ISSN 1977-0987 doi:10.3000/19770987.C_2012.169.mlt |
||
Il-Ġurnal Uffiċjali tal-Unjoni Ewropea |
C 169 |
|
Edizzjoni bil-Malti |
Informazzjoni u Avviżi |
Volum 55 |
Avviż Nru |
Werrej |
Paġna |
|
IV Informazzjoni |
|
|
INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA |
|
|
Il-Kunsill |
|
2012/C 169/01 |
||
2012/C 169/02 |
||
2012/C 169/03 |
||
2012/C 169/04 |
||
|
Il-Kummissjoni Ewropea |
|
2012/C 169/05 |
||
2012/C 169/06 |
||
|
V Avviżi |
|
|
PROĊEDURI AMMINISTRATTIVI |
|
|
Il-Parlament Ewropew |
|
2012/C 169/07 |
||
|
Il-Kummissjoni Ewropea |
|
2012/C 169/08 |
||
|
ATTI OĦRAJN |
|
|
Il-Kummissjoni Ewropea |
|
2012/C 169/09 |
||
MT |
|
IV Informazzjoni
INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
Il-Kunsill
15.6.2012 |
MT |
Il-Ġurnal Uffiċjali tal-Unjoni Ewropea |
C 169/1 |
Konklużjonijiet tal-Kunsill tal-11 ta' Mejju 2012 dwar it-tisħiħ tal-potenzjal kreattiv u innovattiv taż-żgħażagħ
2012/C 169/01
IL-KUNSILL U R-RAPPREŻENTANTI TAL-GVERNIJIET TAL-ISTATI MEMBRI, IMLAQQGĦIN FI ĦDAN IL-KUNSILL:
WARA LI KKUNSIDRAW:
— |
Ir-Riżoluzzjoni tal-Kunsill tas-27 ta' Novembru 2009 dwar qafas imġedded għal kooperazzjoni fil-qasam taż-żgħażagħ (2010-2018) li tappella għal appoġġ biex tiġi żgurata l-parteċipazzjoni taż-żgħażagħ f'demokrazija rappreżentattiva u soċjetà ċivili fil-livelli kollha u fis-soċjetà inġenerali u wkoll biex jiġi appoġġat l-iżvilupp tat-talenti u l-ħiliet intraprenditorjali taż-żgħażagħ bil-ħsieb li jitjiebu l-impjegabbiltà u l-opportunitajiet ta' xogħol futur tagħhom u biex jiġu promossi l-iżvilupp personali, kapaċitajiet ta' apprendiment imtejba, il-ħiliet interkulturali, il-fehim u r-rispett tad-diversità kulturali kif ukoll l-iżvilupp ta' kompetenzi u ħiliet ġodda u flessibbli għal opportunitajiet ta' xogħol futuri. |
— |
L-Istrateġija Ewropa 2020 u l-inizjattiva ewlenija tagħha “Aġenda għal ħiliet u impjiegi ġodda” u “Żgħażagħ Attivi”, u speċjalment il-mira ewlenija dwar l-impjiegi (li għandha l-għan li tgħolli b'75 % r-rata tal-impjiegi tan-nisa u l-irġiel ta' bejn l-20 u l-64 sena, inkluż permezz ta' parteċipazzjoni akbar taż-żgħażagħ, ta' ħaddiema akbar fl-età u ta' ħaddiema b'livell baxx ta' ħiliet u permezz ta' integrazzjoni aħjar tal-migranti legali) u l-mira ewlenija dwar l-edukazzjoni u t-taħriġ (titjib tal-livelli tal-edukazzjoni, b'mod partikolari bl-għan li jitnaqqsu r-rati tat-tluq bikri mill-iskola għal inqas minn 10 % u jiżdied is-sehem ta' persuni ta' bejn it-30 u l-34 sena li jkunu temmew edukazzjoni terzjarja jew ekwivalenti għal mill-inqas 40 %); |
— |
Il-konklużjonijiet tal-Kunsill tat-22 ta' Mejju 2008 dwar il-promozzjoni tal-kreattività u l-innovazzjoni fl-edukazzjoni u t-taħriġ; |
— |
Il-konklużjonijiet tal-Kunsill tas-27 ta' Novembru 2009 dwar il-promozzjoni ta' Ġenerazzjoni Kreattiva: l-iżvilupp tal-kreattività u l-kapaċità innovattiva taż-żgħażagħ permezz tal-espressjoni kulturali billi jiġi promoss aċċess usa' għall-kultura u l-espressjoni kulturali kemm permezz tal-edukazzjoni formali kif ukoll tat-tagħlim mhux formali, b'mod partikolari permezz ta' sħubijiet strutturati u strateġiċi fil-livell istituzzjonali u ta' politika; |
— |
Ir-Riżoluzzjoni tal-Kunsill tad-19 ta' Novembru 2010 dwar il-Ħidma fil-Qasam taż-Żgħażagħ “tenfasizza l-importanza li jiġi żgurat li l-ħidma fil-qasam taż-żgħażagħ tkun inkorporata bis-sħiħ fl-inizjattiva Żgħażagħ Attivi. Għandha tarma liż-żgħażagħ, b'mod partikolari dawk b'anqas opportunitajiet, bil-ħiliet rilevanti u l-kompetenzi ewlenin meħtieġa għas-soċjetà u l-ekonomija tal-2020”. |
— |
Ir-riżoluzzjoni tal-Kunsill tad-19 ta' Mejju 2011 dwar l-inkoraġġiment ta' forom ġodda u effettivi ta' parteċipazzjoni taż-żgħażagħ kollha fil-ħajja demokratika fl-Ewropa li tirrikonoxxi li ż-żgħażagħ għandhom kontributi siewja għall-iżvilupp tas-soċjetà; |
— |
Il-Konklużjonijiet tal-Kunsill tad-29 ta' Novembru 2011 dwar il-kompetenzi kulturali u kreattivi u r-rwol tagħhom fil-bini tal-kapital intellettwali fl-Ewropa; |
— |
Id-Dikjarazzjoni mill-Membri tal-Kunsill Ewropew tat-30 ta' Jannar 2012 li tappella għal sforzi biex jiġu stimulati l-impjiegi, speċjalment għaż-żgħażagħ, inkluż billi jiġu promossi l-ewwel esperjenza ta' xogħol tagħhom u l-parteċipazzjoni tagħhom fis-suq tax-xogħol. |
JIRRIKONOXXU LI:
— |
l-Unjoni Ewropea qed tiffaċċja għadd konsiderabbli ta' sfidi, inklużi l-konsegwenzi ekonomiċi u soċjali tal-kriżi ekonomika u finanzjarja globali li jwasslu għal tkabbir u progress insuffiċjenti, qgħad għoli taż-żgħażagħ u opportunitajiet limitati għaż-żgħażagħ, kif ukoll nuqqas ta' inklużjoni soċjali u koeżjoni; |
— |
ir-rata ta' qgħad attwali taż-żgħażagħ fl-Ewropa li hija aktar minn 20 % hija d-doppju ta' dik għall-popolazzjoni fl-età tax-xogħol u x'aktarx ikollha implikazzjonijiet serji fil-perijodu qasir u fit-tul għaż-żgħażagħ milqutin, inklużi żgħażagħ bi ħtiġijiet addizzjonali jew speċifiċi jew b'anqas opportunijiet li jistgħu jkollhom kwalifiki limitati; |
— |
hemm domanda li qed tikber għal kreattività, innovazzjoni, adattabbiltà u ħiliet ta' komunikazzjoni avvanzati fis-suq tax-xogħol u fil-ħajja soċjali kif ukoll ħtieġa li jiġu żviluppati l-ħiliet intraprenditorjali; |
— |
il-parteċipazzjoni taż-żgħażagħ fi proċessi demokratiċi formali bħal elezzjonijiet hija spiss aktar baxxa minn dik tal-popolazzjoni inġenerali. |
JIKKUNSIDRAW LI:
— |
l-potenzjal kreattiv u innovatti taż-żgħażagħ permezz tal-intraprenditorjat huwa wieħed mill-elementi kruċjali għall-ksib ta' tkabbir intelliġenti, sostenibbli u inkużiv; |
— |
l-edukazzjoni intraprenditorjali tista' tinkoraġġixxi liż-żgħażagħ ikollhom attitudni aktar pożittiva lejn l-edukazzjoni, ikollhom ambizzjonijiet ogħla għall-edukazzjoni u l-karriera futuri tagħhom, iħossu li huma jistgħu jikkontribwixxu għas-soċjetà u jkollhom prospetti aktar ottimisti dwar il-futur; |
— |
l-involviment attiv taż-żgħażagħ fis-soċjetà, pereżempju permezz ta' ħidma fil-qasam taż-żgħażagħ, attivitajiet volontarji u organizzazzjonijiet ċiviċi jista' jisfrutta l-kreattività u l-kapaċità innovattiva tagħhom u b'hekk iċ-ċittadinanza attiva tagħhom u jżid il-prospetti tagħhom għas-suq tax-xogħol u għall-ħolqien ta' opportunitajiet ta' impjieg indipendenti; |
— |
it-tagħlim mhux formali u informali, kif ukoll l-edukazzjoni u t-taħriġ formali huma indispensabbli għall-iżvilupp ta' kompetenzi u ħiliet għall-impjegabbiltà, għall-ksib ta' inklużjoni aħjar taż-żgħażagħ fis-suq tax-xogħol u fis-soċjetà inġenerali; |
— |
il-ħidma fil-qasam taż-żgħażagħ u l-organizzazzjonijiet taż-żgħażagħ huma mezz għall-iżvilupp tal-ħiliet u l-kompetenzi taż-żgħażagħ, inkluż taż-żgħażagħ b'anqas opportunitajiet; |
— |
il-kisba ta' kompetenzi kulturali hija fundamentali għall-iżvilupp tal-kapital intellettwali taż-żgħażagħ u tippromwovi l-formazzjoni tal-kreattività tagħhom u l-kapaċità tagħhom ta' innovazzjoni; |
— |
l-użu kreattiv taż-żgħażagħ tal-media soċjali għandu jiġi stimulat aktar, flimkien ma' sforzi biex isaħħu l-abbiltà tagħhom li jaċċessaw il-media u li jifhmu, jevalwaw b'mod kritiku, joħolqu u jikkomunikaw il-kontenut tal-media, bil-għan li jsaħħu l-parteċipazzjoni tagħhom fis-soċjetà inġenerali, inkluż il-bini ta' kapital soċjali permezz tal-possibbiltà li l-komunitajiet u l-individwi jikkomunikaw online u fl-istess ħin is-soċjetà tibbenefika mill-kompetenzi u l-ħiliet tagħhom. |
JAQBLU LI:
— |
il-parteċipazzjoni taż-żgħażagħ fis-suq tax-xogħol hija essenzjali biex wieħed jibbenefika mill-potenzjal kreattiv u innovattiv tagħhom kif ukoll biex jiġu żgurati ċittadinanza attiva u inklużjoni soċjali; |
— |
il-kreattività, il-kapaċità innovattiva u l-ħiliet intraprenditorjali taż-żgħażagħ bħala għodod għall-parteċipazzjoni attiva fis-soċjetà, u żieda tal-impjegabbiltà għandhom jiġu promossi, permezz ta' finanzjament adattat u bl-iżvilupp ta' sħubijiet bejn is-setturi rilevanti li għandhom l-għan li jistimulaw l-innovazzjoni; |
— |
il-kompetenzi u l-ħiliet miksuba permezz ta' tagħlim mhux formali u informali għandhom jiġu promossi aħjar u preferibbilment jiġu vvalidati sabiex jissaħħu l-kapaċitajiet taż-żgħażagħ u r-rwol futur tagħhom fis-suq tax-xogħol eż. bħala impjegati jew intraprendituri; |
— |
l-inizjattivi taż-żgħażagħ - kif attwalment appoġġati mill-Programm Żgħażagħ fl-Azzjoni - huma strument importanti biex jispiraw u jappoġġaw intraprenditorjat kreattiv taż-żgħażagħ. |
JISTIEDNU LILL-ISTATI MEMBRI BIEX:
(1) |
jappoġġaw il-kreattività, il-kapaċità innovattiva u t-talent taż-żgħażagħ bil-għan li jiżguraw opportunitajiet suffiċjenti għall-iżvilupp personali u soċjali permezz ta' tagħlim mhux formali u informali, l-attivitajiet volontarji, iċ-ċittadinanza attiva, il-kooperazzjoni interkulturali u l-ħidma fil-qasam taż-żgħażagħ, pereżempju bl-iżgurar ta' finanzjament adatt u sostenibbli fejn possibbli; |
(2) |
jistimulaw is-sħubijiet strateġiċi bejn l-organizzazzjonijiet taż-żgħażagħ, l-awtoritajiet fil-livell lokali, reġjonali u dak nazzjonali kif ukoll is-settur privat biex jorganizzaw proġetti u avvenimenti mmexxijin miż-żgħażagħ; |
(3) |
jiffaċilitaw u jtejbu r-rikonoxximent u l-validazzjoni tat-tagħlim mhux formali u informali; |
(4) |
jinkoraġġixxu inizjattivi biex jippromwovu l-koproprjetà maż-żgħażagħ dwar kwistjonijiet relatati maż-żgħażagħ permezz ta' djalogu fejn l-atturi kollha jistgħu jesprimu ideat biex jinvolvu liż-żgħażagħ fi proċeduri demokratiċi ta' teħid ta' deċiżjonijiet fil-livelli kollha; |
(5) |
jippromwovu u jxerrdu informazzjoni dwar il-kreattività, il-kapaċità innovattiva u t-talent taż-żgħażagħ permezz ta' skambju tal-aħjar prattika. |
JISTIEDNU LILL-ISTATI MEMBRI U LILL-KUMMISSJONI BIEX:
(1) |
jistabbilixxu grupp tematiku ta' esperti bil-parteċipazzjoni ta' esperti nazzjonali maħturin mill-Istati Membri skont il-prinċipju tal-metodu miftuħ ta' koordinazzjoni u f'konformità mal-prinċipji stabbiliti fl-Anness bl-objettiv li ġej:
|
(2) |
jindirizzaw il-kreattività u l-kapaċità innovattiva taż-żgħażagħ kif ukoll iċ-ċittadinanza attiva u l-inklużjoni soċjali tagħhom permezz tal-prijoritajiet tal-Programm Żgħażagħ fl-Azzjoni u, mingħajr preġudizzju għan-negozjati li għaddejjin, possibbilment programmi u fondi eżistenti u futuri oħra tal-UE, inkluż il-Fond Soċjali Ewropew; |
(3) |
jikkunsidraw iniedu riċerka dwar l-użu tal-media fir-rigward tal-parteċipazzjoni demokratika fil-livell nazzjonali u Ewropew sabiex jappoġġaw żieda fil-parteċipazzjoni demokratika permezz ta' komunikazzjoni mfassla apposta, favorevoli għaż-żgħażagħ u trasparenti; |
(4) |
jagħmlu l-aħjar użu mis-Sena Ewropea taċ-Ċittadini 2013 (1) bil-ħsieb li ssir enfasi fuq il-mobbiltà libera u l-parteċipazzjoni sħiħa taż-żgħażagħ fis-soċjetà Ewropea; u jsaħħu l-għarfien tad-drittijiet u r-responsabbiltajiet tagħhom bħala ċittadini tal-UE, il-koeżjoni u l-fehim reċiproku ta' xulxin. |
JISTIEDNU LILL-KUMMISSJONI BIEX:
(1) |
tirrapporta lura lill-Grupp ta' Ħidma dwar iż-Żgħażagħ dwar ir-riżultati ta' dan il-grupp tematiku ta' esperti l-aktar tard sa tmiem l-2013; |
(2) |
ixxerred ir-riżultati tal-istudju li se jsir dwar “Il-parteċipazzjoni taż-żgħażagħ fil-Ħajja Demokratika fl-Ewropa”, b'fokus speċjali fuq l-implikazzjonijiet possibbli tiegħu għall-impjegabbiltà taż-żgħażagħ; |
(3) |
jagħmlu proposta għal Rakkomandazzjoni tal-Kunsill dwar il-validazzjoni tat-tagħlim mhux formali u informali kif imħabbar fl-inizjattivi ewlenin tal-Ewropa 2020 “Żgħażagħ Attivi” u “Aġenda għal ħiliet u impjiegi ġodda”. |
(1) Soġġett għall-adozzjoni formali tal-proposta għal Deċiżjoni tal-Parlament Ewropew u tal-Kunsill dwar is-Sena Ewropea taċ-Ċittadini (2013), dok. 13478/11.
