Meraq tal-frott u prodotti simili
SOMMARJU TA’:
Id-Direttiva 2001/112/KE li tirrigwarda l-meraq tal-frott u ċerti prodotti simili maħsuba għall-konsum uman
X’INHU L-GĦAN TAD-DIRETTIVA?
Din tistabbilixxi regoli speċifiċi dwar il-kompożizzjoni tal-meraq tal-frott, l-ismijiet riżervati tagħhom, il-karatteristiċi tal-manifattura tagħhom u t-tikkettar tagħhom.
PUNTI EWLENIN
Meraq tal-frott
Il-prodotti koperti minn din id-Direttiva huma:
- il-meraq tal-frott,
- il-meraq tal-frott minn konċentrat,
- il-meraq tal-frott ikkonċentrat,
- il-meraq tal-frott disidratat/fi trab,
- il-meraq tal-frott estratt bl-ilma, u
- in-nektar tal-frott.
Il-prodotti kkonċernati huma ddefiniti abbażi tal-kompożizzjoni u tal-proċessi ta’ preparazzjoni tagħhom sabiex jiġi żgurat li t-termini jintużaw b’mod korrett fil-kummerċ, u mhux b’mod li jista’ jqarraq bil-konsumaturi. Id-Direttiva tiddefinixxi wkoll denominazzjonijiet (tradizzjonali) partikolari użati f’ċerti pajjiżi u lingwi.
Tikkettar
- Il-meraq tal-frott huwa ttikkettat skont ir-regoli ġenerali stabbiliti fir-Regolament (UE) Nru 1169/2011 dwar it-tikkettar tal-oġġetti tal-ikel (ara s-sommarju). Madankollu, f’din id-Direttiva ġew adottati regoli speċifiċi addizzjonali sabiex tittejjeb l-informazzjoni għall-konsumatur. Dawn jirrikjedu li fl-isem tal-prodott jiġi ċċarat:
- jekk prodott ikunx taħlita ta’ frott differenti;
- jekk prodott ikunx inkiseb kompletament jew parzjalment minn konċentrat.
- Minn mindu ġiet adottata d-Direttiva emendatorja 2012/12/UE, iż-żieda taz-zokkor ma baqgħetx awtorizzata fil-meraq tal-frott. Għal prodotti oħra, iz-zokkor miżjud għandu jkompli jiġi ttikkettat skont ir-Regolament (UE) Nru 1169/2011. Peress li ż-żieda taz-zokkor kienet permessa qabel, kien komuni li xi operaturi tan-negozju tal-ikel jittikkettaw in-nuqqas ta’ zokkor miżjud fil-meraq tal-frott għal raġunijiet kummerċjali permezz ta’ indikazzjoni dwar in-nutrizzjoni “mingħajr zokkor miżjud”. L-użu ta’ din l-indikazzjoni ma kienx permess wara t-tmiem ta’ perjodu tranżitorju ta’ 18-il xahar.
- Sabiex l-industrija tkun tista’ tinforma kif xieraq lill-konsumaturi kemm matul il-perjodu tranżitorju kif ukoll 18-il xahar wara li jintemm, l-operaturi tan-negozji tal-ikel jistgħu jużaw dikjarazzjoni fuq it-tikketti li tinforma lill-konsumaturi li, minn data partikolari, l-ebda meraq tal-frott ma jkun fih zokkor miżjud.
- Għall-prodotti mmanifatturati minn żewġ frottiet jew aktar, ħlief fejn jintuża l-meraq tal-lumi u/jew tal-lajm, l-isem tal-prodott irid ikun magħmul minn lista tal-frott użat, f’ordni dixxendenti tal-volum tal-meraq tal-frott jew tal-purées inklużi, kif indikat fil-lista tal-ingredjenti.
- Madankollu, fir-rigward ta’ prodotti magħmula minn tliet frottiet jew aktar, l-indikazzjoni tal-frott użat tista’ tiġi sostitwita bil-kliem “bosta frott” jew minn kliem simili, jew bl-għadd ta’ frott użat.
- Fil-każ ta’ meraq tal-frott ikkonċentrat, jekk il-prodott ma jkunx maħsub biex jitwassal lill-konsumatur finali, it-tikkettar irid jindika l-preżenza u l-kwantità tal-meraq tal-lumi miżjud, il-meraq tal-lajm jew aġenti aċidifikanti fuq l-imballaġġ, fuq tikketta mwaħħla mal-imballaġġ, jew fuq dokument ta’ akkumpanjament.
- Id-Direttiva telenka l-materja prima li tista’ tintuża għall-manifattura tal-meraq u n-nektar, kif ukoll l-addittivi li jistgħu jiġu awtorizzati, skont ir-Regolament (UE) Nru 1169/2011 dwar it-tikkettar tal-oġġetti tal-ikel.
- Il-kontenut minimu tal-meraq tal-frott u/jew tal-purèe tal-frott fin-nektar tal-frott irid ikun konformi mal-livelli indikati fid-Direttiva u jrid jiġi ddikjarat fit-tikkettar tal-prodott.
MINN META BDIET TAPPLIKA D-DIRETTIVA?
Id-Direttiva ilha tapplika mit-12 ta’ Jannar 2002 u kellha ssir liġi fil-pajjiżi tal-UE sal-11 ta’ Lulju 2003.
SFOND
Għal aktar informazzjoni, ara:
DOKUMENT EWLIENI
Id-Direttiva tal-Kunsill 2001/112/KE tal-20 ta’ Diċembru 2001 li tirrigwarda l-meraq tal-frott u ċerti prodotti simili maħsuba għall-konsum uman (ĠU L 10, 12.1.2002, pp. 58-66)
L-emendi suċċessivi għad-Direttiva 2001/112/KE ġew inkorporati fit-test oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Ir-Regolament ta’ Delega tal-Kummissjoni (UE) Nru 1040/2014 tal-25 ta’ Lulju 2014 li jemenda d-Direttiva tal-Kunsill 2001/112/KE li tirrigwarda l-meraq tal-frott u ċerti prodotti simili maħsuba għall-konsum uman li tadatta l-Anness I tagħha għall-progress tekniku (ĠU L 288, 2.10.2014, pp. 1-2)
l-aħħar aġġornament 29.05.2020