1.1.

Skond l-Artikolu 248 tat-Trattat tal-KE, il-Qorti ta' l-Awdituri tagħti lill-Parlament Ewropew u lill-Kunsill Dikjarazzjoni ta' Assigurazzjoni dwar l-affidabilità tal-kontijiet u dwar il-legalità u r-regolarità tat-tranżazzjonijiet ta' bażi (“id-DAS”). It-Trattat jawtorizza wkoll lill-Qorti li tissupplimenta din id-dikjarazzjoni b'evalwazzjonijiet speċifiċi f'kull qasam prinċipali ta' attività tal-Komunità.

1.2.

L-għan tax-xogħol fuq l-affidabilità tal-kontijiet tal-Komunitajiet Ewropej huwa li tinkiseb biżżejjed evidenza li twassal għall-konklużjoni dwar il-punt sa fejn id-dħul, l-infiq, l-attiv u l-passiv ġew irreġistrati kif suppost u li l-kontijiet annwali jippreżentaw b'mod ġust, fl-aspetti materjali kollha, il-pożizzjoni finanzjarja fil-31 ta' Diċembru 2006, u r-riżultati ta' l-operazzjonijiet tagħhom u l-likwidità għas-sena li ntemmet (ara l-paragrafi 1.6 sa 1.37).

1.3.

L-għan tax-xogħol fuq il-legalità u r-regolarità tat-tranżazzjonijiet ta' bażi huwa li tinġabar biżżejjed evidenza, ta' natura diretta jew indiretta, li tippermetti li tiġi espressa opinjoni dwar jekk dawn humiex skond ir-regolamenti applikabbli jew id-dispożizzjonijiet kontrattwali, u ġewx ikkalkolati b'mod korrett (ara l-paragrafi 1.38 sa 1.42 ta' dan il-kapitolu għal kwistjonijiet orizzontali u l-kapitoli 2 u 4 sa 10 għad-dettalji).

1.4.

Għal darb' oħra, il-Qorti tat attenzjoni partikolari għall-isforzi tal-Kummissjoni biex ittejjeb is-sistema ta' kontroll intern tagħha u s-segwitu mogħti lill-pjanijiet ta' azzjoni adottati fil-kuntest tar-Roadmap lejn qafas ta' kontroll intern integrat jew annessi mar-rapporti ta' attività annwali u s-Sinteżi tagħhom għas-sena finanzjarja 2006 u qabel (ara l-Kapitolu 2).

1.5.

Barra dan, fin-nuqqas ta' preżentazzjoni ta' indikaturi mill-Kummissjoni fuq numru ta' snin (8), il-Qorti tipprovdi ċerti indikaturi biex timmonitorja l-progress fit-titjib tal-kontrolli interni kemm b'mod ġenerali, kif ukoll għal kull qasam ta' dħul u infiq (ara l-annessi ma' dan il-Kapitolu u l-Kapitoli 2 u 4 sa 10).

1.5.

Minbarra l-valutazzjoni ta’ konformità ma’ l-istandards tal-kontroll intern, għall-ewwel darba fl-2006, il-Kummissjoni ħeġġet sabiex ir-Rapporti Annwali ta’ l-Attività jinkludu taqsima dwar “indikaturi ewlenin ta’ appoġġ għal assigurazzjoni raġonevoli” (Taqsima 2.4.), u għall-Fondi Strutturali inklużi fihom, kif ukoll valutazzjonijiet tas-sistemi ta’ l-Istati Membri, informazzjoni dwar il-kontributi, l-output, ir-riżultati u l-impatt ta’ l-azzjonijiet tal-Kummissjoni sabiex tikseb l-assigurazzjoni dwar il-legalità u r-regolarità tat-tranżazzjonijiet.

1.6.

L-osservazzjonijiet tal-Qorti jikkonċernaw il-kontijiet annwali finali għas-sena finanzjarja 2006, ippreparati mill-Uffiċjal tal-Kontijiet tal-Kummissjoni u approvati mill-Kummissjoni b'konformità ma' l-Artikolu 129 tar-Regolament Finanzjarju tal-25 ta' Ġunju 2002 u mibgħuta lill-Qorti sal-31 ta' Lulju 2007. Il-kontijiet jikkomprendu “ir-rendikonti finanzjarji konsolidati” — li jkopru, b'mod partikolari, il-karta tal-bilanċ li turi l-attiv u l-passiv fl-aħħar tas-sena — u “r-rapporti konsolidati dwar l-implimentazzjoni tal-baġit” — li jkopru d-dħul u l-infiq għas-sena.

1.7.

Il-kontijiet annwali 2006 huma t-tieni sett ta' kontijiet ippreparati skond ir-regoli tal-kontabilità ibbażata fuq id-dovuti li kienu introdotti mill-Komunitajiet Ewropej fl-2005 abbażi tad-dispożizzjonijiet tar-Regolament Finanzjarju (b'mod partikolari l-Artikoli 123 sa 138) (9). B'paragun mal-kontijiet annwali ta' l-2005, seħħew il-bidliet prinċipali li ġejjin:

—

il-kontijiet ta' 24 aġenzija ġew konsolidati, meta mqabbla ma' 16 fl-2005;

—

aktar informazzjoni dettaljata hija mogħtija dwar il-forom differenti ta' rkupri ta' l-infiq tal-Kummissjoni;

—

L-Uffiċjal tal-Kontijiet ta' kull istituzzjoni u korp ikkonsolidati fil-kontijiet finali konsolidati ffirma l-kontijiet individwali tiegħu u l-Uffiċjal tal-Kontijiet tal-Kummissjoni ddikjara li huwa kien kiseb assigurazzjoni raġonevoli li l-kontijiet konsolidati jagħtu stampa vera u ġusta tal-pożizzjoni finanzjarja tal-Komunitajiet Ewropej fl-aspetti materjali kollha.

1.8.

L-Uffiċjal tal-Kontijiet tal-Kummissjoni, fuq talba tal-Qorti, taha ittra ta' rappreżentazzjoni li tikkonferma li soġġetti għal ċerti limitazzjonijiet il-kontijiet finali huma kompleti u affidabbli (ara l-paragrafi 1.30 u 2.23 sa 2.25).

1.9.

Il-Qorti kompliet il-verifika tagħha ta' l-immodernizzar tas-sistema ta' kontabilità tal-Komunitajiet (10). Fit-tielet fażi tal-verifika (11), il-Qorti kkonċentrat fuq l-elementi li ġejjin:

—

evalwazzjoni dwar jekk il-miżuri meħuda fil-Kummissjoni, biex tirrimedja n-nuqqasijiet fil-qafas tar-rappurtar finanzjarju l-ġdid u s-sistemi ta' kontabilità ta' ċerti Direttorati-Ġenerali (12), jikkontribwixxux biex jagħtu assigurazzjoni raġonevoli li l-kontijiet huma veri u ġusti (ara l-paragrafi 1.13 sa 1.21);

—

verifikazzjoni ta' l-affidabilità tal-kontijiet 2006, li jikkonċentraw fuq elementi maqbuda għall-ewwel darba fil-kontijiet ta' l-2005 u li ġew ippreżentati kwalifiki dwarhom (13) (prefinanzjament u garanziji relatati, rendikonti ta' fatturi/spejjeż u l-qtugħ) (ara l-paragrafi 1.22 sa 1.37).

1.9.

Fil-21 ta’ Ġunju 2007 l-Kummissjoni ppubblikat Rapport ta’ Progress mill-31 ta’ Marzu 2007 dwar l-immodernizzar tas-sistema tal-kontabbiltà (COM(2007) 343 finali) li jirrapporta, fost l-oħrajn, li l-proġett ġie implimentat fil-parti l-kbira tiegħu skond il-pjan tal-proġett ta’ l-2006-2007 u li jaġġorna u jestendi l-pjan ta’ titjib tas-sistemi ta’ l-IT sa l-2008. Sar progress fit-titjib fl-ambjent tal-kontroll u fil-kwalità tad-data tal-kontijiet fid-Direttorati Ġenerali kollha. Ġie rrapportat progress sinifikanti fl-iżvilupp tas-sistema ABAC IT, u matul is-sena żewġ istituzzjonijiet u sitt aġenziji wkoll qalbu għas-sistema ABAC. Tħejja pjan għat-trasferiment tal-kontijiet tal-Fondi Ewropej ta’ l-Iżvilupp EDF għall-ABAC u s-servizzi tal-Kummissjoni qed jaħdmu biex ikunu jistgħu jagħmlu hekk fl-2008.

1.10.

L-Uffiċjal tal-Kontijiet tal-Kummissjoni introduċa serje ta' miżuri sabiex jikkonsolida t-tranżizzjoni lejn kontijiet ibbażati fuq id-dovuti, inklużi kontrolli ta' kull xahar sabiex l-inkonsistenzi fir-reġistrazzjoni tal-prefinanzjamenti jinstabu.

1.10.

Dawn il-miżuri ser jittejbu kontinwament bħala parti minn proġetti li għadhom għaddejjin b l-għan li jtejbu l-kwalità ta’ l-informazzjoni tal-kontijiet.

1.11.

Dawn il-miżuri kkontribwew għat-tisħiħ tal-qafas ta' rappurtar finanzjarju u s-sistemi ta' kontabilità. Iżda, ċerti nuqqasijiet xorta għadhom jeżistu li jpoġġu f'riskju l-kwalità tad-dejta tal-kontabilità (ara l-paragrafi 1.13 sa 1.21). It- Tabella 1.1 fiha segwitu tal-kwalifiki tal-Qorti dwar l-affidabilità tal-kontijiet li huma espressi fid-Dikjarazzjoni ta' Assigurazzjoni għas-sena finanzjarja 2005, kif ukoll punti oħra imqajma mill-Qorti, li kienu solvuti jew għadhom iridu jiġu indirizzati fil-kuntest tal-miżuri meħuda mill-Kummissjoni biex tikkonsolida t-tranżizzjoni lejn kontijiet ibbażati fuq id-dovuti.

1.11.

Il-Kummissjoni ser tibqa’ ttejjeb il-qafas u s-sistemi kontabbli tagħha. Hija tikkunsidra li r-riskji li fadal huma indirizzati b’mod xieraq u ma jħallu l-ebda impatt fuq l-affidabbiltà tal-kontijiet ta’ l-2006.

1.12.

B'kunsiderazzjoni għar-riżultati tal-verifika tal-Qorti tal-kontijiet ta' l-2005, l-Uffiċjal tal-Kontijiet tal-Kummissjoni, wara li kkonsulta mal-Kumitat Konsultattiv dwar ir-Regoli tal-Kontabilità, emenda r-Regoli tal-Kontabilità Nri 1, 2 u 12 dwar l-ambitu tal-konsolidazzjoni, l-istruttura u l-preżentazzjoni tal-karta tal-bilanċ u t-trattament ta' l-obbligi tal-pensjonijiet tal-Komunitajiet (14). Il-kontijiet 2006 kienu ppreparati bl-applikazzjoni ta' dawn ir-regoli tal-kontabilità.

1.13.

Fil-preżent, 19-il Direttorat-Ġenerali jużaw is-sistemi ta' l-IT tagħhom stess għal għanijiet ta' ġestjoni finanzjarja u biex joħolqu tranżazzjonijiet li jintbagħatu lis-sistemi tal-kontabilità ċentrali (ABAC) permezz ta' interface.

1.14.

Għas-sena finanzjarja 2006, is-servizzi ta' l-Uffiċjal tal-Kontijiet tal-Kummissjoni wettqu segwitu tas-sejbiet tas-sena preċedenti (15). Barra dan, 9 servizzi oħra (16) kienu soġġetti għal reviżjonijiet fil-fond bħala parti minn approċċ ċikliku mmirat biex ikopri bis-sħiħ is-servizzi tal-Kummissjoni fit-terminu taż-żmien medju.

1.15.

L-Uffiċjal tal-Kontijiet tal-Kummissjoni ma kienx f'pożizzjoni li jivvalida s-sistemi lokali ta' l-Uffiċċju tal-Koperazzjoni EuropeAid (17), id-Direttorat-Ġenerali għall-Edukazzjoni u l-Kultura (18) u d-Direttorat-Ġenerali għar-Relazzjonijiet Esterni (19) dwar is-sena finanzjarja 2006. Barra dan, in-numru u l-importanza tal-kwistjonijiet u punti għal aktar konsiderazzjoni jibqa' simili ħafna tar-rapport ta' validazzjoni finali għas-sena finanzjarja 2005 (20).

1.15.

Iż-żmien bejn l-stadju inizjali u r-riżultati fir-rigward ta’ applikazzjonijiet ġodda u għas-sejbien ta’ soluzzjoni ta’ problemi fis-sistemi lokali jista’ jkun wieħed konsiderevoli, speċjalment fejn ikunu involuti bidliet fis-sistemi ta’ l-IT. Barra minn hekk, il-persunal hemm bżonn li jitħarreġ fl-użu tagħhom sabiex jiġi żgurat il-ħsad tal-benefiċċji mistennija.

1.16.

Tlieta (21) mid-disa' servizzi li kienu soġġetti għal reviżjonijiet fil-fond mis-servizzi ta' l-Uffiċjal tal-Kontijiet tal-Kummissjoni ppreżentaw riskji sinifikanti f'dak li għandu x'jaqsam mal-proċeduri tal-qtugħ. Dan il-punt wassal għall-validazzjoni kondizzjonali tas-sistemi lokali fir-rapport ta' validazzjoni finali għas-sena finanzjarja 2006. Iżda, wara li ċċekkja l-proċeduri ta' qtugħ u ffinalizza r-rapporti ta' validazzjoni għat-tliet Direttorati Ġenerali (Soċjetà Informatika u Media, Enerġija u Trasport u ċ-Ċentru Konġunt għar-Riċerka), l-Uffiċjal tal-Kontijiet ħareġ validazzjonijiet b'riżerva waħda mhux relatata mal-kontabilità għaċ-Ċentru Konġunt għar-Riċerka.

1.17.

Il-verifika tal-Qorti kkonfermat li d-deċiżjonijiet ta' l-Uffiċjal tal-Kontabilità tal-Kummissjoni kellhom bażi soda: il-kwistjonijiet u l-punti pendenti kienu importanti. Il-Qorti tikkunsidra li fid-dawl ta' dawn il-problemi kontinwi, id-Direttur-Ġenerali għall-Baġit imissu għamel riżerva speċifika dwar dawn il-kwistjonijiet.

