L-ERBATAX-IL RAPPORT ANNWALI SKONT L-ARTIKOLU 8(2) TAL-POŻIZZJONI KOMUNI TAL-KUNSILL 2008/944/PESK LI TIDDEFINIXXI REGOLI KOMUNI LI JIRREGOLAW IL-KONTROLL TA’ ESPORTAZZJONIJIET TA’ TEKNOLOĠIJA U TAGĦMIR MILITARI

2012/C 386/01

INTRODUZZJONI

Dan ir-rapport ikopri l-attivitajiet li saru mill-UE u l-Istati Membri tagħha fil-qafas tal-implimentazzjoni tal-Pożizzjoni Komuni tal-Kunsill 2008/944/PESK (1) matul l-2011 u l-2012. Sa fejn hija kkonċernata d-data dwar l-armi konvenzjonali, ir-rapport ikopri s-sena kalendarja 2011.

Matul l-2011 u l-2012 l-UE u l-Istati Membri komplew jimplimentaw il-Pożizzjoni Komuni 2008/944/PESK li tiddefinixxi regoli Komuni li jirregolaw il-kontroll ta’ esportazzjonijiet ta’ teknoloġija u tagħmir militari, li fl-2008 ssostitwiet il-Kodiċi ta' Kondotta tal-UE dwar l-esportazzjoni tal-armi minn Ġunju 1998. L-Artikolu 15 tal-Pożizzjoni Komuni jistabbilixxi li l-Pożizzjoni Komuni għandha tiġi riveduta tliet snin wara li tiġi adottata. Fuq din il-bażi, il-Grupp ta' Ħidma tal-Kunsill tal-UE dwar l-Esportazzjoni ta' Armi Konvenzjonali (COARM) beda ħidma ta' tħejjija għar-reviżjoni fit-tieni nofs tal-2011. Fix-xhur li għaddew saret valutazzjoni bir-reqqa tad-dispożizzjonijiet u l-implimentazzjoni tal-Pożizzjoni Komuni li kkonfermat li d-dispożizzjonijiet tal-Pożizzjoni Komuni, u l-istrumenti li tipprevedi, għadhom iservu tajjeb l-għanijiet iffissati mill-Kunsill fl-2008 u jipprovdu bażi solida għall-koordinament tal-politiki tal-Istati Membri dwar l-esportazzjoni tal-armi. Fix-xhur li ġejjin il-Kunsill ser ikompli jaħdem fuq metodi biex titjieb l-implimentazzjoni tal-Pożizzjoni Komuni. Ir-riżultati preliminari tal-proċess ta' reviżjoni mistennija jkunu riflessi fil-Konklużjonijiet tal-Kunsill sa tmiem l-2012.

Il-pajjiżi terzi li ġejjin allinjaw ruħhom uffiċjalment mal-kriterji u l-prinċipji tal-Pożizzjoni Komuni 2008/944/PESK: il-Bosnja-Ħerzegovina, il-Kanada, il-Kroazja, dik li kienet ir-Repubblika Jugoslava tal-Maċedonja, l-Islanda, il-Montenegro u n-Norveġja. Fl-2011 il-COARM żviluppa sistema speċifika ta' skambju ta' informazzjoni bejn l-UE u ċerti pajjiżi terzi li jallinjaw mal-Pożizzjoni Komuni.

Il-promozzjoni ta' sistemi nazzjonali ta' kontroll fuq l-esportazzjoni tal-armi f'pajjiżi terzi magħżula twettqet fl-2011 u l-2012 fil-qafas tad-Deċiżjoni tal-Kunsill 2009/1012/PESK tat-22 ta’ Diċembru 2009 dwar appoġġ għall-attivitajiet tal-UE għall-promozzjoni tal-kontroll tal-esportazzjoni ta’ armi u l-prinċipji u l-kriterji tal-Pożizzjoni Komuni 2011/944/PESK fost pajjiżi terzi (2).

