Il-protezzjoni ta’ data personali li tintuża mill-awtoritajiet tal-pulizija u tal-ġustizzja kriminali (mill-2018)

SOMMARJU TA’:

Direttiva (UE) 2016/680 – il-protezzjoni ta’ individwi fir-rigward tal-ipproċessar tad-data personali tagħhom mill-awtoritajiet tal-pulizija u tal-ġustizzja kriminali, u dwar il-moviment liberu ta’ tali data

X’INHU L-GĦAN TAD-DIRETTIVA?

• Id-Direttiva (UE) 2016/680, id-direttiva tal-infurzar tal-liġi tal-protezzjoni tad-data (LED), tiżgura l-protezzjoni tad-data personali ta’ individwi involuti fi proċeduri kriminali, kemm bħala xhieda, vittmi jew suspettati.
• Din tistabbilixxi qafas komprensiv biex tiżgura livell għoli tal-protezzjoni tad-data, waqt li tikkunsidra n-natura speċifika tal-pulizija u l-qasam tal-ġustizzja kriminali.
• Hija tikkontribwixxi għal fiduċja akbar u tiffaċilita l-kooperazzjoni fil-ġlieda kontra l-kriminalità fl-Ewropa, billi tarmonizza l-protezzjoni ta’ data personali mill-awtoritajiet tal-infurzar tal-liġi fl-Istati Membri tal-Unjoni Ewropea (UE) u l-pajjiżi tax-Schengen .
• Id-direttiva hija parti mir-riforma tal-protezzjoni tad-data tal-UE, flimkien mar-regolament ġenerali tal-protezzjoni tad-data (GDPR) (ara s-sommarju) u r-Regolament (UE) 2018/1725 dwar il-protezzjoni ta’ persuni fiżiċi fir-rigward tal-ipproċessar tad-data personali mill-istituzzjonijiet, korpi, uffiċċji u aġenziji tal-UE (ara s-sommarju).

PUNTI EWLENIN

Id-direttiva tistabbilixxi li d-data miġbura mill-awtoritajiet tal-infurzar tal-liġi tkun:

• ipproċessata b’mod legali u ġusta;
• miġbura għal skopijiet speċifiċi, espliċiti u leġittimi u pproċessata biss f’konformità ma’ dawn l-għanijiet;
• adegwata, rilevanti u mhux eċċessiva fir-rigward tal-iskop li għalih tiġi pproċessata;
• preċiża u aġġornata fejn meħtieġ;
• miżmuma f’forma li tippermetti l-identifikazzjoni tal-individwu għal mhux aktar milli huwa meħtieġ għall-iskop tal-ipproċessar;
• sigura b’mod xieraq, inkluż il-protezzjoni kontra pproċessar mhux awtorizzat u illegali, permezz ta’ miżuri tekniċi jew organizzattivi.

Limiti ta’ żmien

L-Istati Membri għandhom jistabbilixxu limiti taż-żmien għat-tħassir tad-data personali jew għal rieżami regolari tal-bżonn li tinħażen tali data.

Individwi kkonċernati (“suġġetti tad-data”)

Id-direttiva tistabbilixxi li l-awtoritajiet tal-infurzar tal-liġi jagħmlu distinzjoni ċara bejn id-data ta’ kategoriji differenti ta’ persuni, inkluż:

• dawk li għalihom hemm raġunijiet serji biex wieħed jemmen li jkunu wettqu jew li jkunu ser iwettqu reat kriminali;
• dawk li ġew misjuba ħatja ta’ reat kriminali;
• vittmi ta’ reati kriminali jew persuni li jista’ jkun maħsub raġonevolment li jistgħu jkunu l-vittmi ta’ reati kriminali;
• dawk li huma partijiet f’reat kriminali, inkluż xhieda potenzjali.

Informazzjoni lil suġġetti tad-data u aċċess għad-data

L-individwi għandhom id-dritt li ċerta informazzjoni ssir disponibbli – u f’ċerti każi pprovduta – lilhom mill-awtoritajiet tal-infurzar tal-liġi kompetenti, inkluż:

• l-isem u d-dettalji tal-kuntatt tal-awtorità kompetenti li tiddeċiedi l-iskop u l-mezzi tal-ipproċessar tad-data;
• l-iskop tal-ipproċessar tad-data tagħhom;
• id-dritt li jressqu lment quddiem awtorità superviżorja u d-dettalji tal-kuntatt tal-awtorità;
• l-eżistenza tad-dritt li jitolbu aċċess għal u korrezzjoni jew tħassir tad-data personali tagħhom, kif ukoll id-dritt li jirrestrinġu l-ipproċessar tad-data personali tagħhom.

