Fl-2013, kien rakkomandat li s-Slovenja ssaħħaħ is-sostenibbiltà fuq medda twila ta' żmien tas-sistema tal-pensjonijiet u biex ittejjeb l-effiċjenza, il-kosteffettività u l-kwalità tas-settur tal-kura fit-tul. Is-Slovenja għamlet progress limitat fuq il-miżuri meħuda biex tkun indirizzata din ir-rakkomandazzjoni. Evalwazzjoni tar-riforma tal-pensjonijiet tal-2012 tlestiet f'April 2014 u l-ewwel sejbiet huma pożittivi. Waqt li ġie rrealizzat ċertu ffrankar fiskali, il-livell tal-pensjonijiet baqa' ma nbidilx. Is-Slovenja tiffaċċa riskji għolja ta' sostenibilità fiskali fuq terminu twil u medju prinċipalment minħabba żieda fin-nefqa relatata mat-tixjiħ implikata mid-demografija tas-Slovenja. Għaldaqstant is-sistemi tal-pensjonijiet u tal-kura fit-tul ser jeħtieġu li jiġu riformati fuq terminu medju biex in-nefqa kumplessiva tiġi stabbilizzata fuq it-terminu medju u twal filwaqt li tkun żgurata l-adegwatezza tal-pensjonijiet u l-aċċess għal servizzi tal-kura fit-tul. L-awtoritajiet qed jippjanaw li jħejju White Paper għal riforma komprensiva tal-pensjonijiet. Pjan ta' azzjoni għar-riforma tal-kura fit-tul kien adottat fi tmiem l-2013 u l-leġslazzjoni relatata hija mistennija sa tmiem l-2014. Madankollu, hemm ir-riskju li r-riforma tibqa' lura minħabba li r-riorganizzazzjoni tal-assigurazzjoni tal-kura tas-saħħa li għadha qed issir waqgħet lura.

(14)

Is sitwazzjoni tas-suq tax-xogħol marret għall-agħar. Il-qgħad laħaq l-10,3 % fl-2013 u l-qgħad fost iż-żgħażagħ tela' għal 21,6 % fl-2013 filwaqt li l-proporzjon ta' żgħażagħ li huma barra mill-edukazzjoni, impjieg jew taħriġ żdied bi 2,1 punti perċentwali bejn l-2011 u l-2013. L-evalwazzjoni tar-riforma tas-suq tax-xogħol adottata fl-2013 tindika tnaqqis tas-segmentazzjoni bejn il-kuntratti permanenti u dawk b'terminu fiss, minkejja askapitu tal-użu akbar ta' forom oħra ta' kuntratti mhux permanenti, waqt li l-effett tal-inċentivi għall-impjieg ta' persuni ikbar u iżgħar għadu mhux ċar. Is-segmentazzjoni tas-suq tax-xogħol qed tiġi indirizzata wkoll permezz ta' regolamentazzjoni aħjar tal-ħidma tal-istudenti. Waqt li att ġdid qed jistenna l-approvazzjoni, għad hemm tħassib dwar jekk dan hux ser jindirizza b'mod adgwat in-nuqqasijiet fir-regoli preċedenti. Il-Gvern għamel progress limitat fl-implimentazzjoni tar-rakkomandazzjoni tas-sena l-oħra dwar il-paga minima, li għadha qed tkun indiċjata biss mal-inflazzjoni, waqt li l-att dwar il-paga minima jippermetti indiċjar ma' kundizzjonijiet ekonomiċi oħra. Sar progress limitat fl-iżvilupp ta' miżuri effettivi mfassla apposta ta' politika attiva dwar is-suq tax-xogħol u fl-indirizzar tan-nuqqas ta' tlaqqigħ tal-ħiliet.