L-UE u l-Istati Membri tagħha komplew jaqdu rwol ewlieni fil-proċess tat-Trattat dwar il-Kummerċ tal-Armi, billi ppreparaw bir-reqqa, u ħadu sehem attiv fil-Konferenza tal-2012 tan-NU dwar it-Trattat dwar il-Kummerċ tal-Armi f'Lulju 2012, u fis-sessjonijiet kollha tal-Kumitat ta' Tħejjija li saru fl-2011 u l-2012. L-UE tibqa' impenjata favur il-konklużjoni rapida b'suċċess tal-proċess ta' negozjar għat-Trattat dwar il-Kummerċ tal-Armi kmieni fl-2013. L-isforzi tal-UE ffokaw ukoll fuq sensibilizzazzjoni f'pajjiżi terzi, kemm permezz ta' konsultazzjonijiet bilaterali kif ukoll bl-organizzazzjoni ta' avvenimenti reġjonali ta' sensibilizzazzjoni fil-qafas tad-Deċiżjoni tal-Kunsill 2010/336/PESK (3).

I.   IMPLIMENTAZZJONI TAL-POŻIZZJONI KOMUNI TAL-KUNSILL 2008/944/PESK

1.   Implimentazzjoni tal-Pożizzjoni Komuni 2008/944/PESK fil-leġislazzjoni nazzjonali jew regoli amministrattivi

L-Istati Membri huma mitluba japplikaw id-dispożizzjonijiet tal-Pożizzjoni Komuni fis-sistemi nazzjonali tagħhom ta' kontroll tal-esportazzjoni. Il-Pożizzjoni Komuni hija evoluzzjoni tal-Kodiċi ta' Kondotta tal-UE dwar l-esportazzjoni tal-armi, li ssostitwixxiet f'Diċembru 2008.

Hija tinkludi, fost oħrajn, estensjoni tal-kontrolli fuq senserija, transazzjonijiet ta' transitu u trasferimenti mhux tanġibbli ta' teknoloġiji, kif ukoll proċeduri msaħħa li jarmonizzaw il-politiki tal-Istati Membri dwar l-esportazzjoni.

L-Istati Membri huma mitluba jiżguraw l-implimentazzjoni sħiħa tal-Pożizzjoni Komuni fil-leġislazzjoni nazzjonali jew ir-regoli amministrattivi tagħhom. Is-sitwazzjoni fir-rigward tat-traspożizzjoni nazzjonali tal-Pożizzjoni Komuni fis-sistemi ta' kontroll tal-Istati Membri fuq l-esportazzjoni tal-armi hija rrappurtata fit-Tabella C mehmuża.

2.   Gwida għall-Utent

Il-Gwida għall-Utent hija strument essenzjali li jiġbor fil-qosor il-gwida maqbula għall-implimentazzjoni tad-dispożizzjonijiet operattivi tal-Pożizzjoni Komuni 2008/944/PESK, u l-interpretazzjoni tal-kriterji tagħha. Tissemma fl-Artikolu 13 tal-Pożizzjoni Komuni.

Hija ġiet żviluppata mill-Grupp ta' Ħidma dwar l-Esportazzjoni ta' Armi Konvenzjonali (COARM) tal-Kunsill u tiġi aġġornata kif ikun meħtieġ. Hija maħsuba għall-użu primarjament minn uffiċjali għall-ħruġ ta' liċenzji tal-esportazzjoni, u b'hekk tikkontribwixxi sostanzjalment, b'mod prammatiku, għall-konverġenza tal-politiki u l-proċeduri tal-Istati Membri fil-qasam tal-kontroll tal-esportazzjoni tal-armi. Il-Gwida hija dokument pubbliku disponibbli fuq is-sit elettroniku tas-Servizz Ewropew għall-Azzjoni Esterna (4).

Il-Gwida għall-Utent fiha taqsimiet, inter alia, dwar is-suġġetti li ġejjin:

(a)   Notifiki ta' rifjut u konsultazzjoni

Notifiki ta' rifjut u konsultazzjonijiet bilaterali jkomplu jseħħu ta' kuljum permezz tas-sistema elettronika coreu tal-EU. L-informazzjoni tiġi ċċirkolata b'mod f'waqtu, li jiżgura t-trasparenza tal-politiki dwar l-esportazzjoni tal-armi tal-Istati Membri vis-à-vis pajjiżi speċifiċi ta' destinazzjoni finali u utenti aħħarin.

