15.6.2012   

MT

Il-Ġurnal Uffiċjali tal-Unjoni Ewropea

CE 169/1

—

wara li kkunsidra d-Direttiva 2004/39/KE dwar swieq fl-istrumenti finanzjarji (MiFID) (1),

—

wara l- kkunsidra d-Direttiva 2003/6/KE dwar l-insider dealing u l-manipulazzjoni tas-swieq (abbuż tas-suq) (2),

—

wara li kkunsidra d-dikjarazzjonijiet tal-G20 tat-2 ta’ April 2009 f'Londra, tal-25 ta’ Settembru 2009 f'Pittsburgh u tas-26 u 27 ta’ Ġunju 2010 f'Toronto,

—

wara li kkunsidra l-parir tekniku tas-CESR lill-Kummissjoni Ewropea fil-Kuntest tar-Reviżjoni tal-MiFID - Swieq tal-Isħma (Equity Markets: Ref: CESR/10-394),

—

wara li kkunsidra l-parir tekniku tas-CESR lill-Kummissjoni Ewropea fil-Kuntest tar-Reviżjoni tal-MiFID - Rappurtar ta’ Transazzjonijiet (Ref.: CESR/10-292),

—

wara li kkunsidra l-parir tekniku tas-CESR lill-Kummissjoni Ewropea fil-Kuntest tar-Reviżjoni tal-MiFID - Protezzjoni tal-Investituri u l-Intermedjarji (Ref.: CESR/10-417),

—

wara li kkunsidra t-talba tas-CESR għal evidenza dwar kwistjonijiet mikro-strutturali tas-swieq tal-isħma Ewropej (Ref.: CESR/10-142),

—

wara li kkunsidra r-rapport tal-Ministru Franċiż tal-Ekonomija, l-Industrija u x-Xogħol dwar ir-reviżjoni tal-MiFID minn Frar 2010,

—

wara li kkunsidra r-rapport ta’ konsultazzjoni tal-IOSCO dwar “Politiki għal aċċess elettroniku dirett” ta’ Frar 2009,

—

wara li kkunsidra r-rakkomandazzjoni tas-CPSS u l-IOSCO għal kontrapartijiet ċentrali ta’ Novembru 2004,

—

wara li kkunsidra r-rilaxx ta’ kunċett tas-Securities and Exchanges Commission dwar l-Istruttura tas-Suq tal-Isħma (Equity Market Structure) (Nru. 34-61358; File No. S7-02-10),

—

wara li kkunsidra l-parir tekniku tas-CESR lill-Kummissjoni Ewropea fil-Kuntest tar-reviżjoni tal-MiFID u r-risponsi għat-talba tal-Kummissjoni Ewropea għal aktar informazzjoni (Ref: CESR/10-802, Ref: CESR/10-799, Ref: CESR/10-808, Ref: CESR/10-859, Ref: CESR/10-860),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Ekonomiċi u Monetarji (A7-0326/2010),

A.

billi li l-G20 stipulaw li ebda istituzzjoni finanzjarja, ebda prodott finanzjarju u ebda territorju m'għandu jibqa' barra mill-ambitu ta’ regolazzjoni intelliġenti u superviżjoni effettiva u ftiehmu li kull kuntratt derivattiv OTC standardizzat għandu jiġi kummerċjalizzat fis-swieq organizzati jew permezz ta’ pjattaformi tal-kummerċ elettroniku, fejn ikun xieraq,

B.

billi n-nuqqas ta’ trasparenza u l-opaċita li ġġib magħha tax-xejriet tar-riskji fis-sistema finanzjarja kienu fattur aggravanti tal-kriżi finanzjarja, u ffaċilitaw it-tifrix ta’ nuqqas ta’ fiduċja ġenerali u għaldaqstant ikkontribwew għal tnaqqis drastiku ta’ flussi ta’ likwidità,

C.

billi l-protezzjoni tal-konsumatur, it-trasparenza, partikolarment rigward il-proċess tal-formazzjoni tal-prezzijiet, l-effiċjenza u s-swieq likwidi u l-kompetizzjoni b'kundizzjonijiet ugwali kienu l-objettivi kruċjali meta daħlet fis-seħħ l-MiFID iżda madankollu dawn l-objettivi għadhom ma ntlaħqux u għaldaqstant iridu jibqgħu prijorità; billi wara l-kriżi finanzjarja, il-limitazzjoni tar-riskju sistematiku jeħtieġ ukoll li tingħata prijorità fir-reviżjoni tal-MiFID,

D.

billi kwalunkwe tibdil tal-MiFID irid iqis dejjem l-importanza tiegħu għar-regolamentazzjoni tal-flussi tal-kapital fl-ekonomija reali, u għaldaqstant l-impatt potenzjali fuq l-impjiegi, l-investimenti u l-penzjonijiet,

E.

billi sa 40 % tal-volum ta’ kummerċ għadu OTC; billi l-parteċipanti fis-suq għandhom ikunu mħeġġa jagħmlu aktar tranżazzjonijiet f'lokalitajiet ta’ kummerċ organizzati,

F.

billi l-inklużjoni fl-MiFID ta’ konċessjonijiet għar-rekwiżiti ta’ trasparenza ta’ qabel il-kummerċ u t-twaqqif ta’ MTF u dark pools kienu maħsuba biex jiffaċilitaw bidla fid-direzzjoni lejn lokalitajiet aktar regolamentati u trasparenti,

G.

billi l-MiFID tiddefinixxi l-kummerċ OTC bħala kummerċ ad hoc, irregolari, imwettaq ma’ kontropartijiet bl-ingrossa u li jagħmel parti minn relazzjoni kummerċjali li minnha nnifisha hi kkaratterizzata minn tranżazzjonijiet akbar mid-daqs standard tas-suq, u fejn it-tranżazzjonijiet jitwettqu barra mis-sistemi li jintużaw normalment mill-kumpanija konċernata għan-negozju tagħha bħala internalizzatur sistematiku,

H.

billi minkejja d-dispożizzjoni fl-MiFID ta’ konċessjonijiet li jippermettu dark trading fis-swieq organizzati, it-twaqqif ta’ MTFs u Internalizzaturi Sistematiċi (SIs) u d-definizzjoni tal-kummerċ OTC bħala irregolari u ad hoc, il-kummerċ OTC li ma jitwettaqx fuq bażi SI għad għandu proporzjon kbir tal-kummerċ tal-ekwitajiet:38 % tal-kummerċ kollu rappurtat skont CESR/10-394, u billi dan il-proporzjon ma naqasx minn meta ġiet implimentata l-MiFID; billi għandu jiġi żgurat infurzar aktar rigoruża u effikaċi tar-regoli u tal-konċessjonijiet tal-MiFID,

I.

billi l-frammettazzjoni tas-suq tal-kummerċ tal-ekwitajiet kellha impatt mhux mixtieq fuq il-likwidità u l-effiċjenza tas-suq - minħabba tnaqqis fit-trasparenza dovut għal żieda ta’ dark pools u CNs, iż-żieda fin-numru ta’ lokalitajiet ta’ kummerċ, kemm fil-boroż kif ukoll barra minnhom, u kummerċ dejjem aktar immexxi mit-teknoloġija - u naqqset sinifikattivament id-daqs medju tat-tranżazzjonijiet minn EUR 22 266 fl-2006 għal EUR 9 923 fl-2009, biż-żieda tal-kost totali tat-tranżazzjonijiet għal xi utenti,

J.

billi t-tnaqqis fid-daqs tat-tranżazzjonijiet wassal għal tnaqqis fil-kapaċità tal-parteċipenti fis-suq li jwettqu b'mod istantanju ordnijiet kbar f'suq partikulari u x-xewqa li jiġi evitat l-impatt fuq is-suq fil-każ ta’ ordnijiet kbar inkuraġġixxew l-espansjoni ta’ kummerċ “dark pool”; billi anqas minn 10 % tal-kummerċ kollu fl-ekwitajiet EEA fis-swieq organizzati jużaw il-konċessjonijiet ta’ trasparenza ta’ qabel il-kummerċ (CESR/10-394), filwaqt li dawn il-konċessjonijiet tal-MiFID taw lok għal kummerċ dark pool bħala alternattiva aktar trasparenti u aktar regolamentata mill-kummerċ dark trading fi spazju OTC iżda billi n-nuqqas ta’ regolamentazzjoni suffiċjenti għat-tranżazzjonijiet OTC, inklużi Broker Crossing Networks, tipprovdi vantaġġ kompetittiv għall-ispazju OTC u jinkuraġġixxi żieda ta’ kummerċ oskur li jhedded it-trasparenza b'mod ġenerali; billi bħala total kważi nofs l-attivitajiet ta’ kummerċ m'humiex koperti mir-rekwiżiti tat-trasparenza ta’ qabel il-kummerċ, iżda nofs it-tranżazzjonijiet OTC huma anqas mid-daqs tas-suq u għalhekk ma jeżigux protezzjoni kontra l-impatt fuq is-suq,

K.

billi, sabiex ikunu żgurati kundizzjonijiet ekwi għal kulħadd, broker crossing networks (BCNs) għandhom ikunu suġġetti għal investigazzjoni fil-fond tal-mudelli ta’ kummerċ tagħhom sabiex ikun żgurat li - fejn jipprovdu servizzi li jfisser li jkunu jiffunzjonaw essenzjalment bħala swieq regolati (RMs), faċilitajiet tal-kummerċ multilaterali (MTFs) jew bħala Internalizzaturi Sistematiċi - jiġu regolati bħala tali,

L.

billi l-benefiċċji tal-kompetizzjoni f'termini ta’ infrastruttura ta’ kummerċ aktar kompettittiva u innovattiva ma ġewx ippruvati minħabba li l-ispejjeż totali tat-tranżazzjoni ma tnaqqsux, u n-nuqqas ta’ trasparenza żdiedet filwaqt li fl-istess ħin jidher ċar li m'hemmx garanzija xierqa ta’ kwalità u integrità għall-parteċipanti kollha f'suq dejjem aktar frammentat,

M.

billi, ġaladarba l-HFT għandu l-pretensjoni li jipprovdi likwidità lis-swieq finanzjarji, jkun siewi li niddeterminaw jekk hemmx-riskji assoċjati ma’ sistemi ta’ ordnijiet elettroniċi u s-sehem sinifikattiv fil-volumi ta’ kummerċ attribwibbli għal ċerti strateġiji HFT, li jlaħħqu mas-70 % fl-Istati Uniti, b'mod partikulari meta nqisu l-konklużjonijiet tal-Securities and Exchange Commission rigward il-“flash crash” fl-Istati Uniti tas-6 ta’ Mejju 2010 meta l-provvedituri ta’ likwidità HFT ħarġu mis-suq,

N.

billi l-istrateġiji ta’ HFT huma fenomenu relattivament ġdid fl-Ewropa u hu stmat li issa jammontaw għal 35 % tal-volum tas-suq,

O.

billi aktar trasparenza permezz ta’ rapputar ta’ qabel il-kummerċ u ta’ wara l-kummerċ tal-attività kummerċjali fost il-klassijiet kollha ta’ assi għandha tiġi stabbilita biex tipprovdi twissija bikrija aħjar tal-akkumulazzjoni u l-iskala tal-problemi li jkunu qed jiżviluppaw, kif ukoll sabiex tittejjeb l-effiċjenza tal-proċess tal-formazzjoni tal-prezzijiet u tisseddaq il-fiduċja fost il-parteċipanti fis-suq,

P.

billi skont id-deċiżjonijiet tal-G20 tal-24 u l-25 ta’ Settembru 2009 f'Pittsburgh “kull kuntratt derivattiv OTC standardizzat għandu jiġi nnegozjat f'xi borża jew permezz ta’ pjattaformi tal-kummerċ elettroniċi”,

Q.

billi d-diverġenza fl-implimentazzjoni bejn l-Istati Membri wasslet għal applikazzjoni mhux kompluta tal-qafas MiFID,

1.

Jagħraf li l-infrastrutturi tas-swieq żammew sod tul il-kriżi u jistieden lill-Kummissjoni sabiex issaħħaħ l-infrastrutturi tas-suq fil-lokalitajiet kollha ta’ kummerċ u għas-sistemi kollha ta’ approvazzjoni (clearing systems) sabiex ikunu jistgħu jittrattaw ir-riskji futuri permezz ta’ trasparenza mseddqa, flessibilità aħjar u sorveljanza regolatorja tal-kummerċ aggregat kollu;

2.

Jilqa' l-proposta tal-Kummissjoni għal Regolament dwar derivattivi OTC, kontropartijiet ċentrali u repożitorji tal-kummerċ bħala prerekwiżit meħtieġ biex tiżdied it-trasparenza u s-sikurezza fis-swieq fi strumenti finanzjarji u jqisha bħala l-ewwel pass lejn ridirezzjoni tal-proporzjonijiet sinifikanti ta’ kummerċ OTC lejn lokalitajiet tal-kummerċ suġġetti għal regolamentazzjoni tal-MiFID;

3.

Jissuġġerixxi li fl-interess tat-trattament ekwu, l-MTFs għandhom ikunu suġġetti għall-istess livell ta’ sorveljanza, u għalhekk ikunu regolati b'mod komparabbli, għax il-kompetizzjoni bejn l-MTFs u l-RMs għandha ssir b'kundizzjonijiet ugwali, filwaqt li jitqies ir-rwol importanti tal-MTFs għad-dħul fis-swieq;

4.

Jitlob li l-ESMA tagħmel investigazzjoni dwar il-funzjonament u l-iskop tal-iskema SI (Internalizzatur Sistematiku) u li jiġi ssuġġerit titjib għall-mod kif din il-kategorija hija regolata sabiex jiġi żgurat li jiżdied b'mod sustanzjali l-użu ta’ din l-iskema fit-twettiq ta’ ordnijiet fuq bażi bilaterali mal-kontraparti finanzjarja;

5.

Jitlob li ditti ta’ investiment li jipprovdu servizz ta’ mmaniġġjar ta’ portafolli u li jaġixxu fil-kapaċità ta’ ġestjoni tal-portafolli jridu jkunu pprovduti bl-aħjar eżekuzzjoni mid-ditti ta’ investiment lil min jagħtu l-ordni, minkejja l-fatt li l-maniġer tal-portafoll jkun kategorizzat mill-MiFID bħala kontraparti eliġibbli;

6.

Jitlob li l-AETS twettaq reviżjoni dwar jekk l-aħjar twettiq ta’ ordni wara ordni jeħtigx li jkun moqdi aħjar b'regolament fir-rigward tad-disponibilità tad-data, kemm wara l-kummerċjalizazzjoni kif ukoll rigward il-kwalità ta’ eżekuzzjoni, u rigward teknoloġija tas-suq, bħala huma routers ta’ ordnijiet u konnessjonijiet bejn lokalitajiet;

7.

Jitlob li jkun hemm infurzar bir-reqqa tad-dispożizzjonijiet fl-MIFID sabiex ikun żgurat li l-BCNs li jkunu qed iwettqu attivitajiet ekwivalenti għal RM, MTF jew SI jiġu regolamentati bħala tali u li sabiex ikun faċilitat dan l-infurzar, jinsisti li l-BCNs kollha għandhom ikunu meħtieġa jissottomettu lill-awtoritajiet kompetenti l-informazzjoni kollha meħtieġa, inklużi:

8.

Jitlob li ssir investigazzjoni dwar il-kummerċ OTC tal-ekwitajiet u jitlob li jkun hemm titjib għall-mod kif hu regolamentat il-kummerċ OTC sabiex ikun żgurat li l-użu ta’ MTFs fl-eżekuzzjoni tal-ordnijiet fuq bażi multilaterali u ta’ SIs fl-eżekuzzjoni ta’ ordnijiet fuq bażi bilaterali jiżdied, u li l-proporzjon ta’ kummerċ fl-ekwitajiet li jitwettaq OTC jonqos b'mod sosotanzjali;

9.

Jitlob li ssir investigazzjoni mill-Kummissjoni dwar l-effetti tal-iffissar ta’ daqs minimu tal-ordnijiet għal tranżazzjonijiet dark pool kollha u jekk dan jistax tiġi infurżat b'mod rigoruż sabiex jinżamm fluss adegwat ta’ kummerċ permezz tal-lokalitajiet li joperaw b'mod trasparenti fl-interess tad-determinazzjoni tal-prezzijiet;

10.

Jitlob li l-Kummissjoni twettaq rieżami tal-konċessjonijiet tal-MiFID dwar trasparenza ta’ qabel attività ta’ kummerċ sabiex:

11.

Jitlob li jkun hemm applikazzjoni uniformi tal-konċessjonijiet ta’ qabel l-attività ta’ kummerċ fl-Istati Membri kollha sabiex tillimita d-differenzi fl-implimentazzjoni li jistgħu jwasslu għall-inċertezza, arbitraġġ regolatorju u kundizzjonijiet li ma jkunux ekwi għal kulħadd; jissuġġerixxi li l-istandards tekniċi definiti mill-AETS jista' jkunu mod xieraq biex jinkiseb dan, bi qbil mal-kunċett ta’ ġabra waħda ta’ regoli għas-servizzi finanzjarji;

12.

Jilqa' l-avviż reċenti mill-parteċipanti tas-swieq li se jiżvelaw id-data ta’ qabel u wara l-kummerċ u jitlob li jsiru aktar sforzi lejn standards komuni dwar id-data u disponibilità aħjar tad-data;

13.

Jistieden lill-Kummissjoni sabiex tistabbilixxi grupp ta’ ħidma sabiex jingħelbu d-diffikultajiet li qed iżommu lura l-konsolidazzjoni tad-data tas-swieq fl-Ewropa u l-partikolarment l-kwalità fqira tar-rappurtaġġ tad-data dwar it-tranżazzjonijiet kollha;

14.

Jistieden lis-CESR sabiex tfassal standards komuni ta’ rappurtar u formati għar-rappurtar ta’ data kollha ta’ wara l-kummerċ, kemm fil-każ ta’ lokalitajiet tal-kummerċ organizzati kif ukoll dwar OTCs, sabiex jiffavorixxu l-konsolidazzjoni tad-data;

15.

Jitlob li l-lokalitajiet ta’ kummerċ kollha jkunu mistennija jisseparaw id-data ta’ wara l-kummerċ minn mad-data ta’ qabel il-kummerċ sabiex l-informazzjoni tkun tista' tkun disponibbli għall-parteċipanti kollha fis-suq bi spiża kummerċjalment raġonevoli u komparabbli; jitlob ukoll lill-Kummissjoni sabiex tikkunsidra l-introduzzjoni ta’ Arranġamenti ta’ Pubblikazzjoni Approvata (APAs) sabiex jintroduċu standards ta’ kwalità għall-pubblikazzjoni tal-kummerċ u jnaqqsu n-numru ta’ lokalitajiet fejn jiġu rappurtati attivitajiet ta’ kummerċ, kif ukoll l-użu ta’ paġni tal-internet li huma ostaklu għall-konsolidazzjoni;

16.

Jitlob li jitnaqqas il-limitu ta’ żmien għall-pubblikazzjoni diferita sabiex it- tranżazzjonijiet ikunu rrappurtati lir-regolaturi fi żmien erbgħa u għoxrin siegħa wara li jkunu saru; huwa tal- feham li fir-rigward tal-pubblikazzjoni tat- tranżazzjonijiet elettroniċi, f'ċirkustanzi ordinarji, dewmien ta’ aktar minn minuta għandu jkun ikkunsidrat bħala inaċċettabbli;

17.

Jemmen li hu essenzjali li jiġi analizzat ir-rendikont u l-mudelli tan-negozju tal-kummerċ OTC, u għaldaqstant jitlob li introduzzjoni ta’ bnadar speċifiċi tat-trasparenza ta’ qabel u ta’ wara l-kummerċ għall-kummerċ OTC sabiex jiġu mifhuma aktar il-karatteristiċi ta’ tali kummerċ OTC u ssir valutazzjoni ta’ liema tipi ta’ tranżazzjonijiet jistgħu jsiru b'mod leġittimu OTC minħabba l-karatteristiċi speċifiċi tagħhom;

18.

Jinsisti li wara l-“flash crash” li seħħ, il-pjattaformi kollha ta’ kummerċ iridu jkunu jistgħu juru lis-superviżuri nazzjonali tagħhom li t-teknoloġija u s-sistemi ta’ sorveljanza tagħhom kapaċi jifilħu għat-tip ta’ biżibilju ordnijiet esperjenzati fis-6 ta’ Mejju 2010 sabiex jiżguraw li jkunu jistgħu jittrattaw b'suċċess l-attività assoċjata mal-HFT u kummerċ algoritmiku f'ċirkustanzi estremi u juru li jistgħu joħolqu mill-ġdid ir-reġistri tal-ordnijiet tagħhom sal-aħħar tal-ġurnata tax-xogħol, sabiex il-kawżi ta’ attività tas-suq mhux tas-soltu jkunu jistgħu jiġu identifikati, flimkien ma’ kwalunkwe abbuż suspettat tas-suq;

19.

Jitlob lill-AETS twettaq eżami tal-ispejjeż u l-benefiċċji tal-kummerċ algoritmiku u ta’ frekwenza għolja (HFT) fuq is-swieq u l-impatt tiegħu fuq utenti oħrajn tas-swieq, partikolarment investituri istituzzjonali, sabiex jiġi determinat jekk il-fluss tas-suq sinifikanti ġġenerat awtomatikament qiegħedx jipprovdi likwidità reali għas-suq u x'effett dan għandu għad-determinazzjoni ġenerali tal-prezzijiet, kif ukoll il-potenzjal għal abbużi bil-manipulazzjoni tal-prezzijiet tas-suq li jwasslu għal kundizzjonijiet mhux ugwali bejn il-parteċipanti tas-suq, u l-impatt tiegħu fuq l-istabilità ġenerali tas-suq;

20.

Jitlob li l-prattika ta’ “layering” jew “quote stuffing” tiġi definita b'mod espliċitu bħala abbuż tas-suq;

21.

Jitlob li jkun hemm investigazzjoni jekk għandhomx jiġu regolati kumpaniji li jimxu fuq strateġiji ta’ HFT sabiex jiġi żgurat li għandhom sistemi u kontrolli b'saħħithom b'reviżjonijiet regolatorji konsistenti tal-algoritmi li jużaw, il-kapaċità għal monitoraġġ u interrogazzjoni tul l-istess jum dwar pożizzjonijiet pendenti u effett ta’ lieva (leverage) f'ħin reali u li kapaċi juru li għandhom stabbiliti proċeduri maniġerjali b'saħħithom għal okkorenzi anormali;

22.

Jitlob għal eżami tal-isfidi HFT f'termini ta’ monitoraġġ tas-suq; jirrikonoxxi l-ħtieġa li r-regolaturi jkollhom il-mezzi xierqa biex jiskopru u jimmoniterjaw mġiba abbużiva potenzjali; f'din il-perspettiva, jitlob li jsir rappurtar lill-awtoritajiet kompetenti dwar l-ordnijiet kollha li jirċievu s-swieq regolamentati u l-MTFs, kif ukoll tal-kummerċ magħmul permezz ta’ dawn il-pjattaformi;

23.

Jitlob li l-lokalitajiet kollha ta’ kummerċ li jippermettu ko-lokazzjoni ta’ servers, kemm direttament u kemm permezz ta’ partijiet terzi li jipprovdu d-dejta, jiżguraw li jinżamm aċċess ugwali lill-klijenti kollha ko-lokati u fejn ikun possibbli taħt l-istess arraġamenti infrastrutturali dwar dewmien sabiex ikunu konformi mal-prattiki non-diskriminatorji mfissra fil-MiFID;

24.

Jitlob lir-regolaturi sabiex jimmoniterjaw u jirregolaw il-provvediment ta’ aċċess sponsorjat u jitlob lill-Kummissjoni sabiex tqis miżuri addizzjonali li jinkludu:

25.

Minkejja l-applikazzjoni meħtieġa ta’ salvagwardji, jitlob lill-AETS sabiex tinvestiga aktar jekk l-aċċess sponsorjat jaqbiżx il-limitu tal-aċċess mhux diskriminatorju;

26.

Jitlob li l-Kummissjoni tadotta l-prinċipji li qed jiżviluppa l-Kumitat Tekniku tal-IOSCO rigward aċċess elettroniku dirett, inkluż aċċess sponsorjat, li se jkopru l-kriterji għall-għażla ta’ klijenti li jistgħu jingħataw aċċess sponsorjat u r-relazzjoni kontrattwali bejn il-pjattaforma, il-membru u l-klijent, u se jiddefinixxu r-responsabbiltajiet rispettivi rigward l-użu tagħhom permezz ta’ kontrolli u filtri adatti;

27.

Huwa tal-fehma li sabiex ikun hemm konformità mal-prinċipju li l-investituri kollha għandhom jiġu ttrattati b'mod ugwali, il-prattika ta’ ordnijiet flaxx għandha tiġi pprojbita espliċitament;

28.

Jitlob li ssir investigazzjoni mill-AETS dwar l-istruttura tal-ħlasijiet sabiex jiġi żgurat li l-ħlasijiet għat-twettiq ta’ kummerċ, ħlasijiet anċillari u inċentivi oħrajn relatati jkunu trasparenti, non-diskriminatorji u konsistenti ma’ formazzjoni affidabbli ta’ prezzijiet u ma jkunux imfasslin u implimentati b'mod li ma jinkuraġġixxix kummerċ għal skopijiet mhux kif suppost, u sabiex tevalwa jekk għandhiex tiġi imposta tariffa minima għall-utenti li jagħmlu l-ordnijiet, indipendement minn jekk l-ordnijiet jitwettqux jew le, minħabba li dawn l-ordnijiet jeħtieġ jiġu proċessati mill-infrastruttura tas-swieq;

29.

Jissuġġerixxi li jsir studju mill-AETS fuq il-mudell ta’ ħlasijiet tip “maker/taker” sabiex jiġi stabbilit jekk min jirċievi l-istruttura ta’ ħlasijiet aktar favorevoli ta’ “maker”, għandux ikun suġġett ukoll għall-obbligazzjonijiet u s-superviżjoni ta’ “maker” formali tas-suq;

30.

Jitlob li jkun hemm superviżjoni mill-AETS u definizzjoni permezz tal-implimentazzjoni ta’ atti interrutturi u circuit breakers għall-volatilità b'saħħithom li jaħdmu simultanjament fil-lokalitajiet kollha ta’ kummerċ tal-UE sabiex jevitaw l-okkorrenza ta’ “flash crash” bħal dik li ġrat fl-Istati Uniti;

31.

Jitlob li ebda parteċipant mhux regolat tas-suq ma jkun jista' jikseb aċċess sponsorjat dirett jew mhux iffiltrat għall-lokalitajiet ta’ kummerċ u li parteċipanti sinifikanti tas-suq li jinnegozjaw indipendentement ikun jeħtieġ li jirreġistraw mar-regolatur u jippermettu li l-attivitajiet ta’ kummerċ tagħhom ikunu suġġetti għal livell xieraq ta’ superviżjoni u skrutinju għal skopijiet ta’ stabilità;

32.

Jitlob li tranżazzjonijiet rigward attivitajiet ta’ negozju ta’ akkont proprju (proprietary trading) li jsiru permezz ta’ strateġiji algoritmiċi minn entitajiet mhux regolati jsiru biss permezz ta’ kontraparti finanzjarja regolata;

33.

Jitlob għal estensjoni fl-ambitu tar-reġim ta’ trasparenza tal-MiFID għal strumenti kollha li jixxiebħu ma’ ekwitajiet (“equity-like”) inkużi DRs (depository receipts), ETFs (exchange traded funds), EDCs (exchange traded commodities) u ċertifikati;

34.

Jitlob li l-Kummissjoni u l-AETS jikkunsidraw l-introduzzjoni ta’ rekwiżit ta’ trasparenza qabel il-kummerċ u wara l-kummerċ għall-istrumenti kollha finanzjarji non-ekwità (non-equity), inklużi swieq ta’ bonds tal-gvern u ta’ korporazzjonijiet u derivattivi CCP eliġibbli, li jiġi applikat b'mod divrenzjat fejn ikun xieraq skont il-klassijiet tal-assi u li jingħaqad fl-istess ħin ma’ miżuri li jwasslu għal aktar standardizzazzjoni tal-prodotti derivattivi OTC sabiex tkun possibbli l-applikazzjoni ta’ aktar trasparenza;

35.

Huwa tal-fehma li, filwaqt li tqis il-kwistjonijiet esperjenzati fir-rigward tal-kwalità tad-data u l-konsolidazzjoni tad-data ta’ wara l-kummerċ għall-ekwitajiet Ewropej, il-Kummissjoni għandha tiżgura li d-data ta’ wara l-kummerċ għal prodotti li mhumiex ekwitajiet tiġi pprovduta f'sura li tkun tista' tiġi kkonsolidata faċilment;

36.

Jaqbel mal-intenzjoni tal-Kummissjoni li tapplika firxa wiesgħa ta’ dispożizzjonijiet tal-MiFID għal strumenti derivattivi billi l-kummerċ ta’ tali prodotti qiegħed jgħaddi dejjem aktar lejn lokalitajiet ta’ kummerċ formali u huma suġġetti għal standardizzazzjoni dejjem akbar u għal rekwiżiti ta’ approvazzjoni ċentrali;

37.

Jitlob li jkun hemm proposta mill-Kummissjoni li tiżgura li l-kuntratti kollha ta’ derivattivi OTC li jistgħu jiġu standardizzati jiġu kummerċjati fil-boroż jew pjattaformi tal-kummerċ elettroniku, sabiex ikun żgurat li l-prezz ta’ tali kuntratti jiġi stabbilit b'mod trasparenti, ġust u effiċjenti, mingħajr kunflitti ta’ interess;

38.

Jitlob li ssir reviżjoni tal-istandards tal-IOSCO għall-aġenziji ta’ approvazzjoni, is-sistemi ta’ likwidazzjoni ta’ ishma u sistemi ta’ pagament importanti sistematikament bil-għan li titjieb it-trasparenza tas-swieq;

39.

Jemmen li jeħtieġ li r-regolaturi kollha tas-swieq tal-komoditajiet fiżiċi u finanzjarji differenti jkollhom aċċess għall-istess data sabiex jidentifikaw ix-xejriet u r-rabtiet inkroċjati, u jistieden lill-Kummissjoni tikkoordina l-isforzi kemm fi ħdan l-UE kif ukoll b'mod globali;

40.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Bank Ċentrali Ewropew.

15.6.2012   

MT

Il-Ġurnal Uffiċjali tal-Unjoni Ewropea

CE 169/8

—

wara li kkunsidra l-Artiklu 3 TUE u l-Artikoli 2(5), 67, 74, 196 u 222 TFUE,

—

wara li kkunsidra l-Karta tad-Drittijiet Fundamentali tal-Unjoni Ewropea,

—

wara li kkunsidra l-Programm tal-Kunsill u tal-Kummissjoni tal-20 ta’ Diċembru 2002 biex titjieb il-kooperazzjoni fl-Unjoni Ewropea għall-prevenzjoni u l-limitazzjoni tal-konsegwenzi ta’ theddid terroristiku kimiku, bijoloġiku, radjoloġiku jew nukleari (Programm CBRN 2002) (1),

—

wara li kkunsidra d-Deċiżjoni Qafas tal-Kunsill 2002/475/JAI tat-13 ta’ Ġunju 2002 dwar il-ġlieda kontra t-terroriżmu (2), kif emendata permezz tad-Deċiżjoni Qafas tal-Kunsill 2008/919/ĠAI (3),

—

wara li kkunsidra l-Istrateġija tal-2003 tal-UE kontra l-Proliferazzjoni ta’ Armi ta’ Qerda tal-Massa u s-Sistema ta’ Kunsinna tagħhom,

—

wara li kkunsidra l-Istrateġija Ewropea ta’ Sigurtà 2003 – Ewropa Sigura f'Dinja Aħjar, kif adottata mill-Kunsill Ewropew ta’ Brussell tat-12 ta’ Diċembru 2003, kif ukoll l-Istrateġija ta’ Sigurtà Interna tal-UE 2010 (4) u l-Komunikazzjoni tal-Kummissjoni dwarha (COM(2010)0673),

—

wara li kkunsidra l-Programm ta’ Solidarjetà 2004 tal-UE dwar il-konsegwenzi ta’ theddid u attakki terroristiċi (5),

—

wara li kkunsidra l-Istrateġija 2005 tal-UE kontra t-Terroriżmu, adottata mill-Kunsill Ewropew ta’ Brussell fl-1 ta’ Diċembru 2005 (6), u l-Pjan ta’ Azzjoni li jimplimentaha (7),

—

wara li kkunsidra l-Qafas għall-Azzjoni ta’ Hyogo 2005-2015 (8) kif adottat mill-Konferenza Dinjija dwar it-Tnaqqis tad-Diżastri li saret bejn it-18 u t-22 ta’ Jannar 2005 fil-Ġappun,

—

wara li kkunsidra s-Seba' Programm ta’ Qafas għar-Riċerka u għall-Iżvilupp Teknoloġiku (9), speċjalment il-finanzjament li dan jagħti għall-proġett CBRN Emap (10),

—

wara li kkunsidra d-Deċiżjoni 2007/162/KE Euratom tal-Kunsill, tal-5 ta’ Marzu 2007 li tistabbilixxi Strument Finanzjarju għall-Protezzjoni Ċivili (11),

—

wara li kkunsidra d-Deċiżjoni 2007/779/KE Euratom tal-Kunsill, tat-8 ta’ Novembru 2007 li tistabbilixxi Mekkaniżmu Komunitarju għall-Protezzjoni Ċivili (imfassla mill-ġdid) (12),

—

wara li kkunsidra r-Regolament tal-Kunsill (KE) Nru 428/2009 tal-5 ta’ Mejju 2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta’ oġġetti b'użu doppju (13),

—

wara li kkunsidra d-Direttiva tal-Kunsill 2008/114/KE tat-8 ta’ Diċembru 2008 dwar l-identifikazzjoni u l-indikazzjoni tal-Infrastrutturi Kritiċi Ewropej u l-valutazzjoni tal-ħtieġa għat-titjib tal-ħarsien tagħhom (14), speċifikament f'każ ta’ azzjonijiet li jkollhom impatt transkonfinali, li fihom, inter alia, huma deskritti linji gwida għal approċċ integrat għaż-żieda tal-kapaċitajiet għall-ħarsien ta’ infrastruttura kritika fil-livell tal-UE, inkluża l-ħtieġa ta'Netwerk ta’ Informazzjoni ta’ Twissija dwar l-Infrastruttura Kritika (CIWIN) u rwol ta’ tfassil ta’ proposti u koordinazzjoni jingħata lill-Kummissjoni dwar it-titjib tal-ħarsien ta’ din l-infrastruttra kritika,

—

wara li kkunsidra l-Komunikazzjoni mill-Kummissjoni lill-Parlament Ewropew u lill-Kunsill dwar it-Tisħiħ tas-Sigurtà Kimika, Bijoloġika, Radjoloġika u Nukleari fl-Unjoni Ewropea - Pjan ta’ Azzjoni CBRN tal-UE (COM(2009)0273),

—

wara li kkunsidra l-konklużjonijiet tal-Kunsill tat-30 ta’ Novembru 2009 dwar it-tisħiħ tas-sigurtà kimika, bijoloġika, radjoloġika u nukleari fl-Unjoni Ewropea u li japprovaw Pjan ta’ Azzjoni tal-UE dwar is-CBRN (15),

—

wara li kkunsidra l-Programm ta’ Stokkolma – Ewropa miftuħa u sigura għas-servizz u l-protezzjoni taċ-ċittadini (16),

—

wara li kkunsidra l-Komunikazzjoni dwar il-linja politika tal-UE Kontra t-Terroriżmu: Il-kisbiet ewlenin u l-isfidi tal-futur (COM(2010)0386),

—

wara li kkunsidra l-Komunikazzjoni mill-Kummissjoni dwar il-kisba ta’ żona ta’ libertà, sigurtà u ġustizzja għaċ-ċittadini tal-Ewropa - Pjan ta’ Azzjoni li Jimplimenta l-Programm ta’ Stokkolma (COM(2010)0171),

—

wara li kkunsidra r-riżoluzzjonijiet tal-passat tiegħu dwar kwistjonijiet marbuta mas-CBRN u l-prevenzjoni tad-diżastri u r-reazzjoni għalihom, u f'dak ir-rigward ir-riżoluzzjoni riċenti tiegħu tal-10 ta’ Frar 2010 dwar it-terremot riċenti f'Ħaiti (17), li titlob li tinħoloq Forza Ewropea tal-Protezzjoni Ċivili,

—

wara li kkunsidra r-riżoluzzjoni tiegħu tal- 21 ta’ Settembru 2010 dwar il-Komunikazzjoni mill-Kummissjoni: Approċċ Komunitarju dwar il-prevenzjoni tad-diżastri naturali u dawk ikkawżati mill-bniedem (18),

—

wara li kkunsidra l-proposta riveduta tal-Kunsill tal-25 ta’ Ottobru 2010 għall-abbozzi ta’ deċiżjonijiet tal-Kunsill dwar it-tħejjija għal każ ta’ attakk CBRN u r-reazzjoni għalih, imfassla fuq il-bażi tal-objettivi stipulati fl-azzjoni H.29 dwar it-titjib tal-ippjanar ta’ emerġenza fil-pjan ta’ Azzjoni CBRN tal-UE (19), kif adottat mill-Kunsill fit-8 ta’ Novembru 2010,

—

wara li kkunsidra l-Komunikazzjoni mill-Kummissjoni lill-Parlament Ewropew u lill-Kunsill bl-isem “Lejn rispons Ewropew aktar b'saħħtu għal diżastri li jseħħu: ir-rwol tal-protezzjoni ċivili u l-assistenza umanitarja” (COM(2010)0600),

