8.11.2013

MT

Il-Ġurnal Uffiċjali tal-Unjoni Ewropea

CA 322/1

---

Direttorat Ġenerali għall-Baġit

Pubblikazzjoni ta' post battal għal kariga ta' Konsulent Prinċipali (AD 14) fi Brussell

(Artikolu 29, paragrafu 2 tar-Regolamenti tal-Persunal)

COM/2013/10343

(2013/C 322 A/01)

Min aħna

Il-Kummissjoni Ewropea hija responsabbli biex timplimenta bosta mill-obbligi baġitarji tal-Unjoni Ewropea. Id-Direttorat Ġenerali għall-Baġit (DĠ BAĠIT) għandu l-ħidma li jiżgura mill-awtorità baġitarja r-riżorsi meħtieġa biex jimplimenta l-politiki tal-UE, jamministra l-qafas regolatorju tal-baġit, jimplimenta l-baġits annwali (dħul u nefqa), ifassal il-kontijiet annwali tal-istituzzjonijiet, jiżgura ġestjoni finanzjarja tajba u jirrapporta fuq l-eżekuzzjoni tal-baġit lill-Parlament Ewropew, lill-Kunsill u lill-Qorti tal-Awdituri għal dikjarazzjoni ta' assigurazzjoni pożittiva (DAS). Huwa magħmul minn ħames direttorati bbażati fi Brussell bi kważi 420 membru tal-persunal.

Id-DĠ BAĠIT iħejji wkoll ir-regoli li jirregolaw il-finanzi tal-Unjoni Ewropea u, billi joffri konsulenza u taħriġ, iħeġġeġ ġestjoni finanzjarja tajba fid-dipartimenti tal-Kummissjoni. B'dan, id-Direttorat Ġenerali għandu parti deċisiva fil-proċess tar-riforma amministrattiva mfassal biex jagħti lill-istituzzjoni amministrazzjoni pubblika ta' livell għoli li biha jkun jista' jwettaq bl-effiċjenza massima l-ħidmiet mogħtija lilu mit-Trattat.

Id-DĠ BAĠIT għandu rwol importanti fl-allokazzjoni tar-riżorsi finanzjarji u umani, kif ukoll fl-implimentazzjoni tad-dispożizzjonijiet finanzjarji applikabbli lihom. Dan ikopri wkoll l-allokazzjoni tar-riżorsi finanzjarji u umani lil korpi diċentralizzati.

X'qed nipproponu

Fil-qafas tal-Qafas Finanzjarju Pluriennali l-ġdid għall-perjodu bejn l-2014 u l-2020, l-eżekuzzjoni ta' anki aktar programmi se tkun delegata lil aġenziji eżekuttivi u l-korpi diċentralizzati se jibqa' jkollhom rwol importanti għall-kisba tal-għanijiet tal-politika tal-UE. Minħabba d-daqs tal-mezzi baġitarji involuti kif ukoll tar-riżorsi umani u l-implikazzjonijiet ta' governanza, id-DĠ BAĠIT ifittex li jirrekluta Konsulent Prinċipali fejn ir-rwol ta' din il-persuna se jkun li tiżgura approċċ ikkoordinat lejn dawn l-entitajiet.

Il-Konsulent Prinċipali jirrapporta direttament lid-Direttur-Ġenerali u jkun il-punt ta' kuntatt ċentrali fid-DĠ BAĠIT dwar dawn il-kwistjonijiet. Ir-responsabbiltajiet ta' din il-persuna jinkludu b'mod partikolari:

—	Li tipprovdi lid-Direttur Ġenerali tad-DĠ BAĠIT u lis-servizzi rilevanti b'konsulenza, għarfien konċettwali u rakkomandazzjonijiet pratiċi rigward it-trawwim tal-effiċjenza u l-effikaċja ta' aġenziji eżekuttivi u korpi diċentralizzati,

