Valutazzjoni taċ-ċerti effetti tal-pjanijiet u tal-programmi fuq l-ambjent (SEA)

PUNTI EWLENIN

• Il-pjanijiet u l-programmi pubbliċi koperti mid-Direttiva dwar il-Valutazzjoni Ambjentali Strateġika (SEA) huma soġġetti għal valutazzjoni ambjentali waqt it-tħejjija tagħhom u qabel l-adozzjoni tagħhom.
• Din id-direttiva tapplika għall-pjanijiet u l-programmi pubbliċi li ġejjin (kif ukoll għall-emendi tagħhom) li tħejjew u/jew ġew adottati minn awtorità kompetenti u li huma soġġetti għal dispożizzjonijiet leġiżlattivi, regolatorji u amministrattivi:
  • pjanijiet u programmi li jitħejjew għal setturi speċifiċi (l-agrikoltura, il-forestrija, is-sajd, l-enerġija, l-industrija, it-trasport, l-immaniġġjar tal-iskart, l-immaniġġjar tal-ilma, it-telekomunikazzjoni, it-turiżmu, l-urbanistika u l-ippjanar rurali u l-użu tal-art) u li jistabbilixxu l-qafas għall-kunsens għall-iżvilupp ta’ proġetti taħt id-Direttiva dwar il-Valutazzjoni tal-Impatt Ambjentali (EIA);
  • pjanijiet u programmi li għalihom hi meħtieġa valutazzjoni skont l-Artikoli 6 u 7 tad-Direttiva dwar il-“Ħabitats”;
  • pjanijiet u programmi li jistabbilixxu l-qafas għall-kunsens futur għall-iżvilupp ta’ proġetti li jvarjaw minn dawk taħt id-Direttiva EIA (mhux limitati għas-setturi msemmija hawn fuq) u li l-pajjiżi tal-UE identifikaw bħala li aktarx ikollhom effetti ambjentali sinifikanti. Il-pajjiżi tal-UE jistgħu jiddeterminaw dan jew permezz ta’ eżaminazzjoni ta’ każ b’każ jew billi jispeċifikaw it-tipi ta’ pjanijiet u programmi jew billi jikkombinaw iż-żewġ approċċi.
• Id-Direttiva tistabbilixxi proċedura u numru ta’ passi li għandhom jiġu segwiti meta jiġi vvalutat pjan jew programm li tapplika għalih. Dawn il-passi jinkludu:
  • identifikazzjoni;
  • tħejjija tar-rapport ambjentali;
  • konsultazzjoni u parteċipazzjoni pubblika;
  • teħid ta’ deċiżjonijiet; u
  • monitoraġġ.
• Id-Direttiva tagħmel ukoll referenza għal proċedura ta’ skrinjar:
  • pjanijiet u programmi differenti minn dawk imsemmija fl-Artikolu 3(2), iżda li jistipulaw l-iskema għall-kunsens għall-iżvilupp futur tal-proġetti, kif ukoll
  • pjanijiet u programmi: li jiddeterminaw l-użu ta’ żoni żgħar fil-livell lokali u modifiki minuri fi pjanijiet u fi programmi, iżda jekk dawn aktarx ikun se jkollhom effetti ambjentali sinifikanti biss.
• Il-marġni ta’ diskrezzjoni tal-pajjiżi tal-UE huwa limitat mill-kriterji ta’ sinifikanza fl-Anness II, meta wieħed jiġi għall-iskrinjar ta’ ċerti pjanijiet u programmi. Huwa wkoll ristrett mill-objettiv ġenerali tad-Direttiva — li huwa li tiżgura livell għoli ta’ protezzjoni ambjentali.
• Pjanijiet u programmi li l-iskop uniku tagħhom hu li jservu d-difiża nazzjonali jew l-emerġenza ċivili, u pjanijiet u programmi finanzjarji jew baġitarji mhumiex koperti minn din id-direttiva.
• Sett speċifiku ta’ regoli japplika għall-istadji bikrin tat-teħid ta’ deċiżjonijiet meta l-pjanijiet u l-programmi jkunu qed jiġu żviluppati, jiġifieri meta:
  • jitħejja rapport dwar l-effetti sinifikanti li aktarx ikun hemm fuq l-ambjent;
  • jiġu infurmati u kkonsultati l-pubbliku u l-awtoritajiet pubbliċi;
  • isiru konsultazzjonijiet transfruntiera mal-pajjiżi tal-UE li potenzjalment jiġu affettwati;
  • jiġu identifikati miżuri li jindirizzaw u jimmonitorjaw impatti ambjentali sinifikanti.
