KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

20.11.2012

Il-Ġurnal Uffiċjali tal-Unjoni Ewropea

C 356/2

Rata tal-kambju tal-euro (1)

Id-19 ta’ Novembru 2012

2012/C 356/02

1 euro =

	Munita	Rata tal-kambju
USD	Dollaru Amerikan	1,2762
JPY	Yen Ġappuniż	103,60
DKK	Krona Daniża	7,4584
GBP	Lira Sterlina	0,80320
SEK	Krona Żvediża	8,6419
CHF	Frank Żvizzeru	1,2045
ISK	Krona Iżlandiża
NOK	Krona Norveġiża	7,3715
BGN	Lev Bulgaru	1,9558
CZK	Krona Ċeka	25,418
HUF	Forint Ungeriż	283,42
LTL	Litas Litwan	3,4528
LVL	Lats Latvjan	0,6961
PLN	Zloty Pollakk	4,1458
RON	Leu Rumen	4,5363
TRY	Lira Turka	2,3007
AUD	Dollaru Awstraljan	1,2283
CAD	Dollaru Kanadiż	1,2744
HKD	Dollaru ta' Hong Kong	9,8930
NZD	Dollaru tan-New Zealand	1,5621
SGD	Dollaru tas-Singapor	1,5632
KRW	Won tal-Korea t'Isfel	1 386,91
ZAR	Rand ta' l-Afrika t'Isfel	11,2874
CNY	Yuan ren-min-bi Ċiniż	7,9569
HRK	Kuna Kroata	7,5415
IDR	Rupiah Indoneżjan	12 288,36
MYR	Ringgit Malażjan	3,9101
PHP	Peso Filippin	52,489
RUB	Rouble Russu	40,3100
THB	Baht Tajlandiż	39,205
BRL	Real Brażiljan	2,6494
MXN	Peso Messikan	16,7125
INR	Rupi Indjan	70,2740

(1) Sors: rata tal-kambju ta' referenza ppubblikata mill-Bank Ċentrali Ewropew.

20.11.2012

Il-Ġurnal Uffiċjali tal-Unjoni Ewropea

C 356/5

Pubblikazzjoni ta' applikazzjoni skont l-Artikolu 6(2) tar-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel

2012/C 356/05

Din il-pubblikazzjoni tagħti d-dritt għall-oġġezzjoni skont l-Artikolu 7 tar-Regolament tal-Kunsill (KE) Nru 510/2006 (1). Id-dikjarazzjonijiet ta’ oġġezzjoni għandhom jaslu għand il-Kummissjoni fi żmien sitt xhur mid-data ta’ din il-pubblikazzjoni.

DOKUMENT UNIKU

IR-REGOLAMENT TAL-KUNSILL (KE) Nru 510/2006

“CARN D’ANDORRA”

Nru tal-KE: AD-PGI-0005-0875-12.04.2011

IĠP ( X ) DPO ( )

1. Isem:

“Carn d’Andorra”

2. L-istat membru jew il-pajjiż terz:

Il-Prinċipat ta' Andorra

3. Deskrizzjoni tal-prodott agrikolu jew tal-ikel:

3.1. It-tip tal-prodott:

Klassi 1.1

Laħam frisk (u l-ġewwieni)

3.2. Id-deskrizzjoni tal-prodott li japplika għalih l-isem f’(1):

Laħam taċ-ċanga li ġej mir-razza rustika Bruna d’Andorra (baqar irreġistrati fir-reġistru nazzjonali tal-annimali — Padral del Govern) jew mit-taħlit tal-ommijiet ta’ din ir-razza mal-gniedes tar-razez charolaise, gasconne u limousine, imrobbija u msemmna fl-azjendi agrikoli tat-trobbija li jinsabu fl-Andorra, li, mit-twelid tal-bhejjem sa tmiem it-tismin, jiġu mwarrba esklussivament għall-produzzjoni tal-laħam iddenominat biex jiġi kkumerċjalizzat bl-IĠP.

