Regoli ta’ proċedura tal-Kunsill tal-Unjoni Ewropea

SOMMARJU TA’:

Id-Deċiżjoni 2009/937/UE li temenda r-Regoli ta’ Proċedura tiegħu

X’INHU L-GĦAN TAR-REGOLI TA’ PROĊEDURA?

• Ir-regoli ta’ proċedura jistabbilixxu d-dispożizzjonijiet li jirregolaw il-proċedimenti tal-Kunsill tal-Unjoni Ewropea (il-Kunsill).
• Is-setgħa li jadotta regoli ta’ proċedura hija konferita fuq il-Kunsill mill-Artikolu 240(3) dwar il-Funzjonament tal-Unjoni Ewropea.
• Anness III huwa emendat kull sena sabiex jirrifletti l-bidliet fiċ-ċifri li jikkonċernaw il-popolazzjoni tal-pajjiżi tal-UE u l-popolazzjoni ta’ kull pajjiż tal-UE għall-implimentazzjoni tar-rekwiżiti li jikkonċernaw il-votazzjoni b’maġġoranza kwalifikata fil-Kunsill.
• Ir-regoli ġew emendati wkoll b’mod aktar sostanzjali darba — fl-2014 (id-Deċiżjoni 2014/692/UE, Euratom), fir-rigward tal-voti b’maġġoranza kwalifikata.

PUNTI EWLENIN

Il-Kunsill huwa l-istituzzjoni tal-UE fejn jiltaqgħu r-rappreżentanti tal-pajjiżi tal-UE. Kull pajjiż huwa rrappreżentat minn rappreżentant wieħed fil-livell ministerjali li jista’ jimpenja lill-gvern ta’ dak il-pajjiż. Flimkien mal-Parlament Ewropew, il-Kunsill jeżerċita funzjonijiet leġiżlattivi. Jadotta atti leġiżlattivi, skont il-proċedura leġiżlattiva ordinarja jew speċjali. Il-Kunsill flimkien mal-Parlament Ewropew jeżerċita funzjonijiet baġitarji. Fl-aħħar nett, il-Kunsill iwettaq funzjonijiet ta’ tfassil ta’ politika u ta’ koordinazzjoni.

Il-konfigurazzjonijiet tal-Kunsill

• Il-Kunsill jiltaqa’ f’10 konfigurazzjonijiet differenti skont is-suġġett ittrattat.
• Ħlief għal żewġ konfigurazzjonijiet (Kunsill Affarijiet Ġenerali u Kunsill Affarijiet Barranin), il-mandat ta’ kull konfigurazzjoni mhuwiex iddeterminat mit-Trattati u jsegwi mill-prattika.
  • Il-Kunsill Affarijiet Ġenerali jiżgura l-konsistenza fil-ħidma tal-konfigurazzjonijiet differenti tal-Kunsill. Dan iħejji l-laqgħat tal-Kunsill Ewropew. Dan huwa responsabbli għall-koordinazzjoni ġenerali tal-politiki, il-kwistjonijiet istituzzjonali u amministrattivi, id-dossiers orizzontali li jaffettwaw diversi politiki tal-UE;
  • Il-Kunsill Affarijiet Barranin huwa responsabbli għall-azzjoni esterna kollha tal-UE, jiġifieri l-politika estera u ta’ sigurtà komuni, il-politika ta’ sigurtà u ta’ difiża komuni, il-politika kummerċjali komuni, il-kooperazzjoni għall-iżvilupp u l-għajnuna umanitarja.