—

wara li kkonsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għal-Libertajiet Ċivili, il-Ġustizzja u l-Intern u l-opinjonijiet tal-Kumitat għall-Ambjent, is-Saħħa Pubblika u s-Sikurezza tal-Ikel, tal-Kumitat għall-Affarijiet Barranin u tal-Kumitat għall-Industrija, ir-Riċerka u l-Enerġija (A7-0349/2010),

A.

billi l-UE ilha involuta fil-programmi CBRN, sa mill-konklużjonijiet tal-Kunsill Ewropew ta’ Ghent tad-19 ta’ Ottubru 2001 u l-Kunsill Ewropew ta’ Laeken tat-13 u l-14 ta’ Diċembru 2001; billi l-Programm CBRN ġie adottat fl-2002, u mbagħad ġie sostitwit bil-Programm ta’ Solidarjetà tal-UE fl-2004, u billi ġie adottat Pjan ta’ Azzjoni ġdid UE CBRN mill-Kunsill fit-12 ta’ Novembru 2009,

B.

billi diżastri tas-CBRN, kemm dawk inċidentali kif ukoll dawk li jseħħu b'riżultat ta’ attakk terroristiku, joħolqu theddida serja għas-sigurtà u s-saħħa tan-nies li jgħixu fl-UE, jolqtulhom ħajjiethom, l-ambjent u l-beni, inkluż il-wirt kulturali tagħhom u anke l-funzjonament tas-soċjeta fi Stat Membru wieħed jew diversi, billi joħolqu interruzzjonijiet fid-disponibilità ta’ infrastrutturi kritiċi u l-kapaċitajiet tal-governanza,

C.

billi kemm il-Kunsill kif ukoll il-Kummissjoni jaqblu li n-numru ta’ inċidenti li jinvolvu materjal CBRN, inklużi atti ta’ terroriżmu, s'issa kienu relattivament żgħar, u billi l-maġġoranza tad-diżastri li jinvolvu sustanzi CBRN seħħew minħabba inċidenti industrijali jew żieda fil-patoġeni perikolużi, u t-tixrid tagħhom mad-dinja kollha,

D.

billi r-riskju eżistenti u kontinwu ta’ diżastri CBRN fit-territorju tal-Unjoni Ewropea, sew jekk aċċidentali sew jekk intenzjonali, serjament jikkomprometti t-tgawdija sħiħa tad-drittijiet u l-libertajiet fundamentali kollha, u huwa f'kontradizzjoni mal-wegħda ta’ żona Ewropea ta’ libertà, sigurtà u ġustizzja u l-iżvilupp tagħha,

E.

billi l-akbar riskji tas-CBRN jiġu mill-proliferazzjoni ta’ materjal CBRN minn organizzazzjonijiet terroristiċi, u billi, għaldaqstant, l-aktar miżuri importanti għandhom x'jaqsmu mat-tisħiħ tar-reġim tan-nonproliferazzjoni u d-diżarm permezz ta’ implimentazzjoni universali u sħiħa tat-trattati u tal-ftehimiet internazzjonali kollha relevanti (jiġifieri t-Trattat dwar in-Nonproliferazzjoni Nukleari, il-Konvenzjoni dwar l-Armi Kimiċi u l-Konvenzjoni dwar l-Armi Bijoloġiċi) u l-kisba ta’ ftehim dwar trattat li jipprojbixxi l-produzzjoni ta’ materjal fissili għal skopijiet ta’ armi (Trattat għall-Projbizzjoni ta’ Materjal Fissili),

F.

billi l-manifattura, il-pussess, l-akkwist, it-trasport, il-forniment jew l-użu ta’ armi u splussivi jew ta’ armi nukleari, bijoloġiċi jew kimiċi, kif ukoll ir-riċerka dwar, u l-iżvilupp, ta’ armi bijoloġiċi u kimiċi u taħriġ dwar kif wieħed jagħmel jew juża l-isplussivi, l-armi tan-nar jew armi oħra għal skopijiet illegali jagħmlu parti mid-definizzjoni ta’ terroriżmu u taħriġ għal terroriżmu tal-UE kif hemm referenza għalihom fid-Deċiżjonijiet Qafas tal-Kunsill 2002/475/ĠAI u 2008/919/ĠAI,

G.

billi l-miżuri dwar materjal CBRN huma waħda mill-ġebliet tax-xewka tal-Istrateġija Kontra t-Terroriżmu tal-UE, u billi, konsegwentement, il-Kunsill, fit-30 ta’ Novembru 2009, approva Pjan ta’ Azzjoni tal-UE dwar is-CBRN,

H.

billi l-problema tal-użu ħażin ta’ ċerti kimiċi, li huma ġeneralment disponibbli għall-pubbliku ġenerali fuq is-suq, bħala prekursuri għall-isplussivi magħmula d-dar, tista' twassal għal sensiela ta’ inċidenti terroristiċi u kriminali oħra fl-UE; billi dan jirrikjedi monitoraġġ u skrutinju b'saħħithom tal-implimentazzjoni tal-proposta għal regolament tal-Parlament Ewropew u tal-Kunsill dwar it-tqegħid fis-suq u l-użu ta’ prekursuri tal-isplussivi (COM(2010)0473),

I.

billi wara d-dħul fis-seħħ tat-Trattat ta’ Lisbona qed jiġi stabbilit bilanċ tar-responsabilitajiet ġdid bejn id-diversi istituzzjoniiet tal-UE, min-naħa l-waħda, u bejn l-UE u l-Istati Membri tagħha, inkluż l-għarfien espert tad-Difiża, min-naħa l-oħra; billi l-bini ta’ qafas ġdid ta’ dan it-tip hu proċess kontinwu li jirrikjedi li jiġu mifhuma valuri komuni u għan komuni,

J.

billi fil-prinċipju li l-Istati Membri huma responsabbli mill-politika CBRN, imma filwaqt li l-kooperazzjoni u l-koordinament mill-qrib f'livell ta’ UE huma xorta waħda meħtieġa,

K.

billi l-ħolqien tas-Servizz Ewropew għall-Azzjoni Esterna (SEAE) joffri opportunitajiet biex tittejjeb ir-reazzjoni globali tal-UE għall-kriżijiet permezz ta’ azzjonijiet taħt l-Istrument għall-Istabbiltà (IfS),

L.

billi Pjan ta’ Azzjoni tal-UE dwar is-CBRN għandu jagħti lok għal interazzjoni effiċjenti ta’ inizjattivi nazzjonali u oħrajn tal-UE fl-indirizzar ta’ riskji tas-CBRN u fit-tħejjija tar-rispons meħtieġ, b'titjib fil-koordinazzjoni “orizzontali” bejn il-Kummissjoni u l-Istati Membri kif ukoll fil-koordinazzjoni “vertikali” bejn l-istrumenti fil-livell tal-UE u l-istrumenti tal-Istati Membri, sabiex titjieb l-effikaċja u l-veloċità tal-qsim ta’ informazzjoni, ir-rappurtar analitiku fl-istadji kollha, l-ippjanar konġunt, l-iżvilupp ta’ proċeduri operattivi, l-eżerċizzji operattivi u l-użu komuni b'mod kost-effettiv tar-riżorsi eżistenti,

M.

billi bosta aġenziji tal-infurzar tal-liġi kriminali tal-UE huma involuti f'miżuri CBRN, pereżempju l-Europol, permezz tat-twaqqif tal-Bażi tad-Data Ewropea dwar il-Bombi u s-Sistema ta’ Twissija Bikrija għal splussivi u materjal CBRN; billi dan jirrikjedi t-twaqqif ta’ proċeduri xierqa għall-eżerċizzju ta’ skrutinju mill-pulizija Ewropea u l-parlamenti nazzjonali, kif previst, pereżempju, mill-Artikolu 88 TFUE,

N.

billi r-riskji għas-saħħa u l-prevalenza relattiva ta’ patoġeni perikolużi kulma jmur qed jiżdiedu fl-UE u globalment, kif intwera meta dan l-aħħar faqqgħet il-marda bil-virus l-A/H1N1,

O.

billi l-kwistjonijiet tat-tniġġis u l-kontaminazzjoni ambjentali, inklużi dawk ta’ natura transkonfinali, jistgħu jitqanqlu minn inċidenti ta’ CBRN, li jagħmlu neċessarja l-inklużjoni ta’ strateġiji ta’ rkupru u dekontaminazzjoni fil-politika CBRN tal-UE,

P.

billi l-objettiv globali tal-politika CBRN il-ġdida tal-UE huwa r-“riduzzjoni tat-theddida u l-ħsara mill-inċidenti CBRN għaċ-ċittadini tal-Unjoni Ewropea” u filwaqt li biex dan jinkiseb bl-“imminizzar tal-possibilità li jseħħu inċidenti CBRN u bil-limitazzjoni tal-konsegwenzi tagħhom jekk kemm-il darba jimmaterjalizzaw ruħhom”,

Q.

filwaqt li l-Kummissjoni, fil-Komunikazzjoni tagħha dwar ir-Rwol tal-UE fis-Saħħa Dinjija (20), tirrikonoxxi l-ħtieġa li jkun hemm koordinament tal-provvedimenti f'livell ta’ UE u dinji ħalli jkun hemm rispons rapidu għat-theddid għas-saħħa u timpenja ruħha favur it-titjib fil-mekkaniżmi ta’ prontezza u rispons għall-epidemiji, inklużi atti apposta bħalma huwa l-bijoterroriżmu,

R.

billi, paragun mat-teknoloġija nukleari jew l-prekursuri tagħha, il-materjali bijoloġiċi bħalma huwa l-antraċe huma orħos u ħafna eħfef li jinkisbu u jitferrxu, u għalhekk jipprovdu l-possibilità għal attakki terroristiċi mhux konvenzjonali li jġibu theddid kbir fit-tul għas-saħħa u għall-ambjent, inkluża l-biedja u l-provvista tal-ikel,

S.

billi s-servizzi li jirrispondu tal-ewwel, inklużi s-servizzi tal-pulizija, tat-tifi tan-nar u tal-ambulanzi, ma jkunux jistgħu jassistu lill-vittmi fil-lok ta’ inċident CBRN mingħajr ma jiġu esposti għal riskji għas-sigurtà tal-persunal jekk kemm-il darba ma jkunux ingħataw protezzjoni pre-espożizzjoni fil-forma ta’ kontromiżuri mediċi u taħriġ adegwat,

T.

billi l-ħażniet reġjonali ta’ kontromiżuri mediċi jagħtu protezzjoni adegwata għaċ-ċittadini billi jekwilibraw il-protezzjoni tas-saħħa pubblika u t-tħassib ekonomiku, filwaqt li jiżguraw ukoll ir-responsabbiltà u s-solidarjetà tal-Istati Membri,

U.

billi l-Organizzazzjoni Dinjija tas-Saħħa, permezz tal-programm tagħha ta’ Twissija u Rispons Dinjin (21), tipprova ssaħħaħ il-bijosigurtà, il-bijosikurezza u l-prontezza għal meta jfaqqgħu epidemiji ta’ patoġeni perikolużi u emerġenti,

V.

billi l-UE hija parteċipant attiv, permezz tal-Istati Membri tagħha u tal-Kummissjoni, fid-diskussjonijiet tal-Inizjattiva għas-Sigurtà tas-Saħħa Dinjija li għandha l-mira li tikseb l-azzjoni dinjija konċertata għat-tisħiħ tal-prontezza fis-saħħa pubblika u l-għoti ta’ rispons għat-theddid tat-terroriżmu internazzjonali bijoloġiku, kimiku u radjonukleari,

W.

billi t-theddida għas-sigurtà kimika, bijoloġika, radjoloġika u nukleari titqanqal mhux biss mill-attakki terroristiċi jew min-negliġenza, imma wkoll miż-żoni li bħalissa huma mniġġsin bl-armi kimiċi ta’ żmien it-Tieni Gwerra Dinjija mormijin f'qiegħ il-baħar jew fis-siti tal-iskart nukleari fl-UE,

X.

billi l-livell adegwat ta’ sigurtà kimika, bijoloġika, radjoloġika, u nukleari fl-UE jiddependi wkoll mil-livell ta’ sigurtà applikat f'pajjiżi terzi,

Y.

billi t-theddidiet ġodda għas-sigurtà jistgħu jitqanqlu mill-użu ta’ teknoloġiji ġodda fl-ippjanar ta’ atti ġodda ta’ terroriżmu, filwaqt li l-istandards tas-sigurtà mhumiex qed jiġu adattati b'ħeffa biżżejjed għall-progress teknoloġiku,

Z.

billi huwa meħtieġ rieżami bir-reqqa tad-diversi standards li japplikaw bħalissa ħalli jiġu stabbiliti rekwiżiti neċessarji u suffiċjenti ta’ sigurtà,

AA.

billi l-Pjan ta’ Azzjoni UE CBRN huwa maqsum fi tliet partijiet ewlenin: il-Prevenzjoni, l-Identifikazzjoni, u-Tħejjija u r-Rispons, u jinkludi r-raba' kapitlu dwar “Azzjonijiet applikabbli għall-prevenzjoni, l-identifikazzjoni u r-rispons CBRN”; u billi r-rikonoxximent tal-importanza ta’ kull wieħed mill-istadji huwa kruċjali biex tiġi żgurata implimentazzjoni adegwata tal-istudji dwar l-evalwazzjoni tar-riskji, ir-rispons u l-kontromiżuri, filwaqt li jiġi adottat approċċ trasversali u transkonfinali biex jiġu trattati l-materjali CBRN, jiġifieri permezz tal-allokazzjoni adegwata ta’ miri u ta’ azzjonijiet li jistgħu jitkejlu f'kull stadju,

AB.

billi l-bidliet magħmula mill-Kunsill lill-Pjan ta’ Azzjoni attwali tal-UE dwar is-CBRN kif propost mill-Kummissjoni idgħajfu l-Pjan ta’ Azzjoni, jagħmlu l-impenn min-naħa tal-Stati Membri mhux vinkolanti u jnaqqsu mis-saħħa tal-miżuri previsti, li ħafna minnhom huma miżmuma fuq livell nazzjonali minflok ma jingħataw kamp ta’ applikazzjoni fl-UE kollha, kif ukoll idgħajfu l-monitoraġġ u l-iskrutinju tal-implimentazzjoni tagħhom mill-Kummissjoni, filwaqt li xi drabi saħansitra ma jinkludux lill-Kummissjoni bħala “attur involut” flimkien mal-Istati Membri,

1.

Jinnota li l-Pjan ta’ Azzjoni tal-UE dwar is-CBRN jolqot id-diviżjoni tal-kompetenzi ġdida bejn l-Istati Membri u l-UE wara d-dħul fis-seħħ tat-Trattat ta’ Lisbona, kif previst fl-Artikolu 5 TUE b'konnessjoni mal-prinċipji ta’ konferiment, sussidjarjetà u proporzjonalità; jirrimarka li l-Pjan ta’ Azzjoni tal-UE dwar is-CBRN ikopri l-qasam tal-kompetenzi interni maqsuma (Artikolu 4 TFUE) rigward il-qasam ta’ libertà, sigurtà u ġustizzja, interessi tas-sigurtà komuni, u t-trasport; miżuri tal-protezzjoni ċivili (Artikolu 196 TFUE); kif ukoll azzjonijiet esterni tal-Unjoni Ewropea (Artikoli 21 u 22 TUE);

2.

Jindika madankollu li l-eżekuzzjoni tas-sistema komuni tas-sigurtà CBRN ma għandhiex tnaqqas mill-kompetenza tal-Istati Membri f'dan il-qasam tal-politika;

3.

Iqis li l-pjan ta’ azzjoni se jkollu rwol ewlieni fl-iżgurar ta’ interazzjoni mingħajr problemi tal-inizjattivi nazzjonali u Ewropej biex jiġu indirizzati r-riskji CBRN;

4.

Jirrikonoxxi li huwa kruċjali li jintuża l-għarfien espert u tiġi evitata d-duplikazzjoni, il-frammentazzjoni u l-inkonsistenza fl-isforzi tal-istituzzjonijiet tal-UE u/jew tal-Istati Membri fl-oqsma tas-sigurtà u tad-difiża fejn id-dritt fundamentali għall-ħajja jinsab f'riskju u meta l-implikazzjonijiet tat-traskuraġni u l-laxkezza huma bla tarf;

5.

Jenfasizza li l-UE għandha ssaħħaħ l-approċċ komuni tagħha dwar il-prevenzjoni, l-iskoperta u r-rispons permezz tal-ħolqien ta’ mekkaniżmi speċifiċi (strumenti regolatorji, leġiżlattivi jew mhux leġiżlattivi) li jagħmlu l-kooperazzjoni u l-forniment ta’ mezzi ta’ assistenza obbligatorji fil-każ ta’ diżastru ta’ CBRN ikkawżat minn inċident jew attakk terroristiku; ifakkar li l-għan ewlieni tal-istituzzjonijiet tal-UE għandu jkun li jiżguraw l-effiċjenza ta’ rispons nazzjonali jew transnazzjonali għal inċident jew attakk terroristiku CBRN, fuq il-bażi tas-solidarjetà UE, b'mod koordinat taħt il-patroċinju tal-Kummissjoni u b'involviment pan-Ewropew;

6.

Ifakkar li Pjan ta’ Azzjoni tal-UE dwar is-CBRN joffri opportunità li tippermetti lill-UE u l-Istati Membri li jsibu l-mezzi leġiżlattivi xierqa biex jimplimentaw b'mod effettiv il-Klawżola ta’ Solidarjetà inkluża fl-Artikolu 222 TFUE, u li l-Istati Membri jridu jkunu infurmati bil-pjanijiet u l-aħjar prattiki ta’ xulxin li jittrattaw u jiġġieldu diżastri tas-CBRN, kemm dawk aċċidentali kif ukoll dawk intenzjonati, sabiex ikunu jistgħu jgħinu lil xulxin b'mod koordinat u effettiv;

7.

Jenfasizza li huwa essenzjali li jissaħħaħ l-ambitu ta’ intervent normattiv u regolatorju mill-Kummissjoni, li fil-verżjoni preżenti tal-Pjan ta’ Azzjoni tal-UE dwar is-CBRN għandu rwol pjuttost vag fir-rigward ta’ ħafna mill-miri u l-azzjonijiet previsti; konsegwentement, iħeġġeġ li l-Kummissjoni għandha toħroġ proposti leġiżlattivi, kemm jista' jkun fl-oqsma kollha koperti mill-Pjan ta’ Azzjoni; u jenfasizza li huwa biss permezz tal-għoti ta’ rwol regolatorju robust lill-Kummissjoni li jistgħu jiġu megħluba n-nuqqasijiet fl-isforzi ta’ kull Stat Membru;

8.

Iħeġġeġ li l-impenn tal-Istati Membri għall-kontroll tas-CBRN imur lil hinn minn sempliċi qsim tal-aħjar prattiki u informazzjoni, u li t-teknoloġiji u l-infrastrutturi wkoll għandhom jinġabru flimkien/jinqasmu, sabiex tiġi evitata d-duplikazzjoni u l-ħela tar-riżorsi, sabiex jinħolqu sinerġiji siewja u kost-effettivi fil-livell tal-UE; jistieden lill-Istati Membri jaqblu dwar metodi għall-iskoperta u l-prevenzjoni ta’ diżastri CBRN, it-trasferiment ta’ materjali CBRN fi ħdan l-UE u l-miżuri ta’ rispons, inklużi l-qsim ta’ informazzjoni relatata mas-CBRN u l-assistenza transkonfinali;

9.

Iħeġġeġ għalhekk lill-iktar Stati Membri avvanzati fil-qasam tas-sigurtà interna, minkejja n-natura vulnerabbli u essenzjalment nazzjonali tiegħu, biex jaqsmu l-informazzjoni li jkollhom, it-teknoloġiji u l-infrastrutturi u jillanċjaw proġetti strateġiċi kif imsemmi hawn fuq; jistieden lill-Kummissjoni u lill-Kunsill biex joħolqu u jaġġornaw regolarment bażi tad-data tal-kontromiżuri mediċi li huma disponibbli fl-Istati Membri biex jirrispondu għall-inċidenti CBRN, jinkoraġġixxu il-qsim tal-kapaċitajiet eżistenti u jikkoordinaw politika ta’ akkwist kosteffikaċi għal dawn il-kontromiżuri;

10.

Jitlob li jiġu żviluppati standards tal-UE rigward il-kwalità u s-sigurtà, kif ukoll sistema u netwerk ta’ laboratorji tal-UE għaċ-ċertifikazzjoni tat-tagħmir tas-sigurtà u tat-teknoloġiji tas-CBRN; jenfasizza li l-istandards stretti tas-sigurtà u tal-proċeduri tal-impjieg jeħtieġ li japplikaw ukoll għall-persunal impjegat fil-faċilitajiet b'aċċess għall-aġenti li jistgħu jagħmlu ħsara; jitlob għall-qsim u l-użu tal-aħjar għarfien u l-kompetenza esperta kemm mill-qasam ċivili kif ukoll dak militari; għal darb'oħra taħt it-tmexxija tal-Kummissjoni, jenfasizza li għandu jiġi pprovdut il-finanzjament meħtieġ għar-riċerka u għall-iżvilupp biex ikun żgurat it-twettiq tar-riċerka applikata u l-programmi ta’ dimostrazzjoni kbar b'dimensjoni tal-UE, u meta wieħed iqis il-frammentazzjoni ta’ dan is-suq li hija meħtieġa politika industrijali tal-UE fil-qasam tas-sigurtà ċivili, li tistimula l-kooperazzjoni bejn l-intrapriżi fl-UE u b'appoġġ speċifiku għall-SMEs u l- SMIs, li joħolqu sehem sinifikanti mill-innovazzjoni taħt is-Seba' Programm ta’ Qafas/Sigurtà, li għandu jiżdied u għandhom isiru sforzi sabiex tkun stimulata l-koperazzjoni (partikolarment il-kooperazzjoni transkonfinali) bejn l-intrapriżi Ewropej; jawgura li tinħoloq ħila esperta globali li tkun tista' tinkariga ruħha mill-proġetti kollha ta’ sigurtà CBRN, u li tkun tkopri ċ-ċiklu sħiħ ta’ ħajja tat-theddida CBRN (il-prevenzjoni, is-sejbien u r-rispons); jistieden lill-Kummissjoni tipproponi strateġija biex tiżviluppa l-industrija tal-bijodifiża fl-Ewropa;

11.

Jilqa' l-fatt li l-ħarsien CBRN qed jiġi indirizzat bħala suġġett taħt il-Kooperazzjoni Ewropea ta’ Qafas (EFC) għar-riċerka fil-qasam tas-Sigurtà u d-Difiża bejn il-Kummissjoni, l-Aġenzija Ewropea tal-Ispazju (ESA) u l-Aġenzija Ewropea tad-Difiża (EDA); jenfasizza li l-kumplementarjetà, il-koordinazzjoni u s-sinerġija bejn l-investiment fid-difiża R&T u l-investiment fir-riċerka għas-sigurtà ċivili mill-Kummissjoni taħt is-Seba' Programm ta’ Qafas jirrikjedu titjib ġenwin tal-kundizzjonijiet legali rilevanti li jiggvernaw l-iskambju ta’ informazzjoni fi ħdan l-EFC u bejn l-attivitajiet fil-livelli nazzjonali u tal-UE, kif previst fid-Deċiżjoni tal-Kunsill 2006/971/KE tad-19 ta’ Diċembru 2006 dwar il-Programm Speċifiku “Kooperazzjoni” li jimplimenta s-Seba' Programm Kwadru tal-Komunità Ewropea dwar ir-riċerka, l-iżvilupp teknoloġiku u attivitajiet ta’ dimostrazzjoni (2007-2013) (22); iħeġġeġ li jkun hemm żvilupp ta’ riċerka applikata ta’ dimensjoni Ewropea fir-rigward tas-sigurtà tal-istallazzjonijiet, bil-għan li jitħarsu l-popolazzjonijiet u l-ambjent u sabiex jitniedu programmi kbar ta’ dimostrazzjoni; jinkoraġġixxi l-ħolqien ta’ ċentri ta’ esperti li jispeċjalizzaw fit-theddidiet CBRN u l-mobilità tar-riċerkaturi;

12.

Jinsisti li jiġu implimentati garanziji u miżuri ta’ sigurtà xierqa fil-qafas tat-trattament tal-bażijiet tad-data komuni tal-Istati Membri u ta’ data tar-riċerka sensittiva, minħabba li approċċ orjentat lejn is-sigurtà tad-data jinkuraġġixxi kooperazzjoni msaħħa u skambju akbar ta’ informazzjoni fost l-awtoritajiet u l-korpi tal-Istati Membri;

13.

Jenfasizza l-importanza ta’ tħejjija mtejba, u jitlob li tkun aġġornata b'mod regolari s-sitwazzjoni tal-kapaċitajiet u l-assi nazzjonali, kif ukoll li jsiru eżerċizzji konġunti fost l-Istati Membri;

14.

Jappella għat-twaqqif urġenti ta’ mekkaniżmu ta’ rispons għall-kriżijiet Ewropew ibbażat fis-servizzi tal-Kummissjoni li għandu jikkoordina l-mezzi ċivili u militari sabiex jiġi żgurat li l-UE jkollha kapaċità ta’ rispons rapidu biex titratta diżastru CBRN; u jtenni s-sejħa tiegħu għat-twaqqif ta’ Forza tal-Protezzjoni Ċivili Ewropea bbażata fuq il-Mekkaniżmu tal-Unjoni għall-Protezzjoni Ċivili eżistenti, forza li tippermetti lill-Unjoni tgħaqqad flimkien ir-riżorsi meħtieġa biex tipprovdi għajnuna ta’ emerġenza, inkluża għajnuna umanitarja, fi żmien 24 siegħa f'każ ta’ diżastru CBRN fit-territorju tal-UE jew barra minnu; jenfasizza li jridu jinbnew ukoll “pontijiet” u sħubiji xierqa bejn korpi bħall-Europol, l-Interpol u l-awtoritajiet tal-infurzar tal-liġi fl-Istati Membri bil-ħsieb li jinħoloq netwerk xieraq u effettiv għall-monitoraġġ proattiv b'antiċipazzjoni/fil-ħin reali ta’ emerġenzi u l-impenn/koordinazzjoni operazzjonali biex jiġu trattati diżastri relatati mas-CBRN, u jenfasizza l-bżonn li jirrapporta wkoll lill-Kummissjoni; ifakkat fir-rapport Barnier tal-2006 “Għal forza Ewropea ta’ protezzjoni ċivili: EuropeAid” (23) li l-Parlament Ewropew kien appoġġa bil-qawwa, u jilqa' f'dak ir-rigward id-disponibilità tal-Kummissjoni li toħloq Kapaċità Ewropea għal Rispons ta’ Emerġenza kif iddikjarat fil-Komunikazzjoni mill-Kummissjoni “Lejn rispons Ewropew aktar b'saħħtu għal diżastri li jseħħu: ir-rwol tal-protezzjoni ċivili u l-assistenza umanitarja” (COM(2010)0600);

15.

Jappella li tintuża d-duwalità ċivili-militari tat-teknoloġiji bħala sors ta’ sinerġiji; fil-kuntest ta’ assi ta’ kollaborazzjoni strateġika definiti tajjeb, iħeġġeġ biex ikun hemm kooperazzjoni mal-EDA, mal-pajjiżi tan-NATO, bħall-Istati Uniti u l-Kanada, u pajjiżi terzi li huma pijunieri fil-qasam tas-sigurtà CBRN, permezz ta’ skambji ta’ prattika tajba, ta’ djalogi strutturati fost l-esperti u l-iżvilupp komuni tal-kapaċitajiet; jenfasizza l-importanza li l-Istati Membri tal-UE jwettqu eżerċizzji konġunti fil-prevenzjoni u trattament ta’ inċidenti ta’ sigurtà marbuta mas-CBRN, bil-parteċipazzjoni tal-forzi armati u l-forzi tal-protezzjoni ċivili tal-Istati Membri u l-Mekkaniżmu ta’ Protezzjoni Ċivili tal-UE;

16.

Jinnota li l-Mekkaniżmu tal-Unjoni għall-Protezzjoni Ċivili, kif definit permezz tad-Deċiżjoni tal-Kunsill 2007/779/KE, bħalissa huwa l-istrument xieraq għat-trattament ta’ diżastri CBRN, u jenfasizza li din l-istruttura għandha tkun il-forum fejn għandhom jittieħdu deċiżjonijiet ta’ emerġenza dwar it-tħejjija għad-diżastri u r-rispons għalihom; jinnota, madankollu, li sabiex jintlaħaq dan l-għan u sabiex tiġi żgurata prevenzjoni u skoperta xierqa jeħtieġ tiġi stabbilita kooperazzjoni mal-korpi tal-protezzjoni ċivili, mal-awtoritajiet tal-intelliġenza u tal-infurzar tal-liġi kif ukoll mas-servizzi tas-sigurtà, tal-informazzjoni militari u maċ-ċentri ta’ rispons f'kull wieħed mill-Istati Membri u fil-livell tal-UE, bħalma huma l-Kapaċità Ċivili tal-Ippjanar u t-Tmexxija (CPCC) fi ħdan il-Kumitat Politiku u ta’ Sigurtà (KPS) u ċ-Ċentru ta’ Sitwazzjonijiet Konġunt (SitCen); huwa jfakkar ukoll fl-irwol tal-Kumitat Permanenti dwar il-Koperazzjoni Operattiva dwar is-Sigurtà Interna (COSI), li għandu l-kompitu li jiffaċilita, jippromwovi u jsaħħaħ il-koperazzjoni operazzjonali tal-awtoritajiet nazzjonali relevanti tal-Istati Membri fil-qasam tas-sigurtà interna;

17.

Ifakkar li ċ-Ċentru tas-Sitwazzjonijiet Konġunt (SitCen) tqiegħed fi ħdan is-Servizz Ewropew il-ġdid għall-Azzjoni Esterna, u li l-persunal tiegħu ġej primarjament mis-servizzi tas-sigurtà u tal-pulizija tal-Istati Membri; jenfasizza li r-rwol tiegħu huwa tal-akbar importanza għas-sostenn taċ-ċentri nazzjonali tal-ġestjoni tal-kriżijiet;

18.

Jistieden lill-Istati Membri biex jikkoordinaw l-isforzi tagħhom, taħt is-superviżjoni tal-Kummissjoni, sabiex tittejjeb l-interoperabilità tat-tagħmir, kapaċitajiet u teknoloġiji fil-qasam tal-protezzjoni ċivili sabiex tkun implimentata b'mod effiċjenti fil-prattika l-klawżola l-ġdida ta’ solidarjetà fil-każ ta’ diżastru CRBN;

19.

Jenfasizza li t-tisħiħ tal-kapaċità tal-protezzjoni ċivili tal-UE għandu jinkludi l-esplorazzjoni ta’ teknoloġiji, infrastrutturi u kapaċitajiet b'użu doppju, kif ukoll kooperazzjoni strateġika mal-EDA, kif imsemmi hawn fuq, l-ESA, l-Aġenzija Internazzjonali dwar l-Enerġija Atomika (IAEA), l-Organizzazzjoni għall-Projbizzjoni ta’ Armi Kimiċi (OPCW) u ċentri jew programmi ta’ eċċellenza internazzjonali oħra relatati mas-CBRN;

20.

Iħeġġeġ lill-Istati Membri biex jaħtru jew joħolqu awtorità nazzjonali li, fil-każ ta’ attakk jew diżastru CBRN, ikollha r-responsabilità li taġixxi bħala koordinatriċi prinċipali tal-istrutturi nazzjonali u lokali kollha involuti, kif ukoll tal-miżuri li jistgħu jittieħdu kontra tali attakk jew diżastru;

21.

Japprova l-valutazzjoni dwar il-fatt li l-attakki tas-CBRN huma theddida serja għas-sigurtà tan-nies li jgħixu fl-UE; għalhekk jappoġġa l-miżuri kollha li joffru protezzjoni ikbar kontra l-attakki tas-CBRN;

22.

Jenfasizza li l-ġlieda kontra t-terroriżmu trid titwettaq b'rispett sħiħ għal-liġi internazzjonali tad-drittijiet tal-bniedem, u l-liġi tad-drittijiet fundamentali, il-prinċipji u l-valuri Ewropej, inkluż il-prinċipju tal-istat tad-dritt; ifakkar fil-ħtieġa tar-rispett għall-prinċipji tal-Konvenzjoni Aarhus dwar l-aċċess pubbliku għall-informazzjoni, il-parteċipazzjoni u s-sindikabilità ġudizzjarja f'materji marbutin mal-ambjent;

23.

Ifakkar li l-prevenzjoni tal-aċċess tat-terroristi għal materjal CBRN hija prijorità ewlenija kemm taħt l-Istrateġija attwali Kontra t-Terroriżmu 2005 tal-UE u kemm taħt dik ġejjiena, kif ukoll taħt l-Istrateġija tal-UE 2003 kontra l-Proliferazzjoni ta’ Armi ta’ Qerda Massiva u s-Sistema ta’ Kunsinna tagħhom; jitlob, għalhekk, li l-Koordinatur tal-UE għall-Ġlieda Kontra t-Terroriżmu jirrapporta regolarment lill-Parlament, permezz tal-aġenziji u l-esperti tal-UE rilevanti u xierqa, dwar il-livell ta’ kwalunkwe riskju jew theddida potenzjali ta’ CBRN fl-Unjoni jew kontra ċittadini u l-interessi Ewropej x'imkien ieħor; jinsisti li hija meħtieġa aktar kjarifika dwar ir-rwoli xierqa tad-diversi korpi varji tal-UE u nazzjonali involuti fil-ġlieda kontra t-terroriżmu; jirrikonoxxi r-rwol ta’ koordinazzjoni tal-COSI u s-SitCen; jistieden lill-Parlament, bħala l-uniku korp elett demokratikament b'mod dirett fl-UE, u fil-kuntest tal-prerogattivi tiegħu, biex jiggarantixxi sorveljanza demokratika ta’ dawn iż-żewġ korpi u, b'hekk, jinżamm infurmat bis-sħiħ u b'mod immedjat dwar l-attivitajiet tagħhom, sabiex tinżamm l-operabilità sigura tagħhom;

24.

Iħeġġeġ lill-istituzzjonijiet tal-UE biex iżommu l-kontroll demokratiku u t-trasparenza rigward l-iżvilupp u l-implimentazzjoni tal-partijiet kollha tal-Pjan ta’ Azzjoni CBRN tal-UE, li jirrispetta d-dritt tal-pubbliku għall-aċċess għall-informazzjoni u d-dokumentazzjoni rilevanti li jikkonċernaw is-sigurtà pubblika u r-riskji ta’ kuljum assoċjati mad-diżastri tas-CBRN;

25.

Jitlob għall-integrazzjoni tal-miżuri previsti fil-Pjan ta’ Azzjoni dwar is-CBRN fl-istrumenti kollha tal-UE li għandhom x'jaqsmu ma’ relazzjonijiet esterni għall-kooperazzjoni ekonomika u d-djalogu politiku ma’ pajjiżi terzi (inkluż fil-klawżoli tal-UE dwar in-nonproliferazzjoni); iħeġġeġ lill-Kummissjoni u lill-Kunsill, sabiex fid-djalogu politiku u ekonomiku tagħhom ma’ pajjiżi terzi, jużaw kull mezz disponibbli (inklużi strumenti tal-Politika Estera u ta’ Sigurtà Komuni u tar-relazzjonijiet esterni) sabiex jippromwovu standards għall-iskoperta u l-prevenzjoni, inkluż il-qsim tal-informazzjoni u rispons għal inċidenti bis-CBRN f'pajjiżi terzi, kif spjegat fil-Pjan ta’ Azzjoni;

26.

Jenfasizza r-rabta mill-qrib u l-effett ta’ mera bejn is-sigurtà interna u s-sigurtà esterna tal-Unjoni Ewropea; jilqa' bi pjaċir, f'dan ir-rigward, l-attivitajiet imwettqa miċ-ċentri reġjunali ta’ eċċellenza CBRN fiż-żoni ta’ tensjoni barra l-Unjoni Ewropea maħsuba biex irawmu netwerk ta’ ħidma ta’ esperti, itejbu l-kapaċità ta’ kontroll tal-esportazzjoni u l-prevenzjoni tat-traffiku illeċitu ta’ sustanzi CBRN, u jsaħħu l-mezzi regolatorji ta’ dawk l-Istati u l-kooperazzjoni reġjunali f'dan il-qasam; iħeġġeġ li jsir taħriġ fl-Ewropa għall-esperti internazzjonali tal-pajjiżi f'riskju, bir-rispett tar-regoli tas-sigurtà u tal-kunfidenzjalità meħtieġa;

27.

Iħeġġeġ lill-istituzzjonijiet tal-UE u l-Istati Membri biex jirreżistu l-pressjoni mill-industrija u minn partijiet interessati oħra li jfittxu li jaħarbu l-piż ta’ aktar regolamentazzjoni, kif wieħed jista' jistenna (u kif jirriżulta b'mod ċar meta nqabblu l-verżjoni tal-Kummissjoni u l-verżjoni tal-Kunsill tal-Pjan ta’ Azzjoni); iqis li t-tħassib tal-industrija dwar il-kwalità u l-impatt tal-miżuri regolatorji proposti għandhom jittieħdu in kunsiderazzjoni, mingħajr ma wieħed jinsa l-punt ewlieni, jiġifieri d-drittijiet għall-ħajja, għal-libertà, għas-sikurezza tal-popli kollha fl-Ewropa u s-soċjetajiet tagħhom; jenfasizza l-prijorità li tkun żgurata s-superviżjoni u protezzjoni ta’ materjali CBRN madwar l-UE u l-effiċjenza tar-rispons għal diżastru – inċidentali u mhux – min-naħa tal-UE u l-importanza tal-ħidma lejn l-eliminazzjoni ta’ tali theddidiet;

28.

