22.2.2013   

MT

Il-Ġurnal Uffiċjali tal-Unjoni Ewropea

CE 51/1

—

wara li kkunsidra l-Ktiba Ħadra tal-Kummissjoni, tat-13 ta’ Ottubru 2010, dwar il-politika tal-awditjar: lezzjonijiet mill-kriżi (COM(2010)0561)),

—

wara li kkunsidra r-riżoluzzjoni tiegħu tal-11 ta' Mejju 2011 dwar il-governanza korporattiva fl-istituzzjonijiet finanzjarji (1),

—

wara li kkunsidra r-riżoluzzjoni tiegħu tal-10 ta' Marzu 2009 dwar l-implimentazzjoni tad-Direttiva 2006/43/KE dwar il-verifiki statutorji tal-kontijiet annwali u tal-kontijiet konsolidati (2),

—

wara li kkunsidra d-Direttiva 2006/43/KE tal-Parlament Ewropew u tal-Kunsill tas-17 ta' Mejju 2006 dwar il-verifiki statutorji tal-kontijiet annwali u tal-kontijiet konsolidati (3),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Legali u l-opinjoni tal-Kumitat dwar l-Affarijiet Ekonomiċi u Monetarji (A7-0200/2011),

A.

billi l-kriżi finanzjarja reċenti tefgħat dubji fuq ix-xogħol tal-awdituri,

B.

billi, wara l-kriżi, it-teħid ta' riskji eċċessiv min-naħa tal-istituzzjonijiet finanzjarji kien assoċjat b'mod sinifikanti ma' mekkaniżmi ta' kontroll u ta' ġestjoni tar-riskju flessibli, skarsi u mhux effettivi, partikolament f'istituzzjonijiet finanzjarji ta' importanza sistemika (SIFIs),

C.

billi l-awdituri kienu identifikati bħala dawk li jistgħu jiżvolġu rwol fundamentali fit-tisħiħ tas-sorveljanza tal-ġestjoni tar-riskju b'mod partikolari ta' istituzzjonijiet finanzjarji,

D.

billi r-rwol tal-kumitati tal-awditjar fi ħdan l-istituzzjonijiet finanzjarji, b'mod partikolari, ma kienx sfruttat totalment,

E.

billi l-awditjar ta’ kwalità huwa fundamentali għall-istabilità ekonomika u l-fiduċja tas-suq, ladarba jipprovdi garanziji rigward is-saħħa finanzjarja ġenwina tal-kumpaniji,

F.

billi l-indipendenza tal-awditur għandha sehem fundamentali fil-kwalità tal-awditjar,

G.

billi x'aktarx jeżisti kunflitt ta' interess meta impriżi tal-awditjar joffru servizzi differenti lill-istess impriża,

H.

billi l-konċentrazzjoni għolja tas-suq tal-erbgħa ditti l-kbar tal-awditjar tista' toħloq konċentrazzjoni eċċessiva tar-riskju, u billi l-impriżi iżgħar huma differenti u t-tkabbir u l-għarfien espert tagħhom għandhom ikunu inkoraġġiti permezz ta' żieda fl-opportunitajiet biex jikkompetu,

I.

billi, konsegwentement, jeħtieġ li jitnieda mill-ġdid dibattitu fil-fond dwar il-funzjoni tal-awditur u l-istruttura tas-suq tal-awditjar,

1.

Jilqa’ l-Ktiba Ħadra tal-Kummissjoni u jfaħħar l-approċċ globali tagħha,

2.

Jilqa’ l-kwistjoni fundamentali li tqajmet fil-Ktiba Ħadra, jiġifieri kif l-awditjar jista’ jittejjeb, għalkemm fil-passat ma kien hemm l-ebda prova serja li tindika li l-awditjar ma sarx skont ir-regoli u r-rekwiżiti rilevanti;

3.

Huwa tal-fehma li d-dibattitu dwar il-funzjoni tal-awditur irid ikun akkumpanjat mit-tisħiħ tal-funzjoni tal-kumitat tal-awditjar – li llum bilkemm hu effikaċi – kif ukoll mir-rapporti dwar il-finanzi u r-riskji li l-impriżi jridu jipprovdu,

4.

Għadu s'issa mhu jara l-ebda bażi suffiċjenti għal evalwazzjoni finali, u għalhekk ifakkar lill-Kummissjoni li hu meħtieġ iktar użu mir-regolamenti u mit-tip ta' evalwazzjoni tal-impatt li tkopri ħafna oqsma u fil-fond, li tqis diversi alternattivi politiċi, tiffoka fuq kwestjonijiet prattiċi skont il-prinċipji tat-tfassil aħjar tal-liġijiet, tindirizza l-importanza tal-kontabilità fil-provvediment ta' informazzjoni preċiża dwar l-iżvilupp ekonomiku sostenibbli tal-kumpaniji, inkluża analiżi tal-gruppi ta' interess, sabiex tiċċara s-segmentazzjoni tal-istudju ta' evalwazzjoni tal-impatt għall-gruppi varji, bħall-SMEs, is-SIFIs u kumpaniji oħra kwotati u mhumiex; huwa tal-fehma li għandha ssir evalwazzjoni tal-impatt fuq l-utenti tar-rapporti tal-awditjar, bħall-investituri u r-regolaturi tas-SIFI; jistieden lill-Kummissjoni biex tanalizza l-valur miżjud iġġenerat kemm mir-regolament propost u kemm mill-armonizzazzjoni progressiva tal-istandards tal-awditjar u l-prattiki fus-suq uniku Ewropew;

5.

Jilqa’ r-rikonoxximent tal-proporzjonalità fil-Ktiba Ħadra;

6.

Huwa tal-fehma li l-awditjar statutorju għandu funzjoni soċjali u li dan hu fl-interess pubbliku, ladarba dan hu komponent assolutament fundamentali tas-sistema demokratika ekonomika u politika, u għalhekk jilqa' l-għan tal-Ktiba Ħadra li żżid it-trasparenza u ttejjeb il-kwalità tar-rapporti tal-awditjar sabiex jingħata kontribut għall-istabilità tas-suq finanzjarju u jitjieb l-aċċess għall-finanzjament; huwa favur kull miżura bbażata fuq l-evidenza li l-ispejjeż u l-piżijiet għall-istituzzjonijiet finanzjarji, b'mod partikulari, ikollhom piż inqas jekk tiżdied il-kwalità tagħhom b'mod sinifikanti, kif ukoll jekk issir evalwazzjoni esterna regolari u jkun hemm sorveljanza regolatorja adegwata; jenfasizza l-ħtieġa ta' leġiżlazzjoni speċifika;

7.

Jinnota li sistema ta' awditjar ta' kwalità għolja hija parti integrali minn qafas b'saħħtu ta' governanza korporattiva; jitlob lill-Kummissjoni tippreżenta l-proposti tagħha dwar il-governanza u l-awditjar tal-korporazzjonijiet lill-Parlament u lill-Kunsill b'mod konsistenti;

8.

Jenfasizza l-importanza tar-rapport tal-awditjar għall-azzjonisti u għall-pubbliku; jagħraf il-prinċipju li "verifika hija verifika" u jwissi dwar ir-riskju għoli li l-applikazzjoni ta' standards differenti twassal għall-inċertezza legali; għalhekk huwa favur l-estensjoni tal-kamp ta' applikazzjoni għall-istituzzjonijiet finanzjarji kollha,

9.

Jaqbel mal-Kummissjoni dwar il-prinċipju li l-konklużjonijiet ta' rapport tal-awditjar għandhom jiffukaw fuq is-sustanza iktar milli fuq il-forma;

10.

Jitlob lill-Kummissjoni tistudja kif ir-rwol tal-awditur jista' jitwessa' biex jinkludi l-awditjar tar-rapporti dwar ir-riskju mressqa mill-entità li qed issirilha l-verifika, flimkien mal-verifika tal-informazzjoni pprovduta fid-dikjarazzjonijiet finanzjarji prinċipali; jirrakkomanda li l-awdituri għandhom ikunu informati dwar id-drabi kollha fejn il-kumitat dwar ir-riskju kien injorat;

11.

Huwa tal-fehma li r-rapporti tal-awditjar għandhom ikunu qosra, b'konklużjonijiet ċari u konċiżi, u għandhom jindirizzaw l-aspetti kollha tal-mandat statutorju tal-awdituri; iqis li l-awditur għandu jipprovdi spjegazzjonijiet addizzjonali lill-kumitat tal-awditjar u lill-assemblea ġenerali dwar kwestjonijiet ġenerali bħall-metodoloġija li ntużat fit-fassil tal-karta tal-bilanċ, u dwar kwestjonijiet speċifiċi, bħall-indikaturi fundamentali, iċ-ċifri rilevanti, l-evalwazzjoni tar-riskju involut fl-istimi tal-kontabilità pertinenti jew l-opinjonijiet sinifikanti li ngħataw, dwar kwalunkwe problema partikulari li l-awditur iltaqa' magħha waqt it-twettiq tal-verifika;

12.

Jitlob li r-rapporti ta' awditjar ta' istituzzjonijiet finanzjarji jinkludu rekwiżiti ta' żvelar imtejba li jirrigwardaw il-valutazzjoni ta' assi inqas likwidi sabiex jippermettu t-tqabbil ta' valutazzjonijiet ta' strument finanzjarju bejn l-istituzzjonijiet;

13.

Jenfasizza li l-awdituri għandhom jiġbdu l-attenzjoni tas-superviżuri jew l-awtoritajiet rilevanti meta jindunaw bi problemi li jistgħu jipperikolaw il-futur tal-entità li qed issirilha l-verifika; jirrakkomanda li jsiru laqgħat bilaterali bejn l-awdituri u s-superviżuri ta’ istituzzjonijiet finanzjarji kbar;

14.

Jinnota li jista’ jkun hemm responsabilità potenzjali marbuta mal-provvediment ta' informazzjoni addizzjonali barra dik meħtieġa mir-regolament; jemmen, madankollu, li s-soċjetà titlob li l-awdituri jkollhom responsabiltà b’viżjoni kemm għall-futur u kemm għas-soċjetà inġenerali, speċjalment fir-rigward ta’ korporazzjonijiet kbar u sistemikament rilevanti; huwa tal-fehma li l-informazzjoni disponibbli għall-awdituri li hija fl-interess pubbliku u għandha x'taqsam mar-riskju, ma' operazzjonijiet li mhumiex fuq il-karta tal-bilanċ jew riskji potenzjali futuri għandha dejjem tkun żvelata lir-regolaturi u fil-parti l-kbira taċ-ċirkustanzi għandha titqiegħed għad-dispożizzjoni tal-pubbliku;

15.

Jappella għat-tisħiħ tar-rwol tal-kumitati tal-awditjar tal-istituzzjonijiet finanzjarji kollha billi dawn jintalbu japprovaw mudell ta' evalwazzjoni tar-riskju li jinkludi paraguni speċifiċi għall-impriżi skont indikaturi, inkluż ir-rappurtar dwar il-ħtiġijiet finanzjarji futuri, konvenji bankarji, flussi futuri tal-kontanti, ġestjoni tar-riskju, stimi ta' ġestjoni u aderenza għall-prinċipji tal-kontabilità ewlenin u kwalunkwe riskju prevedibbli rigward il-mudell kummerċjali tal-kumpanija; jitlob li din l-evalwazzjoni tkun ippreżentata kull sena lill-bordijiet superviżorji u eżekuttivi tal-istituzzjonijiet finanzjarji, flimkien mar-rapport ta' awditjar sħiħ, għall-eżami u l-approvazzjoni;

16.

Iqis li x-xettiċiżmu professjonali huwa vitali fl-awditjar u jkollu impatt fuq kull fażi ta' verifika; jafferma li dan ix-xettiċiżmu jirriżulta mill-oġġettività u l-indipendenza tal-awditur, flimkien mal-ġudizzju professjonali żviluppat mill-esperjenza li ma jistax ikun issotitwit minn proċeduri fejn wieħed jimmarka kaxxa;

17.

Jemmen li s-sistema tal-kwalifiki fir-rapporti tal-awditjar m'għandhiex tkun rieżaminata, għaliex din għandha funzjoni dissważiva u tikkontribwixxi għall-kwalità tal-informazzjoni finanzjarja;

18.

Iqis li djalogu fluwidu u regolari bejn l-awditur estern, l-awditur intern u l-kumitat tal-awditjar huwa essenzjali biex isir awditjar effikaċi, għaliex huwa neċessarju li l-azzjonisti jinżammu infurmati – pereżempju, bir-raġunijiet tal-għażla, l-għażla mill-ġdid jew ir-revoka tal-inkarigu, tal-awditur – permezz ta’ spjegazzjonijiet speċifiċi għar-rapport tal-kumitat tal-awditjar;

19.

Huwa tal-fehma li l-awdituri għandu jkollhom id-dritt li jinstemgħu fil-laqgħat ġenerali tal-kumpanija fi kwistjonijiet li għandhom x'jaqsmu mar-rwol tagħhom bħala awdituri;

20.

Jemmen li hemm bżonn li ż-żewġ aspetti tal-awditjar – intern u estern – ikunu ċirkoskritti b’mod ċar fil-liġi;

21.

Jissuġerixxi li l-Kummissjoni tadotta b'mod urġenti l-Istandards Internazzjonali tal-Awditjar (ISAs), iċċarati permezz ta' regolament, li jippermettu l-armonizzazzjoni tal-awditjar fil-livell Ewropew u jiffaċilitaw il-kompitu tal-korpi ta’ sorveljanza; huwa tal-fehma li l-awditjar huwa proċedura unika, irrispettivament mid-daqs tal-kumpanija li qed issirilha l-verifika, iżda li l-applikazzjoni tiegħu jeħtieġ li tkun adattata għall-karatteristiċi ta’ intrapriżi żgħar u medji (SMEs); iffakkar lill-Kummissjoni li apparti minn dawk il-kumpanniji li għalihom għandhom japplikaw l-Istandards Internazzjonali tal-Awditjar, hemm ukoll kumpaniji oħra li, minkejja li huma eżentati minn dawk l-istandards, għandhom madankollu jaraw li s-sitwazzjonijiet finanzjarji tagħhom ikunu verifikati minn kumpanniji tal-awditjar awtorizzati;

22.

Jaqbel li jeżisti kunflitt ta’ interess inevitabbli minħabba l-fatt li awditur jitqabbad u jitħallas mill-intrapriża li qed issirilha l-verifika; ma jarax, madankollu, li bħalissa hemm ġustifikazzjoni biex dan l-inkarigu jingħata minn parti terza; jitlob, waqt li jżomm dan f'moħħu u mingħajr preġudizzju għall-Artikolu 37 (2) tad-Direttiva 2006/43/KE, biex ir-rwol tal-kumitat tal-awditjar jissaħħaħ;

23.

Huwa tal-fehma li l-awditur, fejn dak ir-rwol huwa wieħed statutorju, għandu jinħatar mill-kumitat tal-awditjar u mhux mill-bord maniġerjali tal-kumpannija li qed issirilha l-verifika, u f’dan ir-rigward jaħseb li l-membri tal-kumitat tal-awditjar għandu jkollhom l-esperjenza rilevanti, b'nofshom, tal-anqas, b'esperjenza fil-kontabilità u l-awditjar; iqis li l-kumitat tal-awditjar għandu jieħu passi biex jiżgura li l-awditur ikun indipendenti, b'mod partikolari rigward kwalunkwe servizzi ta’ konsulenza li l-awditur jipprovdi jew joffri li jipprovdi;

24.

Huwa tal-fehma li għandu jsir rieżami dettaljat tar-regoli li jiggarantixxu l-indipendenza tal-awdituri u l-kwalità tal-verifika minn korp ta’ sorveljanza pubbliku indipendenti għal kollox mill-professjoni;

25.

Jappoġġa l-ħolqien ta’ kodiċi internazzjonali ta’ governanza tajba għal ditti tal-awditjar li jagħmlu l-verifiki ta' entitajiet ta’ interess pubbliku;

26.

Jaqbel li l-indipendenza tal-awditur hija ta' importanza kbira u li għandhom jittieħdu passi biex ma jkunx hemm familjarità żejda; jisuġġerixxi li l-Kummissjoni għandha tagħmel evalwazzjoni tal-impatt li tkopri firxa ta' alternattivi, b'mod partikolari r-rotazzjoni esterna u l-impatt tal-verifiki konġunti volontarji; iqis ir-rotazzjoni esterna bħala mezz għat-tisħiħ tal-indipendenza tal-awdituri, iżda jtenni l-fehma tiegħu li mhix ir-rotazzjoni esterna iżda pjuttost it-tibdil regolari fl-awdituri interni li jirrappreżenta l-aħjar soluzzjoni regolatorja, kif ikkonfermat bid-Direttiva 2006/43/KE, u li l-arranġamenti eżistenti tar-rotazzjoni tas-sieħba jipprovdu l-indipendenza meħtieġa biex il-verifiki jkunu effettivi;

27.

Jistieden lill-Kummissjoni biex tiżgura li l-prattiċi tal-kumpaniji jgħinu biex jippreservaw il-mezzi ta' protezzjoni pprovduti, inkluża l-protezzjoni tar-rotazzjoni obbligatorja tas-sieħba ewlenin tal-awditjar anke fejn dawk is-sieħba jibdlu l-kumpaniji;

28.

Jissuġġerixxi li għandhom jitqiesu għażliet oħra barra minn, jew flimkien ma', ċiklu ta’ rotazzjoni fiss – pereżempju, jekk jintagħżlu l-verifiki konġunti ċ-ċiklu ta’ rotazzjoni jista’ jkun id-doppju ta’ dak fejn jintuża awditur wieħed peress li d-dinamika ta’ “tlieta f’kamra” hija differenti minn dik ta’ “tnejn f’kamra”, u r-rotazzjoni tal-awditjar konġunt tista’ anke tkun irranġata b’tali mod li ma taħbatx flimkien;

29.

Huwa tal-fehma li għandu jkun hemm demarkazzjoni ċara bejn l-għoti ta’ servizzi tal-awditjar u servizzi oħra, mhux tal-awditjar, li ditta tal-awditjar tipprovdi lill-klijent, bl-għan li jkunu evitati kunflitti ta’ interess kif imsemmija fl-Artikolu 22(2) tad-Direttiva 2006/43/KE u skont il-kodiċi tal-prattika tal-awditjar; b’hekk jista’ jkun limitat il-"lowballing", fejn ikunu offerti prezzijiet artifiċjalment baxxi għall-awditjar bit-tama li l-prezz iktar baxx ikun ikkumpensat mill-ħlas għal servizzi addizjonali; huwa tal-fehma, għalhekk, li d-demarkazzjoni għandha tkun applikata għad-ditti kollha u għall-klijenti tagħhom; jistieden lill-Kummissjoni, b'referenza għar-Rakkomandazzjonijiet tal-2002 dwar l-Indipendenza Statutorja tal-Awdituri, biex tfassal lista ta' kundizzjonijiet skont liema tali servizzi jkunu meqjusa bħala inkompatibbli mas-servizzi tal-awditjar; jirrikonoxxi li l-provvista ta’ servizzi barra l-awditjar, fejn ma tkunx inkompatibbli mal-indipendenza tal-awditur, jista’ jkollha rwol essenzjali biex tkabbar il-bażi tal-ħiliet ta' ditti żgħar u ta' daqs medju, iżda huwa tal-fehma li servizzi ta' awditjar interni u esterni m'għandhomx ikunu pprovduti simultanjament;

30.

Iqis li l-manteniment tal-indipendenza tal-awditur huwa essenzjali; huwa tal-fehma li l-awdituri esterni għandhom ikunu pprojbiti milli jipprovdu servizzi lill-kumpanija li qed issirilha l-verifika li jistgħu jagħtu lok għal nuqqas ta’ konformità mar-rekwiżiti applikabbli rigward l-indipendenza, jew ma’ rekwiżiti etiċi oħra; jirrikonoxxi li, sabiex tingħata spinta lit-tkabbir fl-ekonomija Ewropea, huwa meħtieġ li jkun żgurat li l-impriżi kollha, irrispettivament mid-daqs tagħhom, u inklużi l-SMEs, jistgħu jikkuntrattaw awdituri indipendenti u ditti tal-awditjar li jkollhom firxa wiesgħa ta’ ħiliet;

31.

Jinnota b'mod partikulari li s-servizzi tal-awditjar li huma meqjusa li jagħtu lok għal kunflitt ta' interess ma għandhomx isiru mill-istess kumpanija, inklużi ċerti servizzi ta' konsulenza u evalwazzjonijiet ta' prodotti strutturati kumplessi, u jsostni li għandu jkun hemm sorveljanza mill-awtoritajiet superviżorji kompetenti;

32.

Jemmen li l-kumitati tal-awditjar għandhom rwol superviżorju importanti biex ikun żgurat li l-awditur jibqa’ indipendenti u jitlob lill-Kummissjoni tagħti pariri biex jgħinu lill-kumitati tal-awditjar f’dan ir-rigward;

33.

Jirrakkomanda li l-kumitat tal-awditjar, bħala entità tal-bord superviżorju, mhux il-bord eżekuttiv, għandu jiddeċiedi jekk għandux jippermetti l-provvista ta' servizzi mhux tal-awditjar lill-impriża finanzjarja determinata u għandu jinnegozja l-offerta u d-dettalji tal-mandat; jitlob lill-Kummissjoni biex tagħmel evalwazzjoni tal-impatt rigward il-vijabilità u l-effetti ta' limitu massimu fuq is-servizzi mhux tal-awditjar f'rabta mad-dħul;

34.

Huwa tal-fehma li l-ħlas li ditta tal-awditjar jew netwerk ta’ ditti tal-awditjar jistgħu jirċievu minn klijent wieħed għandu jkun ippublikat meta jaqbżu limitu massimu determinat u s-superviżuri għandhom ikunu jistgħu jintervjenu b’kontrolli, limiti jew rekwiżiti oħra tal-ippjanar meta jaqbżu ċertu perċentwal tad-dħul totali tagħhom sabiex tkun evitata sitwazzjoni fejn id-ditta tal-awditjar titlef l-indipendenza ekonomika tagħha; jirrimarka, madankollu, li għal ditti iżgħar intervent bħal dan m'għandux jirrestrinġi t-tkabbir u wkoll li l-kisba ta' klijent kbir u sinifikanti li jipprovdi persentaġġ għoli tax-xogħol tad-ditta tal-awditjar fl-istadji bikrija hija parti essenzjali mill-proċess tat-tkabbir tagħha;

35.

Iqis li d-ditti tal-awditjar li jivverifikaw il-kontijiet ta' entitajiet ta’ interess pubbliku għandhom jippublikaw il-kontijiet tagħhom u li dawn il-kontijiet, kif ukoll il-metodi li ntużaw, għandhom ikunu kkontrollati sabiex ikun żgurat li l-affarijiet saru kif suppost;

36.

Iqis li, fejn ikun hemm prova ta’ abbuż tal-kariga ta’ direttur ta’ impriża jew ta’ entità ta’ interess pubbliku u/jew tad-ditta ta’ awditjar, għandha tkun possibbli l-prosekuzzjoni ta’ dawk kollha kkonċernati;

37.

Jemmen li l-mudell ta’ sħubija huwa l-mudell xieraq għad-ditti tal-awditjar, għaliex dan jipproteġi l-indipendenza tagħhom;

38.

Jistieden lill-Kummissjoni u lill-Istati Membri biex jiżguraw li l-awditjar ta' entitajiet pubbliċi jkun eżemplari u biex jevitaw kwalunkwe kunflitt ta' interess li jirriżulta minn konnessjonijiet bejn l-awditur u min jieħu d-deċiżjonijiet fi ħdan l-entità pubblika li tkun qed issirilha l-verifika;

39.

Jappoġġa l-proposti tal-Ktiba Ħadra dwar l-awditi ta’ gruppi;

40.

Jistieden lill-Kummissjoni biex teżamina l-kwestjoni tat-trasmissjoni ta' data matul l-awditi ta' gruppi fil-kuntest tar-reviżjoni futura tal-qafas leġiżlattiv tal-UE dwar il-protezzjoni tad-data;

41.

Iqis li l-awdituri ta’ grupp għandu jkollhom stampa ċara tal-grupp u, fil-każ ta’ istituzzjonijiet finanzjarji ssorveljati fuq bażi ta’ grupp, għandu jkollhom djalogu mas-superviżur tal-grupp;

42.

Jistieden lill-Kummissjoni biex tressaq proposta biex ittejjeb il-komunikazzjoni bejn l-awdituri ta’ entitajiet ta’ interess pubbliku u l-awtoritajiet regolatorji;

43.

Jemmen li għandhom ikunu stabbiliti protokolli dwar il-komunikazzjoni u l-kunfidenzjalità u li d-djalogu għandu jkun ġenwinament reċiproku;

44.

Jistieden komunikazzjoni mtejba fiż-żewġ direzzjonijiet bejn l-awdituri u s-superviżuri finanzjarji ta' istituzzjonijiet finanzjarji, speċjalment fir-rigward ta' oqsma li fejn hemm tħassib speċifiku, inkluża l-interazzjoni bejn prodotti finanzjarji differenti; jitlob li tkun stabbilita l-istess komunikazzjoni għall-entitajiet transkonfinali mill-awdituri u l-awtoritajiet superviżorji Ewropej;

45.

Jiġbed l-attenzjoni għall-bżonn tal-armonizzazzjoni tal-prattiki superviżorji tal-awditjar u jitlob lill-Kummissjoni tikkunsidra l-integrazzjoni tal-Grupp Ewropew ta’ Entitajiet ta’ Sorveljanza tal-Awdituri fis-Sistema Ewropea tas-Superviżuri Finanzjarji, possibiliment permezz tal-AETS;

46.

Jistieden lill-awdituri esterni ta' istituzzjonijiet finanzjarji biex jirrapurtaw perjodikament, fuq bażi settorjali lill-BERS, sabiex jiġu identifikati xejriet settorjali u sorsi potenzjali ta' riskju sistemiku u ta' fallimenti potenzjali, u josserva li dan għandu jsir b'mod proporzjonali;

47.

Jitlob lill-Kummissjoni u lill-Istati Membri biex jiżguraw konformità mar-riżultati ppublikati minn uffiċċji nazzjonali tal-awditjar fil-kompitu tal-awditjar tagħhom;

48.

Jemmen li meta wieħed iqis il-konfigurazzjoni attwali tas-suq, il-falliment ta’ waħda mill-erba’ ditti l-kbar idgħajjef il-kredibilità tal-professjoni tal-awditur kollha kemm hi;

49.

Huwa tal-fehma li, anki jekk il-falliment ta' ditta tal-awditjar jista' ma jkollux effett domino dirett fuq il-bqija tal-ekonomija, id-ditti li huma meqjusa ‧kbar wisq biex ifallu‧ jistgħu joħlqu riskju ta' periklu morali u li l-pjanijiet ta' kontinġenza relatati mad-ditti tal-awditjar il-kbar għandhom jissaħħu; jemmen, barra minn hekk, li l-objettivi ta’ dawn il-pjanijiet għandhom ikunu mfassla biex jimminimizzaw il-possibilità li ditta tal-awditjar tabbanduna s-suq mingħajr raġuni valida u biex inaqqsu l-inċertezza u t-tfixkil li dan kieku jikkawża;

50.

Huwa tal-fehma li l-pjanijiet ta' kontinġenza huma mezz importanti ta' prevenzjoni tax-xoljiment diżordinat ta' ditta u li l-pjanijiet għandhom jinkludu mekkaniżmu li permezz tiegħu r-regolatur ikun infurmat bi kwalunkwe problema li thedded ditta ta’ awditjar fil-livell nazzjonali jew internazzjonali, sabiex ir-regolaturi jkunu jistgħu jagħmlu l-parti tagħhom u jimmaniġġjaw dawn is-sitwazzjonijiet bl-attenzjoni dovuta;

51.

Jappoġġa l-introduzzjoni ta' testmenti waqt il-ħajja (living wills) għall-erbgħa ditti l-kbar tal-awditjar u għal dawk l-awdituri li jipprovdu servizzi sinifikanti ta' awditjar lis-settur finanzjarju, kif ukoll l-istabbiliment ta' pjanijiet ta' kontinġenza transkonfinali għat-trasferiment ordnat ta' kuntratti tal-klijenti, jekk attur importanti jirtira mis-suq;

52.

Jenfasizza li wieħed mill-għanijiet ta’ kull azzjoni meħuda fil-qasam tal-awditjar għandu jkun l-iżvilupp tal-kompetizzjoni fost id-ditti varji li jaħdmu fis-settur, waqt li jinżammu l-kwalità, il-preċiżjoni u r-reqqa tal-verifiki;

53.

Jistieden lill-Kummissjoni tistabbilixxi kundizzjonijiet kompetittivi indaqs għad-ditti kollha li joperaw fis-suq tal-awditjar u tissimplifika r-regoli li jirregolaw l-awditjar fil-livell Ewropew; huwa tal-fehma li aċċess aktar faċli għas-suq u t-tneħħija tal-ostakoli għad-ditti li jixtiequ jidħlu fis-suq huma vitali jekk għandu jkun attirat numru akbar ta’ parteċipanti għas-suq tal-awditjar; iqis li l-kumitati tal-awditjar u mhux il-bordijiet tal-kumpaniji huma l-iktar indikati biex jagħżlu it-tip ta' verifika li jissodisfa bl-aħjar mod il-ħtiġijiet tal-entità li qed issirilha l-verifika u biex jimmonitorjaw l-effikaċja u l-kwalità ta' dik il-verifika, u li għandha ssir enfasi partikolari fuq l-indipendenza tal-awditur; jemmen li l-Kummissjoni għandha tesplora modi li jippermettu lill-entitajiet ta’ interess pubbliku, is-settur pubbliku u l-istituzzjonijiet Ewropej jiġġudikaw aħjar il-kwalità tas-servizzi tal-awditjar ipprovduti mid-ditti tal-awditjar, irrispettivament mid-daqs tagħhom;

54.

Jirrikonoxxi li l-implimentazzjoni ta' verifiki konġunti jista' jkollha effetti pożittivi fuq id-diversifikazzjoni tas-suq tal-awditjar; ifakkar li Stati Membri differenti għandhom sitwazzjonijiet tas-suq differenti u esperjenzi differenti ta' verifiki konġunti; jistieden lill-Kummissjoni tevalwa l-benefiċċji potenzjali u l-ispejjeż tal-introduzzjoni obbligatorja kemm għall-impriżi tal-awditjar, b'mod partikolari l-impriżi ta' awditjar żgħar, u kemm għall-kumpaniji li ssirilhom il-verifika – b'mod partikolari l-istituzzjonijiet finanzjarji – u kif din tista' taffettwa l-konċentrazzjoni tas-suq tal-awditjar u l-istabilità finanzjarja;

55.

Iqis li x-xiri tal-akbar għadd ta' ishma f'ditti oħra mill-erba' ditti l-kbar irid jitqies fid-dawl tal-impatt tiegħu fuq it-tkabbir ta' ditti jew networks oħra;

56.

Jitlob lill-Kummissjoni biex tinvestiga l-użu ta' ftehimiet restrittivi minn banek u istituzzjonijiet finanzjarji oħra dwar krediti u prodotti finanzjarji oħra għall-kumpaniji, li jista' jkun li qed jillimitaw l-għażla tal-awdituri;

57.

Iqis vitali l-introduzzjoni ta' projbizzjoni tal-inklużjoni ta' klawżoli restrittivi fil-kuntratti li jiffavorixxu l-erba’ ditti l-kbar;

58.

Jitlob li jkun mħeġġa l-amalgamazzjonijiet bejn ditti tal-awditjar medji u żgħar; iħeġġeġ lill-Kummissjoni biex tistudja l-possibilità tal-ħolqien ta’ ċertifikat u reġistru ta’ kwalità għad-ditti tal-awditjar, sabiex id-ditti tal-awditjar żgħar u medji jkunu jistgħu juru li xogħolhom huwa ta' standard sodisfaċenti; iqis li s-settur tal-akkwist pubbliku għandu jimmira li juża ditti oħra barra l-erba’ ditti l-kbar u li l-korpi pubbliċi għandhom jistabbilixxu persentaġġ ta’ referenza għall-użu ta' tali ditti;

59.

Jitlob lill-Kummissjoni, f’rabta mas-sejħiet għall-offerti mill-entitajiet ta' interess pubbliku, biex tistipula li għandu jingħata aċċess ġust għall-proċess tas-sejħiet għall-offerti lil tal-anqas żewġ ditti li mhumiex mill-erba' l-kbar, flimkien mal-erba' ditti l-kbar; huwa tal-fehma li l-kumitati tal-awditjar għandhom jingħataw rwol ewlieni f’dan il-proċess, li fih għandhom jipparteċipaw ukoll l-azzjonisti; jitlob lill-Kummissjoni tirrevedi l-prattiki tal-kumitati tal-awditjar fir-rigward tal-proċessi tas-sejħa għall-offerti, b’rigward partikolari għall-piżijiet amministrattivi assoċjati ma’ proċess formali ta’ sejħa għall-offerti u bl-għan li tiżgura li d-deċiżjoni finali tal-azzjonisti dwar il-ħatra tal-awdituri tkun ibbażata fuq proposta mill-kumitat tal-awditjar; huwa tal-fehma li din il-proposta għandha tinkludi deskrizzjoni tal-proċedura segwita, il-kriterji użati u r-raġunijiet sottostanti għar-rakkomandazzjoni tal-kumitat tal-awditjar;

60.

Jitlob lill-Kummissjoni (DĠ COMP) twettaq investigazzjoni dettaljata tas-suq tal-awditjar;

61.

Huwa tal-fehma li l-awditjar huwa kruċjali għall-proċess ta’ rivitalizzazzjoni tas-suq intern; jistieden lill-Kummissjoni teżamina sa liema punt miżuri għall-faċilitazzjoni tal-forniment transkonfinali ta’ servizzi ta’ verifika jistgħu jservu biex jeliminaw ostakli għall-aċċess għas-suq u l-ħniq tal-kapaċità; jistieden lill-Kummissjoni teżamina sa liema punt suq Ewropew għas-servizzi ta’ verifika jista’ jservi biex jitnaqqsu l-kumplessità u l-ispejjeż proċedurali għall-parteċipanti kollha tas-suq, b'mod partikolari għad-ditti tal-awditjar żgħar u ta’ daqs medju; iħeġġeġ lill-Kummissjoni tieħu l-passi kollha xierqa biex tinkorpora fil-liġi tal-UE u tinforza standards internazzjonali tal-awditjar li jistgħu jgħinu biex ikunu stabbiliti kundizzjonijiet kompetittivi li jkunu ġenwinament indaqs għad-ditti tal-awditjar; ifakkar lill-Kummissjoni fir-rakkomandazzjonijiet tagħha dwar ir-responsabilità tal-awditur; jistieden lill-Kummissjoni, biex f'dan l-isfond, tressaq proposti għat-titjib tal-armonizzazzjoni bl-għan li jkun stabbilit passaport Ewropew għall-awdituri, b'enfasi partikolari fuq dak kollu li jiggarantixxi l-indipendenza tal-awditur;

62.

Jistieden lill-Kummissjoni tiżviluppa reġim ta' responsabilità pan-Ewropew għall-professjoni tal-awditjar;

63.

Jitlob lill-Kummissjoni żżid l-isforzi tagħha favur iktar konverġenza;

64.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

22.2.2013   

MT

Il-Ġurnal Uffiċjali tal-Unjoni Ewropea

CE 51/9

—

wara li kkunsidra t-Trattat tal-Unjoni Ewropea, b'mod partikolari l-Artikolu 2 u 3 tiegħu,

—

wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 19,

—

wara li kkunsidra l-Karta tad-Drittijiet Fundamentali tal-Unjoni Ewropea u b'mod partikolari l-Artikoli 21, 23 u 25 tagħha,

—

wara li kkunsidra l-Komunikazzjoni mill-Kummissjoni tal-21 ta' Settembru 2010 bit-titolu ‧Strateġija għall-ugwaljanza bejn in-nisa u l-irġiel 2010-2015‧ (COM(2010)0491),

—

wara li kkunsidra l-Kommunikazzjoni tal-Kummissjoni tad-29 ta’ April 2009 dwar kif għandna nittrattaw l-impatt tat-tixjiħ tal-popolazzjoni fl-UE (Ir-Rapport dwar it-Tixjiħ 2009)’ (COM(2009)0180),

—

wara li kkunsidra r-Rakkomandazzjoni tal-Kummissjoni tat-3 ta’ Ottubru 2008 dwar l-inklużjoni attiva tan-nies li huma esklużi mis-suq tax-xogħol (2008/867/KE) (1),

—

wara li kkunsidra r-rapport ikkummissjonat mill-Kummissjoni tat-22 ta' Lulju 2010 bit-titolu Aċċess għall-kura tas-saħħa u kura fit-tul - Ugwali kemm għan-nisa kif ukoll għall-irġiel?

