Ħlief meta indikat mod ieħor, il-Ġurnali Uffiċjali huma ppubblikati fil-lingwi kollha.

27.9.2012

Il-Ġurnal Uffiċjali tal-Unjoni Ewropea

CA 291/1

AVVIŻ TA' KOMPETIZZJONI ĠENERALI

EPSO/AST/121/12

(2012/C 291 A/01)

L-Uffiċċju Ewropew għas-Selezzjoni tal-Persunal (EPSO) qed jorganizza din il-kompetizzjoni ġenerali permezz ta' kwalifiki u eżamijiet sabiex tinħoloq lista ta' riżerva għar-reklutaġġ ta' assistenti (1).

EPSO/AST/121/12 — Tekniċi tal-konferenzi (AST 3)

L-għan ta' din il-kompetizzjoni hu li tinħoloq lista ta' riżerva maħsuba biex jimtlew xi postijiet vakanti fi ħdan l-istituzzjonijiet tal-Unjoni Ewropea.

Qabel tapplika, għandek taqra bir-reqqa l-gwida applikabbli għall-kompetizzjonijiet ġenerali ppubblikata f' Il-Ġurnal Uffiċjali tal-Unjoni Ewropea C 270 A tas-7 ta' Settembru 2012 kif ukoll fuq il-websajt tal-EPSO.

Din il-gwida, li tagħmel parti integrali mill-Avviż ta' Kompetizzjoni, se tgħinek tifhem ir-regoli dwar il-proċeduri u l-kundizzjonijiet tal-applikazzjoni.

WERREJ

I.	QAFAS ĠENERALI

II.	DESKRIZZJONI TAL-FUNZJONIJIET

III.	KUNDIZZJONIJIET TA' AMMISSJONI

IV.	TESTIJIET TA' DĦUL

V.	AMMISSJONI GĦALL-KOMPETIZZJONI U SELEZZJONI ABBAŻI TAL-KWALIFIKI

VI.	KOMPETIZZJONI ĠENERALI

VII.	LISTA TA' RIŻERVA

VIII.

KIF TAPPLIKA?

I. QAFAS ĠENERALI

Numru ta' kandidati magħżula: 23

II. DESKRIZZJONI TAL-FUNZJONIJIET

L-Assistenti tal-livell AST 3 jieħdu sehem, taħt is-sorveljanza ta' Amministratur, fil-kisba tal-missjoni tal-istituzzjoni jew tal-korp tagħhom u jkunu mistennija li jwettqu kompiti ta' applikazzjoni, ta' implimentazzjoni, ta' appoġġ u ta' loġistika f'diversi oqsma tal-attività.

Tekniċi inkarigati b'mod partikolari mit-tfassil, mill-installazzjoni u mill-ġestjoni ta' proċeduri tekniċi ta' awdjo u ta' immaġni f'installazzjonijiet multimedjali/awdjoviżivi jew ta' konferenzi; il-funzjonijiet jinkludu kompiti bħal:

—	it-tfassil ta' installazzjonijiet ta' konferenzi u ta' tagħmir awdjoviżiv,

—	it-tfassil ta' dokumenti tekniċi għal installazzjonijiet ta' konferenzi u għal installazzjonijiet awdjoviżivi ġodda u għar-rinovazzjoni tal-installazzjonijiet eżistenti kif ukoll is-superviżjoni ta' xogħlijiet li jitwettqu mill-kuntratturi,

—	it-twettiq ta' tiswijiet f'każ ta' ħsara fl-installazzjonijiet ta' konferenzi u f'dawk awdjoviżivi,

—	is-superviżjoni tal-operazzjonijiet ta' manutenzjoni tal-installazzjonijiet ta' konferenzi u ta' dawk awdjoviżivi,

—	l-armar, it-tpoġġija u t-tħaddim tat-tagħmir mobbli tal-awdjo u/jew tal-vidjow (pereżempju kameras, skrijns, proġetturi, mikrofoni, miksers, xkafef mobbli, eċċ.) matul avvenimenti,

—	l-iżgurar tal-funzjonament tajjeb tas-sistemi ta' ġestjoni tat-tagħmir awdjoviżiv tas-swali tal-konferenzi,

—	it-twettiq ta' testijiet analogi u diġitali bi strumenti ta' preċiżjoni (ossilloskopji, ġeneraturi ta' sinjali, miters għall-kejl tad-decibels, termometri diġitali, eċċ.) fis-swali tal-konferenzi,

