Materjali u oġġetti tal-plastik f’kuntatt mal-ikel

PUNTI EWLENIN

Sustanzi awtorizzati

• Ir-regolament jelenka s-sustanzi li jistgħu jintużaw intenzjonalment fil-manifattura ta’ materjali u oġġetti tal-plastik. Il-lista tinkludi:
  • monomeri;
  • addittivi (minbarra koloranti);
  • aġenti li jgħinu l-produzzjoni tal-polimer (minbarra s-solventi); u
  • makromolekuli li nkisbu minn fermentazzjoni bil-mikrobi.
• Is-sustanzi ġodda huma miżjuda mal-lista jekk l-Awtorità Ewropea dwar is-Sigurtà fl-Ikel toħroġ opinjoni favorevoli wara applikazzjoni u proċedura ta’ approvazzjoni.

Wara l-emendi introdotti mir-Regolament (UE) 2025/351, ir-regolament jiċċara aktar ir-regoli li jirregolaw is-sustanzi.

• Fil-manifattura ta’ materjali u oġġetti tal-plastik, jistgħu jintużaw biss sustanzi inklużi fil-lista ta’ sustanzi awtorizzati tal-Unjoni Ewropea (UE). Meta jkun hemm dubju dwar l-identità deżinjata ta’ sustanza, tista’ tiġi kkonsultata l-Awtorità Ewropea dwar is-Sigurtà fl-Ikel.
• Ir-regolament jiċċara wkoll l-użu ta’ sustanza ta’ kompożizzjoni mhux magħrufa jew varjabbli, prodotti kumplessi ta’ reazzjoni jew materjali bijoloġiċi (sustanzi UVCB), li jistgħu jintużaw fejn jikkorrispondu għall-identità deżinjata tagħhom.
• Is-sustanzi użati fil-manifattura ta’ materjali u oġġetti tal-plastik, inklużi dawk manifatturati mill-iskart, iridu jkunu ta’ grad għoli ta’ purità. Jistgħu jkunu preżenti biss ammonti limitati ta’ sustanzi miżjuda b’mod mhux intenzjonat, dment li dawn ma jipperikolawx is-saħħa tal-bniedem jew ma jwasslux għal nuqqas ta’ konformità mal-limiti tal-migrazzjoni.

It-tqegħid fis-suq

• Sabiex jitqiegħdu fis-suq, il-materjali u l-oġġetti tal-plastik inkwistjoni jridu jikkonformaw:
  • mar-rekwiżiti għall-użu, it-tikkettar u t-traċċabbiltà stabbiliti fir-Regolament (KE) Nru 1935/2004;
  • mal-prassi t-tajba tal-manifattura ddefinita fir-Regolament (KE) Nru 2023/2006 (ara s-sommarju);
  • rekwiżiti rigward il-kompożizzjoni u d-dikjarazzjoni dwar il-konformità (ara hawn taħt).
• L-annessi tar-regolament jistabbilixxu l-kundizzjonijiet tal-użu għal sustanzi awtorizzati u limiti ta’ migrazzjoni. Il-materjali u l-oġġetti tal-plastik kollha jridu jikkonformaw ma’ limiti ta’ migrazzjoni speċifiċi u ma’ limiti ta’ migrazzjoni globali.
• Il-kompożizzjoni ta’ kull saff tal-plastik ta’ materjal jew oġġett trid tikkonforma mar-regolament. Madankollu, saff li ma jkunx f’kuntatt dirett mal-ikel jista’:
  • ma jikkonformax mar-restrizzjonijiet u l-ispeċifikazzjonijiet tar-regolament (ħlief għall-kloroetilen, kif previst fl-Anness I);
  • ikun manifatturat minn sustanzi mhux inklużi fil-lista ta’ sustanzi awtorizzati (dawn is-sustanzi, madankollu, ma jridux ikunu mutaġeniċi², karċinoġeni³ jew tossiċi għar-riproduzzjoni, jew ikunu f’nanoforma⁴).
• Il-manifattur irid ifassal dikjarazzjoni bil-miktub (Anness IV). Din trid tidentifika l-materjali, l-oġġetti u l-prodotti mill-istadji intermedji tal-manifattura tagħhom, flimkien mas-sustanzi nfushom. Hija trid tiġġedded meta jsiru bidliet sostanzjali fil-kompożizzjoni jew il-produzzjoni.

Ir-Regolament (UE) 2025/351 jiċċara aktar il-kundizzjonijiet skont liema l-materjali u l-oġġetti tal-plastik jistgħu jitqiegħdu fis-suq tal-UE.

• Il-materjali u l-oġġetti kollha tal-plastik iridu jikkonformaw mal-limiti ta’ migrazzjoni speċifiċi u globali applikabbli. F’oġġetti b’ħafna materjali jew b’ħafna saffi, dawn ir-rekwiżiti japplikaw meta s-saff tal-wiċċ f’kuntatt mal-ikel ikun saff tal-plastik.
• Il-materjali u l-oġġetti tal-plastik jista’ jkun fihom plastik ipproċessat mill-ġdid mill-manifattura ta’ prodotti sekondarji (fdalijiet u laqx minn materjali u oġġetti tal-plastik), dment li jiġu ssodisfati r-rekwiżiti tas-sikurezza, il-purità u l-migrazzjoni u li ma jinħoloq l-ebda riskju għas-saħħa tal-bniedem.
• Id-dikjarazzjoni ta’ konformità trid tinkludi informazzjoni addizzjonali meħtieġa biex tintwera s-sikurezza tal-ikel, inkluż, meta rilevanti, informazzjoni dwar sustanzi miżjuda b’mod mhux intenzjonat, dwar materjal maħsub għar-riproċessar u dwar l-użu ta’ sustanzi manifatturati mill-iskart. Id-dokumentazzjoni ta’ sostenn trid tkun disponibbli għall-awtoritajiet kompetenti fuq talba.
• L-oġġetti tal-plastik maħsuba għal kuntatt ripetut mal-ikel iridu jkunu ddisinjati biex jipprevjenu żieda fil-migrazzjoni matul użi suċċessivi u jridu jkunu akkumpanjati b’informazzjoni xierqa dwar l-użu sigur.