It-tbiċċir jibda mill-età ta’ tmien xhur. Il-konformità tal-karkassi, skont it-tabella tal-klassifikazzjoni EUROP, hija biss dik definita bħala E, U, R, u bit-tradizzjoni tal-konsum tat-tipi, tal-età, tal-piż u tat-tul ta’ żmien għall-maturazzjoni skont kif imniżżel fit-tabella 1.

Tabella 1

Piż u tul ta’ żmien għall-maturazzjoni skont it-tip

Tip	Età mat-tbiċċir	(Piż tal-karkassa) (valur minimu u massimu)	Tul ta’ żmien għall-maturazzjoni (f’sigħat)
Għeġejjel femminili (erħiet)	minn 8 xhur sa 12-il xahar	180-260 kg	72
Għeġejjel maskili	minn 8 xhur sa 12-il xahar	240-340 kg	72
Anolles (għeġejjel femminili ta' età ta' bejn 12 il-xahar u 24 xahar)	minn 12-il xahar sa 24 xahar	240-300 kg	72
Anolls (għeġejjel maskili tal-età bejn 12 il-xahar u 24 xahar)	minn 12-il xahar sa 24 xahar	320-390 kg	72

L-istat tat-tismin, skont il-klassifikazzjoni Komunitarja, jinkludi l-gradi 2, 3 jew 4.

Dawn l-infiltrazzjonijiet tax-xaħam jikkonferixxu jagħmlu l-karkassi teneri ħafna mal-qtugħ u sukkulenti fil-ħalq.

Il-pH tal-karkassi għandu jkun anqas minn 6 meta jkunu għaddew 24 siegħa wara t-tbiċċir. Iż-żmien għall-maturazzjoni fil-friża għandu jikkonforma mat-tabella 1; il-karkassi għandhom dejjem fl-istat frisk meta jiġu kkumerċjalizzati: karkassi sħaħ, nofs karkassi, kwart ta’ karkassi ikunu inkella laħam maqtugħ f’biċċiet jew ikkapuljat.

3.3. Il-materja prima (għall-prodotti pproċessati biss):

—

3.4. L-għalf (għall-prodotti li ġejjin mill-annimali biss):

L-annimali jitwieldu f'Andorra u, jitrabbew flimkien mal-omm fil-mergħat lokali, skont il-kundizzjonijiet tal-ispeċifikazzjonijiet dwar it-trobbija elenkati fit-tabella 2.

Tabella 2

Speċifikazzjoni tat-trobbija massima kull ettaru (UBG/Ha)

Tip	Art għall-kultivazzjoni tal-uċuħ u tal-għalf (2)	Art għall-kultivazzjoni tal-uċuħ (3)	Mergħa għall-ħsad tal-għalf (4)	Art għar-ragħa (5)
Baqra bl-għelieġel għat-tismin	3,9	3,3	2,4	1,2
Baqra mingħajr l-għelieġel għat-tismin	5,0	4,3	3,0	1,5

L-għelieġel għandhom jitreddgħu mill-baqar ommijiethom għal tal-anqas erba’ xhur. Matul il-perjodu tas-sajf, dawn jirgħu fil-mergħat li jinsabu fuq muntanji għoljin, flimkien mal-baqar ommijiet, imbagħad, iqattgħu x-xitwa fl-azjendi agrikoli, meta l-muntanji jkunu koperti bil-borra.

Matul ix-xhur tas-sajf, immexxija mir-ragħaj tagħhom, il-merħla tittella’ fl-artijiet tas-sajf, fejn iqattgħu minimu ta’ 90 jum.

Matul il-perjodu tat-tismin, l-ikel għandu jkun ibbażat fuq it-tiben jew il-ħuxlief bħala għalf oħxon u fuq taħlita ta’ ċereali, ta’ ħaxix u ta’ ikel supplementari.

Il-forniment tal-għalf tal-azjendi agrikoli jiġi l-aktar mill-Prinċipat ta' Andorra.