Jistieden lill-Istati Membri sabiex jipparteċipaw b'mod sħiħ fil-fażijiet ta’ implimentazzjoni tal-Pjan ta’ Azzjoni tal-UE dwar is-CBRN, u jikkoperaw f'dan ir-rigward mal-korpi tal-UE li qegħdin jitraduċu l-għanijiet u l-azzjonijiet tal-Pjan ta’ Azzjoni f'passi konkreti, sabiex is-sigurtà tas-CBRN tkun garantita f'kull wieħed mill-Istati Membri tal-UE;

29.

Jistieden lill-Kummissjoni taġixxi bħala l-faċilitatur ewlieni u sorveljant b'rabta mat-twaqqif u l-aġġornament regolari ta’ list ital-UE dwar aġenti CBRN, fejn il-Kummissjoni għandha tkun l-unika waħda li tiddeċiedi dwar skadenzi raġonevoli; jinsisti li l-listi għandhom ukoll jinkludu miżuri possibbli preventive u ta’ rispons għal kull aġent CBRN, bi qbil mal-livell ta’ periklu tiegħu u mal-użu potenzjalment negattiv u l-vulnerabilità;

30.

Huwa tal-fehma li l-Pjan ta’ Azzjoni tal-UE dwar is-CBRN għandu jistabbilixxi standards ogħla rigward il-kriterji ta’ valutazzjoni ta’ faċilitajiet ta’ CBRN b'riskju għoli, u jenfasizza r-rwol u r-responasabilità tal-awtoritajiet nazzjonali li jwettqu kontrolli regolari ta’ tali faċilitajiet, peress li l-iżvilupp ta “kriterji”, kif iddikjarat fil-Pjan ta’ Azzjoni attwali emendat u adottat mill-Kunsill, mhux biżżejjed u għandu standards baxxi ħafna, flimkien mal-livelli baxxi ta’ responsabbiltà allokati lill-organizzazzjonijiet li jittrattaw materjali CBRN, lill-awtoritajiet relevanti tal-Istati Membri u lill-korpi tal-UE; jinnota wkoll li l-miżuri kollha li jittieħdu għandhom ikunu proporzjonali għar-riskji possibbli;

31.

Jenfasizza li l-arranġamenti u l-ħtiġiet ta’ sigurtà fil-faċilitajiet tas-CBRN b'riskju għoli madwar l-UE iridu jkun suġġetti għal regolamenti tal-UE, aktar milli sempliċement “dokumenti dwar il-prassi tajba”, permezz ta’ proċess ta’ konsultazzjoni konsistenti li jiġbru flimkien il-korpi tal-UE, l-awtoritajiet u l-organizzazzjonijiet tal-Istati Membri li jittrattaw aġenti CBRN b'riskju riskju għoli; iħeġġeġ li sakemm jiġu adottati u użati regolamenti bħal dawn, il-Kummissjoni għandha tingħata rwol akbar ta’ sorveljanza u ta’ spezzjoni;

32.

Jilqa' l-inizjattivi li saru miċ-Ċentru Konġunt tar-Riċerka (ĊKR) bħala appoġġ għall-programmi tal-IAEA u għall-ispezzjonijiet nukleari; jirrakkomnda li ssir ħidma favur komunalità tad-databases tagħha u tar-riżultati tar-riċerka ma’ dawk li jinkisbu mill-Istati Membri;

33.

Jappoġġja l-iżvilupp ta’ strateġiji biex titqajjem kuxjenza fost l-impriżi, il-komunità xjentifika u universitarja u l-istabbilimenti finanzjarji dwar ir-riskji assoċjati mal-proliferazzjoni u t-traffiku ta’ sustanzi CBRN fil-kuntest tal-ħidma u tal-attivitajiet tagħhom; iqis ukoll, b'mod ġenerali, li l-kunfidenzjalità hija komponent essenzjali tal-effettività ta’ ċerti miżuri ta’ sigurtà tal-pjan ta’ azzjoni, u li jkun xieraq li wieħed ikun preparat kontra kull riskju ta’ żvelar li jista' jagħmilhom inoperabbli;

34.

Jemmen li l-Kummissjoni u l-awtoritajiet tal-Istati Membri għandhom jissorveljaw l-attivitajiet imwettqa mill-organizzazzjonijiet li jittrattaw materjali CBRN b'riskju għoli u jiżguraw li dawn l-organizzazzjonijiet jikkonformaw ma’ standards ibbażati fuq ir-riskju ta’ sigurtà u sikurezza pubblika. Dan jimplika li l-ispezzjonijiet kif suppost ta’ siti b'riskju għoli għandhom isiru regolarment;

35.

Iqis li huwa kruċjali li l-parti “Prevenzjoni” tal-Pjan ta’ Azzjoni tal-UE dwar is-CBRN għandha tiġi emendata b'tali mod li ġġiegħel lill-industrija tal-kimiki li jissostitwixxu l-użu ta’ kimiċi b'riskju għoli b'alternattivi xierqa b'riskji aktar baxxi, fejn sostituzzjoni bħal din hija xjentifikament, teknoloġikament u ambjentalment possibbli u f'firxa raġonevoli f'termini ekonomiċi; jirrikonoxxi li l-ispejjeż ekonomiċi li tista' tinvolvi sostituzzjoni bħal din u l-impatt tagħhom fuq l-industriji rilevanti, iżda jħeġġeġ lill-UE, lill-Istati Membri u lis-settur privat biex iqiegħdu s-sigurtà tal-ċittadini tal-UE l-ewwel u qabel kollox; jissuġġerixxi b'rabta ma’ dan li għandha tiġi stabbilita rabta speċifika mar-Regolament REACH (24) eżistenti, xi ħaġa li l-verżjoni tal-Pjan ta’ Azzjoni propost mill-Kummissjoni ġustament fittxet li tagħmel; jistieden lill-Kummissjoni tressaq studju dwar l-implimentazzjoni tar-Regolament REACH f'dan ir-rigward;

36.

Jenfasizza li l-ikbar riskji tas-CBRN jirriżultaw mill-proliferazzjoni tal-materjali tas-CBRN mit-terroristi; jisħaq għalhekk fuq l-importanza li r-reġimi tal-kontroll internazzjonali jsiru aktar effettivi, u jitjiebu l-kontrolli fuq il-fruntieri u l-esportazzjoni;

37.

Jistieden lill-Kunsill u lill-Kummissjoni biex iħeġġu lill-Istati Membri kollha biex jiffirmaw u jwettqu l-impenji tagħhom skont il-Konvenzjoni dwar l-Armi Kimiċi (CWC) u l-Konvenzjoni dwar l-Armi Bijoloġiċi (BWC) u biex jagħmlu ħilithom biex jippromwovu l-Protokoll ta’ Verifika Addizzjonali għall-Konvenzjoni dwar l-Armi Bijoloġiċi, li jinkludi lista tal-aġenti bijoloġiċi perikolużi u l-patoġeni u d-dispożizzjonijiet dwar dikjarazzjonijiet ta’ kxif u spezzjonijiet ta’ monitoraġġ; iħeġġeġ ukoll lill-Istati Membri, lill-Kunsill, lill-Kummissjoni u lill-komunità internazzjonali biex ifasslu, bħala parti mill-Anness ta’ Verifika għall-Konvenzjoni dwar l-Armi Kimiċi, lista tas-sustanzi kimiċi potenzjalment perikolużi kollha, inkluż il-fosforu abjad;

38.

Barra minn hekk jistieden lill-Kummissjoni u lill-Kunsill biex ikomplu jżidu l-attivitajiet ta’ appoġġ tas-sistema tat-trattat, partikolarment il-konvenzjonijiet dwar l-armi kimiċi u bijoloġiċi, u għaldaqstant jistiednu lill-Istati Membri kollha biex jimponu projbizzjoni stretta fuq il-produzzjoni u l-użu ta’ armi bijoloġiċi u kimiċi u li jżarmaw l-armi tagħhom stess;

39.

Konxju li l-proliferazzjoni żżid it-theddida tal-użu ħażin minn gruppi terroristiċi, iħeġġeġ lill-UE biex tkompli bl-isforzi tagħha biex tuniversalizza l-qafas legali tal-ġlieda kontra t-terroriżmu nukleari u tiżgura li jkun hemm konformità mar-regoli eżistenti; jappoġġa l-proġetti ta’ kooperazzjoni ma’ pajjiżi terzi, pereżempju fil-Mediterran, fil-ġlieda kontra t-traffiku illeċitu ta’ materjal nukleari u radjoloġiku; jistieden lill-UE biex tuniversalizza s-CWC u l-BWC bi tħejjija għall-Konferenza ta’ Reviżjoni tal-Konvenzjoni dwar l-Armi Bijoloġiċi u l-Armi Tossiċi (BTWC) fl-2011;

40.

Jistieden lill-Kummissjoni biex tippreżenta data komparattiva u evalwazzjoni ġenerali tal-istat attwali fl-industriji fl-Ewropa rigward l-iżgurar u ż-żieda tal-kontroll fuq materjali CBRN b'riskju għoli, inkluża ħarsa ġenerali tal-liġijiet kollha nazzjonali rilevanti dwar l-implimentazzjoni tal-Konvenzjoni dwar il-Projbizzjoni tal-Iżvilupp, il-Produzzjoni, is-CWC, tal-BWC u strumenti internazzjonali oħra relatati mal-materjali CBRN; din il-ħarsa ġenerali għandha tinkludi r-rappurtar dwar kemm l-Istati Membri u l-industriji jissodisfaw l-obbligi internazzjonali tagħhom; jirrikonoxxi, madankollu, li miżuri ta’ infurzar bħall-BWC u s-CWC jistgħu ma jkunux biżżejjed biex jiġu indirizzati r-riskji li jirriżultaw mill-użu tas-CBRN mill-atturi mhux statali, jiġifieri permezz ta’ netwerks terroristiċi;

41.

Jistieden lill-Kunsill u lill-Kummissjoni biex jippromwovu l-Abbozz eżistenti ta’ Konvenzjoni dwar il-Projbizzjoni tal-Iżvilupp, il-Produzzjoni, il-Ħażna, it-Trasferiment u l-Użu tal-Armi tal-Uranju u d-distruzzjoni tagħhom u jippreżentaw din il-konvenzjoni lill-pajjiżi membri tan-NU, biex tiġi ffirmata u rratifikata; jistieden lill-Istati Membri kollha tal-UE u lill-pajjiżi membri tan-NU biex jimponu moratorju dwar l-użu tal-armi tal-uranju mdgħajjef sa ma jkun hemm ftehim dwar projbizzjoni globali ta’ dawn l-armi;

42.

Jinkoraġġixxi l-implimentazzjoni ta’ miżuri biex jiġġieldu l-finanzjament tal-proliferazzjoni, bl-użu tal-mekkaniżmi mwaqqfa biex jiġġieldu l-finanzjament tat-terroriżmu;

43.

Jilqa' l-attivitajiet tal-Kummissjoni taħt l-IfS biex jiġu miġġielda l-attivitajiet CBRN; iqis dawn l-attivitajiet komplementari għall-Pjan ta’ Azzjoni tas-CBRN u jitlob lill-Kummissjoni biex tespandi l-proġetti f'reġjuni barra dawk tal-ex Unjoni Sovjetika (SEDE); jistieden ukoll lill-Kummissjoni, biex nibnu fuq l-esperjenzi miksuba fil-kuntest tal-Istrument għall-Istabbiltà biex tniedi sejħa għal proposti bl-għan tat-tisħiħ tas-sigurtà u l-protezzjoni ta’ laboratorji ċivili sabiex tkun evitata l-proliferazzjoni fil-futur;

44.

Iqis li l-Pjan ta’ Azzjoni tal-UE dwar is-CBRN għandu mingħajr ambigwità jitlob għall-iżvilupp ta’ linji gwida tal-UE dwar it-taħriġ tas-sigurtà u r-rekwiżiti standard li għandhom jiġu implimentati fl-Istati Membri kollha, u għandhom jiżguraw li jiġu provduti programmi ta’ taħriġ speċifiċi għall-persunal tas-sigurtà li jittratta materjali CBRN b'riskju għoli, inkluż il-persunal fl-industriji u f'ċentri ta’ riċerka bi preżenza ta’ CBRN b'riskju għoli, u li jiġu stabbiliti rekwiżiti għal uffiċjali tas-CBRN (rwol, kompetenza u taħriġ); jenfasizza li s-sigurtà u taħriġ biex ikun hemm kuxjenza jridu wkoll jiġu pprovduti lill min hu responsabbli mir-reazzjoni inizjali;

45.

Jenfasizza li reviżjoni fuq medda qasira ta’ żmien ġejjiena tal-Pjan ta’ Azzjoni tal-UE dwar is-CBRN m'għandhiex sempliċiment tippromwovi l-awtoregolamentazzjoni fost l-industriji konċernati, u mhux biss tagħti parir lill-industriji li jadottaw kodiċi ta’ kondotta, imma li titlob lill-Kummissjoni biex tiżviluppa linji gwida u regolamenti pan-Ewropej applikabbli għas-setturi kollha li jittrattaw ma’ aġenti CBRN b'riskju għoli;

46.

Iqis li huwa importanti ħafna li jkunu sorveljati t-tranżazzjonijiet kollha li jinvolvu materjali CBRN b'riskju għoli fl-UE, u li minflok sempliċement “iħeġġu” l-industrija biex tirrapporta dwar it-tranżazzjonijiet, il-Kummissjoni u l-Istati Membri għandhom jaħdmu fuq qafas legali xieraq li jirregola u jissorvelja t-tranżazzjonijiet, u b'hekk jitjieb il-livell ta’ sigurtà u jkun żgurat rappurtar tajjeb u rapidu dwar it-transazzjonijiet suspettużi kollha, kif ukoll dwar telf jew serq ta’ materjali CBRN; jenfasizza li dawn ir-regolamenti għandhom jistabbilixxu bażi xierqa għal trasparenza sħiħa fis-setturi kollha li jittrattaw ma’ aġenti CBRN, u b'hekk l-industriji jinżammu responsabbli għal tali tranzazzjonijiet; iqis li l-kapaċità tas-settur privat li jinforza l-liġijiet u r-regoli rilevanti għandha titqies b'rabta mal-monitoraġġ tal-obbligi tagħhom ta’ rappurtaġġ sabiex tiġi żgurata sorveljanza adegwata;

47.

Jenfasizza li s-sigurtà kemm tat-trasport kif ukoll tal-ħżin ta’ materjali tas-CBRN hija bla dubju u inevitabbilment parti mill-proċess tal-UE biex l-aċċess għal dawn il-materjali jsir kemm jista' jkun diffiċli b'hekk jiġi ttrattat in-nuqqas ta’ sigurtà relatata mal-materjali tas-CBRN;

48.

Jenfasizza li r-riskji marbuta mal-kummerċ ta’ sustanzi kimiċi fuq l-Internet jeħtieġu aktar investigazzjoni u li għandhom isiru azzjonijiet speċifiċi għal dan il-għan;

49.

Jitlob kjarifika dwar it-tisħiħ tar-reġim tal-importazzjoni/esportazzjoni rigward ir-rwoli tal-Istati Membri u l-Kummissjoni; jistieden lill-Istati Membri jimplimentaw u jiżguraw l-applikazzjoni tar-regolamenti internazzjonali eżistenti, u lill-Kummissjoni biex ikollha rwol ta’ monitoraġġ, billi tevalwa u tirraporta dwar il-konformità; jinnota li huwa importanti, meta wieħed iqis l-evoluzzjoni tal-era tat-teknoloġija, li wieħed jipproċedi għall-eżami mill-ġdid u r-reviżjoni u tal-leġiżlazzjoni u r-regolamenti rilevanti vis-à-vis l-akkwist, l-importazzjoni, il-bejgħ, il-ħażna sikura u t-trasport ta’ materjali CBRN;

50.

Jenfasizza l-ħtieġa li jissaħħu fejn jeżistu, u li jinħolqu fejn ma jeżistux, il-mekkaniżmi ta’ spezzjoni u ta’ sikurezza fis-servizzi postali kollha li jittrattaw id-distribuzzjoni ta’ korrispondenza, fil-perspettiva tal-atti ta’ terroriżmu mwettqa f'pajjiżi Ewropej bit-tqegħid ta’ sustanzi splussivi fil-pakketti mibgħuta permezz tal-posta;

51.

Jistieden lill-Kummissjoni tniedi studju, b'kooperazzjoni mal-awtoritajiet tal-Istati Membri, biex tevalwa s-sitwazzjoni fil-post f'każ ta’ identifikazzjoni ta’ CBRN u dwar is-sikurezza ta’ impjanti nukleari fl-Ue u fil-pajjiżi ġara tagħha, fil-każ ta’ inċident jew attakk intenzjonali; jinkoraġġixxi lill-Kummissjoni tibni fuq ir-riżultati ta’ tali evalwazzjoni u taħdem fuq linji gwida komuni tal-UE dwar kif għandhom jiġu trattati inċidenti jew attakki intenzjonati bħal dawn, fosthom li jinstabu l-mezzi biex jiżguraw li l-Istati Membri jallokaw riżorsi umani u materjali għal sforzi bħal dawn;

52.

Jappella li jissaħħaħ ir-rwol taċ-Ċentru ta’ Monitoraġġ u Informazzjoni (MIC) li diġà kien stabbilit taħt il-Mekkaniżmu ta’ Protezzjoni Ċivili tal-UE sabiex jiżgura l-iskambju xieraq tat-tagħrif u tal-prattika tajba bejn l-Istati Membri, li jwassal għal standards pan-Ewropej fl-identifikazzjoni ta’ attivitajiet tas-CBRN;

53.

Jitlob lill-Kummissjoni sabiex tikkontrolla, tevalwa u tirrapporta lill-Parlament dwar il-konformità tal-Istati Membri fuq bażi annwali dwar il-konformità min-naħa tal-Istati Membri, u jitlob lill-awtoritajiet nazzjonali jassiguraw li r-regolamenti u l-linji gwida qed jiġu segwiti u mħarsa mill-industriji u l-organizzazzjonijiet rilevanti li jittrattaw ma’ materjali CBRN ta’ riskju għoli;

54.

Jikkunsidra li huwa essenzjali li jitwettqu studji xierqa fuq bażi obbligatorja bil-ħsieb li jiġu involuti l-korpi u l-partijiet konċernati kollha relevanti, kemm dawk nazzjonali kif ukoll tal-UE, inkluża valutazzjoni ta’ modi biex l-iskambji u l-kooperazzjoni jsiru aktar rapidi u aktar faċli, u b'hekk jagħmlu r-ripons għal theddida lis-sigurtà pubblika aktar effettiva;

55.

Jistieden lill-Kunsill jagħti rwol ta’ “koordinatur” lill-Kummissjoni rigward l-ippjanar f'każijiet ta’ emerġenza, sabiex tkun tista' tagħmel monitoraġġ, u b'hekk ikun żgurat li jeżistu pjanijiet ta’ emerġenza lokali kif ukoll nazzjonali; jenfasizza li l-Kummissjoni għandha tieħu rwol ta’ depożitarju ta’ pjanijiet bħal dawn, u dan ipoġġiha fl-aħjar pożizzjoni biex tidentifika nuqqasijiet potenzjali u biex taġixxi kif xieraq b'aktar ħeffa mill-awtoritajiet rilevanti;

56.

Jilqa' l-intenzjoni li tissaħħaħ il-kapaċità tal-protezzjoni ċivili tal-UE; jinnota madankollu li f'ħafna Stati Membri tal-UE d-dipartimenti tad-difiża militari akkwistaw esperjenzi prattiċi profiċjenti dwar it-trattament tad-diżastri tas-CBRN; jistieden, f'dan ir-rigward, lill-Istati Membri u l-Kummissjoni biex jaqsmu l-aħjar prattiki u biex jinvestu aktar f'koordinazzjoni kbira bejn l-esperti ċivili u militari;

57.

Iħeġġeġ lill-Kummissjoni biex tkompli tidentifika l-ħtiġijiet li għandhom jitwettqu sabiex jittejbu l-kapaċitajiet tal-protezzjoni ċivili, bil-ħsieb għal proġetti ta’ akkwist komuni; jitlob f'dan ir-rigward, li jkun fokus partikolari fuq id-definizzjoni tal-ħtiġijiet tal-UE f'termini tal-livell ta’ preparazzjoni u l-kapaċità tar-rispons tas-CBRN, inklużi kontromiżuri mediċi sabiex id-disponibilità tal-kontromiżuri mediċi f'każ ta’ inċident tas-CBRN tiġi vvalutata kemm fil-livell tal-UE kif ukoll f'dak tal-Istati Membri;

58.

Jitlob għall-organizzazzjoni ta’ eżerċizzji konġunti bejn l-Istati Membri tal-UE, u bejn l-Istati Membri u pajjiżi terzi, biex jiġu evitati sitwazzjonijiet perikolużi fir-rigward tas-sigurtà kimika, bijoloġika, radjoloġika u nukleari;

59.

Jilqa' l-ippjanar tal-eżerċizzji tal-UE ta’ simulazzjonijiet ta’ inċidenti jew attakki CBRN, u jenfasizza li l-Pjan ta’ Azzjoni tal-UE dwar is-CBRNgħandu jagħmel dispożizzjoni għar-riżultati u l-valutazzjonijiet ta’ eżerċizzji bħal dawn għad-dibattitu kontinwu li għandu jkun hemm dwar l-iżvilupp ta’ standards pan-Ewropej;

60.

Jiġbed l-attenzjoni għall-fatt li l-Kummissjoni, għandha tmexxi l-iffissar tal-istandards ibbażati fuq il-ħtiġijiet ta’ kapaċitajiet ta’ kontromiżuri; jenfasizza li dan huwa l-unika mod biex jintlaħaq l-ogħla standard possibbli ta’ sigurtà madwar l-UE, għax dan ikun l-uniku mod possibbli biex jiżguraw li l-Istati Membri qed isegwu l-istess linji gwida u japplikaw l-istess prinċipji meta jaħżnu l-kapaċitajiet ħażna u jħejju r-riżorsi umani u materjali xierqa biex jirrispondi għal diżastru, kemm jekk aċċidentali kif ukoll jekk intenzjonat;

61.

Jenfasizza l-bżonn li jinħolqu stokkijiet reġjonali u madwar l-UE ta’ riżorsi ta’ rispons, li l-iskala tagħhom għandha kemm jista' jkun tkun tirrifletti l-livell attwali ta’ theddida, kemm jekk fil-forma ta’ tagħmir mediku kif ukoll tipi oħra ta’ tagħmir, taħt il-koordinazzjoni tal-Mekkaniżmu ta’ Protezzjoni Ċivili tal-UE, fundati mill-UE u bi qbil ma—linji gwida maqbula komunement fl-UE; jenfasizza l-importanza li jinżammu ħażniet ġestiti sew biex ikun żgurat li r-riżorsi ta’ reazzjoni, tagħmir mediku jew tagħmir rilevanti ieħor, ikunu kompletament funzjonali, attwali u aġġornati; iħeġġeġ li sakemm din il-ħażna ta’ riżorsi UE/reġjonali tiġi imlimentata, il-Pjan ta’ Azzjoni tal-UE dwar is-CBRN għandu jindika mod possibbli kif l-Istati Membri jistgħu jaqsmu bejniethom il-kontromiżuri u r-riżorsi fil-każ ta’ inċident jew attakk terroristiku CBRN, biex titpoġġa fil-prattika l-Klawżola ta’ Solidarjetà l-ġdida; jenfasizza li kwalunkwe att ta’ assistenza lil Stati Membri speċifiċi tal-UE għandu jkun b'riżultat ta’ talba mill-awtoritajiet politiċi rilevanti fil-pajjiżi affettwati u m'għandux imur kontra l-kapaċità tal-Istat Membru li jipproteġi liċ-ċittadini tiegħu;

62.

Jitlob rieżami tar-regoli li jiggvernaw il-Fond Ewropew ta’ Solidarjetà biex dan ikun iktar aċċessibbli f'każ ta’ diżastri naturali, u jkun disponibbli f'każ ta’ diżatri industrijali u maħluqa mill-bniedem, u jistieden lill-Istati Membri jagħmlu użu mir-riżorsi disponibbli taħt il-Fondi Strutturali biex titjieb il-prevenzjoni u t-tħejjija;

63.

Għal tħejjija fil-każ sfortunat li jkun hemm inċident, ħruġ jew użu intenzjonat ta’ CBRN, jistieden lill-Kummissjoni sabiex tistabbilixxi mekkaniżmi ta’ rappurtar li jipprovdu rabta bejn il-ħidma tal-Mekkaniżmu tal-Protezzjoni Ċivili tal-UE u sistemi oħra ta’ twissija bikrija tal-UE fl-oqsma relevanti tas-saħħa, tal-ambjent, tal-produzzjoni tal-ikel u tal-benessri tal-annimali; jistieden ukoll lill-Kummissjoni biex tistabbilixxi mekkaniżmi għall-iskambju ta’ informazzjoni u analiżijiet ma’ korpi internazzjonali bħall-Organizzazzjoni Dinjija tas-Saħħa, l-Organizzazzjoni Dinjija tat-Temp u l-Organizzazzjoni dwar l-Ikel u l-Agrikoltura;

64.

Jitlob li jinħolqu timijiet ta’ rispons speċjalizzati UE/reġjonali, inkluż persunal mediku, persunal tal-infurzar tal-liġi u persunal militari, u jindiku li jekk dawn it-timijiet jinħolqu, għandha ssir skeda ta’ taħriġ speċjali u eżerċizzji operattivi regolari;

65.

Jistieden lill-Kummissjoni biex tipprovdi finanzjament suffiċjenti għall-iżvilupp ta’ tagħmir imtejjeb għas-sejbien u l-identifikazzjoni ta’ aġenti bijoloġiċi fil-każ ta’ attakk jew inċident; jiddeplora l-fatt li t-tagħmir eżistenti għas-sejbien huwa limitat fil-kapaċità u l-ħeffa, bir-riżultat ta’ telf ta’ ħin prezzjuż fil-każ ta’ emerġenza; jenfasizza li l-persunal ta’ emerġenza irid ikun attrezzat tajjeb u medikament protett bil-quddiem sabiex jaħdem b'sigurtà personali massima f'żona ta’ diżastru fejn patoġeni ta’ ħsara jistgħu jkunu preżenti; jenfasizza li tagħmir imtejjeb għall-identifikazzjoni ta’ aġenti u dijanjostiċi huwa meħtieġ ukoll fl-isptarijiet u faċilitajiet oħra li jirċievu l-vittmi ta’ inċident;

66.

Jistieden lill-UE u lill-korpi nazzjonali varji involuti fil-ġbir tal-informazzjoni biex jirrevedu l-istrutturi organizzattivi tagħhom u fejn dawn ikunu nieqsa, jinħatru persuni adegwati bl-esperjenza u l-fehim tal-identifikazzjoni u l-evalwazzjoni ta’ theddid u riskji CBRN;

67.

Jitlob lill-Kummissjoni biex tirrapporta b'mod regolari lill-Parlament dwar il-valutazzjonijiet tat-theddid u tar-riskju tas-CBRN;

68.

Jitlob li jkun hemm tnedija fuq skala Ewropea ta’ programmi ta’ taħriġ u ta’ tqajjim ta’ kuxjenza, filwaqt li jiġu kkunsidrati l-possibilitajiet li joffri l-internet, bħala sorsi ewlenin biex iċ-ċittadini jiġu mgħarrfa dwar kwistjonijiet li jirrigwardaw is-CBRN; jenfasizza l-importanza li għandha tingħata lill-koordinazzjoni tal-mekkaniżmi ta’ twissija u ta’ informazzjoni rapidi taċ-ċittadini tal-UE f'dak li jirrigwarda l-inċidenti CBRN; jinotta b'interess l-istudji dwar il-fattibilità rigward Ċentru Ewropew għat-taħriġ fis-sigurtà nukleari fi ħdan il-JRC;

69.

Josserva s-sovrinvestiment mhux koordinat fil-vaċċini matul il-pandemija A/H1N1; jilqa' b'sodisfazzjon l-Abbozz tal-Konklużjonijiet tal-Kunsill “Dwar it-Tagħlimiet li joħorġu mill-pandemija A/H1N1 – is-sigurtà tas-saħħa fl-Unjoni Ewropea” (12665/2010) li tipprevedi l-iżvilupp ta’ mekkaniżmu għall-akkwist konġunt tal-vaċċini u l-medikament antivirali applikabbli fl-Istati Membri fuq bażi volontarja, u jinkoraġġixi lill-Istati Membri jiżviluppaw flimkien soluzzjonijiet ta’ prontezza reġjonali, inkluż il-qsim tal-kapaċità eżistenti u l-koordinament tal-akkwist li jżomm il-bilanċ bejn il-kost u l-effettività ta’ kontromiżuri mediċi filwaqt li jiġu żgurati livelli għoljin ta’ prontezza CBRN fl-UE kollha;

70.

Jinnota li l-leġiżlazzjoni tal-UE (Deċiżjoni tal-Kunsill 90/424/KEE kif emendata mid-Deċiżjoni tal-Kunsill 2006/965/KE) tiddisponi għal approċċ Komunitarju għat-tqaċċit, il-kontroll u l-monitoraġġ tal-mard tal-annimali u z-zoonożi, inkluż ix-xiri u l-ħżin ta’ kontromiżuri mediċi veterinarji għall-protezzjoni tal-annimali mill-infezzjoni; jiddispjaċih li ma hemm l-ebda approċċ Komunitarju bħal dan biex jikkoordina x-xiri u l-ħżin tal-kontromiżuri mediċi għall-protezzjoni tal-popolazzjoni tal-UE mill-infezzjoni minn patoġeni bijoloġiċi perikolużi;

71.

Jindika li inċident jew attakk li jkun jinvolvi l-patoġeni bijoloġiċi – ngħidu aħna, imma mhux biss, l-antraċe – jikkontamina z-zona milquta għal dekadi, billi jiddanneġġja b'mod gravi ħajjet ix-xtieli, l-annimali u l-bnedmin, u saħħithom, u jwassal għal kosti ekonomiċi fit-terminu t-twil; jistieden lill-Kummissjoni tinkludi l-istrateġiji tal-irkupru u d-dekontaminazzjoni fil-politika tas-CBRN;

72.

Jisħaq li inċident li jkun jinvolvi materjali CBRN li jolqot il-kondizzjoni tal-ħamrija u/jew il-fornitura tal-ilma għax-xorb ikollu l-potenzjali li jipproduċi effetti devastanti u b'firxa wiesgħa fuq is-saħħa u l-benessri ta’ kulmin ikun fiz-zona milquta; jistieden lill-Kummissjoni tqis dan kollu meta tkun qed tabbozza l-Pjan ta’ Azzjoni CBRN tal-UE;

73.

Jisħaq dwar l-importanza li jkun żgurat li jkun hemm kontroll effettiv tal-inċidenti ta’ kontaminazzjoni relattiva għall-ilma, li jkunu involvu t-tniġġis tal-ambjent, kontaminazzjoni tal-art, ir-rimi tal-ilma u/jew ir-rilaxx ta’ sostanzi radjoattivi;

74.

Jiddispjaċih li ma ngħatatx attenzjoni biżżejjed għall-prontezza u r-rispons fil-Komunikazzjoni tal-Kummissjoni u fil-Konklużjonijiet tal-Kunsill dwar il-Pjan ta’ Azzjoni CBRN tal-UE, li għandu attenzjoni qawwija fuq is-sejbien u l-prevenzjoni; jistieden lill-Kummissjoni u lill-Kunsill jagħtu aktar importanza lill-iżvilupp tal-mekkaniżmi ta’ prontezza u rispons meħtieġa għall-protezzjoni tas-saħħa pubblika u l-ambjent, jekk kemm-il darba jseħħ inċident CBRN fuq it-territorju tal-UE;

75.

Jiddispjaċih min-nuqqas ta’ miżuri fil-Pjan ta’ Azzjoni CBRN għas-salvagwardja tas-sigurtà fil-faċilitajiet u materjali radjoloġiċi u nukleari, u fit-titjib tal-pjanijiet ta’ rispons fit-tipi varji ta’ emerġenza radjoloġika u l-konsegwenzi tagħhom għall-popolazzjoni u l-ambjent;

76.

Jinsab allarmat mill-każi ta’ individwi u attivisti li rnexxielhom jiksbu materjal ta’ skart nukleari minn diversi stallazzjonijiet ta’ riproċessar fl-Ewropa, jitlob li jkun hemm azzjoni urġenti konċertata favur it-titjib tas-sigurtà fil-materjali u l-faċilitajiet radjoattivi u nukleari;

77.

Jiddispjaċih bin-nuqqas ta’ attenzjoni fil-Komunikazzjoni tal-Kummissjoni u fil-Konklużjonijiet tal-Kunsill dwar il-Pjan ta’ Azzjoni CBRN dwar l-għoti ta’ protezzjoni adegwata lin-netwerks ta’ trasport pubbliku u lis-saħħa tal-utenti tagħhom, invista tal-bosta attakki terroristiċi dwar it-trasport fis-snin imgħoddija u b'mod ġenerali r-riskju li ormaj kiber ta’ inċidenti CBRN waqt it-trasport ta’ materjali CBRN; jistieden lill-Istati Membri jiggarantixxu l-protezzjoni ta’ pre-espożizjzoni tal-ewwel li jagħtu rispons fl-inċidenti CBRN u t-trattament post-espożizzjoni tal-vittmi, b'mod partikolari kontra l-patoġeni bijoloġiċi;

78.

Jindika li inċident CBRN jista' jkollu effetti fit-tul fuq l-għelejjel u b'hekk għandu l-potenzjal li jaffettwa negattivament is-sigurtà u s-sikurezza tal-ikel fl-UE; jistieden lill-Kummissjoni tqis dan kollu meta tkun qed tabbozza l-Pjan ta’ Azzjoni CBRN tal-UE;

79.

Jinkoraġġixxi l-kooperazzjoni u l-qsim tal-aħjar prattika mal-pajjiżi li jkunu żviluppaw perizja fil-qasam tal-valutazzjoni tar-riskju CBRN, il-prevenzjoni, is-sejbien, il-komunikazzjoni u r-rispons ta’ u għall-istess, bħalma huma l-Istati Uniti, l-Awstralja u l-Indja;

80.

Jinkoraġġixxi politiki konġunti favur it-tneħħija tal-kontaminazzjoni mill-artijiet milqutin mill-kontaminazzjoni kimika, bijoloġika, radjoloġika jew nukleari, ħalli l-ħamrija u l-art ikunu jistgħu jerġgħu jintużaw kemm jista' jkun malajr, u b'hekk jitnaqqsu r-riskji għas-saħħa u l-ambjent;

81.

Jitlob lill-Kummissjoni u lill-Kunsill jikkunsidraw mudelli ta’ rispons li qed jiġu żviluppati u li jagħtu rispons ideali fl-evenjent ta’ inċidenti CBRN, u li fihom tingħata attenzjoni speċjali għall-istabbilimenti ta’ taħriġ, istituzzjonijiet ta’ kura medika u ċentri ta’ kura ġerjatrika;

82.

Jistieden lill-Istati Membri, huma u jabbozzaw il-pjanijiet ta’ evakwazzjoni f'każ ta’ inċident CBRN, li jagħtu attenzjoni speċjali għall-bżonnijiet tal-anzjani, tat-tfal, ta’ min ikun taħt kura medika, persuni b'diżabilità u ta’ gruppi vulnerabbli bħal dawn;

83.

Jistieden lill-Istati Membri jagħtu importanza speċjali għall-kostruzzjoni ta’ xeltrijiet għall-protezzjoni ċivili kemm f'istituzzjonijiet (pubbliċi u amministrattivi) kemm f'livell lokali u reġjonali, li fihom il-pubbliku Ewropew jista' jistkenn fl-evenjent ta’ diżastru;

84.

Iħeġġeġ lill-Kummissjoni tfittex ftehim dwar l-istandards minimi komuni ta’ sigurtà ma’ pajjiżi terzi ġirien li jkollhom fit-territorju tagħhom oġġetti li jistgħu jkunu ta’ theddida maġġuri għas-sigurtà ambjentali u umana fl-UE u fil-każ ta’ inċident;

85.

Jistieden lill-Kummissjoni tikkontempla fil-pjan ta’ azzjoni tagħha adattament aktar flessibbli tal-miżuri ta’ sigurtà għall-iżvilupp teknoloġiku;

86.

Iħeġġeġ lill-Kummissjoni tivvaluta bir-reqqa l-miżuri eżistenti ta’ sigurtà f'termini tal-impatt tagħhom fuq l-ambjent u s-saħħa, u li jiżguraw li l-miżuri l-ġodda jiddaħħlu biss skont ir-riżultati ta’ valutazzjoni bħal din li għandha ssir perjodikament;

87.

Jistieden lill-Kummissjoni tirrediġi Pjan direzzjonali tal-UE għas-CBRN għall-perijodu bejn issa u l-2013, meta se jkun rivalutat il-Pjan ta’ Azzjoni CBRN għall-UE, li fih l-isfidi u r-risponsi għall-politika ġew stabbiliti u li fuqu l-Kummissjoni regolarment tirrapporta lura lill-Parlament dwar l-iżviluppi li jkunu għaddejjin u l-progress li jkun sar sa dak il-mument;

88.

Jistieden lill-Istati Membri u lill-Kummissjoni biex b'ħeffa jerġgħu jeżaminaw u jimplimentaw il-Pjan ta’ Azzjoni tal-UE dwar is-CBRN skont ir-rakkomandazzjonijiet tiegħu, u jistemma li jiġi implimentat b'ħeffa; barra minn hekk, iħeġġeġ lill-Kummissjoni u lill-Kunsill sabiex jirreferu l-Pjan ta’ Azzjoni CBRN tal-UE li jmiss lill-Parlament mill-inqas sena qabel id-dħul tiegħu fil-fażi ta’ implimentazzjoni, sabiex il-Parlament ikun jista' l-opinjoni tiegħu fiż-żmien dovut;

89.

Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni u lill-parlamenti nazzjonali.