(15)

Il-Gvern għamel progress sostanzjali fl-indirizzar ta' rakkomandazzjonijiet dwar l-istabbilità fis-settur bankarju, li jwassal Analiżi tal-Kwalità tal-Assi u Stress Test kredibbli, rikapitalizzazzjoni f'waqtha, u t-trasferiment ta' self improduttiv lill-Kumpanija Maniġerjali tal-Assi tal-Bank. Madankollu, il-ħidma għadha 'l bogħod milli titlesta u azzjoni determinata biex tiġi ffinalizzata u implimentata strateġija bankarja komprensiva kif imħabbar f'Diċembru 2013, inkluż ir-ristrutturar, il-privatizzazzjoni u s-superviżjoni mtejba, hija meħtieġa. Il-livell ta' self improduttiv fis-sistema bankarja għadu għoli. Huwa għalhekk importanti li l-banek jibnu kapaċità interna biex iħaddmu self improduttiv inkluż it-tisħiħ tal-ġestjoni interna tal-assi u l-unitajiet ta' ristrutturar, biex jaċċelleraw l-ipproċessar ta' self improduttiv waqt li jimmassimizzaw l-valur ta' rkupru u jippreservaw in-negozji vijabbli. Kull trasferiment ulterjuri ta' self improduttiv lill-Kumpanija Maniġerjali tal-Assi tal-Bank jeħtieġ li jkun mfassal bir-reqqa sabiex jiffaċilità ristrutturar rapidu u effiċjenti ta' krediti korporattivi, b'mod partikolari fil-każ ta' self ta' gruppi kumplessi u interkonnessi. Pjan komprensiv għall-istrateġija tal-ġestjoni u għan-negozju li jissostanzja miri ta' ħlas lura għall-Kumpannija Maniġerjali tal-Assi tal-Bank huwa mistenni. Waqt li jibnu fuq il-lezzjonijiet meħuda mill-analiżi tal-kwalità tal-assi u mit-test tal-istress, miżuri deċiżivi ulterjuri biex jittejbu l-governanza u s-superviżjoni għall-banek kollha, u b'mod partikolari għal dawk li jibqgħu fi sjieda tal-Istat, huma meħtieġa għat-tisħiħ tal-ġestjoni tar-riskju, it-titjib ta' proċessi għall-approvazzjoni tal-krediti u t-titjib tal-kwalità u d-disponibbiltà tad-data, bl-objettiv li jitnaqqsu l-livelli tas-self improduttiv u biex ikunu limitati r-riskji futuri.

(16)

Il-Gvern għamel progress limitat fl-implimentazzjoni tar-rakkomandazzjoni dwar il-governanza korporattiva ta' intrapriżi tal-istat, li jkopru wieħed minn kull sitta tal-valur miżjud totali u jifformaw relazzjoni komplessa ta' banek domestiċi, grupp tal-assigurazzjoni u korporazzjonijiet mhux finanzjarji, b'parteċipazzjoni azzjonarja inkroċjata sinifikanti. Il-livell ta' influwenza mill-Istat joħloq riskji sinifikanti għall-finanzi pubbliċi kemm direttament kif ukoll indirettament permezz ta' obbligazzjonijiet mill-garanziji. Strateġija koerenti għall-ġestjoni tal-intrapriżi tal-istat flimkien ma' governanza korporattiva mtejba joħolqu ambjent aktar favorevoli biex jiġi attirat investiment dirett barrani. Minkejja li ttieħdu l-ewwel passi billi saret lista inizjali ta' 15-il kumpannija għall-privatizzazzjoni aċċelerata f'Mejju 2013, sal-lum il-progress kien wieħed imħallat u hemm riskju sinifikanti li l-iskadenzi ma jiġux sodisfatti. Wara xi dewmien, il-leġislazzjoni l-ġdida li tirfed l-Impriża Sovrana Slovena, mezz għall-konsolidazzjoni tal-ġestjoni tas-sjieda mill-Istat, ġiet introdotta f'April 2014. Strateġija komprensiva u klassifikazzjoni preċiża tal-assi ewlenin u dawk mhux ewlenin inkluż dawk indikati għall-privatizzazzjoni, huma mistennija. Hemm bżonn li jiġu identifikati u implimentati miżuri xierqa biex ikun żgurat il-proċess ta' ristrutturar u l-kisba tal-miri tiegħu inkluż, fost l-oħrajn, il-massimizzazzjoni tal-valur ta' rkupru għall-kredituri u l-istabbiliment ta' lista tal-każijiet l-iktar urġenti għar-ristrutturar għal soluzzjoni rapida.

