18.9.2013

MT

Il-Ġurnal Uffiċjali tal-Unjoni Ewropea

CA 269/1

---

AVVIŻ TA' POST BATTAL

Kap ta' Unità

(Grupp tal-funzjoni AD, grad 9-12)

Segretarjat Ġenerali — Direttorat Finanzi u Sostenn — Unità Binjiet

(2013/C 269 A/01)

MIN AĦNA

Il-Qorti Ewropea tal-Awdituri hija l-istituzzjoni tal-Unjoni Ewropea (UE) stabbilita bit-Trattat biex twettaq l-awditu tal-finanzi tal-UE. Bħala l-awditur estern tal-UE, hija tikkontribwixxi għat-titjib fil-ġestjoni finanzjarja tal-UE u taġixxi bħala l-gwardjan indipendenti tal-interessi finanzjarji taċ-ċittadini tal-Unjoni.

Il-Qorti tipprovdi servizzi tal-awditjar li permezz tagħhom hija tevalwa kif il-fondi tal-UE ġew riċevuti u użati. Hija teżamina jekk l-operazzjonijiet finanzjarji ġewx irreġistrati u ppreżentati b'mod korrett, ġewx implimentati b'mod legali u regolari, u ġewx ġestiti b'mod ekonomiku, effiċjenti u effettiv. Il-Qorti tippubblika r-riżultati tal-awditi tagħha f'rapporti ċari, rilevanti u oġġettivi. Hija tfassal ukoll opinjonijiet dwar kwistjonijiet li jikkonċernaw il-ġestjoni finanzjarja.

Il-Qorti taħdem biex jissaħħaħ l-obbligu ta' rendikont, tħeġġeġ it-trasparenza u tassisti lill-Parlament Ewropew u lill-Kunsill fis-sorveljanza tal-implimentazzjoni tal-baġit tal-UE, partikolarment matul il-proċedura ta' kwittanza. Il-Qorti hija impenjata li tkun organizzazzjoni effiċjenti fuq quddiem nett tal-progress fil-qasam tal-awditjar u l-amministrazzjoni tas-settur pubbliku.

Il-Qorti tapplika politika ta' opportunitajiet indaqs u tinkoraġġixxi applikazzjonijiet mingħand nisa u rġiel kwalifikati, mingħajr ebda diskriminazzjoni.

Is-sede tal-Qorti tal-Awdituri tinsab fil-Lussemburgu.

L-Unità Binjiet hija parti mid-Direttorat Finanzi u Sostenn u hija inkarigata prinċipalment mill-attivitajiet li ġejjin:

—	ġestjoni tal-proġetti immobiljarji futuri (konformità tal-binja K2 u sostituzzjoni tal-binja K1),

—	żgurar tal-manutenzjoni tal-binjiet, tal-faċilitajiet tekniċi tiegħu, kif ukoll tal-parkeġġi,

—	żgurar tas-sigurtà fiżika tal-binjiet u teħid ta' kwalunkwe miżura fir-rigward ta' saħħa u sigurtà.

X'QEGĦDIN NIPPROPONU

Il-Qorti tal-Awdituri ddeċidiet li tvara l-proċedura ta' reklutaġġ għal post ta' Kap ta' Unità fi ħdan is-Segretarjat Ġenerali — Direttorat Finanzi u Sostenn — Unità Binjiet, skont l-Artikolu 29(2) tar-Regolamenti tal-Persunal għall-Uffiċjali tal-Unjoni Ewropea (minn hawn 'il quddiem imsejħa r-“Regolamenti tal-Persunal”). Din il-proċedura ta' għażla, li timmira li żżid il-possibbiltajiet għall-għażla mill-Awtorità tal-Ħatra, se ssir b'mod parallel mal-proċeduri interni u interistituzzjonali ta' reklutaġġ.