—	l-armar, l-installazzjoni u l-konfigurazzjoni ta' tagħmir A/V u ta' dak informatiku għat-trażmissjoni ta' vidjow u ta' awdjo permezz tan-netwerk tal-informatika u/jew tat-telekomunikazzjonijiet (streaming bil-vidjow u bl-awdjo, vidjokonferenzi, eċċ.),

—	l-iżgurar tar-reġija awdjo u/jew vidjow fis-swali tal-konferenzi lokalment jew mill-bogħod (minn sala ta' kontroll), matul u barra mill-ħinijiet normali tax-xogħol,

—	il-garanzija tar-reġistrazzjoni bl-awdjo u/jew bil-vidjow tal-interventi tal-parteċipanti (permezz ta' mikrofoni, kameras, sorsi awdjoviżivi diversi),

—	il-garanzija tal-programmazzjoni, tal-użu u tat-tiswija tas-sistemi ta' konferenzi u ta' interpretar multilingwu u/jew tal-programmazzjoni, tal-użu u tat-tiswija tas-sistemi ta' akkwist, trattament u diffużjoni tal-fluss tal-vidjow,

—	ir-reġistrazzjoni tad-dibattiti fuq għodod diġitali (lineari u mhux lineari),

—	l-iżgurar tal-akkwist, tar-routing u tad-distribuzzjoni ta' sinjali awdjoviżivi minn sala tal-kontroll għall-punti ta' distribuzzjoni fi ħdan binja,

—	l-iżgurar tat-tħaddim, tal-konfigurazzjoni u tal-funzjonament tajjeb ta' netwerk ta' skrins ta' informazzjoni u tas-softwer operattiv tagħhom,

—	it-tħaddim tas-sistemi ta' kodifikazzjoni u ta' trażmissjoni tal-flussi awdjo-vidjow,

—	il-kontribut għar-rispett tal-istandards internazzjonali fil-qasam tal-installazzjonijiet tal-konferenzi u tal-interpretar simultanju,

—	is-selezzjoni ta' immaġni b'konfigurazzjoni li tirriżulta minn kameras multipli, ta' laqgħat u avvenimenti b'mod partikolari bil-għan li l-immaġni u l-awdjo jixxandru,

—	it-tħaddim ta' sistemi elettroniċi ta' votazzjoni,

—	il-ġestjoni u ż-żamma ta' inventarju tat-tagħmir,

—	l-iżgurar tal-ġestjoni, tal-konfigurazzjoni u tat-tiswija ta' netwerk fuq skala żgħira LAN (TCP-IP),

—	it-twettiq ta' tiswijiet u ta' adattamenti elettroniċi.

III. KUNDIZZJONIJIET TA' AMMISSJONI

Fid-data tal-għeluq stabbilita għall-applikazzjoni elettronika, int għandek tissodisfa l-kundizzjonijiet kollha ġenerali u speċifiċi li ġejjin:

Kundizzjonijiet ġenerali

(1)	Li tkun ċittadin ta' wieħed mill-Istati Membri tal-Unjoni Ewropea.

(2)	Li tgawdi mid-drittijiet ċivili tiegħek.

(3)	Li tkun wettaqt kwalunkwe obbligu impost mil-liġijiet dwar ir-reklutaġġ applikabbli fil-qasam militari.

(4)	Li tipproduċi r-referenzi dwar il-karattru meħtieġa, li jindikaw li int tajjeb biex twettaq il-funzjonijiet previsti.

2.	Kundizzjonijiet speċifiċi

2.1.

Kwalifiki

Jew (a)

Livell ta' edukazzjoni li jikkorrispondi għal studji postsekondarji konklużi, iċċertifikati b'diploma ta' tmiem l-istudji f'qasam relatat mal-funzjonijiet inkwistjoni.

Jew (b)

Livell ta' edukazzjoni sekondarja, iċċertifikat minn diploma ta' tmiem l-istudji li tagħti aċċess għall-edukazzjoni postsekondarja, flimkien ma' esperjenza professjonali ta' mill-inqas 3 snin f'qasam relatat mal-funzjonijiet inkwistjoni.

NB: Dawn it-3 snin ma jistgħux jiġu kkunsidrati bħala parti min-numru ta' snin ta' esperjenza professjonali mitluba hawn taħt.

