14.12.2011

MT EN FR

Il-Ġurnal Uffiċjali tal-Unjoni Ewropea

CA 364/1

---

AVVIŻ TA' POST VAKANTI CONS/AD/096

(2011/C 364 A/01)

Informazzjoni ġenerali
Dipartiment	Direttorat Ġenerali K (Kunsill Affarijiet Barranin, Tkabbir, Għajnuna Umanitarja u Protezzjoni Ċivili)
Post tax-xogħol	Brussell
Titlu tal-pożizzjoni	Direttur (DGK 2)
Grupp ta' funzjoni u grad	AD 14
Awtorizzazzjoni tas-sigurtà meħtieġa	SECRET EU

Skadenza għall-applikazzjonijiet

fid-19 ta' Jannar 2012.

Min aħna

Id-Direttorat huwa magħmul minn 30 kollega u huwa responsabbli għall-politika tat-Tkabbir inġenerali, inklużi l-istrateġiji ta' qabel l-adeżjoni, in-negozjati mat-Turkija u l-Islanda dwar l-adeżjoni u r-relazzjonijiet bilaterali ma' dawn il-pajjiżi, is-segwitu tat-Trattat tal-Adeżjoni mal-Kroazja, is-segwitu tat-Trattat tal-Adeżjoni (Ċipru) tal-2003 u l-Mekkaniżmu ta' Kooperazzjoni u Verifika għall-Bulgarija u r-Rumanija. Barra minn hekk, aħna nkopru relazzjonijiet mal-Istati Ewropej kollha li mhumiex fl-UE, inklużi l-pajjiżi tal-EEA u l-EFTA, ir-Russja u l-pajjiżi tal-KSI l-oħrajn (inkluża l-Asja Ċentrali) u l-Ġeorġja, kif ukoll il-Politika Ewropea tal-Viċinat. Fil-qafas tal-Appoġġ għall-Kunsill Affarijiet Barranin, aħna responsabbli għall-kwistjonijiet tal-Politika Estera u ta' Sigurtà Komuni (PESK) (inkluż il-Politika ta' Sigurtà u ta' Difiża Komunii (PSDK)), il-Viċinat tan-Nofsinhar, ir-relazzjonijiet mal-pajjiżi Għarab, il-Proċess ta' Paċi fil-Lvant Nofsani (PPLN) u l-Israel, l-Iran, in-nonproliferazzjoni u d-diżarm. Aħna naħdmu ma' diversi Gruppi ta' Ħidma rilevanti. Id-Direttorat jissorvelja t-tħejjija u s-segwitu għall-attivitajiet politiċi u leġislattivi fis-Segretarjat Ġenerali tal-Kunsill (SĠK) u barra u f'kooperazzjoni mal-Presidenza, il-Kummissjoni u s-Servizz Ewropew għall-Azzjoni Esterna (SEAE) u l-Istati Membri. L-attivitajiet tagħna jkopru wkoll il-konvokazzjoni tal-laqgħat tal-gruppi ta' ħidma f'koordinazzjoni mal-Presidenza (dik permanenti kif ukoll dik ta' kull sitt xhur) u l-provvediment ta' parir lill-Presidenti, l-Istati Membri u l-ġerarkija tas-SĠK. Aħna responsabbli għat-tħejjija u t-trasmissjoni lid-Delegati tad-dokumenti kollha rilevanti għall-Gruppi ta' Ħidma, il-Kumitat Politiku u ta' Sigurtà (KPS), il-Kumitat tar-Rappreżentanti Permanenti (Coreper) u l-Kunsill. Aħna nħejju wkoll noti ta' informazzjoni fil-qosor għall-Coreper u l-Kunsill, u għall-KPS, kif adatt.