ANNESS
Prinċipji relatati mas-sħubija u l-funzjonament tal-grupp tematiku ta' esperti stabbilit mill-Istati Membri u l-Kummissjoni
Sħubija
— |
Il-parteċipazzjoni tal-Istati Membri fil-ħidma tal-grupp hija volontarja u l-Istati Membri jistgħu jissieħbu fiha fi x'ħin iridu. |
— |
L-Istati Membri interessati li jipparteċipaw fil-ħidma tal-grupp tematiku ta' esperti ser jiżguraw li l-esperti nnominati jkollhom esperjenza rilevanti fil-livell nazzjonali u ser jiżguraw komunikazzjoni effettiva mal-awtoritajiet nazzjonali kompetenti. Il-Kummissjoni ser tikkoordina l-eżerċizzju tan-nominazzjoni. |
— |
Il-grupp tematiku ta' esperti jista' jiddeċiedi li jistieden parteċipanti oħrajn: esperti indipendenti, partijiet interessati u rappreżentanti tal-pajjiżi terzi Ewropej. |
Proċeduri ta' ħidma
— |
Il-grupp tematiku ta' esperti ser ikun responsabbli li jaħtar il-president jew il-kopresidenti tiegħu fl-ewwel laqgħa tal-grupp ta' esperti. Huwa ser iħejji wkoll skeda ta' ħidma bil-ħsieb li jinkisbu riżultati konkreti u utli dwar is-suġġett mitlub. |
— |
Il-Kummissjoni ser tipprovdi tagħrif espert, kif ukoll appoġġ loġistiku u segretarjali għall-ħidma tal-grupp tematiku ta' esperti. Sakemm ikun possibbli, hija ser tappoġġa lill-grupp b'mezzi adatti oħrajn. |
— |
Il-grupp tematiku ta' esperti ser jiltaqa' fi Brussell bħala regola ewlenija, iżda jista' jorganizza laqgħat barra Brussell meta mistieden minn Stat Membru. |
15.6.2012 |
MT |
Il-Ġurnal Uffiċjali tal-Unjoni Ewropea |
C 169/5 |
Konklużjonijiet tal-Kunsill tal-10 ta' Mejju 2012 dwar id-diġitalizzazzjoni u l-aċċessibbiltà fuq l-internet ta' materjal kulturali u l-konservazzjoni diġitali
2012/C 169/02
IL-KUNSILL TAL-UNJONI EWROPEA,
FILWAQT LI JQIS LI:
— |
Id-diġitalizzazzjoni u l-aċċessibbiltà fuq l-internet tal-materjal kulturali tal-Istati Membri u l-konservazzjoni diġitali fit-tul tiegħu huma essenzjali biex jagħtu l-aċċess lil kulħadd għall-kultura u l-għarfien fl-era diġitali u biex jippromwovu r-rikkezza u d-diversità tal-wirt kulturali Ewropew. |
— |
Il-materjal kulturali diġitalizzat huwa riżorsa importanti għall-industriji kulturali u kreattivi Ewropej (1). Id-diġitalizzazzjoni u l-aċċessibbiltà fuq l-internet tal-wirt kulturali tal-Istati Membri, meqjusa f'kuntest nazzjonali kif ukoll transkonfinali, jikkontribwixxu għat-tkabbir ekonomiku u l-ħolqien tal-impjiegi u għal kisba tas-suq uniku diġitali permezz ta' offerta dejjem tikber ta' prodotti u servizzi ġodda u innovattivi fuq l-internet. |
— |
Hija meħtieġa azzjoni kkoordinata fil-livell tal-Unjoni biex jinħolqu sinerġiji bejn sforzi nazzjonali u biex jiġi żgurat li l-aċċessibbiltà fuq l-internet tal-wirt kulturali tal-Ewropa tilħaq massa kritika. |
— |
Il-kuntest għall-isforzi ta' diġitalizzazzjoni u għall-kollaborazzjoni fil-livell Ewropew inbidel minn meta l-Kunsill adotta fl-2006 l-konklużjonijiet dwar id-diġitalizzazzjoni u l-aċċessibbiltà fuq l-internet ta' materjal kulturali u l-konservazzjoni diġitali (2). Fl-2008 tnediet Europeana bħala punt ta' aċċess multilingwi komuni għall-wirt kulturali diġitali tal-Ewropa u l-aġenda għall-iżvilupp ulterjuri tagħha ġiet stabbilita fl-2010 fil-konklużjonijiet tal-Kunsill dwar “Europeana: il-passi li jmiss” (3); |
1. JILQA'
— |
ir-Rakkomandazzjoni tal-Kummissjoni tas-27 ta’ Ottubru 2011 dwar id-diġitalizzazzjoni u l-aċċessibbiltà fuq l-internet ta’ materjal kulturali u l-konservazzjoni diġitali (4) (2011/711/UE) bħala parti mill-Aġenda Diġitali għall-Ewropa (5); |
2. JIRRIKONOXXI
— |
l-isforzi li għaddejjin fl-Istati Membri biex il-materjal tal-istituzzjonijiet kulturali jiġi ddiġitalizzat u jsir disponibbli fuq l-internet, kif ukoll l-isforzi biex jiġi pprovdut finanzjament għad-diġitalizzazzjoni fi żmien ta' kriżi ekonomika; |
— |
il-ħidma ta' valur imwettqa mill-Europeana, mill-istituzzjonijiet tal-Istati Membri u l-aggregaturi nazzjonali li jikkontribwixxu għall-Europeana f'termini ta' kontenut u koordinazzjoni; |
— |
li għalkemm sar progress fid-diġitalizzazzjoni tal-wirt kulturali tal-Ewropa, huma meħtieġa aktar passi biex dan il-wirt jiġi ttrasformat f'assi dejjiemi għaċ-ċittadini u l-ekonomija tal-Ewropa fl-era diġitali; |
3. JISSOTTOLINJA
— |
il-ħtieġa li tinħareġ ir-rikezza tal-wirt kulturali Ewropew fl-ambjent tal-internet u li jiġi promoss il-ħolqien ta' kontenut u servizzi ġodda fuq l-internet bħala parti mis-soċjetà tal-informazzjoni u l-ekonomiija tal-għarfien; |
— |
l-importanza kruċjali li tiġi żgurata l-vijabbiltà fit-tul tal-Europeana, inkluż f'termini ta' governanza u finanzjament, u l-ħtieġa li tiġi żviluppata aktar bħala punt ta' aċċess multilingwi komuni għall-wirt kulturali diġitali tal-Ewropa u riżorsa siewja għall-industriji kreattivi, b'mod partikolari bit-titjib fil-kwalità u l-varjetà tal-materjal kulturali diġitalizzat mill-kategoriji kollha (testi, materjal awdjoviżiv, oġġetti tal-mużewijiet, reġistri tal-arkivji eċċ.); |
— |
il-ħtieġa għal sforz konġunt mill-Istati Membri u l-Kummissjoni għall-promozzjoni tal-istandards tal-kwalità u dawk tekniċi għall-kontenut li jitpoġġa fl-Europeana; |
— |
il-ħtieġa li titkompla l-ħidma fuq standards tekniċi għad-diġitalizzazzjoni u l-metadata, inkluż permezz tal-qafas tal-Europeana, kemm għall-benefiċċju tal-aċċessibiltà kif ukoll tal-konservazzjoni fit-tul ta' materjal diġitali; |
— |
il-viżjoni sottostanti ta' ħidma mas-sħab rilevanti kollha biex jiġi evitat “vojt iswed tas-seklu 20” fil-materjal disponibbli permezz tal-Europeana, u l-ħtieġa li aktar materjal li għadu mħares mid-drittijiet tal-awtur isir disponibbli fuq is-sit; |
— |
il-ħtieġa għall-promozzjoni attiva ta' ftehimiet volontarji (6) għad-diġitalizzazzjoni fuq skala kbira u l-aċċessibilità fuq l-internet ta' xogħlijiet li ma għadhomx fis-suq u li jittieħdu l-miżuri meħtieġa biex jipprovdu għaċ-ċertezza legali meħtieġa f'kuntest nazzjonali u transkonfinali; |
— |
li d-diġitalizzazzjoni u l-aċċessibbiltà fuq l-internet tal-wirt kulturali tal-Ewropa għandhom jitwettqu b'rispett sħiħ għad-drittijiet tal-proprjetà intellettwali; |
4. JIEĦU NOTA TA'
— |
ir-rapport “The New Renaissance” (7) mill-Grupp ta' riflessjoni (“Comité des Sages”) dwar it-tqegħid fuq l-internet tal-wirt kulturali tal-Ewropa, u tal-proposta leġislattiva reċenti tal-Kummissjoni dwar infrastrutturi tas-servizzi diġitali, inkluż dwar il-finanzjament ta' Europeana, bħala parti mill-Faċilità Nikkollegaw l-Ewropa (8), kif ukoll il-proposti dwar xogħlijiet orfni (9) u l-użu mill-ġdid tal-informazzjoni tas-settur pubbliku (10); |
5. JISTIEDEN LILL-ISTATI MEMBRI BIEX
— |
jieħdu l-passi meħtieġa f'konformità mal-prijoritajiet deskritti fl-Anness sabiex:
waqt li jieħdu kont tal-livelli differenti ta' progress dwar, u l-approċċi lejn, id-diġitalizzazzjoni kif ukoll l-isforzi ġenerali ta' konsolidazzjoni fiskali li qed isiru fl-Istati Membri; |
6. JISTIEDEN LILL-KUMMISSJONI BIEX
— |
tkompli tappoġġa l-Europeana bħala punt ta' aċċess multilingwi komuni għall-wirt kulturali diġitali tal-Ewropa f'konformità mal-konklużjonijiet tal-Kunsill tal-2010 dwar l-Europeana: |
— |
tiġbor, tanalizza u xxerred ir-riżultati u l-esperjenzi miksuba f'livell nazzjonali u ta' Unjoni; kull sentejn tippreżenta fuq din il-bażi rapport dwar il-progress dwar id-diġitalizzazzjoni, l-aċċessibbiltà fuq l-internet u l-konservazzjoni diġitali; |
— |
tappoġġa l-iskambju ta' informazzjoni u prattiki tajba inkluż dwar sħubijiet pubbliku-privat u standards għad-diġitalizzazzjoni; |
7. JISTIEDEN LILL-ISTATI MEMBRI, LILL-KUMMISSJONI U LILL-EUROPEANA, FIL-QAFAS TAL-KOMPETENZI RISPETTIVI TAGĦHOM, BIEX
— |
ikomplu, f'konformità mal-konklużjonijiet tal-Kunsill tal-2010 dwar Europeana, il-ħidma fuq il-pjan direzzjonali dwar il-kontenut għal Europeana, inkluż il-kapulavuri tal-wirt kulturali tal-Ewropa kif magħżulin fl-Istati Membri individwali; |
— |
joħloqu għarfien dwar l-Europeana fost il-pubbliku ġenerali; |
— |
jippromwovu l-użu ta' materjal aċċessibbli permezz ta' Europeana u metadata relatata għal finijiet innovattivi b'rispett sħiħ għad-drittijiet tal-proprjetà intellettwali; |
— |
ikomplu jiżviluppaw l-Europeana bħala punt ta' aċċess li jista' jintuża faċilment; |
— |
jagħmlu progress konkret fid-diskussjonijiet dwar l-istruttura ta' governanza ta' Europeana. |
(1) Skont ir-Rapport tal-2010 dwar il-Kompetittività tal-Ewropa, l-industriji kreattivi jammontaw għal 3,3 % tal-PDG tal-UE u 3 % tal-impjiegi fl-UE.
(2) ĠU C 297, 7.12.2006, p. 1.
(3) ĠU C 137, 27.5.2010, p. 19.
(4) ĠU L 283, 29.10.2011, p. 39.
(5) COM(2010) 245 final/2.
(6) Fl-20 ta' Settembru 2011, Memorandum ta' Ftehim dwar il-Prinċipji Ewlenin dwar id-Diġitalizzazzjoni u d-Disponibbiltà ta' Xogħlijiet li ma għadhomx fis-Suq ġie ffirmat fi Brussell minn rappreżentanti ta' partijiet interessati, b'segwitu ta' djalogu għall-partijiet interessati sponsorjat mill-Kummissjoni.
(7) http://ec.europa.eu/information_society/activities/digital_libraries/comite_des_sages/index_en.htm
(8) COM(2011) 665 final/3.
(9) COM(2011) 289 final.
(10) COM(2011) 877 final.
ANNESS
Azzjonijiet ta' prijorità u skeda indikattiva
L-iskeda ssuġġerita ta' attivitajiet u objettivi hija pjan direzzjonali indikattiv għall-ħidma tal-Istati Membri fis-snin 2012-15.
1. |
Jikkonsolidaw l-istrateġiji u l-miri tagħhom għad-diġitalizzazzjoni ta' materjal kulturali billi: |
2. |
Jikkonsolidaw l-organizzazzjoni tad-diġitalizzazzjoni u l-provvediment tal-finanzjament għad-diġitalizzazzjoni, inkluż permezz tal-promozzjoni tal-użu ta' sħubijiet pubbliku-privat billi: |
3. |
Itejbu l-kundizzjonijiet qafas għall-aċċessibbiltà fuq l-internet u l-użu ta' materjal kulturali billi; |
4. |
Jikkontribwixxu għall-iżvilupp ulterjuri tal-Europeana billi: |
5. |
Jiżguraw il-konservazzjoni diġitali billi: |
(1) Dawn il-konklużjonijiet ma jippreġudikawx in-negozjati tal-Qafas Finanzjarju Pluriennali li jmiss.