3.5. Il-passi speċifiċi fil-produzzjoni li jridu jittieħdu fiż-żona ġeografika identifikata:

Laħam ġej mill-bhejjem li jitwieldu, jitrabbew u jitbiċċru f’Andorra.

L-għeġejjel jitwieldu b’mod naturali, u għandhom jitreddgħu mill-baqar ommijiethom.

Matul il-perjodu tas-sajf, l-għeġejjel jirgħu fil-mergħat li jinsabu fuq muntanji għoljin, flimkien mal-baqar ommijiet, imbagħad iqattgħu ix-xitwa fl-azjendi agrikoli meta l-muntanji jkunu koperti bil-borra.

Għall-għelieġel tat-tismin, spazju minimu ta’ 3 m2 għal kull bhima, huwa meqjus bħala neċessarju.

Il-gruppi tal-annimali għat-tismin huma kkostitwiti minn massimu ta’ 20 bhima.

Waqt li jkunu qed jiġu ttrasportati, għandu jiġi evitat kemm jista’ jkun l-istress għall-annimali. It-trasport isir direttament minn kull azjenda agrikola sal-biċċerija; id-distanza massima hija limitata għal 25 km. B’hekk l-istress jiġi evitat kemm jista’ jkun għalkollox u jkun iggarantit prodott finali ta’ kwalità.

3.6. Ir-regoli speċifiċi dwar it-tqattigħ, it-taħkik, l-ippakkjar, eċċ.:

—

3.7. Ir-regoli speċifiċi dwar it-tikkettar:

Il-prodott għandu jinbiegħ bit-tikketta li minbarra l-informazzjoni obbligatorja stabbilita bil-leġiżlazzjoni fis-seħħ ikollha dawn it-tismijiet:

—	L-isem tal-Indikazzjoni Ġeografika Protetta “Carn d’Andorra”

—	It-tipa tal-logo tal-IĠP, li tirreferi għall-identifikazzjoni grafika tad-denominazzjoni “Carn d’Andorra”.

—	Il-logo tal-UE, li jidentifika l-prodotti li jibbenefikaw minn IĠP

4. Definizzjoni konċiża taż-żona ġeografika:

Iż-żona ġeografika tinkludi t-territorju kollu ta' Andorra fejn jitwieldu, jitrabbew u jitbiċċru l-annimali bovini tar-razza Bruna d’Andorra.

F’termini tal-amministrazzjoni, l-Andorra hija maqsuma f’7 gvernijiet lokali: Canillo, Encamp, Ordino, la Massana, Andorra la Vella, Sant Julià de Lòria u Escaldes-Engordany.

5. Ir-rabta maż-żona ġeografika:

5.1. L-ispeċifiċità taż-żona ġeografika:

5.1.1. Karatteristiċi ġeografiċi, klimatiċi u tal-veġetazzjoni

Billi tinsab proprju fil-qalba tal-katina muntanjuża tal-Pyrénées, iż-żona tal-produzzjoni tal-Bruna d’Andorra hija adattata għal tip ta’ trobbija estensiva.

Andorra huwa pajjiż muntanjuż ta’ 468 km2 fejn l-altitudni medja hija ta’ 2 000 metru.

L-erja tal-mergħat hija konsiderevoli u tirrappreżenta madwar 20 % tas-superfiċje totali ta’ Andorra.

L-attività tal-bniedem u l-kultivazzjoni minn dejjem kienu kkonċentrati l-aktar f'dawk iż-żoni l-aktar ċatti f’qiegħ il-widien.

5.1.2. Karattru speċifiku tal-mergħat tal-pajjiż

Il-medda konsiderevoli tal-mergħat u l-artijiet għar-ragħa ta’ Andorra, meta mqabbla mal-artijiet għall-kultivazzjoni, tippermetti l-produzzjoni ta’ kwantità kbira ta’ ikel naturali għall-bhejjem. L-użu favorevoli ta’ dawn il-ħxejjex jiddetermina ċ-ċiklu ta’ dawn il-mergħat.

