It-takografi fit-trasport bit-triq

SOMMARJU TA’:

Regolament (UE) Nru 165/2014 — regoli dwar takografi fit-trasport bit-triq

X’INHU L-GĦAN TAR-REGOLAMENT?

Ir-Regolament (UE) Nru 165/2014 jistabbilixxi r-rekwiżiti dwar il-kostruzzjoni, l-installazzjoni, l-użu, l-ittestjar u l-kontroll tat-takografi* użat fit-trasport bit-triq fl-UE.
Ir-Regolament (UE) 2020/1054 jemenda u jestendi l-kamp ta’ applikazzjoni tar-Regolament (UE) Nru 165/2014 biex titqies, fir-rigward tal-ippożizzjonar permezz ta’ takografi, il-leġiżlazzjoni tal-UE dwar l-istazzjonar tal-ħaddiema fit-trasport bit-triq, id-Direttiva 96/71/KE dwar l-infurzar tal-leġiżlazzjoni tal-UE dwar l-istazzjonar tal-ħaddiema fil-kuntest tal-forniment ta’ servizzi, id-Direttiva 2014/67/UE dwar l-infurzar tad-Direttiva 96/71/KE u d-Direttiva (UE) 2020/1057 li tistabbilixxi regoli speċifiċi għall-istazzjonar tax-xufiera fis-settur tat-trasport bit-triq (ara s-sommarju dwar it-tliet direttivi).

PUNTI EWLENIN

It-takografi jridu jkunu installati fil-vetturi kollha ’l fuq minn 3.5 tunnellati li jittrasportaw il-merkanzija bit-triq, u f’vetturi li jistgħu jġorru aktar minn disa’ persuni (inkluż is-sewwieq), b’ċerti eċċezzjonijiet. Mill-1 ta’ Lulju 2026, it-takografi se jkollhom jiġu installati wkoll f’vetturi ta’ aktar minn 2.5 tunnellati.

It-takografi diġitali jirreġistraw id-data segwenti:

id-distanza vjaġġata, u l-veloċità;
il-kejl tal-ħin;
il-punt tal-bidu, il-punt tat-tmien u l-pożizzjoni kull tliet sigħat (jekk konnessi ma’ sistema tan-navigazzjoni bis-satellita);
l-identità tas-sewwieq;
l-attività tas-sewwieq;
id-data dwar il-kontroll, il-kalibrazzjoni u t-tiswija tat-takografu;
avvenimenti* u ħsarat*.

It-takografi analoġiċi jridu jirreġistraw mill-inqas id-distanza, il-veloċità, il-ħin u l-attività tas-sewwieq.

L-aċċess għad-data tat-takografu jista’ jingħata f’kull ħin lill-awtorità ta’ kontroll u lill-operatur tat-trasport ikkonċernat.

Tintwera l-informazzjoni li ġejja:

il-ħin;
il-mod ta’ tħaddim;
l-attività tas-sewwieq;
il-ħin attwali ta’ sewqan kontinwu tas-sewwieq u/jew il-ħin ta’ pawża kumulattiv attwali tiegħu;
id-data ta’ twissija;
aċċess għall-menu.

It-takografi diġitali javżaw lis-sewwieqa li jkunu se jaqbżu l-ħin tas-sewqan kontinwu massimu permess, sabiex jgħinhom jikkonformaw mal-leġiżlazzjoni.

L-ipproċessar tad-data personali jrid isir biss biex tiġi vverifikata l-konformità ma’ dan ir-regolament u regolamenti oħrajn rilevanti.

