30.10.2007

MT

Il-Ġurnal Uffiċjali ta’ l-Unjoni Ewropea

CA 257/1

---

ID-DIRETTORAT-ĠENERALI GĦALL-ĠUSTIZZJA, IL-LIBERTÀ U S-SIGURTÀ

Pubblikazzjoni ta' post vakanti għall-kariga ta' Direttur (Grad AD14)

Id-Direttorat “Sigurtà Interna u ġustizzja kriminali” fi Brussell

(L-Artikolu 29(2) tar-Regolamenti tal-Persunal)

COM/2007/10052

(2007/C 257 A/01)

 

Min aħna:

Id-Direttorat Ġenerali għall-Ġustizzja, il-Libertà u s-Sigurtà (JLS) hu responsabbli għaż-żamma u l-iżvilupp ta' żona ta' libertà, sigurtà u ġustizzja li fiha jkun żgurat iċ-ċaqliq ħieles ta' persuni.

Id-Direttorat JLS.D “Sigurtà interna u ġustizzja kriminali” għandu persunal totali ta' madwar 100 persuna u fih erba' unitajiet li jindirizzaw: – il-ġlieda kontra t-terroriżmu; l-aċċess għall-informazzjoni; il-ġlieda kontra l-kriminalità organizzata; l-infurzar tal-liġi u l-kooperazzjoni doganali; Il-ġustizzja kriminali; l-appoġġ finanzjarju.

Qegħdin nipproponu

Ix-xogħol tad-Direttur ikun li jipprovdi gwida dwar il-politika, il-ġestjoni u l-koordinazzjoni f'diversi oqsma kumplessi u sensittivi bħal:

—	il-prevenzjoni u l-ġlieda kontra t-terroriżmu u l-kriminalità organizzata;

—	it-titjib tal-kooperazzjoni u l-qsim ta' informazzjoni;

—	l-iżgurazzjoni tar-rappreżentazzjoni tal-Kummissjoni fil-EUROPOL, l-EUROJUST u s-CEPOL kif ukoll f'negozjati internazzjonali.

Qed infittxu

Kandidati, li għandu jkollhom:

—	għarfien tajjeb ta' oqsma speċifiċi ta' responsabbiltà tad-Direttorat “Sigurtà interna u ġustizzja kriminali”, għarfien tajjeb tal-liġi kriminali jkun ta' vantaġġ;

—	ħiliet ta' tmexxija tajbin ħafna;

—	esperjenza ppruvata ta' negozjar; ħiliet eċellenti fil-komunikazzjoni bil-fomm u bil-kitba fl-Ingliż u l-Franċiż, u ħiliet adekwati għall-oħrajn;

—	il-ħila ppruvata li jirrappreżentaw lill-Kummissjoni f'livell għoli;

—	għarfien tal-proċess ta' teħid ta' deċiżjonijiet ta' l-UE f'dan il-qasam;

—	esperjenza ta' tmexxija finanzjarja ppruvata.

L-applikanti għandhom:

—	ikunu ċittadini ta' wieħed mit-tnax-il Stat Membru ġdid ta' l-Unjoni Ewropea (il-Bulgarija, Ċipru, ir-Repubblika Ċeka, l-Estonja, l-Ungerija, il-Latvja, il-Litwanja, Malta, il-Polonja, ir-Rumanija, is-Slovakkja, is-Slovenja);

—	għandu jkollhom grad universitarju li jagħti aċċess għal studji li jwasslu għal dottorat;

—	ikollhom mill-inqas 12-il sena esperjenza professjonali post-universitarja f'livell li jagħtu aċċess għalih il-kwalifiki msemmija hawn fuq. Mill-inqas 6 snin minn dik l-esperjenza professjonali jkunu nkisbu fuq livell maniġerjali jew funzjoni konsultattiva għolja;

—	ikollhom għarfien sod ta' waħda mil-lingwi uffiċjali ta' l-Unjoni Ewropea u għarfien adekwat ta' lingwa uffiċjali oħra. Il-kandidati għandhom ikunu mgħarrfa li l-proċeduri ta' l-għażla ser isiru bl-Ingliż, bil-Franċiż jew bil-Ġermaniż biss).

Id-Direttur jintgħażel u jinħatar mill-Kummissjoni skond il-proċeduri ta' għażla u reklutaġġ tagħha. Il-Kumitat Konsultattiv tal-Kummissjoni għall-Ħatriet u ċentru ta' valutazzjoni mmexxi minn konsulenti esterni ta' reklutaġġ isejħu lil lista finali ta' kandidati għal intervista.

Is-salarji u l-kondizzjonijiet ta' l-impjieg huma dawk stipulati fir-Regolamenti ta' l-Istaff għall-uffiċjali fi grad AD14 tal-Komunitajiet Ewropej.

Il-kandidat magħżul ikun mitlub li jkollu awtorizzazzjoni ta' sigurtà ta' l-UE.

Il-Kummissjoni tapplika politika ta' opportunitajiet indaqs.

Il-link għall-applikazzjoni on-line li fuqha tista' ssib id-deskrizzjoni sħiħa ta' l-impjieg, u l-kriterji ta' għażla huwa:

http://ec.europa.eu/dgs/personnel_administration/seniormanagementvacancies/CV_Encadext/index.cfm

Jekk tiltaqa' ma' problemi tekniċi, jekk jogħġbok ibgħat e-mail lil:

ADMIN-MANAGEMENT-ONLINE@ec.europa.eu

Id-data ta' l-għeluq għall-applikazzjoni hija t-30 ta' Novembru 2007. L-applikazzjoni on-line ma tkunx possibbli wara 12.00 p.m. (nofsinhar) ħin ta' Brussell.

---