2.2.

Esperjenza professjonali

Esperjenza professjonali ta' mill-inqas 3 snin b'rabta man-natura tal-funzjonijiet inkwistjoni.

Din l-esperjenza professjonali hija rilevanti biss jekk tkun inkisbet wara l-għoti tad-diploma li tagħti aċċess għall-kompetizzjoni.

2.3.

Għarfien lingwistiku

Il-lingwi uffiċjali tal-Unjoni Ewropea huma dawn li ġejjin:

BG (il-Bulgaru)

CS (iċ-Ċek)

DA (id-Daniż)

DE (il-Ġermaniż)

EL (il-Grieg)

EN (l-Ingliż)

ES (l-Ispanjol)

ET (l-Estonjan)

FI (il-Finlandiż)

FR (il-Franċiż)

GA (l-Irlandiż)

HU (l-Ungeriż)

IT (it-Taljan)

LT (il-Litwan)

LV (il-Latvjan)

MT (il-Malti)

NL (l-Olandiż)

PL (il-Pollakk)

PT (il-Portugiż)

RO (ir-Rumen)

SK (is-Slovakk)

SL (is-Sloven)

SV (l-Isvediż)

(a)

Lingwa 1

Lingwa prinċipali:

għarfien profond ta' waħda mil-lingwi uffiċjali tal-Unjoni Ewropea

(b)

Lingwa 2

It-tieni lingwa (trid tkun bilfors differenti mil-lingwa 1):

għarfien sodisfaċenti tal-Ġermaniż, tal-Ingliż jew tal-Franċiż

IV. TESTIJIET TA' DĦUL

It-testijiet ta' dħul isiru fuq il-kompjuter u jiġu organizzati mill-EPSO. Il-bord tas-selezzjoni jiddetermina l-livell ta' diffikultà tat-testijiet u japprova s-sustanza tagħhom abbażi tal-proposti magħmula mill-EPSO.

Dawn it-testijiet se jiġu organizzati biss jekk in-numru tal-kandidati li jkunu applikaw ikun ogħla minn 1 000. F'dan il-każ, int tkun infurmat permezz tal-profil tiegħek tal-EPSO.

1.	Stedina għat-testijiet

Inti tiġi mistieden għat-testijiet jekk tkun ivvalidajt l-applikazzjoni tiegħek fil-ħin (ara t-Taqsima VIII).

Attenzjoni:

1.	meta tivvalida l-applikazzjoni tiegħek, inti tiddikjara li tissodisfa l-kundizzjonijiet ġenerali u speċifiċi tat-Taqsima III;

2.	biex tipparteċipa fit-testijiet, trid tirriżerva data; din ir-riżervazzjoni għandha bilfors issir fiż-żmien li jiġi indikat lilek permezz tal-profil tal-EPSO.

2.	Deskrizzjoni tat-testijiet u dettalji dwar il-marki

Sensiela ta' testijiet ibbażati fuq mistoqsijiet b'għażla multipla bil-għan li jiġu evalwati l-kapaċitajiet u l-kompetenzi ġenerali tiegħek fir-rigward ta':

Test (a)

ir-raġunament verbali

marki: minn 0 sa 20 punt

minimu meħtieġ: 10 punti

Test (b)

ir-raġunament numeriku

marki: minn 0 sa 10 punti

Test (c)

ir-raġunament astratt

marki: minn 0 sa 10 punti

Il-minimu meħtieġ għat-testijiet (b) u (c) flimkien huwa ta' 10 punti

3.	Lingwa tat-testijiet

Lingwa 1

V. AMMISSJONI GĦALL-KOMPETIZZJONI U SELEZZJONI ABBAŻI TAL-KWALIFIKI

1. Proċedura

L-evalwazzjoni tal-kundizzjonijiet ġenerali u speċifiċi kif ukoll is-selezzjoni abbażi tal-kwalifiki jsiru fl-ewwel fażi skont id-dikjarazzjonijiet li tkun ipprovdejt fl-applikazzjoni tiegħek.

Ir-risposti tiegħek għall-mistoqsijiet dwar il-kundizzjonijiet ġenerali u speċifiċi se jkunu pproċessati sabiex jiġi ddeterminat jekk inti tagħmilx parti mil-lista tal-kandidati li jissodisfaw il-kundizzjonijiet kollha tal-ammissjoni għall-kompetizzjoni.