—

wara li kkunsidra r-rapport ikkummissjonat mill-Kummissjoni tal-24 ta' Novembru 2009 bit-titolu Politiki ta' inklużjoni attiva għall-integrazzjoni tal-ugwaljanza bejn is-sessi’,

—

wara li kkunsidra l-Konklużjonijiet tal-Kunsill tas-7 ta' Marzu 2011 dwar il-Patt Ewropew għall-Ugwaljanza bejn is-Sessi għall-perjodu 2011-2020,

—

wara li kkunsidra l-Konklużjonijiet tal-Kunsill tas-6 ta' Diċembru 2010 dwar l-impatt ta' popolazzjoni u forza tax-xogħol li qegħdin jixjieħu fuq il-politiki tal-impjieg,

—

wara li kkunsidra l-Konklużjonijiet tal-Kunsill tas-7 ta' Ġunju 2010 dwar tixjiħ attiv,

—

wara li kkunsidra l-Konklużjonijiet tal-Kunsill tat-30 ta’ Novembru 2009 dwar ħajja f'saħħitha u dinjituża,

—

wara li kkunsidra l-Konklużjonijiet tal-Kunsill tat-8 ta' Ġunju 2009 dwar opportunitajiet indaqs għall-irġiel u n-nisa: tixjiħ attiv u dinjituż,

—

wara li kkunsidra r-rapport tal-1 ta' Mejju 2008 mill-Fondazzjoni Ewropea għat-Titjib tal-Kundizzjonijiet tal-Ħajja u tax-Xogħol bit-titolu Kundizzjonijiet tax-xogħol għal forza tax-xogħol li qiegħda tixjieħ’,

—

wara li kkunsidra l-Pjan ta' Azzjoni Internazzjonali ta' Madrid dwar it-Tixjiħ, adottat fit-Tieni Assemblea Dinjija dwar it-Tixjiħ (A/CONF.197/9 8) fit-12 ta' April 2002,

—

wara li kkunsidra l-Konvenzjoni tan-Nazzjonijiet Uniti tal-1979 dwar l-Eliminazzjoni ta' Kull Forma ta' Diskriminazzjoni kontra n-Nisa (CEDAW),

—

wara li kkunsidra r-riżoluzzjoni tiegħu tas-7 ta' Settembru 2010 dwar ir-rwol tan-nisa f'soċjetà li qed tixjieħ (2),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi (A7–0291/2011),

A.

billi l-ugwaljanza bejn is-sessi u n-nondiskriminazzjoni, fost affarijiet oħra fuq il-bażi tal-età, huma prinċipju fundamentali tal-Unjoni Ewropea mħaddna fit-Trattat dwar il-Funzjonament tal-Unjoni Ewropea u wieħed mill-objettivi u kompiti tal-Komunità,

B.

billi l-Istrateġija Ewropa 2020 tistabbilixxi mira għal rata ta' impjieg headline ta' 75 % kemm għan-nisa kif ukoll għall-irgiel u tiddikjara l-objettiv li jitnaqqas in-numru ta' dawk li qegħdin jgħixu fir-riskju tal-faqar, b'20 miljun persuna; billi l-grupp ta' nisa li qabżu l-età ta' 50 sena, minħabba l-livelli għoljin ta' faqar u qgħad marbutin ma' dan il-grupp, jirrappreżenta għalhekk grupp deċisiv li fir-rigward tiegħu għandhom jintlaħqu dawn iż-żewġ miri,

C.

billi l-persistenza ta' sterjotipi tal-ġeneru li, flimkien mad-diskriminazzjoni bbażata fuq l-età fil-konfront ta' persuni mdaħħlin fiż-żmien fis-suq tax-xogħol, tnaqqas l-opportunitajiet ta' impjieg, taħriġ u promozzjoni għan-nisa mdaħħla fiż-żmien u hija responsabbli parzjalment għar-riskju miżjud ta' faqar fl-età avvanzata,

D.

billi d-diskriminazzjoni bbażata fuq il-ġeneru hija tip speċifiku ta' diskriminazzjoni sal-punt li hi sistematika u tinfired mal-forom l-oħra kollha ta' diskriminazzjoni u tiżdied magħhom,

E.

billi s-suq tal-impjieg huwa ferm aktar dinamiku u fluwidu llum il-ġurnata minn qatt qabel, li jfisser li l-impjieg fl-istess qasam ma għadux garantit għal tul ħajja ta' bniedem; billi, għalhekk, il-kriżi ekonomika wriet biċ-ċar li n-nisa għandhom rwol importanti fi ħdan is-suq tax-xogħol,

F.

billi l-kompetittività ekonomika futura tal-Ewropa, il-prosperità u l-inklussività jiddependu kruċjalment fuq l-abilità tagħha li ttejjeb effettivament l-użu tar-riżorsi tax-xogħol tagħha, mhux biss billi testendi l-perjodu ta' impjieg matul il-ħajja ta' bniedem iżda wkoll bil-ħolqien tal-kundizzjonijiet tax-xogħol u s-sistemi tas-sigurtà soċjali li t-tnejn isostnu titjib fil-kundizzjonijiet tal-għajxien u tax-xogħol u huma ta' benefiċċju għall-ekonomija, filwaqt li dan jinkludi wkoll politiki xierqa għar-rikonċiljazzjoni tax-xogħol, il-familja u l-ħajja privata u biex tiġi indirizzata d-diskriminazzjoni diretta u indiretta u l-isterjotipi tas-sessi li jwasslu għal lakuni bejn is-sessi fis-suq tax-xogħol,

G.

billi bejn l-1990 u l-2010 l-popolazzjoni fl-UE-27 ta' persuni impjegati ta' età bejn 20-64 sena żdiedet b'1,8 %, il-popolazzjoni ta' persuni impjegati mdaħħla fiż-żmien (aktar minn 65 sena) żdiedet bi 3,7 %, u l-proporzjon taż-żgħażagħ impjegati (0-19-il sena) naqas b' 5,4 %; billi l-proporzjon tal-popolazzjoni f'età ta' aktar minn 65 sena huwa proġettat li se jiżdied minn 17,4 % fl-2010 għal 30 % fl-2060 (3)

H.

billi fl-2008 r-riskju tal-faqar fost in-nisa mdaħħla fiż-żmien kien ta' 22 % kontra 16 % fir-rigward tal-irġiel tal-istess età (4),

I.

billi, minħabba r-rata tad-divorzju li dejjem qiegħda tiżdied u għomor iqsar għall-irġiel,in-nisa qegħdin ta' spiss ikollhom rappreżentazzjoni qawwija wisq fost l-anzjani iżolati u din it-tendenza qiegħda tiżdied biż-żmien; billi r-romol u n-nisa anzjani li jgħixu waħedhom huma, b'mod ġenerali, f'riskju ogħla ta' faqar, iżolament u esklużjoni soċjali,

J.

billi r-rata ta' impjieg fost in-nisa ta' età bejn 55-64 sena kienet 37,8 % fl-2009 kontra 54,8 % għall-irġiel tal-istess età (5),

K.

billi r-rata ta' qgħad huwa ogħla fost in-nisa milli fost l-irġiel fil-21 Stat Membru u, anke jekk r-rata ta' qgħad fit-tul fost l-irġiel hija ogħla minn dik għan-nisa fi 12-il pajjiż, hemm aktar probabbiltà li l-qgħad tan-nisa jkun qiegħed jinħeba bħala "nuqqas ta' attività" jekk ikunu miżżewġin jew qed irabbu t-tfal,

L.

billi d-dħul medju fis-siegħa tan-nisa taħt it-30 sena huwa 92 % dak tal-irġiel, u 67,5 % għal dawk bejn 50-59 sena (6), u l-medja tad-differenza bejn il-pagi bbażata fuq il-ġeneru fl-UE għadha għolja sa 17,5 %,

M.

billi d-differenzi bejn is-sessi fl-istatus soċjo-ekonomiku għandhom l-għeruq fil-parti l-kbira tagħhom fid-diviżjoni tar-rwoli tradizzjonali bejn is-sessi, fejn l-irġiel huma meqjusa li għandhom ir-responsabbiltà ewlenija li jipprovdu finanzjarjament għall-familja u n-nisa huma responsabbli għal xogħol fid-dar u biex jieħdu ħsieb il-familja mingħajr ħlas, inkluża kura tal-familja aktar mifruxa, u dan għandu impatt kbir fuq il-kapaċità tan-nisa, meta mqabbla ma' tal-irġiel, li jakkumulaw drittijiet tas-sigurtà soċjali, pereżempju, għall-irtirar tagħhom,

N.

billi hemm possibbiltà akbar li n-nisa jkollhom karrieri iqsar, bi progress bilmod u/jew interrotti u qligħ medju aktar baxx mill-irġiel, li huwa rifless fid-distakk tal-pagi bejn in-nisa u l-irġiel u joħloq differenzi fil-kontribuzzjonijiet tan-nisa u l-irġiel għall-kontabilità tal-pensjoni, u b'hekk iżid ir-riskju tal-faqar għan-nisa anzjani,

O.

billi d-distakk bejn il-ġeneri huwa iċken qabel ma tifforma l-familja u tiżdied meta l-individwi jsiru koppja; billi jkun hemm tnaqqis fir-rata tal-impjiegi meta n-nisa jkollhom l-ewwel tarbija u billi dawn jakkumulaw żvantaġġi fis-suq tax-xogħol fl-istadji bikrija taċ-ċiklu tal-ħajja tagħhom, b'rabta mal-kura tat-tfal, li fi stadju aktar tard jinbidel fil-kura tal-persuni anzjani, u ta' spiss twassal għal faqar minkejja li l-persuna tkun impjegata,

P.

billi n-nisa mdaħħla fiż-żmien, meta jitqabblu mal-irġiel, ta' spiss jagħżlu jew ikollhom jagħżlu xogħol part-time u ta' spiss jitilqu mis-suq tax-xogħol billi jagħżlu jew ikollhom jagħżlu li jirtiraw kmieni,

Q.

billi l-importanza ta' approċċ ibbażat fuq il-ġeneru għall-politiki ta' suq tax-xogħol attiv hija rikonoxxuta fuq livell wiesa' fi kważi l-pajjiżi Ewropej kollha, iżda valutazzjonijiet tal-politiki attivi tas-suq tax-xogħol juru li l-integrazzjoni tal-ugwaljanza bejn is-sessi għadha mhix uniformi u pjuttost dejqa fil-mira tagħha,

R.

billi n-nisa ta' età ta' aktar minn 50 sena ħafna drabi jkollhom iħabbtu wiċċhom ma' diskriminazzjoni doppja jew fuq diversi livelli bbażata fuq sterjotipi tal-ġeneru u tal-età, li ta' spiss huma aggravati mix-xogħol u t-tendenzi tal-ħajja speċifiċi għall-ġeneru tagħhom (pereżempju, waqfiet temporanji mix-xogħol, impjieg part-time, il-fatt li jistgħu jirrinunzjaw għax-xogħol tagħhom sabiex jieħdu ħsieb il-familji tagħhom jew biex jaħdmu fin-negozju tal-familja tagħhom, speċjalment fin-negozji ta' distribuzzjoni jew fil-biedja, mingħajr ma jitħallsu salarju jew mingħajr ma jkollhom skema ta' sigurtà soċjali, u d-distakk fil-pagi bejn in-nisa u l-irġiel); billi, madanakollu, hemm tendenza li n-nisa jkollhom jaffrontaw akkumulazzjoni akbar ta' żvantaġġi minn irġiel tal-istess gruppi; billi, barra minn hekk, fi żmenijiet ta' riċessjoni ekonomika n-nisa kkonċernati jinsabu f’periklu akbar li jsiru foqra,

S.

billi ħafna drabi fis-suq tax-xogħol, in-nisa jitqiesu bħala "xjuħ" f'età ħafna iżgħar mill-irġiel; billi 58 % tal-Ewropej jaħsbu li d-diskriminazzjoni tal-età hija mifruxa ħafna (7)

T.

billi l-vjolenza kontra nisa mdaħħla fiż-żmien hija kwistjoni sottovalutata ħafna minħabba r-reżistenza min-naħa tan-nisa mdaħħla fiż-żmien li jiżvelaw l-abbuż, sterjotipi mill-fornituri tas-servizzi li jemmnu li n-nisa mdaħħla fiż-żmien għandhom inqas riskju, u l-firxa fqira ta' għażliet disponibbli għan-nisa mdaħħla fiż-żmien li huma vittmi ta' abbuż,

U.

billi l-edukazzjoni dwar l-ugwaljanza mill-età bikrija, il-politiki ta' gwida vokazzjonali, u l-politiki li jippromwovu l-impjieg tan-nisa huma l-uniċi modi kif tista' titwaqqaf id-diskriminazzjoni ta' dan it-tip għal dejjem,

1.

Jilqa' d-deċiżjoni tal-Kummissjoni li l-2012 tkun nominata s-Sena Ewropea għal Tixjiħ Attiv u s-Solidarjetà bejn il-Ġenerazzjonijiet, u jistieden lill Kummissjoni u lill-Istati Membri biex jieħdu passi xierqa u effettivi għall-ġlieda kontra d-diskriminazzjoni, anke billi jittrattaw l-isterjotipi assoċjati mad-diskriminazzjoni bbażata fuq il-ġeneru u l-età u billi jippromwovu s-solidarjetà bejn il-ġenerazzjonijiet;

2.

Jistieden lill-Kummissjoni u lill-Istati Membri jiżguraw li d-diskriminazzjoni fuq diversi livelli kontra n-nisa ta' età akbar minn 50 sena hija riflessa aħjar u tiġi trattata b'mod effettiv fil-metodu miftuħ ta' koordinament fir-rigward tal-pensjonijiet, l-inklużjoni soċjali, l-impjieg, it-tibdil tal-isterjotipi tal-ġeneru u l-inklużjoni tan-nisa f'korpi politiċi u ekonomiċi, għat-teħid tad-deċiżjonijiet;

3.

Jistieden lill-Istati Membri jimplimentaw l-ugwaljanza bejn is-sessi fit-tħejjija u l-implimentazzjoni tar-riforma tal-pensjoni – punt li għandu jitqies ukoll fil-White Paper li jmiss dwar is-sistemi tal-pensjoni u riformi oħra fil-politika tas-sigurtà soċjali –għall-promozzjoni tal-użu ta' kalkolu attwarjali tal-pensjonijiet li jsaħħaħ l-ugwaljanza bejn in-nisa u l-irġiel, għall-promozzjoni ta' passi li jnaqqsu r-riskju tal-faqar, li tindirizza l-faqar attwalment esperjenzat minn persuni avvanzati aktar fl-età, li ttejjeb il-kwalità, l-aċċessibbiltà u l-affordabbiltà tal-kura tas-saħħa u biex itemm il-prattika ta' rtirar obbligatorju, filwaqt li n-nisa avvanzati aktar fl-età jitħallew jipparteċipaw fis-suq tax-xogħol billi tiġi indirizzata d-diskriminazzjoni;

4.

Jistieden lill-Istati Membri jiddisponu iktar fil-leġiżlazzjoni tagħhom dwar il-pensjonijiet favur il-pensjonijeit tar-romol sabiex in-nisa mdaħħla fiż-żmien ikunu inqas vulnerabbli għar-riskju tal-faqar;

5.

Jiġbed l-attenzjoni dwar l-importanza li jittieħdu miżuri li jippromwovu l-inklużjoni tan-nisa mill-kategoriji l-iktar vulnerabbli, jiġifieri l-immigranti, in-nisa minn minoranzi, nisa b'diżabbiltà, nisa bi ftit edukazzjoni, nisa mingħajr esperjenza tax-xogħol, nisa fil-ħabs, eċċ., sabiex ikun garantit id-dritt tagħhom għal ħajja diċenti;

6.

Jistieden lill-Istati Membri jieħdu passi u miżuri biex jiżguraw tixjiħ b'dinjità mingħajr umiljazzjoni, diskriminazzjoni jew kwalunkwe forma ta' vjolenza kontra nisa mdaħħla fiż-żmien;

7.

Jiġbed l-attenzjoni lejn il-fatt li n-nisa mdaħħla fiż-żmien jikkostitwixxu riżors ekonomiku u fond ta' esperjenzi u jipprovdu appoġġ vitali għall-komunità u l-familji bħala dawk li jieħdu ħsieb il-persuni dipendenti u wkoll bħala konsulenti f'oqsma tax-xogħol, b'kunsiderazzjoni tal-esperjenza professjonali estensiva tagħhom, u, barra minn hekk, li dawn qed jgħinu jippreservaw id-dinja rurali;

8.

Jistieden lill-Kummissjoni u lill-Istati Membri jippromwovu inizjattivi biex itejbu l-fehim tal-lingwi u l-kulturi ta' teknoloġiji ġodda sabiex jagħmluha possibbli għall-popolazzjoni femminili mdaħħla fiż-żmien li tegħleb il-qabża diġitali u żżid il-ħiliet interpersonali u ta' komunikazzjoni tagħha u l-kapaċitajiet tagħha li tiġġestixxi l-indipendenza u l-interessi tagħha;

9.

Jistieden lill-Kummissjoni u lill-Istati Membri jikkonkludu studju, b'kooperazzjoni mill-qrib mal-Istitut Ewropew għall-Ugwaljanza bejn is-Sessi, dwar is-sitwazzjoni tan-nisa li għandhom iktar minn 50 sena, b'mod partikolari billi jiffokaw fuq l-esperjenzi tagħhom fis-suq tax-xogħol, l-esperjenzi ta' għoti ta' kura kif ukoll dwar kwistjonijiet tas-saħħa u sfidi oħra li ffaċċaw;

10.

Jistieden lill-Kummissjoni u lill-Istati Membri joħolqu kundizzjonijiet li jħeġġu n-nisa mdaħħla fiż-żmien ikomplu u/jew jerġgħu lura għas-suq tax-xogħol skont is-Sena Ewropea għal Tixjiħ Attiv u s-Solidarjetà bejn il-Ġenerazzjonijiet, biex il-potenzjal tagħhom ma jinħeliex; jistieden lill-Kummissjoni u lill-Istati Membri wkoll jimplimentaw il-miżuri li jħeġġu l-impjegati jtejbu l-politiki tagħhom ta' opportunitajiet indaqs sabiex jiġu indirizzati prassi li jiddiskriminaw kontra n-nisa mdaħħla fiż-żmien u biex impjegati nisa mdaħħla fiż-żmien ikollhom l-istess aċċess għal pereżempju, it-taħriġ, il-promozzjoni u l-iżvilupp tal-karriera;

11.

Jistieden lill-Kummissjoni u lill-Istati Membri jistabbilixxu approċċ għall-impjieg komprensiv, multidimensjonali, u li jqis l-istat taż-żewġ sessi u li ma jiddiskriminax fuq l-età flimkien ma' politiki soċjali sabiex tiżgura l-impjieg u l-inklużjoni soċjali tan-nisa; jistieden lill-Kummissjoni u lill-Istati Membri biex iwettqu wkoll reviżjoni fid-dettall dwar is-sitwazzjoni tal-ġenerazzjoni tan-nisa mdaħħla fiż-żmien li diġà jgħixu fil-faqar u biex malajr jieħdu miżuri xierqa u effettivi biex dawn in-nisa jinħarġu mill-faqar;

12.

Jistieden lill-Istati Membri jindirizzaw b'mod adegwat id-diskriminazzjoni multipla li qed jiffaċċaw in-nisa mdaħħla fiż-żmien meta jfittxu aċċess għal impjieg;

13.

Jistieden lill-Kummissjoni tkompli tiżviluppa u ttejjeb il-ġbir u l-analiżi ta' dejta speċifika għall-Ewropa, preċiża, rilevanti u kumparabbli dwar il-ġeneru u l-età, b'mod partikolari marbuta mar-rata tal-impjieg u tal-qgħad tan-nisa mdaħħla fiż-żmien, inklużi nisa migranti u b'xi diżabbiltà, l-involviment (informali) tan-nisa mdaħħla fiż-żmien fil-kura (bla ħlas) tal-familji u l-qraba tagħhom, u r-rata tal-persuni anzjani li għadhom dipendenti u dwar l-abbuż tax-xjuħ, li għandha tkun soġġetta għal-leġiżlazzjoni attwali kollha tal-Istati Membri rigward il-protezzjoni tad-dejta;

14.

Jilqa' l-fatt li l-Istati Membri diġà rrikonoxxew li t-tendenzi u l-kawżi tal-inugwaljanza bejn is-sessi fis-suq tax-xogħol huma relatati strettament mal-istadju taċ-ċiklu tal-ħajja, u jenfasizza li approċċ dwar iċ-ċiklu tal-ħajja tax-xogħol għandu għalhekk, jiġi promoss; madanakollu, – sabiex ikunu jistgħu jindirizzaw l-isfidi taċ-ċiklu tal-ħajja b'mod adegwat –, iħeġġeġ lill-Istati Membri jindirizzaw, permezz ta' miżuri ffokati fil-politiki tagħhom għal suq tax-xogħol attiv, il-pożizzjoni żvantaġġata tan-nisa żgħar u ta' dawk imdaħħla fiż-żmien meta mqabbla ma' dik tal-irġiel tal-istess età u mhux jużaw dawn il-politiki biex jindirizzaw biss in-nisa u l-irġiel f'età adulta;

15.

Jistieden lill-Istati Membri jiskambjaw l-aħjar prattiki biex itejbu l-kwalità tal-kundizzjonijiet ta' xogħol tan-nisa mdaħħla fiż-żmien, sabiex joħolqulhom post tax-xogħol sostenibbli u tajjeb għas-saħħa;

16.

Iħeġġeġ lill-Istati Membri jinkludu n-nisa mdaħħla fiż-żmien fi proċessi għal tagħlim tul il-ħajja u biex jiżviluppaw aktar u jsostnu programmi flessibbli ta' taħriġ mill-ġdid li huma adattati għan-nisa mdaħħla fiż-żmien, billi jqisu l-bżonnijiet u l-kapaċitajiet speċifiċi tagħhom biex dawn in-nisa jkunu jistgħu jiġu impjegati aktar faċilment u jgħinuhom jgħixu ħajja indipendenti u attiva, u jaqsmu l-esperjenza akkumulata u l-għarfien tagħhom ma' ġenerazzjonijiet iżgħar;

17.

Jistieden lill-Kummissjoni u l-Istati Membri jiżguraw li l-iżvantaġġi li jaffrontaw in-nisa fis-suq tax-xogħol, b'mod partikolari dawk ġejjin minn responsabbiltajiet għall-għoti tal-kura, ma għandhomx jippenalizzawhom fir-rigward tad-drittijiet tagħhom għall-pensjoni jew drittijiet oħra ta' sigurtà soċjali;

18.

Iħeġġeġ lill-Kummissjoni u l-Istati Membri jiddisponu fis-sistemi ta' benessri favur arranġamenti ta' aggregazzjoni li jagħmluha possibbli li l-kontribuzzjonijiet minn perjodi ta' impjieg b'salarju u impjieg indipendenti, jew minn impjiegi differenti, jiżdiedu flimkien, jekk dan ma jkunx sar diġà;

19.

Jistieden lill-Kummissjoni u lill-Istati Membri jiżviluppaw u jippromwovu sistemi tal-pensjoni evalwati skont il-ġeneru billi jqisu r-riskju ogħla ta' faqar għan-nisa mdaħħla fiż-żmien, kif ukoll il-pawżi fil-karrieri tagħhom minħabba obbligi ta' kura, sabiex ikun evitat li jinħolqu trappoli ġodda ta' dipendenza;

20.

Jistieden lill-Kummissjoni u lill-Istati Membri biex jieħdu, mingħajr telf ta' żmien, miżuri effettivi biex jimplimentaw il-prinċipju ta' paga ugwali għall-istess tip ta' xogħol (eż. permezz ta' skema obbligatorja għall-valutazzjoni tal-impjieg u pjan ta' azzjoni dwar l-ugwaljanza fuq il-post tax-xogħol), sabiex jitneħħa id-distakk fil-pagi bejn in-nisa u l-irġiel, li jista' jgħin ukoll biex jitnaqqas id-distakk fil-pensjonijiet tagħhom, bl-għan li jitnaqqas u fl-aħħar mill-aħħar jiġi eliminat għal kollox il-fattur tar-riskju tal-faqar ogħla għan-nisa - li l-biċċa l-kbira minnhom ikunu mdaħħla fiż-żmien;

21.

Jistieden lill-Kummissjoni u lill-Istati Membri jimplimentaw politiki xierqa biex jirrikonċiljaw ix-xogħol, il-familja u l-ħajja privata u biex jintegraw id-dimensjoni tat-tixjiħ fil-politiki kollha rilevanti, permezz tal-integrazzjoni tad-dimensjoni tal-età, b'kunsiderazzjoni għad-diversi stadji tul il-ħajja; jistieden lill-Istitut Ewropew għall-Ugwaljanza bejn is-Sessi li jinsab f'Vilnius, biex iħejji l-istudju neċessarju dwar l-impatt u r-riċerka;

22.

Jistieden lill-Kummissjoni u lill-Istati Membri jagħmlu użu sħiħ u effikaċi mill-istrumenti u l-programmi eżistenti tal-UE, inkluż il-Fond Soċjali Ewropew u l-Fond Ewropew għall-Iżvilupp Reġjonali, biex tiżdied il-parteċipazzjoni tan-nisa mdaħħla fiż-żmien fis-swieq tax-xogħol u tiġi indirizzata d-diskriminazzjoni kontra n-nisa mdaħħla fl-età, fl-oqsma kollha;

23.

Jitob lill-Istati Membri jħeġġu l-parteċipazzjoni attiva tan-nisa mdaħħla fiż-żmien fis-settur tan-negozju billi jħeġġu n-nisa jniedu negozji ġodda u jipprovdulhom sostenn u jiffaċilitaw l-aċċess tan-nisa għall-finanzjament, speċjalment permezz tal-mikrokreditu, u jiżguraw rappreżentanza ugwali bejn in-nisa u l-irġiel fil-korpi ekonomiċi għat-teħid tad- deċiżjonijiet, inklużi f'bordijiet għat-tmexxija tal-kumpaniji;

24.

Jistieden lill-Istati Membri jħeġġu l-kumpaniji jintegraw prinċipji u strumenti għall-ġestjoni tal-età fil-politika tagħhom, b'mod partikolari fil-politika dwar il-persunal tagħhom, biex jadottaw politika "favur l-età avvanzata u sensittiva għall-ġeneru" fuq il-postijiet tax-xogħol, biex jirrikonoxxu u jirrispettaw aktar l-għarfien u l-esperjenza akkumulati tal-impjegati (nisa) tagħhom imdaħħla fiż-żmien, u biex jiżviluppaw politika ta' informazzjoni affidabbli u trasparenti li tagħti l-opportunità lill-impjegati mdaħħla fiż-żmien jippreparaw għall-irtirar billi jkunu jafu bis-sħiħ bil-fatti dwar l-irtirar tagħhom; jistieden ukoll lill-Kummissjoni u lill-Istati Membri jtejbu l-proċeduri għall-impożizzjoni ta' penalitajiet fuq min jimpjega li jiddiskrimina kontra l-impjegati (nisa) mdaħħla fiż-żmien; jiġbed l-attenzjoni għall-bżonn li dawn il-politiki jiddaħħlu fl-Att dwar in-Negozji ż-Żgħar;

25.

jistieden lill-Istati Membri jinstensifikaw il-progress lejn l-ilħuq tal-bżonnijiet tal-familji li huma responsabbli għal dawk dipendenti fuqhom u jistieden lill-Kummissjoni tkompli ssostni l-iżvilupp ta' strutturi għall-kura bl-użu tal-Fondi Strutturali;

26.

Jitlob lill-Istati Membri jiffaċilitaw id-dispożizzjoni għal servizzi tal-kura ta' kwalità, (li jinkludu kura fid-djar għall-anzjani), jiggarantixxu l-aċċessibilità u l-vijabbiltà finanzjarja ta' tali kura ta' kwalità, itejbu l-apprezzament għall-valur tax-xogħol li jsir minn professjonisiti li jagħtu l-kura, u jsostnu l-familji li jipprovdu l-kura lill-persuni mdaħħla fiż-żmien, pereżempju billi joffrulhom kumpens finanzjarju għal dak li jagħmlu u joffrulhom pariri u taħriġ sabiex ikunu jistgħu jagħtu kura informali ta' kwalità għolja;

27.

Jiġbed l-attenzjoni dwar il-bżonn li ssir dispożizzjoni għal standard għoli, kif inhu xieraq, għas-servizzi tal-kura tat-tfal, tal-anzjani u ta' persuni dipendenti oħra, li għandha tiġi offruta bi prezzijiet affordabbli u tkun kompatibbli max-xogħol full-time tal-persuna sabiex ikun żgurat li n-nisa ma jkunux obbligati jinterrompu, jabbandunaw jew iqassru l-karrieri tagħhom biex jieħdu ħsieb il-bżonnijiet ta' persuni li jiddependu mill-kura tagħhom;

28.

Jiġbed l-attenzjoni għall-fatt li dawn is-servizzi tal-kura tat-tfal u tal-persuni dipendenti jikkostitwixxu sors sostanzjali ta' impjiegi li jista' jimtela min-nisa mdaħħla fiż-żmien, li r-rata ta' impjieg tagħhom bħalissa hija waħda mill-iktar baxxi;

29.

Jistieden lill-Istati Membri jipprovdu taħriġ u żvilupp tal-kapaċità sabiex ikunu garantiti servizzi tal-kura ta' kwalità għolja u jieħdu azzjoni kontra n-nuqqas tal-persunal fis-settur privat (il-kura u s-saħħa) ikkaġunat minn tendenzi demografiċi;

30.

Iħeġġeġ lill-Istati Membri jestendu l-aċċess għal-liv tal-ġenituri lin-nanniet u lit-tfal li jkunu qegħdin jieħdu ħsieb il-ġenituri tagħhom, u jirrikonoxxu l-kura għal persuni dipendenti, filwaqt li jqisu l-possibbiltà li jiġi żviluppat perjodu ta' liv għal min jagħti l-kura, u jipprovdu servizzi, taħriġ u konsulenza għal dawk li jagħtu l-kura;

31.

Jirrikonoxxi li n-nisa li qegħdin joqorbu l-età tal-irtirar, ta' spiss ikunu nanniet; jirrikonoxxi, mandankollu, li n-nisa li qeghdin joqorbu l-età tal-irtirar m'għadhomx jitqiesu biss bħala dawk li jagħtu l-kura; għalhekk, jitlob lill-Istati Membri biex jikkunsidraw faċilitajiet tal-kura tat-tfal li jistgħu joffru lin-nanniet, jekk dawn jixtiequ jagħmlu dan, il-libertà li jipparteċipaw f'attivitajiet oħra;

32.

Iħeġġeġ lill-Istati Membri jippromwovu l-involviment taċ-ċivil u proġetti interġenerazzjonali għal persuni mdaħħla fiż-żmien, permezz ta' inizjattivi u skemi ta' finanzjament;

33.

Jistieden lill-Istati Membri jieħdu miżuri fil-livelli kollha, inkluż billi jsostnu l-NGOs rilevanti, jindirizzaw il-bżonnijiet speċjali tal-persuni mdaħħla fiż-żmien, b'mod partikolari nisa mdaħħla fiż-żmien li jgħixu waħedhom, sabiex ma jibqgħux daqshekk iżolati u dipendenti u jippromwovu l-ugwaljanza, is-sigurtà u l-benessri tagħhom;

34.

Jitlob lill-Istati Membri jqisu firxa ta' għażliet ta' akkomodazzjoni u jsostnu gruppi u organizzazzjonijiet komunitarji fil-ġlieda kontra l-iżolament fost in-nisa anzjani u joħolqu ambjent favorevoli fejn titrawwem is-solidarjetà interġenerazzjonali;

35.

Jirrikonoxxi li n-nisa mdaħħla fiż-żmien għandhom ikollhom l-għażla dinjituża li jgħixu kif jixtiequ, sew jekk jixtiequ jibqgħu waħedhom u sew jekk jixtiequ jgħixu f'komunità;

36.

Jistieden lill-Kummissjoni u lill-Istati Membri jirrikonoxxu d-dimensjoni tal-ġeneru fis-saħħa bħala parti essenzjali tal-politiki tal-UE dwar is-saħħa, u għalhekk jitlob lill-Kummissjoni u lill-Istati Membri jintensifikaw l-isforzi tagħhom biex jadottaw strateġija doppja li tinvolvi l-integrazzjoni tal-ugwaljanza bejn is-sessi u azzjonjiet speċifiċi relatati mal-ġeneru, fil-politika nazzjonali u tal-UE dwar is-saħħa;

37.

Iħeġġeġ lill-Kummissjoni u lill-Istati Membri jirrikonoxxu l-importanza tal-kura tas-saħħa kurattiva u paljattiva li tqis l-età u l-ġeneru; jistieden lill-Istati Membri jespandu r-riċerka dwar mard relatat mal-ġeneru, inkluża riċerka dwar il-kawżi, il-prevenzjoni possibbli u t-trattamenti għal dan il-mard;

38.

Jirrikonoxxi r-rwol essenzjali tat-trattament preventiv u tal-monitoraġġ mediku fil-kura tas-saħħa, u jħeġġeġ lill-Kummissjoni tuża l-metodu miftuħ ta' koordinament biex tiżgura l-iskambju tal-opinjonijiet, tippromwovi l-armonizzazzjoni tal-monitoraġġ mediku fl-UE kollha u tidentifika l-aħjar prattiki u tistabbilixxi linji gwida;

39.

Jilqa' l-isforzi ta' xi Stati Membri li jipprovdu aċċess mingħajr ħlas għall-prevenzjoni ta' mard relatat mal-ġeneru u jħeġġeġ lill-Istati Membri li għadhom ma għamlux dan biex isaħħu l-kura tas-saħħa preventiva għal nisa mdaħħla fiż-żmien billi jipprovdu, pereżempju, mammografiji regolari u aċċessibli, ineħħu l-limiti tal-età fl-aċċess għall-prevenzjoni tas-saħħa bħall-iskrinjar tal-kankru tas-sider, u jqajmu l-kuxjenza dwar l-importanza tal-monitoraġġ mediku.

40.

Iħeġġeġ lill-Istati Membri jkomplu jintensifikaw l-isforzi tagħhom biex jaddottaw strateġija dwar l-integrazzjoni tal-ugwaljanza bejn is-sessi fil-politiki tas-saħħa u biex jiżguraw l-ugwaljanza fl-aċċess għal kura tas-saħħa u kura fit-tul affordabbli kemm għan-nisa kif ukoll għall-irġiel, speċjalment għall-persuni mdaħħla aktar fiż-żmien, u għal dawk li huma żvantaġġati fuq diversi livelli;

41.

Iħeġġeġ lill-Kummissjoni u lill-Istati Membri jiżviluppaw miżuri li jiżguraw saħħa u sikurezza mtejba fuq il-post tax-xogħol, u b'hekk jippreservaw l-impjegabbiltà u l-kapaċitajiet tal-ħaddiema biex ikunu aktar f'saħħithom f'età avvanzata;

42.

Jistieden lill-Kummissjoni u lill-Istati Membri biex jissieltu kontra kull forma ta' vjolenza fil-konfront tan-nisa mdaħħla fiż-żmien, filwaqt li jirrikonoxxu li din il-problema mhix stmata biżżejjed, jittrattaw l-isterjotipi fis-soċjetà u jiżguraw li l-fornituri tas-servizzi jkunu jistgħu jqisu l-bżonnijiet speċifiċi tal-vittmi tal-vjolenza mdaħħla fiż-żmien, sabiex tiġi żgurata t-tgawdija bis-sħiħ tad-drittijiet tal-bniedem u tinkiseb l-ugwaljanza bejn is-sessi u jintuża bis-sħiħ il-programm DAPHNE;

43.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

22.2.2013   

MT

Il-Ġurnal Uffiċjali tal-Unjoni Ewropea

CE 51/17

—

wara li kkunsidra l-Artikoli 67 u 81(2)g tat-Trattat dwar il-Funzjonament tal-Unjoni Ewropea,

—

wara li kkunsidra l-pożizzjoni tiegħu tat-23 ta' April 2008 dwar il-pożizzjoni komuni tal-Kunsill għall-adozzjoni ta' direttiva dwar ċerti aspetti ta' medjazzjoni fi kwistjoni ċivili u kummerċjali (1).

—

wara li kkunsidra s-seduti ta’ smigħ li kellu l-Kumitat għall-Affarijiet Legali fl-20 ta' April 2006, fl-4 ta' Ottubru 2007 u fit-23 ta' Mejju 2011,

—

wara li kkunsidra d-Direttiva 2008/52/KE tal-Parlament Ewropew u tal-Kunsill tal- 21 ta’ Mejju 2008 dwar ċerti aspetti ta’ medjazzjoni f’materji ċivili u kummerċjali (2).

