L-ilmentar dwar in-negozji li jiksru r-regoli tal-kompetizzjoni
SOMMARJU TA’:
Avviż dwar it-trattament tal-ilmenti mill-Kummissjoni skont l-Artikoli 101 u 102 tat-TFUE — preċedentement l-Artikoli 81 u 82 tat-Trattat tal-KE
X’INHU L-GĦAN TAL-AVVIŻ?
- Fl-interess kemm tal-konsumaturi kif ukoll tan-negozji, l-UE għandha regoli biex tiddikjara bħala illegali l-kartelli ta’ ffissar tal-prezzijiet kif ukoll tipi oħra ta’ ftehimiet restrittivi. Hija tfittex ukoll li taġixxi kontra ditti li jabbużaw mill-pożizzjoni dominanti tagħhom f’suq, pereżempju, billi jillimitaw il-produzzjoni jew jeskludu kompetitur.
- Ksur serju tal-Artikoli 101 u 102 tat-Trattat dwar il-Funzjonament tal-Unjoni Ewropea (TFUE) — li ssostitwixxa l-Artikoli 81 u 82 tat-Trattat li jistabbilixxi l-Komunità Ewropea — spiss ikun diffiċli li jiġi identifikat mill-awtoritajiet tal-kompetizzjoni, għalhekk l-avviż għandu l-għan li jħeġġeġ liċ-ċittadini u lin-negozji tal-UE biex jikkuntattjaw lill-korpi tal-infurzar pubbliċi meta jissuspettaw li r-regoli tal-kompetizzjoni qed jiġu miksura.
PUNTI EWLENIN
Il-membri tal-pubbliku u l-impriżi huma mħeġġa jikkuntattjaw lill-korpi tal-infurzar pubbliku fejn jissuspettaw li qed jinkisru r-regoli tal-kompetizzjoni tan-negozju. Hemm 3 modi kif tagħmel dan:
- tressaq ilment quddiem qorti nazzjonali; jew
- tressaq ilment quddiem qorti tal-kompetizzjoni nazzjonali; jew
- tressaq ilment quddiem il-Kummissjoni Ewropea skont l-Artikolu 7(2) tar-Regolament 1/2003 (ara s-sommarju), li għandu jissodisfa ċerti rekwiżiti skont ir-Regolament (KE) Nru 773/2004 (ara s-sommarju) permezz ta’ mezzi elettroniċi, posta jew telefown, bħala l-punt tat-tluq għal investigazzjoni.
L-avviż jipprovdi gwida dwar l-għażla bejn it-tressiq ta’ lment lill-Kummissjoni, lil awtorità nazzjonali tal-kompetizzjoni jew it-tressiq ta’ kawża quddiem qorti nazzjonali. Huwa jkopri wkoll il-proċedura li biha l-Kummissjoni tittratta l-ilmenti.
Vantaġġi tal-qrati nazzjonali
Il-qrati nazzjonali:
- jistgħu jagħtu kumpens għad-danni mġarrba;
- jistgħu jiddeċiedu dwar talbiet għal pagament jew obbligi kuntrattwali bbażati fuq kwalunkwe ftehim skont l-Artikolu 101;
- jistgħu jiddeċiedu dwar u jivvalutaw il-konsegwenzi tat-tħassir tad-dispożizzjonijiet kuntrattwali;
- normalment ikunu f’pożizzjoni aħjar mill-Kummissjoni biex jadottaw miżuri interim;
- normalment ikunu jistgħu jagħtu spejjeż legali lill-applikant ta’ suċċess (dan mhuwiex possibbli taħt il-proċeduri tal-Kummissjoni).
Huwa wkoll possibbli li talba skont id-dritt tal-kompetizzjoni tal-UE tiġi kkombinata ma’ talbiet oħra skont il-liġi nazzjonali.
Ilmenti lill-awtoritajiet nazzjonali tal-kompetizzjoni
- Awtorità nazzjonali tal-kompetizzjoni partikolari normalment tkun f’pożizzjoni tajba biex tittratta ftehimiet jew prattiki li jaffettwaw b’mod sostanzjali l-kompetizzjoni prinċipalment fit-territorju tagħha.
Ilmenti lill-Kummissjoni
- Ilment irid ikun fih l-informazzjoni meħtieġa fil-Formola C fl-Anness għal dan l-avviż:
- informazzjoni dwar l-ilmentatur u l-impriża/impriżi li tagħti/jagħtu lok għall-ilment;
- id-dettalji tal-allegat ksur u l-evidenza;
- is-sejba mfittxija mill-Kummissjoni u l-interess leġittimu;
- il-proċedimenti quddiem l-awtoritajiet nazzjonali tal-kompetizzjoni jew il-qrati nazzjonali.