Takografi intelliġenti

Il-vetturi rreġistrati għall-ewwel darba mill-15 ta’ Ġunju 2019 iridu jkunu mgħammra b’takografu intelliġenti. It-takografu intelliġenti huwa konness ma’ sistema tan-navigazzjoni bis-satellita, u jkun mgħammar b’teknoloġija ta’ komunikazzjoni mill-bogħod sabiex jiġu ffaċilitati l-kontrolli mmirati fil-ġenb tat-triq.
Barra minn hekk, ir-Regolament emendatorju (UE) 2020/1054 jirrikjedi li l-Kummissjoni Ewropea tadotta, permezz ta’ atti ta’ implimentazzjoni, l-ispeċifikazzjoni teknika dwar it-tieni verżjoni tat-takografu intelliġenti.
Skont ir-Regolament emendatorju (UE) 2020/1054, minn Awwissu 2023, il-vetturi li jkunu għadhom kemm ġew irreġistrati jridu jkunu mgħammra bil-verżjoni 2 tat-takografu intelliġenti. Il-verżjoni 2 tinkludi diversi titjibiet fir-rigward tal-verżjoni 1, fost l-oħrajn, ir-reġistrazzjoni tal-qsim tal-fruntieri, ir-reġistrazzjoni tal-pożizzjoni tal-vettura meta l-vettura tkun mgħobbija/maħtuta jew l-implimentazzjoni tas-sistema ta’ awtentikazzjoni pprovduta minn Galileo.
Il-pajjiżi tal-UE għandhom sa Awwissu 2024 biex iħarrġu lill-awtoritajiet ta’ kontroll tagħhom fit-trattament tat-teknoloġija ta’ komunikazzjoni mill-bogħod. Id-data tista’ tinħażen biss għat-tul ta’ kontroll fil-ġenb tat-triq u trid titħassar f’temp ta’ tliet sigħat, sakemm ma jkunx sar kwalunkwe użu ħażin mit-takografu.

Approvazzjoni tat-tip

It-tagħmir tat-takografu huwa soġġett għall-approvazzjoni tat-tip li tingħata minn korpi maħtura mill-pajjiżi tal-UE fuq il-bażi tal-funzjonalità, l-interoperabbiltà, il-konformità u s-sigurtà.

Installazzjoni

It-tagħmir tat-takografu jista’ jiġi installat biss minn fitters jew kumpaniji approvati mill-awtoritajiet rilevanti ta’ kull pajjiż tal-UE, u komponenti u kwalunkwe konnessjoni vulnerabbli jridu jiġu ssiġillati kif xieraq għaċ-ċertifikat tal-approvazzjoni tat-tip.

It-takografu jrid jiġi spezzjonat mill-inqas kull sentejn.

Barra minn hekk, ir-Regolament emendatorju (UE) Nru 2020/1054 jirrikjedi:

li kwalunkwe siġill imneħħi jew imkisser għandu jiġi sostitwit minn fitter jew workshop approvat mingħajr dewmien żejjed u mhux aktar tard minn sebat ijiem mit-tneħħija jew il-ksur tiegħu;
li meta s-siġilli jkunu tneħħew jew tkissru għal finijiet ta’ kontroll, dawn jistgħu jiġu sostitwiti minn uffiċjal ta’ kontroll mgħammar b’tagħmir għas-siġillar u marka unika mingħajr dewmien żejjed.

Kards tas-sewwieqa u folji ta’ reġistrazzjoni

Skont ir-Regolament (UE) Nru 165/2014

Is-sewwieqa jridu jkunu fil-pussess ta’ kard tas-sewwieq maħruġa mill-awtorità rilevanti tal-pajjiż tal-UE, valida għal mhux aktar minn ħames snin. Hija rikonoxxuta b’mod reċiproku mill-pajjiżi kollha tal-UE.
L-operaturi tat-trasport u s-sewwieqa huma responsabbli għall-użu xieraq tat-takografi diġitali u l-kards tas-sewwieqa. Huwa pprojbit li wieħed jiffalsifika, jaħbi, jissopprimi jew jeqred data rreġistrata fuq il-folja ta’ reġistrazzjoni, jew maħżuna fit-takografu jew fuq il-kard tas-sewwieq, jew fuq il-kopji stampati li joħorġu mit-takografu.
L-operaturi tat-trasport huma responsabbli sabiex jiżguraw li s-sewwieqa jkunu mħarrġa kif xieraq dwar il-funzjonament tat-takografi u ma jridu jagħtu lis-sewwieqa tagħhom ebda inċentiv li jista’ jħeġġeġ l-użu ħażin tagħhom.
Fil-każ ta’ takografu difettuż, operatur tat-trasport irid jieħdu għat-tiswija għand fitter approvat malajr kemm jista’ jkun, u s-sewwieq sadanittant irid iżomm rekord manwali tal-attivitajiet.