—

wara li kkunsidra l-Artikoli 48 u 119(2) tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Affarijiet Legali (A7-0275/2011),

A.

billi l-iżgurar ta' aċċess aħjar għall-ġustizzja hija waħda mill-għanijiet ewlenin tal-politika tal-Unjoni Ewropea biex tistabbilixxi żona ta’ libertà, sigurtà u ġustizzja; billi l-kunċett ta’ aċċess għall-ġustizzja għandu, f’dan il-kuntest, jinkludi l-aċċess għal proċessi adegwati ta' riżoluzzjoni ta' kontroversji għall-individwi u n-negozji;

B.

billi l-għan tad-Direttiva 2008/52/KE huwa li tiġi promossa is-soluzzjoni bonarja tal-kontroversji billi tinkoraġġixxi l-użu ta' medjazzjoni u billi tiżgura relazzjoni bbilanċjata bejn il-medjazzjoni u l-proċedimenti ġudizzjarji,

C.

billi sabiex jiġi ffaċilitat l-aċċess għall-medjazzjoni bħala alternattiva vjabbli għall-approċċ kontenzjuż tradizzjonali u sabiex jiġi żgurat li l-partijiet li jirrikorru għall-medjazzjoni fl-Unjoni Ewropea jibbenefikaw minn qafas ta' leġiżlazzjoni prevedibbli, id-Direttiva tintroduċi prinċipji komuni li jindirizzaw, b'mod partikolari, aspetti ta' proċedura ċivili,

D.

billi, minbarra l-prevedibilità, id-Direttiva għandha l-għan li tistabbilixxi qafas li jippreserva l-vantaġġ ewlieni tal-medjazzjoni, li hu l-flessibilità; billi dawn iż-żewġ rekwiżiti għandhom jiggwidaw lill-Istati Membri meta jfasslu liġijiet nazzjonali li jimplimentaw id-Direttiva,

E.

billi d-Direttiva 2008/52/KE wkoll kienet ta’ interess għall-Istati ġirien u kellha effett dimostrabbli fuq l-introduzzjoni ta’ leġiżlazzjoni simili f’uħud minn dawn il-pajjiżi,

F.

billi l-Istati Membru huma meħtieġa li jikkonformaw ma' din id-Direttiva qabel il-21 ta' Mejju 2011, bl-eċċezzjoni tal-Artikolu 10, li għalih id-data ta' konformità kienet il-21 ta' Novembru 2010; billi s'issa l-maġġoranza tal-Istati Membri rraportaw li huma wettqu l-proċess ta' implimentazzjoni jew se jwettquh sad-data tal-iskadenza, u għadd żgħir ta' Stati Membri biss għadhom ma rraportawx il-konformità mad-dispożizzjonijiet tad-Direttiva: ir-Repubblika Ċeka, l-Awstrija, il-Finlandja u l-Isvezja,

G.

billi l-Parlament Ewropew iqis importanti li jiġi eżaminat il-mod ta' kif din il-leġiżlazzjoni ġiet implimentata mill-Istati Membri, sabiex ikun jaf x'jaħsbu mill-medjazzjoni l-operaturi u l-utenti u sabiex jidentifika jekk u kif tista' tittejjeb,

H.

billi, għal dan l-iskop, għandha titwettaq analiżi dettaljata tal-approċċ regolatorji ewlenin tal-Istati Membri biex jiġu identifikati prattiki tajba u jissieltu konklużjonijiet dwar kwalunkwe azzjoni ulterjuri fil-livell Ewropew,

I.

billi l-Pjan ta’ Azzjoni tal-Kummissjoni għall-implimentazzjoni tal-Programm ta’ Stokkolma (COM(2010)0171) jipprevedi Komunikazzjoni dwar l-implimentazzjoni tad-direttiva dwar il-medjazzjoni fl-2013,

J.

billi huwa utli li jiġi kkunsidrat il-mod ta' kif l-Istati Membri implimentaw id-dispożizzjonijiet prinċipali tad-Direttiva tal-Medjazzjoni fir-rigward tal-possibbiltà għall-qrati li jissuġġerixxu l-medjazzjoni direttament lill-partijiet (Artikolu 5), il-garanzija tal-kunfidenzjalità (Artikolu 7), l-inforzabbiltà ta’ ftehimiet li jirriżultaw minn medjazzjoni (Artikolu 6), u l-effett tal-medjazzjoni fuq il-perjodi ta’ limitazzjoni u ta’ preskrizzjoni (Artikolu 8),

K.

billi l-Kummissjoni inkludiet fil-Programm ta’ Ħidma tagħha għall-2011 proposta leġiżlattiva dwar Riżoluzzjoni Alternattiva tal-Kontroversji,

1.

Josserva li r-rekwiżit ta' kunfidenzjalità stabbilit mid-Direttiva kien diġà jeżisti fil-leġiżlazzjoni nazzjonali ta' ċerti Stati Membri: fil-Bulgarija, il-Kodiċi tal-Proċedura Ċivili jipprovdi li l-medjaturi jistgħu jirrifjutaw jixhdu dwar kontroversja li għaliha huma għamluha ta' medjaturi; fi Franza u l-Polonja, il-liġijiet li jirregolaw il-medjazzjoni ċivili jistabbilixxu dispożizzjonijiet simili; jinnota li, fost l-Istati Membri, l-Italja tadotta approċċ strett fir-rigward tal-kunfidenzjalità tal-proċedimenti ta' medjazzjoni, filwaqt li r-regoli Svediżi dwar il-medjazzjoni jipprovdu li l-kunfidenzjalità mhijiex awtomatika u teħtieġ ftehim bejn il-partijiet f'dan is-sens; iqis li jidher li huwa meħtieġ approċċ aktar koerenti;

2.

Josserva li, skont l-Artikolu 6 tad-Direttiva, il-maġġoranza tal-Istati Membri jiddisponu minn proċedura intiża sabiex il-ftehim li jirriżulta mill-medjazzjoni jingħata l-istess saħħa ta' deċiżjoni ġudizzjarja; jinnota li dan iseħħ jew billi l-ftehim jiġi ppreżentat lill-qorti jew billi l-ftehim jiġi insinwat u li jidher li xi leġiżlaturi nazjonali għażlu l-ewwel soluzzjoni filwaqt li, b'kuntrast ma' dan, f'ħafna Stati Membri l-insinwar huwa għażla disponibbli wkoll skont id-dritt nazzjonali: pereżempju, filwaqt li fil-Greċja u s-Slovenja l-liġi tipprovdi li ftehim ta' medjazzjoni jista' jiġi infurzat mill-qrati, fil-Pajjiżi l-Baxxi u fil-Ġermanja l-ftehimiet jistgħu jsiru eżegwibbli bħala atti notarili, u fi Stati Membri oħra, inkluża l-Awstrija, jistgħu, bħalma tgħid il-liġi bħalissa, jiġu inforzati bħala atti notarili minkejja n-nuqqas ta’ kwalunkwe dispożizzjoni espliċita f'dak is-sens fil-leġiżlazzjoni nazzjonali relevanti; jitlob lill-Kummissjoni tiżgura li l-Istati Membri kollha li għadhom ma jikkonformawx mal-Artikolu 6 tad-Direttiva, jagħmlu dan mill-aktar fis possibbli;

3.

Huwa tal-opinjoni li l-Artikolu 8, li jittratta l-effetti tal-medjazzjoni fuq il-perjodi ta’ limitazzjoni u ta’ preskrizzjoni, huwa dispożizzjoni essenzjali peress li dan jiżgura li l-partijiet li jagħżlu l-medjazzjoni sabiex jippruvaw isolvu kontroversja ma jkunux sussegwentement impediti milli jibdew proċedimenti ġudizzjarji minħabba l-perjodu ta' żmien li huma jkunu għaddew f'medjazzjoni; jinnota li l-ebda problema partikolari ma tqajmet mill-Istati Membri fir-rigward ta' dan il-punt;

4.

Jirrimarka li xi Stati Membri għażlu li jmorru lil hinn mir-rekwiżiti essenzjali tad-Direttiva f'żewġ oqsma, li huma l-inċentivi finanzjarji għall-parteċipazzjoni f'medjazzjoni u r-rekwiżiti ta' medjazzjoni obbligatorja; jinnota li l-inizjattivi nazzjonali ta’ dan it-tip jgħinu biex jirrendu r-riżoluzzjoni tat-tilwim aktar effettiva u jnaqqsu l-ammont ta’ xogħol tal-qrati;

5.

Jirrikonoxxi li l-Artikolu 5(2) jippermetti lill-Istati Membri jirrikorru għall-medjazzjoni obbligatorja jew dik suġġetta għal inċentivi jew sanzjonijiet, kemm jekk qabel jew wara l-bidu tal-proċedimenti ġudizzjarji, sakemm dan ma jimpedixxix lill-partijiet milli jeżerċitaw id-dritt ta' aċċess tagħhom għall-qrati;

6.

Josserva li xi stati Ewropew ħadu numru ta' inizjattivi sabiex jipprovdu inċentivi finanzjarji lill-partijiet li jirreferu l-kawżi għall-medjazzjoni: fil-Bulgarija, il-partijiet se jirċievu rifużjoni ta' 50 % tal-pagament statali diġà mħallas għall-preżentata tal-kontroversja quddiem il-qorti jekk huma jsolvu l-kontroversja permezz tal-medjazzjoni, u l-leġiżlazzjoni Rumena tipprovdi għar-rimborż totali tat-taxxa tal-qorti jekk il-partijiet isolvu kontroversja legali pendenti permezz tal-medjazzjoni; jinnota li tinsab dispożizzjoni simili fil-leġiżlazzjoni Ungeriża u li fl-Italja l-atti u l-ftehimiet ta' medjazzjoni kollha huma eżenti mill-bolol u l-ispejjeż;

7.

Josserva li, flimkien mal-inċentivi finanzjarji, ċerti Stati Membri li s-sistemi ġudizzjarji tagħhom huma mgħobbija żżejjed irrikorrew għal regoli li jagħmlu l-użu tal-medjazzjoni obbligatorju; jinnota li f'tali każijiet ma jistgħux jiġu ppreżentati kontroversji fil-qorti qabel ma l-partijiet ikunu l-ewwel ippruvaw isolvu l-kwistjonijiet permezz tal-medjazzjoni;

8.

Jirrimarka li l-eżempju l-aktar ċar huwa d-Digriet Leġiżlattiv Taljan Nru 28, li għandu l-għan li b'dan il-mod jirriforma s-sistema legali u jagħmel tajjeb għall-qrati Taljani, magħrufin li huma maħnuqa bix-xogħol, billi jnaqqas il-kawżi u l-perjodu ta' żmien medju ta' disa' snin għall-konklużjoni tal-kontestazzjoni ta' kawża ċivili; josserva li, hekk kif previst, dan ma ntlaqax tajjeb mill-professjonisti, li kkontestaw id-digriet quddiem il-qorti u anki strajkjaw;

9.

Jirrimarka li, minkejja l-polemika, l-Istati Membri li l-leġiżlazzjoni nazzjonali tagħhom tmur lil hinn mir-rekwiżiti essenzjali tal-Direttiva tal-Medjazzjoni jidhru li kisbu riżultati sinifikanti fil-promozzjoni tat-trattament mhux ġudizzarju tal-kontroversji fi kwistjonijiet ċivili u kummerċjali; josserva li r-riżultati miksuba b'mod partikolari fl-Italja, il-Bulgarija u r-Romanija juru li l-medjazzjoni tista' twassal għas-soluzzjoni extraġudizzjarja kosteffikaċi u rapida ta' kontroversji permezz ta' proċessi mfassla skont il-bżonnijiet tal-partijiet;

10.

Josserva li l-medjazzjoni obbligatorja tidher li qed tilħaq l-objettiv fis-sistema legali Taljana billi tnaqqas il-konġestjoni fil-qrati; madankollu, jenfasizza li l-medjazzjoni għandha tiġi promossa bħala forma ta’ ġustizzja alternattiva vijabbli, ta’ spiża baxxa u aktar rapida minflok aspett obbligatorju tal-proċedura ġudizzjarja;

11.

Jirrikonoxxi r-riżultati pożittivi miksuba mill-inċentivi finanzjarji li jinsabu fil-liġi Bulgara dwar il-medjazzjoni; jirrikonoxxi, madankollu, li dawn huma dovuti wkoll għall-interess fil-medjazzjoni, li ilu jeżisti, mis-sistema legali Bulgara peress li l-komunità tal-medjazzjoni ilha teżisti mill-1990 u ċ-Ċenru ta' Soluzzjoni – kompost minn medjaturi li jaħdmu bix-xifts – ilu jipprovdi servizzi ta' medjazzjoni u informazzjoni bla ħlas u kuljum lill-partijiet f'kawżi pendenti quddiem il-qorti mill-2010; jinnota li fil-Bulgarija żewġ terzi mill-kawżi kienu s-suġġett ta' medjazzjoni u nofs minnhom irriżultaw f'konklużjoni b'suċċess fil-kuntest tal-medjazzjoni;

12.

Jinnota wkoll ir-riżultati pożittivi tal-liġi Rumena dwar il-medjazzjoni: flimkien ma' dispożizzjonijiet dwar inċentivi finanzjarji, Kunsill ta' Medjazzjoni – awtorità nazzjonali għall-prattika ta' medjazzjoni li teżisti bħala entità legali separata u awtonoma – ġie stabbilit; dan huwa ddedikat kompletament għall-promozzjoni ta' attività ta' medjazzjoni, l-iżvilupp ta' standards ta' taħriġ, il-preparazzjoni ta' persuni li jipprovdu korsijiet ta' taħriġ, il-ħruġ ta' dokumenti li jiċċertifikaw il-kwalifiki professjonali tal-medjaturi, l-adozzjoni ta' kodiċi ta' etika u t-tfassil ta' proposti għal aktar leġiżlazzjoni;

13.

Jemmen, fid-dawl ta' dak kollu li ntqal hawn fuq, li l-Istati Membri jinsabu, fit-totalità tagħhom, ġeneralment fit-triq it-tajba sabiex jimplimentaw id-Direttiva 2008/52/KE sal-21 ta' Mejju 2011 u li, għalkemm l-Istati Membri qed jużaw approċċi regolatorji differenti u xi stati għadhom ftit lura, il-fatt jibqa' li l-biċċa l-kbira tal-Istati Membri mhux biss huma konformi, iżda fil-fatt imorru lil hinn mir-rekwiżiti tad-Direttiva;

14.

Jenfasizza li l-partijiet li huma lesti li jistinkaw għar-riżoluzzjoni tal-każ tagħhom għandhom aktar probabilità li jaħdmu ma’ xulxin milli kontra xulxin; huwa tal-fehma li għalhekk dawn il-partijiet għandhom aktar probabilità li jqisu l-pożizzjoni tal-parti l-oħra u li jaħdmu fuq il-kwistjonijiet sottostanti tal-kontroversja; iqis li dan kemm-il darba jkollu l-benefiċċju miżjud li jippreserva r-relazzjoni li l-partijiet kellhom qabel il-kontroversja, u dan huwa importanti ħafna fi kwistjonijiet tal-familja li jinvolvu lit-tfal;

15.

Jinkoraġġixxi lill-Kummissjoni biex, fil-Komunikazzjoni tagħha li jmiss dwar l-implimentazzjoni tad-Direttiva 2008/52/KE, teżamina wkoll dawk l-oqsma fejn l-Istati Membri għażlu li jestendu l-miżuri tad-Direttiva lil hinn mill-ambitu oriġinali tagħha;

16.

Jenfasizza l-karatteristiċi li huma favorevoli għall-konsumaturi tal-iskemi alternattivi ta’ riżoluzzjoni ta’ kontroversji, li joffru soluzzjoni prattika mfassla apposta; jitlob f’dan il-kuntest li jkun hemm preżentazzjoni fil-pront ta’ proposta leġiżlattiva dwar ir-riżoluzzjoni ta’ kontroversji mill-Kummissjoni;

17.

Jinnota li s-soluzzjonijiet li jirriżultaw mill-medjazzjoni u li huma żviluppati bejn il-partijiet ma jistgħux jiġu pprovduti minn imħallef jew ġurija; għalhekk, huwa tal-fehma li l-medjazzjoni għandha aktar probabilità li tipprovdi riżultat li jkun miftiehem b’mod reċiproku mill-partijiet jew li tkun tista’ tgawdi minnu kull parti; għalhekk jinnota li hemm aktar probabilità li jiġi aċċettat tali ftehim u li l-konformità ma’ ftehimiet li jkunu s-suġġett ta' medjazzjoni hija ta’ spiss għolja;

18.

Huwa tal-fehma li hemm bżonn ta’ żieda fl-għarfien u fil-fehim tal-medizzjoni u jitlob biex ikun hemm aktar azzjoni rigward l-edukazzjoni, iż-żieda fl-għarfien tal-medjazzjoni, it-tisħiħ tal-użu tal-medjazzjoni min-negozji u r-rekwiżiti tal-aċċess għall-professjoni ta’ medjatur;

19.

Jinnota li l-awtoritajiet nazzjonali għandhom jiġu inkoraġġiti jiżviluppaw programmi li jippromwovu għarfien xieraq tar-riżoluzzjoni alternattiva tal-kontroversji; iqis li dawk l-azzjonijiet għandhom jindirizzaw il-vantaġġi ewlenin tal-medjazzjoni – l-ispiża, ir-rata ta’ suċċess u l-effiċjenza fil-ħin – u għandhom jirrigwardaw l-avukati, in-nutara u n-negozji, partikolarment l-SMEs, kif ukoll l-akkademiċi;

20.

Jagħraf l-importanza li jiġu stabbiliti standards komuni għall-aċċess għall-professjoni ta' medjatur sabiex tiġi mħeġġa kwalita aħjar tal-medjazzjoni u sabiex jiġu żgurati standards għoljin ta' taħriġ professjonali u akkreditazzjoni madwar l-Unjoni;

21.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-parlamenti nazzjonali tal-Istati Membri.

22.2.2013   

MT

Il-Ġurnal Uffiċjali tal-Unjoni Ewropea

CE 51/21

—

wara li kkunsidra l-Komunikazzjoni tal-Kummissjoni tat-2 ta' Frar 2011 bl-isem ‧Naffrontaw l-isfidi fis-swieq tal-prodotti bażiċi u dawk marbuta mal-materja prima‧ (COM(2011)0025),

—

wara li kkunsidra l-Komunikazzjoni tal-Kummissjoni tal-4 ta' Novembru 2008 bl-isem ‧L-inizjattiva tas-swieq tal-materja prima - nilħqu l-ħtiġijiet kritiċi tagħna għat-tkabbir ekonomiku u l-impjiegi fl-Ewropa‧ (COM(2008)0699),

—

wara li kkunsidra r-rapport ‧Materja Prima Kritika għall-UE‧ mis-Sottogrupp tal-Grupp dwar il-Provvista tal-Materja Prima tad-Direttorat Ġenerali għall-Intrapriża u l-Industrija (1),

—

wara li kkunsidra l-Komunikazzjoni tal-Kummissjoni tat-3 ta' Marzu 2010 bl-isem ‧Ewropa 2020: Strateġija għal tkabbir intelliġenti, sostenibbli u inklussiv‧ (COM(2010)2020),

—

wara li kkunsidra l-Komunikazzjoni tal-Kummissjoni tas-26 ta' Jannar 2011 bl-isem ‧Ewropa li tuża r-riżorsi b‧effiċjenza – Inizjattiva ewlenija taħt l-Istrateġija Ewropa 2020' (COM(2011)0021),

—

wara li kkunsidra l-Komunikazzjoni tal-Kummissjoni tat-8 ta' Marzu 2011 bl-isem ‧Pjan direzzjonali għal ekonomija kompetittiva b’livell baxx ta’ emissjonijiet tal-karbonju fl-2050‧ (COM(2011)0112/4),

—

wara li kkunsidra l-Komunikazzjoni tal-Kummissjoni tat-28 ta' Ottubru 2010 bl-isem ‧Politika Industrijali Integrata għall-Era tal-Globalizzazzjoni - Il-Kompetittività u s-Sostenibilità fix-Xena Prinċipali‧ (COM(2010)0614),

—

wara li kkunsidra l-Komunikazzjoni tal-Kummissjoni tas-6 ta' Novembru 2010 bl-isem ‧Inizjattiva Ewlenija Ewropa 2020 - Unjoni tal-Innovazzjoni‧ (COM(2010)0546),

—

wara li kkunsidra l-Komunikazzjoni tal-Kummissjoni tad-9 ta' Novembru 2010 bl-isem ‧Kummerċ, Tkabbir u Affarijiet Dinjija - Il-Politika tal-Kummerċ bħala element prinċipali mill-Istrateġija tal-UE 2020‧ (COM(2010)0612),

—

wara li kkunsidra r-Riżoluzzjoni tiegħu tad-9 ta' Marzu 2011 dwar ‧Politika Industrijali għall-Era Globalizzata‧ (2),

—

wara li kkunsidra r-Riżoluzzjoni tiegħu tat-3 ta' Frar 2011 dwar skart ta’ tagħmir elettriku u elettroniku (WEEE) (3),

—

wara li kkunsidra r-Riżoluzzjoni tiegħu tas-16 ta' Ġunju 2010 dwar l-UE 2020 (4),

—

wara li kkunsidra d-dokument ta’ gwida ‧Non-energy mineral extraction and Natura 2000‧ (L-estrazzjoni ta' minerali mhux għall-enerġija u r-rekwiżiti ta' Natura 2000) tad-Direttorat Ġenerali għall-Ambjent, il-Kummissjoni Ewropea (5),

—

wara li kkunsidra d-Dokument ta' Ħidma maħruġ flimkien mal-Komunikazzjoni tal-Kummissjoni tal-4 ta' Novembru 2008 bl-isem ‧L-inizjattiva tas-swieq tal-materja prima - nilħqu l-ħtiġijiet kritiċi tagħna għat-tkabbir ekonomiku u l-impjiegi fl-Ewropa‧ (COM(2008)0699) (SEC(2008)2741),

—

wara li kkunsidra ‧Poltika dwar il-materja prima - rapport annwali 2009‧ mid-Direttorat Ġenerali għall-Kummerċ, il-Kummissjoni Ewropea (6),

—

wara li kkunsidra d-dokument ta’ gwida ‧The links between the environment and competitiveness‧ (Ir-rabtiet bejn l-ambjent u l-kompetittvità) tad-Direttorat Ġenerali għall-Ambjent, il-Kummissjoni Ewropea (7),

—

wara li kkunsidra l-Green Paper tal-Kummissjoni tal-10 ta' Novembru 2010 bl-isem ‧Politika tal-iżvilupp tal-UE għall-appoġġ ta' tkabbir inklussiv u żvilupp sostenibbli - Żieda fl-impatt tal-politika tal-iżvilupp tal-UE‧ (COM(2010)0629 finali),

—

wara li kkunsidra l-Komunikazzjoni tal-Kummissjoni tal-10 ta' Novembru 2010 bl-isem 'dwar il-konsolidazzjoni tar-relazzjonijiet bejn l-UE u l-Afrika (COM (2010)0634 finali),

—

wara li kkunsidra l-Komunikazzjoni tal-Kummissjoni li jmiss dwar il-kummerċ u l-iżvilupp,

—

wara li kkunsidra l-Komunikazzjoni tal-Kummissjoni tal-15 ta’ Settembru 2009 bit-titolu ‘Koerenza tal-Politiki għall-Iżvilupp – L-Istabbiliment ta’ qafas ta’ politika għall-approċċ uniku tal-Unjoni’ (COM(2009)0458),

—

wara li kkunsidra r-Riżoluzzjoni tiegħu tat-18 ta' Mejju 2010 dwar il-Koerenza tal-Politiki tal-UE għall-Iżvilupp u l-kunċett ta" ‧Għajnuna Uffiċjali għall-Iżvilupp u iktar‧ (8),

—

wara li kkunsidra r-Riżoluzzjoni tiegħu tal-25 ta’ Novembru 2010 dwar ir-responsabilità soċjali tal-kumpaniji fil-ftehimiet kummerċjali internazzjonali (9),

—

wara li kkunsidra l-Konklużjonijiet tal-Kunsill tal-10 ta’ Marzu 2011 dwar it-trattament tal-isfidi dwar il-materja prima u fis-swieq tal-prodotti bażiċi,

—

wara li kkunsidra l-Artikolu 208 tat-Trattat dwar il-Funzjonament tal-Unjoni Ewropea (Trattat ta’ Lisbona), li jafferma mill-ġdid li l-UE għandha tieħu inkunsiderazzjoni l-objettivi ta' kooperazzjoni għall-iżvilupp fl-implimentazzjoni tal-politika li x'aktarx tolqot lill-pajjiżi li qed jiżviluppaw,

—

wara li kkunsidra n-negozjati attwali taċ-Ċiklu ta' Doha,

—

wara li kkunsidra l-Istrateġija Konġunta Afrika-UE tal-2007 u d-Dikjarazzjoni ta' Tripli tat-3 Summit Afrika-UE fid-29/30 ta' Novembru 2010,

—

wara li kkunsidra l-kawża quddiem id-WTO dwar disa' materji primi mill-UE, l-Istati Uniti u l-Messiku kontra ċ-Ċina,

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Industrija, ir-Riċerka u l-Enerġija kif ukoll l-opinjonijiet tal-Kumitat għall-Ambjent, is-Saħħa Pubblika u s-Sikurezza tal-Ikel, tal-Kumitat għall-Affarijiet Barranin, tal-Kumitat għall-Iżvilupp, tal-Kumitat għall-Kummerċ Internazzjonali u tal-Kumitat għall-Agrikoltura (A7-0288/2011),

A.

billi l-UE teħtieġ bażi industrijali soda, li tkun tiddependi ħafna minn provvisti suffiċjenti ta' materja prima, waqt li ssir aktar favorevoli għall-ambjent, sabiex taqleb għal ekonomija b’użu baxx tal-karbonju u biex tibqa’ kompetittiva;

B.

billi l-kumplessità tal-proċessi amministrattivi u n-nuqqas ta’ koordinazzjoni bejn l-amministrazzjonijiet jistgħu jwasslu għal dewmien ta’ diversi snin biex tinkiseb awtorizzazzjoni għall-isfruttament tar-riżorsi minerali, billi dan id-dewmien huwa eċċessiv, iżid l-ispiża kapitali tal-investiment u jeskludi mis-suq kumpaniji żgħar u ta’ daqs medju;

C.

billi d-domanda dinjija għall-materja prima ilha bil-mod tiżdied, speċjalment għall-‘metalli meħtieġa għat-teknoloġija’,

D.

billi l-Istati Membri tal-UE, l-Awstralja u l-Istati Uniti għandhom il-potenzjal li jiżviluppaw l-estrazzjoni tagħhom tar-riżorsi proprji ta’ materja prima kritika, metalli bażiċi u elementi terrestri rari,

E.

billi l-avvanzi f'teknoloġiji ġodda se jkomplu jżidu d-domanda għal riżorsi ċentrali għall-iżvilupp ta' dawn l-industriji,

F.

billi l-forniment internazzjonali huwa parzjalment ristrett minn kwoti tal-esportazzjoni, u l-prezzijiet qed jilħqu livelli ta’ rekord,

G.

billi fis-settur tal-manifattura s-sehem tal-ispiża tal-materjal bħala parti mill-ispejjeż tal-produzzjoni totali hija ferm ogħla mis-sehem relatat mal-pagi tal-ħaddiema, u billi fis-setturi kollha t-tendenza tal-ewwel li jiżdied mhux mistennija li tinbidel, għall-inqas f’perjodu ta’ żmien medju,

H.

billi s-swieq igawdu meta joperaw fuq pjattaforma ġusta u b’kundizzjonijiet ugwali għal kulħadd,

I.

billi ż-żieda fil-kompetizzjoni dwar il-materji primi tista' tiggrava r-relazzjonijiet internazzjonali u twassal għal kunflitti dwar riżorsi;

J.

billi dawn l-isfidi jistgħu jkunu ta' opportunità għal sħubiji ġodda u innovattivi ta' kooperazzjoni ta’ benefiċċju reċiproku bejn l-UE u pajjiżi terzi,

K.

billi f’ħafna pajjiżi li qed jiżviluppaw l-isfruttar tar-riżorsi naturali ma jseħħx għall-benefiċċju tal-popolazzjoni minħabba l-eżistenza ta’ reġimi mhux demokratiċi, frodi, korruzzjoni jew kunflitti armati,

L.

billi l-azzjonijiet proposti mill-Kummissjoni biex tippromwovi l-effiċjenza tar-riżorsi u r-riċiklaġġ huma limitati, fil-biċċa l-kbira tagħhom, għal valutazzjonijiet ta’ x'jista’ jsir, minflok li jipproponu miżuri konkreti li jridu jittieħdu, u għaldaqstant huma insuffiċjenti biex jintlaħqu l-għanijiet stabbiliti,

M.

billi l-Kummissjoni tidddikjara li implimentazzjoni u infurzar aħjar tal-leġiżlazzjoni eżistenti dwar l-iskart huma essenzjali biex tiġi promossa Ewropa aktar effiċjenti fl-użu tar-riżorsi,

N.

billi ż-żieda fir-riċiklaġġ ta’ materjali prezzjużi, speċjalment l-elementi terrestri rari, teħtieġ xogħol ta’ żmantellament intensiv,

O.

billi r-riċiklaġġ bi profitt jinsab fi klassifikazzjoni affidabbli u effiċjenti u t-teknoloġija tas-separazzjoni, peress li l-valur tal-materjali riċiklati jiddependi mill-purezza tal-frazzjoni;

P.

billi ż-żieda tal-effiċjenzi u r-riċiklaġġ iwasslu għas-sostenibilità, il-kompetittività u s-sigurtà tal-provvista,

Q.

billi l-produttività tal-forza tax-xogħol żviluppat ħafna aktar mgħaġġla fl-aħħar deċennji mill-produttività tar-riżorsi, bl-istimi juru li l-kosti tal-forza tax-xogħol huma anqas minn 20 % ta’ prodott u l-kosti tar-riżorsi jirrappreżentaw 40 %; billi dan ifisser li hemm bżonn li ssir azzjoni b’ħeffa biex tittejjeb l-effiċjenza tar-riżorsi,

R.

billi huwa importanti ħafna li jittieħdu passi f'waqthom u deċiżivi fl-implimentazzjoni ta' strateġija effikaċi li tħalli r-riżultati fir-rigward tal-Inizjattiva Ewropea tas-Swieq tal-Materja Prima;

1.

Jemmen li l-Ewropa qed tiffaċċja kemm sfidi kif ukoll opportunitajiet fir-rigward ta’ materja prima; jenfasizza li l-UE issa, meta d-domanda għall-materja prima tiżdied sewwa globalment, għandha l-opportunità li taħsad benefiċċji billi ssaħħaħ il-provvista u l-effiċjenza fil-materja prima, filwaqt li tissodisfa l-ħtiġijiet tal-industriji tal-UE u s-settur tal-materja prima; jenfasizza li d-disponibilità ta’ aċċess ġust għall-materja prima, u l-prezzijiet stabbli u prevedibbli tagħha, huma ta’ importanza kruċjali għall-potenzjal tal-iżvilupp, il-kompetittività, l-innovazzjoni u l-preservazzjoni tal-industrija Ewropea; filwaqt li restrizzjonijiet fl-aċċess u l-provvista, partikolarment għall-materja prima kritika, bħall-REE, kif ukoll volatilità kbira fil-prezzijiet, jistgħu jostakolaw il-kompetittività, l-effiċjenza ambjentali u l-prospetti ta’ innovazzjoni tal-industrija tal-UE, speċjalment l-SMEs; jilqa’ l-fatt li l-Kummissjoni kienet minn ta’ quddiem fil-kwistjoni tal-politika tal-materja prima bl-Inizjattiva dwar il-Materja Prima (RMI) fl-2008, u jitlob bil-qawwa lill-Kummissjoni u lill-Istati Membri biex jimxu bil-ħeffa lejn l-implimentazzjoni tagħha. Jemmen li l-politika u d-diplomazija fir-rigward tar-riżorsi huma ta’ importanza kbira għall-UE, mhux biss fir-rigward tal-politika industrijali u l-kummerċ internazzjonali, iżda wkoll bħala kwestjoni trasversali li tikkonċerna oqsma differenti tal-politika domestika, kif ukoll tal-politika barranija u tas-sigurtà; jitlob lill-Kummissjoni tagħti kemm jista’ jkun attenzjoni lil din il-kwestjoni daqs kemm tagħti lill-kwestjoni tal-enerġija; iqis ukoll li dan huwa inkarigu għas-Servizz Ewropew għall-Azzjoni Esterna (EEAS);

2.

Jemmen li r-responsabilità għal diplomazija tal-UE koerenti u effikaċi tinsab fl-EEAS u fis-servizzi rilevanti tal-Kummissjoni – u b'mod speċjali d-DĠ għall-Kummerċ rigward kwistjonijiet kummerċjali – b'koordinament mill-qrib mal-Kunsill u mal-Parlament; jemmen, barra minn hekk, li r-relevanza strateġika tal-materja prima għandha tiġi riflessa fl-organizzazzjoni tal-EEAS u fir-reklutaġġ ta’ delegazzjonijiet relevanti tal-UE; jenfasizza l-importanza tal-koordinament tal-politika barranija tal-UE u tal-Istati Membri fil-qasam tal-materja prima;

3.

Jistieden lill-Kummissjoni tikkonċentra b’mod suffiċjenti fuq is-swieq tal-komoditajiet u l-RMI separatament, peress li ż-żewġ oqsma jvarjaw fin-natura tagħhom u jirrikjedu miżuri speċifiċi biex jindirizzaw problemi diverġenti; jenfasizza l-fatt li s-swieq finanzjarji u tal-komoditajiet illum huma minsuġa flimkien ħafna aktar minn qatt qabel u li l-volatilità tal-prezzijiet hija aggravata mill-ispekulazzjoni; jinnota li l-funzjonament xieraq tas-suq tal-materja prima jagħti l-inċentivi meħtieġa biex in-negozji jużaw ir-riżorsi b’mod aktar effiċjenti, jissostitwixxu r-riżorsi, jirriċiklaw u jinvestu aktar fl-attivitajiet tal-R & D għas-sostituzzjoni; jinkuraġġixxi lill-Kummissjoni, għalhekk, issaħħaħ il-funzjonament xieraq tas-swieq tal-materja prima billi, pereżempju, tkompli bir-rieżami tas-swieq fid-Direttiva dwar is-Servizzi Finanzjarji, sabiex tipprovdi għal aktar kummerċ trasparenti; jenfasizza li t-tliet pilastri tal-RMI jikkomplementaw lil xulxin fis-soluzzjoni ta’ kwistjonijiet tal-materja prima u l-garanzija tal-provvista tal-materja prima fl-UE; jistieden lill-Kummissjoni timplimenta l-istrateġija tal-materja prima b’mod ibbilanċjat u koerenti, partikolarment fir-rigward ta' politiki Ewropew importanti oħra, speċjalment fi ħdan l-industrija, ir-riċerka, l-ambjent, it-trasport u Ewropa 2020; jinnota, f’dan il-kuntest, b’mod partikolari, ir-rwol importanti li għandhom l-innovazzjoni b’saħħitha u l-politika industrijali;

4.

Jilqa’ l-ħidma tal-Kummissjoni dwar l-identifikazzjoni tal-materji primi kritiċi, li kollha huma “metalli meħtieġa għat-teknoloġija” ta’ importanza u għandhom jiġu kkunsidrati f’miżuri sussegwenti; jistieden lill-Kummissjoni:

ifakkar li, fi ħdan il-materja prima u l-materja prima kritika b’mod partikolari, il-grad ta’ kemm materja tkun kritika jvarja minn element għal ieħor, kif ukoll id-disponibilità, l-użu tagħhom, il-ħtieġa li jkollhom għall-ipproċessar u konsegwentament, l-iffissar tal-prezzijiet fl-istadji differenti tal-katina tal-provvista, li għandhom jiġu kkunsidrati fl-analiżi; jiġbed l-attenzjoni wkoll għad-diversità tal-paradigmi loġistiċi għall-flussi tal-materja prima fis-suq komuni;

5.

Jinnota li mhux is-swieq kollha tal-materja prima jaġixxu bl-istess mod u, b'mod partikulari, li s-swieq tal-materja prima fis-settur agrikolu huma suġġetti għal fatturi staġjonali u klimatiċi qawwija u għaldaqstant jeħtieġu attenzjoni partikulari;

6.

Jistieden lill-Kummissjoni, għalhekk, tippreżenta studju dwar l-importazzjoni Ewropea tal-materja prima li, għalkemm ma tkunx klassifikata bħala kritika (pereżempju l-litju, il-ħafnju u n-nikil), hija madankollu ta’ importanza strateġika f’dak li jirrigwarda l-qadi tal-bżonnijiet industrijali Ewropej u l-ħolqien ta’ prodotti tal-konsumatur b'valur miżjud għoli; l-istudju għandu jivvaluta wkoll id-dipendenza tal-industriji tagħna fuq dawn il-materji primi u l-miżuri li jiżguraw il-provvista tagħhom, kif ukoll il-kost ambjentali tal-estrazzjoni tagħhom u l-alternattivi li jistgħu jkunu previsti;

7.

Jilqa' l-fatt li firxa wiesgħa ta’ materja prima, bħal-lastiku naturali, l-injam u l-aggregati, huma inklużi fil-Komunikazzjoni tal-Kummissjoni; jistieden lill-Kummissjoni tagħmel analiżi dwar id-disponibilità ta’ dawn il-materjali u d-domanda potenzjali għalihom u fuq din il-bażi tieħu azzjoni xierqa, jekk u fejn ikun meħtieġ; jiddikjara li dan ir-rapport jiffoka fuq materja prima strateġika u kritika;

8.

