Eurostat - l-uffiċċju tal-istatistika tal-UE

SOMMARJU TA’:

Deċiżjoni 2012/504/UE li tiċċara r-rwol tal-Eurostat

X’INHU L-GĦAN TA’ DIN ID-DEĊIŻJONI?

Din tiċċara r-rwol u r-responsabbiltajiet tal-Eurostat fir-rigward tal-iżvilupp, il-produzzjoni u d-disseminazzjoni tal-istatistika Ewropea.

PUNTI EWLENIN

• Il-Eurostat jagħmel parti mill-Kummissjoni Ewropea u huwa mmexxi minn Direttur Ġenerali.
• Il-Eurostat jopera f’konformità mal-prinċipji statistiċi li ġejjin, kif definit fir-Regolament (KE) Nru 223/2009 u l-Kodiċi ta’ Prattika tal-Istatistika Ewropea:
  • indipendenza professjonali;
  • imparzjalità;
  • oġġettività;
  • affidabbiltà;
  • kunfidenzjalità tal-istatistika; u
  • il-kosteffettività.
• Il-Eurostat jimplimenta l-programm Ewropew tal-istatistika u jaħdem fuq il-bażi ta’ programmi ta’ ħidma annwali.
• Il-kompiti ewlenin tal-Eurostat huma li:
  • jiġbor u jgħaqqad data statistika biex jikkompila statistika Ewropea;
  • jiżviluppa u jippromwovi standards, metodi u proċeduri statistiċi;
  • jikkoordina s-Sistema Ewropea tal-Istatistika (ESS), iħeġġeġ kooperazzjoni fost is-sħab tagħha u jiżgura li din ikollha rwol ewlieni fl-istatistika uffiċjali fil-livell internazzjonali;
  • jikkoopera fil-livell internazzjonali ma’ pajjiżi u organizzazzjonijiet oħrajn, u jappoġġja ċerti pajjiżi mhux tal-UE fit-titjib tas-sistemi tal-istatistika tagħhom.
• Id-Direttur Ġenerali tal-Eurostat, li huwa wkoll il-Kap Statistiku:
  • għandu r-responsabbiltà unika li jiddeċiedi dwar il-proċessi, il-metodi statistiċi, l-istandards u l-proċeduri, u l-kontenut u ż-żmien tal-pubblikazzjonijiet tal-istatistika. Id-Direttur Ġenerali jeħtieġlu jaġixxi b’mod indipendenti u ma jistaqsix għal u lanqas jieħu istruzzjonijiet minn kwalunkwe istituzzjoni jew korp tal-UE, minn gvernijiet nazzjonali jew kwalunkwe organizzazzjoni oħra. Id-Direttur Ġenerali jeħtieġlu jieħu l-miżuri kollha meħtieġa biex jiżgura l-ħarsien tal-kunfidenzjalità tal-istatistika;
  • jippresjedi l-Kumitat tas-Sistema Ewropea tal-Istatistika (ESSC), li huwa magħmul minn rappreżentanti tal-pajjiżi tal-UE (minn istituti tal-istatistika nazzjonali) u li jagħti gwida lill-ESS dwar l-iżvilupp, il-kumpilazzjoni u d-disseminazzjoni tal-istatistika Ewropea;
  • jikkomunika wkoll bejn l-ESS u l-Bord Konsultattiv Ewropew għall-Governanza tal-Istatistika (magħmul minn esperti tal-istatistika indipendenti) dwar il-kwistjonijiet kollha li jirrigwardaw l-implimentazzjoni tal-Kodiċi ta’ Prattika tal-Istatistika Ewropea.
• Soġġett għar-regoli ta’ kunfidenzjalità tal-UE, il-Eurostat jista’ jaċċessa d-data amministrattiva tas-servizzi tal-Kummissjoni biex inaqqas it-tagħbija tax-xogħol għar-rispondenti.
• Il-Eurostat huwa responsabbli għall-ġestjoni tal-kwalità tal-istatistika Ewropea u jeħtieġlu jistabbilixxi sistema tal-assigurazzjoni tal-kwalità biex jiżgura li l-Kodiċi ta’ Prattika tal-Istatistika Ewropea huwa implimentata kif xieraq.
• Il-Eurostat jeħtieġlu jiżgura li l-istatistika Ewropea tkun aċċessibbli għall-utenti kollha skont il-prinċipji tal-istatistika, b’mod partikolari l-prinċipji ta’ indipendenza professjonali, ta’ imparzjalità u ta’ kunfidenzjalità tal-istatistika.

META TAPPLIKA D-DEĊIŻJONI?

Din ilha tapplika sa mit-8 ta’ Ottubru 2012.

SFOND

Għal aktar informazzjoni, ara:

• Il-Eurostat u s-Sistema Ewropea tal-Istatistika (Kummissjoni Ewropea).

DOKUMENT EWLIENI

Deċiżjoni tal-Kummissjoni 2012/504/UE tas-17 ta’ Settembru 2012 dwar il-Eurostat (ĠU L 251, 18.9.2012, pp. 49-52)

l-aħħar aġġornament 13.11.2017