21.1.2012

Il-Ġurnal Uffiċjali tal-Unjoni Ewropea

C 18/1

OPINJONI TAL-KUMMISSJONI

tal-20 ta’ Jannar 2012

dwar il-pjan modifikat għar-rimi ta' skart radjuattiv mill-Impjant Nukleari ta' Blayais, fi Franza

(It-test bil-Franċiż biss huwa awtentiku)

2012/C 18/01

Il-valutazzjoni ta’ hawn taħt qed titwettaq skont id-dispożizzjonijiet tat-Trattat tal-Euratom, u hija bla ħsara għal kwalunkwe valutazzjoni oħra li għandha titwettaq skont it-Trattat dwar il-Funzjonament tal-Unjoni Ewropea u l-obbligi li joħorġu minnu u mil-leġiżlazzjoni sekondarja.

Fis-6 ta' Settembru 2011, il-Kummissjoni Ewropea rċeviet mingħand il-Gvern ta’ Franza, skont l-Artikolu 37 tat-Trattat tal-Euratom, Dejta Ġenerali dwar il-pjan emendat għar-rimi tal-iskart radjuattiv mill-Impjant Nukleari ta' Blayais.

Abbażi ta' din id-dejta, u wara konsultazzjoni mal-Grupp ta' Esperti, il-Kummissjoni fasslet l-opinjoni li ġejja:

(1)	Id-distanzi mill-impjant nukleari għall-eqreb Stati Membri huma ta' 226 km għal Spanja u 568 km għall-Italja.

(2)	Il-modifikazzjonijiet ippjanati għandhom l-għan li jużaw elementi tal-karburant MOx f'żewġ unitajiet minn erba' preżenti fis-sit (l-unitajiet 3 u 4).

(3)	Matul kundizzjonijiet normali ta’ operazzjoni, il-modifikazzjoni ppjanata ma twassalx għal esponiment sinifikanti mill-aspett sanitarju tal-popolazzjoni fi Stat Membru ieħor.

(4)	Fil-każ ta’ rilaxxi mhux ippjanati ta’ effluwenti radjuattivi, li jistgħu jseħħu wara xi inċident tat-tip u d-daqs ikkunsidrati fid-Dejta Ġenerali, id-dożi li aktarx jaslu għand il-popolazzjoni fi Stat Membru ieħor minħabba l-modifikazzjoni ppjanata ma jkunux sinifikanti mill-aspett sanitarju.

Bħala konklużjoni, il-Kummissjoni hija tal-opinjoni li l-implimentazzjoni tal-pjan modifikat għar-rimi ta' skart radjuattiv fi kwalunkwe forma mill-impjant ta' Blayais fi Franza, kemm f'operazzjoni normali kif ukoll fil-każ ta' inċident tat-tip u daqs ikkunsidrat fid-Dejta Ġenerali, x'aktarx li ma jirriżultax f'kontaminazzjoni radjoattiva, li tkun sinifikanti mill-aspett sanitarju, tal-ilma, tal-ħamrija jew tal-ispazju tal-arja ta' Stat Membru ieħor.

Magħmul fi Brussell, l-20 ta’ Jannar 2012.

Għall-Kummissjoni

Günther OETTINGER

Membru tal-Kummissjoni

KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

21.1.2012

Il-Ġurnal Uffiċjali tal-Unjoni Ewropea

C 18/3

Rata tal-kambju tal-euro (1)

L-20 ta’ Jannar 2012

2012/C 18/03

1 euro =

	Munita	Rata tal-kambju
USD	Dollaru Amerikan	1,2902
JPY	Yen Ġappuniż	99,53
DKK	Krona Daniża	7,4362
GBP	Lira Sterlina	0,83390
SEK	Krona Żvediża	8,7804
CHF	Frank Żvizzeru	1,2077
ISK	Krona Iżlandiża
NOK	Krona Norveġiża	7,6600
BGN	Lev Bulgaru	1,9558
CZK	Krona Ċeka	25,466
HUF	Forint Ungeriż	304,68
LTL	Litas Litwan	3,4528
LVL	Lats Latvjan	0,6990
PLN	Zloty Pollakk	4,3196
RON	Leu Rumen	4,3440
TRY	Lira Turka	2,3640
AUD	Dollaru Awstraljan	1,2379
CAD	Dollaru Kanadiż	1,3076
HKD	Dollaru ta' Hong Kong	10,0145
NZD	Dollaru tan-New Zealand	1,6071
SGD	Dollaru tas-Singapor	1,6463
KRW	Won tal-Korea t'Isfel	1 463,46
ZAR	Rand ta' l-Afrika t'Isfel	10,2858
CNY	Yuan ren-min-bi Ċiniż	8,1732
HRK	Kuna Kroata	7,5670
IDR	Rupiah Indoneżjan	11 541,85
MYR	Ringgit Malażjan	4,0016
PHP	Peso Filippin	55,940
RUB	Rouble Russu	40,4552
THB	Baht Tajlandiż	40,719
BRL	Real Brażiljan	2,2804
MXN	Peso Messikan	17,1248
INR	Rupi Indjan	64,8730

(1) Sors: rata tal-kambju ta' referenza ppubblikata mill-Bank Ċentrali Ewropew.

21.1.2012

Il-Ġurnal Uffiċjali tal-Unjoni Ewropea

C 18/5

Rapport finali tal-Uffiċjal tas-Seduta (1)

COMP/39.692 – IBM Servizzi ta' Manutenzjoni

2012/C 18/05

(1)

Fit-23 ta’ Lulju 2010, il-Kummissjoni ddeċidiet li tiftaħ proċedimenti kontra International Business Machines Corporation (“IBM”) dwar allegazzjoni ta' abbuż ta' dominanza fis-suq għall-inputs meħtieġa sabiex jipprovdu servizzi ta’ manutenzjoni tal-ħardwer u tas-softwer għal sistemi operattivi għall-mejnfrejm tal-IBM.

(2)

Ġiet adottata valutazzjoni preliminari mill-Kummissjoni fl-1 ta’ Awwissu 2011 skont l-Artikolu 9(1) tar-Regolament (KE) Nru 1/2003 (2) u ġiet innotifikata lil IBM fit-2 ta' Awwissu 2011. Dan ikkonkluda fuq bażi preliminari li IBM setgħet ċaħdet li tagħti aċċess lil mantenituri terzi għal ċerti inputs meħtieġa biex jipprovdu servizzi ta' manutenzjoni lill-ħardwer u s-softwer għal sistemi operattivi għall-mejnfrejm tal-IBM, bi ksur tal-Artikolu 102 tat-Trattat dwar il-Funzjonament tal-Unjoni Ewropea, b'mod partikulari l-paragrafu (b) tiegħu, u l-Artikolu 54 tal-Ftehim dwar iż-Żona Ekonomika Ewropea.

(3)

Fl-14 ta’ Settembru 2011, IBM issottomettiet l-ewwel proposta għall-impenji biex tindirizza t-tħassib li tqajjem mill-Kummissjoni fil-valutazzjoni preliminari tagħha. Fl-20 ta' Settembru 2011, il-Kummissjoni ppubblikat avviż f'Il-Ġurnal Uffiċjali tal-Unjoni Ewropea b’konformità mal-Artikolu 27(4) tar-Regolament (KE) Nru 1/2003, fejn għamlet sommarju tal-każ, il-kontenut prinċipali tal-impenji, il-kors ta' azzjoni propost u stiednet lill-partijiet terzi biex jibagħtu l-kummenti dwar l-impenji proposti minn IBM (3). Bi tweġiba għall-avviż, il-Kummissjoni rċeviet 7 osservazzjonijiet minn partijiet terzi interessati u infurmat lil IBM b’dawn il-kummenti. IBM issottomettiet sett rivedut ta' impenji fl-24 ta' Ottubru 2011.