L-individwi għandhom id-dritt li jiksbu konferma mill-awtoritajiet kompetenti dwar jekk id-data personali tagħhom hijiex qed tiġi pproċessata, u għall-aċċess għal tali data u informazzjoni relatata mal-ipproċessar tagħha.

Sigurtà u rreġistrar

L-awtoritajiet nazzjonali għandhom jieħdu miżuri tekniċi u organizzattivi sabiex jiżguraw livell ta’ sigurtà għad-data personali li jkun xieraq għar-riskju. Fejn l-ipproċessar tad-data jkun awtomatizzat, għandhom jiġu stabbiliti għadd ta’ miżuri, inkluż li:

• persuni mhux awtorizzati jiġu miċħuda l-aċċess għal tagħmir użat għall-ipproċessar;
• jiġu evitati l-qari, l-ikkupjar, il-modifika jew it-tneħħija mhux awtorizzati tal-mezzi tad-data*;
• jiġi evitat id-dħul mhux awtorizzat ta’ data personali u l-wiri, it-tibdil jew it-tħassir ta’ data personali maħżuna.

L-awtoritajiet nazzjonali għandhom iżommu reġistru b’informazzjoni bħad-data u l-ħin tal-aċċess għal data personali u l-ismijiet ta’ dawk li kkonsultaw id-data jew lil min ġiet żvelata d-data. Ir-reġistri għandhom prinċipalment jintużaw għall-verifika tal-legalità tal-ipproċessar, l-iżgurar tas-sigurtà u l-integrità tal-ipproċessar u għal proċeduri kriminali.

Revoka

Id-direttiva tissostiwixxi d-Deċiżjoni Qafas 2008/977/ĠAI dwar il-protezzjoni ta’ data personali pproċessata fil-qafas tal-kooperazzjoni tal-pulizija u ġudizzjarja fi kwistjonijiet kriminali b’effett mis-6 ta’ Mejju 2018.

Rieżami

Il-Kummissjoni Ewropea ħarġet komunikazzjoni bl-isem“It-triq ’il quddiem dwar l-allinjar tat-tielet pilastru preċedenti tal-acquis mar-regoli tal-protezzjoni tad-data” f’Ġunju 2020.

L-ewwel rapport dwar il-valutazzjoni u r-rieżami tad-direttiva għandha tkun lesta sal-5 ta’ Mejju 2022.

MINN META TAPPLIKA D-DIRETTIVA?

Ilha tapplika mill-5 ta’ Mejjuu 2016. L-Istati Membri kellhom jittrasponu d-direttiva (jinkorporawha fil-liġi nazzjonali tagħhom) sas-6 ta’ Mejju 2018.

SFOND

Għal iktar informazzjoni, ara:

• Riforma tar-regoli dwar il-protezzjoni tad-data tal-UE (il-Kummissjoni Ewropea)
• Regoli dwar il-protezzjoni tad-data tal-UE (il-Kummissjoni Ewropea)
• Rapport tal-Kummissjoni: Ir-regoli dwar il-protezzjoni tad-data tal-UE jagħtu s-setgħa liċ-ċittadini u huma adattati għall-era diġitali – stqarrija għall-istampa (il-Kummissjoni Ewropea)
• Riforma dwar il-protezzjoni tad-data – memo (il-Kummissjoni Ewropea)
• Protezzjoni tad-data personali (il-Kummissjoni Ewropea).

TERMINI PRINĊIPALI

DOKUMENT EWLIENI

Id-Direttiva (UE) 2016/680 tal-Parlament Ewropew u tal-Kunsill tas-27 ta’ April 2016 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta’ reati kriminali jew l-eżekuzzjoni ta’ pieni kriminali, u dwar il-moviment liberu ta’ tali data, u li tħassar id-Deċiżjoni Qafas tal-Kunsill 2008/977/ĠAI (ĠU L 119, 4.5.2016, pp. 89–131).

L-emendi suċċessivi għar-Regolament (UE) 2016/680 ġew inkorporati fit-test oriġinali. Din il-verżjoni konsolidata għandha biss valur dokumentarju.

DOKUMENTI RELATATI

Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, pp. 1–88).

Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, pp. 39–98).

Id-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (Direttiva dwar il-privatezza u l-komunikazzjonijiet elettroniċi) (ĠU L 201, 31.7.2002, pp. 37–47).

Ara l-verżjoni konsolidata.

l-aħħar aġġornament 14.01.2022