Jinnota li governanza effettiva tal-politika tal-materja prima hija ta' importanza ewlenija għal strateġija effettiva dwar il-materja prima; jinnota li strateġija effettiva trid tinkludi djalogu kontinwu mal-partijiet interessati kkonċernati; jisħaq fuq il-ħtieġa ta’ koordinazzjoni mill-qrib u l-provvista ta’ informazzjoni fi ħdan il-Kummissjoni u l-Parlament Ewropew u bejn l-Istati Membri; jirrakkomanda t-twaqqif ta' task force interdipartimentali ta’ livell għoli fl-2011, dwar il-materja prima, bħalma hemm fi Franza u fl-Istati Uniti, li jkun jinkludi d-DĠs rilevanti, iċ-Ċentru Konġunt Għar-Riċerka (JRC), l-Aġenzija Ewropea għall-Ambjent u l-EEAS, biex jelabora, jimmoniterja u jirrevedi l-politiki, inklużi l-ftehimiet ta’ sħubija, biex jiżgura l-koerenza strateġika u biex jippromwovi t-twaqqif ta' sistema ta' twissija bikrija, inter alia għad-distorsjoni tas-swieq u għall-kunflitti minħabba r-riżorsi, ikkompletati minn grupp ta' monitoraġġ; jistieden lill-Kummissjoni twaqqaf ‘Pjan direzzjonali għall-materja prima fl-Ewropa għall-2050”, li jidentifika żviluppi, theddidiet u opportunitajiet futuri fis-setturi tal-materja prima u tal-materja prima kritika, u li jista’ jgħin lill-industriji u l-istituzzjonijiet akkademiċi u ta’ riċerka Ewropej jimpenjaw ruħhom f’ippjanar u investiment fuq żmien fit-tul; jistieden ukoll lill-Kummissjoni tappoġġa lill-Istati Membri biex jiżviluppaw strateġiji tal-materja prima proprja tagħhom u biex irawmu l-koordinazzjoni u l-iskambju tal-aħjar prattika bejniethom, inkluża d-dimensjoni esterna; jissuġġerixxi li l-komunikazzjoni li jmiss dwar id-dimensjoni esterna tal-enerġija tista' ssevi bħala mudell;

9.

Jinsisti li l-Parlament Ewropew għandu jiġi regolarment infurmat dwar l-iżvilupp tal-materja prima bla enerġija fil-qafas tal-RMI u l-ilħiq tal-objettivi tagħha permezz ta’ rapport annwali dwar il-progress, li jiffoka wkoll fuq il-koerenza fil-politika fir-rigward tal-politika tal-kummerċ, l-iżvilupp u l-ambjent, l-impatti soċjali, kif ukoll dwar il-materja prima kritika;

10.

Jinnota li meta negħlbu l-isfidi tal-materja prima, niksbu opportunità biex tingħata spinta lill-bażi industrijali, il-kapaċità teknoloġika u n-know-how tal-UE u jiżdiedu l-kompetittività u l-impjiegi kkwalifikati stabbli bis-saħħa ta' strateġija ta’ innovazzjoni industrijali ambizzjuża; jinnota li, minkejja l-importanza ta’ politika kummerċjali effettiva u l-użu ta’ riżorsi proprji, governanza tajba tal-materja prima u ż-żieda tal-effiċjenza, l-użu mill-ġdid, ir-riċiklaġġ effiċjenti mil-lat ta’ enerġija, it-tnaqqis fl-użu tar-riżorsi, anki permezz ta’ standards imtejba tal-kwalità tal-prodott u l-prinċipju ta’ użu aktar fit-tul (‧use-it-longer‧ principle), fejn ikun xieraq, u l-użu ta’ teknoloġiji favorevoli għall-ambjent se jkunu l-qofol għall-kompetittività, is-sostenibilità u għas-sigurtà tal-provvista f’perjodu ta’ żmien medju sa żmien twil; jemmen li kull inizjattiva f’dan ir-rigward għandha tkun ibbażata fuq valutazzjonijiet tal-impatt kif inhu xieraq li jiffokaw fuq impatti ambjentali, soċjali potenzjali kif ukoll possibilment fuq il-kompetittività; jenfasizza l-importanza li tkun applikata b’konsistenza l-Ġerarkija Ewropea tal-Iskart, li torbot legalment, kif stabbilit fid-Direttiva Qafas dwar l-Iskart, li tagħti prijorità lill-prevenzjoni, l-użu mill-ġdid u r-riċiklaġġ, segwiti mill-irkupru u r-rimi; jinnota li l-Kummissjoni għandha tappoġġa l-innovazzjoni soċjali, it-tibdiliet fl-istil tal-ħajja u kunċetti ġodda bħalma huma l-"eco-leasing", u l-"chemical leasing" u l-kondiviżjoni tas-sustanzi kimiċi;

11.

Jinnota li livelli iżjed baxxi ta' konsum, prevenzjoni ta' ġenerazzjoni ta’ skart u l-użu mill-ġdid tiegħu huma komponenti prinċipali għat-tranżizzjoni għal ekonomija effiċjenti fl-użu tar-riżorsi;

12.

Jissuġġerixxi li l-Kummissjoni twettaq studju komprensiv dwar mudelli ta' leasing ekonomiku bħala alternattivi għas-sjieda tal-prodotti u l-impatt tagħhom fuq l-użu u l-irkupru tal-materjali; jenfasizza li s-sensibilizzazzjoni hi l-isfida primarja f'dan ir-rigward;

13.

Jenfasizza l-bżonn li naħdmu lejn is-separazzjoni bejn it-tkabbir ekonomiku u użu akbar ta’ riżorsi, li wkoll se jgħinu biex inaqqsu d-dipendenza relattiva fuq l-importazzjonijiet; jinnota l-importanza li tiġi stabbilita strateġija tal-materja prima anki fi ħdan il-kuntest usa’ tat-tibdil fil-klima; għaldaqstant, jilqa' l-pjan tal-Kummissjoni biex tniedi inizjattiva emblematika fuq l-effiċjenza tar-riżorsi; jistieden lill-Kummissjoni tidentifika l-ostakoli għat-tisħiħ tal-produttività tar-riżorsi (inklużi l-limitazzjonijiet tekniċi, il-kosti, eċċ) u biex tinkorpora u tevalwa miri għat-titjib fl-effiċjenza tar-riżorsi fuq perjodu ta’ żmien medju u twil li jirreflettu l-ħtieġa li tonqos id-dipendenza tal-UE fuq l-importazzjoni tal-materja prima, peress li l-importazzjonijiet tal-materja prima fl-Unjoni Ewropea huma per capita l-ogħla fid-dinja; sabiex il-progress jiġi vvalutat b’mod oġġettiv u biex isir tqabbil ma’ pajjiżi oħra, jitlob lill-Kummissjoni tiżviluppa metodoloġija aktar affidabbli għall-kejl tal-effiċjenza fir-riżorsi, filwaqt li jiġi kkunsidrat ix-xogħol tal-Eurostat f'dan il-qasam, kif ukoll ir-riżultati ta’ studju tal-Parlament Ewropew ikkummissjonat reċentement dwar is-suġġett;

14.

Jilqa’ l-iżvilupp ta’ strumenti u indikaturi, bħat-TEEB (l-Ekonomija tal-Ekosistemi u l-Bijodiversità); iħeġġeġ lill-Kummissjoni tippromwovi u tistimula l-iżvilupp ta' dawn l-istrumenti u l-użu tagħhom;

15.

Jemmen li taxxa fuq ir-riżorsi minerali mhijiex għodda fiskali adattata biex tiżdied l-effiċjenza fir-riżorsi, filwaqt li jistieden lill-Kummissjoni tikkummisjona studju dwar l-effetti ta’ taxxa fuq l-użu tal-ilma u tal-art, b’attenzjoni speċjali għal riperkussjonijiet mhux maħsuba li jista' jkun hemm fuq attivitajiet ekonomiċi u l-produzzjoni tal-enerġija rinnovabbli fl-UE;

16.

Jistieden lill-Kummissjoni tqis serjament li testendi, fuq il-bażi ta’ valutazzjoni tal-impatt, l-approċċ tal-ekodisinn għall-materja prima, biex teżamina l-possibilità ta’ introduzzjoni ta’ strumenti ġodda, taħdem ma' korpi ta' standardizzazzjoni, biex tevalwa l-fattibiltà ta' programm tal-ogħla kwalità għal prodotti li għandhom x'jaqsmu mal-effiċjenza tar-riżorsi, biex issaħħaħ is-servizzi konsultattivi rigward l-effiċjenza tar-riżorsi, l-aktar għall-SMEs, pereżempju billi ssaħħaħ programmi bħalma huwa l-Aġenzija Eżekuttiva għall-Kompetittività u l-Innovazzjoni (EACI); jistieden lill-Kummissjoni tappoġġa l-SMEs f’dan il-qasam billi tippromwovi l-iskambju tal-aħjar prattika fost l-Istati Membri, billi tipprovdi aċċess għar-riċerka relevanti fil-qafas tal-FP7 u l-programmi futuri ta’ riċerka tal-UE; jistieden lill-kumpaniji jużaw jew l-Iskema għall-Immaniġġjar tal-Ambjent u Verifika (EMAS) jew l-istandards ISO; jistieden lill-Kummissjoni u lill-Istati Membri biex jestendu l-proċedura tal-akkwist pubbliku sabiex jitkattru l-prodotti effiċjenti fir-riżorsi u l-prodotti li jutilizzaw materja prima sekondarja, kif ukoll biex jiġi żgurat li jkun hemm riċiklaġġ tajjeb u trasparenti fi tmiem il-ħajja tagħhom; jinnota li fir-riċiklaġġ mhix importanti biss il-kwantità iżda wkoll il-kwalità; jenfasizza, għaldaqstant, l-importanza ta’ disinn tal-prodott li jkun jirrispetta l-ambjent; jenfasizza l-valur li fit-tagħrif tal-prodotti u fuq l-ekotikketti tiddaħħal informazzjoni dwar l-użu tar-riżorsi, biex tagħti s-setgħa lill-konsumaturi; jistieden lill-entitajiet tal-istandardizzazzjoni Ewropej biex jistandardizzaw il-kwistjoni tal-effiċjenza tar-riżorsi fid-definizzjoni tal-istandards;

17.

Jistieden lill-Kummissjoni tistudja kif id-Direttiva dwar l-Ekodisinn, id-Direttiva dwar vetturi li m’għadhomx jintużaw, id-Direttiva dwar Skart ta’ Tagħmir Elettriku u Elettroniku u d-Direttiva dwar l-Iskart tal-Batteriji jistgħu jiġu mmodifikati sabiex jiżdied ir-riċiklaġġ, mhux biss mil-lat ġenerali, iżda wkoll għal materja prima prezzjuża, inklużi l-REE, pereżempju billi jkun hemm rekwiżiti aktar speċifiċi dwar iż-żarmar, u biex, b’konsegwenza, tipproponi emendi għal dawn l-atti;

18.

Jinnota l-kontribut li l-użu mill-ġdid u r-riċiklaġġ jistgħu jagħtu fejn jidħol it-tnaqqis tal-gassijiet serra (GHG), peress li l-materja prima hija sors sinifikattiv tal-produzzjoni ta’ GHG; jinnota, barra minn hekk, ir-rati għolja ta’ riċiklaġġ għal setturi speċifiċi regolati minn leġiżlazzjoni dwar ir-riċiklaġġ; jitlob lill-Kummissjoni tidentifika modi biex tkompli żżid ir-riċiklaġġ f’setturi relattivi billi inter alia ttejjeb il-qafas legali għall-ekonomija ċirkolari; jenfasizza l-ħtieġa li jsir investiment fir-riċiklaġġ tal-materja prima, partikolarment l-REE; jistieden lill-Kummissjoni tniedi analiżi fil-fond dwar il-fluss tal-materjali tal-UE, dwar iċ-ċiklu tal-ħajja sħiħ tal-materja prima (mill-estrazzjoni għall-iskart), kull settur individwalment u bil-ħsieb li jiġu eżaminati u proposti modi effiċjent fil-konfront tal-ispejjeż biex jiżdied ir-riċiklaġġ tal-materja prima, filwaqt li jiġi kkunsidrat l-impatt ambjentali; jistieden lill-Kummissjoni tarmonizza l-leġiżlazzjoni Ewropea u standards minimi tar-riċiklaġġ bil-ħsieb ta’ konsistenza akbar; jistieden lill-Istati Membri jiżguraw l-implimentazzjoni xierqa tal-leġiżlazzjoni eżistenti, jistieden ukoll lill-assoċjazzjonijiet tal-industrija jippromwovu attivament ir-riċiklaġġ fost il-membri tagħhom u biex jiffaċilitaw il-kooperazzjoni mal-istituzzjonijiet tar-riċerka u ma’ setturi oħra; jinnota l-importanza li l-ammont ta’ skart prodott jiġi separat miż-żieda fil-produzzjoni tal-manifattura;

19.

Jinnota l-importanza li jinħolqu sinerġiji industrijali dwar ir-riċiklaġġ u l-għoti tal-għajnuna lill-kumpaniji biex jiskopru kif l-iskart u l-prodotti sekondarji tagħhom jistgħu jservu bħala riżorsi għal ħaddieħor; jistieden lill-Kummissjoni u lill-Istati Membri jippromwovu metodi bħalma għamel ir-Renju Unit bil-Programm Nazzjonali tas-Simbjożi Industrijali;

20.

Jistieden lill-Kummissjoni:

21.

Huwa tal-opinjoni li hemm bżonn kbir ta' aktar informazzjoni dwar it-tħaffir fil-minjieri urbani u għaldaqstant jitlob lill-Kummissjoni tevalwa b'mod speċjali l-potenzjal, iżda wkoll il-limitazzjonijiet possibbli f'dan ir-rigward;

22.

Iħeġġeġ lill-Kummissjoni tiżviluppa strateġija ta' riċiklaġġ bi rkupru qrib kemm jista' jkun tas-sors tal-iskart, inkluża l-purifikazzjoni tal-ilma tad-drenaġġ, peress li dan jippermetti l-irkupru ta' konċentrazzjonijiet ogħla ta' materja prima, jevita n-nuqqas ta' rkuprar, inaqqas l-impatt negattiv fuq l-ambjent u possibbilment ikun aktar effiċjenti f'termini ta' enerġija;

23.

Jitlob lill-Kummissjoni, barra minn hekk, biex tressaq proposta biex temenda d-Direttiva dwar ir-rimi ta' skart f’terraferma (10) u biex tiżviluppa u tespandi l-objettivi stipulati fl-Artikolu 5(2) tagħha; iqis, barra minn hekk, li skont id-Direttiva Qafas dwar l-Iskart, il-mira ta' tnaqqis tal-projbizzjoni li skart bijodegradabbli urban jintbagħat f'terraferma għandha tiġi estiża, b’bidu mill-2020, għall-iskart bijodegradabbli kollu, b'mira ta' tnaqqis stabbilita għal 5 %;

24.

Jistieden lill-Kummissjoni tappoġġa s-sħubijiet tar-riċiklaġġ mal-pajjiżi li qed jiżviluppaw; jitlob lill-Kummissjoni tappoġġa proġetti pilota bħalma huma ż-żoni ta' skart żero;

25.

Jitlob lill-Kummissjoni tevalwa kif il-Bank Ewropew tal-Investiment (BEI) jista' jgħin inaqqas ir-riskji finanzjarji għal investimenti f'impjanti ta' riċiklaġġ b'teknoloġija ġdida u inizjattivi oħra ta’ riċiklaġġ;

26.

Jistieden lill-Kummissjoni ssaħħaħ ir-riċerka u l-iżvilupp dwar inċentivi ekonomiċi għar-riċiklaġġ, inkluż ir-riċiklaġġ ta’ REE, anki billi tħares lejn valutazzjoni tal-impatt; jistieden lill-Kummissjoni wkoll tistħarreġ kif is-swieq għal materjal riċiklat jista' jkun appoġġat minn, fost l-oħrajn, ċertifikati għal materjal riċiklat, rekwiżiti ta' ekodisinn, u biex tiżgura li l-politika ta' koeżjoni u l-baġits ikunu estiżi biex jippromwovu l-effiċjenza u r-riċiklaġġ tar-riżorsi;

27.

Jisħaq fuq il-bżonn li jiġi miġġieled it-trasport illegali tal-iskart riċiklabbli u l-iskart li fih materja prima utli, partikolarment skart elettroniku kopert mid-Direttiva WEEE (2002/96/KE), billi tittejjeb il-leġiżlazzjoni u tissaħħaħ l-implimentazzjoni, u jistieden lill-Istati Membri jagħtu attenzjoni urġenti għal dan il-kompitu; jitlob lill-Kummissjoni tinvestiga kif l-użu ulterjuri tal-kunċett tar-responsabbiltà tal-produttur jista’ jsostni din il-mira; jenfasizza l-ħtieġa li titwaqqaf skema ta' ċertifikazzjoni globali għall-faċilitajiet ta' riċiklaġġ; jinnota l-importanza tal-kooperazzjoni bejn l-uffiċjali tad-dwani nazzjonali; jistieden lill-Kummissjoni teżamina jekk huwiex meħtieġ mekkaniżmu kollettiv biex jinforma lill-awtoritajiet dwar il-flussi ta’ trasport illegali jekk ikun neċessarju; jitlob lill-Kummissjoni tistudja l-flussi illegali tal-flussi tal-iskart u tirrapporta regolarment dwar is-suċċessi fil-ġlieda kontra l-esportazzjonijiet illegali tal-iskart; jitlob lill-Kummissjoni tippromwovi distinzjoni effettiva fid-dikjarazzjonijijiet doganali bejn oġġetti ġodda u oħrajn użati billi tindirizza dan fl-Implimentazzjoni tad-Dispożizzjonijiet tal-Kodiċi tad-Dwana tal-Komunità Moderna (MCCC-IP);

28.

Jistieden ukoll, f’dan il-kuntest, lill-Kummissjoni, fejn ikun mixtieq, tappoġġa s-sħab kummerċjali tal-UE, biex jadottaw liġijiet xierqa u jinfurzaw miżuri adegwati ta’ kontroll ħalli jevitaw l-importazzjoni illegali ta’ kwalunkwe tip ta’ skart fit-territorju tagħhom u jiġġieldu b’mod attiv kontra l-korruzzjoni li spiss tippermetti li jsiru dawn l-importazzjonijiet illegali.

29.

Jistieden lill-Kummissjoni tqis il-kummenti kritiċi minn uħud mill-Istati Membri dwar ir-Regolament tal-Kunsill li jistabbilixxi kriterji li jiddeterminaw meta ċerti tipi ta’ metall skreppjat ma jibqgħux jitqiesu bħala skart skont id-Direttiva 2008/98/KE, u jitlob lill-Kummissjoni ssaħħaħ ir-rekwiżiti dwar il-kwalità tal-prodott u ttejjeb il-possibilitajiet biex tiċċekkja u tiżgura li l-iskrep iddikjarat bħala skrep ta’ tmiem l-iskart ikollu l-kwalità meħtieġa;

30.

Jistieden lill-Kummissjoni tidentifika l-prijoritajiet għar-riċerka u l-innovazzjoni f’metodi ta’ produzzjoni u esplorazzjoni sostenibbli, iċ-ċiklu tal-ħajja ta’ prodott u r-riċiklaġġ (cradle-to-cradle), is-sostituzzjoni u l-effiċjenza tar-riżorsi, peress li dan ukoll jista’ jnaqqas id-dipendenza ta’ importazzjoni li għandha l-Ewropa fuq fornituri monopolistiċi; jistieden lill-Kummissjoni tindirizza sfidi eżistenti fir-rigward tar-riċiklaġġ fi ħdan il-programmi ta’ qafas, u jenfasizza li għandha tingħata attenzjoni lil strateġiji differenti ta’ riċiklaġġ għall-metalli massivi kif ukoll għall-materja prima kritika bħalma huma l-REE; jistieden lill-Kummissjoni tassoċja l-finanzjament għar-riċerka dwar il-materja prima kritika, bħall-REE, ma’ miri ċari, bħal pereżempju, il-mira Ġappuniża li jitnaqqas il-konsum tal-REE b’terz; jistieden lill-Kummissjoni tintegra l-esperjenza mill-pajjiżi terzi li diġà laħqu livelli għoljin ta’ ġbir mill-ġdid, bħan-Norveġja, fejn madwar 80 % tal-iskart elettroniku jerġa’ jinġabar, u biex tiffissa miri adegwati ta’ ġbir mill-ġdid tagħha stess; jenfasizza l-importanza ta’ sħubijiet pubbliċi-privati f’dan il-qasam li jkunu jinvolvu l-industrija, l-akkademja u l-gvern; jirrikonoxxi s-servizz ta’ fejda li dawn l-istituzzjonijiet jagħtu wkoll lill-SMEs; jinsisti dwar l-importanza ta' Sħubija Ewropea għall-Innovazzjoni fuq il-materja prima strateġika biex issir promozzjoni tal-iżvilupp tal-effiċjenza fir-riżorsi, teknoloġija ewlenija, is-sigurtà tal-provvista u s-settur domestiku tal-materja prima; jistieden lill-Kummissjoni biex fl-2011 tniedi sħubija simili;

31.

Jiddispjaċih li s-sostituzzjoni u l-użu mill-ġdid mhumiex indirizzati b’mod suffiċjenti fil-Komunikazzjoni; ifakkar li s-sostituzzjoni, partikolarment għall-materja prima kritika, hija ta’ rilevanza kbira ferm u tista’ toffri soluzzjonijiet effiċjenti għar-riskji fil-provvista u l-perikli ambjentali fejn possibbli; jistieden lill-Kummissjoni, għalhekk, tintensifika l-ħidma tagħha f'dan il-qasam, billi testendi r-riċerka u l-innovazzjoni permezz tal-iżvilupp possibbli ta’ programm ta’ R & D għas-sostituzzjoni fil-programm ta’ qafas dwar ir-riċerka li jmiss, u tagħti appoġġ lill-impjanti għad-dimostrazzjoni; iħeġġeġ lill-Kummissjoni u l-Istati Membri jikkunsidraw l-iffissar ta’ miri għas-sostituzzjoni filwaqt li jikkunsidraw valutazzjonijiet tal-impatt relevanti; jistieden lill-Kummissjoni tagħmel użu sħiħ mill-kompetenza eżistenti dwar l-REE fi ħdan l-UE;

32.

Jitlob politiki mhux fiskali biex jiġu appoġġati setturi domestiċi tal-materja prima biex jattiraw l-investimenti; jilqa', għalhekk, il-kooperazzjoni bejn timijiet ta’ stħarriġ nazzjonali ġeoloġiku; jitlob li jkun hemm aktar kollaborazzjoni bejniethom u jinkoraġġixxi l-użu ta' standards u prattiki komuni li jiffaċilitaw l-iskambju u l-użu tad-data ġeoloġika disponibbli; jilqa' l-pubblikazzjoni annwali tal-Annwarju Ewropew tal-Materja Prima (ERMY), filwaqt li jenfasizza li d-data fuq riżorsi sekondarji u fuq it-tħaffir ta' minjieri urbani għandhom jiġu inklużi; jitlob lill-Kummissjoni tivvaluta jekk huwiex meħtieġ il-ħolqien ta' Sevizz Ġeoloġiku tal-UE li jiġbor il-ħidma ta' stħarriġiet nazzjonali u l-ħidmiet ma' sħab internazzjonali; jappoġġja l-ħidma tal-Kummissjoni biex ittejjeb il-bażi tal-għarfien ġeoloġiku tal-UE; jistieden lill-Kummissjoni biex f'kooperazzjoni mal-Istati Membri, tiżviluppa mappa diġitali ta' riżorsi tal-Unjoni;

33.

Jinnota l-importanza u l-forniment ta' provvista ta' materja prima fl-Ewropa; għalhekk jistieden sabiex,

Jinnota r-rwol importanti tal-kumpanniji li jipprovdu servizzi upstream fil-kuntest tat-tħaffir ta' mini domestiċi; jenfasizza l-importanza li jiġu stimulati raggruppamenti reġjonali jew nazzjonali ta' materja prima li jiġbru flimkien l-industrija, is-servizzi ġeoloġiċi, il-fornituri ta' servizzi upstream, il-manifatturi tat-tagħmir, il-kumpanniji ta' tħaffir ta' minjieri u ta' raffinar, kif ukoll l-industrija tat-trasport u s-sħab soċjali fit-tħaffir ta' minjieri sostenibbli fl-Ewropa, anki bl-użu ta' teknoloġiji ġodda tat-tħaffir ta' minjieri;

34.

Jistieden lill-Kummissjoni tintegra l-objettivi tal-pjan ta' azzjoni dwar il-bijodiversità fl-istrateġija dwar il-materja prima biex issaħħaħ ir-rabtiet bejn l-ekonomija u l-ambjent u tqis l-effetti ambjentali tal-estrazzjoni, il-produzzjoni, l-użu u r-rimi tal-materja prima; iħeġġeġ lill-Kummissjoni tappoġġa l-iżvilupp ta' ppjanar strateġiku dwar l-użu tal-art fl-Istati Membri kollha biex l-estrazzjoni tal-materja prima tiġi bbilanċjata mad-domandi l-oħra għall-użu tal-art u biex l-ambjent u l-bijodiversità jiġu ssalvagwardjati;

35.

Jenfasizza li l-attivitajiet ta' estrazzjoni għandhom jitwettqu b'kunsiderazzjoni xierqa għall-ogħla standards tas-sigurtà fil-post tax-xogħol u tal-protezzjoni ambjentali sabiex jiġu evitati inċidenti u ż-żoni affettwati jiġu rriabilitati;

36.

Jitlob lill-Kummissjoni biex tagħti attenzjoni biżżejjed lill-iżvilupp ta' żoni b'ħafna riżorsi u biex tinkludi approċċ komprensiv biex ittejjeb l-infrastruttura tat-trasport li tgħaqqad żoni tal-Unjoni b'ħafna riżorsi maż-żoni industrijali tagħha; jistieden lill-Kummissjoni, għalhekk, tiżgura li l-linji gwida rreveduti fuq in-Netwerks Trans-Ewropew tat-Trasport (TEN-T) jissodisfaw il-bżonnijiet tal-industrija billi jipprovdu aċċess bla xkiel għall-materja prima;

37.

Jirriafferma li l-linji gwida ta' NATURA 2000 jipprovdu bażi soda li fil-qafas tagħha jistipulaw li għandhom isiru attivitajiet ta' estrazzjoni ta' bla enerġija fid-dawl tal-prinċipju ta' sussidjarjetà; jistieden lill-Kummissjoni tiċċekkja fuq bażi regolari jekk sarx progress fl-Istati Membri fir-rikonċiljazzjoni tal-estrazzjoni tal-materja prima mal-konservazzjoni tan-natura; jinnota li l-kodiċi ta' prattika biex tinkiseb l-eċċellenza teknika, soċjali, kompetittiva u ambjentali huma strumenti importanti; ifakkar fir-Riżoluzzjoni tal-Parlament tal-20 ta' Jannar 2011 dwar politika sostenibbli tal-UE għat-Tramuntana Estrema (11) u jitlob, f'dan ir-rigward, lill-Kummissjoni, skont il-prinċipju ta' prekawzjoni, biex teżamina l-possibilitajiet ta' esplojtazzjoni ambjentalment sostenibbli ta' żoni sensittivi li jistgħu jkunu fornituri prezzjużi ta' materja prima essenzjali, bħall-Artiku, ir-Reġjun ta' Barents u Greenland u, jekk huwa possibli, jestendi l-ftehimiet ta' sħubija mal-pajjiżi f'dawn ir-reġjuni;

38.

Jenfasizza l-bżonn ta’ kundizzjonijiet ta' qafas aktar trasparenti u prevedibbli fuq il-proċessi ta' approvazzjoni regolatorja għall-istabbiliment ta' minjieri ġodda għall-estrazzjoni ta' metalli u minerali, filwaqt li, fl-istess ħin, ma jiġux kompromessi l-istandards ambjentali;

39.

Jinnota li pajjiżi Ewropej tat-Tramuntana u r-Reġjun ta' Barents għandhom depożiti sostanzjali ta' minerali u foresti; jemmen li r-reġjun Ewropew tat-Tramuntana jista' jikkontribwixxi b'mod sostanzjali għall-bżonnijiet ta' provvista ta' materja prima tal-kumpanniji oħra Ewropej u b'hekk inaqqas id-dipendenza Ewropea fuq l-importazzjoni; jemmen li hemm bżonn ċar li tiżdied is-sensibilizzazzjoni dwar il-potenzjal tal-Ewropa tat-Tramuntana fid-diskussjoni attwali dwar il-materja prima;

40.

Jenfasizza l-importanza tar-riċerka, l-iżvilupp u l-innovazzjoni (R&D&I) sabiex jiġu affrontati sfidi ġodda; jinnota l-importanza tar-Riċerka u l-Iżvilupp (R & D) fl-iżvilupp ta' teknoloġiji innovattivi u metodi sostenibbli tat-tħaffir tal-minjieri, tar-raffinar, il-produzzjoni ta' minerali u tar-riċiklaġġ, biex ikomplu jonqsu l-impatt ambjentali u l-effetti soċjali negattivi li huma possibli;

41.

Iħeġġeġ lill-Kummissjoni tieħu miżuri sabiex tixpruna interess fil-ftuħ mill-ġdid ta' xi minjieri, billi tisfruttahom b’mod sostenibbli, sabiex jitnaqqas ir-riskju ta' tnaqqis fil-provvista ta' materja prima għall-industrija Ewropea;

42.

Jenfasizza l-importanza tal-ħiliet u t-taħriġ u r-rwol li għandhom il-ġeologi, l-inġiniera, il-minaturi u persunal ieħor; jistieden lill-Kummissjoni u lill-Istati Membri jidħlu għal djalogu fil-qrib mas-sħab soċjali, l-akkademja u l-industrija relevanti; jitlob lill-Kummissjoni tidentifika l-ħtieġa u l-provvista ta' persunal imħarreġ fil-qasam tal-materja prima R&D, l-estrazzjoni, ir-raffinar, l-ipproċessar u r-riċiklaġġ sal-2012 u biex taqsam is-sejbiet mal-Parlament Ewropew; jitlob lill-Kummissjoni u l-Istati Membri, f'kollaborazzjoni mal-industrija u l-akkademja, biex jappoġġaw l-edukazzjoni dwar il-materja prima permezz tal-istabbiliment ta' programmi universitarji u boroż ta' studju speċjali; jappoġġa wkoll, f'dan il-kuntest, il-programmi ta' skambju f'dan il-qasam bħall-Erasmus Mundus Minerals and Environmental Programme;

43.

Jilqa' l-proposta għal diplomazija tal-UE dwar il-materja prima u r-riżorsi naturali rari tad-dinja bil-għan li tinħoloq pjattaforma regolatorja internazzjonali, li tiżgura aċċess għal u l-forniment ta' materja prima, speċjalment dik kritika, li tiżgura swieq globali miftuħa u l-promozzjoni ta' kooperazzjoni internazzjonali dwar it-tħaffir sostenibbli ta' materja prima u l-użu effikaċi tar-riżorsi skont interessi reċiproċi; jenfasizza, f'dan il-kuntest, il-ħtieġa li jiġi stabbilit djalogu b'saħħtu fil-qasam tad-diplomazija dwar il-materja prima bejn il-pajjiżi industrijalizzati, dawk li bdew jindustrijalizzaw, u dawk il-pajjiżi li qegħdin jiżviluppaw li huma sinjuri fir-riżorsi, bil-għan ukoll li jiġu promossi d-drittijiet tal-bniedem, il-governanza t-tajba, l-istabilità reġjonali u l-prevenzjoni tar-riskju ta' kunflitti dwar ir-riżorsi;

44.

Jitlob lill-Kummissjoni tiżgura infurzar l-aktar strett tal-leġiżlazzjoni attwali tal-UE, biex tinkludi s-sikurezza u l-istandards tat-tħaffir tal-minjieri tad-deheb taħt l-inizjattiva emblematika "Unjoni ta' Innovazzjoni", biex tinkludi punt ta' ħidma speċifiku għall-Panel Internazzjonali dwar il-Ġestjoni Sostenibbli ta' Riżorsi (UNEP) dwar l-estrazzjoni tad-deheb, inklużi l-aspetti ta' sikurezza, innovazzjoni, ġestjoni ta' kimiċi, it-tħaffir ta' minjieri illegali kif ukoll t-tħaffir ta' minjieri artiġjanali, sabiex tinkiseb soluzzjoni sostenibbli fit-tul li tiżgura li d-deheb jiġi prodott jew importat għall-użu fl-UE b'mod sostenibbli, u biex tikkunsidra l-Linji Gwida Berlin II dwar tħaffir ta' minjieri fuq skala żgħira u artiġjanali;

45.

Jenfasizza li t-tħaffir artiġjanali u fuq skala żgħira fil-minjieri (ASM) jista' jkollu rwol vitali fil-ħajja lokali, jipprovdi l-impjiegi u jsostni għanijiet ta' żvilupp meta jkun uffiċjalment rikonoxxut, regolat u sostnut; juri dispjaċir għan-nuqqas relattiv ta' għarfien u għodda analitiċi f'dan il-qasam u jenfasizza l-ħtieġa li tiżdied il-viżibbiltà tiegħu, li jiġu ffaċilitati t-tfassil u l-implimentazzjoni aktar effikaċi tal-politika ASM u jiġu sorveljati l-isforzi għall-għoti tal-assistenza li jgħinu fil-prevenzjoni ta' nases tal-faqar bħat-tħaddim tat-tfal, ambjent tax-xogħol perikoluż, xogħol furzat, li spiss jinsab fit-tħaffir artiġjanali fil-minjieri, u kunflitti assoċjati ma' attivitajiet ta' tħaffir fil-minjieri fuq skala żgħira; jistieden ukoll lill-UE u l-Istati Membri tagħha jappoġġaw il-pajjiżi li qed jiżviluppaw kemm fil-livell nazzjonali u fil-livell lokali billi jagħmlu disponibbli għarfien dwar prattiki ta’ tħaffir sostenibbli fil-minjieri, effiċjenza akbar fir-riżorsi u użu mill-ġdid u riċiklaġġ;

46.

Jistieden lill-Kummissjoni tevalwa l-bżonn li jiġi stabbilt mekkaniżmu ta' ħażna għall-materja prima kritika, speċjalment l-REErari, li jiggarantixxi lill-kumpanniji Ewropej aċċess għall-materjal strateġiku użat fis-settur ambjentali, tat-teknoloġika avvanzata, tad-difiża u tas-saħħa, kif ukoll protezzjoni kontra l-pressjoni monopolistika u ż-żidiet fil-prezzijiet; jenfasizza l-fatt li r-rwol tal-UE f'kwalunkwe programm potenzjali ta' ħażna għandu jkun limitat għall-forniment tal-qafas legali u l-kontroll regolatorju;

47.

Jinnota n-numru li dejjem qed jiżdied tar-restrizzjonijiet kummerċjali u d-distorzjonijiet tal-kompetizzjoni fil-kummerċ tal-materja prima; jitlob lill-Kummissjoni tissorvelja b'mod konsistenti u tindirizza l-kwistjoni tar-restrizzjonijiet fuq l-esportazzjoni u l-importazzjoni fil-livelli reġjonali, multilaterali u bilaterali; miżuri li jxekklu n-negozju rigward il-materja prima industrijali u partikolarment materja prima kritika għandhom jiġu investigati b'mod sħiħ u jistgħu jwasslu għal aktar passi legali fi ħdan il-qafas tad-WTO; jitlob lid-WTO biex jissorvelja mill-qrib l-impatt tar-restrizzjonijiet fuq l-importazzjoni u l-esportazzjoni u, f'dan ir-rigward, jappoġġa l-ħolqien fid-WTO ta' għodda ta' sorveljanza dwar barrieri tariffarji u mhux tariffarji għan-negozju ta' materja prima u ta' REE u l-istabbiliment fil-G20 ta' ‧Bord ta' Stabilità dwar il-Materja Prima u l-Elementi Rari‧; jistieden lill-Kummissjoni tuża n-netwerks internazzjonali kollha tagħha, inkluż is-servizz diplomatiku, sabiex jittejbu r-relazzjonijiet mal-pajjiżi u r-reġjuni fornituri tal-materja prima u l-materja prima kritika, biex b'hekk tiffaċilita l-kummerċ internazzjonali fil-materja prima, u b'mod speċjali l-materja prima kritika; jilqa' l-intenzjoni tal-UE biex titħaddem diplomazija attiva tal-materja prima li tinkludi diversi politiki bħal politika barranija, kummerċjali, ambjentali u tal-iżvilupp u li tippromwovi u ssaħħaħ il-prinċipji demokratiċi, id-drittijiet tal-bniedem, l-istabilità reġjonali, it-trasparenza u l-iżvilupp sostenibbli; jemmen li azzjonijiet ta' prijorità konkreti u strateġija komprensiva għal provvista sostenibbli ta’ REE għandhom ikunu żviluppati fi żmien qasir ħafna; jitlob lill-Kummissjoni tinvolvi l-partijiet interessati Ewropej fis-settur REE fl-identifikazzjoni ta' azzjonijiet bħal dawn;

48.

Jirrikonoxxi d-drittijiet leġittimi tal-gvernijiet u tal-parlamenti tal-pajjiżi li qegħdin jiżviluppaw biex jadottaw politiki u jirregolaw l-investiment barrani fl-interess pubbliku, b’konsultazzjoni mas-soċjetà ċivili, b’tali mod li l-investiment barrani jkun ta' benefiċċju għall-ekonomija lokali, joħloq valur miżjud intern u jrawwem l-iżvilupp; jenfasizza li l-Istrateġija tal-UE dwar il-Materja Prima ma għandhiex tostakola dawn id-drittijiet;

49.