(4)

Fid-deċiżjoni tagħha skont l-Artikolu 9(1) tar-Regolament (KE) Nru 1/2003, il-Kummissjoni tagħmel l-impenji offruti minn IBM vinkolanti għal perjodu totali ta’ 5 snin u tikkonkludi li fid-dawl tar-rimedji offruti, m'għadx hemm raġunijiet għal azzjoni min-naħa tagħha, u għalhekk il-proċeduri f'dan il-każ għandhom jintemmu.

(5)	Jien ma rċevejt l-ebda talba jew ilment mingħand l-ebda parti għall-proċedimenti fil-każ preżenti (4). Fid-dawl ta' dan, inqis li l-ħarsien effettiv tad-drittijiet proċedurali tal-parteċipanti kollha f’dan il-każ ġie rrispettat.

Brussell, il-5 ta’ Diċembru 2011.

Wouter WILS

(1) Skont l-Artikoli 16 u 17 tad-Deċiżjoni 2011/695/UE tal-President tal-Kummissjoni Ewropea tat-13 ta’ Ottubru 2011 dwar il-funzjoni u t-termini ta' referenza tal-uffiċjal tas-seduta f'ċerti proċedimenti dwar il-kompetizzjoni, ĠU L 275, 20.10.2011, p. 29 (“id-Deċiżjoni 2011/695/UE”).

(2) Ir-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat, ĠU L 1, 4.1.2003, p. 1.

(3) Avviż ippubblikat skont l-Artikolu 27(4) tar-Regolament tal-Kunsill (KE) Nru 1/2003 fil-Każ COMP/39.692 – IBM Servizzi ta' manutenzjoni, ĠU C 275, 20.9.2011, p. 8.

(4) Skont l-Artikolu 15(1) tad-Deċiżjoni 2011/695/UE, il-partijiet għall-proċedimenti li joffru impenji skont l-Artikolu 9 tar-Regolament (KE) Nru 1/2003 jistgħu jirrikorru għall-uffiċjal tas-seduta fi kwalunkwe stadju tal-proċedura sabiex ikun żgurat il-ħarsien effettiv tad-drittijiet proċedurali tagħhom.

21.1.2012

Il-Ġurnal Uffiċjali tal-Unjoni Ewropea

C 18/6

Sommarju tad-Deċiżjoni tal-Kummissjoni

tat-13 ta' Diċembru 2011

dwar il-proċediment skont l-Artikolu 102 tat-Trattat dwar il-Funzjonament tal-Unjoni Ewropea u l-Artikolu 54 tal-Ftehim taż-ŻEE

(Każ COMP/39.692 – IBM Servizzi ta’ Manutenzjoni)

(notifikata bid-dokument numru C(2011) 9245)

(It-test bl-Ingliż biss huwa awtentiku)

(Test b’relevanza għaż-ŻEE)

2012/C 18/06

Fit-13 ta’ Diċembru 2011 il-Kummissjoni adottat deċiżjoni skont l-Artikolu 9 tar-Regolament tal-Kunsill (KE) Nru 1/2003 dwar proċediment skont l-Artikolu 102 tat-Trattat dwar il-Funzjonament tal-Unjoni Ewropea (“TFUE”). Konformi mad-dispożizzjonijiet tal-Artikolu 30 tar-Regolament tal-Kunsill (KE) Nru 1/2003 (1), il-Kummissjoni qiegħda hawnhekk tippubblika l-isem tal-parti kkonċernata u tal-kontenut ewlieni tad-deċiżjoni, wara li kkunsidrat l-interess leġittimu tal-impriżi fil-protezzjoni tas-sigrieti kummerċjali tagħhom. Verżjoni mhux konfidenzjali tad-deċiżjoni hija disponibbli fis-sit elettroniku tad-Direttorat Ġenerali għall-Kompetizzjoni fl-indirizz li ġej:

http://ec.europa.eu/competition/elojade/isef/case_details.cfm?proc_code=1_39692

1. INTRODUZZJONI

(1)

Id-deċiżjoni skont l-Artikolu 9 tar-Regolament tal-Kunsill (KE) Nru 1/2003 hija indirizzata lil International Business Machines Corporation (“IBM”). Din id-deċiżjoni tagħmel l-impenji offruti minn IBM obbligatorji sabiex tindirizza t-tħassib dwar il-kompetizzjoni li joħorġu minn investigazzjoni mwettqa mill-Kummissjoni fis-suq tal-manutenzjoni għall-prodotti ta’ ħardwer u ta' softwer għal sistemi operattivi għall-mejnfrejm tal-IBM.

2. DESKRIZZJONI TAL-KAŻ

2.1. Tħassib preliminari dwar il-kompetizzjoni

(2)

Mejnfrejms huma kompjuters b’saħħithom użati minn kumpaniji kbar u istituzzjonijiet governattivi madwar id-dinja kollha għall-ħażna u l-ipproċessar ta’ informazzjoni kummerċjali kritika. Minħabba l-affidabilità kbira tagħhom, id-disponibilità u l-possibbiltà li jingħatalhom servis il-mejnfrejms ġeneralment jintużaw għat-tħaddim ta’ proċessi kummerċjali kruċjali. Sabiex tkun żgurata il-kontinwità kummerċjali, teħtieġ għalhekk manutenzjoni effikaċi. Servizzi ta’ manutenzjoni għall-mejnfrejms huma offruti kemm mill-IBM kif ukoll minn partijiet terzi li jagħtu dan is-servizz (third party maintainers “TPMs”).

(3)	Fl-1 t'Awwissu 2011 il-Kummissjoni indirizzat valutazzjoni preliminari lil IBM fejn ippreżentat it-tħassib li IBM setgħet abbużat mill-pożizzjoni dominanti tagħha fuq is-suq tal-manutenzjoni għall-ħardwer tal-mejnfrejms u l-prodotti ta’ softwer għal sistemi operattivi tagħha.

(4)

B’mod partikolari l-Kummissjoni inizjalment ikkonkludiet li IBM jista’ jkollha pożizzjoni dominanti fuq is-suq għall-kontributi meħtieġa biex isiru servizzi ta’ manutenzjoni għall-mejnfrejms tal-IBM u li IBM setgħet imponiet kondizzjonijiet ta’ forniment mhux raġonevoli, fir-rigward ta’ ċerti kontributi meħtieġa għall-manutenzjoni tal-mejnfrejms tal-IBM, fuq il-kompetituri tagħha fis-suq tal-manutenzjoni, biex b’hekk ġabithom fi żvantaġġ kompetittiv. Il-Kummissjoni kkonkludiet li dan l-aġir jista' jammonta għal ċaħda kostruttiva ta' proviżjon lil fornituri kompetituri ta’ servizzi ta’ manutenzjoni tal-mejnfrejms b'kontravenzjoni tal-Artikolu 102 TFUE.

(5)

Il-prattiki ta’ IBM jistgħu jaffettwaw diversi TPMs, li wħud minnhom huma attivi fi Stati Membri differenti. Għal din ir-raġuni, il-konklużjoni preliminari tal-Kummissjoni kienet li l-prattiki li joħolqu l-problemi jista’ jkollhom riperkussjonijiet fuq il-mudell tal-kompetizzjoni fi ħdan is-suq intern.

2.2. L-Impenji

(6)	Fl-14 ta’ Settembru 2011, bħala tweġiba għat-tħassib tal-Kummissjoni espress fil-valutazzjoni preliminari, IBM ressqet impenji lill-Kummissjoni.

(7)

Fl-20 ta’ Settembru 2011, ġie ppubblikat avviż f'Il-Ġurnal Uffiċjali tal-Unjoni Ewropea skont l-Artikolu 27(4) tar-Regolament (KE) Nru 1/2003, li jagħti taqsira tal-kawża u tal-impenji u li jistieden lil partijiet terzi interessati jressqu l-osservazzjonijiet tagħhom dwar l-impenji fi żmien xahar mill-pubblikazzjoni.

(8)	Sa din id-data ta’ skadenza l-Kummissjoni rċeviet 7 osservazzjonijiet mingħand partijiet terzi interessati. Il-Kummissjoni infurmat lil IBM dwar dawn il-kummenti u fl-24 t’ Ottubru 2011, IBM ressqet proposta emendata għall-impenji (ddatata l-21 t'Ottubru 2011).

