Il-kompetizzjoni fit-trasport bil-ferrovija, bit-triq u permezz tal-passaġġi fuq l-ilma interni

SOMMARJU TA’:

Ir-Regolament (KE) Nru 169/2009 — regoli tal-kompetizzjoni għat-trasport bil-ferrovija, bit-triq u permezz tal-passaġġi fuq l-ilma interni

L-Artikolu 101 tat-Trattat dwar il-Funzjonament tal-Unjoni Ewropea (TFUE) — regoli li japplikaw għal impriżi: prevenzjoni, restrizzjoni jew distorsjoni tal-kompetizzjoni

L-Artikolu 102 tat-TFUE — regoli li japplikaw għal impriżi: abbuż minn kumpaniji f’pożizzjoni dominanti

XI INHU L-GĦAN TAR-REGOLAMENT U TAL-ARTIKOLI 101 U 102 TAT-TFUE?

Ir-regolament jistipula r-regoli tal-kompetizzjoni tal-UE kif japplikaw għat-trasport bit-triq, bil-ferrovija u permezz tal-passaġġi fuq l-ilma interni.

L-Artikoli 101 u 102 tat-TFUE jipprojbixxu l-ftehimiet antikompetittivi u l-prattiki miftiehma bejn l-intrapriżi kif ukoll l-abbużi minn pożizzjoni dominanti*.

PUNTI EWLENIN

Ir-Regolament (KE) Nru 169/2009 japplika għall-ftehimiet, id-deċiżjonijiet u l-prattiki miftiehma li għandhom bħala l-għan jew l-effett tagħhom:

• l-iffissar ta’ rati u ta’ kondizzjonijiet tat-trasport;
• il-limitazzjoni jew il-kontroll tal-provvista tat-trasport;
• il-kondiviżjoni ta’ swieq tat-trasport;
• l-applikazzjoni ta’ titjib tekniku jew ta’ kooperazzjoni teknika;
• l-iffinanzjar jew l-akkwist konġunt ta’ apparat tat-trasport jew provvisti meta dan ikun
  • direttament relatat mal-provvista ta’ servizzi tat-trasport u
  • meħtieġ għat-tħaddim konġunt ta’ servizzi minn grupp ta’ impriżi tat-trasport bit-triq jew permezz tal-passaġġi fuq l-ilma interni.

Eċċezzjoni għall-ftehimiet tekniċi

Madankollu, il-projbizzjoni stabbilita fl-Artikolu 101(1) tat-TFUE ma tapplikax għal ftehimiet, deċiżjonijiet jew prattiki maqbula li l-fini u l-effett tagħhom huma li japplikaw titjib tekniku jew li jiksbu kooperazzjoni teknika permezz ta’:

• l-istandardizzazzjoni ta’ apparat, provvisti tat-trasport, vetturi jew installazzjonijiet fissi;
• l-iskambju jew il-kondiviżjoni ta’ ħaddiema, ta’ apparat, ta’ vetturi jew ta’ installazzjonijiet fissi, bl-iskop li joperaw servizzi tat-trasport;
• l-organizzazzjoni u l-eżekuzzjoni ta’ xogħlijiet ta’ trasport suċċessivi, kumplimentari, sostituttivi jew magħquda, u l-iffissar u l-applikazzjoni ta’ rati u kondizzjonijiet inklużivi għal dawk ix-xogħlijiet, li jinkludu rati kompetittivi speċjali;
• l-użu, għal vjaġġi permezz ta’ mod ta’ trasport wieħed, tar-rotot li huma l-aktar razzjonali mill-aspett operattiv;
• il-koordinazzjoni ta’ skedi tal-ħinijiet tat-trasport għall-konnessjoni tar-rotot;
• ir-ragruppament ta’ konsenji individwali;
• l-istabbiliment ta’ regoli uniformi dwar l-istruttura tat-tariffi u l-kondizzjonijiet ta’ applikazzjoni tagħhom, sakemm dawn ir-regoli ma jistabbilixxux rati u kondizzjonijiet tat-trasport.

Eżenzjoni għal gruppi ta’ impriżi ta’ daqs żgħir u medju

Ir-regolament jippermetti wkoll l-eżenzjoni ta’ gruppi ta’ impriżi ta’ daqs żgħir u medju sakemm:

• il-kapaċità individwali ta’ kull impriża li tappartjeni għal grupp ma taqbiżxl-elf tunnellata fil-każ tat-trasport bit-triq jew il-50 000 tunnellata fil-każ tat-trasport permezz tal-passaġġi fuq l-ilma interni;
• il-kapaċità ta’ ġarr totali ta’ kwalunkwe grupp ma għandhiex teċċedi l-10 000 tunnellata fil-każ tat-trasport bit-triq u l-500 000 tunnellata fil-każ tat-trasport permezz tal-passaġġi fuq l-ilma interni.

Madankollu, jekk l-implimentazzjoni ta’ ftehimiet, deċiżjonijiet jew prattiki maqbula jkollha effetti li jkunu inkompatibbli mal-Artikolu 101(3) tat-TFUE, l-impriżi jistgħu jkunu meħtieġa li jwaqqfu dawn l-effetti.

MINN META JAPPLIKA R-REGOLAMENT?

Ilu japplika mill-25 ta’ Marzu 2009.

Ir-Regolament (KE) Nru 169/2009 jikkodifika u jħassar ir-Regolament (KEE) Nru 1017/68 bl-eċċezzjoni tal-Artikolu 13(3) ta’ dak ir-regolament, li jibqa’ japplika għad-deċiżjonijiet adottati fil-qafas tal-Artikolu 5 ta’ dak ir-regolament qabel l-1 ta’ Mejju 2004, sal-iskadenza tagħhom.

SFOND

Għal aktar informazzjoni, ara:

• EU competition policy in the transport sector (il-Kummissjoni Ewropea).

TERMINI EWLENIN

DOKUMENTI EWLENIN

Ir-Regolament tal-Kunsill (KE) Nru 169/2009 tas-26 ta’ Frar 2009 li japplika r-regoli tal-kompetizzjoni għat-trasport bil-ferrovija, bit-triq u permezz tal-passaġġi fuq l-ilma interni (Verżjoni kodifikata) (ĠU L 61, 5.3.2009, pp. 1-5)

Verżjoni konsolidata tat-Trattat dwar il-Funzjonament tal-Unjoni Ewropea — Parti Tlieta — Politika u azzjonijiet interni tal-Unjoni — Titolu VII — Regoli komuni fuq is-suq, fuq it-tassazzjoni u l-approssimazzjoni tal-liġijiet — Kapitolu 1 — Regoli li jirregolaw il-kompetizzjoni — Taqsima 1 — Regoli li japplikaw għal impriżi — Artikolu 101 (ex Artikolu 81 TKE) (ĠU C 202, 7.6.2016, pp. 88-89)

Verżjoni konsolidata tat-Trattat dwar il-Funzjonament tal-Unjoni Ewropea — Parti Tlieta — Politika u azzjonijiet interni tal-Unjoni — Titolu VII — Regoli komuni fuq is-suq, fuq it-tassazzjoni u l-approssimazzjoni tal-liġijiet — Kapitolu 1 — Regoli li jirregolaw il-kompetizzjoni — Taqsima 1 — Regoli li japplikaw għal impriżi — Artikolu 102 (ex Artikolu 82 TKE) (ĠU C 202, 7.6.2016, p. 89)

l-aħħar aġġornament 06.03.2018