Il-libertà ta’ moviment u residenza tal-UE

PUNTI EWLENIN

Iċ-ċittadini tal-UE b’karta tal-identità valida jew b’passaport validu jistgħu:

• jidħlu fi Stat Membru ieħor tal-UE mingħajr ma jkunu jeħtieġu viża tal-ħruġ jew tad-dħul. Il-membri tal-familja li mhumiex ċittadini ta’ Stat Membru ma għandhomx bżonn ta’ viża tal-ħruġ jew tad-dħul jekk ikunu fil-pussess ta’ karta ta’ residenza valida;
• jgħixu fi Stat Membru ieħor sa massimu ta’ tliet xhur mingħajr ebda kundizzjoni jew formalitajiet;
• jgħixu fi Stat Membru ieħor għal aktar minn tliet xhur soġġetti għal ċerti kundizzjonijiet, skont l-istatus tagħhom fil-pajjiż ospitanti:
  • dawk li huma impjegati jew li jaħdmu għal rashom ma jeħtiġux li jissodisfaw xi kundizzjoni oħra,
  • l-istudenti u persuni oħrajn li ma jaħdmux għal ħlas, bħal dawk li rtiraw, għandu jkollhom biżżejjed riżorsi għalihom infushom u għall-familja tagħhom, sabiex ma jkunux ta’ piż fuq is-sistema tal-assistenza soċjali tal-pajjiż ospitanti, kif ukoll għandu jkollhom polza tal-assigurazzjoni medika komprensiva;
• ikollhom jirreġistraw mal-awtoritajiet rilevanti jekk ikunu ilhom jgħixu fil-pajjiż għal aktar minn tliet xhur. Il-membri tal-familja tagħhom, jekk mhumiex ċittadini tal-UE, jeħtieġu karta ta’ residenza valida għal ħames snin;
• ikunu intitolati għal residenza permanenti jekk ikunu għexu legalment fi Stat Membru ieħor tal-UE għal perjodu kontinwu ta’ ħames snin. Dan japplika wkoll għall-membri tal-familja li jakkumpanjawhom;
• ikollhom id-dritt li jiġu ttrattati l-istess bħaċ-ċittadini tal-pajjiż ospitanti. Madankollu, l-awtoritajiet ospitanti mhumiex obbligati li jagħtu benefiċċji liċ-ċittadini tal-UE li ma jaħdmux għal ħlas matul l-ewwel 3 xhur tar-residenza tagħhom.

Addizzjonalment:

• membri tal-familja li huma qraba taċ-ċittadin tal-UE jistgħu, taħt ċerti kundizzjonijiet, ikollhom id-dritt li jkomplu jgħixu fil-pajjiż ikkonċernat anki jekk iċ-ċittadin tal-UE nnifsu jmut jew iħalli l-pajjiż;
• iċ-ċittadini tal-UE, jew il-membri tal-familja, jistgħu jitkeċċew jekk jaġixxu b’tali mod li jhedded serjament wieħed mill-interessi fundamentali tas-soċjetà;
• l-uniku mard li jiġġustifika r-restrizzjoni tal-libertà ta’ moviment ta’ persuna huwa dak li l-Organizzazzjoni Dinjija tas-Saħħa tqis li għandu potenzjal ta’ epidemija.