(9)	Fil-5 ta' Diċembru 2011, il-Kumitat Konsultattiv fil-qasam tal-Prattiki Restrittivi u Pożizzjonijiet Dominanti ġie kkonsultat u ta opinjoni favorevoli. Fl-istess ġurnata, l-Uffiċjal tas-Seduta ħareġ ir-rapport finali tiegħu.

(10)

Fit-13 ta’ Diċembru 2011, il-Kummissjoni rendiet l-impenji riveduti ta' IBM obbligatorji b’deċiżjoni skont l-Artikolu 9 tar-Regolament (KE) Nru 1/2003. IBM timpenja ruħha, għal perjodu ta’ ħames snin biex tpoġġi għad-dipożizzjoni fil-pront ta’ spare parts importanti u informazzjoni teknika skont termini kummerċjalment raġonevoli u mhux diskriminatorji u tippermetti lil partijiet terzi jinfurzaw l-impenji. F’anness għall-Impenji, IBM ressqet ukoll numru ta’ klawsoli standard ta’ kuntratti li jiddeskrivu l-mod kif l-obbligi mdaħħla se jiġu implimentati. Kwalunkwe modifika jew emenda għal dawn il-klawsoli standard se tkun teħtieġ l-awtorizzazzjoni minn qabel tal-Kummissjoni.

(11)

Il-Kummissjoni tqis li l-impenji fil-forma definittiva tagħhom huma biżżejjed u neċessarji biex jindirizzaw it-tħassib dwar il-kompetizzjoni identifikat fil-valutazzjoni preliminari mingħajr ma jkunu eċċessivi. Malli jinqala' xi tħassib dwar il-kompetizzjoni mill-fatt li IBM setgħet ċaħdet milli tagħti aċċess adegwat lil ċerti kontributi meħtieġa għall-forniment ta' servizzi ta' manutenzjoni għall-oqfsa ewlenin ta’ IBM, il-Kummissjoni tikkunsidra l-impenji riveduti bħala proporzjonali. Huma jindirizzaw dan it-tħassib billi jiggarantixxu li spare parts relevanti u informazzjoni teknika importanti għall-manutenzjoni ta' mejnfrejm tal-IBM ikunu disponibbli fil-pront lit-TPMs.

3. KONKLUŻJONIJIET

(12)	Fid-dawl tal-impenji riveduti proposti, il-Kummissjoni tqis li ma għadx hemm raġunijiet għal azzjoni min-naħa tagħha u, bla ħsara għall-Artikolu 9(2) tar-Regolament (KE) Nru 1/2003, il-proċedimenti f'dan il-każ għandhom għalhekk jintemmu.

(1) ĠU L 1, 4.1.2003, p. 1.

21.1.2012

Il-Ġurnal Uffiċjali tal-Unjoni Ewropea

C 18/8

DEĊIŻJONI TAL-KUMMISSJONI

tad-19 ta’ Jannar 2012

dwar it-twaqqif tal-Grupp ta’ Awtoritajiet tal-Unjoni Ewropea li huma responsabbli għall-attivitajiet taż-żejt u tal-gass li jitwettqu lil hinn mill-kosta

2012/C 18/07

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Billi:

(1)

L-Artikolu 191 tat-Trattat jistabbilixxi l-għanijiet tal-preservazzjoni, tal-ħarsien u tat-titjib tal-kwalità tal-ambjent u joħloq obbligu għall-azzjonijiet kollha tal-Unjoni li jkunu appoġġati minn livell għoli ta’ protezzjoni bbażat fuq il-prinċipju ta’ prekawzjoni u fuq azzjoni preventiva u għall-użu prudenti u razzjonali tar-riżorsi naturali.

(2)

Il-politika tal-Unjoni għandha l-għan li tnaqqas l-okkorrenza ta’ aċċidenti kbar marbutin mal-attivitajiet taż-żejt u tal-gass li jitwettqu lil hinn mill-kosta u li tillimita l-konsegwenzi tagħhom, u b’hekk iżżid il-ħarsien tal-ambjent tal-baħar u tal-ekonomiji ta’ mal-kosta mit-tniġġis kif ukoll tillimita t-tfixkil potenzjali għall-produzzjoni indiġena tal-enerġija fl-Unjoni, u li ttejjeb il-mekkaniżmi ta’ reazzjoni fil-każ ta’ xi aċċident.

(3)

L-aċċidenti marbutin mal-attivitajiet taż-żejt u tal-gass li jitwettqu lil hinn mill-kosta fl-2010, l-iktar dak tal-pjattaforma taż-żejt imsejħa “Deepwater Horizon” fil-Golf tal-Messiku, qanqlu analiżi tal-politiki li għandhom l-għan li jiżguraw is-sikurezza tal-attivitajiet li jitwettqu lil hinn mill-kosta. Il-Kummissjoni esprimiet il-fehmiet inizjali tagħha dwar is-sikurezza tal-ħidmiet taż-żejt u tal-gass li jitwettqu lil hinn mill-kosta fil-Komunikazzjoni tagħha msejħa “L-isfida tas-sikurezza tal-attivitajiet taż-żejt u l-gass fil-baħar” (1) fit-12 ta’ Ottubru 2010.

(4)

Hemm riskji sinifikanti li, fl-ilmijiet tal-Unjoni, iseħħ xi aċċident kbir taż-żejt jew tal-gass lil hinn mill-kosta. L-industriji taż-żejt u tal-gass lil hinn mill-kosta huma stabbiliti f’għadd ta’ reġjuni tal-Unjoni, u hemm prospetti għal żviluppi reġjonali ġodda fl-ilmijiet tal-Unjoni. Il-produzzjoni taż-żejt u tal-gass lil hinn mill-kosta hija element sinifikanti fis-sigurtà tal-provvista tal-enerġija tal-UE.

(5)

Filwaqt li l-Unjoni diġà għandha eżempji ta’ prattiki regolatorji nazzjonali eċċellenti marbutin mal-attivitajiet taż-żejt u tal-gass li jitwettqu lil hinn mill-kosta, it-titjib tal-implimentazzjoni tal-qafas regolatorju għall-ħidmiet taż-żejt u tal-gass li jitwettqu lil hinn mill-kosta jista’ jkompli jtejjeb is-sikurezza tal-attivitajiet li jitwettqu lil hinn mill-kosta.

(6)	L-iskambju kontinwu tal-esperjenza, l-identifikazzjoni tal-aqwa prattiki fost l-awtoritajiet nazzjonali u l-industrija u t-titjib tal-miżuri ta’ implimentazzjoni qed jiġu rrikonoxxuti bħala aspetti ewlenin ta’ skema regolatorja li taħdem tajjeb.

(7)

Il-valur tal-kollaborazzjoni bejn l-awtoritajiet li huma responsabbli għall-attivitajiet li jitwettqu lil hinn mill-kosta ġie stabbilit b’mod ċar permezz tal-attivitajiet tal-Forum tal-Awtoritajiet li huma responsabbli għall-attivitajiet li jitwettqu lil hinn mill-kosta fil-Baħar tat-Tramuntana u tal-Forum tar-Regolaturi Internazzjonali. Abbażi ta’ dawn l-esperjenzi, huwa importanti li l-effettività tat-trasferiment tal-esperjenza u tal-għarfien madwar l-Unjoni tittejjeb kemm jista’ jkun permezz ta’ struttura formali fil-livell tal-Unjoni kollha.

(8)

Filwaqt li jissejjes l-aktar fuq l-attivitajiet tar-regolaturi nazzjonali, fl-attivitajiet tiegħu, il-Grupp ta’ Awtoritajiet tal-Unjoni Ewropea li huma responsabbli għall-attivitajiet taż-żejt u tal-gass li jitwettqu lil hinn mill-kosta għandu jinkludi l-esperjenza tal-partijiet interessati rilevanti, inkluża dik ta’ pajjiżi terzi rilevanti. Il-Grupp ta’ Awtoritajiet għandu jiffaċilita t-trasferiment tal-għarfien fost il-partijiet interessati u jgħin biex jinħarġu linji gwida formali dwar l-aqwa prattiki.

