Konvenzjoni għall-Protezzjoni tar-Rhine

PUNTI EWLENIN

L-għanijiet tal-konvenzjoni huma dawn li ġejjin:

• l-iżvilupp sostenibbli tal-ekosistema tar-Rhine permezz ta’:
  • iż-żamma u t-titjib tal-kwalità tal-ilmijiet tar-Rhine, u l-funzjoni naturali tagħha;
  • il-protezzjoni tad-diversità tal-ispeċi;
  • it-tnaqqis tal-kontaminazzjoni;
  • il-konservazzjoni u t-titjib tal-ħabitati naturali tal-fauna u l-flora selvaġġi;
  • l-iżgurar tal-ġestjoni ambjentalment soda tar-riżorsi tal-ilma;
  • l-ikkunsidrar tar-rekwiżiti ekoloġiċi waqt l-iżvilupp tal-passaġġ tal-ilma;
• il-produzzjoni tal-ilma potabbli;
• it-titjib tal-kwalità tas-sediment;
• il-protezzjoni mill-għargħar;
• il-koordinazzjoni ma’ miżuri għall-protezzjoni tal-Baħar tat-Tramuntana.

Il-pajjiżi riparjani (il-pajjiżi minn fejn tgħaddi r-Rhine) jintrabtu li:

• jikkooperaw fit-teħid ta’ azzjonijiet biex jipproteġu r-Rhine;
• jimplimentaw programmi u studji dwar ix-xmara;
• jidentifikaw il-kawżi ta’ u l-partijiet responsabbli għat-tniġġis;
• jiżguraw li miżuri tekniċi li jista’ jkollhom effett serju fuq l-ekosistema, kif ukoll skariki ta’ ilma mormi u sustanzi perikolużi, jiġu suġġetti għall-awtorizzazzjoni minn qabel;
• inaqqsu r-riskju ta’ inċidenti ambjentali.

Il-Kummissjoni Internazzjonali għall-Protezzjoni tar-Rhine (ICPR) hija magħmula minn rappreżentanti tal-istati kontraenti. Hija ppreseduta skont min imissu minn dawn l-istati. Hija tieħu d-deċiżjonijiet unanimi u tikkomunikahom lill-partijiet kontraenti. Il-kompiti tagħha huma li:

• tipprepara studji u programmi dwar l-ekosistema tar-Rhine;
• tagħmel proposti għal azzjonijiet;
• tevalwa l-effikaċja tal-azzjonijiet imwettqa;
• tikkoordina twissijiet u allerti;
• tinforma l-pubbiku dwar l-istat tar-Rhine u r-riżultati ta’ xogħolha.

Kull sena, l-ICPR tfassal rapport tal-attività u tissottomettiha lill-partijiet kontraenti.

Il-partijiet kontraenti jirrapportaw regolarment lill-ICPR dwar il-miżuri leġiżlattivi, regolatorji u oħrajn li ħadu biex jimplimentaw il-konvenzjoni u r-riżultati ta’ dawk il-miżuri.

Fi Frar 2020, fil-Konferenza Ministerjali f’Amsterdam, l-istati riparjani ltaqgħu biex jagħmlu rendikont tal-implimentazzjoni tal-programm tal-ICPR “Rhine 2020”. Huma adottaw ukoll il-programm il-ġdid “Rhine 2040” għall-perjodu sussegwenti ta’ 20 sena.