19.10.2005   

MT

Il-Ġurnal Uffiċjali ta’ l-Unjoni Ewropea

C NaN/1

I-VI

1-15

1-9

10-15

16-59

16-35

18-27

28-33

34-35

36-59

38-49

50-59

60-72

60-65

66-72

AAL

Ażja — Amerika Latina

ABB

Activity based Baġiting (Baġit ibbażat fuq Attività)

ABM

Activity based Management (Ġestjoni bbażata fuq Attività)

AIDCO

Uffiċċju ta’ Koperazzjoni fl-Għajnuna Ewropea (jew EuropeAid)

ASEAN

Association of South East Asian Nations (Assoċjazzjoni tan-Nazzjonijiet Ażjatiċi tax-Xlokk)

ASEM

Asia-Europe Meeting (Laqgħa Ażja-Ewropa)

CRIS

Common RELEX Information System (Sistema ta’ Informazzjoni Komuni RELEX)

CSP

Country Strategy Papers (Dokumenti ta’ Strateġija tal-Pajjiż)

EBIC

European Business Information Centre (Ċentru Ewropew t’Informazzjoni dwar in-Negozju)

ECERP

EU China Enterprise Reform Project (Proġett UE-Ċina tar-Riformi ta’ l-Intrapriżi)

IPR

Intellectual Property Rights (Drittijiet ta’ Proprjetà Intelletwali)

IT & C

Information Technology & Communications (Teknoloġija ta’ Komunikazzjoni u Informatika)

KE

Kummissjoni Ewropea

MoU

Memorandum of Understanding (Memorandum ta’ Ftehim)

MUTRAP

Multilateral Trade Policy Assistance project (Proġett ta’ Għajnuna fil-Politika tan-Negozju Multilaterali)

NIP

National Indicative Programm (Programm Indikattiv Nazzjonali)

PCM

Project Cyle Management (Ġestjoni ta’ ċiklu ta’ Proġett)

PMO

Project Management Organisation (Organizzazzjoni għall-Ġestjoni tal-Proġett)

PRSP

Poverty Reduction Strategy Paper (Dokument ta’ Strateġija għat-Tnaqqis tal-Faqar)

RELEX

DG External Relations (Relazzjonijiet Esterni tad-DĠ)

RSP

Regional Strategy Paper (Dokument ta’ Strateġija Reġjonali)

SARS

Severe Acute Respiratory System

SME

Small and Medium-sized Enterprise (Impriżi Żgħar u ta’ daqs Medju)

SPF

Small Projects Facility (Faċilità għal Proġetti Żgħar)

UE

Unjoni Ewropea

WTO

World Trade Organisation (Organizzazzjoni Dinjija tal-Kummerċ)

I.

In-nefqa ta’ l-UE għall-koperazzjoni ekonomika hija regolata skond ir-Regolament tal-Kunsill (KEE) Nru 443/92, li ffissa l-miri prinċipali (titjib tal-koperazzjoni xjentifika u teknoloġika; titjib ta’ l-istrutturi istituzzjonali; u appoġġ għall-impriżi permezz ta’ promozzjoni ta’ kummerċ, skemi ta’ taħriġ u għajnuna teknika) u jniżżel is-setturi fejn il-fondi ta’l-UE għandhom jintefqu (paragrafi 1-4).

II.

Il-koperazzjoni ekonomika fl-Ażja hija implimentata b’żewġ metodi differenti: proġetti bilaterali, bejn il-Kummissjoni u l-pajjiżi benefiċjarji individwali, u programmi reġjonali li jkopru sub-reġjuni, jew dawk li jkopru l-Ażja kollha, li huma msejħa bħala “Programmi għall-Ażja kollha” (paragrafi 5-9).

III.

Il-Qorti eżaminat sa fejn il-Kummissjoni stabbiliet strateġija li twassal għall-użu l-aktar effettiv ta’ l-għajnuna relatata ma’ l-attivitajiet ta’ koperazzjoni ekonomika fl-Ażja, u jekk il-Kummissjoni ġestitx l-implimentazzjoni ta’ din l-għajnuna effettivament (paragrafi 10-15).

IV.

Fir-rigward ta’ l-strateġija, il-Qorti sabet:

V.

Fir-rigward tal-ġestjoni mill-Kummissjoni ta’ l-implimentazzjoni tan-nefqa fuq il-koperazzjoni ekonomika, il-Qorti sabet:

VI.

Il-Qorti tirrikkmanda lill-Kummissjoni biex:

1.

L-Ażja tirrappreżenta 56 % tal-popolazzjoni tad-dinja, u 25 % tal-PGN tad-dinja. Ir-relazzjonijiet ekonomiċi u kummerċjali ta’ l-UE ma’ l-Ażja huma ta’ importanza kbira. L-Ażja hija attwalment it-tielet sieħeb l-aktar importanti ta’ kummerċ ta’ l-UE u r-raba’ destinazzjoni l-aktar importanti għall-investiment tagħha. L-UE timporta ‘il fuq minn 230 biljun euro mill-Ażja u tesporta ‘l fuq minn 140 biljun lejn ir-reġjun (1).

2.

Il-koperazzjoni ta’ l-UE ma’ l-Ażja bdiet fis-sena 1976, fl-istess żmien tal-koperazzjoni ma’ l-Amerika Latina u l-pajjiżi tal-Mediterran. Sa l-2004, il-koperazzjoni ta’ l-UE fl-Ażja kellha total ta’ aktar minn 7 800 miljun euro, li żdiedet f’termini medji minn 50 miljun euro għal 400 miljun kull sena.

3.

Il-koperazzjoni ekonomika ta’ l-UE fl-Ażja hija regolata skond ir-Regolament tal-Kunsill (KEE) Nru 443/92 (2). Dan jgħid li l-koperazzjoni ekonomika għandha sservi l-interessi komuni ta’ l-UE u l-pajjiżi sħab tagħha, tikkontribwixxi għall-iżvilupp tal-pajjiżi AAL (Ażja u l-pajjiżi ta’ l-Amerika Latina) billi tgħinhom jibnu l-kapaċità istituzzjonali tagħhom sabiex iwaqqfu ambjent aktar favorevoli għall-investiment. Attenzjoni partikolari hija mogħtija biex jitkabbar ir-rwol tan-negozjanti, teknoloġija u t-tagħrif mill-Pajjiżi Membri ta’ l-UE, partikolarment fis-settur privat u fl-impriżi żgħar u ta’ daqs medju (SMEs). Il-koperazzjoni ekonomika għandha tliet miri ġenerali: titjib tal-koperazzjoni xjentifika u teknoloġika; titjib ta’ l-istruttura istituzzjonali; u appoġġ għall-impriżi permezz ta’ promozzjoni ta’ kummerċ, ta’ taħriġ u skemi ta’ għajnuna teknika. Ir-Regolament tal-Kunsill jenfasizza li l-koperazzjoni reġjonali hija element importanti tal-koperazzjoni ekonomika, inklużi politika reġjonali, kummerċ bejn ir-reġjuni u istituzzjonijiet reġjonali għall-integrazzjoni ekonomika.

4.