1.17.

Fl-2005 ġiet inkluża riżerva ġenerali fir-Rapport Annwali ta’ l-Attività fi żmien meta l-Kummissjoni ma kinitx għadha lestiet l-ewwel sett ta’ kontijiet provviżorji tagħha fuq prinċipji ta’ kontabbiltà abbażi tad-dovuti. Din ikkunsidrat ukoll l-isfidi konsiderevoli ffaċċjati mis-servizzi tal-Kummissjoni fl-applikazzjoni ta' regoli ġodda ta' kontabbiltà u d-diffikultajiet li nqalgħu fil-proċess ta' validazzjoni tas-sistemi lokali.

1.18.

Minħabba li l-2005 kienet l-ewwel sena ta' l-eżerċizzju tal-qtugħ, ma kinux disponibbli metodi ta' paragun biex tiġi ċċekkjata l-adegwatezza tal-metodi. Minħabba din id-diffikultà, is-servizzi ta' l-Uffiċjal tal-Kontabilità tal-Kummissjoni taw lid-Direttorati-Ġenerali proċedura għall-ittestjar ex-post ta' dejta ta' qtugħ u l-ewwel rapport li jikkumbina dejta minn għejun tal-baġit u mill-kontabilità ġenerali. B'mod partikolari din immirat li tassigura l-konsistenza tal-metodu u tal-proċeduri tal-qtugħ. Iżda, xi Direttorati-Ġenerali ma wettqux ittestjar ex-post tal-metodoloġiji tal-qtugħ (22). Dan kellu impatt negattiv fuq l-affidabilità tad-dejta tal-kontabilità inkluża fil-kontijiet provviżorji. Iżda, wara li twettqu l-korrezzjonijiet, il-kontijiet finali ma kinux milquta (ara l-paragrafu 1.32).

1.18.

Matul l-2006 l-Kummissjoni għamlet sforz sinifikanti sabiex ittejjeb l-istima ta' l-ammonti tal-cut-off kif imniżżla fil-paragrafu 1.32. Madanakollu, minħabba nuqqas ta’ informazzjoni mill-benefiċjarji ta’ fondi ta’ l-UE dwar il-ħidma li għadha għaddejja u n-nuqqas ta' mezzi legali obbligatorji biex din tingħata, xi servizzi sabuha ferm diffiċli biex jipproċedu bl-ittestjar tal-metodoloġiji tal-cut-off fir-rigward tat-tranżazzjonijiet li għadhom għaddejjin u li jibqgħu validi sa 7 snin.

1.19.

Il-verifika tal-Qorti ta' l-2005 kkonfermat ir-riżerva ġenerali tad-Direttur-Ġenerali għall-Edukazzjoni u l-Kultura dwar il-kompletezza u l-korrettezza tal-kontijiet tad-Direttorat-Ġenerali. Minħabba l-inċidenza ta' l-ommissjonijiet u reġistrazzjonijiet doppji jew żbaljati, ma kienx possibbli li jkun kwantifikat l-ammont żejjed jew nieqes tas-sehem tiegħu ta' l-attivi u l-passivi (23).

1.19.

Fl-2006, id-Direttorat Ġenerali għall-Edukazzjoni u l-Kultura tejjeb sostanzjalment il-kwalità ta’ l-informazzjoni finanzjarja tiegħu. In-nefqa ta’ dan id-Direttorat Ġenerali u ta‘ l-Aġenzija Eżekuttiva ta’ l-Edukazzjoni, l-Awdjoviżjoni u l-Kultura tammonta għal total ta' madwar 1,5 % tal-baġit tal-KE.

1.20.

Bi ħsieb li jirrimedjaw n-nuqqasijiet identifikati fil-kontijiet ta' l-2005, is-servizzi ta' l-Uffiċjal tal-Kontijiet tal-Kummissjoni tejbu s-sorveljanza tagħhom f'dak li għandu x'jaqsam mad-Direttorat-Ġenerali għall-Edukazzjoni u l-Kultura u l-Aġenzija Eżekuttiva Edukazzjoni, Awdjoviżiv u Kultura li ġiet imwaqqfa reċentement. Barra dan, ġiet imwaqqfa task force, li kienet tinkludi grupp tal-kontabilità, sabiex twettaq reviżjoni dettaljata tad-dikjarazzjonijiet kollha tal-fatturi/spejjeż miftuħa fl-2006 u sabiex tassigura li t-tranżazzjonjiet mibdija fl-unitajiet operattivi huma korretti. Barra dan, konsulent estern ġie kkontrattat bi ħsieb li jipprovdi assistenza għall-identifikazzjoni ta' żbalji li ngħatat informazzjoni dwarhom fil-kontijiet finali ta' l-2005 u l-għeluq tal-kontijiet ta' l-2006.

1.20.

Id-Direttorat Ġenerali għall-Edukazzjoni u l-Edukazzjoni u l-Aġenzija Eżekuttiva ta’ l-Edukazzjoni, l-Awdjoviżjoni u l-Kultura ħadu passi f’diversi oqsma, inklużi:

—

is-sistema lokali ġiet imtejba sabiex l-istess fattura ma tiġix irreġistrata aktar minn darba fl-ABAC;

—

fl-2006 twettqet analiżi dettaljata, minn naħa ta' taskforce, tal-fatturi storiċi kollha sabiex tiġi identifikata u korretta kwalunkwe entrata mtennija;

—

il-metodoloġija tal-cut-off ġiet ipperfezzjonata;

—

Ir-riskju marbut man-nuqqas parzjali ta’ tqabbil bejn is-sistemi lokali u dawk ċentrali tnaqqas permezz ta' l-użu ta’ data mis-sistema ċentrali ta’ kontabbiltà bħala bażi għal kalkoli tal-cut-off u għar-rappurtaġġ ta’ prefinanzjament u impenji pendenti (RAL).

1.21.

Dawn il-miżuri wasslu għal titjib tal-kwalità tad-dejta tal-kontabilità. Madanakollu, verifika (24) kixfet li bosta dejta finanzjarja ma kinux allokati tajjeb bejn id-Direttorat-Ġenerali għall-Edukazzjoni u l-Kultura u l-Aġenzija Eżekuttiva. Barra dan, kontrolli u korrezzjonijiet imwettqa għandhom ikunu dokumentati aħjar, fil-kuntest ta' l-għeluq tal-kontijiet 2006.

1.21.

Billi din mhix kwistjoni li tolqot id-dehra vera u ġusta tal-kontijiet tal-Kummissjoni, is-Servizzi Kontabbli taw parir lid-Direttorat Ġenerali għall-Edukazzjoni u l-Edukazzjoni u l-Kultura u l-Aġenzija Eżekuttiva ta’ l-Edukazzjoni, l-Awdjoviżjoni u l-Kultura sabiex ma jiffokawx din is-sena fuq il-qsim tat-tranżazzjonijiet iżda jikkonċentraw l-isforzi tagħhom fuq it-titjib tal-kwalità tad-data tal-kontijiet globali tagħhom.

1.22.

Matul l-2006, is-servizzi tal-Kummissjoni għamlu sforzi sinifikanti biex jassiguraw il-kompletezza u l-preċiżjoni tar-reġistrazzjoni ta' pagamenti ġodda ta' prefinanzjament, kif ukoll rendikonti tal-fatturi/spejjeż miftuħa ġodda u l-qtugħ.

1.23.

Il-verifika tal-Qorti ta' l-attivi fissi intanġibbli u tanġibbli, stokks, passivi finanzjarji u oħrajn, proviżjonijiet għal riskji u spejjeż u riżervi ma skopriet l-ebda dikjarazzjonijiet bi żbalji sinifikanti. Iżda, l-Qorti identifikat numru ta' żbalji f'partijiet oħra, li huma elenkati hawn taħt.

1.24.

Il-verifika tal-Qorti wasslitha għall-konklużjoni li l-proċeduri ta' għeluq is-sena għandhom jissaħħu f'uħud mill-entitajiet konsolidati (eż. il-Parlament Ewropew, il-Kumitat tar-Reġjuni) u fil-Kummissjoni sabiex tevita korrezzjonijiet meħtieġa wara l-preżentazzjoni tal-kontijiet provviżorji.

1.24.

Filwaqt li l-kwistjonijiet milquta minn dan il-kumment ma jaffettwawx id-dehra vera u ġusta tal-kontijiet konsolidati, il-Kummissjoni xorta waħda ser tagħmel sforzi biex tkompli ttejjeb il-proċeduri kontabbli ta’ tmiem is-sena.

1.25.

Barra dan, il-Qorti nnutat differenzi fit-trattament ta' ċerti kwistjonijiet bejn l-entitajiet konsolidati u bejn id-Direttorati-Ġenerali tal-Kummissjoni (eż. spejjeż pagabbli għal-lijf li ma ttiħidx huma rreġistrati minn xi Aġenziji u Istituzzjonijiet imma mhux mill-Kummissjoni u l-Parlament Ewropew; kuntratti multi-annwali barra kuntratti ta' kiri għas-spejjeż tal-kerrej, li għall-ewwel darba ġew preżentati taħt passivi kontinġenti mill-Kunsill imma mhux minn entitajiet oħra konsolidati; m'hemmx separazzjoni sistematika tal-valur ta' l-art u l-bini u m'hemmx passiv kontinġenti fil-każ li tkun meħtieġa bidla fil-grad ta' numru sinifikanti ta' persunal maħtur fi grad aktar baxx minn dak stabbilit mill-kompetizzjoni li għaddew minnha sakemm ma joħroġ l-eżitu ta' każ li għaddej quddiem il-Qorti Eworpea tal-Prim' Istanza).

1.25.

Il-kwistjonijiet imsemmija mill-Qorti ma jaffettwawx id-dehra vera u ġusta tal-kontijiet konsolidati. Madanakollu l-Kummissjoni ser tinvestiga l-kwistjonijiet ta’ leave li ma ttiħidx u ta' kuntratti multijannwali. Id-differenzi li jifdal osservati mill-Qorti jirrapreżentaw il-fatt li l-entitajiet konsolidati differenti għandhom livelli differenti ta' materjalità x'jikkunisdraw meta jkunu qed jieħdu deċiżjonijiet dwar il-kontijiet. Barra minn hekk joħroġ b’mod ċar li l-każi limitati fejn mhuwiex possibbli li jinqasmu l-valuri ta’ l-art u tal-bini (f’ċerti delegazzjonijiet tal-Kummissjoni u f'għadd żgħir ta’ entitajiet konsolidati) huma każi ta’ nuqqas ta’ informazzjoni fil-livell ta’ l-entità individwali u mhux trattament inkonsistenti tal-kontijiet bejn l-entitajiet konsolidati.

1.26.

Fir-rendikonti finanzjarji konsolidati tal-Komunitajiet Ewropej, operazzjonijiet ta' kapital ta' riskju (211-il miljun euro fil-31 ta' Diċembru 2006) huma klassifikati fil-karta tal-bilanċ taħt l-intestatura “Investimenti” (investimenti disponibbli għall-bejgħ). Dawn huma rreġistrati bil-prezz storiku li minnu huma mnaqqsa l-proviżjonijiet għat-tnaqqis fil-valur, peress li fil-preżent il-valur ġust tagħhom ma jistax jitkejjel b'mod affidabbli. Filwaqt li tali metodu ta' stima huwa aċċettabbli fiċ-cirkostanzi, dan mhux applikat b'mod konsistenti. Il-Qorti sabet xi każijiet fejn stimi provviżorji għat-tnaqqis fil-valur disponibbli għall-maniġer ta' l-operat (il-Bank Ewropew għall-Investiment), għal valur totali ta' 21 miljun euro, ma kienx ġie kkomunikat lill-Kummissjoni (ara l-paragrafi 11.10 u 11.11).

1.26.

L-istandards tar-rappurtaġġ u tal-kontabbiltà evolvew b’mod sinifikanti matul il-perjodu tal-mandati MEDA (li jkopru dawn l-operazzjonijiet ta' kapital tar-riskju). Il-Bank Ewropew ta' l-Investiment (BEI) u l-Kummissjoni segwew l-iżviluppi u bħalissa qed jeżaminaw is-sitwazzjoni flimkien, billi qed ifittxu l-aħjar soluzzjoni li toffri bilanċ bejn in-nefqa u l-benefiċċju u wkoll qed jieħdu in kunsiderazzjoni l-informazzjoni disponibbli skond il-kuntratti ffirmati ma' benefiċjarji finali ħafna snin ilu (b'hekk ma jinkludux standards ta' rappurtaġġ kurrenti).

1.27.

Il-verifika ta' kampjun rappreżentattiv ta' 150 prefinanzjament mill-popolazzjoni ta' prefinanzjamenti rreġistrati fis-sistema ta' kontabilità identifikat livell materjali ta' żball fit-termini tal-frekwenza u l-impatt finanzjarju fir-rigward ta' dan il-punt tal-karta ta' bilanċ. Iżda b'mod ġenerali mhux materjali. It-tipi ta' żbalji l-aktar komuni huma:

—

reġistrazzjoni ta' prefinanzjamenti b'ammont ħażin;

—

reġistrazzjoni ta' prefinanzjamenti minkejja li dawn ġew approvati qabel għeluq is-sena.

1.28.

Barra dan, xogħol ta' verifika addizzjonali dwar l-identifikazzjoni u l-validazzjoni ta' prefinanzjamenti kixef problemi ta' kompletezza/preċiżjoni fil-karta tal-bilanċ ta' l-għeluq:

1.28.

—

Struzzjonijiet dwar it-trattament kontabbli ta' fatturi finali mhux imħallsa u l-approvazzjoni relatata ta' prefinanzjamenti għandhom jiġu riveduti sabiex jiggarantixxu approċċ armonizzat fost is-servizzi tal-Kummissjoni.

—

Dawn l-istruzzjonijiet ġew analizzati bir-reqqa matul Lulju 2007. Għall-għadd limitat ta’ fatturi kkonċernati, intlaħqet il-konklużjoni li t-trattament kontabbli użat mis-servizzi tal-Kummissjoni għall-għeluq ta’ l-2006 huwa l-aħjar wieħed disponibbli. L-istess trattament ser japplika għall-għeluq li jmiss fi tmiem l-2007.