15.6.2012 |
MT |
Il-Ġurnal Uffiċjali tal-Unjoni Ewropea |
C 169/9 |
Konklużjonijiet tal-Kunsill u tar-Rappreżentanti tal-Gvernijiet tal-Istati Membri, imlaqqgħin fi ħdan il-Kunsill, tal-10 ta' Mejju 2012 dwar il-ġlieda kontra d-doping fl-isport rikreattiv
2012/C 169/03
IL-KUNSILL TAL-UNJONI EWROPEA U R-RAPPREŻENTANTI TAL-GVERNIJIET TAL-ISTATI MEMBRI,
1. WAQT LI JFAKKRU:
1. |
fil-Pjan ta’ Ħidma tal-Unjoni Ewropea għall-Isport għall-2011-2014 (1), adottat fl-20 ta’ Mejju 2011, li enfasizza l-ġlieda kontra d-doping bħala tema ta’ prijorità u li stabbilixxa Grupp ta’ Esperti dwar l-antidoping, |
2. |
fil-White Paper tal-Kummissjoni dwar l-Isport tal-11 ta’ Lulju 2007 (2) li appellat lill-atturi kollha b’responsabbiltà għas-saħħa pubblika biex iqisu l-aspetti tar-riskju tad-doping, u l-Komunikazzjoni tal-Kummissjoni tat-18 ta’ Jannar 2011 dwar l-Iżvilupp tad-Dimensjoni Ewropea fl-Isport (3), li ddikjarat li d-doping jibqa’ theddida importanti għall-isport u li l-użu ta’ sustanzi tad-doping minn atleti dilettanti joħloq perikoli serji għas-saħħa pubblika u tappella għal azzjoni preventiva, inkluż fiċ-ċentri tas-saħħa fiżika, |
3. |
li l-azzjoni tal-Unjoni Ewropea fil-qasam tal-isport għandha tkun fil-mira, fost l-oħrajn, waqt li tiġi protetta l-integrità fiżika u morali tal-atleti nisa u rġiel, speċjalment l-iżgħar fosthom, |
2. WAQT LI JIKKUNSIDRAW LI:
1. |
Id-doping fl-isport rikreattiv u f’ambjenti tal-isport rikreattiv bħaċ-ċentri tas-saħħa fiżika, huwa problema importanti fl-Istati Membri kollha tal-UE li:
|
2. |
L-għarfien tad-doping fl-isport rikreattiv, li jinkludi l-ambitu u d-daqs tal-problema u miżuri effettivi tal-prevenzjoni, l-edukazzjoni, il-kontroll, is-sanzjonar u l-irkupru mill-abbuż ta’ sustanzi, huwa limitat kemm f’livell tal-UE kif ukoll f’livell internazzjonali, (4) |
3. |
Filwaqt li l-kooperazzjoni internazzjonali fir-rigward tal-ġlieda kontra d-doping fl-isports tal-elite hija żviluppata sew, il-kooperazzjoni fir-rigward tal-ġlieda kontra d-doping fl-isport rikreattiv, bejn l-Istati Membri tal-UE kif ukoll internazzjonalment, s’issa kienet limitata, |
4. |
Il-ġlieda kontra d-doping fl-isport rikreattiv m’għandhiex tiddevja l-attenzjoni mill- ġlieda kontra d-doping fl-isports tal-elite, iżda pjuttost tissupplimenta l-isforzi għall-iżgurar ta’ ambjenti sportivi nodfa u siguri fil-livelli kollha, |
5. |
Filwaqt li l-motiv ewlieni għall-użu tad-doping fl-isport tal-elite huwa t-tisħiħ tal-prestazzjoni, l-istudji juru li l-utenti tad-doping fl-isports rikreattiv għandhom ukoll firxa ta’ motivi oħrajn, inklużi l-estetika, il-bini tal-fiduċja fihom infushom u li l-esperjenzar tal-ewforija mill-użu ta’ sustanzi tad-doping, u l-problema tad-doping fl-isport rikreattiv għandhom għaldaqstant jinftehmu u jiġu ttrattati, |
6. |
Filwaqt li l-Kodiċi Dinji Kontra d-Doping (il-Kodiċi) jiffoka fuq il-ġlieda kontra d-doping fl-isports tal-elite internazzjonali u nazzjonali, il-Kodiċi jiddikjara wkoll li xi Organizzazzjonijiet Nazzjonali Kontra d-Doping (NADOs) jistgħu jagħżlu li jittestjaw u japplikaw regoli kontra d-doping għal-livell rikreattiv jew il-kompetituri ewlenin, iżda li l-NADOs mhumiex meħtieġa li japplikaw l-aspetti kollha tal-kodiċi għal tali persuni u minflok jistgħu jistabbilixxu regoli nazzjonali speċifiċi għall-kontroll tad-doping għal kompetituti tal-livell mhux internazzjonali jew tal-livell mhux nazzjonali mingħajr ma jkunu f’konflitt mal-Kodiċi (5), |
3. JAPPELLAW LILL-ISTATI MEMBRI TAL-UE BIEX:
1. |
Jinkoraġġixxu u jikkontribwixxu għall-iżvilupp ta’ programmi edukattivi, kampanji ta’ informazzjoni jew miżuri preventivi oħra rigward id-doping fl-isport rikreattiv u kwistjonijiet relatati li jistgħu jiġu applikati mill-movimenti sportivi, mis-settur tas-saħħa fiżika, u mis-sistema edukattiva u s-settur tas-saħħa, |
2. |
Jippromwovu kooperazzjoni mill-qrib bejn l-awtoritajiet pubbliċi, il-moviment sportiv u s-settur tas-saħħa fiżika, pereżempju permezz tal-iskambju ta’ informazzjoni dwar il-prevalenza u l-prevenzjoni u permezz tal-iżvilupp ta’ proġetti konġunti, linji gwida u regolamenti fil-ġlieda kontra d-doping fl-isport rikreattiv, |
3. |
Jinkoraġġixxu kondiviżjoni tal-informazzjoni u kooperazzjoni adegwata u effettiva bejn l-awtoritajiet nazzjonali u internazzjonali li jittrattaw aspetti tal-problemi ta’ doping fl-isport rikreattiv u tal-investigazzjoni u s-sanzjonar ta’ bejgħ illegali u ta’ traffikar ta’ sustanzi tad-doping, inklużi l-awtoritajiet responsabbli għall-isport, l-antidoping, is-saħħa, l-edukazzjoni u l-awtoritajiet tal-pulizija u d-dwana, |
4. |
Jippromwovu qafas ta’ miżuri nazzjonali effettivi u adatti għall-investigazzjoni u s-sanzjonar tal-produzzjoni, it-traffikar, id-distribuzzjoni u l-pussess ta’ sustanzi tad-doping fl-isport rikreattiv sabiex jirrestrinġu d-disponibbiltà u l-użu ta’ tali sustanzi, pereżempju permezz ta’ miżuri ta’ kontroll u miżuri relatati f’ambjenti rilevanti tal-isport rikreattiv bħaċ-ċentri tas-saħħa fiżika, |
5. |
Jappoġġaw l-isforzi tal-WADA biex jiżviluppaw oqfsa effettivi ta’ kooperazzjoni mal- Europol, l-Interpol, l-Organizzazzjoni Dinjija Doganali, l-industrija farmaċewtika, u partijiet interessati internazzjonali rilevanti oħra sabiex jirrestrinġu d-disponibbiltà ta’ sustanzi tad-doping li jistgħu jintużaw kemm fl-isports tal-elite kif ukoll f’dak rikreattiv, |
4. JAQBLU LI:
Jestendu l-mandat tal-Grupp ta’ Esperti dwar l-Antidoping stabbilit taħt il-Pjan ta’ Ħidma tal-UE għall-Isport 2011-2014 biż-żieda, filwaqt li jenfasizzaw li għandha tingħata prijorità lill-azzjonijiet deskritti fil-Pjan ta’ Ħidma relatati mal-kontribut tal-UE għall-proċess ta’ reviżjoni tal-Kodiċi Dinji dwar l-Antidoping, tal-azzjoni li ġejja: Biex jiġbru, inkluż permezz ta’ kooperazzjoni mal-partijiet interessati rilevanti, l-aħjar prattiki fil-ġlieda kontra d-doping fl-isport rikreattiv fl-Istati Membri tal-UE, fost oħrajn fir-rigward tal-prevenzjoni, l-edukazzjoni, il-kontroll u miżuri relatati kif ukoll l-irkupru mill-abbuż ta; sustanzi, u abbażi ta’ dan, sal-aħħar tal-2013, biex jippreżentaw sett ta’ rakkomandazzjonijiet dwar il-ġlieda kontra d-doping fl-isport rikreattiv kemm fil-livell tal-UE kif ukoll fil-livell nazzjonali.
5. JISTIEDNU LILL-KUMMISSJONI EWROPEA BIEX:
1. |
Abbażi tal-ħidma preċedenti f’dan il-qasam tibda studju bl-għan li tiżviluppa l-bażi tal-evidenza għal politiki maħsubin għall-ġlieda kontra d-doping fl-isport rikreattiv, inkluż permezz tal-ġbir tal-informazzjoni dwar l-użu ta’ sustanzi tad-doping fl-isport rikreattiv fl-Istati Membri tal-UE, |
2. |
Tippromwovi u tappoġġa l-kondiviżjoni tal-aħjar prattiki fl-UE rigward il-ġlieda kontra d-doping fl-isport rikreattiv, fost l-oħrajn permezz tal-appoġġ għall-kampanji ta’ għarfien pubbliku transnazzjonali u d-disseminazzjoni tar-riżultati tal-proġetti rigward il-ġlieda kontra d-doping appoġġata permezz tal-Azzjonijiet Preparatorji fil-qasam tal-isport kif ukoll ir-riżultati ta’ kwalunkwe proġett rigward id-doping fl-isport rikreattiv li għandhom jiġu appoġġati fil-futur, partikolarment fir-rigward ta’: Il-kondiviżjoni tal-aħjar prattiki tista’ tkun dwar:
|
(2) dok. 11811/07.
(3) dok. 5597/11.
(4) Fost studji aktar reċenti dwar is-suġġett hemm il-proġetti tan-netwerk rigward id-doping fl-isport rikreattiv ikkofinanzjati permezz tal-Azzjonijiet Preparatorji 2010 fil-qasam tal-isport, “Saħħa Fiżika Kontra d-Doping” u “Strateġija biex Jitwaqqfu l-Isterojdi”.
(5) Kodiċi Dinji Kontra d-Doping, Aġenzija Dinjija Kontra d-Doping, 2009, p. 126 (Appendiċi I, Definizzjonijiet, Atleta).
15.6.2012 |
MT |
Il-Ġurnal Uffiċjali tal-Unjoni Ewropea |
C 169/11 |
Konklużjonijiet tal-Kunsill tal-11 ta' Mejju 2012 dwar il-kapaċità għall-impjieg tal-persuni ggradwati mill-edukazzjoni u t-taħriġ
2012/C 169/04
IL-KUNSILL TAL-UNJONI EWROPEA,
WARA LI JIKKUNSIDRA:
— |
Il-konklużjonijiet tal-Kunsill tat-12 ta' Mejju 2009 dwar qafas strateġiku għal kooperazzjoni Ewropea fl-edukazzjoni u t-taħriġ (“ET 2020”) (1), li minħabba l-importanza li titjieb il-kapaċità għall-impjieg permezz tal-edukazzjoni u t-taħriġ sabiex jintlaħqu l-isfidi attwali u futuri tas-suq tax-xogħol stiednu lill-Kummissjoni tippreżenta proposta għal punt ta' riferiment Ewropew possibbli f'dan il-qasam. |
— |
Il-konklużjonijiet tal-Kunsill u tar-Rappreżentanti tal-Gvernijiet tal-Istati Membri, imlaqqgħin fil-Kunsill, tat-18 ta' Novembru 2010 dwar il-prijoritajiet għall-kooperazzjoni Ewropea msaħħa fil-qasam tal-edukazzjoni u t-taħriġ vokazzjonali għall-perijodu 2011-2020 (2), li enfasizzaw li l-pajjiżi għandhom jippromwovu sħubiji bejn dawk li joffru l-edukazzjoni u t-taħriġ, sħab soċjali u partijiet interessati rilevanti oħrajn sabiex jiġi żgurat trasferiment aħjar ta' informazzjoni dwar il-ħtiġijiet tas-suq tax-xogħol u biex jiġi pprovdut tlaqqigħ aħjar bejn dawk il-ħtiġijiet u l-iżvilupp tal-għarfien, ħiliet u kompetenzi. |
— |
Il-konklużjonijiet tal-Kunsill tal-14 ta' Frar 2011 dwar ir-rwol tal-edukazzjoni u t-taħriġ fl-implimentazzjoni tal-Istrateġija Ewropa 2020 (3), li enfasizzaw l-importanza għaż-żieda fl-impjegabbiltà tat- tranżizzjoni lejn sistemi ta' kwalifiki bbażati fuq ir-riżultati tat-tagħlim u validazzjoni akbar ta' ħiliet u kompetenzi miksuba f'kuntesti mhux formali u informali. |
— |
L-inizjattiva ewlenija ta' Ewropa 2020 “Aġenda għall-ħiliet ġodda u l-impjiegi: Kontribut Ewropew lejn livell massimu ta' impjiegi” , li hija mmirata biex iżżid il-prestazzjoni tal-edukazzjoni u s-sistemi ta' taħriġ u biex iż-żgħażagħ ikomplu jiġu attrezzati bil-ħiliet u kompetenzi rilevanti għall-ħtiġijiet tas-suq tax-xogħol. |
— |
Il-konklużjonijiet tal-Kunsill tas-17 ta' Ġunju 2011 dwar il-promozzjoni tal-impjiegi taż-żgħażagħ għall-kisba tal-objettivi ta' Ewropa 2020 (4), li enfasizzaw li l-Fond Soċjali Ewropew għandu rwol importanti fit-titjib tal-prospetti ta' impjieg u l-livelli tal-ħiliet ta' żgħażagħ u l-linji ta' politika implimentattivi fil-livell nazzjonali, reġjonali u lokali sabiex jikber l-aċċess għas-suq tax-xogħol u l-impjegabbiltà taż-żgħażagħ. |
— |
Il-Konklużjonijiet tal-Kunsill tat-28 ta' Novembru 2011 dwar l-immodernizzar tal-edukazzjoni għolja (5), li appellaw għal sforzi sabiex jissaħħu r-rabtiet bejn l-istituzzjonijiet tal-edukazzjoni għolja, min iħaddem u l-istituzzjonijiet tas-suq tax-xogħol sabiex jittieħed aktar kont tal-ħtiġijiet tas-suq tax-xogħol fil-programmi ta' studju, sabiex jitjieb it-tqabbil bejn il-ħiliet u l-impjiegi, u sabiex jiġu żviluppati politiki tas-suq tax-xogħol attivi bl-għan li jippromwovu l-impjieg tal-persuni ggradwati. |
— |
L-Istħarriġ Annwali dwar it-Tkabbir 2012 (6), li appella lill-Istati Membri biex b'mod partikolari jappoġġaw l-impjieg ta' żgħażagħ, inkluż billi jiġu promossi kuntratti ta’ kwalità ta’ apprendistati u ta’ taħriġ u billi s-sistemi tal-edukazzjoni u ta’ taħriġ jiġu adattati biex jirriflettu l-kondizzjonijiet tas-suq tax-xogħol u d-domanda ta’ ħiliet. |
— |
Id-Dikjarazzjoni tal-Membri tal-Kunsill Ewropew tat-30 ta' Jannar 2012 (7), li tappella għal sforzi biex jiġi stimolat l-impjieg, speċjalment għaż-żgħażagħ, inkluż billi tiġi promossa l-ewwel esperjenza tagħhom tax-xogħol u l-parteċipazzjoni tagħhom fis-suq tax-xogħol, bil-għan li jiġi żgurat li fi żmien ftit xhur minn meta joħorġu mill-iskola, iż-żgħażagħ jirċievu offerta ta' impjieg ta' kwalità tajba, edukazzjoni kontinwa, apprendistat, jew taħriġ għax-xogħol. |
FILWAQT LI JFAKKAR LI:
— |
Huwa essenzjali aktar minn qatt qabel li nagħtu s-setgħa liż-żgħażagħ Ewropej biex jiksbu l-għarfien, il-ħiliet u l-kompetenzi meħtieġa sabiex tiġi żgurata it-tranżizzjoni faċli lejn is-suq tax-xogħol u biex jiżviluppaw aktar il-prospetti tal-karriera tagħhom, hekk kif l-għadd ta' dawk iż-żgħażagħ li qed ifittxu impjieg jibqa' jiżdied b'rata mgħaġġla. |