(17)

Il-qafas ta' insolvenza ġie emendat fl-2013 sabiex tkun iffaċilitata r-riżoluzzjoni f'waqtha tas-self improduttiv iżda l-qafas il-ġdid fil-biċċa l-kbira tiegħu għadu ma ġiex ittestjat. Livell għoli ta' dejn u diffikultà finanzjarja llimitaw il-kapaċità tas-settur korporattiv li jinvesti fi proġetti futuri. Ir-ristrutturar finanzjarju u operattiv urġentament meħtieġ tas-settur korporattiv għad irid jibda fuq skala kbira. Ħarsa konsolidata tal-iskoperturi ta' kreditu varji fis-sistema bankarja hija meħtieġa biex tiġi aċċelerata s-soluzzjoni ta' self improduttiv u jiġu ffaċilitati n-negozjati ta' ristrutturar, b'mod partikolari fil-każ ta' self ta' gruppi kumplessi u interkonnessi. Task force ċentralizzata b'rappreżentanti esperjenzati tal-partijiet interessati kollha jistgħu jieħdu l-inizjattiva li jappoġġaw u jaċċelleraw dan il-proċess. Sadanittant, għeluq rapidu u effiċjenti ta' bosta każijiet urġenti li għadhom għaddejjin bħalissa fil-Kumpanija Maniġerjali tal-Assi tal-Bank huwa kruċjali.

(18)

Minkejja l-potenzjal tagħha, is-Slovenja għandha wieħed mill-iktar stokks baxxi ta' investiment dirett barrani fl-Unjoni (34,1 % tal-PDG meta mqabbel mal-medja ta' 47,1 % tal-PDG fl-Unjoni fl-2012). Filwaqt li l-privatizzazzjoni u r-ristrutturar korporattiv joffru bosta possibilitajiet ġodda għall-investituri privati, hemm evidenza li l-kultura u l-ambjent tan-negozju insuffiċjentament żviluppati jfixklu lis-Slovenja milli tieħu vantaġġ sħiħ minnhom. Fl-2012 beda proċess ta' deregulazzjoni ta' professjonijiet irregolati u, sa issa, l-għadd ta' professjonijiet irregolati naqas minn 323 għal 262. Deregulazzjoni ulterjuri ta' professjonijiet irregolati tikkontribwixxi għaż-żieda tal-għadd ta' fornituri ta' servizzi domestiċi u barranin u għaldaqstant tikkontribwixxi għall-kompetittività miżjuda. Hemm potenzjal li tiżdied il-koerenza tal-miżuri maħsuba biex itejbu l-ambjent tan-negozju u l-attivitajiet imprenditorjali. F'dan il-kuntest, l-Istrateġija ta' Speċjalizzazzjoni Intelliġenti taħt il-Fondi Ewropej Strutturali u ta' Investiment għall-2014-20 ser tipprovdi opportunità biex issir enfasi fuq miżuri ewlenin bħall-ħolqien ta' prodotti kummerċjabbli u innovattivi.

(19)

Is-Slovenja qiegħda fl-istadji bikrija fit-tħejjija ta' proposti ta' riforma tas-settur pubbliku komprensivi (li ser jiġu adottati sa Jannar 2015). F'dan il-kuntest, is-Slovenja għandha tirkupra l-kredibbilità u l-kwalità tal-amministrazzjoni pubblika. Is-Slovenja għamlet xi progress fit-titjib tal-kwalità tas-sistema ġudizzjarja u naqqset l-għadd ta' każijiet pendenti. Riforma tal-ġestjoni ta' każijiet fil-ġustizzja kummerċjali u ċivili tejbet il-funzjonament tas-sistema tal-qorti. Inżammu x-xejriet pożittivi reċenti f'każijiet litiġużi ċivili u kummerċjali.