15.6.2012   

MT

Il-Ġurnal Uffiċjali tal-Unjoni Ewropea

CE 169/23

—

wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikoli 174 sa 178 tiegħu,

—

wara li kkunsidra l-proposta tal-Kummissjoni rigward ir-reviżjoni tar-Regolament Finanzjarju applikabbli għall-baġit ġenerali tal-Unjoni Ewropea tat-28 ta’ Mejju 2010 (COM(2010)0260),

—

wara li kkunsidra r-Regolament tal-Kunsill (KE) Nru 1083/2006 tal-11 ta’ Lulju 2006 li jistipula d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta’ Koeżjoni (1),

—

wara li kkunsidra r-riżoluzzjoni tiegħu tal-21 ta’ Ottubru 2008 dwar il-governanza u s-sħubija fil-livelli nazzjonali u reġjonali, u bażi għal proġetti fil-qasam tal-politika reġjonali (2),

—

wara li kkunsidra r-Riżoluzzjoni tiegħu tal-15 ta’ Ġunju 2010 dwar it-trasparenza fil-politika reġjonali u l-iffinanzjar tagħha (3),

—

wara li kkunsidra l-White Paper tal-Kumitat tar-Reġjuni dwar il-governanza fuq diversi livelli tas-17 u t-18 ta’ Ġunju 2009 u r-Rapport ta’ Konsultazzjoni,

—

wara li kkunsidra l-konklużjonijiet tal-laqgħa Ministerjali informali li saret fis-16 u s-17 ta’ Marzu 2010 f'Málaga,

—

wara li kkunsidra l-Komunikazzjoni tal-Kummissjoni tas-6 ta’ Settembru 2004, bit-titolu “Ir-responsabilitajiet rispettivi tal-Istati Membri u tal-Kummissjoni fil-ġestjoni komuni tal-Fondi Strutturali u tal-Fondi ta’ Koeżjoni - Sitwazzjoni attwali u prospettivi għall-perjodu l-ġdid ta’ pprogrammar wara l-2006” (COM(2004)0580),

—

wara li kkunsidra l-Komunikazzjoni tal-Kummissjoni tal-14 ta’ Mejju 2008 dwar ir-riżultati tan-negozjati dwar l-istrateġiji u l-programmi tal-politika ta’ koeżjoni għall-perjodu ta’ pprogrammar 2007-2013 (COM(2008)0301),

—

wara li kkunsidra r-Rapport Annwali tal-Qorti tal-Awdituri dwar l-implimentazzjoni tal-baġit fir-rigward tas-snin finanzjarji 2006 u 2008,

—

wara li kkunsidra l-Komunikazzjoni tal-Kummissjoni tad-19 ta’ Frar 2008, bit-titolu “Pjan ta’ Azzjoni biex jissaħħaħ ir-rwol ta’ superviżjoni tal-Kummissjoni taħt ġestjoni komuni ta’ azzjonijiet strutturali” (COM(2008)0097),

—

wara li kkunsidra l-Komunikazzjoni tal-Kummissjoni tat-3 ta’ Frar 2009, bit-titolu “Rapport dwar l-implimentazzjoni tal-pjan ta’ azzjoni biex jissaħħaħ ir-rwol ta’ superviżjoni tal-Kummissjoni taħt ġestjoni komuni ta’ azzjonijiet strutturali” (COM(2009)0042),

—

wara li kkunsidra l-Komunikazzjoni tat-28 ta’ Ottubru 2009 mill-Kummissarji Samecki u Špidla lill-Kummissjoni fejn jingħata rapport interim dwar is-segwitu għall-pjan ta’ azzjoni biex jissaħħaħ ir-rwol ta’ superviżjoni tal-Kummissjoni taħt ġestjoni komuni ta’ azzjonijiet strutturali (SEC(2009)1463),

—

wara li kkunsidra l-Komunikazzjoni tal-Kummissjoni tat-18 ta’ Frar 2010 dwar l-impatt tal-pjan ta’ azzjoni biex jissaħħaħ ir-rwol ta’ sorveljanza tal-Kummissjoni b'ġestjoni kondiviża tal-azzjonijiet strutturali (COM(2010)0052),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali (A7–0280/2010),

A.

billi l-implimentazzjoni tal-politika ta’ koeżjoni fil-biċċa l-kbira tagħha hija deċentralizzata u msejsa fuq l-assunzjoni tar-responsabilità min-naħa tal-awtoritajiet sottonazzjonali,

B.

billi l-politika ta’ koeżjoni twettaq rwol ta’ prekursur fl-applikazzjoni tal-governanza fuq diversi livelli bħala strument għat-titjib tal-kwalità tal-proċess tat-teħid tad-deċiżjonijiet permezz tal-involviment attiv tal-awtoritajiet sottonazzjonali mill-fażi preleġiżlattiva tad-dibattiti,

C.

billi l-“governanza fuq diversi livelli” tfisser azzjoni kkoordinata mill-Unjoni, l-Istati Membri u l-awtoritajiet lokali u reġjonali, kif ukoll mis-sħab soċjoekonomiċi u l-NGOs, ibbażata fuq il-prinċipji tas-sħubija u tal-kofinanzjament u mmirata biex jiġu mfassla u implimentati l-politiki tal-Unjoni Ewropea, definizzjoni li timplika li r-responsabilità tinqasam bejn il-livelli differenti tal-gvern,

D.

billi r-rapport tal-2006 tal-Qorti Ewropea tal-Awdituri wera li s-sistemi ta’ kontroll li jeżistu għall-politika ta’ koeżjoni ma kinux effikaċi biżżejjed, b'rata ta’ żball ta’ 12 % fl-ispejjeż rimborsati, u r-rapport tal-2008 kkonferma din id-data bi 11 % tal-fondi rimborsati aktar milli kien imisshom,

E.

billi l-Kummissjoni teħtieġ li ssaħħaħ ir-rwol tagħha ta’ sorveljanza biex tnaqqas il-livell ta’ żball, ittejjeb is-sistema ta’ kontroll u żżid l-assistenza lill-awtoritajiet sottonazzjonali u lill-benefiċjarji, li aktar 'il bogħod fil-ġejjieni kollha se jwasslu għal politika li tkun aktar orjentata lejn ir-riżultati u tkun tirrispetta aktar lill-utenti,

F.

billi proċeduri ta’ talba ta’ finanzjament wisq ikkumplikati u kontrolli żejda għandhom ir-riskju li jbiegħdu lill-benefiċjarji potenzjali tal-politika ta’ koeżjoni,

G.

billi s-soluzzjonijiet prattiċi mistennija minn sħabna ċ-ċittadini rigward is-servizzi pubbliċi (bħat-trasport pubbliku, l-ilma tax-xorb, is-saħħa pubblika, l-akkomodazzjoni soċjali u l-edukazzjoni pubblika) ma jistgħux jinkisbu ħlief bil-governanza t-tajba fil-livell ta’ żewġ sistemi komplementari: minn naħa, is-sistema istituzzjonali, li tipprevedi t-tqassim tal-kompetenzi u tal-baġits bejn l-Istat u l-awtoritajiet regjonali u lokali, u, min-naħa l-oħra, is-sistema tas-sħubija, li tgħaqqad flimkien l-atturi pubbliċi u privati kollha kkonċernati mill-istess suġġett f' territorju partikolari,

H.

billi s-sħubija, li għandha tieħu kont tal-komunitajiet u l-gruppi kollha rilevanti, tista' ġġib kemm benefiċċji kif ukoll valur miżjud għall-implimentazzjoni tal-Politika ta’ Koeżjoni permezz ta’ leġittimità msaħħa, trasparenza garantita u assorbiment aħjar tal-fondi, u għandha tkun evalwata wkoll f'termini tal-valur soċjali u ċiviku li tirrappreżenta,

I.

billi approċċ integrat għandu jagħti każ tal-karatteristiċi speċjali tar-reġjun (żvantaġġi ġeografiċi u naturali, spopolazzjoni, reġjun ultraperiferali, eċċ.) bil-għan li jkun jista' jaffronta l-isfidi lokali u reġjonali,

1.

Jilqa' b'sodisfazzjon il-White Paper tal-KtR dwar il-governanza fuq diversi livelli u l-għarfien tas-sussidjarjetà sottonazzjonali fit-Trattat ta’ Lisbona; jenfasizza li l-approċċ mil-lat ta’ diversi livelli għandu jiġi applikat mhux biss f'sens vertikali imma wkoll f'sens orizzontali, fost l-atturi tal-istess livell, fil-politiki kollha tal-Unjoni fejn jidħlu l-kompetenzi komuni inkluża l-politika ta’ koeżjoni;

2.

Jilqa' l-konklużjonijiet tal-laqgħa ministerjali informali ta’ Málaga ta’ Marzu 2010 u jqis li l-governanza fuq diversi livelli hija prekundizzjoni għall-ksib tal-koeżjoni territorjali fl-Ewropa; jitlob li dan il-prinċipju jsir wieħed obbligatorju għall-Istati Membri fl-oqsma politiċi li għandhom impatt territorjali qawwi biex ikun żgurat żvilupp territorjali bbilanċjat f'konformità mal-prinċipju tas-sussidjarjetà; jirrimarka li dispożizzjoni bħal din m'għandha bl-ebda mod twassal għal proċeduri li jkunu ta’ aktar piż;

3.

Iqis li governanza sodisfaċenti fuq diversi livelli għandha tkun ibbażata fuq approċċ orjentat minn isfel għal fuq, filwaqt li jqis id-diversità tal-arranġamenti amministrattivi li jeżistu fl-Istati Membri differenti; jistieden lill-Istati Membri jidentifikaw il-mezzi l-aktar effiċjenti għall-implimentazzjoni tal-governanza fid-diversi livelli u jtejbu l-kooperazzjoni tagħhom mal-awtoritajiet reġjonali u lokali kif ukoll mal-amministrazzjoni tal-Komunità billi, pereżempju, jistiednu uffiċċjali mil-livelli kollha tal-gvern għal laqgħat perjodiċi organizzati flimkien mal-Kummissjoni jew billi jistabbilixxu Pattijiet Territorjali Ewropej li fuq bażi volontarja jgħaqqdu bejniethom il-livelli differenti tal-gvern ikkonċernat;

4.

Jirrakkomanda li l-analiżi tal-impatt territorjali għandu jsir prattika standard billi d-diversi partijiet ikkonċernati jiġu involuti, minn fażi bikrija tad-deċiżjoni ta’ politika, bil-għan li jiġu mifhuma r-riperkussjonijiet ekonomiċi, soċjali u ambjentali tal-proposti Komunitarji kemm leġiżlattivi u kemm mhux leġiżlattivi fuq ir-reġjuni;

5.

Jenfasizza li l-governanza fuq diversi livelli tippermetti espolojtazzjoni aħjar tal-potenzjal tal-kooperazzjoni territorjali grazzi għar-relazzjonijiet li ġew żviluppati fost atturi privati u pubbliċi minn naħa għall-oħra tal-fruntieri; iħeġġeġ lil dawk l-Istati Membri li għadhom ma adottawx id-dispożizzjonijiet li jippermettu l-istabbiliment tar-Raggruppamenti Ewropej ta’ Kooperazzjoni Territorjali (REKT) biex jagħmlu dan mill-aktar fis possibbli; jirrakkomanda li l-Kummissjoni tippromwovi l-iskambju tat-tagħrif bejn ir-REKT li diġà huma maħluqa u dawk li jinsabu fil-proċess li jiġu stabbiliti fil-qafas tal-programmi eżistenti; jifraħ lill-Kumitat tar-Reġjuni għall-kwalità tax-xogħol tiegħu fuq ir-REKT u jitlob li l-istrumenti disponibbli tiegħu, b'mod partikolari l-Pjattaforma ta’ Monitoraġġ ta’ Liżbona u n-Netwerk ta’ Monitoraġġ tas-Sussidjarjetà tagħha, jintużaw biex jiġi promoss l-iskambju tal-aħjar prattiki bejn ir-reġjuni u l-Istati Membri bil-ħsieb li jiġu identifikati u ddeterminati b'mod konġunt l-objettivi u l-azzjonijiet ta’ ppjanar sussegwenti, u, fl-aħħar, bil-ħsieb li titwettaq evalwazzjoni komparattiva tar-riżultati tal-politika ta’ koeżjoni;

6.

Jistieden lill-awtoritajiet nazzjonali, reġjonali u lokali biex jintensifikaw l-użu li jagħmlu tal-approċċ integrat matul il-perjodu attwali ta’ programmazzjoni; jipproponi li dan l-approċċ isir obbligatorju fil-kuntest tal-politika ta’ koeżjoni futura; jidhirlu li approċċ flessibbli u integrat għandu mhux biss iqis l-aspetti ekonomiċi, soċjali u ambjentali tal-iżvilupp tat-territorju imma jippermetti wkoll li jiġu kkoordinati l-interessi tas-sħab differenti, fid-dawl tal-karatteristiċi territorjali, bil-għan li tkun tista' ssir reazzjoni għall-isfidi fil-livell lokali u reġjonali;

7.

Iħeġġeġ lill-Kummissjoni tiżviluppa gwida għall-atturi pubbliċi u privati dwar kif għandhom jiġu implimentati fil-prattika l-prinċipji tal-governanza fuq diversi livelli u l-approċċ integrat; jirrakkomanda li azzjonijiet immirati għall-promozzjoni ta’ dawn iż-żewġ approċċi jiġu ffinanzjati skont l-assistenza teknika tal-FEŻR;

8.

Jirrakkomanda li l-Kumitat tar-Reġjuni juża Jiem il-Bibien Miftuħa tal-2011 u, safejn għadu possibbli f'dan l-istadju, il-Jiem tal-Bibien Miftuħa tal-2010 bħala okkażjoni biex jippromwovi u japprofondixxi d-dibattitu dwar l-identifikazzjoni tal-mezz l-aktar adattat kif tiġi promossa l-governanza fuq diversi livelli; jissuġġerixxi li mill-2011 fir-reġjuni kollha tal-UE tiġi inizjata u stabbilita marka Ewropea tal-governanza fuq diversi livelli;

9.

Jinnota li l-mekkaniżmi tat-twettiq deċentralizzati huma fattur ewlieni għall-governanza fuq diversi livelli; minħabba l-ħtieġa ta’ simplifikazzjoni, iħeġġeġ lill-Istati Membri u lir-reġjuni jissottodelegaw l-implimentazzjoni ta’ parti waħda minn programm operazzjonali, meta dan ikun xieraq u b'mod partikulari biex jesplojtjaw aħjar l-użu tal-għotjiet globali; jistedinhom jieħdu l-miżuri deċentralizzati meħtieġa, kemm fil-livell leġiżlattiv u kemm f'dak baġitarju, sabiex is-sistema tal-governanza fuq diversi livelli tkun tista' taħdem b'mod effikaċi u f'konformità mal-prinċipji tas-sħubija u s-sussidjarjetà; jenfasizza li l-awtoritajiet reġjonali u lokali, speċjalment dawk li għandhom setgħat leġiżlattivi, għandhom jiġu involuti aktar mill-qrib, peress li mhemmx min hu infurmat aħjar minnhom dwar il-potenzjalitajiet u l-ħtiġijiet tar-reġjun tagħhom u jistgħu għalhekk jikkontribwixxu għal implimentazzjoni mtejba tal-politika ta’ koeżjoni;

10.

Iħeġġeġ lill-Istati Membri jinvolvu l-awtoritajiet reġjonali u lokali relevanti u l-atturi tas-soċjetà ċivili mill-istadji l-aktar bikrija tan-negozjati dwar il-leġiżlazzjoni tal-Unjoni u dwar programmi li jibbenefikaw mill-Fondi Strutturali sabiex ikun jista' jsir djalogu f'waqtu bejn is-saffi differenti tal-gvern; jitlob li dawn l-awtoritajiet jipparteċipaw fil-korpi responsabbli għat-teħid tad-deċiżjonijiet fuq bażi ugwali mar-rappreżentanti nazzjonali;

11.

Jenfasizza li għall-assorbiment effiċjenti tal-fondi u l-massimizzazzjoni tal-impatt tagħhom irid ikun hemm kapaċità amministrattiva suffiċjenti kemm fil-livell tal-UE u kemm fil-livell reġjonali u dak lokali; jistieden għalhekk lill-Kummissjoni ttejjeb il-kapaċità amministrattiva tagħha bil-għan li tkabbar il-valur miżjud tal-politika ta’ koeżjoni u tiżgura s-sostenibilità tal-azzjonijiet u jistieden lill-Istati Membri jiżguraw strutturi amministrattivi u kapital uman adegwati f'dawk li huma reklutaġġ, remunerazzjoni, taħriġ, riżorsi, proċeduri, trasparenza u aċċessibilità;

12.

Jistieden lill-Istati Membri wkoll biex isaħħu, fejn jixraq, ir-rwol tal-awtoritajiet reġjonali u lokali fit-tħejjija, l-immaniġġjar u l-implimentazzjoni tal-programmi u jżidu r-riżorsi li hemm għad-dispożizzjoni tagħhom; jirrakkomanda li fil-politika ta’ koeżjoni tiġi adottata l-metodoloġija tal-iżvilupp lokali bbażata fuq is-sħubiji lokali, b'mod partikolari għal proġetti li għandhom x'jaqsmu ma’ kwistjonijiet urbani, rurali u transkonfinali; jistieden lill-Kummissjoni tinkoraġġixxi s-sħubija bejn ir-reġjuni li għandhom potenzjal ta’ żvilupp speċifiku simili għal ta’ xulxin u tiżgura li jkun hemm stabbilit qafas xieraq fil-livell tal-UE għall-koordinament tal-kooperazzjoni makroreġjonali;

13.

Iqis li l-prinċipji tas-sħubija u l-kofinanzjament irawmu l-assunzjoni tar-responsabilità min-naħa tal-awtoritajiet sottonazzjonali fl-implimentazzjoni tal-politika ta’ koeżjoni; itenni l-impenn tiegħu lejn dawn il-prinċipji ta’ ġestjoni tajba u jitlob li jkomplu jiġu applikati minkejja r-restrizzjonijiet fuq l-infiq pubbliku kkawżati mill-kriżi ekonomika;

14.

Jirrakkomanda t-tisħiħ tal-prattika tas-sħubija u jħeġġeġ lill-Kummissjoni tipprovdi definizzjoni miftiehma tal-kunċett tas-sħubija bħala kundizzjoni għall-kostruzzjoni ta’ sħubiji veri mal-awtoritajiet reġjonali u lokali u l-atturi tas-soċjetà ċivili; jistieden lill-Kummissjoni tivverifika bis-serjetà l-implimentazzjoni ta’ dan il-prinċipju billi tiżviluppa għodod ta’ evalwazzjoni u xxerred l-aħjar prattiki f'dan il-qasam permezz ta’ għodod tal-ICT; jenfasizza li s-sħubija tista' tikkontribwixxi għall-effikaċja, għall-effiċjenza, għal-leġittimità u għat-trasparenza, fl-istadji kollha tal-programmazzjoni u tal-implimentazzjoni tal-Fondi Strutturali u tista' żżid l-impenn lejn ir-riżultati tal-programmi kif ukoll is-sjieda tagħhom; jenfasizza r-rwol importanti li jwettaq is-settur tal-volontarjat fil-proċess tas-sħubija;

15.

Jiġbed l-attenzjoni għar-rekwiżit li jkun ikkonsultat il-pubbliku ġenerali kif permezz ta’ organizzazzjonijiet li jirrappreżentaw lis-soċjetà ċivili u NGOs bil-għan li jiġu riflessi l-proposti tagħhom, u jenfasizza li l-parteċipazzjoni tas-soċjetà ċivili tgħin biex il-proċess tat-teħid tad-deċiżjonijiet ikun leġittimizzat; jinnota li l-isforzi li saru bil-għan li tkun żgurata l-parteċipazzjoni pubblika fil-fażi preparatorja tal-programmi operazzjonali għall-perjodu 2007-2013 ma kinux konlussivi daqs kemm kien previst; jistieden lill-Kummissjoni tidentifika l-prattiki t-tajba u tiffaċilita l-applikazzjoni tagħhom bil-għan li ttejjeb il-parteċipazzjoni taċ-ċittadini waqt il-perjodu ta’ programmazzjoni li jmiss;

16.

Jitlob li l-prinċipju tal-governanza fuq diversi livelli jiġi integrat fil-fażijiet kollha tat-tfassil u l-implimentazzjoni tal-Istrateġija EU2020 biex tkun żgurata sjieda vera tar-riżultati mill-awtoritajiet reġjonali u lokali, li jridu jimplimentawha; ifakkar f'dan il-kuntest fil-proposta rigward patt territorjali tal-awtoritajiet lokali u reġjonali għall-istrateġija Ewropa 2020 bil-ħsieb li r-reġjuni u l-muniċipalitajiet jiġu inkuraġġiti jikkontribwixxu għas-suċċess tar-realizzazzjoni tal-objettivi tal-istrateġija 2020;

17.

Jirrakkomanda li l-Kummissjoni tanalizza mill-ġdid il-possibilitajiet li jiġi implimentat il-proġett pilota li nbeda mill-Parlament Ewropew bit-titolu “Erasmus għar-rappreżentanti lokali u reġjonali eletti” u, bil-ħsieb li jogħla l-istandard tal-proġetti proposti u jintlaħaq l-objettiv tal-effiċjenza, jistieden lill-Kummissjoni timplementa, skont il-linja baġitarja tal-assistenza teknika operazzjonali tal-FEŻR, skema ta’ taħriġ u mobilità għall-atturi lokali u reġjonali involuti fl-immaniġġjar tal-programmi tal-politika ta’ koeżjoni flimkien mas-sħab speċjalizzati fl-implimentazzjoni tal-kunċetti tal-approċċ integrat u l-governanza fuq diversi livelli; jistieden lill-Kummissjoni, għalhekk, talloka finanzjament għal dawn l-inizjattivi b'mod effettiv u ssaħħaħ in-netwerking mal-awtoritajiet reġjonali u lokali, inkluż il-Kumitat tar-Reġjuni;

18.

Hu tal-fehma li n-netwerks Ewropej tar-reġjuni għandhom iwessgħu il-ħidma tagħhom fil-qasam tal-prattiki tajba fil-governanza u s-sħubija, għandhom jisħqu aktar fuq il-lezzjonijiet politiċi u strateġiċi li jkunu ttieħdu miċ-ċikli tal-programmi preċedenti u għandhom jiżguraw l-aċċess pubbliku għat-tagħrif ewlieni dwar l-aħjar prattiki bil-lingwi kollha tal-Unjoni Ewropea u b'hekk jgħinu ħalli jiġi żgurat li l-prattiki tajba jiġu implimentati tassew;

19.

Hu tal-fehma li rwol aktar b'saħħtu għal-livell reġjonali u lokali jrid jikkorrispondi ma’ rwol superviżorju msaħħaħ għall-Kummissjoni li jkun jiffoka fuq il-kontroll tas-sistemi tal-verifika aktar milli fuq proġetti wieħed wieħed; jitlob f'dan il-kuntest għal sistema ta’ ċertifikazzjoni Ewropea tas-servizzi nazzjonali; iħeġġeġ lill-Kummissjoni biex tlesti l-approvazzjoni tar-rapporti dwar il-valutazzjoni tal-konformità sabiex tevita d-dewmien fil-ħlasijiet u t-telf ta’ fondi minħabba d-diżimpenn, u biex tipprovdi proposta fuq ir-riskju tollerabbli ta’ żball qabel l-2012;

20.

Jilqa' b'sodisfazzjon dak li ħareġ mir-rapport tal-Kummissjoni dwar il-Pjan ta’ Azzjoni ta’ Frar 2010 u l-azzjonijiet korrettivi u preventivi li nbdew s'issa; jistieden lid-DĠ REGIO ikompli għaddej b'dan l-eżerċizzju matul il-perjodu kollu kemm hu tal-implimentazzjoni biex iżomm għaddej il-momentum iġġenerat mill-Pjan ta’ Azzjoni;

21.

Jenfasizza li l-inizjattivi Ewropej fil-qasam tal-politika ta’ koeżjoni u l-politika strutturali jeħtieġ li jiġu kkoordinati aħjar ħalli ma jipperikolawx il-koerenza tal-politika reġjonali; jitlob għalhekk koordinazzjoni msaħħa fil-Kummissjoni bejn id-Direttorat Ġenerali REGIO, li hu responsabbli għall-politika ta’ koeżjoni u l-politika strutturali, u d-direttorati ġenerali responsabbli għall-inizjattivi relevanti relatati ma’ setturi speċifiċi; jitlob, minħabba t-tisħiħ tad-drittijiet tal-awtoritajiet reġjonali u lokali li seħħ bit-Trattat ta’ Lisbona, li dawn l-awtoritajiet ikunu assoċjati aktar mill-qrib mat-tfassil tal-politika fil-livell tal-Kummissjoni, bil-għan li tiżdied ir-responsabilità għall-proġetti fost dawk responsabbli mill-proġetti: jitlob ukoll, madankollu, kontroll akbar tar-riżultati mill-Kummissjoni, fuq il-post, bil-għan li tittejjeb l-evalwazzjoni kemm tal-effiċjenza tal-istrutturi ta’ proġett u tal-effikaċja tal-miżuri meta mqabbla mal-objettivi speċifikati li għandhom il-għan li jilħqu;

22.

Jistieden lill-Kummissjoni ssaħħaħ l-inizjattiva “Ħarreġ lill-ħarrieġa” għall-awtoritajiet li jimmaniġġjaw u għall-awtoritajiet li jiċċertifikaw; jenfasizza li għandu jkun hemm monitoraġġ kostanti biex ikun żgurat li l-kontenut tat-taħriġ ikun verament ittrasferit lejn il-livelli aktar baxxi b'mod ibbilanċjat, mingħajr ma jiġu ttraskurati l-atturi lokali;

23.

Iħeġġeġ lill-Kummissjoni biex tillanċja malajr il-portal il-ġdid fil-bażi tad-data SFC 2007 li jippermetti aċċess dirett għal tagħrif relevanti għall-atturi kollha li għandhom x'jaqsmu mal-Fondi Strutturali; jirrakkomanda li l-Istati Membri jippromwovu u jiċċirkulaw tagħrif dwar dan l-istrument fost l-awtoritajiet reġjonali u lokali kif ukoll fost il-benefiċjarji aħħarija;

24.

Jistieden lill-Kummissjoni tistabbilixxi mekkaniżmi addizzjonali ta’ assistenza teknika biex tippromwovi l-għarfien fil-livell reġjonali u lokali dwar problemi relatati mal-implimentazzjoni, speċjalment fl-Istati Membri fejn, skont l-evalwazzjoni ex post li għamlet il-Kummissjoni tal-programmi tal-Politika ta’ Koeżjoni 2000-2006, hemm problemi persistenti ħafna rigward il-kapaċità amministrattiva tagħhom f'dak li jikkonċerna l-implimentazzjoni ta’ dawn il-programmi;

25.

Jitlob għal applikazzjoni standardizzata tal-mudell ta’ informazzjoni unika u tal-mudell ta’ verifika unika (SISA) fil-livelli ta’ verifika kollha biex ikunu evitati d-duplikazzjoni tal-verifiki u l-kontroll żejjed; iħeġġeġ lill-Kummissjoni toħroġ manwal tal-verifika unika inklużi n-noti ta’ gwida kollha li ġew prodotti s'issa;

26.

Jistieden lill-Istati Membri biex ikomplu jisfruttaw aktar l-istrumenti tal-inġinerija finanzjarja bħala mezz biex tiżdied il-kwalità tal-proġetti u l-parteċipazzjoni ta’ atturi privati, speċjalment l-intrapriżi ż-żgħar u ta’ daqs medju, fil-proġetti Ewropej; jistieden lill-Kummissjoni biex tissimplifika r-regoli tal-funzjonament ta’ dawn l-istrumenti, li l-kumplessità attwali tagħhom tillimita l-użu tagħhom;

27.

Jinsab konvint li l-konformità mal-proċeduri ma tistax isseħħ għad-detriment tal-kwalità tal-interventi; jitlob mill-Kummissjoni politika futura li tkun aktar orjentata lejn ir-riżultati, li tkun iffukata fuq prestazzjoni ta’ kwalità u żvilupp strateġiku tal-proġetti aktar milli fuq il-kontrolli; għal dan il-għan, iħeġġeġ lill-Kummissjoni tiżviluppa indikaturi oġġettivi u li jistgħu jitkejlu li jkunu komparabbli fl-Unjoni kollha għal sistemi aħjar ta’ monitoraġġ u evalwazzjoni u tkompli tikkunsidra aktar il-ħtieġa ta’ regoli flessibbli fil-każ li jseħħu kriżijiet ekonomiċi;

28.

Jenfasizza li proċeduri trasparenti u ċari huma fatturi fil-governanza t-tajba; għalhekk jilqa' b'sodisfazzjon is-simplifikazzjoni li qiegħda ssir bħalissa tar-Regolament Finanzjarju u tar-regoli tal-Fondi Strutturali u jistieden lill-Istati Membri jikkonformaw għalkollox ma’ dak li hemm mitlub fir-Regolament Finanzjarju rivedut u jxandru t-tagħrif dwar il-benefiċjarji aħħarija tal-Fondi Strutturali; iħeġġeġ lill-Kummissjoni tipproponi regoli li jinftiehmu, li mhux se jkunu jeħtieġu li jiġu mmodifikati ta’ spiss; jitlob għal arkitettura aktar sempliċi għall-Fondi wara l-2013, mhux bħala konsegwenza tal-kriżi ekonomika imma bħala prinċipju ġenerali tal-politika ta’ koeżjoni futura, bil-għan li jiġi ffaċilitat l-assorbiment tal-fondi, u jirrakkomanda trasparenza u flessibilità akbar fl-użu tal-Fondi tal-UE bil-għan li jiġi evitat piż amministratti addizzjonali li jista' jiskoraġġixxi lis-sħab potenzjali milli jieħdu sehem fil-proġetti;

29.

Jilqa' b'sodisfazzjon ir-Rapport Strateġiku tal-Kummissjoni dwar l-implimentazzjoni tal-Programmi tal-Politika ta’ Koeżjoni 2010 peress li lill-proċess tat-tiswir tal-politiki jista' jagħtih lura tagħrif importanti; jikkunsidra li dak li nstab mir-rapport ukoll irid jitqies bis-serjetà waqt l-ifformular tal-proposti li jkollhom il-għan li jtejbu l-implimentazzjoni effettiva tal-programmi tal-Politika ta’ Koeżjoni;

30.

Itenni l-impenn tiegħu favur politika ta’ koeżjoni b'saħħitha u ffinanzjata kif suppost li tiżgura li r-reġjuni kollha tal-Unjoni Ewropea jiżviluppaw b'mod armonjuż; jitlob li l-mezzi finanzjarji ta’ din il-politika jinzammu kif inhuma wara l-2013 u li kull tentattiv ta’ rinazzjonalizzazzjoni jiġi rruftat;

31.

Jistieden lill-Kummissjoni biex tqis il-prinċipji tad-divrenzjar u tal-proporzjonalità fir-regolamenti futuri u biex tadatta r-rekwiżiti skont id-daqs tal-programmi u n-natura tas-sħab, speċjalment meta jkunu involuti awtoritajiet pubbliċi żgħar; jitlob li jsir użu usa' tas-somom ta’ flus imħallsa f'daqqa u tar-rati fissi għall-Fondi kollha, b'mod partikolari għall-ispejjeż amministrattivi u għall-assistenza teknika; jipproponi li jsir provvediment għal kriterji ta’ evalwazzjoni aktar flessibbli għal proġetti innovattivi, bil-għan li jinkoraġġihom, u rekwiżiti ta’ kontroll aktar moderati għall-proġetti pilota; jinkoraġġixxi lill-Kummissjoni tiżviluppa l-prinċipju tar-“rabta ta’ fiduċja” mal-Istati Membri li jimpenjaw ruħhom, u jirnexxilhom, li jassiguraw utilizzazzjoni tajba tal-Fondi;

32.

Bil-għan li fil-ġejjieni tinbena politika li tirrispetta aktar lill-utent, jitlob għal armonizzazzjoni u integrazzjoni aktar profondi tar-regoli tal-Fondi Strutturali, u b'hekk jiġi evitat li proġett jiġi analizzat f'partijiet differenti biex japplika għal fondi differenti; jirrakkomanda li jsir iffukar mhux sempliċement fuq ir-regolarità tal-infiq imma fuq il-kwalità tal-interventi u li r-riżorsi jkunu kkonċentrati fl-ippotenzjar tal-assistenza fuq in-naħa tal-immaniġġjar;

33.

Jistieden lill-Kummissjoni tippreżenta mill-aktar fis possibbli proposti għar-regolamenti tal-perjodu ta’ programmazzjoni li jmiss, tadotta r-regolament implimentattiv, telabora l-gwida meħtieġa u tipprovdi taħriġ dwarhom meta jkun il-waqt, u tiffaċilita l-proċess tan-negozjati u l-approvazzjoni tal-programmi operazzjonali bil-għan li jiġi evitat kull dewmien fl-implimentazzjni tal-politika ta’ koeżjoni u fl-assorbiment tal-fondi wara l-2013;

34.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni kif ukoll lill-Istati Membri.