—

Ordnijiet ta' rkupru mhumiex maħruġa sistematikament meta l-approvazzjoni ta' prefinanzjament tikxef li għandhom jiġu rkuprati flus mingħand il-benefiċjarju. Dan jirriżulta f'dikjarazzjoni żejda tal-prefinanzjament u f'dikjarazzjoni nieqsa ta' riċevibbli b'ammont li ma jistax jiġi kkwantifikat b'mod preċiż.

—

L-ammonti ta’ prefinanzjament mhumiex intiżi li jiġu rkuprati iżda biex jintużaw mill-benefiċjarji biex iwettqu l-kuntratti tagħhom. L-irkupri jseħħu f'każi rari fejn il-benefiċjarji jonqsu fl-obbligi tagħhom jew fejn ikun hemm differenzi marġinali bejn l-ammonti mħallsa u l-ispejjeż eliġibbli finali.

—

it-testijiet ta' tnaqqis fil-valur li twettqu biex jaġġustaw il-valur ta' prefinanzjament għall-ammont li jista' jiġi rkuprat kienu insuffiċjenti, li rriżulta f'possibilità ta' dikjarazzjoni żejda tal-prefinanzjament u dikjarazzjoni nieqsa ta' l-ispejjeż fuq tnaqqis fil-valur tal-prefinanzjament (25).

—

It-testijiet ta’ deterjorament ma ġewx ikkunsidrati bħala prijorità billi l-parti l-kbira tad-Direttorati Ġenerali kkonċernati jittrattaw ma' entitajiet pubbliċi, minħabba l-eżistenza ta' garanziji bankarji u minħabba r-rata kemmxejn baxxa ta’ ordnijiet ta’ rkupru tal-passat. Din il-kwistjoni ser tingħata attenzjoni ulterjuri fil-ġejjieni sabiex din is-suppożizzjoni tiġi konfermata.

1.29.

Għall-infiq tal-Fond Agrikolu Ewropew dwar Gwida u Garanzija, il-Kummissjoni introduċiet proċedura ta' rkupru (26) ġdida li tinkludi tabelli għall-preżentazzjoni tal-kontijiet tad-debituri. Il-xogħol tal-Qorti relatat ma' dawn il-kontijet tad-debituri jpoġġi f' diskussjoni l-kompletezza ta' dawn it-tabelli (27) (ara l-paragrafi 5.61 u 5.62).

1.29.

Hemm rabta ċara bejn dawn it-tabelli u r-reġistru tad-debituri ta' l-aġenziji tal-ħlas, u l-linji gwida ġodda tal-Kummissjoni applikabbli mill-2007 jirrikjedu li l-entitajiet ta' ċertifikazzjoni jirrikonċiljaw ir-reġistru tad-debituri mat-tabelli u li jipprovdu spjegazzjonijiet għal kwalunkwe diskrepanza li tinstab.

1.30.

Għall-Membri tal-Parlament Ewropew minn pajjiżi li l-awtoritajiet nazzjonali tagħhom ma jipprovdux skema ta' pensjoni, l-Uffiċċju tal-Parlament Ewropew adotta skema tal-pensjoni provviżorja sakemm tiġi mwaqqfa skema Komunitarja tal-pensjonijiet definittiva għall-Membri kollha (28). Iżda, il-passiv fir-rigward ta' dawn id-drittijiet tal-pensjoni mhux rikonoxxut fil-karta tal-bilanċ konsolidata. Fin-nuqqas ta' evalwazzjoni attwarja għal dawn id-drittijiet tal-pensjoni, l-impatt finanzjarju fuq il-(proviżjoni għall-) “Benefiċċji ta' l-Impjegati” u fuq il-kont tar-riżultat ekonomiku, ma jistax ikun kwantifikat.

1.30.

Attwalment, il-ġejjieni ta’ dan l-iskema ta’ pensjoni provviżorja qed jiġi kkunsidrat mill-ġdid. Fid-dawl ta’ l-inċertezza fir-rigward tal-ġejjieni, u n-nuqqas ta’ valutazzjoni attwarja, ma tista ssir l-ebda valutazzjoni sinifikanti fil-kontijiet.

1.31.

Il-verifika ta' kampjun rappreżentattiv ta' 150 fattura/dikjarazzjoni ta' spejjeż minn popolazzjoni ta' kontijiet pagabbli rreġistrati fis-sistema ta' kontabilità identifikat livell materjali ta' żball f'termini tal-frekwenza u l-impatt finanzjarju fir-rigward ta' dan il-punt tal-karta ta' bilanċ. Iżda, b'mod ġenerali dan mhux materjali. Il-parti l-kbira ta' l-iżbalji jikkonċernaw fatturi jew dikjarazzjonijiet ta' spejjeż irreġistati b'ammonti żbaljati.

1.31.

Il-livell ta’ l-iżbalji li stab mill-Qorti kien wieħed limitat.

1.32.

Nuqqasijiet dwar il-proċeduri tal-qtugħ (ara l-paragrafu 1.18) wasslu għan-nuqqasijiet fil-kontijiet provviżorji li ġew ikkoreġuti fil-kontijiet finali.

1.32.

Fl-2006, il-Kummissjoni tejbet l-istima ta' l-ammonti tal-cut-off tagħha billi ħadet l-azzjonijiet li ġejjin:

—

ġie żviluppat rapport ġdid dwar il-cut-off;

—

it-tekniki tal-cut-off ġew imtejba;

—

is-servizzi ingħataw proċedura u lista ta’ kontroll ġodda;

—

ġie abbozzat dokument globali dwar il-metodoloġija tal-cut off kif ukoll ġew organizzati workshops minn familji ta’ Direttorati Ġenerali;

—

id-Direttorat Ġenerali għall-Baġit wettaq kontrolli fuq il-lant tax-xogħol f’ċerti Direttorati Ġenerali;

—

diversi Servizzi ta’ Kapaċità ta’ Verifika Interna kellhom rwol fil-valutazzjoni ta’ l-eżerċizzju tal-cut-off.

1.33.

L-attiv totali żdied minn 58,7 biljun euro fl-2005 għal 67 biljun euro, bil-passiv totali jiżdied minn 120,9 biljun euro għal 131,8 biljun euro. Id-differenza ser tkun iffinanzjata minn ammonti tal-baġit diġà vvutati jew għandha tkun koperta minn baġits futuri. Kif diġà ġie indikat qabel (29), għandha tingħata aktar informazzjoni dwar il-karattru differenti tal-passivi li għandhom jiġu koperti mill-ammonti li għandhom jintalbu mingħand l-Istati Membri, b'mod partikolari s-snin meta huma dovuti.

1.33.

Il-qsim attwali ta’ l-ammonti li għandhom jinġabru mingħand l-Istati Membri bejn ammonti fuq terminu twil u terminu qasir huwa biżżejjed, speċjalment meta dan jingħaqad mal-qsim fuq terminu twil/terminu qasir ta’ l-assi u l-obbligi mogħtija fil-karta tal-bilanċ.

1.34.

Imqabbla ma' l-2005, in-noti spjegattivi tal-kontijiet annwali fihom informazzjoni supplementari dwar il-fatt li xi tranżazzjonijiet aktarx jiġu kkoreġuti f'data aktar tard mid-dipartimenti tal-Kummissjoni jew l-Istati Membri. Iżda, f'dak li għandu x'jaqsam mal-passat, in-noti għadhom ma jidentifikawx, għal kull sena kalendarja, l-ammonti (u l-oqsma) ta' l-infiq li huma aċċettati mill-Kummissjoni u l-ammonti (u l-oqsma) ta' l-infiq li jistgħu jkunu soġġetti għal aktar verifikazzjoni u approvazzjoni ta' kontijiet (30).

1.34.

Ir-Regolament Finanzjarju, u r-regolamenti settorjali dwar il-fondi agrikoli u strutturali, jagħtu d-dritt lill-Kummissjoni sabiex din twettaq verifiki fuq l-infiq kollu sa ħafna snin wara li dan ikun sar. Il-kontijiet m’għandhomx jimplikaw li, minħabba dan id-dritt, l-infiq kollu kkonċernat jkun għadu ma ġiex approvat. Fejn l-ammonti ta’ rkupri potenzjali huma kwantifikabbli, jiġu żvelati fin-noti 5.3 u 5.4 tal-kontijiet konsolidati.

1.35.

Wara talba speċifika tal-Qorti, b'mod partikolari n-noti spjegattivi fil-kont tar-riżultat ekonomiku ta' l-2006 (31) fihom aktar informazzjoni dwar l-ammonti rkuprati b'risposta għall-operazzjonijiet illegali u irregolari, b'mod partikolari fil-livell tal-benefiċjarji/destinatarji finali, fejn aktar minn 90 % ta' l-iżbalji huma identifikati. Iżda, aktar miżuri huma neċessarji sabiex jassiguraw il-kompletezza u l-affidabilità tad-dejta tal-kontabilità u l-informazzjoni preżentata fin-noti spjegattivi (ara l-paragrafi 2.23 sa 2.25).

1.35.

Is-sistema kontabbli ABAC qed tiġi adattata sabiex iżżid il-kwantità ta’ l-informazzjoni rreġistrata dwar l-irkupri. Dan it-titjib huwa ppjanat li jkun effettiv għall-kontijiet ta' l-2008.

1.36.

Rikonċiljazzjoni dettaljata bejn ir-riżulat tal-baġit u r-riżultat ekonomiku hija indispensabbli biex tinkiseb assigurazzjoni raġonevoli dwar l-affidabilità tal-kontijiet. Iżda, ir-rikonċiljazzjoni li ġiet magħmula disponibbli għall-Qorti f'Lulju 2007 għad fiha differenzi żgħar mingħajr spjegazzjoni. Barra dan, l-affidabilità tal-kontijiet titjieb li kienu fil-kontijiet annwali kellha tiġi inkluża tabella li tagħti tali rikonċiljazzjoni.

1.36.

Il-Kummissjoni tammetti li l-proċedura ta’ rikonċiljazzjoni teħtieġ titjib. Ser tittieħed azzjoni sabiex jiġu indirizzati n-nuqqasijiet identifikati. Barra minn hekk, il-Kummissjoni ser tikkunsidra rikonċiljazzjoni sħiħa fil-kontijiet annwali.

1.37.

L-ammont ta' ordnijiet ta' rkupru “Pendenti” fit-tabelli tal-baġit għas-sena finanzjarja 2005 (6 175 miljun euro) (32) ma jaqbilx ma' l-ammont korrispondenti ta' “Drittijiet stabbiliti” u miġjuba 'l quddiem mis-snin preċedenti fil-kontijiet annwali 2006 (6 180 miljun euro) (33). Peress li dan jirrappreżenta ksur tal-prinċipju ta' kontinwità, dan imissu ġie ċċarat qabel ma ġew stabbiliti l-kontijiet.

1.37.

Id-differenza ta’ 5 miljun ewro tikkonċerna aġġustament ta’ sena preċedenti fil-kontijiet baġitarji ta’ entità konsolidata.

1.38.

Iffaċċjata b'ambjent ta' verifika li qed jinbidel malajr u bbażata fuq l-esperjenza miksuba fi tnax-il sena, kien neċessarju li l-metodoloġija li fuqha hija bbażata d-DAS tiġi żviluppata u adattata aktar. L-element prinċipali ta' l-approċċ DAS revedut huwa mudell ta' assigurazzjoni li huwa bbażat fuq żewġ għejun prinċipali ta' evidenza:

a)

Eżami tal-ħidma tas-sistemi ta' sorveljanza u kontroll applikati fil-ġbir u l-infiq tal-fondi Ewropej mill-Istituzzjonijiet Komunitarji, l-Istati Membri u l-Pajjiżi Terzi; li jimmira li jipprovdi informazzjoni rappreżentattiva dwar l-implimentazzjoni u l-operat ta' kontroll prinċipali dwar il-kapaċità tagħhom li jipprevjenu jew isibu u jikkoreġu l-iżbalji.

b)

Kontrolli bbażati fuq kampjuni rappreżentattivi ta' tranżazzjonijiet relatati mad-dħul u l-infiq, li jinżlu sal-livell tal-benefiċjarju finali, li jimmiraw li jipprovdu evidenza diretta dwar il-legalità u r-regolarità tal-pagamenti.

1.39.

L-għejun prinċipali jistgħu jiġu kkumplimentati b'żewġ għejun oħra:

a)

Analiżi tar-Rapport ta' Attività Annwali u d-dikjarazzjonijiet tad-Diretturi-Ġenerali tal-Kummissjoni u s-sinteżi tagħhom dwar jekk il-Kummissjoni kisbitx assigurazzjoni raġonevoli li s-sistemi fis-seħħ jassiguraw il-legalità/regolarità tat-tranżazzjonijiet ta' bażi.

b)

Eżami tax-xogħol ta' awdituri oħra, definiti bħala dawk li huma indipendenti mill-proċess tat-tmexxija u kontroll tal-Komunità (eż. l-Istituzzjonijiet Supremi tal-Verifika fl-Istati Membri jew f'Pajjiżi Terzi) (34).

1.38-1.39.

Id-dikjarazzjoni ta’ assigurazzjoni annwali tal-Qorti u ħidma oħra ta’ verifika u r-rakkomandazzjonijiet huma sors importanti ħafna ta’ informazzjoni għall-Kummissjoni u hi tagħmel mill-aħjar biex timxi b’mod diliġenti mar-rakkomandazzjonijiet li jsirulha.

1.40.

Bħal fis-snin preċedenti, il-konklużjonijiet tal-varji evalwazzjonijiet speċifiċi juru li f'dawk l-oqsma fejn is-sistemi ta' sorveljanza u kontroll, fit-totalità tagħhom, huma applikati tajjeb u korrettament l-ittestjar sostantiv tal-Qorti kixef li r-riskju ta' żbalji materjali fil-legalità u r-regolarità tat-tranżazzjonijiet ta' bażi kien limitat (ara l-paragrafi 4.28 u 5.65 dwar il-IACS, 8.31 dwar delegazzjonijiet, 9.23 bl-eċċezzjoni tas-Sapard u 10.6). Għal dawn l-oqsma, il-Qorti tistma li l-iżbalji għandhom impatt finanzjarju ta' inqas minn 2 % tal-popolazzjoni rispettiva skond il-valur (ara t- Tabella 1.2 ). Barra dan, l-evalwazzjoni tal-Qorti tad-dikjarazzjonijiet tad-Diretturi-Ġenerali u ta' l-uffiċjali li jawtorizzaw b'delega kkonfermaw li, l-ebda riżervi, jew inkella riżervi minuri biss kellhom jiġu ppreżentati (ara l-paragrafi 2.11 sa 2.12).