Il-perjodi staġjonali jiddefinixxu r-rotazzjonijiet tal-mergħat, li, b’mod ġenerali, isegwu l-istess direzzjonijiet: tlajja lejn il-mergħat ’il fuq mill-foresti għall-ħabta ta’ Ġunju, inżul fil-bidu tal-perjodu tal-borra, f’Novembru.

L-abbundanza tal-ilma u d-diversità tal-artijiet agrikoli jiffavorixxu l-iżvilupp ta’ tipi ta’ mergħat differenti.

Il-mergħat li wieħed isib hemmhekk, skont l-ordni tal-importanza tagħhom, huma kif ġej: mergħat taż-żwien (Festuca eskia), li jokkupaw 10 % mill-pajjiż; mergħat tan-nard (Nardus stricta), li jokkupaw 6 %; mergħat ta’ Festuca airoidis (5 %) u mergħat tal-ħaxix taż-żwien (Festuca paniculata).

5.1.3. Karatteristiċi storiċi u antropoġeniċi tal-mergħat

Safejn hija kkonċernata unità agrikola tradizzjonali, l-azjenda prinċipali tieħu ħsieb il-bhejjem li jikkorrispondu għaliha bis-saħħa ta’ art komunali għar-ragħa u ta’ proprjetajiet agrikoli allokati għaċ-ċereali, għall-għalf u għal kultivazzjonijiet ortikulturali oħrajn. Matul ix-xhur tas-sajf, immexxija mir-ragħaj tagħhom, il-merħla titla' għal fuq il-mergħat tas-sajf (f'altitudni ta' bejn 2 000 u 2 500), fejn toqgħod għal 90 jum. F’kull unità ta’ ragħa, il-merħla tibda fl-altitudnijiet l-aktar baxxi (< 2 000 m), imbagħad titla' lejn il-muntanji meta jasal ix-xahar ta’ Awwissu; matul it-tieni parti tar-ragħa l-merħla terġa tibda nieżla lejn l-altitudnijiet l-aktar baxxi.

5.1.4. It-trobbija tal-bhejjem matul is-sena

Il-ġestjoni annwali ssegwi ċ-ċiklu tal-mergħat li ġej, u tagħmel l-aħjar użu miż-żoni fil-baxx, dawk intermedji u fil-għoli:

Żona fil-baxx: mergħat privati li jinsabu fil-widien, madwar il-villaġġi. Ġeneralment kull sena tintuża mergħa għar-ragħa waħda jew tnejn u mergħa għall-ħsad tal-għalf waħda jew tnejn. L-użanza hija li jinżergħu kultivazzjonijiet bħas-sikrana, l-alfalfa (Medicago sativa) u ż-żwien (Festuca sp. omn.).

Żona intermedja: mergħat tal-konfini. Żona ta’ passaġġ, li twassal għall-mergħat ifforestati u lura. Dawn jissejħu “rebaixants”.

Żona fil-għoli: mergħat ’il fuq mill-foresti li jipprovdu l-ikel prattikament is-sajf kollu. Dawn huma magħmula l-aktar minn artijiet komunali, jiġifieri dawk li jappartjenu lill-amministrazzjonijiet lokali, jew il-gvernijiet lokali.

5.2. L-ispeċifiċità tal-prodott:

L-ispeċifiċità tal-prodott hija definita mill-kwalità, u din hija determinata minn metodu tradizzjonali ta’ produzzjoni u mill-aċċettazzjoni tal-konsumatur.

Fil-bidu tas-seklu XX, ir-razza li kien hemm fl-Andorra, jiġifieri razza rustika b’karatteristiċi differenti, tjiebet bil-wasla tal-gniedes mill-Alpi, li kienu adattaw għall-kundizzjonijiet klimatiċi tar-reġjuni tal-muntanji għoljin. Dawn il-gniedes kienu, b'mod partikolari, il-bovini maskili tar-razza Schwitz (ir-razza kannella tal-Alpi jew pardo-Alpin), kif jixhdu diversi dokumenti tal-epoka (“Andorra Agrícola”, gazzetta bl-istampi ta’ kull xahar tal-1933). B’dan il-mod inkisbet razza mtejba, dik li llum hija magħrufa bl-isem “Bruna d’Andorra”.