(9)

L-għanijiet tal-kollaborazzjoni bejn l-awtoritajiet li huma responsabbli għall-attivitajiet li jitwettqu lil hinn mill-kosta fuq kwistjonijiet marbutin mal-fatt li jiġu evitati aċċidenti kbar lil hinn mill-kosta u li jkun hemm reazzjoni għalihom jikkumplimentaw ukoll l-għanijiet tal-Grupp permanenti ta’ ħidma dwar l-industrija tat-tħaffir fil-minjieri u l-industriji tat-tħaffir l-oħrajn stabbilit bl-Artikolu 6 tad-Deċiżjoni tal-Kunsill 2003/C 218/01 li tistabbilixxi Kumitat ta’ Konsulenza dwar is-Sigurtà [is-Sikurezza] u s-Saħħa fuq il-Post tax-Xogħol u jikkumplimentaw ukoll l-għanijiet ta’ dan l-istess Kumitat.

(10)	Għandu jsir provvediment għal regoli dwar l-iżvelar tat-tagħrif mill-membri tal-Grupp ta’ Awtoritajiet u mir-rappreżentanti tagħhom, mingħajr ħsara għar-regoli tal-Kummissjoni dwar is-sigurtà kif stipulat fl-Anness għad-Deċiżjoni tal-Kummissjoni 2001/844/KE, KEFA, Euratom.

(11)

Id-dejta personali kollha dwar il-membri tal-Grupp ta’ Awtoritajiet għandha tkun ipproċessata skont ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwu fir-rigward tal-ipproċessar ta’ data [dejta] personali mill-istituzzjonijiet u l-korpi tal-Komunità u dwar il-movement liberu ta’ dak id-data [din id-dejta] (2),

IDDEĊIDIET KIF ĠEJ:

Artikolu 1

Suġġett

B’dan għandu jiġi stabbilit il-Grupp ta’ Awtoritajiet tal-Unjoni Ewropea li huma responsabbli għall-attivitajiet taż-żejt u tal-gass li jitwettqu lil hinn mill-kosta (minn hawn ’il quddiem imsejjaħ “il-Grupp ta’ Awtoritajiet”).

Artikolu 2

Kompitu

1. Il-Grupp ta’ Awtoritajiet għandu jservi primarjament bħala forum għall-iskambju tal-esperjenzi u tal-għarfien espert bejn l-awtoritajiet nazzjonali u l-Kummissjoni.

2. L-attivitajiet tal-Grupp ta’ Awtoritajiet jistgħu jinkludu, b’koordinazzjoni mal-attivitajiet tal-gruppi kollha l-oħra ta’ esperti rilevanti, il-kwistjonijiet kollha marbutin mal-prevenzjoni ta’ aċċidenti kbar fil-ħidmiet taż-żejt u tal-gass li jitwettqu lil hinn mill-kosta fl-Unjoni kif ukoll lil hinn mill-fruntieri tagħha, jekk ikun xieraq, u mat-tweġiba għalihom.

3. Il-Grupp tal-Awtoritajiet għandu jiddiskuti, jgħin u jagħti l-opinjoni tiegħu lill-Kummissjoni, jew fuq talba tal-Kummissjoni jew fuq inizjattiva tiegħu stess, b’mod partikulari dwar il-kwistjonijiet li ġejjin:

(a)	l-identifikazzjoni ta’ prijoritajiet għat-tħejjija ta’ dokumenti li jservu ta’ gwida u ta’ standards kif ukoll tal-aqwa prattiki fis-settur taż-żejt u tal-gass;

(b)	it-tħejjija ta’ linji gwida dwar l-aqwa prattiki fl-industrija, jew l-għoti ta’ bidu għal din it-tħejjija u s-sorveljanza tagħha;

(c)

fl-interess tal-iskambju tal-esperjenza, it-tħaffif tal-iskambju tat-tagħrif b’mod rapidu bejn il-Kummissjoni u l-awtoritajiet nazzjonali, pereżempju dwar l-okkorrenza ta’ inċidenti kbar u ta’ avvenimenti li setgħu wasslu għal inċidenti kbar u l-kawżi tagħhom u t-tweġiba għalihom, kif ukoll tal-intelliġenza operattiva marbuta mal-istallazzjonijiet tat-tħaffir li beħsiebhom jiċċaqalqu minn Stat Membru għall-ieħor;

(d)	il-promozzjoni u t-tħaffif tal-kunsens bejn il-Kummissjoni u l-awtoritajiet nazzjonali dwar l-aqwa prattiki regolatorji;

(e)	il-promozzjoni tal-iskambji u s-sekondar tal-persunal bejn l-awtoritajiet nazzjonali biex iżidu l-għarfien u l-esperjenza tagħhom;

(f)

l-iskambju tat-tagħrif dwar l-applikazzjoni tal-leġiżlazzjoni u tal-politiki nazzjonali u tal-Unjoni li huma rilevanti għall-attivitajiet taż-żejt u tal-gass li jitwettqu lil hinn mill-kosta, inklużi l-miżuri għall-prevenzjoni ta’ atti illegali intenzjonati kontra dawk l-attivitajiet, u l-għoti ta’ għajnuna lill-Kummissjoni fil-monitoraġġ tal-implimentazzjoni tal-acquis rilevanti tal-Unjoni.

Artikolu 3

Konsultazzjoni

1. Mingħajr ħsara għall-Artikolu 2, il-Kummissjoni tista’ tikkonsulta lill-Grupp tal-Awtoritajiet dwar kull kwistjoni li jkollha x’taqsam ma’ perikli kbar fit-tfittxija u l-esplorazzjoni għaż-żejt u għall-gass lil hinn mill-kosta u fil-produzzjoni tagħhom.

2. Il-Grupp tal-Awtoritajiet għandu jikkonsulta mal-gruppi l-oħra ta’ esperti tal-Kummissjoni meta jkun hemm interessi kumplimentari sabiex jiżgura li l-gruppi l-oħra jkunu jafu dwar kwistjonijiet rilevanti u sabiex jirċievi tagħrif li jkun ta’ interess għalih.

Artikolu 4

Sħubija – Ħatra

1. Il-Grupp tal-Awtoritajiet għandu jkun magħmul mill-awtoritajiet tal-Istati Membri li huma responsabbli għas-sorveljanza regolatorja tal-attivitajiet taż-żejt u tal-gass li jitwettqu lil hinn mill-kosta u għal kwistjonijiet tal-politika relatati ma’ dawn l-attivitajiet.

2. L-awtoritajiet tal-Istati Membri għandhom jaħtru lir-rappreżentanti tagħhom.

3. L-ismijiet tal-awtoritajiet tal-Istati Membri għandhom jiġu ppubblikati fir-Reġistru tal-gruppi ta’ esperti tal-Kummissjoni u ta’ entitajiet simili oħrajn (“ir-Reġistru”).

4. Id-dejta personali għandha tinġabar u tkun ipproċessata u ppubblikata skont ir-Regolament (KE) Nru 45/2001.

Artikolu 5

Operat

1. Il-Grupp tal-Awtoritajiet għandu jkun ippresedut minn rappreżentant tal-Kummissjoni, li jista’ jaħtar kopresident.

2. Bi qbil mas-servizzi tal-Kummissjoni, il-Grupp tal-Awtoritajiet jista’ jistabbilixxi sottogruppi biex jeżaminaw kwistjonijiet speċifiċi, bħalma huwa l-iskambju tal-aqwa prattiki, abbażi ta’ termini ta’ referenza xierqa. Hekk kif itemmu l-mandat tagħhom, dawn is-sottogruppi għandhom jiġu xolti.

