Iffalsifikar u frodi — Ftehim bejn il-Europol u l-Bank Ċentrali Ewropew

SOMMARJU TAD-DOKUMENT:

Ftehim bejn l-Uffiċċju Ewropew tal-Pulizija (Europol) u l-Bank Ċentrali Ewropew (BĊE)

X'INHU L-GĦAN TA' DAN IL-FTEHIM?

Dan jipprovdi regoli għall-kooperazzjoni bejn il-Bank Ċentrali Ewropew (BĊE) u l-l-Aġenzija tal-Unjoni Ewropea għall-Kooperazzjoni fl-Infurzar tal-Liġi u t-Taħriġ (Europol) fil-qasam tal-ġlieda kontra l-iffalsifikar tal-euro u jestendi din il-kooperazzjoni għal:

• il-ġlieda kontra l-frodi f’sistemi ta’ pagamenti b’mod ġenerali; u
• il-prevenzjoni tal-iffalsifikar ta’ mezzi ta’ pagament mhux fi flus

PUNTI EWLENIN

Kooperazzjoni bejn il-BĊE u l-Europol

Din il-kooperazzjoni tkopri:

• miżuri biex jiġi evitat, identifikat u miġġieled theddid li jkun ġej minn attivitajiet illegali relatati ma’ karti ta’ flus u muniti tal-euro, mezzi ta’ pagament mhux fi flus u sigurtà tal-pagamenti;
• assistenza f’dawn l-oqsma pprovduta miż-żewġ partijiet għal awtoritajiet nazzjonali, Ewropej u internazzjonali.

Il-konsultazzjoni u skambju ta' tagħrif

Il-BĊE u l-Europol jaqblu biex:

• b’mod regolari jikkonsultaw lil xulxin dwar dawn il-politiki ta’ interess komuni;
• jipprovdu lil xulxin b’mod regolari u fil-pront b’informazzjoni rigward l-iffalsifikar tal-euro;
• jiskambjaw fuq bażi ad hoc informazzjoni sabiex titrawwem il-prevenzjoni kontra l-frodi u l-ġlieda kontra l-iffalsifikar ta’ mezzi ta’ pagament mhux fi flus, bħal:
  • rapporti u statistiki,
  • informazzjoni dwar inċidenti ta’ sigurtà maġġuri, valutazzjoni tar-riskju u tat-teknoloġija, u
  • sejbiet mill-attivitajiet rilevanti rispettivi tagħhom);
• jikkoordinaw il-politiki, l-attivitajiet tat-taħriġ, kampanji ta’ informazzjoni pubblika u pubblikazzjonijiet dwar l-iffalsifikar tal-euro. Barra minn hekk, l-Europol taqbel li tgħin lill-BĊE fir-relazzjonijiet tiegħu ma’ organizzazzjonijiet tal-infurzar tal-liġi fil-livell nazzjonali, tal-UE jew internazzjonali fi kwistjonijiet relatati mal-iffalsifikar tal-euro.

Bażi ta’ data ta’ Sistema ta’ monitoraġġ tal-iffalsifikar (CMS)

• Il-BĊE jaqbel li jagħti aċċess “li jinqara biss” għall-bażi ta’ data ta’ CMS tagħhom lill-uffiċjali tal-Europol fil-kuntest tal-ġlieda kontra l-iffalsifikar tal-euro. L-uffiċjali tal-Europol mhumiex permessi jintroduċu b’mod dirett data fil-bażi ta’ data.
• Il-BĊE jaqbel li għandu jinforma fil-pront lill-Europol bil-ħolqien ta’ kull tip komuni ġdid ta’ iffalsifikar fis-CMS u bis-sejba ta’ kull kwantità kbira ta’ karti ta’ flus tal-euro ffalsifikati.

MINN META JAPPLIKA DAN IL-FTEHIM?

• Ilu japplika mit-3 ta’ Diċembru 2014.

SFOND

Il-BĊE u l-Europol ilhom jaħdmu flimkien mill-qrib mill-2001 fil-ġlieda kontra l-iffalsifikar tal-euro. Fl-2014, permezz tal-iffirmar ta’ dan il-ftehim, l-organizzazzjonijiet qablu li jestendu din il-kooperazzjoni fir-rigward tal-frodi f’sistemi ta’ ħlas u l-iffalsifikar ta’ mezzi ta’ pagament mhux fi flus.

Għal aktar tagħrif, ara:

• “Anti-Counterfeiting” (Kummissjoni Ewropea)
• “Anti-Counterfeiting” (Bank Ċentrali Ewropew).

DOKUMENT EWLIENI

Ftehim bejn l-Uffiċċju Ewropew tal-Pulizija (Europol) u l-Bank Ċentrali Ewropew (BĊE) (ĠU C 123, 17.4.2015, pp. 1-5)

l-aħħar aġġornament 14.11.2016