Din ir-razza hija kkaratterizzata mill-fatt li hija rustika u adattata għall-mergħat, kwalitajiet li jagħmlu din ir-razza totalment adegwata għat-trobbija estensiva bħal dik ippratikata f’dan il-pajjiż.

Is-sistemi tat-trobbija tradizzjonali tal-bhejjem li nżammu sal-lum, bħall-użu tal-“Bruna d’Andorra” bħala razza indiġena, bhima bil-ġilda kannella, mogħnija bi kwalitajiet materni kbar, rustika u adattata ferm għall-kundizzjonijiet ħarxa tal-muntanji lokali, jiddefinixxu prodott uniku li ġej mill-baqar ommijiet tar-razza “Bruna d’Andorra” u mill-missirijiet tar-razza “Bruna d’Andorra”, “Charolaise”, “Limousine” u “Gasconne”. Hija l-unjoni ta’ razza adattata mar-razez tal-viċinat u magħrufin sew bħala razez bovini għal-laħam.

Il-karatteristiċi tat-trobbija huma stabbiliti skont il-kundizzjonijiet klimatiċi tal-pajjiż, li jitqassmu f’żewġ perjodi:

—	Il-perjodu sajfi (minn April sa Novembru): l-annimali jirgħu liberament fil-muntanji u jgawdu mill-mergħat naturali.

—	Il-perjodu xitwi (minn Novembru sa Marzu): l-annimali jiddaħħlu fl-istalla u l-għalf tar-riżerva jiġi ssupplementat b’ikel ikkonċentrat.

Is-sistema tat-trobbija tradizzjonali tiddependi fuq azjendi agrikoli żgħar adattati għall-klima tal-Pirinej, fejn l-annimali għat-tismin jkunu ftit u inizjalment jkunu ddestinati għall-konsum familjali jew għall-bejgħ fil-lokal tal-viċin. Fil-preżent, għadhom jeżistu dawn it-tipi ta’ azjendi agrikoli: iċ-ċifra medja tal-annimali għat-tismin hija ta’ madwar 35. Id-differenza hija li dawk li jrabbu l-annimali ngħaqdu flimkien f’assoċjazzjoni, il-“Ramaders d’Andorra”, li fost affarijiet oħra hija ddedikata għall-kumerċjalizzazzjoni tal-laħam, u li wasslet għal profitti aħjar għal dawn il-bdiewa.

Din is-sistema tradizzjonali tat-trobbija u tat-tismin li biha l-annimali kollha jitwieldu u jitkabbru fl-Andorra, ir-razza “Bruna d’Andorra”, il-perjodu tat-tismin li fih l-ikel ikkonċentrat huwa kkostitwit minn taħlita ta’ ċereali u ta’ ħxejjex, il-fatt li fix-xitwa jintuża l-għalf bħala ikel supplementari u d-disponibbiltà ta’ mergħat ta’ kwalità għolja matul is-sajf – dan kollu jagħti lil-laħam karatteristiċi tax-xaħam li jagħtu prodott teneru u sukkulenti. Din is-sistema tradizzjonali tat-trobbija tal-annimali hija mingħajr dubju l-aqwa vantaġġ għal tip ta’ laħam li huwa rikonoxxut u apprezzat f’Andorra.

5.3. Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO) jew il-kwalità speċifika, ir-reputazzjoni jew karatteristiċi oħra tal-prodott (għall-IĠP):

L-IĠP “Carn d’Andorra” tiddependi fuq is-sistema tat-trobbija tradizzjonali tal-annimali ta’ pajjiż fil-Pirinej; il-Prinċipat ta' Andorra

Inħoloq reġistru ġenealoġiku għar-razza Bruna d’Andorra f’Novembru 2006; minbarra dan, din ir-razza tibbenefika mill-kollaborazzjoni tal-Unità għas-selezzjoni u l-promozzjoni tar-razza bovina Gaskona (fl-antik UPRA Gascon u attwalment bid-denominazzjoni Groupe Gascon, li tinsab f’Villeneuve du Paréage, 09100, Franza) għall-applikazzjoni tal-programm ta’ selezzjoni ġenetika tar-razza Bruna d’Andorra.