Fil-każ li t-testijiet ta' dħul huma organizzati minn qabel, l-evalwazzjoni tal-kundizzjonijiet ġenerali u speċifiċi ssir, f'ordni dixxendenti tal-punti miksuba fit-testijiet ta' dħul, sakemm jintlaħaq l-ammont ta' 1 000 kandidat li:

—	kisbu kemm il-minimu meħtieġ kif ukoll l-aħjar marki fit-testijiet ta' dħul, u

—	li jissodisfaw il-kundizzjonijiet ta' ammissjoni għall-kompetizzjoni.

F'każ li diversi kandidati jkunu kisbu l-istess marka għall-aħħar post, dawn il-kandidati kollha se jiġu kkunsidrati għall-fażi ta' selezzjoni abbażi tal-kwalifiki. L-applikazzjonijiet elettroniċi tal-kandidati li jiġu kklassifikati taħt dan il-limitu mhux se jkunu eżaminati.

Imbagħad, il-Bord tas-Selezzjoni se jagħżel abbażi tal-kwalifiki sabiex jidentifika, fost il-kandidati li jissodisfaw il-kundizzjonijiet ta' ammissjoni għall-kompetizzjoni, dawk il-kandidati li għandhom l-iktar kwalifiki rilevanti (speċjalment diplomi u esperjenza professjonali) fid-dawl tad-deskrizzjoni tal-funzjonijiet u tal-kriterji għas-selezzjoni deskritti f'dan l-Avviż ta' Kompetizzjoni. Din is-selezzjoni ssir biss fuq il-bażi tad-dikjarazzjonijiet tiegħek ipprovduti fis-sezzjoni “Evalwazzjoni tal-Kapaċitajiet” (“Talent Screener”) u ssir f'żewġ stadji:

—

l-ewwel selezzjoni abbażi tal-kwalifiki ssir biss skont ir-risposti mmarkati fis-sezzjoni “Evalwazzjoni tal-Kapaċitajiet” (“Talent Screener”) tal-applikazzjoni u skont il-piż ta' kull waħda minn dawn il-mistoqsijiet. Skont l-importanza mogħtija lil kull kriterju msemmi fil-punt 3 hawn taħt, il-Bord tas-Selezzjoni jistabbilixxi dan il-piż (minn 1 sa 3). Imbagħad, l-applikazzjonijiet elettroniċi tal-kandidati li jkunu kisbu l-akbar numru ta' punti jgħaddu għat-tieni selezzjoni;

—

in-numru ta' fajls eżaminati matul it-tieni fażi ta' selezzjoni huwa ekwivalenti għal madwar 3 darbiet in-numru ta' kandidati mistiedna għaċ-ċentru ta' evalwazzjoni. Il-Bord tas-Selezzjoni jeżamina r-risposti tal-kandidati u jagħtihom marka minn 0 sa 4 għal kull tweġiba. Il-marki, immultiplikati bil-piż ta' kull mistoqsija, jingħaddu ma' xulxin sakemm tinkiseb il-marka globali.

Imbagħad, il-Bord tas-Selezzjoni jistabbilixxi klassifika tal-kandidati skont dawn il-marki globali. In-numru ta' kandidati mistiedna (2) għaċ-ċentru ta' evalwazzjoni jikkorrispondi għal mhux iktar minn 3 darbiet in-numru ta' kandidati magħżula, indikat f'dan l-Avviż ta' Kompetizzjoni. Dan in-numru se jkun ippubblikat fuq il-websajt tal-EPSO (www.eu-careers.info).

2. Verifika tad-dikjarazzjonijiet tal-kandidati

Wara ċ-ċentru ta' evalwazzjoni u fid-dawl tar-riżultati miksuba minnu, id-dikjarazzjonijiet li saru mill-kandidati fl-applikazzjoni elettronika tagħhom se jkunu vverifikati mill-EPSO għall-kundizzjonijiet ġenerali u mill-Bord tas-Selezzjoni għall-kundizzjonijiet speċifiċi. Għall-evalwazzjoni tal-kwalifiki, id-dokumenti ta' prova se jkunu kkunsidrati biss biex jikkonfermaw ir-risposti diġà mogħtija fis-sezzjoni “Evalwazzjoni tal-Kapaċitajiet” (“Talent Screener”). Jekk matul din il-verifika jinstab li dawn id-dikjarazzjonijiet (3) mhumiex ikkonfermati mid-dokumenti ta' prova rilevanti, il-kandidati kkonċernati jiġu esklużi mill-kompetizzjoni.