— |
Il-kriżi ekonomika attwali tenfassizza l-importanza tat-tranżizzjoni mill-iskola għax-xogħol. Huwa kruċjali li ż-żgħażagħ joħorġu mill-iskola u t-taħriġ bl-aqwa appoġġ possibbli biex jiksbu l-ewwel impjieg tagħhom. Iż-żgħażagħ li jiffaċċjaw il-qgħad jew tranżizzjoni bil-mod jistgħu jesperjenzaw effetti negattivi fuq perijodu fit-tul f'termini ta' suċċess futur fis-suq tax-xogħol, ta' introjtu jew ta' bini ta' familja. Dan jista' min-naħa tiegħu jipperikola l-investiment pubbliku jew privat fl-edukazzjoni u t-taħriġ tagħhom, li jwassal f'telf għas-soċjetà b’mod ġenerali. Dan huwa partikolarment minnu fil-kuntest tal-isfidi demografiċi, li jagħmlu pressjoni akbar fuq iż-żgħażagħ Ewropej, li kull ma jmur qegħdin jonqsu fin-numru, biex jintegraw b'mod rapidu u effettiv fis-suq tax-xogħol. |
— |
Iż-żieda ta' punt ta' riferiment (8) dwar il-porzjon ta' persuni ggradwati impjegati (9) li jiffoka fuq it- tranżizzjoni mill-edukazzjoni u t-taħriġ lejn is-suq ta' xogħol tippermetti li jitwettqu skambji ta' politika fil-qafas “ET 2020” dwar il-miżuri biex tiżdied il-kapaċità għall-impjieg ta' persuni ggradwati. |
WAQT LI JQIS LI:
— |
Il-porzjon ta' persuni ggradwati impjegati - jiġifieri, il-porzjon tal-popolazzjoni impjegata ta' bejn 20 u 34 sena li ggradwa sena, sentejn jew tliet snin qabel is-sena ta' referenza u li mhux attwalment irreġistrat f'xi attività ta' edukazzjoni jew taħriġ avvanzat – naqas bi kważi 4,5 punti perċentwali bejn l-2008 (81 %) u l-2010 (76,5 %). |
— |
Diġà hija disponibbli biżżejjed data li tippermetti l-monitoraġġ tal-kapaċità għall-impjieg tal-persuni ggradwati mill-edukazzjoni u t-taħriġ, mingħajr ma jinħolqu piżijiet u spejjeż amministrattivi addizzjonali għall-Istati Membri jew għall-Eurostat (10). |
JIRRIKONOXXI LI:
— |
Il-kapaċità għall-impjieg – jiġifieri, it-tgħaqqid ta' fatturi li jippermettu li l-individwi jagħmlu progress lejn jew jidħlu fl-impjieg, jibqgħu fl-impjieg u jagħmlu progress matul il-karriera tagħhom – huwa kunċett kumpless, li jinvolvi mhux biss il-karatteristiċi, il-ħiliet, l-attitudnijiet u l-motivazzjoni ta' kull individwu, iżda wkoll fatturi oħra esterni li jaqgħu lil hinn mill-ambitu tal-politika dwar l-edukazzjoni u t-taħriġ, bħal ma huma regolamenti tas-suq tax-xogħol, id-demografija, l-istruttura tal-ekonomija u s-sitwazzjoni ekonomika ġenerali. |
— |
It-tisħiħ tal-kapaċità għall-impjieg huwa ta' interess għal-linji ta' politika għall-awtoritajiet pubbliċi kollha, inkluż dawk responsabbli għall-edukazzjoni u t-taħriġ u għall-impjieg. Fil-livell Ewropew, hija kwistjoni ta' rilevanza għall-istrateġija Ewropa 2020 u l-qafas “ET 2020”. |
— |
L-appoġġ tal-edukazzjoni u t-taħriġ għall-kapaċità għall-impjieg taż-żgħażagħ huwa parzjalment kopert mill-miri ewlenin rilevanti tal-Ewropa 2020 u l-punti ta' riferiment “ET 2020” eżistenti, bħal ma huma dawk dwar il-kisba ta' edukazzjoni terzjarja, dawk li jħallu l-edukazzjoni u t-taħriġ kmieni, il-parteċipazzjoni tal-adulti fit-tagħlim tul il-ħajja u ta' dawk li għandhom riżultati baxxi fil-qari, il-matematika u x-xjenza. |
— |
Madankollu, it-tranżizzjoni mill-edukazzjoni u t-taħriġ għall-imjpieg għandha mhix indirizzata, fil-qafas ta' monitoraġġ attwali. F'din il-fażi, il-kontribut tas-sistemi tal-edukazzjoni u t-taħriġ għall-kapaċità għall-impjieg tal-persuni ggradwati jista' jsir pereżempju permezz ta' gwida u għoti ta' pariri relatati mal-karriera, permezz ta' rabiet aktar qawwijin bejn l-istituzzjonijiet edukattivi u tat-taħriġ u l-partijiet interessati rilevanti, permezz tal-allinjament tal-kurrikulu mal-ħtiġijiet tas-suq tax-xogħol, permezz tat-tisħiħ tal-edukazzjoni dwar l-intraprenditorija, permezz ta' esperjenzi qosra ta' xogħol f'kumpanniji, permezz ta' informazzjoni aktar trasparenti dwar l-eżiti tat-tagħlim u permezz ta' linji ta' politika dwar l-edukazzjoni u t-taħriġ li jirrispondu aħjar u li jirriflettu l-ħtiġijiet tas-suq tax-xogħol, u billi ż-żgħażagħ kollha jiġu mħeġġa jkomplu l-istudji tagħhom lil hinn mill-edukazzjoni sekondarja għolja. Għandha tingħata attenzjoni wkoll għall-kapaċità għall-impjieg taż-żgħażagħ bi bżonnijiet speċjali fis-suq tax-xogħol. |
— |
L-iżvilupp ta' punt ta' riferiment Ewropew dwar il-porzjon ta' persuni ggradwati impjegati jgħin fl-identifikazzjoni ta' linji ta' politika dwar l-edukazzjoni u t-taħriġ li jtejjbu t- tranżizzjoni mill-edukazzjoni u t-taħriġ u x-xogħol u jgħin iżid is-suċċess fl-impjieg. Punt ta' riferiment Ewropew li jkejjel il-porzjon tal-persuni ggradwati impjegati, akkumpanjat mill-analiżi rilevanti dwar l-aspetti kwalitattivi bħat-tqabbil bejn il-forniment ta' għarfien, ħiliet u kompetenzi u l-okkupazzjoni miksuba sa tliet snin wara l-gradwazzjoni, jgħin ukoll biex tissaħħaħ il-kooperazzjoni Ewropea dwar linji ta' politika fil-qasam tal-edukazzjoni u t-taħriġ li jiffokaw fuq it- tranżizzjoni mill-edukazzjoni u t-taħriġ għax-xogħol. Huwa jgħin fil-monitoraġġ tal-progress tal-Istati Membri lejn kapaċità għall-impjieg miżjuda ta' persuni ggradwati, kif ukoll jidentifika eżempji ta' prassi tajba u jappoġġa l-iżvilupp ta' inizjattivi ta' tagħlim bejn il-pari. |
JISTIEDEN LILL-ISTATI MEMBRI:
filwaqt li jieħu kont tas-sitwazzjonijiet differenti fl-Istati Membri individwali,
(1) |
Jadottaw miżuri fil-livell nazzjonali bil-għan li jżidu l-kapaċità għall-impjieg ta' persuni ggradwati li joħorġu mis-sistema edukattiva u tat-taħriġ, bil-ħsieb li jinkiseb il-punt ta' riferiment Ewropew kif deskritt fl-Anness mehmuż, filwaqt li jiġi promoss ukoll it-tqabbil bejn il-kisba edukattiva u l-okkupazzjoni. |
(2) |
Abbażi tas-sorsi u l-għodod disponibbli, iwettqu monitoraġġ tal-porzjon ta' persuni ggradwati impjegati mill-edukazzjoni u t-taħriġ, bil-ħsieb li jsaħħu l-bażi ta' evidenza għall-iżvilupp ta' politika dwar l-interfaċċja bejn l-edukazzjoni u t-taħriġ minn naħa, u x-xogħol min-naħa l-oħra, kif deskritt fl-Anness. |
(3) |
Jippromowovu l-implimentazzjoni u l-użu tal-programmi, l-għodod u l-oqfsa tal-UE imfassla biex jappoġġaw il-kapaċità għall-impjieg, il-mobbiltà u t-tagħlim tul il-ħajja, inklużi l-Europass, il-Youthpass, il-QEK, l-ECTS, l-ECVET u l-EQAVET. |
(4) |
Itejbu l-kooperazzjoni bejn l-istituzzjonijiet edukattivi u tat-taħriġ u l-partijiet interessati rilevanti fid-dinja tax-xogħol fil-livell lokali, reġjonali u nazzjonali, bil-ħsieb li jiġu promossi l-apprendistati, l-internati u l-postazzjonijiet f'kumpanniji matul l-aktar fażi bikrija tat-tranżizzjoni mill-edukazzjoni u t-taħriġ għas-suq tax-xogħol. |
JISTIEDEN LILL-KUMMISSJONI BIEX:
(1) |
Teżamina, b'mod partikolari permezz tal-Monitor tal-Edukazzjoni u t-Taħriġ u r-Rapport Konġunt dwar l-implimentazzjoni tal-qafas strateġiku “ET2020”, il-livell li għandu jintlaħaq mill-punt ta' riferiment Ewropew. Il-Monitor tal-Edukazzjoni u t-Taħriġ għandu jipprovdi informazzjoni dwar il-punt ta' riferiment Ewropew fir-rigward ta' dawk li jħallu l-iskola kmieni, għalkemm dan il-grupp fil-mira mhux inkluż fl-objettiv stabbilit. |
(2) |
Issaħħaħ il-kooperazzjoni Ewropea dwar l-iżvilupp ta' politika fil-qasam tal-edukazzjoni u t-taħriġ għall-kapaċità għall-impjieg permezz tal-analiżi u l-monitoraġġ ta' tali edukazzjoni u taħriġ, inkluż billi:
|
(3) |
Tikkoopera mill-qrib ma' istituzzjonijiet internazzjonali rilevanti, bħall-ILO, l-OECD u l-UNESCO, sabiex jiġu skambjati l-analiżi u l-kompetenza esperta dwar it-tranżizzjoni tal-persuni ggradwati għas-suq tax-xogħol. |
U JISTIEDEN LILL-ISTATI MEMBRI U LILL-KUMMISSJONI BIEX:
(1) |
Jiġbru informazzjoni kwalitattiva u eżempji ta' prassi tajba bil-għan li jiġi kkomplimentat il-monitoraġġ kwantitattiv u tissaħħaħ il-bażi tat-tfassil ta' politika bbażata fuq l-evidenza, bl-użu ta' prinċipalment sorsi eżistenti, inkluż l-arranġamenti ta' rappurtaġġ “ET2020”. |
(2) |
Jidentifikaw eżempji ta' prattika tajba fl-Istati Membri rigward it-tranżizzjoni bla xkiel mill-edukazzjoni u t-taħriġ għax-xogħol bl-istabbiliment ta' grupp ta' esperti dwar it-tranżizzjoni tal-persuni ggradwati mill-edukazzjoni u t-taħriġ għas-suq tax-xogħol, biex b'hekk isir kontribut għall-prijoritajiet tal-“ET2020”. Il-grupp għandu jikkonsisti minn esperti nazzjonali maħtura mill-Istati Membri u esperti li jirrappreżentaw l-imsieħba soċjali rilevanti maħtura mill-Kummissjoni, u għandu, fir-rigward debitu tas-sussidjarjetà:
|
(3) |
Jiżviluppaw, f'kooperazzjoni mal-korpi adatti fl-oqsma tal-edukazzjoni u t-taħriġ u l-impjieg (inkluż il-Kumitat tal-Impjiegi), attivitajiet ta' tagħlim bejn il-pari dwar il-fażi ta' tranżizzjoni mill-edukazzjoni u t-taħriġ għax-xogħol. |
(1) ĠU C 119, 28.5.2009, p. 2.
(2) ĠU C 324, 1.12.2010, p. 5.
(4) 11838/11.
(5) ĠU C 372, 20.12.2011, p. 36.
(6) 17229/11 + ADD 1, 2 u 3.
(7) SN 5/12.
(8) Kif muri fil-qafas strateġiku għall-kooperazzjoni Ewropea fl-edukazzjoni u t-taħriġ tas-sena 2009, dan huwa livell ta’ riferiment tal-prestazzjoni medja Ewropea li m'għandux jiġi kkunsidrat bħala mira konkreta li kull pajjiż li għandu jilħaq, iżda pjuttost bħala mira kollettiva li l-Istati Membri huma mistiedna jikkontribwixxu għall-ksib tagħha (ĠU C 119, 28.5.2009, p. 7).
(9) Għall-fini ta' dan it-test, it-terminu “gradwat” jirreferi għal kwalunkwe persuna li telqet mill-edukazzjoni u t-taħriġ b'tal-inqas kwalifiki sekondarji għolja jew postsekondarji, nonterzjarji (ISCED 3 sa ISCED 4, eskluż ISCED 3 C qasir), jew bi kwalifiki terzjarji (ISCED 5 u 6).
(10) Lejn Punt ta' Riferiment dwar il-Kontribut tal-Edukazzjoni u t-Taħriġ għall-Kapaċità għall-Impjieg: (Nota metodoloġika EUR 24616 EN 2011).
ANNESS
Livell ta’ riferiment tal-prestazzjoni medja Ewropea
(“Punt ta' riferiment Ewropew”)
dwar il-porzjon ta’ persuni ggradwati impjegati mill-Edukazzjoni u t-Taħriġ
Bħala mezz ta' monitoraġġ tal-progress u tal-identifikazzjoni tal-isfidi, kif ukoll ta' kontribut għat-tfassil ta' politika bbażata fuq l-evidenza, fl-2009 l-Istati Membri qablu li l-livelli ta' riferiment tal-prestazzjoni medja Ewropea (“punti ta' riferiment Ewropej”) għandhom jappoġġaw l-objettivi msemmija fil-konklużjonijiet tal-Kunsill li huma adottaw fit-12 ta' Mejju 2009 dwar qafas strateġiku għall-kooperazzjoni Ewropea fl-edukazzjoni u t-taħriġ (1). Dak iż-żmien intlaħaq ftehim dwar ħames punti ta’ riferiment Ewropej u tressqet talba lill-Kummissjoni biex tippreżenta proposti dwar aktar punti ta’ riferiment, inkluża waħda fil-qasam tal-kapaċità għall-impjieg.
Wara li eżaminaw il-proposti fid-dokument ta’ ħidma tal-persunal tal-Kummissjoni tal-24 ta’ Mejju 2011 (2), l-Istati Membri issa jaqblu wkoll dwar il-punt ta’ riferiment li ġej dwar il-porzjon ta' persuni ggradwati impjegati mill-edukazzjoni u t-taħriġ. Il-punt ta' riferiment jikkumplementa dawk diġà adottati f'Mejju 2009 u dak dwar il-mobbiltà tat-tagħlim adottat mill-Kunsill f'Novembru 2011 (3). Proprjament, dan għandu jkun ibbażat biss fuq id-data komparabbli eżistenti. Dan għandu jieħu kont tal-punti ta' tluq differenti tal-Istati Membri individwali u l-possibbiltajiet varji li huma għandhom għat-titjib tal-prestazzjoni permezz tal-politiki dwar l-edukazzjoni u t-taħriġ. Huwa m'għandux jiġi kkunsidrat bħala mira konkreta għal pajjiżi individwali li għandha tintlaħaq sal-2020. Pjuttost, l-Istati Membri huma mistiedna jikkunsidraw, fuq il-bażi ta’ prijoritajiet nazzjonali u filwaqt li jieħdu kont taċ-ċirkostanzi ekonomiċi li qegħdin jinbidlu, kif u safejn huma jistgħu jikkontribwixxu għall-ksib kollettiv tal-punt ta’ riferiment Ewropew fil-qasam deskritt hawn taħt permezz ta’ azzjonijiet nazzjonali.