3. Fuq stedina tal-President, ir-rappreżentanti tas-setturi kkonċernati, fosthom rappreżentanti mill-industrija, mill-għaqdiet tal-ħaddiema, mill-qasam akkademiku, mill-organizzazzjonijiet tar-riċerka, mill-organizzazzjonijiet mhux governattivi, mill-Aġenziji rilevanti tal-Unjoni, minn pajjiżi terzi u minn partijiet interessati oħrajn, jistgħu jieħdu sehem f’ħidmet il-Grupp tal-Awtoritajiet. Barra minn hekk, l-individwi jew l-organizzazzjonijiet li jistgħu jikkontribwixxu, bil-parteċipazzjoni tagħhom, għal ħidmet il-Grupp tal-Awtoritajiet jistgħu jingħataw l-istatus ta’ osservaturi.

4. Normalment il-Grupp tal-Awtoritajiet u s-sottogruppi tiegħu għandhom jiltaqgħu fil-bini tal-Kummissjoni skont il-proċeduri u l-iskeda stabbiliti minnha. Jekk is-servizzi tas-segretarjat ma jkunux ipprovduti mod ieħor, il-Kummissjoni għandha tipprovdihom.

5. Stat Membru jista’ jitlob l-opinjoni tal-Grupp tal-Awtoritajiet dwar dokumenti u tagħrif ippubblikat dwar perikli kbar fl-attivitajiet taż-żejt u tal-gass li jitwettqu lil hinn mill-kosta, skont id-dispożizzjonijiet tal-leġiżlazzjoni applikabbli tal-Unjoni.

6. Il-Grupp tal-Awtoritajiet għandu jirrapporta b’mod regolari dwar l-attività tiegħu, l-iktar dwar l-identifikazzjoni u l-implimentazzjoni tal-aqwa prattiki u dwar il-prestazzjoni tal-industrija tal-attivitajiet li jitwettqu lil hinn mill-kosta.

7. Il-Grupp tal-Awtoritajiet għandu jiltaqa’ mill-inqas darba fis-sena.

8. Il-membri maħtura tal-Grupp tal-Awtoritajiet u l-President għandhom jiltaqgħu mill-inqas darba f’sena mal-kontropartijiet mill-Grupp permanenti ta’ ħidma għall-industrija tat-tħaffir fil-minjieri u l-industriji tat-tħaffir l-oħrajn sabiex jiddiskutu magħhom il-ħidma taż-żewġ organizzazzjonijiet matul il-perjodu ta’ qabel u jaqsmu flimkien il-pjanijiet tagħhom għall-ħidma fil-ġejjieni.

9. It-tagħrif miksub mill-parteċipazzjoni fid-diskussjonijiet tal-Grupp tal-Awtoritajiet jew tas-sottogruppi tiegħu ma jistax jinkixef, jekk, fil-fehma tal-Kummissjoni, dak it-tagħrif ikollu x’jaqsam ma’ kwistjonijiet kunfidenzjali.

10. Il-Grupp tal-Awtoritajiet għandu jadotta r-regoli ta’ proċedura tiegħu abbażi tar-regoli standard ta’ proċedura għall-gruppi ta’ esperti.

Artikolu 6

Spejjeż tal-laqgħat

1. Dawk li jieħdu sehem fl-attivitajiet tal-Grupp tal-Awtoritajiet jew tas-sottogruppi tiegħu m’għandhomx jitħallsu għas-servizzi tagħhom.

2. L-ispejjeż tal-ivvjaġġar u tas-sussistenza li jġarrbu dawk li jieħdu sehem fl-attivitajiet tal-Grupp tal-Awtoritajiet jew fis-sottogruppi tiegħu għandhom jitħallsu lura mill-Kummissjoni skont id-dispożizzjonijiet li jkunu fis-seħħ fil-Kummissjoni.

3. Dawk l-ispejjeż għandhom jitħallsu lura fil-limiti tal-approprjazzjonijiet disponibbli allokati skont il-proċedura annwali għall-allokazzjoni tar-riżorsi.

Magħmul fi Brussell, id-19 ta’ Jannar 2012.

Għall-Kummissjoni

Günther OETTINGER

Membru tal-Kummissjoni

(1) COM(2010) 560 finali.

(2) ĠU L 8, 12.1.2001, p. 1.

21.1.2012

Il-Ġurnal Uffiċjali tal-Unjoni Ewropea

C 18/14

Avviż skont l-Artikolu 13 tad-Direttiva 2001/24/KE tal-Parlament Ewropew u tal-Kunsill fuq ir-riorganizzazzjoni u l-istralċ ta' istituzzjonijiet ta' kreditu

2012/C 18/11

ESTRATT MID-DEĊIŻJONI GĦALL-BIDU TA' PROĊEDURI TA’ FALLIMENT FIR-RIGWARD TA’ AKCINĖ BENDROVĖ BANKAS SNORAS

Fis-7 ta' Diċembru 2011, il-Qorti Reġjonali ta’ Vilnius adottat deċiżjoni għall-bidu ta’ proċeduri ta’ falliment fir-rigward tal-bank f’forma ta’ kumpanija pubblika b’responsabbiltà limitata Snoras (Akcinė bendrovė bankas Snoras, kodiċi tal-entità ġuridika: 112025973, numru tar-reġistrazzjoni tal-VAT: LT120259716, uffiċċju reġistrat: A. Vivulskio g. 7, Vilnius, il-Litwanja, irreġistrat fir-Reġistru tal-Entitajiet Ġuridiċi (Juridinių asmenų registre)(minn hawn ’il quddiem “AB bankas snoras”)) fil-kawża ċivili Nru B2-7791-611/2011, proċedimenti ġudizzjarji Nru 2-55-3-03098-2011-9.

Bid-Deċiżjoni tagħha tas-7 ta' Diċembru 2011, il-Qorti Reġjonali ta’ Vilnius stabbilixxiet limitu ta' żmien ta' xahar (mid-data tad-dħul fis-seħħ tad-Deċiżjoni għall-bidu ta’ proċeduri ta' falliment) għall-kredituri biex jissottomettu pretensjonijiet li kienu tqajmu qabel il-bidu tal-proċeduri ta’ falliment fir-rigward ta’ AB bankas Snoras.

Il-Qorti ħatret lis-Sur Neil Cooper bħala l-amministratur tal-falliment ta’ AB bankas Snoras.

Il-proċeduri ta’ falliment fir-rigward ta’ AB bankas Snoras jikkostitwixxu proċeduri ta’ stralċ skont it-tifsira tad-Direttiva 2001/24/KE tal-Parlament Ewropew u tal-Kunsill fuq ir-riorganizzazzjoni u l-istralċ ta’ istituzzjonijiet ta’ kreditu. Dan l-avviż huwa skont l-Artikolu 13 tad-Direttiva 2001/24/KE.

Estratt mid-Deċiżjoni għall-bidu ta’ proċeduri ta’ falliment qed jingħata hawn taħt:

“Il-Qorti, skont l-Artikoli 290-291 tal-Kodiċi tal-Proċedura Ċivili tar-Repubblika tal-Litwanja, l-Artikolu 84 tal-Liġi dwar il-banek u l-Artikolu 9 tal-Liġi dwar il-falliment ta’ kumpaniji,

IDDEĊIDIET:

Li tibda proċeduri ta’ falliment fir-rigward ta’ AB bankas Snoras, kodiċi tal-entità legali 112025973, irreġistrat f’A. Vivulskio g. 7, Vilnius.

Li taħtar lil Neil Cooper (imwieled fit-30 ta’ Ġunju 1947, indirizz 10 Fleet Place, London, EC4M 7RB, UK, ċertifikat Nru 11198) bħala l-amministratur ta’ AB bankas Snoras.

Li tagħti istruzzjonijiet lill-amministrattur tal-falliment biex iwettaq il-kompiti indikati fl-Artikolu 85(1) tal-Liġi dwar il-bank tar-Repubblika tal-Litwanja u l-Artikolu 10(4)(3) u (7)(8) tal-Liġi dwar il-falliment ta' kumpaniji tar-Repubblika tal-Litwanja.