Il-presidenza tal-Kunsill tal-Unjoni Ewropea

• Il-presidenza tal-Kunsill, bl-eċċezzjoni tal-konfigurazzjoni tal-Affarijiet Barranin, għandha tiġi eżerċitata minn gruppi prestabbiliti ta’ 3 pajjiżi tal-UE għal perjodu ta’ 18-il xahar. Kull membru tal-grupp jippresjedi l-konfigurazzjonijiet kollha tal-Kunsill, bl-eċċezzjoni tal-konfigurazzjoni tal-Affarijiet Barranin, għal 6 xhur. Il-grupp ta’ 3 pajjiżi tal-UE jħejji abbozz ta’ programm tal-attivitajiet tal-Kunsill għal perjodu ta’ 18-il xahar li jiġi approvat mill-Kunsill Affarijiet Ġenerali wara li jsir dibattitu pubbliku dwaru.
• Il-Kunsill Affarijiet Barranin għandu president permanenti: ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà. Huwa possibbli li r-Rappreżentant Għoli jiġi sostitwit mill-pajjiż tal-UE li jkollu l-Presidenza tal-Kunsill. Normalment ikun il-każ meta l-Kunsill jitlaqqa’ biex jiddiskuti kwistjonijiet ta’ politika kummerċjali komuni.
• Il-presidenza hija l-forza li tmexxi l-ħidma tal-Kunsill.

Coreper, kumitati u gruppi ta’ ħidma

• Il-Kunsill huwa appoġġat mill-kumitat tar-rappreżentanti permanenti tal-gvernijiet tal-pajjiżi tal-UE (Coreper) u sa aktar minn 150 grupp ta’ ħidma speċjalizzata u kumitati li huma l-korpi preparatorji tal-Kunsill.
• Coreper iħejji l-ħidma tal-laqgħat kollha tal-Kunsill u jwettaq il-kompiti assenjati lilu mill-Kunsill. Il-Coreper 2 huwa magħmul minn rappreżentanti permanenti, filwaqt li l-Coreper 1 huwa magħmul minn deputati rappreżentanti permanenti.
• Coreper:
  • jiżgura l-konsistenza tal-politiki u l-azzjonijiet tal-UE u l-osservanza tal-prinċipji tal-legalità, is-sussidjarjetà, il-proporzjonalità, kif ukoll tar-regoli li jistabbilixxu s-setgħat tal-istituzzjonijiet, il-korpi, l-uffiċċji u l-aġenziji tal-UE, u r-regoli dwar il-proċedura, it-trasparenza u l-kwalità tal-abbozzar;
  • jeżamina minn qabel il-punti kollha fuq l-aġenda għal laqgħa tal-Kunsill u jiżgura t-tħejjija ta’ kull fajl għall-Kunsill;
  • għal kull fajl, jagħmel ħiltu biex jilħaq ftehim fil-livell tiegħu, li mbagħad jiġi sottomess lill-Kunsill;
  • jista’ jwaqqaf kumitati jew gruppi ta’ ħidma sabiex iwettqu kompiti jew studji ta’ tħejjija.
  • jista’ jadotta numru ta’ deċiżjonijiet ta’ proċedura, bħal deċiżjoni li ssir laqgħa tal-Kunsill f’post li mhux Brussell jew il-Lussemburgu, deċiżjoni li tintuża proċedura bil-miktub, eċċ.

Il-Funzjonament tal-Kunsill

• Il-Kunsill għandu s-sede tiegħu fi Brussell, iżda jagħmel il-laqgħat tiegħu fil-Lussemburgu f’April, Ġunju u Ottubru. Is-sessjonijiet tal-Kunsill jissejħu mill-president, fuq inizjattiva tiegħu stess jew fuq talba ta’ wieħed mill-membri tiegħu jew tal-Kummissjoni Ewropea. Il-President jistabbilixxi l-aġenda proviżorja għal kull laqgħa tal-Kunsill.
• Il-kworum għandu jiġi vverifikat qabel jittieħed vot. Dan jintlaħaq jekk il-maġġoranza tal-membri tal-Kunsill ikunu fiżikament preżenti. Il-Kunsill jivvota fuq l-inizjattiva tal-president tiegħu. Barra minn hekk, il-president jiftaħ proċedura ta’ votazzjoni fuq l-inizjattiva ta’ membru tal-Kunsill jew tal-Kummissjoni, diment li dan jiġi deċiż minn maġġoranza tal-membri tal-Kunsill.