1.40.

Il-Kummissjoni tikkunsidra li matul l-2006 sar progress fl-applikazzjoni tas-sistemi superviżorji u ta’ kontroll, iżda tagħraf il-ħtieġa għal azzjonijiet ulterjuri. L-implimentazzjoni tal-pjan ta’ħidma għal qafas integrat ta’ kontroll intern u l-impatt pożittiv li wisq probabbli ser ikollu fis-snin ġejjiena fuq l-assigurazzjoni miksuba mis-sistemi huma sinjali ulterjuri tar-rieda tal-Kummissjoni biex tagħmel aktar titjib.

1.41.

F'oqsma fejn il-verifika tal-Qorti indikat li sistemi ta' sorveljanza u kontroll huma mill-aktar parzjalment sodisfaċenti, l-ittestjar sostantiv tal-Qorti jkompli jidentifika livelli materjali ta' żball (ara l-paragrafi 5.65 sa 5.78 għal dawk li mhumiex IACS, 6.37 sa 6.39, 7.30 u 7.31, 8.31 u 8.32 dwar organizzazzjonijiet li jimplimentaw u 9.23 għas-Sapard). Il-Qorti tistma' li għal dawk l-oqsma l-iżbalji għandhom impatt finanzjarju ta' aktar minn 2 % tal-popolazzjoni skond il-valur (ara t- Tabella 1.2 ). Barra dan, l-evalwazzjoni tal-Qorti tad-dikjarazzjonijiet tad-Diretturi-Ġenerali kkonfermat li r-riżervi prinċipali jew ġew ippreżentati jew inkella, fl-opinjoni tal-Qorti, imisshom ġew ippreżentati għall-oqsma in diskussjoni (ara l-paragrafi 2.11, 2.12 u 2.13 sa 2.17).

1.41.

In-nefqa iffinanzjata mill-Komunità f’dawn l-oqsma tal-baġit hija soġġetta għal serje ta’ proċessi ta’ kontroll li wħud minnhom isiru qabel iċ-ċertifikazzjoni tan-nefqa lill-Kummissjoni u wħud isiru wara. Per eżempju, fil-politiki interni, ir-riskju inerenti tar-rimbors ta’ spejjeż żejda tnaqqas permezz ta’ żieda sostanzjali fl-għadd ta’ verifiki ex-post, filwaqt li fir-rigward ta’ organizzazzjonijiet li jimplimentaw għajnuna esterna l-Kummissjoni tiżgura li l-kontrolli fuq il-pretensjoni ta’ pagament mill-benefiċjarji jsiru fi stadji importanti ta’ l-implimentazzjoni tal-proġett, biex b’hekk l-iżbalji fuq pagamenti bil-quddiem jinstabu u jiġu rimedjati. Ir-riżultati ppreżentati mill-Qorti juru s-sitwazzjoni f’punt partikolari fit-twettiq ta’ dawn il-proċessi ta’ kontroll. X’aktarx li l-korrezzjoni ta’ parti kbira mill-iżbalji ssir permezz ta’ l-operazzjoni tas-sistema korrettiva multijannwali.

1.42.

L-evalwazzjonijiet speċifiċi għall-infiq taħt il-Politika Agrikola Komuni, il-Politika Strutturali u l-Politika Interna, juru li kriterji ta' eliġibilità kkumplikati u mhux ċari jew rekwiżiti legali kumplessi jistgħu jkollhom impatt konsiderevoli fuq il-legalità u r-regolarità tat-tranżazzjonijiet (ara l-paragrafi 5.44 għall-Infiq għall-Iżvilupp Rurali, 6.29 għall-Operazzjonijiet Strutturali u 7.11 għall-Politika Interna). Per eżempju, il-verifika tas-sistemi tal-Qorti tindika li miżuri ta' Żvilupp Rurali għandhom tendenza ta' inċidenza għolja ta' żbalji minħabba kundizzjonijiet ta' eliġibilità li ta' sikwit huma kumplessi (38). Min-naħa l-oħra, id-disinn u l-implimentazzjoni ta' l-Iskema ta' Pagament Uniku tillimita r-riskju ta' pagamenti irregolari. Minkejja dan, ir-rata ġenerali ta' żball għall-infiq agrikolu fit-totalità tagħha hija 'l fuq mil-livell ta' materjalità.

1.42.

Filwaqt li l-ilħuq ta’ l-għanijiet tal-politika kultant ikunu jirrekjedu regolamentazzjoni dettaljata, il-Kummissjoni tagħraf il-ħtieġa għal simplifikazzjoni tar-regoli safejn l-ilħuq ta’ l-għanijiet tal-politika jkun jippermetti dan. Fejn ir-rekwiżiti legali jkunu għadhom kumplessi, il-Kummissjoni tipprovdi gwida għas-simplifikazzjoni u l-kjarifika ta’ l-applikazzjoni tagħhom. B'mod ġenerali, il-fatt li jiġu evitati l-iżbalji jiddependi fuq il-gwida mogħtija mill-awtoritajiet ta' l-Istati Membri lil entitajiet ta' l-implimentazzjoni u lill-benefiċjarji, dwar l-effettività tal-kontrolli, u dwar l-għarfien tal-benefiċjarji li n-nuqqas ta' konformità tista' twassal għat-telf ta' l-għotja. Il-Kummissjoni qed tinkoraġġixxi lill-Istati Membri sabiex jgħaġġlu l-attivitajiet tagħhom f'dawn l-oqsma bħala parti mill-Pjan ta' Azzjoni għal Qafas Integrat ta’ Kontroll Intern.

2.1.

Dan il-kapitolu jirrapporta dwar l-isforzi tal-Kummissjoni fl-2006 biex ittejjeb l-effettività tas-sistemi ta' sorveljanza u kontroll tad-Direttorati-Ġenerali tagħha sabiex tassigura l-legalità u r-regolarità tat-tranżazzjonijiet li jirriżultaw mill-baġit ta' l-UE. B’mod partikolari, dan janalizza:

—

il-punt sa fejn l-informazzjoni mingħand il-maniġment fir-rapporti ta' attività annwali u d-dikjarazzjonijiet mid-Diretturi-Ġenerali u — is-sinteżi tal-Kummissjoni, huma kkonfermati mis-sejbiet tal-Qorti (il-paragrafi 2.3 sa 2.18),

—

informazzjoni fuq irkupri u korrezzjonijiet finanzjarji (il-paragrafi 2.23 sa 2.30).

2.1.

L-azzjonijiet li ttieħdu fl-2006 jinkludu t-tnedija tal-pjan ta' azzjoni lejn qafas ta' kontroll intern integrat, bil-preżentazzjoni f'Marzu 2007 ta’ l-ewwel rapport ta’ progress li wera l-progress li sar. Sar titjib fil-linji gwida għar-Rapporti ta' Attività Annwali inkluż il-preżentazzjoni ta' l-istrateġiji ta' kontroll tas-servizzi u r-riżultati tagħhom u — mhux obbligatorju għall-2006 — ta’ l-indikaturi tal-legalità u r-regolarità.

2.2.

Dan il-kapitolu jikkummenta wkoll fuq il-pjan ta' azzjoni tal-Kummissjoni lejn qafas ta' kontroll integrat (il-paragrafi 2.19 sa 2.22) u jevalwa l-operat tas-sistemi ta' sorveljanza u kontroll tal-Kummissjoni (il-paragrafi 2.31 sa 2.34).

2.3.

Barra r-rapport dwar ir-riżultati tal-politika (1), il-Kummissjoni adottat ir-Rapport Sinteżi 2006 (2) dwar ir-riżultati tat-tmexxija tagħha li jikkunsidra li s-sistemi ta' kontroll intern imwaqqfa, bil-limitazzjonijiet deskritti fir-rapporti ta' attività annwali, jipprovdu assigurazzjoni raġonevoli dwar il-legalità u r-regolarità ta' l-operazzjonijiet, li hija responsabbli għalihom il-Kummissjoni skond l-Artikolu 274 tat-Trattat tal-KE. Iżda, hija tagħraf li jinħtieġu aktar sforzi biex jiġu rranġati għadd ta' nuqqasijiet, b'mod partikolari dawk imsemmija fir-riżervi ta' l-uffiċjali delegati li jawtorizzaw.

2.4.

L-evalwazzjoni tal-Kummissjoni ta' ċerti kwistjonijiet transversali taqbel ma' l-analiżi tal-Qorti, dwar il-konklużjonijiet fuq it-tmexxija ċentralizzata diretta fil-qasam tar-riċerka (ara l-paragrafu 2.12), il-bżonn għas-simplifikazzjoni (ara l-paragrafu 1.42), sforzi kontinwi fl-iżvilupp ta' indikaturi tal-legalità u r-regolarità (ara l-paragrafu 2.18) u aktar titjib fil-kwalità tar-rapporti ta' attività annwali (ara l-paragrafi 2.7 u 2.9). Iżda, f'ċerti partijiet tal-politika agrikola komuni, il-miżuri strutturali u wkoll ċerti partijiet ta' l-azzjonijiet esterni l-verifika tal-Qorti tikxef nuqqasijiet sinifikanti fis-sistemi ta' sorveljanza u kontroll li jmorru lil hinn minn dawk imsemmija mid-Diretturi-Ġenerali bħal riżervi fid-dikjarazzjonijiet tagħhom li jakkumpanjaw ir-rapporti ta' attività annwali (ara l-paragrafi 2.13 sa 2.17). Barra dan, l-analiżi tal-Kummissjoni tal-problemi li jifdal dwar l-affidabilità tal-kontijiet, b'mod partikolari fil-livell tas-sistemi sussidjarji lokali, ma kinitx kompleta (ara l-paragrafi 1.13 sa 1.17).

2.4.

Id-Diretturi Ġenerali ifformulaw riżervi fid-dikjarazzjonijiet tagħhom fejn l-informazzjoni li kienu bnew mix-xogħol ta’ verifika tagħhom stess u ta’ l-Istati Membri dwar it-tħaddim tas-sistemi kienet tindika nuqqasijiet sinifikanti li jippreżentaw riskju materjali għall-baġit tal-Komunità li ma jkunx jista’ jitmexxa kif xieraq bil-mekkaniżmi korrettivi normali tas-sistema ta’ kontroll. B'żieda ma' dawn il-każijiet id-Diretturi Ġenerali jistgħu jagħmlu riżervi fejn hemm riskju għoli għar-reputazzjoni ta’ l-Istituzzjonijiet tal-Komunità. Id-Diretturi Ġenerali msemmijin mill-Qorti għalhekk ma ħarġux riżervi meta kkunsidraw li r-riskju kien ġestit b'mod adegwat u spjegaw ir-raġunijiet ta' l-evalwazzjoni tagħhom fir-Rapport Annwali ta' l-Attività tagħhom.

2.5.

Il-Kummissjoni fir-Rapport Sinteżi tagħha tgħid li f'xi każijiet id-differenza bejn l-evalwazzjoni tal-Qorti ta' l-assigurazzjoni li għandha tinkiseb mis-sistemi ta' kontroll intern u l-assigurazzjoni mogħtija mid-Diretturi-Ġenerali responsabbli toħroġ primarjament mill-interpretazzjonijiet differenti fuq it-tipoloġija u l-impatt ta' l-iżbalji u/jew fuq l-evalwazzjonijiet tan-nuqqasijiet tas-sistemi. Skond il-Qorti, id-differenza tirrifletti prinċipalment il-fatt li l-evalwazzjoni tal-Kummissjoni tar-riżultati tat-tmexxija ma tiħux in konsiderazzjoni b'mod adegwat l-impatt kontinwu ta' nuqqasijiet fil-kontroll, għalkemm huma rikonoxxuti l-aktar fil-pjanijiet ta' azzjoni differenti u fir-rapporti ta' attività annwali (ara l-paragrafi 2.11 u 2.19 sa 2.22).

2.5.

Il-Kummissjoni indikat fir-Rapport ta' Sinteżi li l-evalwazzjoni ta' l-assigurazzjoni li għandha tittieħed mill-qafas ta' kontroll intern tikkunsidra wkoll il-karattru multiannwali tiegħu, li jippermetti li jsiru korrezzjonijiet xi ftit wara l-kwittanza tal-fondi, u tal-miżuri korrettivi għar-rimedju tan-nuqqasijiet ta' kontroll identifikati.

2.6.

Per eżempju, kif issemma diġà fir-Rapport Annwali dwar is-sena finanzjarja 2005 (3) il-verifiki tal-Qorti juru li, f'numru ta' oqsma, is-sistemi ta' sorveljanza u kontroll eżistenti ma jassigurawx il-prevenzjoni jew l-identifikazzjoni u l-korrezzjoni fil-ħin ta' l-iżbalji (ara l-paragrafi 5.76, 6.39, 7.30, 8.31 (4) u 9.23). Il-Kummissjoni tgħid li s-servizzi tagħha japplikaw sistema multi-annwali li taħta żbalji f'sena minnhom jistgħu jinstabu u jiġu kkoreġuti fi snin sussegwenti. Minkejja dawn l-argumenti l-Kummissjoni m'għandiex disponibbli informazzjoni adegwata u affidabbli dwar korrezzjonijiet li saru fil-livell tal-benefiċjarji (ara l-paragrafi 2.23 sa 2.30).

2.6.

Fil-qasam ta' l-infiq agrikolu r-riżultati tal-kontrolli fuq il-livell tal-benefiċjarji aħħarin, kif ikkomunikat mill-Istati Membri lill-Kummissjoni u ppublikat fir-rapport annwali ta' l-attività relevanti jipprovdi indikazzjoni tal-firxa ta' ħlas irregolari għall-infiq agrikolu. Biex tkompli tittejjeb l-assigurazzjoni li tista' tinkiseb minn din l-informazzjoni, mill-2007 l-Kummissjoni implimentat ir-rakkomandazzjoni tal-Qorti li l-entitajiet ta' ċertifikazzjoni għandhom jaħdmu aktar biex jivverifikaw u jivvalidaw l-istatistika ta' l-ispezzjonijiet u l-ispezzjonijiet ta' wara l-ħlas.

2.7.