Il-Kummissjoni għandha żewġ linji/punti prinċipali tal-baġit (3) ikopru l-koperazzjoni fl-Ażja: koperazzjoni “finanzjarja u teknika” (B7-3 0 0/19 10 01); u “koperazzjoni politika, ekonomika u kulturali” (B7-3 0 1/19 10 02) (ara Tabella 1 hawn taħt). Bejn l-2000 u l-2004 il-Kummissjoni impenjat 509 miljun euro taħt l-artikolu tal-baġit ta’ l-aħħar. Fir-realtà l-ammonti impenjati għal attivitajiet ta’ koperazzjoni ta’ natura ekonomika huma attwalment ogħla għaliex ċerti proġetti ffinanzjati taħt il-linja ġenerali tal-baġit, B7-3 0 0, huma ta’ natura ekonomika wkoll.

5.

Taħt dan il-qafas ġenerali, il-koperazzjoni ekonomika ta’ l-UE fl-Ażja hija implimentata b’modi differenti. Hemm proġetti bilaterali bejn il-Kummissjoni u pajjiżi benefiċjarji individwali (ara l-paragrafu 38); programmi reġjonali bejn il-Kummissjoni u regjuni żgħar speċifiċi bħal ASEAN (4) u programmi mtella’ fuq talbiet li jkopru l-Ażja kollha (ara l-paragrafu 50). Għal ta’ l-aħħar, il-benefiċjarji jistgħu jkunu minn kwalunkwe pajjiż fl-Ażja, kif identifikati mir-Regolament ALA u għal din ir-raġuni huma msemmija bħala “programmi għall-Ażja kollha” tul dan ir-rapport.

6.

Il-Qorti ta’ l-Awdituri kkalkulat li l-proġetti bilaterali tal-koperazzjoni ekonomika fl-Ażja approvati għall-finanzjament bejn l-1995 u l-2002 (5) laħqu it-total ta’ 343 miljun euro, (ara Tabella 2) bi proġetti ta’ 37 miljun euro fir-reġjun ASEAN.

7.

Hemm ħames programmi differenti li jkopru l-Ażja kollha; it-tnejn li għandhom x’jaqsmu b’mod aktar espliċitu ma’ koperazzjoni ekonomika huma Asia Invest u Asia IT & C  (6). Sa ċertu punt l-Asia ProEco, — Asia Link u l-Programmi Asia Urbs ukoll isostnu l-koperazzjoni ekonomika.

8.

Il-programm Asia Invest beda fl-1997 b’kontribuzzjoni mill-Kummissjoni (7) ta’ 42 miljun euro fuq perjodu ta’ ħames snin, u minn dakinhar daħal fit-tieni fażi ta’ implimentazzjoni mill-2003 sa l-2007, b’kontribuzzjoni ta’ 41 miljun euro. L-għan tal-proġetti finanzjati mill-programm huwa li jħeġġeġ koperazzjoni diretta għan-negozju bejn operaturi ekonomiċi fl-UE u fl-Ażja, b’fokus fuq l-impriżi żgħar u ta’ daqs medju, u biex jagħtu sostenn lis-settur privat dinamiku fl-Ażja. Dan il-programm jinvolvi sħab kemm fl-Istati Membri ta’ l-UE kif ukoll fil-pajjiżi ta’ l-Ażja.

9.

Il-programm Asia IT & C ħadem mill-1999 sa l-2003 b’kontribuzzjoni mill-Kummissjoni ta’ 35 miljun euro. It-tieni fażi kienet approvata fit-3 ta’ Novembru 2003 għal sena oħra, b’kontribuzzjoni ta’ 10 miljun euro. Il-mira ġenerali ta’l-Asia IT & C  (8) hija li toħloq relazzjonijiet teknoloġiċi u ekonomiċi li huma wiesgħa, intensi u kontinwi bejn l-Ażja u l-Ewropa, fejn sħubija bilanċjata u innovazzjonijiet konġunti jistgħu jiżdiedu. Dan il-programm jinvolvi sħab kemm fil-Pajjizi Membri ta’ l-UE kif ukoll fil-pajjiżi ta’ l-Ażja.

10.

Fil-passat il-verifiki tal-Qorti kkonċentraw fuq koperazzjoni finanzjarja u teknika. Il-koperazzjoni sseħħ fl-isfond tal-kummerċ internazzjonali li qed jiżviluppa b’mod mgħaġġel. L-isfidi speċifiċi ta’ ġestjoni li dawn iġibu magħhom, u r-riskji involuti, huma l-fokus tal-verifika tal-Qorti.

11.

Il-verifika kopriet proġetti bilaterali, u ż-żewġ tipi ta’ programmi reġjonali: dawk li jkopru l-Ażja kollha (programmi għall-Ażja kollha) u dawk li jkopru sub-reġjuni (programmi ASEAN), b’aktar attenzjoni fuq l-ewwel wieħed.

12.

Il-mira ta’ din il-verifika kienet li tevalwa l-ġestjoni tal-Kummissjoni ta’ l-attivitajiet ta’ koperazzjoni ekonomika fl-Ażja, billi teżamina:

13.

In-nefqa fuq il-proġetti individwali kienet ivverifikata fit-tliet pajjiżi benefiċjarji — l-Indja, il-Vjetnam u ċ-Ċina — li tirrappreżenta (ara Tabella 2) 67 % tal-proġetti bilaterali kollha, kif ukoll porzjoni sinifikanti tal-proġetti ta’ l-Ażja (50 %, ara Tabella 3).

14.

Il-kampjun tal-proġetti bilaterali għal verifika dettaljata kopra t-tipi differenti ta’ programmi u proġetti dwar il-koperazzjoni ekonomika, filwaqt li ħalla l-kwistjonijiet prinċipali ta’ ġestjoni biex ikunu identifikati. Il-kampjun kien fih l-aktar proġetti li għadhom għaddejjin, imma numru ta’ proġetti lesti kienu verifikati wkoll (ara Tabella 4). 14-il proġett bilaterali kienu verifikati fid-dettall, li jirrappreżentaw 37 % ta’ din it-tip ta’ nefqa f’pajjiżi magħżula (ara Tabella 5). Mill-proġetti għall-Ażja kollha, 39 kienu verifikati fid-dettall, li jirrappreżentaw 25 % tal-valur totali tagħhom (ara Tabella 6). Il-lista kollha tal-proġetti Asia Invest u Asia IT & C verifikati tidher fit- Tabella 7.

15.

Il-verifika tal-Qorti inkludiet ukoll żjarat lill-Organizzazzjoni għall-Ġestjoni tal-Proġetti (PMOs), u sħab Ewropej fil-Ġermanja, Spanja, Franza u r-Renju Unit u sħab Ażjatiċi u l-PMOs fl-Indja, il-Vjetnam u ċ-Ċina. Missjoni preliminari twettqet ukoll fit-Tajlanda.

16.

Il-Qorti eżaminat sa fejn il-Kummissjoni stabbiliet strateġija li twassal għall-użu l-aktar effettiva tan-nefqa għall-koperazzjoni ekonomika. Din involviet li jiġi determinat jekk strateġija ċara kienitx stabbilita, tivvaluta sa fejn din ser twassal għal użu effettiv ta’ l-għajnuna, u tiġġudika l-applikazzjoni tagħha fil-prattika.

17.

Strateġija tista’ tkun distinta bejn politika ta’ strateġija — li tirriżulta f’deċiżjoni li tagħti appoġġ lil settur jew suġġett magħżul — u strateġija operattiva, li tistabbilixxi kif il-politika ta’ strateġija għandha titpoġġa fil-prattika. F’dan il-każ, ir-riżultat tad-deċiżjoni li ssostni l-koperazzjoni ekonomika fl-Ażja kienet inkluża fir-Regolament AAL tal-Kunsill (KEE) Nru 443/92 (li jkopri l-għajnuna kollha għall-iżvilupp fl-Ażja u l-Amerika Latina). Dan jistabbilixxi l-miri prinċipali u jipprovdi lista tas-setturi fuq liema l-flus għandhom jintnefqu. L-iskop ta’ strateġija operattiva huwa li jiġi stabbilit kif dawn il-miri għandhom jintlaħqu, u tipprovdi direzzjoni u fokus għan-nefqa.