Li tordna lill-amministratur tal-falliment jinforma lill-Qorti bil-miktub immedjatament jekk isir jaf b'xi kawżi miġjuba kontra AB bankas Snoras jew b’dokumenti ta’ infurzar sottomessi lill-uffiċjali ġudizzjarji fir-rigward ta' rkupru minn AB bankas Snoras.

Li tistabbilixxi limitu ta’ żmien ta’ xahar, mid-data tad-dħul fis-seħħ tad-Deċiżjoni għall-bidu ta’ proċeduri ta’ falliment, għas-sottomissjoni tal-pretensjonijiet finanzjarji tal-kredituri li tqajmu qabel il-bidu tal-proċeduri ta’ falliment.

Li tordna lill-entitajiet ta' AB bankas Snoras jittrasferixxu l-assi tal-kumpanija, skont ir-rapport finanzjarju magħmul abbażi tad-dejta li kienet tapplika fid-data tad-dħul fis-seħħ tad-Deċiżjoni għall-bidu ta’ proċeduri ta' falliment, u d-dokumenti kollha lill-amministratur tal-falliment fi żmien 15-il jum mid-data tad-dħul fis-seħħ tad-Deċiżjoni għall-bidu ta’ proċeduri ta' falliment.

Li tikkonfiska l-proprjetajiet immobbli kollha ta’ AB bankas Snoras u assi fissi tanġibbli oħrajn sal-jum meta tidħol fis-seħħ id-Deċiżjoni għall-bidu ta’ proċeduri ta’ falliment.

Li tagħti istruzzjonijiet lill-amministratur tal-falliment biex jissottometti kopja tad-Deċiżjoni fir-rigward tal-konfiska tal-assi ta’ AB bankas Snoras għal infurzar lil uffiċjal ġudizzjarju tal-għażla tiegħu li jopera fit-territorju tal-Qorti tat-Tieni Distrett tal-Belt ta’ Vilnius.

Li tinforza din id-Deċiżjoni b'urġenza.

Din id-Deċiżjoni tista' tiġi appellata fi żmien 10 ijiem mill-adozzjoni tagħha billi jitressaq appell separat quddiem il-Qorti tal-Appell tal-Litwanja permezz tal-Qorti Reġjonali ta’ Vilnius.”

Vilnius, il-Litwanja, il-15 ta’ Diċembru 2011.

L-amministratur ta’ Akcinė bendrovė bankas Snoras (fil-falliment) (li jaġixxi bħala l-aġent tal-bank imsemmi mingħajr responsabbiltà personali)

Neil COOPER

21.1.2012

Il-Ġurnal Uffiċjali tal-Unjoni Ewropea

C 18/16

Avviż ta' tnedija ta' reviżjoni tal-iskadenza tal-miżuri anti-dumping applikabbli għall-importazzjoni ta' etanolamini li joriġinaw mill-Istati Uniti tal-Amerika

2012/C 18/12

Wara l-pubblikazzjoni ta’ avviż ta’ skadenza imminenti (1) tal-miżuri tal-antidumping fis-seħħ dwar l-importazzjonijiet ta' etanolamini li joriġinaw mill-Istati Uniti tal-Amerika (“il-pajjiż ikkonċernat”), il-Kummissjoni Ewropea (“il-Kummissjoni”) irċeviet talba għal reviżjoni skont l-Artikolu 11(2) tar-Regolament tal-Kunsill (KE) Nru 1225/2009 tat-30 ta' Novembru 2009 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea (2) (“ir-Regolament bażiku”).

1. It-talba għal reviżjoni

It-talba tressqet fil-21 ta’ Ottubru 2011 mill-BASF AG, Ineos Europe AG, and Sasol Germany GmbH, tliet produtturi tal-Unjoni (“l-applikanti”) li jirrappreżentaw proporzjon prinċipali, f’dan il-każ aktar minn 50 %, tat-total tal-produzzjoni tal-Unjoni tal-etanolamini.

2. Il-prodott

Il-prodott taħt reviżjoni huwa l-etanolamini li joriġinaw mill-Istati Uniti tal-Amerika (“il-prodott ikkonċernat”), li bħalissa huma klassifikabbli fi ħdan il-kodiċijiet NM ex 2922 11 00, ex 2922 12 00 u 2922 13 10.

3. Miżuri eżistenti

Il-miżuri li hemm bħalissa fis-seħħ huma dazju definittiv ta' anti-dumping impost bir-Regolament ta’ Implimentazzjoni tal-Kunsill (UE) Nru 54/2010 (3).

4. Ir-raġunijiet għar-reviżjoni

It-talba hija msejsa fuq ir-raġuni li l-iskadenza tal-miżuri x’aktarx twassal biex jissokta d-dumping u tissokta l-ħsara għall-industrija tal-Unjoni.

L-allegazzjoni tal-issoktar ta' dumping hija msejsa fuq it-tqabbil ta' prezzijiet domestiċi fil-pajjiż ikkonċernat mal-prezzijiet ta’ esportazzjoni tal-prodott ikkonċernat għall-Unjoni Ewropea. Abbażi ta' dan, il-marġini tad-dumping ikkalkolat huwa sinifikanti.

L-evidenza prima facie mogħtija mill-applikanti turi li l-volumi u l-prezzijiet tal-prodott importat ikkonċernat komplew ikollhom, fost konsegwenzi oħrajn, impatt negattiv fuq il-livell tal-prezzijiet mitluba mill-industrija tal-Unjoni, u dan irriżulta f'effetti negattivi sostanzjali fuq il-prestazzjoni ġenerali tal-industrija tal-Unjoni.

5. Proċedura

Wara li ddeterminat, wara konsultazzjoni mal-Kumitat Konsultattiv, li hemm biżżejjed provi biex tkun iġġustifikata l-inizjazzjoni ta' reviżjoni tal-iskadenza, il-Kummissjoni b'dan tagħti bidu għal reviżjoni skont l-Artikolu 11(2) tar-Regolament bażiku.

5.1. Proċedura biex tiġi stabbilita l-probabbiltà ta’ dumping u ħsara

L-investigazzjoni se tiddetermina jekk hux probabbli jew le li l-iskadenza tal-miżuri twassal biex jissokta d-dumping u tissokta l-ħsara.

(a) Kwestjonarji

Biex tikseb it-tagħrif li tqis meħtieġ għall-investigazzjoni tagħha, il-Kummissjoni se tibgħat kwestjonarji lill-industrija tal-Unjoni u lil kull assoċjazzjoni magħrufa ta’ produtturi fl-Unjoni, lill-esportaturi produtturi magħżula fl-Istati Uniti tal-Amerika u lil kull assoċjazzjoni magħrufa ta’ esportaturi produtturi, lill-importaturi magħrufa, lil kull assoċjazzjoni magħrufa ta’ importaturi, u lill-awtoritajiet tal-pajjiż esportatur ikkonċernat.

(b) Ġbir ta' informazzjoni u seduti ta’ smigħ

Il-partijiet kollha interessati, b'dan qed jiġu mistiedna jesprimu l-fehmiet tagħhom, jissottomettu informazzjoni barra mit-tweġibiet li taw fil-kwestjonarju u jipprovdu evidenza ta' sostenn. Dan it-tagħrif u dokumenti ta' prova għandhom jaslu għand il-Kummissjoni fiż-żmien stipulat fil-punt 6(ii).

Barra minn hekk, il-Kummissjoni tista' tisma' lill-partijiet interessati, sakemm dawn iressqu talba li turi li hemm raġunijiet partikolari għaliex għandhom jinstemgħu. Din it-talba għandha ssir fiż-żmien stipulat fil-punt 6(iii).