Ir-rifjuti nnotifikati, kif ukoll ir-riżultati ta' konsultazzjonijiet bilaterali, jiġu inklużi f'bażi ta' data elettronika ċentrali tal-UE għan-notifiki ta' rifjut. Il-bażi ta' data hi amministrata mis-Servizz Ewropew għall-Azzjoni Esterna, u tirrappreżenta sistema dinamika li tirrifletti l-politiki tal-Istati Membri dwar l-esportazzjoni tal-armi. In-numru ta' rifjuti nnotifikati fl-2011 huma indikati fir-ringiela (d) tat-tabelli fit-Tabella AI (annessa għal dan ir-rapport) għal kull destinazzjoni u għal kull kategorija ta' lista militari; in-numru ta' konsultazzjonijiet maħruġa u rċevuti minn kull Stat Membru, u n-numru ta' konsultazzjonijiet għal kull destinazzjoni jinsabu fit-Tabelli BI u BII rispettivament.

(b)   L-aħjar prattika għall-interpretazzjoni tal-kriterji

L-aħjar prattiki għall-interpretazzjoni tal-kriterji tal-Pożizzjoni Komuni 2008/944/PESK ġew żviluppati mill-Grupp ta' Ħidma COARM, abbażi tal-aħjar prattiki nazzjonali u b'kont meħud tal-kontribut minn partijiet interessati rilevanti oħrajn.

L-għan tagħhom huwa li tinkiseb konsistenza akbar fost l-Istati Membri fl-applikazzjoni tal-kriterji tal-Pożizzjoni Komuni. Dan jinkiseb, fost oħrajn, billi jiġu identifikati fatturi li jeħtieġ li jiġu kkunsidrati meta jiġu vvalutati applikazzjonijiet għal liċenzji tal-esportazzjoni. L-aħjar prattiki huma għall-użu mill-uffiċjali li joħorġu liċenzji tal-esportazzjoni u uffiċjali oħra f'dipartimenti u aġenziji governattivi. Il-proċess deċiżjonali jirċievi tagħrif minn dawn l-uffiċjali esperti dwar mistoqsijiet li jkopru kwistjonijiet reġjonali, legali (eż. liġijiet ta' drittijiet tal-bniedem, il-liġi internazzjonali pubblika), kwistjonijiet tekniċi, dwar l-iżvilupp, kif ukoll b'rabta mas-sigurtà u militari.

3.   Reviżjoni tal-Pożizzjoni Komuni 2008/944/PESK

L-Artikolu 15 tal-Pożizzjoni Komuni jistabbilixxi li l-Pożizzjoni Komuni għandha tiġi riveduta tliet snin wara li tiġi adottata. Abbażi ta' dan, il-Grupp ta' Ħidma dwar l-Esportazzjoni ta' Armi Konvenzjonali (COARM) tal-Kunsill tal-UE beda l-ħidma ta' tħejjija għar-reviżjoni fit-tieni nofs tal-2011 u fl-2012 saret valutazzjoni bir-reqqa tad-dispożizzjonijiet tal-Pożizzjoni Komuni. L-involviment tal-partijiet interessati rilevanti, bħall-Parlament Ewropew u s-soċjetà ċivili, ġie żgurat bl-organizzazzjoni ta' serje ta' laqgħat għal dan il-għan.

Fuq il-bażi ta' din il-valutazzjoni, irriżulta li l-Pożizzjoni Komuni, u l-istrumenti li tipprevedi, għadhom iservu tajjeb l-objettivi ffissati mill-Kunsill fl-2008 u jipprovdu bażi solida għall-koordinament tal-politiki tal-Istati Membri dwar l-esportazzjoni tal-armi. Ir-riżultati preliminari tal-proċess ta' reviżjoni mistennija jkunu riflessi fil-Konklużjonijiet tal-Kunsill sa tmiem l-2012.

Fl-istess ħin irriżulta wkoll li jista' jinkiseb aktar progress fl-implimentazzjoni tal-Pożizzjoni Komuni u sabiex tiġi żgurata konverġenza massima fost l-Istati Membri fil-kamp tal-esportazzjoni tal-armi konvenzjonali. Għal dan l-iskop, fix-xhur li ġejjin il-Kunsill ser ikompli jaħdem fuq metodi biex titjieb l-implimentazzjoni tal-Pożizzjoni Komuni.

