Il-ftuħ/il-bdil tal-kontijiet tal-bank u informazzjoni dwar it-tariffi
SOMMARJU TA’:
Id-Direttiva 2014/92/UE — tariffi u regoli komparabbli u trasparenti għall-kontijiet tal-ħlas kollha u għall-bdil tal-kontijiet tal-ħlas
X’INHU L-GĦAN TAD-DIRETTIVA?
Hi għandha l-għan li tindirizza 3 kwistjonijiet ewlenin:
- l-aċċess għal kontijiet tal-ħlas bażiċi*,
- it-trasparenza u l-komparabbiltà tat-tariffi tal-kont tal-ħlas u
- il-bdil tal-kont tal-bank.
PUNTI EWLENIN
Aċċess għall-kontijiet tal-bank
- Il-liġi tiddikjara li l-konsumaturi residenti legalment fl-Unjoni Ewropea (UE) għandhom id-dritt jiftħu kont tal-ħlas b’karatteristiċi bażiċi fi kwalunkwe Stat Membru tal-UE. Madankollu, persuna li tixtieq tiftaħ kont tal-bank bħal dan dejjem għandha tikkonforma mar-regoli kontra l-ħasil tal-flus tal-UE.
- Kont tal-bank bażiku jinkludi diversi servizzi bħall-ġbid ta’ flus kontanti minn bank jew permezz ta’ magni tal-flus u t-twettiq ta’ tranżazzjonijiet tal-ħlas bħal debiti diretti jew trasferimenti ta’ kreditu fl-UE.
Tariffi tal-kont tal-ħlas ċari u komparabbli
Il-liġi tipprovdi diversi għodda biex tagħmel it-tariffi aktar ċari għall-konsumaturi. Pereżempju, hija tesiġi li f’kull Stat Membru jkun hemm mill-inqas sit web wieħed indipendenti li jqabbel it-tariffi tal-kontijiet tal-ħlas imposti minn banek differenti.
Servizzi ta’ bdil tal-kont tal-bank
- Ir-regoli jistabbilixxu proċedura ta’ konsultazzjoni għall-konsumaturi li jkunu jridu jibdlu l-kont tagħhom minn bank għal ieħor fl-istess Stat Membru. Il-bidla għandha ssir mill-bank destinatarju. Il-banek iġarrbu l-ispejjeż ta’ kull telf finanzjarju fil-każ ta’ żbalji li jsiru waqt il-proċess.
- Meta konsumatur ikun irid jibdel il-kontijiet bejn żewġ Stati Membri, il-bank li fih ikun hemm il-kont li ser jingħalaq għandu jgħin fil-proċess.
MINN META JAPPLIKAW DAWN IR-REGOLI?
Id-direttiva kellha tiġi trasposta fil-liġi nazzjonali sat-18 ta’ Settembru 2016.
SFOND
- Mhux iċ-ċittadini Ewropej kollha għandhom aċċess faċli għal kont tal-bank, għalkemm dan huwa essenzjali fil-ħajja moderna. Din il-liġi tal-UE ttejjeb is-sitwazzjoni billi tagħtihom id-dritt li jiftħu kont tal-ħlas bażiku kullimkien fl-UE, u ttejjeb it-trasparenza tat-tariffi tal-kontijiet tal-bank kif ukoll il-proċess tal-bdil tal-kontijiet.
- Għal aktar informazzjoni, ara:
TERMINI EWLENIN
Kont tal-ħlas bażiku. Skont din id-direttiva, jinkludi dan li ġej:
- is-servizzi li jippermettu li jsiru l-operazzjonijiet meħtieġa għall-ftuħ, l-operat u l-għeluq ta’ kont tal-ħlas;
- is-servizzi li jippermettu li jitqiegħdu fondi f’ kont tal-ħlas (kont kurrenti);
- is-servizzi li jippermettu ġbid tal-flus kontanti (fl-UE) mill-bank jew minn magna awtomatika;
- it-twettiq ta’ diversi tranżazzjonijiet tal-ħlas fl-UE, bħal debiti diretti u trasferimenti ta’ kreditu, kif ukoll ħlasijiet b’kard tal-ħlas.
DOKUMENT PRINĊIPALI
Id-Direttiva 2014/92/UE tal-Parlament Ewropew u tal-Kunsill tat 23 ta’ Lulju 2014 dwar il-komparabbiltà tat-tariffi relatati mal-kontijiet tal-ħlas, il-bdil tal-kontijiet tal-ħlas u l-aċċess għal kontijiet tal-ħlas b’karatteristiċi bażiċi (ĠU L 257, 28.8.2014, pp. 214–246).
l-aħħar aġġornament 01.03.2023