15.6.2012   

MT

Il-Ġurnal Uffiċjali tal-Unjoni Ewropea

CE 169/29

—

wara li kkunsidra t-Trattat ta’ Lisbona li jemenda t-Trattat dwar l-Unjoni Ewropea u t-Trattat li jistabblixxi l-Komunità Ewropea, u partikolarment it-Titolu I u t-Titolu XVIII tiegħu,

—

wara li kkunsidra l-konklużjonijiet tal-Kunsill Ewropew tal-25 u s-26 ta’ Marzu 2010,

—

wara li kkunsidra l-Komunikazzjoni mill-Kummissjoni lill-Kunsill, lill-Parlament, lill-Kumitat Ekonomiku u Soċjali Ewropew u lill-Kumitat tar-Reġuni bl-isem: “L-Ewropa Globali: Kompetizzjoni Dinjija: Kontribut lill-Istrateġija tal-UE għat-Tkabbir Ekonomiku u l-Impjiegi” (COM(2006)0567),

—

wara li kkunsidra r-Rapport Annwali tal-2009 tal-OECD,

—

wara li kkunsidra Successful partnerships: a guide, tal-Forum għas-Sħubijiet u l-Governanza Lokali tal-Programm LEED tal-OECD, 2006,

—

wara li kkunsidra r-Rapport dwar il-Kompetittività Globali 2009-2010, Forum Ekonomiku Dinji, Ġinevra, l-Isvizzera, 2009,

—

wara li kkunsidra r-rapport “An agenda for a reformed cohesion policy – A place-based approach to meeting European Union challenges and expectations”, rapport indipendenti mħejji fuq talba ta’ Danuta Hübner, Kummissarju għall-Politika Reġjonali, ta’ Fabrizio Barca, April 2009,

—

wara li kkunsidra d-dokument ta’ definizzjoni ta’ politika tal-Kunsill tal-Muniċipalitajiet u tar-Reġjuni tal-Ewropa dwar il-“Futur tal-Politika ta’ Koeżjoni tal-UE”, Brussell, Diċembru 2009,

—

wara li kkunsidra r-riżoluzzjoni tal-Assemblea tar-Reġjuni Ewropej (AER) dwar il-politika reġjonali ta’ wara l-2013, adottata mill-Assemblea Ġenerali tal-AER fit-8 ta’ Novembru 2007 f'Udine, l-Italja,

—

wara li kkunsidra l-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar ir-riżultati tan-negozjati dwar l-istrateġiji u l-programmi tal-politika ta’ koeżjoni għall-perjodu ta’ programmazzjoni 2007-2013 (COM(2008)0301),

—

wara li kkunsidra r-riżoluzzjoni tal-24 ta’ Marzu 2009 dwar l-implimentazzjoni tar-Regolament tal-Fondi Strutturali 2007-2013: ir-riżultati tan-negozjati dwar l-istrateġiji ta’ koeżjoni nazzjonali u l-programmi operattivi (1),

—

wara li kkunsidra r-riżoluzzjoni tiegħu tal-24 ta’ Marzu 2009 dwar l-aħjar prattiki fil-qasam tal-politika reġjonali u l-ostakli għall-użu tal-Fondi Strutturali (2),

—

wara li kkunsidra r-riżoluzzjoni tiegħu tal-21 ta’ Ottubru 2008 dwar il-governanza u s-sħubija fuq livelli nazzjonali u reġjonali, u bażi għal proġetti fil-qasam tal-politika reġjonali (3),

—

wara li kkunsidra r-riżoluzzjoni tiegħu tal-24 ta’ Marzu 2009 dwar Green Paper dwar il-koeżjoni territorjali u l-qagħda tad-diskussjonijiet dwar ir-riforma futura tal-politika għall-koeżjoni (4),

—

wara li kkunsidra r-riżoluzzjoni tiegħu tas-16 ta’ Ġunju 2010 dwar l-UE 2020 (5),

—

wara li kkunsidra r-raba' rapport dwar il-Koeżjoni Ekonomika u Soċjali (COM(2007)0273),

—

wara li kkunsidra l-20 rapport annwali tal-Kummissjoni dwar l-implimentazzjoni tal-Fondi Strutturali (2008) (COM(2009)0617),

—

wara li kkunsidra l-komunikazzjoni mill-Kummissjoni lill-Parlament, lill-Kunsill, lill-Kumitat Ekonomiku u Soċjali u lill-Kumitat tar-Reġjuni bl-isem “Il-mobilizzazzjoni tal-investiment privat u pubbliku għall-irkupru u tibdil strutturali fit-tul: l-iżvilupp tal-Partenarjati Pubbliċi Privati” (COM(2009)0615),

—

wara li kkunsidra l-paragrafu 37 tar-riżoluzzjoni tiegħu tal-14 ta’ Frar 2006 dwar ir-riforma tal-għajnuna mill-istat 2005-2009 (6),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Iżvilupp Reġjonali (A7-0309/2010),

A.

billi l-promozzjoni tal-koeżjoni territorjali, soċjali u ekonomika, u s-solidarjetà bejn l-Istati Membri, hija wieħed mill-għanijiet tal-Unjoni Ewropea, kif stipulat fl-Artikolu 3 tat-Trattat dwar l-Unjoni Ewropea,

B.

billi l-Unjoni Ewropea tista' tkun globalment kompetittiva biss jekk il-politiki interni jirfdu l-kapaċità tagħha li tirreaġixxi għall-isfidi globali billi tħaddem ekonomija sostenibbli u b'livell baxx ta’ emissjonijiet tal-karbonju li tħares il-bijodiversità – b'perjodi ta’ reċessjoni juru kif ir-reġjuni inqas żviluppati għandhom inqas kapaċità ta’ rkupru,

C.

billi l-kompetittività u l-koeżjoni la huma kontradittorji u lanqas inkompatibbli iżda għandhom elementi ta’ komplementarjetà,

D.

billi, anke jekk sar progress sinifikanti f'termini ta’ konverġenza fi ħdan l-Unjoni Ewropea, it-tendenza attwali hija li d-disparitajiet territorjali bejn ir-reġjuni tal-UE sejrin għall-agħar, pereżempju mil-lat tal-aċċessibbiltà, b'mod partikolari għar-reġjuni strutturalment żvantaġġati, iżda anke f'livell intrareġjonali u fit-territorji tal-UE, u dan jista' jwassal għal segregazzjoni territorjali, kif ukoll biex jiżdiedu d-differenzi bejn il-livelli ta’ prosperità fir-reġjuni tal-UE u biex tixxekkel il-kompetittività globali tal-UE,

E.

billi fir-Rapport Annwali tagħha tal-2009, l-OECD fformulat rakkomandazzjoni għal tkabbir fit-tul li ffokalizzat fuq l-importanza tat-tassazzjoni, tal-investiment fl-infrastruttura, fl-edukazzjoni u l-ħaddiema kif ukoll tar-regolamentazzjoni tas-swieq tal-produzzjoni u b'hekk ir-rwol tagħhom jiġi enfasizzat,

F.

billi l-Forum Ekonomiku Dinji, fir-Rapport tiegħu dwar il-Kompetittività Globali tal-2009 kif ukoll f'rapporti oħra, ġibed l-attenzjoni għar-rwol deċiżiv li tiżvolġi l-infrastruttura bħala t-tieni pilastru minn 12 li fuqhom il-kompetittività globali hija vvalutata, u ppreċiża li l-infrastruttura ta’ kwalità hija fundamentali biex tnaqqas l-effetti tad-distanza, tiġbed investiment barrani u tiggarantixxi li l-iżvilupp ekonomiku jkun possibbli,

G.

billi fl-aħħar mill-aħħar il-kompetittività tista' tinkiseb biss jekk it-tkabbir ekonomiku jkun verament sostenibbli fl-UE kollha,

H.

billi r-rapport tal-Grupp ta’ Esperti Indipendenti dwar ir-Riċerka u l-Iżvilupp u l-Innovazzjoni maħtur wara s-Samit ta’ Hampton Court u ppresedut minn Esko Aho intitolat “Noħolqu Ewropa Innovattiva” jidentifika l-oqsma ewlenin – is-saħħa elettronika, il-prodotti farmaċewtiċi, it-trasport u l-loġistika, l-ambjent, il-kontenut diġitali, l-enerġija u s-sigurtà – fejn suq għall-innovazzjoni jista' jaħdem u fejn il-politika pubblika jista' jkollha rwol sinifikanti,

I.

billi, biex l-objettivi tal-UE 2020 jintlaħqu, jeħtieġ li tiġi aċċettata l-pożizzjoni inizjali ta’ disparità fil-livelli ta’ żvilupp u fil-limitazzjonijiet, u li l-objettivi għandhom jiġu ffissati filwaqt li jqisu l-qagħda u l-bżonnijiet reali identifikati permezz tal-konsultazzjoni mal-atturi kollha involuti fid-diversi livelli ta’ gvern,

J.

billi l-Kunsill Ewropew ta’ Marzu 2010 għaraf l-importanza tal-promozzjoni tal-koeżjoni ekonomika, soċjali u territorjali anke permezz tal-iżvilupp tal-infrastruttura biex tgħin biex jiġi żgurat is-suċċess tal-istrateġija UE 2020, f'ċirkostanzi li fihom din l-istrateġija l-ġdida se tittratta l-imblokki fl-iżvilupp ekonomiku,

K.

billi l-politika ta’ koeżjoni wriet li hija strument effikaċi għal reazzjoni flessibbli għall-isfidi soċjoekonomiċi li joriġinaw mill-kriżi finanzjarja,

L.

billi, minbarra infrastruttura tajba, il-prerekwiżiti ewlenin għall-kompetittività huma l-promozzjoni tar-riċerka, l-innovazzjoni u l-iżvilupp teknoloġiku u l-għoti ta’ taħriġ korrispondenti ta’ livell għoli għan-nies fir-reġjuni,

M.

billi r-reġjuni se jiżvolġu rwol kruċjali fit-trażżin tal-impatt tal-kriżi fuq il-pubbliku u għalsaqstant għandhom iħaddnu l-prinċipju ta’ sħubija u jiżviluppaw strumenti idonei għal valutazzjoni ex-ante tal-impatt territorjali tat-tipi differenti ta’ politika, bil-għan li jaffrontaw sfidi ewlenin bħall-adegwament għall-globalizzazzjoni, it-tibdiliet demografiċi u d-depopolazzjoni konsegwenti tar-reġjuni, it-tibdil fil-klima u l-kwestjonijiet relatati mal-enerġija u l-ħarsien tal-bijodiversità, kif ukoll sfidi ġodda li jirriżultaw mill-kriżi,

N.

billi, kif juri l-eżitu tat-taħdidiet dwar l-istrateġiji u l-programmi fil-qasam tal-politika ta’ koeżjoni għall-perjodu ta’ programmazzjoni 2007-2013, f'kull livell ta’ gvern il-kwalità tal-programmi u l-involviment tal-partijiet interessati żdiedu u b'hekk jirrappreżentaw pass 'il quddiem lejn l-ilħuq tal-objettivi ta’ Lisbona ta’ kompetittività ekonomika u impjiegi,

O.

billi r-riforma tal-politika ta’ koeżjoni teħtieġ li ssaħħaħ din il-politika permezz ta’ korrelazzjoni aħjar kif ukoll koordinament u sinerġija aħjar fost il-politiki Ewropej, mingħajr ma politika tkun subordinata għal oħra, abbażi tal-eżiġenzi u tal-objettivi tal-Unjoni f'termini ta’ żvilupp sostenibbli,

P.

billi l-involviment ta’ atturi lokali u reġjonali fil-politika ta’ koeżjoni huwa rifless fl-istrateġiji lokali u reġjonali tagħhom biex jittejbu l-iżvilupp ekonomiku u l-inklużjoni soċjali,

Q.

billi l-kompetittività ekonomika tar-reġjuni li baqgħu lura qed tiġi sostnuta mill-iżvilupp tal-kapaċitajiet tagħhom, inkluż l-iżvilupp tal-infrastruttura ta’ kull tip u b'hekk isir possibbli l-aċċess għall-edukazzjoni, ir-riċerka u l-innovazzjoni,

R.

billi, filwaqt li xi elementi tal-arkitettura ta’ dawn l-istrumenti, bħall-kalendarju komuni u l-allinjament mal-aġenda ta’ Lisbona, jippermettu li jinħolqu sinerġiji, għad hemm differenzi, fir-rigward tal-bażijiet ġuridiċi, tal-approċċ (tematiku jew territorjali), u tal-ġestjoni (komuni jew ċentralizzata),

1.

Jenfasizza l-kisbiet tal-politika ta’ koeżjoni tal-UE u l-fatt li l-implimentazzjoni tagħha hija indispensabbli għas-suċċess tal-istrateġija UE 2020 bħala strument biex ineħħi d-disparitajiet bejn ir-reġjuni, iżid il-kompetittività tar-reġjuni, jiffaċilita t-tnedija tar-riformi strutturali u jsaħħaħ il-kapaċità tar-reġjuni biex jadattaw ruħhom għall-klima ekonomika globali;

2.

Japprezza li, għall-perjodu 2007-2013, l-Istati Membri kollha ddedikaw ammont sinifikanti mill-allokazzjonijiet finanzjarji totali tagħhom lir-riċerka u żvilupp (R&Ż), innovazzjoni u żvilupp ta’ ekonomija bbażata fuq l-għarfien, u dan irriżulta f'246 Programm Operattiv Nazzjonali jew Reġjonali, b'madwar EUR 86 biljun allokati għar-riċerka u l-innovazzjoni, li EUR 50 biljun minnhom diġà ġew allokati għall-attivitajiet ta’ R&Ż prinċipali u ta’ innovazzjoni; jisħaq li, billi r-riċerka u l-innovazzjoni huma essenzjali għat-titjib tal-kompetittività tal-UE meta taffronta sfidi dinjija, l-investimenti f'dawn l-oqsma għandhom ikomplu u għandhom isiru valutazzjonijiet tal-progress regolari u bbażati fuq ir-riżultati; jirrakkomanda, għalhekk, fid-dawl tal-perjodu ta’ programmazzjoni li jmiss, li l-Istati Membri u l-Kummissjoni jallokaw riżorsi suffiċjenti mill-fondi strutturali għar-riċerka u l-innovazzjoni, partikolarment għall-innovazzjoni sostenibbli, u jsaħħu l-kapaċitajiet ta’ riċerka; jisħaq fuq il-ħtieġa li jiġu promossi u applikati mudelli ta’ suċċess fit-trijanglu tal-għarfien biex jiġi żgurat l-iżvilupp sostenibbli tal-oqfsa reġjonali strateġiċi u ta’ riċerka għall-innovazzjoni b'kollaborazzjoni mal-impriżi, iċ-ċentri ta’ riċerka, l-universitajiet u l-awtoritajiet pubbliċi; jenfasizza l-potenzjal ta’ raggruppamenti reġjonali innovattivi b'intensità għolja ta’ għarfien fil-mobilizzazzjoni tal-kompetittività reġjonali u jappella għal koordinament aħjar tal-fondi strutturali u tas-Seba' Programm Kwadru għar-riċerka u l-iżvilupp teknoloġiku;

3.

Jisħaq li t-tisħiħ tal-konċentrazzjoni tar-riżorsi tal-politika ta’ koeżjoni jista' jiggarantixxi li din il-politika tagħti kontribut sinifikanti għat-tħeġġiġ tal-kompetittività, l-innovazzjoni u l-impjiegi fl-UE;

4.

Jisħaq fuq ir-rwol ewlieni li żvolġew kemm is-settur pubbliku, fil-livelli kollha ta’ gvern, kif ukoll is-settur privat fl-implimentazzjoni tal-politika ta’ koeżjoni, fil-bini mill-ġdid tal-fiduċja u tas-solidarjetà fi żminijiet ta’ reċessjoni u sussegwentement billi ggarantixxew opportunitajiet indaqs f'termini ta’ aċċess għal investiment pubbliku, speċjalment fl-infrastruttura, it-teknoloġiji ġodda u l-kapital uman, u ggarantixxew żvilupp sostenibbli;

5.

Jenfasizza l-fatt li l-kompetittività ekonomika tar-reġjuni tal-UE hija marbuta mill-qrib mal-eżistenza ta’ livell adegwat ta’ impjieg, forza tax-xogħol edukata u kkwalifikata, sigurtà soċjali u aċċess għas-servizzi pubbliċi; josserva, f'dan ir-rigward, li l-appoġġ għall-koeżjoni soċjali mogħti mill-politika ta’ koeżjoni jżid l-importanza ta’ din il-politika għall-kompetittività reġjonali ġenerali fuq skala dinjija;

6.

Huwa tal-fehma li, b'konformità mal-ispirtu tat-Trattati, politika ta’ koeżjoni li l-għan tagħha huwa li tnaqqas id-disparitajiet fil-livelli ta’ żvilupp u tħejji lir-reġjuni biex jissodisfaw l-isfidi fit-tul u fi żmien qasir (globalizzazzjoni, tibdil demografiku, depopolazzjoni taż-żoni rurali, tibdil fil-klima u l-ħarsien tal-bijodiversità) filwaqt li jitqiesu l-punti b'saħħithom u d-dgħufijiet speċifiċi tagħhom, uriet ruħha essenzjali għall-proċess ta’ integrazzjoni Ewropea;

7.

Jiġbed l-attenzjoni għall-fatt li, jekk jiżdiedu s-sinerġiji bejn ir-riċerka u l-iżvilupp, u l-politika ta’ koeżjoni, l-isfidi tal-istrateġija UE 2020 jistgħu jiġu affrontati aħjar; jisħaq li l-politika ta’ koeżjoni għandha tiżvolġi rwol sinifikanti fl-implimentazzjoni tal-istrateġija UE 2020, billi din tistimola bidla strutturali fl-Ewropa kollha u tappoġġa prijoritajiet fundamentali ta’ investiment fil-livelli kollha, kemm lokali, reġjonali, nazzjonali kif ukoll transkonfinali, filwaqt li tiġi garantita l-koeżjoni soċjali, ekonomika u territorjali; jiġbed, madankollu, l-attenzjoni għall-fatt li, minkejja li l-prijoritajiet tal-politika ta’ koeżjoni għandhom ikunu allinjati mal-għanijiet tal-istrateġija UE 2020, din għandha tibqa' politika indipendenti kapaċi takkomoda l-ispeċifiċitajiet reġjonali u jiġu appoġġati r-reġjuni l-aktar dgħajfa u l-aktar fil-bżonn sabiex jegħlbu d-diffikultajiet soċjoekonomiċi tagħhom u l-iżvantaġġi naturali u jitnaqqsu d-disparitajiet; huwa tal-fehma li l-iżgurar tal-kontinwità tal-linji gwida dwar il-politika ta’ koeżjoni li diġà qegħdin fis-seħħ, jissalvagwarda d-dimensjoni reġjonali tar-riċerka u l-iżvilupp u l-innovazzjoni u joħloq l-impjiegi f'setturi innovattivi;

8.

Japprova l-fehmiet espressi fil-Green Paper dwar il-Koeżjoni Territorjali rigward il-kompetittività, li “tiddependi mill-bini ta’ rabtiet ma’ territorji oħra biex ikun żgurat li l-beni komuni jintużaw b'mod koordinat u sostenibbli” sabiex jinħeles il-potenzjal inerenti fid-diversità territorjali tal-UE; jisħaq, b'rabta ma’ dak li ntqal hawn fuq, li l-operazzjoni bla intoppi u kkoordinata tas-servizzi ta’ trasport, aċċess suffiċjenti għat-telekomunikazzjonijiet u l-ġbir komuni, meta jkun xieraq, tal-enerġija, il-kura tas-saħħa, ir-riċerka, l-edukazzjoni, il-ħarsien tal-ambjent u l-infrastruttura huma kundizzjonijiet bażiċi biex tkompli tiġi sostnuta l-kompetittività jistieden lill-Kummissjoni tressaq proposti konkreti għad-definizzjoni u l-implimentazzjoni koerenti tal-objettiv relatat mal-koeżjoni territorjali;

9.

Huwa tal-fehma li l-Istati Membri għandhom jappoġġaw approċċ b'bażi lokali biex ifasslu u jimplimentaw il-politika ta’ koeżjoni; jagħraf li r-rwol tar-reġjuni jvarja bejn l-Istati Membri skont l-istruttura politika u amministrattiva tagħhom; jitlob li l-prinċipju ta’ sussidjarjetà, fil-kunċett imsaħħa u estiż tiegħu kif definit fit-TFUE, għandu jkun applikat kif suppost u li jinkiseb titjib, permezz tal-promozzjoni tal-prinċipju ta’ deċentralizzazzjoni, matul il-perjodu ta’ programmazzjoni attwali, sal-livell ta’ awtorità lokali, bil-għan li jitjieb l-assorbiment tal-fondi; iqis li huwa kontraproduċenti, f'dan il-kuntest, li r-reġjuni jamministraw medja ta’ 30,5 % biss tal-baġit kumplessiv allokat għall-politika ta’ koeżjoni, u l-bqija tkun amministrata mill-gvernijiet ċentrali; jikkunsidra, għaldaqstant, li fil-ġejjieni l-prinċipju ta’ sħubija għandu jissaħħaħ konsiderevolment;

10.

Huwa tal-fehma li t-territorji fil-fruntieri, b'mod partikolari, juru biċ-ċar il-problemi li l-UE qiegħda tħabbat wiċċha magħhom b'rabta mal-isfidi tal-ftuħ tal-fruntieri, il-kompletament tas-suq intern u l-globalizzazzjoni; jenfasizza li l-kompetittività ta’ territorji bħal dawn tista' tiddgħajjef minħabba l-ħtieġa li jinżamm il-pass ma’ sistemi fiskali u ta’ benesseri li jikkompetu magħhom, arranġamenti amministrattivi kumplessi u flussi migratorji bejn ir-reġjuni u l-istati; jisħaq fuq l-importanza li tiġi żviluppata l-għodda meħtieġa għall-kooperazzjoni transkonfinali u l-governanza f'diversi livelli u jistieden lill-Kummissjoni tinkoraġġixxi skambji ta’ informazzjoni u tal-aħjar prassi;

11.

Jiġbed l-attenzjoni għall-fatt li l-koeżjoni territorjali għandha karatteristika orizzontali u multisettorjali u għalhekk il-politiki tal-Unjoni jridu jikkontribwixxu għall-kisba tagħha; itenni l-fatt li dan il-kunċett mhuwiex limitat għall-effetti tal-politika reġjonali iżda jimplika wkoll koordinament ma’ politiki oħra tal-Unjoni li l-għan tagħhom huwa l-iżvilupp sostenibbli u joffru riżultati tanġibbli f'livell reġjonali, sabiex jiġu żviluppati u jintużaw bis-sħiħ il-forom speċifiċi ta’ potenzjal reġjonali u biex jiżdied l-impatt tagħhom fil-prattika, filwaqt li tingħata spinta lill-kompetittività u l-forza ta’ attrazzjoni tar-reġjuni u tinkiseb il-koeżjoni territorjali; huwa tal-fehma li 'konċentrazzjoni, kooperazzjoni, konnessjoni' huma l-koordinati ewlenin tal-koeżjoni territorjali sabiex jinkiseb żvilupp territorjali aktar ibbilanċjat fl-UE;

12.

Jisħaq li governanza f'diversi livelli timplika d-devoluzzjoni tar-responsabilità għall-programmi li jippermettu sfruttament aħjar tal-potenzjali tal-kooperazzjoni territorjali, u li, għalhekk, sabiex l-Unjoni tkun tista' tilħaq għanijiet komuni bl-użu ta’ miżuri koerenti u orjentati lejn ir-riżultati filwaqt li tistabbilixxi prijoritajiet lokali u reġjonali speċifiċi, għandhom jiġu implimentati l-prinċipji tal-governanza f'diversi livelli;

13.

Jilqa' b'sodisfazzjon ir-riżultat tal-inizjattivi URBAN u LEADER u jenfasizza l-bżonn li din l-esperjenza tintuża kif ukoll jintużaw l-eżempji assoċjati tal-aħjar prassi għall-provvista ta’ qafas għal żvilupp rurali-urban integrat, skont l-eżiġenzi ta’ kull reġjun; jistieden il-Kummissjoni teżamina u tipproponi metodoloġiji ta’ xogħol li jippromwovu sħubiji urbani-rurali, jikkumbattu d-depopolazzjoni taż-żoni rurali u, fl-istess ħin, jistimolaw żvilupp urban sostenibbli billi kważi 80 % tal-popolazzjoni tal-UE tgħix f'żoni urbani; jiġbed l-attenzjoni għall-fatt li kemm iż-żoni urbani kif ukoll dawk rurali jiżvolġu rwol dinamiku fl-iżvilupp ekonomiku reġjonali u jenfasizza l-bżonn, fid-dawl tal-perjodu ta’ programmazzjoni li jmiss, għal investiment fi proġetti urbani kif ukoll suburbani għal koordinament aħjar mal-programmi ta’ żvilupp rurali;

14.

Iqis is-sħubija bħala prinċipju fundamentali għad-determinazzjoni tal-kontenut tal-politika ta’ koeżjoni, u l-approċċ minn isfel għal fuq isaħħaħ il-kapaċitajiet amministrattivi u l-kwalità tal-proċess ta’ programmazzjoni; jemmen li l-livelli kollha ta’ gvern jeħtieġu jiżvolġu rwol koeżiv, komplementari u produttiv biex jagħtu spinta lill-kompetittività ekonomika tal-UE; jistieden lill-Kummissjoni tagħti definizzjoni aktar ċara tal-prinċipju ta’ sħubija sabiex ikun żgurat li jitwaqqfu sħubiji veri ma’ awtoritajiet reġjonali u lokali u biex jiġi ffaċilitat l-iskambju tal-aħjar prassi bejn ir-reġjuni;

15.

Jiġbed l-attenzjoni għall-fatt li l-kofinanzjament huwa prinċipju fundamentali għall-ġestjoni tajba tal-politika ta’ koeżjoni; jitlob li jkun applikat kontinwament minkejja l-limitazzjonijiet fuq l-infiq pubbliku minħabba l-kriżi ekonomika;

16.

Jenfasizza l-ħtieġa li tiġi promossa l-imprenditorija u li jiġu appoġġati l-impriżi ż-żgħar u ta’ daqs medju (SMEs), billi jingħaraf ir-rwol fundamentali li żvolġew fit-trawwim tal-kompetittività ekonomika u fil-ħolqien tal-impjiegi; jisħaq fuq il-ħtieġa li jiġi rivedut u analizzat ir-rwol tal-istrumenti tal-UE li jappoġġaw il-kompetittività Ewropea bil-għan li jiġu razzjonalizzati l-proċeduri amministrattivi, jiġi ffaċilitat l-aċċess għall-finanzjament, speċjalment għall-SMEs, u li jiddaħħlu mekkaniżmi innovattivi ta’ inċentiv ibbażati fuq l-ilħuq ta’ għanijiet marbuta mat-tkabbir intelliġenti, sostenibbli u integrattiv, kif ukoll mal-promozzjoni ta’ kooperazzjoni aktar mill-qrib mal-Bank Ewropew tal-Investiment u ma’ istituzzjonijiet finanzjarji oħrajn; japprezza, f'dan il-kuntest, il-valur miżjud offrut mill-istrumenti ta’ inġinerija finanzjarja u jħeġġeġ l-użu tagħhom, kif ukoll dak tal-fondi ta’ rotazzjoni u ta’ għotjiet globali, fuq skala kemm jista' jkun wiesgħa, bil-għan li jinkisbu sinerġiji pożittivi u jiġu massimizzati r-riżultati; jappella wkoll għal aċċess semplifikat għall-kapital ta’ riskju u għall-mikrofinanza;

17.

Jenfasizza, barra minn hekk, li implimentazzjoni effiċjenti tal-politika ta’ koeżjoni tiddependi ferm minn kif tkun tfasslet u għalhekk l-involviment tal-awtoritajiet lokali u reġjonali, fi stadju bikri, fit-tiswir u l-implimentazzjoni tal-politika ta’ koeżjoni futura, huma kruċjali; jenfasizza, bl-istess mod, il-ħtieġa li jiġu żviluppati sħubiji orizzontali u vertikali bejn l-awtoritajiet pubbliċi fil-livelli kollha bil-għan li tinkiseb l-aktar governanza effiċjenti possibbli f'għadd ta’ livelli; ifakkar li l-governanza f'diversi livelli tirrappreżenta wieħed mill-prinċipji kruċjali tal-politika ta’ koeżjoni u li hija fundamentali biex tiggarantixxi l-kwalità tal-proċess tat-teħid tad-deċiżjonijiet; jisħaq ukoll, f'dan il-kuntest, fuq l-importanza tas-sħubija li l-awtoritajiet reġjonali għandhom mal-Kumitat tar-Reġjuni;

18.

Jilqa' b'sodisfazzjon l-emenda għar-Regolament tal-Kunsill (KE) Nru 1083/2006 li jissemplifika l-proċeduri għall-użu tal-fondi strutturali u tal-Fond ta’ Koeżjoni u jistieden lill-Kummissjoni tkompli tissemplifika t-tali proċeduri biex tiġi garantita l-flessibilità tagħhom u jitnaqqas il-piż amministrattiv fuq il-benefiċjarji tal-finanzjamenti, biex b'hekk l-awtoritatjiet ikunu jistgħu jittrattaw l-isfidi l-kbar fil-ħin u bl-użu ta’ riżorsi xierqa; huwa tal-fehma li s-sħubiji bejn is-settur pubbliku u dak privat jistgħu joffru sostenn awtentiku billi jissupplementaw l-isforzi li jsiru fuq livell lokali u reġjonali, u jistieden il-Kummissjoni tressaq proposti konkreti għall-konsolidament tas-sħubiji bejn is-settur pubbliku u dak privat fl-ambitu tal-politika ta’ koeżjoni;

19.

Jisħaq fuq l-importanza, fl-interess li jiġu eliminati d-disparitajiet, li jkompli jingħata appoġġ primarjament lill-proġetti mmirati għar-reġjuni li baqgħu lura, sabiex l-impatt mistenni f'dan il-perjodu ta’ programmazzjoni jinżamm u jkun konformi mal-istimi inizjali; josserva li t-titjib tal-aċċessibilità u tal-faċilitajiet infrastrutturali jikkontribwixxu biex ir-reġjuni li għadhom lura fis-suq intern isiru aktar kompetittivi, u għaldaqstant jikkontribwixxu għall-kompetittività esterna tal-UE kollha kemm hi; huwa tal-fehma li l-irtirar ta’ dan l-appoġġ inaqqas l-impatt tar-riżultati pożittivi inizjali;

20.

Jisħaq fuq il-fatt li, minkejja l-politika ta’ koeżjoni tradizzjonalment tiffokalizza fuq ir-reġjuni l-anqas prosperi, hija tikkonċerna r-reġjuni kollha tal-Ewropa, indipendentement mil-livell ta’ żvilupp tagħhom; jenfasizza, għalhekk, il-ħtieġa li jitħeġġeġ l-objettiv tal-kompetittività reġjonali u l-impjiegi; itenni li politika ta’ koeżjoni soda u finanzjata sew, mgħammra b'baġit tal-anqas ekwivalenti għak dak attwali f'termini assoluti u relattivi, tikkostitwixxi prekundizzjoni biex jintlaħqu l-objettivi tal-istrateġija tal-UE 2020, bil-għan kemm li tiġi żgurata ekonomija intelliġenti, sostenibbli u integrattiva, li tagħmel lill-UE globalment kompetittiva, kif ukoll li jiġi garantit li r-reġjuni kollha jiżviluppaw b'mod armonjuż filwaqt li jiksbu l-objettiv ta’ koeżjoni soċjali, ekonomika u territorjali;

21.

Huwa tal-fehma li l-PDG jrid jibqa' l-kriterju prinċipali biex tkun iddeterminata l-eliġibilità tar-reġjuni għall-għajnuna mill-politika ta’ koeżjoni, waqt indikaturi oħra li jistgħu jitkejlu jistgħu jiżdiedu kemm il-darba jkun ippruvat li huma rilevanti, u għandu jitħalla spazju għall-awtoritajiet nazzjonali li japplikaw, fil-livell xieraq tat-teħid ta’ deċiżjonijiet, indikaturi oħra li jqisu l-attributi speċifiċi ta’ reġjuni u bliet;

22.

Jisħaq fuq l-importanza li fl-allokazzjoni tal-fondi, jitqiesu l-karatteristiċi speċifiċi pereżempju ta’ reġjuni mal-kosta, tal-muntanja u ultraperiferiċi, reġjuni bi problemi ta’ depopolazzjoni, jew reġjuni u bliet remoti mal-fruntieri; jinkoraġġixxi lir-reġjuni jressqu inizjattivi għall-isfruttament tal-ispeċifiċità reġjonali tagħhom; jistieden lill-Kummissjoni tadatta d-diversi strumenti finanzjarji biex toħloq valur miżjud f'terminu qasir u medju, hija u tqis ukoll l-effetti tal-kriżi ekonomika u finanzjarja;

23.

Jistieden lill-Kummissjoni tistudja modi li bihom tekniki ġodda fl-inġinerija finanzjarja jistgħu jtejbu l-effikaċja u l-impatt tal-politika ta’ koeżjoni bil-għan li jinkisbu l-aħjar riżultati possibbli fil-proġetti magħżula;

24.

Jenfasizza l-effetti pożittivi tal-ugwaljanza bejn is-sessi fuq it-tkabbir ekonomiku u l-koeżjoni soċjali tal-UE u, għaldaqstant, fuq il-kompetittività tagħha;

25.

Jenfasizza r-rwol deċiżiv li l-iżvilupp reġjonali u l-koeżjoni territorjali jiżvolġu fl-Ewropa kollha, minħabba l-valur miżjud Ewropew tagħhom, fit-tisħiħ tal-kompetittività ekonomika tal-UE u fl-ilħuq tal-objettivi tal-UE 2020, u l-approċċ b'bażi lokali jkun wieħed mill-modi ewlenin ta’ kif jintlaħaq ekwilibrju ekonomiku;

26.

Jisħaq fuq il-ħtieġa ta’ approċċ integrat għall-applikazzjoni tal-fondi strutturali bħal mezz importanti li jgħin lir-reġjuni jiksbu tkabbir sostenibbli, impjiegi u prosperità;

27.

Jisħaq fuq il-ħtieġa li jinżammu l-arranġamenti tranżitorji biex jiġi kkonsolidat u mtejjeb il-livell attwali ta’ żvilupp, li jista' jinżel jekk il-finanzjament jitnaqqas b'mod sinifikanti ladarba jintlaħaq għan partikolari; jiġbed l-attenzjoni għall-fatt li dan jiżgura trattament ugwali għal reġjuni f'sitwazzjonijiet analogi, li min-naħa tiegħu jwassal għall-organizzazzjoni effiċjenti tal-programmi;

28.

Ifakkar lill-Kummissjoni u lill-Istati Membri li l-aspettattivi tal-pubbliku Ewropew huma bbażati fuq il-bżonnijiet tan-nies, u speċjalment fuq ix-xewqa għall-aċċess għal infrastruttura adegwata u servizzi pubbliċi ta’ kwalità, li għandhom jiġu fornuti b'mod ekwu u bi prezzijiet li jifilħu għalihom iċ-ċittadini Ewropej kollha, indipendentement minn fejn jgħixu u jaħdmu; jinsisti li d-dritt għal opportunitajiet indaqs għandu jitħares u jisħaq fuq il-ħtieġa tal-aċċess ta’ persuni b'diżabilità għall-infrastruttura u l-proġetti kollha ffinanzjati mill-fondi strutturali;

29.

Jisħaq fuq il-fatt li biex l-għarfien u l-innovazzjoni jiġu kkonsolidati bħala muturi tat-tkabbir ekonomiku futur u tal-kompetittività Ewropea, jeħtieġ li tittejjeb il-kwalità tal-edukazzjoni, isir progress skont ir-riżultati tar-riċerka, jiġu promossi l-innovazzjoni u t-trasferiment tal-għarfien fl-Unjoni kollha, l-ICTs jiġu sfruttati kemm jista' jkun, jiġi żgurat li ideat innovattivi jiġu riflessi fi prodotti u servizzi ġodda li jiġġeneraw it-tkabbir u impjiegi ta’ kwalità u jikkontribwixxu biex jiġu sodisfatti l-isfidi tal-bidla soċjali fl-Ewropa u fid-dinja, titħeġġeġ l-imprenditorija, tingħata prijorità lill-ħtiġijiet tal-utenti u lill-opportunitajiet tas-suq, u jiġi ggarantit finanzjament ta’ natura aċċessibbli u adegwata abbażi ta’ rwol fundamentali għall-fondi strutturali;

30.

Jenfasizza l-fatt li l-koeżjoni ekonomika, soċjali u territorjali toffri opportunità biex jiġi sfruttat il-potenzjal sħiħ tar-riċerka, tal-iżvilupp u tal-innovazzjoni u jiġi żgurat li l-pubbliku Ewropew ikun jista' jkollu standards ta’ ħajja aħjar u aktar fiduċja fl-UE; l-investiment selettiv u kombinat fir-riċerka, fl-iżvilupp u fl-innovazzjoni għandu jqis il-kapaċitajiet u l-potenzjali reġjonali u urbani u jgħin fl-iżvilupp ta’ oqsma ewlenin bħas-saħħa elettronika, il-prodotti farmaċewtiċi, it-trasport u l-loġistika, l-ambjent, il-kontenut diġitali, l-enerġija u s-sigurtà, permezz tal-iżvilupp istituzzjonali u programmi ta’ tisħiħ tal-kapaċitajiet;

31.

Huwa tal-fehma li parti mill-finanzjament allokat għar-riċerka, l-iżvilupp u l-innovazzjoni skont il-politika ta’ koeżjoni għandha tintuża biex jinkiseb u jinżamm ir-rwol ta’ pijunier f'setturi fejn l-Ewropa diġà għandha vantaġġ kompetittiv u f'dawk fejn għandha opportunità ġdida li ssir pijunier;

32.

Huwa tal-fehma li, sabiex is-suq intern jiġi kkonsolidat, jinħtieġu miżuri speċifiċi biex tiġi stimolata l-kompetizzjoni f'livell Ewropew, iżda bla ma jinħoloq żbilanċ bejn l-Istati Membri; jemmen li b'dan il-mod jista' jintlaħaq livell komdu ta’ stabbilità u prosperità ekonomika f'livell Ewropew;

33.

Jirrakkomanda li l-Istati Membri u l-Kummissjoni jagħtu aktar attenzjoni lill-appoġġ ta’ proġetti kbar li jkopru żewġ programmi operattivi jew aktar b'impatt kbir f'livell Ewropew, li jiġġeneraw valur miżjud, joħolqu impjiegi ta’ kwalità għolja u jissalvagwardaw l-iżvilupp sostenibbli tar-reġjuni;

34.

Huwa tal-fehma li l-politika ta’ koeżjoni għandha tkompli tippromwovi miżuri li jiġġeneraw l-akbar għadd ta’ impjiegi possibbli, biex b'hekk ikun possibbli li jintużaw r-riżorsi umani u li jiġi żgurat l-iżvilupp kontinwu tagħhom sabiex tkun garantita produttività għolja;

35.

Jibqa' jsostni li l-kisba ta’ koeżjoni ekonomika, soċjali u territorjali hija kundizzjoni meħtieġa iżda mhijiex biżżejjed biex tkun garantita l-kompetittività ekonomika f'livell dinji, li tirrikjedi investimenti sinifikanti f'oqsma ewlenin bħall-enerġija, l-ambjent, l-infrastruttura, l-edukazzjoni, ir-riċerka u żvilupp, l-industriji u s-servizzi kreattivi, il-loġistika u t-trasport;

36.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

15.6.2012   

MT

Il-Ġurnal Uffiċjali tal-Unjoni Ewropea

CE 169/37

—

wara li kkunsidra l-Komunikazzjoni tal-Kummissjoni dwar il-Programm ta’ Ħidma tal-Kummissjoni 2011 (COM(2010)0623),

—

wara li kkunsidra l-aħħar Ftehim Qafas dwar ir-relazzjonijiet bejn il-Parlament Ewropew u l-Kummissjoni Ewropea, b'mod partikolari l-Anness 4 tiegħu,

—

wara li kkunsidra l-Artikolu 110(4) tar-Regoli ta’ Proċedura tiegħu,

A.

billi huwa kruċjali li d-Djalogu bejn il-Parlament Ewropew u l-Kummissjoni għandu jitwettaq bla dewmien sabiex l-isforzi jiffukaw fuq id-definizzjoni tal-għanijiet strateġiċi ewlenin tal-UE għas-sena d-dieħla u s-snin li ġejjin,

B.

billi l-prijoritajiet politiċi għandhom jitqabblu mar-riżorsi finanzjarji disponibbli,

C.

billi l-politika u l-azzjoni Ewropea, id f'id ma’ dawk tal-Istati Membri bi qbil mal-prinċipju tas-sussidjarjetà, jistgħu u għandu jkollhom influwenza reali biex jgħinu liċ-ċittadini jantiċipaw u jirreaġixxu għal soċjetà li qed tinbidel malajr,

D.

billi l-2011 sejra tkun ta’ importanza kruċjali għas-suċċess futur tal-Unjoni u sfida sinifikanti għall-Kummissjoni Ewropea u għall-Unjoni kollha kemm hi,

E.

billi l-kriżi finanzjarja għadu qed ikollha effetti sinfikanti fuq l-ekonomiji tal-Istati Membri u billi jeħtieġ li jsiru aġġustamenti maġġuri sew fil-livell nazzjonali kif ukoll f'dak tal-UE; billi l-irkupru sħiħ jeħtieġ strateġija komuni Ewropea għal tkabbir sostenibbli u ħolqien ta’ impjiegi, appoġġata bis-setgħat u r-riżorsi meħtieġa,

1.

Jinnota li dan il-programm ta’ ħidma huwa l-ewwel wieħed li se jiġi adottat skont il-ċiklu l-ġdid ta’ programmazzjoni, u jenfasizza li d-djalogu stabbilit mal-Kummissjoni jeħtieġ li jiġi approfondit sabiex tittejjeb ir-rabta evidenti bejn il-prijoritajiet politiċi u l-baġit biex jiġu ffinanzjati fil-livell tal-UE;

2.

Iħeġġeġ lill-Kummissjoni timpenja ruħha biex twettaq eżerċizzju ta’ programmazzjoni realistiku u operattiv li għandu jkun effikaċi u tradott fir-realtà, kif ukoll li jkun implimentat aħjar milli fil-passat; jitlob skeda aktar ċara marbuta mal-proposti ewlenin li jridu jitressqu;

3.

Iħeġġeġ lill-Kummissjoni tadatta l-acquis għad-dispożizzjonijiet tal-Artikoli 290 u 291 tat-TFUE mill-aktar fis possibbli skont skeda ċara;

4.

