Ftehim bejn l-UE u l-Istati Uniti dwar il-protezzjoni ta’ data personali
SOMMARJU TAD-DOKUMENT:
Id-Deċiżjoni (UE) 2016/920 dwar l-iffirmar tal-Ftehim bejn l-Istati Uniti tal-Amerika u l-UE dwar il-protezzjoni ta’ informazzjoni personali relatata mal-prevenzjoni, l-investigazzjoni, is-sejbien u l-prosekuzzjoni ta’ reati kriminali
Ftehim bejn l-UE u l-Istati Uniti dwar standards ta' protezzjoni meta data personali tiġi transferita bejn l-awtoritajiet tal-infurzar tal-liġi tal-UE u l-Istati Uniti
X’INHU L-GĦAN TAD-DEĊIŻJONI U L-FTEHIM?
-
Id-deċiżjoni awtorizzat l-iffirmar (fit-2 ta’ Ġunju 2016) tal-ftehim bejn l-Istati Uniti tal-Amerika (US) u l-Unjoni Ewropea (UE) dwar il-protezzjoni ta’ informazzjoni personali relatata mal-prevenzjoni, l-investigazzjoni, is-sejbien u l-prosekuzzjoni ta’ reati kriminali (l-hekk imsejjaħ “Ftehim Komprensiv”). Il-ftehim jidħol fis-seħħ biss wara li l-partijiet ikunu nnotifikaw lil xulxin li l-proċeduri interni rispettivi tagħhom għad-dħul fis-seħħ tlestew (li, min-naħa tal-UE, jeħtieġ li l-Kunsill jadotta deċiżjoni biex jikkonkludi l-ftehim wara l-kunsens tal-Parlament Ewropew).
-
Il-ftehim għandu l-għan li jiżgura li d-data personali tkun protetta bi standard għoli meta tiġi trasferita mill-awtorjitajiet tal-infurzar tal-liġi (il-pulizija u l-awtoritajiet tal-ġustizzja kriminali). Huwa għandu l-għan ukoll li jrawwem kooperazzjoni fl-infurzar tal-liġi bejn l-UE u l-pajjiżi tal-UE, minn naħa waħda, u l-Istati Uniti fuq in-naħa l-oħra.
-
Huwa jipprovdi aktar ċertezza legali u jsaħħaħ id-drittijiet tal-individwi kkonċernati mit-trasferiment tad-data tagħhom.
-
Il-ftehim huwa waħda minn tliet azzjonijiet ewlenin stipulati f’Komunikazzjoni tal-2016 maħsuba biex terġa' tinkiseb il-fiduċja fil-flussi tad-data bejn l-UE u l-Istati Uniti.
PUNTI EWLENIN
Kamp ta’ applikazzjoni
-
Il-ftehim jikkomplementa r-regoli rigward il-protezzjoni tad-data personali fi ftehim eżistenti bejn l-UE/pajjiżi tal-UE u l-Stati Uniti, u f’liġijiet nazzjonali, li jawtorizzaw l-iskambju ta’ informazzjoni għall-finijiet tal-infurzar tal-liġi. Huwa jistabbilixxi qafas komuni dwar il-protezzjoni tad-data li japplika wkoll għal ftehimiet u liġijiet nazzjonali futuri f’dan il-qasam.
-
Il-ftehim ikopri d-data personali kollha (inkluż ismijiet, indirizzi, rekords kriminali) skambjata bejn l-UE u l-Istati Uniti għall-finijiet tal-prevenzjoni, is-sejbien, l-investigazzjoni u l-prosekuzzjoni ta’ reati kriminali, inkluż it-terroriżmu.
Protezzjoni
Il-ftehim jipprovdi għadd ta’ miżuri ta’ protezzjoni għad-data personali meta tiġi skambjata bejn il-pulizija u l-awtoritajiet tal-ġustizzja inkluż:
-
limitazzjonijiet ċari dwar l-użu tad-data — id-data personali tista’ tintuża biss għall-finijiet tal-prevenzjoni, l-investigazzjoni, is-sejbien u l-prosekuzzjoni ta’ reati kriminali.