Il-verifika ssir b'ordni dixxendenti ta' mertu, għall-kandidati li kisbu l-minimu meħtieġ u l-aħjar marki fit-testijiet ta' evalwazzjoni kollha (d), (e), (f) u (g) taċ-ċentru ta' evalwazzjoni. Dawn il-kandidati jridu wkoll jiksbu l-minimu meħtieġ fit-testijiet tal-kapaċità (a), (b) u (c). Din il-verifika tibqa' ssir sakemm jintlaħaq in-numru ta' kandidati li jistgħu jitniżżlu fil-lista ta' riżerva u li effettivament jissodisfaw il-kundizzjonijiet kollha tal-ammissjoni. Id-dokumenti ta' prova tal-kandidati li jikklassifikaw taħt dan in-numru mhux se jiġu eżaminati.

3. Kriterji għas-selezzjoni

Fil-qafas tas-selezzjoni abbażi tal-kwalifiki, il-Bord tas-Selezzjoni se jikkunsidra l-kriterji li ġejjin:

(5)	Esperjenza professjonali fil-programmazzjoni, fl-użu u fit-tiswija ta' sistemi ta' konferenzi u ta' interpretar multilingwu;

(6)	Esperjenza professjonali fil-programmazzjoni, fl-użu u fit-tiswija ta' sistemi ta' akkwist, trattament u diffużjoni tal-fluss tal-vidjow;

(7)	Esperjenza professjonali fl-armar u fit-tħaddim tat-tagħmir mobbli tal-awdjo u/jew tal-vidjow (pereżempju kameras, skrijns, proġetturi, mikrofoni, miksers, xkafef mobbli, eċċ.);

(8)	Esperjenza professjonali fl-użu ta' sistemi mobbli ta' konferenzi u ta' interpretar multilingwu (l-użu ta' sistema tat-tip trasportabbli u/jew ta' kabini mobbli);

(9)	Esperjenza professjonali fit-tfassil ta' dokumenti tekniċi għal installazzjonijiet ta' konferenzi u għal installazzjonijiet awdjoviżivi ġodda u għar-rinovazzjoni tal-installazzjonijiet eżistenti;

(10)	Esperjenza professjonali fis-superviżjoni tal-kuntratturi matul it-twettiq ta' xogħlijiet;

(11)	Esperjenza professjonali fl-użu ta' netwerks ibbażati fuq il-protokoll TCP/IP;

(12)	Esperjenza professjonali fit-twettiq ta' testijiet analogi u diġitali bi strumenti ta' preċiżjoni (ossilloskopji, ġeneraturi ta' sinjali, miters għall-kejl tad-decibels, termometri diġitali, eċċ.) fis-swali tal-konferenzi;

(13)	Esperjenza professjonali fl-akkwist, fir-routing, fid-distribuzzjoni ta' sinjali awdjoviżivi minn sala tal-kontroll għall-punti ta' distribuzzjoni fi ħdan binja;

(14)	Esperjenza professjonali fit-tħaddim tas-sistemi ta' kodifikazzjoni u ta' trażmissjoni tal-flussi awdjoviżivi fuq netwerks TCP-IP (“streaming”) jew ISDN jew satellita;

(15)	Esperjenza professjonali fl-elettronika b'mod ġenerali (kemm dik analoga kif ukoll dik diġitali).

VI. KOMPETIZZJONI ĠENERALI

1.	Stedina għaċ-ċentru ta' evalwazzjoni

Jekk int wieħed mill-kandidati (4)

—	li jkunu kisbu waħda mill-aħjar marki fit-testijiet ta' dħul (jekk dawn ikunu ġew organizzati minn qabel, ara t-Taqsima IV) u l-minimu meħtieġ għal dawn it-testijiet, u

—	li, skont id-dikjarazzjonijiet tagħhom fl-applikazzjoni elettronika, jissodisfaw il-kundizzjonijiet ta' ammissjoni ġenerali u speċifiċi tat-Taqsima III, u

—	li kisbu waħda mill-aħjar marki fis-selezzjoni abbażi tal-kwalifiki,

inti tiġi mistieden biex tipparteċipa fl-eżamijiet (5) taċ-ċentru ta' evalwazzjoni li ġeneralment isiru fi Brussell u li jdumu jum jew jumejn.