18.

Il-kunċett ta’ koperazzjoni ekonomika kien formalizzat mir-regolament AAL (ara l-paragrafu 3). L-Artikolu 7 jistabbilixxi l-mira li tingħata għajnuna lill-pajjiżi li qed jiżviluppaw “jibnu l-kapaċità istituzzjonali tagħhom biex jinħoloq ambjent iktar favorevoli għall-investiment u l-iżvilupp (…) tagħmel l-iżjed possibli mill-prospetti li jinfetħu bit-tkabbir tal-kummerċ internazzjonali, inkluż is-suq uniku Ewropew.” Il-Pajjizi Membri huma wkoll mistennija li jibbenefikaw billi “…żżid ir-rwol tan-negozjanti, teknoloġija u t-tagħrif mill-Pajjiżi Membri kollha, partikolarment fis-settur privat u fl-impriżi żgħar u ta’ daqs medju”. Dawn huma miri wiesgħa fi sfond immexxi minn suq li qed jiżviluppa b’mod mgħaġġel, dominat b’żieda fin-negozju internazzjonali. L-inklużjoni tal-pajjiżi li qed jiżviluppaw u tal-Pajjiżi Membri ta’ l-UE bħala sħab ikabbar l-iskop ta’ l-għajnuna, li jsaħħaħ il-bżonn għall-iffukar bi ħsieb.

19.

L-Artikolu 8 jistabbilixxi t-tlett setturi fejn l-għajnuna ser tintefaq. L-ewwel hija, “titjib tal-potenzjal xjentifiku u teknoloġiku u ta’ l-ambjent ekonomiku, soċjali u kulturali in ġenerali permezz ta’ skemi ta’ taħriġ u t-trasferiment ta’ tagħrif”, li huwa“… direttata prinċipalment għall-eżekuttivi, nies li jieħdu deċiżjonijiet ekonomiċi u għandha tkopri kull qasam ekonomiku, tekniku, u xjentifiku..”. It-tieni settur huwa “titjib ta’ l-istruttura istituzzjonali … biex tinħoloq klima ekonomika, leġiżlattiva, amministrattiva u soċjali li tikkontribwixxi iżjed għall-iżvilupp”. It-tielet hija “appoġġ għall-impriżi permezz tal-promozzjoni tal-kummerċ, it-taħriġ u skemi ta’ għajununa teknika …. billi tistabbilixxi kuntatti bejn impriżi u skemi biex tiffaċilita koperazzjoni bejniethom”.

20.

Il-miri ta’ l-Artikolu 8 tar-Regolament AAL huma ta’ natura globali u b’sensiela estremament wiesgħa, kif ukoll numru għoli ta’ benefiċjarji potenzjali u proġetti. Għalhekk, mingħajr mira speċifika fil-qafas ta’ l-għajnuna fi strateġija ta’ implimentazzjoni approprjata, hemm ir-riskju li l-progress u l-impatt ġenerali tan-nefqa ma jistax jitkejjel, u b’hekk m’hemmx bażi li tiġi assigurata ġestjoni finanzjarja tajba tal-fondi ta’ l-UE. Barra minn hekk, l-Ażja hija reġjun enormi — li tinkludi tlieta minn ħames pajjiżi l-aktar popolati tad-dinja, u r-raba’ l-akbar ekonomija tagħha — li qed tiżviluppa b’mod mgħaġġel kemm f’termini ekonomiċi u dawk ta’ żvilupp ġenerali.

21.

L-istrateġija ġenerali tal-Kummissjoni lejn l-Ażja hija stabbilita fil-Komunikazzjoni tagħha lill-Kunsill tas-sena 1994 “Lejn strateġija ġdida Ażjatika (11)”, aġġornata fl-2001 fil-Komunikazzjoni “Qafas strateġiku biex Jissaħħu r-Relazzjonijiet ta’ Sħubija Ewropa-Ażja (12)”.

22.

Il-Komunikazzjoni ta’ l-1994 tagħraf il-bidliet radikali u t-tkabbir mistenni tar-reġjun Ażjatiku, u li għalhekk l-Unjoni għandha bżonn urġentament issaħħaħ il-preżenza ekonomika tagħha fl-Ażja sabiex iżżomm ir-rwol prinċipali tagħha fid-dinja ekonomika…u tassigura li l-interessi tagħha jittieħdu in konsiderazzjoni b’mod sħiħ hemmhekk. Is-suċċess ta’ l-Ewropa jiddependi l-biċċa l-kbira fuq deċiżjonijiet meħuda mis-settur privat, bl-irwol ta’ l-Unjoni biex tegħleb xkiel għas-suq u investiment Ewropej billi jinkoraġixxi ambjent regolatorju favorevoli għan-negozju fl-Ażja. Dan jeħtieġ aktar strateġiji li jħeġġu l-attività għal perjodu twil: b’aktar enfasi u użu aktar iffukat ta’ koperazzjoni ekonomika sabiex tippromovi kummerċ u investiment Ewropew. Għalhekk l-enfasi hija fuq il-protezzjoni ta’l-influwenza ta’l-UE, u l-opportunitajiet tas-suq għall-kumpaniji Ewropej, filwaqt li jiġu żviluppati l-ekonomiji tal-pajjiżi benefiċjarji Ażjatiċi.

23.

In-natura speċifika tal-koperazzjoni ekonomika hija rikonoxxuta mill-Komunikazzjoni, u deskritta bħala li ttejjeb in-negozju u l-ambjent regolatorju fil-pajjiżi msieħba sabiex tistimula s-suq u l-investiment fuq iż-żewġ naħat b’parteċipazzjoni diretta tas-settur privat għall-benefiċċju kemm ta’ l-Unjoni kif ukoll tal-Pajjiż imsieħeb. Għalhekk, il-koperazzjoni ekonomika hija ta’ natura kwalitattiva differenti mill-koperazzjoni finanzjarja u teknika li tifforma l-parti l-kbira tan-nefqa ta’ l-UE fil-qasam ta’ l-azzjonijiet esterni. Għalhekk teħtieġ attenzjoni speċifika biex tirrifletti n-natura u l-karatteristiċi speċjali ta’ l-għajnuna. Dan ma kienx evidenti fid-dokumenti strateġiċi.

24.

Il-Komunikazzjoni tas-sena 2001 taġġorna dik tas-sena 1994, bl-iskop li tiffissa qafas ta’ strateġija komprensiva għar-relazzjonijiet tagħna ma’ l-Ażja u r-sub-reġjuni tagħha fl-għaxar snin ġejjin. Fil-każ tal-koperazzjoni ekonomika, il-mira prinċipali hija definita bħala li ssaħħaħ il-preżenza politika u ekonomika ta’ l-UE tul ir-reġjun … billi issaħħaħ aktar il-kummerċ bejniethom u ċ-ċirkolazzjoni tal-benefiċċji mar-reġjun. Għal darba oħra, il-fokus huwa fuq il-benefiċċji għall-UE, kif ukoll il-miri ta’ l-iżvilupp tal-pajjiżi benefiċjarji.

25.