—	Tistimula, tappoġġa u tiżgura approċċ orizzonatli fost is-servizzi rilevanti fid-DĠ BAĠIT biex tiddefinixxi l-pożizzjonijiet tad-DĠ lejn l-entitajiet interessati ewlenin,

—	Tikkomunika kif meħtieġ ma' servizzi ċentrali oħrajn fil-Kummissjoni Ewropea, bħas-Segretarjat-Ġenerali, is-Servizz Legali, id-DĠ Riżorsi Umani u Sigurtà, id-DĠ Informatika kif ukoll id-Direttorati-Ġenerali ewlenin tal-korpi diċentralizzati,

—	Tirrappreżenta lid-DĠ BAĠIT fil-fora rilevanti u tiddefenti l-pożizzjonijiet tiegħu ġewwa u barra l-Kummissjoni.

X'qegħdin infittxu

Il-kandidat ideali għandu jkollu:

—

Għarfien tajjeb, u esperjenza fl-istabbiliment, ta' oqfsa għal korpi diċentralizzati jew aġenziji eżekuttivi; fil-koordinazzjoni ta' relazzjonijiet ma' kostituwenti varji u fit-trawwim tal-adozzjoni ta' approċċi konsistenti, inklużi fejn jidħlu responsabbiltajiet finanzjarji, legali u ta' organizzazzjoni,

—	Esperjenza ċertifikata fil-preżentazzjoni ta' strateġiji innovattivi u effettivi, b'mod speċjali fl-oqsma tal-istruttura organizzattiva jew tal-effikaċja tal-governanza biex jinħolqu gwadanni fl-effiċjenza,

—	Esperjenza fl-ifformular u fl-implimentar ta' politiki jew leġiżlazzjoni effiċjenti u effettivi,

—	Għarfien tajjeb tal-bidliet li qed taffaċċja l-Kummissjoni Ewropea u l-korpi diċentralizzati jew l-aġenziji eżekuttivi fil-qasam tal-ġestjoni finanzjarja,

—	Esperjenza fil-ġestjoni baġitarja, finanzjarja jew tar-riżorsi umani f'kuntest nazzjonali jew Ewropew,

—	Ħiliet ċertifikati ta' negozjar u koordinazzjoni, tkun kapaċi li tiddiskuti b'mod effiċjenti ma' entitajiet interessati interni u esterni f'livell għoli.

L-applikanti jridu:

1.	Ikunu ċittadini ta' wieħed mill-Istati Membri tal-UE.

2.

Ikollhom: (i) jew livell ta' edukazzjoni li jikkorrispondi għal studji universitarji li tlestew, iċċertifikati b'diploma, fejn il-perjodu normali tal-edukazzjoni universitarja jkun ta' erba' snin jew aktar. (ii) jew livell ta' edukazzjoni li jikkorrispondi għal studji universitarji li tlestew, iċċertifikati b'diploma, u esperjenza professjonali xierqa ta' mill-inqas sena, fejn il-perjodu normali tal-edukazzjoni universitarja jkun ta' mill-inqas tliet snin.

3.

Ikollhom mill-inqas 15-il sena esperjenza professjonali ta' wara l-lawrja f'livell li l-kwalifiki msemmija hawn fuq jagħtu aċċess għalih. Mill-inqas ħames snin minn din l-esperjenza professjonali għandhom ikunu f'funzjoni ta' konsulenza ta' livell għoli f'qasam relatat ma' din il-kariga. Il-kandidati għandhom jindikaw b'mod ċar għal kull funzjoni ta' konsulenza ta' livell għoli t-titlu tagħha u r-rwol eżatt li jkunu eżerċitaw.

4.	Ikollhom għarfien tajjeb ħafna ta' waħda mil-lingwi uffiċjali tal-Unjoni Ewropea u għarfien adegwat ta' lingwa oħra minn fost dawn il-lingwi uffiċjali.