-
restrizzjonijiet fuq trasferiment ulterjuri — kull trasferiment ulterjuri lil pajjiż mhux tal-Istati Uniti, pajjiż mhux tal-UE jew organizzazzjoni internazzjonali għandu jiġi approvat mill-awtorità kompetenti tal-pajjiż li oriġinarjament kienet ittrasferiet id-data personali.
-
perjodi ta’ żamma — id-data personali ma tistax tinżamm għal aktar żmien milli huwa meħtieġ jew xieraq. Dawn il-perjodi ta’ żamma għandhom ikunu ppubblikati jew isiru pubblikament disponibbli.
-
id-dritt għall-aċċess ta’ data personali u għal rettifika — kull individwu huwa intitolat għall-aċċess għad-data personali tiegħu, taħt ċerti kundizzjonijiet, u jista’ jitlob li d-data tiġi kkoreġuta jekk ma tkunx eżatta.
-
notifika f’każ ta’ ksur tas-sigurtà tad-data — se jiddaħħal fis-seħħ mekkaniżmu biex ikun żgurat li l-awtorità kompetenti u, fejn xieraq, is-suġġett tad-data* jiġi nnotifikat dwar kwalunkwe ksur tas-sigurtà tad-data.
-
rimedju ġudizzjarju u l-infurzabbiltà tad-drittijiet — iċ-ċittadini tal-UE se jingħataw drittijiet addizzjonali biex ifittxu rimedju ġudizzjarju quddiem qrati fl-Istati Uniti jekk l-awtoritajiet tal-Istati Uniti jiċħdu l-aċċess jew ir-rettifika, jew jiżvelaw id-data personali tagħhom illegalment. jistrieħ fuq id-drittijiet tar-rimedju ġudizzjarju eżistenti fl-Istati Uniti.
MINN META JAPPLIKAW ID-DEĊIŻJONI U L-FTEHIM?
Id-Deċiżjoni ilha tapplika mill-20 ta' Mejju 2016. Il-ftehim ġie ffirmat mill-UE u l-Istati Uniti fit-2 ta’ Ġunju 2016.
SFOND
Għal aktar informazzjoni, ara:
* TERMINI EWLENIN
Suġġett tad-data: il-persuna li d-data personali tkun relatata magħha.
DOKUMENT EWLIENI
Deċiżjoni tal-Kunsill (UE) 2016/920 tal-20 ta’ Mejju 2016 dwar l-iffirmar, f’isem l-Unjoni Ewropea, tal-Ftehim bejn l-Istati Uniti tal-Amerika u l-Unjoni Ewropea dwar il-protezzjoni ta’ informazzjoni personali relatata mal-prevenzjoni, l-investigazzjoni, is-sejbien u l-prosekuzzjoni ta’ reati kriminali (ĠU L 154, 11.6.2016, p. 1-2)
Ftehim bejn l-Istati Uniti tal-Amerika u l-Unjoni Ewropea dwar il-protezzjoni personali ta' informazzjoni relatata mal-prevenzjoni, l-investigazzjoni, l-iskoperta, u l-prosekuzzjoni ta' reati kriminali (ĠU L 336, 10.12.2016, p. 3-13)
DOKUMENTI RELATATI
Direttiva (UE) 2016/680 tal-Parlament Ewropew u tal-Kunsill tas-27 ta’ April 2016 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta’ reati kriminali jew l-eżekuzzjoni ta’ pieni kriminali, u dwar il-moviment liberu ta’ tali data, u li tħassar id-Deċiżjoni Qafas tal-Kunsill 2008/977/ĠAI (ĠU L 119, 4.5.2016, pp. 89-131)
l-aħħar aġġornament 23.01.2017