Il-Komunikazzjoni tirrikonoxxi r-riżorsi limitati disponibbli, u tgħid li l-Kummissjoni għandha tiffukhom fuq numru inqas ta’ attivitajiet eħfef immirati għall- prijoritajiet prinċipali … u tassigura li dawn l-attivitajiet huma implimentati b’ħeffa u effettivament. Is-suċċess ta’ l-għajnuna fuq il-bażi ta’ ċerti indikaturi sempliċi (jekk għall-aktar parti kwalittativi) … bħall-evoluzzjoni tar-relazzjonijiet tas-suq u investiment ta’ l-UE ma’ l-Ażja. Il-Qorti ma sabet l-ebda evidenza ta’ l-għajnuna li kienet immirata lejn numru żgħir ta’ prijoritajiet prinċipali (ara l-paragrafu 35), u l-indikaturi ta’ impatt u tar-riżultat sa minn meta twaqqfu mill-Kummissjoni huma bbażati fuq il-proċess aktar milli fuq ir-riżultat (ara l-paragrafi 32-33).

26.

Il-Komunikazzjoni tenfasizza li l-għajnuna ekonomika għandha tkun “modulari”, jiġifieri mmirata speċifikament għaċ-ċirkostanzi u bżonnijiet tal-pajjiżi individwali. Għalhekk, id-Dokumenti ta’ Strateġija tal-Pajjiż (CSP), li huma maħsuba li jkopru l-bżonnijiet ta’ żvilupp kollha, għandhom jistabbilixxu l-istrateġija speċifika ta’ koperazzjoni ekonomika. Fil-prattika dan ma kienx il-każ: l-aspett ekonomiku tal-CPSs tat-tlett pajjiżi verifikati fid-dettall — l-Indja, il-Vjetnam u ċ-Ċina — kien inadegwatament distint mill-kwistjoniet ta’ żvilupp ġenerali, insuffiċjenti fid-dettal u kontenut, u għalhekk ma provdiex strateġija prattika sabiex torjenta l-għajnuna.

27.

Il-Kummissjoni tenfasizza fil-Komunikazzjonijiet tagħha l-bżonn għal dimensjoni reġjonali fil-proġetti biex tippromovi koperazzjoni reġjonali. Għalkemm, mhuwiex mistenni min-natura tagħhom li l-proġetti bilaterali għandu jkollhom fokus reġjonali, fil-prattika, ftit minnhom kienu hekk. Għall-proġetti individwali għall-Ażja kollha, u l-programmi fit-totalità tagħhom, dan ħafna drabi ma kienx il-każ.

28.

Sa mill-2001, il-Kummissjoni kienet progressivament qed tintroduċi l-approċċ ta’ ġestjoni tagħha — Ġestjoni bbażata fuq Attività (ABM) — maħsuba biex ittejjeb il-mod kif ir-riżorsi huma mogħtija prijorità, użati u rappurtati dwarhom. L-ABM hija l-mod kif il-Kummissjoni tpoġġi l-istrateġija operattiva tagħha fil-prattika. Baġit ibbażat fuq Attività (ABB) huwa l-komponent tal-baġit ta’ l-ABM. Il-baġit ta’ l-2004 kien l-ewwel li kien adottat wara l-approċċ ABB. L-allokazzjoni ta’ riżorsi għandha tkun konsisteni mal-prijoritajiet politiċi, u l-ġestjoni ta’ riżorsi konsistenti ma’ miri determinati minn qabel. Fl-istruttura tal-baġit ir-“relazzjonijiet ma’ l-Ażja” huma definiti bħala attività distinta (kapitolu tal-baġit 19.10), u “Koperazzjoni politika, ekonomika u kulturali ma’ pajjiżi li qed jiżviluppaw ta’ l-Ażja” huwa l-artikolu tal-baġit (minn ħamsa) li għandu x’jaqsam mal-koperazzjoni ekonomika.

29.

Għal kull eżerċizzju tal-baġit dikjarazzjoni ta’ attività hija ppreparata biex tagħti appoġġ u tiġġustifika l-approprjazzjonijiet tal-baġit mitluba, tniżżel il-miri speċifiċi u l-indikaturi tar-riżultati u ta’ l-impatt. Fil-każ ta’ l-Abbozz Preliminari tal-Baġit għas-sena 2004, id-dikjarazzjonijiet ta’ attività kienu ppubblikati kmieni fl-2004 (13). Il-Qorti eżaminat id-dikjarazzjoni ta’ attività għar-relazzjonijiet ma’ l-Ażja fir-rigward ta’ attivitajiet ta’ koperazzjoni ekonomika u vvalutat il-loġika u koerenza tagħha, ir-relevanza tal-miri u l-utilità ta’ l-indikaturi.

30.

Parti 3 tad-dikjarazzjoni ta’ attività tistabbilixxi l-miri l-aktar importanti ta’ l-attività kif stabbilita fil-Komunikazzjoni 2001- biex issaħħaħ il-preżenza politika u ekonomika ta’ l-UE tul ir-reġjun … — flimkien ma’ sitt prijoritajiet. Il-prijorità li tirrigwardja l-koperazzjoni ekonomika hija li ssaħħaħ is-suq komuni u ċ-ċirkolazzjoni ta’ l-investiment mar-reġjun.

31.

Parti 4 tad-dikjarazzjoni ta’ attività tistabbilixxi miri speċifiċi, indikaturi, riżultati tal-proġett u riżultati ta’ l-attività. Din tifforma l-bażi operattiva għall-immirar, monitoraġġ u valutazzjoni ta’ l-implimentazzjoni tan-nefqa ta’ l-UE, b’hekk tassigura ġestjoni finanzjarja soda. Il-koperazzjoni ekonomika mhiex mira ta’ l-ABM, imma hija inkluża fir-raba’mira: Fil-kuntest tal-qafas politiċi miftehma, biex issaħħaħ djalogu u koperazzjoni ma’ sħab Ażjatiċi fl-oqsma politiċi, ekonomiċi u kulturali. Din hija ddikjarata bħala relatata mal-mira strateġika biex tippromovi l-iżvilupp sostenibbli, ekonomiku u soċjali tal-pajjiżi li qed jiżviluppaw, li la jirriflettu l-mira l-aktar importanti, lanqas il-prijoritajiet relatati (ara l-paragrafu ta’ qabel).

32.

Indikatur ta’ impatt wieħed biss huwa provdut: Dikjarazzjonijiet konġunti, pożizzjonijiet u aġendi komuni fuq kwistjonijiet ta’ livell internazzjonali importanti, politiċi u ekonomiċi li jirriżultaw minn laqgħat fuq livell ministerjali u ta’ Summit ta’ l-ASEM fis-sena 2004 (14). Filwaqt li din issegwi b’mod wiesgħa l-miri ABM, ma tkejjilx l-impatt ta’ l-għajnuna, li ħafna minnu huwa minfuq fuq proġetti żgħar, lanqas il-prijorità prinċipali tal-kummerċ komuni u ċ-ċirkolazzjoni ta’ investiment (skond in-natura tagħha hija kemm objettiva u tista’ tiġi mkejla).

33.

L-indikaturi tal-produzzjoni, fir-rigward tas-sena finanzjarja 2004 (li minnhom hemm disgħa), il-biċċa l-kbira jkopru parteċipazzjoni fil-laqgħat jew kumitati, li jistgħu jirriflettu l-ħsibijiet politiċi u azzjoni importanti, imma wkoll mhumiex il-mira jew l-għan prinċipali tan-nefqa. Barra minn dan, l-indikaturi jikkonċernaw l-aktar il-proċess — laqgħa fis-seħħ — aktar milli l-produzzjoni tiegħu — ir-riżultati mistennija.

