Linji gwida dwar l-applikazzjoni tal-Artikolu 101(3) tat-TFUE (dak li kien l-Artikolu 81(3) tat-TKE)

PUNTI EWLENIN

L-Artikolu 101(1) tat-TFUE jipprojbixxi kwalunkwe ftehim bejn impriżi, deċiżjonijiet magħmula minn assoċjazzjonijiet ta’ impriżi, jew prattiki miftiehma li jaffettwaw il-kummerċ bejn pajjiżi tal-UE li jistgħu jipprevjenu, jirrestrinġu jew joħolqu distorsjoni tal-kompetizzjoni. L-Artikolu 101(3) jirrikonoxxi li ċerti ftehimiet restrittivi jistgħu jiġġeneraw benefiċċji ekonomiċi oġġettivi li jisbqu l-effetti negattivi tar-restrizzjoni tal-kompetizzjoni, u jeżenta dawk il-ftehimiet minn dawn il-projbizzjonijiet.

L-Artikolu 101(3) jista’ jiġi applikat f’każijiet individwali jew għal kategoriji ta’ ftehimiet u prattiki miftiehma permezz tar-regolament ta’ eżenzjoni ta’ kategorija.

Il-linji gwida jiffukaw fuq il-każijiet individwali u jipprovdu għal kull waħda mill-4 kundizzjonijiet biex jiġu ssodisfati l-indikazzjonijiet tal-Artikolu 101(3) dwar kif se jiġu applikati.

Dawn l-4 kundizzjonijiet huma:

• għandu jikkontribwixxi għat-titjib tal-produzzjoni jew tad-distribuzzjoni tal-prodotti jew għall-promozzjoni tal-progress tekniku jew ekonomiku;
• il-konsumaturi għandhom jirċievu sehem ġust mill-benefiċċju li jirriżulta;
• ir-restrizzjonijiet għandhom ikunu essenzjali biex jintlaħqu dawn l-objettivi; u
• il-ftehim m’għandux jagħti lill-partijiet il-possibbiltà li jeliminaw il-kompetizzjoni fir-rigward ta’ elementi sostanzjali tal-prodotti inkwistjoni.