(20)

Fil-kuntest tas-Semestru Ewropew, il-Kummissjoni wettqet analiżi komprensiva tal-politika ekonomika tas-Slovenja. Hija vvalutat il-Programm Nazzjonali ta’ Riforma u l-Programm ta’ Stabbiltà. Mhux biss ħadet kont tar-rilevanza tagħhom għall-politika fiskali u soċjoekonomika sostenibbli fis-Slovenja iżda qieset ukoll il-konformità tagħhom mar-regoli u mal-gwida tal-UE, fid-dawl tal-ħtieġa li tissaħħaħ il-governanza ekonomika kumplessiva tal-Unjoni billi jingħata kontribut fil-livell tal-UE għad-deċiżjonijiet nazzjonali futuri. Ir-rakkomandazzjonijiet tagħha taħt is-Semestru Ewropew huma riflessi fir-rakkomandazzjonijiet minn (1) sa (8) hawn taħt.

(21)

Fid-dawl ta’ din il-valutazzjoni, il-Kunsill eżamina l-Programm ta’ Stabbiltà, u l-opinjoni tiegħu (6) hija riflessa b’mod partikolari fir-rakkomandazzjoni (1) ta' hawn taħt.

(22)

Fid-dawl tar-reviżjoni fil-fond tal-Kummissjoni u din il-valutazzjoni, il-Kunsill eżamina l-Programm Nazzjonali ta’ Riforma u l-Programm ta’ Stabbiltà. Ir-rakkomandazzjonijiet tiegħu taħt l-Artikolu 6 tar-Regolament (UE) Nru 1176/2011, huma riflessi fir-rakkomandazzjonijiet minn (1) sa (8) ta' hawn taħt.

(23)

Fil-kuntest tas-Semestru Ewropew, il-Kummissjoni wettqet ukoll analiżi tal-politika ekonomika fiż-żona tal-euro bħala entità sħiħa. Abbażi ta' dan, il-Kunsill ħareġ rakkomandazzjonijiet speċifiċi indirizzati lill-Istati Membri li l-munita tagħhom hija l-euro (7). Bħala pajjiż li l-munita tiegħu hija l-euro, is-Slovenja għandha wkoll tiżgura l-implimentazzjoni sħiħa u f'waqtha ta' dawk ir-rakkomandazzjonijiet,

1.

Issaħħaħ l-istrateġija baġitarja b'miżuri suffiċjentament speċifikati għas-sena 2014 u lil hinn biex tiżgura korrezzjoni tad-defiċit eċċessiv b'manjiera sostenibbli sal-2015 permezz tal-kisba tal-isforz tal-aġġustament strutturali speċifikat fir-rakkomandazzjoni tal-Kunsill fil-Proċedura ta' Defiċit Eċċessiv. Korrezzjoni durabbli tal-iżbilanċi fiskali teħtieġ l-implimentazzjoni kredibbli ta' riformi strutturali ambizzjużi biex tiżdied il-kapaċità ta' aġġustament u jiġu xprunati t-tkabbir u l-impjiegi. Wara l-korrezzjoni tad-defiċit eċċessiv, tfittex li tikseb aġġustament strutturali ta' mill-inqas 0,5 % tal-PDG kull sena, u iktar f'kondizzjonijiet ekonomiċi tajba jew li tiżgura li r-regola tad-dejn tkun sodisfatta sabiex il-proporzjon tad-dejn tal-amministrazzjoni pubblika jitqiegħed fit-triq tan-niżla. Ittejjeb il-kredibbiltà tal-politika fiskali, tlesti l-adozzjoni ta' regola ta' bilanċ/surplus baġitarju tal-amministrazzjoni pubblika f'termini strutturali, tagħmel il-qafas baġitarju fuq terminu medju vinkolanti, kumplessiv u trasparenti, u tistabilixxi l-bażi legali meħtieġa għal kunsill fiskali li jiffunzjona billi tiddefinixxi l-mandat tiegħu fil-proċess baġitarju u tintroduċi arranġamenti proċedurali ċari għall-monitoraġġ tar-riżultati baġitarji mill-aktar fis possibbli. Tniedi rieżami komprensiv tan-nefqa li tkopri l-livelli tal-istat u tal-gvern lokali, l-utenti diretti u indiretti tal-baġit u l-fornituri ta' utilitajiet u servizzi proprjetà tal-muniċipalità fil-qasam tal-kura tas-saħħa sal-aħħar tal-2014 bil-għan li jkun realizzat iffrankar baġitarju fl-2015 u lil hinn.