34.

In-nuqqas ta’ strateġiji operattivi speċifiċi kemm fil-Kummissjoni kif ukoll fil-livell tal-pajjiż speċifiku irriżultaw fil-prattika f’sensiela wiesgħa ħafna u varjetà ta’ proġetti fuq żona ġeografika wiesgħa (ara l-paragrafi 39 u 50). In-nuqqas ta’ immirar, fl-isfond ta’ l-ekonomiji kbar li qed jikbru ta’ l-Ażja, il-kummerċ internazzjonali li qed jiżdied u investiment sinifikanti barra mill-pajjiż ta’ l-Ażja, ifisser li l-impatt ġenerali ta’ l-għajnuna huwa diffiċli biex jitkejjel jew jiġi ġestit b’mod attiv. Għalhekk, hemm biss bażi limitata li tivvaluta l-effettività tan-nefqa, jew jekk il-valur għall-flus intlaħaqtx.

35.

Strateġija operattiva inadegwata u inkonsistenti tirriżulta minħabba n-natura speċifika ħafna tal-koperazzjoni ekonomika, li hija maħsuba biex tibbenefika sħab ta’ l-UE bl-istess mod bħal dawk fl-Ażja. Tassew, il-mira prinċipali tat-tisħiħ tal-kummerċ u ċ-ċirkolazzjoni ta’ investiment tistrieħ ħafna fuq inizjattivi politiċi, bħal permezz ta’ negozjar fuq bażi bilaterali jew multilaterali (e.ż. l-Organizzazzjoni Dinjija tal-Kummerċ). Fil-prattika, l-użu ta’ qafas ta’ għajnuna għall-iżvilupp immirat madwar proġetti żgħar f’pajjiżi sinjuri li qed jiżdiedu fil-ġid (meta mqabbla mal-proġetti bilaterali akbar) għandha ftit impatt li jista’ jitkejjel fuq li jintlaħqu l-miri ġenerali. Barra minn hekk, id-dinja kummerċjali tal-merkanzija u servizzi bl-IT li qed jevolvu b’mod mgħaġġel, ma tistax tkun ikkunsidrata b’mod effettiv permezz tal-proċeduri tradizzjonali u relattivament twal tal-preparazzjoni, approvazzjoni u implimentazzjoni tal-proġett użati għall-għajnuna għall-iżvilupp.

36.

Sabiex tikkonkludi fuq din il-mira ta’ verifika, il-Qorti eżaminat sa fejn il-ġestjoni tal-Kummissjoni:

37.

Attivitajiet ta’ koperazzjoni ekonomika jikkonsistu f’żewġ approċċi differenti ta’ implimentazzjoni: proġetti bilaterali bejn il-Kummissjoni u l-pajjiżi imsieħba, u programmi għall-Ażja kollha (ara l-paragrafi 38 u 50). Minħabba n-natura differenti tagħhom, u xi drabi l-kwistjonijiet speċifiċi involuti, ir-rapport jirrappreżenta s-sejbiet tiegħu fuq iż-żewġ approċċi separatament.

38.

Għall-proġetti bilaterali Ftehim ta’ Finanzjament huwa konkluż bejn il-Kummissjoni u l-gvern benifiċjarju. Qabel l-introduzzjoni tar-Regolament Finanzjarju kurrenti, il-proġetti kienu normalment implimentati minn Organizzazzjoni għall-Ġestjoni tal-Proġett (PMO), ħafna drabi mmexxija kemm minn ko-diretturi Ewropej kif ukoll Ażjatiċi.

Kaxxa 1 — Eżempji ta’ proġetti u l-miri tagħhom

39.

Fil-pajjiżi verifikati kien hemm varjetà ta’ proġetti bilaterali ta’ koperazjoni ekonomika (ara Tabella 4 għal dettalji kompleti) bl-ebda fokus fuq settur jew tema partikolari. F’ħafna każijiet il-proġetti kienu allokati biss fondi relattivament limitati biex jindirizzaw għanijiet ta’ sfida f’ pajjiżi estremament kbar u popolati. Ġeneralment, il-proġetti taw l-opportunità għal djalogu kontinwu fuq il-koperazzjoni ekonomika imma l-impatt tal-proġetti innifshom kien f’ħafna każijiet mhux sinifikanti s’issa (ara l-paragrafu 44).

40.

Fid-dinja, li qed tiżviluppa b’mod mgħaġġel, ta’ koperazzjoni ekonomika ma’ l-Ażja, huma imperattiv li l-proġetti jkunu pjanati, approvati u implimentati fl-iqsar żmien possibli. Dewmien mhux neċessarju jwassal għar-riskju li l-proġetti ma jkunux meħtieġa aktar, jew għall-bżonn li jiġu formulati b’mod sinifikanti, ikun hemm bidla fis-suppożizzjonijiet ta’ l-ispejjeż ta’ bażi u l-impenji ta’ baġit ikunu marbuta b’mod mhux neċessarju. Ir-riżultat huwa li l-proċess isir aktar diffiċli u jqum il-flus biex jiġi ġestiet, u l-proġetti jkunu inqas effettivi.

41.

Proġetti bilaterali huma identifikati fuq bażi ta’ każ b’każ, milli permezz ta’ proċedura standarizzata ta’ applikazzjoni (15). Minħabba n-natura tal-proċessi l-ħin meħud bejn l-identifikazzjoni ta’ proġett u li l-proġett jibda’ l-implimentazzjoni jista’ jkun sinifikanti. Il-verifika eżaminat sa fejn il-proġetti kienu soġġetti għal dewmien mhux neċessarju.

42.

Il-proġetti kollha verifikati soffrew minn dewmien twil qabel l-implimentazzjoni għal raġunijiet varji: organizzazzjonijiet mill-ġdid u bidliet tal-persunal fis-servizzi ċentrali tal-Kummissjoni fi Brussel, konfużjoni bejn is-servizzi ċentrali tal-Kummissjoni u d-Delegazzjonijiet tagħha fuq responsabbilitajiet wara d-devoluzzjoni, proċeduri kumplessi, problemi bl-istrutturi magħżula għall-proġetti, u diffikultajiet fir-reklutaġġ ta’ esperti ta’ l-UE kwalifikati b’mod xieraq u bl-esperjenza.

Kaxxa 2 — Dewmien qabel l-implimentazzjoni

43.

Dewmien sinifikanti seħħ ukoll matul l-implimentazzjoni ta’ għaxar minn 14 -il proġett verifikat. Hemm kemm numru ta’ kawżi: il-kumplessità mhux neċessarja tal-proġetti; nuqqas ta’ esperjenza tal-PMO; bidliet frekwenti fil-persunal tal-Kummissjoni; problemi fil-ftehim kuntrattwali u proċeduri bil-mod.

Kaxxa 3 — Dewmien matul l-implimentazzjoni

44.

Sabiex jiġi valutat il-progress u s-suċċess tal-proġett, miri approprjati għandhom jiġu stabbiliti mill-bidu. Fil-prattika, l-Qorti sabet li miri tal-proġetti, per eżempju n-numru ta’ persuni li jridu jitħarrġu għal livell definit, ħafna drabi ma kienux stabbiliti b’mod ċar, u, għalhekk, ma kienx hemm bażi objettiva biex jiġu ġudikati r-riżultati jew l-eżekuzzjoni. Il-Qorti sabet, meta bbażat il-ġudizzju tagħha fuq kriterji eżistenti jew elaborati għaċ-ċirkostanzi, li ċerti proġetti kienu b’mod ċar bla suċċess, filwaqt li oħrajn kienu ta’ suċċess.