2.	Ċentru ta' evalwazzjoni

Inti tiġi evalwat bi tliet tipi ta' evalwazzjonijiet:

—

il-kapaċitajiet tiegħek fir-rigward tar-raġunament, ħlief jekk dawn ma kinux diġà evalwati waqt it-testijiet ta' dħul organizzati minn qabel, permezz ta' dawn it-testijiet:

(a)	test tar-raġunament verbali;

(b)	test tar-raġunament numeriku;

(c)	test tar-raġunament astratt;

—

il-kompetenzi speċifiċi tiegħek fil-qasam permezz ta' dan it-test:

(d)	intervista strutturata dwar il-kompetenzi fil-qasam, abbażi tar-risposti li tkun tajt fis-sezzjoni “Evalwazzjoni tal-Kapaċitajiet” tal-applikazzjoni

—

il-kompetenzi ġenerali tiegħek (6):

—	Analiżi u soluzzjoni tal-problemi,

—	Komunikazzjoni,

—	Kwalità u riżultati,

—	Tagħlim u żvilupp,

—	Prijoritizzazzjoni u organizzazzjoni,

—	Perseveranza,

—	Ħidma f'tim.

permezz tat-testijiet (7) li ġejjin:

(e)	studju tal-każ;

(f)	eżerċizzju fi grupp;

(g)	intervista strutturata dwar il-kompetenzi ġenerali.

Kull waħda mill-kompetenzi ġenerali se tiġi ttestjata skont din it-tabella:

Studju ta' każ partikolari

Eżerċizzju fi grupp

Intervista strutturata

Analiżi u soluzzjoni tal-problemi

Komunikazzjoni

Kwalità u riżultati

Tagħlim u żvilupp

Prijoritizzazzjoni u organizzazzjoni

Perseveranza

Ħidma f'tim

3.	Lingwa taċ-ċentru ta' evalwazzjoni

Lingwa 1 għat-testijiet (a), (b) u (c)

Lingwa 2 għat-testijiet (d), (e), (f) u (g)

Marki

Kapaċitajiet fil-qasam tar-raġunament

(a)	verbali: minn 0 sa 20 punt minimu meħtieġ: 10 punti;

(b)	numeriku: minn 0 sa 10 punti;

(c)	astratt: minn 0 sa 10 punti; minimu meħtieġ għat-testijiet (b) u (c) flimkien: 10 punti.

It-testijiet (a), (b) u (c) huma eliminatorji iżda l-marki tagħhom mhux se jkunu miżjuda mal-marki l-oħra taċ-ċentru ta' evalwazzjoni.

Kompetenzi speċifiċi (test d)

minn 0 sa 100 punt

minimu meħtieġ: 50 punt

piż: 55 % tal-marka globali

Kompetenzi ġenerali (testijiet (e), (f) u (g))

minn 0 sa 10 punti għal kull kompetenza ġenerali

minimu meħtieġ:

3 punti għal kull kompetenza u

35 punt minn 70 għas-7 kompetenzi ġenerali kollha f'daqqa

piż: 45 % tal-marka globali

VII. LISTA TA' RIŻERVA

1.	Lista ta' riżerva

Il-Bord tas-Selezzjoni jniżżel ismek fuq il-lista ta' riżerva

—	jekk int tkun wieħed mill-kandidati (8) li jkunu kisbu l-minimu meħtieġ flimkien ma' waħda mill-aħjar marki fit-testijiet kollha d), e), f) u g) taċ-ċentru ta' evalwazzjoni (ara l-għadd ta' kandidati magħżula, Taqsima I, punt 1)

—	u jekk, skont id-dokumenti ta' prova, tkun tissodisfa l-kundizzjonijiet kollha ta' ammissjoni.

2.	Klassifika

Il-lista tiġi stabbilita skont l-ordni alfabetiku.

VIII. KIF TAPPLIKA?

1.	Applikazzjoni elettronika

Għandek tapplika b'mod elettroniku billi ssegwi l-proċedura indikata fuq il-websajt tal-EPSO, u b'mod speċjali fil-Manwal tal-Applikazzjoni.