Jilqa' l-isforzi tal-UE li tippromwovi l-kummerċ sostenibbli tal-materja prima ma’ pajjiżi terzi (eż. FLEGT);

50.

Jenfasizza l-bżonn li jitwaqqfu regoli ċari għall-kooperazzjoni fil-qasam tal-kummerċ tal-materja prima bejn il-parteċipanti kollha involuti (produtturi, esportaturi, pajjiżi ta' tranżitu, importaturi);

51.

Jitlob lill-Kummissjoni tiżgura li jkun hemm koerenza bejn il-politika tal-iżvilupp u l-RMI (Inizjattiva Ewropea tas-Swieq tal-Materja Prima), fejn il-politika tal-UE dwar il-materja prima għandha tqis għalkollox it-tkabbir ekonomiku sostenibbli fil-pajjiżi li qegħdin jiżviluppaw u għandha tkun konsistenti mal-għan ewlieni li jinqered il-faqar, kif stipulat fl-Artikolu 208 tat-TFUE; jenfasizza li l-appoġġ sħiħ għall-iżvilupp ekonomiku, soċjali u ambjentali tal-pajjiżi għonja fir-riżorsi, jista' jgħinhom biex jibnu istituzzjonijiet solidi u demokratiċi, li jiżguraw benefiċċji reċiproki kemm għal pajjiżi li jesportaw kif ukoll għal dawk li jimpurtaw; jitlob, għalhekk biex il-klawżoli dwar id-drittijiet tal-bniedem u d-demokratizzazzjoni jiddaħħlu fi ftehimiet futuri mal-pajjiżi sħab li jesportaw il-materja prima; jemmen li l-UE għandha wkoll tappoġġa l-pajjiżi li qed jiżviluppaw biex jiddiversifikaw l-ekonomiji tagħhom, inaqqsu d-dipendenza tagħhom fuq l-esportazzjonijiet tal-materja prima u jżidu l-valur tal-prodotti tagħhom permezz ta' manifattura u proċessar domestiku; jistieden lill-Kummissjoni, sabiex tinkludi fit-tħejjija ta' strumenti ta' azzjoni esterna ġodda għall-perjodu wara l-2013, miżuri ta' appoġġ għall-governanza tajba u t-tħaffir sostenibbli fil-programmi għall-istabilità demokratika u ekonomika ta' stati fraġili li huma fornituri ta' materja prima;

52.

Jikkunsidraha bħala r-responsabbiltà tal-kumpanniji biex jiksbu r-riżorsi; jirrikonoxxi d-diffikultajiet fil-ksib tar-riżorsi għall-SMEs; għalhekk, jitlob lill-Kummissjoni tikkunsidra kif kunċetti bħalma huwa s-Sehem Ewropew tal-Materja Prima jistgħu jkunu appoġġjati b'mod mhux finanzjarju; jitlob lill-Kummissjoni u lill-Istati Membri jeżaminaw il-JOGMEC tal-Ġappun sew;

53.

Iħeġġeġ lill-Istati Membri jikkooperaw flimkien bħala parti mill-istrateġija Ewropea għall-materja prima; jitlob biex din l-istrateġija tieħu vantaġġ mis-sinerġiji bejn il-politika ekonomika, il-politika tat-tħaffir tal-minjieri, il-politika industrijali u l-politika internazzjonali u biex timmira lejn is-salvagwardja tal-provvisti ta' sustanzi strateġiċi;

54.

Jistieden lill-Kummissjoni tevalwa r-riżultat tal-kawża tad-WTO kontra ċ-Ċina u biex fil-ġejjieni u fejn ikun xieraq tuża mekkaniżmi tad-WTO;

55.

Jinnota l-importanza tar-relazzjonijiet bejn l-UE u l-Afrika u l-ftehim Addis Ababa ta' Ġunju 2010; jinsisti li din is-sħubija għandha tkun ibbażata fuq l-interessi reċiproki, jinnota li sabiex jitrawmu prattiki ta' tħaffir tal-minjieri sostenibbli, huwa importanti li jkun hemm skambju tal-aħjar prattiki dwar governanza tajba, aktar effiċjenza tar-riżorsi, użu mill-ġdid u riċiklaġġ, ġestjoni tar-residwi u tal-iskart tal-ġebel, riabilitazzjoni tas-siti tal-minjieri, saħħa u sikurezza, protezzjoni tal-ħaddiema u eliminazzjoni tax-xogħol tat-tfal; jirrimarka li l-Unjoni Afrikana ddikjarat fil-African Mining Vision (Viżjoni Afrikana fuq it-Tħaffir tal-Minjieri) li l-pajjiżi Afrikani għandhom ma jistgħux jibbenefikaw s'issa mill-vantaġġ kompetittiv tagħhom fir-riżorsi naturali, u għalhekk għandhom jitqiesu miżuri sabiex jiġi żgurat li l-ġid tar-riżorsi naturali tgawdi minnu l-popolazzjoni tal-pajjiżi għonja fir-riżorsi;

56.

Jiddeskrivi l-importanza tal-kooperazzjoni bilaterali dwar il-materja prima, kif muri mill-UE u l-Unjoni Afrikana f'Ġunju 2010, u jħeġġeġ sforzi ulterjuri fil-kuntest tal-Pjan ta' Azzjoni Konġunt bejn l-Afrika u l-UE għall-2011-2013; jitlob l-iżvilupp ta' kooperazzjoni simili ma' pajjiżi oħrajn li huma produtturi ewlenin ta' materja prima kritika; jipproponi, bħala waħda mill-miri reali tad-diplomazija dwar il-materja prima, id-diversifikazzjoni tar-riżorsi mill-Asja tax-Xlokk lejn l-Amerika Latina u l-Afrika, ta' ċerta materja prima li l-UE tiddependi fuq l-importazzjoni tagħha;

57.

Jilqa’ l-approċċ ta’ dan il-Pjan ta’ Azzjoni li jipprovdi taħriġ fl-aħjar prattiki biex jiġu negozjati kuntratti dwar il-minerali u jrawwem il-kooperazzjoni xjentifika fis-settur tal-minjieri, flimkien mal-promozzjoni ta’ governanza tajba, inkluża t-trasparenza;

58.

Jiddispjaċih li l-Komunikazzjoni tonqos mill-issemmi reġjuni jew pajjiżi oħra; jemmen li għandhom jiġu esplorati sorsi alternattivi ta' materja prima sabiex tiġi evitata d-dipendenza Ewropea fuq numru limitat ta' pajjiżi; jistieden lill-Kummissjoni tinkoraġġixxi sħubiji vantaġġjużi reċiprokament ma' pajjiżi u reġjuni għonja fir-riżorsi; jemmen li l-UE għandha toffri sħubiji forma ta' trijangolu tal-infrastruttura, ta' tpartit tal-għarfien u tar-riżorsi"; jitlob lill-UE biex tappoġġa l-pajjiżi li qed jiżviluppaw li huma għonja fir-riżorsi fl-iżvilupp tal-għarfien ġeoloġiku, tat-tħaffir tal-minjieri u tal-ipproċessar tal-minerali tagħhom, kif ukoll fi kwistjonijiet xjentifiċi u legali, sabiex jiġi stabbilit il-bini sostenibbli tal-kapaċità; jipproponi f'dan il-kuntest it-twaqqif ta' sedji ffinanzjati b’mod konġunt f'fakultajiet ġeoloġiċi; jistieden lill-Kummissjoni timmoniterja mill-qrib il-ftehimiet internazzjonali konklużi minn pajjiżi għonja fir-riżorsi ma' Stati Membri li mhumiex fl-UE, li jipprevedu aċċess esklussiv għal riżorsi u sabiex jiġi garantit aċċess ġust għar-riżorsi u l-funzjonament xieraq tal-liġijiet kummerċjali internazzjonali;

59.

Huwa mħasseb li ma ġietx identifikata strateġija għad-djalogu u l-kooperazzjoni maċ-Ċina u atturi internazzjonali prinċipali oħra; jenfasizza l-ħtieġa ta' kummerċ u djalogu dwar it-teknoloġija maċ-Ċina; jistieden lill-Kummissjoni teżamina kif jistgħu jinbdew proġetti pilota maċ-Ċina fuq it-tħaffir sostenibbli tal-minjieri u l-ipproċessar tal-minerali, is-sostituzzjoni, l-effiċjenza tar-riżorsi jew ir-riċiklaġġ ta' materja prima kritika, għall-benefiċċju reċiproku; jappoġġa bis-sħiħ ukoll djalogi bilaterali simili dwar kwistjonijiet li jirrigwardaw materja prima ma' fornituri prinċipali oħra, bħal BRICS, peress li huma għandhom u jużaw ammont kbir ta' materja prima; jistieden lill-Kummissjoni tittratta bl-istess mod il-kwistjoni tal-materja prima fil-Politika Ewropea tal-Viċinat tagħha;

60.

Iqis li l-istrateġija għall-materja prima tal-UE għandha tirrifletti d-differenzi bejn l-ekonomiji żviluppati u emerġenti kbar, minn naħa, u l-pajjiżi l-anqas żviluppati min-naħa l-oħra;

61.

Jenfasizza li l-kwestjoni tal-aċċess għall-materja prima għandha tiġi integrata b'suċċess fil-miżuri tal-politika għall-prevenzjoni tal-kunflitti u għall-promozzjoni tal-paċi, peress li numru sostanzjali ta' kunflitti reġgħu tfaċċaw f'ċerti reġjuni;

62.

Jaqbel li politika tal-iżvilupp għandha rwol biex tgħin pajjiżi jdawru l-għana tar-riżorsi tagħhom fi żvilupp sostenibbli u inklussiv, fost l-oħrajn billi jtejbu l-governanza u t-trasparenza; jissottolinja l-fatt li l-politika tal-iżvilupp, inkluż l-SPĠ, mhijiex għodda ta' diplomazija tal-materja prima, iżda jemmen li jista' jkollha rwol importanti ta' appoġġ fil-politika Ewropea tal-materja prima; għalhekk jitlob lill-Kummissjoni biex tiżgura li jkun hemm koerenza bejn it-tnejn; jilqa' l-inklużjoni ta' garanziji konkreti dwar l-aċċess għas-swieq għall-materja prima fil-ftehimiet kummerċjali fl-UE u bħala prerekwiżit għal sħubija fid-WTO; iżda jaqbel li l-ftehimiet kummerċjali għandhom jipprovdu l-flessibbiltà neċessarja biex jgħinu lill-pajjiżi li qed jiżviluppaw biex joħolqu rabtiet bejn l-industrija estrattiva u dik lokali; jemmen li s-sovranità tal-pajjiżi rigward ir-riżorsi għandha tkun irrispettata, u jitlob lill-Kummissjoni, f'dan il-kuntest, tikkumpensa l-oppożizzjoni għat-taxxi fuq l-esportazzjoni billi tuża approċċ differenzjat li jqis il-kuntesti nazzjonali varji sabiex l-għanijiet ta' żvilupp u l-industrijalizzazzjoni ta' pajjiżi li qed jiżviluppaw ma jitqegħdux f'periklu; jenfasizza li l-kummerċ ħieles u ġust huwa ta' importanza għall-iżvilupp tas-settur globali tal-Materja Prima u l-ħolqien tal-ġid fis-soċjetajiet kollha; jinnota li d-dħul mill-Materja Prima jista' jkollu rwol kruċjali fil-ksib tal-Għanijiet ta' Żvilupp tal-Millenju mill-pajjiżi l-anqas żviluppati;

63.

Jinsab imħasseb dwar il-fatt li l-inizjattiva mġedda dwar il-materja prima la tirreferi għall-SPĠ jew għall-SPĠ+ u lanqas tipproponi inċentivi kummerċjali alternattivi għall-promozzjoni tad-drittijiet tal-bniedem, tal-istandards ambjentali, tal-evitar tat-tħaddim tat-tfal u tas-sostenn għal riformi interni għall-pajjiżi li ma jidħlux fl-ambitu ta’ dawn l-iskemi; jitlob lill-Kummissjoni ssostni u tħeġġeġ inizjattivi ta’ diversifikazzjoni fl-ekonomiji tal-pajjiżi li qegħdin jiżviluppaw, li jiddependu ħafna minn materja prima partikolari;

64.

Jitlob lill-Kummissjoni tgħin pajjiżi li qed jiżviluppaw jegħlbu n-nuqqas ta' simmetrija tal-informazzjoni fin-negozjar tal-materja prima u kuntratti tat-tħaffir tal-minjieri bis-saħħa tal-bini ta' kapaċità, u biex tgħin fin-negozjar tat-trasferiment tat-teknoloġija, kemm fil-livell nazzjonali kif ukoll qalb il-komunitajiet lokali;

65.

Jenfasizza r-rwol li r-responabbiltà soċjali u korporattiva taqdi billi timxi skont standards għoljin u ta' barra mill-pajjiż u li huma ambjentali, soċjali u tal-ħaddiema, u bl-applikazzjoni tagħha tal-aqwa teknoloġiji disponibbli; jemmen li dawn għandhom jiġu promossi permezz ta' fora relevanti bħall-G8, il-G20, id-WTO, l-OECD, il-UNCTAD, il-UNEP u l-Bord Internazzjonali għall-Ġestjoni Sostenibbli tar-Riżorsi tagħha, il-gruppi ta' studju internazzjonali dwar il-metalli, u korpi oħrajn; ifaħħar f'dan il-kuntest il-kontribut pożittiv permezz tal-Patt Globali tan-NU (UN's Global Compact); jistieden lill-kumpanniji tal-UE jiżviluppaw kodiċi xierqa dwar il-kondotta għal dawk li jaħdmu f'pajjiżi terzi, u jibbażaw l-attività tagħhom fuq il-linji gwida tal-OECD għall-impriżi multinazzjonali u l-ISO 26000; jistieden lill-Kummissjoni tieħu miżuri li jiżguraw il-konformità mal-istandards soċjali, ambjentali u tax-xogħol mill-kumpanniji Ewropej li qed iwettqu attività ta' tħaffir ta' minjieri f'pajjiżi terzi; jistieden lill-Kummissjoni tressaq proposta tagħha dwar rappurtar għal kull pajjiż fir-rigward ta' minerali ta' konflitt u biex tistabilixxi rekwiżiti li huma legalment mandatorji għal impriżi tal-estrazzjoni biex jippublikaw il-ħlas fiskali tagħhom għal kull proġett u għal kull pajjiż li jinvestu fih, skont l-eżempju tal-Liġi Dodd-Frank tal-Istati Uniti; jappoġġja l-Inizjattiva għat-Trasparenza tal-Industriji Estrattivi (EITI) u n-netwerk globali "Ippubblika Dak Li Tħallas" (PWYP); jemmen li dawn l-istandards għandhom ikunu applikati partikolarment għal proġetti li jirċievu l-fondi tal-UE, pereżempju mill-BEI; iħeġġeġ lill-UE tinvestiga kif l-importazzjoni ta' minerali kkumerċjalizzati jew estratti illegalment tista' tiġi evitata; jitlob lill-Kummissjoni tinvestiga jekk tistax tintuża t-teknoloġija "tal-marki tas-swaba'" f'dan il-kuntest u tippromwovi proġetti pilota bbażati fuq l-esperjenzi "tal-marki tas-swaba' coltan"; jistieden lill-BEI jwettaq analiżi regolari tal-impatti mistennija tas-self tiegħu lill-industrija estrattiva;

66.

Jesprimi t-tħassib serju tiegħu fir-rigward tal-każijiet numerużi u dokumentati tajjeb, fejn kumpaniji Ewropej jiksru standards ambjentali, standards tax-xogħol u drittijiet tal-bniedem;

67.

Itenni li inizjattivi ta' trasparenza fis-settur tal-industrija ta' estrazzjoni huma fil-fatt favur in-negozju, li jistgħu joħolqu sigurtà legali u sħubiji sostenibbli fit-tul u jistgħu jaġixxu bħala salvagwardji kontra l-ftuħ mill-ġdid tan-negozjati jew l-espulsjoni; jinnota li hemm sfidi x’jiġu indirizzati u li ċerti kuntratti jeħtieġu kunfidenzjalità, iżda madankollu għandhom ikunu sottoposti għal skrutinju pubbliku; jinnota li l-Ghanaian Petroleum Revenue Management Bill huwa eżempju tajjeb biex minn banda tinżamm ċerta kunfidenzjalità filwaqt li mill-banda l-oħra, jiġi ssalvagwardat l-iskrutinju parlamentari;

68.

Jikkunsidra li l-kumpanniji tal-UE għandhom ikunu legalment responsabbli fil-pajjiżi tagħhom stess għal kwalunkwe ksur tad-drittijiet tal-bniedem, l-istandards ambjentali jew l-istandards bażiċi tax-xogħol tal-ILO minn sussidjarji tagħhom barra l-pajjiż u minn entitajiet li jikkontrollaw;

69.

Jitlob lill-BEI u lill-Kummissjoni jikkunsidraw b'mod aktar rigoruż jekk il-proġetti jikkontribwixxux għall-qerda tal-faqar, għall-iżviluppp sostenibbli u għat-tkabbir inklussiv, qabel ma jiddeċiedu dwar sostenn min-naħa tagħhom għall-industriji estrattivi fil-pajjiżi li qegħdin jiżviluppaw;

70.

Hu mħasseb dwar il-persistenza tal-kummerċ fil-minerali, u l-użu tagħhom, li jkun ġej minn żoni ta’ kunflitt, li l-produzzjoni tagħhom twassal għal vjolenza inaċċettabbli u attivitajiet illegali; jistieden lill-Kummissjoni, lill-EEAS, lill-Kunsill u lill-Istati Membri jqisu din is-sitwazzjoni fil-kuntest tar-relazzjonijiet tagħhom ma' pajjiżi terzi; jitlob lill-Kummissjoni u lill-pajjiżi fornituri strateġiċi tal-UE jiżviluppaw b'mod konġunt sistemi effikaċi għall-intraċċar tal-materja prima mill-importazzjoni sar-riċiklaġġ jew rimi, u jintroduċu skema ta' ċertifikazzjoni reċiproka għall-materja prima u l-katini tal-kummerċ tagħhom (Certified Trading Chains), sabiex jiggarantixxu kummerċ ġust, u, b'mod partikulari sabiex jevitaw l-abbużi fir-rigward ta' kummerċ ta' materja prima minn reġjuni fi kriżi; jitlob lill-Kummissjoni tikkoopera mal-istituzzjonijiet internazzjonali rilevanti (in-NU, l-OECD, l-ILO) bil-għan li tidentifika u tistinka biex tarmonizza l-aħjar prattiki ta’ ċertifikazzjoni;

71.

Jenfasizza li s-swieq finanzjarji jista’ jkollhom rwol importanti bħala kopertura kontra r-riskju kemm tal-produtturi kif ukoll tal-konsumaturi tal-materja prima u l-komoditajiet; jistieden lill-Kummissjoni tieħu l-miżuri meħtieġa biex tiżgura t-trasparenza fis-swieq tal-komoditajiet u taġixxi b’mod deċiżiv kontra l-ispekulazzjoni mhux ġustifikata tal-kommoditajiet, li twassal għall-abbuż fis-suq tal-kommoditajiet; jekk jitqies neċessarju fuq il-bażi ta' analiżi empirika profonda; jinnota li dan jinkludi inizjattivi xierqa fil-kuntest tan-negozjati tal-G8 u l-G20;

72.

Hu mħasseb dwar l-impatt tas-swieq tad-derivati fuq ix-xejriet tal-prezzijiet għall-materja prima; iqis li għandu jkun hemm iktar kontrolli effikaċi fuq is-swieq tad-derivati barra l-Borża; f'dan il-kuntest, jappoġġa miżuri bħaż-żieda fit-trasparenza tad-derivati barra l-Borża taħt is-sorveljanza tal-AETS; iqis li tali miżuri jistgħu jwasslu għal iktar sigurtà għall-investituri u l-SMEs u jippermettu lill-produtturi Ewropej jippjanaw b’iktar ċertezza;

73.

Jilqa' l-ħidma fuq il-materja prima u s-sostenibilità fl-OECD, il-G8 u l-G20 u jenfasizza l-ħtieġa ulterjuri ta' djalogu G20 dwar il-materja prima sabiex tiġi żviluppata perspettiva komuni; jilqa' wkoll il-volontà ta' membri tal-G8 u tal-G20 li jiġġieldu kontra l-volatilità tal-prezz tal-materja prima u jistieden għall-iżvilupp ta' miżuri konkreti sabiex tiġi mrażżna l-ispekulazzjoni dwar dawk il-prodotti; jistieden lill-Kummissjoni tippromwovi x-xogħol tal-OECD dwar l-impatt tar-restrizzjonijiet fuq l-esportazzjoni u dwar l-użu tagħhom bħala strument ta' politika; jappoġġja l-inklużjoni f'dawn id-diskussjonijiet ta' membri li mhumiex fl-OECD; jitlob li tinħoloq strateġija ta' kooperazzjoni bejn l-UE, l-Istati Uniti u l-Ġappun fuq il-materja prima kritika lejn "sorveljanza dinjija tal-materja prima" billi jaqsmu bejniethom id-data dwar it-talba u l-forniment, it-tbassir komuni, jinkoraġixxu l-iskambju tal-aqwa prattika, in-know-how teknoloġiku u l-privattivi, l-analiżi ta' katni tad-distribuzzjoni, bl-istħarriġ tal-possibbilità għal ħżin strateġiku u konġunt, u t-twaqqif ta' proġetti konġunti tal-R & D; hu tal-opinjoni li tali kwistjonijiet għandhom jagħmlu parti mill-aġenda tas-Sammits li jmiss bejn l-UE u l-Istati Uniti; jistieden lill-Kummissjoni tippromwovi diplomazija Track-II dwar il-materja prima billi jiġi appoġġjat l-iskambju ta’ organizzazzjonijiet, l-akkademja u gruppi ta’ riflessjoni nongovernattivi mill-UE u minn pajjiżi oħra b’riżorsi rilevanti; jistieden lill-Kummissjoni torganizza avvenimenti regolari, bħall-‘Metal Saloons’ tal-JOGMEC, dwar il-materja prima mal-pajjiżi b'riżorsi rilevanti; jitlob ukoll lill-Kummissjoni tistħarreġ il-fattibililtà ta' inizjattiva ta' statistika internazzjonali fuq il-materja prima kritika bbażata fuq l-eżempju tal-Inizjattiva dwar id-Dejta tal-Organizzazzjonijiet Konġunti (JODI), kif ukoll jekk ftehim internazzjonali għall-metalli jkunx strument utli; jitlob lill-Aġenzija Ewropea għad-Difiża tikkontribwixxi, bi qbil mal-Artikolu 42(3) tat-TUE, għall-identifikazzjoni ta' miżuri għat-tisħiħ tal-bażi industrijali u teknoloġika tas-settur tad-difiża fir-rigward tal-materja prima;

74.

Isostni l-analiżi pprovduta mill-Kummissjoni fir-rigward tal-prodotti agrikoli fil-kuntest tas-sigurtà tal-ikel globali, fejn ir-riżervi tal-ikel globali qegħdin jiċkienu u n-numru ta' nies li qegħdin isofru l-ġuħ qed jiżdied, u f’dak li jirrigwarda l-perspettivi tas-suq, jenfasizza l-volatilità estrema tal-prezzijiet tal-ikel u tal-għalf, l-imperfezzjonijiet tal-katini tal-ikel u tal-għalf u r-rwol tal-istrumenti finanzjarji u l-imġiba spekulattiva bħala kaġun possibbli tal-instabbiltà, li għandu jiġi kkunsidrat bis-serjetà; ifakkar li erba’ Stati Membri tal-UE huma attwalment fost dawk il-pajjiżi fid-dinja l-aktar vulnerabbli għal-prezzijiet tal-ikel li qed jogħlew;

75.

Jitlob li tingħata attenzjoni bir-reqqa lill-inċertezza fundamentali li hemm madwar iż-żieda fl-interazzjoni bejn iċ-ċaqliq fil-prezzijiet tal-kommoditajiet tal-enerġija u dawk li mhumiex tal-enerġija, speċjalment l-ikel;

76.

Jinsisti, bi qbil mal-Kummissjoni, li l-komunità internazzjonali għandha tadotta approċċ koordinat fuq medda twila ta’ żmien għas-sikurezza tal-ikel, li jinkludi aktar sforzi ta’ riċerka u investiment fis-settur tal-agrikoltura fil-pajjiżi li qegħdin jiżviluppaw, partikolarment permezz ta’ politiki prijoritarji sabiex jiżdiedu l-flessibilità u l-adattibilità għal xokkijiet rigward ikel;

77.

Jappoġġa l-isforzi riċenti tal-G20 dwar reazzjonijiet politiċi fil-konfront tal-volatilità tal-prezzijiet fis-swieq tal-ikel u tal-agrikoltura, inkluż permezz ta' aktar skambju tal-informazzjoni fil-previżjonijiet tal-produzzjoni tal-ikel u jenfasizza l-ħtieġa għal aktar trasparenza u informazzjoni f'waqtha fuq riżervi u stokkijiet tal-prodotti tal-ikel;

78.

Jilqa' l-Komunikazzjoni Konġunta tat-Tielet Summit ta' Berlin tal-Ministri tal-Agrikoltura tat-22 ta' Jannar 2011, iffirmata minn 48 pajjiż, li talbet b'mod partikolari għal titjib fil-kapaċità tas-swieq agrikoli biex jiffunzjonaw sew u li rrikonoxxiet l-importanza tal-kummerċ biex jinħoloq bilanċ bejn l-atturi differenti fis-swieq agrikoli u jittejjeb l-aċċess tal-bdiewa għall-materja prima u l-enerġija;

79.

Jitlob rapport mill-Kummissjoni dwar ir-regolamentazzjoni tad-derivati finanzjarji u l-kommoditajiet u dwar jekk hemmx bżonn regolamentazzjoni separata għall-kommoditajiet agrikoli fid-dawl tal-ispeċifiċitajiet tas-settur; jappoġġa l-proposta riċenti tal-Kummissjoni dwar ir-regolametazzjoni tad-derivati OTC u tal-konsultazzjoni pubblika dwar id-Direttiva MiFiD; jemmen li l-imġiba spekulattiva abbużiva u l-prattika ħażina u l-abbuż fis-swieq tad-derivati għandhom jiġu indirizzati b'urġenza;

80.

Jitlob lill-Kummissjoni tipproponi miżuri konkreti biex tiżgura s-sigurtà tal-ikel, tindirizza l-instabbiltà tas-suq u, b’responsabbiltà sostenibbli ġenerali, issaħħaħ b'urġenza l-operabbiltà tas-swieq tad-derivati għall-kommoditajiet agrikoli;

81.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Istati Membri.

22.2.2013   

MT

Il-Ġurnal Uffiċjali tal-Unjoni Ewropea

CE 51/37

—

wara li kkunsidra t-Trattat dwar il-Funzjonament tal-Unjoni Ewropea (TFUE) u r-riżoluzzjoni tiegħu tas-7 ta' Mejju 2009 dwar l-irwol u r-responsabilitajiet ġodda tal-Parlament fl-implimentazzjoni tat-Trattat ta' Lisbona (1),

—

wara li kkunsidra r-riżoluzzjoni tiegħu tal-20 ta' Jannar 2011 dwar strateġija tal-UE għall-Baħar l-Iswed (2),

—

wara li kkunsidra r-riżoluzzjoni tiegħu tal-25 ta' Frar 2010 dwar il-Green Paper dwar ir-riforma tal-politika komuni tas-sajd (3),

—

wara li kkunsidra r-riżoluzzjoni tiegħu tal-21 ta' Ottubru 2010 intitolata "Il-politika marittima integrata – evalwazzjoni tal-progress li sar u sfidi ġodda" (4),

—

wara li kkunsidra r-Regolament tal-Kunsill (UE) Nru 1256/2010 tas-17 ta' Diċembru 2010 li jistabbilixxi l-opportunitajiet tas-sajd għal ċerti stokkijiet tal-ħut applikabbli fil-Baħar l-Iswed għall-2011 (5),

—

wara li kkunsidra d-Direttiva tal-Kunsill 92/43/KEE tal-21 ta' Mejju 1992 dwar il-konservazzjoni tal-habitat naturali u tal-fawna u tal-flora selvaġġa (6),

—

wara li kkunsidra d-Direttiva 2008/56/KE tal-Parlament Ewropew u tal-Kunsill tas-17 ta' Ġunju 2008 li tistabbilixxi Qafas għal Azzjoni Komunitarja fil-qasam tal-Politika tal-Ambjent Marin (Direttiva Kwadru dwar l-Istrateġija Marina) (7),

—

wara li kkunsidra l-Komunikazzjoni mill-Kummissjoni intitolata "Politika Marittima Integrata għall-UE" (COM(2007)0575),

—

wara li kkunsidra l-Konvenzjoni tal-1992 dwar il-protezzjoni tal-Baħar l-Iswed mit-tniġġis (Il-Konvenzjoni ta' Bukarest) u l-protokolli tagħha,

—

wara li kkunsidra d-Dikjarazzjoni Ministerjali tal-1993 dwar il-protezzjoni tal-Baħar l-Iswed (Id-Dikjarazzjoni ta' Odessa),

—

wara li kkunsidra l-analiżi dijanjostika transkonfinali tal-Baħar l-Iswed tal-2007 (8),

—

wara li kkunsidra r-rapport tal-Kummissjoni tal-2008 dwar l-istat tal-ambjent tal-Baħar l-Iswed rigward il-Protezzjoni tal-Baħar l-Iswed mit-Tniġġis,

—

wara li kkunsidra l-pjan ta' azzjoni strateġiku tal-Kummissjoni tal-2009 għall-protezzjoni ambjentali u r-riabilitazzjoni tal-Baħar l-Iswed rigward il-Protezzjoni tal-Baħar l-Iswed mit-Tniġġis,

—

wara li kkunsidra l-Konvenzjonijiet tan-Nazzjonijiet Uniti tal-1982 dwar il-liġi tal-baħar,

—

wara li kkunsidra l-Ftehim tan-Nazzjonijiet Uniti għall-implimentazzjoni tad-dispożizzjonijiet tal-Konvenzjoni tal-10 ta' Diċembru 1982 dwar il-konservazzjoni u l-immaniġġjar ta' stokkijiet ta' ħut transżonali u stokkijiet ta' ħut li jpassi ħafna,

—

wara li kkunsidra l-Ftehim dwar l-implimentazzjoni tal-Parti XI tal-Konvenzjoni dwar il-liġi tal-baħar,

—

wara li kkunsidra l-Kodiċi ta' Kondotta tal-FAO tal-1995 għal sajd responsabbli,

—

wara li kkunsidra l-Konvenzjoni tan-Nazzjonijiet Uniti tal-1992 dwar id-diversità bijoloġika,

—

wara li kkunsidra l-Konvenzjoni tan-Nazzjonijiet Uniti dwar il-kummerċ internazzjonali ta' speċijiet fil-periklu,

—

wara li kkunsidra l-Konvenzjoni tan-Nazzjonijiet Uniti dwar l-artijiet mistagħdra ta' importanza internazzjonali partikolarment bħala ħabitats tal-għasafar tal-ilma (Il-Konvenzjoni ta' Ramsar),

—

wara li kkunsidra l-Konvenzjoni tal-1979 dwar il-konservazzjoni tal-ispeċijiet migratorji tal-annimali selvaġġi (Il-Konvenzjoni ta' Bonn),

—

wara li kkunsidra l-Ftehim dwar il-konservazzjoni taċ-ċetaċji tal-Baħar l-Iswed, tal-Baħar Mediterran u taż-żona Atlantika kontigwa (ACCOBAMS),

—

wara li kkunsidra l-Ftehim tan-Nazzjonijiet Uniti tal-1995 dwar l-istokkijiet tal-ħut,

—

wara li kkunsidra r-rapport tal-2008 intitolat "It-tisħiħ tal-kooperazzjoni fil-Baħar l-Iswed" tat-tnejn u tletin sessjoni tal-Kummissjoni Ġenerali għas-Sajd fil-Mediterran (GFCM),

—

wara li kkunsidra l-istudju reġjonali tal-2009 tal-GFCM dwar tonn żgħir fil-Mediterran, inkluż il-Baħar l-Iswed,

—

wara li kkunsidra l-Organizzazzjoni tal-Kooperazzjoni Ekonomika tal-Baħar l-Iswed,

—

wara li kkunsidra d-Dikjarazzjoni konġunta tas-Summit tas-Sħubija tal-Lvant li sar fi Praga fis-7 ta' Mejju 2009 (Id-Dikjarazzjoni ta' Praga),

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għas-Sajd (A7-0236/2011),

A.

billi d-dibattitu dwar ir-riforma tal-Politika Komuni tas-Sajd (PKS) fl-UE għadu għaddej, u billi għandu jqis l-ispeċifiċitajiet u l-ħtiġijiet ta' dan il-baħar, għaliex din se tkun l-ewwel riforma tal-PKS li tinkorpora l-Baħar l-Iswed,

B.

billi sal-lum kien hemm ftit wisq kollaborazzjoni u kooperazzjoni, jekk mhux saħansitra ineżistenti, nuqqas ta' qafas leġiżlattiv konkret u armonizzat u nuqqas ta' att leġiżlattiv komuni li jirregola l-attivitajiet tas-sajd bejn l-istati tal-Baħar l-Iswed, minħabba l-fatt li l-ilmijiet kollha jaqgħu taħt il-ġurisdizzjoni ta' stati kostali differenti, kif ukoll minħabba n-nuqqas ġenerali ta' riċerka xierqa u sistematika u ta' informazzjoni xjentifika dwar il-baċin tal-Baħar l-Iswed,

C.

billi l-ġestjoni tas-sajd fil-Baħar l-Iswed hija diffiċli ferm, għaliex tnejn biss mis-sitt pajjiżi madwar il-baċin huma Stati Membri tal-UE, u anke dawk it-tnejn huma Stati Membri ġodda li ilhom biss membri tal-UE mill-2007,

D.

billi l-ħolqien ta' mekkaniżmu ta' politika komuni għas-sitt pajjiżi madwar il-Baħar l-Iswed għandu jkun eżaminat minn perspettiva fit-tul biex, fost affarijiet oħra, jiġi ggarantit il-ħarsien tal-ambjent u jiġi ffaċilitat l-iżvilupp ekonomiku u soċjali taż-żoni littorali,

E.

billi dan il-mekkaniżmu ġdid ta' politika komuni għall-Baħar l-Iswed għandu jkollu l-għan li jħares u jtejjeb il-bijodiversità u l-prosperità tan-nies li jaħdmu fis-settur tas-sajd fl-inħawi, li huma wħud mill-prijoritajiet tal-Unjoni Ewropea,

F.

billi l-Baħar l-Iswed għandu jieħu postu kif xieraq fost iż-żoni tal-baħar ewlenin tal-Ewropa, ladarba huwa l-aktar żagħżugħ u l-aktar dinamiku tal-ibħra semi-magħluqa,

G.

billi l-Baħar l-Iswed għandu jieħu postu fil-PKS riformata u fil-Politika Marittima Integrata, u billi l-ħtiġijiet tas-sajjieda, u tal-industriji tas-sajd, tal-produzzjoni u tal-ipproċessar, għandhom jitqiesu b'mod xieraq fil-qafas finanzjarju ġdid tal-Fond Ewropew għas-Sajd wara l-2013,

H.

billi r-rapport attwali jista' jitqies mhux biss bħala linja gwida għar-riforma tal-PKS, iżda jista' jsir ukoll parti minn politika futura tal-UE dwar il-kollaborazzjoni mas-sħab tagħha tal-Lvant biex jiġi mmassimizzat l-użu tal-Komunikazzjoni eżistenti tal-Kummissjoni dwar Sinerġija tal-Baħar l-Iswed (COM(2007)0160) sabiex tiġi intensifikata l-kooperazzjoni fir-reġjun tal-Baħar l-Iswed, li fiha s-sajd u l-iżvilupp tad-diversi setturi għandhom rwol sinifikanti,

I.

billi l-ġestjoni tas-sajd fir-reġjun tal-Baħar l-Iswed tibbenefika b'mod sinifikanti minn kooperazzjoni xjentifika aktar ikkoordinata bejn l-istati littorali, kif ukoll minn politika koerenti għall-ħarsien u t-titjib tal-istat tal-istokkijiet tal-ħut f'livell Ewropew,

J.

billi ħafna mill-ekosistemi tal-baħar inġenerali, u l-ekosistema tal-Baħar l-Iswed b'mod partikolari, huma milquta serjament minn bidliet dinamiċi marbuta mas-sajd, mat-tibdil fil-klima u t-tniġġis,

K.

billi l-popolazzjoni tal-'veined rapa whelk' (Rapana venosa) għandha impatt negattiv fuq il-Baħar l-Iswed, u hija theddida għall-bilanċ ekoloġiku tiegħu, billi teqred il-filtri naturali tal-ilma bħall-masklu l-blu (Mythilus galloprovincialis) u l-'istriped white venus' (Chamelea gallina),

L.

billi l-biċċa l-kbira tal-bastimenti tas-sajd użati fil-Baħar l-Iswed minn sajjieda tal-UE huma anqas minn 12-il metru twal, u għalhekk għandhom impatt limitat fuq l-ambjent tal-Baħar l-Iswed, madankollu, għandhom jirrispettaw l-isforzi li qed isiru biex jinkiseb sajd sostenibbli u jassumu r-responsabbiltajiet tagħhom f'dan ir-rigward,

M.

billi s-sajd illegali, mhux rappurtat u mhux regolat fil-Baħar l-Iswed għandu jiġi ttrattat minnufih,

N.

billi n-nuqqas ta' ftehim komuni bejn is-sitt pajjiżi madwar il-Baħar l-Iswed jista' jiġi rimedjat bi ftehim qafas innegozjat, pereżempju, abbażi ta' komunikazzjoni mill-Kummissjoni, li fiha jiġu mfissra u kkunsidrati l-interessi tal-partijiet kollha,

O.

billi parti kbira mill-problemi tal-Baħar l-Iswed hija r-riżultat tan-nuqqas ta' struttura istituzzjonali xierqa li tikkoordina u twettaq il-ġestjoni tas-sajd fil-Baħar l-Iswed f'livell professjonali u speċjalizzat; billi ilhom għaddejjin negozjati bejn l-amministrazzjonijiet nazzjonali involuti fl-implimentazzjoni tal-politika tas-sajd għal dawn l-aħħar għaxar snin dwar il-ħolqien ta' tali struttura istituzzjonali, kif ukoll dwar il-forma u r-responsabbiltajiet tagħha, u billi dawn in-negozjati għadhom ma rnexxewx; billi, għal din ir-raġuni, ma ttiħdux miżuri xierqa biex jiġu kkontrollati l-qabdiet u, b'mod partikolari, is-sajd transkonfinali,

P.

billi, il-Kummissjoni Ġenerali għas-Sajd fil-Mediterran (GFCM), li l-mandat tagħha jkopri ż-żona tal-Baħar l-Iswed, s’issa ma tissodisfax daqs kemm huwa possibbli l-ħtiġijiet u l-aspettattivi tal-partijiet interessati, partikolarment tas-sajjieda, u għandha tagħmel użu mill-għodod kollha disponibbli f’dan il-qasam,

Q.

billi l-Baħar l-Iswed huwa differenti ħafna mill-Mediterran fir-rigward tal-istokkijiet ta' ħut, il-livelli ta' tniġġis, il-varjetà tal-ispeċijiet, l-ispeċijiet dominanti, il-bijomassa komuni u l-produttività tiegħu,

R.

billi f'Jannar 2011 il-Parlament Ewropew adotta rapport dwar Strateġija tal-UE għall-Baħar l-Iswed (9), li jenfasizza wkoll il-ħtieġa tal-applikazzjoni ta' pjanijiet ta' ġestjoni multiannwali għas-sajd, kif ukoll il-ħolqien ta' korp reġjonali indipendenti għall-ġestjoni tas-sajd fil-Baħar l-Iswed,

1.