Il-gwida (5) għar-rapporti ta' attività annwali għall-2006, kif ukoll l-eżerċizzju tal-peer review  (6), jindikaw l-isforzi kontinwi mis-servizzi ċentrali tal-Kummissjoni sabiex jiċċaraw ir-rabta bejn l-effettività tas-sistemi ta' kontroll intern u l-bażi li fuqha huma mibnija d-dikjarazzjonijiet (7), u jipprovdu informazzjoni ġenerali dwar kif għandhom jiġu ppreżentati indikaturi prinċipali dwar il-legalità u r-regolarità (8).

2.8.

Fid-dikjarazzjonijiet tagħhom mehmużin mar-rapporti ta' attività annwali, id-Diretturi-Ġenerali jridu jgħidu jekk ir-riżorsi li ġew assenjati lill-attivitajiet ġewx użati skond il-prinċipji ta' ġestjoni finanzjarja tajba u l-kontrolli interni implimentati fid-dipartimenti jipprovdux assigurazzjoni raġonevoli li t-tranżazzjonijiet ta' bażi huma legali u regolari. Fil-każ ta' nuqqasijiet jew irregolaritajiet materjali tal-kontroll intern, huma jridu jikkwalifikaw id-dikjrazzjonijiet li minnhom joħorġu r-riżervi (9) u jippreparaw pjanijiet ta' azzjoni ta' rimedju.

2.8.

Flimkien dawn iż-żewġ prinċipji (assigurazzjoni raġonevoli jew ġestjoni finanzjarja soda u legalità u regolarità) iwasslu għal ċertu “bilanċ” ta' riskji u kontrolli li jiġu kkunsidrati bħala aċċettabbli mill-maniġment, għalkemm “assigurazzjoni sħiħa” u “legalità/regolarità sħiħa” ma jistgħux jintlaħqu.

2.9.

L-analiżi tal-Qorti tar-rapporti ta' attività annwali u d-dikjarazzjonijiet tad-Diretturi-Ġenerali għas-sena finanzjarja 2006 turi li l-kriterji ta' materjalità, kif ukoll id-definizzjoni tar-riżervi u l-impatt tagħhom fuq l-assigurazzjoni b'mod ġenerali (10), kienu ċari. Il-verifika tal-Qorti turi wkoll li r-rapporti ta' attività annwali ġeneralment jippreżentaw evalwazzjoni imtejba tal-punti b'saħħithom u dgħajfa tas-sistemi ta' sorveljanza u kontroll (11).

2.9.

Il-Kummissjoni tistenna iktar titjib għall-2007, notevolment permezz tal-ġeneralizzazzjoni ta' l-użu tal-Mudell ta' Kontroll Intern fir-rapporti annwali ta' attività li jistabbilixxi rabta iktar ċara bejn is-sistemi ta' kontroll u l-assigurazzjoni. Il-Kummissjoni ser tkompli wkoll bl-isforzi biex ittejjeb il-kriterji ta' materjalità u ssaħħaħ il-bażi ta' l-assigurazzjoni fejn meħtieġ.

2.10.

Id-Diretturi-Ġenerali kollha qalu li huma kisbu assigurazzjoni raġonevoli li r-riżorsi allokati lilhom kienu użati għall-iskopijiet speċifikati, u li l-kontrolli interni li huma introduċew assiguraw il-legalità u r-regolarità tat-tranżazzjonijiet ta' bażi.

2.11.

Il-Qorti tinnota li, 15 minn 40 dikjarazzjoni fihom riżerva waħda jew aktar. In-numru totali ta' riżervi minn 31 fl-2005 niżel għal 20 fl-2006 (12). Il-maġġoranza ta' dawn tirreferi għal nuqqasijiet diġà identifikati fis-snin preċedenti (13) u jikkonċernaw prinċipalment il-legalità u r-regolarità tat-tranżazzjonijiet ta' bażi. Ir-riżervi l-aktar importanti fil-kuntest tad-DAS huma murija fit- Tabella 2.1 .

2.12.

Fil-każ tar-riżervi proprji, il-politika interna (inkluża r-riċerka), l-istrateġija ta' qabel l-adeżjoni (19) u l-infiq amministrattiv (ara t- Tabella 2.1 u l-paragrafu 4.28, 7.30, 9.23, 10.15, 10.16 u 10.25) ir-rapporti ta' attività annwali ġeneralment jaqblu mal-konklużjonijiet ta' l-evalwazzjonijiet speċifiċi tad-DAS relevanti.

2.13.

Min-naħa l-oħra, f'partijiet sinifikanti tal-baġit ta' l-UE, id-Diretturi-Ġenerali jagħtu stampa aktar pożittiva tal-legalità u r-regolarità ta' l-infiq ta' l-UE minn dik tal-verifika tal-Qorti.

2.13.

Il-verifika tal-Qorti tikkonċerna l-legalità u r-regolarità tat-tranżazzjonijiet irreġistrati f'sena partikolari. Id-Diretturi Ġenerali jipprovdu assigurazzjoni dwar l-operazzjoni ta' sistemi ta' kontroll multiannwali matul dik is-sena. Il-Kummisjoni ma tissottovalutax in-nuqqasijiet tas-sistema li jistgħu jwasslu għal infiq li ma jissodisfax il-kondizzjonijiet meħtieġa, imma tibni l-assigurazzjoni tagħha tul iż-żmien u tikkunsidra l-miżuri ta' rimedju li jittieħdu biex jiġu kkoreġuti dawn in-nuqqasijiet u l-kapaċità tas-sistema multiannwali biex tikkoreġi żbalji xi ftit wara l-ħlas ta' fondi.

2.14.

Fir-rigward tal-politika agrikola komuni, l-assigurazzjoni mogħtija mid-dikjarazzjoni tad-Direttur Ġenerali għall-Agrikoltura u l-Iżvilupp Rurali (ara t- Tabella 2.1 ), f'xi punti sinifikanti, mhix għal kollox kompatibbli mas-sejbiet tal-Qorti. Id-Direttorat-Ġenerali għall-Agrikoltura u l-Iżvilupp Rurali qed juża mudell ta' assigurazzjoni biex isostni d-dikjarazzjoni. L-elementi ta' dan il-mudell huma speċifikati fir-rapport ta' attività annwali (20). Is-sejbiet tal-Qorti juru nuqqasijiet li jagħmlu impatt fuq kull wieħed minn dawn l-elementi u li jillimitaw l-assigurazzjoni li d-dikjarazzjoni tista' tagħti. B'mod partikolari, mill-fatt li assigurazzjoni tingħata minn elementi mhux relatati ma' l-infiq ta' l-2006 (21), mill-użu ta' previżjonijiet ta' korrezzjonijiet fil-futur (attivi kontinġenti) fir-rigward tas-sena attwali u mill-inklużjoni ta' l-impatt ta' korrezzjonijiet finanzjarji fuq l-Istati Membri aktar milli fuq il-benefiċjarji li ġew imħallsa irregolarment (ara l-paragrafi 5.63 u 5.64).

2.14.

Il-Kummissjoni tinnota li l-livell totali ta' żbalji naqas b'mod sinifikanti u li, għall-parti ta' l-iżvilupp mhux rurali fin-nefqa tal-Garanzija ta' l-FAEGG, li tammonta għal aktar minn 85 % tan-nefqa totali, dan huwa taħt il-livell ta' materjalità. Għal dak li jirrigwarda l-Iżvilupp Rurali, il-miżuri agro-ambjentali huma suxxettibbli li jkollhom inċidenza qawwija ta' żbalji materjali.

2.15.

Fil-politika strutturali, id-dikjarazzjonijiet tad-Direttturi-Ġenerali għall-Politika Reġjonali u ta' l-Impjiegi, Affarijiet Soċjali u Opportunitajiet Indaqs inaqqsu mill-importanza ta' nuqqasijiet sinifikanti fis-sistemi ta' ġestjoni u kontroll fl-Istati Membri (ara l-paragrafu 6.38) u l-livell materjali ta' żbalji fil-livell tal-proġett (ara l-paragrafu 6.39) misjuba mill-verifiki tal-Qorti (ara t- Tabella 2.1 ).

2.15.

Ir-rapporti annwali ta' attività tad-Diretturi Ġenerali responsabbli jfasslu l-bażi għall-evalwazzjoni tagħhom ta' l-effettività tas-sistema ta' ġestjoni u kontroll fl-Istati Membri u l-miżuri korrettivi li qed jitħejjew biex isir it-titjib meħtieġ u jindika l-livelli ta' riskju għall-fondi tal-Komunità. L-evalwazzjonijiet huma bbażati fuq xogħol estensiv ta' verifika u huma ġeneralment fuq l-istess linja ma' dawk tal-Qorti. Dawn jindikaw, kif stabbilit fir-risposta għall-paragrafu 2.6, li madwar 10 % tas-sistemi ta' kontroll għandhom nuqqasijiet serji, u għalhekk jippreżentaw riskju għoli. F'dawn il-każijiet, pagamenti lil Stati Membri jistgħu jkunu sospiżi u jistgħu jkunu imposti korrezzjonijiet finanzjarji meta l-Istat Membru ma jagħmilx il-korrezzjonijiet meħtieġa huwa stess. Il-Kummissjoni ssostni li l-parti l-kbira ta' l-iżbalji li jinsabu x'aktarx jiġu kkoreġuti permezz tal-mekkaniżmu multiannwali korrettiv fis-sistema.

2.16.

Il-Qorti tpoġġi in diskussjoni wkoll jekk l-evalwazzjoni ġenerali tad-Direttur-Ġenerali għall-Politika Reġjonali fir-rigward tal-Fond Ewropew għall-Iżvilupp Reġjonali u l-Fond ta' Koeżjoni hijiex kumpatibbli mal-kwalifiki li huwa jagħmel dwar l-operat tas-sistemi ta' tmexxija u kontroll f'10 u 9 Stati Membri rispettivament (22). Hemm l-istess sitwazzjoni fid-Direttorat-Ġenerali għall-Impjiegi, Affarijiet Soċjali u Opportunitajiet Indaqs (23). Barra dan, il-Qorti tinnota li r-rapport ta' attività annwali ta' dan li ssemma l-aħħar jgħid li l-opinjoni tal-verifika ma kinitx ifformulata fuq 17,5 % ta' l-infiq tal-perijodu ta' programmar 2000-2006 għall-Fond Soċjali Ewropew (ESF); id-Direttur-Ġenerali bbaża l-assigurazzjoni tiegħu fuq il-komunikazzjonijiet tal-maniġment.

2.16.

Filwaqt li s-servizzi ta' ġestjoni u verifika tad-Direttorat Ġenerali għall-Politika Reġjonali taw opinjonijiet b’riżervi dwar is-sistemi f'għadd ta' Stati Membri minħabba n-nuqqasijiet materjali li jaffettwaw l-elementi ewlenin tas-sistemi tagħhom, ġie konkluż, skond il-miżuri korrettivi li kienu qed jittieħdu u fid-dawl ta’ l-operazzjoni multiannwali tal-mekkaniżmi ta' kontroll, li n-nuqqasijiet ma kinux daqstant sinifikanti biex jiġġustifikaw riżerva formali fuq id-dikjarazzjoni tad-Direttur Ġenerali. F'dak li jirrigwarda l-Fond Soċjali Ewropew, il-Kummissjoni tikkunsidra li l-evalwazzjoni globali mid-Direttur Ġenerali tad-Direttorat Ġenerali għall-Impjieg, l-Affarijiet Soċjali u l-Opportunitajiet Indaqs dwar is-sistemi hija kompatibbli mar-riżervi dwar il-programmi f'7 Stati Membri. Ir-rappreżentazzjonijiet tal-maniġment qegħdin hemm biex jimlew il-lakuni marbutin ma’ operazzjonijiet mhux verifikati sempliċement minħabba li mhuwiex possibbli li jkun hemm kopertura totali tal-verifika kull sena.

2.17.

L-inċidenza materjali ta' żbalji u n-nuqqasijiet fis-sistemi ta' sorveljanza u kontroll imfassla biex jassiguraw il-legalità u r-regolarità tat-tranżazzjonijiet fil-livell ta' organizzazzjonijiet li jimplimentaw il-proġetti fil-qasam ta' l-azzjonijiet esterni (ara l-paragrafi 8.31 u 8.32) misjuba mill-Qorti mhumiex riflessi biżżejjed fir-rapport ta' attività annwali u d-dikjarazzjoni ta' l-Uffiċċju Ewropew għall-Għajnuna tal-Koperazzjoni (ara t- Tabella 2.1 ).

2.17.

Is-sistema ta' kontroll intern tal-Kummissjoni tfittex bilanċ bejn l-ispejjeż u l-benefiċċji tal-verifika, u hija strutturata b'mod li tikkunsidra n-natura multiannwali ta' l-infiq fuq l-għajnuna esterna, u tiżgura li l-kontrolli fuq it-talbiet għall-ħlas mill-benefiċjarji jsiru fi stadji ewlenin ta' l-implimentazzjoni ta' proġett, biex b'hekk żbalji fi ħlasijiet bil-quddiem ikunu jistgħu jinstabu u jitranġaw.

2.18.

Tliet kwarti (24) tad-Direttorati-Ġenerali jippreżentaw indikaturi ta' legalità u regolarità fir-rapporti ta' attività annwali ta' l-2006 tagħhom. Il-Qorti tinnota li dawn l-indikaturi mhux kollha jikkonformaw mat-tipi (ta' riżultati u/jew indikaturi ta' l-impatt) ġenerali indikati fil-linji ta' gwida ppreparati mis-servizzi ċentrali tal-Kummissjoni. Il-Qorti tqis li għad hemm bżonn sforzi addizzjonali fil-livell tad-Direttorati-Ġenerali sabiex titkejjel l-effettività tas-sistemi ta' sorveljanza u kontroll kif ukoll il-legalità u r-regolarità tat-tranżazzjonijiet ta' bażi (ara l-paragrafi 2.31 sa 2.34).

2.18.

Għalkemm kien għadu mhux obbligatorju għad-Diretturi Ġenerali li jipprovdu indikaturi ta' legalità u regolarità fir-Rapporti Annwali ta' Attività tagħhom għall-2006 skond it-tipi ġenerali rrakkomandati fl-istruzzjonijiet permanenti (D(2006) 12058), ir-rapport ta' Sinteżi 2006 jħabbar it-tkomplija ta’ l-isforzi biex jiġu żviluppati l-indikaturi ta' legalità u regolarità filwaqt li tkun żgurata strateġija koerenti skond il-gruppi ta' politika ta' servizzi. Mir-rapport annwali ta' l-attività 2007 'il quddiem, l-użu ta' indikaturi ser ikun obbligatorju.