5.2. Il-proċedura għall-valutazzjoni tal-interess tal-Unjoni

B'konformità mal-Artikolu 21 tar-Regolament bażiku u fil-każ li l-probabbiltà li jissokta d-dumping u li tissokta l-ħsara tiġi kkonfermata, għandu jkun stabbilit jekk iż-żamma tal-miżuri anti-dumping tmurx kontra l-interess tal-Unjoni. Għal din ir-raġuni l-Kummissjoni tista' tibgħat kwestjonarji lill-industrija tal-Unjoni magħrufa, lill-għaqdiet rappreżentattivi tagħhom, lill-utenti rappreżentattivi u lill-organizzazzjonijiet rappreżentattivi tal-konsumatur. Partijiet bħal dawn, inklużi dawk li ma tafx dwarhom il-Kummissjoni, bil-kundizzjoni li jagħtu prova li hemm rabta oġġettiva bejn l-attività tagħhom u l-prodott ikkonċernat, jistgħu, fiż-żmien stipulat fil-punt 6(II), jippreżentaw ruħhom u jipprovdu lill-Kummissjoni bit-tagħrif. Il-partijiet li jkunu aġixxew f'konformità mas-sentenza preċedenti jistgħu jitolbu seduta ta' smigħ, filwaqt li jfissru r-raġunijiet partikolari għala għandhom jinstemgħu, fiż-żmien stipulat fil-punt 6(iii). Ta’ min jinnota li kull tagħrif imressaq skont l-Artikolu 21 tar-Regolament bażiku se jitqies biss jekk ikun sostnut minn evidenza fattwali fil-mument meta jitressaq.

6. Limiti ta’ żmien

(i) Biex il-partijiet jitolbu kwestjonarju

Kull parti interessata li ma kkooperatx fl-investigazzjoni li twassal għall-miżuri soġġetti għar-reviżjoni preżenti għandha titlob kwestjonarju kemm jista' jkun malajr, iżda mhux aktar tard minn 15-il ġurnata wara l-pubblikazzjoni ta' dan l-avviż f’Il-Ġurnal Uffiċjali tal-Unjoni Ewropea.

(ii) Għall-partijiet li jridu jippreżentaw lilhom infushom, biex jissottomettu t-tweġibiet tal-kwestjonarju u kull informazzjoni oħra

Il-partijiet kollha interessati, jekk ir-rappreżentazzjonijiet tagħhom għandhom jitqiesu matul l-investigazzjoni, għandhom jippreżentaw ruħhom billi jikkuntattjaw lill-Kummissjoni, iressqu l-opinjonijiet tagħhom u jibagħtu t-tweġibiet tal-kwestjonarju jew kull informazzjoni oħra fi żmien 37 jum mid-data tal-pubblikazzjoni ta’ dan l-avviż f’Il-Ġurnal Uffiċjali tal-Unjoni Ewropea, sakemm ma jkunx speċifikat mod ieħor. Għandha tinġibed l-attenzjoni għall-fatt li l-eżerċizzju tal-biċċa l-kbira tad-drittijiet proċedurali stabbiliti fir-Regolament bażiku tiddependi fuq il-preżentazzjoni tal-parti fil-limitu ta' żmien imsemmi qabel.

(iii) Seduti ta' smigħ

Il-partijiet kollha interessati jistgħu japplikaw ukoll biex jinstemgħu mill-Kummissjoni fl-istess limitu ta' żmien ta' 37 jum.

7. Istruzzjonijiet dwar kif għandhom isiru s-sottomissjonijiet bil-miktub u kif għandhom jintbagħtu l-kwestjonarji mimlija u l-korrispondenza

Is-sottomissjonijiet kollha, inkluż it-tagħrif mitlub f’dan l-avviż, il-kwestjonarji mimlija u l-korrispondenza pprovduta mill-partijiet interessati li għaliha jintalab trattament kunfidenzjali, għandhom ikunu mmarkati “Ristretti (4)”.

Il-partijiet interessati li jipprovdu tagħrif “Ristrett” huma mitluba jipprovdu taqsiriet mhux kunfidenzjali tiegħu skont l-Artikolu 19(2) tar-Regolament bażiku, li se jkunu mmarkati “Għal spezzjoni mill-partijiet interessati”. Dawn it-taqsiriet għandhom ikunu dettaljati biżżejjed biex tinftiehem b'mod raġonevoli s-sustanza tat-tagħrif imressaq b’mod kunfidenzjali. Jekk parti interessata li tipprovdi informazzjoni kunfidenzjali ma tipprovdix taqsira mhux kunfidenzjali tagħha fil-format u l-kwalità mitluba, din l-informazzjoni kunfidenzjali tista’ titwarrab.

Il-partijiet interessati huma mitluba jressqu s-sottomissjonijiet u t-talbiet kollha f'għamla elettronika (is-sottomissjonijiet mhux kunfidenzjali permezz tal-email, dawk kunfidenzjali fuq CD-R/DVD), u għandhom jindikaw l-isem, l-indirizz tal-e-mail, in-numri tat-telefown u tal-faks tal-parti interessata. Madankollu, kull Prokura, ċertifikazzjonijiet iffirmati, u kull aġġornament tagħhom, li jakkumpanjaw it-tweġibiet tal-kwestjonarju għandhom jiġu sottomessi f'għamla ta' dokument, jiġifieri bil-posta jew bl-idejn, fl-indirizz ta' hawn taħt. Skont l-Artikolu 18(2) tar-Regolament bażiku, jekk parti interessata ma tkunx tista' tipprovdi s-sottomissjonijiet u t-talbiet tagħha f'format elettroniku, hija għandha tgħarraf lill-Kummissjoni b'dan minnufih. Għal aktar informazzjoni dwar il-korrispondenza mal-Kummissjoni, il-partijiet interessati jistgħu jikkonsultaw il-paġna tal-web rilevanti fuq il-websajt tad-Direttorat Ġenerali għall-Kummerċ: http://ec.europa.eu/trade/tackling-unfair-trade/trade-defence/

L-indirizz tal-Kummissjoni għall-korrispondenza:

Il-Kummissjoni Ewropea

Id-Direttorat Ġenerali għall-Kummerċ

Direttorat H

Uffiċċju: N105 04/092

1049 Bruxelles/Brussel

BELGIQUE/BELGIË

Fax +32 22956505

Kuntatt:

Għal kwistjonijiet marbuta mad-dumping:

Kaxxa postali tal-każijiet: trade-ethanolamine-dumping@ec.europa.eu

Fax +32 22980450

Għal kwistjonijiet marbuta mal-ħsara:

Kaxxa postali tal-każijiet: trade-ethanolamine-injury@ec.europa.eu

Fax +32 22980765

8. Nuqqas ta' kooperazzjoni

F’każijiet fejn xi parti interessata tirrifjuta l-aċċess jew ma tipprovdix l-informazzjoni meħtieġa fil-limitu ta' żmien, jew tfixkel l-investigazzjoni b’mod sinifikanti, is-sejbiet, pożittivi jew negattivi, jistgħu jsiru f'konformità mal-Artikolu 18 tar-Regolament bażiku, abbażi tal-fatti disponibbli.

Fejn jinstab li xi parti interessata tkun tat informazzjoni falza jew qarrieqa, din l-informazzjoni għandha titwarrab u jista’ jsir użu mill-fatti disponibbli, skont l-Artikolu 18 tar-Regolament bażiku. Jekk parti interessata ma tikkooperax jew tikkoopera biss b’mod parzjali, u jsir użu mill-fatti disponibbli, ir-riżultat jista’ jkun inqas favorevoli għal dik il-parti milli kieku kkooperat.

9. L-iskeda tal-investigazzjoni

L-investigazzjoni għandha tiġi konkluża, skont l-Artikolu 11(5) tar-Regolament bażiku, fi żmien 15-il xahar mid-data tal-pubblikazzjoni ta' dan l-avviż f’Il-Ġurnal Uffiċjali tal-Unjoni Ewropea.

10. Il-possibbiltà li tintalab reviżjoni skont l-Artikolu 11(3) tar-Regolament bażiku

Peress li din ir-reviżjoni tal-iskadenza tnediet f'konformità mad-dispożizzjonijiet tal-Artikolu 11(2) tar-Regolament bażiku, is-sejbiet tagħha mhux se jwasslu biex il-livell tal-miżuri eżistenti jiġi emendat iżda biex dawn il-miżuri jiġu rrevokati jew miżmuma f'konformità mal-Artikolu 11(6) tar-Regolament bażiku.