Is-salarju bażiku attwali fil-grad AD9 huwa ta' EUR 7 127,99 fix-xahar, u dak fil-grad AD12 huwa ta' EUR 10 324,20. Skont il-kundizzjonijiet stabbiliti fir-Regolamenti tal-Persunal, ċerti benefiċċji jistgħu jiġu miżjuda mas-salarju bażiku, li huwa suġġett għat-taxxa Komunitarja u eżentat mit-taxxa nazzjonali.

Taħt l-awtorità tad-Direttur, il-Kap ta' Unità jkollu l-kompiti li ġejjin:

—	sorveljanza tal-organizzazzjoni u monitoraġġ tal-kompiti ta' manutenzjoni ġenerali teknika tal-bini,

—	sorveljanza u koordinazzjoni tal-proġetti ta' kostruzzjoni immobiljarja u tax-xogħlijiet relatati,

—	parteċipazzjoni fl-għoti ta' kuntratti ġodda permezz ta' proċeduri ta' akkwist pubbliku fid-diversi setturi ta' attività tal-entità u negozjar mal-fornituri u mal-konsulenti,

—	tfassil, tħejjija, formalizzar, proponiment, implimentazzjoni u monitoraġġ tal-objettivi u tal-pjanijiet ta' azzjoni fil-qafas stipulat mill-ġerarkija tiegħu,

—	immaniġġjar, immotivar u koordinazzjoni ta' tim wieħed jew aktar ta' persunal, massimizzazzjoni tal-użu tar-riżorsi tal-entità filwaqt li tiġi żgurata l-kwalità tas-servizz (organizzazzjoni, immaniġġjar tar-riżorsi umani u baġitarji, eċċ.) fl-oqsma ta' attività tagħha.

X'QEGĦDIN INFITTXU

Din il-proċedura ta' għażla hija miftuħa għall-kandidati li, fid-data ta' għeluq stabbilita għall-applikazzjonijiet, jissodisfaw il-kundizzjonijiet li ġejjin:

—

skont l-Artikolu 5 tar-Regolamenti tal-Persunal: — ikollhom livell ta' edukazzjoni li jikkorrispondi ma' kors komplet ta' studji universitarji, iċċertifikat b'diploma meta t-tul ta' żmien normali ta' dawn l-istudji jkun ta' 4 snin jew aktar, jew — livell ta' edukazzjoni li jikkorrispondi ma' kors komplet ta' studji universitarji, iċċertifikat b'diploma, u esperjenza professjonali xierqa ta' mill-anqas sena meta t-tul ta' żmien normali ta' dawn l-istudji jkun ta' 3 snin jew aktar, jew — meta iġġustifikat fl-interessi tas-servizz, taħriġ professjonali ta' livell ekwivalenti.

—	ikunu kisbu esperjenza professjonali ta' mill-inqas 10 snin fil-qasam ikkonċernat,

—	ikollhom esperjenza fil-ġestjoni ta' proġetti fil-qasam tal-bini jew tax-xogħlijiet pubbliċi,

—	ikollhom esperjenza ta' mill-inqas 3 snin fl-akkwist pubbliku u fil-monitoraġġ u l-ġestjoni ta' kuntratti,

—	ikollhom esperjenza fit-tmexxija ta' timijiet inkarigati mill-faċilitajiet tekniċi ta' binja amministrattiva (organizzazzjoni ta' attivitajiet u mmaniġġjar ta' persunal),

—	ikunu kapaċi jikkomunikaw b'mod ċar u diplomatiku, kemm fi ħdan il-Qorti kif ukoll lil hinn minnha, filwaqt li jieħdu kont tan-natura tal-kompiti tal-Unità,

—	ikollhom għarfien approfondit ta' waħda mil-lingwi uffiċjali tal-Unjoni Ewropea u għarfien sodisfaċenti ta' lingwa uffiċjali oħra tal-UE,

—	għal raġunijiet tas-servizz, jinħtieġ għarfien tajjeb tal-Franċiż,

—	għarfien tajjeb tal-lingwa Ġermaniża u/jew dik Lussemburgiża jkun ta' vantaġġ.