X'qegħdin nipproponu

Il-pożizzjoni hija waħda ta' profil għoli f'waħda mill-istituzzjonijiet prinċipali Ewropej. Id-Direttur imexxi d-Direttorat “it-Tkabbir, l-Ewropa (mhumiex fl-UE), Appoġġ għall-Kunsill Affarijiet Barranin” fid-Direttorat Ġenerali K (Kunsill Affarijiet Barranin, Tkabbir, Għajnuna Umanitarja u Protezzjoni Ċivili), u l-kandidat magħżul ser ikun mistenni jagħti kontribut sostanzjali għall-iżvilupp u l-progress tal-attivitajiet tad-Direttorat. Huwa ser jaħdem f'ambjent politiku li joffri sfidi kbar f'varjetà wiesgħa ta' oqsma differenti, imexxi u jimmotiva tim multikultirali u ser jingħata possibbiltà kbira li juri l-ħila tiegħu li jiddefinixxi u jikseb objettivi, jieħu deċiżjonijiet tajba u juri ħiliet tajba ta' ġestjoni tan-nies. Barra minn dan noffru pakkett ta' salarju attraenti.

Skop tal-pożizzjoni

Taħt l-awtorità tad-Direttur Ġenerali, id-Direttur imexxi d-Direttorat K2 fis-Segretarjat Ġenerali tal-Kunsill, li jappoġġa t-tmexxija tajba tal-Kunsill (il-Kunsill Affarijiet Ġenerali u l-Kunsill Affarijiet Barranin) u l-Kunsill Ewropew u jkopri l-oqsma li ġejjin (1): it-Tkabbir; l-Ewropa (pajjiżi li mhumiex fl-UE); Appoġġ għall-Kunsill Affarijiet Barranin.

Minħabba l-ispeċifiċità ta' dan is-servizz, il-persuna fil-kariga ser tkun qed taħdem ukoll mill-qrib ma'/tappoġġa lir-Rappreżentant Għoli tal-Unjoni għall-Affarijiet Barranin u l-Politika ta' Sigurtà u s-SEAE.

Kompiti

—	Imexxi d-Direttorat tiegħu u jorganizza l-attivitajiet tiegħu, u jappoġġa u jimmotiva lill-persunal f'xogħlu.

—	Jiddefinixxi l-objettivi li għandhom jintlaħqu u jgħin biex dawn jinkisbu permezz tat-tfassil ta' programm ta' ħidma tad-Direttorat u jissorvelja l-implimentazzjoni tagħha, kif adatt.

—	Jagħti pariri lill-Presidenza u lis-Segretarju Ġenerali, id-Direttur Ġenerali u d-dipartimenti tas-SĠK dwar l-aspetti kollha ta' dossier sabiex jgħin biex jinstabu soluzzjonijiet u jwettaq studji speċjalizzati ta' livell għoli relatati mal-oqsma ta' kompetenza tad-Direttorat.

—	Jirrappreżenta lis-servizz tiegħu kemm fil-livell tad-Diretturi fis-SĠK kif ukoll esternament, b'mod partikolari fir-relazzjonijiet tiegħu mal-Presidenza, u fir-relazzjonijiet tiegħu mal-Istituzzjonijiet l-oħrajn, b'mod partikolari mas-SEAE.

—	Jiżgura l-kwalità tas-servizzi u l-eżiti fid-Direttorat.

—	Jiżgura t-tmexxija professjonali tar-riżorsi tad-Direttorat.

—	Jiżgura l-komunikazzjoni u l-kooperazzjoni effettivi kemm fid-Direttorat kif ukoll mad-dipartimenti l-oħrajn tas-SĠK.

—	Jissorvelja l-politika tat-Tkabbir tal-UE, inklużi n-negozjati dwar l-adeżjoni u l-istrateġiji ta' qabel l-adeżjoni, kif ukoll ir-relazzjonijiet mal-pajjiżi kandidati.

—	Jissorvelja r-relazzjonijiet mal-pajjiżi Ewropej l-oħrajn li mhumiex fl-UE, b'mod partikolari fil-kuntest tar-relazzjonijiet speċjali li jinvolvuhom (l-EEA/EFTA, il-Viċinat, il-pajjiżi tal-COEST, il-Balkani tal-Punent, eċċ.).

—

Jappoġġa lill-Kunsill Affarijiet Barranin, il-Coreper, il-KPS, il-Gruppi ta' Ħidma, b'mod partikolari fil-Viċinat tan-Nofsinhar, ir-relazzjonijiet mal-pajjiżi Għarab, il-PPLN, l-Iżrael, l-Iran, il-materji tal-PESK inkluża l-PSDK, id-diżarm u n-nonproliferazzjoni: appoġġ għall-attivitajiet politiċi u l-leġislattivi f'dan il-qasam, kif meħtieġ, u f'kooperazzjoni mill-qrib mas-SEAE.