Skont ir-Regolament emendatorju (UE) 2020/1054, il-folja ta’ reġistrazzjoni jew il-kard tas-sewwieq ma jridux jiġu rtirati qabel tmiem il-perjodu ta’ ħidma ta’ kuljum sakemm l-irtirar tagħhom ma jkunx awtorizzat mod ieħor jew meħtieġ biex jiddaħħal is-simbolu tal-pajjiż wara li jkun qasam fruntiera.

Konformità

L-uffiċjali tal-kontroll mgħammra bl-għodod meħtieġa u s-setgħat legali xierqa jinħatru mill-pajjiżi tal-UE biex jiżguraw il-konformità mar-regolament.
Il-pajjiżi tal-UE jridu wkoll jgħinu lil xulxin fl-iżgurar tal-konformità u l-istabbiliment ta’ regoli dwar penali effettivi, proporzjonati, dissważivi u mhux diskriminatorji.
Forum dwar it-Takografi jippermetti djalogu dwar kwistjonijiet tekniċi fost l-esperti fil-pajjiżi tal-UE.

MINN META JAPPLIKA R-REGOLAMENT?

Ir-Regolament (UE) Nru 165/2014 ilu japplika mit-2 ta’ Marzu 2016.
Ir-Regolament Emendatorju (UE) 2020/1054 ilu japplika mill-20 ta’ Awwissu 2020.

SFOND

Għal aktar informazzjoni, ara:

It-takografu (il-Kummissjoni Ewropea).

TERMINI EWLENIN

Takografu: tagħmir installat fil-vetturi tat-triq sabiex juri, jirreġistra, jistampa, jaħżen u joħroġ dettalji dwar il-moviment, inkluża l-veloċità, ta’ tali vetturi, kif ukoll ċerti perjodi ta’ attività tas-sewwieqa tagħhom.

Avveniment: operazzjoni mhux normali li nqabdet mit-takografu diġitali li tista’ tirriżulta minn tentattiv ta’ frodi.

Ħsara: operazzjoni mhux normali li nqabdet mit-takografu diġitali li tista’ tirriżulta minn funzjonament ħażin jew ħsara tal-apparat.

DOKUMENT EWLIENI

Ir-Regolament (UE) Nru 165/2014 tal-Parlament Ewropew u tal-Kunsill tal-4 ta’ Frar 2014 dwar takografi fit-trasport bit-triq, li jħassar ir-Regolament tal-Kunsill (KEE) Nru 3821/85 dwar apparat ta’ reġistrazzjoni għat-trasport bit-triq u li jemenda r-Regolament (KE) Nru 561/2006 tal-Parlament Ewropew u tal-Kunsill dwar l-armonizzazzjoni ta’ ċerta leġiżlazzjoni soċjali li għandha x’taqsam mat-trasport bit-triq (ĠU L 60, 28.2.2014, pp. 1-33)

L-emendi suċċessivi għar-Regolament (UE) Nru 165/2014 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament ta’ Implimentazzjoni tal-Kummissjoni (UE) 2016/799 tat-18 ta’ Marzu 2016 li jimplimenta r-Regolament (UE) Nru 165/2014 tal-Parlament Ewropew u tal-Kunsill li jistabbilixxi r-rekwiżiti għall-kostruzzjoni, l-ittestjar, l-istallazzjoni, l-operazzjoni u t-tiswija ta’ takografi u l-komponenti tagħhom (ĠU L 139, 26.5.2016, pp. 1-506)

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2016/68 tal-21 ta’ Jannar 2016 dwar il-proċeduri u l-ispeċifikazzjonijiet komuni meħtieġa għall-interkonnessjoni tar-reġistri elettroniċi tal-kards tas-sewwieqa (ĠU L 15, 22.1.2016, pp. 51-68)

Ara l-verżjoni konsolidata.

l-aħħar aġġornament 07.10.2020