Jiġbed l-attenzjoni li għandu jitwaqqaf settur tas-sajd vijabbli, stabbli u sostenibbli f'livell Ewropew u li, b'mod aktar speċifiku, il-Baħar l-Iswed jeħtieġ politika speċjali biex tinżamm u tittejjeb is-sitwazzjoni tar-riżorsi tas-sajd u biex jiġi żgurat li s-settur tas-sajd ikun adattat għall-baċin tal-Baħar l-Iswed, filwaqt li jitqiesu l-ispeċifiċitajiet tar-reġjun tal-Baħar l-Iswed, kif ukoll il-fatt li l-politika dwar is-sajd fil-Baħar l-Iswed għandha tkun parti integrali mir-riforma li jmiss tal-PKS;

2.

Jenfasizza l-ħtieġa ta' riċerka xjentifika u analitika iktar eżatta u kkoordinata f'livell reġjonali, nazzjonali u Ewropew biex jitħarsu u jittejbu r-riżorsi u l-ekosistemi tas-sajd fil-baċin tal-Baħar l-Iswed;

3.

Jirrikonoxxi l-isforzi tal-Kummissjoni biex tippromwovi djalogu aktar solidu u strutturat mal-Istati madwar il-Baħar l-Iswed li mhumiex membri tal-UE, u jinkuraġġixxi lill-Kummissjoni biex tintensifika l-isforzi tagħha sakemm jintlaħaq ftehim dwar qafas komuni aktar strutturat li jkopri l-baċin kollu tal-Baħar l-Iswed u li jsegwi approċċ reġjonali għall-ġestjoni tas-sajd fir-reġjun;

4.

Huwa tal-fehma li d-deċiżjonijiet u l-politiki kollha marbuta mal-Baħar l-Iswed għandhom ikunu bbażati fuq dejta xjentifika soda u jitlob il-kollaborazzjoni bejn il-partijiet interessati kollha għal dan il-għan;

5.

Jisħaq fuq il-ħtieġa ta' analiżi xjentifika kontinwa tal-istat tal-istokkijiet tal-ħut u ta' sistema stabbli u fuq perjodu twil ta' żmien ta' osservazzjoni tas-sajd, u jinnota li jeħtieġ li l-Istati littorali kollha tal-Baħar l-Iswed jieħdu sehem f'din l-analiżi;

6.

Jinkuraġġixxi lill-Kummissjoni tuża l-mezzi diplomatiċi u finanzjarji kollha disponibbli biex ikunu jistgħu jinkisbu riżultati konkreti rigward sajd sostenibbli u li jirnexxi, fl-interess tal-UE, filwaqt li jintużaw bl-aħjar mod l-Assemblea Parlamentari Euronest u l-Inizjattiva dwar is-Sħubija tal-Lvant, meta jitqies ir-rwol kruċjali tal-ġirien l-aktar qrib tal-UE;

7.

Jappella għal sistema msaħħa ta' monitoraġġ, kontroll u sorveljanza tal-attivitajiet tas-sajd, li tikkontribwixxi għal esplojtazzjoni fit-tul u sostenibbli tal-istokkijiet tal-ħut u għall-ġlieda kontra s-sajd illegali, mhux rappurtat u mhux regolat b’mod aktar effikaċi;

8.

Jappoġġja r-rwol internazzjonali tal-operazzjonijiet tal-Aġenzija Komunitarja għall-Kontroll tas-Sajd u jappella sabiex ikun hemm kontribut aktar attiv u kooperazzjoni aktar effikaċi fil-kontroll, l-ispezzjoni u s-sorveljanza taż-żona tal-Baħar l-Iswed;

9.

Huwa tal-fehma li t-tekniki tas-sajd għall-ispeċijiet demersali għandhom jiġu eżaminati bir-reqqa u f'ċertu dettall sabiex jiġu identifikati dawk li ma jagħmlux ħsara jew dawk li jagħmlu l-anqas ħsara lil qiegħ il-baħar; jenfasizza li l-użu xieraq tat-tekniki tas-sajd għall-istokkijiet demersali huwa ta' importanza kbira fil-prevenzjoni ta' popolazzjonijiet eċċessivi ta' ‧veined rapa whelk‧ (Rapana venosa), li jheddu l-filtru naturali li huwa l-masklu l-blu (Mythilus galloprovincialis), l-'istriped venus clam' (Chamelea gallina), kif ukoll il-popolazzjonijiet tal-gajdra ċatta (Ostrea edulis) u ħafna frott tal-baħar ieħor;

10.

Huwa tal-fehma li l-Baħar l-Iswed għandu jkollu status xieraq fil-politiki Komunitarji, u għal dan il-għan għandhom isiru sforzi diplomatiċi u xjentifiċi xierqa u għandhom isiru disponibbli riżorsi finanzjarji xierqa għal sajd sostenibbli fil-baċin; jemmen li r-riżorsi baġitarji tal-UE għandhom ikunu flessibbli, aċċessibbli u trasparenti, biex l-UE tkun tista' tiżgura s-sostenibbiltà tas-sajd fil-Baħar l-Iswed;

11.

Jenfasizza li d-djalogu bejn il-partijiet interessati huwa l-bażi għall-promozzjoni b'suċċess tal-Politika Marittima Integrata fiż-żona tal-Baħar l-Iswed; jinnota li l-Politika Marittima Integrata għandha tiffaċilita wkoll l-istabbiliment ta' rabta bla kunflitti u bla inkwiet bejn is-setturi marittimi, filwaqt li jitqies l-iżvilupp sostenibbli taż-żoni kostali;

12.

Jenfasizza r-rwol importanti tal-kooperazzjoni bilaterali u tal-ftehimiet internazzjonali, billi l-biċċa l-kbira tal-istati tal-Baħar l-Iswed mhumiex membri tal-UE u għalhekk mhumiex obbligati jirrispettaw il-liġi Komunitarja;

13.

Jemmen li l-istati kollha tal-Baħar l-Iswed, speċjalment dawk li huma Stati Membri tal-UE jew pajjiżi kandidati, għandhom jirrispettaw il-liġi internazzjonali u tal-UE li tapplika għall-attivitajiet tas-sajd, li l-għan tagħha huwa li tiggarantixxi s-sostenibbiltà mhux biss tal-istokkijiet tal-ħut, iżda anke tas-settur tas-sajd;

14.

Jinkuraġġixxi lill-Kummissjoni tippromwovi aktar l-iżviupp taż-żoni kostali billi jiġi żviluppat sajd sostenibbli, li huwa partikolarment importanti għar-reġjun tal-Baħar l-Iswed, minħabba r-rati għoljin ta' qgħad;

15.

Jesprimi s-sodisfazzjon tiegħu bl-isforzi tal-Kummissjoni biex tistabbilixxi gruppi ta' ħidma fil-qasam tal-ġestjoni tas-sajd mat-Turkija u mal-Federazzjoni Russa, li jipprovdu l-bażi għal aktar dibattitu dwar il-kooperazzjoni; jistieden lill-Kummissjoni żżid l-isforzi tagħha u d-djalogu mal-pajjiżi kollha madwar il-Baħar l-Iswed; jistieden lill-Kummissjoni tagħmel użu sħiħ tal-organizzazzjonijiet eżistenti, kif ukoll tal-għodod rilevanti, sabiex isir progress lejn koordinazzjoni aħjar tal-politiki; huwa tal-fehma, sadattant, li Organizzazzjoni Reġjonali tal-Ġestjoni tas-Sajd (RFMO) indipendenti għall-Baħar l-Iswed tista', fuq perjodu twil ta' żmien, tħeġġeġ u tippromwovi l-komunikazzjoni bejn istituti xjentifiċi u organizzazzjonijiet professjonali tas-sajjieda, tal-produtturi u ta' min jipproċessa bl-għan li jinstabu soluzzjonijiet għat-tilwim u li tissaħħaħ il-kooperazzjoni fil-Baħar l-Iswed; jinkuraġġixxi lill-Kummissjoni taħdem mal-pajjiżi tal-Baħar l-Iswed f'livell bilaterali, filwaqt li tqis li ħafna minnhom mhumiex membri tal-Unjoni Ewropea;

16.

Jenfasizza l-ħtieġa li jiġi eżaminat fuq perjodu twil ta' żmien il-ħolqien ta' RFMO, li tikkoordina r-riċerka xjentifika, tanalizza s-sitwazzjoni tal-istokkijiet tal-ħut u twettaq politiki speċjali rigward l-osservazzjoni tal-ispeċijiet fil-periklu; jinnota li din l-organizzazzjoni tista' wkoll tressaq proposti rigward il-livell tal-pjanijiet ta' ġestjoni multiannawali tas-sajd u tqassam il-kwoti għall-pajjiżi madwar il-Baħar l-Iswed;

17.

Iħeġġeġ lill-UE tuża r-riżorsi diplomatiċi tagħha biex tikkonvinċi lil kemm jista' jkun pajjiżi littorali tal-Baħar l-Iswed li mhumiex membri tal-UE dwar il-valur tal-prinċipji tal-Politika Komuni tas-Sajd tal-UE, speċjalment fir-rigward tal-applikazzjoni tal-pjanijiet ta' ġestjoni multiannwali;

18.

Jemmen li għodda tal-UE għandha tintuża f'attivitajiet xjentifiċi bħala strument li jħeġġeġ u jiffaċilita l-kooperazzjoni u l-ħidma konġunta bejn it-timijiet xjentifiċi Ewropej u l-kontropartijiet tagħhom mill-Ukraina, il-Federazzjoni Russa, il-Ġeorġja u t-Turkija;

19.

Jemmen li l-attivitajiet tal-UE marbuta mas-sajd fil-Baħar l-Iswed, partikolarment il-Politika Marittima Integrata, għandhom jiffukaw l-aktar fuq is-sajd fuq skala żgħira, li huwa kruċjali għar-reġjun u għall-istatus ekonomiku taż-żoni kostali;

20.

Jenfasizza li l-Politika Komuni tas-Sajd tal-UE għandha tinkuraġġixxi l-istabbiliment ta' organizzazzjonijiet tas-sajjieda professjonali u ta' organizzazzjonijiet interprofessjonali fl-industriji tas-sajd u tal-akkwakultura fil-Baħar l-Iswed fejn dawn ma jkunux jeżistu jew ikunu sottożviluppati ferm;

21.

Jemmen li l-prinċipji tal-Qabdiet Totali Permissibbli u l-kwoti annwali applikati attwalment m'għandhomx ikunu l-unika għażla għall-ġestjoni tas-sajd fil-Baħar l-Iswed; jemmen li għandhom jiġu mħeġġa pjanijiet ta' ġestjoni multiannwali li jistgħu jipprovdu aktar ċarezza rigward l-objettivi tal-UE fil-qasam tas-sajd fir-reġjun tal-Baħar l-Iswed u rigward il-viżjoni tagħha għall-futur tal-baċin;

22.

Jenfasizza li għandu jkun hemm approċċ komuni, koordinat u fuq perjodu twil ta' żmien mill-partijiet interessati kollha fir-reġjun bl-għan li l-partijiet kollha fil-Baħar l-Iswed jiksbu sajd sostenibbli, u għaldaqstant jilqa' l-iskambju tal-prassi tajba bejn il-partijiet interessati involuti;

23.

Jenfasizza l-importanza ta' ġestjoni tas-sajd li tippermetti l-vijabbiltà u s-sostenibbiltà tal-ekosistemi, l-iżvilupp tal-attivitajiet tas-sajd legali u l-ġlieda kontra s-sajd illegali, mhux rappurtat u mhux regolat; jitlob li jitwaqqaf Gwardjan tax-xtut Ewropew bl-għan li tiġi żviluppata b’mod effikaċi l-kooperazzjoni bejn l-Istati Membri sabiex tissaħħaħ is-sikurezza marittima u biex jiġu miġġielda t-theddidiet moderni fil-baħar, partikolarment fil-Baħar l-Iswed;

24.

Jemmen li l-pjanijiet ta' ġestjoni multiannwali huma ta' interess kbir ferm kemm għas-sitwazzjoni ekonomika tas-settur tas-sajd kif ukoll għas-sitwazzjoni ambjentali tal-ekosistemi tal-Baħar l-Iswed; jemmen li l-approċċ ta' pjan ta' ġestjoni multiannwali għandu jkun akkumpanjat minn kontroll effikaċi tal-qabdiet;

25.

Jenfasizza l-ħtieġa li titħeġġeġ ir-riċerka xjentifika dwar kwistjonijiet rigward il-Baħar l-Iswed, sabiex id-deċiżjonijiet meħuda mill-awtoritajiet responsabbli Ewropej, reġjonali u nazzjonali jkunu jistgħu jqisu l-konsegwenzi ekonomiċi, soċjali u ambjentali tagħhom; jemmen li jeħtieġ li ssir riċerka dettaljata u koordinata sabiex tingħata tweġiba ċara u bla ekwivoċi għall-mistoqsijiet rigward il-ġestjoni tas-sajd u l-impatt li jista' jkollhom metodi ta' sajd (i.e. is-sajd li jsir bit-tkarkir mal-qiegħ), billi fin-nuqqas ta' studji dwar l-effetti tagħhom ma jistgħux jinsiltu konklużjonijiet serji; huwa tal-fehma li programmi u proġetti ta' riċerka fil-qasam tas-sajd fil-Baħar l-Iswed, bħal SESAME, KNOWSEAS, WISER u BlackSeaFish, għandhom jitħeġġu aktar;

26.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Gvernijiet u l-Parlamenti tal-Istati Membri u lill-Gvernijiet u l-Parlamenti tal-Ukraina, il-Federazzjoni Russa, il-Ġeorġja u t-Turkija.

22.2.2013   

MT

Il-Ġurnal Uffiċjali tal-Unjoni Ewropea

CE 51/43

—

wara li kkunsidra d-Direttiva 94/22/KE tal-Parlament Ewropew u tal-Kunsill tat-30 ta' Mejju, 1994, dwar il-kondizzjonijiet għall-għoti u l-użu ta' awtorizzazzjonijiet għall-prospettar, esplorazzjoni u produzzjoni ta' idrokarburi (1),

—

wara li kkunsidra d-Direttiva tal-Kunsill 92/91/KEE tat-3 ta' November 1992 li tikkonċerna l-ħtiġiet minimi għat-titjib tal-ħarsien tas-sigurtà u tas-saħħa tal-ħaddiema fl-industriji tal-estrazzjoni tal-minerali permezz tat-tħaffir (2),

—

wara li kkunsidra d-Direttiva 2008/1/KE tal-Parlament Ewropew u tal-Kunsill tal-15 ta' Jannar 2008 dwar il-prevenzjoni u l-kontroll integrati tat-tniġġis (id-Direttiva IPPC) (3),

—

wara li kkunsidra d-Direttiva tal-Kunsill 85/337/KEE tas-27 ta' Ġunju 1985 dwar l-istima ta' l-effetti ta' ċerti proġetti pubbliċi u privati fuq l-ambjent (id-Direttiva dwar l-istima tal-Impatt Ambjentali) (4), kif emendata bid-Direttivi 97/11/KE (5), 2003/35/KE (6) u 2009/31/KE (7),

—

wara li kkunsidra d-Direttiva 2004/35/KE tal-Parlament Ewropew u tal-Kunsill tal-21 ta' April 2004 dwar ir-responsabbiltà ambjentali f'dak li għandu x'jaqsam mal-prevenzjoni u r-rimedju għal danni ambjentali (id-Direttiva dwar ir-responsabbiltà ambjentali jew ELD) (8),

—

wara li kkunsidra r-Regolament (KE) Nru 1406/2002 tal-Parlament Ewropew u tal-Kunsill tas-27 ta' Ġunju 2002 li jistabbilixxi l-Aġenziji Marittima Ewropea tas-Sigurtà (9), kif emendat,

—

wara li kkunsidra r-Regolament (KE) Nru 2038/2006 tal-Parlament Ewropew u tal-Kunsill tat-18 ta' Diċembru 2006 dwar finanzjament pluriennali għall-azzjonijiet tal-Aġenzija Ewropea għas-Sigurtà Marittima fil-qasam tar-rispons għal tniġġis ikkaġunat minn bastimenti u li jemenda r-Regolament (KE) Nru 1406/2002 (10),

—

wara li kkunsidra d-Direttiva 2008/56/KE tal-Parlament Ewropew u tal-Kunsill tas-17 ta' Ġunju 2008 li tistabbilixxi Qafas għal Azzjoni Komunitarja fil-qasam tal-Politika tal-Ambjent Marin (Direttiva ta' Qafas dwar l-Istrateġija Marittima) (11),

—

wara li kkunsidra r-riżoluzzjoni tiegħu tas-7 ta' Ottubru 2010 dwar azzjoni tal-UE fil-qasam tat-tfittxija għaż-żejt u l-estrazzjoni taż-żejt fl-Ewropa (12),

—

wara li kkunsidra l-Komunikazzjoni mill-Kummissjoni bit-titolu: "L-isfida tas-sikurezza tal-attivitajiet taż-żejt u l-gass fil-baħar" (COM (2010)0560),

—

wara li kkunsidra l-Artikolu 194 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 11 u l-Artikolu 191 tat-Trattat dwar il-Funzjonament tal-Unjoni Ewropea,

—

wara li kkunsidra l-inċident tad-Deepwater Horizon li wassal għat-telf traġiku ta' ħajjiet u ħsara ambjentali sinifikanti,

—

wara li kkunsidra r-rapport finali tal-Kummissjoni Nazzjonali tal-Istati Uniti dwar it-tixrid ta' żejt ikkawżat mill-pjattaforma Deepwater Horizon tal-BP u t-tħaffir fil-baħar,

—

wara li kkunsidra d-Direttiva tal-Kunsill 92/43/KEE tal-21 ta' Mejju 1992 dwar il-konservazzjoni tal-ħabitats u tal-fawna u l-flora selvaġġa (id-Direttiva dwar il-Ħabitats) (13),

—

wara li kkunsidra l-Artikolu 48 tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Industrija, ir-Riċerka u l-Enerġija u l-opinjonijiet tal-Kumitat għall-Impjiegi u l-Affarijiet Soċjali, tal-Kumitat għall-Ambjent, is-Saħħa Pubblika u s-Sikurezza tal-Ikel u l-Kumitat għall-Affarijiet Legali (A7-0290/2011),

A.

billi l-Artikolu 194 TFUE speċifikament isostni d-dritt ta' Stat Membru li jiddetermina l-kundizzjonijiet għall-isfruttament tar-riżorsi ta' enerġija tiegħu, filwaqt li jkompli jħares is-solidarjetà u l-protezzjoni ambjentali,

B.

billi l-Artikolu 191 TFUE, jistabbilixxi l-fatt li l-politika tal-Unjoni dwar l-ambjent trid timmira għal livell għoli ta' protezzjoni u hi msejsa fuq il-prinċipju ta' prekawzjoni u fuq prinċipji li għandha tittieħed azzjoni preventiva, li l-ħsara lill-ambjent għandha, bħala prijorità, tissewwa f'ras il-għajn u li min iniġġes għandu jħallas,

C.

billi sorsi indiġeni ta' żejt u gass jikkontribwixxu b'mod sinifikattiv għall-bżonnijiet attwali ta' enerġija tal-Ewropa u huma fil-mument kruċjali għas-sigurtà tal-enerġija tagħna u d-diversità enerġetika,

D.

billi l-attività offshore qed tikber f'żoni qrib it-territorju tal-UE, li mhumiex suġġetti għad-dritt tal-UE, iżda fejn kwalunkwe inċident jista' jkollu impatt fuq it-territorju tal-UE u billi ħafna minn dawn iż-żoni huma politikament instabbli;

E.

billi ġa hemm ġabra estensiva ta' liġijiet internazzjonali u ta' konvenzjonijiet internazzjonali li jirregolaw l-ibħra, inklużi dawk Ewropej,

F.

billi l-Konvenzjoni tan-Nazzjonijiet Uniti dwar il-Liġi tal-Baħar (UNCLOS) tistipula l-qafas ġuridiku li fih l-attivitajiet fl-oċeani u l-ibħra għandhom jitwettqu, inkluża d-delimitazzjoni tal-blata kontinentali u ż-żona ekonomika esklussiva (ŻEE);

G.

billi s-sigurtà u l-integrità tal-esplorazzjoni taż-żejt u tal-gass naturali u l-protezzjoni massima għaċ-ċittadini tal-Ewropa u għall-ambjent jeħtieġ li jiġu garantiti,

H.

billi l-effetti ta' inċident jistgħu jkunu transkonfinali fin-natura tagħhom u għaldaqstant jiġġustifikaw l-eżistenza ta' kapaċità ta' rispons mill-UE dwar it-tniġġis ippreparata minn qabel, li tikkunsidra l-inċidenti barra l-ibħra tal-UE,

I.

billi t-tixrid ta' żejt ikkawżat mill-pjattaforma Deepwater Horizon wera l-konsegwenzi potenzjalment devastanti li jista' jkollu fuq l-ambjent u għall-bniedem l-isfruttmanet taż-żejt f'ambjenti estremi, u l-ispejjeż ekonomiċi enormi assoċjati ma' tali impatti ambjentali,

J.

billi wħud mir-rakkomandazzjonijiet tal-Kummissjoni Nazzjonali tal-Istati Uniti dwar it-tixrid ta' żejt ikkawżat mill-pjattaforma Deepwater Horizon tal-BP u t-tħaffir fil-baħar jirriflettu numru ta' prattiki li ilhom prevalenti f'partijiet tal-UE għal 20 sena jew aktar,

K.

billi t-tixrid ta' żejt ikkawżat mill-pjattaforma Deepwater Horizon fil-Golf tal-Messiku għandu jwassal lill-UE biex, b'mod urġenti, u fejn ikun meħtieġ, twettaq rieżami bir-reqqa tal-leġiżlazzjoni u r-regolamentazzjoni tagħha fil-qasam, fir-rigward tal-prinċipju prekawzjonarju u l-prinċipju li għandha tittieħed azzjoni preventiva, dwar l-aspetti kollha tat-tħaffir u tat-tiftix fil-baħar għaż-żejt u għall-gas, inkluż it-trasferiment sikur permezz ta' pajpijiet taħt l-ilma mqiegħda fuq il-qiegħ, jew taħt il-qiegħ, tal-baħar, fit-territorji tagħha; billi f'dan il-kuntest il-Parlament jilqa' r-rieda tal-Kummissjoni li tieħu ħsieb b'mod urġenti l-lakuni fil-leġiżlazzjoni eżistenti tal-UE.

L.

billi d-diżastru fil-Golf tal-Messiku wassal biex l-industrija u l-awtoritajiet kompetenti jistabbilixxu fora, bħall-GIRG (14) u l-OSPRAG (15) biex jitgħallmu mid-diżastru, u billi ħafna minn dawn l-inizjattivi diġà pproduċew riżultati konkreti;

M.

billi l-Kumpaniji Nazzjonali taż-Żejt pproduċew 52 % tal-produzzjoni globali taż-żejt u kkontrollaw 88 % tar-riżervi aċċertati taż-żejt fl-2007 u billi l-importanza tagħhom fir-rigwrd tal-kumpaniji taż-żejt internazzjonali qed tiżdied b'mod straordinarju;

N.

billi l-mekkaniżmi regolatorji differenti tal-Istati Membri jagħmluha iktar diffiċli li tiġi żgurata l-integrità tal-miżuri ta' sikurezza, joħolqu piż finanzjarju żejjed fuq l-impriżi u jfixklu l-funzjonament adegwat u tajjeb tas-suq intern,

O.

billi l-provi jissuġġerixxu li s-separazzjoni tal-proċess ta' ħruġ tal-liċenzji minn dak tal-valutazzjonijiet tas-saħħa u s-sigurtà tista' tevita kwalunkwe kunflitti tal-interess potenzjali, jew konfużjoni tal-objettivi,

P.

billi r-regolaturi nazzjonali għandhom jivvalutaw il-vijabbiltà finanzjarja u l-kapaċità qabel tinħareġ liċenzja u l-kunsens finali għat-tħaffir, filwaqt li jiżguraw li jeżistu biżżejjed fondi, inklużi dawk permezz ta' assigurazzjoni għar-responsabbiltà ċivili u fondi komuni,

Q.

billi diversi fora internazzjonali diġà jeżistu fejn ir-regolaturi jistgħu jiskambjaw l-aħjar prattiki, inkluż in-NSOAF (16),

R.

billi l-Kummissjoni, f'isem l-UE, diġà hi parti kontraenti tal-OSPAR (17), Konvenzjoni Reġjonali li tipproteġi l-ambjent marittimu tal-Oċean Atlantiku tal-Grigal,

S.

billi diġà jeżistu mekkaniżmi li jirrappurtaw l-inċidenti, inkluż ir-rapport tal-OSPAR dwar l-iskariki, it-tixrid u l-emissjonijiet annwali, u billi l-kanali mhux regolatorji bħall-"bulettini ta' sikurezza" tal-NSOAF jistgħu jintużaw biex jitwasslu t-tagħlimiet miksuba minn inċidenti bħal dawn,

T.

billi diversi ftehimiet eżistenti diġà jiddenfinixxu l-proċeduri ta' reazzjoni internazzjonali għat-tixrid ta' importanza internazzjonali, bħall-ftehim OCES (18),

U.

billi d-Direttiva tal-UE dwar il-Makkinarju tapplika normalment għat-tagħmir fil-faċilitajiet taż-żejt u l-gass fil-baħar iżda teskludi l-unitajiet ta' tħaffir mobbli fil-baħar u t-tagħmir marbut magħhom,

V.

billi l-Aġenzija Ewropea għas-Sigurtà Marittima diġà tipprovdi għajnuna teknika lill-Kummissjoni fl-iżvilupp u l-implimentazzjoni tal-leġiżlazzjoni tal-UE dwar is-sigurtà marittima u ngħatat impenji operattivi fil-qasam tar-reazzjoni għat-tniġġis biż-żejt, fil-monitoraġġ bis-satelliti u fl-identifikazzjoni b'firxa wiesgħa u l-intraċċar tal-bastimenti,

W.

billi r-responsabbiltà għat-tindif ta' kwalunkwe tixrid ta' żejt u r-responsabbiltà għad-danni huma bbażati fuq l-Artikolu 191 TFUE li jistabbilixxi l-prinċipju ta' "min iniġġes iħallas" u dan huwa rifless fil-leġiżlazzjoni sekondarja bħad-Direttiva dwar ir-Responsabbiltà Ambjentali (ELD) u d-Direttiva dwar l-Iskart,

X.

billi diġà teżisti skema ta' kumpens volontarju fil-każ ta' tniġġis miż-żejt fil-Baħar tat-Tramuntana,

1.

Jirrikonoxxi li l-ħruġ ta' liċenzji u awtorizzazzjonijiet oħra għall-esplorazzjoni u l-isfruttament tar-riżorsi ta' idrokarburi huwa prerograttiv ta' Stat Membru, u li kull sospensjoni ta' attivitajiet hija fid-diskrezzjoni tal-Istat Membru kkonċernat; jisħaq, madankollu, li l-proċeduri tal-ħruġ tal-liċenzji jridu jkunu konformi ma' ċerti kriterji komuni tal-UE u jenfasizza li l-Istati Membri għandhom japplikaw il-prinċipju ta' prekawzjoni meta joħorġu l-awtorizzazzjonijiet għall-esplorazzjoni u l-isfruttament ta' riżorsi ta' idrokarburi;

2.

Jinsisti, għaldaqstant, li l-introduzzjoni ta' moratorju fl-UE kollha dwar it-tħaffir ġdid kollu fil-baħar fond għaż-żejt fl-ilmijiet tal-UE tkun reazzjoni sproporzjonata għall-bżonn li jiġu żgurati standards għolja ta' sikurezza fl-UE;

3.

Jenfasizza li s-sistema leġiżlattiva u regolatorja ta' kull Stat Membru għandha tiżgura li l-operaturi kollha jippreżentaw “każ ta' sikurezza”, ibbażat fuq ir-riskju u speċifiku skont is-sit, li jitlobhom juru bis-sħiħ lill-awtoritajiet tas-saħħa, tas-sigurtà u tal-ambjent rilevanti tagħhom li ġew ikkunsidrati r-riskji skont is-sit flimkien ma' oħrajn u ġew implimentati kontrolli għal kull installazzjoni;

4.

Jenfasizza li l-oqfsa leġiżlattivi u regolatorji kollha tal-Istati Membri għandhom jadottaw sistema soda skont l-aħjar prattika kurrenti fejn il-proposti kollha għat-tħaffir ikollhom każ ta' sikurezza, li għandu jiġi approvat qabel ma jistgħu jibdew l-operazzjonijiet, inklużi proċeduri ta' verifika indipendenti minn partijiet terzi u rieżami f'intervalli regolari u xierqa minn esperti indipendenti; jisħaq li "punti ta' stennija" regolatorji qabel it-tħaffir se jiżguraw iktar li r-riskji kollha jiġu kkunsidrati u mitigati, u li r-rieżamijiet minn esperti indipendenti jiġu implimentati f'intervalli xierqa għal kull installazzjoni;

5.

Jitlob biex il-każijiet ta' sigurtà kollha jsiru dokument aġġornat u li jevolvi sabiex bidliet sostanzjali, tekniċi jew fit-tagħmir jiġu approvati mill-awtoritajiet kompetenti rilevanti, u jenfasizza li l-każijiet ta' sigurtà kollha għandhom jiġu rieżaminati minn tal-inqas kull ħames snin, inkluż mir-regolaturi indipendenti; jenfasizza li l-proċeduri kollha fil-post u t-tagħmir disponibbli sabiex jiġu affrontati blow-outs possibbli jeħtieġ li jkunu inklużi fil-każ ta' sikurezza;

6.

Jirrikonoxxi li diġà hemm netwerk ta' sistemi u l-aħjar prattiki, u jemmen li hemm riskju li kull element ġdid ta' leġiżlazzjoni speċifika tal-UE jkollu effett destabilizzanti fuq in-netwerk attwali ta' sistemi, li jwarrabhom mill-approċċ aċċertat tal-każ ta' sikurezza, u jenfasizza li l-leġiżlazzjoni l-ġdida ma għandhiex tfittex li tidduplika jew tikkomprometti l-aħjar prattika eżistenti;

7.

Jappoġġja l-aspiċju tal-Kummissjoni li tgħolli l-istandards minimi fi ħdan l-UE, b'kooperazzjoni mal-Istati Membri; jemmen li t-tħassib dwar is-sikurezza u l-ambjent għandu jiġi inkorporat fil-leġiżlazzjoni kollha u li l-ogħla standards ta' sikurezza u tal-ambjent għandhom jiġu applikati fl-oqsma kollha tal-attivitajiet taż-żejt u l-gass fil-baħar; jappella li terz indipendenti jżid il-livell ta' koordinament fil-każ ta' inċident; jirrakkomanda li tinħatar l-EMSA għal dan ir-rwol;

8.

Jitlob li d-Direttiva dwar l-istudju tal-Impatt Ambjentali (EIA) (19) tiġi estiża sabiex tkopri l-fażijiet kollha tal-proġetti fuq il-baħar (ta' tiftix u operattiva) u jitlob li jkun hemm rekwiżiti speċifiċi għall-EIAs f'każ ta' ibħra fondi, bjar kumplessi, u kundizzjonijiet diffiċli għat-tħaffir, u t-trasferiment taż-żejt/tal-gass permezz ta' pajpijiet taħt l-ilma mqiegħda fuq il-qiegħ jew taħt il-qiegħ tal-baħar; iqis, barra minn hekk, li l-Kummissjoni għandha tiżgura li l-EIAs għall-proġetti fuq il-baħar approvati mill-awtoritajiet nazzjonali jkopru wkoll il-proċeduri li l-operaturi jridu jsegwu waqt id-dekummissjonar; jistieden lill-Kummissjoni teżamina mill-ġdid id-dispożizzjonijiet ġuridiċi dwar l-EIAs u tistipula fihom li l-proċeduri tal-istudju tal-impatt ambjentali jridu jiġu fdati f'idejn esperti li jkunu indipendenti mill-klijent;

9.

Jistieden lill-Kummissjoni teżamina l-qafas regolatorju attwali dwar id-dekummissjonar tal-infrastruttura eżistenti ta' tħaffir, u tiċċara, jekk ikun hemm bżonn permezz ta' leġiżlazzjoni, ir-responsabbiltà tal-operaturi li jiżguraw it-tneħħija sikura u r-responsabbiltà għal kull ħsara ambjentali li tirriżulta mid-dekummissjonar jew minn sit ta' tħaffir wara li jkun ġie ddekummissjonat;

10.

Jistieden lill-Kummissjoni tistudja l-possibbiltà li testendi l-prinċipji sodi fil-leġiżlazzjoni tagħha biex tikkontrolla l-perikli fuq il-baħar (SEVESO II (20) u III (21)) għal-leġiżlazzjoni li tirrigwarda l-attivitajiet taż-żejt u tal-gass fuq il-baħar; fl-istess waqt, u f'każ li l-Kummissjoni ma tipproponix leġiżlazzjoni speċifika ġdida, jistieden lill-Kummissjoni teżamina mill-ġdid il-proposta SEVESO III tagħha sabiex testendi l-ambitu tagħha għall-pjattaformi taż-żejt u għall-pajpijiet taħt l-ilma mqiegħda fuq il-qiegħ jew taħt il-qiegħ tal-baħar, għall-fażijiet kollha tat-tiftix għal riservi taż-żejt u tal-gass sakemm il-bir jiġi ddekummissjonat; jilqa' l-memorandum ta' spjegazzjoni tal-Kummissjoni dwar ir-reviżjoni tad-Direttiva SEVESO II, li fih il-Kummissjoni tgħid li hi se tevalwa l-mod xieraq biex issaħħaħ il-leġiżlazzjoni ambjentali;

11.

Jinnota li l-attivitajiet taż-żejt u tal-gass fuq il-baħar huma esklużi mid-dispożizzjonijiet fundamentali tad-Direttiva dwar l-Emissjonijiet Industrijali (22); jissuġġerixxi li fil-punt 1.5 tal-Anness I, il-Kummissjoni żżid "attivitajiet taż-żejt u tal-gass fuq il-baħar" bħala parti mill-ewwel reviżjoni tal-ambitu li trid issir sal-31 ta' Diċembru 2011, u jissuġġerixxi li l-Bureau Ewropew tal-IPPC jiddefinixxi l-Aħjar Prattiki Disponibbli (BAT) għall-attivitajiet tat-tħaffir għaż-żejt u l-gass fuq il-baħar;

12.

