Il-bilanċ bejn ix-xogħol u l-ħajja privata għall-ġenituri u għall-persuni li jindukraw

PUNTI EWLENIN

Kamp ta’ applikazzjoni

• Id-Direttiva hija relatata mal-irġiel u n-nisa kollha li għandhom kuntratt ta’ impjieg jew relazzjoni ta’ impjieg kif definit mil-liġi, il-ftehimiet kollettivi jew il-prassi li jkunu fis-seħħ f’kull pajjiż tal-UE, b’kunsiderazzjoni tal-ġurisprudenza tal-Qorti tal-Ġustizzja tal-UE.

Drittijiet minimi

Id-Direttiva tipprevedi drittijiet minimi individwali relatati ma’ dan li ġej:

• il-liv tal-paternità, il-liv tal-ġenituri u l-liv tal-persuni li jindukraw;
• l-arranġamenti tax-xogħol flessibbli għall-ħaddiema li huma ġenituri, jew persuni li jindukraw; u
• il-protezzjoni legali għal dawk li japplikaw għal-liv relatat mal-familja jew li jagħmlu użu minnu u l-arranġamenti tax-xogħol flessibbli.

Il-pajjiżi tal-UE jistgħu jagħżlu li jintroduċu jew iżommu regoli li huma aktar favorevoli għall-ħaddiema.

Liv tal-paternità

• Il-missirijiet jew it-tieni ġenituri ekwivalenti għandhom id-dritt li jieħdu l-liv tal-paternità ta’ 10 ijiem ta’ xogħol mat-twelid tat-tarbija.
• Il-liv tal-paternità għandu jitħallas fil-livell tal-paga nazzjonali għall-mard.
• Id-dritt għal-liv tal-paternità ma għandux ikun soġġett għal kwalifika ta’ perjodu ta’ xogħol jew għal kwalifika ta’ tul ta’ żmien fis-servizz.
• Il-pajjiżi tal-UE jistgħu jagħmlu d-dritt għal pagament jew benefiċċju soġġett għal perjodi ta’ impjieg preċedenti, li ma għandhomx jaqbżu s-6 xhur immedjatament qabel id-data mistennija tat-twelid tat-tarbija.

Il-liv tal-ġenituri

• Kull ħaddiem għandu dritt individwali għal liv tal-ġenituri mħallas ta’ 4 xhur, li xahrejn minnhom mhumiex trasferibbli bejn il-ġenituri.
• Tal-anqas xahrejn ta’ liv tal-ġenituri għal kull ġenitur għandhom jitħallsu f’livell adegwat.
• Il-pajjiżi tal-UE jistgħu jagħmlu d-dritt għal-liv tal-ġenituri soġġett għal kwalifika ta’ perjodu ta’ xogħol jew għal kwalifika ta’ tul ta’ żmien fis-servizz, li ma għandux jaqbeż sena.
• Il-pajjiżi tal-UE għandhom jiżguraw li l-ħaddiema jkollhom id-dritt jitolbu li jieħdu l-liv tal-ġenituri b’mod flessibbli, bħal pereżempju fuq bażi part-time, jew f’perjodi li jalternaw ta’ liv separati b’perjodi ta’ xogħol.

Il-liv tal-persuni li jindukraw

• Id-Direttiva tintroduċi regoli għall-persuni li jindukraw, jiġifieri ħaddiema li jieħdu ħsieb il-qraba tagħhom li jkunu jeħtieġu appoġġ minħabba raġunijiet mediċi serji. Dawn ir-regoli jkopru wkoll l-indukrar għal persuna li tkun tgħix fl-istess dar mal-ħaddiem.
• Kull persuna li tindokra hija intitolata li tieħu 5 ijiem ta’ xogħol fis-sena.

Arranġamenti tax-xogħol flessibbli

• Il-ħaddiema li jkollhom tfal sa età speċifikata, iżda li jkollhom mill-inqas 8 snin, u l-persuni li jindukraw għandhom id-dritt li jitolbu arranġamenti tax-xogħol flessibbli għall-finijiet ta’ indukrar.
• Dawn l-arranġamenti jinkludu l-użu ta’ arranġamenti ta’ xogħol mill-bogħod, skedi ta’ xogħol flessibbli, jew tnaqqis fis-sigħat tax-xogħol.
• L-impjegaturi għandhom jindirizzaw dawn it-talbiet f’perjodu ta’ żmien raġonevoli u jagħtu raġunijiet għar-rifjut jew il-posponiment ta’ tali arranġamenti.
• Il-pajjiżi tal-UE jistgħu jagħmlu d-dritt għal arranġamenti tax-xogħol flessibbli soġġett għal kwalifika ta’ perjodu ta’ xogħol jew għal kwalifika ta’ tul ta’ żmien fis-servizz. Dan il-perjodu ma għandux jaqbeż is-6 xhur.

Protezzjoni legali

Il-pajjiżi tal-UE għandhom jintroduċi regoli li jiżguraw li:

• il-ħaddiema jkunu protetti minn diskriminazzjoni u tkeċċija minħabba li jkunu applikaw għal, jew ikunu ħadu, liv relatat mal-familja jew arranġamenti tax-xogħol flessibbli;
• il-ħaddiema li jqisu li jkunu tkeċċew abbażi tal-fatt li jkunu eżerċitaw tali drittijiet għandhom ikunu jistgħu jitolbu lill-impjegatur jipprovdi raġunijiet sostanzjati kif xieraq għat-tkeċċija;
• ix-xogħol preċedenti u d-drittijiet miksuba jew li jkunu fil-proċess li jinkisbu qabel ma l-ħaddiem jieħu l-liv għandhom jinżammu wara l-liv.

Revoka

Id-Direttiva tħassar id-Direttiva 2010/18/UE dwar il-liv tal-ġenituri mit-2 ta’ Awwissu 2022.