4.   Sensibilizzazzjoni

L-Artikolu 11 tal-Pożizzjoni Komuni jappella lill-Istati Membri biex “jagħmlu mill-aħjar biex iħeġġu lil Stati oħrajn, li jesportaw teknoloġija jew tagħmir militari biex japplikaw il-kriterji tal-Posizzjoni Komuni.” Matul l-2011 u l-2012 sa issa tkomplew l-attivitajiet ta' sensibilizzazzjoni kkoordinati mill-Istati Membri u l-UE (ara t-Tabella D, annessa hawnhekk).

Id-Deċiżjoni 2009/1012/PESK talloka fondi għal ħames seminars reġjonali ta' sensibbilizzazzjoni u erba' skambji ta' persunal ma' pajjiżi terzi assoċjati mill-qrib mal-UE. L-implimentazzjoni teknika tagħha ġiet fdata lill-Uffiċċju Federali Ġermaniż tal-Ekonomija u l-Kontroll tal-Esportazzjoni (BAFA).

Fl-2011, ir-raba' u l-ħames seminars ta' sensibilizzazzjoni previsti mid-Deċiżjoni 2009/1012/PESK saru rispettivament f'Podgorika, il-Montenegro, f'Mejju 2011 għall-pajjiżi tal-Balkani tal-Punent (l-Albanija; il-Bosnja-Ħerzegovina, il-Kroazja; dik li kienet ir-Repubblika Jugoslava tal-Maċedonja; il-Montenegro u s-Serbja), u f'Kiev, l-Ukraina, f'Novembru 2011, għall-imsieħba tal-Ewropa tal-Lvant u l-Kawkasu tal-Politika Ewropea tal-Viċinat (l-Armenja, l-Azerbajġan, il-Bjelorussja, il-Ġeorġja, ir-Repubblika tal-Moldova u l-Ukraina).

Fejn jikkonċerna l-iskambji ta' persunal previsti fid-Deċiżjoni tal-Kunsill, l-Ungerija ospitat żjara ta' studju għal uffiċjali Kroati tal-kontroll tal-esportazzjoni tal-armi f'Ġunju 2011, u l-Portugall ospita żjara ta' studju għal uffiċjali minn Dik li kienet ir-Repubblika Jugoslava tal-Maċedonja u mill-Montenegro f'Ottubru 2011. Żjarat ta' studju għal persunal tal-kontroll tal-esportazzjoni tal-armi mill-Kroazja, Dik li kienet ir-Repubblika Jugoslava tal-Maċedonja u l-Montenegro ġew ospitati wkoll mill-Polonja f'Novembru 2011. Fl-aħħar nett, ir-Repubblika Ċeka ospitat żjara ta' studju għal uffiċjali mill-Kroazja, Dik li kienet ir-Repubblika Jugoslava tal-Maċedonja u l-Montenegro f'Jannar 2012. Dawn l-iskambji ta' persunal għamluha possibbli għal uffiċjali minn pajjiżi kandidati tal-UE biex igawdu mill-esperjenza tal-Istati Membri fl-implimentazzjoni tal-prattika ta' kuljum ta' kwistjonijiet ta' dwana relatata mal-esportazzjoni tal-armi, kontrolli għal senserija u transitu, rappurtar u trasparenza, programmi interni ta' konformità tal-esportaturi, u l-implimentazzjoni nazzjonali ta' sanzjonijiet internazzjonali u tal-UE.

Fit-tieni nofs tal-2012 inbdiet ħidma biex titħejja l-adozzjoni ta' Deċiżjoni tal-Kunsill ġdida dwar attivitajiet ta' sensibilizzazzjoni biex jippromwovu l-prinċipji u l-kriterji tal-Pożizzjoni Komuni fost pajjiżi terzi.

5.   Laqgħat ta' djalogu politiku

Saru laqgħat ta' djalogu politiku dwar kwistjonijiet ta' kontroll tal-esportazzjoni tal-armi fuq bażi ta' darbtejn fis-sena fl-2011 u l-2012 man-Norveġja, il-Kanada, l-Ukraina, l-Istati Uniti, il-Federazzjoni Russa u, fl-2012, għall-ewwel darba mas-Serbja.