Jilqa' l-fatt li l-Kummissjoni għandha l-intenzjoni li teżamina mill-ġdid id-Direttiva 92/91/KEE, u jitlob li jkun hemm approċċ ibbażat fuq standards komuni, biex jiġu evitati differenzi fit-trattament bejn l-impjegati fi ħdan l-istess impriża, skont il-post tax-xogħol tagħhom; jitlob, barra minn hekk, li jkun hemm għadd ta' regoli trasparenti, effiċjenti u konsistenti li japplikaw għall-impjegati kollha li jaħdmu fis-settur tal-offshore (fuq il-baħar), u li jkun hemm evalwazzjoni ta' kemm l-effikaċja tal-leġiżlazzjoni fis-seħħ kif ukoll il-possibilitajiet għal armonizzazzjoni futura tal-leġiżlazzjoni;

13.

Jistieden lill-Unjoni Ewropea tippromwovi l-applikazzjoni tal-linji gwida tal-ILO dwar Sistemi ta' Ġestjoni tas-Sikurezza tax-Xogħol u s-Saħħa (ILO-OSH 2001) fl-industrija kollha taż-żejt u l-gass;

14.

Iwissi, madankollu, li l-effettività tal-leġiżlazzjoni fl-aħħar mill-aħħar tiddependi fuq il-kwalità tal-implimentazzjoni tagħha mill-awtoritajiet u l-entitajiet Ewropej u nazzjonali relevanti li jimplimentaw, jimmaniġġjaw u jinfurzaw il-leġiżlazzjoni relevanti; jemmen li l-Kummissjoni għandha tkun attiva fl-iżgurar tal-konformità mill-awtoritajiet tal-Istati Membri;

15.

Jenfasizza li xi Membri diġà għandhom mekkaniżmi ta' sikurezza eċċellenti meta mqabbla mal-livell internazzjonali u Ewropew;

16.

Jenfasizza l-importanza ta' spezzjonijiet regolari, varjati u rigorużi mwettqa minn speċjalisti indipendenti u mħarġa li huma familjari mal-kundizzjonijiet lokali; jemmen li s-sistemi ta' spezzjoni ta' operatur għandhom ukoll ikunu suġġetti għal verifika minn terzi; jappoġġja l-isforzi li diġà saru minn ċerti Stati Membri biex iżidu n-numru ta' spezzjonijiet rigorużi; jenfasizza l-importanza tal-indipendenza tal-awtoritajiet nazzjonali u tat-trattament trasparenti tal-kunflitti tal-interess possibbli li l-ispetturi jistgħu jiffaċċjaw ma' dawk li jistgħu jħaddmuhom fil-futur;

17.

Jinnota li r-riżorsi huma limitati fir-rigward ta' spetturi b'esperjenza u jappella għal investiment ulterjuri biex jiġi żviluppat netwerk ta' spezzjoni aktar kwalifikat fl-Istati Membri; jistieden lill-Kummissjoni teżamina modi li bihom tista' tgħin lill-Istati Membri jiżviluppaw l-ispettorati tagħhom stess;

18.

Jinsisti fuq il-bżonn li jkun hemm sistemi ta' kontroll effikaċi mill-entitajiet ta' spezzjoni, b'metodi innovattivi ta' verifiki speċifiċi fir-rigward tal-ħinijiet tax-xogħol u l-operazzjonijiet ta' salvataġġ, u l-bżonn li jkun hemm il-possibbiltà li jiġu applikati sanzjonijiet għal ksur ta' regoli dwar is-saħħa u s-sikurezza tal-ħaddiema;

19.

Jirrimarka li s-sistemi ta' spezzjoni ta' operatur għandhom ikunu suġġetti għal verifika minn terzi kif ukoll ispezzjonijiet fil-livell tal-UE u li l-verifika ta' bastimenti għandha tiġi estiża għall-pjattaformi fuq il-baħar taż-żejt u tal-gass;

20.

Jirrikonoxxi li f'xi operazzjonijiet inqas estensivi jista' jkun hemm l-ekonomiji ta' skala jekk l-Istati Membri jkollhom spettorati komuni;

21.

Jirrimarka li kwalunkwe estensjoni potenzjali tal-leġiżlazzjoni tal-UE dwar il-prodott għat-tagħmir ta' installazzjonijiet fuq il-baħar għandha tirrikonoxxi li, fid-dawl tar-rata għolja tal-progress teknoloġiku, l-ispeċifikazzjonijiet preskrittivi żejda jista' malajr ma jkunx hemm iktar bżonnhom;

22.

Huwa mħasseb li "kontrollur tal-kontrolluri" fuq il-livell tal-UE mhux se jġib miegħu valur miżjud suffiċjenti biex jiġi ġġustifikat l-użu ta' riżorsi regolatorji skarsi mill-awtoritajiet nazzjonali kompetenti; jirrikonoxxi, minkejja dan, l-potenzjal li hemm fl-esperjenza sinifikanti tal-EMSA fil-ġestjoni tal-prevenzjoni ta' inċidenti taż-żejt, attivitajiet ta' monitoraġġ u detezzjoni, u li l-ġbir ta' data, l-iskambju tal-aħjar prattiki u l-koordinament tar-riżorsi ta' rispons għandhom jiġu kkoordinati fil-livell tal-UE; jistieden lill-Kummissjoni tinvestiga jekk korp regolatorju Ewropew għall-operazzjonijiet fuq il-baħar, li jiġbor flimkien ir-regolaturi nazzjonali fuq il-linji tal-BEREC fis-settur tat-telekomunikazzjonijiet, jistgħax iġib miegħu valur miżjud u jsaħħaħ l-infurzar u l-implimentazzjoni tal-ogħla standards fl-UE,

23.

Jenfasizza l-importanza tal-inizjattivi reġjonali bħala l-ewwel saff ta' azzjoni multilaterali u jemmen li fora simili għall-NSOAF fil-Baħar tat-Tramuntana għandhom jiġi stabbiliti għall-Istati Membri madwar il-Baħar Mediterran, il-Baħar Baltiku u l-Baħar l-Iswed sabiex jissorveljaw l-adozzjoni u l-infurzar tal-istandards minimi; f'dan ir-rigward jilqa' l-inizjattiva tal-Kummissjoni għall-ħolqien tal-Forum Mediterranju tal-Awtoritajiet Offshore (MOAF) u jħeġġeġ il-parteċipazzjoni ta' pajjiżi mhux membri fl-UE; hu tal-fehma li l-istandards u r-regoli adottati għall-UE għandhom jikkunsidraw kwistjonijiet ambjentali marbutin mal-esplorazzjoni tal-idrokarbur fiż-żoni mhux tal-UE;

24.

Jirrikonoxxi l-varjetà ta' kundizzjonijiet fiż-żoni ta' baħar differenti iżda jemmen li għandu jkun hemm koordinament inter-fora bejn l-inizjattivi reġjonali, fejn xieraq, sabiex tiġi żgurata l-aħjar prattika fil-livell tal-UE; jenfasizza li l-Kummissjoni għandha tiżvolġi rwol attiv f'dawn il-fora;

25.

Jilqa' l-inizjattiva tal-Kummissjoni li tistabbilixxi laqgħat konġunti UE/NSOAF bħala opportunità ta' skambju tal-aħjar prattiki fl-UE kollha; jenfasizza li dawn il-laqgħat għandhom jiġu valutati mill-parteċipanti;

26.

Jilqa' d-deċiżjoni tal-Assoċjazzjoni Internazzjonali tal-Produtturi taż-Żejt u l-Gass għall-ħolqien tal-Grupp Globali ta' Reazzjoni Industrijali (GIRG) wara d-diżastru fil-Golf tal-Messiku; iħeġġiġhom jaħdmu b'mod trasparenti fil-qsim ta' informazzjoni u fil-ħidma mal-awtoritajiet;

27.

Jenfasizza l-benefiċċji ta' sikurezza mill-programmi ta' involviment tal-forza tax-xogħol; iħeġġeġ rabtiet b'saħħithom, u inizjattivi konġunti, bejn l-industrija, il-forza tax-xogħol u l-awtoritajiet nazzjonali kompetenti fil-qasam tas-saħħa, tas-sikurezza u tal-protezzjoni tal-ambjent;

28.

Jenfasizza li s-settur tal-attivitajiet taż-żejt u l-gass fuq il-baħar iġib miegħu riskji kbar għas-saħħa u s-sikurezza tal-ħaddiema minħabba l-kundizzjonijiet ambjentali kultant estremi, il-ħinijiet tax-xogħol f'forma ta' perjodi ta' 12-il siegħa, u s-sitwazzjoni ta' iżolament, u jirrikonoxxi li dawn il-kundizzjonijiet speċifiċi tax-xogħol, speċjalment l-istress psikoloġiku, huma u jeħtieġ li jkomplu jkunu, regolamentati sabiex jiġu minimizzati l-iżbalji umani u sabiex ikunu protetti l-ħaddiema; jirrakkomanda għalhekk li l-ħaddiema jingħataw assigurazzjoni li tkun tal-livell tar-riskju li jiffaċċjaw;

29.

Jemmen li għandha tiġi żviluppata kultura preventiva ta' saħħa u ta' sikurezza, permezz tal-impenn min-naħa ta' min iħaddem u tat-trejdunjins u l-parteċipazzjoni attiva min-naħa tal-ħaddiema, partikolarment billi dawn jiġu kkonsultati, billi jiġu involuti fit-tfassil u fl-applikazzjoni tal-proċeduri ta' sikurezza u billi jingħataw informazzjoni dwar ir-riskju potenzjali involut; jenfasizza l-importanza tat-testjar u l-monitoraġġ ta' dawn il-proċeduri tul il-katina kollha ta' kmand sabiex ikun żgurat li l-iktar persuni mlaħħqin fl-amminstrazzjoni wkoll ikunu mħarrġa u responsabbli f'każ ta' inċidenti jew nuqqasijiet ta' sikurezza;

30.

Jitlob lill-industrija timpenja lilha nnifisha għal kultura ta' sikurezza reali fl-organizzazzjonijiet tagħhom, kemm dawk offshore jew dawk f'ambjent ta' uffiċċju; għalhekk jippromwovi programmi ta' taħriġ regolari għall-impjegati permanenti u dawk fuq kuntratt kollha kif ukoll għal dawk li jħaddmu;

31.

Jistieden lill-Kummissjoni tqis il-possibbiltà li tistabbilixxi standards u sistemi komuni għal sikurezza għolja, biex jiġu ffaċċjati u limitati t-theddidiet ħalli jonqsu r-riskji u, meta jkun jeħtieġ, biex ikun hemm rispons mgħaġġel u effikaċi; jitlob ukoll biex jiġu stabbiliti rekwiżiti ta' taħriġ fl-Istati Membri tal-UE għall-ħaddiema, inklużi l-kuntratturi u s-sottokuntratturi, involuti f'kompiti b'riskju għoli, u biex dawn jiġu armonizzati ħalli tiġi żgurata implimentazzjoni koerenti fl-ilmijiet kollha Ewropej; jistieden lill-Kummissjoni tibda azzjoni pożittiva ma' sħab internazzjonali biex tesplora l-possibbiltà li tinkiseb inizjattiva globali dwar ir-regoli ta' saħħa u sikurezza tal-ħaddiema u biex dawn jiġu aġġornati regolarment ħalli jieħdu inkunsiderazzjoni l-iktar teknoloġija avvanzata;

32.

Jistieden lill-Istati Membri jippermettu biss taħriġ intern jew estern kwalifikat;

33.

Jilqa' l-programmi ta' skambju internazzjonali u ta' taħriġ komuni għall-persunal tal-awtoritajiet nazzjonali kompetenti u jitlob lill-Kummissjoni u lill-Istati Membri biex jipproponu inizjattivi li jħeġġuhom;

34.

Jitlob li jiġu applikati regoli stretti fil-qasam tas-sikurezza, tal-protezzjoni tas-saħħa, u tat-taħriġ lis-sottokuntratturi, li għandu jkollhom il-kompetenzi meħtieġa biex iwettqu kompiti ta' manutenzjoni u ta' kostruzzjoni fil-qasam ta' responsabbiltà tagħhom; jitlob li l-ħaddiema, inklużi l-kuntratturi u s-sottokuntratturi u organizzazzjonijiet tal-ħaddiema jkunu informati dwar ir-riskji kollha involuti fix-xogħol qabel ma dan jitwettaq;

35.

Jenfasizza li l-impjegati ta' katina ta' proċessar ulterjuri fuq il-baħar jew fuq l-art huma wkoll esposti għal riskji estremament kbar għas-saħħa u s-sikurezza; jitlob lill-Istati Membri jinkludu lil dawn l-impjegati fl-attivitajiet ta' regolamentazzjoni tagħhom;

36.

Jitlob li tiġi prevista kura medika ta' segwitu regolari u speċifika għall-ħaddiema li jwettqu l-attivitajiet tagħhom fis-settur taż-żejt u l-gass fuq il-baħar; jirrakkomanda li ssir vista medika li tevalwa s-saħħa fiżika u psikoloġika tal-ħaddiema mill-inqas darba fis-sena;

37.

Jitlob li jiġi approvat mekkaniżmu għall-evalwazzjoni tar-riskji ffaċċjati mill-ħaddiema, u jitlob li din l-evalwazzjoni titqies fil-kalkolu tar-rimunerazzjoni tal-ħaddiema;

38.

Jistieden lill-industrija ssegwi l-aħjar prattika dwar ir-rappreżentanti tas-sikurezza; l-impjegati għandhom ikunu jistgħu jeleġġu rappreżentant tas-sikurezza li hu involut fi kwistjonijiet ta' sikurezza fil-livelli kollha tal-proċess operattiv u tat-teħid ta' deċiżjonijiet; jemmen ukoll li l-impjegati għandhom ikunu jistgħu jiddikjaraw nuqqasijiet jew riskji ta' sikurezza lill-awtoritajiet kompetenti b'mod anonimu filwaqt li jiġu protetti minn fastidju;

39.

Jappoġġja sforzi aktar qawwija biex l-aħjar prattiki tajba jiġu skambjati bejn l-Istati Membri fir-rigward ta' leġiżlazzjoni, standards, proċeduri, u fir-rappurtaġġ u l-ġestjoni ta' inċidenti, inklużi l-opinjonijiet xjentifiċi, is-sikurezza operattiva u s-sistemi ta' protezzjoni ambjentali, il-ġestjoni tar-riskju, il-proċeduri ta' reazzjoni eċċ;

40.

Jirrikonoxxi li diġà qed tiġi mqassma informazzjoni, jew mill-gruppi regolatorji jew mill-imsieħba kummerċjali u mill-impriżi konġunti; jemmen li s-sikurezza mhijiex proprjetà esklużiva;

41.

Jistieden lill-awtoritajiet nazzjonali kompetenti jiġbru u jaqsmu bejniethom informazzjoni u jippubblikawha mir-rappurtaġġ tal-inċidenti, b'kunsiderazzjoni xierqa għas-sensittivitajiet kummerċjali, sabiex jitgħallmu minnha; jirrikonoxxi li l-konsolidament u l-koordinament akbar ta' prattiki eżistenti u ta' rappurtaġġ ta' inċident li jistgħu jgħinu biex tiġi żgurata t-trasparenza u l-konsistenza madwar l-UE; din l-informazzjoni għandha tiġi kkomunikata malajr kemm jista' jkun wara li jkun seħħ l-inċident and għandha tinkludi, inter alia, inċidenti personali, ħsara fil-makkinarju, tixrid tal-idrokarburi u kwistjonijiet ta' tħassib; jilqa' l-inizjattivi internazzjonali, inkluż fil-Grupp ta' ħidma G20, bħala appoġġ fil-livell globali fl-iżgurar li hemm għarfien mifrux ta' inċidenti u kwalunkwe azzjoni ta' rimedju meħtieġa;

42.

Jemmen lil-Kummissjoni għandha tivvaluta: l-effikaċja ta' kanali varji ta' informazzjoni eżistenti u/jew in-neċessità li jiġu stabbiliti sistemi internazzjonali ġodda, b'kunsiderazzjoni xierqa għall-piż amministrattiv li jirriżulta minn dan;

43.

Jinnota d-differenza bejn il-ħruġ ta' liċenzji li jippermettu t-tħaffir u l-persuna li tingħatalha l-liċenzja tista' ma tkunx l-organizzazzjoni inkarigata mit-tħaffir; jemmen li jrid ikun hemm "punti ta' stennija" wara li tingħata liċenzja u qabel it-tħaffir;

44.

Jirrakkomanda li l-funzjonijiet tal-ħruġ ta' liċenzji u tas-saħħa u tas-sikurezza jkunu separati fl-Istati Membri kollha; jemmen li l-Kummissjoni għandha taħdem flimkien mal-Istati Membri biex tistabbilixxi kriterji ta' ħruġ ta' liċenzji li jkunu komuni, trasparenti u oġġettivi li jiżguraw is-separazzjoni tal-funzjonijiet ta' ħruġ ta' liċenzji u ta' saħħa u ta' sikurezza, biex jitnaqqas ir-riskju ta' kunflitt ta' interess;

45.

Jinnota li numru sinifikanti ta' installazzjonijiet fl-ibħra tal-UE qed jiqdiemu; jilqa' l-isforzi għat-titjib tal-integrità tal-assi tal-pjattaformi eżistenti;

46.

Iqis li l-operaturi taż-żejt u tal-gass iridu jinħtieġu, waqt il-proċedura tal-ħruġ ta' liċenzji u matul il-perjodu operattiv u matul il-fażijiet kollha tal-proġetti fuq il-baħar (tiftix, operazzjoni, trasport u dekummissjonar), juru li jkollhom biżżejjed kapaċità finanzjarja biex jiżguraw rimedju fir-rigward tal-ħsara ambjentali kkawżata mill-attivitajiet speċifiċi li huma jwettqu, inklużi dawk ikkawżati minn inċidenti ta' impatt kbir u ta' probabbiltà baxxa – kemm permezz ta' skemi obbligatorji ta' garanzija industrijali reċiproka, jew permezz ta' assigurazzjoni obbligatorja, jew permezz ta' skema mħallta li tiggarantixxi s-sigurtà finanzjarja;

47.

Iħeġġeġ l-użu ta' pjanijiet ta' kontinġenza speċifiċi għas-sit li jidenfikaw il-perikli, jivvalutaw sorsi potenzjali ta' tniġġis u l-effetti tagħhom, jippreżentaw strateġija ta' reazzjoni u jippreżentaw pjanijiet ta' tħaffir għal bjar ta' salvataġġ potenzjali; jirrakkomanda li l-operaturi li jiksbu liċenzja għandhom, bħala prerekwiżit għall-ksib tal-kunses għat-tħaffir, iwettqu studju ta' impatt ambjentali u jippreżentaw il-pjanijiet ta' kontinġenza tagħhom minn tal-anqas xahrejn qabel il-bidu tal-operazzjonijiet; fil-każ ta' bjar kumplessi jew kundizzjonijiet ta' tħaffir diffiċli, il-pjan ta' kontinġenza għandu jiġi vvalutat, ikkonsultat u approvat flimkien ma' proċessi ta' approvazzjoni regolatorja oħra (pereżempju dawk konnessi mal-impatti ambjentali jew id-diżinn tal-bir); f'kull każ l-operazzjonijiet ma jistgħux jibdew qabel ma jiġi approvat pjan ta' kontinġenza mill-Istat Membru li fih dawn għandhom jitwettqu; il-pjanijiet ta' kontinġenza għandhom jiġu ppubblikati mill-awtorità nazzjonali kompetenti b'kunsiderazzjoni xierqa għall-protezzjoni tad-data;

48.

Jistieden lill-Istati Membri jabozzaw, jemendaw jew jaġġornaw il-Pjanijiet ta' Kontinġenza Nazzjonali li jispeċifikaw il-kanali ta' ordni u l-mekkaniżmi għall-użu tal-assi nazzjonali b'mod parallel mar-riżorsi tal-industrija fil-każ ta' tnixxija; jistieden lill-Istati Membri jikkooperaw ma' xulxin u mal-pajjiżi ġirien tal-UE fit-tfassil ta' pjanijiet ta' kontinġenza reġjonali; jitlob li dawn il-pjanijiet jiġu trażmessi lill-EMSA;

49.

Jinnota li avvenimenti reċenti enfasizzaw ir-riskji ta' attivitajiet ta' esplorazzjoni u ta' produzzjoni taż-żejt u tal-gass fil-baħar għat-trasport marittimu u għall-ambjent tal-baħar; huwa tal-opinjoni li l-użu tal-kapaċitajiet ta' reazzjoni tal-EMSA għandhom ikunu estiżi b'mod espliċitu sabiex ikopru l-prevenzjoni u r-rispons għat-tniġġis li joriġina minn attivitajiet ta' din ix-xorta;

50.

Jissuġġerixxi li l-inventarji tar-riżorsi ta' rispons tal-EMSA għandhom jinkludu ir-riżorsi relevanti kollha tal-industrija u dawk pubbliċi sabiex l-EMSA titqiegħed pożizzjoni tajba biex tipprovdi rwol ta' koordinament, fejn xieraq, f'każ ta' inċident kbir;

51.

Jissuġġerixxi li kull tagħmir disponibbli għat-trażżin ta' kull tixrid potenzjali għandu jifforma parti essenzjali mill-pjanijiet ta' kontinġenza u li dan it-tagħmir għandu jkun disponibbli fi prossimità tal-installazzjonijiet sabiex jiġi permess l-użu tiegħu f'waqtu f'każ ta' inċident kbir;

52.

Iħeġġeġ lill-kumpaniji jkomplu jallokaw fondi għar-riċerka u għall-iżvilupp fir-rigward ta' teknoloġiji ġodda ta' prevenzjoni u ta' rimedju wara l-inċidenti; jenfasizza li qabel ma tiżdied kull teknoloġija ta' rispons għal diżastru, din għandha tiġi ttestjata, ivvalutata u awtorizzata b'mod indipendenti;

53.

Jikkunsidra bħala essenzjali li titwettaq riċerka xjentifika mmirata u innovattiva bil-għan li jkun possibbli li jintużaw sistemi awtomatiċi għall-monitoraġġ ta' operazzjonijiet ta' tħaffir u għeluq u b'hekk tiżdied l-affidabbiltà ta' operazzjonijiet ta' tħaffir u struttament, u ta' sistemi ta' sikurezza għan-nar f'kundizzjonijiet ta' temp estremi;

54.

Huwa favur il-kontroll strett, it-testjar kontinwu u l-valutazzjoni tal-impatt ambjentali tas-sustanzi kimiċi li jferrxu (u dwar pjanijiet għal rispons ta' emerġenza li jinvolvu l-użu ta’ sustanzi kimiċi li jferrxu), kemm biex tiġi żgurata l-adegwatezza tagħhom f'każ ta' tixrid ta' żejt kif ukoll biex jiġu evitati implikazzjonijiet għas-saħħa pubblika u għall-ambjent; jistieden lill-Kummissjoni tipprovdi għal aktar riċerka ddettaljata fl-impatti ta’ dawn is-sustanzi kimiċi, permezz ta’ programmi ta’ riċerka tal-UE jekk ikun hemm bżonn;

55.

Jirrikonoxxi li l-industrija għandha r-responsabbiltà primarja għar-rispons għad-diżastri jilqa' l-inizjattivi konġunti tal-industrija li jiġu żviluppati, mobbilizzati u utilizzati riżorsi biex jiġi affaċċjat it-tixrid ta' żejt; jenfasizza li s-settur pubbliku għandu rwol importanti fir-regolament, is-sikurezza u l-koordinament ta' rispons għal diżastru;

56.

Jirrakkomanda li għandha tingħata enfasi akbar fuq it-taħriġ sistematiku, partikolarment fuq l-applikazzjoni prattika tat-tagħmir ta' rispons għal diżastru;

57.

Jistieden lill-Istati Membri u lill-Kummissjoni jiżguraw li s-sistema ta' ħruġ ta' liċenzji tinkludi l-protezzjoni adatta tal-istrumenti finanzjarji biex tiżgura li f'każ ta' inċidenti kbir dawn ikunu jistgħu jintużaw b'mod urġenti, għall-għoti ta' kumpens għat-telf ekonomiku, soċjali u ambjentali kkawżati minn tixrid ta' żejt jew ta' gass;

58.

Jilqa' l-isforzi tal-Kummissjoni li testendi l-ambitu tal-mandat tal-Aġenzija Ewropea għas-Sigurtà Marittima sabiex tkopri mhux biss bastimenti iżda wkoll installazzjonijiet fuq il-baħar;

59.

Jinnota li r-rikors għall-kompetenza u għar-riżorsi tal-EMSA għandha tiġi ddeterminata mir-regolament rivedut tal-EMSA, iżda dan għandu jsir estiż biċ-ċar biex ikopri r-rispons għat-tniġġis li joriġina mill-esplorazzjoni taż-żejt u tal-gass u għandu jkun disponibbli madwar l-UE u l-pajjiżi ġirien, jekk meħtieġ;

60.

Jemmen li l-għodod ta' rispons u ta' monitoraġġ żviluppati fil-livell tal-UE, rispettivament in-netwerk ta' bastimenti għall-irkupru taż-żejt stand-by tal-EMSA u tal-CleanSeaNet (CSN), għall-monitoraġġ u d-detezzjoni tat-tixrid ta' żejt, jistgħu jintużaw għal inċidenti f'installazzjonijiet fuq il-baħar;

61.

Jirrakkomanda l-użu tas-Servizz CleanSeaNet tal-EMSA għall-monitoraġġ ta' pjattaformi taż-żejt u t-tixrid ta' żejt illegali minn bastimenti; jirrikonoxxi li 50 % tal-istampi attwalment ipprovduti lill-CleanSeaNet jistgħu jintużaw biex jiġu mmonitorjati l-pjattaformi taż-żejt;

62.

Jirrakkomanda, għalhekk, l-użu tan-Netwerk ta' Servizz ta' Bastimenti Stand-by ta' Rispons għat-tixrid taż-żejt tal-EMSA (SOSRV) wara r-rieżami tal-punti li ġejjin:

63.

Itenni l-istedina tiegħu lill-Kummissjoni biex tressaq proposti mill-aktar fis biex tistabbilixxi Forza tal-Protezzjoni Ċivili tal-UE bbażata fuq il-Mekkaniżmu tal-Protezzjoni Ċivili tal-UE u biex tfassal pjan ta’ azzjoni Ewropew, flimkien mal-Istati Membri, li jintegra mekkaniżmi speċifiċi li jistipulaw kif l-UE tista’ tirrispondi għal tniġġis kbir ikkawżat minn installazzjonijiet taż-żejt fuq il-baħar, inklużi pajpijiet taħt l-ilma mqiegħda fuq il-qiegħ jew taħt il-qiegħ tal-baħar;

64.

Jirrikonoxxi r-rwol tal-MIC (23) li jikkomplementa l-mekkaniżmi ta' rispons ta' emerġenza tal-Istati Membri u l-industrija;

65.

Jappoġġja servizzi innovattivi diretti għas-settur marittimu; jilqa' d-diskussjoni mill-Kummissjoni u mill-Istati Membri dwar il-bini ta' inizjattiva e-marittima ġdida dwar il-proġett SafeSeaNet, u jemmen li din tkun tista' toffri benefiċċji ulterjuri għas-sikurezza tal-industrija taż-żejt u tal-gass fuq il-baħar;

66.

Jenfasizza li kull żona ta' baħar għandha dejjem ikollha aċċess suffiċjenti għat-tagħmir disponibbli biex tiffaċċja t-tixrid ta' żejt kbir, u fl-agħar qagħda possibbli għal żona tal-baħar speċifika u mhux biss fl-ilmijiet tal-UE;

67.

Jistieden lill-Kummissjoni tiżgura li l-ġestjoni mtejba tad-data dwar il-baħar proposta fil-Komunikazzjoni "Għarfien dwar il-Baħar 2020" (24), u fil-proposta għal Regolament li jistabbilixxi Programm biex jiġi appoġġjat l-iżvilupp ulterjuri ta' Politika Marittima Integrata (25), tqis il-ħtieġa li jiġi żgurat li jkun hemm monitoraġġ xieraq tat-theddid ta' tniġġis sabiex tiġi ddeterminata l-azzjoni xierqa fil-mument opportun;

68.

Jitlob lill-Kummissjoni tħejji proposta biex l-għarfien xjentifiku ġġenerat mill-operaturi fuq l-baħar li joperaw permezz ta’ liċenzja pubblika jkun disponibbli għall-awtoritajiet responsabbli bl-użu ta’ standards u protokolli żviluppati fil-kuntest tal-"Għarfien dwar il-Baħar 2020", bil-għan li jiġi ffaċilitat l-iskrutinju pubbliku u biex jiżdied l-għarfien tal-ambjent tal-baħar;

69.

Iħeġġeġ lill-Istati Membri, meta jkunu qed jikkunsidraw mekkaniżmi ta' garanzija finanzjarja, inkluż il-bżonn għal assigurazzjoni għal responsabbiltà ċivili, joqogħdu attenti biex jiffissaw rati ta' assigurazzjoni fuq il-bażi tar-riskju reali li jirriżulta mid-diffikultajiet tat-tħaffir u ta' sfruttament, sabiex ma jeskludux mis-suq operaturi żgħar u ta' daqs medju mis-suq filwaqt li jiġi żgurat li danw huma koperti għar-responsabbiltà ċivili;

70.

Jenfasizza li, filwaqt li fil-prinċipu jistgħu jingħataw garanziji finanzjarji permezz ta’ assigurazzjoni jew ta’ mutwalizzazzjoni industrijali, huwa importanti li jiġi żgurat li l-operaturi juru li jkollhom garanziji finanzjarji biex ikopru l-ispejjeż kollha ta’ tindif u ta’ kumpens f’każ ta’ diżastru kbir, u li r-riskji u r-responsabbiltà ma jkunux esternalizzati lil kumpaniji iżgħar li jkun aktar probabbli li jiddikjaraw insolvenza f’każ ta’ inċident; jitlob li kwalunkwe skema konġunta tkun stabbilita b’mod li jinżammu l-inċentivi biex jiġu evitati r-riskji u tkun tirrispetta l-ogħla standards ta’ sikurezza possibbli fl-operazzjonijiet individwali;

71.

Jirrikonoxxi l-mertu tal-fondi komuni bħall-OPOL fil-Baħar tat-Tramuntana u, jitlob li fondi bħal dawn jiġu stabbiliti f'kull żona marittima tal-UE; jitlob li s-sħubija tkun obbligatorja għall-operaturi u li tiġi żgurata ċ-ċertezza ġuridika sabiex jiġu pprovdut mekkaniżmu ta' sikurezza maħsub ħalli l-Istati Membri, is-settur marittimu, b'mod partikolari s-sajjieda u l-kontribwenti jiġu assigurati;

72.

Jenfasizza li n-natura volontarja tal-iskemi bħall-OPOL jillimitaw il-kontroll ġuridiku tagħhom u għalhekk jemmen li dawn il-fondi jistgħu jissaħħu b'rekwiżit ta' liċenzja obbligatorja;

73.

Jenfasizza li l-kontribuzzjonijiet għandhom ikunu bbażati kemm fuq il-livell ta' riskju fuq is-sit ikkonċernat kif ukoll fuq il-pjanijiet ta' kontinġenza, u jkunu konsistenti magħhom;

74.

Iqis li l-ambitu tad-Direttiva dwar ir-Responsabbiltà Ambjentali (26) għandu jiġi estiż sabiex il-prinċipju ta' "min iniġġes iħallas" u r-responsabbiltà stretta japplikaw għall-ħsara kollha kkawżata lill-ilmijiet tal-baħar u lill-bijodiversità, sabiex il-kumpaniji taż-żejt ikunu jistgħu jinżammu responsabbli għal kwalunkwe ħsara u għall-ħsara ambjentali kollha li huma jikkawżaw, u jkunu jistgħu jassumu r-responsabbiltà kollha;

75.

Jappella biex issir reviżjoni tad-Direttiva dwar ir-Responsabbiltà Ambjentali sabiex tkopri wkoll l-ibħra kollha tal-UE, f’konformità mad-Direttiva Kwadru dwar l-Istrateġija Marina (27);

76.

Jistieden lill-Kummissjoni, skont id-Direttiva dwar ir-Responsabbiltà Ambjentali, tbaxxi l-limiti minimi ta' ħsara u sabiex tinforza sistema ta' responsabbiltà stretta li jkopri l-ħsara kollha mwettqa lill-ibħra u lill-bijodiversità tal-baħar;

77.

Huwa tal-fehma li l-Kummissjoni għandha teżamina jekk jistax jinħoloq fond ta’ kumpens għad-diżastri taż-żejt fi ħdan il-qafas tar-responsabbiltà ambjentali, li jkun fih dispożizzjonijiet ta’ sigurtà finanzjarja;

78.

Jirrakkomanda li l-Istati Membri jqisu jadottaw u jsaħħu diżinċentivi għal negliġenza u n-nuqqas ta' konformità, bħall-multi, l-irtirar tal-liċenzji, u r-responsabbiltà penali għall-impjegati; jirrimarka, madankollu, li tali sistema kienet teżisti fl-Istati Uniti tal-Amerika qabel t-tnixxija tad-Deepwater Horizon;

79.

Jenfasizza li dawk il-partijiet b'responsabbiltà finanzjarja għandhom jiġu stabbiliti mingħajr ambigwità qabel ma jibda t-tħaffir;

80.

Iħeġġeġ lill-industrija tapplika tal-anqas l-istandards ambjentali u ta' sikurezza tal-UE jew l-ekwivalenti tagħhom, irrispettivament mill-post li fih ikunu qed joperaw fid-dinja; huwa konxju tal-kwistjonijiet ta' infurzar tar-rekwiżit għall-kumpaniji bbażati fl-UE li joperaw skont l-istandards tal-UE fid-dinja, iżda jitlob lill-Kummissjoni teżamina liema mekkaniżmi jistgħu jkunu adegwati biex jiżguraw li l-kumpaniji bbażati fl-UE joperaw globalment tal-anqas skont l-istandards tal-UE; jemmen li r-responsabbiltà tal-kumpaniji għandha tkun il-forza ewlenija f'dan il-qasam u li s-sistemi ta' ħruġ ta' liċenzji tal-Istati Membri għandhom jikkunsidraw inċidenti globali li jinvolvu kumpaniji fil-ħruġ ta' liċenzji, sakemm dawn l-inċidenti huma akkumpanjati b'reviżjonijiet dettaljati; jistieden lill-Kummissjoni tippromwovi l-użu ta' standards għoljin flimkien mas-sieħba globali;

81.

Iħeġġeġ lill-Kummissjoni u l-Istati Membri jkomplu jikkontribwixxu għal inizjattivi offshore (fuq il-baħar) fi ħdan il-qafas tal-G20, b'kunsiderazzjoni tal-Konvenzjoni tan-Nazzjonijiet Uniti dwar il-Liġi tal-Baħar (UNCLOS);

82.

Jinnota l-importanza tal-leġiżlazzjoni eżistenti li seħħet bl-inizjattiva tal-Programm tan-Nazzjonijiet Uniti għall-Ambjent, permezz tal-OSPAR, il-Konvenzjonijiet ta' Barċellona u ta' Ħelsinki, iżda jirrikonoxxi li d-dritt internazzjonali attwali ma tipprovdix qafas sħiħ jew konsistenti għal standards ta' sikurezza u ambjentali fit-tħaffir fil-baħar, u tista' tkun diffiċli li tiġi infurzata;

83.

Jenfasizza l-importanza tad-dħul fis-seħħ tal-Protokoll Offshore tal-Mediterran tal-1994 li mhuwiex irratifikat, iffukat fuq il-protezzjoni kontra l-inkwinament konsegwenza tal-esplorazzjoni u tal-isfruttament;

84.

Iħeġġeġ lill-Kummissjoni timpenja ruħha b'mod attiv mal-istati l-oħra li jmissu ma' żoni tal-baħar tal-UE biex tiżgura li l-oqfsa regolatorji u s-sorveljanza jipprovdu l-istess livelli għolja ta' sikurezza;

85.

Jistieden lill-UE tikkollabora mal-pajjiżi relevanti barra l-UE, inklużi l-organizzazzjonijiet tal-ħaddiema u ta’ min iħaddem tagħhom, li ċ-ċittadini tagħhom jwettqu servizzi fl-industrija taż-żejt u l-gass fuq il-baħar tal-UE, sabiex jiżguraw li l-kumpaniji bbażati barra l-UE iżda li joperaw fl-ilmijiet tal-UE jkunu marbuta bil-kundizzjonijiet tax-xogħol tal-UE u l-leġiżlazzjoni OSH;

86.

Jistieden lill-Kummissjoni tniedi dibattitu dwar ir-regolamenti fl-oqsma tar-responsabbiltà għall-ħsara ambjentali u tal-garanziji finanzjarji li jkunu jinkludu wkoll pajjiżi terzi;

87.

Iħeġġeġ lill-Kummissjoni taħdem flimkien mas-sħab u mal-ġirien biex tikseb sistema speċjali għal kull operazzjoni fl-Artiku, b'kunsiderazzjoni partikolari għas-sostenibbiltà u n-neċessità ta' attivitajiet fuq il-baħar f'ambjent daqstant vulnerabbli u uniku;

88.