Kaxxa 4 — Miri tal-proġetti mhux milħuqa

Kaxxa 5 — Proġetti ta’ Suċċess

45.

Monitoraġġ effettiv jinvolvi s-segwitu tal-progress segwenti, tidentifika l-problemi u tieħu azzjoni korrettiva fil-ħin. Dan għandu jkun dokumentat b’mod xieraq sabiex jiġi reġistrat ix-xogħol li sar u kwalunkwe azzjoni meħuda sussegwentament. Il-Qorti vvalutat il-kwalità tal-monitoraġġ tal-Kummissjoni għal kull wieħed mill-proġetti magħzula. Il-Ftehim ta’ Finanzjament jistipulaw li l-PMO għandhom jagħtu lill-Kummissjoni rapporti regolari fuq il-progress ta’ l-implimentazzjoni tal-proġett. Ħafna mill-proġetti jistabbilixxu sistemi biex ikejjlu u jimmonitoraw il-progress u jipprovu bażi għar-rapporti ta’ progress, li, dawn, huma reveduti u valutati mill-Kummissjoni.

46.

Il-monitoraġġ mill-Kummissjoni ma kienx dejjem konsistenti jew komplement ta’ suċċess. F’ċerti każijiet ma kienx biżżejjed, li rriżulta bi problemi li ma kinux identifikati, filwaqt li f’oħrajn kien hemm ħafna ndħil fit-tmexxija ta’ kuljum tal-proġett. Dawn ifixklu l-implimentazzjoni, ikun hemm riskji li ma jiġux identifikati problemi f’livell għola u huwa użu mhux effettiv tar-riżorsi skarsi tal-Kummissjoni. Anke meta jitwettaq monitoraġġ mhux dejjem ikun hemm evidenza ta’ xi jkun sar.

Kaxxa 6 — Monitoraġġ inkonsistenti

47.

Il-proġetti kollha finanzjati mill-UE huma maħsuba biex ikunu sostenibbli: attività hija kkunsidrata sostenibbli meta hija kapaċi twassal benefiċċji lil grupp immirat għal perjodu ta’ żmien estiż wara li l-għajnuna prinċipali spiċċat. Dan jista’ jintlaħaq billi l-proġett isir iffinanzjat minnu innifsu jew minn impenn li jitkompla mill-gvern ta’ pajjiż benefiċjarju. Il-Qorti eżaminat jekk il-proġetti abbozzawx pjan ta’ sostenibilità u tawx attenzjoni adegwata lill-kwistjoni ta’ sostenibilità matul iż-żmien tal-proġett. Fil-prattika, sostenibilità ħafna drabi tiddependi fuq progress suffiċjenti milħuq tul iż-żmien tal-proġett: żmien suffiċjenti għandu jingħata biex jintlaħqu l-miri għaliex proġett mhux lest is-soltu ma jkunx sostenibbli. F’sitta minn 14-il proġett verifikat, il-potenzjal għal sostenibilità kien dubjuż.

Kaxxa 7 — Sostenibilità

48.

Il-valutazzjoni hija element essenzjali ta’ l-approċċ tal-Kummissjoni għal ġestjoni finanzjarja tajba u tinvolvi ġudizzju ta’ intervenzjonijiet skond ir-rizultati tagħhom, l-impatti tagħhom u l-bżonnijiet li huma jimmiraw li jissodisfaw (16). Hija maħsuba biex tivvaluta sa fejn intlaħqu l-miri u tispjega mekkanismi kawżali ta’ bażi.[Il-valutazzjoi tista’ sseħħ kemm fil-livelli ta’ proġett individwali kif ukoll ta’ programmi ġenerali]. Problemi jew nuqqasijiet identifikati kemm fil-maniġment kif ukoll fir-riżultati għandhom jiffurmaw il-bażi għal azzjoni korrettiva mill-Kummissjoni.

49.

Il-Ftehim ta’ Finanzjament għall-proġetti bilaterali verifikati ma provdewx sistematikament għal valutazzjonijiet indipendenti u ma kienx hemm evidenza tal-kriterja użata biex tiddeċiedi liema proġetti għandhom ikunu valutati. Anke meta l-valutazzjonijiet kienu provduti mhux dejjem saru fil-ħin b’hekk naqqsu jew ukoll ċaħdu, l-effettività tagħhom.

Kaxxa 8 — Nuqqasijiet fil-valutazzjonijiet tal-proġetti

50.

Il-programmi għall-Ażja kollha (ara l-paragrafi 5, 7-9) huma maqsuma f’numru ta’ strumenti jew komponenti li fihom jsiru numru kbir ta’ proġetti ta’ valur żgħir. Proġetti tipiku huwa 100 000-200 000 euro u jinvolvi ko-finanzjament minn sħab Ażjatiċi jew Ewropej li jipprovdu 50 % tal-fondi. Il-proġetti huma ffinanzjati fuq talba fejn l-applikanti jagħmlu t-talba tagħhom ta’ finanzjament f’għamla ta’ proposti. Dan wassal għal finanzjament ta’ sensiela differenti ta’ proġetti. Għal lista kompluta ara Tabella 7.

Kaxxa 9 — Eżempji ta’ proġetti għall-Ażja kollha

51.

Il-proċeduri ta’ applikazzjoni għandhom jipprovdu bażi suffiċjenti għall-għażla ta’ proġetti l-aktar effettivi u jipproteġu l-interessi finanzjarji tal-Komunitajiet, filwaqt li ma jżommux lura applikanti potenzjali minħabba proċeduri kumplessi żejda u ħtiġijiet mhux neċessarji. Għall-programmi Asia Invest u Asia IT & C kien hemm sejħa għall-proposti darbtejn fis-sena taħt liema l-applikanti ssottomettew prosposti ta’ proġett li l-Kummissjoni imbagħad tivvaluta. Il-proċess ta’ applikazzjoni huwa formalizzat: applikazzjoni standarizzata għandha timtela, li tinkludi, baġit dettaljat u Dikjarazzjoni ta’ Sħubija taħt liema s-sħab differenti jaqblu mal-prinċipji ta’ prattika ta’ sħubija tajba.

52.

Il-Kummissjoni tipprovdi linji ta’ gwida ċari u dettaljati għall-applikanti, inklużi tmien annessi ta’ spjega. Madankollu li tilħaq il-ħtiġijiet tal-proċedura ta’ applikazzjoni huwa mifhum li ser ikun diffiċli għal applikanti mingħajr esperjenza. Għalkemm ħafna mis-sħab sabu d-dokumenti ta’ gwida ta’ għajnuna, dettaljati u loġiċi biex isegwu, għaxra minn disgħa u tletin proġett sabuhom diffiċli biex jifhmu u jikkonformaw magħhom. Għall-applikanti, il-preparazzjoni, il-ġbir u l-kumpilazzjoni ta’ l-informazzjoni kollha meħtieġa tieħdilhom ħafna ħin u għalhekk tiswa’ l-flus, partikolarment jekk din trid tkun tradotta.

53.