Dawn id-djalogi politiċi pprovdew forum għal diskussjonijiet siewja dwar kwistjonijiet ta' interess reċiproku bħall-politiki tal-esportazzjoni lejn destinazzjonijiet speċifiċi, kwistjonijiet ta' osservanza u kontroll, u l-proċess għat-Trattat dwar il-Kummerċ tal-Armi.

6.   Aġġornament tal-Lista Militari Komuni tal-Unjoni Ewropea

Il-Lista Militari Komuni tal-Unjoni Ewropea għandha l-istatus ta' impenn fil-qafas tal-Politika Estera u ta' Sigurtà Komuni. Hija qed tidher mill-ġdid bħala l-firxa ta' prodotti relatati mad-difiża annessa mad-Direttiva 2009/43/KE tal-Parlament Ewropew u tal-Kunsill tas-6 ta' Mejju 2009 dwar l-issimplifikar tat-termini u l-kondizzjonijiet tat-trasferimenti ta’ prodotti relatati mad-difiża fil-Komunità (5).

Fis-27 ta' Frar 2012, il-Kunsill adotta verżjoni aġġornata tal-lista li tieħu kont tat-tibdiliet fil-Lista ta' Munizzjonijiet tal-Arranġament ta' Wassenaar li sar qbil dwarhom fil-Laqgħa plenarja tal-2011 tal-Arranġament ta' Wassenaar. Il-verżjoni aġġornata tal-Lista Militari Komuni tal-Unjoni Ewropea ġiet ippubblikata f’ Il-Ġurnal Uffiċjali tal-Unjoni Ewropea C 85 tat-22 ta’ Marzu 2012, p. 1.

7.   Senserija tal-armi

Il-Kunsill qabel li l-impenji ta' kondiviżjoni ta' informazzjoni mniżżlin fil-Pożizzjoni Komuni tal-Kunsill 2003/468/PESK tat-23 ta' Ġunju 2003 dwar il-kontroll fuq is-senserija fil-bejgħ tal-armi (6) għandhom jiġu implimentati permezz tal-mekkaniżmu stabbilit fil-Pożizzjoni Komuni 2008/944/PESK. F'konformità mal-Artikolu 5 tal-Pożizzjoni Komuni 2003/468/PESK, l-Istati Membri stabbilixxew arranġamenti separati għall-iskambju ta' informazzjoni dwar liċenzji ta' senserija li ngħataw u li ġew irrifjutati. Barra minn hekk, f'konformità mal-Artikoli 4 u 5 tal-Pożizzjoni Komuni 2003/468/PESK, dawk l-Istati Membri li talbu li s-sensara jiksbu awtorizzazzjoni bil-miktub biex jaħdmu ta' sensara u/jew stabbilixxew reġistru ta' sensara tal-armi, stabbilixxew arranġamenti separati għall-iskambju ta' informazzjoni rilevanti dwar sensara rreġistrati. L-informazzjoni dwar liċenzji tas-senserija maħruġin u rrifjutati mill-Istati Membri tal-UE tinsab fit-Tabella AIII annessa.

Informazzjoni dettaljata dwar l-implimentazzjoni nazzjonali tal-Pożizzjoni Komuni dwar is-senserija jew, għal dawk l-Istati Membri li għadhom ma implimentawx għal kollox il-Pożizzjoni Komuni, informazzjoni dwar is-sitwazzjoni attwali tal-implimentazzjoni tagħha, tingħata fit-Tabella C annessa.

8.   Trasferimenti relatati mad-difiża fi ħdan l-UE

Id-Direttiva 2009/43/KE li tissimplifika t-trasferimenti relatati mad-difiża fi ħdan l-UE tipprevedi li l-Istati Membri għandhom jadottaw u jippubblikaw, sa mhux aktar tard mit-30 ta’ Ġunju 2011, il-liġijiet, ir-regolamenti u d-dispożizzjonijiet amministrattivi meħtieġa biex tintlaħaq konformità magħha. L-Istati Membri huma marbuta li japplikaw il-miżuri adottati mit-30 ta' Ġunju 2012. Wara l-adozzjoni tad-Direttiva fl-2009, l-Istati Membri kellhom diskussjonijiet fil-kuntest ta' kumitat ippresedut mill-Kummissjoni dwar kif l-aħjar li jiġu indirizzati kwistjonijiet imqajma bit-traspożizzjoni tad-Direttiva fil-leġislazzjoni nazzjonali tagħhom. Abbażi tal-kontribut ta' dan il-kumitat, fil-11 ta' Jannar 2011 il-Kummissjoni adottat Rakkomandazzjoni (7) dwar iċ-ċertifikazzjoni ta' impriżi tad-difiża skont l-Artikolu 9 tad-Direttiva 2009/43/KE. L-Anness tad-Direttiva li jispeċifika l-firxa ta' prodotti relatati mad-difiża koperti bid-Direttiva ġie emendat skont aġġornamenti tal-lista militari komuni tal-UE bid-Direttivi tal-Kummissjoni 2010/80/UE (8) u 2011/10/UE (9) u sa tmiem l-2012 għandu jsir aġġornament ieħor.

