Ġlieda kontra t-terroriżmu - definizzjonijiet ta’ reati terroristiċi u appoġġ għall-vittmi
SOMMARJU TA’:
Direttiva (UE) 2017/541 dwar il-ġlieda kontra t-terroriżmu
X’INHU L-GĦAN TAD-DIRETTIVA?
Din għandha l-għan li tadatta l-liġi tal-UE fir-rigward tal-ġlieda kontra t-terroriżmu fid-dawl tat-theddidiet terroristiċi li qed jevolvu u filwaqt li tqis in-natura internazzjonali tat-terroriżmu.
Din tistabbilixxi regoli minimi li jirrigwardaw id-definizzjonijiet tal-offiżi u s-sanzjonijiet relatati f’dan il-qasam.
Din tintroduċi wkoll miżuri ta’ protezzjoni, appoġġ u assistenza għall-vittmi.
Din tieħu post id-Deċiżjoni Qafas 2002/475/ĠAI bħala l-pilastru tar-rispons tal-ġustizzja kriminali tal-pajjiżi tal-UE fil-ġlieda kontra t-terroriżmu, u temenda parti mid-Deċiżjoni 2005/671/ĠAI dwar l-iskambju ta’ informazzjoni u l-kooperazjoni rigward ir-reati ta’ terroriżmu.
PUNTI EWLENIN
Definizzjoni ta’ reati teroristiċi
Id-direttiva tipprovdi lista eżawrjeti ta’ reati serji li l-pajjiżi tal-UE jridu jikklasifikawhom bħala reati terroristiċi fil-liġi nazzjonali tagħhom meta dawn ikunu twettqu jew meta jkun hemm theddida li jitwettqu għal skop terroristiku partikolari.
L-iskopijiet terroristiċi huma deskritti bħala xi wieħed mis-segwenti:
- intimidazzjoni serja ta’ popolazzjoni;
- impediment bla bżonn lil xi gvern jew organizzazzjoni internazzjonali biex iwettqu jew jastjenu milli jwettqu kwalunkwe att;
- destabbilizzazzjoni b’mod serju jew qerda tal-istrutturi politiċi, kostituzzjonali, ekonomiċi jew soċjali fundamentali ta’ pajjiż jew ta’ organizzazzjoni internazzjonali.
Reati relatati
Il-lista ta’ reati terroristiċi li l-pajjiżi tal-UE iridu jikkastigaw bħala reati kriminali, anki jekk ma jkunx effettivament twettaq reat terroristiku, hija estiża biex tkopri:
- reati relatati ma’ grupp terroristiku (jiġifieri t-tmexxija ta’ tali grupp jew il-parteċipazzjoni b’mod konxju fl-attivitajiet tiegħu) meta jkunu twettqu b’mod intenzjonat, u
- reati relatati ma’ attivitajiet terroristiċi. Dawn jinkludu:
- id-distribuzzjoni, kemm online jew offline, ta’ messaġġ bl-intenzjoni li jiġi inċitat reat terroristiku, pereżempju billi jiġu gglorifikati azzjonijiet terroristiċi;
- li tiġi mħajjra jew reklutata persuna oħra biex twettaq reat terroristiku;
- il-forniment u r-riċeviment ta’ taħriġ għal skopijiet terroristiċi, pereżempju, fil-produzzjoni jew fl-użu ta’ splussivi, ta’ armi tan-nar jew ta’ sustanzi perikolużi;
- l-ivjaġġar fl-UE, barra mill-UE jew lejn l-UE għal skopijiet ta’ terroriżmu, pereżempju għal parteċipazzjoni fl-attivitajiet ta’ grupp terroristiku jew biex jitwettaq attakk terroristiku;
- l-organizzazzjoni u l-faċilitar ta’ tali vjaġġar, inkluż l-appoġġ loġistiku u materjali bħal pereżempju x-xiri ta’ biljetti jew l-ippjanar ta’ rotot;
- il-provvediment jew il-ġbir ta’ fondi bl-intenzjoni li dawn jintużaw jew bl-għarfien li dawn jintużaw biex jitwettqu reati terroristiċi.