Kompetenzi mitluba

—	Għarfien tajjeb tal-linji politiċi ġenerali tal-Unjoni Ewropea fil-qasam kopert mid-Direttorat.

—	Kapaċità li jmexxi x-xogħol u r-riżorsi u jippjana, jorganizza, jissorvelja u jiddelega x-xogħol u juża r-riżorsi b'mod adatt sabiex jintlaħqu miri speċifiċi.

—	Konoxxenza tal-organizzazzjoni: jifhem l-ambjent tal-organizzazzjoni, jkun kapaċi jidentifika kwistjonijiet strateġiċi f'dak il-kuntest u jikkomunikahom lil interlokuturi interni u esterni.

—

Ħiliet tajbin fit-teħid ta' deċiżjonijiet: kapaċità li janalizza sitwazzjonjiet u jiżen azzjonijiet alternattivi u jieħu deċiżjonijiet li huma adatti għas-sitwazzjoni, inkluża l-kapaċità li jieħu riskji raġonevoli, b'kont meħud tal-impatti fuq is-servizz, fuq l-interlokuturi interni u esterni u fuq l-organizzazzjoni kollha kemm hi.

—	Kapaċità li jmexxi u jimmotiva gruppi multikulturali u li jibni u jżomm koeżjoni u kooperazzjoni fil-grupp.

—	Kapaċità li jipprovdi gwida u feedback f'waqthom lill-membri individwali tal-grupp u jinkoraġġixxi l-iżvilupp tal-ħiliet tagħhom abbażi tal-ħtiġijiet tas-servizz u tal-persuna.

—	Kapaċità li jmexxi negozjati u jżomm relazzjonijiet interpersonali tajbin fl-ogħla livell f'ambjent internazzjonali u multikulturali.

—	Għarfien tajjeb ħafna ta' waħda mil-lingwi uffiċjali tal-Unjoni Ewropea u għarfien sodisfaċenti ta' lingwa oħra fil-livell meħtieġ għat-twettiq tad-doveri meħtieġa. Fil-prattika, fid-dawl tal-oqsma ta' attività koperti, huwa meħtieġ l-għarfien ta' mill-inqas l-Ingliż u l-Franċiż.

Kondizzjonijiet għall-ammissjoni

L-applikanti għandhom:

—	Ikunu ċittadini ta' wieħed mill-Istati Membri tal-Unjoni Ewropea.

—	Igawdu mid-drittijiet kollha tagħhom bħala ċittadini.

—	Ikunu wettqu kwalunkwe obbligu impost fuqhom mil-liġijiet dwar il-lieva.

—	Jissodisfaw ir-rekwiżiti tal-karattru għad-doveri li jridu jitwettqu.

—

Ikollhom livell ta' edukazzjoni li jikkorrispondi għal studji universitarji kompluti ċċertifikati b'diploma meta t-tul ta' żmien normali ta' tali studji huwa ta' erba' snin jew aktar, jew livell ta' edukazzjoni li jikkorrispondi għal studji universitarji kompluti ċċertifikati b'diploma u esperjenza adatta ta' mill-inqas sena meta t-tul ta' żmien normali ta' tali studji huwa ta' mill-inqas tliet snin.

—	Ikollhom mill-inqas 15-il sena esperjenza professjonali, li f'mill-inqas 5 snin minnhom huma kienu inkarigati minn entità amministrattiva kbira, u jkunu effettivament eżerċitaw responsabbiltajiet maniġerjali u organizzattivi.

L-applikanti għandhom jissodisfaw il-kondizzjonijiet kollha għall-ammissjoni fil-ħin tal-applikazzjoni.

Proċedura tal-għażla

Il-proċedura tal-għażla titwettaq permezz tal-applikazzjoni tal-Artikolu 29(2) tar-Regolamenti tal-Persunal tal-Uffiċjali tal-Unjoni Ewropea (2). Sabiex jassisti lill-Awtorità tal-Ħatra biex tagħmel l-għażla tagħha, ser jiġi stabbilit Kumitat Konsultattiv ta' Għażla, bir-responsabbiltà li jfassal lista tal-aħjar applikanti. Inizjalment, dan il-Kumitat ser jeżamina l-kwalifiki u l-esperjenza tal-applikanti, u l-applikanti magħżula ser jiġu mistiedna għal intervista.

