Pjan direzzjonali għal Żona Unika Ewropea tat-Trasport: Lejn sistema tat-trasport kompetittiva u li tuża r-riżorsi b’mod effiċjenti

It-trasport huwa fundamentali għall-ekonomija u s-soċjetà tagħna. Dan jippermetti lill-persuni jgawdu l-libertà li jivjaġġaw, imexxi l-merkanzija fil-kontinent u joħloq tkabbir u impjiegi. Fl-istess waqt, irid ikun sostenibbli minħabba l-limitazzjonijiet tar-riżorsi u ambjentali li qed jiżdiedu.

ATT

Pjan direzzjonali għal Żona Unika Ewropea tat-Trasport - Lejn sistema tat-trasport kompetittiva u li tuża r-riżorsi b'mod effiċjenti (COM(2011) 144 finali tat-28 ta’ Marzu 2011).

SOMMARJU

X’JAGĦMEL IL-PJAN DIREZZJONALI?

Dan jistabbilixxi 40 punt ta’ azzjoni speċifiku u jelenka 131 inizjattiva konkreta għad-deċennju li jmiss sabiex jibni sistema ta’ trasport kompetittiva li se telimina l-punti ta' konġestjoni prinċipali u ċċaqlaq il-persuni u l-merkanzija b’mod effiċjenti u sikur fl-Unjoni Ewropea (UE). Il-proposti għandhom inaqqsu d-dipendenza tal-UE fuq iż-żejt importat, jiksbu mobilità fil-bliet essenzjalment ħielsa mis-CO₂ fiċ-ċentri urbani ewlenin sal-2030 u jnaqqsu l-emissjonijiet tal-karbonju mit-trasport b’60 % sal-2050

PUNTI EWLENIN

Il-pjan direzzjonali jidentifika l-għanijiet li ġejjin biex tiġi ggwidata l-azzjoni ta’ politika:

it-tnaqqis tal-użu ta’ karozzi li jaħdmu bil-petrol u d-diżil fil-bliet bin-nofs sal-2030, u t-tneħħija gradwali għalkollox sal-2050 u l-kisba ta’ mobilità fil-bliet ħielsa mis-CO₂ sal-2030,
iż-żieda fl-użu ta’ fjuwils sostenibbli b’karbonju baxx fit-trasport bl-ajru għal 40% sal-2050,
it-tnaqqis fl-emissjonijiet tas-CO₂ fl-UE minn fjuwils tal-vapuri b’40 % sal-2050,
30 % tat-trasport tal-merkanzija fuq it-triq fuq aktar minn 300 km għandu jaqleb għat-trasport ferrovjarju u fuq l-ilma sal-2030, u aktar minn 50 % sal-2050,
iż-żieda bi tliet darbiet tan-netwerk ferrovjarju eżistenti ta’ veloċità għolja sal-2030. Il-maġġoranza tat-trasport tal-passiġġieri fuq distanza medja għandu jsir bil-ferrovija sal-2050,
l-istabbiliment ta' netwerk tal-qalba TEN-T għalkollox funzjonali madwar l-UE li jintegra l-forom kollha tat-trasport sal-2030,
il-konnessjoni tal-ajruporti ewlenin mal-ferrovija u l-portijiet tal-qalba u mal-mogħdijiet interni tal-ilma sal-2050,
l-introduzzjoni ta’ sistemi tal-immaniġġjar tat-traffiku għal diversi modi tat-trasport, bħall-ferrovija u t-triq,
l-iżvilupp ta’ sistema ta’ informazzjoni, immaniġġjar u ħlas għat-trasport multimodali sal-2020,
it-tnaqqis bin-nofs tal-imwiet fit-toroq sal-2020 u t-tnaqqis ta’ dawn sa kważi żero sal-2050,
l-applikazzjoni sħiħa tal-priċipji ta’ “min juża jħallas” (jiġifieri dawk li jużaw l-infrastruttura jħallsu għaliha) u “min iniġġes iħallas” (jiġifieri dawk li jniġġsu jħallsu għal dan).

Din l-istrateġija komprensiva għat-trasport tfittex li toħloq sistema ta’ trasport kompetittiva li se żżid il-mobilità, tneħħi l-ostakoli ewlenin f’żoni importanti u tistimola t-tkabbir u l-impjiegi sal-2050. Din hija kkomplementata minn inizjattivi bħal:

Il-programm Orizzont 2020 bl-appoġġ tiegħu għar-riċerka u l-innovazzjoni fuq trasport intelliġenti, ekoloġiku u integrat,
Il-Faċilità Nikkollegaw l-Ewropa li tipprovdi l-finanzi għal għaxar proġetti transnazzjonali tal-infrastruttura tat-trasport,
Il-Pjan direzzjonali għal ekonomija b’użu baxx tal-karbonju sal-2020, fejn it-trasport huwa settur ewlieni biex jintlaħaq dak l-għan,
diversi miżuri ta’ effiċjenza fl-enerġija biex jitnaqqas l-użu tal-enerġija primarja fl-Ewropa b’20 % fl-2020.

Għal aktar informazzjoni ara l-paġna web dwar Temi tat-trasport: strateġiji Ewropej tal-Kummissjoni Ewropea.

l-aħħar aġġornament 08.05.2015