Kummerċ responsabbli ta’ minerali minn żoni ta’ riskju għoli jew ta’ kunflitt
SOMMARJU TA’:
Ir-Regolament (UE) 2017/821 li jistabbilixxi obbligi tad-diliġenza dovuta tal-katina tal-provvista għall-importaturi tal-Unjoni ta’ landa, tantalu u tungstenu, il-minerali tagħhom, u deheb li joriġinaw minn żoni affettwati minn kunflitti u ta’ riskju għoli
X’INHU L-GĦAN TAR-REGOLAMENT?
Ir-Regolament tal-Unjoni Ewropea (UE) jimmira li:
- jiżgura li l-importaturi tal-UE ta’ landa, tungstenu, tantalu u deheb (3TG) jissodisfaw standards internazzjonali ta’ provvista responsabbli stabbiliti mill-Organizzazzjoni għall-Kooperazzjoni u l-Iżvilupp Ekonomiċi (OECD);
- jiżgura li funderiji u raffinaturi globali u tal-UE* jakkwistaw it-3TG b’responsabbiltà;
- jgħin biex titkisser ir-rabta ta’ bejn il-kunflitt u l-użu illegali tal-minerali;
- jgħin biex jintemm kemm l-isfruttament kif ukoll l-abbuż tal-komunitajiet lokali, inkluż dak tal-ħaddiema tal-minjieri, u jappoġġja l-iżvilupp lokali.
PUNTI EWLENIN
- F’żoni politikament instabbli, il-kummerċ ta’ minerali bħal 3TG jista’ jintuża biex jiffinanzja gruppi armati, iwassal għal xogħol furzat u abbużi oħrajn tad-drittijiet tal-bniedem, u jappoġġja l-korruzzjoni u l-ħasil tal-flus.
- Dawn il-minerali ta’ kunflitt imbagħad jintużaw fil-prodotti ta’ kuljum, fosthom fil-mowbajls, fil-karozzi, jew fil-ġojjellerija.
Diliġenza dovuta
- It-terminu diliġenza dovuta ifisser li taġixxi b’attenzjoni raġonevoli u tinvestiga kwistjoni qabel ma tieħu deċiżjoni. Huwa proċess li għadu għaddej, proattiv u reattiv li permezz tiegħu, il-kumpaniji jimplimentaw sistemi u proċessi biex jidentifikaw, jimmaniġġjaw u jirrappurtaw riskji fil-ktajjen ta’ provvista tagħhom.
- Għall-minerali koperti mir-Regolament, ifisser li l-kumpaniji għandhom jiċċekkjaw li dak li jixtru jinkiseb b’mod responsabbli u b’tali mod li ma jikkontribwix għal kunflitt jew għal xi attività illegali oħra.
- Kumpaniji li jipprattikaw diliġenza dovuta, l-ewwel jiċċekkjaw kemm hu riskjuż li tikseb materja prima minn żona fraġli jew li hija affettwata minn kunflitt. Dawn jivvalutaw kemm huwa probabbli li dawn il-materji prima jkunu qegħdin jiffinanzjaw kunflitt, xogħol furzat jew riskji oħrajn stipulati fir-Regolament. Billi jiċċekkjaw il-ktajjen ta’ provvista tagħhom, jistgħu jiżguraw li jimmaniġġjaw dawn ir-riskji b’mod responsabbli.
- Ir-Regolament jibni fuq il-Gwida tal-OECD dwar id-Diliġenza Dovuta għal Ktajjen ta’ Provvista Responsabbli tal-Minerali minn Żoni Affettwati mill-Kunflitti u Żoni ta’ Riskju Għoli tal-2011, li tistabbilixxi l-parametru referenzjarju internazzjonali dwar id-diliġenza dovuta tal-katina ta’ provvista, u l-komunikazzjoni konġunta tal-2014 “Il-provenjenza responsabbli ta’ minerali li joriġinaw f’żoni affettwati minn kunflitti u f’żoni ta’ riskju għoli: Lejn approċċ integrat tal-UE”.
Skont ir-Regolament, l-importaturi tal-minerali tal-UE għandhom:
- jidentifikaw u jivvalutaw ir-riskji fil-katina ta’ provvista tagħhom;
- jimplimentaw strateġija biex iwieġbu għal dawn ir-riskji;
- iwettqu verifika ta’ parti terza indipendenti ta’ diliġenza dovuta għal katina ta’ provvista;
- jirrappurtaw annwalment dwar il-politiki u l-prattiċi tagħhom ta’ ksib b’mod responsabbli.
L-awtoritajiet kompetenti tal-Istati Membri tal-UE għandhom iwettqu verifiki biex jiżguraw li l-importaturi ta’ minerali u metalli tal-UE jikkonformaw mal-obbligi tagħhom ta’ diliġenza dovuta.
Skemi ta’ diliġenza dovuta tal-katina tal-provvista
- Gvernijiet, assoċjazzjonijiet tal-industrija u gruppi ta’ organizzazzjonijiet interessati fi skemi ta’ diliġenza dovuta fis-seħħ jistgħu japplikaw biex l-iskemi tagħhom jiġu rikonoxxuti mill-Kummissjoni Ewropea bħala konformi mar-Regolament. Att delegat, ir-Regolament Delegat (UE) 2019/429 jistabbilixxi l-metodoloġija u l-kriterji li jippermettu lill-Kummissjoni tivvaluta jekk l-iskemi ta’ diliġenza dovuta tal-katina tal-provvista li jikkonċernaw it-3TG jissodisfawx ir-rekwiżiti tar-Regolament (UE) 2017/821, u tirrikonoxxi skemi bħal dawn.