Jistieden lill-Kummissjoni taġixxi sal-limitu aħħari tal-poteri legali u tal-awtorità politika tagħha; jinnota li l-Unjoni Ewropea ma tistax tiffunzjona b'effikaċja sakemm il-Kummissjoni ma tidentifikax, ma tartikulax u ma tippromovix l-interess ġenerali tal-Unjoni u taċ-ċittadini tagħha, u sakemm ma taqdix b'effiċjenza dmirha li tissorvelja l-applikazzjoni tat-Trattati u tal-liġijiet tal-UE;

5.

Jinnota li l-isforzi li saru s'issa biex tinstab soluzzjoni għall-kriżi finanzjarja u biex isostnu l-irkupru ekonomiku tal-Ewropa baqgħu wisq lura minn dak li huwa meħtieġ; u jiddeplora l-fatt li l-programm ta’ ħidma ma jinkludix miżuri addizzjonali biex jinħolqu aktar impjiegi; jistieden lill-Kummissjoni, għalhekk, tispjega t-tweġiba dettaljata tagħha dwar kif l-inizjattivi u l-proposti tagħha se jilqgħu l-isfida;

6.

Hu tal-fehma li l-UE se jkollha tindirizza r-riforma strutturali mingħajr dewmien sabiex ittejjeb il-kompetittività tagħha u terġa' tvara mill-ġdid it-tkabbir; jemmen ukoll li l-modernizzazzjoni tal-infrastruttura (inkluża l-broadband), iż-żieda fl-isforzi fir-rigward tar-riċerka, l-iżvilupp u l-innovazzjoni, politika li tiżgura enerġija suffiċjenti, ekonomika u nadifa, l-innovazzjoni u l-iżvilupp ta’ teknoloġiji ġodda u l-kwalità tal-edukazzjoni u t-taħriġ huma s-sisien ċentrali tal-istrateġija;

7.

Jilqa' bi pjaċir il-prijorità mogħtija lir-riforma tal-governanza ekonomika Ewropea; iwissi li, jekk l-UE ma tiżviluppax governanza ekonomika kredibbli, b'mod partikolari fiż-żona tal-euro, li tkun kapaċi tiżgura politika fiskali soda u terġa' lura għal stat ta’ tkabbir, il-futur tal-euro se jkun ipperikolat; jinsisti li riforma bħal din għandha tqis għalkollox il-pożizzjoni tal-Parlament, kif spjegata fir-riżoluzzjoni tiegħu tal-20 ta’ Ottubru 2010, u għandu jkollha bħala skop l-ilħuq tal-objettivi ekonomiċi u soċjali tal-Unjoni, kif stipulat fl-Artikolu 3 tat-Trattat ta’ Lisbona;

8.

Ifakkar li l-Parlament u l-Kunsill, bħala ż-żewġ fergħat tal-awtorità baġitarja, għandhom ikunu involuti b'mod ugwali fi kwalunkwe mobilizzazzjoni tal-Mekkaniżmu Ewropew għall-Istabilità Finanzjarja; jitlob li jiġu ppreżentati proposti malajr biex il-mekkaniżmu għas-soluzzjoni tal-kriżijiet isir permanenti (pereżempju l-Fond Monetarju Ewropew), biex l-Istrateġija UE 2020 tiġi integrata fil-qafas makroekonomiku għal perjodu twil ta’ żmien, biex jittieħdu l-ewwel passi li jwasslu għall-ħruġ reċiproku ta’ parti mid-dejn sovran u l-introduzzjoni ta’ bonds għal dan il-għan, kif deskritt fir-rapporti preċedenti tal-Parlament, u biex tiġi żgurata rappreżentazzjoni esterna unika taż-żona tal-euro; jippreferi bidla żgħira fit-Trattat li tkun tipprevedi bażi legali għal mekkaniżmu bħal dan minflok ma wieħed jirrikorri għal emenda sostanzjali tat-Trattat;

9.

Jinsisti li l-Kummissjoni għandha tressaq malajr proposti biex tirrevedi l-qafas finanzjarju multiannwali attwali; jiddikjara li l-MFF għall-perjodu wara l-2013 għandu jirrifletti wkoll l-ambitu akbar ta’ dawk ir-responsabilitajiet; jistieden lill-Kummissjoni tippreżenta proposta ta’ investiment ambizzjuża biex tilħaq il-miri tal-istrateġija UE 2020, u biex jinħolqu l-impjiegi, tingħata spinta lit-tkabbir u tiġi garantita s-sigurtà taċ-ċittadini Ewropej; iqis li l-flessibilità f'dan il-qafas se tkun essenzjali u li l-baġit tal-UE għandu jippermetti li jiġu mobilizzati sorsi alternattivi ta’ finanzjament (allokazzjonijiet, bonds tal-proġetti, eċċ);

10.

Ifakkar li l-adozzjoni tar-Regolament MFF jirrikjedi l-approvazzjoni tal-Parlament; jistieden lill-Kummissjoni tiffaċilita l-adozzjoni rapida ta’ ftehim interistituzzjonali dwar ir-rwol tal-Parlament fit-tħejjija u n-negozjar tal-MFF li jmiss;

11.

Iħeġġeġ b'mod qawwi lill-Kummissjoni biex f'Ġunju 2010, wara l-adozzjoni tal-pożizzjoni tal-Parlament rigward l-MFF il-ġdid, tersaq bi proposti kuraġġużi u innovattivi għal reviżjoni sostantiva tas-sistema tar-riżorsi proprji, biex tinħoloq sistema li tkun ġusta, ċara, trasparenti u newtrali rigward il-piż tat-taxxa għaċ-ċittadini tal-UE; jemmen b'mod qawwi li l-MFF u l-kwistjoni tar-riżorsi proprji huma interkonnessi, għandhom jiġu deċiżi fl-istess ħin fuq il-bażi ta’ dibattitu interistituzzjonali miftuħ, b'involviment b'saħħtu tal-parlamenti nazzjonali, u li ma jistax jiġi pospost aktar;

12.

Jenfasizza li l-politika ta’ koeżjoni tirrappreżenta wieħed mill-istrumenti l-aktar importanti tal-UE ta’ reazzjoni għall-kriżi ekonomika, permezz tal-promozzjoni tal-investiment fl-ekonomija reali; jilqa b'sodisfazzjon, f'dan ir-rigward, l-ewwel valutazzjoni tal-Kummissjoni dwar l-implimentazzjoni tal-miżuri marbuta mal-politika ta’ koeżjoni fil-Pjan Ewropew għall-Irkupru Ekonomiku, li jenfasizza r-rwol prinċipali ta’ din il-politika fil-proċess li jilqa' għall-effetti tal-kriżi; Jenfasizza l-konnessjoni inkontestabbli tal-politika ta’ koeżjoni mat-tliet prijoritajiet il-kbar tal-Istrateġija Ewropa 2020, billi tiffaċilita l-kisba ta’ tkabbir intelliġenti, sostenibbli u inklużiv ogħla, filwaqt li tippromwovi l-iżvilupp armonjuż fil-271 reġjun tal-Unjoni;

13.

Jinnota l-introduzzjoni ta’ “Semestru Ewropew”; jemmen li l-kumitati tal-Parlament għandu jkollhom rwol aktar importanti biex juru l-għarfien espert tagħhom billi jipproduċu “rapporti tal-aħħar tas-sena” dwar il-progress fl-ilħuq ta’ għanijiet importanti, segwiti minn riżoluzzjonijiet (konġunti) ta’ gruppi politiċi;

14.

Jiddispjaċih li l-proposti għas-Semestru Ewropew u l-pakkett ta’ governanza jipprovdu ftit li xejn opportunità għal skrutinju demokratiku Ewropew, u jinsisti li għandu jkun hemm involviment parlamentari qawwi fit-tnejn li huma;

15.

Jitlob lill-Kummissjoni tressaq mill-aktar fis possibbli proposti dwar ir-riformulazzjoni tad-Direttiva dwar l-Abbuż tas-Suq u tad-Direttiva dwar is-Suq tal-Istrumenti Finanzjarji; jinnota li l-Kummissjoni għandha żżomm quddiem għajnejha l-impatt kumulattiv possibbli tal-proposti li qed tintroduċi biex tiżgura li jsaħħu l-istabilità, it-trasparenza u r-responsabilità tas-settur finanzjarju u l-kapaċità tiegħu li jaqdi lill-ekonomija reali fis-sens ta’ tkabbir u impjiegi;

16.

Jitlob li l-inizjattiva leġiżlattiva fir-rigward tas-soluzzjoni tal-kriżijiet fis-settur bankarju tkun koordinata mar-regoli tal-politika tal-kompetizzjoni biex jinħoloq qafas komprensiv għall-ġestjoni tal-kriżijiet, li jkun ikopri l-parteċipanti privati u pubbliċi u li jipproteġi lill-kontributuri tat-taxxa; jemmen li r-reviżjoni tar-Regolament dwar l-Aġenziji tal-Klassifikazzjoni tal-Kreditu għandha tindirizza n-nuqqas ta’ kompetizzjoni fis-settur u jitlob lill-Kummissjoni taġixxi fir-rigward tat-talba riċenti tal-Parlament li jiġu eżaminati l-għażliet għal aġenzija Ewropea indipendenti tal-klassifikazzjoni tal-kreditu u involviment aktar b'saħħtu tal-entitajiet pubbliċi indipendenti fil-ħruġ tal-klassifikazzjonijiet;

17.

Jistieden lill-Kummissjoni tippreżenta pjan ta’ azzjoni komprensiv, bi skeda u miri, biex jintlaħaq suq uniku għall-kontenut u għas-servizzi online, fl-interess ta’ soċjetà diġitali miftuħa u prospera, u biex jingħelbu d-differenzi diġitali;

18.

Jenfasizza li l-aġenda diġitali u l-investiment fl-ICTs huma kruċjali għall-kompetittività tal-Ewropa fit-tul, u jħeġġeġ lill-Istati Membri u lill-Kummissjoni biex ikomplu bl-introduzzjoni fis-suq tan-netwerks tal-ġenerazzjoni li jmiss u l-aċċess għalihom permezz ta’ liberalizzazzjoni kontinwa tas-suq intern għall-komunikazzjonijiet biex tingħata spinta lill-innovazzjoni fl-UE;

19.

Jinkoraġġixxi b'mod qawwi lill-Kummissjoni biex trawwem l-għarfien u l-innovazzjoni fl-FP8 fis-segwitu tal-eżami ta’ nofs it-terminu, u jfakkar li hu importanti li l-Parlament ikollu l-opportunità li jesprimi l-prijoritajiet tiegħu qabel l-adozzjoni tal-FP8 fl-2012;

20.

Jilqa' l-ambizzjoni tal-Kummissjoni rigward l-Unjoni tal-Innovazzjoni li se tinvolvi l-eżami tal-għajnuna tal-istat għall-oqfsa tar-riċerka u l-iżvilupp u tal-innovazzjoni, bit-tisħiħ tar-rwol tal-BEI u tal-kapital ta’ riskju; jirrikonoxxi wkoll ir-rwol li jista' jkollu l-akkwist pubbliku biex jistimola l-innovazzjoni;

21.

Iħeġġeġ lill-Kummissjoni tnaqqas il-burokrazija żejda fil-programmi tagħha għar-riċerka u l-iżvilupp u żżid il-parteċipazzjoni tad-ditti innovattivi fil-proġetti; iqis li l-Kummissjoni għandha tippromwovi ulterjorment is-sħubijiet bejn il-pubbliku u l-privat biex trawwem ir-riċerka, l-iżvilupp u l-innovazzjoni tal-Ewropa;

22.

Jenfasizza l-importanza li għandha tingħata lill-programmi multiannwali ġodda ta’ wara l-2013 fil-qasam tal-edukazzjoni, il-kultura, il-mezzi awdjoviżivi, iż-żgħażagħ u ċ-ċittadinanza, li huma mistennija jiġu ppreżentati fl-2011; iqis li l-azzjonijiet u l-miżuri meħuda f'dawn il-programmi għandhom iwieġbu għall-ħtiġijiet taċ-ċittadini Ewropej u jkunu bbażati fuq qafas baġitarju adegwat u effiċjenti; iqis li l-inizjattiva “Żgħażagħ Mobbli” tenfasizza l-importanza ta’ dawk il-programmi;

23.

Jenfasizza l-importanza strateġika tal-inizjattiva emblematika dwar l-effiċjenza tar-riżorsi, u jħeġġeġ lill-Kummissjoni taħdem rapidament fuq proposta ambizzjuża maħsuba biex tilħaq miri vinkolanti u benchmarks konkreti fil-qafas tas-Semestru Ewropew tal-UE 2020 dwar il-koordinament tal-politiki; u jistieden lill-Kummissjoni tersaq b'leġiżlazzjoni biex ikomplu jitnaqqsu l-emissjonijiet tal-UE;

24.

Iqis li għandha tingħata prijorità lill-implimentazzjoni xierqa u funzjonali tal-istrumenti leġiżlattivi eżistenti bħat-Tielet Pakkett tal-Enerġija u jappoġġa bis-sħiħ l-istrateġija 2050, in-netwerks intelliġenti u l-inizjattivi dwar is-sigurtà tal-provvista;

25.

Jenfasizza li sabiex it-tkabbir ekonomiku jkun sostenibbli, is-sigurtà tal-enerġija hija importanti ħafna biex ikunu żgurati l-provvista mingħajr interruzzjonijiet, ir-rispett għall-arranġamenti kuntrattwali, prezz tas-suq ġust, u l-evitar ta’ dipendenza fuq għadd żgħir wisq ta’ produtturi;

26.

Jemmen li l-Komunikazzjoni dwar il-Politika Industrijali ġdida għall-Ewropa għandha tiġi segwita b'miżuri effikaċi, b'mod partikolari biex tintlaħaq il-bidla mixtieqa għal ekonomija b'livelli baxxi ta’ karbonju u sostenibbli u biex jiġi żgurat li l-mira tal-UE ta’ 20 % għall-effiċjenza enerġetika tintlaħaq;

27.

Jenfasizza li l-mitigazzjoni tat-tibdil fil-klima u l-adattament għalih huma prijorità għolja li se tkun ta’ benefiċċju wkoll għall-kompetittività tal-industrija Ewropea u tal-SMEs;

28.

Jilqa' b'sodisfazzjon il-prijoritajiet ewlenin rigward il-pubblikazzjoni tal-White Paper u jħeġġeġ lill-Kummissjoni biex tħaffef it-tħejjija tar-reviżjoni tal-linji gwida TEN-T u tal-mekkaniżmi modernizzati ta’ finanzjament tiegħu, skont l-istrateġija Ewropa 2020 u r-rieżami tal-baġit tal-UE;

29.

Jinsisti mill-bidu nett li l-proċess ta’ riforma tal-PAK għandu jirriżulta f'politika b'saħħitha, ġusta, ġenwinament komuni u multifunzjonali li tissodisfa l-aspettattivi tal-konsumaturi u l-produtturi u tagħti effettivament “prodotti pubbliċi”, b'mod speċjali s-sigurtà tal-ikel, u tiggarantixxi l-awtosuffiċjenza tal-UE fir-rigward tal-ikel;

30.

Ifakkar li, fir-riżoluzzjoni tiegħu tat-8 ta’ Lulju 2010 dwar il-ġejjieni tal-Politika Agrikola Komuni wara l-2013, insista li fil-perjodu ta’ programmazzjoni finanzjarja li jmiss l-ammonti allokati għall-PAK fis-sena baġitarja 2013 għandhom għall-inqas jinżammu;

31.

Jitlob li l-importazzjonijiet agrikoli minn pajjiżi terzi għandhom ikunu biss permessi fl-UE jekk ikunu ġew prodotti b'mod konsistenti ma’ standards Ewropej tal-protezzjoni tal-konsumatur, tal-benessri tal-annimali u tal-protezzjoni ambjentali u ma’ standards soċjali minimi; jinsisti li l-konklużjoni ta’ ftehimiet ta’ kummerċ bilaterali jew multilaterali m'għandhomx isiru bi ħsara għall-produtturi agrikoli tal-UE;

32.

Iħeġġeġ lill-Kummissjoni, fid-dawl tas-sejbiet tar-rapport tal-Qorti tal-Awdituri dwar ir-riforma tas-suq taz-zokkor, biex teżamina mill-ġdid il-proċeduri tagħha ta’ valutazzjoni tal-impatt sabiex tkun żgura li tintuża l-aħjar informazzjoni u dik l-aktar f'waqtha meta tħejji l-valutazzjonijiet kollha, li se jkun determinanti meta jiġi vvalutat l-impatt tal-ftehimiet ta’ kummerċ bilaterali tal-ġejjieni għal setturi ewlenin tal-ekonomija tal-UE;

33.

Jilqa' l-proposti imminenti tal-Kummissjoni biex tiġu implimentata l-Politika Marittima Integrata, bħall-proposta dwar il-qafas tal-Ippjanar tal-Ispazji fil-Baħar u l-Komunikazzjoni għal tkabbir sostenibbli fir-reġjuni tal-kosta u s-setturi marittimi, kif ukoll il-Komunikazzjoni dwar l-integrazzjoni tas-sorveljanza marittima; jenfasizza, madankollu, li l-finanzjament għall-implimentazzjoni tal-PMI għandu jiġi ggarantit fil-baġit Komunitarju permezz ta’ kontribut proporzjonali mis-setturi kollha affettwati minn din il-politika;

34.

Jemmen li t-tkabbir inklużiv jista' jinbena biss fuq pedament ta’ trattament indaqs għall-ħaddiema kollha fil-post tax-xogħol u kundizzjonijiet indaqs għan-negozji kollha; jemmen li l-Programm ta’ Ħidma tal-Kummissjoni għandu jinkludi proposti biex jiġu garantiti dawn il-prinċipji, u jinsisti li l-proposta leġiżlattiva dwar l-impliemntazzjoni tal-Istazzjonar tal-Ħaddiema, kif previst fil-Komunikazzjoni dwar l-Att dwar is-Suq Uniku, għandha tiċċara l-eżerċitar tad-drittijiet soċjali fundamentali;

35.

Jitlob li tiġi ppreżentata proposta tal-Kummissjoni dwar il-parteċipazzjoni finanzjarja tal-ħaddiema fil-qligħ tal-kumpaniji;

36.

Jistieden lill-Kummissjoni biex fir-rapporti tagħha dwar “Ħiliet u Impjiegi Ġodda” u “Pjattaforma kontra l-Faqar” tqis id-diffikultajiet speċifiċi li jaffaċċjaw in-nisa, b'mod speċifiku biex tiġi promossa l-ugwaljanza fil-post tax-xogħol bħala mezz biex jiġi indirizzat il-faqar, u biex in-nisa jiġu inkoraġġiti jsiru intraprendisti, billi jittieħdu miżuri li jaqsmu l-aħjar prattika;

37.

Hu ta’ fehma soda li t-tnaqqis tad-diskrepanza fil-pagi bejn is-sessi tibqa' sfida reali li jeħtieġ li tingħeleb, u jtenni t-talbiet li saru lill-Kummissjoni fir-riżoluzzjoni tal-Parlament tal-2008 biex tippreżenta lill-Parlament proposta leġiżlattiva dwar ir-reviżjoni tal-leġiżlazzjoni eżistenti dwar l-applikazzjoni tal-prinċipju ta’ paga ugwali għall-irġiel u n-nisa, filwaqt li jitqiesu r-rakkomandazzjonijiet annessi mar-riżoluzzjoni tiegħu tal-2008;

38.

Jistieden lill-Kummissjoni biex tagħti widen għall-fehmiet tas-sħab soċjali fil-qasam tal-pensjonijiet u biex tiżgura li l-White Paper tirrifletti l-aspettattivi taż-żewġ naħat tal-industrija, inkluż it-tisħiħ tal-ewwel pilastru;

39.

Jilqa' r-riforma tal-EURES, il-websajt għall-impjiegi, li permezz tagħha hemm iktar aċċess għall-informazzjoni u l-pariri dwar l-impjiegi għall-ħaddiema żgħażagħ, iżda jiddispjaċih li din il-proposta kienet posposta għall-2012, filwaqt li ż-żgħażagħ jeħtiġuha llum;

40.

Jitlob li jkun hemm iktar effikaċja u riżultati rigward żewġ aġenziji ewlenin għat-taħriġ tal-UE – is-Cedefop, iċ-Ċentru Ewropew għall-Iżvilupp ta’ Taħriġ Vokazzjonali, u l-ETF, il-Fondazzjoni Ewropea għat-Taħriġ;

41.

Jappoġġa b'mod qawwi integrazzjoni akbar tas-suq, li tindirizza d-diskrepanzi persistenti sinifikanti, kif identifikati mill-Professur Monti, u li ssaħħaħ il-fiduċja taċ-ċittadini, il-ħaddiema, in-negozji żgħar u l-konsumaturi tal-UE; jemmen, filwaqt li jilqa' l-pubblikazzjoni tal-Att dwar is-Suq Uniku, li l-proposti għandhom ikunu aktar ambizzjużi u konkreti; jistieden lill-Kummissjoni tressaq, malajr kemm jista' jkun, prijoritajiet ċari u proposti leġiżlattivi;

42.

Jitlob modernizzazzjoni tal-qafas leġiżlattiv tal-UE dwar l-akkwist pubbliku, permezz tal-armonizzazzjoni tad-direttivi u tal-Ftehim dwar l-Akkwist Pubbliku, u jitlob skeda aktar ċara għas-sena li jmiss;

43.

Jistieden lill-Kummissjoni tiżgura approċċ konsistenti bejn l-istrument legali dwar il-liġi kuntrattwali Ewropea u d-Direttiva dwar id-Drittijiet tal-Konsumatur; iqis li huwa essenzjali li Strateġija Politika ċara tal-Kummissjoni għall-Konsumaturi tiġi indirizzata b'mod integrat b'urġenza fl-2011, u mhux fl-2014 kif inhu propost bħalissa;

44.

Jappoġġa r-reviżjoni tad-Direttiva tal-Ivvjaġġar b'Kollox Inkluż u l-eżami tad-Direttiva dwar is-Sigurtà Ġenerali tal-Prodotti b'enfasi fuq is-sorveljanza tas-suq;

45.

Jenfasizza l-ħtieġa ta’ qafas legali effiċjenti għas-sikurezza tal-prodotti fl-UE; jappoġġa l-eżami tad-Direttiva dwar is-Sigurtà Ġenerali tal-Prodotti, li jirrikjedi li jiġi stabbilit kalendarju aktar ċar, bi qbil mal-eżami tal-qafas leġiżlattiv il-ġdid; jistieden lill-Kummissjoni teżamina s-sistema tal-marka CE biex tiżgura li l-marka CE tkun tista' titqies bħala marka ta’ sikurezza mill-konsumaturi;

46.

Jenfasizza li l-inizjattivi tal-liġi ċivili huma importanti biex is-Suq Uniku terġa' tingħatalu l-ħajja; jappoġġa l-azzjonijiet tal-Kummissjoni, fejn tidħol il-ġustizzja ċivili, biex l-istrumenti tal-liġi ċivili jsiru aktar kompatibbli mal-ġustizzja elettronika;

47.

Jitlob li jkun hemm riżoluzzjoni finali tal-problemi madwar l-istabbiliment ta’ privattiv Ewropew, u, jekk dan ikun meħtieġ, jistieden lill-Kummissjoni tressaq proposta għal kooperazzjoni msaħħa;

48.

Jiddispjaċih ħafna dwar in-nuqqas ta’ inizjattiva leġiżlattiva rigward il-kabotaġġ u d-dewmien sal-2012 tal-aċċess għas-suq ferrovjarju, inkluż il-ftuħ tas-suq għall-passiġġieri domestiċi; itenni l-konvinzjoni soda tal-Parlament li għandha tinżamm u tiġi żviluppata politika komprensiva dwar id-drittijiet tal-passiġġieri fl-Ewropa;

49.

Jinsab imħasseb ferm li m'hemm l-ebda proposti konkreti dwar id-drittijiet fundamentali jew dwar id-Direttiva orizzontali tan-Nondiskriminazzjoni, u li l-kwistjoni tan-nondiskriminazzjoni lanqas biss tissemma; jistieden lill-Kummissjoni taġixxi b'ħeffa biex tneħħi l-imblukkar tad-Direttiva tan-Nondiskriminazzjoni;

50.

Jitlob li ssir proposta għal Komunikazzjoni dwar solidarjetà msaħħa fl-UE fil-qasam tal-asil, iżda jiddispjaċih għan-nuqqas ta’ proposti leġiżlattivi dwar l-asil, filwaqt li jitqies li l-Unjoni għandu jkollha politika komuni ta’ asil stabbilita sal-2012;

51.

Jitlob li jsiru proposti dwar il-migrazzjoni; ifakkar li l-funzjonament tajjeb tas-Sistema ta’ Dħul/Ħruġ proposta se jiddependi mis-suċċess tal-VIS u tas-SIS II, għalkemm is-SIS II għadha mhix titħaddem kompletament;

52.

Jenfasizza l-bżonn ta’ politika ambizzjuża dwar id-drittijiet fundamentali wara d-dħul fis-seħħ tat-Trattat ta’ Lisbona u l-ħtieġa li d-drittijiet fundamentali stipulati fil-Karta jsiru effikaċi kemm jista' jkun; jitlob lill-Kummissjoni tiżgura l-kompatibilità ta’ kull inizjattiva legali mad-drittijiet fundamentali kif ukoll tiggarantixxi li l-Istati Membri jirrispettaw il-Karta meta jimplimentaw il-liġi tal-UE; jitlob li jissaħħu l-kapaċitajiet ta’ sorveljanza ta’ każijiet ta’ ksur tal-Karta tad-Drittijiet Fundamentali, u li jiġu applikati l-mekkaniżmi tat-trattati kontrihom;

53.

Jenfasizza li fil-ġlieda kontra t-terroriżmu u l-kriminalità organizzata d-drittijiet u l-libertajiet taċ-ċittadini tal-UE għandhom jiġu rrispettati bi sħiħ u li l-protezzjoni tad-data u d-dritt ta’ rimedju legali huma essenzjali fil-ħolqien ta’ politika ta’ sigurtà kredibbli u effikaċi; iqis li l-għadd li kulma jmur qiegħed jikber ta’ reati jeħtieġ aktar pjanijiet Komunitarji dwar il-kriminalità organizzata u s-sigurtà fl-Internet;

54.

Jilqa' l-proposta dwar id-drittijiet tal-vittmi tal-kriminalità u, fuq kollox, dwar id-dritt għal assistenza legali u għal għajnuna legali, iżda jiddispjaċih li din hija l-unika miżura maħsuba; jitlob li jkun hemm skeda ċara għall-miżuri li għad fadal tal-pjan direzzjonali għad-drittijiet proċedurali;

55.

Jilqa' l-varar fl-2011 ta’ qafas legali komprensiv ġdid għall-protezzjoni tad-data personali fl-UE; jenfasizza li sejjer jeżamina bir-reqqa kull proposta, inklużi l-UE-PNR u l-UE-TFTP, biex jiżgura l-konformità tagħhom mad-drittijiet fundamentali;

56.

Jilqa' l-proposti dwar il-liġi ċivili, iżda jitlob lill-Kummissjoni, biex jintlaħqu standards komuni għaċ-ċittadini tal-UE fl-Istati Membri, biex tqis li tħaffef ir-reviżjoni tal-acquis fil-qasam tal-liġi ċivili u kriminali u tirrapporta lill-Parlament;

57.

Jappoġġa inizjattivi maħsuba biex jirrikonċiljaw il-ħajja tax-xogħol ma’ dik tal-familja permezz, inter alia, ta’ miżuri dwar il-frank parentali minimu u l-promozzjoni ta’ arranġamenti tax-xogħol flessibbli għan-nisa u l-irġiel, kif ukoll għajnuna għal min jieħu ħsieb persuni oħrajn biex ikunu jistgħu jikkombinaw l-impjieg mar-responsabbiltajiet ta’ kura;

58.

Jiddispjaċih għad-dewmien tal-Kummissjoni fit-tressiq ta’ proposti leġiżlattivi fil-qasam tal-“Lisbonizzazzjoni” tal-“acquis” attwali fir-rigward tal-kooperazzjoni tal-pulizija u ġudizzjarja f'materji kriminali, li hija prijorità fil-qasam tal-Libertà, il-Ġustizzja u l-Intern;

59.

Iqis li wara l-adozzjoni tat-Trattat ta’ Lisbona, ir-reviżjoni tal-qafas legali hija essenzjali, u jiddispjaċih li din ir-reviżjoni ġiet proposta biss għall-2012 – 2013; jinsisti li l-aġenziji kollha tal-ĠAI għandhom ikunu effiċjenti, u - l-iktar importanti - responsabbli;

60.

Jenfasizza li l-promozzjoni tad-drittijiet tal-bniedem madwar id-dinja hi objettiv ewlieni tal-Unjoni Ewropea fil-livell globali u li titjib fir-relazzjonijiet kummerċjali u għajnuna għall-iżvilupp imsaħħa jistgħu jgħinu għall-inkorraġġiment tal-progress f'dan il-qasam;

61.

Jistieden lill-Kummissjoni biex iżżomm il-momentum għall-proċess ta’ tkabbir;

62.

Jenfasizza li, fir-rigward tas-suġġetti li ġejjin, jintlaqgħu inizjattivi ġodda:

63.

Jemmen li biex turi l-valuri u l-prinċipji tagħha b'mod effikaċi u biex tikkontribwixxi għall-istabilità politika u l-iżvilupp ekonomiku fil-viċinat tagħha, l-UE għandha tappoġġa demokraziji ġodda madwar l-Ewropa u ssaħħaħ ir-relazzjonijiet mas-sħab tagħha; jistieden lill-Kummissjoni tiffinalizza l-eżami tal-Politika Ewropea tal-Viċinat bil-għan li jiġi żgurat li jkun hemm koerenza aħjar bejn l-objettivi tal-politika u l-istrumenti finanzjarji; iqis li fir-rabtiet tagħha mal-ġirien, il-kundizzjonalità fir-rigward tad-drittijiet tal-bniedem u tad-demokrazija għandha tissaħħaħ;

64.

Jistieden lill-Kummissjoni tagħti aktar prijorità lis-sigurtà tal-ikel fl-Afrika kollha; jenfasizza l-ħtieġa li jissaħħaħ is-settur agrikolu fl-Afrika, b'mod sostenibbli; f'dan il-kuntest iħeġġeġ lill-Kummissjoni tiżgura aktar aċċess għall-fqar għas-servizzi ta’ kreditu u finanzjarji fl-Afrika; iħeġġeġ lill-Kummissjoni tippromwovi miżuri biex tingħata spinta lill-kummerċ intrakontinentali Afrikan, fosthom pakketti ta’ għajnuna mtejba għall-komunitajiet ekonomiċi reġjonali u biex titjieb l-infrastruttura fil-kontinent Afrikan kollu;

65.

Jistieden lill-Kummissjoni tipprovdi rapport annwali dwar il-progress tal-UE lejn l-ilħuq tal-MDGs sal-2015 u sabiex tintroduċi miżuri biex jiġi żgurat li l-Istati Membri jissodisfaw l-impenji tagħhom li jallokaw 0.7 % tad-DNG għall-għajnuna uffiċjali għall-iżvilupp u jimmoniterjaw dawn l-impenji;

66.

Jenfasizza li fil-kuntest tan-negozjati li għaddejjin bħalissa dwar il-ftehimiet ta’ sħubija ekonomika (EPAs), għandu jkun hemm fokus imġedded fuq id-dimensjoni tal-iżvilupp;

67.

Jitlob lill-Kummissjoni tippromwovi attivament progress tanġibbli fin-negozjati tad-WTO li huma għaddejjin biex ir-Rawnd ta’ Doha jiġi konkluż mill-aktar fis possibbli; jinsisti li t-tisħiħ tal-Ftehimiet ta’ Kummerċ Ħieles bilaterali u reġjonali eżistenti u l-konklużjoni ta’ oħrajn ġodda huwa importanti, imma għandu jitqies bħala strateġija komplementari u mhux bħala alternattiv għall-qafas multilaterali;

68.

Ifakkar li l-multilateraliżmu għandu jibqa' l-prijorità ewlenija tal-UE, u jitlob bi dritt li n-negozjati kummerċjali li għaddejjin bħalissa u dawk ġodda għandhom jirrispettaw il-prinċipju tat-trattament speċjali u divrenzjali għall-pajjiżi li qed jiżviluppaw; jemmen bis-saħħa li hemm bżonn ta’ qafas kummerċjali multilaterali effikaċi u riformat biex tinbena sistema ekonomika aktar bilanċjata u ġusta bħala parti minn governanza globali ġdida li taqdi l-iżvilupp u l-qerda tal-faqar;

69.

Jenfasizza li l-importazzjonijiet minn pajjiżi terzi għandhom isibu ruħhom fis-swieq tal-UE biss jekk jikkonformaw mal-istandards Ewropej dwar il-ħarsien tal-konsumatur; iqis li, fin-negozjati internazzjonali, il-Kummissjoni għandha tinsisti li s-sħab kummerċjali tagħna jikkonformaw mal-istandards ambjentali, soċjali u tax-xogħol Ewropej;

70.

Jitlob li fil-ftehimiet kummerċjali internazzjonali ffirmati mill-UE tiddaħħal klawsola dwar ir-responsabilità soċjali tal-kumpaniji (CSR); iqis li dan irid jinkludi rappurtar u trasparenza min-naħa tal-kumpaniji u diliġenza xierqa min-naħa tal-impriżi u l-gruppi ta’ impriżi, investigazzjonijiet f'każ ta’ ksur ippruvat tal-impenji tas-CSR u aċċess aħjar għall-qrati għall-vittmi tal-azzjonijiet tal-kumpaniji;

71.

Jitlob lill-Kummissjoni tressaq inizjattiva leġiżlattiva simili għal-Liġi l-ġdida tal-Istati Uniti dwar il-“Minerali tal-Gwerer” sabiex tissaħħaħ it-trasparenza u l-governanza tajba fil-qasam tal-industrija tal-estrazzjoni fil-pajjiżi li qed jiżviluppaw; jistieden lill-Kummissjoni ssaħħaħ il-ġlieda kontra l-korruzzjoni f'dawn il-pajjiżi, li ddgħajjef id-drittijiet tal-bniedem u l-governanza tajba;

72.

Jistieden lill-Kummissoni tippreżenta proposti bil-ħeffa għall-emenda tar-Regolamenti OLAF;

73.

Jenfasizza li l-Kummissjoni għandha tikkontribwixxi aktar apertament għal attitudni pożittiva lejn id-Dikjarazzjonijiet ta’ Ġestjoni Nazzjonali (NMD) iffirmati mill-ministri tal-finanzi; jenfasizza li l-Kummissjoni għandha tħeġġeġ lill-Istati Membri joħorġu NMDs; jitlob li jiġu introdotti bażijiet ta’ data komprensivi fuq l-internet li jkunu faċli li tużahom;

74.

Jitlob, għalhekk, li jsiru valutazzjonijiet sistematiċi, regolari u indipendenti tal-programmi tal-UE - kemm il-politiki interni kif ukoll l-għajnuna għall-iżvilupp - sabiex ikun żgurat li jinkisbu r-riżultati mixtieqa u li dan isir b'mod kost-effettiv, sabiex:

75.

Hu ta’ fehma soda li t-traspożizzjoni u l-implimentazzjoni korretta u f'waqtha tad-direttivi Ewropej hija partikolarment importanti biex titneħħa n-nuqqas ta’ fiduċja taċ-ċittadini fl-azzjonijiet tal-UE; iqis li dan jirrikjedi kooperazzjoni effikaċi bejn il-Kummissjoni u l-Istati Membri;

76.

Jisħaq li l-leġiżlazzjoni tal-UE tiġi ssimplifikata u jenfasizza li l-valutazzjonijiet tal-impatt, qabel il-leġiżlazzjoni, għandhom jintużaw b'mod imparzjali u effiċjenti, filwaqt li titqies l-implimentazzjoni; jappoġġa b'mod sod l-isforzi kontinwi tal-Kummissjoni fir-rigward tal-proġett Regolamentazzjoni Intelliġenti;

77.

Jilqa' l-fatt li l-Kummissjoni se tagħti aktar attenzjoni lill-aspetti tal-kompetittività fil-valutazzjonijiet tal-impatt u jisħaq fuq l-importanza tal-evalwazzjoni tal-effetti kumulattivi fuq il-kompetittività ta’ atti kkombinati ta’ leġiżlazzjoni (“fitness checks”);

78.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.

15.6.2012   

MT

Il-Ġurnal Uffiċjali tal-Unjoni Ewropea

CE 169/45

—

wara li kkunsidra d-Dikjarazzjoni ta’ Tripli maħruġa mill-Kapijiet ta’ Stat jew ta’ Gvern fit-30 ta’ Novembru 2010,

—

wara li kkunsidra d-Dikjarazzjoni Ta’ Qabel is-Samit tal-Parlament Ewropew u tal-Parlament Pan-Afrikan tas-27 ta’ Novembru 2010,

—

wara li kkunsidra Artikoli 177 sa 181 tat-Trattat dwar l-Unjoni Ewropea,

—

wara li kkunsidra l-Artikolu 110(4) tar-Regoli ta’ Proċedura tiegħu,

A.

billi s-sħubija bejn l-Afrika u l-UE hija bbażata fuq l-interess reċiproku fl-esplojtjar tal-potenzjali tagħhom ikkombinati flimkien,

B.

billi d-Dikjarazzjoni ta’ Tripli tagħti sura konkreta lir-rieda tal-mexxejja differenti li tiġi kkonsolidata s-sħubija strateġika stabbilita tliet snin ilu bejn iż-żewġ kontinenti sabiex flimkien jaffrontaw l-isfidi komuni u jiġi promoss it-tkabbir ekonomiku sostenibbli għall-benefiċċju ta’ dawk kollha li jgħixu fl-Afrika,

C.

billi l-UE hija responsabbli għal aktar minn nofs l-għajnuna għall-iżvilupp u għadha s-sieħba fil-kummerċ li hi l-aktar importanti tal-Afrika,

D.

billi l-Afrika qiegħda tiddiversifika s-sħubijiet tagħha, partikolarment ma’ pajjiżi ewlenin fl-Asja u fl-Amerika Latina,

1.