• Fost informazzjoni oħra, ir-rapport ambjentali jrid ikun fih dan li ġej:
  • il-kontenut tal-pjan jew tal-programm u l-objettivi u r-rabtiet ewlenin tiegħu ma’ pjanijiet u programmi rilevanti oħra;
  • is-sitwazzjoni ambjentali eżistenti u l-iżvilupp probabbli tagħha jekk il-pjan jew il-programm ma jiġix implimentat;
  • kwalunkwe problema ambjentali eżistenti li hi rilevanti għall-pjan jew għall-programm, b’mod partikolari dawk relatati maż-żoni fin-netwerk Natura 2000;
  • il-miżuri previsti biex jipprevjenu, inaqqsu u jikkanċellaw kwalunkwe effett negattiv fuq l-ambjent;
  • deskrizzjoni ta’ kif saret il-valutazzjoni;
  • il-miżuri ta’ monitoraġġ previsti;
  • sommarju mhux tekniku tal-informazzjoni t’hawn fuq.
• L-abbozz tal-pjan jew tal-programm u r-rapport ambjentali jridu jsiru disponibbli għall-awtoritajiet responsabbli għal kwistjonijiet ambjentali u għall-pubbliku. L-awtoritajiet u l-pubbliku jrid ikollhom l-opportunità li jesprimu l-fehmiet tagħhom dwar l-abbozz tal-pjan jew tal-programm fi stadju bikri u f’perjodi ta’ żmien xierqa qabel l-adozzjoni jew il-preżentazzjoni tiegħu għall-proċess leġiżlattiv.
• Il-pajjiż tal-UE responsabbli biex iħejji l-pjan jew il-programm hu meħtieġ jibgħat kopja tal-abbozz tal-pjan jew tal-programm, flimkien ma’ kopja tar-rapport ambjentali, lill-pajjiżi l-oħra tal-UE:
  • fejn jikkunsidra li l-pjan jew il-programm aktarx ikollu effetti ambjentali fuq it-territorju ta’ dawk il-pajjiżi tal-UE l-oħrajn;
  • fuq talba ta’ dawk minn pajjiżi oħra tal-UE.
• Ir-rapport ambjentali, l-opinjonijiet espressi mill-awtoritajiet rilevanti u mill-pubbliku u r-riżultati ta’ kwalunkwe konsultazzjoni transfruntiera jridu jitqiesu mill-awtorità kompetenti waqt it-tħejjija tal-pjan jew tal-programm u qabel jiġi adottat.
• Meta pjan jew programm jiġi adottat, il-pajjiż tal-UE responsabbli jrid jinforma lill-partijiet kollha kkonċernati li ġew ikkonsultati u jagħmlilhom disponibbli:
  • il-pjan u l-programm kif adottat;
  • dikjarazzjoni li tiddeskrivi fil-qosor kif il-kunsiderazzjonijiet ambjentali ġew integrati u r-rapport tal-impatt ambjentali;
  • l-opinjonijiet u r-riżultati tal-konsultazzjonijiet;
  • ir-raġunijiet għala ntgħażel il-pjan jew il-programm kif adottat;
  • il-miżuri ta’ monitoraġġ li ttieħdu.
• Madankollu, il-valutazzjoni ambjentali li ssir skont id-Direttiva SEA ma tneħħix l-obbligu li ssir il-valutazzjoni meħtieġa taħt id-Direttiva EIA, jew biex jiġi ssodisfat kwalunkwe rekwiżit legali ieħor tal-UE.
• Il-pajjiżi tal-UE jistgħu jipprovdu għal proċeduri kkoordinati jew konġunti sabiex jevitaw id-duplikazzjoni tal-valutazzjoni ambjentali fir-rigward tal-pjanijiet u tal-programmi li għalihom l-obbligu li jsiru l-valutazzjonijiet jitfaċċa b’mod simultanju kemm minn din id-direttiva kif ukoll minn leġiżlazzjoni oħra tal-UE.
• Mill-21 ta’ Lulju 2006, u sussegwentement kull 7 snin, il-Kummissjoni Ewropea se tkompli tippreżenta rapporti dwar l-applikazzjoni tad-Direttiva lill-Parlament Ewropew u lill-Kunsill.