Applikazzjoni

L-applikazzjonijiet għandhom jintbagħtu bil-posta, preferibbilment irreġistrata, lir-Recruitment Service, General Secretariat of the Council of the European Union, rue de la Loi/Wetstraat, 1048 Bruxelles/Brussel, BELGIQUE/BELGIË, sa mhux aktar tard mid-data msemmija f'dan l-avviż ta' pożizzjoni vakanti, bit-timbru tal-posta jiġi meqjus bħala prova.

Jiġu kkunsidrati biss id-dossiers kompluti li jinkludu:

(a)	il-formola ta' applikazzjoni (ANNEX 3/ANNEXE 3) mimlija, datata u ffirmata kif meħtieġ (bil-firma oriġinali tiegħek fuqha);

(b)

ittra ta' motivazzjoni flimkien ma' curriculum vitae ddettaljat, bl-Ingliż jew Franċiż, preferibbilment fil-format Europass (http://europass.cedefop.europa.eu), li jkopri l-karriera sħiħa tal-applikant, u jelenka, fost l-oħrajn, il-kwalifiki, l-għarfien tal-lingwi, l-esperjenza, u d-dmirijiet attwali tal-applikant; u

(c)	dokumenti ta' sostenn relatati mad-diplomi u l-esperjenza professjonali (fotokopji biss). Dokumenti ta' sostenn relatati mal-esperjenza professjonali għandhomjiġu minn parti terza u mhux biżżejjed li sempliċiment jintbagħat s-CV msemmi f'b).

L-ebda wieħed minn dawn id-dokumenti ma jintbagħat lura.

N.B.

Din il-pożizzjoni teħtieġ awtorizzazzjoni tas-sigurtà li tippermetti aċċess għal dokumenti klassifikati (livell SECRET UE). Ikun ta' vantaġġ jekk l-applikant ikollu diġà din l-awtorizzazzjoni. Inkella, bl-applikazzjoni għall-post, il-kandidati jkunu qed jaqblu li jagħmlu skrining tas-sigurtà, jekk jintgħażlu (Deċiżjoni tal-Kunsill 2011/292/UE (3)).

Rieżaminazzjoni tal-applikazzjonijiet

Il-proċeduri relatati mat-talbiet għal rieżami, appelli u riferimenti għall-Ombudsman Ewropew jinsabu fl-Anness 1 għal dan l-avviż ta' pożizzjoni vakanti.

Protezzjoni tad-data

Ir-regoli li jirregolaw l-ipproċessar ta' data personali inkonnessjoni ma' din il-proċedura tal-għażla jinsabu fl-Anness 2 għal dan l-avviż.

Opportunitajiet indaqs

L-Istituzzjonijiet Ewropej japplikaw politika ta' opportunitajiet indaqs u jaċċettaw applikazzjonijiet mingħajr ebda diskriminazzjoni abbażi ta' sess, razza, kulur, oriġini etnika jew soċjali, karatteristiċi ġenetiċi, lingwa, reliġjon jew twemmin, opinjonijiet politiċi jew oħrajn, sħubija f'minoranza nazzjonali, ġid, twelid, diżabbiltà, età jew orjentazzjoni sesswali.

Minħabba r-rappreżentanza baxxa ta' nisa fil-livelli maniġerjali ogħla, is-Segretarjat Ġenerali tal-Kunsill jilqa' b'mod partikolari applikazzjonijiet minn kandidati nisa għal din il-pożizzjoni.

---

(1)  Din il-lista tirrifletti l-organizzazzjoni attwali tax-xogħol — id-Direttorat Ġenerali u/jew l-attivitajiet tiegħu jistgħu jiġu ristrutturati.

(2)  Ir-Regolamenti tal-Persunal tal-Uffiċjali u l-Kondizzjonijiet ta' Impjieg ta' Uffiċjali Oħra tal-Unjoni Ewropea, stabbiliti permezz tar-Regolament tal-Kunsill (KEE, Euratom, KEFA) Nru 259/68 ĠU L 56, 4.3.1968, p. 1 — http://eur-lex.europa.eu

(3)  ĠU L 141, 27.5.2011, p. 17.

---

---

---

---

---