- Bħala l-ilmentatur, inti titlob lill-Kummissjoni biex issib ksur tad-dritt tal-kompetizzjoni u li dan jinġieb fi tmiemu.
- Il-Kummissjoni, għall-kuntrarju tal-qrati ċivili, li l-kompitu tagħhom huwa li jissalvagwardjaw id-drittijiet tal-individwi, hija awtorità amministrattiva li għandha taġixxi fl-interess pubbliku, b’marġni ta’ diskrezzjoni li tistabbilixxi l-prijoritajiet fl-attività ta’ infurzar tagħha.
- Il-Kummissjoni hija intitolata li tagħti prijoritajiet differenti lill-ilmenti u tista’ tirreferi għall-interessi tal-UE bħala fattur.
- Il-Kummissjoni tagħmel ħilitha biex tgħarraf lill-ilmentaturi bl-azzjoni li tipproponi li tittratta lment fi żmien 4 xhur minn meta tirċevih.
- Il-Kummissjoni tista’ tirrifjuta lment jekk ma jkunx ta’ interess suffiċjenti għall-UE biex tinvestiga aktar.
- Bħala alternattiva mhux formalistika għal ilment, individwu affettwat jista’ jipprovdi informazzjoni dwar is-suq lill-Kummissjoni.
MINN META JAPPLIKA L-AVVIŻ?
Dan ilu japplika mis-27 ta’ April 2004.
SFOND
Id-Direttiva 2014/104/UE (ara s-sommarju) tistabbilixxi regoli dwar il-kumpens għall-vittmi tal-kartelli u tal-prattiki antikompetittivi.
Għal aktar informazzjoni ara:
DOKUMENT EWLIENI
Avviż tal-Kummissjoni dwar it-trattament ta’ lmenti mill-Kummissjoni skont l-Artikoli 81 u 82 tat-Trattat tal-KE (ĠU L 101, 27.4.2004, pp. 65-77)
DOKUMENTI RELATATI
Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politika u azzjonijiet interni tal-Unjoni — Titolu VII — Regoli komuni fuq il-kompetizzjoni, fuq it-tassazzjoni u l-approssimazzjoni tal-liġijiet — Kapitolu 1 — Regoli li jirregolaw il-kompetizzjoni — Taqsima 1 — Regoli li japplikaw għal impriżi — Artikolu 101 (ex Artikolu 81 TKE) (ĠU C 202, 7.6.2016, pp. 88-89)
Verżjoni konsolidata tat-Trattat dwar il-Funzjonament tal-Unjoni Ewropea — It-Tielet Parti — Politika u azzjonijiet interni tal-Unjoni — Titolu VII — Regoli komuni fuq il-kompetizzjoni, fuq it-tassazzjoni u l-approssimazzjoni tal-liġijiet — Kapitolu 1 — Regoli li jirregolaw il-kompetizzjoni — Taqsima 1 — Regoli li japplikaw għal impriżi — l-Artikolu 102 (ex Artikolu 82 TKE) (ĠU C 202, 7.6.2016, p. 89)
Id-Direttiva 2014/104/UE tal-Parlament Ewropew u tal-Kunsill tas-26 ta’ Novembru 2014 dwar ċerti regoli li jirregolaw l-azzjonijiet għad-danni skont il-liġi nazzjonali għall-ksur tad-dispożizzjonijiet tal-liġi tal-kompetizzjoni tal-Istati Membri u tal-Unjoni Ewropea (ĠU L 349, 5.12.2014, p. 1-19)
Ir-Regolament tal-Kummissjoni (KE) Nru 773/2004 tas-7 ta’ April 2004 dwar it-tmexxija ta’ proċeduri mill-Kummissjoni skont l-Artikolu 81 sa 82 tat-Trattat tal-KE (ĠU L 123, 27.4.2004, pp. 18-24)
L-emendi suċċessivi għar-Regolament (KE) Nru 773/2004 ġew inkorporati fit-test oriġinali. Din il-verżjoni konsolidata għandha valur dokumentarju biss.
Avviż mill-Kummissjoni dwar il-kooperazzjoni fi ħdan in-Netwerk Ewropew għall-Kompetizzjoni (ĠU C 101, 27.4.2004, pp. 43-53)
Ir-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (ĠU L 1, 4.1.2003, pp. 1-25)
Ara l-verżjoni konsolidata.
l-aħħar aġġornament 29.05.2020