9.   Djalogu mal-Parlament Ewropew u l-NGOs

Wara s-sospensjoni temporanja tal-laqgħat mal-Parlament Ewropew sakemm twaqqaf is-Servizz Ewropew għall-Azzjoni Esterna, id-djalogu bejn il-grupp ta' ħidma tal-COARM u l-Parlament Ewropew issokta fil-5 ta' Diċembru 2011 bis-smigħ tas-Sedja tal-COARM mis-Sottokumitat dwar id-difiża u s-sigurtà.

F'konformità mal-prattika fil-passat, fil-perijodu 2011-2012 il-laqgħat tal-COARM ma' organizzazzjonijiet mhux governattivi ġew organizzati darba kull sitt xhur.

II.   TRATTAT DWAR IL-KUMMERĊ TAL-ARMI (ATT)

1.   Involviment fis-sessjonijiet tal-Kumitat ta' Tħejjija

Il-kisba ta' Trattat dwar il-Kummerċ tal-Armi (ATT) legalment vinkolanti u robust kienet fost il-prijoritajiet ewlenin fil-politika barranija għall-Unjoni Ewropea. L-ATT jista' jagħti kontribut sostanzjali lir-regolamentazzjoni tal-kummerċ internazzjonali tal-armi, billi jagħmlu aktar trasparenti u aktar responsabbli, permezz tal-istabbiliment ta' standards internazzjonali għoljin komuni. Il-proċess tal-ATT laħaq stadju kruċjali bit-tlaqqigħ f'Lulju 2012 tal-Konferenza tan-NU b'mandat li tinnegozja t-Trattat.

Matul il-perijodu tal-2011 u l-2012, l-Unjoni Ewropea u l-Istati Membri tagħha appoġġaw u pparteċipaw mill-qrib fil-proċess tat-Trattat dwar il-Kummerċ tal-Armi mmexxi min-NU. Bi tħejjija għas-sessjonijiet tal-Kumitat ta' Tħejjija tal-ATT (Frar u Lulju 2011, u Frar 2012) u għall-Konferenza tan-NU ta' Lulju 2012, sottogrupp għal dan il-għan tal-grupp ta' ħidma tal-COARM iltaqa' regolarment biex jiskambja fehmiet u jikkoordina pożizzjonijiet, u b'hekk ippermetta lill-UE tibqa' parteċipant viżibbli u attiv ħafna fil-proċess tal-ATT. Abbażi ta' pożizzjonijiet ikkoordinati tal-UE, l-UE u l-Istati Membri tagħha kellhom ukoll konsultazzjonijiet estensivi ma' pajjiżi terzi, u b'mod partikolari pajjiżi kbar li jimmanifatturaw l-armi, u mal-President tal-Konferenza tan-NU, l-Ambaxxatur Roberto García Moritán.

Waqt li tirrikonoxxi li nkiseb progress sinifikanti fil-Konferenza tan-NU, l-UE jiddispjaċiha li ma setax jintlaħaq qbil dwar test finali tat-Trattat. Ser ikomplu jsiru sforzi kbar biex tinkiseb konklużjoni bikrija u b'suċċess tal-proċess ta' negozjar fil-konferenza finali tan-NU kmieni fl-2013, li ser ittemm in-negozjati fuq il-bażi tal-abbozz tat-Trattat tas-26 ta' Lulju 2012.