L-interazzjoni tal-kundizzjonijiet klimatiċi ta’ Andorra, li jirriżultaw f’mergħat abbundanti u ta’ kwalità, u s-sistema tat-trobbija tradizzjonali tal-annimali fl-azjendi agrikoli li ssegwi ċiklu ta’ ragħa li juża ż-żoni kollha (dawk fil-baxx, intermedji u fil-għoli), jagħtu liż-żona teknika speċifika li tagħmel l-aħjar użu minn dawn ir-riżorsi kollha u minn razza stabbilita u adattata għall-ambjent li tippermetti l-ksib ta’ prodott li huwa rikonoxxut u apprezzat mill-konsumaturi fil-pajjiż.

Il-laħam kollu prodott f’konformità ma’ dawn il-karatteristiċi huwa kkumerċjalizzat fil-Prinċipat ta' Andorra.

Studju li tmexxa minn Ramaders d’Andorra SA tal-biċċerija nazzjonali tal-Andorra fuq 60 % tal-postijiet tal-bejgħ tal-laħam jindika li 100 % tal-postijiet sottomessi għall-istħarriġ jidentifikaw il-prodott “Carn d’Andorra” bħala l-laħam taċ-ċanga kkumerċjalizzat mill-kumpanija Ramaders d’Andorra bit-tikketta nazzjonali ta’ kontroll u ta’ garanzija “Carn de Qualitat Controlada d’Andorra”, li tiggarantixxi l-metodu ta’ produzzjoni kif ġie deskritt hawn fuq.

Referenza għall-pubblikazzjoni tal-ispeċifikazzjoni:

(L-Artikolu 5(7) tar-Regolament (KE) Nru 510/2006)

It-test kollu tal-ispeċifikazzjoni tal-prodott jista’ jiġi kkonsultat fuq id-dejtabejż DOOR

http://ec.europa.eu/agriculture/quality/door/list.html

(1) ĠU L 93, 31.3.2006, p. 12.

(2) Art li fiha, wara l-kultivazzjoni tas-sajf, jinżera l-għalf.

(3) Art li tiġi kkultivata darba fis-sajf.

(4) Mergħat naturali jew miżrugħa.

(5) Art mhux miżrugħa fejn jirgħu l-annimali.

		ISSN 1977-0987 doi:10.3000/19770987.C_2012.356.mlt
Il-Ġurnal Uffiċjali tal-Unjoni Ewropea		C 356

Edizzjoni bil-Malti	Informazzjoni u Avviżi	Volum 55 20 ta' Novembru 2012

Avviż Nru	Werrej	Paġna
	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2012/C 356/01	Ebda oppożizzjoni għal konċentrazzjoni notifikata (Każ COMP/M.6686 – Terex/GAZ/JV) ( 1 )	1

	V Avviżi
	PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI
	Il-Kummissjoni Ewropea
2012/C 356/03	Notifika minn qabel ta' konċentrazzjoni (Każ COMP/M.6765 – Precision Castparts Corp./Titanium Metals Corporation) ( 1 )	3

2012/C 356/04	Notifika minn qabel ta' konċentrazzjoni (Każ COMP/M.6764 – JCDecaux/Russ AD/Russ Out Of Home) – Każ li jista' jiġi kkunsidrat għal proċedura simplifikata ( 1 )	4

	ATTI OĦRAJN
	Il-Kummissjoni Ewropea
2012/C 356/05	Pubblikazzjoni ta' applikazzjoni skont l-Artikolu 6(2) tar-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel	5

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2012/C 356/02	Rata tal-kambju tal-euro	2


	(1) Test b’relevanza għaż-ŻEE