Punt ta’ riferiment dwar il-porzjon ta’ persuni ggradwati impjegati mill-Edukazzjoni u t-Taħriġ
Il-kapaċità għall-impjieg - jiġifieri, it-tgħaqqid ta' fatturi li jippermettu li l-individwi jagħmlu progress lejn jew jidħlu fl-impjieg, jibqgħu fl-impjieg u jagħmlu progress matul il-karriera tagħhom – huwa kunċett kumpless, li jinvolvi mhux biss il-karatteristiċi, il-ħiliet, l-attitudnijiet u l-motivazzjoni ta' kull individwu, iżda wkoll fatturi oħra esterni li jaqgħu lil hinn mill-ambitu tal-politika dwar l-edukazzjoni u t-taħriġ, bħal ma huma regolamenti tas-suq tax-xogħol, id-demografija, l-istruttura tal-ekonomija u s-sitwazzjoni ekonomika ġenerali.
Fuq dan l-isfond, u bil-ħsieb li jiġi enfasizzat dak li l-politiki dwar l-edukazzjoni u t-taħriġ jistgħu jagħmlu biex iżidu s-suċċess fl-impjiegi u biex tiżdied il-kapaċità għall-impjieg tal-persuni ggradwati (4) li mhumiex attwalment irreġistrati fi kwalunkwe attività ta' edukazzjoni u taħriġ ulterjuri, għaldaqstant l-Istati Membri jaqblu dwar il-punt ta' riferiment li ġej:
Il-livell ta' mira jirreferi għal medja tal-UE u ma joħloqx mira nazzjonali għall-Istati Membri individwali.
Il-punt ta' riferiment għandu jippermetti tqassim skont is-subpopolazzjonijiet speċifiċi. B'mod partikolari għandu jkun hemm diżaggregazzjoni ta' data bbażata fuq il-livelli tal-ISCED (8), l-orjentazzjoni edukattiva u l-qasam tal-edukazzjoni u t-taħriġ li jippermetti, pereżempju, distinzjoni li għandu jkun hemm bejn il-prestazzjoni ta' gradwati ta' edukazzjoni sekondarja ogħla hekk kif ilestu l-edukazzjoni ġenerali jew l-edukazzjoni u t-taħriġ vokazzjonali, u bejn il-prestazzjoni ta' gradwati b'edukazzjoni ogħla skont il-qasam tal-edukazzjoni u t-taħriġ.
Barra minn hekk, għandha titwettaq analiżi dwar safejn l-oqsma u l-livelli tal-edukazzjoni u t-taħriġ jaqblu mat-tipi ta' okkupazzjoni li l-persuni ggradwati jsegwu matul l-ewwel snin ta' impjieg tagħhom u din tista' tkun ibbażata fuq il-kisba edukattiva mkejla bl-ISCED.
Il-punt ta’ riferiment t'hawn fuq ser jiġi eżaminat u vvalutat mill-Istati Membri u l-Kummissjoni bħala parti mir-Rapport Konġunt “ET2020” fl-2014, sabiex jiġi deċiż jekk ikunx meħtieġ rieżami tal-indikaturi.
(1) ĠU C 119, 28.5.2009, p. 7.
(2) Dok. 10697/11.
(3) ĠU C 372, 20.12.2011, p. 31.
(4) Għall-fini ta' dan it-test, it-terminu “gradwat” jirreferi għal kwalunkwe persuna li għandha bejn 20-34 li telqet mill-edukazzjoni u t-taħriġ b'mill-inqas kwalifiki sekondarji għolja jew postsekondarji nonterzjarji (ISCED 3 sa ISCED 4, eskluż ISCED 3C qasir), jew bi kwalifiki terzjarji (ISCED 5 u 6).
(5) Il-Klassifikazzjoni tal-Istandards Internazzjonali tal-Edukazzjoni tal-1997 (ISCED) tikklassifika l-attivitajiet edukattivi f'7 livelli wesgħin, fejn l-ISCED 0-2 u 3C qasir ikopru l-edukazzjoni sekondarja fil-livell baxx. Fl-istima tal-livelli adatti għall-mira tal-2020, huma kkunsidrati biss żewġ livelli ta' gradwati, b'mod partikolari gradwati b'kisba ta' edukazzjoni sekondarja ogħla (ISCED 3), postsekondarju, nonterzjarju (ISCED 4) u kisba ta' edukazzjoni terzjarja (ISCED 5-6). Dawk li ggradwaw mill-edukazzjoni sekondarja ogħla ġenerali (ISCED 3A) għandhom ikunu mħajra biex jipparteċipaw f'edukazzjoni u taħriġ ulterjuri. Il-grupp ta' persuni ggradwati b'inqas minn kisba sekondarja għolja (ISCED 0-2 u ISCED C3 qasir) ġie eskluż mill-istima minħabba li kien kampjun żgħir (fil-grupp b'età ta' 20-34 sena hemm biss xi ftit persuni li waqfu reċentement mill-iskola qabel iż-żmien b'inqas minn edukazzjoni sekondarja ogħla), u minħabba l-fatt li fl-2003 l-Istati Membri qablu li jnaqqsu r-rata ta' dawk li jieqfu mill-edukazzjoni u t-taħriġ qabel iż-żmien għal inqas minn 10 % ta' dawk bejn it-18 u l-24 sena (mira kkonfermata mill-istrateġija Ewropa 2020).
(6) Intgħażel il-limitu minimu ta' 20 sena biex ikun allinjat mal-grupp ta' età ġdid introdott mal-mira ewlenija tar-rata tal-impjiegi tal-istrateġija Ewropa 2020 (jiġifieri 20-64). Billi fl-Ewropa l-maġġoranza tal-istudenti jkomplu l-edukazzjoni sekondarja ogħla tagħhom (ISCED 3, eskluż l-ISCED 3C qasir) u edukazzjoni postsekondarja, nonterzjarja (ISCED 4) bejn l-età ta' 18 u 20 sena, dan il-limitu minimu ta' età huwa mistenni jippermetti l-analiżi tal-kapaċità għall-impjieg ta' dak il-grupp sena, sentejn, u tliet snin wara li jiksbu l-lawrea. Il-limitu massimu ta' 34 sena madankollu ntgħażel fir-rigward tal-punt ta' riferiment attwali dwar il-ksib terzjarju, li jitkejjel fil-grupp ta' persuni bejn it-30 u l-34 sena. Għal darb'oħra, dan il-limitu massimu għandu għalhekk jiżgura kopertura ottimali tal-popolazzjoni gradwata ġdida mill-edukazzjoni terzjarja (ISCED 5-6).
(7) Imkejla bħala l-porzjon tal-popolazzjoni impjegata ta' bejn 20 u 34 sena li ggradwa 1, 2 jew 3 snin qabel u li mhux attwalment irreġistrat f'xi attività ta' edukazzjoni jew taħriġ ulterjuri. Individwi li bħalissa huma impenjati f'xi forma ta' edukazzjoni jew taħriġ huma esklużi, biex jiġi żgurat li l-kapaċità għall-impjieg ta' dak il-grupp ma tistax tinbidel mill-fatt li l-individwu bħalissa huwa impenjat fl-aġġornament tal-ħiliet tiegħu. Minħabba n-nuqqas ta' data lonġitudinali biex jitkejjel preċiżament il-fluss ta' gradwati fl-impjiegi, tintuża l-medja ta' punti fl-aħħar tat-tliet snin wara l-lawrja. Dan l-approċċ jgħin biex ma jixxekkilx l-impatt possibbli tal-perijodi qosra ta' qgħad li huma komuni fis-snin bikrin tal-impjiegi.
(8) Kif indikat hawn fuq, il-Klassifikazzjoni tal-Istandards Internazzjonali tal-Edukazzjoni tal-1997 attwali (ISCED) tikklassifika l-attivitajiet edukattivi f'7 livelli wesgħin minn 0 sa 6. ISCED 2011 ser tiġi implimentata fl-2014 b'9 livelli fis-sorsi kollha ta' data tal-UE dwar l-edukazzjoni. Dan jimplika li l-edukazzjoni terzjarja ser tkun aktar differenzjata f'livell ta' Baċellerat, Master u Dottorat u li l-konfini bejn l-edukazzjoni sekondarja fil-livell baxx u ogħla ser ikunu ddefiniti aħjar.
Il-Kummissjoni Ewropea
15.6.2012 |
MT |
Il-Ġurnal Uffiċjali tal-Unjoni Ewropea |
C 169/16 |
Rata tal-kambju tal-euro (1)
L-14 ta’ Ġunju 2012
2012/C 169/05
1 euro =
|
Munita |
Rata tal-kambju |
USD |
Dollaru Amerikan |
1,2551 |
JPY |
Yen Ġappuniż |
99,51 |
DKK |
Krona Daniża |
7,4312 |
GBP |
Lira Sterlina |
0,80920 |
SEK |
Krona Żvediża |
8,8373 |
CHF |
Frank Żvizzeru |
1,2008 |
ISK |
Krona Iżlandiża |
|
NOK |
Krona Norveġiża |
7,5070 |
BGN |
Lev Bulgaru |
1,9558 |
CZK |
Krona Ċeka |
25,540 |
HUF |
Forint Ungeriż |
297,63 |
LTL |
Litas Litwan |
3,4528 |
LVL |
Lats Latvjan |
0,6968 |
PLN |
Zloty Pollakk |
4,3150 |
RON |
Leu Rumen |
4,4578 |
TRY |
Lira Turka |
2,2890 |
AUD |
Dollaru Awstraljan |
1,2626 |
CAD |
Dollaru Kanadiż |
1,2885 |
HKD |
Dollaru ta' Hong Kong |
9,7379 |
NZD |
Dollaru tan-New Zealand |
1,6143 |
SGD |
Dollaru tas-Singapor |
1,6102 |
KRW |
Won tal-Korea t'Isfel |
1 464,11 |
ZAR |
Rand ta' l-Afrika t'Isfel |
10,5901 |
CNY |
Yuan ren-min-bi Ċiniż |
7,9411 |
HRK |
Kuna Kroata |
7,5508 |
IDR |
Rupiah Indoneżjan |
11 844,46 |
MYR |
Ringgit Malażjan |
3,9990 |
PHP |
Peso Filippin |
53,460 |
RUB |
Rouble Russu |
41,0070 |
THB |
Baht Tajlandiż |
39,586 |
BRL |
Real Brażiljan |
2,5912 |
MXN |
Peso Messikan |
17,6279 |
INR |
Rupi Indjan |
70,0530 |
(1) Sors: rata tal-kambju ta' referenza ppubblikata mill-Bank Ċentrali Ewropew.
15.6.2012 |
MT |
Il-Ġurnal Uffiċjali tal-Unjoni Ewropea |
C 169/17 |
Komunikazzjoni mill-Kummissjoni dwar il-kwantità li għaliha ma tressqet l-ebda applikazzjoni u li għandha tiżdied mal-kwantità stabbilita għas-subperjodu mill-1 ta’ Ottubru 2012 sal-31 ta’ Diċembru 2012 fil-kuntest ta’ ċerti kwoti miftuħa mill-Komunità għal prodotti fis-settur tal-laħam tat-tjur
2012/C 169/06
Ir-Regolament tal-Kummissjoni (KE) Nru 616/2007 (1) fetaħ kwoti tariffarji għall-importazzjoni ta' prodotti mis-setturi tal-laħam tat-tjur. L-applikazzjonijiet għal liċenzji tal-importazzjoni li tressqu matul l-ewwel sebat ijiem tax-xahar ta' April 2012 għas-subperjodu mill-1 ta' Lulju sat-30 ta’ Settembru 2012, għall-kwoti 09.4212, 09.4214, 09.4217 u 09.4218, kienu jkopru kwantitajiet iżgħar minn dawk disponibbli. F’konformità mal-Artikolu 7(4) it-tieni frażi, tar-Regolament tal-Kummissjoni (KE) Nru 1301/2006 (2), il-kwantitajiet li għalihom ma sarux talbiet, ġew miżjuda mal-kwantità stabbilita għas-subperjodu tal-kwoti ta’ wara, mill-1 ta’ Ottubru sal-31 ta’ Diċembru 2012, u jidhru fl-Anness ta’ din il-Komunikazzjoni.
(2) ĠU L 238, 1.9.2006, p. 13.
ANNESS
Nru tal-ordni tal-kwota |
Kwantitajiet mhux mitluba li għandhom jiżdiedu mal-kwantità stipulata għas-subperjodu mill-1 ta’ Ottubru 2012 sal-31 ta’ Diċembru 2012 (f'kg) |
09.4212 |
9 891 500 |
09.4214 |
6 597 950 |
09.4217 |
690 000 |
09.4218 |
3 478 800 |
V Avviżi
PROĊEDURI AMMINISTRATTIVI
Il-Parlament Ewropew
15.6.2012 |
MT |
Il-Ġurnal Uffiċjali tal-Unjoni Ewropea |
C 169/18 |
Avviż ta' reklutaġġ PE/158/S
2012/C 169/07
Il-Parlament Ewropew qed jorganizza l-proċedura ta’ għażla:
PE/158/S – Aġent Temporanju – Amministrazzjoni ta’ entitajiet Parlamentari (AD 7)
Din il-proċedura ta’ għażla tirrikjedi livell ta’ edukazzjoni li jikkorrispondi għal ċiklu komplut ta’ studji universitarji bil-ksib ta’ lawrja rikonoxxuta uffiċjalment.
Il-kandidati jeħtiġilhom ikunu kisbu, sad-data tal-għeluq tal-applikazzjonijiet u wara l-konferiment tal-lawrja msemmija hawn fuq, mhux anqas minn sitt snin esperjenza ta’ xogħol relatat man-natura tal-funzjonijiet, li minnhom tal-anqas erba’ snin iridu jkunu nħadmu fi ħdan entità tal-Unjoni Ewropea jew ta’ amministrazzjoni nazzjonali.
Dan l-avviż ta’ reklutaġġ qed jiġi ppubblikat biss bil-Franċiż, bil-Ġermaniż u bl-Ingliż. It-test sħiħ jinsab f'Il-Ġurnal Uffiċjali C 169 A b’dawn it-tliet lingwi.
Il-Kummissjoni Ewropea
15.6.2012 |
MT |
Il-Ġurnal Uffiċjali tal-Unjoni Ewropea |
C 169/19 |
Sejħa għall-proposti – EACEA/20/12
skont il-Programm tat-Tagħlim tul il-Ħajja
Implimentazzjoni tal-objettivi strateġiċi Ewropej fl-Edukazzjoni u t-taħriġ (ET 2020) (kooperazzjoni tal-partijiet interessati, esperimentazzjoni u innovazzjoni)
2012/C 169/08
Parti A – |
Appoġġ għall-implimentazzjoni u t-tqajjim ta’ sensibilizzazzjoni nazzjonali dwar l-objettivi tal-kooperazzjoni Ewropea fl-edukazzjoni u t-taħriġ (ET 2020) |
Parti B – |
Appoġġ għall-implimentazzjoni ta’ ambjenti ta’ tagħlim innovattivi permezz tal-ICT (imsejħa “Klassijiet Kreattivi”) fil-qafas tal-kooperazzjoni transnazzjonali fl-iżvilupp u l-implimentazzjoni ta’ kwistjonijiet trasversali relatati mal-politika tal-edukazzjoni u t-taħriġ marbutin mal-prijoritajiet stabbiliti fl-Ewropa 2020 u ET 2020 |
1. Objettivi u Deskrizzjoni
L-għan ġenerali tas-sejħa għall-proposti huwa:
Il-promozzjoni tal-implimentazzjoni tal-erba’ objettivi strateġiċi tal-“Qafas strateġiku għall-kooperazzjoni Ewropea fl-edukazzjoni u t-taħriġ (ET 2020)” (tagħlim tul il-ħajja u mobilità; kwalità u effiċjenza; ekwità, koeżjoni soċjali u ċittadinanza attiva; kreattività u innovazzjoni) u l-prijoritajiet strateġiċi maqbula għall-2012-14 permezz ta’ attivitajiet li jtejbu l-impenn istituzzjonali, il-koordinazzjoni u s-sħubija mal-partijiet interessati rilevanti kollha fil-livelli nazzjonali/ reġjonali/lokali, billi:
— |
jiġu appoġġjati t-tqajjim ta’ sensibilizzazzjoni u l-impenn istituzzjonali, il-koordinazzjoni u s-sħubija mal-partijiet interessati kollha, b’enfasi fuq ir-rwol tal-edukazzjoni u t-taħriġ fil-prevenzjoni u t-tnaqqis tal-qgħad fost iż-żgħażagħ (Parti A); |
— |
tiġi appoġġjata l-kooperazzjoni transnazzjonali (esperimentazzjoni bil-politiki, żvilupp konġunt tal-politiki, skambju ta’ prattiki tajbin u innovazzjoni) fl-iżvilupp u l-implimentazzjoni ta’ approċċi ta’ politika innovattivi b’konformità mal-prijoritajiet stabbiliti fl-Ewropa 2020 u ET 2020, b’enfasi fuq il-“Klassijiet Kreattivi” (Parti B). |
Il-kooperazzjoni transnazzjonali tista’ sseħħ fil-livell nazzjonali, reġjonali jew lokali; tista’ tkopri tipi differenti (formali, mhux formali, informali) u livelli (qabel l-iskola, primarju, sekondarju, terzjarju, tal-adulti, inizjali u t-tkomplija ta’ edukazzjoni u taħriġ vokazzjonali) ta’ tagħlim u tista’ tinkludi rabtiet ma’ setturi oħrajn (eż. l-impjiegi u n-negozji).