Jilqa’ b’sodisfazzjon l-adozzjoni tal-Pjan ta’ Azzjoni Strateġiku 2010-2013 u tas-sħubijiet tiegħu, u jittama li se tikkontribwixxi valur miżjud fir-rigward tal-Ftehim ta’ Cotonou u l-Unjoni għall-Mediterran u li hija espressjoni ta’ approċċ ambizzjuż għar-relazzjonijiet interkontinentali;

2.

Jenfasizza li l-prinċipji li huma l-bażi tal-istrateġija konġunta bejn l-Afrika u l-UE għandhom ikunu mfassla b'tali mod li jappoġġaw il-ħtiġijiet sostenibbli tal-pajjiżi li qed jiżviluppaw biex jiġi miġġieled l-faqar, jiġu ggarantiti dħul u għajxien diċenti kif ukoll ir-realizzazzjoni tad-drittijiet bażiċi tal-bniedem, inklużi d-drittijiet soċjali, ekonomiċi u ambjentali;

3.

Jittama li l-lezzjonijiet se jiġu meħuda mid-diffikultajiet li nqalgħu waqt l-implimentazzjoni tal-ewwel “Pjan ta’ Azzjoni”, għall-2008-2010 u jittama li l-intenzjonijiet espressi bħala prinċipju fid-Dikjarazzjoni Finali mill-Kapijiet ta’ Stat u ta’ Gvern jiġu mwettqa;

4.

Jinnota b’interess li kemm is-settur privat kif ukoll is-soċjetà ċivili, b'mod partikolari dawk tal-Afrika, jistgħu jitħallew jagħtu kontribut wisq aktar effettiv għall-istrateġija milli kien il-każ sal-ġurnata tal-lum.

5.

Jirrikonoxxi wkoll id-dimensjoni importatnti tal-integrazzjoni reġjonali għat-tkabbir u l-iżvilupp u jenfasizza b'mod partikolari l-impenn tad-Dikjarazzjoni ta’ Tripli biex l-Arkitettura Afrikana tal-Paċi u tas-Sigurtà ssir funzjonali għalkollox b'kooperazzjoni mill-qrib mal-organizzazzjonijiet reġjonali;

6.

Jilqa’ l-progress li sar fl-implimentazzjoni ta’ Architettura Afrikana tal-Paċi u tas-Sigurtà bil-għan li jiġu indirizzati l-isfidi tal-paċi u tas-sigurtà fuq il-kontinent Afrikan; jenfasizza f’dan ir-rigward kemm hu importanti li jiġi pprovdut finanzjament prevedibbli u sostenibbli għall-operazzjonijiet Afrikani ta’ appoġġ għall-paċi, kemm hu meħtieġ li jinbnew kapaċitajiet lokali ta’ rkuprar, u d-determinazzjoni li l-popolazzjoni ċivili tiġi mħarsa fil-konflitti armati;

7.

Huwa tal-fehma li l-politika tal-prevenzjoni tal-kunflitti hija prekondizzjoni essenzjali għall-paċi dejjiema u li l-kawżi strutturali tal-kunflitti għadhom jiġu indirizzati billi tiġi stabbilita politika ta’ żvilupp sostenibbli bil-għan li jiġu ssodisfati l-ħtiġijiet bażiċi tal-popolazzjoni Afrikana u jiġu miġġielda l-qgħad, l-inġustizzji soċjali u ekonomiċi;

8.

Iqis li l-adozzjoni tal-liġi ġdida tal-Istati Uniti tal-“Minerali ta’ Kunflitt” hija pass enormi 'l quddiem fil-ġlieda kontra l-esplojtazzjoni illegali tal-minerali fl-Afrika, li jħeġġeġ gwerer ċivili u konflitti; huwa tal-fehma li l-Kummissjoni u l-Kunsill għandhom joħorġu bi proposti simili sabiex tiġi żgurata t-traċċabilità tal-minerali importati fis-suq tal-UE filwaqt li jitqiesu l-Inizjattiva ta’ Trasparenza fl-Industrija Estrattiva (EITI);

9.

Jistieden lill-UE u lill-Unjoni Afrikana (UA) jindirizzaw b’mod konġunt il-kwistjonijiet ewlenin li jkunu ta’ interess komuni għaż-żewġ naħat bħalma huma r-reazzjonijiet għall-kriżijiet politiċi u l-appoġġ għall-governanza ekonomika bil-ħsieb li jiġu fformulati aġendi ta’ governanza komuni għaż-żewġ naħat permezz tal-Pjattaforma għad-Djalogu dwar il-Governanza u d-Drittijiet tal-Bniedem li għadha kif ġiet stabbilita;

10.

Jilqa' b’sodisfazzjon il-fatt li l-impenn konġunt bejn l-UE u l-Afrika għall-prinċipji fundamentali li jinkludu r-rispett għad-drittijiet tal-bniedem, il-prinċipji demoktariċi, l-istat tad-dritt u l-kundanna ta’ kull sura ta’ terroriżmu;

11.

Jinnota li, fid-Dikjarazzjoni tagħhom, il-Kapijiet ta’ Stat jew ta’ Gvern jindikaw li huma “għaqda waħda fil-(…) ħarsien tad-drittijiet tal-bniedem fuq iż-żewġ kontinenti”; jenfasizza l-prinċipju tal-universalità ta’ dawn id-drittijiet, li jridu jiġu partikolarment osservati fl-azzjonijiet ippjanati bħala parti mis-“Sħubija dwar il-Governanza Demokratika u d-Drittijiet tal-Bniedem”;

12.

Jiddispjaċih qatigħ, meta wieħed iqis l-impenji ripetuti tagħna għall-governanza demokratika u għad-drittijiet tal-bniedem, minħabba l-fatt li Robert Mugabe ġie mistieden u pparteċipa b’mod attiv fit-Tielet Samit bejn l-Afrika u l-UE; jistieden lill-atturi kollha jieħdu pożizzjoni politika aktar qawwija fil-ġejjieni bil-għan li jibagħtu messaġġ ċar tat-twemmin sod tagħna fl-istat tad-dritt u d-demokrazija;

13.

Iħeġġeġ biex l-azzjonijiet kollha mmexxija skont il-kundizzjonijiet tad-diversi sħubiji jiġu segwiti mingħajr ebda diskriminazzjonijiet fuq il-bażi ta’ sess, razza jew oriġini etnika, reliġjon jew konvinzjoni, diżabilità, età jew orjentazzjoni sesswali jew kontra nies li qed jgħixu bl-HIV/AIDS;

14.

Japprova uffiċjalment l-istedina tal-Parlament Pan-Afrikan lill-istati membri kollha tal-Unjoni Afrikana biex jirratifikaw il-Karta tal-Unjoni Afrikana dwar id-Demokrazija, l-Elezzjonijiet u l-Governanza;

15.

Jenfasizza t-talba tal-President tal-Kunsill Ewropew Herman Van Rompuy biex il-mexxejja Afrikani jappoġġjaw il-Qorti Kriminali Internazzjonali (QKI) u “jesprimu l-qbil sħiħ tagħhom mal-prinċipju tal-ġlieda kontra impunità”;

16.

Iħeġġeġ lill-UE u lill-UA jimpenjaw ruħhom biex jaħdmu flimkien bil-għan li jiżguraw kooperazzjoni Afrikana u Ewropea aħjar fil-korpi internazzjonali relevanti, inkluża n-NU;

17.

Jilqa’ b’sodisfazzjon il-ftehim bejn l-UE u l-UA li jidħlu fi djalogu politiku bil-għan li jsibu soluzzjonijiet għal kwistjonijiet ta’ interess komuni dwar il-Ftehimiet ta’ Sħubiji Ekonomiċi; jagħraf li l-integrazzjoni reġjonali, il-kummerċ u l-investimenti huma kruċjali għall-istabilità ekonomika u t-tkabbir sostenibbli;

18.

Iħeġġeġġ lill-UE u lill-UA jikkooperaw flimkien fl-esplojtazzjoni sostenibbli tal-materja prima, speċjalment billi jiffukaw fuq il-bini tal-kapaċità, il-governanza, l-iżvilupp tal-infrastruttura, l-investimenti, l-għarfien u l-ħiliet ġeoloġiċi, u fuq it-trasparenza tal-kuntratti tal-minjieri; jitlob f’dan ir-rigward li jiddaħħlu politiki dwar il-materja prima li jkunu ambjentalment sodi u soċjalment sostenibbli, li jkunu ta’ benefiċċju wkoll għall-popolazzjoni lokali;

19.

Iħeġġeġ lill-istati membri kollha tal-Unjoni Afrikana jiffaċilitaw l-istabbiliment ta’ qafas legali u fiskali li jwassal biex min-naħa l-waħda jiġi stimulat it-tkabbir ekonomiku u jiġi attirat l-investiment barrani dirett (IBD), u biex min-naħa l-oħra tinqered il-korruzzjoni u tinqatgħu l-burokrazija żejda u l-amministrazzjoni ħażina fuq in-naħa l-oħra;

20.

Iħeġġeġ lill-mexxejja Afrikani u tal-UE jonoraw l-impenn ta’ Tripli u jużaw l-istrateġija bħala għodda biex tingħata spinta lill-kummerċ intrakontinentali Afrikan, inklużi pakketti ta’ appoġġ imtejba għall-komunitajiet ekonomiċi reġjonali u għat-titjib tal-infrastutturi madwar il-kontinent Afrikan kollu;

21.

Jinnota t-tiġdid tal-impenn tal-pajjiżi tal-Unjoni Ewropea li jallokaw 0,7 % tal-PGD tagħhom sal-2015, li hija ħaġa vitali jekk l-Għanijiet ta’ Żvilupp tal-Millennju għandhom jintlaħqu sal-2015;

22.

Se jfittex li jiżgura, b’mod partikolari, li l-ilħuq tal-Għanijiet ta’ Żvilupp tal-Millennju jkun ċentrali għat-twettiq tas-Sħubijiet kollha;

23.

Ifakkar li attivitajiet speċifiċi dwar is-saħħa materna, tat-trabi tat-twelid u tat-tfal, il-ġeneru, l-edukazzjoni, il-politika tal-art u l-iżvilupp sostenibbli, l-aċċess għall-ilma u l-kundizzjonijiet tajba għall-ħarsien tas-saħħa, u dwar il-persuni b'diżabilità huma kruċjali biex jintlaħqu l-Għanijiet ta’ Żvilupp tal-Millennju; jinkoraġġixxi l-kontinwità tal-programmi fil-qasam tal-edukazzjoni u s-saħħa;

24.

Jenfasizza kemm hu importanti li tġi ggarantita s-sigurtà tal-ikel fl-Afrika kollha u jenfasizza l-ħtieġa li jissaħħu s-setturi tas-sajd u tal-agrikoltura fl-Afrika, b'mod sostenibbli, speċjalmant fir-rigward tal-bdiewa b’ażjendi tal-biedja żgħar u s-sajjieda;

25.

Ifakkar fir-rwol dominanti li twettaq l-agrikoltura fl-ekonomiji nazzjonali Afrikani; jenfasizza għalhekk ir-rwol ċentrali tal-armonizzazzjoni tal-istandards sanitarji u fitosanitarji, kif ukoll il-bini tal-kapaċità għas-settur agrikolu Afrikan;

26.

Jiddispjaċih li l-akkwist attwali ta’ art għall-biedja fl-Afrika minn investituri barranin appoġġjati mill-gvern, li, jekk ma jsirx sew, jhedded li jdgħajjef is-sigurtà tal-ikel fuq livell lokali u jwassal għal konsegwenzi serji u b'riperkussjonijiet li jmorru 'l bogħod, ma ġiex indirizzat mis-Summit;

27.

Jemmen li l-mexxejja Afrikani u tal-UE għandhom juru l-impenn veru tagħhom li jistabbilixxu mekkaniżmu biex jiġi evitat il-ħruġ illegali ta’ kapital għall-evażjoni tat-taxxa, tiġi promossa trasparenza sħiħa dwar ir-rappurtar pajjiż pajjiż u biex tiġi intensifikata l-pressjoni internazzjonali fuq il-ġurisdizzjonijiet kollha li jista’ jkun li jippermettu l-evitar jew l-evażjoni tat-taxxa fl-Afrika;

28.

Jemmen li l-enerġija rinnovabbli hija vitali għall-iżvilupp ekonomiku u soċjali tal-Afrika u jenfasizza t-talba tal-President Barroso għal rivoluzzjoni ħadra enerġetika fl-Afrika;

29.

Jilqa’ b’sodisfazzjon il-Programm ta’ Kooperazzjoni fl-Enerġija Rinnovabbli bejn l-Afrika u l-UE u l-miri politiċi miftiehma fil-Laqgħa ta’ Livell Għoli ta’ Vjenna dwar l-Enerġija f'Settembru 2010, li għandhom jintlaħqu sal-2010, inkluż li jinġieb aċċess għal servizzi tal-enerġija moderni u sostenibbli lil 100 miljun ruħ Afrikana addizzjonali, li tiġi rduppjata l-kapaċità tal-konnessjonijiet transkonfinali tal-elettriċità fi ħdan l-Afrika u jiġi rduppjat l-użu tal-gass naturali fl-Afrika, u jiżdied l-użu tal-enerġija rinnovabbli fl-Afrika u tittejjeb l-effiċjenza enerġetika fl-Afrika fis-setturi kollha;

30.

Jistieden lill-UE u lill-UA jgħaqqdu bejniethom l-isforzi tagħhom biex inaqqsu l-emissjonijiet mid-deforestazzjoni u d-degradazzjoni tal-foresti;

31.

Ifakkar fl-impenn tal-UE tas-somma ta’ EUR 7,2 biljun fl-2010-2012 għal proġetti u inizjattivi li jinbdew malajr li jirrigwardaw it-tibdil tal-klima, li parti sinifikanti minnha se tkun disponibbli għall-Afrika;

32.

Jenfasizza li huma n-nies l-aktar foqra tad-dinja li jintlaqtu l-ewwel u l-agħar mit-tibdil tal-klima u jistieden lill-atturi kollha jappoġġjaw lill-pajjiżi li qed jiżviluppaw ħalli jadattaw ruħhom għall-impatt tat-tibdil tal-klima u jikbru b'mod li jkun baxx fil-karbonju bil-għan li l-faqar jiġi eradikat;

33.

Jinnota li huwa kruċjali li jsir progress fir-rigward ta’ qbil globali dwar il-klima jekk għandu jiġi affrontat il-faqar u, f’dan il-kuntest, jenfasizza l-potenzjal immens għar-riżorsi naturali – ix-xemx, ir-riħ, ix-xmajjar u l-mareat – li l-pajjiżi Afrikani spiss jippossedu b'abbundanza;

34.

Josserva li l-migrazzjoni ma għandhiex effetti pożittivi u jinsisti fuq il-ħtieġa li jkun hemm strateġija komuni kompluta b’kalendarju u proġetti b’miri speċifikati biex jitnaqqsu l-effetti negattivi tal-migrazzjoni illegali;

35.

Ifakkar fl-impenn tas-sħab kollha li joħolqu impjiegi aktar u aħjar permezz tal-promozzjoni tat-tkabbir sostenibbli u inklużiv;

36.

Jilqa’ b’sodisfazzjon it-tisħiħ tal-programmi eżistenti fir-rigward tal-mobilità tal-istudenti u tal- akkademiċi, flimkien ma’ inizjattivi bħalma huma l-Università Pan-Afrikana u l-Istrutturi u l-Programmi Edukattivi tat-Tuning;

37.

Iqis li t-telf tal-aħjar imħuħ hija problema maġġuri għall-Afrika u li n-nies professjonali li ħallew il-pajjiż għandhom jingħataw inċentivi qawwija biex jerġgħu lura u japplikaw il-benefiċċju tat-taħriġ tagħhom fil-pajjiż ta’ oriġini tagħhom;

38.

Jilqa' b'sodisfazzjon l-illanċjar ta’djalogu ta’ livell għoli dwar politika tax-xjenza u t-teknoloġija fil-livell uffiċjali u ministerjali superjuri bil-għan li jissaħħaħ il-qafas ta’ kooperazzjoni fil-qasam tax-xjenza u t-teknoloġija sabiex tingħata mbuttatura lit-tkabbir ekonomiku inklussiv u lill-iżvilupp soċjali aktar mgħaġġla fl-Afrika;

39.

Jinnota li s-Sudan mhijiex irrappreżentata, peress li l-awtoritajiet ta’ dan il-pajjiż ma jqisux ruħhom marbuta mid-Dikjarazzjoni tal-Kapijiet ta’ Stat u ta’ Gvern li ġiet adottata fi Tripli, u jixtieq jara l-elementi kollha tal-Ftehim ta’ Paċi tal-2005 implimentati, kif hemm iddikjarat fid-Dikjarazzjoni msemmija, inkluż għalhekk ir-referendum skedat għal Jannar 2011 li jrid jippermetti lin-nies tan-nofsinhar tas-Sudan jagħżlu huma d-destin tagħhom;

40.

Jiddispjaċih li ċerti Kapijiet ta’ Stat jew ta’ Gvern mill-Istati Membri aktar kbar tal-UE ma kinux jistgħu jattendu għas-Samit ta’ bejn l-UE u l-Afrika;

41.

Jiddispjaċih li ma hemm l-ebda pjan ta’ finanzjament biex jakkumpanja l-istrateġija konġunta tal-Afrika u l-UE u għal darba oħra jitlob li l-Fond Ewropew għall-Iżvilupp (FEŻ) jiġi taħt il-baġit tal-UE ħalli tkun tista’ ssir sorveljanza parlamentari tal-implimentazzjoni tad-diversi strumenti finanzjarji tal-UE użati fil-ħolqien tas-sħubijiet differenti;

42.

Jittama li jkun hemm involviment akbar min-naħa tal-korpi ministerjali fl-implimentazzjoni tal-Istrateġija;

43.

Jitlob li l-Parlament Pan-Afrikan u l-Parlament Ewropew ikunu jistgħu jeżerċitaw ir-rwol superviżorju tagħhom fl-implimentazzjoni tal-Pjan ta’ Azzjoni Strateġiku;

44.

Jistieden lill-parlamenti nazzjonali tal-pajjiżi kollha Afrikani u tal-UE jeżaminaw u jiddibattu dwar il-Pjan Strateġiku;

45.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni tal-UE u lill-Kunsill u lill-Kummissjoni tal-UA, lir-Rappreżentant Għoli tal-Unjoni għall-Affarijiet Barranin u l-Politika tas-Sigurtà, lill-gvernijiet u lill-parlamenti tal-Istati Membri, lill-Assemblea Parlamentari Konġunta AKP-UE u lill-Parlament Pan-Afrikan (PPA).

15.6.2012   

MT

Il-Ġurnal Uffiċjali tal-Unjoni Ewropea

CE 169/49

—

wara li kkunsidra l-preambolu tat-Trattat dwar l-Unjoni Ewropea, b'mod partikulari t-tieni u mir-raba' sas-seba' inċiżi,

—

wara li kkunsidra l-Artikoli 2, 3(3) it-tieni inċiż, 6 u 7 tat-Trattat dwar l-Unjoni Ewropea,

—

wara li kkunsidra l-Karta tad-Drittijiet Fundamentali tal-Unjoni Ewropea tas-7 ta’ Diċembru 2000, kif ipproklamata fit-12 ta’ Diċembru 2007 fi Strasburgu,

—

wara li kkunsidra l-Konvenzjoni għall-Protezzjoni tad-Drittijiet tal-Bniedem u l-Libertajiet Fundamentali (KEDB),

—

wara li kkunsidra l-Komunikazzjoni tal-Kummissjoni dwar l-Istrateġija għall-implimentazzjoni effikaċi tal-Karta tad-Drittijiet Fundamentali mill-Unjoni Ewropea (COM(2010)0573),

—

wara li kkunsidra l-konvenzjonijiet relatati kollha u r-rakkomandazzjonijiet tal-Kunsill tal-Ewropa u tan-Nazzjonijiet Uniti, inklużi l-korpi speċjalizzati ta’ monitoraġġ, fil-qasam tad-drittijiet fundamentali,

—

wara li kkunsidra d-deċiżjonijiet u l-każistika tal-Qorti tal-Ġustizzja tal-Unjoni Ewropea (QTĠ) u tal-Qorti Ewropea tad-Drittijiet tal-Bniedem (QEDB),

—

wara li kkunsidra l-Memorandum ta’ Ftehim bejn il-Kunsill tal-Ewropa u l-Unjoni Ewropea (1),

—

wara li kkunsidra l-Programm ta’ Stokkolma – Ewropa miftuħa u sigura għas-servizz u l-protezzjoni taċ-ċittadini,

—

wara li kkunsidra l-attività u r-rapporti annwali tal-Aġenzija tal-Unjoni Ewropea għad-Drittijiet Fundamentali (FRA),

—

wara li kkunsidra r-rapporti tal-NGOs dwar id-drittijiet tal-bniedem,

—

wara li kkunsidra s-smigħ pubbliku organizzat mill-Parlament Ewropew fil-21 u t-22 ta’ Ġunju 2010 dwar l-impatt tal-Karta tad-Drittijiet Fundamentali fl-iżvilupp ta’ żona ta’ libertà, sigurtà u ġustizzja Ewropea (AFSJ),

—

wara li kkunsidra r-riżoluzzjoni tiegħu tal-14 ta’ Jannar 2009 dwar il-qagħda tad-drittijiet fundamentali fl-Unjoni Ewropea (2004-2008) (2),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għal-Libertajiet Ċivili, il-Ġustizzja u l-Intern (A7-0344/2010),

A.

billi l-Artikolu 2 tat-Trattat dwar l-Unjoni Ewropea jibbaża l-Unjoni fuq komunità ta’ valuri indiviżibbli u universali ta’ rispett għad-dinjità tal-bniedem, il-libertà, id-demokrazija, l- ugwaljanza, is-solidarjetà, l-istat tad-dritt u r-rispett għad-drittijiet tal-bniedem, għall-persuni kollha li jgħixu fit-territorju tal-Unjoni Ewropea, inklużi dawk li jagħmlu parti minn minoranzi; billi s-salvagwardja u l-promozzjoni b'mod effettiv tad-drittijiet għandhom ikunu objettiv ġenerali tal-politiki Ewropej kollha, inkluż id-dimensjoni esterna tagħhom, u kundizzjoni essenzjali għall-konsolidazzjoni tal-Unjoni Ewropea li tikkontribwixxi għall-promozzjoni tal-paċi, il-valuri u l-prinċipji relatati mad-drittijiet tal-bniedem u mal-libertajiet fundamentali u l-ġid tal-popli,

B.

billi d-dħul fis-seħħ tat-Trattat ta’ Lisbona ħoloq sitwazzjoni ġdida fl-UE fil-qasam tad-drittijiet tal-bniedem biex b'hekk il-Karta tad-Drittijiet Fundamentali (“il-Karta”) issir legalment vinkolanti u valuri bażiċi jinbidlu fi drittijiet konkreti; billi mill-adozzjoni tagħha l-Karta saret sors ta’ inspirazzjoni għall-każistika tal-qrati Ewropej; billi l-Kummissjoni ppubblikat rapport annwali dwar l-implimentazzjoni tal-Karta, filwaqt li l-promozzjoni u l-implimentazzjoni tad-drittijiet fundamentali bbażati fuq il-Karta għandhom jiġu koperti permezz tar-rapporti annwali tal-FRA,

C.

billi għandha tiġi żviluppata, promossa u msaħħa kultura reali tad-drittijiet fundamentali kemm fl-istituzzjonijiet tal-UE u kemm fl-Istati Membri, b'mod partikolari meta japplikaw u jimplimentaw il-liġi tal-Unjoni kemm internament kif ukoll fir-relazzjonijiet mal-pajjiżi terzi,

D.

billi, skont ir-Regoli ta’ proċedura tiegħu, il-Parlament Ewropew jista' jindirizza, jeżamina u jivvaluta s-sitwazzjoni tad-drittijiet fundamentali fuq bażi annwali u jagħmel rakkomandazzjonijiet,

1.

Jenfasizza li l-protezzjoni u l-promozzjoni effikaċi tad-drittijiet tal-bniedem u l-libertajiet fundamentali jikkostitwixxu l-qalba tad-demokrazija u l-istat tad-dritt fl-UE u kundizzjoni essenzjali tal-konsolidazzjoni taż-żona ta’ libertà, sigurtà u ġustizzja Ewropea u jeħtieġu azzjonijiet f'diversi livelli (livell internazzjonali, Ewropew, nazzjonali, reġjonali u lokali); jenfasizza, barra minn hekk, ir-rwol li jista' jkollhom l-awtoritajiet reġjonali u lokali fl-implimentazzjoni konkreta u fil-promozzjoni ta’ dawn id-drittijiet; għalhekk jitlob lill-istituzzjonijiet kollha tal-UE u l-gvernijiet u l-parlamenti tal-Istati Membri biex jibnu fuq il-qafas istituzzjonali u legali ġdid li nħoloq mit-Trattat ta’ Lisbona sabiex ifasslu politika interna komprensiva dwar id-drittijiet tal-bniedem għall-Unjoni li tiżgura mekkaniżmi effikaċi ta’ kontabilità kemm fil-livell nazzjonali kif ukoll dak tal-UE biex jiġi indirizzati l-ksur tad-drittijiet tal-bniedem;

2.

Jiġbed l-attenzjoni għar-riżoluzzjonijiet tiegħu, kif ukoll għall-mistoqsijiet orali b'dibattitu tiegħu u s-sejbiet minn żjarat fl-2009 dwar każijiet konkreti ta’ drittijiet fundamentali, bħalma huma dwar l-privatezza, id-dinjità personali u l-protezzjoni tad-data, il-projbizzjoni tat-tortura, il-libertà tal-ħsieb, il-kuxjenza u r-reliġjon, il-libertà tal-espressjoni u l-informazzjoni, il-libertà tal-istampa u l-midja, in-nondiskriminazzjoni, l-użu ta’ lingwi ta’ minoranzi, dwar is-sitwazzjoni tar-Roma u l-moviment ħieles, dwar in-nisa tar- Roma, dwar id-diskriminazzjoni kontra ż-żwieġ jew fi sħubija ċivili bejn persuni tal-istess sess, dwar il-minorenni, iċ-ċentri ta’ detenzjoni għall-immigranti u dwar l-allegat detenzjoni illegali ta’ priġunieti skont il-programm ta’ rendizzjoni tas-CIA; jenfasizza li dawn ir-riżoluzzjonijiet kollha jirriflettu l-valuri integrati fil-Karta, juru l-impenn ċar tagħha favur il-protezzjoni ta’ kuljum tad-drittijiet fundamentali, u jibagħtu messaġġi politiċi lill-individwi kollha fl-UE, lill-Istati Membri u lill-istituzzjonijiet tal-UE kif ukoll is-sħab internazzjonali;

3.

Jiddispjaċih li l-Kunsill u l-Kummissjoni ma segwew l-ebda rakkomandazzjoni li hemm fir-rapport tal-Parlament Ewropew tal-2007 dwar l-allegat użu tal-pajjiżi Ewropej mis-CIA għall-ġarr u ż-żamma illegali ta’ priġunieri (3) u lanqas ma qasmu l-informazzjoni mal-Parlament Ewropew dwar id-diskussjonijiet bejn l-UE u l-Istati Unit fuq dan is-suġġett;

4.

Iqis neċessarju li ssir riflessjoni dwar l-iżviluppi fir-rigward tal-protezzjoni tad-drittijiet fundamentali fil-perjodu wara t-Trattat ta’ Lisbona u, f'dan il-kuntest, għandu l-ħsieb li din ir-riżoluzzjoni tiċċara r-rwol li kull istituzzjoni u mekkaniżmu għandu jkollhom fl-istruttura Ewropea l-ġdida tad-drittijiet fundamentali;

5.

Itenni li d-dħul fis-seħħ tat-Trattat ta’ Lisbona fl-1 ta’ Diċembru 2009 biddel b'mod fundamentali d-dehra tal-UE, li għandha tistabbilixxi dejjem iktar lilha nnifisha bħala komunità ta’ valuri u prinċipji komuni; b'hekk jilqa' s-sistema l-ġdida b'aktar minn livell wieħed tal-UE ta’ protezzjoni tad-drittijiet fundamentali li titnissel minn sorsi multipli u tiġi infurzata permezz ta’ diversi mekkaniżmi, inkluż il-Karta li hija legalment vinkolanti; id-drittijiet garantiti bil-QEDB, li r-rikonoxximent tagħha joħroġ mill-obbligu tal-Unjoni li taċċedi għall-KEDB; u d-drittijiet ibbażati fuq it-tradizzjonijiet kostituzzjonali tal-Istati Membri u l-interpretazzjoni tagħhom skont il-ġurisprudenza tal-QEDB u l-QTĠ;

6.

Jafferma mill-ġdid li l-Karta għandha l-istess valur legali bħat-Trattati u tirrapreżenta l-kodifikazzjoni l-iktar moderna tad-drittijiet fundamentali, filwaqt li toffri bilanċ tajjeb bejn id-drittijiet u s-solidarjetà u tinkludi fiha kemm drittijiet ċivili, politiċi, ekonomiċi, soċjali u kulturali kif ukoll drittijiet “tat-tielet ġenerazzjoni” (jiġifieri d-drittijiet ta’ amministrazzjoni tajba, il-libertà tal-informazzjoni, ambjent b'saħħtu u protezzjoni tal-konsumatur); iqis li l-UE għandha tiżviluppa qafas regolatorju biex tipproteġi lil persuni minn abbużi tad-drittijiet fundamentali min-negozji;

7.

Jenfasizza li l-inkorporazzjoni tal-Karta fil-liġi primarja tal-UE, filwaqt li ma testendix il-kompetenzi tal-Unjoni u hi konformi mal-prinċipju tas-sussidjarjetà kif definit fl-Artikolu 51 tagħha, toħloq responsabilitajiet ġodda għall-istituzzjonijiet ta’ implimentazzjoni u teħid ta’ deċiżjonijiet, kif ukoll għall-Istati Membri meta jkunu qed jimplimentaw il-leġiżlazzjoni tal-UE fil-livell nazzjonali, u li d-dispożizzjonijiet tal-Karta għalhekk saru infurzabbli direttament mill-qrati Ewropej u nazzjonali; jistieden lill-istituzzjonijiet tal-UE u lill-Istati Membri jżidu l-koerenza fost il-korpi varji tagħhom responsabbli għas-sorveljanza u l-implimentazzjoni, bl-għan li jkun hemm applikazzjoni effettiva tal-qafas komprensiv stabbilit u biex jiġi rinforzat mekkaniżmu ta’ monitoraġġ madwar l-UE kollha, kif ukoll sistema ta’ twissija bikrija bħar-Reviżjoni Perjodika Universali;

8.

Ifakkar li r-rispett tal-valuri ċentrali tal-UE u l-protezzjoni u l-promozzjoni tad-drittijiet tal-bniedem u tal-libertajiet fundamentali jikkostitwixxu bażi komuni fir-relazzjonijiet tal-Unjoni ma’ pajjiżi terzi, u jenfasizza li l-UE hi marbuta mal-Karta wkoll f'dan ir-rigward; ifakkar f'dan ir-rigward li l-promozzjoni tad-demokrazija u tal-istat tad-dritt timxi id f'id mar-rispett, il-protezzjoni u l-promozzjoni tad-drittijiet tal-bniedem u tal-libertajiet fundamentali; jenfasizza l-fatt li, fl-istruttura istituzzjonali l-ġdida tal-UE, is-Servizz Ewropew għall-Azzjoni Esterna (SEAE) jista' joffri biss opportunità li tiżdied il-koerenza u l-effikaċja fl-isfera tal-isforzi tal-politika esterna biex jiġu promossi d-drittijiet tal-bniedem u d-demokrazija jekk ikun maqbul approċċ ibbażat fuq id-drittijiet tal-bniedem fir-rigward tal-istruttura, ir-riżorsi u l-attivitajiet; jenfasizza li l-Unjoni għandha rwol ewlieni fil-promozzjoni tad-drittijiet tal-bniedem fid-dinja; f'dan ir-rigward, jitlob li l-UE tiżgura l-effikaċja tal-klawsoli tad-drittijiet tal-bniedem fil-ftehimiet internazzjonali u biex tqis il-prinċipji tal-Karta meta tidħol fi ftehimiet ma’ pajjiżi terzi, kif ukoll biex iżżomm il-koerenza bejn il-politika interna u esterna tagħha dwar id-drittijiet tal-bniedem;

9.

Jafferma mill-ġdid li l-adeżjoni tal-UE għall-KEDB se tikkostitwixxi l-livell minimu ta’ protezzjoni għad-drittijiet tal-bniedem u l-libertajiet fundamentali fl-Ewropa u tipprovdi mekkaniżmu addizzjonali għall-infurzar tad-drittijiet tal-bniedem, jiġifieri l-possibilità ta’ tressiq ta’ lment quddiem il-QEDB fir-rigward ta’ ksur tad-drittijiet tal-bniedem li jirriżulta minn min-naħa ta’ istituzzjoni tal-UE jew ta’ Stat Membru fl-implimentazzjoni tal-liġi tal-UE, li jaqa' fil-mandat tal-KEDB; u li l-każistika tal-QEDB għalhekk ser tipprovdu kontribut għall-azzjoni attwali u futura tal-UE għar-rispett għal, u l-promozzjoni tal-libertajiet fundamentali fl-oqsma tal-libertajiet ċivili, il-ġustizzja u l-intern, minbarra l-każistika tal-Qorti tal-Ġustizzja f'dan il-qasam;

10.

Jistieden lill-Istati Membri tal-UE u tal-Kunsill tal-Ewropa biex jesprimu l-impenn politiku ċar tagħhom u r-rieda tagħhom biex jappoġġaw il-proċess ta’ adeżjoni filwaqt li jenfasizza l-ħtieġa għal konsultazzjoni xierqa mal-partijiet interessati rilevanti kollha; jistieden lill-Kummissjoni tiffinalizza l-konsultazzjonijiet interni tagħha, kif ukoll in-negozjati mal-Kunsill tal-Ewropa, billi ssib soluzzjonijiet adegwati għall-kwistjonijiet tekniċi ewlenin sabiex jitlesta l-proċess ta’ adeżjoni fi żmien raġonevoli u sabiex jiġi żgurat l-ogħla livell possibbli ta’ protezzjoni tad-drittijiet tal-bniedem fl-Ewropa;

11.

Jistieden lill-Kummissjoni u lill-Istati Membri jqajmu kuxjenza dwar il-benefiċċji tal-adezjoni għall-KEDB u tar-rekwiżiti kollha li jridu jiġu ssodisfati mill-applikanti, billi jiżviluppaw linji gwida dwar l-applikazzjoni adegwata u l-effetti ta’ dan il-mekkaniżmu addizzjonali sabiex jiġi żgurat li dan ikun jista' jintuża b'mod effiċjenti u effikaċi, kif ukoll billi jiġi inkluż taħriġ tal-ħaddiema professjonisti rilevanti kollha;

12.

Jilqa', barra minn hekk, l-obbligi ġenerali ġodda maħluqa bit-Trattat ta’ Lisbona tal-ġlieda kontra l-esklużjoni soċjali u d-diskriminazzjoni u tal-promozzjoni tal-protezzjoni u l-ġustizzja soċjali, l-ugwaljanza bejn l-irġiel u n-nisa, ir-rispett għall-ħajja privata u tal-familja, is-solidarjetà bejn il-ġenerazzjonijiet u l-protezzjoni tad-drittijiet tat-tfal, u biex tiġi żviluppata politika komuni dwar l-ażil u l-immigrazzjoni u l-ġlieda kontra t-traffikar ta’ persuni, kif ukoll ir-referenza espliċita tiegħu għall-persuni li jagħmlu parti minn minoranzi, li tirrifletti valur fundamentali ieħor tal-Unjoni; jilqa' l-fatt li l-Unjoni kisbet personalità legali li tippermettilha taċċedi għat-trattati internazzjonali, it-titjib tal-protezzjoni ġudizzjarja bl-estensjoni tal-ġurisdizzjoni tal-QTĠ għal oqsma ta’ relevanza ovvja għall-protezzjoni tad-drittijiet fundamentali, bħalma huma l-oqsma tal-pulizija u l-koperazzjoni ġudizzjarja fil-liġi kriminali, it-tisħiħ tar-rwol tal-Parlament Ewropew u l-parlamenti nazzjonali fil-proċess ta’ teħid ta’ deċiżjonijiet Ewropew, speċjalment fil-valutazzjoni tal-implimentazzjoni tal-politika tal-UE fiż-żona ta’ libertà, sigurtà u ġustizzja, u r-rwol ikbar taċ-ċittadini Ewropej, li issa ingħataw is-setgħa li jniedu leġiżlazzjoni tal-UE permezz tal-Inizjattiva Ewropea taċ-Ċittadini, u l-obbligu biex jiżamm djalogu miftuħ, trasparenti u regolari mal-assoċjazzjonijiet rappreżentattivi u s-soċjetŕ ċivili (L-Artikolu 11(2) TUE);

13.

Jitlob implimentazzjoni sħiħa u konsistenti b'konformità mal-liġi internazzjonali u Ewropea tad-drittijiet tal-bniedem tal-Programm ta’ Stokkolma, li jaqleb l-obbligi u l-prinċipji li joħorġu mit-Trattat għall-prattika billi jistabbilixxi l-linji gwida strateġiċi għaż-żona ta’ libertà, sigurtà u ġustizzja;

14.