2.19.

Fis-7 ta' Marzu 2007, il-Kummissjoni ppreżentat rapport (25) dwar il-punt li jinsab fih il-pjan ta' azzjoni (26) lejn qafas ta' kontroll intern integrat, li l-konklużjoni tiegħu hija prinċipalment pożittiva. Dan jgħid li sar progress konkret fl-implimentazzjoni tal-pjan ta' azzjoni, iżda l-isfidi li baqa' iridu jiġu indirizzati. Għalkemm kien hemm xi dewmien, il-Kummissjoni tikkunsidra li sa l-aħħar ta' l-2007 ser ikollha l-bażi biex tmexxi sewwa r-riskju ta' l-iżbalji u tipprovdi assigurazzjoni akbar li t-tranżazzjonijiet huma legali u regolari.

2.20.

Fl-analiżi dettaljata li takkumpanja r-rapport ta' progress tagħha (ara t-Tabella 2.2 ), il-Kummissjoni evalwat li, minn 35 sotto-azzjoni, 10 kienu kkompletati, 5 kienu kważi ikkompletati, 13 kienu qed jitwettqu, 4 ma kinux għadhom inbdew u 3 ġew annullati. Introduċiet ukoll 6 sotto-azzjonijiet ġodda biex jiġu implimentati sa l-aħħar ta' l-2007.

2.21.

Kif qalet fir-rapport annwali tagħha ta' l-2005 (28), il-Qorti ser tevalwa r-riżultati tal-pjan ta' azzjoni meta jkun possibbli li tistma' l-impatt tiegħu. Iżda, il-Qorti tinnota li l-orarju tal-Kummissjoni għall-pjan ta' azzjoni tagħha (ara l-paragrafu 2.19) jidher li huwa ottimistiku u tiġbed l-attenzjoni li bosta mill-azzjonijiet ikkonċernati aktarx li jkollhom impatt reali fuq l-operat tas-sistemi ta' sorveljanza u kontroll tal-Kummissjoni fit-terminu medju/twil biss.

2.21.

Il-Kummissjoni stess enfasizzat fir-rapport ta' progress dwar il-Pjan ta' Azzjoni tal-Kummissjoni lejn Qafas ta' Kontroll Intern Integrat (29) li s-sotto-azzjonijiet il-ġodda se jitlestew fiż-żmien previst oriġinarjament għall-pjan ta' azzjoni (tmiem l-2007) u sejrin, flimkien ma' l-azzjonijiet kurrenti, jiżguraw li l-qafas ikun lest sa dik id-data sabiex il-Qafas Integrat ta' Kontroll Intern jibda jkollu l-impatt ippjanat fuq l-assigurazzjoni.

2.22.

It- Tabella 2.2 tipprovdi idea ġenerali ta' l-evalwazzjoni preliminari tal-Qorti dwar l-implimentazzjoni tal-miżuri inklużi fil-pjan ta' azzjoni lejn qafas ta' kontoll intern integrat. Fl-aħħar ta' l-2006, din l-analiżi kienet tindika li 4 azzjonijiet kienu għadhom ma nbdewx, 16 kienu għadhom qed jiġu implimentati, 15 (30) kienu jeħtieġu segwitu (l-objettiv ma kienx miksub kollu jew l-impatt ma kienx għadu twettaq) u 6 kienu azzjonijiet introdotti ġodda. Il-Qorti tikkunsidra li xi azzjonijiet minn dawn huma segwitu (jew marbuta) ma' azzjonijiet preċedenti stabbiliti mir-Rapport Sintezi 2005 u/jew qabel (ara l-paragrafu 2.29) (31).

2.22.

L-implimentazzjoni tal-pjan ta' azzjoni qed issir fil-parti l-kbira fiż-żmien stabbilit mill-Kummissjoni, li jestendi fuq is-snin 2006 u 2007. Il-Kummissjoni se tipprovdi rapport finali dwar l-implimentazzjoni tal-pjan ta' azzjoni fir-rebbiegħa 2008. L-impatt ikun osservat fuq perjodu twil. Il-Kummissjoni ser issegwi dan l-impatt fuq l-assigurazzjoni u r-rapport 2008 għandu jagħti l-ewwel ħarsa lejn l-impatt ta' l-azzjonijiet differenti u joħroġ il-konklużjonijiet għall-konsolidazzjoni futura tal-Qafas ta' Kontroll Intern Integrat (ara COM(2007) 86).

2.23.

L-objettiv primarju tas-sistemi ta' sorveljanza u kontroll huwa li jipprevjenu jew isibu u jikkoreġu żbalji fi tranżazzjonijiet mill-baġit ta' l-UE. Bħal fis-snin preċedenti, il-verifika tal-Qorti sabet evidenza ta' żball materjali f'oqsma sostanzjali ta' l-infiq ta' l-UE u li l-parti kbira ta' l-iżbalji jsiru fil-livell tal-benefiċjarji finali; korrezzjoni ta' żbalji fl-infiq mill-baġit ta' l-UE għalhekk tkun teħtieġ azzjoni primarja f'dan il-livell (32).

2.23.

Fejn is-sistemi ta' superviżjoni u kontroll ġew evalwatii bħala ineffettivi u fejn in-nuqqasijiet identifikati jikkostitwixxu riskju għall-baġit tal-KE, il-Kummissjoni tapplika l-mekkaniżmi mfassla fl-eżerċizzju tar-rwol ta' superviżjoni tagħha biex tirkupra l-ammonti rispettivi mill-Istati Membri responsabbli. Għalhekk l-Istati Membri għandhom inċentiv biex jiżguraw kontrolli adegwati sabiex ikunu evitati korrezzjonijiet finanzjarji eventwali.

2.24.

Iżda hemm evidenza insuffiċjenti dwar il-korrezzjonijiet li saru. L-informazzjoni fuq l-irkupri u l-korrezzjonijiet finanzjarji ppreżentata fir-rapporti ta' attività annwali 2006 u sezzjonijiet differenti tal-kontijiet annwali finali kkonsolidati għall-2006 ma fihiex biżżejjed spjegazzjonijiet sabiex tinforma dwar ir-riskju li l-elementi differenti jikkoinċidu ma' xulxin. Barra dan, ma tippermettix li ssir distinzjoni bejn irkupri ta' infiq illegali/irregolari fil-livell tal-benefiċjarji finali/persuni li jirċievu u l-korrezzjonijiet imġarrba mill-Istati Membri għan-nuqqasijiet tas-sistemi.

2.24.

Għalkemm l-informazzjoni dwar irkupri u korrezzjonijiet finanzjarji fis-settur agrikolu hija ġeneralment adegwata, jenħtieġ li titjieb f'setturi oħra. L-Azzjoni 11N tal-pjan ta' azzjoni hija mmirata inter alia biex tiddetermina “jekk is-sistemi ta' rkupru u kumpens humiex qed jaħdmu b'mod effikaċi”, permezz ta’ l-identifikazzjoni ta' l-ammonti rkuprati fl-2005 u l-2006 u l-koerenza tagħhom ma' żbalji identifikati matul il-kontrolli u għall-ġestjoni konġunta għandha teżamina s-sistemi ta' monitoraġġ nazzjonali u ta’ rappurtar.

2.25.

Barra dan, l-informazzjoni mogħtija mhix kompleta minħabba li la turi l-firxa sħiħa tal-korrezzjonijiet imwettqa fuq l-infiq tal-KE u lanqas il-punt sa fejn l-ammonti jirrelataw ma' l-infiq li sar fl-2006 (ara l-paragrafi 5.61 u 5.62). B'mod partikolari, dan japplika għall-qasam ta' l-azzjonijiet strutturali, minkejja l-fatt li hemm fis-seħħ mekkaniżmi speċifiċi, kemm fil-livell tal-Kummissjoni u l-Istati Membri, sabiex jassiguraw li għotjiet ineliġibbli jiġu rritornati (per eżempju, billi infiq ineliġibbli jiġi skambjat ma' infiq eliġibbli u billi rkupri jiġu mpoġġija kontra l-infiq jew permezz ta' tnaqqis ta' dikjarazzjonijiet ta' spejjeż futuri).

2.25.

Id-deċiżjonijiet dwar korrezzjonijiet finanzjarji fl-agrikoltura li ttieħdu fl-2006 huma mniżżlin fir-rapport annwali ta' l-attività għall-Iżvilupp Agrikolu u Rurali flimkien ma', għal kull deċiżjoni, it-total tas-sommom esklużi mill-finanzjament tal-Komunità.

2.26.

Minħabba l-bżonn li tkun assigurata d-disponibilità, il-kompletezza u l-affidabilità ta' l-informazzjoni dwar il-korrezzjoni ta' l-iżbalji, fl-2006 l-Kummissjoni nediet numru ta' inizjattivi.

2.27.

Barra l-azzjoni li ttieħdet għall-Garanzija FAEGG (ara l-paragrafi 5.52 u 5.61), il-Kummissjoni bidlet ir-Regolament (KE) Nru 448/2001 f'Diċembru 2006 (33) u ħarġet nota ta' gwida fuq informazzjoni li hija meħtieġa dwar il-korrezzjonijiet li saru u ammonti li għandhom jiġu rkuprati mill-Istati Membri fil-qasam ta' l-azzjonijiet strutturali.

2.27.

F'Jannar 2008 l-Kummissjoni kitbet ukoll lill-Istati Membri kollha biex titlobhom l-informazzjoni għall-2006 u kumulattivament għall-perjodu 2000-2006 dwar l-irkupri u l-irtirar u s-sitwazzjoni ta' l-irkupri pendenti fl-aħħar ta' l-2006.

2.28.

F'Marzu 2007, “miżura ġdida (11N)” ġiet introdotta fil-pjan ta' azzjoni lejn qafas ta' kontroll intern integrat (ara l-paragrafu 2.20 u t- Tabella 2.2 ). Abbażi ta' dan, il-Kummissjoni timmira li tiddetermina jekk is-sistemi ta' rkupru u ta' offsetting hux qegħdin jaħdmu b'mod effettiv, billi tidentifika ammonti rkuprati fl-2005 u 2006 u l-koerenza tagħhom ma' żbalji identifikati waqt il-kontrolli. F'dan il-kuntest, fil-każ ta' infiq taħt ġestjoni diretta, hija ser tiżviluppa tipoloġija ta' żbalji u tfittex li tidentifika r-rabta bejn l-irkupri, il-korrezzjonijiet finanzjarji u l-aġġustamenti lill-pagamenti. Għall-infiq taħt ġestjoni maqsuma, hija ser teżamina l-affidabilità tas-sistemi nazzjonali ta' monitoraġġ.

2.29.

Iżda, fil-verità din l-azzjoni 11N hija segwitu (jew inkella hija marbuta) ma' pjanijiet ta' azzjoni orizzontali tal-Kummissjoni (34) (ara l-paragrafu 2.22), li l-Kummissjoni kkunsidrat bħala kkompletati.

2.29.

L-Azzjoni 11N hija usa’ mill-azzjonijiet preċedenti msemmija mill-Qorti, minħabba li torbot mas-sejbiet tal-kontrolli.

2.30.

F'numru ta' rapporti annwali preċedenti (35), il-Qorti ġibdet l-attenzjoni tal-Kummissjoni għan-nuqqasijiet fil-kisba ta' informazzjoni affidabbli dwar il-korrezzjoni ta' l-iżbalji. Minħabba l-kumplessità tal-kwistjonijiet, m'hemmx indikazzjoni li dawn in-nuqqasjiet s'issa ġew solvuti jew aktarx jiġu solvuti fit-terminu qasir.

2.30.

Kif indikat fir-risposta għal paragrafi 2.6, il-Kummissjoni ser tiżgura li r-rapporti ta' attività annwali futuri jinkludu iktar informazzjoni dwar korrezzjonijiet li kienu maħsuba, imnedija jew imposti matul is-sena partikolari. Il-Kummissjoni tagħti attenzjoni partikolari għall-iżvilupp ta' miżuri ta' prevenzjoni, ibbażati fuq analiżi ta' raġunijiet li jwasslu biex ikunu imposti korrezzjonijiet. Dawn jistgħu jkunu miżuri ġenerali bħad-definizzjoni tal-qafas leġiżlattiv jew iktar speċifiċi, bħal verifiki finanzjarji individwali.

2.31.

Il-Qorti eżaminat l-applikazzjoni ta' l-istandards ta' kontroll intern (36) minn għadd (37) ta' servizzi tal-Kummissjoni, bil-ħsieb li tevalwa mhux biss il-punt sa fejn ġew implimentati l-ħtiġijiet minimi (baselines), imma wkoll biex tevalwa l-effettività tas-sistemi li jiżguraw il-legalità u r-regolarità tat-tranżazzjonijiet ta' bażi (38).

2.32.

Ħarsa lejn il-kundizzjoni tal-kontroll intern fis-servizzi tal-Kummissjoni fl-2006, ippreżentata mid-Direttorat-Ġenerali għall-Baġit, turi li, għas-sena finanzjarja 2006, bħala medja d-Direttorati-Ġenerali kkonformaw ma' 95 % tal-ħtiġijiet minimi. Peress li l-ħtiġijiet minimi essenzjalment ma nbidlux (39), il-Qorti osservat li l-konformità ma' l-istandards tal-kontroll intern hija stabbli, meta imqabbla mas-sena 2005. L-evalwazzjoni tal-Qorti dwar l-implimentazzjoni ta' l-istandards tal-kontroll intern (li ġeneralment hija konsistenti ma' l-analiżi tal-Kummissjoni) hija ppreżentata fit- Tabella 2.3 .

2.32.

Għalkemm il-medija ta' 95 % tidher stabbli u ma nbidlitx fl-2006 id-Direttorati Ġenerali kellhom jiffaċċjaw rekwiżiti ġodda fil-qasam ta' ICS 11 (b'mod partikolari tal-Pjanijiet ta' Sigurtà fl-IT ibbażati fuq analiżi ta' riskju tas-sistemi IT) u ICS 15 (żewġ rekwiżiti ġodda fil-qasam ta' l-ippjanar tal-kontinwità operattiva).

2.33.