2. Organizzazzjonijiet eliġibbli
Is-sejħa hija miftuħa għall-organizzazzjonijiet stabbiliti fil-pajjiżi li jipparteċipaw fil-Programm tat-Tagħlim Tul il-Ħajja.
L-applikazzjonijiet iridu jiġu sottomessi minn persuna legali li għandha kapaċità legali. Persuni fiżiċi ma jistgħux japplikaw għal għotja.
Il-benefiċjarji jistgħu jkunu ministeri nazzjonali jew reġjonali inkarigati mill-edukazzjoni u t-taħriġ u l-politiki ta’ tagħlim tul il-ħajja, u awtoritajiet/korpi oħrajn u organizzazzjonijiet ta’ partijiet interessati attivi fl-iżvilupp u l-implimentazzjoni ta’ politiki ta’ tagħlim tul il-ħajja. L-organizzazzjonijiet ta’ partijiet interessati jinkludu l-assoċjazzjonijiet jew l-organizzazzjonijiet Ewropej, nazzjonali u reġjonali li l-attivitajiet ewlenin jew ir-responsabbiltajiet ewlenin tagħhom huma direttament marbutin ma’ kwalunkwe settur tal-edukazzjoni u t-taħriġ, b’mod partikolari l-organizzazzjonijiet tal-imsieħba soċjali u assoċjazzjonijiet nazzjonali jew reġjonali oħrajn li jirrappreżentaw l-interessi ta’ grupp soċjetarju fit-twaqqif u l-implimentazzjoni ta’ politiki ta’ tagħlim tul il-ħajja.
Għall-finijiet ta’ din is-sejħa, l-istituzzjonijiet kollha ta’ edukazzjoni għolja akkreditati mill-Istati Membri (pajjiżi parteċipanti), u l-istituzzjonijiet jew l-organizzazzjonijiet kollha li jipprovdu opportunitajiet ta’ tagħlim li rċivew aktar minn 50 % tad-dħul annwali tagħhom minn sorsi pubbliċi matul l-aħħar sentejn (għotjiet oħrajn tal-Unjoni Ewropea għal azzjoni eskluża), jew li huma kkontrollati minn korpi pubbliċi jew ir-rappreżentanti tagħhom, huma meqjusin li huma korpi pubbliċi. Dawn l-organizzazzjonijiet huma meħtieġa jistipulaw f’dikjarazzjoni fuq l-unur ffirmata (inkluża fil-pakkett ta’ applikazzjoni) li l-organizzazzjoni tagħhom tikkonforma mad-definizzjoni ta’ korp pubbliku msemmija hawn fuq. L-Aġenzija tirriżerva d-dritt li titlob dokumentazzjoni sabiex tintwera l-verità ta’ din id-dikjarazzjoni.
Parti A.1 – Appoġġ għall-implimentazzjoni u t-tqajjim ta’ sensibilizzazzjoni nazzjonali dwar l-objettivi tal-kooperazzjoni Ewropea fl-edukazzjoni u t-taħriġ (ET 2020) b’enfasi fuq l-involviment tal-awtoritajiet pubbliċi
L-applikazzjonijiet għal finanzjament jistgħu jsiru minn awtorità nazzjonali jew reġjonali waħda jew aktar mill-istess pajjiż responsabbli għall-edukazzjoni u t-taħriġ u l-politiki ta’ tagħlim tul il-ħajja (qabel il-primarja, skejjel, VET, edukazzjoni għolja u tagħlim lill-adulti), jew korpi u organizzazzjonijiet ta’ partijiet interessati oħrajn magħżula mit-tali awtorità(jiet) sabiex iwieġbu għas-sejħa. Trid tintbagħat ittra/i ta’ għażla ffirmata/i mill-awtorità involuta flimkien mal-verżjoni tal-proposta stampata.
Parti A.2 – Appoġġ għall-implimentazzjoni u t-tqajjim ta’ sensibilizzazzjoni nazzjonali dwar l-objettivi tal-kooperazzjoni Ewropea fl-edukazzjoni u t-taħriġ (ET 2020) b’enfasi fuq l-involviment tal-organizzazzjonijiet ta’ partijiet interessati
Applikazzjonijiet għal finanzjament jistgħu jsiru biss minn sħubijiet nazzjonali magħmulin minn tal-inqas tliet organizzazzjonijiet involuti direttament fl-iżvilupp u l-implimentazzjoni ta’ politiki ta’ tagħlim tul il-ħajja.
Parti B – Appoġġ għall-implimentazzjoni ta’ ambjenti ta’ tagħlim innovattivi permezz tal-ICT (imsejħa “Klassijiet Kreattivi”) fil-qafas tal-kooperazzjoni transnazzjonali fl-iżvilupp u l-implimentazzjoni ta’ kwistjonijiet trasversali relatati mal-politika tal-edukazzjoni u t-taħriġ marbutin mal-prijoritajiet stabbiliti fl-Ewropa 2020 u ET 2020
L-applikazzjonijiet għal finanzjament jistgħu jsiru biss minn ministeru nazzjonali jew reġjonali involut direttament fl-iżvilupp u l-implimentazzjoni ta’ politiki ta’ tagħlim tul il-ħajja, jew organizzazzjoni oħra magħżula minn ministeru bħal dan biex twieġeb għas-sejħa.
Is-sħubijiet transnazzjonali jridu jkunu komposti minn tal-inqas 5 organizzazzjonijiet li jinvolvu 3 pajjiżi eliġibbli jew aktar. Tal-inqas imsieħeb wieħed skont il-pajjiż irid ikun ministeru nazzjonali jew reġjonali direttament involut fl-iżvilupp u fl-implimentazzjoni ta’ politiki ta’ tagħlim tul il-ħajja, jew organizzazzjoni oħra magħżula minn ministeru bħal dan biex twieġeb għas-sejħa.
Trid tintbagħat ittra/i ta’ għażla ffirmata/i mill-ministeru/i li jiddelega(w) flimkien mal-verżjoni tal-proposta stampata.
L-applikazzjonijiet iridu jiġu sottomessi mill-organizzazzjonijiet (inklużi l-imsieħba tal-organizzazzjonijiet kollha) stabbiliti fil-pajjiżi li jieħdu sehem fil-Programm tat-Tagħlim Tul il-Ħajja:
— |
is-27 Stat Membru tal-UE |
— |
it-tliet pajjiżi taż-ŻEE/EFTA: l-Islanda, il-Liechtenstein, in-Norveġja |
— |
il-pajjiżi kandidati: il-Kroazja, dik li kienet ir-Repubblika Jugoslava tal-Maċedonja, is-Serbja, it-Turkija |
— |
l-Isvizzera |
Il-parteċipazzjoni minn pajjiżi terzi mhijiex permessa għal din l-azzjoni.
Tal-inqas pajjiż wieħed tas-sħubija jrid ikun Stat Membru tal-UE (japplika biss għall-Parti B ta’ din is-sejħa).
3. Attivitajiet Eliġibbli
Parti A.1 – Appoġġ għall-implimentazzjoni u t-tqajjim ta’ sensibilizzazzjoni nazzjonali dwar l-objettivi tal-kooperazzjoni Ewropea fl-edukazzjoni u t-taħriġ (ET 2020) b’enfasi fuq l-involviment tal-awtoritajiet pubbliċi
L-attivitajiet li jridu jiġu ffinanzjati f’din il-parti tas-sejħa jinkludu (objettivi speċifiċi)
— |
Attivitajiet ta’ tqajjim ta’ sensibilizzazzjoni li jappoġġjaw dibattiti u djalogi nazzjonali marbutin mal-implimentazzjoni tal-erba’ objettivi strateġiċi tal-ET 2020 (bħal konferenzi, seminars jew workshops nazzjonali jew reġjonali), b’enfasi fuq kif jistgħu jintużaw l-għodod u s-servizzi ta’ tagħlim tul il-ħajja għaż-żgħażagħ sabiex jiksbu l-ħiliet u l-kompetenzi meħtieġa għas-suq tax-xogħol. |
— |
L-istabbiliment ta’ fora għall-partijiet interessati u attivitajiet oħrajn li sejrin jikkontribwixxu għal koerenza u koordinazzjoni aħjar fil-livell nazzjonali fil-proċess ta’ twaqqif u implimentazzjoni ta’ strateġiji koerenti u komprensivi għat-tagħlim tul il-ħajja, b’enfasi fuq l-għoti tal-ħiliet u l-kompetenzi meħtieġa liż-żgħażagħ għas-suq tax-xogħol. |
— |
Attivitajiet ta’ tixrid u sensibilizzazzjoni skont l-ET 2020 ta’ għodod jew materjal ta’ referenza (eż. attivitajiet ta’ tagħrif, inklużi kampanji tal-midja, avvenimenti ta’ reklamar, eċċ.), b’enfasi fuq l-għodod u s-servizzi ta’ tagħlim tul il-ħajja li jtejbu l-kapaċità ta’ mezzi ta’ tagħlim alternattivi għaż-żgħażagħ u adulti bi kwalifiki baxxi sabiex jiksbu l-ħiliet u l-kompetenzi meħtieġa għas-suq tax-xogħol permezz ta’, pereżempju, validazzjoni ta’ tagħlim mhux formali u informali, gwida fil-karrieri, oqfsa ta’ kwalifiki, mobilità, eċċ. |
— |
Azzjonijiet ta’ segwitu marbutin ma’ programmi nazzjonali eżistenti bil-għan li jiġi stabbilit u jiġi implimentat il-Metodu Miftuħ ta’ Edukazzjoni u Taħriġ ta’ attivitajiet ta’ Koordinazzjoni skont l-istrateġija ET 2020 fil-livell nazzjonali, b’enfasi speċjali fuq iż-żgħażagħ u l-adulti bi ftit jew ebda kwalifiki. |
Parti A.2 – Appoġġ għall-implimentazzjoni u t-tqajjim ta’ sensibilizzazzjoni nazzjonali dwar l-objettivi tal-kooperazzjoni Ewropea fl-edukazzjoni u t-taħriġ (ET 2020) b’enfasi fuq l-involviment ta’ organizzazzjonijiet ta’ partijiet interessati
L-attivitajiet li jridu jiġu ffinanzjati f’din il-parti tas-sejħa jinkludu (objettivi speċifiċi):
— |
Attivitajiet ta’ tqajjim ta’ sensibilizzazzjoni li jappoġġjaw dibattiti u djalogu nazzjonali marbutin mal-implimentazzjoni tal-erba’ objettivi strateġiċi tal-ET 2020 (bħal konferenzi, seminars jew workshops nazzjonali jew reġjonali), b’enfasi fuq kif jistgħu jintużaw l-għodod u s-servizzi ta’ tagħlim tul il-ħajja għaż-żgħażagħ sabiex jiksbu l-ħiliet u l-kompetenzi meħtieġa għas-suq tax-xogħol. |
— |
L-istabbiliment ta’ fora għall-partijiet interessati u attivitajiet oħrajn li jikkontribwixxu għal koerenza u koordinazzjoni aħjar fil-livell nazzjonali fil-proċess ta’ stabbiliment u implimentazzjoni ta’ strateġiji koerenti u komprensivi għat-tagħlim tul, il-ħajja, b’enfasi fuq l-għoti tal-ħiliet u l-kompetenzi meħtieġa liż-żgħażagħ għas-suq tax-xogħol. |
— |
Azzjonijiet ta’ segwitu marbutin ma’ programmi nazzjonali eżistenti bil-għan li jiġi stabbilit u jiġi implimentat il-Metodu Miftuħ ta’ Edukazzjoni u Taħriġ ta’ attivitajiet ta’ koordinazzjoni skont l-istrateġija ET 2020 fil-livell nazzjonali, b’enfasi speċjali fuq iż-żgħażagħ u l-adulti bi ftit jew ebda kwalifiki. |
Parti B – Appoġġ għall-implimentazzjoni ta’ ambjenti ta’ tagħlim innovattivi permezz tal-ICT (imsejħa “Klassijiet Kreattivi”) fil-qafas tal-kooperazzjoni transnazzjonali fl-iżvilupp u l-implimentazzjoni ta’ kwistjonijiet trasversali relatati mal-politika tal-edukazzjoni u t-taħriġ marbutin mal-prijoritajiet stabbiliti fl-Ewropa 2020 u ET 2020
L-attivitajiet li għandhom jiġu ffinanzjati f’din il-parti jinkludu (objettivi speċifiċi):
— |
L-esperimentazzjonijiet bil-politiki minn sħubijiet transnazzjonali, li jinvolvu l-awtoritajiet rilevanti, il-partijiet interessati u l-istituzzjonijiet ta’ riċerka. L-azzjonijiet m’humiex sejrin jindirizzaw suġġetti wisgħin, iżda mmirati lejn kwistjonijiet politiċi komuni konkreti. Trid tingħata l-importanza xierqa lill-iżvilupp ta’ bażi ta’ provi robusta u lill-involviment ta’ proċeduri ta’ monitoraġġ, evalwazzjoni u rapportar affidabbli tal-bosta esperimentazzjonijiet tal-kuntesti ta’ ‘Klassijiet Kreattivi’. |
— |
It-tfassil u l-ittestjar konġunt ta’ għodod u prattiki innovattivi permezz ta’ esperimentazzjonijiet li jinvolvu numru għoli biżżejjed ta’ istituzzjonijiet edukattivi sabiex tintlaħaq massa rappreżentattiva kritika. |
— |
Azzjonijiet li jimmiraw lejn l-analiżi minn perspettiva politika tal-effikaċja, l-effiċjenza u l-kundizzjonijiet ta’ ġeneralizzazzjoni tal-esperimentazzjonijiet, kif ukoll it-trasferiment transnazzjonali tal-lezzjonijiet miksuba u l-prattika tajba (tagħlim fost pari) li jistgħu jinkludu analiżijiet, konferenzi u seminars li għandhom l-għan li jappoġġjaw b’mod dirett it-tfassil u l-implimentazzjoni ta’ politiki. |
— |
Azzjonijiet li jiżguraw it-tixrid sistematiku fil-livell nazzjonali u internazzjonali u li jrawwmu t-trasferibilità bejn sistemi u politiki edukattivi u ta’ taħriġ differenti. |
Għall-Partijiet A u B:
L-attivitajiet iridu jibdew bejn l-1 ta’ Marzu 2013 u l-31 ta’ Mejju 2013.