Karatteristiċi ġenerali
Dawn jinkludu:
- regoli mtejba:
- dwar l-għajnuna u t-tixiwix, l-inċitament u t-tentattiv, u
- dwar il-ġurisdizzjoni u l-prosekuzzjoni biex tiġi żgurata l-konsistenza u l-applikazzjoni b’mod effettiv tar-regoli rilevanti biex jiġu evitati l-lakuni;
- l-obbligu għall-pajjiżi tal-UE:
- li jintroduċu pieni u sanzjonijiet għal persuni fiżiċi u għal entitajiet legali responsabbli għar-reati, li jirriflettu s-serjetà tar-reati;
- li jieħdu miżuri għat-tneħħija immedjata ta’ u għall-imblukkar tal-aċċess għal kontenut terroristiku online ospitat fit-territorju tagħhom, u biex jiksbu t-tneħħija ta’ tali kontenut ospitat barra mit-territorju tagħhom; u
- li jirrispettaw id-drittijiet fundamentali u l-prinċipji legali fundamentali, kif stabbiliti fl-Artikolu 6 tat-Trattat dwar l-Unjoni Ewropea meta tkun qed tiġi implimentata din id-direttiva;
- l-emendi għad-Deċiżjoni 2005/671/ĠAI dwar l-iskambju ta’ informazzjoni u l-kooperazzjoni rigward ir-reati terroristiċi.
Appoġġ għall-vittmi
- Id-direttiva tinkludi klawsoli addizzjonali rigward firxa ta’ servizzi biex jiġu ssodisfati l-ħtiġijiet speċjali tal-vittmi tat-terroriżmu, bħal pereżempju l-aċċess immedjat għal servizzi ta’ appoġġ professjonali li joffru appoġġ mediku u psikoloġiku u parir prattiku u legali.
- Din issaħħaħ ukoll il-mekkaniżmi ta’ rispons ta’ emerġenza għall-assistenza għall-vittmi tat-terroriżmu immedjatament wara attakk terroristiku.
- Il-pajjiżi tal-UE għandhom jiżguraw li l-vittmi tat-terroriżmu li huma residenti ta’ pajjiż tal-UE barra minn dak li fih ikun twettaq ir-reat terroristiku ikollhom aċċess:
- għal informazzjoni dwar id-drittijiet tagħhom,
- għas-servizzi ta’ appoġġ u għall-iskemi ta’ kumpens disponibbli fil-pajjiż fejn ikun twettaq ir-reat terroristiku.
META TAPPLIKA DIN ID-DIRETTIVA?
Din ilha tapplika mill-20 ta’ April 2017. Il-pajjiżi tal-UE jridu jinkorporawha fil-liġi nazzjonali sat-8 ta’ Settembru 2018.
SFOND
DOKUMENT EWLIENI
Id-Direttiva (UE) 2017/541 tal-Parlament Ewropew u tal-Kunsill tal-15 ta’ Marzu 2017 dwar il-ġlieda kontra t-terroriżmu u li tissostitwixxi d-Deċiżjoni Kwadru tal-Kunsill 2002/475/ĠAI u li temenda d-Deċiżjoni tal-Kunsill 2005/671/ĠAI (ĠU L 88, 31.3.2017, pp. 6-21)
DOKUMENTI RELATATI
Verżjoni konsolidata tat-Trattat tal-Unjoni Ewropea — Titolu I — Dispożizzjonijiet komuni — Artikolu 6 (eks Artikolu 6 TUE) (ĠU C 202, 7.6.2016, p. 19)
Id-Direttiva 2014/42/UE tal-Parlament Ewropew u tal-Kunsill tat-3 ta’ April 2014 dwar l-iffriżar u l-konfiska ta’ mezzi strumentali u r-rikavat minn attività kriminali fl-Unjoni Ewropea (ĠU L 127, 29.4.2014, pp. 39-50)
Emendi suċċessivi għad-Direttiva 2014/42/UE ġew inkorporati fit-test bażiku. Din il-verżjoni konsolidata hija biss għal skopijiet ta’ referenza.
Id-Direttiva 2013/40/UE tal-Parlament Ewropew u tal-Kunsill tat-12 ta’ Awwissu 2013 dwar attakki kontra s-sistemi tal-informazzjoni u li tissostitwixxi d-Deċiżjoni Qafas tal-Kunsill 2005/222/ĠAI (ĠU L 218, 14.8.2013, pp. 8-14)
Id-Deċiżjoni tal-Kunsill 2005/671/ĠAI tal-20 ta’ Settembru 2005 dwar l-iskambju ta’ informazzjoni u l-kooperazzjoni fir-rigward ta’ reati terroristiċi (ĠU L 253, 29.9.2005, pp. 22-24)
Ara l-verżjoni konsolidata.
Id-Deċiżjoni Kwadru tal-Kunsill 2002/475/ĠAI tat-13 ta’ Ġunju 2002 dwar il-ġlieda kontra t-terroriżmu (ĠU L 164, 22.6.2002, pp. 3-7)
Ara l-verżjoni konsolidata.
l-aħħar aġġornament 20.02.2018