Data tal-għeluq (inkluża l-validazzjoni): Fis-30 ta' Ottubru 2012 f'12:00 (nofsinhar), ħin ta' Brussell.

2.	Fajl tal-applikazzjoni

Jekk inti tagħmel parti mill-kandidati ammessi għaċ-ċentru ta' evalwazzjoni, għandek iġġib miegħek (9) il-fajl tal-applikazzjoni tiegħek komplut (l-applikazzjoni elettronika tiegħek iffirmata u d-dokumenti ta' prova) meta tiġi fiċ-ċentru ta' evalwazzjoni.

Kundizzjonijiet: ara l-punt 6.1 tal-gwida applikabbli għall-kompetizzjonijiet ġenerali.

(1) F'dan l-avviż kull referenza għal persuna tas-sess maskil tirreferi wkoll għal persuna tas-sess femminil.

(2) Il-kandidati li ma jiġux mistiedna għaċ-ċentru ta' evalwazzjoni jirċievu r-riżultati tal-evalwazzjoni tagħhom kif ukoll il-piż ta' kull mistoqsija mingħand il-Bord tas-Selezzjoni.

(3) Din l-informazzjoni se tiġi vverifikata, abbażi tad-dokumenti ta' prova, qabel ma tiġi stabbilita l-lista ta' riżerva (ara t-Taqsima VII, il-punt 1 u t-Taqsima VIII, il-punt 2).

(4) Fil-każ fejn fl-aħħar post jiġu diversi kandidati bl-istess marka, dawn il-kandidati kollha jkunu mistiedna għaċ-ċentru ta' evalwazzjoni.

(5) Minħabba raġunijiet ta' organizzazzjoni, it-testijiet ta' raġunament kif ukoll l-istudju ta' każ partikolari (test (e)) jistgħu jsiru fiċ-ċentri tal-ittestjar fl-Istati Membri u/jew fi Brussell, indipendentement mill-eżamijiet l-oħra li jsiru matul iċ-ċentru ta' evalwazzjoni.

(6) Dawn il-kompetenzi huma mfissra fil-punt 1.2 tal-gwida applikabbli għall-kompetizzjonijiet ġenerali.

(7) Il-kontenut ta' dawn l-elementi huwa vvalidat mill-Bord tas-Selezzjoni.

(8) Fil-każ fejn fl-aħħar post jiġu diversi kandidati bl-istess marka, dawn il-kandidati kollha jitniżżlu fil-lista ta' riżerva.

(9) Id-data ta' meta trid tattendi għaċ-ċentru ta' evalwazzjoni tiġi kkomunikata lilek fi żmien xieraq permezz tal-kont tiegħek tal-EPSO.

		ISSN 1977-0987 doi:10.3000/19770987.CA2012.291.mlt
Il-Ġurnal Uffiċjali tal-Unjoni Ewropea		C 291A

Edizzjoni bil-Malti	Informazzjoni u Avviżi	Volum 55 27 ta' Settembru 2012

Avviż Nru	Werrej	Paġna
	V Avviżi
	PROĊEDURI AMMINISTRATTIVI
	L-Uffiċċju Ewropew għas-Selezzjojni tal-Persunal (EPSO)
2012/C 291A/01	Avviż ta' kompetizzjoni ġenerali — EPSO/AST/121/12	1

8	(DA/EL/HU/IT/MT/PL)
10
17	(LT)
20	(EN)
22	(DE/EN/FR)
27
30	(FR)
31	(ES)
37
44
46
53
55
59
69	(DE/EN/FR)
70	(EL)
71	(ES)
74	(HU)
75	(NL)
76
77	(RO)
84	(DE/EN/FR)
86
90	(EN)
101
110	(DE/EN/FR)
114
121	(BG)
122
134
136	(PT)
140
144	(DE/EN/FR)
146	(CS/DA)
160
161
169	(DE/EN/FR)
180	(DE/EN/FR)
187
189
197	(DA/DE/EN/SK)
198	(EN/FR)
199	(DE/EN/FR)
204	(ET/GA/LV/PT)
206	(CS)
210	(LT)
211	(MT)
212	(PL)
214	(SK)
215	(DE/EN/FR)
228	(SL)
266
270
274	(CS)
275	(LV)
276	(DE/EN/FR)
278
281	(MT)
283	(SV)
285	(ES)
288	(DE/EN/FR)
290
291