It-tul obbligatorju tal-proġetti huwa ta' 12-il xahar għall-Parti A u 24 xahar għall-Parti B. Ma hija sejra tiġi aċċettata l-ebda applikazzjoni għal proġetti skedati li joperaw f’perjodu differenti minn dak speċifikat f’din is-sejħa għall-proposti.
Ma hi se tingħata l-ebda estensjoni għall-perjodu ta’ eliġibilità lil hinn mit-tul massimu. Madankollu, jekk wara l-iffirmar tal-ftehim u l-bidu tal-proġett, għal raġunijiet kompletament ġustifikati li mhumiex fil-kontroll tiegħu, isir impossibbli għall-benefiċjarju li jtemm il-proġett fi żmien il-perjodu skedat, tista’ tingħata estensjoni għall-perjodu ta’ eliġibilità. Tista’ tingħata estensjoni massima ta’ 3 xhur addizzjonali għall-Parti A u 6 xhur addizzjonali għall-Parti B, jekk tintalab qabel id-data ta’ skadenza speċifikata fil-ftehim. Imbagħad, it-tul massimu jsir 15-il xahar għall-Parti A u 30 xahar għall-Parti B.
Fil-baġits u fid-dispożizzjonijiet tal-ippjanar tagħhom, il-konsorzji jridu jippjanaw għal żewġ laqgħat fi Brussell matul l-eżistenza tal-proġett: laqgħa ta’ bidu li tgħaqqad flimkien il-proġetti kollha ta' suċċess, u laqgħa ta’ monitoraġġ oħra (tista’ tkun mitluba mill-Aġenzija matul l-eżistenza tal-proġett). Hu mistenni li kull konsorzju jiġi mistieden jibgħat massimu ta’ żewġ rappreżentanti.
4. Kriterji tal-Għoti
L-applikazzjonijiet eliġibbli sejrin jiġu vvalutati fuq il-bażi tal-kriterji li ġejjin:
Parti A – Appoġġ għall-implimentazzjoni u t-tqajjim ta’ sensibilizzazzjoni nazzjonali dwar l-objettivi tal-kooperazzjoni Ewropea fl-edukazzjoni u t-taħriġ (ET 2020)
1. Ir-rilevanza: fuq il-bażi tas-sejħa għall-proposti, l-objettivi huma ċari, realistiċi u jindirizzaw kwistjonijiet u gruppi fil-mira rilevanti, inkluża firxa wiesgħa ta’ partijiet interessati ewlenin fil-livelli kollha kkonċernati mill-istabbiliment u l-implimentazzjoni tal-istrateġiji ta’ tagħlim tul il-ħajja, inklużi dawk li jfasslu l-politiki u li jieħdu d-deċiżjonijiet, dawk li jagħmlu użu minnhom, il-fornituri, l-imsieħba soċjali, ir-rappreżentanti tas-soċjetà ċivili u dawk li jitgħallmu (30 %).
2. Il-kwalità tal-pjan ta’ azzjonijiet: l-organizzazzjoni tal-ħidma hija ċara u xierqa sabiex jinkisbu l-objettivi; il-kompiti/l-attivitajiet huma definiti b’tali mod li r-riżultati sejrin jinkisbu fil-ħin u ma jaqbżux il-baġit (10 %).
3. Il-kwalità tal-metodoloġija: l-għodod u l-approċċi prattiċi proposti huma koerenti u xierqa sabiex jindirizzaw il-bżonnijiet identifikati għal gruppi fil-mira identifikati b’mod ċar (10 %).
4. Il-kwalità tat-tim tal-proġett: it-tim tal-proġett jinkludi l-ħiliet kollha, l-għarfien espert u l-kompetenzi rikonoxxuti meħtieġa biex jiġu eżegwiti l-aspetti kollha tal-pjan tal-azzjonijiet, u hemm tqassim ta’ kompiti xieraq fost il-membri tiegħu (10 %).
5. Il-Proporzjon ta’ Spejjeż u Benefiċċji: l-applikazzjoni tal-għotja turi l-valur għall-flus f’termini tal-attivitajiet ippjanati relatati mal-baġit previst (10 %).
6. L-impatt: l-effetti previsti tal-attivitajiet tal-proġett fuq il-gruppi u s-sistemi fil-mira kkonċernati huma definiti b’mod ċar u konsistenti mas-sett ta’ objettivi; il-miżuri huma ppjanati sabiex jiżguraw li dawk l-effetti jistgħu jintlaħqu. Ir-riżultati tal-attivitajiet aktarx li jkunu sinifikanti (20 %).
7. Il-kwalità tal-pjan ta’ valorizzazzjoni (tixrid u użu tar-riżultati): sa fejn l-attivitajiet ippjanati ta’ tixrid u użu jiżguraw użu ottimali tar-riżultati lil hinn mill-parteċipanti fil-proposta, matul u wara l-eżistenza tal-proġett (10 %).
Parti B – Appoġġ għall-implimentazzjoni ta’ ambjenti ta’ tagħlim innovattivi permezz tal-ICT (imsejħa “Klassijiet Kreattivi”) fil-qafas tal-kooperazzjoni transnazzjonali fl-iżvilupp u l-implimentazzjoni ta’ kwistjonijiet trasversali relatati mal-politika tal-edukazzjoni u t-taħriġ marbutin mal-prijoritajiet stabbiliti fl-Ewropa 2020 u ET 2020
1. Ir-rilevanza: fuq il-bażi tas-sejħa għall-proposti, l-objettivi huma ċari, realistiċi u jindirizzaw kwistjonijiet u gruppi fil-mira rilevanti, inkluża firxa wiesgħa ta’ partijiet interessati ewlenin fil-livelli kollha kkonċernati mill-istabbiliment u l-implimentazzjoni tal-istrateġiji ta’ tagħlim tul il-ħajja, inklużi dawk li jfasslu l-politiki u jieħdu d-deċiżjonijiet, dawk li jagħmlu użu minnhom, il-fornituri, l-imsieħba soċjali, ir-rappreżentanti tas-soċjetà ċivili u dawk li jitgħallmu (30 %).
2. Il-kwalità tal-pjan ta’ azzjonijiet: l-organizzazzjoni tal-ħidma hija ċara u xierqa sabiex jintlaħqu l-objettivi; il-kompiti/l-attivitajiet huma mqassma fost l-imsieħba b’tali mod li r-riżultati jinkisbu fil-ħin u ma jaqbżux il-baġit (10 %).
3. Il-kwalità tal-metodoloġija: l-għodod u l-approċċi prattiċi proposti huma koerenti, innovattivi u xierqa sabiex jindirizzaw il-bżonnijiet identifikati għal gruppi fil-mira identifikati b’mod ċar (10 %).
4. Kwalità tal-Konsorzju: il-konsorzju jinkludi l-ħiliet kollha, l-għarfien espert u l-kompetenzi rikonoxxuti meħtieġa biex jiġu eżegwiti l-aspetti kollha tal-pjan tal-azzjonijiet, u hemm tqassim ta’ kompiti xieraq fost l-imsieħba tiegħu (10 %).
5. Il-Proporzjon ta’ Spejjeż u Benefiċċji: l-applikazzjoni tal-għotja turi l-valur għall-flus f’termini tal-attivitajiet ippjanati relatati mal-baġit previst (10 %).
6. Impatt u Valur Miżjud Ewropew: l-effetti prevedibbli tal-attivitajiet tal-proġett fuq il-gruppi u s-sistemi fil-mira kkonċernati huma definiti b’mod ċar u konsistenti mal-objettivi stabbiliti; il-miżuri huma ppjanati sabiex jiġi żgurat li dawk l-effetti jistgħu jinkisbu. Aktarx li r-riżultati tal-attivitajiet ikunu sinifikanti u l-benefiċċji u l-bżonn tal-kooperazzjoni Ewropea (li tkompli żżid mal-approċċi nazzjonali, reġjonali jew lokali) jintwerew b’mod ċar (20 %).
7. Il-kwalità tal-Pjan ta’ Valorizzazzjoni (Tixrid u Użu tar-Riżultati): sa fejn l-attivitajiet ippjanati ta’ tixrid u użu sejrin jiżguraw użu ottimali tar-riżultati lil hinn mill-parteċipanti fil-proposta, matul u wara l-eżistenza tal-proġett (10 %).
5. Baġit
Il-baġit totali allokat għall-kofinanzjament ta’ proġett jammonta għal EUR 3,8 miljun.
Il-kontribuzzjoni finanzjarja mill-Unjoni Ewropea ma tistax taqbeż il-75 % tal-ispejjeż eliġibbli totali.
L-għotja massima għal kull proġett sejra tkun ta’ EUR 120 000 għall-Parti A (A.1 u A.2) u EUR 800 000 għall-Parti B.
L-Aġenzija tippjana li talloka l-ammont disponibbli skont il-proporzjon indikattiv li ġej: EUR 1 500 000 għall-Parti A u EUR 2 300 000 għall-Parti B. Madankollu, l-allokazzjoni finali tiddependi min-numru u mill-kwalità tal-proposti riċevuti għall-partijiet A u B.
L-Aġenzija tirreżerva d-dritt li ma tqassamx il-fondi kollha disponibbli.
6. Data ta’ skadenza għas-sottomissjoni
Sejrin jiġu aċċettati biss l-applikazzjonijiet sottomessi fuq il-formola l-korretta, mimlija kif suppost, datata, li turi baġit ibbilanċjat (dħul/infiq), sottomessa online (oriġinali) u ffirmata mill-persuna awtorizzata sabiex tidħol f’impenji legalment vinkolanti f’isem l-organizzazzjoni applikanti.
Data ta’ skadenza: It-Tnejn 1 ta’ Ottubru 2012 12:00 nofsinhar (Ħin tal-Ewropa Ċentrali)
L-applikazzjonijiet li ma jinkludux id-dokumenti kollha stipulati u li ma jiġux sottomessi qabel id-data ta’ skadenza mhumiex sejrin jiġu kkunsidrati.
Applikazzjoni sħiħa tikkonsisti f’dan li ġej:
— |
Pakkett ta’ Applikazzjoni oriġinali wieħed (Formola Elettronika u l-erba’ annessi). Irid jiġi sottomess online kif jingħad fil-Gwida tal-Utenti tal-Formola Elettronika. Din il-verżjoni, inklużi l-annessi tagħha huma meqjusa bħala l-verżjoni prinċipali. |
— |
Verżjoni stampata waħda li trid tintbagħat eżatt wara d-data ta’ skadenza li jkun fiha:
|
Il-verżjoni stampata trid tintbagħat permezz tal-posta rreġistrata jew ordinarja eżatt wara s-sottomissjoni online fuq l-indirizz li ġej:
Education, Audiovisual and Culture Executive Agency |
Unit P9 — Lifelong Learning: Eurydice and Policy Support |
Key Activity 1 — ECET |
Call for proposals EACEA/20/12 — Part A.1/Part A.2/Part B (please specify) |
BOU2 01/055 |
Avenue du Bourget/Bourgetlaan 1 |
1140 Bruxelles/Brussel |
BELGIQUE/BELGIË |
L-applikazzjonijiet sottomessi wara d-data ta’ skadenza mhumiex sejrin jiġu kkunsidrati.
Dawk l-applikazzjonijiet mibgħuta b’faks jew bil-posta elettronika biss mhumiex sejrin jiġu aċċettati.
7. Aktar tagħrif
Linji gwida dettaljati dwar is-Sejħa għall-Proposti u l-Pakkett ta’ Applikazzjoni huma disponibbli fuq il-websajt li ġejja:
http://eacea.ec.europa.eu/llp/funding/2012/call_ecet_2012_en.php
L-applikazzjonijiet iridu jiġu sottomessi billi jintużaw il-formoli pprovduti u jrid ikun fihom l-annessi, l-annessi u l-informazzjoni kollha kif mitlub fil-linji gwida dettaljati.
ATTI OĦRAJN
Il-Kummissjoni Ewropea
15.6.2012 |
MT |
Il-Ġurnal Uffiċjali tal-Unjoni Ewropea |
C 169/25 |
Pubblikazzjoni ta' applikazzjoni skont l-Artikolu 6(2) tar-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel
2012/C 169/09
Din il-pubblikazzjoni tagħti d-dritt għal oġġezzjoni għall-applikazzjoni skont l-Artikolu 7 tar-Regolament tal-Kunsill (KE) Nru 510/2006 (1). Id-dikjarazzjonijiet ta' oġġezzjoni għandhom jaslu għand il-Kummissjoni fi żmien sitt xhur mid-data ta' din il-pubblikazzjoni.
DOKUMENT UNIKU
IR-REGOLAMENT TAL-KUNSILL (KE) Nru 510/2006
“STORNOWAY BLACK PUDDING”
KE Nru: UK-PGI-0005-0876-03.05.2011
IĠP ( X ) DPO ( )
1. Isem:
“Stornoway Black Pudding”
2. Stat Membru jew pajjiż terz:
Ir-Renju Unit
3. Deskrizzjoni tal-prodott agrikolu jew tal-oġġett tal-ikel:
3.1. Tip tal-prodott:
Klassi 1.2.: |
Prodotti tal-laħam (imsajrin, immellħin, affumikati, eċċ.) |
3.2. Deskrizzjoni tal-prodott li għalih japplika l-isem f’(1):
Stornoway Black Puddings huma pudini suwed uniċi għal Stornoway, il-belt kapitali tal-Isle of Lewis fl-Outer Hebrides tal-Iskozja. Huma ta’ kulur rikk li jvarja minn kannella ħamrani skur għal kannella skur meta nejjin, u jvarjaw skont ir-riċetti lokali individwali.
L-ingredjenti li ġejjin jintużaw fil-produzzjoni ta' Stornoway Black Pudding:
— |
Xaħam ta’ dam taċ-ċanga |
— |
Dqiq tal-ħafur |
— |
Basla |
— |
Demm tan-nagħaġ jew baqar jew ħnieżer |
— |
Ilma – fejn jintuża demm imnixxef |
— |
Melħ |
— |
Bżar |
— |
Tubi jew ġlud għaz-zalzett sintetiċi jew naturali |
Ma huma permessi l-ebda ħwawar oħra u Stornoway Black Puddings iridu jkunu ħielsa mill-kuluri u togħmiet artifiċjali, aġenti li jagħtu l-massa u preservattivi.
Fil-forma oriġinali tagħhom, huma prodotti bħala pudini ta’ 52 mm sa 72 mm f’dijametru ċilindriku “forma ta’ zalzett”, li jvarjaw fit-tul minn 150 mm għal 500 mm u fil-piż minn 0,5 kg sa 1,36 kg, magħluqin f’ġilda. Madankollu, jistgħu jiġu prodotti f'daqsijiet u forom oħra skont ir-rekwiżiti tal-klijenti differenti, eż. ħolqa, jew fi flieli.
Huma umdużi u solidi fis-sawra tagħhom, u għandhom partikuli żgħar tax-xaħam li jintiegħmu. Id-dqiq tal-ħafur Skoċċiż użat fi Stornoway Black Puddings huwa responsabbli għas-sawra tajba u mhux lixxa tagħhom.
Stornoway Black Puddings iżommu l-forma tagħhom sew matul il-proċess kollu tat-tisjir. Ladarba imsajjrin, jidhru kważi suwed u jinqasmu faċilment meta jinqatgħu, iżda ma jitfarkux ħafna. It-togħma ta’ laħam hija niedja, rikka, kompluta, bnina, imħawwra sew – iżda mhux pikkanti – b'togħma li mhix xaħmija, pjaċevoli u tħalli togħma ta’ wara nadifa.
3.3. Materja prima (għall-prodotti proċessati biss):
Skont it-tradizzjoni u l-patrimonju, hemm xi varjazzjoni individwali fir-riċetti użati. Uħud mir-riċetti jirrikjedu ingredjenti imqattgħajn fini, oħrajn jirrikjedu qatgħa nqas delikata, li jirriżultaw fil-varjazzjonijiet żgħar fid-dehra u s-sawra skont ir-riċetta individwali tal-produtturi. Hemm ukoll varjazzjoni żgħira ħafna fir-riċetti fil-perċentwali ta' kull ingredjent użat biex isiru l-pudini.