Jekk xi parti fil-proċediment tqis li tkun meħtieġa reviżjoni tal-livell tal-miżuri biex tippermetti l-possibbiltà li jiġi emendat (jiġifieri miżjud jew imnaqqas) il-livell tal-miżuri, dik il-parti tista' titlob reviżjoni skont l-Artikolu 11(3) tar-Regolament bażiku.

Il-partijiet li jkunu jixtiequ jitolbu tali reviżjoni, li ssir indipendentement mir-reviżjoni tal-iskadenza msemmija f'din in-notifika, jistgħu jikkuntattjaw lill-Kummissjoni fl-indirizz mogħti hawn fuq.

11. L-ipproċessar ta' dejta personali

Jekk jogħġbok kun af li kull dejta personali miġbura f'din l-investigazzjoni se tkun ittrattata f'konformità mar-Regolament (KE) Nru 45/2001 tal-Parlament Ewropew u tal-Kunsill dwar il-protezzjoni ta' individwu fir-rigward tal-ipproċessar ta' dejta personali mill-istituzzjonijiet u l-korpi tal-Komunità u dwar il-moviment liberu ta' dik id-dejta (5).

12. L-Uffiċjal tas-Seduta ta' Smigħ

Ta' min jinnota wkoll, li jekk il-partijiet interessati jqisu li qed jiltaqgħu ma' diffikultajiet fl-eżerċizzju tad-drittijiet tagħhom għal difiża, dawn jistgħu jitolbu l-intervent tal-Uffiċjal tas-Seduta ta' Smigħ tad-Direttorat Ġenerali għall-Kummerċ. Dan jaġixxi bħala punt ta' interazzjoni bejn il-partijiet interessati u s-servizzi tal-Kummissjoni, u joffri, fejn meħtieġ, il-medjazzjoni dwar kwistjonijiet proċedurali li jaffettwaw il-ħarsien tal-interessi tagħhom f'dan il-proċediment, partikolarment fir-rigward ta' kwistjonijiet relatati mal-aċċess għall-fajl, mal-kunfidenzjalità, mal-estensjoni tal-limiti taż-żmien u mat-trattament tas-sottomissjonijiet tal-fehmiet bil-miktub u/jew bil-fomm. Għal aktar informazzjoni u dettalji ta' kuntatt, il-partijiet interessati jistgħu jikkonsultaw il-paġni tal-internet tal-Uffiċjal tas-Seduti ta' Smigħ fuq il-websajt tad-Direttorat Ġenerali għall-Kummerċ (http://ec.europa.eu/trade/tackling-unfair-trade/hearing-officer/index_en.htm).

(1) ĠU C 79, 12.3.2011, p. 20.

(2) ĠU L 343, 22.12.2009, p. 51.

(3) ĠU L 17, 22.1.2010, p. 1.

(4) Dokument “Ristrett” huwa dokument li jitqies bħala kunfidenzjali skont l-Artikolu 19 tar-Regolament tal-Kunsill (KE) Nru 1225/2009 (ĠU L 343, 22.12.2009, p. 51) u l-Artikolu 6 tal-Ftehim tad-WTO dwar l-Implimentazzjoni tal-Artikolu VI tal-GATT 1994 (Ftehim dwar l-Anti-dumping). Dan hu wkoll dokument protett skont l-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (ĠU L 145, 31.5.2001, p. 43).

(5) ĠU L 8, 12.1.2001, p. 1.

		ISSN 1977-0987 doi:10.3000/19770987.C_2012.018.mlt
Il-Ġurnal Uffiċjali tal-Unjoni Ewropea		C 18

Edizzjoni bil-Malti	Informazzjoni u Avviżi	Volum 55 21ta' Jannar 2012

Avviż Nru	Werrej	Paġna
	I Riżoluzzjonijiet, rakkomandazzjonijiet u opinjonijiet
	OPINJONIJIET
	Il-Kummissjoni Ewropea
2012/C 018/01	Opinjoni tal-Kummissjoni tal-20 ta’ Jannar 2012 dwar il-pjan modifikat għar-rimi ta' skart radjuattiv mill-Impjant Nukleari ta' Blayais, fi Franza	1

	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2012/C 018/02	Ebda oppożizzjoni għal konċentrazzjoni notifikata (Każ COMP/M.6425 – Imperial Mobility/Lehnkering) ( 1 )	2

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2012/C 018/03	Rata tal-kambju tal-euro	3

2012/C 018/04	Opinjoni tal-Kumitat Konsultattiv dwar ftehimiet ristrettivi u pożizzjoni dominanti mogħtija fil-laqgħa tal-5 ta' Diċembru 2011 rigward abbozz ta' deċiżjoni dwar Każ COMP/39.692 – IBM Servizzi ta’ Manutenzjoni – Relatur: L-Estonja	4

2012/C 018/05	Rapport finali tal-Uffiċjal tas-Seduta – COMP/39.692 – IBM Servizzi ta' Manutenzjoni	5

2012/C 018/06	Sommarju tad-Deċiżjoni tal-Kummissjoni tat-13 ta' Diċembru 2011 dwar il-proċediment skont l-Artikolu 102 tat-Trattat dwar il-Funzjonament tal-Unjoni Ewropea u l-Artikolu 54 tal-Ftehim taż-ŻEE (Każ COMP/39.692 – IBM Servizzi ta’ Manutenzjoni) (notifikata bid-dokument numru C(2011) 9245) ( 1 )	6

2012/C 018/07	Deċiżjoni tal-Kummissjoni tad-19 ta’ Jannar 2012 dwar it-twaqqif tal-Grupp ta’ Awtoritajiet tal-Unjoni Ewropea li huma responsabbli għall-attivitajiet taż-żejt u tal-gass li jitwettqu lil hinn mill-kosta	8

	INFORMAZZJONI MILL-ISTATI MEMBRI
2012/C 018/08	Komunikazzjoni tal-Kummissjoni skont il-proċedura stipulata fl-Artikolu 16(4), il-punt 1, tar-Regolament (KE) Nru 1008/2008 tal-Parlament Ewropew u tal-Kunsill dwar regoli komuni għall-operat ta' servizzi tal-ajru fil-Komunità – Impożizzjoni ta' obbligi ta’ servizz pubbliku fir-rigward tas-servizzi tal-ajru bejn il-portijiet ta' Lampedusa u Pantelleria u l-portijiet ta' Trapani, Palermo u Catania ( 1 )	11

2012/C 018/09	Komunikazzjoni tal-Kummissjoni skont il-proċedura stipulata fl-Artikolu 17(5) tar-Regolament (KE) Nru 1008/2008 tal-Parlament Ewropew u tal-Kunsill dwar regoli komuni għall-operat ta' servizzi tal-ajru fil-Komunità – Sejħa għall-offerti rigward l-operat ta’ servizzi tal-ajru bi skeda skont l-obbligi tas-servizz pubbliku skont l-avviż ippubblikat fil-ĠU C 53 tad-19 ta’ Frar 2011 ( 1 )	12

	V Avviżi
	PROĊEDURI AMMINISTRATTIVI
2012/C 018/10	Pubblikazzjoni skont id-Direttiva 2001/24/KE tal-Paralment Ewropew u tal-Kunsill fuq ir-riorganizzazzjoni u l-istralċ ta' istituzzjonijiet ta' kreditu	13

2012/C 018/11	Avviż skont l-Artikolu 13 tad-Direttiva 2001/24/KE tal-Parlament Ewropew u tal-Kunsill fuq ir-riorganizzazzjoni u l-istralċ ta' istituzzjonijiet ta' kreditu	14

	PROĊEDURI GĦALL-IMPLIMENTAZZJONI TAL-POLITIKA KUMMERĊJALI KOMUNI
	Il-Kummissjoni Ewropea
2012/C 018/12	Avviż ta' tnedija ta' reviżjoni tal-iskadenza tal-miżuri anti-dumping applikabbli għall-importazzjoni ta' etanolamini li joriġinaw mill-Istati Uniti tal-Amerika	16


	(1) Test b’relevanza għaż-ŻEE