5.	Ikunu għadhom ma laħqux l-età tal-irtirar regolari, li għall-persunal li jidħol fis-servizz tal-Kummissjoni Ewropea mill-1 ta' Jannar 2014, l-eta tal-irtirar hija definita bħala l-aħħar tax-xahar li fih il-persuna tagħlaq 66 sena (Ara Art.52 lit (a) tar-Regolamenti tal-Persunal) (1).

Indipendenza u dikjarazzjoni tal-interessi:

Il-kandidati huma mitluba jikkonfermaw il-volontà tagħhom li jagħmlu dikjarazzjoni tal-impenn tagħhom li jaġixxu b'mod indipendenti fl-interess pubbliku u dikjarazzjoni ta' kwalunkwe interess li jista' jiġi kkunsidrat li jippreġudika l-indipendenza tagħhom.

Ħatra u kundizzjonijiet tal-impjieg:

Il-Konsulent Prinċipali se jintgħażel u jinħatar mill-Kummissjoni skont il-proċeduri tagħha tal-għażla u r-reklutaġġ (ara wkoll: Id-Dokument ta' Kompilazzjoni dwar il-Politika għall-Uffiċjali b'Kariga Għolja (2)). Minn fost il-lista tal-kandidati jintgħażlu dawk li jissejħu għal intervista mill-Kumitat Konsultattiv tal-Kummissjoni għall-Ħatriet u għal ċentru ta' valutazzjoni mmexxi minn konsulenti esterni tar-reklutaġġ. Is-salarji u l-kundizzjonijiet tal-impjieg huma dawk stipulati fir-Regolamenti tal-Persunal għall-Uffiċjali fil-grad AD 14 tal-Unjoni Ewropea. L-applikanti għandhom jinnutaw li skont ir-Regolamenti tal-Persunal, il-persunal ġdid kollu jrid jagħmel b'suċċess perjodu ta' prova ta' disa' xhur.

Il-kandidat magħżul se jiġi rreklutat bħala uffiċjal skont it-termini tar-Regolamenti tal-Persunal.

Opportunitajiet indaqs:

L-Unjoni Ewropea tapplika politika ta' opportunitajiet indaqs.

Proċedura tal-applikazzjoni:

Din il-kariga tista' tiġi ppubblikata fl-istess żmien ma' għadd ta' karigi oħrajn għal uffiċjali f'livell għoli. Il-kandidati li jixtiequ japplikaw għal iżjed minn kariga waħda jridu jressqu applikazzjoni separata għal kull kariga.

Qabel ma tissottometti l-applikazzjoni tiegħek, għandek tiċċekkja b'attenzjoni jekk tissodisfax il-kriterji ta' eliġibilità kollha, b'mod partikolari rigward it-tipi ta' diploma u l-esperjenza professjonali meħtieġa.

Jekk trid tapplika, trid tirreġistra permezz tal-Internet billi tmur fil-websajt

https://ec.europa.eu/dgs/human-riżorsi/seniormanagementvacancies/

u ssegwi l-istruzzjonijiet li jikkonċernaw id-diversi stadji tal-proċedura.

Hija responsabbiltà tiegħek li tlesti r-reġistrazzjoni onlajn tiegħek fil-ħin (3). Tistenniex sal-aħħar ftit jiem biex tapplika, peress li konġestjoni qawwija fuq l-Internet jew xi difett fil-konnessjoni tal-Internet tiegħek jistgħu jwasslu biex ir-reġistrazzjoni onlajn tiġi tterminata qabel ma tkun lestejtha, u b'hekk ikollok tirrepeti l-proċess kollu. Ladarba d-data tal-iskadenza għas-sottomissjoni tar-reġistrazzjonijiet tkun għaddiet, ma tkunx tista' tirreġistra iżjed. Bħala regola ġenerali, ir-reġistrazzjoniet bil-posta elettronika jew normali li jaslu tard ma jiġux aċċettati.