Minkejja l-livell għoli ta' konformità mal-ħtiġijiet minimi, is-sistemi ta' sorveljanza u kontroll fil-livell tal-Kummissjoni ma naqqsux biżżejjed ir-riskju ta' l-iżball, b'mod partikolari, f'ċerti oqsma ta' l-agrikoltura, il-politika strutturali, il-politika interna, l-azzjonijiet esterni u l-għajnuna ta' qabel l-adeżjoni (ara l-paragrafi 5.77, 6.38, 7.30, 8.32, 9.23 u t- Tabella 2.4 ). Din l-analiżi taqbel ma' waħda mill-konklużjonijiet (40) tar-rapport annwali ta' l-2006 tas-Servizz tal-Verifika Interna tal-Kummissjoni (IAS) (41).

2.33.

Dan huwa mistenni minħabba li l-Istandards ta' Kontroll Intern jinvolvu fil-parti l-kbira operazzjonijiet fi ħdan il-Kummissjoni, filwaqt li l-parti l-kbira ta' l-iżbalji jsiru fl-infiq li jsir mill-Istati Membri jew mill-organizzazzjonijiet li jimplimentaw.

2.34.

Ir-reviżjoni tal-kwalità mwettqa mis-Servizz tal-Verifika Interna tal-Kummissjoni (IAS) fuq il-Kapaċitajiet tal-Verifika Interna (IACs) tad-Direttorati-Ġenerali kkonkludiet li l-maġġoranza tal-IACs (45) b'mod parzjali jew ġenerali kkonformaw ma' l-istandards (professjonali) imma l-isforzi biex tittejjeb il-verifika interna għandhom ikomplu (46). Il-Qorti tikkunsidra s-sejbiet inklużi f'din ir-reviżjoni u tilqa' il-proposti rilevanti għat-titjib, b'mod partikolari dak li jirrikmanda li, min-naħa, il-IACs għandhom jipprovdu evalwazzjoni ġenerali tas-sistemi ta' kontroll intern tad-Direttorati-Ġenerali fl-aħħar tal-perijodu ta' 3 snin li jintemm fl-2009 u, min-naħa l-oħra, l-istess ikun japplika għall-IAS fil-livell tal-Kummissjoni (47).

2.34.

Ir-rwol ta' l-Istruttura ta' Verifika Interna (IAC) m'huwiex li jipprovdi opinjoni kull sena dwar ir-Rapporti ta' Attività Annwali (RAA) tad-Diretturi Ġenerali, iżda li jagħti pariri dwar il-proċess tar-RAA u skond in-natura u l-ambitu ta' ħidmietu matul is-sena kkonċernata, l-IAC għandu jesprimi opinjoni dar l-istat tal-kontroll bħala kontribut għat-tħejjija tar-RAA (ara SEC(2003) 0059).

2.35.

Fis-sena finanzjarja 2006, il-Qorti sabet aktar titjib fis-sistemi ta' sorveljanza u kontroll, b'mod partikolari, it-titjib tal-proċess ta' preparazzjoni tar-rapporti ta' attività annwali u d-dikjarazzjonijiet (il-paragrafu 2.7) u l-evalwazzjoni ta' l-operat tas-sistemi ta' sorveljanza u kontroll u l-impatt tar-riżervi relevanti dwar l-assigurazzjoni mogħtija fid-dikjarazzjonijiet tad-Diretturi-Ġenerali (il-paragrafi 2.9 u 2.12).

2.36.

Iżda l-verifiki tal-Qorti identifikaw nuqqasijiet kontinwi fl-evalwazzjonijiet mogħtija mir-rapporti ta' attività annwali u d-dikjarazzjonijiet ta' xi Diretturi-Ġenerali (il-paragrafi 2.13 sa 2.18) u l-operat tas-sistemi ta' sorveljanza u kontroll (il-paragrafi 2.33 u 2.34).

2.36.

Ir-rapporti ta' attività annwali ġeneralment ifasslu b'mod ċar l-evalwazzjoni tagħhom ta' l-effikaċja tas-sistemi ta' kontroll u ġestjoni fl-Istati Membri u l-miżuri korrettivi li jittieħdu biex isir it-titjib meħtieġ. L-evalwazzjonijiet tad-Diretturi Ġenerali huma differenti minn dawk tal-Qorti, pereżempju għal dak li jirrigwarda l-bżonn għal riżervi dwar l-assigurazzjoni espressa, fil-parti l-kbira minħabba l-perspettiva multiannwali tas-sistemi ta' kontroll implimentati f'kull qasam ta' politika.

2.37.

Il-Qorti tirrikmanda li l-Kummissjoni tkompli bl-isforzi tagħha biex issaħħaħ is-sistemi ta' sorveljanza u kontroll tad-Direttorati-Ġenerali tagħha billi tiffoka fuq l-oqsma li ġejjin:

2.37.

a)

tassigura li r-rapporti ta' attività annwali jippreżentaw evalwazzjoni konsistenti tas-sistemi ta' sorveljanza u kontroll, li jinkludu indikaturi adegwati tal-legalità u r-regolarità li huma kumpatibbli mar-riżervi li saru fid-dikjarazzjonijiet (il-paragrafi 2.13 sa 2.18);

a)

Il-Kummissjoni impenjat ruħa fir-Rapport ta' Sinteżi 2006 biex issegwi l-implimentazzjoni ta' azzjonijiet ta' rimedju mnedija mill-uffiċjali li jawtorizzaw iddelegati biex isolvu n-nuqqasijiet ta' kontroll sottostanti.

b)

l-ikkompletar ta' segwitu adegwat tal-miżuri rilevanti ta' pjan ta' azzjoni lejn qafas ta' kontroll intern integrat bi ħsieb li tassigura impatt reali fuq is-sistemi ta' sorveljanza u kontroll, b'mod partikolari l-elaborazzjoni ta' informazzjoni adegwata u affidabbli fuq il-korrezzjoni ta' l-iżbalji fil-livell tal-benefiċjarji finali (il-paragrafi 2.19 sa 2.30);

b)

Il-Kummissjoni se tipprovdi rapport finali dwar l-implimentazzjoni tal-pjan ta' azzjoni fir-rebbiegħa 2008. Dan ir-rapport se tagħmel eżami prima facie ta’ l-impatt ta' l-azzjonijiet differenti dwar l-assigurazzjoni u se jislet konklużjonijiet għall-konsolidazzjoni futura tal-Qafas Integrat ta' Kontroll Intern.

c)

ittejjeb l-effettività tas-sistemi ta' sorveljanza u kontroll bi ħsieb li tnaqqas b'mod suffiċjenti r-riskju ta' l-iżball (il-paragrafi 2.33 u 2.34).

c)

Il-Kummissjoni taqbel mar-rakkomandazzjoni u tixtieq tiżgura li r-riżorsi tagħha tal-kontroll jintużaw b'mod ekonomikament effiċjenti u li n-nefqa fuq il-kontrolli tkun iġġustifikata f'termini tar-rata osservata ta' żbalji, l-effetti dissważivi, u benefiċċji kwalitattivi oħra.

Il-Kummissjoni ser tkompli bl-isforzi tagħha biex ittejjeb is-sistemi ta' superviżjoni u ta' kontroll bil-għan partikolari li tnaqqas ir-riskju ta' żbalji fil-programmi implimentati mill-Istati Membri fil-ġestjoni konġunta. Il-pjan ta’ azzjoni tal-Kummissjoni lejn qafas ta’ kontroll intern integrat hu maħsub biex itejjeb il-kooperazzjoni ma' l-Istati Membri u l-effettività tal-qafas ta’ kontroll globali. L-elementi ġodda introdotti fil-qafas regolatorju għall-perjodu 2007-2013 ukoll ser iżid l-effettività.

3.1.

Dan il-kapitolu janalizza kwsitjonijiet li joħorġu mill-implimentazzjoni tal-baġit ġenerali ta' l-UE fl-2006, l-aħħar sena tal-perspettiva finanzjarja 2000-2006. B'mod partikolari, huwa jkopri r-rata għolja ta' implimentazzjoni tal-baġit, il-baġits ta' emenda, il-livell li qed jogħla ta' impenji baġitarji pendenti u l-effett ta' nefqa inqas milli mbassra fil-Fond ta' Koeżjoni.

3.2.

Għal informazzjoni aktar dettaljata dwar l-istruttura u kif jopera l-baġit — partikolarment it-tifsira ta', u r-relazzjoni bejn, pagamenti u impenji — ara l- Anness I ta' dan ir-Rapport Annwali.

3.3.

L-approprijazzjonijiet totali fl-2006 għall-impenji (122,8 biljun euro) u l-pagamenti (111,2 biljun euro) kienu rispettivament 4,1 % u 1,6 % ogħla milli fl-2005. B'mod ġenerali, l-approprijazzjonijiet għall-impenji u għall-pagamenti baqgħu taħt il-limiti tal-perspettiva finanzjarja b'0,7 biljun euro u 7,9 biljun euro rispettivament.

3.4.

Is-sitt baġits ta' emenda ivvutati matul is-sena rriżultaw fi tnaqqis ġenerali ta' 0,6 biljun euro fl-approprijazzjonijiet għall-impenji u tnaqqis ta' 4,6 biljun euro fl-approprijazzjonijiet għall-pagamenti. Dan ta' l-aħħar huwa l-aktar reazzjoni għal pagamenti inqas milli mistenni fl-agrikoltura (0,9 biljun euro) u fl-operazzjonijiet strutturali (3,3 biljun euro). It-tnaqqis ta' l-approprijazzjonijiet għall-pagamenti b'dan il-mod jirrifletti ġestjoni baġitarja tajba għax dan inaqqas il-baġit żejjed (1) bl-istess ammont (li jippermetti li r-riżorsi proprji jiġu rritornati lill-Istati Membri).

3.4.

Il-Kummissjoni qed tieħu l-passi biex permezz ta’ ġestjoni baġitarja attiva timminimizza s-sottoimplimentazzjoni. Is-Sistema ta’ Twissija għall-Previżjoni tal-Baġit tgħin biex tagħraf il-problemi potenzjali fi stadju bikri. Avvenimenti li ma jistgħux ikunu previsti jiġu solvuti billi jkun emendat il-baġit, kif irrakkomandat mill-Qorti. B’riżultat ta’ din l-istrateġija, ir-rata ta’ l-implimentazzjoni tal-ħlas finali kibret b’mod konsistenti biex għalqet il-100 %.

3.5.

Ir-riżultat tal-baġit għall-2006 huwa mogħti fid- Dijagrammi III u IV ta' l- Anness I , u juri dan li ġej:

3.5.

—

ir-rati ta' utilzzazzjoni kemm għall-impenji kif ukoll għall-pagamenti — f'99 % u 96 % rispettivament — kienu identiċi għall-2005;

—

għall-operazzjonijiet strutturali tnaqqis ta' 3,3 biljun euro fl-approprijazzjonjiet ta' pagamenti (li qabeż iż-żieda baġitarja f'dan il-qasam għal din is-sena) irriżulta f'rata ta' utilizzazzjoni finali ta' 99 %. Din kienet tkun 90 % mingħajr il-baġit ta' emenda. Dan it-tnaqqis kien prinċipalment minħabba ż-żamma ta' kljems ta' pagament fi Spanja u ta' pagamenti fir-Renju Unit riżultat tan-nuqqasijiet fis-sistema tal-ġestjoni u tal-kontroll tagħhom;

—

Iżda għal dan, u għal ħlas anqas milli mistenni fl-UE-10, skond l-estimi tal-Kummissjoni, l-approprijazzjonijiet tal-ħlas disponibbli tal-bidu kienu se jkunu użati kollha.

—

2,7 biljun euro ta' approprijazzjonijiet ta' pagamenti mhux użati ma ġewx ikkanċellati iżda trasferiti mill-2006 għall-2007, l-istess livell ta' dak li ġie trasferit mill-2005 għall-2006;

—

iż-żejjed tal-baġit għas-sena kien ta' 1,9 biljun euro, inqas mis-sena 2005 (2,4 biljun euro).

3.6.

Informazzjoni dettaljata dwar l-implimentazzjoni tal-baġit għall-2006 tista' tinksieb mid-dokument tal-Kummissjoni, Rapport dwar il-ġesjtoni baġitarja u finanzjarja — Sena finanzjarja 2006 (2) (ara l-paragrafu 3.15).

3.7.

Impenji baġitarji pendenti — impenji mhux użati li jridu jiġu trasferiti sabiex jiġu wżati fis-snin futuri, priċipalment fuq programmi multi-annwali — żdiedu bi 12,6 biljun euro (10,6 %) għal 131,3 biljun euro (ara t- Tabella 3.1 ). Madwar 90 % taż-żieda (u 71 % tat-total) kienet marbuta ma' l-operazzjonijiet strutturali, 23 % ta' liema (2,9 biljun euro) kienet marbuta mal-Fond ta' Koeżjoni (ara l-paragrafu 3.12).

3.7.

Kif tinnota l-Qorti fil-paragrafu 3.10, akkumulazzjoni ta' impenji pendenti fuq perjodu ta’ Perspettiva Finanzjarja hi konsegwenza naturali ta’ infiq differenzjat, fejn l-impenji jsiru matul il-perjodu iżda l-ħlasijiet jistgħu jkomplu jsiru lilhinn mit-tmiem tal-perjodu.

3.8.

L-2006 kienet l-aħħar sena tal-perijodu ta' programmar 2000 sa l-2006: sa tmiem is-sena l-impenji kollha għal dak il-perijodu kienu ġew magħmula. L-impenji baġitarji pendenti fi tmiem l-2006 għalhekk jirrappreżentaw l-entità sħiħa tal-pagamenti li għad iridu jsiru fil-ftit snin li ġejjin (3). Huma jikkorrispondu għal 28 % ta' l-ammonti totali ta' l-intestaturi tal-perspettiva finanzjarja relatati għall-perijodu kollhu.

3.9.

Fi tmiem l-2006 l-bilanċ ta' l-impenji baġitarji pendenti kien jirrappreżenta l-ekwivalenti ta' 2,6 sena ta' pagamenti u l-ekwivalenti ta' 2,0 (sentejn) ta' impenji bir-rati ta' l-2006. Dawn il-miżuri huma rispettivament 30 % u 38 % aktar milli fil-punt korrispondenti fiċ-ċiklu preċedenti (jiġifieri l-1999, li kienet l-aħħar sena tal-perijodu 1994 sa 1999), li jindika livell relattiv ogħla ta' impenji tal-baġit pendenti.

3.10.