Jippromwovi s-sħubijiet bilaterali internazzjonali permezz tal-Pjanijiet ta' Azzjoni tal-Politika Ewropea tal-Viċinat li, inter alia, iħeġġu lill-pajjiżi terzi jadottaw standards ta' sikurezza għoljin; iħeġġeġ lil dawk il-pajjiżi li għadhom ma attivawx bis-sħiħ il-PEV biex jagħmlu dan;

89.

Joppoġġja skemi mmexxija mill-industrija għat-trasferiment ta' kompetenzi, speċjalment lejn dawk il-pajjiżi b'oqfsa regolatorji inqas żviluppati;

90.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Istati Membri.

22.2.2013   

MT

Il-Ġurnal Uffiċjali tal-Unjoni Ewropea

CE 51/56

—

wara li kkunsidra r-Regolament tal-Kummissjoni (KE) Nru 800/2008 tas-6 ta' Awwissu 2008 li jiddikjara li ċerti kategoriji ta' għajnuna bħala kompatibbli mas-suq komuni (Regolament għal Eżenzjoni Ġenerali Sħiħa) skont l-Artikoli 87 u 88 tat-Trattat (1),

—

wara li kkunsidra r-Rapport tal-Kummissjoni tat-3 ta’ Ottubru 2008 bl-isem ‘Implimentazzjoni tal-għanijiet ta’ Barċellona rigward il-faċilitajiet ta’ kura għat-tfal f’età ta’ qabel l-iskola’ (COM(2008)0638),

—

wara li kkunsidra r-Rapport tal-Kummissjoni ‘Promotion of Women Innovators and Entrepreneurship’ (Promozzjoni tal-Innovatriċi u tal-Intraprenditorija tan-Nisa) tal-25 ta’ Lulju 2008,

—

wara li kkunsidra l-Komunikazzjoni tal-Kummissjoni tal-25 ta' Ġunju 2008 bit-titolu ‘Aħseb l-Ewwel fiż-Żgħir’: “Att dwar in-Negozji ż-Żgħar” għall-Ewropa (COM(2008)0394),

—

wara li kkunsidra d-Direttiva 2010/41/UE tal-Parlament Ewropew u tal-Kunsill tas-7 ta' Lulju 2010 dwar l-applikazzjoni tal-prinċipju ta' trattament ugwali bejn l-irġiel u n-nisa li jeżerċitaw attività li fiha jaħdmu għal rashom u li tħassar id-Direttiva tal-Kunsill 86/613/KEE (2),

—

wara li kkunsidra d-Deċiżjoni tal-Kunsill 2010/707/UE tal-21 ta' Ottubru 2010 dwar il-linji gwida għall-politika tal-Istati Membri dwar l-impjiegi (3),

—

wara li kkunsidra r-Regolament tal-Kunsill (KE) Nru 1346/2000 tas-29 ta' Mejju 2000 dwar proċedimenti ta’ falliment (4),

—

wara li kkunsidra r-riżoluzzjoni tiegħu tal-10 ta' Marzu 2009 dwar l-Att tan-Negozji Żgħar (5),

—

wara li kkunsidra r-riżoluzzjoni tiegħu tat-30 ta’ Novembru 2006 dwar Wasal iż-żmien li ningranaw – Noħolqu Ewropa ta' imprenditorija u tkabbir (6),

—

wara li kkunsidra r-riżoluzzjoni tiegħu tal-10 ta' Ottubru 2002 dwar ir-rapport tal-Kummissjoni lill-Parlament Ewropew u l-Kunsill: L-Inizjattiva għat-Tkabbir u l-Impjiegi - miżuri fuq l-assistenza finanzjarja għall-innovazzjoni u għall-ħolqien ta' impjiegi ta' intrapriżi żgħar u medji (SMEs) (7),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi (A7-0207/2011),

A.

billi huwa importanti li jkun rikonoxxut li t-tqassim bejn in-nisa u l-irġiel tal-familja u r-responsabbiltajiet domestiċi tagħhom, l-aktar permezz ta' rikors akbar għal liv tal-ġenituri u tal-paternità, huwa essenzjali għall-avvanz u l-ksib tal-ugwaljanza bejn is-sessi u għalhekk jinħtieġ li jinżamm bilanċ bejn ix-xogħol u l-ħajja, li jista' jgħin lin-nisa jibdew negozju tagħhom biex jiżguraw l-indipendenza finanzjarja tagħhom u l-indipendenza fix-xogħol,

B.

billi l-impjieg indipendenti ġeneralment joffri flessibilità akbar fir-rigward tal-ħinijiet tax-xogħol, l-għadd ta’ sigħat maħduma u l-post tax-xogħol milli l-impjieg dipendenti, u b’hekk jipprovdi possibilitajiet għal dawk li jimmiraw li joħolqu bilanċ bejn ix-xogħol u l-kompiti ta’ kura tagħhom jew attivtajiet oħra, jew għal dawk li jeħtieġu post tax-xogħol adattat,

C.

billi l-kategorija ta' intrapriżi żgħar ħafna, żgħar u ta’ daqs medju (SMEs) hija magħmulha minn intrapriżi li jħaddmu anqas minn 250 persuna u li ta' kull sena l-valur tal-introjtu tagħhom ma jaqbiżx l-EUR 50 miljun u t-total tal-karta tal-bilanċ tagħhom ma jaqbiżx l-EUR 43 miljun,

D.

billi 99 % tat-twaqqif ta' negozji fl-Ewropa huma intrapriżi żgħar ħafna jew intrapriżi żgħar u terz minn dawn jitniedu minn nies qiegħda, u billi l-intrapriżi żgħar ħafna li jimpjegaw anqas minn 10 min-nies jammontaw għal 91 % tan-negozji Ewropej,

E.

billi l-‘Pjan ta’ Azzjoni: L-Aġenda Ewropea għall-Intraprenditorija’ (COM(2004)0070) jiġbed l-attenzjoni għall-bżonn ta' skemi aħjar tas-sigurtà soċjali, billi l-Kummissjoni qed tippjana li tippreżenta Komunikazzjoni dwar l-Att dwar in-Negozji ż-Żgħar kmieni fl-2011, u billi l-bżonn ta' dispożizzjoni mtejba tas-sigurtà soċjali għal imprendituri nisa partikolarment għandu jkun enfasizzat,

F.

billi n-nisa jistgħu jaffaċċjaw ostakli fl-aċċess għall-appoġġ informazzjonali u finanzjarju u għall-għodda u s-servizzi teknoloġiċi li jistgħu joħolqulhom limiti fil-kapaċità tagħhom li jespandu n-negozji tagħhom u jikkompetu għal kuntratti tal-gvern u muniċipali,

G.

billi, skont it-terminoloġija tal-Kummissjoni Ewropea, l-impjieg indipendenti fals huwa tip ta’ impjieg li ma jeżistix li jinħoloq minħabba klassifikazzjoni inadegwata tal-istat ta’ impjieg li ssir biex wieħed japprofitta mis-sistema ta’ protezzjoni soċjali u li teskludi lil ħaddiema bħal dawn minn drittijiet bażiċi tal-ħaddiema sabiex jitnaqqsu l-ispejjeż tal-impjieg;billi l-ħaddiema kkonċernati jibqgħu ekonomikament dipendenti,

H.

billi l-intraprendituri huma dawk il-persuni (sidien ta' negozji) li jfittxu biex jiġġeneraw valur, bis-saħħa tal-ħolqien jew tat-tkabbir ta' attività ekonomika, billi jidentifikaw u jisfruttaw prodotti, proċessi jew swieq ġodda (8),

I.

billi intraprenditur mara tista' tiġi ddefinita bħala mara li ħolqot negozju fejn hija għandha l-ikbar sehem fih u fejn hija tieħu interess attiv fit-teħid tad-deċiżjonijiet, fit-teħid tar-riskji u fil-ġestjoni ta' kuljum,

J.

billi bosta negozji, immexxija fil-maġġorparti min-nisa, inbdew fir-reġjuni tal-‘Objettiv 1’ li dalwaqt se jitneħħew mill-istatus tagħhom ta’ reġjuni żvantaġġati meta jissieħbu pajjiżi ġodda,

K.

billi bosta mir-reġjuni li mhux se jibqgħu jirċievu appoġġ jinkludu żoni rurali li għadhom mhumiex adegwatament żviluppati, filwaqt li reġjuni f’pajjiżi li ssieħbu reċentement sikwit ma jkollhomx ir-riżorsi kulturali, soċjali u organizzattivi biex jagħmlu l-aħjar użu possibbli mill-finanzjament Ewropew,

L.

billi hemm diskrepanzi bejn l-Istati Membri u l-għadd ta' intraprendituri nisa; billi inqas nisa milli rġiel iqisu li l-intraprenditorija bħala għażla ta' karriera vijabbli u minkejja r-riżultat pożittiv fl-aħħar għaxar snin fil-għadd ta’ nisa li jmexxu SMEs, fl-Unjoni Ewropea huma biss 1 minn 10 nisa li huma intraprendituri meta mqabbla ma’ 1 minn 4 rġiel, billi n-nisa jammontaw għal madwar 60 % tal-gradwati universitarji kollha, iżda mhumiex rappreżentati biżżejjed fl-impjieg full-time fis-suq tax-xogħol, partikolarment fil-qasam tan-negozju; billi huwa kruċjali li n-nisa jitħeġġu u jingħataw is-setgħa li jibdew negozji intraprenditorjali sabiex jitnaqqsu l-inugwaljanzi eżistenti bejn is-sessi,

M.

billi l-att tal-Istati Uniti ‧Women's Business Ownership Act (1988)‧ żied l-ammont ta' nisa proprjetarji ta' negozju bħala perċentwali min-negozji kollha minn 26 % fl-1992 għal 57 % fl-2002; billi s-suċċess ta’ dan l-Att jista' jgħin lill-UE fl-identifikazzjoni ta' prattiki tajba,

N.

billi dawk l-intraprendituri nisa li għandhom inqas għarfien dwar l-għażliet disponibbli tal-finanzjament u inqas esperjenza fil-ġestjoni finanzjarja, minħabba fatturi soċjali, jeħtieġu appoġġ mhux biss matul il-fażi tal-bidu imma wkoll tul iċ-ċiklu ekonomiku ta' impriża, minħabba li hemm differenza fit-tip ta' appoġġ meħtieġ għall-ippjanar tan-negozju fil-fażijiet tal-bidu u tal-iżvilupp,

O.

billi l-intraprenditorija femminili u l-SMEs nisa jipprovdu sors ewlieni għal żieda fl-għadd ta' impjiegi femminili u b'hekk jiġi sfruttat iktar il-livell ta' edukazzjoni tan-nisa, kif ukoll jiġi żgurat li n-nisa ma jidħlux għal impjiegi prekarji, u billi l-intraprenditorija tan-nisa tiżgura dinamiżmu u innovazzjoni fin-negozju, li l-potenzjal tiegħu għadu mhux qed jiġi sfruttat fl-Unjoni Ewropea, b’żieda fl-għadd ta' intraprendituri nisa li jirriżulta f’impatt pożittiv u f'kontribuzzjoni immedjata għall-ekonomija b’mod ġenerali; billi fi klima ekonomika instabbli l-miżuri ta' appoġġ għall-intraprendituri nisa huma sikwit ittraskurati,

P.

billi l-irġiel u n-nisa ġeneralment m'għandhomx l-istess opportunitajiet biex imexxu u jiżviluppaw kumpaniji u billi l-promozzjoni tal-intraprenditorija tan-nisa hija proċess twil li titlob il-ħin biex jinbidlu l-istrutturi u l-attitudnijiet fis-soċjetà; billi n-nisa minn dejjem kienu intraprenditorjali, imma r-regoli u l-firda tradizzjonali tar-rwoli fissru li l-intraprenditorija mhux dejjem kienet għażla għan-nisa,

Q.

billi l-Bank Ewropew tal-Investiment (BEI) żied sostanzjalment l-attività ta' self tiegħu ddedikata lill-SMEs minn EUR 8,1 biljun fl-2008 għal madwar EUR 11,5 biljun fl-2009; billi l-istrumenti tal-SME mogħtija skont il-Programm ta’ Qafas għall-Kompetittività u l-Innovazzjoni kienu kontinwament implimentati (EUR 1,13 biljun allokati għall-2007-2013); billi l-Kummissjoni adottat qafas temporanju dwar l-għajnuna statali 2009/2010 li jagħti lill-Istati Membri iktar possibilitajiet biex jindirizzaw l-effetti tal-problema tal-kreditu,

R.

billi programmi ta' dispożizzjoni għall-investiment iqawwu l-kapaċità ta' SME jew intraprenditur biex jifhem il-biżgħat tal-banek jew ta' investituri oħra li jkunu jistgħu jipprovdu finanzjament estern,

S.

billi intraprendituri nisa huma grupp eteroġenu, li jvarja f'termini ta' età, sfond u edukazzjoni, minn dawk li għadhom kemm iggradwaw għal dawk li mxew sew fil-karriera tagħhom li jixtiequ jsibu toroq ġodda biex jużaw it-talenti tagħhom tal-ġestjoni, l-ispirtu intraprenditorjali, il-ħiliet komunikattivi, l-approċċ konsenswali u l-abilità biex jivvalutaw ir-riskji b'mod preċiż, u billi l-intraprendituri nisa huma attivi f'medda wiesgħa ta' setturi u negozji; billi l-irġiel u n-nisa m'għandhomx l-istess opportunitajiet biex imexxu u jiżviluppaw kumpaniji minħabba sterjotipi sesswali u ostakli strutturali, in-nisa li sikwit u inġustifikabbilment huma mifhuma bħala dawk li għandhom nuqqas ta' ħiliet intraprenditorjali bħalma huma l-fiduċja fihom infushom, il-ħiliet tal-ġestjoni, l-assertività u t-teħid tar-riskji,

T.

billi l-konsulenza u l-appoġġ minn nisa attivi kif ukoll minn intraprendituri rġiel jistgħu jgħinu intrapriżi ġodda minn intraprendituri nisa biex jingħelbu ħafna mill-biżgħat marbuta mal-eżordji tan-negozji,

U.

billi huwa importanti li jkunu promossi rakkomandazzjonijiet prattiċi li jqisu r-realtà tal-ħajja tan-negozju u ekonomika fl-ambjent tas-suq kompetittiv,

V.

billi ma kienx hemm biżżejjed riċerka dwar l-intraprenditorija tan-nisa fil-livell tal-UE li tista’ tinforma l-iżvilupp u l-implimentazzjoni ta’ politiki madwar l-UE f’dan il-qasam,

W.

billi, f'ħafna Stati Membri, persuni li jaħdmu għal rashom m'għandhomx drittijiet soċjali xierqa, bħalma huwa l-liv tal-maternità u tal-paternità, l-assigurazzjoni kontra l-qgħad u l-mard, il-ħlas għal diżabilità, dispożizzjonijiet tal-pensjoni u faċilitajiet għat-tfal, anki jekk faċilitajiet simili huma essenzjali biex jippermettu intraprendituri nisa jirrikonċiljaw l-impenn professjonali u l-ħajja familjari u jippermettu l-Unjoni Ewropea tgħolli l-isfida demografika; billi, fil-linji gwida għall-politiki tal-impjegar, l-Istati Membri huma mitluba jippromwovu l-impjieg indipendenti filwaqt li jiżguraw sigurtà soċjali adegwata għall-persuni li jaħdmu għal rashom,

X.

billi hemm grupp magħmul prinċipalment minn nisa li huwa attiv fix-xogħol bħalma hu x-xogħol domestiku jew dak tal-kura privata li mhuwiex uffiċjalment impjegat iżda wkoll li ma jaħdimx għal rasu, u għalhekk ma jibbenefika minn l-ebda protezzjoni soċjali,

1.

Jinkoraġġixxi lill-Kummissjoni, lill-Istati Membri u lill-awtoritajiet reġjonali u lokali biex jagħmlu użu aħjar mill-opportunitajiet tal-iffinanzjar li huma disponibbli għall-intraprendituri nisa bis-saħħa ta' għotjiet speċjali, kapital ta' riskju, dispożizzjonijiet tas-sigurtà soċjali u rati mraħħsa tal-interessi li jippermettu aċċess ġust u ugwali għall-finanzjament, bħalma hi l-Faċilità Ewropea ta' Mikrofinanzjament għall-Progress, li tipprovdi mikrokrediti ta' mhux iktar minn EUR 25 000 lil mikrointrapriżi u lil dawk li jridu jibdew negozju żgħir tagħhom mingħajr aċċess għas-servizzi bankarji tradizzjonali, bħalma huma dawk li huma qiegħda;

2.

Jistieden lill-Istati Membri jifformaw kampanji nazzjonali, inklużi workshops u seminars, li jippromwovu u jinformaw lin-nisa b’mod iktar effettiv dwar il-Faċilità Ewropea ta’ Mikrofinanzjament għall-Progress u dwar il-possibilitajiet kollha ta’ finanzjament offruti minn din il-faċilità;

3.

Jirrimarka li l-ugwaljanza bejn in-nisa u l-irġiel tikkostitwixxi prinċipju fundamentali tal-UE, rikonoxxut mit-Trattat dwar l-Unjoni Ewropea u mill-Karta tad-Drittijiet Fundamentali tal-Unjoni Ewropea, waqt li, billi minkejja l-progress sinifikanti li sar, għad fadal ħafna inugwaljanzi bejn in-nisa u l-irġiel f’termini ta’ intraprenditorija u ta’ teħid ta’ deċiżjonijiet,

4.

Jiddispjaċih li l-kriżi finanzjarja u ekonomika żiedet il-problemi għal bosta intraprendituri nisa potenzjali, speċjalment fl-ewwel tliet snin tan-negozju; jisħaq li l-iżvilupp ta' SMEs li jagħmlu profitt kemm għall-irġiel kif ukoll għan-nisa jista' jgħin biex l-Istati Membri jiksbu iktar tkabbir ekonomiku sostenibbli;

5.

Jilqa' t-taqsima separata dwar għajnuna għal intraprenditorija femminili fir-Regolament tal-Kummissjoni (KE) Nru 800/2008 msemmi hawn fuq; jistieden lill-Kummissjoni tiżgura li din l-għajnuna tibqa' tingħata f'qafas ta’ appoġġ Komunitarju futur sabiex tgħin jissaħħu l-intraprendituri nisa wara l-iskadenza ta' dan ir-Regolament;

6.

Jistieden lill-Istati Membri jiżguraw li s-SMEs immexxija (u mwaqqfa) minn nisa jkunu jistgħu jibbenefikaw ukoll mill-vantaġġi fiskali pprovduti għal SMEs;

7.

Iħeġġeġ lill-Kummissjoni u lill-Istati Membri jimplimentaw sew ir-Regolament tal-Kunsill (KE) Nru 1346/2000 tad-29 ta’ Mejju 2000 dwar proċedimenti ta’ falliment u jiżguraw li l-intraprendituri li m'għadhomx biżżejjed flus biex jonoraw l-obbligi kummerċjali tagħhom jew li għaddew minn waqfiet fil-karrieri tagħhom ikollhom aċċess għal assistenza u appoġġ ta' rkupru finanzjarju sabiex ikunu jistgħu jkomplu bi proġetti mibdija jew ibiddlu d-direzzjoni;

8.

Jistieden lill-Kummissjoni u lill-Istati Membri jippromwovu l-iskambju tal-aħjar prattika bejn ir-reġjuni li mhux se jibqgħu jikkwalifikaw għall-istatus tal-Objettiv 1 u r-reġjuni f’pajjiżi li għadhom kemm issieħbu sabiex jiżguraw l-involviment ta’ intraprendituri nisa, partikolarment fis-settur agrikolu bi skala żgħira, kemm biex jippermettilhom jgħaddu l-esperjenza li kisbu, u b’hekk jevitaw it-tneħħija ħesrem tal-appoġġ finanzjarju, kif ukoll bl-għan tat-taħriġ u tal-ħolqien ta’ klassi ġdida ta’ nisa f’pożizzjonijiet maniġerjali fil-pajjiżi li ssieħbu l-iktar reċentement;

9.

Jistieden lill-Kummissjoni, lill-Istati Membri u lill-Konfederazzjoni tan-Negozji Ewropej jippromwovu l-intraprenditorija femminili, l-appoġġ finanzjarju u l-istruttura tal-konsulenza professjonali u biex iwettqu, flimkien ma' skejjel u organizzazzjonijiet tan-negozju u organizzazzjonijiet nazzjonali għan-nisa, programmi ta' dispożizzjoni għall-investiment li jistgħu jgħinu lin-nisa joħolqu pjanijiet kummerċjali vijabbli u jsibu u jiddefinixxu investituri potenzjali;

10.

Jistieden lill-Kummissjoni u lill-Istati Membri jinvestigaw l-ostakli għall-intraprenditorija femminili u partikolarment imexxu analiżi komprensiva tal-aċċess tan-nisa għall-finanzi;

11.

Jistieden lill-Istati Membri jħeġġu lill-banek u lill-istituzzjonijiet finanzjarji jqisu servizzi ta’ appoġġ għan-negozji li jistgħu jużawhom faċilment in-nisa;

12.

Jistieden lill-Kummissjoni, lill-Istati Membri u lill-Konfederazzjoni tan-Negozji Ewropej jikkunsidraw il-ħolqien ta' skemi ta' konsulenza u programmi ta' appoġġ li jagħmlu użu partikulari minn skemi ta' tixjiħ attiv li jutilizzaw is-suġġerimenti u l-esperjenza ta' rġiel u nisa li rtiraw minn professjonijiet intraprenditorjali;

13.

Jistieden lill-Istati Membri jagħtu attenzjoni partikolari s-sitwazzjoni tan-nisa li għandhom iktar minn 50 sena biex jgħinuhom iwaqqfu l-kumpaniji tagħhom;

14.

Jinsisti li l-Istati Membri jimplimentaw politiki li jippermettu lin-nisa jiksbu bilanċ adegwat bejn il-ħajja u x-xogħol u jistabbilixxu faċilitajiet xierqa ta' kura għat-tfal, minħabba li l-prezzijiet mhux raġonevoli tagħhom, in-nuqqas ta' disponibilità u ta' kwalità tagħhom joħolqu ostakoli żejda lin-nisa li jixtiequ jniedu intrapriża;

15.

Jistieden lill-Kummissjoni u lill-Istati Membri jappoġġaw l-aċċess għal valutazzjonijiet potenzjali ta' tkabbir ta' intraprendituri nisa li jkejlu l-potenzjal tar-riskju u li huma mmexxija minn konsulenti ta' esperjenza;

16.

Jinnota li diversi studji riċenti taw kreditu lil intraprendituri nisa talli għandhom approċċ iktar meqjus mill-irġiel fit-teħid ta' riskji ekonomiċi u finanzjarji; iqis li s-sejbiet ta' tali studji għandhom jiġu eżaminati iktar mill-qrib biex ikun aċċertat jekk dawn humiex korretti u liema konklużjonijiet għandhom jittieħdu minnhom;

17.

Jistieden lill-Istati Membri u lill-awtoritajiet reġjonali jħaddnu kunċetti edukattivi u nazzjonali biex iqajmu l-kuxjenza tal-bniet għall-intraprenditorji u n-nisa fil-ġestjoni u jiżviluppaw ‧intraprenditorija żagħżugħa‧ fl-iskejjel sabiex tul il-kors ta' sena skolastika l-istudenti femminili jkunu jistgħu, jekk jixtiequ, jesperjenzaw iċ-ċiklu tal-ħajja ta' negozju mit-twelid tiegħu, it-treġija u l-likwidazzjoni ta' kumpanija, filwaqt li jintrabat ma' dan il-proċess il-konsulenza minn għalliema u minn konsulenti minn ‧tixjiħ attiv‧ mill-komunità kummerċjali lokali.

18.

Jirrikonoxxi li minn età żgħira ħafna bniet ma jitħeġġux jistudjaw suġġetti tal-iskola jew tal-università li huma meqjusa bħala ‧tal-irġiel‧ minnhom innifishom, bħax-xjenza, il-matematika u t-teknoloġija; jirrakkomanda l-introduzzjoni fl-iskejjel ta' korsijiet inizjali dwar il-bażi tal-intraprenditorija u twessigħ tal-medda ta' suġġetti u karrieri possibbli miftuħa għall-bniet, sabiex dawn ikunu jistgħu jiżviluppaw il-bażi tal-għarfien u sensiela sħiħa ta' ħiliet neċessarji biex jirnexxu fin-negozju; jenfasizza l-importanza li titjieb l-impjegabilità tat-tfajliet u tan-nisa permezz ta' taħriġ tal-ħiliet u t-tagħlim tul il-ħajja;

19.

Jitlob lill-istituzzjonijiet tal-UE, lill-Istati Membri u lill-awtoritajiet reġjonali jinkoraġġixxu programmi ta' intraprenditoriji jew ta' apprendistat ta' sena mmirati għat-tfajliet u skambji f'universitajiet madwar l-Ewropa, fejn l-istudenti jmexxu proġetti ta' żvilupp ibbażati fuq kunċetti reali tan-negozju bil-għan li jibdew kumpanija vijabbli u li tkun tagħmel il-qligħ waqt is-snin tal-edukazzjoni; jikkunsidra wkoll li attivitajiet minn għaqdiet ta' gradwati u ta' studenti għandhom jifformaw parti integrali minn dan il-proċess biex tiddaħħal il-fiduċja u wkoll il-mentalità ta' ‧mudell‧ fl-istudenti; jitlob lill-Kummissjoni biex tinkoraġġixxi l-iskambju tal-aħjar prassi f'dan il-qasam;

20.

Jitlob lill-Istati Membri u lill-Konfederazzjoni tan-Negozji Ewropej jinsebilizzaw, u jippromwovu l-programm ta' skambju tal-intraprendituri Ewropej, ‧Erasmus għall-intraprendituri żgħar‧, li għandu l-għan speċifiku li jikkontribwixxi biex titjieb l-intraprenditorija, l-internazzjonalità u l-kompetittività ta' intraprendituri potenzjali li għadhom jibdew fl-UE u ta’ mikrointrapriżi u intrapriżi żgħar li għadhom jibdew, u li joffru l-possibilità lill-intraprendituri ġodda biex jaħdmu sa 6 xhur ma' intraprenditur tal-esperjenza fl-SME tiegħu/tagħha f'pajjiż ieħor tal-UE; jirrakkomanda boroż ta' studju speċifiċi, bħall-għotjiet tal-UE ‧Leonardo da Vinci‧, biex jingħataw lil studenti tfajliet li għandhom potenzjal eċċezzjonali, li laħqu l-ogħla punti f'ċerimonji ta’ għoti ta’ premji għall-‧aqwa prattika‧ għal gradwati li kisbu suċċess;

21.

Jinsisti li l-Istati Membri jippromwovu aċċess ugwali għall-kuntratti tal-akkwist u jagħmlu l-politika tal-akkwist fis-settur pubbliku ‧newtrali għas-sessi‧;

22.

Jistieden lill-Istati Membri jinkoraġġixxu l-programmi ta' kooperazzjoni transkonfinali mmirati lejn l-istabbiliment ta' ċentri transkonfinali ta' appoġġ għall-intraprendituri nisa sabiex jipprovdu bażi għall-iskambji ta' esperjenza, ir-razzjonalizzazzjoni tar-riżorsi, u d-disseminazzjoni tal-aħjar prassi;

23.

Jistieden lill-Kummissjoni u lill-Istati Membri jutilizzaw it-teknoloġiji tal-informazzjoni u tal-komunikazzjoni li jistgħu jgħinu biex ikun hemm sensibilizzazzjoni u appoġġ fin-netwerking għan-nisa; jirrikjedi li l-qasma diġitali madwar l-Ewropa tiġi indirizzata permezz tat-titjib tal-konnessjonijiet broadband, u b'hekk ikun possibbli li n-nisa jkollhom il-flessibilità li jmexxu negozji mid-dar jekk ikunu jixtiequ dan;

24.

Jistieden lill-Kummissjoni u lill-Istati Membri jinkoraġġixxu l-parteċipazzjoni tan-nisa fil-kmamar tal-kummerċ lokali, f'NGOs speċifiċi, fi gruppi li jagħmlu pressjoni u f'organizzazzjonijiet ibbażati fl-industrija li jifformaw l-integrazzjoni ġenerali tal-komunità kummerċjali biex huma jkunu jistgħu jiżviluppaw u jsaħħu l-ħiliet kummerċjali tal-kompetittività, u jistieden lill-kmamar tal-kummerċ biex jagħmlu l-parti tagħhom li jistiednu attivament lil intraprendituri nisa biex ikunu involuti u biex jippromwovu t-twaqqif ta' servizzi speċjali u gruppi rappreżentattivi għal intraprendituri nisa li jassistu t-tisħiħ u l-iżvulupp tagħhom f'kultura intraprenditorjali;

25.

Jitlob lill-Istati Membri jenfasizzaw ir-rwol tal-NGOs fit-tħeġġiġ u fl-iffaċilitar tal-intraprenditorija tan-nisa;

26.

Jitlob lill-Kummissjoni tippromwovi l-iskambju tal-aħjar prassi sabiex tinkoraġġixxi l-intraprenditorija fost in-nisa; jitlob lill-Kummissjoni u lill-Istati Membri u lill-Konfederazzjoni tan-Negozji Ewropej iħeġġu u jagħmlu provediment għal intraprendituri nisa biex ikunu marbuta mas-sħab xierqa tan-negozji f'oqsma oħra sabiex huma jkun jista’ jkollhom l-opportunità li jaqsmu l-esperjenzi u l-prattiki u jiksbu fehim aħjar tad-dinja kummerċjali fil-wisa' tagħha;

27.

Jistieden lill-Kummissjoni tistabbilixxi kunsilli konsultattivi b'għarfien espert speċifiku dwar l-isfidi u l-ostakoli li jħabbtu wiċċhom l-intraprendituri nisa bħala parti min-network tal-Enterprise Europe, li jista' jservi wkoll ta' punti uniċi ta' kuntatt għal każijiet ta' diskriminazzjoni mill-fornituri ta' servizzi finanzjarji dwar l-aċċess għall-kreditu;

28.

Jirrikonoxxi l-importanza ta' ambaxxaturi nisa, pereżempju n-Netwerk Ewropew ta’ Ambaxxaturi Nisa tal-Intraprenditorija (ENFEA), li jenfasizza r-rwol li n-nisa jista' jkollhom fil-ħolqien ta' impjiegi u jippromwovi l-kompetittività billi jispira lin-nisa u lill-bniet biex jiżviluppaw negozju tagħhom bis-saħħa ta' attivitajiet fl-iskejjel, universitajiet, gruppi komunitarji u l-midja; jinnota li l-Ambaxxaturi għandu jkollhom sfondi, etajiet u esperjenzi differenti u jkunu attivi fl-industriji kollha;

29.

Jistieden lill-Kummissjoni biex tmexxi kampanja li tippromwovi l-involviment tan-nisa fix-xogħol permezz tat-twaqqif tal-kumpaniji tagħhom, u fl-istess ħin biex tipprovdi informazzjoni dwar id-diversi strumenti disponibbli li jiffaċilitaw il-bidu tan-negozji;

30.

Iqis li s-Servizz Ewropew għall-Azzjoni Esterna (SEAE) u d-delegazzjonijiet tal-UE fil-pajjiżi terzi, b'kooperazzjoni mal-missjonijiet kummerċjali tal-Istati Membri, jistgħu jgħinu biex jiġu żviluppati netwerks ta' SMEs immexxija min-nisa;

31.

Jistieden lill-Kummissjoni tiġbor data komparabbli u komprensiva dwar l-intraprenditorija femminili fl-Unjoni Ewropea (bħalma hija l-età tal-intraprendituri femminili, it-taqsima tan-negozju, id-daqs tan-negozju, kemm ilu jeżisti n-negozju u l-etniċità skont ir-regolamenti tal-Istati Membri dwar il-protezzjoni tad-data personali) bl-għajnuna tal-Fondazzjoni Ewropea għat-Titjib tal-Kondizzjonijiet tal-Għajxien u tax-Xogħol u l-Istitut Ewropew għall-Ugwaljanza bejn is-Sessi, b'tali mod li ma titfax piż żejjed fuq l-SMEs, u tanalizza dawn id-data fir-rapport annwali fuq l-SMEs tal-UE tar-Reviżjoni tal-Prestazzjoni tal-SME; iqis li d-data u l-informazzjoni miġbura għandhom jilluminaw lill-persuni li jieħdu d-deċiżjonijiet dwar il-problemi speċifiċi li intraprendituri nisa jaffaċċjaw;

32.

Jilqa' l-istudju tal-Kummissjoni tal-2008 dwar l-innovaturi nisa u l-intraprenditorija, u jħeġġeġ lill-Istati Membri biex jaderixxu mar-rakkomandazzjonijiet politiċi tiegħu;

33.

Jitlob li jittieħdu miżuri mill-Kummissjoni, mill-Istati Membri u mill-awtoritajiet reġjonali u lokali jittrattaw l-intraprendituri nisa bl-istess mod bħala huma ttrattati l-impjegati meta jiġu għal servizzi soċjali u komunitarji oħra, u biex titjieb il-pożizzjoni soċjali tal-kointraprendituri u l-intraprendituri nisa fl-SMEs – permezz ta' arranġament aħjar tal-maternità, faċilitajiet aħjar tal-kura tat-tfal u tal-kura tal-anzjani u tal-persuni bi bżonnijiet speċjali, kif ukoll dispożizzjoni aħjar tas-sigurtà soċjali, u billi jitkissru l-isterjotipi bbażati fuq is-sessi – u biex titjieb il-pożizzjoni kulturali u legali tagħhom, speċjalment fir-riċerka, fix-xjenza, fl-inġinerija, fil-medja l-ġodda, fl-ambjent, fit-teknoloġija ambjentali u ta' livell ta' karbonju baxx, fis-setturi agrikoli u industrijali f'żoni urbani u rurali;

34.

Iħeġġeġ lill-Istati Membri biex jeżaminaw l-ostakli għall-awtoimpjieg minn nisa Roma, biex joħolqu programmi li jagħmlu reġistrazzjoni aċċessibbli, rapida u mhux għolja possibbli għal intraprendituri nisa Roma u għal persuni impjegati għal rashom u biex jistabbilixxu modi għal kreditu aċċessibbli – inkluż il-mikrokreditu – għall-finanzjament ta' intrapriżi ta' nisa Roma, u jħeġġeġ lill-Kummissjoni biex tappoġġa dawn l-attivitajiet permezz ta' mekkaniżmi rilevanti ta' fondi;

35.

Jistieden lill-Istati Membri biex jiġġieldu b'mod attiv l-awtoimpjieg falz billi jiddefinixxi b'mod effettiv l-awtoimpjieg u jissanzjonaw l-awtoimpjieg falz;

36.

Jistieden lill-Kummissjoni u lill-Istati Membri biex jistabbilixxu programm immirat biex jgħin lil dawk li jkunu attivi fix-xogħol domestiku, fix-xogħol tal-kura u f'xogħol ieħor ta' servizz, prinċipalment in-nisa, li la huma impjegati u lanqas huma impjegati għal rashom, biex jidħlu fl-impjieg għal rashom iddikjarat jew jistabbilixxu l-intrapriża tagħhom;

37.

Jistieden lill-Kummissjoni u lill-Istati Membri joffru appoġġ lil nisa li qed jippjanaw li jibdew jew li jixtru kumpanija, jew li jibdew imexxu negozju tal-familja, inklużi dawk li huma involuti fil-professjonijiet liberali bħalma huma dawk li jkollhom uffiċċju legali jew mediku privat; iqis li l-appoġġ għandu jikkonsisti f'seminars u workshops xierqa ta' taħriġ sabiex jagħmluha possibbli għal dawn in-nisa li jiksbu l-ħiliet maniġerjali biex jaffaċċjaw b'suċċess sitwazzjoni ta' akkwist, partikolarment evalwazzjonijiet, l-ivvalutar ta' kumpanija u kwistjonijiet bankarji u legali; jirrikonoxxi li għandha tingħata attenzjoni partikulari lil nisa taħt il-25 sena u dawk ta' 'l fuq minn 50, minħabba li dawn huma l-iktar persuni milquta mill-kriżi finanzjarja;

38.

jistieden lill-Polonja tenfasizza l-intraprenditorija tan-nisa matul il-presidenza tagħha, partikolarment fil-bidu ta' Ottubru permezz tal-Ġimgħa Ewropea tal-SME; jistieden lill-Kummissjoni tipproponi, kemm jista' jkun malajr, pjan ta' azzjoni biex jiżdied il-proporzjon tan-nisa intraprendituri, u biex tniedi kampanji ta' sensibilizzazzjoni li jkissru l-isterjotipi fejn skonthom in-nisa mhumiex kapaċi jkunu mexxejja tajbin fin-negozju;

39.

Jistieden lin-negozji tal-familji jipprovdu l-istess livell ta' oppportunità għall-qraba nisa – bħall-ulied bniet – meta jqisu li jħallu kumpanija lil xi ħadd jew li jittrasferixxuha;

40.

Jistieden lill-Istati Membri jadottaw miżuri li jagħmluha eħfef li wieħed jirrikonċilja t-talbiet li jikkompetu ma' xulxin tal-familja u tal-ħajja privata, li jiffaċilitaw l-impjieg tan-nisa u jgħinu biex jitjiebu l-prospetti tal-karriera għal dawk impjegati għal rashom;