Meta titlesta l-applikazzjoni tiegħek onlajn, tirċievi fuq l-iskrin numru ta' reġistrazzjoni. Dan ikun in-numru ta' referenza tiegħek fil-kwistjonijiet kollha li jikkonċernaw din il-proċedura ta' selezzjoni speċifika. Meta tirċievi dan in-numru, il-proċess tar-reġistrazzjoni jkun intemm — in-numru huwa l-konferma li d-dejta tiegħek tkun ġiet irreġistrata.

Jekk ma tirċevix numru, l-applikazzjoni tiegħek ma tkunx ġiet irreġistrata!

Mal-applikazzjoni tiegħek ikollok tehmeż CV fil-format WORD jew PDF, u ddaħħal ittra ta' motivazzjoni online (massimu ta' 8 000 karattru). Kemm is-CV kif ukoll l-ittra ta' motivazzjoni jridu jkunu bl-Ingliż, bil-Franċiż jew bil-Ġermaniż.

Il-proċeduri tal-għażla ser isiru bl-Ingliż, bil-Franċiż u/jew bil-Ġermaniż biss (4).

Irid ikollok indirizz tal-posta elettronika validu. Il-korrispondenza kollha madwar din il-proċedura tal-għażla se ssir billi jintuża dan l-indirizz tal-posta elettronika. Għandek tinforma lill-Kummissjoni rigward kwalunkwe tibdiliet possibbli f'dan l-indirizz.

Nixtiequ niġbdulek l-attenzjon li mhuwiex possibbli li ssegwi l-progress tal-applikazzjoni tiegħek onlajn. Il-Kummissjoni Ewropea se tikkuntattjak dwar l-istat tal-applikazzjoni tiegħek direttament.

Jekk għandek diżabbiltà li ma tippermettilekx tirreġistra onlajn, tista' tibgħat l-applikazzjoni (is-CV u l-ittra ta' motivazzjoni) fuq il-karta permezz ta' posta rreġistrata  (5) , b'timbru postali b'data li ma taqbiżx id-data meta tagħlaq ir-reġistrazzjoni. Kull komunikazzjoni sussegwenti bejnek u bejn il-Kummissjoni tkun bil-posta. F'dan il-każ, mal-applikazzjoni tiegħek trid tehmeż ċertifikat, maħruġ minn korp rikonoxxut, li jikkonferma d-diżabbiltà tiegħek. Għandek issemmi wkoll, fuq karta separata, kwalunkwe arranġamenti speċjali li taħseb li jistgħu jkunu meħtieġa biex jiffaċilitaw il-parteċipazzjoni tiegħek fis-selezzjoni.

Jekk teħtieġ aktar tagħrif u/jew tiltaqa' ma' problemi tekniċi, ibgħat email lil HR-A2-MANAGEMENT-ONLINE@ec.europa.eu.

Data ta' għeluq:

Id-data ta-għeluq għar-reġistrazzjoni hi s-6 ta' Diċembru 2013. Ir-reġistrazzjoni onlajn ma tkunx possibbli wara nofsinhar (12.00), ħin ta' Brussell.

---

(1)  Suġġett għad-dħul fis-seħħ tar-Regolament li jemenda r-Regolamenti tal-Persunal tal-Uffiċjali u l-Kundizzjonijiet tal-Impjieg għal Impjegati oħra b'effett mill-1 ta' Jannar 2014.

(2)  http://ec.europa.eu/civil_service/docs/official_policy_en.pdf

(3)  Mhux aktar tard min-nofsinhar (12.00), ħin ta' Brussell, is-6 ta' Diċembru 2013.

(4)  Il-bord tal-għażla se jiżgura li ma jingħata l-ebda vantaġġ lil kelliema nattivi ta' dawn it-tliet lingwi.

(5)  European Commission, Directorate-General for Human Resources and Security, Unit for Executive Staff and CCA Secretariat, COM/2013/10343, SC11 8/35,1049 Bruxelles/Brussel, BELGIQUE/BELGIË.

---