2.

Abbażi tal-konsultazzjoni pubblika, taqbel dwar miżuri biex jiżguraw is-sostenibbiltà tas-sistema tal-pensjonijiet u l-adegwatezza tal-pensjonijiet wara l-2020, li jinkludu aġġustamenti ta' parametri ewlenin, bħall-irbit tal-età statutorja tal-irtirar maż-żieda fl-istennija tal-ħajja u tinkoraġġixxi kontribuzzjonijiet privati għat-tieni pilastru tas-sistema tal-pensjonijiet. Tillimita n-nefqa relatata mal-età fuq il-kura fit-tul billi tindirizza l-benefiċċji lil dawk li l-aktar għandhom bżonn u tmexxi l-enfasi mill-provvediment tal-kura istituzzjonali għall-kura fid-dar.

3.

Wara konsultazzjoni mal-imsieħba soċjali u skont il-prattiki nazzjonali, tiżviluppa sa tmiem l-2014 Ftehim Soċjali komprensiv li jiżgura li l-iżviluppi fil-pagi, inkluża l-paga minima, jappoġġaw il-kompetittività, id-domanda domestika u l-ħolqien tax-xogħol. Tiddefinixxi mill-ġdid il-kompożizzjoni tal-paga minima u tirrieżamina s-sistema ta' indiċjar tagħha. Tieħu miżuri biex titnaqqas iktar is-segmentazzjoni, b'mod partikolari billi tindirizza l-effiċjenza tal-inċentivi għar-reklutaġġ ta' ħaddiema żgħażagħ u dawk iktar maturi u l-użu ta' kuntratti tad-dritt ċivili. Tadotta l-Att dwar ix-Xogħol tal-Istudenti. Tipprijoritizza l-attivitajiet biex jintlaħqu żgħażagħ mhux irreġistrati billi tiżgura kapaċitajiet tas-servizz pubbliku tal-impjiegi. Iżżid l-impjieg ta' ħaddiema bi ftit ħiliet u dawk iktar maturi, tadatta l-ambjent tax-xogħol għal ħajja tax-xogħol itwal u tiffoka r-riżorsi fuq miżuri ta' politika attiva mfassla apposta fis-suq tax-xogħol, waqt li ttejjeb l-effikaċja. Tindirizza n-nuqqas ta’ tlaqqigħ tal-ħiliet billi ttejjeb l-attrazzjoni tal-edukazzjoni u t-taħriġ vokazzjonali u billi tiżviluppa aktar il-kooperazzjoni mal-partijiet interessati rilevanti fil-valutazzjoni tal-ħtiġijiet tas-suq tax-xogħol.

4.

Kif ippjanat, tlesti l-privatizzazzjoni ta' NKBM fl-2014, tipprepara Abanka għall-privatizzazzjoni fl-2015, tkompli l-implimentazzjoni minnufih tal-pjanijiet ta' ristrutturar tal-banek li qed jirċievu għajnuna mill-Istat u l-konsolidazzjoni meħtieġa tas-settur bankarju. Abbażi tal-lezzjonijiet li ħarġu mill-analiżi tal-kwalità tal-assi u mit-test tal-istress, tiffinalizza l-pjan ta' azzjoni komprensiv għall-banek f'Awwissu 2014, inklużi miżuri speċifiċi biex ittejjeb il-governanza, is-superviżjoni, il-ġestjoni tar-riskji, il-proċess ta' approvazzjoni tal-krediti u l-kwalità u d-disponibbiltà tad-data. Issaħħaħ il-kapaċità tal-banek li jsolvu self improduttiv billi jsaħħu l-unitajiet interni tal-ġestjoni tal-assi u r-ristrutturar. Tikkjarifika l-mandat tal-Kumpannija Maniġerjali tal-Assi tal-Bank billi tippubblika pjan komprensiv għall-istrateġija tal-ġestjoni u għan-negozju sa Settembru 2014, li jispjega fid-dettall r-rwol tagħha fir-ristrutturar tal-assi tagħha, il-miri ta' tifdija, baġits, pjanijiet ta' ġestjoni tal-assi u redditu mistennija, waqt li tiżgura riżorsi adegwati.