Votazzjoni b’maġġoranza kwalifikata (VMK)

Fl-1 ta’ Novembru 2014, ġiet introdotta proċedura ġdida għal VMK, ir-regola ta’ “maġġoranza doppja”.

• Meta l-Kunsill jivvota fuq proposta mressqa mill-Kummissjoni jew mir-Rappreżentant Għoli tal-UE għall-Affarijiet Barranin u l-Politika ta’ Sigurtà, maġġoranza kwalifikata tinkiseb jekk jiġu ssodisfati 2 kundizzjonijiet:
  • 55 % tal-membri tal-Kunsill jivvutaw favur — jiġifieri 15 minn 27 (minn meta r-Renju Unit ħareġ mill-UE);
  • il-proposta tiġi appoġġata mill-membri tal-Kunsill li jirrappreżentaw mill-inqas 65 % tal-popolazzjoni tal-UE.
• Meta l-Kunsill ma jaġixxix fuq proposta mill-Kummissjoni jew mir-Rappreżentant Għoli, deċiżjoni tiġi adottata jekk:
  • hemm 72 % tal-membri tal-Kunsill li jivvutaw favur; u
  • dawn jirrappreżentaw mill-inqas 65 % tal-popolazzjoni tal-UE.

It-trasparenza u l-pubblikazzjoni tal-atti tal-Kunsill

• Id-deliberazzjonijiet u l-voti dwar l-atti leġiżlattivi huma miftuħa għall-pubbliku.
• L-ewwel deliberazzjoni tal-Kunsill dwar proposti ġodda importanti mhux leġiżlattivi li fihom regoli legalment vinkolanti fil-pajjiżi tal-UE jew għalihom hija miftuħa għall-pubbliku.
• Fuq deċiżjoni meħuda mill-Kunsill jew mill-Coreper, il-Kunsill jorganizza dibattiti pubbliċi dwar kwistjonijiet importanti li jaffettwaw l-interessi tal-UE u ċ-ċittadini tagħha. Il-Kunsill jagħmel ukoll għadd ta’ dibattiti ta’ orjentazzjoni fil-pubbliku.
• L-atti leġiżlattivi għandhom jiġu ppubblikati fil-Ġurnal Uffiċjali (ĠU), kif ukoll ir-regolamenti u d-direttivi li jiġu indirizzati lill-pajjiżi kollha tal-UE, id-deċiżjonijiet li ma jispeċifikawx lil min huma indirizzati, il-ftehimiet internazzjonali konklużi mill-UE. L-Artikolu 17 tar-Regoli ta’ Proċedura jelenka atti oħrajn li għandhom jiġu ppubblikati fil-ĠU, inkluż meta l-Kunsill jew il-Coreper jiddeċiedi hekk.

MINN META JAPPLIKAW IR-REGOLI TA’ PROĊEDURA?

Dawn ilhom japplikaw mill-1 ta’ Diċembru 2009.

SFOND

Għal aktar informazzjoni, ara:

• Il-Kunsill tal-Unjoni Ewropea.

DOKUMENT EWLIENI

Id-Deċiżjoni tal-Kunsill 2009/937/UE tal-1 ta’ Diċembru 2009 li temenda r-Regoli ta’ Proċedura tiegħu (ĠU L 325, 11.12.2009, pp. 35-61)

L-emendi suċċessivi għad-Deċiżjoni 2009/937/UE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Id-Deċiżjoni tal-Kunsill (UE) 2020/430 tat-23 ta’ Marzu 2020 dwar deroga temporanja mir-Regoli ta’ Proċedura tal-Kunsill fid-dawl tad-diffikultajiet ta’ vvjaġġar ikkawżati mill-pandemija tal-COVID-19 fl-Unjoni (ĠU L 88I, 24.3.2020, pp. 1-2)

l-aħħar aġġornament 19.06.2020