- Il-Kummissjoni se tistabbilixxi reġistru ta’ skemi ta’ diliġenza dovuta tal-katina tal-provvista rikonoxxut, disponibbli għall-pubbliku fuq l-internet, u lista ta’ funderiji u raffinaturi responsabbli globali.
Linji gwida
F’konsultazzjoni mas-Servizz Ewropew għall-Azzjoni Esterna u mal-OECD, il-Kummissjoni ħejjiet linji gwida mhux vinkolanti għall-operaturi ekonomiċi li jispjegaw kif l-aħjar li jiġu applikati l-kriterji għall-identifikazzjoni ta’ żoni affettwati minn kunflitti u żoni ta’ riskju għoli. Fl-Anness tagħha, ir-Rakkomandazzjoni (UE) 2018/1149 tipprevedi linji gwida mhux vinkolanti għall-identifikazzjoni ta’ żoni affettwati minn kunflitti u żoni ta’ riskju għoli u riskji oħra tal-katina tal-provvista skont ir-Regolament (UE) 2017/821 tal-Parlament Ewropew u tal-Kunsill.
Rieżami
Sal-1 ta’ Jannar 2023 u kull 3 snin minn dakinhar, il-Kummissjoni se tirrieżamina l-operat, l-effettività u l-impatt tas-sistema l-ġdida, u se tipproponi miżuri ġodda biex tiżgura katina globali tal-provvista kontinwa u responsabbli għall-minerali.
Emenda għar-Regolament (UE) 2017/821
Ir-Regolament Delegat (UE) 2020/1588 li jemenda l-Anness I għar-Regolament (UE) 2017/821 billi jistabbilixxi l-limiti ta’ volum għal minerali u konċentrati tat-tantalju jew nijobju, minerali u konċentrati tad-deheb, ossidi u idrossidi tal-landa, tantalati, u karburi tat-tantalju.
MINN META JAPPLIKA R-REGOLAMENT?
Dan ilu japplika mill-1 ta’ Jannar 2021.
SFOND
Għal aktar informazzjoni, ara:
TERMINI EWLENIN
Funderiji u raffinaturi. Individwi jew negozji li jwettqu forom ta’ metallurġija estrattiva li jinvolvu passi ta’ pproċessar bil-għan li jipproduċu metall minn mineral.
DOKUMENT EWLIENI
Ir-Regolament (UE) 2017/821 tal-Parlament Ewropew u tal-Kunsill tas-17 ta’ Mejju 2017 li jistabbilixxi obbligi tad-diliġenza dovuta tal-katina tal-provvista għall-importaturi tal-Unjoni ta’ landa, tantalu u tungstenu, il-minerali tagħhom, u deheb li joriġinaw minn żoni affettwati minn kunflitti u ta’ riskju għoli (ĠU L 130, 19.5.2017, pp. 1–20).
L-emendi suċċessivi għar-Regolament (UE) 2017/821 ġew inkorporati fid-dokument oriġinali. Din il-verżjoni konsolidata għandha valur dokumentarju biss.
DOKUMENTI RELATATI
Ir-Regolament Delegat tal-Kummissjoni (UE) 2019/429 tal-11 ta’ Jannar 2019 li jissupplimenta r-Regolament (UE) 2017/821 tal-Parlament Ewropew u tal-Kunsill fir-rigward tal-metodoloġija u l-kriterji għall-valutazzjoni u r-rikonoxximent ta’ skemi ta’ diliġenza dovuta tal-katina tal-provvista li jikkonċernaw il-landa, it-tantalu, it-tungstenu u d-deheb (ĠU L 75, 19.3.2019, pp. 59–65).
Ir-Rakkomandazzjoni tal-Kummissjoni (UE) 2018/1149 tal-10 ta’ Awwissu 2018 dwar linji gwida mhux vinkolanti għall-identifikazzjoni ta’ żoni affettwati minn kunflitti u żoni ta’ riskju għoli u riskji oħra tal-katina tal-provvista skont ir-Regolament (UE) 2017/821 tal-Parlament Ewropew u tal-Kunsill (ĠU L 208, 17.8.2018, pp. 94–106).
Komunikazzjoni konġunta lill-Parlament Ewropew u lill-Kunsill — Il-provenjenza responsabbli ta’ minerali li joriġinaw f’żoni affettwati minn kunflitti u f’żoni ta’ riskju għoli: Lejn approċċ integrat tal-UE (JOIN(2014) 8 final, 5.3.2014).
Dokument ta’ valutazzjoni ta’ ħidma tal-persunal tal-Kummissjoni Parti I (Valutazzjoni tal-Impatt) li jakkumpanja d-dokument Proposta għal Regolament tal-Parlament Ewropew u tal-Kunsill li jistabbilixxi sistema tal-Unjoni għall-awtoċertifikazzjoni tad-diliġenza dovuta tal-katina tal-provvista ta’ importaturi responsabbli tal-landa, tat-tantalju u tat-tungstenu, il-minerali tagħhom, u deheb li joriġina f’żoni affettwati minn kunflitti u żoni ta’ riskju għoli (SWD(2014) 53 final, 5.3.2014).
Komunikazzjoni mill-Kummissjoni lill-Parlament Ewropew u lill-Kunsill — L-inizjattiva tas-swieq tal-materja prima : nilħqu l-ħtiġijiet kritiċi tagħna għat-tkabbir ekonomiku u l-impjiegi fl-Ewropa (KUMM(2008) 699 finali, 4.11.2008).
l-aħħar aġġornament 19.10.2021