POLITIKA TA' REKLUTAĠĠ

KUNDIZZJONIJIET TA' REKLUTAĠĠ

Skont l-Artikolu 28 tar-Regolamenti tal-Persunal, il-kandidati jridu:

—	ikunu ċittadini ta' wieħed mill-Istati Membri tal-Unjoni Ewropea,

—	igawdu mid-drittijiet tagħhom kollha bħala ċittadini,

—	ikunu wettqu kull obbligu impost fuqhom mil-liġijiet dwar is-servizz militari,

—	jipproduċu r-referenzi ta' karattru xierqa li juru li huma tajbin biex iwettqu d-dmirijiet tagħhom.

PROĊEDURA TA' GĦAŻLA

(a)

Bil-ħsieb li jgħin lill-Qorti fl-għażla tagħha, kumitat ta' preselezzjoni (minn hawn 'il quddiem imsejjaħ il-“kumitat”) jevalwa l-applikazzjonijiet abbażi tal-kriterji li ġejjin: (i) id-diplomi, l-esperjenza professjonali, il-motivazzjoni, il-versatilità u l-ħiliet analitiċi tal-kandidati, (ii) il-ħiliet tagħhom ta' ġestjoni u ta' tmexxija ta' tim, (iii) il-kompetenzi speċifiċi tagħhom, li huma meħtieġa għall-post ikkonċernat.

(b)

Il-kumitat jipproċedi għall-evalwazzjoni f'żewġ stadji: (i) il-kandidati kollha jiġu evalwati abbażi: — tal-curriculum vitae u tal-ittra ta' motivazzjoni tagħhom, — ta' studju ta' każ li huma jkunu meħtieġa jiktbu. (ii) il-kandidati magħżula jiġu mistiedna biex: — jattendu għal intervista, — jippreżentaw l-istudju ta' każ.

Jekk jidhirlu li huwa meħtieġ, il-kumitat jista' wkoll jitlob valutazzjoni tal-ħiliet maniġerjali mingħand “ċentru ta' valutazzjoni”.

PROTEZZJONI TAD-DATA

Skont l-Artikolu 7(3) tar-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward tal-ipproċessar ta' data personali mill-istituzzjonijiet u l-korpi tal-Komunità u dwar il-moviment liberu ta' dik id-data  (1), “ir-reċipjent għandu jipproċessa d-data personali biss għall-għanijiet li għalihom tkun ġiet trażmessa.”

PREŻENTAZZJONI TAL-APPLIKAZZJONIJIET

L-applikazzjonijiet, miktuba bl-Ingliż jew bil-Franċiż, għandhom jintbagħtu fl-indirizz e-mail li ġej: vacancies@eca.europa.eu.

Biex tiġi aċċettata, kull applikazzjoni għandha tinkludi n-numru ta' referenza tal-avviż ta' post battal fis-suġġett u għandha tkun akkumpanjata mid-dokumenti li ġejjin:

—	ittra ta' motivazzjoni,

—	curriculum vitae aġġornat, magħmul bl-użu tal-mudell “curriculum vitae Europass” (jekk jogħġbok ikkonsulta s-sit li ġej: http://europass.cedefop.europa.eu),

—	id-dikjarazzjoni fuq l-unur ikkompletata, iffirmata u datata (mehmuża).

Il-kandidati mistiedna għall-intervista għandhom jinnutaw li, fid-data tal-intervista, huma jridu jippreżentaw biss kopji jew fotokopji tad-dokumenti ta' sostenn li jirrigwardaw l-istudji, l-esperjenza professjonali u d-dmirijiet attwali tagħhom. Ebda wieħed minn dawn id-dokumenti ta' sostenn ma jingħata lura.

Id-data ta' għeluq għall-preżentazzjoni tal-applikazzjonijiet hija d-9 ta' Ottubru 2013, fil-5 p.m. (ħin tal-Lussemburgu).

---

(1)  ĠU L 8, 12.1.2001, p. 1.

---

---