Sħab Ażjatiċi ltaqgħu ukoll ma’ problemi biex jipprovdu l-istatuti u/jew artikoli ta’ assoċjazzjoni kif meħtieġ mill-proċedura ta’ applikazzjoni, partikolarment għax f’ċerti pajjiżi Ażjatiċi tali dokumenti lanqas jeżistu f’din l-għamla. Il-fatt li arranġamenti legali bejn il-partijiet iridu jkunu kuntrattati meta dawn japplikaw għall-proġett kienet ukoll diffikultà. Sħab Ażjatiċi spjegaw ir-riluttanza tagħhom biex jidħlu f’ tali arranġamenti qabel ma jkunu jafu jekk l-applikazzjoni hijiex ser tkun ta’ suċċess.

54.

Għalkemm il-programm huwa mmirat lejn is-settur privat li jopera fl-ambjent orjentat għall-kummerċ, l-għajnuna tista’ tkun imħallsa biss lill-intermedjari ta’ negozji mingħajr profitt li jippromwovu suq u investiment bejn il-UE u l-Ażja, jiġifieri organizzazzjonijet pubbliċi u li ma jagħmlux profitt, jew amministrazzjonijiet lokali. Fil-prattika, il-proġetti huma ta’ spiss ma’ assoċjazzjonijiet jew organizzazzjonijiet tan-negozju li fit-teorija ma jagħmlux profitt imma huma finanzjati minn kumpaniji tas-settur privat biex ikomplu l-miri kummerċjali. Dan l-isforz rigward l-iffinanzjar jista’ jwassal għar-riskju li jiġu esklużi proġetti potenzjalment ta’ valur bħal dawn li jinvolvu sħab diretti fin-negozju li, minħabba s-segretezza kummerċjali, jistgħu ma jkunux iridu jużaw intermedjarji jew assoċjazzjonijiet ta’ negozju.

Kaxxa 10 — Proċedura ta’ applikazzjoni

55.

Ir-rwol tad-Delegazzjonijiet li jassistu applikanti potenzjali bil-proposti mhux definit b’mod ċar. Għajnuna aktar immirata għandha tinkoraġixxi numru akbar ta’ applikazzjonijiet, tħaffef il-proċess ta’ applikazzjoni, ittejjeb il-kwalità ta’ l-applikazzjonijiet u tgħin tkabbar il-potenzjal tal-proġetti. Madanakollu, l-għajnuna mogħtija ma għandiex tikkomprometti l-objettività tar-rwol tad-Delegazzjonijiet li jivvalutaw jew japprovaw il-proposti, lanqas tagħti l-impressjoni li l-għajnuna tad-Delegazzjonijiet tagħti dritt għal approvazzjoni.

56.

Fil-prattika d-Delegazzjonijiet ma jagħtu l-ebda għajnuna, imma r-rwol tagħhom fil-valutazzjoni u approvazzjoni ta’ proġetti huwa limitat li jagħmlu kummenti fuq il-proposti lil kumitat ta’ valutazzjoni fis-servizzi ċentrali tal-Kummissjoni fi Brussell. Għalhekk, benefiċjarji potenzjali u attwali tal-programmi ta’ l- UE qed ikunu miċħuda għajnuna prezzjuża biex jaffrontaw proċess kumpless, b’hekk jiżdiedu d-dewmien u n-nuqqasijiet fl-applikazzjonijiet u probabilment ċerti applikanti qed jiġu skoraġġati.

57.

Għalkemm tmienja mill-proġetti verifikati kienu għadhom fl-istadju inizjali u allura kien għadu kmieni biex jiġu valutati r-riżultati tagħhom, fi tmienja u għoxrin każ il-proġetti wrew progress sostanzjali u riżultati siewja. Il-proġetti verifikati ma kellhomx dewmien kbir u ffaċċjaw b’mod tajjeb problemi esterni, bħal SARS u inċertezzi politiċi. Filwaqt li jittieħed in konsiderazzjoni l-valur monetarju baxx tal-proġetti individwali Asia Invest u Asia IT & C, in-numru ta’ benefiċjarji li laħqu kien konsiderevoli.

Kaxxa 11 — Proġetti ta’ suċċessProġett ta’ 100 000 euro biex isaħħaħ il-kapaċità tas-servizzi ta’ konsulenza fl-inġenierija fil-Vjetnam, bi ħsieb li jtejjeb il-preparazzjoni ta’ proġetti u s-supervizzjoni ta’ xogħol fuq il-post, ħarreġ 600 persuna fi tlett modules ta’ taħriġ indipendenti, ta’ madwar ġimgħatejn il-wieħed.

58.

Is-sistemi ta’ monitoraġġ regolari mtella’ għall-programmi Asia Invest u Asia IT & C ħadmu tajjeb ħafna. Is-sħab provdew rapporti kull tlett xhur u dawn kienu eżaminati minn timijiet imwaqqfa mill-Kummissjoni, li jagħmlu kummenti qosra bil-miktub fuq ir-rapporti. Iż-żewġ timijiet jibgħatu nota sabiex ifakkruhom meta r-rapporti jkunu tard. Ħafna mill-benefiċjarji esprimew livell għoli ta’ sodisfazzjoni bil-monitoraġġ regolari mit-timijiet fi Brussell u/jew Bangkok. Il-benefiċjarji apprezzaw b’mod partikolari il-monitoraġġ tal-programm Asia IT & C għaliex it-tim dejjem ta feedback, kemm pożittiv kif ukoll negattiv, fuq ir-rapporti kollha ta’ progress, filwaqt li l-programm Asia Invest ħafna drabi kkuntattja s-sħab biss meta kien hemm problemi.

59.

Bħala parti mill-proċedura ta’ applikazzjoni l-applikanti huma mistennija li jagħtu informazzjoni dwar il-pjanijiet tagħhom ta’ sostenibilità. Ħafna mill-proġetti verifikati fl-Ewropa kienu stabbilew pjan ta’ sostenibilità bħala parti mit-tfassil tal-proġett imma ma kienx dejjem ċar jekk is-sostenibilità ser tkunx assigurata. F’ċerti każijiet il-proġetti kienu ddisinjati fuq is-suppożizzjoni li ser ikun hemm fażi oħra iffinanzjata mill-UE, li tfisser, b’definizzjoni, li l-proġett mhux sostenibbli.

Kaxxa 12 — Sostenibilità

60.

Il-koperazzjoni ekonomika hija qasam speċifiku relattivament ġdid tal-programmi ta’ żvilupp tal-KE. Filwaqt li l-istrateġija għall-koperazzjoni ekonomika hija stabbilita f’numru ta’ sorsi differenti, hemm ftit konsistenza. Din hija maħsuba biex tgħin l-iżvilupp ta’ l-ekonomiji tal-pajjiżi Ażjatiċi infushom, filwaqt li żdiedet l-influwenza u n-negozju ta’ l-UE. Hija mmirata lejn il-pajjiżi Ażjatiċi l-inqas żviluppati, kif ukoll lejn dawk bl-ekonomiji aktar żviluppati (ara l-paragrafi 16-27).

61.

Il-Qorti tirrikkmanda l-Kummissjoni biex tistabbilixxi, fil-kuntest ta’ koperazzoni ta’ żvilupp ġenerali, strateġija konsistenti għall-koperazzjoni ekonomika li tagħraf in-natura speċifika ħafna ta’ l-għajnuna u l-għan tagħha, tagħmel distinzjoni ċara bejn il-miri li jridu jintlaħqu b’negozjar u b’azzjoni politika, u għal dawk għal liema n-nefqa fuq proġetti u programmi hija xierqa.

62.