5.

Tkompli timplimenta l-privatizzazzjonijiet imħabbra fl-2013 bl-oqfsa taż-żmien stabbiliti. Tadotta strateġija Għas-Slovenian Sovereign Holding bi klassifikazzjoni ċara tal-assi f'konformità mal-iskeda u d-definizzjonijiet stabbiliti fl-Att tas-Slovenian Holding Act tal-2014. Sa Novembru 2014 timpenja ruħha għal skeda ta' divestiment fuq żmien qasir (orizzont ta' sena sa sentejn) għal għadd ta' assi mmirati sew bi skala ċara ta' żmien. Tagħmilha kompletament operattiva bħala vejikolu għall-ġestjoni tal-assi li jibqgħu sjieda tal-Istat u għad-divestiment tal-assi mmarkati skont l-atti ta' ġestjoni, fil-qafas ta' żmien stipulat bil-liġi. Sa Settembru 2014, tadotta u timplimenta kodiċi ta' governanza korporattiva għall-intrapriżi tal-Istat biex tiżgura ġestjoni professjonali, trasparenti u indipendenti.

6.

Tiffinalizza pjan regolatorju għar-ristrutturar korporattiv sa tmiem l-2014 skont prijoritajiet ċari u proċess ta' implimentazzjoni effettiva. Twaqqaf task force ċentrali u korporattiva għar-ristrutturar li timmonitorja u tikkoordina l-proċess kumplessiv ta' ristrutturar, waqt li tipprovdi l-kompetenza esperta, il-gwida u l-pariri meħtieġa u tiffaċilita l-proċess ta' negozjar bejn il-partijiet interessati kollha involuti. Tistabbilixxi lista tal-każijiet l-iktar urġenti ta' ristrutturar, waqt li timmassimizza l-valur ta' rkupru tal-kredituri. Tippromwovi l-użu tal-mekkaniżmi legali disponibbli u tal-aħjar prattiki internazzjonali lill-partijiet interessati kollha fil-proċess ta' ristrutturar. Tevalwa bidliet riċenti fil-leġislazzjoni dwar l-insolvenza sa Settembru 2014, waqt li tkun lesta li tintroduċi kull miżura addizzjonali meħtieġa. Tnaqqas aktar it-tul tal-proċedimenti ġudizzjarji fl-ewwel istanza f'kawżi litiġużi ċivili u kummerċjali inklużi kawżi skont il-leġislazzjoni dwar l-insolvenza, u l-għadd ta' kawżi pendenti, b'mod partikolari kawżi ta' infurzar u insolvenza.

7.

Tnaqqas l-ostakoli għan-negozju fis-Slovenja f'oqsma ewlenin għall-iżvilupp ekonomiku biex b'hekk tagħmel il-pajjiż iktar attraenti għall-investiment dirett barrani b'mod partikolari permezz ta' liberalizzazzjoni aċċellerata tal-professjonijiet irregolati, tnaqqis tal-piż amministrattiv inklużi skemi ta' awtorizzazzjoni inqas ingumbranti. Tiżgura awtonomija baġitarja suffiċjenti għall-Aġenzija għall-Protezzjoni tal-Kompetizzjoni u żżid l-indipendenza istituzzjonali tagħha. Tissimplifika l-prijoritajiet u tiżgura konsistenza bejn l-Istrateġija għar-Riċerka u l-Innovazzjoni tal-2011 u dik tal-Politika Industrijali tal-2013, flimkien mal-istrateġiji li ġejjin dwar l-Ispeċjalizzazzjoni Intelliġenti u t-Trasport u tiżgura l-implimentazzjoni minnufih u l-valutazzjoni tal-effikaċja tagħhom.

8.

Tieħu miżuri effettivi biex tiġġieled il-korruzzjoni, ittejjeb it-trasparenza u r-responsabbiltà, u tintroduċi evalwazzjoni esterna tal-prestazzjoni u proċeduri tal-kontroll ta' kwalità.