Il-perċentwali tal-ingredjenti użati fi Stornoway Black Pudding għandhom jidħlu fil-firxiet li ġejjin:
— |
Xaħam ta’ dam taċ-ċanga – minimu ta’ 37 % sa massimu ta’ 50 % |
— |
Dqiq tal-ħafur – minimu ta’ 16 % sa massimu ta’ 20 % |
— |
Basla – minimu ta’ 15 % sa massimu ta’ 18 % |
— |
Demm tan-nagħaġ jew baqar jew ħnieżer – minimu ta’ 12 % sa massimu ta’ 26 % |
— |
Ilma – fejn jintuża demm imnixxef |
— |
Melħ – minimu ta’ 0,6 % sa massimu ta’ 2 % |
— |
Bżar – minimu ta’ 0,4 % sa massimu ta’ 2 % |
— |
Ġlud (jew tubi) sintetiċi jew naturali – Dijametru – 52 mm sa 72 mm, Tul – 150 mm sa 500 mm |
3.4. Għalf (għall-prodotti li ġejjin mill-annimali biss):
Mhux applikabbli
3.5. Passi speċifiċi tal-produzzjoni li jridu jseħħu fiż-żona ġeografika identifikata:
L-istadji kollha tal-preparazzjoni u l-produzzjoni ta’ Stornoway Black Pudding għandhom iseħħu fiż-żona inkluż:
— |
Il-preparazzjoni tax-xaħam ta’ dam taċ-ċanga |
— |
It-taħlit tal-ingredjenti |
— |
Il-mili fit-tubi sintetiċi |
— |
It-tisjir u t-tberrid tal-pudini |
3.6. Regoli speċifiċi dwar it-tqattigħ, it-tħakkik, l-ippakkjar, eċċ.:
Mhux applikabbli
3.7. Regoli speċifiċi dwar it-tikkettar:
Mhux applikabbli
4. Definizzjoni konċiża taż-żona ġeografika:
Il-belt ta’ Stornoway fuq l-Isle of Lewis u l-parroċċi inklużi fiż-żona ta’ “Stornoway Trust”.
5. Rabta maż-żona ġeografika:
5.1. Speċifiċità taż-żona ġeografika:
Il-kultivazzjoni tal-għelieqi żgħar magħluqin bil-ħitan (crofting), formola ta’ impriża żgħira tal-inkwilini li hija unika fl-Iskozja, kienet s-sostenn ewlieni tal-ħajja fuq il-gżira ta’ Lewis għal mijiet ta’ snin. Kien biss fl-aħħar 40 sena li il-kultivaturi ta’ dawn l-għelieqi magħluqa (crofters) bdew jagħmlu xogħol ieħor barra dawn l-għelieqi, u saru kultivaturi ta’ dan it-tip fuq bażi part-time. Il-kultivazzjoni tal-għelieqi żgħar magħluqin bil-ħitan hija tip ta’ ekonomija ta’ sussistenza, dawn il-kultivaturi ta’ Stornoway żammew għadd żgħir ta’ nagħaġ u/jew ħnieżer u baqar u kellhom jiżguraw li kull parti ta' dawk l-annimali kienet qed tiġi utilizzata kompletament. Meta kien jasal il-mument biex joqtlu l-annimal dawn il-kultivaturi ħadmu fimkien u, meta ma kienx jeżisti apparat tat-tkessiħ, kienu jaqsmu l-laħam mal-ġirien li minn naħa tagħhom kienu jagħmlu l-istess aktar tard, u b’hekk tkun żgurata provvista tal-laħam matul ix-xitwa twila.
Biex jagħmlu “Marag Dubh” – l-isem Skoċċiż bil-Gaeliku għal pudina sewda; dubh tfisser “sewda”, l-annimal jinqatel u d-demm jinġabar u jinżamm. L-intestini jitneħħew u jitnaddfu fl-ilma mielaħ tal-baħar. Wara jittieħdu lura fl-għelieqi magħluqa, jinqalbu ta’ barra ġewwa u jitqiegħdu fl-ilma kiesaħ f’sink, aktar tard jiżdiedu l-ilma baħar u l-melħ u wara jitħallew koperti għal 24 siegħa. L-intestini wara jitlaħalħu bl-ilma kiesaħ u mbagħad bil-misħun. Dan il-proċess twil irattab il-ġewwieni tal-istonku, u dawn il-kultivaturi jkunu jistgħu inaddfu l-intestini billi joborxuhom, fejn ir-riżultat ikun intestini bojod u nodfa l-ġmiel tagħhom. Minn intestin sħiħ wieħed jista’ joħroġ il-ġilda għal mill-inqas ħames Marag Dubhs – id-Deasainn (mill-kirxa), il-Brog (jew Boot), il-Curachd an Righ (King's Crown) u żewġ pudini twal maqtugħin mal-ileu u marbutin.
Dawn il-kultivaturi ma setgħux jiskartaw l-ebda biċċa laħam, allura kienu jieklu l-istess ikel kuljum sakemm jispiċċa. Il-pudini ipprovdew sors rikk ta’ ħadid u kienu parti importanti ħafna mid-dieta ta’ dawn il-kultivaturi u għadhom hekk għall-poplu ta’ Stornoway. Id-dqiq tal-ħafur Skoċċiż użat fi Stornoway Black Puddings huwa responsabbli għas-sawra tajba u mhux lixxa tagħhom. Fi klimi kesħin, bħall-Hebrides, il-valur kalorifiku għoli tax-xaħam ta’ dam jagħmlu ikel ideali fix-xitwa.
Il-produzzjoni ta’ Stornoway Black Puding tinvolvi ħafna ħiliet manwali diretti bħal:
— |
il-preparazzjoni tax-xaħam ta’ dam taċ-ċanga jinvolvi tindif u preparazzjoni tax-xaħam ta’ dam għad-daqs meħtieġ; |
— |
it-taħlit tal-ingredjenti xotti jirrikjedi l-użin bir-reqqa tal-ingredjenti li jiżguraw li l-konsistenza kumplessiva tat-taħlita għandha d-densità ħoxna t-tajba – dan huwa proċess ta’ ħila ġġudikat bl-għajn u s-sengħa tal-biċċier; |
— |
il-mili tat-tubi jitwettaq bil-magni megħjuna bl-idejn, xi zalzett imbagħad jintrabat bl-idejn; |
— |
It-tisjir u t-tberid tal-pudina – ladarba tissajjar kull pudina tiddendel individwalment biex tibred. |
Il-ħiliet involuti ġew żviluppati lokalment u għaddew minn ġenerazzjoni għall-oħra u rriżultaw fiż-żamma tal-karatteristiċi tradizzjonali ta’ Stornoway Black Pudding.
5.2. Speċifiċità tal-prodott:
Stornoway Black Pudding hija unika fis-sens li tuża biss dawn l-ingredjenti li ġejjin ordnati skont il-kwantità; xaħam ta’ dam taċ-ċanga, dqiq tal-ħafur, basla, demm (biż-żieda tal-ilma meta jintuża demm niexef), melħ u bżar. Huma ħielsa minn kuluri artifiċjali, togħmiet, aġenti li jagħtu l-massa u preservattivi. Għandhom kulur kannella ħamrani rikk li jvarja għal kannella skur meta jkun nej.
Bil-kuntrarju ta’ pudini suwed reġjonali oħrajn, ix-xaħam ta’ dam taċ-ċanga huwa ingredjent maġġuri fi Stornoway Black Puddings. Ix-xaħam ta’ dam huwa x-xaħam madwar il-kliewi u flettijiet tal-ifrat. Idub f’temperatura baxxa ta’ bejn 45-50 grad Celsius li jfisser li huwa faċli biex jintuża fil-forma solida għal produzzjoni tal-pudini iżda jinħall meta jitqiegħed fuq il-fwar jew bit-togħlija. Għalkemm ix-xaħam ta’ dam huwa kważi mingħajr togħma huwa jtejjeb it-togħma tal-ingredjenti miżjuda u jagħmel is-sawra tal-pudini eħfef ukoll. Fi klimi kesħin, bħall-Hebrides, il-valur kalorifiku għoli tax-xaħam ta’ dam jagħmlu ikel ideali fix-xitwa. It-tip ta’ dqiq tal-ħafur li jikber fl-Iskozja jipprovdi sawra tajba mhux lixxa għal Stornoway Balck Pudding.
Ir-riċetta bażika ta’ Stornoway Black Puddings baqgħet l-istess matul is-snin – għad ikun fihom biss xaħam ta’ dam taċ-ċanga, dqiq tal-ħafur, basal, demm, melħ u bżar, iżda l-metodi tal-produzzjoni kellhom jinbidlu, għaliex daħlu fis-seħħ regolamenti tal-iġene iktar rigorużi u għaliex id-domanda għal pudini żdiedet. Il-passi tal-produzzjoni biex issir Stornoway Black Pudding jinvolvu ħafna ħila. Il-preparazzjoni manwali tax-xaħam ta’ dam taċ-ċanga trid titwettaq biex ikun żgurat li l-biċċiet jinqatgħu f’biċċiet fini ta’ daqs konsistenti. Barra minn hekk, l-ingredjenti nexfin l-ewwel jitħalltu, bl-idejn, jew bil-magna qabel ma jiżdied l-ilma u jitħalltu. L-ingredjenti kollha jintiżnu b’ħafna reqqa matul il-proċess kollu, biex tkun żgurata l-konsistenza tal-prodott, li għandu konsistenza ta’ poriġ magħquda, li xorta titħawwad iżda trid tisforza ftit. It-taħlita mbagħad tiġi ttrasferita għal ġol-magna li timla z-zalzett li tmexxi t-taħlita għal ġot-tubi taz-zalzett. Iz-zalzett jimtela billi l-qoxra taz-zalzett titqiegħed manwalment fuq iż-żennuna tal-magna. Ir-regolazzjoni tal-fluss tal-laħam ukoll issir manwalment. It-truf wara jingħaqdu manwalment bl-ispag, jew jinqarsu flimkien bil-magna. Ladarba tissajjar, kull pudina tiddendel individwalment fuq xkaffa biex tibred.
Stornoway Black Puddings jistgħu jissajru fi, jew mingħajr il-ġilda, u jżommu l-forma tagħhom sew matul il-proċess kollu tat-tisjir. Ladarba imsajjrin, jidhru kważi suwed u jinqasmu faċilment meta jinqatgħu, iżda ma jitfarkux ħafna. It-togħma ta’ laħam hija niedja, rikka, kompluta, bnina, imħawwra sew – iżda mhux pikkanti – b'togħma li mhix xaħmija, pjaċevoli u tħalli togħma ta’ wara nadifa.
Il-biċċiera jkomplu jagħmlu dan il-prodott lokali distint permezz tar-riċetti li għaddew minn diversi ġenerazzjonijiet filwaqt li żammew il-karatteristiċi tradizzjonali li ġejjin minn ingredjenti speċifiċi u s-sawra tal-prodott.
5.3. Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO) jew il-kwalità speċifika, ir-reputazzjoni jew karatteristiċi oħra tal-prodott (għall-IĠP):
Il-kultivazzjoni tal-għelieqi żgħar magħluqin bil-ħitan, kienet is-sostenn ewlieni tal-ħajja fuq il-gżira ta’ Lewis għal mijiet ta’snin. Dawn il-kultivaturi ma setgħux jiskartaw l-ebda biċċa laħam, allura kienu jieklu l-istess ikel kuljum sakemm jispiċċa. Il-pudini ipprovdew sors rikk ta’ ħadid u kienu parti importanti ħafna tad-dieta ta’ dawn il-kultivaturi u għadhom hekk għall-poplu ta’ Stornoway.
Stornoway Black Pudding hija unika fis-sens li tuża biss dawn l-ingredjenti li ġejjin f’ordni ta’ kwantità; xaħam ta’ dam taċ-ċanga, dqiq tal-ħafur, basla, demm, melħ u bżar biż-żieda tal-ilma. Huma ħielsa minn kuluri artifiċjali, togħmiet, aġenti li jagħtu l-massa u preservattivi.
Bil-kuntrarju ta’ pudini suwed reġjonali oħrajn, ix-xaħam ta’ dam taċ-ċanga huwa ingredjent maġġuri fi Stornoway Black Puddings. Ix-xaħam ta’ dam huwa x-xaħam ta’ madwar il-kliewi u flettijiet tal-ifrat. Idub f’temperatura baxxa ta’ bejn 45-50 grad Celsius li jfisser li huwa faċli biex jintuża fil-forma solida għal produzzjoni tal-pudini iżda jinħall meta jitqiegħed fuq il-fwar jew bit-togħlija. Għalkemm ix-xaħam ta’ dam huwa kważi mingħajr togħma huwa jtejjeb it-togħma tal-ingredjenti miżjuda u jagħmel is-sawra tal-pudini eħfef ukoll. Ħafna mill-pudini suwed reġjonali huma magħmula mid-demm tal-ħnieżer. Stornoway Black Puddings madankollu jużaw demm tan-nagħaġ jew tal-baqar jew tal-ħnieżer, fejn id-demm jinkiseb mill-biċċerija lokali ta’ fuq il-gżira meta possibbli.
Uħud mill-biċċiera ta’ Stornoway li jiffurmaw parti minn Stornoway Black Pudding Producers’ Association ilhom jagħmlu u jbiegħu l-pudini tagħhom sa mill-1931. Stornoway Black Pudding ilhom jiġu mibjugħa taħt dak l-isem sa minn dak iż-żmien. Il-biċċiera użaw l-isem Stornoway Black Pudding fl-ambitu ta’ kooperattiva u fittxew li jżżommu standards għoljin fil-produzzjoni u li jżommu r-rabtiet li jmorru lura għall-patrimonju Hebridean. Bħala riżultat il-pudina ħadet reputazzjoni li dejjem qed issir aktar internazzjonali minħabba t-togħma u kwalità tagħha u issa hija magħrufa bħala waħda mill-aqwa pudini gourmet fir-Renju Unit. Il-prodott għamel it-tranżizzjoni milli jkun magħruf tradizzjonalment bħala platt ikel tipiku ta’ dawn il-kultivaturi sabiex il-lum isir assoċjat ma’ speċjalità tal-ikel magħrufa madwar id-dinja kollha.
Stornoway Black Pudding hija intrinsikament marbuta mat-turiżmu taż-żona, spiss mixtrija minn viżitaturi bħala tifkira jew “togħma tal-Gżejjer”. Hemm rikonoxximent dinji tad-ditta u r-rabta lura għal Stornoway bħala ż-żona. Ħafna mill-kotba ta’ gwida dwar l-Iskozja jsemmu l-Marag Dubh f’konnessjoni ma’ Lewis. Bosta mijiet ta’ entrati fuq Google wkoll isemmu din ir-rabta. Hebrides qed jesperjenzaw żieda fl-għadd ta’ viżitaturi u l-industrija tat-turiżmu fiż-żona tjiebet permezz tas-suċċess tal-esposizzjoni fuq it-TV minħabba programmi bħal “Great Hebridean Escape” ta’ Monty Hall. Il-pudina dehret fl-edizzjoni ta’ Jannar 2010 tan-National Geographic u kienet parti essenzjali tal-“Homecoming Campaign” tal-2010 ta’ Visit Scotland.
Referenza għall-pubblikazzjoni tal-ispeċifikazzjoni:
(L-Artikolu 5(7) tar-Regolament (KE) Nru 510/2006)
http://www.archive.defra.gov.uk/foodfarm/food/industry/regional/foodname/products/documents/stornoway-black-pudding-pgi.pdf
(1) ĠU L 93, 31.3.2006, p. 12.