Il-Kummissjoni tagħraf il-bżonn li tieħu in konsiderazzjoni l-bżonnijiet speċifiċi tal-pajjiżi individwali f’ termini ta’ koperazzjoni ekonomika, imma tonqos milli tirrifletti dan suffiċjentement fid-Dokumenti ta’ Strateġija tal-Pajjiż. Fid-dikjarazzjoni ta’ l-attività ABM — li bħalissa hija fil-qalba ta’ l-approċċ tal-Kummissjoni għal ġestjoni finanzjarja tajba — m’hemm l-ebda konsistenza u struttura loġika mill-miri ġenerali, mill-prijoritajiet sal-miri dettaljati. L-indikaturi tar-riżultati u ta’ l-impatt — li għandhom jiffurmaw il-bażi għal monitoraġġ u valutazzjoni tal-progress u impatt — jikkonċentraw fuq il-proċess fil-livell politiku, aktar milli fuq il-produzzjoniu r-riżultati ta’ l-għajnuna innifisha (ara paragrafi 21-33).

63.

Il-Qorti tirrikkmanda li l-Kummissjoni tipprovdi konsiderazzjoni suffiċjenti tal-koperazzjoni ekonomika fid-Dokumenti ta’ Strateġija tal-Pajjiż, filwaqt li tieħu in konsiderazzjoni r-rabta mal-bżonnijiet ġenerali ta’ l-iżvilupp. L-approċċ għandu jkun definit każ b’każ sabiex jippreżenta t-taħlita tajba ta’ għajnuna għaċ-ċirkostanzi partikolari. Sforzi speċifiċi għandhom isiru sabiex tiġi assigurata loġika u konsistenza fid-dikjarazzjoni ta’ attività. Indikaturi, li huma objettivi, utli u komprensivi u jirriflettu r-riżultati ta’ l-għajnuna għandhom ikunu stabbiliti.

64.

In-nuqqas ta’ strateġiji speċifiċi operattivi għall-koperazzjoni ekonomika rriżultat f’sensiela differenti ta’ proġetti u programmi mxerrda tul ir-reġjuni kollha — reġjuni fejn jiddomina n-negozju nazzjonali u globali. Dan in-nuqqas ta’ fokus ifisser li l-impatt ta’ koperazzjoni ekonomika huwa diffiċli biex jitkejjel, ir-rabta mal-prijorità prinċipali tat-tisħiħ ta’ negozju u investiment hija diffiċli biex tkun stabbilita, u għalhekk hemm biss bażi limitata biex tiġi assigurata jekk in-nefqa ta’ l-UE kienitx effettiva jew kienx hemm valur għall-flus (ara l-paragrafi 34-35).

65.

Il-Qorti tirrikkmanda li l-Kummissjoni tassigura li l-għajnuna hija ffukata fuq miri definiti u li jistgħu jitkejlu sabiex iservu bħala bażi għal ġestjoni finanzjarja tajba tal-baġit ta’ l-UE.

66.

Il-verifika tal-Qorti wriet nuqqasijiet fil-ġestjoni mill-Kummissjoni ta’ l-implimentazzjoni tal-koperazzjoni ekonomika fl-Ażja. Ftit minn dawn in-nuqqasijiet fixklu l-effikaċja ta’ l-għajnuna.

67.

Fil-każ tal-proġetti bilaterali kien hemm dewmien twil ħafna u mhux aċċettabli bejn il-fażi ta’ identifikazzjoni u l-bidu ta’ l-implimentazzjoni għal raġunijiet varji. F’ ħafna każijiet id-dewmien kompla matul il-fażi ta’ implimentazzjoni, dan naqqas ir-riżultati u l-impatt tal-proġetti. Il-livell ta’ monitoraġġ ma kienx dejjem sodisfaċenti, valutazzjonijiet esterni ma twettqux dejjem fil-ħin u l-potenzjal għal sostenibilità kien dubjuż għal kważi nofs il-proġetti verifikati (ara paragrafi 38-49).

68.

Il-Qorti tirrikkmanda li l-Kummissjoni tidentifika t-tipi ta’ azzjonijiet korrettivi neċessarji biex isolvu l-problemi fil-proġetti bilaterali u biex jiġu evitati problemi simili fl-ippjanar u l-implimentazzjoni ta’ proġetti futuri. Oqsma speċifiċi li jeħtieġu attenzjoni inkludew li jiġi assigurat li l-miri tal-programmi u proġetti differenti huma ċari u realistiċi għaż-żmien ippjanat u li l-valutazzjonijiet imwettqa kienu approprjati, isegwu strateġija ċara u fil-ħin.

69.

Fil-każ ta’ proġetti verifikati fil-programmi għall-Ażja kollha, il-proċedura ta’ applikazzjoni nstabet li kienet oneruża u kumplessa minn ħafna applikanti għall-proġetti ta’ daqs żgħir. Barra minn dan, in-nuqqas ta’ klarità fir-rwol tad-Delegazzjonijiet li jassistu benefiċjarji potenzjali biex jippreparaw l-applikazzjonijiet tagħhom fissret li għajnuna ta’ valur ma kienitx mogħtija. Filwaqt li l-proġetti verifikati għamlu progress tajjeb fil-kisba ta’ riżultati utli, dawn setgħu ma jkunux sostenibbli għax ħafna minnhom kellhom bżonn aktar appoġġ finanzjarju. Is-sistemi ta’ monitoraġġ tal-Kummissjoni kienu effettivi ħafna (ara paragrafi 50-59).

70.

Il-Qorti tirrikkmanda l-Kummissjoni li tikkunsidra mill-ġdid l-proċeduri ta’ applikazzjoni bi ħsieb li tibbilanċja l-bżonn li tipproteċi l-interessi finanzjarji ta’ l-UE filwaqt li tinkoraġixxi l-aktar sensiela wiesgħa ta’ benefiċjarji potenzjali u proġetti. Billi tagħmel dan hija għandha tirrikunsidra l-bżonn għall-applikanti li jippreparaw qafas loġiku. Il-Kummissjoni għandha tassigura wkoll li d-dokumenti jew informazzjoni mitluba huma disponibbli. Mudell komplut ta’ l-applikazzjoni, preferibilment każ b’każ għall-qafas legali u organizzattiv f’kull pajjiz, ikun ta’ għajnuna f’dan ir-rigward. Il-Kummissjoni għandha tikkunsidra li twaqqaf reġistru ċentrali għad-dokumenti provduti ma’ l-applikazzjonijiet, sabiex ma jkunx hemm bżonn li jiġu provduti mill-ġdid għal applikazzjoni futuri mill-istess benefiċjarju.

71.

Il-Qorti tirrikkmanda li r-rwol tad-Delegazzjonijiet li jassistu benefiċjarji potenzjali fid-definizzjoni tal-proġetti u fil-preparazzjoni ta’ applikazzjonijiet għandu jkun imfisser u msaħħaħ b’mod ċar. L-għan għandu jkun li jitqanqlu interessi wiesa’ fil-programmi u b’hekk jinkoraġixxu l-akbar numru ta’ benefiċjarji potenzjali u proposti, jgħin biex jiġi assigurat li l-applikazzjonijiet huma kompluti u preparati malajr, b’hekk tgħin biex assigurat li l-proġetti l-aktar effettivi u approprjati jiġu magħżula.

72.

Il-Qorti tirrikkmanda li s-sistema ta’ monitoraġġ regolari tal-proġetti għall-Ażja kollha, inkluża format standard ta’ rappurtar, tista’ taqdi bħala mudell utli għad-Delegazzjonijiet għall-monitoraġġ kemm tal-proġetti bilaterali kif ukoll għall-proġetti għall-Ażja kollha.