29.7.2014   

MT

Il-Ġurnal Uffiċjali tal-Unjoni Ewropea

C 247/122

(1)

Fis-26 ta’ Marzu 2010, il-Kunsill Ewropew qabel mal-proposta tal-Kummissjoni li tiġi mnedija strateġija ġdida għat-tkabbir u l-impjiegi, Ewropa 2020, ibbażata fuq koordinazzjoni msaħħa tal-politiki tal-ekonomija, li tiffoka fuq l-oqsma ewlenin fejn tinħtieġ azzjoni biex tingħata spinta lill-potenzjal tal-Ewropa għal tkabbir u kompetittività sostenibbli.

(2)

Fit-13 ta' Lulju 2010, il-Kunsill, abbażi tal-proposti tal-Kummissjoni, adotta Rakkomandazzjoni dwar il-linji gwida ġenerali għall-politiki ekonomiċi għall-Istati Membri u l-Unjoni (mill-2010 sal-2014) u, fil-21 ta' Ottubru 2010, huwa adotta deċiżjoni dwar il-linji gwida għall-politiki tal-impjiegi tal-Istati Membri (2), li flimkien jiffurmaw il-“linji gwida integrati”. L-Istati Membri kienu mistiedna sabiex jikkunsidraw il-linji gwida integrati fil-politiki ekonomiċi u tal-impjiegi tagħhom.

(3)

Fid-29 ta' Ġunju 2012, il-Kapijiet ta' Stat jew ta' Gvern tal-Istati Membri ddeċidew dwar Patt għat-Tkabbir u l-Impjiegi, li jipprovdi qafas koerenti għal azzjoni f'livell nazzjonali, dak tal-UE kif ukoll taż-żona tal-euro permezz bl-użu tal-lievi, l-istrumenti u l-politiki kollha possibbli. Huma ddeċidew dwar azzjoni li għandha tittieħed fil-livell tal-Istati Membri, fejn b'mod partikolari esprimew impenn sħiħ biex jintlaħqu l-għanijiet tal-Istrateġija Ewropa 2020 u biex jiġu implimentati r-rakkomandazzjonijiet speċifiċi għall-pajjiżi.

(4)

Fid-9 ta' Lulju 2013, il-Kunsill adotta Rakkomandazzjoni (3) dwar il-Programm Nazzjonali ta' Riforma tas-Slovakkja għall-2013 u ta l-opinjoni tiegħu dwar il-Programm ta' Stabbiltà aġġornat tas-Slovakkja għall-perijodu 2012‐2016. Fil-15 ta' Novembru 2013, il-Kummissjoni, f'konformità mar-Regolament (UE) Nru 473/2013 tal-Parlament Ewropew u tal-Kunsill (4), ippreżentat l-opinjoni tagħha dwar l-abbozz ta' pjan baġitarju tas-Slovakkja għall-2014.

(5)

Fit-13 ta' Novembru 2013, il-Kummissjoni adottat l-Istħarriġ Annwali dwar it-Tkabbir, li jimmarka l-bidu tas-Semestru Ewropew 2014 għall-koordinazzjoni tal-politika ekonomika. Barra minn hekk, fit-13 ta' Novembru 2013, il-Kummissjoni, abbażi tar-Regolament (UE) Nru 1176/2011 tal-Parlament Ewropew u tal-Kunsill (5), adottat ir-Rapport ta' Mekkaniżmu ta' Twissija, li fih is-Slovakkja ma ġietx identifikata bħala wieħed mill-Istati Membri li għalihom ser issir reviżjoni fil-fond.

(6)

Fl-20 ta' Diċembru 2013, il-Kunsill Ewropew approva l-prijoritajiet li jiżguraw stabbiltà finanzjarja, konsolidazzjoni fiskali u azzjoni biex jissaħħaħ it-tkabbir. Il-Kunsill enfasizza l-ħtieġa li jissokta l-konsolidazzjoni fiskali differenzjat u favur it-tkabbir, sabiex il-kundizzjonijiet ta' self għall-ekonomija jerġgħu lura għan-normal, jiġu promossi t-tkabbir u l-kompetittività, jiġu ttrattati l-qgħad u l-konsegwenzi soċjali tal-kriżi, u biex l-amministrazzjoni pubblika tiġi mmodernizzata.