2.   Sensibilizzazzjoni fil-kuntest tad-Deċiżjoni tal-Kunsill 2010/336/PESK tal-14 ta' Ġunju 2010 dwar l-attivitajiet tal-UE f’appoġġ għat-Trattat dwar il-Kummerċ tal-Armi

Sa mill-2009, l-UE kienet partikolarment attiva fil-promozzjoni tal-proċess tal-ATT fil-konfront ta' pajjiżi terzi, u bil-għan li tiżdied il-parteċipazzjoni fil-konsultazzjonijiet tan-NU u li jitjieb l-intendiment mill-Istati Membri kollha tan-NU tal-elementi differenti ta' trattat futur.

Fuq il-bażi tar-riżultati miksuba fl-ewwel serje ta' avvenimenti ta' sensibilizzazzjoni ffinanzjati bid-Deċiżjoni 2009/42/PESK, l-UE ddeċidiet li żżid l-isforzi għat-tisħiħ tal-parteċipazzjoni fil-proċess tal-ATT u biex dan jinftiehem aħjar bl-adozzjoni tad-Deċiżjoni 2010/336/PESK.

Fl-2011 u l-2012 saru seminars ta' sensibilizzazzjoni fil-qafas tad-Deċiżjoni tal-Kunsill tal-2010 f'Casablanca, il-Marokk (Frar 2011) għall-pajjiżi fit-Tramuntana, il-Punent u ċ-Ċentru tal-Afrika, f'Montevideo, l-Urugwaj (April 2011) għall-pajjiżi Amerikani u tal-Karibew, f'Bali, l-Indoneżja (Ġunju 2011) għall-pajjiżi tal-Lvant tal-Asja u l-Paċifiku, f'Najrobi, il-Kenja, għall-pajjiżi tal-Lvant u n-Nofsinhar tal-Afrika (Frar 2012), f'Bejrut, il-Libanu, għall-pajjiżi tal-Lvant Nofsani (Marzu 2012) u f'Belgrad, is-Serbja, għall-pajjiżi Ewropej u tal-Kawkasu (April 2012). Ġew organizzati wkoll avvenimenti fil-marġni tas-sessjonijiet tal-Kumitat ta' Tħejjija tal-ATT, li saru fi New York fi Frar u Lulju 2011, u fil-marġni tas-66 sessjoni tal-Ewwel Kumitat tal-Assemblea Ġenerali tan-NU f'Ottubru 2011. Kien hemm avveniment finali fi New York fil-marġni tal-Konferenza tan-NU ta' Lulju 2012 dwar it-Trattat dwar il-Kummerċ tal-Armi.

III.   LINJI GWIDA TA' PRIJORITÀ GĦALL-COARM GĦALL-FUTUR QRIB

Bl-adozzjoni tal-Pożizzjoni Komuni legalment vinkolanti 2008/944/PESK, ġew identifikati l-elementi fundamentali ta' approċċ komuni għall-kontroll tal-esportazzjonijiet konvenzjonali tal-armi mill-Istati Membri. Minkejja l-progress rappreżentat mill-adozzjoni tal-Pożizzjoni Komuni, għad fadal il-ħidma xi ssir, speċjalment fl-oqsma li ma ġewx indirizzati fil-passat, jew fejn tinħtieġ aktar ħidma biex tikkonsolida u tibni fuq ir-rizultati miksuba. Ir-reviżjoni tal-Pożizzjoni Komuni, kif awtorizzata bl-Artikolu 15 tagħha, s'issa ppermettiet l-identifikazzjoni ta' oqsma fejn il-potenzjal sħiħ tat-test tal-Pożizzjoni Komuni jista' jiġi eżerċitat aħjar fuq il-livell tal-implimentazzjoni.

Dawn li ġejjin huma linji gwida ta' prijorità għall-futur qrib:

(1)  ĠU L 335, 13.12.2008, p. 99.

(2)  ĠU L 348, 29.12.2009, p. 16.

(3)  ĠU L 152, 18.6.2010, p. 14.

(4)  http://www.eeas.europa.eu/non-proliferation-and-disarmament/arms-export-control/index_mt.htm

(5)  ĠU L 146, 10.6.2009, p. 1.

(6)  ĠU L 156, 25.6.2003, p. 79.

(7)  ĠU L 11, 15.1.2011, p. 62.

(8)  ĠU L 308, 24.11.2010, p. 11.

(9)  ĠU L 34, 9.2.2011, p. 41.