Iqis li l-istituzzjonijiet Ewropej ta’ sikwit aġixxew b'mod parallel fil-qasam tal-protezzjoni tad-drittijiet fundamentali u għalhekk jitlob li ssir riflessjoni dwar azzjonijiet li saru u għal titjib fil-kooperazzjoni bejn dawk l-istituzzjonijiet, bħal kooperazzjoni interistituzzjonali stabbilita għall-monitoraġġ annwali tas-sitwazzjoni tad-drittijiet tal-bniedem fl-UE, sabiex kull istituzzjoni tkun tista' tikkontribwixxi għar-reaaporti tal-istituzzjonijiet l-oħra;

15.

Jinnota l-ħolqien ta’ portafoll ġdid fil-Kummissjoni għall-Ġustizzja, id-Drittijiet Fundamentali u ċ-Ċittadinanza bħala indikazzjoni tal-impenn tagħha biex iżżid l-isforzi fil-qasam tal-libertajiet u d-drittijiet fundamentali u bħala reazzjoni pożittiva għat-talbiet ripetuti tal-Parlament f'dan ir-rigward; diviżjoni bħal din bejn il-ġustizzja u s-sigurtà m'għandhiex tirrinforza d-dikotomija żbaljata bejn il-ħtieġa biex jiġu protetti d-drittijiet tal-bniedem tal-bnedmin kollha u l-ħtieġa biex tiġi assigurata l-garanzija tas-sigurtà tagħhom; il-Kummissarju l-ġdid għandu jagħti attenzjoni partikulari lill-politiki tal-UE biex jikkumbattu l-imigrazzjoni irregolari u t-terroriżmu u l-appoġġ sħiħ mill-Kulleġġ tal-Kummissarji huwa kruċjali biex jippermetti lill-Kummissarju l-ġdid ikun ta’ importanza kbira;

16.

Jistieden lill-Kummissjoni biex tagħmel l-2013 s-Sena Ewropea taċ-Ċittadinanza sabiex tagħti imbuttatura lid-dibattitu dwar iċ-ċittadinanza Ewropea u tinforma liċ-ċittadini tal-UE bid-drittijiet tagħhom, b'mod partikolari d-drittijiet il-ġodda li jirriżultaw mid-dħul fis-seħħ tat-Trattat ta’ Lisbona;

17.

Jistenna azzjonijiet konkreti mill-Kummissarju l-ġdid responsabbli, b'konformità mal-intenzjonijiet diġà ddikjarati: partikolarment u bl-aktar mod importanti, jilqa' l-impenn li tiġi introdotta valutazzjoni tal-impatt fuq id-drittijiet fundamentali tal-proposti leġiżlattivi ġodda kollha; li jissorvelja l-proċess leġiżlattiv sabiex jiżgura li t-testi emerġenti finali jkunu konformi mal-Karta; u li japplika politika ta’ “tolleranza żero” fir-rigward ta’ ksur tal-Karta, billi jitwettqu investigazzjonijiet komprensivi u filwaqt li jniedi proċedimenti ta’ ksur meta l-Istati Membri jiksru l-obbligi tagħhom tad-drittijiet tal-bniedem fl-implimentazzjoni tal-liġi tal-UE; u biex jiġi assigurat li ċ-ċittadini tal-UE jkunu informati b'mod xieraq dwar l-istruttura tad-drittijiet fundamentali ġodda; jitlob li jkun hemm segwitu għall-Komunikazzjoni tal-2003 dwar l-Artikolu 7 tat-Trattat dwar l-Unjoni Ewropea COM(2003)0606 biex jiġi definit mod trasparenti u koerenti biex jiġi indirizzat il-ksur tad-drittijiet tal-bniedem u biex isir użu rilevanti tal-Artikolu 7 tal-istess Trattat abbażi tal-istruttura l-ġdida tad-drittijiet fundamentali;

18.

Ifakkar lill-Kummissjoni tissorvelja l-proposti leġiżlattivi ġodda kollha biex tara li jkunu konformi mal-Karta, u biex tivverifika l-istrumenti eżistenti f'dan ir-rigward; jissuġġerixxi li l-valutazzjonijiet tal-impatt li jakkumpanjaw il-proposti tal-Kummissjoni għandhom jindikaw b'mod ċar jekk dawn il-proposti jikkonformawx mal-Karta, sabiex din il-kunsiderazzjoni ssir parti integrali tal-preżentazzjoni tal-proposti leġiżlattivi; ifakkar lill-Kummissjoni fil-kompitu espliċitu tagħha biex tinvolvi l-partijiet konċernati permezz ta’ konsultazzjonijiet wiesgħa sabiex jiġu assigurati l-koerenza u t-trasparenza fl-azzjonijiet tal-Unjoni Ewropea (l-Artikolu 11(3) TUE); jenfasizza f'dan ir-rigward l-importanza tal-Pjattaforma tal-Aġenzija għad-Drittijiet Fundamentali bħala riżorsa sinifikanti biex jiġi ssodisfat dan il-kompitu;

19.

Ifakkar lill-Kummissjoni biex twettaq investigazzjonijiet oġġettivi u tibda proċedimenti ta’ ksur, biex b'hekk jiġu evitati standards doppji, kull meta Stat Membru, fl-implimentazzjoni tal-leġiżlazzjoni tal-UE, jikser id-drittijiet imħaddna f'din il-Karta; barra minn hekk, ifakkar lill-Kummissjoni titlob lill-Istati Membri jipprovdu fatti affidabbli u tiġbor l-informazzjoni wkoll minn sorsi mhux governattivi, kif ukoll titlob lill-Aġenzija għad-Drittijiet Fundamentali u korpi oħra tad-drittijiet tal-bniedem biex jagħtu l-kontribut tagħhom;

20.

Jiġbed l-attenzjoni għall-qawmien riċenti ta’ nazzjonaliżmu, ksenofobija u diskriminazzjoni f'uħud mill-Istati Membri u jenfasizza r-rwol ċentrali li l-Kummissjoni għandha tieħu sabiex tevita u tiġġieled dan il-ksur possibbli tad-drittijiet fundamentali;

21.

Jenfasizza l-importanza tas-sorveljanza annwali tal-Kummissjoni fir-rigward tal-konformità mal-Karta, u jinnota li r-rapporti ta’ monitoraġġ tagħha għandu jkun fihom valutazzjoni tal-implimentazzjoni tad-drittijiet iggarantiti, valutazzjoni tal-kwistjonijiet l-aktar kontenzjużi u s-sitwazzjoni tal-gruppi l-iktar vulnerabbli fl-Unjoni, lakuni eżistenti fil-protezzjoni, xejriet ewlenin u problemi strutturali fil-livell nazzjonali u tal-UE, bil-ħsieb li jiġu proposti inizjattivi u miżuri konkreti, u jirrakkomanda t-tixrid ta’ prattika tajba fost l-Istati Membri;

22.

Jilqa' l-Komunikazzjoni tal-Kummissjoni dwar l-Istrateġija għall-implimentazzjoni effettiva tal-Karta tad-Drittijiet Fundamentali mill-Unjoni Ewropea billi tirreferi fost l-oħrajn għall-approċċ tagħha ta’ prevenzjoni fl-implimentazzjoni effettiva, l-importanza tat-taħriġ intern dwar id-drittijiet fundamentali, u l-kontroll sistematiku tal-aspett tad-drittijiet fundamentali tal-evalwazzjonijiet tal-impatt tal-Kummissjoni mill-Bord tal-Evalwazzjoni tal-Impatt, kif ukoll il-miżuri ta’ komunikazzjoni mmirati mfassla għad-diversi sitwazzjonijiet meħtieġa f'dan ir-rigward; barra minn hekk, jilqa' l-enfasi tal-Komunikazzjoni tal-Kummissjoni msemmija hawn fuq rigward l-importanza tal-kriterji politiċi għall-adezjoni stabbiliti mill-Kunsill Ewropew ta’ Kopenħagen tal-1993 li kien jesiġi pajjiżi kandidati li jkollhom istituzzjonijiet stabbli li jiggarantixxu d-demokrazija, l-istat tad-dritt, id-drittijiet tal-bniedem u r-rispett għal u l-protezzjoni tal-minoranzi; il-preservazzjoni ta’ dan il-kriterju tkun tappoġġja l-protezzjoni tad-drittijiet fundamentali fl-Istati Membri futuri;

23.

Jistieden lill-Kummissjoni tinforza l-valuri u l-prinċipji mħaddna fit-Trattat u l-Karta kif ukoll l-istrateġija stipulata fil-Programm ta’ Stokkolma permezz ta’ proposti leġiżlattivi konkreti filwaqt li tikkunsidra l-ġurisprudenza tal-QEDB meta tkun qed twettaq dawn l-attivitajiet; barra minn hekk, jitlob il-'Lisbonizzazzjoni' tal-acquis attwali fil-qasam tal-pulizija u l-kooperazzjoni ġudizzjarja u t-tisħiħ tar-responsabilità demokratika fiż-żona ta’ libertà, sigurtà u ġustizzja;

24.

Jissuġġerixxi t-twaqqif ta’ relazzjoni ta’ ħidma bejn l-Kummissarji responsabbli għall-Ġustizzja, id-Drittijiet Fundamentali u ċ-Ċittadinanza u l-Intern u l-Kumitat għal-Libertajiet Ċivili, il-Ġustizzja u l-Intern tal-Parlament, billi l-Kummissarji jiġu mistiedna b'mod regolari għall-skambju ta’ opinjonijiet dwar kwistjonijiet u żviluppi attwali relatati mad-drittijiet fundamentali;

25.

Jenfasizza li l-Parlament Ewropew ukoll għandu jsaħħaħ il-valutazzjoni awtonoma tal-impatt dwar id-drittijiet fundamentali f'relazzjoni mal-proposti u l-emendi leġiżlattivi taħt eżami fil-proċess leġiżlattiv biex issir aktar sistematika, l-aktar billi jkabbru l-possibilitajiet attwalment previsti bir-Regola 36 tar-Regoli ta’ Proċedura tal-Parlament dwar ir-rispett għall-Karta u biex titlob għall-opinjonijiet tas-Servizz Legali dwar kwistjonijiet legali rigward kwistjonijiet tad-drittijiet fundamentali fl-UE;

26.

Jistieden lill-Kunsill jadatta għall-bidliet meħtieġa bit-Trattat u jikkonforma mal-Karta meta jkun qed jilleġiżla; għalhekk jilqa' t-twaqqif ta’ Grupp ta’ Ħidma permanenti tal-Kunsill dwar id-Drittijiet Fundamentali, id-Drittijiet taċ-Ċittadini u l-Moviment Liberu tal-Persuni u jenfasizza l-importanza li dan il-korp il-ġdid ikollu mandat wiesa' biex jinkludi kwistjonijiet marbuta mad-drittijiet fundamentali mal-UE u l-Istati Membri rilevanti u jipprovdi forum għal skambju ta’ opinjonijiet tal-Kunsill dwar kwistjonijiet interni tad-drittijiet tal-bniedem u għall-ħidma ma’ dan il-kor il-ġdid sabiex il-ħidma ta’ dan il-korp il-ġdid tkun trasparenti u effiċjenti, ukoll b'rabta mal-Parlament Ewropew;

27.

Jafferma mill-ġdid il-ftehim interistituzzjonali Approċċ Komuni għall-Valutazzjoni tal-Impatt (4) imsemmi fil-Komunikazzjoni tal-Kummissjoni dwar l-Istrateġija għall-implimentazzjoni effettiva tal-Karta tad-Drittijiet Fundamentali mill-Unjoni Ewropea, li tiddikjara li l-Parlament u l-Kunsill huma responsabbli biex jivvalutaw l-impatt tal-emendi tagħhom stess;

28.

Jistieden lill-Kunsill jassigura li l-Grupp ta’ Ħidma tal-Kunsill dwar id-Drittijiet Fundamentali, id-Drittijiet taċ-Ċittadini u l-Moviment Liberu tal-Persuni (FREMP) ikollu mandat wiesa' li jkun jista' jinkludi, pereżempju s-setgħa li jiddiskuti u jwieġeb b'mod uffiċjali għar-rapporti tal-FRA (barra mir-rakkomandazzjonijiet tal-korpi, proċeduri u miżuri speċjali tat-trattat tan-NU), li jivvaluta l-impatt estern tad-drittijiet tal-bniedem tal-istrumenti u l-politiki tal-UE, f'koordinazzjoni mal-Grupp ta’ Ħidma tal-Kunsill dwar id-Drittijiet tal-Bniedem (COHOM), li jassigura koordinazzjoni mal-aġenziji bla mandat tad-drittijiet tal-bniedem iżda b'impatt tad-drittijiet tal-bniedem (pereżempju l-EIB jew il-FRONTEX), li jeżamina l-firma, ir-ratifikazzjoni u l-konformità tal-UE u tal-Istati Membri mal-istrumenti internazzjonali tad-drittijiet tal-bniedem u li jipprovdi forum għall-iskambji tal-Kunsill dwar kwistjonijiet interni tad-dritttijiet tal-bniedem;

29.

Jitlob għar-rispett tad-dritt tiegħu għal skrutinju demokratiku abbażi tat-trattati; jinsisti dwar in-neċessità li jissaħħu t-trasparenza u l-aċċess għad-dokumenti bejn l-istituzzjonijiet tal-UE, sabiex tkun żviluppata kooperazzjoni interistituzzjonali iktar effikaċi, inkluża r-responsabbiltà dwar il-kwistjonijiet relatati mad-drittijiet fundamentali; jenfasizza r-rwol tiegħu fis-segwitu tar-riżoluzzjonijiet tiegħu relatati mad-drittijiet fundamentali fl-UE u r-rwol tiegħu fl-evalwazzjoni tax-xogħol li jsir minn istituzzjonijiet oħra tal-UE f'termini tal-azzjonijiet tagħhom jew in-nuqqas ta’ azzjoni meta jivvalutaw l-iżviluppi fil-qasam (eż. permezz ta’ rapporti annwali), b'kombinazzjoni ma’ messaġġi politiċi b'approċċ ibbażat fuq il-fatti; jenfasizza d-dritt tiegħu, skont l-Artikolu 218(10) tat-Trattat dwar il-Funzjonament tal-UE, biex ikun infurmat immedjatament u bis-sħiħ fl-istadji kollha tal-proċedura għall-konklużjoni ta’ ftehimiet internazzjonali bejn l-Unjoni u pajjiżi terzi jew organizzazzjonijiet internazzjonali;

30.

Jafferma mill-ġdid il-fatt tar-rwol imkabbar tal-QTĠ fir-rigward tal-iżgurar li l-istituzzjonijiet tal-UE, l-aġenziji u l-Istati Membri kollha li jkunu qed jimplementaw il-liġi tal-UE jirrispettaw il-Karta kif xieraq, u jinnota li dan se jagħti lok sabiex il-QTĠ ssaħħaħ u tkompli tiżviluppa l-każistika tagħha dwar id-drittijiet fundamentali; jenfasizza l-bżonn ta’ kooperazzjoni stabbilita bejn il-qrati nazzjonali, il-QTĠ u l-QEDB sabiex jitkattar l-iżvilupp ta’ sistema koerenti ta’ każistika f'dan il-qasam;

31.

Jenfasizza r-rwol tal-FRA fl-osservazzjoni kontinwa tas-sitwazzjoni tad-drittijiet fundamentali fi ħdan l-Unjoni u l-implikazzjonijiet tat-Trattat ta’ Lisbona f'dan il-qasam, billi tipprovdi analiżi, għajnuna u għarfien espert, kompitu li jeħtieġ il-kwalità, l-oġġettività, l-imparzjalità effikaċi u t-trasparenza; jitlob lill-Kummissjoni tirrevedi u ssaħħaħ il-mandat tal-FRA sabiex iġġib xogħolha konformi mar-rekwiżiti l-ġodda bbażati fuq it-Trattat ta’ Lisbona u l-Karta, jindika li, fi żmien il-mandat rivedut, ir-rwol ta’ monitoraġġ tal-FRA għandu jiġi estiż għall-pajjiżi għall-adeżjoni; għalhekk huma meħtieġa riżorsi xierqa għaż-żieda fil-kompiti wara l-implimentazzjoni tal-Karta; itenni t-talba tiegħu li jkun assoċjat b'mod sħiħ fir-reviżjoni tal-programm multiannwali tal-FRA; jilqa' l-inklużjoni ta’ Anness fir-rapport annwali tal-FRA, li jindika r-ratifika mill-Istati Membri ta’ strumenti internazzjonali tad-drittijiet tal-bniedem;

32.

Jenfasizza li l-kompitu ewlieni tal-FRA huwa li tipprovdi lill-istituzzjonijiet li jieħdu d-deċiżjonijiet b'fatti u data dwar il-kwistjonijiet relatati mad-drittijiet fundamentali u li, għal dan il-għan, tiġbor u tanalizza informazzjoni u data, kif ukoll tqajjem kuxjenza billi twettaq riċerka u stħarriġ xjentifiċi bbażati fuq metodoloġiji ta’ reqqa, tippubblika rapporti tematiċi u annwali, tinnetwerkja u tippromwovi d-djalogu mas-soċjetà ċivili; jilqa' r-rapport annwali 2009 tagħha kif ukoll l-approċċ tagħha fejn tipprovdi ħarsa ġenerali komparattiva u tiġbed l-attenzjoni għall-prattiki tajbin fis-27 Stat Membru;

33.

Jistieden lill-istituzzjonijiet tal-UE li jieħdu d-deċiżjonijiet sabiex jużaw id-data u l-fatti pprovduti mill-FRA matul l-istadju preparatorju ta’ attività leġiżlattiva, fil-proċessi ta’ teħid ta’ deċiżjonijiet u/jew ta’ sorveljanza u li jkunu f'kooperazzjoni kostanti u mill-qrib mal-FRA, filwaqt li jinvolvu l-Pjattaforma tal-NGO tagħha;

34.

Jistieden lill-aġenziji Ewropej kollha, biex iżommu l-impenn tagħhom għall-protezzjoni tad-drittijiet fundamentali u biex jintegraw l-approċċ tad-drittijiet fundamentali fl-attivitajiet kollha tagħhom; barra minn hekk jitlob li l-UE tiżgura r-responsabbiltà legali sħiħa tal-aġenziji tagħha f'dan ir-rigward;

35.

Huwa tal-opinjoni li l-FRONTEX għandha tistabbilixxi kooperazzjoni strutturata mal-aġenziji li jittrattaw id-drittijiet fundamentali jew migranti jew l-ażil u l-UNHCR, sabiex jiffaċilitaw l-operazzjonijiet li għandhom implikazzjonijiet għall-protezzjoni tad-drittijiet tal-bniedem; jilqa' l-ftehim ta’ kooperazzjoni bejn il-FRONTEX u l-FRA ffirmat fl-2010;

36.

Jenfasizza l-fatt li l-UE u l-Istati Membri għandhom obbligi kondiviżi fil-qasam tal-implimentazzjoni u/jew l-infurzar tad-drittijiet tal-bniedem u dawk fundamentali, fl-isferi ta’ responsabilità rispettivi tagħhom, skont il-prinċipju ta’ sussidjarjetà, u li din ir-responsabilità u l-kompetenza kondiviżi jirrappreżentaw opportunità u obbligu min-naħa tal-Istati Membri u l-istituzzjonijiet tal-UE; jenfasizza r-rwol imkabbar tal-parlamenti nazzjonali pprovdut bit-Trattat ta’ Lisbona u jappoġġa l-istabbiliment ta’ djalogu formali kontinwu bejn il-Parlament Ewropew u l-parlamenti nazzjonali;

37.

Ifakkar lill-Istati Membri fid-dmir tagħhom li jipprovdu lill-Kummissjoni, bħala gwardjan tal-trattati, b'fatti u data affidabbli, meta tintalab;

38.

Jenfasizza l-importanza tal-korpi ġudizzjarji fl-Istati Membri, li għandhom rwol ewlieni fl-infurzar tal-konformità mad-drittijiet tal-bniedem u l-infurzar tad-drittijiet fundamentali, u għalhekk iħeġġeġ li jiġi appoġġjat aċċess faċli għall-qrati u l-proċeduri b'limitu ta’ ħin raġonevoli bħala mezz biex tissaħħaħ il-protezzjoni tad-drittijiet fundamentali u tal-bniedem; iħeġġeġ lill-Istati Membri jagħmlu sforz fir-rigward tat-taħriġ kontinwu tal-imħallfin nazzjonali dwar il-libertajiet u d-drittijiet fundamentali, inklużi l-aspetti ġodda f'dan il-qasam wara t-Trattat ta’ Lisbona;

39.

Jemmen li l-azzjoni tal-UE m'għandhiex tindirizza biss il-ksur tad-drittijiet fundamentali wara li jkunu twettqu, iżda għandha tfittex li tipprevenihom; konsegwentement jitlob li ssir riflessjoni dwar mekkaniżmi biex ksur potenzjali tad-drittijiet fundamentali fl-UE u fl-Istati Membri tagħha jiġu identifikati kmieni, dwar iffriżar temporanju tal-miżuri li jikkostitwixxu tali ksur, dwar proċeduri legali aċċellerati biex jiġi determinat jekk miżura hix kuntrarja għad-drittijiet fundamentali tal-UE u għal sanzjonijiet fil-każ li dawn il-miżuri jkunu madankollu implimentati kuntrarju għal-liġi tal-UE;

40.

Jistieden lill-istituzzjonijiet tal-UE u lill-Istati Membri jirdoppjaw l-isforzi tagħhom bl-għan li jinfurmaw sew u jqajmu l-kuxjenza pubblika, minħabba li d-drittijiet fundamentali jistgħu jiġu protetti aħjar jekk l-individwi nfushom ikunu konxji mid-drittijiet tagħhom u l-mekkaniżmi disponibbli għall-protezzjoni tagħhom; jitlob użu attiv tal-korpi ċivili u l-NGOs relevanti għaż-żamma ta’ relazzjoni ta’ ħidma kontinwa ma’ dawn il-korpi fl-implimentazzjoni tal-istruttura l-ġdida tad-drittijiet fundamentali u meta tkun qed tittieħed azzjoni dwar każijiet speċifiċi;

41.

Jafferma mill-ġdid id-dritt tagħha li kull sena toħroġ rapport dwar is-sitwazzjoni tad-drittijiet fundamentali fl-UE, li jindirizza l-kwistjoni tad-drittijiet fundamentali mal-istituzzjonijiet tal-UE, aġenziji jew Stati Membri jekk ikun meħtieġ;

42.

Jissuġġerixxi li jinstabu modijiet għall-istituzzjonijiet u l-aġenziji tal-UE biex issir kooperazzjoni aħjar mal-organizzazzjonijiet internazzjonali impenjati favur il-libertajiet u d-drittijiet fundamentali, u li jsir użu aħjar u direzzjonat b'mod aktar effikaċi tar-riżultati tal-esperjenza f'dan il-qasam;

43.

Jistieden lill-istituzzjonijiet tal-UE jisfruttaw il-potenzjal sħiħ tal-Memorandum ta’ Ftehim bejn il-Kunsill tal-Ewropa u l-UE, fl-interessi ta’ konsistenza u sinerġija ikbar fil-livell Ewropew, u jissuġġerixxi li jsir użu aħjar tal-kompetenzi tal-mekkaniżmi, l-istandards u r-riżultati ta’ sorveljanza tad-drittijiet tal-bniedem żviluppati mill-Kunsill tal-Ewropa, biex b'hekk jiġi evitat xogħol doppju; jafferma mill-ġdid il-bżonn li l-Unjoni tkun involuta iktar fil-ħidma tal-Kummissarju tal-Kunsill tal-Ewropa għad-Drittijiet tal-Bniedem u għall-UE biex tqis ħafna aktar dak ix-xogħol meta timplimenta l-politiki fil-qasam tal-libertajiet, il-ġustizzja u s-sigurtà;

44.

Jistieden lill-Istati Membri tal-UE jiffirmaw u jirratifikaw il-konvenzjonijiet ċentrali dwar id-drittijiet tal-bniedem tal-Kunsill tal-Ewropa u tan-Nazzjonijiet Uniti kif ukoll il-protokolli fakultattivi addizzjonali: fosthom, il-Karta Soċjali Ewropea (riveduta), il-Konvenzjoni dwar l-Azzjoni kontra t-Traffikar ta’ Persuni, il-Konvenzjoni Qafas għall-Protezzjoni tal-Minoranzi Nazzjonali, il-Karta Ewropea għal-Lingwi Reġjonali u Minoritarji tal-Kunsill tal-Ewropa, kif ukoll il-Konvenzjoni tan-NU Kontra t-Tortura u Trattament jew Pieni Krudili, Inumani jew Degradanti oħra, il-Konvenzjoni tan-NU dwar l-Istatus tar-Rifuġjati, il-Konvenzjoni tan-NU dwar il-Protezzjoni tad-Drittijiet tal-Ħaddiema Migranti kollha u l-Membri tal-Familji tagħhom, il-Konvenzjoni tan-NU dwar il-kriminalità organizzata u ż-żewġ protokolli tagħha kontra t-traffikar tal-bnedmin u l-kuntrabandu, il-Konvenzjoni tan-NU dwar l-Eliminazzjoni ta’ Kull Forma ta’ Diskriminazzjoni kontra n-Nisa, il-Konvenzjoni tan-NU dwar id-Drittijiet tat-Tfal u l-Konvenzjoni tan-NU dwar id-Drittijiet tal-Persuni b'Diżabbiltà; barra minn hekk, jissuġġerixxi li, fil-proċess leġiżlattiv Ewropew, jitqiesu iktar id-dokumenti internazzjonali u ssir iktar referenza għalihom;

45.

Jenfasizza l-bżonn ta’ attenzjoni proporzjonata għall-mekkaniżmi ta’ sorveljanza varji tan-Nazzjonijiet Uniti u għas-sejbiet tal-korpi tad-drittijiet tal-bniedem tan-Nazzjonijiet Uniti, u jissuġġerixxi li jiġu segwiti mill-qrib ir-rakkomandazzjonijiet tagħhom b'relevanza għall-Istati Membri; jinnota l-importanza tal-Eżami Perjodiku Universali (EPU) tal-Kunsill tad-Drittijiet tal-Bniedem; jirrakkomanda kooperazzjoni mal-Uffiċċju tal-Kummissarju Għoli tan-Nazzjonijiet Uniti għad-Drittijiet tal-Bniedem u l-Uffiċċju tal-Kummissarju Għoli għar-Rifuġjati tan-Nazzjonijiet Uniti; u jilqa' l-ftuħ, fi Brussell, tal-ewwel Uffiċċju Reġjonali Ewropew tal-Kummissarju Għoli tan-Nazzjonijiet Uniti għad-Drittijiet tal-Bniedem;

46.

Jenfasizza r-rwol importanti u l-ħidma attiva tal-Uffiċċju għall-Istituzzjonijiet Demokratiċi u d-Drittijiet tal-Bniedem (ODIHR), tar-Rappreżentanti Speċjali tal-OSKE għal-Libertà tal-Midja u Kontra t-Traffikar tal-Bnedmin u tal-Kummissarju Għoli għall-Minoranzi Nazzjonali;

47.

Jistieden lill-Istati Membri li qegħdin fil-Kunsill tas-Sigurtà tan-Nazzjonijiet Uniti biex jassiguraw garanziji proċedurali għad-drittijiet fil-proċess ta’ tqegħid fil-lista u t-tneħħija minnha tal-allegati gruppi jew persuni terroristi, kif meħtieġ mill-każistika rilevanti tal-QTĠ;

48.

Jenfasizza li l-istruttura l-ġdida se titkejjel skont kemm jiġu indirizzati b'mod effikaċi l-kwistjonijiet l-iktar urġenti u l-ksur l-aktar rikorrenti mill-istituzzjonijiet responsabbli, kemm fl-Istati Membri kif ukoll fil-livell tal-UE, anki b'rabta mar-relazzjonijiet esterni tagħha;

49.

Ifakkar, għalhekk, fir-riżoluzzjonijiet u d-dibattiti u s-sejbiet minn missjonijiet fl-2009 dwar il-kwistjonijiet tad-drittijiet fundamentali, li wrew li hemm ħafna kwistjonijiet pendenti u każijiet speċifiċi ta’ ksur tad-drittijiet fundamentali, li jirrikjedu passi konkreti urġenti, strateġiji ta’ nofs it-terminu u soluzzjonijiet fit-tul kif ukoll segwitu mill-istituzzjonijiet tal-UE; bħal pereżempju:

50.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni kif ukoll lill-Gvernijiet u lill-Parlamenti tal-Istati Membri u tal-pajjiżi kandidati, lin-Nazzjonijiet Uniti, lill-Kunsill tal-Ewropa u lill-Organizzazzjoni għas-Sigurtà u l-Kooperazzjoni fl-Ewropa.

15.6.2012   

MT

Il-Ġurnal Uffiċjali tal-Unjoni Ewropea

CE 169/58

—

wara li kkunsidra d-Direttiva 2005/29/KE tal-Parlament Ewropew u tal-Kunsill tal-11 ta’ Mejju 2005 dwar Prattiki Kummerċjali Żleali fin-negozju mal-konsumatur fis-suq intern (DPKŻ) (1),

—

wara li kkunsidra d-Direttiva 2006/114/KE tal-Parlament Ewropew u tal-Kunsill tat-12 ta’ Diċembru 2006 dwar reklamar qarrieqi u komparattiv (DRQK) (2),

—

wara li kkunsidra d-Direttiva 2010/13/UE tal-Parlament Ewropew u tal-Kunsill tal-10 ta’ Marzu 2010 dwar il-koordinazzjoni ta’ ċerti dispożizzjonijiet stabbiliti bil-liġi, b’regolament jew b’azzjoni amministrattiva fi Stati Membri dwar il-forniment ta’ servizzi tal-media awdjoviżiva (Direttiva dwar is-Servizzi tal-Media Awdjoviżiva) (3) (DSMA),

—

wara li kkunsidra r-Regolament (KE) Nru 2006/2004 tal-Parlament Ewropew u tal-Kunsill tas-27 ta’ Ottubru 2004 dwar il-kooperazzjoni bejn l-awtoritajiet nazzjonali responsabbli għall-infurzar tal-liġijiet tal-protezzjoni tal-konsumaturi (“ir-Regolament dwar kooperazzjoni fil-protezzjoni tal-konsumaturi”) (4),

—

wara li kkunsidra l-Karta tad-Drittijiet Fundamentali tal-Unjoni Ewropea u, b’mod partikolari, l-Artikolu 7 (ir-rispett tal-ħajja privata u familjari) u l-Artikolu 8 (il-ħarsien tad-data personali) tagħha,

—

wara li kkunsidra d-Direttiva 95/46/KE tal-Parlament Ewropew u tal-Kunsill tal-24 ta’ Ottubru 1995 dwar il-ħarsien ta’ individwi fir-rigward tal-ipproċessar ta’ dejta personali u dwar il-moviment liberu ta’ dik id-dejta (5),

—

wara li kkunsidra d-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (6),

—

wara li kkunsidra d-Direttiva 2000/31/KE tal-Parlament Ewropew u tal-Kunsill tat-8 ta’ Ġunju 2000 dwar ċerti aspetti legali tas-servizzi minn soċjetà tal-informazzjoni, partikolarment il-kummerċ elettroniku, fis-Suq Intern (7),

—

wara li kkunsidra r-riżoluzzjoni tiegħu tad-9 ta’ Marzu 2010 dwar il-protezzjoni tal-konsumaturi (8),

—

wara li kkunsidra r-riżoluzzjoni tiegħu tat-9 ta’ Marzu 2010 dwar it-Tabella ta’ Valutazzjoni tas-Suq Intern (9),

—

wara li kkunsidra r-riżoluzzjoni tiegħu tat-13 ta’ Jannar 2009 dwar it-traspożizzjoni, l-implimentazzjoni u l-infurzar tad-Direttiva 2005/29/KE rigward prattiċi kummerċjali żleali fin-negozju mal-konsumatur fis-suq intern u d-Direttiva 2006/114/KE dwar reklamar qarrieqi u komparattiv (10),

—

wara li kkunsidra r-riżoluzzjoni tiegħu tat-18 ta’ Novembru 2008 dwar it-Tabella ta’ Valutazzjoni tas-Swieq tal-Konsumatur (11),

—

wara li kkunsidra r-riżoluzzjoni tiegħu tat-3 ta’ Settembru 2008 dwar l-effett tal-kummerċjalizzazzjoni u tar-riklamar fuq l-ugwaljanza bejn in-nisa u l-irġiel (12),

—

wara li kkunsidra l-komunikazzjoni tal-Kummissjoni tat-28 ta’ Jannar 2009 bit-titlu “Il-monitoraġġ tar-riżultati għall-konsumatur fis-suq waħdieni: It-tieni edizzjoni tat-‘Tabella ta’ Valutazzjoni tas-Swieq tal-Konsumatur” (COM(2009)0025) u d-dokument ta’ ħidma tal-istaff tal-Kummissjoni li jakkumpanjaha bit-titolu “It-Tieni Tabella ta’ Valutazzjoni tas-Swieq tal-Konsumatur” (SEC(2009)0076),

—

wara li kkunsidra d-dokument ta’ ħidma tal-istaff tal-Kummissjoni tad-29 ta’Marzu 2010 bit-titlu “Tabella ta’ Valutazzjoni tas-Swieq tal-Konsumatur – Il-Konsumaturi jħossuhom komdi fis-Suq Intern: Is-sorveljanza tal-Integrazzjoni tas-Suq Intern tal-kummerċ bl-imnut u l-Ambjent tal-Konsumaturi fl-Istati Membri” (SEC(2010)0385),

—

wara li kkunsidra r-rapport dwar il-ħarsien tal-konsumaturi fis-suq intern, ippubblikat mill-Kummissjoni f’Ottubru 2008 fl-Ewrobarometru Speċjali Nru 298,

—

wara li kkunsidra r-rapport analitiku dwar l-attitudnijiet lejn il-bejgħ transkonfinali u l-ħarsien tal-konsumaturi, ippubblikat mill-Kummissjoni f’Marzu 2000 (Ewrobarometru Flash Nru 282),

—

wara li kkunsidra l-approċċ Ewropew għal-litteriżmu medjatiku fid-dinja diġitali (COM(2007)0833),

—

wara li kkunsidra l-linji gwida tal-Kummissjoni dwar l-applikazzjoni tad-Direttiva dwar Prattiki Kummerċjali Żleali (SEC(2009)1666),

—

wara li kkunsidra l-Opinjoni 2/2010 dwar ir-riklamar komportamentali bl-internet adottata fit-22 ta’ Ġunju 2010 mill-Grupp ta’ Ħidma tal-Artikolu 29 dwar il-ħarsien tad-data,

—

wara li kkunsidra l-Opinjoni 5/2009 dwar in-netwerks soċjali bl-internet adottata fit-12 ta’ Ġunju 2009 mill-Grupp ta’ Ħidma tal-Artikolu 29 dwar il-ħarsien tad-data,

—

wara li kkunsidra l-komunikazzjoni tal-Kummissjoni Nazzjonali Franċiża dwar it-Teknoloġija tal-Informatika u l-Libertajiet Ċivili tal-5 ta’ Frar 2009 bit-titlu “La publicité ciblée en ligne” (“Ir-riklamar immirat bl-internet”),

—

wara li kkunsidra l-Artikolu 48 tar-Regoli ta’ Proċedura tiegħu,

—

wara li kkunsidra r-rapport tal-Kumitat għas-Suq Intern u l-Ħarsien tal-Konsumatur u l-opinjoni tal-Kumitat għad-Drittijiet tan-Nisa u l-Ugwaljanza bejn is-Sessi (A7-0338/2010),

A.

billi r-riklamar jistimula l-kompetizzjoni u l-kompetittività, jaf jillimita l-abbuż ta’ pożizzjonijiet dominanti u jħeġġeġ l-innovazzjoni fis-suq intern, u konsegwentement għandu impatt pożittiv fuq il-konsumaturi, partikularment billi tiżdied il-firxa ta’ għażla, jitbaxxew il-prezzijiet u tiġi mogħtija informazzjoni dwar il-prodotti l-ġodda,

B.

billi r-riklamar huwa sors importanti u ta’ spiss kruċjali ta’ dħul għal settur tal-midja dinamiku u kompetittiv u jikkontribwixxi b’mod attiv għall-istampa indipendenti u diversa fl-Ewropa,

C.

billi ċerti prattiki tar-riklamar jista’ madankollu jkollhom impatt negattiv fuq is-suq intern u l-konsumaturi (minħabba prattiki żleali, intrużjoni fl-ispazji pubbliċi u l-arena privata, riklamar immirat lejn individwi, ostakoli għall-aċċess u tagħwiġ tas-suq intern),

D.

billi għadu neċessarju li jiġu miġġielda l-prattiki kummerċjali żleali fil-qasam tar-riklamar, kif il-Ewrobarometru Speċjali Nru 29 jagħmilha ċara li għadhom komuni,

E.

meta wieħed iqis l-impatt sinifikattiv tar-riklamar fuq l-evoluzzjoni tal-mezzi ta’ komunikazzjoni, partikularment permezz tal-iżvilupp tal-internet, tan-netwerks soċjali, tal-forums u l-blogs, il-mobilità dejjem tikber tal-utenti u ż-żieda rapida ta’ prodotti diġitali,

F.

billi, peress li l-konusumatur sa ċertu punt qed jitlef l-interess fil-proliferazzjoni ta’ messaġġi ta’ riklamar, illum il-ġurnata hemm it-tentazzjoni li t-teknoloġiji l-ġodda tal-komunikazzjoni jintużaw sabiex jinxterdu messaġġi kummerċjali anke meta ma jkunux maħsuba għal dan il-għan u għaldaqstant jistgħu jqarqu lill-konsumaturi,

G.

billi l-iżvilupp ta’ prattiki ġodda ta’ riklamar onlajn u permezz ta’ apparat mobbli qed jiġġenera firxa ta’ problemi li għandhom jiġu indirizzati sabiex jiġi ssalvagwardjat livell għoli ta’ protezzjoni għall-utenti,

H.