(7)

Fit-23 ta' April 2014, is-Slovakkja ppreżentat il-Programm Nazzjonali ta' Riforma tagħha għall-2014 kif ukoll il-Programm ta' Stabbiltà għall-2014. Biex jiġu kkunsidrati l-konnessjonijiet ta' bejniethom, iż-żewġ programmi ġew ivvalutati fl-istess żmien.

(8)

L-objettiv tal-istrateġija baġitarja spjegata fil-Programm ta' Stabbiltà għall-2014 huwa li tiġi żgurata s-sostenibbiltà tal-korrezzjoni tad-defiċit eċċessiv u li jintlaħaq l-objettiv fuq terminu medju ta' defiċit strutturali ta' madwar 0,5 % tal-PDG sal-2017. Dan l-objettiv ta’ terminu medju huwa aktar strett minn dak li jeħtieġ il-Patt ta' Stabbiltà u Tkabbir. Fl-2013, id-defiċit tal-amministrazzjoni pubblika tas-Slovakkja ġie b'mod sostenibbli taħt it-3 % tal-PDG. Il-bidla ppjanata (rikalkulata) fil-bilanċ strutturali tal-2014 timplika li s-Slovakkja ser tiddevja b'mod sinifikanti mill-pjan ta' aġġustament lejn l-objettiv ta’ terminu medju tagħha. Fl-2015, it-titjib ippjanat ta' 0,3 % tal-PDG ikun konformi mar-regoli tal-Patt ta' Stabbiltà u Tkabbir. Fis-snin tal-aħħar, il-Programm ta' Stabbiltà ma jiżgurax aġġustament adegwat lejn l-objettiv ta’ terminu medju. In-nefqa tikber b'pass konsistenti mal-parametru referenzjarju tan-nefqa kemm fl-2014 kif ukoll fl-2015. Il-Programm ta' Stabbiltà jipprevedi li l-akbar parti tal-isforz ta' konsolidazzjoni biex jintlaħaq l-objettiv ta’ terminu medju ser isseħħ fl-2016 u 2017. B'mod ġenerali, il-pjan ta' aġġustament lejn l-objettiv ta’ terminu medju jippreżenta riskji fir-rigward tal-konformità mar-rekwiżiti tal-Patt ta' Stabbiltà u Tkabbir. Il-Programm ta' Stabbiltà jipprevedi li d-dejn tal-amministrazzjoni pubblika jibqa' taħt il-valur ta' referenza ta' 60 % tal-PDG matul il-perijodu kollu tal-ipprogrammar. Ix-xenarju makroekonomiku li jirfed il-projezzjonijiet baġitarji fil-Programm ta' Stabbiltà, li ġew approvati minn korp indipendenti (il-Kumitat tat-Tbassir Makroekonomiku), huwa plawsibbli.

Il-miżuri li diġà huma kwantifikati ma jiżgurawx li l-miri fiskali definiti mill-awtoritajiet ser jintlaħqu. Madankollu, mhux il-miżuri tad-dħul kollha huma speċifikati biżżejjed u riformi ta' ffrankar tal-ispejjeż tal-amministrazzjoni tal-Istat jibqgħu soġġetti għal riskji ta' implimentazzjoni filwaqt li l-kont tal-pagi pubbliċi jista' ma jkunx tal-valuri bbaġitjati, kif ġara fil-passat. Min-naħa l-oħra, iċ-ċifri ppreżentati fil-Programm ta' Stabbiltà għadhom mhux iqisu l-iffrankar li jirriżulta mill-attivazzjoni tat-trażżin tad-dejn domestiku. Skont it-tbassir tar-Rebbiegħa tas-servizzi tal-Kummissjoni tal-2014, li jinkorpora l-impatt tal-iffrankar fin-nefqa minħabba t-trażżin tad-dejn, id-devjazzjoni mill-pjan ta' aġġustament tkun iżgħar fl-2014 milli mbassar fil-Programm ta' Stabbiltà, filwaqt li aġġustament strutturali suffiċjenti huwa pprojettat fl-2015, bil-parametru referenzjarju tan-nefqa jintlaħaq kemm fl-2014 kif ukoll fl-2015.