L-impenji baġitarji pendenti huma l-konsegwenza naturali tan-nefqa differenzjata, fejn programmi ta' nefqa jieħdu numru ta' snin sabiex jitlestew u l-impenji xi kultant isiru snin qabel il-pagamenti korrispondenti. Fil-każ ta' nefqa anqas milli suppost — bħalma ġara sa ċertu punt sinifikanti bejn l-1999 u l-2003 (4) u huwa fil-preżent il-każ għall-infiq fuq l-operazzjonijiet strutturali fil-pajjiżi tat-tkabbir (ara l-paragrafu 3.12) — l-approporijazzjonjiet ta' pagament mhux użati jiġu kkanċellati, iżda l-impenji mhux użati magħmula jiġu trasferiti għal ċertu perijodu qabel ma jiġu diżimpenjati (ara l-paragrafu 3.13). Sa mill-1994, l-impenji qabżu lill-pagamenti b'medja ta' 21 % (ara l- Grafika 3.1 ). L-effett huwa akkumulazzjoni akbar milli mistennija ta' impenji pendenti, bis-sitwazzjoni tiġi trasferita 'l quddiem kull sena.

3.9-3.10.

Il-Kummissjoni tuża' wkoll il-proporzjon ta' l-impenji pendenti għal impenji annwali medji, li huwa anqas influenzat minn ħlasijiet bil-quddiem u minn avvenimenti ta’ darba. Il-proporzjon kien ta’ madwar sentejn ta’ impenji (2.1 fl-2006), li hu normali għar-regola n + 2.

3.11.

Kif imsemmi fil-paragrafu 3.7, l-operazzjonjiet strutturali — il-Fondi Strutturali u l-Fondi ta' Koeżjoni — jirrappreżentaw is-sehem ta' maġġoranza ta' l-impenji pendenti. Għall-Fondi Strutturali l-impenji pendenti fil-programmi 2000-2006 kienu ta' 76,9 biljun euro, li jirrappreżentaw l-ekwivalenti ta' 2,6 snin ta' pagamenti bir-rata ta' nfiq ta' l-2006 (ara l- Grafika 3.2 ). Dan jirrappreżenta tnaqqis pro rata minn 3,6 snin ta' pagamenti fi tmiem l-2005. Benefiċarji tal-fondi għandhom sa tmiem l-2008 sabiex jagħmlu l-pagamenti (5). Madanakollu, l-esperjenza turi illi l-infiq jinżel b'mod naturali sakemm jintemm lejn it-tmiem. Dan jindika r-riskju illi n-nefqa jkollha tiġi diżimpenjata taħt ir-regola tas-sena n + 2 (ara l-paragrafu 3.13). Fil-fatt, l-infiq fl-2006 kien xi ftit inqas milli fl-2005 minkejja l-baġit li żdied (6).

3.11.

It-tnaqqis żgħir tal-ħlasijiet fl-2006 imqabbel ma' l-2005 ma kienx relatat mat-tmiem tal-perjodu tal-programm. Ix-xiehda disponibbli dwar ix-xejriet ta' twettiq tal-programmi tal-perjodu ta’ pprogrammar għas-snin 2000-2006 ma tissuġġerixxi ebda tnaqqis sinifikanti sottostanti.

3.12.

Ir-rata ta' nfiq għall-Fond ta' Koeżjoni kienet anqas milli kien mistenni fl-Istati Membri l-ġodda, marbuta mad-diffikultajiet tagħhom li jassorbu n-nefqa. Baġit ta' emenda naqqas l-approprijazzjonijiet ta' pagament b'0,5 biljun euro u l-impenji baġitarji penedenti żdiedu minn12,5 biljun euro fl-2005 għal 15,4 biljun euro fi tmiem l-2006 (ara l- Grafika 3.3 ). Dan jirrappreżenta l-ekwivalenti ta' 5,1 snin ta' pagamenti bir-rata ta' nfiq ta' l-2006. Għalhekk, l-infiq li jikkorrispondi aktarx ser jidħol sew fil-perijodu 2007 sa 2013, meta l-Istati Membri ser ikollhom programmi ġodda sabiex jistabbilixxu u n-nefqa addizzjonali relatata x'jassorbu.

3.12.

Il-Kummissjoni tirreferi għall-kummenti tagħha fil-paragrafu 3.9 dwar il-proporzjon bejn il-livell ta’ l-impenji pendenti u l-impenji annwali medji. Għall-Fond ta’ Koeżjoni dan il-proporzjon kien ta’ 3.9 fi tmiem l-2006.

3.13.

Impenji pendenti għall-Fondi Strutturali (imma mhux għall-Fond Strutturali) huma soġġetti għar-regola tas-sena n + 2, li titlob illi l-impenji jiġu kkanċellati jekk l-ebda pagamenti korrispondenti ma jkunu saru sa tmiem it-tieni sena li ssegwi s-sena li fiha l-impenn ikun sar. L-Istati Membri huma avżati mir-riskju ta' kanċellament, u b'hekk jiġu megħjuna jiffukaw l-attenzjoni meta l-implimentazzjoni tkun qed taqa' lura. L-ammont totali diżimpenjat taħt ir-regola tas-sena n + 2 fl-2006 kien ta' 217 miljun euro (286 miljun euro fl-2005). Id-diżimpenji jibqgħu żgħar meta mqabbla mal-medja ta' l-impenji annwali (madwar 0,7 %).

3.13.

L-għan tar-regola n + 2 hi biex tkabbar l-implimentazzjoni. Rata baxxa ta’ kanċellazzjoni tindika li r-regola qed taħdem kif maħsub.

3.14.

Il-Qorti tinnota illi l-perijodu ta' prgorammar ġdid 2007 sa 2013 huwa soġġett għal bidla, permezz ta' liema xi Stati Membri (7) ser jingħataw sena oħra żejda (n + 3) sabiex jagħmlu t-talbiet fuq l-impenji relatati. Fl-istess waqt, il-Fond ta' Koeżjoni ser ikun soġġett għar-regola tas-sena n + 2/n + 3. L-ewwel bidla potenzjalment ser tirriżulta f'aktar żieda fl-impenji baġitarji pendenti, imma dan l-effett aktarx ikun imnaqqas bl-effett tat-tieni bidla.

3.15.

Ir-rapport tal-Kummissjoni dwar il-ġesjtoni baġitarja u finanzjarja jipprovdi informazzjoni mtejba dwar l-implimentazzjoni dettaljata tal-baġit, l-impenji pendenti tal-baġit inklużi indikaturi — u raġunijiet għall-infiq inqas milli mbassar. Madanakollu, b'kuntrast ma' l-2005, l-ebda informazzjoni ma hi mogħtija dwar l-implimentazzjoni kumulattiva tal-programmi Komunitarji multi-annwali li huma akbar, u l-ebda distinzjoni ma hi magħmula bejn in-nefqa UE-15 u UE-10. Barra minn hekk, ir-rapport ma jippreżentax dejjem livell konsistenti ta' analiżi. Per eżempju, spjegazzjoni aktar dettaljata tingħata għall-infiq inqas milli mbassar fl-agrikoltura, milli għal oqsma oħra. L-infiq inqas milli mbassar fuq l-operazzjonijiet strutturali li wassal għall-baġit ta' emenda m'huwiex analizzat fid-dettall (8).

3.15.

Il-Kummissjoni tieħu nota tal-kummenti. Il-mument meta r-rapport hu meħtieġ mir-Regolamenti Finanzjarji (l-aħħar ta’ Marzu) jagħmilha diffiċli li jiġi pprovdut aktar analiżi ta’ l-ispiża għall-operazzjonijiet strutturali, li hi r-raġuni għaliex din l-informazzjoni hi ppreżentata f’rapport separat dwar il-Fondi Strutturali ppubblikati f’Mejju.

3.16.

Il-baġit ta' l-2006 żdied meta mqabbel ma' l-2005 u r-rati ta' nfiq baqgħu f'livell għoli. Madanakollu, għall-operazzonijiet strutturali l-approprijazzjonijiet ta' pagamenti inizjali rriżultaw li kienu konsiderevolment ogħla milli kien hemm bżonn u l-baġit finali kellu jiġi mnaqqas bi 3,3 biljun euro permezz ta' baġit ta' emenda, li effettivament ikkanċella ż-żieda irċevuta.

3.16.

Il-baġit finali kellu jitnaqqas minħabba tnaqqis fil-ħlasijiet lil Spanja u lir-Renju Unit b’riżultat ta’ nuqqassijiet fis-sistemi ta’ ġestjoni u kontrolli tagħhom u minħabba nfiq anqas milli kien mistenni fl-UE-10.

3.17.

L-impenji pendenti tal-baġit dwar nefqa differenzjata żdiedu b'10,7 % għal 130,5 biljun euro. Fl-ekwivalenti għal 2,6 sena ta' pagamenti dan huwa 30 % aktar milli fil-punt komparattiv fil-perijodu preċedenti (1999). Il-bidla mir-regola tas-sena n + 2 għar-regola tas-sena n + 3 għal ċerti Stati Membri għall-perijodu ta' programmar ġdid tirriskja li żżid aktar il-livell ta' l-impenji pendenti tal-baġit, għalkemm dan l-effett aktarx jiġi mnaqqas mill-applikazzjoni tar-regola tas-sena n + 2/n + 3 għall-Fond ta' Koeżjoni.

3.17.

Il-proporzjon ta’ l-impenji pendenti għal impenji annwali medji hu ta' madwar 2, li hu normali għar-regola n + 2.

3.18.

Kif enfasizzat fl-2005 (9), ir-rata ta' nfiq diġà għolja fil-Fondi Strutturali (li tirrappreżenta l-proporzjoni maġġuri tan-nefqa differenzjata u ta' l-impenji pendenti) hemm bżonn li tiżdied aktar fl-2007 u fl-2008 sabiex tassigura illi l-iskadenza għall-benefiċarji fl-Istati Membri sabiex jagħmlu pagamenti (tmiem l-2008) tintlaħaq għall-programmi 2000-2006. Dan ser ikun diffiċli minħabba illi l-infiq għandu t-tendenza li jonqos fi tmiem il-perijodu ta' programmar. Ir-riskju illi l-għeluq sussegwenti tal-programmi kurrenti jkun imdewwem u jkollu mpatt fuq l-implimentazzjoni tal-programmi 2007-2013 — kif kien il-każ għall-bidu tal-perijodu ta' programmar kurrenti (10) — għandu jkun indirizzat mill-Kummissjoni u mill-Istati Membri.

3.18.

L-iskadenza għall-infiq (tmiem l-2008) għandha tkun distinta mid-data ta’ l-għeluq għas-sottomissjoni tat-talbiet għall-ħlasijiet finali mill-Istati Membri (Marzu 2010). Il-ħlas tal-bilanċi pendenti għandhom isiru għall-parti l-kbira tal-programmi fl-2010/2011. Biex tħejji għall-għeluq, il-Kummissjoni ħarġet linji gwida dwar l-għeluq fl-2006 u qed torganizza seminars dwar l-għeluq għall-Istati Membri. Jekk ma tinżammx id-data għan-nefqa, il-fondi li ma jintefqux ikunu disimpenjati mill-Kummissjoni fl-għeluq. Ix-xiehda disponibbli dwar ix-xejriet ta' twettiq tal-programmi għas-snin 2000-2006 mhix turi xi tnaqqis sinifikanti. Il-kummissjoni qed taħdem fil-qrib ma' l-Istati Membri biex tiffaċilita bidu faċli għall-programmi għas-snin 2007-2013.

3.19.

Attenzjoni speċifika hija meħtieġa għall-Fond ta' Koeżjoni fejn in-nuqqas ta' nfiq ikkawża żieda kbira fl-impenji tal-baġit pendenti. Is-sitwazzjoni aktarx tiġi eżasperata bil-bidu tal-perijodu ġdid ta' programmar.

3.19.

Il-Kummissjoni qed tissorvelja bir-reqqa s-sitwazzjoni tal-Fond ta’ Koeżjoni. Ir-rata ta’ l-infiq anqas milli mistenni tal-Fond ta’ Koeżjoni fl-UE-10 hi parzjalment riżultat taż-żmien relattivament twil meħtieġ għal proġetti ta’ infrastrutttura u partzjalment minħabba problemi tal-bidu (ara l-paragrafu 3.12). L-applikazzjoni tar-regola n + 2/n + 3 fl-2007-2013 għandha taħdem kontra l-akkumulazzjoni ta’ l-impenji pendenti.

3.20.

Kif ġie rrakkomandat qabel (11), meta tipproponi baġits ta' pagament futuri l-Kummissjoni għandha tieħu kont aħjar tal-kapaċitajiet ta' assorbiment ta' l-Istati Membri u l-profil tan-nefqa fi ħdan il-perijodu ta' programmar. F'dan il-kuntest, il-Kummissjoni għandha wkoll tagħti l-attenzjoni meħtieġa lir-riskju għall-ġestjoni finanzjarja b'saħħitha.

3.20.

L-ippjanar tal-baġit tal-Kummissjoni, ankrat fil-prinċipju ta' ġestjoni finanzjarja b'saħħitha, jikkunsidra safejn hu possibli l-kapaċità ta' l-assorbiment ta' l-Istati Membri, billi partikolarment joqgħod attent għall-eżekuzzjoni baġitarja tas-snin preċedenti, għall-previżjonijiet, u għal-livell ta’ l-implimentazzjoni tal-programmi. Avvenimenti mhux previsti ttrattati permezz ta' emendati fil-baġits. Ir-rata ta’ implimentazzjoni tal-ħlasijiet finali kibret konsistentament biex għalqet il-100 %.

3.21.

Ir-Rapport dwar il-ġestjoni baġitarja u finanzjarja ppreparat mid-DĠ Baġit jipprovdi livell ta' informazzjoni tad-dettal imtejjeb imma inkonsistenti. Il-Qorti tirrakkomanda illi livell konsistenti ta' analiżi dwar l-infiq inqas milli imbassar jiġi provdut għall-oqsma prinċipali kollha tal-baġit.

3.21.

Il-Kummissjoni tieħu nota ta’ dawn il-kummenti (ara wkoll il-punt 3.15).

4.1.

Id-dħul fil-baġit ta' l-Unjoni Ewropea jikkonsisti f'riżorsi proprji u dħul ieħor. Kif jidher fit- Tabella 4.1 , fil- Grafika 4.1 u fil- Grafika 4.2 ir-riżorsi proprji huma bil-bosta s-sors prinċipali ta' finanzjament għan-nefqa baġitarja (94,4 %).